HebreoHeb 1:1 Ing Dios, anti ning sinabi na king minunang panaun karing ibpa king pamamilatan ding manula king miayaliwang dake, at king miayaliwang paralan, Heb 1:2 Sinabi na king katataulian da deting aldo, kekami king pamamilatan ning Anak na, nung ninu ing tilduan nang talapagmana karing anggang bague, a king pamamilatan na naman guewa no ding panaun; Heb 1:3 A iti, anti ning ningning ne ning keang ligaya, ampon tune neng larawan ning keang katawan at mamalale karing sablang bague king amanu ning keang upaya, inyang guewa na ing pamanlinis king kasalanan, linukluk ya king wanan ning Dangalan king katasan; Heb 1:4 Anti ning meguing bina yang mayap karing angeles, pablasang migmana yang lalung mayap a laguiu king karela. Heb 1:5 Uling kaninu karing angeles a miniabi ya king king kapilan pa man, Ika ing kakung Anak, King aldo iti aku penganak da ka? at pasibayu, Aku maguing Ibpa ku kea, At ya ing maguing Anak ku? Heb 1:6 At inyang pepasibayu neng dela ing pangane king yatu sasabian na, At paburen la ding anggang angeles na ning Dios samban de. Heb 1:7 At karing angeles sasabian na, Ya ing gagawang angin karing angeles na, At ding talapanibala na metung a lablab ning api: Heb 1:8 Dapot king Anak sasabian na, Ing kekang luklukan, Oh Dios, angga ya king mangga; At ing cetro ning katuliran yang cetro na ning kekang kayarian. Heb 1:9 Liguran mu ing katuliran, at kesaman mu ing dewakan: Inya pin ing Dios, ing kekang Dios, Linian naka king laru ning tula a maiguit karing kekang kayabe. Heb 1:10 Ampon, Ika, Guinu, king kamumulan binili me ing pitatalakaran ning labuad, At ding banua dapat do ding gamat mu: Heb 1:11 Ila mangapupus la; dapot ika manatili ka; At ila ngan mayaran la, anti mong metung a imalan; Heb 1:12 At anti mong metung a balabal ilulun mula, Anti mong imalan, at mialilan la: Dapot ika ing sadia mu rin, At ding banua mu e la mapupus. Heb 1:13 Dapot kaninu karing angeles a miniabi ya king kapilan pa man. Lukluk ka king wanan ku, Anggang king gawan ko ding kekang kasalang dalpakan ding kekang bitis? Heb 1:14 E ila ngan espiritu lang manibala, a mituburan bang sumuyu karetang magmana king kaligtasan? Heb 2:1 King uli na niti dapat tang munie lalu pang maingat a pamakiramdam karing bague a meramdam, a magkang sakaling milaut tamu karela. Heb 2:2 Uling nung ing amanung mesabi king pamamilatan da ding angeles mesubuk matibe, at ing balang kapanalangsangan ampon e kapamintuan tinggap na ing matulid a kabayaran; Heb 2:3 Makananu tang mitakas, nung paimburisan tamu ing binang maragul a kaligtasan? a iti minuna mesabi king pamamilatan ning Guinu, mipatutuan kekatamu king pamamilatan ding mekaramdam; Heb 2:4 Ing Dios patutu ya naman karela a kagum ding tanda at pagmumulalan, at king miayaliwang bague a mala, at king kalam na ning Banal a Espiritu, agpang king sarili nang kaburian. Heb 2:5 Uling e na karing angeles pepasakup ing panaun a datang, a iti yang sasabian tamu. Heb 2:6 Dapot ing katau king metung a karinan pepatutuan na, ngana, Nanu ya ing tau, bameng ganakan? O ing anak ning tau, bameng dalawan. Heb 2:7 Guewa meng mababa mung ditak karing angeles: Pitungan meng ligaya at puri, At binili me babo ra ding dapat ding kekang gamat: Heb 2:8 Binili mo ding keganaganang bague king pangasakup lalam ding keang bitis. Uling king pamipasakup na king keganaganang bague kea, nanuman alang melakuan a e makasakup kea. Dapot ngeni e tala akakit ding keganaganang bague a makasakup kea. Heb 2:9 Dapot lalawan taya ing megawang mababa mung ditak karing angeles, a ya i Jesus, king uli na ning kasakitan na king kamatayan a miputungan ligaya ampon puri bang king uli na ning kalam na ning Dios takman na ing kamatayan king balang tau. Heb 2:10 Uling meguing ya ita, a nung kenu la ding keganaganang bague, at nung kenu king pamamilatan na ding keganaganang bague, ing migdala karing dakal a anak king ligaya bang gawan neng sakdal ing maki rapat king karelang pangakabus king pamamilatan da ding kasakitan. Heb 2:11 Uling ing papagbanal, anti naman ding maguing banal, metung la mu: king uli na niti e no pikarine ausan kapatad, Heb 2:12 Sasabian na, Pamalita ke ing kekang laguiu karing kakung kapatad, King libutad ning kapamisanan ku ing kapurian mu. Heb 2:13 At pasibayu, Aku ibili ku ing kapanaligan ku kea. At pasibayu, Oini, aku ampon ding anak a binie na kaku ning Dios. Heb 2:14 Manibat kanita ding anak makarake la king laman king daya, ya man anti mu rin dinake ya king anti kaniti; bang king pamamilatan na ning kamatayan dalan ne king pangawala itang maki upaya king kamatayan, a ya iti, ing diablo; Heb 2:15 At iligtas nala detang a king pamamilatan ning takut king kamatayan kabang bie ra makasakup la king pangaalipan. Heb 2:16 Uling king katutuan e karing angeles karin ya babie saup, nung e babie yang saup karing palipi nang Abraham. Heb 2:17 King uli na niti karampatan kea king keganaganang bague milupa ya karing keang kapatad, bang maguing metung yang mapamakalulu at tapat a matas a sacerdote karing bague a makatungkul king Dios, bayang gawang pakalambut lub makarikil king kasalanan na ning balayan. Heb 2:18 Uling anti ning ya migkasakit ya king pangatuksuan, ya malyaring asaupan nala naman detang mitutuksuan. Heb 3:1 King uli na niti, banal a kapatad, karake king metung a aus king banua, ganakan ye ing Apostol at Matas a Sacerdote ning kekatang pamanalese, a ya i Jesus; Heb 3:2 A iti tapat ya ketang kea mialal, anti mu naman i Moises king mabilug nang bale. Heb 3:3 Uling mibilang yang karampatan king labis pang kaligayan kesa kang Moises, king uli ning itang mitalakad king bale atin yang maiguit a kapurian kesa king bale. Heb 3:4 Uling ing balang bale mitalakad ya king pamamilatan ning aliwa: dapot ing mitalakad karing sablang bague ya ing Dios. Heb 3:5 At i Moises king katutuan tapat ya king mabilug nang bale anti mong metung a talasuyu, king pamipatutu karetang bague a masabi pangaibat; Heb 3:6 Dapot i Cristo anti mong metung a anak, a sasakup king keang bale; a ing bale a iti itamu, nung ingatan tamung matibe ing kekatang tetagan at ing pamipaligaya ning kekatang kapanayan manatili angga king kapupusan. Heb 3:7 King uli na niti, nung makananu nang sasabian ning Espiritu Santo, Ngeni nung damdaman yu ing keang siwala, Heb 3:8 E yo pasiasan ding kekong pusu, anti mo ing king pamamungkasi, Anti mo ing king aldo na ning pamanuksu king ilang. Heb 3:9 Nung nukarin ding kekong mangatua tiksuan daku king pamaniubuk da kanaku, At ikit do ding kakung dapat king apatapulung banua, Heb 3:10 King uli na niti e ku metula king daing iti, At sinabi ku, Mababalatung lang parati king karelang pusu: Dapot e ro balu ding kakung dalan; Heb 3:11 Anti ning sinumpa ku king kakung mua, E la lungub king kakung kapainawan. Heb 3:12 Mingat kayu, kapatad, a magkang atin kenuman kekayu a metung a marawak a pusu ning kealan pamaniwala, king pamangalilua king Dios a mabie; Heb 3:13 Dapot miuusukan ya ing metung at metung kekayu aldoaldo, kabang mayayaus yang Ngeni; magkang ing ninuman kekayu maguing masias ya king uli na ning pirait na ning kasalanan: Heb 3:14 Uling meguing karake nakatang Cristo, nung ingatan tamung matibe ing kamumulan na ning kekatang kapanaligan angga king kawakasan: Heb 3:15 Kabang masasabi, Ngeni nung damdaman yu ing keang siwala, E yo pasiasan ding kekong pusu, anti mo king pamamungkasi. Heb 3:16 Uling ninu a inyang dimdam da, ing memungkasi? wa, e ding anggang meko Egipto king pamamilatan nang Moises? Heb 3:17 At kaninu ya e metula apatapulung banua? E wari karing mikasala, a ding karelang katawan miragsa la king ilang? Heb 3:18 At kaninu na simpa king e la milub king keang kapainawan, nung e karetang sinalangsang? Heb 3:19 At akakit ta pin king e la milyaring milub king uli na ning kealan pamaniwala. Heb 4:1 Tumakut tamu pin, a magkang, uling ating melakuan a pangaku king pamanlub king keang kapainawan, ating ninuman kekayu a balamu e makayabut kaniti. Heb 4:2 Uling king katutuan atin tang mayap a balita mipanaral kekatamu, anti mo karela: dapot ing amanu ning pamakiramdam e meguing pakinabang karela, uling alang kagum a kasalpantayanan karing mekaramdam. Heb 4:3 Uling itamung meniwala lulub tamu ketang kapainawan a ita; nung makananu nang sinabi, Anti ning simpa ku king kakung mua, E la lungub king kakung kapainawan: aguiang ding dapat meari la manibat king pangalalang ning yatu. Heb 4:4 Uling sinabi na king metung a panig tungkul king aldo a kapitu king anti keni, At pepainawa ya ing Dios king kapitung aldo king sabla nang dapat; Heb 4:5 At king panig a iti pasibayu, E la lungub king kakung kapainawan. Heb 4:6 Nung inya pin anti ning atin pang makatagan king ding mapilan sukat ing lungub la karin, at detang king karela mipanaral lang minuna ding mangayap a balita e la milub king uli na ning kealan kapamintuan, Heb 4:7 Pasibayu pa tutulduan na ing metung a aldo, Ngeni, masasabi kang David kaibat ning makabang panaun (anti mo king atiung mesabi nang minuna), Ngeni nung damdaman yu ing keang siwala, E yo pasiasan ding kekong pusu. Heb 4:8 Uling nung i Josue dininan nong kapainawan, e ne sa maniabi pa kaibat dikil king metung a aliwang aldo. Heb 4:9 Atin pa ping mitatagan metung a sabbath dikil king balayan na ning Dios. Heb 4:10 Uling ing milub king keang kapainawan ya mu rin naman pepainawa ya karing dapat na, anti mo ing depatan ning Dios karing kea. Heb 4:11 Munie ta ping kasipagan bang milub tamu king kapainawan a ita, bayang e manabu ing ninuman dikil king alimbawa na naman ning pamanalangsang. Heb 4:12 Uling ing amanu ning Dios mabie, at darapat, at mataram pa king kaisanumang talibung a adua taram, at tatalab ya angga king pamikawani na ning kaladua ila ning espiritu, ding pikalukaluan ila ning utak, at maliksi yang kilala karing kaisipan ampon karing nasa ning pusu. Heb 4:13 At alang metung mu mang melalang a e mipakit king keang panimanman: nung e bagkus ding keganaganang bague lubas la ampon makabuklat la karing mata na nitang kekatamung pagsulitan. Heb 4:14 Anti na ning atin ping metung a maragul a matas a sacerdote, a linub karing banua, a i Jesus a Anak ning Dios, kawatan tamung matibe ing kekatang pamanalese. Heb 4:15 Uling ala tang metung a matas a sacerdote a e malyaring matagkil karing panamdam na ning kekatang keinan; nung e metung ya a mituksuan king keganaganang bague anti mo itamu, makanian man ala yang kasalanan. Heb 4:16 Tara lumapit ta ping maki tetagan king luklukan na ning kalam, bang tanggap tamung kapakaluluan, at manakit tang kalam a sumaup kekatamu king panaun ning pamagkailangan. Heb 5:1 Uling balang matas a sacerdote, anti ning meyakua ya karing tau, mialal ya dikil karing tau karing bague a makatungkul king Dios, ban idaun na ing pagkalub ampon ain king uli na ning kasalanan, Heb 5:2 A makapibata yang mamu lub karing alang malit at karing mababalatung, pablasang ya man makapatulug ya king keinan: Heb 5:3 At king uli na niti atiu king katungkulan, anti mong dikil king balayan, makanian mu naman dikil king keang sarili, a main dikil king kasalanan. Heb 5:4 At ninuman e na kakuanan ing kapurian king sarili na, nung e mu nung meaus ya king Dios, anti mo i Aaron. Heb 5:5 Makanian mu naman i Cristo e na pepaligayan ing keang sarili bang magawa yang matas a sacerdote, nung e itang kea sinabi. Ika ing kakung Anak, King aldo iti aku penganak daka: Heb 5:6 Anti mo ing sasabian na naman king aliwang panig, Ika Sacerdote ka king kapilan pa man, Dikil king pangasacerdote nang Melquisedec. Heb 5:7 Nung ninu ing king aldo na ning keang laman, minain yang panalangin ampon pamagamuamu kagum ning masikan a kulisak at lua kanitang maki aguiu bang ikabus ne king kamatayan, at meramdam ya king keang banal a takut, Heb 5:8 Aguia mang ya metung yang Anak, makanian man pegaralan na ing pamamintu king uli ra ding bague a pibata na; Heb 5:9 At inyang sakdal ne, meguing penibatan ne ning alang anggang pangakabus da ding sablang kea mamintu; Heb 5:10 Pemalaguiuwan ne ning Dios matas a sacerdote agpang king pangasacerdote nang Melquisedec. Heb 5:11 A tungkul kea atin keng sabian a dakal a bague, at masakit pibaldugan: pablasang meguing mapurul ko king pamakiramdam. Heb 5:12 Uling inyang king uli na ning panaun a sukat kong maguing talaturu, kailangan yung pasibayu king ing ninuman ituru no kekayu ding pitatalakaran da ding mumunang tuntunan karing waga na ning Dios; at meguing anti kayu karing mangailangan gatas, at e king masias a pamangan. Heb 5:13 Uling balang metung a gagamit gatas ala yang sibukan king amanu ning katuliran; uling metung yang pungul. Heb 5:14 Dapot ing pamangan a masias karing ganap na king ketuan, karetang a king uli na ning pamangamit misane na ing karelang panamdam bang akilala ra ing mayap ampon ing marawak. Heb 6:1 King uli na niti, lakuan la ding doctrina karing mumunang tuntunan nang Cristo, magkapilit tang sumulung angga king kasakdalan; e tamu mibibiling pasibayung katatalakaran na ning pamanisi karing dapat a mete, anti naman ning kasalpantayanan king Dios, Heb 6:2 King turu karing binyag, at king pamitumpak karing gamat, at king pamaniubli rang mie ding mete, ampon king pamanukum a alang angga. Heb 6:3 At daptan tamu iti, nung ipaintulut ning Dios. Heb 6:4 Uling anti mo ing pamaniaglawe karing miaslagan mu misan at alasa ra ing kalam na ning banua, at meguing karake la king Espiritu Santo, Heb 6:5 At alasa ra ing mayap a amanu ning Dios, at ding upaya ning panaun a daratang, Heb 6:6 At kaibat mebaldug lang marayu, e na malyaring abayu lang pasibayu king pamanisi; anti ing akakit a papaku reng pasibayu king karelang sarili ing Anak ning Dios, at bibili re king bulalag a kamarinayan. Heb 6:7 Uling ing labuad a sinipsip king uran a manibatan madalas babo na, at patubung tanaman a makatalagang karampatan karetang king uli ra mesese mu rin iti, tatanggap kanuanan a ibat king Dios: Heb 6:8 Dapot nung patubu yang suksuk at aya, misakuil ya, at malapit ya king sumpa; a ing keang kararasan ya ing pangaduluk. Heb 6:9 Dapot, kakung kaluguran, manaya ke king mangayap a bague kekayu, at bague a kalangkap ning pangakabus, aguiang maniabi kami king makanian: Heb 6:10 Uling ing Dios e ya anting e banal, bang kalinguan na ing kekong dapat at ing lugud a pepakit yu king keang laguiu, a kanita sinuyu kayu karing banal, at makanian man susuyu ko pa. Heb 6:11 At pagnasan mi king ing balang metung kekayu pakit na sa ing kasipagan, dikil king ganap a kapanayan angga man king kapupusan: Heb 6:12 King e ko sa mangatamaran, nung e makitulad kayu karetang a king pamamilatan na ning kasalpantayanan ampon kapibabatan, magmana la karing pangaku. Heb 6:13 Uling kanitang ing Dios guinawa yang pangaku kang Abraham, anti ning e ne makasumpang aliwang maragul, sinumpa ya king keang sarili. Heb 6:14 Nganang sinabi, Tune king pamipanuan panuanan daka, at king pangarakal parakalan daka. Heb 6:15 At makanian, kaibat nang menayang mibabata, kimtan na ing pangaku. Heb 6:16 Uling ding tau susumpa la king lalu pang maragul: at king balang pamitaltalan da ing sumpa maguing wakas ne ning pamitilmid da. Heb 6:17 Nung nukarin ing Dios, anti na ning buri nang ipakit king labislabis karing talapagmana king pangaku ing ala nang pangauman ning keang usuk pepamilatan na ing keang sumpa; Heb 6:18 Bang king uli ra ding aduang bague a e mauman a kareti e mapalyari king ing Dios maglaram ya, mika atin tamung metung a masikan a pamipasikan lub itamung tinakas manintun santungan bang talan king kapanayan a makabili arapan tamu: Heb 6:19 Nung isanung gagawan tamung anting sinipete ning kaladua, kapanayan a bitasa at matibe at lulub ya ketang atiu king lub ning tabing; Heb 6:20 A karin anti mong kekata manimuna, i Jesus linub ya king uli tamu, meguing matas a sacerdote angga king mangga, agpang king pangasacerdote nang Melquisedec. Heb 7:1 Uling iting Melquisedec a iti, a ari king Salem, sacerdote ning Dios a Kakataskatasan, a iti yang sinalubung kang Abraham king pamibalik nang menibat king pamanlipul na karing arian, at pepanuanan ne, Heb 7:2 A kea naman i Abraham dinake ne king kapulung dake ning sabla (a nung pibaldugan, ing mumuna, Ari ne ning katuliran, ampon naman Ari ya Salem, a ya, Ari ya king Kapayapan; Heb 7:3 Alang ibpa, alang indu, alang pipunpunan, ala ya aguiang pigmulan a aldo, ni kapupusan a bie, dapot meguing katulad ne ning Anak ning Dios), manatili yang sacerdote angga king mangga. Heb 7:4 Ngeni balakan yu nung nu ya anti karagul ing taung iti, nung kaninu ing patriarca Abraham, binie na ing kapulung dake ning mangamal a bague. Heb 7:5 At king katutuan ding karing anak nang Levi a tinanggap katungkulan king pangasacerdote, atin lang utus a kumang sikapulu, king balen agpang king kautusan, king matulid a sabi, karing karelang kapatad, aguiang deti linual la naman king awakan nang Abraham: Heb 7:6 Dapot itang a ing keang pipunpunan e mibilang karela, kinanua yang sikapulu kang Abraham, at pepanuanan ne itang atilu kea ding pangaku. Heb 7:7 Dapot alang nanumang pamitua, ing malati panuanan ne ning maragul. Heb 7:8 At keni ding tau a mamamate tatanggap lang sikapulu: dapot karin ing metung, nung kaninu mipatutuan king mabie ya. Heb 7:9 At, bang sabian makanian, king pamamilatan nang Abraham, i Levi man a tatanggap sikapulu beyaranan nalang sikapulu: Heb 7:10 Uling atiu pa king awakan nang ibpa na, kanitang selubungan neng Melquisedec. Heb 7:11 Ngeni nung ating pangatune king pamamilatan na ning pangasacerdote levitico (uling lalam na tinggap na ning balen ing kautusan), nanu pang kailangan king ing aliwang sacerdote talakad ya dikil king pangasacerdote nang Melquisedec, at e mibilang agpang king pangasacerdote nang Aaron? Heb 7:12 Uling anti ning ing pangasacerdote mialilan karampatan king mialilan mu naman ing kautusan, Heb 7:13 Uli ping itang nung kaninu deting bague mesabi la makayabe ya king aliwang dai, a kareti ninuman alang susuyu dikil king altar. Heb 7:14 Uling malino a ing kekatang Guinu linto ya kang Juda, a nung kaisanu king daing iti i Moises ala yang sasabian tungkul karing sacerdotes. Heb 7:15 At ing sasabian mi lalu pang ganap a lino, nung dikil king pangakalupa kang Melquisedec talakad ya ing aliwang sacerdote, Heb 7:16 A iti mialal ya, e agpang king kautusan na ning utus dikil king laman, nung e agpang king upaya na ning metung a bie a alang kawakasan: Heb 7:17 Uli ping kea mipatutuan iti: Ika sacerdote ka angga king mangga Agpang king pangasacerdote nang Melquisedec. Heb 7:18 Uling ating pangalabag na ning kautusan a minuna king uli na ning keang keinan at kayalang kabaldugan Heb 7:19 (Uling ing kautusan e ya magdala nanuman king keang pangasakdal), at king pamagdala na kanitang lalung mayap a kapanayan, king pamamilatan na niti milalapit tamu king Dios. Heb 7:20 At nung makananung e anti ing e pamangamit metung a sumpa Heb 7:21 (Uling deta king katutuan mialal lang sacerdote king alang sumpa, dapot ya maki sumpa king uli na nitang sinabi tungkul kea; Ing Guinu sinumpa ya at e sumisi: Ika metung kang sacerdote angga king mangga); Heb 7:22 King uli ning kaiguitan mu naman i Jesus ya ing talapakibat king lalu pang mayap a pangaku. Heb 7:23 At king katutuan meguing sacerdotes la ding dakal, uling king uli na ning kamatayan e mipaintulut karela king misundu la; Heb 7:24 Dapot ya uling manatili ya angga king kapilan pa man, atin yang pangasacerdote a e mialilan. Heb 7:25 King uli na naman niti malyari yang mangabus angga king lalung matas karing lalapit king Dios king pamamilatan na, pablasang makapanatili yang mabie bang mamilatan ya karela. Heb 7:26 Uling ing anti kaniting matas a sacerdote karampatan ya kekatamu, banal ya, alang pamamirait, alang musing, makakalilua ya karing makasalanan, at megawa yang lalu pang matas karing banua; Heb 7:27 A e na kailangan king aldoaldo, anti mo detang matas a sacerdote, ing midaun ain, mumuna king uli ra ding keang sariling kasalanan, at kaibat king kasalanan na ning balayan; uling iti depatan na king misan angga na king mangga, inyang inain na ing keang sarili. Heb 7:28 Uling ing kautusan mamalal yang matas a sacerdote karing atiu lalam na ning kapanamdaman; dapot ing amanu na ning sumpa, a katuki na ning kautusan, yalal ne ing Anak, a meguing sakdal a angga na king mangga. Heb 8:1 Ngeni karing bague a sasabian mi ing pekamaragul ya iti: Atin kaming metung a matas a sacerdote, a linukluk king wanan ning luklukan na ning Dangalan karin banua; Heb 8:2 Talapanibala ya king santuario, at king tune tabernaculo, a telakad na ning Guinu, at e ning tau. Heb 8:3 Uling ing balang matas a sacerdote miyalal ya bang midaun king pigkalub ampon naman ain; king uli na niti karampatan naman king iting matas a sacerdoteng iti atin yang nanu mu mang daun. Heb 8:4 Ngeni nung atiu sa babo ning gabun, e ya sacerdote king makananu mang bague, uling atin nang midadaun king pigkalub agpang king kautusan; Heb 8:5 A deti susuyu la king metung a likas at anino ding bague karin banua; anti mo i Moises a iniwaran ne ning Dios inyang ume neng italakad ing tabernaculo: Lawan mu, ngana kea, gawan mula ding anggang bague agpang king pitutularan a mipakit keka king bunduk. Heb 8:6 Dapot ngeni ya kimtan na ing metung a pamanibala a lalung marangal, pablasang ya naman ing talapamilatan king metung a tipan a lalung mayap, a mibili babo ra ding lalung mayap a pangaku. Heb 8:7 Uling nung itang mumunang pangaku e mika kapintasan, e sa menintun pagbilian ing kadua. Heb 8:8 King pamanintun kapintasan karela, sinabi na, Oini ding aldo, daratang la, ngana ning Guinu, King gawa kung metung a tipan a bayu king bale nang Israel ampon king bale nang Juda; Heb 8:9 E agpang king pangakung depatan ku karing karelang mangatua, King aldo a talanan ko gamat Bang kuanan ko king gabun na ning Egipto: Uling e la menatili king kakung tipan, At aku binilang kong alang ulaga, ngana ning Guinu Heb 8:10 Uling iti yang pangaku a daptan ku king bale ning Israel kaibat ding aldo a deta, ngana ning Guinu: Ibili ku ing kakung kautusan king karelang kaisipan, At king karelang pusu naman isulat kula; At aku ing karelang maguing Dios, At ilang kakung maguing balayan: Heb 8:11 At e re ituru king balang katau ing keang kabalayan, At king balang katau king keang kapatad, ngana, Kilalanan me ing Guinu: Uling ila ngan kilalanan daku, Manibat king malati angga king maragul karela; Heb 8:12 Uling aku mika atin kung kapakaluluan king karelang dewakan, At ing karelang kasalanan e ku na ganakan pa. Heb 8:13 Kanita sasabian na, Metung a bayung tipan, guewa nang aran ing minuna. Dapot ing mayayaran at matutua na, malapit na king pangalipas. Heb 9:1 Ngeni aguiang ing mumunang pangaku ating tuntunan king kasuyuan kadiosan, at ing keang santuario, santuario ya king yatung iti. Heb 9:2 Uling ating metung a tabernaculo a misadia, ing mumuna a nung nu la karin ing pagkandilan, at ing dulang, ampon ding tinape a yain; a iti mayayaus yang ing karinan a Banal. Heb 9:3 At gugulutan na ning kaduang tabing ing tabernaculo mayayaus yang ing Kabanalbanalan; Heb 9:4 A maki atin king pipapagincensuan a guintu ampon king kaban ning tipan a makakalupkup guintu, a kaniti atiu ing metung a sarung guintu a maki mana, ampon ing tukud nang memulaklak Aaron, at ding tabla ning tipan; Heb 9:5 At babo na niti, ding querubin ning ligaya, a lililung king luklukan na ning pakalulu; a ding bague a deti e tala ngeni apisabing mabukud. Heb 9:6 Ngeni deting bague anti king makasadia na la, king mumunang tabernaculo ding sacerdotes, lulub lang makaparati king pamanupad karing kasuyuan; Heb 9:7 Dapot king kadua, ing matas a sacerdote mu kabud, misan king pabanua, e magdalang daya, a iti yain na king keang sarili, ampon king kabalatungan na ning balayan: Heb 9:8 Ing Espiritu Santo patalastas na king ing pamanlub king banal a karinan e pamibulalag kabang makatalakad ya pa ing mumunang tabernaculo. Heb 9:9 A iti metung yang larawan king salukuyan a panaun; agpang kaniti midaun la ding pigkalub ampon ain a e ra apapalyari, a mipatungkul king pilubluban, makapasakdal king sasamba, Heb 9:10 Bukud mu (king laman-kati at inuman at miayaliwang pamanuas) king tuntunan na ning laman, bayad angga king panaun na ning pamanuman. Heb 9:11 Dapot inyang dinatang ne i Cristo a matas a sacerdote karing mayap a bague datang, king pamamilatan na ning maragul at lalung sakdal a tabernaculo, e guewang gamat, ngana wari, e king pamaglalang a iti; Heb 9:12 E mu naman king pamamilatan na ning daya ding kambing ampon ding vacang biceru nung e king keang sariling daya, linub ya misan angga na king mangga king banal a karinan, inyang akamtan na ing alang anggang pangayatbus. Heb 9:13 Uling nung ing daya ding kambing ampon ding vacang lalaki, at ing abu ning vacang dumalaga, a mipisik karing meguing marinat, papagbanalan nala dikil king kalinisan na ning laman; Heb 9:14 Lalu na pa ing daya nang Cristo a iti king pamamilatan na ning alang anggang Espiritu inain na ing keang sarili alang musing king Dios, linisan na ing kekong pilubluban karing dapat a mete bang sumuyu king Dios a mabie? Heb 9:15 At king uli na niti ya ing talapamilatan king metung a bayung tipan, bang ing metung a kamatayan dikil king pangayatbus ning kapanalangsangan a atiu lalam ning mumunang tipan, ding meyaus tanggapan da ing pangaku king alang anggang mana. Heb 9:16 Uling nung nukarin ating metung a pangaku atiu ing karampatan king kamatayan na ning guinawa kaniti. Heb 9:17 Uling ing metung a pangaku sapilitan ya nung nu ating pangamate: uling alang sikanan nanuman kabang mabie ya ing guinawa. Heb 9:18 King uli na niti aguia mang ing mumunang tipan e ya mitalagang alang daya. Heb 9:19 Uling inyang ing balang utus abulalag nang Moises king mabilug a balayan agpang king kautusan, kinanua yang daya karing bicerung vaca at karing kambing, makalangkap ing danum ampon ing bulbul a malutu ning tupa at isopo, at pisikan ne iti mu ring libru, anti mu naman ing mabilug a balayan. Heb 9:20 Nganang sasabi, Iti yang daya ning tipan a inutus ning Dios tungkul kekayu. Heb 9:21 Makanian mu naman ing tabernaculo ampon ding anggang kasangkapan king pamaniamba, pisikan nala namang makanian king daya. Heb 9:22 At dikil king kautusan, maiguit kung asabi king ding keganaganang bague luminis la king daya; at nung alang mibubung daya alang pangayatbus. Heb 9:23 Meguing kailangan pin a king ding likas ding bague karin banua luminis la kareti, dapot deti mu ring bague karin banua, king lalung mangayap pang kaainan kareti. Heb 9:24 Uling i Cristo e ya linub king metung a banal a karinan a guewang gamat, a metung ya mung katulad na ning katutuan, nung e king banua kabud, bang miarap ngeni arapan na ning Dios dikil kekatamu: Heb 9:25 Ni e mu naman karampatan a yain nang maralas ing sarili na, anti mo ing panlub na ning matas a sacerdote banua banua king banal a karinan king daya a e king sarili na; Heb 9:26 Nung e karampatan sa kea ing lumasa yang maralas manibat king pangatalakad ning yatu: dapot misan mu kabud king kapupusan da ding panaun ya mipabalu ya banang ilako ing kasalanan, king pamamilatan na ning ain king keang sarili. Heb 9:27 At makanian mu naman anti ning mitalaga karing tau king mate lamung misan, at kaibat na niti tuki na ing pamanukum; Heb 9:28 Makanian mu naman i Cristo, a inain na king misan mu, bang dalan na ing kasalanan ding dakal pakit ya king kaduang ukdu a makakawani king kasalanan karetang manaya kea king kaligtasan. Heb 10:1 Uling ing kautusan, anti ning atin yang metung a anino ding mayap a bague a datang, aliwa ing kabud larawan da mu rin ding bague, e malyaring king uli ding kabud ain banua banua, a idadaun dang alang tuknang, kapilan man makapasakdal karetang lalapit: Heb 10:2 Nung ali e la sa tinuknang mamaen? uling ding sasamba, nung melinis nalang misan, e no sa mika pilubluban king kasalanan. Heb 10:3 Dapot karing ain a deta ating pamigaganaka king kasalanan banua banua. Heb 10:4 Uling e malyari a king ing daya ding vaca ampon ding kambing ilako na ing kasalanan. Heb 10:5 King uli na niti ngening datang ne king yatu, sabian na, Ain at daun e mo birian; Dapot ing katawan sidia me kanaku: Heb 10:6 Karing ain a dilukan ampon daun king uli na ning kasalanan e ka mika tula: Heb 10:7 Kanita sinabi ku, Oini, aku daratang ku (King balut ning libru makasulat tungkul kanaku), Bang daptan ing kekang kaburian, Oh Dios, Heb 10:8 Masasabi babo: Ain ampon daun, at kabilugan a ain a durulukan ampon daun king uli na ning kasalanan, e mu birian, ni e ka mika tula kanita (bague a miain agpang king kautusan), Heb 10:9 Kanita asabi na, Oini aku daratang ku bang daptan ing kekang kaburian. Ilalako na ing mumuna, bang itatag na ing kadua. Heb 10:10 A king kaburian a iti meguing banal tamu king pamamilatan na ning pamiain king katawan nang Jesucristo misan mu angga na king mangga. Heb 10:11 At ing balang sacerdote king katutuan aldoaldo sisiasat ya, at mamain yang maralas king metung mu ring ain, a e malyaring kapilan man makalako king kasalanan: Heb 10:12 Dapot ya, inyang adaun na na ing metung mung ain king uli na ning kasalanan angga na king mangga, linukluk ya king wanan na ning Dios; Heb 10:13 Manibat na kanita manaya ya anggang king ding keang kasalang magawa lang dalpakan ding keang bitis: Heb 10:14 Uling king metung mung daun guewa nong sakdal angga na king mangga ding meguing banal. Heb 10:15 At ing Espiritu Santo mu naman babie yang patutu kekatamu; uling kaibat nang sinabi: Heb 10:16 Iti ya ing tipan a daptan ku karela, Kaibat ding aldo a deta, ngana ning Guinu: Ibili kula ding kakung kautusan king karelang pusu, At king karelang kaisipan naman isulat kula; kanita sasabian na, Heb 10:17 At ding kasalanan da ampon karelang dewakan e ku na ganakan pa. Heb 10:18 Ngeni nung nukarin ating kapatawaran kareti, ala nang ain pa king kasalanan. Heb 10:19 Anti ning atin ta na pin, kapatad, tetagan bang lungub king banal a karinan, king uli na ning daya nang Jesus, Heb 10:20 King metung a dalan a telaga na kekatamu, bayu at mabie dalan, king pamamilatan na ning tabing, ngana wari, ing keang laman; Heb 10:21 At anti na ning ating metung a maragul a sacerdote a pekapun king bale na ning Dios; Heb 10:22 Lumapit tamung maki pusung tapat king mipnung kabitasan na ning kasalpantayanan, a maki ating pusung mipisikan bang luminis king metung a marawak a pilubluban: at ding kekatang katawan mawas la king danum a wagas. Heb 10:23 Ingatan tang matibe ing pamipasiag king kekatang kapanaligan bang e makimut; uling tapat ya ing mengaku, Heb 10:24 At mika kapigaganakan tamu ing metung at metung, bang makapiyayagyagan tamu king lugud at karing mangayap a dapat: Heb 10:25 E ta titikusan ing kekatang sariling pamitipun miabeabe anti mo ing ugali ra ding mapilan, nung e miu-usukan tamu ing metung at metung; at lalu na, nung akakit yung lalapit na ing kayaldawan. Heb 10:26 Uling nung ing pamikasala seria tamu kaibat tinggap ing pamangilala king katutuan, ala nang mitatagan kekatamu ain a nanu man dikil king kasalanan; Heb 10:27 Nung e metung a makatakut a pamanaya king pamanukum, ampon metung a kabagsikan na ning api, a laklak karing kasalang. Heb 10:28 Ing metung a taung payalang ulaga king kautusan nang Moises, mate yang alang kapakaluluan nanuman king amanu ra ding adua o atlung saksi: Heb 10:29 Nu kaya anti kasakit ing parusa, a ukulan yu, a maguing karampatan, kanitang dinalpak lalam ding keang bitis king Anak ning Dios, at guewa nang anti mong e banal a bague ing daya ning pangaku a mekapagbanal kea, at depatan nang alang panalala king Espiritu ning kalam? Heb 10:30 Uling balu taya nung ninu itang sinabi, Kanaku ing pamanablas, aku ibie ku ing kablasan. At pasibayu, ing Guinu atulan na ing keang balayan. Heb 10:31 Metung a makatakut a bague ing manabu karing gamat ning Dios a mabie. Heb 10:32 Dapot ausan yo king kapigaganakan ding aldo a minuna, nung kaisanu, kaibat yung miaslagan, pibata yu ing maragul a pamakilaban king kasakitan; Heb 10:33 King metung a dake, meguing kapagmulalan king kalibakan at kalungkutan; at king aliwa, meguing kayabe ra detang megamit makanian. Heb 10:34 Uling mika atin kayung lunus karing atiung makasukul, at kinua yung matula ing pangasamsam ning kekong pibandian, uling akikilala yu king ating dikil king kekayung sarili metung a pibandian a lalu pang mayap at manatili. Heb 10:35 E yu pin sasakuil ing kekong tetagan, a atin yang metung a maragul a kabayaran a ablas. Heb 10:36 Uling atin kong pamangailangan king kapibabatan, a king, nung depatan yu na ing kaburian na ning Dios, tanggapan yu ing pangaku. Heb 10:37 Uling tutu pang ditak a panaun, Itang nung ninu ing datang datang ya, at e magluat. Heb 10:38 Dapot ing kanakung banal mie ya king kasalpantayanan; At nung ya mibalik ya, e tumula kea ing kakung kaladua. Heb 10:39 Makanian man itamu e ta karetang mibabalik dikil king kasiran; nung e karing maki kasalpantayanan dikil king kaligtasan na ning kaladua. Heb 11:1 Ngeni ing kasalpantayanan ya ing kabitasan karing bague a panayan, ya ing kaustan karing bague a e pa mayayakit. Heb 11:2 Uling karin ding makatua akamtan da ing metung a pamipatutu. Heb 11:3 King kasalpantayanan atatalastas tamu king ding yatu mibalangkas la king uli na ning amanu ning Dios, nanu pata ing mayayakit e megawa karing bague a makalto. Heb 11:4 King kasalpantayanan i Abel inain na king Dios ing lalu pang marangal a ain king kang Cain, king pamamilatan na niti miabie kea ing pamipatutu king banal ya, ing Dios sasaksi ya tungkul karing keang pigkalub; at king pamamilatan na nita, mete na ya, maniabi ya pa. Heb 11:5 King kasalpantayanan i Enoc milipat ya bang e na akit ing kamatayan; at e meakit, uling linipat ne ning Dios: uling mipatutuan ya bayu ya milipat, king kalugudlugud ya king Dios. Heb 11:6 At nung alang kasalpantayanan e malyaring makapalugud; uling karampatan king ing lalapit king Dios maniwala ya king ya pin, at king ya ing mamablas karing manintun kea. Heb 11:7 King kasalpantayanan i Noe, anti ning iniwaran ne ning Dios tungkul karing bague a e pa meakit, mekimut ya king banal nang takut, sidia ne ing metung a daung dikil king kaligtasan na ning keang bale; king pamamilatan na niti inatulan na ing yatu, at meguing talapagmana ya king katuliran a makayagpang king kasalpantayanan. Heb 11:8 King kasalpantayanan i Abraham, inyang meaus ya, memintu ya bang ume ya king metung a labuad a tinggap na anti mong mana na, at meko yang e na balu nung nu ya ume. Heb 11:9 King kasalpantayanan menuknangan yang anting aliwang balen king labuad a pangaku, anti mo king e na sariling labuad, menuknangan ya karing kubu abe ne i Isaac ilang Jacob, a kamana king pangaku mu ring iti: Heb 11:10 Uling linawe yang metung a ciudad a maki katatalakaran; a ing aluagui ampon ing mengawa kaniti ya ing Dios. Heb 11:11 King kasalpantayanan naman i Sara mu rin tinanggap yang upaya a kumagling palipi kanitang ya lipas na ing keang banua; pablasang binilang neng tapat itang mengaku: Heb 11:12 King uli na naman niti ating linto king metung, at ya katimbang neng mete, daing anting batuin king karakal, at e mabilang anti mo ing balas a atiu king pampang ning dayatmalat. Heb 11:13 Deti mete la ngan king kasalpantayanan, a e ro tinggap man ding pangaku; dapot ikit dala ampon inatu manibat king makarayu, at pisiag da king aliwa lang balayan at maglakbe babo ning labuad. Heb 11:14 Uling ding sasabi karing bague a anti kareti, pagsulit da king panintunan de ing tibuan dang balayan. Heb 11:15 At nung king katutuan karela yang aganaka itang balayan nung nu la menibatan, mika panaun lang mibalik. Heb 11:16 Dapot ngeni magnasa lang lalung mayap a balayan ngana wari, ing king banua: a king uli na niti ing Dios e no pikakarine a ausan deng Dios da; uling atin yang sidia karelang metung a ciudad. Heb 11:17 King kasalpantayanan i Abraham, inyang mesubuk ya, dinaun ne i Isaac, ngana wari, ing tinanggap matula karing pangaku, talaga neng yain ing keang bugtung a anak, Heb 11:18 Makanian mu naman ya nung kaninu mesabi, Kang Isaac mayaus ing kekang dai; Heb 11:19 Binalak na king busal da man ding mete apasublian neng mie ning Dios; manibat karin naman tinggap neng pepasibayu king metung a pakiaske. Heb 11:20 King kasalpantayanan i Isaac binendiciunan ne i Jacob ampon i Esau tungkul karing bague a datang. Heb 11:21 King kasalpantayanan i Jacob, inyang mamamate ne, binendiciunan nala ing balang metung karing anak nang Jose; at sinamba ya, makasapnu king babo na ning keang tukud. Heb 11:22 King kasalpantayanan i Jose, inyang ing kawakasan na lalapit na, siglawe na ing panlako ra ding anak nang Israel, at minie yang utus tungkul karing keang butul. Heb 11:23 King kasalpantayanan i Moises, inyang mibait ya, selikut deng atlung bulan ding keang mangatua; uling ikit da king masanting yang pungul; at e la mirinan takut king utas ning ari. Heb 11:24 King kasalpantayanan i Moises, inyang maragul ne, tingguian nang mayaus yang anak na ning anak nang babaing Faraon; Heb 11:25 Pinili na pa ing mibata yang lungkut kayabe na ning balayan na ning Dios ketang dumalan kasayan king kasalanan a manamanaun. Heb 11:26 Binalak na pang maragul a pibandian ing kalibakan nang Cristo, king karing pibandian na ning Egipto; uling linawe ya king kabayaran a ablas. Heb 11:27 King kasalpantayanan likuan na ing Egipto, a e na pitakutan ing mua na ning ari; uling menatili ya, anti mong manakit king e mayayakit. Heb 11:28 King kasalpantayanan pigmasusian na ing pasku, ampon ing pamamisik king daya, bang ing manlipul karing pangane e no tagkilan. Heb 11:29 King kasalpantayanan dinalan la libutad ning dayatmalat a Malutu, anti mo king gabun a malangi; a inyang ding Egipcios subukan dang daptan meyakmul la, Heb 11:30 King kasalpantayanan melagpak la ding kuta ning Jerico, kaibat dang mitulugan pitung aldo. Heb 11:31 King kasalpantayanan i Rahab a patutut, e ya mete a kayabe ra ding e talapamintu, anti na ning tinggap nong payapa ding tiktik. Heb 11:32 At nanu pang sabian ku? uling kumulang kung panaun nung maniabi ku dikil kang Guideon, kang Barac, kang Samson, kang Jepta, kang David at kang Samuel, ampon karing manula; Heb 11:33 A deti king kasalpantayanan mekalupig lang kayarian, dinapat lang kabanalan, migkamit lang pangaku, kebat do asbuk ding leon, Heb 11:34 Pitda ra ing upaya ning api, mitakas la king taram ning talibung, manibat king keinan meguing masikan la, meguing mayupaya la king pamipamuk, apaurungan dala ding tapuk ding aliwang balen. Heb 11:35 Ding babai tinggap dong sinubling mebie ding karelang mete: at ding aliwa mete la king paluka, e ra tinggap ing karelang pangatimawa; barang akamtan ing metung a lalung mayap a pamaniublingmie: Heb 11:36 At ding aliwa mesubuk la king kalibakan ampon paluka, anti naman ing pangatalikala ampon pangasukul: Heb 11:37 Pematu rala, pinlagari rala, tiksuan dala, mete la king talibung; linakad la keni at karin a maki balat tupa at kambing, a mengawale la, melugma at pikakasaman Heb 11:38 (A kareti e ya karampatan ing yatu), lilibut la karing ilang ampon karing kabundukan, at karing lukib ampon lungga ning gabun. Heb 11:39 At deti ngan, kaibat dang midinan mayap a patutu king uli na ning karelang kasalpantayanan, e ra tinggap ing pangaku. Heb 11:40 Ing Dios kaibat nang misadiang mapilan a mayap a bague tungkul kekatamu, a king pangakalilua ra kekatamu e la sukat maguing sakdal. Heb 12:1 King uli na niti itamu naman, anti na ning makapatulug tamu king metung a binang maragul a biga ding saksi, ibili tamu ing anggang bayat ampon ing kasalanan a lilipit kaketamu, at mulai tamu king kapibabatan king pipulayan a mibili king arapan tamu; Heb 12:2 A lawan ya i Jesus a maki dapat ampon papalyaring tune king kekatang kasalpantayanan, a iti king uli na ning tulang mibili arapan na pibatan ne ing cruz, guewa nang mistula ing kamarinayan, at linukluk ya king wanan na ning Dios. Heb 12:3 Uling ganakan ye pin itang mibata king anti kaniting pamanalangsang ding makasalanan salang king sarili na bang e ko magal, layun mina king kekong kaladua. Heb 12:4 E ko pa linaban angga king daya, a makipamuk salang king kasalanan; Heb 12:5 At kelinguan yu ing usuk a pamatulid kekayu, anti mong karing anak, Anak ku, e mu gagawan mistula ing pamipasakit ning Guinu, At e naka man mimina lub nung misabianan ka kaya; Heb 12:6 Uling ing luluguran na ning Guinu panasakitan ne, At papalukan ne ing balang metung a tatanggapan nang anting anak. Heb 12:7 Atiu king pamipasakit bang mibata kayu; ing Dios pakiutusan nakong anting anak na; uling ninu ping anak a e ne panasakitan tata na? Heb 12:8 Dapot nung ala kong pangapanasakit, a kaniti makarake la ding keganagana, nung makanian bastardu kayu, at e nako anak. Heb 12:9 Bukud pa, itamu atin tang tata king kekatang laman bang panasakitan dakatamu, at gagalangan tala: e ta lalung matulid pasakup king Ibpa ra ding espiritu, at mie? Heb 12:10 Uling ila king katutuan penasakit dakatamu king mapilan aldo, a anti mong mayap karela; dapot ya dikil king kekatang pakinabang, batang mirakayan king keang kabanalan. Heb 12:11 Ing keganaganang pasakit king kasalukuyan e anting ikatula nung e bagkus ikalungkut; makanian man kaibat na, mamunga yang payapang bunga karing misane kaniti, a iti ya ing bunga ning katuliran. Heb 12:12 King uli na niti, itas yula ding gamat a makabaldug, at ding tud a gagalgal; Heb 12:13 At gawa kong matulid a dalan karing kekong bitis, bang ing pile e malili nung e bagkus, kumayap ya. Heb 12:14 Tukian yu ing kapayapan dikil karing sablang tau, ampon ing kabanalan a nung ala kaniti ninuman e ne akit ing Guinu: Heb 12:15 Layun lawan yung miamasamas a magkang ating ninumang kawalan king kalam na ning Dios; king e ya sibut sana ing nanumang yamut ning kapaitan at lingasngasan nakayu, at king uli na niti dakal la ding mimusingan. Heb 12:16 Magkang mika ating ninumang mapangalugud, o taung mapanlapastangan, anti mo i Esau, a iti king metung mung pinggan a pamangan pisali na ing sarili nang pangapangane: Heb 12:17 Uling balu yu king aguiang kanitang ibat na pagnasan na ing numabang king bendicion, misakuil ya uling e ne menakit pagkarinan dikil king pangabayu na kaisipan ibpa na aguia mang pagpilitan nang panintunan miamasamas a kambe na ing lua. Heb 12:18 Uling e ko linapit king metung a bunduk a malyaring asalat at milalablab king api, at king kadalumduman, ampon king pisak at baguiu, Heb 12:19 At ing katni na ning pakakak, at ing siwala ding amanu; a ing siwalang iti ding dinamdam pekisabi ra king ala na sang amanung masabi karela; Heb 12:20 Uling e ra malyaring apibata ing yutus na karela, Nung ing metung a animal man tuklu ya king bunduk, batuan ya; Heb 12:21 At binang makasdan ing keang panaske, i Moises mu rin sinabi na, Mitatakutan ku ampon gagalgal: Heb 12:22 Nung e linapit kayu king bunduk ning Sion, at king ciudad ning Dios a mabie, ing Jerusalem ning banua, ampon ding e mabibilang a ejercitong angeles, Heb 12:23 King pulung a pamipamisan at iglesia ra ding pangane a makasulat karin banua, at king Dios a Ukum ding sabla, at karing espiritu ding banal a meguing sakdal na, Heb 12:24 At kang Jesus ing Talapamilatan king bayung tipan, at king dayang pamisik, a maniabing mangayap pang bague king kang Abel. Heb 12:25 Lawan yu a king e ko sasalangsang king maniabi. Uling nung deta e la mitakas inyang selangsangan de ing mengamanu karela king labuad, lalu na pa itamu e ta mitakas ketang mangamanung manibat banua: Heb 12:26 Ing siwala na niti kanita pepaugunan na ing labuad: dapot ngeni pengaku na, ngana, King misan pa pagalgalan ke e mu ing labuad, nung e pa naman ing banua. Heb 12:27 At ing amanung iti, Misan pa, pakilala na ing nasa nang ilako nala detang bague a meugun, anti mong bague a megawa, bang detang bague a e meugun manatili la. Heb 12:28 King uli na niti, king pamananggap metung a kayarian a e malyaring maugum, mika atin tang kalam, a king pamamilatan na niti main tamung kasuyuan a kalugudlugud king Dios king metung a kagalangan at takut: Heb 12:29 Uling ing kekatang Dios metung yang aping manampus. Heb 13:1 Manatili sa kekatamu ing lugud pamikapatad. Heb 13:2 E yu kakalinguan ing pakit lugud karing aliwang balayan; uling king makanian, ding mapilan pepalayunan dala ding angeles king e ra balu. Heb 13:3 Ganakan yula ding makasukul a anti mong abe rakong makasukul; at ding mipasakitan a anti mong ikayu man sana ing mipasakitan king katawan. Heb 13:4 Mipuri sana ing pamakiasawa karing sabla, at e na ya sa mikaka dungis ing pagkeran; uling ding paliwas at ding makipangalugud, ing Dios atulan nala. Heb 13:5 Magbalukas kayu king lugud king salapi; managuiu kayu ketang atiu kekayu; uling ya mu rin sinabi na, E raka lakuan, ni e raka paimburisan. Heb 13:6 Nanupata king mayap a tetagan asabi tamu, Ing Guinu yang kanakung talasasaup; E ku tumakut: Nanung arapat na kanaku ning tau? Heb 13:7 Ganakan yula detang ating pamaniakup kekayu, lalaki a miniabi kekayu king amanu ning Dios: at balakan yu ing kawakasan na ning karelang bie, tularan yu ing karelang kasalpantayanan. Heb 13:8 I Jesucristo ya mu rin ing napun, at ing ngeni, ampon angga king mangga. Heb 13:9 E ko pin padala karing miayaliwa at e yu akikilalang turu; uling mayap a ing pusu mitalakad ya king kalam, e king pamangan nung nu detang migkabili kaniti e la mipakinabangan. Heb 13:10 Atin tang metung a altar, a karin ala lang matulid mangan detang susuyu king tabernaculo. Heb 13:11 Uling ding katawan da detang animal, a ing karelang daya dudurup na ning matas a sacerdote king banal a karinan anti mong ain king uli na ning kasalanan, dudulukan dala lual ning kabalenan. Heb 13:12 Inya pin i Jesus man, bang apapagbanalan na ing balayan king pamamilatan ning sarili nang daya linasa ya lual ning pasbul. Heb 13:13 Lualan taya pin king lual ning kabalenan, layun dalan ing keang pangalibak. Heb 13:14 Uling keti ala tang ciudad a manatili, dapot panintunan tayang masipit ing ciudad nung isanu ing datang. Heb 13:15 King pamamilatan na pin tara midurup tang metung a ain ning pamamuring alang tuknang king Dios, ngana wari, ing bunga ra ding labi a darapat pamagsulit king keang laguiu. Heb 13:16 Dapot ing pamaniapat mayap ampon ing pamaniaup e yu kakalinguan; uling karing anti kareting ain ing Dios bina yang matutula. Heb 13:17 Mamintu kayu karing sasakup kekayu, at pasakup ko karela; uling lalame la dikil karing kekong kaladua, anti mong ila ding munie sulit; baping daptan da iti kambe ning tula, at e kambe ning kalungkutan; uling iti alang pakinabang kekayu. Heb 13:18 Panalangin yu kami; uling bibitasan mi king atin keng mayap a pilubluban, a pagnasan mi ing mie mapuri king sablang bague. Heb 13:19 At usukan dakayu a king lalung kapagnasan daptan yu iti, bang aku misubli ku kekayu king palalung kamalaguanan. Heb 13:20 Ngeni ing Dios ing kapayapan, a kinanuang pasibayu ibat karing mete king maragul a pastul ding tupa kambe ning daya ning alang anggang tipan, a ya ing kekatang Guinung Jesus, Heb 13:21 Gawan nako sang sakdal king balang mayap a bague bang daptan yu ing keang kaburian, a daraptan na kekatamu ing makapatula king keang panimanman, king pamamilatan nang Jesucristo; a kea na sa ing ligaya angga king mangga. Yanasa. Heb 13:22 Dapot aku usukan dakayu, kapatad, king pibatan ye ing amanu ning kausukan: uling silatanan dakayu king mapilan a amanu. Heb 13:23 Balu yu a king ing kekatang kapatad a i Timoteo mitimawa ne; a kambe na, nung agad yang datang, akit dakayu. Heb 13:24 Pagmananuan yula ding anggang sasakup kekayu, ampon ding anggang banal. Pagmananuan dakayu ding karin Italia. Heb 13:25 Ing kalam manatili sa keko na ngan. Yanasa. |