Ephesians

Í-hut-só͘

Í-hut-só͘ 1

1 Góa sī [Pó-lô], hōng Siōng-tè ê chí-ì choh Ki-tok Iâ-so͘ ê sù-tô͘; góa siá-phoe hō͘ tòa tī [Í-hut-só͘], sio̍k Ki-tok Iâ-so͘ tiong-sìn ê sìn-tô͘. 2 Goān lán ê Pē Siōng-tè kap Chú Iâ-so͘ Ki-tok sù lín un-tián kap pêng-an! 3 Tio̍h chheng-chàn lán ê Chú Iâ-so͘ Ki-tok ê Pē Siōng-tè! In-ūi I ū chiong thiⁿ-téng ta̍k khoán sio̍k-lêng ê hok-khì, thong-kè lán kap Ki-tok kiat-liân, sù hō͘ lán. 4 Chhòng-sè í-chêng, Siōng-tè í-keng thong-kè Ki-tok kéng-soán lán, hō͘ lán tī I bīn-chêng chiâⁿ-chòe sèng-kiat bô khoat-tiám ê lâng. In-ūi Siōng-tè thiàⁿ lán, 5 chá chiū koat-tēng beh thong-kè Iâ-so͘ Ki-tok hō͘ lán choh I ê kiáⁿ-jî; che sī I só͘ hoaⁿ-hí ê, sī I ê chí-ì. 6 Lán tio̍h siōng-chàn Siōng-tè êng-iāu ê un-tián, in-ūi I ū chiong I só͘ thiàⁿ ê Kiáⁿ bô tiâu-kiāⁿ sù hō͘ lán! 7 Tùi Ki-tok, thong-kè I ê sí, lán tit-tio̍h chū-iû, chōe-kò tit-tio̍h sià-bián. Siōng-tè ê un-tián si̍t-chāi chin hong-hù; 8 I ū chiong chit-ê un-tián chhiong-chhiong chiok-chiok sù hō͘ lán. I ēng ta̍k khoán ê tì-hūi kap lí-kái, 9 chiàu I só͘ hoaⁿ-hí ê chí-ì, hō͘ lán chai I chá chiū koat-tēng thong-kè Ki-tok lâi oân-sêng ò-biāu ê kè-ōe. 10 Chit-ê kè-ōe, Siōng-tè beh tī sî-ki sêng-se̍k ê sî oân-sêng, thang hō͘ tī thiⁿ-téng kap tōe-chiūⁿ it-chhè ê pī-chō-bu̍t lóng chun Ki-tok choh thâu, liân-ha̍p chòe chi̍t-ê. 11 Bān-iú lóng chiàu Siōng-tè ê kè-ōe kap koat-tēng lâi oân-sêng. Siōng-tè chiàu I tāi-seng koat-tēng ê chí-ì, thong-kè Ki-tok kéng-soán goán lâi sêng-chiap I ê ke-gia̍p. 12 Án-ni sī beh hō͘ goán chiah-ê tāi-seng chiong ǹg-bāng khǹg tī Ki-tok ê lâng thang siōng-chàn Siōng-tè ê êng-iāu. 13 Thong-kè Ki-tok, lín mā ū thiaⁿ-tio̍h chin-lí ê sìn-sit, chiū-sī hit-ê hō͘ lín tit-kiù ê hok-im, hit sî lín ū sìn, Siōng-tè chiū sù lín só͘ èng-ún ê Sèng Sîn, kā lín khàm-ìn chèng-bêng lín sio̍k I. 14 Sèng Sîn pó-chèng lán thang sêng-chiap Siōng-tè só͘ èng-ún ê ke-gia̍p, ti̍t-kàu hō͘ sio̍k I ê lâng tit-tio̍h oân-choân ê chū-iû, thang siōng-chàn I ê êng-iāu. 15 In-ūi án-ni, góa chi̍t-ē thiaⁿ-tio̍h lín tùi Chú Iâ-so͘ ū sìn-sim, tùi só͘-ū ê sìn-tô͘ ū thiàⁿ-sim, 16 chiū ūi-tio̍h lín put-sî teh kám-siā Siōng-tè. Góa tī kî-tó tiong siàu-liām lín, 17 kî-kiû lán ê Chú Iâ-so͘ Ki-tok ê Siōng-tè, êng-iāu ê Thiⁿ Pē, sù Sèng Sîn hō͘ lín ū tì-hūi kap khé-sī thang jīn-bat I. 18 Góa khún-kiû Siōng-tè khui lín ê sim-gán, hō͘ lín thang chai I soán-tiàu lín lâi tit-tio̍h ê ǹg-bāng sī sím-mi̍h. I tùi I ê sìn-tô͘ só͘ èng-ún ê chiok-hok jōa-ni̍h hong-hù koh bí-biāu, 19 tī lán sìn I ê lâng tiong-kan teh ūn-hêng ê koân-lêng jōa-ni̍h tōa. I ū ūn-iōng chit-ê khùi-la̍t hō͘ Ki-tok tùi sí-lâng tiong koh-oa̍h, koh hō͘ Ki-tok tī thiⁿ-téng chē tī I ka-kī ê chiàⁿ-pêng, 21 tī hia koán-hat só͘-ū ê thóng-léng-chiá, chiáng-koân-chiá, koân-le̍k-chiá, kap chú-chèng-chiá, m̄-nā kim-sè, mā pau-koat lâi-sè it-chhè ū koân-pèng ōe-tàng chheng-ho͘ ê hâm-thâu. 22 Siōng-tè hō͘ bān-iú lóng khut-ho̍k tī Ki-tok ê kha-ē, hō͘ I choh kàu-hōe ê goân-siú, thóng-tī bān-iú. 23 Kàu-hōe sī Ki-tok ê sin-thé, sī chhiong-móa bān-iú ê Ki-tok só͘ oân-choân chhiong-móa ê.

Í-hut-só͘ 2

1 Í-chêng in-ūi lín hoān-chōe pōe-ge̍k Siōng-tè, lêng-sèng í-keng sí. 2 Hit sî, lín thàn sè-kan ê tiâu-liû, sūn-ho̍k khong-tiong ê chiáng-koân-chiá, chiū-sī hiān-chāi teh koán-hat pōe-ge̍k Siōng-tè ê lâng hit-ê siâ-sîn. 3 Kî-si̍t, goán í-chêng mā lóng kap chiah-ê lâng kâng-khoán thàn pún-sèng ê io̍k-bōng seng-oa̍h, chiàu ka-kī jio̍k-thé ê su-io̍k kap ì-liām teh hêng-tōng. Goán kap kî-tha ê lâng kâng-khoán, chù-tiāⁿ siū Siōng-tè hêng-hoa̍t. 4 M̄-kú Siōng-tè ū hong-sēng ê lîn-bín, ēng ke̍k-tōa ê chû-ài thiàⁿ lán, 5 tī lán iáu teh pōe-ge̍k, lêng-sèng í-keng sí ê sî, I hō͘ lán kap Ki-tok chòe-hé koh-oa̍h; lín sī tùi Siōng-tè ê un-tián tit-tio̍h kiù ê. 6 Thong-kè lán kap Ki-tok Iâ-so͘ kiat-ha̍p, Siōng-tè hō͘ lán kap I chòe-hé koh-oa̍h, tī thiⁿ-téng chòe-hé chiáng-koân. 7 I án-ni chòe sī beh thong-kè Ki-tok Iâ-so͘ tùi lán hián-sī chû-ài, thang tùi āu sè-tāi piáu-bêng I bû-hān hong-hù ê un-tián. 8 In-ūi lín sī khò Siōng-tè ê un-tián tùi sìn tit-tio̍h kiù; m̄-sī khò lín ka-kī, sī khò Siōng-tè ê un-sù. 9 Kì-jiân m̄-sī khò hêng-ûi, sím-mi̍h lâng to bōe-tàng khoa-kháu. 10 In-ūi lán sī Siōng-tè chhòng-chō ê; I thong-kè Ki-tok Iâ-so͘ chhòng-chō lán, hō͘ lán thang chòe I chá chiū chún-pī ài lán chòe ê hó-sū. 11 Só͘-í, lín chiah-ê chhut-sì chòe Gōa-pang-lâng ê, tio̍h ōe kì-tit lín kè-khì ū hō͘ chū-chheng siū-kat-lé-ê, chiū-sī ēng chhiú tī seng-khu kiâⁿ kat-lé ê [Iû-thài]-lâng, kiò-chòe bô-siū-kat-lé ê lâng. 12 Lín hit sî kap Ki-tok bô koan-hē, bô sio̍k Siōng-tè ê soán-bîn, bô hūn tī Siōng-tè èng-ún ê bêng-iok, tī chit sè-kan bô ǹg-bāng, bô Siōng-tè. 13 M̄-kú lín chiah-ê í-chêng lī-khui Siōng-tè hn̄g-hn̄g ê Gōa-pang-lâng, hiān-chāi khò Ki-tok Iâ-so͘, thong-kè I ê sí, í-keng kap Siōng-tè chhin-kūn. 14 Ki-tok chhiok-chìn lán ê hô-pêng; I ū hō͘ [Iû-thài]-lâng kap Gōa-pang-lâng chiâⁿ-chòe chi̍t-ê. I ēng ka-kī ê seng-khu thiah-húi kā in keh-khui ê chhiûⁿ, siau-tû in tiong-kan ê te̍k-tùi. 15 I hòe-tû [Iû-thài] Lu̍t-hoat ê kài-bēng kap kui-lē, hō͘ nn̄g pêng thong-kè I thang chhòng-chō chi̍t ê sin ê lâng lâi chhiok-chìn hô-pêng. 16 Ki-tok thong-kè si̍p-jī-kè siau-bia̍t pí-chhú ê te̍k-tùi, hō͘ nn̄g pêng chiâⁿ-chòe chi̍t-thé, thang kap Siōng-tè hô-hó. 17 Án-ni, Ki-tok lâi sī beh thoân hô-pêng ê hok-im hō͘ só͘-ū ê lâng, pau-koat lín chiah-ê í-chêng lī-khui Siōng-tè hn̄g-hn̄g ê Gōa-pang-lâng kap chhin-kūn Siōng-tè ê [Iû-thài]-lâng. 18 Thong-kè Ki-tok, lán nn̄g pêng ê lâng lóng ōe-tàng tùi kâng chi̍t ūi Sèng Sîn lâi chhin-kūn Pē. 19 Só͘-í, lín Gōa-pang-lâng í-keng m̄-sī gōa-kok-lâng, m̄-sī chhut-gōa-lâng, sī kap Siōng-tè ê chú-bîn pîⁿ-pîⁿ choh kok-bîn, choh Siōng-tè ê ka-cho̍k, 20 kiàn-li̍p tī sian-ti kap sù-tô͘ só͘ hē ê tōe-ki téng, ēng Ki-tok Iâ-so͘ pún-sin chòe siōng tiōng-iàu ê ki-chio̍h, 21 kui-ê kiàn-tio̍k-bu̍t khò I lâi liân-chiap kiat-ha̍p, chiām-chiām khok-tōa chiâⁿ-chòe sèng ê tiān kui-sio̍k Chú. 22 Lín kap I kiat-liân, khò Sèng Sîn ê pang-chān, mā chòe-hé siū khí-chō chòe Siōng-tè khiā-khí ê só͘-chāi.

Í-hut-só͘ 3

1 In-ūi án-ni, góa --- [Pó-lô], ūi-tio̍h lín Gōa-pang-lâng choh Ki-tok Iâ-so͘ ê siû-hoān, thòe lín tùi Siōng-tè kî-kiû. 2 Lín it-tēng ū thiaⁿ-tio̍h, ūi-tio̍h lín, Siōng-tè tùi I ê un-tián ū úi-thok góa chit-ê chit-bū. 3 Siōng-tè ū chiong I ê ò-pì khé-sī hō͘ góa chai. Góa í-keng ū kán-lio̍k siá chit-ê tāi-chì, 4 lín tha̍k liáu chiū ōe bêng-pe̍k góa tùi Ki-tok ò-pì ê liáu-kái; 5 chit-ê ò-pì, tī kè-khì ê sè-tāi bô hō͘ lâng chai, hiān-chāi Siōng-tè thong-kè Sèng Sîn í-keng ū tùi I ê sèng sù-tô͘ kap sian-ti khé-sī. 6 Chit-ê ò-pì sī án-ni: Gōa-pang-lâng thong-kè hok-im thang kap [Iû-thài]-lâng pîⁿ-pîⁿ choh kè-sêng-jîn, pîⁿ-pîⁿ sio̍k chi̍t ê sin-thé, kap Ki-tok Iâ-so͘ kiat-liân pîⁿ-pîⁿ sêng-siū Siōng-tè ê èng-ún. 7 Tùi Siōng-tè pe̍h-pe̍h ê un-sù, thong-kè I tōa lêng-le̍k ê ūn-hêng, góa chiâⁿ-chòe hok-im ê chhe-ēng. 8 Góa tī Siōng-tè só͘-ū ê chú-bîn tiong sī tē-it bî-sòe, I kèng-jiân sù góa te̍k-pia̍t ê un-tián thang chiong Ki-tok sǹg bōe-liáu hong-hù ê hok-im thoân hō͘ Gōa-pang-lâng, 9 thang hō͘ só͘-ū ê lâng bêng-pe̍k Siōng-tè án-chóaⁿ si̍t-hiān I ê ò-pì. Chhòng-chō bān-iú ê Siōng-tè tī kè-khì ê sè-tāi ū chiong chit-ê ò-pì ún-ba̍t khí-lâi, 10 sī beh tī hiān-kim ê sè-tāi, thong-kè kàu-hōe, hō͘ thian-kài ê thóng-léng-chiá, koân-le̍k-chiá, lóng thang jīn-bat Siōng-tè ta̍k khoán ê tì-hūi. 11 Siōng-tè án-ni chòe sī kun-kù I éng-oán ê chí-ì; chit-ê chí-ì í-keng thong-kè lán ê Chú Ki-tok Iâ-so͘ si̍t-hiān lah. 12 Kap Ki-tok kiat-liân, thong-kè tùi I ê sìn, lán thang chhiong-móa sìn-sim hó-táⁿ chiū-kūn Siōng-tè. 13 Só͘-í, chhiáⁿ lín m̄-bián in-ūi góa ūi-tio̍h lín siū-khó͘ lâi kan-khó͘-sim; kî-si̍t che sī lín ê kong-êng. 14 In-ūi án-ni, góa kūi-lo̍h tī Thiⁿ Pē bīn-chêng, 15 tùi I thiⁿ-téng tōe-chiūⁿ lóng-chóng ê chong-cho̍k niá-siū miâ-hō. 16 Góa tùi I kî-kiû, chiàu I hong-hù ê êng-iāu, thong-kè I ê Sèng Sîn só͘ sù ê khùi-la̍t, hō͘ lín lōe-chāi ê oa̍h-miā ióng-chòng khí-lâi. 17 Góa mā kî-kiû Ki-tok ōe in-ūi lín ê sìn lâi tiàm tī lín sim-lāi, hō͘ I ê thiàⁿ chòe tōe-ki tit-tio̍h lo̍k-si̍t, 18 hō͘ lín ōe-tàng tit-tio̍h khùi-la̍t kap Siōng-tè só͘-ū ê chú-bîn lóng bêng-pe̍k Ki-tok ê thiàⁿ jōa-ni̍h tn̂g, khoah, koân, chhim, 19 koh keng-giām hit-ê chhiau-kè lâng ê tì-sek só͘ ōe-tàng liáu-kái ê thiàⁿ, hō͘ Siōng-tè ê oân-siān kā lín oân-choân chhiong-móa. 20 Siōng-tè ōe-tàng ēng I tī lán tiong-kan teh ūn-hêng ê tōa lêng-le̍k, tōa-tōa chhiau-kè lán só͘ kiû só͘ siūⁿ ê, lâi sêng-chiū it-chhè. 21 Goān êng-iāu tī kàu-hōe tiong, thong-kè Ki-tok Iâ-so͘ kui hō͘ Siōng-tè, kàu sè-sè tāi-tāi, bû-kiông bû-chīn. Amen!

Í-hut-só͘ 4

1 Chòe chi̍t ê ūi-tio̍h Chú choh siû-hoān ê lâng, góa khó͘-khǹg lín. Kì-jiân lín siū Siōng-tè ho͘-tiàu, hêng-ûi tio̍h hû-ha̍p I ê ho͘-tiàu. 2 Hoān-sū tio̍h khiam-pi, un-jiû, jím-nāi, ēng thiàⁿ hō͘-siōng khoan-iông, 3 ēng hô-pêng hō͘-siōng liân-hê, chīn-la̍t pó-chhî Sèng Sîn só͘ sù ê ha̍p-it. 4 Sin-thé chí-ū chi̍t ê; Sèng Sîn chí-ū chi̍t ūi; in-ūi Siōng-tè tiàu lán beh tit-tio̍h ê ǹg-bāng sī chi̍t ê. 5 Chú chí-ū chi̍t ūi; sìn-gióng chí-ū chi̍t ê; sóe-lé chí-ū chi̍t ê; 6 Siōng-tè chí-ū chi̍t ūi, chiū-sī bān-iú ê Pē, I tī bān-iú ê téng-bīn, koàn-chhoàn bān-iú, koh tī bān-iú tiong. 7 Lán ta̍k ê lâng lóng chiàu Ki-tok só͘ sù ê hūn-liōng niá-siū un-sù. 8 Chiàu Sèng-keng só͘ kóng: I seng-koân kàu siōng-koân ê ūi ê sî, tòa chi̍t tōa-tūi siū-lia̍h-ê kap I khì, sù un-sù hō͘ lâng. 9 “I seng-koân” chit kù ōe sī sím-mi̍h ì-sù? Chiū-sī: I mā bat kàng-lo̍h kàu tōe siōng-chhim ê só͘-chāi. 10 Án-ni, “kàng-lo̍h” Hit-ūi chiū-sī kap “seng-koân” kàu pôaⁿ-kè chèng-thiⁿ ê téng-bīn lâi chhiong-móa bān-iú Hit-ūi sī kâng chi̍t ūi. 11 I só͘ sù ê ū sù-tô͘, ū sian-ti, ū thoân-hok-im-ê, ū bo̍k-ióng-ê kap kàu-tō-ê. 12 I án-ni chòe sī beh chong-pī Siōng-tè ê chú-bîn thang chòe sū-hōng ê kang-chok lâi kiàn-li̍p Ki-tok ê thé, 13 chòe-āu, lán lóng thang tùi Siōng-tè ê Kiáⁿ ū it-tì ê sìn-gióng kap jīm-sek lâi tióng-tāi sêng-jîn, ta̍t-kàu Ki-tok oân-choân ê thêng-tō͘. 14 Án-ni, lán chiū bô koh choh gín-á, hō͘ khi-phiàn-chiá phian-chō chhut-lâi só͘-ū chhò-gō͘ ê ha̍k-soat thoa teh-kiâⁿ, phiau-lâi phiau-khì. 15 Lán hoán-tńg tio̍h ēng thiàⁿ-sim kóng chin-si̍t, tī ta̍k hong-bīn ēng choh thâu ê Ki-tok chòe phiau-chún lâi sêng-tióng. 16 Tùi Ki-tok, sin-thé ê ta̍k kun-chat hō͘-siōng liân-chiap, ta̍k ê chi-thé hoat-hui eng-kai ū ê kong-lêng, hō͘ kui-ê sin-thé tióng-tōa, ēng thiàⁿ kiàn-li̍p khí-lâi. 17 Só͘-í, góa hōng Chú ê miâ khó͘-khǹg lín, m̄-thang kè-sio̍k chhin-chhiūⁿ Gōa-pang-lâng án-ni seng-oa̍h. In in-ūi bû-ti kap ngī-sim, sim-su o͘-àm, tì-kàu su-siúⁿ khong-tōng, kap Siōng-tè só͘ sù ê oa̍h-miā keh-tn̄g. 19 In sit-khì liâm-thí ê sim, chīn-chêng hòng-chhiòng, tham-loân ta̍k khoán ù-òe ê hêng-ûi. 20 Lín pèng m̄-sī án-ni ha̍k-si̍p Ki-tok. 21 Lín eng-kai ū thiaⁿ-tio̍h koan-hē I ê tāi-chì, ū tùi I ha̍k-si̍p, in-ūi tī Iâ-so͘ chiah ū chin-lí. 22 Án-ni, tio̍h thoat-lī í-chêng ê seng-oa̍h, thǹg-khì kū ê lâng, in-ūi kū ê lâng siū su-io̍k ê bê-he̍k teh pāi-hoāi. 23 Lín ê sim-su ì-liām tio̍h oân-choân ōaⁿ-sin, 24 chiū-sī tio̍h chhēng chiàu Siōng-tè ê hêng-siōng chhòng-chō ê sin lâng, ēng kun-kù chin-lí só͘ sán-seng ê kong-gī kap sèng-kiat piáu-hiān chhut-lâi. 25 Só͘-í, lín tio̍h thoat-lī hu-ké, tio̍h tùi chhù-piⁿ kóng chin-si̍t-ōe, in-ūi lán lóng sī Ki-tok sin-thé ê chi̍t pō͘-hūn. 26 Lín nā siū-khì m̄-thang tì-kàu hoān-chōe. M̄-thang kàu ji̍t-lo̍h iáu teh siū-khì; 27 m̄-thang hō͘ Mô͘-kúi ū khang-phāng thang lī-iōng. 28 Bat chòe-chha̍t ê m̄-thang koh thau-the̍h; tio̍h khò siang-chhiú chhut-la̍t chòe-kang tit-tio̍h chèng-tong ê siu-ji̍p, ū-la̍t thang pang-chān sàn-chhiah-lâng. 29 Pháiⁿ-ōe lóng m̄-thang kóng; tian-tò tio̍h kóng chō-chiū lâng ê hó-ōe, hō͘ thiaⁿ-tio̍h ê lâng tit-tio̍h lī-ek. 30 M̄-thang hō͘ Siōng-tè ê Sèng Sîn iu-siong; in-ūi Sèng Sîn sī lín sio̍k Siōng-tè ê ìn-kì, pó-chèng lín tī chín-kiù ê Ji̍t tit-tio̍h tháu-pàng. 31 Tio̍h khì-sak it-chhè ê ok-to̍k, pháiⁿ sèng-tē, siū-khì, soan-jióng, húi-pòng, í-ki̍p it-chhè ê pháiⁿ. 32 Tio̍h chhin-chhiat jîn-chû saⁿ khoán-thāi, hō͘-siōng sià-bián, tú kap Siōng-tè ū thong-kè Ki-tok sià-bián lín kâng-khoán.

Í-hut-só͘ 5

1 Kì-jiân lín sī Siōng-tè só͘ thiàⁿ ê kiáⁿ-jî, tio̍h o̍h I. 2 Giân-hêng kú-chí tio̍h ū thiàⁿ-sim, chhin-chhiūⁿ Ki-tok thiàⁿ lán, ūi-tio̍h lán hi-seng ka-kī ê sìⁿ-miā chòe phang-phang ê chè-mi̍h hiàn hō͘ Siōng-tè. 3 Kì-jiân lín sī Siōng-tè ê chú-bîn, it-chhè îm-loān, ù-òe, á-sī tham-io̍k ê sū, tī lín tiong-kan liân kóng to m̄-thang. 4 Mā m̄-thang kóng siâ-îm, chho͘-sio̍k, á-sī hā-liû ê ōe, hoán-tńg tio̍h kám-siā. 5 Tio̍h khak-si̍t chai, îm-loān, ù-òe, tham-loân ê lâng --- tham-loân sī chi̍t chióng ê pài ngó͘-siōng --- Ki-tok kap Siōng-tè ê Kok choa̍t-tùi bô in ê hūn. 6 M̄-thang hō͘ lâng ēng khong-tōng ê ōe kā lín bê-khì; Siōng-tè ê siū-khì ōe ūi-tio̍h chiah-ê tāi-chì lîm-kàu hiah-ê pōe-ge̍k ê lâng. 7 Só͘-í, m̄-thang kap hit khoán lâng kau-chhap. 8 Lín chêng tī o͘-àm tiong, m̄-kú hiān-chāi í-keng chiâⁿ-chòe sio̍k Chú ê lâng tī kng-bêng tiong, kiâⁿ-chòe tio̍h ū kng-bêng kiáⁿ-jî ê khoán-sit; 9 kng-bêng só͘ kiat ê ké-chí sī ta̍k khoán ê liông-siān, kong-gī, kap chin-lí. 10 Tio̍h chhâ-chhut sím-mi̍h sī Chú só͘ hoaⁿ-hí ê sū. 11 M̄-thang chham-ú tī o͘-àm tiong teh chòe bô lō͘-ēng ê tāi-chì, tian-tò tio̍h kā in po̍k-lō͘ chhut-lâi. 12 In am-am khàm-khàm teh chòe ê, liân kóng to kiàn-siàu! 13 It-chhè hō͘ kng po̍k-lō͘ chiū hián-bêng, 14 in-ūi it-chhè hián-bêng chhut-lâi ê chiū chiâⁿ-chòe kng. Só͘-í ū chi̍t kù ōe án-ni kóng: Teh khùn ê lâng, khí-lâi; tio̍h tùi sí-lâng tiong peh khí-lâi! Ki-tok beh kā lí chiò-kng! 15 Só͘-í, lín ê hêng-ûi tio̍h kín-sīn, m̄-thang chòe bô tì-hūi ê lâng, tio̍h chòe chhong-bêng ê lâng, 16 siān-iōng ki-hōe, in-ūi hiān-kim ê sî-tāi siâ-ok. 17 Só͘-í, m̄-thang chòe hô͘-tô͘ ê lâng, tio̍h bêng-pe̍k sím-mi̍h sī Chú ê chí-ì. 18 M̄-thang chiú-chùi; chiú-chùi ōe hō͘ lín pāi-hoāi; hoán-tńg tio̍h hō͘ Sèng Sîn chhiong-móa. 19 Tio̍h ēng si-phian, sèng-si, lêng-koa tùi-chhiùⁿ, tùi sim-tóe chhiùⁿ sèng-si kap si-phian chheng-chàn Chú. 20 Tio̍h khò lán ê Chú Iâ-so͘ ê miâ, ūi-tio̍h ta̍k hāng tāi-chì sî-siông kám-siā Thiⁿ Pē Siōng-tè. 21 Lín tio̍h ēng kèng-ùi Ki-tok ê sim hō͘-siōng sūn-ho̍k. 22 Choh hū-jîn-lâng-ê, tio̍h chhin-chhiūⁿ sūn-ho̍k Chú án-ni sūn-ho̍k tiōng-hu. 23 In-ūi tiōng-hu sī hū-jîn-lâng ê thâu, chhin-chhiūⁿ Ki-tok sī kàu-hōe ê thâu; I pún-sin sī kàu-hōe --- I ê seng-khu ê Kiù-chú. 24 Chhin-chhiūⁿ kàu-hōe sūn-ho̍k Ki-tok, choh hū-jîn-lâng-ê eng-kai mā tio̍h sū-sū sūn-ho̍k tiōng-hu. 25 Choh tiōng-hu-ê, tio̍h thiàⁿ hū-jîn-lâng, chhin-chhiūⁿ Ki-tok thiàⁿ kàu-hōe, ūi-tio̍h kàu-hōe hi-seng ka-kī. 26 I án-ni chòe sī beh thong-kè I ê ōe ēng chúi sóe chheng-khì lâi sèng-hòa kàu-hōe kui Siōng-tè, 27 hō͘ kàu-hōe ū êng-kng, lóng bô ù-tiám, bô jiâu-bûn, á-sī kî-tha chit khoán ê khoat-tiám, chiâⁿ-chòe sèng-kiat bô hâ-chhû thang hiàn hō͘ ka-kī. 28 Siâng-khoán, tiōng-hu tio̍h thiàⁿ ka-kī ê hū-jîn-lâng, chhin-chhiūⁿ thiàⁿ ka-kī ê seng-khu. Thiàⁿ hū-jîn-lâng chiū-sī thiàⁿ ka-kī. 29 Bô-lâng oàn-hūn ka-kī ê seng-khu, tian-tò sī kā i pó-ióng, chiàu-kò͘, kap Ki-tok tùi-thāi kàu-hōe kâng-khoán, 30 in-ūi lán sī I seng-khu ê chi-thé. 31 Sèng-keng kóng, “In-ūi án-ni, lâng ōe lī-khui pē-bú, kap i ê bó͘ kiat-ha̍p, nn̄g lâng chiâⁿ-chòe chi̍t-thé.” 32 Chit-ê keng-bûn khé-sī chi̍t ê ke̍k-tōa ê ò-pì; chiàu góa ê lí-kái, che sī teh chí Ki-tok kap kàu-hōe ê koan-hē. 33 Chóng-sī, che mā sek-iōng tī lín ta̍k ê lâng: Tiōng-hu tio̍h thiàⁿ ka-kī ê hū-jîn-lâng, chhin-chhiūⁿ thiàⁿ ka-kī; hū-jîn-lâng tio̍h kèng-tiōng i ê tiōng-hu.

Í-hut-só͘ 6

1 Choh jî-lú-ê, tio̍h sūn-ho̍k pē-bú, che sī sìn Chú ê lâng eng-kai ū ê pún-hūn. 2 “Tio̍h hàu-kèng pē-bú”, che sī thâu-chi̍t tiâu hù-tài èng-ún ê kài-bēng, “án-ni chòe lín chiū ōe ta̍k hāng hó-sè, tī chit-ê tōe kú-tn̂g khiā-khí.” 4 Choh pē-bú-ê, m̄-thang kek lín ê jî-lú siū-khì, tio̍h chiàu Chú ê koán-kàu kap kà-sī kā in pôe-ióng. 5 Choh lô͘-lē-ê, kap sūn-ho̍k Ki-tok kâng-khoán, tio̍h ēng kèng-ùi kap kiaⁿ-hiâⁿ choan-sim sūn-ho̍k lín tī sè-chiūⁿ ê chú-lâng. 6 M̄-thang tī lâng ê bīn-chêng kò͘-ì chòe hō͘ lâng khòaⁿ, hō͘ lâng hoaⁿ-hí; tio̍h choh Ki-tok ê lô͘-lē, tùi sim-lāi chun-thàn Siōng-tè ê chí-ì, 7 kam-sim lo̍k-ì chīn lô͘-lē ê pún-hūn, chhin-chhiūⁿ teh ho̍k-sāi Chú, m̄-sī teh ho̍k-sāi lâng. 8 Tio̍h chai, bô-lūn sī lô͘-lē á-sī chū-iû-ê, Chú lóng ōe chiàu ta̍k ê lâng ê hó hêng-ûi kā in pò-tap. 9 Choh chú-lâng-ê, mā tio̍h ēng kâng-khoán ê thài-tō͘ tùi-thāi lín ê lô͘-lē; m̄-thang kā in ui-hia̍p. Tio̍h chai, lín kap lín ê lô͘-lē lóng sio̍k kâng chi̍t ūi thiⁿ-téng ê Chú-lâng; I ēng kâng-khoán ê phiau-chún tùi-thāi ta̍k ê lâng. 10 Chòe-āu, góa khǹg lín tio̍h kap Chú kiat-liân, khò I ê tōa lêng-le̍k chòe kian-kiông ê lâng. 11 Tio̍h chhēng Siōng-tè só͘ sù choân-thò ê bú-chong, hō͘ lín khiā-chāi, thang tí-khòng Mô͘-kúi ê khúi-kè. 12 In-ūi lán m̄-sī kap ū huih ū bah ê lâng teh kau-chiàn, sī kap thian-kài ê siâ-lêng, chiū-sī chit-ê o͘-àm sè-tāi ê ú-tiū thóng-léng-chiá, koân-le̍k-chiá, chiáng-koân-chiá teh kau-chiàn. 13 Só͘-í, tio̍h ēng Siōng-tè só͘ sù choân-thò ê bú-chong lâi chong-pī ka-kī, thang tī siâ-ok ê ji̍t-chí ōe-tàng tí-khòng tùi-te̍k ê kong-kek, kian-chhî kàu-tóe chhî-siú tīn-tōe. 14 Só͘-í, tio̍h khiā-chāi, ēng chin-lí chòe tòa hâ, ēng chèng-gī chòe hō͘-heng-kah chhēng, 15 ēng chún-pī hó-sè ê hô-pêng ê hok-im chòe ôe chhēng. 16 Tio̍h put-sî ēng sìn-sim chòe tîn-pâi, thang phah-hoa Siâ-ok-chiá siā lâi hé ê chìⁿ. 17 Tio̍h ēng chín-kiù chòe thâu-khoe, ēng Sèng Sîn chòe kiàm, chiū-sī Siōng-tè ê ōe. 18 Tio̍h khò Sèng Sîn choân-sim kî-tó, siông-siông kî-kiû. Tio̍h put-sî kéng-séng, sî-siông ūi-tio̍h só͘-ū ê sìn-tô͘ kî-tó; 19 mā ūi-tio̍h góa kî-tó, kiû Siōng-tè sù góa sìn-sit, thang hó-táⁿ khui-chhùi soan-iông hok-im ê ò-pì. 20 Ūi-tio̍h chit-ê hok-im, góa hiān-chāi chòe chi̍t ê kòa thih-liān ê tāi-sài. Tio̍h ūi-tio̍h góa kî-tó, hō͘ góa thang hó-táⁿ soan-iông eng-kai kóng ê. 21 Lán chhin-ài ê hiaⁿ-tī, iā-sī Chú tiong-si̍t ê chhe-ēng [Chhui-ki-kó͘], ōe pò lín chai góa ê tāi-chì kap kūn-hóng. 22 Góa chhe i khì lín hia ê bo̍k-te̍k sī beh pò lín chai goán chia ê chêng-hêng, thang hō͘ lín an-sim. 23 Goān Pē Siōng-tè kap Chú Iâ-so͘ Ki-tok sù pêng-an, jîn-ài, kap sìn-sim hō͘ chèng hiaⁿ-tī chí-bē! 24 Goān Siōng-tè ê un-tián kap só͘-ū ēng bōe-piàn ê thiàⁿ lâi thiàⁿ lán ê Chú Iâ-so͘ Ki-tok ê lâng tông-chāi!

AMAZING GRACE BIBLE INSTITUTE