2 Corinthians

2 Ko-lîm-to

1 Góa sī [Pó-lô], hōng Siōng-tè ê chí-ì choh Ki-tok Iâ-so͘ ê sù-tô͘. Góa kap hiaⁿ-tī [Thê-mô͘-thài] siá-phoe hō͘ tī [Ko-lîm-to] Siōng-tè ê kàu-hōe kap choân [A-kai-a-séng] só͘-ū sìn-tô͘. 2 Goān lán ê Pē Siōng-tè kap Chú Iâ-so͘ Ki-tok sù lín un-tián kap pêng-an! 3 Tio̍h chheng-chàn lán ê Chú Iâ-so͘ Ki-tok ê Pē Siōng-tè! I sī chû-pi ê Pē, sù ta̍k hāng an-ùi ê Siōng-tè. 4 Tī lán it-chhè ê hoān-lān tiong, I an-ùi lán, hō͘ lán ōe-tàng ēng Siōng-tè sù lán ê an-ùi khì an-ùi hiah-ê tú-tio̍h ta̍k khoán hoān-lān ê lâng. 5 In-ūi Ki-tok ūi-tio̍h lán siū chin chōe khó͘-lān, lán mā thong-kè Ki-tok siū hiah-ni̍h chōe ê an-ùi. 6 Goán tú-tio̍h hoān-lān, mā-sī beh hō͘ lín tit-tio̍h an-ùi kap chín-kiù; goán tit-tio̍h an-ùi, mā-sī beh hō͘ lín tit-tio̍h an-ùi, ū khùi-la̍t thang jím-siū kap goán só͘ jím-siū siâng-khoán ê khó͘-lān. 7 Goán tùi lín ê ǹg-bāng bōe iô-tāng; in-ūi goán chai, lín kap goán tâng siū-khó͘, lín mā ōe kap goán tâng siū an-ùi. 8 Hiaⁿ-tī chí-bē, goán ài lín chai goán tī [A-se-a]-séng só͘ tú-tio̍h ê hoān-lān. Goán só͘ taⁿ ê tāng-tàⁿ hui-siông tāng, tāng kàu taⁿ bōe-khí, tì-kàu giōng-beh oa̍h bōe lo̍h-khì. 9 Goán ka-kī kám-kak ū siū phòaⁿ sí-hêng; án-ni sī beh hō͘ goán bô koh óa-khò ka-kī, chí-ū óa-khò hō͘ sí-lâng koh-oa̍h ê Siōng-tè. 10 I ū kiù goán thoat-lī sí ê gûi-hiám; chiong-lâi mā ōe kiù goán. Goán khak-sìn I chiong-lâi it-tēng ōe-koh kiù goán. 11 Lín mā tio̍h ēng kî-tó lâi pang-chān goán, án-ni chiah ū chin chōe lâng ōe in-ūi goán tùi lín chin chōe lâng ê kî-tó tit-tio̍h chiok-hok lâi kám-siā Siōng-tè. 12 Goán só͘ khoa-kháu ê sī án-ni: Goán ê liông-sim chèng-bêng, goán tī chit sè-kan ê seng-oa̍h lóng sī chiàu Siōng-tè só͘ sù ê sûn-kiat kap sêng-si̍t, m̄-sī khò sio̍k-sè ê tì-hūi, sī khò Siōng-tè ê un-tián; goán tùi-thāi lín koh-khah sī án-ni. 13 Goán siá hō͘ lín ê lóng sī lín ōe-hiáu tha̍k ōe-tàng liáu-kái ê. Lín kàu taⁿ só͘ lí-kái ê chí-ū chi̍t pō͘-hūn, góa ǹg-bāng lín kàu lō͘-bé ōe oân-choân liáu-kái. Án-ni, tī lán ê Chú Iâ-so͘ ê Ji̍t, lín ōe chòe goán ê khoa-kháu, goán mā chòe lín ê khoa-kháu. 15 In-ūi ū chit-ê khak-sìn, góa chiah kè-ōe seng khì hóng-būn lín, thang hō͘ lín tit-tio̍h ka-pē ê chiok-hok; 16 chiū-sī kè-ōe khì [Má-kî-tùn] ê lō͘-tiong seng khì hóng-būn lín, koh tùi [Má-kî-tùn] tò-lâi keng-kè lín hia ê sî, hō͘ lín thang sàng góa chhut-hoat khì [Iû-thài]. 17 Chit-ê kè-ōe kiám sī chhìn-chhái chòe ê? Góa chòe chit khoán kè-ōe kiám chhut tī chū-su ê tōng-ki, liâm-piⁿ kóng “sī” liâm-piⁿ kóng “m̄-sī”? 18 Siōng-tè sī sìn-si̍t, góa tùi lín tah-èng ê ōe chiū m̄-sī liâm-piⁿ “sī” liâm-piⁿ “m̄-sī”. 19 In-ūi [Se-lah], [Thê-mô͘-thài], kap góa thoân hō͘ lín hit ūi Siōng-tè ê Kiáⁿ Iâ-so͘ Ki-tok pèng m̄-sī liâm-piⁿ “sī” liâm-piⁿ “m̄-sī” ê. Chāi-tī Iâ-so͘ Ki-tok chí-ū “sī” nā-tiāⁿ. 20 Siōng-tè it-chhè ê èng-ún chāi-tī Iâ-so͘ Ki-tok chiâⁿ-chòe “sī”, só͘-í lán chiah thong-kè I kóng “Amen” lâi kui êng-kng hō͘ Siōng-tè. 21 Hō͘ goán kap lín lâi kap Ki-tok kiat-liân koh soán-phài goán ê sī Siōng-tè. 22 I kā goán khàm-ìn, koh sù Sèng Sîn tī goán sim-lāi chòe tam-pó. 23 Góa ēng ka-kī ê sìⁿ-miā chiù-chōa kiû Siōng-tè kā góa choh-chèng. Góa sī thé-thiap lín chiah bô khì [Ko-lîm-to]. 24 Goán m̄-sī teh kiông-chè lín tio̍h sìn sím-mi̍h, hoán-tńg sī teh chòe lín ê tâng-kang, hō͘ lín thang hoaⁿ-hí, in-ūi lín ê sìn-sim ū khiā-chāi.

2 Ko-lîm-to 2

1 Só͘-í, góa koat-tēng bô beh khì lín hia, chiah-bián koh-chài hō͘ lín kan-khó͘-sim. 2 Góa nā ū hō͘ lín kan-khó͘-sim, lín chiah-ê kan-khó͘-sim ê lâng í-gōa iáu ū sím-mi̍h lâng thang hō͘ góa khoài-lo̍k? 3 Ūi-tio̍h beh pī-bián góa khì lín hia ê sî, hiah-ê eng-kai hō͘ góa hoaⁿ-hí ê lâng hoán-tńg hō͘ góa kan-khó͘-sim, góa chiah siá chêng hit tiuⁿ phoe hō͘ lín. Góa khak-sìn, góa ê hoaⁿ-hí chiū-sī lín tāi-ke ê hoaⁿ-hí. 4 Góa hui-siông khùn-jiáu koh thòng-sim, lâu chin chōe ba̍k-sái siá hit tiuⁿ phoe, m̄-sī beh hō͘ lín kan-khó͘-sim, sī beh hō͘ lín chai góa jōa-á-ni̍h thiàⁿ lín. 5 Nā ū lâng hō͘ lâng kan-khó͘-sim, m̄-sī hō͘ góa kan-khó͘-sim --- góa khah bô ài kóng-kah kè-thâu giâm-tiōng --- kàu bó͘ chi̍t ê thêng-tō͘ sī hō͘ lín tāi-ke lóng kan-khó͘-sim. 6 Hit khoán lâng siū lín tāi-to-sò͘ ê lâng khiàn-chek í-keng kàu-gia̍h. 7 Lín tian-tò tio̍h kā i sià-bián, kā i kó͘-lē, chiah-bián hō͘ i kè-thâu kan-khó͘-sim soah choa̍t-bāng. 8 Só͘-í, góa khó͘-khǹg lín, tio̍h hō͘ i chai-iáⁿ lín khak-si̍t ū thiàⁿ i. 9 Góa chêng siá hit tiuⁿ phoe sī ài-beh chai lín jōa gâu jím-siū khó-giām, sī m̄-sī hoān-sū goān-ì sūn-ho̍k. 10 Lín sià-bián sím-mi̍h lâng, góa mā sià-bián i. Góa nā ū sià-bián sím-mi̍h lâng, sī tī Ki-tok ê bīn-chêng ūi-tio̍h lín ê iân-kò͘ sià-bián i. 11 Án-ni chiah-bián hō͘ Sat-tàn kā lán phiⁿ khì, in-ūi lán chin chheng-chhó Sat-tàn ê khúi-kè. 12 Góa khì [Te̍k-lô-a] thoân Ki-tok ê Hok-im ê sî, Chú í-keng kā góa khui kang-chok ê mn̂g; 13 put-kò bô tú-tio̍h góa ê hiaⁿ-tī [Thê-to], góa bōe an-sim, chiū kap hia ê lâng saⁿ-sî khì [Má-kî-tùn]. 14 Kám-siā Siōng-tè! In-ūi kap Ki-tok kiat-liân, góa sî-siông hō͘ Siōng-tè chhōa-khì chham-ka Ki-tok khái-soân ê hâng-lia̍t. Siōng-tè koh ēng goán khì ta̍k só͘-chāi soan-iông tùi jīn-bat Ki-tok chiah ū ê phang-bī. 15 Bô-lūn tī tit-kiù á-sī tîm-lûn ê lâng tiong-kan, goán chiâⁿ-chòe Ki-tok ê phang-bī hiàn hō͘ Siōng-tè; 16 tùi teh-beh tîm-lûn ê lâng sī sí ê chhàu-bī, tùi teh-beh tit-kiù ê lâng sī oa̍h ê phang-bī. Sím-mi̍h lâng ōe kham-tit chòe chit khoán tāi-chì? 17 Goán bô chhin-chhiūⁿ chin chōe lâng chiong Siōng-tè ê ōe chòe sio̍k-hè phah-bōe, tian-tò sī chòe chi̍t ê sûn-chin ê lâng, siū Siōng-tè chhe-phài, tī I ê bīn-chêng khò Ki-tok soan-káng.

2 Ko-lîm-to 3

1 Goán kiám koh-teh chhui-chiàn ka-kī? Goán kiám tio̍h chhin-chhiūⁿ chi̍t-kóa lâng siá chhui-chiàn-su hō͘ lín, á-sī su-iàu lín ê chhui-chiàn-su? 2 Lín pún-sin chiū-sī goán ê chhui-chiàn-su, siá tī goán ê sim lāi, beh hō͘ chèng-lâng chai, chèng-lâng tha̍k. 3 Chin bêng-hián, lín sī Ki-tok só͘ siá thong-kè goán lâi sàng ê phoe. Chit tiuⁿ phoe m̄-sī ēng ba̍k-chúi siá tī chio̍h-pán, sī ēng éng-oa̍h Siōng-tè ê Sîn siá tī lâng ê sim-pán. 4 Goán thong-kè Ki-tok tùi Siōng-tè ū chit khoán ê khak-sìn chiah án-ni kóng. 5 Che m̄-sī kóng goán ka-kī ū châi-tiāu thang chòe chit-ê tāi-chì, goán ê châi-tiāu sī tùi Siōng-tè lâi ê. 6 I sù goán ū châi-tiāu thang chòe sin ê iok ê chhe-ēng; m̄-sī ēng bûn-jī siá ê, sī Sèng Sîn ê iok. Bûn-jī hō͘ lâng sí, m̄-kú Sèng Sîn hō͘ lâng oa̍h. 7 Ēng bûn-jī khek tī chio̍h-pán ê Lu̍t-hoat pan-pò͘ ê sî, Siōng-tè ê êng-kng ū hián-hiān. Tùi [Mô͘-se] ê bīn hoán-chiò chhut-lâi ê kng sui-jiân chiām-chiām teh siau-sit, m̄-kú hit-ê kng iáu chin kiông, tì-kàu [Í-sek-lia̍t] kiáⁿ-sun bōe-tàng ba̍k-chiu kim-kim kā i khòaⁿ. Hō͘ lâng tì-kàu sí ê Lu̍t-hoat to ū chit khoán ê êng-kng, 8 án-ni Sèng Sîn só͘ hoat-chhut ê êng-kng kiám bōe koh-khah tōa? 9 Hit-ê kā lâng tēng-chōe ê thé-chè nā ōe hoat-chhut chit khoán ê êng-kng, hit-ê kā lâng soan-pò͘ bô-chōe ê thé-chè só͘ hián-chhut ê êng-kng kiám bōe koh-khah tōa! 10 Án-ni, in-ūi hiān-chāi ê êng-kng pí í-chêng ê koh-khah tōa, í-chêng ê êng-kng soah bô-khì. 11 Hit-ê siau-sit-ê nā ōe hoat-chhut êng-kng, hit-ê éng-chûn-ê it-tēng ōe hián-chhut koh-khah tōa ê êng-kng. 12 In-ūi goán ū chit khoán ê ǹg-bāng chiah chiah-ni̍h ióng-kám. 13 Goán bô chhin-chhiūⁿ [Mô͘-se] tio̍h ēng phè tà ka-kī ê bīn. [Mô͘-se] án-ni chòe, chiah-bián hō͘ [Í-sek-lia̍t] kiáⁿ-sun khòaⁿ-tio̍h i bīn ê êng-kng chiām-chiām siau-sit. 14 M̄-kú in ê sim tūn, it-ti̍t kàu kin-á-ji̍t in tha̍k kū ê iok ê sî, in ê sim iáu hō͘ hit tè phè tà-teh. In-ūi chí-ū kap Ki-tok kiat-liân, hit tè phè chiah the̍h khí-lâi. 15 Sīm-chì kàu kin-á-ji̍t, in ta̍k pái tha̍k [Mô͘-se] ê Lu̍t-hoat, hit tè phè iáu tà tī in ê sim. 16 M̄-kú, koan-hē [Mô͘-se], Sèng-keng ū kì-chài, “Tng i kui-ǹg Chú ê sî, i ê phè chiah the̍h khí-lâi.” 17 Tī chia teh kóng ê “Chú” sī Sèng Sîn; ū Chú ê Sîn ê só͘-chāi chiū ū chū-iû. 18 Lán tāi-ke lóng ēng bô tà-phè ê bīn teh hoán-chiò Chú ê êng-kng; chit-ê êng-kng sī tùi Chú, chiū-sī tùi Sèng Sîn hoat chhut-lâi ê êng-kng, teh kā lán kái-chō chiâⁿ-chòe I ê hêng-siōng, hō͘ lán ū koh-khah tōa ê êng-kng.

2 Ko-lîm-to 4

1 Kì-jiân Siōng-tè ū lîn-bín goán, chiong chit-ê chit-bū kau-thok goán, goán bô sit-chì. 2 Goán pàng-sak it-chhè bô ài lâng chai ê kiàn-siàu-tāi, bô chòe khi-phiàn lâng ê tāi-chì, bô oai-khiok Siōng-tè ê ōe, chí-ū tī Siōng-tè ê bīn-chêng kong-khai hián-bêng chin-lí, lâi kiò-chhíⁿ chèng-lâng ê liông-sim. 3 Goán só͘ thoân ê hok-im nā ū am-khàm bô chheng-chhó, chí-ū tùi hiah-ê teh-beh tîm-lûn ê lâng am-khàm bô chheng-chhó nā-tiāⁿ. 4 In m̄-sìn sī in-ūi chit sè-kan ê sîn-bêng hō͘ in ê sim-ba̍k chhiⁿ-mî, bōe-tàng khòaⁿ-kìⁿ hok-im ê kng, chit-ê hok-im teh kiàn-chèng êng-kng ê Ki-tok; Ki-tok sī Siōng-tè ê hêng-siōng. 5 Goán m̄-sī thoân ka-kī, sī thoân Iâ-so͘ Ki-tok sī Chú; goán ka-kī in-ūi Iâ-so͘ ê iân-kò͘ chòe lín ê lô͘-po̍k. 6 Hit-ūi bēng-lēng kng tùi o͘-àm chiò-chhut-lâi ê Siōng-tè, chiū-sī ēng kng chiò lán lāi-sim ê Siōng-tè, hō͘ lán jīn-bat I chiò tī Iâ-so͘ Ki-tok ê bīn hit-ê êng-kng. 7 Put-kò goán chiah-ê ū chit-ê sio̍k-lêng pó-pòe ê lâng, sī chhin-chhiūⁿ thô͘ chō ê khì-khū, beh piáu-sī hit-ê chì-tōa ê lêng-le̍k sī sio̍k tī Siōng-tè, m̄-sī tùi goán chhut-lâi ê. 8 Goán siông-siông tú-tio̍h ta̍k khoán khùn-lân, m̄-kú bô khut-ho̍k; tú-tio̍h choa̍t-kéng, m̄-kú bô choa̍t-bāng; 9 siū-tio̍h khún-pek, m̄-kú bô hō͘ Siōng-tè pàng-sak; siū phah-tó, m̄-kú bô tì-kàu sí. 10 Goán put-sî tòa Iâ-so͘ ê sí tī goán ōe-sí ê seng-khu, hō͘ Iâ-so͘ ê oa̍h-miā mā thang tī goán ê sin-chiūⁿ hián-bêng. 11 Goán oa̍h tī sè-kan, ūi-tio̍h Iâ-so͘ ê iân-kò͘ sî-siông tú-tio̍h sí ê gûi-hiám, thang hō͘ I ê oa̍h-miā tī goán chit-ê ōe-sí ê seng-khu hián-bêng chhut-lâi. 12 Án-ni, sí tī goán ê lāi-bīn teh hoat-seng chok-iōng, m̄-kú oa̍h-miā tī lín ê lāi-bīn teh hoat-seng chok-iōng. 13 Sèng-keng kóng, “Góa ū sìn, só͘-í góa chiah kóng”, kun-kù chit khoán sìn-gióng ê cheng-sîn, goán mā sìn, só͘-í goán chiah kóng. 14 Goán chai, hō͘ Chú Iâ-so͘ koh-oa̍h ê Siōng-tè mā ōe hō͘ goán kap Iâ-so͘ tâng koh-oa̍h, koh chhōa goán kap lín chòe-hé kàu I ê bīn-chêng. 15 Chiah-ê it-chhè lóng sī ūi-tio̍h lín, sī beh hō͘ koh-khah chōe ê lâng tit-tio̍h Siōng-tè ê un-tián, thang hiàn koh-khah chōe ê kám-siā lâi êng-iāu Siōng-tè. 16 In-ūi án-ni, goán bô sit-chì. Sui-jiân goán gōa-chāi ê lâng chiām-chiām teh soe-pāi, goán lōe-chāi ê lâng khiok ji̍t-ji̍t teh ōaⁿ-sin. 17 Goán só͘ siū chit-ê chiām-sî koh sió-khóa ê kan-khó͘ sī beh hō͘ goán tit-tio̍h bōe thang pí, koh-khah tōa, éng-oán ê êng-kng. 18 Goán só͘ tiōng-sī ê m̄-sī khòaⁿ-ōe-tio̍h ê, sī khòaⁿ-bōe-tio̍h ê; in-ūi khòaⁿ-ōe-tio̍h ê sī chiām-sî, khòaⁿ-bōe-tio̍h ê sī éng-oán.

2 Ko-lîm-to 5

1 In-ūi goán chai, lán tī tōe-chiūⁿ teh tòa chit-ê pò͘-pîⁿ ê chhù nā thiah khí-lâi, Siōng-tè ōe hō͘ lán thiⁿ-téng ê chhù, m̄-sī lâng ê chhiú khí ê, sī éng-oán ê chhù. 2 Lán hiān-chāi tī chit-ê pò͘-pîⁿ teh thó͘-khùi, jia̍t-chhiat ǹg-bāng thang khì tiàm thiⁿ-téng ê chhù, chhin-chhiūⁿ saⁿ tha̍h lo̍h-khì, 3 nā tha̍h lo̍h-khì chiū bōe chhiah-sin lō͘-thé. 4 Lán iáu tiàm tī chit-ê pò͘-pîⁿ pē tāng-tàⁿ teh thó͘-khùi; lán m̄-sī ài thǹg-khì tōe-chiūⁿ ê thé, sī beh tha̍h sio̍k-thiⁿ ê thé, thang hō͘ oa̍h-miā kā ōe-sí ê thun lo̍h-khì. 5 Hō͘ lán ū chit-ê kái-piàn ê sī Siōng-tè, I sù Sèng Sîn hō͘ lán, kā lán pó-chèng. 6 Só͘-í, goán put-sî ū ióng-khì. Goán chai, lán iáu tòa tī chit-ê seng-khu teh oa̍h ê sî, sī kap Chú saⁿ-lī. 7 In-ūi lán teh oa̍h, m̄-sī khò ba̍k-chiu khòaⁿ, sī khò sìn-sim. 8 Goán ū ióng-khì, khah ài lī-khui chit-ê seng-khu khì kap Chú tòa. 9 Só͘-í, bô-lūn tī chit-ê seng-khu á-sī lī-khui chit-ê seng-khu, goán ê bo̍k-te̍k sī ài hō͘ Chú hoaⁿ-hí. 10 In-ūi lán lóng it-tēng tio̍h khiā tī Ki-tok ê bīn-chêng siū I sím-phòaⁿ. Ta̍k ê lâng lóng tio̍h chiàu ka-kī tī tōe-chiūⁿ ê seng-khu só͘-chòe ê, bô-lūn sī hó á-sī pháiⁿ, chiap-siū pò-èng. 11 Kì-jiân goán chai-iáⁿ tio̍h kèng-ùi Chú, goán chiū khó͘-khǹg lâng. Tùi Siōng-tè lâi khòaⁿ, goán sī sím-mi̍h khoán lâng chin chheng-chhó; góa ǹg-bāng tùi lín ê liông-sim lâi khòaⁿ mā chin chheng-chhó. 12 Goán m̄-sī beh koh tùi lín chhui-chiàn ka-kī, sī hō͘ lín ū ki-hōe ēng goán chòe khoa-kháu, hō͘ lín thang hôe-èng hiah-ê chù-tiōng gōa-piáu bô chù-tiōng lāi-sim ê lâng. 13 Goán nā bô chèng-siông, sī ūi-tio̍h Siōng-tè; goán nā chèng-siông, sī ūi-tio̍h lín. 14 In-ūi Ki-tok ê thiàⁿ chhui-pek goán chòe chit-ê kiat-lūn: Chi̍t lâng ūi-tio̍h chèng-lâng sí, chèng-lâng chiū lóng sí. 15 I ūi-tio̍h chèng-lâng sí, sī beh hō͘ hiah-ê oa̍h-teh ê lâng bô koh ūi-tio̍h ka-kī oa̍h, sī ūi-tio̍h hit-ūi thòe in sí-liáu koh-oa̍h ê Ki-tok lâi oa̍h. 16 Só͘-í, tùi taⁿ í-āu goán bô koh kun-kù lâng ê phiau-chún bat lâng. Sui-jiân goán bat ēng lâng ê phiau-chún bat Ki-tok, m̄-kú hiān-chāi bô koh án-ni bat I. 17 Án-ni, bô-lūn sím-mi̍h lâng, nā kap Ki-tok kiat-liân, chiū-sī sin chhòng-chō ê lâng; kū-ê í-keng kè-khì, taⁿ lóng pìⁿ-chòe sin-ê. 18 Chiah-ê it-chhè lóng sī Siōng-tè ê chok-ûi; I thong-kè Ki-tok hō͘ lán kap I koh hô-hó, koh chiong hō͘ lâng hô-hó ê chit-bū kau-tài goán. 19 Goán só͘ thoân ê sìn-sit sī án-ni: Siōng-tè thong-kè Ki-tok hō͘ sè-kan-lâng kap I hô-hó. I bô koh tui-kiù in ê chōe-kò, khiok chiong chit-ê hō͘ lâng hô-hó ê sìn-sit kau-thok goán. 20 Só͘-í, goán choh Ki-tok ê tāi-sài, Siōng-tè thong-kè goán kā lín khó͘-khǹg. Goán thòe Ki-tok kā lín kiû, tio̍h kap Siōng-tè hô-hó. 21 Siōng-tè hō͘ bô-chōe ê Ki-tok ūi-tio̍h lán ê iân-kò͘ chiâⁿ-chòe ū-chōe-ê, hō͘ lán thang khò Ki-tok kap Siōng-tè kiàn-li̍p ha̍p-gî ê koan-hē.

2 Ko-lîm-to 6

1 Goán choh Siōng-tè ê tâng-kang koh kā lín khó͘-khǹg, lín tùi Siōng-tè niá-siū ê un-tián m̄-thang hō͘ i lo̍k-khong. 2 In-ūi Siōng-tè kóng: Tī thang siū chiap-la̍p ê sî, góa ū thiaⁿ lí; tī chín-kiù ê ji̍t, góa ū pang-chān lí. Tio̍h thiaⁿ! Chit-chūn sī siū chiap-la̍p ê sî; kin-á-ji̍t sī chín-kiù ê ji̍t! 3 Ūi-tio̍h goán sū-hōng ê kang-chok bián siū chí-chek, chó͘-gāi pa̍t-lâng ê tāi-chì goán lóng bô chòe, 4 hoán-tńg ēng siōng-tōa ê nāi-sim, hoān-sū thong-kè hoān-lān, kan-lân, kap khùn-khó͘, piáu-sī goán sī Siōng-tè ê chhe-ēng. 5 Goán bat siū-tio̍h piⁿ-phah, koaiⁿ-kaⁿ, pō-le̍k ê siong-hāi, lô-khó͘, bô-khùn, bô-chia̍h. 6 Goán ēng sûn-kiat, tì-sek, khoan-iông, jîn-chû, óa-khò Sèng Sîn, ēng sûn-chin ê thiàⁿ, 7 thoân chin-lí ê sìn-sit kap Siōng-tè ê tōa lêng-le̍k, ēng kong-gī chòe bú-khì kong-kek tùi-te̍k, pó-hō͘ ka-kī. 8 Goán siū chun-tiōng, mā siū bú-jio̍k; tit-tio̍h pháiⁿ miâ-siaⁿ, mā tit-tio̍h hó miâ-siaⁿ. Goán hō͘ lâng khòaⁿ-chòe pián-sian, kî-si̍t goán kóng si̍t-ōe; 9 ná-chún bô-lâng bat, kî-si̍t lâng-lâng lóng bat; ná-chún sí-khì, kî-si̍t iáu teh oa̍h. Goán sui-jiân siū chhú-hoa̍t, m̄-kú bô hō͘ lâng thâi-sí; 10 sui-jiân iu-siong, m̄-kú put-sî hoaⁿ-hí; sui-jiân sàn-chhiah, m̄-kú hō͘ chin chōe lâng hó-gia̍h; chhin-chhiūⁿ bô pòaⁿ-hāng, m̄-kú ta̍k hāng lóng ū. 11 [Ko-lîm-to] ê pêng-iú, goán ê sim-heng í-keng phah-khui, khui-chhùi kā lín kóng lah. 12 M̄-sī goán tùi lín bô tō͘-liōng, sī lín tùi goán bô tō͘-liōng. 13 Góa khòaⁿ lín chòe ka-kī ê kiáⁿ kā lín kóng: Kap goán siâng-khoán, lín ê sim-heng mā tio̍h phah khah khui leh. 14 M̄-thang kap bī-sìn ê lâng khan-liân kau-chhap; kong-gī kap put-hoat ū sím-mi̍h koan-liân? Kng-bêng kap o͘-àm ná ōe-tàng kau-óng? 15 Ki-tok kap Mô͘-kúi ná ōe-tàng hô-ha̍p? Sìn kap bô-sìn ê lâng ū sím-mi̍h koan-hē? 16 Siōng-tè ê tiān kap ngó͘-siōng ná ōe-tàng pâi chòe-hé? In-ūi lán sī éng-oa̍h Siōng-tè ê tiān! Chiàu Siōng-tè só͘ kóng: Góa beh kap góa ê chú-bîn chòe-hé khiā-khí, tī in tiong-kan óng-lâi. Góa beh chòe in ê Siōng-tè, in beh chòe góa ê chú-bîn. 17 Só͘-í Chú kóng: Lín tio̍h tùi in tiong-kan chhut-khì, kap in hun-lī. Bô chheng-khì ê m̄-thang chiap-chhiok, án-ni góa chiū chiap-la̍p lín. 18 Góa beh chòe lín ê Pē, lín beh chòe góa ê kiáⁿ, cha-bó͘-kiáⁿ. Choân-lêng ê Chú ū án-ni kóng.

2 Ko-lîm-to 7

1 Chhin-ài ê pêng-iú, kì-jiân lán tit-tio̍h chiah-ê èng-ún, lán tio̍h kiat-chēng ka-kī, tû-khì it-chhè hō͘ seng-khu kap sim-lêng phah lâ-sâm ê sū, ēng kèng-ùi Siōng-tè hō͘ seng-oa̍h oân-choân sèng-hòa. 2 Lín tio̍h ēng khoan-tāi ê sim tùi-thāi goán. Goán m̄-bat khek-khui lâng, m̄-bat hāi lâng tūi-lo̍h, m̄-bat phiⁿ lâng. 3 Góa án-ni kóng, m̄-sī beh kā lín khiàn-chek. Góa í-chêng bat kóng, goán chin thiàⁿ lín, goān-ì kap lín tâng-sí tâng-oa̍h. 4 Góa chin sìn-jīm lín, ēng lín chòe khoa-kháu. Góa chhiong-móa an-ùi; tī goán it-chhè ê hoān-lān tiong, góa ū móa-móa ê hoaⁿ-hí. 5 Goán kàu [Má-kî-tùn] í-āu, seng-khu bô thang hioh-khùn, hoán-tńg ta̍k hāng tāi-chì lóng tú-tio̍h khùn-lân, gōa-bīn ū hun-cheng, lāi-bīn ū kiaⁿ-hiâⁿ. 6 M̄-kú, an-ùi sit-chì ê lâng ê Siōng-tè ū chhe [Thê-to] lâi, hō͘ goán tit-tio̍h an-ùi; 7 m̄-nā in-ūi i ū lâi, koh in-ūi i ū kóng-khí lín án-chóaⁿ kā i kó͘-lē ê tāi-chì. I ū kā goán kóng-khí lín ài kìⁿ góa, lín ê sim kan-khó͘, kap lín tùi góa ê jia̍t-chêng, hō͘ góa koh-khah hoaⁿ-hí. 8 Sui-jiân góa chêng hit tiuⁿ phoe hō͘ lín sim kan-khó͘, góa bô hō͘-hóe; m̄-kú chai-iáⁿ hit tiuⁿ phoe ū hō͘ lín chi̍t-sî sim kan-khó͘, góa ū hō͘-hóe; 9 chóng-sī hiān-chāi góa chin hoaⁿ-hí, m̄-sī in-ūi lín sim kan-khó͘, sī in-ūi lín ê kan-khó͘-sim ū tì-kàu hóe-kái. Siōng-tè ū siān-iōng lín ê kan-khó͘-sim, só͘-í goán só͘ chòe ê tùi lín bô siong-hāi. 10 In-ūi Siōng-tè siān-iōng lín ê kan-khó͘-sim lâi hō͘ lín hóe-kái thang tit-tio̍h kiù, goán chiū bô sím-mi̍h thang hō͘-hóe; m̄-kú sio̍k-sè ê kan-khó͘-sim ōe hō͘ lâng tì-kàu sí. 11 Lín khòaⁿ, Siōng-tè hiah-ni̍h gâu siān-iōng lín ê kan-khó͘-sim, chiah hō͘ lín hiah-ni̍h pek-chhiat piān-bêng ka-kī ê chheng-pe̍k, hiah-ni̍h hùn-khài, hiah-ni̍h ū kéng-kài-sim, hiah-ni̍h ū kî-thāi, hiah-ni̍h jia̍t-chêng, hiah-ni̍h ke̍k-lia̍t khiàn-chek put-hoat; tī ta̍k hāng tāi-chì, lín í-keng ū chèng-bêng ka-kī ê chheng-pe̍k. 12 Só͘-í, sui-jiân góa ū siá hit tiuⁿ phoe, m̄-kú m̄-sī ūi-tio̍h kā lâng khek-khui ê lâng, á-sī siū lâng khek-khui ê lâng, sī beh tùi lín piáu-bêng lín tī Siōng-tè ê bīn-chêng tùi goán ê jia̍t-chêng ū jōa chhim. 13 In-ūi án-ni, goán ū tit-tio̍h an-ùi. Goán m̄-nā tit-tio̍h an-ùi, mā in-ūi khòaⁿ-tio̍h [Thê-to] ê hoaⁿ-hí koh-khah hoaⁿ-hí, in-ūi i ê sim ū tùi lín tāi-ke tit-tio̍h kek-lē. 14 Góa bat tùi i po-chióng lín, lín bô hō͘ góa làu-khùi. Góa ta̍k hāng tāi-chì lóng tùi lín kóng si̍t-chāi-ōe, góa tùi [Thê-to] po-chióng lín ê ōe mā-sī si̍t-chāi. 15 Só͘-í, i siūⁿ-khí lín tāi-ke án-chóaⁿ sūn-ho̍k i, kiong-kiong kèng-kèng kā i chiap-thāi, i tùi lín ê thiàⁿ-sim chiū ná chhim. 16 Góa hui-siông hoaⁿ-hí, in-ūi góa ōe-tàng oân-choân sìn-jīm lín.

2 Ko-lîm-to 8

1 Hiaⁿ-tī chí-bē, góa ài lín chai Siōng-tè sù hō͘ [Má-kî-tùn] chèng kàu-hōe ê un-hūi. 2 In ū tùi hoān-lān keng-le̍k chin chōe khó-giām, iáu-kú chhiong-móa hoaⁿ-hí; sui-jiân hui-siông sàn-chhiah, iáu-kú hui-siông khóng-khài koan-hiàn. 3 Góa ōe-tàng kā lín chèng-bêng, in í-keng chīn in só͘-ōe hōng-hiàn, sīm-chì chhiau-kè in ê khùi-la̍t. 4 In jia̍t-chhiat kiû goán hō͘ in ū chham-ka kiù-chè [Iû-thài] sìn-tô͘ sū-hōng ê kong-êng. 5 In án-ni chòe m̄-nā chhiau-kè goán ê kî-thāi, sīm-chì chun-thàn Siōng-tè ê chí-ì tāi-seng chiong ka-kī hiàn hō͘ Chú, jiân-āu hiàn hō͘ goán. 6 Só͘-í goán khǹg [Thê-to] kè-sio̍k hia̍p-chō͘ lín, lâi oân-sêng i só͘ khai-sí chit hāng chû-siān ê kang-chok. 7 Lín ê sìn-sim, kháu-châi, tì-sek, pang-chān lâng ê jia̍t-sêng, í-ki̍p tùi goán ê thiàⁿ-sim lóng hiah-ni̍h hong-hù, goán ài lín tùi chit hāng chû-siān ê kang-chok mā tio̍h hiah-ni̍h khóng-khài. 8 Góa án-ni kóng m̄-sī teh bēng-lēng, sī ài lín chai pa̍t-lâng jia̍t-sim teh pang-chān lâng, lâi khó-giām lín ê thiàⁿ-sim sī m̄-sī chin ê. 9 Lín chai lán ê Chú Iâ-so͘ Ki-tok ê un-tián: I sui-jiân hù-chiok, m̄-kú ūi-tio̍h lín chiâⁿ-chòe sàn-chhiah, sī beh hō͘ lín in-ūi I ê sàn-chhiah chiâⁿ-chòe hù-chiok. 10 Koan-hē chit hāng tāi-chì, góa kiàn-gī lín khah hó chit sî tio̍h khì oân-sêng kū-nî khai-sí ê bō͘-koan; lín m̄-nā tāi-seng hêng-tōng, koh tāi-seng thê-chhiòng. 11 Taⁿ, lín tio̍h oân-sêng chit-ê kang-chok, ēng khí-thâu kè-ōe ê sî ê jia̍t-sim, chīn lín só͘-ōe khì chòe lâi oân-sêng. 12 Lín nā hoaⁿ-hí koan-hiàn, Siōng-tè ōe hoaⁿ-hí chiap-la̍p lín hiàn lín só͘ ū-ê, bōe iau-kiû lín hiàn lín só͘ bô-ê. 13 Góa m̄-sī beh ke-thiⁿ lín ê hū-tam, hō͘ pa̍t-lâng khah khin-sang. Kì-jiân lín hiān-chāi hù-chiok, tio̍h kiong-kip sàn-chhiah ê lâng. Án-ni, lín sàn-chhiah in hó-gia̍h ê sî, in mā ōe kiong-kip lín. Án-ni chiah ū kong-pîⁿ. 15 Chiàu Sèng-keng só͘ kì-chài: Chōe ê, bô chhun; chió ê, bô khiàm. 16 Kám-siā Siōng-tè hō͘ [Thê-to] chhin-chhiūⁿ góa chiah-ni̍h jia̍t-sim pang-chān lín. 17 I m̄-nā ū hoaⁿ-hí chiap-siū goán ê khún-kiû, koh hui-siông jia̍t-sim chū-goān pang-chān lín, koat-tēng beh khì lín hia. 18 Goán lēng-gōa phài chi̍t ê hiaⁿ-tī kap [Thê-to] chòe-hé khì; chit-ê hiaⁿ-tī tī thoân hok-im ê kang-chok ū siū-tio̍h chèng kàu-hōe ê chheng-chàn. 19 M̄-nā án-ni, i siū chèng kàu-hōe soán-phài chòe goán lú-hêng ê tâng-phōaⁿ, lâi chham-ka goán chit hāng chû-siān ê kang-chok; chit-ê kang-chok sī beh kui êng-kng hō͘ Chú, koh piáu-sī goán hoaⁿ-hí kam-goān teh chòe. 20 Goán hui-siông kín-sīn teh chhú-lí lâng khóng-khài hōng-hiàn ê chîⁿ-hāng, chiah-bián ín-khí lâng ê phoe-phêng. 21 In-ūi goán ê tōng-ki kong-bêng chèng-tāi, m̄-nā tī Chú ê bīn-chêng, tī lâng ê bīn-chêng mā-sī án-ni chòe. 22 Só͘-í goán beh koh phài chi̍t ê hiaⁿ-tī kap in chòe-hé khì. I keng-kè goán chin chōe piàn ê khó-giām, chai i tī chin chōe tāi-chì jia̍t-sim pang-chān lâng. Hiān-chāi i hui-siông sìn-jīm lín, chiū koh-khah jia̍t-sim beh pang-chān lín. 23 Kóng-tio̍h [Thê-to], i sī góa ê tâng-phōaⁿ, chòe góa ê tâng-kang pang-chān lín; kap i chòe-hé khì hiah-ê hiaⁿ-tī sī ta̍k kàu-hōe chhe-phài ê, sī Ki-tok ê êng-kng. 24 Só͘-í, lín tio̍h tùi ta̍k ê kàu-hōe kong-khai chèng-si̍t lín ê thiàⁿ-sim, koh chèng-si̍t goán tùi lín ê khoa-kháu.

2 Ko-lîm-to 9

1 Koan-hē chín-chè [Iû-thài] sìn-tô͘ ê sū, góa m̄-bián koh siá-phoe hō͘ lín. 2 Góa chai lín kam-sim pang-chān, góa bat ūi-tio̍h chit hāng tāi-chì tùi [Má-kî-tùn]-lâng khoa-kháu kóng, “[A-kai-a] ê sìn-tô͘ tī kū-nî chiū chún-pī piān.” Lín ê jia̍t-sim ū kám-tōng in tōa-pō͘-hūn ê lâng. 3 Góa ū chhe kúi-nā ê hiaⁿ-tī khì lín hia, ǹg-bāng lín chiàu góa só͘ kóng ê chún-pī piān, chiah-bián góa tī chit hāng tāi-chì ūi-tio̍h lín tùi lâng ê khoa-kháu lo̍k-khong. 4 Nā bô, [Má-kî-tùn]-lâng nā kap góa khì, khòaⁿ-tio̍h lín bô chún-pī piān, goán ōe in-ūi siuⁿ siong-sìn lín soah chin làu-khùi, lín kiám bōe koh-khah làu-khùi! 5 Só͘-í, góa siūⁿ eng-kai kó͘-lē hiah-ê hiaⁿ-tī seng khì lín hia, kiò lín chêng tah-èng beh koan-hiàn ê chîⁿ seng chún-pī piān. Án-ni góa kàu-ūi ê sî lín lóng chún-pī piān lah, piáu-sī lín ê koan-hiàn m̄-sī bián-kióng, sī kam-sim lo̍k-ì. 6 Tio̍h chai: Iā chió siu chió, iā chōe siu chōe. 7 Só͘-í ta̍k ê lâng tio̍h chiàu ka-kī só͘ koat-tēng ê lâi hiàn, m̄-thang m̄-kam, mā m̄-thang bián-kióng; in-ūi Siōng-tè thiàⁿ hoaⁿ-hí hōng-hiàn ê lâng. 8 Siōng-tè ōe chiong ta̍k hāng un-tián hong-hong hù-hù sù-hok hō͘ lín, m̄-nā ka-kī ta̍k hāng kàu-gia̍h, koh ōe-tàng chòe ta̍k hāng hó-sū. 9 Chiàu Sèng-keng só͘ kì-chài: I khóng-khài chín-chè sàn-chhiah-lâng; I ê jîn-gī sòa kàu éng-oán. 10 Kiong-kip chéng-chí hō͘ iā-chéng-ê, koh siúⁿ-sù chia̍h-mi̍h hō͘ lâng chia̍h hit-ūi Siōng-tè ōe chiong lín só͘ su-iàu ê chéng-chí kiong-kip lín, koh hō͘ chéng-chí ná chōe, mā hō͘ lín jîn-gī ê ké-chí hong-siu. 11 I ōe hō͘ lín sū-sū hù-chiok, thang sûi-sî khóng-khài si-sià, hō͘ chin chōe lâng thong-kè goán chiap-tio̍h lín ê lé-mi̍h lâi kám-siā Siōng-tè. 12 In-ūi lín só͘ chòe chit-ê sū-hōng ê kang-chok m̄-nā kái-koat sìn-tô͘ ê su-iàu, mā hō͘ in tùi Siōng-tè ê kám-siā ke-thiⁿ kàu móa chhut-lâi. 13 Thong-kè lín só͘ chòe chit-ê sū-hōng chèng-si̍t lín ū sūn-thàn só͘ soan-jīn ê Ki-tok ê hok-im, í-ki̍p lín tùi in kap kî-tha só͘-ū ê lâng khóng-khài ê koan-hiàn, thang kui êng-kng hō͘ Siōng-tè. 14 Siōng-tè sù lín bû-hān ê un-tián, hō͘ in ōe koh-khah kèng-ài lín, koh ūi-tio̍h lín kî-tó. 15 Kám-siā Siōng-tè, I ū hō͘ lán bōe-tàng hêng-iông ê un-sù!

2 Ko-lîm-to 10

1 Lâng kóng góa kap lín kìⁿ-bīn ê sî kheh-khì, kap lín saⁿ-lī ê sî giâm-hat, m̄-kú góa chit-ê [Pó-lô] ēng Ki-tok ê un-jiû kap jîn-chû chhin-sin khó͘-khǹg lín. 2 Góa khì lín hia ê sî m̄-thang pek góa tùi lín giâm-hat; tùi hiah-ê phoe-phêng kóng góa ēng sio̍k-sè ê tōng-ki chòe tāi-chì ê lâng, góa it-tēng ōe tùi in bô kheh-khì. 3 Sui-jiân lán tiàm sè-kan teh seng-oa̍h, m̄-kú bô chiàu sè-kan ê hong-sek teh cheng-chiàn. 4 Góa cheng-chiàn teh ēng ê m̄-sī sio̍k-sè, sī Siōng-tè ū ui-le̍k ê bú-khì, liân kian-kò͘ ê iàu-sài to ōe-tàng phò-hoāi. Goán thui-hoan in ê giân-lūn, 5 chiong chó͘-tòng lâng jīn-bat Siōng-tè it-chhè ê kiau-ngō͘ lóng kā siau-bia̍t, koh kái-piàn it-chhè ê ì-liām, hō͘ i oân-choân kui-sūn Ki-tok. 6 Lín oân-choân sūn-ho̍k Ki-tok liáu-āu, goán chiū chhú-hoa̍t ta̍k ê m̄ sūn-ho̍k ê lâng. 7 Lín kan-ta teh khòaⁿ gōa-piáu. Nā ū lâng káⁿ kóng i sio̍k Ki-tok, i ka-kī tio̍h koh siūⁿ khòaⁿ-bāi, i sio̍k Ki-tok, góa mā kâng-khoán sio̍k Ki-tok. 8 Chú hō͘ goán ê koân-pèng sī beh kā lín kiàn-li̍p, m̄-sī beh húi-hoāi. Góa tùi chit-ê koân-pèng nā ū khah khoa-kháu, góa mā bô kám-kak kiàn-siàu. 9 Góa bô ài hō͘ lín siūⁿ-kóng góa siá-phoe teh kā lín khióng-hat. 10 In-ūi ū lâng kóng, “[Pó-lô] ê phoe giâm-hat koh kiông-ngī, m̄-kú lâng lâi ê sî khiok nńg-chiáⁿ, kóng-ōe bô hūn-liōng.” 11 Kóng chit khoán ōe ê lâng tio̍h chai, goán bô tī lín hia ê sî phoe án-chóaⁿ siá, goán kàu lín hia ê sî mā ōe án-ni chòe. 12 Goán m̄-káⁿ kap gâu tián ka-kī ê lâng pâi-teh saⁿ-pí; in án-ni pí-chhú chhìn-tāng, hō͘-siōng pí-kàu, si̍t-chāi bô tì-hūi. 13 Liân tī lín tiong-kan ê kang-chok pau-hâm chāi-lāi, goán ê khoa-kháu lóng tī Siōng-tè tēng ê hān-tō͘ lāi, lóng bô chhiau-kè. 14 Goán bô chhiau-kè hoān-ûi, bô khì lín hia mā kóng ū khì; kî-si̍t, goán sī thâu-chi̍t ê chiong Ki-tok ê hok-im thoân hō͘ lín ê. 15 Goán pèng bô chhiau-kè hān-tō͘, ēng pa̍t-lâng só͘ lô-khó͘ ê chòe ka-kī ê sêng-chek lâi khoa-kháu. Goán só͘ ǹg-bāng ê sī lín ê sìn-sim ná cheng-tióng, goán tī lín tiong-kan kang-chok ê hoān-ûi mā ná khui-khoah. 16 Án-ni, goán chiah thang chiong hok-im thoân kàu lín í-gōa ê tōe-khu, bô ēng pa̍t-lâng tī pa̍t ê hoān-ûi ê sêng-chiū chòe khoa-kháu. 17 Chiàu Sèng-keng só͘ kóng, “Beh khoa-kháu ê lâng, tio̍h khoa-kháu Chú!” 18 In-ūi m̄-sī ka-kī chhui-chiàn, sī Chú só͘ chhui-chiàn ê chiah-sī kham-tit siū chiap-la̍p ê lâng.

2 Ko-lîm-to 11

1 Chhiáⁿ lín khoan-iông góa sió-khóa ê gû-gōng; chhiáⁿ khoan-iông góa! 2 Góa thiàⁿ lín, chhin-chhiūⁿ Siōng-tè thiàⁿ lín thiàⁿ-kah beh khí chi̍t-tò͘. In-ūi lín chhin-chhiūⁿ sûn-kiat ê chāi-sek-lú, góa ū chiong lín phòe hō͘ chi̍t ê tiōng-hu, chiū-sī Ki-tok. 3 Chhin-chhiūⁿ [Hā-oa] hō͘ chôa ê khúi-chà phiàn-khì, góa mā kiaⁿ-liáu lín ê sim-su ōe siū bê-he̍k, soah khì-sak tùi Ki-tok ê sûn-kiat kap chin-sêng. 4 In-ūi tùi ū lâng khì lín hia thoân kap goán só͘ thoân bô kâng ê Iâ-so͘, á-sī lín chiap-la̍p kap lín chêng só͘ chiap-la̍p bô kâng ê Sèng Sîn, á-sī lín chiap-siū kap lín chêng só͘ chiap-siū bô kâng ê hok-im, lín mā lóng iông-jím. 5 Kap hiah-ê “chhiau-kip sù-tô͘” pí, góa siūⁿ góa chi̍t-sut-á to bô khah-su. 6 Kiám-chhái góa kóng-ōe khah ham-bān, m̄-kú tì-sek bô pí lâng khah-su, chit hāng sū góa í-keng ū ēng ta̍k khoán hong-hoat, lī-iōng ta̍k chióng ki-hōe tùi lín piáu-bêng. 7 Ūi-tio̍h beh kā lín ko-seng, góa kàng-kē ka-kī, chiong hok-im pe̍h-pe̍h thoân hō͘ lín, án-ni kiám ū sǹg hoān-chōe? 8 Góa tī lín hia sū-hōng ê sî, góa ê só͘-hùi lóng sī pa̍t ê kàu-hōe kā góa kiong-kip. Kóng khí-lâi, góa sī teh pak-siah pa̍t ê kàu-hōe lâi pang-chān lín. 9 Góa tī lín hia ê sî, ū sím-mi̍h su-iàu lóng m̄-bat kiû lín pang-chān, kā lín mâ-hoân; it-chhè ê su-iàu lóng sī [Má-kî-tùn] lâi ê sìn-tô͘ kā góa kiong-kip. Góa í-chêng bô kā lín mâ-hoân, í-āu mā bōe kā lín mâ-hoân. 10 Góa chí só͘ sìn Ki-tok ê chin-lí chiù-chōa, tī choân [A-kai-a]-séng kéng-lāi, góa lóng káⁿ án-ni tián. 11 Sī án-chóaⁿ? Kiám kóng góa bô thiàⁿ lín? Góa ū, Siōng-tè chai! 12 Góa teh chòe ê, góa beh kè-sio̍k chòe, sī beh hō͘ hiah-ê siūⁿ-beh kap goán siâng-khoán choh “sù-tô͘” ê bô ki-hōe thang khoa-kháu. 13 Chit khoán lâng sī ké sù-tô͘, chòe tāi-chì kan-chà, ké-chòe sī Ki-tok ê sù-tô͘. 14 Che bô kî-koài, liân Sat-tàn pún-sin mā ké-chòe kng-bêng ê thiⁿ-sài. 15 Án-ni Sat-tàn ê po̍k-jîn nā ké-chòe gī ê po̍k-jîn mā m̄-sī sím-mi̍h tōa tāi-chì. Chòe-āu in ê hêng-ûi ōe siū-tio̍h èng-tit ê pò-èng. 16 Góa koh kóng chi̍t piàn, m̄-thang khòaⁿ góa chòe gōng-lâng; m̄-kú nā beh, kā góa chiap-la̍p chòe gōng-lâng, góa chiah thang tián chi̍t-ē. 17 Góa chit-chūn teh kóng ê m̄-sī Chú ê ì-sù, sī chòe chi̍t ê gōng-lâng teh tián. 18 Kì-jiân ū chiah-ni̍h chōe lâng teh tián sio̍k-sè ê sū, góa mā beh tián chi̍t-ē. 19 Lín to hiah-ni̍h khiáu, eng-kai ōe hoaⁿ-hí iông-jím góa chit-ê gōng-lâng chiah tio̍h. 20 Nā ū lâng kā lín tòng-choh lô͘-lē chhe-kah, kā lín phiⁿ, kā lín hām-hāi, kā lín khòaⁿ-khin, á-sī kā lín siàn chhùi-phóe, lín to ōe iông-jím. 21 Chin kiàn-siàu, góa tio̍h sêng-jīn, chit khoán tāi-chì goán m̄-káⁿ chòe. M̄-kú nā ū lâng káⁿ tián sím-mi̍h, chún-chòe chi̍t ê gōng-lâng lâi kóng, góa mā káⁿ. 22 In sī [Hi-pek-lâi]-lâng sī-bô? Góa mā-sī. In sī [Í-sek-lia̍t]-lâng sī-bô? Góa mā-sī. In sī [A-pek-la-hán] ê kiáⁿ-sun sī-bô? Góa mā-sī. 23 In sī Ki-tok ê chhe-ēng sī-bô? Góa chún-chòe siáu-lâng lâi kóng, góa koh-khah sī. Góa siū koh-khah chōe lô-khó͘, chē koh-khah chōe kaⁿ, siū sǹg bōe-liáu ê piⁿ-phah, chin chōe piàn hiám-hiám-á sí. 24 Góa gō͘ piàn hō͘ [Iû-thài]-lâng piⁿ-phah, ta̍k piàn sì-cha̍p ē kiám chi̍t ē. 25 Góa saⁿ piàn hō͘ [Lô-má]-lâng ēng kùn-á kòng, chi̍t piàn hō͘ lâng ēng chio̍h-thâu tìm, saⁿ piàn tú-tio̍h chûn phòa, chi̍t piàn tī hái-ni̍h phiau-liû chi̍t-mî chi̍t-ji̍t. 26 Tī lú-hêng tiong góa tú-tio̍h tōa-chúi ê gûi-hiám, chhiúⁿ-kiap ê gûi-hiám, [Iû-thài] tông-pau kap Gōa-pang-lâng ê hām-hāi; mā ū siâⁿ-chhī ê gûi-hiám, khòng-iá ê gûi-hiám, hái-siōng ê gûi-hiám, kap ké hiaⁿ-tī ê gûi-hiám. 27 Góa lô-lo̍k thoa-bôa, siông-siông bô khùn, iau-gō chhùi-ta, bô thang chia̍h, bô thang tòa, bô thang chhēng. 28 Kî-tha ê tāi-chì bián kóng, kan-ta ta̍k ji̍t ūi-tio̍h só͘-ū ê kàu-hōe khòa-lū í-keng kàu-gia̍h. 29 Siáⁿ-lâng loán-jio̍k, góa bô loán-jio̍k? Siáⁿ-lâng hoān-chhò sit-pāi, góa bô siū-khì hé-to̍h? 30 Góa nā tio̍h tián, beh tián góa ê loán-jio̍k. 31 Lán ê Chú Iâ-so͘ ê Pē Siōng-tè --- goān I ê miâ éng-oán tit-tio̍h chheng-chàn --- I chai góa bô kóng pe̍h-chha̍t. 32 Góa tī [Tāi-má-sū-kek] ê sî, [A-lí-ta̍t]-ông chhiú-ē ê chóng-tok phài siú-ōe kò͘-siú siâⁿ-mn̂g, beh kā góa lia̍h, 33 m̄-kú ū lâng ēng tōa-kha nâ tùi siâⁿ-chhiûⁿ ê thang-á kā góa lūi lo̍h-khì, hō͘ góa thoat-lī i ê chhiú.

2 Ko-lîm-to 12

1 Góa it-tēng tio̍h tián. Sui-jiân bô lī-ek, m̄-kú góa beh kóng Chú hō͘ góa ê īⁿ-siōng kap khé-sī. 2 Góa chai ū chi̍t ê Ki-tok-tô͘ tī cha̍p-sì nî chêng hō͘ Chú chhōa kàu tē-saⁿ chàn thiⁿ. Góa m̄-chai i ê seng-khu ū chiūⁿ-khì, á-sī kan-ta khòaⁿ-kìⁿ īⁿ-siōng, chí-ū Siōng-tè chai. 3 Góa chai ū chi̍t ê lâng siū chhōa kàu Lo̍k-hn̂g. I ê seng-khu ū siū chiap chiūⁿ-khì, á-sī kan-ta khòaⁿ-kìⁿ īⁿ-siōng, góa m̄-chai, chí-ū Siōng-tè chai. Tī hia i ū thiaⁿ-kìⁿ ēng ōe bōe-tàng piáu-ta̍t, ēng chhùi bōe-tàng kóng chhut ê sū. 5 Góa beh tián chit-ê lâng; m̄-kú góa ê loán-jio̍k í-gōa, góa bōe ūi-tio̍h ka-kī tián. 6 Kî-si̍t, góa nā beh tián, mā bōe sǹg-sī khong-khám, in-ūi góa beh kóng ê sī sū-si̍t. M̄-kú góa bōe tián ka-kī, chiah-bián lâng tùi góa ê phêng-kè chhiau-kè in só͘ khòaⁿ-tio̍h só͘ thiaⁿ-kìⁿ ê. 7 Ūi-tio̍h beh hō͘ góa bô in-ūi ū khòaⁿ-kìⁿ chin chōe ê khé-sī tì-kàu chū-ko tek-ì, tī góa ê seng-khu ū chi̍t ki chhì, chhin-chhiūⁿ Sat-tàn ê sù-chiá teh kā góa khó͘-chhó͘, hō͘ góa bōe siuⁿ chū-ko tek-ì. 8 Ūi-tio̍h chit hāng tāi-chì, góa bat saⁿ piàn khún-kiû Chú hō͘ hit ki chhì lī-khui. 9 I ìn góa kóng, “Góa ê un-tián ū-kàu thang boán-chiok lí ê su-iàu; in-ūi lí loán-jio̍k ê sî, góa ê khùi-la̍t chiah ōe-tàng oân-choân hoat-hui.” In-ūi án-ni, góa te̍k-pia̍t ài khoa-kháu góa ê loán-jio̍k, thang hō͘ Ki-tok ê khùi-la̍t tiàm tī góa sin-chiūⁿ. 10 Ūi-tio̍h Ki-tok ê iân-kò͘, góa kā loán-jio̍k, bú-jio̍k, khùn-khó͘, kan-lân, kap pek-hāi khòaⁿ-chòe hó, in-ūi góa loán-jio̍k ê sî, góa siōng kian-kiông. 11 Góa it-ti̍t chòe gōng-lâng, sī lín kā góa pek ê; lín tio̍h kā góa po-chióng chiah tio̍h. Sui-jiân góa bô siū tiōng-sī, mā bô khah-su hiah-ê “chhiau-kip sù-tô͘”. 12 Góa tī lín tiong-kan ū ēng siōng-tōa ê nāi-sim kiâⁿ sîn-jiah, kî-sū kap koân-lêng, chèng-bêng góa sī sù-tô͘. 13 Góa bô hō͘ lín ki-hōe pang-chān góa í-gōa, góa tùi-thāi lín pí tùi-thāi kî-tha ê kàu-hōe, ū tó chi̍t hāng chòe khah bô kàu? Góa chit-ê “bô kong-tō”, chhiáⁿ lín goân-liōng 14 Taⁿ góa tē-saⁿ piàn chún-pī beh khì hóng-būn lín. Góa bōe chiâⁿ-chòe lín ê hū-tam; góa bōe iau-kiû lín sím-mi̍h, in-ūi góa só͘ ài ê sī lín, m̄-sī lín ê chîⁿ. Eng-kai sī pē-bú ūi-tio̍h kiáⁿ-jî, m̄-sī kiáⁿ-jî ūi-tio̍h pē-bú chek-chū châi-bu̍t. 15 Góa chin hoaⁿ-hí ūi-tio̍h lín hù-chhut góa só͘-ū ê, sīm-chì liân góa pún-sin to oân-choân hù-chhut. Kiám kóng góa thiàⁿ lín jú chōe, tio̍h tit-tio̍h lín ê thiàⁿ jú chió? 16 Chún kóng góa khúi-kè to-toan, ēng khi-phiàn lī-iōng lín tit-tio̍h lī-ek, góa kiám bat kā lín thoa-lūi? 17 Góa kiám ū phài sím-mi̍h lâng khì kā lín phiⁿ? 18 Góa ū khǹg [Thê-to] khì lín hia, koh phài chi̍t ê hiaⁿ-tī kap i chòe-hé khì. [Thê-to] kiám ū phiⁿ lín? Goán kiám bô kâng sim-sîn teh chòe? Kiám bô kâng pō͘-tiau teh kiâⁿ? 19 Lín it-ti̍t siūⁿ-kóng goán tùi lín teh ūi-tio̍h ka-kī piān-hō͘ sī-bô? M̄-sī! Goán tī Siōng-tè bīn-chêng kóng Ki-tok ài goán kóng ê ōe. Chhin-ài ê pêng-iú, goán só͘ chòe ê lóng sī beh hō͘ lín tit-tio̍h chō-chiū. 20 Góa kiaⁿ-liáu khì lín hia ê sî khòaⁿ-kìⁿ lín kap góa só͘ kî-thāi ê bô sio-siâng; lín khòaⁿ-kìⁿ góa kap lín tùi góa ê kî-thāi mā bô sio-siâng. Góa kiaⁿ-liáu lín ū hun-cheng, chi̍t-tò͘, pháiⁿ-sèng-tē, chū-su, húi-pòng, kóng ka-chiah-āu-ōe, kiau-ngō͘, bô tia̍t-sū. 21 Góa kiaⁿ-liáu āu-piàn koh khì lín hia ê sî, góa ê Siōng-tè ōe hō͘ góa tī lín bīn-chêng kiàn-siàu. Góa ōe ūi-tio̍h chin chōe lâng thî-khàu, in-ūi in tùi kè-khì só͘ hoān ê chōe, ù-òe, îm-loān, hòng-tōng iáu-bē hóe-kái.

2 Ko-lîm-to 13

1 Che sī góa tē-saⁿ piàn beh khì lín hia. Sèng-keng kóng, “Bô-lūn kò sím-mi̍h, tio̍h ū nn̄g ê á-sī saⁿ ê chèng-jîn.” 2 Tùi hiah-ê í-chêng hoān-chōe kap kî-tha lóng-chóng ê lâng, tī góa tē-jī piàn hóng-būn ê sî góa ū kā lín kéng-kò, hiān-chāi góa bô tī lín hia, beh koh chi̍t piàn kā lín kéng-kò, āu-piàn góa khì ê sî, góa chiū bōe pàng lín soah; 3 in-ūi lín só͘ teh chhē Ki-tok thong-kè góa kóng-ōe ê chèng-kù, lín ōe tit-tio̍h. I tùi-thāi lín pèng m̄-sī loán-jio̍k, tian-tò tī lín tiong-kan hián-chhut tōa lêng-le̍k. 4 Sui-jiân I in-ūi loán-jio̍k siū tèng-sí tī si̍p-jī-kè, m̄-kú I khò Siōng-tè ê tōa lêng-le̍k teh oa̍h. Goán kap I kiat-liân pìⁿ-chòe loán-jio̍k, m̄-kú ūi-tio̍h lín, goán khò Siōng-tè ê tōa lêng-le̍k ōe kap I chòe-hé oa̍h. 5 Lín tio̍h séng-chhat ka-kī, khòaⁿ ū chiàu sìn-gióng teh seng-oa̍h bô? Tio̍h khó-giām ka-kī. Iâ-so͘ Ki-tok tī lín lāi-bīn, lín ka-kī it-tēng chai --- lín khó-giām nā bô thong-kè chiū bián kóng. 6 Góa ǹg-bāng lín chai, goán khó-giām lóng ū thong-kè. 7 Goán kî-kiû Siōng-tè hō͘ lín bōe chòe m̄-tio̍h; che m̄-sī beh piáu-sī goán khó-giām ū thong-kè, sī beh hō͘ lín chòe tio̍h ê tāi-chì, sui-jiân goán hō͘ lâng khòaⁿ-chòe khó-giām bô thong-kè mā bô iàu-kín. 8 In-ūi goán bōe-tàng chòe ûi-pōe chin-lí ê tāi-chì, chí-ū ióng-hō͘ chin-lí. 9 Goán loán-jio̍k, lín kian-kiông, goán chiū hoaⁿ-hí. Goán só͘ kî-kiû ê sī lín ōe-tàng chiâⁿ-chòe oân-choân. 10 In-ūi án-ni, thàn góa bô tī lín hia ê sî siá chit tiuⁿ phoe, chiah-bián góa khì ê sî ēng Chú hō͘ góa ê koân-pèng giâm-hat tùi-thāi lín; chit-ê koân-pèng sī beh kiàn-li̍p, m̄-sī beh thiah-húi. 11 Hiaⁿ-tī chí-bē, chhiáⁿ pó-tiōng. Tio̍h tui-kiû oân-choân, hō͘-siōng kó͘-lē. Tio̍h tâng-sim, hô-bo̍k siong-chhù. Goān sù chû-ài kap pêng-an ê Siōng-tè kap lín tông-chāi! 12 Tio̍h ēng sèng-kiat ê saⁿ-chim hō͘-siōng chhéng-an! Só͘-ū ê sìn-tô͘ lóng beh kā lín chhéng-an! 13 Goān Chú Iâ-so͘ Ki-tok ê un-tián, Siōng-tè ê chû-ài, Sèng Sîn ê thoân-khè, kap lín tāi-ke tông-chāi!

AMAZING GRACE BIBLE INSTITUTE