II Timoteo2Ti 1:1 I Pablo, a apostol nang Cristo Jesus king kaburian na ning Dios, agpang king pangaku king bie a atiu kang Cristo Jesus, 2Ti 1:2 Kang Timoteo, a kaluguran kung anak: Kalam, pakalulu, kapayapan, a ibat king Dios Ibpa at kang Cristo Jesus a kekatang Guinu. 2Ti 1:3 Pasalamat ku king Dios, a kakung susuyuan manibat pa karing nunu ku king malinis a pilubluban, a alang patugut gaganakan daka king kakung pamanigapu, bengi at aldo. 2Ti 1:4 Pagnasan kung akit daka, gaganakan ku ing kekang lua, bakung kumatmung tula, 2Ti 1:5 A gaganakan ku ing kasalpantayanan a e pamagkanuari a atiu keka, a iti menuknangan minuna kang apu mung babaing Loida, at kang indu mung Eunice; at, aku mapipilit ku, keng keka mu naman. 2Ti 1:6 King uli na niti paganaka ku keka king biayan mu ing kalam ning Dios a atiu keka king pamamilatan na ning pangatumpak da ding kakung gamat. 2Ti 1:7 Uling e nakatamu dininan ning Dios king espiritu ning telotian; nung e ning upaya at ning tuntunan. 2Ti 1:8 E mu pin pikakarine ing pamipatutu king kekatang Guinu, ni kanaku a makasukul king uli na: nung e bagkus mibata kang kasakitan kagum ning evangelio agpang king kayupayan ning Dios; 2Ti 1:9 A ya kinabus nakatamu, at inaus nakatamu king metung a banal a aus, e agpang king sarili nang nasa at kalam, a kekatamu miabie kang Cristo Jesus minuna king panaun a alang angga, 2Ti 1:10 Dapot mipakilala ngeni king pamamilatan na ning pangalto na ning kekatang Mangabus a i Cristo Jesus a ya leko na ing kamatayan, at inatad na king sala ing bie at ing alang kamatayan king pamamilatan na ning evangelio, 2Ti 1:11 A kaniti aku mitulduan kung talapanaral, at apostol ampon talaturu. 2Ti 1:12 A king uli na naman aku pigkasakitan ku ing bague a iti: makanian man e ku marine; uling balu ke itang kakung peniwalan, at bibitasan ku king ya aguiu nang ingatan itang peniwala ku kaya laban king aldo ita: 2Ti 1:13 Panatilian mung apusan ding amanung mayap a dimdam mu kanaku, king kasalpantayanan at lugud a atiu kang Cristo Jesus. 2Ti 1:14 Bang itang mayap a bague a keka mipaniwala ingatan mu king pamamilatan na ning Espiritu Santo a manuknangan kekatamu. 2Ti 1:15 Pangabaluan mu iti, king kinalilua la kanaku ding anggang karin king Asia; a deti ila di Figello at Hermogenes. 2Ti 1:16 Pagkalub na sa ning Guinu ing pakalulu na king bale nang Onesifero: uling ya madalas nakung dininan kapasnon, at e ne pikarine ing talikala ku; 2Ti 1:17 Dapot, inyang karin ya Roma, penintun nakung mapilit, at ikit naku. 2Ti 1:18 (Ipagkalub na na sa kea ning Guinu a manakit yang pakalulu king Guinu king aldo a ita); at king nung pilan bague a ya sinuyu ya Efeso, ika balu mung mayap. 2Ti 2:1 Ika nung makanian, anak ku, magpakasikan ka king kalam a atiu kang Cristo Jesus. 2Ti 2:2 At ing bague a dimdam mu kanaku libutad da ding dakal a saksi, iti mu rin ipaniwala mu karing taung tapat, nung ninu ding karampatan makaturu mu naman karing aliwa. 2Ti 2:3 Makiabe ka kanaku king kapibabatan king kasakitan, anti mong mayap nang kawal Cristo Jesus. 2Ti 2:4 Alang kawal a atiu king keang katungkulan a makialam king kapanintunan king bie a iti; baneng apatulan itang mitala kea king pangakawal. 2Ti 2:5 At nung ing metung a taung lalaki makilaban ya king pialung, e ya mipacoronan, subali nung makilaban yang masalese. 2Ti 2:6 Ing mananaman a darapat ya ing sukat munang kumang dake karing bunga. 2Ti 2:7 Talastasan mu ing sasabian ku; uling ing Guinu ibie na keka ing pamanalastas king keganaganang bague. 2Ti 2:8 Ganakan me i Jesucristo, a mibangun ibat karing mete, king bini nang David, agpang king kanakung evangelio: 2Ti 2:9 Nung nu ku mibatang kasakitan angga karing sukulan, anti mong mapaniapat kung marawak; dapot ing amanu ning Dios e makasukul. 2Ti 2:10 Inya pin aku pibabatan ku ing keganaganang bague king uli ra ding mepili, bang ila man apakikuanan da ing kaligtasan a atiu kang Cristo Jesus kagum ning ligayang alang angga. 2Ti 2:11 Tapat ya ing kasebian: Uling nung mete tamung kayabe na, mie tamu mu namang kayabe na: 2Ti 2:12 Nung mibata tamu, magari tamu mu namang kayabe na: nung payalian taya, ya man payalian nakatamu: 2Ti 2:13 Nung e ta tapat, ya manatili yang tapat, uling e na apayalian ing sarili na. 2Ti 2:14 Paganaka mo karela ding bague a deti, panabilinan mula king panimanman na ning Guinu, king e la sa misaskal tungkul karing amanu, king alang pakinabang, king ikasira ra ding makaramdam. 2Ti 2:15 Munie kang sipagan king pamiarap mu king sarili mu a mipamayapan king Dios, metung a talapaniapat a alang nanumang pikakarine, a gagamitan na king matulid ing amanu ning katutuan. 2Ti 2:16 Dapot isakuil mu ing pamalmurang alang kabaldugan: uling lalu la pang misundu king dewakan, 2Ti 2:17 At ing karelang amanu sisirang anti mong kangrena: ila pin di Himeneo ilang Fileto; 2Ti 2:18 Lalaki la a agpang king katutuan mebalatung, a ngara king ing pamanyublingmie milabas na, at sisiran da ing kasalpantayanan ding mapilan. 2Ti 2:19 Makanian man ing matibe pitalakaran ning Dios makatalakad, a maki tatak a anti ini, Balu no ning Guinu ding kea: at, Paburen yang kalilua king dewakan ing balang tutungue king laguiu ning Guinu. 2Ti 2:20 Ngeni king metung a bale maragul e mu ating lulanan a guintu at pilak, nung e pa naman dutung at gabun; at ding mapilan king kapurian, at ding mapilan king e kapurian. 2Ti 2:21 Nung ing metung a lalaki pin melinis ing sarili na kareti, maguing metung yang lulanan king kapurian, meguing banal, karampatan king pangagamit king Guinu, misadia king balang dapat a mayap. 2Ti 2:22 Dapot tumakas ka king malebuaran nang imbut ning kayanakan, at tuki ka king katuliran, kasalpantayanan, lugud, kapayapan, a kayabe ra ding mamaus king Guinu king malinis a pusu. 2Ti 2:23 Dapot isakuil mu ing pisasabian a kamangmangan at kealan beluan, baluan mu king mamungang pamiaskal. 2Ti 2:24 At ing talasuyu ning Guinu e sukat makitua, nung e mamu ya karing sabla, makasadia king pamanuru, mapibabata, 2Ti 2:25 King kamung lub tuliran la detang sasalangsang king sarili ra; magkang ing Dios ipagkalub na karela ing pamanisi dikil king beluan king katutuan, 2Ti 2:26 At balang mabulus king silu na ning diablo, a king uli na mebijag la dikil king kaburian na. 2Ti 3:1 Dapot pakibaluan mu iti, king karing tauling aldo datang ing panaun a mapanganib. 2Ti 3:2 Uling ding tau maguing malugud la king karelang sarili, malugud la king salapi, mayabang, palalu, mapanlibak, e mapamintu karing pengari, alang pasalamat, alang kabanalan, 2Ti 3:3 Alang lugud a katutubu, e abayutuk, mapaniandali, alang pamangawat king sarili, mabagsik, e malugud king mayap, 2Ti 3:4 Taksil, masias a buntuk, palalu, malugud king pitutulan a maiguit king pamanlugud king Dios; 2Ti 3:5 Atiu karela ing anyu ning kabanalan, dapot sikuil da ing keang kayupayan: kawani ka naman karing anti deti. 2Ti 3:6 Uling kareti la ding manlub karing bale, at kakuang bijag karing babaing magalo a masna king kasalanan, a meyagyag king miayaliwang kelabuaran, 2Ti 3:7 Parati king pamagaral, at kapilan pa man e ra disan ing beluan king katutuan. 2Ti 3:8 At nung makananu lang sinalangsang i Janes at i Jambres kang Moises, makanian la namang sasalangsang deti king katutuan; taung merawak a pamiisip, misasakuil tungkul king kasalpantayanan. 2Ti 3:9 Dapot e ra na isundu pa: uling mipatutuan karing sablang tau ing kabiguan da nung makananu ing karela mepalyari. 2Ti 3:10 Dapot ika tikian mu ing kakung turu, panugali, pake, kasalpantayanan, kamung lub, lugud, kapibabatan, 2Ti 3:11 Kaligaligan, kasakitan; nung nanung bague ing milyari kanaku Antioquia, king Iconio, king Listra; nung nanung kaligaligan ing pibata ku: at kareti ngan kinabus naku ning Guinu. 2Ti 3:12 Wa, at ding anggang mie king kabanalan kang Cristo Jesus mibata la king kaligaligan. 2Ti 3:13 Dapot ding taung marawak at ding lilu lalu la pang mipakarawak, mamirait la, at mapipirait la. 2Ti 3:14 Dapot manatili ka karing bague a kekang pegaralan at kekang pekabitasan, anti ning balu mu nung kaninu mu pegaralan; 2Ti 3:15 At ibat pa king pungul ka abalu mu no ding banal a kasulatan nung isanu ding makapabiasa keka king kaligtasan king pamamilatan na ning kasalpantayanan a atiu kang Cristo Jesus. 2Ti 3:16 Ing balang kasulatan a kesian na ning Dios mapakinabang mu naman king pamanuru, king pamangamanu, king pamanlarin, king pamanuru king atiu king katuliran: 2Ti 3:17 Bang ing tau ning Dios maguing sakdal ya, mipagkalubanan yang tibubus king balang dapat a mayap. 2Ti 4:1 Panabilin ku keka king arapan na ning Dios, at kang Cristo Jesus, a matul karing mabie at karing mete, at king keang pangalto at king keang kayarian. 2Ti 4:2 Panaral mu ing amanu; pagpilitan mu king kapanaunan, at king o kapanaunan; mangamanu ka, mamintas ka, musuk ka, kagum ning kapibabatan at ning pamanuru. 2Ti 4:3 Uling datang ing panaun a e ra pibatan ing mayap a doctrina: dapot, panga atin na lang gatal a balugbug, mibuntun lang talaturu ra dikil king karelang sariling kelabuaran; 2Ti 4:4 At ikawani ro king katutuan ding balugbug da, at mibalik la karing pikatsa. 2Ti 4:5 Dapot ika mangawat ka king sablang bague, pibatan mu ing kasakitan, daptan mu ing dapat ning evangelista, tuparan mu ing kekang pamanibala. 2Ti 4:6 Uling aku midaun na ku, at ing panaun na ning kakung panlako miras na. 2Ti 4:7 Mekilaban ku king mayap a pamakilaban, ayari ku ing kakung pake, iningat ku ing kasalpantayanan: 2Ti 4:8 Manibat na ngeni makasadia ne kaku ing corona ning katuliran, a ing Guinu, ing banal a ukum, ibie ne kanaku king aldo a ita; at e mu kanaku, nung e karing anggang malugud king pangalto na. 2Ti 4:9 Ibie mu ing pamamalagua bakang miras agad kaku: 2Ti 4:10 Uling i Demas pepaimburisan naku, anti ning liguran ne iting yatung salukuyan, at mine ya Tesalonica; i Cresente king Galacia, i Tito king Dalmacia. 2Ti 4:11 Bukud mung i Lucas yang abe ku, Yagkat me i Marcos, at ituki me; uling ya magamitan ya kaku king pamanibala. 2Ti 4:12 Dapot i Tiquico pepadala ke Efeso. 2Ti 4:13 Ing balabal a likuan ku Troas kang Carpo, dalan me keng datang ka, at ding libru, lalu na ding lulun a balat. 2Ti 4:14 I Alejandro a pande tangsu diptananan nakung dakal a marawak: ablasanan ne ning Guinu agpang king keang dapat: 2Ti 4:15 Nung kaninu ka naman dapat manginlag; uling bina nang selangsangan ing kekeng amanu. 2Ti 4:16 King minuna kung pamanutul ninuman alang kinampi kanaku, nung e ila ngan pepaimburisan daku: e na sa mibilang karela iti. 2Ti 4:17 Dapot ing Guinu tinalakad ya siping ku, at pepasiknangan naku; bang king kakung pamamilatan ing balita malyaring ganap mibulalag at barang damdaman ding anggang Gentiles; at aku miligtas ku king asbuk ning leon. 2Ti 4:18 Ing Guinu ikabus naku king balang dapat a marawak, at iligtas naku king kayarian na banua: nung kaninu ing ligaya angga king mangga. Yanasa. 2Ti 4:19 Pagmananuan me i Prisca ampon i Aquila, at ing bale nang Onesifero. 2Ti 4:20 I Erasto melakuan ya Corinto: dapot i Trofimo likuan keng masakit karin Mileto. 2Ti 4:21 Ibie mu ing pamagkapilit bang miratang ka bayu miras ing kauran. Pagmananuan nakang Eubulo, at i Pudente, at i Lino, at i Claudia, at ding anggang kapatad. 2Ti 4:22 Ing Guinu mantabe ya king kekang espiritu. Ing kalam manatili sa keka. |