I Corinto

1Co 1:1 I Pablo a meyaus maguing apostol nang Jesucristo, king kaburian na ning Dios, at i Sostenes a kekatang kapatad,

1Co 1:2 King iglesia na ning Dios a atiu Corinto, detang meguing banal kang Cristo Jesus, meaus king pangasanto, pati na ding sablang mamaus king laguiu ning Guinu tang Jesuscristo king anggang karinan, karelang Guinu at kekatamu:

1Co 1:3 Kalam kekayu at kapayapan a ibat king Dios a kekatang Ibpa ampon king Guinung Jesucristo.

1Co 1:4 Pasalamat kung parati king kakung Dios makatungkul kekayu, king uli na ning kalam na ning Dios a miabie kekayu a kang Cristo Jesus.

1Co 1:5 A king sablang bague mipabandian kayu kea, king anggang amanu, at king anggang beluan;

1Co 1:6 Anti mo ing pamipatutu nang Cristo mipatibayan kekayu:

1Co 1:7 Inya daratang kong makatauli king alang kalam; a manaya king pamipatilip ning Guinu tang Jesucristo;

1Co 1:8 A iti patutuan nakayu angga king kawakasan, bang e ko misabianan king kayaldawan na ning Guinu tang Jesucristo.

1Co 1:9 Ing Dios tapat ya a king pamamilatan na meaus kayu king pangayagum king keang Anak a i Jesucristo a kekatang Guinu.

1Co 1:10 Ngeni, pagamuamu ku kekayu, kapatad, king pamamilatan na ning laguiu ning Guinu tang Jesucristo, king maniabi ko ngan metung mung bague, at ala sang pamidakedake kekayu; nung e magbili ko sa king tune pamisausig king metung mung pamanisip at king metung mung kayatulan.

1Co 1:11 Uling mipabaluan ku dikil kekayu, kakung kapatad, karing katubale nang Cloe, king atin kong kaguluan.

1Co 1:12 Ngeni ing buri kung sabian ya ini, a king ing balang metung kekayu sabian na, Aku kang Pablo ku; at aku kang Apolos ku; at aku kang Cefas ku; at aku kang Cristo ku.

1Co 1:13 I Cristo wari midakedake ya? Mipaku ya i Pablo king uli yo? o mebinyag kayu king laguiu nang Pablo?

1Co 1:14 Pasalamat ku king Dios king ala kung bininyag ninuman kekayu, nung e mu i Crispo ampon i Gayo;

1Co 1:15 Bang ninuman alang makasabi king mebinyag kayu king laguiu ku.

1Co 1:16 At bininyag kula naman ding katubale nang Estefanas: bukud kareti, e ku balu nung meminyag ku pang aliwa.

1Co 1:17 Uling i Cristo e naku pepadalang maminyag, nung e ipanaral ing evangelio; dapot e king kabiasnan na ning amanu, bang ing cruz nang Cristo e mayalang kabaldugan.

1Co 1:18 Uling ing amanu king cruz metung a kamangmangan karing mamamate; dapot kekatamung makaligtas ya ing upaya ning Dios.

1Co 1:19 Uling makasulat: Labagan ku ing kabiasnan ding biasa, At isakuil ku ing kaisipan ding maisip.

1Co 1:20 Nu ya karin ing biasa? nu ya karin ing escriba? nu ya karin ing talapakiaskal king yatung iti? E wari ing Dios guewa nang kamangmangan ing kabiasnan na ning yato?

1Co 1:21 Uling king kabiasnan na ning Dios ing yatu king pamamilatan na ning keang kabiasnan, e ne abalu ing Dios, ya ing meyapan na ning Dios king kapamilatan na ning kamangmangan na ning aral ing iligtas no ding maniwala.

1Co 1:22 Uling ding Judios maniawad lang tanda, at ding Griegos manintun lang kabiasnan;

1Co 1:23 Dapot ikami ipanaral miya i Cristo a mipaku, a makatakid karing Judios, at karing Gentiles kamangmangan;

1Co 1:24 Dapot karing mayayaus, ding Judios anti, naman ding Griegos, i Cristo ya ing upaya na ning Dios, at ya ing kabiasnan na ning Dios.

1Co 1:25 Uling ing kamangmangan ning Dios biasang maiguit kesa karing tau, at ing keinan na ning Dios masikan a maiguit kesa karing tau.

1Co 1:26 Uling oiti ing kekong pangayaus, kapatad, king e ding dakal a mangabiasang dikil king laman, e ding dakal a mayupaya, e ding dakal a mangapuri meaus la:

1Co 1:27 Dapot pinili no ning Dios ding kamangmangan a bague king yatu, bang abili nala king kamarinayan detang mangabiasa; at ing Dios pinili no ding bague a mangaina king yatu, bang abili nala king kamarinayan ding bague a mangasikan;

1Co 1:28 At ing bague a lang ulaga king yatu, ampon ding bague a mura, pinili no ning Dios, wa, ding bague alayu bang apayalan nong ulaga ding bague atiyu:

1Co 1:29 Bang alang nanu mang laman a paligaya king arapan na ning Dios.

1Co 1:30 Dapot kea ati kayu kang Cristo Jesus, a kekatamu megawang kabiasnan ibat king Dios, at katuliran, at pangabanal, at pangayatbus.

1Co 1:31 Bang, dikil king makasulat, Ing paligaya, paligaya ya sa king Guinu.

1Co 2:1 At aku, kapatad, inyang mine ku kekayu, e ku mine king sintingan na ning pamaniabi o ning kabiasnan, papasiag ke kekayu ing patutu ning Dios.

1Co 2:2 Uling inari ku a ala kung abalu nanuman kekayu, nung e i Jesucristo, at ing mipakung iti.

1Co 2:3 At kayabe yuku king keinan, at king takut, at king dakal a galgal.

1Co 2:4 At ing kakung pawaga ampon ing kakung panaral e king amanung panamuyut ning kabiasnan, nung e king pamipakilala king Espiritu ampon king upaya;

1Co 2:5 Bang ing kekong kasalpantayanan e manguntalan king kabiasnan ding tau, nung e king upaya ning Dios.

1Co 2:6 Maniabi kaming kabiasnan makanian man karing ganap na king ketuan: makanian man kabiasnan a e king yatung iti, ni e karing pekapun king yatung iti, a deti miraras la king alang kabaldugan:

1Co 2:7 Dapot sasabian mi ing kabiasnan na ning Dios king metung a misterio, a ya pin ing kabiasnan a milijim, a iti telaga na nang minuna ning Dios karing panaun, king kekatang ikaligaya:

1Co 2:8 At iti e na abalu ning ninuman karing pekapun king yatung iti: uling nung abalu re, e re sa pinaku ing Guinu ning ligaya:

1Co 2:9 Dapot anti ing makasulat, Bague a e na ikit ning mata, at e na dimdam ning balugbug, At kapilan pa man e linub king pusu na ning tau, Ding bague a sidia na ning Dios karing lulugud kea,

1Co 2:10 Dapot kekatamu pisiag no deti ning Dios king pamamilatan na ning keang Espiritu: uling ing Espiritu sasaliksikan no ding anggang bague, wa, ding bague nang mangalalam ning Dios.

1Co 2:11 Uli ping ninu karing tau ing maki balu karing kabagayan na ning metung a tau, nung e ing espiritu ning taung atiu kea? makanian mu naman ding kabagayan na ning Dios alang maki balu, nung e mu ing Espiritu ning Dios.

1Co 2:12 Dapot ikami tinggap miya, e ing espiritu ning yatu, nung e ing espiritu a ibat king Dios; bang abalu mi ing bague a binie nang alang bayad kekami ning Dios.

1Co 2:13 A ding bague deti sasabian mi mu naman, e king amanung tuturu na ning kabiasnan na ning tau, nung e ing tuturu na ning Espiritu; a piabayan no ding bague king espiritu ila ding amanung espiritu.

1Co 2:14 Ngeni ing taung dikil king laman e no tatanggapan ding bague king Espiritu ning Dios: uling kea kamangmangan la; at e no malyaring abalu, pablasang mauusisa la dikil king espiritu.

1Co 2:15 Dapot ing tau king espiritu usisan no ding keganaganang bague at ya e ne usisan ning ninuman.

1Co 2:16 Uling ninung makakilala king kaisipan na ning Guinu, bang ituru ne? Dapot atiu kekatamu ing kaisipan nang Cristo.

1Co 3:1 At aku, kapatad, e rako apakisabian anti mong king espiritu nung e anting king laman, anti mong pungul kang Cristo.

1Co 3:2 Pepakan dakong gatas, e king lamankati; uling e yu pa aguiu ita: ali, aguia mang ngeni e yu pa aguiu;

1Co 3:3 Uling king laman ko pa: uling anggang atiu kekayu ing kapangalaluan ampon pamiaskal, e ko wari king laman, at eko wari lalakad dikil king ugali ding tao?

1Co 3:4 Uli ning sasabian na ning metung, Aku kang Pablo ku; at ing aliwa, Aku kang Apolos ku; e ko wari tao?

1Co 3:5 Nanu ya pin i Apolos? At nanu ya i Pablo? Talapanibala a king pamamilatan da pesipaniwala kayu; at balang metung dikil king binie na ning Guinu kea.

1Co 3:6 Aku ing tinanam, i Apolos yang dinilig; dapot ing Dios ya ing peparakal.

1Co 3:7 Nanupata alang nanuman ni king tatanam, ni king didilig man; nung e king Dios a babie king pangarakal.

1Co 3:8 Ngeni ing tatanam ampon ing didilig mikakametung la mu: dapot ing balang katau tanggapan na ing keang tune kablasan agpang king sarili nang dapat.

1Co 3:9 Uling ikami kasaup nake ning Dios king keang dapat: ikayu ing asikan na ning Dios, ikayu ing bale na ning Dios.

1Co 3:10 Agpang king kalam ning Dios a miabe kaku, anti mong biasang manalakad aku binili ke ing pitalakaran; at ing aliwa ya ing menalakad babo na. Dapot lawan na sa ning balang metung nung makananu yang mitatalakad babo na.

1Co 3:11 Uling ninuman ala nang makabiling aliwang pitalakaran a bukud king makabili na, a iti ya i Jesucristo.

1Co 3:12 Dapot nung ninu man ing mitatalakad babo ning pitalakaran guintu, pilak, batung mayalaga, dutung, are, kumpe;

1Co 3:13 Ing dapat ning balang metung mibulalag: uling ing aldo ipagsulit ne, uling mipakilala ya king api; at ing api mu rin subukan na ing dapat ning balang katua a nung makananu.

1Co 3:14 Nung ing dapat na ning ninuman manatili a telakad na babo na, tanggapan na ing kablasan.

1Co 3:15 Nung ing dapat na ning ninuman maruluk, pibatan na ing pangalugui: dapot miligtas ya mu rin; makanian man anting king pamamilatan na ning api.

1Co 3:16 E yu balu king pisamban nako ning Dios, at king ing Espiritu ning Dios, manuknangan ya kekayo?

1Co 3:17 Nung ing ninuman sintangan ne ing pisamban ning Dios, ya sintangan ne ning Dios; uling ing pisamban na ning Dios banal ya, at iti ikayu.

1Co 3:18 Ninuman sa e na pipiraitnan ing sarili na. Nung ninuman kekayu isipan na king ya biasa ya king panaun a iti, magpakamangmang ya, bayang maguing biasa.

1Co 3:19 Uling ing kabiasnan ning yatung iti kamangmangan king Dios. Uling makasulat, Ya ing darakap karing biasa king karela mu ring kalalangan:

1Co 3:20 At pasibayu, Ing Guinu balu na ing pamangatuliran ding biasa, king alang kabaldugan.

1Co 3:21 Inya pin e ya sa magmarangal ing ninuman karing tau. Uling ing anggang bague kekayu;

1Co 3:22 Maguing i Pablo o i Apolos o i Cefas o ing yatu o ing bie o ing kamatayan o ding bague kasalukuyan o ding bague daratang; ing sabla kekayu ngan;

1Co 3:23 At ikayu kang Cristo kayu; at i Cristo king Dios ya.

1Co 4:1 Ing tau tungguian nakata sang anti mong talapamajala nang Cristo, at katiwala karing misterios ning Dios.

1Co 4:2 Keni, bukud pa kaniti, mayayawad karing katiwala king ing tau mayakit ya sang tapat.

1Co 4:3 Dapot tungkul kanaku tutu mung malating bague ing miatulan ku kekayu, o king atul ning tau: wa, aku e ku atulan ing kakung sarili.

1Co 4:4 Uling nanuman ala kung balu a salang king sarli ku; makanian man e king uli na niti metanggap kung banal: dapot ing kaku mamatul ya ing Guinu.

1Co 4:5 Inya pin e ko sa mamatul nanuman king e pa panaun, angga king datang ya ing Guinu, a ya dalan nang miagum king masala ing bague makasalikut king dalumdum, at ibulalag na ing nasa ra ding pusu; at kanita balang metung a tau mirinan yang kapurian ibat king Dios.

1Co 4:6 Ngeni ding bague a deti, kapatad, linipat ku king makatulad kanaku mu rin ampon kang Apolos king uli yu; bang king kekami makabalu kayu a e ume labis king bague a makasulat; bang ninuman kekayu e magpalalu king metung salang king aliwa.

1Co 4:7 Uling ninung darapat kekayu bang miayaliwa? at nanung atiu kekang e mu mu tinggap, dapot nung tinggap mu iti, baket magmarangal ka a anti mong e mu tinggap?

1Co 4:8 Mikatmuan na kayu, mibandi na kayu, dinatang kong magari aguiang ala kami: wa at aku buri ku sa ing migari kayu, bang ikami man magari kaming abe yu.

1Co 4:9 Uling, isipan ku, ing Dios binili na kekami ing maguing apostoles king katataulian karing sabla, anting taung miparusan king kamatayan: uling mibili keng pialben king yatu, karing angeles, anti naman karing tau.

1Co 4:10 Ikami mangmang kami king uli nang Cristo, dapot ikayu mangabiasa kayu kang Cristo; ikami mangaina kami, dapot ikayu mangasikan kayu; ikayu atin kong kaligayan, dapot ikami atin keng kayalang puri.

1Co 4:11 Angga king oras ngening salukuyan danupan kami, at mau kami, at lubas kami, at matatampaling kami at ala keng tune tuknangan;

1Co 4:12 At darapat kami, darapat kami karing tune ming gamat; palmuran dake man, panuan kami; pasakitan dake man, mibabata kami;

1Co 4:13 Malilibak ke man, manatili kami: milyari keng anting dinat na ning yatu, at suka ning anggang bague, angga man ngeni.

1Co 4:14 E ku susulat ing bague a iti bang pakarinayan dakayu, nung e pakisabian dakayu anti mong anak kung kaluguran.

1Co 4:15 Uling aguiang mika apulu kong libung maningat kang Cristo, makanian man ala kong dakal a ibpa; uling kang Cristo Jesus aku penganak dakayu, king pamamilatan na ning evangelio.

1Co 4:16 Pagamuamu ku pin kekayu, maguing talatulad ko sa kanaku.

1Co 4:17 King uli na niting sangkan pepadala ke kekayu i Timoteo, a kanakung kaluguran, at tapat kung anak king Guinu, a iti paganaka no kekayu ding kakung dalan kang Cristo, aguia mang tuturu ku king nukarin pa man king balang iglesia.

1Co 4:18 Ngeni ding mapilan magpalalu la, a anti waring e na ku datang kekayu.

1Co 4:19 Dapot ayan dakong agad, nung ing Guinu burian na; at abalu ku, e ing amanu ra ding palalu, nung e ing upaya.

1Co 4:20 Uling ing kayarian na ning Dios e ya king amanu, nung e king upaya.

1Co 4:21 Nanung buri yu? ayan dakong magpaluka, o king lugud at king espiritu ning kalambutan a lub?

1Co 5:1 Tune mipabalu king ating pamakipangalugud kekayu, at ing anti kaniting pamakipangalugud karing Gentiles man e mayayakit, a ya pin, king ing metung kekayu atiu kea ing asawa nang ibpa na.

1Co 5:2 At ikayu magpalalu kayu, at e ko migpaldas, bang milako ya libutad yu ing dinapat kaniting dapat.

1Co 5:3 Uling aku, king katutuan e ku makarap man king katawan dapot atiku makarap king espiritu, makasadia ku anti mong makarap ku inatulan ku ne ing dinapat king bague a iti,

1Co 5:4 King laguiu ning Guinu tang Jesus, ikayu anti ning mitipun kong miabeabe, ampon ing kakung espiritu, kagum ning upaya na ning Guinu tang Jesus,

1Co 5:5 Bang ibie ya ing makanian kang Satanas king pangalasak na ning laman, bang ing espiritu miligtas ya king aldo na ning Guinung Jesus.

1Co 5:6 Ing kekong pamagmarangal e mayap. E yu wari balu king ing ditak a levadura ipakumbo ne ing mabilug a masa?

1Co 5:7 Maglinis kayu king matuang levadura, bakong maguing bayung masa, ya pin ing ala kong levadura. Uling ing kekatang pasku miain ya naman, a ya i Cristo:

1Co 5:8 Inya pin pangilinan tamu ing pista, e king matuang levadura, a ing levadura na ning pamamiukul at ning dewakan, nung e king tinape a alang levadura ning katunayan at ning katutuan.

1Co 5:9 Sinulat ku kekayu king kakung sulat, king e ko makiabe karing makipangalugud;

1Co 5:10 E ko makiabe king makananu man karing makipangalugud keti king yatu, o karing mapanangkamin at mapaniupil, o karing sasambang idolos; uling nung makanian kailangan ing mako kayu king yatu:

1Co 5:11 Dapot anti mo ing malilyari, sinulat ku kekayu king e ko makiabe, kaninumang mayayaus kapatad nung makipangalugud ya, o mapanangkamin, o sasambang idolo, o mapanagkas, o mapaglasing, o mapaniupil; king anti kaniti, e ko makipangan man.

1Co 5:12 Uling nanung arapat ku king pamanatul ku karing makalual? E yu atulan ding atiu kilub?

1Co 5:13 Dapot ding makalual atulan no ning Dios. Ilako ye ing taung marawak libutad yu.

1Co 6:1 Mangangas ya ing ninuman kekayu, nung atin yang piamanuan salang king lupa nang tau, a ya magsakdal ya king arapan ding e banal, at e king arapan ding banal?

1Co 6:2 O e yu wari balu king ding banal ilang matul king yatu? at nung ing yatu mayatul ya kekayu, e ko wari matampang matul karing mangalating bague?

1Co 6:3 E yu balu king atulan tala ding angeles? nu la pa anti iguit ding bague dikil king bie a iti?

1Co 6:4 Nung mirinan kong pamanatul karing bague a dikil king bie a iti ibibili yung matul ding alang kabaldugan king iglesia?

1Co 6:5 Sasabian ku iti bayung ikarine. Nanu pin, e malyaring mayakit kekayu ing metung mu mang taung biasa a dapat munie pamikalutas karing keang kapatad,

1Co 6:6 Nung e, ing kapatad pandalum ne ing keang kapatad, at iti king arapan ding e talapaniwala?

1Co 6:7 Ngeni pin, iti metung nang kakulangan kekayu, king atin kung piamanuan ing metung at metung kekayu. Baket e yu lalung amiaman ing e matulid? baket e yu lalung apapaintulut ing mapirait kayu?

1Co 6:8 Ali, dapot ikayu mu rin daraptan yu ing e matulid, at mamirait kayu, at anti mu rin ding kekong kapatad.

1Co 6:9 O e yu wari balu king ding e banal e re manan ing kayarian na ning Dios? E ko paipirait; ni ding makipangalugud, ni ding sasamba karing idolos, ni ding paliwas, ni ding maganting babai, ni ding makipangatawan lupang lalaki,

1Co 6:10 Ni ding mapanako, ni ding mapanangkamin, ni ding mapaglasing, ni ding mapanagkas, ni ding mapaniupil, e re manan ing kayarian na ning Dios.

1Co 6:11 At anti la kareti ding mapilan kekayu: dapot mewas na kayu, dapot melinis na kayu, dapot metanggap na kong banal, king laguiu ning Guinung Jesucristo, at king Espiritu na ning kekatang Dios.

1Co 6:12 Ding anggang bague katuliran la kaku; dapot e ding anggang bague karampatan la. Ding anggang bague katuliran kaku; dapot e ku manginu kaninuman karela.

1Co 6:13 Ding pamangan tungkul la king atian, at ing atian tungkul ya king pamangan: dapot ing Dios dalan ne king ala, makanian mu naman deti. Dapot ing katawan e ya king pamakipangalugud, nung e king Guinu ya; at ing Guinu king katawan ya:

1Co 6:14 At ing Dios binangun ne ing Guinu, at ibangun nakatamu mu naman king pamamilatan na ning keang upaya.

1Co 6:15 E yu balu king ding kekong katawan dake nong Cristo? kuanan ko pin ding dake nang Cristo, at gawan kong dake na ning katawan na ning metung a patutut? E na ipaintulut ning Dios.

1Co 6:16 O e yu wari balu king itang makiabe king metung a patutut makisanmetung yang katawan kea? uling, Ding kambal, sasabian na, maguing metung la mu laman.

1Co 6:17 Dapot itang makiabe king Guinu kasanmetung yang espiritu kea.

1Co 6:18 Tumakas kayu king pamakipangalugud. Balang kasalanan a daraptan na ning tau makalual king katawan; dapot ing darapat king pamakipangalugud mikakasala ya salang king keang sariling katawan.

1Co 6:19 O e yu wari balu king ing kekong katawan pisamban ne ning Espiritu Santo a atiu kekayo, a tinggap yu king Dios? at aliwa ikayu ing maki bandi king kekong sarili;

1Co 6:20 Uling mesali kayu king metung a alaga; paligayan ye pin ing Dios king kekong katawan.

1Co 7:1 Ngeni ingguil karing baguebague a sinulat yu: Mayap sana king ing lalaki e ne tatagkilan ing babai;

1Co 7:2 Dapot, king uli na ning pamakipangalugud, ing balang lalaki mika sarili ya sang asawa na, at ing balang metung a babai atin ya sang sarili nang asawa.

1Co 7:3 Ibie na sa ning lalaki king keang asawa ing karampatan kea: at makanian mu naman ing babai king keang asawa.

1Co 7:4 Ing babai ala yang upaya king sarili nang katawan, nung e ing asawa: na at makanian mu naman ing asawang lalaki ala yang upaya king sarili nang katawan, nung e ing babai.

1Co 7:5 E ko mipamirait ing metung at metung kekayu, nung e mu king pikasunduan king misan a panaun, bang mipuk la ding sarili yu king panalangin, at mibalik kayung miabe miuman, banakong e tuksuan Satanas king uli na ning kekong e kapangawatan.

1Co 7:6 Dapot iti sasabian ku kekayu king dalan na ning kapaintulutan, e king kautusan.

1Co 7:7 Makanian man buri ku sa king ding anggang tau mianti la kanaku. Dapot ing balang metung atin yang sarili nang kalam king Dios, ing metung king anti kaniting bague, at ing metung king anti kanita.

1Co 7:8 Dapot sasabian ku karing e talasawa ampon karing babaing mebalu, Mayap karela nung manatili lang anti kanaku.

1Co 7:9 Dapot nung ala lang pamangawat, makiasawa la: uling mayap ing makiasawa kesa king maduluk.

1Co 7:10 Dapot karing talasawa iyutus ku, wa aliwa aku, nung e ing Guinu, King e ya sa kakawani ing babai king keang asawa;

1Co 7:11 (Dapot nung kawani ya, manatili yang e makiasawa, o kaya makikasundu ya king keang asawa); at ing lalaki e ne sa lalakuan ing asawa na.

1Co 7:12 Dapot karing aliwa, sasabian ku, aliwa ing Guinu: Nung ing ninu mang kapatad a lalaki atin yang asawa a e ya talapaniwala, at nung tula na ing manuknangan yang abe na, ya e ne sa lalakuan.

1Co 7:13 At ing babaing maki asawang e talapaniwala, at nung tula na ing manuknangan yang abe na, ya e ne sa lalakuan ing keang asawa.

1Co 7:14 Uling ing asawang lalaki a e maniwala magbanal ya king keang asawa, at ing babaing e maniwala magbanal ya kaniting kapatad a lalaki: nung ali ding kekong anak marinat la; dapot ngeni banal la.

1Co 7:15 Makanian man nung ing e maniwala kakalilua ya, kalilua ne: ing kapatad a lalaki, o ing kapatad a babai e ya makasakup king pangayalipan king anti kaniting bague: dapot ing Dios inaus nakatamu king kapayapan.

1Co 7:16 Uling makananu mu ping balu, Oh asawang babai, nung aligtas me ing asawa mu? o makananu mung balu, Oh asawang lalaki, nung aligtas me ing asawa mu?

1Co 7:17 Bukud mu, king pirake na ning Guinu king balang metung, at dikil king pamaniaus ning Dios king balang metung, makanian yang lumakad. At makanian ng iyutus ku karing anggang iglesia.

1Co 7:18 Meaus ya ing ninuman nung metuli ya? E sa malyaring e tuli. Meaus ya ing ninuman king e pangatule? E sa malyaring patuli.

1Co 7:19 Ing pangatuli alang nanuman, at ing e pangatuli alang nanuman; dapot ing maki kabaldugan ya ing pamanupad karing utus na ning Dios.

1Co 7:20 Ing balang katau manatili ya sa ketang pangayaus a keaus na.

1Co 7:21 Meaus ka king bang ika alipan ka? E mu sa gunamgunaman iti: mayap nung ika naman malyari kang maguing timawa, palusuk mung gamitan iti.

1Co 7:22 Uling ing meaus king Guinu, inyang alipan ya, timawa ne king Guinu: makanian mu naman, ing meaus nung timawa ya, alipan neng Cristo.

1Co 7:23 Mesali kayu king metung a alaga; e ko sa maguing alipan ding tau.

1Co 7:24 Kapatad, ing balang katau nung nuya meaus manatili ya sa king Dios.

1Co 7:25 Ngeni tungkul karing alang bakas ala kung utus ning Guinu: dapot babie ku ing kakung pamalak, anti mong migkamit pakalulu ning Guinu bang maguing karampatan king kapanaligan.

1Co 7:26 Aku isipan ku king iti mayap king uli na ning kalungkutan a atiu kekatamu, a ya pin, king mayap a king ing tau manatili ya king sadiang bili na.

1Co 7:27 Makatali ka king asawang babae? e mu sa pagpilitan mabulus ka. Makakalag ka king asawang babae? e ka sa manintun asawang babai.

1Co 7:28 Dapot makiasawa ka man sa, e ka mikakasala; at nung ing metung sang dalaga makiasawa ya, e ya sa mikakasala. Makanian man ding anti kareti midinan lang sindak king laman: at aligtas dako sa.

1Co 7:29 Dapot iti sasabian ku, kapatad, ing panaun mekuyad, bang karing lalaking ating asawa maguing anti mong ala lang asawa;

1Co 7:30 At ding manangis, maguing anti la mong e menangis; at ding magsaya, anti la mong e migsaya; at ding maniali, anti la mong alang asali;

1Co 7:31 At ding gagamit king yatu, anti la mong e migaganap king pamangamit: uling ing kaugalian king yatung iti lilipas.

1Co 7:32 Dapot aku buburian ku king mibili kayung timawa king kalingapan. Ing e talasawa, maguing malingap ya king kabagayan na ning Guinu, nung makananu yang makapatula sana king Guinu:

1Co 7:33 Dapot ing talasawa, magkapilit ya king kabagayan king yatu, isipan na nung makananu yang makapatula king asawang babai,

1Co 7:34 At mirarake la. Makanian mu naman ing babaing e talasawa at dalaga magkapilit ya king kabagayan king Guinu, bayang magbanal king katawan anti naman king espiritu: dapot ing talasawa magkapilit ya king kabagayan ning yatu, isipan na nung makananu neng apatulan ing asawang lalaki.

1Co 7:35 At iti sasabian ku kekayu dikil king sarili yung pakinabang; e king barakong siluan, nung e king bague a katimtimanan, at bakong makasuyu king Guinu king alang kabanalan.

1Co 7:36 Dapot nung ing ninuman isipan na king e ya makapagtimtiman king keang anak a dalaga, nung lumabas ne king kayanakan na ning keang panaun, at nung ing pamagkailangan karampatan na, daptan na na ing buri na; e mikakasala; makiasawa nala.

1Co 7:37 Dapot ing tatalakad matatag king keang pusu, ala ya kaniting pamangailangan, dapot atin yang sikanan king sarili nang kaburian, at inari na iti king sarili nang pusu, king ingatan ne ing keang anak a dalaga, mayap ing daptan na.

1Co 7:38 Makanian mu naman ing papakiasawa king anak nang dalaga, mayap ing daraptan na; at ing e papakiasawa kea darapat yang lalung kayapan.

1Co 7:39 Ing babaing talasawa atiu lalam ning pangasakup kabang panaun a mabie ya ing keang asawa; dapot nung ing asawa na mete ne, mipaintulutan ne a makiasawa king buri na; dapot sang agpang king Guinu.

1Co 7:40 Dapot lalu ya pang matula nung manatili ya king sadia nang bili, dikil king kakung pamalak: at isipan ku king aku man atin ku king Espiritu ning Dios.

1Co 8:1 Ngeni tungkul karing bague a yain king pamidaun karing idolos: Balu tamu king ita ngan atin tang beluan. Ing beluan magpalalu, dapot ing lugud patibe.

1Co 8:2 Nung ninuman isipan na king atin yang balu nanuman, nanuman ala ya pang balu agpang king dapat nang pakibaluan;

1Co 8:3 Dapot ninuman ing malugud king Dios, ing anti kaniti balu ne.

1Co 8:4 Tungkul pin king pamangan karing bague a miain karing idolos, balu tamu a king ing idolo ala yang kabaldugan king yatu, at alang Dios nung e mu metung.

1Co 8:5 Uling aguia mang ating mayayaus dioses, king banua man, o keti sulip man; anti mong dakal la ding dioses, at dakal la ding panginuan;

1Co 8:6 Makanian man kekatamu metung ya kabud ing Dios, ing ibpa, a penibatan na ning sablang bague, at itamu kea tamu; at metung ya mu kabud ing Guinu, i Jesucristo, a king pamamilatan na, ding sablang bague, at itamu king pamamilatan na.

1Co 8:7 Makanian man, ala karing sabla ing beluan a iti: dapot ding mapilan, pablasang angga ngeni makagawi la pa king idolo, mamangan la king bague a ain a anti mong midaun king metung a idolo; at ing karelang pilubluban, pablasang maina, mimusingan ya.

1Co 8:8 Dapot ing kanan e nakatamu panabilin king Dios; ni, nung e tamu mangan, itamu ding lalung marawak; ni, nung mamangan tamu, itamu ding lalung mayap.

1Co 8:9 Dapot mingat kayu, a magkang iting kekong katimawan malyaring katatakiran da ding mangaina.

1Co 8:10 Uling ninuman ing manakit keka, ika a atin king beluan a iti, a makalukluk ka king dulang king pisamban na ning idolo, e mipasiknangan ing keang pilubluban, nung maina ya, bang mangan karing bague a miain king pangadaun karing idolos?

1Co 8:11 Uling king uli na ning kekang beluan malyari yang mate ing maina, ing kapatad a king uli na i Cristo mete ya.

1Co 8:12 At ing pamikasalang makanian salang karing kapatad, at susugatan ya ing pilubluban da ngening atilu king keinan, salang kang Cristo mikakasala kayu.

1Co 8:13 King uli na niti, nung ing pamangan makatakid ya king kakung kapatad, e naku mangan laman-kati kapilan pa man, bang e ya mitakid king uli ku ing kakung kapatad.

1Co 9:1 E ku timawa? e ku apostol? e ke ikit i Jesus a kekatang Guinu? e rako dapat king Guinu?

1Co 9:2 Nung karing aliwa e ku apostol, kekayu muman apostol ku; uling ing tatak ning kakung pangaapostol ikayu mu rin king Guinu.

1Co 9:3 Ing kakung tututul dikil karing kaku mumusisa ya iti.

1Co 9:4 Ala ta waring katuliran mangan at minum?

1Co 9:5 Ala ta waring katuliran mituki nukarin paman metung a asawa a talapaniwala, anti mo ding aliwa karing apostoles, at ding kapatad king Guinu, ampon i Cefas?

1Co 9:6 O bukud aku ampon i Bernabe ing alang katuliran a e dapat?

1Co 9:7 Ninu ing kawal a sumuyu kapilan man king sarili nang gugul? ninu ing tatanam uvas, at e ya mamangan king bunga na? o ninu ing papastul king metung a kawan, at e magkabie king gatas ning kawan?

1Co 9:8 Sasabian ko wari deting bague dikil mu king kaugalian ding tau? o e na sasabian ning kautusan mu naman ite?

1Co 9:9 Uling makasulat king kautusan nang Moises, E me dirinan busal ing vacang dadara. Ding vaca wari ilang ingatan nang makanian ning Dios;

1Co 9:10 O sasabian nang tune iti king uli tamu? King alang kapikakunuan misulat king uli tamu: uling ing sasarul dapat yang sarul maki kapanayan, at ing dadara, dapat yang dumarang maki kapanayan a mirakayan.

1Co 9:11 Nung ikami tinanam keng dikil kekayu king bague tungkul ding espiritu, maragul a bague ing pupulan mi ing kekong bague a dikil king laman?

1Co 9:12 Nung ding aliwa dumake la king anti kaniting katuliran kekayu, e ke maiguit pa? Makanian man e mi guinamit ing katuliran a iti; nung e bagkus ing sablang bague pibabatan mi, bang e maguing makapangabala nanuman king evangelio nang Cristo.

1Co 9:13 E yu balu king ding susuyu karing banal a bague, mamangan la karing bague tungkul king pisamban, at ding susuyu king altar karake no ning altar?

1Co 9:14 Makanian mu naman inutus na ning Guinu, king ding mamalita king evangelio, sukat lang mie king evangelio.

1Co 9:15 Dapot e ku guinamit ing isanu man kareting bague: at e ku susulat man ding bague a deti bang kaku makanian ing marapat; uling mayap pa kaku ing mate, ketang payalan nang kabaldugan ning ninuman ing kakung pamipaligaya.

1Co 9:16 Uli ping nung panaral ke ing evangelio, nanuman ala kung pagmarangal; uling ing pamagkailangan kanaku mibili; uli ping kalulu naku, nung e ke ipanaral ing evangelio.

1Co 9:17 Uling nung daraptan ku iti king tune kung kaburian, atin kung ablas: dapot nung e king kaburian ku atin kung pangakatiwala a mipaniwala kanaku.

1Co 9:18 Nanu pin ing ablas ku? King, nung panaral ke ing evangelio, bibili ku king ing evangelio alang bayad, bang e ku agamit ing lubus kung katuliran king evangelio.

1Co 9:19 Uling aguia mang aku timawa kukaring sabla, pepayalipan ku karing sabla, bang makayagyag kung lalung dakal.

1Co 9:20 At karing Judios meguing anti kung Judio, bakong ayagyag ding Judios; karing atiu lalam ning kautusan, anti mong atiu lalam ning kautusan, aguiang aku ala ku lalam ning kautusan, bang ayagyag kula ding atiu lalam ning kautusan:

1Co 9:21 Karing alalu king kautusan, anti mong alang kautusan, e la ala king kautusan dikil king Dios, nung e lalam ning kautusan kang Cristo, bakong ayagyag ding ala king kautusan.

1Co 9:22 Karing maina meguing anti kung maina, bakong ayagyag ding maina: karing sablang bague meguing anti ku karing sablang tau, bang king makananu pa man aku aligtas ku sa ding mapilan.

1Co 9:23 At daraptan ku ing sablang bague king uli na ning evangelio, bang aku man mirakayan ku kea.

1Co 9:24 E yu pangabaluan king ding pupulai king pipupulayan pupulai la ngan, dapot metung ya mu ing tatangap ablas? Inya pasipulai kung makanian; bakong magkamit.

1Co 9:25 At ing balang taung makilaban karing pialung sasane na ing pamangawat king sarili king sablang bague. Ngeni daraptan da iti bang akamtan de ing corona a masisira; dapot itamu ing metung a e masisira.

1Co 9:26 Aku pin pupulai kung anti kaniti, anti mung e pa lubus; makanian kung makilaban, e anti mong babarug king angin:

1Co 9:27 Dapot pakidaigan ke ing katawan ku, at payalipan ke: magkang king makananu mang bague, kaibat kung menaral karing aliwa, aku mu rin misakuil ku.

1Co 10:1 Uling e ku buri kapatad, ing e yu pangabaluan king ding kekatang mangatua ila ngan atilu lalam ning biga, at ila ngan dinalan la libutad ning dayatmalat;

1Co 10:2 At ila ngan mebinyag la kang Moises king biga ampon king dayatmalat;

1Co 10:3 At ila ngan mengan la king metung mung pamangan espiritual;

1Co 10:4 At ila ngan mininum la king metung mung inuman espiritual: uling mininum la kanitang batung espiritual a tinuki karela: at ing batung ita ya i Cristo.

1Co 10:5 Makanian man, karing keraklan karela ing Dios e ya mipatulan: uling miragsa la king ilang.

1Co 10:6 Ngeni ding bague a deti alimbawa la kekatamu, ba ping itamu e ta mangaibugan king bague a mangarawak, anti mo ila man mengaibugan la.

1Co 10:7 Ni e kayu naman sasamba karing idolos anti mo ding mapilan karela; dikil king makasulat, Ing balayan linukluk bang mangan ampon minum, at tinalakad bang mamialungan.

1Co 10:8 Ni e tamu naman darapat pamakipangalugud, anti mo ing depatan da ding mapilan karela, at miragsa la king misan a aldo ning aduangpulu't atlung libu.

1Co 10:9 Ni e taya naman tutuksuan ing Guinu, anti mo ding mapilan karela tiksuan de, at mengamate lang mekeat ubingan.

1Co 10:10 Ni e kayu naman bubulung anti mu ding mapilan karela milung la, at mengamate la king manlasak.

1Co 10:11 Ngeni ding bague a deti milyari la karela anting pialimbawanan; at misulat bang munie pamigunam kekatamu, a kaniti ding wakas da ding panaun datang la.

1Co 10:12 Inya pin ing mimisip king ya makatalakad ya mingat ya a magkang miragsa ya.

1Co 10:13 E ko mirasnan nanumang tuksu a e na malyaring apibata ning ninumang tau: dapot tapat ya ing Dios, a iti e na paintulut king tuksuan dakayu a maiguit ketang aguiu yung pibatan; dapot kalangkap ning tuksu, gawan na ne man ing dalan na ning pamanakas, bayung malyaring apibata.

1Co 10:14 King uli na niti, kakung kaluguran, tumakas kayu king pamaniamba karing idolos.

1Co 10:15 Maniabi kung anti mong karing mangabiasa; atulan yu iting sasabian ku.

1Co 10:16 Ing copa na ning kanuanan a panuanan tamu, aliwa ing pamikiagum king daya nang Cristo? Ing tinape a pinisi tamu, aliwa ya ing pamakiagum king katawan nang Cristo?

1Co 10:17 Mayayakit king itamu, bistat dakal tamu, metung tamu mung tinape, metung tamu mung katawan: uling ita ngan mirakerake tamu keting metung mung tinape.

1Co 10:18 Lawan ye ing Israel a dikil king laman: ding mamangan wari karing ain, ala lang pamakiagum king altar?

1Co 10:19 Nanu pin ing sabian ku? a king ing bague midadaun karing idolos ating kabaldugan? o ing metung a idolo atin yang kabaldugan?

1Co 10:20 Dapot sasabian ku, king ding bague a ding Gentiles daraun dang yayain karing demonios, at e king Dios: at e ku buri ing atin kung pamakiagum karing demonios.

1Co 10:21 E ku makainum king copa ning Guinu, ampon king copa ding demonios: e ko makapakirake king dulang na ning Guinu, at king dulang da ding demonios.

1Co 10:22 O pamuan taya wari ing Guinu king pamangalalo? Masikan ta pa wari kea?

1Co 10:23 Ding anggang bague matulid la; dapot e ding anggang bague karampatan la. Ding anggang bague matulid la; dapot e ding anggang bague magamit la king pamagtibe.

1Co 10:24 E nasa panintunan ning ninuman ing keang sarili, nung e ing balang metung ing ikakayap na ning kalupang tau.

1Co 10:25 Ing anggang pisasali king pipagtindan, kanan yu, e pamu mangutang king uli na ning pilubluban;

1Co 10:26 Uling ing labuad king Guinu ya, at ing keganaganang makalaman kea.

1Co 10:27 Nung agkatan nakayu king pista ning metung karing e maniwala at bisa kung ume, ing keganaganang ibili ra king arap yu, kanan yu, e ku pamu mangutang king uli na ning pilubluban.

1Co 10:28 Dapot nung ing ninu man sabian na kekayu, Iti midaun a ain, e yu kakanan, king uli na nitang mituru kekayu, at king uli na ning pilubluban:

1Co 10:29 Pilubluban, ngaku, e ing kekayu, nung e ing king aliwa; uling baket miatulan ing kakung katimawan king pilubluban ning aliwa.

1Co 10:30 Nung darake kung kambe ning kapasalamatan, baket malyari kung malibak king uli na ning pepasalamatan ku?

1Co 10:31 Inya pin mamangan ko man, o miminum, o nanuman ing daraptan yu, daptan yu ngan king kaligayan na ning Dios.

1Co 10:32 E ku babie kasangkanan king makatakid, aguiang karing Judios, o karing Griegos, o king iglesia na ning Dios:

1Co 10:33 Anti mu naman aku king keganaganang bague pagpilitan kung makapatula karing malda, e ku panintunan ing sarili kung pakinabang, nung e ing karing malda, bang miligtas la.

1Co 11:1 Maguing talatulad ko pin sa kanaku, anti mo aku kang Cristo.

1Co 11:2 Ngeni aku pupurian dakayu king gaganakan yuku king keganaganang bague, at ingatan yung matibe ing likaslikas a sabi, agpang king binie ku kekayu.

1Co 11:3 Dapot buri ku ing abalu yu, king ing buntuk na ning balang tau i Cristo; at ing buntuk na ning babai ing lalaki; at ing buntuk nang Cristo ing Dios.

1Co 11:4 Ing balang lalaking manalangin o manula, a makatakap a buntuk, lalako ne puri ing keang buntuk.

1Co 11:5 Dapot ing balang babaing manalangin o manula a alang talikbung a buntuk, lalako ne puri ing keang buntuk; uling metung ya ampon ya naman ing anti ya mu ring inurud.

1Co 11:6 Uli ping nung ing babai e magtalikbung paurud ya naman: dapot nung kamarinayan king babai ing urud ya o guitgatan ya, magtalikbung ya.

1Co 11:7 Uling ing lalaki king katutuan e ne dapat talikbungan ing keang buntuk, anti na ning yang larawan na at ligaya ning Dios: dapot ing babai yang ligaya na ning lalaki.

1Co 11:8 Uling ing lalaki e ya king babai; nung e ing babai king lalaki ya:

1Co 11:9 At king katutuan, e ya melalang ing lalaki king uli na ning babai; nung e ing babai king uli na ning lalaki:

1Co 11:10 King uli na niti ing babai dapat yang magdalang tanda king kayupayan babo na ning keang buntuk, king uli ra ding angeles.

1Co 11:11 Makanian man, e malubus ing lalaki nung alang babai, aguiang ing babai nung alang lalaki, king Guinu.

1Co 11:12 Uling nung makananung ing babai king lalaki ya, makanian mu naman ing lalaki king pamamilatan na ning babai; dapot ding sablang bague king Dios la.

1Co 11:13 Atulan yu king kekong sarili: bague a kasinsinan a ing metung a babai manalangin ya king Dios a e makatalikbung?

1Co 11:14 E wari king ing kaugalian mu naman ya ing tuturu kekayu, king nung ing lalaki makaba ya buak, metung a kayalang puri kea?

1Co 11:15 Dapot nung ing babai makaba ya buak, metung a kaligayan kea: uling ing buak na miabie kea a panakap.

1Co 11:16 Dapot nung ninuman anti yang makasalangsang, ala keng kaugalian king anti kaniti, ni ding iglesia na ning Dios.

1Co 11:17 Dapot king pamamie kung kapanabilinan kekayu, e rako pupurian, king mititipun kayu e king bang lalung ikakayap nung e king bang lalung ikarawak.

1Co 11:18 Uling king kaunanunan, neng mititipun kayu king iglesia, daramdaman ku king ating pamidakedake kekayu; at atin kung ditak a pamaniwala.

1Co 11:19 Uling atin mu namang mipapagkamua kekayu, bang detang nung ninu ding mesubuk mipakilala la kekayu.

1Co 11:20 Ngening mitipun ko ping miabeabe, e malyari ing mangan kayu king apunan na ning Guinu:

1Co 11:21 Uling king kekong pamamangan, ing balang metung kakuanan na king kea ing sariling apunan na; at ing metung danupan ya, at ing metung malasing ya.

1Co 11:22 Nanu, ala kung bale a pipanganan at piinuman? o payalan yeng ulaga ing iglesia na ning Dios, at pakarinayan yula ding ala nanuman? Nanung sabian ku kekayu? purian dakayu? Kaniti e rako purian.

1Co 11:23 Uling aku tinggap ke king Guinu ing binie ku naman kekayu, king ing Guinung Jesus, king bengi mu ring mipaglinguan ya kinangua yang tinape;

1Co 11:24 At kaibat nang pepasalamat, pinisi ne at sinabi na, Iti yang kakung katawan, a mepisi king uli yu: daptan yu iti king kapigaganakan kanaku.

1Co 11:25 Makanian mu rin ing copa, kaibat ning pamanapun, nganang sinabi, Ing copang iti ya ing bayung tipan king kakung daya: daptan yu iti, balang inuman ye, king kapigaganakan kanaku.

1Co 11:26 Uling balang kanan ye iting tinape, at inuman ye ing copang iti, babalita yu ing kamatayan na ning Guinu angga king datang ya.

1Co 11:27 King uli na niti itang mangan king tinape o minum king copa ning Guinu a e ya karampatan, mikasala ya tungkul king katawan na at daya ning Guinu.

1Co 11:28 Dapot siasatan na ing sarili na ning tau, at kanita mangan ya king tinape, at minum ya king copa.

1Co 11:29 Uling ing mamangan at miminum a e karampatan mamangan ya at miminum kayatulan king keang sarili, nung e ne kikilalanan ing katawan.

1Co 11:30 King uli na niti ding dakal kekayu mangaina la at palpisakit, at e la ditak ding matudtud.

1Co 11:31 Dapot nung atulan tamu ing kekatang sarili, e tamu dapat miatulan.

1Co 11:32 Dapot nung miatulan tamu, miparusan tamu king Guinu, bang e tamu misumpang kayabe na ning yatu.

1Co 11:33 King uli na niti, kakung kapatad, nung mitipun kayu bang mangan mipanaya kayu ing metung at metung.

1Co 11:34 Nung ninuman danupan ya, mangan ya bale na; bang ing pamisulu yung miabeabe e dikil king kayatulan. At ing makatagan salesean ku kaniang ayan dakayu.

1Co 12:1 Ngeni tungkul karing kalam dikil king espiritu, kapatad, e ku buri king e yu balu.

1Co 12:2 Balu yu a inyang Gentiles kayu, miatad kayu karing idolong pipi, king nanu pa mang paralan a pangayatad yu.

1Co 12:3 King uli na niti pabalu ku kekayu, king ala ninumang maniabi dikil king Espiritu ning Dios a sasabian na, I Jesus makasakuil ya; at ninuman e na asabi, I Jesus ya ing Guinu, nung e mu king Espiritu Santo.

1Co 12:4 Ngeni ating miayaliwang kalam, dapot ya mu rin ing Espiritu;

1Co 12:5 At miayaliwa ing kapaningatan, at ya naman ing Guinu:

1Co 12:6 At ating miayaliwang pamaniapat, dapot ya naman ing Dios, a iti daraptan na ing keganaganang bague karing sabla.

1Co 12:7 Dapot king balang metung miabie kea ing pamipakilala ning Espiritu dikil king pakinabang ding malda.

1Co 12:8 Uling king metung miabie kea king pamamilatan na ning Espiritu ing amanu ning kabiasnan; at king aliwa ing amanu ning beluan, agpang mu rin kaniting Espiritu:

1Co 12:9 King aliwa, kasalpantayanan, kaniti mu ring Espiritu, king aliwa kalam king pamanulu, kaniti mu ring metung a Espiritu;

1Co 12:10 At king aliwa, kapaintulutan king pamaniapat mala; at king aliwa pamanula; at king aliwa pamangilala karing espiritu: king aliwa, miayaliwang amanu; at king aliwa, pamibaldugan karing amanu.

1Co 12:11 Dapot deting keganaganang bague daraptan nala nitang metung at iti mu ring Espiritu, pirakerakayan na king balang metung dikil king buri na.

1Co 12:12 Uling nung makananung ing katawan, metung ya at atin yang dakal a dake, at ding anggang dake ning katawan, aguiang dakal la, metung la mu ring katawan; makanian ya naman i Cristo.

1Co 12:13 Uling king metung a Espiritu ita ngan mebinyag tamu king metung mung katawan, maguing Judios o Griegos man, maguing alipan o timawa man; at ita ngan pepainum nakatamu king metung mu ring Espiritu.

1Co 12:14 Uling ing katawan e ya metung mung dake, nung e dakal ya.

1Co 12:15 Nung sabian na ning bitis, Anti na ning e ku gamat, e ku king katawan; e king uli na niti e ne king katawan.

1Co 12:16 At nung sabian na ning balugbug, Anti na ning e ku mata, e ku king katawan; e king uli na niti e ne king katawan.

1Co 12:17 Nung ing mabilug a katawan mata ya ngan nuya karin ing panamdam? Nung ing keganagana panamdam ya, nu ya magkabili ing pamau?

1Co 12:18 Dapot ngeni ing Dios binili no ding dake, balang metung karela, king katawan, agpang king birian na.

1Co 12:19 At nung wari't ding sabla metung la mung dake, nu ya magkabili ing katawan?

1Co 12:20 Dapot ngeni dakal la ding dake, dapot metung ya mu kabud ing katawan.

1Co 12:21 At e na asabi ning mata king gamat, Ala kung kailangan keka: o pasibayu ing buntuk karing bitis, Ala kung kailangan kekayu.

1Co 12:22 Ali, nung e bagkus, lalu la pang kailangan detang dake ning katawan a anti mong lalung mangaina:

1Co 12:23 At detang dake ning katawan a babalakan tamung ditak la kapurian, a kareti babie ta ing lalung ganap a puri; at ding kekatang dake a manawang ilang lalung ating ganap a lagu;

1Co 12:24 Kabang ding kekatang dake a mangalagu e la binang kailangan: dapot ing Dios pibaguebague ne ing katawan king sarili na mu rin, a babie na ing lalung maragul a kapurian ketang dake a maki kakulangan;

1Co 12:25 Bang e mirinan pamikakawani ing katawan; nung e ding dake mika atin lang mikakametung a pamaningat king metung at metung.

1Co 12:26 At kapilan pa man ing metung a dake manamdam ya, manamdam lang abe na ding anggang dake; o mapuri ya ing metung a dake, ding anggang dake tumula la ngang abe na.

1Co 12:27 Ngeni iko pin ing katawan nang Cristo, at balang metung kekayu dake ne.

1Co 12:28 At ing Dios binili no ding mapilan king iglesia, mumuna ding apostoles, kadua ding manula, katlu ding talaturu, kanita ding mala, ampon ing kalam king pamanulu, ding king pamaniaup, ding pamaniakup, miayaliwang amanu.

1Co 12:29 Ding sabla apostoles la? ding sabla manula la? talaturu la ngan? talapaniapat la ngan mala?

1Co 12:30 Atin la ngang kalam a manulo? makapaniabi la ngang miayaliwang amanu? makapibaldugan la ngan?

1Co 12:31 Dapot lusuk yung lalung pagnasan ding lalung mangaragul a kalam. At maiguit kaniti ing metung a dalan a lalu pang marangal ituru ke kekayu.

1Co 13:1 Nung maniabi ku karing amanu ding tau at ding angeles, dapot ala kung lugud, meguing anti kung tangsung kakatni, o kampanang bibiung,

1Co 13:2 At nung mika atin ku king kalam ning pamanula, at balu ku ing anggang misterio, at ing anggang beluan; at nung mika atin ku king anggang kasalpantayanan, nanupata ayalis ko ding bunduk, dapot ala kung lugud, ala kung kabaldugan.

1Co 13:3 At nung ibie ku ngan ing kayatinan ku bang pakan karing kalulu, at nung ibie ke ing katawan ku bang dulukan, dapot ala kung lugud, ala kung pakinabangan.

1Co 13:4 Ing lugud mapibabata, at maganaka; ing lugud alang diria; ing lugud e mapagparangalan, e ya palalu,

1Co 13:5 E manugaling alang kasinsinan, e na panintunan ing keang sarili, e paimua, e ya kakuang nanu man king marawak;

1Co 13:6 E ya tutula king e katuliran, dapot makitutula ya king katutuan,

1Co 13:7 Ing sabla pibabatan na, ing sabla paniwalan na, ing sabla panaligan na, ing sabla yayamyaman na.

1Co 13:8 Ing lugud kapilan man e kumulang: dapot aguian mang atin pang ula, mangapupus la; aguian mang atin pang pamangamanu, tuknang la; aguian mang atin pang beluan mapupus.

1Co 13:9 Uling ditak mu man balu tamu, at ditak mu man auula tamu;

1Co 13:10 Dapot nung datang ya ing sakdal, ing e sakdal mapupus ya.

1Co 13:11 Inyang anak ku, miniabi kung anting anak, menamdamam kung anting anak, minisip kung anting anak: dapot ngening maragul naku, likuan ku na ing pangaanak.

1Co 13:12 Uling, ngeni akakit tamu king metung a salamin, madadalumdum; dapot kanita lupa at lupa: ngeni abalu ku ditak mu man: dapot kanita abalu ku nang lubus nung makananung aku man mebalu kung lubus.

1Co 13:13 Dapot ngeni manatili ing kasalpantayanan, ing kapanayan, ing lugud, deting atlu; at ing maragul dili kareti ya ing lugud.

1Co 14:1 Tukian yu pin ing lugud; makanian man lalu yung lusuk pagnasan ding kalam tungkul king espiritu, dapot lalu na pa ing pasipanula kayu.

1Co 14:2 Uling ing maniabi king aliwang amanu e maniabi karing tau, nung e king Dios; uling ninuman e ne atatalastas; dapot king espiritu maniabi ya king misterios.

1Co 14:3 Dapot itang manula maniabi ya karing tau dikil king katibayan at king kausukan, at king pamipatula.

1Co 14:4 Ing maniabi king aliwang amanu, papagtibayan na ing keang sarili; dapot ing manula, papagtibayan ne ing iglesia.

1Co 14:5 Ngeni aku buburian ku king iko ngan maniabi kong aliwang amanu, dapot lalu pa sana ing manula kayu: at maiguit ya itang manula ketang maniabing aliwang amanu, subali mu nung sabian na kabaldugan bang ing iglesia tanggap yang pamagtibe.

1Co 14:6 Dapot ngeni, kapatad, nung ayan dakayung maniabi ku king aliwang amanu, nanung pakinabangan ku kekayu, bukud mu nung maniabi ku kekayu king pamamilatan na ning pamipatilip, o ning beluan, o ning pamanula, o ning pamanuru?

1Co 14:7 Aguiang ding bague mang alang bie, a babie siwala, basle ya man o alpa nung e la babie pamialiwa king katni, makananung mabalu nung nanung titigtig king basle o titigtig king alpa?

1Co 14:8 Uling nung ing pakakak pin munie yang katning e makilala, ninung magsadia dikil king pamipamuk?

1Co 14:9 Makanian mu naman ikayu, nung king dila e ku gungkas amanung mangayan talastasan, makananung mabalu ing mesabi? uling maniabi kayu mu king angin.

1Co 14:10 Atin marajil, dakal a adle siwala king yatu, at metung man alang e maki tanda king pangakilala na.

1Co 14:11 Nung aku pin e ku balu ing kabaldugan na ning siwala, maguing tau ku king aliwang labuad king maniabi, at ing maniabi maguing metung yang tau king aliwang labuad kanaku.

1Co 14:12 Makanian mu naman ikayu, anti ning matupad kayu karing kalam a dikil king espiritu, panintunan yu bakong mikatmuan king ikatibe na ning iglesia.

1Co 14:13 King uli na niti, ing maniabi king aliwang amanu, panalangin na king makaibie ya sang kasalesayan.

1Co 14:14 Uling nung aku manalangin ku king aliwang amanu, ing kakung espiritu manalangin ya, dapot ing kakung pamanalastas e mamunga.

1Co 14:15 Nanu pin? Manalangin ku a kagum ning espiritu, at manalangin ku naman a kagum ning pamanalastas; dalit ku a kagum ning espiritu, at dalit ku naman a kagum ning pamanalastas.

1Co 14:16 Nung ali nung panuan ka a kagum ning espiritu, makananu nang sabian ning magbili king kabilian na ning e biasa ing Yanasa king kekang pamipasalamat, anti ning e na balu ing kekang sasabian?

1Co 14:17 Uling ika king katutuan babie mung mayap ing pasalamat, dapot ing aliwa e ya titibe.

1Co 14:18 Pasalamat ku king Dios, king aku maniabi kung aliwang amanu a maiguit pa keko na ngan:

1Co 14:19 Makanian man king iglesia buri ku pang maniabi kung lima mung amanu king kakung atatalastas, bang makaturu naku man karing aliwa, ketang apulung libung amanu a makayaliwa.

1Co 14:20 Kapatad, e ku sa magpakaanak king pamiisip: makanian man king pamamiukul magpakabingut kayu, dapot king pamiisip magpakatau na kayu.

1Co 14:21 King kautusan makasulat, Karing taung maki aliwang amanu at karing labi ding aliwang labuad, aku pakisabian ke ing balayan a iti; at makanian man e raku pakiramdaman, ngana ning Guinu.

1Co 14:22 Nanupata ding miayaliwang amanu dikil la king tanda, e karing maniwala, nung e karing e maniwala: dapot ing pamanula dikil king tanda, e dikil karing e maniwala, nung e karing maniwala.

1Co 14:23 Nung ing mabilug a iglesia pin makatipun makapamisan at ding sabla maniabi la king aliwang amanu, at lungub la ding e biasa, o ding e maniwala, e ra sabian king mamulang kayo?

1Co 14:24 Dapot nung ding sabla manula la at lungub ya ing metung a e maniwala, o e biasa, apangamanuan de ding sabla, miatulan ya karing sabla;

1Co 14:25 Ding lijim ning keang pusu mibulalag la; at kanita magsakab ya at samba ya king Dios, ipasiag na king ing Dios katutuan atiu libutad yu.

1Co 14:26 Nanu pin, kapatad? Ngening mititipun kong makapamisan, balang metung atin yang metung a dalit, atin yang metung a turu, atin yang metung a pamipakilala, atin yang metung a aliwang amanu, atin yang metung a pamamie kabaldugan king amanu. Daptan ing sablang bague dikil king ikatibe.

1Co 14:27 Nung ing ninu mang tau maniabi ya king aliwang amanu, maguing adua la, o ing keraklan, titlu, at mililiwas la, at ing metung sasalesayan na kabaldugan:

1Co 14:28 Dapot nung alang talapanalese king kabaldugan, magtajimik ya sa king iglesia; at paburen yang makisabi king sarili na, ampon king Dios.

1Co 14:29 At karing manula maniabi la ding adua o atlu, at ding aliwa magumasid la.

1Co 14:30 Dapot nung ing pamipakilala mesabi ya king metung a makalukluk, magtajimik ya ing mumuna.

1Co 14:31 Uling iko ngan malyari ku ngang manula tunggal tunggal, bang ding sabla abalu ra at ila ngan mausuk la;

1Co 14:32 At ding espiritu ra ding manula makasakup la karing manula;

1Co 14:33 Uling ing Dios e Dios ning kaguluan, nung e ning kapayapan. Anti mo ing karing anggang iglesia ding banal,

1Co 14:34 Ding babai tajimik la sa karing iglesia: uling e makapaintulut karela ing maniabi; nung e magbili la king pamipasakup anti ing sasabian na naman ning kautusan.

1Co 14:35 At nung bisa lang makabalung nanu mang bague, ikutang da bale karing karela mu ring asawa: uling makarine bague a ing metung a babai maniabi ya king iglesia.

1Co 14:36 Nanu? kekayu wari ibat itang amanu ning Dios a biglang linual? o kekayu ya mu kabud dinatang?

1Co 14:37 Nung ninuman isipan na king ya manula ya, o taung mipaisipan king espiritu, pakibaluan na a king ding bague a susulat ku kekayu utus no ning Guinu.

1Co 14:38 Dapot nung ninuman ala yang balu, magala yang balu.

1Co 14:39 King uli na niti, kapatad ku, pagnasan yung lusuk ing malyaring makapanula, at e yu babawal ing maniabi king aliwang amanu.

1Co 14:40 Dapot daptan sana ing keganaganang bague king kalinisan at king kaayusan.

1Co 15:1 Ngeni pabalu kekayu, kapatad, ing evangelio a penaral ku kekayu, a iti tinggap yuya naman, nung nukarin makatalakad kayu naman,

1Co 15:2 At king pamamilatan na niti makakabus kayu, nung ingatan yung parati ing amanung penaral ku kekayu, bukud mu nung meniwala kayung alang kabaldugan.

1Co 15:3 Uling binie ke kekayu bayu king keganagana ing tinggap ku naman: a king i Cristo mete ya king uli na ning kasalanan tamu agpang karing kasulatan;

1Co 15:4 At king ya mikutkut yu: at king ya sinubli yang mebie king katlung aldo, agpang karing kasulatan;

1Co 15:5 At king ya pepakit ya kang Cefas; kaibat karing labingadua;

1Co 15:6 Kaibat pepakit ya karing maiguit limangdalan a kapatad king misan mu, a kareti ding keraklan manatili la mu angga ngeni, dapot ding mapilan matudtud na la:

1Co 15:7 Kanita pepakit ya kang Santiago; kanita karing anggang apostoles;

1Co 15:8 At katataulian, anti mong kikuan, pepakit ya naman kanaku.

1Co 15:9 Uling aku pin ing malating dili karing apostoles, a e ku karampatan mayaus apostol, uling ligaligan ke ing iglesia na ning Dios.

1Co 15:10 Dapot king uli na ning kalam na ning Dios aku pin nung ninu aku: at ing keang kalam a miabie kaku e mealang kabaldugan; nung e bagkus dinapat ku pang lalung maiguit karela ngan: makanian man aliwa aku, nung e ing kalam na ning Dios a atiu kanaku.

1Co 15:11 Inya maguing aku man pin o ila man, makanian ming ipanaral, at makanian ing kekong peniwalan.

1Co 15:12 Ngeni nung i Cristo mipanaral ya king mibangun ya ibat karing mete, makananu rang asabi ding mapilan kekayu king alang pamaniubling mebie karing mete?

1Co 15:13 Dapot nung ala la ping pangasublingmie ding mete, ni i Jesucristo e ya naman sa mibangun:

1Co 15:14 At nung i Cristo e ya, mibangun nung makanian alang kabaldugan ing kekeng panaral, at ing kekong kasalpantayanan ala mu namang kabaldugan.

1Co 15:15 Wa, ampon meguing saksi kaming malaram tungkul king Dios; uling sinaksi kami tungkul king Dios, king binangun ne i Cristo: a e ne binangun, nung makanian ding mete e la naman mibangun.

1Co 15:16 Uling nung ding mete e la mibangun, i Cristo man e ya mibangun:

1Co 15:17 At nung i Cristo e ya mibangun alang kabaldugan ing kekong kasalpantayanan; ati ko pa karing kekong kasalanan.

1Co 15:18 Makanian mu naman ding matudtud kang Cristo mengamate la.

1Co 15:19 Nung atin tamung kapanayan kang Cristo king bie a iti, itamu ding taung lalung makalunus

1Co 15:20 Dapot ngeni i Cristo mibangun ya ibat karing mete, yang mumunang bunga ra ding metudtud.

1Co 15:21 Uling king pamamilatan na ning tau dinatang ing kamatayan, king pamamilatan na naman ning tau dinatang ing pangasubli rang mie ding mete.

1Co 15:22 Uling nung makananung kang Adam ding sabla mangamate la, makanian mu naman kang Cristo ding sabla mie la.

1Co 15:23 Dapot ing balang metung king sarili nang ayus: i Cristo ing mumunang bunga; at kaibat ding kang Cristo, king panaun na ning keang pamaniatang.

1Co 15:24 Kanita datang na ing kawakasan nung ya ibie na na ing kayarian king Dios a Ibpa; nung alako na na ing anggang pamaniakup at ing anggang kapayan ampon kayupayan.

1Co 15:25 Uling karampatan king ya magari ya, angga king abili nala ding keang kasalang lalam ding keang bitis.

1Co 15:26 Ing tauling kasalang a keang ilako ya ing kamatayan.

1Co 15:27 Uling, binili na ing keganaganang bague king pangasakup lalam ding keang bitis. Dapot nung sasabian na na, Ding keganaganang bague makabili no king pangasakup, malino king makapasubali ya itang pepasakup karing sablang bague

1Co 15:28 At nung ding keganaganang bague mesakup la kea, kanita iting Anak mu rin masakup ya naman king sinakup karing keganaganang bague, bang ing Dios maguing ya ing sabla king sabla.

1Co 15:29 Nung e makanian nanung daptan da ding mebinyag dikil karing mete? Nung ding mete tune e la mibangun baket mabibinyag la pa dikil karela?

1Co 15:30 Baket tatalakad tamu naman king kapanganiban king balang oras?

1Co 15:31 Tututul ku uli nitang pamipaligayang atiu kekayu, kapatad, a atiu kaku kang Cristo Jesus a kekatang Guinu, aku mamamate ku aldoaldo.

1Co 15:32 Nung dikil king ugaling tau mekipate ku karing lasip king Efeso, nanung pakinabang kanaku? Nung ding mete e la mibangun mangan at minum tamu, uling bukas mate tamu.

1Co 15:33 E ku paipirait: Ing marawak a pamiabe parawak karing mangayap a kaugalian.

1Co 15:34 Miguising kong maki panamdam king katuliran, at e ku mikakasala; uling ding mapilan ala lang pangabaluan king Dios: sasabian ku iti barakong akimut king kamarinayan.

1Co 15:35 Dapot ing aliwa sasabian na, Makananu lang mibabangun ding mete? at nanung anyu na ning katawan dang datang?

1Co 15:36 Ika mangmang, ing keka mu ring isasalbag e mie nung e ya mate pamu:

1Co 15:37 At ketang tatanam mu e me tatanam ing katawan a ya ing malyari, nung e ing bukud mung binutil, maguing trigu ya man, o isanuman karing aliwang binutil;

1Co 15:38 Dapot ing Dios dinan neng metung a katawan, agpang king makapatula kea, at king balang bini metung a sariling katawan na.

1Co 15:39 E ing anggang laman metung mung laman: dapot ating metung a laman ning tau, at aliwang laman karing animal, at ing aliwang laman karing ayup, at ing aliwa karing asan.

1Co 15:40 Atin mu namang katawan a king banua, at katawan a king gabun: dapot aliwa ya ing ligaya ra ding king banua at aliwa ya ing ligaya ra ding king gabun.

1Co 15:41 Aliwa ya ing ligaya na ning aldo, at aliwa ya ing ligaya na ning bulan; at aliwa ya ing ligaya ra ding batuin: uling ing metung a batuin makayaliwa ya king metung a batuin king ligaya na.

1Co 15:42 Makanian mu naman ing pamanyubli rang mie ding mete. Mitatanam ya king ating pangasira; mibabangun ya king alang pangasira;

1Co 15:43 Mitatanam ya king kamuran; mibabangun ya king kaligayan; mitatanam ya king keinan, mibabangun ya king kayupayan:

1Co 15:44 Mitatanam ya king katawan a gabun, mibabangun ya king katawan a espiritu. Nung ating katawan a gabun, atin mu namang katawan a espiritu.

1Co 15:45 Inya makanian mu naman makasulat, Ing mumunang tau, i Adam, meguing kaladua yang mabie. Ing tauling Adam meguing metung yang espiritung babie bie.

1Co 15:46 Dapot e minuna ing king espiritu, nung e ing king gabun; at kaibat ing king espiritu.

1Co 15:47 Ing minunang tau ibat ya king gabun, gabun ya: ing kaduang tau king banua ya.

1Co 15:48 Nung makananu ya ing ibat king gabun, makanian la naman ding king gabun: at nung makananu ya ing king banua, makanian la naman ding king banua.

1Co 15:49 At nung makananu tayang dela ing larawan na ning ibat king gabun dalan taya naman ing larawan na ning king banua.

1Co 15:50 Ngeni iti sasabian ku, kapatad, king ing laman at daya e ra amana ing kayarian na ning Dios, ni ing ating kasiran man e ne amana ing alang kasiran.

1Co 15:51 Oini, sasabian ku kekayu ing metung a misterio: E ita ngan matudtud tamu, dapot ita ngan mialiwa tamu,

1Co 15:52 King misan a saguli, king misan a kisapmata, king katataulian a pakakak: uling matigtig ya ing pakakak, at ding mete mibangun lang alang kasiran, at itamu mialiwa tamu.

1Co 15:53 Uling iting katawan a masisira miblas ya king alang pangasira at iting katawan a maki kamatayan miblas ya king alang kamatayan.

1Co 15:54 Dapot nung iting katawan a masisira misulud ne king alang pangasira at iting katawan a maki kamatayan misulud ne king alang kamatayan, kanita malyari na ing amanung makasulat, Ing kamatayan inakmul ne ning pamagwagui.

1Co 15:55 Oh kamatayan, nu ya karin, ing kekang pamagwagui? Oh kamatayan, nu ya karin ing kekang uyung?

1Co 15:56 Ing uyung ning kamatayan ya ing kasalanan, at ing sikanan na ning kasalanan ya ing kautusan:

1Co 15:57 Dapot salamat king Dios, a babie na kekatamu ing pamagwagui, king pamamilatan na ning Guinu tamung Jesucristo.

1Co 15:58 King uli na niti, kaluguran kung kapatad, magtibe kayu, e ku balisa, dagdagan yu ing dapat king Guinu, baluan yu king ing kekong dapat e alang kabaldugan king Guinu.

1Co 16:1 Ngeni tungkul king ambagan karing banal, agpang king binie kung utus karing iglesia ning Galacia, ikayu man yang daptan yu.

1Co 16:2 King mumuna nang aldo ning paruminggu, ing balang metung kekayu mikawani bang isimpan na, agpang king pangapala na, bang keta nung datang ku e na daptan ing ambagan.

1Co 16:3 At nung datang na ku, ninu man ding kekayung pamayapan, karela patad kung sulat, bang dalan da ing kekong saup Jerusalem:

1Co 16:4 At nung karampatan ku namang ume, ila tuki la kaku.

1Co 16:5 Dapot aku datangan dakayu panga midalan na ku Macedonia: uling dumalan ku Macedonia;

1Co 16:6 Dapot kambe yu malyaring manatili ku, o aguiang king kauran, bang ituru yuku king lakbayan ku king nu ku man ume.

1Co 16:7 Uling e ku buri ing akit dakayu ngeni king pamanialan ku; uling pagnasan kung manatiling mapilan a aldo kayabe yu, nung ing Guinu paintulut na.

1Co 16:8 Dapot manatili ku Efeso angga king Pentecoste;

1Co 16:9 Uling ing metung a pasbul a maragul at masikanan mibuklat ya kanaku, at ding kasalang dakal la.

1Co 16:10 Ngeni nung i Timoteo datang ya lawan yu king makiabe ya sa kekayung alang takut; uling daraptan na ing dapat ning Guinu, anti mo ing daraptan ku:

1Co 16:11 E yu pin paburen a libakan ne ning ninu mang tau. Bagkus pang ipatnube ye king lakbayan na king kapayapan, bayang ume kanaku: uling panayan keng kambe no ding kapatad.

1Co 16:12 Dapot tungkul king kapatad a i Apolos, pigamuamu kung dakal kea king ume ya sa kekayu kambe no ding kapatad: at king makananumang bague e mebisang ume ngeni; dapot ume ya kabud mirinan yang panaun.

1Co 16:13 Maglame kayu, magtibe kayu king kasalpantayanan, magbili ko king pangalalaki, magpakasikan kayu.

1Co 16:14 Ing keganaganang daraptan yu sana daptan yu king lugud.

1Co 16:15 Ngeni usukan dakayu, kapatad (balu ye pin ing bale nang Estefanas, king ya ing mumuna nang bunga ning Acaya, at king binili ra ing karelang sarili king kasuyuan karing banal).

1Co 16:16 King ikayu pasakup kayu naman karing anti kareti, at anti mu rin king balang metung a sasaup king dapat ampon darapat.

1Co 16:17 At matula ku king uli na ning paniatang nang Estefanas ampon i Fortunato at i Acaico: uling ing kekong meguing kakulangan ila guenapanan da:

1Co 16:18 Uling dininan deng kapasnon ing kakung espiritu ampon ding kekayu: kilalanan yu pin ding anti kareti.

1Co 16:19 Ding iglesia king Asia pagmananuan dakayu. I Aquila ampon i Prisca, pagmananuan dakong dakal king Guinu, pati na ing iglesia a atiu king bale ra.

1Co 16:20 Ding anggang kapatad pagmananuan dakayu. Mipagmananu kayu king metung at metung king banal a uma.

1Co 16:21 Ing pamagmananu ku, aku i Pablo sinulat ning tune kung gamat.

1Co 16:22 Nung ninuman a e ne luluguran ing Guinu misakuil ya. Maran-atha

1Co 16:23 Ing kalam na ning Guinung Jesuscristo mike kekayu.

1Co 16:24 Ing kakung lugud mike sa kekayu ngan kang Jesucristo. Yanasa.

AMAZING GRACE BIBLE INSTITUTE