I Tesalonica1Th 1:1 I Pablo, at i Silvano, at i Timoteo, king iglesia ding tau Tesalonica king Dios Ibpa ampon king Guinung Jesucristo: kalam kekayu at kapayapan. 1Th 1:2 Pasalamat keng parati king Dios makauli keko ngan, a sasaglawayan dakayu king kekeng panalangin; 1Th 1:3 Gaganakan ming alang patugut ing dapat yu king kasalpantayanan ampon ing kapagalan yu king lugud at ing kapibabatan yu king kapanayan king Guinu tang Jesucristo, king arapan na ning kekatang Dios at Ibpa; 1Th 1:4 Baluan yu, kapatad a kaluguran na ning Dios, ing pangaalal yu, 1Th 1:5 Nung makananung ing kekaming evangelio e miras kekayu king amanu mu kabud, nung e pa naman king upaya, at king Espiritu Santo, ampon king dakal a kabitasan; anti mo ing kekong pangabaluan nung nanung pangatau ing kekeng pepakit kekayu king uli yu. 1Th 1:6 At ikayu pesitulad ko kekami, at king Guinu, inyang tinggap yu ing amanu king dakal a kasakitan, a maki tula king Espiritu Santo; 1Th 1:7 Nanupata ikayu meguing uliran kayu karing sablang maniwala king Macedonia at king Acaya. 1Th 1:8 Uling manibat kekayu mipasiwala ing amanu ning Guinu, e mu bukud karin Macedonia at Acaya, nung e king anggang karinan mikalat ing kekong kasalpantayanan king Dios; nung inya ikami e mi na kailangan ing sumabi nanuman. 1Th 1:9 Uling ila mu rin ing miulat tungkul kekami nung makananu ing pangalub mi kekayu; at nung makananu ing pamipainggulut yu karing idolos at mibalik ko king Dios, bang sumuyu king Dios a mabie at katutuan, 1Th 1:10 At bang manaya king keang Anak a manibat banua a binangun na ibat karing mete, a ya pin i Jesus, mikabus kekatamu king muang daratang. 1Th 2:1 Uling ikayu mu ri buluan yu, kapatad, ing pamanlub mi kekayu, king e meakit alang kabaldugan: 1Th 2:2 Dapot anti ning migkasakit kami king minuna at guewa rakeng makarine, anti mo ing kekong pangabaluan, karin Filipos, mirinan keng maragul a tepangan king kekatang Dios bang sabian miya kekayu ing amanu na ning Dios king dakal a galigaligan. 1Th 2:3 Uling ing kekeng usuk e king kabalatungan, ni e king karinatan, ni e king kapamiraitnan: 1Th 2:4 Dapot nung makananung guewa nakeng meguing karampatan ning Dios bakeng mipaniwalan king evangelio, makanian yang sasalita mi; e anting palugud karing tau, nung e king Dios a susubuk karing kekeng pusu. 1Th 2:5 Uling e ke guinamit kapilan man king amanung sunu, anti ing pangabaluan yu, ni e king balabal ning pamanangkamin, saksi ya ing Dios; 1Th 2:6 Ni e mi panintunan ing kapurian ding tau, ni kekayu ni karing aliwa, ngening atin keng kayupayan bandian mi ing pangaapostol kang Cristo. 1Th 2:7 Dapot mamu kami king libutad yu, anti mo ing pamakamal na ning metung a sisiwa karing tune nang anak: 1Th 2:8 Makanian mu naman, pablasang atin keng masampat a kapagnasan kekayu, pepamayapan mi king ikayu dakayanan dakayu, e mu king evangelio ning Dios, nung e pa naman karing tune ming kaladua, pablasang meguing bina kong mal kekami. 1Th 2:9 Uling gaganakan yu, kapatad, ing kekeng kapagalan ampon kasakitan: darapat kami king bengi at aldo, bang e ke maguing pusan kaninuman kekayu, panaral miya kekayu ing evangelio na ning Dios. 1Th 2:10 Ikayu saksi kayu, at ing Dios man, nung nu anti ing pangabanal at matulid at alang pangapintas ing penugalian mi kekong maniwala: 1Th 2:11 Anti mo ing kekong pangabaluan nung makananu keng makiutus kagum ning balang metung kekayu, anti mong metung a ibpa karing tune nang anak, a usukan dakayu, at patibayan dako lub, at patutu, 1Th 2:12 Bang king kawakasan lumakad kayung karampatan king Dios, a minaus kekayu king sarili nang kayarian at ligaya. 1Th 2:13 At king uli na niti ikami man pasalamat kami king Dios a alang patugut, a inyang tanggapan ye kekami ing amanu na ning balita, a ya ing amanu ning Dios, tinggap yu e king amanung tau, nung e anting king katutuan, ing amanu na ning Dios, a darapat mu naman kekayu a maniwala. 1Th 2:14 Uling ikayu, kapatad, meguing talatulad kayu karing iglesia na ning Dios a atiu Judea kang Cristo Jesus: uling pigkasakitan yu naman ing bague a iti karing kekong sariling kabalen, anti ing depatan da karing Judios; 1Th 2:15 Ilang mekamate king Guinung Jesus at karing manula, at ikami tinabi rakami lual, at e la pepatula king Dios, at salang la karing anggang tau; 1Th 2:16 Babawalan dakeng makisabi karing Gentiles balang miligtas; batang katmuan parati ing karelang kasalanan: dapot dinatang karela ing mua angga king wakas. 1Th 2:17 Dapot ikami, kapatad, a miwale kekayu king ditak a panaun, king arapan e king pusu, pigkapilitan ming masipit bang akit mi ing lupa yu king maragul a kapagnasan: 1Th 2:18 Uling matula kaming ayan dakayu, aku i Pablo king misan at miuman pa; at pengabalanan na keng satanas. 1Th 2:19 Uling nanu ing kekatang kapanayan, o tula, o corona ning pamipaligaya? E ikayu mu rin, king arapan na ning Guinu tang Jesus king keang paniatang? 1Th 2:20 Uling ikayu ing kekeng ligaya at kekeng tula. 1Th 3:1 King uli na niti inyang e mi na apibata pa, inisip ming mayap ing pailakuan dilidili Atenas; 1Th 3:2 At tinubud miya i Timoteo, a kekeng kapatad, at talapanibala na ning Dios king evangelio nang Cristo, bang patibayan nakayu, at patulan nakayu king kekong kasalpantayanan; 1Th 3:3 Bang ninuman e ya makimut king uli na ning kasakitan a reti; uling ikayu mu rin baluan yu king kaniti ke makaalal. 1Th 3:4 Uling king katutuan, kanitang abe yukami, sinabi ming makauna kekayu king dumalan tang kasakitan; anti na pin ing milyari, at baluan yu. 1Th 3:5 King uli na niti aku man, inyang e ku na apibata pa, mitubud ku bakung abalu ing kekong kasalpantayanan, magkang king makananu man atuksu nako ning manuksu, at ing kekeng kapagalan mayalang kabaldugan. 1Th 3:6 Dapot kanining i Timoteo dinatang ne kekami ngeni a ibat ken kekayu, at pigdala nakeng masayang balita king kekong kasalpantayanan at lugud, at parati ing atin kong mayap a pamigaganaka kekami, pagnasan yung akit yu kami, nung makananung ikami man pagnasan ming akit dakayu; 1Th 3:7 King uli na niti, kapatad, mipatulan kami tungkul kekayu king anggang kekeng kagutgutan at kasakitan king pamamilatan na ning kekong kasalpantayanan: 1Th 3:8 Uling ngeni mabibie kami, nung ikayu manatili kayung matibe king Guinu. 1Th 3:9 Uling nanu ping pamipasalamat ing aibie mi king Dios dikil kekayu, king uli na ning anggang tula a kekeng ketula dikil kekayu king arapan na ning kekatang Dios; 1Th 3:10 Bengi't aldo panalangin ming mapilit king akit mi sa ing kekong lupa, ampon aganapanan mi ing kulang king kekong kasalpantayanan? 1Th 3:11 Ngeni mananu na sang ing Dios a Ibpa tamu at ing Guinu tang Jesus, ituru no ding kekeng dalan kekayu: 1Th 3:12 At daptan na sa ning Guinu king dakal kayu at kamatmu king lugud king metung at metung, ampon karing sablang tau, nung makananu naman ing daraptan mi kekayu; 1Th 3:13 Bang king katataulian patibayan nala ding kekong pusu king alang pangapintas king kabanalan king arapan na ning kekatang Dios at Ibpa, king paniatang ning kekatang Guinung Jesus a kambe no ding anggang keang banal. 1Th 4:1 King kapupusan pin, kapatad, pagamuaman dakayu at usukan king Guinung Jesus, a king makayagpang king tinggap yu kekami nung makananu kong dapat lumakad at patula king Dios, makanian kong lumakad, bang lalu at lalu kong lumabung. 1Th 4:2 Uling balu yu nung nanung kautusan ing binie mi kekayu king pamamilatan na ning Guinung Jesus. 1Th 4:3 Uling iti ya ing kaburian na ning Dios, ya pin ing kekong pangabanal; bang manginlag ko king pamakipangalugud; 1Th 4:4 Bang ing balang metung kekayu mabiasa yang papanginu king keang sariling lulanan king pamagbanal ampon king kapurian, 1Th 4:5 E king kaibugan ning kelabuaran, anti mo ding Gentiles a e maki balu king Dios; 1Th 4:6 Bang alang lalaki a lapastangan, at dapat marok king kapatad na kaniting bague: uling ing Guinu yang talapanablas kaniting anggang bague, anti mo ing inusuk ming minuna kekayu at pepatutuan. 1Th 4:7 Uling e nakata inaus ning Dios king karinatan, nung e king kabanalan. 1Th 4:8 Inya pin itang misasakuil aliwa ing tau ing sasakuil na, nung e ing Dios, a babie kekayu king keang Espiritu Santo. 1Th 4:9 Dapot tungkul king lugud pamikapatad e yu na kailangan ing sulatanan na ko pa ning ninuman: uling ikayu mu rin mituruan ko king Dios king mikalugud kayu ing metung at metung; 1Th 4:10 Uling king katutuan daraptan yung makanian karing anggang kapatad a atiu king mabilug a Macedonia. Dapot yusuk mi kekayu, kapatad, king lalu at lalu ko sang dakal; 1Th 4:11 At king magaral kong magtajimik, at daptan yu ing kekong sariling dapat, at dapat ko karing sariling gamat yu, nung makanu ing inutus mi kekayu; 1Th 4:12 Ba ping lumakad kayu king karampatan karing atiu lual, at e ko magkailangan nanuman. 1Th 4:13 Dapot e mi buri king ala kong kamalayan, kapatad, tungkul karing pesitudtud; bang ikayu e ko lungkut, anti mo ding aliwang alang kapanayan. 1Th 4:14 Uling nung maniwala tamu a king i Jesus mete ya at mibangun miuman, makanian mu naman ding mipatudtud kang Jesus idala no ning Dios a kayabe na. 1Th 4:15 Uling iti sasabian mi kekayu king amanu ning Guinu, a king itamung mabie, a melakuan king paniatang na ning Guinu, e ta miuna king makananu man karing metudtud na. 1Th 4:16 Uling ing Guinu kabud yang kuldas ibat banua, maki metung a gulisak, king siwala ning arcangel, at king pakakak ning Dios: at ding mete kang Cristo talakad lang muna; 1Th 4:17 Kanita, itang mabie, a makatangan, mayakua tamu a kayabe ra karing biga, bang salubung king Guinu king angin; at kanita akayabe nakatamu ning Guinu king kapilan pa man. 1Th 4:18 Nung makanian mipapamatula kayu ing metung at metung karing amanung deti. 1Th 5:1 Dapot tungkul karing panaun at dake ning kapanaunan, kapatad, e yu kailangan a misulat pa kekayu. 1Th 5:2 Uling ikayu ing lubus maki balu a anti mong mapanako king bengi ing paniatang na ning aldo na ning Guinu. 1Th 5:3 Kabang ila sasabian da, Kapayapan. at kaligtasan, kanita datang karela ing biglang kasiran, anti mo ing pamiramdam ning metung a babai a maki kabuktut; at e ra akuang miligtas. 1Th 5:4 Dapot ikayu, kapatad, ala ko king dalumdum, a bang ing aldo a ita anti mo ing mapanako atagal nakayu: 1Th 5:5 Uling iko ngan anak nako ning sulu, at anak ning aldo: itamu e ta king bengi, ni king dalumdum; 1Th 5:6 Nung makanian e ta matudtud, anti mo ding aliwa, nung e lumame tamu at maniti. 1Th 5:7 Uling ding matudtud matudtud la king bengi; at ding maglasing maglasing la king bengi. 1Th 5:8 Dapot tara, anti ning king aldo tamu, maniti tamu, isulud tamu, ing baluting salu ning kasalpantayanan at ning lugud; at ing gawan baluting buntuk ing kapanayan ning kaligtasan. 1Th 5:9 Uling ing Dios e nakata telaga king mua, nung e king pamagkamit king pangakabus king pamamilatan na ning Guinu tang Jesucristo, 1Th 5:10 A ya mete ya king uli tamu, bang, makaguising ta man o matudtud mie tang kayabe na. 1Th 5:11 King uli na niti miuusukan ko ing metung at metung, at mipagtibe kayu ing metung at metung, anti mo ing kekong daraptan. 1Th 5:12 Dapot pagamuamu mi kekayu, kapatad, king kilalanan yo sa ding paipagal kekayu, at pekapun yu king Guinu, at papigaganaka kekayu; 1Th 5:13 At kekayu lang lusuk pakamalan king lugud king uli na ning karelang dapat. Magpayapa kayu king kekong sarili. 1Th 5:14 At yusuk mi kekayu, kapatad, kekayu lang sabianan ding magulu, pasiknangan yula ding manamdaman a pusu, alalayan yula ding mangaina, mapibabata ko sa karing sabla. 1Th 5:15 Lawan yu king ninuman e na ablasan kenu man ing marawak king marawak; nung e tukian yung parati ing mayap, ing metung king metung at karing sabla. 1Th 5:16 Magsaya kong parati; 1Th 5:17 Manalangin kong alang patugut; 1Th 5:18 King balang bague munie kong kapasalamatan: uling iti yang kaburian na ning Dios kang Cristo Jesus tungkul kekayu. 1Th 5:19 E ye papatdan ing Espiritu; 1Th 5:20 E yu lilibakan ing pamanula; 1Th 5:21 Subukan yu ing sablang bague; kawatan yung matalik ing mayap. 1Th 5:22 Manginlag kayu king anggang anyu ning dewakan. 1Th 5:23 At ing Dios na mu rin ning kapayapan papagbanalan nakayung ganap; at mapalyari sa king ing kekong espiritu at kaladua at katawan maingat lubus, a alang pangapintas king pamaniatang na ning Guinu tang Jesucristo. 1Th 5:24 Tapat ya itang kekayu mamaus, a ya daptan na naman. 1Th 5:25 Kapatad, panalangin yukami. 1Th 5:26 Pagmananuan yula ding anggang kapatad king banal a uma. 1Th 5:27 Pagamuamu ku kekayu king uli ning Guinu king basan ye ing sulat a iti karing anggang kapatad. 1Th 5:28 Ing kalam ning Guinu tang Jesucristo miabie kekayu. |