1 TIMOTHY

1 Timothy 1

1 Yah khyuot yoeus Mangso yahge yang nghamhloms joqyos nghuot dah Khristu Yesu gvng mas, Khristu Yesu dah lvgyo ngos Paulo gas, 2 lomsjingh cho mha ngah lo gyingh nghuot dah Timothi jyank mas maussauh lhaih kat. Uwus Mangso yahge yah Yhensain Khristu Yesu jyank masyah nvng lyis jyehjuh, nhaiqnyen zis yahge nyenstap zis dyei bas jungh. 3 Ngos Makedoni mau pheh lai loh uhlyis nvng lyis taiq toh goeus zis yah dvyhangteh, Ephesu wus mas tsoq nyeis nhang mes. Houmha dius dvyhamh shuot dah lomsjingh cho lhyi tsain jyauh nyeis, hauh yvlyis nvng yoh tomp tyamp chah das. 4 Jyoengh ma gis bweh dah tying dang mvnyei, ma thank lo dah dius caiq shap cho toh tyamp das xiklyis nyamoq lyis taiq aq. Hauh cho jens gas dyoqgoh nyens goh, phyen-goh cho lhoq thuq nyeis las hau lomsjingh cho yah kyingh dvyoh seq dah Mangso dah nghamh toeuq toh cho lhyi ma yoh bweh los nhang. 5 Hai taiq toh dah toeuqkhom ka lhoqshang ehnyet masyah thuq los dah jyetdap cho, gying dah soh seq ehnyet yahge gyingh dah lomsjingh cho lhyi nhauh toq kat cho tsain nghuot. 6 Dvyhamh gas hauh cho jens masyah whang lha vkoh vpaq vkyuh ma bos dah taiq phyen-goh cho yah dye tyamp. 7 Nyamoq gas Mangso dah lyi jyauh bang tsain bweh mes, laus eq nyamoq gas vsainnyang taiq dang lyis eq, vsainnyang nghamhnywe zis yah taiq nyeis dah cho cha nghuot yvlyis ma tsain seqgyo. 8 Lyi gas yhung chah khyvlyis yhung lhyi ka hauh Lyi gis yvlyis ngamoq seq. 9 Housoeh las yang seq toh chah cho ka, hauh lyi gas dius gis jens xiklyis ma nghuot; lyi lhyweq bang, shei mon yaunos bos bang, gywes ma tsungh bang, yaunos bos bang, lomsnoq cho ma chank bang, lomsjingh cho nghuot ya dyos yah sen cho mha nhaiq ma wvng bang, ungwes uwus lyis sat bang yahge dius sat bang, 10 wotwu dyoq bang, nye changh yukgis changh nyeis goh bang, jons ungh dah soenghi kuot bang, hwah bang, ma ying kanghjyoeng kat bang yahge gohtoeu cho vja ja khyvlyis yah lomsjingh dah jyauh cho lhyi tyixo lha kang dwis bang xiklyis lyi dvtoh. 11 Hauh jyauh cho ka phunk bos las ngelhoq Mangso mhayah gausyis Dang yah dvyhangteh nghuot. Hau gausyis dang lyis taiq hoeuh das nyhenshang Mangso ka ngos lyis kyauh toh. 12 Ngos wons wuq muhzoh xiklyis ngos lyis yomdyei soeu, yah Yhensain Khristu Yesu lyis nhaiqshoqlang chungh. Nyang gas ngos lyis mon yih soeu nghuot ge suon lha nyang lyis phuqsoe das xiklyis toeuq toh zis xauh yvmvyah nyang lyis nhaiqshoqlang chungh. 13 Ngos gas lai loh goeus shishenh lyis Yhensain lhyi ma gis khyvlyis yobos huon, khyangh pu, shoeuhshih soeu jwangh soeu, nghuot ku laus eq, Mangso ka ngos lyis nhaiqnyen nyeis: khasoeh ge lyis ngos mas lomsjingh cho ma bos shih las ngos cha kuot nyeis zis ngos ma seq. 14 Yah Yhensain ka nyah magons magoh jyehjuh ngah thoq mas huot khyoq dyei las Khristu yah dvdain dvlom kang dwis nyeis yvmvyah yang xauh yoeus vvng dah lomsjingh cho yahge jyetdap ehnyet ngos lyis dyei goeus. 15 Yaunos dap bang lyis khyuot yoeus das xiklyis Khristu Yesu gas mungkvn mas jweh lyih, ge dah dang gas top nyang lhom yoeus las lomsjingh mon, jyoeng lha wontang dah dang nghuot. Hau yaunos wons bang mas ngos yaunos nyo thank soeu nghuot. 16 Nghuot laus eq, Mangso ngos lyis nhaiqnyen cho ka thang pheh Yhensain lhyi lomsjingh las vcaiq vto kang xauh yoeus das bang dvnganh dah nyhenshang yikhyoh bweh bas jungh ge Khristu Yesu gas ngos yaunos zes nyo soeu lhyi nyah dah nhaiqlom xing xing jhen cho lhyi Chixoeuq zis nghuot. 17 Gvshih, vcaiq vto Hwankti nghuot las ma seq dyoq dyuk loh, nyoqjeih yah ma yoh nyvng, dvso kyingh dah Mangso mha phunk yahge nyoqnho ngelang gas vcaiq vto bos joq bas jungh. Amen. 18 Ngah lo Timothi eh, lai loh goeus shishenh lyis nvng lyis toeuq las taiq toh dah lvpe dang yah dvyhangteh, wons wuq loh das nyhenshang ngos nvng lyis vmingh dyei; jes vlhomuh yoh zan das xiklyis hau lvpe jens taiqtoh dang lyis kyonhkhyi teh yhung aq. 19 Hauh thoq lyis nvng mas lomsjingh cho yahge gying dah sohseq ehnyet bos aq. Dvyhamh gas sohseq ehnyet yah taiq kyingh yvlyis ma gyo yvmvyah nyamoq dah lomsjingh cho lhyi lhoeu thyoq tyamp. 20 Nyamoq mas Satan loq mas kyauh khyvlyis ngos joeng dah Himenu yahge Alesandria tsain bos. Housoeh kuot zis gas nyamoq dah loeusmus soqzo cho lhyi doms tyamp bas jungh, jyauh das xiklyis kuot zis nghuot.

1 Timothy 2

1 Housoeh yvmvyah cangxeih lyis dius dvnganhmoq dah nyhenshang Mangso jyank mas shangphu cho, shvmanh dung cho, bos khyoeuq cho yahge jyehjuh chungh cho kuot nyeis aq oen ngos nvng lyis taiq kyingh kat. 2 Yang gas Mangso lhyi gyukwoms cho dvnganh mas vlhomuh chank suh las doeus las gis dah wotwu bos zis yah samlo nyenstap khyvlyis kang dwis nyeis bas jungh. Hwankti jens yahge vmingh yoh bang dvnganhmoq xiklyis shvmanh dung dyei aq. 3 Haih muh gas gis dah muh nghuot las yah khyuot yoeus Yhensain Mangso lhyi nhaiqdoeus nhang nyeis. 4 Nyang gas dius dvnganh khyuot yoeus zis xauh las hau jyoeng cho lhyi seq los das nyhenshang o. 5 Khasoeh ge lyis Mangso ka dvso kyingh nghuot las Mangso yahge dius jo mas shangphu dyei soeu eq dius lyih duot dah Khristu Yesu ge soeu dvyuk kyingh nghuot. 6 Yhensain ka dius nyau dvnganh lyis khyuot yoeus das nyhenshang nyah gungs lyis nyang kyauh tyamp goeus. Housoeh khyvlyis yah yang shishenh jweh lyis Mangso ka dius lyis khyuot yoeus mes cho kanghjyoeng lhyi hau toeuq toh shishenh lyis chixoeuq zis nghuot. 7 Housoeh las Yhensain ka ngos lyis lvgyo dvyuk khyvlyis eq, gohnyau bang dah jyauh soeu dvyuk khyvlyis eq hau lomsjingh cho yahge jyoeng cho dah dang lyis taiq kyoh das nyhenshang nhang kat zis xauh. Ngos hwah nyeis zis ma nghuot; jyoeng dang dvtaiq. 8 Phung dah paiq cho huom khanghmuh mas vbusbih jens lyis shvmanh dung nhang mes. Mangso mha kyauh toh zis xauh dah vbusbih jens gas, nhaiq yo cho, phyen-goh cho ma bos bos, gyingshang dah loq toeu lha shvmanh yoh dung. 9 Vmesbih jens lyis eq nyamoq dah dyimis wuot cho mha shop khyvlyis vlhomuh wuot nhang mes. Cam zaiq, xing, pvleh yahge phauhdap dyimis yah ma shunk, 10 paiq thungh chank kuot dah vmesbih jens dah nyhenshang kuot vvng zis yah dvyhangteh gis dah wotwu yah vsainnyang dah gungs lyis shunk nyeis bas jungh. 11 Vmesbih jens gas ehnyet nyhen mha gyoh zis yah samlo xuq bas jungh. 12 Vmesbih jens gas jyauh das zis yahge vbusbih jens thoq mas toeuh yoeus las guon das zis ngos ma gyo. nyamoq gas samlo nyeis bas jungh. 13 Khasoeh ge lyis Adam lyis shih gvnkhanh las Ewa lyis gas thang lhyi dvgvnkhanh toh. 14 Satan dah mhuih zis xauh soeu ka Adam ma nghuot, vmesbih yuk mhuih zis xauh las Mangso dah lyi lyis lhyweq goeus. 15 Nghuot laus eq vmesbih dvyuk gas shop zis yah lomsjingh cho, jyetdap cho, gyingshang cho mha tsoq chank nyeis lyis gas, hau lo khoeu dah gvng mas nyang khyuot yoeus zis xauh das.

1 Timothy 3

1 Phung dah uhshe soeu dvyuk bweh mes soeu ka gis thank dah muh lyis o mes soeu nghuot ge dah dang gas jyoeng dang nghuot. 2 Phung lhyi uhshe dah soeu ka yobos ma bos soeu, yhensain nyhiq dvyuk kyingh bos soeu, zaih soeu, vsainnyang gungs lyis joeu soeu, cho jeis lyis yoeuh las kang dwis soeu, boengh mes daih soeu, seq jyauh das vlho chi soeu nghuot chah. 3 Yhei ma shuk, ma bat, ehnyet noeuh nhamp las nyens nyens tap tap nghuot chah. Nyang gas ngwis nyoq ma noq soeu nghuot chah. 4 Vsainnyang yhen lhyi vlhomuh yoh guon las, vsainnyang lo jens lyis domsyos gyo zis yah phauh nyang zis xauh kham shoq yoh kuot soeu nghuot chah. 5 Dius dvyuk gas vsainnyang yhen lhyi ma seq shwih nghuot lyis gas, Mangso dah phung lhyi loqzamh khasoeh yoh zwi das lah? 6 Nyang gas phung dius vsaiq bweh los soeu eq ma nghuot goeus jungh, nyang gas khwank ehnyet bos los las yius Satan lyis teh dang thang thyet zis ma xauh bas jungh, hau lomsjingh cho mha nhaiqbos chah. 7 Nyang gas jwangh las yobos huon zis ma xauh, yius dah lhyik mas ma nyih bas jungh, phung nghe pheh bang phauh nyang kham soeu eq nghuot chah. 8 Phung thuk jens eq dan las wotwu gis bang nghuot chah. Lhyo kuq soeu, zvbiq shuk lais soeu, ngwis nyonsdot soeu ma gis nghuot. 9 Mangso yah Chixoeuq toh goeus dah lomsjingh cho jyoeng cho lhyi shangkyei dah sohseq ehnyet yah lhom yoeus las zwi zains toh bang nghuot chah. 10 Nyamoq gas cangxeih lyis kyink zis xauh las, yobos huon dais ma bos lyis gas phung thuk muh wons bas jungh. 11 Nyamoq dah yhensain nyhiq jens eq wotwu gis bang nghuot las, loeus ma mus, zaih lha cho khvt khanghmuh mas lomluk bang nghuot chah. 12 Phung thuk gas yhensain nyhiq dvyuk kyingh yoh soeu nghuot las, vsainnyang yhen yahge lo jens lyis gis gis yoh guon soeu nghuot chah. 13 Vsainnyang dah muh lyis vlhomuh wons wuq dah phung thuk gas nyah xiklyis gis dah nyoqnho ngelang yoh las Khristu Yesu mas nyamoq dah lomsjingh cho mha womh dah ehnyet yah yoh taiq kyoh. 14 Ngos nvng lyis haih maussauh lhaih nyeis uhlyis nah jyank mas ma nyangh lyis yoh jweh das oen nghamhloms nyeis. 15 Nghuot laus eq ngos lvnyap ma yoh jweh los lyis dwis nyeis Mangso dah phung ge, hau jyoeng cho lhyi thuk dah zains tsain nghuot dah Mangso dah yhenbang mas yang khasoeh teh dah wotwu chank chah cho yoh seq bas jungh oen haih maussauh lyis lhaih kat. 16 Yah lomsnoq cho dah nghop toh zis gas kha iq kuhxing yvlyis hank eq ngoek chank ma bos zis gas o mha taiq toh zis yah dvyhangteh nghuot. Nyang gas cangsoeu gungs shoh yah thuq los zis yah dan soeu nghuot yvlyis Dyos yah Chixoeuq goeus, loeuswons bang eq nyang lyis nyvng goeus. Nyah cho dius nyau dvnganh lyis taiq kyoh goeus. Mungkvn gonh gas nyang lyis lomsjingh goeus. Housoeh nyang gas maukhung mha toqh kat zis xauh goeus.

1 Timothy 4

1 Dyos yah bvng bvng taiq zis gas, Thang pheh dius dvyhamh gas lomsjingh cho lhyi tyamp das; nyamoq gas hwah las mhuih dah dyos dang gyo las yius Satan dah jyauh cho mha tsain chank loh das. 2 Vsainnyang dah sohseq ehnyet gas ngeh dah thyeq yah tanh ngheq zis xauh bang teh shei tyamp goeus dah mhuih bang gas housoeh teh jyauh cho lhyi tsain taiq hoeuh. 3 Housoeh teh bang gas nyihwank cho yahge zonoms dvkhamh lyis kyi das nyhenshang tsain jyauh. Nghuot laus eq lomsjingh bang yahge jyoeng cho lhyi seq bang gas nhaiqshoqlang oen shvmanh dung zis yah yoh zo das xiklyis Mangso ka hauh zonoms lyis gvnkhanh toh. 4 Mangso gvnkhanh toh zis dvnganh gas gis las zonoms cha lhyi eq ma peq noh: nghuot laus eq zonoms dvnganh lyis nhaiqshoqlang oen shvmanh dung zis yah lhom yoeus chah. 5 Khasoeh ge lyis Mangso dang yahge shvmanh dung dang gas hauh yvlyis gyingshang nhang nyeis las Mangso lhom yoeus mon dah zonoms bweh los nhang nyeis. 6 Hai taiq shet toh dang yah dvyhangteh nvng Khristan vmang vnoeuh moq lyis taiq kyingh nyeis lyis gas, nvng xauh lhom yoeus las chank nyeis, Dyos dah lomsjingh cho mha eq, jyoeng dah jyauh dang mas eq vsainnyang gungs lyis nyhoeu kuh, Khristu dah jyeidwis gis nghuot nyeis. 7 Nghuot laus eq Mangso yah ma sen taiq das xiklyis vkyuh ma bos dah mvnyei dang lyis jhank las gywes so lhyi phauh nyang dah kang dwis cho lhyi pot toh aq. 8 Gungs yah sen lha pot zis gas vkyuh dvtsiq dvbos. Nghuot laus eq hau dyos dah lomsjingh cho mha pot cho ka cho khvt khanghmuh mas vkyuh bos; khasoeh ge lyis houka haq caiq yahge thang caiq xiklyis kang yoh dyei. 9 Hauh dang gas jyoeng lha dvnganh lhom yoeus las lomsjingh gis dah dang nghuot. 10 Dius dvnganh yahge zes las lomsjingh bang dah khyuot yoeus Yhensain nghuot las kang dwis Mangso ka yah dah nghamhloms joqyos nghuot yvmvyah yang zwi khank cho mha yomkat nyeis. 11 Nyamoq lyis hai taiq shet dang yahge jyauh cho lhyi dyei toh aq. 12 Nvng wotyamh nghuot yvmvyah hank eq nvng lyis dius ngis ma khyoq bas jungh, taiq dang, wotwu, jyetdap cho mha, lomsjingh cho mha, ehnyet lhoqshang cho mha eq lomsjingh bang xiklyis yikhyoh bweh nyeis aq. 13 Ngos jweh los shoq dius phung xikkhonh mas Jyomp maussauh nghap kyoh cho, gausyis dang taiq kyoh cho yahge jyauh cho lhyi shishenh dyei las yomkat nyeis aq. 14 Lvpe jens taiq toh dang bos yvmas phung whop jens nah thoq mas loq tsain kih las toeuq toh dyei uhlyis nvng lyis kyauh toh, nvng mas bos, dyos yah sen dah jyehjuh jyungshuk lyis ma phauh ma danh kuot las vchi thyuk tyamp. 15 Nvng seq los kunk los cho dius jens dvnganh yoh nyvng bas jungh, haih taiq toh goeus yvwons lyis nhaiq wvng zis yah chank kuot las houmha lang toh aq. 16 Nah gungs lyis eq, nvng jyauh dang lyis eq zaih lha zungh yoeuh nyeis aq. Nvng haih cho jens lyis tsoq kuot nyeis aq, khasoeh ge lyis nvng housoeh kuot lyis nah gungs lyis eq, nah dang xauhgyo bang lyis eq nvng yoh khyuot yoeus das.

1 Timothy 5

1 Nyenhkyi bos dah logis lyis vnyho, nah uwus lyis teh sang aq; ngis bang lyis vmang vnoeuh lyis teh, 2 nyhiqzains jens lyis ungwes moq lyis teh, lonyi jens lyis nhamhmuh jens lyis teh, lhoqshang ehnyet yah taiq kyingh nyeis aq. 3 Jyoengh dvyuk kyingh nghuot dah chauhmuh jens lyis phauh nyang nyeis aq. 4 Nghuot laus eq chauhmuh dvyuk yuk mas lo jens nyei jens bos lyis gas, nyamoq gas nyamoq yhen khau nyhenshang lomsnoq cho yah sen lha kuot cho yvwons lyis shih xuq bas jungh; housoeh kuot khyvlyis vsainnyang ungwes uwus, vphauh vyos lyis jyehjuh phuk bas jungh. Khasoeh ge lyis houka Mangso lhyi nhaiqdoeus nhang cho nghuot. 5 Nyang bauh nghuot las nyang lyis yoeuh das zis hank ma bos dah chauhmuh dvyuk gas Mangso lhyi nghamhloms zis yah nyeis las nyeih nyenh shvmanh dung zis yah Mangso jyank mas pangh cho dung nyeis. 6 Nghuot laus eq wotwu dyoq las pyo cho dvxo dah chauhmuh gas dwis nyeis shih laus eq vshei dvnghuot. 7 Nyamoq lyis hank eq yobos huon chank ma bos bas jungh, haih tying toh dang yah nyamoq lyis taiq kyingh nyeis aq. 8 Dvyuk yuk nyang yah sen soeu yahge zes las yhen khau dius lyis ma khoeu soeu ka, lomsjingh cho lhyi ngoek soeu nghuot las ma lomsjingh soeu thoq lyis zes las ma shop soeu nghuot. 9 Nyenhkyi khyukci zvn ma lai lyis gas khah chauhmuh lyis eq chauhmuh nyings mas ma bos shih goeus jungh; Nyang gas dvlhain kyingh phoengh dvwvng soeu nghuot chah. 10 Hauh thoq lyis nyang gas wotwu gis cho mha hoeuh soeu, lo jens lyis vlhomuh khoeu bes kat soeu, boenghwus lyis nyah yhen mha daih ku soeu, ehnyet nyhen mha gyoh las Khristan changh jens lyis kuot dyei soeu, shohjyen bang lyis bos pangh soeu, gis dah muhzoh khanghmuh lyis yomkat las bos wons wuq soeu nghuot chah. 11 Nghuot laus eq nyenhkyi ngis shih dah chauhmuh jens lyis chauhmuh nyings mas ma kat goeus jungh. Khasoeh ge lyis, nyamoq ehnyet omes cho yah duon gvng mas yhen loh lyis Khristu masyah nungs seq doms loh. 12 Housoeh las nyamoq gas Yhensain lhyi cangxeih toh goeus dah dangthoengh lyis toh tyamp dah yaunos yoh bang bweh los. 13 Hauh thoq lyis nyamoq gas dvyhen dvyhen kwang lha shishenh lyis vkom thank nhang cho seq kuot los. Hauh thoq lyis zes ma gis cho ka nyamoq ma taiq vvng cho lhyi tsain taiq loeusmus yenh las nyamoq yah ma sen dah cho mha bos seq nhunk bang bweh los. 14 Housoeh las jeswus jens gas yah cho ma gis khyvlyis taiq das cho lhyi toeuh ma dyei das khyvlyis nyenhkyi ma kuh shih dah chauhmuh jens gas phoengh wvng las lo bos zis yah yhenkhau zom nyeis das xiklyis ngos zes o nyeis. 15 Khasoeh ge lyis, gvshih yangh chauhmuh dvyhamh Satan dah thang chank das nyhenshang nungs doms loh goeus. 16 Lomsjingh dah vmesbih dvyuk yuk gas nyah yhen mha chauhmuh muh bang bos nghuot lyis gas, nyang nyamoq lyis yoeuh chah. Nyamoq nyhenshang phung lhyi yvwons s ma gis lyei nhang. Housoeh kuot lyis phung ka jyoengh khau nges gus ma bos lo dah chauhmuh jens lyis yoh yoeuh dyei das. 17 Uhshe dah muh lyis vlhomuh kuot nyeis dah phung shwih bang gas uhkung phauh aiq huon yoh mon soeu nghuot oen nghamh yoeuh gis. Zes las Dang taiq kyoh las jyauh cho mha yomkat wons wuq nyeis bang gas housoeh kham yoeus mon bang nghuot. 18 Khasoeh ge lyis lhaihtoh dang mas, Guk nang nyeis noeulu lyis nhuottsungh vtsungh toh dyei; tsai muh zwi soeu ka nyah uhkung phauh xauh kham zo vvng, ge taiq. 19 Kanghjyoeng aiq yuk somh yuk ma bos bos, phung uhshe soeu lhyi yobos huon zis ma gis gyo dyei. 20 Gohyuk gyukwoms bas jungh, yaunos kuot bang dvnganh lyis moqphung xikkhonh mas nyho lha jyauh aq. 21 Haih taiq shet toh cho lhyi hank dah nyoqnho lyis eq ma yoeuh, nvng kuot loh cho khanghmuh mas dvshot shot mas ma dap dap, domsyos gyo las chank kuot das nyhenshang Mangso yahge Khristu Yesu dah xikkhonh mas eq, gyingshang loeuswons bang xikkhonh mas eq ngos nvng lyis taiq toh. 22 Yhensain dah muh wons wuq das nyhenshang hank lyis eq loq kih las muh kyauh das zis vgyen. Gohyhamh bang yaunos kuot cho mha vbos lhoeuh. Nvnyang yobos ma dap shoq shangkyei nyeis aq. 23 Nvng dvsoq soq lyis nos yvmvyah, nah womdau zos tyik yvmas pangh jus das nyhenshang jeis kyingh ma shuk shuk, zvbiq dvtsiq tsiq bos shuk dyei nyeis aq. 24 Dvyhamh bang dah yaunos gas nyvng das xiklyis dede nghuot las nyamoq dah yaunos gas nyamoq dah xik pheh soetuon yvpheh loh nyeis. Nghuot laus eq dvyhamh bang dah yaunos gas thang lhyi dede dvyoh nyvng. 25 Houyah dvyhangteh gis dah muhzoh lyis dede yoh nyvng, dede ma nghuot yvlyis yangh ma yoh nghop shung toh.

1 Timothy 6

1 Jons jens gas, vsainnyang dah yhensain lhyi phauh nyang gis soeu nghuot oen nghamh chah. Housoeh lyis hank eq Mangso dah nyings yahge ngamoq dah jyauh cho lhyi ma gis khyvlyis loeusmus soqzo das zis ma nghuot. 2 Khristan yhensain jens dah o mha nyeis dah jons jens gas vsainnyang dah yhensain lhyi dvyhangteh vmang vnoeuh dvnghuot oen ma phauh ma nyang ma gis kuot: khasoeh ge lyis vsainnyang phuqsoe lha vkyuh xauh kham bang gas vsainnyang jyetdap nyeis dah lomsjingh bang nghuot yvmvyah nyamoq lyis zes nyangh phuqsoe chah. Nvng gas haih cho lhyi jyauh zis yah taiq kyoh nyeis chah. 3 Hank laus eq shaih dah jyauh cho jyauh soeu ka, yah Yhensain Yesu Khristu dah jyoeng lha dyinghjet dah dang yahge yah lomsjingh cho dah jyauh cho lhyi ma chank soeu nghuot. 4 Nyang gas khwank las cha eq ma seq soeu nghuot. Nyang gas dang taiq goh yvmas taiq phyen-goh das xiklyis dyoqgoh das xiklyis ma jus dah ehnyet bos soeu nghuot. Housoeh kuot yvmvyah noh cho, gang lvn loh cho, phyen-goh cho, laihwangh cho, ma gis khyvlyis kuot jyo cho tsain thuq los nhang nyeis. 5 Hauh thoq lyis uhnuk ma dyingh cho yahge jyoeng cho lhyi ma nyvng ma seq bang masyah phyen-goh cho dvsoq soq thuq los nyeis. Lomsnoq cho ge zis gas dis los das nyhenshang nghuot ge nyamoq nghamh. 6 Jyoengh oen lhyi ka vsainnyang yoh yvmas nhaiq seq tap lyis gas, lomsnoq cho ka dius dvyuk lyis svsoh dis nhang nyeis. 7 Khasoeh ge lyis, yang haih mungkvn mas cha chi los? Cha ma chi los. Mungkvn masyah cha yoh chi loh? Cha ma yoh chi loh. 8 Housoeh las yang wuot das zo das zis yoh goeus ya, hauh zis yah nhaiq tap nyeis goh. 9 Nghuot laus eq dis mes bang gas, shiwu zis xauh las vkoh vpaq yah shanghsenh yoh bweh nhang dah nyoqnoq obos cho nyoshoq dah lhyik mas nyop loh. Houka nyamoq lyis dyoqbis las somh loh yvmas she wvng loh. 10 Khasoeh ge lyis ngwis nyoqnoq ehnyet gas, ma gis cho vja ja dah vpom nghuot. Dius dvyhamh gas hauh zis yoh das nyhenshang svsoh omes nyeis yvmvyah, lomsjingh cho mhayah whang loh las kuk cho vja ja yah vsainnyang dah ehnyet lyis dyoqbis loh nhang. 11 Mangso dah dius nvng gas haih cho dvnganh lyis jhank aq. Dan cho, gywes so lhyi phauh nyang cho, lomsjingh cho, jyetdap cho, nhaiqlom xing cho yahge noeuh nhamp ehnyet lyis yoh shoq yomkat nyeis aq. 12 Lomsjingh zis yah sen dah wuih khyank goh pwe mha duot thank shoq wuih las vcaiq vto kang ge dah jyungshuk xauh yoeus shoq kuot aq. Khasoeh ge lyis hau kang dwis cho mha nvng lyis Mangso lui yoeus uhlyis nvng gas kanghjyoeng nyoshoq dah xikkhonh mas lomsjingh goeus cho toenk toenk rhen goeus. 13 Vyhang dvnganh lyis kang dyei soeu Mangso xikkhonh mas eq, Pontu Pilat xikkhonh mas nyang lomsjingh cho lhyi toenk toenk rhen dah Khristu Yesu dah xikkhonh mas eq hai muh wons das xiklyis ngos nvng lyis taiq toh. 14 Nvng gas nvng lyis taiq toh goeus cho lhyi domsyos gyo las Khristu doms thuq xoeuq das buisnyeis jweh shoq lomluk luk chank kuot tyink nyeis aq. 15 Dvyuk kyingh nghuot las zau guon nyoqnho ngelang bos dah guon soeu, hwankti jens dah Hwankti, yhensain jens dah Yhensain, Mangso ka shishenh jweh lyis Yhensain Yesu lyis dvlhain doms thuq xoeuq nhang das. 16 Nyang kyingh ma shei ma dyuk soeu nghuot las nyang gas hank ma yoh ni loh dah bvng yvmas nyeis. Nyang lyis hank eq ma nyvng ku, hank eq nyang lyis ma yoh nyvng. Nyah jyank mas nyoqnho ngelang yahge vcaiq vto phunk bos joq bas jungh. Amen. 17 Haih nyeisjvng thoq kang dwis nyeis caiq dah zisyos nyeisgis yaplhoq cho mha dis bang lyis hauh zisyos mas ma khwank das zis yahge ma goeng dah nyeisgis yaplhoq cho lhyi nyamoq dah nghamhloms khau nges joqyos ma kuot, yang gausyis zis yah lhom yoeus das xiklyis vyhang dvnganh lyis magons magoh dyei dah Mangso lhyi nghamhloms las langh nyeis das nyhenshang taiq toh aq. 18 Gis zis kuot das cho yahge gis dah muh mas dis das nyhenshang eq, gohyuk lyis dyei gvm cho mha eq, magons magoh dyei das zis cicont nghuot bas jungh nyamoq lyis jyauh nyeis aq. 19 Heisoeh khyvlyis nyamoq gas thang caiq xiklyis goeng dah vpom duot nyeis bas jungh. Phauhdap dah zisyos nyamoq yoh yung toh las jyoeng dah kang dwis cho gyingh lyis yoh das. 20 Timothi eh, nvng lyis kyauh toh dah muh lyis vlhomuh yoeuh gomh zwi zains toh aq. Ma lhoq ma shang dang taiq yvlyis eq, dius dvyhamh seq cho nghuot ge ma jus khyvlyis nyhink dah vkoh vpaq phyen-goh dang lyis eq jhank aq. 21 Khasoeh ge lyis dius dvyhamh gas seq cho bos bang nghuot ge toh las lomsjingh cho mhayah whang loh. Mangso dah jyehjuh gas namoq dvnganhmoq yah dvgeh joq bas jungh.