1 THESSALONIANS1 Paulo, Sila yahge Timothi moq gas, Uwus Mangso yahge Yhensain Yesu Khristu mas nghuot dah Thesaloni wus mas dah phung lhyi maussauh lhaih kat. Jyehjuh yahge nyenstap zis gas namoq mas joq bas jungh. 2 Ngamoq gas namoq dvnganhmoq xiklyis vjangh jyehjuh chungh nyeis zis yahge ngamoq dah shvmanh dung dang mas namoq lyis nyings yoeus nyeis. 3 Khasoeh ge lyis namoq dah lomsjingh cho mha muhzoh khasoeh khanh nyeis zis eq, namoq dah jyetdap ehnyet gvng mas muh kha iq khank nyeis zis eq, Yhensain Yesu mas namoq dah nghamhloms cho kha iq goeng yvlyis eq yah Uwus Mangso dah xikkhonh mas ngamoq soh nyeis. 4 Boekyis eh, Mangso ka namoq lyis jyetdap las nyah dius duot das xiklyis khyen yoeus cho ngamoq seq. 5 Khasoeh ge lyis, ngamoq dah gausyis dang gas, dang yah kyingh jweh zis ma nghuot, yomsoq yah eq Gyingshang Dyos yah eq, gausyis dang dah jyoeng cho lhyi dyingh dyingh lomsjingh ehnyet yah eq namoq jyank mas los taiq kyoh. Namoq yah dvgeh nyeis lyis namoq dah gis cho xiklyis ngamoq kang khasoeh dwis cho namoq nyang seq. 6 Namoq gas ngamoq yahge Yhensain dah yikhyoh yoeus las cho tsain chank kuot nyeis. Shanghsenh zis nyoshoq xauh laus eq, hauh gausyis dang lyis Gyingshang Dyos masyah los dah gauslaus ehnyet yah tsain lhom yoeus. 7 Housoeh las namoq gas Makedoni mau yahge Akhaia mau mas dah lomsjingh bang dvnganhmoq dah yikhyoh bweh los. 8 Khasoeh ge lyis namoq mas dah hau Yhensain dah loeus gas Makedoni mau yahge Akhaia mau gonh hoeuh loh thoq lyis magoh namoq Mangso lhyi lomsjingh cho loeus eq dvkhauyah hoeuh loh goeus. Housoeh las namoq lyis cha taiq dais ma bos lo. 9 Namoq jyank mas ngamoq jweh los uhlyis namoq ngamoq lyis khasoeh lhom yoeus zis eq, namoq gas dwis nyeis las jyoeng dah Mangso lhyi yoh phuqsoe das xiklyis phvra lyis tsain tyamp las Mangso jyank pheh khasoeh lhain los zis eq, 10 maukhung mhayah jweh los das Mangso dah Lo lyis langh nyeis zis lyis eq, dius jens dvnganh taiq hoeuh nyeis. Hau Lo Yesu gas shei goeus bang masyah Mangso dwis toq los nhang lha jweh los das Mangso dah nhaiqlom dyis masyah yang lyis lhuiq kat soeu nghuot. 1 Boekyis eh, ngamoq namoq jyank mas jweh los cho ka vkom ma nghuot zis gas namoq nyang seq. 2 Ngamoq namoq nyeis dah Thesaloni wus mas ma los shih, Philipi wus mas nyeis dah uhlyis ngamoq lyis khasoeh shoeuhshih zis yahge jwangh nyhap zis xauh cho lhyi namoq seq. Housoeh tyixo cho nyoshoq bos laus eq namoq lyis Mangso dah gausyis dang yoh taiq kyoh das xiklyis yah Mangso ka ngamoq lyis womh ehnyet dyei toh goeus. 3 Ngamoq shuot cho yahge ma lhoq ma shang ehnyet yah dvyuk yuk lyis mhuih jyomh mes dah ehnyet yah namoq lyis taiq kyingh ku zis ma nghuot. 4 Hauh gungsthaiq ngamoq gas khanhamp eq Mangso taiq nhang zis yah dvyhangteh taiq nyeis. Khasoeh ge lyis Mangso ka ngamoq lyis mon yih bang nghuot cho soetuon thuq kat las seq goeus yvmvyah hau gausyis loeus taiq kyoh das nyhenshang loms toh goeus. Ngamoq gas dius lyis nhaiqdoeus nhang das xiklyis yom ma kat, yang kuot loh dah wotwu lyis yoh seq soeu Mangso lhyi nhaiqdoeus nhang das xiklyis yom dvkat. 5 Khasoeh ge lyis namoq vlhomuh seq zis yah dvyhangteh, ngamoq gas namoq jyank mas ma jus khyvlyis mhuih dang taiq zis yah, nghuot ya nyoqnoq cho lhyi nghop shung toh dang chi lha los zis ma nghuot. Hauh cho mha Mangso nyang kanghjyoeng nghuot. 6 Ngamoq gas namoq jyank masyah eq, gohyuk jyank masyah eq hank jyank masyah eq chungh cho xauh yoeus shoq yomkat zis ma nghuot. 7 Ngamoq gas Khristu dah lvgyo jens nghuot zis yah dvyhangteh namoq lyis vmingh yah yoh taiq. Nghuot laus eq ngamoq namoq yah nyeis uhlyis ungwes gas nyah lo jens lyis dyangh teh, noeuh noeuh nhamp nhamp kuot goeus. 8 Namoq gas ngamoq dah jyetdap kang twih bang bweh los goeus. Mangso dah gausyis dang kyingh ma nghuot, ngamoq dah kang lhyi yangh namoq lyis gvm dyei das zis cicont nghuot. 9 Boek yis eh, ngamoq muh kha iq zwi khank lai loh goeus yvlyis namoq vlhomuh soh nyeis. Namoq lyis yvwons ma lyei nhang bas jungh oen ngamoq gas ngamoq dah kang khoeu muh lyis nyeih nyenh zwi khank zis yah Mangso dah gausyis dang lyis taiq kyoh. 10 Namoq lomsjingh nyeis bang xikkhonh mas ngamoq dah wotwu lhoq shang, jyoeng zis yah yobos huon dais ma bos nyeis zis gas namoq nyang eq, Mangso eq kanghjyoeng tsain nghuot. 11 Uwus gas nyah lo jens lyis kuot dyei teh namoq dvyuk dvyuk lyis ngamoq kuot dyei goeus zis namoq seq. 12 Ngamoq namoq lyis yomdyei cho yahge nhaiqtaink cho kuot goeus. Nyah munghdan mas xauh wvng das zis yahge phunk xauh yoeus bas jungh ge namoq lyis khi yoeus dah Mangso lhyi nhaiqdoeus nhang dah kang dwis cho mha suh e nyeis das nyhenshang ngamoq tsoq las taiq kyingh yomdyei kat. 13 Tsai Mangso dah jyehjuh lyis malyen lo chungh das cho gohtoeu dvkoeuq bos shih. Ngamoq namoq jyank mas hau Mangso dang los taiq kyoh uhlyis dius dah dang lyis teh ma nghuot, Mangso dang namoq xauhgyo las lomsjingh zis yah lhom yoeus goeus. Hauh dang gas namoq lomsjingh bang dah vkhau mha muh khanh dyei nyeis dah Mangso dang gyingh nyang nghuot. 14 Boekyis eh, namoq mas xauh kham dah cho jens gas Yuda mau mas Mangso dah phung nghuot dah Khristu Yesu yah sen bang mas eq dvyhangteh xauh nyeis. Namoq gas vsainnyang dius jens loq mas shoeuhshih cho xauh zis yah dvyhangteh, nyamoq eq Yuda dius jens loq mas shoeuhshih zis tsain xauh. 15 Hauh bang gas Yhensain Yesu lyis eq lvpe jens lyis eq sat goeus. Ngamoq lyis eq tsain shoeuhshih. Nyamoq gas Mangso nhaiqdoeus das khyvlyis ma tsain kuot, yuk khanghmuh dah jes duot nyeis. 16 Ngamoq gas gohnyau bang lyis nyamoq khyuot yoeus cho khasoeh xauh das cho taiq kyoh yvlyis yangh Yuda dius jens tomp tyamp das xiklyis yom tsain kat. Heisoeh khyvlyis nyamoq shuot nyeis dah yaunos dyingh dyingh kuot goeus. Housoeh las thang thank lyis Mangso dah nhaiqlom dyis zis gas nyamoq thoq mas jweh los. 17 Boekyis eh, ngamoq eq namoq yah nhaiqlom yah ma nghuot, gungsdom yah dvyoq gang joq las soh nyeis. Namoq yah nyoq nyvng sangh tsuk doms xauhgoh das nyhenshang yomkat nyeis. 18 Ngamoq namoq jyank mas doms los mes. Ngos Paulo nyang namoq jyank mas doms jweh los das xiklyis dvlhain aiq lhain yomkat yoeuh goeus. Nghuot laus eq Satan ka ngamoq lyis kyoq toh. 19 Yah Yhensain Yesu doms jweh los lyis, nyah xikkhonh mas gohtoeu hank ma nghuot, namoq lyis vgungs toh las ngamoq dah nghamhloms cho, gausyis cho yahge ung cho nyhenshang khwank das buismuk nghuot. 20 Jyoengh nyang namoq gas ngamoq dah nyoqnho ngelang yahge gauslaus cho tsain nghuot. 1 Housoeh las ngamoq ma yoh zain lo yvmvyah, Athen wus mas ngamoq nyang kyingh gyoh nyeis das zis nghamh thyet las, 2 Khristu dah gausyis dang taiq kyoh yvmas ngamoq yah dvgeh muh wons nyeis, ngamoq dah boek Timothi lyis nhang kat. 3 Namoq mas hank eq hai gvshih xauh nyeis dah shoeuhshih cho gvng mas lomsjingh cho ma lop ma loeh bas jungh, namoq lyis thukxank yomdyei das xiklyis nyang lyis namoq jyank mas nhang kat. Hai yang xauh nyeis dah shoeuhshih cho ka yah xiklyis Mangso dah nghamh toeuq cho dvkhamh nghuot oen yvlyis namoq nyang seq nyeis. 4 Khasoeh ge lyis, ngamoq namoq yah dvgeh nyeis shih uhlyis, yang gas shoeuhshih zis xauh das cho, taiq kyoh zaih nhang toh goeus. Houyah dvyhangteh top bweh los goeus yvlyis namoq vlhomuh seq. 5 Ngos tsoq las ma yoh zain lo yvmvyah, namoq dah lomsjingh cho khasoeh nghuot joq zis yoh seq das xiklyis ngos Timothi lyis nhang kat. Jyoengh nyang namoq gas yius yah shiwu yvpheh chank loh las ngamoq yomkat ohhont toh dah muhzoh vnyet vkom ma mes bweh nhang. 6 Gvshih Timothi gas namoq jyank masyah ngamoq jyank mas doms jweh los las, namoq mas lomsjingh cho yahge jyetdap zis je los cho gausyis lhom yoeus phoh dah loeus wons los. Namoq ngamoq lyis vjangh vlhomuh soh nyeis thoq lyis ma goh, ngamoq namoq yah xauhgoh mes teh, namoq eq ngamoq yah xauhgoh mes cho ngamoq lyis los taiq kyoh. 7 Housoeh las boekyis eh, ngamoq dah yaukyenh cho yahge shohjyen xauh nyeis uhlyis namoq cho xauhgyo las yom gyo bos. Houka namoq dah lomsjingh cho gvng mas yom yoh cho nghuot. 8 Khasoeh ge lyis, namoq gvshih Yhensain Yesu mas dvdain dvlom kang dwis cho mha ma lop ma loeh yap joq las yang nhaiqtap khyvlyis yoh tsain dwis nyeis. 9 Gvshih gas namoq gvng mas ngamoq Mangso lhyi nhaiqshoqlang yoh sang goeus. Namoq gvng mas Yhensain xikkhonh mas ngamoq xauh yoeus dah gausyis ehnyet dah gvng mas ngamoq nyang lyis nhaiqshoqlang tsain chungh. 10 Ngamoq gas namoq dah nyoqnho xauh nyvng das zis yahge namoq dah lomsjingh cho mha chah nyeis shih yvlyis yoh tyink das xiklyis ngamoq ehnyet dvnganh yah nyeih nyenh dung nyeis. 11 Namoq nyeis yvmas ngamoq los das cho lhyi, yah Uwus Mangso nyang yahge Yhensain Yesu cho sont dyei bas jungh. 12 Namoq nyang changh nyang thoq mas eq, dius dvnganh dah thoq mas eq namoq toh dah jyetdap ehnyet gas ngamoq namoq thoq mas toh dah jyetdap ehnyet teh zes las jelvm los nhang das xiklyis Mangso namoq lyis pangh bas jungh. 13 Haih cho yah nyang namoq lyis thukxank das. Yah Yhensain Yesu gas nyah gyingshang bang dvnganh yah dvgeh doms jweh uhlyis, namoq gas yah Uwus Mangso xikkhonh mas, dyinghjet las gyingshang bang bweh los das. 1 Thang thank lyis boekyis eh, Mangso nhaiqdoeus das nyhenshang namoq kang khasoeh dwis chah cho namoq ngamoq masyah xuq goeus, Namoq hauh cho chank yah kang dwis nyeis goeus. Hauh thoq lyis zes yoh kuot das nyhenshang Yhensain Yesu dah nyings mas ngamoq namoq lyis shangphu zis yah yomdyei kat. 2 Khasoeh ge lyis namoq kang khasoeh dwis gis ge tyingtoh cho lhyi Yhensain Yesu dah vmingh yah ngamoq namoq lyis dyei toh goeus zis gas namoq seq. 3 Mangso ka namoq lyis gyingshang nhang mes zis yahge nyetnau muh kuot mhayah kyoq kyoq luiq das nyhenshang o. 4 Namoq yukgis jens vsainnyang dah yhensain nyhiq yah gyingshang zis yah nyoqnho ngelang bos khyvlyis khasoeh yoh chomp nyeis das cho seq chah. 5 Mangso lhyi ma seq dah gohnyau bang teh nyetnau ehnyet yah ma gis zomh. 6 Heisoeh teh muh mas namoq hank eq vsainnyang dah Khristan vmang vnoeuh lyis shuot cho nghuot ya, vmang vnoeuh thoq mas toeuh yoeus cho ma gis kuot. Haih cho xikpheh ngamoq namoq lyis taiq kyoh ku goeus las Mangso ka shuot loh soeu lyis joeng das cho khoek khoek zaih nhang goeus. 7 Mangso ka yang lyis ma lhoq ma shang kang dwis cho mha dwis nyeis das xiklyis khi yoeus toh zis ma nghuot. Gyingshang dah kang dwis cho mha nyeis das nyhenshang dvkhi yoeus toh. 8 Housoeh las haih jyauh cho lhyi peq soeu hank laus eq dius lyis ma nghuot gyingshang Dyos dyei dah Mangso lhyi peq tyamp soeu dvnghuot. 9 Namoq dah lomsjingh vmang vnoeuh lyis jyetdap das cho yah sen lha ngos namoq jyank mas lhaih kat das chank ma bos lo. Nyang changh nyang jyetdap goh nyeis das cho Mangso jyauh yvlyis namoq kham goeus. 10 Jyoengh oen lhyi namoq gas Makedoni mau gonh mas dah Khristan vmang vnoeuh dvnganh lyis housoeh jyetdap cho chank kuot nyeis goeus. Housoeh las boekyis eh, namoq dah jyetdap ehnyet zes je los das xiklyis ngamoq namoq lyis khyoeuq. Housoeh zes las tsoq kuot loh goh. 11 Ngamoq namoq lyis taiq ku zis yah dvyhangteh, namoq gas nyenstap khyvlyis kang dwis nyeis das nyhenshang eq, gohyuk dah cho mha ma bos lhoeuh, vsainnyang dah womdau khoeu muh lyis nghamh toeuq nyeis bas jungh. 12 Haih cho khyvlyis yah namoq gas lomsjingh dah phung dius ma nghuot bang dah phauh nyang cho lhyi xauh kham yoeus das. Hauh thoq lyis namoq dah chah shih cho yah sen lha hank lyis eq ma nges lo noh das. 13 Boekyis eh, namoq gas nghamhloms cho ma bos bang teh nhaiqkuk zis ma xauh bas jungh, ngamoq gas shei goeus bang yah sen lha hau jyoeng cho namoq lyis seq nhang mes. 14 Yhensain Yesu gas shei lha dwis toq los yvlyis yang lomsjingh nyeis lyis gas, Yesu lyis lomsjingh zis yah shei loh bang lyis eq Mangso ka Yesu yah dvgeh nyah jyank mas shwih loh das oen ngamoq lomsjingh. 15 Gvshih ngamoq namoq lyis jyauh nyeis zis gas Yhensain dah jyauh cho nghuot. Yhensain jweh los lyis yang dwis nyeis shih bang gas shei goeus bang dah xik pheh loh das zis ma nghuot. 16 Yhensain dah kaiq hoeu thwe, vmingh dang, loeuswons vgyis dah thwe yahge Mangso dah lvbuh thwe yah dvgeh Yhensain nyang maukhung mhayah gyoh los das. Hauh uhlyis Khristu lyis lomsjingh las shei loh bang cangxeih dwis toq los das. 17 Hauh shishenh lyis dwis nyeis shih dah yang gas nyamoq yah dvgeh jyommauh yah nyhang mha toqh yoeus loh zis xauh das. Housoeh las yang Yhensain yah vjangh dvgeh nyeis das. 18 Housoeh las haih dang yah namoq nyang changh yomdyei goh nyeis geh. 1 Boekyis eh, haih cho bweh los das shishenh yahge yoq khanhamp nghuot das cho namoq lyis ma lhaih kat noh. 2 Khasoeh ge lyis Yhensain doms jweh lyih das buisnyeis gas nyenh lyis khauh soeu wvng teh, jweh los das yvlyis namoq nyang jyuk jyuk seq toh. 3 Dius jens gas, Sam joq, gau joq goeus, ge taiq das. Housoeh taiq uhlyis nyang loshang gungs lyis chi dah vmesbih gas lokhoeu nos nos yhangteh hau dyoqbis zis gas nyamoq thoq mas nyetlos nyettant jweh los das las dius jens hank eq yoh luiq das zis ma nghuot. 4 Nghuot laus eq boekyis eh, namoq gas chuot yvmas nyeis bang ma nghuot yvmvyah hauh Yhensain doms jweh los das buisnyeis gas khauh soeu teh, nyetlos nyettant namoq thoq mas jweh das zis ma nghuot. 5 Khasoeh ge lyis namoq dvnganh gas bvng dah lo jens yahge nyeih dah lo jens nghuot. Yang gas nyenh yahge chuot zis yah eq ma sen. 6 Housoeh yvmvyah yang gas gohyhamh teh ma yhet joq joq, phuk soh lhaiq zungh yoeuh nyeis chah. 7 Dius jens gas nyenh lyis yhet joq: nyenh lyis yhei yet nyeis. 8 Nghuot laus eq yang gas nyeih yah sen yvmvyah phuk soh lhaiq mus chah. Yang gas lomsjingh cho yahge jyetdap ge dah sainhkhonh nghop nghop las, yang nghamhloms dah khyuot yoeus cho ge dah uhkyop tsain kyop toh goh. 9 Mangso yang lyis nyah dah nhaiqlom dyis yvlyis kham nhang das xiklyis yang lyis khyen yoeus toh zis ma nghuot, Yhensain Yesu Khristu gvng mas khyuot yoeus cho xauh sain das xiklyis dvkhyen yoeus toh. 10 Nyang doms jweh los uhlyis yang gas dwis nyeis laus eq, shei goeus laus eq nyang yah dvgeh kang yoh dwis nyeis das nyhenshang nyang gas yah xiklyis shei kham dyei goeus. 11 Haih cho gvng mas namoq gvshih kuot nyeis zis yah dvyhangteh, nyang changh nyang yomdyei goh cho, pangh thuk goh cho kuot nyeis geh. 12 Boekyis eh, namoq mas khyoeuq kat zis gas, muh wons las namoq lyis Khristan kang dwis cho mha cho shet, jyauh nyeis bang lyis jus jyoeng khyvlyis phauh nyang nyeis das nyhenshang khyoeuq kat. 13 Nyamoq dah muh gvng mas svsoh jyetdap zis yah nyamoq lyis phauh nyang nyeis geh. Namoq nyang changh eq nyenstap goh nyeis geh. 14 Boekyis eh, namoq lyis taiq kyingh zis gas, Lan bang lyis zaih nhang lha, nhaiqngis bang lyis thukxank nyeis geh. Yomnhuk bang lyis pangh geh, yuk khanghmuh dah thoq mas jhen ehnyet bos geh. 15 Hank lyis eq ma gis gvng mas ma gis khyvlyis ma tauh tauh, namoq nyang changh yahge dius dvnganhmoq xiklyis gis dah muh kuot das zis namoq nghamh toeuq toh geh. 16 Vjangh gausyis nyeis geh. 17 Malyen lo shvmanh dung nyeis geh. 18 Cho khvt khanghmuh mas jyehjuh chungh nyeis geh. Houka Khristu mas namoq dah kang dwis cho yah sen lha Mangso o khyvlyis nghuot. 19 Namoq ehnyet lyis yomdyei nyeis dah Gyingshang Dyos lyis vkyamp toh goh. Gyingshang dyos lyis nhaiq vkuk nhang goh. 20 Mangso dah dyos kat dyei zis xauh las taiq kyoh dang lyis pvlhyahlyoeus vkuot. 21 Cho dvnganh lyis kyink las gis yvlyis lhom yoeus las zwi zains toh geh. 22 Ma gis dah cho dvnganh lyis jhank geh. 23 Yang lyis nyenstap cho dyei dah Mangso nyang nyamoq lyis cho khvt khanghmuh mas gyingshang nhang lha yah Yhensain Yesu Khristu jweh los uhlyis, namoq dah gungs, ehnyet, dyos dvnganh gas yobos huon chank ma bos shoq gomh nyeis bas jungh. 24 Namoq lyis khi yoeus soeu ka wontang soeu nghuot las haih cho lhyi kuot das. 25 Boekyis eh, ngamoq xiklyis eq shvmanh dung dyei geh. 26 Lomsjingh bang dvnganh lyis gyingshang dah wotwu yah jeshuh dyei geh. 27 Hai huon maussauh lyis lomsjingh bang dvnganh lyis nghap kyoh das nyhenshang hau Yhensain kyauh toh dah toeuh yah ngos namoq lyis vmingh dyei. 28 Yah Yhensain Yesu Khristu dah jyehjuh gas namoq yah dvgeh joq bas jungh.
|