I Timoteo -HERE-1Ti 1:1 I Pablo, a metung a apostol nang Cristo Jesus agpang king utus ning Dios a kekatang Mangabus, at kang Cristo Jesus a kekatang kapanayan, 1Ti 1:2 Kang Timoteo, a tune kung anak king kasalpantayanan: Kalam, kapakaluluan, kapayapan, a ibat king Dios a Ibpa at kang Cristo Jesus a kekatang Guinu. 1Ti 1:3 Anti mo ing pamamie kung usuk keka king manaya ka Efeso, inyang ume ku Macedonia, bang apanabilin mu karing mapilan a tau a e la tuturu king doctrinang makayaliwa, 1Ti 1:4 Ni e la makiramdam king pikatsa at karing pipunpunan a alang kapupusan, a panibatan na ning pamiaskal lugal king pamagkalub ning Dios a king kasalpantayanan; makanian ing daraptan ku ngeni. 1Ti 1:5 Dapot ing kawakasan na ning bilin ya ing lugud a manibatan king metung a pusung malinis: at king metung a pilubluban a mayap at king kasalpantayanan a tapat: 1Ti 1:6 A kareting bague pangalisia ra ding mapilan pesibalik la king metung mung alang kabaldugan a pamagsalita; 1Ti 1:7 Pagnasan dang maguing talaturu king kautusan, aguiang e ra atatalastas ni ing karela mang sasabian, ni keta mang patutuan dang mitmung katiwalan. 1Ti 1:8 Dapot balu mi king ing kautusan mayap ya, nung ing tau gamitan ne king katunayan, 1Ti 1:9 Anti ning pangabaluan iti, king ing kautusan e megawa king uli ning metung a taung banal, nung e king talapanalangsang at mapangulu, karing mangarawak at makasalanan, karing e banal at alang kagalangan, karing makamate ibpa ra at makamate indu ra, karing makamate lupa rang tau. 1Ti 1:10 Karing makipangalugud, karing parawak king sarili ra karing lalaki, karing taung mapanako, karing mangalaram, karing palsumpan king e tutu, at nung atin pang aliwang makasalangsang king mayap a doctrina; 1Ti 1:11 Agpang king maligayang evangelio ning Dios a nuan, a kanaku mipaniwala. 1Ti 1:12 Pasalamat ku kanitang kanaku pepasikan, a ya i Cristo Jesus a kekatang Guinu, anti ning ya binilang nakung tapat, binili naku king keang kasuyuan; 1Ti 1:13 Bista man king minuna mapaniumpa ku, at mapanligalig, at tampalasan: makanian man migkamit kung pakalulu, uling iti depatan kung alang kamalemale king kayalang kasalpantayanan; 1Ti 1:14 At ing kalam na ning Guinu tamu lubus merakal kagum na ing kasalpantayanan at lugud a kang Cristo Jesus. 1Ti 1:15 Tapat ing kasebian, at karampatan ping lubus tanggapan, king i Cristo Jesus dinatang ya keti king yatu bang ikabus no ding makasalanan; a kareti aku ing pekapun. 1Ti 1:16 Makanian man dikil kaniti migkamit kung pakalulu, bang king kanaku a anting pekapun i Jesucristo ipakit na ing anggang keang lubus a kapibabatan, anti mong uliran karetang kaibat niti maniwala kea king bie alang angga. 1Ti 1:17 Ngeni king Aring alang angga, alang kamatayan, e mayayakit, ing bukud mung Dios, ing kapurian at ligaya angga king mangga. Yanasa. 1Ti 1:18 Ing bilin a iti paniwala ku keka, anak kung Timoteo, agpang king ulang midala keka king dalan, bang king uli ra deti makipamuk ka king mayap a pamakipamuk; 1Ti 1:19 A mimingat king kasalpantayanan ampon king mayap a pilubluban; a inyang isakuil da ding mapilan meguing kasiran karela tungkul king kasalpantayanan: 1Ti 1:20 A kareti metung ya i Himeneo at i Alejandro; ila binie ko kang Satanas, bang mituruan lang e maniumpa. 1Ti 2:1 Yuyusuk ku pin, makauna king sabla, king daptan da sa ing pamagamuamu, pamanalangin, pamanigapu, pamipasalamat, king uli ra ding sablang tau; 1Ti 2:2 Karing ari ampon ding sablang atiu king matas a karurukan; bang manimuna tamu king metung a bie tajimik at maratun, king lubus a kabanalan at kataimtiman. 1Ti 2:3 Iti mayap at matatanggap king panimanman na ning Dios a kekatang Talapagligtas; 1Ti 2:4 A ya buri na king ding anggang tau mikabus la, at miras la king beluan ning katutuan. 1Ti 2:5 Uling ating metung a Dios, at metung a talapamilatan mu naman king Dios at karing tau, ya kabud tau ya, a ya i Cristo Jesus, 1Ti 2:6 A binie na ing keang sarili a metung a panatbus karing sabla; ing pamipatutu a mibulalag king sariling kapanaunan na; 1Ti 2:7 A kaniti mialal kung talapanaral at apostol (sasabian ku ing katutuan, e ku maglaram), metung a talaturu ra ding Gentiles king kasalpantayanan at katutuan. 1Ti 2:8 Pagnasan ku pin king manalangin la ding tau king balang karinan, a itas do ding gamat a banal, king alang mua at pamisalangsang. 1Ti 2:9 Makanian mu naman, ding babai pamutian da ing katawan da king imalan maki kajinjinan, kagum ning kagalangan at kataimtiman; e kagum ning inikat a buak, at guintu o perlas o imalan a maki alaga; 1Ti 2:10 Nung e (karampatan iti karing babaing maguing banal) king pamamilatan ding mangayap a dapat. 1Ti 2:11 Paburen ya ing babai magaral king karatunan king lubus a pamipasakup. 1Ti 2:12 Dapot e ku paintulut king ing babai turu ya, ni mirinan mang kayupayan king metung a lalaki, nung e magtajimik ya. 1Ti 2:13 Uling i Adam yang minunang mibalangkas, kanita i Eva; 1Ti 2:14 I Adam a mepirait, nung e ing babai king pangapirait na menabu ya king kapanalangsangan; 1Ti 2:15 Dapot ya mikabus ya king pamamilatan na ning pamanganak, nung ila manatili la king kasalpantayanan at lugud at kabanalan kagum ning kapanitian. 1Ti 3:1 Tapat ya ing kasebian, Nung ing metung a tau magnasa yang maguing obispo, mayap a dapat ing nasa na. 1Ti 3:2 Kailangan pin king ing obispo ala yang kapintasan, asawa ne ning metung mung babai, mapaniti, maisip, mayayusan, mapanampun, karampatan ya king pamanuru; 1Ti 3:3 E mapamulio, e tampalasan; nung maganaka, e palpakitua, e malugud king kaulta; 1Ti 3:4 Metung yang mamajalang mayap king sarili nang bale, sasakupan nala ding keang anak king lubus a kajinjinan; 1Ti 3:5 (Dapot nung ninuman e ne balung pamajalan ing sarili nang bale, makananu neng panibalan ing iglesia na ning Dios?) 1Ti 3:6 E sana mapagbayubayu, a magkang nung kamatmu yang kapalaluan manabu ya king parusa na ning diablo. 1Ti 3:7 Maiguit kaniti sukat ya namang mika mayap a pangapatutu karing atiu lual; magkang manabu ya king kalibakan at king silu ning diablo. 1Ti 3:8 Anti mu rin ding diaconos dapat lang maisip, e salapungan a dila, e makayungyung king dakal a alak, e matako king pakinabang a e malinis; 1Ti 3:9 Ingatan na ing misterio ning kasalpantayanan king malinis a pilubluban. 1Ti 3:10 At deti paburen lang masubuk pamu; kanita paburen lang sumuyung anting diacono, nung ala lang pangapintas. 1Ti 3:11 Makanian mu naman ding babai dapat ing maisip la, e la mapaniandali, mapaniti la, tapat king keganaganang bague. 1Ti 3:12 Ding diaconos maguing asawa la sang tunggal mung babai, mamajalang mayap karing karelang anak at karing karelang bale. 1Ti 3:13 Uling ding sinuyung mayap king katungkulan ning diacono magkamit la king karelang sarili metung a pangabilian mayap, at maragul a tetagan king kasalpantayanan a atiu kang Cristo Jesus. 1Ti 3:14 Deting bague susulat ko keka, pagnasan kung miratang kung agad keka; 1Ti 3:15 Dapot nung aku magluat kung makabang panaun, bang abalu mu nung nanung dapat dang panugalian ding tau king bale ning Dios, a iti ya ing iglesia na ning Dios a mabie, ing asias at katatalakaran ning katutuan. 1Ti 3:16 At king alang nanumang pamisalangsang, maragul ya ing misterio ning kabanalan; Itang mipabalu king laman, Mipatutuan king espiritu, Meakit karing angeles, Mipanaral karing bansa, Mepaniwala king yatu, Metanggap babo karing king ligaya. 1Ti 4:1 Dapot ing Espiritu sasabian nang malino, a king panaun a makatauli ding mapilan kawani la king kasalpantayanan, makiramdam la karing espiritung mapamiraya ampon king doctrina ra ding demonios, 1Ti 4:2 King uli ning pamagbanalbanalan ding tau a maniabing kalaraman, kinintalan king sarili rang pilubluban king metung a mapaling bakal; 1Ti 4:3 Babawal da ing pamakiasawa, at yutus da ing pamangilin king laman-kati, a lelangan na ning Dios a dapat tanggapan king pamipasalamat ding maniwala at maki balu king katutuan. 1Ti 4:4 Uling ing balang lelangan na ning Dios mayap, at ala nanumang dapat isakuil, nung tatanggapan kagum ning pamipasalamat: 1Ti 4:5 Uling meguing banal king pamamilatan na ning amanu ning Dios ampon ning panalangin. 1Ti 4:6 Nung ipaganaka mo karing kapatad ding bague a deti, maguing metung kang mayap a talapanibala nang Cristo Jesus, mesese karing amanu ning kasalpantayanan at ning mayap a doctrina a tikian mu angga ngeni: 1Ti 4:7 Dapot isakuil mu ing kalibakan at pikatsa ding mangatuang asawang babai. At isane mu ing sarili mu king kabanalan: 1Ti 4:8 Uling ing pamagsane king katawan ditak mung bina pakinabang; dapot ing kabanalan king keganaganang bague pakinabang, a maki pangaku king bie a iti, at king daratang man. 1Ti 4:9 Tapat iting kasebian, at karampatan king sablang pangatanggap. 1Ti 4:10 Uling king uli na mu rin niti darapat kami at magkapilit, uling atiu makabili ing kekeng kapanayan king Dios a mabie, a ya ing Talapagligtas karing anggang tau, lalu na karing talapaniwala. 1Ti 4:11 Yutus mu ing bague a iti, at ituru. 1Ti 4:12 E mu paburen a ing ninuman umisan na ing kayanakan mu; nung e maguing uliran daka ding maniwala, king amanu, king ayus ning bie, king lugud, king kasalpantayanan, king kalinisan. 1Ti 4:13 Angga keng datang ku, magmalasakit ka king pamamasa, king pamamie usuk, king pamanuru. 1Ti 4:14 E mu paburen ing kalam a atiu keka, a miabie keka king pamamilatan na ning ula, kagum ning pangatumpak ding gamat da ding presbitero. 1Ti 4:15 Magkasipag ka karing bague a deti; ibie mung lubus ing sarili mu kareti; bang ing pamaniulung mu makilala karing sabla. 1Ti 4:16 Ingatan mu ing kekang sarili, at ing tuturu mu, Manatili ka karing bague a deti; uling king pamaniapat mu kaniti aligtas mu ing kekang sarili anti naman ding keka makiramdam. 1Ti 5:1 E me pangamanuan ing metung a makatua, nung e usukan meng anti mung ibpa; at ding kayanakan a lalaki anti mung kapatad; 1Ti 5:2 Ding babaing makatua anti mung indu; ding kayanakan a babai anti mung kapatad, king anggang kalinisan. 1Ti 5:3 Igalang mu ding babaing mebalu, a tune mebalu. 1Ti 5:4 Dapot nung ing ninumang mebalung babai maki anak ya o apu, ituru la pang muna a pakit kabanalan arapan ding karelang sariling sapni, at mablas karing karelang pengari: uling iti matatanggap king panimanman na ning Dios. 1Ti 5:5 Ngeni ing tune babaing mebalu, magdilidili, atiu makabili ing keang kapanayan king Dios at manatili ya king pamanialung at king panalangin bengi't aldo. 1Ti 5:6 Dapot itang babie na ing sarili na king pitutulan mete ya bistat mabie ya. 1Ti 5:7 Yutus mu mu naman ing bague a iti, king ala la sang pangapintas. 1Ti 5:8 Dapot nung ninuman alang pamagsadia king keang sarili, at lalung lalu na karetang king tune nang bale, sikuil na ing kasalpantayanan, at marawak ya pa kesa king e maniwala. 1Ti 5:9 E sa mitala ing ninuman anting babaing mebalu nung kulang ya king anamapulung banua, a meguing asawa na mu ning metung a lalaki, 1Ti 5:10 Mayap a pangaulat tungkul king mayap a dapat; nung sinese yang anak, nung minie yang layunanan karing aliwang balayan, nung inuas no bitis ding banal, nung binie na ing saup na karing misasakitan, nung masipag yang tinuntun king anggang mayap a dapat. 1Ti 5:11 Dapot isakuil mo ding babaing mebalung anak pa: uling nung dasan na no ning kelabuaran salang kang Cristo, pagnasan da ing makiasawa; 1Ti 5:12 Atin lang parusa uling pepaimburisan da ing minuna rang pangaku. 1Ti 5:13 At kagum niti magaral lang magtamad, lipatlipat karing bale; at e mu bukud matamad, nung e pa naman malabit la at mapakialam, mapagsalita la karing bague a e ra sukat isalita. 1Ti 5:14 Pagnasan ku pin a king ding babaing mebalung anak pa makiasawa la, manganak la, panibalan de ing bale ra, e re dirinan dalan ing kasalang king nanumang kapalmuran: 1Ti 5:15 Uling ding aliwa kinawani na la a paike kang Satanas. 1Ti 5:16 Nung ninumang babaing talapaniwala atin yang babaing mebalu sumaup ya king kailangan da, at e sa mipabayatnan ing iglesia; bang asaupan nala ding babaing tune mebalu. 1Ti 5:17 Ipaintulut karing makatuang mamajalang mayap ing mibilang lang karampatan king aduang kapurian, lalu na detang darapat king amanu at king pamanuru, 1Ti 5:18 Uling sasabian na ning kasulatan, E me bibili ing busal king baka ngening dadara yang mais. At, Karampatan ya ing darapat king keang kaupajan. 1Ti 5:19 Salang king metung a makatua e ka tatanggap sumbung, subali king pamipatutu ra ding adua o atlung saksi. 1Ti 5:20 Ding mikasala pangamanuan la king arapan ding malda, bang ding aliwa naman midinan lang takut. 1Ti 5:21 Panabilinan daka king arapan na ning Dios, at kang Cristo Jesus, at karing piling angeles, a tuparan mu ing bague a iti king alang maling pamanatul, a e darapat nanuman king pamangabiran. 1Ti 5:22 E mo marapal gugong ding gamat mu kaninuman, ni e ka makirake king kasalanan ning aliwa: ingatan mung malinis ing sarili mu. 1Ti 5:23 E na ka miminum danum, nung e gumamit kang ditak a alak uli na ning kekang dungus ampon ning maralas mung kapanamdaman. 1Ti 5:24 Ing kasalanan da ding mapilan a tau makabulalag na, mame nang mumuna king piukuman; at ding aliwa namang tau tutuki la. 1Ti 5:25 Makanian mu naman ating mangayap a dapat a makabulalag: at ding anti kareti e la malyaring misalikut. 1Ti 6:1 Ding anggang atiu lalam ning paud ning pangayalipan kilalanan do ding tune rang panginuan king lubus a kapurian, bang ing laguiu ning Dios ampon ing doctrina na e malibak. 1Ti 6:2 At ding ating panginuan a talapaniwala, e yu papalyarian ing libakan dala, uling kapatad dala; nung e bagkus pasuyuan lang mayap karela, uling ding mikakadake king pakinabang ila ding talapaniwala at kalugudlugud. Ituru mu at iyusuk ing bague a iti. 1Ti 6:3 Nung ing ninuman ituru na ing aliwang doctrina, at e makapanayun king amanung mangayap, king amanu ning Guinu tang Jesucristo, at king doctrina a makayagpang king kabanalan; 1Ti 6:4 Ya palalu ya, alang balu nanuman, nung e tutu yang malugud king pamanusisa at pamakiaskal karing amanu, a nung nu manibatan ing diria, pamitua, sabing sapala, pamagsalupsupan a marawak, 1Ti 6:5 Pamitaltalan ding taung maki pamiisip a marawak at kulang king katutuan, a babalakan da king ing kabanalan dalan na ning pakinabang. 1Ti 6:6 Dapot ing kabanalan a kagum ning pamanaguiu maragul a pakinabang: 1Ti 6:7 Uling ala tang dela nanu man king yatu, ni makanian mu naman ala tang akua nanumang bague kea; 1Ti 6:8 Dapot anti ning atin tamung kakanan at imalan managuiu ta na kaniti. 1Ti 6:9 Dapot ding magnasang mibandi manabu la king tuksu at king silu at king dakal a kamangmangan at king kelabuaran a makapanganiaya, a papalbug karing tau king kasiran at karawakan. 1Ti 6:10 Uling ing lugud king salapi metung a yamut na ning sablang adle dewakan: a kaniti ding mapilan a miras metaid lang kawani king kasalpantayanan, at ing karelang sarili penaglusan na ning dakal a kalungkutan. 1Ti 6:11 Dapot ika, Oh tau ning Dios, manginlag ka king bague a iti; at tuki ka king katuliran, kabanalan, kasalpantayanan, lugud, kapibabatan, kamung lub. 1Ti 6:12 Makilaban ka king mayap a pamakilaban na ning kasalpantayanan, talan ka king bie alang angga, a kaniti meaus ka, at pigsulit mu ing mayap a pamanalese king arapan ding dakal a saksi. 1Ti 6:13 Yutus ku keka king arapan ning Dios, nung ninung babie bie king sablang bague, at kang Cristo Jesus, a iti king arapan nang Poncio Pilato pepatutu ya king mayap a pamanalese; 1Ti 6:14 King ika tuparan mu ing utus, alang musing, alang pangapintas, angga king pamipakit na ning kekatang Guinung Jesucristo. 1Ti 6:15 A iti king sarili nang kapanaunan pakilala ne nung ninu ing nuan at bugtung a Mayupapa, ing Ari ra ding ari, at Guinu ra ding guinu; 1Ti 6:16 A ya ing bukud mung atin king kealan kamatayan, manuknangan ya king sala a e alapitan: a e ne akit ning ninu mang tau, ni malyaring akit: a kea atiu ing puri at upayang alang angga. Yanasa. 1Ti 6:17 Yutus mu karing mabandi king king panaun a iti, king e la sa mangatas a lub, ni e ra bibili ing kapanayan da king pibandian a e manatili, nung e king Dios, a ya babie na kekatamung labislabis ing keganaganang bague bang ikatula tamu; 1Ti 6:18 King ila dapat lang mayap, king ila mibandi la king mayap a dapat, king ila mitalaga la king pamagkalub, makasadia king pamamie; 1Ti 6:19 Mibili la king kamalig king karelang sarili metung a mayap a pipagtibayan laban king panaun a daratang, balang talan king bie a ya ing tune bie. 1Ti 6:20 Oh Timoteo, ingatan mu ing keka mipaniwala, gulutan mu ing pamaniabing alang kabaldugan at pamanalangsang king beluan a ausan dang makanian a e matulid; 1Ti 6:21 A ding aliwang mipakilala mebalatung la tungkul king kasalpantayanan. Ing kalam mantabe sa keka. |