SantiagoJas 1:1 I Santiago, metung a talasuyu na ning Dios at ning Guining Jesucristo, karing labingaduang dai ning Pamikalatkalat, kapagmananuan. Jas 1:2 Ibilang yu ngang tula, kanakung kapatad, ngening mananabu kayu king miayaliwang tuksu; Jas 1:3 Baluan yu king ing pangasubuk ning kekong kasalpantayanan darapat kapibabatan. Jas 1:4 At pabustan yu king ing kapibabatan mirinan sakdal a dapat, bakong maguing sakdal at tibubus, a e ko kukulang king nanumang bague. Jas 1:5 Dapot nung ing ninuman kekayu kukulang yang kabiasnan, maniawad ya king Dios, a ya babie nang ganap karing sabla at e mamalsala; at miabie kea. Jas 1:6 Dapot pabustan yang aduan na king kasalpantayanan, alang nanu mang kapikakunuan: uling itang mikakunu katulad ne ning metung a alun ning dayatmalat a tatabi ning angin at sapulsapulan. Jas 1:7 Uling e yu papustan isipan ning taung ita king tanggap yang nanumang bague king Guinu; Jas 1:8 Taung adua pilubluban, alang katibayan karing anggang keang dalan. Jas 1:9 Dapot pabustan ye ing kapatad a lalaki mababa dangalan magsaya king matas nang kabilian: Jas 1:10 At ing mabandi, kanita ya megawang mababa: uling anti mo ing bulaklak ning dikut makanian yang lumipas. Jas 1:11 Uling ing aldo saslag ya kagum ning mapaling angin, at palangian na ing dikut; at malagas la ding bulaklak, ampon mawala ing sintingan na ning keang anyu: makanian ya namang kukupas ing masalapi king keang kalakaran. Jas 1:12 Nuan ya ing taung mibabata king tuksu; uling panga mesubuk ya, tanggapan ne ing corona ning bie, nung isanu ing pengaku ning Guinu karing kea lulugud. Jas 1:13 E yu tutulut king tau ing sabian na nung mitutuksuan ya, Tutuksuan naku ning Dios; uling ing Dios e malyaring matuksu king marawak, at ya king sarili na alang tutuksuan a tau: Jas 1:14 Dapot ing balang tau mitutuksuan ya, ngening mitataguyud ya king sarili nang kelabuaran, at masilu ya. Jas 1:15 Kanita ing kelabuaran, ngening mipangagli ya, ibunga na ing kasalanan: at ing kasalanan, ngening ganap ne king dagul, ibunga ne ing kamatayan. Jas 1:16 E ko pairait, kaluguran kung kapatad. Jas 1:17 Ing balang mayap a pigkalub ampon ing balang miabie sakdal pawang ibat babo, a kukuldas ibat king Ibpa ding sulu, a kea alang pamiayaliwa, ni anino man a misabug king uli ning pamibalik. Jas 1:18 King sarili nang kaburian ya penganak nakatamu king amanu ning katutuan bang itamu maguing metung tang adle karing mumuna rang bunga ding keang lelangan. Jas 1:19 Baluan yu iti, kaluguran kung kapatad. Dapot malagawa ya sang makiramdam ing balang tau, banayad maniabi, makupad mimua; Jas 1:20 Uling ing mua ning tau e darapat king katuliran na ning Dios. Jas 1:21 King uli na niti ikawani yu ing anggang karinatan at ing lalapo dewakan, tanggapan yu king kamung lub ing amanung mitanam, a mayupayang magligtas karing kekong kaladua. Jas 1:22 Dapot maguing talatupad kayu king amanu, at e mu kabud talapakiramdam, a pipiraitnan yu ing kekong sarili. Jas 1:23 Uling nung ing ninumang talapakiramdam ya king amanu at e ya taladapat, ing anti kaniti katulad ne ning metung a tau a lalawan ne ing katutubu nang lupa king metung a salamin: Jas 1:24 Uling ya lawan na ing sarili na, at mako ya, at agad nang akalinguan nung nanu ya aske tau. Jas 1:25 Dapot itang lalawe king kautusan a sakdal, ing kautusan ning katimawan, at manatili ya, e ya mu talapakiramdam a mapangalinguan nung e talatupad a darapat, ing taung iti mipanuanan ya king keang dapat. Jas 1:26 Nung ing ninu mang tau isipan na king sarili na king talasamba ya, kabang e ne pipiguilan ing keang dila dapot pipiraitnan ne ing keang pusu, ing religion na ning taung iti alang kabaldugan. Jas 1:27 Ing religion a malinis at alang musing king arapan ning kekatang Dios At Ibpa ya iti, dalawan la ding ulila ampon ding mebalung babai king karelang kalungkutan, at ingatan na ing sarili na ning balang metung a alang dungis king yatu. Jas 2:1 Kakung kapatad, e yu babandian ing kasalpantayanan ning kekatamung Guinu a i Jesucristo, ing Guinu ning ligaya, a maki kapamilinan karing tau. Jas 2:2 Uling nung lungub ya king kekong sinagoga ing metung a taung magsingsing guintu, ampon miimalan masanting, at lungub ya naman ing metung a malukang taung miimalan maluka; Jas 2:3 At mika panalala kayu king makaimanlan masanting, at sabian yu, Lukluk ka keni king metung a karinan a mayap; at king malukang tau sabian yu, Talakad ka kean, o lukluk ka lalam ning dalpakan ning kakung bitis; Jas 2:4 E ko gagawang pamialiwa king kekong sarile, at maguing ukum a maki kaisipan a marawak? Jas 2:5 Pakiramdaman yu, kaluguran kung kapatad; e no pinili ning Dios ding maluka ingguil king yatu bang maguing mabandi king kasalpantayanan, ampon talapagmana king kayarian a nung isanu ing pengaku na karing kea lulugud? Jas 2:6 Dapot ikayu leko ye puri ing taung maluka. Anta ding mabandi e rako alipitan, at ila mu rin guguyud dakayu arapan ding luklukan ning piukuman? Jas 2:7 E re Paniumpan itang mapuring laguiu a nung kaisanu kayu meaus? Jas 2:8 Makanian man nung kekong tuparan ing marangal a kautusan, agpang king kasulatan, Luguran me ing kalupa mung tau anti mo ing pamanlugud mu king kekang sarili, darapat kong mayap: Jas 2:9 Dapot nung atin kong pamamili karing tau, mikakasala kayu, miatulan ko king kautusan anti mong talapanalangsang. Jas 2:10 Uling ninu ya man ing mimingat king mabilug a kautusan, at miragsa ya king metung mung tuldik, ya meguing pikasalanan na no ngan. Jas 2:11 Uling itang sinabi, E ka darapat paliwas, sinabi na naman, E ka makamate. Ngeni pin nung ika e ka darapat paliwas, dapot makamate ka, meguing mapanalangsang ka king kautusan. Jas 2:12 Makanian ko ping maniabi, at makanian kong dapat, anti mong taung miatulan king kautusan ning katimawan. Jas 2:13 Uling ing pamanukum alang pakalulu kanitang e pepakit pakalulu: ing pakalulu paligaya salang king pamanukum. Jas 2:14 Nanung pakinabang, kakung kapatad, nung ing tau sabian na king atin yang kasalpantayanan, dapot ala yang dapat? Aligtas ne ning anti itang kasalpantayanan? Jas 2:15 Nung ing metung a kapatad a lalaki o metung a kapatad a babai lubas ya at ala yang kanan aldoaldo, Jas 2:16 At ing metung kekayu sabian na karela, Ume kong payapa, magpakapali kayu at magpakatmu; dapot e yu babie karela ing bague a kailangan king katawan; nanu ing pakinabang? Jas 2:17 Makanian mu naman ing kasalpantayanan, nung ala yang dapat, mete ya king keang sarili. Jas 2:18 Wa, ing metung a tau sabian na, Ika atin kang kasalpantayanan, at aku atin kung dapat: pakit mu kanaku ing kekang kasalpantayanan a makakalilua king kekang dapat, at aku karing kakung dapat pakit ku keka ing kakung kasalpantayanan. Jas 2:19 Ika paniwalan mu king ing Dios metung ya mu; mayap ing daraptan mu: ding demonios man maniwala la, at gagalgal. Jas 2:20 Dapot buri mung abalu, Oh taung alang kabaldugan, a king ing kasalpantayanan a alang dapat baug ya? Jas 2:21 E wari i Abraham a kekatang ibpa meyakit yang banal king uli ning dapat, inyang inain ne i Isaac a keang anak babo na ning altar? Jas 2:22 Ika akakit mu king ing kasalpantayanan darapat a kagum na ing keang dapat, at king pamamilatan ding dapat ing kasalpantayanan meguing sakdal ya; Jas 2:23 At metupad ya ing kasulatan, a ngana, At i Abraham meniwala ya king Dios, at mibilang keang kabanalan; at meaus yang kakaluguran na ning Dios. Jas 2:24 Akakit yu king uli na ning dapat maguing banal ya ing tau, at e mu bukud king uli na ning kasalpantayanan. Jas 2:25 At makanian mu naman i Rahab a patutut e ya metanggap banal king dapat, inyang tinggap nala ding tubud, at pepadala no king aliwang dalan? Jas 2:26 Uling nung makananu ing katawan makakawani ya king espiritu mete ya, makanian ya naman ing kasalpantayanan a makakawani king dapat mete ya. Jas 3:1 E la sa maguing talaturu ding dakal kekayu kapatad ku, pangabaluan tamu king tanggap tang lalu pang mabayat a pangayatul. Jas 3:2 Uling ita ngan mitatakid tamu king dakal a bague. Nung ninuman ing e mitatakid king amanu, ing anti kaniti metung yang taung ganap, aguiu nia namang pamajalan ing mabilug a katawan. Jas 3:3 Ngeni nung ibili tala ding busal karing asbuk ding kabayu, bang mamintu la kekatamu, abalik tala naman ding mabilug dang katawan. Jas 3:4 Oreni, mu naman ding daung, aguiang ila tutu lang mangaragul, at tutulak nala ning masikan a angin, makanian man king pamamilatan na ning lalung malating uguit, abalik nala nukarin man ing buri na ning talauguit. Jas 3:5 Makanian mu naman ing dila metung yang dake a malati, at magpalalu ya karing mangaragul a bague. Lawan yu nung nuanti karakal a dutung ing apatawan na ning ditak a api! Jas 3:6 At ing dila metung yang api: ing metung a yatu ning dewakan karing dake tang katawan ya ing dila, nung isanu ing parawak king mabilug a katawan, at susulsulan ne ing parulang ning katutubu at susulsulan na ne man ning api ning infierno. Jas 3:7 Uling ding anggang miayaliwang lasip ampon ayup, ding bague a gagapang at ding bague king dayatmalat, tutunud la, at apapatunud no ning tau: Jas 3:8 Dapot ing dila e ne apakamu ning ninumang tau; metung yang marawak a e tutuknang, a mipnung lasun a makamate. Jas 3:9 Ya ing pamuri tamu king Guinu ampon Ibpa; at ya ing palmura tamu karing tau, a melalang katulad ning wangis ning Dios: Jas 3:10 King metung mu ring asbuk lulual ing pamamuri at pamalmura. Kakung kapatad, ding bague a deti e la dapat mipakanian. Jas 3:11 Ing bukal wari mumulmul na king metung mu ring sibul ing danum a mayumu ampon mapaet? Jas 3:12 Malyari king metung a dutung a higuera, kakung kapatad, ing mamunga yang aceitunas, o ing uvas higos? E mu naman malyari a ing malat munie danum a matabang. Jas 3:13 Ninu ing biasa at matalas a isip kekayu? pabustan yung pakit na king uli ning mayap nang bie ing keang dapat king kamu na ning kabiasnan. Jas 3:14 Dapot nung atin kong mapait a kapangalaluan ampon pamikampikampi king kekong pusu, e ko maliligaya at e ko maglaram salang king katutuan. Jas 3:15 Ing kabiasnan a iti aliwa ing metung a kabiasnan a kukuldas manibat babo, nung e ya ing kayatuan, kelabuaran, king diablo. Jas 3:16 Uling nung nukarin ating kapangalaluan ampon pamikampikampi, atiu karin ing kaguluan ampon ing anggang dapat a marawak. Jas 3:17 Dapot ing kabiasnan a manibat babo munangmuna wagas, layun payapa, majalan, mayan pagamuamuan, mitmung kapakaluluan ampon mangayap a bunga, alang pamiayaliwa, alang pamagbanalbanalan. Jas 3:18 At ing bunga ning kabanalan mitatanam ya king kapayapan, karing darapat king kapayapan. Jas 4:1 Nu manibatan ing pamipamuk ampon nu manibatan ing pamipate libutad yu? e la wari manibatan kanita, aguiang ing sarili yung kaburian a makipamuk karing dake ning kekong katawan? Jas 4:2 Mangaibugan kayu, at e ko mikakayatin: makamate kayu, at manangkamin, at e yu malyaring akamtan: makipate kayu at makipamuk; ala kekayu, uling e ko maniawad. Jas 4:3 Maniawad kayu at e ko tatanggap, uling maniawad kayu king e karampatan bang gugulan yu king kekong pamitutula. Jas 4:4 Ikayung paliwas, e yu wari balu king ing pamakikaluguran king yatu pamakipagkamua king Dios? Nung makanian ninu ya man ing bisang maguing kakaluguran na ning yatu gagawan na ing sarili na a kapagkamua ning Dios. Jas 4:5 O isipan yu galang king ing kasulatan maniabi yang alang kabaldugan? Ing espiritu wari a nung isanu ing guewa nang manuknangan kekatamu magimbut ya king diria? Jas 4:6 Dapot ya babie yang lalung dakal a kalam. King uli na niti sasabian na ning kasulatan Ing Dios sasalangsang ya king papalu, dapot babie yang kalam king mapagpakumbaba. Jas 4:7 King uli na niti pasakup ko pin king Dios; dapot salangsang kayu ding diablo, at ya takasan nakayu. Jas 4:8 Lumapit kayu king Dios, at ya lapitan nakayu. Linisan yula ding kekong gamat, ikayung makasalanan; at pawagasan yula ding kekong pusu, ikong maki adua pilubluban. Jas 4:9 Paipagkasakit kayu, at pailungkut ampon manangis: pabustan yung ing kekong aili mialilan lungkut, at ing kekong saya king pagbitkil. Jas 4:10 Magpakumbaba kayu king panimanman na ning Guinu, at ya isaplala nakayu. Jas 4:11 Kapatad, e ko maniabing makasalangsang king metung at metung. Itang maniabing salang king kapatad, o atulan ne ing keang kapatad, maniabi yang salang king kautusan, at atulan ne ing kautusan: dapot nung atulan me ing kautusan, ika e ka talatupad king kautusan, nung e metung kang ukum. Jas 4:12 Metung yamu kabud ing babie king kautusan ampon ukum, a ya itang makapagligtas, ampon makasintang: dapot ninu ika a atulan me ing kekang kalupang tau? Jas 4:13 Lumapit ngeni, ikong sasabi, Ngening aldo iti o bukas ume kami king ciudad a ini, at gumugul keng pabanua karin, at mangalakal, ampon magtubu: Jas 4:14 Bagkus e yu man balu nung nanu ing malyari king aldo bukas. Nanu ing kekong bie? Uling metung kayung singo a king saguling panaun lalto, at kaibat mawala. Jas 4:15 King anti ita dapat yung sabian. Nung ing Guinu burian na, ita ngan mie tamu, at daptan ini o ita. Jas 4:16 Dapot ngeni maliligaya kayu king kekong pamagpalalu: ing anggang pamipaligaya a anti kaniti marawak. Jas 4:17 Kanitang maki balu pin king pamaniapat mayap, at e na daraptan, king kea iti kasalanan. Jas 5:1 Lumapit ngeni, ikong mabandi, tumangis kayu at maniambitan king uli na ning kekong kabiguan a datang kekayu. Jas 5:2 Ing kekong pibandian mabubuluk, at ing kekong imalan mayayatat pulilia. Jas 5:3 Ing kekong guintu ampon ing kekong pilak mikakalawangan la; at ing kalawang da yang malyaring saksi salang kekayu, at kanan na ing kekong laman anti mong api. Ikayu binili yu ing kekong pibandian karing katataulian a aldo. Jas 5:4 Oini, ing upa ra ding talapagobra a memalut karing kekong marangle, nung isanu ding kekong sininup uli ning pamamirait, gugulisak la: at ing gulisak da ding mamalut linub karing balugbug ning Guinu ning Sabaoth. Jas 5:5 Mebie kayung layo king babo ning labuad, at kinua yu ing kekong pamitutula, pepataban yula ding kekong pusu king aldo na ning pamakamate. Jas 5:6 Perusan ye, pete ye ing metung a banal; ya e lalaban kekayu. Jas 5:7 Mibata kayu nung makanian, kapatad, angga king paniatang na ning Guinu. Oini, ing manasik panayan na ing mayulagang bunga ning labuad, mibabata ya kaniti, angga king tanggapan na ing maranun at tauling uran. Jas 5:8 Mibata kayu naman: patibayan yula ding kekong pusu: uling ing paniatang ning Guinu malapit na. Jas 5:9 E ko mibubulungan, kapatad, ing metung salang king metung, bang e ko mayatul: oini, ing ukum makatalakad ya arapan ding pasbul. Jas 5:10 Kapatad, kuanan yung alimbawa ing kasakitan at kapibabatan ding manula a miniabi king laguiu ning Guinu. Jas 5:11 Oini, ausan milang nuan ding mibata: dimdam yu ing kapibabatan nang Job, at ikit yu ing katataulian ning Guinu, a nung makananu king ing Guinu mitmu ya king lunus at pakalulu. Jas 5:12 Dapot maiguit king sabla, kakung kapatad, e ko susumpa, aguiang king uli ning banua, aguiang king uli ning gabun, aguiang king uli ning isanumang aliwang sumpa: dapot pabustan yung ing kekong wa, maguing wa ya, at ing kekong ali, ali; bang e ko mabaldug lalam ning parusa. Jas 5:13 Ating ninu mang magkasakit libutad yo? pabustan yeng manalangin. Ating ninu mang matula? pabustan yeng dalit kapurian. Jas 5:14 Ating ninu mang masakit libutad yo? pabustan yeng payaus karing makatua king iglesia, at pabustan yong ipanalangin de, lanian de king laru king laguiu ning Guinu: Jas 5:15 At ing panalangin ning kasalpantayanan iligtas ne itang masakit, at ibangun ne ning Guinu; at nung dinapat yang kasalanan, mipatawad la kea. Jas 5:16 Nung makanian ipasiag yu ing kekong kasalanan king metung at metung, at mipanalangin kayu ing metung at metung, bakong kumayap. Dakal ing arapat na ning taimtim a panalangin na ning taung banal. Jas 5:17 I Elias metung yang taung kalupa ta king kapagnasan, at menalangin ya king taimtim a panalangin king e sa mumuran; at e minuran babo ning labuad king lub ning atlung banua ampon anam a bulan. Jas 5:18 At pepasibayu yang menalangin; at ing banua minie yang uran, at ing labuad binunga na ing keang bunga. Jas 5:19 Kapatad ku, ninuman kekayu ing milisia a ibat king katutuan, at ing metung pabalikan ne, Jas 5:20 Pabustan yung abalu na, king itang papibalik king metung a makasalanan ibat king maling dalan iligtas ne king kamatayan ing metung a kaladua, at atakpan na ing dakal a kasalanan. |