2 PETER

2 Peter 1

1 Yesu Khristu dah jyeidwis yahge lvgyo duot soeu, ngos Simon Petru gas, yah Mangso yahge khyuot yoeus Yhensain Yesu Khristu dah dan cho mha, ngamoq teh phauhdap dah lomsjingh cho xauh yoeus bang lyis dang tying kat. 2 Mangso yahge yah khyuot yoeus soeu Yesu Khristu lyis namoq seq gvng mas namoq gas jyehjuh yahge nyenstap cho dyinghjet shoq xauh kham yoeus bas jungh. 3 Nyah phunk yahge gis cho lhyi chomp kham yoeus das nyhenshang namoq lyis lui yoeus dah Khristu lyis seq gvng mas Mangso dah gywes so yomsoq gas jyoeng dah lomsnoq cho mha kang yoh dwis nyeis das xiklyis yang mas chah nyeis cho dvnganh dyei goeus. 4 Haih cho khyvlyis svsoh kuhxing lha phauhdap dah jyehjuh jyungshuk yah sen dah dangthoengh yang lyis dyei toh goeus. Housoeh las haih jyehjuh gvng mas yang gas mungkvn mas dah dyoqbis loh nhang dah nyetnau cho mhayah yoh luiq las soengh choenk gywes tsungh so tsungh bang yoh bweh los. 5 Haih cho gvng mas namoq lomsjingh cho mha gis cho, gis cho mha seq cho lhungh kat geh. 6 Seq cho mha vsainnyang gungs lyis joeu cho, vsainnyang gungs lyis joeu cho mha jhen cho, jhen cho mha gywes so lhyi phauh nyang cho, 7 Gywes so lhyi phauh nyang cho mha vmang vnoeuh sain teh nhaiqbos goh cho, hou mhayah jyetdap sainhnos goh cho lhungh kat geh. 8 Heinyhoq gas namoq mas bos chah dah kank bos cho tsain nghuot. Haih cho namoq mas magons magoh bos nghuot lyis gas namoq dah Yhensain Yesu Khristu lyis namoq seq zis yah kang dwis cho mha thyvdvng siq siq yah vkyuh bweh nhang das. 9 Nghuot laus eq hauh kank bos cho lhyi ma yoh soeu ka, we we ma nyvng nyoqjet soeu nghuot las, gohnhamp nyah yaunos masyah cheihshang kat zis xauh cho lhyi tohnyhik tyamp. 10 Housoeh las ngah boekyis eh, namoq lyis Mangso khi lha khyen yoeus cho lhyi vjangh xauh kham das xiklyis yomkat nyeis geh. Housoeh kuot nyeis lyis gas, namoq dah lomsjingh cho lhyi khanhamp eq ma tyamp das. 11 Hauh cho chank nyeis lyis gas, yah Yhensain yahge khyuot yoeus soeu Yesu Khristu dah vcaiq vto munghdan mas yoh wvng das toeuh, namoq lyis dyingh dyingh dyei das. 12 Housoeh las namoq haih cho lhyi tsain seqgyo las lhom yoeus toh goeus dah jyoeng cho mha vpom goeng goeng kuot toh goeus laus eq ngos namoq lyis vjangh taiq kyingh nyeis das. 13 Ngos kang dwis nyeis shih yoq lyis haih cho yah sen lha namoq lyis taiq kyingh zaih nhang zis gas ngos kuot vvng dah muh nghuot oen nghamh. 14 Yah Yhensain Yesu Khristu ngos lyis bvng bvng taiq toh goeus zis yah dvyhangteh, hai seq shei dah gungs ma nyangh lyis ngos haih gungs lyis toh tyamp das zis seq. 15 Housoeh las ngos shei thang lhyi haih cho lhyi dvcho cho yah namoq vjangh soh nyeis das xiklyis ngos yomkat ohhont das. 16 Yah Yhensain Yesu Khristu dah yomzains yah jweh los cho ngamoq namoq lyis seq nhang das xiklyis ngamoq gas dius yah kuot taiq dah mvnyei mas ma nges, nyah kuhxing cho lhyi ngamoq nyoqjeih yah nyvng goeus. 17 Nyang lyis Uwus Mangso jyank masyah nyoqnho ngelang yahge phunk dyei uhlyis, zes thank dah phunk nyoqnho ngelang khau mhayah nyah jyank mas jweh los dah thwe ka, Haih soeu ka ngos jyetdap Lo nghuot, ngos nyang lyis nhaiqdoeus, ge taiq uhlyis eq ngamoq houmha nyang yah dvgeh nghuot. 18 Ngamoq Yhensain yah dvgeh hau gyingshang boms thoq mas nyeis uhlyis maukhung mhayah nyings thuq los dah thwe lhyi ngamoq nyang xauhgyo. 19 Housoeh yvmvyah ngamoq gas lvpe jens taiq toh dah nyoqnyvng dang lyis zes yoh nghamhnywe. Namoq hauh Dang lyis vlhomuh gyo nyeis geh. Khasoeh ge lyis houka namoq dah ehnyet mas bvng los las buhnyhiq thuq los shishenh jweh shoq soeng soeng noq yvmas bvng joq dah nyibung teh nghuot. 20 Nghuot laus eq hank laus eq vsainnyang o khyvlyis lhaihtoh dang mas bos dah lvpe dang lyis vjyuk ma yoh phant yvlyis cangxeih comh toh chah. 21 Khasoeh ge lyis lvpe dang kha khonh eq dius dah ehnyet o khyvlyis bweh los zis ma nghuot. Gyingshang Dyos yah bos jyonh zis xauh bang gas Mangso jyank masyah jweh los dah dang lyis tsain taiq.

2 Peter 2

1 Lai loh goeus shishenh lyis dius jens mas lvpe hwah tsain thuq los zis yah dvyhangteh, namoq mas eq ma jus dah jyauh bang thuq los das. Nyamoq gas thyoqpi cho, ma jus dah jyauh cho gauh chi hwank las vsainnyang lyis khyuot yoeus goeus dah Yhensain lhyi eq peq tyamp das. Housoeh nyamoq gas nyamoq thoq mas nyetlos nyettant dyoqbis cho jweh los nhang das. 2 Housoeh bweh laus eq dius nyoshoq gas nyamoq dah ma gis wotwu cho mha chank loh das. Nyamoq housoeh kuot yvmvyah jyoeng cho lhyi ma gis khyvlyis tsain taiq jwangh das. 3 Hai ma jus dah jyauh bang gas nyamoq dah nyoqnoq ehnyet yah kuot yoeus dah mvnyei taiq las vmyat xo das. Nyamoq lyis joeng das soetuon soeu ka, gohlhain yah yangh cicont kuot toh goeus, nyamoq lyis mhont das soeu ka yhet muih joq zis ma nghuot. 4 Mangso ka, yaunos kuot dah loeuswons bang lyis yangh khyamhsa ma dyei, nyamoq lyis munyi thomh mas khyoq las, hau soeng soeng noq yvmas shamjvng yah twih las soetuon das buisnyeis lyis langh nhang toh. 5 Mangso ka gohlhain caiq lyis dah mungkvn lyis eq khyamhsa ma dyei, gywes so lhyi ma phauh nyang dah mungkvn lyis dvjeis lhyi nhang. Dan cho lhyi taiq kyoh soeu Noa yahge gohtoeu dius nyhet yuk lyis gas khyuot yoeus. 6 Mangso ka Sodom yahge Gomora aiq wus lyis eq nyi yah mhont las gywes ma tsungh bang khasoeh bweh los das cho yikhyoh toh. 7 Nyang gas lyi ma chi, wotwu dyoq dah dius jens gvng mas nhaiqkuk yomgyau nyeis soeu ge dah Lot lyis gas lhuiq kat. 8 Hauh dan soeu ka nyamoq yah dvgeh nyeis dah uhlyis dvnyeih dvnyeih nyamoq kuot dah ma gis muh lyis nyvng, xauhgyo gvng mas nyah ehnyet mas shanghsenh nyung daus nyeis. 9 Housoeh yvmvyah Mangso ka gywes so lhyi phauh nyang bang lyis nyamoq xauh nyeis dah shiwu cho mhayah khasoeh lhuiq kat das zis yahge lhung bang lyis soetuon buisnyeis jweh shoq khasoeh joeng das zis seq. 10 Zes las vchoqh vlhauq gungsshoh dah nyetnau cho mha tsain suh e las, Mangso dah toeuh lyis maphauh madanh kuot bang gas housoeh teh cho xauh das. Hai ma jus dah jyauh bang gas svsoh womh las lhoq lhoq teh nyhang mha dah phunk bos bang lyis phauh nyang cho ma Chixoeuq, nyamoq lyis ma phauh gis kuot. 11 Hai ma jus dah jyauh bang thoq lyis yom yahge yomsoq zes tsain bos dah Loeuswons bang yangh Yhensain xikkhonh mas nyamoq lyis ma phauh gis zau ma kauq. 12 Nghuot laus eq haih dius jens gas, nyhik yoeus las sat das xiklyis nyeis dyos dah gaunyhauq lamh jens teh, nyamoq yangh ma seq dah soengh choenk ehnyet yah ma phauh gis kuot. Nyamoq gas yewus yhangteh mhont tyamp zis xauh das. 13 Nyamoq gas nyamoq yah gohyuk lyis xauh nhang dah shanghsenh cho tauh dyei zis xauh das. Nyeihgungs lyis yangh nyamoq dah gungs shoh pyo cho lhyi tyink das xiklyis gas nyamoq dah pyo cho nghuot. Nyamoq gas namoq yah dvgeh zo shuk huom mha bos wvng yvmvyah namoq xiklyis vxoq vcaiq, nyoqnho gyoh cho bweh nhang nyeis. Nyamoq gas mhuih cho lhyi tsain ngwis. 14 Nyamoq gas nyi shuot lvng shuot muh yoh kuot das toeuh xo thoq lyis gohtoeu cha lhyi eq ma mes yoeuh. Nyamoq yaunos kuot las xauh kham dah whitau lhyi nhaiq ma thoq shei. Nyamoq dah ehnyet lyis nyoq noq o seq bos das xiklyis xik toh goeus. Nyamoq gas Mangso dah nhoengh zis xauh nyeis. 15 Nyamoq gas cho dan lyis toh tyamp las cho whang loh: Beora dah lo Balam chank dah cho mha chank loh goeus. Balam gas ma jus dah muh kuot las yoh dah uhkung phauh lyis obos soeu nghuot. 16 Balam gas nyang kuot dah yaunos gvng mas nyho lha jyauh zis xauh. Nyah mauhlyihzoe gas dius nyingh yah dang taiq los las lvpe dah huonh muh lyis tomp tyamp. 17 Haih dius jens gas jeis kanh dah jeisthuq dwang yahge lyeis jyang yah muot tangh los dah jyommauh teh tsain nghuot. Mangso ka soeng soeng noq yvmas nyamoq xiklyis noq thank joqyos dvkoeuq sont toh dyei. 18 Nyamoq gas shuot dah kang dwis cho mhayah vsaiq yoh luiq los bang lyis vkom mha moengs dang taiq zis yah gungs shoh dah nyetnau cho mha chuq yoeus las cho shwih whang loh. 19 Nyamoq gas nyamoq nyang dyoqbis dah wotwu dah jons tsain duot toh las gohyuk lyis lhuiq cho das ing toh. Khasoeh ge lyis dius dvyuk gas nyang lyis yoh ung dah vyhang dvnganh dah jons nghuot. 20 Dius jens gas namoq dah khyuot yoeus soeu Yhensain Yesu Khristu lyis yoh seq gvng mas, mungkvn dah vchoqh vjyot yomsoq masyah luiq los thang lhyi, tsai dvlhain vchoqh vjyot cho yah ung tyamp zis xauh lyis gas, thang thank lyis hauh bang dah bweh cho ka cangxeih thoq lyis zes xungh. 21 Dan cho lhyi seq lho lha, nyamoq lyis kyauh toh, gyingshang dah tyingtoh dang lyis lhyweq tyamp thoq lyis, hauh cho lhyi ma seq seq nyeis das zis gas dvzes gis shih. 22 Lvkhuih gas nyang duk yvlyis doms zo, wuq eq cheih dyei thang lhyi thomh boengh mas doms lhoeuh, ge dah sangkhyangh gas nyamoq xiklyis jus joq.

2 Peter 3

1 Ngos jyetdap dah dyenschangh jens eh, heika ngos namoq lyis aiq vlhain huon maussauh nghuot. Hai aiq koeuq mas namoq dah shangkyei ehnyet vpom yah seq nghamh yoeuh das xiklyis haih cho jens lyis taiq kyingh kat. 2 Gyingshang dah lvpe jens gohnhamp taiq khoq dang lyis eq, namoq dah lvgyo jens dah loq cho yah, namoq xauh yoeus dah khyuot yoeus soeu Yhensain tyingtoh dang lyis eq ngos namoq lyis doms soh nhang mes. 3 Hau thang thank buisnyeis lyis vsainnyang dah gungs shoh nyetnau khyvlyis chank zis yah kang dwis bang thuq los das yvlyis cangxeih seq toh chah. Nyamoq gas namoq lyis jwangh zis yah, Yhensain doms jweh los das ge dangthoengh dyei toh ma nghuot lhyeh? Gvshih nyang khalhye gah? 4 Ngamoq uwus moq shei loh goeus: nghuot laus eq vyhang dvnganh gas mungkvn lyis gvnkhanh dah shishenh yah dvyhangteh dvnghuot joq nyvng, ge los das. 5 Mangso ka cangxeih lyis maukhung yahge nyeisjvng lyis nyah dang yah gvnkhanh toh goeus yvlyis eq, nyeisjvng lyis jeis khau mhayah jeis yah she thuq toh goeus yvlyis eq, 6 tsai nyeisjvng vcauh lyis jeis yah dvjeis lhyi lha thyoq tyamp goeus yvlyis eq nyamoq pa i tohnyhik tyamp. 7 Nghuot laus eq Mangso ka gvshih joq dah maukhung yahge nyeisjvng lyis nyi yah mhont tyamp das xiklyis gohlhain dah hau dang yah nyang shung toh. nyamoq lyis gywes ma tsungh bang yah dvgeh soetuon lha mhont das buisnyeis jweh shoq toh shih das. 8 Nghuot laus eq jyetdap dyenschangh jens eh, hai dvcho lhyi vtohnyhik goh, Yhensain xikkhonh mas buisnyeis dvnyeih yahge khyoengh zvn gas cha ma shaih, nyah xiklyis hau aiq ja gas dvyhangteh dvnghuot. 9 Dius dvyhamh nghamh teh Mangso ka nyang dangthoengh toh goeus dah cho lhyi kuot tyink das xiklyis sheq nyeis zis ma nghuot; dvnganhmoq yaunos masyah lhain los las hank eq dyoqbis zis ma xauh bas jungh, nyang o nyeis yvmvyah nyang namoq lyis jhen nyeis zis dvnghuot. 10 Yhensain dah buisnyeis gas khauh soeu teh jweh los das. Hauh buisnyeis lyis maukhung nyings huomh toh thwe yah dyuk loh das. Maukhung vyhang dvnganh eq nyi ngeh las dyoqbis tyamp das; nyeisjvng yahge houmha nyeis ya nyeis zis gas bi tyamp das. 11 Vyhang dvnganh heisoeh mhont tyamp zis xauh das lyis gas, namoq khasoeh teh dius jens nghuot chah das lah? Namoq dah kang dwis cho ka gyingshang lha Mangso mha kyauh toh dah kang dwis cho nghuot chah das. 12 Namoq gas Mangso dah buisnyeis lyis langh nyeis cho mha lvnyap jweh los bas jungh gis thank khyvlyis yomkat zis yah langh nyeis geh. Hauh buisnyeis lyis maukhung ka ngeh las dyoqbis tyamp das; maukhung vyhang jens eq ngeh yvmvyah yings tyamp das. 13 Nghuot laus eq yang gas Mangso dangthoengh dyei toh goeus, dan bang nyeis das yhen ge maukhung vsaiq yahge nyeisjvng vsaiq lyis nghamhloms las dvlangh nyeis. 14 Housoeh las ngah dyenschangh jens eh, namoq hauh buisnyeis lyis langh nyeis shishenh lyis Mangso xikkhonh mas namoq dah ehnyet shangkyei lha yaunos ma dap bas jungh oen zis yahge nyang mas nyenstap zis yah yoh nyeis das xiklyis yomkat ohhont nyeis geh. 15 Yang jyetdap dah vmang vnoeuh Paulo eq, Mangso dyei dah joeui yhung lha namoq jyank mas lhaih kat goeus zis yah dvyhangteh, yang Mangso lhyi ehnyet xing xing yah langh nyeis zis gas khyuot yoeus xauh das xiklyis toeuh nghuot yvlyis seq geh, nyvng geh. 16 Paulo ka haih cho yah sen lha nyang huon maussauh mas hei yah dvyhangteh lhaih xoeuq toh. Nyah maussauh mas bos dah cho dvkhamh gas seqgyo nanh las joeui ma seq bang yahge ehnyet ma gying bang gas shuot khyvlyis vjyuk tsain phant yoeus. Dius jens gas gohtoeu lhaihtoh dang jens lyis shuot khyvlyis vjyuk phant yoeus. Housoeh nyamoq dah dyoqbis cho lhyi nyamoq nyang kuot yoeus goeus. 17 Nghuot laus eq dyenschangh jens eh, namoq gas heinyhoq lyis tsain seq toh goeus. Housoeh yvmvyah namoq gas lyi ma chi bang dah shuot cho pheh shwih loh yvpheh ma bos das zis yahge gau dah kang dwis cho mhayah ma gyoh tyamp das xiklyis zaih nyeis geh. 18 Namoq gas yah khyuot yoeus Yhensain Yesu Khristu dah jyehjuh yahge seq cho mha tsoq las kuhxing jebais los geh. Gvshih eq, vcaiq vto eq Yesu Khristu mas phunk bos bas jungh. Amen.