James
Yakobus
Yakobus 1
1:1 Sura toi ngkai aku' Yakobus, batua Alata'ala pai' batua Pue' Yesus
Kristus; kupakatu hi to hampulu' rontina to Israel to pagaa'-gaa' hi humalili'
dunia'. Wori' tabe! 1:2 Ompi'-ku hawe'ea! Ane wori' nyala kasusaa' pai'
pesori to mporumpa'-ta, neo' tapopeda' nono, agina tapokagoe' lau-wadi.
1:3 Apa' ta'inca: ane tida-ta mepangala' hi Pue' hi rala kasusaa', jadi'
moroho-ta mpai' mpengkatarii ba napa-napa. 1:4 Toe pai' kana tari ncuu-ta
duu' hi kahudua-na, bona moroho mpu'u pepangala'-ta pai' uma ria
kasalaia'-na ba kakuraa'-na. 1:5 Ane ria-ta to uma monoto nono-ta, agina
taperapi' kanotoa nono ngkai Alata'ala. Bate nawai' moto-ta mpai' kanotoa
nono to taperapi'. Apa' hi butu dua tauna Alata'ala mewai' ngkai
kamanara-na, uma-i ria mewai' ngkahuru. 1:6 Aga ane merapi'-ta hi
Alata'ala, kana mepangala' mpu'u-ta, uma ma'ala morara' nono-ta. Apa'
tauna to morara' nono-na, hewa rauniri to nawaro ngolu' hilou tumai. 1:7-8
Apa' tauna to hewa toe morompenga nono-na, uma ria kanoo-noaa'-na hi
rala katuwu'-na. Toe pai' neo' nasarumaka kanarata-na ba napa-napa ngkai
Pue'. 1:9 Ompi' hampepangalaa'-ku! Kita' to kabu, kana goe'-ta apa' nau'
mpe'ahii' tuwu'-ta, napokalangko moto-ta Alata'ala. 1:10 Wae wo'o kita' to
mo'ua', kana goe'-ta apa' Alata'ala mpakadingki' nono-ta. Apa' manusia'
topo'ua' hewa sehe kowo': hangkale'liu-wadi katuwu'-ra. 1:11 Apa' ane
mehupa'-damo eo pai' mokara-pi, kaliliu molaju-mi kowo', alaa-na roda'-mi
sehe-na, uma-ipi ncola. Wae wo'o topo'ua'-e: bate mate moto wo'o-ra-rawo
bula-ra mpo'urusi-pidi ka'uaa'-ra. 1:12 Morasi' tauna to tari hi rala kasusaa'
pai' pesori. Apa' ane ntaha-ra, mporata-ra mpai' katuwua' to lompe' to
najanci Alata'ala hi tauna to mpoka'ahi'-i. 1:13 Ane ria-ta to rasori bona
mpobabehi gau' to dada'a, neo' ta'uli' hewa toi: "Pesori toi ngkai Alata'ala."
Uma makono toe, apa' Alata'ala uma-i ma'ala rasori bona mpobabehi to
dada'a, pai' uma wo'o-i mposori-ta bona mpobabehi-ta to dada'a. 1:14 Butu
dua tauna rasori ane kahinaa nono-na moto-hawo to mpodii'-i pai'
mpo'opa-i. 1:15 Ane natuku' kahinaa nono-na toe, walikaa-na mpobabehi
jeko' lau-imi. Pai' ane mpobabehi jeko' ncuu-i, ka'omea-na mpai' mate-i
pai'-i ragaa' ngkai Alata'ala. 1:16 Ompi'-ku to kupe'ahi'! Neo'-ta ma'ala
rabagiu: Alata'ala uma-i-hana mposori-ta. 1:17 Hawe'ea pewai' to lompe'
pai' to hono' tarata ngkai Alata'ala-hana. Hi'a-mi to mpajadi' hawe'ea anu
mehini hi langi'. Hawe'ea to mehini hi langi' toe, ria kabalia'-na. Aga
Alata'ala, uma-hana ria kabalia'-na, pai' uma wo'o ria ka'uncua
kalompea'-na. 1:18 Napohowa'-taka lolita-na to makono, pai' hante
lolita-na toe napajadi'-tamo ana'-na. Nababehi toe ntuku' konoa-na moto,
bona ngkai hawe'ea to napajadi', kita' jadi' pomobohea-na. 1:19 Ompi'-ku
to kupe'ahi'! Penonoi lompe'-e' tohe'i: Butu dua-ta kana rodo mpe'epei, neo'
haliu mololita pai' neo' jolia moroe. 1:20 Apa' tauna to moroe, uma-ra
mpotuku' konoa Alata'ala. 1:21 Toe pai' kana tabahaka hawe'ea gau' to
babo' pai' po'ingku to dada'a to jadi' kabiasaa-ta, pai' tapakadingki' nono-ta
mpe'epei lolita to nahawu' Alata'ala hi rala nono-ta. Apa' lolita-na toe-mi to
mobaraka' mpobahaka-ta ngkai huku' jeko'-ta. 1:22 Jadi', kana tatuku'-mi
Lolita Pue', neo' ra'epe mara-wadi. Apa' ane ta'epe mara-wadi, mpobagiu
woto-ta moto-tamo. 1:23 Tauna to mpo'epe Lolita Pue' pai' uma ratuku',
hira' hewa tauna to mponaa lence-na hi pampewao'. 1:24 Ka'oti-na nanaa
lence-na pai'-i malai, uma-pi nakiwoi ba beiwa-ki lence-na. 1:25 Toe pai'
kana tapoinono lompe' hawa' Pue' pai' tida-ta mpotuku'. Apa' hawa' Pue',
moroli' lia, pai' ria kabaraka'-na mpobahaka-ta ngkai jeko'. Jadi', neo' ta'epe
mara-wadi, pai' kaliliu talipo'. Kana tatuku' hawa'-na toe. Apa' tauna to
hewa toe-mi to nagane' Pue' hi hawe'ea to nababehi. 1:26 Ane ria tauna to
mpo'uli' topo'agama-i, hiaa' uma najagai wiwi-na, mpobagiu woto-na
moto-imi. Uma ria kalaua po'agama-na tetu. 1:27 Ane po'ingku tauna to
mo'agama mpu'u hante uma ria pebagiua-na ba kasalaia'-na hi poncilo
Alata'ala to Tuama, hewa toi: mpewili' ana' ilu pai' tobalu to mpe'ahii'
tuwu'-ra, pai' neo' mpotuku' gau'-ra to uma mpo'incai Alata'ala.
Yakobus 2
2:1 Ompi'-ku hawe'ea! Pue'-ta, Pue' Yesus Kristus, uma mowo
kabaraka'-na. Jadi', ane mepangala'-ta-damo hi Pue'-e, neo'-ta mpelence
tauna. 2:2 Rapa'-na rata hi porumpua-ta hadua tauna to mohincii bulawa
pai' moheai to ncola, pai' rata wo'o-hawo hadua tokabu to moheai
ronto-na. 2:3 Ane meliu pebila'-ta hi tauna to lompe' pohea-na toe, pai'
ta'uli'-ki: "Mai-ta mohura hi pohuraa to lompe' tohe'i," hiaa' hi tauna to
kabu ta'uli': "Mokore hi retu-moko mai," ba ta'uli'-ki: "Mohura retu-moko
hi ila'," 2:4 batua-na, tapoposisala hingka doo-ta, pai' tapelence tauna
hante patuju to dada'a. 2:5 Ompi'-ku to kupe'ahi'! Pe'epei lompe'-dile:
tauna to mpe'ahii' katuwu'-ra, nau' uma-ra mo'ua' hi dunia' toi, Alata'ala
mpelihi-ra bona jadi' mo'ua' hi pepangala'-ra. Hira' toe-mi mpai' to mporata
rasi' hi rala Kamagaua'-na, hewa to najanci-raka tauna to mpoka'ahi'-i. 2:6
Hiaa' ane hewa toe we'i pololita-ta hi torata-e, hewa taruge' lau-ramo
doo-ta to kabu! Hiaa' hema to biasa-na mpobalinai'-koi pai' mpakilu-koi hi
totu'a ngata? Bate tauna topo'ua'-hana! 2:7 Topo'ua' toe-ramo to mporuge'
hanga' to tabila', to tatarima ngkai Alata'ala. 2:8 Po'ingku-ta to lompe'
ompi', ane tatuku' hawa' Magau'-ta to tabasa hi rala Buku Tomoroli' to
mpo'uli': "Kana tapoka'ahi' doo-ta hewa kampoka'ahi'-ta woto-ta moto."
2:9 Aga ane tapoposisala-di tauna ntuku' tuwu'-ra ba lence-ra, mojeko'-ta
ompi'. Monoa'-mi kamojeko'-ta, apa' Atura Pue'-mi to tatiboki toe-e. 2:10
Apa' nau' tahuduwukui mpotuku' hawe'ea parenta to hi rala Atura Pue', ane
tatiboki nau' hanyala-wadi, bate masala'-ta-hana. Ma'ala-mi ta'uli', hewa to
tatiboki hawe'ea lau-mi. 2:11 Apa' ria hawa' Pue' to mpo'uli': "Neo'
mobualo'." Pai' ria wo'o hawa'-na to mpo'uli': "Neo' mepatehi." Jadi', nau'
uma-ta mobualo', aga ane mepatehi-ta, mpotiboki Atura Pue' oa'-tamo.
2:12 Toe pai' kana tapelompehi pololita-ta pai' po'ingku-ta. Apa' kita'
toi-mi to rapohurai kara-kara-ta ntuku' Atura Pue' to mpobahaka manusia'
ngkai jeko'. 2:13 Apa' tauna to uma ria ahi'-na hi doo-na, Pue' mpai'
mpohuku'-i hante uma ria ahi'-na. Aga hi tauna to ma'ahi' hi doo-na, Pue'
wo'o mpai' mpopohiloi-i ahi'-na hi eo pehukua'. 2:14 Ompi'-ku hawe'ea!
Napa-mi-hawo kalaua-na ane ta'uli' mepangala'-ta hi Pue', pai' po'ingku-ta
uma mpotuku' konoa-na. Ha tebahaka-ta mpai' ngkai huku' jeko'-ta ane
hewa toe-wadi pepangala'-tae? Uma-e'! 2:15 Rapa'-na ria hadua ompi'-ta
to mparaluu pohea, pai' uma wo'o hono' pongkoni'-na butu eo-na. 2:16
Napa-mi-hawo kalaua-na ane ta'uli'-ki hewa toi: "Pelompehi momako'!
Kusarumaka moheai lompe'-ko pai' ngkoni' mpebohui-moko!" Hiaa' ane
uma-i tawai' napa to naparaluu, napa-mi-hawo kalaua-nae? 2:17 Wae wo'o
hante pepangala'-ta: ane ta'uli' mepangala'-ta hi Pue', pai' po'ingku-ta uma
mpotuku' konoa-na, batua-na mepangala' mara-ta-wadi. Pepangala' to
hewa toe, hewa pae to lopa'--uma ria ihi-na. 2:18 Meka' ria mpai' to
mpo'uli' hewa toi: "To hadua ncarumaka hi pepangala'-na, to hadua
ncarumaka hi kalompe' po'ingku-na." Hiaa' aku' mpo'uli': uma-ko bisa
mpopohiloi-a pepangala'-nu tetu-e ane uma lompe' po'ingku-nu. Aga aku',
ngkai po'ingku-ku to lompe', kupopohiloi-koko karia-na wo'o
pepangala'-ku hi Pue'. 2:19 Ha tapangala' kahadudua-na-wadi Alata'ala-e?
Makono moto tetu. Aga ane tetu-wadi, uma hono'! Bangku' seta-hawoe',
rapangala' wo'o-rawo kahadudua-na-wadi Alata'ala. Toe pai' moridi'-ra
nakeni eka'-ra. 2:20 Wojo lia-ta ompi' ane ta'uli' hono'-mi mepangala'
mara-wadi hi Alata'ala hante uma ria po'ingku-ta to lompe'. Uma ria
tuju-na pepangala' to hewa tetu. 2:21 Kiwoi tutura-na Abraham: Alata'ala
mpotarima-i napomonoa'-i hi poncilo-na sabana po'ingku-na, apa' Abraham
mpotonu Ishak ana'-na hi Alata'ala hi lolo watu pontunua pepuea'. 2:22 Hi
tutura tohe'e, monoto-mi tahilo: pepangala'-na Abraham incana hi
po'ingku-na. Jadi', ma'ala-mi ta'uli' po'ingku-na toe mpakaroli'
pepangala'-na. 2:23 Jadi', madupa'-mi lolita Buku Tomoroli' to mpo'uli':
"Abraham mepangala' hi Alata'ala, pai' ngkai pepangala'-na toe, Alata'ala
mpo'uli' kamonoa'-na hi poncilo-na." Toe pai' rahanga'-i bale-na Alata'ala.
2:24 Monoto-mi tahilo kanapomonoa'-ra Alata'ala tauna to lompe'
po'ingku-ra, uma wule' mepangala' mara-wadi. 2:25 Wae wo'o tutura-na
Rahab, tobine to uma tumotoa gau'-na owi. Ba hangkuja dua tantara to
Yahudi rahubui hilou mopadaso' hi ngata bali', pai' Rahab toe-imi to
mpopehani-ra hi tomi-na pai' natulungi-ra malai ntara ohea ntani'-na. Ngkai
po'ingku-na to lompe' toe-mi pai' alaa-na rapohewa tauna to monoa'-i. 2:26
Jadi', hewa woto to uma inohaa', ta'uli' mate-imi. Wae wo'o pepangala'-ta,
ane uma incana hi po'ingku-ta, hibali mate, uma ria kalaua-na.
Yakobus 3
3:1 Ompi'-ku hawe'ea! Neo'-koi wori' to doko' jadi' guru agama. Apa'
ta'inca moto ompi', motomo-pi mpai' pomparesa'-na Alata'ala hi kita' to
jadi' guru ngkai pomparesa'-na hi tau ntani'-na. 3:2 Kita' omea pontu-na
hala' mpo'ingku. Ane rapa'-na ria tauna to uma hala' mpo'ingku hi
pololita-ra, hira' toe-mi tauna to moroli'. Ma'ala-ra mpokuasai hawe'ea
kahinaa nono-ra. 3:3 Anu to kedi' ma'ala mpokuasai to bohe. Biasa-na
tasamai' jara' bona natuku' konoa-ta. Hante sama' to kedi' ma'ala tahawai'
jara' to bohe. 3:4 Wae wo'o kapal hi tahi': nau' hewa apa-mi kabohe-na pai'
nawui ngolu' to bohe, kapal toe rapopomako' hiapa konoa pangkeni-na
hante kaju to kedi'-wadi to rahanga' poguli'. 3:5 Wae wo'o hante jila'
manusia'-e. Nau' kedi' lia-wadi jila'-ta, aga uma mowo kabohe pepakeni-na.
Ngkai apu to kedi'-wadi, ponulu to mowela' bisa mampu. 3:6 Wae wo'o
hante lolita to tapohowa' hante jila'-ta. Lolita-ta toe hibalia kada'a-na hante
apu. Hi rala woto-ta, jila'-ta toe-mi to mpopehuwu wori' nyala kada'aa-na,
meliu ngkai hawe'ea bagia woto-ta to ntani'-na. Lolita to tapohowa' hante
jila'-ta hewa apu to ngkai naraka, to mpakada'a hobo' katuwu'-ta. 3:7 Butu
nyala binata to me'ila, danci, binata to menyolo pai' uru hi rala ue, ma'ala
rapomou', pai' ria-mi tauna to mpomou'-ra. 3:8 Aga uma ria tauna to
ma'ala mpomou' jila' manusia'! Jila' manusia' dada'a lia-i, pai' uma-i ma'ala
hawaia'. Lolita to tapohowa' hante jila'-ta hewa rasu to mepatehi! 3:9
Lolita-ta ma'ala tapake' mpo'une' Pue' Ala Tuama-ta. Pai' ma'ala wo'o
tapake' mpotipo' doo-ta to napajadi' Pue' Ala ntuku' lence-na. 3:10 Ngkai
wiwi to hameha' lau-wadi mehuwu lolita pe'une' pai' lolita petipo'.
Ompi'-ku hawe'ea! Kakoo-kono-na ke neo'-hawo hewa toe. Uma-hawo
natao ane jila'-ta tapake' mpohowa' to lompe' pai' mpohowa' to dada'a
wo'o. 3:11 Ha ria wo'o-hawo ue tuwu' to mpopehupa' ue to mononto pai'
ue to mopai' wo'o? 3:12 Kaju ara uma-i mowua' zaitun. Pai' kaju anggur,
uma-i mowua' ara. Buwu to mopoi' uma-i mpopehuwu ue to mononto.
3:13 Ane ria hi laintongo'-ta tauna to lompe' pekiri-na pai' monoto nono-na,
kana napopehuwu kanotoa nono-na toe hante po'ingku-na to lompe' pai'
hante kehi-na to mehuwu ngkai kadingki' nono-na, hewa to natao hi tauna
to monoto nono-ra. 3:14 Tapi' ane ria hi rala nono-ta to mohingi' hi doo-ta
pai' doko' mpopeliu woto-ta moto, neo' tapomolangko nono-ta, pai' neo'
ta'uli' monoto mpu'u-mi-tana nono-ta. Apa' kehi-ta toe mosisala hante tudui'
to makono. 3:15 Kanotoa nono to hewa toe, bela-hana to ngkai Pue'. Tetu
ngkai dunia', ngkai kahinaa nono-ta, pai' ngkai seta! 3:16 Apa' ane ria
tauna to mohingi' pai'-ra mpopeliu woto-ra moto, bate ria wo'o potudaa'
pai' butu nyala kehi to dada'a. 3:17 Aga ane tauna to mporata mpu'u
kanotoa nono ngkai Alata'ala, hewa toi po'ingku-ra: lomo'-lomo'-na moroli'
nono-ra. Doko' tuwu' hintuwu'-ra hante doo, mo'olu nono-ra pai'-ra
mpotuku' konoa doo. Jau-ra mpotulungi tauna to mpe'ahii', pai' mpobabehi
kehi to lompe'. Uma-ra mopahamalia pai' uma-ra turu mpomahapi. 3:18
Tauna to mpokono kahintuwuaa' pai' mpali' kahintuwuaa', po'ingku-ra bate
mpotuku' konoa Alata'ala.
Yakobus 4
4:1 Napa pai' alaa-na ria potudaa' pai' pomehonoa'-ni ompi'? Tetu-le bate
mehupa' ngkai kahinaa nono-ni to dada'a. Kahinaa nono-ni to dada'a toe-mi
to manga'e ncuu hi rala nono-ni, mpokeni-koi mpobabehi to dada'a. 4:2
Mehina-koi aga uma niratai to nipokahina. Toe pai' alaa-na mepatehimokoi.
Mohingi'-koi mpokahina anu doo, aga uma oa' niratai. Toe pai'
alaa-na momehono' pai' motuda'-mokoi. Uma oa' niratai to nipali', apa' uma
niperapi' hi Pue'. 4:3 Ba nau' niperapi'-mi, uma oa'-koi rawai', apa' sala'
patuju-ni. Apa' napa to niperapi' tetu, doko' nipake' mpoka'oha
nono-ni-wadi. 4:4 Koi', uma-koi tida mpotuku' Pue'! Ha ni'inca wa ompi',
ane tatuku' gau' to dada'a hi dunia' toi, kita' jadi' bali'-na Alata'ala?
Hangkani-pi ku'uli': hema to mpokono gau' to dada'a hi dunia' toi, hi'a-mi
bali' Alata'ala! 4:5 Ba nipekiri-koina wae-e ompi', uma ria tuju-na ihi' Buku
Tomoroli' to mpo'uli': Alata'ala mpajadi' nono manusia', tapi' nono-ta toe
uma mowo hina-na. *4:5b tafsiran ntani'-na: Alata'ala mpajadi' nono
manusia', pai' mehina lia-i doko' mpokuasai nono-ta toe.* 4:6 Aga
petulungia to nawai'-taka Pue' ngkai kabula rala-na meliu-hana
kamoroho-na ngkai hawe'ea hina nono-ta. Toe pai' ria te'uki' hi rala Buku
Tomoroli': "Alata'ala mpo'ewa tauna to molangko nono-ra. Tapi' tauna to
dingki' nono-ra, natulungi-ra ngkai kabula rala-na." 4:7 Toe pai'
kuparesai'-koi ompi': mengkoru-mokoi hi Alata'ala. Ewa-imi Magau'
Anudaa', napetiboi' moto-koi mpai'. 4:8 Mohui'-imi Alata'ala, pai' Hi'a wo'o
mpomohui'-koi. Koi' to mojeko', bahakai-mi mpobabehi jeko'. Koi' to
morompenga nono-ni, pomoroli' nono-ni. 4:9 Kana soho' nono-ta pai'
geo'-ta mpokiwoi kamojeko'-ta. Apa' ane ta'inca karia-na jeko'-ta,
uma-hawo lompe' tapokagoe', kana taposoho' nono-hawo pai' tapokageo'.
4:10 Kana tapakadingki' nono-ta hi nyanyoa Pue', napomolangko moto-ta
mpai'. 4:11 Ompi'-ompi', neo'-ta mometuntui'. Tauna to mpotuntui' ba
mposalai' ompi'-na, hewa mpotuntui' ba mposalai' Atura Pue' lau-imi.
Tauna to mposalai' ompi'-na, uma-i mpotuku' Atura Pue'. Ma'ala-mi ta'uli',
hewa hi'a lau-mi to mpobotuhi Atura Pue'. 4:12 Hiaa' hadua-na-wadi to
masipato' mpowai' atura hi manusia' pai' to jadi' Topobotuhi. Hi'a-mi
Alata'ala, to ria kuasa-na mpohuku'-ta ba mpobahaka-ta ngkai huku'. Jadi'
kita' toi, hema rahi-tadie, pai'-ta daho' mpotuntui' doo-tae! 4:13 Toi
paresa'-ku hi koi' to molangko nono-ni. Mololita-koi hewa toi: "Eo toe lau
ba mepulo mpai', me'ongko'-kai hilou hi ngata nu'anu, tida-makai hi ria nte
hampae, modaga pai'-kai mporata rasi'." 4:14 Hiaa' bo uma ni'incai napa to
jadi' mepulo! Beiwa ntoto katuwu'-ni? Katuwu'-nile hewa rangahu: kahiloa
hampai', pai' muu-mule' moronto-mi! 4:15 Kakoo-kono-na kana hewa
toe-di-hawo-le lolita-nie: "Ane napokono Pue', tuwu'-kai pai' ma'ala
kibabehi nu'anu pai' nu'anu." 4:16 Hiaa' uma-di hewa toe pololita-nie.
Molangko lau-di nono-ni pai' mpopeliu tuwu'-ni. Hawe'ea to hewa tetu,
bate dada'a-hana. 4:17 Jadi', tauna to mpo'inca mpobabehi to lompe', pai'
uma-di nababehi-e, bate napojeko'.
Yakobus 5
5:1 Toi paresa'-ku hi tauna topo'ua'. Motantangi'-mokoi pai' geo', apa'
narumpa'-koi mpai' kaparia. 5:2 Ka'uaa'-ni moronto-mi. Pohea-ni ntoto'-mi.
5:3 Bulawa pai' salaka' to niloju', ta'igaraa'-mi. Pai' ka'uaa'-ni to ta'igaraa'
tetu mpai' jadi' tanda kahala' mpopake'-ni ka'uaa'-ni. Mpoloju'-koi rewa hi
dunia', hiaa' dunia' toi neo' hudu-mi! Toe pai' rasesa' mpu'u-koi mpai', hewa
to nakoni' apu. 5:4 Tauna to mobago hi bonea-ni, uma-ra niwai' gaji'.
Epe-mi pontodohaka-ra! Topobago to mepae hi bonea-ni mekakae
mperapi' tulungi, pai' pekakae-ra toe na'epe-mi Pue' Alata'ala, Pue' to bohe
baraka'-na. 5:5 Koi' hewa porewua to raruduhi pai' rasumale', apa' hi dunia'
toi tuwu' mpomaradika-koi, mpali' kagoea'-ni, tapi' ka'omea-na mpai' bate
rahuku'-koi. 5:6 Koi' mpohuku' pai' mpopatehi tauna to uma masala', to
uma-ra bisa mpo'ewa-koi. 5:7 Toe-mi ompi', pai' kana tari-ta duu'-na Pue'
rata nculii'. Hilo pe' posabara topolia'-e, mpopea-ra duu'-na ria wua'
polia'-ra to rasarumaka. Mosabara-ra mpopea uda ka'oti-ra ntuja', duu'-na
rata tempo-na mepae. 5:8 Wae wo'o kita' kana mosabara ompi'. Pakatida
nono-ta, apa' neo' rata mpu'u-imi Pue'-ta. 5:9 Ompi', neo'-ta ngkunuti pai'
momesaa-salai', bona neo'-ta rabelahi huku'. Apa' Pue', etu-imi mai hi
wobo'! Hi'a-damo mpai' to mpobotuhi omea. 5:10 Ompi'-ku hawe'ea!
Kiwoi-koi nabi owi to mpokeni Lolita Pue'. Mosabara-ra pai' tari-ra
mpotodohaka kaparia. Agina tatuku' posabara-ra. 5:11 Apa' hema-ra-kona
to ta'uli' morasi'-e? To morasi'-le, tauna to ntaha hi rala kaparia. Ni'inca
moto tutura-na Ayub, kantaha-na hi rala kaparia-na. Pai' ni'inca beiwa Pue'
mpogane'-i hi ka'omea-na. Apa' Pue', ma'ahi' lia-i, pai' lompe' nono-na. 5:12
Ompi'-ku hawe'ea! Ngkai hawe'ea paresa'-ku, toi-mi to meliu mpu'u:
Neo'-ta mosumpa, mpokahangai' langi' ba mpokahangai' dunia' ba
napa-napa ntani'-na. Ane patuju-ta mpo'uli' io', uli'-mi-hana "Io'." Ane
patuju-ta mpo'uli' uma, uli'-mi "Uma," bona neo'-ta rabelahi huku'. 5:13
Ane ria hi laintongo'-ta to narumpa' kasusaa', agina mosampaya-i. Ane ria
to goe', agina morona'-i mpo'une' Alata'ala. 5:14 Ane ria to peda', agina
mpokio'-i pangkeni agama, bona pangkeni toera mposampayai-i pai'
mpogelai'-i hante lana hi rala hanga' Pue'. 5:15 Ane mosampaya-ra hante
nono to mepangala', tauna to peda' bate mo'uri' mpai'. Pue' mpaka'uri'-i, pai'
ane ria jeko'-na, ra'ampungi-ki. 5:16 Toe-mi pai' kana himpau tapangaku'
sala'-ta pai' momeposampayai, bona mo'uri'-ta. Posampaya tauna to monoa'
nono-ra moso' lia. 5:17 Kiwoi tutura-na nabi Elia owi. Nabi Elia toei,
manusia' hewa kita' wo'o-i-wadi-hawo. Mosampaya-i hante nono-na mpu'u
bona neo' udaa. Uma mpu'u-pi dungku uda rala-na tolu mpae ono mula.
5:18 Oti toe, mosampaya wo'o-imi, duu'-na langi' mpopana'u-mi uda pai'
alaa-na ria-mi wua' polia'-ra. 5:19 Ompi'-ku hawe'ea! Ane ria doo-ta to
meleli' ngkai tudui' to makono, pai' ria hadua to mpotete'-i nculii' hi Pue',
lompe' kehi-na toe. 5:20 Apa' tauna to mpokeni topojeko' nculii' ngkai
kehi-na to sala', mpohore-imi ngkai silaka to duu' kahae-hae-na, pai'
jeko'-na to wori' te'ampungi-mi.
|