Titus

Thê-to

Thê-to 1

1 Góa sī [Pó-lô], choh Siōng-tè ê lô͘-po̍k kap Iâ-so͘ Ki-tok ê sù-tô͘, siū soán-phài khì pang-chān Siōng-tè soán-bîn ê sìn-gióng, ín-chhōa in jīn-bat ha̍h tī kèng-khiân ê chin-lí; 2 chit-ê chin-lí hō͘ lán tùi éng-oán ê oa̍h-miā ū ǹg-bāng, chiū-sī bōe kóng pe̍h-chha̍t ê Siōng-tè tī bān-sè í-chêng èng-ún beh hō͘ lán ê. 3 I tī sî-ki sêng-se̍k ê sî, thong-kè sìn-sit ê soan-káng chiong chit-ê èng-ún hián-bêng chhut-lâi. Góa ū siū thok, hōng lán ê Kiù-chú Siōng-tè ê bēng-lēng soan-káng chit-ê hok-im. 4 Góa siá-phoe hō͘ lí --- [Thê-to], tī lán kiōng-tông ê sìn-gióng lí sī góa chin ê kiáⁿ. Goān Pē Siōng-tè kap lán ê Kiù-chú Ki-tok Iâ-so͘ sù lí un-tián kap pêng-an! 5 Góa kā lí lâu tī [Kek-lí-tí], sī beh hō͘ lí chhú-lí iáu-bē pān chheng-chhó ê tāi-chì, koh chiàu góa só͘ chí-sī, tī ta̍k ê siâⁿ-chhī jīm-bēng lâng chòe tiúⁿ-ló. 6 Choh tiúⁿ-ló ê tio̍h bô thang chí-chek, chí-ū chi̍t ê bó͘, kiáⁿ-jî lóng sī sìn-tô͘, koh bô-lâng khòng-kò sī hòng-tōng á-sī m̄ sūn-ho̍k. 7 Kàu-hōe ê kam-tok, kì-jiân choh Siōng-tè ê koán-ke, tio̍h bô thang chí-chek, bô chū-ko, bô pháiⁿ sèng-tē, bô chiú-chùi, bô hiong-pō, bô tham-châi. 8 Tio̍h gâu khoán-thāi chhut-gōa-lâng, gâu chòe hó-sū, siú-kí, chèng-ti̍t, sèng-kiat, chiat-chè. 9 I it-tēng tio̍h kian-siú hit-ê khó-khò hû-ha̍p kàu-gī ê sìn-sit, án-ni chiah ōe-tàng ēng kiān-choân ê kà-sī khoàn-bián lâng, piān-tó hoán-tùi ê lâng. 10 In-ūi ū chin chōe m̄ sūn-ho̍k ê lâng, te̍k-pia̍t sī hiah-ê chú-tiuⁿ tio̍h siū kat-lé ê lâng, in ài kóng bô lō͘-ēng ê ōe, koh khi-phiàn lâng. 11 Chit khoán lâng it-tēng tio̍h kìm-chí in kóng-ōe, in-ūi in ūi-tio̍h beh tham put-gī ê chîⁿ-châi, ēng bô eng-kai kà-sī ê ōe phò-hoāi chi̍t-kóa ka-têng. 12 In [Kek-lí-tí]-lâng ê chi̍t ê sian-ti bat án-ni kóng, “[Kek-lí-tí]-lâng ài kóng pe̍h-chha̍t, sī hiong-ok ê iá-siù, tham-chia̍h koh pîn-tōaⁿ.” 13 I kóng ê sī sū-si̍t. Só͘-í lí tio̍h giâm-keh kā in chek-pī, thang hō͘ in ū kiān-choân ê sìn-gióng, 14 bô thiaⁿ-thàn [Iû-thài]-lâng bô iáⁿ-chiah ê thoân-soat kap pōe-ge̍k chin-lí ê lâng ê kui-lē. 15 Tùi chheng-khì ê lâng lâi kóng, it-chhè lóng chheng-khì; m̄-kú tùi ù-òe kap m̄-sìn ê lâng lâi kóng, bô chi̍t hāng sī chheng-khì, in-ūi in ê sim-su kap liông-ti lóng sī ù-òe. 16 In kong-khai kóng bat Siōng-tè, khiok ēng hêng-ûi hó͘-jīn I. In khó-ò͘ⁿ, pōe-ge̍k, chòe bōe chhut sím-mi̍h hó-sū.

Thê-to 2

1 Chóng-sī lí, lí ê kàu-tō tio̍h hû-ha̍p kiān-choân ê kàu-gī. 2 Tio̍h khǹg lāu-lâng ài chiat-chè, ū hó phín-keh, siú-kí, tio̍h ū kiān-choân ê sìn-sim, thiàⁿ-sim, kap nāi-sim. 3 Lí mā tio̍h án-ni khǹg lāu hū-jîn-lâng hêng-ûi kín-sīn, m̄-thang kóng lâng ê sī-hui, m̄-thang choh chiú ê lô͘-châi, tio̍h ēng hó bô͘-hoān kà-sī lâng, 4 chiah thang kà-sī siàu-liân hū-jîn-lâng thiàⁿ tiōng-hu, kap thiàⁿ kiáⁿ-jî, 5 koh tio̍h siú-kí, cheng-kiat, gâu lí-ke, chhin-chhiat, sūn-ho̍k tiōng-hu, Siōng-tè ê tō-lí chiah bōe siū húi-pòng. 6 Chhin-chhiūⁿ án-ni, lí mā tio̍h khó͘-khǹg siàu-liân ta-po͘-lâng siú-kí. 7 Lí ka-kī hoān-sū tio̍h chòe hó hêng-ûi ê bô͘-hoān, kà-sī lâng ê sî tio̍h sêng-khún ún-tiōng, 8 giân-sû tio̍h toan-chiàⁿ, bô thang chí-chek, hō͘ hoán-tùi ê lâng bô thang kóng lán ê pháiⁿ-ōe, soah ka-kī kám-kak kiàn-siàu. 9 Choh lô͘-lē-ê tio̍h sūn-ho̍k in ê chú-lâng, sū-sū hō͘ in hoaⁿ-hí; m̄-thang ìn-chhùi ìn-chi̍h; 10 m̄-thang thau-the̍h, tio̍h sū-sū tiong-si̍t liông-siān, hō͘ lán ê Kiù-chú Siōng-tè ê kà-sī tī ta̍k hong-bīn koh-khah ū kong-chhái. 11 In-ūi Siōng-tè í-keng hián-bêng I ê un-tián beh chín-kiù choân jîn-lūi. 12 Chit-ê un-tián hùn-liān lán khì-sak bô kèng-khiân ê seng-oa̍h kap sio̍k-sè ê io̍k-bōng, tī hiān-kim ê sî-tāi kè siú-kí, chèng-ti̍t, kap kèng-khiân ê seng-oa̍h, 13 thèng-hāu hit-ê chhiong-móa hok-khì ê ǹg-bāng, chiū-sī chì-chun ê Siōng-tè í-ki̍p lán ê Kiù-chú Iâ-so͘ Ki-tok êng-iāu ê hián-hiān. 14 Ki-tok ūi-tio̍h lán hiàn ka-kī, sī beh kiù-sio̍k lán thoat-lī it-chhè ê chōe-ok, hō͘ lán chiâⁿ-chòe I sûn-kiat ê chú-bîn kui-sio̍k I, jia̍t-sim chòe hó-sū. 15 Chiah-ê sū, lí tio̍h kóng, tio̍h khoàn-bián, chhiong-hun ūn-iōng chit-koân chek-pī lâng. M̄-thang hō͘ lâng khòaⁿ-khin.

Thê-to 3

1 Tio̍h thê-chhíⁿ tāi-ke ho̍k-chiông chip-chèng-chiá kap tong-koân-chiá; tio̍h sūn-ho̍k, thang piān-piān chòe ta̍k hāng hó-sū. 2 Tio̍h khǹg in m̄-thang húi-pòng pa̍t-lâng, m̄-thang oan-ke; tio̍h hô-khì iú-siān, ēng un-hô ê thài-tō͘ tùi-thāi só͘-ū ê lâng. 3 In-ūi lán ka-kī í-chêng mā-sī bô tì-sek, pōe-ge̍k, kiâⁿ bê-lō͘, choh chióng-chióng chêng-io̍k kap hióng-lo̍k ê lô͘-lē, tī ok-to̍k kap chi̍t-tò͘ tiong teh tō͘-ji̍t, hō͘-siōng oàn-hūn, pí-chhú iàm-ò͘ⁿ. 4 M̄-kú lán ê Kiù-chú Siōng-tè ê chû-pi jîn-ài hián-bêng ê sî, 5 I ū chín-kiù lán; m̄-sī in-ūi lán ka-kī ê hó hêng-ûi, sī in-ūi I ê lîn-bín, thong-kè hō͘ lâng têng-sin chhut-sì ê sóe-lé kap Sèng Sîn ê keng-sin lâi chín-kiù lán; 6 chit-ūi Sèng Sîn sī Siōng-tè thong-kè lán ê Kiù-chú Iâ-so͘ Ki-tok hong-hong hù-hù kā lán koàn-ak ê, 7 hō͘ lán khò I ê un-tián tit-tio̍h chheng-chòe gī, lâi sêng-siū lán só͘ ǹg-bāng éng-oán ê oa̍h-miā. 8 Chit kù ōe thang siong-sìn. Góa ài lí te̍k-pia̍t kiông-tiau chiah-ê sū, thang hō͘ sìn Siōng-tè ê lâng choân-sim chòe hó-sū; chiah-ê sū lóng hó, koh tùi lâng ū lī-ek. 9 Tio̍h siám-pī gû-gōng ê cheng-lūn, cho̍k-phó͘, hun-cheng, kap Lu̍t-hoat ê cheng-chip, in-ūi chiah-ê lóng bô lō͘-ēng, bô kè-ta̍t. 10 Chè-chō hun-cheng ê lâng, kā i kéng-kò chi̍t-nn̄g-piàn í-āu chiū m̄-thang koh kap i lâi-óng. 11 Lí chai, chit khoán lâng í-keng pāi-hoāi; i kè-sio̍k hoān-chōe sī teh kā ka-kī tēng-chōe. 12 Góa chhe [A-thê-má] á-sī [Chhui-ki-kó͘] khì lí hia ê sî, lí tio̍h kóaⁿ-kín lâi [Nî-ko-pho-lí] chhē góa, in-ūi góa í-keng koat-tēng beh tī hia kè tang-thiⁿ. 13 Tio̍h chīn só͘-ōe pang-chān [Se-la̍p] lu̍t-su kap [A-pho-lô] lú-thêng ê su-iàu, hō͘ in thang an-sim chhut-hoat. 14 Tio̍h hoan-hù lán ka-kī ê lâng ha̍k-si̍p chòe hó-sū lâi kiong-kip si̍t-chè ê su-iàu, chiah-bián chòe bô lō͘-ēng ê lâng. 15 Kap góa tī chia ê lâng lóng beh kā lí chhéng-an. Chhiáⁿ thòe goán kā hiah-ê tâng-sìn ê hó pêng-iú chhéng-an. Goān Siōng-tè ê un-tián kap lín tāi-ke tông-chāi!

AMAZING GRACE BIBLE INSTITUTE