II Pedro2Pe 1:1 I Simon Pedro, a talasuyu at apostol nang Jesucristo, karetang tinanggap a kalupa tamu king maulagang kasalpantayanan king kabanalan ning kekatang Dios ampon Talapagligtas a i Jesucristo: 2Pe 1:2 Kalam kekayu at kapayapan dakal sana, king pamangilala king Dios ampon kang Jesus a kekatang Guinu; 2Pe 1:3 Akakit tamu king ing keang banal a upaya binie no kekatamu ding keganaganang bague a makatungkul king bie ampon kabanalan, king pamamilatan ning pamangilala kanitang kekatamu minaus king sarili nang kaligayan at kayapan; 2Pe 1:4 Nung nu ya binie nala kekatamu ding maulaga at binang mangaragul nang pangaku; bang king pamamilatan da deti maguing karake kayu king kabanalan a katutubu, malyaring mitakas kayu king kasiran a atiu king yatu king uli na ning kaibugan. 2Pe 1:5 Wa, at king uli na mu rin naman niti idagdag yu king kekong dake ing anggang pamagkapilit, king kekong kasalpantayanan ing kayapan; at king kekong kayapan ing beluan; 2Pe 1:6 At king kekong beluan, ing pamangawat king sarili; at king pamangawat king sarili ing kapibabatan; at king kekong kapibabatan, ing kabanalan; 2Pe 1:7 At king kekong kabanalan, ing ganakang pamikakapatad; at king kekong ganakang pamikakapatad ing lugud. 2Pe 1:8 Uling nung deting bague kekayu la at dakal la, gawan dakong e alang daraptan at e alang bunga king pamangilala king kekatang Guinung Jesucristo. 2Pe 1:9 Uling itang ala karing bague a deti, bulag ya, ing malapit ya mung akakit na, akalinguan na ing pamanlinis king matua nang kasalanan. 2Pe 1:10 King uli na niti, kapatad, ibie yu ing lalung kasipagan bakong mika kabitasan king kekong pangayaus at pangayalal a tune: uling nung daptan yula ding bague a deti, e ko mitakid kapilan man; 2Pe 1:11 Uling makanian kong mipabandian dakal king pamanlub king alang anggang kayarian ning kekatang Guinu a Talapagligtas i Jesucristo. 2Pe 1:12 King uli na niti makasadia kung parati a paganaka ko kekayu ding bague deti, aguiang balu yula, at mitalakad kayu king katutuan a atiu kekayu. 2Pe 1:13 At isipan kung matulid, kabang atiku king tabernaculong iti, ing ayamuyut dakayu king pamamilatan na ning pamigaganaka; 2Pe 1:14 Anti na ning balu ku king ing pamangawani ning kakung tabernaculo malagawang daratang nung makananu nang tildu kanaku ning kekatang Guinung Jesucristo. 2Pe 1:15 Wa, ibie ku ing maragul a kasipagan king balang panaun a malyari yung arapat kaibat ning pamanlako ku, a ganakan yula ding bague a deti. 2Pe 1:16 Uling e ke tinuki karing sutil a pikatsang salita inyang binie mi kekayung pepakilala ing upaya at ing paniatang ning Guinu tang Jesucristo, nung e saksi kaming menakit king keang panga-ari. 2Pe 1:17 Uling tinanggap ya ibat king Dios a Ibpa puri at kaligayan, inyang ing metung a siwala midala ya kea ibat king Marangal a Ligaya, Iti ya ing Anak kung kaluguran, a kea atiu ing tula ku: 2Pe 1:18 At ing siwalang iti king kekeng sarili dimdam mi a miparalang ibat banua, inyang abe miya king banal a bunduk. 2Pe 1:19 At mika kabitasan ke king amanu ning ula; a kaniti daraptan yu ing mayap king kekong pamaningat, anti mo ing metung a sulu a saslag king metung a karinan a madalumdum, anggang munagmunag, at ing tala king munag sunlag ya karing kekong pusu: 2Pe 1:20 Anti ning pangabaluan yung mumuna iti, king alang ula king kasulatan a makasalikut a pangasalese. 2Pe 1:21 Uling kapilan man alang ula a mipadala king kaburian ning tau: nung e ding tau miniabi lang ibat king Dios king kimut ning Espiritu Santo. 2Pe 2:1 Dapot atin mu namang e tune manula a linto king libutad ning balayan nung makananung kekayu mu naman mika ating e tune talaturu, a deti milub lang lijim kasalpantayanan a manyira, payalian de aguiang ing Guinu a sinali karela, a dalan da ing karelang sarili king metung a malagawang kasiran. 2Pe 2:2 At dakal lang tuki king dapat dang kaibugan king laman; makauli karela, ing dalan na ning katutuan mapisabi ya king marawak. 2Pe 2:3 At king pamanangkamin, king amanung maki pirait, pangalakal da kekayu: a ing atul kareti ibat pa king minuna e na mikatiban, at ing karelang pangasira e matudtud. 2Pe 2:4 Uling nung ing Dios e no pepasayangan ding angeles inyang mikasala la, nung e bildug nala king infierno, at kilung nala karing kalalaman ning dalumdum, bang maingat la angga king pamanukum; 2Pe 2:5 At e ne pepasayangan ing matuang yatu, nung e iningat ne i Noe pati na ding aliwang pitu, ing metung a talapanaral ning katuliran, inyang pabal na ing albug king yatu ding marawak; 2Pe 2:6 At ding ciudad ning Sodoma at ning Gomorra pepalyarian nong abu, simpa nala king kasiran, a binili nala bang alimbawan da ding mie king dewakan; 2Pe 2:7 At linigtas ne ing banal a Lot, a melungkut king malebuaran a bie ra detang mangarawak 2Pe 2:8 (Uling ing banal a taung ita a manuknangan libutad da, king pamanakit na at pamakiramdam, malulumbe ya aldoaldo ing keang kaladuang banal karing dapat a e matulid a daraptan da); 2Pe 2:9 Ing Guinu balu nong iligtas king tuksu ding banal, at ibili ding e banal bang magkamit parusa king kayaldawan na ning pamanukum: 2Pe 2:10 Dapot lalu na ding lalakad dikil king laman, king kelabuaran na ning karinatan, at umisan de ing pamaniakup. Mapangangas la at masikan a lub, a e la tatakut malmura salang karing pekapun: 2Pe 2:11 Kabang ding angeles, aguiang lalu la pang maiguit king sikanan ampon upaya, e la magdalang kapalmuran a atul salang karela king arapan na ning Guinu. 2Pe 2:12 Dapot deti anti mong melalang a alang pamagmatulid, a mibait kabud mu animal bang dakpan at patayan, lilibakan do ding bague ketang e ra atatalastas, king karelang pamanyira tune lang masira. 2Pe 2:13 A pibabatan da ing kamalian anti mong kablasan na ning dapat a mali; tau a bibilang kaniti anti mong pamagsaya ing makitua king aldo; dungis ampon kapintasan, makiaskal la king karelang kapamiraitnan, kabang makipangan lang abe yu; 2Pe 2:14 A atin lang mata a mitmu king pamipaliwas, at e malyaring tuknang ing pamipaliwas, at e malyaring tuknang ing pamikasala; sisilu karing kaladuang e matibe; maki metung lang pusung misane king pamanangkamin; anak no ning pamaniumpa; 2Pe 2:15 A king pamipaimburis da king dalan a matulid, melili la tikian de ing dalan nang Balaam a anak nang Beor, a iti liguran na ing ablas ning pamaniapat kamalian; 2Pe 2:16 Dapot misabianan ya king keang sariling kapanalangsangan; ing merung a asnong pipi, miniabi ya king siwalang tau at piniguil na ing mua na ning manula. 2Pe 2:17 Deti sibul lang alang danum, at ulap lang sepula na ning metung a baguiu; a kareti makasadia ing pisak ning dalumdum. 2Pe 2:18 Uling, maniabi lang amanung palalu a kitmuan kaparangalan, sisilu la king kelabuaran na ning laman, king pamamilatan na ning kaibugan, karing tatakas a manibat karela a mabibie king kabalatungan; 2Pe 2:19 Pangakuanan dong katimawan, kabang ila mu rin alipan nala ning kasiran uling nung kaninu ya mediag ing metung a tau, iti man ya ing midala king pangayalipan. 2Pe 2:20 Uling nung, kaibat dang mitakas king pangamusingan king yatu, king pamilatan na ning pangabaluan king Guinu at Tagapagligtas a i Jesucristo, mipasibayuan lang mikulaput kaniti at madaig la, ing tauli rang pangabilian lalu pang mipakarawak kesa king minuna. 2Pe 2:21 Uling mayap pa karela ing e ra na abalu ing dalan na ning katuliran, kanitang, kaibat dang abalu iti, gumulut la king banal a kautusan a miabie karela. 2Pe 2:22 Milyari karela itang diparan a katutuan, Ing asu belikan nang pasibayu ing keang sariling suka, at ing babing babaing mewas miglubalug ya king pusali. 2Pe 3:1 Iti ngeni, kakung kaluguran, ing kaduang sulat a susulat ku kekayu; at karing adua guiguisingan ku ing kekong tapat pamiisip king pamibili kekayu king pamipaganaka; 2Pe 3:2 Bang agaganaka yu ing amanung sinabi rang minuna ding banal a manula, at ing utus ning Guinu at Tagapagligtas, king pamamilatan da ding kekong apostoles: 2Pe 3:3 A abalung mumuna pamu iti, bang king katataulian a aldo datang la ding manyunu a magdalang pamanyunu, a lalakad la agpang king karela mu ring kelabuaran, 2Pe 3:4 At sabian da, Nukarin ya ing pangaku ning keang pamaniatang? Uling manibat king aldo a metudtud la ding mangatua, ding sablang bague menatili lang sinulang anti mo ing bili ra manibat king kamumulan na ning pangalalang. 2Pe 3:5 Uling king kaburian da kakalinguan da iti, king ating banua manibat pa king minunang panaun, at metung a king pangalbug na a makakawani king danum, at king busal ning danum, king uli na ning amanu ning Dios; 2Pe 3:6 King pamamilatan da deti ing yatu kanita, king pangalbug na king danum, mewala ya; 2Pe 3:7 Dapot ding banua ngeni ampon ing labuad, king ulina mu rin ning sadiang amanu makatipun la dikil king api, anti na ning makatalaga la salang king kayaldawan na ning pamanukum ampon ning pangalipul da ding taung mangarawak. 2Pe 3:8 Dapot e yu kakalinguan iting metung a bague, kakung kaluguran, a king ing metung mung aldo tungkul king Guinu anti ya mong libung banua, at ing libung banua anti mong metung mung aldo. 2Pe 3:9 Ing Guinu e paliban tungkul king keang pangaku, anti mo ding mapilan bibili ra a miliban; nung e manaya yang mibabata ingguil kekayu, a e na buri a ninuman mipajamak ya, nung e bang ding sabla sumisi la. 2Pe 3:10 Dapot ing kayaldawan na ning Guinu datang anti mong mapanako; a kanita ding banua lumipas la king maragul a biung, at ding elementos malaso la king minlungang pali; at ing labuad at ding dapat a atiu king kaniti maduluk la. 2Pe 3:11 Anti ning ding sablang bague a deti malaso lang makanian, nanu ping anyung pangatau ing karampatan kekayu, king sablang banal a kabiayan ampon kalinisan, 2Pe 3:12 Makalawe at manayang malagawa king paniatang na ning kayaldawan na ning Dios, a makaingguil kaniti ding banua a mitatau matampus la, at ding elementos malaso la king minlungang pali? 2Pe 3:13 Dapot, agpang king keang pangaku, itamu manaya tamu karing bayung banua at metung a bayung labuad, nung nu manuknangan ing katuliran. 2Pe 3:14 King uli na niti, kakung kaluguran, ya rin king panayan yula ding bague a deti, magkasipag kayu, bang mayakit kayu king kapayapan, a alang musing, at e mipalsalanan king panimanman na. 2Pe 3:15 At talastasan yu king ing makabang kapibabatan na ning kekatang Guinu, ya ing kaligtasan; anti mo ing kekatang kaluguran a kapatad a i Pablo, agpang king kabiasnan a miabie kea, sinulat na kekayu; 2Pe 3:16 Anti mu naman karing sabla nang sulat, sasabian no karela deting bague a deti; a kareti ating mapilan a bague a mangasakit talastasan, a ding alang balu ampon e matibe babaluktut da, anti mo ing daraptan da karing aliwang kasulatan, dikil king sarili rang kasiran. 2Pe 3:17 Iko pin, kakung kaluguran, ya rin king babaluan yu nong makauna deting bague, mingat kayu, a magkang nung midala kayu king kabalatungan da ding mangarawak, manabu kayu manibat king sarili yung katibayan. 2Pe 3:18 Dapot pasilabung kayu king kalam at king beluan ning kekatang Guinu at Talapagligtas a i Jesucristo. Kea na sa ing ligaya, ngeni ampon angga king mangga. Yanasa. |