1 Thessalonians

1 Thiap-sat-lô-nî-ka

1 Thiap-sat-lô-nî-ka 1

1 Góa --- [Pó-lô], [Se-lah], kap [Thê-mô͘-thài] siá-phoe hō͘ [Thiap-sat-lô-nî-ka], sio̍k Pē Siōng-tè kap Chú Iâ-so͘ Ki-tok ê kàu-hōe. Goān lín tit-tio̍h un-tián kap pêng-an! 2 Goán sî-siông ūi-tio̍h lín tāi-ke kám-siā Siōng-tè, tī kî-tó tiong put-sî siūⁿ-tio̍h lín. 3 Goán tī lán ê Pē Siōng-tè ê bīn-chêng siàu-liām lín khò sìn-sim só͘ chòe ê kang, chhut tī thiàⁿ-sim ê lô-khó͘, kap tùi lán ê Chú Iâ-so͘ Ki-tok ê ǹg-bāng só͘ piáu-hiān ê kian-jím. 4 Hiaⁿ-tī chí-bē, goán chai, lín sī Siōng-tè só͘ thiàⁿ, só͘ kéng-soán ê, 5 in-ūi goán thoân hok-im kàu lín hia, m̄-sī chí-ū ēng giân-gú, mā khò tōa lêng-le̍k kap Sèng Sîn, í-ki̍p tùi hok-im ū oân-choân ê khak-sìn. Chiàu lín só͘ chai, goán tī lín tiong-kan ê sî choh-lâng sím-mi̍h khoán, lóng sī ūi-tio̍h beh hō͘ lín tit-tio̍h lī-ek. 6 Lín ū o̍h goán mā ū o̍h Chú, sui-jiân tī chin chōe khó͘-lān tiong, lín iáu-kú ēng Sèng Sîn só͘ sù ê hoaⁿ-hí lâi niá-siū sìn-sit. 7 Tùi án-ni, lín chiâⁿ-chòe [Má-kî-tùn] kap [A-kai-a] choân-thé sìn-tô͘ ê bô͘-hoān. 8 In-ūi Chú ê sìn-sit sī tùi lín thoân-chhut, m̄-nā tī [Má-kî-tùn] kap [A-kai-a], lín tùi Siōng-tè ê sìn mā thoân kàu ta̍k só͘-chāi, só͘-í m̄-bián goán koh kóng sím-mi̍h. 9 In ka-kī ū kóng-khí goán tī lín hia ê sî jōa-ni̍h siū lín hoan-gêng, lín án-chóaⁿ lī-khui ngó͘-siōng kui-ǹg Siōng-tè, lâi sū-hōng oa̍h koh chin ê Siōng-tè, 10 thèng-hāu I ê Kiáⁿ tùi thiⁿ lâi; I hō͘ Iâ-so͘ tùi sí-lâng tiong koh-oa̍h, lâi chín-kiù lán thoat-lī beh lâi ê sím-phòaⁿ.

1 Thiap-sat-lô-nî-ka 2

1 Hiaⁿ-tī chí-bē, lín ka-kī chai goán khì lín hia hóng-būn m̄-sī bô hāu-kó. 2 Lín chai goán khì lín hia í-chêng tī [Hui-li̍p-pí] sui-jiân siū-tio̍h pek-hāi kap bú-jio̍k, iáu-kú ū óa-khò lán ê Siōng-tè hó-táⁿ biān-tùi chin chōe chó͘-gāi thoân Siōng-tè ê hok-im hō͘ lín. 3 Goán ê khoàn-bián m̄-sī chhut tī chhò-gō͘ á-sī bô sûn-chèng ê tōng-ki, mā m̄-sī beh phiàn lâng. 4 Kì-jiân Siōng-tè khòaⁿ goán ōe kham-tit, chiong hok-im kau-thok goán, goán chiū chiàu án-ni kóng, m̄ sī beh hō͘ lâng hoaⁿ-hí, sī beh hō͘ kàm-chhat goán lāi-sim ê Siōng-tè hoaⁿ-hí. 5 Lín chai, goán m̄-bat tùi lín kóng phô͘-tháⁿ ê ōe, mā m̄-bat ū tham-sim ê liām-thâu; che Siōng-tè ōe-tàng kā goán choh-chèng. 6 Goán mā m̄-bat tùi lâng, bô-lūn sī lín á-sī pa̍t-lâng, kiû êng-kng. 7 Sui-jiân choh Ki-tok ê sù-tô͘, goán pún-lâi thang iau-kiû lín chun-tiōng goán; m̄-kú goán tī lín tiong-kan ê sî un-jiû tùi-thāi lín, chhin-chhiūⁿ ni-bú teh io gín-á. 8 Kì-jiân goán hiah-ni̍h thiàⁿ-sioh lín, m̄-nā goān-ì kap lín hun-hióng Siōng-tè ê hok-im, liân goán ka-kī ê sìⁿ-miā to kam-goān hō͘ lín, in-ūi lín sī goán só͘ thiàⁿ ê. 9 Hiaⁿ-tī chí-bē, tio̍h ōe kì-tit goán ê sin-khó͘ kap lô-lo̍k; goán thoân Siōng-tè ê hok-im hō͘ lín ê sî, ūi-tio̍h bô ài ke-thiⁿ lín jīm-hô lâng ê hū-tam, goán mî-ji̍t teh chòe-kang. 10 Lín kap Siōng-tè ōe-tàng kā goán choh-chèng, tùi lín chiah-ê sìn-tô͘, goán ê choh-lâng jōa-ni̍h sûn-kiat, chèng-ti̍t, bô thang hiâm. 11 Lín chai goán tùi-thāi lín ta̍k ê lâng, chhin-chhiūⁿ lāu-pē tùi-thāi ka-kī ê jî-lú. 12 Goán khó͘-khǹg lín, kó͘-lē lín, khoàn-bián lín, ài lín ê giân-hêng kú-chí ōe-tàng hû-ha̍p Siōng-tè ê chí-ì; I ū tiàu lín chìn-ji̍p I ka-kī ê Kok-tō͘ kap êng-iāu. 13 Goán mā ūi-tio̍h chit-ê iân-kò͘ siông-siông kám-siā Siōng-tè, in-ūi lín tùi goán thiaⁿ-tio̍h Siōng-tè ê ōe ê sî, bô kā i khòaⁿ-chòe sī lâng ê ōe, tian-tò kā i khòaⁿ-chòe khak-khak si̍t-si̍t sī Siōng-tè ê ōe; chit-ê ōe tī lín sìn-tô͘ tiong-kan teh ūn-chok. 14 Hiaⁿ-tī chí-bē, lín ū tú-tio̍h tī [Iû-thài] tōe Siōng-tè ê kàu-hōe, chiū-sī sio̍k Ki-tok Iâ-so͘ ê kàu-hōe só͘ tú-tio̍h ê tāi-chì. Lín siū-tio̍h ka-kī tông-pau ê pek-hāi, tú chhin-chhiūⁿ in ū siū-tio̍h [Iû-thài]-lâng ê pek-hāi. 15 Hiah-ê [Iû-thài]-lâng thâi-sí Chú Iâ-so͘ kap chèng sian-ti, mā pek-hāi goán. In hō͘ Siōng-tè bô hoaⁿ-hí, mā kap chèng-lâng chòe tùi-te̍k, 16 sīm-chì chó͘-tòng goán thoân hok-im hō͘ Gōa-pang-lâng, hō͘ in thang tit-tio̍h kiù. In kè-sio̍k hoān-chōe, ti̍t-kàu chōe-ok koàn-boán. Chòe-āu Siōng-tè ê siū-khì lîm-kàu in sin-chiūⁿ. 17 Hiaⁿ-tī chí-bē, goán siū pek chiām-sî kap lín hun-lī, put-kò sī seng-khu saⁿ-lī, sim khiok bô lī-khui. Goán jōa-ni̍h pek-chhiat ài koh khòaⁿ-tio̍h lín ê bīn. 18 Goán chin ài khì lín hia. Góa --- [Pó-lô] chi̍t piàn koh chi̍t piàn siūⁿ-beh khì hóng-būn lín, m̄-kú Sat-tàn kā goán chó͘-tòng. 19 Lán ê Chú Iâ-so͘ lâi-lîm ê sî, goán ê ǹg-bāng, hoaⁿ-hí, kap siōng khoa-kháu ê sī sím-mi̍h? Kiám m̄-sī lín? 20 Lín si̍t-chāi sī goán ê êng-kng kap hoaⁿ-hí.

1 Thiap-sat-lô-nî-ka 3

1 Só͘-í, goán tán bōe-tiâu, koat-tēng kan-ta goán lâu tī [Ngá-tián], 2 chiū chhe goán ê hiaⁿ-tī, iā-sī ūi-tio̍h Siōng-tè thoân Ki-tok hok-im ê tâng-kang [Thê-mô͘-thài], khì lín hia, lâi kó͘-lē lín, kian-kò͘ lín ê sìn-sim, 3 hō͘ lín tiong-kan bô-lâng in-ūi só͘ tú-tio̍h ê khó͘-lān tì-kàu iô-tāng. Lín ka-kī chai lán tú-tio̍h khó͘-lān sī Siōng-tè ê an-pâi. 4 Goán iáu kap lín chòe-hé ê sî, ū seng kā lín kóng-khí goán ōe siū khó͘-lān, āu-lâi chin-chiàⁿ ū án-ni hoat-seng, che sī lín só͘ chai ê. 5 In-ūi án-ni, góa tán bōe-tiâu chiah chhe [Thê-mô͘-thài] khì lín hia, ài chai lín ê sìn-sim án-chóaⁿ, chiah-bián lín siū Chhì-thàm-chiá bê-he̍k, tì-kàu goán tī lín tiong-kan ê lô-khó͘ lo̍k-khong. 6 Hiān-chāi [Thê-mô͘-thài] í-keng tùi lín hia tò-lâi, chiong koan-hē lín ê sìn-sim kap thiàⁿ-sim ê hó siau-sit pò goán chai, kā goán kóng lín sî-siông teh siàu-liām goán, ài kap goán kìⁿ-bīn, chhin-chhiūⁿ goán ài kap lín kìⁿ-bīn. 7 In-ūi án-ni, hiaⁿ-tī chí-bē, tī it-chhè ê hoān-lān kap khùn-khó͘ tiong goán tùi lín ê sìn-sim ū tit-tio̍h an-ùi. 8 Lín nā tùi Chú ū kian-kò͘ ê sìn-sim, goán chiah ōe-tàng kóng hiān-chāi ū chin-chiàⁿ teh oa̍h. 9 Goán tī Siōng-tè ê bīn-chêng in-ūi lín lâi hoaⁿ-hí; tùi che it-chhè ê hoaⁿ-hí, goán tio̍h án-chóaⁿ kám-siā chiah ū kàu-gia̍h? 10 Goán mî-ji̍t pek-chhiat kî-kiû thang kìⁿ lín ê bīn, lâi pó͘-chiok lín sìn-sim ê su-iàu. 11 Goān lán ê Thiⁿ-pē Siōng-tè kap lán ê Chú Iâ-so͘ kā goán khui-lō͘ thang khì lín hia. 12 Goān Chú hō͘ lín saⁿ-thiàⁿ kap thiàⁿ chèng-lâng ê sim it-ti̍t ke-thiⁿ, chhin-chhiūⁿ goán tùi lín ê thiàⁿ ū ná ke-thiⁿ. 13 Án-ni, I ōe hō͘ lín ê sim kian-kò͘, tī lán ê Chú Iâ-so͘ kap I ê chèng sìn-tô͘ lâi-lîm ê sî, tī lán ê Pē Siōng-tè ê bīn-chêng sèng-kiat, bô thang hiâm. Amen!

1 Thiap-sat-lô-nî-ka 4

1 Chòe-āu, hiaⁿ-tī chí-bē, goán iáu ū ōe beh kā lín kóng, lín ū chiap-siū goán ê kà-sī chai-iáⁿ tio̍h án-chóaⁿ seng-oa̍h chiah ōe hō͘ Siōng-tè hoaⁿ-hí, kî-si̍t lín ū chiàu án-ni teh seng-oa̍h. Put-kò goán hōng Chú Iâ-so͘ ê miâ khún-kiû koh khó͘-khǹg lín tio̍h ka-pē ló͘-le̍k. 2 In-ūi lín chai goán ū hōng Chú Iâ-so͘ ê miâ kā lín chí-sī sím-mi̍h. 3 Siōng-tè ê chí-ì sī ài lín sèng-kiat, bô îm-loān, 4 hō͘ lín ta̍k ê lâng ōe-hiáu ēng sèng-kiat kap chū-chun ê sim khòng-chè ka-kī ê seng-khu, 5 bô chhin-chhiūⁿ m̄-bat Siōng-tè ê Gōa-pang-lâng teh hòng-chhiòng chêng-io̍k. 6 M̄-thang chhim-hāi, mā m̄-thang khi-hū tâng-sìn ê hiaⁿ-tī chí-bē. Goán í-keng ū kā lín kóng, mā ū giâm-giâm seng kā lín kéng-kò, “Chòe chit khoán tāi-chì ê lâng, Chú ōe pò-èng.” 7 Siōng-tè m̄-sī ho͘-tiàu lán kè bô chheng-khì ê seng-oa̍h, sī ho͘-tiàu lán kè sèng-kiat ê seng-oa̍h. 8 Só͘-í, kū-choa̍t chit-ê kà-sī ê, m̄-sī kū-choa̍t lâng, sī kū-choa̍t sù lín Sèng Sîn ê Siōng-tè. 9 Koan-hē hiaⁿ-tī chí-bē saⁿ-thiàⁿ ê sū, bô su-iàu goán siá sím-mi̍h hō͘ lín, in-ūi lín ka-kī í-keng siū-tio̍h Siōng-tè ê kà-sī tio̍h hō͘-siōng saⁿ-thiàⁿ. 10 Kî-si̍t, lín ū chiàu chit-ê kà-sī tùi-thāi choân [Má-kî-tùn] ê hiaⁿ-tī chí-bē. M̄-kú, hiaⁿ-tī chí-bē, goán khó͘-khǹg lín tio̍h ka-pē ló͘-le̍k. 11 Chiàu goán chêng só͘ hoan-hù, lín tio̍h li̍p-chì kè an-chēng ê seng-oa̍h, chīn ka-kī ê pún-hūn chhin-chhiú chòe-kang. 12 Án-ni lín chiū ōe-tàng tit-tio̍h hōe-gōa ê lâng ê chun-kèng, bô su-iàu khò pa̍t-lâng pang-chān. 13 Hiaⁿ-tī chí-bē, koan-hē í-keng sí-khì ê lâng, goán ài lín chai, chiah-bián chhin-chhiūⁿ hiah-ê bô ǹg-bāng ê lâng án-ni teh pi-siong. 14 Kì-jiân lán sìn Iâ-so͘ ū sí, ū koh-oa̍h, só͘-í lán mā sìn Siōng-tè ōe thong-kè Iâ-so͘ chhōa hiah-ê í-keng sí-khì ê lâng kap I chòe-hé lâi. 15 Goán chiàu Chú ê ōe kā lín kóng chit-ê sū, chiū-sī lán chiah-ê tī Chú lâi-lîm ê sî iáu oa̍h-teh ê lâng, bōe pí hiah-ê í-keng sí-khì ê lâng khah tāi-seng kìⁿ-tio̍h Chú. 16 Bēng-lēng chi̍t-ē chhut, thiⁿ-sài-tiúⁿ ê siaⁿ chi̍t-ē hoah, Siōng-tè ê lat-pah chi̍t-ē hiáng, Chú pún-sin chiū ōe tùi thiⁿ-téng kàng-lîm, hiah-ê sí í-chêng í-keng sìn Ki-tok ê sí-lâng ōe tāi-seng koh-oa̍h, 17 jiân-āu lán chiah-ê iáu oa̍h-teh ê lâng lóng ōe kap in chòe-hé siū chiap-khì hûn-lāi, tī khong-tiong kap Chú saⁿ-kìⁿ. Án-ni, lán chiū ōe it-ti̍t kap Chú chòe-hé. 18 Só͘-í, lín tio̍h ēng chiah-ê ōe hō͘-siōng kó͘-lē.

1 Thiap-sat-lô-nî-ka 5

1 Hiaⁿ-tī chí-bē, koan-hē chit-ê tāi-chì hoat-seng ê sî kap kî, bô su-iàu siá-phoe kā lín kóng, 2 in-ūi lín ka-kī chai Chú ê Ji̍t ōe chhin-chhiūⁿ chha̍t-á àm-sî thau-thau-á lâi. 3 Lâng teh kóng “pêng-an bô-sū” ê sî, chai-lān chhin-chhiūⁿ sán-hū chhui-chūn ê thàng-thiàⁿ hut-jiân lîm-kàu in, bô hoat-tō͘ thang tô-pī. 4 M̄-kú, hiaⁿ-tī chí-bē, lín m̄-sī tī o͘-àm tiong, hit-ê Ji̍t bōe chhin-chhiūⁿ chha̍t-á tī bô siūⁿ-tio̍h ê sî hut-jiân lâi. 5 In-ūi lín lóng sī kng-bêng ê lâng, sī ji̍t-sî ê lâng; lán m̄-sī sio̍k mî-sî, m̄-sī sio̍k o͘-àm. 6 Só͘-í, lán m̄-thang chhin-chhiūⁿ kî-tha ê lâng teh khùn, tio̍h chhíⁿ-chhíⁿ, tio̍h kín-sīn. 7 In-ūi khùn ê lâng lóng sī àm-sî teh khùn; chiú-chùi ê lâng sī àm-sî teh chùi. 8 Kì-jiân lán sī sio̍k ji̍t-sî ê lâng, tio̍h kín-sīn, ēng sìn-sim kap thiàⁿ-sim chòe hō͘-heng-kah chhēng, ēng tit-kiù ê ǹg-bāng chòe thâu-khoe tì. 9 Siōng-tè bô an-pâi lán tio̍h siū I ê hêng-hoa̍t, sī beh hō͘ lán thong-kè Chú Iâ-so͘ Ki-tok lâi tit-tio̍h kiù. 10 Ki-tok thòe lán sí sī beh hō͘ lán, bô-lūn sī sí á-sī oa̍h, lóng ōe-tàng kap I chòe-hé oa̍h. 11 Só͘-í, chhin-chhiūⁿ lín hiān-chāi án-ni, tio̍h kè-sio̍k hō͘-siōng kó͘-lē, pí-chhú chō-chiū. 12 Hiaⁿ-tī chí-bē, chhiáⁿ lín tio̍h kèng-tiōng tī lín tiong-kan teh tio̍h-bôa, iā-sī Chú kéng-soán lâi chí-tō kap khoàn-bián lín hiah-ê lâng. 13 In-ūi in só͘ chòe ê kang, lín tio̍h ēng siōng-tōa ê kèng-ì kap thiàⁿ-sim tùi-thāi in. Lín ka-kī tio̍h hô-bo̍k siong-chhù. 14 Hiaⁿ-tī chí-bē, goán khó͘-khǹg lín tio̍h kéng-kài pîn-tōaⁿ ê lâng, bián-lē bô-táⁿ ê lâng, pang-chān loán-jio̍k ê lâng; tùi chèng-lâng tio̍h khoan-iông. 15 Lín tio̍h kín-sīn, m̄-thang ēng pháiⁿ pò pháiⁿ, tio̍h put-sî ūi-tio̍h pí-chhú í-ki̍p só͘-ū ê lâng chòe hó-sū. 16 Tio̍h put-sî hoaⁿ-hí; 17 tio̍h kè-sio̍k kî-tó; 18 bô-lūn sím-mi̍h kéng-gū lóng tio̍h kám-siā; in-ūi che sī Siōng-tè ê chí-ì, ài lín chiah-ê sio̍k Ki-tok Iâ-so͘ ê lâng án-ni chòe. 19 M̄-thang phah-hoa Sèng Sîn ê hé; 20 m̄-thang biáu-sī sian-ti ê ōe. 21 Sū-sū tio̍h chhat-giām; hó ê tio̍h chhî-siú, 22 it-chhè ê siâ-ok tio̍h khì-sak. 23 Goān sù pêng-an ê Siōng-tè chhin-sin kā lín oân-choân sèng-hòa, hō͘ lín ê lêng, hûn, kap thé tī lán ê Chú Iâ-so͘ Ki-tok lâi-lîm ê sî tit-tio̍h pó-choân, bô thang hiâm! 24 Ho͘-tiàu lín ê Siōng-tè sī sìn-si̍t, I it-tēng ōe oân-sêng chit-ê sū. 25 Hiaⁿ-tī chí-bē, chhiáⁿ ūi-tio̍h goán kî-tó. 26 Tio̍h ēng sèng ê saⁿ-chim kā lóng-chóng ê hiaⁿ-tī chí-bē chhéng-an. 27 Goán hōng Chú ê miâ hoan-hù lín tio̍h tha̍k chit tiuⁿ phoe hō͘ chèng hiaⁿ-tī chí-bē thiaⁿ. 28 Goān lán ê Chú Iâ-so͘ Ki-tok ê un-tián kap lín tông-chāi!

AMAZING GRACE BIBLE INSTITUTE