2 TIMOTHY1 Mangso o zis yah dvyhangteh Khristu dah lvgyo duot las Khristu Yesu dvdain dvlom duot nyeis gvng mas yang xauh yoeus das dangthoengh yah sen dah kang cho taiq hoeuh das nyhenshang nhang zis xauh soeu ngos Paulo gas, Ngos jyetdap, ngah lo Timothi lyis dang tying kat. 2 Uwus Mangso yahge yah Yhensain Khristu Yesu gas nvng lyis jyehjuh, nhaiqnyen zis yahge nyenstap cho dyei bas jungh. 3 Ngah phauh thyeih moq kuot teh, lhoqshang ehnyet yah ngos phuqsoe nyeis dah Mangso lhyi chungh. Ngos nyeih nyenh shvmanh dung yvmas namoq lyis malyen soh nyeis zis yah Mangso lhyi jyehjuh chungh nyeis. 4 Ngos nah nyoqdyeis lyis soh dyei las, ngos mas hau gauslaus cho dyingh los bas jungh ngos nvng yah svsoh xauhgoh mes nyeis. 5 Nvng gas nah vyos Loi metang nah ungwes Euni mas cangxeih bos joq, jyoeng dah lomsjingh ehnyet gas nvng mas zuk joq yvlyis ngos soh nyeis. Nvng mas eq hauh zis bos joq yvlyis ngos soh soh nghuot. 6 Housoeh yvmvyah ngos nvng lyis loq kih las muh dyei uhlyis Mangso jyank masyah nvng kham yoeus goeus dah jyehjuh lyis dwis nyeis nhang das xiklyis ngos nang lyis doms nhauh kat. 7 Khasoeh ge lyis Mangso ka yang lyis seq gyuk dah dyos ma dyei. Hau Yhensain dah Dyos gvng mas yang lyis yomsoq bos, jyetdap, vsainnyang gungs lyis seq joeu dah ehnyet dvdyei toh. 8 Housoeh las yah Yhensain Yesu dah xiklyis kanghjyoeng kat cho mha eq, Khristu gvng mas thung lungh soeu ngah gvng mas eq vxoq nyeis. Mangso ka nvng lyis hauh nyhenshang yomdyei toh goeus zis yah dvyhangteh, hau gausyis dang gvng mas shanghsenh kham cho mha ngos yah dvgeh yaukyenh cho chomp kham nyeis goh. 9 Mangso ka, yang kuot goeus dah muhzoh dvja ja gvng mas ma nghuot, nyang nghamh toh cho yahge jyehjuh gvng mas yang lyis khyuot yoeus las nyah dius jens duot das xiklyis khi toh. Nyang gas mauthuq nyeis ma zvn shih lyis yah Khristu Yesu gvng mas hauh jyehjuh yang lyis dyei toh. 10 Nghuot laus eq gvshih gas yah khyuot yoeus Yhensain Khristu jweh los shishenh lyis hauh cho yang lyis chixoeuq kat. Nyang gas shei cho dah yomsoq lyis yoeus tyamp las hau gausyis dang khyvlyis yah ma seq shei dah kang dwis cho lhyi Chixoeuq kat. 11 Gausyis dang taiq kyoh das nyhenshang Mangso ka ngos lyis lvgyo dvyuk khyvlyis eq, jyauh soeu khyvlyis eq toeuq toh. 12 Hauh cho gvng mas ngos haih shanghsenh zis kham nyeis. Nghuot laus eq ngos mas nghamhnywe cho dyingh dyingh bos joq: khasoeh ge lyis, ngos hank lyis khau nges nyeis yvlyis ngos seq zis yahge ngos lyis loms las ngah loq mas kyauh toh goeus dah vyhang lhyi hauh soetuon buisnyeis jweh shoq yoh tsomh toh dah yomsoq nyang mas bos oen zis ngos soh soh nghuot. 13 Ngos nvng lyis jyauh dah jyoeng dang lyis nvng chank kuot das yikhyoh toh las goeng goeng zwi zains toh zis yah yang Khristu Yesu yah dvdain dvlom duot las kang dwis cho yah sen dah lomsjingh cho yahge jyetdap ehnyet mas goeng joq nhang aq. 14 Nvng lyis loms las kyauh toh, gis dah vyhang lhyi, yah jyank mas bos joq Gyingshang Dyos dah yomsoq yah tsomh toh aq. 15 Asia mauxom mas bang dvnganhmoq ngos lyis tsain doeuh tyamp goeus zis nvng seq. nyamoq mas Phigelu yahge Hermogene tsain bos. 16 Yhensain ka Onesiphoru yhenbang lyis nhaiqnyen bas jungh: khasoeh ge lyis nyang ngos lyis nyoshoq lhain nhaiqtaink thoq lyis magoh, nyang ngos thung lungh cho yah sen lha ma xoq soeu nghuot. 17 Nyang gas Roma wus mas jweh yah dvyih ngos lyis nyvng shoq lyih xo xauhgoh. 18 Yhensain ka nyang lyis hauh soetuon buisnyeis lyis nhaiqnyen cho dyei bas jungh. Ephesu wus mas eq nyang ngos lyis kha iq daih goeus zis gas nvng vlhomuh seq. 1 Ngah lo eh, yah Khristu Yesu yah dvdain dvlom duot las kang dwis gvng mas xauh yoeus dah jyehjuh mas yombos nyeis aq. 2 Kanghjyoeng nyoshoq dah xikkhonh mas nvng ngah jyank masyah xuq, xauhgyo yoeus dah dang lyis yoeus las gohyuk lyis yoh doms jyauh das oen nvng yoh loms bang lyis cheh kyauh toh aq. 3 Khristu Yesu dah lomluk jeslo gis teh nvng kham yoeus vvng dah shanghsenh lyis kham yoeus aq. 4 Jesmuh wons nyeis dah jeslo dvyuk gas nyah thoq mas dah zau lyis nhaiqdoeus nhang shoq kuot mes yvmvyah jesphung yah ma sen dah dius jens cho mha ma bos nhunk. 5 Wuih khyank goh pwe mha wvng khyank goh soeu ka chank chah lyi vgus ma khyank goh lyis gas jyungshuk yoh das zis ma nghuot. 6 Danh muh, yos muh khank soeu ka, xauh yhomh yoeus dah guk nyau shih nyau cangxeih dah gvm boms xauh yoeus vvng. 7 Ngos taiq nyeis cho lhyi nghamh yoeuh aq: khasoeh ge lyis Yhensain ka hauh cho dvnganh nvng lyis seqgyo nhang das. 8 Ngos taiq kyoh dah gausyis dang mas bos zis yah dvyhangteh, shei masyah dwis toq los Dawi vnyau vshih nghuot dah Yhensain Yesu Khristu lyis soh nyeis aq. 9 Khasoeh ge lyis ngos gas Gausyis dang taiq kyoh gvng mas shanghsenh zis xauh. Ma shop dah thung dius dvyuk lyis teh shamjvng yah yangh twih zis xauh goeus. Nghuot laus eq Mangso dang gas ma twih toh. 10 Housoeh yvmvyah, ngos gas Mangso khyen yoeus zis xauh bang nyhenshang shanghsenh zis kham nyeis. Housoeh kham cho ka nyamoq eq Khristu Yesu gvng mas khyuot yoeus dah jyehjuh yah dvgeh, vcaiq vto phunk xauh yoeus das nyhenshang nghuot. 11 Haih zis gas jyoeng dang nghuot. Yang nyang yah dvgeh shei lhyi ka, nyang yah dvgeh eq yoh tsain dwis das. 12 Yang tsoq las kham nyeis lyis gas, nyang yah dvgeh eq xauh guon nyeis das. Yang nyang lyis ngoek tyamp lyis gas nyang eq yang lyis ngoek tyamp das. 13 Yang lom ma luk laus eq, nyang gas wontang: khasoeh ge lyis nyang gas nyang gungs lyis nyang yoh hwah ngoek tyamp zis ma nghuot. 14 Nah dius jens lyis haih cho taiq kyingh nyeis aq. Dang khonh jens dah vjyuk yah sen lha taiq phyen-goh las zan goh cho ma bos das xiklyis nyamoq lyis Mangso xikkhonh mas than than zaih nhang aq. Housoeh phyen-goh cho ka cha vkyuh ma bweh nhang thoq lyis, xauhgyo bang lyis lhoq thyoq cho dvbweh nhang. 15 Nvng gas nyah muh mas xoq chank cha ma bos dah muh wons soeu teh Mangso dah jyoeng dang lyis jus khyvlyis taiq kyoh, jyauh soeu khyvlyis eq Mangso xikkhonh mas nyoqnho yoh shoq nah Kank bos nyhoq yomkat nyeis aq. 16 Mangso yah we loh nhang dah vwot v-oeu yahge vkoh vpaq xamgoh dang lyis jhank aq. 17 Housoeh ge jyauh cho ka gungs lyis zo tomh loh dah mvnggvng dvm yah doeusgoh. Housoeh teh jyauh bang mas Himenu nhaiq tang Philetu bos. 18 Nyamoq gas hau jyoeng cho mhayah whang loh las, Yah dah dwis toq cho ka dye bweh goeus, ge taiq zis yah, dvyhamh bang dah lomsjingh cho lhyi lhoeu nhunk tyamp dyei. 19 Nghuot laus eq Mangso kuot toh, goeng dah vpom lhyi ka ma yoh nhont. Hauh vpom thoq mas, Yhensain ka nyah dius jens nghuot bang lyis seq, ge eq, Yhensain yah sen soeu nghuot ge taiq bang dvnganh gas lhung cho lhyi tsain jhank nyeis bas jungh, ge kyihau tap toh. 20 Yhenzains yoszains mas bvn khuq vja ja zis tsain joq; dvkhamh gas ngwis yah xing yah kuot toh; Dvyhamh gas saiq yahge tsoh yah kuot toh. Dvyhamh gas nyoqnho ngelang xiklyis yhaugyen uhlyis yhung lha, dvkhamh gas dius laiq nyeis dah joqyos mha tsain yhung. 21 Dius dvyuk yuk gas taiq loh goeus ma gis ma shop cho dvnganh masyah vsainnyang gungs lyis cheihshang lhyi ka, nyang gas Yhensain dah lhyenwhei nghamh toeuq toh cho mha yhung zis xauh kham yoeus das. Khasoeh ge lyis nyang gas gis dah muh lyis kuot das zis cicont nghuot joq bas jungh Yhensain dah xiklyis vkyuh bos yvmas kyauh toh goeus soeu nghuot. 22 Loyvm dah o mes cho lhyi jhank las, Mangso lhyi Lhoq shang ehnyet yah pangh das cho sang bang yah dvgeh Dan cho, lomsjingh cho, jyetdap cho yahge nyenstap cho lhyi yomkat xo nyeis aq. 23 Nghuot laus eq koh las cha ma seq nyei gyo phyen-goh bang lyis jhank aq. Housoeh teh bang dah vthang ka dyoqgoh cho dvnghuot yvlyis nvng seq. 24 Yhensain dah jyeidwis gas dyoqgoh zis ma gis bos, dvnganhmoq lyis nhaiq seq nyen, gis cho yahge nhaiqlom xing xing seq jyauh dah jyauh soeu nghuot chah. 25 Vsainnyang lyis tyixo bang lyis soq dyei uhlyis noeuh nhamp zis yah kuot soeu nghuot chah: khasoeh ge lyis nyamoq gas ehnyet thaiq las hau jyoeng cho lhyi seqgyo los das toeuh Mangso nyamoq lyis dyei lyis dyei das. 26 Hauh uhlyis nyamoq gas jus khyvlyis doms nyvng soh los las Satan dah lhyik masyah yoh luiq los das. Hauh Satan gas nyamoq lyis nyhik las nyang o khyvlyis chank nhang ku goeus soeu nghuot. 1 Thang thank buisnyeis lyis loh yau thank shishenh jweh das zis lyis seq nyeis aq. 2 Dius jens gas vsainnyang vkyuh dvxo, nyoqnoq, moengs, khwank bang nghuot los das. Nyamoq gas laihwangh dang taiq bang, nyhiphoq domsyos ma gyo bang, jyehjuh ma seq soh bang, lomsnoq cho ma bos bang nghuot das. 3 Nyamoq gas nhaiq ma bos, nhaiq ma seq nyen, nyhap, thyoq zo bang yahge gyukphoh bweh bang nghuot das. Nyamoq gas gis cho lhyi hoeng bang, 4 gauh chuq thyoq, dang ma jings, ehnyet nyhang lha khwank bang nghuot las: Mangso lhyi jyetdap das thoq lyis vsainnyang dah pyo cho lhyi zes ngwis bang nghuot das. 5 Nyamoq gas ngamoq dah lomsnoq cho dah thoqlosbaus lyis chank kuot laus eq hauh yomsoq gyingh lyis gas ngoek tyamp bang nghuot. Housoeh teh bang lyis eq jhank aq. 6 Nyamoq mas dvyhamh gas, dius jens dah yhen mha gauh wvng zis yah, seq cho nain las yomnhuk dah vmesbih jens lyis nyamoq loq mas wvng shoq tsain kuot. Hauh vmesbih jens gas vsainnyang shuot dah yaunos gvng mas ehnyet nyung daus las nhaiqlom ma tap zis yah nyetnau cho vja ja mas nhaiq wvng tyamp las, 7 jyauh yvlyis kham yoeus das zis vjangh o mes zis yah yomkat laus eq nyamoq hau jyoeng cho lhyi seq das yvmas khanhamp eq ma yoh jweh. 8 Yanne yahge Yambre gas Moshe lhyi tomp gos toh teh, hauh bang eq jyoeng cho lhyi tsain tomp gos toh. Hauh dius jens gas nyamoq dah ehnyet nghamh suon yoeuh ge zis ma bos lo las lomsjingh cho mha dyoqbis somh loh. 9 Nghuot laus eq nyamoq dah ung cho ka hounyhoq masyah jes las nyangh shoq yoh kham das zis ma nghuot. Khasoeh ge lyis hau aiq yuk mas cha bweh los cho dede thuq los teh, haih dius jens kha iq koh cho eq, dius jens xikkhonh mas dede thuq los das. 10 Nghuot laus eq nvng gas ngah jyauh cho, ngah wotwu yahge, ngah kang dwis cho mha ngos nghamh toh cho lhyi chank nyeis, ngah lomsjingh cho, ngos ehnyet xing cho, ngah jyetdap cho, jhen cho, 11 Ngos shoeuhshih zis xauh cho, khamzo cho; Antiok, Ikoni yahge Listra wus mas gyuk Phoh shoeuhshih cho xauh las ngos zain khoq yvlyis nvng seq. Housoeh xauh laus eq Yhensain ka ngos lyis hau dvnganh masyah khyuot yoeus. 12 Jyoengh, Khristu Yesu mas kang dwis las gywes so lhyi phauh nyang khyvlyis kang dwis mes soeu hank eq shoeuhshih zis xauh das. 13 Ma shop bang yahge vguons kuot bang, mhuih zo bang gas mhuih zo zis doms xauh las ma shop cho mha ma gis mhayah ma gis thank yvmas zes xunghxent loh das. 14 Nghuot laus eq nvng gas nvng xauh xuq las goeng goeng lomsjingh nyeis goeus, hau jyoeng cho mha tsoq las chank nyeis aq. Nvng gas nvng lyis jyauh bang hank nghuot yvlyis tsain soh nyeis. 15 Nvng lyis loshang yoq lyis yah joeui dyei las Khristu Yesu lyis lomsjingh gvng mas khyuot yoeus cho xauh yoeus das nyhenshang cho shwih she los dah gyingshang lhaihtoh dang vlhomuh seq soeu nghuot yvlyis eq soh nyeis aq. 16 Jyomp maussauh dvnganh lyis Mangso soq kat toh dyei yvmvyah jyoeng cho jyauh das, shuot cho lhyi yobos tuonh shet las kyink, shuot cho lhyi soq dan das zis yahge, jus dah kang dwis cho nyhenshang taiq shet dyei das xiklyis vkyuh bos. 17 Housoeh, Mangso dah muh wons wuq soeu ka gis dah muhzoh khanghmuh kuot das xiklyis kank bos cho yah tyink dyei las chi chah dah kyonhkhyi yah dyingh nhang nyeis. 1 Mangso xikkhonh mas eq, dwis nyeis bang yahge shei bang lyis soetuon das soeu Khristu Yesu xikkhonh mas eq, Yhensain ka guon das nyhenshang Hwankti khyvlyis jweh los das las ngos nvng lyis tungh kuot nhang zis gas, 2 Dang lyis taiq kyoh das xiklyis, seqgyo nhang das xiklyis, yobos tuonh shet las nyho das xiklyis, yomdyei das xiklyis, ehnyet xing xing toh las jyauh das xiklyis yoq doeus laus eq ma doeus laus eq yomkat nyeis aq oen, ngos nvng lyis kywih kat. 3 Dius jens gas, jyoeng lha chah zis ma bos dah jyauh cho lhyi ma gyo, nyamoq o yvpheh chank loh zis yah nyamoq ehnyet mas gvjywih yo shoq gyo yoeus mes dah cho lhyi jyauh das bang nyamoq xiklyis zes zes nyoshoq xo tsainh shishenh jweh los das. 4 Nyamoq gas hau jyoeng cho gyo mhayah phanh las dius dah mvnyei dang gyo das zis nhaiq wvng loh das. 5 Nvng gas chah cho bweh los laus eq nah gungs lyis joeu zis yah shanghsenh cho lhyi zain aq. Hau gausyis dang lyis taiq kyoh muh lyis wons wuq las, Mangso dah jyeidwis dvyuk khyvlyis nah yvwons s bos ya bos yvlyis wons wuq nyeis aq. 6 Ngah xiklyis gas ngah kang lhyi phudyei das shishenh jweh los nyeis. Gvshih nyang ngah xiklyis nyeisjvng thoq kang lhyi toh tyamp das shishenh jweh los nyeis. 7 Ngos gas wuih khyank goh cho mha kank bos nyhoq wuih goeus; khyank goh cho thank shoq wuih jweh goeus. Lomsjingh yvmas goeng goeng yap goeus. 8 Gvshih masyah dan dah soetuon soeu ge, Yhensain ka Soetuon buisnyeis lyis ngos lyis dyei das, dan dah kang dwis cho yah sen dah ung cho buismuk lyis ngah xiklyis toh toh. Ngos lyis kyingh ma nghuot, nyang doms jweh das buisnyeis lyis nhaiqdoeus zis yah langh nyeis bang dvnganhmoq lyis eq kyauh das. 9 Nvng ngah jyank mas lvnyap jweh das xiklyis mangh aq. 10 Dema gas haih mungkvn lyis ngwis yvmvyah ngos lyis toh tyamp khoq las Thesaloni wus pheh loh goeus. Kareka gas Galati mau pheh, Titu gas Dalamati mau pheh tsain loh goeus. 11 Luka kyingh ngos yah dvgeh nyeis. Makho lyis khi yoeus las nvng yah dvgeh shwih los aq. Khasoeh ge lyis haih muh mas nyang ngos lyis yoh pangh das. 12 Tichiku lyis gas ngos Ephesu wus pheh nhang kat. 13 Nvng los lyis Troa wus Karpu jyank mas ngos toh khoq dah ngah shanhzoe eq, maussauh eq, zes las shohyeis maussauh tsain yoeus los aq. 14 Hauh thunk bat soeu Alesanda gas ngos lyis ma gis zis nyoshoq kuot goeus. Nyang kuot zis yah dvyhangteh Yhensain ka nyang lyis phauh shangh das. 15 Nvng nyang lyis zaih las jhank aq: khasoeh ge lyis nyang gas yang taiq kyoh dah dang lyis than than kyoq tomp toh soeu nghuot. 16 Ngos lyis cangxeih vlhain zau kauq las ngos ngah gungs lyis ngos taiq gos uhlyis ngah shot pheh hank eq ma bos taiq toenk dyei. Dius dvnganh gas ngos lyis tyamp khoq: Mangso ka nyamoq housoeh kuot gvng mas yobos ma dyei bas jungh. 17 Nghuot laus eq Yhensain ka ngos yah nyeis las ngos lyis yomdyei yvmvyah ngos gas gohnyau bang dvnganh xauhgyo shoq hau gausyis dang lyis vlhomuh yoh taiq kyoh bas jungh: sat das dang thang thyet masyah lhuiq kat zis xauh goeus. 18 Yhensain ka ngos lyis ma gis cho dvnganh masyah khyuot kat las, nyah maukhung munghdan jweh shoq sam cho dyei zis yah shwih loh das. Nyang mas vcaiq vto phunk bos joq bas jungh. Amen. 19 Priska vzomh Akula yahge Onesiphoru dah yhenbang lyis jeshuh kat. 20 Erastu gas Korinthu wus mas gyoh nyeis khoq. Trophimu gas nos las, ngos nyang lyis Miletu wus mas nyhei toh khoq. 21 Cungh ma thuq shih lyis yoh jweh shoq mangh aq. Eubulu, Puden, Linu, Klaudia yahge gohtoeu Khristan boekyis dvnganhmoq nvng lyis tsain jeshuh kat. 22 Yhensain ka nah dyos yah dvgeh nghuot bas jungh. Mangso dah jyehjuh gas namoq mas joq bas jungh.
|