Galatians

Ka-lia̍p-thài

Ka-lia̍p-thài 1

1 Góa sī [Pó-lô]. Góa choh sù-tô͘ m̄-sī tùi lâng á-sī thong-kè lâng, sī tùi Iâ-so͘ Ki-tok kap hō͘ I tùi sí-lâng tiong koh-oa̍h ê Pē Siōng-tè ê ho͘-tiàu. 2 Góa kap tī chia ê hiaⁿ-tī chí-bē siá-phoe hō͘ [Ka-lia̍p-thài] ê chèng kàu-hōe. 3 Goān lán ê Pē Siōng-tè kap Chú Iâ-so͘ Ki-tok sù lín un-tián kap pêng-an! 4 Ūi-tio̍h beh kiù lán thoat-lī hiān-kim chit-ê siâ-ok ê sè-tāi, Ki-tok ū chiàu lán ê Pē Siōng-tè ê chí-ì ūi-tio̍h lán ê chōe hiàn I pún-sin. 5 Goān êng-kng kui hō͘ Siōng-tè ti̍t-kàu éng-éng oán-oán. Amen! 6 Lín hō͘ góa chin tio̍h-kiaⁿ! Lín kèng-jiân hiah-ni̍h kín chiū pàng-sak hit-ūi thong-kè Ki-tok ê un-tián ho͘-tiàu lín ê Siōng-tè, khì tè pa̍t ê hok-im. 7 Kî-si̍t bô pa̍t khoán ê hok-im. Góa án-ni kóng sī in-ūi ū chi̍t-kóa lâng kā lín jiáu-loān, siūⁿ-beh khiok-kái Ki-tok ê hok-im. 8 M̄-kú, bô-lūn sī goán á-sī tùi thiⁿ-téng lâi ê thiⁿ-sài, só͘ thoân ê nā kap goán í-chêng thoân hō͘ lín ê hok-im bô kâng-khoán, i eng-kai siū chiù-chó͘! 9 Goán bat kóng, hiān-chāi koh kóng chi̍t piàn: Nā ū lâng só͘ thoân ê hok-im kap lín í-keng chiap-siū ê bô kâng-khoán, i eng-kai siū chiù-chó͘! 10 Góa chit-chūn án-ni kóng, kiám sī beh tit-tio̍h lâng á-sī Siōng-tè ê chheng-chàn? Góa kiám sī beh tit-tio̍h lâng ê hoaⁿ-hí? Góa nā iáu teh siūⁿ-beh tit-tio̍h lâng ê hoaⁿ-hí, góa chiū m̄-sī Ki-tok ê lô͘-po̍k. 11 Hiaⁿ-tī chí-bē, góa ài lín chai, góa só͘ thoân ê hok-im m̄-sī lâng siūⁿ chhut-lâi ê. 12 Chit-ê hok-im, góa m̄-sī tùi lâng niá-siū, mā m̄-sī tùi lâng ha̍k-si̍p, sī tùi Iâ-so͘ Ki-tok lâi ê khé-sī. 13 Lín í-keng ū thiaⁿ-kìⁿ góa í-chêng choh [Iû-thài] kàu-tô͘ ê sî ê só͘-kiâⁿ só͘-chòe. Góa jōa-ni̍h kek-lia̍t pek-hāi Siōng-tè ê kàu-hōe, beh thiat-tí kā i húi-bia̍t. 14 Góa pí kâng chi̍t pòe ê [Iû-thài-lâng] koh-khah chek-ke̍k chun-thàn [Iû-thài] kàu-kui, koh-khah jia̍t-sim chun-siú chó͘-sian ê thoân-thóng. 15 M̄-kú, tùi Siōng-tè ê un-tián, góa iáu-bē chhut-sì I chiū koat-tēng beh kéng-soán góa, 16 tùi góa khé-sī I ê Kiáⁿ, hō͘ góa thang tùi Gōa-pang-lâng soan-iông I ê Kiáⁿ ê hok-im. Hit sî, góa lóng bô kā lâng chhéng-kàu, 17 mā bô chiūⁿ [Iâ-lō͘-sat-léng] khì kìⁿ hiah-ê pí góa khah tāi-seng choh sù-tô͘ ê lâng. Góa sûi-sî khì [A-lah-pek], jiân-āu koh tò-khì [Tāi-má-sū-kek]. 18 Saⁿ nî āu, góa chiah khì [Iâ-lō͘-sat-léng] pài-hóng [Pí-tek], kap i tòa cha̍p-gō͘ ji̍t. 19 Chú ê hiaⁿ-tī [Ngá-kok] í-gōa, kî-tha ê sù-tô͘ góa lóng bô kìⁿ-tio̍h. 20 Góa só͘ siá ê lóng sī sū-si̍t; tī Siōng-tè bīn-chêng góa bô kóng pe̍h-chha̍t. 21 Āu-lâi, góa khì [Sū-lī-a] kap [Ki-lī-ka] kéng-lāi ta̍k só͘-chāi. 22 Tng-sî, [Iû-thài] tōe-khu chèng kàu-hōe ê sìn-tô͘ lóng m̄-bat góa. 23 In chí-ū thiaⁿ-tio̍h pa̍t-lâng kóng “Hit-ê í-chêng pek-hāi lán ê lâng, hiān-chāi teh thoân i kè-khì siūⁿ-beh húi-bia̍t ê sìn-gióng!” 24 In chiū in-ūi góa kui êng-kng hō͘ Siōng-tè!

Ka-lia̍p-thài 2

1 Cha̍p-sì nî āu, góa koh chiūⁿ [Iâ-lō͘-sat-léng], [Pa-ná-pa] kap góa chòe-hé khì, mā chhōa [Thê-to] chòe-hé khì. 2 Góa chiūⁿ [Iâ-lō͘-sat-léng] sī chun-thàn Chú ê khé-sī. Góa ū su-hā tùi hiah-ê léng-siù soat-bêng góa tùi Gōa-pang-lâng só͘ thoân ê hok-im, chiah-bián hō͘ góa kè-khì á-sī hiān-chāi só͘ phun-pho phah-piàⁿ ê lóng lo̍k-khong. 3 Kap góa chòe-hé khì ê [Thê-to], sui-jiân sī [Hi-la̍h]-lâng, mā bô-lâng kiông-pek i chiap-siū kat-lé. 4 Ū chi̍t-kóa ké sìn-tô͘ pì-bi̍t chǹg-ji̍p lán tiong-kan, chhin-chhiūⁿ cheng-thàm chhàng ji̍p-lâi, beh thàm lán tùi Ki-tok Iâ-so͘ só͘ tit-tio̍h ê chū-iû, siūⁿ-beh hō͘ lán chiâⁿ-chòe lô͘-lē, sòng-sit chū-iû. 5 M̄-kú, ūi-tio̍h beh hō͘ lín thang pó-choân hok-im ê chin-lí, goán chi̍t-si-á to bô tùi in niū-pō͘. 6 M̄-kú hiah-ê hō͘ lâng khòaⁿ-chòe léng-siù ê, bô-lūn in ê tōe-ūi sī sím-mi̍h, tùi góa lóng bô éng-hióng, in-ūi Siōng-tè bô ēng gōa-māu phòaⁿ-toàn lâng. In pèng bô lēng-gōa hō͘ góa sím-mi̍h chí-sī, 7 hoán-tńg liáu-kái Siōng-tè ū chiong thoân hok-im hō͘ Gōa-pang-lâng ê jīm-bū kau-thok góa, tú chhin-chhiūⁿ I ū chiong thoân hok-im hō͘ Iû-thài-lâng ê jīm-bū kau-thok [Pí-tek]. 8 In-ūi Siōng-tè ū ēng I ê koân-lêng hō͘ góa chiâⁿ-chòe Gōa-pang-lâng ê sù-tô͘, tú chhin-chhiūⁿ I mā ū hō͘ [Pí-tek] chiâⁿ-chòe [Iû-thài]-lâng ê sù-tô͘. 9 [Ngá-kok], [Pí-tek], kap [Iok-hān] chiah-ê hō͘ lâng khòaⁿ-chòe sī kàu-hōe thiāu-chio̍h ê, kì-jiân chai-iáⁿ Siōng-tè ū chiong chit-ê te̍k-pia̍t ê sú-bēng kau-tài góa, chiū kap [Pa-ná-pa] í-ki̍p góa ak-chhiú piáu-sī lóng sī tâng-kang, koh tông-ì [Pa-ná-pa] kap góa tī Gōa-pang-lâng tiong-kan kang-chok, in tī [Iû-thài]-lâng tiong-kan kang-chok. 10 In chí-ū iau-kiû goán tio̍h koan-hoâi [Iû-thài]-lâng tiong ê sàn-chhiah-lâng; chit hāng tāi-chì tú sī goán it-ti̍t ló͘-le̍k beh chòe ê. 11 [Pí-tek] lâi-kàu [An-thê-o] ê sî, góa tng-bīn kā i hoán-tùi, in-ūi i ū thang chek-pī ê só͘-chāi. 12 Goân-lâi ū chi̍t-kóa tùi [Ngá-kok] hia lâi ê lâng iáu-bē kàu í-chêng, [Pí-tek] ū kap Gōa-pang-lâng ê hiaⁿ-tī chòe-hé chia̍h-pn̄g, m̄-kú hiah-ê lâng kàu í-āu, i soah siám-pī Gōa-pang-lâng sìn-tô͘, m̄-káⁿ koh kap in chòe-hé, in-ūi kiaⁿ hiah-ê chú-tiuⁿ Gōa-pang-lâng tio̍h siū kat-lé ê lâng. 13 Kî-tha ê [Iû-thài]-lâng sìn-tô͘ mā chhin-chhiūⁿ [Pí-tek] chòe hit khoán hu-ké ê tāi-chì, liân [Pa-ná-pa] mā siū éng-hióng khì chòe kâng-khoán bô goân-chek ê tāi-chì. 14 Góa chi̍t-ē khòaⁿ-tio̍h in bô chiàu hok-im ê chin-lí teh chòe, chiū tī chèng-lâng ê bīn-chêng tùi [Pí-tek] kóng, “Sui-jiân lí sī [Iû-thài-lâng], bô chiàu [Iû-thài-lâng] khiok chhin-chhiūⁿ Gōa-pang-lâng teh seng-oa̍h, lí ná thang kiông-pek Gōa-pang-lâng tio̍h o̍h [Iû-thài-lâng] seng-oa̍h?” 15 Lán pún-sin chhut-sì chiū-sī [Iû-thài]-lâng, m̄-sī lâng só͘ kóng ê “gōa-pang chōe-jîn”. 16 Put-kò, lán chai lâng ōe-tàng kap Siōng-tè ū ha̍p-gî ê koan-hē sī khò sìn Iâ-so͘ Ki-tok, m̄-sī khò chun-siú [Mô͘-se] ê Lu̍t-hoat. Lán ka-kī mā sìn Ki-tok Iâ-so͘, sī beh hō͘ lán tùi sìn Ki-tok ōe-tàng kap Siōng-tè ū ha̍p-gî ê koan-hē, m̄-sī khò chun-siú Lu̍t-hoat, in-ūi bô-lâng ōe-tàng khò chun-siú Lu̍t-hoat kap Siōng-tè ū ha̍p-gî ê koan-hē. 17 Lán nā siūⁿ-beh tùi óa-khò Ki-tok kap Siōng-tè ū ha̍p-gî ê koan-hē, iáu-kú hō͘ lâng khòaⁿ-chòe kap Gōa-pang-lâng sio-siâng sī chōe-jîn, án-ni Ki-tok sī chōe-ok ê chhe-ēng sī-bô? Choa̍t-tùi m̄-sī! 18 Góa nā koh khí-chō góa í-chêng só͘ thiah-húi ê, chiū chèng-bêng góa sī ûi-pōe Lu̍t-hoat ê lâng. 19 In-ūi, chiàu Lu̍t-hoat góa í-keng sí tī Lu̍t-hoat-ē, sī beh hō͘ góa ǹg Siōng-tè lâi oa̍h. Góa í-keng kap Ki-tok tâng tèng si̍p-jī-kè; 20 án-ni hiān-chāi teh oa̍h ê m̄-sī góa, sī Ki-tok tī góa ê lāi-bīn teh oa̍h. Góa hiān-chāi teh oa̍h, sī khò sìn Siōng-tè ê Kiáⁿ teh oa̍h; I thiàⁿ góa, ūi-tio̍h góa pàng-sak sìⁿ-miā. 21 Góa bô hō͘ Siōng-tè ê un-tián sit-khì hāu-le̍k. Lâng nā khò Lu̍t-hoat ōe-tàng kap Siōng-tè ū ha̍p-gî ê koan-hē, Ki-tok sí chiū bô bo̍k-te̍k.

Ka-lia̍p-thài 3

1 Lín chiah-ê gōng [Ka-lia̍p-thài]-lâng ah, siáⁿ-lâng kā lín bê-he̍k? Iâ-so͘ Ki-tok tèng si̍p-jī-kè ê sū, kiám m̄-sī chin chheng-chhó hián-sī tī lín ba̍k-chiu chêng? 2 Ū chi̍t hāng tāi-chì, góa kā lín chhéng-kàu: Lín niá-siū Sèng Sîn sī tùi siú Lu̍t-hoat á-sī tùi sìn só͘ thiaⁿ-tio̍h ê hok-im? 3 Lín ná hiah-ni̍h gōng? Lín kì-jiân tùi khò Sèng Sîn khai-sí, hiān-chāi beh khò jio̍k-sin lâi oân-sêng sī-bô? 4 Lín ū hiah-chōe siū-khó͘ ê keng-giām kiám lóng bô lō͘-ēng? It-tēng ū chiah tio̍h. 5 Siōng-tè sù lín Sèng Sîn, koh tī lín tiong-kan kiâⁿ sîn-jiah, sī in-ūi lín siú Lu̍t-hoat, á-sī in-ūi lín sìn só͘ thiaⁿ-tio̍h ê hok-im? 6 Sèng-keng án-ni kóng, “[A-pek-la-hán] sìn Siōng-tè, Siōng-tè chiū khòaⁿ i chòe gī-lâng.” 7 Só͘-í, lín tio̍h chai, sìn ê lâng chiah-sī [A-pek-la-hán] chin-chiàⁿ ê kiáⁿ-sun. 8 Sèng-keng sū-sian chiū chai, Siōng-tè ōe hō͘ Gōa-pang-lâng tùi sìn kap I ū ha̍p-gî ê koan-hē, só͘-í ū chiong chit-ê hó siau-sit seng thoân hō͘ [A-pek-la-hán], kóng “Tōe-chiūⁿ bān-bîn ōe in-ūi lí tit-tio̍h chiok-hok!” 9 Án-ni it-chhè sìn ê lâng mā ōe kap ū sìn ê [A-pek-la-hán] chòe-hé siū chiok-hok! 10 Hiah-ê khò siú Lu̍t-hoat ê lâng lóng oa̍h tī chiù-chó͘ ê ē-bīn, in-ūi Sèng-keng kóng, “Bô chun-siú kì-chài tī Lu̍t-hoat ê chheh-ni̍h só͘-ū kui-tēng ê lâng lóng tio̍h siū Siōng-tè chiù-chó͘.” 11 Án-ni, bô-lâng ōe-tàng khò siú Lu̍t-hoat kap Siōng-tè ū ha̍p-gî ê koan-hē, in-ūi Sèng-keng ū kóng, “Gī ê lâng ōe tùi sìn lâi oa̍h.” 12 M̄-kú, Lu̍t-hoat m̄-sī ēng sìn chòe kun-kù. Sèng-keng kóng, “Chun-siú Lu̍t-hoat ê lâng ōe khò Lu̍t-hoat lâi oa̍h.” 13 Ki-tok í-keng ūi-tio̍h lán siū chiù-chó͘, lâi kiù-sio̍k lán thoat-lī Lu̍t-hoat ê chiù-chó͘, in-ūi Sèng-keng kì-chài kóng, “Só͘-ū tiàu tī chhâ-téng ê lâng lóng tio̍h siū chiù-chó͘.” 14 Ki-tok án-ni chòe sī beh chiong Siōng-tè hō͘ [A-pek-la-hán] ê chiok-hok thong-kè Ki-tok Iâ-so͘ sù hō͘ Gōa-pang-lâng, mā beh hō͘ lán tùi sìn lâi niá-siū Siōng-tè só͘ èng-ún ê Sèng Sîn. 15 Hiaⁿ-tī chí-bē, góa ēng chi̍t ê ji̍t-siông seng-oa̍h ê tāi-chì chòe lē lâi soat-bêng. Lâng só͘ li̍p ê khè-iok it-tàn sêng-li̍p, chiū bōe ēng-tit ke-thiⁿ á-sī hòe-iok. 16 Siōng-tè ū tùi [A-pek-la-hán] kap i ê kiáⁿ-sun èng-ún. Sèng-keng pèng m̄-sī kóng “kiáⁿ-kiáⁿ sun-sun”, chí chin chōe lâng, sī kóng “lí ê kiáⁿ-sun”, chí chi̍t ê, chiū-sī Ki-tok. 17 Góa ê ì-sù sī án-ni: Siōng-tè ū kap [A-pek-la-hán] li̍p-iok, koh tah-èng beh siú iok. Sì-pah saⁿ-cha̍p nî āu chiah chhut-hiān ê Lu̍t-hoat bōe-tàng hòe-tû chit-ê iok hō͘ Siōng-tè ê èng-ún sit-hāu. 18 In-ūi, sêng-chiap Siōng-tè sù ê sán-gia̍p nā-sī kun-kù Lu̍t-hoat, chiū bô koh khò èng-ún. M̄-kú Siōng-tè sī chiàu I ê èng-ún si-un hō͘ [A-pek-la-hán]. 19 Án-ni, Lu̍t-hoat ū siáⁿ lō͘-ēng? Lu̍t-hoat sī ūi-tio̍h beh hō͘ lâng chai sím-mi̍h sī chōe-kò, thong-kè thiⁿ-sài tùi chi̍t ê tiong-kan-jîn lâi chè-tēng ê, kong-hāu kàu só͘ èng-ún Hit-ūi “kiáⁿ-sun” lâi-lîm ê sî chiū kiat-sok. 20 M̄-kú tan-hong chi̍t ê chòe ê tāi-chì chiū bô su-iàu tiong-kan-jîn, Siōng-tè sī tan-hong chi̍t ê chòe chit hāng tāi-chì. 21 Án-ni, Lu̍t-hoat kap Siōng-tè ê èng-ún ū saⁿ tí-chhiok bô? Choa̍t-tùi bô! In-ūi Lu̍t-hoat pan-pò͘ ê bo̍k-te̍k nā-sī beh hō͘ lâng tit-tio̍h oa̍h-miā, lâng chiū ōe-tàng khò Lu̍t-hoat kap Siōng-tè ū ha̍p-gî ê koan-hē. 22 M̄-kú Sèng-keng toàn-tēng choân sè-kài lóng tī chōe-ok koán-hat ê ē-bīn, thang hō͘ Siōng-tè chiong èng-ún thong-kè sìn Iâ-so͘ Ki-tok sù hō͘ sìn ê lâng. 23 M̄-kú “sìn” ê sî-tāi lâi-lîm í-chêng, lán hō͘ Lu̍t-hoat koaiⁿ-teh, siū kàm-sī ti̍t-kàu teh-beh lâi “sìn” ê sî-tāi hián-hiān ê sî. 24 Án-ni, tī Ki-tok lâi-lîm í-chêng, Lu̍t-hoat chòe lán ê kàm-hō͘-jîn, thang hō͘ lán tùi “sìn” kap Siōng-tè ū ha̍p-gî ê koan-hē. 25 Hiān-chāi “sìn” ê sî-tāi í-keng lâi-lîm, Lu̍t-hoat chiū bô koh chòe lán ê kàm-hō͘-jîn. 26 Lín tāi-ke tùi sìn kap Ki-tok Iâ-so͘ kiat-liân chiâⁿ-chòe Siōng-tè ê kiáⁿ-jî. 27 Lín só͘-ū niá-siū sóe-lé kap Ki-tok kiat-liân ê lâng í-keng chhēng Ki-tok, ū I ê oa̍h-miā. 28 Án-ni, bô hun [Iû-thài]-lâng á-sī Gōa-pang-lâng, lô͘-lē á-sī chū-iû-ê, ta-po͘-lâng á-sī cha-bó͘-lâng, tī Ki-tok Iâ-so͘ ê lāi-bīn lóng chiâⁿ-chòe chi̍t-thé. 29 Lín kì-jiân sio̍k Ki-tok, chiū-sī [A-pek-la-hán] ê kiáⁿ-sun, sī Siōng-tè èng-ún ê kè-sêng-jîn.

Ka-lia̍p-thài 4

1 Góa koh kóng, kè-sêng-jîn sui-jiân sī choân-pō͘ châi-sán ê só͘-iú-chiá, i tī bī-sêng-liân ê sî kap lô͘-lē bô sím-mi̍h chha-pia̍t, 2 it-ti̍t kàu lāu-pē só͘ tēng ê ji̍t-chí, tio̍h siū kàm-hō͘-jîn kap hoat-tēng tāi-lí-jîn ê kàm-tok. 3 Lán mā chhin-chhiūⁿ án-ni, tī lêng-sèng bī-sêng-liân ê sî siū ú-tiū ê lêng chi-phòe chòe lô͘-lē. 4 M̄-kú sî-kî kàu, Siōng-tè chhe ka-kī ê Kiáⁿ, hō͘ I tùi hū-jîn-lâng lâi chhut-sì, oa̍h tī Lu̍t-hoat-ē, 5 ūi-tio̍h beh kiù-sio̍k oa̍h tī Lu̍t-hoat-ē ê lâng, thang hō͘ Siōng-tè kā lán siu khí-lâi chòe kiáⁿ-jî. 6 In-ūi lín sī Siōng-tè ê kiáⁿ-jî, I ū chhe I ê Kiáⁿ ê Sîn ji̍p lín ê sim, hō͘ lín kiò “A-pa, Pē!” 7 Án-ni, lí bô koh chòe lô͘-lē, sī kiáⁿ-jî; kì-jiân sī kiáⁿ-jî, Siōng-tè chiū hō͘ lí chòe kè-sêng-jîn. 8 Í-chêng, lín m̄-bat Siōng-tè ê sî hō͘ hiah-ê pún-chit m̄-sī sîn ê sîn-bêng chòe lô͘-lē chi-phòe. 9 M̄-kú hiān-chāi lín í-keng bat Siōng-tè, á-sī kóng hō͘ Siōng-tè bat, sī án-chóaⁿ lín koh tò-khì chhē chi-phòe lêng-kài hiah-ê bô-la̍t koh bô lō͘-ēng ê sîn-lêng, chòe in ê lô͘-lē? 10 Lín siú te̍k-pia̍t ê ji̍t, ge̍h, kap nî-á-choeh-á. 11 Góa kiaⁿ-liáu góa ūi-tio̍h lín só͘-chòe ê lóng sī pe̍h-pe̍h chòe. 12 Hiaⁿ-tī chí-bē, in-ūi góa í-keng ū chiâⁿ-chòe chhin-chhiūⁿ lín, góa khún-kiû lín mā tio̍h chiâⁿ-chòe chhin-chhiūⁿ góa. Lín m̄-bat khek-khui góa. 13 Lín ōe kì-tit, góa thâu-chi̍t piàn thoân hok-im hō͘ lín ê sî sī in-ūi góa seng-khu ū pīⁿ. 14 Sui-jiân góa ê kiān-khong chiâⁿ-chòe lín ê tāng-tàⁿ, lín to bô khòaⁿ-khin góa, bô kū-choa̍t góa. Lín tian-tò chiap-thāi góa chhin-chhiūⁿ teh chiap-thāi Siōng-tè ê thiⁿ-sài, chhin-chhiūⁿ teh chiap-thāi Ki-tok Iâ-so͘. 15 Lín tng-sî ê hoaⁿ-hí boán-chiok ná soah bô-khì? Góa káⁿ kóng, lín tng-sî nā tio̍h kā ba̍k-chiu ó͘ chhut-lâi hō͘ góa mā kam-goān. 16 Hiān-chāi, góa tùi lín chiàu-si̍t kóng soah pìⁿ-chòe lín ê tùi-te̍k! 17 Hiah-ê lâng tùi lín jia̍t-chêng pèng m̄-sī chhut tī hó-ì, tian-tò sī siūⁿ-beh thiah-khui lín kap góa ê koan-hē, hō͘ lín thang tùi in jia̍t-chêng. 18 Hó-sū m̄-sī kan-ta góa kap lín chòe-hé ê sî chiah chòe, tio̍h put-sî jia̍t-sim khì chòe. 19 Góa ê sòe-kiáⁿ, ūi-tio̍h beh hō͘ lín ū Ki-tok ê khoán-sit, góa koh chi̍t piàn keng-kè siⁿ-kiáⁿ ê thòng-khó͘. 20 Góa chin ài chit-chūn chiū khì lín hia, thang ēng bô kâng-khoán ê kháu-khì kap lín kóng-ōe. Góa si̍t-chāi m̄-chai beh án-chóaⁿ tùi-thāi lín! 21 Lín chiah-ê ài hō͘ Lu̍t-hoat koán-hat ê lâng, kā góa kóng, lín kiám bô beh thiaⁿ Lu̍t-hoat teh kóng sím-mi̍h? 22 In-ūi Lu̍t-hoat ū kì-chài: [A-pek-la-hán] ū nn̄g ê kiáⁿ, chi̍t ê sī lú-pī siⁿ ê, koh chi̍t ê sī chū-iû ê hū-jîn-lâng siⁿ ê. 23 Lú-pī ê kiáⁿ sī thàn jio̍k-thé siⁿ ê; tùi chū-iû ê hū-jîn-lâng siⁿ ê kiáⁿ sī thong-kè Siōng-tè ê èng-ún. 24 Che thang ēng ē-bīn ê phì-jū lâi soat-bêng: Chit nn̄g ê hū-jîn-lâng tāi-piáu nn̄g chióng khè-iok. Chi̍t ê sī [Hā-kah], tāi-piáu [Se-nái]-soaⁿ ê iok, siⁿ ê kiáⁿ choh lô͘-lē. 25 [Hā-kah] chí [A-lah-pek] ê [Se-nái]-soaⁿ, tāi-piáu hiān-chāi ê [Iâ-lō͘-sat-léng]; in-ūi i kap i ê kiáⁿ-sun lóng sī lô͘-lē. 26 Put-kò thiⁿ-téng ê [Iâ-lō͘-sat-léng] sī chū-iû ê, sī lán ê lāu-bú. 27 In-ūi Sèng-keng ū kì-chài: Bōe hoâi-īn, bōe siⁿ-kiáⁿ ê hū-jîn-lâng ah, tio̍h hoaⁿ-hí! M̄-bat keng-kè siⁿ-kiáⁿ thòng-khó͘ ê hū-jîn-lâng ah, tio̍h tōa-siaⁿ hoaⁿ-hí chhiùⁿ-koa! In-ūi siū pàng-sak ê hū-jîn-lâng pí ū tiōng-hu ê koh-khah chōe kiáⁿ-jî! 28 Hiaⁿ-tī chí-bē, lín chhin-chhiūⁿ [Í-sat], sī Siōng-tè èng-ún ê kiáⁿ-jî. 29 Tng-sî, thàn jio̍k-thé siⁿ ê pek-hāi thàn Siōng-tè ê Sîn siⁿ ê; hiān-chāi mā-sī án-ni. 30 M̄-kú Sèng-keng án-chóaⁿ kóng? “Tio̍h kā lú-pī kap i ê kiáⁿ kóaⁿ chhut-khì, in-ūi lú-pī ê kiáⁿ bōe-tàng kap chū-iû ê hū-jîn-lâng ê kiáⁿ pîⁿ-pîⁿ kè-sêng sán-gia̍p!” 31 Só͘-í, hiaⁿ-tī chí-bē, lán m̄-sī lú-pī ê kiáⁿ-jî, sī chū-iû ê hū-jîn-lâng ê kiáⁿ-jî.

Ka-lia̍p-thài 5

1 Ūi-tio̍h beh hō͘ lán ū chū-iû, Ki-tok í-keng ū kā lán tháu-pàng. Só͘-í tio̍h khiā-chāi, m̄-thang koh chiap-siū ap-chè chòe lô͘-lē! 2 Taⁿ góa --- [Pó-lô] kā lín kóng, tio̍h chù-ì thiaⁿ: Lín nā siū kat-lé, Ki-tok chiū tùi lín lóng bô lī-ek. 3 Góa koh chi̍t piàn kā ta̍k ê kam-goān chiap-siū kat-lé ê lâng kéng-kò, chit-ê lâng ū gī-bū chun-siú choân-pō͘ ê Lu̍t-hoat! 4 Lín chiah-ê siūⁿ-beh khò chun-siú Lu̍t-hoat tit-tio̍h kap Siōng-tè ū ha̍p-gî koan-hē ê lâng, sī kap Ki-tok toān-choa̍t koan-hē, sit-lo̍h Siōng-tè ê un-tián. 5 Goán pek-chhiat teh thèng-hāu, ǹg-bāng Siōng-tè hō͘ lán kap I ū ha̍p-gî ê koan-hē; chit-ê ǹg-bāng khò Siōng-tè ê Sîn, tùi sìn chiah ōe-tàng si̍t-hiān. 6 In-ūi lán nā kap Ki-tok Iâ-so͘ kiat-liân, ū siū kat-lé á-sī bô siū kat-lé lóng bô iàu-kín, iàu-kín ê sī ū thiàⁿ ê hêng-tōng piáu-hiān chhut-lâi ê sìn-sim. 7 Lín í-keng chòe liáu chin hó; sī siáⁿ-lâng kā lín chó͘-tòng, hō͘ lín bô sūn-ho̍k chin-lí? 8 Sòe-ho̍k lín ê m̄-sī hit-ūi ho͘-tiàu lín ê Siōng-tè. 9 Sio̍k-gú kóng, “Chi̍t-sut-á kàⁿ-bú ōe hō͘ kui sn̂g ê mī-chhè hoat khí-lâi.” 10 Tī Chú ê lāi-bīn góa siong-sìn lín bōe kap góa ū bô sio-siâng ê siūⁿ-hoat. Hiah-ê teh jiáu-loān lín ê, bô-lūn sī sím-mi̍h lâng, it-tēng ōe siū Siōng-tè chek-hoa̍t. 11 Hiaⁿ-tī chí-bē, góa nā kè-sio̍k thoân tio̍h siū kat-lé, sī án-chóaⁿ góa iáu teh siū pek-hāi? Góa nā án-ni chòe, góa soan-iông Ki-tok ê si̍p-jī-kè chiū bōe siū chó͘-gāi. 12 Hiah-ê teh jiáu-loān lín ê lâng lêng-khó ka-kī iam khí-lâi! 13 Hiaⁿ-tī chí-bē, Siōng-tè ho͘-tiàu lín sī beh hō͘ lín chū-iû. Put-kò m̄-thang hō͘ lín ê chū-iû pìⁿ-chòe hòng-chhiòng su-io̍k ê ki-hōe. Tio̍h ēng thiàⁿ-sim hō͘-siōng ho̍k-bū. 14 In-ūi choân-pō͘ Lu̍t-hoat pau-hâm tī “Tio̍h thiàⁿ chhù-piⁿ chhin-chhiūⁿ thiàⁿ ka-kī” chit-ê kài-bēng. 15 Tio̍h sió-sim, lín nā iáu teh sio-kā sio-thun, ōe hō͘-siōng châu-bia̍t. 16 Góa ê ì-sù sī: Lín tio̍h chiàu Sèng Sîn ê ín-chhōa seng-oa̍h, choa̍t-tùi m̄-thang kiû boán-chiok pún-sèng ê io̍k-bōng. 17 In-ūi lâng pún-sèng ê io̍k-bōng tùi-khòng Sèng Sîn; Sèng Sîn tùi-khòng lâng ê pún-sèng. Chit nn̄g ê hō͘-siōng te̍k-tùi, tì-kàu lín bōe-tàng chiàu ka-kī só͘ ài khì chòe. 18 Lín nā hō͘ Sèng Sîn ín-chhōa, chiū bōe siū Lu̍t-hoat khòng-chè. 19 Lâng pún-sèng ê hêng-ûi chin bêng-hián, chiū-sī îm-loān, ù-òe, hò͘ⁿ-sek, 20 pài ngó͘-siōng, kiâⁿ siâ-su̍t, te̍k-tùi, tò͘-cheng, chi̍t-tò͘, siū-khì, chū-su, kiat-tóng, hun-phài, 21 oàn-tò͘, chiú-chùi, hoa-thian chiú-tōe, téng. Góa í-chêng bat kā lín kéng-kò, chit-chūn koh chi̍t piàn kā lín kéng-kò: Chòe chit khoán tāi-chì ê lâng bōe-tàng chiâⁿ-chòe Siōng-tè-kok ê chú-bîn! 22 M̄-kú Sèng Sîn só͘ kiat ê ké-chí sī: Jîn-ài, hoaⁿ-hí, hô-pêng, jím-nāi, jîn-chû, liông-siān, tiong-si̍t, 23 un-jiû, chiat-chè. Chit khoán hêng-ûi it-poaⁿ ê hoat-lu̍t bô teh kìm-chí. 24 Hiah-ê sio̍k Ki-tok Iâ-so͘ ê lâng í-keng ū chiong pún-sèng kap it-chhè ê siâ-chêng su-io̍k chòe-hé tèng-sí tī si̍p-jī-kè. 25 Kì-jiân lán khò Sèng Sîn teh oa̍h, mā tio̍h chun-chiàu Sèng Sîn ê ín-chhōa lâi oa̍h. 26 Lán m̄-thang tui-kiû hu-êng, m̄-thang pí-chhú kek-khì, hō͘-siōng chi̍t-tò͘.

Ka-lia̍p-thài 6

1 Hiaⁿ-tī chí-bē, nā ū lâng hām-lo̍h kè-sit, lín chiah-ê sio̍k-lêng ê lâng tio̍h ēng un-hô ê sim kā i kiù-chèng. Lín ka-kī mā tio̍h sió-sim, chiah-bián siū ín-iú. 2 Tio̍h hun-tam tāng-tàⁿ, án-ni chòe chiah-sī teh si̍t-hiān Ki-tok ê lu̍t-hoat. 3 Ka-kī bô gâu siūⁿ-kóng chin gâu, sī teh khi-phiàn ka-kī. 4 Ta̍k ê lâng tio̍h séng-chhat ka-kī ê hêng-ûi; nā ū hó hêng-ûi, i kan-ta thang tùi ka-kī khoa-kháu, m̄-bián kap pa̍t-lâng pí-kàu. 5 In-ūi ta̍k ê lâng tio̍h taⁿ ka-kī ê tàⁿ. 6 Ha̍k-si̍p tō-lí ê lâng tio̍h kap kàu-tō i ê lâng hun-hióng ta̍k hāng hó-mi̍h. 7 M̄-thang phiàn ka-kī, Siōng-tè sī bōe ēng-tit bú-jio̍k ê. Lâng chèng sím-mi̍h chiū siu sím-mi̍h. 8 Lâng só͘ iā-ê nā-sī ūi-tio̍h boán-chiok ka-kī ê io̍k-bōng, chiū ōe siu-sêng bia̍t-bông; lâng só͘ iā-ê nā-sī ūi-tio̍h beh hō͘ Sèng Sîn hoaⁿ-hí, chiū ōe tùi Sèng Sîn siu éng-oán ê oa̍h-miā. 9 Chòe hó-sū m̄-thang siūⁿ siān; nā bô hoe-sim, sî kàu chiū thang siu-sêng. 10 Só͘-í, bô-lūn sím-mi̍h sî-chūn, tio̍h pá-ak ki-hōe tùi chèng-lâng chòe hó-sū, te̍k-pia̍t sī tùi sìn-gióng chiâⁿ-chòe chi̍t ke ê lâng. 11 Lín khòaⁿ, góa chhin-pit ēng chiah-ni̍h tōa ê jī siá hō͘ lín! 12 Hiah-ê chù-tiōng gōa-piáu thé-biān ê lâng, siūⁿ-beh kiông-pek lín chiap-siū kat-lé. In án-ni chòe kan-ta sī bô ài ūi-tio̍h Ki-tok ê si̍p-jī-kè siū pek-hāi. 13 Kî-si̍t, liân hiah-ê siū kat-lé ê lâng pún-sin mā bô chun-siú Lu̍t-hoat. In pek lín siū kat-lé, chiah ōe-tàng khoa-kháu kóng lín ū chun-siú gōa-piáu ê lé-gî. 14 Góa leh, góa chí-ū beh khoa-kháu lán ê Chú Iâ-so͘ Ki-tok ê si̍p-jī-kè, in-ūi chit-ê si̍p-jī-kè, tùi góa lâi kóng, sè-kài í-keng tèng-sí tī si̍p-jī-kè; tùi sè-kài lâi kóng, góa mā í-keng tèng-sí. 15 Ū siū kat-lé bô siū kat-lé lóng bô tiōng-iàu; tiōng-iàu ê sī lán tio̍h chiâⁿ-chòe sin chhòng-chō ê lâng. 16 Chiàu chit-ê chún-chek seng-oa̍h ê lâng chiū-sī Siōng-tè ê [Í-sek-lia̍t] chú-bîn. Goān pêng-an kap lîn-bín kap in tông-chāi! 17 Tùi taⁿ í-āu, bô-lūn sím-mi̍h lâng to lóng m̄-thang kā góa kiáu-jiáu; in-ūi Iâ-so͘ ū tī góa ê seng-khu khàm-ìn chòe kì-hō, chèng-bêng góa sio̍k I. 18 Hiaⁿ-tī chí-bē, goān lán ê Chú Iâ-so͘ Ki-tok ê un-tián kap lín tông-chāi. Amen!

AMAZING GRACE BIBLE INSTITUTE