Philippians

Hui-li̍p-pí

Hui-li̍p-pí 1

1 Góa --- [Pó-lô] kap [Thê-mô͘-thài] sī Ki-tok Iâ-so͘ ê lô͘-po̍k. Goán siá-phoe hō͘ tòa tī [Hui-li̍p-pí], kap Ki-tok Iâ-so͘ kiat-liân lóng-chóng ê sìn-tô͘ í-ki̍p kok ūi kam-tok kap chip-sū. 2 Goān lán ê Pē Siōng-tè kap Chú Iâ-so͘ Ki-tok sù lín un-tián kap pêng-an! 3 Góa ta̍k piàn siūⁿ-tio̍h lín ê sî lóng kám-siā góa ê Siōng-tè; 4 ta̍k piàn ūi-tio̍h lín chèng-lâng kî-tó ê sî lóng ēng hoaⁿ-hí ê sim kî-kiû, 5 in-ūi lín, tùi thâu-chi̍t ji̍t khí kàu hiān-chāi, lóng ū chham-ú soan-iông hok-im ê kang-chok. 6 Góa chhim-sìn hit-ūi tī lín tiong-kan khai-sí chòe bí-hó kang-chok ê Siōng-tè ōe tī Ki-tok Iâ-so͘ ê Ji̍t kā i oân-sêng. 7 Góa siông-siông teh siàu-liām lín, tùi lín chèng-lâng ū chit khoán ê kám-chêng sī tong-jiân ê, in-ūi bô-lūn góa hiān-chāi tī kaⁿ-ga̍k lāi á-sī í-chêng ūi-tio̍h hok-im piān-hō͘ kap choh-chèng ê sî, lín lóng ū kap góa hun-hióng Siōng-tè ê un-sù. 8 Góa ēng Ki-tok Iâ-so͘ ê thiàⁿ-sim jōa-ni̍h siàu-liām lín tāi-ke, Siōng-tè thang kā góa choh-chèng. 9 Góa só͘ kî-kiû ê sī án-ni: Lín ê thiàⁿ ōe ná ke-thiⁿ, lín ê tì-sek kap tùi ta̍k hāng ê phòaⁿ-toàn-le̍k mā ná chìn-pō͘, 10 hō͘ lín ōe-hiáu hun-pia̍t hit-ê siōng-hó ê tāi-chì, án-ni tī Ki-tok ê Ji̍t lín chiah ōe chiâⁿ-chòe sûn-kiat bô thang hiâm ê lâng, 11 chhiong-móa khò Iâ-so͘ Ki-tok chiah ū ê hó tek-hēng, thang chiong êng-kng kap o-ló kui hō͘ Siōng-tè. 12 Hiaⁿ-tī chí-bē, góa ài lín chai, góa só͘ tú-tio̍h ê tāi-chì tian-tò hō͘ hok-im koh-khah chìn-tián, 13 tì-kàu ông-kiong ê choân-thé kéng-ōe í-ki̍p kî-tha só͘-ū ê lâng lóng chai-iáⁿ góa koaiⁿ-kaⁿ sī ūi-tio̍h Ki-tok ê iân-kò͘. 14 Chin chōe hiaⁿ-tī chí-bē mā in-ūi góa koaiⁿ-kaⁿ tùi Chú koh-khah ū khak-sìn, koh-khah hó-táⁿ bô kiaⁿ-hiâⁿ lâi thoân Siōng-tè ê tō-lí. 15 Ū lâng thoân Ki-tok sī chhut tī chi̍t-tò͘ kap hò͘ⁿ cheng-lūn; mā ū lâng sī chhut tī hó ì-sù. 16 Chiah-ê lâng sī chhut tī thiàⁿ-sim, chai-iáⁿ góa siū jīm-bēng sī beh ūi hok-im piān-hō͘. 17 Lēng-gōa hiah-ê lâng soan-iông Ki-tok sī chhut tī iá-sim, tōng-ki bô sûn, siūⁿ-beh thàn góa koaiⁿ-kaⁿ ê sî ke-thiⁿ góa ê kan-khó͘. 18 Án-ni ū sím-mi̍h koan-hē? Sī ké-ì á-sī chin-sim, bô-lūn án-chóaⁿ, Ki-tok siū thoân-khui, góa chiū ūi-tio̍h án-ni hoaⁿ-hí! Tio̍h, góa beh kè-sio̍k hoaⁿ-hí, 19 in-ūi góa chai, tùi lín ê kî-tó kap Iâ-so͘ Ki-tok ê Sîn ê pang-chān, góa it-tēng ōe tit-tio̍h chū-iû. 20 Góa pek-chhiat kî-thāi kap ǹg-bāng ê, chiū-sī bô chi̍t hāng tāi-chì ōe hō͘ góa kiàn-siàu; góa sî-sî khek-khek, te̍k-pia̍t sī hiān-chāi, ū kàu-gia̍h ê ióng-khì, sī oa̍h á-sī sí, thang hō͘ Ki-tok thong-kè góa chit-ê lâng tit-tio̍h êng-iāu. 21 In-ūi, tùi góa lâi kóng, teh-oa̍h sī Ki-tok, sí sī lī-ek. 22 Nā-sī kè-sio̍k oa̍h-teh ōe-tàng chòe khah chōe ū hāu-kó ê kang-chok, góa soah m̄-chai beh kéng sím-mi̍h. 23 Góa chìn-thòe-lióng-lân. Góa si̍t-chāi chin ài lī-khui chit-ê sè-kan kap Ki-tok chòe-hé, che eng-kai sī khah hó. 24 Put-kò, ūi-tio̍h lín ê iân-kò͘, góa koh-khah tio̍h oa̍h lo̍h-khì. 25 Tùi chit hāng, góa khak-sìn; góa chai góa beh oa̍h lo̍h-khì, beh kè-sio̍k kap lín tāi-ke oa̍h lo̍h-khì, sī beh hō͘ lín ê sìn-gióng koh-khah chìn-pō͘, koh-khah ū hoaⁿ-hí, 26 án-ni góa kap lín koh saⁿ-kìⁿ ê sî, lín ōe in-ūi Ki-tok Iâ-so͘ ū chhiong-hun ê lí-iû thang ēng góa chòe khoa-kháu. 27 Bô-lūn án-chóaⁿ, lín ê giân-hêng kú-chí tio̍h hû-ha̍p Ki-tok ê hok-im. Án-ni, bô-lūn góa ōe-tàng koh khì kap lín saⁿ-kìⁿ á-bōe, lóng ōe-tàng thiaⁿ-tio̍h lín ê tāi-chì, chai lín lóng ēng siâng chi̍t ê sim-chì khiā-chāi, tâng-sim saⁿ-kap ūi-tio̍h hok-im ê sìn-gióng phah-piàⁿ. 28 Bô-lūn chòe sím-mi̍h, m̄-bián kiaⁿ hoán-tùi-chiá ê ui-hia̍p, án-ni thang chèng-bêng in ōe sit-pāi, lín ōe tek-sèng; chit-ê tek-sèng sī tùi Siōng-tè lâi ê. 29 In-ūi Siōng-tè m̄-nā ū sù lín te̍k-pia̍t ê un-hūi lâi sìn Ki-tok, mā hō͘ lín ūi-tio̍h Ki-tok siū-khó͘, 30 lâi chham-ú siâng-khoán ê cheng-chiàn; chit-ê cheng-chiàn lín ū khòaⁿ-tio̍h góa án-chóaⁿ chiàn, hiān-chāi koh thiaⁿ-kìⁿ góa iáu teh chiàn.

Hui-li̍p-pí 2

1 Kì-jiân lín kap Ki-tok kiat-liân ū tit-tio̍h kek-lē; kì-jiân lín tùi I ê thiàⁿ ū tit-tio̍h an-ùi; kì-jiân lín kap Sèng Sîn ū kau-gî; kì-jiân lín ū keng-giām Siōng-tè ê chû-pi lîn-bín; 2 lín tio̍h ū siâng-khoán ê sim-chì, siâng-khoán ê thiàⁿ-sim, hô-hâi ê kám-chêng, it-tì ê siūⁿ-hoat, thang hō͘ góa chhiong-móa hoaⁿ-hí. 3 M̄-thang chū-su chū-lī, mā m̄-thang tui-kiû hu-êng; hoán-tńg tio̍h ū khiam-sùn ê sim, khòaⁿ pa̍t-lâng pí ka-kī khah gâu. 4 Lín ta̍k ê lâng m̄-thang chí-ū kò͘ ka-kī ê tāi-chì, mā tio̍h kò͘ pa̍t-lâng ê tāi-chì. 5 Lín tio̍h ū Ki-tok Iâ-so͘ ê sim-chì: 6 I goân-pún ū Siōng-tè ê sin-hūn, khiok bô lām-iōng kap Siōng-tè pêng-téng ê tōe-ūi. 7 I hoán-tńg piàⁿ-khang ka-kī, chhú lô͘-po̍k ê sin-hūn, chhut-sì kap lâng kâng-khoán, ēng lâng ê hêng-thé chhut-hiān. 8 I chū-goān khiam-pi, sūn-ho̍k kàu sí --- sīm-chì sí tī si̍p-jī-kè téng. 9 In-ūi án-ni, Siōng-tè thê-seng I kàu siōng-koân ê tōe-ūi, sù I chhiau-oa̍t bān miâ ê miâ-hō. 10 Án-ni, ūi-tio̍h kèng-tiōng Iâ-so͘ ê miâ, thiⁿ-téng, tōe-chiūⁿ, tōe-ē, it-chhè ê kha-thâu-u lóng ōe kūi-pài, 11 it-chhè ê chhùi lóng soan-jīn, “Iâ-so͘ Ki-tok sī Chú”, lâi êng-iāu Pē Siōng-tè. 12 Só͘-í, chhin-ài ê hiaⁿ-tī chí-bē, góa tī lín hia ê sî, lín lóng ū sūn-thàn góa, hiān-chāi góa bô tī lín hia, lín koh-khah tio̍h án-ni. Tio̍h kè-sio̍k kiaⁿ-hiâⁿ ngia̍uh-ngia̍uh-chhoah lâi oân-sêng lín ê chín-kiù; 13 in-ūi Siōng-tè sî-siông tī lín tiong-kan teh chòe-kang, hō͘ lín ū ì-goān koh ōe si̍t-chián I ê hó chí-ì. 14 Bô-lūn chòe sím-mi̍h tāi-chì, lóng m̄-thang bâi-oàn á-sī cheng-lūn, 15 hō͘ lín thang chheng-pe̍k sûn-kiat, tī chit-ê siâ-ok hú-pāi ê sè-tāi choh Siōng-tè bô khoat-tiám ê kiáⁿ-jî. Tio̍h tī in tiong-kan hoat-kng, chhin-chhiūⁿ kng teh chiò sè-kan, 16 lâi kian-siú sù oa̍h-miā ê sìn-sit, hō͘ góa tī Ki-tok ê Ji̍t thang khoa-kháu kóng ka-kī bô khang-khang phun-pho, bô khang-khang lô-khó͘. 17 Góa nā tio̍h ēng ka-kī ê huih chòe tiān-chè phoah tī lín ê sìn-sim só͘ hiàn ê chè-mi̍h, góa mā hoaⁿ-hí, mā beh kap lín chòe-hé hoaⁿ-hí. 18 Siâng-khoán, lín mā tio̍h hoaⁿ-hí, kap góa hun-hióng hoaⁿ-hí. 19 Góa ǹg-bāng Chú Iâ-so͘ hō͘ góa ōe-tàng kín chhe [Thê-mô͘-thài] khì lín hia, hō͘ góa thang thiaⁿ-tio̍h lín ê siau-sit lâi tit-tio̍h kek-lē. 20 Chí-ū i ū kap góa tâng-sim chin-chiàⁿ teh koan-sim lín ê sū. 21 Chèng-lâng lóng teh tui-kiû ka-kī ê sū, m̄-sī Iâ-so͘ Ki-tok ê sū. 22 M̄-kú [Thê-mô͘-thài] ê chòe-lâng lín lóng chai, i kap góa chhin-chhiūⁿ pē kap kiáⁿ chòe-hé ūi-tio̍h thoân hok-im teh ho̍k-sāi. 23 Án-ni, góa chi̍t-ē chai góa ê tāi-chì ū sím-mi̍h kiat-kio̍k, ǹg-bāng ōe-tàng sûi-sî chhe i khì lín hia. 24 Góa khak-sìn Chú, I mā ōe hō͘ góa chin kín khì kìⁿ lín. 25 Put-kò, góa siūⁿ-kóng tio̍h chhe [Í-pa-hut-thê] khì lín hia; i sī góa ê hiaⁿ-tī, tâng-kang, kap chiàn-iú, tī góa su-iàu ê sî lín ū phài i lâi ho̍k-sāi góa. 26 I chin siàu-liām lín tāi-ke, mā in-ūi chai-iáⁿ lín ū thiaⁿ-tio̍h i phòa-pīⁿ ê tāi-chì, sim chin kan-khó͘. 27 I khak-si̍t ū phòa-pīⁿ, sīm-chì hiám sí-khì. M̄-kú Siōng-tè ū lîn-bín i, m̄-nā i nā-tiāⁿ, mā ū lîn-bín góa, hō͘ góa m̄-bián koh ke-thiⁿ iu-siong. 28 In-ūi án-ni, góa kóaⁿ-kín beh chhe i tńg-khì lín hia, hō͘ lín ōe-tàng koh kìⁿ-tio̍h i lâi hoaⁿ-hí, mā thang kiám-chió góa ê khòa-lū. 29 Só͘-í, lín tio̍h tī Chú ê lāi-bīn hoaⁿ-hoaⁿ hí-hí kā i chiap-la̍p. Tio̍h chun-tiōng chhin-chhiūⁿ i chit khoán ê lâng, 30 in-ūi i ūi-tio̍h Ki-tok ê kang-chok mō͘ sìⁿ-miā ê gûi-hiám hiám-hiám-á sí, beh pó͘ lín chòe bô-kàu ê, thòe lín lâi ho̍k-sāi góa.

Hui-li̍p-pí 3

1 Chòe āu, hiaⁿ-tī chí-bē, lín tio̍h khò Chú lâi hoaⁿ-hí! Góa koh kóng-khí í-chêng só͘ siá ê, tùi góa pèng bô mâ-hoân, tùi lín khiok ū pang-chān. 2 Tio̍h chù-ì hit tīn káu, chù-ì hiah-ê choh-pháiⁿ ê lâng, chù-ì hiah-ê ka-kī koah-siong seng-khu ê lâng. 3 Kî-si̍t, lán chiah-sī chin-chiàⁿ siū kat-lé ê lâng. Lán thong-kè Sèng Sîn kèng-pài Siōng-tè, khoa-kháu Ki-tok Iâ-so͘, bô óa-khò gōa-piáu ê lé-gî. 4 Nā kóng beh óa-khò lé-gî, góa mā ōe; nā ū lâng siūⁿ-kóng i ōe-tàng óa-khò lé-gî, góa koh-khah ōe. 5 Góa chhut-sì tē-poeh ji̍t chiū siū kat-lé, sī [Í-sek-lia̍t]-lâng, sio̍k [Piān-ngá-bín] chi-cho̍k, sī sûn-chhùi ê [Hi-pek-lâi]-lâng. Tùi siú Lu̍t-hoat lâi kóng, góa sio̍k [Hoat-lī-sài]-phài; 6 tùi jia̍t-sim lâi kóng, góa sī kàu-hōe ê pek-hāi-chiá; tùi siú Lu̍t-hoat lâi chiâⁿ-chòe gī ê phiau-chún lâi kóng, góa lóng bô sím-mi̍h thang hiâm. 7 M̄-kú, í-chêng tùi góa ū lī-ek ê, hiān-chāi in-ūi Ki-tok ê iân-kò͘, góa kā i khòaⁿ-chòe sún-sit. 8 M̄-nā án-ni, góa chin-chiàⁿ khòaⁿ it-chhè chòe sún-sit, in-ūi góa khòaⁿ jīn-bat góa ê Chú Ki-tok Iâ-so͘ chòe siōng pó-pòe. Ūi-tio̍h I góa pàng-sak it-chhè, khòaⁿ bān-sū chòe pùn-sò, sī beh tit-tio̍h Ki-tok, 9 oân-choân kap I kiat-liân, bô koh ū hit khoán khò ka-kī siú Lu̍t-hoat lâi tit-tio̍h ê gī. Góa hiān-chāi ū ê gī sī thong-kè sìn-khò Ki-tok, sī kun-kù sìn lâi tit-tio̍h Siōng-tè só͘ siúⁿ-sù ê gī. 10 Góa só͘ ài ê sī jīn-bat Ki-tok koh thé-giām I koh-oa̍h ê tōa lêng-le̍k, kap I chòe-hé siū-khó͘, keng-giām I ê sí, 11 ǹg-bāng ka-kī mā ōe-tàng tùi sí koh-oa̍h. 12 Án-ni m̄-sī kóng góa í-keng tit-tio̍h á-sī í-keng ta̍t-kàu bo̍k-phiau; góa kè-sio̍k ti̍t-ti̍t cháu, ǹg-bāng thang tit-tio̍h siúⁿ; kî-si̍t Ki-tok Iâ-so͘ í-keng tit-tio̍h góa. 13 Hiaⁿ-tī chí-bē, góa bô siūⁿ-kóng ka-kī í-keng tit-tio̍h. Góa chí-ū choan-sim chi̍t hāng, chiū-sī bōe kì-tit āu-bīn ê sū, phah-piàⁿ tui-kiû thâu-chêng ê sū, 14 ǹg bo̍k-phiau ti̍t-ti̍t cháu, ūi-tio̍h beh tit-tio̍h siúⁿ, chiū-sī Siōng-tè thong-kè Ki-tok Iâ-so͘ tiàu góa khì niá-siū hit-ê tùi téng-bīn lâi ê oa̍h-miā. 15 Só͘-í, lán tiong-kan sêng-se̍k ê lâng tio̍h ū siâng-khoán ê siūⁿ-hoat. Lín tiong-kan nā ū pa̍t khoán ê siūⁿ-hoat, Siōng-tè mā ōe chiong chit-ê siūⁿ-hoat kā lín chí-sī. 16 Bô-lūn án-chóaⁿ, lán tio̍h chiàu í-keng cháu kè-lâi ê lō͘-sòaⁿ kè-sio̍k chiân-chìn. 17 Hiaⁿ-tī chí-bē, lín lóng tio̍h o̍h góa; tio̍h chù-ì khòaⁿ hiah-ê tè goán ê bô͘-iūⁿ ê lâng án-chóaⁿ teh seng-oa̍h. 18 Góa í-keng ū kā lín kóng chin chōe piàn, hiān-chāi koh lâu ba̍k-sái kā lín kóng: Ū chin chōe lâng, in ê hêng-ûi hō͘ in chiâⁿ-chòe Ki-tok si̍p-jī-kè ê tùi-te̍k. 19 In ê kiat-kio̍k sī bia̍t-bông; in ēng pak-tó͘ chòe sîn-bêng; in chiong kiàn-siàu khòaⁿ-chòe kong-êng; in chí-ū koan-sim tōe-chiūⁿ ê sū. 20 M̄-kú, lán sī thiⁿ-téng ê kong-bîn, teh thèng-hāu tùi hia lâi ê Kiù-sè-chú, chiū-sī Chú Iâ-so͘ Ki-tok. 21 I ōe ēng hō͘ bān-iú khut-ho̍k ê lêng-le̍k lâi kái-piàn lán pi-chiān ê thé, hō͘ lán pìⁿ-chòe kap I siâng-khoán êng-iāu ê thé.

Hui-li̍p-pí 4

1 Só͘-í, góa só͘ chhin-ài só͘ siàu-liām ê hiaⁿ-tī chí-bē, lín sī góa ê hoaⁿ-hí, góa ê êng-kng, tio̍h óa-khò Chú lâi khiā-chāi. 2 Góa khó͘-khǹg [Iú-a-tia̍p], mā khó͘-khǹg [Sûn-to͘-ki], lín tī Chú ê lāi-bīn tio̍h tâng-sim. 3 Góa tiong-si̍t ê tâng-phōaⁿ, góa mā ài lí pang-chān chit nn̄g ê hū-jîn-lâng, in-ūi in kap [Kek-lī-bián] í-ki̍p góa kî-tha ê tâng-kang bat ūi-tio̍h hok-im kap góa chòe-hé hùn-tò͘; in ê miâ í-keng ū kì-chài tī oa̍h-miā-chheh. 4 Tio̍h sî-siông kap Chú kiat-liân lâi hoaⁿ-hí! Góa koh kóng chi̍t piàn, tio̍h hoaⁿ-hí! 5 Tio̍h hō͘ chèng-lâng khòaⁿ ōe chhut lín ê khoan-iông. Chú teh-beh lâi lah. 6 Lóng m̄-thang khòa-lū sím-mi̍h. Bān-sū tio̍h ēng kám-siā ê sim kî-kiû kap tāi-tó, chiong lín só͘ kiû ê hō͘ Siōng-tè chai. 7 Án-ni, Siōng-tè só͘ sù chhiau-oa̍t lâng it-chhè liáu-kái ê pêng-an, ōe thong-kè Ki-tok Iâ-so͘ pó-siú lín ê sim-su ì-liām. 8 Hiaⁿ-tī chí-bē, chóng kóng chi̍t kù, hiah-ê ōe kiàn-li̍p hó tek-hēng ê sū, hiah-ê ta̍t-tit chheng-chàn ê sū, chiū-sī it-chhè chin-si̍t ê, it-chhè thang chun-kèng ê, it-chhè kong-chèng ê, it-chhè sûn-kiat ê, it-chhè khó-ài ê, it-chhè thang o-ló ê, chiah-ê lín lóng tio̍h put-sî khǹg tī sim-lāi. 9 Lín tùi góa só͘ ha̍k-si̍p koh chiap-siū ê, thiaⁿ-tio̍h koh khòaⁿ-tio̍h ê, chiah-ê lóng tio̍h kè-sio̍k si̍t-hêng. Án-ni, sù pêng-an ê Siōng-tè chiū ōe kap lín tông-chāi. 10 Góa tī Chú ê lāi-bīn hui-siông hoaⁿ-hí! In-ūi kè chi̍t tōaⁿ sî-kan liáu-āu, lín tùi góa ê koan-sim ū koh puh-íⁿ khui-hoe; kî-si̍t, lín ū teh kā góa koan-sim, put-kò sī bô ki-hōe thang piáu-sī nā-tiāⁿ. 11 M̄-sī kóng góa bô kàu ēng, in-ūi góa í-keng o̍h ōe-hiáu bô-lūn tī sím-mi̍h kéng-gū lóng ti-chiok. 12 Góa chai án-chóaⁿ kè sàn-chhiah ê seng-oa̍h, mā chai án-chóaⁿ kè hù-jū ê seng-oa̍h. Sī pá á-sī iau, sī ū-chhun á-sī ū-khiàm, góa í-keng tit-tio̍h pì-koat, chiū-sī bô-lūn sím-mi̍h sî-chūn sím-mi̍h só͘-chāi, góa lóng ti-chiok. 13 Óa-khò sù góa lêng-le̍k ê Ki-tok, góa ū khùi-la̍t thang khek-ho̍k ta̍k khoán ê kéng-gū. 14 M̄-kú, lín ū hun-tam góa ê khùn-lân, án-ni si̍t-chāi chin hó. 15 Lín [Hui-li̍p-pí]-lâng ka-kī mā lóng chai, tī góa thoân hok-im ê chho͘-kî, góa lī-khui [Má-kî-tùn] ê sî, chí-ū lín ê kàu-hōe ū hun-tam góa seng-oa̍h hùi-iōng ê siu-chi. 16 Liân góa tī [Thiap-sat-lô-nî-ka] ê sî, lín ū kúi-nā piàn sàng mi̍h-kiāⁿ lâi kiong-kip góa ê su-iàu. 17 Góa m̄-sī ài lín sàng mi̍h-kiāⁿ, sī ài lín ū khah chōe ê lī-sûn kì ji̍p-khì lín ê hō͘-thâu. 18 Che sī lín hō͘ góa it-chhè mi̍h-kiāⁿ ê siu-kù. Lín hō͘ góa ê í-keng kàu-gia̍h koh ū-chhun. Góa ū tùi [Í-pa-hut-thê] siu-tio̍h lín sàng hō͘ góa ê lé-mi̍h, chhin-chhiūⁿ hoat-chhut phang-bī, Siōng-tè só͘ hoaⁿ-hí ê chè-mi̍h. 19 Góa ê Siōng-tè ōe chiàu I êng-iāu ê hong-hù, thong-kè Ki-tok Iâ-so͘ lâi boán-chiok lín só͘-ū ê su-iàu. 20 Goān êng-kng kui hō͘ lán ê Pē Siōng-tè, ti̍t-kàu éng-éng oán-oán. Amen! 21 Chhiáⁿ thòe góa kā sio̍k Ki-tok Iâ-so͘ ê só͘-ū sìn-tô͘ chhéng-an. Kap góa tī chia ê hiaⁿ-tī chí-bē mā beh kā lín chhéng-an. 22 Tī chia só͘-ū ê sìn-tô͘, te̍k-pia̍t sī [Khái-sat] ông-kiong lāi ê sìn-tô͘, lóng beh kā lín chhéng-an. 23 Goān Chú Iâ-so͘ Ki-tok ê un-tián kap lín tāi-ke tông-chāi!





AMAZING GRACE BIBLE INSTITUTE