PAMPANGO ROMANSRom 1:1 I Pablo, talasuyu nang Jesucristo, a meaus a maguing metung a apostol, a mibukud dikil king evangelio ning Dios, Rom 1:2 A pengakuanan neng makauna, king asbuk da ding keang manula, karing banal na kasulatan, Rom 1:3 Dikil king keang Anak, a mibait king dai nang David, dikil king laman, Rom 1:4 A metunggue nang Anak ning Dios maki kayupayan tungkul king espiritu ning kabanalan, king keang pangasubling mebie ibat karing mete; Rom 1:5 King pamamilatan na nitang tinggapanan tang kalam at king panga apostol, king kapamintuan king kasalpantayanan karing anggang bansa, king uli na ning keang laguiu; Rom 1:6 A kareti ikayu man mayayaus kong dikil kang Jerucristo: Rom 1:7 Keko ngang atiu keang Roma, a kaluguran na ning Dios, a mayayaus maguing banal: Kalam kekayu at kapayapan a ibat king Dios a kekatang Ibpa ampon king Guinu Jesucristo. Rom 1:8 King kaunanunan pasalamat ku king kakung Dios king pamamilatan nang Jesucristo, king uli yu ngan, pablasang ing kekong kasalpantayanan mipasiag king meto yatu. Rom 1:9 Uling saksi ke ing Dios, a susuyuan ku king kakung espiritu king evangelio ning keang Anak, nung makananung alang tuknang babangguitan dakayu, kapilan man karing kakung panalangin, Rom 1:10 Yaduan ku, nung ipaintulut ning Dios a akayanan ku pagnasan kung ayan dakayu. Rom 1:11 Uling pagnasan kung lusuk a akit dakayu, bang adake rakayu king mapilan a kalam ning espiritu, angga king bakong pasitibe; Rom 1:12 Ya pin, king aku kekayu mipatulan ku uli yu, balang metung kekatamu king kasalpantayanan ning metung, ing kekayu at ing kaku. Rom 1:13 At e ku buri king e yu kabaluan, kapatad, king aku maralas kung pigayakan a ume ku kekayu (at angga na ngeni meambangan ku), bang mika atin ku nanumang bunga mu naman kekayu, anti mo ding king karing mitagan a Gentiles. Rom 1:14 Maki utang ku karing Griegos at karing Barbaros, karing biasa at karing e biasa. Rom 1:15 Inya sa angga nung nukarin ing kaguiuwan ku, ati ku agad makatalagang ipanaral ke ing evangelio kekayu mang atiu kean Roma. Rom 1:16 Uling e ke pin pikakarine ing evangelio: uling yang upaya ning Dios king kaligtasan ning balang metung a maniwala; mumuna king Judio, at anti naman king Griego. Rom 1:17 Uling kaniti mipabalu ing kabanalan na ning Dios, manibat king kasalpantayanan angga king kasalpantayanan; anti ing atiung makasulat, Dapot ing banal mie ya king pamamilatan ning kasalpantayanan. Rom 1:18 Uling ing mua ning Dios mipakit manibat banua, salang karing anggang alang kabanalan ampon alang katuliran ding tau, a mamambangan king katutuan uli ning dewakan. Rom 1:19 Uling ing makikilala king Dios makabulalag king lub da; uling ing Dios pepabalu na karela. Rom 1:20 Uling ding bague nang e mayayakit, anti ding alang angga nang kayupayan ampon panga-Dios: manibat king pangalalang ning yatu, bina lang masalang mayayakit, pablasang makikilala la king pamamilatan da ding bague a megawa, bang ila ala lang asangkan: Rom 1:21 Anti na ning balu re ing Dios, e re pepaligayan anting Dios, ni minie mang pasalamat; nung e maguing ala lang kabaldugan king karelang pamangatuliran, at ing karelang pusu a alang panandam medalumdum ya. Rom 1:22 King pamagbibiasa ra, meguing mangmang la, Rom 1:23 At linibe re ing ligaya ning Dios a e masisira, king kalupa ning metung a larawan na ning taung masisira, ampon ding ayup, at ding lasip a tiapat a bitis, at ding bague gagapang. Rom 1:24 King uli na niti binie no ning Dios king kelabuaran da ding karelang pusu king karinatan, bang ila mu rin ilako ra puri ing sarili rang katawan; Rom 1:25 Uli ning linibe ra ing katutuan na ning Dios king metung a kalaraman, at simban de at siyuan ing lelangan kesa king Linalang; a nung ninu ing nuan angga king mangga. Yanasa. Rom 1:26 King uli na niting sangkan binie no ning Dios king nasang marawak: uling ding karelang babai linibian da ing karelang katutubung pamangamit king ketang makasalangsang king katutubu: Rom 1:27 At makanian mu rin ding lalaki man, likuan da ing katutubung pamangamit king babai, mikaluku la king kelabuaran ning metung at metung, ding lalaki karing kalupa rang lalaki guinawa lang karinatan, at tinggap da king karela mu ring sarili ing karampatan a ablas ning kabalatungan da. Rom 1:28 At anti ning sikuil deng bandian ing Dios king karelang pamangilala, binie no ning Dios king metung a marawak a pamanisip, bang dapat lang bague a e sukat karela. Rom 1:29 Mikatmuan la king anggang e katuliran, karawakan, kaingguitan, kapamiukulan; kitmun king diria, pamakamate, pamakipate, kapamirayatnan, marawak a ugali, mapanutsut, Rom 1:30 Mapanlibak, ating sama king Dios, mapalmura, mayabang, mapamikudtang dewakan, e mapamintu karing mangatua, Rom 1:31 Alang kaisipan, mapanlabag tipan, alang talagang pamakamal, alang kapakaluluan: Rom 1:32 A nung ninung balu ra ing tuntunan ning Dios, king ding darapat karing anti kareting bague karampatan la king kamatayan, e mu king daraptan da iti, nung e pa naman pamayapan da karetang darapat kaniti. Rom 2:1 Inya pin ala kang asangkan, Oh tau, ninuman sa ikang mamatul; uling king pamanatul mu king aliwa, ing sarili mu yang paparusan mu; anti ning ikang mamatul daraptan mo ding bague mu ring deti. Rom 2:2 At balu mi king atul ning Dios, makayagpang king katutuan salang karing darapat karing anti kareting bague. Rom 2:3 At isipan mu iti, Oh tau, king atulan mu la ding darapat karing anti kareting bague, at daraptan mu murin iti, ban king ika alisian mu ing atul ning Dios? Rom 2:4 O kaya lilibakan mu ing pibandian na ning keang kayapan at kapibabatan at pamanatili, a e mu balu king ing kayapan na ning Dios pupunta naka king pamanise? Rom 2:5 Dapot dikil king kekang kasiasan at e sisising pusu paibandi ka king sarili mu king mua king kayaldawan na ning mua at pamipabalu king matulid nang atul ning Dios; Rom 2:6 A nung ninu ing munie king balang metung a tau agpang karing keang dapat: Rom 2:7 Karetang king kapamilatan ning kapibabatan king mayap a dapat, panintuan da ing ligaya ing puri at ing alang kasiraan, bie alang angga; Rom 2:8 Dapot karetang talapanalangsang at e mamintu king katutuan, nung e bagkus mamintu la king e katuliran, parikilan nala king mua at kasbung lub, Rom 2:9 Kagutgutan at pagsalbat babo ning balang metung a kaladua na ning tau a darapat king dewakan, kaunanunan king Judio ampon naman king Griego; Rom 2:10 Dapot ligaya at puri at kapayapan king balang metung a tau a darapat king mangayap, mumuna na king Judio, ampon naman king Griego; Rom 2:11 Uling king Dios ala lang pamialiwa ding tau. Rom 2:12 Uling deta ngang mikasalang alang kautusan mate lang alang kautusan: at deta ngang mikasala lalam ning kautusan, miatulan la king kautusan; Rom 2:13 Uling e pin ding talapakiramdam king kautusan banal la king arapan na ning Dios, nung e ding tutupad king kautusan ilang matanggap banal. Rom 2:14 Uling nung ding Gentiles a ala karela ing kautusan darapatan do king talagang ugali ding bague ning kautusan, deti, aguiang alayu karela ing kautusan king karelang sarili kautusan la; Rom 2:15 (A deti papakit da ing dapat ning kautusan a makasulat karing karelang pusu, ing pilubluban da layun babie mu namang patutu, ampon ing karelang pamiukul king metung at metung susumbung o ipanlualu ra la); Rom 2:16 King aldo a atulan na ning Dios ing dapat dang makasalikut ding tau agpang king kakung evangelio, king uli nang Jesucristo. Rom 2:17 Dapot ika nung darala mu ing laguiu ning metung a Judio, at sasandal ka king kautusan, ampon paligaya ka king Dios, Rom 2:18 At balu mu ing keang kaburian, at pamayapan mo ding bague a mangayap, uling mituruan ka keting kautusan, Rom 2:19 At atin kang katiwalan a king ika mu rin maguing metung kang talataid ding bulag, metung a sulu ra detang atiu king dalumdum, Rom 2:20 Mitutuntun karing mangmang, tataluru ding bingut, layun atiu keka ing anyu ning pamangilala at ning katutuan; Rom 2:21 Ika pin tuturu king aliwa, e mu tuturu ing kekang sarile? Ikang manaral king tau king e dapat manako, manako ka? Rom 2:22 Ikang sasabi king tau king e dapat paliwas, ika darapat kang paliwas? Ikang masama karing idolos panakawanan mo ding pisamban? Rom 2:23 Ikang paligaya king kautusan, king kapanalansangan mu king kautusan, sisira kang kapurian king Dios? Rom 2:24 Uling, king uli yu, ing laguiu ning Dios malilibak ya karing Gentiles, anti mo ing makasulat. Rom 2:25 Uling ing pangatuli katutuan pakinabangnan, nung talatupad ka king kautusan: dapot nung talapanalangsang ka king kautusan, ing kekang pangatuli mumuling e pangatuli. Rom 2:26 Nung ing e pin pangatuli tuparan nala ding tuntunan ning kautusan, ing keang e pangatuli e mibilang pangatule? Rom 2:27 At itang e pangatuli a king katutubu, nung tutupad yang kautusan, ya atulan naka, ikang talapanalangsang king kautusan, bistat atiu keka ing pangatuli. Rom 2:28 Uling e Judio, ing makanian king lual na mu; i e mu naman pangatuli, ing pangatuling mayayakit king laman: Rom 2:29 Dapot Judio ya ing makanian king lub na; at ign pangatuli ya ing king pusu, king espiritu e king sulat; a ing keang kapurian e karing tau, nung e king Dios. Rom 3:1 Nanu ping iguit a atiu king Judio? o nanung pakinabang ning pangatuli? Rom 3:2 Dakal king sablang kaparalanan: kaunanunan pin, king mipaniwala la karela ding waga na ning Dios. Rom 3:3 Nanu pin nung ding mapilan meala lang kasalpantayanan? ing karela waring kealan kasalpantayanan makapalyaring mistula king katapatan na ning Dios? Rom 3:4 E na ipaintulut ning Dios: wa, ing Dios ya sa ing mayakit katutuan, dapot ing balang tau malaram ya sa agpang king makasulat, Bang mipatunayan ka karing kekang amanu, At magwagui ka nung datang ka king kayatulan. Rom 3:5 Dapot nung ing kekatamung dewakan babie ulaga king kabanalan na ning Dios, nanung sabian tamu? ing Dios wari e ya banal a daralo yang magdalang mua? (Maniabi ku anti mong tau.) Rom 3:6 E na ipaintulut ning Dios: uling nung makanian pin makananu neng atulan ning Dios ing yatu? Rom 3:7 Dapot nung ing katutuan na ning Dios, king uli na ning kakung kalaraman, makapayubu king keang kaligayan, baket miatulan ku pa naman anti mong makasalanan? Rom 3:8 At baket ali (anti ning malilibak ta pangapamalita, at anti ning ding mapilan patutuan da ing gagkas tamu), Dapat tang marawak bang datang ing mayap? Kaniti nan matulid ing parusa. Rom 3:9 Nanu pin? Mayap ta waring bina karela? Ali, king makananu man: uling minuna simbung ta na la ding Judios anti naman ding Griegos, a king ila ngan atilu lalam ning kasalanan; Rom 3:10 Agpang king makasulat, Alang banal, ala, metung man; Rom 3:11 Alang makatalastas, Alang manintun king Dios; Rom 3:12 Ilang keganagana guinulut la, Pawa lang mealang ulaga; Alang darapat mayap, Ala, ala aguiang metung mu man. Rom 3:13 Ing karelang akmulan kutkutan yang makabuklat; Karing karelang dila guinamit lang kapamirayatnan, Ing kamandag ding ubingan atiu lalam ning karelang labi: Rom 3:14 A ing keang asbuk kitmuan ya king pamalmura ampon kapaitan: Rom 3:15 Ding karelang bitis lalakad lang masalusu bang mikalat daya: Rom 3:16 Kasiran at kagutgutan ding atiu king karelang dalan; Rom 3:17 At ing dalan na ning kapayapan e re balu: Rom 3:18 Ala ing takut king Dios king arapan ding karelang mata. Rom 3:19 Ngeni balu tamu king ing nanumang sasalesean na ning kautusan, maniabi ya karing atiu lalam ning kautusan; bang ing balang asbuk mikabat ya, at ing meto yatu midala ya lalam ning kayatulan ning Dios: Rom 3:20 Uling king uli ra ding dapat ning kautusan alang laman a matanggap banal king keang panimanman; uling king pamamilatan na ning kautusan mipakilala ing kasalanan. Rom 3:21 Dapot ngeni, makakalilua king kautusan, mipabalu ya ing metung nang katuliran ning Dios, a mipatutuan king kautusan ampon karing manula; Rom 3:22 A ya ing katuliran na ning Dios king pamamilatan ning kasalpantayanan kang Jesucristo karing anggang maniwala; uling alang pamialiwa; Rom 3:23 Uling ding sabla mikasala la, at e ra akamtan ing ligaya na ning Dios; Rom 3:24 A mipamayapan timawa king uli ning keang kalam, king pamamilatan na ning pangayatbus a atiu kang Cristo Jesus: Rom 3:25 A yang binili ning Dios anting ain king kablasan, king pamamilatan ning kasalpantayanan, king daya na, bang malyaring pakit ning Dios king keang katuliran king uli na ning pangayatbus ning kasalanan a depatan a minuna, king kapibabatan na ning Dios; Rom 3:26 Dikil king pamipakilala, ngaku, king keang katuliran king panaun a salukuyan: king bang ya kabud magbanal ya, at talatanggap banal kanitang maki kasalpantayanan kang Jesus. Rom 3:27 Nukarin pin ing pamipaligaya? Makakalilua. King kaisanung kautusan? king dapat? Ali: nung e king metung a kautusan king kasalpantayanan. Rom 3:28 Yarian ta pin king ing tau matanggap yang banal king kasalpantayanan a makakalilua king dapat ning kautusan. Rom 3:29 O ing Dios wari karing Judios ya mo? E raya naman wari Dios ding Gentiles? Wa, karing Gentiles ya naman; Rom 3:30 Nung makanian metung ya mu ing Dios, a iti tatanggapan nang banal ing pangatuli king uli ning kasalpantayanan, at ing e pangatuli king pamamilatan na ning kasalpantayanan. Rom 3:31 Payalan taya ping kabaldugan ing kautusan king uli ning kasalpantayanan? E na ipaintulut ning Dios: nung e bagkus patibayan taya ing kautusan. Rom 4:1 Nanu ping sabian tamu tungkul kang Abraham a kekatang nunu king ikit na dikil king laman? Rom 4:2 Uling nung i Abraham pin metanggap yang banal king dapat, atin yang pagparangalan; dapot e king Dios. Rom 4:3 Uling nanung sasabian na ning kasulatan? At i Abraham meniwala ya king Dios, at iti mibilang keang kabanalan. Rom 4:4 Ngeni kanitang darapat, ing kablasan e bibilang anting kalam, nung e anting utang. Rom 4:5 Dapot king e darapat, nung e maniwala ya kanitang tatanggap banal king marawak, ing keang kasalpantayanan mibilang keang kabanalan. Rom 4:6 Anti mo i David mu naman maniabi yang kanuanan king tau, a nung kenu ing Dios bibilang na ing katuliran a makakalilua karing dapat, Rom 4:7 Ngana, Nuan la detang a ing karelang dewakan mipatawaran, At ing karelang kasalanan makatakap. Rom 4:8 Nuan ya ing taung kea e na ibilang kasalanan ning Guinu. Rom 4:9 Dirikil na pin ing kanuanan a iti king pangatule, o king e pangatuli mu naman? Uling sasabian tamu, Kang Abraham ing keang kasalpantayanan mibilang katuliran. Rom 4:10 Makananu ping mibilang kea? Kanitang ya atiu king pangatule, o king e pangatuli? E king pangatuli, nung e king e pangatuli: Rom 4:11 At tinggap ne ing tanda ning pangatuli, metung a tatak na ning katuliran na ning kasalpantayanan a atiu kea inyang atiu pa king e pangatuli: bang ya maguing ibpa re ding anggang maniwala, maguing atilu king e pangatuli, bang ing kabanalan pin mibilang karela; Rom 4:12 At ibpa na ning pangatuli karetang e mu bukud king pangatuli, nung e pa naman detang lalakad karing lakbang na nitang kasalpantayanan na ning kekatang ibpang Abraham a atiu kea inyang atiu king e pangatuli. Rom 4:13 Uling e king uli na ning kautusan ing pangaku kang Abraham, o karing palipi na a maguing talapagmana king yatu, nung e king uli na ning katuliran na ning kasalpantayanan. Rom 4:14 Uling nung ding atiu king kautusan talapagmana la, ing kasalpantayanan magawa yang alang kabaldugan, at ing pangaku magawang alang ulaga: Rom 4:15 Uling ing kautusan darapat yang mua; dapot nung nukarin alang kautusan, ala mu namang kapanalangsangan. Rom 4:16 King uli na niting kasangkanan king kasalpantayanan ya, bayang mibiling agpang king kalam; ban king wakas mabitasa ing pangaku karing anggang palipi; e mu kanitang king kautusan, nung e kanita mang king kasalpantayanan nang Abraham; a iti ya ing ibpa tamu ita na ngan. Rom 4:17 (Dikil king atiung makasulat, Guewa rakang ibpa ra ding dakal a bansa) king arapan na nitang nung kaninu ya meniwala, ya pin, ing Dios, a babie bie karing mete, at mamaus karing bague e mabibie, anti mung mabie: Rom 4:18 Nung ninu a king kapanayan meniwala yang salang king kapanayan bang maguing ibpa re ding dakal a bansa, makayagpang king mesabi, Makanian la ding maguing palipi mu. Rom 4:19 At king e na pangaina king kasalpantayanan inapus na ing katawan nang sarili ngeni anti mong mete (anti ning ya bibilang neng anggang dinalan a banua tua), at ing pangamate na man ning palanakan nang Sara; Rom 4:20 Makanian man king pamanaya king pangaku ning Dios, e mikakunu king uli ning kealan kapaniwalan, nung e mesikan ya king kasalpantayanan, babie yang kaligayan king Dios, Rom 4:21 At anti ning lubus bitasan na king ing pengaku na atuparan na naman. Rom 4:22 King uli na niti binilang na namang kabanalan kea. Rom 4:23 Ngeni e mu bukud misulat king uli na king mibilang makanian kea; Rom 4:24 Nung e king uli tamu man, a nung kaninu mibilang, kanitang maniwala ketang mitalakad karing mete kang Jesus a Guinu tamu, Rom 4:25 A iti miabie ya king uli na ning kekatang kapanalangsangan, at sinubli yang mebie dikil king kekatang ikatanggap banal. Rom 5:1 Anti ning metanggap ping banal king kasalpantayanan, atin tamung kapayapan king Dios king pamamilatan na ning Guinu tang Jesucristo; Rom 5:2 A king pamamilatan na mu rin atin ta nang pamanlapit king kalam a iti a nung nu ta makatalakad king uli na ning kasalpantayanan tamu; at magsaya tamu king kapanayan king ligaya na ning Dios. Rom 5:3 At e mu bukud makanian, nung e tutula tamu mu naman king kekatang kasakitan; anti ning baluan king ing kasakitan darapat pamanatili; Rom 5:4 At ing pamanatili, pangapamayapan; at ing pangapamayapan, kapanayan; Rom 5:5 At ing kapanayan a e mipakarine; uling ing lugud ning Dios makabubu karing kekatang pusu king pamamilatan na ning Espiritu Santo a miabie kekatamu. Rom 5:6 Uling i Cristo, inyang maina ta pa, king kapanaunan, mete ya king uli ra ding mangarawak. Rom 5:7 Uling malagad mu king uli na ning metung a banal mate ya ing ninuman; pablasang king uli na ning taung mayap, mekad atin pang ninuman a mangangas mate. Rom 5:8 Dapot ing Dios itatalaga na ing keang lugud dikil kekatamu, uling kanitang itamu makasalanan ta pa, i Cristo mete ya king uli tamu. Rom 5:9 Lalu na pin, metanggap tamung banal king keang daya, miligtas tamu king mua ning Dios king uli na. Rom 5:10 Uling nung, inyang kasalang tamu, misut tamu king Dios king uli ning kamatayan na ning keang Anak, lalu na pa, inyang misut tamu, miligtas tamu king uli na ning keang bie; Rom 5:11 At e mu bukud makanian, nung e magsaya tamu king Dios, king pamamilatan na ning Guinu tang Jesucristo, a king uli na kimtan tamu ngeni ing pangasut. Rom 5:12 Inya pin, nung makananu a king uli ning metung mung tau ing kasalanan, linub king yatu, at king uli ning kasalanan, ing kamatayan; at kaniti ing kamatayan dinalan karing anggang tau, uling ding sabla mikasala la: - Rom 5:13 Uli ping anggang king inyang atin nang kautusan, ing kasalanan atiu king yatu; dapot ing kasalanan e mibilang kasalanan inyang alang kautusan. Rom 5:14 Makanian man migari ing kamatayan manibat kang Adam angga kang Moises, aguiang kareta mang e mikasala a makayagpang king pangatulad na kanitang kapanalangsangan nang Adam, a iti kauri ne nitang datang. Rom 5:15 Dapot e anti mo ing kapanalangsangan, makanian ya naman ing kalam a alang bayad. Uli ping nung king uli na ning kapanalangsangan na ning metung, ding malda mete la, lalu na pa ing kalam ning Dios, at ing pigkalub king uli na ning kalam ning metung a tau, i Jesucristo, laganap labislabis karing dakal. Rom 5:16 At e anti king pamamilatan na ning metung a mikasala, makanian ing kalam: uling ing atul meguing metung mu kabud dikil king parusa; dapot ing kalam a alang bayad king dakal a kapanalangsangan makapatanggap banal. Rom 5:17 Uling nung king uli na ning kapanalangsangan na ning metung, ing kamatayan migari king pamamilatan na ning metung, lalu na pa, ding tinanggap king dakal a kalam at ing kalam ning katuliran magari la king bie king pamamilatan na ning metung, i Jesucristo. Rom 5:18 Inya, anti mo king uli ning metung mung kapanalangsangan, ing atul king parusa dinatang karing anggang tau, makanian mu naman king uli na ning metung mung dapat king katuliran, ing kalam a alang bayad dinatang karing anggang tau dikil king pangatanggap banal king bie. Rom 5:19 Uli ping nung makananu a king pamamilatan na ning e na pamanupad ning metung a atu, ding dakal milyari lang makasalanan, makanian mu naman king pamamilatan na ning pamanupad ning metung, ding malda maguing banal la kea. Rom 5:20 At ing kautusan linub mu naman, bang dakal ing kapanalangsangan; dapot nung nu merakal ing kasalanan, lalu pang merakal ing kalam: Rom 5:21 Bang, nung makananung migari ing kasalanan king kamatayan, makanian mu naman magari ing kalam king pamamilatan na ning katuliran king bie alang angga, king pamamilatan nang Jesucristong Guinu tamu. Rom 6:1 Nanu ping sabian tamu? Manatili tamu king kasalanan, bang dakal ing kalam? Rom 6:2 E na ipaintulut ning Dios. Itamung mete king kasalanan, makananu tang mie pa kaniti? Rom 6:3 O ala ko waring balu king itamung anggang mebinyag kang Jesucristo, king kamatayan na mebinyag tamo? Rom 6:4 Mikutkut ta ping abe na, king pamamilatan na ning binyag king kamatayan: bang anti mo i Cristo sinubli yang mebie ibat karing mete king uli na ning maligayang upaya na ning Ibpa, makanian mu naman itamu lumakad ta king pangabayu ning bie? Rom 6:5 Uli ping nung miagum tamu kea king katulad ning keang kamatayan, maguing anti tamu mu naman king katulad ning keang pamaniubling mebie; Rom 6:6 Baluan tamu iti, king ing kekatang matuang pangatua mipaku a kayabe na, bang malasak ya ing katawan na ning kasalanan, bang e ta na pin mibili king lalam ning pangayalipan king kasalanan; Rom 6:7 Uling itang mete makakabus ne king kasalanan. Rom 6:8 Dapot nung mate tamung abe nang Cristo, maniwala tamu king mie tamu mu namang abe na; Rom 6:9 Pangabaluan king i Cristo pamaniubli na nang mebie karing mete e ne mate; ing kamatayan ala nang pamaniakup kea. Rom 6:10 Uling ing kamatayan a kemate na king kasalanan misan mu: dapot ing bie kabibie na, kabibie na king Dios. Rom 6:11 Makanian mu naman ikayu ibilang yu king mete nakayu king kasalanan dapot mabie kayu king Dios kang Cristo Jesus. Rom 6:12 E yu pin paburen magari ing kasalanan king kekong katawan a maki kamatayan, bang apamintuan yu ing keang kelabuaran: Rom 6:13 Ni e yo yain king kasalanan ding dake ning kekong katawan, anti mong kasangkapan na ning kealan katuliran; yain yu ing sarili yu king Dios, anti mong sinubling mebie libutad ding mete, at ding dake ning katawan yu anti mong kasangkapan na ning katuliran dikil king Dios. Rom 6:14 Uling ing kasalanan e ya mika pamaniakup kekayu; uling ala kayu lalam ning kautusan, nung e lalam ning kalam. Rom 6:15 Nanu pin? Mikasala tamu, uli ning ala tamu lalam ning kautusan, nung e lalam ning kalam? E na ipaintulut ning Dios. Rom 6:16 E yu wari balu nung kaninu yu yain ing kekong sarili anting talasuyu na ning kapamintuan, talasuyu nakayu nitang pamintuan yu, aguiang king kasalanan dikil king ikamate, kapamintuan a dikil king katuliran? Rom 6:17 Dapot salamat ing Dios, a king aguia mang meguing talasuyu nakayu ning kasalanan, milyari kong mapamintu king pusu kanitang kabagayan na ning turu a kaniti miabe kayu; Rom 6:18 At anti ning miligtas na ko king kasalanan, milyari kong talasuyu na ning katuliran. Rom 6:19 Maniabi ku agpang king kaugalian ding tau uli na ning keinan na ning kekong laman: uling nung makananu yong inain ding kekong dake ning katawan anting talasuyu na ning karinatan at ning dewakan angga king dewakan makanian ngeni yain yo ding kekong dake ning katawan anting talasuyu na ning katuliran king pangabanal. Rom 6:20 Uling inyang talasuyu nako ning kasalanan, tinawa kayu king uli ning katuliran. Rom 6:21 Nanu pin ing bungang atiu kekayu kanita karetang bague a ngeni pikakarine yu? Uli ping ing kawakasan da ding bague a deta kamatayan. Rom 6:22 Dapot ngeni kaibat yung miligtas king kasalanan at meguing talasuyu na ning Dios, atiu ing kekayung bunga king pangabanal, at king kawakasan bie alang angga. Rom 6:23 Uling ding bayad ning kasalanan ing kamatayan; dapot ing kalam nang alang bayad ning Dios ya ing bie alang angga kang Jesucristong Guinu tamu. Rom 7:1 O la kong balu, kapatad, (uling maniabi ku karing taung maki balu king kautusan) king ing kautusan atin yang pamaniakup king tau angga mung mabie ya? Rom 7:2 Uling ing babaing makiasawa makatali ya king kautusan king keang asawa kabang iti mabie ya; dapot nung mete ne ing asawang lalaki, makalual ne king kautusan ning asawang lalaki. Rom 7:3 Inya pin, kabang mabie ya ing asawang lalaki, makiabe ya king aliwang lalaki, mayaus yang metung a paliwas: dapot nung mate ne ing asawang lalaki, timawa ne king kautusan, nanupata e ne paliwas, bista mang makikametung ya king aliwang lalaki. Rom 7:4 Anti mu naman, kapatad ku, meguing mete kayu king kautusan king pamamilatan na ning katawan nang Cristo, bang makiabe ko king aliwa, kanitang sinubling mebie libutad ding mete; bang makapagdala tang bunga king Dios. Rom 7:5 Uling inyang ati tamu king laman, ding palpikasala tang kaibugan, a ati lu king pamamilatan na ning kautusan; dinapat la karing kekatang dake ning katawan papagdalang bunga dikil king kamatayan. Rom 7:6 Dapot ngeni makalual ta na king kautusan, anti ning mete tamu kanitang king kea mipiguil tamu; nung inya susuyu ta na king pangabayu ning espiritu at e king ketuan na ning sulat. Rom 7:7 Nanu pin ing sabian tamu? Kasalanan ya wari ing kautusan? E na ipaintulut ning Dios. Nung e bagkus e ku sa abalu ing kasalanan, nung e mu king pamamilatan na ning kautusan: uling e ku sa abalu ing pamangaibugan nung ing kautusan e na sinabi, E ka mangaibugan: Rom 7:8 Dapot ing kasalanan, inyang mipanaunan, dinapat kanaku, king pamamilatan ning utus, ing keganaganang adle pamangaibugan: uling makakawani king kautusan ing kasalanan ing kasalanan mete. Rom 7:9 At mebie ku a makakawani king kautusan, misan mu: dapot inyang dinatang ing utus, mebie pasibayu ing kasalanan, at aku mete ku. Rom 7:10 At ing utus, a dikil king bie, ikit keng dikil king kamatayan: Rom 7:11 Uling ing kasalanan, inyang mipanaunan, king pamamilatan na ning utus pirait naku, at king pamamilatan na pete naku. Rom 7:12 Nung makanian ing kautusan banal ya, at ing utus banal ya, at matulid, at mayap. Rom 7:13 Ing mayap ping milyaring kamatayan kanako? E na ipaintulut ning Dios. Dapot ing kasalanan, bang mipakilalang kasalanan, king pamaniapat nang kamatayan kanaku king pamamilatan na nitang mayap; bang king pamamilatan na ning utus, ing kasalanan mibiling lakuas palpikasala. Rom 7:14 Uling balu tamu king ing kautusan king espiritu ya: dapot aku malebuaran ku, a makapisali king kasalanan. Rom 7:15 Uling ing daraptan ku, e ku akikilala: uling e ing sukat daptan ku ya ing sasane ku, nung e ing pikakasaman ku, yang daraptan ku. Rom 7:16 Dapot nung ing e ku sukat daptan yang daraptan ku, paintulutan ku king kautusan king iti mayap ya. Rom 7:17 Ngeni pin aliwa na aku ing darapat kaniti, nung e ing kasalanan a makasaut king lub ku. Rom 7:18 Uling balu ku king kilub ku, king matulid a sabi, king kakung laman, alang makasaut bague a mayap: uling atiung salukuyan kanaku ing pamagnasa, dapot ing pamaniapat king mayap ala yu. Rom 7:19 Uling ing mayap a sukat kung daptan e ku daraptan: dapot ing marok a e ku sukat daptan yang daraptan ku. Rom 7:20 Dapot nung ing e ku sukat daptan, yang daraptan ku, aliwa na aku ing darapat kaniti, nung e ing kasalanan a makasaut kilub ku. Rom 7:21 Akakit ke uli nita ing kautusan, a kanaku, a sukat dapat mayap, ing marok atiu. Rom 7:22 Uling matutula ku king kautusan na ning Dios, dikil king pangataung atiu kilub: Rom 7:23 Dapot manakit kung makayaliwang kautusan karing kakung dake ning katawan makipamuk salang king kautusan na ning kakung kaisipan, at daralan naku king pangabijag lalam ning kautusan na ning kasalanan a atiu karing dake kung katawan. Rom 7:24 Oh alang kalmang tau kanaku! Ninung miligtas kanaku king katawan na niting kamatayan? Rom 7:25 Pasalamat ku king Dios, king uli nang Jesucristong kekatang Guinu. Nung inya aku mu rin king kaisipan, susuyu ku king kautusan na ning Dios; dapot king laman ing kautusan na ning kasalanan. Rom 8:1 Ala pin ngeni nanumang parusa karing atiu kang Cristo Jesus. Rom 8:2 Uling ing kautusan na ning Espiritu ning bie kang Cristo Jesus linigtas naku king kautusan na ning kasalanan ampon ning kamatayan. Rom 8:3 Uli pin ing e na arapat ning kautusan, pablasang maina ya king pamamilatan na ning laman, ing Dios, king pamipabal na king keang Anak king katulad na ning laman a palpikasala, at dikil king kasalanan, perusan na ing kasalanan king laman: Rom 8:4 Bang ing yaduan na ning kautusan matupad kekatamu, a e lalakad dikil king laman, nung e dikil king Espiritu. Rom 8:5 Uling ding atiu dikil king laman, mimisip la king bague ning laman; dapot ding atiu dikil king Espiritu, karing bague ning Espiritu. Rom 8:6 Uling ing kaisipan ning laman kamatayan; dapot ing kaisipan na ning Espiritu bie at kapayapan: Rom 8:7 Uling ing kaisipan na ning laman makisalang yang laban king Dios; uling e ya makasakup king kautusan na ning Dios, at king katutuan e malyaring magbili; Rom 8:8 At ding atiu king laman e la makapatula king Dios. Rom 8:9 Dapot ikayu ala ko king laman, nung e king Espiritu, nung makanian ing Espiritu ning Dios manuknangan ya kekayu. Dapot nung ninu mang tau a ala yu kea ing Espiritu nang Cristo, iti ala ya king kea. Rom 8:10 At nung i Cristo atiu kekayu, ing katawan mete ya king uli na ning kasalanan; dapot ing espiritu bie ya king uli na ning katuliran. Rom 8:11 Dapot nung ing Espiritu na nitang pepasubling mebie kang Jesus ibat karing mete makasaut ya kilub yu, ing pepasubling mebie kang Cristo Jesus ibat karing mete dinan nala namang bie ding kekong katawan a maki kamatayan king pamamilatan na ning keang Espiritu a makasaut kilub yu. Rom 8:12 Inya uli nita, kapatad, maki utang tamu, e king laman, bang mie dikil king laman: Rom 8:13 Uli ping nung mabibie kayu dikil king laman, kailangan mate kayu; dapot nung king uli ning Espiritu papaten yula ding dapat ning katawan, mie kayu. Rom 8:14 Uling ding anggang tataira na ning Espiritu ning Dios, deti anak ning Dios. Rom 8:15 Uling e ye tinggap pasibayu ing espiritu ning pangayalipan king takut; dapot tinggap ye ing espiritu ning pangatanggap anting anak, a king uli na niti kukulait tamu, Abba, Ibpa. Rom 8:16 Ing Espiritu mu rin babie yang patutu a makayagum king kekatang espiritu, a king itamu anak nakata ning Dios; Rom 8:17 At nung anak nakatamu, nung makanian talapagmana tamu; talapagmana ning Dios, at makipagmana kang Cristo; nung makanian makiabe tang mibabata kea, bang mipaligayan tamu mu namang abe na. Rom 8:18 Uling babalakan ku king ing kasakitan king panaun a iting salukuyan e katampatan ibas king ligayang mipakilala kekatamu nangan karin. Rom 8:19 Uling ing malablab a pamanaya king pamaglalang panayan na ing pangapakilala ra ding anak ning Dios. Rom 8:20 Uling ing pamaglalang mesakup king alang kabaldugan, e king sarili nang kaburian, nung e king matulid na nitang sinakup kea, king kapanayan Rom 8:21 A ing pamaglalang man miligtas king pangayalipan king kasiran king katimawan na ning ligaya ding anak ning Dios. Rom 8:22 Uling balu tamu king ing mabilug a melalang daralung at magkasakit king sakit angga ngeni. Rom 8:23 At e mu bukud makanian, nung e ding sarili tamu man, nung ninu ding maki atin karing mumunang bunga ning Espiritu, aguiang itamu mu rin daralung tamu king lub tamung sarili, manaya king pangatanggap tamung anting anak, ngana wari, ing pangayatbus ning kekatang katawan. Rom 8:24 Uling miligtas tamu king kapanayan: dapot ing kapanayan a mayayakit na, e kapanayan: uling ninu ing manaya king akakit na na? Rom 8:25 Dapot nung panayan tamu ing e ta pa akakit, uli nita king kapibabatan manaya tamu. Rom 8:26 Makanian mu naman ing Espiritu sasaupan na ing kekatang keinan: uling e ta biasang manalangin king katampatan; dapot ing Espiritu mu rin darapat yang pamamilatan king uli tamu, king dalung a e milyaring apasiag king amanu; Rom 8:27 At ing sisiasat karing pusu balu na nung nanu ing kaisipan na ning Espiritu, uling darapat yang pamamilatan dikil karing banal makayagpang king kaburian na ning Dios. Rom 8:28 At balu tamu king karetang malugud king Dios ding sablang bague darapat lang makapamisan dikil king mayap, karetang mayayaus agpang king keang nasa. Rom 8:29 Uling ding akilala na nang makauna, telaga na nala naman bang mitulad la king larawan na ning keang Anak, bang yang maguing pangane karing dakal a mikakapatad: Rom 8:30 At ding telaga na na, inaus nala naman; at ding inaus na, tinggap na no mang banal: at ding tinggap nang banal, pepaligayan nala naman. Rom 8:31 Nanu ping sabian tamu karing bague a deti? Nung ing Dios kekatamu ya ninung salang kekatamu? Rom 8:32 Ing king keang tune Anak e pepakawan, nung e binie ne king uli ta ngan, makananu pin namang e na ibie kekatamung alang bayad ing anggang bague a makayagum kea? Rom 8:33 Ninung mibiling sumbung salang karing inalal ning Dios? Ing Dios ya ing tatanggap banal; Rom 8:34 Ninu ing mamatul? Ya i Cristo Jesus a nung ninu ing mete; wa lalu na, yang tinalakad ibat karing mete; nung ninu ing atiu wanan na ning Dios; at ya naman ing mamilatan kekatamu. Rom 8:35 Ninung mikawani kekatamu king lugud nang Cristo? Ing kasakitan, o ing pagsalbat, o ing kaligaligan, o ing danup, o ing kalubasan, o ing panganeb, o ing talibong? Rom 8:36 Dikil king makasulat, King uli mu mamamate kami patitingapun; Mibibilang keng anting tupa dikil king pipapatayan. Rom 8:37 Ali, karing keganaganang bague a deti maiguit tamu karing talapagtagumpe king pamamilatan na nitang kekatamu linugud. Rom 8:38 Uling mapipilit ku, king ni ing kamatayan, ni ing bie, ni ding angeles, ni ding kayupayan, ni ding bague a kasalukuyan, ni ding bague a datang, ni ding upaya, Rom 8:39 Ni ing katasan, ni ing kalalaman, ni ing nanumang aliwang melalang, maguing malyaring mikawani kekatamu king lugud ning Dios, a atiu kang Cristong Jesus a kekatang Guinu. Rom 9:1 Sasabian ku ing katutuan kang Cristo, e ku maglaram, ing kakung conciencia babie pamipatutu kanaku king Espiritu Santo, Rom 9:2 King ating kung maragul a lungkut ampon kasakitan a alang likat king kakung pusu. Rom 9:3 Uling aku makapagnasa ku mu ring misumpa ku kang Cristo, king uli ra ding kapatad ku, ding kakung kamaganak dikil king laman: Rom 9:4 A ila Israelitas la; a karela ing pangatanggap anting anak, ampon ing ligaya, ampon ding tipan, ampon ing pamiibie king kautusan, ampon ing kasuyuan king Dios, ampon ding pangaku; Rom 9:5 A karela ing pangaibpa, at nung kenu ya i Cristo dikil king laman, a nung ninu ing atiu babo ra ding sabla, ing Dios a nuan ya angga king mangga. Yanasa. Rom 9:6 Dapot e anting ing amanu na ning Dios, meguing ala. Uling e ila ngan Israel la, ding king Israel: Rom 9:7 Ni e uling palipi nong Abraham, anak no ila ngan: dapot, Kang Isaac ing kekang palipi mayaus ya. Rom 9:8 Ngana wari, king e ding anak ning laman ilang anak ning Dios; nung e ding anak ning pangaku mibilang lang metung a palipi. Rom 9:9 Uling iti metung yang amanu ning pangaku: Agpang king panaun a iti datang ku, at i Sara mika metung yang anak a lalaki. Rom 9:10 At e mu bukud makanian; nung e i Rebecca man mipakaglian ya king metung mu rin, king kekatamu ping ibpang Isaac- Rom 9:11 Uling ding anak inyang e la pa mibait, ni ala la pang depatan a bague mayap o marawak, bang ing nasa na ning Dios a agpang king pamanalal, mitalakad, e king uli na ning dapat nung e king uli nitang mamaus, Rom 9:12 A mesabi kea, Ing kaka suyuan ne ing wali. Rom 9:13 Makanian ing makasulat, Liguran ke i Jacob, dapot i Esau kesaman ke. Rom 9:14 Nanu ping sabian tamu? Atin waring kelan katuliran king Dios? E na ipaintulut ning Dios. Rom 9:15 Uling ya sasabian na kang Moises, Mika pakalulu ku nung kaninu ku maki pakalulu, at mika lunus ku nung kaninu ku maki lunus. Rom 9:16 Inya pin e dikil king maki buri, ni e dikil king pupulai man, nung e king Dios a maki kapakaluluan. Rom 9:17 Uling sasabian na ning kasulatan kang Faraon, King kaniti mu ring nasa aku telakad daka, bang ipakit ku keka ing kakung upaya, at bang mibulalag ing kakung laguiu king anggang labuad. Rom 9:18 Nung inya atin yang pakalulu king nung ninu buri na, at kanitang buri na apasias ne lub. Rom 9:19 Ika pin sabian mu kanaku, Baket manintun ya pang kamalian? Uling ninung makasalangsang king keang kaburian? Rom 9:20 Ali dapot, Oh tau, ninu ikang makibat salang king Dios? Ing waring bague a megawa sabian na king guinawa kea, Baket guewa mukung makanian? Rom 9:21 O ing magtatalu ala yang matulid king pila, bang gawang metung a lulanan kaniti mu ring pila dikil king kapurian at ing metung dikil king kaumisan? Rom 9:22 Nanu nung ing Dios, buri nang ipakit ing keang mua, at ipabalu ing keang upaya, pibatan no king dakal at makabang kapibabatan ding lulanan ning mua a makatalaga na king kasiraan: Rom 9:23 At ba ping ipabalu na ing pibandian na ning keang ligaya karing lulanan ning kapakaluluan, a ya sidia na nang minuna dikil king ligaya, Rom 9:24 Aguiang itamu, a inaus na mu naman, e mu manibat karing Judios nung e naman manibat karing Gentiles? Rom 9:25 At malyari a king karinan a nung nu mesabi karela, Ausan keng balayan ku, ing e ku balayan; At ing keang kaluguran a e meguing kalugudlugud. Rom 9:26 At malyari a king karinan a nung nu mesabi karela, Aliwa ikayu ing kakung balayan, Karin mu rin mayaus lang anak ning Dios a mabie. Rom 9:27 At i Isaias kukulait ya dikil king Israel, Nung ing kabilangan ding anak ning Israel anti la karing balas ning dayatmalat, Ing tagan ya mu kabud miligtas: Rom 9:28 Uling ing Guinu daptan na ing keang amanu keti sulip, Pupusan ne iti at pakuyaran. Rom 9:29 At, anti ning i Isaias asabi na nang minuna, Subaling ing Guinu king Sabaoth likuananan nakatamung bini, Milyari ta sang anti ing Sodoma, at mitulad ta sana king Gomorra. Rom 9:30 Nanu ping sabian tamu? King ding Gentiles a e tinuki king katuliran, migkamit la king katuliran, a ya ing katuliran a dikil king kasalpantayanan: Rom 9:31 Dapot ing Israel, king pamanuki na king metung a kautusan na ning katuliran e ne disan ing kautusan a ita. Rom 9:32 Baket? Uling penintun de e king pamamilatan ning kasalpantayanan, nung e anti mo king pamamilatan na ning dapat. Mitakid la king batu ning katatakiran; Rom 9:33 Anti ing king makasulat, Oini, aku bibili ke king Sion ing metung a batung katatakiran at metung yang roca a makapamua: At ing maniwala kea e ya mibili king kamarinayan. Rom 10:1 Kapatad, ing nasa ning kakung pusu at ing kakung dalung king Dios, makatungkul karela balang mangaligtas. Rom 10:2 Uling patutu ku karela king atin lang binang katapatan king Dios, dapot e agpang king beluan. Rom 10:3 Uling anti ning ala lang balu king katuliran na ning Dios, at pagpilitan dang italakad ing sariling karela, ila e ra pepasakup ing sarili ra king katuliran na ning Dios. Rom 10:4 Uling i Cristo ya ing kawakasan na ning kautusan a ikapagbanal na ning balang metung a maniwala. Rom 10:5 Uling i Moises sinulat na king ing taung darapat king katuliran a atiu king kautusan mie ya king uli nita. Rom 10:6 Dapot ing katuliran a king kasalpantayanan makanian ing sabi na, E mu sasabian king kekang pusu, Ninung mukiat banua (ngana wari, midala keti lalam kang Cristo:) Rom 10:7 O Ninung tipa king kalalaman? (ngana wari, ing mitas kang Cristo ibat karing mete.) Rom 10:8 Dapot nanung sasabian na? Ing amanu malapit keka, king kekang asbuk, ampon king kekang pusu; ngana wari ing amanu ning kasalpantayanan, a kekaming panaral: Rom 10:9 Uling nung ipasiag me king kekang asbuk i Jesus anting Guinu, at paniwalan mu king kekang pusu king ing Dios pepasublian neng mebie ibat karing mete, ika miligtas ka: Rom 10:10 Uling king pusu ing tau maniwala ya king katuliran; at king asbuk ing pamipasiag king kaligtasan. Rom 10:11 Uling sasabian na ning kasulatan, Ninu mang maniwala kea, e mibili king kamarinayan. Rom 10:12 Uling alang pamialiwa king Judio ila ning Griego; uli ning ing Guinu mu rin yang Guinu ding sabla, at mabandi ya karetang sablang mamaus kea: Rom 10:13 Uling, ninu ya man ing maus king laguiu ning Guinu miligtas ya. Rom 10:14 Makananu re ping ausan itang e ra paniwalan? At makananu lang maniwala kanitang e ra pa dimdam? at makananu lang makiramdam nung alang talapanaral? Rom 10:15 At makananu lang manaral, nung e la talagang mipadala? Nung makananu ing makasulat, Kalagu rang bina ding bitis a magdalang masayang balita ding bague a mayap! Rom 10:16 Dapot e ding sabla pakiramdaman da ing masayang balita. Uling i Isaias sasabian na, Guinu, ninung meniwala king kekeng pepabalu? Rom 10:17 Inya pin ing kapaniwalan manibatan king pamakiramdam, at ing pakiramdam king pamamilatan na ning amanu nang Cristo. Rom 10:18 Dapot sasabian ku, E ra wari dimdam? Wa, katunayan, Ing siwala ra mikalat king mabilug a labuad, At ding karelang amanu angga king wakas na ning yatu. Rom 10:19 Dapot sasabian ko, I Israel e na wari balo? King minuna i Moises sasabian na, Pamuan dakayu king pamangalalu king nung isanu ing e bansa, Rom 10:20 At i Isaias ala yang gulat, at ngana, Ikit daku ding e menintun kanaku; Pepatilip ku karing e kukutang kanaku. Rom 10:21 Dapot tungkul king Israel, sasabian na, King kabang aldo lidlad ko ding gamat ku king metung a balayan a e mapamintu at mapanalangsang. Rom 11:1 Sasabian ku pin, Sikuil ne ning Dios ing keang balayan? E na ipaintulut ning Dios. Uling aku man Israelita ku, king laji nang Abraham, king tribu nang Benjamin. Rom 11:2 E ne sikuil ning Dios ing keang balayan, a kilala nang makauna. O e yu wari balu ing sasabian na ning kasulatan kang Elias? Nung makananu yang menigapu king Dios salang king Israel: Rom 11:3 Guinu, ila pete ro ding kekang manula, inaun dong ligpak ding kekang altares at aku melakuan kung dilidili, at panintunan da ing kakung bie. Rom 11:4 Dapot nanung sasabian na kea ning pakibat ning Dios? Mitagan ku kanakung pitung libung lalaki, at deti e ro siniklaud ding tud da kang baal. Rom 11:5 Makanian mu naman pin, king panaun mu naman a iting salukuyan, ating metung a iguit dikil king alal na ning kalam. Rom 11:6 Dapot nung king uli ning kalam, e na karing dapat: o kaya ing kalam e na kalam. Rom 11:7 Nanu pin? Itang panintunan ning Israel, ita e na akamtan; dapot ding mialal kimtan da, at ding mitagan sinais la lub: Rom 11:8 Dikil king makasulat, Ing Dios dininan nong espiritu king tudtud a malalam, matang e ra panakit, at balugbug a e makaramdam, angga king aldo ngeni. Rom 11:9 At i David sasabian na, Ing karelang dulang malyari ya sa karelang metung a silu ampon metung a umang, Ampon metung a makatakid at metung a kabayaran karela: Rom 11:10 Dalumdum la sa ding karelang mata barang e akit, At mibaluktut la sa ding karelang galudgud kapilan man. Rom 11:11 Sasabian ku pin, Mitakid la wari balang miragsa? E na ipaintulut ning Dios: dapot king karelang pangaragsa dinatang ing kaligtasan karing Gentiles, bang mimua la king kapangalaluan. Rom 11:12 Ngeni nung ing karelang pangaragsa yang meguing pibandian na ning yatu, at ing karelang pangalugui yang pibandian ding Gentiles; nu anti pa kasi iguit ing karelang kaganapan? Rom 11:13 Dapot maniabi ku kekayung Gentiles. Anti na pin ning aku apostol daku ding Gentiles, paligayan ku ing kakung pamaniuyu; Rom 11:14 Nung king kaisanu mang paralan apamua ko king pangalalu ding laman ku, ampon aligtas ding mapilan karela. Rom 11:15 Uling nung ing pamisakuil karela ya ing pangasut na ning yatu, mipakananu pin pamananggap karela, nung e bie manibat karing mete? Rom 11:16 At nung ing mumunang bunga banal ya, makanian ya naman ing kabilugan; at nung ing yamut banal ya, makanian la naman ding sanga. Rom 11:17 Dapot nung ding mapilan karing sanga mepakli la, at ika, anti king metung kang olivong lili, mitaid kang kayabe ra, at mekirake ka karela king yamut at taba ning dutung a olivo; Rom 11:18 E ka magmaragul karing sanga: dapot nung magmaragul ka, ganakan mu king aliwa ikang magdala king yamut, nung e ing yamut yang magdala keka. Rom 11:19 Sabian mu pin, Ding sanga mepakli la, bang aku mitaid ku. Rom 11:20 Mayap; king uli na ning kelan dang pamaniwala mepakli la, at ika makatakad ka king uli na ning kekang kasalpantayanan. E ka magpalalu, bagkus tumakut ka: Rom 11:21 Uli pin nung ing Dios e no pepakawanan ding sangang tune, ika man e naka pakawanan. Rom 11:22 Lawan mu pin ing kayapan ampon ing kabagsikan na ning Dios: dikil karing miragsa, kabagsikan; dapot dikil keka, ing kayapan na ning Dios, nung ika manatili ka king keang kayapan: nung ali ika man makutud ka. Rom 11:23 At ila man, nung e la manatili king e ra pamaniwala, mitaid la: uling apalyari ning Dios asubli nong itaid miuman. Rom 11:24 Uli pin nung ika mekutud ka king talagang dutung a olivong lili, at salang king kaugalian mitaid ka king mayap a dutung a olivo, lalu na pa kasi deting tune a sanga, a mitaid la king karelang sariling dutung a olivo? Rom 11:25 Uling e ku buri kapatad, king e yu balu ing misteriung iti, magkang maguing mangabiasa kayu king kekong sariling pamibalak, a king ing kasiasan na ning metung a dake milyaring mekaragsa king Israel, angga king ing kaganapan ding Gentiles linub ya; Rom 11:26 At uli nita ing mabilug a Israel miligtas ya; nung makananu ing makasulat, Manibatan ya king Sion ing Magligtas; Ya ikawani na kang Jacob ing dewakan: Rom 11:27 At iti yang kakung tipan karela, keng ilako ku ing kasalanan da. Rom 11:28 Dikil king evangelio, kasalang la king uli yu: dapot dikil king pangayalal, kalugudlugud la king uli ra ding ibpa. Rom 11:29 Uling ding kalam at ing pamaniaus king Dios e la sinisian. Rom 11:30 Uling nung makananung ikayu a king milabas a panaun meguing e ko mapamintu king Dios, dapot ngeni migkamit kong pakalulu king uli ning e ra kapamintuan, Rom 11:31 Makanian mu naman deti e la meguing talapamintu, bang king uli ning pakalulu a mipakit kekayu, ila man kamtan da ngeni ing kapakaluluan. Rom 11:32 Uling kilung no ngan ning Dios king e kapamintuan, bang mika kapakaluluan ya karing sabla. Rom 11:33 Oh ing lalam ning pibandian, a ya ing kabiasnan at beluan na ning Dios! binang e asaliksik ing keang atul, at e la atalus ding keang daklat! Rom 11:34 Uling ninung mekabalu king kaisipan na ning Guinu? o ninung keang talausuk? Rom 11:35 O ninung minie keang mumuna, at miablasan ya keang miuman? Rom 11:36 Uling king kea la, at king pamamilatan na, at dikil la kea, ding keganaganang bague. Kea ing ligaya angga king mangga. Yanasa. Rom 12:1 Pagamuamu ku pin kekayu, kapatad, king uli na ning pakalulu ning Dios, king yarap yula ding kekong katawan, anti mong metung a ain a mabie, banal matatanggap king Dios, a kekong kasuyuan espiritual. Rom 12:2 At e ko mamapus agpang king yatung iti, nung e bagkus maliwa kong aske king pangabayu ning kekong kaisipan, bang asubuk yu nung isanu ing mayap at matatanggap at sakdal nang kaburian ning Dios. Rom 12:3 Uling sasabian ku, king pamamilatan na ning kalam a miabe kanaku, king balang metung a tau a atiu pililibudtan yu, king e ne mimisip king keang sarili king matas pa a e na dapat isipan; nung e misip yang maki pamagpakumbaba, agpang king dinake na ning Dios king balang metung king sukad ning kasalpantayanan. Rom 12:4 Uling nung makananung king metung a katawan atin tang dakal a dake, at ding anggang dake e la mikakametung a katungkulan; Rom 12:5 Makanian mu naman itamu, aguiang dakal tamu, metung tamu mung katawan kang Cristo, at dake re ding dakal ing metung at metung. Rom 12:6 At anti ning atin tang kalam a miayaliwa dikil king kalam a miabe kekatamu, maguing pamanula, manula tamu dikil king sukad na ning kekatang kasalpantayanan; Rom 12:7 O maguing pamaniuyu, ibie ta ing kekatang sarili king pamaniuyu; o ing tuturu, king keang turu; Rom 12:8 O ing mumusuk, king keang usuk: ing mamie, munie ya king kayubuan a lub; ing sasakup, king kasipagan; ing pakilala king kapakululuan, king saya sa. Rom 12:9 Ing lugud ala sang pamagkakanuari. Pikasaman yu ing marawak; makiabe ko king mayap. Rom 12:10 King lugud karing kapatad, mikalugud ko sang tune king metung at metung; king kapurian, ipalalu ne ing metung king metung; Rom 12:11 King sipagan e malamlam, mataimtim king espiritu, susuyu king Guinu; Rom 12:12 Magsaya king kapanayan; mapibabata king kasakitan; mapanatiling tapat king panalangin; Rom 12:13 Makiabiayan king kailangan da ding banal; makatalagang palayun. Rom 12:14 Panuanan yu la ding liligalig kekayu; panuan kayu, at e ko malmura. Rom 12:15 Makipagsaya kayu karing magsaya; makitangis kayu karing tatangis. Rom 12:16 Misanmetung kayu king nasa king metung at metung. E yo bibili ding isip yu karing bague kapalaluan, nung e tumulad kayu karing bague mangababa. E ko sa mangabiasa king kekong sariling pamibalak. Rom 12:17 Kaninuman e yu atbanan marawak ing marawak. Misip ko dikil karing bague a mapuri king arapan ding anggang tau. Rom 12:18 Nung malyari, dikil king atiung kaguiuwan yu, makipagyapa kayu karing anggang tau. Rom 12:19 E ko bablas king kekong sarili, kaluguran ku, nung e dinan yung pagbilian ing mua ning Dios: uling makasulat, Kaku ing pamanablas; aku mablas ku, ngana ning Guinu. Rom 12:20 Dapot nung ing kekong kasalang danupan ya, pakanan ye; nung mau ya, painuman ye; uling king makanian a dapat; mibuntun kong bayang api babo ning keang buntuk. Rom 12:21 E ko sa pailupig king marawak, nung e lupigan yu ing marawak king mayap. Rom 13:1 Pasakup ya sa ing balang kaladua karing lalu pang matas a upaya: uling alang upaya a e king Dios; at ding upayang atiu na, telaga no ning Dios. Rom 13:2 Ing sasalangsang pin king upaya, sasalangsang ya king patupad ning Dios: at ding sasalangsang tanggap lang kayatulan king sarili ra. Rom 13:3 Uling ding sasakup e la pitakutan king dapat a mayap, nung e king marawak. Buri mu ping ala kang pitakutan king upaya? Daptan mu ing mayap, at mika kapurian ka manibat kea mu rin: Rom 13:4 Uling talasuyu ne ning Dios keka dikil king mayap. Dapot nung daptan mu itang marawak, tumakut ka; uling e nea mu daralan ing talibung alang kabaldugan: uling metung yang talasuyu ning Dios, metung a talapanablas king mua kanitang darapat marawak. Rom 13:5 Inya pin pasakup kayu, e mu bukud king uli na ning mua nung e naman king uli na ning conciencia. Rom 13:6 Uling king uli na niting sangkan mamayad kayu namang buis; uling talasuyu la king kasuyuan king Dios, dirikil alang tuknang king kabud bague a iti. Rom 13:7 Ibie yo karing sabla ding mangaintulid karela: buis ketang ing buis mangaintulid; ambag king ambagan; takut king pitakutan; puri king dapat purian; Rom 13:8 E ko sa mikakautang nanuman king kaninuman, subali king mikalugud kayu ing metung at metung: uling ing lulugud king lupa nang tau, tinupad ya king kautusan. Rom 13:9 Uling iti, E ka darapat paliwas, E ka makamate, E ka manako, E ka manangkamin, at nung ating nanu mang aliwa pang utus king amanung iti makayagum na ngan, a ya pin, Luguran me ing lupa mung tau anti mo keka. Rom 13:10 Ing lugud e darapat marawak king keang kalupang tau: ing lugud pin ya ing katuparan na ning kautusan. Rom 13:11 At iti, anti ning akikilala ta ing panaun, a oras na ing miguising kayu king pangatudtud; uling ing kaligtasan lalu pang makalapit kekatamu king kanitang mumunang meniwala tamu. Rom 13:12 Ing bengi malalam na, at ing aldo malapit na: yugse ta pin ing dapat ning dalumdum, at isulud tala ding sandata na ning sala. Rom 13:13 Lumakad tamung binang mapuri, anti mong king aldo; e king katakawan ampon kalasingan, e king kalibian ampon kanawangan, e king pamipapagkamua at pamipapangalalu. Rom 13:14 Dapot miblas kayu king Guinung Jesucristo, at e yu dirinan alale ing laman ban namung apanusigan ing keang kelabuaran. Rom 14:1 Dapot itang maina king kasalpantayanan, tanggapan ye, makanian man e king pamaglutas ding mikakunu. Rom 14:2 Ing metung a tau maki kasalpantayanan yang makapangan king keganaganang bague: dapot ing maina, mamangan yang gulegule. Rom 14:3 Ing mamangan, e ne sa payalan kabaldugan ing e mamangan; at ing e mamangan, e ne sa atulan ing mamangan; uling ing Dios tinggap ne. Rom 14:4 Ninu ika a mamatul king ipus na ning aliwa? king sarili nang panginuan talakad ya o miragsa. Wa, mitalakad ya; uling mayupaya ya ing Guinu bang patalakaran ne. Rom 14:5 Ing metung a tau pakamalan ne ing metung a aldo maiguit king aliwa; ing aliwa ding anggang aldo mikakametung la kea. Ing balang metung a tau pabustan yang mika ganap a pamanibe king sarili nang kaukulan. Rom 14:6 Ing migaganaka king aldo, gaganakan ne dikil king Guinu: at ing mamangan, mamangan ya dikil king Guinu uling pasalamat ya king Dios; at ing e mamangan, dikil king Guinu e mamangan, at babie yang pasalamat king Dios. Rom 14:7 Uling ninuman kekatamu e ya mabibie king keang sarili, at alang mamamate king keang sarili. Rom 14:8 Uling nung mabibie tamu, mabibie tamu dikil king Guinu: o nung mamamate tamu, mamamate tamu dikil king Guinu: mie tamu man pin o mate, king Guinu kea tamu. Rom 14:9 Uling king uli niti Cristo mete ya at pepasibayung mebie bang yang maguing Guinu ra ding mete ampon ding mabie. Rom 14:10 Dapot ika, baket atulan me ing kekang kapatad? O pasibayu ika, baket payalan meng kabaldugan ing kekang kapatad? Uling itamu ngan talakad tamu king arapan na ning piukuman na ning Dios. Rom 14:11 Uling makasulat, Anti ning mabie ku, ngana ning Guinu, kanaku duku ya ing balang tud, At ing balang dila magsulit ya king Dios. Rom 14:12 Inya pin ing balang katau kekatamu munie yang sulit keang sarili king Dios. Rom 14:13 E ta na pin mipanatul ing metung at metung: nung e bagkus atulan yu ini, king ninuman e ya bibili king arapan ning katapad na metung a katatakiran o metung a sangkan na ning pangaragsa. Rom 14:14 Balu ku, at maniwala kung lubus king Guinung Jesus, king ala nanumang e malinis king sarili na: nung e mu ketang babalak king kaisanuman anting marinat, dikil kea marinat ya. Rom 14:15 Uling nung king uli na ning kanan ing kekang kapatad malulumbe ya, e naka lalakad dikil king lugud. E me sa sisintangan king kekang kanan itang king uli na mete ya i Cristo. Rom 14:16 E yu sa paburean a pisasabian marawak ing kekong kayapan: Rom 14:17 Uling ing kayarian na ning Dios e ing pamangan at e ing pamaninum, nung e ing katuliran, at ing kapayapan, at ing tula king Espiritu Santo. Rom 14:18 Uling ing king kaniti susuyu kang Cristo, makapatula yang mayap king Dios, at mipamayapan ya karing tau. Rom 14:19 Inya pin, tukian tala ding bague a darapat dikil king kapayapan, at ding bague a king uli ra patibayan taya ing metung at metung. Rom 14:20 E mu lalagpakan, king uli na ning pamangan, ing dapat ning Dios. Ding anggang bague tune king malinis la; makanian man marawak ya king taung mamangan king salang ning pilubluban. Rom 14:21 Mayap ing e mangan, laman-kati, ni minum alak, ni dapat nanumang bague a ikatakid ning kekang kapatad, Rom 14:22 Ing kasalpantayanan a atiu keka, tanggapan mu king sarili mu king arapan ning Dios. Masaya ya itang e mamatul king keang sarili ketang bague a keang pamayapan. Rom 14:23 Dapot ing mikakunu mipaparusan ya nung mamangan ya, uling e mamangan king uli na kasalpantayanan; at ing nanu pa mang e king kasalpantayanan kasalanan. Rom 15:1 Ngeni itamung masikan dapat tamung pibatan ing keinan da ding mangaina, at e patulan ing kekatang sarili. Rom 15:2 Ing balang metung kekatamu patula ya sa king kalupa nang tau, tungkul king mayap, dikil king keang ikatibe. Rom 15:3 Uling i Cristo man e na patulan ing keang sarili; nung e bagkus, dikil king makasulat, Ing kalibakan ding linibak keka menabu kanaku. Rom 15:4 Uling ding nanu mang bague a misulat king minuna pa, misulat la dikil king kekatang pangaturu, bang king pamamilatan na ning kapibabatan ampon ning tula karing kasulatan itamu mirinan tang kapanayan. Rom 15:5 Ngeni paintulut na sa kekayu ning Dios ning kapibabatan ampon ning tula king mikametung ko king isip king metung at metung dikil kang Jesucristo: Rom 15:6 Bang king metung mung pamisausig, king metung mu ring asbuk paligayan ye ing Dios at Ibpa ning kekatang Guinung Jesucristo. Rom 15:7 Inya pin mitanggapan kayu ing metung at metung, anti mo i Cristo ikayu man tinggap nakayu, dikil king ikaligaya na ning Dios. Rom 15:8 Uling sasabian ku pin king i Cristo megawa yang talasuyu ning pangatuli king uli na ning katutuan na ning Dios, bang patunayan na ing pangakung miabie karing ibpa, Rom 15:9 At ban ding Gentiles paligayan de ing Dios king keang kapakaluluan; anti mo ing makasulat, Inya pin munie kung kapurian keka king busal da ding Gentiles, At dalit king laguiu mu. Rom 15:10 At masasabing pasibayu, Tumula kayu, ikong Gentiles, kagum ning keang balayan. Rom 15:11 At pasibayu, Purian ye ing Guinu, ikong anggang Gentiles; At pabustan yung ding anggang balayan purian de. Rom 15:12 At pasibayu sasabian nga Isaias, Mika metung a sulul king yamut nang Isai, Itang talakad bang sumakup karing Gentiles. Kea ka manaya ding Gentiles. Rom 15:13 Ngeni ing Dios ning kapanayan katmuan nakayu king anggang tula at kapayapan king pamaniwala, bang mikatmuan kayu king kapanayan, king kayupayan na ning Espiritu Santo. Rom 15:14 At aku man mapipilit ku dikil kekayu, kapatad ku, king ikayu kabud kitmuan kong kayapan, kitmuan kayu king keganaganang beluan, malyari kayu namang mipapangamanu ing metung at metung. Rom 15:15 Dapot susulat ku kekayu king lalung tetagan anti mong bibili rakong miuman king pamigaganaka, king uli na ning kalam a miabie kanaku dikil king Dios, Rom 15:16 Bang aku maguing metung kung talasuyu nang Jesucristo, karing Gentiles manibalang susuyu king evangelio ning Dios, bang ing pamidaun da ding Gentiles, malyaring matanggap, anti ning pepagbanalan na ning Espiritu Santo. Rom 15:17 Aku pin atiu ing pamipaligaya ku kang Cristo Jesus, karing bague makarikil king Dios. Rom 15:18 Uling aku e ku mangangas maniabi king nanu mang bague subali mu nung tungkul king depatan nang Cristo king kakung kapamilatan, dikil king kapamintuan ding Gentiles, king amanu ampon king dapat, Rom 15:19 King upaya ding tanda ampon makapagmulala, king kayupayan na ning Espiritu Santo; bang keta ibat Jerusalem at king anggang makapatulug king Ilirico, penaral keng binang ganap ing evangelio nang Cristo; Rom 15:20 Wa, gagawan ku ing pake ku king anti kaniti a ipanaral ke ing evangelio, e ketang nung nu ya matutunggue na i Cristo, bang e ku makapanalakad babo ning pitatalakaran a king aliwang tau; Rom 15:21 Dapot, anti mo ing makasulat, Akit da detang e na disan ning balita dikil kea, At ding e mekaramdam atalastas da. Rom 15:22 King uli na naman niti meambangan kung madalas king nasang ume ku kekayu: Rom 15:23 Dapot ngeni, ala nang nanu mang karinan karing labuad keni, at anti ning karing dakal a banuang deni mika metung kung milalablab a nasa a ayan dakayu, Rom 15:24 Kapilan mang tumulak na ku a ume Espana, (uling panaligan kung akit dakayu king pamaglakbe ku, at midala ku king dalan ku nangan keng king uli yu nung warit king kaunanunan kumit ku dit mu mang tula king pamakiabe ku kekayu) - Rom 15:25 Dapot ngeni, sasabian ku, Ume ku Jerusalem, a susuyu karing banal. Rom 15:26 Uling meyapan na ning Macedonia at ning Acaya ing gawang metung a ambagan dikil karing kalulu karing banal a atiu Jerusalem. Rom 15:27 Wa, ya ing meyapan da; at pikakautangan dala. Uling nung ding Gentiles miabe la king karelang bague a dikil king espiritu, utang da naman karela ing sumuyu karela karing bague dikil king katawan. Rom 15:28 Panga atupad ku na pin iti nan, at tetakan ku na karela ing bungang iti, dumalan ku keang kekayu king pamunta ku Espana. Rom 15:29 At balu ku ita nung ume na ku keang kekayu, ume kung mitmu king kanuanan nang Cristo. Rom 15:30 Ngeni pagamuamu ku kekayu, kapatad, king uli na ning Guinu tang Jesucristo, at king uli na ning lugud ning Espiritu, king magkapilit ko sa iko ngan a kayabe ku king kekong pamanalangin king Dios a iparikil yu kaku; Rom 15:31 Bang aku miligtas ku karing e talapamintu a atiu Judea; at ing kakung pamanibala king pamaniaup Jerusalem matanggap sa karing banal; Rom 15:32 Bang aku masaya kung ume kekayu king pamamilatan na ning kaburian na ning Dios, at manakit kung kapainawan a kayabe yu. Rom 15:33 Ngeni ing Dios ning kapayapan manatili sa keko ngan. Yanasa. Rom 16:1 Panabilin ke kekayu ing kapatad tang babaing Febe, a iti diaconisa ya king iglesia a atiu Cencrea; Rom 16:2 King tanggapan ye king Guinu, a karampatan karing banal, at saupan ye king nanu mang bague a kailangan na kekayu: uling ya man meguing kasaup de ding dakal, at anti naman ning kakung sarili. Rom 16:3 Pagmananuan ye i Prisca ampon i Aquila, a kakung kasaup king kapagalan kang Cristo Jesus; Rom 16:4 A deti king uli ning kanakung bie binili ro ding karelang sariling batal; a kareti e mu aku ing babie kapasalamatan karela, nung e pa naman ding anggang iglesia ra ding Gentiles: Rom 16:5 At pagmananuan ye ing iglesia a atiu kilub dang bale. Pagmananuan ye i Epeneto, a kaluguran ku, a iti yang mumunang bunga king Asia kang Cristo. Rom 16:6 Pagmananuan ye i Maria, a iti dinapat yang dakal kekayu. Rom 16:7 Pagmananuan ye i Andronico at i Junias, a kakung kamaganak, at kayabe king sukulan, a deti kakilala ro ding apostoles, a atiu mu naman kang Cristo a minuna kanaku. Rom 16:8 Pagmananuan ye i Ampliato a kakung kaluguran king Guinu. Rom 16:9 Pagmananuan ye i Urbano, a kekaming kasaup darapat kang Cristo, ampon i Eustaquis a kakung kaluguran. Rom 16:10 Pagmananuan ye i Apeles a mesubuk kang Cristo. Pagmananuan yu la ding katubale nang Aristobulo. Rom 16:11 Pagmananuan ye i Herodion, a kakung kamaganak. Pagmananuan yo ding katubale nang Narciso, ding atiu king Guinu. Rom 16:12 Pagmananuan ye i Trifena ampon i Trifosa, a deti darapat la king Guinu. Pagmananuan ye i Persida, ing binang kaluguran, a dinapat dakal king Guinu. Rom 16:13 Pagmananuan ye i Rufo, a mepili king Guinu, at ing keang indu, a kaku ya naman. Rom 16:14 Pagmananuan ye i Asincrito, i Flegonte, i Hermes, i Patrobas, i Hermas, at ding kapatad a kayabe ra. Rom 16:15 Pagmananuan ye i Filologo at i Julia, i Nereo at ing kapatad nang babai, at i Olimpas, at ding anggang banal a kayabe ra. Rom 16:16 Mipapagmananu kayu ing metung at metung king metung a banal a uma. Pagmananuan dako ngan ding anggang iglesia nang Cristo. Rom 16:17 Ngeni pagamuamu ku kekayu, kapatad, king pagumasdan yula ding makapauli king pamidakedake ampon katitisuran, a makasalangsang king doctrina a kekong pegaralan: at kawani ko karela. Rom 16:18 Uling ding anti kareti e la susuyu king Guinu tang Cristo, nung e karing karela mung sariling atian; at king karelang mayubu at makawiling pamangamanu pipiraitnan dala ding pusu ra ding alang malit. Rom 16:19 Uling ing kekong kapamintuan makikilala na karing sablang tau. Magsaya ku pin tungkul kekayu: dapot pagnasan ku king mangabiasa ko sa king mayap, at maguing alang beluan king marawak. Rom 16:20 At ing Dios ning kapayapan dunutan neng agad i satanas king lalam da ding kekong talampakan. Ing kalam na ning Guinu tang Jesucristo manatili sa kekayu. Rom 16:21 Pagmananuan nakong Timoteo a kakung kausap king pamaniapat; ampon i Lucio at i Jason at Sosipatro, a kakung kamaganak. Rom 16:22 Aku i Tercio, a susulat king sulat a iti, pagmananuan dakayu king Guinu. Rom 16:23 Pagmananuan nakong Gayo a palayun kanaku, anti mu naman pagmananuan nako ning mabilug a iglesia. Pagmananuan nakong Erasto a talaingat bandi ning ciudad, ampon ing kapatad a i Cuarto. Rom 16:24 Ing kalam na ning Guinu tang Jesucristo manatili sa kekayu. Yanasa. Rom 16:25 Ngeni ketang malyaring makapatibe kekayu agpang king kakung evangelio at king pamipanaral nang Jesucristo, makayagpang king pangakilala ning misterio a king kabang panaun misimpan ya king karatunan, Rom 16:26 Dapot ngeni mipasiag, at king uli ra ding kasulatan da ding manula, agpang king utus ning Dios a alang angga, mipabalu karing anggang bansa king kapamintuan king kasalpantayanan; Rom 16:27 King bukud mung Dios a biasa, king pamamilatan nang Jesucristo, a nung kenu ing ligaya angga king mangga. Y |