1 PETER1 Yesu Khristu dah lvgyo ngos Petru gas Pontu, Galati, Kapadokia, Asia yahge Bithuni mau mas boenghwus teh khau nges yenh bang, Mangso khyen yoeus dah dius nyau jens lyis maussauh lhaih kat. 2 Nyah Dyos mas gyingshang dius nyau kuot las Yesu Khristu dah domsyos gyo das zis yahge nyah suih yah cheihshang yoeus das nyhenshang Uwus Mangso dah gohlhain yah nghamh toeuq toh zis yah dvyhangteh namoq lyis khyen yoeus goeus. Jyehjuh yahge nyenstap zis gas namoq mas dyingh los bas jungh. 3 Yang gas Yhensain Yesu Khristu dah Uwus Mangso lhyi chungh nyeis goh. Khasoeh ge lyis nyah nhaiqnyen ehnyet zainsmuh yah Yesu Khristu lyis shei masyah dwis toq los nhang gvng mas, nyang yang lyis kang vsaiq doms dyei toh goeus las yang mas dwis nyeis dah nghamhloms cho tyink dyei goeus. 4 Housoeh las yang gas nyah dius nyau xiklyis Mangso tsomh toh, magons magoh dah shvmanh jyehjuh lyis xauh sain das nyhenshang nghamhloms nyeis. Nyang gas ma bop ma yuq, vwot v-oeu ma bos, ma nyhauh loh dah vso namoq nyhenshang maukhung mha tsomh toh dyei. 5 Houka namoq xiklyis nghuot. Namoq gas lomsjingh gvng mas thang thank shishenh lyis thuq xoeuq das zis sont toh dah khyuot yoeus jyehjuh xiklyis Mangso dah yomsoq yah gomh toh zis xauh bang nghuot. 6 Namoq xauh nyeis dah shiyoeuh cho vja ja gvng mas nhaiqkuk zis dvyoq xauh laus eq hau khyuot yoeus cho gvng mas namoq svsoh gaus nyeis geh. 7 Hau shiyoeuh zis xauh dah cho ka namoq Mangso lhyi lomsjingh ehnyet gas gyingh lah, zis khyink yoeuh das xiklyis nghuot. Yoh thyoq dah xing lhyi yangh nyi mas ngheq shauq las khyink tyamp chah las xing thoq lyis zes phauhdap namoq dah lomsjingh cho lhyi eq goeng toenk das nyhenshang khyink tyamp chah. Housoeh lyis Yesu Khristu doms thuq xoeuq buisnyeis lyis chungh dah phunk yahge nyoqnho ngelang lyis namoq xauh kham yoeus das. 8 Namoq Yesu lyis ma nyvng ku laus eq nyang lyis jyetdap nyeis. Gvshih nyang lyis ma nyvng laus eq nyang lyis lomsjingh nyeis. Housoeh las namoq gas ma thoq taiq lo shoq dah gausyis zis yah gausyis nyeis. 9 Khasoeh ge lyis Yesu Khristu lyis lomsjingh kang dwis cho dah toeuqkhom nghuot dah namoq dyos kang dah khyuot yoeus cho lhyi xauh lhom yoeus nyeis. 10 Hai khyuot yoeus cho yah sen lha lvpe jens gas yomkat las nyei gyo pheh xo lha Mangso namoq lyis dyei das hau jyehjuh jyungshuk cho nyamoq lvpe pe lha taiq kyoh. 11 Hau khyuot yoeus zis yah sen dah jyehjuh gas khah shishenh khah caiq lyis khasoeh khyvlyis jweh das cho lhyi yomkat tsain xo. Nyamoq mas bos, Khristu dah dyos gas hauh shishenh lyis Khristu kham das dah shanghsenh cho lhyi eq, housoeh dye kham thang lhyi eq xauh kham yoeus das phunk lyis eq uhlhomh las Chixoeuq toh goeus. 12 Nyamoq wons wuq nyeis, taiq kyoh muh gas nyamoq nyang vkyuh xiklyis ma nghuot, namoq xiklyis dvnghuot cho Mangso ka haih lvpe jens lyis Chixoeuq goeus. Namoq jyank mas gausyis loeus chi los bang gas hau lvpe jens uhlhomh las taiq kyoh bang lyis maukhung mhayah nhang kat, Gyingshang Dyos dah yomsoq yah namoq lyis taiq shet yvmvyah namoq xauhgyo goeus. Haih cho lhyi loeuswons bang yangh seqgyo mes. 13 Housoeh yvmvyah namoq muh kuot loh das nyhenshang namoq ehnyet lyis cicont kuot geh. Yesu Khristu thuq jyweq xoeuq uhlyis namoq lyis dyei das jyehjuh lyis khamkhvv ehnyet ma bos bos, jyoeng zaih zis yah dyingh dyingh nghamhloms nyeis geh. 14 Mangso dah dang lyis domsyos gyo las, namoq xikpheh ma seq shih shishenh lyis namoq dah omes cho khyvlyis suh e lai loh goeus teh tsoq las vdoms kuot goh. 15 Namoq lyis khi yoeus dah Mangso ka gyingshang nyeis zis yah dvyhangteh, namoq eq namoq dah kuot loh cho khanghmuh mas gyingshang nyeis geh. 16 Hau lhaihtoh dang mas eq, Ngos gyingshang nyeis yvmvyah namoq eq gyingshang nyeis geh, ge toh. 17 Hauh thoq lyis dius dvnganh lyis nyoqnho ma khyen, hank eq hank nyang kuot zis yah dvyhangteh soetuon nyeis dah Mangso jyank mas namoq shvmanh dung lyis Nyang lyis Uwus eh, ge tsain dung. Housoeh las haih mungkvn mas namoq kang dwis nyeis gyo lyis nyang lyis gyukwoms nyeis geh. 18 Namoq dah phauh thyeih moq masyah bos lyih las phauh ma dap dah kang dwis cho wotwu masyah namoq lyis cha yah khyuot thaiq toh zis gas namoq seq. Houka seq dyoqbis loh dah ngwis xing teh zis dvja ja yah ma nghuot. 19 Mesyos ma bos, chah zis ma bos dah yvnglo teh dah phauhdap Khristu suih yah dvnghuot. 20 Mungkvn ma bos shih lyis yah Mangso ka nyang lyis khyen toeuq toh las hai thang thank shishenh lyis namoq xiklyis Chixoeuq kat. 21 Nyang lyis dwis toq los nhang lha phunk dyei dah Mangso lhyi nyah gvng mas namoq lomsjingh nyeis. Housoeh namoq dah lomsjingh cho yahge nghamhloms cho ka Mangso mha zuk joq. 22 Gvshih namoq gas hau jyoeng cho lhyi domsyos gyo zis yah namoq gungs lyis tsain cheihshang lha, namoq dah lomsjingh boekyis lyis jyoengh jyetdap nyeis. Housoeh las namoq nyang changh ehnyet dvnganh yah jyetdap goh nyeis geh. 23 Khasoeh ge lyis namoq gas dwis nyeis las vcaiq vto nyeis Mangso Dang gvng mas ma seq shei dah ungwes uwus moq lo jens teh doms khoeu kat zis xauh goeus. 24 Houka lhaihtoh dang mas, Cangsoeu dvnganh gas mhanh teh nghuot; nyamoq dah phunk dvnganh mhanh buh yah doeusgoh. Hauh mhanh nyhauh tyamp las vbuh eq gywis gyoh tyamp. 25 Nghuot laus eq Yhensain dang gas vcaiq vto joq, ge taiq toh. Hauh Dang gas namoq lyis taiq kyoh dah gausyis dang nghuot. 1 Housoeh yvmvyah namoq gas ma gis cho vja ja yahge, mhuih khwangh cho, tyam cho, noh cho yahge ma phauh gis taiq cho dvnganh yvlyis shang tyamp geh. 2 Lonoeuh teh dyos yah sen, gyingh dah nauh lyis vjangh yuot nyeis geh. Housoeh namoq shuk las kuhxing los zis yah khyuot yoeus zis xauh das. 3 Lhaihtoh dang mas, Yhensain ka kha iq nhaiqnyen shohgyo dah Yhensain nghuot yvlyis namoq nyang kham yoeus ku khyvlyis tsain seq goeus, ge. 4 Yhensain jyank mas los geh, nyang gas dius jens yah vkyuh ma bos ge khyen tyamp, dwis nyeis dah luk nghuot. Nghuot laus eq Mangso yah khyen yoeus, phauhdap dah luk bweh los goeus. 5 Namoq eq dwis nyeis luk teh Mangso jyank mas los las, dyos yah sen dah yhenmuh tsuk yvmas namoq nyang bos wvng las yhung zis kham geh. Hauh joqyos mas Yhensain Yesu gvng mas, Dyos yah sen lha nhaiqdoeus lhom yoeus gis dah lomhxangh lyis Mangso lhyi phudyei das nyhenshang gyingshang phudyei bang teh namoq phuqsoe das. 6 Khasoeh ge lyis lhaihtoh dang mas eq, Yoeuh aq, ngos Zion mha phauhdap luk dvlom khyen lha yhenthunk luklom khyvlyis khyoq toh las, Hauh yvlyis lomsjingh soeu hank laus eq yom ma gyau das. ge bos. 7 Namoq lomsjingh bang xiklyis haih luk gas phauhdap. Nghuot laus eq ma lomsjingh bang xiklyis gas, Yhen tsuk bang vkyuh ma bos ge peq tyamp dah luklom gas Yhaugyen dah yhenthunk lukzains bweh goeus, ge. 8 Tsai gohtoeu lhaihtoh dang dvkoeuq mas Haih luk gas dius jens lyis thungh lains nhang das; nyamoq lyis dyetgyoh nhang dah lukmuh lom eq duot das, ge taiq toh. Nyamoq gas hau Dang lyis ma lomsjingh yvmvyah thungh lains: housoeh tsain bweh zis gas nyamoq xiklyis Mangso dah ehnyet o cho nghuot. 9 Nghuot laus eq namoq gas, khyen yoeus dah vnyau, hwankti phudyei bang, gyingshang dius nyau yahge Mangso nyang sain nyeis bang nghuot. Housoeh khyen yoeus cho ka namoq lyis soeng soeng noq masyah nyah mauhphoh bvng yvmas khi hwank soeu dah phunk bos muhzoh lyis hoeuh kat dyei das xiklyis nghuot. 10 Namoq eq lai loh goeus shishenh lyis Mangso dius nyau ma tsain nghuot, gvshih gas nyah dius nyau tsain nghuot los goeus. Xik pheh Mangso nhaiqnyen zis ma xauh kham yoeus, gvshih gas nhaiqnyen zis tsain xauh kham yoeus goeus. 11 Ngos jyet kang bang eh, namoq gas mungkvn mas gyung suh boenghwus yahge khau nyeis bang teh nghuot las, gungs dyos yah zan goh nyeis, gungsshoh obos cho lhyi khanhamp eq vsomh ma dyei das xiklyis ngos namoq lyis dung kat. 12 Gohnyau bang gas namoq lyis ma gis zis kuot bang nghuot ge tsuk lyis namoq dah gis muhzoh nyvng las Yhensain doms jweh lyih buisnyeis lyis Mangso lhyi yoh chungh bas jungh, nyamoq xikkhonh mas namoq wotwu gis gis kuot geh. 13 Yhensain dah nyoqnho lhyi yoeuh las dius jens mas toeuh yoh bang dah o mha gyoh nyeis geh; nyhang thank toeuh yoh dah hwankti o mha laus eq, 14 ma shop muh kuot bang lyis shoenk zis yahge gis dah muh kuot bang lyis chungh das xiklyis, toeuq kat toh zis xauh dah mungh zau jens dah o mha laus eq gyoh nyeis geh. 15 Khasoeh ge lyis namoq gis dah muh khanh gvng mas seq cho ma bos vkoh vpaq ge taiq los dah dang lyis yoh sam nhang das zis gas Mangso o nyeis. 16 Namoq gas luiq bang teh nyeis geh; nghuot laus eq ma gis cho lhyi nghop gos tyamp das xiklyis namoq dah luiq toeuh lyis vyhung goh. Namoq gas Mangso yah sain toh dah jyeidwis jens teh kuot nyeis geh. 17 Yuk khanghmuh lyis phauh geh: namoq dah lomsjingh vmang vnoeuh lyis jyetdap geh; Mangso lhyi gyukwoms nyeis geh; hwankti lhyi phauh nyang geh. 18 Jyeidwis jens eh, namoq dah yhensain o mha yoh gyoh nyeis das. Nhaiqbos las seq nghamh yoeuh bang lyis kyingh ma nghuot, thung thot bang lyis eq phauh nyang cho vlhomuh Chixoeuq geh. 19 Namoq gas Mangso o cho lhyi tsain seq nyeis las namoq ma kham vvng dah shanghsenh xauh kham nyeis lyis gas Mangso ka hauh nyhenshang namoq lyis shvmanh dyei das. 20 Namoq gas namoq nyang kuot shuot dah yobos gvng mas kham vvng dah yobos lyis kham nyeis lyis gas cha chungh chank bos lah! Nghuot laus eq jyoeng cho lhyi kuot nyeis goeus lyis eq shanghsenh zis kham lha nos zain nyeis lyis gas Mangso ka namoq lyis hauh nyhenshang shvmanh jyehjuh dyei das. 21 Housoeh chank kuot das nyhenshang Mangso ka namoq lyis khi yoeus goeus. Khasoeh ge lyis Khristu nyang eq namoq xiklyis shanghsenh xauh zis yahge namoq nyah beszoh mas yoh chank nang bas jungh ge namoq xiklyis yikhyoh toh dyei. 22 Nyang gas yaunos kuot ku zis ma nghuot; nyah nhuot mas mhuih dang hank khanhamp eq ma xauhgyo ku. 23 Nyang lyis ma phauh gis kuot lyis nyang ma doms tauh kuot; nyang shanghsenh kham uhlyis nyang kyuk tant cho cha ma kuot, jyoeng dah soetuon soeu Mangso loq mas nyah dah nghamhloms cho kyauh toh. 24 Yang gas yaunos toh tyamp las dan yvmas kang yoh dwis nyeis bas jungh, Khristu nyang hau saiqzains thoq mas, yah yaunos nyah gungs mas wons tyamp dyei goeus: nyah dvm gvng mas namoq gas lhoq gis zis xauh goeus. 25 Namoq gas chowhang loh yvng jens teh nghuot. Gvshih gas hau Yvng yoeuh soeu yahge namoq dah gungs dyos lyis tsomh soeu dah thang chank das nyhenshang nyah jyank mas shwih tauh jweh los goeus. 1 Houyah dvyhangteh yhensain nyhiq jens eh, namoq yhensain phoq jens dah o mha gyoh nyeis geh. Haih cho khyvlyis namoq mas Mangso dang lyis ma lomsjingh shih dah yhensain phoq jens bos lyis namoq dah wotwu lyis nyvng las dang dvkhonh yangh ma taiq noh lomsjingh bang yoh bweh nhang das. 2 Khasoeh ge lyis nyamoq gas namoq dah wotwu kha iq gyingh zis yahge phauh nyang yvlyis nyvng das. 3 Namoq dah gungs shunk das zis nghe shot pheh nghuot dah cam soq, ngwis xing yah shunk, dyimis yungh yah ma nghuot. 4 Housoeh kuot das gungsthaiq namoq dah yungh cho ge yvmas jyoeng lha nyoq yah ma yoh nyvng, nhaiqlom khau mha kang dwis cho noeuh nhamp las vjangh nyens nyens nghuot dah ehnyet ge, nyenhkyi kuh ngis yah ma sen, yungh cho bos chah. Hau yungh cho ka Mangso xikkhonh mas phauhdap thank cho nghuot. 5 Khasoeh ge lyis gohnhamp Mangso lhyi nghamhloms nyeis, Lomsjingh cho kuh dah vmesbih jens eq, nyamoq dah yhensain phoq jens dah o mha gyoh nyeis khyvlyis yah nyamoq gungs lyis tsain shunk. 6 Sara eq houyah dvyhangteh teh kuot. Nyang gas Abraham lyis domsyos gyo las nyang lyis yhensain ge lui. Namoq eq cha lhyi eq ma gyuk ma woms, gis dah muh kuot nyeis lyis gas gvshih namoq gas Sara dah lonyi jens nghuot joq. 7 Houyah dvyhangteh yhensain phoq jens eh, vmesbih jens gas yom nhuk bang nghuot ge yvlyis vlhomuh seqgyo las namoq dah yhensain nyhiq jens yah zomh nyeis geh. Nyamoq lyis phauh nyang geh: khasoeh ge lyis nyamoq eq namoq yah dvyhangteh Mangso jyank masyah kang vso vlho jyungshuk kham yoeus das zis nghuot. Haih cho kuot geh, housoeh lyis namoq dah shvmanh dung dang lyis cha yah eq lhoeu nhunk cho ma bweh nhang das. 8 Vthang khyvlyis yah taiq mes zis gas, namoq dvnganhmoq mas dvyhangteh dah nghamh cho yahge kham zo zis yoh bos das las, boekyis nyang changh teh jyetdap goh, nhaiqbos goh zis yah dvyuk yah dvyuk dah nyhen mha gyoh nyeis geh. 9 Ma gis yvlyis ma gis zis yah, nhoengh zis lyis nhoengh zis yah vphuk goh. Housoeh kuot das gungsthaiq shvmanh dang yah phuk geh: khasoeh ge lyis hau shvmanh dah dang gas nyang namoq lyis khi yoeus uhlyis namoq lyis dyei das nyhenshang dangthoengh dyei toh goeus. 10 Lhaihtoh dang mas, Hank laus eq kang dwis cho mha gausyis zis yah nyeisgis yaplhoq cho o mes, nyvng mes soeu ka, ma gis cho taiq dang jhank las hwah dang taiq cho no tyamp chah. 11 Nyang gas ma gis cho mhayah tauh los las gis dah muh kuot bas jungh. Nyang nyenstap cho lhyi xo lha chank kuot bas jungh. 12 Khasoeh ge lyis Yhensain dah nyoqjeih gas dan bang lyis yoeuh nyeis las, nyah no gas nyamoq dung zis lyis gyo dyei. Nghuot laus eq ma gis zis kuot bang lyis gas ma gyo dyei, ge. 13 Namoq gas gis zis nhaiq wvng wvng kuot mes nyeis lyis gas, namoq lyis hank yoh lhoeu yau das lah? 14 Nghuot laus eq jyoeng cho lhyi chank kuot nyeis goeus lyis eq namoq shanghsenh xauh kham nyeis lyis gas, namoq ngelhoq; Hank lyis eq vgyuk goh, chiq eq vchiq goh. 15 Namoq dah nhaiqlom mas Khristu lyis phauh nyang zis yah Yhensain o khyvlyis chungh nyeis geh. Namoq mas kham yoeus toh goeus dah nghamhloms cho lhyi dvyuk yuk nyei nghuot lyis gas vjyuk yoh phuk taiq das xiklyis cicont kuot geh. 16 Nghuot laus eq hauh yvlyis noeuh nhamp las phauh nyang zis yah kuot nyeis geh. Namoq lyis ma phauh gis kuot bang gas, namoq Khristu thang chank bang khyvlyis chank kuot nyeis dah wotwu gis lyis nyvng las nyamoq taiq goeus dah dang yah sen lha xoqphuh bas jungh, namoq dah sohseq ehnyet shang shang yah kang dwis nyeis geh. 17 Khasoeh ge lyis Mangso o khyvlyis dvnghuot lyis gas gis dah muh kuot gvng mas shanghsenh xauh zis gas ma gis zis kuot las shanghsenh zis xauh thoq lyis zes gis. 18 Khasoeh ge lyis Khristu gas yah yaunos gvng mas dvlhain lhyi yah dvnganh dah xiklyis dye shoq shei kham goeus. Nyang gas dius gis dvyuk nghuot joq las yaunos wons bang dah gungsthaiq shei kham goeus. Housoeh kuot cho ka namoq lyis Mangso jyank mas shwih loh das xiklyis nghuot. Nyang gas gungs shoh khyvlyis yah sat zis xauh laus eq dyos mas Mangso dwis toq yoeus goeus. 19 Nyang gas hau dyos gungs mas nghuot uhlyis thung lungh nyeis dah dyos jyank mas loh tsain taiq kyoh. 20 Hauh dyos jens gas gohlhain Noa sangpho tsuk uhlyis Mangso ka ehnyet xing xing yah langh nyeis lyis domsyos ma gyo bang dah dyos tsain nghuot. Hau sangpho mha dius xet yuk kyingh jeis yah khyuot yoeus zis tsain xauh. 21 Hau jeis gas khvnyhik namoq lyis khyuot yoeus dah jeisnyhop kham cho lhyi Chixoeuq dah vlho nghuot. Hauh jeis nyhop gas gungs shoh mas dap dah vchoqh vlhauq lyis shang tyamp zis ma nghuot; sohseq ehnyet vwot yah Mangso xikkhonh mas dangthoengh toh cho nghuot. Namoq hau jeisnyhop lyis kham lhyi Yesu Khristu shei mhayah dwis toq los gvng mas khyuot yoeus zis tsain xauh. 22 Yesu Khristu gas maukhung mha Mangso dah loqyos shot pheh loh nyeis las, Loeuswons bang, maukhung mha toeuh yoh bang yahge yomsoq bos bang dvnganh thoq mas guon nyeis. 1 Khristu gas gungsshoh mas shanghsenh zis xauh goeus las nyang mas bos dah nghamh cho yah dvyhangteh, namoq eq vsainnyang gungs lyis yom hont geh. Khasoeh ge lyis gungs shoh shanghsenh kham goeus soeu ka yaunos yah cha ma sen lo. 2 Housoeh las gvshih masyah haih mungkvn mas namoq kang dwis das xiklyis nyet shih dah shishenh gyo lyis dius dah gungsshoh o mes khyvlyis ma chank, Mangso dah ehnyet khyvlyis joeu yvmas kang dwis chah. 3 Namoq gas lai loh goeus caiq lyis gvgis lo nyangh shoq gohnyau bang kuot mes cho lhyi tsain kuot khoq goeus. Namoq gas lyi ma chank dah muh, ma yungh ma shop dah muh, nyetnau, yhei shuk pwe kuot zis yah vchoqh vlhauq muh, silho paiq cho kuot zis yah kang dwis lai loh goeus. 4 Gvshih gas nyamoq yah dvgeh ye las zau ma guon dah kang dwis cho mha namoq ma bos lo gvng mas nyamoq mauh las namoq lyis ma phauh gis dang taiq. 5 Nghuot laus eq nyamoq gas dwis nyeis bang yahge shei goeus bang lyis soetuon das zis cicont toh soeu Mangso dah xikkhonh mas nyamoq nyang dah cho comh toh zis Chixoeuq chah das. 6 Haih cho gvng mas shei goeus bang lyis eq gausyis dang taiq kyoh goeus. Nyamoq gas gungsshoh khyvlyis kang dwis nyeis uhlyis dius yuk khanghmuh lyis soetuon teh nyamoq soetuon zis xauh goeus bang nghuot. Nyamoq lyis taiq kyoh cho ka Mangso dwis nyeis teh nyamoq dah dyos mas dwis nyeis das xiklyis nghuot. 7 Vyhang dvnganh dah thang thank shishenh jweh los nyeis. Housoeh las namoq gas shvmanh yoh dung das nyhenshang vsainnyang gungs lyis joeu las phuk soh lhaiq mus geh. 8 Dvnganh thoq lyis, namoq nyang changh jyetdap goh yvmas shvnanh khying twih toh geh: khasoeh ge lyis jyetdap cho ka yaunos nyoshoq lyis nghop tyamp. 9 Ma lop lop namoq nyang changh boengh daih goh nyeis geh. 10 Namoq dvyuk dvyuk Mangso jyank masyah lhyenwhei jyehjuh jyungshuk lyis xauh yoeus zis yah dvyhangteh Mangso dah jyehjuh vja ja lyis yvwons yoeus dah lvgungh teh nyang changh nyang gis dah vkyuh xiklyis yhung geh. 11 Dvyuk yuk loeus taiq kyoh lyis gas, Mangso dah dang taiq kyoh bas jungh. Dvyuk yuk phuqsoe lhyi ka Mangso dyei toh dah yom yah dvyhangteh phuqsoe nyeis bas jungh. Housoeh lyis nyang kuot muhzoh dvnganh gas Yesu Khristu gvng mas Mangso dah phunk lyis chungh cho bweh das. Yesu Khristu mas phunk yahge yomsoq vcaiq caiq bos joq. Amen. 12 Jyetdap bang eh, namoq xauh kham zo nyeis, svsoh nos dah shiwu cho ka xikpheh ma bweh ku, gohtseq dah cho jeis nghuot teh vmauh nyeis goh. 13 Mauh nyeis das gungsthaiq, namoq gas Khristu dah shanghsenh yvlyis Khristu yah dvgeh wvng kham yoeus nyeis yvmvyah gaus nyeis geh. Housoeh lyis nyang nyah phunk thuq jyweq xoeuq uhlyis, namoq svsoh gausyis zis yah dyingh los das. 14 Namoq Khristu thang chank bang nghuot yvmvyah ma phauh gis kuot zis xauh kham lhyi namoq ngelhoq. Houka phunk bos dyos ge Mangso dah Dyos gas namoq mas bos dah vjyuk nghuot. 15 Namoq mas dvyuk yuk shanghsenh xauh lyis houka dius sat soeu, khauh soeu, ma gis ma shop las soetuon zis xauh soeu, svbih dah soe mha bos khank yenh soeu nghuot yvmvyah xauh dah shanghsenh cho ma xauh bas jungh. 16 Nghuot laus eq Khristan nghuot yvmvyah shanghsenh xauh lyis gas, hauh yvlyis vxoq; hauh gungsthaiq Khristu dah nyings xauh kham yoeus las Mangso dah jyehjuh lyis chungh nyeis aq. 17 Soetuon xi das shishenh jweh los nyeis las Mangso dah yhenbang shih soetuon zis xauh das. Yang hau soetuon zis cangxeih xauh lyis gas Mangso dah gausyis dang lyis ma lomsjingh bang dah nyhenshang ka khasoeh nghuot das lah? 18 Lhaihtoh dang mas, Dius gis jens dah xiklyis khyuot yoeus zis xauh das nyhenshang yau lyis gas gywes ma tsungh dah yaunos wons bang gas cha bweh los das lah, ge toh. 19 Housoeh las nyamoq xiklyis Mangso dah ehnyet yah dvyhangteh shanghsenh zis xauh bang gas gis dah muhzoh kuot zis yah, vjangh wontang, nyamoq dah Gvnkhanh Soeu lhyi loms toh bas jungh. 1 Phung lhyi shwih uhshe soeu dvyuk khyvlyis phung lhyi yoeuh nyeis soeu ngos gas phung uhshe bang mas bos dah namoq lyis khyoeuq kat. Ngos gas Khristu kham dah shanghsenh lyis nyvng dah kanghjyoeng dvyuk khyvlyis yah eq, thuq los das phunk lyis namoq yah dvgeh xauh kham das oen nghamhloms nyeis soeu khyvlyis eq ngos namoq lyis khyoeuq kat. 2 Mangso namoq lyis kyauh toh dah yvng phung dah yvng yoeuh bang teh Mangso namoq lyis kuot nhang mes khyvlyis yah dvyhangteh, tsoengh kuot nhang zis xauh dah ehnyet teh ma nghuot, gausyis zis yah vlhomuh yoeuh gomh nyeis geh: uhkung phauh ngwis yoh das nyhenshang kyingh ma nghuot, kuot dyei mes dah ehnyet yah phuqsoe geh. 3 Namoq yoeuh gomh das nyhenshang kyauh toh dah phung lhyi guon mes ehnyet yah ma nghuot, hau yvng phung xiklyis gis dah yikhyoh duot nyeis geh. 4 Hau yvng yoeuh uhjyung thuq los uhlyis namoq gas khanhamp eq ma shen loh dah phunk bos buismuk xauh yoeus das. 5 Houyah dvyhangteh wotyamh jens eh, nyenhkyi kuh bang dah o mha gyoh nyeis geh. Namoq nyang changh phuqsoe goh das xiklyis namoq dvnganhmoq ehnyet nyhen mha gyoh ge dah huhyhauh lyis wuot chi geh: khasoeh ge lyis Lhaihtoh dang mas, Mangso ka khwank bang lyis kyamp toh laus eq, ehnyet nyhen mha gyoh bang lyis jyehjuh dyei las nyoqnho yoh nhang, ge bos. 6 Housoeh las Mangso ka nyah dah gis shishenh jweh lyis namoq lyis toeu toq bas jungh nyah dah yomzains loq o mha namoq ehnyet nyhen mha gyoh nyeis geh. 7 Namoq dah chiqh cho dvnganh nyang lyis kyauh toh geh: khasoeh ge lyis Nyang namoq lyis loqzamh zwi nyeis. 8 Namoq jyoeng zaih zis yah zungh nyeis geh: namoq dah jeswus ge dah Satan ka, khayuk lyis yoh nyhau tyamp das lah, ge nyings yenh dah khangkhyi teh lhaink yenh. 9 Namoq gas namoq lhom yoeus goeus dah lomsjingh cho lhyi goeng toenk nhang lha hau jeswus lyis thoenk zan geh. Khasoeh ge lyis mungkvn mas nyeis namoq dah lomsjingh boekyis eq housoeh teh shanghsenh xauh nyeis cho lhyi namoq seq. 10 Nghuot laus eq namoq dvdvm shanghsenh thang lhyi, jyehjuh dvnganh dah Mangso ka namoq lyis Khristu mas dvdain dvlom bweh nhang lha vcaiq vto phunk mas xauh wvng bas jungh, namoq lyis khi yoeus dah Yhensain nyang namoq lyis dyinghjet cho, goeng toenk cho, yom yahge goeng dah vpom dyei das. 11 Nyang mas yomsoq vcaiq vto bos joq bas jungh. Amen. 12 Ngos haih maussauh lyung lyis Sila bos pangh zis yah lhaih kat; ngos nyang lyis wontang dah Khristan vmang vnoeuh oen suon yoeus. Heika jyoeng dah Mangso jyehjuh nghuot cho ngos namoq lyis yomdyei zis yahge kanghjyoeng kat das xiklyis, haih maussauh lhaih kat. Houmha goeng goeng yap joq geh. 13 Babilon wus mas nyeis, namoq lyis teh khyen yoeus zis xauh dah phung ka namoq lyis jeshuh kat. Ngah lo Makho eq namoq lyis jeshuh kat. 14 Namoq nyang changh jyetdap vlho ge, bvlot tanh zis yah jeshuh goh geh. Khristu dah dius jens dvnganhmoq mas nyenstap zis joq bas jungh.
|