GalaciaGal 1:1 I Pablo, a apostol (e menibatan karing tau, ni e king pamamilatan na ning tau, nung e king pamamilatan nang Jesuscristo ampon ning Dios Ibpa, a mibangun kea ibat karing mete), Gal 1:2 At ding anggang kapatad a kayabe ku, karing iglesia na ning Galacia: Gal 1:3 Kalam kekayu at kapayapan a ibat king Dios a Ibpa, at king kekatang Guinung Jesucristo, Gal 1:4 A binie na ing keang sarili king uli na ning kekatang kasalanan, bang ikabus nakatamu king salukuyan a marawak a yatu, agpang king kaburian na ning kekatang Dios at Ibpa: Gal 1:5 A kea manatili ing ligaya angga king mangga. Yanasa. Gal 1:6 Aku mipapamulala ku king binang malagawa ing pamangalilua yu king minaus kekayu king kalam nang Cristo bang ume king makayaliwang evangelio; Gal 1:7 A nung isanu ing e aliwang evangelio: nung e atin mung mapilan a lilingasngas kekayu, at buri reng gawan marawak ing evangelio nang Cristo. Gal 1:8 Dapot aguing ikami, o ing metung a angel a ibat banua, panaral na kekayu ing evangeliong makayaliwa king penaral mi kekayu, paburen yeng misakuil. Gal 1:9 Anti ing sinabi mi nang minuna, ya namang sublian kung pasibayung sabian, Nung ninuman ipanaral na kekayu ing nanu mang evangeliong makayaliwa king kekong tinggap, paburen yeng misakuil. Gal 1:10 Uling panintunan ku wari ing kaburian ding tau o ing king Dios? o kaya, pagkapilitan kung papuri karing tau? Nung aku papuri ku pa karing tau, e ku sa alipan nang Cristo. Gal 1:11 Uling pabalu ku kekayu, kapatad, tungkul king evangeliong penaral ku, king e dikil king tau. Gal 1:12 Uling ni e ke tinggap iti ibat king tau, ni e ya man mituru kanaku, nung e dinatang ya kanaku king pamamilatan na ning pamipatilip nang Jesucristo. Gal 1:13 Uling dimdam yu ing tungkul king kabiayan ku king milabas a panaun king religion ding Judios, nung makananung liligaligan keng alang patugut ing iglesia na ning Dios, at pekisiran ke: Gal 1:14 At minuna ku king religion da ding Judios a maiguit pa karing maldang kakametung ku king tua karing kalaji ku, lalu ku pang matupad king likaslikas a sabi ding mangatua ku. Gal 1:15 Dapot inyang mayapan na ning Dios, a mikalilua kanaku, dikil kea ibat pa king atian nang indu ku, at inaus naku king pamamalitan na ning keang kalam, Gal 1:16 Bang patilip ne ing keang Anak kanaku, bang ipanaral ke karing Gentiles; ibat na pin kanita e ku miniawad usuk king laman at daya: Gal 1:17 Ni e ku minukiat Jerusalem karing apostoles nang minuna kanaku: nung e mine ku Arabia: at mibalik kung pasibayu Damasco. Gal 1:18 Kanita kaibat ning atlung banua minukiat ku Jerusalem bang dalawan ke i Cefas, at menuknangan kung labinglimang aldo kayabe na. Gal 1:19 Dapot ala kung ikit ninuman karing aliwang apostoles, nung e mu i Santiago a kapatad ning Guinu. Gal 1:20 Ngeni tungkul karing bague susulat ku kekaye, oini, king arapan na ning Dios, e ku maglaram. Gal 1:21 Kanita dinatang ku karing sakup ding Siria at Cilicia. Gal 1:22 At e raku pa akikilala lupa ding iglesia ning Judea a kang Cristo: Gal 1:23 Dapot ing karela mu ping dimdam a pisasabian da, Itang liligalig kekatamu ketang minuna ngeni panaral na ing kasalpantayanan a king misan a panaun pakisiran na; Gal 1:24 At pepaligayan de ing Dios kanaku. Gal 2:1 Kanita kaibat ning labingapat a banua minukiat kung pepasibayu Jerusalem, abe ke i Bernabe, layun tiki kuya naman i Tito. Gal 2:2 At minukiat ku dikil king pangapatilip; at selese ku king arapan da itang evangeliong panaral ku karing Gentiles dapot makasarili king arapan da ding marangal, magkang king makananu mang paralan mulai ku, o milai kung alang kabaldugan. Gal 2:3 Dapot aguiang i Tito man a kayabe ku anti ning metung yang Griego, e mepilit a matuli ya: Gal 2:4 At king uli ra ding e tune kapatad a linub da king lijim, a deti pesilub lang lijim, bang atiktikan da ing katimawan a kakamtan mi kang Cristo Jesus, bang abili rake king pangaalipan: Gal 2:5 Nung kaninu minie keng lugal king dalan ning pangasakup, ali, ala metung mu mang oras; bang ing katutuan na ning evangelio manatili ya kekayu. Gal 2:6 Dapot karing miparangalan a balamu nanu (maguing nanu la pa man sa alang nanu naman kanaku: ing Dios e na tatanggapan ing anyu na ning ninumang tau) ila, ngaku, a ating dangalan e la migkalub nanuman kanaku: Gal 2:7 Dapot sumangid na nita, inyang ikit da king mipaniwala ya kanaku ing evangelio ning e pangatuli, anti mo kang Pedro ing evangelio ning e pangatuli, Gal 2:8 (Uling ing dinapat kang Pedro king pangaapostol na king pangatuli dinapat ya naman kanaku dikil karing Gentiles); Gal 2:9 At inyang atalastas da pin ing kalam a miabie kanaku, i Santiago at i Cefas at i Juan, a miparangalan pekaasias, binie re kanaku ampon kang Bernabe ing gamat a wanan ning pamiabe, bang ume ke karing Gentiles, at ila king pangatuli; Gal 2:10 Bukud mung pagnasan da king ganakan mila sa ding pakakalulu; a ing bague mu ring iti aku man pigpilitan kung daptan. Gal 2:11 Dapot inyang i Cefas dinatang ya Antoquia, sinalangsang ku kea king arapan, uling tinikdo ya miatulan. Gal 2:12 Uling bayu la dinatang ding mapilan a ibat kang Santiago, mekipangan ya karing Gentiles; dapot inyang dinatang na la, meko ya, at kinawani ya karela king takut na karing ati na king pangatuli. Gal 2:13 At ding aliwang Judios pati na ya migmanggap la; nanupata i Bernabe milisia ya king dalan king pamagmanggap da. Gal 2:14 Dapot inyang ikit ku king e la lalakad matulid agpang king katutuan na ning evangelio, sinabi ku kang Cefas king arapan da ngan, Nung ika, anting metung a Judio, magkabiayan kang anti ding Gentiles, at e anti ding Judios, makananu mung apilit ding Gentiles bang magkabiayan lang anti mo ding Judios? Gal 2:15 Ikami, Judios ke king pangatau, at e makasalanan karing Gentiles, Gal 2:16 Makanian man ing tau balu mi king e ya matatanggap banal king dapat ning kautusan nung e king pamamilatan na ning kasalpantayanan kang Jesucristo, ikami mu rin meniwala ke kang Cristo Jesus, bang matanggap keng banal king kasalpantayanan kang Cristo, at e karing dapat ning kautusan: uling karing dapat ning kautusan e ya matanggap banal ing isanu mang laman. Gal 2:17 Dapot nung, kabang pagpilitan tamu ing matanggap banal kang Cristo, itamu mu rin naman meakit tang makasalanan, i Cristo wari talapanibala ya king kasalanan? E na ipaintulut ning Dios. Gal 2:18 Uling nung aku pin italakad kong pasibayu ding bague a lesakan ku na, aku mu rin pabitasa kung talapanalangsang ing kakung sarili. Gal 2:19 Uling king pamamilatan ning kautusan, aku mete ku king kautusan, bang mie ku king Dios. Gal 2:20 Mipaku kung abe nang Cristo; at aliwa na aku ing mabibie, nung e i Cristo yang mabibie kanaku: at ing bie a ita a ngeni mabibie ku king laman mabibie ku king kasalpantayanan, ing kasalpantayanan a atiu king Anak ning Dios, a linugud kaku, at binie na ing sarili na king uli ku. Gal 2:21 E ku gagawan alang kabaldugan ing kalam ning Dios: uling nung ing katuliran atiu king pamamilatan na ning kautusan, nung makanian i Cristo mete ya king alang kabaldugan. Gal 3:1 Oh mangmang a tau Galacia, ninung mekaguna kekayu, a king arapan ding mata yu i Jesucristo malino mibulalag yang mipaku? Gal 3:2 Iti yang bukud a malyari kung abalu kekayu, Tinggap ye ing Espiritu king dapat ning kautusan o king pamakiramdam king kasalpantayanan? Gal 3:3 Bina na kong mangmang? kaibat yung migmula king Espiritu, ngeni magpakasakdal ku king laman? Gal 3:4 Mibata kong dakal a bague king alang kabaldugan? nung iti katutuan alang kabaldugan. Gal 3:5 Ing babie pin kekayu king Espiritu, at darapat yang mala kekayu, daraptan na iti king dapat ning kautusan, o king pamakiramdam king kasalpantayanan? Gal 3:6 Anti mu pin i Abraham meniwala ya king Dios, at iti mibilang keang katuliran. Gal 3:7 Pakibaluan yu pin king ding king kasalpantayanan, deti anak nung Abraham. Gal 3:8 At ing kasulatan, akilala na nang minuna king ing Dios tanggapan nung banal ding Gentiles king kasalpantayanan, penaral na neng minuna ing evangelio kang Abraham ngana, Keka mipanuanan la ding anggang bansa. Gal 3:9 Inya ding king kasalpantayanan mipanuanan lang kayabe na ning talasalpantayang Abraham. Gal 3:10 Uling ding anggang king dapat ning kautusan atilu king lalam ning sumpa: uling makasulat, Makasumpa ya ing balang metung a e manatili king anggang makasulat king libru ning kautusan, a daptan da iti. Gal 3:11 Ngeni king ala ping ninumang matanggap banal king kautusan king arapan na ning Dios malino: uling, Ing banal mie ya king uli na ning kasalpantayanan; Gal 3:12 At ing kautusan e ya king kasalpantayanan; dapot, Itang darapat kareti mie ya kareti. Gal 3:13 I Cristo inatbus nakatamu ibat king sumpa ning kautusan, a meguing metung a sumpa kekatamu, uling makasulat, Misusumpa ya ing balang metung a misabit king dutung: Gal 3:14 Bang karing Gentiles datang ing kanuanan nang Abraham kang Cristo Jesus; bang kanita tanggapan tamu ing pangaku ning Espiritu king pamamilatan na ning kasalpantayanan. Gal 3:15 Kapatad, miniabi ku agpang king ugali ding tau: Aguia mang metung mung tipan ning metung a tau, makanian man ngening mipatunayan, ninuman e ne apayalan kabaldugan, o e ne aragdaganan. Gal 3:16 Ngeni kang Abraham atilu ding pangakung mesabi, at king keang bini. E na sasabian, At karing bini, anti mu karing dakal; nung e anti mu king metung, At king kekang bini, a iti ya i Cristo. Gal 3:17 Ngeni iti ya ing sasabian ku: Ing metung a tipan a mipatunayan king Dios king makauna ing kautusan, a dinatang pangalabas ning apat a dalan at atlungpulung banua, e na payalan kabaldugan, baneng gawan alang ulaga ing pangaku. Gal 3:18 Uling nung ing mana king kautusan ya, e ne king pangaku: dapot ing Dios pigkalub na kang Abraham king pamamilatan na ning pangaku. Gal 3:19 Nanu ya pin ing kautusan? Meguing karagdagan uli na ning kapanalangsangan, angga king datang ya ing bini a nung kenu miabie ing pangaku; at miutus king pamamilatan da ding angeles king gamat na ning metung a talapamilatan. Gal 3:20 Ngeni ing talapamilatan e naya mu talapamilatan ning metung; dapot ing Dios metung ya. Gal 3:21 Ing kautusan wari makasalangsang ya karing pangaku ning Dios? E na ipaintulut ning Dios: uling nung ating metung a kautusan a miabie a nung isanu ing makabie, katutuan ing katuliran meguing king kautusan sana. Gal 3:22 Dapot ing kasulatan kilung na ing sablang bague lalam ning kasalanan, bang ing pangaku dikil king kasalpantayanan kang Jesucristo malyaring miabie karing maniwala. Gal 3:23 Dapot bayu dinatang ing kasalpantayanan, makapaingat tamu lalam ning kautusan, a mikulung king kasalpantayanan a mipatilip kaibat. Gal 3:24 Nanupata ing kautusan yang kekatang maningat bang idala nakatamu kang Cristo, bang matanggap tang banal king uli ning kasalpantayanan. Gal 3:25 Dapot ngening ing kasalpantayanan a ita dinatang na, ala ta na lalam ning maningat. Gal 3:26 Uling iko ngan anak na naku ning Dios, king pamamilatan ning kasalpantayanan, kang Cristo Jesus. Gal 3:27 Uling ding anggang mebinyag kekayu kang Cristo mibablas la kang Cristo. Gal 3:28 Alang Judio ni Griego, alang alipan ni timawa, alang lalaki ni babai, uling iko ngan metung kayu mu pangatau kang Cristo Jesus. Gal 3:29 At nung kang Cristo kayu, nung makanian bini nakung Abraham, talapagmana agpang king pangaku. Gal 4:1 Dapot sasabian ku king kabang ing talapagmana anak ya pa, ala yang pangaaliwa nanuman king alipan aguia mang guinu ne pa ning sabla; Gal 4:2 Nung e atiu lalam ding talaingat at ding talasiasat angga king panaun a tildu ning ibpa. Gal 4:3 Makanian mu naman itamu, inyang anak ta pa, mipiguil tamu lalam ning pangaalipan lalam ning mumunang aral king yatu: Gal 4:4 Dapot inyang miras na ing pangaganap na ning panaun, pepabal ne ning Dios ing keang Anak, a penganak ning metung a babai, mibait lalam ning kautusan, Gal 4:5 Bang atbusan nala ding atiu lalam ning kautusan, bang tanggapan tamu ing pangaampun anting penganak. Gal 4:6 At anti ning anak kayu, pepabal ne ning Dios ing Espiritu na ning keang Anak karing kekatang pusu, kukulait tamu, Abba, Ibpa. Gal 4:7 Bang keta e na ka alipan, nung e metung kang anak; at nung metung kang anak, nung makanian talapagmana ka king uli ning Dios. Gal 4:8 Bukud kaniti, king panaun a ita, uling e ye balu ing Dios, ati kayu lalam ning pangaalipan karing e talagang dios: Gal 4:9 Dapot ngeni, abalu ye ing Dios, o kaya abalu naku ning Dios, baket babalikan yung pasibayu detang mangaina at musmus a mumunang aral, a pagnasan yung pasibayu ing mibili king pangaalipan? Gal 4:10 Pangilinan yu ding aldo, at ding bulan, at ding panaun, at ding banua. Gal 4:11 Mitatakutan ku tungkul kekayu, a magkang king makananu mang bague, pepaigal ku mung alang kabaldugan kekayu. Gal 4:12 Pagamuamuan dakayu, kapatad, maguing anti ku sa kanaku, uling aku man maguing anti ku kekayu. Ala kong depatan kanaku nanumang kamalian: Gal 4:13 Dapot balu yu a king uli na ning keinan ning laman penaral ke kekayu ing evangelio king kaunan-unan: Gal 4:14 At itang meguing tuksu kekayu king kanakung laman e yu mirajan, ni sikuil; nung e tinggap yukung anti mung metung nang angel ning Dios, anti mu kang Cristo Jesus mu rin. Gal 4:15 Nu pin karin ngeni ing saya yu kanita? uling babie kung patutu kekayu, king nung malyari mu sa, dinukit yu ding kekong mata at binie yu kanaku. Gal 4:16 Inya pin meguing kasalang yuku wari king pamaniabi ku kekayu king katutuan? Gal 4:17 Ila maingat dakung panintunan king e nasang mayap, ali, buri rakong ikalilua, bang ikayu panintunan yula. Gal 4:18 Dapot mayap ing maingat panintunan king bague mayap king sablang panaun, at e mu bukud ngening aku makarungut ku kekayu. Gal 4:19 Mangalati kung anak, nung kaninu atiu kung pasibayu king pamaniapat anggang i Cristo e mianyu king kekayu. Gal 4:20 Dapot bisa ku sang makirungut kekayu ngeni, at alilan ing siwala ku; uling mikakunu ku tungkul kekayu. Gal 4:21 Sabian yu kanaku, ikong magnasang magbili king lalam ning kautusan, e ye daramdaman ing kautusan? Gal 4:22 Uling makasulat, king i Abraham mika anak yang adua, ing metung king alipan a babai, at ing metung king babaing timawa. Gal 4:23 Dapot ing king alipan a babai, mibait ya dikil king laman; dapot ing king babaing timawa mibait ya king pamamilatan na ning pangaku. Gal 4:24 Deting bague atiu la king talimjaga: uling deting aduang babai adua lang tipan; ing metung ibat ya king bunduk Sinai, a manganak karing anak ning pangaalipan, a iti ya i Agar. Gal 4:25 Ngeni iting Agar ya ing bunduk Sinai karin Arabia, at makibat ya king Jerusalem a ya ing ngeni: uling atiu king pangaalipan pati na ding keang anak. Gal 4:26 Dapot ing Jerusalem a atiu babo timawa ya, a iti yang kekatang indu. Gal 4:27 Uling makasulat, Magsaya ka, ikang baug a e manganak; Luksu ka king kapurian at kulisak, ika a e pa miramdam: Uling maiguit la pa ding anak ning mipaburen karetang king atin king asawa. Gal 4:28 Ngeni ikami, kapatad, anti mo i Isaac, anak nake ning pangaku. Gal 4:29 Dapot anti mu ing kanita a ing mibait dikil king laman ligalig ne ing mibait dikil king Espiritu, makanian mu naman ing malilyari ngeni. Gal 4:30 Makanian man nanung sasabian na ning kasulatan? Itabi ya ing alipan ampon ing anak na; uling ing anak ning alipan e makipagmana king anak ning babaing timawa. Gal 4:31 King uli na niti, kapatad, e nakata anak ning alipan, nung e ning babaing timawa. Gal 5:1 Uling king katimawan i Cristo timawa nakatamu: manatili ta pin, at e pasaklit pasibayu king paud ning pangaalipan. Gal 5:2 Oini, aku i Pablo sasabian ku kekayu, king, nung tatanggapan yu ing pangatuli, i Cristo e naku pakinabangnan nanuman. Gal 5:3 Wa, patutu kung pasibayu king balang taung tatanggap king pangatuli, king utang na ing pamanupad king mabilug a kautusan. Gal 5:4 Makakalilua kong lubus kang Cristo, ikong bisang matanggap banal king uli na ning kautusan: menabu kayu a menibat king kalam. Gal 5:5 Uling ikami pin king pamamilatan na ning Espiritu king kasalpantayanan panayan mi ing kapanayan king katuliran. Gal 5:6 Uling kang Cristo Jesus ni ing pangatuli alang kabaldugan, ni ing e pangatuli; dapot ing kasalpantayanan darapat king pamamilatan na ning lugud. Gal 5:7 Pupulai kong mayap; ninung babie pangabala kekayu bang e ku mamintu king katutuan? Gal 5:8 Iting amuyut e dinatang kanitang mamaus kekayu. Gal 5:9 Ing ditak a levadura ipakumbo na ing keganaganang masa. Gal 5:10 Aku atin kung kapanaligan dikil kekayu king Guinu, king e ku misip king aliwang bague: dapot ing munie lingasngas kekayu idala na ing kayatulan na, maguing ninu ya pa man. Gal 5:11 Dapot aku, kapatad, nung ipanaral ku mu ing pangatuli, baket maliligalig ku mu? nung makanian mepupus na ing katatakiran king cruz. Gal 5:12 Buri ku sa a king ding manlingasngas kekayu, ume nung lipat na pa ning pangatuli. Gal 5:13 Uling ikayu, kapatad, meaus kayu king katimawan; bukud a e ye sa gagamitan ing kekong katimawan bang dinan yu mung dajilan ing laman, nung e bagkus king pamamilatan na ning lugud, maguing talasuyu kayu king metung at metung. Gal 5:14 Uling ing mabilug a kautusan matutupad king metung a amanu, a ya ini: Luguran me ing lupa mung tau anti mu keka. Gal 5:15 Dapot nung ing metung at metung kekayu mipapangeat kayu at mipapamangan kayu, mingat kayu magkang mipapanapas kayu ing metung at metung. Gal 5:16 Dapot sasabian ku, Lumakad kayu king Espiritu, at e yu apamintuan ing nasa ning laman. Gal 5:17 Uling ing laman mangaibugan ya salang king Espiritu, at ing Espiritu salang king laman; uling deti mikasama la ing metung at metung; bang e yu arapat ing bague a buri yu. Gal 5:18 Dapot nung tatairan naku ning Espiritu, ala ku lalam ning kautusan. Gal 5:19 Ngeni ding dapat ning laman mibulalag la, a ila deni: pamakipangalugud, karinatan, kalibian, Gal 5:20 Pamaniambang idolos, pamaganitu, pamipagkamua, pamipate, pamangalalu, kamua, kaguluan, pamidakedake, pamikampikampi, Gal 5:21 Diria, pamaglasing, katakawan at aliwa pang bague anti kaniti; a tungkul kareti iniwaran da na kong makauna, anti mu ing sinabi ku na kekayu, bang ding misasane karing anti kareting bague e ra manan ing kayarian na ning Dios. Gal 5:22 Dapot ing bunga ning Espiritu ya ing lugud, tula, kapayapan, kapibabatan, ganaka, kayapan, katapatan, Gal 5:23 Kamung lub, pamangawat king sarili; salang karing bague a deti alang kautusan. Gal 5:24 At detang kang Cristo Jesus pinaku re ing laman pati na ing karelang kaibugan a milalu ampon ing karelang kelabuaran. Gal 5:25 Nung mabibie ta king uli ning Espiritu, dikil king Espiritu lumakad tamu mu naman. Gal 5:26 E ta sa magpalalu, a pamua king metung at metung, mipangariria ing metung at metung. Gal 6:1 Kapatad, nung ing ninuman mibili ya king kaisanumang kapanalangsangan, ikong atiu na king espiritu, papibalikan ye iti king espiritu ning kabanayaran; layun lawan yu ing kekayu mu ring sarili, a magkang ikayu man matuksu kayu. Gal 6:2 Misaupsaupan kong magdala king pupusanan ning metung at metung, at makanian yung tuparan ing kautusan nang Cristo. Gal 6:3 Uling nung ing ninuman isipan na king atin yang kabaldugan ngening ala yang kabaldugan, pipiraitnan na ing keang sarili. Gal 6:4 Dapot subukan na ning balang metung ing sarili nang dapat, at kanita mika atin yang kaligayan tungkil mu rin king keang kasarilinan, at e tungkul king kalupa nang tau. Gal 6:5 Uling ing balang katau idala na ing keang sariling pusan. Gal 6:6 Dapot paburen ya itang mituruanan king amanu a makisangguni kanitang tuturu king keganaganang bague a makaingguil king mayap. Gal 6:7 E ku paipirait; ing Dios e pabiru: uling ing nanu mang itanam ning tau, ita mu rin yang pupulan na. Gal 6:8 Uling ing tatanam dikil king keang laman king laman ing pupulan nang kasiran; dapot itang tatanam dikil king Espiritu king Espiritu ing pupulan nang bie alang angga. Gal 6:9 At e ta sa manamdaman kapagalan king mayap a pamaniapat: uling king panaun na pupulan tamu, nung e ta parimlan ing lub. Gal 6:10 Inya pin, agpang king kekatamung mayap a panaun, daptan tamu ing mayap karing sablang tau, at lalu na karetang katubale na ning kasalpantayanan. Gal 6:11 Lawan yu nung nu la anti pangaragul ding letrang susulat ku kekayu king tune kung gamat. Gal 6:12 Detang anggang bisang pakit mayap a aske king laman, ila pipilitan dakayu a patuli kayu; bang e la mu maligalig king uli na ning cruz nang Cristo. Gal 6:13 Uling e mu detang tatanggap king pangatuli ilang tutupad king kautusan; nung e buri rang abili rako king pangatuli, balang mika ligaya king kekong laman. Gal 6:14 Dapot marayu kanaku ing paligaya ku, nung e mu king cruz ning Guinu tang Jesucristo, a king pamamilatan na niti ing yatu mipaku ya kanaku at aku king yatu. Gal 6:15 Uling ni ing pangatuli alang kabaldugan, ni ing a pangatuli mu naman, nung e ing bayung pangalalang. Gal 6:16 At ding anggang lalakad agpang king tuntunan a iti, ing kapayapan sa mike karela, at ing pakalulu, at king Israel ning Dios. Gal 6:17 Manibat na ngeni ninuman e na naku sa lingasngasan; uling daralan kong makakintal king katawan ku ding tanda nang Jesus. Gal 6:18 Ing kalam ning Guinu tang Jesucristo miabie na sa king kekong espiritu, kapatad. Yanasa. |