JAMES1 Mangso yahge Yhensain Yesu Khristu dah jyeidwis nghuot dah Yaku gas, mungkvn gonh nyeis dyos joq dah Mangso dius jens lyis jeshuh kat. 2 Ngah boekyis eh, shiwu zis vja ja xauh uhlyis namoq xiklyis gaus cho nghuot oen lhom yoeus geh. 3 Khasoeh ge lyis namoq dah lomsjingh ehnyet yah housoeh teh shiwu cho lhyi yoh ung tyamp uhlyis vsainnyang mas yoh kham dah yom lung los yvlyis namoq seq. 4 Namoq gas chah cho mha laus eq chah zis ma bos, dyinghjet nyeis bas jungh, namoq dah jhen ehnyet lyis thang thank jweh shoq goeng joq nhang geh. 5 Nghuot laus eq namoq mas dvyuk yuk joeui chah nyeis lyis gas Mangso jyank mas shvmanh dung bas jungh, Mangso ka nyang lyis hauh cho dyei das: khasoeh ge lyis nyang gas dvnganh lyis magons magoh jyehjuh khyvlyis dyei nyeis soeu nghuot. 6 Nghuot laus eq, namoq shvmanh dung uhlyis loms shuot ehnyet ma bos bos, lomsjingh ehnyet yah dung chah. Loms shuot soeu hank laus eq lyeis muot las toq dah thomh mas jeisphauq yah doeusgoh. 7 Housoeh teh soeu ka nyang kuot cho dvnganh mas nyah ehnyet ma yoh nghamh thyet las ehnyet ma thyeh thyet soeu nghuot. 8 Nyang gas ehnyet aiq ja bos soeu nghuot las, Yhensain jyank masyah cha eq xauh yoeus das oen ma nghamh noh. 9 Nyungs dah Khristan vmang vnoeuh gas, nyang lyis Mangso toeu toq uhlyis gaus bas jungh. 10 Dis dah Khristan vmang vnoeuh ka, Mangso nyang lyis nyhen mha khyoq zis xauh lyis gaus nyeis chah: khasoeh ge lyis dis bang gas mhanhdyvp mas ban teh wui loh das. 11 Buis gas gywes ngeh los lyis ban zains ngeh kyuk tyamp. Ban buh eq gywis gyoh zis yah ban yungh dah vwot gas dyoq tyamp. Houyah dvyhangteh dis soeu ka nyah muhzoh kuot nyeis lyis dyoqbis las dyuk tyamp das. 12 Shiwu zis xauh lyis lomluk nyeis soeu ka ngelhoq: khasoeh ge lyis hauh soeu ka housoeh teh shiyoeuh cho lhyi yoh lai ung lhyi Mangso ka nyang lyis jyetdap bang lyis dyei das ge thoengh toh dah kang lhyi jyungshuk khyvlyis xauh kham yoeus das. 13 Dius dvyuk housoeh teh dah shiwu zis xauh lyis, Mangso ka ngos lyis shiwu, ge yoh taiq das zis ma nghuot. Khasoeh ge lyis ma gis zis gas Mangso lhyi yoh shiwu zis ma nghuot. Tsai, nyang hank lyis eq shiwu nyeis zis ma nghuot. 14 Nghuot laus eq dius dvyuk shiwu zis xauh ge zis gas, vsainnyang ehnyet obos cho yah she loh yvmas chank loh las hauh jons duot loh yvlyis taiq zis nghuot. 15 Hau obos ehnyet yenh goeus ya yaunos lyis khoeu kat. Yaunos yenh goeus ya shei cho lhyi khoeu kat. 16 Ngah jyetdap boekyis eh, chowhang vwhang goh. 17 Gis las dyinghjet dah jyehjuh jyungshuk dvnganh gas maukhung mhayah, maukhung bvng zis lyis tsain gvnkhanh toh dah Mangso mhayah los zis nghuot. Nyang mas phanh phuk nyeis gvng mas thaiq loh shaih loh cho yahge siyet ma bos. 18 Nyang gvnkhanh toh yvmas yang gas cangxeih joqyos yoh dah vxeih vnyau duot bas jungh, nyang o khyvlyis hau jyoeng dang yah nyang yang lyis yaus kat. 19 Ngah jyetdap boekyis eh, haih cho comh geh. Yuk khanghmuh gas gyo yoeus das zis nyap bas jungh, nghuot laus eq dang taiq das zis yahge nhaiq yo das zis vgyen. 20 Dius dah nhaiqyo zis gas Mangso o dah dan cho lhyi yoh bweh nhang zis ma nghuot. 21 Housoeh yvmvyah ma lhoq ma shang dah wotwu khanghmuh yahge ma gis wotwu dvnganh lyis shang tyamp geh. Ehnyet nyhen mha gyoh zis yah Mangso dah domsyos gyo las, nyang namoq ehnyet mas kat toh dyei goeus, namoq lyis yoh khyuot yoeus dah hauh dang lyis lhom yoeus geh. 22 Nyah dang lyis xauhgyo khyvlyis yah kyingh vsainnyang gungs lyis ma mhuih jyomh bas jungh, hauh dang lyis chank kuot nyeis geh. 23 Hauh dang xauhgyo las ma chank kuot soeu hank laus eq vsainnyang nyoqnho lhyi bvngtoenk mas yoeuh zo soeu yah doeusgoh. 24 Nyang gas nyah gungs lyis yoeuh zo lho lha thuq loh yah dvyih nyah gungs khasoeh teh zis tohnyhik tyamp. 25 Nghuot laus eq dius lyis lhuiq kat dah dyinghjet lyi lyis yoeuh tsuk toh soeu ka hauh lyi lyis xauhgyo las doms tohnyhik tyamp soeu ma nghuot, tsoq las chank kuot soeu nghuot yvmvyah nyang kuot yvlyis Mangso shvmanh zis xauh das. 26 Ngos gas lomsnoq cho chank soeu nghuot ge namoq mas dvyuk yuk nghamh laus eq, vsainnyang lhyo lhyi ma yoh joeu lyis gas nyah lomsnoq cho ka vkom dvnghuot las nyah gungs lyis mhuih jyomh soeu dvnghuot. 27 Uwus Mangso xikkhonh mas lhoqshang lha gyingh dah lom noq cho ge zis gas, yaukyenh xauh nyeis dah chauhmuh chauhlo jens lyis bos yoeuh bos gomh las, vsainnyang gungs lyis mungkvn dah vwot v-oeu yah ma zangh shoq zaih las nyeis cho nghuot. 1 Ngah boekyis eh, namoq gas yah phunk bos Yhensain Yesu Khristu lyis lomsjingh bang nghuot zis yah dvyhangteh dius jens lyis yoh nyvng dah gungs lyis yoeuh las nyoqnho khyen khyvlyis dvyuk yah dvyuk khanhamp eq vzomh goh. 2 Dangtoeuq, dis las xing loqkyop kyop, phauhdap dyimis wuot soeu dvyuk yahge vjuiq vnyho dyimis wuot dah nyungs soeu dvyuk namoq huom yvmas jweh los oen goh. 3 Namoq gas hau phauhdap dyimis wuot soeu lhyi zes phauh nyang zis yah, Haih gis thank joqyos mas tsung aq ge lho lha; nyungs soeu lhyi ka, Nvng thyimha yap aq, nghuot ya ngah khyeiyang mas tsung aq, ge sang lhyi ka, 4 namoq mas khwih khyamh cho lhyi bweh nhang lha, ma gis dah nghamh ehnyet yah dang thang thyet bang bweh goeus yvmvyah yaunos tsain bos. 5 Ngah jyetdap boekyis eh, gyo yoeus geh: Mangso ka haih mungkvn mas nyungs bang lyis lomsjingh cho mha dis bang bweh das zis yahge nyang lyis jyetdap bang lyis thoengh toh dah munghdan lyis xauh sain yoeus das nyhenshang nyang nyamoq lyis khyen yoeus. 6 Namoq yuk nyungs bang lyis ma phauh ma danh kuot goeus nyvng! Namoq lyis zaiq las soetuon bang xikkhonh mas lang she loh bang gas hank tsain nghuot lah? Hauh zis gas dis bang nghuot. 7 Nyamoq gas namoq lyis dyei toh goeus dah nyings gis lyis jwangh bang tsain nghuot. 8 Namoq gas, Nah yhenkyoh lyis nvnyang gungs lyis teh yoh jyetdap das, ge lhaihtoh dang mas bos. Maukhung munghdan lyi lyis domsyos gyo lyis gas namoq gis las jus yvlyis kuot nyeis. 9 Nghuot laus eq namoq gas dius lyis yoh nyvng dah gungs lyis yoeuh las nyoqnho khyen khyvlyis lhom yoeus las zomh nghuot lyis gas namoq yaunos tsain yoh zis yahge hauh Lyi gas namoq lyis lyi lhyweq soeu khyvlyis dang thang thyet das. 10 Hank laus eq lyi dvkoeuq lhyweq goeus ya lyi dvnganh yvlyis lhyweq goeus. 11 Khasoeh ge lyis, nyi shuot lvng vshuot, ge tung toh soeu nyang, Dius vsat, ge taiq nyeis shih. Nvng gas nyi ma shuot laus eq dius sat lyis gas nvng lyi lhyweq soeu nghuot goeus. 12 Housoeh yvmvyah namoq gas yang lyis lhuiq kat dah lyi yah soetuon zis xauh das bang teh taiq las, chank kuot loh geh. 13 Khasoeh ge lyis nhaiqnyen das ehnyet ma bos soeu lhyi soetuon uhlyis Mangso ka nyang lyis nhaiqnyen cho Chixoeuq das zis ma nghuot. Nghuot laus eq Nhaiqnyen ehnyet gas soetuon cho lhyi ung tyamp goeus. 14 Ngah boekyis eh, namoq dvyuk yuk gas, Ngos gas lomsjingh cho bos, ge taiq laus eq, nyang muh khanh yvmas kanghjyoeng ma chixoeuq lyis gas cha vkyuh bos lah? Hau lomsjingh zis gas nvng lyis yoh khyuot yoeus lhyeh? 15 Dangtoeuq: dyimis chah nyeis zis yahge zoshuk das zonoms dyet dah vmang vnoeuh, nghuot ya nhamhmuh jens nyeis oen goh. 16 Namoq gas nyamoq lyis, Namoq lyis Mangso shvmanh dyei bas jungh! Jo jo zo geh, nywe nywe nyeis geh, ge las kang xiklyis yhaugyen zis ma dyei lyis gas chah vkyuh bos das lah? 17 Lomsjingh cho mha eq houyah dvyhangteh nghuot. Muhzoh ma bos dah lomsjingh cho ka vshei dvnghuot. 18 Nghuot laus eq dvyuk mas lomsjingh cho bos las, gohtoeu dvyuk mas muhzoh bos, ge dvyuk yuk ngos lyis taiq los lyis gas, muhzoh ma bos dah lomsjingh cho ngos lyis Chixoeuq aq; ngos gas ngah lomsjingh cho lhyi ngah muhzoh yah nvng lyis Chixoeuq das. 19 Mangso ka dvso kyingh dvnghuot yvlyis nvng jingh lhyeh? Nghuot goeus, gis joq! Yius jens eq lomsjingh nyeis las tsain gyuk nvn nyeis. 20 Koh soeu eh, muhzoh ma bos dah lomsjingh cho ka vkom dvnghuot yvlyis nvng seq mes lhyeh? 21 Yah phauh thyeih Abraham gas Mangso xikkhonh mas dan cho lhyi khasoeh yoh yoeus lah? Nyang gas nyah lo Isak lyis phon mha phudyei ge dah muhzoh yah xauh yoeus. 22 Nyah lomsjingh cho yahge muhzoh dvgeh khanh nyeis zis yahge nyah lomsjingh cho ka nyah muhzoh gvng mas yoh dyinghjet los goeus yvlyis nvng ma nyvng ma seq lhyeh? 23 Abraham gas Mangso lhyi lomsjingh las nyah lomsjingh cho gvng mas nyang lyis dan, ge lhom yoeus dyei, ge dah lhaihtoh dang gas dyingh nyuk los. Housoeh las Abraham gas Mangso dah buisnoms phoq ge dah nyings lyis kham yoeus goeus. 24 Housoeh las dius gas nyah lomsjingh gvng mas kyingh ma nghuot, nyah muhzoh yah Mangso dah xikkhonh mas dan soeu yoh bweh los yvlyis namoq nyvng. 25 Nghe nyhiq Rahab dah cho eq houyah dvyhangteh nghuot. Nyang gas joh yoeuh bang lyis lhom yoeus lho lha, gohcho yah luiq thuq loh das xiklyis pangh kat dah muhzoh gvng mas Mangso xikkhonh mas dan cho lhyi xauh lhom yoeus. 26 Housoeh las gungs mas dyos ma bos lyis gas vshei dvnghuot teh, muhzoh ma bos dah lomsjingh cho eq vshei dvnghuot. 1 Ngah boekyis eh, yang svra moq gas gohyuk thoq lyis zes than dah lyi yah soetuon zis xauh das yvlyis soh zis yah, namoq svra nyoshoq yuk vkuot mes goh. 2 Yang dvnganhmoq gas dvsoq soq lyis seq shuot bang nghuot. Nghuot laus eq dius dvyuk gas nyang taiq yvmas khanhamp eq ma shuot nghuot lyis gas hauh soeu ka dyinghjet soeu nghuot las nyah gungs gonh lyis yoh joeu soeu nghuot. 3 Yang gas nyang lyis yah dang gyo nhang das xiklyis nyang nhuot mas thyeq lungthungh kat lyis yang o yvpheh yoh loh nhang. 4 Nghuot ya sangpho dvkoeuq lyis nghamh yoeuh goh, Svsoh kuh dah sangpho lhyi than dah lyeismuh jyang yah bat zis xauh laus eq, svsoh ngis dah shvp yah yoh joeu las sangpho komp soeu loh nhang mes yvpheh loh nyeis. 5 Lhyo ka houyah dvyhangteh nghuot. Houka gungsdoeus mas vmhauhlo dvnghuot laus eq svsoh kuh cho jeis lyis seq moengs. Vtsihlo dah nyi jyenh gas kha iq teh dah dainhjeis yos lyis yoh ngeh tyamp yvlyis nghamh yoeuh geh. 6 Lhyo eq nyi yah doeusgoh. Lhyo yah gungs shoh dah gungsdoeus mas ma gis ma shop dah mungkvn nghuot las gungs gonh mas hau ma shop yvlyis dyingh los nhang. Lhyo ka munyi yah nyang, yah kang dwis cho gonh lyis ngheq kat. 7 Yang cangsoeu dius gas gohtoeu yewus ja khanghmuh, nghoq ja khanghmuh, shweh loh ja yahge jeis khau mha dah oengdoq vja ja lyis yoh mhiq las hounyhoq zis tsain mih. 8 Nghuot laus eq lhyo lhyi ka hank eq ma yoh mhiq: hauh zis gas ma gis ma shop joq zis yahge ma yoh guon toh las shei nhang dah nyonoq yah dyingh joq. 9 Yang gas lhyo lhyi, yah Yhensain Uwus Mangso lhyi chungh yvmas eq, Mangso dah gungsdoeus lho yah dvyhangteh gvnkhanh toh goeus dah dius nyang changh yah nhoengh khan goh yvmas eq, yhung nyeis. 10 Nhuot dvkoeuq kyingh masyah Chungh Dang yahge nhoengh dang thuq los. Ngah boekyis eh, houka namoq mas ma bweh oeng. 11 Jeisthuq dwang dvkoeuq kyingh masyah jeis nghamh yahge jeis khoh yoh thuq kat zis ma nghuot. 12 Ngah boekyis eh, maiphang zains mas tsanlun shih, zvbiq nwis mas maiphang shih ma yoh shih. Houyah dvyhangteh coh ngvm jeis thuq dwang gas nghamh dah jeis ma yoh thuq nhang. 13 Namoq mas joeui bos las seq cho bos soeu dvyuk yuk bos lah? Hauh soeu ka nyang joeui bos cho lhyi nyah dah gis dah kang dwis cho yah eq, noeuh nhamp las joeui bos khyvlyis gis dah muhzoh kuot zis yah eq kanghjyoeng Chixoeuq bas jungh. 14 Nghuot laus eq namoq ehnyet mas noh goh cho, nhaiq khoh, namoq nyang vkyuh dvxo ehnyet bos lyis gas, namoq joeui bos ge nghamh las khwank zis yah hau jyoeng cho lhyi shuot dah yobos vkuot goh. 15 Housoeh teh joeui ka maukhung mhayah los dah joeui ma nghuot: houka mungkvn yahge dyos cho ma nghuot dah suih shoh yahge yius gomloeus yah dvsen. 16 Hauh yvmas noh cho, vsainnyang vkyuh dvxo cho, nhunk cho yahge ma gis ma shop cho vja ja bos yvlyis nyvng. 17 Nghuot laus eq nyhang mhayah jweh los dah joeui ka, cangxeih gas tsingh-kan, hauh thang lhyi nyenstap, noeuh nhamp, dap goh cho lhyi bweh nhang thoq lyis nhaiqnyen shoh gyo cho yah dyingh las gis dah muhzoh ge dah vshih lyis xauh yhomh yoeus. Houmha nyoqnho khyen cho yahge vguons kuot cho ma bos. 18 Hau gis dah cho ka nyenstap muh wons bang nyenstap cho mha nyau khyoq las xauh yhomh yoeus dah jyo nyau shih nyau nghuot. 1 Namoq mas zan goh cho yahge dyoqgoh nyens goh cho ka kha mhayah los lah? Houka namoq dah gungs shoh pyo cho omes mhayah thuq los las vjangh zan goh nyeis. 2 Namoq gas vyhang dvja ja lyis o lha hauh yvlyis ma yoh los lyis dius sat das zis cicont nghuot. Namoq svsoh o mes laus eq ma tsain yoh yvmvyah dyoqgoh zan goh nyeis. Namoq o zis namoq ma yoh: khasoeh ge lyis namoq hauh nyhenshang Mangso lhyi ma dung yvmvyah nghuot. 3 Namoq dung lyis ma tsain xauh yoeus: khasoeh ge lyis namoq kuot dah cho ka ma gis namoq nyang dah pyo cho mha yhung das xiklyis dvdung yvmvyah ma tsain xauh yoeus. 4 Namoq gas lom ma luk bang nghuot nyvng! Mungkvn yah buisnoms kuot zis gas, Mangso dah jeswus bweh nyeis ge zis lyis namoq ma seq goh lhyeh? Mungkvn dah buisnoms bweh mes soeu hank laus eq vsainnyang gungs lyis Mangso dah jeswus bweh nhang nyeis. 5 Yah jyank mas Mangso kat toh dyei dah dyos gas noh dah ehnyet dyingh joq ge dah lhaihtoh dang mas jyoeng cho ma bos oen namoq nghamh goh lhyeh? 6 Nghuot laus eq Mangso yang lyis dyei dah jyehjuh gas yom zes bos. Mangso ka khwank bang lyis kyamp toh laus eq, ehnyet nyhen mha gyoh bang lyis jyehjuh dyei, ge lhaihtoh dang mas taiq zis yah dvyhangteh nghuot. 7 Housoeh las Mangso dah o mha gyoh nyeis las nyang o cho chank geh. Satan lhyi thoenk tyamp geh; housoeh lyis nyang namoq jyank masyah phang loh das. 8 Mangso jyank pheh los geh; hauh uhlyis nyang namoq jyank pheh los das. Yaunos dap bang eh, namoq dah loq lyis cheihshang toh geh; vguons kuot bang eh, namoq dah ehnyet lyis tsingh-kan nhang geh. 9 Nhaiqkuk nhaiqngis zis yah kaiq ngaus geh; namoq dah yis zis gas ngaus yvpheh, gausyis zis gas chiqjyen yvpheh thaiq tyamp geh. 10 Yhensain xikkhonh mas namoq nhaiqlom nyhen mha gyoh nyeis geh: hauh uhlyis nyang namoq lyis toeu toq das. 11 Boekyis eh, namoq nyang changh tyixo dang vtaiq goh. Vsainnyang Khristan boekyis dvyuk lyis tyixo dang taiq, nghuot ya soetuon soeu hank laus eq hauh lyi lyis tyixo thoq lyis magoh hauh yvlyis soetuon soeu eq nghuot. Namoq hauh lyi lyis soetuon lhyi ka, lyi chank bang ma nghuot, hauh yvlyis soetuon bang dvnghuot joq. 12 Mangso kyingh lyi dyei soeu yahge soe yoh tuon soeu nghuot. Nyang kyingh yoh khyuot yoeus zis yahge yoh mhont tyamp soeu nghuot. Nah yhenkyoh lyis soetuon soeu nvng gas hank nghuot oen nghamh nyeis lah? 13 Khvnyhik, nghuot ya phvnaq nyeihyo yang dvwus wus mas loh las, houmha dvzvn thoeng lha soenghi kuot las ngwis nyo nyo yoh shoq kuot das ge bang eh, ngos taiq yvlyis gyo yoeuh geh. 14 Namoq gas phvnaq nyeihyo namoq dah kang chamus das zis yangh ma tsain seq. Namoq gas dvsoq kyingh dvthuq los las bi loh dah nyikhauh yah doeusgoh. 15 Mangso gyo lyis gas yang dwis nyeis las haih muh eq thyih muh eq yoh kuot das, ge dah dang gas namoq taiq gis. 16 Nghuot laus eq gvshih gas namoq khwank las tsain moengs nyeis: housoeh moengs cho dvnganh gas shuot cho nghuot. 17 Housoeh yvmvyah gis dah muh kuot das zis seq las ma kuot soeu ka yaunos bos. 1 Dis bang eh, gvshih ngos taiq dang lyis gyo yoeus geh! Namoq mas jweh los nyeis dah shanghsenh cho gvng mas kaiq ngaus nyeis geh. 2 Namoq dah dis cho dah zisyos gas bop yuq tyamp las, namoq dah dyimis lyis naus yah zo tyamp goeus. 3 Namoq dah ngwis xing mha yangh yus zo las hauh yus eq namoq yah tyi dah shot pheh kanghjyoeng duot das las namoq dah gungsshoh lyis nyi teh ngeh jom tyamp das. Namoq gas hai thang thank buisnyeis xiklyis zisyos tsain yung toh. 4 Namoq gas namoq dah danh mas muh zwi bang lyis uhkung phauh ma tsain dyei. Nyamoq lop dah thwe lhyi gyo yoeuh geh. Namoq dah jyo yhomh dyei bang dah kaiq thwe ka Maukhung Jesphung Yhensain Mangso dah no mas bangh wvng loh goeus. 5 Haih nyeisjvng thoq mas namoq dah kang dwis cho ka gungsdom ehnyet lyis lhoq ngon dah kyahsoe gis yahge pyo cho yah kyingh dyingh joq. Namoq gas sat xauh das buisnyeis xiklyis, namoq nyang gungs lyis coeu shoq tsain nyhuk nyeis. 6 Namoq gas yobos ma bos bang lyis dang thang thyet las sat goeus; nyamoq gas namoq lyis tyi ma xo. 7 Housoeh yvmvyah boekyis eh, Yhensain doms jweh lyih shoq jhen nyeis geh. Danh zwi zo soeu ka nyah danh masyah phauhdap dah guk nyau shi nyau khasoeh thuq los nhang das yvlyis khasoeh langh nyeis yvlyis yoeuh geh. Nyang gas ehnyet xing xing yah mau xeih yahge mau nhungh wus das yvlyis langh nyeis. 8 Namoq eq nhaiqlom xing xing jhen nyeis geh: Namoq yom hont zis yah nghamhloms nyeis geh. Khasoeh ge lyis Yhensain doms jweh lyih das buisnyeis gas ni los goeus. 9 Ngah boekyis eh, namoq Mangso dah dang thang thyet zis ma xauh bas jungh, namoq nyang changh vlop goh nyeis goh; soetuon soeu ka jweh los nyeis goeus las thuq xoeuq das zis cicont nghuot goeus. 10 Ngah boekyis eh, Yhensain dah nyings yah taiq kyoh, Lvpe jens dah cho lhyi nghamh suon yoeuh geh. Shanghsenh zis xauh uhlyis ehnyet xing xing jhen yvlyis yikhyoh yoeus geh. 11 Nyamoq gas yoh jhen bang nghuot las ngamoq gas nyamoq lyis, Ngelhoq bang oen sang. Yoba dah ehnyet xing cho namoq xauhgyo ku. Thang thank lyis Yhensain ka nyang lyis khasoeh pangh goeus cho namoq seq. Khasoeh ge lyis Yhensain ka nhaiqnyen shohgyo ehnyet yah dyingh joq soeu nghuot. 12 Zes las ngah boekyis eh, namoq dangthoengh toh dah uhlyis maukhi dang vyhung goh: maukhung, nyeisjvng, cha lhyi eq nyings yoeus las mau vkhi goh: namoq Mangso dah soetuon zis ma xauh bas jungh, namoq taiq dah dang gas nghuot zis lyis nghuot, ma nghuot zis lyis gas ma nghuot oen dvtaiq geh. 13 Namoq mas dvyuk yuk yaukyenh zis xauh nyeis lah? Nyang shvmanh dung bas jungh; dvyuk yuk ehnyet pyo nyeis lyis gas, nyang Chungh Dang yhang bas jungh. 14 Namoq mas dvyuk yuk nos xauh nyeis lah? Nyang gas phung logis jens lyis khi lha, nyamoq gas Yhensain dah nyings masyah nyang lyis tsanlun coeu juot las, nyah xiklyis shvmanh dung dyei bas jungh. 15 Lomsjingh zis yah shvmanh dung dang gas hau nos soeu lhyi yoh gis los nhang lha Yhensain ka nyang lyis doms yanghzan los nhang das zis yahge; nyang zangh kuot dah yaunos lyis eq khyuot dyei das. 16 Namoq lhoq gis zis xauh bas jungh, namoq dah yaunos lyis dvyuk yah dvyuk rhen goh las dvyuk yah dvyuk nyhenshang shvmanh dung dyei goh geh. Dan soeu dah shvmanh dung dang gas yoh bweh los nhang dah yomsoq bos. 17 Eliya gas yang teh cangsoeu dius dvnghuot laus eq, mau ma wus bas jungh ge shvmanh dung lyis, somh zvn lhamhmuh khyuk khyvp nyeisjvng mas mau ma wus mus tyamp. 18 Tsai nyang shvmanh doms dung lyis, maukhung ka mau wus khyoq dyei las, hau nyeisjvng gas, nyah jyo nyau shih nyau thuq los nhang. 19 Ngah boekyis eh, namoq mas dvyuk yuk hau jyoeng cho mhayah whang loh soeu lhyi tauh los nhang lhyi ka, 20 hank laus eq hau shwih tauh los soeu ka yaunos yoh soeu lhyi, nyah dah shuot cho mhayah doms tauh nhang kat zis yah nyah dyos lyis shei masyah khyuot yoeus las yaunos vbomsdom masyah khyuot kat zis xauh das nyhenshang kuot dyei soeu nghuot yvlyis soh nyeis bas jungh.
|