Mateo

Mat 1:1 Ing libru king pipunpunan nang Jesucristo, a anak nang David, a anak nang Abraham.

Mat 1:2 I Abraham ayanak ne i Isaac; at i Isaac ayanak ne i Jacob; at i Jacob ayanak ne i Juda at ding keang kapatad;

Mat 1:3 At i Juda ayanak no kang Tamar di Fares at Zara; at i Fares ayanak ne i Esron; at i Esron ayanak ne i Aram,

Mat 1:4 At i Aram ayanak ne i Aminadab: at i Aminadab ayanak ne i Naason; at i Naason ayanak ne i Salmon;

Mat 1:5 At i Salmon ayanak ne kang Rahab i Boaz; at i Boaz ayanak ne kang Rut i Obed, at i Obed ayanak ne i Isai;

Mat 1:6 At i Isai ayanak ne ing aring David. At i David ayanak ne i Solomon kanitang ayasawa nang Urias;

Mat 1:7 At i Solomon ayanak ne i Rehoboam; at i Rehoboam ayanak ne i Abias; at i Abias ayanak ne i Asa;

Mat 1:8 At i Asa ayanak ne i Josafat; at i Josafat ayanak ne i Joram; at i Joram ayanak ne i Ozias;

Mat 1:9 At i Ozias ayanak ne i Jotam; at i Jotam ayanak ne i Acaz; at i Acaz ayanak ne i Ezequias;

Mat 1:10 At i Ezequias ayanak ne i Manases; at i Manases ayanak ne i Amon; at i Amon ayanak ne i Josias;

Mat 1:11 At i Josias ayanak ne i Jeconias at ding keang kapatad, king panaun a miugse la Babilonia.

Mat 1:12 At kaibat na ning pangaugse ra Babilonia, i Jeconias ayanak ne i Sealtiel; at i Sealtiel ayanak ne i Zorobabel;

Mat 1:13 At i Zorababel ayanak ne i Abiud; at i Abiud ayanak ne i Eliaquim; at i Eliaquim ayanak ne i Azor;

Mat 1:14 At i Azor ayanak ne i Sadoc; at i Sadoc ayanak ne i Aquim; at i Aquim ayanak ne i Eliud;

Mat 1:15 At i Eliud ayanak ne i Eleazar; at i Eleazar ayanak ne i Matan; at i Matan ayanak ne i Jacob;

Mat 1:16 At i Jacob ayanak ne i Jose a asawa nang Maria, a kaniti ya mibait i Jesus, a mayayaus Cristo.

Mat 1:17 Nanupata ding pipunpunan na manibat kang Abraham angga kang David, labi lang apat a pipunpunan; at manibat kang David angga king pangaugse ra Babilonia, labi lang apat a pipunpunan: at manibat king pangaugse ra Babilonia angga kang Cristo labi lang apat a pipunpunan.

Mat 1:18 Ngeni ing pangabait nang Jesucristo makanian a pangapalyari: A inyang i Maria a keang indu mekitangu ya kang Jose, bayu la miabe mabuktut ne king lalang ning Espiritu Santo.

Mat 1:19 At i Jose a asawa na, anti ning tau yang banal, at e na buri ing magawa yang metung a bulalag a pialimbawan binalak nang kawanian neng lijim.

Mat 1:20 Dapot inyang isipan no deting bague, oini, ing metung a angel ning Guinu pepakit ya kea king metung a paninap, sinabi na, Jose, a anak nang David, e ka magsalupsupan tanggap kang Maria a kekang asawa; uling ing atiung kabuktut na, lalang ne ning Espiritu Santo.

Mat 1:21 At manganak yang metung a lalaki; at palaguiuwan meng JESUS; uling ya ing manatbus king kasalanan na ning keang balayan.

Mat 1:22 Ngeni ing keganaganang iti mepalyari ngan bang matupad ing sinabi na ning Guinu king pamamilatan ning manula, ngana:

Mat 1:23 Oini ing dalagang alang bakas muktut ya, At manganak yang metung a lalaki, At mipalaguiuwan yang Emmanuel; A ing kabaldugan na, Ing Dios kayabe taya.

Mat 1:24 At i Jose miguising ya king keang tudtud, at depatan na ing inutus na kea ning angel ning Guinu, at pekiabayan ne ing keang asawa;

Mat 1:25 At e ne kilalang babai anggang e mibait ing anak a lalaking pangane: at pepalaguiuwan neng JESUS.

Mat 2:1 Ngeni inyang i Jesus mibait ne Bethlehem sakup ning Judea, king panaun nang aring Herodes, oreni, ding Mangabiasa a menibatan king aslagan dinatang la Jerusalem, sasabian da,

Mat 2:2 Nu ya karin itang mibait a ari ra ding Judios? uling ikit mi ya ing batuin na king aslagan, at dinatang kami bami yang samban.

Mat 2:3 At inyang ing aring Herodes dimdam na iti melingasngas ya, at pati na ing mabilug a Jerusalem.

Mat 2:4 At tinipun na la pin ding anggang pun da ding sacerdotes at ding escribas king balayan, kitang na karela nung nu ya kaya mibait ing Cristo.

Mat 2:5 At ila sinabi ra kea, King Bethlehem ning Judea: uling makanian ing makasulat king pamamilatan ning manula:

Mat 2:6 At ika Bethlehem, labuad ning Juda, King makananu mang bague e ka lati karing ukuman ning Juda; Uling keka ya lunto ing talapamajala, A maguing pastul king balayan kung Israel.

Mat 2:7 Kanita i Herodes inaus nong lijim ding Mangabiasa, at inusisa nang miamasamas karela ing panaun a pangalto na ning batuin.

Mat 2:8 At tinubud no Bethlehem, at ngana, Ume kayu, at siasatan yung miamasamas ing bague dikil king pungul; at panakit yu kea, pabalu yu kanaku, baku ya namang ayan at samban ke.

Mat 2:9 At ila, kaibat deng pekiramdaman ing ari, meko na la; at oini, ing batuin a ikit da king aslagan, mumuna ya karela, angga inyang miras ya at tinuknang ya tulid ning kabibilian na ning pungul.

Mat 2:10 At inyang ikit de ing batuin, bina lang mesaya.

Mat 2:11 At linub la bale at ikit de ing pungul pati i Mariang indu na; at memanyiklaud la at simban de; at pangabuklat na ning karelang pibandian inain da kea ing lamak da, guintu at incienso at mirra.

Mat 2:12 At anti ning iniwaran no ning Dios king pamanaguimpan king e no mibabalik kang Herodes, minuli la king labuad da king aliwang dalan.

Mat 2:13 Ngeni inyang mako nala, oini, ing metung a angel ning Guinu pepakit ya king panaguimpan kang Jose, ngana, Talakad ka, kuanan me ing pungul ampon i indu na, at tumakas kong ume Egipto; at karin kayu anggang ala kung sabian keka: uling i Herodes panintunan ne ing pungul baneng papate.

Mat 2:14 At tinalakad ya pin kanita, at kinua ne ing pungul ampon i indu na itang bengi, at mine la Egipto;

Mat 2:15 At karin ya angga king kamatayan nang Herodes: ban matupad ing sinabi na ning Guinu king pamamilatan ning manula, ngana, Inaus ke Egipto ing anak ku.

Mat 2:16 Kanita pin i Herodes, inyang ikit nang biniru re ding Mangabiasa, mikasbu yang bina, at mitubud yang kawal, at pepapate no ngan ding anggang anak a lalaki karin king Bethlehem, at king anggang sakup na, manibat king pungul a bayung penganak angga king aduang banua, agpang king panaun a inusisa nang miamasamas karing Mangabiasa.

Mat 2:17 Kanita pin metupad ing guingkas na ning manula a i Jeremias, ngana,

Mat 2:18 Siwalang meramdam karin Rama, Tangis at maragul a tagulele, Ya i Raquel a tatangisan no ding keang anak, At e ne bisang tumula, Uling ala nalu.

Mat 2:19 Dapot pangamate nang Herodes, oini, ing metung nang angel ning Guinu pepakit ya king metung a taguimpan kang Jose karin Egipto, ngana,

Mat 2:20 Talakad ka, at kuanan me ing pungul ampon i indu na, at ume ko Israel: uling mete no ding magnasa king bie na ning pungul.

Mat 2:21 At tinalakad ya, kinua ne ing pungul ampon i indu na, at minuli la king labuad ning Israel.

Mat 2:22 Dapot inyang damdaman na king i Arquelao yang aring mumutus Judea a minalili kang Herodes a tata na, mirinan yang takut ume karin; at anti ning iniwaran ne ning Dios king metung a taguimpan, minuli ya king sakup ning Galilea,

Mat 2:23 At miras ya karin, menuknangan ya king metung a ciudad a ausan dang Nazaret; bang matupad ing mesabi king pamamilatan ding manula, king mipalaguiuwan yang Nazareno.

Mat 3:1 At karing aldo a deta dinatang ya i Juan a Maminyag, manaral ya king ilang ning Judea, ngana,

Mat 3:2 Sumisi kayu; uling ing kayarian banua linapit na.

Mat 3:3 Uling ya iti ing mibalita king pamamilatan ning manula a Isaias, ngana, Ing siwala ning metung a kukulait king ilang, Isadia ye ing dalan na ning Guinu Tuliran yo ding keang daklat.

Mat 3:4 I Juan pin mimalan yang bulbul camello, at makababat ya king awakan na ing metung a kaliko balat; at ing pamangan na durun la ampon pulut panilan.

Mat 3:5 Kanita pin mame kea ing Jerusalem, at ing mabilug a Judea, ampon ing anggang mikakanlapit a karatig ning Jordan;

Mat 3:6 At mebinyag la kea king ilug ning Jordan, sasalesean da ing karelang kasalanan.

Mat 3:7 Dapot panakit na karing maldang Fariseos at Saduceos a lalapit king binyag na sinabi na karela, Ikayu daing ubingan, ninung mengamanu kekayu ban manginlag ko king muang daratang?

Mat 3:8 Munie ko ping bungang karampatan na ning pamanisi:

Mat 3:9 At e yu isipan sabian king kekong pilubluban, I Abraham yang ibpa mi: uling sasabian ku kekayu, king ing Dios makapalto yang anak kang Abraham kareni mang batung deni.

Mat 3:10 At aguiang ngeni ing palakul makabili ya king yamut da ding dutung: uli niti ing balang dutung a e magdalang mayap a bunga makutud ya, at miugse king api.

Mat 3:11 Aku king katutuan bibinyagan da kong danum king pamanisi; dapot ing datang king tauli ku, mayupaya ya pa kanaku, a e ku bague mang magdala karing keang sapin: ya binyagan nakayu king Espiritu Santo ampon king api:

Mat 3:12 Atiu king gamat na ing pamepe, at linisan nang mayap ing keang pidadaran; at tipunan na ing trigu king kamalig, dapot ing are dulukan na king aping e matatda.

Mat 3:13 Kanita pin i Jesus inayan ne i Juan, manibat Galilea angga king Jordan, bayang mabinyag kea.

Mat 3:14 Dapot i Juan buri neng ambanganan, ngana, Akung sukat pabinyag keka, at inayan mu ko?

Mat 3:15 Dapot i Jesus mekibat ya, ngana kea, Paburen mu ngeni: uling bague kekata ing tupad king anggang katuliran. Kanita pin pepaburean na ne.

Mat 3:16 At i Jesus, inyang mebinyag ne, sinaka ya king danum: at oini, ding banua mebuklat la kea, at ikit ne ing Espiritu ning Dios kukuldas yang katulad ne ning patipati at daratang ya tulid na;

Mat 3:17 At oini, ing metung a siwala a ibat karing banua, ngana, Iti yang kaluguran kung Anak, a atiu kea ing kasayan ku.

Mat 4:1 Kanita pin i Jesus dela ne king ilang ning Espiritu baneng tuksuan ning diablo.

Mat 4:2 At inyang mekapagayunu neng apat apulung aldo ampon apat apulung bengi, meranup ya.

Mat 4:3 At ing mapanuksu linapit ya at sinabi na kea, Nung ika ing Anak na ning Dios, yutus mu king ding batung deni malyari lang tinape.

Mat 4:4 Dapot ya mekibat ya, at ngana, Tiu makasulat, E mu king tinape karin ya mie ing tau, nune king balang amanung manibatan king asbuk ning Dios.

Mat 4:5 Kanita pin ing diablo dela ne king santong ciudad; at binili ne king taluktuk ning pisamban,

Mat 4:6 At sinabi na kea, Nung ika ing Anak ning Dios, luksu ka ken angga lalam: uling makasulat, Karing keang angeles munie yang bilin dikil keka; At, babo ning palad da ding gamat da karin da ka dalan, Magkang pota mitakid ka bitis king metung a batu.

Mat 4:7 I Jesus sinabi na kea, Makasulat mu naman, E me susubukan ing kekang Guinung Dios.

Mat 4:8 Pasibayu dela ne ning diablo king metung a bunduk a tutung matas, at pepakit no kea ding anggang kayarian king yatu, ampon ing ligaya ra;

Mat 4:9 At sinabi na kea, Ing sablang bague iti ibie ku keka, nung siklaud ka at samba kaku.

Mat 4:10 Kanita pin i Jesus sinabi na kea, Lisia ka, satanas: uling makasulat, Samba ka king Guinung kekang Dios at kea ka mu sumuyu.

Mat 4:11 Likuan ne pin kanita ning diablo; at oini, dinatang la ding angeles at siyuan de.

Mat 4:12 Ngeni inyang damdaman nang king i Juan mesukul ya, minuli ne Galilea;

Mat 4:13 At likuan na ing Nazaret; mine ya at menuknangan Capernaum, a makalele dayatmalat, wakas ning Zabulon at ning Neftali:

Mat 4:14 Bang matupad ing guingkas ning manulang Isaias, ngana,

Mat 4:15 Ing labuad ning Zabulon at ing labuad ning Neftali, Nangan king dayatmalat, nangan na pa karin ning Jordan, Galilea ding Gentiles,

Mat 4:16 Ing balayan a linukluk king dalumdum Menakit yang metung a maragul a sulu, At karetang linukluk king sakup at lilung ning kamatayan, Karela sinlag ya ing sulu.

Mat 4:17 Manibat king panaun a ita migmula ne i Jesus menaral, at menalese, Sumisi kayu, uling ing kayarian banua linapit na.

Mat 4:18 At kabang lalakad ya lele ning dayatmalat Galilea, ikit no ding aduang mikapatad, i Simon a mayayaus Pedro, at i Andres a keang kapatad, babaldug lang metung a lambat king dayatmalat; uling mamalakaya la.

Mat 4:19 At sinabi na karela Tuki ko kanaku, at gawan da kong mamalakayang tau.

Mat 4:20 At kanita murin ila likuan do ding lambat da, at tinuki la kea.

Mat 4:21 At pamanlakad na pang ibat karin ikit no ding aliwang aduang mikapatad pa, i Santiago a anak nang Zebedeo, at i Juan a keang kapatad, king bangka abe re i Zebedeo a karelang ibpa, ulipan do ding lambat da; at inaus na la.

Mat 4:22 At ita murin, ila likuan de ing bangka at i ibpa ra, at tinuki la kea.

Mat 4:23 At i Jesus libutan na ing mabilug a Galilea, tuturu ya karing sinagogas da, at panaral ne ing mayap a balita ning kayarian, at pakayapan no king anggang sakit at keganagana rang panamdaman ding memalayan.

Mat 4:24 At ing kabantugan na mikalat king mabilug a Siria; at dela ro kea ding anggang sakitan, ding manamdaman a miayaliwang sakit at kasakitan, ding alipnar da ding demonios, at ding sosoning at ding lumpu; at ya pakayapan na la.

Mat 4:25 At tikian de ding dakal a taung menibatan Galilea at Decapolis at Jerusalem at Judea, at ibat king nangan na pa karin ning Jordan.

Mat 5:1 At inyang ikit no ding malda, minukiat ya king bunduk: at pangalukluk na ding keang alagad linapit la kea;

Mat 5:2 At bisni ne ing asbuk na, tiru na la, ngana,

Mat 5:3 Nuan la ding maluka king espiritu: uling karela ya ing kayarian banua.

Mat 5:4 Nuan la ding tatangis: uling mipatulan la.

Mat 5:5 Nuan la ding mamu lub: uling ilang magmana keti sulip.

Mat 5:6 Nuan la ding daranup at mau king katuliran: uling mipawasan la.

Mat 5:7 Nuan la ding mapamakalulu: uling kumit lang pakalulu.

Mat 5:8 Nuan lan ding malinis a pusu: uling akit de ing Dios.

Mat 5:9 Nuan la ding mapamayapa: uling ilang mipalaguiuwan anak ning Dios.

Mat 5:10 Nuan la ding meligalig king uli na ning katuliran: uling karela ya ing kayarian banua.

Mat 5:11 Nuan kayu nung palmuran dakayu, at ligaligan da kayu, manga paniabianan king keganaganang marawak, king uli ku mu, aguia mang maglaram la.

Mat 5:12 Magpakasaya kayu at tumula, uling maragul ing miablas kekayu karin banua: uling makanian dong pepalasan ding manulang minuna kekayu.

Mat 5:13 Ikayung asin na ning labuad: dapot nung milako kalat ing asin, nanung panalat kea? ala neng kabaldugan nanuman, nung e miugse na ya mu, at maramusak karing tau.

Mat 5:14 Ikayung sulu ning yatu. Ing metung a ciudad a makabili babo ning metung a bunduk-bundukan a misalikut.

Mat 5:15 E ra naman daraptan ding tau a salaingan de ing sulu, at ibili lalam ning katabe, nung e king pibibilianan sulu; at aslagan no ngan ding anggang atiu bale.

Mat 5:16 Makanian yang sumala ing kekong sulu arapan ding tau; barang akit ing dapat yung mayap, at mipaligayan ya i Ibpa yung atiu karin banua.

Mat 5:17 E yu isipan ing mine kung labagan ku ing kautusan o ding manula: e ku mine ban labagan ku, nung e bang tuparan.

Mat 5:18 Uling king katutuan sasabian ku kekayu, Angga king ing banua at gabun lumipas, kapatak man at kagulis alang mawala king kautusan angga king mituparan ing keganaganang bague.

Mat 5:19 Uli na niti ninu man ing salangsang king metung kareting lalung maisak a kautusan, at makanian ing ituru na karing tau, mipalaguiuwan yang malati king kayarian banua: dapot ing ninu mang dapat at mituru kareti, mipalaguiuwan yang maragul king kayarian banua.

Mat 5:20 Uling sasabian ku kekayu, a nung ing kekong katuliran e miguit king katuliran da ding escribas at Fariseos, king makananu mang bague e ko lungub king kayarian banua.

Mat 5:21 Dimdam yu ing mesabi karing minunang tau, E ka makamate; at ing ninu mang makamate mibili ya king panganib ning kayatulan:

Mat 5:22 Dapot aku sasabian ku kekayu, ninuman itang mimua king kapatad na mibili ya king panganib ning kayatulan; at ing sumabi king kapatad na, Raca, mibili ya king panganib king concilio; at ninu man ing sumabi, Mangmang ka, mibili ya king panganib ning api king infierno.

Mat 5:23 Uli na niti nung idurup me ing ain mu king altar, at karin mu aganaka king ing kapatad mu atin yang sukal a lub keka,

Mat 5:24 Lakuan me karin ing kekang ain king arap ning altar, at ume ka; makikasundu ka pamu king kapatad mu, at kanita mibalik ka at idurup me ing kekang ain.

Mat 5:25 Makikasundu kang agad king kasalang mu, kabang abe me king dalan; a magkang ing kasalang ibie na ka king ukum, at ing ukum ibie na ka king manibala, at mibili ka king sukulan.

Mat 5:26 Ing katutuan sasabian ku keka, E ka milako karin, anggang e ka makabayad king katataulian a utsabas.

Mat 5:27 Dimdam yu king mesabi, E ka darapat paliwas:

Mat 5:28 Dapot aku sasabian ku kekayu, a ninuman ing lumawe king metung a babai a magdalang pamangaibugan, dinapat neng pamipaliwas kea king pusu na.

Mat 5:29 At nung ing mata mung wanan makaibie yang pangatakid keka, dukitan me, at ilako me keka: uling mayap pang mawala ya keka ing metung a dake ning katawan mu, at e ing mabilug mung katawan miugse king infierno.

Mat 5:30 At nung ing gamat mung wanan makaibie yang pangatakid keka, pututan me, at yugse: uling mayap pang mawala ya keka ing metung a dake ning katawan mu, at e ing mabilug mung katawan ume king infierno.

Mat 5:31 Mesabi mu naman, Ninuman ing kawan king asawa na, dinan neng kaustan king pamikawani ra:

Mat 5:32 Dapot kekayu sasabian ku, a ninuman ing kawani king asawa na, nung e ya murin pepaliwas, gagawan neng metung a paliwas: at ing ninumang makiasawa king kewanian, mikasala ya king pamipaliwas.

Mat 5:33 Pasibayu, dimdam yu king mesabi karetang king minunang panaun, E ka susumpa king kekang sarili, nung e tuparan mu ing panata mu king Guinu.

Mat 5:34 Dapot sasabian ku kekayu: King makanu mang bague e ko susumpa: aguiang king uli ning banua, uling yang luklukan na ning Dios;

Mat 5:35 Aguiang king uli ning labuad, uling yang dalpakan da ding keang bitis; aguiang king uli ning Jerusalem, uling yang ciudad na ning Aring matas.

Mat 5:36 E kayu mu naman susumpa king uli na ning buntuk yu uling e yu arapat ing metung mumang buak maguing maputi ya o matuling.

Mat 5:37 Dapot ing kekong pamaniabi maguing, Wa, wa; Ali, ali; at nanuman ing miguit kaniti manibatan king marawak.

Mat 5:38 Dimdam yu king mesabi, Mata libe mata, at ipan libe ipan:

Mat 5:39 Dapot kekayu sasabian ku, E ko bablas king marawak, dapot nung ninumang sumugat keka king pisngi mung wanan, ipalad mea naman kea ing kaili.

Mat 5:40 At ing bisang makiamanu keka, at kunan ne ing imalan mu, ibie mea naman ing balabal mu.

Mat 5:41 At nung ating mamilit keka a papusan lumakad metung a milla, daptan mu ing aduang milla.

Mat 5:42 Dinan me ing maniawad keka; at ing bisang mandam keka e me gugulutan.

Mat 5:43 Dimdam yu king mesabi: Luguran me ing lupa mung tau, at pikasaman me ing kasalang mu:

Mat 5:44 Dapot kekayu sasabian ku, Luguran yo ding kekong kasalang, at panalangin yo detang kekayu liligalig;

Mat 5:45 Bang maguing anak nakayu ning Ibpa yung atiu banua: uling ya pasikat ne pin ing keang aldo karing marawak at mayap, at papabal yang uran karing banal at makasalanan.

Mat 5:46 Uling nung luguran yo ding kekayu malugud, nanung ablas a mike kekayu? E mu naman makanian ing daraptan da ding manyingil bues?

Mat 5:47 At nung ding kapatad yu ilang bukud a kekong atuan, nanung iguit a depatan yu kesa karing aliwa? E mu naman makanian ing daraptan da ding Gentiles?

Mat 5:48 Magpakasakdal ko pin, anti mo ing Ibpa yung atiu banua sakdal ya.

Mat 6:1 Mingat ka a e mu daraptan ing kekang kabanalan arapan ding tau, bang pakit kamu karela: uling a magkang e na ka mika ablas kang Ibpa mung atiu banua.

Mat 6:2 Nung manlimus ka pin, e ka titiup pakakak arapan mu, antimo ing daraptan da ding magbanalbanalan karing sinagogas at karing dalan, bang mika kaligayan la karing tau. Ing katutuan sasabian ku kekayu, Tinggap da na ing karelang ablas.

Mat 6:3 Dapot nung manlimus ka e na sa ababalu ning kaili mu ing daraptan na ning wanan mu:

Mat 6:4 Bang milijim ing pamanlimus mu; at i Ibpa mung manakit keka king lijim ablasan naka.

Mat 6:5 At nung manalangin ka, e ka sa anti ding magbanalbanalan: uling ila kapad da ing makatalakad at manalangin karing sinagogas ampon karing suluk da ding dalan bang akit do ding tau. Ing katutuan sasabian ku kekayu, Tinggap da na ing karelang ablas.

Mat 6:6 Dapot ika, nung manalangin ka, lungub ka king silid mu, at kaibat meng kebat ing kekang pasbul, manalangin ka kang Ibpa mung atiu makalijim, at i Ibpa mung manakit keka king lijim, ablasan na ka.

Mat 6:7 At king pamanalangin e yu gagamitan ing alang kabaldugan a ulit-ulit, anti ing daraptan ding Gentiles: uling ila isipan da ing maramdam la uli ning dakal dang sinabi.

Mat 6:8 E ko pin makiapus karela: uling i Ibpa yu balu na ing bague kailangan yu bayu yu aduan kea.

Mat 6:9 Manalangin ko pin anti kanini: Ibpa mi, a atiu banua, Samban da sa ing laguiu mu.

Mat 6:10 Datang ing kayarian mu. Mipamintuan ing kaburian mu keti sulip anti karin banua.

Mat 6:11 Ibie mu king aldo iti ing kakanan mi king aldo-aldo.

Mat 6:12 At ipatawad mu kekami ing utang mi, anti mo ing pamamatawad mi karing mikautang kekami.

Mat 6:13 Ampon e mu ke daralan king tuksu, nung e ikabus mu kami king marawak.

Mat 6:14 Uling nung patawaran yo ding tau king karelang kasalanan, patawaran na kayu naman ning Ibpa yung atiu banua.

Mat 6:15 Dapot nung e yo patawaran ding tau king karelang kasalanan, e nakayu naman patawaran Ibpa yu king kekong kasalanan.

Mat 6:16 Bukud keta nung magayunu kayu, e ko sa anti ding magbanalbanalan, a palumbayan de ing lupa ra: uling ila babayu re ing lupa ra, bang akit do ding tau a magayunu la. Ing katutuan sasabian ku kekayu, Tinggap da na ing karelang ablas.

Mat 6:17 Dapot ika, nung magayunu ka, lanian me ing buntuk mu, at imuan me ing kekang lupa;

Mat 6:18 Bara kang e akit magayunu ding tau, nung e i Ibpa mung atiu makasalikut; at i Ibpa mu a manakit lijim keka, ablasan na ka.

Mat 6:19 E ko titipun pibandian keti sulip, a nung nu ing pulilia ampon kalawang asisira ra, at ding mapanako akulkul da at apanako:

Mat 6:20 Nung e bagkus, tumipun kong pibandian banua, a nung nu ing pulilia at kalawang e ra asira, at nung nu ding mapanako e ra akulkul at apanako:

Mat 6:21 Uling nung nukarin ing pibandian yu, atiu naman karin ing kekong pusu.

Mat 6:22 Ing sulu ning katawan ya pin ing mata: nung ing mata mu pin mayap ya, ing mabilug mung katawan kumatmu yang sala.

Mat 6:23 Dapot nung ing mata mu marawak ya, ing mabilug mung katawan kumatmu yang dalumdum. Nung ing salang atiu pin keka dalumdum ya, karagul nang bina ning dalumdum a ita!

Mat 6:24 Ninuman alang makasuyung aduang guinu: uling o kamuan ne ing metung at luguran ne ing metung, o kumampi ya king metung at murajan ne ing metung. E ko makasuyu king Dios ampong king pibandian.

Mat 6:25 Inya pin sasabian ku kekayu, E ko mababalisa king kekong bie, nung nanu ing kekong kanan o nung nanu ing kekong inuman; makanian mu naman king uli na ning kekong katawan, nung nanu ing kakong imalanan. E wari ing bie miguit king pagkabie, at ing katawan miguit king imalan?

Mat 6:26 Lawan yo ding ayup banua, e la tatanam, e la papalut, e la mibabangan; at i Ibpa yung atiu banua pakanan nala: E ko maiguit pa ulaga karela?

Mat 6:27 At ninu kekayu, aguia mang mabalisa ya, atuglungan neng metung a siku ing sukad ning bie na?

Mat 6:28 At baket mababalisa ko tungkul king imalan? Pagumasdan yo ding lirios king marangle, nung makananu lang tutubu; e la magobra, ni e la mamabal:

Mat 6:29 Makanian man sasabian ku kekayu king i Solomon man busal ning keang kaligayan e mipaimalanan anti ing metung kareti.

Mat 6:30 Dapot nung ing Dios paimalanan nang makanian ing dikut king marangle, a ngeni mabie, at bukas mitangab king kalang, e na ko lalung paimalanan, O ikayung ditak a kasalpantayanan?

Mat 6:31 Uli na niti e ko mababalisa ngayu, Nanung kanan mi? o, Nanung inuman mi? o, Nanung imalanan mi?

Mat 6:32 Uling ding Gentiles panintunan dang mapilit ing keganaganang bague a iti; balu na pin ning Ibpa yung atiu banua, king kailangan yu ing keganaganang bague a iti.

Mat 6:33 Dapot munang panintunan yu pa ing kayarian na ampon ing katuliran na; at ing keganaganang bague a iti mabie karagdagan kekayu.

Mat 6:34 Inya pin e ko mababalisa king aldo bukas; uling ing aldo bukas pagmalasakitan na ing keang sarili. Makaguiu king balang aldo ing sarili nang kaligaligan.

Mat 7:1 E ko manatul, ban e ko miatulan.

Mat 7:2 Uling nung makananu ing kayatulan a inatul yu, makanian kong mayatul; at ing sukad a panyukad yu, ya namang panyukad kekayu.

Mat 7:3 At baket lalawan me ing puling king mata na ning kapatad mu, at e me ukulan ing kabual a atiu king sariling mata mo?

Mat 7:4 O makananu mung sabian king kapatad mu, Paburen mukung palual ke ing puling king mata mu? at oini, ing kabual king sarili mung mata?

Mat 7:5 Magbanalbanalan, palual me pa ing kabual king sariling mata muat kanita masala yang akit mung ipalual ing puling king mata ning kapatad mu.

Mat 7:6 E yu babie ing banal a bague karing asu, ni e yo yugse ding perlas arapan ding babi, a magkang damusakan dala mu at arapan dakayu at panginisan.

Mat 7:7 Maniawad kayu, at mirinan kayu; manintun kayu, at manakit kayu; tigtig kayu, at mibuklatanan kayu:

Mat 7:8 Uling ing balang metung a maniawad, tanggap ya; at ing manintun, manakit ya; at ing titigtig mibuklatanan ya.

Mat 7:9 O ninu ing tau kekayu, a nung aduananan neng tinape ning anak na, dinan neng metung a batu?

Mat 7:10 O nung aduananan neng metung a asan, dinan neng metung a ubingan?

Mat 7:11 Nung ikayu pin mangarawak kayu, biasa kong magkalub karing anak yu, lalu ne kasi i Ibpa yung atiu banua munie mayap a bague karing maniawad kea?

Mat 7:12 Inya pin itang anggang bague buri yung daptan da kekayu ding tau, ya namang daptan yu karela: uling iti ya ing kautusan at ding manula.

Mat 7:13 Lungub ko king pasbul a makiput; uling maliwalas ya ing pasbul, ampon malapad ya ing dalan a mame king kasiran; at dakal la ding lulub kea.

Mat 7:14 Uling makiput ya ing pasbul, at makitid ya ing dalan a mame king bie, at ditak la mu ding manakit kea.

Mat 7:15 Mingat kayu karing e tutung manula, a datangan da kayung maganiu lang oveja, dapot king lub da lobu lang ganid.

Mat 7:16 King karelang bunga akilala yu la. Anta gagtal ko waring uvas karing suksok; o higus karing sapinet?

Mat 7:17 Makanian mu naman ing balang dutung a mayap mamunga yang mayap: dapot ing dutung a marawak mamunga yang marawak.

Mat 7:18 E malyaring mamungang marawak ing dutung a mayap, ni ing dutung a marawak mamungang mayap.

Mat 7:19 Ing balang dutung a e maki bungang mayap, makutud ya at miugse king api.

Mat 7:20 Inya pin king bunga ra akilala yu la.

Mat 7:21 E ing balang metung a sasabi kanaku, Guinu, Guinu, lungub ya king kayarian banua; nung e itang darapat king kaburian nang Ibpa kung atiu banua.

Mat 7:22 Dakal la ding sumabi kanaku king aldo a ita: Guinu, Guinu, e ke wari menula king laguiu mu, ampon king laguiu mu pepalual keng demonios, at king laguiu mu dinapat keng dakal a mayupayang dapat?

Mat 7:23 At kanita itutul ku karela, Kapilan man e ra ko kilala: kawani ko kanaku, mapaniapat marawak.

Mat 7:24 Inya pin ing balang metung a makiramdam kareting amanu ku at daraptan nala, makaablas ya king metung a taung maisip, a mitalakad bale babo ning batu;

Mat 7:25 At ing uran mebaldug, at ing bulus dinatang, at ing angin tiniup at ing bale bingguan de; at e miragsa: uling mitalakad ya babo ning batu.

Mat 7:26 At ing balang metung a makiramdam kareting amanu ku, at e no daraptan, makaabas ya king metung a taung alang isip a mitalakad bale babo balas:

Mat 7:27 At ing uran mebaldug, at ing bulus dinatang, ing angin tiniup, at pingkulan de itang bale; at miabual ya: at makatakut ing pangaragsa na.

Mat 7:28 At milyari inyang i Jesus apupus no deting amanu, ding malda mengapamulala la king keang turu;

Mat 7:29 Uling tiru na la anti ya mo king maki maragul a kayupayan, at e anti karing karelang escribas.

Mat 8:1 At inyang kuldas ne king bunduk, malda lang tau ding tinuki kea.

Mat 8:2 At oini ing metung a leproso linapit ya at sinamba kea, sinabi na, Guinu, nung buri mu alinis mu ku.

Mat 8:3 At guewang ne ing gamat na, tigkilan ne, sinabi na, Buri ku; luminis ka. At ita murin melinis ya lepra.

Mat 8:4 At i Jesus sinabi na kea, Mingat ka, kaninuman e mu paniabian; nung e mako ka, pakit ka king sacerdote, at idurup me ing ain a inutus nang Moises, a metung a patutu karela.

Mat 8:5 At pamanlub na Capernaum, linapit ya kea ing metung a centurion pagamuamu na kea,

Mat 8:6 At sinabi na, Guinu, ing ipus ku makarate ya bale, lumpu ya, at bina yang misasakitan.

Mat 8:7 At i Jesus sinabi na kea, Datang ku at pakayapan ke.

Mat 8:8 At ing centurion mekibat ya, at ngana, Guinu, e ku karampatan ban lungub ka lalam ning kakung bubungan; dapot sumabi kang metung a amanu, at ing ipus ku kumayap ya.

Mat 8:9 Uling aku tau ku namang sasakupan, atin kung kawal a sakup: at sabian ku king metung a ini, Ume ka, at ya ume ya; at king aliwa, Lumapit ka keni, at ya lumapit ya; at king ipus ku, Daptan mu ini, at ya daptan na.

Mat 8:10 At inyang dimdam nang Jesus iti, mipamulala ya, at sinabi na karing tinuki kea, Ing katutuan sasabian ku kekayu, karin man Israel e ku menakit kasalpantayanan a binang maragul.

Mat 8:11 At kekayu sasabian ku, king dakal la ding manibatan king aslagan at king albugan, at makiluklukan la kang Abraham, at kang Isaac at kang Jacob king kayarian banua;

Mat 8:12 Dapot ding anak ning kayarian miugse la king dalumdum lual: karin na ing tangis at pamitiguis da ding ipan.

Mat 8:13 At i Jesus sinabi na king centurion, Mako na ka; at nung makananu ing kapaniawalan mu, yang mapalyari keka. At ing ipus na kinayap ya king oras muring ita.

Mat 8:14 At inyang datang ya i Jesus king bale nang Pedro, ikit ne ing katiwangan nang babai makakera ya at malalagnat.

Mat 8:15 At inapis ne gamat, at ing lagnat likuan ne; at ya tinalakad ya, at sinuyu ya kea.

Mat 8:16 At inyang miras na ing gatpanapun, dela ro kea ding alipnan da ding demonios: at king metung nang amanu pepalualan no ding espiritu, at pepakayapan na la ding anggang salunan:

Mat 8:17 Bang matupad ing mesabi king pamamilatan na ning manulang Isaias, a ngana, Ya muring kinanua king kekatang sakit, at migdala king kekatang panamdaman.

Mat 8:18 Panakit na ping Jesus karing maldang taung makapatulug kea, inutus na king dalakit la kangatba.

Mat 8:19 At linapit ya ing metung a escriba at sinabi na kea, Maestro, tuki ku nu ka man ume.

Mat 8:20 At i Jesus sinabi na kea, Ding zorras atin lang lukib, at ding ayup banua atin lang sale; dapot ing Anak ning tau ala yang pijiligan king buntuk na.

Mat 8:21 At ing metung karing alagad sinabi na kea, Guinu, paintulutan mu ku pang mako at ikutkut ke i ibpa ku.

Mat 8:22 Dapot i Jesus sinabi na kea, Tuki ka kanaku; at paburen mo ding mete mikutkut karing karelang mete.

Mat 8:23 At inyang lungub ya king metung a bangka, ding keang alagad tinuki la kea.

Mat 8:24 At oini dinatang ing masikan a baguiu king dayatmalat, nanupata ing bangka tatakpan ne ning alun: dapot ya matudtud ya.

Mat 8:25 At lepitan de, at guinising de, sinabi ra kea, Iligtas mu kami, Guinu: mangamate kami.

Mat 8:26 At sinabi na karela, Baket tatakut kayu, taung ditak a kasalpantayanan? Kanita pin mibangun ya, at sebianan na ing angin ampon ing dayatmalat; at mika maragul a karatunan.

Mat 8:27 At ding tau mengapamulala la, sinabi ra, Nanu yang tau iti, a ing angin man at ing dayatmalat mamintu la kea?

Mat 8:28 At pangaras da kangatba, king labuad da ding tau Gadara, selubungan de ding aduang alipnan dang demonios, a lulual karing kutkutan, mabagik lang bina, nanupata ninuman alang mangangas daralan king dalan a ita.

Mat 8:29 At oini, kinulait la, ngara, Nanung pakialam mi keka, oh Anak ning Dios? mine ka keting pasakitan mu kami bayu miras ing panaon?

Mat 8:30 At ating makarayu karela metung a kawan da ding dakal a babing mamangan.

Mat 8:31 At ding demonios pekisabi ra kea, ngara, Nung palualan mu kami, padala mu na kami mu ketang kawan da ding babi.

Mat 8:32 At ya sinabi na karela, Ume kayu. At linual la, at mine la karing babi: at oini, ing mabilug a kawan tinulandung manibat king gulud angga king dayatmalat, at mete la king danum.

Mat 8:33 At ding papastul karela memanakas la, at pepainturu la king ciudad, selita ra ngan ing bague, at nung nanu itang mepalyari karetang inalipnan da ding demonios.

Mat 8:34 At oini, ing mabilug a ciudad linual sinalubung kang Jesus: at panakit da kea, pigamuamu ra king mako ya sa king sakup da.

Mat 9:1 At linub ya king metung a bangka, at dinalakit ya kangatba, at mine ya king keang sariling ciudad.

Mat 9:2 At oini, dela re kea ing metung a taung lumpu, a makarate na king pagkeram: at panakit nang Jesus king kasalpantayanan da, sinabi na king lumpu, Anak, magsaya ka; ding kasalanan mu mipatawaran la.

Mat 9:3 At oini, ding mapilan karing escribas sasabian da king lub da, Ing taung iti manyumpa ya.

Mat 9:4 At i Jesus balu na ing isipan da, sinabi na, Baket mimisip kong marawak karing kekong pusu?

Mat 9:5 Uling isanu ta ing mayan sabian, Ding kasalanan mu mipatawad la; o sabian, Talakad ka, at lumakad?

Mat 9:6 Dapot bang abalu yu pin, king ing Anak ning tau maki kayupayan ya keti sulip mamatawad kasalanan (kanita sinabi na pin king lumpu), Talakad ka, kuanan me ing pagkeran mu, at muli ka bale mu.

Mat 9:7 At ya tinalakad ya kanita, minuli ya bale na.

Mat 9:8 Dapot panakit da kaniti ding malda mengatakutan la, at pepaligayan de ing Dios, a minie anti kanitang kayupayan karing tau.

Mat 9:9 At inyang mako ya i Jesus karin, ikit ne ing metung a tau, a mayayaus Mateo, makalukluk ya king bangkung pipanyingilan buis: at sinabi na kea, Tuki ka kanaku. At tinalakad ya, at tinuki ya kea.

Mat 9:10 At milyari, inyang makalukluk neng mangan king bale, oini, ding dakal a manyingil buis at makasalanan dinatang la at mekiluklukan la kang Jesus at karing keang alagad.

Mat 9:11 At inyang ikit da iti ding Fariseos, sinabi ra karing keang alagad, Baket makisulu yang mamangan ing kekong Maestro karing manyingil buis at makasalanan?

Mat 9:12 Ya pin panamdam na kanita, sinabi na, Ding alang masakit e la magkailangan manulu, nung e ding masakit.

Mat 9:13 Dapot ume kayu at pagaralan yu nung nanung kabaldugan na niti. Pagnasan ku ing kapakaluluan, at e ing ain: uling e ku mine keting ausan ko ding banal, nung e makasalanan.

Mat 9:14 Kanita pin detangan de ding alagad nang Juan, sinabi ra, Baket ikami at ding Fariseos magayunu keng madalas, dapot ding kekang alagad e la magayunu?

Mat 9:15 At i Jesus sinabi na karela, Makananu lang magpaldas ding kayantabe king kasal abe re ing asawang lalaki? Dapot miras ing aldo a ing asawang lalaki mikawani ya karela, at kanita pin magayunu la.

Mat 9:16 At ninuman e ne itagpi ing imalan a bayu king imalan a aran; uling iti muring penagpi igutan ne ing imalan, at lalu neng dagul a kasiran.

Mat 9:17 Ni e la naman mibibiling bayung alak karing lulanan a aran: nung mipakanian mangatdas la ding lulanan, at ing alak miugse, at masira la ding lulanan; nung e ibili ra ing alak a bayu king bayung lulanan, at mikametung lang asinup.

Mat 9:18 Kabang ya sasabian no karela deting bague, oini, dinatang ya ing metung a pekapun, at sinamba ya kea, ngana, Ing anak kung babai mete ne: dapot ume ka keni, at itumpak me ing gamat mu kea, at mie ya.

Mat 9:19 At tinalakad ya i Jesus, at tinuki ya kea, at abe no ding keang alagad.

Mat 9:20 At oini, ing metung a babaing atin nang labing aduang banuang miagasan daya, linapit ya king gugulatan na, at tigkilan ne ing lele ning keang imalan:

Mat 9:21 Uling sasabian na king pilubluban na, Nung atagkil ku ya muman ing imalan na, kumayap ku.

Mat 9:22 Dapot melikid ya kanita i Jesus, at inyang akit ne, sinabi na, Anak a babai, magsaya ka; ing kasalpantayanan mu pepakayapan na ka. At ing babai kinayap ya manibat na king oras a ita.

Mat 9:23 At inyang miras ya pin i Jesus king bale nitang pekapun, at panakit na karing titigtig basle, ampon ding dakal a taung malingongo,

Mat 9:24 Sinabi na, Palabas kayu: uling ing dalaga e mete, nung e matudtud ya mu. At ila keilian de king sunu.

Mat 9:25 Dapot inyang ding malda milual na la, linub ya, ampon telanan ne gamat; at ing dalaga tinalakad ya.

Mat 9:26 At iting pangabantug mikalat king mabilug a labuad a ita.

Mat 9:27 At panlako nang Jesus karin, tinuki la kea ding aduang bulag, kukulait la, at ngara, Pakaluluan mu kami, oh anak nang David.

Mat 9:28 At inyang lungub ya king bale, linapit la kea ding bulag: at i Jesus sinabi na karela, Paniwalan yu ing arapat ku ite? Sinabi ra kea, Wa, Guinu.

Mat 9:29 Kanita pin inapis no mata, ngana, Nung makananu ing kekong kasalpantayanan, yang mapalyari kekayu.

Mat 9:30 At mebuklat la ding karelang mata. At i Jesus penabilin nang matalik karela, ngana, Mingat kayu, ninuman sa alang makabalu.

Mat 9:31 Dapot ila meko na la, at bilalag da ing kabantugan na king mabilug a labuad a ita.

Mat 9:32 At inyang mako na la, oini dela re kea ing metung a taung pipi, a alipnan na ning demonio.

Mat 9:33 At inyang milual ne ing demonio, ing pipi miniabi ne: at ding kekaldan mengapamulala la, sasabian da, Kapilan man ala pang meakit a bague a anti kaniti keti Israel.

Mat 9:34 Dapot ding Fariseos sinabi ra, King uli na ning pekapun da ding demonios papalual yang demonios.

Mat 9:35 At lilibut ya i Jesus karing anggang ciudad, ampon nayun, tuturu ya karing sinagogas da, at panaral na ing mayap a balita ning kayarian, at pakayapan no king keganaganang sakit at king miayaliwang kapanamdaman.

Mat 9:36 Dapot inyang akit no ding keraklan, melunus ya karela, uling malungkut la at pakasambulat, anti mong tupang alang pastul.

Mat 9:37 Kanita sinabi na pin karing keang alagad, Katutuan king ing palutan dakal, dapot ding magobra ditak la mu.

Mat 9:38 Panalangin yu pin king Guinu ning palutan padala yang magobra king keang palutan.

Mat 10:1 At pepalapitan no kea ding labi nang aduang alagad, at dininan nong kayupayan karing espiritung marinat, barong apalual, at makapakayap king keganaganang sakit ampon miayaliwang kapanamdaman.

Mat 10:2 Ngeni, ing laguiu ra ding labingaduang apostoles ila reni: Ing mumuna, i Simon, a mayayaus Pedro, ampon i Andres a kapatad na; i Santiago a anak nang Zebedeo, ampon i Juan a kapatad na;

Mat 10:3 I Felipe ampon i Bartolome; i Tomas at i Mateong manyingil buis; i Santiago a anak nang Alfeo, at i Tadeo;

Mat 10:4 I Simon ing matupad, at i Judas Iscariote a miglingu kea.

Mat 10:5 Deting labingadua inutusan nong Jesus, at penabilinan nala, sinabi na, E ko mame king insa mang dalan da ding Gentiles at e ko lulub king insa mang ciudad da ding tau Samaria:

Mat 10:6 Dapot lalung mayap ume kayu karing tupang mengawala king bale ning Israel.

Mat 10:7 At king kekong paglakad manaral kayu ngayu, Linapit na ing kayarian banua.

Mat 10:8 Pakayapan yo ding salunan, biayan yo ding mete, linisan yo ding leproso, palual yo ding demonios: tinggap yung alang bayad, pamie yung alang bayad.

Mat 10:9 E ko magbakal guintu, o pilak, o tangsu man karing kekong bulsa;

Mat 10:10 Suput man king kekong panlakad, adua man kapiblas a imalan, sapin man o tukud, uling ing darapat karampatan ya king kakanan na.

Mat 10:11 At nukarin mang ciudad o nayun a lungub kayu, siasatan yu nung ninu ing karin karampatan; at manuknangan ko karin angga king panlako yu.

Mat 10:12 At king panlub yu king bale mamugue kayu.

Mat 10:13 At nung ing bale karampatan ya, ibie yu ing kapayapan kea; dapot nung e ya karampatan misubli kekayu ing kapayapan.

Mat 10:14 At ninuman ing e tanggap kekayu, at e na pakiramdaman ing kekong sasabian, pamanlako yu king bale a ita o ciudad, ipagpag yu ing alikabuk ding kekong bitis.

Mat 10:15 Ing katutuan sasabian ku kekayu, king mayan pa ing parusa king labuad ning Sodoma at Gomorra king aldo ning pamanukum, king kanitang ciudad a ita.

Mat 10:16 Oini, aku yutus dakayu anti mo ding tupa king busal da ding lobo: maisip ko sang anti ding ubingan, at mamung anti ding patipati.

Mat 10:17 Dapot e ko magtiwala karing tau: uling ibie rakayu karing piukuman, at karing sinagogas da batbatan dakayu;

Mat 10:18 Wa, at midala kayu arapan da ding ukum ampon ding ari king uli ku, bang mipatutuan karela at karing Gentiles.

Mat 10:19 Dapot nung miabie na kayu, e ko mababalisa nung makananu o nanung sabian yu: uling king oras mu ring ita miabie kekayu ing bague yung sabian:

Mat 10:20 Uling aliwa ikayu ing maniabi, nung e ing Espiritu nang ibpa yu a maniabi kekayu.

Mat 10:21 At ibie neng papate ning kapatad ing keang kapatad, at ning tata ing anak na; at ding anak salangsang la karing pengari ra, at papate rala.

Mat 10:22 At pikasaman dako ngang ding tau king uli ning laguiu ku: dapot ing mibata angga king kapupusan, iti mu rin miligtas ya.

Mat 10:23 Dapot nung ligaligan dako pin king ciudad a iti, ume ko king aliwa; uling ing katutuan sasabian ku kekayu king e yo apupus lakaran ding ciudad ning Israel, angga king datang ya ing Anak ning tau.

Mat 10:24 Ing alagad e ne iguitan ing keang maestro, at ing ipus man e ne iguitan ing guinu na.

Mat 10:25 Dapat na king ing alagad mipante ya king maestro, at ing ipus king guinu na. Nung ing ibpa ning pibalebale inaus deng Beelzebub lalu na kasi ding katubale na!

Mat 10:26 E yo pin pitatakutan: uling alang makatakap a e mibulalag; at makasalikut a e mabalu.

Mat 10:27 Ing sasabian ku kekayu king madalumdum, sabian yu king masala; at ing damdaman yu king bulungbulung paniaus yu manibat king bubungan.

Mat 10:28 At e ko tatakut karing makamate king katawan, dapot ing kaladua e re apate: lalu ya pang pitakutan itang makapate king kaladua anti mu naman king katawan karin king infierno.

Mat 10:29 E ro pisasaling metung a kualta ding aduang denas? at metung man karela alang manabu king gabun nung e na balung Ibpa yu:

Mat 10:30 Dapot ing buak yu man king buntuk makabilang.

Mat 10:31 E ko pin tatakut: ikayu maiguit ko ulaga karing dakal a denas.

Mat 10:32 Inya pin ing balang metung a mipasiag kanaku king arapan ding tau, ipasiag kea naman arapan nang Ibpa kung atiu banua.

Mat 10:33 Dapot ninu man ing milingad kanaku king arapan da ding tau, ilingad kea naman arap nang Ibpa kung atiu banua.

Mat 10:34 E yu isipan ing mine kung magdalang kapayapan keti sulip, e ku mine magdalang kapayapan, nung e talibung.

Mat 10:35 Uling mine kung pialiwan kula ing metung a lalaki laban kang tata na, at ing anak a babai laban kang inda na, at ing manuyang a babai laban king katiwangan nang babai:

Mat 10:36 At ding kasalang ning tau ila naman ding king sarili nang bale.

Mat 10:37 Ing lugud kang ibpa na, o indu na miguit pa kanaku, e dapat kanaku; at ing lugud king anak nang lalaki o babai miguit pa kanaku, e dapat kanaku.

Mat 10:38 At ing e mamusan king cruz na ampon e tutuki king tauli ku, e dapat kanaku.

Mat 10:39 Ing manakit king bie na, ibating ne; at ing mibating king bie na king uli ku mu, akit naya.

Mat 10:40 Ing tanggap kekayu, akung tatanggapan na, at ing tatanggap kanaku, tatanggapan ne itang pepadala kanaku.

Mat 10:41 Ing tatanggap king metung a manula king laguiu na ning manula, ablas manula ing tanggapan na: at ing tatanggap king metung a taung banal, king laguiu ning taung banal, abias taung banal ing tanggapan na.

Mat 10:42 At ninuman ing minie king metung karing anak a mangalating deni metung a vasung danum a marimla, king laguiu ning metung a alagad, ing katutuan sasabian ku kekayu e pin mawala ablas.

Mat 11:1 At milyari king inyang i Jesus meari na nong dininan utus ding keang labingaduang alagad, meko ne karin bang turu at manaral karing karelang ciudad.

Mat 11:2 At inyang dimdam nang Juan king sukulan ing dapat nang Cristo, minutus ya karing keang alagad

Mat 11:3 At sinabi na kea, Ika pin itang datang, o manaya keng aliwa?

Mat 11:4 At i Jesus mekibat ya ngana karela, Ume kayu at salesayan yu kang Juan ing bague daramdaman yu ampon akakit:

Mat 11:5 Ding bulag manakit la, at ding pile lalakad la, ding leproso malilinis la, at ding maklak makaramdam la, at ding mete susubli lang mie, at ing evangelio mipanaral ya karing maluka.

Mat 11:6 At nuan la detang e manakit makatakid kanaku.

Mat 11:7 At inyang deti mako na la, migmula neng miniabi i Jesus karing malda tungkul kang Juan, Nanung inayan yung inalben king ilang? metung a dikut a matas a ugunan na ning angen?

Mat 11:8 Dapot nanung inayan yung inalben? ing metung a taung misusulud imalan a maulaga? Lon yu, ding misusulud imalan a maulaga atilu karing bale ra ding arian.

Mat 11:9 Dapot nanung ine yung inalben? metung a manula? kekayu sasabian ku king ya pin, at miguit ya pa king manula.

Mat 11:10 Iti ya itang a kea misulat, Oini, aku padala ke ing tubud ku king arapan mu, a isadia na ing dalanan mu.

Mat 11:11 Ing katutuan sasabian ku kekayu, a karing mibait karing babai, ala pang linto miguit kang Juan a Maminyag: makanian man itang lalung malati king kayarian banua, miguit ya kea.

Mat 11:12 At manibat king panaun nang Juan a Maminyag angga ngeni, ing kayarian banua magkasakit ya king pangapilit; at ding lalaki ning pamamilit kakuanan de king bigla.

Mat 11:13 Uling ding anggang manula ampon ing kautusan, menula na la angga kang Juan.

Mat 11:14 At nung buri yung tanggapan iti, oiti i Elias a datang.

Mat 11:15 Ing ating balugbug a makiramdam, makiramdam ya.

Mat 11:16 Dapot kaninu ke ibas ing daing iti? Katulad de ding anak a pakalukluk karing plaza, a mangulait karing abe ra,

Mat 11:17 At sasabian da, Penigtigan dakong basle, at e ko tinerak; delitanan dakong malumbe, at e ko migkalungkut.

Mat 11:18 Uling dinatang ya i Juan a e mamangan o miminum, at sasabian da, Atin yang demonio.

Mat 11:19 Dinatang ya ing Anak ning tau, a mamangan ya, at miminum, at sasabian da, Oini ing taung matako at mapaninum alak, metung yang kakaluguran da ding manyingil buis at makasalanan! At ing kabiasnan mipatunayan king keang dapat.

Mat 11:20 Kanita pin pigmulan nong sebianan ding ciudad a nung nu merapat ing dakal nang mala, uling e la sinisi.

Mat 11:21 Kalulu naka, Corazin! kalulu na ka, Bethsaida! uling nung king Tiro at Sidon karin milyari ing malang merapat kekayu, maluat nang bina ing sinisi lang linukluk king abu at suput.

Mat 11:22 Dapot sasabian ku kekayu king mika kapanupayan pa king Tiro at Sidon king aldo ning pamanukum, king kekayu.

Mat 11:23 At ika, Oh Capernaum, mitas ka angga banua? mabaldug ka king kalalaman ning Hades: uling nung king Sodoma karin milyari ing malang keka merapat, menatili ya sa angga king aldo ngeni.

Mat 11:24 Dapot sasabian ku kekayu king mika kapanupayan pa king labuad ning Sodoma king aldo ning pamanukum, king keka.

Mat 11:25 King panaun a ita i Jesus mekibat ya, at ngana, Pasalamat ku keka, oh Ibpa, Guinu ning banua at sulip, king selikut mu ing bague a iti karing biasa ampon maisip, at pepabalu mu karing bingut.

Mat 11:26 Makanian pin, Ibpa, uling yang minamayap na ning panlalawe mu.

Mat 11:27 Ding keganaganang bague binie no kanakung Ibpa ku: at ninuman alang makakilala king Anak, nung e ing Ibpa; at alang makakilala ninuman king Ibpa, nung e ing Anak, at itang buri nang pabaluan ning Anak.

Mat 11:28 Lumapit ko kanaku ikong anggang mapagal na at kababayatnan, at aku dinan dakong kapainawan.

Mat 11:29 Pusanan ye ing paud ku, at magaral ko kanaku; uling mamu ya at mapagpakumbaba ing pusu ku: at manakit kong kapainawan king kaladua yu.

Mat 11:30 Uling malambut ya ing kanakung paud, at mayan ya ing pupusanan ku.

Mat 12:1 King panaun a ita i Jesus lalakad ya misan a aldo ning sabbath libutad ding marangle ding binutil; at ding alagad na danupan la, migmula lang menakdut tinalague at pengan da.

Mat 12:2 Dapot panakit da kaniti ding Fariseos, sinabi ra kea, Lawan mu, ding kekang alagad darapat la king e karampatan daptan king aldo ning sabbath.

Mat 12:3 Dapot ya sinabi na karela, E yu abasa ing depatan nang David, inyang dumanup ya, mangga na ding abe na;

Mat 12:4 Nung makananung ya linub ya king bale ning Dios, at pengan no ding tinape ning ain, a e no dapat kanan, ni deta mang abe na, nune mu ding sacerdotes?

Mat 12:5 O e yu abasa king kautusan, a king aldo ning sabbath ding sacerdotes king pisamban mayayala lang galang king sabbath at e la mikakasala?

Mat 12:6 Dapot aku sasabian ku kekayu, king ing miguit pa king pisamban atiu keti.

Mat 12:7 Dapot nung abalu yu pin nung nanung kabaldugan na niti, Pagnasan ku ing pakalulu, at e ing ain, e yo sa peparusan ding alang kasalanan.

Mat 12:8 Uling ing Anak ning tau guinu ne ning sabbath.

Mat 12:9 At meko ya karin, at linub ya king sinagoga ra:

Mat 12:10 At oini, ing metung a taung malangi metung a gamat. At kitang da kea, ngara, Dapat ing manulu king aldo ning sabbath?

Mat 12:11 At ya sinabi na karela. Ninu kaya kekayu, a mika atin yang metung a tupa a iti nung manabu ya king kulkul king aldo ning sabbath, e ne abutan at isaka?

Mat 12:12 Nu pin anti ing iguit ning tau king tupa! Inya karampatan ing dapat mayap king aldo ning sabbath.

Mat 12:13 Sinabi na pin kanita king lalaki, Yatyat me ing gamat mu. At ya inatyat ne; at kinayap yang anti ing metung.

Mat 12:14 Dapot ding Fariseos pesilual la, at mipulung lang salang kea, nung makananu reng asintang.

Mat 12:15 At i Jesus akikilala na iti, meko ya karin: at tikian de ding dakal, at ya pepakayapan no ngan,

Mat 12:16 At penabilin na karela king e re sa pabalu:

Mat 12:17 Bang matupad ing mesabi king pamamilatan ning manulang Isaias, ngana,

Mat 12:18 Oini ing talasuyu ku a kakung pinili; Ing kaluguran ku a pitutulan na ning kaladua ku: Ibili ke ing Espiritu ku babo na, At pabalu na ing pamanukum karing Gentiles.

Mat 12:19 E makipatas, e kulait; At ninu man alang makaramdam king siwala na karing dalan.

Mat 12:20 E ne paklian ing medamusak a timbu, At e ne patdan ing mitsang babasuk, Angga king magtagumpe ing pamanukum:

Mat 12:21 At king laguiu na manalig la ding Gentiles.

Mat 12:22 Kanita pin pigdala reng metung a taung makayalipan king demonio, bulag ya at pipi: at pepakayapan ne, nanupata ing pipi miniabi ya at menakit.

Mat 12:23 At ing mabilug a kekaldan mengapamulala, at sasabian da: Ini wari ya ing Anak nang David?

Mat 12:24 Dapot ding Fariseos inyang damdaman da, ngara, Iti e papalual demonios, nung e mu king pamamilatan nang Beelzebub, a principe ding demonios.

Mat 12:25 At uling balu na ing isipan da, sinabi na karela, Ing balang kayarian a midadake salang king sarili na, misalbag ya; at ing balang ciudad o bale a midadake salang king sarili na e mitalakad:

Mat 12:26 At nung i Satanas ipalual ne i Satanas, ya midadake yang salang king sarili na; makananu ya ping talakad ing kayarian na?

Mat 12:27 At nung aku abe keng palual karing demonios i Beelzebub, ding kekong anak ninung abe rang papalual karela? uli na nita ilang maguing ukum yu.

Mat 12:28 Dapot nung aku abe ke ing Espiritu ning Dios papalual karing demonios, nung makanian ing kayarian na ning Dios miras na kekayu.

Mat 12:29 O makananu yang lungub ing ninuman king bale ning mayupaya, at samsaman no ding keang kasangkapan, nung e ne pa igapus ing mayupaya? at kanita samsaman na ing king pibalebale na.

Mat 12:30 Ing e kampi kanaku, salang ya kanaku; at ing kanaku e makitipun, makasalbag ya.

Mat 12:31 Inya sasabian ku kekayu, Ing keganaganang kasalanan ampon pamanyumpa mipatawad karing tau; dapot ing pamanyumpa a salang king Espiritu alang kapatawaran.

Mat 12:32 At ing maniabing salang king Anak ning tau, mipatawad kea; dapot ing maniabing salang king Espiritu Santo, e mipatawaran, king yatu mang iti, o king daratang man.

Mat 12:33 Pakayapan ye ing dutung, at ing bunga na mayap; o parawakan ye ing dutung, at ing bunga na marawak: uling king bunga makikilala ya ing dutung.

Mat 12:34 Ikayung daing ubingan, makananu kayung makapaniabi king bague mangayap: nung mangarawak kayu? uling king mangatmu king pusu manyabi ya ing asbuk.

Mat 12:35 Ing taung mayap, king mayap nang pibandian papalto yang bague mangayap: at ing taung marawak, king pibandian nang marawak papalto yang bague marawak.

Mat 12:36 At sasabian ku pin kekayu a ing balang amanung alang kabaldugan a igkas da ding tau, ibie rang sulit king aldo ning pamanukum:

Mat 12:37 Uling king amanu mu mipatutuan ka, at king amanu mu miparusan ka.

Mat 12:38 Kanita pin pekibatan de ding mapilan karing escribas at Fariseos, ngara, Maestro, pagnasan ming manakit metung a tanda keka.

Mat 12:39 Dapot ya mekibat ya at ngana karela, Ing daing marawak at mapagpaliwas manintun yang metung a tanda; at nanumang tanda e midinan, nung e mu ing tanda nang Jonas ing manula:

Mat 12:40 Uling nung makananu yang mituknang i Jonas king atian ning maragul a asan king lub ning atlung aldo ampon atlung bengi, makanian ya ing Anak ning tau manuknangan atlung aldo ampon atlung bengi king pusu na ning gabun.

Mat 12:41 Ding tau ning Ninive talakad la king aldo ning pamanukum kambe ne ing daing iti, at layun deng isumpa: uling ila sinisi la king aral nang Jonas; at oini ing maiguit kang Jonas atiu keti.

Mat 12:42 Ing reina king abagatan mibangun ya king aldo ning pamanukum kambe ne ing daing iti, at layun neng isumpa; uling ya ibat ya karing wakas na ning gabun bang pakiraman na ing kabiasnan nang Solomon; at oini ing miguit pa kang Solomon atiu keti.

Mat 12:43 Dapot ing espiritung marinat pangalual na king tau, maglabas ya karing karinan a alang danum, manintun yang kapainawan, at e manakit.

Mat 12:44 Kanita pin sabian na, Mibalik ku bale ku a nung nu ku meko; at pangaras na, akit neng alang laman, pelisan ampon masalese.

Mat 12:45 Kanita pin mako ya ampon kuma ya pang pitung demoniong marawak pa kea, at panlub da manuknangan no karin: at lalu ya pa namang mipakarawak ing tauling asal na ning taung ita king ketang minuna. Makanian mu naman ing malyari king daing marawak a iti.

Mat 12:46 Kabang makisabi ya karing malda, oini i indu na ampon ding keang karin la lual, manintun lang paralan a akasabi re.

Mat 12:47 At ing katau sinabi na kea, Oini king i indu mu ampon ding kekang kapatad atilu karin lual, manintun lang paralan a akasabi raka.

Mat 12:48 Dapot ya pekibatan ne itang sinabi kea kanita, ngana, Ninu i indu ku? at ninu ding kapatad ku?

Mat 12:49 At inatyat ne ing gamat na karing keang alagad, at sinabi na, Oreni di indu ku ampon kapatad!

Mat 12:50 Uling ing ninu mang dapat king kaburian nang Ibpa kung atiu karin banua, iti yang kapatad kung lalaki, at kapatad kung babai, ampon indu.

Mat 13:1 King aldo ita linual ya i Jesus king bale, at linukluk ya lele ning dayatmalat.

Mat 13:2 At detangan de ding dakal a katipunan a tau, nung inya linub ya king metung a bangka, at linukluk ya; at ding malda pesitalakad la king pangpang.

Mat 13:3 At migsalita yang dakal a bague king alimbawa karela, ngana, Oini, ing mananaman linual ya ban tanam;

Mat 13:4 At pamananam na, ing aliwang bini menabu king lele na ning dalan; at dinatang la ding ayup, at pengan da:

Mat 13:5 At ing aliwa menabu king kabatuan, a nung nu ditak mu ing gabun: at tinubung malagua, uling e malalam ing gabun:

Mat 13:6 At pangaslag ning aldo, mepanat; at anti ning alang yamut, melangi.

Mat 13:7 At ing aliwa menabu busal ding suksuk; at ding suksuk meragul la, at piputan da:

Mat 13:8 At ing aliwa menabu king gabun a mayap, at memunga, ing aliwa tiadinalan, ing aliwa tianamapulu, ing aliwa titlungpulu.

Mat 13:9 Nung ninu ing maki balugbug, makiramdam ya.

Mat 13:10 At linapit la ding keang alagad at sinabi ra kea, Baket pakisabian mo king alimbawa?

Mat 13:11 At ya mekibat ya, ngana karela, Kekayu dapat mipabalu ing misterios ning kayarian banua, dapot karela e miabie.

Mat 13:12 Uling ing atin mirinan ya, at mika atin yang labislabis: dapot ing ala, ita mang atiu kea milako pa.

Mat 13:13 Inya pakisabian ko king alimbawa; uling lalawe la e la manakit, at makiramdam la e la daramdam, ni e ra atatalastas.

Mat 13:14 At matutupad karela ing ula ning manulang i Isaias, a miniabing, King pamakiramdam yu, damdam kayu, at e yu naman atalastas; At king pamanlalawe yu akit yu, at e yu naman atalus.

Mat 13:15 Uling ing pusu ning balayan a iti mekapal ya, At maulit dang daramdaman karing balugbug da, Ampon piniak do ning mata ra; A magkang akilala ra karing mata ra, At damdaman karing balugbug da, At atalus karing pusu ra, Ampon mibalik lang miuman, At aku pakayapan kula.

Mat 13:16 Dapot nuan la ding kekong mata, uling manakit la; at ding kekong balugbug, uling makaramdam la.

Mat 13:17 Uling ing katutuan sasabian ku kekayu, king dakal la ding manula ampon banal a mignasang manakit king bague a ikit yu, at e ra ikit; ampon makaramdam king bague a dimdam yu, at e ra dimdam.

Mat 13:18 Pakiramdam ye pin ing alimbawa ning mananaman.

Mat 13:19 Panamdam na ning ninuman king amanu ning kayarian, at e na atalastas, kanita datang ya ing marawak at samsaman na ing mitanam king pusu na. Iti ya ing mitanam king lele na ning dalan.

Mat 13:20 At ing mitanam king kabatuan, ya itang makiramdam king amanu at matula nang agad tanggapan;

Mat 13:21 Dapot alang sariling yamut, nung e panapanaun mu pamanatili; at nung miras na pin ing kalingasngasan o ing kasakitan king uli na ning amanu, king oras a ita miragsa ya.

Mat 13:22 At ing mitanam busal ding suksuk, iti ya ing makiramdam king amanu; dapot ing kalingapan king yatu ampon ing piraya ning pibandian puputan da ing amanu, at e mamunga.

Mat 13:23 At ing mitanam king gabun a mayap, iti ya ing makiramdam king amanu, at makatalastas kaniti; ya naman ing mamunga, at magdala ya ing mapilan tiadinalan, ing mapilan tianamapulu, ing mapilan titlung pulu.

Mat 13:24 Pigsalita ne karela ing aliwang alimbawa, ngana, Ing kayarian banua kabas ne ning metung a taung tinaman bining mayap king keang marangle:

Mat 13:25 Dapot kabang matudtud la ding tau, dinatang ya ing kasalang na at tinanam ya namang balut libutad ning trigu, at saka ne meko.

Mat 13:26 Dapot inyang ing tanaman pin tinubu na ampon memunga, linto mu naman kanita ing balut.

Mat 13:27 At dinatang la ding ipus na ning ibpa ning pibalebale, at sinabi ra kea, Guinu, e ka tinanam mayap a bini king kekang marangle? nukarin pin ibat ing balut?

Mat 13:28 At ya sinabi na karela, Metung yang kasalang ing dinapat kaniti. At ding ipus sinabi ra kea, Buri mu pin ume kami at putputan me?

Mat 13:29 Dapot ya sinabi na, Ali yu; magkang king pamangua yu king balut, apakiputput yu naman ing trigu.

Mat 13:30 Paburen yu nong miagnan tumubu angga na king pamamupul: at king panaun ning pamamupul sabian ku karing papalut, Tipunan yu pang muna ing balut, ampon aptasan yu bayung dulukan; dapot ing trigu tipunan yu king kamalig ku.

Mat 13:31 Pigsalita naya naman karela ing aliwang alimbawa, ngana, Ing kayarian banua kabas ne ning metung a binutil a butul mustasa, a kinua na ning metung a tau, at tenam ne king marangle na:

Mat 13:32 A iti ing katutuan malati yang dili karing anggang bini; dapot pamanubu na, maragul yang dili karing gule, at dutung ne wari; nung inya daratang la ding ayup banua, at dagpa la karing sanga na.

Mat 13:33 Pigsalita naya naman karela ing aliwang alimbawa, Ing kayarian banua kabas ne ning levadura, a kinua na ning metung a babai, at binusal ne king atlung takal a arina, angga king sinlam ngan.

Mat 13:34 Ing anggang bague a iti sinabi nang Jesus karing malda king alimbawa; at nung e makayagum ing alimbawa nanuman ala yang sinabi karela:

Mat 13:35 Bang matupad ing mesabi king pamamilatan ning manula, ngana, Ibuklat ke king alimbawa ing asbuk ku; Ipasiag ko ding bague king makasalikut manibat king pangalalang ning yatu.

Mat 13:36 Kanita likuan no ding malda, linub ya king bale: at lepitan de ding keang alagad, ngara, Salesayan me kekami ing alimbawa king dikut a balut king marangle.

Mat 13:37 At ya mekibat ya at ngana, Ing tatanam king mayap a bini ya ing Anak ning tau;

Mat 13:38 At ing marangle ya ing yatu; at ing mayap a bini ila ding anak ning kayarian; at ing balut ila ding anak ning marawak;

Mat 13:39 At ing kasalang a tinanam kareta ya ing diablo: at ing pamamupul ya ing kawakasan na ning yatu; at ding papalut ila ding angeles.

Mat 13:40 Nung makananu ing pamanipun king balut at pamaniuluk king api, makanyan mu naman ing king kawakasan na ning yatu.

Mat 13:41 Padala no ning Anak ning tau ding keang angeles, at tipunan dong ikawani king keang kayarian detang anggang bague a makatakid, at detang darapat marawak,

Mat 13:42 At yugse ro king horno ning api: karin na ing tangis ampon ing pamitiguis ding ipan.

Mat 13:43 Kanita pin sunlag la ding banal anti mo ing aldo king kayarian nang Ibpa ra. Nung ninung makibalugbug, makiramdam ya.

Mat 13:44 Ing kayarian banua kabas ne ning pibandian a makasalikut king metung a marangle a akit ne ning metung a tau, at selikut ne; at king tula na, meko ya at pisali na ing anggang kayatinan na, at seli ne itang marangle.

Mat 13:45 Pasibayu, ing mayarian banua katulad ne ning metung a mangalakal a manintun mangasanting a perlas:

Mat 13:46 At inyang manakit yang metung mu kabud a perlas a maragul a alaga meko ya at pisali na ngan ing kayatinan na, at seli ne.

Mat 13:47 Pasibayu, ing kayarian banua katulad ne ning metung a lambat a miumang king dayatmalat, at menikua yang miayaliwang asan:

Mat 13:48 A iti, inyang mitmu ne, sinaka re lele; at linukluk la kanita, tinipun do ding mangayap karing lulanan, dapot inugse ro ding mangarawak.

Mat 13:49 Makanian mu naman king kawakasan na ning panaun: lual la ding angeles, at ikawani ro ding marawak karing mayap,

Mat 13:50 At yugse ro king horno ning api: karin na ing tangis, at pamitiguis ding ipan.

Mat 13:51 Atalastas yu ing anggang bague ite? Ila sinabi ra kea, Wa.

Mat 13:52 At ya sinabi na karela, Inya pin ing balang escribang metanggap a anting alagad king kayarian banua, katulad ne ning metung a ibpa ning pamibalebale, a kakua king pibandian na bague a bayu ampon bague a aran.

Mat 13:53 At milyari, inyang i Jesus ayari na no ding alimbawang deti, meko ne karin.

Mat 13:54 At paniatang na king labuad a tibuan na, tiru nala king sinagoga ra, nanupata mengapamulala la, at ngara, Nu na ibat niti ing kabiasnan a iti at iting kayupayan?

Mat 13:55 Aliwa iti ing anak ning aluague? ing indu na e mayayaus Maria? at ding kapatad nang lalaki i Santiago, at i Jose, at i Simon, ampon i Judas?

Mat 13:56 At ding kapatad nang babai, e tala ngan abe kete? Nukarin na pin ibat ning lalaking iti iting sablang bague?

Mat 13:57 At mitakid la kea dapot i Jesus sinabi na karela, Ing manula e ya mayalang puri, nung e king labuad nang tibuan, at king sariling bale na.

Mat 13:58 At e dinapat dakal a mala karin uli ning karelang e pamaniwala.

Mat 14:1 King panaun a ita i Herodes a tetrarca dimdam na ing kabantugan dikil kang Jesus,

Mat 14:2 At sinabi na karing keang ipus; iti ya i Juan a Maminyag; tinalakad yang ibat karing mete; at inya iting maki kayupayan a dapat mararapat king uli na.

Mat 14:3 Uling i Herodes peparakap ne i Juan, at pepatanikala ne, ampon pepasukul, uli nang Herodias a asawa nang Felipe a keang kapatad.

Mat 14:4 Uling i Juan sinabi na kea, E karampatan ing pakiabayan me.

Mat 14:5 At inyang buri ne sang patayan, mitakutan ya karing malda, uling paniwalan deng anting metung a manula.

Mat 14:6 Dapot inyang miras ing kayaldawan nang Herodes king pangabait na, ing anak nang babaing Herodias tinerak ya king pirurungutan, at mekapatula kang Herodes.

Mat 14:7 King uli na niti pengaku nang leukan sumpa king ibie na kea ing nanu mang aduan na.

Mat 14:8 At ya, king abluk nang indu na, sinabi na, Ibie me kanaku king metung a pinggan ing buntuk nang Juan a Maminyag.

Mat 14:9 At ing ari melungkut ya; dapot king uli na ning sumpa na, at ding kasulu na king pamangan, pepabie ne kea;

Mat 14:10 At minutus ya at pepapungut ne buntuk i Juan king sukulan.

Mat 14:11 At dela re ing buntuk na king metung a pinggan, at binie re king dalaga: at ya dela ne kang indu na.

Mat 14:12 At ding alagad na dinatang la at kinua re ing keang bangke, at kitkut de; at meko no kanita, at pemalita ra kang Jesus.

Mat 14:13 Ngeni inyang damdaman nang Jesus iti, meko ya karin, sinake ya king metung a bangka, at mine ya king metung a karinan a ilang ampon makakalilua: at panamdam da kaniti ding malda, tinuki la keang lalakad manibat karing ciudad.

Mat 14:14 At linague ya, at ikit no ding kekaldan, at melunus ya karela, at pepakayapan no ding karelang salunan.

Mat 14:15 At inyang miras na ing gatpanapun, ding alagad linapit la kea, ngarang sinabi, Ilang ing karinan, at milabas na ing oras; palakuan mu no ding kekaldan bang ume la karing nayun at saling pamangan da.

Mat 14:16 Dapot i Jesus sinabi na karela, E no kailangan mako; dinan yong karelang apangan.

Mat 14:17 At ila sinabi ra kea, Ala ke keni nung e mu limang tinape, ampon aduang asan.

Mat 14:18 At sinabi na, Idala yo keni kaku.

Mat 14:19 At inutus na karing kekaldan king magjilig la babo ning dikut; at kinua no ding limang tinape at ding aduang asan, at tinalanga ya banua binendiciunan nala at pirakerake no ding tinape, at binie no karing alagad, at ding alagad, karing kekaldan.

Mat 14:20 At mengan la ngan, at kinabsi: at kingua ra ing pisipising mitagan, labingaduang salikap a mitmu.

Mat 14:21 At ding mengan ating limang libu katau, e la pa kabilang ding babai ampon anak.

Mat 14:22 At ita murin pepaluban nong Jesus king bangka ding keang alagad, at pepaunan nong dinalakit kea kangatba, kabang ya palakuan no ding kekaldan.

Mat 14:23 At inyang apalakuan na no ding kekaldan minukiat yang dili na king bunduk, manalangin ya: at inyang miras na ing bengi, ya mung dili na karin.

Mat 14:24 Dapot ing bangka makalibutad ne king dayatmalat, sasabulan ne ning alun; uling makasalangsang ya king angin.

Mat 14:25 At king kapat nang vigilia ning bengi inayan nala, lalakad ya babo dayatmalat.

Mat 14:26 At ding alagad, panakit da keang lalakad ya babo dayatmalat, mengasdan la, ngarang sasabi, Multu ya; at guinulisak la king takut.

Mat 14:27 Dapot i Jesus agad nong pekisabian, ngana karela, Pasayan yu ing lub yu; aku; e ko tatakut.

Mat 14:28 At i Pedro mekibat ya, ngana, Guinu, nung ika pin, palapitan mu ku keka babo ning danum.

Mat 14:29 At ya sinabi na, Ume ka keni. At i Pedro kinuldas ya king bangka, at linakad ya babo ning danum at inayan ne i Jesus.

Mat 14:30 Dapot inyang akit na ing angin, mitakutan ya; at inyang lalbug ne, kinulait ya, ngana, Guinu, iligtas muku?

Mat 14:31 At agadagad i Jesus guewang ne ing gamat na, at telan ne, at sinabi na kea, Taung ditak a kasalpanatayanan, baket mikakunu ka?

Mat 14:32 At panlub da ding bangka, tinuknang ing angin.

Mat 14:33 At ding atiu king bangka, simban de, ngara, Tutu pin ika ing Anak ning Dios.

Mat 14:34 At inyang midalakit nala, dinatang la king labuad a sakup ning Genesaret.

Mat 14:35 At inyang akilala re ding tau king labuad a ita, mitubud la ketang anggang labuad a pakapatulug, ampon dela ro kea ding anggang salunan;

Mat 14:36 At pakisabi rang mayap kea king paintulutan no sang tagkil muman king lele ning imalan na: at deta ngang mekatagkil kinayap la.

Mat 15:1 Kanita pin inayan de i Jesus ding escribas ampon Fariseos a menibatan Jerusalem, ngara,

Mat 15:2 Baket lalakton da ding alagad mu ing taidtaid dang sabi ding makatua? uling e ro pin wasan ding karelang gamat neng mamangan lang tinape.

Mat 15:3 At ya mekibat ya, at ngana karela, Ikayu man baket lalakton yu ing utus ning Dios king uli ning taidtaid yung sabi?

Mat 15:4 Uling ing Dios ngana, Igalang mo di ibpa mu, at indu mu: at ing malmura kang ibpa na, o kang indu na, mate yang alang sala.

Mat 15:5 Dapot ikayu sasabian yu, Ing sumabi kang ibpa na, o kang indu na, Miain king Dios itang malyaring pakinabang mu kaku;

Mat 15:6 E na ne igalang i ibpa na. Ampon i indu na. Makanian yeng guewang alang kabaldugan ing amanu ning Dios uli na ning taidtaid yung sabi.

Mat 15:7 Magbanalbanalan, mayap namu inulan na kekayung Isaias, ngana,

Mat 15:8 Ing balayan a iti pupurian naku karing labi na: Dapot ing pusu ra marayu ya kanaku.

Mat 15:9 Dapot alang kabaldugan ing pamanyamba na kanaku, King pamanuru rang anting ilang doctrina ra ding tuntunan ding tau.

Mat 15:10 At inaus no kea ding kekaldan at sinabi na karela, Pakiramdaman yu, at talastasan:

Mat 15:11 Aliwa ing lulub king asbuk yang makamusing king tau, nung e itang lulual king asbuk, iti yang makamusing king tau.

Mat 15:12 Kanita linapit la kea ding alagad na, ngara kea, Balu mu king ding Fariseos mimua la inyang damdaman da ing amanung ite?

Mat 15:13 Dapot mekibat ya, at ngana, Ing balang tanaman a e na tenam Ibpa kung atiu banua, mabagut.

Mat 15:14 Paburen yula: ila bulag lang talataid. At nung ing bulag tairan ne ing bulag, mikametung lang manabu king kulkul.

Mat 15:15 At mekibat ya i Pedro ngana kea, Salesayan me kekami ing alimbawang iti.

Mat 15:16 At sinabi na, Ikayu man ala ko pang kaisipan?

Mat 15:17 E yu balu king ing anggang lulub king asbuk tataglus king atian, at palual king lijim a karinan?

Mat 15:18 Dapot ing lulual king asbuk, king pusu manibatan; at iti yang makarawak king tau.

Mat 15:19 Uling king pusu manibatan ing marawak a kaisipan, pamakamate, pamakipaliwas, pamakipangalugud, pamanako, pamagsaksi king e tutu, pamakitua:

Mat 15:20 Deti ila ding bague makamusing king tau; dapot ing pamamangan a e manuas gamat e makamusing king tau.

Mat 15:21 At i Jesus meko ya karin, mine ya karing sakup ding Tiro at Sidon.

Mat 15:22 At oini ing metung a babaing tau Cana, linual yang ibat keta muring sakup a ita, at kinulait ya, ngana, O Guinu, a anak nang David; ing anak kung babai pasakitan neng bina ning demonio.

Mat 15:23 Dapot ya e ne pekibatan metung mang amanu. At lepitan de ding keang alagad, pakisabi rang mayap kea, ngara, Palakuan me; uling kukulait ya gugulutan tamu.

Mat 15:24 Dapot ya mekibat ya, at ngana, E ku mipadala nung e mu karing tupang mewala king bale nang Israel.

Mat 15:25 Dapot linapit ya at simban ne, ngana, Guinu, saupan muku.

Mat 15:26 At ya mekibat ya at sinabi na, E matulid ing kuanan ya ing tinape karing anak, at yugse ya karing asu.

Mat 15:27 Dapot ya sinabi na, Makanian pin Guinu: dapot ding asu man mamangan la king mugmug a manganabu king dulang ning guinu ra.

Mat 15:28 Kanita i Jesus mekibat ya, ngana kea, Oh babai, ing kasalpantayanan mu maragul: mapalyari keka nung makananu ing kaburian mu. At ing anak na kinayap ya manibat na king oras a ita.

Mat 15:29 At i Jesus meko ya karin, at mine ya king lele na ning dayatmalat Galilea; at minukiat ya king bunduk, at linukluk ya karin.

Mat 15:30 At detangan de ding maragul a kekaldan, a magdalang pile, bulag, pipi, singkul, ampon aliwa pang dakal a salunan, at binili ro karing bitis na: at ya pepakayapan nala:

Mat 15:31 Nanupata ding kekaldan mipapamulala la, inyang akit dong maniabi ding pipi, kinayap ding singkul, at ding pile lalakad, at ding bulag manakit: at pepaligayan de ing Dios ning Israel.

Mat 15:32 At i Jesus maus no kanita ding keang alagad, at sinabi na, Malulunus ku kareting kekaldan a atlu nong aldo abe ku ngeni, at nanuman ala lang apangan: at e ko buring palakuan e mengan, a magkang mangaliping la king dalan.

Mat 15:33 At ding alagad na sinabi ra kea, Nu ke kuma keti king ilang dakal a tinape a ipakan mi karing dakal a tau?

Mat 15:34 At i Jesus sinabi na karela, Pilan la ding tinape yu? Ila sinabi ra, Pitu la, ampon mapilan a asan a mangalati.

Mat 15:35 At inutus na karing kekaldan king magjilig la king gabun;

Mat 15:36 At kinua no ding pitung tinape ampon ding asan; at pepasalamat ya, at pinisi nala, at binie karing keang alagad, at ding alagad karing kekaldan.

Mat 15:37 At mengan la ngan, at kinabsi: at tinipun da ing pisipising tagan, pitung salikap a mitmu.

Mat 15:38 At ding mengan apat lang libung lalaki, e la pa makabilang ding babai ampon anak.

Mat 15:39 At pepalakuan no ding kekaldan at linub ya king bangka, at mine ya karing angganan ning Magadan.

Mat 16:1 At dinatang la ding Fariseos at Saduceos, at susubukan de a inawad da kea, king pakitanan no sang metung a tanda ning banua.

Mat 16:2 Dapot ya mekibat ya, ngana karela, Panga gatpanapun na sabian yu, Lumino ing panaun: uling ing banua malutu ya.

Mat 16:3 At panga abak na, Ngeni mika baguing masikan; uling ing banua malutu ya at bababa. Biasa ko ping kilala tungkul king aske ning banua; dapot e yu arapat tungkul king tanda ding panaun.

Mat 16:4 Ing metung a daing marawak at mapagpaliwas mapilit nang panintunan ing metung a tanda; at e mirinan nanu mang tanda, nung e ing tanda nang Jonas. At likuan nala, at meko ya.

Mat 16:5 At ding alagad dinalakit la kangatba at akalinguan dang migdalang tinape.

Mat 16:6 At i Jesus sinabi na karela, Mingat kayu at manginlag ko king levadura ra ding Fariseos at Saduceos.

Mat 16:7 At ila miisipisip lang sarili, ngara, E ta migdalang tinape.

Mat 16:8 At akikilala nang Jesus, sinabi na, Nanu ta ing piisipisipan yung sarili, taung ditak mu kasalpantayanan, uling ala kong tinape?

Mat 16:9 E yu pa atalastas, at e yu no agaganaka ding limang tinape karing limang libu, at pilan lang salikap ding biwat yu?

Mat 16:10 O ding pitung tinape karing apat a libu, at pilan lang salikap ding biwat yo?

Mat 16:11 Baket e yu atalastas king e ku miniabi kekayu tungkul king tinape? Dapot manginlag ko king levadura ra ding Fariseos at Saduceos.

Mat 16:12 Kanita atalastas da king e na sinabi karela ing mingat la king levadura ning tinape, nung e king tuturu ra ding Fariseos at Saduceos.

Mat 16:13 Ngeni inyang datang ya i Jesus king dake ning Cesarea a sakup ning Filipo, kitang na karing keang alagad, ngana, Ninu ing sasabian da ding tau a Anak ning tau?

Mat 16:14 At ila sinabi ra, Ding mapilan ngara I Juan a Maminyag; ding mapilan, i Elias at ding mapilan i Jeremias, o metung karing manula.

Mat 16:15 Ya sinabi na karela, Dapot ikayu ninung sasabian yu tungkul kanaku?

Mat 16:16 At i Simon Pedro mekibat ya, ngana, Ika ing Cristo ing Anak ning Dios a mabie.

Mat 16:17 At i Jesus mekibat ya, at ngana kea, Nuan ka, Simon, a anak nang Jonas: uling e na pepawaga keka ning laman at daya, nung e i Ibpa kung atiu karin banua.

Mat 16:18 Aku man sasabian ku keka, king ika i Pedro, at babo na niting Batu italakad ke ing Iglesia ku; at ding pasbul ning infierno e re daigan.

Mat 16:19 Ibie ko keka ding sulut ning kayarian banua; at nanumang talian mu keti sulip, matali ya naman banua; at ing nanumang kalagan mu keti sulip, makalag ya naman banua.

Mat 16:20 Kanita inutus na karing keang alagad king e ra sasabian kaninuman a ya ing Cristo.

Mat 16:21 Manibat na kanita pigmulan nang pepakilalang Jesus karing keang alagad king kailangan kea ing ume ya Jerusalem, at magdusa yang dakal a bague karing makatua, at karing pun ding sacerdotes, ampon escribas, layun yang mate at subling mie king katlung aldo.

Mat 16:22 At kanita kewani neng Pedro, pigmulan neng pengamanuan, ngana, Marayu keka, Guinu: king makananu mang bague e malyari keka iti.

Mat 16:23 Dapot ya melikid ya, at sinabi na kang Pedro, Ume ka king gugulutan ku, satanas: makatakid ka kanaku: uling e mo isipan ding bague king Dios, nung e ding bague karing tau.

Mat 16:24 Kanita sinabi nang Jesus karing keang alagad, Nung ing ninuman bisang tuki gugulutan ku, isakuil na ing keang sarili, at dalan ne ing cruz na, at tuki ya kanaku.

Mat 16:25 Uling ninu mang miligtas king bie na, mawala ya kea: at ing ninu mang kawalan king bie na king uli ku mu akit ne.

Mat 16:26 Uling nanung pakinabangnan na ning tau nung akamtan na man ing mabilug a yatu, at milibe ne man ing bie na? o nanung aibie ning tau ban ilibe king bie na?

Mat 16:27 Uling ing Anak ning tau datang ya king ligaya nang Ibpa na kayabe no ding keang angeles; at kanita ibie na king balang metung a tau ing karampatan king depatan na.

Mat 16:28 Ing katutuan sasabian ku kekayu, Ating mapilan karing pakatalakad keti, a e ra atakman ing kamatayan, anggang e re akit ing Anak ning tau a datang king kayarian na.

Mat 17:1 At kaibat ning anam a aldo tiki neng Jesus i Pedro, at i Santiago, ampon i Juan a kapatad na, at inukiat no king metung a bunduk a matas at makakawani:

Mat 17:2 At mibayu ya aske king arapan da; at sinlag ya ing lupa na anti mo ing aldo, at ing imalan na meputing anti mo ing sala.

Mat 17:3 At oini, pepakit la karela di Moises ampon i Elias, makisabi la kea.

Mat 17:4 At i Pedro mekibat ya, at ngana kang Jesus, Guinu, mayap ing keti ta na nung buri mu, gawa ku keting atlung tabernaculos; metung keka, metung kang Moises, at metung kang Elias.

Mat 17:5 Kabang maniabi ya mu, oini, ing metung a masalang biga selilungan nala: at oini, ing metung a siwala linual ya king biga at sasabian na, Iti yang Anak kung kaluguran, a kea atiu ing tula ku; pakiramdaman ya.

Mat 17:6 At inyang damdaman da iti ding alagad, mengasubsub la, at bina lang mitakutan.

Mat 17:7 At i Jesus lepitan no kanita, tigkul nala, at sinabi na, Talakad kayu, at e ko tatakut.

Mat 17:8 At inyang itas do ding mata ra, ala nong ikit nung e bukud i Jesus namu.

Mat 17:9 At kabang kukuldas la king bunduk, inutus nang Jesus karela, ngana: E yu sasabian kenuman ing malikmatang ikit yu, angga king ing Anak ning tau mibangun ya a ibat karing mete.

Mat 17:10 At ding alagad na kitang da kea, ngara, Baket pin sasabian da ding escribas king dapat yang datang muna i Elias?

Mat 17:11 At mekibat ya, sinabi na, I Elias king katutuan datang ya, at yang misuking lumarin king keganaganang bague:

Mat 17:12 Dapot aku sasabian ku kekayu king dinatang ne i Elias, at e re akilala, bagkus da pang depatan kea ing anggang buri ra. Makanian mu naman ing Anak ning tau karela yang pasakitan.

Mat 17:13 Kanita pin ding alagad atalastas da king i Juan a Maminyag yang sasabian na karela.

Mat 17:14 At inyang disan do ding kekaldan linapit ya kea ing metung a tau, sisiklauran ne, at nganang sasabi,

Mat 17:15 Guinu, malunus ka king anak kung lalaki: uling sosoning ya, at tutu yang magkakasakit; uling parati yang mananabu king api, ampon parati yang mananabu king danum.

Mat 17:16 At dela ke karing alagad mu, at e re apakayapan.

Mat 17:17 At i Jesus mekibat ya, ngana, Oh daing e talasalpantaya at marawak, angga kapilan akayabe yu ku? angga ra ko pa kapilan pibatan? idala ye keni kanaku.

Mat 17:18 At pengamanuan neng Jesus at ing demonio linual ya kea: at ing anak kinayap ya manibat king oras a ita.

Mat 17:19 Kanita pin linapit lang magdilidili kang Jesus ding alagad, at sinabi ra, Baket a miya apalual?

Mat 17:20 At ya sinabi na karela, Uli ning ditak yung kasalpantayanan: uling king katutuan pin sasabian ku kekayu, a nung atin kayung kasalpantayanan anti muman ing butul ning mustasa, asabi yu naman king bunduk a iti, Lumipat ka karin; at lumipat ya; at alang e yu apalyari.

Mat 17:21 Dapot ing anti kaniti e milual nung e mu king panalangin at king pagamayunu.

Mat 17:22 At kabang atilu Galilea, sinabi na karelang Jesus, Ing Anak ning tau manabu ya karing gamat ding tau;

Mat 17:23 At patayan de; at king katlung aldo subli yang mie. At ila bina lang melungkut.

Mat 17:24 At pangaras da Capernaum, linapit la kang Pedro ding manyingil king kapitnang siclo, at sinabi ra, Ing kekong Maestro e ne babayaran ing kapitnang siclo?

Mat 17:25 Ya sinabi na, Wa. At inyang linub no bale i Jesus migpauna yang sinabi kea, ngana, Nanung balak mu, Simon? Ding ari keti sulip, kaninu la tatanggap buis? ibat karing anak da, o ibat karing aliwa?

Mat 17:26 At inyang sinabi na, Ibat karing aliwa, i Jesus sinabi na kea, Uli nita pin ding anak makatimawa la.

Mat 17:27 Dapot a magkang mitakid la kekatamu, ume ka king dayatmalat, at mibaldug kang metung a taga, at kuanan me ing munang asan a mayakua; at kabud ibuklat me asbuk akit me ing metung a siclo: kuanan me ita, at ibie me karela para kekata yang adua.

Mat 18:1 King oras a ita ding alagad linapit la kang Jesus, sinabi ra, Ninu pin ing maragul dili king kayarian banua?

Mat 18:2 At ya inaus ne kanita ing metung a anak a malati, at telakad ne libutad da,

Mat 18:3 At sinabi na, King katutuan sasabian ku kekayu, nung e ko subli at maguing anting mangalating anak, king makananu mang bague e ko lungub king kayarian banua.

Mat 18:4 At ninu man pin ing magpakumbabang anti ing anak a ini yang maragul dili king kayarian banua.

Mat 18:5 At ing tanggap king anak a anti kanini king laguiu ku akung tatanggapan na.

Mat 18:6 Dapot ing ninu mang mibiling sangkan king ikatakid ning ninu man karing mangalating deti a sasalpantaya kaku, mayap pa kea ing sabitanan ya king batal metung a batung guilingan, at mipalbug ya king kalalaman na ning dayatmalat.

Mat 18:7 Kalulu ne ing yatu, uli ra mu ding katatakiran! uling kailangan lang datang ding katatakiran; dapot Kalulu ne itang taung panibatan na ning katatakiran!

Mat 18:8 At nung ing gamat mu o bitis makapauli ya king ikatakid mu, pututan me at ilako keka; mayap keka ing lungub kang putul o pile king bie, king ketang atin kang aduang gamat o aduang bitis, miugse ka king aping alang angga.

Mat 18:9 At nung ing mata mu makapauli ya king ikatakid mu, dukitan me, at ilako keka; mayap keka ing lungub kang metung mu mata king bie, king ketang atin kang aduang mata, miugse ka king api king infierno.

Mat 18:10 Lawan yu king e ye umisan ing metung karing mangalating deti; uling sasabian ku kekayu, king ding karelang angeles karin banua akakit deng parati ing lupa ing Ibpa kung atiu karin banua.

Mat 18:11 makalako ya. Balang metung a talento timbang yang aduang libung pesus. Dinaan a denario, alagang atlung pulu't atlung pesus.

Mat 18:12 Nanung balak yu? nung ing metung a tau maki dinalan yang tupa, at malili ya ing metung karela, e no lakuan ding siamapulu't siam at ume ya king bunduk at panintunan ne ing melile?

Mat 18:13 At nung mikatagun ing akit ne, ing katutuan sasabian ku kekayu, tumula ya kea maiguit karetang siamapulu't siam a e melili.

Mat 18:14 Makanian mu naman, e na kaburian ning Ibpa yung atiu banua king ing metung karing anak a malating deni mipajamak ya.

Mat 18:15 At nung ing kapatad mu mikasala ya keka, ume ka, pawaga mu kea ing kasalanan na ngening ikayung adua; nung pekiramdaman naka, ikua me mo ing kapatad mu.

Mat 18:16 Dapot nung e naka pakiramdaman, maus ka pang katau o adua pa, bang king asbuk ding adua o atlung saksi mipatibayan ing balang amanu.

Mat 18:17 At nung ila man e no pakiramdaman, sabian me king iglesia: at nung e ne pa pakiramdaman ing iglesia, yapus mu neng anting metung a Gentil at metung a manyingil buis.

Mat 18:18 Ing katutuan sasabian ku kekayu, detang bague talian yu keti sulip, matali la banua; at detang bague kalagan yu keti sulip, makalag la banua.

Mat 18:19 Sasabian kung pasibayu kekayu, a nung ding adua kekayu pikasunduan da keti sulip tungkul king nanumang bague a aduan da, daptan na karelang Ibpa kung atiu karin banua.

Mat 18:20 Uling nu la man makatipun ding adua o atlu katau king laguiu ku, karin atiu ku libutad da.

Mat 18:21 Kanita linapit ya i Pedro at sinabi na kea, Guinu makapipilan ya mikasala ing kapatad ku salang kanaku, a patawaran ke? makapipito?

Mat 18:22 I Jesus sinabi na kea, E ku sasabian keka makapipitu; nung e, pitungpulung tiapitu.

Mat 18:23 Uli na niti ing kayarian banua katulad ne ning metung a ari a mekipagmasalese karing ipus na.

Mat 18:24 At inyang migmula na nong selese, midurup ya kea ing metung a maki utang apulung libung talento.

Mat 18:25 Dapot anti ning ala yang apamayad, ing guinu na papapisali ne, at ing asawa na ampon ding anak, at ing keganaganang kayatinan na, at daptan na ing kapamayaran.

Mat 18:26 Ing ipus uli nita siniklaud ya at sinamba ya kea, ngana, Guinu, pibatan muku, at bayaran ku ngan keka.

Mat 18:27 At ing guinu nitang ipus king pangalunus na kea, pepaburian na ne, at pepatawad na kea ing utang na.

Mat 18:28 Dapot ing ipus a ita meko ya, at ikit ne ing metung karing abe nang ipus a maki utang keang dinalan a denario: at telanan ne kanita, at sekal ne batal, sasabian na, Mamayad ka king utang mu.

Mat 18:29 Kanita ing abe nang ipus siniklaud ya arap na, pakisabi nang mayap kea, ngana, Pibatan muku, at bayaranan daka.

Mat 18:30 At ya e mebisa: nung e meko ya at pepasaksak ne king sukulan, anggang e mekapamayad.

Mat 18:31 Inyang akit da pin ding abe rang ipus ing milyari, bina lang melungkut at meko la kanita, sinabi ra king guinu ra ing anggang mepalyari.

Mat 18:32 Kanita, pepayaus ne pin ning guinu na, at sinabi na kea, Ipus a marawak, pepatawad ku keka ing anggang utang mu, uling mekisabi kang mayap kanaku:

Mat 18:33 E ka pin dapat malumus king abe mung ipus, anti mo ing pangalunus ku keka?

Mat 18:34 At ing guinu na, bina yang mimua, binie ne karing pasakit, anggang e na abayaran ing utang na.

Mat 18:35 Makanian mu naman ing daptan na kekayung Ibpa kung atiu banua, nung king pusu yu e ne patawaran ning metung at metung ing kapatad na.

Mat 19:1 At milyari a inyang i Jesus apupus no deting amanu, meko ya Galilea, at mine ya king sakup ning Judea, kangatba ning Jordan.

Mat 19:2 At tikian de ding maragul a kekaldan; at pepakayapan no karin.

Mat 19:3 At linapit la kea ding Fariseos, susubukan de, at ngara, Dapat king lalaki ing kawanian ne ing asawa na king balang kasangkanan?

Mat 19:4 At mekibat ya, at ngana, E yu pa pin abasa king ing mengawa karela manibat king mula, guewa nong lalaki at babae,

Mat 19:5 At sinabi na, King uli na niting sangkan lakuan no ning lalaki di ibpa na at indu, at makiabe ya king asawa na; at ding adua maguing metung lang laman?

Mat 19:6 Inya e no adua, nung e metung na la mu king laman. Uli na niti, ding piabe nang pisanmetung ning Dios e no dapat pikawanian ning tau.

Mat 19:7 Ila sasabian da kea, Baket pin inutus nang Moises ing munie pisulatan king pamikawani, at kawanian ya?

Mat 19:8 Sinabi na karela, King kasiasan na ning kekong pusu pepaintulutan nakong Moises kawani karing asawa yu: dapot king kamumulan e makanian.

Mat 19:9 At aku sasabian ku kekayu, A ing kawani king asawa na, nung e mu king pamakipangalugud, at makiasawa ya king aliwa, dinapat ya king pamipaliwas: at ing makiasawa king kewanian, darapat ya king pamipaliwas.

Mat 19:10 Ding alagad sinabi ra kea, Nung ing dikil king lalaki kalupa na ning king asawa na, e dapat ing pamakiasawa.

Mat 19:11 Dapot ya sinabi na karela, E ding sablang lalaki atuparan da ing sabing iti, nung e mu detang mipagkaluban.

Mat 19:12 Uling ating kapun a mibait nang makanian manibat king atian nang indu na: at ating kapun a kepunan da ding tau: at ating kapun a ila murin ing kinapun king sarili ra uli na ning kayarian banua. Ing malyaring makatanggap kaniti, tanggapan na.

Mat 19:13 Kanita pin dela ro kea ding mangalating anak, bang itumpak no karela ding gamat na, at manalangin ya: at ding alagad sebianan dala.

Mat 19:14 Dapot i Jesus sinabi na, Paburen yong lumapit kanaku ding mangalating anak, at e yo babawalan, uling kareti ya ing kayarian banua.

Mat 19:15 At timpak no ding gamat na karela, at meko ya karin.

Mat 19:16 At oini, linapit ya kea ing metung, at ngana, Maestro, nanung mayap kung daptan bang akamtan ku ing bie alang angga?

Mat 19:17 At ya sinabi na kea, Baket kukutnan mu ku tungkul king bague a mayap? Atin mung metung a mayap: dapot nung bisa kang lungub king bie, tuparan mo ding utus.

Mat 19:18 Sinabi na kea, Isanu? At i Jesus sinabi na, E ka makamate, e ka darapat paliwas, E ka manako, E ka sasaksing kalaraman,

Mat 19:19 Igalang me i ibpa mu at indu mu; at, Luguran me ing lupa mung tau anti mo keka.

Mat 19:20 Sinabi na kea ning kayanakan, Iti ngan tiparan ku: nanu pang kulang kanaku?

Mat 19:21 Sinabi na keang Jesus, Nung buri mung miganap ka, ume ka, pisali mu ing anggang kayatinan mu, at ibie mu karing kalulu, at mika bandi ka banua: at mekeni, tuki ka kanaku.

Mat 19:22 Dapot panamdam ning kayanakan king sabing iti, meko yang malungkut; uling maragul ya kayatiman.

Mat 19:23 At i Jesus sinabi na karing keang alagad, Ing katutuan sasabian ku kekayu, Ing mabandi masulit yang lungub king kayarian banua.

Mat 19:24 At yulit kung sabian kekayu, mayan pa king camello ing dumalan ya king busbus ning karayum, king lungub ya ing mabandi king kayarian ning Dios.

Mat 19:25 At inyang damdaman da iti ding alagad mengasdan lang bina, ngarang sinabi, Ninu pin ing miligtas?

Mat 19:26 At i Jesus, linawe no kanita, ngana karela, Karing tau iti e mapalyari; dapot king Dios ing sablang bague mapalyari ngan.

Mat 19:27 Kanita i Pedro mekibat ya, ngana kea, Oini, ikami likuan mi ngan, at tikian daka; nanu ping kamtan mi?

Mat 19:28 At i Jesus sinabi na karela, Ing katutuan sasabian ku kekayu, king ikayung tinuki kanaku, kaniang kaduang bie, ing Anak na ning tau lukluk ya king luklukan, bang matul karing labi nang aduang tribu ning Israel.

Mat 19:29 At ing balang milakuan bale, o kapatad a lalaki, o kapatad a babai, o tata, o indu, o anak, o gabun, king uli na ning laguiu ku, tanggap yang makatadinalan a pakinabang at manan na ing bie alang angga.

Mat 19:30 Dapot dakal la ding mumunang mitauli; at tauling mipauna.

Mat 20:1 Uling ing kayarian banua, katulad ne ning metung a taung, ibpa king pebalebale, a panga abak meko yang menintun upajan king keang uvasan.

Mat 20:2 At kaibat nang mekikayari karing upajan manunggal denario ing aldo, pepadala no king uvasan.

Mat 20:3 At linual ya inyang malapit na ing oras a katlu at ikit no ding aliwa king plaza ala lang daraptan;

Mat 20:4 At sinabi na karela, ume kayu naman king uvasan, at ing magkanu mang karampatan ibie ku kekayu. At ila mine la.

Mat 20:5 Linual yang pepasibayu itang bayu kanam a oras at anti naman king kasiam, at makanian mu rin ing depatan na.

Mat 20:6 At bayu king kalabing metung a oras linual ya naman, at ikit no ding aliwang pakatalakad; at sinabi na karela, Baket patingapun keti ko pakatalakad a ala kong daraptan?

Mat 20:7 Sinabi ra kea, Uling alang sinungkung manupa kekami. Sinabi na karela, Ume kayu naman king uvasan.

Mat 20:8 At inyang miras na ing bengi, ing guinu ning uvasan sinabi na king katiwala na, Ausan mo ding upajan, at bayaranan mula king talagang kaupajan, panibatan mo karing tauli, at pupusan mo karing minuna.

Mat 20:9 At inyang datang la pin ding mine malapit king oras a kalabing metung, tinanggap la balang katau metung a denario.

Mat 20:10 At inyang dinatang la ding minuna, isipan da tanggap lang maiguit; at ila man tinanggap la balang katau metung a denario.

Mat 20:11 At inyang tanggapan da na la, bubulungan de ing ibpa ning pibalebale,

Mat 20:12 Ngara, deting tauli guinalo lamung metung a oras, at pinte mo kekaming mibatang kasakitan pepatingapun ampon ing pali ning aldo.

Mat 20:13 Dapot ya mekibat ya, ngana king metung karela, Kakaluguran, e ra ka diptanan marok: e mu pekitanguanan kanaku ing metung mung denario?

Mat 20:14 Kuanan me ing keka, at mako ka; aku buri keng dinan iting tauli anti ing keka.

Mat 20:15 E wari matulid ing daptan ku ing buri ku king bandi ko? o marawak ya ing mata mu, uling aku mayap ku?

Mat 20:16 Inya ding mumuna mitauli la, at ding tauli muna la.

Mat 20:17 At inyang mukiat ya i Jesus Jerusalem, inaus nong makabukud ding labingaduang alagad, at king dalan sinabi na karela,

Mat 20:18 Oini mumukiat ta na Jerusalem; at ing Anak ning tau manabu ya karing pun ding sacerdotes ampon escribas; at deti atulan de king kamatayan.

Mat 20:19 At ibie re karing Gentiles, ba reng palmuran, at batbatan, ampon ipaku: dapot king katlung aldo subli yang mie.

Mat 20:20 Kanita linapit ya kea ing indu ra ding anak nang lalaking Zebedeo, abe no ding anak na, sasamba la kea, at aduan da kea ing metung a bague.

Mat 20:21 At ya sinabi na kea, Nanung buri mu? Ya sinabi na kea, Yutus mu king deting adua kung anak a lalaki lukluk la, ing metung king wanan mu, at ing metung king kaili mu, king kayarian mu.

Mat 20:22 Dapot i Jesus mekibat ya, at ngana, E yu balu ing aduan yu. Malyari yeng ainum ing copang malapit kung inuman? Sinabi ra kea, Apalyari mi.

Mat 20:23 Ya sinabi na karela, Minum kong tutu king copa ku: dapot ing lukluk ko king wanan ku, at king kaili, aliwa akung makaibie; dapot kareta yang nung kenu ne sidia ning Ibpa ku.

Mat 20:24 At inyang damdaman da ding apulu iti, mikasbu la karing aduang mikapatad.

Mat 20:25 Dapot i Jesus pin inaus no kanita kea at sinabi na, Balu yu king ding pun da ding Gentiles ilang guiguinuan da deti at ding mangaragul ilang maki kayupayan a sasakup karela.

Mat 20:26 Kekayu e makanian: dapot ing maguing maragul kekayu, yang maguing talasuyu yu;

Mat 20:27 At ing bisang mumuna kekayu, yang maguing talasuyu yu:

Mat 20:28 Anti mo ing Anak ning tau e mine keting suyuan da, nung e sumuyu, at bang ibie na ing bie na a maguing metung a panatbus karing dakal.

Mat 20:29 At panlako ra Jerico ing metung a maragul a kekaldan tinuki kea.

Mat 20:30 At oini ding aduang bulag, a makalukluk lele dalan, inyang damdaman da king i Jesus lalabas ya, kinulait la, ngara, Guinu, malunus ka kekami, anak nang David.

Mat 20:31 At ding kekaldan pengamanuan dala balang tuknang. Dapot ila lalu rang sikan ing siwala ra, ngara, Guinu, malunus ka kekami, anak nang David.

Mat 20:32 At tinuknang ya kanita i Jesus, at inaus nala, at sinabi na, Nanung buri yung daptan ku kekayu?

Mat 20:33 Ila sinabi ra kea, Guinu, mabuklat la sa ding mata mi.

Mat 20:34 At i Jesus, king pangalunus na karela inapis no mata; at ita murin misubli ing panimanman da; at tinuki la kea.

Mat 21:1 At inyang milapit no Jerusalem at miras la Betfage, king bunduk Olivos, i Jesus tinubud no ding aduang alagad,

Mat 21:2 Sinabi na karela, Ume kayu king nayun a arapan yu, at ita murin manakit kong metung a asnong babai a makatali, ampon abe ne ing metung a pollino: kalagan yula at dalan yo keti kanaku.

Mat 21:3 At nung ating sumabing ditak kekayu, sabian yu, Ing Guinu kailangan nala; at kanita padala nala.

Mat 21:4 Ngeni iti milyari bang matupad ing mesabi king pamamilatan ning manula, ngana,

Mat 21:5 Sabian yu king anak nang babaing Sion, Oini, ing Ari mu daratang ya, Mamu ya, at makalukluk babo ning asno, At babo ning metung a pollino, a anak ning asna.

Mat 21:6 Ding alagad meko la, at depatan da itang inutus nang Jesus karela,

Mat 21:7 Dela re ing asna ampon ing pollino; at timpak da babo ra ing karelang imalan, at ya linukluk ya babo ra deti.

Mat 21:8 At ding dakal karing kekaldan lalantang da ing imalan da king dalan; at ding aliwa kinutud lang sangang dutung at kakalat da king dalan.

Mat 21:9 At ding maldang mumuna kea, at ding kea tauli kukulait la, ngarang sasabi, Hosanna king anak nang David: Nuan ya ing daratang king laguiu ning Guinu; Hosanna king katasan.

Mat 21:10 At panlub na karin Jerusalem, ing mabilug a ciudad melingongo ya, ngara, Ninu iti?

Mat 21:11 At ding malda sasabian da, Iti ya i Jesus, ing manula a ibat king Nazaret ning Galilea.

Mat 21:12 At linub ya i Jesus king pisamban na ning Dios, at tinabi no ding misasali at maniali kilub ning pisamban; at pinyakub no ding dulang da ding manlibe salapi, ampon ding luklukan da ding misasaling patipati;

Mat 21:13 At sinabi na karela, Makasulat, Ing bale ku mayaus yang metung a bale ning panalangin: Dapot ikayu gagawan yeng lukib ding mapanako.

Mat 21:14 At linapit la kea king pisamban ding bulag ampon pile; at ya pepakayapan nala.

Mat 21:15 Dapot inyang ding pun ding sacerdotes ampon ding escribas ikit da ing makapagmulalang bague a depatan na, ampon ding anak a kukulio king pisamban, at ngarang sasabi, Hosanna king anak nang David; mikasbu lang bina,

Mat 21:16 At sinabi ra kea, Daramdaman mu ing sasabian da rene? Sinabi nang Jesus karela, Wa: kapilan man e yu pa wari abasa iti, King asbuk ding mangalati, at ding sususu, Aganap mu ing kapurian?

Mat 21:17 At likuan no kanita, mine ya lual ning ciudad angga Betania, at tinuknang ya karin.

Mat 21:18 Ngeni kabukasan abak inyang mibabalik ya king ciudad, meranup ya.

Mat 21:19 At panakit na king metung a higuera lele ning dalan, lepitan ne, at ala yang ikit nanuman nung e mu bukud bulung; at sinabi na kaniti, Kapilan paman alang lunto bunga keka. At agadagad ing higuera melangi ya kanita.

Mat 21:20 At panakit da kaniti ding alagad mipamulala la, ngara, Bat kalalagua nang melangi ning higuera?

Mat 21:21 At i Jesus mekibat ya, ngana, karela, Ing katutuan sasabian ku kekayu, Nung atin kayung kasalpantayanan, at e ko mikakunu, e mu ing arapat yu ing merapat king higuera, nung e aguia mang sabian yu king bunduk a ini, Mabagut ka, at tulandung ka king dayatmalat, malyari.

Mat 21:22 At ing keganaganang aduan yu king pamanalangin salpantaya kayu sa, tanggapan yu.

Mat 21:23 At inyang datang ya kilub pisamban, ding pun ding sacerdotes ampon ding makatua king balen linapit la kea kabang tuturu ya, at ngara, Kaisanung kayupayan a daraptan mo ding bague a deti? At ninung minie keka king kayupayan a iti?

Mat 21:24 At i Jesus mekibat ya, ngana karela, Aku man ikutang ke kekayu ing metung a kutang, a nung asabi yu kanaku, aku man sabian ku kekayu nung kaisanung kayupayan daraptan ko ding bague a deti.

Mat 21:25 Ing binyag nang Juan, nu menibatan? menibat banua, o menibat karing tau? At ila mibadbaran la king sarili ra, ngara, Nung sabian tamu, Ibat banua; sabian na kekatamu, Baket pin e ye peniwalan?

Mat 21:26 Dapot nung sabian tamu, Ibat karing tau; tatakut tamu king balayan; uling kikilalanan de ngang manula i Juan.

Mat 21:27 At mekibat la kang Jesus, sinabi ra, E mi balu. Ya man sinabi na karela, Aku man e ku sabian kekayu nung kaisanung kayupayan daraptan ko ding bague a deti.

Mat 21:28 Dapot nanung balak yu? Ing metung a tau atin yang aduang anak a lalaki; at linapit ya king mumuna, sinabi na kea, Anak, ume ka, at galo ka ngeni king uvasan.

Mat 21:29 At mekibat ya, at ngana, E ku bisa: dapot kaibat na sinisi ya, at mine ya.

Mat 21:30 At mine ya king metung, makanian mu naman ing sinabi na kea. At mekibat ya, at ngana, Aku ume ku pu, at e mine.

Mat 21:31 Isanu karing adua ing tinupad king kaburian na ning ibpa? Ila ngara, Ing mumuna. I Jesus sinabi na karela, Ing katutuan sasabian ku kekayu, king ding manyingil buis ampon ding patutut mumuna la pang lungub kekayu king kayarian na ning Dios.

Mat 21:32 Uling detangan nakong Juan king dalan na ning katuliran, at e ye peniwalan; dapot ding manyingil buis ampon ding patutut sinalpantaya la kea: at ikayu, panakit yu kaniti, e ko sinising agad bang paniwalan ye.

Mat 21:33 Pakiramdaman ye ing aliwang alimbawa: Ating metung a ibpa ding mibalebale, a menanaman uvasan at bekuran neng makapatulug, at kinulkul yang pipapaslan alak kilub, ampon mitalakad yang metung a matas a bantayan, at pepapabunga ne karing makisamak, at mine ya king aliwang labuad.

Mat 21:34 At iniang malapit nang datang ing panaun a pamamunga, tinubud no ding ipus na karing makisamak, barong tanggapan ding bunga na.

Mat 21:35 Dapot ding makisamak dekap do ding keang ipus, pemaluka re ing metung, at pete re ing metung, at ing metung pemukul deng batu.

Mat 21:36 Minulit yang mitubud aliwang ipus, maiguit la pa karing minuna: at makanian mu naman ing depatan da karela.

Mat 21:37 Dapot katataulian pin tinubud ne karela ing anak na, ngana, Galangan de ing anak ku.

Mat 21:38 Dapot ding makisamak panakit da king anak na, misabisabi la, Iti yang magmana; ume ko keni, patayan taya, at kuanan tamu ing mana na.

Mat 21:39 At dekapan de, liwal de king uvasan, at pete re.

Mat 21:40 Nung datang ya pin ing guinu ning uvasan, nanu ing daptan na karetang makisamak?

Mat 21:41 Sasabian da kea, Lipulan nong alang pakalulu ding mangarawak a lalaking deta, at papabunga na ing uvasan na karing aliwang makisamak a munie kea karing bunga na king karelang panaun.

Mat 21:42 I Jesus sinabi na karela, E yu pa abasa karing Kasulatan, Ing batung inugse ra ding aluagui, Ita mu rin milyari yang pamuntuk ning sulok; Iti ibat ya king Guinu, At makapagmulala ya karing ke katang mata?

Mat 21:43 Inya pin sasabian ku kekayu, Ing kayarian na ning Dios milako ya kekayu, at miabie ya king metung a bansa a mikaka atin king bunga na.

Mat 21:44 At ing mabaldug king babo ning batung iti, mabalbal yang mangalasi, dapot kaisanu ya man manabu, ita isalbag neng anting pulvus.

Mat 21:45 At inyang ding pun ding sacerdotes ampon ding Fariseos dimdam da ing keang alimbawa, atingid da king ilang sasabian na.

Mat 21:46 At inyang pagpilitan dang arakap de, tinakut la karing kekaldan, uling binilang deng manula.

Mat 22:1 At i Jesus mekibat ya, at inulitan nong pigsalitanan alimbawa, ngana,

Mat 22:2 Ing kayarian banua katulad ne ning metung a ari, a pigsayan na ing pangakasal ning keang anak a lalaki,

Mat 22:3 At tinubud no ding ipus na barong dakitan ding inagkat king kasal: at e la bisang datang.

Mat 22:4 Tinubud nong pepasibayu ding aliwang ipus, sinabi na karela, Sabian yu karing inagkat, Oini, sidia ku ing pamangan, ding vaca ku at ding biserung vaca mepate nala, at makasadia na ing sablang bague: ume ko king kasal.

Mat 22:5 Dapot ila guewa rang mistula, at pesilako la, ing metung king keang marangle, at ita king keang kapanintunan;

Mat 22:6 At ding aliwa, dekapan do ding keang ipus, at inalala rong makarine, at pete rala.

Mat 22:7 Dapot ing ari mikasbu ya; at tinubud no ding keang tapuk, at linipul do detang mapakamate, at pepasilab ne ing karelang ciudad.

Mat 22:8 Kanita sinabi na karing ipus na, Ing kasal makasadia, dapot ding inagkat e la karampatan.

Mat 22:9 Ume ko pin karing suluk da ding dalan; at detang anggang akit yu, yagkat yo king kasal.

Mat 22:10 At detang ipus linual lang mine karing dalan, at tinipun do ding anggang ikit da, marawak na ampon mayap: at ing kasal kinatmu ya karing inagkat.

Mat 22:11 Dapot inyang linub ya ing ari banong lawan ding inagkat, ikit ne karin ing metung a taung e miimalan pagkasal.

Mat 22:12 At sinabi na kea, Kakaluguran, baket linub ka keting e miimalan pagkasal? At ya ala yang bulad.

Mat 22:13 Kanita pin ing ari sinabi na karing ipus, Gapusan ye gamat ampon bitis, at yugse ye king dalumdum lual; karin na ing tangis at pamitiguis ding ipan.

Mat 22:14 Uling dakal la ding meaus, dapot ditak la mu ding mepili.

Mat 22:15 Kanita pin meko la ding Fariseos, at pisabisabi ra nung makananu reng arakap king pamaniabi na.

Mat 22:16 At tinubud do pin kea ding karelang alagad, abe ro ding Herodianos, sinabi ra kea, Maestro, balu mi king ika maniabi ka king katutuan, at tuturu me king katutuan ing dalan na ning Dios, at e ka mangimi kenuman: uling e mu lalawan ing anyu ra ding tau.

Mat 22:17 Sabian mu pin kekami, Nanung balak mu? Karampatan ing mamayad buis kang Cesar, o ali?

Mat 22:18 Dapot i Jesus balu na ing karawakan da, at ngana, Baket susubukan yuku, taung magbanalbanalan?

Mat 22:19 Ipakit ye kanaku ing kualta ning buis. At diwang de kea ing metung a denario.

Mat 22:20 At ya sinabi na karela, Kaninu ya larawan ini, at ing makasulat?

Mat 22:21 Sinabi ra kea, Kang Cesar. Kanita pin sinabi na karela, Ibie yu pin kang Cesar ing bague a kang Cesar; at king Dios ing bague a king Dios.

Mat 22:22 At panamdam da kaniti, mengapamulala la, at likuan de at meko la.

Mat 22:23 Kanita muring aldo a ita dinatang la kea ding Saduceos, detang maniabi king alang pamanyublingmie; at kitang da kea,

Mat 22:24 Ngara, Maestro, i Moises sinabi na, Nung ing metung a tau mate yang alang anak, makiasawa ya ing kapatad na king keang asawa, at dinan neng palipi ing kapatad na.

Mat 22:25 Ngeni, atin ping pitung mikakapatad a lalaking kayabe mi: at ing mumuna, mekiasawa ya pin at mete ya, at anti ning ala yang palipi, likuan ne ing asawa na king kapatad na;

Mat 22:26 Makanian mu naman ing kadua, at ing katlu, angga na king kapitu.

Mat 22:27 At pangamate ra ngan mete ya ing babai.

Mat 22:28 Pamanyublingmie pin, kaninu ya asawa karing pitu ing babai? uling ila ngan ayasawa re.

Mat 22:29 Dapot i Jesus mekibat ya at ngana karela, Mababalatung kayu, uling e yo balu ding Kasulatan, ampon ing kayupayan na ning Dios.

Mat 22:30 Uling king pamanyublingmie, e la makiasawa, at e no papakiasawa, anti lang angeles banua.

Mat 22:31 Dapot tungkul king pamanyubli rang mie ding mete, e yu abasa ing sinabi na kekayu ning Dios ngana,

Mat 22:32 Aku ing Dios nang Abraham, at ing Dios nang Isaac, at ing Dios nang Jacob? Ing Dios e re Dios ding mete, nung e ding mabie.

Mat 22:33 At panamdam da kaniti ding kekaldan mipamulala la king tuturu na.

Mat 22:34 Dapot ding Fariseos iniang dimdam da king apatuknangan nong sinabi ding Saduceos, mipulung la ila ngan.

Mat 22:35 At ing metung karela, talapanalese ya king kautusan, kitnan neng metung a kutang, susubukan ne,

Mat 22:36 Maestro, isanung masaplalang utus king kautusan?

Mat 22:37 At ya sinabi na kea, Luguran me ing Guinung Dios mu mabilug king pusu mu, at mabilug king kaladua mu, at mabilug king kaisipan mu.

Mat 22:38 Iti ya ing mumuna at ya ing masaplalang utus.

Mat 22:39 At ing kadua a katulad na niti, ya ini, Luguran me ing lupa mung tau anti mo keka.

Mat 22:40 Kareting aduang utus atiu na ngan ing kautusan, pati na ding manula.

Mat 22:41 Ngeni kabang makatipun la ding Fariseos, i Jesus kitnan nala,

Mat 22:42 Ngana, Nanung isipan yu tungkul kang Cristo? kaninu ya anak? Ila sinabi ra kea, Kang David.

Mat 22:43 Ya sinabi na karela, Baket pin i David king pamamilatan na ning Espiritu, ausan neng Guinu, ngana,

Mat 22:44 Sinabi ning Guinu king Guinu ku, Lukluk ka wanan ku, Angga king ibili ku la ding kekang kasalang lalam ning kekang talampakan?

Mat 22:45 Nung i David pin ausan neng Guinu na, makananung anak ne?

Mat 22:46 At ninu man e re apakibatan a metung mu mang amanu, at manibat king aldo a ita ala nang mengangas mengutan pa kea.

Mat 23:1 Kanita miniabi ya i Jesus karing malda, at karing keang alagad,

Mat 23:2 Ngana, Ding escribas at Fariseos lukluk la king luklukan nang Moises:

Mat 23:3 Ing anggang bague yutus da kekayu pin, daptan yu at tuparan; dapot e ko darapat agpang king dapat da; uling sasabi la mu at e la darapat.

Mat 23:4 Wa, ila talian do ding pusan a mabayat at masakit dalan, at layun dong ibili karing pago ra ding tau; dapot ila king metung da mang taliri e ro buring kimutan.

Mat 23:5 Makanyan man, ing anggang dapat da papakit da karing tau; uling lalapad da la ding karelang filacteria, ampon daragul da la ding lele ning karelang imalan,

Mat 23:6 At kaluguran do ding mumunang kabilianan king abala at ding mumunang luklukan karing sinagogas,

Mat 23:7 At ing pamamugue karing plasa, ampon pamipayaus karing tau, Rabbi.

Mat 23:8 Dapot e ko payaus, Rabbi: uling metung ya kabud ing kekong Maestro, at iko ngan mikakapatad kayu.

Mat 23:9 At ninuman e ye ausan keti sulip ibpa yu: uling metung ya kabud ing Ibpa yu, iti ya ing atiu karing banua.

Mat 23:10 E kayu naman payaus Maestro, uling metung ya kabud ing kekong Maestro, ya pin ing Cristo.

Mat 23:11 Dapot ing maragul dili kekayu, yang maguing talasuyu yu.

Mat 23:12 At ing misasaplala king sarili na mibaba ya; at ing magpakumbaba king sarili na misaplala ya.

Mat 23:13 Dapot kalulu na kayu, escribas at Fariseos, a magbanalbanalan! uling kakabat ye karing tau ing kayarian banua: uling bat na ikayu e na ko lulub, at ding pasipanlub e yo pa buring lungub.

Mat 23:14 Kalulu na kayu escribas at Fariseos, a magbanalbanalan! uling lalaklakan yo ding bale ra ding babaing mebalu, a kanuari manalangin kong makaba: uli na niti kamtam yu ing lalung dakal a parusa.

Mat 23:15 Kalulu na kayu escribas at Fariseos, a magbanalbanalan! uling tutulugan ye ing dayatmalat ampon ing labuad bang manakit kayung metung a kakampi; at pangapalyari na, gagawan yeng karampatan aduang ukdu pa a anak ning infierno kesa king kekayung sarili.

Mat 23:16 Kalulu na kayu, talataid a bulag a sasabing, Ing ninuman a isumpa ne ing pisamban, alang nanu naman; dapot ing misumpa king guintu ning pisamban metung yang mikautang.

Mat 23:17 Mangmang at bulag, isanu pin ing matimbang, ing guintu, o ing pisamban a pepapagbanal king guintu?

Mat 23:18 At, ing ninuman isumpa ne ing altar, alang nanu naman; dapot ing misumpa king ain a atiu babo na, metung yang mikautang.

Mat 23:19 Ikong bulag: isanu pin ing matimbang; ing ain, o ing altar a papapagbanal king ain?

Mat 23:20 King uli na niti ing misumpa king altar, susumpa ne, at ing anggang bague atiu babo na.

Mat 23:21 At ing misumpa king pisamban, susumpa ne, at itang kea manuknangan.

Mat 23:22 At ing misumpa king banua, susumpa ne ing luklukan na ning Dios, at itang king babo na makalukluk.

Mat 23:23 Kalulu na kayu, escribas at Fariseos, a magbanalbanalan! uling sisikapuluan yu ing dikut a mayap, ing anis ampon ing comino, at pepaburen yu ing lalung mayulaga pang bague ning kautusan, katuliran, pakalulu, at kasalpantayanan: dapot deti depatan yo sana at e yo paburen mu namang e matutupad ding aliwa.

Mat 23:24 Bulag a talataid, a mamagag king gamugamu, at ing camello kekayu yang yakmul!

Mat 23:25 Kalulu na kayu escribas at Fariseos, a magbanalbanalan! uling lilinisan ye ing lual ning copa ampon ning pinggan, dapot king kilub mitmu lang kapanakawanan ampon kapalaluan.

Mat 23:26 Bulag a Fariseo linisan me pamu ing kilub ning copa ampon ning pinggan, bang ing lual na luminis mu naman

Mat 23:27 Kalulu na kayu, escribas at Fariseos, a magbanalbanalan! uling katulad da kayu ding kutkutan a pitian, a king lual mayayakit lang masanting, dapot king kilub mitmu lang butul mete ampon sablang karinatan.

Mat 23:28 Makanian mu naman ikayu, ing katutuan king lual papakit kong banal karing tau, dapot king lub mitmu kong pamagkanuari ampon karawakan.

Mat 23:29 Kalulu na kayu escribas at Fariseos, a magbanalbanalan! uling tatalakad yo ding kutkutan ding manula, at gagayak yu la ding kutkutan ding banal,

Mat 23:30 At sasabian yu, Nung keta sang panaun da di ibpa tamu ati tana, e ra kata sana karame deta king pamibubu king daya ra ding manula.

Mat 23:31 Inya ikayu mu rin patutuan yu king kekong sarili a anak da ko detang mekamate karing manula.

Mat 23:32 Katmuan yo ya naman nung makanian ing sukad da ding matua yu.

Mat 23:33 Ikayung ubingan, ikayung daing kamamalu. Makananu yung takasan ing kayatulan king infierno?

Mat 23:34 Inia pin, oini, aku padala ko ding manula kekayu, at pantas ampon escribas: a kareti, ding mapilan patayan yu la at ipaku, at ding mapilan karela batbatan yu la karing kekong sinagogas, at talukian yong pasakitan king balang ciudad:

Mat 23:35 Bang dumpa kekayu ing anggang banal a dayang mikalat keti sulip, manibat king daya nang Abel a banal angga na king daya nang Zacarias a anak nang Baraquias, a pete yu pilatan na ning Santuario ampon ning altar.

Mat 23:36 Ing katutuan sasabian ku kekayu, king iti ngan datang king daing iti.

Mat 23:37 O Jerusalem, Jerusalem, a makamate karing manula, ampon pamatuan na la ding padala ra kea, makatapilan ko buring tinipun ding anak mu, anti mo ing manuk a gaindu titipunan na la ding keang sisi lalam ning baguius na, at e ka mebisa!

Mat 23:38 Oini, ing bale mu likuan deng ilang keka.

Mat 23:39 Aku pin sasabian ku kekayu, manibat na ngeni e yu na ku akit, anggang e yu sabian, Nuan ya itang datang king laguiu ning Guinu.

Mat 24:1 At i Jesus linual ya king pisamban, at linakad ne; at ding keang alagad linapit la bang ituru ra ing pangapatali ning Templo.

Mat 24:2 Dapot ya mekibat ya, at ngana karela, E yo akakit ding sablang bague a dete? ing katutuan sasabian ku kekayu, Alang mitagan keti batung mitutumpak, a e maluslus.

Mat 24:3 At kabang makalukluk ya babo ning bunduk Olivos, ding alagad linapit lang lijim kea, ngarang sinabi. Sabian mu kekami, kapilan la malyari deting bague? at nanung tandang mayakit king paniatang mu, at king kawakasan na ning panaun?

Mat 24:4 At i Jesus mekibat ya kanita, ngana karela, Mingat kayu bang ninu man e na ko apirait.

Mat 24:5 Uling dakal la ding datang king laguiu ku, ngarang sumabi, Aku ing Cristo, at dakal la ding piraitnan da.

Mat 24:6 At damdaman yung pisabian da ing pamipamuk, ampon ing bulungbulung ning pamipamuk; mingat kayu, e ko paisira lub: uling kailangan ing malyari la deting bague; dapot aliwa pa ing kawakasan.

Mat 24:7 Uling talakad ya ing dai salang king dai, at ing kayarian salang king kayarian; ampon mika danup at ayun karing miayaliwang karinan.

Mat 24:8 Dapot ding keganaganang bague a deti ilang kamumulan ning kasakitan.

Mat 24:9 Kanita pin miabie ko king kasakitan, ampon patayan da kayu: at ding anggang bansa akasaman da kayu uli na ning laguiu ku.

Mat 24:10 At kanita dakal la ding mitakid, ampon ila ila mipapanganiya la, layun ila ila mipapagkamua la.

Mat 24:11 At dakal lang e tune manula ding lunto, at piraitnan do ding dakal.

Mat 24:12 At uling ing karawakan dakal, dimla ing lugud ding keraklan.

Mat 24:13 Dapot ing mibata angga king kapupusan, iti miligtas ya.

Mat 24:14 At iting evangelio ning kayarian mipanaral ya king meto sikluban, king pamipatutu karing anggang bansa; at kanita ing kawakasan datang na.

Mat 24:15 Pamanakit yu pin king mabagsik a kasiran, a mesabi king pamamilatan nang Daniel a manula, king pangatalakad na king Santong Karinan (Talastasan ning babasa),

Mat 24:16 Kanita pin ding atiu Judea mulai la king bunduk:

Mat 24:17 At ing atiu king bubungan, e ne kukuldas bale a kuma karing bague a atiu bale na:

Mat 24:18 At ing atiu king marangle, e ne mibalik bang kuanan ne ing keang balabal.

Mat 24:19 Dapot kalulu no ding mabuktut, ampon pasusu karing aldo a deta.

Mat 24:20 Panalangin yu pin king e nasa king panaun na ning dimla ing pamamulai yu, at king aldo ning sabbath:

Mat 24:21 Uling datang kanita ing maragul a kasakitan, a e pa meakit manibat king kamumulan ning yatu angga ngeni, ali, ni kapilan man e na mayakit.

Mat 24:22 At subali mu nung kumuyad la ding aldo a deta, alang laman a miligtas: dapot uli ra ding pili, ding aldo a deta kumuyad la.

Mat 24:23 Kanita nung ating taung sumabi kekayu, Lon yu oini ing Cristo, o kaya, Oining keni; e yu paniwalan.

Mat 24:24 Uling lunto la ding e tune Cristo, ampon e tune manula, at pakit lang dakal a tanda ampon mala; ban keta alili ra la, nung malyari, aguiang ding pili.

Mat 24:25 Oini, kekayu sinabi ku nang makapauna.

Mat 24:26 Nung sabian da pin kekayu, Oini, atiu king ilang; e ko lulual: Oini, atiu karing silid; e yu paniwalan.

Mat 24:27 Uling anti mo ing kildap lalto ya king aslagan, at mayayakit yang sasala angga na king albugan; makanyan mu naman ing panyatang na ning Anak ning tau.

Mat 24:28 Uling nu ya man karin ing bangke, karin la mitipun ding buitre.

Mat 24:29 Dapot agadagad, kaibat ning alimbuyu karing aldo a deta, ing aldo dalumdum ya, at ing bulan e na ibie ing keang sala, at ding batuin manabu lang ibat banua, at ding upaya banua mangaugun la:

Mat 24:30 At kanita pin lunto ya ing tanda ning Anak ning tau king banua: at kanita pin maglunus la ding anggang dai keti sulip, at akit de ing Anak ning tau datang yang atiu babo ding biga ning banua, kagum na ing kayupayan ampon ligaya.

Mat 24:31 At pabal no ding angeles na kambe ra ing masiglang tiup ding pakakak, at tipunan do ding keang pili ibat karing apat nang dake ning angin manibat king metung nang sepu ning banua angga king kangatba nang sepu.

Mat 24:32 Ngeni manibat king higuera pagaralan yu ing alimbawa na: pamanyaguiwa na sanga, ampon pasibutan na no ding keang bulung, balu yu na king ing kaleldo malapit na;

Mat 24:33 Makanyan mu naman ikayu panakit yu karing anggang bague a deti, talastasan yu na king malapit ne karing pasbul.

Mat 24:34 Ing katutuan sasabian ku kekayu, king e milabas ing daing iti anggang e la malyari ding keganaganang bague a deti.

Mat 24:35 Ing banua at sulip lumipas la, dapot ding amanu ku e la lumipas.

Mat 24:36 Dapot bague king aldo a ita at oras, ninuman alang makabalu, ding angeles man banua, ing Anak man, nung e mu kabud ing Ibpa.

Mat 24:37 At nung makananu ing king panaun nang Noe, makanian mu naman ing paniatang ning Anak ning tau.

Mat 24:38 Uling karing aldo a deta, bayu dinatang ing albug, mamangan la ampon miminum, pakasal la at mangasal, angga king aldo a panlub nang Noe king daung.

Mat 24:39 At e ra abalu anggang e miras ing albug, at dela no ila ngan; makanian ing paniatang ning Anak ning tau.

Mat 24:40 Kanita pin miabe la ding aduang lalaki king marangle; ing metung mayakua ya, at ing metung malakuan ya.

Mat 24:41 Ating aduang babai a guiguiling king guilingan; ing metung mayakua ya, at ing metung malakuan ya.

Mat 24:42 Lumame ko pin: uling e yu balu nung kaisanung aldo a datang ya ing kekong Guinu.

Mat 24:43 Makanian man talastasan yu, a nung ing ibpa ning pibalebale abalu na ing oras a paniatang na ning mapanako, lumame ya, at e na paburen atibag de ing bale na.

Mat 24:44 Inia pin miadia kayu naman; uling king oras a e yu isipan, ing Anak ning tau datang ya.

Mat 24:45 Ninu pin ing tapat a lub ampon maingat a ipus, a ing guinu na pepanibala no kea ding sakup na bale, banong dinan pamangan king panaun?

Mat 24:46 Nuan ya itang ipus, a paniatang ning guinu na dasan neng darapat makanian.

Mat 24:47 Ing katutuan sasabian ku kekayu king ipaniwala na ngan kea ing anggang kayatinan na.

Mat 24:48 Dapot nung itang ipus a marawak sabian na king keang pusu, Ing guinu ku maluat ya pang e datang:

Mat 24:49 At magmula neng mamaluka karing abe nang ipus at makipangan ya ampon makipaninum karing malasing;

Mat 24:50 Datang ya ing guinu na nitang ipus king metung a aldo a e ne panayan, at king metung a oras a e na balu,

Mat 24:51 At sagsagan neng piduan layun itulad ne karing magbanalbanalan: karin na ing tangis ampon langitngit da ding ipan.

Mat 25:1 Ing kayarian banua katulad de pin ding apulung dalagang alang bakas, a kinua ro ding karelang sulugui, at linual lang tanggap king asawang lalaki.

Mat 25:2 At ding lima kareti mangmang la, at ding lima maisip la.

Mat 25:3 Uling ding mangmang inyang kuanan do ding karelang sulugui, e ro lilanan laru:

Mat 25:4 Dapot ding maisip kinanua lang laru karing lulanan da, dadalan do ding karelang sulugui.

Mat 25:5 Ngeni kabang meluat ya pin ing asawang lalaki, ila ngan mipalilu la, at mipatudtud.

Mat 25:6 Dapot inyang kapitangan nang bengi ating metung a kulait, Oini, ing asawang lalaki! Lual kong salubung.

Mat 25:7 Kanita pin deta ngang dalagang alang bakas tinalakad la ampon sinindian do ding sulugui ra.

Mat 25:8 At ding mangmang sinabi ra karing maisip, Dinan yu ke king laru yu, matatda la ding sulugui mi.

Mat 25:9 Dapot ding maisip mekibat la, ngara, Bang e malyari ing kakulangan tang parapara: ume ko pa karing misasali, at sali kong kekayu.

Mat 25:10 At kabang ila mame la ban sali, dinatang ya ing asawang lalaki; at ding makaadia linub lang kayabe na king pikakasalan; at mikabat ya ing pasbul.

Mat 25:11 Kaibat na nita dinatang la naman ding aliwang dalagang alang bakas, ngara, Guinu, buklatanan mu kami.

Mat 25:12 Dapot mekibat ya, at ngana, Ing katutuan kekayu sasabian ku, E ra ko akikilala.

Mat 25:13 Lumame ko pin, uling e yu balu ing aldo, ni ing oras man.

Mat 25:14 Uling anti mo king metung a taung mine king aliwang labuad inaus no ding keang ipus, at peniwala na karela ing kayatinan na.

Mat 25:15 At dininan ne pin ing metung limang talento, ing metung adua, at ing tauli metung; king balang metung makabague king aguiu na; layun neng meko marayu.

Mat 25:16 Kanita mu rin ing tinanggap limang talento, meko ya at penintun na la, at mekinabang yang limang talento.

Mat 25:17 Makanian mu naman ing tinanggap adua, mekinabang yang aliwang adua.

Mat 25:18 Dapot ing tinanggap metung, meko ya, at minaun ya king gabun, selikut ne karin ing salapi na ning keang guinu.

Mat 25:19 Ngeni pangalabas ning makabang panaun, dinatang ya ing guinu ra detang ipus at dinapat yang pamakipagmasalese karela.

Mat 25:20 Dinurup ya pin kanita ing tinanggap limang talento, migdala ya pang aliwang limang talento, ngana, Guinu, lima lang talento ding peniwala mu kanaku: oini, mekinabang ku pang aliwang limang talento.

Mat 25:21 Ing keang guinu sinabi na kea, Mayap a pangarapat, mayap at tapat a ipus: king ditak a bague migtapat ka, panibalan da ka king dakal a bague; lungub ka king tula na ning guinu mu.

Mat 25:22 Makanian mu naman ing tinanggap aduang talento, dinurup ya, at sinabi na, Guinu adua lang talento ding peniwala mu kanaku: oini, mekinabang kung aliwang adua pang talento.

Mat 25:23 Ing guinu na sinabi na kea, Mayap a pangarapat, mayap at tapat a ipus: king ditak a bague migtapat ka, panibalan da ka king dakal a bague; lungub ka king tula na ning guinu mu.

Mat 25:24 At dinatang ya naman ing tinanggap king metung a talento, sinabi na, Guinu, aku balu ra ka king tau kang masakit kautus, papalutan mu ing e mu tenam, at pupupulan mu ing e mu silbag;

Mat 25:25 At migdala kung takut, at meko ku layun keng selikut king gabun ing kekang talento: oini, ing bandi mo.

Mat 25:26 Dapot ing keang guinu mekibat ya, at ngana kea, Ipus a marawak at matamad, baluan mu king papalutan ku ing e ku tenam, at pupupulan ku ing e ku silbag;

Mat 25:27 Dapat me sang binie ing salapi ku karing mamajalang pipanilasan salapi, at king panaun na ning panyatang ku tanggapan ke ing kanaku pati na ing tubu.

Mat 25:28 Kunan ya kea, nung makanian, ing talento, at ibie ye king maki apulung talento.

Mat 25:29 Uling ing balang metung a atin na, midinan ya pa, at mika atin yang dakal: dapot itang ala, ita mang atiu kea milako ya pa.

Mat 25:30 At ing ipus a alang kabaldugan yugse ya king dalumdum lual: karin na ing tangis ampon langitngit da ding ipan.

Mat 25:31 Dapot pamaniatang na ning Anak ning tau king ligaya na, at kambe no ding angeles na, kanita pin lukluk ya king trono ning ligaya na:

Mat 25:32 At king arapan na mitipun la ding anggang bansa: at pikaliluan na lang sikakatau anti mo ing pastul kakalilua no ding tupa karing kambing;

Mat 25:33 At ibili no wanan na ding tupa, dapot ding kambing king kaili na.

Mat 25:34 Kanita pin sabian na ning Ari karing atiu wanan na, Ume ko keni mipanuanan kang Ibpa ku, manan ye ing kayarian a misadia kekayu manibat king pangalalang ning yatu:

Mat 25:35 Uling meranup ku, at pepakan yu ku; kinau ku, at pepainum yu ku; migaliwa kung balayan, at pepanlayunanan yu ku;

Mat 25:36 Melubus ku, at pepaimalanan yu ku; misalunan ku, at inapa yu ku; mesukul ku, at delawan yu ku.

Mat 25:37 Kanita pin pakibatan de ding banal, ngarang sumabi, Guinu, kapilan daka ikit danupan, at pepakan da ka; o mau at pepainum da ka?

Mat 25:38 At kapilan daka ikit menaliwang balayan, at pepanlayunanan da ka; o lubas at pepaimalanan da ka?

Mat 25:39 At kapilan daka ikit salunan, o king sukulan, at dinalo ra ka?

Mat 25:40 At makibat ya kaniti ing Ari, sabian na karela, Ing katutuan sasabian ku kekayu, Ing depatan yu pin king metung karing lalung malati karening kapatad ku, kanaku yu depatan.

Mat 25:41 Kanita pin sabian na naman karing atiu king kaili na, Dayu ko kanaku, ikayung makasumpa, ume kayu king aping alang angga, a makasadia king diablo ampon karing angeles na:

Mat 25:42 Uling meranup ku, at e yu ku pepakan; kinau ku, at e yu ku pepainum;

Mat 25:43 Migaliwa kung balayan, at e yu ku pepanlayunanan; lubas ku at e yu ku pepaimalanan; salunan ku, at mesukul ku, at e yu ku delawan?

Mat 25:44 Kanita pin ila makibat la naman, ngarang sumabi, Guinu, kapilan daka ikit danupan, o mau, o menaliwang balayan, o lubas, o salunan, o king sukulan, at e ke sinuyu keka?

Mat 25:45 Kanita pin makibat ya karela, nganang sumabi, Ing katutuan sasabian ku kekayu, Ing e yu pamaniapat pin king metung karing pelalung malati kareti nan, kanaku yu e depatan.

Mat 25:46 At deti ume la king parusang alang angga: dapot ding banal king bie alang angga.

Mat 26:1 At milyari iniang i Jesus ayari na no ngan deting amanu sinabi na karing keang alagad,

Mat 26:2 Baluan yu king kalabas ning aduang aldo datang ing Pasku, at ing Anak ning tau miabie ya bang mipaku.

Mat 26:3 Kanita pin ding pun ding sacerdotes, ampon ding makatua king balayan mitipun la king patio ning matas a sacerdote, a ausan dang Caifas;

Mat 26:4 At misangguni la bareng dakpan i Jesus king kalalangan, at layun deng papate.

Mat 26:5 Dapot sinabi ra, E king kayaldawan na ning pista, bang e magulu ing balayan.

Mat 26:6 Ngeni, inyang karin ya Betania i Jesus, king bale nang Simon a leproso,

Mat 26:7 Linapit ya kea ing metung a babaing magdalang metung a vasung alabastro, mitmung maulagang unguento, at bilus na king keang buntuk, kabang makajilig ya king dulang.

Mat 26:8 At ding alagad panakit da kaniti mikasbu la, at sinabi ra. Nanung kapakayan na ning kapanyiran a itinan?

Mat 26:9 Uling ing unguentung iti apisaling mal, at miabie karing kalulu.

Mat 26:10 Dapot i Jesus talastas na iti, sinabi na karela, Bakit lilingasngasan ye ing babai? mayap naman ing depatan na kanaku.

Mat 26:11 Uling kayabe yong parati ding kalulu; dapot aku e yu ku akayabe parati.

Mat 26:12 Uling ing pamamulus na king katawan ku king unguentung iti, depatan na bang isadia na kanaku dikil king kutkutan.

Mat 26:13 Ing katutuan sasabian ku kekayu, king nukarin paman iting evangelio mipanaral ya king meto yatu, iti mang depatan na ning babaing iti misalita king kapigaganakan kea.

Mat 26:14 Kanita ing metung karing labingadua, itang mayayaus Judas Iscariote, mine ya karing pun ding sacerdotes.

Mat 26:15 At sinabi na, Nanung buri yung ibie kanaku, at aku ibie ke kekayu? At tinimbang do kea ding atlung pulung kapirasung pilak.

Mat 26:16 At manibat pin kanita menintun neng mayap a paralan baneng aibie karela.

Mat 26:17 Ngeni king mumuna nang kayaldawan ning king tinape alang levadura, linapit la kang Jesus ding alagad, ngara, Nukarin ing buri mung isadia raka bakang mangan king pasku?

Mat 26:18 At ya sinabi na, Ume ko king ciudad, ketang metung a tau, at sabian yu kea, Ing maestro sasabian na, Ing kayaldawan ku malapit na; king bale mu karin ku pagmasusian ing pasku, abe ko ding alagad ku.

Mat 26:19 At ding alagad depatan da itang inutus nang Jesus karela; at sidia ra ing pasku.

Mat 26:20 Ngeni inyang miras na ing gatpanapun, ya makalukluk ya king dulang at abe no ding labingaduang alagad;

Mat 26:21 At kabang mamangan la, sinabi na, Ing katutuan sasabian ku kekayu king ing metung kekayu paglinguan naku.

Mat 26:22 At ila bina lang melungkut, at balang katau migmulang sinabi kea, Aku, Guinu?

Mat 26:23 At mekibat ya at ngana, Itang makisulu kanaku king pinggan yang maglingu kanaku.

Mat 26:24 Ing Anak ning tau mako ne, nung makananu ing misulat dikil kea: dapot kalulu ne itang tau a king uli na mipaglinguan ya ing Anak ning tau! mayap pa ketang taung ita king e ne sa mibait.

Mat 26:25 At i Judas a miglingu kea, mekibat ya ngana, Aku wari, Rabbi? Ya ngana kea, Ika sinabi mu.

Mat 26:26 At kabang mamangan la, i Jesus kinanua yang metung a tinape, at binendiciunan ne, pinisi ne; ampon binie kanita karing alagad, sinabi na, Kuanan ye, at kanan; iti yang katawan ku.

Mat 26:27 At kinua ne kanita ing metung a copa, at pepasalamat ya, ampon binie ne karela, nganang sinabi, Inuman ye ngan;

Mat 26:28 Uling iti yang daya ku king tipan, a iti mibulus king uli ra ding malda, bang mayatbus ing kasalanan.

Mat 26:29 Dapot aku sasabian ku pin kekayu, king manibat ngeni e na ku minum king bunga na niting wake, angga na king aldo a inuman keng bayu a kagum dakayu king kayarian nang Ibpa ku.

Mat 26:30 At kaibat dang dinalit metung a himno, mine la king bunduk ning Olivos.

Mat 26:31 Kanita pin i Jesus sinabi na karela, Iko ngan manakit kong ikamua yu kanaku king benging iti: uling makasulat, Sugatan ke ing pastul. At ding tupa ning kawan misalbag la.

Mat 26:32 Dapot pamaniubli kung mie, ume kung makauna kekayu king Galilea.

Mat 26:33 Dapot i Pedro mekibat ya, ngana kea, Nung ila manakit la ngang ikamua keka, kapilan man aku e ku mimua.

Mat 26:34 I Jesus sinabi na kea, Ing katutuan sasabian ku keka, king benging iti, bayu ya tulauk ing manuk, ilingad mu kung makatatlu.

Mat 26:35 Sinabi na keang Pedro, Bistat man mate kung kayabe mu, makanian man e ra ka ilingad. At ding anggang alagad makanian mu naman ing sinabi ra.

Mat 26:36 Kanita i Jesus dinatang yang kayantabe na la king metung a kakarinan a mayayaus Getsemani, at sinabi na karing keang alagad, Lukluk ko keti, kabang aku mame ku karin ampon manalangin.

Mat 26:37 At tiki no di Pedro ampon ding adua nang anak Zebedeo, at migmula neng melungkut, at binang melingasngas.

Mat 26:38 Kanita sinabi na karela, Malungkut yang bina ing kaladua ku, angga king kamatayan: malakuan ko keti, at makipaglame ko kanaku.

Mat 26:39 At sinulung ya pang ditak, at migsakab ya at menalangin, nganang sinabi, Ibpa ku, nung malyari, paburen mung lumabas ya kaku iting kalis: makanian man aliwa ing kaburian ku yang malyari, nung e itang keka.

Mat 26:40 At mine ya karing keang alagad, at disan nong matudtud, at sinabi na kang Pedro, Baket e ko makapaki paglame kanaku metung mu mang oras?

Mat 26:41 Lumame kayu at manalangin bang e ko lungub king tuksu: ing espiritu king katutuan makasadia ya, dapot ing laman maina.

Mat 26:42 Meko yang miuman king kaduang ukdu, at menalangin ya, ngana, Ibpa ku, nung ini e na akuang lumabas, subali mu nung e ke inuman, malyari ing kaburian mu.

Mat 26:43 At mibalik yang pepasibayu, at disan nong matudtud, uling ding mata ra mabayat la.

Mat 26:44 At likuan nong pepasibayu, meko ya, ampon menalangin katlung ukdu, guingkas na ita mu ring sinabi na.

Mat 26:45 Kanita inayan no ding alagad, at sinabi na karela, Sulung matudtud na kayu ngeni, at painawa: Oini, ing oras malapit na, at ing anak ning tau mipaglinguan yang miabie king gamat ding makasalanan.

Mat 26:46 Talakad kayu, mako tamu: oini, lalapit ne itang miglingu kanaku.

Mat 26:47 At kabang sasabi yamu, oini i Judas, a metung karing labingadua, dinatang ya, at abe no ding maldang taung makatalibung ampon magpalupalu, a ibat karing pun ding sacerdotes ampon makatua king balayan.

Mat 26:48 Ngeni ing miglingu kea dininan nong metung a tanda, ngana, Ing uman ku, ya ita; dakpan ye.

Mat 26:49 At balus yang linapit kang Jesus, at sinabi na, Ba pu, Rabbi; at inuma ne.

Mat 26:50 At i Jesus sinabi na kea, Kakaluguran, daptan mu ing sangkan ning inayan mu. Kanita linapit la, at telanan de i Jesus, ampon dekapan de.

Mat 26:51 At oini, ing metung karing abe nang Jesus guinawang ya at begut ne ing keang talibung, layun sinugat ne ing ipus ning matas a sacerdote, at leko ne metung a balugbug.

Mat 26:52 Sinabi na ping Jesus kea, Isubli me ing talibung king kabibilian na: uling ding anggang gagamit talibung mate la king talibung.

Mat 26:53 Isipan mu galang king e ku makaaus kang Ibpa ku, at ya, ngeni mu rin, padalan na kung miguit king labing aduang tapuk a angeles?

Mat 26:54 Makananu lang matupad ding kasulatan, a deti sasabian da king kailangan ing malyari ing makanian?

Mat 26:55 King oras a ita sinabi nang Jesus karing malda, Linague kong dakap kanaku, anting metung a mapanako, magtalibung ampon magpalupalo? Aldo-aldo lulukluk ku king pisamban, tuturu, at e yu ku dekapan.

Mat 26:56 Dapot iti ngan mepalyari, bang matupad la ding kasulatan ding manula. Kanita ding anggang alagad, likuan de at pesitakas la.

Mat 26:57 At ding dinakap kang Jesus dela re kang Caifas, a matas a sacerdote, a nung nu la makatipun ding escribas ampon ding makatua.

Mat 26:58 Dapot i Pedro tinuki ya keang makarayu angga king patio na ning matas a sacerdote; at melaus ya kilub, mekiluklukan ya karing manibala, banang akit ing kawakasan.

Mat 26:59 Ngeni ding pun ding sacerdotes mangga na ing mabilug a concillo menintun lang saksing malaram laban kang Jesus, bareng apapate;

Mat 26:60 Dapot e la menakit, bistat man dakal lang malaram a saksi ding dinurup. Dapot king katataulian ating aduang dinatang.

Mat 26:61 At sinabi ra, Iti sinabi na, Atin kung upayang lasak king pisamban na ning Dios, at italakad ke king katlung aldo.

Mat 26:62 At tinalakad ya kanita ing matas a sacerdote, at sinabi na kea, E ka makibat nanuman? nanu iting laban da keka deting saksi?

Mat 26:63 Dapot i Jesus e bubulad. At ing matas a sacerdote sinabi na kea. Ipaniawad kung lub keka king uli na ning Dios a mabie, king sabian mu kekami, nung ika i Cristo, ing Anak ning Dios.

Mat 26:64 I Jesus sinabi na kea, Ika sinabi mu: makanian man sasabian ku kekayu, king manibat pa ngeni akit ye ing Anak ning tau a makalukluk wanan na ning Kayupayan, at datang ya babo ding biga banua.

Mat 26:65 Kanita ing matas a sacerdote guinabak na ing keang imalan, nganang sinabi, Minyumpa ya: nanan tala pa ding saksi? Oini, ngeni dimdam yu na ing sumpa.

Mat 26:66 Nanung karin king lub yu? At ila mekibat la kanita, ngara, Karampatan kea ing kamatayan.

Mat 26:67 Kanita liran de lupa at timpaling: at ding aliwa piniugat de king sirul,

Mat 26:68 Ngara, Ulan mu kami, oh Cristo: ninu ing tinud keka?

Mat 26:69 Ngeni i Pedro makalukluk ya lual king patio: at linapit ya kea ing metung a ipus a babai, ngana, ika man abe na kang Jesus a Galileo.

Mat 26:70 Dapot ya lingad na king arapan ding sabla, ngana, E ku balu ing sasabian mu.

Mat 26:71 At panlual na king pasbul, ikit ne ning metung pang ipus a babai at ngana karetang atiu karin, Ini man abe neng Jesus Nazareno.

Mat 26:72 At pepaalian neng pepasibayu a maki lauk sumpa, E ke akikilala ing taung yan.

Mat 26:73 At miumanuman ditak, lepitan de detang karin makatalakad, at sinabi ra kang Pedro, Katutuan ika metung ka naman karela, uling king pamaniabi mu pakilala na ka.

Mat 26:74 Kanita migmula neng menagkas, ampon sinumpa, E ke akikilala ing taung yan. At ita murin tinulauk ya ing metung a tatio manuk.

Mat 26:75 At aganaka nang Pedro ing amanung guingkas nang Jesus, Bayu ya tulauk ing tatio manuk, ilingad mu kung makatatlung ulit. At linual ya kanita, at menangis yang kapaitpaitan.

Mat 27:1 Ngeni inyang mayabak na, ding anggang pun ding sacerdotes ampon ding makatua king balayan mipulung lang laban kang Jesus, bareng apapate:

Mat 27:2 At guinapus de, at dela re, ampon binie kang Pilato a gobernador.

Mat 27:3 Kanita i Judas a miglingu kea, inyang akit neng miatulan, sinisian na ing keang sarili, sibli nala ding atlung pulung salaping pilak karing pun ding sacerdotes at karing makatua,

Mat 27:4 Ngana, Aku mikasala ku, king pamaglingu ku king dayang alang kasalanan. Dapot ila sinabi ra, Nanu ita kekami? ikang bala.

Mat 27:5 At silbag no ding salaping pilak king santuario, at meko ya; at linakad at binitki na ing keang sarili.

Mat 27:6 At ding pun ding sacerdotes pinulut do ding salaping pilak, at sinabi ra, E dapat ibaldug la king kaban limus, uling abli lang daya.

Mat 27:7 At mipulung la, at piniali ro king marangle na ning metung a magtatalu, a pikukutkutan karing taung aliwang labuad.

Mat 27:8 Nung inya mipalaguiuwan ing labuad a ita, Ing marangle ning daya, angga man king aldo ngeni.

Mat 27:9 Kanita pin metupad ing mesabi king pamamilatan ning manulang i Jeremias, ngana, At kinua ro ding atlung pulung salaping pilak, abli ning mialagan, a inalaga ra ding mapilan karing anak ning Israel;

Mat 27:10 At penabli ro king marangle ning magtatalu, nung makananu nang inutus daptan kanaku ning Guinu.

Mat 27:11 Ngeni pin i Jesus makatalakad ya arapan ning gobernador: at kitnan ne ning gobernador, ngana, Ika pin ing ari ding Judios? At i Jesus sinabi na kea, Ika sasabian mu.

Mat 27:12 At inyang isumbung de ding pun ding sacerdotes ampon ding makatua, e mekibat nanu man.

Mat 27:13 Kanita i Pilato sinabi na kea, E mu daramdaman ing dakal a bague a sasaksi ra laban keka?

Mat 27:14 Dapot ya e ne pekibatan metung mang amanu: nanu pata ing gobernador bina yang migmulala.

Mat 27:15 Ngeni king pista kaugalian na ning gobernador mibulus king kekaldan metung a makasukul, itang aduan da.

Mat 27:16 At maki metung la ping makasukul a balita king dewakan, a milaguiuwan Barrabas.

Mat 27:17 Inyang makatipun la pin, sinabi nang Pilato karela, Ninung buri yu a kekong pabulus? i Barrabas, o i Jesus a milalaguiuwan Cristo?

Mat 27:18 Uling ya baluan na pin king binie re kea uli na ning diria.

Mat 27:19 At kabang makalukluk ne king piukuman, mitubud ya kea ing asawa na, ngana, E ka makialam king banal a taung yan; uling ing peninap ku king aldo iti dakal a bague mabayat king uli na mu.

Mat 27:20 Ngeni ding pun ding sacerdotes ampon ding makatua inabluk de ing balayan king aduan de i Barrabas, at pasintang ne i Jesus.

Mat 27:21 Dapot mekibat ya pin ing gobernador, at ngana karela, Ninu karing adua ing buri yu a kekong pubulus? At ila sinabi ra, I Barrabas.

Mat 27:22 Sinabi na karelang Pilato, Nanu pin ing daptan ku kang Jesus a milalaguiuwan Cristo? Ila ngan sinabi ra kea, Paburen meng mipaku.

Mat 27:23 At sinabi na, Baket, nanung depat nang marawak? Dapot ila kukulait lang masikan, ngara, Paburen meng mipaku.

Mat 27:24 Panakit na ping Pilato king ala yang akarapat, nung e bagkus daragul ing gulu, kinanua yang danum, at menuas yang gamat king arapan na ning kekaldan, nganang sinabi, Ala kung kasalanan king daya niting taung banal; ikayu nang bala.

Mat 27:25 At mekibat ya kanita ing mabilug a balayan, at ngana, Dumpa kekami, ampon karing anak mi ing daya na.

Mat 27:26 Binulus ne pin karela i Barrabas; dapot pepapaluka ne i Jesus at binie ne karela bang mipaku.

Mat 27:27 Kanita ding kawal ning gobernador dela re king Pretorio, ing mabilug a katipunan pepatulugan de.

Mat 27:28 At linubas de, at pepasuluranan deng metung a balabal a malutu.

Mat 27:29 At guinawa la kanita metung a coronang suksuk, at pinutung de king buntuk na, at ing metung a timbu king gamat nang wanan; ampon siniklaud la arapan na, susunu re, ngara, Ba pu, Ari ding Judios!

Mat 27:30 At panluran de, ampon kinua re ing timbu, at piniugat de king buntuk.

Mat 27:31 At kaibat deng piniunu, likas de kea ing balabal, at sinulud da kea ing tune nang imalan, layun delang liwal ban ipaku re.

Mat 27:32 At panlual da, ikit de ing metung a tau Cirene, milalaguiuwan Simon: iti pinilit deng tuki ya karela a migdala king cruz na.

Mat 27:33 At inyang miras nala king karinan a ausan dang Golgota, a ing buri nang sabian, Karinan na ning metung a bungu,

Mat 27:34 Pepainum deng alak a maki lauk atdu; dapot ya, kaibat nang tikman, e na ininum.

Mat 27:35 At inyang apaku ra ne, pirakerake ra ing keang imalan, peparalan da king pamipaningalma; bang matupad ing guingkas ning manula, Pirakerake ra ing imalan ku. Layun dang pipaningalman:

Mat 27:36 At linukluk la kanita, at binten de karin.

Mat 27:37 At binili re tulid ning buntuk na ing sumbung kea a makanian a pangasulat, ITI YA I JESUS ING ARI RA DING JUDIOS.

Mat 27:38 Kanita inabe rong pinaku kea ding aduang mapaniabat, ing metung king wanan na, at ing metung king kaili na.

Mat 27:39 At ding lalabas lilibakan de, pipiling la buntuk,

Mat 27:40 At ngarang sasabi, Ikang makalasak king pisamban, at king lub ning atlung aldo atalakad me, iligtas mu ing kekang sarili: nung ika ing Anak ning Dios, kuldas ka king cruz.

Mat 27:41 Makanian mu naman ding pun ding sacerdotes lilibakan de, pati na ding escribas ampon makatua, ngarang sinabi,

Mat 27:42 Ding aliwa linigtas nala; ing sarili na e na aligtas. Ya ing ari king Israel; kuldas ya ngeni king cruz, at maniwala ke kea.

Mat 27:43 Manalig ya king Dios; pabustan yeng ikabus ne ngeni, nung kaluguran ne: uling sinabi na, Aku ing Anak ning Dios.

Mat 27:44 At ding mapaniabat a abe nang makapaku, lilibakan dea naman.

Mat 27:45 Ngeni manibat king oras a kanam medalumdum king meto sikluban angga king oras a kasiam.

Mat 27:46 At inyang malapit na ing oras a kasiam, i Jesus kinulait yang masikan, nganang sinabi, Eli, Eli, lama sabachthani? a ing buri nang sabian, Dios ko, Dios ko, baket pepaimburisan muku?

Mat 27:47 Ding mapilan a atiu karin, panamdam da kaniti, sinabi ra, Ausan ne i Elias niti.

Mat 27:48 At agad nang milai ning metung karela, kinanua yang metung a esponja, at besa ne king aslam, at binili ne king metung a timbu, at binie ne kea bang painum.

Mat 27:49 Dapot ding aliwa sinabi ra, Paburen ye, alben tamu nung datang ya i Elias at iligtas ne.

Mat 27:50 At i Jesus miuman yang kinulait masikan, at binie ne ing keang espiritu.

Mat 27:51 At, oini, ing tabing ning pisamban meguisi yang adua karake, manibat babo angga lalam; at guinalgal ing gabun; at ding batu mengabangal la;

Mat 27:52 At ding kutkutan mengabuklat la; at ding dakal a katawan ding banal a mipatudtud tinikdo la;

Mat 27:53 At inyang lual la karing kutkutan, kaibat nang sinubling mebie, linub la king banal a ciudad, ampon pepakit la karing dakal.

Mat 27:54 Ngeni ing centurion pin, ampon ding abe nang babante kang Jesus, panakit da king ayun at king bague a mengapalyari, mitakutan lang bina, ngarang sinabi, Tutu pin king iti ya ing Anak ning Dios.

Mat 27:55 At atilu naman karin ding dakal a babai, makarayu lang lalawe, a deti tikian de i Jesus manibat Galilea, susuyu la kea:

Mat 27:56 Kareti atilu di Maria Magdalena, at i Maria a indu nang Santiago at Jose, ampon ing indu ra ding anak nang lalaking Zebedeo.

Mat 27:57 At inyang gatpanapun na, dinatang ya ing metung a taung mabandi a tubu Arimatea, a ing laguiu na Jose, iti alagad naya namang Jesus:

Mat 27:58 Ing lalaking iti dinurup ya kang Pilato, at inawad ne ing katawan nang Jesus. Kanita i Pilato inutus na king ibie re.

Mat 27:59 At kinua ne kanitang Jose ing katawan, binalut ne king metung a imalan a liensong malinis,

Mat 27:60 At binili ne king sarili nang kutkutan a bayung pepakulkul na king batu: at tinulang ne ing metung a batung maragul king pasbul ning kutkutan, at meko ya.

Mat 27:61 At karin la di Maria Magdalena ampon ing metung a Maria, makalukluk tulid ning kutkutan.

Mat 27:62 Ngeni kabukasan na nita, a ya ing aldo kaibat ning Pamiadia, ding pun ding sacerdotes ampon Fariseos dinurup lang miagnan kang Pilato,

Mat 27:63 Sinabi ra, Guinu, aganaka mi king itang mapamirait sinabi na kanita pang mabie ya, Katlung aldo subli kung mie.

Mat 27:64 Yutus mu king bantayan de ing kutkutan angga king katlung aldo, a magkang ayan de ding keang alagad, at panakawan de, at sabian da king balayan, Sinubli yang mebie ibat karing mete: at ing tauling kabalatungan lalu pang marawak king minuna.

Mat 27:65 Sinabi na karelang Pilato, Atin kong metung a bante: ume kayu, at pakaingatan ye king lalung mayap a kabaluan yu.

Mat 27:66 Ila mine la pin, at pekaingatan de ing kutkutan, layun tetakan de pa ing batu, kayabe re ing bante.

Mat 28:1 Ngeni king kawakasan na ning adlo sabbath, inyang ume neng mamunag ing mumuna nang kayaldawan ning paruminggu, ine reng delawan ing kutkutan di Maria Magdalena ampon ing metung a Maria.

Mat 28:2 At oini, minayun masikan; uling ing metung a angel ning Guinu tinipa yang ibat banua, at inyang miras ya, tinulang neng leko ing batu at linukluk ya babo na.

Mat 28:3 Ing aske na anti ya mong kildap, at maputing anting lipat ing keang imalan:

Mat 28:4 At king takut da kea ding bante guinalgal la, at anti la mong mete.

Mat 28:5 At sinabi ya ing angel kanita, ngana karing babai, E ko tatakut; uling balu ku king panintunan ye i Jesus, ing pinaku ra.

Mat 28:6 Alayu keti; sinubli ne ping mebie, anti ing sinabi na. Ume ko keni, lawan ye ing kebilianan ning Guinu.

Mat 28:7 At mako kong agad, ampon sabian yu karing alagad na king sinubli yang mebie ibat karing mete; at, oini, ume yang makauna kekayu karin Galilea; karin ye akit: oini, sinabi ku kekayu.

Mat 28:8 At ila kanita meko lang agad king kutkutan magdala lang takut at maragul a tula, at milai lang magdalang balita karing keang alagad.

Mat 28:9 At, oini, i Jesus selubungan nala, nganang sinabi karela, Pagmananuan da ko ngan. At ila, lepitan de kanita, at kinawat la karing bitis na, at layun deng simban.

Mat 28:10 Kanita i Jesus sinabi na karela, E ko tatakut: ume kayu, at sabian yu karing kapatad ku king tumuru la Galilea; at akit daku karin.

Mat 28:11 Ngeni kabang mame na la, oini ding mapilan karing bante, mine la king ciudad, pemalita ra karing pun ding sacerdotes ing anggang bague mengapalyari.

Mat 28:12 At inyang ibat nong mekitipun ampon mekipulung karing makatua, dininan dong dakal a kualta ding kawal,

Mat 28:13 Ngara, Sabian yu, Ding keang alagad dinatang lang bengi, at penako re inyang matudtud kami.

Mat 28:14 At nung iti damdaman na ning gobernador, ikami aguiagan miya, at ibili rako king panatag.

Mat 28:15 Ila pin kinua ro kanita ding kualta, depatan da anti mo ing mituru karela: at ing salitang iti mikalat karing Judios, at menatili angga king panaun a iti.

Mat 28:16 Dapot ding labing metung a alagad mine la Galilea, king bunduk a tiru nang Jesus karela.

Mat 28:17 At panakit da kea, simban de; dapot ding mapilan mikakunu la.

Mat 28:18 At linapit ya karela i Jesus, pekisabian nala, ngana, Ing anggang kayupayan karin banua ampon keti sulip miabie kanaku.

Mat 28:19 Ume ko pin, at mialal kong alagad karing anggang bansa, binyagan yu la king laguiu ning Ibpa, ampon ning Anak, ampon ning Espiritu Santo:

Mat 28:20 Ituru yu karela king tuparan de ding anggang bague a inutus ku kekayu: at oini, atiu ku kekayu kapilan man, angga man king kapupusan na ning yatu.

AMAZING GRACE BIBLE INSTITUTE