II Juan2Jn 1:1 Ing matua king mepiling guinung babai at karing keang anak, a kakung kaluguran king katutuan; at e mu bukud aku, nung e ding anggang maki balu king katutuan; 2Jn 1:2 King uli na ning katutuan a manuknangan kekatamu, at akayabe taya angga king mangga. 2Jn 1:3 Kalam, kapakaluluan at kapayapan, miabie na sa kekatamu a manibatan king Dios Ibpa, at kang Jesucristo, a Anak ning Ibpa, king katutuan at king lugud. 2Jn 1:4 Metula kung bina inyang ikit ko ding mapilan karing kekang anak a lalakad king katutuan, anti mo nung makananu tang tinggap ing utus ning Ibpa. 2Jn 1:5 At ngeni pagamuamu ku keka, guinung babai, e wari anting silatanan dakang metung a utus a bayu, nung e ita mu ring atiu kekatamu manibat king mula, a king mikakalugud ta sa ing metung at metung. 2Jn 1:6 At iti ya ing lugud, king pasilakad tamu agpang karing utus na. Iti mu rin ya ing utus, anti mo ing dimdam yu manibat king mula, bang lumakad kayu kaniti. 2Jn 1:7 Uling dakal la ding mapamirait a dinatang king yatu, a ila kabud ding mipapasiag king i Jesucristo e dinatang a mikatawan tau. Iti ya ing mapamirait at ing anticristo. 2Jn 1:8 Lawan yu ing kekong sarili, a e yo babating ding bague a depatan mi, nung e tanggap kong metung a kablasan a ganap. 2Jn 1:9 Ing ninumang lalagpus, at e manatili king turu nang Cristo, alayu kea ing Dios: ing manatili king turu, kaniti atiu ing Ibpa anti naman ing Anak. 2Jn 1:10 Nung ing ninuman datang ya kekayu, at e na daralan ing turung iti, e ye tatanggapan king bale yu, at e ya naman pagmananuan: 2Jn 1:11 Uling ing magmananu kea darake ya karing keang dapat a marawak. 2Jn 1:12 Anti na ning dakal a bague ing isulat ku kekayu, e ko isulat king papel ampon tinta: dapot panenayan ku ing ayan dakayu, at makisabing lupa at lupa, bang ing kekong tula miganap. 2Jn 1:13 Ding anak ning mepili a kekang kapatad a babai pagmananuan daka. |