1 Corinthians

1 Ko-lîm-to

1 Ko-lîm-to 1

1 Góa sī [Pó-lô], hōng Siōng-tè ê chí-ì siū tiàu choh Ki-tok Iâ-so͘ ê sù-tô͘. Góa kap lán ê hiaⁿ-tī [Só͘-thê-nî] 2 siá-phoe hō͘ tī [Ko-lîm-to] Siōng-tè ê kàu-hōe, chiū-sī hiah-ê kap tī ta̍k só͘-chāi ho͘-kiò lán ê Chú Iâ-so͘ Ki-tok ê miâ, kap Ki-tok Iâ-so͘ kiat-liân siū tiàu choh sìn-tô͘ kui-sio̍k Siōng-tè ê lâng; Ki-tok sī in ê Chú, mā-sī lán ê Chú. 3 Goān lán ê Pē Siōng-tè kap Chú Iâ-so͘ Ki-tok sù lín un-tián kap pêng-an! 4 Góa sî-siông ūi-tio̍h lín teh kám-siā góa ê Siōng-tè, in-ūi I thong-kè Ki-tok Iâ-so͘ sù lín un-tián, 5 hō͘ lín thong-kè Ki-tok ta̍k hāng tit-tio̍h hù-chiok, chhiong-móa ta̍k khoán kháu-châi kap tì-sek. 6 Ki-tok ê sìn-sit í-keng tī lín tiong-kan kian-kò͘ kiàn-li̍p, 7 hō͘ lín lóng bô khiàm sím-mi̍h un-sù, thèng-hāu lán ê Chú Iâ-so͘ Ki-tok hián-hiān. 8 I mā ōe hō͘ lín kian-kò͘ ti̍t-kàu chòe-āu, tī lán ê Chú Iâ-so͘ Ki-tok ê Ji̍t bô thang hiâm. 9 Siōng-tè sī sìn-si̍t, I ho͘-tiàu lín, beh hō͘ lín kap I ê Kiáⁿ lán ê Chú Iâ-so͘ Ki-tok kiat-liân. 10 Hiaⁿ-tī chí-bē, góa hōng lán ê Chú Iâ-so͘ Ki-tok ê miâ khǹg lín tāi-ke, kóng-ōe tio̍h it-tì; lín tiong-kan mā m̄-thang hun-lia̍t. Tio̍h thoân-kiat, ū siâng-khoán ê siūⁿ-hoat kap kiōng-tông ê bo̍k-phiau. 11 Góa ê hiaⁿ-tī chí-bē, [Kek-lâi] in tau ê lâng ū tùi góa kóng-khí lín tiong-kan ū hun-cheng. 12 Góa án-ni kóng sī in-ūi lín tiong-kan ì-kiàn hun-hun; ū-ê kóng “Góa sio̍k [Pó-lô]”; ū-ê kóng “Góa sio̍k [A-pho-lô]”; ū-ê kóng “Góa sio̍k [Pí-tek]”; mā ū-ê kóng “Góa sio̍k Ki-tok”. 13 Ki-tok kèng-jiân hō͘ lâng hun-koah lah! [Pó-lô] kiám ū thòe lín tèng-sí tī si̍p-jī-kè? Lín kiám ū hōng [Pó-lô] ê miâ niá-siū sóe-lé? 14 Kám-siā Siōng-tè, [Ki-lī-su-pò͘] kap [Kai-iû] í-gōa, góa bô kā lín tiong-kan sím-mi̍h lâng sóe-lé. 15 Án-ni bô-lâng ōe-tàng kóng, lín ū hōng góa ê miâ niá-siū sóe-lé. 16 Ū-lah, góa mā ū kā [Sū-thê-hoán-ná] chi̍t ke ê lâng sóe-lé, kî-tha ū kā pa̍t-lâng sóe-lé á-bô, góa bōe kì-tit. 17 Ki-tok bô chhe góa kā lâng sóe-lé, sī beh thoân hok-im, m̄-sī ēng tì-hūi ê giân-sû thoân, chiah-bián hō͘ Ki-tok ê si̍p-jī-kè sit-khì hāu-le̍k. 18 Si̍p-jī-kè ê sìn-sit, tùi hiah-ê ǹg bia̍t-bông teh kiâⁿ ê lâng sī gû-gōng, put-kò tùi lán chiah-ê ǹg tit-kiù teh kiâⁿ ê lâng sī Siōng-tè ê tōa lêng-le̍k. 19 In-ūi Sèng-keng ū kì-chài: Góa beh siau-bia̍t tì-hūi ê lâng ê tì-hūi; góa beh khì-sak chhong-bêng ê lâng ê chhong-bêng. 20 Án-ni tì-hūi ê lâng tī tó-ūi? Keng-ha̍k-kàu-su tī tó-ūi? Chit sè-kan ê hiông-piān-ka tī tó-ūi? Siōng-tè í-keng hō͘ chit sè-kan ê tì-hūi pìⁿ-chòe gû-gōng lah! 21 Kì-jiân sè-kan-lâng bōe-tàng khò ka-kī ê tì-hūi jīn-bat Siōng-tè, Siōng-tè chiū tùi I ê tì-hūi hoaⁿ-hí ēng goán só͘ thoân gû-gōng ê sìn-sit lâi chín-kiù sìn I ê lâng. 22 [Iû-thài]-lâng kiû sîn-jiah, [Hi-la̍h]-lâng chhē tì-hūi, 23 put-kò goán soan-iông tèng si̍p-jī-kè ê Ki-tok. Chit-ê sìn-sit tùi [Iû-thài]-lâng sī chó͘-gāi, tùi Gōa-pang-lâng sī gû-gōng, 24 m̄-kú tùi Siōng-tè só͘ kéng-tiàu ê lâng, bô-lūn sī [Iû-thài]-lâng á-sī [Hi-la̍h]-lâng, chit-ê sìn-sit sī Siōng-tè ê tōa lêng-le̍k, sī Siōng-tè ê tì-hūi. 25 In-ūi Siōng-tè ê gû-gōng pí lâng khah tì-hūi, Siōng-tè ê loán-jio̍k pí lâng khah ióng-chòng. 26 Hiaⁿ-tī chí-bē, tio̍h ōe kì-tit Siōng-tè ho͘-tiàu lín ê sî, chiàu lâng ê phiau-chún, lín tiong-kan bô jōa chōe lâng ū tì-hūi, bô jōa chōe lâng ū lêng-le̍k, bô jōa chōe lâng ū chun-kùi tōe-ūi. 27 Siōng-tè kò͘-ì ēng sè-kan-lâng khòaⁿ-chòe gōng ê tāi-chì lâi hō͘ khiáu ê lâng kiàn-siàu; Siōng-tè ēng sè-kan-lâng khòaⁿ-chòe jio̍k ê tāi-chì lâi hō͘ kiông ê lâng kiàn-siàu. 28 Siōng-tè ēng sè-kan-lâng só͘ biáu-sī, khòaⁿ-bōe-khí ê tāi-chì lâi phò-hoāi lâng só͘ khòaⁿ-tāng ê tāi-chì; 29 án-ni sè-kan chiū bô-lâng ōe-tàng tī Siōng-tè ê bīn-chêng khoa-kháu. 30 M̄-kú Siōng-tè hō͘ lín kap Ki-tok Iâ-so͘ kiat-liân, hō͘ Ki-tok chiâⁿ-chòe lán tùi Siōng-tè lâi ê tì-hūi, hō͘ lán kap Siōng-tè ū ha̍p-gî ê koan-hē, chiâⁿ-chòe Siōng-tè sèng-kiat ê chú-bîn, koh tit-tio̍h chū-iû. 31 Chiàu Sèng-keng só͘ kì-chài, “Beh khoa-kháu ê lâng tio̍h khoa-kháu Chú.”

1 Ko-lîm-to 2

1 Hiaⁿ-tī chí-bē, góa í-chêng khì lín hia ê sî bô ēng súi ê giân-sû á-sī tì-hūi soan-káng Siōng-tè ê ò-pì. 2 In-ūi góa koat-tēng, tī lín tiong-kan sím-mi̍h to m̄-kóng, chí-ū beh kóng Iâ-so͘ Ki-tok í-ki̍p I tèng-sí tī si̍p-jī-kè ê sū. 3 Góa tī lín hia ê sî, loán-jio̍k koh kiaⁿ-kah phi̍h-phi̍h-chhoah. 4 Góa só kóng ê ōe, só͘ soan-káng ê sìn-sit, lóng bô ēng kháu-biāu tì-hūi ê giân-sû, sī khò Siōng-tè ê Sîn ê tōa lêng-le̍k lâi chèng-si̍t, 5 sī beh hō͘ lín ê sìn-gióng m̄-sī khò lâng ê tì-hūi, sī khò Siōng-tè ê tōa lêng-le̍k. 6 Sui-jiân sī án-ni, tùi hiah-ê lêng-sèng sêng-se̍k ê lâng góa mā ū kóng tì-hūi, put-kò m̄-sī chit sè-kan ê tì-hūi, mā m̄-sī chit sè-kan chù-tiāⁿ ōe sit-sè ê thóng-tī-chiá ê tì-hūi. 7 Góa só͘ kóng ê sī Siōng-tè ò-pì ê tì-hūi, sī tùi lâng ún-ba̍t ê, sī Siōng-tè ūi-tio̍h beh hō͘ lán tit-tio̍h êng-kng, tī chhòng-sè í-chêng chiū seng koat-tēng ê. 8 Chit sè-kan ê thóng-tī-chiá bô chi̍t ê jīn-bat chit-ê tì-hūi, in nā bat chiū bōe chiong êng-iāu ê Chú tèng-sí tī si̍p-jī-kè. 9 Chiàu Sèng-keng só͘ kì-chài: Siōng-tè ūi-tio̍h thiàⁿ I ê lâng chún-pī ê, sī ba̍k-chiu m̄-bat khòaⁿ-tio̍h, hīⁿ-khang m̄-bat thiaⁿ-tio̍h, mā m̄-bat ū lâng siūⁿ-tio̍h ê. 10 M̄-kú Siōng-tè í-keng ū thong-kè Sèng Sîn chiong chiah-ê sū tùi lán khé-sī. Sèng Sîn thiat-tóe chai bān-sū, liân Siōng-tè chhim-tîm ê chí-ì mā chai. 11 Chí-ū lâng ka-kī lāi-bīn ê sîn chiah chai ka-kī ê sū; chhin-chhiūⁿ án-ni, chí-ū Siōng-tè ê Sîn chiah chai Siōng-tè ê sū. 12 Lán niá-siū ê m̄-sī sè-kan ê sîn, sī tùi Siōng-tè lâi ê Sîn, beh hō͘ lán chai Siōng-tè sù hō͘ lán ê un-sù. 13 Só͘-í, goán tùi sio̍k-lêng ê lâng kóe-seh sio̍k Sèng Sîn ê sū, m̄-sī ēng lâng só͘ kà ê tì-hūi, sī ēng Sèng Sîn só͘ kà ê ōe. 14 Sio̍k hiat-khì ê lâng bōe-tàng niá-siū tùi Siōng-tè ê Sîn lâi ê un-sù, chiah-ê un-sù tùi i lâi kóng sī gû-gōng ê, bô hoat-tō͘ liáu-kái, in-ūi chí-ū sio̍k-lêng ê lâng chiah ōe-tàng léng-ngō͘. 15 Sio̍k Sèng Sîn ê lâng ōe-hiáu phòaⁿ-toàn bān-sū, put-kò i pún-sin ê sū bô-lâng ōe-tàng kā i phòaⁿ-toàn. 16 Sèng-keng ū kì-chài: Sím-mi̍h-lâng chai Chú ê sim-ì? Sím-mi̍h-lâng ōe-tàng kā I chhut chú-ì? M̄-kú lán ū Ki-tok ê sim-ì.

1 Ko-lîm-to 3

1 Hiaⁿ-tī chí-bē, góa kàu taⁿ tùi lín kóng-ōe, bōe-tàng khòaⁿ lín chòe sio̍k Sèng Sîn ê, sī sio̍k-sè ê, sī Ki-tok sìn-gióng ê eⁿ-á. 2 Góa ēng lin chhī lín, bô ēng pn̄g, in-ūi lín iáu bōe-tàng chia̍h-pn̄g, kàu hiān-chāi mā iáu bōe-tàng, 3 in-ūi lín iáu-kú sī sio̍k-sè ê lâng. Lín tiong-kan ū chi̍t-tò͘, ū hun-cheng; án-ni kiám m̄-sī chèng-bêng lín sī sio̍k-sè ê, sī chiàu sè-kan-lâng ê hong-sek teh seng-oa̍h? 4 Lín tiong-kan ū lâng kóng “Góa sio̍k [Pó-lô]”; mā ū lâng kóng “Góa sio̍k [A-pho-lô]”. Án-ni lín kap sè-kan-lâng ū sím-mi̍h bô kâng-khoán? 5 [A-pho-lô] sǹg siáⁿ? [Pó-lô] sǹg siáⁿ? Goán put-kò sī Siōng-tè ê chhe-ēng, ín-chhōa lín siong-sìn; ta̍k ê lâng chiàu Chú só͘ hō͘ goán ê chit-hūn teh chòe. 6 Góa iā-chéng, [A-pho-lô] ak-chúi, m̄-kú Siōng-tè hō͘ i tōa-châng. 7 Iā-chéng-ê kap ak-chúi-ê lóng bô tiōng-iàu, chí-ū hō͘ i tōa-châng ê Siōng-tè chiah tiōng-iàu. 8 Iā-chéng-ê kap ak-chúi-ê lóng kâng-khoán, Siōng-tè ōe chiàu ta̍k lâng ê kang-chok kā in pò-siúⁿ. 9 Goán sī Siōng-tè ê tâng-kang; lín sī Siōng-tè ê chhân-hn̂g. Lín mā-sī Siōng-tè ê kiàn-tio̍k-bu̍t. 10 Chiàu Siōng-tè hō͘ góa ê un-sù, choh chi̍t ê gâu ê kiàn-tio̍k-su, góa hē tōe-ki, pa̍t-lâng tī hit téng-bīn khí-chō. M̄-kú ta̍k ê lâng tio̍h khòaⁿ ka-kī án-chóaⁿ teh khí-chō. 11 In-ūi Siōng-tè í-keng ū hē Iâ-so͘ Ki-tok chòe î-it ê tōe-ki, I í-gōa bô pa̍t-ê tōe-ki. 12 Tī chit-ê tōe-ki téng, lâng nā ēng kim, gûn, pó-chio̍h, bo̍k-chhâi, chháu, á-sī tiū-kó khí-chō, 13 ta̍k ê lâng kang-thêng ê hó-bái, tī Ki-tok lâi-lîm ê Ji̍t, ōe hō͘ hé kā i lō͘-hiān chhut-lâi, in-ūi hé ōe chhì-giām ta̍k ê lâng kang-thêng ê phín-chit. 14 Lâng só͘ khí-chō ê nā hō͘ hé sio bōe-khì, i chiū ōe tit-tio̍h pò-siúⁿ. 15 Lâng só͘ khí-chō ê nā hō͘ hé sio-khì, i chiū ōe sún-sit; put-kò i pún-sin ōe tit-tio̍h kiù, chhin-chhiūⁿ tùi hé-tiong tô-miā cháu chhut-lâi. 16 Kiám m̄-chai, lín sī Siōng-tè ê tiān, Siōng-tè ê Sîn tiàm tī lín lāi-bīn? 17 Nā ū lâng húi-hoāi Siōng-tè ê tiān, Siōng-tè ōe kā hit-ê lâng húi-bia̍t; in-ūi Siōng-tè ê tiān sī sîn-sèng ê, lín chiū-sī hit-ê tiān. 18 M̄-thang phiàn ka-kī. Lín tiong-kan nā ū lâng ēng sè-kan ê phiau-chún khòaⁿ ka-kī chòe ū tì-hūi, ūi-tio̍h beh chiâⁿ-chòe chin-chiàⁿ ū tì-hūi, i tian-tò tio̍h chòe gû-gōng ê. 19 In-ūi chit sè-kan ê tì-hūi, tùi Siōng-tè lâi khòaⁿ sī gû-gōng. Sèng-keng ū kì-chài: Siōng-tè hō͘ tì-hūi ê lâng tiòng-tio̍h ka-kī ê khúi-kè. 20 Pa̍t ê só͘-chāi koh kóng: Chú chai tì-hūi ê lâng ê sim-su bô lō͘-ēng. 21 Só͘-í, bô-lūn sím-mi̍h-lâng lóng m̄-thang ēng lâng chòe khoa-kháu. Kî-si̍t it-chhè lóng sī lín ê: 22 bô-lūn [Pó-lô], [A-pho-lô], [Pí-tek], chit sè-kài, siⁿ á-sī sí, hiān-chāi á-sī chiong-lâi, che it-chhè lóng sī lín ê; 23 lín sī Ki-tok ê, Ki-tok sī Siōng-tè ê.

1 Ko-lîm-to 4

1 Án-ni, lâng tio̍h khòaⁿ goán choh Ki-tok ê lô͘-po̍k, sī Siōng-tè ò-pì ê koán-ke. 2 Tùi koán-ke ê iau-kiû sī tio̍h tùi chú-lâng tiong-si̍t. 3 Góa siū lín á-sī pa̍t-lâng phêng-toàn, lóng khòaⁿ-chòe sió-sū; liân góa mā bô phêng-toàn ka-kī. 4 Góa kám-kak ka-kī ê liông-sim chheng-pe̍k, put-kò m̄-sī án-ni chiū chèng-bêng góa bô-chōe. Sím-phòaⁿ góa ê sī Chú. 5 Só͘-í, sî-ki iáu-bē kàu, lín m̄-thang phoe-phòaⁿ lâng. Tán kàu Chú lâi-lîm, hit sî I ōe ēng kng chiò o͘-àm-tiong ê pì-bi̍t, kā ún-chông tī lâng sim-lāi ê tōng-ki po̍k-lō͘ chhut-lâi. Hit sî, ta̍k ê lâng ōe tùi Siōng-tè tit-tio̍h chheng-chàn. 6 Hiaⁿ-tī chí-bē, ūi-tio̍h lín ê iân-kò͘, góa chiong chiah-ê sū chòe lē ēng tī góa pún-sin kap [A-pho-lô] ê sin-chiūⁿ, hō͘ lín thang tùi goán ha̍k-si̍p “m̄-thang chhiau-kè Sèng-keng só͘ kì-chài” chit kù ōe ê ì-sù. Lín tiong-kan bô-lūn sím-mi̍h-lâng to m̄-thang phô͘-tháⁿ chit-ê, khòaⁿ-khin hit-ê. 7 Sím-mi̍h-lâng hō͘ lí siūⁿ-kóng ka-kī pí pa̍t-lâng khah gâu? Lí só͘-ū-ê kiám m̄-sī lóng tùi Siōng-tè niá-siū? Nā án-ni, lí sī-án-chóaⁿ teh chū-khoa, ná-chún m̄-sī tùi Siōng-tè niá-siū. 8 Lín í-keng ta̍k hāng lóng ū! Lín í-keng hù-chiok! Lín kā goán sak tī piⁿ-a, ka-kī choh-ông. Lín nā chin-chiàⁿ choh-ông m̄-chai jōa-á-ni̍h hó leh, án-ni góa mā thang kap lín chòe-hé choh-ông! 9 Góa siūⁿ, Siōng-tè chiong goán chiah-ê sù-tô͘ pâi tī bé-liu, chhin-chhiūⁿ sí-hêng-hoān hō͘ lâng thoa chhut-lâi sī-chiòng, hō͘ sè-kài, thiⁿ-sài, kap lâng khòaⁿ. 10 Goán ūi-tio̍h Ki-tok ê iân-kò͘ chòe gōng-lâng, lín khiok kap Ki-tok kiat-liân chòe khiáu-lâng; goán loán-jio̍k, lín ióng-chòng; lín siū chun-tiōng, goán siū khòaⁿ-khin. 11 Kàu hiān-chāi, goán iáu koh-teh chhùi-ta, chhēng phòa-saⁿ, siông-siông hō͘ lâng phah, ta̍k só͘-chāi liû-lōng; 12 goán khò siang-chhiú thoa-bôa tō͘-oa̍h. Goán hō͘ lâng mē, hoán-tńg kā in chiok-hok; hō͘ lâng pek-hāi, goán jím-nāi; 13 hō͘ lâng bú-jio̍k, goán ēng hó-ōe hôe-tap. Kàu hiān-chāi, goán iáu hō͘ lâng khòaⁿ-chòe sè-kan ê pùn-sò, jîn-kan ê che-tái. 14 Góa siá chiah-ê hō͘ lín, m̄-sī beh hō͘ lín kiàn-siàu, sī khòaⁿ lín chòe ka-kī chhin-ài ê kiáⁿ-jî teh kā lín kà-sī. 15 Lín sui-jiân ū kui-bān-ê kàu-tok ê lâng teh kà lín bat Ki-tok, m̄-kú lāu-pē chí-ū chi̍t-ê. Thong-kè hok-im, góa tī Ki-tok Iâ-so͘ chiâⁿ-chòe lín ê lāu-pē. 16 Só͘-í góa khǹg lín, tio̍h o̍h góa. 17 In-ūi án-ni, góa chhe [Thê-mô͘-thài] khì lín hia; tī Chú ê lāi-bīn i sī góa chhin-ài koh tiong-si̍t ê kiáⁿ; i ōe chiong góa kap Ki-tok Iâ-so͘ kiat-liân ê bô͘-hoān, chiū-sī góa tī ta̍k só͘-chāi ta̍k kàu-hōe só͘ kà-sī ê sū kā lín thê-chhíⁿ. 18 Lín tiong-kan ū lâng siūⁿ-kóng góa bōe khì lín hia, chiū chū-ko chū-tāi. 19 Nā-sī Chú ê ì-sù, góa liâm-piⁿ ōe khì lín hia. Hit sî, góa chiū ōe chai hiah-ê kiau-ngō͘ ê lâng teh kóng sím-mi̍h, mā ōe chai in ōe-tàng chòe sím-mi̍h. 20 In-ūi Siōng-tè-kok ê si̍t-hiān m̄-sī khò giân-sû, sī khò koân-lêng. 21 Lín ài tó chi̍t hāng? Góa khì lín hia ê sî, lín ài góa gia̍h chhê-á á-sī tòa un-jiû thiàⁿ-thàng ê sim?

1 Ko-lîm-to 5

1 Góa khak-si̍t ū thiaⁿ-tio̍h tī lín tiong-kan ū îm-loān ê sū; chit khoán îm-loān liân kàu-hōe-gōa mā bô, in-ūi ū lâng kap i ê āu-bú tông-ku. 2 Án-ni, lín iáu ū sím-mi̍h thang phòng-hong! Lín kiám m̄ eng-kai kám-kak siong-sim, kā chòe chit khoán tāi-chì ê lâng tùi lín tiong-kan khai-tû? 3 Sui-jiân góa lâng kap lín saⁿ-lī, sim khiok kap lín chòe-hé. Góa í-keng hōng Chú Iâ-so͘ ê miâ kā chòe chit khoán khó-ò͘ⁿ ê tāi-chì ê lâng phòaⁿ-chōe lah. Lín chū-chi̍p ê sî, góa ê sim mā kap lín chòe-hé, thang khò lán ê Chú Iâ-so͘ ê tōa lêng-le̍k, 5 chiong chit-ê lâng kau hō͘ Sat-tàn húi-bia̍t i ê seng-khu, hō͘ i ê lêng-hûn thang tī lán ê Chú ê Ji̍t tit-tio̍h kiù. 6 Lín teh khoa-kháu bô eng-kai! Lín kiám m̄-chai “Chi̍t sut-á kàⁿ-bú ōe hō͘ kui oân ê mī-chhè hoat khí-lâi”? 7 Kū ê kàⁿ tio̍h tû hō͘ chheng-khì, lín chiah ōe chiâⁿ-chòe sin ê mī-chhè, sū-si̍t lín sī bô kàⁿ ê chhè. Lán Pôaⁿ-kè-choeh ê iûⁿ-ko Ki-tok í-keng hiàn-chòe seng-lé. 8 Só͘-í, lán m̄-thang ēng ok-to̍k siâ-ok ê kū kàⁿ-bú, tio̍h ēng sûn-choân chin-si̍t ê bô-kàⁿ-piáⁿ chòe chè-mi̍h lâi siú-choeh. 9 Góa chêng kià hō͘ lín ê phoe ū kéng-kài lín m̄-thang kap îm-loān ê lâng lâi-óng. 10 Góa m̄-sī chí chit sè-kan hiah-ê îm-loān, tham-loân, chà-khi, kap pài ngó͘-siōng ê lâng; nā m̄-sī lī-khui chit-ê sè-kài chiū bōe-tàng bô kap chiah-ê lâng lâi-óng. 11 Góa taⁿ án-ni siá, sī kóng m̄-thang kap hiah-ê chū-chheng Ki-tok-tô͘, khiok sī îm-loān, tham-loân, pài ngó͘-siōng, húi-pòng pa̍t-lâng, chiú-chùi, á-sī chà-khi ê lâng lâi-óng; liân kap chiah-ê lâng tâng-toh chia̍h-pn̄g to m̄-thang. 12 Phoe-phòaⁿ kàu-hōe-gōa ê lâng m̄-sī góa ê tāi-chì; Siōng-tè ōe kā in sím-phòaⁿ. Lín kiám m̄-sī tio̍h phoe-phòaⁿ kàu-hōe-lāi ê lâng? Sèng-keng ū kì-chài, “Tio̍h tùi lín tiong-kan chiong siâ-ok ê lâng khai-tû!”

1 Ko-lîm-to 6

1 Lín tiong-kan ū lâng kap pa̍t-ê sìn-tô͘ ū kiù-hun, bô tī sìn-tô͘ bīn-chêng kā i kò, hoán-tńg tùi bô-sìn ê lâng kò i? 2 Lín kiám m̄-chai sìn-tô͘ beh sím-phòaⁿ sè-kan? Kì-jiân lín beh sím-phòaⁿ sè-kan, kiám bōe-hiáu kái-koat sió-khóa tāi-chì? 3 Lín kiám m̄-chai liân thiⁿ-sài lán to beh sím-phòaⁿ, chit sè-kan ji̍t-siông ê tāi-chì koh-khah m̄-bián kóng. 4 Chit khoán tāi-chì, lín kiám thang kau hō͘ bô siū kàu-hōe chun-tiōng ê gōa-lâng chhú-lí ? 5 Lín si̍t-chāi chin kiàn-siàu! Lín tiong-kan kiám chin-chiàⁿ bô chi̍t ê ū tì-hūi ê lâng thang phòaⁿ-toàn sìn-tô͘ tiong-kan ê sī-hui? 6 Lín kèng-jiân ū sìn-tô͘ kò sìn-tô͘, sīm-chì kò kàu bô-sìn ê lâng bīn-chêng! 7 Kî-si̍t lín sio-kò, piáu-sī lín í-keng lóng su lah. Lín ná m̄ lêng-khó siū oan-óng? Ná m̄ lêng-khó siū khek-khui? 8 Lín tian-tò oan-óng lâng, khek-khui lâng, sīm-chì tùi hōe-lāi ê hiaⁿ-tī chí-bē mā án-ni chòe! 9 Kiám m̄-chai put-gī ê lâng bōe-tàng chòe Siōng-tè-kok ê chú-bîn? M̄-thang phiàn ka-kī; bô-lūn sī îm-loān ê, pài ngó͘-siōng ê, choh lâm-chhiong ê, hò͘ⁿ lâm-sek ê, 10 chòe-chha̍t ê, tham-sim ê, chiú-chùi ê, húi-pòng ê, chà-khi ê, lóng bōe-tàng chòe Siōng-tè-kok ê chú-bîn. 11 Lín tiong-kan ū lâng í-chêng sī án-ni. M̄-kú lín í-keng sóe chheng-khì, í-keng sèng-hòa kui Siōng-tè, í-keng thong-kè Chú Iâ-so͘ Ki-tok ê miâ, koh thong-kè lán ê Siōng-tè ê Sîn, kap Siōng-tè ū ha̍p-gî ê koan-hē. 12 Ū lâng kóng, “Ta̍k hāng tāi-chì góa lóng thang chòe.” M̄-kú m̄-sī ta̍k hāng tāi-chì lóng ū lī-ek. Góa mā thang kóng, “Ta̍k hāng tāi-chì góa lóng thang chòe.” M̄-kú góa bô beh hō͘ jīm-hô tāi-chì khòng-chè. 13 Ū lâng kóng, “Chia̍h-mi̍h sī ūi-tio̍h pak-tó͘, pak-tó͘ sī ūi-tio̍h chia̍h-mi̍h.” Tio̍h, m̄-kú chit nn̄g hāng, Siōng-tè lóng ōe kā in húi-hoāi. Seng-khu m̄-sī ūi-tio̍h îm-loān, sī ūi-tio̍h ho̍k-sāi Chú; Chú ōe kiong-kip lán seng-khu ê su-iàu. 14 Siōng-tè ū hō͘ Chú tùi sí koh-oa̍h, I mā ōe ēng I ê tōa lêng-le̍k hō͘ lán koh-oa̍h. 15 Kiám m̄-chai lín ê seng-khu sī Ki-tok ê chi-thé? Án-ni, góa kiám thang chiong Ki-tok ê chi-thé hō͘ i pìⁿ-chòe ki-lú ê chi-thé? Choa̍t-tùi m̄-thang! 16 Kiám m̄-chai, kap ki-lú hoat-seng jio̍k-thé koan-hē chiū-sī kap i chiâⁿ-chòe chi̍t-thé? In-ūi Sèng-keng kóng, “Nn̄g ê lâng beh chiâⁿ-chòe chi̍t-thé.” 17 M̄-kú kap Chú kiat-ha̍p ê lâng, chiū tī sim-lêng kap I chiâⁿ-chòe chi̍t-thé. 18 Tio̍h kū-choa̍t îm-loān. Lâng bô-lūn hoān sím-mi̍h chōe, lóng bô éng-hióng ka-kī ê seng-khu, put-kò hoān îm-loān ê sī hoān-chōe hāi-tio̍h ka-kī ê seng-khu. 19 Kiám m̄-chai lín ê seng-khu sī Sèng Sîn ê tiān? Chit-ūi Sèng Sîn tiàm tī lín lāi-bīn, sī lín tùi Siōng-tè niá-siū ê. Lín m̄-sī sio̍k ka-kī, sī sio̍k Siōng-tè, 20 in-ūi lín sī I hù-chhut tāi-kè bóe lâi ê. Só͘-í, tio̍h ēng lín ê seng-khu êng-iāu Siōng-tè.

1 Ko-lîm-to 7

1 Koan-hē lín tī phoe ê lāi-bīn só͘ siá ê būn-tôe: Ta-po͘-lâng bô chhin-kūn cha-bó͘-lâng khah hó. 2 M̄-kú ūi-tio̍h îm-loān ê tāi-chì, ta-po͘-lâng eng-kai ū ka-kī ê bó͘; cha-bó͘-lâng eng-kai ū ka-kī ê ang. 3 Ta-po͘-lâng tùi bó͘ eng-kai chīn choh-ang ê gī-bū; cha-bó͘-lâng tùi ang eng-kai chīn choh-bó͘ ê gī-bū. 4 Bó͘ tùi ka-kī ê seng-khu bô koân, m̄-kú ang ū; siâng-khoán, ang tùi ka-kī ê seng-khu bô koân, m̄-kú bó͘ ū. 5 M̄-thang hut-lio̍k tùi-hong ê su-iàu; nā ūi-tio̍h beh choan-sim kî-tó, thang tông-ì chiām-sî hun-khui; chóng-sī í-āu tio̍h koh hôe-ho̍k chèng-siông ê koan-hē, chiah-bián in-ūi bōe-tàng khòng-chè ka-kī tì-kàu siū Sat-tàn iú-he̍k. 6 Góa kóng thang chiām-sî hun-khui, sī bián-kióng tông-ì, m̄-sī bēng-lēng. 7 Sū-si̍t, góa ài ta̍k ê lâng lóng chhin-chhiūⁿ góa bô kiat-hun. M̄-kú ta̍k ê lâng tùi Siōng-tè niá-siū bô kâng-khoán ê un-sù, chit-ê lâng chit khoán, hit-ê lâng hit khoán. 8 Hiān-chāi, góa tùi bô kiat-hun-ê kap kóaⁿ-hū kóng, nā ōe-tàng chhin-chhiūⁿ góa siú to̍k-sin sī khah hó; 9 m̄-kú nā bōe-tàng khòng-chè ka-kī, chiū tio̍h kiat-hun. Lêng-khó kiat-hun, pí hō͘ io̍k-hé sio khah hó. 10 Í-keng kiat-hun ê lâng, góa bēng-lēng lín --- kî-si̍t m̄-sī góa, sī Chú ê bēng-lēng: Cha-bó͘-lâng m̄-thang lī-khui tiōng-hu, 11 nā lī-khui, tio̍h siú to̍k-sin; nā bô, tio̍h koh kap tiōng-hu hô-hó. Tiōng-hu mā m̄-thang pàng-sak bó͘. 12 Tùi kî-tha ê lâng, góa kóng --- m̄-sī Chú kóng ê: Lâm ê sìn-tô͘ nā chhōa bô sìn Chú ê lâng chòe bó͘, bó͘ tông-ì kè-sio̍k kap i tòa, i chiū m̄-thang kā i pàng-sak. 13 Nā ū lú ê sìn-tô͘ kap bô sìn Chú ê lâng kiat-hun, tiōng-hu tông-ì kè-sio̍k kap i tòa, i mā m̄-thang pàng-sak tiōng-hu. 14 Bô sìn Chú ê tiōng-hu ōe in-ūi sìn Chú ê bó͘ tit-tio̍h Siōng-tè chiap-la̍p. Chhin-chhiūⁿ án-ni, bô sìn Chú ê bó͘ mā ōe in-ūi sìn Chú ê tiōng-hu tit-tio̍h Siōng-tè chiap-la̍p. Nā m̄-sī án-ni, in ê kiáⁿ-jî chiū bô sio̍k Siōng-tè; kî-si̍t, in sī sio̍k Siōng-tè. 15 M̄-kú, bô sìn Chú ê lâng nā beh lī-khui, chiū chhut-chāi i lī-khui. Tī chit khoán ê chêng-hêng, sìn Chú ê tiōng-hu á-sī bó͘ chiū bô siū hun-in ê iok-sok. Siōng-tè ho͘-tiàu lín, sī ài lín hô-bo̍k khiā-khí. 16 Tio̍h chai, sìn Chú ê cha-bó͘-lâng kiám-chhái ōe kiù ka-kī ê tiōng-hu. Tio̍h chai, sìn Chú ê tiōng-hu kiám-chhái ōe kiù ka-kī ê bó͘. 17 Bô-lūn án-chóaⁿ, ta̍k ê lâng tio̍h chiàu Chú pun hō͘ lín ê un-sù, chiàu Siōng-tè kéng-tiàu ê bo̍k-te̍k lâi seng-oa̍h. Che sī góa hō͘ ta̍k ê kàu-hōe ê kui-tēng. 18 Kat-lé liáu-āu chiah siū ho͘-tiàu ê lâng, m̄-bián am-khàm kat-lé ê kì-hō; siū ho͘-tiàu ê sî iáu-bē kat-lé ê lâng mā m̄-bián siū kat-lé. 19 In-ūi ū kat-lé bô kat-lé lóng bô iàu-kín, iàu-kín ê sī tio̍h chun-siú Siōng-tè ê kài-bēng. 20 Ta̍k ê lâng tio̍h pó-chhî siū tiàu ê sî ê sin-hūn. 21 Lí siū tiàu ê sî sī lô͘-lē sī-bô, m̄-bián khòa-ì; put-kò lí nā ū ki-hōe tit-tio̍h chū-iû, tio̍h pá-ak ki-hōe. 22 In-ūi siū Chú ho͘-tiàu ê lô͘-lē sī Chú só͘ tháu-pàng ê chū-iû-jîn; siâng-khoán, siū Chú ho͘-tiàu ê chū-iû-jîn sī Ki-tok ê lô͘-lē. 23 Lín sī Siōng-tè hù-chhut tāi-kè bóe lâi ê, m̄-thang chiâⁿ-chòe lâng ê lô͘-lē. 24 Hiaⁿ-tī chí-bē, lín ta̍k ê lâng tio̍h tī Siōng-tè ê bīn-chêng pó-chhî siū tiàu ê sî ê sin-hūn. 25 Koan-hē chāi-sek-lú ê būn-tôe, góa bô tùi Chú tit-tio̍h sím-mi̍h bēng-lēng, put-kò chòe chi̍t ê tit-tio̍h Chú ê lîn-bín chiâⁿ-chòe thang sìn-jīm ê lâng, góa thê-chhut ka-kī ê ì-kiàn. 26 Khó-lū ba̍k-chêng kan-lân ê chhù-kéng, góa siūⁿ lâng pó-chhî hiān-chōng sī khah hó. 27 Í-keng chhōa-bó͘, m̄-thang siūⁿ-beh chū-iû; iáu-bē chhōa-bó͘, m̄-thang siūⁿ-beh chhōa. 28 M̄-kú nā chhōa-bó͘, bô sǹg hoān-chōe; siàu-lú nā chhut-kè, mā bô sǹg hoān-chōe. Put-kò kiat-hun ê lâng ōe ke-thiⁿ seng-oa̍h siōng ê thoa-lūi, góa khah ài lín bián tú-tio̍h chit khoán tāi-chì. 29 Hiaⁿ-tī chí-bē, góa ài kóng ê sī, sî-kan pek-kūn lah, tùi taⁿ í-āu, ū bó͘ ê tio̍h ná-chún bô bó͘; 30 teh khàu ê ná-chún bô teh khàu; teh hoaⁿ-hí ê ná-chún bô teh hoaⁿ-hí; bóe-mi̍h ê ná-chún bô tit-tio̍h pòaⁿ-hāng; 31 chhap sè-kan sū ê, ná-chún bô teh chhap. In-ūi chit sè-kan ê hiān-chōng teh kè-khì. 32 Góa ài lín lóng bô khòa-lū. Bô chhōa-bó͘ ê lâng koan-sim Chú ê sū, khòaⁿ-beh án-chóaⁿ hō͘ Chú hoaⁿ-hí. 33 Chhōa-bó͘ ê lâng koan-sim sè-kan ê sū, khòaⁿ-beh án-chóaⁿ hō͘ bó͘ hoaⁿ-hí, 34 soah hun-sim. Bô kè ê cha-bó͘-lâng á-sī siàu-lú koan-sim Chú ê sū, sī beh hō͘ seng-khu kap sim-lêng sèng-kiat; put-kò kè-ang ê cha-bó͘-lâng koan-sim sè-kan ê sū, khòaⁿ-beh án-chóaⁿ hō͘ tiōng-hu hoaⁿ-hí. 35 Góa tùi lín án-ni kóng sī ūi-tio̍h lín ê lī-ek, m̄-sī beh kā lín sok-pa̍k, sī ài lín chòe ha̍p-gî ê sū, thang choan-sim chi̍t-ì ho̍k-sāi Chú. 36 Nā ū lâng tèng-hun liáu koat-tēng bô beh chhōa, āu-lâi in-ūi chêng-io̍k kiông, bōe-tàng khòng-chè ka-kī, ōe tùi bī-hun-chhe chòe-chhut bô ha̍p-gî ê sū, in tio̍h kiat-hun, án-ni chòe m̄-sī hoān-chōe. 37 Put-kò i nā m̄-sī in-ūi gōa-lâi ê ap-le̍k, sī chhut tī ka-kī ê koat-sim, koh ōe-tàng khòng-chè ka-kī ê ì-chì, koat-tēng bô beh kap bī-hun-chhe kiat-hun, hō͘ i pó-chhî chāi-sek-lú ê sin-hūn, i án-ni chòe sī hó. 38 Chóng kóng, kap bī-hun-chhe kiat-hun sī hó, bô kap i kiat-hun koh-khah hó. 39 Tiōng-hu iáu oa̍h-teh ê sî cha-bó͘-lâng bô chū-iû; tiōng-hu sí liáu, cha-bó͘-lâng thang chū-iû kap kah-ì ê lâng kiat-hun, put-kò, chí-ū thang kè hō͘ sìn Chú ê lâng. 40 I nā bô koh kè sī koh-khah ū hok-khì, che sī góa ê ì-kiàn, chóng-sī góa siūⁿ góa mā ū Siōng-tè ê Sîn ê chí-sī.

1 Ko-lîm-to 8

1 Koan-hē chè ngó͘-siōng ê mi̍h, lán chai “lán lóng ū tì-sek.” Kî-si̍t tì-sek ōe hō͘ lâng kiau-ngō͘; m̄-kú thiàⁿ-sim ōe chō-chiū lâng. 2 Ka-kī siūⁿ-kóng ū tì-sek ê, si̍t-chè siōng eng-kai chai ê, i iáu m̄-chai. 3 Lâng nā thiàⁿ Siōng-tè, chit-ê lâng Siōng-tè í-keng bat i. 4 Só͘-í, koan-hē chia̍h chè ngó͘-siōng ê mi̍h, lán chai, sè-kan ê ngó͘-siōng lóng m̄-sī chin ê, lán mā chai chí-ū chi̍t ūi Siōng-tè, í-gōa bô pa̍t ê. 5 Sui-jiân tī thiⁿ-téng á-sī tōe-chiūⁿ ū só͘-ūi ê sîn-bêng, koh sui-jiân ū chin chōe “sîn” á-sī “chú”, 6 m̄-kú lán chí-ū chi̍t ūi Siōng-tè, chiū-sī Thiⁿ Pē; bān-iú tùi I lâi chhòng-chō, lán ūi-tio̍h I lâi oa̍h. Lán chí-ū chi̍t ūi Chú, chiū-sī Iâ-so͘ Ki-tok; bān-iú thong-kè I chhòng-chō, lán mā thong-kè I lâi chûn-chāi. 7 M̄-kú, m̄-sī ta̍k ê lâng lóng ū chit khoán tì-sek. Ū lâng pài ngó͘-siōng koàn-sì, kàu kin-á-ji̍t chia̍h chit khoán mi̍h ê sî iáu siūⁿ-kóng sī teh chia̍h ngó͘-siōng ê mi̍h; in ê liông-sim loán-jio̍k, siūⁿ-kóng ōe hō͘ hit khoán chia̍h-mi̍h bak lâ-sâm. 8 Kî-si̍t chia̍h-mi̍h bōe hō͘ lán khah chiap-kūn Siōng-tè; bô chia̍h bô sún-sit, chia̍h mā bô khah ū lī-ek. 9 M̄-kú tio̍h sòe-jī, m̄-thang in-ūi lín chū-iû ê hêng-ûi chiâⁿ-chòe loán-jio̍k ê lâng sìn-gióng ê chó͘-gāi. 10 Nā ū lâng liông-sim loán-jio̍k, khòaⁿ-tio̍h lín só͘-ūi “ū tì-sek” ê lâng tī ngó͘-siōng ê biō-lāi lim-chia̍h, án-ni lín kiám m̄-sī teh kó͘-lē in chia̍h chè ngó͘-siōng ê mi̍h? 11 Án-ni, chit-ê loán-jio̍k ê sìn-tô͘ mā-sī Ki-tok ūi-tio̍h i sí ê lâng, ōe in-ūi lín ê “tì-sek” lâi bia̍t-bông. 12 Lín án-ni chòe sī tek-chōe lín ê hiaⁿ-tī á-sī chí-bē, siong-hāi tio̍h in ê liông-sim chiū-sī tek-chōe Ki-tok. 13 Só͘-í, nā chia̍h-mi̍h ōe hō͘ hiaⁿ-tī á-sī chí-bē ê sìn-gióng siū chó͘-gāi, góa choa̍t-tùi m̄ chia̍h chè ngó͘-siōng ê bah, chiah-bián hō͘ góa ê hiaⁿ-tī á-sī chí-bē ê sìn-gióng siū chó͘-gāi.

1 Ko-lîm-to 9

1 Góa kiám m̄-sī chū-iû ê lâng? Góa kiám m̄-sī sù-tô͘? Góa kiám m̄-bat kìⁿ-tio̍h lán ê Chú Iâ-so͘? Lín kiám m̄-sī góa ūi-tio̍h Chú kang-chok ê sêng-kó? 2 Tùi pa̍t-lâng lâi khòaⁿ góa kiám-chhái m̄-sī sù-tô͘, m̄-kú tùi lín lâi khòaⁿ, góa khak-si̍t sī. In-ūi lín kap Chú kiat-liân chiū-sī góa choh sù-tô͘ ê chèng-kù. 3 Tùi hiah-ê phoe-phêng góa ê lâng, góa án-ni piān-bêng: 4 Goán kiám bô koân thang chia̍h, thang lim? 5 Goán kiám bô koân kap kî-tha ê sù-tô͘, Chú ê hiaⁿ-tī, í-ki̍p [Pí-tek] kâng-khoán, chhōa lú sìn-tô͘ chòe bó͘ chòe-hé lú-hêng? 6 Kiám kan-ta góa kap [Pa-ná-pa] it-tēng tio̍h chòe kang chiah ōe-tàng seng-oa̍h? 7 Kiám ū lâng choh-peng koh-teh chia̍h ka-kī? Kiám ū lâng chèng-choh phû-tô-hn̂g bô chia̍h hn̂g-lāi chhut-sán ê phû-tô? Kiám ū lâng chhī-iûⁿ bô lim ka-kī ê iûⁿ-lin? 8 Góa kóng chiah-ê kiám sī kun-kù lâng ê siūⁿ-hoat? Lu̍t-hoat kiám m̄-sī mā án-ni kóng? 9 [Mô͘-se] ê Lu̍t-hoat kui-tēng, “Gû teh lún ngó͘-kok ê sî, m̄-thang kā i kòa gû-chhùi-lam.” Siōng-tè koan-sim ê kiám sī gû? 10 I kiám m̄-sī oân-choân ūi-tio̍h lán kóng ê? Tong-jiân sī! In-ūi keng-choh ê lâng khǹg ǹg-bāng keng-choh, siu-koah ê lâng khǹg ǹg-bāng siu-koah, in lóng sī kî-thāi tit-tio̍h ngó͘-kok. 11 Goán nā ū tī lín tiong-kan iā sio̍k-lêng ê chéng-chí, tùi lín tit-tio̍h bu̍t-chit siōng ê kiong-kip kiám ū kè-hūn? 12 Pa̍t-lâng nā ū koân thang tùi lín iau-kiû, goán kiám m̄-sī koh-khah ū? M̄-kú goán lóng m̄-bat ēng chit-ê koân, hoán-tńg jím-siū it-chhè, chiah-bián hō͘ Ki-tok ê hok-im siū chó͘-gāi. 13 Lín it-tēng chai, tī Sèng-tiān teh kang-chok ê lâng tùi Sèng-tiān tit-tio̍h chia̍h-mi̍h; tī chè-tôaⁿ teh hiàn-chè ê lâng pun tôaⁿ téng ê chè-mi̍h. 14 Chhin-chhiūⁿ án-ni, Chú ū hoan-hù, thoân hok-im ê lâng eng-kai khò hok-im seng-oa̍h. 15 M̄-kú góa lóng m̄-bat ēng chiah-ê koân. Góa hiān-chāi siá chiah-ê ōe mā m̄-sī beh cheng-chhú chit khoán ê koân. Góa lêng-khó sí mā bô ài hō͘ góa só͘ khoa-kháu ê lo̍k-khong! 16 Góa thoân hok-im pèng bô sím-mi̍h thang khoa-kháu; góa sī hōng-bēng teh thoân. Góa nā bô thoân ū chai-hō. 17 Góa nā kam-goān chòe chit-ê kang, chiū ū pò-siúⁿ; góa nā m̄-sī chhut-tī kam-goān, mā tio̍h chip-hêng Siōng-tè kau-tài ê jīm-bū. 18 Án-ni, góa ê pò-siúⁿ sī sím-mi̍h? Chiū-sī góa thang thoân hok-im hō͘ lâng pe̍h-pe̍h tit-tio̍h, góa tian-tò bô hióng-siū-tio̍h thoân hok-im eng-kai ū ê koân-lī. 19 Góa sī chū-iû ê lâng, bô siū lâng ê sok-pa̍k, m̄-kú ūi-tio̍h beh tit-tio̍h khah chōe lâng lâi sìn Chú, góa chiâⁿ-chòe chèng-lâng ê lô͘-lē. 20 Tùi [Iû-thài]-lâng, góa chiū choh [Iû-thài]-lâng, sī ūi-tio̍h beh tit-tio̍h [Iû-thài]-lâng. Sui-jiân góa bô siū [Mô͘-se] ê Lu̍t-hoat khu-sok, khiok choh Lu̍t-hoat-ē ê lâng, sī ūi-tio̍h beh tit-tio̍h Lu̍t-hoat-ē ê lâng. 21 Tùi Lu̍t-hoat-gōa ê lâng, góa chiū choh Lu̍t-hoat-gōa ê lâng, sī ūi-tio̍h beh tit-tio̍h Lu̍t-hoat-gōa ê lâng. Án-ni m̄-sī kóng góa bô chun-siú Siōng-tè ê Lu̍t-hoat; kî-si̍t góa sī siū Ki-tok Lu̍t-hoat iok-sok ê lâng. 22 Tùi sìn-sim loán-jio̍k ê lâng, góa chiâⁿ-chòe loán-jio̍k, sī ūi-tio̍h beh tit-tio̍h loán-jio̍k ê lâng. Tùi tó chi̍t khoán lâng, góa chiū choh hit khoán lâng, ēng ta̍k khoán hong-hoat thang ke kiù chi̍t-kóa lâng. 23 Góa chòe chiah-ê lóng sī ūi-tio̍h hok-im, bo̍k-te̍k sī beh kap lâng hun-hióng hok-im ê chiok-hok. 24 Lín it-tēng chai, tī ūn-tōng-tiûⁿ chham-ka kèng-sài ê lâng lóng lo̍h-khì cháu, m̄-kú chí-ū chi̍t ê tit-tio̍h siúⁿ. Chhin-chhiūⁿ án-ni, ūi-tio̍h beh tit-tio̍h siúⁿ, lín tio̍h phah-piàⁿ cháu. 25 Ta̍k ê soán-chhiú lóng ū chiap-siū giâm-keh ê hùn-liān; in án-ni chòe sī beh tit-tio̍h ōe pāi-hoāi ê hoa-koan; m̄-kú lán ài tit-tio̍h ê sī bōe pāi-hoāi ê hoa-koan. 26 Án-ni, góa cháu m̄-sī bô bo̍k-phiau teh cháu, phah-kûn m̄-sī teh phah khong-khì. 27 Góa giâm-keh chhau-liān ka-kī ê seng-khu kàu ōe-tàng oân-choân khòng-chè, chiah-bián chio pa̍t-lâng lâi chham-ka pí-sài, ka-kī soah sit-lo̍h chu-keh.

1 Ko-lîm-to 10

1 Hiaⁿ-tī chí-bē, góa ài lín kì-tit, lán ê chó͘-sian lóng kun-tè [Mô͘-se], tī hûn ê pó-hō͘-ē kè [Âng-hái]. 2 In tī hûn-lāi, tī hái-ni̍h, siū sóe kui tī [Mô͘-se]. 3 In lóng chia̍h kâng-khoán sio̍k-lêng ê chia̍h-mi̍h, 4 lóng lim kâng-khoán sio̍k-lêng ê chôaⁿ-chúi, chit-ê chôaⁿ-chúi sī tùi kap in tâng-kiâⁿ hit-ê sio̍k-lêng ê chio̍h-pôaⁿ lâu chhut-lâi ê; hit-ê chio̍h-pôaⁿ chiū-sī Ki-tok. 5 M̄-kú in tiong-kan tōa-pō͘-hūn ê lâng bô hō͘ Siōng-tè hoaⁿ-hí, lóng siū húi-bia̍t, tó-kah kui khòng-iá. 6 Chiah-ê tāi-chì hō͘ lán chòe kàm-kài, kiò lán m̄-thang chhin-chhiūⁿ in tham-loân pháiⁿ-tāi. 7 M̄-thang chhin-chhiūⁿ in tiong-kan ū chi̍t-kóa lâng khì pài ngó͘-siōng, chiàu Sèng-keng kì-chài: “Chiah-ê chú-bîn chē lo̍h-khì, tōa-lim tōa-chia̍h; khiā khí-lâi, tian-kông loān-sńg.” 8 Lán m̄-thang chhin-chhiūⁿ in ū chi̍t-kóa lâng îm-loān, soah tī chi̍t ji̍t lāi sí nn̄g-bān saⁿ-chheng lâng. 9 M̄-thang chhin-chhiūⁿ in tiong-kan ū chi̍t-kóa lâng chhì-thàm Chú, soah hō͘ chôa kā-sí. 10 M̄-thang chhin-chhiūⁿ in tiong-kan ū chi̍t-kóa lâng kóng oàn-giân, soah hō͘ Húi-bia̍t-chiá châu-bia̍t. 11 In só͘ tú-tio̍h chiah-ê tāi-chì thang chòe pa̍t-lâng ê kàm-kài, koh kì-lio̍k lo̍h-lâi thang kéng-kài lán chiah-ê oa̍h tī boa̍t-sè ê lâng. 12 Só͘-í, siūⁿ-kóng ka-kī khiā-chāi ê tio̍h kín-sīn, chiah bōe poa̍h-tó. 13 Lín só͘ tú-tio̍h ê chhì-thàm lóng sī lâng ōe tú-tio̍h ê. Siōng-tè sī sìn-si̍t, I bōe hō͘ lín tú-tio̍h tam-tng bōe-khí ê chhì-liān. Lín tú-tio̍h chhì-liān ê sî, I ōe kā lín khui chi̍t tiâu chhut-lō͘, hō͘ lín jím-siū ōe-tiâu. 14 Só͘-í, chhin-ài ê hiaⁿ-tī chí-bē, pài ngó͘-siōng ê sū lóng m̄-thang chhap-tio̍h. 15 Góa khòaⁿ lín chòe bêng-pe̍k sū-lí ê lâng kap lín kóng-ōe; góa só͘ kóng ê lín ka-kī thang phòaⁿ-toàn. 16 Lán teh lim hit-ê chiok-siā ê poe, kiám m̄-sī teh hun-hióng Ki-tok ê huih? Lán teh chia̍h hit-ê peh-khui ê piáⁿ, kiám m̄-sī teh hun-hióng Ki-tok ê seng-khu? 17 In-ūi piáⁿ chí-ū chi̍t tè, lán sui-jiân chin chōe lâng, iáu-kú sī chi̍t-thé, in-ūi lán chòe-hé chia̍h kâng chi̍t tè piáⁿ. 18 Ēng [Í-sek-lia̍t]-lâng chòe lē, hiah-ê chia̍h chè-mi̍h ê lâng kap chè-tôaⁿ ū koan-hē. 19 Án-ni góa teh kóng ê sī sím-mi̍h ì-sù? Sī kóng ngó͘-siōng ū sím-mi̍h tiōng-iàu, chè-mi̍h ū sím-mi̍h iàu-kín sī-bô? 20 M̄-sī, góa sī teh kóng, hiàn tī īⁿ-kàu chè-tôaⁿ téng ê chè-mi̍h sī hiàn hō͘ kúi, m̄-sī hiàn hō͘ Siōng-tè. Góa bô ài lín kap kúi kau-chhap. 21 Lín bōe-tàng lim Chú ê poe, mā lim kúi ê poe; bōe-tàng chham-ka Chú ê iân-sia̍h, mā chham-ka kúi ê iân-sia̍h. 22 Lán beh kek hō͘ Chú chi̍t-tò͘ sī-bô? Lán pí I khah kiông sī-bô? 23 Ū lâng kóng “Ta̍k hāng lóng thang chòe”, put-kò m̄-sī ta̍k hāng lóng ū lī-ek. “Ta̍k hāng lóng thang chòe”, put-kò m̄-sī ta̍k hāng sū lóng ōe-tàng pang-chān lâng. 24 Ta̍k lâng lóng m̄-thang kiû ka-kī ê lī-ek, tio̍h kiû pa̍t-lâng ê lī-ek. 25 Chhī-tiûⁿ teh bōe ê bah lóng thang bóe lâi chia̍h, m̄-bián ūi-tio̍h liông-sim ê iân-kò͘ mn̄g-tang mn̄g-sai. 26 In-ūi Sèng-keng kóng, “Tōe kap tōe-chiūⁿ ê bān-mi̍h lóng sio̍k tī Chú.” 27 Nā ū bī-sìn-chiá chhiáⁿ lín chia̍h-pn̄g, lín nā khì, pâi tī lín bīn-chêng ê mi̍h chòe lín chia̍h, m̄-bián ūi-tio̍h liông-sim ê iân-kò͘ mn̄g-tang mn̄g-sai. 28 M̄-kú nā ū lâng kā lín kóng, “Chiah-ê chia̍h-mi̍h ū chè kè ngó͘-siōng”, lín chiū ūi-tio̍h hit-ê kā lín kóng ê lâng kap liông-sim ê iân-kò͘, m̄-thang chia̍h hit-ê chia̍h-mi̍h. 29 Góa só͘ chí ê sī hit-ê lâng ê liông-sim, m̄-sī lín ê liông-sim. Kiám-chhái ū lâng ōe mn̄g, “Góa ê chū-iû ná-tio̍h siū pa̍t-lâng ê liông-sim phoe-phòaⁿ? 30 Chè kè ê mi̍h, góa nā kám-siā lâi chia̍h, ū sím-mi̍h thang hō͘ lâng húi-pòng?” 31 Só͘-í, lín bô-lūn sī chia̍h sī lim, á-sī chòe sím-mi̍h, lóng tio̍h ūi-tio̍h êng-iāu Siōng-tè lâi chòe. 32 Bô-lūn sī tùi [Iû-thài]-lâng, Gōa-pang-lâng, á-sī Siōng-tè ê kàu-hōe, lín lóng m̄-thang chiâⁿ-chòe in ê chó͘-gāi. 33 Lín tio̍h chiàu góa só͘ chòe ê khì chòe. Góa ūi-tio̍h hō͘ tāi-ke hoaⁿ-hí, m̄-bat kiû ka-kī ê lī-ek, sī kiû tāi-ke ê lī-ek, thang hō͘ in tit-tio̍h kiù.

1 Ko-lîm-to 11

1 Lín tio̍h o̍h góa, chhin-chhiūⁿ góa o̍h Ki-tok. 2 Lín put-sî ōe kì-tit góa, koh chun-thàn góa thoân-siū hō͘ lín ê kà-sī, lín si̍t-chāi thang hō͘ góa o-ló. 3 Put-kò góa ài lín bêng-pe̍k, ta̍k ê ta-po͘-lâng ê thâu sī Ki-tok, hū-jîn-lâng ê thâu sī tiōng-hu, Ki-tok ê thâu sī Siōng-tè. 4 Ta-po͘-lâng tī kong-kiōng tiûⁿ-só͘ kî-tó á-sī soan-káng Siōng-tè sìn-sit ê sî, nā tà thâu-kun sī bú-jio̍k i ê thâu Ki-tok. 5 M̄-kú cha-bó͘-lâng tī kî-tó á-sī soan-káng Siōng-tè sìn-sit ê sî, nā bô tà thâu-kun sī bú-jio̍k ka-kī ê thâu, chiū-sī i ê tiōng-hu. Chit khoán ê hū-jîn-lâng kap thâu-mn̂g hō͘ lâng thì khí-lâi ê cha-bó͘-lâng bô sím-mi̍h chha-pia̍t. 6 Cha-bó͘-lâng nā m̄ tà thâu-kun, thâu-mn̂g tio̍h chián khí-lâi; kì-jiân khòaⁿ thì kng-thâu á-sī chián thâu-mn̂g chòe kiàn-siàu ê sū, chiū tio̍h tà thâu-kun. 7 Ta-po͘-lâng bô eng-kai tà thâu-kun, in-ūi i sī Siōng-tè ê hêng-siōng kap êng-iāu; cha-bó͘-lâng sī ta-po͘-lâng ê êng-iāu. 8 In-ūi ta-po͘-lâng m̄-sī tùi cha-bó͘-lâng chō chhut-lâi ê, cha-bó͘-lâng sī tùi ta-po͘-lâng chō chhut-lâi ê. 9 Ta-po͘-lâng m̄-sī ūi-tio̍h cha-bó͘-lâng chō ê, m̄-kú cha-bó͘-lâng sī ūi-tio̍h ta-po͘-lâng chō ê. 10 Ūi-tio̍h thiⁿ-sài ê iân-kò͘, cha-bó͘-lâng ê thâu eng-kai tà koân-ui ê kì-hō. 11 Chóng-sī tī Chú ê lāi-bīn, ta-po͘-lâng su-iàu cha-bó͘-lâng, cha-bó͘-lâng mā su-iàu ta-po͘-lâng. 12 In-ūi cha-bó͘-lâng sī tùi ta-po͘-lâng chō chhut-lâi ê, ta-po͘-lâng sī thong-kè cha-bó͘-lâng siⁿ ê, m̄-kú bān-mi̍h lóng sī tùi Siōng-tè chhut-lâi ê. 13 Lín tio̍h ka-kī phòaⁿ-toàn: cha-bó͘-lâng bô tà thâu-kun tùi Siōng-tè kî-tó ū ha̍p-gî bô? 14 Chū-jiân ê pún-sèng kà lán, lâu tn̂g thâu-mn̂g sī ta-po͘-lâng ê kiàn-siàu, 15 m̄-kú cha-bó͘-lâng lâu tn̂g thâu-mn̂g sī i ê êng-iāu. In-ūi tn̂g thâu-mn̂g thang chòe cha-bó͘-lâng ê jia-phè. 16 Nā ū lâng ài piān-pok, góa chí-ū ōe-tàng kóng, tī goán kap Siōng-tè ê kàu-hōe pèng bô kî-tha ê kui-kú. 17 Góa tī chia beh kóng ê ōe m̄-sī beh kā lín o-ló, in-ūi lín ê chū-hōe sún-hāi pí lī-ek khah chōe. 18 Tē-it, góa ū thiaⁿ-kìⁿ kóng, lín tī kàu-hōe chū-hōe ê sî kiat-tóng hun-phài, góa siong-sìn ū chi̍t pō͘-hūn sī sū-si̍t. 19 Lín tiong-kan bōe bián-tit ū hun-lia̍t, án-ni hō͘ lín thang khòaⁿ-chhut sím-mi̍h lâng ōe thong-kè khó-giām. 20 Lín chū-chi̍p ê sî, m̄-sī teh chia̍h Chú ê Boán-chhan. 21 In-ūi lín ta̍k ê lâng kóaⁿ-kín chia̍h ka-kī tòa-lâi ê mi̍h-kiāⁿ, kiat-kó ū-ê iau, ū-ê chiú-chùi. 22 Lín kiám bô chhù thang chia̍h, thang lim? Lín sī teh biáu-sī Siōng-tè ê kàu-hōe, ia̍h teh hō͘ bô mi̍h thang chia̍h ê lâng kiàn-siàu sī-bô? Góa beh tùi lín kóng sím-mi̍h? Góa kiám tio̍h kā lín o-ló? Bōe, tī chit hāng sū góa bōe kā lín o-ló! 23 Góa tùi Chú só͘ niá-siū ê, góa mā thoân hō͘ lín: Chú Iâ-so͘ hō͘ lâng chhut-bōe hit mî, I the̍h piáⁿ, 24 kám-siā Siōng-tè liáu-āu, peh-khui, kóng, “Chit-ê sī góa ê seng-khu, ūi-tio̍h lín hi-seng ê; lín tio̍h chòe chit-ê lâi kì-liām góa.” 25 Chiàu án-ni, chia̍h liáu-āu, I koh phâng poe, kóng, “Chit-ê poe sī sin ê iok, ēng góa ê huih siat-li̍p ê, lín ta̍k pái lim ê sî tio̍h chòe chit-ê lâi kì-liām góa.” 26 Án-ni, lín ta̍k pái chia̍h chit-ê piáⁿ, lim chit-ê poe, sī teh soan-kò Chú ê sí, ti̍t-kàu I lâi-lîm. 27 Só͘-í, bô-lūn sím-mi̍h lâng, nā bô ēng ha̍p-gî ê thài-tō͘ chia̍h Chú ê piáⁿ, lim Chú ê poe, sī tek-chōe Chú ê sin-thé kap huih. 28 Ta̍k ê lâng tio̍h séng-chhat ka-kī chiah thang chia̍h chit-ê piáⁿ, lim chit-ê poe. 29 Lín chia̍h chit-ê piáⁿ, lim chit-ê poe, nā bô khak-si̍t bêng-pe̍k Chú ê seng-khu ê ì-sù, chia̍h chit-ê piáⁿ lim chit-ê poe sī ka-kī jiá sím-phòaⁿ. 30 In-ūi án-ni, tī lín tiong-kan ū chin chōe lâng loán-jio̍k, phòa-pīⁿ, mā ū lâng tì-kàu sí. 31 Lán nā seng séng-chhat ka-kī, chiū bōe tì-kàu siū sím-phòaⁿ. 32 Put-kò lán siū Chú sím-phòaⁿ ê sî, sī teh siū koán-kàu, hō͘ lán bián tì-kàu kap sè-kan tâng siū tēng-chōe. 33 Só͘-í, góa ê hiaⁿ-tī chí-bē, lín chū-chi̍p chia̍h Chú ê Boán-chhan ê sî, tio̍h hō͘-siōng thèng-hāu. 34 Nā ū lâng iau, tio̍h tī chhù-ni̍h seng chia̍h, chiah-bián chū-hōe tian-tò pìⁿ-chòe siū Siōng-tè sím-phòaⁿ. Kî-tha ê tāi-chì, góa khì lín hia ê sî chiah chhú-lí.

1 Ko-lîm-to 12

1 Hiaⁿ-tī chí-bē, koan-hē Sèng Sîn ê un-sù, góa ài lín liáu-kái. 2 Lín chai, lín iáu sī īⁿ-kàu-tô͘ ê sî chhut-chāi lâng chhōa-khì kiâⁿ bê-lō͘, khì pài bōe kóng-ōe ê ngó͘-siōng. 3 Só͘-í góa ài lín liáu-kái, só͘-ū siū Siōng-tè ê Sîn kám-tōng ê lâng, bô-lâng ōe kóng “Iâ-so͘ tio̍h siū chiù-chó͘”; nā bô siū Sèng Sîn kám-tōng, mā bô-lâng ōe kóng “Iâ-so͘ sī Chú.” 4 Un-sù ū chin chōe khoán, m̄-kú sù un-sù ê sī kâng chi̍t ūi Sèng Sîn. 5 Sū-hōng ū chin chōe khoán, m̄-kú sī sū-hōng kâng chi̍t ūi Chú. 6 Kang-chok ū chin chōe khoán, m̄-kú pang-chān ta̍k ê lâng khì chòe ta̍k hāng tāi-chì ê sī kâng chi̍t ūi Siōng-tè. 7 Ūi-tio̍h beh hō͘ tāi-ke tit-tio̍h lī-ek, Sèng Sîn tī ta̍k ê lâng sin-chiūⁿ só͘ hián-bêng ê kang-chok mā-sī chi̍t lâng chi̍t khoán. 8 Ū lâng thong-kè Sèng Sîn tit-tio̍h thoân sìn-sit ê tì-hūi; ū lâng kun-kù kâng chi̍t ūi Sèng Sîn tit-tio̍h thoân sìn-sit ê tì-sek; 9 ū lâng tùi kâng chi̍t ūi Sèng Sîn tit-tio̍h sìn-sim; ū lâng tùi kâng chi̍t ūi Sèng Sîn tit-tio̍h i-pīⁿ ê un-sù; 10 ū lâng tit-tio̍h kiâⁿ sîn-jiah ê un-sù; ū lâng tit-tio̍h thoân Siōng-tè sìn-sit ê un-sù; ū lâng tit-tio̍h hun-piān Siōng-tè ê Sîn kap pa̍t ê sîn ê un-sù; ū lâng tit-tio̍h kóng lêng-gú ê un-sù; ū lâng tit-tio̍h kóe-seh lêng-gú ê un-sù. 11 Chiah-ê it-chhè lóng sī kâng chi̍t ūi Sèng Sîn ê ūn-chok, I chiàu ka-kī ê ì-sù chiong bô kâng-khoán ê un-sù pun hō͘ ta̍k ê lâng. 12 Chhin-chhiūⁿ seng-khu sī chi̍t ê, m̄-kú ū chin chōe chi-thé; seng-khu sui-jiân ū chin chōe chi-thé, m̄-kú seng-khu chí-ū chi̍t ê; Ki-tok mā-sī án-ni. 13 Bô-lūn sī [Iû-thài]-lâng á-sī Gōa-pang-lâng, lô͘-lē á-sī chū-iû ê lâng, lán lóng tùi kâng chi̍t ūi Sèng Sîn niá-siū sóe-lé, chiâⁿ-chòe chi̍t-thé, koh lán mā lóng lim kâng chi̍t ūi Sèng Sîn lâi tit-tio̍h lūn-te̍k. 14 Seng-khu m̄-sī chí-ū chi̍t ê chi-thé, sī ū chin chōe chi-thé. 15 Kha nā kóng “Góa m̄-sī chhiú, só͘-í bô sio̍k seng-khu”, kha m̄-sī án-ni kóng chiū bô sio̍k seng-khu. 16 Hī-á nā kóng “Góa m̄-sī ba̍k-chiu, só͘-í bô sio̍k seng-khu”, hīⁿ-á m̄-sī án-ni kóng chiū bô sio̍k seng-khu. 17 Choân seng-khu nā lóng sī ba̍k-chiu, beh ēng sím-mi̍h lâi thiaⁿ? Choân seng-khu nā lóng sī hī-á, beh ēng sím-mi̍h lâi phīⁿ? 18 Kî-si̍t, Siōng-tè chiàu I ê chí-ì chiong ta̍k khoán chi-thé an-tì tī seng-khu. 19 Choân-pō͘ nā chí-ū sī chi̍t ê chi-thé, ná ōe-tàng sǹg-chòe seng-khu? 20 Án-ni, chi-thé ū chin chōe, m̄-kú seng-khu chí-ū chi̍t ê. 21 Ba̍k-chiu bōe-tàng kā chhùi kóng “Góa bô su-iàu lí!” Thâu mā bōe-tàng tùi kha kóng “Góa bô su-iàu lí!” 22 Kî-si̍t hiah-ê khòaⁿ khí-lâi khah loán-jio̍k ê chi-thé tian-tò khah ū pit-iàu. 23 Lán khòaⁿ khah m̄ chiūⁿ-ba̍k ê chi-thé, tian-tò khah tio̍h kā in khòaⁿ-tāng; khah pháiⁿ-khòaⁿ ê chi-thé, tian-tò khah tio̍h kā in chng-thāⁿ; 24 hiah-ê khah hó-khòaⁿ ê chi-thé chiū bô su-iàu chng-thāⁿ. Siōng-tè chiong seng-khu an-pâi hó-sè, hō͘ hiah-ê khah bô tiōng-iàu ê chi-thé tit-tio̍h khah tōa ê chun-tiōng, 25 thang hō͘ seng-khu bián tì-kàu hun-lia̍t, tian-tò hō͘ ta̍k ê chi-thé hō͘-siōng chiàu-kò͘. 26 Chi̍t ê chi-thé siū-khó͘, kî-tha ê chi-thé chiū chòe-hé siū-khó͘; chi̍t ê chi-thé tit-tio̍h êng-kng, kî-tha ê chi-thé chiū chòe-hé hoaⁿ-hí. 27 Lín sī Ki-tok ê seng-khu, ta̍k ê lâng sī seng-khu ê chi-thé. 28 Siōng-tè tī kàu-hōe só͘ an-tì ê, tē-it sī sù-tô͘, tē-jī sī sian-ti, tē-saⁿ sī kàu-su, koh ū kiâⁿ sîn-jiah ê, koh ū i-pīⁿ un-sù ê, pang-chān lâng ê, koán-lí sū-bū ê, kóng ta̍k khoán lêng-gú ê. 29 Ta̍k ê lâng kiám lóng sī sù-tô͘? Kiám lóng sī sian-ti? Kiám lóng sī kàu-su? Kiám lóng sī kiâⁿ sîn-jiah ê? 30 Kiám lóng sī ū i-pīⁿ un-sù ê? Kiám lóng sī kóng lêng-gú ê? Kiám lóng sī kóe-seh lêng-gú ê? 31 Lín tio̍h jia̍t-chhiat him-bō͘ koh-khah tiōng-iàu ê un-sù. Taⁿ góa kā lín chí-sī chi̍t tiâu siōng-hó ê lō͘.

1 Ko-lîm-to 13

1 Góa nā ōe-hiáu kóng lâng ê gú-giân, sīm-chì thiⁿ-sài ê gú-giân, nā bô jîn-ài, góa chiū chhin-chhiūⁿ lô teh tân, lâ-poa̍h teh hiáng. 2 Góa nā ū thoân-ta̍t Siōng-tè sìn-sit ê un-sù, ōe liáu-kái ta̍k khoán ê ò-pì kap ta̍k khoán ê tì-sek; góa nā ū kàu-gia̍h ê sìn-sim thang î-san tó-hái, nā bô jîn-ài, góa chiū bô lō͘-ēng. 3 Góa nā the̍h só͘-ū ê châi-sán khì kiù-chè, á-sī hiàn seng-khu hō͘ hé sio, nā bô jîn-ài, tùi góa lóng bô lī-ek. 4 Jîn-ài sī khoan-iông; jîn-ài sī chû-pi; ū jîn-ài chiū bōe chi̍t-tò͘, bōe khoa-kháu, bōe kiau-ngō͘, 5 bōe chòe kiàn-siàu ê tāi-chì, bōe kiû ka-kī ê lī-ek, bōe khoài siū-khì, bōe khioh-hūn, 6 bōe ài put-gī, chí-ū ài chin-lí. 7 Jîn-ài ōe pau-iông it-chhè, tùi it-chhè ū sìn-sim, tùi it-chhè ū ǹg-bāng, tùi it-chhè ū nāi-sim. 8 Jîn-ài éng-oán chûn-chāi. Thoân-ta̍t Siōng-tè sìn-sit ê un-sù sī chiām-sî; kóng lêng-gú ê un-sù ōe bô-khì; tì-sek mā ōe bô-khì. 9 Lán só͘ bat ê iú-hān; lán thoân-ta̍t Siōng-tè sìn-sit ê un-sù mā iú-hān. 10 M̄-kú hit-ê oân-choân-ê chi̍t-ē lâi, hit-ê iú-hān-ê chiū siau-sit. 11 Góa choh gín-á ê sî, kóng-ōe chhin-chhiūⁿ gín-á, ì-kiàn chhin-chhiūⁿ gín-á, siūⁿ-hoat mā chhin-chhiūⁿ gín-á. Taⁿ góa í-keng sêng-jîn, chiū chiong gín-á ê sū lóng pàng-sak. 12 Lán hiān-chāi chhin-chhiūⁿ chiò-kiàⁿ teh khòaⁿ, bū-bū bô-bêng, chiong-lâi ōe bīn-tùi-bīn khòaⁿ chheng-chhó. Góa hiān-chāi chí-ū chai chi̍t pō͘-hūn, chiong-lâi ōe oân-choân liáu-kái, chhin-chhiūⁿ Siōng-tè oân-choân liáu-kái góa. 13 Án-ni, sìn, ǹg-bāng, jîn-ài chit saⁿ-hāng éng-oán chûn-chāi, kî-tiong siōng tiōng-iàu ê sī jîn-ài.

1 Ko-lîm-to 14

1 Tio̍h tui-kiû jîn-ài; tio̍h jia̍t-chhiat him-bō͘ sio̍k-lêng ê un-sù, te̍k-pia̍t sī thoân-ta̍t Siōng-tè sìn-sit ê un-sù. 2 Kóng lêng-gú ê lâng m̄-sī teh tùi lâng kóng, sī teh tùi Siōng-tè kóng, in-ūi bô-lâng thiaⁿ ū; i sī khò Sèng Sîn teh kóng ò-pì ê sū. 3 Put-kò thoân-ta̍t Siōng-tè sìn-sit ê lâng sī teh tùi lâng kóng, beh hō͘ in tit-tio̍h chō-chiū, kó͘-lē, an-ùi. 4 Kóng lêng-gú ê lâng chí-ū chō-chiū ka-kī, put-kò thoân-ta̍t Siōng-tè sìn-sit ê lâng chō-chiū choân kàu-hōe. 5 Góa ài lín ta̍k ê lâng lóng ōe kóng lêng-gú, koh-khah ài lín ōe thoân-ta̍t Siōng-tè ê sìn-sit. Kóng lêng-gú nā m̄-sī ū lâng kóe-seh, thang hō͘ kàu-hōe tit-tio̍h chō-chiū, thoân-ta̍t Siōng-tè ê sìn-sit pí kóng lêng-gú khah tiōng-iàu. 6 Só͘-í, hiaⁿ-tī chí-bē, góa khì lín hia, nā kan-ta kóng lêng-gú, bô thoân-ta̍t Siōng-tè ê khé-sī, á-sī tì-sek, á-sī sìn-sit, á-sī kà-sī, tùi lín ū sím-mi̍h lī-ek? 7 Bô sìⁿ-miā ê ga̍k-khì chhin-chhiūⁿ phín-á á-sī khîm, in só͘ hoat-chhut ê im nā bô koân-kē piàn-hòa, lâng ná-ōe chai sī teh chàu sím-mi̍h? 8 Lat-pah ê siaⁿ nā bô chún-khak, lâng ná chai thang chún-pī sio-chiàn? 9 Chhin-chhiūⁿ án-ni, lín só͘ kóng ê lêng-gú, ì-sù nā bô chheng-chhó, lâng ná-ōe lí-kái lín teh kóng sím-mi̍h? Án-ni lín sī teh tùi khong-khì kóng-ōe. 10 Sè-kan ū chin chōe bô kâng-khoán ê gú-giân, ta̍k ê lóng ū ì-sù. 11 Góa nā m̄-bat bó͘ chi̍t ê gú-giân, tùi teh kóng chit-ê gú-giân ê lâng lâi khòaⁿ góa sī gōa-kok-lâng; teh kóng chit-ê gú-giân ê lâng tùi góa lâi khòaⁿ mā-sī gōa-kok-lâng. 12 Lín mā-sī án-ni, kì-jiân lín jia̍t-chhiat him-bō͘ sio̍k-lêng ê un-sù, tio̍h koh-khah chhut-la̍t tui-kiû hiah-ê ōe chō-chiū kàu-hōe ê un-sù. 13 Só͘-í, kóng lêng-gú ê lâng tio̍h kî-kiû ōe-tàng kóe-seh ê lêng-le̍k. 14 Góa nā ēng lêng-gú kî-tó, sī góa ê lêng teh kî-tó, m̄-kú góa ê lí-tì bô chok-iōng. 15 Án-ni góa beh án-chóaⁿ? Góa beh ēng lêng kî-tó, mā beh ēng lí-tì kî-tó. Góa beh ēng lêng gîm-si, mā beh ēng lí-tì gîm-si. 16 Nā bô, lín nā chí-ū ēng lêng kám-siā Siōng-tè, chham-ka chū-hōe ê hiah-ê bô liáu-kái lêng-gú ê sìn-tô͘ m̄-chai lín teh kóng sím-mi̍h, beh ná-ōe tùi lín ê kám-siā kóng “Amen”? 17 Lín ê kám-siā kiám-chhái chin hó, m̄-kú bô hō͘ pa̍t-lâng tit-tio̍h chō-chiū. 18 Kám-siā Siōng-tè, góa pí lín chèng-lâng kóng koh-khah chōe lêng-gú. 19 M̄-kú tī kàu-hōe tiong, góa lêng-khó kóng gō͘ kù ū lí-tì ê ōe thang kà-sī pa̍t lâng, mā bô ài kóng chi̍t-bān kù lêng-gú. 20 Hiaⁿ-tī chí-bē, lín siūⁿ tāi-chì m̄-thang chhin-chhiūⁿ gín-á; chòe pháiⁿ tāi-chì tio̍h chhin-chhiūⁿ eⁿ-á, siūⁿ tāi-chì tio̍h chhin-chhiūⁿ tōa-lâng. 21 Tī Lu̍t-hoat-su ū kì-chài: Chú kóng, Góa beh ēng kóng gōa-kok-ōe ê lâng, ēng īⁿ-pang-lâng ê chhùi-tûn, tùi góa ê chú-bîn kóng-ōe, m̄-kú in iáu m̄-thiaⁿ. 22 Án-ni, kóng lêng-gú m̄-sī beh hō͘ sìn-tô͘, sī beh hō͘ bô-sìn ê lâng chòe kì-hō. M̄-kú thoân-ta̍t Siōng-tè sìn-sit ê un-sù m̄-sī beh hō͘ bô-sìn ê lâng, sī beh hō͘ sìn-tô͘ chòe kì-hō. 23 Choân kàu-hōe chū-chi̍p ê sî, tāi-ke nā lóng teh kóng lêng-gú, ū bô liáu-kái lêng-gú ê sìn-tô͘ á-sī bô-sìn ê lâng ji̍p-lâi, kiám bōe kóng lín sī teh khí-siáu? 24 Tāi-ke nā lóng teh thoân-ta̍t Siōng-tè ê sìn-sit, ū bô-sìn ê lâng á-sī bô liáu-kái lêng-gú ê sìn-tô͘ ji̍p-lâi, thiaⁿ-tio̍h hiah-ê ōe chiū hiáu-ngō͘ chai-chōe, 25 sim-lāi ê pì-bi̍t hián-lō͘ chhut-lâi, ōe phak lo̍h-khì kèng-pài Siōng-tè, soan-kò kóng, “Siōng-tè chin-chiàⁿ tī lín tiong-kan!” 26 Hiaⁿ-tī chí-bē, án-ni beh án-chóaⁿ? Lín chū-hōe ê sî, ū lâng chhiùⁿ sèng-si, ū lâng kà-sī, ū lâng soan-káng Siōng-tè ê khé-sī, ū lâng kóng lêng-gú, mā ū lâng kóe-seh lêng-gú. Ta̍k hāng tāi-chì lóng tio̍h ūi-tio̍h chō-chiū kàu-hōe lâi chòe. 27 Nā ū lâng kóng lêng-gú, chí-ū nn̄g ê, siōng-chōe saⁿ ê lûn-liû kóng, koh tio̍h ū lâng kóe-seh. 28 Nā-sī bô-lâng thang kóe-seh, in tī chū-hōe tiong tio̍h chēng-chēng, chí-ū tùi ka-kī kap Siōng-tè kóng. 29 Soan-káng Siōng-tè ê sìn-sit, thang hō͘ nn̄g ê á-sī saⁿ ê kóng, kî-tha ê lâng thang phòaⁿ-toàn in só͘ kóng ê. 30 Put-kò chāi-chō ê lâng nā ū tit-tio̍h Siōng-tè ê khé-sī, tú teh kóng ê lâng tio̍h chēng-chēng. 31 Lín ta̍k ê lâng lóng thang lûn-liû soan-káng Siōng-tè ê sìn-sit, thang saⁿ-kap ha̍k-si̍p, hō͘-siōng bián-lē. 32 Soan-káng Siōng-tè sìn-sit ê lâng tio̍h ōe-hiáu iok-sok ka-kī ê un-sù, 33 in-ūi Siōng-tè m̄-sī hūn-loān ê Siōng-tè, sī hô-hâi ê Siōng-tè. Kap só͘-ū Siōng-tè chú-bîn ê kàu-hōe kâng-khoán, 34 hū-jîn-lâng tī chū-hōe tiong tio̍h chēng-chēng, bōe ēng-tit kóng-ōe. Chiàu [Iû-thài] Lu̍t-hoat só͘ kóng, hū-jîn-lâng tio̍h sūn-ho̍k. 35 In nā ài o̍h sím-mi̍h, tio̍h tī chhù-ni̍h mn̄g ka-kī ê tiōng-hu; hū-jîn-lâng tī chū-hōe tiong kóng-ōe bô thé-biān. 36 Ná án-ni kóng! Siōng-tè ê ōe kiám tùi lín lâi, á-sī kan-ta thoân hō͘ lín? 37 Nā ū lâng siūⁿ-kóng ka-kī sī thoân-ta̍t Siōng-tè sìn-sit ê lâng, á-sī sio̍k-lêng ê lâng, tio̍h chai góa teh siá hō͘ lín ê sī Chú ê bēng-lēng. 38 Nā ū lâng bô khòaⁿ chit-ê tāi-chì chòe iàu-kín, mā m̄-thang kā i khòaⁿ-chòe iàu-kín. 39 Só͘-í, góa ê hiaⁿ-tī chí-bē, tio̍h jia̍t-chhiat him-bō͘ thoân-ta̍t Siōng-tè sìn-sit ê un-sù, put-kò mā m̄-thang kìm-chí lâng kóng lêng-gú. 40 Hoān-sū tio̍h kui-kui kú-kú, chiàu tia̍t-sū chòe.

1 Ko-lîm-to 15

1 Hiaⁿ-tī chí-bē, góa beh kā lín thê-chhíⁿ: Góa thoân hō͘ lín ê hok-im lín ū chiap-siū, mā ēng che chòe sìn-gióng ê ki-chhó͘. 2 Lín nā m̄-sī khang-khang sìn, hiān-chāi iáu ū teh kian-siú góa só͘ thoân ê sìn-sit, chiū ōe khò chit-ê hok-im tit-tio̍h kiù. 3 Góa í-keng ū chiong góa pún-sin só͘ niá-siū hit-ê siōng tiōng-iàu ê sìn-sit thoân hō͘ lín, chiū-sī chiàu Sèng-keng só͘ kì-chài, Ki-tok ūi-tio̍h lán ê chōe sí, 4 bâi-chòng; koh chiàu Sèng-keng só͘ kì-chài, I tē-saⁿ ji̍t koh-oa̍h; 5 I ū tùi [Pí-tek] hián-hiān, koh tùi cha̍p-jī sù-tô͘ hián-hiān. 6 Āu-lâi I ū chi̍t pái tùi gō͘-pah gōa ê hiaⁿ-tī chí-bē hián-hiān; hiah-ê lâng ū ê í-keng sí, m̄-kú tōa-pō͘-hūn ê lâng iáu oa̍h-teh. 7 Āu-lâi I ū tùi [Ngá-kok] hián-hiān, koh tùi só͘-ū ê sù-tô͘ hián-hiān. 8 Chòe-āu, I mā tùi góa chit-ê ná-chún bô kàu-ge̍h chiū chhut-sì ê lâng hián-hiān. 9 Góa sī sù-tô͘ tiong siōng bî-sòe ê, bōe kham-tit chheng-chòe sù-tô͘, in-ūi góa bat pek-hāi Siōng-tè ê kàu-hōe. 10 M̄-kú ū Siōng-tè ê un-tián chiah ū kin-á-ji̍t ê góa, I sù hō͘ góa ê un-tián bô lo̍k-khong. Góa tian-tò pí kî-tha ê sù-tô͘ koh-khah phah-piàⁿ kang-chok, kî-si̍t m̄-sī góa ka-kī, sī Siōng-tè ê un-tián kap góa tông-chāi. 11 Só͘-í, bô-lūn sī góa á-sī in, che sī goán só͘ teh thoân, lín í-keng ū teh sìn ê. 12 Kì-jiân goán só͘ soan-iông ê sī Ki-tok í-keng ū tùi sí-lâng tiong koh-oa̍h, lín tiong-kan ná ū lâng kóng bô sí-lâng koh-oa̍h? 13 Nā bô sí-lâng koh-oa̍h, án-ni Ki-tok chiū bô koh-oa̍h. 14 Nā Ki-tok bô koh-oa̍h, án-ni góa só͘ soan-iông ê sī khang-khang, lín ê sìn mā-sī khang-khang. 15 Án-ni goán chiū-sī teh ūi Siōng-tè chòe ké kiàn-chèng, in-ūi goán kiàn-chèng Siōng-tè í-keng hō͘ Ki-tok koh-oa̍h; sí-lâng nā bô koh-oa̍h, Siōng-tè chiū bô hō͘ Ki-tok koh-oa̍h. 16 Nā sí-lâng bô koh-oa̍h, Ki-tok chiū bô koh-oa̍h. 17 Ki-tok nā bô koh-oa̍h, lín ê sìn chiū bô lō͘-ēng, lín chiū iáu tī chōe-ok tiong. 18 Án-ni, hiah-ê í-keng sí-khì ê Ki-tok-tô͘ mā lóng bia̍t-bông lah. 19 Lán sìn Ki-tok ê lâng nā kan-ta tī hiān-sè ū ǹg-bāng, lán sī só͘-ū ê lâng ê tiong-kan siōng thang khó-lîn ê. 20 M̄-kú, hiān-chāi Siōng-tè í-keng ū hō͘ Ki-tok tùi sí-lâng tiong koh-oa̍h, thang chòe í-keng sí-khì ê lâng koh-oa̍h ê pó-chèng. 21 In-ūi sí thong-kè chi̍t ê lâng lâi, sí-lâng ê koh-oa̍h mā-sī thong-kè chi̍t ê lâng lâi. 22 Tùi [A-tong] chèng-lâng lóng tio̍h sí, án-ni, mā tùi Ki-tok chèng-lâng lóng ōe koh-oa̍h. 23 Put-kò ta̍k ê lâng lóng tio̍h chiàu ka-kī ê sūn-sū koh-oa̍h: Thâu-chi̍t ê sī Ki-tok, sòa lo̍h-khì sī Ki-tok lâi-lîm ê sî sio̍k I ê lâng, 24 koh lâi chiah-sī boa̍t-kî; hit sî I ōe siau-bia̍t it-chhè ê thóng-léng-chiá, chiáng-koân-chiá, kap koân-le̍k-chiá, jiân-āu chiong thóng-tī-koân kau hō͘ Pē Siōng-tè. 25 In-ūi Ki-tok it-tēng tio̍h thóng-tī, ti̍t-kàu Siōng-tè hō͘ it-chhè ê tùi-te̍k lóng khut-ho̍k tī I ê kha-ē. 26 Chòe-āu siū húi-bia̍t ê tùi-te̍k sī sí. 27 In-ūi Sèng-keng kì-chài kóng, “Siōng-tè hō͘ bān-iú lóng khut-ho̍k tī I ê kha-ē.” Chin bêng-hián, chia só͘ kóng ê “bān-iú” pèng bô pau-hâm hō͘ bān-iú khut-ho̍k tī Ki-tok kha-ē ê Siōng-tè. 28 Kàu bān-iú lóng khut-ho̍k Ki-tok ê sî, Kiáⁿ pún-sin mā ōe khut-ho̍k tī hō͘ bān-iú lóng khut-ho̍k ê Siōng-tè, thang hō͘ Siōng-tè oân-choân thóng-hat it-chhè. 29 Nā m̄-sī án-ni, lâng thòe sí-lâng siū sóe ū sím-mi̍h ì-sù? Nā bô sí-lâng koh-oa̍h ê sū, sī án-chóaⁿ beh thòe sí-lâng siū sóe? 30 Goán sī án-chóaⁿ tio̍h sî-sî khek-khek mō͘-hiám? 31 Hiaⁿ-tī chí-bē, góa hōng lán ê Chú Ki-tok Iâ-so͘ tùi lín chiah-ê góa só͘ khoa-kháu ê lâng hó-táⁿ kóng: Góa ta̍k ji̍t biān-tùi sí. 32 Góa tī [Í-hut-só͘] kap “iá-siù” tò͘-cheng, nā sûn-chhùi sī chhut tī lâng ê tōng-ki, tùi góa ū sím-mi̍h lī-ek? Nā sí-lâng bô koh-oa̍h, chhin-chhiūⁿ lâng teh kóng: Lán bîn-á-chài to beh sí à, lâi chia̍h, lâi lim! 33 M̄-thang hō͘ lâng phiàn khì: “Kau-tio̍h pháiⁿ pêng-iú ōe phò-hoāi phín-tek!” 34 Tio̍h kak-chhíⁿ, siūⁿ hō͘ chheng-chhó, m̄-thang koh hoān-chōe, in-ūi ū chi̍t-kóa lâng iáu m̄-bat Siōng-tè, góa kóng chiah-ê sī beh hō͘ lín chai thang kiàn-siàu. 35 Kiám-chhái ū lâng beh mn̄g, “Sí-lâng án-chóaⁿ koh-oa̍h? In ōe ēng sím-mi̍h khoán ê thé lâi?” 36 Gōng-lâng! Lín iā lo̍h-tōe ê chéng-chí nā bô sí-khì, kiám ōe oa̍h khí-lâi? 37 Lín só͘ iā ê, bô-lūn sī be̍h-á á-sī pa̍t khoán ngó͘-kok, put-kò kan-ta sī chéng-chí, m̄-sī āu-lâi tióng-tōa ê hêng-thé. 38 Siōng-tè chiàu I ê chí-ì hō͘ chéng-chí ū hêng-thé; ta̍k khoán chéng-chí ū ka-kī ê hêng-thé. 39 Ta̍k khoán tōng-bu̍t ê jio̍k-thé mā lóng bô kâng-khoán: Lâng ê jio̍k-thé chi̍t khoán, siù-lūi chi̍t khoán, chiáu-lūi chi̍t khoán, hî-lūi koh chi̍t khoán. 40 Ū thiⁿ-téng ê thé, ū tōe-chiūⁿ ê thé; thian-thé ê kng kap tōe-chiūⁿ ê thé ê kng bô kâng-khoán. 41 Ji̍t-thâu ū ji̍t-thâu ê kng, ge̍h ū ge̍h ê kng, chhiⁿ ū chhiⁿ ê kng; sīm-chì ta̍k lia̍p chhiⁿ ê kng to lóng bô kâng-khoán. 42 Sí-lâng ê koh-oa̍h mā-sī án-ni. Tâi-lo̍h-khì-ê ōe hiú-nōa, koh-oa̍h-ê bōe hiú-nōa. 43 Tâi-lo̍h-khì-ê sī pi-chiān ê, koh-oa̍h-ê sī êng-iāu ê. Tâi-lo̍h-khì-ê sī loán-jio̍k ê, koh-oa̍h-ê sī ióng-chòng ê. 44 Tâi-lo̍h-khì-ê sī hiat-jio̍k ê thé, koh-oa̍h-ê sī sio̍k-lêng ê thé. Kì-jiân ū hiat-jio̍k ê thé, chiū ū sio̍k-lêng ê thé. 45 Só͘-í Sèng-keng ū kì-chài, “Thâu-chi̍t ê lâng [A-tong] siū-chō chòe ū oa̍h-miā ê lâng”, m̄-kú lō͘-bé ê [A-tong] sī sù oa̍h-miā ê Sîn. 46 Tāi-seng ū ê m̄-sī sio̍k-lêng ê, sī hiat-jio̍k ê, āu-lâi chiah ū sio̍k-lêng ê. 47 Thâu-chi̍t ê lâng sī tùi tōe chhut, sī thô͘ chō ê; tē-jī ê lâng sī tùi thiⁿ lâi ê. 48 Só͘-ū ēng thô͘ chō ê lâng lóng kap hit-ê thâu-chi̍t ê ēng thô͘ chō ê lâng kâng-khoán; só͘-ū sio̍k-thiⁿ ê lâng mā kap hit-ê lō͘-bé lâi sio̍k-thiⁿ ê lâng kâng-khoán. 49 Tú chhin-chhiūⁿ lán ū hit-ê thâu-chi̍t ê ēng thô͘ chō ê lâng ê hêng-siōng, mā ōe ū hit-ê lō͘-bé lâi sio̍k-thiⁿ ê lâng ê hêng-siōng. 50 Hiaⁿ-tī chí-bē, góa kā lín kóng: Hiat-jio̍k ê thé bōe-tàng sêng-siū Siōng-tè ê kok; ōe hiú-nōa-ê mā bōe-tàng sêng-siū bōe hiú-nōa-ê. 51 Góa beh kā lín kóng chi̍t hāng ò-pì: Lán bōe lóng sí, put-kò tī chi̍t sùn-kan, chi̍t-ba̍k-nih-kú, chòe-āu ê lat-pah chi̍t-ē tân, lán lóng ōe kái-piàn; lat-pah tân, sí-lâng ōe koh-oa̍h, pìⁿ-chòe bōe hiú-nōa-ê, lán mā lóng ōe kái-piàn. 53 In-ūi chit-ê ōe hiú-nōa-ê it-tēng tio̍h pìⁿ-chòe bōe hiú-nōa-ê, ōe-sí-ê pìⁿ-chòe bōe-sí-ê. 54 Tng ōe hiú-nōa-ê pìⁿ-chòe bōe hiú-nōa-ê, ōe-sí-ê pìⁿ-chòe bōe-sí-ê hit sî, Sèng-keng só͘ kì-chài ê ōe chiū ōe èng-giām: Sí hō͘ sèng-lī thun lo̍h-khì lah! 55 Sí ah, lí ê sèng-lī tī tó-ūi? Sí ah, lí ê to̍k-chhì tī tó-ūi? 56 Sí ê to̍k-chhì sī chōe, chōe ê ui-le̍k sī tùi Lu̍t-hoat lâi ê. 57 Kám-siā Siōng-tè, I thong-kè lán ê Chú Iâ-so͘ Ki-tok hō͘ lán tit-tio̍h sèng-lī. 58 Só͘-í, chhin-ài ê hiaⁿ-tī chí-bē, tio̍h khiā-chāi, m̄-thang iô-tāng. Tio̍h siông-siông chīn-la̍t ūi Chú chòe-kang, in-ūi lín chai ūi Chú tio̍h-bôa chòe-kang it-tēng bōe lo̍k-khong.

1 Ko-lîm-to 16

1 Koan-hē koan-hiàn pang-chān sìn-tô͘ ê tāi-chì, lín mā tio̍h chiàu góa kā [Ka-lia̍p-thài] ê chèng kàu-hōe só͘ chí-sī ê khì chòe. 2 Múi lé-pài ê thâu-chi̍t ji̍t, ta̍k ê lâng tio̍h chiàu ka-kī ê siu-ji̍p the̍h chi̍t-kóa khí-lâi khǹg, bián-tit góa khì lín hia ê sî chiah khai-sí bō͘-koan. 3 Góa kàu-ūi ê sî, ōe chiong kài-siāu ê phoe kap lín ê koan-hiàn kau hō͘ lín ōe sìn-jīm-tit ê lâng, phài in tòa khì [Iâ-lō͘-sat-léng]. 4 Nā-sī góa mā tio̍h khì khah hó, in ōe kap góa chòe-hé khì. 5 Góa chit-chūn tú teh keng-kè [Má-kî-tùn], keng-kè [Má-kî-tùn] liáu-āu àn-sǹg beh khì lín hia, 6 tāi-khài ōe tòa lín hia kap lín chòe-hé kè tang-thiⁿ. Án-ni, bô-lūn beh koh khì tó-ūi, lín thang sàng góa chhut-hoat. 7 Góa bô ài tī kè-lō͘ ê sî chiah sūn-sòa khì khòaⁿ lín; Chú nā ún-chún, góa ǹg-bāng kap lín tòa chi̍t-chām-á. 8 Góa ōe tī [Í-hut-só͘] tòa kàu Gō͘-sûn-choeh. 9 Tī chia sui-jiân ū chin chōe hoán-tùi ê lâng, m̄-kú mn̂g ūi góa tōa khui, thang chòe ū-hāu-kó ê kang-chok. 10 [Thê-mô͘-thài] kàu-ūi ê sî, lín tio̍h kā i chiap-thāi, hō͘ i ōe-tàng an-sim, in-ūi i kap góa kâng-khoán teh chòe Chú ê kang. 11 Lín lóng m̄-thang khòaⁿ i bô-khí. Tio̍h sàng i pêng-an lī-khui, hō͘ i thang tńg-lâi góa chia, in-ūi góa teh thèng-hāu i kap hiah-ê hiaⁿ-tī chòe-hé lâi. 12 Koan-hē lán ê hiaⁿ-tī [A-pho-lô], góa ū ke̍k-le̍k khǹg i kap kî-tha ê hiaⁿ-tī khì hóng-būn lín. Put-kò i bo̍k-chêng lóng bô àn-sǹg beh khì. Nā ū tú-hó ê ki-hōe i chiū ōe khì. 13 Lín tio̍h kéng-séng, sìn-sim khiā-chāi, tio̍h ióng-kám, kian-kiông. 14 Lín só͘ chòe it-chhè ê tāi-chì tio̍h ēng thiàⁿ-sim khì chòe. 15 Hiaⁿ-tī chí-bē, lín bat [Sū-thê-hoat-ná] chi̍t ke ê lâng; in sī [A-kai-a]-séng thâu-chi̍t ke kui-sìn Ki-tok ê lâng, jia̍t-sim ho̍k-bū sìn-tô͘. 16 Góa khǹg lín tio̍h sūn-thàn chit khoán lâng, í-ki̍p só͘-ū kap in chòe-hé tio̍h-bôa kang-chok ê lâng. 17 [Sū-thê-hoat-ná], [Hok-tô͘-ná-to͘], kap [A-kai-kó͘] lâi góa chia, góa chin hoaⁿ-hí. Lín bô tī-chia, in thòe lín lâi pang-chān góa. 18 In hō͘ góa kap lín pîⁿ-pîⁿ tit-tio̍h kek-lē. Só͘-í lín tio̍h kèng-tiōng chit khoán lâng. 19 [A-se-a]-séng ê chèng kàu-hōe lóng beh kā lín chhéng-an. [A-ku-lah] kap [Pek-ki-lah], í-ki̍p tī in tau teh chū-hōe ê kàu-hōe, tī Chú ê lāi-bīn beh jia̍t-chhiat kā lín chhéng-an. 20 Só͘-ū ê hiaⁿ-tī chí-bē lóng beh kā lín chhéng-an. Lín tio̍h ēng sèng-kiat ê saⁿ-chim hō͘-siōng chhéng-an. 21 Góa --- [Pó-lô] chhin-pit kā lín chhéng-an. 22 Nā ū lâng bô thiàⁿ Chú, tio̍h siū chiù-chó͘. Chú ah, chhiáⁿ lâi! 23 Goān Chú Iâ-so͘ ê un-tián kap lín tông-chāi! 24 Goān góa ê thiàⁿ kap lín só͘-ū sio̍k Ki-tok Iâ-so͘ ê lâng tông-chāi!

AMAZING GRACE BIBLE INSTITUTE