II Corinto2Co 1:1 I Pablo, a metung a apostol nang Cristo Jesus king pamamilatan na ning kaburian na ning Dios, at i Timoteo a kekatang kapatad, king iglesia na ning Dios a atiu Corinto, pati na karing anggang banal a atiu king mabilug a Acaya; 2Co 1:2 Kalam kekayu at kapayapan a ibat king Dios a kekatang Ibpa ampon ning Guinung Jesucristo. 2Co 1:3 Nuan ya ing Dios at Ibpa ning Guinu tang Jesucristo, ing Ibpa ning kapakaluluan ampon Dios ning sablang tula; 2Co 1:4 A iti patulan nakami king sabla ming kalungkutan, bang apatulan mila ding atiu king kaisanumang kalungkutan, king pamamilatan na ning tula a pepatula na naman kekami ning Dios. 2Co 1:5 Uling nung makananung binang merakal ing kasakitan nang Cristo dikil kekami, makanian mu naman ing kekaming tula binang darakal king pamamilatan nang Cristo. 2Co 1:6 Dapot aguia mang magkasakit kami, iti dikil king kekayu mung ikatula at kaligtasan; o aguia mang mipatulan kami, iti dikil king kekayung ikatula, a darapat king kapibabatan a manatili king kasakitan mu ring pibabatan mi mu naman: 2Co 1:7 At ing kekaming kapanaligan dikil kekayu matibe; baluan yu na, anti na ning karake kayu king kasakitan, makanian mu naman karake kayu king tula. 2Co 1:8 Uling e mi pin buri king ala kong pangabaluan, kapatad, tungkul king kekeng kalungkutan a milyari kekami king Asia, king kebayatnan keng bina, maiguit king aguiu mi, nanupata meala kekami pati ing kapanaligan king kabiayan: 2Co 1:9 Wa, ikami mika atin ke king kekeng sariling kayatulan king kamatayan karing kekeng kasarilinan, bang e ke manalig king kekami mu ring sarili, nung e king Dios a papibangun karing mete; 2Co 1:10 A mikabus kekami king binang maragul a kamatayan, at kakabus nake pa: a kea binili mi ing kekeng kapanayan bang ikabus nake pa mu naman; 2Co 1:11 Ikayu man sumaup kayung miagum-agum patungkul kekami king kekong karalungan; bang, king uli na ning kalam a miabie kekatamu king uli ra ding dakal, ing pasalamat malyaring mipagkalub uli ra ding dakal a tau dikil kekami. 2Co 1:12 Uling ing kekeng kaligayan ya iti, ing patutu na ning kekeng pilubluban, a king kabanalan at king kalausan na lub ning Dios, e king kabiasnan ning laman, nung e king uli na ning kalam na ning Dios, meningat kami king yatu, at lalung lalu na kekayu. 2Co 1:13 Uling e rako susulatanan aliwang bague, subali king babasan yu o kikilalanan yu naman, at aku panaligan ku king kilalanan yu naman angga king kapupusan: 2Co 1:14 Anti mo ing pamangilala yu naman kekami ditak mu man, king ikaming kaligayan yu, anti mu naman a ikayu ing kekaming kaligayan, king aldo na ning Guinu tang Jesus. 2Co 1:15 At king kapanaligan a iti inisip ku ing ayan dakayung muna, bakong mirinan kaduang pakinabang; 2Co 1:16 At dumalan ku keang kekayu a ume Macedonia, at pasibayuan dakong ayan manibat Macedonia, at kekayu papatnube ku king paglakbe kung ume Judea. 2Co 1:17 Inyang aisip ku na pin iti, pepakit ku waring alang katibayan a lub? o ding bague a tatalaga ku, tatalaga kula agpang king laman, bang mike kanaku ing wa wa at ing ali ali? 2Co 1:18 Dapot anti na ning ing Dios tapat ya, ing kekeng amanu kekayu e wa at ali. 2Co 1:19 Uling ing Anak ning Dios, a i Jesucristo, a king libutad yu penaral miya, aku at i Silvano ampon i Timoteo, e wa at ali, nung e king kea wa ya. 2Co 1:20 Uling nu pa man anti ing pangaku na ning Dios, kea atiu ing wa: makanian mu naman pin a king uli na ya ing Yanasa, dikil king ligaya na ning Dios king pamamilatan mi. 2Co 1:21 Ngeni itang pasikan kekami a kagum yu kang Cristo, at linian nakami, ya ing Dios; 2Co 1:22 A iti tetakan nakami naman, at binie no kekami ding sangla na ning Espiritu karing kekeng pusu. 2Co 1:23 Dapot ing Dios yang ausan kung saksi dikil king kakung kaladua, king e ku manamdaman pibata ku ing e na pa ume Corinto. 2Co 1:24 E king atin keng pamaniakup king kekong kasalpantayanan, nung e talasaup kami king kekong tula: uling king uli na ning kasalpantayanan makatalakad kong matibe. 2Co 2:1 Dapot iti bitasa ku king kakung sarili, a king e na ku ume pasibayu kekayu a maki lungkut. 2Co 2:2 Uling nung aku palungkutan dakayu, ninu pin ing patula kaku nung e ing pepalungkutan ku mu rin? 2Co 2:3 At sinulat ku iting kabud bague, magkang, nung datang ku, mirinan kung lungkut karetang dapat kung ikatula; a maki katiwalan ku kekong sabla king ing kakung tula yang tula yu iko ngan. 2Co 2:4 Uling busal ning dakal a kalungkutan at pagsalbat na ning pusu sinulat ku kekayu kambe ning dakal a lua; e king ikayu bakong lungkut, nung e bang abalu yu ing lugud kung binang maragul kekayu. 2Co 2:5 Dapot nung ninuman mekapalungkut ya, mekapalungkut ya, e kanaku, nung e king ditak (bang e rako binang pabayatan) keko ngan. 2Co 2:6 Makaguiu na king anti ita ing anti kaniting parusa a peparusa ra ding keraklan; 2Co 2:7 Bang king sumangid na niti dapat yeng patawaran at patulan, a magkang king uli na ning nanu mang sangkan iti mayakmul ya king binang maragul a kalungkutan. 2Co 2:8 King uli na niti aku pagamuamu ku kekayu king patutuan yu ing lugud yu kea. 2Co 2:9 Uling king uli na mu rin niti sinulat ku, bang abalu ku ing kaustan kekayu, nung mapamintu kayu king keganaganang bague. 2Co 2:10 Dapot ninuman ing patawaran yu, aku man patawaran ke; at ing pepatawaran ku naman, nung pepatawad kung nanuman, king uli yu pepatawaran ke king pangaatiu nang Cristo; 2Co 2:11 King bang alang kaiguitan a nabangnan nang Satanas kekatamu: uling e tamu alang kamalayan karing keang kalalangan. 2Co 2:12 Ngeni inyang dinatang ku Troas, dikil king evangelio nang Cristo, at inyang ing pasbul mibuklat ya kanaku king Guinu, 2Co 2:13 Ala kung panaplak king kakung espiritu, uling e ke ikit i Tito a kakung kapatad: dapot inyang mamun na ku karela, mine ku Macedonia. 2Co 2:14 Dapot salamat king Dios a parating tataid kekatamu king pamagwagui dikil kang Cristo, at king pamamilatan tamu bubulalag na ing samiu ning beluan king kea mu rin king balang karinan. 2Co 2:15 Uling mayumu nakatang samiung Cristo king Dios, dikil karing miligtas, ampon karing mangamate; 2Co 2:16 King metung a samiu a ibat king kamatayan angga king kamatayan; king aliwa metung a samiu a ibat king bie angga king bie. At ninung ganap dikil kareting bague? 2Co 2:17 Uling ikami e ke pin anti karing dakal, sisiran da ing amanu ning Dios: dapot anting katapatan, dapot anting king Dios, king panlalawe na ning Dios, maniabi kami kang Cristo. 2Co 3:1 Pagmulan tamu waring pasibayung ipanabilin ing kekatamu mu ring sarile? O kailangan mi wari, anti mo ding mapilan, sulat a pamanabilin kekayu o manibatan kekayu? 2Co 3:2 Ikayu ing kekaming sulat, a makasulat karing kekaming pusu, ababalu at ababasa ra ding anggang tau; 2Co 3:3 Anti na ning makabulalag na kayung metung nang sulat Cristo, a kekeng susuyuwan, makasulat e king tinta, nung e king Espiritu ning Dios a mabie; e karing dulang a batu, nung e karing dulang a ila pin ding pusung laman. 2Co 3:4 At ing katiwalan a anti kaniti atiu kekatamu king pamamilatan nang Cristo king Dios: 2Co 3:5 E king ikami mu rin makaguiu na kami king kekeng sarili, bang ibilang mi ing isanu mang bague a ibat karing sarili mi; nung e ing kekaming kaguiuwan ibat king Dios: 2Co 3:6 A ya naman guewa nakeng makaguiu bang manibala king bayung tipan; e king letra, nung e king espiritu: uling ing letra makamate ya, dapot ing espiritu babie yang bie, 2Co 3:7 Dapot nung ing pamanibala king kamatayan, a makasulat, at makatatak karing batu, dinatang kagum ning ligaya, bang keta ding anak ning Israel e ra alawe maratun ing lupa nang Moises king uli na ning ligaya na ning keang lupa; a ing ligayang iti lilipas: 2Co 3:8 Makananung e ya pa lalung mika ligaya ing pamanibala king espiritu? 2Co 3:9 Uling nung ing pamanibala king ikayatul mirinan yang ligaya, ing pamanibala king katuliran lalu ya pang mirinan dakal a ligaya. 2Co 3:10 Uling king katutuan ing megawang maligaya e ne mipaligayan king anti kaniti, king uli na ning ligayang mimiguit pa. 2Co 3:11 Uling nung itang lilipas pin mirinan ligaya, lalu na pa ing manatiling atiu king kaligayan. 2Co 3:12 Anti na ning atin ta ping metung a kapanayan, gagamit keng maragul a tetagan king pamagsalita. 2Co 3:13 At e anti i Moises, a iti tekap ne ing metung a talikbung king keang lupa, bang ding anak ning Israel e la lumawe maratun king kapilan pa man kanitang lilipas: 2Co 3:14 Dapot ding karelang kaisipan mengasias la: uling angga king aldo ngeni, king pamamasa ra king matuang tipan ing sadiang talikbung mu rin manatili ya, a iti e mipakilala karela, milako ne kang Cristo. 2Co 3:15 Dapot angga king aldo iti, kapilan mang i Moises mabasa ya, ing metung a talikbung makatakap ya king karelang pusu. 2Co 3:16 Dapot kapilan pa man a ing ninuman karela mibalik ya king Guinu, milako ya kea ing talikbung. 2Co 3:17 Ngeni ing Guinu ya ing Espiritu: at nung nu ya karin atiu ing Espiritu ning Guinu, karin atiu ing katinawan. 2Co 3:18 Dapot ita ngan, a alang talikbung a lupa a lalawe anti mo king metung a salamin king ligaya ning Guinu, mibayu tamu king sadiang pangalarawan mu rin, manibat king ligaya angga king ligaya, a iti ibat king Guinu ing Espiritu. 2Co 4:1 King uli na niti anti na ning akakit yu king atiu kekami ing pamanibalang iti, nung makananung tinanggap keng pakalalu, e ke mimina: 2Co 4:2 Nung e bagkus sikuil mila ding dapat a makarine a makasalikut, e ke lalakad king kasutilan, ni e mi tatalanan ing amanu na ning Dios king kapiraitanan; dapot king pamipakilala king katutuan panabilin mila ding kekeng sarili king balang pilubluban ning tau king panimanman ning Dios. 2Co 4:3 At aguia mang makatalikbung ya pa ing kekeng evangelio, makatalikbung ya karing mamamate: 2Co 4:4 A kareti ing dios ning yatu bilagan na ing kaisipan ding e maniwala bang ing sala ning evangelio ning ligaya nang Cristo, a iti ya ing larawan na ning Dios, e mamunag karela. 2Co 4:5 Uling e mi panaral ing kekaming sarili, nung e i Cristo Jesus anting Guinu, at ikami anting talasuyu yu king uli nang Jesus. 2Co 4:6 Akakit yu king ing Dios yang sinabi, Ing sulu sunlag ya busal ning dalumdum, a yang sinlag karing kekaming pusu, bang ibie na ing sala ning beluan king ligaya na ning Dios king lupa nang Jesucristo. 2Co 4:7 Dapot atiu kekami ing pibandian a iti karing lulanan a gabun, bang ing labislabis nang degulan ning upaya maguing king Dios, at e ibat kekami; 2Co 4:8 Malilipit kami king misusumangid, dapot e ke malulugma; mebalisa, makanian man e king pamagkulang kapanaligan; 2Co 4:9 Mangaligalig, makanian man e mipaimburisan; miraragsa dapot e malalasak; 2Co 4:10 Parati miyang daralan numan karin king katawan ing kamatayan nang Jesus, bang ing bie na namang Jesus mipakilala ya king kekeng katawan. 2Co 4:11 Uling ikami a mabibie parati keng miayabie king kamatayan king uli nang Jesus, bang ing bie na namang Jesus mipakilala ya king kekeng laman a maki kamatayan. 2Co 4:12 Nanupata ing kamatayan darapat ya kekami, dapot ing bie kekayu. 2Co 4:13 Dapot anti na ning atin tamung milulupang espiritu ning kasalpantayanan, agpang ketang makasulat, Meniwala ku, at nung inya maniabi ku; ikami man maniwala kami, at king uli na naman niti maniabi kami; 2Co 4:14 Pangabaluan mi na king ing mibangun king Guinung Jesus, ibangun nakami naman a kayabe nang Jesus, at iyarap nakaming kayabe yu. 2Co 4:15 Uling ding anggang bague tungkul la mu kekayu, bang ing kalam, anti ning miragdagan king pamamilatan da ding dakal, maguing panibatan na ning kapasalamatan a labislabis king ikaligaya na ning Dios. 2Co 4:16 King uli na niti, e ke mimina; dapot aguia mang ing kekeng pangataung atiu lual malalaso ya, makanian man ing kekeng pangataung atiu kilub mibabayu aldoaldo. 2Co 4:17 Uling ing kekeng mayan a kalungkutan, a sagasaguli mu, susulung nang susulung darapat kekami king metung a alang anggang bayat ning ligaya; 2Co 4:18 Bistat e ke lalawe karing bague a mayayakit, nung e karing bague a e mayayakit: uling ding bague a mayayakit panapanaun la mu; dapot ding bague a mayayakit, ala lang kapupusan. 2Co 5:1 Uling balu mi king nung ing kekaming bale a gabun ning kekeng tabernaculo, masira ya, atin kami king Dios metung a tuknangan, metung a bale a e guewang gamat, alang kapupusan, karing banua. 2Co 5:2 Uling king katutuan kaniti daralung kami, pagnasan ming binang lusuk ing mipaimalanan kami king kekeng tuknangan a ibat banua: 2Co 5:3 Nung makanian king pangapaimalanan mi e ke mayakit lubas. 2Co 5:4 Uling tune ikaming atiu king tabernaculong iti daralung kami, anti na ning mipabayatnan kami; e ing dikil king ikami malubas kami, nung e king mipaimalanan kami, bang ing maki kamatayan mayakmul ya king bie. 2Co 5:5 Ngeni ing dinapat kekami dikil kaniti mu ring bague ya ing Dios, a ya ing minie kekami king katapatan ning Espiritu. 2Co 5:6 Anti ning parati keng ating mayap a tetagan, at baluan mi king, kabang ati kami king bale ning katawan, ala kami king arap ning Guinu. 2Co 5:7 (Uling lalakad ke pin king kasalpantayanan, at e king lawe); 2Co 5:8 Atin kami king mayap a tetagan ngaku, at pagnasan mi pang maiguit ing mawala na ke king katawan, at miras na ke bale a kagum ning Guinu. 2Co 5:9 King uli na niti naman gagawan ming kekeng pake, a maguing ati ke man bale o ala ke man, a makapatula ke sa kea. 2Co 5:10 Uling kailangan a ike ngan malyari keng mipakilala king arapan na ning luklukan ning piukuman nang Cristo; bang ing balang metung tanggapan no ding bague mengarapat king katawan, agpang king depatan na, aguiang mayap man o marawak. 2Co 5:11 Anti na ning pangabaluan pin ing takut king Guinu, amuyutan mila ding tau, dapot mipakilala kami king Dios; at pagnasan ku king mipakilala kami naman karing kekong pilubluban. 2Co 5:12 E mi panabilin pasibayu kekayu ing kekeng sarili, dapot maniabi keng anti mung babie panaun kekayu king pamipaligaya king uli mi, bang atin kung apakibat karing paligaya king anyu, at e king pusu. 2Co 5:13 Uling ibang ke man sa, iti dikil king Dios; o malino ke man sa kaisipan, iti dikil kekayu. 2Co 5:14 Uling ing lugud nang Cristo pipilitan nakami; uling mamatul keng makanian, king metung ya ing mete king uli ra ding sabla, nung makanian mete la ding sabla; 2Co 5:15 At ya mete ya king uli ra ding sabla, bang ding mabibie e no mie pa karing karelang sarili, nung e dikil kanitang mete king uli ra at mibangun pasibayu. 2Co 5:16 Inya pin ikami manibat na ngeni e miya balu ing ninumang tau a dikil king laman: aguia mang abalu miya i Cristo dikil king laman makanian man ngeni e mi ne balu pa. 2Co 5:17 Inya nung ninuman atiu kang Cristo, metung yang bayung melalang: ding bague a matua linipas na la, oreni, meguing bayu la. 2Co 5:18 Dapot ding keganaganang bague king Dios la, a iti sinut nakami kea mu rin king pamamilatan nang Cristo, at binie na kekami ing pamanibala king pamisut; 2Co 5:19 A ya pin, king ing Dios atiu kang Cristo a kea mu rin sinut na ing yatu, king keang sarili e na tutunggayan ing karelang kapanalangsangan, at peniwala na kekami ing amanu ning pamisut. 2Co 5:20 Ikami pin tubud kami king uli nang Cristo, anti mung nung ing Dios pagamuamu na king uli mi: pagamuamu mi kekayu king uli nang Cristo, sumut kayu king Dios. 2Co 5:21 Ya a maki balu king kasalanan guewa na keang kasalanan king uli tamu; bang itamu malyari tang katuliran ning Dios king uli na. 2Co 6:1 At king pamaniapat ming makayagum kea ikami man pagamuamu mi kekayu king e yu tatanggapan ing kalam na ning Dios king alang kabaldugan; 2Co 6:2 (Uling sasabian na, King panaun a matatanggap pekiramdaman daka, At king aldo na ning kaligtasan seupan daka; Oini ngeni ing panaun a matatanggap; Oini ngeni ing aldo na ning kaligtasan): 2Co 6:3 E babie nanumang sangkan a ikatakid king nanu mang bague, bang ing kekeng pamanibala e mipalsalanan; 2Co 6:4 Dapot king keganaganang bague panabilin mi ing sarili mi, anting talapanibala na ning Dios, king dakal a kapibabatan, king kalungkutan, king pamagkailangan, king kagutgutan. 2Co 6:5 King batbat, king pangasukul, king kaguluan, king dapat, king pamaglane, king pamagayunu; 2Co 6:6 King kalinisan, king beluan, king katibayan a lub, king ganaka, king Espiritu Santo, king lugud a e pigagawan, 2Co 6:7 King amanu ning katutuan, king kayupayan na ning Dios; king pamamilatan na ning sandata na ning katuliran king wanan a gamat at king kaili, 2Co 6:8 King pamamilatan na ning ligaya at kealan puri, king pamamilatan na ning marawak a ulat at mayap a ulat; anti mung mapamiraya, at makanian man tutu; 2Co 6:9 Anti mung e pikabaluan, at bagkus lubus a lubus balu; anti mung mamamate, at oini, mabie kami; anti mung miparusan, at e mete; 2Co 6:10 Anti mung malungkut, makanian man parating tutula; anti mung kalulu, dapot pabandian nala ding dakal; anti mong ala la nanuman, at bagkus bandi ra ing keganaganang bague. 2Co 6:11 Ding kekeng asbuk makabusni la kekayu, Oh tau Corinto, ing kekeng pusu menawa ya. 2Co 6:12 E ku misasakitan kekami, dapot misasakitan kayu king sarili yung pamalsinta. 2Co 6:13 Ngeni pin bilang kablasan na ning anti iti (maniabi ku anti mo karing kakung anak), pasinawa kayu naman. 2Co 6:14 E ku sa makipaud karing e maniwala: uling nanu pin ing pamiabe ra ing katuliran ila ning dewakan? o nanung pamakiagum na ning sala king dalumdum? 2Co 6:15 At nanung pamakikasundu nang Cristo kang Belial? o nanu ing dake na ning maniwala king e maniwala? 2Co 6:16 At nanung pamikametung na ning pisamban na ning Dios karing idolos? uling itamu pisamba nakatamu ning Dios a mabie; anti mo ing sinabi na ning Dios, Manuknangan ku karela, at lumakad ku karela; at aku ing karelang maguing Dios, at ila ing kakung maguing balayan. 2Co 6:17 King uli na niti Mako kayu karela at kalilua kayu, ngana ning Guinu, At e ko tatagkil karing bague a marinat; At aku tanggapan dakayu, 2Co 6:18 At akung kekong maguing Ibpa, At ikayu ding anak kung lalaki at anak a babai, Ngana ning Guinung Mayupaya king Sabla. 2Co 7:1 Anti ning atiu pin kekatamu ing pangakung anti kaniti, kaluguran magpakalinis ta sa king anggang karinatan ning laman at king espiritu, gawan tamung sakdal ing kabanalan king takut king Dios. 2Co 7:2 Ibuklat yo ding kekong pusu kekami: e ke dinapat kamalian kaninuman, ninuman e miya peparawak, kaninuman e ke memirait. 2Co 7:3 E ku sasabian iti bang atulan dakayu: uling sinabi ku na, king ati kayu karing kekeng pusu, bang miabe at miabe mie. 2Co 7:4 Maragul ing kakung tetagan a maniabi kekayu, maragul ing kakung kaligayan king uli yu: kitmuan kung pamipatula, ganap ku king saya busal ning kekeng anggang kalungkutan. 2Co 7:5 Uling anguing inyang datang ke pa Macedonia ing kekeng laman e mirinan kapasnawan, nung e ati ke king kalungkutan king misusumangid; king lual pamipamuk, king kilub takut. 2Co 7:6 Makanian man ing patula karing mababa lub, a ya pin ing Dios, pepatula nakami king paniatang nang Tito; 2Co 7:7 At e mu kabud king paniatang na, nung e naman king uli na ning pamipatula a kaniti mipatulan ya kekayu, kabang pamalita na kekami ing kekong nasang milalablab, ing kekong pamagpaldas, ing kekong katapatan kanaku; nung inya lalu ku pang metula. 2Co 7:8 Uling aguiang pepalungkutan dakayu king kanakung sulat, e ku pagkalungkutan iti: bistat pigkalungkutan ku iti (uling akakit ku pin king ing sulat a ita pepalungkutan nakayu, aguiang king makuyad mung panaun), 2Co 7:9 Ngeni magsaya ku, e king uli ning melungkut kayu, nung e uli ning melungkut kayu dikil king pamanisi; uling melungkut kayu dikil king banal a lungkut, bang nanuman e ku magkamit kasiran kekami. 2Co 7:10 Uling ing banal a lungkut darapat king pamanisi dikil king kaligtasan, metung a pamanisi a e magdalang kalungkutan: dapot ing kalungkutan king yatu bubunga na ing kamatayan. 2Co 7:11 Uling oini, iti mu ring bague king melungkut kayu dikil king banal a lungkut, nanu ing ganap a kaingatan ing depatan na kekayu, wa nanu ing pamanlualu na kekayu, wa nanung kasbu, wa nanung takut, wa nanung milalablab a nasa, wa nanung katapatan, wa nanung pamanablas! King balang bague pepakit kayung malinis king bague a iti. 2Co 7:12 Inya pin bistat sinulat ku kekayu, e ku sinulat king uli na nitang dinapat king e matulid ni e mu naman king uli na nitang mibata king e matulid, nung e king ing ganap yung kaingatan kekami mipabalu kekayu king panimanman ning Dios. 2Co 7:13 Inya pin mipatulan kami: at king kekeng tula, mesaya ke pang maiguit king uli na ning tula nang Tito, pablasang ing keang espiritu mipasno ya king uli yu ngan. 2Co 7:14 Uling nung king ditak muman pigmarangal ke tungkul kekayu, e ku mipakarine; dapot anti ning sasabian mi ing keganaganang bague kekayu king katutuan, inya ing kekeng pamagparangalan mu naman dikil kang Tito meakit a katutuan. 2Co 7:15 At ing keang pamalsinta lalu pang labislabis dikil kekayu, kabang agaganaka na ing kapamintuan yu ngan, nung makananu yeng tinggap a maki takut at galgal. 2Co 7:16 Aku matutula ku pin king king balang bague atin kung mayap a tetagan dikil kekayu. 2Co 8:1 Bukud kaniti, kapatad, pabalu mi kekayu ing kalam na ning Dios a miabie karing iglesia king Macedonia; 2Co 8:2 Nung makananu king busal na ning maragul a pangasubuk king kalungkutan ing keraklan na ning karelang tula ampon ing karelang malalam a kakaluluan linapo dikil king karing pibandian na ning karelang mayubung lub. 2Co 8:3 Uling agpang king karelang kayupayan, aku pin babie kung patutu, wa at maiguit pa king karelang kayupayan, minie la king sarili rang kusa. 2Co 8:4 Pagamuamu ra kekaming mapilit tungkul kaniting kalam at king pamiabe king pamanibala karing banal: 2Co 8:5 At iti, e anti mu ing kekeng kapanayan, nung e binie ra pamu ing sarili ra kaunanunan king Guinu, at kekami king pamamilatan na ning kaburian na ning Dios. 2Co 8:6 Nanupata inusukan miya i Tito, a anti ning ya minuna yang migmula, makanian mu rin iganap na kekayu iting kalam. 2Co 8:7 Dapot ya rin pin king mikatmuan kayu king balang bague, king kasalpantayanan, at pamaniabi, at beluan, at king sablang kalausan lub, ampon king kekong lugud kekami, lawan yu king mikatmuan kayu naman king kalam a iti. 2Co 8:8 E ku maniabing anting mumutus, nung e king pamaniubuk king pamamilatan na ning kalausan lub ding aliwa ing katunayan na naman ning kekong lugud. 2Co 8:9 Uling balu yu ing kalam na ning kekatang Guinung Jesucristo, king, king bistat mabandi ya, makanian man king uli yu mekalulu ya, bang ikayu king pamamilatan na ning keang kakaluluan mibandi kayu. 2Co 8:10 At kaniti babie ku ing kakung kayatulan: pablasang iti karampatan kekayu, a nung ninu ding mumunang mekapagmula ketang pabanuang milabas, e mu naman bang mabisa. 2Co 8:11 Dapot ngeni pin arian yu ing dapat mu namang iti; a anti na ning ating makasadiang pangabisa, makanian mu rin atiu naman ing pangatupad na lalam ning kekong kaguiuwan. 2Co 8:12 Uling nung ing pangasadia atiu karin, matatanggap agpang king atiu king tau, e agpang king alayu kea. 2Co 8:13 Uling e ku sasabian iti bang ding aliwa mirinan lang kapaldanan at ikayu kagutgutan; 2Co 8:14 Dapot uli ning pamipante; ing kekong kayatinan a labislabis maguing saup king panaun ngeni tungkul king karelang kakulangan, bang ing karelang kayatinan a labislabis maguing kasaupan tungkul king kekong kakulangan; bang mika pamipantepante: 2Co 8:15 Anti ing king makasulat, Ing tinipun dakal ala yang mitagan; at ing tinipun ditak e ya migkulangan. 2Co 8:16 Dapot salamat king Dios a mibibili king tapat a kaingatan kekayu king pusu nang Tito. 2Co 8:17 Uling king katutuan tinggap na ing kekeng kausukan; dapot pablasang tutu yang tapat a lub, king sarili nang kaburian inayan nakayu. 2Co 8:18 At tinubud miyang abe na ing kapatad a ing kapurian na king evangelio mibantug karing anggang iglesia: 2Co 8:19 At e mu kabud iti, nung e detang inalal da ding iglesia king pamaglakad kayabe mi a makatungkul king kalam a iti, a mipanibala kekami dikil king ligaya na ning Guinu, at bang apakit ing kekeng pangasadia: 2Co 8:20 King pamanginlag kaniti ninuman alang makapalsala kekami tungkul kaniting pibandian a mipanibala kekami: 2Co 8:21 Uling gagamit keng pamiisip tungkul king bague makarangal, e mu king panimanman na ning Guinu, nung e pa naman king panimanman da ding tau. 2Co 8:22 At tinubud miyang abe ra ing kekeng kapatad, a iti madalas miyang asubukan masipag king dakal a bague, dapot ngeni lalu ya pang masipag king uli na ning kapanaligan nang maragul a atiu kekayu. 2Co 8:23 Nung ating ninumang kukutang tungkul kang Tito, ya ing kayabe ku ampon kasaup king pamagobra dikil kekayu; o karing kapatad, ila tubud dala ding iglesia, ila ligaya nung Cristo. 2Co 8:24 Pakit yu pin karela king arapan ding iglesia ing kaustan na ning kekong lugud, at ning kekeng pamipaligaya dikil kekayu. 2Co 9:1 Uling tungkul king kapanibalan karing banal, labis na kanaku ing isulat ku kekayu: 2Co 9:2 Uling balu ku pin ing kekong pangasadia, a kaniti maliligaya ku tungkul kekayu dikil karetang king Macedonia, king ing Acaya keta pang banuang metung makasadia ne; at ing kekong kalingapan inaguiag nala ding keraklan karela. 2Co 9:3 Dapot tinubud ko ding kapatad, bang ing kekeng pamipaligaya tungkul kekayu e sa mayalang kabaldugan king bague a iti; bang, dikil king sinabi ku, magsadia kayu: 2Co 9:4 A magkang sakali, tuki ya kanaku ing ninuman karing tau Macedonia, at dasan dakong e makasadia, ikami (bang e mi asabing ikayu) dumine kami king kapanaligan ming iti. 2Co 9:5 Inisip ku king katampatan ipagamuamu karing kapatad king muna nung ume kekayu, at isadia raneng tambing ing kekong pagkalub a saup a makapangaku na; bang makasadia anti mung pagkalub, at e anting bague a simsam pilit. 2Co 9:6 Dapot iti yang sasabian ku, Ing tatanam maki karimutan, malut ya namang maki karimutan; at ing tatanam binang dakal, malut ya namang binang dakal. 2Co 9:7 Paburen ya ing balang katau a dapat dikil king atiung tatalaga na king keang pusu; a e mabayat king lub na, o king sapilitan mu: uling ing Dios kaluguran ne ing masayang babie. 2Co 9:8 At ing Dios arapat na a king ing anggang kalam miabe labislabis kekayu; king bang, ikayung atin a parati king anggang bague king alang kulang, mika atin kong dakal dikil king balang dapat a mayap; 2Co 9:9 Agpang king atiung makasulat: Kinalat nang malakue, binie na karing kalulu; Ing keang kabanalan manatili angga king mangga. 2Co 9:10 At ing babie bini king mananaman, ampon tinape dikil king pamangan na, pagkalub na ampon parakalan ing kekong bining isalbag at dagdagan no ding bunga na ning kekong katuliran: 2Co 9:11 A ikayu king pamipabandi yu king balang bague, king anggang mayubung lub: a darapat kekatamu king pamipasalamat king Dios. 2Co 9:12 Uling ing pamanibala king kasuyuan a iti e mu ing kakatmuan na ing sukad ning kakulangan ding banal, nung e labislabis ya naman, king dakal a kapasalamatan king Dios; 2Co 9:13 Akakit yu king pamamilatan na ning kekong pangasubuk, a merapat king pamanibalang iti, ila paligayan de ing Dios, king uli na ning kapamintuan ning pamipatutu yu king evangelio nang Cristo; ampon king uli ning mayubu yung lub king ambag yu karela, ampon karing sabla: 2Co 9:14 Kabang ila mu rin naman, king pamanalangin a makatungkul kekayu, atin lang malablab a lugud kekayu, king uli na ning ganap at labislabis a kalam na ning Dios kekayu. 2Co 9:15 Salamat king Dios king uli na ning keang kalam a e pasabi. 2Co 10:1 Ngeni aku kabud i Pablo magamuamu kekayu alangalang king kamung lub ampon yubu nang Cristo, aku nung ninung makarap kekayu mamu ku lub, dapot nung ali ku atin kung tetagan kekayu; 2Co 10:2 Wa, aku pagamuamu ku kekayu, bang nung makarap ku e ku sa pakit tetagan a ating katiwalan nung nukarin anti kung ating tepangan laban karing mapilan, a mibibilang kekami a anti ke waring lalakad dikil king laman. 2Co 10:3 Uling aguiang lalakad ke king laman, e ke makipamuk a dikil king laman, 2Co 10:4 (Uling ding sandata ning kekeng pamakipamuk e la king laman, dapot maki upaya la king arapan ning Dios a makalagpak karing kuta,) 2Co 10:5 Yang lalasak king pamiisipisip at king balang matas a bague a itatas salang king beluan na ning Dios, at daralan na ing balang kaisipan king pangabijag king kapamintuan kang Cristo; 2Co 10:6 At anti ning makasadia lang mablas king anggang kapanalangsangan, nung ing kekong kapamintuan miganap na. 2Co 10:7 Lalawan yula ding bague a atiu arapan yu. Nung ing ninuman panaligan na ing keang sarili, king ya kang Cristo ya, piunusan na sang pasibayu king keang sarili iti: a nung makananung ya kang Cristo ya ikami makanian kami naman. 2Co 10:8 Uling aguiang magmaragul ku ping labis anti itang tungkul king kekeng kayupayan (a binie ne kekami ning Guinu bang patibayan dakayu, at e bang iragsa nakayu), e ku mibili king kamarinayan: 2Co 10:9 Bang e ku lunto anting bisang patakut kekayu karing kakung sulat. 2Co 10:10 Uling, Ding keang sulat, sasabian da, mabayat la at masikan; dapot ing anyu na king katawan maina ya, at ing keang pamangamanu alang kabaldugan. 2Co 10:11 Paburen ya ing ninuman isipan na iti, bang, nung nanu kami king amanu ra ding sulat ngening e ke makarap, makanian kami naman king dapat, ngening makarap kami. 2Co 10:12 Uling e ke mangangas makibilang o makibas karing mapilan karetang pupuri king sarili ra: dapot ilang sarili susukdan da ing karelang sarili king sarili ra, ala lang pamanalastas. 2Co 10:13 Dapot ikami e ke papuri ketang makalabis king kekeng sukad, nung e bagkus, dikil karing sukad ning dulun a pirake na ning Dios kekami, sukad a miraras pa angga na kekayu. 2Co 10:14 Uling e mi daragul milalu ing kekeng sarili, anti mung e ke miraras angga kekayu: uling angga man kekayu miras kami king evangelio nang Cristo: 2Co 10:15 E ke papuri ketang makalual king kekeng sukad, ya pin, ing king daraptan da ding aliwa; dapot anti ning atin keng kapanayan, anti mu ing panubu na ning kekong kasalpantayanan, lalu ke pa sang mipuri kekayu king makayagpang king aguiu mi king lalu pang ikaragul. 2Co 10:16 Bang ipanaral ing evangelio karing dake a nangan yu pa karin, at e king ligaya ning aliwang dulun a makatungkul karing bague a makasadia karing kekatang gamat. 2Co 10:17 Dapot ing paligaya, paligaya ya sa king Guinu. 2Co 10:18 Uling e mipamayapan ing pupuri king keang sarili, nung e itang pupurian na ning Guinu. 2Co 11:1 Mananu na sanang apibata yuku king ditak kung kamangmangan: dapot king katutuan pibabatan yuku. 2Co 11:2 Uling aku pangalalu rakayu, king pamangalalu dikil king Dios, uling kesal dakayu king metung mung asawang lalaki, bang ayarap dakayu kang Cristo anti mung dalagang malinis. 2Co 11:3 Dapot tatakut ku, magkang, nung makananung ing ubingan pirait ne i Eva king keang kalalangan, makanian mu naman ing kekong kaisipan masira ibat king pangatune ampon king kalinisan kang Cristo. 2Co 11:4 Uling nung itang datang, panaral ne ing aliwang Jesus, a ikami e miya penaral, o nung tanggap kayung aliwang espiritu, a iti e ye tinggap, o aliwang evangelio, a e yu tinggap, mayap nung pibabatan ye ing anti kaniti. 2Co 11:5 Uling babalakan kung e ku tauli king makanu man karing lalu pang mangarangal a apostoles. 2Co 11:6 Dapot aguiang magaspang ku king pamaniabi, makanian man ali ku king kabiasnan; ali ku, king balang paralan pepakilala mi iti kekayu king keganaganang bague. 2Co 11:7 O mikasala ku wari king pamagpakumbaba ku king sarili ku, bang ikayu misaplala kayo, uling peneral keng alang nanu na man kekayu ing evangelio ning Dios? 2Co 11:8 Simsamanan kula ding aliwang iglesia, king pamangua kung upa karela bang sumuyu ku kekayu. 2Co 11:9 At inyang ati ku king arapan yu, at kukulang kung pagkabie, e ku meguing pusan king kaninuman; uling ding kapatad inyang datang lang menibatan Macedonia binie ra ing sukad ning kailangan ku; at king keganaganang bague iningat ke ing sarili ku bang e makapangabayat kekayu, at makanian keng ingatan ing kakung sarili. 2Co 11:10 Anti na ning atiu kanaku ing katutuan nang Cristo, ninuman e na atuknang kanaku ing pamipaligayang iti karing labuad ning Acaya. 2Co 11:11 Nanung kasangkanan? uling e rako kaluguran? Ing Dios balu na. 2Co 11:12 Dapot ing daraptan ku, ya namang daptan ku, bang akutud ku ing kasangkanan karing magnasang kasangkanan; bang keta nung nu la paligaya, mayakit la sang anti mu itamu. 2Co 11:13 Uling ding anti kareting tau e la tune apostoles, mamirait lang talapagobra, yanyu ra ing karelang sarili, anting apostoles nang Cristo. 2Co 11:14 At alang pagmulalan; uling i Satanas mu rin yanyu na ing sarili na king angel na ning sala. 2Co 11:15 E maragul a bague pin nung ding keang talapanibala maganiu lang anti mong talapanibala ning katuliran; a ing keang sepu makayagpang ya karing karelang dapat. 2Co 11:16 Sasabian kung pasibayu, Ninuman sa e na isipan ing mangmang ku; dapot nung daptan yu, makanian man, anti mong metung a mangmang tanggapan yuku, bang paligaya ku pang ditak. 2Co 11:17 Ing sasabian ku, e dikil king Guinu sasabian ku, nung e anti mong atiu ku king kamangmangan, kaniti mu ring kapanaligan kung pamipaligaya. 2Co 11:18 Anti na ning mayayakit king ding dakal paligaya la dikil king laman, aku man paligaya ku. 2Co 11:19 Uling pibabatan yong matula ding mangmang, aguiang mangabiasa kayu. 2Co 11:20 Uling pibabatan ye ing tau nung daralan nakayu king pangaalipan, nung lalaklakan nakayu, nung bibijagan nakayu, nung ya sasaplala na ing sarili na, nung susugatan nakayu king lupa. 2Co 11:21 Maniabi ku king dalan ning kapintasan, anti mong mengaina tamu. Makanian man king numan karing karinan a ing ninuman mapangangas ya (maniabi ku king kamangmangan), aku man mapangangas ku. 2Co 11:22 Hebreos la? Aku man. Israelitas la? Aku man. Ila ding bini nang Abraham? Aku man. 2Co 11:23 Talapanibala nong Cristo? (Maniabi ku anti mong mebating a isip) Lalu ku pa; king dapat ganap ku pa, karing sukulan lalu pang parati, karing batbat labis king bilang, king kamatayan maralas. 2Co 11:24 Karing Judios, makatalima ku tinanggap apat apulung batbat, kulang metung; 2Co 11:25 Mekatatlu ku mebatbat karing pamaluka, misan daku pemukul batu, mekatatlu ku metiab, kabukas at patingapun ati ku king kalalaman; 2Co 11:26 King pamaglakbe maralas, king panganib karing ilug, king panganib karing tulisan, king panganib karing kabalen, king panganib karing Gentiles, king panganib king ciudad, king panganib king ilang, king panganib king dayatmalat, king panganib busal ding e tune kapatad: 2Co 11:27 King pagal ampon king pamagkasakit, king pamaglame maralas, king danup at kau, king pamagayunu maralas, king dimla ampon kalubasan. 2Co 11:28 Subali karetang bague a makalual, ating kaku pasakit king aldoaldo, ing kabalisan ku karing anggang iglesia. 2Co 11:29 Ninung maina, a aku e ku mo sa maina? ninung penibatan na ning pangatakid, a aku e ku mo sa meduluk? 2Co 11:30 Nung kailangan kung paligaya, paligaya ku karing bague a dikil king kakung keinan. 2Co 11:31 Ing Dios at Ibpa ning Guinung Jesus, a ya ing kapilan pa man nuan balu na king e ku maglaram. 2Co 11:32 Karin Damasco ing gobernador a sakup ning ari Aretas, babantayan ne ing ciudad ding tau Damasco, bang dakpan naku: 2Co 11:33 King pamamilatan na ning metung a awang, migpatagusgus ku king metung a buslu, king lele na ning pader, at mitakas ku karing gamat na. 2Co 12:1 Kailangan ku ing kaligayan, aguiang e makabague; dapot datang ku karing malikmata ampon karing pamipatilip king Guinu. 2Co 12:2 Aku balu ke ing metung a tau kang Cristo, labi nang apat a banuang milabas (aguiang king katawan man, e ku balu; o lual ning katawan, e ku balu; ing Dios balu na), a ya ing metung a mesamsam angga king katlung banua. 2Co 12:3 At balu ke ing taung iti, (king katawan man, o lual ning katawan, e ku balu; ing Dios balu na), 2Co 12:4 Nung makananu yang mesamsam linub king Paraiso, at dimdam no ding amanung e pasabi, a e na dapat sabian ning metung a tau. 2Co 12:5 Tungkul king uli na ning metung a anti iti paligaya ku, dapot tungkul king kakung sarili e ku paligaya, nung e mu king kakung keinan. 2Co 12:6 Uling nung burian ku ing maligaya, e ku maguing mangmang; uling sabian ku ing katutuan: dapot mangawat ku, bang ninuman e misip kanaku king matas ku king akakit na kanaku, o daramdaman nang ibat kanaku. 2Co 12:7 At king uli na ning malusuk a degulan na ning pamipatilip, king e ku magkasaplalang milalu, miabe ya kanaku ing metung a suksuk king kakung laman metung neng tubud Satanas bang tampaling kanaku, ba ping aku e ku magpakasaplalang milalu. 2Co 12:8 Dikil kaniting bague makatatlu ke pigamuamuan ing Guinu, bang kawani ya kanaku. 2Co 12:9 At ya sinabi na kanaku, Ing kakung kalam labislabis tungkul keka: uling ing kayupayan ku meguing sakdal king keinan. Inya pin aku bina kung matula a maligaya king kakung keinan, bang ing upaya nang Cristo magbili kanaku. 2Co 12:10 Inya pin mikaka atin kung tula king keinan, king pamanlupig, king pamangailangan, king kaligaligan, king kalungkutan, king uli nang Cristo: uling ngening maina ku, kanita masikan ku pin. 2Co 12:11 Milyari kung mangmang: ikayu pinilit yuku; uli ping dapat ku sang mipuri kekayu: uling king makananu pa man e ku makatauli karing mangarangal diling apostoles, aguiang ala kung kabaldugan. 2Co 12:12 Katutuan ding tanda ning pangaapostol merapat la libutad yu king anggang kapibabatan, king pamamilatan da ding tanda ampon ding makapagmulala at dapat a mangayupaya. 2Co 12:13 Uling nanu ing ketauli yu karing makatagan a iglesia, nung e mu ing aku mu rin e ku mekapangabayat kekayu? Ipatawad yu kaku iting kamalian. 2Co 12:14 Oini, iti ing katlung ukdu a makasadia kung ayan dakayu; at e ku makapangabayat kekayu: uling e ku panintunan ing kekayu, nung e ikayu; uling e dapat karing anak ing tumipun dikil karing pengari, nung e ding pengari dikil karing anak. 2Co 12:15 At aku matula kung binang gumugul at paigugul ku king uli ra ding kaladua yu. Nung aku luluguran dakayung lalung labis, sukat luguran yukung lalung ditak? 2Co 12:16 Dapot aguiang makanian pa, aku mu rin e ku mekapangabayat kekayu; dapot, pablasang maguematan ku, ikua rako king lalang. 2Co 12:17 Pirait dako wari king uli ra ding mapilan karetang tinubud ku kekayu? 2Co 12:18 Inusukan ke i Tito, at tinubud keng abe na ing kapatad a lalaki. Pirait naku waring Tito? E ke wari linakad king mikakametung mung espiritu? e ke wari linakad karing mikakametung mu ring takbang? 2Co 12:19 Isipan yu a king kabang panaun a iti papanupaya kami kekayu. King panimanman na ning Dios maniabi kami kang Cristo, dapot ding keganaganang bague, kakung kaluguran, mipatungkul la king kekong ikatibe. 2Co 12:20 Uling pitatakutan ku, magkang malyari king makananu mang bague, keng datang ku, dasan dakayu ketang e ku buri, at aku man akit yuku ketang e yu buri; magkang pota malyari king makananu man, ing pamituatua, kapangalaluan, kamua, pamikampikampi, pamanyirang puri, bulungbulungan, pamidaguldagul, kaguluan: 2Co 12:21 A magkang pasibayu malyari a nung ume ku, ing kakung Dios daptan nang ibaba naku arapan yu, at kiakan kula ding keraklan a mikasalang minuna, at e la sinisi king karinatan ampon pamakipangalugud at kaibugan a depatan da. 2Co 13:1 Iti ya ing katlung panaun a mame ku kekayu. At king asbuk da ding aduang saksi, o ding atlu mipatutuan ing balang amanu. 2Co 13:2 Sinabi ku nang minuna, at sasabian ku namang pasibayu, a mumuna, anti mo inyang makarap ku ketang kaduang panaun, makanian ngeni, bistat ala ku, karela a mikasalang minuna, ampon karing anggang makatagan, bang, nung datang kung pasibayu, e ku mamatawad; 2Co 13:3 Akakit yu king manintun kong metung a kaustan kang Cristo king maniabi ya kanaku; a iti e keinan dikil kekayu, nung e bagkus mayupaya ya king kekayu: 2Co 13:4 Uling mipaku ya pin king uli na ning keinan, makanian man mabie ya king uli na ning upaya na ning Dios. Uling ikami man pin maina kami kea, dapot mie kaming kagum na, king uli na ning kayupayan na ning Dios tungkul kekayu. 2Co 13:5 Subukan yu ing kekong sarili, nung ati kayu king kasalpantayanan; subukan yu ing kekong sarili. O e yu wari balu ing makatungkul kekayu mu rin, king i Jesucristo atiu kekayo? bukud mu nung misakuil kayu. 2Co 13:6 Dapot aku panayan ku king akilala yu king ikami e ke misakuil. 2Co 13:7 Ngeni panalangin mi king Dios king e ku sa darapat nanumang marawak; e king ikami mayakit keng metanggap, nung e bang ikayu daptan yu ing kapuripuri aguia mang ikami arti nakeng misakuil. 2Co 13:8 Uling ala keng akarapat salang king katutuan, nung e king makausig king katutuan. 2Co 13:9 Uling matutula kami, ngening mangaina kami, at ikayu mangasikan kayu: iti man panalangin mi, ya pin ing kekong pangasakdal. 2Co 13:10 King uli na niting sangkan, susulat ku deting bague, anggang ala ku, bang nung ati naku e ku gumamit kabangisan, dikil king kayupayan a binie na kanaku ning Guinu dikil king pamagtibe, at e dikil king pamaglasak. 2Co 13:11 King kawakasan, kapatad, mamun ku. Magpakasakdal kayu; magsaya kayu; mikametung ku king isip; mie kayu king kapayapan: at ing Dios ning lugud ampon kapayapan mantabe ya kekayu. 2Co 13:12 Mipagmananu kayu ing metung at metung king banal a uma. 2Co 13:13 Ding anggang banal pagmananuan dakayu. 2Co 13:14 Ing kalam ning Guinung Jesucristo, ampon ing lugud ning Dios, at ing pamakiagum na ning Espiritu Santo, manatili sa kekayu na ngan. |