1 Peter

1 Pí-tek

1 Pí-tek 1

1 Góa --- [Pí-tek] sī Iâ-so͘ Ki-tok ê sù-tô͘, góa siá-phoe hō͘ hun-sòaⁿ tī [Pún-to͘], [Ka-lia̍p-thài], [Ka-phàⁿ-to-ka], [A-se-a], [Pí-chhui-nî] téng só͘-chāi khiā-khí ê lâng. 2 Lín siū kéng-soán sī chiàu Pē Siōng-tè ū-tēng ê chí-ì, tùi Sèng Sîn chiâⁿ-chòe sèng-kiat, thang sūn-ho̍k Iâ-so͘ Ki-tok, koh tùi I ê huih tit-tio̍h kiat-chēng. Goān Siōng-tè hong-hong hù-hù sù lín un-tián kap pêng-an! 3 Tio̍h chheng-chàn lán ê Chú Iâ-so͘ Ki-tok ê Pē Siōng-tè! Kun-kù I bô-hān ê jîn-chû, thong-kè Iâ-so͘ Ki-tok tùi sí-lâng tiong koh-oa̍h, Siōng-tè ū hō͘ lán têng-chhut-sì thang tit-tio̍h oa̍h-oa̍h ê ǹg-bāng, 4 lâi sêng-siū I ūi-tio̍h lín pó-chûn tī thiⁿ-ni̍h hit-ê bōe hiú-nōa, bōe phah lâ-sâm, bōe siau-sit ê hok-khì. 5 Che sī beh hō͘ lín chiah-ê thong-kè sìn siū I ê tōa lêng-le̍k pó-siú ê lâng thang tit-tio̍h chún-pī tī chiong-boa̍t ê sî-ki beh si̍t-hiān ê chín-kiù. 6 Ūi-tio̍h án-ni, sui-jiân lín hiān-chāi chiām-sî iáu tio̍h siū chióng-chióng ê chhì-liān sim kan-khó͘, lín tio̍h hoaⁿ-hí. 7 Che sī beh chèng-bêng lín ê sìn-sim kham-tit siū khó-giām, pí hō͘ hé liān-kè iáu ōe pāi-hoāi ê kim koh-khah pó-kùi, thang hō͘ lín tī Iâ-so͘ Ki-tok hián-hiān ê sî tit-tio̍h o-ló, êng-kng, kap chun-kùi. 8 Lín sui-jiân m̄-bat khòaⁿ-tio̍h I, mā thiàⁿ I; hiān-chāi bô khòaⁿ-kìⁿ I, iáu-kú sìn I. Lín ū ēng giân-gú bōe-tàng piáu-ta̍t ke̍k-tōa ê hoaⁿ-hí, 9 in-ūi lín ōe tit-tio̍h sìn ê kiat-kó, chiū-sī lêng-hûn ê tit-kiù. 10 Koan-hē chit-ê chín-kiù, ū-giân lín ōe tit-tio̍h un-tián hiah-ê sian-ti í-keng ū gián-kiù koh siông-sè cha-khó. 11 In tit-tio̍h tī in sim-lāi Ki-tok ê Sîn tùi in ê chí-sī, cha-khó koan-hē Ki-tok ê siū-khó͘ kap āu-lâi tit-tio̍h êng-kng chit-ê ū-giân ōe tī sím-mi̍h sî, ōe án-chóaⁿ si̍t-hiān. 12 Siōng-tè ū kā in khé-sī, hō͘ in chai in ê sū-hōng m̄-sī ūi-tio̍h ka-kī, sī ūi-tio̍h lín. Chiah-ê sū hiān-chāi í-keng ū khò tùi thiⁿ lâi ê Sèng Sîn, thong-kè hok-im ê sù-chiá thoân ho͘ lín; chiah-ê sū liân thiⁿ-sài mā pek-chhiat teh thèng-hāu ài chai. 13 Só͘-í, lín ê sim-chì tio̍h chún-pī piān, tio̍h kéng-séng, choân-sim ǹg-bāng Iâ-so͘ Ki-tok hián-hiān ê sî só͘ beh sù lín ê un-tián. 14 Tio̍h chòe sūn-ho̍k ê kiáⁿ-jî, m̄-thang chiàu lín chêng m̄-bat Siōng-tè ê sî án-ni hòng-chhiòng su-io̍k. 15 Ho͘-tiàu lín ê Siōng-tè sī sèng-kiat, lín tī it-chhè ê hêng-ûi mā tio̍h sèng-kiat. 16 In-ūi Sèng-keng ū kì-chài, “Lín tio̍h sèng-kiat, in-ūi góa sī sèng-kiat. ” 17 Lín kì-jiân kiû-kiò ēng kâng chi̍t ê phiau-chún, chiàu ta̍k lâng ê hêng-ûi sím-phòaⁿ lâng Hit-ūi chòe Pē, chiū tio̍h ēng kèng-ùi ê sim tī sè-kan ê ji̍t-chí choh kiâu-bîn seng-oa̍h. 18 In-ūi lín chai, lín siū sio̍k-hôe thoat-lī chó͘-sian lâu hō͘ lín hit khoán bô lō͘-ēng ê thoân-thóng, m̄-sī ēng ōe pāi-hoāi ê kim-gûn, 19 sī ēng hit-ūi bô khoat-tiám bô ù-tiám ê iûⁿ-ko Ki-tok só͘ lâu ê pó-huih. 20 Ki-tok tī chhòng-chō ú-tiū í-chêng seng hō͘ Siōng-tè kéng-soán, tī chit-ê boa̍t-kî chiah ūi-tio̍h lín hián-hiān. 21 Lín thong-kè Ki-tok sìn hō͘ I tùi sí-lâng tiong koh-oa̍h koh sù I êng-kng hit-ūi Siōng-tè; án-ni, lín ê sìn kap ǹg-bāng lóng chāi-tī Siōng-tè. 22 Lín í-keng tùi sūn-thàn chin-lí lâi kiat-chēng ka-kī, ū sûn-chin ê chhiú-chiok-chi-chêng, chiū tio̍h ēng chheng-khì ê sim tùi sim-tóe jia̍t-chhiat saⁿ-thiàⁿ. 23 Lín m̄-sī tùi ōe pāi-hoāi, sī tùi bōe pāi-hoāi ê chéng-chí, chiū-sī thong-kè Siōng-tè oa̍h-oa̍h, éng-oán bōe bô-khì ê ōe lâi têng-chhut-sì. 24 In-ūi Sèng-keng ū kì-chài: Lâng lóng chhin-chhiūⁿ chháu, in ê êng-hôa lóng chhin-chhiūⁿ chháu hoe; chháu ōe ta, hoe ōe siā, 25 chóng-sī Chú ê ōe éng-oán chûn-chāi. Che chiū-sī thoân hō͘ lín ê hok-im ê sìn-sit.

1 Pí-tek 2

1 Só͘-í, tio̍h khì-sak it-chhè ê pháiⁿ, it-chhè ê khúi-chà, ké-hó, chi̍t-tò͘, kap it-chhè ê húi-pòng. 2 Tio̍h chhin-chhiūⁿ tú chhut-sì ê eⁿ-á chin ài sûn ê sio̍k-lêng ê lin, hō͘ lín thang sêng-tióng kàu tit-tio̍h kiù; 3 in-ūi lín í-keng ū tam-tio̍h Chú ê jîn-chû. 4 Tio̍h chhin-kūn Chú, I sī oa̍h-chio̍h, sui-jiân hō͘ lâng khì-sak, m̄-kú siū Siōng-tè kéng-soán khòaⁿ-chòe pó-kùi. 5 Lín mā tio̍h choh oa̍h-chio̍h, hō͘ Siōng-tè ēng lâi khí-chō sio̍k-lêng ê tiān, koh choh sèng-kiat ê chè-si, thong-kè Iâ-so͘ Ki-tok hiàn Siōng-tè só͘ hoaⁿ-hí sio̍k-lêng ê chè-mi̍h. 6 In-ūi Sèng-keng ū kì-chài: Khòaⁿ ah, góa beh tī Sek-an hē chi̍t tè chio̍h, sī siū kéng pó-kùi ê chhù-kak-chio̍h; sìn I ê lâng choa̍t-tùi bōe sit-bāng. 7 Chit tè chio̍h tùi lín chiah-ê sìn ê lâng sī pó-kùi ê, m̄-kú tùi m̄-sìn ê lâng sī: Khí-chhù sai-hū só͘ khì-sak ê chio̍h í-keng chiâⁿ-chòe siōng tiōng-iàu ê ki-chio̍h! 8 Tī pa̍t-ūi ū kì-chài: Chit tè sī poàn-kha-chio̍h, sī hō͘ lâng poa̍h-tó ê chio̍h. In m̄ sūn-thàn tō-lí lâi poa̍h-tó sī Siōng-tè ê an-pâi. 9 M̄-kú lín leh, lín sī siū kéng-soán ê chióng-cho̍k, ông-ka ê chè-si, sèng-kiat ê kok-tō͘, Siōng-tè ê chú-bîn, beh hō͘ lín thang soan-iông Siōng-tè úi-tāi ê chok-ûi; chit-ūi Siōng-tè ū tiàu lín chhut o͘-àm lâi ji̍p tī I chhàn-lān ê kng-bêng. 10 Sèng-keng kóng: Lín chêng m̄-sī Siōng-tè ê chú-bîn, hiān-chāi sī I ê chú-bîn; lín chêng bô tit-tio̍h Siōng-tè ê lîn-bín, hiān-chāi tit-tio̍h I ê lîn-bín. 11 Chhin-ài ê hiaⁿ-tī chí-bē, lín tī sè-kan choh kiâu-bîn, choh lú-kheh, góa khǹg lín m̄-thang hòng-chhiòng jio̍k-thé ê chêng-io̍k; chit-ê chêng-io̍k put-sî teh kong-kek lêng-hûn. 12 Lín tī bī-sìn-chiá ê tiong-kan tio̍h ū hó hêng-ûi, hō͘ hiah-ê húi-pòng lín sī pháiⁿ-lâng ê lâng thang khòaⁿ-kìⁿ lín ê hó hêng-ûi, tī Chú lâi-lîm ê Ji̍t kui êng-kng hō͘ Siōng-tè. 13 Ūi-tio̍h Chú ê iân-kò͘, lín tio̍h sūn-thàn lâng it-chhè ê chè-tō͘, bô-lūn sī tùi chòe-ko ê thóng-tī-chiá kun-ông, 14 á-sī tùi kun-ông só͘ phài lâi chióng-lē chòe hó ê lâng, hêng-hoa̍t chòe pháiⁿ ê lâng ê koaⁿ-tiúⁿ lóng tio̍h án-ni. 15 In-ūi che sī Siōng-tè ê chí-ì; I ài lín chòe hó, hō͘ bô tì-sek ê gōng-lâng bô ōe thang kóng. 16 Lín choh chū-iû ê lâng, m̄-thang ēng chū-iû chòe siâ-ok ê chià-kháu, tio̍h choh Siōng-tè ê lô͘-po̍k. 17 Lín tio̍h chun-tiōng só͘-ū ê lâng; tio̍h thiàⁿ hiaⁿ-tī chí-bē, kèng-ùi Siōng-tè, chun-kèng kun-ông. 18 Lín choh po̍k-jîn ê, tio̍h kiong-kèng sūn-thàn lín ê chú-lâng, m̄-nā tùi siān-liông un-hô ê chú-lâng, liân khek-po̍k ê mā tio̍h án-ni. 19 Tú-tio̍h bô eng-kai siū ê thòng-khó͘, nā liáu-kái sī Siōng-tè ê ì-sù lâi jím-siū sī thang chheng-chàn ê. 20 Lín nā chòe m̄-tio̍h hō͘ lâng phah lâi jím-siū thòng-khó͘, ū sím-mi̍h thé-biān? M̄-kú lín nā choh-hó lâi jím-siū khó͘-lān, che sī Siōng-tè só͘ chheng-chàn ê. 21 Ūi-tio̍h chit-ê, Siōng-tè ho͘-tiàu lín; in-ūi Ki-tok mā ū ūi-tio̍h lín siū-khó͘, lâu bô͘-iūⁿ hō͘ lín, beh hō͘ lín thang tè I ê kha-pō͘. 22 I bô hoān-chōe; I ê chhùi mā bô khúi-chà. 23 I siū lóe-mē, bô lóe-mē tò-tńg; siū ge̍k-thāi, mā bô kā lâng ui-hia̍p; chí-ū chiong ka-kī kau-thok hō͘ hit-ūi kong-gī ê Sím-phòaⁿ-chiá. 24 Ki-tok tī si̍p-jī-kè téng chhin-sin tam-tng lán ê chōe, hō͘ lán ǹg chōe sí, ǹg gī lâi oa̍h; tùi I ê siū-siong, lín tit-tio̍h i-tī. 25 Lín chêng chhin-chhiūⁿ iûⁿ bê-lō͘, hiān-chāi í-keng tńg-lâi kui tī lín lêng-hûn ê Bo̍k-chiá kap Kàm-hō͘-chiá.

1 Pí-tek 3

1 Siâng-khoán, lín choh hū-jîn-lâng-ê tio̍h sūn-ho̍k ka-kī ê tiōng-hu. Án-ni, in tiong-kan nā ū lâng bô sūn-thàn tō-lí ê, ōe tùi lín ê hó phín-hēng siū kám-hòa; lín lóng m̄-bián kóng pòaⁿ-kù ōe, 2 in-ūi in ōe khòaⁿ-chhut lín ê seng-oa̍h sûn-kiat koh kèng-khiân. 3 Lín m̄-thang khò pīⁿ thâu-mn̂g, kòa kim-khì, chhēng súi-saⁿ téng chng-thāⁿ, 4 tio̍h khò lōe-chāi ê súi, ēng un-jiû kap an-chēng ê sèng-chêng chòe bōe pāi-hoāi ê chng-thāⁿ; che tī Siōng-tè ê bīn-chêng sī siōng pó-kùi ê. 5 In-ūi chá-sî gióng-bōng Siōng-tè hiah-ê sèng-kiat ê hū-jîn-lâng mā-sī án-ni chng-thāⁿ ka-kī, sūn-ho̍k in ê tiōng-hu; 6 chhin-chhiūⁿ [Sat-la̍h] sūn-chiông [A-pek-la-hán], chheng-ho͘ i chòe “Chú-lâng”. Lín nā chòe hó-sū, bô siū khióng-hat tì-kàu kiaⁿ-hiâⁿ, chiū-sī [Sat-la̍h] ê cha-bó͘-kiáⁿ. 7 Kâng-khoán, lín choh tiōng-hu-ê tio̍h kap ka-kī ê hū-jîn-lâng chòe-hé seng-oa̍h, thé-thiap in jio̍k-thé-siōng khah loán-jio̍k. Tio̍h kā in chun-tiōng, in-ūi in mā kap lín pîⁿ-pîⁿ sī hun-hióng Siōng-tè un-sù ê oa̍h-miā ê lâng. Án-ni, lín ê kî-tó chiah bōe siū chó͘-gāi. 8 Chóng kóng, lín tio̍h tâng-sim, tâng-chêng, saⁿ-thiàⁿ chhin-chhiūⁿ hiaⁿ-tī chí-bē, tio̍h ū jîn-chû, sim chûn khiam-pi; 9 bô ēng pháiⁿ pò pháiⁿ, á-sī ēng bú-jio̍k tùi-hù bú-jio̍k; tian-tò tio̍h ēng chiok-hok hôe-pò, in-ūi lín sī ūi-tio̍h chit-ê siū ho͘-tiàu, hō͘ lín thang sêng-siū hok-khì. 10 In-ūi Sèng-keng ū kì-chài: Lâng nā ài sìⁿ-miā, ài kè hó ji̍t-chí, tio̍h kìm-chí chhùi-chi̍h bô kóng pháiⁿ ōe, chhùi-tûn bô kóng khúi-chà. 11 Tio̍h lī-khui pháiⁿ, chòe hó-sū, it-sim tui-kiû hô-pêng. 12 In-ūi Chú ê ba̍k-chiu khòaⁿ-kò͘ gī-lâng, I ê hīⁿ-khang thiaⁿ in ê kî-kiû; m̄-kú I ōe tùi choh-pháiⁿ ê lâng pìⁿ-bīn. 13 Lín nā jia̍t-sim choh-hó, siáⁿ-lâng ōe hāi lín? 14 Chóng-sī lín nā ūi-tio̍h gī siū-khó͘, chiū ū hok-khì. M̄-bián kiaⁿ lâng ê ui-hia̍p, mā m̄-bián tio̍h-kip put-an. 15 Tio̍h chun-chông Ki-tok chòe Chú. Nā ū lâng mn̄g lín sim-tiong ê ǹg-bāng, tio̍h chún-pī piān-piān thang tùi in piān-bêng. 16 Put-kò tio̍h ēng un-hô kap chun-tiōng ê thài-tō͘ lâi hôe-tap. Tio̍h ū chheng-pe̍k ê liông-sim, thang tī lín siū bú-jio̍k ê sî hō͘ hiah-ê bú-jio̍k lín ê lâng khòaⁿ-kìⁿ lín khò Ki-tok só͘ piáu-hiān ê hó phín-hēng kám-kak kiàn-siàu. 17 Siū-khó͘ nā-sī Siōng-tè ê chí-ì, choh-hó lâi siū-khó͘ pí choh-pháiⁿ lâi siū-khó͘ khah hó. 18 In-ūi Ki-tok mā bat ūi-tio̍h chōe siū-khó͘, chi̍t piàn chiū oân-sêng; gī ê lâng thòe put-gī ê lâng siū-khó͘, sī ūi-tio̍h beh chhōa lín kàu Siōng-tè ê bīn-chêng. Tī jio̍k-thé, I siū chhú-sí; tī lêng, I ū koh-oa̍h. 19 Thong-kè I ê lêng, I mā ū khì tùi hiah-ê tī kaⁿ-lāi ê lêng thoân-tō, 20 chiū-sī [Ná-a] chún-pī tōa-chûn ê sî, Siōng-tè ū nāi-sim thèng-hāu hiah-ê m̄ sūn-ho̍k I ê lâng. Tng-sî chìn-ji̍p tōa-chûn ê lâng bô kúi ê, chí-ū poeh ê, in ū tùi chúi-ni̍h tit-tio̍h kiù. 21 Chit-ê chúi ū-piáu sóe-lé, m̄-sī beh sóe-tû lín seng-khu ê lah-sap, sī beh hō͘ lín ū chheng-pe̍k ê liông-sim thang tùi Siōng-tè kî-kiû; chit-ê sóe-lé thong-kè Iâ-so͘ Ki-tok ê koh-oa̍h hō͘ lín tit-tio̍h chín-kiù. 22 I í-keng chiūⁿ-thiⁿ, hiān-chāi tī Siōng-tè ê chiàⁿ-pêng teh chiáng-koán chèng thiⁿ-sài í-ki̍p lêng-kài ê chiáng-koân-chiá kap koân-le̍k-chiá.

1 Pí-tek 4

1 Ki-tok kì-jiân tī jio̍k-thé siū-khó͘, lín mā tio̍h ū kâng-khoán ê sim-chì lâi chong-pī ka-kī, in-ūi tī jio̍k-thé siū-khó͘ sī kap chōe-ok toān-choa̍t koan-hē. 2 Án-ni, lín tī sè-kan só͘ chhun ê ji̍t-chí chiū bô koh chiàu lâng ê chêng-io̍k, sī chiàu Siōng-tè ê chí-ì lâi oa̍h. 3 Lín ū lōng-hùi kong-im chòe bī-sìn-chiá só͘ ài chòe ê sū, îm-loān, sek-io̍k, chiú-chùi, iàn-lo̍k, tōa-chia̍h tōa-lim, kap khó-ò͘ⁿ ê ngó͘-siōng chông-pài téng, í-keng kàu-gia̍h lah. 4 In khòaⁿ-kìⁿ lín bô koh kap in kè hòng-tōng bô chiat-chè ê seng-oa̍h, chiū kî-koài soah kā lín húi-pòng. 5 In tio̍h kap teh-beh sím-phòaⁿ oa̍h-lâng kap sí-lâng ê Siōng-tè sǹg-siàu. 6 Ūi-tio̍h án-ni, hok-im sīm-chì ū thoân hō͘ sí-khì ê lâng, án-ni, in ê jio̍k-thé sui-jiân ū chiàu it-poaⁿ lâng ê khoán siū sím-phòaⁿ, m̄-kú in ê lêng ōe-tàng chiàu Siōng-tè ê khoán lâi oa̍h. 7 Bān-iú ê chiong-kio̍k kūn lah! Só͘-í, tio̍h kín-sīn siú-kí, thang kéng-séng kî-tó. 8 Siōng iàu-kín ê, sī tio̍h jia̍t-chhiat saⁿ-thiàⁿ, in-ūi thiàⁿ ōe jia-khàm chin chōe chōe-kò. 9 Tio̍h hō͘-siōng hó khoán-thāi, m̄-thang bâi-oàn. 10 Choh Siōng-tè só͘ sù ta̍k hāng un-sù ê hó koán-ke, tio̍h chiàu ta̍k ê lâng só͘ tit-tio̍h ê un-sù hō͘-siōng ho̍k-bū. 11 Kóng tō-lí ê, tio̍h kóng Siōng-tè ê sìn-sit; sū-hōng ê, tio̍h chiàu Siōng-tè só͘-sù un-sù ê le̍k-liōng lâi sū-hōng, hō͘ Siōng-tè thong-kè Iâ-so͘ Ki-tok tī bān-sū tit-tio̍h êng-iāu. Goān êng-kng koân-pèng lóng kui I, ti̍t-kàu éng-éng oán-oán. Amen! 12 Chhin-ài ê hiaⁿ-tī chí-bē, lín tú-tio̍h chhin-chhiūⁿ hé ê chhì-liān, m̄-thang ná-chún tú-tio̍h kî-koài ê sū; 13 hoán-tńg tio̍h in-ūi ū hun-tam Ki-tok ê khó͘-lān lâi hoaⁿ-hí, hō͘ lín tī I êng-iāu hián-hiān ê sî mā thang hoaⁿ-hí khoài-lo̍k. 14 Lín nā ūi-tio̍h Ki-tok ê miâ siū lêng-jio̍k, lín chin ū hok-khì, in-ūi ū Siōng-tè êng-kng ê Sîn tiàm tī lín sin-chiūⁿ. 15 Lín tiong-kan m̄-thang ū lâng in-ūi thâi-lâng, choh-chha̍t, choh-pháiⁿ, á-sī ài koán pa̍t-lâng ê tāi-chì lâi siū-khó͘. 16 Nā in-ūi choh Ki-tok-tô͘ lâi siū-khó͘, m̄-bián kiàn-siàu, hoán-tńg tio̍h in-ūi ū chit-ê miâ kui êng-kng hō͘ Siōng-tè. 17 Sím-phòaⁿ ê sî kàu lah! Siōng-tè ê ke tio̍h tāi-seng siū sím-phòaⁿ; nā tùi lán khai-sí, hiah-ê m̄ sìn-thàn Siōng-tè hok-im ê lâng ê kiat-kio̍k kiám bōe koh-khah giâm-tiōng? 18 Sèng-keng ū kóng: Gī-lâng tit-kiù to chin oh, bô kèng-khiân ê lâng kap chōe-jîn kiám bōe koh-khah khùn-lân? 19 Só͘-í, hiah-ê chiàu Siōng-tè ê chí-ì siū-khó͘ ê lâng, tio̍h chiong ka-kī kau-thok hō͘ hit-ūi thang sìn-khò ê Chō-bu̍t-chú, kè-sio̍k chòe hó-sū.

1 Pí-tek 5

1 Góa choh tiúⁿ-ló, koh choh Ki-tok siū-khó͘ ê kiàn-chèng-jîn, ū hūn tī I teh-beh hián-hiān ê êng-kng, góa kā lín tiong-kan pîⁿ-pîⁿ teh choh tiúⁿ-ló ê lâng khó͘-khǹg. 2 Tio̍h bo̍k-ióng Siōng-tè kau-tài lín ê iûⁿ-kûn, kā in koàn-kò͘, m̄-sī bián-kióng, sī chiàu Siōng-tè ê chí-ì kam-sim lo̍k-ì; m̄-sī ūi-tio̍h tham-châi, sī chū-goān jia̍t-sim lâi chòe. 3 Kau-tài hō͘ lín ê iûⁿ-kûn, m̄-thang ēng koân-ui koán-hat, tio̍h chòe in ê bô͘-iūⁿ. 4 Án-ni, lín tī Tōa-bo̍k-chiá hián-hiān ê sî ōe-tàng tit-tio̍h éng-oán bōe sit-khì kong-chhái êng-kng ê hoa-koan. 5 Siâng-khoán, lín siàu-liân-lâng tio̍h sūn-ho̍k tióng-pòe. Lín tāi-ke tio̍h khiam-pi saⁿ tùi-thāi; in-ūi Sèng-keng ū kì-chài: Siōng-tè te̍k-tùi kiau-ngō͘ ê lâng, si-un hō͘ khiam-pi ê lâng. 6 Só͘-í, lín tio̍h tī Siōng-tè tōa khùi-la̍t ê chhiú-ē khiam-pi, I kàu sî chiū ōe kā lín ko-seng. 7 Lín tio̍h chiong it-chhè ê khòa-lū kau hō͘ Siōng-tè, in-ūi I koan-sim lín. 8 Tio̍h kín-sīn, tio̍h kéng-séng, in-ūi lín ê tùi-te̍k Mô͘-kúi chhin-chhiūⁿ teh háu ê sai, sì-kòe kiâⁿ teh chhē thang thun-chia̍h ê lâng. 9 Tio̍h khò kian-tēng ê sìn-sim lâi tí-tng i, in-ūi lín chai choân sè-kài ê chèng hiaⁿ-tī chí-bē lóng teh keng-le̍k siâng-khoán ê khó͘-lān. 10 Sù it-chhè un-tián ê Siōng-tè, chiū-sī thong-kè Ki-tok lâi ho͘-tiàu lín chìn-ji̍p éng-oán ê êng-kng Hit-ūi, tī lín chiām-sî siū-khó͘ í-āu, it-tēng ōe chhin-sin kā lín tiông-sin kiàn-li̍p, sù lín khùi-la̍t, hō͘ lín kian-kò͘ khiā-chāi. 11 Goān koân-lêng kui hō͘ I, ti̍t-kàu éng-oán. Amen! 12 Thong-kè tiong-si̍t ê hiaⁿ-tī [Se-lah], góa siá chit tiuⁿ té-té ê phoe hō͘ lín, lâi bián-lē lín, koh kiàn-chèng che sī Siōng-tè chin-si̍t ê un-tián. Tio̍h tī chit-ê un-tián téng-bīn khiā-chāi. 13 Tiàm tī [Pa-pí-lûn] kap lín pîⁿ-pîⁿ siū kéng-tiàu ê kàu-hōe kā lín chhéng-an. Góa ê kiáⁿ [Má-khó] mā kā lín chhéng-an. 14 Tio̍h ēng thiàⁿ ê saⁿ-chim hō͘-siōng chhéng-an. Goān pêng-an kui tī lín só͘-ū sio̍k Ki-tok ê lâng!

AMAZING GRACE BIBLE INSTITUTE