JudasJud 1:1 I Judas a talasuyu nang Jesucristo, at kapatad nang Santiago, karing meaus kalugud-lugud king Dios a Ibpa at meingat dikil kang Jesucristo: Jud 1:2 Kapakaluluan at kapayapan at lugud ing dakal sana kekayu. Jud 1:3 Kaluguran, kabang bibili ku ing anggang kasipagan king pamaniulat ku kekayu tungkul king kekata ngang kaligtasan, mapipilit kung sinulat kekayu, usukan dakayu king pakilaban ye sang mapilit ing kasalpantayanan a misan mu miabie karing banal. Jud 1:4 Uling ating mapilan a taung mangarawak a milub lang lijim aguiang detang a minunang misulat a makapauna dikil king kaparusan a iti, ding taung alang Dios, a deti lilibian da king kaibugan ning laman ing kalam ning kekatang Dios, at sasakuil de ing kekatang metung a Maestro at Guinu, a i Jesucristo. Jud 1:5 Ngeni pagnasan ku ping paganaka kekayu, bistat abalu yu ing keganaganang bague king misan mu, king ing Guinu, inyang aligtas ne ing balayan king labuad ning Egipto, kaibat na linipul no ding e meniwala. Jud 1:6 At ding angeles a e ra iningat ing karelang minunang pangabili, nung e likuan de ing sarili rang tuknangan, piniguil nala king pangasukul a alang angga lalam ning karalumduman angga king pamanukum king maragul a aldo. Jud 1:7 Anti mo ing Sodoma at ing Gomorra, at ding ciudad a pakapatulug karela, makanian la naman deti, a binie ra ing karelang sarili king pamakipangalugud, at menusig la king aliwang laman, mibibili lang anti mong pialimbawanan, a mibabata la king parusa na ning aping alang angga. Jud 1:8 Makanian man deti man king karelang paninap dirinatan de ing laman, at payalan dang ulaga ing kayupayan, at kalibakan salang karing pekapun. Jud 1:9 Dapot i Miguel a Arcangel inyang makilaban ya king diablo, mekitaltalan ya tungkul king katawan nang Moises, e mengangas migdala salang kea metung a kayatulan a pamanlibak, nung e sinabi na, Ing Guinu sabianan naka. Jud 1:10 Dapot deting kalibakan a nanumang bague e ra atatalastas: at nanuman ing talagang atatalastas da, anti mo ding melalang a alang katuliran, karing bague a deti magpakasira la. Jud 1:11 Kalulu nala! uling mine la king dalan nang Cain, at milai lang alang tarus king kabalatungan nang Balaam king kablasan, at mete la king kapanalangsangan nang Core. Jud 1:12 Deti musing la king kekong pista king lugud ngening makipagpista la kekayu, pastul lang alang takut a pakanan da ing karelang sarili; lulam a alang danum, a pitangetange na ning angin; dutung la king panaun a mula ning dimla alang bunga makaladua mete, meputput angga king wakat; Jud 1:13 Mabiyung lang alun ning dayatmalat, a bubula ra ing karelang sariling kamarinayan; batuin lang gagala, a karela misadia ing pisak na ning dalumdum angga king mangga. Jud 1:14 At kareti i Enoc, ing kapitu manibat kang Adam, menula ya, ngana, Oini, dinatang ya ing Guinu kambe no ding apulung libu karing keang banal, Jud 1:15 Bang daptan na ing pamanukum karing sabla, at bang misaldak yang parusa karing anggang mangarawak king anggang dapat dang mangarawak a depatan da king karawakan, at king keganaganang mangabayat a bague a ding makasalanan a mangarawak sinabi ra salang kea. Jud 1:16 Deti mapamulung la, mapanutul a lalakad agpang king karelang kelabuaran, (at ding asbuk da maniabi lang amanung binang palalu), papakit lang galang karing tau king uli na ning pakinabang. Jud 1:17 Dapot ikayu, kaluguran, ganakan yo ding amanung sinabi rang minuna ding apostoles na ning Guinu tang Jesucristo: Jud 1:18 Anti mo ing sinabi ra kekayu, King katataulian a panaun lunto la ding mapaniunu, a lumakad la agpang king karela mu ring mangarawak a kelabuaran. Jud 1:19 Deti ilang gagawang pamikakawani, maibugan king laman, a alayu karela ing Espiritu. Jud 1:20 Dapot ikayu, kaluguran, patibayan yu ing kekong sarili king banal yung diling kasalpantayanan, manalangin king Espiritu Santo, Jud 1:21 Ipanatili yu ing kekong sarili king lugud ning Dios, makalawe king pakalulu na ning Guinu tang Jesucristo, dikil king bie alang angga. Jud 1:22 At karing mapilan dapat kong pakalulu, karing atiu king kapikakunuan; Jud 1:23 At ding aliwa iligtas yula, samsaman yo king api; at karing mapilan mika pakalulu ko sang maki takut; isakuil yu mangga na ing imalan a mikadungis king laman. Jud 1:24 Ngeni itang maki aguiu a makaingat kekayu king pangatakid, at bang ayarap nakong alang kapintasan king arapan na ning keang ligaya kagum na ning lubus a tula; Jud 1:25 King metung mung Dios a Talapagligtas tamu king pamamilatan nang Jesucristo a kekatang Guinu, kea ing ligaya, ing dangalan, at ing pamaniakup at ing upaya, mumuna karing anggang panaun, at ngeni, at king kapilan pa man. Yanasa. |