LUKE1 Cangxeih lyis yah nyoq yah nyvng dah kanghjyoeng yahge gausyis Dang lyis wons wuq bang taiq kyoh zis yah dvyhangteh, 2 Ngamoq vkhau mha bweh lai loh goeus cho vjaja lyis lhaih xi bang nyoshoq bos yvmvyah, 3 Ngos eq haih cho dvnganh lyis vpom mhayah vlhomuh nyei gyo thang lhyi nvng xuq goeus cho dvnganh gas jyoengh jus yvlyis nvng yoh seq shoq ngos nah xiklyis vzoh yah lhaih dyei das oen nghamh thyet toh, nhaiqbos Theophilu eh. 5 Yuda hwankti Herod zaih lyis, Abiya vkoq mas dah Zekharia ge dah phudyei soeu dvyuk nyeis. Nyah yhensain nyhiq Elizabet gas Aron dah nyeinyet nghuot. 6 Nyah zomh gas yobos huon chank ma bos khyvlyis Yhensain dah lyi yahge tyingtoh cho dvnganh lyis chank las Mangso xikkhonh mas dan nyeis. 7 Nghuot laus eq Elizabet gas dius thonh nghuot yvmvyah, nyah zomh loshang ma bos, Nyah zomh gas mang eq mang loh goeus. 8 Dvlhain ka nyang Mangso dah xikkhonh mas nyah phudyei phung mha muh kuot vvng lhyi, 9 phudyei bang dah thungh yah dvyhangteh nyamoq doeugoh lyis nyang mas vvng lha, nyang gas Yhensain dah yhenmuh mas wvng las xangh ngheq nhamp nyeis. 10 Hauh uhlyis dius jens dvnganhmoq gas nghe pheh shvmanh dung nyeis. 11 Xangh ngheq nhamp dah phon loqyos shot pheh Yhensain dah loeuswons soeu yap las nyang lyis nyvng xoeuq. 12 Zekharia nyang lyis nyvng las gyuk nvn nyeis. 13 Nghuot laus eq hauh loeuswons soeu yah nyang lyis taiq zis gas, Vgyuk Zekharia eh, khasoeh ge lyis nvng dung zis lyis gyo dyei goeus; nah yhensain nyhiq Elizabet gas nah nyhenshang yukgis lo dvyuk khoeu los das, nvng nyah nyings lyis Yohan ge lui das. 14 Housoeh las nvng gausyis nhaiqtap zis yoh das; nyang khoeu los yvmvyah dius nyoshoq eq gaus das. 15 Khasoeh ge lyis nyang gas Yhensain xikkhonh mas kuhxing das. Nyang gas zvbiq yahge yhei shuk das zis ma nghuot; nyah ungwes dah ung mhayah yangh Gyingshang Dyos yah dyingh das. 16 Nyang gas Israel jens nyoshoq lyis nyamoq dah Yhensain Mangso jyank pheh doms lhain los nhang das. 17 Uwus moq dah ehnyet lyis lo jens jyank pheh, dang ma gyo bang lyis dan bang dah joeui cho pheh lhain los nhang das zis yahge, Yhensain xiklyis sont toh dah dius nyau lyis cicont kuot dyei das nyhenshang nyang gas Eliya dah dyos yahge yomsoq dyingh las nyah xik pheh loh das, ge. 18 Zekharia loeuswons soeu lhyi taiq zis gas, Ngos gas mang loh goeus, ngah yhensain nyhiq eq nyenhkyi kuh goeus yvmvyah, haih zis lyis jyoengh nghuot oen ngos kha mhayah yoh seq das lah, ge. 19 Loeuswons soeu nyang lyis taiq zis gas, Ngos gas Mangso xikkhonh mas yap soeu Gabriel nghuot. Nvng lyis taiq kyoh aq, ge haih gausyis loeus taiq kyoh das xiklyis, ngos lyis nhang kat. 20 Yoeuh aq, nyah shishenh jweh lyis nyuk los das dah ngah dang lyis nvng ma jingh yvmvyah, haih cho bweh los dah buisnyeis jweh shoq nvng dang ma yoh jis, nhuot jet nyeis das, ge. 21 Zekharia gas yhenmuh khau mha loh nyangh nyeis yvmvyah, nyang lyis langh nyeis dah dius jens gas mauh nyeis. 22 Nyang thuq los dah uhlyis nyamoq lyis dang ma yoh jis lo yvmvyah, nyang gas yhenmuh mas nyoqnyvng nyvng zis lyis nyamoq soh dyei. Nyang gas nyamoq lyis loq toeuq toeuq las nhuot jet zis yah nyeis. 23 Nyang gas, nyang phudyei muh kuot dah buisnyeis dyingh lyis, nyah yhen pheh loh. 24 Hauh thang lhyi nyah yhensain nyhiq Elizabet gas loshang gungs lyis chi los las, nyang kyingh yhen khau mha lhamhmuh oeng khyvp gauh lungh joq. 25 Housoeh nyang taiq zis gas, Svbih dah xikkhonh mas ngos lyis jwangh nyhap zis yoeus tyamp dyei das xiklyis Yhensain ka ngos lyis nyoqzons doeus las jyehjuh dyei goeus, ge. 26 Elizabet loshang gungs lyis chi zis lhamhmuh khyuk vkhyvp lyis, Mangso ka loeuswons soeu Gabriel lyis Galile mau Nazaret ge dah wugungs mas, 27 Hwankti Dawi dah vnyau vshih, Yosep ge soeu xiklyis kwank toh dah lonyi gyingh jyank mas nhang kat. Hauh lonyi dah nyings gas Mari nghuot. 28 Loeuswons soeu nyah jyank mas jweh taiq zis gas, Dvyangh lah? Yhensain ka nvng lyis nyoqzons doeus las, nvng yah dvgeh nyeis. (Vmesbih jens mas nvng gas ngelhoq), ge. 29 Mari gas nyang lyis nyvng las housoeh taiq zis lyis gyo mauh las, Heisoeh lhom jis zis gas khasoeh ge zis nghuot das au, ge nyah ehnyet mas nghamh nyeis. 30 Loeuswons soeu nyang lyis taiq zis gas, Mari eh, vgyuk: nvng gas Mangso nyoqzons doeus soeu nghuot. 31 Nvng gas loshang gungs lyis chi lha, yukgis lo dvyuk khoeu das. Nvng nyah nyings lyis Yesu oen nyhink dyei chah. 32 Nyang gas kuhxing lha nyang lyis gas Nyhang thank Soeu dah Lo ge lui das: Yhensain Mangso ka nyah uwus Dawi dah hwankti tsung tank eq nyang lyis dyei das. 33 Nyang gas Yakop dah yhen thoq mas vcaiq vto guon das. Nyah munghdan khayhoq eq thank das zis ma nghuot, ge. 34 Mari loeuswons soeu lhyi taiq zis gas, Hauh zis khasoeh yoh bweh das lah? Ngos lonyi gyingh dvnghuot, ge. 35 Loeuswons soeu nyang lyis phuk taiq zis gas, Gyingshang Dyos nah thoq mas jweh das las, nyhang thank thoq mas soeu dah yomsoq yah nvng lyis gos das. Housoeh las nvng khoeu das lo gas gyingshang. Nyang lyis Mangso dah Lo ge lui das. 36 Yoeuh aq, dius thonh ge dvlui, nvng yah dvhuh dah Elizabet eq manglo lyis yukgis loshang dvyuk gungs lyis chi zis lhamhmuh khyuk khyvp nghuot los goeus. 37 Khasoeh ge lyis Mangso ma yoh kuot zis cha ma bos, ge. 38 Hauh uhlyis Mari taiq zis gas, Yoeuh aq, Yhensain dah jyeidwis ngos nghuot nyeis; nah dang yah dvyhangteh ngah jyank mas nghuot bas jungh, ge. Hauh uhlyis hauh loeuswons soeu nyah jyank masyah loh. 39 Hauh buisnyeis gyo lyis Mari gas Yuda mau boms wugungs dvkoeuq mas lvnyap toq loh las, 40 Zekharia yhen mha nyang wvng loh lyis, Elizabet yah loh xauhgoh. 41 Mari lhom jis zis lyis Elizabet xauhgyo lyis nyah ung mha loshang jywe los. Elizabet gas Gyingshang Dyos dyingh las, 42 thwe zainsmuh yah kaiq zis gas, Vmesbih jens mas nvng gas ngelhoq, nah ung mha dah shih eq ngelhoq. 43 Ngah Yhensain dah ungwes ngah jyank mas jweh los zis gas, kha iq gaus chank bos au! 44 Yoeuh aq, nvng lhom jis dang ngah no mas xauhgyo yah dvyih, ngah ung mha loshang ka gaus zis yah jywe los. 45 Yhensain jyank masyah nyang lyis taiq zis gas bweh los das, ge lomsjingh dah vmesbih gas ngelhoq. 46 Mari taiq zis gas, Ngah dyos Yhensain lhyi chungh. 47 Ngah dyos eq khyuot yoeus Yhensain mha gauslaus: 48 Khasoeh ge lyis ma mon ma yih dah nyah jyeidwis lyis nyang nhaiqdoeus dyei: khasoeh ge lyis, Yoeuh aq, gvshih masyah dius caiq dvnganh gas ngos lyis ngelhoq soeu ge das. 49 Khasoeh ge lyis yomsoq zains bos soeu ka ngos lyis kuh thank dah muh kuot dyei, nyah nyings eq gyingshang. 50 Nyang lyis phauh nyang gyukwoms bang thoq mas nyah nhaiqnyen shohgyo zis gas, dvcaiq thang lhyi dvcaiq joq joq. 51 Nyah loqyom yah yombos zis lyis chixoeuq; Nyamoq dah ehnyet mas nghamh yvlyis khwank nyeis soeu lhyi lhoq sanh tyamp. 52 Yombos bang lyis nyamoq hwankti tank masyah khyoq las, Nyhen mha gyoh bang lyis nyang toeutoq das. 53 Nyang gas yuot bang lyis zonoms gis yah jo nhang lha, Dis bang lyis gungskom nhang kat. 54 Nyah nhaiqnyen ehnyet lyis soh zis yah nyah jyeidwis Israel lyis pangh dyei. 55 Houka Abraham yahge nyah lo jens nghuot dah yah phauh thyeih moq lyis dyei toh dah vcaiq vto dangthoengh yah dvyhangteh nghuot, ge. 56 Mari gas Elizabet yah dvgeh lhamhmuh somh khyvp ko nyeis lho lha nyah yhen pheh tauh loh. 57 Gvshih Elizabet gas buisnyeis dyingh las, yukgis lo dvyuk khoeu. 58 Yhensain ka nyah kuhxing dah nhaiqnyen shohgyo zis nyang lyis khasoeh Chixoeuq yvlyis buisnoms sainhchangh yahge dvhuh bang xauhgyo lyis nyang yah dvgeh tsain gaus nyeis. 59 Xet vnyeih lyis, loshang lhyi vthyoh tyomh dyei das zis nyamoq los las, nyah uwus dah nyings teh nyang lyis Zekharia ge nyhink das zis sont. 60 Nyah ungwes phuk taiq zis gas, Ma nghuot, nyang lyis Yohan oen nyhink dyei chah, ge. 61 Nyang lyis nyamoq taiq zis gas, Nah vhuh mas housoeh ge zis hank eq ma bos, ge. 62 Nyamoq gas nyah uwus lyis loq toeuq las nyings khasoeh nyhink mes yvlyis nyei. 63 Nyang gas lhaih das luklhyoq sang yoeus las, Nyah nyings gas Yohan nghuot, ge lhaih xoeuq. Housoeh nyamoq dvnganhmoq mauh. 64 Houjang nyah nhuot eq bangh, lhyo eq buis las dang taiq zis yah Mangso lhyi chungh. 65 Nyah vyvm vwi mas nyeis bang gas gyuk las, hauh dang lyis Yuda boms mau dvnganh yvmas hoeuh loh. 66 Xauhgyo bang dvnganh dah nhaiqlom mas tsain comh toh las, Haih loshang ka khasoeh teh soeu nghuot das au, tsain ge. Khasoeh ge lyis, Yhensain dah yomsoq gas nyang yah dvgeh nghuot. 67 Hauh uhlyis nyah uwus Zekharia gas Gyingshang Dyos dyingh las pe zis gas, 68 Hauh Yhensain Israel dah Mangso ka ngelhoq: Nyah dius lyis komh las khyuot yoeus cho kuot dyei. 69 Nyah jyeidwis Dawi dah yhen mhayah, yah xiklyis yomsoq bos dah khyuot yoeus soeu thuq los nhang das, ge. 70 Mungkvn xi masyah nyang nyah gyingshang lvpe jens dah nhuot masyah taiq toh zis yah dvyhangteh, 71 Yah jeswus yahge yang lyis hoeng bang dvnganh dah loq masyah lhuiq kat das xiklyis nghuot. 72 Nyang taiq zis gas, Yah phauh thyeih moq lyis nhaiqnyen ehnyet Chixoeuq las nyah gyingshang dangthoengh lyis soh das, ge. 73 Ngamoq yahge ngamoq dah jes jens masyah khyuot yoeus las gyuk ehnyet ma bos bos nyang lyis yoh phuqsoe das xiklyis Mangso ka yah phauh thyeih Abraham lyis maukhi dang yah dangthoengh toh. 75 Housoeh yang gas yah dvcaiq gonh nyah xikkhonh mas gyingshang zis yah dan khyvlyis yoh nyeis das nyhenshang nghuot. 76 Loshang eh, nvng lyis gas, Nyhang thank Soeu dah lvpe ge lui los das: khasoeh ge lyis nvng gas Yhensain dah cho sont das xiklyis nyah xik pheh loh das zis nghuot las, 77 Nyah dius jens lyis yaunos khyuot dyei zis xauh yvmvyah khyuot yoeus dah jyehjuh lyis seq nhang das. 78 Yah Mangso dah nhaiqnyen jyehjuh yah, nyah khyuot yoeus cho ka yah thoq mas buis teh pank dyei las, 79 chuot zis yahge shei dah siyet mas tsung toh bang dvnganh lyis nyenstap cho mha xauh suh bas jungh, nyhang thank thoq masyah pank dyei nyeis, ge. 80 Loshang ka bes los zis yahge nyah dah dyos yombos los las Israel vnyau lyis thuq xoeuq buisnyeis jweh shoq nyang gas mhanhdyvp mas nyeis. 1 Hauh buisnyeis gyo lyis mungkvn gonh dius nyings lhaih das xiklyis Kesar Agustu dah dang kyoh kat. 2 Haih dius nyings lhaih zis gas, Siria mau mas Kureni mungh zau kuot uhlyis, cangxeih vlhain nghuot. 3 Hauh uhlyis dius dvnganhmoq gas, nyings lhaih das xiklyis yuk khanghmuh vsainnyang wus pheh tsain loh. 4 Housoeh Yosep eq, Dawi dah nyei nyet nghuot yvmvyah, Galile mau Nazaret wus masyah Yuda mau Betlehem ge, Dawi dah wugungs pheh loh. 5 Nyah yhensain nyhiq duot das xiklyis kwank toh dah Mari yah dvgeh nyings kat das xiklyis loh. Mari gas ung mha loshang chi. 6 Nyah zomh houmha nyeis dah uhlyis, Mari loshang khoeu das buisnyeis jweh los las, 7 yukgis lomons lyis khoeu lha, misseh yah lyet las lang khau mha lhain toh: khasoeh ge lyis nyah zomh xiklyis hau boengh doq yhen mha joqyos ma bos. 8 Hauh wuxom pa mha yvng yoeuh bang gas, nyenh lyis nyamoq dah yvng tsomh uhlyis yah nyeis. 9 Yoeuh aq, Yhensain dah loeuswons soeu ka, nyamoq jyank mas jweh las, Yhensain dah phunk gas, nyamoq dah vyvm vwi mas bvng joq: housoeh las nyamoq gas svsoh gyuk. 10 Loeuswons soeu nyamoq lyis taiq zis gas, Vgyuk goh, Yoeuh aq dius dvnganhmoq xiklyis gaus thank dang ngos namoq jyank mas wons lyih. 11 Khvnyhik Dawi wugungs mas namoq xiklyis khyuot yoeus soeu khoeu los. Hauh soeu ka Yhensain Khristu nghuot. 12 Namoq xiklyis vlho ka haih zis nghuot. Loshang lhyi shipu yah lyet las lang mas lhain toh zis lyis namoq nyvng das, ge. 13 Hauh loeuswons soeu yah dvgeh, loeuswons bang moqjens nyetlos nyettant thuq los las Mangso lhyi chungh zis gas: 14 Nyhang thank thoq mas Mangso ka phunk bos nyeis bas jungh, Nyeisjvng mas eq nyang nhaiqdoeus bang jyank mas nyenstap zis joq bas jungh, ge. 15 Hauh loeuswons bang nyamoq jyank masyah maukhung pheh tauh loh thang lhyi, yvng yoeuh bang dvyuk yah dvyuk taiq goh zis gas, Yang gvshih Betlehem jweh shoq e lha, bweh los goeus zis yahge Yhensain yang lyis seq nhang zis yah dvyhangteh, e tsain yoeuh goh, ge. 16 Housoeh nyamoq lvnyap e lha, Mari yahge Yosep lyis eq, lang mas lhain toh dah loshang lyis eq tsain nyvng. 17 Housoeh nyamoq nyvng lho lhyi, haih loshang dah cho, nyamoq lyis taiq kyoh khoq dah dang lyis tsain hoeuh loh. 18 Yvng yoeuh bang taiq dah dang lyis xauhgyo bang dvnganhmoq gas mauh. 19 Nghuot laus eq Mari gas haih cho dvnganh yvlyis comh yoeus las nyah ehnyet mas nghamh yoeuh nyeis. 20 Yvng yoeuh bang nyamoq lyis taiq zis yah dvyhangteh, nyamoq xauhgyo, xauh nyvng dah cho dvnganh gvng mas Mangso dah phunk lyis chungh las tauh loh. 21 Xet nyeih dyingh las nyang lyis vthyoh tyomh dyei lyis, nyang ung mha ma bos shih lyis yah loeuswons soeu nyings dyei toh vgus, nyang lyis Yesu ge nyhink. 22 Moshe dah lyi yah dvyhangteh nyamoq dah cheihshang chah dah buisnyeis dyingh los lyis, nyah zomh gas Yhensain lhyi kyauh das xiklyis nyang lyis Yerusalem mas shwih e. 23 Cangxeih khoeu dah yukgis lo khanghmuh lyis Yhensain xiklyis gyingshang oen yoh taiq das, ge Yhensain dah lyi mas lhaih toh vgus nghuot. 24 Yhensain dah lyi mas taiq zis yah dvyhangteh, khotjyauh dvzomh, nghuot ya, guzoe lo dvzomh yah lomhxangh lainh. 25 Yoeuh aq, Yerusalem mas Simon ge soeu dvyuk nyeis. Nyang gas dan las lomsjingh cho mha wontang soeu nghuot las Israel lyis nhaiqtaink dyei das cho lhyi nghamhloms nyeis soeu nghuot. Gyingshang Dyos eq nyah thoq mas nyeis. 26 Simon gas Yhensain dah Khristu lyis ma nyvng dvchank ma shei das ge, Gyingshang Dyos yah chixoeuq zis xauh. 27 Thungh yah dvyhangteh kuot dyei das nyhenshang nyhiphoq gas Yesu lyis shwih e lhyi, nyang eq Dyos yah yhenmuh mas jweh lyih los. 28 Nyang gas hauh loshang lyis nyah loq mas po chi lha Mangso lhyi chungh zis gas, 29 Yhensain eh, nah dang vgus nah jyeidwis lyis nyenstap zis yah shei nhang lo aq: 30 Khasoeh ge lyis nah khyuot yoeus cho lhyi ngah nyoqjeih yah nyvng goeus. 31 Dius dvnganhmoq xikkhonh mas hauh zis nvng sont toh dyei. 32 Gohnyau bang lyis pank dyei das dah bvng zis yahge Nah vnyau Israel dah phunk nyhenshang nghuot, ge. 33 Nyah cho yah sen zis lyis taiq gvng mas, Yosep yahge nyah ungwes gas gyo mauh. 34 Simon gas nyamoq lyis shvmanh dyei lho lha nyah ungwes Mari lyis taiq zis gas, Haih loshang ka Israel dius jens nyoshoq dyoqbis zis xauh das cho yahge khyuot yoeus zis xauh das xiklyis Mangso khyen toh soeu nghuot. Nyang lyis dius nyoshoq yah ngoek tyamp das, Mangso jyank mas dah vlho nghuot las nghop toh dah nghamh cho lhyi phank xoeuq das. 35 Nah sainh lyis eq shamthoh teh dah chiqjyen cho yah thauh kyank dyei zis xauh das, ge. 36 Hou mhayah Asher vnyau Phanuel dah lonyi Anna ge dah lvpe vmesbih dvyuk nyeis. Nyang gas svsoh mang goeus: lonyi uhlyis yah nyhet zvn kyingh nyah yhensain phoq yah zomh nyeis las, 37 zvnlom xetci nyei zvn bos shoq chauhmuh muh nyeis. Nyang gas yhenmuh yah ma gang, womkyi lha shvmanh dung zis yah nyeih nyenh Mangso lhyi phuqsoe nyeis. 38 Nyang eq hauh shishenh lyis los las Yhensain dah jyehjuh lyis chungh las, Yerusalem wugungs lyis khyuot yoeus das cho lhyi nghamhloms bang dvnganhmoq lyis nyah cho taiq kyoh. 39 Nyah zomh gas Yhensain dah lyi yah dvyhangteh dye kuot lho lhyi, nyamoq nyang dah wugungs Nazaret mas tauh loh. 40 Hauh loshang ka kuh bes, yombos los las joeui yah dyingh joq. Mangso dah nhaiqdoeus soeu bweh nyeis. 41 Gvshih nyah nyhiphoq gas, zvn yau zvn Lhuiq Kat Pwe Yerusalem mas loh. 42 Yesu dvci aiq zvn jweh lyis, pwe dah thungh yah dvyhangteh, nyamoq eq Yerusalem pheh doq loh. 43 Pwe buisnyeis lai loh thang lhyi tsain tauh loh lyis, loshang Yesu gas Yerusalem mas gyoh nyeis khoq; hauh zis lyis nyah ungwes uwus gas ma seq. 44 Nyang dius phung mha bos, ge nghamh las, dvnyeih gyung cho loh thang lhyi, buisnoms sainhchangh yahge seq goh bang mas nyang lyis tsain xo. 45 Nyah zomh gas nyang lyis ma nyvng lyis Yerusalem mas doms loh las nyang lyis xo. 46 Housoeh somh vnyeih lyis, nyang lyis yhenmuh khau mha svra moq dah vgungs mas tsung lha gyo yoeus las nyei goh nyeis zis lyis nyvng. 47 Nyah dang lyis xauhgyo bang dvnganhmoq gas, nyang seqgyo cho lhyi eq, nyang phuk taiq dang gvng mas eq tsain mauh. 48 Nyah ungwes uwus nyang lyis nyvng lhyi tsain mauh las nyah ungwes nyang lyis taiq zis gas, Lo eh, chamus nvng ngamoq lyis heisoeh kuot lah? Yoeuh aq, nah uwus yahge ngos gas nvng lyis sainhkhoh las xo nyeis, ge. 49 Nyang nyamoq lyis taiq zis gas, Chamus namoq ngos lyis xo goh? Ngos gas ngah Uwus dah yhen mha nyeis chah yvlyis namoq ma seq goh lhyeh, ge. 50 Nghuot laus eq nyang nyah aiq yuk lyis taiq dah dang lyis nyah aiq yuk ma seqgyo. 51 Housoeh nyang gas nyamoq yah dvgeh loh las Nazaret mas jweh lyis nyamoq sang dang gyo las nyeis. Nghuot laus eq nyah ungwes gas hauh dang dvnganh zis lyis nyah nhaiqlom mas comh toh. 52 Yesu gas gungs bes yvmas thyoh bes, joeui bos los las, Mangso xikkhonh mas eq, dius xikkhonh mas eq nyoqnho ngelang bos los. 1 Hwankti Kesar guon zis dvci oeng vzvn lyis Pontu Pilat gas Yuda mau lyis, Herod gas Galile mau lyis, nyah vnoeuh Yuda gas Ituria yahge Trakoni lyis, Lisani gas Abili lyis guon nyeis uhlyis, 2 Anna yahge Kayapa gas phudyei zainsmuh tsain nghuot. Hauh uhlyis, Mangso dah dang gas mhanhdyvp mas nyeis, Zekharia dah lo Yohan jyank mas jweh los. 3 Nyang gas Yodan lvng vwi vyvm dvkhauyah jweh las yaunos masyah nhaiqlom thaiq zis yah jeisnyhop kham geh, Mangso ka namoq dah yaunos khyuot dyei das, ge taiq hoeuh nyeis. 4 Lvpe Esaia dah maussauh mas lhaih toh vgus, mhanhdyvp mas dvyuk kaiq nyeis dah thwe ka, Yhensain dah cho lhyi tsain sont toh geh; Nyah chokhyoh lyis soq dan geh. 5 Langhkhau khanghmuh yoh tyink das, Boms khanghmuh, jing khanghmuh lyis chink khyoq das; Cho yauhyot lyis yoh xiq das, Cho guih lyis yoh lhoq dan das. 6 Cangsoeu dius dvnganh Mangso dah khyuot yoeus cho lhyi nyvng das, ge. 7 Yohan ka nyah jyank mas jeisnyhop kham das xiklyis tsain los dah dius moqjens lyis taiq zis gas, Ywimuhtsanh vnyau eh, jweh los das dah nhaiqlom dyis masyah cangh das zis namoq lyis hank yah taiq kyingh goh lah? 8 Housoeh yvmvyah nhaiqlom thaiq zis yah mon yih dah vshih shih geh. Namoq ehnyet mas Abraham gas namoq dah phauh thyeih nghuot, oen vtaiq zo goh; khasoeh ge lyis, ngos namoq lyis taiq bah, Mangso ka haih lukzains masyah Abraham xiklyis lo jens yoh thuq los nhang. 9 Gvshih yangh wuzung gas saiqzains khyei mha toh goeus. Housoeh yvmvyah gis dah vshih ma shih dah vzains khanghmuh lyis thoeuq las nyi mas kat das. 10 Dius jens nyang lyis nyei zis gas, Housoeh lyis ngamoq cha kuot das lah, ge. 11 Nyang nyamoq lyis phuk taiq zis gas, Thoq dyi aiq dung yoh soeu ka ma yoh soeu lhyi gvm dyei bas jungh; zonoms yoh soeu eq vgus housoeh kuot bas jungh, ge. 12 Khoengh khywi bang eq jeisnyhop kham das ge nyah jyank mas lyih las taiq zis gas, Svra eh, ngamoq cha kuot das lah, ge. 13 Nyang nyamoq lyis taiq zis gas, Toeuq toh dah vgus masyah jyeq las vkhywi yoeus goh, ge. 14 Jeslo jens eq nyang lyis nyei zis gas, Ngamoq cha kuot das lah, ge. Nyang nyamoq lyis phuk taiq zis gas, Hank lyis eq lyi ma bos khyvlyis ngwis vlhyent yoeus goh; ma jus khyvlyis zau vkauq goh, namoq nyang dah uhkung phauh yah nhaiqtap geh, ge. 15 Dius jens gas, Yohan ka Meshia mvbeh, ge nghamhloms zis yah nyamoq ehnyet mas tsain nghamh yoeuh nyeis. 16 Yohan nyamoq dvnganhmoq lyis phuk taiq zis gas, Ngos gas namoq lyis jeis mas jeisnyhop dyei: nghuot laus eq ngah thoq lyis yombos soeu dvyuk ngah thang mha los nyeis. Ngos gas nyah thyvkoq twih phui das zis yangh ma mon. Nyang gas namoq lyis Gyingshang Dyos yah eq, nyi yah eq jeisnyhop dyei das. 17 Nyang nyah thanjang mas guk lhank das xiklyis hauq chi toh. Nyang gukmos lyis jyi mha kat toh las, guksom lhyi ka ma jom nyi mas ngheq das, ge. 18 Housoeh nyang gas gohtoeu taiq kyingh dang nyoshoq yah eq dius jens lyis gausyis dang taiq kyoh. 19 Mau nyei boms dvboms lyis guon dah zau Herod gas nyah vnoeuh Philip dah yhensain nyhiq Herodia cho yahge, Herod kuot dah ma shop muh dvnganh gvng mas eq nyang nyho zis xauh. 20 Hau thang lhyi Herod gas Yohan lyis thung lhunk zis yah nyang gas zes ma gis dah muh kuot goeus. 21 Dius jens dvnganh jeisnyhop dye kham thang lhyi Yesu eq jeisnyhop kham. Nyang shvmanh dung nyeis lyis maukhung phank los las, 22 Gyingshang Dyos gas khotjyauh gungs teh zis nyah thoq mas gyoh lyih. Hauh uhlyis maukhung mhayah thwe dvkoeuq thuq los zis gas, Nvng gas ngos jyetdap dah ngah Lo nghuot, ngos nvng lyis nhaiqdoeus, ge. 23 Yesu gas muh kuot xi loh lyis, somhci zvn ko nghuot; Nyang gas dius jens nghamh vgus, Yosep dah lo khyvlyis nghuot. Yosep gas Heli dah lo; 24 Heli gas Mathat dah lo; Mathat gas Lewi dah lo; Lewi gas Melki dah lo; Melki gas Yanai dah lo; Yanai gas Yosep dah lo; 25 Yosep gas Matathia dah lo; Matathia gas Amo dah lo; Amo gas Nahum dah lo; Nahum gas Esli dah lo; Esli gas Nagai dah lo; 26 Nagai gas Maat dah lo; Maat gas Matathia dah lo; Matathia gas Semein dah lo; Semein gas Yosek dah lo; Yosek gas Yoda dah lo; 27 Yoda gas Yoanan dah lo; Yoanan gas Resa dah lo; Resa gas Zerubabe dah lo; Zerubabe gas Shealtiel dah lo; Sheatiel gas Neri dah lo; 28 Neri gas Melki dah lo; Melki gas Adi dah lo; Adi gas Khosam dah lo; Khosam gas Elmadam dah lo; Elmadam gas Era dah lo; 29 Era gas Yoshua dah lo; Yoshua gas Elieza dah lo; Elieza gas Yorim dah lo; Yorim gas Mathat dah lo; Mathat gas Lewi dah lo; 30 Lewi gas Simon dah lo; Simon gas Yuda dah lo; Yuda gas Yosep dah lo; Yosep gas Yonam dah lo; Yonam gas Eliakim dah lo; 31 Eliakim gas Melea dah lo; Melea gas Mena dah lo; Mena gas Matatha dah lo; Matatha gas Nathan dah lo; Nathan gas Dawi dah lo; 32 Dawi gas Yese dah lo; Yese gas Obed dah lo; Obed gas Boaz dah lo; Boaz gas Salmon dah lo; Salmon gas Nashon dah lo; 33 Nashon gas Aminadab dah lo; Aminadab gas Admin dah lo; Admin gas Arni dah lo, Arni gas Hezron dah lo; Hezron gas Pere dah lo; Pere gas Yuda dah lo; 34 Yuda gas Yakop dah lo; Yakop gas Isak dah lo; Isak gas Abraham dah lo; Abraham gas Tera dah lo; Tera gas Nahor dah lo; 35 Nahor gas Serug dah lo; Serug gas Reu dah lo; Reu gas Peleg dah lo; Peleg gas Eber dah lo; Eber gas Shela dah lo; 36 Shela gas Kainan dah lo; Kainan gas Arphaza dah lo; Arphaza gas Shem dah lo; Shem gas Noa dah lo; Noa gas Lamek dah lo; 37 Lamek gas Methusela dah lo; Methusela gas Enok dah lo; Enok gas Yared dah lo; Yared gas Mahalalel dah lo; Mahalalel gas Kenan dah lo; 38 Kenan gas Enosh dah lo; Enosh gas Set dah lo; Set gas Adam dah lo; Adam gas Mangso dah lo nghuot. 1 Hauh thang lhyi Yesu gas Gyingshang Dyos dyingh las Yodan lvng masyah tauh loh lyis, Dyos yah mhanhdyvp pheh shwih loh. 2 Houmha nyeici nyeih Satan yah shiwu zis xauh; hauh buisnyeis gyo lyis nyang gas cha eq ma zo las, thang thank lyis nyang wom yuot. 3 Housoeh las yius nyang lyis taiq zis gas, Nvng Mangso dah Lo nghuot lyis gas, haih lukgoq lyis ohlhyoq bweh nhang aq, ge. 4 Yesu nyang lyis phuk taiq zis gas, Dius gas ohlhyoq yah kyingh yoh dwis nyeis zis ma nghuot, ge lhaih toh, ge. 5 Tsai, yius gas nyang lyis boms nyhang thoq mas shwih doq loh las, mungkvn mas dah munghdan dvnganh lyis dvdvm dyvm chixoeuq. 6 Yius gas, Haih yomsoq yahge dis cho dvnganh yah ngos nvng lyis dyei das. Khasoeh ge lyis hauh zis gas ngos lyis kyauh toh goeus las, ngos dyei mes soeu hank lyis eq yoh dyei. 7 Nvng ngos lyis paiq lyis gas, hai dvnganh yah nah zis nghuot das, ge. 8 Yesu nyang lyis phuk taiq zis gas, Nvng Yhensain nah Mangso lhyi paiq las, nyang lyis kyingh phuqsoe chah, ge lhaih toh, ge. 9 Tsai, yius gas nyang lyis Yerusalem mas shwih loh las, Yhenmuh thyoh mas yap nhang lha taiq zis gas, Nvng Mangso dah Lo nghuot lyis gas hei mhayah o mha dyvm gyoh aq. 10 Khasoeh ge lyis lhaih toh zis gas, Nvng lyis gomh das xiklyis Mangso ka nyah loeuswons bang lyis tying toh das. 11 Nah khyei lukzains mas ma thungh das xiklyis nyamoq loq yah nvng lyis po langh das, ge. 12 Yesu phuk taiq zis gas, Nvng Yhensain nah Mangso lhyi vshi yoeuh ge lhaih toh, ge. 13 Yius gas Yesu lyis shiwu zis dvnganh dye goeus ya, nyah jyank masyah dvyoq gang loh. 14 Hou mhayah Yesu gas Galile mau pheh tauh loh. Gyingshang Dyos dah yomsoq gas nyang mas bos joq. Hauh uhlyis nyah cho dvmau yah hoeuh loh. 15 Nyang nyamoq dah lyi jungs mas jyauh las nyamoq dvnganhmoq nyang lyis chungh. 16 Housoeh nyang nyeis bes los dah Nazaret mas jweh loh las, nyah thungh yah dvyhangteh Yuda No Buisnyeis lyis lyi jungs mas wvng loh. Houmha nyang maussauh nghap das xiklyis toq yap. 17 Lvpe Esaia maussauh dain nyang lyis dyei los las, nyang hauh yvlyis phank lyis heisoeh ge lhaih toh yvlyis nyvng. 18 Yhensain dah Dyos ngah thoq mas nyeis. Khasoeh ge lyis nyungs bang lyis gausyis dang taiq kyoh das xiklyis, Nyang ngos lyis coeu juot dyei. Lhunk toh bang lyis phank kat das xiklyis, nyoqjet bang doms nyvng das xiklyis, zaiq toh las shanghsenh zis xauh bang luiq das xiklyis taiq kyoh das nyhenshang nyang ngos lyis nhang kat. 19 Yhensain nhaiq doeus zvn lyis taiq hoeuh das, ge. 20 Dye lyis nyang hauh maussauh nyheih las uhshe soeu lhyi doms dyei lho lha tsung toh. Hauh lyi jungs mas bang dvnganh nyang lyis yoeuh tsuk toh. 21 Housoeh nyang nyamoq lyis taiq zis gas, Hai lhaihtoh dang gas khvnyhik nyang namoq dah no mas nyuk los goeus, ge. 22 Dvnganhmoq yah nyah cho lhyi kanghjyoeng kat dyei zis yahge, nyah nhuot masyah thuq los dah jyehjuh dang lyis mauh las, Haih soeu ka Yosep dah lo ma nghuot lhyeh, ge. 23 Housoeh las nyang nyamoq lyis taiq zis gas, Namoq gas ngos lyis, Lastsiang eh, nvnyang gungs lyis yhohzo aq; ngamoq xauhgyo ku vgus, Kaperna-um mas kuot teh nvnyang mau mas eq kuot xoeuq aq, ge sodang yah tsain taiq los das, ge. 24 Nyang taiq zis gas, Ngos namoq lyis jyoengh taiq bah, lvpe lhyi nyah choq thyet mau mas lhom yoeus zis ma bos, ge. 25 Nghuot laus eq ngos namoq lyis jyoengh taiq bah, Eliya zaih lyis maukhung lhyi somh zvn lhamhmuh khyuk khyvp mau ma wus las, mau gonh mas panghkhauq gyoh los lyis Israel vnyau mas chauhmuh nyoshoq nyeis khoq ku. 26 Nghuot laus eq Sidon mau Zarephat mha dah chauhmuh dvyuk mas lai las gohyuk hank jyank mas eq Eliya lyis ma nhang kat. 27 Lvpe Elisha zaih lyis eq Israel mau mas mvnggvng dap bang nyoshoq nyeis khoq; Siria dius Naman mas lai las nyamoq mas gohyuk hank eq ma yoh thyauhlhang los, ge. 28 Haih dang xauhgyo lyis lyi jungs mas bang dvnganh gas nhaiqlom dyis zis yah, 29 toq las nyang lyis wus nghe pheh khat thuq las nyamoq wus kuot toh dah jing mhung mhayah vtauh khyvlyis duon thyet khyoq das ge tsain shwih loh. 30 Nghuot laus eq nyang gas nyamoq dah vjo masyah thuq las loh lo. 31 Yesu gas Galile mau Kaperna-um wus mas loh las, Yuda No Buisnyeis lyis nyang dius jens lyis jyauh. 32 Nyang gas vmingh yah taiq yvmvyah nyamoq gas nyang jyauh cho lhyi mauh. 33 Hauh uhlyis lyi jungs mas yius kuq dah dius dvyuk nyeis, nyang gas yomkat kaiq las, 34 Nazaret phoq Yesu eh, nvng ngamoq yah cha sen lah? Nvng ngamoq lyis mhont das xiklyis los lhyeh? Ngos nvng hank nghuot zis seq; Nvng gas Mangso dah Gyingshang Soeu nghuot, ge. 35 Hauh uhlyis Yesu gas nyang lyis, Tsoek! nyah jyank masyah thuq loh aq, ge nyho. Housoeh las yius gas hauh soeu lhyi dvm ma dap nhang nhang nyamoq vgungs mas toeulhain tyamp khoq las nyah jyank masyah thuq loh. 36 Housoeh las dvnganhmoq mauh las nyamoq nyang changh taiq goh nyeis zis gas, Haih zis gas chah dang nghuot au lhyeh? Zaudang yah eq, yomsoq yah eq yius lyis taiq kat las nyamoq thuq loh, ge. 37 Housoeh las hauh mau vyvm vwi joqyos khyiq khanghmuh mas nyah cho tsain taiq hoeuh loh. 38 Nyang lyi jungs masyah thuq loh las, Simon dah yhen mha wvng loh. Houmha Simon dah yuknyih gungs svsoh ngeh las nos nyeis. Nyamoq gas nyah nyhenshang Yesu lyis sang. 39 Housoeh las nyang nyah nvm mas yap las hauh nos lyis nyho tyamp lho lhyi nyang gungs ngeh zis gis los. Nyang houjang toq las nyamoq lyis daih. 40 Buis wvng zoh lyis noslom vja ja yah nos moq yoh bang dvnganh gas hauh bang lyis nyah jyank mas shwih lyih; nyang gas nyamoq yuk khanghmuh dah thoq mas loq kih dyei las gis los nhang. 41 Yius jens eq, nyoshoq moq masyah, Nvng gas Mangso dah Lo nghuot, ge kaiq las tsain thuq loh. Nyamoq gas nyang Meshia nghuot yvlyis seq yvmvyah nyang nyamoq lyis dang ma yoh jis lo shoq nyho. 42 Nyoq nyvng los lyis nyang gas mhanhdyvp pheh loh. Dius jens gas nyang lyis chank xo lha, nyah jyank mas jweh lyis, nyang lyis nyamoq jyank masyah ma gang loh das xiklyis tomp. 43 Yesu nyamoq lyis taiq zis gas, Gohwus gohthomh mas eq Mangso munghdan gausyis dang ngos loh taiq kyoh chah: khasoeh ge lyis hauh nyhenshang ngos lyis nhang kat, ge. 44 Housoeh nyang gas dvmau gonh mas dah lyi jungs mas tsain taiq hoeuh. 1 Dvlhain ka Yesu Genesaret thomh yvm mas yap joq dah uhlyis moqjens gas Mangso dang gyo yoeus das xiklyis nhoenk los. 2 Hauh uhlyis nyang gas jyank yvm mas lhyik aiq koeuq joq yvlyis nyvng. Oeng nhoh bang gas lhyik masyah thuq las nyho tsain cheih nyeis. 3 Nyang gas Simon dah lhyik khau mha wvng lho lha, tungyos masyah dvtsiq we loh das xiklyis Simon lyis sang. Housoeh nyang tsung lha moqjens lyis jyauh. 4 Nyang dang dye taiq lyis Simon lyis taiq zis gas, Jeis nauh yvmas ywi las nyho doeuh aq, ge. 5 Simon nyang lyis phuk taiq zis gas, Yhensain eh, ngamoq nyens gonh kuot nyung goeus, nghuot laus eq nah dang masyah ngos nyho doeuh bah, ge. 6 Nyamoq nyho doeuh zis yah dvyhangteh oengdoq nyoshoq xauh doeuh yoeus las nyho eq juiq bah ge loh. 7 Housoeh nyamoq gas gohtoeu lhyik mas dah loeuzomh jens lyis los bos pangh das xiklyis uk nyeis. Nyamoq los las lhyik aiq koeuq mas dyingh las nyop loh bah ge loh. 8 Simon Petru hauh zis nyvng lyis, Yesu dah khyeiyang mas gyuis gyoh las taiq zis gas, Yhensain eh, ngah jyank masyah gang loh aq: Khasoeh ge lyis ngos gas yaunos wons soeu nghuot, ge. 9 Khasoeh ge lyis nyamoq oengdoq hounyhoq tsain xauh yoeus yvmvyah, nyang eq, nyang yah dvgeh bang dvnganhmoq eq mauh. 10 Simon dah oengnhoh changh Zebedi dah lotang Yaku yahge Yohan eq tsain mauh. Yesu Simon lyis taiq, Vgyuk, gvshih masyah nvng dius nhoh das, ge. 11 Nyamoq lhyik lyis jyankyvm mas dvp loh lho lhyi, nyamoq vyhang dvnganh tsain toh khoq las nyah thang mha chank loh. 12 Nyang wugungs dvkoeuq mas nyeis lyis, yoeuh aq, dvgungs yah mvnggvng dap soeu dvyuk Yesu lyis nyvng lyis, dupaiq las dung zis gas, Yhensain eh, nvng bauh nghuot lyis gas ngos lyis yoh thyauhlhyang los nhang, ge. 13 Hauh uhlyis Yesu gas nyang nyah loq yhuonh kat las, nyang lyis tanh uhlyis yah, Ngos mes, nvng thyauhlhyang los aq ge lho lhyi, houjang nyah gungs mas mvnggvng gas dyuk loh. 14 Yesu gas, hank lyis eq ma taiq kyoh das xiklyis khyangh com lho lha taiq zis gas, Loh aq, gohyhamh bang dah xiklyis kanghjyoeng nghuot bas jungh, phudyei soeu jyank mas nah gungs loh chixoeuq aq, Moshe lyi vgus, nvng thyauhlhyang los goeus gvng mas loh phudyei khoq aq, ge. 15 Nghuot laus eq Yesu dah cho ka zes hoeuh loh. Dius moqjens gas nyah dang gyo yoeus das zis yahge nos yhoh yoeus das xiklyis tsain zain los. 16 Nghuot laus eq nyang gas mhanhdyvp pheh thuq loh las shvmanh dung nyeis. 17 Dvnyeih gas, nyang nyamoq lyis jyauh nyeis lyis, Galile mau, Yuda mau yahge Yerusalem, wus khanghmuh mas dah Pharishe jens yahge lyi svra jens eq, nyah nvm thaq los tsung toh. Nyamoq lyis gis los nhang das xiklyis Yhensain dah yomsoq gas nyah jyank mas bos joq. 18 Yoeuh aq, gungsjen shei soeu dvyuk lyis yhetyos masyah nyamoq dvng lyih las, nyah xikkhonh mas wvng das xiklyis cho tsain xo. 19 Nghuot laus eq dius sunk nyo yvmvyah nyang lyis khasoeh kuot las dvng hwank das cho xo ma nyvng las, nyamoq gas yhenkhung mha doq loh las yhenkhung phank lho lha, hauh soeu lhyi nyah yhetyos yah dvgeh moqphung vgungs, Yesu dah xikkhonh mas juons khyoq kat. 20 Nyang nyamoq dah lomsjingh nhaiqlom lyis nyvng lyis nyang lyis taiq zis gas, Buisnoms eh, nah yaunos khyuot dyei goeus, ge. 21 Hauh uhlyis maussauh lhaih bang yahge Pharishe moq gas, heisoeh loeusmus soqzo dang taiq soeu ka hank nghuot lah? Mangso kyingh ma nghuot lyis gas, yaunos hank yoh khyuot dyei lah, ge. 22 Nghuot laus eq nyamoq nghamh zis lyis Yesu seq yvmvyah, nyamoq lyis phuk taiq zis gas, Namoq ehnyet mas chamus housoeh tsain nghamh goh lah? 23 Nah yaunos khyuot dyei goeus oen zis yahge, Toq yap las suh loh aq, oen zis kha khonh zes taiq lwis lah? 24 Nghuot laus eq cangsoeu Lo gas nyeisjvng thoq mas yaunos yoh khyuot dyei dah vmingh yoh zis gas namoq seq das xiklyis hauh gungsjen shei soeu lhyi, Ngos nvng lyis taiq bah, Toq aq, nah yhetyos yoeus las nah yhen pheh loh aq, ge. 25 Houjang nyang nyamoq xikkhonh masyah toq las, nyah yhetyos yoeus lho lha Mangso lhyi chungh uhlyis yah nyah yhen pheh loh. 26 Nyamoq dvnganhmoq mauh dvn las Mangso lhyi chungh nyeis; nyamoq gyuk las taiq zis gas, Khvnyhik ngamoq muh gohtseq nyvng goeus, ge. 27 Hauh thang lhyi nyang thuq loh lyis khoengh khywi jang mas Lewi ge dah khoengh khywi soeu tsung toh zis lyis nyvng las nyang lyis, Ngah thang mha chank los aq, ge. 28 Nyang gas dvnganh toh khoq las nyah thang mha chank loh. 29 Lewi gas Yesu lyis nyah yhen mha pwe zainsmuh dvkoeuq kuot dyei; houmha khoengh khywi bang yahge gohtoeu nyoshoq moq dvgeh tsung toh. 30 Housoeh las Pharishe moq yahge nyamoq dah maussauh lhaih bang dvyhamh gas, Namoq khoengh khywi bang yahge yaunos wons bang yah dvgeh chamus zo shuk goh lah, ge nyah changlo jens lyis tsain lop. 31 Yesu nyamoq lyis phuk taiq zis gas, Yanghzan bang gas mvcheih lastsiang ma chah, nos bang dvchah. 32 Dan bang lyis khi das xiklyis ngos lyih zis ma nghuot; yaunos wons bang nhaiqlom thaiq das xiklyis dvnghuot, ge. 33 Nyamoq, nyang lyis taiq zis gas, Yohan dah changlo jens gas Pharishe dah changlo jens teh dvsoq soq lyis womkyi lha shvmanh dung; nghuot laus eq nah changlo jens gas zo shuk nyeis, ge. 34 Nyang nyamoq lyis taiq zis gas, Nyi hwank pwe los bang lyis, nyamoq loloeu saiq yah dvgeh nyeis shih lyis wom yoh kyi nhang das lah? 35 Nghuot laus eq, loloeu saiq lyis nyamoq jyank masyah shwih loh buisnyeis jweh los das, hauh uhlyis nyamoq womkyi das, ge. 36 Nyang nyamoq lyis dangtoeuq dvkoeuq taiq zis gas, Dyi saiq masyah misseh chuiq las dyi tyang mha hank ma pho; housoeh kuot lyis gas, dyi saiq eq juiq las, vcauh eq dyisaiq seh yah ma phi goh das. 37 Zvbiq saiq eq shohyeis thung cauh mas hank ma kat, shohyeis thung cauh mas zvbiq jeis saiq kat lyis gas, zvbiq jeis saiq gas hau thung lhyi juiq nhang zis yah zvbiq shuon lha shohyeis thung eq monh das. 38 Nghuot laus eq zvbiq saiq lyis gas shohyeis thung saiq mas kat chah. 39 Zvbiq vcauh shuk goeus soeu ka vsaiq lyis ma o: Khasoeh ge lyis vcauh gas gis ge taiq, ge. 1 Yuda No Buisnyeis dvnyeih lyis, Yesu gas sunghso yos cho yah lai loh. Hauh uhlyis nyah changlo jens gas sunghso nham lhyi shap las loq yah tsain nis phuk zo loh. 2 Housoeh las Pharishe dvyhamh nyamoq lyis taiq zis gas, Yuda No Buisnyeis lyis kuot das lyi ma bos zis lyis chamus kuot goh, ge. 3 Yesu nyamoq lyis phuk taiq zis gas, Dawi nyang yahge nyah dyenschangh jens gas, yuot shet dah uhlyis, cha kuot khoq zis lyis namoq ma nghap yoeuh goh lhyeh? 4 Nyang gas Mangso dah yhen khau mha wvng loh las, phudyei bang kyingh ma nghuot lyis gas, hank eq ma gis zo, chixoeuq ohlhyoq lyis nyah dyenschangh jens lyis eq dyei las, tsain zo ma nghuot lhyeh, ge. 5 Nyang nyamoq lyis taiq zis gas, Cangsoeu Lo gas Yuda No Buisnyeis dah Yhensain nghuot, ge. 6 Gohtoeu Yuda No Buisnyeis lyis nyang gas lyi jungs mha wvng las jyauh nyeis; houmha loqyos loq shei soeu dvyuk nyeis. 7 Maussauh lhaih bang yahge Pharishe moq gas, nyang lyis yoh kauq shoq Yuda No Buisnyeis lyis nyang nos bang lyis vgis los nhang dvluk, ge tsain zungh yoeuh nyeis. 8 Nghuot laus eq nyamoq nghamh zis lyis Yesu seq las, loq shei soeu lhyi, Heimha los yap aq, ge lyis nyang toq yap joq. 9 Yesu nyamoq lyis taiq zis gas, Ngos namoq lyis dvja nyei yoeuh bah, Yuda No Buisnyeis lyis gis cho kuot das zis lyi bos lah? ma gis cho kuot das zis lyi bos lah? Kang kyoeu gis lah, mhont gis lah, ge. 10 Hauh thang lhyi nyang gas vyvm vwi mas nyamoq lyis tsain yoeuh lho lha, nyang nos soeu lhyi taiq zis gas, Nah loq yhuonh kat aq, ge. Nyang loq yhuonh kat lyis nyah loq gis los. 11 Nghuot laus eq, nyamoq gas nhaiq gis yo las, Yesu lyis khasoeh kuot das lah, ge nyang changh nyang xamgoh nyeis. 12 Hauh buisnyeis gyo lyis, Yesu gas shvmanh dung das xiklyis boms mas doq loh las dvnyens gonh Mangso lhyi shvmanh dung nyeis. 13 Nyoq nyvng los lyis nyah changlo jens lyis khi yoeus las nyamoq masyah dvci aiq yuk khyen yoeus lho lha, nyamoq lyis lvgyo jens ge nyhink. 14 Hauh bang gas, Yesu yah Petru ge nyings nyhink dyei dah Simon yahge nyah vnoeuh Andre; Yaku yahge Yohan; Philip; Bartholomeu; 15 Mathe yahge Thoma; Alphe dah lotang Yaku yahge Zelot ge soeu Simon; 16 Yaku dah lo Yuda yahge phanhlyen soeu Yudas Iskarot moq nghuot. 17 Yesu gas lvgyo jens yah dvgeh jing masyah gyoh loh las jangpa mha nyah changlo jens dius phung zainsmuh yah dvgeh yap joq. Hauh yvmas Yuda mau gonh mas bang, Yerusalem mas bang, thomh yvm Taire yahge Sidon mau mas bang bos. 18 Nyamoq gas nyah dang gyo yoeus das zis yahge, nyamoq dah nos zis gis los das xiklyis tsain los. Yius yah yau dyei zis xauh bang eq los las gis los nhang zis xauh. 19 Yhensain dah gungs mas yomsoq thuq las dvnganhmoq lyis gis los nhang yvmvyah moq dvphung gonh nyang lyis xauh tanh das xiklyis tsain yomkat. 20 Housoeh nyang nyah changlo jens lyis nghank yoeuh las taiq zis gas, Namoq nyungs bang gas ngelhoq: Khasoeh ge lyis Mangso munghdan gas namoq zis nghuot. 21 Namoq gvshih yuot shet nyeis bang gas ngelhoq: Khasoeh ge lyis namoq jo los das. Namoq gvshih ngaus nyeis bang gas ngelhoq: Khasoeh ge lyis namoq yis das. 22 Cangsoeu Lo gvng mas namoq lyis hoeng zis yah kangh tyamp las jwangh zis yah namoq nyings lyis ma gis khyvlyis nghamh las lhoeu thyoq zis xauh lyis namoq ngelhoq. 23 Hauh buisnyeis lyis tsain gausyis las jywe nyeis geh: Khasoeh ge lyis maukhung mha namoq lyis phauh shangh zis gas svsoh kuh. Nyamoq dah phauh thyeih moq eq lvpe jens lyis housoeh teh kuot ku. 24 Nghuot laus eq namoq dis bang gas mvtanhzoe nghuot! Khasoeh ge lyis namoq gas pyo pyo xauh nyeis goeus. 25 Gvshih namoq jo buk nyeis bang gas mvtanhzoe nghuot! Khasoeh ge lyis namoq yuot shet zis xauh das. Namoq gvshih yis nyeis bang gas mvtanhzoe nghuot! Khasoeh ge lyis namoq gas kukxi zis yahge ngaus zis xauh das. 26 Dius dvnganhmoq namoq lyis gis, ge taiq lyis namoq mvtanhzoe nghuot! Khasoeh ge lyis namoq dah phauh thyeih moq eq lvpe hwah jens lyis housoeh teh taiq khoq ku. 27 Namoq gyo yoeus bang lyis ngos taiq bah, Namoq dah jeswus lyis jyetdap geh. Namoq lyis hoeng bang lyis eq gis khyvlyis kuot dyei geh. 28 Namoq lyis nhoengh bang lyis shvmanh dyei geh; namoq lyis laihwangh bang lyis shvmanh dung dyei geh. 29 Nah bvlot dvshot los tyuk soeu lhyi, gohtoeu dvshot eq lhaiq dyei shih aq; nah thoq dyi yoeus soeu lhyi nah dyi lyis eq yoeus nhang shih aq. 30 Nvng lyis sang soeu lhyi dyei aq; nah kyahsoe zisyos yoeus loh soeu jyank masyah vdoms sang lo. 31 Gohyuk yah namoq lyis khasoeh kuot dyei nhang mes lyis namoq eq nyamoq lyis housoeh nyang kuot dyei geh. 32 Namoq lyis jyetdap bang lyis kyingh namoq doms phuk jyetdap lyis gas, namoq xiklyis chah jyehjuh bos lah? Khasoeh ge lyis yaunos wons bang yangh vsainnyang lyis jyetdap bang lyis gas jyetdap. 33 Namoq lyis gis zis kuot bang lyis kyingh gis khyvlyis phuk kuot lyis gas, namoq xiklyis chah jyehjuh bos lah? Khasoeh ge lyis yaunos wons bang eq housoeh gas kuot. 34 Yoh doms cap das teh bang lyis za dvjyeih dvnghoh dyei lyis gas namoq xiklyis chah jyehjuh bos lah? Khasoeh ge lyis yaunos wons bang yangh yaunos wons bang lyis yoh doms cap das nyhoq jyeih dyei. 35 Nghuot laus eq namoq dah jeswus lyis jyetdap aq, nyamoq lyis gis zis kuot geh; doms xauh yoeus das oen ma nghamh jyeih nghoh dyei geh; housoeh lyis namoq khyik manh phauh gas kuh das. Nyhang thank thoq mas Soeu dah lo jens eq namoq duot das: khasoeh ge lyis nyang gas jyehjuh ma seq nghamh bang yahge ma gis bang lyis nhaiqnyen nyeis. 36 Housoeh yvmvyah namoq dah Uwus nhaiqnyen zis yah dvyhangteh, namoq eq nhaiqnyen nyeis geh. 37 Soe vtuon goh, housoeh lyis namoq eq soetuon zis ma xauh das. Yobos vhuon goh, housoeh lyis namoq eq yobos huon zis ma xauh das. Khyuot dyei geh, housoeh lyis namoq eq khyuot dyei zis xauh das. 38 Dyei geh, housoeh lyis namoq lyis dyei das: jyoeng pan mhayah dyingh muis shoq lhvvq jying lha namoq dah dyithang khau mha dyei das: Khasoeh ge lyis namoq laiq dyei pan mhayah namoq lyis doms laiq dyei das. 39 Nyang nyamoq lyis dangtoeuq yah taiq zis gas, nyoqjet soeu ka nyoqjet soeu lhyi cho yoh she goh das lah? Aiq yuk yah dwang mas ma gyoh das lah? 40 Changlo gas svra thoq lyis zes zis ma nghuot: nghuot laus eq dyinghjet shoq xuq goeus soeu hank laus eq nyah svra teh nghuot das. 41 Nah nyoqjeih mas bos dah thangh-tungh lyis ma nghamh yoeuh, nah vmang vnoeuh nyoqjeih mas bos dah phvlhau lhyi chamus yoeuh nyeis lah? 42 Vsainnyang dah nyoqjeih mas dah thangh-tungh yangh ma nyvng zis, Vmang vnoeuh eh, nah nyoqjeih mas dah phvlhau lhyi ngos yoeus tyamp dyei bah, oen nah vmang vnoeuh lyis khasoeh yoh taiq lah? Gis guons kuot soeu eh, nah nyoqjeih mas dah thangh-tungh lyis shih cangxeih yoeus tyamp aq; hauh thang lhyi nah vmang vnoeuh nyoqjeih mas dah phvlhau lhyi yoeus tyamp dyei das zis dede nyvng das. 43 Khasoeh ge lyis, saiq gis zains mas ma gis dah vshih ma shih; ma gis dah saiqzains mas eq gis dah vshih ma shih. 44 Housoeh las saiqzains khanghmuh lyis nyah vshih masyah yoh seq: Khasoeh ge lyis zoeu zains masyah maiphang shih hank ma thyoq yoeus ku; zoeu gyomh masyah eq zvbiq shih hank ma thyoq ku. 45 Gis soeu ka nyah gis dah nhaiqlom zisyos masyah gis zis thuq kat. Ma gis soeu eq nyah ma gis dah nhaiqlom masyah ma gis zis thuq kat: Khasoeh ge lyis nhaiqlom mas dyingh las nhuot mas taiq thuq los. 46 Ngos taiq zis yah dvyhangteh ma tsain kuot zis, ngos lyis Yhensain eh, Yhensain eh, oen chamus lui goh lah? 47 Ngah jyank mas los las, ngah dang gyo yoeus zis yah chank kuot bang hank lyis laus eq, nyang hank yah doeusgoh zis lyis ngos chixoeuq das. 48 Nyang gas lukmuh lom thoq mas noq noq doeu cuk toh dah yhen tsuk soeu yah doeusgoh: jeis je los las changhphauq doeuh lyis eq hauh yhen lhyi ma yoh lhoq nhont: Khasoeh ge lyis hauh zis gas lukmuh lom thoq mas ci toh. 49 Nghuot laus eq xauhgyo thang lhyi ma chank dah soeu ka, yhen lhyi ma ci, nyeisjvng mas kuot soeu yah doeusgoh. Hauh yhen lhyi jeisbaus yah guons las houjang lains loh; hauh yhen dyoqbis tyamp, ge. 1 Yesu dius jens lyis dvnganh dye jyauh goeus ya, Kaperna-um wus mas wvng loh. 2 Hauh uhlyis jes dvxo guon zau jyetdap dah jyeidwis gas nos las shei loh nyeis. 3 Nyang Yesu dah loeus xauhgyo las, Yuda jens dah logis jens lyis Yesu jyank mas, nyah jyeidwis lyis lyih lhoq gis dyei das xiklyis sang nhang kat. 4 Nyamoq Yesu jyank mas jweh lyis, nyang lyis khyoeuq taiq zis gas, Nvng haih zis kuot dyei das xiklyis nyang gas mon yih soeu nghuot. 5 Nyang gas yah vnyau lyis jyetdap yvmvyah, yah xiklyis lyi jungs eq dvkoeuq kuot dyei soeu nghuot, ge. 6 Housoeh las Yesu gas nyamoq yah dvgeh chank loh. Nyang hauh yhen yah khahweq ma we yvmas jweh lyis, jes dvxo guon zau gas nyah dyenschangh lyis yah taiq nhang kat zis gas, Yhensain eh, nvng lyis ma thauqkhyi lo goeus jungh, nvng ngah yhen nyhangh mau khau mas wvng das zis ngos ma mon. 7 Housoeh ngos eq nah jyank mas lyih das zis ma mon oen ngos nghamh; nghuot laus eq nah dang dvkhonh yah taiq kat aq. Housoeh lyis ngah jyeidwis gis los das. 8 Khasoeh ge lyis ngos gas vmingh khau mha dah dius dvyuk nghuot las, ngah o mha eq jeslo jens nyeis: ngos haih soeu lhyi, Loh aq, oen lhyi nyang loh. Gohtoeu dvyuk lyis, Los aq, oen lhyi nyang los. Ngah jyeidwis lyis, Haih zis kuot aq, oen lhyi nyang kuot, ge. 9 Yesu gas hauh zis xauhgyo lyis, nyang lyis mauh las nyah thang mha chank yenh bang lyis lhain yoeuh las, Ngos namoq lyis taiq bah, Israel dius nyau mas yangh hei iq lomsjingh zis ngos ma nyvng, ge. 10 Hau nhang kat zis xauh bang yhen mha doms jweh loh lyis, hauh jyeidwis gas gis nyeis langh goeus zis lyis nyvng. 11 Ma nyangh lyis nyang gas Na-in ge dah wukhau mha loh lyis nyah changlo jens yahge moqjens eq nyang yah dvgeh loh. 12 Nyang wus khomh jweh ni los lyis, Yoeuh aq, chauhmuh dvyuk dah loloeu loteh shei lha mvng tsain dvng nyhop loh: wugungs dius nyoshoq eq nyang yah dvgeh nghuot. 13 Yhensain ka hauh chauhmuh lyis nyvng lyis nhaiq yoeuh nyen las, nyang lyis, Vngaus, ge. 14 Nyang loh las, koncaih lyis tanh lho lhyi, mvng dvng bang gas no yap joq. Housoeh nyang gas, Loyvm phoq eh, ngos nvng lyis taiq bah, Toq aq, ge. 15 Shei soeu ka toq tsung lha dang jis los. Housoeh Yesu gas nyah ungwes lyis kyauh kat. 16 Dvnganhmoq gyuk los las, nyamoq Mangso lhyi chungh zoh lyis yah taiq zis gas, Lvpe zainsmuh dvyuk yamoq mas thuq los goeus; Mangso ka nyah dius lyis lyih komh yenh, ge. 17 Housoeh las hai nyah loeus gas Yuda mau gonh yahge hauh vyvm vwi mas tsain taiq hoeuh loh. 18 Yohan dah changlo jens gas hauh cho dvnganh Yohan lyis loh taiq kyoh. 19 Yohan gas nyah changlo aiq yuk lyis khi lha, Yesu jyank mas nhang lha taiq zis gas, Nvng gas lyih das soeu nghuot lah? Nghuot ya ngamoq gohtoeu lhyi langh shih das lah, ge. 20 Nyah aiq yuk eq nyah jyank mas jweh lyis, Nvng gas hau jweh los das soeu nghuot lah? Nghuot ya ngamoq gohyuk lyis langh shih das lah, ge jeisnyhop dyei soeu Yohan ngah aiq yuk lyis nah jyank mas nyei nhang kat, ge. 21 Hauh shishenh lyis nyang, nyang gas nos bang, yomh, yius kuq bang nyoshoq lyis gis los nhang; nyoqjet bang nyoshoq lyis eq nyvng los nhang. 22 Yesu nyamoq lyis phuk taiq zis gas, Namoq nyvng las xauhgyo zis Yohan lyis loh taiq kyoh geh: nyoqjet bang nyoq nyvng los, khyei gyau bang yoh suh loh, mvnggvng dap bang thyauh lhyang loh, nojet bang no gyo los, shei goeus bang eq doms dwis los nhang zis xauh las, nyungs bang lyis gausyis dang taiq kyoh nyeis. 23 Ngos mas ehnyet dyet zis ma bos soeu hank laus eq ngelhoq, ge. 24 Yohan dah loeuswons bang aiq yuk loh khoq thang lhyi, Yesu gas Yohan cho dius phung lhyi taiq zis gas, Namoq mhanhdyvp pheh cha loh yoeuh goh? Lyeis muot kamh dah jvmbu lyis lhyeh? 25 Housoeh lyis cha loh thuq yoeuh goh? Lungphauq dyi wuot soeu lhyi lah? Yoeuh aq, nhamp dah dyimis wuot las zogis shuklhoq zo bang gas hwankti yhen mha nyeis. 26 Housoeh lyis cha loh thuq yoeuh goh? Lvpe lhyi lah? Nghuot goeus, ngos namoq lyis taiq bah, lvpe thoq lyis zes kuh soeu nghuot. 27 Yoeuh aq, nah cho sont das zis ngos ngah loeuskyoh soeu lhyi nah xik pheh nhang kat, ge lhaih toh zis gas nyah cho nghuot. 28 Ngos namoq lyis taiq bah, vmesbih masyah khoeu bang mas jeisnyhop dyei soeu Yohan thoq lyis kuh soeu hank ma bos. Nghuot laus eq Mangso munghdan mas ngis thank soeu ka nyah thoq lyis zes kuh, ge. 29 Khoengh khywi bang yahge dius jens dvnganhmoq gas, Yohan dah dang xauhgyo lyis, nyah jeisnyhop lyis tsain kham zis yah, Mangso ka dan, ge nyamoq rhen. 30 Pharishe jens yahge Lyi svra jens gas, Yohan dah jeisnyhop lyis ma kham yoeus, Mangso toeuq toh cho lhyi peq tyamp. 31 Housoeh las Yhensain taiq zis gas, Haq caiq mas bang, nyamoq cha yah doeusgoh zis lyis ngos cha yah byi das lah? 32 Nyamoq gas kaih jang mas tsung lha, dvyuk yah dvyuk lui goh las, Ngamoq gas namoq lyis khvlhank muot dyei lyis eq namoq ma goh, Ngamoq kukxi lyis eq namoq ma ngaus, ge dah loshang jens yah doeusgoh. 33 Khasoeh ge lyis jeisnyhop dyei soeu Yohan gas, ohlhyoq eq ma zo, zvbiq eq ma shuk jweh los lyis namoq gas, Nyang mas yius bos, tsain ge. 34 Yoeuh aq, Cangsoeu Lo gas zo shuk uhjyangh lyih lyis, Womlvm soeu, zvbiq yet soeu, khoengh khywi bang yahge yaunos wons bang dah dyenschangh, tsain ge. 35 Nghuot laus eq Mangso dah joeui ka jyoeng yvlyis hau joeui dah lo jens yah tuonh shet nyeis. 36 Pharishe dvyuk gas nyang yah dvgeh wom zo das zis nyang lyis khi; nyang eq Pharishe dah yhen khau mha wvng las womjus mas tsung toh. 37 Yoeuh aq, hauh wugungs mas yaunos wons dah vmesbih dvyuk gas Yesu Pharishe yhen mha wom zo das zis tsung toh zis lyis seq lyis, xangh coeu luk jywanglo dvkoeuq chi lyih las, 38 Nyah khyeiyang nungstsaink mas ngaus yap uhlyis yah Yesu khyei mha nyoqdyeis yah jyweq los las, nyah uhloms mas cam yah buot las nyah khyei lhyi bvlot tanh zis yah coeu juot dyei. 39 Nyang lyis khi dah Pharishe hauh yvlyis nyvng lyis, nyah ehnyet mas, Haih soeu lvpe nghuot lyis gas, nyang lyis tanh dah haih vmesbih gas hank nghuot zis eq, yaunos wons dah soeu nghuot zis lyis eq nyang seq wondoeus, ge. 40 Yesu nyang lyis phuk taiq zis gas, Simon eh, ngos nvng lyis taiq das zis dvja bos, ge. Nyang gas, Svra eh, taiq aq, ge. 41 Yesu gas, jyeih dyei soeu dvyuk mas jyen dap soeu aiq yuk bos: dvyuk mas ngwis kyvp oengxo, gohtoeu dvyuk mas oengci nghuot. 42 Nyah aiq yuk gas jyen cap das zis ma yoh yvmvyah nyah aiq yuk lyis khyuot tyamp dyei goeus. Housoeh lyis hau aiq yuk mas nyang lyis khayuk zes jyetdap das lah, ge. 43 Simon phuk taiq zis gas, Zes nyoshoq khyuot tyamp dyei zis xauh soeu nghuot das oen ngos nghamh, ge. Nyang taiq zis gas, Nvng jus khyvlyis soetuon goeus, ge. 44 Housoeh nyang gas vmesbih jyank pheh xoeu lha Simon lyis taiq zis gas, Haih vmesbih lyis nvng nyvng ma nghuot lhyeh? Ngos nah yhen mha wvng los lyis nvng ngos lyis khyei cheih jeis ma dyei: nghuot laus eq nyang gas nyah nyoqdyeis yah ngah khyei mha taiqh dyei las, nyah cam yah buot dyei. 45 Nvng ngos lyis bvlot ma tanh, nghuot laus eq haih vmesbih gas ngos wvng los masyah ma lyen lo ngah khyei mha bvlot tanh nyeis. 46 Nvng ngah uhloms lyis coeu eq ma juot dyei, nghuot laus eq haih vmesbih gas ngah khyei lhyi xangh coeu juot dyei. 47 Housoeh yvmvyah ngos nvng lyis taiq bah, nyah yaunos nyoshoq lyis khyuot dyei zis xauh goeus yvmvyah nyang zes las jyetdap nyeis. Dvmhauh khyuot dyei zis xauh soeu ka nainlo dvjyetdap, ge. 48 Hauh vmesbih lyis eq, Nah yaunos khyuot tyamp dyei goeus, ge nyang lyis taiq. 49 Nyang yah dvgeh womjus mas tsung toh bang, nyamoq ehnyet mas taiq zis gas, Yaunos yangh yoh khyuot dyei soeu haih zis gas hank nghuot lah, ge. 50 Nyang hau vmesbih lyis taiq zis gas, Nah lomsjingh zis gas nvng lyis khyuot yoeus goeus, nyenstap zis yah loh lo aq, ge. 1 Hauh thang lhyi khanyhank ma nyangh lyis nyang gas Mangso munghdan gausyis dang lyis taiq hoeuh uhjyangh wus yahge wukhau khanghmuh jweh loh. Changlo dvci aiq yuk moq eq nyang yah dvgeh nghuot. 2 Yius kuq zis yahge noslom nyoshoq masyah gis los nhang zis xauh dah vmesbih jens dvyhamh, yius nyhet doeu thuq loh goeus dah Magdala ge soeu Mari; 3 Herod dah ziszom Khuza dah yhensain nyhiq Yoana yahge Susana, gohtoeu nyoshoq moq eq nyamoq yoh zisyos yah nyang lyis phuqsoe uhjyangh nyang yah dvgeh tsain chank yenh. 4 Wugungs khanghmuh masyah dah dius phung nyah jyank mas huom los lyis, nyang dangtoeuq yah taiq zis gas, 5 Jyo khyoq soeu ka nyah jyo nyau sanh das xiklyis thuq loh. Nyang sanh kat lyis dvkhamh gas chokhyoh mas gyoh las svbih yah nang nheh zis yahge mau dang nghoq jens yah lyih kui zo tyamp. 6 Dvyhamh gas lukjvp yos mas gyoh loh. Hauh zis gas yuk los laus eq nyeissoq ma nam yvmvyah nyhauh loh. 7 Dvyhamh gas zoeu gyomh mas gyoh loh, hauh zis gas zoeu zains yah dvgeh yuk kuh los las hauh yvlyis huop tyamp. 8 Gohtoeu ka nyeisjvng gis yvmas gyoh las, yuk kuh los lyis vshih eq dvxo huon je los. Nyang haih zis dye taiq lyis, Gyo yoeus das no dap soeu ka xauhgyo bas jungh, ge. 9 Nyah changlo jens nyang lyis nyei zis gas, Haih dangtoeuq gas cha ge mes lah, ge. 10 Nyang taiq zis gas, Maukhung munghdan dah nghop toh cho ka namoq lyis seq nhang goeus. Nghuot laus eq gohyhamh bang lyis gas ngos dangtoeuq yah dvtaiq. Housoeh nyamoq yoeuh laus eq ma nyvng, gyo laus eq ma seqgyo, ge. 11 Gvshih haih dangtoeuq gas heisoeh nghuot: jyo nyau gas Mangso dah Dang nghuot. 12 Cho mha gyoh zis gas, hauh zis lyis xauhgyo lyis nyamoq lomsjingh las khyuot yoeus zis ma xauh das xiklyis, yius los las nyamoq nhaiqlom mas dah dang lyis yoeus tyamp zis xauh bang nghuot. 13 Luk thoq mas gyoh zis gas, nyamoq hau dang xauhgyo lyis gausyis zis yah dang lyis lhom yoeus laus eq vnyet ma chent yvmvyah, dvyoq kyingh lomsjingh las shiwu zis xauh lyis nungsdoms loh bang nghuot. 14 Zoeu gyomh mas gyoh zis gas, xauhgyo thang lhyi chiq cho, dis los cho yahge pyo cho yah huop las mos dah vshih ma shih bang nghuot. 15 Nghuot laus eq nyeisjvng gis yvmas gyoh zis gas, gis dah ehnyet yah dang lyis gyo yoeus lho lha wontang zwi zains toh las jhen zis yah vshih shih bang nghuot. 16 Nyibung lyis tuonh las dang yah nghop toh zis hank ma bos, jungjeis mas eq hank ma kat toh: wvng los bang bvng zis nyvng das xiklyis nyibung gus mas dvgyangh tuonh toh. 17 Khasoeh ge lyis, ma chixoeuq shoq gauh shung toh zis cha eq ma bos; ma seq ma nyvng shoq nghop toh zis cha eq ma bos. 18 Housoeh yvmvyah namoq khasoeh xauhgyo zis lyis zaih nyeis geh. Khasoeh ge lyis, yoh bang lyis lung dyei das; ma yoh bang jyank masyah gas nyamoq yoh joq teh zis yangh yoeus tyamp dyei das. 19 Hauh uhlyis nyah ungwes yahge nyah vwik jens gas nyah jyank mas jweh lyih las dius puk thoeu yvmvyah nyah jyank mas ma tsain yoh wvng loh. 20 Housoeh nyang lyis taiq los zis gas, Nah ungwes yahge nah vwik jens nvng yah xauhgoh mes las nghe mha los tsain yap joq, ge. 21 Nyang nyamoq lyis phuk taiq zis gas, Mangso dang lyis xauhgyo las, hauh yvlyis chank kuot bang gas ngah ungwes yahge ngah vwik jens nghuot, ge. 22 Dvnyeih gas nyang nyah changlo jens yah dvgeh lhyik khau mha wvng tsung lha nyamoq lyis taiq, Yang thomh thyitvp pheh goeu e goh, ge nyamoq goeu loh. 23 Housoeh nyamoq goeu loh nyeis lyis Yesu gas yhet joq. Houmha lyeismuh jyang muot yvmvyah chont mas jeis dyingh los las, nyamoq gudwvng bah ge. 24 Housoeh las nyamoq gas nyang lyis loh nhauh uhlyis yah taiq zis gas, Svra eh, svra eh, ngamoq shei bah ge loh nyeis, ge. Housoeh nyang toq las lyeis yahge jeisphauq lyis nyho lho lhyi, hauh zis gas tam loh las sam joq. 25 Nyang nyamoq lyis taiq zis gas, Namoq dah lomsjingh zis gas khalhye gah, ge. Hauh uhlyis nyamoq gyuk mauh las, Haih soeu ka hank nghuot lah? Lyeis yahge jeisphauq lyis taiq kat lyis, nyah domsyos tsain gyo, ge nyang changh nyang tsain taiq goh. 26 Nyamoq gas Galile thyitvp Gerasa ge dah mau mas jweh loh. 27 Nyang tungyos pheh thuq suh loh lyis houmha hauh wus mas dah yius kuq dah yukgis dvyuk yah xauhgoh. Hauh soeu ka shishenh nyangh nyangh dyimis ma wuot, yhen mha eq ma nyeis, lopkhyam mha kyingh dvnyeis. 28 Nyang Yesu lyis nyvng yah dvyih kaiq zis yah xikkhonh mas gop las, Nyhang thank Mangso dah Lo Yesu eh, Nvng ngos yah cha sen lah? Nvng ngos lyis ma shoeuhshih das xiklyis ngos dung, ge thwe zainsmuh yah taiq. 29 Khasoeh ge lyis Yesu gas hauh yius lyis hauh dius yuk jyank masyah thuq loh das xiklyis vmingh dyei yvmvyah nghuot. Vlhain lhain nyang lyis kuq las shamjvng yah twih las kyomh kyomh toh lyis eq, lang phaiq thyet las yius gas nyang lyis mhanhdyvp pheh shwih loh loh mus. 30 Yesu nyang lyis nyei zis gas, Nah nyings cha nghuot, ge. Nyang gas, Nyoshoq nghuot: Khasoeh ge lyis nyah vkhau mha yius nyoshoq lungh joq. 31 Nyamoq lyis noq thank dwang chuk buiq mas ma khat tyamp das xiklyis nyang lyis dung. 32 Hauh jingkank mas wuq dvjens bot zo nyeis: nyamoq gas hauh wuq jens mas wvng nhang aq, ge nyang lyis vmingh sang nyeis las nyang gyo dyei. 33 Hauh uhlyis yius jens gas dius jyank masyah thuq las wuq jens mas tsain wvng loh. Wuq jens gas gammhung mhayah tyauq gyoh las thomh mas ciang shei. 34 Wuq yoeuh bang hauh zis nyvng yvmvyah cangh loh las, wugungs yahge wukhau mha loh tsain taiq kyoh. 35 Nyamoq eq bweh goeus cho lhyi yoeuh das xiklyis thuq loh las Yesu jyank mas jweh lyis, vkhang yius thuq loh goeus dah dius gas yos yos lyis dah ehnyet teh, dyimis wuot las Yesu dah khyeiyang mas tsung toh zis lyis nyamoq nyvng las gyuk. 36 Hauh zis lyis nyvng bang gas, vkhang yius kuq soeu lhyi khasoeh kuot las gis los nhang zis nyamoq lyis taiq kyoh. 37 Hauh uhlyis Gerasa mau vyvm vwi mas dah somhloh moqjens dvnganhmoq gas, nyang lyis nyamoq jyank masyah thuq loh das xiklyis tsain dung: Khasoeh ge lyis nyamoq svsoh gyuk. Nyang gas chont khau mha wvng tsung lha tauh loh. 38 Nghuot laus eq yius cangh thuq loh goeus soeu ka, nyang yah dvgeh nyeis das xiklyis nyang lyis khyoeuq nyeis. Nghuot laus eq Yesu gas nyang lyis nhang kat uhlyis yah taiq zis gas, 39 Nah yhen mha tauh loh las, Mangso nvng lyis kha iq kuot dyei goeus zis loh taiq hoeuh aq, ge. Nyang eq loh las Yesu nyah xiklyis kha iq kuhxing zis kuot dyei goeus zis lyis dvwus gonh, joqyos khanghmuh mas taiq hoeuh loh. 40 Housoeh Yesu tauh loh lyis, dius jens gas nyang lyis gauslaus zis yah lhom yoeus: Khasoeh ge lyis nyamoq dvnganhmoq gas nyang lyis tsain langh nyeis. 41 Yoeuh aq, Yairu ge, lyi jungs uhjyung dvyuk los las, Yesu dah khyeiyang mas gyuis las, nyah yhen mha los das xiklyis khyoeuq nyeis. 42 Khasoeh ge lyis, dvci aiq zvn ko dah nyah lonyi loteh gas shei loh nyeis. Nyang e loh nyeis lyis moqjens yah nyang lyis duon nyhenh los. 43 Dvci aiq zvn suih shuon lha nos dah vmesbih dvyuk gas, nyang yoh goeu dvnganh mvcheih lastsiang jens jyank mas yhung mhont tyamp lyis eq, hank eq nyang lyis ma thyeh yhoh gis dyei. 44 Nyah nungsthank dyithang mha tanh lho lhyi, nyang suih shuon zis houjang doms tyamp. 45 Yesu gas, Ngos lyis hank tanh, ge nyei. Dvnganhmoq yah he uhlyis, Petru yahge nyang yah dvgeh nghuot bang taiq zis gas, Svra eh, moqjens nvng lyis tsain duon nyhenh los lyis, Ngos lyis hank tanh lah, ge. 46 Yesu gas, Dvyuk ngos lyis tanh goeus, khasoeh ge lyis ngah gungs masyah yomsoq thuq loh zis ngos seq, ge. 47 Hauh vmesbih gas ma yoh zauh toh zis lyis seq goeus ya, tyik tyik nvn zis yah nyah xikkhonh mas gyuis gyoh las, nyang lyis chamus tanh zis yahge houjang nyang khasoeh gis los zis lyis taiq thuq. 48 Yesu nyang lyis taiq zis gas, Lonyi eh, nhaiq dainh lo aq, nah lomsjingh zis gas nvng lyis gis los nhang goeus; nyenstap zis yah loh lo aq, ge. 49 Nyang housoeh taiq nyeis lyis, lyi jungs uhjyung dah yhen mha bang dvyuk los las, Nah lonyi shei goeus; Svra lyis vthauqkhyi nyeis lo, ge. 50 Hauh dang Yesu xauhgyo lyis phuk taiq zis gas, Vchiq, lomsjingh ehnyet dvbos aq, housoeh lyis nah lonyi gis los das, ge. 51 Housoeh nyang yhen khau mha jweh loh lyis, Petru, Yaku yahge Yohan, nyelo dah ungwes uwus masyah lai las gohyuk hank lyis eq ma wvng nhang. 52 Dvnganhmoq yah ngaus las hauh nyelo xiklyis shei uh tsain ngauh nyeis laus eq nyang taiq zis gas, Vngaus goh, nyang ma shei, dvyhet joq, ge. 53 Hauh nyelo shei goeus zis lyis tsain seq yvmvyah, nyamoq gas nyang lyis jwangh yis. 54 Nghuot laus eq nyang, nyah loq lyis zwi las, Nyelo eh, toq aq, ge lui lho lhyi, 55 nyah dyos doms los las, nyang houjang toq los. Yesu gas, nyang lyis zonoms dyei das zis nyamoq lyis taiq toh. 56 Nyah ungwes uwus gas mauh: laus eq bweh goeus cho hank lyis eq ma taiq kyoh das xiklyis, nyang nyamoq lyis khyangh com. 1 Hauh thang lhyi Yesu gas nyah changlo dvci aiq yuk lyis khi yoeus las, yius dvnganh lyis ung das zis yahge noslom gis los nhang das yomsoq yahge toeuh dyei las, 2 Mangso munghdan cho lhyi taiq kyoh das xiklyis eq, nos bang lyis gis los nhang das xiklyis eq nyang nyamoq lyis nhang kat. 3 Nyang nyamoq lyis taiq zis gas, Gyung cho xiklyis lhamloq, bvtmuh, ohlhyoq, ngwis, dyi aiq dung, cha eq vchi goh. 4 Namoq kha yhen mha wvng loh lyis eq hauh wukhau mhayah doms thuq loh shishenh jweh shoq houmha nyeis geh. 5 Hank laus eq namoq lyis ma lhom yoeus nghuot lyis gas, namoq hauh wukhau mhayah doms thuq loh dah uhlyis nyamoq xikkhonh mas kanghjyoeng duot das xiklyis namoq khyei mha dap dah phvlhau lhyi ko khyoq toh khoq geh, ge. 6 Housoeh nyamoq tsain thuq loh las, wugungs khanghmuh mas gausyis dang taiq hoeuh yenh uhlyis yah joqyos khyiq khanghmuh mas nos bang lyis gis los nhang. 7 Gvshih nyei boms dvboms guon soeu hwankti Herod gas nyang kuot dah muhzoh dvnganh yvlyis xauhgyo lyis, nyang gas nhaiqlom svsoh ma nyens ma tap mus nyeis: khasoeh ge lyis, dvyhamh bang gas, Yohan gas shei masyah dwis toq los. 8 Dvyhamh gas Eliya jweh los. Gohtoeu dvyhamh gas, Gohnhamp dah lvpe dvyuk dwis toq los, ge. 9 Herod gas, Ngos Yohan lhyi uhloms thyet goeus: nghuot laus eq ngos hei iq xauhgyo tsuk toh soeu ka hank nghuot lah? Nyang lyis nyvng mes, ge. 10 Lvgyo jens tauh los las, nyamoq kuot goeus dah cho dvnganh nyang lyis tsain taiq kyoh. Nyang gas nyamoq lyis shwih las, Betsaida wus pheh jhank loh. 11 Nghuot laus eq dius jens seq las nyah thang mha tsain chank loh. Housoeh nyang nyamoq lyis lhom yoeus las Mangso munghdan cho lhyi taiq kyoh. Nos gis los mes bang lyis gis los nhang. 12 Nyenhthang buis wvng loh lyis dvci aiq yuk moq nyang lyis los taiq zis gas, Haih zis mhanhdyvp dvnghuot yvmvyah, moqjens lyis vwi vyvm wukhau mha yhet das joqyos yahge xo zo das xiklyis nyamoq lyis nhang kat aq, ge. 13 Nyang taiq zis gas, Nyamoq lyis namoq zonoms dyei geh, ge. Hauh uhlyis nyamoq phuk taiq zis gas, Haih dius dvnganhmoq xiklyis gas ngamoq loh wis zis ma nghuot lyis gas, ohlhyoq oeng koeuq yahge oengdoq aiq doeu mas lai las ngamoq cha eq ma yoh, ge. 14 Khasoeh ge lyis yukgis jens oeng khyoengh ko nghuot. Nyang nyah changlo jens lyis taiq zis gas, Dvhuom mha oengci ci tsung nhang geh, ge. 15 Nyamoq eq housoeh kuot las dvnganhmoq lyis tsung nhang. 16 Hauh thang lhyi ohlhyoq oeng koeuq yahge oengdoq aiq doeu lyis nyang yoeus chi lha, maukhung mha nghank yoeuh las shvmanh dung thang lhyi khyiq las moqjens lyis gvm dyei das nyhenshang changlo jens lyis dyei. 17 Nyamoq dvnganhmoq zo jo thang lhyi, nyet dah vpop vsop kui tsainh lyis dvci aiq dang nghuot. 18 Hauh thang lhyi nyang kyingh shvmanh dung nyeis uhlyis, nyah changlo jens eq nyang yah dvgeh nyeis las, nyang nyamoq lyis nyei zis gas, Moqjens ngos lyis hank nghuot ge goh lah, ge. 19 nyamoq phuk taiq zis gas, Dvyhamh gas, Jeisnyhop dyei soeu Yohan; dvyhamh gas, Eliya; gohtoeu dvyhamh gas, gohnhamp dah lvpe dvyuk dwis toq los, tsain ge, ge. 20 Nyang nyamoq lyis taiq zis gas, Namoq gas ngos lyis hank nghuot oen goh lah, ge. Petru phuk taiq zis gas, Nvng gas Mangso dah Khristu nghuot, ge. 21 Hauh zis hank lyis eq ma taiq das xiklyis nyang nyamoq lyis khyangh wontang com toh. 22 Housoeh nyang taiq zis gas, Cangsoeu Lo gas shanghsenh zis nyoshoq xauh las, maussauh lhaih bang, phudyei uhjyung jens yahge logis jens yah peq tyamp las, nyang lyis sat thang lhyi somh vnyeih lyis dwis toq los das, ge. 23 Housoeh nyang dvnganhmoq lyis taiq zis gas, Dvyuk yuk ngah thang chank soeu duot mes lyis gas, nyah gungs lyis nungsyos toh las nyeih khanghmuh nyah tapzains wuq las ngah thang mha chank bas jungh. 24 Khasoeh ge lyis vsainnyang kang lhyi khyuot yoeus mes soeu ka kang dyuk das. Nghuot laus eq ngah gvng mas kang dyuk soeu ka kang yoh das. 25 Dius gas mungkvn gonh lyis sain toh laus eq, nyah kang dyuk tyamp lyis gas nyah xiklyis chah vkyuh bos lah? 26 Hank laus eq ngos yahge ngah dang lyis xoq soeu lhyi ka, cangsoeu Lo gas nyah phunk yah, Uwus dah phunk yahge gyingshang loeuswons bang dah phunk yah jweh lyih lyis nyang lyis eq xoq das. 27 Nghuot laus eq ngos namoq lyis jyoengh taiq bah, heimha yap joq bang mas dvyhamh gas Mangso munghdan ma nyvng dvchank gas ma shei das, ge. 28 Hauh dang taiq thang lhyi xet nyeih ko lhyi, Yesu gas Petru, Yaku, Yohan moq lyis shwih las, shvmanh dung das xiklyis boms mas doq loh. 29 Nyang shvmanh dung nyeis lyis nyah nyoqnho vwot thaiq los las, nyang wuot dyi eq thyoeu lha kyi kyi bvng. 30 Vbusbih aiq yuk, Moshe yahge Eliya gas nyang yah dang jis goh nyeis yvlyis nyamoq nyetlos nyettant nyvng. 31 Nyah aiq yuk gas phunk yah thuq los las, Yesu Yerusalem mas kuot nyhuk chah dah nyang shei chah cho lhyi taiq goh nyeis. 32 Nghuot laus eq Petru yahge nyang yah dvgeh nghuot vzomh gas yhet tsain nguis nyeis zis gying soh los lyis, nyah phunk yahge nyang yah dvgeh yap joq vbusbih aiq yuk lyis nyvng. 33 Hauh vbusbih aiq yuk nyah jyank masyah gang loh nyeis lyis, Petru gas Yesu lyis, Svra eh, heimha yang nyeis das xiklyis gis, yang zvng somh koeuq kuot goh, Nvng, Moshe, Eliya xiklyis dvyuk dvkoeuq ge las nyang cha taiq nyeis zis nyang ma seq taiq. 34 Nyang housoeh taiq nyeis lyis, jyommauh yah nyamoq lyis nghop las, nyamoq hau vkhau mha wvng loh nyeis lyis nyamoq gyuk los. 35 Hauh thang lhyi jyommauh khau mhayah eq thwe dvkoeuq thuq los zis gas, Haih soeu ka ngos khyen toh, ngos jyetdap Lo nghuot; nyah dang gyo geh, ge. 36 Hauh thwe dye taiq lyis, Yesu dvyuk lyis kyingh dvnyvng lo: hauh yoq lyis nyamoq tsoeklo nyeis las, nyamoq nyvng zis lyis hank lyis eq ma taiq kyoh. 37 Nungs nyeih nyamoq boms masyah gyoh los lyis, dius nyoshoq moq nyang lyis zes langh. 38 Yoeuh aq, dius phung mhayah yukgis dvyuk gas kaiq las, Svra eh, ngah lo lyis yoeuh dyei das zis ngos nvng lyis dung: khasoeh ge lyis nyang gas ngah loteh nghuot. 39 Yoeuh aq, yius yah kuq dah uhlyis gas chuot las nyetlos nyettant kaiq los. Nyop vdoe doe mulas yius yah nyang lyis nos shoq shoeuhshih las khayhoq eq nyang yah ma gang loh. 40 Nyang lyis khat thuq dyei das xiklyis nah changlo jens lyis ngos dung yoeuh goeus; nghuot laus eq nyamoq ma yoh khat tyamp. 41 Yesu phuk taiq zis gas, Lomsjingh cho ma bos, ma shop dah caiq mas bang eh, ngos namoq yah dvgeh khanyhank jweh shoq nyeis las namoq lyis jhen dyei nyeis das lah? Nah lo lyis heimha shwih los aq, ge. 42 Loshang los nyeis uhlyis, yius yah kuq lhain kat las chuot nhang. Nghuot laus eq Yesu gas yius lyis nhant las loshang lo lyis gis los nhang lha nyah uwus lyis doms kyauh kat. 43 Nyamoq dvnganhmoq Mangso dah yomsoq zains lyis tsain mauh. Nyang kuot dah muhzoh dvnganh gvng mas tsain mauh nyeis lyis nyang nyah changlo jens lyis taiq zis gas, 44 Namoq haih dang lyis wontang gyo yoeus geh: khasoeh ge lyis Cangsoeu Lo gas svbih loq mas phanhlyen dyei zis xauh das, ge. 45 Nghuot laus eq nyamoq gas nyang cha lhyi taiq zis ma seqgyo: khasoeh ge lyis haih zis gas nyamoq jyank masyah nghop shung toh. Nyang lyis nyamoq hauh cho nyei das zis tsain gyuk. 46 Hauh uhlyis nyamoq mas kuh thank zis hank, ge taiq phyen-goh thuq los. 47 Yesu gas nyamoq ehnyet mas nghamh zis lyis seq las, loshang dvyuk lyis nyah vyvm mas shwih toh las, 48 Nyang nyamoq lyis taiq zis gas, Ngah nyings masyah haih loshang lhyi lhom yoeus soeu hank laus eq, ngos lyis lhom yoeus zis nghuot. Ngos lyis lhom yoeus soeu hank laus eq ngos lyis nhang kat soeu lhyi lhom yoeus zis nghuot. Khasoeh ge lyis namoq dvnganhmoq mas ngis thank soeu ka, kuh thank soeu eq nghuot, ge. 49 Yohan phuk taiq zis gas, Svra eh, nah nyings yah yius khat thuq soeu dvyuk lyis ngamoq nyvng. Nyang ngamoq mas zis ma nghuot yvmvyah, nyang lyis tomp toh, ge. 50 Yesu nyang lyis taiq zis gas, Nyang lyis vtomp toh goh: khasoeh ge lyis namoq lyis tyi ma xo soeu ka namoq shot pheh zis nghuot, ge. 51 Nyang lyis toqh yoeus das shishenh jweh los nyeis lyis, nyang gas Yerusalem mas e das zis lyis wontang nghamh tsuk zains toh. 52 Nyah xik pheh loeuswons bang lyis nhang kat. Nyah xiklyis cicont sont toh dyei das nyhenshang nyamoq gas Samari wukhau dvkoeuq mas wvng loh. 53 Nyah nyoqnho ka Yerusalem pheh loh das teh dvdoeus yvmvyah nyamoq gas nyang lyis ma tsain lhom yoeus. 54 Nyah changlo tang Yaku yahge Yohan hauh zis lyis nyvng las taiq zis gas, Yhensain eh, nyamoq lyis ngheq tyamp das zis ngamoq lyis maukhung mha dah nyi vkhi khyoq nhang mes lah, ge. 55 Nghuot laus eq nyang lhain yoeuh las nyah aiq yuk lyis nyho. 56 Hauh thang lhyi Yesu yahge nyah changlo jens gas gohwus pheh loh. 57 Hauh thang lhyi nyamoq cho mha loh nyeis lyis dius dvyuk Yesu lyis taiq zis gas, Nvng khalhye loh khalhye ngos nah thang mha chank das, ge. 58 Yesu nyang lyis taiq zis gas, Womkhuih jens eq khyung bos; mau dang nghoq jens eq sot yoh; nghuot laus eq Cangsoeu Lo gas nyah uhloms toh das joqyos ma yoh, ge. 59 Nyang gas gohtoeu dvyuk lyis, Ngah thang mha chank los aq, ge. Nyang taiq zis gas, Yhensain eh, ngah uwus lyis shih loh nyhop khoq nhang aq, ge. 60 Nghuot laus eq Yesu nyang lyis taiq zis gas, Shei bang lyis gas nyamoq dah shei bang nyang nyhop bas jungh: nvng gas Mangso munghdan cho loh taiq hoeuh aq, ge. 61 Tsai, gohtoeu dvyuk eq, Yhensain eh, ngos nah thang chank das: nghuot laus eq ngah yhen mha nyeis bang lyis shih loh jeshuh khoq bah, ge. 62 Yesu nyang lyis taiq zis gas, Khont zwi las nungs pheh lhain yoeuh soeu hank laus eq Mangso munghdan yah ma mon, ge. 1 Yhensain ka gohtoeu nyhetci aiq yuk lyis eq toeuq kat las, nyamoq lyis nyang loh das wukhau khyiq khanghmuh mas aiq yuk dvtwi twi nyah xik mas nhang kat. 2 Nyang nyamoq lyis taiq zis gas, Jyo yhomh das zis nyoshoq bos laus eq, muh zwi bang nain. Housoeh yvmvyah jyo Yhensain ka nyah jyo yhomh das zis uhkung jens lyis nhang kat dyei bas jungh dung nyeis geh. 3 Namoq tsain loh geh, yoeuh aq, ngos namoq lyis womkhuih jens jo mas yvng lo jens lyis teh, nhang kat. 4 Ngwis thung, bvtmuh, thyvkoq teh zis cha eq vchi goh: cholvt mas hank lyis eq vjhent goh. 5 Namoq kha yhen mha wvng loh laus eq, Haih yhen mha nyenstap joq bas jungh, oen shih cangxeih taiq geh. 6 Hauh yhen mha nyenstap dah lo nyeis nghuot lyis gas, namoq dah nyenstap zis hauh soeu jyank mas doengs joq das, ma nyeis nghuot lyis gas, namoq dah nyenstap zis gas namoq jyank mas tauh los das. 7 Namoq hauh yhen mha nyang nyeis las, nyamoq gvmtsoh zis zo shuk geh: khasoeh ge lyis muh zwi soeu ka, nyah uhkung phauh yoh mon: dvyhen thang lhyi dvyhen vtyungh vlvng goh. 8 Namoq wvng loh dah wukhau mha laus eq, nyamoq lhom yoeus langh nghuot lyis gas, namoq xikkhonh mas khyoq dyei yvlyis tsain zo shuk geh. 9 Houmha nos bang lyis gis los nhang lha, Mangso dah munghdan gas namoq jyank mas ni los goeus, oen dius jens lyis taiq kyoh geh. 10 Nghuot laus eq namoq loh dah wus mas bang, namoq lyis ma lhom yoeus nghuot lyis gas, talhoeu pheh doms thuq las heisoeh oen taiq geh. 11 Ngamoq khyei mha dap, namoq wus mas dah phvlhau yangh namoq lyis yobos tuonh shet yvmas kanghjyoeng duot das nyhenshang ko khyoq toh khoq goeus; nghuot laus eq Mangso munghdan gas namoq jyank mas ni los goeus zis lyis soh geh, oen taiq kyoh geh. 12 Nghuot laus eq namoq lyis ngos taiq bah, hauh buisnyeis lyis Sodom wugungs kham zo zis gas, hauh wus thoq lyis sunghhuq das, ge. 13 Korazin eh, nvng mvtanhzoe nghuot! Betsaida eh, nvng mvtanhzoe nghuot! Khasoeh ge lyis namoq jyank mas nyvng nhang dah yomsoq zains muhzoh lyis Taire yahge Sidon mas nyvng nhang nghuot lyis gas, hauh wus mas bang gohnhamp yah yanghthung dyi wuot, nyiyvp boms mas lhoeuh las nhaiqlom yoh thaiq hah das. 14 Soetuon dah buisnyeis lyis Taire yahge Sidon xauh zis gas namoq thoq lyis sunghhuq das. 15 Kaperna-um eh, nvng maukhung jweh shoq chunghtoq zis xauh das lah, munyi thomh jweh shoq khyoq zis xauh das. 16 Namoq dah dang gyo soeu ka ngah dang gyo zis nghuot, Namoq lyis peq tyamp soeu ka ngos lyis peq tyamp zis nghuot. Ngos lyis peq tyamp soeu ka, ngos lyis nhang kat soeu lhyi peq tyamp zis nghuot, ge. 17 Hau nyhetci aiq yuk moq gas gauslaus zis yah tauh los las taiq zis gas, Yhensain eh, nah nyings masyah yius jens yangh ngamoq dah dang tsain gyo, ge. 18 Nyang nyamoq lyis doms taiq zis gas, Satan gas maunyoq nyik teh maukhung mhayah gyoh zis ngos nyvng goeus. 19 Yoeuh aq, lhangnoq yahge gungsgauh lyis nang nheh das zis yahge jeswus yomsoq dvnganh zis lyis ung tyamp das yomsoq gas, ngos namoq lyis dyei goeus yvmvyah, namoq lyis cha yah eq yoh nos nhang das zis ma nghuot. 20 Nghuot laus eq yius gas namoq dah dang gyo oen vgauslaus goh: namoq dah nyings maukhung mha lhaih toh yvmvyah dvgauslaus geh, ge. 21 Hauh shishenh lyis Yesu gas, Dyos mas gauslaus las heisoeh ge: Maukhung nyeisjvng dah Yhensain Uwus eh, joeui bos bang yahge ehnyet yik bang jyank masyah nvng haih cho jens lyis nghop shung toh las, lonoeuh jens lyis chixoeuq yvmvyah, ngos nvng lyis nhaiqshoqlang. Nghuot goeus Uwus eh, heisoeh bweh los zis gas nvng nhaiqdoeus khyvlyis nghuot. 22 Ngah Uwus gas ngos lyis dvnganh dyei toh goeus: Lo hank nghuot yvlyis Uwus mas lai las hank eq ma seq, Uwus hank nghuot yvlyis Lo yahge hauh Lo yah nyah cho chixoeuq das xiklyis khyen yoeus zis xauh soeu mha lai las hank ma seq. 23 Hauh thang lhyi nyang nyah changlo jens jyank pheh lhain yoeuh las gauh taiq zis gas, Namoq nyvng dah vyhang lhyi nyvng dah nyoq gas ngelhoq. 24 Khasoeh ge lyis ngos namoq lyis taiq bah, namoq nyvng yvlyis lvpe jens yahge hwankti jens nyoshoq nyvng mes laus eq ma xauh nyvng khoq. Namoq xauhgyo yvlyis gyo mes laus eq ma xauhgyo khoq, ge. 25 Yoeuh aq, lyi svra dvyuk toq yap las Yesu lyis shiwu zoh lyis yah taiq zis gas, Svra eh, vcaiq vto kang vso vlho xauh kham yoeus das xiklyis ngos cha kuot chah lah, ge. 26 Yesu nyang lyis taiq zis gas, Lyi maussauh mas cha lhaih toh? Nvng khasoeh seqgyo lah, ge lyis, 27 Nyang phuk taiq zis gas, Nah Yhensain Mangso lhyi nah nhaiqlom dvnganh yah, nah dyos dvnganh yah, nah yom dvnganh yah, nvng dolhain zis dvnganh yah jyetdap aq, nah yhenkyoh lyis eq nah gungs yah dvyhangteh jyetdap aq, ge. 28 Yesu doms taiq zis gas, Nvng taiq zis jus, housoeh kuot lyis kang yoh das, ge. 29 Nghuot laus eq nyang gas vsainnyang dan zis lyis seq nhang mes dah ehnyet yah taiq zis gas, Ngah yhenkyoh gas hank nghuot lah, ge. 30 Yesu phuk taiq zis gas, Dius dvyuk Yerusalem wus masyah Yerikho pheh gyoh e lhyi, khyanktau xauh. Hauh bang gas nyah dyi khyuot lho lha vnyhoq mvnos bat, dvmtap las vluk shei bah ge lyis toh khoq las tsain loh. 31 Hou cho yah phudyei soeu dvyuk suh lai jus las, hauh soeu lhyi nyvng lyis gohshot jhank lai loh. 32 Vgus Lewi dius dvyuk hauh yvmas jweh las nyang lyis loh yoeuh lho lha gohshot cho yah doms jhank lai loh. 33 Nghuot laus eq gyung suh loh dah Samari dvyuk hauh soeu jyank mas jweh las nyvng lyis nhaiq yoeuh nyen las, 34 nyah jyank mas loh las, nyah dvm mas coeu yahge zvbiq kat dyei lho lha misseh yah lyet dyei thang lhyi, nyah mauhlyihzoe thoq mas thuq loh las, boenghdoq yhen dvkoeuq mas shwih loh las dyangh dyei. 35 Thang lhyi nyeihyo nyang ngwis kyvp aiq koeuq yhensain lhyi lap dyei las taiq zis gas, nyang lyis bos dyangh aq, kha nyhoq jes gyoh zis ngos doms los uhlyis nvng lyis doms cap das, ge thuq loh. 36 Hau somh yuk mas khyanktau xauh soeu dah yhenkyoh gas khayuk nghuot oen nvng nghamh lah, ge nyei. 37 Nyang gas, Nyang lyis nhaiqnyen soeu nghuot, ge. Yesu taiq zis gas, Nvng eq houyah dvyhangteh loh kuot aq, ge. 38 Gvshih nyamoq loh lyis, nyang gas wukhau dvkoeuq mas wvng loh: houmha Matha ge dah vmesbih dvyuk gas, nyang lyis nyah yhen mha boengh lhom yoeus langh. 39 Nyang mas Mari ge dah vnoeuh dvyuk bos: nyang gas Yesu dah khyeiyang mas tsung lha nyah dang gyo nyeis. 40 Nghuot laus eq Matha gas phuqsoe dah muh lyis chiq yvmvyah, Yesu jyank mas los las taiq zis gas, Yhensain eh, ngah vnoeuh gas boengh daih cho mha ngos lyis kyingh doeuh gyomh toh dyei yvlyis nvng chaxwe ma nhang lhyeh? Nyang ngos lyis bos pangh das xiklyis taiq kat dyei aq, ge. 41 Yesu nyang lyis phuk taiq zis gas, Matha, Matha, nvng gas vyhang nyoshoq lyis ehnyet nyo las chiq nyeis. 42 Nghuot laus eq chah zis dvja kyingh dvnghuot: Mari gas gis zis lyis khyen yoeus goeus yvmvyah, hauh zis lyis nyah jyank masyah yoh yoeus tyamp dyei das zis ma nghuot, ge. 1 Dvlhain ka nyang joqyos dvdeh mas shvmanh dung nyeis. Nyang dye dung thang lhyi nyah changlo dvyuk nyang lyis taiq zis gas, Yhensain eh, Yohan eq nyah changlo jens lyis shvmanh dung jyauh yhangteh, ngamoq lyis eq jyauh aq, ge. 2 Nyang nyamoq lyis taiq zis gas, Namoq shvmanh dung lyis heisoeh dung geh: Ngamoq dah Uwus eh, Nah nyings gyingshang nyeis bas jungh. Nah munghdan jweh los bas jungh. 3 Ngamoq chah dah wom jeis ngamoq lyis nyeih yau nyeih dyei aq. 4 Ngamoq gas ngamoq lyis cu bang dah yobos lyis khyuot dyei goeus yvmvyah ngamoq dah yobos lyis khyuot dyei aq. Ngamoq lyis shiwu yvmas vshwih loh. 5 Yesu nyamoq lyis taiq zis gas, Namoq mas dvyuk, dyenschangh yoh las, gungsgvm lyis nyah jyank mas e lha, Dyenschangh phoq eh ohlhyoq somh lhyoq jenh dyei langh aq; 6 ngah dyenschangh dvyuk nyah gyung cho mhayah ngah jyank mas jweh los, nyang lyis tsoh das zis cha eq ma joq, ge lho lhyi, 7 yhen khau mha soeu ka, Ngos lyis vthauqkhyi goh; khomh eq nyheih goeus, ngah lo jens eq ngos yah dvgeh yhetyos mas yhet joq goeus, ngos nvng lyis ma yoh toq dyei lo, ge phuk toeuh goh lah? 8 Ngos namoq lyis taiq bah, dyenschangh nghuot, ge las ma toq dyei nghuot laus eq nyang tungh khyoeuq sang nyeis yvmvyah, hauh soeu lhyi nyang chah ya chah zis, toq las dyei das. 9 Housoeh yvmvyah ngos namoq lyis taiq bah, Dung geh, hauh zis namoq lyis dyei das: xo geh, housoeh lyis namoq nyvng das; khomh koq geh, housoeh lyis namoq lyis phank dyei das. 10 Dung soeu hank eq yoh; xo soeu eq nyvng; khomh koq soeu lhyi eq phank dyei das. 11 Dangtoeuq gvshih namoq mas uwus dvyuk yuk lyis lo gas ohlhyoq sang lhyi lukgoq dyei das lhyeh? Oengdoq sang lhyi lhangnyis dyei das lhyeh? 12 Gyoq uq sang lhyi gungsgauh dyei das lhyeh? 13 Namoq ma gis dah bang yangh vsainnyang lo jens lyis gis dah jyungshuk seq dyei lyis gas, hauh thoq lyis zes las maukhung mha dah Uwus gas, nyang lyis dung bang lyis hauh Gyingshang Dyos dyei das ma nghuot lhyeh? 14 Nyang gas nhuotjet yius lyis khat tyamp: yius thuq loh thang lhyi, nhuotjet soeu dang jis los las, dius jens gas mauh. 15 Nghuot laus eq nyamoq mas dvyhamh taiq zis gas, Yius zau Bezebu dah vmingh yah nyang yius jens lyis yoh khat thuq, ge. 16 Gohyhamh bang eq nyang lyis shiwu zoh lyis yah, maukhung mha dah vlho dvkoeuq tsain sang. 17 Nyang gas nyamoq nghamh yvlyis seq las nyamoq lyis taiq zis gas, munghdan nyang changh zan goh lyis gas hauh munghdan gas dyoqbis das. Yhenbang nyang changh dyoqgoh lyis gas hauh yhen ka dyoqbis tyamp das. 18 Ngos gas Bezebu dah yomsoq yah yius jens lyis khat tyamp, ge namoq taiq. Satan gas nyang changh nyang zan goh nghuot lyis gas, nyah munghdan khasoeh yoh goeng joq das lah? 19 Ngos Bezebu yomsoq yah yius jens lyis khat thuq nghuot lyis gas, namoq dah lo jens gas hank mas yah khat thuq nyeis lah? Housoeh yvmvyah nyamoq gas namoq lyis soetuon das bang duot das. 20 Nghuot laus eq ngos gas Mangso dah yomsoq yah yius jens lyis khat tyamp nghuot lyis gas, Mangso munghdan namoq jyank mas jweh goeus. 21 Yombos soeu ka jes kyahsoe yah nyah yhen zungh nyeis lyis gas, nyah zisyos gau joq. 22 Nghuot laus eq nyah thoq lyis yombos soeu los las, nyang lyis ung tyamp thang lhyi, nyang khauq dah sham lham yoeus tyamp lho lha, nyah yhenzis lyis tsain gvm yoeus. 23 Ngos yah dvgeh ma nghuot soeu ka, ngos lyis jes sont soeu nghuot. Ngos yah dvgeh ma tsainh soeu ka dungsshih lvnggang nghuot, ge. 24 Yius gas dius jyank masyah thuq loh las, kyuk dah mau mas lamh yenh. Nyang noyos xo laus eq ma nyvng. Hauh thang lhyi nyang doms taiq zis gas, Ngos thuq khoq dah yhen mha tauh loh das, ge. 25 Nyang jweh loh lyis yhen ka shenh shang lha vshung vgvn joq yvlyis nyvng. 26 Hauh thang lhyi nyang loh las nyah thoq lyis zes xungh xent dah yius nyhet doeu shwih las hauh vkhau mha los tsain wvng lungh joq. Housoeh las hauh soeu dah wotwu gas xikpheh thoq lyis zes yau los. 27 Nyang housoeh taiq nyeis uhlyis, dius phung mhayah vmesbih dvyuk gas kaiq las nyang lyis taiq zis gas, Nvng lyis khoeu kat las nauh gvmshuk soeu ka ngelhoq, ge. 28 Nghuot laus eq nyang taiq zis gas, Nghuot goeus, Mangso dang lyis gyo yoeus las chank bang gas nge zes lhoq, ge. 29 Moqjens zain nhoenk los lyis nyang nyamoq lyis taiq zoh loh zis gas, Dius haih caiq gas lhung dah vcaiq nghuot. Nyamoq gas vlho lhyi tsain xo laus eq, lvpe Yona dah vlho mha lai las gohtoeu chah vlho lhyi eq nyamoq lyis ma chixoeuq das. 30 Yona gas Ninewe bang dah vlho duot vgus, Cangsoeu Lo eq dius haq caiq xiklyis vlho duot das. 31 Hauh Soetuon yvmas, mautyi hwankti nyih gas haq caiq mas bang yah dvgeh toq los las nyamoq lyis dang thang thyet das. Khasoeh ge lyis nyamoq gas Solomon dah joeui gyo yoeus das xiklyis mau thang mhayah jweh los. Yoeuh aq, heimha Solomon thoq lyis zes soeu nyeis. 32 Soetuon yvmas Ninewe wus mas bang gas, haq caiq mas bang yah dvgeh toq las nyamoq lyis dang thang thyet dyei das: khasoeh ge lyis Yona taiq kyoh dang gvng mas nyamoq nhaiqlom tsain thaiq los. Yona thoq lyis zes soeu heimha nyeis. 33 Nyibung lyis tuonh las hank ma gyangh gos shung toh; dang yah eq ma gyangh tsungh toh: wvng los bang bvng zis nyvng das xiklyis nyibung gus mas dvgyangh tuonh toh. 34 Nyoqjeih gas gungs dah bvng zis nghuot. Nah nyoqjeih gyings lyis gas, nah dvgungs gonh bvng joq das, nah nyoqjeih ma gis lyis gas nah gungs eq soeng soeng noq. 35 Housoeh yvmvyah nah jyank mas bos dah bvng zis gas ma noq tyamp bas jungh zaih nyeis aq. 36 Nah gungs mas soeng soeng noq zis dvchuq eq ma bos, gungs gonh yah bvng nyeis nghuot lyis gas, bvng dah nyibung yah nvng lyis pank dyei yhangteh nah gungs gonh bvng zis yah dyingh das, ge. 37 Nyang housoeh taiq nyeis lyis, Pharishe dvyuk gas nyang yah dvgeh zo shuk das zis nyang lyis khi lha, nyang wvng las wom zo das zis tsung toh. 38 Pharishe gas Yesu nyang wom ma zo shih lyis cheihshang cho ma kuot yvmvyah mauh nyeis. 39 Housoeh las Yhensain nyang lyis taiq zis gas, Namoq Pharishe jens gas, kom yahge bvn lyis nghe pheh kyingh dvgyangh shang nhang; namoq dah vkhau mha ka lhuot zo lhuot shuk las lhung zis kyingh dyingh joq. 40 Koh bang eh, nghe pheh kuot toh dah Mangso ka vkhau mha eq kuot ma nghuot lhyeh? 41 Bvn vkhau mha bos zis nyungs bang lyis dyei geh. Housoeh lyis dvnganh gas, namoq xiklyis lhoqshang zis duot das. 42 Pharishe jens eh, namoq mvtanhzoe nghuot! Khasoeh ge lyis, namoq gas shomnhamh yahge angh nyaus dvja ja mas ciboms dvboms tsain kat. Nghuot laus eq, lyi jyoeng zis yahge Mangso lhyi jyetdap cho lhyi lhyweq toh khoq. Ciboms dvboms dyei cho lhyi ma toh khoq, lyi jyoeng cho yahge Mangso lhyi jyetdap cho lhyi kuot vvng. 43 Pharishe jens eh, namoq mvtanhzoe nghuot! Khasoeh ge lyis, lyi jungs mas gis thank tsunggus mas tsung, kaih mas phauh nyang jeshuh das yvlyis namoq o. 44 Namoq mvtanhzoe nghuot! Khasoeh ge lyis namoq gas ma nyvng lo dah lop yah doeusgoh, dius jens gas hauh thoq mas pyo pyo suh nyeis, ge. 45 Hauh uhlyis lyi svra dvyuk nyang lyis phuk taiq zis gas, Svra eh, nvng heisoeh taiq zis gas, ngamoq lyis jwangh nyeis. 46 Housoeh las nyang taiq zis gas, Lyi svra moq eh, namoq eq mvtanhzoe nghuot! Khasoeh ge lyis namoq gas dius jens lyis wons nanh dah yvwons kih dyei las vsainnyang gas hauh yvwons lyis loqnyhauh yah eq ma tsain tanh yoeuh ku. 47 Namoq gas mvtanhzoe nghuot! Khasoeh ge lyis, namoq dah phauh thyeih moq sat dah lvpe jens lop lyis tsain ci goeus. 48 Namoq gas namoq dah phauh thyeih moq dah muhzoh lyis kanghjyoeng kat bang yahge xamxonh bang jyoengh nghuot: khasoeh ge lyis, nyamoq dah lvpe jens lyis sat las, nyamoq lop lyis namoq tsain ci. 49 Housoeh yvmvyah, Mangso dah joeui yah taiq zis gas, lvpe jens yahge lvgyo jens lyis ngos nyamoq jyank mas nhang kat das, nyamoq dvyhamh lyis sat las dvyhamh lyis shoeuhshih das. 50 Mungkvn cangxeih gvnkhanh uhlyis yah huot tyamp, lvpe jens dvnganh dah suih gas haq caiq bang masyah cangjau sang das. 51 Abel dah suih masyah hau yhenmuh yahge phon jo mas sat zis xauh dah Zekharia suih jweh shoq, nghuot goeus, ngos namoq lyis taiq bah, hauh zis gas haq caiq bang mas yoh huon das. 52 Lyi svra jens eh, namoq mvtanhzoe nghuot! Khasoeh ge lyis, seq cho suhshih yoeus toh las, vsainnyang eq ma wvng, wvng loh mes bang lyis eq namoq kyoq toh, ge. 53 Nyang nghe pheh thuq loh lyis lyi svra moq yahge Pharishe jens gas nyang lyis svsoh nhaiqyo zis yah nyang lyis cho vja ja yah sen lha nyei zis yah, 54 nyang dvja ja taiq shuot lyis yobos nyhik das nyhenshang langh nyeis. 1 Hauh uhlyis dius ma thoq suon lo dah moqjens zain los las, nyamoq nyang changh zangh nang goh loh nyeis lyis, nyang nyah changlo jens lyis shih taiq zis gas, Pharishe jens dah bicheih lyis zaih geh, ge. Houka gis guons kuot ge dah wotwu nghuot. 2 Khasoeh ge lyis ma yoh chixoeuq shoq nghop shung toh zis cha eq ma bos; ma yoh seq shoq shung toh zis cha eq ma bos. 3 Housoeh yvmvyah namoq chuot yvmas taiq ya taiq zis lyis bvng yvmas xauhgyo los das. Yvplhunk mas nhuot sot sot zis yhen khung thoq mas taiq hoeuh loh das. 4 Ngah loeuzomh jens eh, ngos namoq lyis taiq bah, gungs lyis kyingh yoh sat las hauh thang lhyi cha eq ma yoh kuot lo bang lyis vgyuk goh. 5 Nghuot laus eq hank lyis gyuk chah zis ngos namoq lyis taiq; gungs lyis sat thang lhyi, munyi thomh mas yoh khyoq kat dah yomsoq yoh soeu lhyi dvgyuk geh. Nghuot goeus, ngos namoq lyis taiq bah, nyang lyis gyuk geh. 6 Nghuot laus eq jos oeng doeu lyis dyvpson aiq kyvp yah ungh ma nghuot lhyeh? Hau jos dvdoeu lyis eq Mangso ma tohnyhik. 7 Namoq dah uhloms mas cam khvt dvnganh lyis yangh suon toh. Housoeh yvmvyah vchiq goh, namoq gas jos nyoshoq thoq lyis zes phauhdap. 8 Nghuot laus eq ngos namoq lyis taiq bah, Hank laus eq dius xikkhonh mas ngos lyis rhen soeu lhyi, cangsoeu Lo eq Mangso dah loeuswons bang xikkhonh mas nyang lyis rhen das. 9 Nghuot laus eq cangsoeu dius xikkhonh mas ngos lyis he tyamp soeu lhyi, Mangso dah loeuswons bang xikkhonh mas nyang lyis eq he tyamp das. 10 Cangsoeu Lo lyis dang yah jis shuot yobos lyis yoh khyuot dyei: nghuot laus eq Gyingshang Dyos lyis loeusmus soqzo dah yobos lyis gas ma yoh khyuot dyei das. 11 Nyamoq gas namoq lyis lyi jungs mas nhaiqbos bang, vmingh yoh dah guon bang xikkhonh mas shwih loh lyis, khasoeh cha phuk taiq das zis vchiq goh. 12 Hauh shishenh lyis khasoeh taiq chah zis gas, Gyingshang Dyos yah namoq lyis jyauh das. 13 Dius huom mha dvyuk nyang lyis taiq zis gas, Svra eh, ngah vmang lyis ngos yah yhenzis gvm goh das cho lhyi bos taiq aq, ge. 14 Nyang hauh soeu lhyi taiq zis gas, Lvcang eh, nah zomh jo mas soetuon das zis yahge gvm dyei das soeu kuot das nyhenshang ngos lyis hank toeuq toh lah, ge. 15 Nyang nyamoq lyis taiq zis gas, Nyoqnoq cho lhyi tsain zaih lha zaih geh: khasoeh ge lyis, zisyos magons magoh yoh yvmas dius dah kang bos zis ma nghuot, ge. 16 Nyang nyamoq lyis dangtoeuq dvkoeuq taiq zis gas, Dis soeu dvyuk dah maunyeis mas guknyau shihnyau nyoshoq yoh los. 17 Nyang nghamh zis gas, Ngah guknyau shihnyau kat toh das joqyos ma bos, ngos khasoeh kuot das au? 18 Ngos heisoeh kuot das: Ngah jyi cauh lyis thyoq tyamp las, zes kuh zis tsuk lho lha, hauh yvmas ngah wom yahge yhenzis dvnganh kat toh das. 19 Housoeh las ngah gungs dyos lyis, Gungs dyos eh, zvnlom nyoshoq xiklyis vyhang nyoshoq kat toh goeus, zo shuk, pyo lha nyenstap nyeis aq, oen taiq das, ge. 20 Nghuot laus eq Mangso nyang lyis taiq zis gas, Koh soeu eh, khvnyens nyang, nyang nah gungs dyos lyis yoeus tyamp das: housoeh las nvng ba kat toh vyhang ka hank xiklyis nghuot das lah, ge. 21 Vsainnyang xiklyis zisyos yung toh las Mangso mha ma dis soeu ka housoeh teh soeu nghuot. 22 Tsai, nyang nyah changlo jens lyis taiq zis gas, Housoeh yvmvyah ngos namoq lyis taiq bah, kang xiklyis cha zo das; gungs xiklyis cha wuot das oen vchiq goh, ge. 23 Kang ka zonoms thoq lyis, gungs gas dyimis thoq lyis zes phauhdap. 24 Kvnhoq jens gas jyo ma khyoq, jyo eq ma yhomh zis lyis nghamh yoeuh geh; nyamoq mas jyi eq ma bos, zisyos eq ma joq; nghuot laus eq Mangso ka nyamoq lyis gvmtsoh nyeis. Namoq gas nghoq thoq lyis kha iq zes phauhdap! 25 Namoq chiq las vsainnyang kang lhyi loq dvbon hank yoh chent kat? 26 Housoeh teh ngis thank cho lhyi yangh namoq ma yoh kuot lyis, gohtoeu nyet shih goeu lyis chamus chiq nyeis goh lah? 27 Anghchau ban khasoeh yuk kuh los yvlyis nghamh yoeuh geh. Nyamoq gas muh eq ma zwi, jei eq ma ni, nghuot laus eq ngos namoq lyis taiq bah, phunk nyoqnho ngelang bos dah Solomon dyimis yangh haih ban dvjyo lhyi ma nyis. 28 Lomsjingh ehnyet nain bang eh, yos mas yuk las phvnaq nyeihyo nyikhyomp mas kat tyamp das dah mhanh lyis yangh Mangso heisoeh gvmhuot lyis gas, namoq lyis hauh thoq lyis zes gvmhuot das ma nghuot lhyeh? 29 Cha zo cha shuk das oen zis yah sen yvmas kyingh shishenh vthank nhang goh. 30 Khasoeh ge lyis, hauh zis lyis gas mungkvn mas dah dius jens tsain xo lha, hounyhoq namoq chah nyeis yvlyis namoq dah Uwus seq. 31 Namoq gas Mangso munghdan lyis xo geh; housoeh lyis hau chah nyeis cho dvnganh namoq lyis lung dyei das. 32 Yvng phung ngis eh, Vchiq goh: khasoeh ge lyis, namoq Uwus gas hauh munghdan namoq lyis dyei das zis svsoh mes. 33 Namoq yoh zis lyis ungh las, gvm dyei geh. Khauh soeu ma jweh, naus eq ma yoh zo joqyos, maukhung mha namoq zisyos xiklyis ma seq tyang dah ngwis thung kuot toh geh. 34 Khasoeh ge lyis, namoq zisyos joq yvmas namoq nhaiqlom eq joq das. 35 Namoq dah yhensain nyihwank pwe mhayah tauh los lyis zes das xiklyis sont langh nyeis dah jyeidwis jens teh dyichih chih, nyibung tuonh las cicont langh nyeis geh. 36 Nyang jweh las khomh koq lyis hau jyeidwis jens nyang lyis khomh phank dyei. 37 Jyeidwis jens langh nyeis zis lyis yhensain los nyvng lyis, hauh jyeidwis jens gas ngelhoq. Ngos namoq lyis jyoengh taiq bah, hauh yhensain nyang dyichih chih lho lha, nyamoq lyis zojus mas tsung nhang lha, nyang nyang nyamoq lyis phuqsoe das. 38 Nyensyo gungsgvm lyis, nghuot ya maubuh los yoq lyis housoeh zungh nyeis langh zis lyis yhensain los nyvng lyis, hauh jyeidwis jens gas ngelhoq. 39 Haih zis lyis seq geh: khauh soeu khanhamp los das zis lyis yhensain seq nghuot lyis gas, nyah yhen lhyi ma los yoh thyoq wvng shoq nyang zungh nyeis das. 40 Housoeh yvmvyah namoq eq cicont kuot geh. Khasoeh ge lyis namoq ma zangh soh dah shishenh lyis, Cangsoeu Lo jweh los das, ge. 41 Hauh thang lhyi Petru nyang lyis taiq zis gas, Yhensain eh, haih dangtoeuq gas ngamoq lyis kyingh taiq lah, dvnganhmoq lyis taiq lah, ge. 42 Yhensain taiq zis gas, Yhensain ka nyah yhenbang lyis, shishenh jweh lyis zonoms gvm dyei das xiklyis toeuq toh, lomluk las joeui bos dah jyeidwis gas hank nghuot lah, ge. 43 Nyah yhensain jweh los uhlyis lomluk luk kuot nyeis yvlyis los nyvng jus dah jyeidwis gas ngelhoq. 44 Ngos namoq lyis jyoengh taiq bah, yhensain ka nyah zisyos dvnganh thoq mas guon soeu nyang lyis kuot nhang das. 45 Nghuot laus eq hauh jyeidwis gas nyah ehnyet mas, Ngah yhensain los das zis nyangh shih ge, nghamh las, phoq jyeidwis nyhiq jyeidwis jens lyis bat, zo shuk, yet nyeis lyis gas, 46 hauh jyeidwis dah yhensain ka nyang ma nghamh dah buisnyeis, ma soh dah shishenh lyis nyah yhensain jweh los lyis, nyang lyis zan chink las lom ma luk bang yah dvgeh toh das. 47 Nyah yhensain dah ehnyet lyis seq toh las, nyah ehnyet ma chank, cicont ma sont toh dah jyeidwis hank laus eq pop pop bat zis xauh das. 48 Nghuot laus eq ma seq las lyuk mon dah muh shuot soeu ka, nainlo dvxauh lyuk das: khasoeh ge lyis, nyoshoq dyei zis xauh soeu hank laus eq nyah jyank masyah nyoshoq sang zis xauh das. Nyoshoq dyei toh goeus soeu jyank masyah zes las sang das. 49 Nyeisjvng thoq mas nyi khyoq kat das xiklyis ngos los; hauh nyi gvshih nyang dap nyeis lyis kha iq gis das lah? 50 Nghuot laus eq ngos kham chah shih dah jeisnyhop dvkoeuq bos shih. Hauh zis ma kham dvchank, ngos kha iq ehnyet nyo nyeis lah? 51 Nyeisjvng thoq mas nyenstap cho chi lyih das xiklyis nghuot oen nghamh goh lhyeh? Ma nghuot, kangh das xiklyis dvnghuot. 52 Khasoeh ge lyis, gvshih masyah gas oeng yuk nyeis dah yhen mha somh yuk gas aiq yuk yah, aiq yuk gas somh yuk yah tyixo goh das. 53 Uwus yahge loloeu, loloeu yahge uwus; ungwes yahge lonyi, lonyi yahge ungwes, nyimuh yahge doeusmuh, doeusmuh yahge nyimuh gang goh das. 54 Nyang dius phung lhyi eq taiq zis gas, Buiswvng shot pheh jyommauh nyvng lyis, nvng houjang yah mau wus das, ge vgus wus los. 55 Mautyi lyeis muot los lyis gas, buis gywes das ge vgus gyangh bweh los. 56 Gis guons kuot bang eh, maukhung yahge nyeisjvng nyoqnho wuhsoh lyis seq taiq lyis gas: haq caiq dah vlho lhyi chamus ma seq suon goh lah? 57 Namoq nyang gungs lyis chamus jyoeng khyvlyis soe ma tuon goh lah? 58 Nvng gas nvng lyis zau kauq soeu yah cho mha dvgeh nghuot shih lyis hauh soeu yah lvnyap taiq tamp goh aq. Housoeh ma nghuot lyis gas, zau kauq soeu yah nvng lyis soetuon soeu jyank mas kyauh das. Soetuon soeu nvng lyis pyada lyis kyauh las, nyang gas nvng lyis thung khyoq das. 59 Ngos nvng lyis taiq bah, thang thank thunkcent kyvp ma dye cap dvchank nvng hou mhayah yoh thuq los das zis ma nghuot. 1 Hauh uhlyis houmha nyeis bang dvyhamh gas, Pilat mungh zau gas, Galile dius dvyhamh bang dah suih lyis nyamoq lomhxangh lainh zis yah lhoeuq cho Yesu lyis tsain taiq kyoh. 2 Yesu nyamoq lyis phuk taiq zis gas, Hauh Galile dius jens housoeh xauh yvmvyah, Galile dius dvnganh thoq lyis yaunos zes wons oen namoq nghamh goh lah? 3 Ma nghuot, ngos namoq lyis taiq bah: namoq eq nhaiqlom ma thaiq lyis gas, namoq dvnganh houyah dvyhangteh dyoqbis das. 4 Nghuot ya, Silom wus mas dah tyoeuqzvm gyop las nhiq sat goeus bang dvci xet yuk gas Yerusalem mas bang dvnganh thoq lyis yaunos zes wons bang nghuot oen namoq nghamh goh lah? 5 Ma nghuot, ngos namoq lyis taiq bah, namoq eq nhaiqlom ma thaiq lyis gas namoq dvnganh houyah dvyhangteh dyoqbis das. 6 Nyang haih dangtoeuq eq taiq shih: dius dvyuk nyah zvbiq khyam mha maiphang dvzains tsungh toh. Houmha vshih e xo lhyi cha eq ma nyvng. 7 Housoeh las nyang nyah zvbiq khyam dyangh soeu lhyi taiq zis gas, Yoeuh aq, ngos haih maiphang zains mas shih xo zis somh zvn bos goeus; cha eq ma nyvng, thoeuq tyamp aq, chamus joqyos nghant toh lah, ge. 8 Nghuot laus eq hauh soeu nyang lyis phuk taiq zis gas, Yhensain eh, khvzvn yuk joq shih bas jungh: ngos zuilhaink yah khop nhuk, jenh kat dyei shih das. 9 Sangnhaiq vshih shih los mvbeh, ma shih los nghuot lyis gas, hauh thang lhyi nvng thoeuq tyamp aq, ge. 10 Yuda No Buisnyeis lyis nyang gas lyi jungs dvlom mas jyauh nyeis. 11 Yoeuh aq, dvci xet zvn gonh yius kuq nosbaus wons dah vmesbih dvyuk nyeis. Nyang gas nungs goeuh las shoqlang ma yoh dan lo. 12 Yesu hauh vmesbih lyis nyvng las, nyang lyis nyah jyank mas khi yoeus lho lha, Vmesbih eh, nvng nos masyah luiq goeus ge, 13 Nyah thoq mas Yesu loq kih lho lhyi, houjang nyang dan los las, Mangso phunk lyis chungh. 14 Yesu Yuda No Buisnyeis lyis noslom yoh bang lyis gis los nhang yvmvyah, lyi jungs gomh soeu ka, nhaiqyo las dius jens lyis taiq zis gas, Muh zwi das xiklyis khyuk nyeih bos, hauh buisnyeis gyo lyis lyih yhoh yoeus geh, Yuda No Buisnyeis lyis vlyih goh, ge. 15 Yhensain nyang lyis phuk taiq zis gas, Gis guons kuot soeu eh, namoq yuk khanghmuh Yuda No Buisnyeis lyis, noeu nghuot ya mauhlyihzoe lyis jeis gvmshuk das zis, zungs masyah phank shwih thuq loh ma nghuot lhyeh? 16 Housoeh lyis dvci xet zvn Satan yah twih toh zis xauh, Abraham lonyi nghuot dah haih vmesbih lyis hau twih toh masyah Yuda No Buisnyeis lyis ma gis phui kat lhyeh, ge. 17 Nyang heisoeh taiq lho lhyi, nyang lyis tyixo bang dvnganh gas tsain xoq goeus. Dius jens gas nyang kuot dah mauhphoh cho dvnganh gvng mas tsain gauslaus. 18 Hauh thang lhyi Yesu taiq zis gas, Mangso munghdan gas cha yah doeusgoh lah? Ngos cha yah byi das lah? 19 Hauh zis gas, dius dvyuk yoeus las nyah khyam mha sanh kat dah anghwvng shih chvp yah doeusgoh. Hauh zis yuk las vzains kuh los lyis mau dang nghoq jens hauh vko mha sot yoh sot, ge. 20 Nyang taiq shih zis gas, Mangso munghdan lyis ngos cha yah byi das au lhyeh? 21 Hauh zis gas vmesbih dvyuk sunghso mons somh pan mha yoeus kat lyis sunghso dvnganh yvlyis yoh dau los nhang dah bicheih yah doeusgoh, ge. 22 Tsai, nyang gas, dvwus thang lhyi dvwus wvng las jyauh uhlyis yah, Yerusalem pheh e loh. 23 Hauh uhlyis dius dvyuk nyang lyis taiq zis gas, Yhensain eh, khyuot yoeus zis xauh bang nainlo dvnghuot lhyeh, ge. Nyang nyamoq lyis taiq zis gas, 24 Zvvs dah khomh cho yah wvng das xiklyis yomkat geh: khasoeh ge lyis dius nyoshoq wvng loh das zis xo laus eq ma tsain xauh wvng loh das. 25 Hauh Yhensain khomh toq nyheih toh goeus ya, namoq nghe pheh yap las khomh koq uhlyis yah, Yhensain eh, ngamoq lyis khomh phank dyei aq ge lyis, Namoq khalhye yah zis nghuot yvlyis ngos ma seq, ge toeuh das. 26 Namoq gas, Ngamoq nah xikkhonh mas zo shuk ku; ngamoq dah talhoeu mha eq nvng jyauh ku, tsain ge das. 27 Nghuot laus eq nyang taiq das zis gas, Namoq khamha bang nghuot yvlyis ngos ma seq; ma jyoeng dah muh kuot bang dvnganhmoq eh, ngah jyank masyah thuq loh geh, ge. 28 Abraham, Isak, Yakop yahge lvpe jens nyoshoq Mangso munghdan mas nyeis zis lyis namoq nyvng las, namoq nyang gas nghe pheh khat thuq zis xauh das: hauh yvmas ngausdyeis ngausnhvp yah zwis khih chap loh das. 29 Hauh uhlyis dius jens gas buisthuq buiswvng, mautsung mautyi pheh yah los las Mangso munghdan mas zo shuk das. 30 Housoeh las, thang thank bang gas xik lyis nghuot das; xik lyis bang gas thang thank nghuot das, ge. 31 Hauh nyeihyo nyang Pharishe dvyhamh Yesu jyank mas tsain lyih las Yesu lyis taiq zis gas, Nvng hei mhayah thuq loh aq; Herod nvng lyis sat das zis cvvq nyeis, ge. 32 Nyang nyamoq lyis taiq zis gas, Hauh dah cauhpau lhyi heisoeh oen loh taiq geh, Khvnyhik yahge phvnaq nyeihyo ngos yius khat tyamp las nos zis lyis gis los nhang das, somh vnyeih lyis ngah muh dye das. 33 Nghuot laus eq khvnyhik phvnaq nyeihyo, sangphoq nyeihyo ngos suh chah shih: Khasoeh ge lyis, Yerusalem mas lai las lvpe gohyos ma gis shei. 34 Yerusalem eh, Yerusalem eh, lvpe jens lyis sat las, nah jyank mas nhang kat bang lyis lukzains yah doeuh sat dah wus eh, gyoqzains gas gyoqlo jens lyis nyah dungs khau mha xwih tsainh teh, nah lo jens lyis ngos khanyhoq lhain xwih tsainh toh mes laus eq, nvng ma gyo. 35 Yoeuh aq, nah yhenmuh gas jyamhjyuklhyuk joq goeus. Ngos namoq lyis taiq bah, Yhensain nyings mas jweh los soeu ka ngelhoq, ge namoq nyang ma taiq dvchank, nvng ngos lyis ma nyvng das, ge. 1 Hauh thang lhyi, Yuda No Buisnyeis lyis nyang gas Pharishe uhjyung dvyuk dah yhen mha wom zo das zis wvng loh lyis, nyamoq gas nyang lyis zungh yoeuh nyeis. 2 Yoeuh aq, khyei loq yam nos dah vbusbih dvyuk Yesu jyank mas jweh los. 3 Housoeh las Yesu gas lyi svra moq yahge Pharishe moq lyis taiq zis gas, Yuda No Buisnyeis lyis gis los nhang das zis lyi vbos lah, ge. 4 Nyamoq gas samlo nyeis. Hauh soeu lhyi nyang shwih yoeus las gis los nhang lho lha nhang kat. 5 Hauh thang lhyi nyang nyamoq lyis taiq zis gas, Namoq dvyuk yuk dah lo, nghuot ya noeu Yuda No Buisnyeis lyis jeisdwang mas dyet gyoh loh lyis, namoq houjang ma siq yoeus das lhyeh, ge. 6 Nyamoq gas nyang lyis haih cho ma yoh phuk taiq lo. 7 Khi toh boenghwus gas zes phauh joqyos lyis tsain khyen zis nyvng las, nyang nyamoq lyis dangtoeuq yah taiq zis gas, 8 Dius dvyuk yuk nvng lyis nyihwank pwe mha khi lhyi, zes gis joqyos mas vloh tsung; nah thoq lyis nyoqnho ngelang bos soeu lhyi eq nyang khi toh mvbeh. 9 Nah aiq yuk lyis khi toh soeu lyih las, Haih soeu lhyi joqyos xwiq dyei aq, ge nvng lyis taiq lyis, nvng gas xoq zis yah nyhen thank joqyos mas cheh tsung chah das. 10 Nghuot laus eq nvng lyis khi lhyi, nyhen thank yvmas loh tsung aq. Hauh uhlyis nvng lyis khi toh soeu los las, Dyenschangh phoq eh, nyhang mha doq tsung aq, ge nvng lyis taiq lyis, nvng yah tsung toh bang dvnganh dah xikkhonh mas nvng nyoqnho ngelang yoh das. 11 Khasoeh ge lyis, nyah gungs lyis chungh zo soeu hank laus eq o mha khyoq zis xauh das: nghuot laus eq nyah gungs lyis o mha gyoh soeu ka chungh zis xauh das, ge. 12 Nyang lyis boengh khi soeu lhyi eq nyang taiq zis gas, Nvng nyeihzvng, nghuot ya, nyenhcon khi tsoh lyis, nah dyenschangh jens, nah vmang vnoeuh, buisnoms sainhchangh jens, dis dah yhenkyoh hank lyis eq vkhi. Nyamoq eq nvng lyis doms khi tsoh lyis gas, nvng lyis zo jyen doms yoh cap das. 13 Nghuot laus eq nvng pwe kuot lyis, nyungs bang, khyei gis loq ma yoh bang khyei gyau bang, nyoqjet bang lyis khi aq. 14 Housoeh lyis nvng ngelhoq das: khasoeh ge lyis nyamoq nvng lyis jyehjuh ma yoh tauh. Nghuot laus eq dan bang dwis toq yvmas nvng jyehjuh xauh kham das, ge. 15 Nyang yah dvgeh zo tsung toh soeu dvyuk hauh zis xauhgyo lyis, Mangso munghdan mas wom xauh zo das soeu ka ngelhoq, ge nyang lyis taiq. 16 Yesu nyang lyis phuk taiq zis gas, Dius dvyuk nyenhcon tsoh pwe zainsmuh dvkoeuq kuot las, dius nyoshoq lyis khi toh. 17 Nyenhcon tsoh yoq jweh lyis, Tsain los geh, zo shuk das zis dvnganh cicont nghuot goeus, ge khi toh bang lyis khi das xiklyis nyah jyeidwis lyis nhang kat. 18 Nghuot laus eq nyamoq dvnganhmoq xamxonh las tsain jyamp taiq. Cangxeih vyuk gas, Ngos maunyeis dvchuq wis toh, hauh zis lyis loh yoeuh chah, ngos lyis jenh nhang kat aq, ge. 19 Gohtoeu dvyuk gas, Ngos gas noeu oeng kya wis toh, hauh zis lyis shi yoeuh chah, ngos lyis jenh nhang kat aq, ge. 20 Gohtoeu dvyuk eq, Ngos eq phoengh hwank toh, housoeh las ma yoh los, ge. 21 Hauh jyeidwis gas nyah yhensain lhyi hauh cho los taiq kyoh. Hauh yhensain ka nhaiq gis yo las nyah jyeidwis lyis taiq zis gas, Wus talhoeu yahge khyam gyung mas lvnyap e lha, nyungs bang khyei gis loq ma yoh bang, khyei gyau bang, nyoqjet bang lyis e shwih hwank aq, ge. 22 Hauh thang lhyi jyeidwis taiq zis gas, Yhensain eh, nvng taiq vgus khi goeus, nghuot laus eq joqyos bos shih, ge. 23 Hauh yhensain ka nyah jyeidwis lyis, talhoeu mha, vthunk vyoq mas e lha, ngah yhen khau dyingh bas jungh, nyamoq lyis ma gyo ma thoq khi hwank aq, ge. 24 Khasoeh ge lyis ngos namoq lyis taiq bah, khi toh bang dvyuk eq ngah nyenhcon lhyi xauh zo shi yoeuh das zis ma nghuot, ge. 25 Moqjens nyang yah dvgeh loh nyeis las, nyang lhain yoeuh lho lha nyamoq lyis taiq zis gas, 26 Ngah jyank mas los soeu hank laus eq, vsainnyang dah ungwes uwus, yhensain nyhiq yahge lo jens, vmang vnoeuh yahge nhamhmuh moq; hauh thoq lyis vsainnyang kang lhyi jyet thoq lyis ngos lyis ma zes jyet lyis gas ngah changlo ma yoh bweh. 27 Hank laus eq vsainnyang tapzains wuq las ngah thang mha ma chank soeu ka ngah changlo ma yoh bweh. 28 Khasoeh ge lyis namoq jyank mas dvyuk yuk tyoeuqzvm tsuk das lyis, hauh zis dye tsuk shoq nyah ngwis luk das, ma luk das zis lyis tsung lha cangxeih ma suon yoeuh soeu bos lah? 29 Housoeh vpom xi lho lha dye shoq ma tyeh tsuk nyhuk lyis gas, nyvng bang dvnganhmoq gas jwangh las, 30 Haih soeu ka, kuot xi lho lha dye shoq ma yoh tsuk lo, tsain ge das. 31 Dvcho ka: hwankti dvyuk gas gohtoeu hwankti dvyuk yah moeng zan goh das cvvq lyis, dius aiq mons yah lyih dah bang lyis dvmons yah yoh thoenk zan das, ma yoh thoenk zan das zis, tsung lha cangxeih ma nghamh yoeuh zis bos das lah? 32 Ma duot lyis gas, gohtoeu hwankti we yvmas nghuot shih lyis lvgyo nhang lha nyenstap das xiklyis kuot nhang chah. 33 Housoeh las namoq mas vsainnyang yoh ya yoh zis lyis ma tyamp khoq soeu hank laus eq ngah changlo ma yoh bweh. 34 Coh gas gis, nghuot laus eq, ngvm zis bi tyamp goeus ya khasoeh doms yoh ngvm nhang das lah? 35 Hauh zis gas nyeisjvng xiklyis ma gis, jenh eq ma gis las nghe pheh gyangh doeuh tyamp. Gyo yoeus das no dap soeu ka xauhgyo bas jungh, ge. 1 Hauh uhlyis khoengh khywi bang yahge yaunos wons bang dvnganh gas, nyah dang gyo das ge nyah jyank mas zain los. 2 Housoeh las Pharishe moq yahge maussauh lhaih bang lop zis gas, Haih soeu ka yaunos wons bang lyis lhom yoeus las, nyamoq yah dvgeh zo shuk nyeis, ge. 3 Nyang nyamoq lyis haih dangtoeuq yah taiq zis gas, 4 Namoq dvyuk yuk yvng dvxo doeu yoh; hou mhayah dvdoeu dyuk loh lyis gauci gau doeu lyis mhanhdyvp mas nyhei toh khoq las, dyuk dah vdoeu lyis nyvng shoq ma chank xo soeu hank bos lah? 5 Nyang hauh yvlyis xo nyvng lyis, gauslaus zis yah nyah kvtoq mas kih wuq las, 6 Nyah yhen mha jweh los lyis, nyah dyenschangh jens yahge nyah yhenkyoh bang lyis khi tsainh las taiq zis gas, Ngah yvng dyuk dah vdoeu doms nyvng goeus yvmvyah, ngos yah dvgeh tsain gausyis goh, ge. 7 Houyah dvyhangteh ngos namoq lyis taiq bah, Dan las nhaiqlom thaiq ma chah dah dius gauci gau yuk lyis gauslaus thoq lyis, yaunos wons soeu dvyuk nhaiqlom thaiq los lyis maukhung mha zes gauslaus. 8 Vmesbih dvyuk gas ngwis kyvp dvci yoh yvmas dvkyvp dyuk tyamp lyis, nyibung tuonh lho lha yhen shenh las nyvng shoq vlhomuh ma xo zis bos das lah? 9 Nyang hauh zis xo nyvng lho lhyi, nyah dyenschangh jens yahge yhenkyoh bang lyis taiq zis gas, Ngah ngwis dyuk dah vkyvp xo nyvng goeus yvmvyah ngos yah dvgeh chomp gaus goh, ge. 10 Houyah dvyhangteh ngos namoq lyis taiq bah, yaunos wons soeu dvyuk nhaiqlom thaiq los lyis, Mangso dah loeuswons bang xikkhonh mas gauslaus chank bos, ge. 11 Nyang taiq shih zis gas, Gohlhain dius dvyuk mas yukgis lo aiq yuk bos. 12 Vnoeuh yuk gas nyah uwus lyis, Uwus eh, ngos yoh vvng dah yhenzis gvmdyei aq, ge sang lhyi, nyang nyah yhenzis nyah zomh lyis gvm dyei. 13 Khanyhank nyeih ma nyangh lyis vnoeuh yuk gas nyah yhenzis dvnganh yoeus las we mau pheh gyung suh loh. Hauh mau mas xihphah wuhlhan lha nyah zisyos dvnganh kvlhoeu lhangzvng tyau tyamp. 14 Housoeh nyang yoh ya yoh goeu dvnganh thank tyamp dah thang lhyi, hauh mau mas panghkhauq zainsmuh gyoh los las nyang gas shanghsenh los. 15 Hauh uhlyis nyang gas hauh mau mas dah dius dvyuk jyank mas khau nges nyeis. Hauh soeu ka nyang lyis nyah yos mas wuq nyhoeu nhang kat. 16 Nyang gas wuq zo dah nukkuk yah nyah womdau tyink mes laus eq, nyang lyis hank ma gvmtsoh. 17 Housoeh nyang nghamh soh los las taiq zis gas, Ngah uwus dah uhkung jens gas jo shoq xauh zo las nyet shih das. Ngos gas heimha yuot shet shei loh nyeis. 18 Ngos toq las ngah uwus jyank mas loh las nyang lyis, Uwus eh, ngos Mangso lhyi eq, nvng lyis eq cu goeus. 19 Ngos nah lo oen das zis ma mon lo, nah uhkung dvyuk yhangteh jenh toh aq, oen taiq das. 20 Housoeh nyang toq las nyah uwus jyank mas loh. Nyang we mas dvnghuot shih lyis, nyah uwus gas nyang lyis nyvng lyis nhaiq yoeuh nyen zis yah wuih e lha, nyah lainzain mas po lha bvlot zwi tanh. 21 Hauh lo nyang lyis taiq zis gas, Uwus eh, ngos Mangso lhyi eq, nvng lyis eq cu goeus, ngos gas nah lo oen lui das zis ma mon lo, ge. 22 Nghuot laus eq nyah uwus, jyeidwis jens lyis taiq zis gas, Gis thank dyi xing dung lvnyap yoeus gvmhuot geh, nyah loq mas loqkyop kyop dyei las, nyah khyei mha thyvkoq koq dyei geh. 23 Nyhuk toh noeulo eq she los las sat geh, yang zo las pyo goh: 24 Khasoeh ge lyis hai ngah lo gas shei goeus zis doms dwis los, nyang dyuk goeus zis doms nyvng, ge. Housoeh las nyamoq pwe kuot nyeis. 25 Gvshih nyah lomons yuk gas yos masyah los las yhen mha jweh ni los lyis zains thungh mangh bat sam yahge goh sam xauhgyo. 26 Nyang gas jyeidwis dvyuk lyis khi yoeus las khasoeh nghuot zis nyei yoeuh. 27 Hauh soeu ka nyang lyis, Nah vnoeuh doms los goeus las, nah uwus eq nyang lyis yangh yangh zan zan xauh lhom yoeus langh yvmvyah, nyhuk toh noeulo eq sat goeus, ge. 28 Lomons yuk nhaiqyo los las yvpkhau mha eq ma wvng loh lo. Housoeh las nyah uwus thuq loh las nyang lyis e jyoeuq yoeus. 29 Nyang nyah uwus lyis phuk taiq zis gas, Yoeuh aq, heinyhoq zvn ngos nvng lyis jons dvyuk teh phuqsoe los: tyingtoh dang khayhoq eq ma lai ku, nghuot laus eq ngah dyenschangh jens yah pyo das zis shvbeq lo dvdoeu yangh nvng ngos lyis ma dyei ku. 30 Nghuot laus eq nghe nyhiq yah zomh las nah zisyos chi yonh tyamp, hai nah lo doms los lyis gas, nyhuk toh dah noeulo nyah xiklyis sat dyei, ge. 31 Nyah uwus nyang lyis taiq zis gas, Vlo eh, nvng gas vjangh ngos yah dvgeh nyeis: ngos yoh ya yoh zis dvnganh nah zis nghuot. 32 Hai nah vnoeuh gas shei goeus zis doms dwis los; dyuk goeus mhayah doms xo nyvng. Housoeh yvmvyah yang pyo pyo gausyis gis, ge. 1 Yesu nyah changlo jens lyis eq taiq zis gas, Dis soeu dvyuk gas nyah ziszom dvyuk yoh. Hauh ziszom gas nyah yhensain dah zisyos lyis lhoeu mhont tyamp dyei, ge zau kauq bang bos. 2 Dis soeu ka nyang lyis khi yoeus las taiq zis gas, Hai nah cho ngos xauhgyo zis khasoeh nghuot lah? Nvng kuot dah muhzoh jyen suon xoeuq aq, gvshih masyah nvng gas ziszom muh yoh kuot lo das zis ma nghuot, ge. 3 Hauh uhlyis ziszom nyah nhaiq mas taiq zo zis gas, Ngos khasoeh kuot das lah? Ngah yhensain ngos lyis ziszom muh no tyamp dyei goeus. Ngos yos eq ma yoh khop, yon zo das zis eq xoq. 4 Nghuot laus eq ziszom muh masyah gyoh thang lhyi svbih, nyamoq yhen mha ngos lyis lhom yoeus das xiklyis cha kuot das zis ngos seq goeus, ge. 5 Yhensain lhyi jyen dap bang yuk khanghmuh lyis khi yoeus las, cangxeih dah soeu lhyi, Ngah yhensain lhyi nvng jyen khanyhoq dap lah, ge nyei. 6 Hauh soeu taiq zis gas, Coeu dvxo joi dap, ge. Nyang gas, Nah jyen comh maussauh buk yoeus las, oengci oen lvnyap lhaih aq, ge. 7 Tsai, gohtoeu dvyuk lyis eq, Nvng jyen kha nyhoq dap lah, ge. Nyang gas sunghso dvxo luh dap, ge lho lhyi nyang taiq zis gas, Nah jyen comh buk yoeus las xetci oen lhaih aq, ge. 8 Ma dan dah ziszom joeui bos khyvlyis kuot yvmvyah hauh yhensain ka nyang lyis chungh: khasoeh ge lyis haq caiq mas dah lo jens gas nyamoq muh kuot yvmas, bvng dah lo jens thoq lyis zes yik. 9 Housoeh las ngos namoq lyis taiq bah, nyeisjvng zisyos yah vsainnyang xiklyis buisnoms tsain kuot geh, hauh zis wui lho lhyi namoq gas, vcaiq vto joqyos mas lhom yoeus zis xauh das. 10 Dvmhauh yvmas lomluk soeu ka nyoshoq yvmas eq lomluk das. Dvmhauh yvmas ma dan soeu ka nyoshoq yvmas eq dan das zis ma nghuot. 11 Housoeh las nyeisjvng zisyos lyis yangh namoq lom ma yoh luk lyis gas, hau jyoeng dah zisyos namoq lyis loms las hank kyauh das lah? 12 Namoq gas svbih dah vyhang lhyi lom ma yoh luk lyis gas, namoq yoh vvng dah zisyos namoq lyis hank dyei das lah? 13 Jyeidwis dvyuk yhensain aiq yuk lyis ma yoh phuqsoe: khasoeh ge lyis dvyuk lyis hoeng lha dvyuk lyis gas jyetdap das. Dvyuk lyis domsyos gyo las dvyuk lyis gas ma phauh ma danh kuot das. Namoq gas Mangso yahge nyeisjvng zisyos lyis dvgeh ma yoh phuqsoe, ge. 14 Hauh dang dvnganh zis lyis ngwis nyoqnoq dah Pharishe moq xauhgyo las, nyang lyis tsain jwangh. 15 Nyang nyamoq lyis taiq zis gas, Svbih dah xikkhonh mas vsainnyang gungs lyis dan, ge bang namoq nghuot. Nghuot laus eq namoq nhaiqlom lyis Mangso seq: khasoeh ge lyis dius xikkhonh mas chunghtoq zis gas Mangso xikkhonh mas gas vchoqh vlhauq nghuot. 16 Lyi yahge lvpe jens dah dang gas, jeisnyhop Yohan dah buisnyeis jweh shoq nghuot. Hou mhayah Mangso munghdan gausyis dang lyis taiq kyoh nyeis las, dius dvnganh gas houmha xauh wvng das xiklyis tsoengh nyhenh loh. 17 Lyi maussauh mas dah sauhchvp dvzoq gyoh lwis thoq lyis, maukhung yahge nyeisjvng lai loh das zis svsoh lwis. 18 Vsainnyang dah yhensain nyhiq she tyamp las gohtoeu dvyuk lyis phoengh hwank soeu hank laus eq nyi shuot zis nghuot. Yhensain phoq she tyamp dah vmesbih lyis phoengh hwank soeu eq nyi shuot zis nghuot. 19 Dis soeu dvyuk gas nyeih khanghmuh nesnoq las yhwiq dah jeimuh dyi xing wuot las nghamh nghamh zo zis yah pyo nyeis. 20 Gungs gonh dvmjot jot dah Lazaru ge, shohjyen soeu dvyuk lyis khomhdwang mas lyih tsain toh las, 21 Dis soeu dah kihgus masyah gyoh dah zopop kui zo mes nyeis. Lvkhuih eq nyah dvm mas los lyoq dyei. 22 Hauh thang lhyi hauh shohjyen soeu shei lai loh las, loeuswons bang gas nyang lyis Abraham sainhkhonh khau mha shwih kat toh. Dis soeu eq shei lha tsain ba nyhop. 23 Munyi thomh mas shanghsenh zoh lyis yah, nyah nyoq nghank yoeuh kat lyis, svsoh we yvmas Abraham yahge nyah sainhkhonh khau mha dah Lazaru lyis nyvng kat. 24 Hauh uhlyis nyang kaiq las taiq zis gas, Uwus Abraham eh, ngos lyis nhaiqnyen aq; ngos haih nyilhyam thyoh mas shanghsenh zis xauh nyeis yvmvyah, Lazaru gas nyah loqnyhauh thyoh jeis mas jen las ngah lhyo mha taiqh jyamh dyei das zis ngah jyank mas jenh nhang kat aq, ge. 25 Nghuot laus eq Abraham taiq zis gas, Lo eh, nvng gas dwis nyeis yoq lyis gis dah zis lyis xauh yoeus. Lazaru gas houmha shanghsenh zis lyis soh aq. Nghuot laus eq gvshih nyang gas nhaiqtaink zis xauh las, nvng gas shanghsenh zis xauh nyeis. 26 Hauh thoq lyis, hei mhayah namoq jyank pheh goeu e mes bang ma yoh goeu dap loh das xiklyis eq, hou mhayah ngamoq jyank pheh hank ma yoh goeu dap los das xiklyis eq, ngamoq yahge namoq dah jo mas langhkhau zainsmuh kyo joq, ge. 27 Nyang taiq zis gas, Housoeh lyis gas, ngah uwus dah yhen mha nyang lyis nhang kat das xiklyis dung. 28 Khasoeh ge lyis ngos vmang vnoeuh oeng yuk yoh shih yvmvyah, heisoeh shanghsenh dah joqyos mas nyamoq ma jweh das xiklyis, nyang nyamoq lyis loh zaih nhang aq, ge. 29 Abraham nyang lyis phuk taiq zis gas, Nyamoq gas Moshe dah lyi yahge lvpe jens dah maussauh yoh: hauh bang nyamoq dah dang gyo yoeus bas jungh, ge. 30 Dis soeu ka, Ma nghuot, uwus Abraham eh, shei goeus bang mas zis dvyuk nyamoq jyank mas doms loh lyis nyamoq nhaiqlom tsain thaiq das, ge. 31 Abraham nyang lyis taiq zis gas, Nyamoq Moshe yahge lvpe jens dah dang yangh ma gyo yoeus lyis gas, shei goeus bang dvyuk doms toq loh laus eq gyo yoeus das zis ma nghuot, ge. 1 Hauh thang lhyi, nyang changlo jens lyis taiq zis gas, Lainszo gus ma bos shoq gas ma yoh bweh; nghuot laus eq lainszo gus lhoeu thuq soeu ka mvtanhzoe nghuot! 2 Hai ngis bang dvyuk yuk lyis yaunos kuot nhang soeu ka, nyah lainzain mas mhoq shan tyaulhangh las thomh mas lhwih kat das zis gas nyah xiklyis zes gis. 3 Namoq gas namoq nyang zaih geh: Nah vmang vnoeuh nvng lyis yobos kuot lhyi nyang lyis nyho aq. Nyang nhaiqlom thaiq lyis gas nyang lyis yobos khyuot dyei aq. 4 Nyang nvng lyis dvnyeih lyis nyhet lhain yobos kuot las, Ngos nhaiqlom thaiq goeus, ge dvnyeih lyis nyhet lhain nah jyank mas doms lhain los las taiq lyis gas, nvng nyah yobos khyuot dyei aq. 5 Lvgyo jens Yhensain lhyi taiq zis gas, Ngamoq dah lomsjingh ehnyet je los nhang aq, ge. 6 Yhensain taiq zis gas, Namoq lomsjingh ehnyet anghshih chvp iq bos nghuot lyis, namoq gas nyvng zains lyis, Nvng vnyet masyah guot las thomh mas loh yuk joq aq, oen taiq lyis hauh zis gas namoq domsyos gyo das. 7 Namoq jyank mas yos phuk soeu, nghuot ya yvng yoeuh soeu jyeidwis nyeis las, yos pheh yah jweh los yah dvyih nyang lyis, Lvnyap los tsung lha zo shuk aq, ge namoq mas hank taiq das lah? 8 Nyang lyis, Ngah nyenhcon ba aq, nvng dyichih chih las ngos dye zo shuk shoq ngos lyis phuqsoe aq, hauh thang lhyi nvng dvyoh zo shuk das, ge taiq das ma nghuot lhyeh? 9 Nyang lyis taiq ya taiq zis kuot dyei yvmvyah, nyang gas jyeidwis lyis, Nhaiqshoqlang, ge taiq das lah? Ma taiq mvbeh. 10 Houyah dvyhangteh namoq eq taiq ya taiq zis lyis dye kuot lho lhyi, Ngamoq gas phauh ma dap dah jyeidwis dvtsain nghuot, ngamoq kuot chah goeu kyingh dvkuot oen taiq geh, ge. 11 Nyang Yerusalem pheh loh uhlyis Samari yahge Galile mau gungs cho lai loh. 12 Wukhau dvkoeuq mas wvng loh lyis, mvnggvng nos dah yukgis dvci yuk we we mas yap joq las nyang yah xauhgoh. 13 Nyamoq kaiq las taiq zis gas, Yhensain Yesu eh, ngamoq lyis nhaiqnyen aq, ge. 14 Nyang nyamoq lyis nyvng las nyamoq lyis taiq zis gas, Namoq dah gungs phudyei bang lyis loh chixoeuq geh, ge. Nyamoq loh nyeis lyis tsain thyauhlhang loh goeus. 15 Nyamoq mas dvyuk gas, nyang gis goeus zis lyis nyvng lho lhyi, tauh loh las Mangso lhyi yomkat kaiq chungh lho lha, 16 Nyah khyeiyang mas dupaiq las nyang lyis nhaiqshoqlang sang. Nyang gas Samari dius nghuot. 17 Yesu phuk taiq zis gas, Dvci yuk thyauhlhyang loh goeus ma nghuot lhyeh? Gau yuk khapheh loh goeus lah, ge. 18 Haih tungbaus mas lai las gohtoeu ka Mangso phunk lyis chungh das zis doms tauh los soeu ma bos lo nyvng, ge lho lha, 19 Nyang hauh soeu lhyi taiq zis gas, Toq las loh lo aq; nah lomsjingh zis gas nvng lyis gis los nhang goeus, ge. 20 Mangso munghdan khanhamp jweh los das cho, Pharishe moq yah nyang lyis nyei lyis nyang taiq zis gas, Mangso munghdan jweh zis gas nyoqjeih yah yoeuh nyeis las nyvng das zis ma nghuot. 21 Yoeuh aq, heineh, yoeuh aq thyineh, ge yoh taiq das zis ma nghuot: khasoeh ge lyis Mangso dah munghdan gas namoq dah vkhau mha nghuot, ge. 22 Nyang changlo jens lyis taiq zis gas, cangsoeu Lo dah buisnyeis dvnyeih lyis namoq nyvng mes laus eq, ma xauh nyvng das shishenh jweh los das. 23 Nyamoq gas namoq lyis, Heimha yoeuh aq, thyimha yoeuh aq ge lyis eq nyamoq thang mha vchank loh goh. 24 Khasoeh ge lyis maukhung dvshot pheh yah maunyoq nyik kat zis gohtoeu dvshot jweh shoq bvng loh zis yah dvyhangteh, Cangsoeu Lo gas nyah buisnyeis lyis housoeh nghuot los das. 25 Nghuot laus eq hauh zis ma bweh shih lyis shanghsenh zis nyoshoq yahge haq caiq bang peq tyamp zis xauh shih das. 26 Noa zaih lyis bweh yhangteh, hauh Cangsoeu Lo dah buisnyeis lyis eq housoeh nghuot los das. 27 Noa gas jeis sangpho khau mha wvng lho lhyi jeis nhauq las, dvnganh yvlyis mhont tyamp dah buisnyeis jweh shoq nyamoq gas, zo, shuk, nyihwank, lonyi dyeizo tsain kuot nyeis. 28 Lot zaih lyis eq housoeh vgus nghuot. Hauh uhlyis eq nyamoq gas zo, shuk, wis, ungh, jyo khyoq, yhen kuot las nyeis. 29 Nghuot laus eq Lot gas Sodom masyah thuq loh dah buisnyeis lyis maukhung mha dah nyi yahge hwank mau wus las, dvnganh yvlyis mhont. 30 Cangsoeu Lo thuq xoeuq dah buisnyeis lyis eq housoeh nghuot das. 31 Hauh buisnyeis lyis yhenkhung mha nyeis soeu ka, nyah yhen khau mha joq vyhang vlyih gyoh yoeus lo. Yos mas nyeis soeu eq vtauh los lo. 32 Lot dah yhensain nyhiq lyis tsain soh geh. 33 Vsainnyang kang lhyi khyuot yoeus das cho xo soeu hank laus eq, kang dyuk das. Kang dyuk soeu hank laus eq nyang kang xauh dwis das. 34 Ngos namoq lyis taiq bah, hauh nyens lyis dvjung mas aiq yuk yhet joq mhayah dvyuk lyis shwih loh las dvyuk gas nyet joq das. 35 Vmesbih aiq yuk dvgeh wom mhoq nyeis masyah, dvyuk lyis shwih loh las dvyuk gas nyet joq das. 36 Yos mas nyeis dah vbusbih aiq yuk mas, dvyuk lyis shwih yoeus loh las dvyuk gas nyet joq khoq das. 37 Nyamoq nyang lyis taiq zis gas, Yhensain eh, khamha bweh das lah, ge. Nyang gas, Mvng joq yvmas lvngda eq houmha zain los das, ge. 1 Hauh thang lhyi, dius gas yom ma gyau gyau vjangh shvmanh dung chah dah cho lhyi Yesu nyamoq lyis dangtoeuq yah taiq zis gas, 2 Wusmuhpuk dvkoeuq mas Mangso lhyi ma gyuk, dius lyis eq gungsyaus ma seq yaus dah soetuon soeu dvyuk nyeis. 3 Hauh wus mas chauhmuh dvyuk nyeis. Nyang gas nyah jyank mas lyih las sang zis gas, Ngah jeswus yahge ngah jo mas dan khyvlyis soetuon dyei aq, ge. 4 Nyang gas nyangh shoq soe ma tuon dyei toh tyamp. Hauh thang lhyi nyang taiq zis gas, Ngos gas Mangso lhyi ma gyuk, dius changh lyis eq gungsyaus ma yaus nghuot laus eq, 5 haih chauhmuh gas ngos lyis dvthauqkhyi nyeis yvmvyah, nyah shot pheh dap las lvto phuk dyei das: housoeh ma nghuot lyis gas nyang ngos lyis lhoq nyung nyeis das, ge. 6 Housoeh las Yhensain taiq zis gas, Ma dan dah soetuon soeu taiq zis lyis gyo yoeuh geh. 7 Mangso nyang khyen toh bang, nyang lyis nyeih nyenh dung nyeis shot pheh dap las dan khyvlyis lvnyap soetuon dyei das. 8 Ngos namoq lyis taiq bah, nyang gas nyamoq xiklyis lvto lvnyap phuk dyei das. Nghuot laus eq cangsoeu Lo jweh lyih buisnyeis lyis haih nyeisjvng mas lomsjingh ehnyet bos bang lyis xo nyvng das lah, ge. 9 Vsainnyang gungs lyis dan, ge nghamhzo las gohyhamh bang lyis gas cha nho ma doeus bang lyis toeuq las nyang hai dangtoeuq yah eq taiq kyoh. 10 Dius aiq yuk shvmanh dung das xiklyis yhenmuh mas doq loh: dvyuk gas Pharishe, gohtoeu dvyuk gas khoengh khywi soeu nghuot. 11 Pharishe gas yap las, Mangso eh, ngos gas lhuot zo lhuot shuk, ma dan, nyi shuot lvng shuot bang teh ma nghuot thoq lyis magoh khoengh khywi soeu yhangteh yangh ma nghuot yvmvyah ngos nvng lyis jyehjuh chungh. 12 Ngos gas Yuda No Buisnyeis dvdaus lyis aiq lhain womkyi lha, ngos yoh goeu dvnganh mas ciboms dvboms vlu kat, ge dung. 13 Khoengh khywi soeu ka we mas yap las, nyah nyoq maukhung mha ma womh nghank yoeuh yoeuh nyah yvnggvng mas bat las dung zis gas, Mangso eh, ngos yaunos wons soeu lhyi nhaiqnyen aq, ge. 14 Ngos namoq lyis taiq bah, haih soeu ka thyi gohtoeu dvyuk thoq lyis dan zis yah nyah yhen pheh loh. Khasoeh ge lyis vsainnyang gungs lyis chunghzo soeu hank laus eq o mha khyoq zis xauh das. Vsainnyang gungs lyis o mha gyoh soeu ka chungh zis xauh das, ge. 15 Nyamoq gas lonoeuh jens lyis tanh dyei bas jungh, ge nyah jyank mas shwih lyih yvlyis changlo jens nyvng las nyamoq lyis tsain nyho. 16 Nghuot laus eq Yesu nyamoq lyis khi yoeus las taiq zis gas, Loshang jens lyis ngah jyank mas los nhang geh, nyamoq lyis vtomp toh goh: khasoeh ge lyis, Mangso munghdan gas housoeh teh bang xiklyis nghuot. 17 Ngos namoq lyis jyoengh taiq bah, Hank laus eq Mangso munghdan lyis loshang teh ma lhom yoeus soeu ka, houmha ma yoh wvng loh, ge. 18 Guon soeu dvyuk nyang lyis nyei zis gas, Gis dah Svra eh, ngos vcaiq vto kang yoh das xiklyis cha kuot chah lah, ge. 19 Yesu nyang lyis taiq zis gas, Nvng ngos lyis chamus Gis soeu, oen lui lah? Mangso mha lai las gis soeu dvyuk eq ma bos. 20 Lyi mas, nyi shuot lvng vshuot, dius vsat, vkhauh, ma ying kanghjyoeng vkat, nah ungwes uwus lyis phauh nyang aq, ge zis nvng seq toh goeus, ge. 21 Nyang taiq zis gas, Haih goeu dvnganh lyis ngos loyvm yoq lyis yah chank goeus, ge. 22 Yesu haih yvlyis xauhgyo las nyang lyis taiq zis gas, nvng dvja chah shih: nvng yoh dah goeu dvnganh ungh las nyungs bang lyis gvm dyei aq, housoeh lyis nvng maukhung mha zisyos yoh das; housoeh las ngah thang mha chank los aq, ge. 23 Gvshih, nyang haih zis xauhgyo lyis, nyang svsoh nhaiqkuk: khasoeh ge lyis nyang gas svsoh dis soeu nghuot. 24 Nyang housoeh nhaiqkuk yvlyis Yesu nyvng lyis, nyang taiq zis gas, Yoh khuiq bang gas Mangso munghdan mas wvng das zis kha iq yau! 25 Khasoeh ge lyis dis soeu Mangso munghdan mas wvng lwis thoq lyis gola-u gas nghvpnho mha wvng das zis zes lwis, ge. 26 Hauh dang lyis xauhgyo bang taiq zis gas, Housoeh lyis gas khyuot yoeus zis hank xauh das lah, ge. 27 Nyang taiq zis gas, Dius ma gis bweh zis Mangso ka gis bweh, ge. 28 Hauh uhlyis Petru taiq zis gas, Yoeuh aq, ngamoq gas dvnganh toh khoq las nah thang mha chank los goeus, ge. 29 Housoeh las nyang nyamoq lyis taiq zis gas, Ngos namoq lyis jyoengh taiq bah, Mangso munghdan gvng mas vsainnyang dah yhen, ungwes, uwus, vmang vnoeuh, yhensain nyhiq, lo jens lyis toh khoq soeu hank laus eq, 30 gvshih dah vcaiq mas nyoshoq huon xauh yoeus das: hauh thoq lyis jweh los das vcaiq mas eq vcaiq vto kang xauh yoeus das, ge. 31 Hauh thang lhyi nyang gas dvci aiq yuk moq lyis nyah jyank mas shwih yoeus las nyamoq lyis taiq zis gas, Yoeuh aq, yang gas Yerusalem pheh loh nyeis. Cangsoeu Lo yah sen lha lvpe jens lhaih ya lhaih toh zis dvnganh nyuk los das. 32 Khasoeh ge lyis nyang lyis gohnyau bang loq mas kyauh tyamp las, jwangh, ma phauh gis kuot zis yahge svkanh dyeh gyuon zis xauh das. 33 Nyamoq gas nyang lyis lyuk las sat das: somh vnyeih lyis nyang dwis toq das. 34 Nyamoq gas haih zis dvkoeuq eq ma seqgyo: khasoeh ge lyis haih dang gas nyamoq xikkhonh mas nghop shung toh las, taiq kyoh zis dvkoeuq eq ma tsain seq. 35 Gvshih nyang Yerikho mas jweh ni los lyis, nyoqjet soeu dvyuk choyvm mas tsung lha dung zo nyeis. 36 Moqjens lai sam gyo las, nyang gas hauh zis cha nghuot yvlyis nyei. 37 Nyamoq gas nyang lyis, Nazaret Yesu lai loh zis lyis tsain taiq kyoh dyei. 38 Housoeh las nyang kaiq sang zis gas, Dawi dah Lo Yesu eh, ngos lyis nhaiqnyen aq, ge. 39 Xik lyis loh nyeis bang gas nyang tsoeklo nyeis bas jungh ge, nyang lyis tsain nyho. Nghuot laus eq nyang gas zes kaiq las, Dawi dah Lo eh, ngos lyis nhaiqnyen aq, ge. 40 Yesu yap las, hauh soeu lhyi nyah jyank mas shwih los das xiklyis vmingh dyei. Housoeh nyah jyank mas ni los lyis nyang lyis nyei zis gas, 41 Ngos nvng lyis cha kuot dyei das zis o lah, ge. Nyang gas, Yhensain eh, ngah nyoq doms nyvng nhang aq, ge. 42 Yesu nyang lyis taiq zis gas, Nah nyoq doms nyvng los bas jungh, nah lomsjingh zis gas nvng lyis gis los nhang goeus, ge. 43 Houjang yah nyah nyoq nyvng los las, Mangso dah phunk lyis chungh zis yah nyah thang mha chank loh. Dius dvnganh gas hauh zis lyis nyvng las Mangso lhyi chungh. 1 Yesu gas Yerikho wus cho yah wvng las lai loh. 2 Yoeuh aq, khoengh khywi bang mas uhjyung nghuot dah Zake ge soeu dvyuk nyeis. Hauh soeu ka dis soeu nghuot. 3 Nyang gas Yesu hank nghuot yvlyis nyvng mes las xo laus eq dius puk thoeu lha, nyang gas nyhen yvmvyah ma yoh nyvng. 4 Housoeh las nyang lyis nyvng shoq, xik lyis uhlhomh wuih las nyang lai loh das choyvm, lvhomp zains mas doq loh. 5 Yesu hauh yvmas jweh las nghank yoeuh kat lyis nyang lyis nyvng las, Zake eh, lvnyap gyoh los aq, khvnyhik ngos nah yhen mha thoeng das, ge. 6 Nyang eq lvnyap gyoh las nyang lyis gauslaus gausseq lhom yoeus langh. 7 Nyamoq hauh zis nyvng lyis, nyamoq dvnganhmoq gas nyang lyis, yaunos wons soeu yhen mha boengh wvng doq, ge lop. 8 Zake toq yap las Yhensain lhyi taiq zis gas, Yhensain eh, yoeuh aq ngah vyhang dvgohyih nyungs bang lyis dyei das; dvyuk yuk lyis ngos anzo lyis nyei huon doms cap das, ge. 9 Yesu nyang lyis taiq zis gas, Khyuot yoeus cho ka khvnyhik haih yhen mha los goeus, khasoeh ge lyis nyang eq Abraham dah lo dvyuk nghuot. 10 Cangsoeu Lo gas dyuk loh soeu lhyi xo lha khyuot yoeus das xiklyis los zis nghuot, ge. 11 Nyamoq haih zis lyis tsain xauhgyo lyis, nyang gas Yerusalem mas jweh ni los yvmvyah eq, nyamoq gas Mangso munghdan lvnyap thuq los das ge nghamh yvmvyah eq, nyang dangtoeuq dvkoeuq yah doms kyah taiq. 12 Housoeh yvmvyah nyang taiq zis gas, Nyoqnho bos soeu dvyuk gas, nyang nyang munghdan dvkoeuq xauh yoeus thang lhyi doms los das ge we mau pheh loh. 13 Hauh uhlyis nyah jyeidwis jens mas dvci yuk lyis khi las, yuk khanghmuh lyis ngwis kyvp dvci ci kyauh toh lho lha taiq zis gas, Ngos doms jweh los shoq haih zis yah soenghi kuot geh, ge. 14 Nghuot laus eq nyah dius jens gas nyang lyis hoeng lha, Haih soeu ngamoq thoq mas guon das zis ngamoq ma o, ge nyah thang mha mang chank kat kat. 15 Hauh thang lhyi nyang munghdan yoh las tauh jweh los lyis, nyang ngwis dyei toh khoq dah jyeidwis jens soenghi kuot las, vmyat khayuk khanyhoq yoh zis seq shoq nyamoq lyis khi nhang kat. 16 Cangxeih vyuk lyih las taiq zis gas, Yhensain eh, nah ngwis kyvp mas dvci kyvp myat goeus, ge. 17 Nyang gas, Gis dah jyeidwis eh, nvng gas vmhauhlo dah muh mas lomluk goeus, wus dvci lhyi guon aq, ge nyang lyis taiq. 18 Aiq vyuk eq, Yhensain eh, nah ngwis kyvp mas oeng kyvp myat goeus, ge. 19 Nyang gas hauh soeu lhyi eq, Nvng wus oeng koeuq lyis guon aq, ge taiq. 20 Gohtoeu dvyuk eq lyih las, Yhensain eh yoeuh aq, nah ngwis kyvp lyis ngos misseh yah khoek tsomh toh. 21 Nvng gas ma toh masyah yoeus las, jyo ma khyoq masyah seq yhomh dah dius yau dvyuk nghuot yvmvyah ngos nvng lyis gyuk, ge taiq. 22 Nyang taiq zis gas, Ma lyungs jyeidwis eh, nvnyang dang khonh yah ngos nvng lyis soetuon das: ngos ma toh masyah yoeus las, jyo ma khyoq masyah yhomh yoeus soeu, yau dah dius nghuot yvlyis nvng seq toh goeus lyis gas, 23 ngos doms los lyis ngah ngwis bonzoe yahge ngwis lhyi yoh shoq ngwis jyi mha chamus ma kat toh, ge. 24 Vyvm mas yap joq bang lyis eq nyang taiq zis gas, Nyah jyank masyah hauh ngwis kyvp dvkoeuq lyis yoeus las ngwis kyvp dvci yoh soeu lhyi dyei geh, ge. 25 Nyamoq, nyang lyis taiq zis gas, Yhensain eh, nyang ngwis kyvp dvci yoh goeus, ge. 26 Ngos namoq lyis taiq bah, Yoh bang lyis lung dyei das. Ma yoh bang jyank masyah gas, nyamoq yoh joq zis yangh yoeus tyamp dyei das. 27 Ngos, nyamoq lyis guon das yvlyis ma o dah ngah jeswus lyis heimha shwih los las, ngah xikkhonh mas sat geh, ge. 28 Nyang housoeh dye taiq lho lhyi, nyang gas nyamoq xik mas Yerusalem pheh tsoq loh nyeis. 29 Tsanlun ge dah boms, Betphage yahge Bethani wukhau nvm mas jweh ni los lyis, nyang nyah changlo aiq yuk lyis nhang lha taiq kat zis gas, 30 Nah aiq yuk, xik mas dah wukhau mha loh geh; houmha wvng loh lyis hank eq ma ji ku shih dah mauhlyihzoe lo dvdoeu twih toh zis lyis nah aiq yuk wvng loh lyis nyvng das, hauh yvlyis phui she los geh. 31 Dvyuk yuk nah aiq yuk lyis, Chamus hauh yvlyis phui goh lah, ge nyei lyis, Yhensain hauh yvlyis yhung chah ge, oen taiq geh, ge. 32 Jyeinhang zis xauh vzomh loh las nyang taiq kat vgus loh nyvng. 33 Nyah aiq yuk mauhlyihzoe lo lyis phui nyeis lyis, yhensain moq gas, Hauh mauhlyihzoe lo chamus phui goh lah, ge nyah aiq yuk lyis nyei. 34 Nyah aiq yuk phuk taiq zis gas, Yhensain haih yvlyis yhung chah ge, ge. 35 Nyah aiq yuk gas hau mauhlyihzoe lo lyis Yesu jyank mas she loh dyei. Mauhlyihzoe gungs thoq mas nyamoq dah dyimis nyhoeuh las Yesu lyis ji nhang. 36 Nyang housoeh ji loh nyeis lyis cho mha dius jens gas nyamoq dah dyi tsain nyhoeuh dyei. 37 Gvshih wugungs jweh bah ge dah Tsanlun boms nyeismhung mha jweh lyis, nyah moqjens gas nyamoq nyvng ku dah yomsoq zains muhzoh gvng mas phunk lyis gauslaus las Mangso lhyi yomkat las tsain chungh zis gas, 38 Yhensain nyings mas jweh los dah hwankti ka ngelhoq; Maukhung mha nyenstap zis yahge nyhang thank joqyos mas phunk bos nyeis bas jungh, ge. 39 Dius moqjens masyah Pharishe dvyhamh nyang lyis taiq zis gas, Svra eh, nah changlo jens lyis nyho aq, ge. 40 Nyang nyamoq lyis phuk taiq zis gas, Ngos namoq lyis taiq bah, haih bang samlo nyeis nghuot lyis gas lukgoq tsain kaiq los das, ge. 41 Nyang hauh wus mas jweh ni los las, hauh wugungs lyis nyvng lyis, hauh nyhenshang nyang ngaus las taiq zis gas, 42 Wugungs nvng eh, nah nyenstap zis yah sen zis cha nghuot yvlyis khvnyhik nvng toq seq ya lhyeh! Nghuot laus eq gvshih gas hauh zis lyis nvng ma nyvng. 43 Khasoeh ge lyis, nah jeswus jens gas nah vyvm vwi mas gvduk kuot lho lha, nvng lyis tsain lhaink toh las, nvng lyis shot khanghmuh kyamp gos toh dah buisnyeis jweh los das. 44 Nvng lyis eq, nah wusciank khau mha nyeis bang lyis eq mhont tyamp das las, nvng mas lukgoq dvlom thoq mas dvlom yangh ma yoh ci toh lo das: khasoeh ge lyis Mangso nvng lyis komh das shishenh lyis nvng ma seq. 45 Nyang gas yhenmuh mas wvng loh las houmha kaih ungh kaih wis bang lyis khat thuq tyamp. 46 Nyang nyamoq lyis taiq zis gas, Maussauh mas, Ngah yhen ka shvmanh dung yhen nghuot, ge lhaih toh laus eq namoq gas hauh yvlyis khyanktau khyung tsain kuot, ge. 47 Nyang gas nyeih khanghmuh yhenmuh mas jyauh nyeis. Nghuot laus eq Phudyei uhjyung jens, maussauh lhaih bang yahge dius jens lyis uhshe bang gas, nyang lyis sat das cho tsain xo. 48 Nghuot laus eq dius jens dvnganh gas nyah dang mas nhaiq wvng nyeis yvmvyah, nyamoq khasoeh kuot das cho ma xo nyvng. 1 Dvnyeih gas nyang yhenmuh mas dius jens lyis jyauh zis yahge gausyis dang taiq kyoh nyeis dah uhlyis, Phudyei uhjyung jens, maussauh lhaih bang yahge logis jens nyah jyank mas lyih las, 2 Nvng gas chah vmingh yah haih zis kuot lah? Nvng lyis haih vmingh hank dyei zis ngamoq lyis taiq kyoh aq, ge. 3 Nyang nyamoq lyis phuk taiq zis gas, Ngos eq namoq lyis dvja nyei bah, ngos lyis phuk taiq geh. 4 Yohan dah jeisnyhop cho ka Mangso mhayah nghuot lah? Dius masyah nghuot lah, ge. 5 Nyamoq nyang changh xamgoh las, Yang maukhung mhayah nghuot oen taiq lyis gas, Housoeh lyis namoq, nyang lyis chamus ma lomsjingh goh lah, ge das. 6 Nghuot laus eq yang dius masyah nghuot oen lhyi ka, dius dvnganh gas yang lyis lukgoq yah doeuh das: khasoeh ge lyis Yohan ka lvpe nghuot yvlyis nyamoq jingh, ge. 7 Housoeh las nyamoq phuk taiq zis gas, Khamha yah nghuot zis ngamoq ma seq, ge. 8 Yesu nyamoq lyis taiq zis gas, Ngos haih muh chah vmingh yah kuot zis namoq lyis ma taiq kyoh das, ge. 9 Hauh thang lhyi, nyang dius jens lyis haih dangtoeuq yah taiq zoh loh zis gas, Dius dvyuk zvbiq dvkhyam ba tsungh toh lho lha, khyam muh zwi bang lyis tsoeuh dyei khoq las, nyang gas we mau mas nyangh shoq loh nyeis. 10 Shishenh jweh lyis, khyam mha dah zvbiq shih gvmboms nyang lyis dyei bas jungh ge, khyam tsoeuh zwi bang jyank mas jyeidwis dvyuk nhang kat. Nghuot laus eq khyam tsoeuh zwi bang gas nyang lyis bat las, gungskom nhang kat. 11 Nyang gohtoeu jyeidwis dvyuk lyis doms nhang kat. Nyang lyis eq nyamoq bat, vxoq vcaiq shoeuhshih las gungskom nhang kat. 12 Somh vyuk nhang lhyi, nyang lyis eq dvmtap las, khat thuq tyamp. 13 Hauh thang lhyi zvbiq khyam sain taiq zis gas, Ngos khasoeh kuot das lah? Ngos jyetdap, ngah lo lyis nhang kat das, nyang lyis gas nyamoq phauh nyang mvbeh, ge. 14 Nghuot laus eq, khyam tsoeuh zwi bang nyang lyis nyvng lyis, nyamoq nyang changh taiq goh zis gas, Haih soeu ka yhenzis zom das soeu nghuot. Hauh yhenzis gas yah zis nghuot bas jungh, nyang lyis sat goh, ge. 15 Nyamoq gas, nyang lyis zvbiq khyam nghe pheh she thuq las sat. Housoeh las zvbiq khyam sain ka nyamoq lyis khasoeh kuot das lah? 16 Nyang jweh los las hauh khyam tsoeuh zwi bang lyis mhont las, zvbiq khyam ka gohyhamh bang lyis dyei das, ge. Hauh zis xauhgyo bang gas, Heisoeh ma nghuot bas jungh, tsain ge. 17 Nyang nyamoq lyis yoeuh las taiq zis gas, Housoeh lyis gas, yhen tsuk bang peq tyamp dah luklom gas, yhenthunk lukzains bweh los goeus, ge lhaih toh zis gas cha ge lah? 18 Hauh lukzains thoq mas gyoh soeu hank laus eq dyis tyamp das. Hank thoq mas laus eq hauh zis gyoh lyis gas phih soeh nhoeuq tyamp das, ge. 19 Hauh dangtoeuq gas, phudyei uhjyung jens yahge maussauh lhaih bang lyis toeuq las taiq yvlyis nyamoq seqgyo las, hauh uhlyis yangh nyang lyis nyhik das zis sont nyeis. Nghuot laus eq dius jens lyis gyuk. 20 Housoeh las nyamoq gas, jyoeng guons kuot dah joh yoeuh bang lyis lhom nhang zis gas, nyang cha taiq yvlyis nyhik las, nyang lyis yomsoq yahge vmingh yoh dah mungh zau jyank mas yoh kyauh tyamp das xiklyis nghuot. 21 Nyamoq, nyang lyis nyei zis gas, Svra eh, nvng gas dius dah nyoqnho lhyi ma yoeuh dan khyvlyis jyauh las Mangso dah lyi jus jus jyauh nyeis zis lyis ngamoq seq. 22 Ngamoq gas hwankti Kesar lyis khoengh kat das zis lyi bos lah, ma bos lah, ge. 23 Nghuot laus eq nyang gas nyamoq dah nhaiqlom guih zis seq las nyamoq lyis taiq zis gas, 24 Ngwis kyvp dvkoeuq ngos lyis chixoeuq geh, hauh zis hank gungslho yahge maussauh dap lah, ge. Nyamoq taiq zis gas, Kesar zis nghuot, ge. 25 Nyang nyamoq lyis taiq zis gas, Housoeh yvmvyah Kesar zis nghuot lyis gas Kesar lyis, Mangso zis nghuot lyis gas Mangso lhyi dyei geh, ge. 26 Nyamoq gas dius jens xikkhonh mas nyah dang khonh mas yobos ma nyvng zis yahge nyang phuk taiq dang lyis tsain mauh las samlo no dyuk goeus. 27 Hauh uhlyis, dwis toq cho ma bos ge dah Saduke dvyhamh nyah jyank mas los nyei zis gas, 28 Svra eh, yhensain nyhiq bos dah vmang, lo ma bos khoq shei lhyi, vmang dah chauhmuh lyis vnoeuh shoeuh las vmang dah vshih tsoq bas jungh ge Moshe ngamoq lyis lhaih toh dyei. 29 Gvshih houteh vmang vnoeuh nyhet yuk nyeis. Cangxeih vyuk gas nyihwank las lo ma bos shei khoq. 30 Aiq vyuk eq chauhmuh shoeuh las lo ma bos shei khoq. 31 Somh vyuk eq chauhmuh shoeuh goeus. Housoeh nyhet yuk jweh shoq lo ma bos tsain shei khoq. 32 Thang thank lyis hauh vmesbih eq shei loh. 33 Housoeh yvmvyah hau dwis toq los uhlyis hauh vmesbih gas, hank dah yhensain nyhiq nghuot das lah? Khasoeh ge lyis nyang gas nyhet yuk moq yah phoengh wvng goeus, ge. 34 Yesu nyamoq lyis phuk taiq zis gas, Haih mungkvn lo jens gas phoengh hwank, lonyi dyeizo kuot. 35 Nghuot laus eq shei masyah dwis toq los las hauh mau mas jweh bang gas, phoengh hwank, lonyi dyeizo zis ma bos lo. 36 Nyamoq gas loeuswons bang teh nghuot las ma shei lo. Nyamoq lyis shei masyah dwis toq los nhang goeus yvmvyah nyamoq gas Mangso dah lo jens nghuot. 37 Shei bang lyis dwis toq los nhang cho yah sen lha Moshe ka kanghjyoeng dede chixoeuq goeus. Nyi dap nyeis dah mhanhgyomh yah sen lha lhaih toh dah Jyomp maussauh doeus mas Moshe ka Yhensain lhyi Abraham dah Mangso, Isak dah Mangso, Yakop dah Mangso, ge lui. 38 Khasoeh ge lyis nyang gas shei bang dah Mangso ma nghuot, dwis nyeis bang dah Mangso dvnghuot; Mangso dah xikkhonh mas haih bang dvnganh gas dwis nyeis, ge. 39 Hauh uhlyis maussauh lhaih bang dvyhamh nyang lyis phuk taiq zis gas, Svra eh, nvng taiq zis jus, ge. 40 Hauh thang lhyi nyamoq gas nyang lyis cha eq ma womh nyei lo. 41 Nyang nyamoq lyis taiq zis gas, Khristu gas Dawi dah lo nghuot, ge nyamoq khasoeh yoh taiq lah? 42 Dawi nyang Chungh Dang maussauh mas, Hauh Yhensain ngah Yhensain lhyi taiq zis gas, 43 Ngos nah jeswus lyis nah nangte kuot shoq, Nvng ngah loqyos shot pheh tsung toh aq, ge. 44 Housoeh las Dawi gas Khristu lyis Yhensain ge lui lyis gas, nyah lo khasoeh yoh nghuot das lah, ge. 45 Hauh thang lhyi dius dvnganhmoq xauhgyo shoq nyang nyah changlo jens lyis taiq zis gas, 46 Maussauh lhaih bang lyis zaih geh: nyamoq gas dyixing wuot las suh mes. Kaih mas phauh nyang zis yah jeshuh das zis eq, lyi jungs mas gis thank tsunggus lyis eq, pwe mha gis thank joqyos lyis eq tsain o mes. 47 Chauhmuh jens dah yhen lhyi kuotzo kuot shuk las dius dah xikkhonh mas yoeuh doeus das xiklyis shvmanh xing xing dung guons kuot. Hauh bang gas zes than dah yobos dyei zis xauh das, ge. 1 Housoeh nyang yoeuh kat lyis, dis bang ziskwi mha vlu tsain kat nyeis yvlyis nyvng las, 2 thunkcent aiq kyvp kat, nyungs dah chauhmuh dvyuk lyis eq nyang nyvng. 3 Nyang taiq zis gas, Ngos namoq lyis jyoengh taiq bah, hai nyungs dah chauhmuh gas nyamoq dvnganhmoq thoq lyis zes nyo shoq kat goeus. 4 Khasoeh ge lyis hauh bang dvnganhmoq gas, nyamoq magons magoh yoh masyah vlu kat. Nghuot laus eq nyang gas vshoh vjyen masyah nyah kang khoeu das zis dvnganh kat goeus, ge. 5 Dius dvyhamh gas yhenmuh lyis yungh dah luk yahge dyei toh dah jyungshuk yah shunk toh zis lyis taiq nyeis lyis nyang taiq zis gas, 6 Gvshih namoq nyvng nyeis, luk dvlom thoq mas dvlom ci toh dah haih goeu gas, dvlom thoq mas dvlom kih toh zis ma bos lo das buisnyeis jweh los das, ge. 7 Nyamoq, nyang lyis nyei zis gas, Svra eh, hauh zis gas khanhamp nghuot das lah? Hauh cho bweh ni los lyis chah vlho nghuot das lah, ge. 8 Nyang taiq zis gas, Namoq mhuih khwangh zis ma xauh bas jungh, zaih geh: khasoeh ge lyis, nyoshoq moq ngah nyings yoeus las, Ngos gas Khristu nghuot; hauh shishenh jweh ni los goeus, ge vguons kuot taiq los das: housoeh las namoq hauh bang thang mha vchank loh goh. 9 Namoq gas moeng dyoq zis yahge gomloeus toq cho xauhgyo lyis vgyuk vdvn goh: Hauh cho ka xik bweh los das. Nghuot laus eq thang thank zis gas ma jweh los shih, ge. 10 Tsai, nyang nyamoq lyis taiq zis gas, Dius dvnyau yah dvnyau, munghdan dvkoeuq yah dvkoeuq zan goh das. 11 Joqyos vdeh deh mas maunyeis gvgis dwis las, panghkhauq, yomh jweh los das. Maukhung mhayah eq gyukphoh zis yahge vlho zainsmuh bweh thuq los das. 12 Nghuot laus eq hauh cho dvnganh ma bweh shih lyis, ngah nyings gvng mas svbih yah namoq lyis nyhik las shoeuhshih, lyi jungs mas kyauh tyamp las thung lhunk, hwankti yahge guon bang dah xikkhonh mas shwih loh zis tsain xauh das. 13 Housoeh teh zis gas namoq kanghjyoeng kat das dah toeuh bweh los das. 14 Housoeh yvmvyah namoq khasoeh toeuh das zis, xik lyis yah ma nghamh toh noh zis namoq nhaiqlom mas tsain kat chi geh. 15 Khasoeh ge lyis jeswus namoq lyis ma yoh taiq ung, dang uh ma yoh lhomh das nyhenshang ngos namoq lyis nhuot mas joeui dyei das. 16 Namoq dah nyhiphoq, vmang vnoeuh, vnyau vhuh yahge dyenschangh jens gas namoq lyis phanhlyen das. Namoq mas dvyhamh lyis gas sat das. 17 Ngah nyings gvng mas dvnganhmoq namoq lyis hoeng los das. 18 Nghuot laus eq namoq dah cam dvkhvt eq dyoq das zis ma nghuot. 19 Namoq gas jhen zis yah namoq dah kang khyuot yoeus zis xauh das. 20 Yerusalem wugungs lyis jeswus yah lhaink toh zis lyis namoq nyvng goeus ya, hauh wugungs dyoqbis bah ge goeus zis lyis namoq seq toh lo geh. 21 Hauh uhlyis Yuda mau mas nyeis bang gas boms pheh phang loh bas jungh. Wugungs khau mha nyeis bang gas thuq loh bas jungh. Wuxom mha nyeis bang eq wus vkhau mha ma wvng los bas jungh. 22 Khasoeh ge lyis hauh buisnyeis lyis gas, lhaih ya lhaih toh dang nyuk los das las, haih buisnyeis gas lvto phuk das buisnyeis nghuot. 23 Hauh buisnyeis lyis loshang gungs nghuot bang yahge lonoeuh nauh gvmshuk bang gas mvtanhzoe nghuot! Khasoeh ge lyis hauh mau mas gyukluklvsonh shohjyen zis xauh las, haih dius nyau thoq mas nhaiqlom dyis zis jweh das. 24 Nyamoq gas moengsa yah dyoqbis das, dius nyau khanghmuh yah nyhik shwih loh zis xauh das. Gohnyau bang dah shishenh ma thank dvchank Yerusalem gas gohnyau bang yah nang zaiq toh zis xauh das. 25 Hauh uhlyis buis, lhamhmuh yahge kyi mha eq vlho thuq los das; thomh yahge jeisphauq toq thwe gvng mas munghdan gas mauh las, 26 hauh nyeisjvng mas bweh los zis lyis yoeuh las, dius jens gyuk zis yah chuot lains loh das. Khasoeh ge lyis maukhung mha dah yomsoq nonh los das. 27 Hauh uhlyis Cangsoeu Lo gas, yomsoq yahge phunk zainsmuh yah jyommauh yah gyoh los zis lyis nyamoq nyvng das. 28 Haih vyhang bweh zoh los lyis, namoq uhloms nghank las yoeuh kat geh: khasoeh ge lyis namoq dah khyuot yoeus cho jweh ni los goeus. 29 Nyang nyamoq lyis dangtoeuq yah taiq zis gas, Namoq maiphang zains yahge gohtoeu saiqzains dvnganh zis lyis yoeuh geh: 30 Saiq nyuk tuot los zis nyvng goeus ya, zvn wvng los zis lyis namoq nyang yoh seq. 31 Houyah dvyhangteh hai bweh los dah vyhang lhyi nyvng lyis, Mangso munghdan gas jweh ni los goeus zis seq geh. 32 Ngos namoq lyis jyoengh taiq bah, Haih zis ma nyuk los dvchank haq caiq ma lai das. 33 Maukhung nyeisjvng lai loh laus eq ngah dang gas ma lai loh das. 34 Namoq gas vsainnyang dah gungs lyis zaih nyeis geh. Namoq gas, zo lais shuk lais pwe kuot gvng mas nyeisjvng thoq mas dah chiqjyen yvmas shishenh vthank nhang goh. Hauh buisnyeis gas lhyik baiq teh namoq mas nyetlos nyettant thungh phuh los das. 35 Khasoeh ge lyis, hauh buisnyeis gas nyeisjvng gonh mas nyeis ya nyeis bang thoq mas jweh los das. 36 Housoeh yvmvyah hai bweh los das dah cho dvnganh masyah namoq luiq las, cangsoeu Lo dah xikkhonh mas yoh yap das xiklyis, vjangh shvmanh dung las zungh nyeis geh, ge. 37 Housoeh Yesu gas nyeih lyis yhenmuh mas jyauh nyeis. Nyenh lyis gas thuq las Tsanlun ge dah boms mas loh nyeis. 38 Dius dvnganh nyah dang lyis gyo yoeus das nyhenshang nvpsangh yah yhenmuh mas tsain los. 1 Lhuiq Kat Pwe ge nyhink dah bicheih ma kat ohlhyoq zo pwe jweh ni los nyeis. 2 Hauh uhlyis phudyei uhjyung jens yahge maussauh lhaih bang gas, nyang lyis khasoeh yoh sat das dah cho tsain xamgoh nyeis. Nghuot laus eq nyamoq gas dius jens lyis gyuk nyeis. 3 Hauh shvhoeu lhyi dvci aiq yuk mas Iskarot ge dah Yudas jyank mas Satan wvng las, 4 nyang thuq loh las phudyei uhjyung jens yahge zau jens jyank mas, nyang lyis khasoeh yoh phanhlyen dyei das cho, nyamoq yah e xamgoh nyeis. 5 Hauh bang gas gaus las ngwis dyei das xiklyis xamxonh. 6 Nyang nyamoq yah xamxonh las moqjens ma nyeis uhlyis nyang lyis yoh phanhlyen dyei das toeuh xo nyeis. 7 Lhuiq Kat Pwe yvnglo sat phudyei las bicheih ma kat ohlhyoq zo pwe shishenh jweh los. 8 Housoeh yvmvyah nyang gas, Petru yahge Yohan lyis xik pheh nhang lha taiq kat zis gas, Yang zo das xiklyis Lhuiq Kat Pwe loh sont langh geh, ge. 9 Hauh aiq yuk nyang lyis nyei zis gas, Nvng ngamoq lyis khamha loh sont toh dyei langh nhang mes lah, ge. 10 Nyang nyah aiq yuk lyis taiq zis gas, Nah aiq yuk wugungs mas wvng loh lyis jywang dvng soeu dvyuk yah xauhgoh das: hauh soeu wvng loh dah yhen khau mha chank wvng loh geh. 11 Hauh yhensain lhyi, Ngos ngah changlo jens yah Lhuiq Kat Pwe zo das dah boenghdoq yvp khah zis nghuot lah, ge Svra nyei nhang, oen taiq geh. 12 Housoeh lyis nyang sont toh dah yhenthoq yvpmuh dvyvp tuonh shet das, yah nyhenshang houmha ba sont toh langh geh, ge. 13 Nyah aiq yuk loh lyis nyang taiq kat vgus nyvng las, hau Lhuiq Kat Pwe nyenhcon lhyi tsain ba sont toh. 14 Shishenh jweh las nyang gas lvgyo jens yah dvgeh kihgus mas joqyos yoeus. 15 Nyang nyamoq lyis taiq zis gas, Ngos shanghsenh zis ma xauh shih lyis namoq yah dvgeh haih Lhuiq Kat Pwe svsoh zo shuk mes. 16 Ngos namoq lyis taiq zis gas, Mangso munghdan mas doms xauh zo shishenh jweh shoq, ngos haih yvlyis ma zo das, ge. 17 Nyang kom lhyi yoeus las jyehjuh chungh lho lha taiq zis gas, Haih zis lyis yoeus las namoq mas gvm geh. 18 Ngos namoq lyis taiq bah, Mangso munghdan jweh los shoq, ngos zvbiq shih mas zis ma shuk lo das, ge. 19 Hauh thang lhyi ohlhyoq yoeus las jyehjuh chungh lho lha khyiq dyei las taiq zis gas, Haih zis gas namoq xiklyis dyei tyamp dah ngah gungs nghuot. Ngos lyis soh das xiklyis haih zis kuot geh. 20 Houyah dvyhangteh nyamoq dye zo thang lhyi kom lhyi yoeus las taiq zis gas, Haih zis gas namoq xiklyis huot tyamp, ngah suih yah kuot toh dah thanghchvp vsaiq nghuot. 21 Nghuot laus eq yoeuh aq, ngos lyis phanhlyen das soeu dah loq gas haih kihgus mas ngah loq yah dvgeh nghuot. 22 Cangsoeu Lo gas toeuq toh zis yah dvyhangteh loh lo das; nghuot laus eq nyang lyis phanhlyen soeu ka mvtanhzoe nghuot, ge. 23 Hauh uhlyis nyamoq eq hauh cho kuot das zis hank nghuot das au, ge tsain nyei goh nyeis. 24 Hauh thoq lyis changlo jens mas zes kuh soeu hank nghuot nyeis au lhyeh, ge nyamoq taiq phyen goh nyeis yvmas, 25 Nyang nyamoq lyis taiq zis gas, Gohnyau hwankti jens gas nyamoq xauh guon bang lyis kyukzo nhantzo. Nyamoq lyis vmingh dyei bang eq, nyamoq nyang gungs lyis jyehjuh yhensain nghuot ge taiqzo. 26 Nghuot laus eq namoq gas housoeh ma nghuot; namoq mas zes kuh soeu ka zes ngis soeu yhangteh nghuot las, uhjyung ka phuqsoe soeu teh nghuot chah. 27 Womjus mas tsung toh soeu yahge phuqsoe soeu hank zes kuh lah? Wom jus mas tsung toh soeu ma nghuot lhyeh? Nghuot laus eq ngos gas namoq mas phuqsoe soeu teh nghuot nyeis. 28 Namoq gas, ngos yaukyenh uhlyis, ngos yah dvgeh nyeis bang nghuot. 29 Ngah Uwus ngos lyis munghdan dyei zis yah dvyhangteh, ngos namoq lyis dyei. 30 Namoq gas ngah munghdan mas, ngah kihgus mas yoh zo shuk das zis yahge soetuon tank mas tsung lha, Israel dvci aiq nyau lyis soetuon das, ge. 31 Housoeh las Yhensain taiq zis gas, Simon, Simon Satan gas namoq lyis sunghso khyink teh khyink mes nyeis. 32 Nghuot laus eq nah lomsjingh ehnyet ma dyoq das xiklyis, ngos nvng lyis shvmanh dung dyei. Nah nhaiqlom thaiq las doms lhain soh los lyis, nah vmang vnoeuh moq lyis thukxank nyeis aq, ge. 33 Petru taiq zis gas, Yhensain eh, ngos gas nvng thung gyoh laus eq, shei chah laus eq nvng yah dvgeh loh das xiklyis cicont nghuot, ge. 34 Nyang taiq zis gas, Petru, ngos nvng lyis taiq bah, khvnyens gyoq ma tuon shih lyis nvng, ngos lyis ma seq, ge somh lhain he tyamp das, ge. 35 Nyang nyamoq lyis doms taiq zis gas, Ngos namoq lyis ngwis thung, bvtmuh yahge thyvkoq ma bos bos nhang kat lyis dvja ja vchah goh lah, ge. Nyamoq gas, Cha eq ma chah, ge. 36 Nyang taiq zis gas, Gvshih gas ngwis thung yoh soeu ka yoeus chi aq, bvtmuh eq houyah dvyhangteh wons aq, moengsa ma yoh soeu ka dyi ungh las wis chi aq. 37 Ngos namoq lyis taiq bah, O mha dah dang gas ngos mas nyuk los chah. Houka, Nyang lyis gas lyi lhyweq bang mas bos suon kat goeus; jyoengh ngah cho lhaih toh zis gas nyuk los, ge. 38 Nyamoq taiq zis gas, Yoeuh aq, moengsa aiq chamh joq, ge. Nyang gas, Hauh zis luk goeus, ge. 39 Hauh thang lhyi nyang gas, vjangh gyangh doq dah Tsanlun boms mas doq loh. Nyah changlo jens eq nyah thang mha chank loh. 40 Joqyos mas jweh las nyang nyamoq lyis taiq zis gas, Shiwu yvmas ma wvng loh das xiklyis shvmanh dung nyeis geh, ge lho lha, 41 nyamoq nyeis masyah luk dvlom doeuh ko loh las, phvluk zomhgyuis lho lha shvmanh dung zis gas: 42 Uwus eh, nvng bauh lyis gas, haih kom ngah jyank masyah yoeus tyamp dyei aq, nghuot laus eq ngah ehnyet ma nghuot, nah ehnyet dvnghuot bas jungh, ge. 43 Loeuswons soeu dvyuk maukhung mhayah thuq los las nyang lyis yomdyei nyeis. 44 Nyah ehnyet loh thank nyung daus zis yah dvgeh yomkat las shvmanh dung nyeis lyis, nyah gywesjeis eq nyeisjvng mas suih zoq gyoh teh gyoh nyeis. 45 Shvmanh dung masyah toq las nyah changlo jens jyank pheh loh lyis, nyamoq gas nhaiqkuk ehnyet yah yhet joq zis lyis loh nyvng. 46 Nyang nyamoq lyis taiq zis gas, Namoq chamus yhet joq goh lah? Shiwu yvmas ma bos loh das xiklyis toq las shvmanh dung nyeis geh, ge. 47 Housoeh taiq nyeis shih lyis, yoeuh aq, moqjens yah dvgeh, dvci aiq yuk mas dvyuk nghuot dah Yudas ge soeu ka, nyamoq xik mas loh las, Yesu lyis bvlot tanh das xiklyis nyah jyank mas ni loh. 48 Yesu nyang lyis taiq zis gas, Yudas eh, nvng gas cangsoeu Lo lyis bvlot tanh zis yah phanhlyen nyeis vnghuot lah, ge. 49 Yesu yah dvgeh nyeis bang gas, bweh los das cho lhyi yoeuh seq las nyang lyis taiq zis gas, Yhensain eh, ngamoq moengsa yah vzan das lah, ge. 50 Dvyuk gas Phudyei Zainsmuh jyeidwis dah loqyos no zan thyet dyei. 51 Yesu phuk taiq zis gas, No geh, ge hauh no lyis nyang tanh zis yah doms gis nhang. 52 Yesu gas jweh los dah phudyei uhjyung jens, yhenmuh gomh zau jens yahge logis jens lyis taiq zis gas, Namoq gas khyanktau nyhik das teh, ngos lyis nyhik das xiklyis moengsa, dunghkuq chi lha los lhyeh? 53 Yhenmuh mas nyeih yau nyeih ngos namoq yah dvgeh nyeis uhlyis gas namoq ngos lyis ma nyhik, nghuot laus eq gvshih gas namoq dah shishenh nghuot joq zis yah dvyhangteh, mauchuot dwang dah yomsoq eq nghuot, ge. 54 Hauh dius jens gas Yesu lyis nyhik las Phudyei Zainsmuh dah yhen mha tsain shwih loh. Petru eq nyamoq yah we we masyah chank loh. 55 Ganthoq khau mha nyi khat las tsung toh yvmas Petru eq bos. 56 Housoeh nyikhyomp yvm mas tsung toh zis lyis jyeidwis nyelo dvyuk nyvng lyis, nyang lyis jeih jeih yoeuh las, Haih soeu eq Yesu yah dvgeh zis nghuot, ge. 57 Petru he lha taiq zis gas, Nyelo eh, nyang lyis ngos ma seq, ge. 58 Dvxa lhyi gohtoeu dvyuk eq Petru lyis nyvng las, Nvng eq haih bang mas zis nghuot ge lyis, Petru gas, Vbusbih eh, ngos ma nghuot, ge. 59 Dvshishenh ko doms nyangh thang lhyi, gohtoeu dvyuk taiq zis gas, Haih soeu eq jyoengh nyang, nyang yah dvgeh zis nghuot. Nyang Galile dius eq nghuot, ge. 60 Petru doms taiq zis gas, Vbusbih eh, nvng cha taiq zis ngos ma seq, ge. Housoeh taiq yah dvyih gyoq tuon los. 61 Hauh uhlyis Yhensain ka Petru lyis lhain yoeuh kat: Gyoq ma tuon shih lyis nvng ngos lyis somh lhain he tyamp das, ge dah Yhensain dang lyis Petru soh los yah dvyih, 62 Petru nghe pheh thuq las svsoh ngaus. 63 Yesu lyis nyhik toh bang gas, nyang lyis lyuk las tsain jwangh. 64 Nyah nyoq lyis nghop dyei las lyuk zis yah, nyang lyis taiq zis gas, nvng lyis lyuk zis hank nghuot lah? Lvpe pe aq, ge. 65 Gohtoeu dah loeusmus soqzo dang eq nyoshoq Yhensain lhyi sang gyuon shih. 66 Nyoq nyvng los lyis, dius jens dah logis jens, phudyei uhjyung jens, maussauh lhaih bang tsain huom lha, Yhensain lhyi hauh huom pheh shwih e lha taiq zis gas, 67 Nvng Khristu nghuot jyoeng lhyi ka ngamoq lyis taiq aq, ge. Yesu nyamoq lyis taiq zis gas, Ngos taiq lyis eq namoq jingh das zis ma nghuot. 68 Ngos nyeidang lyis eq namoq ma phuk taiq, ngos lyis kat kat das zis ma nghuot. 69 Gvshih masyah cangsoeu Lo gas Mangso Yomsoq dah loqyos shot pheh tsung das, ge. 70 Nyamoq dvnganhmoq gas, Housoeh lyis nvng Mangso dah Lo nyang nghuot lhyeh, ge tsain nyei. Nyang gas, Ngos hauh soeu nghuot ge namoq taiq nyeis, ge. 71 Housoeh hauh bang taiq zis gas, Yang gohtoeu chah kanghjyoeng chah shih lah? Yvnyang nyah nhuot masyah xauhgyo goeus, ge. 1 Housoeh somci moqmuh dvnganhmoq yah toq las, nyang lyis Pilat jyank mas shwih e. 2 Haih soeu ka dius jens lyis chowhang shwih whang lha, vsainnyang gas Khristu ge dah hwankti nghuot, ge Kesar lhyi khoengh ma kat noh, ge tung zis ngamoq nyvng, ge zau tsain kauq. 3 Pilat nyang lyis nyei zis gas, Nvng Yuda hwankti nghuot lhyeh, ge. Nyang phuk taiq zis gas, Nvng taiq nyeis, ge. 4 Pilat gas, Ngos haih dius yuk mas chah yobos eq ma nyvng, ge phudyei uhjyung jens yahge moqjens lyis taiq. 5 Nghuot laus eq hauh bang zes kaiq las taiq zis gas, Haih dius yuk gas Galile mau masyah xi lha Yuda mau khyiq khanghmuh, haih joqyos mas jweh shoq jyauh las shwih hoeu, ge. 6 Pilat haih zis xauhgyo yah dvyih, Haih dius yuk gas Galile dius nghuot lhyeh, ge nyei. 7 Hwankti Herod guon dah yvmas soeu nghuot zis seq yah dvyih, nyang lyis hauh hwankti jyank mas shwih kat nhang. Hauh shvhoeu lhyi Herod eq Yerusalem mas nyeis. 8 Herod gas Yesu lyis nyvng lyis svsoh gaus: khasoeh ge lyis nyah cho xauhgyo yvmvyah nyang lyis nyvng mes zis nyangh goeus. Chixoeuq dah vlho dvkoeuq koeuq lyis xauh nyvng das, ge nghamhloms nyeis. 9 Herod gas nyang lyis dang nyoshoq nyei laus eq, nyang gas cha eq ma phuk taiq. 10 Phudyei uhjyung jens yahge maussauh lhaih bang gas toq las, nyang lyis yobos khoek khoek taiq huon. 11 Herod gas nyah jesphung yah dvgeh Yhensain lhyi jwangh nyhap zis yah nyang lyis kyi kyi bvng dah dyi gvmhuot las Pilat jyank mas doms shwih dyei kat. 12 Hauh nyenhyo Herod yahge Pilat gas buisnoms bweh los: xikpheh gas nyang changh nyang jes dvnghuot. 13 Pilat gas Phudyei uhjyung jens yahge zauguon jens, dius jens lyis khi tsainh las taiq zis gas, 14 Haih soeu ka dius jens lyis chowhang shwih whang soeu teh namoq ngah jyank mas shwih los las, yoeuh aq, namoq nyang dah xikkhonh mas ngos nyang lyis nyei yoeuh goeus. Nghuot laus eq, namoq nyang lyis yobos huon zis yah dvyhangteh, ngos nyang mas yobos ma nyvng. 15 Ngos namoq lyis Herod jyank mas eq nhang kat goeus: Herod eq yobos ma nyvng. Yoeuh aq, haih soeu ka shei mon dah yobos cha eq ma kuot toh. 16 Housoeh yvmvyah ngos haih soeu lhyi lyuk las kat kat das, ge. 17 (Khasoeh ge lyis, hauh pwe mha thung lungh bang dvyuk yuk lyis ma lhuiq kat ma gis nghuot.) 18 Somci moqmuh gas, Hauh soeu lhyi toh las nyamoq lyis Baraba lhuiq kat dyei aq, ge dvyih dvyot tsain kaiq sang. 19 (Baraba gas wugungs lyis jausxo, coeuh kang nhang dah yobos, dius sat dah yobos gvng mas thung gyoh soeu nghuot.) 20 Pilat gas Yesu lyis lhuiq kat mes las dvlhain doms taiq. 21 Nyamoq kaiq zis gas, Nyang lyis tapzains mas taplhangh aq, taplhangh aq, tsain ge. 22 Pilat gas, Hauh soeu ka cha cu lah? Ngos nyah jyank mas shei das yobos dvkoeuq eq ma nyvng, ge somh vlhain jweh shoq taiq. Housoeh las ngos nyang lyis lyuk las kat kat das, ge. 23 Dius jens gas hauh soeu lhyi tapzains mas taplhangh tyamp das xiklyis yomkat tsain kaiq nyeis las, hauh bang thwe yahge phudyei uhjyung jens dah thwe kaiq ung tyamp. 24 Pilat eq nyamoq dung zis yah dvyhangteh bweh shoq dang thang thyet dyei. 25 Coeuh kang nhang dah zis yahge dius sat yobos gvng mas thung lhunk toh soeu lhyi nyamoq o zis yah dvyhangteh lhuiq las, Yesu lyis gas nyamoq o khyvlyis kyauh tyamp. 26 Yhensain lhyi shwih thuq loh dah uhlyis, Kureni mhanhdyvp wukhau mhayah los langh dah Simon lyis nyvng lyis, nyhik las Yesu thang mha tapzains bos wuq nhang. 27 Yesu thang mha chank loh dah dius somci moqmuh mas, Yhensain gvng mas ngausdyeis ngausnhvp mus bang vmesbih jens dvyhamh bos. 28 Hauh bang lyis Yesu lhain yoeuh las taiq zis gas, Yerusalem lonyi jens eh, namoq ngah nyhenshang vngaus goh, namoq nyang xiklyis yahge namoq dah lo jens xiklyis ngaus geh. 29 Yoeuh aq, dius thonh vmesbih gas ngelhoq: lo ma wons ku dah ung yahge vnoeuh ma jyop ku dah nauh gas phauhdap ge taiq los dah buisnyeis jweh los das. 30 Hauh uhlyis nyamoq gas boms lyis, Ngamoq thoq mas jingh gyoh nhiq aq, jing jens eh, ngamoq lyis nghop toh dyei aq, ge khi das. 31 Khasoeh ge lyis vnyaus zains lyis housoeh kuot lyis, vkyuk zains gas khasoeh bweh das lah, ge. 32 Yhensain yah dvgeh khyanktau aiq yuk lyis eq sat das xiklyis shwih thuq loh. 33 Uhkhangh ge dah joqyos mas jweh lyis, tapzains mas taplhangh las, khyanktau aiq yuk lyis eq nyah loqwi loqyos dvshot dvyuk taplhangh toh. 34 Housoeh las Yesu taiq zis gas, Uwus eh, nyamoq kuot dah zis nyamoq ma seq yvmvyah nyamoq lyis khyuot dyei aq, ge. Nyah dyi lyis eq nyamoq doeugoh las gvm yoeus. 35 Dius jens eq houmha tsain yoeuh yap joq. Houmha dah zau jens Yesu lyis jwangh zis gas, Nyang gohyhamh lyis daq khyuot yoeus. Mangso khyen yoeus dah Khristu nghuot lyis gas nyah gungs nyang khyuot yoeus bas jungh, ge. 36 Jeslo jens los las nyang lyis shihjyen jeis dyei uhlyis yah jwangh zis gas, 37 Nvng Yuda Hwankti nghuot jyoeng lhyi, nvnyang gungs nvnyang khyuot yoeus zo aq, ge. 38 Nyah vtoeu mha maussauh lhaih toh zis gas, Haih soeu ka YUDA HWANKTI nghuot, ge Heleni, Latin yahge Hebre nyingh pheh yah tsain lhaih toh. 39 Tapzains mas lhangh toh dah khyanktau dvyuk eq, Nvng Khristu nghuot lyis gas nah gungs lyis nvnyang yahge ngah aiq yuk lyis eq khyuot yoeus aq, ge ma phauh ma danh sang. 40 Gohtoeu dvyuk gas nyah dyenschangh phoq lyis nyho lha taiq zis gas, Nvng eq joeng zis heinyhoq xauh nyeis goeus lyis eq Mangso lhyi ma gyuk lhyeh? 41 Yah aiq yuk gas vsainnyang kuot dah yobos gvng mas mon yih khyvlyis xauh kham lha, haih soeu ka cha ma cu, ge. 42 Nyang Yesu lyis taiq zis gas, Yhensain eh, nah munghdan mas jweh lyis, ngos lyis soh dyei aq, ge. 43 Yesu nyang lyis taiq zis gas, Ngos nvng lyis jyoengh taiq bah, khvnyhik nyang nvng ngos yah dvgeh Pharadisu mas nyeis das, ge. 44 Hauh shishenh gas dvci aiq shishenh ko nghuot las, somh shishenh jweh shoq dvmau gonh mau chuot joq. 45 Buis eq soeng soeng noq las, yhenmuh khau mha gos misseh eq vgungs masyah juiq tyamp. 46 Yesu thwe zainsmuh yah taiq zis gas, Uwus eh, ngah dyos lyis nah loq khau mha kyauh goeus, ge nyang kang gyoh. 47 Hauh cho lhyi jes dvxo guon zau nyvng lyis, Haih soeu ka ehnyet dan soeu gyingh nghuot, ge Mangso lhyi chungh nyeis. 48 Hauh cho lhyi los jweh yoeuh bang gas heisoeh teh yvlyis nyvng las sainhkhonh loq bat las tauh loh. 49 Galile mau masyah Yhensain thang mha chank los dah vmesbih jens yahge nyang yah seq goh bang eq we masyah tsain yap las hau dvnganh yvlyis yoeuh nyeis. 50 Yoeuh aq, nhaiqbos zau Yosep ge soeu nyang gas gis las dan soeu dvyuk nghuot. 51 Nyang gas, Arimathia mas dah Yuda dius nghuot. Nyang gas Mangso munghdan lyis langh nyeis dah nhaiqbos soeu nghuot las nyamoq xam lha kuot yvmas xam ma bos xonh soeu nghuot. 52 Nyang gas Pilat jyank mas wvng las Yesu dah gungs lyis sang yoeus. 53 Gungs lyis khyoq las jeimuh mis yah lyet lho lha hank eq ma nyhop ku shih dah lop mas e kat toh. 54 Hauh nyeih gas Yuda jens dah sont buisnyeis nghuot zis yahge Yuda No Buisnyeis eq ni los goeus. 55 Galile mau masyah, nyang yah dvgeh chank los dah vmesbih jens eq lop mas nyah mvng toh dah joqyos lyis yoeuh das xiklyis tsain los. 56 Hauh thang lhyi nyamoq doms los las, xangh coeu yahge nvm pyo zis tsain sont toh. Tyingtoh dang yah dvyhangteh Yuda No Buisnyeis lyis no nyeis. 1 Dvdaus dah cangxeih vnyeih, nvpsangh noq yah hau vmesbih jens gas, gohtoeu vmesbih jens yah dvgeh nyamoq sont toh dah xangh coeu chi lha lop pheh tsain e loh. 2 Jweh lyis lop mas dah lukzains toeu phanh toh zis nyvng las, 3 lop mas wvng loh lyis eq Yhensain Yesu dah mvng lyis ma tsain nyvng. 4 Housoeh svsoh tsain mauh nyeis lyis, yoeuh aq, bvng dah dyi wuot dah dius aiq yuk, nyamoq vyvm mas yap joq. 5 Hauh vmesbih jens gyuk yos zoh lyis yah nyeisjvng mas tsain gop joq lyis, hauh aiq yuk nyamoq lyis taiq zis gas, Dwis nyeis soeu lhyi shei bang mas chamus xo nyeis goh lah? Nyang heimha ma nyeis lo, dwis toq loh goeus. 6 Galile mas nyeis shih yoq lyis nyang namoq lyis khasoeh taiq toh zis lyis soh geh. 7 Cangsoeu Lo gas yaunos dap bang dah loq mas kyauh tyamp zis xauh las, tapzains mas taplhangh tyamp zis xauh thang lhyi somh vnyeih lyis dwis toq das, ge taiq toh, ge. 8 Housoeh nyamoq gas nyang taiq dang lyis tsain soh. 9 Lop masyah doms loh las hauh cho dvnganh, dvci dvyuk moq yahge gohtoeu dah bang lyis tsain taiq kyoh. 10 Lvgyo jens lyis hauh loeuskyoh bang gas, Magdala Mari, Yaku ungwes Mari, Yoana yahge gohtoeu vmesbih jens tsain nghuot. 11 Nyamoq taiq dang gas lvdyoq mvnyei taiq teh dvnghuot las ma tsain jingh. 12 Nghuot laus eq Petru gas toq las lop pheh wuih e. Lop mas jweh las gop yoeuh lyis lyet misseh dvjoq lo zis nyvng yvmvyah mauh las nyah yhen pheh tauh loh. 13 Hauh nyeihyo nyang, Yerusalem masyah nyhet main ko we dah Ema-u wukhau pheh dius aiq yuk loh nyeis. 14 Hauh nhaiqtang eq hau bweh lai loh dah cho lhyi taiq goh loh. 15 Housoeh taiq goh nyeis lyis Yesu nyang nvmtanh jweh thuq los las, nyamoq dvgeh loh. 16 Nghuot laus eq nyah aiq yuk gas Yesu nghuot zis ma seq das xiklyis nyoq hwah nhang. 17 Nyang nyah aiq yuk lyis taiq zis gas, Nah aiq yuk gyung suh uhjyangh chah bvhwa lhah goh las nhaiqngis goh lah, ge. 18 Khleopa ge soeu nyang lyis phuk taiq zis gas, Nvng gas Yerusalem mas dah boenghwus nghuot las, khvlyens bweh dah cho lhyi nvng kyingh ma seq dvmus lhyeh, ge. 19 Nyang nyei zis gas, chah cho gah, ge. Nyah aiq yuk taiq zis gas, Nazaret wukhau mha dah Yesu cho nghuot. Nyang gas lvpe nghuot las, Mangso yahge dius xikkhonh mas kuot dah muh yahge taiq dang mas yomsoq bos soeu nghuot. 20 Hauh soeu lhyi phudyei uhjyung jens yahge ngamoq dah guon bang yah sat das xiklyis kyauh tyamp las, tapzains mas tsain taplhangh tyamp. 21 Nyang gas Israel dius nyau lyis khyuot yoeus das soeu nghuot, oen ngamoq nghamhloms. Hauh thoq lyis haih cho bweh zis gvshih somh nyeih bos goeus. 22 Ngamoq mas dah vmesbih dvyhamh nvpsangh yah e lha, 23 Nyah mvng ma nyvng las tauh los lyis, Nyang gas dwis nyeis, ge loeuswons bang yah nyvng xoeuq dah cho los tsain taiq kyoh las nyamoq mauh nyeis. 24 Housoeh las ngamoq yah nyeis bang dvyhamh lop mas e yoeuh lyis eq, hauh vmesbih jens taiq teh nyvng nghuot laus eq nyamoq, nyang lyis ma nyvng, ge taiq ge, ge. 25 Nyang nyah aiq yuk lyis taiq zis gas, Lvpe jens dah dang dvnganh yvlyis yoh lomsjingh das joeui ma bos, nhaiqlom than bang eh, 26 Khristu gas housoeh teh shanghsenh kham lha nyah phunk mas yoh wvng das ma nghuot lhyeh, ge lho lha, 27 Moshe masyah xi lha lvpe jens dvnganh dah dang mas, nyang yah sen lha lhaih toh dang lyis nyang nyah aiq yuk lyis phui kyoh. 28 Nyah aiq yuk loh nyeis dah wukhau nvm mas jweh lyis, nyang lai loh das teh doeus las, 29 nyah aiq yuk gas nyang lyis, Ngah aiq yuk yah dvgeh wukhau mha thoeng goh: buis wvng goeus, mau eq chuot goeus, ge nyang lyis khyoeuq. Housoeh las thoeng das xiklyis nyah aiq yuk yah loh. 30 Womjus mas nyamoq yah dvgeh tsung toh uhlyis, ohlhyoq lyis yoeus las shvmanh thang lhyi khyiq las nyah aiq yuk lyis dyei. 31 Hauh uhlyis nyah aiq yuk nyoq bangh los las, nyang Yesu nghuot zis lyis tsain seq. Housoeh las nyang gas nyah aiq yuk jyank masyah dyuk loh. 32 Nyah aiq yuk dvyuk yah dvyuk taiq goh zis gas, Nyang cho mha yah aiq yuk yah dvgeh taiq goh los las, lhaihtoh dang vjyuk phant uhlyis, yah aiq yuk dah nhaiqlom nyi soeh ngeh vnghuot lah, ge. 33 Nyah aiq yuk gas hauh shishenh lyis nyang, Yerusalem wus pheh tauh loh las dvci dvyuk moq gas gohyhamh bang yah dvgeh nyeis zis lyis loh nyvng. 34 Huom nyeis bang eq, Yhensain ka jyoengh dwis toq goeus, Simon dah nyoq mas eq nyvng xoeuq, ge taiq. 35 Nyah aiq yuk eq cho mha bweh zis yahge ohlhyoq khyiq yvmas, nyang nghuot cho yoh seq cho lhyi tsain taiq kyoh. 36 Housoeh tsain taiq goh nyeis lyis, nyamoq dah vgungs mas Yesu yap las nyamoq lyis taiq zis gas, Namoq nyenstap nyeis bas jungh, ge. 37 Nghuot laus eq changlo jens gas sidyos lyis nyvng, ge nghamh las gyuk nyeis. 38 Nyang nyamoq lyis taiq zis gas, Chamus chiq nyeis goh lah? Chamus ehnyet khamkhvv goh lah? 39 Ngah loq ngah khyei lhyi yoeuh geh, ngos lyis zwi yoeuh geh, ngos gas gungs gyingh nyang nghuot. Sidyos gas ngos lyis nyvng teh shohyau shohkhyiq ma bos, ge. 40 Haih zis taiq lho lha, nyang nyamoq lyis nyah loq yahge nyah khyei chixoeuq. 41 Hauh bang gaus las ma yoh jingh shih, dvmauh nyeis shih lyis, nyang nyamoq lyis taiq zis gas, Namoq heimha zonoms dvja ja vyoh lah, ge. 42 Nyamoq gas nyang lyis kank dah oengdoq dvchink yahge dyoyhei dvtap dyei lyis, 43 Yhensain ka yoeus las nyamoq xikkhonh mas zo. 44 Nyang nyamoq lyis taiq zis gas, Moshe dah Lyi mas eq, lvpe jens dah maussauh mas yahge Chungh Dang maussauh mas ngos lyis toeuq las lhaih ya lhaih toh dang nyuk los chah ngos namoq yah dvgeh nyeis khoq yoq lyis taiq dah dang gas, haih cho nyang nghuot. 45 Housoeh las lhaihtoh dang seqgyo das xiklyis nyamoq dah seqgyo cho lhyi phank dyei. 46 Nyang taiq zis gas, Lhaihtoh dang heisoeh ge: Khristu gas shanghsenh zis xauh las somh vnyeih lyis shei masyah dwis toq chah: 47 Yerusalem masyah xi lha, dius nyau khanghmuh lyis yaunos yoh khyuot dyei dah nhaiqlom thaiq cho lhyi nyah nyings mas yoh taiq kyoh das. 48 Namoq eq haih cho dvnganh dah kanghjyoeng tsain nghuot. 49 Yoeuh aq, ngah Uwus dah dangthoengh joq zis yah dvyhangteh, ngos namoq lyis nhang kat dyei das. Housoeh las namoq gas nyhang mha dah yomsoq ma xauh yoeus dvchank, Yerusalem mas nyeis shih geh, ge. 50 Hauh thang lhyi nyamoq lyis Bethani jweh shoq shwih loh las, nyah loq toeu lha nyamoq lyis shvmanh dyei. 51 Housoeh shvmanh dyei nyeis uhlyis, nyang gas changlo jens yah gang las maukhung mha toqh yoeus zis xauh goeus. 52 Housoeh las nyamoq gas nyang lyis paiq las svsoh gausyis zis yah Yerusalem wus pheh tsain tauh loh. 53 Housoeh Mangso lhyi chunghtoq las chungh zis yah Yhenmuh mas tsain nyeis nyeis. Amen.
|