EPHESIANS1 Mangso dah ehnyet yah Khristu Yesu dah lvgyo toeuq toh zis xauh soeu ngos Paulo gas, Ephesu wus mas nyeis, Khristu yah dvdain dvlom nghuot dah kang dwis cho mha lomluk bang, Mangso dah dius jens lyis dang tying kat. 2 Yah Uwus Mangso yahge Yhensain Yesu Khristu gas namoq lyis jyehjuh yahge nyenstap cho dyei bas jungh. 3 Yah Yhensain Yesu Khristu dah Uwus, Mangso lhyi nhaiqshoqlang chungh goh. Khasoeh ge lyis yang Khristu mas dvdain dvlom yoh bweh gvng mas nyang gas maukhung nyhang mha Dyos yah sen dah shvmanh jyehjuh cho khvt khanghmuh yang lyis dyei nyeis. 4 Yang gas jyetdap ehnyet yah nyah xikkhonh mas gyingshang lha yobos huon dais ma bos bang bweh los bas jungh yang Khristu gvng mas nyeisjvng ma xi shih lyis yah yangh Mangso ka yang lyis khyen yoeus goeus. 5 Nyang gas nyah jyetdap ehnyet yah, Yesu Khristu gvng mas yang lyis nyah lo jens ge rhen das xiklyis nghamh thyet toh goeus. Houka nyang o zis yah dvyhangteh nghamh toeuq cho nghuot. 6 Housoeh yvmvyah phauh ma sang, yang lyis dyei dah jyehjuh yahge phunk bos jyehjuh gvng mas Mangso lhyi chungh goh. 7 Khasoeh ge lyis Khristu shei kham gvng mas yang lhuiq kat zis xauh goeus. Houka yah yaunos khyuot tyamp dyei cho nghuot. Yang lyis heinyhoq magons magoh dyei dah Mangso jyehjuh gas kha iq kuhxing joq lah! 9 Nyah dah joeui yah eq, yik cho yah eq Mangso ka nyang nghamh toeuq toh cho lhyi kuot goeus las Khristu gvng mas tyink das xiklyis nghamh thyet toh goeus. Nghamh toeuq las nghop shung toh dah kuot das cho lhyi chixoeuq kat goeus. 10 Shishenh jweh lyis Mangso kuot tyink das dah nghamh toeuq cho ka maukhung nyhang tsank yahge nyeisjvng mas gvnkhanh toh vyhang dvnganh gas Khristu lyis uhjyung kuot zis yah dvdain dvlom kuot toh das cho nghuot. 11 Dvnganh gas Mangso dah nghamh toeuq cho yahge nghamh thyet toh zis yah dvyhangteh bweh los goeus. Tsai, xik lyis yah nghamh thyet toh goeus yvmas vpom kuot las Khristu mas dvdain dvlom nghuot gvng mas nyang nghamh toeuq toh khyvlyis yah yang lyis nyah dius nyau duot das xiklyis khyen toeuq toh goeus. 12 Housoeh lyis Khristu mas cangxeih nghamhloms cho yoh toh goeus bang yang gas, Mangso phunk lyis chungh goh. 13 Namoq lyis khyuot yoeus cho dyei, jyoeng dang ge dah gausyis loeus lyis namoq xauhgyo lyis namoq eq Mangso dah dius nyau jens bweh los goeus. Namoq Khristu lyis lomsjingh goeus las, nyang thoengh toh dah Gyingshang Dyos dyei gvng mas nyang gas namoq dah Yhensain nghuot cho kyihau tap dyei goeus. 14 Hau Dyos dyei cho ka Mangso nyah dius nyau jens lyis kham yoeus nhang das thoengh toh goeus vso vlho xauh kham das yvlyis pauh toh cho nghuot. Houka Mangso ka nyah dius nyau jens lyis dyinghjet dah luiq toeuh dyei das cho, yang lyis nhaiq tap nhang nyeis. Yang nyah phunk lyis chungh nyeis goh. 15 Housoeh yvmvyah namoq Yhensain Yesu lyis lomsjingh cho yahge Mangso dah dius jens lyis jyetdap cho ngos xauhgyo masyah, 16 ngos gas namoq nyhenshang Mangso lhyi malyen lo nhaiqshoqlang sang zis yah ngos shvmanh dung yvmas namoq lyis soh nyeis. 17 Namoq Mangso lhyi zes seq los bas jungh. Yah Yhensain Yesu Khristu dah Mangso, phunk bos Uwus gas joeui yahge nyoqnyvng yoh nyvng yomsoq bos dah Dyos namoq lyis dyei bas jungh, ngos Uwus Mangso lhyi dung. 18 Yhensain ka namoq lyis chah nghamhloms cho mha khi yoeus goeus zis eq, Yhensain dah dius nyau jens lyis thoengh toh, mauhphoh jyehjuh vso vlho ka kha iq magons magoh nghuot yvlyis eq, 19 Yhensain lhyi lomsjingh bang mas muh khanh nyeis dah nyah yomsoq gas kha iq kuhxing joq yvlyis eq, namoq yoh nyvng seq das xiklyis namoq dah ungkhau dolhain los bas jungh oen dung. Yang mas muh khanh nyeis dah yomsoq gas, 20 Khristu lyis dwis toq los nhang lha, maukhung mha Mangso dah loqyos shot pheh tsung toh nhang uhlyis yhung dah mathank magons yomsoq nyang nghuot. 21 Houmha Khristu gas, maukhung mungkvn lyis guon bang, vmingh yoh bang, yomsoq bos bang, yhensain jens dvnganh thoq mas joeu las guon nyeis. Nyah nyings gas haih mungkvn, jweh los das mungkvn mas taiq das toeuh yoh dah nyings dvnganh thoq lyis zes dah nyings nghuot. 22 Mangso ka vyhang dvnganh zis lyis Khristu khyei o mha toh las, nyang lyis hau phung nyhenshang dvnganh thoq mas dah uhloms duot das xiklyis toeuq toh. 23 Hauh phung ka dvnganh yvlyis yoh dyinghjet nhang soeu, dyinghjet ge dah Khristu gungs nghuot. 1 Lai loh goeus yoq lyis namoq gas domsyos ma gyo cho yahge yaunos gvng mas dyos gas shei joq. 2 Hauh shishenh lyis namoq gas hai mungkvn dah ma gis ma shop cho mha tsain suh e lha, maulat mas dah vmingh yoh soeu, sidyos dah domsyos tsain gyo. Hauh sidyos gas gvshih eq Mangso domsyos ma gyo dah lo jens mas muh kuot nyeis. 3 Jyoengh yang dvnganh eq xikpheh nyamoq teh nghuot las, yah dah gungsshoh nyetnau cho chank zis yah, gungsshoh yahge ungkhau mha nghamh khyvlyis kuot tyink goeus. Yang eq gungsshoh khyvlyis yah gohyuk yah dvyhangteh Mangso dah nhaiqlom dyis zis xauh kham vvng bang nghuot. 4 Nghuot laus eq Mangso ka nhaiqnyen ehnyet nyo las nyang yang lyis jyetdap ehnyet kuh joq las, 5 yang domsyos ma gyo dah lyi lhyweq cho yaunos gvng mas dyos mas shei joq bang lyis Khristu mas kang doms dwis nhang goeus. Houka Mangso dah jyehjuh yah namoq khyuot yoeus zis xauh goeus. 6 Yang gas Khristu yah dvdain dvlom bweh gvng mas Mangso ka yang lyis maukhung nyhang mha Yhensain yah dvgeh guon nyeis das xiklyis nyang yah dvgeh dwis toq nhang. 7 Nyang heisoeh kuot cho ka Khristu Yesu mas yang lyis jyetdap ehnyet Chixoeuq yvmas Yhensain dah jyehjuh gas gohtseq kuhxing joq cho thang pheh vcaiq caiq dius jens yoh nyvng das xiklyis nghuot. 8 Khasoeh ge lyis namoq gas lomsjingh gvng mas Mangso dah jyehjuh yah kyingh namoq khyuot yoeus zis xauh. Houka namoq yomkat las ma nghuot, Mangso dah jyehjuh jyungshuk dvnghuot. 9 Namoq zwi khank dah muhzoh gvng mas ma nghuot, Mangso dah jyungshuk dvnghuot. Housoeh las hank eq khwank chank ma bos. 10 Khasoeh ge lyis yang gas Mangso khasoeh gvnkhanh toh lyis housoeh nghuot joq. Khristu Yesu mas dvdain dvlom nghuot joq gvng mas, Mangso ka uhlhomh las cicont sont toh goeus, gis dah muh lyis kuot uhjyangh kang dwis das xiklyis yang lyis gvnkhanh toh goeus. 11 Khoeu los lyis yah gohnyau bang tsain nghuot las dius dah loq yah vsainnyang gungs mas kuot yoeus dah muh, vthyoh tyomh bang ge nyhink yoeus dah Yuda dius jens yah, Vthyoh ma tyomh bang, ge lui dah gohnyau bang eh, xikpheh namoq hank tsain nghuot yvlyis soh geh. 12 Hauh shishenh lyis namoq gas Khristu yah gang joq bang, Mangso khyen yoeus dius nyau Israel jens mas ma bos dah lvbaus, nyah dius nyau lyis dyei toh thanghchvp yah sen dangthoengh mas ma bos bang nghuot las, mungkvn mas nghamhloms chank ma bos, Mangso eq ma yoh, nyeis dyos los dah dius jens nghuot lai los goeus. 13 Nghuot laus eq gvshih gas Khristu Yesu mas dvdain dvlom nghuot goeus las xikpheh Mangso yah we joq laus eq Khristu shei kham gvng mas Mangso yah yoh ni los goeus. 14 Khasoeh ge lyis Khristu gas Yuda vnyau yahge gohnyau bang lyis dvkoeuq kyingh bweh nhang zis yah namoq lyis nyenstap cho dyei goeus. Nyang gas nyah gungs lyis kyauh tyamp yvmas yang lyis vnyau khyvlyis khwih khyamh las jes khyvlyis nyeis nhang dah vkyo lhyi thyoq tyamp goeus. 15 Nyang gas aiq nyau lyis nyang yah dvdain dvlom kuot las dius nyau saiq dvkoeuq bweh nhang das xiklyis Yuda lyi yah dvgeh tyingtoh lyi yahge chank chah lyi lyis thyuk tyamp goeus. Heisoeh khyvlyis nyenstap cho dyei goeus. 16 Khristu gas tapzains mas shei kham zis yah nyamoq dah hoeng cho lhyi thyoq tyamp las hau aiq nyau lyis dvnyau kyingh kuot las Mangso jyank mas doms shwih loh dyei. 17 Housoeh Mangso yah we joq dah namoq gohnyau bang lyis eq, Mangso yah ni nyeis dah Yuda dius jens lyis eq Khristu jweh los las hau nyenstap gausyis loeus taiq kyoh goeus. 18 Gohnyau bang yahge Yuda dius jens nghuot dah yang dvnganh gas Khristu gvng mas hau Dyos dvkoeuq kyingh yah Uwus xikkhonh mas yoh wvng loh goeus. 19 Housoeh yvmvyah gvshih gas namoq gohnyau bang, nghuot ya lvbaus yahge boenghwus ma nghuot lo. Namoq gas Mangso dah dius jens mas bos, mung dius jens nghuot las Mangso dah yhenbang nghuot. 20 Namoq eq lvgyo jens yahge lvpe jens xi toh yhen-yos mas yhen tsoq tsuk zis xauh goeus. Khristu gas hauh yhen thunk lukzains nyang nghuot. 21 Nyang gas yhen dvkoeuq gonh lyis goeng goeng zwi toh las gyingshang zis yah Yhensain mha kyauh toh yhenmuh bweh los nhang goeus. 22 Namoq eq Khristu yah dvdain dvlom duot las gohyhamh bang dvnganh yah chomp tsuk zis kham yoeus las nyah Dyos gvng mas Mangso nyeis dah joqyos bweh los goeus. 1 Haih cho gvng mas Khristu Yesu dah thung lungh soeu ngos Paulo gas, namoq gohnyau bang xiklyis, Mangso jyank mas shvmanh dung dyei. 2 Mangso ka nyah jyehjuh yah namoq xiklyis gis das cho nyhenshang haih muh kuot das zis ngos lyis dyei toh goeus yvlyis namoq jyoengh xauhgyo ku goeus. 3 Mangso ka nyah dah noq thank nghamh toeuq cho ngos lyis chixoeuq goeus. Haih cho yah sen lha lyung khyvlyis lhaih kat ku goeus. 4 Hauh zis namoq nghap ku lhyi Khristu yah sen lha ngos seqgyo hau noq thank cho lhyi namoq yoh xuq das. 5 Lai loh goeus yoq lyis hai noq thank cho cangsoeu dius lyis ma taiq kyoh ku. Nghuot laus eq Mangso ka gvshih nyah gyingshang lvgyo jens yahge lvpe jens lyis Dyos masyah Chixoeuq. 6 Hau noq thank cho ka gausyis dang gvng mas gohnyau bang gas Yuda dius jens yah dvgeh Mangso dah shvmanh jyehjuh xauh kham cho nghuot. Nyamoq gas dvgungs mas dah gungsdoeus tsain nghuot las Khristu gvng mas Mangso dyei dah dangthoengh dah vso vlho kham yoeus das toeuh tsain yoh. 7 Mangso dyei dah lhyenwhei jyehjuh jyungshuk gvng mas hauh Gausyis dang dah jyeidwis ngos lyis duot nhang goeus. Hauh jyehjuh jyungshuk lyis Mangso dah yomsoq yah khanh dah muhzoh khyvlyis ngos lyis dyei toh goeus. 8 Ngos gas Mangso dah dius jens mas ngis thank soeu thoq lyis yangh nyhen soeu nghuot laus eq Mangso ka Khristu dah mathank magons nyeisgis yaplhoq cho yah sen dah hau gausyis loeus lyis gohnyau bang jyank mas yoeus loh dyei das xiklyis eq, 9 Mangso dah nghop toh dah nghamh toeuq cho khasoeh kuot thuq kat das cho dius dvnganh lyis nyvng, seq nhang das xiklyis eq Mangso ngos lyis hauh toeuh dyei toh. Dwis ya dwis yvlyis gvnkhanh toh dah Mangso ka nyah dah noq thank cho lhyi gohlhain caiq masyah nghop shung toh. 10 Housoeh kuot zis gas guon dah loeuswons bang yahge maukhung mha yomsoq bos bang gas Mangso dah joeui vja ja lyis gvshih uhlyis phung dah kang dwis cho khyvlyis yah xuq las seq los nhang das xiklyis nghuot. 11 Mangso ka nyah dah vcaiq vto nghamh toeuq toh cho yah dvyhangteh haih yvlyis kuot goeus. Hau nghamh toeuq cho lhyi yah Yhensain Khristu Yesu gvng mas nyang yoh dye kuot goeus. 12 Khristu yah dvdain dvlom yoh bweh gvng mas eq, nyang lyis lomsjingh gvng mas eq yang gas womh ehnyet yah Mangso xikkhonh mas nghamhnywe zis yah yoh wvng. 13 Housoeh las ngos namoq xiklyis kham dah shanghsenh gvng mas namoq ehnyet ma dyet bas jungh oen shangphu. Houka namoq vkyuh xiklyis ngos kham cho nghuot. 14 Haih cho gvng mas maukhung yahge nyeisjvng mas nyeis dah yhenbang khanghmuh lyis jyoeng dah nyings dyei dah, 15 Uwus Mangso xikkhonh mas ngos dupaiq las shvmanh dung. 16 Namoq dah ungkhau ehnyet yombos los bas jungh Mangso ka nyah phunk yah magons magoh zisyos masyah nyah Dyos khyvlyis yah namoq lyis yomsoq dyei bas jungh oen eq, 17 lomsjingh gvng mas Khristu gas namoq dah nhaiqlom khau mha nyang nyeis joqyos kuot bas jungh oen zis yahge jyetdap ehnyet mas vnyet chent zis yah, 18 namoq gas Khristu dah jyet cho kha iq dvm lha xing, kha iq nyhang lha noq joq yvlyis Mangso dah dius jens dvgeh yoh seqgyo das xiklyis dung. 19 Nyah jyetdap cho lhyi ka khanhamp eq dvnganh yoh seq das zis ma nghuot. Namoq gas nyah jyetdap ehnyet seq los las Mangso nyang namoq mas nyeis bas jungh oen dung. 20 Yah ehnyet mas nyah yomsoq yah muh kuot nyeis. Yang seq dung, nghuot ya nghamh toeuq thoq lyis yangh zes shoq kuot dyei nyeis. 21 Mangso ka hau phung gvng mas eq, Khristu Yesu gvng mas eq vcaiq vto vjangh phunk bos nyeis bas jungh. Amen. 1 Housoeh yvmvyah Yhensain lhyi phuqsoe gvng mas thung lungh soeu ngos Paulo gas namoq lyis khi yoeus masyah Mangso toeuq goeus kang dwis cho vpom yah dvyhangteh kang dwis das xiklyis ngos namoq lyis taiq kyingh kat. 2 Vjangh ehnyet nyhen mha khyoq las noeuh nhamp zis yah jhen nyeis geh. Namoq nyang changh jhen zis yah jyetdap ehnyet Chixoeuq goh nyeis geh. 3 Namoq lyis dvgeh twih xom dah nyenstap shvnanh khying gvng mas Dyos yah dyei toh dvdain dvlom xamxonh cho lhyi yomkat las tsomh toh geh. 4 Namoq lyis Mangso khi yoeus cho mha nghamhloms zis dvkoeuq mas khi yoeus goeus zis yah dvyhangteh, dvgungs dvdyos, 5 Yhensain dvyuk, lomsjingh cho dvkhvt, jeisnyhop kham cho dvkoeuq kyingh dvnghuot. 6 Dius nyau dvnganh dah Uwus ge dah Mangso eq dvso kyingh dvnghuot. Nyang gas dvnganh dah Yhensain nghuot las dvnganh dah ungkhau mha muh khanh nyeis. 7 Yang yuk khanghmuh gas Khristu dyei dah lhyenwhei jyehjuh jyungshuk lyis xauh kham yoeus. 8 Lhaihtoh dang mas taiq zis yah dvyhangteh, Nyang gas svsoh nyhang yvmas doq loh lyis lhunk toh bang nyoshoq lyis nyang yah dvgeh shwih loh. Nyang gas dius nyau jens lyis jyungshuk dyei, ge. 9 Doq loh ge zis cha lhyi ge, yhensain ka nyhen thank nyeisjvng dah nyhen tsank mas cangxeih gyoh loh goeus ge mes zis nghuot. 10 Gyoh los soeu ka, dvnganh yvlyis nyah phunk nyoqnho yah tyink das nyhenshang nyhang thank maukhung mha doq loh soeu nyang nghuot. 11 Cangsoeu dius jens lyis jyehjuh jyungshuk dyei dah Yhensain eq nyang nghuot. Nyang gas dvyhamh lyis lvgyo jens, dvyhamh lyis lvpe jens, dvyhamh lyis gausyis dang taiq kyoh yenh bang, dvyhamh lyis phung yoeuh bang yahge jyauh bang tsain kuot nhang toh. 12 Nyang housoeh kuot zis gas Khristu dah gungs lyis jebais los nhang das nyhenshang Mangso dius jens dvnganh lyis Khristan phuqsoe sasvna muh dyinghjet shoq sont dyei cho nghuot. 13 Housoeh las yah lomsjingh cho gvng mas eq, Mangso dah Lo lyis seq cho gvng mas eq thang thank lyis yang nyeis ya nyeis bang gas dvkoeuq kyingh duot las Khristu dah nyhang thank dyinghjet dah gungs khyank vkant yah dvyhangteh nhaiqbos ung gying bang bweh los das. 14 Hauh uhlyis yang gas seq mhuih khwangh dah dius jens yah vphanh vphuk taiq tangh dah jyauh cho khanghmuh mas vtauh vxoeu bos dang loh dah loshang jens teh ma nghuot lo das. 15 Housoeh bweh das gungsthaiq jyetdap ehnyet yah jyoeng dang taiq las, yang gas cho khvt khanghmuh mas uhloms nghuot dah Khristu mas kuh bes los chah nyeis. 16 Uhloms ge dah Yhensain shwih uhshe dah vkhau mha gungsdom dah gungsdoeus bos ya bos zis gas dvkoeuq yah dvkoeuq coq tsuk nyeis zis yahge yaunyoq changnyoq khanghmuh tsoq tsuk yomdyei nyeis gvng mas gungs gonh lyis dvdain dvlom yoh zwi toh. Housoeh las gungsdoeus khanghmuh vsainnyang yah sen dah muh khanh lyis gungs gonh lyis jyetdap zis yah kuhxing jebais los nhang. 17 Nghamh cho vkyuh ma bos dah gohnyau bang teh tsoq las kang ma dwis das xiklyis Yhensain nyings mas ngos namoq lyis zaih nhang. 18 Nyamoq dah seq cho soeng soeng noq zis yah koh las ehnyet than yvmvyah Mangso dyei dah kang vso mha ma bos bang nghuot. 19 Nyamoq gas xoq gyuk ehnyet dvnganh chithyuk tyamp goeus yvmvyah nyetnau cho chank las, ma lhoq ma shang vchoqh vjyot muh vja ja lyis tomp toh cho ma bos shoq kuot das nyhenshang vsainnyang gungs lyis duon jens tyamp. 20 Namoq gas Khristu dah cho mha housoeh teh yvlyis xuq goeus zis ma nghuot. 21 Namoq nyah cho lhyi jyoengh xauhgyo ku goeus zis yahge nyah thang chank bang nghuot las Yesu mas bos hau jyoeng cho lhyi namoq xuq goeus. 22 Housoeh las namoq gas xikpheh namoq chank ku dah kang dwis cho mha dah gungskhyank cauh lyis eq, pyo cho lhyi nyetnau las mhuih jyomh mes ehnyet gvng mas dyoqbis goeus dah gungskhyank cauh lyis eq tyamp geh. 23 Namoq dah ehnyet gungsdyos lyis vsaiq bweh nhang geh. 24 Vsaiq lyis wuot toh las hauh yvlyis dan zis yahge gyingshang ge, jyoeng dah kang dwis cho mha yoh chixoeuq das. 25 Housoeh las hwah dang vtaiq goh; yuk khanghmuh lomsjingh dah vsainnyang vmang vnoeuh lyis dang jyoeng taiq goh geh: khasoeh ge lyis, yang dvnganh gas Khristu ge dah gungs mas dah gungsdoeus tsain nghuot. 26 Namoq nhaiqyo lyis hau nhaiqyo dah ehnyet lyis yaunos vkuot nhang goh, buis wvng shoq eq nhaiq vyo goh. 27 Yius lyis joqyos vxwiq goh. 28 Khauh ku soeu ma doms khauh lo bas jungh: chah nyeis bang lyis yoh pangh shoq, gvm dyei shoq, vsainnyang xiklyis jyoeng dah womdau khoeu kang dwis cho yoh shoq muh zwi nyeis bas jungh. 29 Namoq dah nhuot masyah ma shop dah dang cha eq ma taiq bas jungh. Xauhgyo bang xiklyis vkyuh bweh shoq, chah nyeis zis yah dvyhangteh jebais los nhang dang kyingh taiq nyeis geh. 30 Hauh thoq lyis Gyingshang Dyos lyis nhaiq vkuk nhang goh: khasoeh ge lyis hau Gyingshang Dyos gas namoq lyis Mangso sain toh cho lhyi kanghjyoeng kyihau nghuot las thang thank buisnyeis lyis Mangso namoq lyis lhuiq kat zis xauh das cho lhyi kham toh cho dvkoeuq eq nghuot. 31 Nhaiq gyeih, nhaiqlom dyis, nhaiq yo, dyoqgoh kaiq goh, ma phauh ma danh kuot, hoeng ehnyet vja ja yahge gohtoeu houyah doeusgoh cho dvnganh lyis shang tyamp geh. 32 Namoq nyang changh nhaiqnyen goh, gis dah ehnyet chixoeuq goh las, Mangso ka Khristu mas namoq dah yobos khyuot dyei goeus zis yah dvyhangteh, namoq eq dvyuk yah dvyuk yobos khyuot dyei goh nyeis geh. 1 Namoq gas Mangso dah jyetdap lo jens nghuot goeus yvmvyah nyang yah doeus los shoq yomkat chah das. 2 Khristu gas yang lyis jyetdap las yah xiklyis nyah gungs lyis Mangso nhaiqdoeus dah xangh shom phudyei vyhang kuot las lomhxangh lainh zis yah dvyhangteh, namoq eq jyetdap ehnyet yah shwih dah vkhau mha suh e nyeis geh. 3 Namoq Mangso dah dius nyau jens nghuot joq yvmvyah yauxi cho, ma lhoq ma shang zis dvnganh, nyoqnoq obos zis yah sen dah cho lhyi namoq mas dang yah yangh ma nyhink bas jungh. 4 Ma lhoq khonhchoqh, vwot v-oeu dang, ma yungh dang, zeh dang eq ma taiq taiq, nhaiqshoqlang Chungh Dang sang nyeis bas jungh. 5 Yau kuot soeu, ma daq xoq gungs ma shung soeu, nyoqnoq obos soeu hank eq Khristu yahge Mangso munghdan dah vso vlho lhyi ma xauh zom zis gas namoq nyang top seq toh. Khasoeh ge lyis nyoqnoq obos cho ka silho paiq cho dvja nghuot. 6 Hank laus eq yhung pvjus dang yah namoq lyis vmhuih jyomh nhang goh: khasoeh ge lyis hauh cho gvng mas Mangso dah nhaiqlom dyis zis gas domsyos ma gyo bang thoq mas jweh los das. 7 Housoeh yvmvyah namoq housoeh teh bang yah dvtsiq eq vbos zomh goh. 8 Xikpheh namoq eq soeng soeng noq yvmas nyeis lai loh goeus. Nghuot laus eq, gvshih gas Yhensain dius jens duot los goeus las bvng yvmas jweh joq goeus. Housoeh yvmvyah namoq gas bvng dah lo jens teh suh e nyeis geh. 9 Khasoeh ge lyis hau bvng zis gas gis cho vja ja, dan cho yahge jyoeng cho lhyi bweh los nhang. 10 Yhensain nhaiqdoeus zis cha nghuot yvlyis tungh xuq geh. 11 Chuot yvmas suh e bang kuot, vkyuh ma bos chuot cho yah sen dah muhzoh cha eq ma chank kuot, hauh muh jens lyis bvng yvmas chixoeuq nyeis geh. 12 Khasoeh ge lyis nyamoq gauh kuot muh gas taiq das zis yangh vxoq vcaiq nghuot. 13 Hauh cho bos ya bos zis lyis bvng yvmas chixoeuq kat lyis nyamoq dah soengh choenk wotwu gas dede thuq los. 14 Khasoeh ge lyis joq ya joq yvlyis dede thuq los nhang nyeis. Housoeh las nyang taiq zis gas, Yhet pyo soeu eh, toq aq, shei masyah dwis toq los aq. Khristu nvng lyis bvng zis pank dyei das, ge. 15 Housoeh las namoq khasoeh kang dwis nyeis zis gas vlhomuh zaih nyeis geh. Koh bang teh ma nghuot, joeui bos bang teh kang dwis geh. 16 Gvshih dah buisnyeis shishenh gas ma shop joq yvmvyah namoq yoh dah toeuh dvnganh yvlyis vkyuh bos das khyvlyis yhung geh. 17 Housoeh las koh bang vbweh goh; Yhensain o dah cho cha nghuot zis gas seqgyo geh. 18 Yhei vyet goh, houka nvng lyis dyoqbis nhang das. Dyos yah dyingh joq geh. 19 Namoq nyang changh chungh dah lvkhyank dang, Dyos dah lomsjingh cho yah sen dah Chungh Dang yah jis goh las namoq dah ungkhau ehnyet mas Mangso lhyi chunghthwe kat las chungh nyeis geh. 20 Yah Yhensain Yesu Khristu dah nyings yoeus las cho khvt khanghmuh xiklyis, Uwus Mangso dah jyehjuh lyis vjangh nhaiqshoqlang sang geh. 21 Khristu lyis gyukwoms dah ehnyet yah namoq nyang changh nyang o mha gyoh nyeis geh. 22 Yhensain nyhiq jens eh, namoq gas Yhensain dah guon cho lhyi kham yoeus zis yah dvyhangteh yhensain phoq jens dah guon cho lhyi kham yoeus geh. 23 Khristu gas phung dah uhloms duot das toeuh yoh teh, yhensain phoq eq yhensain nyhiq dah thoq mas uhloms duot das toeuh yoh. Khristu nyang nyah gungs nghuot dah hauh phung lhyi khyuot yoeus soeu eq nghuot. 24 Phung ka Khristu dah guon cho lhyi kham zis yah dvyhangteh yhensain nyhiq jens eq cho khat khanghmuh mas yhensain phoq dah guon yvlyis kham yoeus das. 25 Yhensain phoq jens eh, Khristu gas hau phung lhyi jyetdap las, hauh xiklyis nyah gungs kyauh tyamp zis yah dvyhangteh, namoq dah yhensain nyhiq jens lyis jyetdap nyeis geh. 26 Yhensain nyah kang lhyi kyauh tyamp cho ka, hauh phung lhyi jeis yah cheihshang lha nyah Dang yah Mangso lhyi phudyei zis yah, 27 Hauh phung lhyi nyah gungs xiklyis kyauh uhlyis nyang mas mesyos, vnyhung teh zis cha eq ma bos bos, gyingshang zis yahge tswi ma bos, phunk bos, yungh thank das xiklyis nghuot. 28 Housoeh las yhensain phoq jens gas vsainnyang gungs lyis jyetdap nyeis teh, vsainnyang dah yhensain nyhiq jens lyis jyetdap chah. Vsainnyang yhensain nyhiq lyis jyetdap soeu ka nyah gungs lyis nyang jyetdap. 29 Khasoeh ge lyis yang hank laus eq vsainnyang gungs lyis hoeng zis ma bos. Hauh gungsthaiq Khristu gas hauh phung lhyi khoeu tsoh yoeuh gomh teh yang gas hau gungs lyis khoeu tsoh yoeuh gomh nyeis goh. 30 Khasoeh ge lyis yang gas nyah gungsdom dah gungsdoeus jens tsain nghuot. 31 Lhaihtoh dang mas, Haih gvng mas vbusbih gas, nyah ungwes uwus lyis toh khoq las, nyah yhensain nyhiq yah xonh zis yah nyah zomh gas dvsuih dvshoh bweh das, ge bos. 32 Haih cho ka lhaihtoh dang mas Chixoeuq, noq thank jyoeng cho dvkoeuq nghuot las. Khristu yahge phung lhyi toeuq las taiq zis nghuot oen ngos seqgyo. 33 Nghuot laus eq houka namoq yah eq sen joq. Yhensain phoq khanghmuh gas nyah yhensain nyhiq lyis yoh jyetdap das las yhensain nyhiq khanghmuh eq nyah yhensain phoq lyis yoh phauh nyang das. 1 Loshang jens eh, namoq nyhiphoq dah domsyos gyo nyeis geh. Housoeh kuot zis gas Khristan jens kuot chah dah jus cho nghuot. 2 Lhaihtoh dang mas, Nah ungwes uwus lyis phauh nyang geh, housoeh lyis nvng nyeisgis yaplhoq las nyeisjvng thoq mas kang xing zis yah xauh nyeis das, ge. Housoeh taiq toh dang gas dangthoengh mas bos cangxeih dah tyingtoh dang nghuot. 4 Namoq nyhiphoq jens eh, namoq dah lo jens lyis nhaiqyo das khyvlyis vkuot goh. Housoeh kuot das gungsthaiq nyamoq lyis Yhensain dah nyho jyauh cho yahge cho shet yvmas nyhoeu tsoh nyeis geh. 5 Jons jens eh, namoq Khristu lyis phuqsoe nyeis teh namoq dah cangsoeu yhensain jens lyis gyukwoms zis yah ehnyet dan khyvlyis domsyos gyo nyeis geh. 6 Yhensain jens yoeuh nyeis lyis nyoqnho yoh mes las kuot zis kyingh ma nghuot, Khristu dah jons jens teh Mangso ehnyet o cho lhyi nhaiqlom dvnganh yah kuot nyeis geh. 7 Dius lyis phuqsoe teh kyingh ma nghuot, hauh Yhensain lhyi phuqsoe teh mes dah ehnyet yah namoq dah jons muh lyis zwi nyeis geh. 8 Jons lyis laus eq, luiq soeu lhyi laus eq, Mangso ka nyang yuk nyang toeu lhyi nyang kuot dah gis muhzoh xiklyis tauh dyei das zis seq nyeis geh. 9 Yhensain jens eh, namoq eq houyah dvyhangteh namoq dah jons jens thoq mas chank kuot nyeis geh. Nyamoq lyis kyuk tant cho no toh geh. Namoq yahge namoq dah jons jens gas maukhung mha Yhensain dvyuk yah kyingh sen bang nghuot las hauh Yhensain ka dvyuk yah dvyuk lyis nyoqnho ma khyen soetuon soeu nghuot yvlyis soh nyeis geh. 10 Thang thank lyis, Yhensain yah dvkoeuq kyingh nghuot khyvlyis eq, nyah yomzains yomsoq yah eq, namoq yomhuont nyeis geh. 11 Yius dah khaujeini zis lyis namoq yoh toeu nghank tyamp bas jungh, Mangso namoq lyis dyei toh dah jesgungs dvnganh zis lyis wuot toh geh. 12 Khasoeh ge lyis yang gas dius yah zan goh zis ma nghuot, maukhung nyhang mha nyeis ma shop dah yius jens yah eq, haih mauchuotdwang dah mungkvn lyis guon dah zau jens, vmingh bos bang yah dvtsain zan goh nyeis. 13 Housoeh yvmvyah, Mangso dah jesgungs dvnganh yvlyis gvshih nyang wuot toh geh. Housoeh lyis ma shop zis yahge yaukyenh buisnyeis jweh lyis namoq gas jeswus dah zan cho lhyi yoh thoenk zan shuq tyamp das. Thang thank jweh shoq dye zan lyis eq, namoq goeng goeng yoh yap das. 14 Housoeh las namoq thyikdom lyis jyoeng cho ge dah dyichih chih las dan zis lyis sainhkhonh nghop teh gos lho lha, 15 nyenstap gausyis dang taiq kyoh das zis cicont nghuot joq bas jungh, khyei mha thyvkoq koq las thoenk yap joq geh. 16 Hauh thoq lyis lomsjingh ge dah gos lyis vjangh chi toh geh. Khasoeh ge lyis namoq gas hauh gos yah ma shop soeu baiq kat dah nyi shamshih dvnganh lyis yoh sat das. 17 Tsai, Khyuot yoeus cho ge dah uhkyop lyis kyop las, hau Dyos yah dyei dah Mangso dang ge moengsa lhyi wons toh geh. 18 Mangso jyank masyah pangh cho yoh bas jungh khyoeuq zis yah shvmanh dung yvmas haih cho dvnganh kuot nyeis geh. Haih cho gvng mas phuksohlhaiq mus nyeis geh. Khanhamp eq yom vshwe, Mangso dah dius jens xiklyis vjangh vkyuh dung nyeis geh. 19 Ngos dang taiq das xiklyis cicont nghuot shishenh lyis Mangso ngos lyis dang dyei bas jungh, hau gausyis dang dah noq thank vjyuk lyis ma gyuk ma woms, womh womh yoh taiq shoq, ngah xiklyis eq vkyuh bos dung nyeis geh. 20 Gvshih ngos thung lungh soeu nghuot joq laus eq hau gausyis dang gvng mas lvgyo dvyuk nghuot joq. Hau gausyis dang taiq kyoh das xiklyis ngos yvwons yoh zis yah dvyhangteh womh womh yoh taiq bas jungh shvmanh bos dung geh. 21 Namoq ngos khasoeh nghuot nyeis dah loeus jyuk yang yoh seq shoq, Yhensain dah muh mas lomluk kank kat nyeis, yah jyetdap boekyis Tichiku taiq kyoh das. 22 Housoeh las yang dvnganh khasoeh bweh nyeis cho loeus dvnganh namoq lyis taiq kyoh bas jungh zis yahge, namoq lyis pangh, yomdyei das nyhenshang ngos nyang lyis namoq jyank mas nhang kat. 23 Uwus Mangso yahge Yhensain Yesu Khristu gas Khristan boekyis dvnganhmoq lyis nyenstap, jyetdap zis yahge, lomsjingh cho dyei bas jungh. 24 Mathank magons jyetdap ehnyet yah, yah Yhensain Yesu Khristu lyis jyetdap nyeis bang dvnganhmoq mas jyehjuh joq bas jungh.
|