ROMANS1 Yesu Khristu dah jyeidwis ngos Paulo ka, lvgyo duot das xiklyis khi toh las Mangso dah gausyis dang nyhenshang toeuq toh zis xauh soeu nghuot. 2 Gausyis dang mas nyang gas gohlhain lvpe jens lyis yah gyingshang lhaihtoh dang mas dangthoengh toh las, 3 Nyah Lo, yah Yhensain Yesu Khristu lyis gas, gungsshoh khyvlyis Dawi dah vnyau vshih mas khoeu los nhang. 4 Gyingshang dah Dyos mas, yomsoq yah nyang lyis shei masyah dwis toqh kat las nyang gas Mangso dah Lo, yah Yhensain Yesu Khristu nghuot yvlyis taiq hoeuh. 5 Nyah nyings gvng mas dius nyau khanghmuh hau lomsjingh cho lhyi domsyos gyo bas jungh ge, nyah jyank masyah jyehjuh yahge lvgyo muh lyis ngamoq xauh kham yoeus. 6 Yesu Khristu yah sen bang duot das xiklyis khi tsainh toh bang mas namoq eq bos. 7 Mangso dah jyetdap bang yahge gyingshang dius bweh bas jungh ge, khi yoeus zis xauh dah Roma bang dvnganhmoq thoq mas, yah Uwus Mangso yahge Yhensain Yesu jyank masyah, jyehjuh yahge nyenstap zis joq bas jungh. 8 Namoq dah lomsjingh zis gas mungkvn gonh seq loh goeus las, Yesu Khristu nyings yah ngos ngah Mangso lhyi shih nhaiqshoqlang sang. 9 Ngah shvmanh dung dang mas ngos namoq lyis soh nyeis cho lhyi, nyah Lo dah gausyis dang taiq kyoh zis yah ngos phuqsoe nyeis, Mangso ka ngah kanghjyoeng nghuot. 10 Mangso dah ehnyet o khyvlyis gvshih thang thank lyis ngos namoq yah los yoh xauhgoh das cho phank dyei das xiklyis ngos shvmanh dung nyeis. 11 Khasoeh ge lyis namoq lyis yom yoh bos nhang shoq, Dyos jyungshuk dvkhamh yoh gvm dyei bas jungh, ngos namoq yah yoh xauhgoh das nyhenshang hwangh nyeis. 12 Ngos taiq mes zis gas, yah lomsjingh cho gvng mas yang nyang changh nyang yom yoh dyei goh das oen zis nghuot. 13 Hauh thoq lyis boekyis eh, gohnyau bang masyah khyuot yoeus xauh bang lyis yoh taiq kyoh shwih los teh, namoq masyah eq yoh taiq kyoh shwih los das xiklyis namoq jyank mas los das zis nyoshoq lhain sont laus eq, gvshih jweh shoq kyamp toh zis xauh nyeis yvlyis, namoq lyis seq nhang mes. 14 Heleni yahge dius soengh, joeui bos bang, joeui ma bos bang yahge dius dvnganh lyis gausyis dang taiq kyoh das nyhenshang jyen shauh soeu ka ngos nghuot. 15 Housoeh las namoq Roma bang lyis eq hau gausyis dang svsoh taiq kyoh mes nyeis. 16 Hau Khristu dah gausyis dang mas ngos ma xoq: khasoeh ge lyis hauh zis gas cangxeih lyis Yuda, hauh thang lhyi gohnyau lomsjingh bang dvnganh lyis yoh khyuot yoeus das xiklyis Mangso dah yomsoq nghuot. 17 Lomsjingh gvng mas dan cho yoh ge, Mangso dah dan cho ka, hau gausyis dang mas Chixoeuq toh: khasoeh ge lyis dan soeu ka lomsjingh zis yah dwis nyeis das, ge lhaih toh. 18 Maukhung mhayah Mangso dah nhaiqlom dyis zis gas, gywes ma tsungh bang yahge nyamoq dah ma gis muhzoh yah jyoeng cho lhyi kyamp gos tyamp bang thoq mas Chixoeuq. 19 Khasoeh ge lyis Mangso lhyi seq gis cho ka, Mangso nyang nyamoq lyis Chixoeuq goeus las, hauh zis gas nyamoq xikkhonh mas dede nghuot. 20 Khasoeh ge lyis, nyoq yah ma nyvng, Mangso nyah vcaiq vto yomsoq yahge Mangso nghuot cho ka, hau gvnkhanh zis dvnganh masyah yoh nyvng las, nyamoq hauh zis lyis mauthuq nyeiszvn lyis yah nyvng las seq goeus. Housoeh yvmvyah nyamoq jyamp gus ma bos lo. 21 Nyamoq Mangso lhyi seq toh las, nyang lyis Mangso lhyi teh ma phauh nyang, Nhaiqshoqlang eq ma tsain ge, nyamoq nghamh cho ka vkom duot las nyamoq dah koh ehnyet gas chuot tyamp. 22 Nyamoq gas nyang gungs nyang joeui bos tsain ge laus eq nyamoq gas koh bang nghuot. 23 Ma seq shei dah Mangso phunk nyoqnho lyis, seq shei dah dius, nghoq, nyei khyei dap yewus, shweh loh ja dah silho jens yah tsain thaiq tyamp. 24 Housoeh las Mangso ka nyamoq lyis nyamoq dah obos dah vchoqh vjyot muh kuot bas jungh ge kyauh tyamp. Housoeh nyamoq gas nyamoq nyang changh vxoq vcaiq muh tsain kuot. 25 Khasoeh ge lyis, Mangso dah jyoeng cho lhyi hwah cho yah tsain thaiq tyamp. Gvnkhanh soeu lhyi paiq phuqsoe das gungsthaiq gvnkhanh toh zis lyis tsain paiq phuqsoe nyeis. Gvnkhanh toh soeu nyang gas vcaiq vto phunk bos. Amen. 26 Housoeh las Mangso ka nyamoq lyis vxoq vcaiq dah gungsshoh nyetnau muh mas kyauh tyamp. Nyamoq dah vmesbih jens yangh soengh choenk lyi khyvlyis zomh cho yah tyi lha nyamoq nyang changh tsain zomhgoh. 27 Vbusbih jens eq vmesbih jens yah zomhgoh dah soengh choenk lyi toh tyamp las vbusbih nyang changh vxoq vcaiq muh tsain kuot yvmvyah nyamoq dah gungs mas nyamoq dah nyetnau yobos yah mon yih dah yobos dyei zis tsain kham yoeus. 28 Tsai, Mangso cho, jyoeng dah seq cho lhyi ngoek tyamp yvmvyah, Mangso ka nyamoq lyis ma gis dah ehnyet yah suh e das xiklyis kyauh tyamp las nyamoq gas nyamoq ma kuot vvng dah muh lyis tsain kuot. 29 Nyamoq gas lhung cho vja ja, ma gis cho, nyoqnoq obos, gohyuk lyis nos nhang mes cho yah dyingh joq; noh, dius sat, dyoqgoh, mhuih, hoeng, wotwu ma gis zis yah dyingh joq. 30 Loeusmus goh, khyangh sang goh, Mangso lhyi hoeng bang, moengs bang, khwank bang, gomloeus pan bang, nyhiphoq dang ma gyo bang, 31 Seq cho ma bos bang, dang thanghchvp lais bang, jyetdap ehnyet ma bos bang, yobos ma yoh thoq khyuot dyei bang yahge nhaiq ma seq nyen bang nyamoq tsain nghuot. 32 Housoeh kuot bang gas shei mon, ge Mangso dah soetuon cho lhyi seq laus eq nyamoq gungs nyang hauh zis lyis tsain kuot thoq lyis magoh, housoeh chank kuot bang lyis eq xihhonh, bos gaus nyeis. 1 Housoeh yvmvyah gohyuk lyis soetuon soeu eh, nvng gas jyamp das cho ma bos lo: khasoeh ge lyis nvng soetuon dah muh lyis nvnyang kuot nyeis yvmvyah, gohyuk lyis soetuon yah dvyih nah gungs lyis nvnyang dang thang thyet goeus. 2 Housoeh kuot bang dah thoq mas Mangso dah soetuon cho ka jus yvlyis yang seq. 3 Housoeh kuot bang lyis soetuon nyeis las vsainnyang gas chank kuot soeu eh, nvng Mangso dah soetuon yvmvyah yoh luiq das oen nghamh lah? 4 Mangso dah jyehjuh gas nhaiqlom yoh thaiq shoq nvng lyis shwih uhshe los goeus yvlyis ma soh seq las, nyah magons magoh dah jyehjuh eq kuhxing ehnyet yah nvng lyis jhen nyeis yvlyis nvng chaxwe ma nhang lhyeh? 5 Nvng nothoeu zis yahge ma yoh thaiq dah ehnyet gvng mas hau Mangso dah nhaiqlom dyis ge, dan dah soetuon das buisnyeis lyis nvng kham das zis yobos yom nyhuk toh. 6 Mangso ka dvyuk yah dvyuk lyis vsainnyang dah muhzoh yah dvyhangteh phauh shangh das. 7 Gis dah muh kuot las jhen zis yah phunk, nyoqnho ngelang ma dyoq ma dyuk zis xo soeu lhyi ka vcaiq vto kang dyei das. 8 Nghuot laus eq vsainnyang vkyuh kyingh xo bang yahge dyoqgoh nyensgoh las, jyoeng cho lhyi domsyos ma gyo, lhung zis kuot bang xiklyis nhaiqlom tsoeu zis yahge nhaiqlom dyis zis xauh das. 9 Ma gis muh khanh bang dvnganhmoq thoq mas yaukyenh zis yahge shanghsenh zis xauh das. Houka cangxeih lyis Yuda jens, hauh thang lhyi gohnyau bang xauh das. 10 Gis dah muh kuot soeu khanghmuh mas phunk, nyoqnho ngelang yahge nyenstap zis joq das. Cangxeih lyis Yuda dius mas shih, hauh thang lhyi gohnyau bang mas eq joq das. 11 Khasoeh ge lyis Mangso ka dius dah nyoqnho khyen zis ma nghuot. 12 Lyi ma yoh las yaunos kuot bang hank laus eq, Lyi ma bos khyvlyis dyoqbis das. Lyi khau mha yaunos kuot bang gas Lyi khyvlyis soetuon zis xauh das. 13 Lyi xauhgyo ku zis yah kyingh Mangso xikkhonh mas dan zis ma nghuot; Lyi lyis chank kuot bang lyis gas dan bang ge das. 14 Gohnyau bang gas Lyi ma yoh, nghuot laus eq Lyi yah taiq toh cho lhyi nyang pheh nyang chank kuot nyeis lyis, nyamoq Lyi ma yoh laus eq hau taiq toh cho ka nyamoq xiklyis Lyi bweh los goeus. 15 Nyamoq dah wotwu gas nyamoq dah ehnyet mas Lyi dah taiq toh cho lhaih toh goeus yvlyis chixoeuq nyeis zis yahge nyamoq dah seq nghamh ehnyet eq hauh yvlyis kanghjyoeng kat dyei nyeis las, nyamoq dah seq ehnyet gas nyamoq lyis yobos huon das, nghuot ya yobos khyuot dyei das. 16 Housoeh ngos taiq kyoh dah Gausyis Dang yah dvyhangteh, Mangso ka Yesu Khristu loq yah dius dah nghop toh cho lhyi soetuon das buisnyeis lyis houyah dvyhangteh nghuot das. 17 Yoeuh aq, nvng gas Yuda dius nyings dap soeu nghuot las, hauh Lyi mas nges zis yah Mangso yah sen lha moengs nyeis. 18 Nyah ehnyet o zis seq las Lyi yah jyauh yvmvyah gis thank yvlyis dang thang seq thyet las, 19 Nvng gas nyoqjet bang dah choshe soeu yahge, chuot yvmas bang xiklyis bvng zis, 20 koh bang dah shet dyei soeu, lonoeuh jens dah svra, lyi mas jyoeng dah seq cho bos soeu nghuot, ge ehnyet tap nyeis. 21 Gohyuk lyis jyauh soeu nvng gas nah gungs lyis ma jyauh das lhyeh? Ma gis khauh ge taiq kyoh lho lha nvnyang gas khauh lhyeh? 22 Nyi vshuot ge las nvng gas nyi shuot nyeis lhyeh? Silho lhyi choqh ge las nvng silho yhen lhyi thyoq yoeus nyeis lhyeh? 23 Nvng lyi mas khwank nyeis las lyi lhyweq zis yah Mangso lhyi ma phauh ma nyang kuot lhyeh? 24 Khasoeh ge lyis namoq gvng mas Mangso dah nyings gas gohnyau bang mas loeusmus soqzo zis xauh nyeis, ge lhaih toh. 25 Lyi lyis chank lyis gas, vthyoh tyomh zis vkyuh bos. Nghuot laus eq Lyi lhyweq soeu nvng nghuot joq lyis, nah vthyoh tyomh cho ka ma tyomh zis doms bweh joq goeus. 26 Housoeh yvmvyah vthyoh tyomh soeu ma nghuot laus eq Lyi taiq toh cho lhyi chank nghuot lyis gas, Mangso yah nyang lyis vthyoh tyomh soeu ge suon dyei das ma nghuot lah? 27 Gungs vthyoh ma tyomh laus eq Lyi chank lyis gas, lhaih toh Lyi khyvlyis chank las vthyoh tyomh toh dah nvng, Lyi lhyweq soeu lhyi soetuon das ma nghuot lhyeh? 28 Khasoeh ge lyis thoqlos baus lyis Yuda nghuot soeu ka Yuda gyingh ma nghuot. Gungsshoh dah vthyoh tyomh zis eq vthyoh tyomh gyingh ma nghuot. 29 Nghuot laus eq nhaiqlom mas Yuda nghuot soeu ka Yuda dius gyingh nghuot. Vthyoh tyomh cho jyoeng ka ehnyet yah sen cho nghuot. Houka gungs shoh yah ma nghuot, dyos yah sen zis dvnghuot. Housoeh teh bang gas gohyuk yah chungh zis ma nghuot mulas, Mangso yah chungh yvlyis xauh kham yoeus. 1 Housoeh lyis gas, Yuda jens gas gohnyau bang thoq lyis cha zes lah? Vthyoh tyomh zis eq chah vkyuh bos lah? 2 Cho khat khanghmuh mas vkyuh svsoh bos. Cangxeih lyis Mangso ka hauh Lyi Yuda jens dah loq mas kyauh toh yvmvyah nghuot. 3 Nyamoq mas dvyhamh ma lomsjingh lyis gas khasoeh gah? Nyamoq dah ma lomsjingh zis gas Mangso dah wontang cho lhyi vnyet vxuh bweh nhang lhyeh? 4 Housoeh ma nghuot: dius dvnganh gas hwah bang bweh los laus eq Mangso jyoeng zis gas dede nghuot cho kyink toh. Khasoeh ge lyis, Jyomp maussauh mas lhaih toh zis yah dvyhangteh, Nvng taiq dang gas dede jus joq zis yahge Nvng soetuon zis xauh lyis ung los bas jungh, ge. 5 Gvshih, yah ma dan cho ka, Mangso dah dan yvlyis bvng bvng zes nyvng nhang nghuot lyis gas, yang khasoeh taiq das lah? Mangso yang lyis nhaiqlom dyis dah joeng cho dyei lyis gas Nyang lyi ma chi khyvlyis kuot zis nghuot lhyeh? (Ngos heisoeh taiq zis gas dius dah nghamh cho khyvlyis chank las dvtaiq.) 6 Housoeh ma nghuot, Mangso lyi ma chi nghuot lyis gas mungkvn gonh lyis soe khasoeh yoh tuon das lah? 7 Tsai, ngos cu zis gas Mangso dah jyoeng cho lhyi bvng bvng zes bweh nhang khyvlyis yah nyah nyoqnho ngelang lyis zes chixoeuq dyei lyis gas, ngos yaunos yoh soeu dvyuk teh chamus dang thang thyet zis xauh nyeis shih lah? 8 Housoeh dvnghuot lyis gas, Gis cho bweh thuq los bas jungh, ma gis muh tsain kuot goh oen chamus ma taiq das lah? Jyoengh dius dvyhamh gas housoeh, ngamoq lyis loeusmus soqzo zis yah yobos huon nyeis. Nyamoq mon yih dah dang thang thyet zis xauh das. 9 Housoeh lyis khasoeh gah? Ngamoq dah chojeis gas gohyhamh thoq lyis zes gis lhyeh? Ma nghuot, khasoeh ge lyis ngos Chixoeuq goeus zis yah dvyhangteh Yuda jens yahge gohnyau bang dvnganhmoq gas yaunos dah yomsoq o mha nghuot joq. 10 Lhaih toh zis yah dvyhangteh: Dan soeu ma bos, dvyuk eq ma bos; 11 Seqgyo soeu hank ma bos, Mangso lhyi xo soeu eq ma bos; 12 Dvnganhmoq chowhang whang loh goeus, Nyamoq yhung pvjus bang bweh tyamp, nhaiqbos cho chixoeuq zis hank ma bos, dvyuk yangh ma bos. 13 Nyamoq dah khyunghkang ka bangh joq dah lop tsain nghuot; Nyamoq lhyo eq mhuih dang taiq. Nyamoq nhuotkuk khau mha ywimuhtsanh dah duk bos. 14 Nyamoq nhuot mas xungh xent dah nhoengh dang yah dyingh joq. 15 Nyamoq dah khyei ka suih huot das zis nyap. 16 Nyamoq dah cho mha dyoqbis zis yahge shanghsenh cho yah dyingh joq. 17 Nyamoq nyenstap cho lhyi ma seq: 18 Nyamoq mas Mangso lhyi gyukwoms cho ma bos, ge. 19 Lyi mas lhaih toh zis dvnganh zis gas, Lyi khau mha kang dwis bang chank das xiklyis lhaih toh yvlyis yang seq. Hau lhaih toh dah Lyi gas hank lyis eq ma seq oen jyamp taiq das cho ma dyei toh zis yahge mungkvn dius dvnganh gas Mangso dah soetuon zis xauh das cho chixoeuq toh. 20 Housoeh las Lyi taiq toh cho lhyi tyink khyvlyis yah hank eq Mangso xikkhonh mas yoh dan zis ma nghuot. Khasoeh ge lyis Lyi gas yang yaunos yoh bang nghuot ge zis lyis kyingh dvyoh chixoeuq. 21 Nghuot laus eq gvshih gas Lyi yahge lvpe jens kanghjyoeng kat toh laus eq Lyi yah ma sen khyvlyis yah Mangso dah dan cho lhyi chixoeuq goeus. 22 Hauh zis gas Yesu Khristu lyis lomsjingh gvng mas, lomsjingh bang dvnganh lyis dyei, Mangso dah dan cho nghuot. Khasoeh ge lyis houmha khwih khyamh cho ma bos. 23 Khasoeh ge lyis dius dvnganh gas yaunos kuot las, Mangso dah phunk lyis kat khyoq tyamp. 24 Nghuot laus eq gvshih gas Yesu Khristu khyuot yoeus gvng mas phauh ma dyei noh, Mangso dah jyehjuh yah dan cho xauh yoeus. 25 Mangso ka, Yesu Khristu lyis yah jyank mas nhang lha yah xiklyis lomhxangh kuot goeus. Housoeh nyah suih gvng mas nyang lyis lomsjingh bang gas nyamoq dah yaunos khyuot dyei zis tsain xauh. Mangso heisoeh kuot zis gas nyang nyang dan soeu nghuot ge yvlyis chixoeuq das nyhenshang nghuot. 26 Lai loh goeus shishenh lyis nyang dius dah yaunos lyis yoeuh lhaiq tyamp goeus. Nghuot laus eq gvshih nyang gas nyamoq dah yaunos lyis soetuon khyvlyis nyah dan cho lhyi chixoeuq nyeis. Heisoeh Mangso ka nyah gungs dan cho lhyi chixoeuq zis yah Yesu lyis lomsjingh bang dvnganh lyis dan cho xauh yoeus nhang. 27 Housoeh lyis khwank das cho cha bos? Cha ma bos, Chamus? Yang Lyi chank las lah? Ma nghuot, lomsjingh gvng mas dvnghuot. 28 Khasoeh ge lyis yang seqgyo zis gas, dius dvyuk Lyi yah taiq toh muh lyis chank kuot khyvlyis ma nghuot, lomsjingh gvng mas dan cho xauh yoeus ge zis nghuot. 29 Mangso ka Yuda jens dah Mangso kyingh nghuot lhyeh? Gohnyau bang dah Mangso eq nyang nghuot, ma nghuot lhyeh? Nghuot, gohnyau bang dah Mangso eq nghuot. 30 Mangso ka dvso kyingh dvnghuot yvmvyah, vthyoh tyomh kham bang lyis lomsjingh gvng mas dan nhang, Tsai vthyoh tyomh ma kham bang lyis eq hau lomsjingh cho yah kyingh dan nhang das. 31 Housoeh lyis gas, lomsjingh gvng mas hauh Lyi lyis tyamp goeus lhyeh? Housoeh ma nghuot, tyamp das gungsthaiq yang hauh Lyi lyis tsain chank tyink. 1 Housoeh lyis gas yah phauh thyeih Abraham dah thungh phuh cho cha nghuot? 2 Abraham gas muhzoh yah dan zis xauh yoeus lyis gas, khwank chank bos; nghuot laus eq Mangso xikkhonh mas khwank chank ma bos. 3 Hau lhaihtoh dang mas khasoeh ge lah? Abraham gas Mangso lhyi lomsjingh gvng mas nyang lyis dan soeu, ge dyei goeus, ge. 4 Gvshih muh zwi soeu xauh yoeus dah uhkung phauh gas jyungshuk khyvlyis suon yoeus zis ma nghuot, nyang muh zwi phauh dvnghuot. 5 Vsainnyang muh mas nges khyvlyis ma nghuot, yaunos yoh bang lyis yoh dan nhang soeu lhyi lomsjingh soeu lyis ka nyah lomsjingh zis lyis dan, ge suon dyei das. 6 Houka muhzoh yah ma nghuot, Mangso yah dan soeu, ge suon dyei zis xauh soeu ka ngelhoq cho, Dawi eq taiq toh. 7 Nyang taiq zis gas: Chah shuot zis lyis khyuot dyei las, nyah yaunos lyis nghop tyamp dyei zis xauh soeu ka ngelhoq. 8 Yhensain yah yobos comh zis ma xauh soeu ka ngelhoq, ge. 9 Housoeh haih ngelhoq cho ka vthyoh tyomh bang xiklyis kyingh nghuot lah, nghuot ya, vthyoh ma tyomh bang xiklyis eq nghuot lah? Abraham gas lomsjingh gvng mas dan soeu, ge dyei goeus oen yang taiq. 10 Housoeh lyis gas khanhamp suon dyei zis xauh lah? Vthyoh ma tyomh shih lyis lah? Vthyoh tyomh thang lhyi lah? Vthyoh tyomh thang lhyi ma nghuot, vthyoh ma tyomh shih lyis nghuot goeus. 11 Nyang vthyoh tyomh vlho lhyi xauh yoeus zis gas, nyang vthyoh ma tyomh shih lyis yah bos joq dah lomsjingh ehnyet gvng mas nyang lyis dan zis kuot dyei dah kyihau nghuot. Houka vthyoh ma tyomh, lomsjingh las hauh gvng mas dan ge suon dyei zis xauh bang dah phauh thyeih duot dyei das xiklyis nghuot. 12 Nyang gas vthyoh tyomh kham bang dah phauh thyeih eq nghuot. Hauh bang gas vthyoh tyomh kham bang thoq lyis zes las yah phauh thyeih Abraham vthyoh tyomh ma kham shih lyis yoh dah lomsjingh zis yah kang dwis yhangteh kang dwis bang nghuot. 13 Abraham, nghuot ya nyah vnyau vshih lyis mungkvn yhenzis khyvlyis dyei das ge dangthoengh toh uhlyis Abraham hau Lyi chank tyink gvng mas ma nghuot. Abraham gas lomsjingh gvng mas Mangso ka nyang lyis dan ge suon dyei zis xauh gvng mas dvnghuot. 14 Khasoeh ge lyis, Lyi chank bang vso vlho kham yoeus bang tsain nghuot lyis gas, dius dah lomsjingh zis gas vkom nghuot loh zis yahge Mangso dangthoengh eq pyaih tyamp goeus. 15 Lyi gas Mangso dah nhaiqlom dyis cho she los, nghuot laus eq lyi ma joq lyis gas, lyi lhyweq cho eq ma bos das. 16 Housoeh hauh dangthoengh lyis Mangso dah jyehjuh yah Abraham dah vnyau vshih dvnganh xauh kham yoeus das nyhenshang yoh kham toh das xiklyis hauh dangthoengh lyis lomsjingh yvmas vpom xi toh. Abraham dah vshih ge zis gas, Lyi chank tyink bang kyingh ma nghuot, Abraham teh lomsjingh bang lyis eq ge zis nghuot. Khasoeh ge lyis Abraham gas yang dvnganh dah lomsjingh phauh thyeih nghuot. 17 (Ngos nvng lyis dius nyau nyoshoq dah uwus duot nhang goeus ge lhaih toh) Abraham gas lomsjingh nyeis. Shei bang lyis dwis toq nhang zis yahge ma bweh shih dah vyhang lhyi yoh bweh los nhang dah Mangso xikkhonh mas hauh dangthoengh gas goeng joq. 18 Nghamhloms joqyos ma bos laus eq Abraham gas lomsjingh zis yah nghamhloms nyeis las dius nyau nyoshoq dah uwus bweh loh. Jyomp maussauh mas taiq zis gas, Nah vnyau vshih jens gas maukhung mha kyi teh jebais los das, ge. 19 Nyah lomsjingh ehnyet yah nyang dvxo zvn ko bos los goeus dah nyah gungsdom lyis eq, loshang ma yoh khoeu lo dah Sara ung lhyi eq yom ma shuon. 20 Lomsjingh cho ma dyuk, Mangso dah dangthoengh lyis ma khamkhvv, nyah lomsjingh cho mha yombos los las Mangso lhyi chungh nyeis. 21 Mangso ka nyang toh dah dangthoengh lyis yoh tyink dyei ge yom nghamh zuk nyeis. 22 Housoeh las nyah lomsjingh cho lhyi dan cho nghuot ge suon dyei goeus. 23 Nyang lyis housoeh suon dyei ge dah dang gas nyah xiklyis kyingh lhaih toh zis ma nghuot. 24 Houka yah Yhensain Yesu Khristu lyis dwis toq nhang soeu lhyi lomsjingh bang, dan bang ge suon yoeus zis xauh dah, yah xiklyis eq lhaih toh. 25 Yang cu dah yaunos gvng mas nyang gas shei das xiklyis kyauh tyamp zis xauh las, yang dan cho yoh das xiklyis dwis toqh kat zis xauh goeus. 1 Lomsjingh gvng mas tsain dan los yvmvyah, yah Yhensain Yesu Khristu gvng mas yang Mangso yah yoh nyenstap goeus. 2 Yesu gas yang lyis lomsjingh khyvpheh yah gvshih kham zo nyeis Mangso dah jyehjuh shot pheh shwih wvng loh goeus. Housoeh yang gas Mangso dah phunk mas xauh wvng das zis nghamhloms zainsmuh bos las khwank gaus nyeis. 3 Hauh thoq lyis yang gas yaukyenh shanghsenh xauh dah cho mha laus eq yang khwank gaus nyeis. Khasoeh ge lyis yaukyenh zis gas jhen zis lyis bweh los nhang yvlyis yang seq. 4 Jhen zis gas kyink zis, kyink zis gas nghamhloms zis lyis bweh nhang. 5 Hau nghamhloms zis gas yang lyis ehnyet yom ma gyau nhang. Khasoeh ge lyis yang lyis dyei toh dah Gyingshang Dyos khyvlyis yah Mangso dah jyetdap ehnyet gas, yah nhaiqlom khau mha huot kat dyei goeus. 6 Yang gas yomnhuk joq shih lyis toeuq toh shishenh lyis, Khristu gas yaunos yoh bang xiklyis shei kham goeus. 7 Jyoengh, dan soeu xiklyis shei kham das dius hank ma bos mvbeh; dius gis dvyuk yuk xiklyis gas womh shei kham das zis dvyuk yuk bos mvbeh. 8 Nghuot laus eq yang yaunos dap bang nghuot joq shih lyis, Khristu gas yah nyhenshang shei kham yvmvyah, Mangso ka nyah jyetdap cho lhyi, yah jyank mas dede Chixoeuq goeus. 9 Housoeh nyah suih gvng mas gvshih yang dan cho yoh goeus las, nyah gvng mas Mangso dah nhaiqlom dyis masyah yang khyuot yoeus zis zes xauh. 10 Khasoeh ge lyis yang gas nyang lyis jes kuot bang dvtsain nghuot joq shih lyis, nyah Lo shei kham zis yah, yang lyis Mangso yah mehoq tamp zis xauh goeus bang yang gas nyah dah dwis nyeis kang yah zes las khyuot yoeus zis xauh das. 11 Tsai, hauh thoq lyis yang lyis Mangso yah mehoq tamp das xiklyis nyang gas yah Yhensain Yesu Khristu lyis nhang kat yvmvyah yang gauslaus nyeis. 12 Housoeh las dius dvyuk gvng mas yaunos gas mungkvn mas wvng los las yaunos gvng mas shei cho jweh los zis yah dvyhangteh, dius dvnganh yaunos kuot yvmvyah dvnganh gas shei chah. 13 Khasoeh ge lyis, hauh lyi ma dyei shih lyis yaunos gas mungkvn mas joq goeus; nghuot laus eq lyi ma joq shih gyo lyis yaunos comh toh ge zis ma bos. 14 Nghuot laus eq Adam masyah Moshe jweh shoq shei zis guon nyeis las, Adam dah shuot cho teh ma shuot bang thoq mas eq guon nyeis. Adam gas jweh los das soeu dah vzwvng nghuot. 15 Nghuot laus eq hau aiq yuk gas dvyhangteh ma nghuot. Khasoeh ge lyis Mangso dah jyehjuh jyungshuk gas Adam dah yaunos teh ma nghuot. Dius dvyuk dah yaunos gvng mas dius nyoshoq shei zis xauh ge zis gas jus. Nghuot laus eq Mangso dah jyehjuh gas hauh thoq lyis zes kuh joq. Houyah dvyhangteh Yesu Khristu ge dah dius dvyuk dah jyehjuh gvng mas dius nyoshoq lyis dyei dah nyah jyehjuh jyungshuk gas zes kuh joq. 16 Mangso dah jyehjuh jyungshuk yah dius dvyuk dah yaunos cho ka shaih goh. Adam gas yaunos dvkoeuq kuot uhlyis yobos yoh ge dah dang thang thyet cho chank los. Nyah thang lhyi yaunos nyoshoq kuot uhlyis ma mon ma yih laus eq yobos ma bos ge dah jyehjuh jyungshuk chank los. 17 Khasoeh ge lyis dius dvyuk dah shuot cho gvng mas shei zis yah guon cho bweh thuq los zis gas jyoeng. Nghuot laus eq Yesu Khristu ge dius dvyuk kuot dah muh gvng mas bweh thuq los dah vkyuh gas kha iq zes kuh joq! Mangso dyei dah magons magoh jyehjuh jyungshuk lyis xauh yoeus las nyah jyehjuh yah dan ge suon dyei zis xauh bang dvnganh gas Yesu Khristu ge dius dvyuk dah gvng mas kang dwis zis yah xauh guon nyeis das. 18 Housoeh las dius dvyuk shuot dah yaunos gvng mas dius dvnganh dang thang thyet zis xauh zis yah dvyhangteh, dius dvyuk dan dah muhzoh gvng mas dius dvnganh gas dan cho xauh las kang tsain dwis nyeis das. 19 Khasoeh ge lyis dius dvyuk domsyos ma gyo gvng mas nyoshoq lyis yaunos wons bang bweh nhang zis yah dvyhangteh, gohtoeu dius dvyuk domsyos gyo gvng mas nyoshoq gas dan bang bweh los das. 20 Lyi jweh los yvmvyah shuot cho nyo los. Nghuot laus eq yaunos zes nyo los zes Mangso dah jyehjuh gas magons magoh zes dyingh shon los. 21 Housoeh yaunos gas shei cho khyvpheh yah guon nyeis zis yah dvyhangteh Mangso dah jyehjuh gas dan khyvlyis yah guon nyeis las, yah Yhensain Yesu dah jyehjuh yah yang lyis vcaiq vto kang dwis yvpheh shwih loh nyeis. 1 Housoeh lyis gas yang khasoeh taiq das lah? Jyehjuh je los bas jungh oen yang yaunos mas kang tsoq dwis nyeis das lah? 2 Ma nghuot, yang yaunos masyah shei gang goeus lyis gas houmha khasoeh kang tsoq dwis nyeis das lah? 3 Yesu Khristu mas jeisnyhop kham bang yang dvnganh gas nyang shei kham yvmas jeisnyhop tsain kham nyeis yvlyis namoq ma seq goh lhyeh? 4 Housoeh yvmvyah Khristu gas Uwus dah phunk yah, shei masyah dwis toq los nhang zis xauh zis yah dvyhangteh, yang eq kang saiq mas yoh suh shoq, hau jeisnyhop kham yvmas shei yvlyis yang kham yoeus las, nyang yah dvgeh nyhop zis tsain xauh goeus. 5 Yang gas nyang shei kham yvmas dvgeh bos shei kham lhyi ka, nyang dwis toq los yvmas eq dvgeh dwis toq los das. 6 Yang gas yaunos dah jyeidwis ma tsoq bweh bas jungh, yaunos gungsshoh lyis mhont das xiklyis, yah dius cauh lyis nyang yah dvgeh taplhangh kham yvlyis yang seq. 7 Khasoeh ge lyis shei goeus soeu ka yaunos masyah lhuiq zis xauh goeus. 8 Yang Khristu yah dvgeh shei lhyi ka, yang nyang yah dvgeh dwis nyeis das oen lomsjingh nyeis. 9 Khasoeh ge lyis Khristu gas dwis toq nhang zis xauh goeus yvmvyah ma doms shei lo zis lyis yang seq. Shei zis eq nyang lyis ma yoh guon lo. 10 Khristu shei zis gas yaunos xiklyis dvlhain kyingh shei lha, nyang kang dwis zis gas Mangso xiklyis dwis nyeis. 11 Houyah dvyhangteh namoq eq yaunos yah shei gang loh bang nghuot las, yah Khristu Yesu gvng mas Mangso mha dwis nyeis bang nghuot oen nghamh yoeus chah. 12 Namoq obos ehnyet dah jyeidwis jens ma duot loh bas jungh, yaunos lyis namoq dah seq shei gungs mas vguon nhang goh. 13 Namoq dah gungsdoeus lyis ma gis ma shop muh kuot das xiklyis yaunos dah muh mas vkyauh tyamp goh. Hauh gungsthaiq shei mhayah dwis toq nhang zis xauh bang teh namoq gungs Mangso lhyi kyauh las, namoq gungsdoeus lyis dan dah muh kuot das nyhenshang Mangso lhyi kyauh toh geh. 14 Khasoeh ge lyis namoq gas lyi khau mha ma nghuot, jyehjuh khau mha kang dwis nyeis yvmvyah yaunos dah yomsoq gas namoq thoq mas ma yoh zau lo. 15 Housoeh lyis gas khasoeh gah? Yang gas lyi khau mha ma nghuot, jyehjuh khau mha dvtsain nghuot yvmvyah, yaunos kuot das lah? Housoeh ma nghuot. 16 Namoq dvyuk dah domsyos gyo lyis namoq gas hauh soeu dah jyeidwis nghuot yvlyis namoq ma seq lhyeh? Yaunos dah jons duot lyis gas shei das. Mangso lhyi domsyos gyo dah jons duot lyis gas dan yvlyis xauh kham yoeus das. 17 Namoq xikpheh yaunos dah jons duot ku laus eq, namoq xauh yoeus dah jyauh cho, jyoeng yvvlyis ehnyet nhaiqlom dvnganh yah domsyos gyo goeus las Mangso lhyi nhaiqshoqlang. 18 Namoq gas yaunos masyah lhuiq kat zis xauh las dan cho dah jons jens duot los goeus. 19 (Namoq gungsshoh nhuk joq yvmvyah dius dah nghamh cho lhyi chank las ngos dvtaiq). Dvlhain ka ma gis dah muh kuot das xiklyis ma lhoq ma shang zis yahge ma shop dah jons jens bweh nhang. Houyah dvyhangteh gvshih gas namoq dah gungs dvnganh yah gyingshang dah muh kuot das xiklyis dan cho dah jons jens bweh los nhang chah goeus. 20 Namoq yaunos jons tsain duot nyeis shih uhlyis, namoq gas Mangso o cho, dan cho yah cha ma tsain sen. 21 Gvshih doms yoeuh lyis xoqphoh cho xikpheh namoq kuot ku goeus muh masyah chah vkyuh xauh yoeus lah? Hauh muh dah uhkung phauh gas shei zis nghuot. 22 Gvshih gas yaunos masyah lhuiq zis xauh las, Mangso dah jyeidwis jens duot goeus. Hauh vkyuh gas namoq gyingshang bang bweh los las thang thank lyis vcaiq vto kang yoh. 23 Khasoeh ge lyis yaunos dah uhkung phauh gas shei zis nghuot; Mangso dah jyehjuh jyungshuk gas yah Yhensain Yesu Khristu mas vcaiq vto kang nghuot. 1 Boekyis eh, ngos lyi seq bang lyis taiq bah, dius dwis nyeis gyo lyis lyi gas nyang lyis sain toh zis lyis namoq ma seq nyeis goh lhyeh? 2 Housoeh yhensain phoq yoh dah vmesbih gas yhensain phoq dwis nyeis dvchank, lyi gvng mas nyang yah dvgeh twih toh: nghuot laus eq yhensain phoq shei goeus ya, yhensain phoq yah sen dah lyi masyah luiq goeus. 3 Housoeh las yhensain phoq dwis nyeis shih lyis, yhensain phoq gohyuk xo loh lyis gas, nyang lyis lvng shuot soeu ge das: nghuot laus eq yhensain phoq shei goeus ya, nyang lyi masyah luiq goeus las, yhensain phoq gohyuk jyank mas loh laus eq nyang lvng shuot soeu bweh das zis ma nghuot. 4 Houyah dvyhangteh boekyis eh, shei masyah dwis toq los soeu yah phoengh wvng las yah Mangso xiklyis vshih yoh shih bas jungh, namoq eq Khristu gungs mas Lyi yah shei gang loh. 5 Khasoeh ge lyis yang gungsshoh nghuot shih lyis, Lyi yah nhauh toq kat, yah dah yaunos dap gungsshoh dah obos ehnyet gas shei muhzoh dah vshih shih bas jungh, yah gungsdoeus jens lyis muh khanh dyei nyeis. 6 Nghuot laus eq gvshih gas yang lyis twih toh dah Lyi masyah shei luiq goeus las, yang gas lhaih toh Lyi cauh dah phuqsoe bang ma nghuot lo, gyingshang Dyos dah kang vsaiq mas dvphuqsoe nyeis. 7 Housoeh lyis gas yang khasoeh oen taiq das lah? Lyi gas yaunos nghuot joq lhyeh? Housoeh ma nghuot: Lyi yah ma nghuot lyis gas, yaunos lyis ngos ma seq: Khasoeh ge lyis nyoq vnoq, ge Lyi ma taiq ya, ngos nyoqnoq obos cho lhyi jyoengh ma seq. 8 Nghuot laus eq yaunos gas tyingtoh dang lyis jyamp las obos cho vja ja lyis ngos masyah kuot thuq kat. Khasoeh ge lyis lyi ma joq lyis gas yaunos gas shei joq. 9 Khasoeh ge lyis xikpheh ngos gas lyi dah nghe pheh nyeis khoq: nghuot laus eq hauh lyi dah twih toh cho ngah jyank mas jweh yah dvyih, yaunos gas ngos mas kuh los las ngos gas shei loh. 10 Housoeh kang dyei das ge dah dangthoengh yah jweh los dah lyi nyang ngos mas shei cho bweh nhang. 11 Khasoeh ge lyis yaunos gas hau tyingtoh dang lyis yhung lha ngos lyis mhuih zis yah sat. 12 Housoeh las Lyi gas gyingshang, hau tyingtoh dang eq gyingshang, dan las gis joq. 13 Housoeh lyis gas, gis ja gas ngah xiklyis shei cho bweh los lhyeh? Housoeh ma nghuot: yaunos gas gis zis lyis yhung lha ngos lyis shei nhang. Houka yaunos dah wotwu lyis chixoeuq das xiklyis nghuot. Housoeh las tyingtoh dang gas yaunos gas cha yah ma yoh byi shoq kuh cho lhyi chixoeuq nyeis. 14 Khasoeh ge lyis Lyi gas Dyos yah sen yvlyis yang seq; nghuot laus eq ngos gas gungsshoh ehnyet bos las yaunos dah jons duot das xiklyis ungh zis xauh. 15 Ngos khanh yoszoh lyis ngos ma seqgyo; nghuot laus eq ngos kuot mes cho lhyi ma kuot kuot, ngos hoeng dah muh lyis kyingh ngos dvkuot nyeis. 16 Ngos ma mes kuot zis lyis ngos kuot lyis gas, Lyi gas gis joq yvlyis, ngos xamxonh. 17 Housoeh las, gvshih ngos nyang hauh zis lyis kuot nyeis zis ma nghuot, ngos mas bos dah yaunos dvkuot nyeis. 18 Khasoeh ge lyis ngah ungkhau mha, nghuot goeus, ngah gungsshoh mas gis zis cha ma bos yvlyis ngos seq. Ngos mas kuot mes ehnyet bos joq laus eq gis khyvlyis kuot das zis ngos ma nyvng. 19 Kuot mes dah gis cho lhyi ngos ma kuot, ma mes kuot, ma shop yvlyis ngos kuot nyeis. 20 Housoeh ngos ma mes kuot yvlyis ngos kuot nyeis lyis gas, ngos nyang hauh yvlyis ma kuot, ngos mas bos dah yaunos dvkuot nyeis. 21 Housoeh ngos nyvng dah lyi dvkoeuq gas, ngos gis dah muh lyis kuot mes khanghmuh ma gis zis lyis kyingh ngos dvyoh kuot. 22 Khasoeh ge lyis ngah ungkhau mha ka, Mangso dah lyi lyis nhaiqdoeus nyeis. 23 Nghuot laus eq ngah gungsdoeus mas gohtoeu lyi dvkoeuq gas ngah ehnyet mas bos dah lyi yah zan goh nyeis zis ngos nyvng. Hauh lyi gas ngos lyis ngah gungsdoeus mas bos, yaunos lyi dah thung dius kuot. 24 Mvshohjyen soeu ngos eh, hai shei nhang dah gungs masyah ngos lyis hank khyuot yoeus das lah? 25 Yah Yhensain Yesu Khristu gvng mas ngos lyis khyuot kat Mangso dah jyehjuh lyis chungh. Housoeh las ngos gungs doeu nyang, Mangso lyi lyis phuqsoe nyeis; nghuot laus eq gungsshoh yah gas yaunos lyi lyis ngos phuqsoe nyeis. 1 Housoeh yvmvyah gvshih gas, Khristu Yesu mas nyeis bang dah xiklyis gas dang thang thyet dais ma bos lo. 2 Khasoeh ge lyis Khristu Yesu masyah kang saiq dyei, dwis nyeis Dyos dah lyi gas ngos lyis yaunos dah lyi yahge shei cho lyi mhayah lhuiq kat. 3 Khasoeh ge lyis gungsshoh yomnhuk las Lyi ma yoh kuot yvlyis, Mangso ka nyah Lo lyis yobos bos dah gungsshoh teh doeus khyvlyis, yaunos lyis shang tyamp das xiklyis nhang kat yvmvyah, nyah gungsshoh mas yaunos lyis dang thang thyet tyamp goeus. 4 Housoeh gungsshoh khyvlyis ma chank Dyos khyvlyis chank las kang dwis nyeis bang yang gas hau Lyi taiq toh dah dan cho yoh nyuk los nhang das xiklyis nghuot. 5 Khasoeh ge lyis gungsshoh ehnyet chank bang gas, gungs yah sen dah vyhang lhyi nghamh twih toh. Nghuot laus eq Dyos dah ehnyet chank bang gas Dyos dah nhaiqdoeus khyvlyis loh nyeis. 6 Gungsshoh yah sen yvmas nghamh twih toh cho ka shei cho nghuot. Dyos mas nghamh twih cho ka kang yahge nyenstap yvpheh shwih loh nyeis. 7 Haih cho gvng mas gungsshoh lyis nghamh twih dah ehnyet gas Mangso lhyi jesmus nyeis las Mangso dah lyi lyis ma chank las, jyoengh ma yoh chank. 8 Gungsshoh ehnyet chank bang gas Mangso lhyi yoh pyo nhang zis ma nghuot. 9 Nghuot laus eq Mangso dah Dyos namoq mas nyeis goeus yvmvyah, namoq gas gungsshoh o khyvlyis ma nghuot, Dyos dah ehnyet o khyvlyis tsain suh nyeis. Ehnyet mas Khristu dah Dyos ma lungh soeu hank laus eq Khristu yah ma sen. 10 Khristu namoq mas nyeis lyis gas yaunos gvng mas gungs shei laus eq dan soeu dah gvng mas namoq dah dyos gas dwis nyeis das. 11 Yesu lyis shei masyah toq los nhang soeu dah dyos namoq mas nyeis lyis gas, Khristu lyis dwis toq los nhang soeu ka namoq mas bos dah dyos khyvpheh yah namoq dah seq shei gungs lyis eq dwis dah kang dyei das. 12 Housoeh las boekyis eh, yang gas gungsshoh ehnyet chank das xiklyis gungsshoh dah jyen dap bang ma nghuot. 13 Khasoeh ge lyis, gungsshoh yah sen khyvlyis kang dwis nyeis lyis gas, namoq shei das; nghuot laus eq namoq dyos masyah gungsshoh dah wotwu lyis tsain thyuk tyamp lyis gas namoq dwis nyeis das. 14 Mangso dah Dyos yah shwih zis xauh ya xauh bang gas Mangso dah lo jens nghuot. 15 Khasoeh ge lyis, Mangso namoq lyis dyei dah dyos gas namoq lyis jons kuot las nyang lyis doms gyuk nhang das xiklyis ma nghuot. Hauh gungsthaiq hauh dyos gas namoq lyis Mangso dah lo jens duot nhang lha hauh dyos yomsoq yah yang gas Mangso lhyi, Aba Uwus eh, oen sang. 16 Hauh Dyos nyang, yah dyos yah dvgeh kanghjyoeng kat zis gas, Yang gas Mangso dah lo jens nghuot, ge. 17 Yang gas lo jens tsain nghuot goeus ya, vso vlho kham yoeus bang nghuot. Khristu yah dvgeh shanghsenh kham lhyi ka nyang yah dvgeh nyoqnho ngelang dyei zis eq xauh kham das. 18 Khasoeh ge lyis gvshih shishenh dah shanghsenh zis gas, yang lyis Chixoeuq das phunk yah byi das zis ma mon oen ngos nghamh. 19 Gvnkhanh toh zis dvnganh gas Mangso dah lo jens hank nghuot yvlyis Chixoeuq das nyhenshang sainh hwangh zis yah langh nyeis. 20 Khasoeh ge lyis gvn ya gvnkhanh toh zis gas vsainnyang o zis yahge hauh dah toeuqkhom vkom bweh loh das zis gas vsainnyang dah ehnyet o khyvlyis ma nghuot mulas, Mangso bweh nhang yvmvyah dvnghuot. 21 Nghuot laus eq dvnyeih gas gvnkhanh toh zis dvnganh gas dyoqbis masyah yoh luiq las Mangso lo jens xauh yoeus, phunk nyoqnho bos dah luiq cho mha xauh bos das yvlyis nghamhloms zis yah Mangso heisoeh bweh nhang goeus. 22 Khasoeh ge lyis gvnkhanh toh zis dvnganh gas gvshih jweh shoq dvgeh lokhoeu nos nos dah vmesbih teh nos kyingh nyeis yvlyis yang seq. 23 Hauh thoq lyis Dyos dah cangxeih vshih lyis kham yoeus bang yang eq, yah gungs lyis khyuot ge, Mangso dah lo jens duot das shishenh lyis tsain langh nyeis. 24 Khasoeh ge lyis yang nghamhloms cho haih yvmas khyuot yoeus zis tsain xauh goeus. Nghuot laus eq nyvng yvlyis nghamhloms zis gas nghamhloms cho gyingh ma nghuot. Yang mas hank gas yoh nyvng yvlyis nghamhloms nyeis lah? 25 Ma nyvng dah vyhang lyis dvnghamhloms nyeis lyis gas, yang hauh yvlyis ehnyet xing xing tsain langh nyeis. 26 Houyah dvyhangteh Dyos eq yah dah yomnhuk yvlyis thukxank dyei nyeis. Yang shvmanh khasoeh dung das zis ma seq. Nghuot laus eq hauh Dyos nyang dang ma yoh thuq, soqmuh nyhank zis yah, yah xiklyis mehoq yoh tamp shoq bos shangphu dyei nyeis. 27 Yah ehnyet nhaiqlom lyis lhau yoeuh soeu Mangso ka Dyos cha nghamh nyeis yvlyis seq. Khasoeh ge lyis Dyos gas nyah dius jens xiklyis Mangso dah ehnyet o zis yah dvyhangteh Mangso jyank mas shangphu dyei nyeis. 28 Mangso ka nyang lyis jyetdap las nyah toeuqkhom yah dvyhangteh khi yoeus toh bang xiklyis gas, cho dvnganh yvmas gis zis chomp bweh los nhang nyeis yvlyis yang seq. 29 Khasoeh ge lyis, nyah Lo gas vmang vnoeuh nyoshoq mas lobes duot bas jungh ge, xik lyis yah seq toh bang lyis, nyah Lo dah gungskhyank yah doeusgoh das xiklyis nyang gas nyamoq lyis xik lyis yah toeuq toh. 30 Xik lyis yah toeuq toh bang lyis eq nyang khi yoeus. Khi yoeus bang lyis eq nyang dan nhang, dan nhang goeus bang lyis eq phunk tsain yoh nhang. 31 Housoeh lyis heinyhoq mas yang cha taiq das lah? Mangso, yah shot pheh nyeis lyis gas yang lyis tyi hank yoh xo das lah? 32 Nyah Lo lyis ma yu, yang dvnganhmoq xiklyis nyang lyis kyauh tyamp soeu ka, nyah Lo eq cheq vyhang dvnganh lyis eq yang lyis jyungshuk dyei das ma nghuot lhyeh? 33 Mangso khyen yoeus bang lyis yobos hank yoh huon das lah? Dan nhang soeu ka Mangso nghuot. 34 Dang thang thyet das soeu hank nghuot lah? Shei kham lha, nghuot goeus, shei kham thoq lyis magoh, shei masyah dwis toqh kat zis xauh thang lhyi Mangso dah loqyos shot pheh nghuot joq las, yah xiklyis khyoeuq dyei soeu Khristu Yesu nyang nghuot. 35 Khristu dah jyetdap masyah yang lyis hank yoh kangh tyamp das lah? Yaukyenh, shanghsenh, shoeuhshih, panghkhauq, shohchen, shohjyen, gudwvng cho, moengsa yah lah? 36 Nah gvng mas ngamoq dvnyeih gonh sat zis xauh, Ngamoq gas sat das nyhenshang she loh dah yvng jens lyis teh kuot zis xauh, ge lhaih toh zis yah dvyhangteh nghuot. 37 Housoeh ma nghuot! Yang lyis jyetdap nyeis soeu gvng mas hai dvnganh mas yang gas ung bang thoq lyis zes bang nghuot. 38 Khasoeh ge lyis shei cho, dwis cho, loeuswons bang, zauguon, yomsoq, gvshih joq dah vyhang yahge thang pheh jweh los das vyhang, 39 nyhang mha dah yomsoq eq, nyhen mha dah yomsoq eq gvn ya gvnkhanh toh vyhang masyah cha nghuot laus eq yah Yhensain Khristu Yesu mas Mangso dah jyetdap ehnyet masyah yang lyis yoh kangh tyamp das zis ma nghuot oen zis ngos soh soh nghuot. 1 Ngos Khristu yah sen soeu nghuot las jyoeng dang taiq, ngos ma hwah. Gyingshang Dyos yah guon yvlyis lhom yoeus dah ngah sohseq ehnyet yah ngos ma hwah cho kanghjyoeng kat. 2 Ngah suih ngah shoh, ngah vnyau jens dah nyhenshang ngah ehnyet mas nhaiqkuk zainsmuh yahge yaukyenh cho malyen lo xauh nyeis cho taiq lyis kha iq kuh joq lah! 3 Khasoeh ge lyis, nyamoq xiklyis ngos Mangso dah nhoengh zis lyis eq, Khristu yah gang loh das zis lyis eq kham mes shoq nghuot. 4 Israel jens gas Mangso lo jens nghuot. Nyamoq lyis nyah lo jens duot nhang lha, nyah phunk thuq xoeuq. Nyamoq yah thanghchvp toh, Lyi eq dyei. Nyamoq gas jyoeng dah paiq cho yahge Mangso dah dangthoengh lyis eq xauh yoeus. 5 Nyamoq gas nyings hoeuh dah Hebre phauh thyeih moq masyah yaus lyih bang nghuot. Dius khyvlyis gas Khristu eq nyamoq vnyau yah sen. Dvnganh lyis guon dah Mangso lhyi vcaiq vto chungh goh. Amen. 6 Mangso dah dangthoengh gas vnyet vkom bweh goeus oen zis ma nghuot. Khasoeh ge lyis Israel vnyau dvnganh yah Mangso dah dius gyingh ma tsain nghuot. 7 Abraham dah vnyau vshih nghuot bang eq dvnganh gas Mangso dah lo jens nghuot lhyeh? Mangso Abraham lyis taiq zis gas, Ngos nvng lyis dangthoengh toh vgus Isak masyah nah vnyau vshih gyoh das, ge. 8 Hauh vjyuk gas, gungsshoh pheh yah khoeu los dah lo jens gas Mangso dah lo jens ma tsain nghuot; Mangso dangthoengh toh zis yah dvyhangteh khoeu los dah lo jens gas Abraham dah vnyau vshih gyingh nghuot ge suon yoeus dyei. 9 Khasoeh ge lyis dangthoengh mas, Heinyos ngos doms jweh lyis Sara gas yukgis lo yoh das, ge taiq toh. 10 Haih zis kyingh ma nghuot, Rebeka dah lotang eq yah phauh thyeih Isak masyah los. 11 Nghuot laus eq lotang ma khoeu shih las, gis gang cha ma daq kuot shih lyis yah Mangso Rebeka lyis taiq zis gas, Nah lo kuh vyuk gas ngis vyuk jyank mas jons mus das, ge. 12 Mangso housoeh taiq zis gas, nyang toeuq toh zis yah dvyhangteh lobes yuk lyis ma lui yoeus, khyen cho mha nyang gas dius ya kuot dah muh lyis vgungs toh las khyen zis ma nghuot, nyang o khyvlyis dvkhyen. 13 Housoeh Jyomp maussauh mas, Ngos Yakop lyis jyetdap las, Esau lyis hoeng, ge lhaih toh. 14 Housoeh lyis yang, Mangso ma dan oen taiq das lah? Housoeh ma nghuot. 15 Khasoeh ge lyis, Ngos jyehjuh kuot mes soeu lhyi jyehjuh kuot das. Ngos nhaiqnyen mes soeu lhyi nhaiqnyen das, ge Moshe lhyi taiq toh. 16 Housoeh las Mangso dah khyen cho ka dius dah omes cho, dius dah zwi khank cho mha ma nges. Mangso dah nhaiqnyen cho mha dvnges toh. 17 Khasoeh ge lyis lhaihtoh dang mas Egutu hwankti Pharao lyis taiq zis gas, Nvng mas ngah yomsoq yoh chixoeuq las ngah nyings nyeisjvng gonh hoeuh loh bas jungh, oen ngos nvng lyis dvtoeu toh, ge. 18 Housoeh las Mangso ka nyang nhaiqnyen mes soeu lyis nhaiqnyen las, nhaiqlom than nhang mes soeu lyis lhoq than dyei nyeis. 19 Nghuot laus eq namoq dvyuk yuk ngos lyis, Housoeh lyis Mangso ka dius lyis yobos khasoeh yoh xo das lah? Nyang bauh dah cho lhyi hank yoh kyamp toh lah, ge ngos lyis taiq mes mvbeh. 20 Buisnoms phoq eh, nvng gas hank nghuot las Mangso lhyi housoeh yoh toeuh lah? Tsoh auh dvlom gas hauh yvlyis kuot toh goeus soeu lhyi, Nvng ngos lyis chamus heisoeh kuot lah, oen yoh taiq lhyeh? 21 Auh shonh soeu ka tsohnyhon lhyi nyang o khyvlyis kuot das toeuh yoh las, tsoh dvjop zis lyis dvkhamh yah nyoqnho ngelang bos yvmas yhung das phauhdap auh, gohtoeu dvkhamh yah ma phauh dah auh yoh kuot ma nghuot lhyeh? 22 Housoeh Mangso eq housoeh kuot nyeis. Nyang gas nyah nhaiqlom dyis cho Chixoeuq zis yah nyah yomsoq lyis seq nhang nyeis. Nghuot laus eq nyah dah nhaiqlom dyis gvng mas monh las somh loh mon bang lyis ehnyet xing xing jhen nyeis. 23 Yhensain ka nyah nhaiqnyen cho kham yoeus das bang ge dah yang lyis nyah mathank magons Phunk lyis xauh nyvng nhang das nyhenshang o nyeis. Hauh bang gas Mangso dah phunk xauh yoeus das zis sont toh goeus bang nghuot. 24 Khasoeh ge lyis yang gas Mangso yah khi toh goeus bang nghuot las, Yuda jens mas kyingh ma nghuot, gohnyau bang mas zis eq nghuot. 25 Houyah dvyhangteh, Hosea maussauh mas eq Mangso heisoeh ge taiq: Ngah dius ma nghuot bang lyis ngos ngah dius oen das; Ngos ma jyet ku dah dius nyau lyis eq, Ngos jyet dah dius nyau nghuot, oen das. 26 Tsai, namoq ngah dius jens ma nghuot, ge nyamoq lyis taiq zis xauh joqyos mas nyang, dwis nyeis Mangso dah lo jens ge das, ge. 27 Esaia eq Israel vnyau dah cho kaiq las, Israel jens gas thomh mas sihsho nyhoq nyo laus eq, nyamoq mas dvtsiq kyingh khyuot yoeus zis dvxauh das. 28 Khasoeh ge lyis Mangso ka nyeisjvng thoq mas dius lyis soetuon cho lvnyap kuot tyink das. 29 Houyah dvyhangteh xik lyis yah Esaia taiq toh zis gas, Maukhung Jesphung Yhensain yang lyis vnyau vshih dvyhamh ma nyhet toh lyis gas, Yang Sodom teh bweh las Gomora yah doeusgoh das, ge. 30 Housoeh yvmvyah yang cha taiq chank bos lo lah? Dan yvlyis ma chank dah gohnyau bang gas lomsjingh gvng mas dan cho yoh. 31 Israel vnyau gas, lyi chank las dan cho yoh das xiklyis yomkat, nghuot laus eq hauh lyi lyis ma yoh tsain chank tyink. 32 Chamus ma yoh ge lyis, nyamoq gas lomsjingh zis lyis ma nges, muhzoh mas vgungs toh khyvlyis kyingh dvtsain yomkat yvmvyah ma yoh tyink. Housoeh las thungh dwes das luklom mas tsain thungh lains. 33 Hauh zis gas lhaihtoh dang mas, Yoeuh aq, ngos Zion mha thungh lains das luklom yahge lainszo das lukmuh lom toh. Nghuot laus eq nyang lyis lomsjingh soeu hank laus eq yom ma gyau das, ge toh. 1 Boekyis eh, ngah vnyau Israel jens khyuot yoeus zis xauh das nyhenshang ngos ngah ehnyet nhaiqlom dvnganh yah ngos kha iq o mes zis yah nyamoq xiklyis Mangso jyank mas shvmanh dung nyeis lah! 2 Khasoeh ge lyis nyamoq gas Mangso dah cho mha nhaiqkank wvng yvlyis ngos kanghjyoeng yoh kat. Nghuot laus eq hau nhaiq wvng yvmas seq cho ma bos. 3 Khasoeh ge lyis nyamoq gas Mangso jyank masyah los dah dan cho lhyi ma tsain seq las, vsainnyang dah dan cho lhyi doengs nhang das ge yomkat yvmvyah nyamoq gas Mangso dah dan cho lhyi ma lhom yoeus. 4 Khasoeh ge lyis lomsjingh bang dvnganh gas dan cho yoh bas jungh, Khristu gas hau Lyi lyis thank loh nhang goeus. 5 Lyi chank zis yah Mangso xikkhonh mas dan soeu yoh bweh cho yah sen lha Moshe ka, Lyi chank soeu ka dwis nyeis das ge, lhaih toh. 6 Nghuot laus eq lomsjingh zis yah Mangso xikkhonh mas yoh dan los cho yah sen lha lhaihtoh dang mas, nah ehnyet mas, Khristu lyis gyoh los nhang das xiklyis maukhung mha hank yoh doq das lah, oen vsang. 7 Khristu lyis shei masyah dwis toq nhang das xiklyis, Noq thank joqyos mas hank yoh gyoh loh das lah, oen eq vsang. 8 Housoeh ge zis gas, Mangso dang gas nvng yah ni joq, nah nhuotkuk mas, nah nhaiqlom khau mha bos. Hauh zis gas ngamoq taiq kyoh dah lomsjingh cho yah sen dah dang nghuot. 9 Housoeh Yesu gas Yhensain nghuot, ge nah nhuot yah rhen lha, Mangso ka nyang lyis dwis toq nhang yvlyis nah ehnyet mas lomsjingh nghuot lyis gas nvng khyuot yoeus zis xauh das. 10 Khasoeh ge lyis dius gas dan zis xauh yoeus shoq, ehnyet nhaiqlom yah lomsjingh las, khyuot yoeus zis xauh shoq nhuot yah rhen toh. 11 Khasoeh ge lyis lhaihtoh dang eq, Nyang lyis lomsjingh soeu hank laus eq yom ma gyau das, ge. 12 Khasoeh ge lyis Yuda dius, gohnyau bang lyis khwih khyamh zis ma bos yvmvyah houmha yuk khanghmuh bos. Mangso ka dvnganh dah Yhensain nghuot las, nyang lyis lui bang dvnganh lyis shvmanh jyehjuh magons magoh dyei. 13 Lhaihtoh dang mas taiq zis yah dvyhangteh, Yhensain dah nyings lyis lui soeu khanghmuh khyuot yoeus zis xauh das. 14 Nghuot laus eq Yhensain lhyi ma lomsjingh shih bang gas nyang lyis khasoeh yoh lui das lah? Nyamoq dang lyis ma xauhgyo ku lhyi khasoeh yoh lomsjingh das lah? Dang cho taiq kyoh soeu ma bos lyis nyamoq khasoeh yoh xauhgyo das lah? 15 Gausyis dang taiq kyoh das bang lyis ma nhang kat lyis gas khasoeh yoh taiq kyoh das lah? Lhaihtoh dang mas taiq zis yah dvyhangteh, hau gausyis dang wons los dah loeuskyoh bang dah khyei ka kha iq yungh! 16 Nghuot laus eq hau gausyis dang lyis dvnganhmoq lhom yoeus zis ma nghuot. Khasoeh ge lyis Esaia nyang taiq zis gas, Yhensain eh, ngamoq loeus lyis hank lomsjingh lah, ge. 17 Housoeh las hau lomsjingh ehnyet gas loeus xauhgyo masyah bweh los, hauh loeus gas Khristu dah cho taiq kyoh masyah los. 18 Nghuot laus eq ngos nyei zis gas, Nyamoq hauh loeus ma xauhgyo ku zis jyoeng lhyeh? Nyamoq xauhgyo goeus. Khasoeh ge lyis lhaihtoh dang mas taiq zis yah dvyhangteh, Nyamoq dah thwe ka nyeisjvng gonh mas, Nyamoq dang gas mungkvn goms shoq duons loh goeus, ge. 19 Tsai, ngos nyei zis gas, Israel dius jens ma seqgyo lhyeh? Moshe nyang shih toeuh zis gas, Ngos gas cha ma nghuot dah dius nyau lyis yhung zis yah ngah dius nyau lyis noh nhang das. Koh dah dius nyau lyis yhung lha namoq lyis nhaiqyo nhang das, ge. 20 Hauh thoq lyis Esaia womh womh taiq zis gas, Ngos lyis ma xo bang ngos lyis nyvng goeus. Ngah cho ma nyei bang jyank mas ngos thuq xoeuq, ge. 21 Nyang Israel yah sen cho taiq zis gas, Domsyos ma gyo, gomloeus toq dah dius jens lyis lhom yoeus das xiklyis ngos ngah loq dvnyeih gonh yhuonh toh, ge. 1 Housoeh las ngos nyei zis gas, Mangso ka nyah vnyau lyis peq tyamp goeus lah? Housoeh ma nghuot, Ngvnyang eq Israel vnyau, Abraham dah vshih yahge Benyamin vkoq nghuot. 2 Mangso ka xik lyis yah nyang khyen toh dah nyah dius nyau lyis ma peq tyamp. Lhaihtoh dang mas Eliya gas Israel jens lyis yobos huon zis yah Mangso lhyi khasoeh dung yvlyis namoq seq. 3 Yhensain eh, nyamoq nah lvpe jens lyis sat goeus. Nah phon lhyi eq tsain thyoq tyamp; ngos kyingh dvnyet joq lo las, nyamoq ngah kang lhyi eq tsain xo, ge. 4 Mangso ka nyang lyis khasoeh ge toeuh lah? Bala mangso xikkhonh mas phvluk zomh gyuis ma paiq dah yukgis nyhet khyoengh gas, ngos ngah xiklyis nyhet toh, ge. 5 Houyah dvyhangteh haq caiq mas eq Mangso jyehjuh gvng mas nyang khyen yoeus zis xauh bang dvyhamh nyet shih. 6 Nyang khyen yoeus cho ka muhzoh gvng mas ma nghuot, nyah jyehjuh gvng mas nghuot. Muhzoh yah nghuot lyis gas, nyah jyehjuh cho ka jyehjuh gyingh ma nghuot lo. 7 Housoeh lyis khasoeh taiq das lah? Israel jens gas nyamoq xo zis ma nyvng. Mangso khyen yoeus zis xauh bang nainlo dvtsain nyvng; nyet bang gas Mangso lui zis lyis ma xauhgyo. 8 Lhaihtoh dang mas taiq zis yah dvyhangteh, Mangso ka nyamoq dah uhnuk yahge ehnyet nhaiqlom lyis yoeu nhang lha khvnyhik jweh shoq nyamoq ma nyvng, xauh eq ma xauhgyo. 9 Dawi eq, Nyamoq dah zo pwe ka nyamoq xiklyis lhyik yahge twih mas nyih zis yah lains bas jungh, nyamoq joeng zis xauh bas jungh. 10 Nyamoq ma yoh nyvng das xiklyis nyoqjet nhang zis xauh bas jungh; Nyamoq dah nungs gas lyei dah yvwons o mha vjangh goeuh joq bas jungh, ge. 11 Housoeh las ngos nyei zis gas, Israel jens gas nyamoq dyoqbis shoq thungh lains goeus lah? Ma nghuot, Nyamoq yaunos kuot yvmvyah khyuot yoeus cho ka gohnyau bang jyank mas jweh loh. Houka Yuda dius jens noh cho bweh das nyhenshang nghuot. 12 Yuda jens dah yaunos kuot zis gas mungkvn dius jens xiklyis shvmanh jyehjuh nyoshoq bweh los nhang. Yuda jens dah dyos mas shohjyen cho ka gohnyau bang xiklyis shvmanh jyehjuh nyoshoq bweh los nhang. Housoeh lyis gas Yuda jens dvnganh hau khyuot yoeus yvmas bos nhang zis xauh lyis gas, kha iq kuh dah jyehjuh jyungshuk bweh los das lah! 13 Housoeh las ngos namoq gohnyau bang lyis taiq zis gas, Ngos gohnyau bang dah lvgyo nghuot joq dvchank, ngos ngah muhzoh mas nyoqnho ngelang yoeus las khwank nyeis. 14 Ngos ngah vnyau lyis noh dah ehnyet bos nhang zis yah nyamoq dvyhamh lyis yoh khyuot yoeus das. 15 Khasoeh ge lyis, nyamoq lyis peq tyamp zis gas cangsoeu dius jens yah Mangso jo mas buisnoms bweh los shoq mehoq tamp cho bweh los lyis gas, Yuda jens lyis Mangso doms lhom yoeus cho ka shei bang lyis kang dwis nhang zis nghuot. 16 Khasoeh ge lyis cangxeih yhomh dah guknyau shih nyau khyvlyis phudyei dah ohlhyoq dvkhyiq gas gyingshang nghuot lyis gas hau ohlhyoq dvkoeuq gonh gyingshang. Vnyet gyingshang lhyi ka vko jens eq gyingshang. 17 Tsungh toh dah tsanlun zains dah vko dvkhamh pheq tyamp las hauh vngot mas tsanlun lamh dah vko lhyi gyangh tsoq tsungh toh. Gohnyau bang nghuot dah nvng gas hauh tsanlun lamh dah vko yah doeusgoh las, nvng gas Yuda jens dah yombos dyos kang bos xauh gvm yoeus. 18 Housoeh lyis nvng hauh vko pheq tyamp zis xauh teh dah bang lyis dius ngis ma gis yoeuh khyoq, ma gis khwank, nvng gas vko dvnghuot. Nvng vnyet lyis wons toh zis ma nghuot, hauh vnyet yah nvng lyis dvwons toh. 19 Nghuot laus eq, Ngos lyis coq das zis hauh vko ka pheq tyamp zis xauh goeus, ge nvng taiq mvbeh. 20 Nghuot goeus, nyamoq gas ma lomsjingh yvmvyah pheq tyamp zis xauh: nvng gas lomsjingh zis yah goeng joq. Nghuot laus eq nvng vkhwank, gyukwoms nyeis aq. 21 Khasoeh ge lyis, Mangso ka vko gyingh ge dah Yuda lyis yangh ma yu lyis gas nvng lyis eq yu das teh mus lah? 22 Haih yvmas Mangso ka kha iq nhaiq seq nyen zis yahge kha iq than shoq yau dyei yvlyis yang nyvng goeus. Nyang gas yaunos kuot bang lyis than than joeng laus eq namoq gas nyah nhaiqnyen shohgyo cho lhyi kham yoeus cho mha tsoq las mon yih shoq suh e nyeis lyis gas, Yhensain ka namoq lyis nhaiqnyen nyeis das. Nghuot laus eq namoq eq nyah nhaiqnyen zis kham yoeus mon bang ma duot lyis gas pheq tyamp zis xauh das. 23 Yuda jens nyamoq dah ma lomsjingh cho tyamp lyis gas, nyah joqyos mas doms coq zis tsain xauh das: Khasoeh ge lyis Mangso ka nyang lyis yoh doms coq. 24 Namoq gohnyau bang gas hau tsanlun lamh vko lhyi zan yoeus las soengh choenk nghuot dah tsanlun gyingh mas coq tsungh teh nghuot. Yuda jens gas tsungh toh dah vko gyingh teh nghuot las, hau tsanlun vko jens lyis vkhang dah vzains gyingh mas coq tsungh das zis gas Mangso xiklyis zes lwis ma nghuot lhyeh? 25 Boekyis eh, namoq gas namoq nyang svsoh seq ge ma nghamh das xiklyis nghop toh, Mangso dah jyoeng cho dvkoeuq ngos namoq lyis seqgyo nhang mes. Houka Israel jens gas vjangh ehnyet than joq das zis ma nghuot, laus eq houka khyuot yoeus xauh las Mangso jyank mas jweh loh das, Gohnyau bang dah sonzoh dyingh los shoq dvnghuot das. 26 Heika Israel dius dvnganh khyuot yoeus zis khasoeh xauh das cho nghuot. Lhaihtoh dang mas: Zion masyah khyuot yoeus soeu thuq los las, Yakop vnyau masyah lhung cho dvnganh yoeus tyamp das. 27 Ngos nyamoq dah yaunos yoeus tyamp dyei uhlyis, Ngos nyamoq yah haih thanghchvp toh das, ge. 28 Namoq gohnyau bang gvng mas Yuda jens gas Gausyis Loeus lyis peq tyamp yvmvyah nyamoq gas Mangso dah jeswus bweh los. Nghuot laus eq Mangso ka nyamoq lyis khyen yoeus dah vnyau kuot goeus yvmvyah nyamoq dah phauh thyeih moq lyis toh dah dangthoengh gvng mas nyamoq gas nyang jyetdap zis xauh bang nghuot. 29 Khasoeh ge lyis Mangso ka hank lyis laus eq khi yoeus las shvmanh dyei das xiklyis nghamh thyet thang lhyi ma phanh lo soeu nghuot. 30 Namoq gohnyau bang xiklyis gas, namoq xikpheh Mangso dah domsyos ma gyo, nghuot laus eq gvshih gas Yuda jens domsyos ma gyo yvmvyah namoq gas Mangso dah nhaiqnyen cho xauh yoeus. 31 Namoq Mangso dah nhaiqnyen zis xauh kham yoeus teh nyamoq eq xauh kham yoeus bas jungh ge nyamoq gvshih domsyos ma gyo mus nyeis. 32 Khasoeh ge lyis Mangso ka dius dvnganh lyis nhaiqnyen zis yoh chixoeuq shoq dvnganh lyis domsyos ma gyo yvmas lhunk toh zis xauh nhang. 33 Mangso dah jyehjuh kha iq kuh joq! Nyah joeui yahge seq cho ka kha iq noq! Nyang nghamh thyet cho lhyi hank yoh phant kyoh! Nyah cho lhyi hank yoh seqgyo! 34 Lhaihtoh dang mas taiq zis yah dvyhangteh, Yhensain dah ehnyet lyis hank seq lah? Nyang lyis joeui hank yoh dyei lah! 35 Mangso jyehjuh tauh dyei bas jungh ge nyang lyis hank cha jyungshuk dyei toh ku lah? 36 Vyhang dvnganh yvlyis nyang gvnkhanh toh. Joq ya joq zis dvnganh gas nyang masyah, nyah xiklyis goeng joq. Mangso ka vcaiq vto phunk bos bas jungh. Amen. 1 Housoeh yvmvyah boekyis eh, Mangso ka yang lyis nhaiqnyen nyeis yvmvyah, namoq gungs lyis gyingshang lha lhom yoeus mon dah dwis nyeis, lomhxangh khyvlyis Mangso lhyi ngheq phudyei geh oen ngos namoq lyis taiq kyingh yomdyei kat. Houka namoq phudyei vvng, jyoeng dah paiq cho nghuot. 2 Namoq gas haih mungkvn dah vwot lyis ma wuot: Mangso lhyi namoq vkhau mha dah ehnyet nhaiqlom dvnganh lyis vsaiq thaiq nhang geh. Hauh uhlyis namoq gas Mangso o dah cho, gis cho, lhom yoeus mon cho yahge dyinghjet cho cha tsain nghuot yvlyis seq gvn das. 3 Housoeh Mangso ngos lyis dyei toh dah jyehjuh jyungshuk yah ngos namoq yuk khanghmuh lyis taiq bah. Namoq nyang gungs lyis nghamh vvng thoq lyis lai las vnghamh goh. Hauh gungsthaiq Mangso dius yuk khanghmuh lyis lvdoeus toeuq las dyei toh dah lomsjingh cho yah dvyhangteh vsainnyang gungs lyis nghamh yoeuh las thyet geh. 4 Khasoeh ge lyis dvgungs mas gungsbon nyoshoq bos, hauh gungsbon jens eq nyang muh nyang bos. 5 Houyah dvyhangteh yang nyoshoq tsain nghuot laus eq, Khristu mas dvgungs kyingh nghuot las, nyang changh nyang sain goh joq. 6 Housoeh yang gas yang lyis dyei toh dah jyehjuh jyungshuk nyang ja nyang nghuot zis yah dvyhangteh hauh yvlyis yhung chah. Yang yoh dah jyehjuh jyungshuk gas Mangso dah dang taiq kyoh das muh nghuot lyis gas yang yoh dah lomsjingh cho yah dvyhangteh kuot chah. 7 Phuqsoe muh nghuot lyis gas phuqsoe muh wons wuq bas jungh; jyauh muh nghuot lyis gas jyauh bas jungh. 8 Taiq kyingh yomdyei muh nghuot lyis taiq kyingh yomdyei muh khanh nyeis bas jungh. Vlu dyei soeu eq magons magoh dyei bas jungh; guon soeu eq yomkat las guon bas jungh; nhaiq seq nyen soeu ka gausyis ehnyet yah kuot bas jungh. 9 Jyetdap cho mha vguons kuot zis ma bos bas jungh; ma gis yvlyis hoeng geh, gis yvlyis zwi zains toh geh. 10 Jyetdap yvmas Khristan vmang vnoeuh teh jyet goh geh. Dvyuk yah dvyuk phauh nyang cho tungh chixoeuq goh nyeis geh. 11 Muh mas ma lan lo yomkat nyeis geh; Yhensain lhyi nhaiq wvng zis yah phuqsoe nyeis geh. 12 Nvng nghamhloms zis gas nvng lyis gauslaus nhang bas jungh; shanghsenh yvmas jhen geh; Vjangh shvmanh dung nyeis geh. 13 Nyungs dah Khristan dyenschangh jens lyis nvng yoh vyhang gvm dyei aq. Boengh daih nyeis geh. 14 Namoq lyis shoeuhshih bang lyis Mangso jyank mas shvmanh dung dyei geh; vnhoengh goh, shvmanh dyei geh. 15 Gauslaus bang yah dvgeh gauslaus las ngaus bang yah dvgeh ngaus geh. 16 Dvyuk yah dvyuk xamxonh zis yah pangh thuk goh nyeis geh. Vkhwank goh, nyoqnho ma yoh dah muh lyis lhom yoeus las wons wuq nyeis geh. Vsainnyang seq thoq lyis joeui bos oen vmoengs. 17 Dvyuk yuk nvng lyis ma gis khyvlyis kuot lyis, nvng nyang lyis ma gis khyvlyis vtauh dyei. Yuk khanghmuh gis ge nghamh yvlyis tungh kuot aq. 18 Namoq gas dvnganh yvmas nah shot pheh yah gis bweh lyis dius yuk khanghmuh yah nyenstap khyvlyis nyeis geh. 19 Jyetdap bang eh, khanhamp eq lvto vphuk; Mangso dah nhaiqlom dyis yvlyis xwiq toh geh: Khasoeh ge lyis lhaihtoh dang mas taiq zis gas, Lvto phuk das zis gas ngah muh nghuot, ngos tauh dyei das, ge Yhensain taiq. 20 Lvto phuk das gungsthaiq lhaihtoh dang mas taiq zis yah dvyhangteh, nah jeswus yuot lyis tsoh aq: shet lyis jeis gvmshuk aq; heisoeh kuot gvng mas nvng nyang lyis xoqphuh nyoqnho ngeh nhang das. 21 Ma gis zis yah nvng lyis ma ung bas jungh, gis zis yah ma gis yvlyis dv ung bas jungh. 1 Yuk khanghmuh gas guon dah toeuh yoh bang dah o mha gyoh nyeis bas jungh. Khasoeh ge lyis Mangso jyank masyah ma nghuot lyis gas, chah toeuh eq ma bos: bos dah toeuh dvnganh zis gas Mangso yah dyei toh. 2 Hank laus eq hau toeuh yoh soeu lhyi ngoek zis gas Mangso toeuq toh soeu lhyi ngoek yvmvyah nyang gungs nyang soetuon zis xauh das. 3 Khasoeh ge lyis guon bang gas gis dah muh kuot bang xiklyis gyuk phoh duot zis ma nghuot. Ma gis dah muh kuot bang xiklyis gyuk phoh dvtsain nghuot. Nvng vmingh yoh bang lhyi ma gyuk gyuk nyeis mes lah? Gis dah muh kuot aq: housoeh lyis nvng chungh zis xauh das. 4 Khasoeh ge lyis nyang gas nah vkyuh xiklyis Mangso dah muh wons soeu nghuot. Nvng ma gis mus kuot nghuot lyis gas gyuk aq: khasoeh ge lyis nyang gas yoh joeng dah yomsoq jyoeng yoh. Nyang gas Mangso dah jyeidwis nghuot las ma gis zis kuot soeu lhyi Mangso gungsthaiq soetuon lha yobos dyei soeu nghuot. 5 Housoeh las nvng gas Mangso yobos dyei das yvlyis gyuk las kyingh ma nghuot, sohseq ehnyet yah vmingh yoh bang dah domsyos gyo nyeis chah. 6 Hauh gvng mas eq namoq khoengh tsain kat nyeis: khasoeh ge lyis nyamoq gas vsainnyang kuot chah muh lyis wons wuq uhlyis Mangso xiklyis muh wons bang tsain duot nyeis. 7 Housoeh las nyamoq lyis dyei chah zis dvnganh dyei geh; khoengh khywi soeu mha khoengh kat las, vkhoq kui soeu mha vkhoq kat geh. Gyuk chah soeu lhyi gyuk las phauh chah soeu lhyi phauh geh. 8 Dvyuk yah dvyuk jyetdap goh thoq lyis lai las hank yah eq chah jyen vdap goh: khasoeh ge lyis gohyuk lyis jyetdap soeu ka lyi lyis domsyos gyo goeus. 9 Khasoeh ge lyis nyi shuot lvng vshuot, dius vsat, vkhauh, gohyuk yah sen vyhang lhyi nyoq vnoq ge dah Lyi yahge gohtoeu bos shih dah Lyi dvnganh zis gas, Nah yhenkyoh lyis nvnyang gungs lyis teh yoh jyetdap das ge dah dang mas xom toh. 10 Jyetdap zis gas yhenkyoh lyis ma gis zis kuot ku zis ma nghuot: housoeh jyetdap zis gas Lyi dvnganh chank kuot goeus. 11 Gvshih gas yhet soh los shishenh nghuot chah goeus yvlyis namoq seq yvmvyah namoq haih jyetdap lyi lyis chank kuot chah. Khasoeh ge lyis yang khyuot yoeus xauh das cho ka yang lomsjingh zoh loh yoq thoq lyis gvshih zes ni goeus. 12 nyensyo lai loh nyeis las nyeihyo jweh los nyeis: housoeh mauchuot cho yah sen dah muh lyis toh tyamp las, bvng zis yah sen dah jesgungs lyis tsain wuot toh goh. 13 Nyeih lyis yhangteh topkoq suh e goh: vpyo lais, vshuk yet, nghe nyhiq vnan, vdyoqgoh, vnoh goh. 14 Yhensain Yesu Khristu lyis jesgungs teh wuot toh geh, gungsshoh nyetnau khyvlyis tyink das zis toeuh dvtsiq eq vdyei. 1 Lomsjingh cho mha yomnhuk soeu lhyi lhom yoeus geh: nghuot laus eq nyang nghamh khamkhvv cho lhyi taiq phyen-goh das xiklyis lhom yoeus zis ma nghuot bas jungh. 2 Khasoeh ge lyis dvyuk dah lomsjingh cho ka dvnganh yah gis zo ge loms: gohtoeu lomsjingh cho mha yomnhuk soeu dvyuk gas anghnyaus zo nyeis. 3 Vja ja zo soeu ka ma zo soeu lhyi dius ngis ma yoeuh khyoq bas jungh; ma zo soeu eq zo soeu lhyi soe vtuon: khasoeh ge lyis Mangso ka nyang lyis lhom yoeus. 4 Nvng gas hank nghuot las gohyuk dah jyeidwis lyis soetuon lah? Hauh soeu dah muh ung cho, ma ung cho lhyi ka nyah yhensain nyang thyet das. Nyang jyoengh yoh ung das: khasoeh ge lyis hauh Yhensain ka nyang lyis ung shoq yoh kuot dyei. 5 Dius dvyuk gas buisnyeis dvnyeih gas gohnyeih thoq lyis zes yhaugyen ge nghamh: gohtoeu dvyuk gas nyeih khanghmuh dvyhangteh nghuot ge nghamh. Hank eq hank nyang ehnyet mas goeng goeng yap bas jungh. 6 Buisnyeis kyi soeu ka Yhensain dah phunk lyis chungh das xiklyis kyi nyeis. Ja khanghmuh zo soeu ka Yhensain dah phunk lyis chungh das xiklyis zo. Khasoeh ge lyis nyang gas hau Yhensain dah jyehjuh lyis chungh las zo nyeis. Zonoms dvkhamh lyis kyi soeu eq Mangso dah phunk lyis chungh das xiklyis kyi nyeis. Housoeh nyang eq Yhensain dah jyehjuh lyis chungh nyeis. 7 Khasoeh ge lyis, yang hank eq vsainnyang gungs xiklyis kyingh dwis nyeis zis ma nghuot; hank laus eq vsainnyang xiklyis kyingh shei zis ma nghuot. 8 Dwis nyeis lyis gas Yhensain nyhenshang yang dwis nyeis; shei lhyi eq Yhensain dah nyhenshang tsain shei loh. Housoeh yvmvyah dwis laus eq, shei laus eq yang gas Yhensain yah sen joq. 9 Khasoeh ge lyis shei bang yahge dwis nyeis bang dah Yhensain bweh shoq, Khristu gas shei kham lha dwis toq loh goeus. 10 Housoeh las nvng anghphoq kyingh zo soeu nah boek lyis chamus soetuon nyeis lah? Nvng vja ja zo soeu eq nah boek lyis chamus dius ngis yoeuh khyoq lah? Yang dvnganhmoq gas Mangso dah soetuon zis xauh das xiklyis nyah soetuon tank xikkhonh mas xauh jweh yap das. 11 Khasoeh ge lyis lhaihtoh dang mas, Yhensain taiq zis gas, Ngos dwis nyeis zis yah dvyhangteh, yuk khanghmuh ngah xikkhonh mas los dupaiq las, lhyo khanghmuh gas, Ngos gas Mangso nghuot ge rhen das, ge. 12 Yang yuk khanghmuh gas Mangso jyank mas vsainnyang dah cho lhyi suon xoeuq chah das. 13 Housoeh yvmvyah yang dvyuk yah dvyuk chah soe ma tuon goh. Hank laus eq vsainnyang boek xik mas thungh lains gus, lainszo gus ma toh das cho dvnghamh thyet goh. 14 Yhensain Yesu yah dvgeh kang dwis yvmvyah ngos jyoengh yoh seq zis gas, zonoms cha nghuot laus eq hauh zis nyang pheh yah loms noq cho khyvpheh yah ma sen oen. Nghuot laus eq dius dvyuk yuk gas zonoms dvja ja lyis ma lhoq ge nghamh lyis gas, hauh zis gas nyah xiklyis ma lhoq. 15 Nvng zo dah zonoms shukphoh gvng mas nah boek lyis ehnyet ma tap joqyos bweh nhang lhyi ka, nvng jyetdap cho mha suh e nyeis zis ma nghuot. Khristu gas nyah xiklyis shei kham dyei goeus yvmvyah, nah zonoms yah nyang lyis vlhoq thyoq. 16 Namoq gis ge lhom yoeus toh yvlyis gohyuk lyis, ma gis oen ma sang nhang goh. 17 Khasoeh ge lyis Mangso munghdan gas lvzo lvshuk cho ma nghuot, Gyingshang Dyos yah dyei dah dan cho, nyenstap gauslaus cho dvnghuot. 18 Housoeh chank las Khristu dah muh wons wuq soeu ka, Mangso nhaiqdoeus soeu bweh las, dius dah chungh zis eq xauh das. 19 Housoeh yvmvyah, yang gas nyang changh nyang nyenstap cho yoh bweh nhang cho yahge nyang changh nyang kuhxing los nhang cho lhyi vjangh nghamh toeuq zis yah suh e nyeis goh. 20 Zonoms gvng mas Mangso dah muhzoh lyis vlhoeu thyoq tyamp. Zonoms dvnganh gas zo gis. Nghuot laus eq zo las dius lyis lainszo nhang zis gas shuot cho nghuot. 21 Nah boek lyis lainszo nhang cho nghuot lyis gas, shoh zo, zvbiq shuk, chah zonoms laus eq jhank das zis gas gis cho nghuot. 22 Hai cho yah sen lha nvng khasoeh chank kuot ge zis gas nvng yahge Mangso yah sen. Vsainnyang jus ge lomsjingh las thyet zis yah dvyhangteh kuot las ehnyet mas shang shang yobos ma bos ge nghamh soeu ka ngelhoq. 23 Khamkhvv zis yah zo soeu ka Mangso dang thang thyet zis xauh goeus. Houka lomsjingh zis yah ma zo yvmvyah nghuot: khasoeh ge lyis lomsjingh zis yah ma kuot zis cha eq yaunos nghuot. 1 Yang lomsjingh cho mha yombos bang gas vsainnyang pyo cho ma gis chank, lomsjingh cho yomnhuk bang wons chah dah yvwons lyis bos gis pangh. 2 Yang dvnganh gas yah vmang vnoeuh jens dah nyeisgis yaplhoq das cho nghamh las lomsjingh cho mha jebais los das xiklyis nyamoq lyis lhoq pyo dyei goh. 3 Housoeh lhaihtoh dang mas, Nvng lyis jwangh nyhap dang gas ngos lyis zangh los, ge zis yah dvyhangteh, Khristu eq nyah gungs lyis nyang gaus nhang zis ma nghuot. 4 Lhaihtoh dang dvnganh gas yang lyis jyauh das xiklyis nghuot. Housoeh yang gas lhaihtoh dang masyah yoh dah jhen cho yahge yombos nhang cho gvng mas nghamhloms cho bos das xiklyis nghuot. 5 Yang dvnganh gas Khristu Yesu dah yikhyoh lyis chank las namoq nyang changh ehnyet dvdain dvlom yoh nghuot bas jungh, jhen cho yahge yomdyei cho dyei nyeis dah Mangso ka namoq lyis shwih bas jungh. 6 Housoeh lyis namoq dvnganhmoq dvgeh dvthwe kyingh yah, yah Yhensain Yesu Khristu dah Uwus nghuot dah Mangso lhyi yoh chungh das. 7 Housoeh las Mangso dah nyoqnho ngelang xiklyis Khristu gas namoq lyis lhom yoeus goeus zis yah dvyhangteh, namoq nyang changh nyang lhom yoeus goh geh. 8 Khasoeh ge lyis ngos taiq zis gas, Mangso ka dang jings soeu nghuot cho Chixoeuq das xiklyis phauh thyeih moq lyis dyei toh dah dangthoengh tyink das zis Khristu gas vthyoh tyomh bang Yuda jens dah gis cho nyhenshang jweh los, oen. 9 Gohnyau bang yangh Mangso dah nhaiqnyen cho lhyi yoh chungh bas jungh ge eq jweh los. Lhaihtoh dang mas taiq zis yah dvyhangteh nghuot. Houka, Gohnyau bang mas ngos nvng lyis chungh das, Ngos nvng lyis chunghthwe kat das, ge. 10 Tsai, lhaihtoh dang mas, Gohnyau bang eh, Mangso dah dius jens yah dvgeh gauslaus geh. 11 Tsai, Gohnyau bang dvnganh eh, Yhensain lhyi chungh geh; Dius jens dvnganh eh, nyang lyis chungh geh. 12 Tsai Esaia gas, Yese dah vnyet dvkoq thuq los das, Nyang gas Gohnyau bang lyis guon das; Nyamoq gas nyang lyis nghamhloms das, ge. 13 Gvshih Gyingshang Dyos dah yomsoq yah namoq dah nghamhloms cho tsoq je los bas jungh, Nghamhloms vpom nghuot dah Mangso ka, namoq dah lomsjingh cho mha gauslaus zis yahge nyenstap zis tyink dyei bas jungh. 14 Ngah boekyis eh, namoq gas gis cho yah dyingh las seq cho dvnganh dyingh zis yah, namoq nyang changh yoh jyauh goh nyeis yvlyis ngos wontang loms toh. 15 Nghuot laus eq haih maussauh mas ngos namoq lyis taiq kyingh kat dah cho dvkhamh womh womh lhaih kat. Ngos housoeh womh womh lhaih zis gas, 16 Mangso ngos lyis Khristu Yesu dah jyeidwis duot zis yah gohnyau bang xiklyis muh wons soeu duot das toeuh dyei yvmvyah nghuot. Gohnyau bang gas Mangso lhom yoeus mon dah phudyei duot las Gyingshang Dyos yah Mangso lhyi kyauh zis xauh bang bweh bas jungh, ngos gas phudyei soeu khyvlyis Mangso dah Gausyis dang lyis taiq kyoh. 17 Housoeh las Khristu Yesu mas dvdain dvlom bweh zis yah ngos wons wuq dah Mangso muh mas yoh khwank gaus nyeis. 18 Ngos womh womh taiq das zis gas Gohnyau bang Mangso dah domsyos gyo bas jungh Khristu gas ngos lyis yhung lha shwih uhshe nhang cho dvnghuot. Nyang haih yvlyis dang yah eq, muhzoh yah eq kuot. 19 Yomsoq muh yahge mauh loqmuh, Mangso dah Dyos yomsoq yah eq kuot. Housoeh ngos gas Yerusalem masyah Ilirikum wuxom ngap shoq chwang lha Khristu dah cho gausyis dang lyis taiq kyoh. 20 Nghuot laus eq dvyuk yuk tsuk toh dah vpom thoq mas ma tsank bas jungh, ngos vjangh nghamh tsuk zains toh zis gas, Khristu nyings ma xauhgyo ku shih joqyos mas, ngos hau gausyis dang taiq hoeuh das cho nghuot. 21 Lhaihtoh dang mas lhaih toh zis yah dvyhangteh nghuot: Houka: Nyah cho khanhamp eq ma xauhgyo ku bang nyvng das, Hauh zis ma xauhgyo ku bang seqgyo los das, ge. 22 Housoeh las ngos namoq jyank mas jweh das cho tomp toh zis nyoshoq lhain xauh. 23 Gvshih gas haih wuxom jens mas ngos kuot chah dah muh dye wons wuq goeus. Ngos namoq jyank mas los xauhgoh das xiklyis nyoshoq zvn lyis yah nghamh toh goeus. 24 Gvshih namoq jyank mas yoh los das oen nghamhloms. Ngos Spain mau pheh loh uhlyis namoq yah los xauhgoh mes. Namoq yah dvyoq zomh nyeis thang lhyi, hauh mau mas namoq ngos lyis pangh kat bas jungh oen nghamhloms nyeis. 25 Gvshih gas, Mangso dah dius jens lyis pangh thuk muh wons wuq das xiklyis Yerusalem pheh loh nyeis. 26 Khasoeh ge lyis Makedoni yahge Akhaia mau mas dah phung jens gas, Yerusalem mas nyeis, shohjyen dah Mangso dius jens lyis pangh das xiklyis gausyis zis yah vlu tsainh das zis nghamh thyet toh. 27 nyamoq thyet cho ka dius yah kywih las ma nghuot, nghuot laus eq jyoengh ge lyis hauh bang lyis pangh thuk das nyhenshang nyamoq mas yvwons s bos. Khasoeh ge lyis, Yuda jens dah dyos vso vlho gohnyau bang lyis gvm lyis gas, gohnyau bang gas nyeisjvng zisyos yah nyamoq lyis pangh das zis gis. 28 Housoeh yvmvyah haih muh dye kuot las, hauh bang xiklyis yung dah ngwis dye kyauh goeus ya, ngos Spain pheh loh uhjyangh namoq jyank mas wvng xauhgoh khoq das. 29 Namoq jyank mas jweh lyis Khristu dah shvmanh jyehjuh dyingh zis yah jweh das yvlyis ngos seq. 30 Housoeh yvmvyah boekyis eh, Yhensain Yesu Khristu gvng mas eq, Dyos yah dyei dah jyetdap gvng mas eq namoq ngah xiklyis ngos yah dvgeh malyen lo lomsjingh ehnyet zainsmuh yah shvmanh dung yvmas yomkat das xiklyis yomdyei kat. 31 Houka Yuda mau mas dah ma lomsjingh bang masyah jeslhuiq das zis yahge Yerusalem mas ngos phuqsoe dah muhzoh lyis houmha nyeis dah Mangso dius jens yoh lhom yoeus dyei das xiklyis shvmanh bos dung geh. 32 Housoeh Mangso dah ehnyet nghuot lyis gas ngos namoq lyis gausyis zis yah yoh xauhgoh las, namoq yah dvgeh pyo pyo yom doms yoh huiq das. 33 Nyenstap vpom Mangso ka, namoq dvnganhmoq yah dvgeh nghuot bas jungh. Amen. 1 Kenkhrea phung mha muh wons soeu, ngamoq dah nhamhmuh Phoebe lyis ngos namoq jyank mas taiq toenk dyei kat. 2 Mangso dius jens dah lhom yoeus goh khyvlyis Yhensain nyings mas nyang lyis lhom yoeus las chah cho mha laus eq, nyang chah yvmas yoeuh dyei geh. Khasoeh ge lyis nyang gas dius nyoshoq lyis eq, ngos lyis eq bos thuk ku dah dyenschangh gis nghuot. 3 Khristu Yesu dah muh mas ngah muh wons changh jens Priska yahge Akula lyis bos jeshuh dyei geh. 4 Nyah zomh gas ngah kang xiklyis vsainnyang dah lainzain kham das zis nghamh thyet ku yvmvyah, ngos nyah zomh lyis jyehjuh soh. Ngos kyingh ma nghuot, gohnyau bang dah phung dvnganh eq nyah zomh lyis jyehjuh soh. 5 Nyah zomh yhen mha dah phung lhyi eq bos jeshuh dyei geh. Akhaia mau mas Khristu xiklyis cangxeih shih dah shihxeih nghuot, ngos jyetdap dah Epaenetu lyis bos jeshuh dyei geh. 6 Namoq xiklyis svsoh yomkat ku dah Mari lyis bos jeshuh dyei geh. 7 Ngah vnyau Yuda tsain nghuot las, ngos yah dvgeh thung lungh ku dah Androniku yahge Yunia lyis bos jeshuh dyei geh: hauh vzomh gas lvgyo jens mas nyings hoeuh las, ngah xikpheh Khristan bweh goeus. 8 Yhensain yah zomh cho mha ngos jyetdap dah Ampliatu lyis bos jeshuh dyei geh. 9 Ngamoq yah dvgeh Khristu dah muh mas pangh soeu Urbanu yahge ngos jyetdap dah Staki lyis bos jeshuh dyei geh. 10 Khristu mas dang jings dah Apele yahge Aristobulu dah yhenbang lyis bos jeshuh dyei geh. 11 Ngah Yuda vnyau Herodion lyis bos jeshuh dyei geh. Narkisu yhenbang Khristan vmang vnoeuh moq lyis bos jeshuh dyei geh. 12 Yhensain muh wons wuq dah Triphena yahge Triphosa lyis bos jeshuh dyei geh. Yhensain mha gvgis yomkat dah jyetdap Persi lyis jeshuh dyei geh. 13 Yhensain dah muh mas lyes soeu Rufu yahge nyah ungwes, ngos lyis vjangh nyah lo lyis teh dyangh soeu lhyi bos jeshuh dyei geh. 14 Asinkritu, Phlegon, Herme, Patroba, Herma yahge nyamoq yah dvgeh nyeis dah Khristan boekyis lyis bos jeshuh dyei geh. 15 Philologu yahge Yulia, Nereu yahge nyah nhamhmuh lyis eq, Olimpa yahge nyang yah dvgeh nyeis dah Mangso dius jens dvnganhmoq lyis jeshuh dyei geh. 16 Namoq nyang changh nyang gyingshang dah bvlot tanh zis yah jeshuh goh nyeis geh. Khristu dah phung jens dvnganh gas, namoq lyis tsain jeshuh kat. 17 Boekyis eh, namoq kham yoeus dah jyauh cho lhyi tyixo lha, lvn nhang zis yahge dius jens dah lomsjingh cho lhyi lainszo nhang bang lyis zungh yoeuh las, nyamoq lyis jhank nyeis bas jungh, ngos namoq lyis taiq kyingh kat. 18 Khasoeh ge lyis housoeh teh bang gas, yah Yhensain Khristu lyis ma phuqsoe, vsainnyang womdau xiklyis kyingh chiq las, cha ma seq bang lyis danggis dang chau yah tsain mhuih. 19 Nyamoq hau Gausyis Dang mas nhaiq wvng lomsjingh nyeis cho ka, dius dvnganh mas hoeuh loh goeus. Housoeh yvmvyah ngos namoq xiklyis gaus nyeis. Namoq gas gis cho cha nghuot yvlyis seq dah joeui bos bang bweh las, ma gis cho mha ka yobos ma bos bang bweh nhang mes. 20 Nyenstap vpom Mangso ka, ma nyangh lyis Satan lhyi namoq dah khyei o mha nang gyik tyamp das. Yah Yhensain Yesu dah jyehjuh gas namoq yah dvgeh nghuot bas jungh. 21 Muh wons changh Timothi yahge ngah Yuda vnyau Luki, Yason, Sosipata moq gas namoq lyis jeshuh kat. 22 Haih maussauh lhaih soeu ngos Tertiu eq Yhensain mha namoq lyis jeshuh kat. 23 Ngos lyis eq, phung gonh lyis eq, boengh daih dah yhensain Gai-u ka namoq lyis jeshuh kat. Hauh wus mas dah ngwis kwi zom soeu Erastu yahge vmang vnoeuh Kuartu vzomh gas namoq lyis jeshuh kat. 24 Yah Yhensain Yesu Khristu dah jyehjuh gas namoq yah dvgeh nghuot bas jungh. Amen. 25 Yang Mangso phunk lyis chungh goh. Ngos namoq lyis taiq kyoh goeus Yesu Khristu cho gausyis loeus yahge gohlhain caiq masyah nghop shung toh dah jyoeng cho chixoeuq kat zis yah dvyhangteh, nyang gas namoq lyis namoq dah lomsjingh cho mha goeng goeng yoh yap nhang toh. 26 Nghuot laus eq gvshih hau nghop toh dah jyoeng cho ka lvpe jens lhaih toh khyvlyis chixoeuq kat. Dius nyau khanghmuh Mangso lhyi lomsjingh las nyah domsyos gyo bas jungh ge, vcaiq vto Mangso tying toh zis yah dvyhangteh hau jyoeng cho lhyi taiq kyoh nyeis goeus. 27 Dvyuk kyingh nghuot las nyang kyingh joeui bos dah Mangso ka, Yesu Khristu gvng mas vcaiq vto phunk bos bas jungh. Amen.
|