FilemonPhm 1:1 I Pablo a makasukul nang Jesucristo, ampon ing kapatad tang Timoteo, kang Filemon a pakamalan at kayabe talapagobra, Phm 1:2 At kang Apia a kapatad tang babai, at kang Arquipo a kayabe tang kawal ampon king iglesia king kekang bale: Phm 1:3 Kalam keka at kapayapan a ibat king Dios a kekatang Ibpa ampon king Guinung Jesucristo. Phm 1:4 Pasalamat kung parati king kakung Dios, a ika sasaglawayan daka king kakung panalangin. Phm 1:5 Daramdaman ku ing lugud mu, ampon ing kekang kasalpantayanan king Guinung Jesus, at mangga na karing anggang banal; Phm 1:6 Bang ing pangayagun ning kekang kasalpantayanan mika bunga king pamangilala karing anggang mayap a bague a atiu keka, kang Cristo. Phm 1:7 Uling maragul ing tula ku at saya king kekang lugud, uling ding pusu ra ding banal mipasiknangan la king uli mu, kapatad a lalaki. Phm 1:8 King uli na niti, aguiang atin kung tetagan kang Cristo bang yutus ku keka itang karampatan, Phm 1:9 Makanian man king uli ning lugud, buburian ku pa ing magamuamu, anting metung a matua, aku i Pablo, at ngeni makasukul mu naman kang Cristo Jesus: Phm 1:10 Pagamuamu ke keka ing kanakung anak a kakung penganak king pangasukul ku, i Onesimo. Phm 1:11 A ya king minunang panaun alayang kabaldugan keka, dapot ngeni maki kabaldugan ya keka at kanaku: Phm 1:12 Nung ninu ing pepabalik ku keka king kasarilinan na, ita, ing tune kung pusu: Phm 1:13 Nung ninu ing kakatula kung akayabe, bang king uli mu sumuyu ya kaku king sukulan na ning evangelio: Phm 1:14 Dapot king e mu kaburian e ku dapat nanuman; bang ing kekang kayapan e maguing anting mapipilit, nung e king timawang kaburian. Phm 1:15 Uling mekad king uli na mu rin niti ya mikawani ya keka king saguling panaun, bang ika malyari meng akayabe king kapilan pa man; Phm 1:16 E na anting ipus, nung e maiguit king ipus, anti mong kapatad a kalugudlugud, lalu na kanaku, dapot nu pa anti keka, king laman at king Guinu. Phm 1:17 Nung ika pin bibilang mukung kayabe, tanggapan meng anti mo ing sarili ku. Phm 1:18 Dapot nung atin yang depat a e matulid keka, o atin yang utang nanuman keka, ibilang mu iti a kanakung utang; Phm 1:19 Aku i Pablo sinulat ku iti king sarili kung gamat, bayaran ku pa iti: bang e ku sabian keka king ika utang mu kaku subali pa king sarili mu. Phm 1:20 Wa, kapatad, tulutan mukung tumula keka king Guinu: dinan meng kapasnon ing pusu ku kang Cristo. Phm 1:21 Anti ning atin kung kapanaligan king kekang kapamintuan, sinulat ku keka, baluan ku king maiguit pa ing daptan mu king sasabian ku. Phm 1:22 Dapot maiguit kaniti isadia muku naman sang metung a santungan: uling panayan ku king pamamilatan ding kekang panalangin mipagkalub ku kekayu. Phm 1:23 I Epafras, a kakung abe king sukulan kang Cristong Jesus, pagmananuan naka; Phm 1:24 At makanian mu naman i Marcos, i Aristarco, i Demas, i Lucas, a kakung kayabe talapagobra. Demas, i Lucas, a kakung kayabe talapagobra. Phm 1:25 Ing kalam ning Guinu tang Jesucristo miabie na sa king kekong espiritu. Yanasa. |