KapahayaganRev 1:1 Ing Pamipatilip nang Jesucristo, a binie na ning Dios kea, banang ipakit karing keang talasuyu, ila pin ding bague a sukat agad mapalyari: at keang pepadala at pepawaga na king pamamilatan na ning keang Angel, kang Juan a talasuyu na; Rev 1:2 A sinaksi king amanu ning Dios, at king pamipatutu nang Jesucristo, king sablang bague ikit na. Rev 1:3 Nuan ya ing babasa, at ding makiramdam karing amanu ning ula, at tutuntun karing bague makasulat kea: uling ing panaun malapit na, Rev 1:4 I Juan karing pitung iglesia a atiu king Asia: Kalam kekayu, at kapayapan, a manibat kanitang mabibie, at mebie, at datang; at karing pitung Espiritu a atiu king arapan na ning keang luklukan; Rev 1:5 At manibat kang Jesucristo, a ya ing saksing tapat, ing pangane karing mete, at ing pekapun da ding ari keti sulip. Kanitang lulugud kekatamu at kelag nakatamu king kekatang kasalanan king pamamilatan ning kea mu ring daya; Rev 1:6 At guewa nakatamung maguing metung a kayarian, maguing sacerdotes dikil king keang Dios at Ibpa; Kea ing ligaya at ing pamagari angga king mangga. Yanasa. Rev 1:7 Oini, daratang yang kayabe ding biga, at ing balang mata akit ne, at pati na detang tinandus kea; at ding anggang dai keti sulip pasitangis la king uli na. Makanian nasa. Yanasa. Rev 1:8 Aku ing Alfa at ing Omega, ngana ning Guinung Dios, ing mabie at ing mebie, at itang datang, ya ing Kakataskatasan. Rev 1:9 Aku i Juan, a kekong kapatad at kekong karame king kasakitan at king kayarian at king kapibabatan a atiu kang Jesus, karin ku king pulung mayayaus Patmos, king uli na ning amanu ning Dios at ning pamipatutu nang Jesus. Rev 1:10 Aku ati ku king Espiritu king aldo ning Guinu, at dimdam ku king gugulutan ku ing metung a masikan a siwala, anti ya mo ing king metung a pakakak, Rev 1:11 A sasabian na, Ing akakit mu, isulat mu king metung a libru, at ipadala me karing pitung iglesia: karin Efeso at karin Smirna, at karin Pergamo, at karin Tiatira, at karin Sardis, at karin Filadelfia, at karin Laodicea. Rev 1:12 At melikid ku bakeng akit ing siwalang miniabi kanaku. At inyang mibalikid ku, menakit kung pitung pagkandilan a guinintuan; Rev 1:13 At king libutad da ding pagkandilan, ating metung a katulad ning metung a anak ning tau, a makapiblas king imalan a angga king bitis, at makababat ya king salu king metung a babat a guintu. Rev 1:14 At ing keang buntuk ampon buak maputing anti ing bulbul nang maputi ning tupa, anti mo ing nieve; at ding keang mata anti lang metung a lablab ning api; Rev 1:15 At ding bitis na katulad no ning tangsung binuli, anti mong medalise king metung a horno; at ing keang siwala anti mo ing biung na ning dakal a danum. Rev 1:16 At king gamat nang wanan atin yang pitung batuin: at king asbuk na lulual ya ing talibung a adua taram: at ing keang lupa anti ya mong aldo a saslag king keang sikanan. Rev 1:17 At inyang ikit ke, misubsub kung anti mong mete karing bitis na. At ya timpak ne ing gamat nang wanan kaku, sinabi na, E ka tatakut; aku ing kamumulan at kawakasan, Rev 1:18 At ing Mabibie; at aku mete ku, at oini, aku mabie ku angga king mangga, at atilu kaku ding susi ning kamatayan at ning Hades. Rev 1:19 Isulat mo pin ding bague a ikit mu, at ding bague a atiu ngeni, at ding bague a mapalyari kaibat; Rev 1:20 Ing lijim da ding pitung batuin a ikit mu king kakung wanan, at ding pitung pagkandilan a guinintuan. Ding pitung batuin ila ding angeles da ding pitung iglesia: at ding pitung pagkandilan, ila ding pitung iglesia. Rev 2:1 King angel ning iglesia karin Efeso, isulat mu, Ding bague a deti sasabian no ning maki atin karing pitung batuin king wanan nang gamat, itang lalakad king libutad da ding pitung pagkandilan a guinintuan: Rev 2:2 Aku akikilala ku ing kekang dapat, at ing kekang kapagalan, at ing kapibabatan mu, at e mo apibata ding mangarawak a tau, at sinubuk mula ding babansag da ing sarili ra apostoles, at ali la, at ikit mong malaram la; Rev 2:3 At atin kang kapibabatan, at migkasakit ka king uli na ning kakung laguiu, at e ka metikal. Rev 2:4 Dapot atin kung laban keka, a likuan mu ing mumuna mung lugud. Rev 2:5 Inya ganakan mu nung nu ka mebaldug, at sumisi ka, at gawan mu ing mumuna mung dapat; nung ali ume ku keka, at ilako ke ing kekang pagkandilan king keang pangabilian, subali nung sumisi ka. Rev 2:6 Dapot ika atin ka kaniti, a kasaman mu ing dapat da ding Nicolaitas, a iti aku man kasaman ku. Rev 2:7 Ing maki balugbug, pabustan yang makiramdam king sasabian na ning Espiritu karing iglesia. King magwagui, pakanan ke king dutung ning bie a atiu kilub na ning Paraiso ning Dios. Rev 2:8 At king angel ning iglesia king Smirna isulat mu: Deting bague sasabian na ning mumuna at ning kawakasan, a mete at mebie pasibayu: Rev 2:9 Aku balu ku ing kekang kasakitan, at ing kekang kakaluluan, (dapot ika mabandi ka), at ing pamanyumpa ra ding sasabi king ila Judios la, at ali la, nung e bagkus metung lang sinagoga nang Satanas. Rev 2:10 E mo pitatakutan ding bague a painturung pibatan mu: oini, ing diablo malapit yugse no ding mapilan kekayu king sukulan, bakong masubuk; at mika atin kong kasakitan apulung aldo. Manatili kang tapat angga king kamatayan, at aku ibie ke keka ing corona na ning bie. Rev 2:11 Ing maki balugbug, pabustan yang makiramdam king sasabian na ning Espiritu karing iglesia. Itang magwagui e ya numanu balang king kaduang kamatayan. Rev 2:12 At king angel ning iglesia king Pergamo isulat mu: Deting bague sasabian na ning maki matalas a talibung a adua taram: Rev 2:13 Aku balu ku nung nu ka manuknangan, aguiang nung nu ya karin ing luklukan nang satanas; at ingatan mung tapat ing laguiu ku, at e mu pepayalian ing pamanyalpantaya kaku, aguiang karing aldo nang Antipas a tapat kung saksi, mete king libutad yu, nung nu ya manuknangan i Satanas. Rev 2:14 Dapot atin kung mapilan a bague laban keka, uling atin ka kean mapilan a mimingat king aral nang Balaam, a iti tiru ne i Balak bang mibiling katatakiran king arapan da ding anak ning Israel, bang mangan karing bague midadaun king ain karing idolos, at bang dapat pamipaliwas. Rev 2:15 Makanian mu naman atin kang mapilan a mimingat king makanian mu ring bague a tuturu ra ding Nicolaitas, Rev 2:16 Sumisi ka pin; o nung ali, datang kung agad keka, at makipamuk kung laban karela king talibung ning kakung asbuk. Rev 2:17 Ing maki balugbug, pabustan yang makiramdam king sasabian na ning Espiritu karing iglesia. Ing magwagui, pakanan ke king manang makasinup, at dinan keng metung a batung maputi, at kaniting batu makasulat ing metung a laguiung bayu, a ninuman alang makibalu, nung e itang tanggap kaniti. Rev 2:18 At king angel ning iglesia king Tiatira isulat mu: Deting bague sasabian no ning Anak ning Dios, a maki atin karing mata a anti mong lablab ning api, at ding bitis na makatulad la king tangsung binuli: Rev 2:19 Aku balu ku ing kekang dapat, at ing lugud mu, at kasalpantayanan, at suyu, at kapibabatan, at king ding dapat mung tauli maiguit la king minuna. Rev 2:20 Dapot atin kung laban keka, paintulutan me ing babaing Jezabel, a ausan na ing sarili na metung a manulang babai; at ya tuturu ya at susukilkil na karing talasuyu ku king dapat lang pamipaliwas, at mangan king miayain karing idolos. Rev 2:21 At dininan keng panaun king bayang sumisi; at ya e mebisang sinisi king keang pamipaliwas. Rev 2:22 Oini, kaku yang binili king metung a pagkeran, at ding darapat pamipaliwas kea king maragul a kasakitan, subali mu nung pasisisi la king dapat da. Rev 2:23 At patayan kula ding anak na king salut; at ding anggang iglesia abalu ra king aku itang sasaliksik king lalung masalikut a kaisipan at karing pusu: at ibie ku ing king balang metung kekayu agpang king depatan yu. Rev 2:24 Dapot kekayu sasabian ku, karing mitagan a atiu kean Tiatira, karing anggang e maki atin king turung iti, a e maki balu karing bague nang mangalalam Satanas anti ing sasabian da; aku e ku mibiling aliwa pang pusan kekayu. Rev 2:25 Makanian man ing atiu kekayu, ingatan yung matibe anggang aku datang ku. Rev 2:26 At itang magwagui at ing misimpan king dapat ku angga king kapupusan, dinan keng kayupayan karing bansa: Rev 2:27 At pamajalan nala king tukud a bakal; anti mo ing pamaniunut na ning magtatalu karing lulanan; aku makanian mu namang tinggap ku kang Ibpa ku; Rev 2:28 At ibie ke kea ing tala king munag. Rev 2:29 Ing maki balugbug, pabustan yang makiramdam king sasabian na ning Espiritu karing iglesia. Rev 3:1 At king angel ning iglesia karin Sardis isulat mu: Deting bague sasabian na ning maki pitung Espiritu ning Dios, at ding pitung batuin: Aku balu ku ing dapat mu, a atin kang metung a laguiu king ika mabie ka, at ika mete ka. Rev 3:2 Mapaglame ka sa at pakatibayan mo ding bague makatagan, a makasadiang mate: uling e ku menakit dapat mung meguing sakdal king arapan na ning Dios ku. Rev 3:3 Ganakan mu pin nung makananu mung tinggap at dimdam; at isimpan mu, at sumisi ka. Nung e ka pin lumame datang kung anting metung a mapanako, at e mu abala nung nanung oras datangan daka. Rev 3:4 Dapot atin kang mapilan a laguiu karin Sardis a e ra dininan musing ing imalan da: at abe kong lumakad makaimalan maputi; uling karampatan la. Rev 3:5 Ing magwagui, iti misuluran yang makanian king imalan a maputi: at e ke patdan ing laguiu na king libru na ning bie, at patutuan ku ing laguiu na king arapan nang Ibpa ku, at king arapan da ding keang angeles. Rev 3:6 Ing maki balugbug, pabustan yang makiramdam king sasabian na ning Espiritu karing iglesia. Rev 3:7 At king angel ning Iglesia king Filadelfia isulat mu: Deting bague sasabian na ning banal, ing katutuan, nitang maki atin king susi nang David, itang bubuklat at ninuman e ne akabat, at mikakabat at ninuman e ne abuklat: Rev 3:8 Aku balu ku ing dapat mu (oini, binili ke king arapan mu ing metung a pasbul a makabuklat, kaniti ninuman alang makakabat), king atin kang ditak a kayupayan, at sinimpan mu ing amanu ku, at e mu lingad ing laguiu ku. Rev 3:9 Oini, aku babie ko king sinagoga nang Satanas, detang sasabi king ila Judios la, at ali la, nung e maglaram la: oini aku daptan kung papuntan ko ken at pasamban king arapan ding bitis mu, at pabalu king aku liguran daka. Rev 3:10 Pablasang sinimpan mu ing amanu ning kakung kapibabatan, aku naman ingatan daka king oras ning subuk, itang oras a datang king mabilug a yatu, balang masubuk ding manuknangan king labuad. Rev 3:11 Aku datang kung agad; ingatan mung matibe ing atiu keka, bang ala ninu man a manikua king kekang corona. Rev 3:12 Ing magwagui, aku gawan keng metung a asias king pisamban ning kakung Dios, at e ne lual karin: at isulat ke kea ing laguiu ning kakung Dios, at ing laguiu na ning ciudad ning kakung Dios, ing bayung Jerusalem, a iti datang yang lual king banua a manibatan king kakung Dios, at ing sarili kung bayung laguiu. Rev 3:13 Ing maki balugbug, pabustan yang makiramdam king sasabian na ning Espiritu karing iglesia. Rev 3:14 At king angel ning iglesia king Laodicea isulat mu: Deting bague sasabian na ning Yanasa, ing saksing tapat at katutuan, ing kamumulan king pamaglalang ning Dios: Rev 3:15 Aku balu ku ing kekang dapat, king e ka marimla ni e ka mapali. Ing buri ku king ika marimla ka o mapali. Rev 3:16 Inya pin anti ning maligamgam ka, ni e ka mapali ni e ka marimla, aku isuka raka king kakung asbuk. Rev 3:17 Uling ika sasabian mu, Aku mabandi ku, at mika pibandian ku, at ala nakung kailangan nanuman; at e mu balung king ika mura ka at kalunuslunus at maluka at bulag at lubas: Rev 3:18 Aku iyusuk ku keka king sali ka king kakung guintu a medalise king api, bakang maguing mabandi; at imalan a maputi bang piblasan mu ing sarili mu, at e mibulalag ing kamarinayan king kalubasan mu; at panulung mata bang ipulis mu karing kekang mata, bakang manakit. Rev 3:19 Aku ding anggang luluguran ku sasabianan kula at papalukan: ika magkapilit ka pin at sumisi. Rev 3:20 Oini, ati ku makatalakad king pasbul at titigtig ku; nung ninuman pakiramdaman na ing siwala ku at ibuklat ne ing pasbul, lungub ku kea, at makiapun kung kasulu na, at ya kanaku. Rev 3:21 Ing magwagui aku paintulutan keng makiluklukan kanaku king kanakung luklukan, anti ning aku man migwagui ku, at mekiluklukan ku kang Ibpa ku king keang luklukan. Rev 3:22 Ing maki balugbug, pabustan yang makiramdam king sasabian na ning Espiritu karing iglesia. Rev 4:1 Kaibat da deting bague, ikit ku, at oini, ing metung a pasbul makabuklat karin banua, at ing mumunang siwala a kakung dimdam, metung a siwala a anti mo ing king pakakak, makisabi ya kanaku, ing metung a ngana, Manik ka keni, at ipakit ko keka ding bague a mapalyari king paintungul. Rev 4:2 Kaniti mu rin ati ku king Espiritu: at oini metung yang luklukan a makabili banua, at babo na ning luklukan ating metung a makalukluk; Rev 4:3 At ing makalukluk ing keang wangis makatulad king metung a batung jaspe at metung a sardio: at ating metung a pinanari a makapaliguid king luklukan, katulad ne ning esmeralda nung lawan me. Rev 4:4 At king makapatulug king luklukan ating aduangpulu at apat a luklukan: at babo ra ding luklukan ikit kong makalukluk ding aduangpulu at apat a makatua makapiblas imalan a maputi; at babo ning buntuk da makaputung la ding coronang guintu. Rev 4:5 At king luklukan lulual ing kildap, at siwala, at duldul. At ating pitung sulu a maki aping milalablab king arapan na ning luklukan, deti ila ding pitung Espiritu ning Dios; Rev 4:6 At king arapan na ning luklukan ating metung a anting dayatmalat a salamin a katulad ning bubug; at king libutad na ning luklukan, at king makapatulug king luklukan, ating apat a mabie melalang mitmu lang mata king arap at king gulut. Rev 4:7 At ing mumunang melalang lulupa ya king metung a leon, at ing kaduang melalang lulupa ya king metung a bicerung vaca, ing katlung melalang atin yang lupa a anting metung a tau, at ing kapat a melalang makalupa ya king aguilang susulapo. Rev 4:8 At ding apat a mabie melalang balang metung karela maki anam yang baguius, mitmu lang mata king makapatulug ampon king atiu kilub: at ala lang aldo kapainawan at bengi, ngara, Banal, banal, banal ya ing Guinung Dios, ing Mayupaya king Sabla, a mebie at mabie at datang. Rev 4:9 At kabud ding mabie melalang munie lang kaligayan at kapurian at kapasalamatan king makalukluk king babo na ning luklukan, king mabibie angga king mangga, Rev 4:10 Ding aduangpulu at apat a makatua magsakab la king arap na nitang makalukluk babo ning luklukan, at sasamban de itang mabibie angga king mangga, at yugse ro ding karelang corona king arapan na ning luklukan, sasabian da, Rev 4:11 Karampatan ka, Guinu mi at Dios mi, a tanggapan mu ing ligaya at ing kapurihan at ing kayupayan; uling ika lelangan mu ing sablang bague, at king uli ning kaburian mu ila atilu, at melalang la. Rev 5:1 At ikit ke king wanan nang gamat nitang makalukluk king babo ning luklukan, ing metung a libru a ating sulat kilub at king gulut, makakabat yang matalik karing pitung tatak. Rev 5:2 At ikit ke ing metung a angel a masikan a mipapasiag king maragul a siwala, Ninu ing karampatan muklat king libru at kalag karing tatak? Rev 5:3 At ninuman karin banua, aguiang king babo na ning labuad, at king lalam na ning labuad, alang makabuklat king libru, at makalawe. Rev 5:4 At aku kiniak kung bina, uling alang meakit metung man a karampatan muklat king libru, o makalawe: Rev 5:5 At sasabian na kanaku ning metung karing makatua: E ka kikiak; oini, ing Leon king dai nang Juda, ing Uyat nang David, migwagui ya bang muklat king libru, at bang kalag karing pitung tatak. Rev 5:6 At ikit keng makatalakad king libutad ning luklukan, at ding apat a mabie melalang, at king libutad ding makatua, ing metung a Cordero a makatalakad anti ya mong pete, a iti atin yang pitung sagu at pitug mata, a ila ding pitu nang Espiritu ning Dios a mipabal king mabilug a labuad. Rev 5:7 At linapit ya at kinua ne king gamat nang wanan nitang makalukluk king babo na ning luklukan. Rev 5:8 At inyang akua na ne ing libru, ding apat a mabie melalang at ding aduangpulu at apat a makatua, migsakab la king arapan na ning Cordero, at balang metung karela atin yang alpa, ampon mangkuk a guintu a mitmung incienso, a iti ya ing panalangin ding banal. Rev 5:9 At dadalit lang metung a bayung dalit, ngara, Karampatan kang kuma king libru, at muklat karing keang tatak: uling pete raka, at seli mo king Dios king daya mung sarili, ding anggang dai, at amanu, at balayan at bansa, Rev 5:10 At guewa mula king kekaming Dios metung a kayarian at sacerdotes; at magari la king babo ning labuad. Rev 5:11 At ikit ku, at dimdam ku ing siwala ding dakal a angeles king makapatulug king luklukan at ding mabie melalang at ding makatua; at ing bilang da deti apulung libung ukdung apulung libu, at libulibung tialibu-libu; Rev 5:12 Maniabi la king metung a maragul a siwala, Karampatan ya ing Cordero a pete ra, a tanggapan na ing upaya, at pibandian, at kabiasnan, at sikanan, at kapurian at kaligayan, at kanuanan. Rev 5:13 At ing balang bague a melalang a atiu banua, at king babo na ning gabun, at king lalam na ning gabun, at babo ning dayatmalat, at ding sablang bague a atiu karela, dimdam kong sasabi, King makalukluk king luklukan, at king Cordero miabie ing kanuanan at ing kapurian, at ing ligaya, at ing pamaniakup, angga king mangga. Rev 5:14 At ding apat a mabie melalang sinabi ra, Yanasa. At ding makatua migsakab la at sinamba. Rev 6:1 At ikit ku inyang ing Cordero biklat ne ing mumuna karing pitung tatak, at dimdam ku king metung karing apat a mabie melalang a maniabing anti mo ing siwalang duldul, Ume ka keni. Rev 6:2 At ikit ku, at oini, ing metung a kabayung maputi, at itang makalukluk babo na magdala yang metung a bai; at mirinan yang metung a corona: at linual yang magtagumpe, at bang magtagumpe. Rev 6:3 At inyang biklat ne ing kaduang tatak, dimdam ke ing kaduang mabie melalang a sasabian na, Ume ka keni. Rev 6:4 At linual ya ing metung a aliwang kabayu, metung yang malutung kabayu: at king makalukluk babo na niti, mipagkalub kea ing milako keti sulip king kapayapan, at balang mipapatayan ing metung at metung: at mirinan yang metung a maragul a talibung. Rev 6:5 At inyang biklat ne ing katlung tatak, dimdam ke ing katlung mabie melalang a ngana, Ume ka keni. At ikit ku, at oini, ing metung a kabayung matuling; at king makalukluk babo na ating metung a timbangan a atiu king gamat na. Rev 6:6 At dimdam kung anti mong metung a siwala libutad da ding apat a mabie melalang a ngana, Metung a takal a trigu king metung a denario, at atlung takal a cebada king metung a denario, at e mu nananan balang ing laru at ing alak. Rev 6:7 At inyang biklat ne ing kapat a tatak, dimdam ku ing siwala ning kapat a mabie melalang a ngana, Ume ka keni. Rev 6:8 At ikit ku, at oini, ing metung a kabayung maputla: at itang makalukluk babo na, ing laguiu na Kamatayan; at ing Hades tutuki ya kea. At deti mipagkaluban lang kayupayan king kapat nang dake ning labuad, bang makapakamate king sandata, at king danup, at king kamatayan, at karing maliap nang lasip ning labuad. Rev 6:9 At inyang biklat ne ing kalimang tatak, ikit ko lalam ning altar ding kaladua ra detang mengamate king uli ning amanu ning Dios, at king uli na ning karelang pamipatutu: Rev 6:10 At guinulisak la king metung a maragul a siwala, ngara, Angga kaplan, Oh Guinu, ing kabanalan at katutuan, e mu ukuman at yablas ing kekaming daya karing manuknangan king labuad? Rev 6:11 At mirinan lang balang metung karela metung a imalan a maputi; at karela sinabi na king painawa la pang ditak a panaun, angga king ding abe rang talasuyu mu naman at ding kapatad da, a paten da naman a anti ila, apupus da ing karelang lakad. Rev 6:12 At ikit ku inyang biklat ne ing kanam a tatak, at mika metung a masikan a ayun; at ing aldo metuling ya anti mong suput a buak, at ing kabilugan a bulan meguing anti yang daya; Rev 6:13 At ding batuin ning banua mebaldug la king labuad, anti mo ing higuera ngening malulugus la ding keang higos a e pa malulut, nung sasapulan no ning angin a masikan. Rev 6:14 At ing banua mekimut ya anting metung a librung lulun ngening mengalulun ya; at ding balang bunduk ampon pulu mengakimut la karing kakarinan da. Rev 6:15 At ding arian king yatu, at ding principes, at coronel, at ding mabandi, at ding masikan, at ing balang alipan at timawa, pesisalikut la karing lukib at karing batu karing bunduk; Rev 6:16 At sinabi ra karing bunduk at karing batu, Mangabaldug ko kekami, at ipampan yukami king lupa na nitang makalukluk babo ning luklukan, at king mua na ning Cordero: Rev 6:17 Uling dinatang na ing marangal a aldo ning karelang mua, at ninung malyaring mitalakad? Rev 7:1 Kaibat na niti, ikit ko ding apat a angel a makatalakad karing apat nang suluk ning labuad, kakawatan da ing apat nang angin ning labuad, bang alang angin a tumiup king babo ning labuad, o king babo ning dayatmalat, o king nanu mang dutung. Rev 7:2 At ikit ke ing metung a aliwang angel a mumukiat manibat king aslagan na ning aldo, daralan ne ing tatak na ning Dios a mabie: at guilisak na king metung a maragul a siwala karing apat a angel a mirinan upayang manganiaya king labuad at king dayatmalat, Rev 7:3 Ngana, E yu nananan balang ing labuad, ni ing dayatmalat, aguiang ding dutung, kabang e mila atatakan king kanuan ding talasuyu na ning kekatang Dios. Rev 7:4 At dimdam ku ing bilang da ding mitatakan, dinalan apatapulu at apat a libu, a mitatakan king balang dai ding anak nang Israel: Rev 7:5 King dai nang Juda mitatakan la ding labingaduang libu; King dai nang Ruben labi lang aduang libu; King dai nang Gad labi lang aduang libu; Rev 7:6 King dai nang Aser labi lang aduang libu; King dai nang Neftali labi lang aduang libu; King dai nang Manases labi lang aduang libu; Rev 7:7 King dai nang Simeon labi lang aduang libu; King dai nang Levi labi lang aduang libu; King dai nang Isacar labi lang aduang libu; Rev 7:8 King dai nang Zabulon, labi lang aduang libu; King dai nang Jose labi lang aduang libu; King dai nang Benjamin labi lang aduang libu ding mitatakan. Rev 7:9 Kaibat da deting bague ikit ku, at oini, ing metung a maragul a kekaldan ding tau a ninuman e no abilang, manibat king balang bansa at karing sablang dai at balayan at amanu, makatalakad la arapan na ning luklukan at king arapan na ning Cordero, makapiblas lang imalan a maputi, at atin lang palma karing gamat da; Rev 7:10 At kukulisak da king metung a maragul a siwala, ngara, Ing pangakabus king kekaming Dios a atiu makalukluk king luklukan, at king Cordero. Rev 7:11 At ding anggang angeles makatalakad la king makapatulug ning luklukan, at karing makatua, at karing apat a mabie melalang; at migsakab la ngan king arapan na ning luklukan, at simban de ing Dios, Rev 7:12 Ngara, Yanasa: Kanuanan, at ligaya, at kabiasnan, at pamipasalamat, at kapurian, at kayupayan, at sikanan king kekaming Dios angga king mangga. Yanasa. Rev 7:13 At mekibat ya ing metung karing makatua sasabian na kanaku, Deting makapiblas king imalan a maputi, ninu ila, at nu la menibatan? Rev 7:14 At aku sinabi ku kea, Guinu ku, ika balu mu. At ya sinabi na kaku, Deti ila ding linual king maragul a kasakitan, at pinipi ra ing karelang imalan, at pitian da king daya na ning Cordero. Rev 7:15 Nung inya ila atilu king arapan na ning luklukan ning Dios; at susuyuan de king aldo at bengi king keang pisamban: at itang makalukluk king babo na ning luklukan iladlad ne babo ra ing keang tabernaculo. Rev 7:16 E no dumanup, ni e no kumau; at e na no turan ning aldo, ni aguiang nanumang pali: Rev 7:17 Uling ing Corderong atiu libutad ning luklukan ya ing maguing pastul da, at patnubayan nalang paike karing bukal ding danum ning bie: at pulisan na ning Dios ing balang lua karing mata ra. Rev 8:1 At inyang biklat ne ing kapitung tatak, sinalisi ing katajimikan karin banua king lub ning kapitnang oras. Rev 8:2 At ikit ko ding pitung angeles a makatalakad arap ning Dios; at miabie la karela ding pitung pakakak. Rev 8:3 At dinatang ya ing metung a aliwang angel at tinalakad ya king siping ning altar, tatalan yang metung a incensariung guintu; at dininan neng dakal a incienso, bang idagdag na king panalangin da ding anggang banal king babo na ning altar a guintu, a atiu king arapan na ning luklukan. Rev 8:4 At ing asuk ning incienso kagum na ning panalangin da ding banal, minukiat angga king arapan na ning Dios manibat king gamat ning angel. Rev 8:5 At kinua ne ning angel ing incensario; at kitmuan ne king api na ning altar, at inugse ne king gabun: at sinalisi ing duldul, at siwala, at kildap ampon metung a ayun. Rev 8:6 At ding pitung angeles a ating pitung pakakak pesiadia la barong tigtigan. Rev 8:7 At ing mumuna tinigtig ya, at sinalisi ing lipat at api, a maki samut daya, at misalbag king labuad: at ing katlu nang dake ning labuad mesilab, at ding katlung dake karing dutung mesilab la, at meduluk ing anggang dikut a saguiwa. Rev 8:8 At ing kaduang angel tinigtig ya, at ing anting metung a maragul a bunduk a mitatau king api miugse ya king dayatmalat: at ing katlung dake ning dayatmalat milyaring daya; Rev 8:9 At mete la ding katlung dake karing melalang a atiu king dayatmalat, aguiang detang maki bie; at ding katlung dake karing sasaken mesira la. Rev 8:10 At ing katlung angel tinigtig ya, at mebaldug yang ibat banua ing metung a maragul a batuin, mitataung anting sulugui, at mebaldug ya king katlung dake ra ding ilug, at karing sibul ning danum; Rev 8:11 At ing laguiu ning batuin Ajenjo: at ing katlung dake ning danuman milyaring ajenjo; at dakal lang taung mengamate king uli na ning danum, uling mepait. Rev 8:12 At ing kapat a angel tinigtig ya, at mepisi ya ing katlu nang dake ning aldo, at ing katlu nang dake ning bulan, at ing katlu rang dake ding batuin; balang dalumdum ding katlu rang dake, at bang ing aldo e sumala ing katlu nang dake, makanian mu naman ing bengi. Rev 8:13 At ikit ke, at dimdam ing metung a aguila, a susulapo king kapitna ning banua, a sasabian na king metung a maragul a siwala, Sindak, sindak, sindak, karetang manuknangan king labuad, king uli ra ding aliwa pang siwala ra ding pakakak ding atlung angeles, a nung ninu ding tigtig pa. Rev 9:1 At ing kalimang angel tinigtig ya, at ikit ke ing metung a batuin a mebaldug ibat banua king labuad: at miabie ya kea ing susi ning talaga ning kalalaman. Rev 9:2 At biklat ne ing talaga ning kalalaman; at menik ing asuk king talaga, anti mo ing asuk ning metung a maragul a horno; at meralumdum la ing aldo ila ning angin, uli ning asuk king talaga. Rev 9:3 At ibat king asuk linual la ding durun king labuad; at ing upaya miabie karela, anti ding alakdan keti king labuad atin lang upaya. Rev 9:4 At miutus karela king e ra nananan balang ing dikut king labuad, ni isanu mang saguiwang bague, aguiang nanumang dutung, nung e bukud mu karetang taung alang tatak king Dios karing karelang kanuan. Rev 9:5 At mipaintulut karela king e ro papaten, nung e pasakitan dalang limang bulan: at ing pasakit da anti mo ing pamipasakit ning alakdan nung asiaran ne ing metung a tau. Rev 9:6 At karing aldo a deta ding tau panintunan da ing kamatayan, at king makananu man e ra akit; at pagnasan dang mate, at ing kamatayan tumakas karela. Rev 9:7 At ing aske ding durun katulad do ding kabayung misadia dikil king pamipamuk; at karing buntuk da anti la waring corona a kalupa ning guintu, at ding lupa ra anti ing lupa ding tau. Rev 9:8 At atin lang buak anti ding buak ding babai, at ding ipan da anti la mo ding ipan ding leon. Rev 9:9 At maki baluti lang salu, anti mong baluting salu a bakal; at ing biung ding karelang baguius anti mo ing biung da ding karro, ding dakal a kabayu a sasagasa king pamipamuk. Rev 9:10 At atin lang iki a kalupa ra ding iki ra ding alakdan, at atin lang panasiad; at king iki ra atiu karin ing karelang kayupayan a pasakit karing tau king lub ning limang bulan. Rev 9:11 At maki metung lang sasakup a pekaari ra a ya ing angel ning kalalaman: ing laguiu na king Hebreo Abaddon at king Griego atin yang laguiung Apollyon. Rev 9:12 Ing mumunang Sindak: milabas ne; oini, datang la pa ding aduang Sindak kaibat niti. Rev 9:13 At ing kanam a angel tinigtig ya, at mekaramdam kung metung a siwala karing tambuyuk ning altar a guintu, a atiu king arap ning Dios, Rev 9:14 A ing metung sasabian na king kanam a angel a maki pakakak: Kalagan mo ding apat a angeles a makagapus king maragul a ilug Eufrates. Rev 9:15 At mekalag la ding apat a angeles, a misadia dikil king oras, at aldo, at bulan, at banua king barong paten ding katlu rang dake ding tau. Rev 9:16 At ing bilang da ding tapuk a sasake kabayu adua lang tiapulung libung tiapulung libu: aku dimdam ku ing bilang da. Rev 9:17 At makanian kong ikit ding kabayu king malikmata, at ding pakasake karela, maki baluti lang salu, anti mong api at jacinto ampon asufre: at ding buntuk ding kabayu anti la ding bunduk da ding leon; at king asbuk da lulual ing api at asuk ampon asufre. Rev 9:18 King uli ra deting atlung batbat mete la ding katlu rang dake ding tau; king uli ning api at asuk at asufre, a lulual king asbuk da. Rev 9:19 Uling ing upaya ra ding kabayu atiu king karelang asbuk, at karing iki ra: uling ding iki ra kalupa ro ding ubingan, at maki buntuk la; at kareti makapanampalasan la. Rev 9:20 At ding mitagan karing tau, a e mete kareting batbat, e la pesisisi king depatan da ding karelang gamat, bang e no sukat samba karing demonios, at idolong guintu, at pilak, at tangsu, at batu, at dutung; a deti e la malyaring makakit, ni makaramdam, aguiang lumakad: Rev 9:21 At e la pesisisi king pamakamate ra, ni king karelang pamaganitu, aguiang king karelang pamakipangalugud, aguiang king karelang kapanakawanan. Rev 10:1 At ikit ke ing metung a aliwang angel a masikan a kukuldas ibat banua, miimalan king metung a biga; at ing pinanari atiu babo nang buntuk, at ing keang lupa anti ya mo ing aldo, at ding keang bitis anti lang asias a api; Rev 10:2 At king keang gamat atin yang metung a malating librung makabuklat: at ing bitis nang wanan binili ne babo ning dayatmalat, at ing kaili na babo ning labuad; Rev 10:3 At kinulisak yang maragul a siwala, anti ya mong mamius ing metung a leon: at inyang mekakulisak ne, ding pitung duldul pisiag da ing siwala ra. Rev 10:4 At inyang ding pitung duldul apasiag da na ing siwala ra, aku isulat ku na sana: at dimdam ku ing metung a siwalang ibat banua, a sasabian na, Tatakan mo ding bague a pisiag da ding pitung duldul, at e mo susulat. Rev 10:5 At ing angel a ikit kung makatalakad babo ning dayatmalat at babo ning labuad tinas ne ing gamat nang wanan banua, Rev 10:6 At sinumpa ya kanitang mabibie angga king mangga, a linalang king banua at karing sablang bague atiu karin, at king labuad ampon king sablang atiu kea, at king dayatmalat ampon king sablang atiu kea, a e na magluat: Rev 10:7 Dapot karing aldo na ning siwala ning kapitung angel, nung malapit neng tigtig, kanita mayari na ing misterio na ning Dios, agpang king mayap a balita a selese na karing manulang talasuyu na. Rev 10:8 At ing siwalang dimdam kung ibat banua, dimdam kung pasibayu a makisabi kaku, at ngana, Ume ka, kuanan me ing librung makabuklat a atiu king gamat ning angel a makatalakad babo ning dayatmalat at babo ning labuad. Rev 10:9 At aku mine ku king angel, sinabi ku kea king ibie ne kaku ing malating libru. At ya sinabi na kaku, Kuanan me, at kanan me; at gawan neng mapait ing kekang atian, dapot king kekang asbuk malyari yang mayumu anti ing pulut. Rev 10:10 At kinua ke ing malating libru king gamat ning angel, at pengan ke, at king asbuk ku mayumu yang anti ing pulut; at inyang apangan ku ne, mepait ku atian. Rev 10:11 At sinabi ra kaku, Kailangan king ika pasibayu kang manula karing dakal a balayan at bansa at amanu ampon arian. Rev 11:1 At miabie ya kaku ing metung a timbu a kalupa na ning paniukad: at ing metung sinabi na, Talakad ka, at sukdan me ing pisamban na ning Dios, at ing altar, at ding sasamba karin. Rev 11:2 At ing patiung atiu lual ning pisamban paburen me, at e me susukdan; uling miabie ya karing bansa: at ila dalpakan de ing banal a ciudad apatapulu at aduang bulan. Rev 11:3 At aku munie ku karing adua kung saksi, at ila manula la king lub ning libu at aduang dalan at anamapulung aldo, makaimalan lang suput. Rev 11:4 Deti ila ding aduang dutung a oliva, at ding aduang pagkandilan, a makatalakad king arapan na ning Guinu ning labuad. Rev 11:5 At nung ninumang tau pagnasan nong nanan balang, api ing lulual karing asbuk da, at lalaklakan do ding salang da; at nung ninuman pagnasan nong nanan balang, kailangan king mate ya king anti kaniting paralan. Rev 11:6 Deti maki upaya lang mikabat king banua, bang e muran king aldo ning karelang pamanula; at atin lang upaya king danum bang apapalyarian dang daya at bang abatbat da ing labuad king balang batbat kapilan mang aburi ra. Rev 11:7 At nung mayari na ing karelang pamipatutu, ing animal a manik ibat king kalalaman makipamuk ya karela, at asaul nala at pamaten. Rev 11:8 At ding bangke ra mikalat la king dalan na ning maragul a ciudad, a king espiritu mipalaguiuwan Sodoma, at Egipto, a nung nu ya naman mipaku ing karelang Guinu. Rev 11:9 At karing busal balayan at dai at amanu at bansa albayan dala ding tau ding bangke ra atlung aldo at kapitna, at e ra ipaintulut king ding bangke ra mibili la king metung a kutkutan. Rev 11:10 At ding manuknangan babo ning labuad magsaya la karela, at gawa lang pikatulan; at mipamaralan lang lamak ing metung at metung karela, uling deting aduang manula pepasakitan dala ding manuknangan king labuad. Rev 11:11 At kalabas da ding atlung aldo at kapitna ing pangisnawa ning bie a ibat king Dios linub karela, at tinalakad la karing bitis da; at digpa ing maragul a takut karing menakit karela. Rev 11:12 At mekaramdam lang metung a siwalang maragul a ibat banua, a sasabian na karela, Manik ko keni. At minukiat la banua king biga, at ding salang da akakit da la. Rev 11:13 At kanitang oras a ita mika metung a masikan a ayun, at melasak ing kapulu nang dake ning ciudad; at mete la king ayun ding pitung libu katau; at ding mitagan mengatakutan la, at minie lang kaligayan king Dios banua. Rev 11:14 Ing kaduang Sindak milabas ne; oini, ing katlung Sindak daratang yang marapal. Rev 11:15 At ing kapitung angel tinigtig ya; at sinalisi ing mangangaragul a siwala karin banua, at sinabi ra, Ing kayarian king yatu, milyari yang kayarian na ning kekatang Guinu, at ning keang Cristo: at ya magari ya angga king mangga. Rev 11:16 At ding aduangpulu at apat a makatuang makalukluk king babo ra ding karelang luklukan king arapan na ning Dios, migsakab la at simban de ing Dios. Rev 11:17 Ngara, Babie mi keka ing pasalamat, Oh Guinung Dios a Kakataskatasan, mabie at mebie; uling kinua mu ing maragul mung kayupayan, at migari ka. Rev 11:18 At mimua la ding bansa, at ing kekang mua dinatang, at ing panaun da ding mete balang miatulan, at ing panaun banang miabie ing ablas karing kekang talasuyu a manula, at karing banal at karetang tatakut king kekang laguiu ding mangalati at ding mangangaragul; at ing pamanlipul karing manganiaya king labuad. Rev 11:19 At mebuklat ya ing pisamban na karin banua ning Dios; at ing kaban ning keang tipan meakit ya king keang pisamban; at sinalisi ing kildap, at siwala, at duldul, at metung a ayun, ampon masikan a uran lipat. Rev 12:1 At ing metung a maragul a tanda meakit ya banua: metung yang babaing miimalan king aldo, at ing bulan king lalam ding keang bitis, at king keang buntuk metung yang coronang maki labing aduang batuin; Rev 12:2 At ya mabuktut ya, at papapiglo ya, mirarandam ya king pamanganak, at magkakasakit yang manganak. Rev 12:3 At meakit ya pa ing metung a aliwang tanda king banua: at oini, metung yang maragul a dragon a malutu, atin yang pitung buntuk at apulong sagu, at ding makaputung karing keang buntuk pitu no mang diadema. Rev 12:4 At ing keang iki papalisan no ding katlung dake karing batuin banua, at inugse no king labuad: at ing dragon makatalakad ya arap ning babaing manganak, baneng laklakan ing keang anak, nung ibait na ne. Rev 12:5 At menganak yang metung a anak a lalaki, metung a lalaking anak, a sumakup karing anggang bansa king kapamilatan ning metung a pamalukang bakal: at ing keang anak mesamsam ya angga king Dios at angga king keang luklukan. Rev 12:6 At ing babai tinakas yang mine king ilang, a nung nuya ating metung a karinan a sidia ning Dios, bang karin de sesayan king lub ning libu at aduang dalan ampon anamapulung aldo. Rev 12:7 At mika pamipamuk karin banua: I Miguel at ding angeles na mekipamuk lang salang king dragon; at ing dragon at ding angeles na mekipamuk la; Rev 12:8 At e la migwagui, ni e ra nia naman ikit ing karelang karinan karin banua. Rev 12:9 At bildug de ing maragul a dragon, ing matuang ubingan, itang mipalaguiuwan Diablo at Satanas, ing mapamirait king mabilug a yatu; mebaldug ya king labuad, at ding keang angeles mebaldug lang kayabe na. Rev 12:10 At dinamdam kung metung a maragul a siwala banua, a ngana, Ngeni dinatang na ing kaligtasan, at ing kayupayan, at ing kayarian na ning kekatang Dios, at ing kayupayan na ning keang Cristo: uling ing talasumbung ding kekatang kapatad mebaldug ne, a isusumbung nala king arapan na ning kekatang Dios aldo at bengi. Rev 12:11 At ila simbut de king uli na ning daya na ning Cordero, at king uli ning amanu na ning karelang pamipatutu; at e ra liguran ing karelang bie angga king kamatayan. Rev 12:12 Inya pin magsaya, Oh ikayung banua mangga na ikong manuknangan karela. Kalulu na ing labuad ampon ing dayatmalat; uling ing diablo tinipa ya kekayu, atin yang maragul a mua, baluan nang ditak na mu ing panaun na. Rev 12:13 At inyang ikit ning dragon king ya bildug de king labuad, pepasakitan ne ing babaing menganak metung a lalaki. Rev 12:14 At king babai miabie la ding aduang baguius ning metung a maragul a aguila, bang sulapo king ilang paike king keang karinan, nung nu ya mesese king misan a panaun, at ding panaun, at kapitna ning metung a panaun, manibat king arapan ning ubingan. Rev 12:15 At ing ubingan migja ya king asbuk na king gugulutan na ning babai danum a anti mong ilug, baneng apaniud king pamamilatan ning agus. Rev 12:16 At ing gabun seupan ne ing babai, at ing gabun bisni ne ing asbuk na, at inalduk ne ing ilug a bigja ning dragon king keang asbuk. Rev 12:17 At ing dragon mimua ya king babai at ine nong pekipamukan ding makatagan karing dai na, ding tutupad karing utus ning Dios, at makipatutu kang Jesus: Rev 13:1 At ya makatalakad ya babo ning balas ning dayatmalat. At ikit ke ing metung a lasip a sinaka king dayatmalat, a atin yang apulung sagu at pitung buntuk, at karing sagu na apulu lang diadema, at babo ra ding buntuk na laguiu lang kapaniumpan. Rev 13:2 At ing lasip a ikit ku kalupa ne ning metung a leopardo, at ding bitis na anti la mo ding bitis na ning metung a oso, at ing asbuk na anti yang asbuk ning metung a leon: at binie na kea ning dragon ing keang upaya, at ing keang luklukan, at maragul a kayupayan. Rev 13:3 At ikit ke ing metung karing buntuk na, anti yang mika sugat a ikamate; at iting sugat a ikamate kinayap ya: at ing mabilug a labuad mengapamulalang tutuki king lasip; Rev 13:4 At simban de ing dragon, uling binie na ing keang kayupayan king lasip, at sinamba la king lasip ngara, Ninung maguing anti ing lasip? at ninung makapakipamuk laban kea? Rev 13:5 At mirinan yang metung a asbuk a maniabi king mangangaragul a bague, at pamaniumpa; at mirinan yang kayupayan bang manatiling apatapulu at aduang bulan. Rev 13:6 At biklat ne ing asbuk na king pamaniumpa laban king Dios, bang paniumpan na ing laguiu na, at ing keang tabernaculo, at aguiang ding manuknangan banua. Rev 13:7 At mipaintulutan yang makipamuk karing banal, at saulan nala: at mirinan yang upaya king balang dai, at balayan at amanu at bansa. Rev 13:8 At ding anggang manuknangan king labuad samban de, balang metung a ing keang laguiu e pa misulat, king libru ning bie ning Cordero a pete ra, ibat king kamumulan ning yatu. Rev 13:9 Nung ninumang tau maki balugbug ya, pabustan yang makiramdam. Rev 13:10 Nung ninumang tau king pangabijag ya, king pangabijag karin ya ume: nung ing ninumang tau makamate ya king talibung, kailangan mate ya king talibung, kailangan mate ya king talibung. Oiti ing pamibabata ra at ing kasalpantayanan da ding banal. Rev 13:11 At ikit ke ing metung a aliwang lasip a sasaka king labuad; at maki adua yang sagu anti ing king metung a cordero, at maniabi yang anting metung a dragon. Rev 13:12 At gagamitan na ing mabilug nang kayupayan ning mumunang lasip king lalawan na. At daraptan na king ing labuad, at ding manuknangan kea samba la king mumunang lasip nung isanu ing maki sugat a ikamate kinayap. Rev 13:13 At darapat yang mangangaragul a tanda, nanupata makapatipa ya pang api ibat banua king labuad king lalawan ding tau. Rev 13:14 At pipiraitnan nala ding manuknangan king labuad, king pamamilatan da ding tandang miabie a upayang arapat na king arapan na ning lasip; sasabian na karing manuknangan king yatu king gawa lang metung a larawan na ning lasip a makisugat talibung at mebie ya. Rev 13:15 At miabie kea ing munie pangisnawa kaniti, king larawan na pin ning lasip, bang ing lawaran ning lasip makapaniabi ya, at arapat na pa king ninuman ding e samba king larawan na ning lasip papate nala. Rev 13:16 At daraptan na king ding sabla, ding mangangalati at ding mangangaragul, at ding masalapi at ding kalulu, at ding timawa at ding alipan, king mirinan lang metung a kintal king gamat a wanan, o king karelang kanuan; Rev 13:17 At king alang tau a makasali o makapisali, nung e mu itang maki kintal king laguiu na pin ning lasip o ing bilang ning kayang laguiu. Rev 13:18 Kaniti ating kabiasnan. Ing ating pamanalastas, pabustan yang bilangan na ing bilang na ning lasip; uling bilang na ning metung a tau; at ing bilang na anam a dalan anamapulu at anam. Rev 14:1 At linawe ku, at oini, ing Cordero makatalakad ya king babo na ning bunduk ning Sion, at ding kayabe na dinalan la at apatapulu at apat a libu, a maki atin king laguiu na at king laguiu nang Ibpa na, makasulat king karelang kanuan. Rev 14:2 At dimdam ku ing metung a siwalang ibat banua, anti mo ing biung ning dakal a danum, at anti ing kalugkug ning metung a matning duldul; at ing siwalang dimdam ku anti mo ing karing talapanigtig alpa a magalpa karing karelang alpa: Rev 14:3 At dadalit lang anti wari ing metung a dalit a bayu king arapan ning luklukan, at king arapan da ding apat a mabie melalang, ampon ding makatua; at alang tau a makapagaral king dalit a ita, nung e mu detang dinalan apatapulu at apat a libu, detang meatbus a ibat king labuad. Rev 14:4 Deti ila ding e mimusingan karing babai; uling ala lang bakas. Deti ila ding tutuki king Cordero nuya man ume. Deti ilang meatbus karing lalaki, ban maguing kamumulan a bunga tungkul king Dios at tungkul king Cordero. Rev 14:5 At king asbuk da alang meakit a kalaraman; ala lang musing. Rev 14:6 At ikit ke ing metung a aliwang angel susulapo ya king kapitna na ning banua, atin yang metung a mayap a balita a alang angga a ipamalita karing manuknangan king labuad, at king balang bansa, at dai at amanu at balayan; Rev 14:7 At sasabian na king metung a maragul a siwala, Tumakut ko king Dios, at dinan yeng kaligayan: uling ing oras ning keang pamanatul miras na: at samba ko kanitang linalang king banua at king labuad at dayatmalat at karing bukal ning danum. Rev 14:8 At ing aliwang angel, ing kadua, sinalisi ya, ngana, Melasak ne, melasak ne ing maragul a babilonia, a pepainum karing anggang bansa king alak na ning mua ning keang pamipaliwas. Rev 14:9 At ing aliwang angel, ing katlu, sinalisi ya karela, sasabian na king metung a maragul a siwala, Nung ninumang tau samba ya king lasip at king larawan na, at tanggap yang kintal king kanuan na, o king gamat na, Rev 14:10 Ya man minum ya king alak ning mua na ning Dios, a iti makasadiang alang samut king copa ning keang mua; at mipasakitan ya king api at asupri king arapan da ding angeles a banal, at king arap ning Cordero: Rev 14:11 At ing asuk ning karelang kasakitan magparati angga man king mangga; at ala lang painawa king aldo at bengi, ding sasamba king lasip at king larawan na, at ninumang tatangap king kintal ning keang laguiu. Rev 14:12 Atiu kaniti ing pamibabata ra ding banal, ding tutupad karing utus ning Dios, at king kasalpantayanan kang Jesus. Rev 14:13 At dimdam ku ing metung a siwala banua a sasabian na, Isulat mu, Nuan la ding mete a mamamate king GUINU manibat ngeni angga king paintungul: yanasa, ngana ning Espiritu, balang painawa king karelang dapat; uling ding dapat da tutuki la karela. Rev 14:14 At ikit ku, at oini, ing metung a lulam a maputi, at babo na ning lulam, ikit ke ing metung a kalupa na ning metung a anak ning tau, a king buntuk na mamutung yang metung a coronang guintu, at king gamat na metung yang lait a mataram. Rev 14:15 At ing metung a aliwang angel linual ya king pisamban, kukulisak na king metung a maragul a siwala king makalukluk king babo ning lulam, Ibaba me ing lait mu, at mamalut ka; uling ing oras ning pamamalut miras na; uling ing pupul king labuad malulut na. Rev 14:16 At ing makalukluk babo ning lulam bildug ne ing lait na king labuad; at ing king labuad mepalut. Rev 14:17 At ing metung a aliwang angel linual ya king pisamban a atiu banua, atin ya namang metung a lait a mataram. Rev 14:18 At ing metung a aliwang angel linual ya king altar, ing maki kayupayan king api; at kilisak nang maragul a siwala king maki lait a mataram, ngana, Ibaba me ing lait mung mataram, at tipunan mo ding punggul-punggul ning wake king labuad; uling malulut no ding keang uvas. Rev 14:19 At ing angel bildug ne ing lait na king labuad, at tinipun no ding wake uvas king labuad, at bildug no king pipapaslan alak, ing maragul a pipapaslan alak, king mua na ning Dios. Rev 14:20 At ing pipapaslan alak medara ya king lual ning ciudad, at ibat king pipapaslan alak linual ing daya, miras karing prenu ra ding kabayu, king dayung angga king libu at anam a dalan a estadio. Rev 15:1 At ikit ke ing metung a aliwang tanda king banua, maragul at makapagmulala, pitu lang angeles ding maki pitung batbat a ila ding katataulian, uling kareti mapupus ing mua ning Dios. Rev 15:2 At ikit ke ing anti waring metung a dayatmalat a salamin a makisamut api; at detang linual a migwagui king lasip at king keang larawan, at king bilang na ning laguiu na, makatalakad siping ning dayatmalat a salamin, atin lang alpa ning Dios. Rev 15:3 At dadalit de ing dalit nang Moises, a talasuyu na ning Dios, at ing dalit na ning Cordero, ngara, Maragul la at makapagmulala ding kekang dapat, Oh Guinung Dios a Mayupaya king Sabla; matulid la at katutuan ding kekang dalan, Ari ra ding panaon. Rev 15:4 Ninung e tumakut, Oh Guinu, at e paligaya king kekang laguiu? uling ikang sarili ing banal; uling ding anggang bansa datang la at samba la king arapan mu; uling ding kekang banal a dapat mibulalag la. Rev 15:5 At kaibat da deting bague ikit ku, at makabuklat ya ing pisamban na ning king pamipatutu karin banua: Rev 15:6 At king pisamban linual la ding pitung angeles a tatalan karing pitung batbat, makaimalan lang maulagang batu, malinis at maslag, at pakababat lang babat a guintu king salu. Rev 15:7 At ing metung karing apat a mabie melalang minie ya karing pitung angeles pitung mangkuk a guintu, mitmu la king mua na ning Dios, a mabibie angga king mangga. Rev 15:8 At kinatmu ya ing pisamban king asuk a ibat king ligaya na ning Dios at ibat king keang kayupayan; at ninuman alang milub king pisamban, anggang e la metupad ding pitung batbat da ding pitung angeles. Rev 16:1 At dimdam ku ing metung a maragul a siwala a ibat king pisamban, a maniabi karing pitung angeles, Ume kayu, at ibulus yo king labuad ding pitung mangkuk king mua na ning Dios. Rev 16:2 At linual ya ing mumuna at bilus ne ing mangkuk na king babo ning labuad; at meguing marawak at mabayat a sugat karing taung maki kintal king lasip, at pesisamba king keang larawan. Rev 16:3 At ing kadua bilus ne ing mangkuk na king dayatmalat; at milyaring daya anting king metung a taung mete, at ing balang kaladuang mabie mete ya, aguiang ding bague a atiu king dayatmalat. Rev 16:4 At ing katlu tigtug ne ing mangkuk na karing ilug at karing sibul ning danum, at milyaring daya. Rev 16:5 At dimdam ke ing angel ning danuman, a ngana, Matulid ka, mabibie at mebie, Oh Banal, uling minatul kang makanian: Rev 16:6 Uling ila bibu ra ing daya ra ding banal at ding manula, at daya ing binie mu karela barang inuman: karampatan la. Rev 16:7 At ing altar dimdam keng miniabi, Wa, Oh Guinung Dios, a Mayupaya king sabla, katutuan la at matulid ding kekang kayatulan. Rev 16:8 At ing kapat bilus ne ing mangkuk na king aldo; at miabie kea bang dulukan no ding tau king api. Rev 16:9 At meduluk la ding tau king maragul a pali: at piniumpan da ing laguiu na ning Dios a ating kayupayan kareting batbat; at e la sinisi bareng paligayan. Rev 16:10 At ing kalima bilus ne ing mangkuk na king luklukan na ning lasip; at ing kayarian na meralumdum ya; at ngitngat do ding karelang dila king uli na ning kasakitan, Rev 16:11 At piniumpan de ing Dios na ning banua, king uli ning kasakitan da at ding karelang sugat; at e la sinisi karing dapat da. Rev 16:12 At ing kanam bilus ne ing mangkuk na king maragul a ilug, ing ilug ning Eufrates; at melangi ing danum na, bang ing dalan misadia ya karing ari a datang ibat king aslagan. Rev 16:13 At ikit kong lulual ibat king asbuk ning dragon, at ibat king asbuk ning lasip, at ibat king asbuk ning malaram a manula, ding atlung espiritung marinat, a balamu tugak la: Rev 16:14 Uling espiritu lang demonio a darapat tanda; a mame karing arian ning mabilug a yatu, barong tipunan king pamipamuk king maragul a aldo na ning Dios a Mayupaya king Sabla. Rev 16:15 (Oini, aku datang kung anting metung a mapanako. Nuan ya itang lalame, at ingatan na ing imalan na, a magkang lumakad yang lubas, at atangalan da ing keang kamarinayan.) Rev 16:16 At tinipun dala ketang karinan a ausan dang Har-Magedon king amanung Hebreo. Rev 16:17 At ing kapitu bilus ne ing mangkuk na king angin; at linual ing metung a maragul a siwala king pisamban, manibat king luklukan, sasabian na, Merapat na: Rev 16:18 At mika kildap, at siwala, at duldul; at mika maragul a ayun, a e pa milyari kapilan man ibat king mika tau king labuad, metung a ayun a binang maragul at binang masikan. Rev 16:19 At ing maragul a ciudad mikawakawani yang atlung dake, at ding ciudad karing bansa mengalasak la: at ing maragul a babilonia aganaka ne king panimanman na ning Dios, bang ibie ne kea ing copa ning alak ning bigsikan na ning keang mua. Rev 16:20 At tinakas ing balang pulu, at ding bunduk e no meakit. Rev 16:21 At ing maragul a lipat, balang kabatu, mamabut ya king bayat na ning metung a talento, menabung ibat banua karing tau: at ding tau piniumpan de ing Dios king uli na ning batbat king lipat; uling ing batbat na mebinang maragul. Rev 17:1 At dinatang ya ing metung karing pitung angeles a maki ating pitung mangkuk, at miniabi ya kanaku, ngana, Ume ka keni, pakit ku keka ing atul na ning maragul a patutut, a makalukluk king babo na ning dakal a danum; Rev 17:2 A kea la mekipangalugud ding arian keti sulip, at ding manuknangan king labuad mengalasing la king bagsik ning alak na ning pamakipangalugud na. Rev 17:3 At dela nakung atiu king Espiritu king ilang: at ikit ke ing metung a babai a makalukluk babo na ning metung a lasip a malutu, mitmu ya karing laguiung pamaniumpa, at maki pitu yang buntuk ampon apulung sagu. Rev 17:4 At ing babai makaimalan yang purpura at malutu, at pemutian yang guintu at batung mayalaga ampon perlas, at atin yang copang guintu king gamat na, mitmu ya king makasumami, nanupata karing bague a karinatan ning keang pamakipangalugud. Rev 17:5 At babo ning kanuan na metung yang laguiung makasulat, MISTERIO, ING MARAGUL A BABILONIA, ING INDU RA DING PATUTUT AT DING MAKASUMAMI KING LABUAD. Rev 17:6 At ikit keng melasing ing babai king daya ra ding banal, at king daya ra ding martires nang Jesus. At inyang ikit ke, mipamulala ku king maragul a pangapamulala. Rev 17:7 At sinabi na kaku ning angel, Baket migmulala ka? aku sabian ku keka ing misterio ning babai, at ning lasip a magdala kea, a maki pitung buntuk at apulung sagu. Rev 17:8 Ing lasip a ikit mu linto ya, at ala yu, at malapit neng lual ibat king kalalaman, at ume king kasiran. At ding manuknangan king labuad, detang e makasulat a laguiu king libru ning bie ibat king pangalalang ning yatu, mangapamulala la, pamanakit da king lasip, nung makananu yang linto, at meala, at datang ya. Rev 17:9 Kaniti ing kaisipan a ating kabiasnan. Ding pitung buntuk, pitu lang bunduk a luluklukan na ning babai; Rev 17:10 At pitu lang ari; ding lima misaldak la, ing metung atiu, at ing metung e pa dinatang: at pamaniatang na kailangan manatili ya pang ditak a panaun. Rev 17:11 At ing lasip a linto, at meala, ya mu rin ing kawalu, at kakampi re ding pitu; at ume ya king kasiran. Rev 17:12 At ding apulung sagung ikit mu apulu lang ari, e la pa tinanggap kayarian; dapot tanggap lang kayupayan anti mong ari, kagum ning lasip, metung a oras. Rev 17:13 Deti mikakametung la kaisipan, at ibie ra ing kayupayan da at katungkulan king lasip. Rev 17:14 Deti makipamuk la laban king Cordero, at ing Cordero saulan nala, uling ya ing Guinu ra ding guinu, at Ari ra ding ari; at detang atiu kea, ila ding meaus at mepili ampon tapat, magwagui la naman. Rev 17:15 At sinabi na kaku, Ding danum a ikit mu, nung nuya makalukluk ing patutut, balayan la, at kekaldan, at bansa, at amanu. Rev 17:16 At ding apulung sagung ikit mu, at ing lasip deti akasaman de ing patutut, at pabustan deng magsarili, at lubas, at kanan da ing laman na, at tampusan de king api. Rev 17:17 Uling ing Dios binili na karing pusu ra bang dapat king keang kaisipan, at bang miras la king metung a kaisipan, at ibie ra ing kayarian da king lasip angga king ding amanu na ning Dios mipamintuan la. Rev 17:18 At ing babaing ikit mu, ya ing maragul a ciudad a magari babo ding arian keti king labuad. Rev 18:1 Kaibat da deting bague ikit ke ing metung a aliwang angel a titipang ibat banua, atin yang maragul a kayupayan; at ing labuad mipasalan ya king keang ligaya. Rev 18:2 At kinulisak ya king metung a makapayan a siwala, ngana, Misaldak ya, misaldak ya ing marangal a babilonia, at milyari yang tuknangan da ding demonios, at kuta na ning balang espiritung marinat, at kuta na ning balang ayup a marinat at pikakasaman. Rev 18:3 Uling king uli ning alak na ning mua ning keang pamakipangalugud mebaldug la ding anggang bansa; at ding arian king yatu migkamit lang pamakipangalugud kea, at ding mangalakal keti king yatu mengabandi la king uli na ning binang dakal nang pamagkaula. Rev 18:4 At dinamdam kung aliwang siwala a ibat banua, a sasabian na, Pasilual ku kea, kakung balayan, bakong e mirame king keang kasalanan, at bang e ko tanggap karing keang batbat; Rev 18:5 Uling ding kasalanan da miras la angga banua, at ing Dios aganaka na ngan ing karelang dewakan. Rev 18:6 Dinan ye agpang king binie na, at bayaran yeng adua timbang king aduang timbang ning keang dapat, king copa nung nu na pilauk, misamut kayu adua timbang dikil kea. Rev 18:7 Nung makananung pepaligayan na ing sarili na at mebie ya king kalayawan, makanian naman ing ibie yu keang pamipasakit at lungkut: uling ya sasabian na king pusu na, Aku makalukluk kung reina, at e ku mebalu, at e ku akit kapilan man ing kalungkutan. Rev 18:8 Uli nita king misan a aldo datang kea ing batbat, kamatayan, at lungkut, at danup; at malyari yang matampus king api; uling ing Guinung Dios a matul kea masikanan ya. Rev 18:9 At nung akit da ing asuk na ning keang pangasilab manangis la at managulele kea ding arian king yatu, a migkamit pamakipangalugud at mebie king kalayawan kea, Rev 18:10 Magbili la king marayu uli ning takut da king dusa na, ngara, Sindak, sindak, king maragul a ciudad ning babilonia, kanitang ciudad a masikanan! uling king metung mung oras dinatang ing kekang atul. Rev 18:11 At ding mangalakal king labuad manangis la at managulele kea, uling ala nang sali pa king kalakal da: Rev 18:12 Kalakal a guintu, at pilak, at batung mayalaga, at perlas, at masinsin a lienso, at purpura, at sutla, at imalan a malutu; at miayaliwang mangabanglung dutung, at sarisaring paglulanan a megawa king garing, ampon miayaliwang paglulanan a megawa king dutung a binang mayalaga, at tangsu, at bakal, at marmol; Rev 18:13 At kanela, ampon maparas, at incienso, at unguento, at olibano, at alak, ampon laru, at sampagang arina, at trigu, at animal, at tupa; at kabayu at carro, at alipan; at kaladua ra ding tau. Rev 18:14 At ding bungang pangaibugnan na ning kekang kaladua kinawani la keka, at ding anggang mangaulaga at mangasanting kinawani no ngan keka, at kapilan man e ra no akit ding tau. Rev 18:15 Ding mangalakal kareting bague, a mibandi king uli na, magtalakad lang marayu king takut da king keang dusa, pasitangis la at managulele, Rev 18:16 Ngara: Sindak, sindak, kanitang maragul a ciudad, a miimalan liensong masinsin at purpura at malutu, at pemutian guintu, at batung mayalaga, at perlas! Rev 18:17 Uling king metung a oras milyari ngang mewala ing anti kanitang maragul a kayatinan. At ing balang pekapun karing saken king danuman, at ing balang maglayag numan karin, at ding marineros, at ding anggang manintunan bie king dayatmalat, tinalakad la king marayu, Rev 18:18 At memangulisak la kabang lalon da ing asuk ning keang pangasilab, ngara, Isanu kayang katulad na nitang maragul a ciudad? Rev 18:19 At bilusanan dong alikabuk ding buntuk da, at gugulisak lang manangis, at managulele, ngara, Sindak, sindak, ing maragul a ciudad, a nung nu ding anggang maki saken king dayatmalat mibandi la ngan king uli na ning pibandian na! uling king lub ning metung a oras milyari yang mesira. Rev 18:20 Tumula ka, tungkul kea, Oh banua, at ikong banal, at ikong apostoles, at ikong manula; uling ing Dios inatul na kea ing kekong atul. Rev 18:21 At ing metung a angel a masikan dinamput yang metung a batung maragul a anting metung a guilingan a batu, at besibas ne king dayatmalat, ngana, Makanian ing pangasaldak nang makasdan ning babilonia, itang maragul a ciudad, misaldak ya, at kapilan man e ne mayakit pa. Rev 18:22 At ing siwala ding titigtig alpa, at musikus, at titigtig basle at titigtig pakakak, kapilan man e no maramdam keka; at ding talagawa king pamirapat dapat king nanu mang dapat e no mayakit keka; at ing siwala ning metung a guilingan e na maramdam keka: Rev 18:23 At ing sala na ning metung a sulugui e na sunlag pa keka; at ing siwala na ning asawang lalaki at asawang babai kapilan man e na maramdam pa keka; uling ding kekang mangalakal ila ding principes king labuad; uling king pamaganitu mu mepirait la ding anggang bansa. Rev 18:24 At kea meakit ing mibubu rang daya ding manula, at ing karing banal, at ing karing anggang pete ra babo ning labuad. Rev 19:1 Kaibat da deting bague dimdam ku ing anti mo waring metung a maragul a siwala ning metung a maragul a kekaldan karin banua, a ngana, Aleluya; Ing pangaligtas at ligaya, at kayupayan bandi na ning kekatang Dios; Rev 19:2 Uling katutuan la at matulid ding keang pamanatul; uling ya inatulan ne ing kabalitan a patutut, a peparawak king labuad king keang pamakipangalugud; at king gamat na inablas na ing daya ra ding keang talasuyu. Rev 19:3 At king kaduang ukdu sinabi ra, Aleluya. At ing keang asuk mukiat angga king mangga. Rev 19:4 At migsakab la ding aduangpulu at apat a makatua, at ding apat a mabie melalang at sinamba la king Dios a makalukluk king luklukan, ngara, Yanasa; Aleluya. Rev 19:5 At ing metung a siwala linual yang ibat king luklukan, ngana, Munie kong kapurian king kekatang Dios, ikong anggang keang talasuyu, ikong tatakut kea, malati at maragul. Rev 19:6 At dinamdam kung anti mo waring siwala na ning metung a maragul a kekaldan, at anti mo waring siwala na ning dakal a danum, at anti mo waring kalugkug ning mangasikan a duldul, a sasabian da, Aleluya: uling magari ya ing Guinung Dios, ing Mayupaya king Sabla. Rev 19:7 Magsaya tamu at lubus tumula, at tara ibie ta ing kaligayan kea: uling miras na ing pangakasal na ning Cordero, at ing keang asawang babai sidia na na ing keang sarili. Rev 19:8 At kea mipagkalub ing misulud yang lienzong masinsin, maningning at wagas: uling ing lienzong masinsin ya ing matulid dang dapat ding banal. Rev 19:9 At ya sinabi na kaku, Isulat mu. Nuan la ding meagkat king apunan na ning kasal ning Cordero. At sinabi na kaku, Deti ilang amanu nang katutuan ning Dios. Rev 19:10 At migsakab ku karing keang bitis bakeng samban. At ya sinabi na kaku, Ingatan mu yan a e daraptan: aku talasuyu kung kalupa mu, anti mu naman ding kapatad mung mimingat king pamipatutu kang Jesus: samba ka king Dios: uling ing pamipatutu kang Jesus yang espiritu na ning ula. Rev 19:11 At ikit keng mebuklat ing banua; at oini ing metung a kabayung maputi, at ing makalukluk babo na, mayayaus yang Tapat at Katutuan; at king katuliran mamatul ya at makipamuk. Rev 19:12 At ding keang mata metung lang lablab ning api, at king babo ning buntuk na dakal lang diadema; at maki metung yang laguiung makasulat a ninuman e ne balu nung e ya mung sarili na. Rev 19:13 At misusulud yang metung a imalan a pisikanan daya; at ing laguiu na mayayaus, ING VERBO NING DIOS. Rev 19:14 At ding tapuk a atiu banua tutukian de, makasake lang kabayung maputi, makaimalan lang lienzong masinsin, maputi at wagas. Rev 19:15 At king keang asbuk lulual ya ing metung a talibung a mataram, bang sugatan no kaniti ding bansa: at pagarian nala king tukud a bakal: at daralpakan ne ing pipapaslan alak ning kabagsikan ning mua na ning Dios a Mayupaya king Sabla. Rev 19:16 At king imalan na at king keang puad atin yang laguiung makasulat, ARI DING ARI, AT GUINU RA DING GUINU. Rev 19:17 At ikit ke ing metung a angel a makatalakad king aldo; at kinulisak ya king maragul a siwala, ngana karing anggang ayup a susulapo libutad ning banua, Ume ko keni, mitipun kayu king maragul nang apunan ning Dios; Rev 19:18 Ban kanan yu ing laman ding arian, at ing laman ding pekapun, at ing laman ding masikanan a lalaki, at ing laman ding kabayu at ing karing makasake karela, at ing laman da ding sablang tau, ding taung timawa, anti naman ding alipan, at ding mangalati at ding mangaragul. Rev 19:19 At ikit ke ing lasip, at ding ari king labuad at ding karelang tapuk a makatipun bang makipamuk laban kanitang makalukluk babo na ning kabayu, at laban king keang tapuk. Rev 19:20 At meakua ya ing lasip, at kayabe ne ing malaram a manula a dinapat tanda king keang arapan, a iti ya ing pemirait na karing tinanggap king kintal na ning lasip at karing sinamba king larawan na: deting adua miugse lang mabie king dayatdayatan malat ning api a milalablab king asupri: Rev 19:21 At ding mitagan mete la king talibung na nitang makalukluk babo ning kabayu, ketang talibung a lulual king asbuk na: at ding anggang ayup kinabsi la king laman da. Rev 20:1 At ikit ke ing metung a angel a titipang ibat banua, a atiu kea ing sulut ning kalalaman, at ing metung a maragul a talikala king keang gamat. Rev 20:2 At dekapan ne ing dragon, ing matuang ubingan, a ya ing diablo, at satanas, at tinali ne king lub ning libung banua, Rev 20:3 At bildug ne king kalalaman, at kebatan ne, at babo na tetakan ne, bang e na no piraitnan pa ding bansa, anggang e la mapupus ding libung banua, kalabas na niti, kailangan ing ibulus ya king saguling panaun. Rev 20:4 At menakit kung luklukan, at linukluk la karela, at mipagkaluban lang matul: at ikit ko ding kaladua ra ding pemanabtab da batal king uli ning pamipatutu ra kang Jesus, at king uli na ning amanu na ning Dios, at ding anggang e sinamba king lasip, ni king larawan na man, at e no man tinanggap kintal karing kanuan da at karing gamat da; at mebie la at migari la a kayabe nang Cristo libung banua. Rev 20:5 Ding mitagan karing mete, e la sinubling mebie anggang e mepupus ing libung banua, Iti ya ing mumunang pangasublingmie. Rev 20:6 Nuan ya at banal ing milangkap king mumunang pangasublingmie: kareti ing kaduang kamatayan ala neng kayupayan; nung e malyari lang sacerdotes ning Dios ampon ning Cristo, at magari lang kayabe na ning lub ning libung banua. Rev 20:7 At pangapuspus da ding libung banua, i satanas mabulus ya king kasusukulan na, Rev 20:8 At lual ya banong piraitnan ding bansa karing apat nang suluk ning yatu, kang Gog at kang Magog, banong tipunan king pamipamuk: ing kabilangan da anti la mo ing balas na ning dayatmalat. Rev 20:9 At minukiat la king kelaparan na ning labuad, at kibkuban da ing kampamentu ra ding banal king makapatulug, at ing ciudad a mipakamalan: at ing api tinipang ibat banua, at liklak nala. Rev 20:10 At ing diablong mamiraya karela misaldak ya king dayatdayatanmalat ning api at asupri, a nung nu la naman karin ing lasip at ing malaram a manula; at ila mipasakitan la aldo at bengi angga king mangga. Rev 20:11 At ikit ke ing metung a maragul a luklukan a maputi, at ing makalukluk babo na, a king arapan na tinakas ing labuad at banua; at alang meakit a karinan tungkul karela. Rev 20:12 At ikit ko ding mengamate, ding mangaragul at ding mangalati, makatalakad la king arapan na ning luklukan; at mengabuklat la ding libru: mebuklat ya ing metung a aliwang libru, a ya ing libru ning bie: at ding mete meatul la karing bague a makasulat karing libru, agpang king dapat da. Rev 20:13 At ing dayatmalat binie no ding mengamate atiu kea; at ing kamatayan at ing hades binie ro ding mengamate a atiu karela: at meatul la balang katau agpang king dapat da. Rev 20:14 At ing kamatayan at ing hades misaldak la king dayatdayatanmalat ning api. Iti ya ing kaduang kamatayan, Rev 20:15 At ing e meakit makasulat king libru ning bie misaldak ya king dayatdayatanmalat ning api. Rev 21:1 At ikit ke ing metung a bayung banua, at metung a bayung labuad: uling ing mumunang banua at mumunang labuad linipas nala; at ing dayatmalat ala nayu. Rev 21:2 At ikit ke ing banal a ciudad, ing bayung Jerusalem, a titipang ibat banua king Dios, makasadiang anti mo ing metung a asawang babai a gagayak da tungkul king asawa na. Rev 21:3 At dimdam ke ing metung a maragul a siwala a ibat king luklukan, a sasabian na, Oini, ing tabernaculo ning Dios atiu karing tau, at ya manuknangan ya karela at ila malyari nong balayan, at iti mu ring Dios malyari yang abe ra, at maguing Dios de: Rev 21:4 At pulisan na ing anggang lua karing mata ra; at ing kamatayan mawala na; ni e na mika lungkut, aguiang aklis, aguiang kasakitan: ding mumunang bague linipas nala. Rev 21:5 At ing makalukluk king luklukan sinabi na, Oini, aku gawan kong bayu ding sablang bague. At ngana, Isulat mu: uling deting amanu tapat la at katutuan. Rev 21:6 At kaku sinabi na, Mepalyari nala. Aku ing Alpa at ing Omega, ing mula at kapupusan. Ibie kung alang bayad king kumau ing danum ning bukal ning bie. Rev 21:7 Ing magwagui, manan no deting bague, at akung maguing Dios na at ya maguing anak ke. Rev 21:8 Dapot karing matakutin, at karing e maniwala, at karing makasumami, at karing mapamakamate tau, at karing makipangalugud at mapaganitu, at sasambang idolos, at karing anggang malaram, ing maguing dake ra king dayatdayatanmalat a mitataung api at asupri; a ya ing kamatayan a kadua. Rev 21:9 At dinatang ya ing metung karing angeles a ating pitung mangkuk, a mitmu karing pitung tauling batbat; at miniabi ya kanaku, ngana, Ume ka keni; ituru ke keka ing babaing asawa ning Cordero. Rev 21:10 At dela naku king Espiritu king metung a maragul a bunduk at matas, at pepakit ne kaku ing banal a ciudad ning Jerusalem, a titipa king banua manibat king Dios: Rev 21:11 A maki atin king ligaya na ning Dios: ing sulu na makipara ya king metung a batung mayalagang dili, anti ing batung jaspe a malino anti mong bubug: Rev 21:12 Atin yang metung a kutang maragul at matas; atin yang labingaduang pasbul, at karing pasbul labi lang aduang angeles; at ating laguiung makasulat kareti, a ila pin ding laguiu ra ding labingaduang dai ning Israel. Rev 21:13 Nangan king aslagan ating atlung pasbul; nangan amianan, atlung pasbul; nangan abagatan, atlung pasbul; at nangan albugan, atlung pasbul. Rev 21:14 At ing kuta na ning ciudad atin yang labingaduang pitatalakaran, at kareti ing laguiu ra ding labingaduang apostoles ning Cordero. Rev 21:15 At ing makisabi kaku atin yang metung a paniukad a guintu, baneng sukdan ing ciudad at ding pasbul na, at ing keang kuta. Rev 21:16 At ing ciudad misusukad ya king apat nang lupa, at ing kekaban na ya naman ing lapad na: at sikdan ne ing ciudad king paniukad, labi yang aduanglibung estadio: at ing kaba na, at ing lapad na at ing katas na misukadsukad. Rev 21:17 At sikdan ne ing kuta na, dinalan ya at apatapulu at apat a siku, agpang king sukad lalaki, ngana wari, king metung a angel. Rev 21:18 At ing kasangkapan na ning keang kuta batung jaspe: at ing ciudad guintung lubus, kalupa ning salamin a malinis. Rev 21:19 Ding katatalakaran na ning kuta ning ciudad pemutian la karing anggang miayaliwang batung mayalaga. Ing mumunang katatalakaran na jaspe; ing kadua, zapiro; ing katlu, calcedonia; ing kapat, esmeralda; Rev 21:20 Ing kalima, sardonica; ing kanam, sardio; ing kapitu, crisolito; ing kawalu, berilo; ing kasiam, topacio; ing kapulu, crisopracio; ing kalabingmetung, jacinto; ing kalabingadua, amatista. Rev 21:21 At ding labingaduang pasbul labi lang aduang perlas; ing balang metung karing pasbul metung yang perlas: at ing dalan na ning ciudad guintu yang lubus, malino yang anti mong salamin. Rev 21:22 At e ku menakit pisamban kea; uling ing Guinung Dios a Mayupaya king Sabla, ampon ing Cordero, ila ding keang pisamban. Rev 21:23 At ing ciudad e magkailangan king aldo, ni king bulan man, a sunlag kea: uling ing ligaya na ning Dios pasalan ne, at ing sulu na ya ing Cordero. Rev 21:24 At ding bansa lumakad la king sala na: at ding ari king yatu idala ra kea ing kapurian da. Rev 21:25 At ding pasbul na e la mikabat kapilan man king aldo, (uling e na mika bengi karin): Rev 21:26 At idala ra kea ding bansa ing ligaya ra at kapurian: Rev 21:27 At e na lungub kea ing nanumang bague marinat, o ing darapat mang makasumami at kalaraman; nung e ding bukud mung atiu makasulat king libru ning bie ning Cordero. Rev 22:1 At tiru ne kaku ing metung a ilug ning danum ning bie, maningning yang anting bubug, a lulual king luklukan na ning Dios at ning Cordero, Rev 22:2 King libutad na ning dalan na ning ciudad. At king pampang nang ini ning ilug at king kangatbang na atiu ing metung a dutung ning bie a magdalang labingaduang adle bunga, mamunga ya balang bulan: at ding bulung ning dutung dikil la king pangakayap ding bansa. Rev 22:3 At e ne mirinan sumpa: at ing luklukan na ning Dios at ning Cordero atilu kea: at ding talayusu na suyuan de; Rev 22:4 At ikit de ing lupa na; at ing keang laguiu mibili ya karing kanuan da. Rev 22:5 At e na mika bengi; at e la magkailangan sala na ning sulu aguiang king sala na ning aldo; uling ing Guinung Dios aslagan nala: at magari la angga king mangga. Rev 22:6 At sinabi na kaku, Deting amanu tapat la at katutuan: at ing Guinu, ing Dios da ding espiritu ra ding manula, tinubud ne ing angel na banong ipakit karing keang talasuyu ding bague a kailangan agad marapat. Rev 22:7 At oini, aku datang kung agad. Nuan ya ing mimingat karing amanu ning ula niting libru. Rev 22:8 At aku i Juan, aku ing dinamdam at menakit kareting bague. At inyang dimdam ku at ikit, migsakab ku bakung samba king arap na karing bitis ning angel a pepakit kaku kareting bague. Rev 22:9 At ya sinabi na kaku, Ingatan mung e daraptan; aku abe mukung talasuyu at ding kapatad mung manula, at karing mimingat karing amanu na niting libru: samba ka king Dios. Rev 22:10 At sinabi na kaku, E mu tatatakan ing amanu ning ula niting libru; uling ing panaun malapit na. Rev 22:11 Ing e matulid, pabustan ya pang dapat e katuliran: at ing marinat pabustan yang magpakarinat pa: at ing matulid, pabustan yang lalu pang maguing matulid: at ing banal, pabustan yang lalu pang magpakabanal. Rev 22:12 Oini, aku datang kung agad; at ing panablas ku atiu kaku, bakung ibie ing kayablasan king balang katau agpang king depat na. Rev 22:13 Aku ing Alpa at ing Omega, ing mumuna at ing tauli, ing kamumulan at ing kawakasan. Rev 22:14 Nuan la detang pipian da ing imalan da, balang mangaintulid king dutung na ning kabiayan, at malyari lang milabas king pasbul king panlub king ciudad. Rev 22:15 King lual atilu ding asu, at ding mapaganitu, at ding mapangalugud, at ding makamate lupang tau, ding sasamba karing idolos at balang metung a lulugud at gagawang kalaraman. Rev 22:16 Aku i Jesus tinubud ke ing kakung angel, bang patutu kekayu karetang bague dikil karing iglesia. Aku ing yamut at supling nang David, ing talang masinag ning abak. Rev 22:17 At ing Espiritu at ing asawang babai ngara, Lumapit ka. At ing daramdam, pabustan yung sabian na, Lumapit ka. At ing mau, pabustan yeng lumapit: ing bisa, pabustan yung kuma ya king danum ning bie, alang bayad. Rev 22:18 Aku patutu ku king balang katau a daramdam karing amanu na ning ula niting libru, Nung ninumang tau dagdagan nala, idagdag no ning Dios kea ding batbat a makasulat at kaniting libru: Rev 22:19 At nung ninumang tau lakonan no ding amanu ning libru niting ula, ing Dios ilako na ing keang dake king dutung na ning bie, at king ciudad a banal, a atiung makasulat kaniting libru. Rev 22:20 Ing babie patutu kareting bague, sasabian na, Wa: aku datang kung agad. Yanasa. Lumapit ka, Guinung Jesus. Rev 22:21 Ing kalam na ning Guinung Jesus manatili sa karing banal. Yanasa. |