I Pedro1Pe 1:1 I Pedro, a apostol nang Jesucristo, karing mepili a manaliwang balayan king Pamikalatkalat karin Ponto, Galacia, Capadocia, Asia, at Bitinia; 1Pe 1:2 Agpang king pamangilalang makauna ning Dios Ibpa, king pamipabanal na ning Espiritu, tungkul king kapamintuan at pamamisik king daya nang Jesucristo: Kalam kekayu at kapayapan a dakal sa. 1Pe 1:3 Nuan ya sa ing Dios ampon Ibpa ning kekatang Guinung Jesucristo, a iti, agpang king maragul nang kapakaluluan, penganak nakatamung pepasibayu dikil king metung a kapanayan a mabie, king pamamilatan na ning pamanyubli nang mebie Jesucristo ibat karing mete; 1Pe 1:4 Dikil king pamagkamit king metung a manang e masisira, at alang musing, ampon e kukupas, a makasimpan karin banua tungkul kekayu, 1Pe 1:5 Nung ninu king uli ning upaya na ning Dios meingat king pamamilatan na ning kasalpantayanan dikil king kaligtasan a makasadia bang mipatilip king tauling panaun. 1Pe 1:6 A kaniti magsaya kong bina, aguiang ngeni king ditak a panaun, nung kailangan, mibili kayu king lungkut king miayaliwang subuk, 1Pe 1:7 Bang ing kamasalan ning kekong kasalpantayanan anti ning lalu pang maulaga king guintung masisira aguiang susubukan ya king pamamilatan na ning api, mayakit ya king kapurian at ligaya at puri king pamipatilip nang Jesucristo: 1Pe 1:8 Nung ninu aguiang e meakit kaluguran ye; nung kaninu aguiang ngeni e ye akakit, makanian man king pamaniwala, magsaya kong bina king tulang e pasabi ampon kitmuan kaligayan: 1Pe 1:9 Tatanggapan yu ing kawakasan ning kekong kasalpantayanan, a ya ing kaligtasan ding kekong kaladua. 1Pe 1:10 Tungkul ketang kaligtasan a penintun da ding manula at siniasat dang mitmung kasipagan, nung ninu ding menula king kalam a sukat datang kekayu: 1Pe 1:11 Siasatan da nung nanung panaun o nanung aske ning panaun a tildu na ning Espiritu nang Cristo a atiu karela, inyang patutuan nang makauna ing kasakitan nang Cristo, ampon ding kaligayan a sukat tuki karela. 1Pe 1:12 Nung kaninu mipatilip e king sariling karela, dapot kekayu, a ila sinuyu rala deting bague, a ngeni mibalita kekayu king pamamilatan da ding kekayu menaral king evangelio king uli ning Espiritu Santo a mipabal iba't banua; nung isanung bague a pagnasan dang akit ding angeles. 1Pe 1:13 Nung makanian babatan yo ding awakan ning kekong kaisipan, maniti kayu at ibili yung lubus ing kekong kapanayan king kalam a malyaring dalan da kekayu king pamipatilip nang Jesucristo; 1Pe 1:14 Anting anak ning kapamintuan, e yu panusigan ing kekong sarili agpang king kelabuaran a mipapauna kanitang panaun na ning kealan yung malit: 1Pe 1:15 Dapot katulad na ning pangabanal na nitang kekayu minaus, magpakabanal kayu naman king keganaganang ayus ning kabiayan; 1Pe 1:16 Uling makasulat, Magpakabanal kayu; uling aku banal ku. 1Pe 1:17 At nung ausan yeng anting Ibpa, itang a alang pamialiwa karing tau atulan nala agpang king dapat ning balang katau, gugulan yu king takut ing panaun na ning kekong pamanaliwang balayan: 1Pe 1:18 Baluan yu king meatbus kayu, e karing bague a masisira, king pilak o guintu, ibat king ayus ning kekong alang kabaldugan a kabiayan a miabie ibat karing kekong ibpa; 1Pe 1:19 Nung e king maulagang daya, anti mo ing metung a cordero a alang pangapintas at alang dungis, a ya ing daya nang Cristo: 1Pe 1:20 A mekilalang makauna bayu melalang ing yatu, dapot mipabalu king kawakasan ding panaun, king uli yu, 1Pe 1:21 A king pamamilatan na ngeni talapaniwala kayu king Dios, a pepasubling mebie kea ibat karing mete, at dininan neng kaligayan; bang ing kekong kasalpantayanan ampon kapanayan maguing king Dios. 1Pe 1:22 Ikit na king lilinis yo ding kekong kaladua king uli na ning kekong kapamintuan king katutuan king lugud a e kukupas karing kapatad, mikalugud kayu ing metung at metung king pusu yu king katapatan. 1Pe 1:23 Penganak nakong pepasibayu, e king bining masisira, nung e king e masisira, king pamamilatan na ning amanu ning Dios, a iti mabie at manatili. 1Pe 1:24 Uling, Ing anggang laman anti mo ing dikut, At ing anggang kaligayan na anti mo ing sampaga ning dikut; Ing dikut malalangi, at ing sampaga malalagas: 1Pe 1:25 Dapot ing amanu ning Guinu manatili angga king mangga, At iti ya ing amanu ning mayap a balita a mipanaral kekayu. 1Pe 2:1 King uli na niti, ikawani ing anggang dewakan, at ing anggang kapamiraitnan, at pamagbanalbanalan, at diria, at ing anggang pamaniabing marawak, 1Pe 2:2 Anti mong pungul a bayung bait, pagimbutan yu ing alang samut a gatas a makatungkul king espiritu, bang king pamamilatan na tumubu kayu dikil king kaligtasan; 1Pe 2:3 Nung atakman yu king ing Guinu mayap ya: 1Pe 2:4 Nung kaninu ya manibat ing metung a batung mabie, king katutuan sikuil de ding tau, dapot king Dios pili ya, maulaga ya, 1Pe 2:5 Ikayu man, anti mong batung mabie, mitatalakad kayung metung a bale espiritual, bang maguing metung a pangasacerdoteng banal, bang midaun ain a makatungkul king espiritu, matatanggap king Dios, king pamamilatan nang Jesucristo. 1Pe 2:6 Uling iti makalaman king kasulatan, Oini, aku ibili ke king Sion ing batung pamuntuk ning suluk, mepili, maulaga; At itang maniwala kea e mibili king kamarinayan. 1Pe 2:7 Uling kekayu ping maniwala karin ing maulaga: dapot karing e maniwala, Ing batung sikuil da ding aluagui, Ya mu ring meguing pamuntuk ning suluk, 1Pe 2:8 At, Metung a batung makatakid, at metung a roca a makapalpikasala; uling ila mitakid la king amanu, anti na ning e la talapamintu: a kaniti naman mitalaga la. 1Pe 2:9 Dapot ikayu metung kayung daing pili, metung a pangasacerdoteng marangal, metung a banal a bansa, metung a balayan a bandi nang tune ning Dios, bang ipakilala yu ing matas a dangalan na nitang kekayu minaus manibat king dalumdum king keang makapagmulalang sala: 1Pe 2:10 Ikayu king milabas a panaun e ko balayan, dapot ngeni balayan nakayu ning Dios: nung ninu ding e migkamit pakalulu, dapot ngeni migkamit kong pakalulu. 1Pe 2:11 Kaluguran, pagamuamu ku kekayu anti mo karing manaliwang balayan at maglakbe, king maniti kayu king kelabuaran na ning laman, a makipamuk salang king kaladua; 1Pe 2:12 Manugali ko sang karampatan libutad ding Gentiles; bang karing bague a sasabian da salang kekayu anting darapat marawak, king uli na ning mayap yung dapat a karelang akakit, purian de ing Dios king aldo na ning pamandalo. 1Pe 2:13 Pasakup kayu king balang tuntunan ning tau king uli na ning Guinu: maguing king ari man sa a kakataskatasan; 1Pe 2:14 O karing gobernador, a tinubud na king pamanablas karing darapat marawak, at king kapurian karing darapat king mayap. 1Pe 2:15 Uling makanian ing kaburian na ning Dios, bang king uli ning pamaniapat yung mayap apatajimikan yu ing kealan dang balu ding taung mangmang: 1Pe 2:16 Anti mong timawa, at e yu gagamitan ing kekong katimawan anting pekabalabal ning dewakan, nung e bagkus anti mong alipan na ning Dios. 1Pe 2:17 Igalang la ding anggang tau. Luguran ing pamikapatad. Tumakut king Dios. Igalang ya ing ari. 1Pe 2:18 Ipus pasakup kayu karing kekong panginuan king lubus a takut; e mu karing mangayap ampon mangaganaka, nung e naman karing mabangis. 1Pe 2:19 Uling iti matatanggap, nung king pilubluban dikil king Dios ing metung a tau mibata yang sindak, magkasakit ala king matulid. 1Pe 2:20 Uling nanung kaligayan iti, nung, ngening mikakasala kayu, at mabatbat kayu dikil kaniti, pibatan yung tanggapan? dapot nung darapat kong mayap, at magkasakit kayu kaniti, pibatan yung tanggapan, iti matatanggap king Dios. 1Pe 2:21 Uling kaniti, kayu meyaus: uling i Cristo man migkasakit ya king uli yu, a likuananan nakong metung a alimbawa, bang tuki kayu karing keang lakbang: 1Pe 2:22 A ya e dinapat kasalanan, ni alang meakit a kapamiraitnan king keang asbuk: 1Pe 2:23 Ya inyang melibak ya, e minablas linibak; inyang migkasakit ya, e guinamit bala; nung e peniwala na ing keang sarili kanitang mamatul king matulid: 1Pe 2:24 A ya mu rin dela na ing kekatang kasalanan king sarili nang katawan babo na ning dutung, bang itamu, anti ning mete ta na king kasalanan, mie tamu king katuliran; a king uli ra ding keang sugat kinayap kayu. 1Pe 2:25 Uling anti kayung tupang melili; dapot ngeni mibalik kayu king Pastul at Obispo ding kekong kaladua. 1Pe 3:1 Makanian mu naman, ikayung asawang babai, pasakup kayu karing tune yung asawa; bang, nung ing ninuman e mamintu king amanu, mayakua lang alang amanu king pamamilatan na ning asal ding karelang asawa; 1Pe 3:2 Anti ning lalawan da ing kekong asal a majinjin a kagum na ning takut. 1Pe 3:3 A ing karelang gayak e sa ing gayak king lual ning pamiikat buak, at e misusulud alajas a guintu, o misulud piblas a maulaga: 1Pe 3:4 Nung e ing pangatau sanang makasalikut king pusu, king e masisirang piblas ning espiritung mamu at payapa, a king arapan na ning Dios ating maragul a alaga. 1Pe 3:5 Uling king minunang panaun, makanian la namang migagayak ding babaing banal, a menaya king Dios, a deti makapasakup la karing tune rang asawa. 1Pe 3:6 Anti mo i Sara memintu ya kang Abraham, a ausan neng guinu: a ding keang anak ikayu, nung darapat kong mayap, at e ko tatakut king isanu mang pitatakutan. 1Pe 3:7 Makanian mu naman, ikong asawang lalaki, manuknangan kong abe ra ding kekong asawa makayagpang king beluan, dinan yang puri ing babai anti mong matbud a lulanan, pablasang ila man kakametung lang talapagmana king kalam ning bie; bang king kawakasan ing kekong panalangin e mayambangan. 1Pe 3:8 Katataulian, iko ngan magmetung ko sa king pamiisip, malunusan, mikakalugud anti mong mikakapatad, mapamakalulu, mapagpakumbaba isip: 1Pe 3:9 E yablas ing marawak king marawak, ing pamanlibak king pamanlibak; nung e bagkus kanuanan; uling kaniti kayu mu rin meyaus, bang magmana kong metung a kanuanan. 1Pe 3:10 Uling, Ing bisang lugud king bie, At manakit mangayap a aldo, Kawatan ne ing dila na king marawak, At ding keang labi bang e la maniabing pirait: 1Pe 3:11 At pabustan yang kawani king marawak, at dapat king mayap; Pabustan yeng panintunan na ing kapayapan, at tukian na. 1Pe 3:12 Uling ding mata na ning Guinu atilu karing banal, At ding keang balugbug king karelang daing: Dapot ing lupa na ning Guinu makasalangsang ya karing darapat marawak. 1Pe 3:13 At ninu ing dapat marawak kekayu, nung malingap kayu king mayap? 1Pe 3:14 Dapot aguia mang magkasakit kayu king uli na ning katuliran, nuan kayu: at e ko tatakut king karelang takut, at e ko pailingasngas; 1Pe 3:15 Nung e samban ye karing kekong pusu i Cristo anting Guinu: a kapilan man makasadia kong munie pakibat karing anggang kekayu maniawad katuliran tungkul king kapanaligan a atiu kekayu; makanian man kagum ning kamung lub at takut: 1Pe 3:16 A maki mayap a pilubluban; bang, nung nu rako pisabian king makalaban kekayu, dumine la ding manlibak king kekong mayap a ayus ning bie yu kang Cristo. 1Pe 3:17 Uling lalung mayap nung burian nang makanian ning kaburian na ning Dios, king magkasakit kayu dikil king pamaniapat king mayap, kesa king pamaniapat marawak. 1Pe 3:18 Uling i Cristo man migkasakit ya king uli na ning kasalanan king misan, ing banal king uli ra ding e banal, bang adala nakatamu king Dios; inyang pete re king laman, dapot mebie ya king espiritu; 1Pe 3:19 A kaniti ya naman mine yang menaral karing espiritung atiu king sukulan, 1Pe 3:20 A king minunang panaun talapanalangsang la, inyang manaya ya king makaba nang kapibabatan ning Dios karing aldo nang Noe, kabang sasadia ne ing daung, a kaniti ding mapilan, ya pin ita, walu lang kaladua, ding maligtas king danum: 1Pe 3:21 A iti kabas ne ning binyag a ngeni liligtas nakatamu mu naman, e ing lalako kayaduanan ning metung a mayap a pilubluban king Dios, king pamamilatan na ning pamanyubli nang mebie Jesucristo: 1Pe 3:22 A inyang ume ne banua, atiu wanan na ning Dios; makasakup la kea ding angeles at kapamajalan ampon kayupayan. 1Pe 4:1 Anti ning migkasakit ya pin i Cristo king laman, magsandata kayu naman king makanian a pamiisip; uling itang migkasakit king laman tinuknang ne king kasalanan; 1Pe 4:2 Bang e nako mie king makatagan a kekong panaun king laman dikil king kelabuaran ding tau, nung e king kaburian na ning Dios. 1Pe 4:3 Uling ing panaun a milabas ganap na bang daptan ing kaburian ding Gentiles, at lalakad king kaibugan, king kelabuaran, king pamaglasing, king pamanialangsang, king pamagsaya king laman, ampon king makasumaming pamaniambang idolos: 1Pe 4:4 King bague a iti magmulala la king ikayu e ko makipulai karela king anti itang milalalung kaguluan, inya maniabi lang marawak dikil kekayu: 1Pe 4:5 Deti ibie rang sulit kanitang makatalagang matul karing mabie at karing mete. 1Pe 4:6 Uling dikil kaniti pati karing mete mipanaral ya naman ing evangelio, bang miatulan lang tune agpang karing tau king laman, dapot mie la agpang king Dios tungkul king espiritu. 1Pe 4:7 Dapot ing kawakasan ding sablang bague malapit na: mika isip ko ping mayap, at mataimtim king panalangin: 1Pe 4:8 Maiguit king sablang bague maguing taimtim kayu king pamikakalugud king kekong sarili; uling ing lugud tatakpan na ing keraklan a kasalanan: 1Pe 4:9 Mipapanampun kayu a alang pamibulungbulungan: 1Pe 4:10 Agpang king tinggap nang kalam ning balang metung, ipaniuyu na kekayu, anti mong mayap a katiwala king binang dakal nang kalam ning Dios; 1Pe 4:11 Nung ninu mang tau maniabi ya, maniabi yang anti mo karing waga na ning Dios; nung ing ninu mang tau manibala ya, manibala ya sa king sikanan a ibabie na ning Dios: bang ing Dios mipaligayan ya karing keganaganang bague king pamamilatan nang Jesucristo, a kea ing ligaya ampon ing pamaniakup angga king mangga. Yanasa. 1Pe 4:12 Kakung kaluguran, e yu pagmulalan ing tungkul king mapaling subuk kekayu, nung isanu ing daratang kekayu bakong masubuk, a balamu ing metung a makapagmulalang bague mepalyari kekayu: 1Pe 4:13 Nung e bagkus anti ning makarake kayu karing kasakitan nang Cristo magsaya kayu; bang king pangabulalag na naman ning keang ligaya tumula kayu king ganap a tula. 1Pe 4:14 Nung melibak kayu king laguiu nang Cristo, nuan kayu; uling ing Espiritu ning ligaya at ing Espiritu ning Dios manuknangan ya kekayu. 1Pe 4:15 Uling e yu pabustan a ninuman kekayu magkasakit yang anti mong makamate tau, o anti mong mapanako, o anti mong mapaniapat marawak, o anti mong palpakialam king pisasabian ning aliwa: 1Pe 4:16 Dapot nung ninuman magkasakit yang anti mong Cristiano, e ya sa marine, nung e bagkus paligayan ne ing Dios king anti kaniting laguiu. 1Pe 4:17 Uling miras na ing panaun a mipagmulan ing pamanukum king bale ning Dios: at nung magmula kekatamu, nanu ing kawakasan da ding e mamintu king evangelio ning Dios? 1Pe 4:18 At nung ing banal masakit yang miligtas, ing marawak ampon makasalanan nuya marap? 1Pe 4:19 King uli na niti, detang linasa agpang king kaburian na ning Dios italaga rala ding karelang kaladua king dapat a mayap king tapat a Miglalang. 1Pe 5:1 Karing makatuang atiu kekayu yusuk ku akung matua nang kayabe ra, ampon saksi king kasakitan nang Cristo, a karake mu naman king ligayang malyaring mibulalag: 1Pe 5:2 Pastulan yula ding kawan ning Dios a atiu libutad yu, isane yu ing pamagbante, e king sapilitan, nung e king talagang kaburian, agpang king kaburian ning Dios; at e mu naman king marinat a pamakinabang, nung e king makasadiang pamiisip; 1Pe 5:3 At e mu naman sana king ikayu anti ko mong ating pangaguinu dikil king panibalan a miabie kekayu, nung e bagkus gawan yu ing sarili yu anti mong uliran ding kawan. 1Pe 5:4 At panga mibulalag ne ing Pastul a pekabuntuk, tanggapan ye ing e kukupas a corona ning ligaya. 1Pe 5:5 Makanian mu naman, ikong kayanakan, pasakup kayu karing makatua. Wa, iko ngan magbabat kong kapakumbaban, bakong misusuyuanan ing metung at metung: uling ing Dios makisalangsang ya karing palalu, dapot babie yang kalam karing mapagpakumbaba. 1Pe 5:6 Inya pin magpakumbaba kayu lalam ning mayupaya nang gamat ning Dios, bang ya isaplala nakayu king kapanaunan; 1Pe 5:7 Ibili yu kea ing anggang kekong kabalisan, uling ya ingatan nakayu. 1Pe 5:8 Maniti kayu, maglame kayu: ing kekong kasalang a diablo, anti yang leon a mamius, gagala ya, manintun yang alaklak na: 1Pe 5:9 Labanan ye ping matibe king kekong kasalpantayanan, baluan yu king ing lasa mu ring iti matutupad karing kekong kapatad a atiu king yatu. 1Pe 5:10 At ing Dios ning anggang kalam, a minaus kekayu king keang alang anggang ligaya kang Cristo, kaibat yung migkasakit king ditak a panaun, ya mu rin gawan nakong sakdal, patibayan nakayu, pasiknangan nakayu. 1Pe 5:11 Kea ing pamaniakup angga king mangga. Yanasa. 1Pe 5:12 King pamamilatan nang Silvano, a kekatang tapat a kapatad, anti ning binilang keng makanian, sinulat ku kekayung makuyad, mumusuk at patutu king iti ya ing tune kalam ning Dios: Magtibe kayu kaniti. 1Pe 5:13 Pagmananuan nakayu nitang atiu Babilonia, a mepiling kayabe yu, ampon naman i Marcos a kakung anak. 1Pe 5:14 Mipapagmananu kayu ing metung at metung king uma ning lugud. Kapayapan keko ngang atiu kang Cristo. |