Genesis
MATTHEW
1
1 Iaminne pattottorang boe-boeNa Isa Almasi, sossorang battua ri Daud, siagang sossorang battua ri Abraham. Punna nisusungi battu ri Abraham sa'genna Daud, iaminne areng-arenna ke'nanga: 2 Abraham, Ishak, Yakub, Yehuda massari'battang, Peres siagang Zerah (amma'na ke'nanga niarengi Tamar), Hezron, Ram, Aminadab, Nahason, Salmon, Boas (amma'na niarengi Rahab), Obed (amma'na niarengi Rut), Isai, na Karaeng Daud. 6 (6b)Battu ri Daud sa'genna ri wattunna nipela' bansa Israel mange ri butta Babel, iaminne areng-arenna ke'nanga: Salomo (amma'na le'baki nibaineang ri Uria), Rehabeam, Abia, Asa, Yosafat, Yoram, Uzia, Yotam, Ahas, Hizkia, Manasye, Amon, Yosia, Yekhonya massari'battang. 12 Battu ri wattunna nipela' bansa Israel mange ri butta Babel sa'genna lassu' Isa Almasi, iaminne areng-arenna ke'nanga: Yekhonya, Sealtiel, Zerubabel, Abihud, Elyakim, Azur, Zadok, Akhim, Eliud, Eleazar, Matan, Yakub, Yusuf bura'nenna Maria. Na battu ri iaminjo Maria lassu' Isa nigallaraka Almasi. 17 Jari, punna nisusungi appakkaramula battu ri Abraham sa'genna Daud nia' sampulo angngappa' lapisi'na sossorang. Na punna nisusung battu ri Daud sa'genna ri wattunna nipela' bansa Israel mange ri butta Babel nia' todong sampulo angngappa' lapisi'na sossorang. Kammayatompa punna nisusung battu ri wattunna nipela' bansa Israel mange ri butta Babel sa'genna nilassukang Almasi nia' todong sampulo angngappa' lapisi'na sossorang. 18 Ia kalassukanNa Isa Almasi kammai anne lampa-lampana. Amma'Na niarenga Maria, eroki nipasialle siagang Yusuf. Mingka lalang tenanapa nasialle ke'nanga, apaji natianammo Maria lanri gau' makoasa battua ri RohNa Allata'ala. Na tanaassenga Yusuf angkanaya lanri gau' makoasa battu ri RohNa Allata'ala natianang anjo Maria. 19 Anjo Yusuf tuli tutui anggaukangi gau' tojenga situru' napangngajarranga agamana. Taerokai ampelakkangi siri'na Maria ri dallekanna tau jaia. Jari ero'mi a'lampa cokko-cokko ambokoi Maria. 20 Mingka lalang nanawa-nawana Yusuf eroka a'lampa, asso'nami ri wattunna tinro. Lalang asso'nana, nia'mo nacini' sitau malaeka'Na Batara battu mae ri ia angkana, “E, Yusuf, sossoranna Daud, teako mallakki a'nikka siagang Maria; nasaba' anjo ana' natiananganga, pa'jari battu ri gau' makoasaNa RohNa Allata'ala. 21 Lammanaki sallang Maria sitau ana' bura'ne. Na anjo anaka musti nuarengi sallang Isa, nasaba' Iami sallang lampasalamaki umma'Na battu ri kapanrakanga.” 22 Nakajariang ngasemmo anjo sikammaya sollanna a'rupamo apa le'baka napabattu na'bi Nasuroa Batara, angkanaya, 23 “Nia' sallang se're tulolo latianang siagang allassukang sitau ana' bura'ne. Anjo anaka lanigallaraki Imanuel.” (Imanuel iamintu bicara tu Ibrani, battuanna “Niaki Allata'ala anrurungangki'”.) 24 Ambangunna Yusuf, nagaukammi anjo pappasang le'baka napabattu malaeka'Na Allata'ala ri ia. A'nikkami siagang Maria. 25 Mingka lalang tenanapa nalassukangi Maria anjo anaka, tenapa nale'ba' sikatinroang Yusuf siagang Maria. Na wattunna lassu'mo anjo anaka, nisaremi areng Isa ri Yusuf.
2
1 Anjorengi ri kota Betlehem, ri pa'rasangang Yudea, nilassukang Isa, ri wattunna Herodes ammarenta. Anjo wattua nia'mo siapa are tucara'de' accini' bintoeng, battu raya mange ri Yerusalem. 2 Battui akkuta'nang mange-mange ke'nanga angkana, “Kemae pammantanganna anjo Ana' beru nilassukanga, la'jari karaenga ri tu Yahudia? Le'baki nia' ammumba bintoeng pammateiNa iraya. Nia' maki' anne battu ero' anynyomba ri Ia.” 3 Nalangngere'na Herodes anjo kabaraka, teaimi sipato' ta'bangkana. Kammayatompa sikontu tau niaka ri Yerusalem ta'bangka ngaseng tommi. 4 Nasuro kio' ngasemmi Herodes sikontu imang-imang kapalaya siagang guru-guru agamana tu Yahudia. Napa'rappungammi ke'nanga nampa nakuta'nang angkana, “Kemae lanilassukang anjo Karaeng le'baka Napa'janjiang Allata'ala?” 5 Appialimi ke'nanga angkana, “Ri kota Betlehem, ri pa'rasangang Yudea. Nasaba' kammaminne le'baka natulisi' na'bia, 6 ‘Ikau Betlehem, ri pa'rasangang Yudea, Tena sikali naikau kaminang tuna ri alla'na sikamma kota lompo niaka ri Yudea, Nasaba' battu ri kaumi lammumba sitau pamimping eroka ampimpingi ummakKu Israel.’ ” 7 Nalangngere'na Herodes pappialina ke'nanga, nasuro kio' cokko-cokkomi anjo tucara'deka accini' bintoeng. Nampa nakuta'nang ke'nanga angkanaya ringngapanna nappakkaramula ammumba anjo bintoenga. 8 Le'baki anjo nasuromi ke'nanga a'lampa mange ri Betlehem. Na napasang ke'nanga angkanaya, “A'lampamako mange amboya baji'-bajiki anjo Anaka. Napunna nubuntulu'mo, pauang tonga', sollangku mange todong anynyomba ri ia.” 9 A'lampami ke'nanga. Nalalang a'jappanamo ke'nanga, nia'mi pole nacini' ke'nanga anjo bintoeng le'baka ammumba iraya. Tamaka rannuna ke'nanga nacini'namo pole anjo bintoenga. A'lolo'mi anjo bintoenga mange ri dallekang, irateanganna ke'nanga. Sa'genna ammantang irateanganna pammantanganna anjo Anaka. 11 Antama'mi ke'nanga ri pammantanganna anjo Anaka. Nabuntulu'mi anjo Anaka siagang Maria amma'Na. Su'ju'mi ke'nanga anynyomba ri anjo Anaka. Nampa massing nasungke roko'-roko'na ke'nanga, namassing assare koro'bang, iamintu bulaeng, kamanynyang, siagang mur. 12 Ri lammotere'na ke'nanga, nipauammi ri Allata'ala lalang so'na, sollanna tea ammoteri ke'nanga mange ri Herodes. Jari oloang maraemmi naolo ke'nanga ammotere' mange ri pa'rasanganna. 13 Ammotere'namo anjo tucara'deka accini' bintoeng, nia'mi pole malaeka'Na Batara ampappicinikangi kalenna lalang so'na mae ri Yusuf. Nakana anjo malaekaka, “Eroki nasuro boya siagang nasuro buno Herodes antu Anaka. Jari ambangungko nai', erangi antu Anaka siagang amma'Na mange accokko ri Mesir. Ammantang mako anjoreng sa'gennu Kusare poleang kabara'.” 14 Ambangummi Yusuf, na'lampa memang anjo bangngia angngerangi anjo Anaka siagang amma'Na mange accokko ri butta Mesir. 15 Ammantammi ke'nanga anjoreng sa'genna mate Herodes. Lanri kammana, a'rupami kananNa Batara le'baka Nasuro pabattu ri na'biNa, angkanaya, “Kukioki ammotere' anakKu battu ri Mesir.” 16 Naassenna Herodes angkanaya nitipui ri anjo tucara'deka accini' bintoeng niaka battu raya, tamakami larrona. Appasulu'mi parenta, assuro buno ngasengi sikontu ana'-ana' bura'ne niaka lalang ri Betlehem siagang ri ampi'-ampi'na, ia umuru' ruan taunga siagang irawangannaya. Anjo umuruka appakkaramulai nirekeng ri wattu pammumbana anjo bintoenga, situru' le'baka napau anjo tucara'deka accini' bintoeng. 17 Kammaminjo na'rupamo apa le'baka napau Na'bi Yeremia, angkanaya, 18 “Nia' sa'ra karru' kalangngerang ri Rama Kunrareng siagang piraung Rahel angkarruki ana'-ana'na; na taeroka nisaleori lanri taena ngasemmi ana'na.” 19 Ri wattunna matemo Herodes, ri nia'na ija Yusuf siagang anjo Anaka siagang amma'Na ri butta Mesir, nia'mi pole malaeka'Na Batara battu ampappicinikangi kalenna lalang so'na ri Yusuf. 20 Nakana anjo malaekaka, “Mate ngasemmi sikontu tau eroka ambunoi antu Anaka. Jari ambangung mako, allei antu Anaka siagang amma'Na siagang ammotere' mako mange ri Israel.” 21 Ambangummi Yusuf, nampa naerang anjo Anaka siagang amma'Na ammotere' mange ri Israel. 22 Mingka nalangngere'na Yusuf angkanaya Arkelaus, iamintu ana'na Herodes ansambeangi manggena a'jari karaeng ri pa'rasangang Yudea, malla'mi Yusuf mange anjoreng. Mingka nipauammi pole ri Batara lalang so'na, sollanna a'lampa mange ri Daera Galilea. 23 Anjoremmi ammantang ke'nanga, ri se'reang kota nikanaya Nazaret. Lanri kammana, a'rupami apa le'baka napau na'bi-na'bia ri passala'na anjo Anaka angkanaya, “Lanigallaraki Tu Nazaret.”
3
1 Anjo wattua nia'mi Yohanes Paje'ne' battu ri parang lompoa ri Yudea. Appakkaramulami akkato'ba nakana, 2 “Toba' ngaseng mako battu ri gau' dosa-dosanu, nasaba' tasalloami nappakkaramulamo ammarenta Allata'ala, salaku Karaeng!” 3 Iaminne Yohanes natabaya kananna Na'bi Yesaya ri wattunna angkana, “Nia' tau akkiok-kio' ri parang lompoa angkana, ‘Pasadiai oloanNa Batara; Lappari oloang laNaoloa.’ ” 4 Anjo Yohanes bulu unta pakeanna. Kukkulu' passikko' aya'na, na katimbang siagang bani romang napare' kanre. 5 Jaimi tau battu mange ri Yohanes. Nia' tu battu ri kota Yerusalem, tu battu ri sikontu pa'rasangang Yudea, kammayatompa tu battu ri daera-daera a'biringa ri Binanga Yordan. 6 Namangakuimi dosa-dosana ke'nanga, nampa nije'ne' ke'nanga ri Yohanes lalang ri Binanga Yordan. 7 Jai tommi tu Farisi siagang tu Saduki battu mae ri Yohanes, ero' assuro je'neki kalenna. Mingka nacini'na Yohanes battu todong ke'nanga, nakanamo ri ke'nanga, “Ikau ngaseng tu ja'dalaka! Inai ampauangko angkanaya akkullei nuliliang hukkunganNa Allata'ala, labattua sallang mae ri kau? 8 Pappicinikammi rolong lalang ri panggaukannu, sollanna ma'nassamo angkanaya toba' tojeng mako battu ri gau' dosa-dosanu. 9 Teako akkapangi angkanaya lakkullei nuliliang hukkunganNa Allata'ala lanri nukanana kalennu sossorannako Abraham. U'rangi angkanaya, manna anne batu-batua, akkulle tongi Napa'jari Allata'ala sossoranna Abraham! 10 Sadiami pangkulu' lanipata'banga ri poko' kayua sa'genna ri aka'-aka'na. Sikamma poko' kayu tenaya nabaji' rapponna lanita'bangi nampa nipela' antama' ri pepeka. 11 Inakke je'ne' kupake anje'nekko a'jari pammatei angkanaya ma'nassa toba' mako battu ri gau' dosa-dosanu; mingka labattua sallang ri bokoangangku, iami sallang lanje'nekko pepe' siagang RohNa Allata'ala. La'birangangi nainakke. Manna a'jari pabinting sapatuNa tena todong kusiratang. 12 Nia'mi pa'dinginga lalang limanNa, eroka Napake antapi sikontu berasaka sa'genna tangkasa'. Sikontu berasaka laNaboliki lalang ri pammolikanna, mingka sikamma awanga laNatunui lalang ri pepe' tenaya nalammari rinrana.” 13 Anjo wattua a'lampai Isa battu ri Galilea mange ri Binanga Yordan. Mangemi ri Yohanes assuro je'neki KalenNa. 14 Mingka taerokai Yohanes anje'neki. Nakana Yohanes, “Inakkeji siratang Kije'ne' Bapa'. Mingka ba'lalo iKatte battu mae assuro je'neki KalenTa ri nakke.” 15 Mingka appialimi Isa Nakana, “Boli'mi kamma rolong ri kamma-kammaya anne. Nasaba' lanri kammana minjo nanigaukang ngaseng sikamma Nakaerokia Allata'ala.” Jari nije'ne'mi Isa ri Yohanes. 16 Le'baki nije'ne', assulu'mi Isa battu ri je'neka ri anjo binangaya. Ti'ring tassungkemi langika, nampa nia'mo Nacini' Isa RohNa Allata'ala manurung sangkamma jangang-jangang bodobangkeng, battu attompo' irateanganNa. 17 Nampa nia' kalangngerang sa'ra battu rate ri langika angkana, “Iaminne AnakKu Kukamaseanga. Iami nakate'neang atingKu.”
4
1 Le'baki anjo, nierammi Isa ri RohNa Allata'ala mange ri parang lompoa, sollanna niso'ri ri billisika. 2 Patampulo allo patampulo bangngi tamangnganrea Isa, sa'genna cipuru'mi. 3 Battumi billisika na nakana, “Sai Ana'Nako Allata'ala? Punna kamma, suromi anjo batu-batua a'jari roti.” 4 Appialimi Isa Nakana, “Nia' tattulisi' lalang ri Kittaka angkanaya: Tena nalanri battu ri rotija bawang nakkulle attallasa' rupataua, mingka lanri battu ri kana-kana Napabattua pole Allata'ala.” 5 Le'baki anjo, nierammi pole Isa ri billisika mange ri Yerusalem, kota matangkasaka, nampa niboli' irate ri tompo'na Balla'Na Batara. 6 Nampa nakana billisika ri ia, “Sai Ana'NaKo Allata'ala? Punna kamma, a'lumpa' maKo naung; nasaba' nia' tattulisi' lalang ri Kittaka angkanaya, ‘LaNasuroi malaeka'-malaeka'Na Allata'ala anjagaiKo, LaNaruppaiKo lalang limanna ke'nanga, Sollanna manna bangkenNu tena todong nata'runtu' ri batua.’ ” 7 Appialimi Isa Nakana, “Mingka nia' todong tattulisi' lalang ri Kittaka angkanaya, ‘Teako so'ri-so'ri Karaeng Allata'alanu.’ ” 8 Nampa nierang pole Isa ri billisika nai' ri moncong tinggi dudua, nampa nipicinikiang sikontu kakaraenganna siagang kakalumanynyanganna linoa mae ri Ia. 9 Nampa nakana billisika ri Ia, “Yangasenna anjo lakupassareang ngasengi mae ri Kau punna su'jukKo anynyomba mae ri nakke.” 10 Appialimi Isa Nakana, “A'lampako Billisi'! Nia' tattulisi' lalang ri Kittaka angkanaya: Sombai Batara, Allata'alanu, siagang Iaji bawang siratang tuli nupakala'biri'!” 11 Kala'busanna, a'lampami Billisika ambokoi Isa. Nampa battumi malaeka'-malaekaka allayani Isa. 12 Nalangngere'na Isa angkanaya nitarungkumi Yohanes, a'lampami alliliangi KalenNa mange ri Galilea. 13 Nabokoimi Nazaret, nampa mange ammantang ri Kapernaum, ri birinna Tamparang Galilea, ri daera Zebulon siagang Naftali. 14 Lanri Nagaukannamo Isa kammaya anjo, a'rupami apa le'baka napau Na'bi Yesaya, angkanaya, 15 “Butta Zebulon siagang Naftali Ri oloang mangea ri tamparanga, ba'leanna Binanga Yordan, Butta Galilea tanapammantangia tu Yahudi! 16 Bansa niaka lalang ri sassanga accini'mi singara' accaya lompoa! Ri tau niaka lalang ri sassanna kamateanga Battumi cayana singaraka assiori!” 17 Iaminjo wattua Nappakkaramulamo Isa ampabattui angkanaya, “Toba' ngaseng mako battu ri gau' dosa-dosanu, nasaba' tasalloami nappakkaramulamo ammarenta Allata'ala, salaku Karaeng!” 18 Ri wattu a'jappana Isa ri birinna Tamparang Galilea, nia'mo Nacini' rua paboya juku', iamintu niarenga Simon (Nigallaraka Petrus) siagang andi'na niarenga Andreas. Sitabangi ke'nanga anjala juku' ri tamparanga. 19 Nakanamo Isa ri ke'nanga, “Maeko amminawang ri Nakke. LaKuajarakko a'jari sanrapang pajala tau.” 20 Nabokoi memammi jalana ke'nanga, nampa amminawang a'lampa siagang Isa. 21 A'jappana pole Isa, nia'mo pole Nacini' tau rua assari'battang, iamintu niarenga Yakobus siagang Yohanes, niarenga Zebedeus manggena. Sitabangi ke'nanga nia' rate ri biseanna appakabaji' jala siagang manggena ke'nanga. Nikio' tommi ke'nanga ri Isa, 22 nanabokoi memammo biseanna siagang manggena ke'nanga, nampa a'lampa amminawang ri Isa. 23 Wattunna ri Galilea, a'lampai Isa angnginroi sikontuna anjo pa'rasanganga. Angngajaraki ri sikamma balla' sambayanga siagang Nabirittakammi Kabara' Bajika angkanaya lammarentami Allata'ala. Naballei tommi sikamma tau garringa siagang tau sala-salanga sa'genna baji' ngaseng. 24 Tassiara'mi kabara'Na Isa mange ri pa'rasangang Siria, sa'genna pila' jaimi tau ambattui. Massing angngerammi ke'nanga tau garring. A'rupa-rupami tau garring siagang tau susa nierang mae ri Ia. Tau nisosoka ri setang, tau mate-mate jangang, tau peso', na maraengannaya, Naballei ngasemmi Isa sa'genna baji' memang silalonna. 25 Jai sikalimi tau amminawang ri Isa anjo wattua. Nia' tu battu ri Galilea, tu battu ri Sampulo Kota, battu ri Yerusalem, tu battu ri Yudea, kammayatompa nia' todong tu battu ri pa'rasangang ba'leanna Binanga Yordan.
5
1 Wattunna Nacini' Isa anjo tau jaia, nai'mi ri se'reang bonto. Ammemponamo, battu ngasemmi ana'-ana' gurunNa a'reppese'. 2 Appakkaramulami Naajara' ke'nanga: 3 “Mate'nei tau tanjenga ri Allata'ala lanri naassenna kalenna tau tena kullena; nasaba' iami a'jari umma'Na Allata'ala! 4 Mate'nei tau susaya pa'mai'na; nasaba' iami lanisaleori ri Allata'ala! 5 Mate'nei tau tuna pa'maika; nasaba' iami langgappai apa le'baka Napa'janjiang Allata'ala! 6 Mate'nei tau attojeng-tojenga ero' anggaukangi ero'Na Allata'ala; nasaba' iami lanipasukku' tallasa'na ri Allata'ala! 7 Mate'nei tau mangngamaseanga ri paranna tau; nasaba' iami lanikamaseang todong ri Allata'ala! 8 Mate'nei tau lambusu' pa'maika; nasaba' iami langngassengi Allata'ala! 9 Mate'nei tau mappasiamaka paranna tau; nasaba' iami laniakui ri Allata'ala a'jari ana'-ana'Na! 10 Mate'nei tau nisessaya lanri nagaukanna ero'Na Allata'ala; nasaba' iami a'jari umma'Na Allata'ala! 11 Kate'neangi punna nicallako, yareka nisessako siagang nipassalako passabakkang iNakke. 12 Kasukkurangi siagang karannuangi, nasaba' lompoangangi pahala lanutarimaya sallang battu ri Allata'ala. Kamma tomminjo batena nisessa na'bi-na'bi le'baka battu rioloangannu.” 13 “Ikau ngasemmi rapang ce'lana anne linoa. Punna la'bamo ce'laya, maka lakkulleiji nipa'jari ce'la poleang? Ma'nassa tenamo matu-matunna, passangalinna nipela' mami na nionjo'-onjokang ri taua. 14 Ikau ngasemmi rapang singara'na anne linoa. Kota niaka irate ri bontoa takkulleai nicokko. 15 Tenanniakka tau apparinra lampu nampa natongko' katoang. Passangalinna naboliki irate ri pa'dongkokanna, sollanna nasingari ngasengi tau niaka lalang balla'. 16 Kamma todong minjo alarapanna singara'nu, parallui accaya ri dallekanna tau jaia; sollanna nacini' gau' baji'nu, na napakala'biri' Allata'ala Manggenu niaka ri suruga.” 17 “Teako sala pahang kanukana battuA' assuro pelaki atorang agama napabattua Musa siagang napangngajarranga na'bi-na'bia. Tena naKubattu assuro pelaki, passangalinna eroki Kupakasingara' battuanna sitojennaya. 18 U'rangi laloi! Angkanaya lalang nia'na ija langika siagang linoa, manna se're hurupu' yareka titti' kaminang ca'dina anjo atorang agamaya tena sikali lanipela' punna tenapa na'rupa ngaseng! 19 Lanri kammana, inai-nai andakkai kalase'renna anjo parentaya, manna nakaminang ca'diaja, nampa naajara' todong paranna tau a'gau' kamma, iaminjo taua la'jari kaminang ca'di ri umma'Na Allata'ala. Mingka inai-nai anturuki anjo sikamma parentaya, nampa naajara' todong paranna tau anggaukangi, iaminjo taua sallang la'jari malompo ri umma'Na Allata'ala. 20 Jari u'rangi anne: Takkulleako a'jari umma'Na Allata'ala, punna tena nabajikangang batenu anggaukangi ero'Na Allata'ala naanjo guru-guru agamaya siagang tu Farisia!” 21 “Nuassemmi apa le'baka nipangngajarrang mange ri boe-boeta riolo angkanaya: Teako ammunoi; inai-nai ammuno, musti laniadeli. 22 Mingka anne kamma Kukana ri kau ngaseng, inai-nai larro ri paranna tau, laniadeli sallang; siagang inai-nai ampali'boi paranna tau musti niadeli ri dallekanna Pangadelang Agamaya. Siagang inai-nai ampakkanai paranna tau, ‘Tolo,’ siratangi nipela' antama' ri pepe'na narakaya. 23 Lanri kammana, punna nia' kalase'rennu sitabang angngerangi koro'bang sukkuru'nu mae ri Allata'ala, na nuu'rangi angkanaya nia' parannu tau pa'risi' pa'mai' ri kau, 24 bokoi rolong anjo koro'bannu, nunampa mange assibajiki siagang anjo taua. Punna le'ba' mako assibajiki, nampa mako ammotere' mange ampassareangi anjo koro'bannu mae ri Allata'ala. 25 Ebara'na nia' tau antuntukko mange ri pangadelanga, assibajiki memang mako lalang nia'na ija wattu, lalang tenanapa nubattu mange ri pangadelanga. Nasaba' punna tenapa nussibajiki nanubattu mange ri pangadelanga, tena tanapassareannu anjo taua mange ri hakinga; nampa hakinga ampassareangko mange ri pulisia; nampa napantamakko pulisia ri tarungkua; 26 Na u'rangi angkanaya: Ma'nassa takkulleako assulu' battu ri anjo tarungkua punna tena nalappasa' ngaseng inrang nipassalanu.” 27 “Nuasseng ngaseng tommi pangngajarang angkanaya: Teako a'gau' salimarri. 28 Mingka anne kamma Kukana ri kau ngaseng: Inai-nai accini' baine nabattumo cinnana a'gau' salimara', a'gau' salimara'mi siagang anjo bainea ilalang ri nyawana. 29 Punna passala' mata kanannu nudoraka, kocciki assulu' anjo matannu nampa nupela'! Nasaba' bajikangangi tappelaka anjo mata kanannu, naia punna nipasambilako sibatu kale antama' ri naraka. 30 Punna passala' lima kanannu nudoraka, tattaki anjo lima kanannu nampa nupela'! Nasaba' bajikangangi tappelaka anjo lima kanannu, naia punna antamakko sibatu kale ri naraka.” 31 “Nia' todong pangngajarang kammaya anne: Inai-nai antallaki bainenna, parallui nasare sura' talla'. 32 Mingka anne kamma Kukana ri kau ngaseng: inai-nai antallaki bainenna pantaranganna passabakkang a'gau' salimara', iami a'jari saba' na'gau' salimara' anjo bainenna, punna a'bunting poleang anjo bainenna siagang bura'ne maraeng. Na inai-nai bura'ne ambuntingi anjo bainea, tappinawang tommi a'gau' salimara' siagang anjo bainea.” 33 “Nuasseng ngasemmi angkanaya nia' pangngajarang ri boe-boeta kammaya anne: teako takkaluppai ri janjinnu. Apa le'ba' nupa'janjiang siagang assumpa ri dallekanNa Allata'ala, parallui nupa'rupa. 34 Mingka anne kamma Kukana ri kau ngaseng: tea' laloko assumpai. Teako assumpai lanri langika, nasaba' anjo langika empoang kala'biranNa Allata'ala; 35 yareka lanri buttaya, nasaba' anjo buttaya pa'dongkokang bangkenNa Allata'ala; yareka lanri Yerusalem, nasaba' anjo kotaya, kota kalompoanNa Karaenga. 36 Tea tongko assumpai lanri ulunnu, nasaba' takkulleako ampa'jari keboki yareka ampa'jari le'lengi uu'nu manna silawara'. 37 Jari angkana mako bawang ‘Iyo’ punna iyo, yareka ‘Tena’ punna tena. La'biangang na anjo, pangngajara'na mami billisika.” 38 “Nuasseng ngaseng tommi angkanaya nia' pangngajarang kammaya anne: mata nisambei mata; gigi nisambei gigi. 39 Mingka anne kamma Kukana ri kau ngaseng: teako appasibalasaki gau' kodi mange ri tau le'baka a'gau' kodi ri kau. Passangalinna punna nia' antempaka'rangi pilisi' kanannu, boli'mi kamma natempaka'rang todong pilisi' kairinnu. 40 Na punna nia' antuntukko mae ri hakinga ri pangadelanga lanri eroki naalle bajunnu, sareang tongi lipa'nu. 41 Punna nia' tummarenta ampassako angngerangangi barang-baranna se're kilometere' bellana, erangangi rua kilometere' bellana. 42 Punna nia' tau appala' apa-apa ri kau, sare laloi. Siagang teako pattenangi tau eroka angnginrang apa-apa ri kau punna nia'ja ri kau.” 43 “Nuasseng ngasemmi angkanaya nia' todong pangngajarang kammaya anne: kamaseangi agannu na nukabirisi balinnu. 44 Mingka anne kamma Kukana ri kau ngaseng: kamaseangi sikontu balinnu siagang pappala' doangangi tau assessayako, 45 sollannu a'jari ana'-ana'Na Allata'ala Manggenu ri suruga. Nasaba' Napammumbai alloNa Allata'ala sollanna nasiori ngaseng rupataua, baji' natau a'gau' bajika kammayatompa tau a'gau' kodia. Kammayatompa Napaturungi bosiNa Allata'ala sollanna natuju ngaseng rupataua, baji' natau a'gau' bajika kammayatompa tau a'gau' kodia. 46 Nasaba' punna iaji bawang tau angkamaseangako nukamaseang, apa paralluna Nabalasa' Allata'ala anjo panggaukannu? Sai manna parentea angngasseng tonji anggaukangi kammaya anjo? 47 Na punna agannuji bawang nujamakki, apa la'bina kabajikannu? Kamanna tau kapereka nagaukang tonji kammaya. 48 Ia Allata'ala Manggenu ri suruga sukku' Nakamaseangi sikontu rupataua. Jari parallui nukamaseang todong parannu tau.”
6
1 “U'rangi, teako gaukangi apa napassuroanga agamanu ri dallekanna tau jaia, lanri ero'nu ampappiassengangi ri tau jaia. Punna kamma anjo batenu appanggaukang, mattantu tena nulanggappa pahala battu ri Allata'ala Manggenu niaka ri suruga. 2 Jari, punna assareko passidakka mange ri tau kasi-asia, teako pau-paui mange ri tau maraenga, sangkamma sarroa nagaukang tau munapeka ri balla' sambayanga yareka ri tangngana aganga, lanri eroki nipalece ri taua. U'rangi angkanaya ia tommi anjo pappalecea a'jari pahalana ke'nanga. Pantaranganna anjo pappalecea tenamo pahala maraeng lanagappa. 3 Mingka ikau ngaseng, punna assareko passidakka, teako paui ri tau maraenga sollanna tena tau maraeng angngassengi anjo passidakkanu. 4 Boli'mi kamma na Allata'ala Manggenu ri suruga bawang anciniki siagang angngassengi anjo passidakkanu. Iami sallang assareko pahala lanri assarenu passidakka.” 5 “Punna assambayangko, teako sangkammai tau munapeka. Anjo ke'nanga nangai ammenteng assambayang lalang ri balla' sambayanga, yareka ri panyingkulu'na aganga, lanri eroki nicini' ri tau jaia. U'rangi angkanaya iatommi anjo pahalana ke'nanga punna nicini'mo ri tau jaia assambayang. Pantaranganna anjo, tenamo pahala maraeng lanagappa ke'nanga. 6 Jari, ikau punna erokko assambayang, antamakko ri bili'nu nampa nutongko' pakke'bu'nu, nunampa assambayang ri Allata'ala Manggenu, tenaya naniciniki. Na Manggenumi anciniki anjo sambayannu nugaukanga ri pammantangang taccokkoa. Iami sallang lassareko pahala lanri anjo sambayannu. 7 Na punna assambayangko, tea' mako la'bu dudui bicarannu, sangkamma tau kapereka. Nasaba' napikkiriki anjo tau kapereka angkanaya punna la'bu sambayanna, iaminjo lanitarima ri Allata'ala. 8 Teako kau appakammai anjo batenu assambayang. Kale'ba' Naasseng riolomi Allata'ala parallunu ri tenanapa nuppala'. 9 Jari, punna erokko assambayang pakammaminne batenu: ‘O, Manggea ri suruga: IKattemi Allata'ala Tenaya Ruanna Poro iKatte nisomba siagang nipakala'biri'. 10 IKattemi Karaenna ikambe. Poro iKattemi ammarenta ri lino, na nituruki erotTa ri lino kamma ri suruga. 11 Kisarei ikambe anne alloa apa naparalluanga ikambe. 12 Kipammopporangi dosa-dosana ikambe, Sangkamma napammopporammi ikambe tu salaya ri kalenna ikambe. 13 TeaKi' balang parekangi ikambe nibeta ri paccobaya passangalinna Kipakabellai ikambe battu ri maja'dalaka [IKattemi Karaeng makoasaya siagang kaminang mala'birika satunggu-tungguna. Aming!]’ 14 Punna nupammopporang tu kasalanga ri kalennu, Napammopporang tongi Allata'ala Manggenu ri suruga dosanu. 15 Mingka punna tena nupammopporangi parannu tau, tena todong Napammopporangi Allata'ala Manggenu ri suruga dosanu.” 16 “Punna appuasako, teako pinra-pinrai tanja'nu a'jari susa, kamma tau munapeka. Anjo tau munapeka nangai napinra-pinra tanja'na a'jari kamma tau susa punna appuasai, lanri ero'na niasseng ri taua angkanaya appuasai. U'rangi angkanaya ia tommi anjo pahalana ke'nanga punna niassemmo ri taua angkanaya appuasai. Pantaranganna anjo tenamo nalanggappa pahala maraeng ke'nanga. 17 Mingka ikau ngaseng, punna appuasako, pira'nyuki rupannu siagang a'jangka baji'-bajikko, 18 sollanna tena naassengi tau maraenga angkanaya appuasako; passangalinna Manggenu bawang ri suruga angngassengi. Na iaminjo Manggenu ri suruga lassareko sallang pahala lanri appuasanu.” 19 “Teako pa'barang-barangang bawang nupasse're ri lino. Nasaba' pa'barang-baranganga ri anne linoa akkullei nakanre kacoa', siagang bu'bu', yareka akkullei nilukka' ri palukkaka. 20 Jari appasse're mako pa'barang-barangang lanueranga mange ri suruga. Nasaba' ri suruga, tena kacoa' siagang bu'bu' langkanrei anjo pa'barang-baranganga, yareka tena palukka' akkulle allukkaki. 21 Lanri kemae ammantang pa'barang-barangannu, anjoreng tommi ta'dongko' nyawanu.” 22 “Anjo mataya rapangi sulo ri batangkalea. Punna tangkasaki siagang corai matannu, singara' ngaseng tommi antu sikontu batangkalennu. 23 Mingka punna ra'masaki matannu, sassang ngaseng tommi antu sikontu batangkalennu. Jari punna sassammi lampu niaka ri kalennu, tamakami sassang makkappu'na anjo sassanga!” 24 “Takkulleai se'rea tau ampa'jari atai kalenna mae ri ruaya karaeng. Nasaba' nia' lanangai, nania' latanajampangia kananna. Yareka la'bi a'dakkikangngangi mae ri se'reanga na maraengannaya. Ikau kamma tommako anjo. Takkulleako lampa'jari atai kalennu mae ri Allata'ala, punna nupa'jari ata todong kalennu mae ri pa'barang-baranganga. 25 Lanri kammana, u'rangi laloi anne; teako ranggaselai ri passala'na katallassannu. Angkanaya apa lanukanre siagang apa lanuinung, kammayatompa apa lanupake ri batangkalennu. Sai la'bi paralluangangi anjo tallasaka naanjo kanrea? Siagang anjo batangkalea naanjo care-carea? 26 Cini' sai anjo jangang-janganga ri panri'bakkanna. Tena nangngasseng a'lamung-lamung, tena nakkatto, kammayatompa tena nammoli' wassele' lamung-lamung ri pammoli'-molikanna. Mingka manna nakamma mamo, niparakai tonji ri Manggenu niaka ri suruga. Sai lompoangangi anggarannu nasikamma anjo jangang-janganga? 27 Maka inaika akkulle antambai umuru'na manna sike'de' lanri ranggaselana? 28 Kammayatompa, angngapa nuranggasela lanri care-carenu? Cini' sai antekamma tallasa'na anjo bunga-bunga rosia attimboa ri paranga. Anjo bunga-bungaya tena nakkulle anjama siagang tena nattannung; 29 u'rangi sai antekamma kalumanynyanna anjo Karaeng Salomo, mingka tenapa nabajikangang pakeanna naanjo bunga-bungaya! 30 Anjo ruku'-ruku' niaka ri paranga, attimboi anne alloa nammuko lanitunui sa'genna cappu'. Mingka manna nakamma, nipipakei tonji ri Allata'ala anjo ruku'-rukuka sa'genna ga'ga nicini'. Jari la'biangampa pole ikau! Tena tanipipakeinu! Mingka sayanna kakurang tappakko! 31 Jari tea' mako bata-batai angkanaya, ‘Apamo lanikanre’, yareka ‘apamo laniinung’, yareka ‘apamo lanipake’? 32 Tau tenayaji natappa' ri Allata'ala tuli angngondang dudui sikammaya anjo. Sikontutojenna le'ba' Naasseng memanji Manggenu ri suruga, angkanaya nuparalluang ngasengi anjo sikammaya. 33 Jari, boyami la'bi riolo antekamma nasollanna Allata'ala ammarenta lalang ri katallassannu, siagang nanugaukang ero'Na. Na sikontu anjo kaparalluannu maraenganga laNasare tonjako Allata'ala. 34 Lanri kammana, tea' mako bata-batai ri passala'na lanukaparalluanga ammuko, nasaba' untu' ammukoa nia' todong bata-batana. Anne alloa angga'nami lanukasusanga, tea' mako tambai ba'lalo susanu.”
7
1 “Teako mangngadeli ri parannu tau, sollanna tena todong Naadeliko Allata'ala. 2 Nasaba' antekamma batenu mangngadeli ri parannu tau, kamma tomminjo batenu laniadeli ri Allata'ala. Siagang pa'baku' apa nupake ambakuki parannu tau, ia tomminjo sallang pa'bakuka laNapake Allata'ala ambakukko. 3 Angngapa nakkulle nucini' limbu'bu' niaka lalang ri matanna parannu tau, mingka batu niaka lalang ri matannu tanucinikai? 4 Antekamma lanukana ri parannu tau, ‘Mae kupasulukangko anjo limbu'bu' niaka lalang ri matannu,’ nania' batu lompo lalang ri matannu? 5 E, munape'! Pasuluki rolong anjo batu niaka lalang ri matannu, nunampa akkulle accini' baji' ampasuluki anjo limbu'bu' niaka lalang ri matanna parannu tau. 6 Teako assarei barang matangkasa' mange ri kongkonga, sollanna tena na'giling ri kau ambakkaiko. Tea tongko assarei mutiara mange ri bawia, sollanna tena naonjo'-onjokangi anjo mutiaraya.” 7 “Appalakko, nunisare. A'boyako, nunggappa. De'deki pakke'buka, nunisungkeang. 8 Nasaba' inai-nai appala', iami lanisare; inai-nai a'boya, iami langgappa; siagang inai-nai ande'de' pakke'bu', iami lanisungkeang. 9 Maka nia' se're tau toa assare batu punna appala' roti ana'na? 10 Yareka assare ulara' punna appala' juku' ana'na? 11 Manna antekamma ja'dala'nu mingka angngasseng tonjako assare apa-apa baji' mae ri ana'-ana'nu. La'biangampa pole Manggenu ri suruga, ma'nassa laNasarena apa baji' mae ri tau appalaka ri Ia. 12 Gaukammi ri parannu tau apa nungaia lanagaukang parannu tau ri kalennu. Iaminjo hukkung napabattua Musa, siagang pangngajaranna na'bi-na'bia.” 13 “Pakke'bu' seppaka nuolo antama, lanri luaraki oloang mangea ri kapanrakanga, kammayatompa lompoi pakke'bu'na, najaimo tau angngolo anjoreng. 14 Mingka seppaki siagang sukkaraki pakke'bu' angngoloa mange ri katallassanga, nasike'de'ji tau angngolo anjoreng.” 15 “Tutuko mae ri na'bi-na'bi palassua. Sanrapangi nicini' gimbala' ke'nanga, mingka sikontutojenna sanrapangi kongkong nye'nyereka lalang nyawana ke'nanga. 16 Battu ri panggaukanna ke'nanga akkulle nuasseng nubatei. Takkulleai romang-romang akkatintinga a'rappo anggoro'; siagang takkulleai rompo'-rompo' akkatintinga a'rappo ara. 17 Poko' copponga bajiki rapponna, napoko' dattuluka kodi rapponna. 18 Takkulleai poko' copponga lakodi rapponna, kammayatompa poko' dattuluka takkulleai labaji' rapponna. 19 Nasikamma poko' tenaya nabaji' rapponna lanita'bangi nampa nitunu. 20 Kammatommi anjo sikamma na'bi-na'bi palassua. Akkullei nuasseng nubatei battu ri panggaukanna.” 21 “Tayangasenga tau akkioka ri Nakke angkana, ‘O, Batara, o, Batara,’ la'jari umma'Na Allata'ala; mingka iaji bawang tau anggaukangai ero'Na ManggeKu ri suruga. 22 Punna narapi' sallang allonna niadeli taua, jai tau lakkiok-kio' ri Nakke angkana, ‘O, Batara, o, Batara, sai lalang arenTa tonji le'ba' kupabattu pappasanNa Allata'ala? Sai lalang arenTa tommi le'ba' kubongka setanga, anggaukangi gau' appakalannasaka?’ 23 Mingka laKukana sallang appiali, ‘Tena le'bakako Kuasseng! A'lampa ngasengko anrinni ikau le'baka a'gau' ja'dala'!’ ” 24 “Jari, inai-nai ampilangngeri siagang anggaukangi kana-kana Kupangngajarranga, iami sanrapang tau cara'deka, ambangunga balla' irate ri tompo'na batu makassaka. 25 Ri wattunna battu bosia siagang a'baya kammayatompa anging barubua antujui anjo ballaka takkulleai anra'ba, lanri kassaki pammentenganna irate ri batua. 26 Na tau allangngerekai kana-kana Kupangngajarranga mingka tena nagaukangi, iami sanrapang tau toloa, ambangunga balla' irate ri tompo'na kassika. 27 Ri wattunna battu bosia siagang a'baya kammayatompa anging barubua antujui anjo ballaka, anra'bami. Nateaimi sipato' sanna'na panra'na anjo ballaka!” 28 Le'ba'na Isa angngajara', teaimi sipato' lannasa'na ngaseng tau jaia allangngereki anjo apa Napangngajarranga. 29 Lanri lompo sikali pangaruNa nilangngere' bateNa a'bicara. Tasangkammayai batena guru-guru agamana ke'nanga.
8
1 Naungi Isa battu ri bontoa, najaimo tau ampinawangi. 2 Anjo wattua nia' tommo se're tau garring sala battu akkulantu' ri dallekanNa Isa angkana, “O, Bapa', punna Kierokangi akkulleKi' amballeia' ku'jari baji' ri garringku.” 3 Naangka'mi limanNa Isa naNajama anjo tau garring salaya, na Nakana, “Kuerokangi, a'jari baji' mako!” Apaji nammari memammo silalonna garrinna anjo taua. 4 Le'baki anjo Nakanamo pole Isa ri anjo taua, “U'rangi! Tea' laloko caritai anne kajarianga manna pole ri nai. Mingka a'lampamako mange ri imanga, na nusuro paressa kalennu ri ia. Le'baki anjo, a'lampamako mange assare koro'bang situru' napassuroanga Musa; iaminjo a'jari butti ri taua angkanaya ma'nassa baji' mako ri garrinnu!” 5 Ri wattunna battu Isa ri Kapernaum, nia'mo se're perwira surudaduna Roma mange ambuntuli, ero' appala' tulung. 6 Nakanamo anjo perwiraya, “O, Bapa', garringi pajamaku ri balla'. Sanna'mi sessana, attinro mami rate ri katinroanga lanri peso'mi.” 7 Nakanamo Isa, “ErokKa' a'lampa mange amballei, sollanna a'jari baji'.” 8 Mingka appialimi anjo perwiraya nakana, “Tea' maKi' mangei ri ballakku Bapa'. Nasaba' tena nakusiratang Kibattui ri ballakku. Kiparentakang mami bawang, ma'nassa la'jari baji'mi antu pajamaku. 9 Nasaba' manna inakke amminawang turu' tonja' ri parentana komandang irateangangku. Irawangangku nia' todong siapa are kupimping surudadu, amminawang turuka todong ri parentaku. Punna nia' surudadu kusuro angkana, ‘A'lampako,’ tena ta'lampana. Yareka punna kukana ri maraenganga, ‘Maeko anrinni,’ tena tabattuna mae; kammayatompa punna kuparenta tunisuro-suroku angkana, ‘Gaukangi anne!’ tena tanagaukanna anjo kupassuroanga.” 10 Nalangngere'na Isa kananna anjo perwiraya, teaimi sipato' lannasa'na. Nakanamo ri sikamma tau niaka amminawang ri Ia, “Teai sipato' anne taua. Tenanniakkapa le'ba' Kubuntulu' tau lompo kammaya anne tappa'na ri alla'na tu Israel! 11 Memang, jai tau lania' battu iraya siagang battu ilau' ero' a'rannu-rannu siagang Abraham, Ishak, siagang Yakub, lalang ri Lino BeruNa Allata'ala. 12 Padahala' tau siratanga a'jari umma'Na Allata'ala nipelaki assulukang ri sassanga. Anjoremmi ke'nanga langngarru' siagang langkasiaki sessaya.” 13 Le'baki anjo Nakanamo Isa mange ri anjo perwiraya, “Ammotere' mako mange ri balla'nu, a'jarimi antu apa nukatappakia.” Naanjo wattua baji' memammi ri garrinna pajamana anjo perwiraya. 14 A'lampami Isa mange ri balla'na Petrus. Narapikammi matoang bainena Petrus garring rammusu' irate ri katinroanga. 15 Najamami Isa limanna anjo tau garringa, sa'genna ammari memang silalonna garrinna. Ambangummi nai', nampa mange allayani Isa. 16 Ri wattunna appakkaramulamo karuenga, jaimi tau nisoso' ri setang nierang mange ri Isa. Naporo sibukuji bawang kana Napau Isa naNabongkamo assulu' anjo setang-setanga battu ri yangasenna anjo tunisosoka ri setang, kammayatompa naNaballei ngaseng tommo sikontu tau garringa. 17 Lanri Nagaukanna ngasemmo Isa anjo sikammaya, a'rupami apa le'baka napau Na'bi Yesaya angkanaya, “Natanggongi sikontu pa'risitta siagang Napammolei sikontu garrinta.” 18 Jai sikali tau antammulili Isa. Nacini'na ngaseng Isa ke'nanga, Nasuromi ana'-ana' gurunNa a'lampa a'limbang ri tamparanga. 19 Nia'mo sitau guru agama battu mae ri Ia angkana, “O Pa' Guru, erokka' amminawang ri Katte, manna pole a'lampa kemae!” 20 Appialimi Isa Nakana, “Kongkong romanga nia' pammantanganna; kammayatompa jangang-janganga nia' ru'munna. Mingka Ana' Ma'rupataua manna laNapappadongkoki ulu tena todong.” 21 Nia'mo pole ana' gurunNa maraenga angkana, “O Bapa', Kisarea' rolong kasampatang ammotere' antarawangi maya'na manggeku.” 22 Mingka appialimi Isa Nakana, “Amminawang mako ri Nakke; lappassang tommi tau matea nanatarawang tau matena.” 23 Naiki Isa ri biseanga, namminawang ngaseng todong ana'-ana' gurunNa. 24 Ti'ring battumi anging puttusu' sannaka lompona antujui tamparanga, sa'genna nitunrummi ri bombang anjo biseanga. Na anjo wattua attinroi Isa. 25 Battumi ana'-ana' gurunNa akkiok-kio' anronrongi nakana, “Bapa', natujuki' bala, tulungi ana'-anatTa!” 26 Nakanamo Isa, “Angngapa numalla' kamma ngaseng? Kurang tappakko ri Nakke?” Nampa ammenteng Isa, naNaga'gara' anjo anginga siagang tamparanga. Sa'genna sannang sikalimo anjo tamparanga. 27 Lannasa' ngasemmi ana' gurunNa Isa. Nakanamo ke'nanga, “Tau apamo anne kutaeng? Kamanna anginga siagang bombanga amminawang turu' todong ri parentaNa!” 28 Battui Isa ri ba'leanna tamparanga, ri daera Gadara. Anjoreng nia'mo rua tau nasoso' setang battu mae ri Ia. Tenamo tau barani a'reppese' mae ri anjo tau ruaya, lanri sekke'na. 29 Battu lalangi ke'nanga assulu' ri pa'jerakkanga akkiok-kio' angkana, “E Ana'Na Allata'ala! Apa ero' battu nugaukang ri kambe? Ero' mako battu ansessai kambe, manna tanarapikapa wattunna?” 30 Tena nabella battu anjoreng ri tampaka, jai sikali bawi sitabang a'boya kanre. 31 Napala' dudumi anjo setang-setanga ri Isa angkana, “Punna lanusuroki' assulu' battu lalang ri kalenna anne taua, suromi kambe antama' anjoreng ri bawi-bawia.” 32 Nakanamo Isa, “A'lampamako!” Assulu'mi anjo setang-setanga battu lalang ri kalenna anjo tau ruaya. Nampa a'lette' antama' anjoreng ri bawi-bawia a'lampa mange ambuangi kalenna naung ri tubirika ri tamparanga sa'genna tallang ngaseng. 33 Lari ngasemmi pakalawakinna anjo bawia, mange ri kotaya; nanacarita ke'nanga anjo apa kajarianga, siagang passala'na anjo tau ruaya nasosoka setang. 34 Jari a'lampa ngasemmi anjo tau niaka ri kotaya, mae ri Isa. Nabuntulu'namo ke'nanga Isa, napala' dudumi ke'nanga ri Isa sollanna a'lampamo ambokoi anjo daeraya.
9
1 Nai'mi Isa ri biseanga, nampa a'limbang anta'leang ammotere' mange ri kamponNa. 2 Battuna mange anjoreng, nia'mo se're tau peso' nierang rate ri katinroanga mae ri Isa. Nacini'na Isa antekamma lompona tappa'na ke'nanga, Nakanamo ri anjo tau pesoka, “Sa'barakko na'! Nipammopporammi dosa-dosanu.” 3 Anjo wattua nia' todong siapa are guru-guru agama anjoreng. Nakanamo lalang nyawana anjo guru-guru agamaya, “Anne taua nahinai Allata'ala!” 4 Na anjo nawa-nawanna ke'nanga Naassengi Isa. Jari Nakanamo Isa ri ke'nanga, “Angngapa naja'dala' kamma batenu ngaseng appikkiri'? 5 Kereanga la'bi gampang: angkanaya ‘Nipammopporammi dosanu’, yareka angkanaya ‘Ambangungko nai' nu'jappa’? 6 Mingka kamma-kamma anne erokKa' ampa'buttiangko angkanaya makoasai Ana' Ma'rupataua ampammopporangi dosaya ri lino.” Nampa Nakana Isa ri anjo tau pesoka, “Ambangungko nai', angkaki katinroannu, siagang ammotere' mako!” 7 Ambangummi nai' anjo tau pesoka, nampa ammotere' mange ri balla'na. 8 Ri wattunna nacini'mo tau jaia anjo apa kajarianga, malla' ngasemmi ke'nanga; nammuji-mujimo ke'nanga ri Allata'ala, lanri Napa'nyatanamo Allata'ala koasa kammaya lompona mae ri tu linoa. 9 Le'baki anjo a'lampami Isa ambokoi anjo tampaka. Lalang a'jappaNa, nia'mo Nacini' sitau pasingara' sima niarenga Matius, sitabang ammempo lalang ri kantoro'na. Nakanamo Isa ri ia, “Maeko amminawang ri Nakke!” Ammentemmi Matius nampa amminawang ri Isa. 10 Ri wattunna angnganre Isa ri balla'na Matius, jaimi pasingara' sima siagang tau nicini' kodia ri tau jaia battu ngaseng todong angngagangi Isa siagang ana'-ana' gurunNa angnganre. 11 Nia'mo siapa are tu Farisi anciniki ke'nanga sipangnganreang. Akkuta'nammi anjo tu Farisia ri ana'-ana' gurunNa Isa angkana, “Apa saba'na naNaagang sipangnganreang gurunnu pasingara' simaya siagang tau kodia sipa'na?” 12 Nalangngere'na Isa pakkuta'nanna ke'nanga, appialimi Isa Nakana, “Tu tenaya nagarring tena naparallu ri dottoro', passangalinna tu garringaji. 13 Pappilajarimi apa battuanna niaka nipau lalang ri Kittaka angkanaya: ‘Pangngamaseang Kukaeroki, jari teai koro'bang olo'-olo'’. Nasaba' iaji Kunia' battu lanri tu dorakaya ero' battu Kukio', jari teai tu tojenga.” 14 Le'baki anjo battumi ana'-ana' gurunna Yohanes Paje'ne' mae ri Isa. Akkuta'nammi ke'nanga ri Isa angkana, “Angngapa natappuasaya Katte ana'-ana' gurunTa, na ikambe anne siagang tu Farisia appuasaki'?” 15 Appialimi Isa angkana, “Maka biasai toanaya si'na atinna punna nia' ija bunting bura'nea ri tangnga-tangngana ke'nanga? Antekamma panggappanu? Tantu tena! Mingka lanarapiki sallang wattunna lanialle anjo bunting bura'nea battu ri tangnga-tangngana ke'nanga. Iaminjo wattua nalasi'namo atinna ke'nanga. 16 Tenanniakka tau annampeng baju toamo nakaeng beru ija napatampeng. Nasaba' punna assibeso' anjo baju toaya siagang anjo kaeng beru nipatampenga, tena tapila' a'jari luara'na kekke'na anjo baju toaya. 17 Kammayatompa, tenanniakka tau ammoli' anggoro' beru ri pammantangang lajappokamo. Nasaba' tena tareppe'na anjo pammantanganna, sa'genna tappela'-pela'mo anjo anggoroka. Jari anjo anggoroka musti anjorengi ri pammantangang berua todong niboli', sollanna tuli baji' anjo anggoroka siagang pammoneanna.” 18 Ri wattunna a'bicara Isa siagang ana'-ana' gurunna Yohanes Paje'ne', nia'mo sitau pamimping balla' sambayang battu. Akkulantuki ri dallekanNa Isa nampa nakana, “Silalonna mate ana' baineku. Mingka kuminasaiKi' naKimange ampadongkoki lima, sollanna attallasa' poleang.” 19 Ammentemmi Isa nampa a'lampa siagang ana'-ana' gurunNa amminawang mange ri balla'na anjo taua. 20 Ri tangngana aganga, nia'mo sitau baine battu ri boko a'reppese' mae ri Isa. Anjo bainea sampulomi anrua taung garring nalari cera'. Na nakana pikkiranna, “Manna kuseroja bawang jubaNa, akkullema' a'jari baji' ri garringku.” Jari naseromi jubaNa Isa. 22 Anjo wattua assailemi Isa, naNaciniki anjo bainea. Siagang Nakanamo ri anjo bainea, “Sa'barakko na'! Lanri tappa'nu ri Nakke, a'jari baji' mako ri garrinnu!” A'jari baji' memammi silalonna anjo bainea. 23 Le'baki anjo anrapi'mi Isa ri balla'na anjo pamimping balla' sambayanga. Nia'mo nacini' tau assuling-suling kamateyang, kammayatompa jaimi sa'ra gegere' nalangngere'. 24 Nakanamo Isa ri ke'nanga, “Assulu' ngasengko! Katena namate anne anaka, mingka attinronaja.” Ammakkala'mi taua angkakkali Isa. 25 Mingka assulu'na ngasemmo anjo taua, antama'mi Isa ri kamara'na anjo anaka, naNata'gala' limanna. Ambangummi nai' anjo ana' bainea. 26 Alla'bammi anjo kabaraka ri sikontu anjo daeraya. 27 A'lampami Isa battu anjoreng ri tampaka. Na ri tangngana aganga, nia'mo rua tau buta ampinawangi. Akkio'-kioki ke'nanga angkana, “O, Ana'na Daud, Kikamaseangi ikambe anne!” 28 Ri wattunna antama' Isa ri se'reang balla', battumi anjo ruaya tau buta mae ri Isa. Akkuta'nammi Isa ri ke'nanga Nakana, “Maka nupatappaki angkanaya akkulleko Kubajiki sa'gennu accini'?” Appialimi ke'nanga angkana, “Iye' tappaki ikambe!” 29 Jari Najamami Isa matanna ke'nanga siagang Nakana, “Lanri tappa'nu, a'jarimi ri kau apa numinasaia.” 30 Apaji nakkullemo accini' ke'nanga. Napakainga' dudumi Isa ke'nanga, sollanna tena napaui ke'nanga anjo kajarianga manna pole ri nai. 31 Mingka a'lampa tonji ke'nanga napa'la'bang anjo kabara' Nagaukanga Isa ri sikontu anjo daeraya. 32 Ri wattunna a'lampamo anjo tau ruaya, nia'mo pole se're tau pepe siagang nisoso' ri setang nierang mae ri Isa. 33 Nabongkami Isa assulu' anjo setanga battu lalang ri kalenna anjo tau pepea; sa'genna akkulle memammo silalonna a'bicara anjo tau pepea. Lannasa' ngasemmi tau jaia anciniki anjo kajarianga. Nakanamo ke'nanga, “Tena le'bakapaki' accini' kajariang kammaya anjo lalang ri pa'rasangang Israel!” 34 Mingka nakanamo tu Farisia, “Kakapalanaji anjo setanga assarei koasa nakkulle Nabongka assulu' anjo setanga.” 35 Kammaminjo pa'lampanna Isa akkuliling battu ri se'reang kota mange ri kota maraenga; battu ri se'reang kampong mange ri kampong maraenga. Angngajara'mi lalang ri sikamma balla' sambayanga, siagang Napabattumi Kabara' Kasalamakkanga, ri passala' antekamma bateNa ammarenta Allata'ala salaku Karaeng. Naballei ngasemmi tau garringa na'jari baji' ngasemmo. Na anjo tau garringa a'rupa-rupai garrinna siagang kasessanna. Kammayatompa tu sala-salanga nabajiki ngaseng tommi. 36 Na ri wattunna Nacini' ngaseng Isa anjo tau jaia, tu'guru'mi pangngamaseanNa. Lanri sanrapangi ke'nanga gimbala' tappelaka siagang dodonga lanri tenana pakalawakinna. 37 Jari Nakanamo Isa ri ana'-ana' gurunNa, “Jaimi kattoang, mingka sike'de'ji tu lakkatto. 38 Jari pala'mi ri patanna tana sollanna nasuro battu pakattona.”
10
1 Nia' se're allo, Nakio'mi Isa sampuloa anrua ana' gurunNa battu asse're. Nampa Nasare ke'nanga koasa untu' ambongkai roh-roh ja'dalaka siagang amballei nakkulle baji' sikontu tu garringa kammayatompa tu sala-salanga. 2 Naia arenna anjo sampuloa anrua ana'-ana' gurunNa, iaminne: uru-uruna iamintu Simon (nigallaraka Petrus) siagang sari'battanna niarenga Andreas; nampa Yakobus siagang sari'battanna niarenga Yohanes, niarenga Zebedeus manggena. 3 Nampa Filipus siagang Bartolomeus, Tomas siagang Matius pasingara' simaya; kammayatompa Yakobus ana'na Alfeus, siagang Tadeus; 4 na kala'busanna iamintu Simon nigallaraka Patriot, siagang Yudas Iskariot ambalukangai Isa. 5 Le'baki anjo Nasuromi Isa anjo sampuloa anrua tu nisuroNa. Na Napasang angkana, “Teako a'lampai mange ri pantaranganna daerana tu Yahudia. Tea tongko mangei ri kota-kotana tu Samariaya. 6 Mingka a'lampamako mange ri tu Israelka, mange ri tau sala oloanga ri katallassanna. 7 Pabattuammi ke'nanga angkanaya tasalloami Nammarenta Allata'ala salaku Karaeng. 8 Pakabaji'mi sikamma tau garringa; pabangung poleangi tau matea pakabaji'mi tau garring salaya, siagang bongkami sikamma setanga. Na anne Kusareangako, apa kupassareang bawang-bawanji ri kau ngaseng. Jari passareang bawang-bawang tommi mae ri taua. 9 Teako angngerangi doe' lanubokong ri lampanu, baji' na doe' bulaeng, doe' pera', yareka doe' tambaga. 10 Tea tongko angngerangi pammoneang passidakka, yareka pakeang ruang lawara', teako angngerangi sapatu yareka takkang. Nasaba' sikamma tau anjamaya tena tanisareanna kaparalluanna. 11 Punna battuko mange ri se'reang kota yareka kampong, boyami tau eroka antarimako ri balla'na. Ammantang mako anjoreng sa'gennu a'lampa pole. 12 Punna antamakko ri se'reang balla', a'barisallang mako angkana, ‘Poro nibarakkaki ngasengko ri Batara sibatu balla'.’ 13 Na punna natarimajako anjo taua antama' ri balla'na, boli'mi kamma nammantang anjo barakkaka ri ke'nanga sibatu balla'. Mingka punna tanatarimayako ke'nanga, alle poleammi ammotere' anjo barakkaka. 14 Punna nia' tau ri se'reang balla' yareka ri se'reang kota taeroka antarimako, yareka taerokai ampilangngeri kana-kanannu, bokoimi anjo tampaka na nube'besang limbu'bu' niaka ri pala' bangkennu. 15 U'rangi! Angkanaya ri Allo Kiamaka sallang, lakkulleangangi nipammopporang tau niaka ri kota Sodom siagang Gomora, kala ia anjo tau niaka lalang ri kotaya!” 16 “Parhatikangi anne: Sanrapangko gimbala' tenaya pakkullena Kusuro antama' ri tangnga-tangngana kongkong romang sekkeka. Jari paralluko tutu sanrapang ularaka siagang tuna pa'mai' sanrapang jangang-jangang bodobangkenga. 17 A'jaga-jagako, nasaba' lanijakkalakko sallang nampa nierangko mange andallekang ri pangadelang agamaya. Lanisessako ri balla' sambayanga. 18 Lanierangko mange andallekang ri pamarentaya siagang karaenga, passabakkang amminawannu ri Nakke. Mingka iaminjo wattua la'jari kasampatang ri kau untu' la'jari sa'bingKu ri dallekanna ke'nanga siagang tu tenayapa naassengi Allata'ala. 19 Na punna nierangko mange laniadeli, teako bata-batai ri passala' lanupaua yareka antekamma batenu la'bicara. Nasaba' punna narapi'mo wattunnu la'bicara tena tanipauannu apa siratanga lanupau. 20 Nasaba' teai ikau la'bicara anjo wattua, passangalinna RohNa Manggea ri suruga la'bicara battu lalang ri kalennu. 21 Nia' sallang wattunna nakajariang nania' tau ampassareangi sari'battanna nasuro buno; yareka tau toa ampassareangi ana'na nasuro buno. Ana'-anaka lanaewai anrong manggena, siagang nasuro bunoi ke'nanga. 22 Lanikabirisiko ri tau jaia passabakkang amminawannu ri Nakke. Mingka inai-nai tuli attahang sa'genna kala'busang tallasa'na, iami lanipasalama'. 23 Punna nisessako ri se'reang kota, lariko mange ri kota maraenga. Kupauangko angkanaya: Tanula'bangapi numangei sikontu kota-kotaya ri Israel, nania'mo battu poleang Ana' Ma'rupataua. 24 Takkulleai lompoangang ana' gurua na gurunna; kammayatompa takkulleai lompoangang palayanga na karaenna. 25 Sukku'mi sa'genna punna a'jari sangkamma ana' gurua siagang gurunna; yareka a'jari sangkamma palayanga siagang karaenna. Punna nigallara'mo Pinggawa setang kapala ruma tanggaya, la'biangampa pole kodina lanigallarrangi bone balla'na!” 26 “Teako mallakki ri ma'rupataua. Tenanniakka apa-apa taccokko talakacinikang sallang; siagang tenanniakka apa-apa nicokkoi talakaassengang sallang. 27 Apa-apa Kupabattua ri kau lalang ri sassanga, musti nupabattu poleangi lalang ri singara'na alloa. Siagang apa-apa nipa'bicikanga ri tolinnu, pa'la'bangi sa'genna ri kere-keremae! 28 Teako mallakki ri tau akkullea ammuno tubu, mingka tenaya koasaNa ammuno nyawa. Mingka musti mallakko mae ri Allata'ala, niaka koasana ammuno tubu siagang nyawa lalang ri naraka. 29 Ruang kayua cui-cui akkullei niballi se're seng. Mingka manna nakamma mamo, manna sikayua takkulleai tu'guru' naung ri buttaya punna taNakaerokangi Allata'ala Manggea. 30 Siapa jaina uu'nu irate ri ulunnu, le'ba' bilang ngasemmi. 31 Lanri kammana minjo, tea' mako mallakki! Nasaba' lompoangangi anggarannu naanjo jangang-jangang cui-cuia!” 32 “Inai-nai ammangakui ri dallekanna tau jaia angkanaya amminawangi ri Nakke, laKumangakui tongi sallang ri dallekanNa ManggeKu ri suruga. 33 Mingka inai-nai ansassaliA' ri dallekanna tau jaia angkanaya amminawangi ri Nakke, laKusassali tongi sallang ri dallekanNa ManggeKu ri suruga.” 34 “Teako harakki angkanaya passiamakkang battu Kuerang antama' ri anne linoa. Teai passiamakkang Kuerang, passangalinna passisala-salang. 35 Nasaba' passabakkang kabattuangKumi nalanaewa ana'-ana' bura'nea manggena; yareka nalanabali-bali ana'-ana' bainea amma'na; kammayatompa nalanabali-bali mintu bainea matoang bainena. 36 Jari tau lalang ballaka tonji sallang la'jari bali lompo. 37 Inai-nai la'bi angkamaseangi anrong manggena naiNakke, tasiratangai amminawang ri Nakke. Kammaya todong, inai-nai la'bi angkamaseangi ana'-ana' bainena yareka ana'-ana' bura'nena naiNakke, tasiratanga tongi amminawang ri Nakke. 38 Siagang inai-nai taeroka ampisangi salli'na nampa amminawang ri Nakke, tasiratanga tongi amminawang ri Nakke. 39 Inai-nai angkatutui nyawana, iami latappela' nyawana; mingka inai-nai tappela' nyawana lanri tuli jarreki pa'mai'na amminawang ri Nakke, iami langgappai katallassang satunggu-tunggua.” 40 “Inai-nai antarimako, iNakke natarima. Na inai-nai antarimA', natarima tommi ManggeKu assuroA' battu. 41 Inai-nai antarimai na'bia kalanri na'bina anjo taua lanatarimai sallang pahalana na'bia. Na inai-nai antarimai tau bajika kalanri baji'na anjo taua, lanatarimai sallang pahalana tau bajika. 42 Inai-nai assarei je'ne' inung kalase'renna tau tuna dudua, manna naje'ne' dinginja, passabakkang amminawanna ri Nakke, patappa'mi angkanaya tena tanggappana pahala sallang!”
11
1 Le'baki Naajara' Isa anjo sampuloa anrua ana' gurunNa, a'lampami ambokoi anjo tampaka. A'lampami mange angngajara' siagang ampa'la'bangi pappasanNa Allata'ala ri kota-kota ambania anjoreng. 2 Nalangngere'mi Yohanes, niaka lalang ri tarungkua, sikamma apa le'baka Nagaukang Isa Almasi. Nasuromi siapa are ana'-ana' gurunna mange akkuta'nang ri Isa angkana, 3 “Maka iKatte mintu le'baka Napa'janjiang Allata'ala? Yareka musti lanitayanginji maraenganga?” 4 Appialimi Isa Nakana, “Ammotere' mako mae ri Yohanes nanupauang apa le'baka nucini' siagang nulangngere', iamintu: 5 accini'mi tau butaya, a'jappami tau pesoka, a'jari baji'mi tau garring salaya, allangngere'mi tau tongoloka, attallasa' poleammi tau matea, kammayatompa nibirittakammi Kabara' Baji' battua ri Allata'ala mae ri tu kasi-asia. 6 Mate'nemi tau tenaya nasorongbokoA'!” 7 A'lampanamo ana'-ana' gurunna Yohanes, Nabicarami Isa mae ri anjo tau jaia passala'na Yohanes. Nakana, “Apa mange nucini' ri parang lompoa? Ruku' silawaraka nairi' anging? 8 Apa ero' mange nucini' anjoreng? Tau ammake pakeang ga'ga? Niaki ri balla' lompona karaenga tau ammakeang ga'gaya! 9 Jari angngapa nu'lampa mange ri parang lompoa? Erokko mange accini' na'bi? Annabai, ba'lalo la'biangampa na na'bia. 10 Nasaba' iaminjo Yohanes niaka nisero kana lalang ri Kittaka angkanaya, ‘Nakana Allata'ala, iaminne tunisuroKu, Kusuroa a'lampa rioloanganNu sollanNu nasungkeang oloang.’ 11 U'rangi laloi anne! Tenanniakka tau le'ba' nia' ri lino lompoanganga na Yohanes Paje'ne'. Mingka manna nakamma mamo, inai-nai kaminang tuna ri umma'Na Allata'ala, lalompoangangi na Yohanes. 12 Battu ri pakkaramula nabirittakanna Yohanes anne kabaraka sa'genna kamma-kamma anne, tuli nisusaina umma'Na Allata'ala battu ri tau eroka angkoasai passai ke'nanga. 13 Ri tenanapa nabattu Yohanes le'ba'mi napassareang ngaseng Musa sikontu pangngatorang agamaya. Kammayatompa sikontu apa lakajarianga le'ba'mi napau la'bi riolo na'bi-na'bia. 14 Na ka'de' ero'jako tappa', iaminjo Yohanes le'baka nisero kana kabattuanna. Mingka nukanai Elia anjo Yohanes. 15 Jari punna nia' tolinnu, pilangngerimi! 16 Apa laKupasanrapangangi anne taua ri jammanga? Sanrapangi ana'-ana' pakarenaya ri passua'-suarranga. 17 Nia' angkana, ‘Kelong a'rannu-rannu nikelongang, mingka taerokako akkarena! Kelong tu kamateang nikelongang, mingka taerokako angngarru'!’ 18 Battui Yohanes — nappuasa siagang tangnginunga anggoro'; nanupakkanaimo, ‘Tu setangngang!’ 19 Battuiseng Ana' Ma'rupataua — Nangnganre siagang angnginung; nanipakkanaimo ri taua, ‘Cinissai anjo taua, balalana siagang painunna! Manna pasingara' simaya siagang tau kodi sipaka Naagang ngaseng sipa'rappungang.’ Mingka manna nakamma mamo, lanipa'butti tonjia ero'Na Allata'ala lanri a'nyatana wassele'na.” 20 Le'baki anjo appakkaramulami Nacalla Isa sikamma tau niaka ammantang anjoreng ri kotaya, lanri tenana naero' toba' ke'nanga. Na punna nipikkiri', anjoreng minjo ri kota-kotaya jai gau' appakalannasa' le'ba' Nagaukang Isa ri ke'nanga. 21 “Cilaka mako ikau ngaseng tau niaka ammantang lalang ri Korazim! Kammayatompa ikau ngaseng tau niaka ammantang lalang ri Betsaida, cilaka ngaseng tommako! Ebara' angkana le'ba' tommi nigaukang anjo gau'-gau' appakalannasaka ri tangnga-tangnganu ri Tirus siagang Sidon, ma'nassa sallomi le'ba'na toba' siagang nasassala' kalenna tau niaka anjoreng. 22 U'rangi laloi angkanaya, punna narapi' Allo Kiamaka sallang, akkulleangangi Napammopporang Allata'ala dosa-dosana tau niaka anjoreng ri Tirus siagang Sidon nakala ikau ngaseng! 23 Kammayatompa ikau tau niaka ri Kapernaum! Gassingka nukana lanipakatinggiko nai' ri suruga? Tena! Passangalinna lanipelakko antama' ri naraka! Nasaba' ka'de' anjorengi ri kota Sodom le'ba' nigaukang anjo gau'-gau' appakalannasaka, mattantu nia' iji kota Sodom sa'genna kamma-kamma anne! 24 U'rangi laloi angkanaya, punna narapi' Allo Kiamaka sallang, akkulleangangi Napammopporang Allata'ala dosa-dosana tau niaka anjoreng ri kota Sodom nakala ikau ngaseng!” 25 Anjo wattua appala' doammi Isa Nakana, “O ManggeKu, Batara Makoasaya ri langika siagang ri linoa! Appala' sukkurukKa' ri Katte, lanri Kirahasiakanna ngaseng anne mae ri tau cara'deka siagang tau niaka pangngassenganna; mingka Kipappiassengangi mae ri tu tenaya sikolana. 26 Iaminjo ampakasannangi atinTa.” 27 Nampa Nakana Isa, “Yangaseng-ngasenna le'ba'mi Kipassareang mae ri Nakke. Tenanniakka manna sitau angngassengi AnatTa, pantaranganna iKatte. Tenanniakka todong angngassengKi', pantaranganna AnatTa, siagang sikamma tau le'baka Kupauang. 28 Battu ngaseng mako mae ri Nakke ikau tau posoa siagang tau battalaka erangnganna; laKupakabajiki pakkasia'nu. 29 Amminawang mako ri parentaKu, siagang appilajara' mako ri Nakke. Nasaba' inakke baji' pa'maikKa' siagang sa'barakKa'. Jari lasannammi nusa'ring. 30 Nasaba' lanukarannuangi apa Kupassuroanga, siagang laringangi nusa'ring apa Kupappieranganga ri kau.”
12
1 Nia' se're allo iamintu ri allo Pammari-marianga nanumalo Isa ri se'reang koko ase. Massing angngattili'mi ase ana' gurunNa Isa nampa nakanre lanri cipuru'na ngaseng. 2 Ri wattunna nicini' ke'nanga ri tu Farisia angkattiliki anjo asea, akkuta'nammi anjo tu Farisia mae ri Isa angkana, “Cini' sai anjo ana'-ana' gurunNu! Nadakkaimi atorang agamata nasaba' nagaukangi apa nipappisangkanga nigaukang ri allo Pammari-marianga.” 3 Appialimi Isa Nakana, “Tena le'bakapi nubaca lalang ri Kittaka, apa nagaukanga Karaeng Daud siagang taunna ri wattunna cipuru'? 4 Antamaki ri Balla'Na Allata'ala, nanakanre roti le'baka nipassareang ri dallekanNa Allata'ala. Padahala', manuru' ri pangatorang agamata takkulleai ke'nanga angkanrei anjo rotia — nasaba' imang-imangaji bawang akkulle angkanrei. 5 Yareka tale'bakapi nubaca lalang ri Kitta' Pangngatorang napabattua Musa; angkanaya imang-imang anjamaya ri allo Pammari-marianga lalang ri Balla'Na Batara nadakkai pangatorang allo Pammari-marianga, mingka tena tonja nipasalai? 6 Pilangngeri bajiki anne kanangKu: niaki anrinni tau lompoanganga na Balla'Na Batara. 7 Nia' tattulisi' lalang ri Kittaka angkanaya: Ia Kukaerokia iamintu pangngamaseang, teai koro'bang olo'-olo'. Ebara' nupahang baji'-baji' anjo bicaraya mattantu tena nupasalai tau tenaya salana. 8 Nasaba' makoasai Ana' Ma'rupataua irateanganna allo Pammari-marianga.” 9 Nabokoimi Isa anjo tampaka nampa mange ri balla' sambayanga. 10 Anjoreng ri balla' sambayanga nia' se're tau mate siali limanna. Nia'mo siapa are tau ero' ampa'boyangi sala Isa. Jari akkuta'nammi ke'nanga ri Isa angkana, “Maka akkulleji niballei taua ri allo Pammari-marianga?” 11 Appialimi Isa nakana, “Ebara' angkana nia' ri kau ammallaki sikayu gimbala', nampa tu'guru' anjo gimbala'na naung ri kali'bong lantanga ri allo Pammari-marianga, maka taerokako ampanaiki anjo gimbalaka battu ri kali'bonga lanri kaallo Pammari-mariangi? 12 Anjo rupataua lompoangangi anggaranna na gimbalaka! Lanri kammanami anjo, nakkulleja taua annulung ri allo Pammari-marianga.” 13 Le'baki anjo Nakanamo Isa ri anjo tau mate sialia limanna, “Pajonjoi limannu.” Napajonjomi limanna anjo taua; apaji na'jari baji'mo limanna anjo taua sangkamma limanna sialia. 14 Mingka a'lampami anjo tu Farisia, nampa sikongkolo' a'boya akkala' ero' ambunoi Isa. 15 Naassengi Isa angkanaya niakkali ero' nibuno ri anjo tu Farisia. Jari a'lampami ambokoi anjo tampaka. Jaimi tau ampinawangi. Naballei ngasemmi sa'genna a'jari baji' sikontu tau garringa. 16 Mingka Napisangkaimi ke'nanga ancaritai anjo apa Nagaukanga Isa mae ri tau maraenga. 17 Lanri kammana, a'rupami apa le'baka Nasuro pabattu Allata'ala ri Na'bi Yesaya angkanaya, 18 “Iaminne TunisuroKu le'ba' Kupilea, TunikamaseangKu siagang TuKupassiratanga ri atingKu. LaKupassareangi RohKu mae ri Ia, LaNakabarrangi kaadelangKu mae ri bansa-bansaya. 19 Tala'geakai siagang talakkio'-kiokai, yareka talappidatoai ri agang-agang lompoa. 20 TalaNata'bangai bulo ta'dundua TalaNabunoai kanjoli ca'dia rinrana. Lappattujuangi sa'genna a'rupa kaadelanga; 21 nalama'minasa sikontu bansa-bansaya ri Ia.” 22 Le'baki anjo, nia'mo se're tau buta siagang pepe nisosoka ri setang nierang mae ri Isa. Naballeimi Isa anjo taua sa'genna akkullemo accini' siagang a'bicara. 23 Lannasa' ngasemmi siagang angkanami taua, “Maka iaminne Ana'na Daud, le'baka nipa'janjiang?” 24 Nalangngere'na tu Farisia anjo pakkuta'nanga, appialimi ke'nanga angkana, “Nakkulle Nabongka setanga anne taua, lanri le'ba'naji nisare koasa ri pinggawana setanga.” 25 Mingka Naassengi Isa nawa-nawana anjo tu Farisia. Jari angkanami Isa ri ke'nanga, “Punna nia' se're bansa ta'bage-bage nampa simusu-musu para ia, ma'nassa tena nalajarre' ammenteng anjo bansaya. Kammayatompa punna nia' tau lalang kota, yareka nia' tau lalang se're balla' ta'bage-bage nampa simusu-musu para ia, mattantu laancuruki. 26 Kamma tomminjo lalang ri pamarentahanna Billisika, punna nia' silokoang ambongkai lokoang maraenga, ma'nassa ta'bage-bagemi siagang lanra'bami pamarentahanna anjo Billisika. 27 Angkana ngasengko nakkulle Kubongka setanga lanri nasareKu koasa pinggawana setanga. Jari punna kamma, lanri inai pata koasa nanabongka setanga ana'-ana' gurunnu? Kalenna ana'-ana' gurunnu ampa'butti angkanaya sala ngasengko! 28 Mingka iNakke nakkulle Kubongka setanga lanri koasa battu ri RohNa Allata'ala. Na iaminjo a'jari pammatei, angkanaya appakkaramulami ammarenta Allata'ala ri tangnga-tangnganu ngaseng. 29 Antekamma lakkulle antama' taua ri se'reang balla', angngalle passai barang-baranna punna tau gassing patanna balla'? Mattantu nasikkoki rolong anjo tau gassinga, patannaya balla'. Punna le'ba'mo nasikkokang anjo patannaya balla', nampami akkulle naalle passa barang-baranna. 30 Inai-nai taeroka a'jari agangKu, sikontutojenna a'jari musui ri Nakke. Siagang tau taeroka ambantuA' ri jama-jamangKu, sikontutojenna iami lampanraki jama-jamangKu! 31 Jari parallui nuasseng angkanaya, punna a'gau' salai siagang a'bicara hinai taua, akkulleji nipammopporang! Mingka punna nahinai RohNa Allata'ala, takkulleami nipammopporang! 32 Punna nia' tau ambali-bali Ana' Ma'rupataua, akkulleji nipammopporang; mingka punna nahinai Rohna Allata'ala, takkulleami nipammopporang ri kamma-kammaya anne kammayatompa ri ahera' sallang!” 33 “Sollanna akkulle baji' rapponna, parallui coppong se'rea poko'-poko'. Punna tacopponga se'rea poko'-poko', tena todong nalabaji' rapponna. Battu ri rapponnai nicini' antekamma copponna yareka tenana nacoppong se'rea poko'-poko'. 34 Ikau tau ja'dala' ngasengko! Antekammako lakkulle ampaui kabajikanga punna tau ja'dalakko? Apa nupau iamintu bonena lalang atinnu, assulu' battu ri bawanu! 35 Tau bajika, tuli apa baji' todong lanapau, nasaba' bajiki lalang atinna. Mingka tau ja'dalaka tuli apa-apa ja'dala' napau, nasaba' ja'dalaki lalang atinna. 36 Jari u'rangi laloi anne: ri Allo Kiamaka sallang, massing lanatanggong jawakki rupataua sikontu bicaranna tenaya matu-matunna. 37 Nasaba' battu ri bicarannu tonji sallang nalanitappuki ma'nassanu sala yareka tena.” 38 Le'baki anjo, nia'mo siapa are guru-guru agama siagang tu Farisi angkana ri Isa, “O Pa' Guru, eroki anne ikambe ancinikKi' anggaukangi gau' appakalannasaka.” 39 Appialimi Isa nakana, “Teai sipato' ja'dala'na siagang dorakana taua ri anne jammanga. NusuroA' anggaukangi gau' appakalannasaka? Manna se're tania' lanipicinikiangko gau' appakalannasa' pantaranganna gau' appakalannasa' le'baka kajariang ri kalenna Na'bi Yunus. 40 Tallungalloi le'ba' ammantang Na'bi Yunus lalang ri battanna juku' lompoa. Kamma tomminjo sallang Ana' Ma'rupataua, latallungalloi ammantang lalang ri battanna buttaya. 41 Punna Allo Kiama' sallang lambangungi taua ri Niniwe siagang taua ri anne jammanga antudui ke'nanga. Nasaba' anjo taua ri Niniwe toba'mi ri wattunna akkato'ba Na'bi Yunus ri ke'nanga. Mingka kamma-kamma anne nia' anrinni lompoangang na Na'bi Yunus! 42 Punna Allo Kiama' sallang, lambangungi karaeng baine battu Timboroka siagang taua ri anne jammanga antuntuki ke'nanga. Nasaba' ri wattu ero'na anjo karaeng bainea allangngereki kacara'dekanna Salomo bella sikalimi najappai, battu ri cappa'na buttaya. Mingka kamma-kamma anne, nia' anrinni lompoanganga na Salomo!” 43 “Punna a'lampa roh ja'dalaka ambokoi se'rea tau, la'lampai anjo roh ja'dalaka akkuliling ri tampa'-tampa' kalotoroka, ero' a'boya pammari-mariang. Mingka tena nanggappa tampa'. 44 Jari nakanamo ri kalenna, ‘Erokka' ammotere' mange ri balla' le'baka kupammantangi.’ Ri wattunna battu mange anjoreng, narapikammi anjo ballaka tena bonena, tangkasa' siagang baji' atoro'na. 45 Jari a'lampami pole nampa battu angngerang tuju roh ja'dala' maraeng, ja'dallanganga na ia. Nampa antama' ke'nanga ammantang ri kalenna anjo taua. Kale'bakkanna a'jari sannakkangammi kodina anjo taua na ri uru-uruna. Ia tomminjo lakajariang ri katallassanna taua ri anne jammanga.” 46 Lalang a'bicaraNa Isa siagang anjo tau jaia, battumi amma'Na siagang sari'battanNa. Eroki antama' ke'nanga angngagangi a'bicara Isa. 47 Nia'mo se're tau angkana ri Isa, “Bapa', niaki ammatTa siagang sari'battanTa pantarang. Eroki ke'nanga angngagangKi' a'bicara.” 48 Appialimi Isa Nakana, “Inaika ammakKu? Siagang inaika sari'battangKu?” 49 Najo'jo'mi sikontu tau amminawanga ri Ia nampa Nakana, “Iaminne ammakKu siagang sari'battangKu. 50 Inai-nai anggaukangi ero'Na ManggeKu ri suruga, iami siratang a'jari sari'battangKu, siagang siratanga a'jari ammakKu.”
13
1 Anjo memang alloa, a'lampami Isa ambokoi anjo ballaka, nampa mange ammempo ri biring tamparanga. 2 Jai sikali tau a'rappungang angkulilingi Isa. Lanri kammana a'lette'mi nai' ammempo Isa ri se'reang biseang. Na anjo tau jaia anjorengi ri biring tamparanga ammenteng. 3 Nampa Naajara' Isa ke'nanga a'rupa-rupa pangngajarang, lalang se're pangngebarang. Nakana, “Nia' sitau pamarri appakioro' bine. 4 Lalang napakioro'na anjo binea, nia'mo takkioro' ri aganga. Apaji nabattumo jangang-janganga angkanrei anjo binea sa'genna cappu'. 5 Nia' tommo bine takkioro' ri butta jaia batu-batunna, na kuranga buttana. Lanri kuranna buttana anjo tampaka, linta'mi attimbo anjo binea. 6 Mingka ri wattu nai'namo alloa, appakaramulami kalumeng anjo bine beru accu'laka; nampa kalotoro', sa'genna mate, nasaba' tenana nalantang antama' ri buttaya aka'na. 7 Kammayatompa, nia' todong bine takkioro' ri alla'na ruku'-ruku' akkatintinga; naipi'mi anjo bine beru accu'laka sa'genna mate. 8 Mingka nia' todong bine takkioro' ri butta copponga. Baji'mi attimbona anjo binea, coppongi poko'na, najai rapponna; nia' a'lappi sibilangngang, nia' a'lappi annampulo, siagang nia' todong a'lappi tallumpulo jaina rapponna.” 9 Le'ba'na Nacarita Isa anjo pangngebaranga, Nakanamo Isa ri ke'nanga, “Inai-nai nia' tolinna, pilangngerimi baji'-baji'!” 10 Le'baki anjo battumi ana'-ana' gurunNa Isa akkuta'nang ri Ia angkana, “Angngapa Kimmake pangngebarang punna angngajarakKi' mange ri anne tau jaia?” 11 Appialimi Isa Nakana, “Nasaba' ikau nisare ngaseng mako pangngassengang sollanna nupahang rahasiana ri passala' antekamma batena ammarenta Allata'ala. Mingka anjo ke'nanga tanisareai. 12 Nasaba' tau niakamo apa-apanna lanitambaiangi pole sijaiang, sa'genna kala'biang. Mingka tau tenaya apa-apanna, yareka naniaka sike'de' apa-apanna, lanialleangi ba'lalo ammotere'. 13 Iaminjo saba'na naKummake pangngebarang punna Kuajara' anjo tau jaia. Nasaba' accini'ji ke'nanga, mingka sanrapangi tau tenaya naccini'. Allangngere'ji ke'nanga, mingka sanrapangi tau tenaya nallangngere' siagang tau tenaya nammahang. 14 Lanri kammana, a'rupami apa le'baka nasero kana Na'bi Yesaya angkanaya, ‘Nakana Allata'ala: Latuli allangngerekko mingka tanupahangai; Latuli nuparhatikangi mingka tanuassengai apa kajarianga. 15 Nasaba' tattongko' ngasemmi pikkiranna ke'nanga anne, a'jari tamallangngerai tolinna na tatassungkea matanna. Kajariammi anne, sollanna taccinika matanna tallangngera tolinna, tammahanga pikkiranna, na taeroka ammotere' mae ri Nakke, nampa Kupa'jari baji' ngaseng ke'nanga.’ ” 16 Nakana pole Isa ri ana'-ana' gurunNa, “Ikau, teai sipato' upa'nu ngaseng. Nasaba' ikau accini' baji' ngaseng mako siagang allangngere' baji' ngaseng mako. 17 U'rangi, angkanaya jai na'bi siagang umma'Na Allata'ala ero' anciniki anne apa nucinika ri kamma-kammaya anne, mingka takkulleai nacini' ke'nanga. Eroki ke'nanga allangngereki anne apa nulangngereka ri kamma-kammaya anne mingka takkulleai nalangngere' ke'nanga.” 18 Le'baki anjo Nakanamo Isa, “Pilangngerimi battuanna anjo pangngebarang pakioroka. 19 Anjo bine takkioroka ri aganga, iaminjo a'jari pangngebarang mae ri tau allangngerekami ri passala' antekamma bateNa Allata'ala ammarenta, mingka tanapahangai anjo kabaraka. Battui kaja'dallanga angngalleangi anjo apa le'baka nipakioro' ri atinna ke'nanga. 20 Na anjo bine takkioroka ri butta jaia batu-batunna, iaminjo a'jari pangngebarang mae ri tau allangngerekami anjo kabaraka, na natarima memang silalonna siagang te'ne pa'mai'na. 21 Mingka tena nasallo attahang anjo kabaraka lanri tenana nabaji' angngaka'na anjo kabaraka lalang ri atinna ke'nanga. Punna natabamo susa yareka passessa ke'nanga lanri anjo kabaraka, ta'giling memammi silalonna atinna ke'nanga. 22 Naia bine takkioroka ri alla'na ruku'-ruku' akkatintinga, iaminjo pangngebarang mae ri tau allangngerekami anjo kabaraka, mingka ranggasela iji atinna ke'nanga, siagang ero' dudui kalumanynyang lalang ri katallassanna. Lanri kammana, rapang kasepekammi lalang ri atinna ke'nanga anjo Kabara' battua ri Allata'ala, sa'genna takkullea a'rappo. 23 Na anjo bine takkioroka ri butta copponga, iaminjo pangngebarang mae ri sikamma tau allangngerekami anjo kabaraka siagang napahang baji'-baji'. Jaimi rapponna ke'nanga, nia' a'lappi sibilangngang, nia' a'lappi annampulo, siagang nia' a'lappi tallumpulo wassele'na.” 24 Napaccaritammi pole Isa se're pangngebarang maraeng anjo tau jaia. Nakana, “Punna ammarenta Allata'ala, pangngebaranna lakammaminne: Nia' sitau pamarri appakioro' bine ri tanana. 25 Nia'mo se're bangngi, ri wattunna attinro ngasemmo taua, battumi musunna anjo pamarria a'lamung rea ri alla'na anjo asea nampa a'lampa. 26 Ri wattunna appakkaramulamo attimbo anjo lamung-lamunga, siagang appakkaramulamo kacinikang rapponna, kacinikang tommi anjo ruku' reaya. 27 Jari mangemi tungnganre gajina anjo pamarria ampauangi anjo pamarria angkana, ‘O Karaeng, sai lamungang baji'ji bawang le'ba' kilamung ri tanata? Antekamma nakkulle nia' todong ruku' rea attimbo anjoreng?’ 28 Appialimi anjo pamarria nakana, ‘Anjo panggaukanna musua.’ Jari akkuta'nammi pole anjo tungnganre gajina pamarria nakana, ‘Jari kikellai kisuro bi'bu' anjo reaya?’ 29 Appialimi anjo pamarria nakana, ‘Tena, nasaba' punna nibi'buki anjo reaya, akkullei ta'bi'bu' todong anjo asea. 30 Lappassammi attimbo todong anjo reaya sa'genna narapi' wattu pakkattoanga. Lakusuroi sallang pakattoa angkana: Passe'rei rolong anjo reaya siagang sikko' ngasengi nampa nitunu pepe'. Le'baki anjo passe'remi anjo asea, nampa nuboli' lalang ri pammantanganna.’ ” 31 Napaccaritammi pole Isa se're pangngebarang anjo tau jaia. Nakana, “Punna ammarenta Allata'ala, pangngebaranna lakammaminne: Nia' silisere' parekang lamungang ca'di dudu nialle ri se'reang tau, nampa nalamung ri kokonna. 32 Anjo lisere' lamunganga, iami lisere' lamungang kaminang ca'di ri linoa. Mingka punna attimbomo anjo lisere' lamunganga, iami a'jari poko' kaminang lompo ri sikamma lamung-lamungang niaka anjoreng. A'jarimi poko' lompo, sa'genna battumo jangang-janganga appare' ru'mung ri tangke-tangkenna.” 33 Nia' pole se're pangngebarang maraeng Nacarita Isa mae ri anjo tau jaia. Nakana, “Punna ammarenta Allata'ala, sanrapangi pa'gambang niallea ri sitau baine, nampa napasileo' siagang patampulo litere' labu'. Sa'genna pila' a'bakka' jaina anjo labuka!” 34 Sikontu anjo Napangngajarranga Isa mae ri tau jaia, ammakei pangngebarang. 35 Lanri kammana, a'rupami apa le'baka napau na'bia angkana, “PungKu a'bicara ri ke'nanga pangngebarang Kupake Kupakasingara' ngasengi mae ri ke'nanga apa-apa taccokkoa battu ri uru kajarianna anne linoa.” 36 Le'baki anjo, Nabokoimi Isa anjo tau jaia, nampa antama' ri balla'. Battumi ana'-ana' gurunNa akkuta'nang angkana, “Kipakasingara' sai ri kambe battuanna anjo pangngebarang rea attimboa ri alla'na asea.” 37 Appialimi Isa Nakana, “Anjo tau appakioroka lamungang baji', iaminjo Ana' Ma'rupataua nataba. 38 Anjo tanaya, iaminne linoa nataba. Na anjo lamungang bajika, iamintu tau a'jariamo umma'Na Allata'ala. Na anjo reaya, iamintu tau mannurukia ri Billisika. 39 Na ia musu appakioroka rea iamintu Billisika. Wattu pakkattoanga, iamintu Allo Kiamaka, na anjo tau akkattoa, iamintu sikamma malaekaka. 40 Antekamma batena nipasse're nampa nitunu anjo reaya, lakamma tommi anjo sallang ri Allo Kiamaka. 41 LaNasuroi malaeka'-malaeka'Na Ana' Ma'rupataua ampasse're ngasengi sikontu tau a'jari passabakkanga na'gau' dosa taua, kammayatompa sikontu tau a'gau' ja'dalaka. 42 Lanipela' ngasengi ke'nanga antama' ri bara pepe' a'rinra-rinraya; anjoremmi ke'nanga langngarru'-arru', angkasiaki sessaya. 43 Na sikontu tau anggaukangai ero'Na Allata'ala laccayami sanrapang mataalloa lalang ri Lino BeruNa Allata'ala, a'jaria Manggena ke'nanga. Jari, punna nia' tolinnu, pilangngerimi baji'-baji'!” 44 “Punna ammarenta Allata'ala, pangngebaranna lakammaminne: Nia' barang-barang taccokko lalang butta, nanibuntulu' ri se'reang tau, na napoterang pole anjo baranga antama' ri buttaya. Nampa, lanri teai sipato' rannuna, a'lampami anjo taua ambalukang ngasengi sikontu barang-baranna, na nampa ammotere' amballi anjo tampaka sumpaeng.” 45 “Punna ammarenta Allata'ala, pangngebaranna lakammaminne: Nia' sitau padanggang a'boya mutiara ka'jalaka ballinna. 46 Ri wattunna ammuntulu' mutiara sannaka ga'gana, a'lampa memammi linta' mange ambalukang ngasengi sikontu barang-baranna, nampa ammotere' amballi anjo mutiara silisereka.” 47 “Punna ammarenta Allata'ala, lasanrapangi jala nibuanga ri tamparanga, nanggappa a'rupa-rupa juku'. 48 Ri wattunna rassimo anjo jalaya, niangka'mi nai' ri paboya jukuka, na nierang nai' ri tompo'na buttaya. Nampa ammempo ke'nanga ansa'la'-sa'laki anjo jukuka: anjo juku' bajika napantamaki ri katoanga, mingka anjo juku' kodia nipelaki. 49 Kammaminjo sallang kajarianna ri Allo Kiamaka: labattui malaeka'-malaeka'Na Allata'ala ansa'laki sikontu tau ja'dalaka siagang tau anggaukangai ero'Na Allata'ala. 50 Nampa napela' anjo sikontu tau ja'dalaka antama' ri bara pepeka. Anjoremmi ke'nanga langngarru'-arru', angkasiaki sessaya.” 51 Akkuta'nammi Isa Nakana, “Maka nupahang ngasenji anne Kupakkanaya?” Appialimi ke'nanga angkana, “Iye' Bapa', napahanji ikambe.” 52 Jari Nakanamo Isa, “Lanri kammana minjo na anjo sikamma guru agama a'jariamo umma'Na Allata'ala, sanrapangi patanna balla' ampasuluka ngasengi barang-barang beruna siagang barang-barang sallona battu ri pammolikang barang-baranna.” 53 Le'ba'na Nacarita Isa anjo sikammaya pangngebarang, a'lampami ambokoi anjo tampaka, 54 nampa ammotere' mange ri pa'rasanganNa. Battuna mange anjoreng, mangemi ri sikamma balla' sambayanga angngajara'; na lannasa' ngasemmo taua allangngereki anjo apa Napangngajarranga. Nakanamo ke'nanga, “Battu kemaei anggappa pangngassengang kammaya anjo anne Taua? Battu kemaei anggappa koasa kammaya lompona Nakkulle anggaukangi gau'-gau' appakalannasaka? 55 Sai ana'na tukang kayua anne Taua? Sai niarengi Maria amma'Na, siagang assari'battangi Yakobus, Yusuf, Simon na Yudas? 56 Siagang sari'battanNa bainea anrinni ngaseng tonji ammantang. Battu kemae ngasengi Nagappa anjo sikammaya?” 57 Jari tenamo naero' taua antarimai Isa antama' anjoreng ri pa'rasanganga. Nakanamo Isa ri ke'nanga, “Punna na'bi taua, nipakalompoi ri kere-keremae; mingka punna ri kamponNa yareka ri balla' KalenNa tonji, taerokai taua ampakalompoi.” 58 Jari tenamo Naero' Isa appare' gau' appakalannasa' anjoreng, lanri tenana natappa' ke'nanga ri KalenNa.
14
1 Anjo wattua, Herodes a'jari karaeng ri pa'rasangang Galilea. Nalangngere'mi Herodes kabara'Na Isa. 2 Nakanamo Herodes ri pagawena, “Mattantu Yohanes Paje'ne' anjo taua attallasa' poleang! Iaminjo namakoasa kamma anggaukangi anjo gau'-gau' appakalannasaka.” 3 Nasaba' le'baki pirangalloang nasuro jakkala' Herodes anjo Yohanes, nampa nasikko' na napantama' ri tarungkua. Passabakkang bainenna niarenga Herodias nanajakkala'. Na anjo Herodias, le'ba' bainenna sari'battanna iamintu niarenga Filipus, naalle nabuntingi Herodes. 4 Nale'baki nipakainga' ri Yohanes sollanna tena nabuntingi anjo bainenna sari'battanna. Nakana Yohanes, “Takkulleako a'bunting siagang Herodias!” 5 Na sikontutojenna, eroki Herodes assuro bunoi Yohanes, mingka mallaki ri tau jaia. Nasaba' anjo Yohanes nipatappaki ri taua ma'nassa na'bi. 6 Nia' se're wattu assua'-suaraki Herodes, ansua'-suarri allo kalassukanna. Anjo wattua nasuromi ana' tulolonna Herodias a'dansa ri dallekanna sikamma toana niaka hadere'. Nasanna' sannanna pa'mai'na Herodes anciniki lanri sanna' baji'na batena a'dansa tulolonna. 7 Na lanri sannang duduna pa'mai'na, najanjimi siagang assumpami Herodes, ri anjo tulolonna angkanaya manna apa napala' tena tanisarena. 8 Na lanri niajara' salai ri amma'na, nakanamo anjo tuloloa, “Kupalaki nanisareanga' ulunna Yohanes Paje'ne'. Ero' memanga' kamma-kamma anne nipadongko' irate ri kapparaka!” 9 Nalangngere'na Herodes anjo apa napalaka, teaimi sipato' susana nyawana. Mingka lanri le'ba'namo a'janji siagang assumpa ri dallekanna ngaseng toananna, takkulleami tanaturukiang pappala'na anjo tuloloa. 10 Nasuromi taua mange ri tarungkua, mange ansamballei kallonna Yohanes. 11 Nampa nierang ulunna antama', nipadongko' rate ri kapparaka. Nisareammi anjo tuloloa; nampa napassareang anjo tuloloa mae ri amma'na. 12 Le'baki anjo, battumi ana'-ana' gurunna Yohanes angngallei maya'na, namange ke'nanga antarawangi. Nampa a'lampa ke'nanga ampabattuangi Isa anjo apa kajarianga. 13 Nalangngere'na Isa anjo kabara'na Yohanes, nai'mi ri biseanga, na'lampa kale-kalenna ambokoi anjo tampaka. A'lampai mange akkale-kale ri pammantangang sino-sinoa. Mingka nalangngere'na taua anjo, a'lampami ke'nanga ambokoi kota-kotana mange ampinawangi Isa. Ammolongangi ke'nanga a'jappa rate ri bontoa mange ri tampa' lanamangeia Isa. 14 Ri wattunna naung Isa battu ri biseanga, Nacini'mi anjo tau jaia. Tu'guru'mi pangngamaseanNa Isa anciniki ke'nanga. Naballeimi sikamma tau garringa, niaka todong battu. 15 Ri wattu karuennamo, battumi ana'-ana' gurunNa akkuta'nang ri Ia angkana, “Karuemmi anne, nampa bella anne tampa' nipammantangia. Bajikangang Kisuromi anne tau jaia ammotere', sollanna akkulle ke'nanga ammalli apa-apa lanakanre ri kampong-kamponga.” 16 Nakanamo Isa, “Tea' mako suroi a'lampa ke'nanga. Ikau ngasemmo assarei kanre.” 17 Appialimi ana'-ana' gurunNa Isa angkana, “Mingka limambatuji roti siagang ruang kayuji juku' anne niaka ri katte.” 18 Nakanamo Isa, “Erangi mae anjo apa niaka.” 19 Nasuromi anjo tau jaia ammempo naung ri paranga. Le'baki anjo, Naallemi anjo roti limambatua siagang juku' ruang kayua. Nampa acconga nai' ri langika, appala' sukkuru' ri Allata'ala. Nabage-bagemi anjo rotia, nampa Napassareang mae ri ana'-ana' gurunNa, sollanna natawa-tawai anjo tau jaia. 20 Angnganre ngasemmi ke'nanga sa'genna bassoro'. Le'baki angnganre ke'nanga, napasse'remi ana'-ana' gurunNa Isa sikamma kanre niaka tassesa; nia' sampulo anrua baku' rassi ngaseng anjo kanre alla'bia. 21 Tau angnganrea anjo wattua, nia' limassa'bu jaina, natanirekengapa tubai'-bainea siagang ana'-anaka. 22 Le'baki anjo Nasuromi Isa ana'-ana' gurunNa nai' ri biseanga. Nampa Nasuro ke'nanga a'lampa riolo a'limbang ri tamparanga. Na tau jaia Nasuro ngasemmi ammotere'. 23 A'lampana ngasemmo tau jaia, a'lampa tommi Kale-kalenNa nai' ri se'reang bonto, mange appala' doang. Sa'genna ta'rapi' bangngia nia' iji Isa anjoreng Kale-kalenNa. 24 Anjo wattua, bellami antama' ri tangngana tamparanga biseang nadongkokia ana'-ana' gurunNa. Nipatappa'-tappasa'mi ri bombanga biseanna ke'nanga, lanri a'ruppami siagang anging. 25 Ri wattunna subumo, nia'mi Isa battu, a'jappa irate ri tompo'na je'neka. 26 Ta'bangka ngasemmi ana'-ana' gurunNa anciniki a'jappa ri tompo'na je'neka. Ammarrammi ke'nanga napakamma malla' angkana: “Setang!” 27 Mingka linta'mi Isa appiali Nakana: “Sannangko! Teako mallakki. INakkejinne Isa!” 28 Nakanamo Petrus, “Punna ma'nassa iKatte Isa, suroma' battu mae ri Katte, a'jappa irate ri tompo'na je'neka.” 29 Appialimi Isa Nakana, “Battu mako mae.” Jari naummi Petrus battu ri biseanga, a'jappa irate ri tompo'na je'neka, ero' mange ri Isa. 30 Mingka nacini'na Petrus bombang lompoa ri tamparanga, nabattuimi malla'. Appakkaramulami tallang. Ammarrang lompomi nakana, “O Batara, Kiallea'!” 31 Linta'mi Isa anta'galaki limanna. Nampa Nakana, “O Petrus, anne ikau kurang tappakko. Apa saba'na nanubata-bata?” 32 Nampa nai'mi sipa'rua ri biseanga. Na'jari sannang tommo anginga. 33 Su'ju' ngasemmi ana'-ana' gurunNa Isa anynyomba ri Ia. Angkanami ke'nanga, “Ma'nassa tojeng, iKattemi Batara Ana'Na Allata'ala!” 34 Ri wattunna battumo ke'nanga ri ba'leanna anjo tamparanga, naummi ke'nanga ri Genesaret. 35 Nicini'mi ri tau niaka anjoreng angkana niaki Isa battu. Napa'la'bammi ke'nanga anjo kabara' kabattuanNa Isa ri sikontu daera a'reppeseka ri anjo kotaya. Battumi nierang sikontu tau garringa mange ri Isa. 36 Napala'mi ke'nanga sollanna nipa'biang ke'nanga anjamai jubaNa Isa, manna cappa'naja. Na sikontu tau garring anjamayai jubaNa, a'jari baji' ngasemmi.
15
1 Nia' siapa are tu Farisi siagang guru-guru agama battu ri Yerusalem mae ri Isa. Akkuta'nammi ke'nanga ri Ia angkana, 2 “Apa saba'na nanadakkai ana'-ana' gurunNu ada'-ada'na tu riolota? Kapunna langnganre ke'nanga tena na'bissa lima situru' atoranga!” 3 Appialimi Isa Nakana, “Mingka angngapa nanudakkai todong passuroNa Allata'ala, lanri ero'nu bawang anggaukangi ada'-ada'na tu riolonu? 4 Nasaba' Nakana Allata'ala, ‘Pakala'biriki anrong-manggenu.’ Siagang, ‘Inai-nai ampakka'-pakkanai anrong-manggena, siratangi nihukkung mate.’ 5 Mingka nupangngajarrangi ikau ngaseng angkana: punna nia' tau angkana ri tau toana angkanaya, ‘Le'ba'mi kupassidakkang mae ri Allata'ala anjo doe' lakupassareanga ri katte,’ 6 anjo tau kammaya tenamo nakkulle nikellai dudu ampakala'biriki tau toana. Jari lanri ada'-ada'na tu riolonu nanubalang parekang kana-kana Napangngajarranga Allata'ala. 7 Munape' ngasengko antu! Annaba sikalimi apa le'baka napau Na'bi Yesaya, ansero kana ngasengko angkanaya: 8 ‘Kammaminne kananNa Allata'ala: Napakala'birikKa' anne taua mingka poro ri bawanaji bawang naia atinna sanna' bellana ri Nakke. 9 Tena matu-matunna anynyomba ke'nanga ri Nakke, nasaba' atorang rupatauji napangngajarrang kamma le'ba' angkana iaminjo atorang Kupassareanga.’ ” 10 Le'baki anjo Nakio'mi Isa tau jaia nampa Nakana ri ke'nanga, “Pilangngerimi sollanna nupahang! 11 Teai apa-apa antamaya ri bawaya anrantassi rupataua; mingka apa-apa assuluka battu ri bawaya, iaminjo anrantassi kalenna.” 12 Battumi ana'-ana' gurunNa angkana, “Maka Kiassenji angkanaya kasi'rikangi anjo tu Farisia nalangngeretTa akkana kamma?” 13 Appialimi Isa angkana, “Sikamma lamung-lamung tenaya Nalamungi Manggeku ri suruga lanibi'buki. 14 Tea' mako jampangi anjo tu Farisia. Anjo ke'nanga sangnging pamimping-pamimping buta. Na punna tau buta ammimping tau buta, tena tatu'guru'na rua-rua naung ri solonganga.” 15 Angkanami Petrus, “Kipakasingara' sai battuanna anjo pangngebaranga ri kambe, Bapa'!” 16 Appialimi Isa mae ri ke'nanga Nakana, “Maka tena ijapa nanupahangi? 17 Tenapa nuassengi, angkanaya apa antamaya ri bawaya, iaminjo naung ri parruka nampa assulu' poleang? 18 Mingka apa assuluka battu ri bawaya, iaminjo battu lalang ri atia; iaminjo anrantassi taua. 19 Nasaba' battu lalammi ri atia ammumba pikkirang-pikkirang ja'dalaka, a'jaria saba' nammuno taua, a'gau' salimara', a'gau' bawang, a'lukka', siagang appitina. 20 Yangaseng minjo kammaya a'jari saba' na'jari rantasa' rupataua. Jari teai lanri angnganre ta'bissa lima.” 21 Le'baki anjo, Nabokoimi Isa anjo tampaka. A'lampami mange ri daera ambania ri kota Tirus siagang Sidon. 22 Nia'mo sitau baine tu Kanaan niaka anjoreng ri daeraya battu mae ri Isa akkiok-kio' angkana, “O Ana'na Daud, Kikamaseanga'! Napantamakki setang ana' baineku. Sanna' dudumi sessana!” 23 Mingka tena sikali Nappiali Isa ri anjo bainea. Napala'mi ana'-ana' gurunNa sollanna Nasuro anjo tu bainea a'lampa. Nakanamo ke'nanga, “Bapa' Kisuro laloi anjo bainea a'lampa. Amminawanji apparicu ri bokota!” 24 Appialimi Isa ri anjo bainea, Nakana, “INakke nisuro mangejA' bawang ri bansa Israelka, la'biangampa ri tau sala oloanga.” 25 Battumi anjo bainea su'ju' ri dallekanNa Isa angkana, “Kitulullaloa' tuang!” 26 Appialimi Isa Nakana, “Tabajikai nialle kanrena ana'-anaka, nampa nipassareang mae ri kongkonga.” 27 Appialimi anjo bainea nakana, “Kammatojengi tuang, mingka kanre nakanrea kongkonga, iamintu sesa-sesa kanre tu'guruka battu ri mejang pangnganreanna karaenna.” 28 Nakanamo Isa ri anjo bainea: “Ibu', teai sipato' lompona tappa'nu. Boli'mi kamma na'jarimo apa nukaerokia!” Apaji naia memang anjo wattua na'jari baji' poleammo ana'na anjo bainea. 29 Nabokoimi Isa anjo tampaka, nampa a'jappa ri birinna Tamparang Galilea. Nampa nai' ammempo ri se'reang bonto. 30 Jaimi tau ambattui. Nia' angngerang tau tempang, tau buta, tau peso', tau pepe, siagang a'rupa-rupa garring maraengang. Niboli'mi ri dallekanNa Isa yangasenna anjo tau garringa. Nampa Naballei Isa na'jari baji' ngaseng silalonna. 31 Lannasa' sikali sikontu tau niaka anjoreng, lanri nacini'na tau pepea akkullemi a'bicara, tau tempanga a'jari baji'mi, tau pesoka a'jappami, siagang tau butaya accini'mi. Ammuji-muji ngasemmi ke'nanga ri Allata'alana bansa Israel. 32 Le'baki anjo Nakio'mi Isa ana'-ana' gurunNa nampa Nakana, “Kukamaseanna anne tau jaia. Tallungallomi angngagangA', natenamo kanrena ke'nanga. Tena nalaKupa'biangi ammotere' ke'nanga punna cipuru', gassingka kodi sallang pakkasia'na ke'nanga ri tangngana aganga!” 33 Akkuta'nammi ana'-ana' gurunNa ri Ia angkana, “Kemaeki' akkulle ampanggappangi kanre tau sikammaya anne jaina ri daera bella kammaya anne?” 34 Akkuta'nammi Isa ri ke'nanga angkana, “Siapa mami jaina roti niaka ri kau ngaseng?” Appialimi ke'nanga angkana, “Tuju mami, siagang pirang kayu are juku' ca'di-ca'di.” 35 Nasuromi Isa ammempo naung anjo tau jaia. 36 Nampa Naalle anjo roti tujumbatua siagang anjo jukuka. Le'baki appala' sukkuru' ri Allata'ala, Nabage-bagemi anjo rotia siagang jukuka nampa Napassareang mae ri ana'-ana' gurunNa. Natawa-tawaimi ke'nanga anjo tau jaia. 37 Angnganre ngasemmi anjo tau jaia sa'genna bassoro'. Le'baki anjo napasse'remi ana'-ana' gurunNa Isa kanre niaka tassesa. Nia' tuju baku' jaina rassi ngaseng. 38 Na anjo tau angnganrea, nia' patassa'bu tau jaina, natanirekengapa tu bai'-bainea siagang ana'-anaka. 39 Le'baki anjo nampami Nasuro Isa ammotere' anjo tau jaia. Nampa Ia KalenNa, nai'mi ri se'reang biseang, Na'lampa mange ri daera Magadan.
16
1 Nia' siapa are tu Farisi siagang tu Saduki battu mae ri Isa ero' ampa'boyangi kodi. Napala'mi ke'nanga sollanna appa'nia' gau' malompo na Napa'butti Isa angkanaya ma'nassa battu tojengi ri Allata'ala. 2 Appialimi Isa ri ke'nanga angkana, “Punna lalabu alloa, nanucini' eja langika nuassemmi nubatei angkana talabosiai. 3 Na punna bari'basa', nanucini' rammanga le'leng nuassemmi angkana labattui bosia. Jari akkullei nuasseng la'bi riolo angkanaya labosi yareka talabosiai lanri akkullei nubatei ri langika. Mingka pammateina jammanga tanuassengai nubatei. 4 Teai sipato' ja'dala'na siagang dorakana ngaseng taua ri anne jammanga. NusuroA' anggaukangi gau' appakalannasaka. Mingka manna sirupa gau' appakalannasa' tena todong lanipicinikiangko, pantaranganna gau' appakalannasa' le'baka kajariang ri kalenna Na'bi Yunus.” Le'baki akkana kamma Isa, a'lampami ambokoi ke'nanga. 5 Wattunna battumo ana'-ana' gurunNa Isa ri ba'leanna tamparanga nampami naasseng angkanaya nakaluppai ke'nanga angngerang roti. 6 Nakanamo Isa ri ke'nanga, “Tutuko ri pa'gambanna tu Farisia siagang tu Sadukia.” 7 Nalangngere'na ke'nanga akkana kamma Isa, angkanami ke'nanga para ia todong, “Nakkana kamma anjo nasaba' nikaluppai angngerang roti.” 8 Mingka Naassengi Isa anjo apa nabicaraya ke'nanga. Jari angkanami, “Angngapa napassala' tenana roti massing nubicara? Tena ngaseng najarre' tappa'nu! 9 Tena ngasempa nupahangi? Tena nuu'rangi anjo roti limambatua le'baka nipa'bage-bageang, ri limassa'bua tau jaina? Pirang baku' tassesa le'ba' nupasse're? 10 Siagang antekamma anjo roti tujumbatua nipa'bage-bageanga mae ri patassa'bua tau jaina? Pirang baku' le'ba' tassesa nupasse're? 11 Angngapa natanupahanga angkanaya teai passala' roti anjo Kubicaraya ri kau ngaseng sumpaeng? Tutuko ri pa'gambanna tu Farisia siagang tu Sadukia!” 12 Kale'bakkanna napahammi ana'-ana' gurunNa Isa angkanaya nisuroi ri Isa sollanna tutu ke'nanga ri pangngajarang salana tu Farisia siagang tu Sadukia. Jari teai passala' nikellaina ke'nanga tutu ammake pa'gambang punna appare' roti. 13 Anjo wattua a'lampai Isa mange ri daera a'reppeseka ri Kota Kaisarea Filipi. Anjoreng, akkuta'nammi Isa ri ana'-ana' gurunNa Nakana, “Turu' pakkanana taua, inai anjo Ana' Ma'rupataua?” 14 Appialimi ana'-ana' gurunNa nakana, “Nia' angkana Yohanes Paje'ne'. Nia' todong angkana Elia. Maraengannaya angkana Yeremia, yareka kalase'renna na'bi-na'bia.” 15 Akkuta'nammi Isa ri ke'nanga Nakana, “Mingka turu' ri panggappanu ngaseng inaiA' anne?” 16 Appialimi Petrus nakana, “IKattemi Karaeng Mappasalamaka, Ana'Na Allata'ala Mattallasaka.” 17 Nakanamo Isa, “Upa' sikaliko kau Simon ana'na Yona! Nasaba' teai rupataua ampauangko anne, mingka ManggeKu ri suruga. 18 Lanri kammana, siratangi nuasseng angkanaya, ikau mintu Petrus, batu makassaka. Iratemi ri tompo'na anne batu pa'dongkokanga laKupaenteng garejaKu, tenaya lambetai, manna pole kamateanga. 19 LaKupassareangi ri kau konci Lino BeruNa Allata'ala. Apa nupappisangkanga ri linoa, nipappisangkang tongi ri suruga. Siagang apa nupattojenga ri linoa, lanipattojeng tongi ri suruga.” 20 Le'baki anjo Napasammi ana'-ana' gurunNa sollanna tena napappiassengangi manna ri nai, angkanaya Iami Karaeng Mappasalamaka. 21 Anjo wattua appakkaramulami a'bicara silambusu'na Isa mae ri ana'-ana' gurunNa, angkanaya takkulleai ta'lampa mange ri Yerusalem angkasiaki passessa jaia. Iamintu passessa battua ri pingga'-pinggawana tu Yahudia, imang-imang kapalaya, kammayatompa guru-guru agamaya. Lanibunoi, mingka lanipattallasa' poleangi battu ri kamateanga ri makatalluna alloa! 22 Nibeso'mi Isa ri Petrus mae ri sa'ri nampa nipauang angkana, “Tapporo Napakabella laloi Allata'ala ri Katte anjo kammaya, Batara! Poro tena lalo nakajariang anjo kammaya ri Katte Batara!” 23 Mingka assailemi Isa ri Petrus nampa Nakana, “A'lampako anrinni, Setang! NualleA' nurompa-rompai. Antu pikkirannu, pikkirang rupatau; teai pikkiranNa Allata'ala!” 24 Nampa Nakana Isa mae ri ana'-ana' gurunNa, “Tau eroka amminawang ri Nakke takkulleai tanapariboko kaparalluang kalenna, nanapisang salli'na, nampa amminawang tuli ri Nakke. 25 Nasaba' inai-nai angkatutui nyawana, iami latappela' nyawana. Mingka inai-nai angkoro'bangkangi katallassanna untu' iNakke iami langgappai katallassanga. 26 Nasaba' apa matu-matunna nagappa ngaseng taua anne linoa punna latappela' katallassanna? Maka akkullei anjo katallassanga nipassambe apa-apa maraeng? 27 Tasalloami Nabattu Ana' Ma'rupataua siagang kakoasanNa ManggeNa, nirurungang ri malaeka'-malaeka'Na. Iaminjo wattua naNabalasa' massing panggaukanna rupataua. 28 U'rangi anne! Ri alla'nu anne hadereka anrinni, nia' talamateapi punna tenapa naciniki Ana' Ma'rupataua battu poleang a'jari Karaeng.”
17
1 Annangallo ribokoanganna, Naerammi Isa i Petrus, Yakobus siagang sari'battanna iamintu Yohanes, mange akkale-kale ri se'reang moncong tinggi. 2 Anjoreng, ti'ring tappinrami rupanNa Isa ri dallekanna ke'nanga: a'jari singaraki nicini' rupanNa kamma matanna alloa. Kammayatompa accillaki pakeanNa lanri kebo'na. 3 Nampa nia'mo battu nacini' ke'nanga Musa siagang Elia, a'bicara siagang Isa. 4 Nakanamo Petrus ri Isa, “Baji' sikali nikasia' ammantanga anrinni. Punna Kingai, Batara, erokka' appare' tallu balla' pammantangang anrinni: se're pammantanganTa, se're pammantanganna Musa, na se're pammantanganna Elia.” 5 Lalang a'bicarana Petrus, nia'mo rammang accaya manaung irateanganna ke'nanga. Nania'mo sa'ra kalangngerang battu lalang ri anjo rammanga angkana, “Iaminne Ana' nikamaseangKu. Napakate'nei atingKu. Pilangngerimi kananNa!” 6 Nalangngere'na ana'-ana' gurunNa Isa anjo sa'raya, teaimi sipato' malla'na ngaseng, sa'genna tassu'ju'mi ke'nanga naung ri buttaya. 7 Mingka battumi Isa anta'galaki ke'nanga. Nakana Isa, “Ambangungko nai', teako mallakki!” 8 Assailena ke'nanga, tenamo tau maraeng nacini' pantaranganna Isa. 9 Ri wattunna naung ke'nanga battu ri monconga, appasammi Isa ri ke'nanga Nakana, “Teako niakki ancaritai anjo kajariang nucinika sumpaeng manna ri nai, punna tenapa nipabangungi Ana' Ma'rupataua battu ri kamateanga.” 10 Akkuta'nammi ana'-ana' gurunNa Isa ri Ia angkana, “Angngapa nanakana guru-guru agamana tu Yahudia, angkanaya Elia labattu rioloangang?” 11 Appialimi Isa Nakana, “Battu memangi Elia ero' ampasadiai sikamma parallua nipasadia. 12 Mingka Kukana ri kau ngaseng, battumi Elia mingka tena niassengi ri taua. Sangka' rupami nigaukangi ri ke'nanga. Na kammatommi anjo lanagaukangangi ke'nanga Ana' Ma'rupataua.” 13 Nampami napahang ke'nanga angkanaya Yohanes Paje'ne' anjo natabaya kananNa Isa. 14 Ri wattunna ammotere' ke'nanga mange anjoreng ri tau jaia, nia'mo sitau bura'ne battu su'ju' ri dallekanNa Isa. 15 Angkanami anjo taua, “O Bapa', Kikamaseang laloi anakku. Natabai garring mate-mate jangang. Nateai sipato' sanna'na garrinna. Pammate sanna'na garrinna sa'genna biasai tu'guru' antama' ri pepeka yareka antama' ri je'neka. 16 Le'ba'mi kuerang mange ri ana'-ana' gurunTa, mingka tanakulleai ke'nanga amballei.” 17 Appialimi Isa angkana, “Teaiko anne sipato' ngaseng! Ma'nassa tau sala oloang ngasengko siagang tena ngaseng tappa'nu. Siapapi salloKu lammantang siagang lasa'bara' ri tangnga-tangnganu ngaseng? Erangi mae anjo anaka!” 18 Nampa Nabongka Isa anjo roh ja'dalaka battu lalang ri kalenna anjo anaka. Assulu'mi anjo roh ja'dalaka, na'jari baji'mo anjo anaka silalonna. 19 Ri wattunna kale-kalenna mami Isa, battumi ana'-ana' gurunNa akkuta'nang ri Ia angkana, “O Bapa', apa saba'na nakitakkullea anne ikambe ambongkai roh ja'dalaka?” 20 Appialimi Isa Nakana, “Nasaba' kurang tappa' ngasengko. U'rangi! Punna nia' tappa'nu manna sillompoja lisere' kaminang ca'di dudua, akkulleko angkana mae ri anne buluka, ‘A'lettekko anrinni mange anjoreng!’ ma'nassa tena ta'lette'na anne buluka. Jari tena takkulle nugaukang punna tappakko! 21 Mingka anne roh ja'dala' kammaya pappala' doangang siagang puasaji bawang akkulle ampasuluki.]” 22 Ri wattunna a'rappungang ana'-ana' gurunNa Isa ri Galilea, angkanami Isa ri ke'nanga, “Tenamo nasallo nanipassareammo Ana' Ma'rupataua mae ri kakoasanna rupataua. 23 Lanibunoi, mingka lambangung poleangi ri makatalluna alloa.” Jari sanna' ngasemmi si'nana atinna ana'-ana' gurunNa. 24 Ri wattunna battu Isa siagang ana'-ana' gurunNa mange ri Kapernaum, battumi pasingara' simaya ri Balla'Na Batara ri Petrus angkana, “A'bayara' tonji sima gurunnu yareka tena?” 25 Appialimi Petrus nakana, “A'bayaraki.” Ri wattunna ammotere' Petrus, nikuta'nammi ri Isa angkana, “O Simon, antekamma panggappanu? Inai musti a'bayara' sussung yareka sima, mae ri pammarentana anne linoa? Ra'yaka yareka tu battu pantarang pa'rasangang?” 26 Appialimi Petrus nakana, “Tu battu pantarang pa'rasanganga.” Angkanami Isa, “Punna kammanjo, tena naparallu ra'yaka a'bayara'. 27 Mingka takkulleaki' ansusai nyawana anjo taua. Jari a'lampamako mange ammekang ri tamparanga. Allei juku' uru nubantunga. Nia' doe' lanugappa lalang ri bawana anjo jukuka, anggannaka lanipa'bayarrang sima sipa'rua! Allei anjo doeka, nampa nubayara' simata mange ri Balla'Na Batara!”
18
1 Anjo wattua akkuta'nammi ana'-ana' gurunNa Isa ri Ia angkana, “Inai akkulle nikana kaminang malompo ri sikontu umma'Na Allata'ala?” 2 Akkio'mi Isa sitau ana'-ana', nampa Nasuro ammenteng ri dallekanna ke'nanga. 3 Nampa Nakana Isa, “Patappaki anne kanangKu! Punna a'jari kammako anne ana'-anaka, nampa mako akkulle a'jari umma'Na Allata'ala. 4 Inai-nai ampakatunai kalenna a'jari sanrapang anne anaka, iami la'jari kaminang malompo ri tangnga-tangngana umma'Na Allata'ala. 5 Na inai-nai antarimai ana'-ana' sanrapanga anne lanri iNakke, sanrapang iNakkemi natarima.” 6 “Inai-nai a'jari saba' natenamo natappa' ri Nakke tau ca'di kammaya anne, bajikangangi punna nigentungi batu kallonna nampa nitallangngang naung ri tamparanga. 7 Teai sipato' cilakana anne linoa lanri jaina passabakkang na'jari doraka rupataua. Mingka memang tuli lania'na anjo passabakkang kammaya. Mingka la'biangampa cilakana tau a'jari passabakkanga nadoraka paranna tau! 8 Punna passabakkang limannu yareka bangkennu nudoraka, bajikangang polongi nampa nupela'. Bajikanganji tenaya siali limannu yareka bangkennu assala' Napasalamakko Allata'ala, kala nipelakko antama' ri pepe'na narakaya sibatu kale. 9 Na punna passabakkang matannu nudoraka, bajikangang kocciki assulu' nampa nupela'. Bajikangangi tenaya matannu siali assala' Napasalamakko Allata'ala, kala nipelakko antama' ri pepe'na narakaya sibatu kale.” 10 “Tutuko! Tea' laloko hinai kalase'renna anne tau ca'di kammaya. Nasaba' u'rangi angkanaya, tuli niaki malaeka'na ke'nanga ri dallekanNa ManggeKu ri suruga. [ 11 Nasaba' tau sala oloanga ero' Napasalama', nabattu Ana' Ma'rupataua!] 12 Alarapanna, nia' sitau ammallaki sapi sibilangngang kayunna. Na punna tappela' sikayu, maka apa lanagaukang anjo taua? Antekamma panggappanu? Mattantu lanaboliki anjo sapinna salapampuloa assalapang ri bontoa, nampa a'lampa amboyai anjo sapinna sikayua tappelaka. 13 Tappa' mako angkanaya, punna nabuntulu'mo ammotere' anjo sapinna sikayua, lalompoangangi rannuna ri anjo sapi sikayua kala ri anjo sapi salapampuloa assalapang kayunna, tenaya natappela'. 14 Kamma tomminjo Manggenu ri suruga. Tena Nakellai kalase'renna anne tau beru tappaka ri Nakke sala oloang.” 15 “Punna sala sari'battannu ri kau, battuko mae ri ia nanupauang kasalanna. Ikau tommo sipa'rua punna nupauangi. Na punna napilangngeriji kanannu, nugappamintu ammotere' anjo sari'battannu. 16 Mingka punna tena napilangngeriko, akkiokko pole se're yareka rua tau, nu'rurung mange ampauangi pole. Nasaba' nia' tattulisi' lalang ri Kittaka angkanaya, ‘Kaminang kuranna parallui rua yareka tallu tau a'jari sa'bi nampa akkulle se'rea tau nipattantu kasalanna.’ 17 Punna tena ija napilangngeri pappakainga'na anjo siapaya tau, nampami nipau mange ri jama'aka. Kale'bakkanna, punna tena ijapa naero' ampilangngeri pappakainga'na jama'aka, pasangkammami pasingara' sima siagang tau kapere' anjo taua siagang tau tena natappa' ri Allata'ala.” 18 “Assengi angkanaya: Apa nupappisangkanga ri lino, nipappisangkang tongi ri suruga. Siagang apa nupattojenga ri lino, nipattojeng tongi ri suruga. 19 Kammayatompa asseng tongi angkanaya: Punna nia' rua tau ri kau assamaturu' ri apa-apa mamo nampa appala' doang ri Allata'ala laNatarimai ManggeKu ri suruga pappala'na. 20 Nasaba' kemae nia' rua yareka tallu tau a'rappungang nasaba' iNakke, laniakKa' hadere' ri tangnga-tangngana ke'nanga.” 21 Le'baki anjo mangemi Petrus akkuta'nang ri Isa angkana, “O Batara, punna sala sari'battangku ri nakke, pissiapai akkulle kupammopporang? Sa'genna pintuju?” 22 Appialimi Isa Nakana, “Tena, tena napintujuja, mingka pintujui ri pintujupuloa! 23 Nasaba' punna ammarentamo Allata'ala, lakammai anne pangngebaranna: Nia' se're karaeng ero' assuro lappasi inranna ata-atanna. 24 Wattunna appakkaramula ammaressa, nia'mo sitau atanna nierang mange ri dallekanna, a'juta-jutaya inranna. 25 Tanakulleami nabayara' anjo inranna. Jari napassuroammi anjo karaenga sollanna nibalukang anjo ataya sipakkalabini siagang ana'-ana'na, kammayatompa sikontu barang-baranna, nampa nabayara' inranna. 26 Mingka su'ju'mi anjo ataya ri dallekanna anjo karaenga nappala' tulung angkana, ‘O Tuang, kikamaseangi atanta. Lanabayara' ngasenji atanta anjo inranna ngaseng.’ 27 Tu'guru'mi pangngamaseanna anjo karaenga, sa'genna nabilang lappasa' ngasemmo inranna anjo atanna. 28 Ri wattunna assulu'mo anjo taua, sibuntulammi paranna ata, kainranganga ri ia pirassa'bu are jaina. Nata'gala'mi anjo aganna nanaaccekang kallonna nampa nakana, ‘Bayara' ngasengi inrannu!’ 29 Su'ju'mi anjo aganna ri dallekanna appala' tulung nakana, ‘Sa'barakko rolong gang, kalakubayara' ngasenji inrangku!’ 30 Mingka tanajampangiaji anjo aganna. Ba'lalo napantama'ji ri tarungkua anjo aganna sa'genna nabayara' ngaseng inranna. 31 Nacini'na ata-ata maraenga anjo apa kajarianga, si'nami atinna ke'nanga. Mangemi ke'nanga ampabattui ri karaenga anjo apa kajarianga. 32 Nisuro kio'mi ri karaenga anjo ata kodi sipaka na nakana karaenga ri ia, ‘E kau ata kodi sipaka! Kubilang lappasa' ngasemmi inrannu lanri appala' tulungko ri nakke. 33 Maka tasiratangai nukamaseang anjo agannu sangkamma todong batenu kukamaseang?’ 34 Teaimi sipato' larrona anjo karaenga. Nasuro pantama'mi ri tarungkua anjo ata kodi sipaka sa'genna nalappasi ngaseng inranna.” 35 Na ri kala'busang caritaNa Isa Nakanamo, “Kammatommi anjo sallang laNagaukanga ManggeKu ri kau ngaseng, punna tena nuero' ampammopporangi sari'battannu siagang ati maci'nonnu.”
19
1 Le'ba'na Napau ngaseng Isa sikammaya anjo, Nabokoimi Galilea, nampa a'lampa mange ri daera Yudea, ri ba'leanna Binanga Yordan. 2 Jaimi tau ampinawangi. Naballeimi sikamma tau garring niaka anjoreng. 3 Battumi tu Farisia ero' ampa'boyangi kasalang. Akkuta'nammi ke'nanga angkana, “Manuru' ri atorang agamata, maka akkulleji taua antallaki bainenna manna napassala' apa mamo?” 4 Appialimi Isa Nakana, “Maka tena ngasempa nubacai lalang ri Kittaka angkanaya ri uru nipare'na rupataua ri Allata'ala, Napareki bura'nea siagang bainea? 5 Na le'ba'na Napare' Nakanamo, ‘Iaminjo saba'na nanabokoi anrong-manggena bura'-bura'nea namange a'jari se're siagang bainenna, sa'genna a'jari se'remi sipa'rua.’ 6 Jari tenamo narua ke'nanga, mingka a'jari se'remi. Jari iaminjo saba'na naapa le'baka Napa'jari se're Allata'ala, takkulleai napasisa'la' rupataua.” 7 Akkuta'nammi pole tu Farisia ri Ia angkana, “Punna paleng kamma, apa saba'na nanasuro taua Musa assarei sura' talla' bainenna punna natalla'?” 8 Appialimi Isa Nakana, “Tena napisangkaiko Musa antallaki bainennu lanri susanu ngaseng niajara'. Mingka sikontutojenna uru-uruna takammayai anjo. 9 Jari, pilangngerimi anne: Inai-nai antallaki bainenna — nateaija passala' a'gau' salimara' — na ribokoanganna na'baine poleang baine maraeng, a'gau' salimara' minjo taua.” 10 Jari angkanami ana'-ana' gurunNa Isa ri Ia, “Punna kammaja anjo pakkalabinianga, bajikangangi tenaya na'bunting taua.” 11 Appialimi Isa Nakana, “Tayangasenga taua akkulle antarimai anne Kupaua, pantaranganna tau le'bakamo Napattantu Allata'ala. 12 Nasaba' nia' tau takkulleai a'bunting lanri naerang memang tongi battu ri lassu'na. Mingka nia' todong takkullea a'bunting lanri panggaukanna tau maraenga. Nania' todong tau ia memang todong tea a'bunting sollanna akkulle a'jari palayanNa Allata'ala. Inai akkulle antarimai anne pangngajaranga, ia tommo antarimai.” 13 Nia' siapa are tau angngerangi ana'na mae ri Isa sollanna nibarakkaki siagang nipappala' doangang anjo ana'-anaka. Mingka nikalarroimi ri ana'-ana' gurunNa Isa anjo taua. 14 Nakanamo Isa ri ana'-ana' gurunNa, “Lappassangi namae ri Nakke anjo ana'-anaka, teako pisangkai. Nasaba' tau kammayami anne la'jari umma'Na Allata'ala.” 15 Naangka'mi limanNa Isa naNabarakkaki ngaseng anjo ana'-anaka. Le'baki anjo a'lampami ambokoi anjo tampaka. 16 Ri se'reang allo, nia' se're tau bura'ne battu mae ri Isa angkana, “O Guru, panggaukang apa baji' kugaukang sollanna akkulle kugappa katallassang sitojennaya siagang mannannunganga?” 17 Appialimi Isa Nakana, “Angngapa nukkuta'nang ri Nakke ri passala' apa bajika? Se'reji bawang baji'. Punna erokko salama', turukimi sikamma apa Napassuroanga Allata'ala.” 18 Akkuta'nammi anjo tau rungkaya angkana, “Apa passuroNa Allata'ala?” Appialimi Isa Nakana, “Teako ammunoi; teako a'gau' salimararri; teako a'lukkaki; teako a'balle-ballei; 19 pakala'biriki anrong-manggenu; siagang kamaseangi parannu tau sangkamma nukamaseanna batangkalennu.” 20 Appialimi pole anjo tau rungkaya angkana, “Yangaseng anjo parenta kammaya le'ba'mi kugaukang. Jari apapi pole parallu kugaukang?” 21 Akkanami pole Isa ri ia, “Punna ma'nassa erokko a'jari tau ganna', a'lampamako ambalukang ngasengi barang-barannu. Passareammi ballinna mae ri tu kasi-asia, nama'nassa lanugappamo sallang pa'barang-barangang niaka ri suruga. Punna le'ba'mo nugaukang anjo kammaya, battu mako mae amminawang ri Nakke!” 22 Nalangngere'na akkana kamma Isa, a'lampami anjo tau rungkaya; si'na sikali atinna nasaba' akkalumanynyang sikali. 23 Nakanamo Isa ri ana'-ana' gurunNa, “Kukanamo ri kau ngaseng, teai sipato' susana tau kalumanynyanga la'jari umma'Na Allata'ala. 24 Siagang Kukana pole ri kau ngaseng; la'bi akkulleangangi sikayua unta antama' ri so'bolo' jarunga kala tau kalumanynyanga lantama' ri Lino BeruNa Allata'ala.” 25 Lannasa' ngasemmi ana'-ana' gurunNa Isa nalangngere'na akkana kamma Isa. Nakanamo ke'nanga, “Punna paleng kamma, jari inai mami akkulle salama'?” 26 Nicinikimi ke'nanga ri Isa; nampa Nakana Isa ri ke'nanga, “Anjo tena memang nantama' ri akkala'na rupataua. Mingka tena tamakkulle punna Nakaerokang Allata'ala.” 27 Nakanamo Petrus, “Kicini' minne, ikambe nibokoi ngasemmi sikamma apa niaka ri kambe lanri erotta amminawang ri Katte. Na apa sallang lanagappa ikambe?” 28 Nakanamo Isa ri ke'nanga, “Tappa' mako angkanaya: Ri Lino Berua, lammempoi Ana' Ma'rupataua irate ri empoang kala'biranNa. Anjo wattua sallang, ikau ngasemmi ana'-ana' gurungKu lammempo irate ri sampuloa anrua empoang kala'birang. Na ikaumi langngadeli sampuloa anrua suku ri bansa Israelka! 29 Na inai-nai ambokoi balla'na, yareka sari'battanna bura'nea, yareka sari'battanna bainea, yareka anrong-manggena, yareka ana'na ngaseng, yareka kokonna, passabakkang iNakke, iami sallang langgappai ammotere' sikamma apa nabokoia a'lappi sibilangngang jaina. Siagang iami langgappai katallassang sitojennaya siagang mannannunganga. 30 Mingka jai tau ri dallekanga ri kamma-kammaya anne la'jari tau ri boko dudui sallang. Na tau ri boko dudua ri kamma-kammaya anne la'jari tau ri dallekang dudui sallang.”
20
1 “Punna ammarenta Allata'ala, pangngebaranna lakammaminne: Nia' se're tau ero' a'boya pajama ri koko anggoro'na. A'lampa bari'basa'mi a'boya tau. 2 Ri wattunna nia'mo siapa are tau nagappa, sitappukimi angkanaya lanabayaraki ke'nanga se're doe' pera' lalanna sialloa. Le'baki anjo nasuromi ke'nanga a'lampa anjama ri koko anggoro'na. 3 Ri tette' salapanna alloa, a'lampami pole anjo patannaya koko. Nia'mo pole nacini' siapa are tau, tenaya jama-jamanna ri pasaraka. 4 Nakanamo ri ke'nanga, ‘A'lampamako mange anjama ri koko anggorokku, nakubayarakko siapa siratanga.’ 5 A'lampami ke'nanga mange anjama. Kammaminjo pole nakkio'moseng tau anjama ri wattunna a'lampa ri tette' sampulona anrua ri tangngana alloa siagang ri tette' talluna ri karuenga. 6 Nakira-kira ri tette' limana ri karuenga a'lampami pole. Nanacini'mo pole nia' ija tau tenaya jama-jamanna. Akkuta'nammi anjo patanna koko ri ke'nanga angkana, ‘Angngapa nummantang ngaseng anrinni ammenteng sila'busu' allo tena apa-apa nugaukang?’ 7 Appialimi ke'nanga angkana, ‘Katena tau ampajamaki'.’ Nakanamo anjo patanna koko, ‘Punna kamma padeng, mange ngaseng mako anjama ri koko anggorokku.’ 8 Ri karueng dudunamo, nakanamo anjo patanna koko ri mandoro' pajama-jamana, ‘Kio' ngasemmi anjo tau anjamaya. Massing bayara'mi gajina appakkaramula battu ri anjo kala'busang dudua antama' anjama sa'genna tau ri dallekang dudua antama'.’ 9 Battumi anjo pajama tette' limaya ri karuenga nappakkaramula anjama. Massing nibayara'mi tasse'renna doe' pera'. 10 Le'baki anjo battu tommi anjo pajama appakkaramulaya anjama ri bari'basaka. Napikkiriki ke'nanga angkanaya lala'bi lanatarima ke'nanga. Mingka kajarianna se're tonji doe' pera' nibayarrangi ke'nanga. 11 Natarimana doeka ke'nanga, a'moro-moromi ke'nanga ri anjo patannaya koko. 12 Nakana ke'nanga, ‘Pajama ri boko dudua sitette'ji anjama. Na ikatte sila'busu' alloki' nabambangi allo anjama, mingka kipasangkammaji kipa'gajianga ri ke'nanga siagang ri kambe anne!’ 13 Appialimi anjo patanna koko mae ri kalase'renna ke'nanga, angkana, ‘E gang, tena nakusala ri kau. Sai le'ba' maki' sitappuki angkanaya se're doe' pera' gajinu siallo? 14 Jari, allemi anne gajinu, nu'lampa. Ero' memang tonga' assarei anjo tau ri boko dudua antama' anjama, gaji sangkammaya jaina siagang gaji kupassareanga ri kau. 15 Apa takkullea' angngatoroki pa'barang-barangangku situru' apa nakaerokia nyawaku? Yareka assereatiko lanri lammoro' pa'maikka'?’ ” 16 Nampa Nakanamo pole Isa, “Kamma tomminjo, tau ri boko dudua la'jari ri dallekang dudui, na tau ri dallekanga la'jari ri boko dudui.” 17 Ri wattunna a'lampa Isa mange ri Yerusalem, ri tangngana aganga Nakio'mi mange ri tampa' tassa'laka ana'-ana' gurunNa. Nampa Nakana ri ke'nanga, 18 “Pilangngerimi! Anne kamma a'lampa maki' mange ri Yerusalem. Punna battuki' mange anjoreng, lanipassareammi Ana' Ma'rupataua mae ri imang-imang kapalaya siagang guru-guru agamaya. Lanihukkung matei, 19 nanipassareang ri tau teai bansa Yahudi. Lanicau-caui ri ke'nanga, lanisessai, nampa nisalli' ri ke'nanga. Mingka ri makatalluna alloa lanipabangungi pole ammotere'.” 20 Le'baki anjo battumi bainenna Zebedeus siagang ana'-ana'na andallekang ri Isa. Su'ju'mi ri dallekanNa Isa. Nia' ero' napala'. 21 Akkuta'nammi Isa Nakana, “Apa nukaeroki?” Appialimi anjo bainea nakana, “Punna a'jari KaraengKi' sallang kupalaki naKipaempo anne anakku ruaya, se're ri kairinTa na se're ri kananTa.” 22 Nakanamo Isa ri ke'nanga, “Tanupahangai antu apa nupalaka. Maka akkullejako lampisa'ringi todongi passessa laKupisa'ringia?” Appialimi ke'nanga angkana, “Iye', akkulleja'.” 23 Nakanamo Isa, “Memang akkullejako ampisa'ringi passessa laKupisa'ringia. Mingka inai sallang lammempo ri sa'ri kairingKu siagang ri sa'ri kanangKu, teai iNakke lampattantui. Anjo tampaka lanipassareangi ri tau le'bakamo Napattantu Manggea.” 24 Nalangngere'na ana'-ana' gurunNa Isa sampuloa anjo passalaka, larromi ke'nanga mae ri anjo tau ruaya massari'battang. 25 Lanri kammana nikio' ngasemmi ke'nanga ri Isa. Nakanamo Isa ri ke'nanga, “Nuassemmi angkanaya sikamma pamimpinna bansa kapereka ri anne linoa najallakkangi ra'yaka. Kammayatompa sikamma tumalompona ke'nanga anjallakkang tongi ra'ya'. 26 Mingka ikau takkulleako appakamma anjo. Passangalinna inai-nai ero' a'jari tau lompo parallui a'jari palayang. 27 Na inai-nai ero' a'jari tau ri dallekang dudu, parallui a'jari ata. 28 Sangkamma minjo Ana' Ma'rupataua; niaki battu teai sollanna nanilayani, passangalinna sollanna na'jari palayang. NaNapassareang nyawaNa, sollanna nakkulle Napasalama' tau jaia.” 29 Ri wattunna nabokoimo ke'nanga Yerikho, jaimi tau amminawang ri Isa. 30 Nia'mo rua tau buta ammempo ri biring aganga. Nalangngere'na ke'nanga angkanaya niaki Isa numalo, akkiok-kio'mi ke'nanga angkana, “O Ana'na Daud, kamaseangki' anne kodong!” 31 Nikalarroimi siagang nisuromi ke'nanga a'mere' ri sikamma tau niaka anjoreng. Mingka pila' akkio' lompoji pole ke'nanga angkana, “O Tuang, Ana'na Daud, Kikamaseangki' anne kodong!” 32 Jari ammantammi Isa nampa Nasuro kio' ke'nanga. Akkuta'nammi ri ke'nanga angkana, “Apa ero' nupala' Kugaukang ri kau sipa'rua?” 33 Appialimi ke'nanga angkana, “O Tuang, erokki' anne accini'!” 34 Tu'guru'mi pangngamaseanNa Isa ri ke'nanga. Najamami matanna ke'nanga, nakkulle memammo accini' silalonna. Nampa amminawammi ke'nanga ri Isa.
21
1 A'reppese'namo ri Yerusalem, battumi ke'nanga ri Betfage, ri Bonto Zaitun. Battuna anjoreng Nasuromi rua ana' gurunNa Isa a'lampa riolo. 2 Napasammi ke'nanga angkana, “A'lampamako mange anjoreng ri kampong niaka ri dallekannu. Nia' sinampe' nucini' sikayu keledai tappau' siagang ana'na. Lappassang rua-ruami, nampa nuerang mae. 3 Punna nia' angkuta'nangko, pauammi patanna angkana, ‘Naparalluangi Batara,’ napassareang mintu nuerang anjo keledaia.” 4 Lanri kammana a'rupami apa le'baka napau na'bia angkanaya, 5 “Pabattumi ri Sion, angkanaya nia'mi battu Karaennu mae ri kau. Tunai ri pa'mai', ma'dongko' ri keledai sikayu ana' keledai rungkaya.” 6 A'lampami anjo ruaya ana' gurunNa Isa. Nagaukammi ke'nanga situru' napappasanganga Isa. 7 Naerammi ke'nanga anjo keledaia siagang ana'na. Nampa nalapakki ke'nanga dongko'na anjo keledaia siagang jubana ke'nanga. Nampa nai'mi Isa. 8 Jaimi tau ampalaparaki jubana siagang ansarei leko'-leko' kayu ri tangngana agang laNaoloa Isa. 9 Nampa a'jappa anjo tau jaia ri dallekanNa siagang ribokoNa Isa. Akkiok-kio'mi ke'nanga angkana, “Nipakalompoi Ana'na Daud! Nibarakkakimi battua lalang arenNa Batara! Nipujimi Allata'ala Kaminang Tinggia!” 10 Ri wattunna antama'mo Isa ri kota Yerusalem, gegere'mi sikontu tau niaka ammantang anjoreng ri kotaya. Akkuta'nammi tau anjorenga ri kotaya angkana, “Inai anne taua?” 11 Appialimi tau jaia niaka anrurungangi Isa angkana, “Na'bi Isa, battu ri Nazaret, ri Galilea.” 12 Le'baki anjo antama'mi Isa ri Balla'Na Batara. Nabongka ngasemmi sikamma tau niaka anjoreng a'balu'-balu'. Nabulinta' ngasemmi mejang-mejanna pasambe doeka, kammayatompa bangko-bangkona pabalu' jangang-jangang bodobangkenga. 13 Nampa Nakana ri anjo taua ngaseng, “Nia' tattulisi' lalang ri Kittaka angkana, Nakana Allata'ala, ‘Lanipareki balla' sambayang BallakKu.’ Mingka ikau ngaseng nupareki pa'rappungang paella'!” 14 Battumi tau butaya siagang tau pesoka nierang mae ri dallekanNa Isa lalang ri Balla'Na Batara. Nampa niballei ngaseng ri Isa, na'jari baji' memang silalonna. 15 Mingka larromi imang-imang kapalaya siagang guru-guru agamaya nacini'na Nagaukang Isa anjo gau' appakalannasaka. Larro tommi ke'nanga nalangngere'na ana'-anaka akkiok-kio' lalang ri Balla'Na Batara angkana, “Nipakalompoi Ana'na Daud!” 16 Nakanamo ke'nanga mae ri Isa, “Nulangngere'ji anjo napaua ke'nanga?” Appialimi Isa Nakana, “Iyo, Kulangngere'ji. Tena le'bakapi nubaca apa niaka tattulisi' lalang ri Kittaka angkanaya, ‘Le'ba'mi nuajara' ana'-anaka siagang ana' loloa ampaui kana-kana pammujia’?” 17 Le'baki anjo a'lampami Isa ambokoi ke'nanga. Assulu'mi battu ri kotaya, namange a'bangngi ri Betania. 18 Ammukona bari'basa', lalang a'jappana ammotere' mange ri kotaya cipuru'mi Isa. 19 Nia' nacini' se're poko' ara ri biring aganga. Mangemi anjoreng ri poko' araya. Mingka manna sibatu tania' Nacini' rapponna pantaranganna leko-leko'na bawang. Nakanamo Isa ri anjo poko' araya, “Tenamo nukkulle a'rappo pole!” Nakalumeng memammo silalonna anjo poko' araya. 20 Lannasa' ngasemmi ana'-ana' gurunNa Isa ri wattunna nacini' anjo kajarianga. Akkuta'nammi ke'nanga angkana, “Antekamma nakkulle mate silalonna anjo poko' araya?” 21 Appialimi Isa Nakana, “Sitojeng-tojenna, punna tappakko natena nubata-bata, akkulle ngaseng tongko anggaukangi anjo apa le'baka Kugaukang mange ri poko' araya. Ba'lalo teai anjo bawang. Lakkulleko pole angkana ri anne bontoa, ‘Ta'angkakko, nutassambila naung ri tamparanga’; nalakamma tojeng-tojeng anjo kajarianna. 22 Manna apa mamo nupala' lalang pappala' doangannu assala' tappa' tojeng-tojengko, ma'nassa lanutarimai apa nupalaka.” 23 Le'baki anjo ammotere'mi Isa mange ri Balla'Na Batara. Antama'mi angngajara' lalang. Sitabanna angngajara', battumi mae ri Ia imang-imang kapalaya siagang pamimping-pamimpinna tu Yahudia. Akkuta'nammi ke'nanga angkana, “Apa passabakkanna nakkulle Nugaukang ngaseng anne? Inai assareKo koasa?” 24 Appialimi Isa Nakana, Ero' tongA' akkuta'nang ri kau ngaseng. Na punna nupialimo pakkuta'nangKu, nampa mako laKupauang todong angkanaya inai assareA' koasa anggaukang ngasengi sikammaya anjo apa le'baka Kugaukang. 25 Iaminne pakkuta'nangKu, “Inai assarei koasa Yohanes anje'neki taua? Allata'ala yareka rupataua?” Massing sikuta'nammi para ia anjo imang-imang kapalaya siagang pamimping-pamimpinna tu Yahudia angkana, “Punna nikana ‘Allata'ala assarei koasa,’ lakkuta'nangi pole ri katte angkana, ‘Punna kamma padeng, apa saba'na natena nutappa' ri ia?’ 26 Mingka punna nikana, ‘Taua assarei koasa,’ mallakki' ri tau jaia, nasaba' tappaki taua angkanaya na'bi memang anjo Yohanes.” 27 Jari appialimi ke'nanga angkana, “Tanaassengai ikambe.” Jari Nakanamo Isa ri ke'nanga, “Punna kamma tena todong Kuero' ampauangko angkana inai assareA' koasa anggaukang ngasengi anjo Kugaukanga.” 28 Nakanamo pole Isa, “Nia' sitau bura'ne, nia' ana'na bura'ne rua. Nakanamo ri ana'na toaya, ‘Na', a'lampako anne alloa anjama ri koko anggoroka.’ 29 Appialimi anjo ana'na nakana, ‘Teaja'.’ Mingka tena nasallo, tappinrami pikkiranna, na'lampaja mange anjama ri koko anggoroka. 30 Le'baki anjo a'lampami pole anjo taua mange ri ana' makaruana, nanasuro tommo mange anjama ri kokoa. Appialimi anjo ana' makaruaya nakana, ‘Iye',’ Mingka kale'bakkanna ta'lampayaji. 31 Jari kamma-kamma anne antekamma panggappanu? Kereanga anjo ana' ruaya anggaukangi napassuroanga manggena?” Appialimi imang-imang kapalaya siagang pamimping-pamimpinna tu Yahudia angkana, “Anjo ana'na toaya.” Jari Nakanamo pole Isa ri ke'nanga, “Patappa'mi angkanaya: Rioloangangi sallang parentea siagang bai'-baine ja'dalaka a'jari umma'Na Allata'ala kala ikau ngaseng. 32 Nasaba' battumi Yohanes Paje'ne' ampicinikiang ngasengko carana katallassang Nakaerokia Batara, mingka taerokako tappa' ri pangngajara'na; mingka parentea siagang bai'-baine ja'dalaka tappaki ri ia. Na ikau ngaseng, manna pole nucini' ngasemmi anjo apa kajarianga tena tompa natappinra pikkirannu siagang tena tongija nuero' tappa' ri Batara.” 33 Nakanamo pole Isa, “Pilangngerimi pole anne se'rea pangngebarang. Nia' se're tau ero' allamungi kokonna anggoro'. Napangngalakkimi attammulili kokonna. Nampa appare' kali'bong eroka napake ammacco' je'ne' anggoro'. Appare' tommi balla'-balla' jaga tinggia. Le'baki anjo napappitesangammi anjo koko anggoro'na mae ri siapa are pajama koko. Nampa a'lampa ri se'reang pa'rasangang maraeng. 34 Se're wattu, narapi'mi wattunna lanialle rapponna anjo anggoroka ri kokonna. Nasuromi siapa are palayanna anjo patanna koko mange ampalaki tawana ri anjo tau anjamayai kokonna. 35 Mingka battuna mange anjo palayanna patanna koko, nijakkala'mi ke'nanga ri anjo pajama kokoa. Nia'mo naba'ji, nia'mo nasambila batu, siagang nia' tommo nibuno ri ke'nanga. 36 Nasuromi pole palayanna maraenganga anjo patanna koko, jaiangang naanjo nasuroa riolo. Mingka nipakamma ngaseng tommiseng ke'nanga. Nia' niba'ji, nia' nisambila batu, nania' nibuno ri anjo pajama kokoa. 37 Kala'busanna nasuromi ana' kalenna anjo patanna koko. Napikkiriki angkanaya, ‘Punna anakku mattantu lanipakala'biriki ri ke'nanga.’ 38 Mingka nacini'na ke'nanga anjo ana'na patanna koko nakanamo para ia, ‘Iaminne ana'na, warisi'na patanna koko. Umba nibunoi nampa nialleang warisi'na!’ 39 Najakkala'mi anjo ana'na patanna koko, nampa nabuno, nanapela' assulukang.” 40 Le'baki Nacarita Isa anjo pangngebaranga akkuta'nammi ri ke'nanga angkana, “Jari punna ammotere' anjo patanna koko, apa lanagaukang ri anjo tau anjamayai kokonna?” 41 Appialimi ke'nanga angkana, “Mattantu lanabunoi anjo tau ja'dala' kammaya. Nampa napappitesangang ri tau maraeng anjo kokonna, eroka ambagei punna narapi' wattunna nibage wassele'na anjo kokoa.” 42 Jari Nakanamo Isa ri ke'nanga, “Tale'bakapi nubaca niaka tattulisi' lalang ri Kittaka angkanaya, ‘Batu tenaya napakei tukanga a'jarimi batu panjarreki. Iaminne Napareka Allata'ala; natamaka ga'gana!’ ” 43 Nakanamo pole Isa, “Jari u'rangi angkanaya, yangasenna ha'nu a'jari umma'Na Allata'ala lanialleangko ammotere', nampa nipassareang mae ri bansa maraenga, eroka anggaukangi ero'Na Allata'ala. [ 44 Tau tu'guruka naung ri batua laancuruki; na tau nitujua ri batua lanijalla'-jallakkangi sa'genna a'jari limbu'bu'.]” 45 Nalangngere'na imang-imang kapalaya siagang tu Farisia anjo pangngebarang Nacaritaya Isa, naassemmi angkanaya kalenna ke'nanga nataba anjo pangngebaranga. 46 Jari a'boyami cara ke'nanga ero' anjakkalaki Isa. Mingka mallaki ke'nanga ri tau jaia. Kaanjo tau jaia tappaki angkanaya na'bi anjo Isa.
22
1 A'bicarami pole Isa ri tau jaia, ammake pangngebarang, 2 Nakana, “Punna ammarenta Allata'ala kammaminne pangngebarranna: Nia' se're Karaeng ampa'buntingi ana'na bura'nea, nanapassua'-suarrang. 3 Nasuromi pala'-palayanna anjo Karaenga mange ambuntuli sikamma tau le'baka niburittai mae ri anjo passua'-suarranga. Mingka taerokai battu anjo sikamma tau le'baka niburittai. 4 Jari nasuromi pole pala'-palayanna maraenga anjo Karaenga. Napasammi ke'nanga angkana: ‘Pauang ngasengi anjo tau le'baka niburittai angkanaya: Tattala ngasemmi apa-apaya ri passua'-suarrang pa'buntinganna Karaenga. Sikamma sapia siagang sapi rungka kaminang bajika le'ba'mi nisuro polong. Kamma-kamma anne sadia ngasemmi. Umbamo kimange anjoreng assua'-suara' ri pa'buntinganga!’ 5 Mingka tenaja nijampangi ri anjo tau le'baka ngaseng niburittai. Massing a'lampaji ke'nanga ri jama-jamanna — nia' a'lampa mange ri kokonna, nia' tommo a'lampa mange ri usahana; 6 ba'lalo nia' tommo anjakkalaki anjo pala'-palayanna nasuroa Karaenga, naallei naba'ji, nampa nabuno. 7 Nalangngere'na Karaenga anjo kajarianga teaimi sipato' larrona. Nakirimmi tantarana nanasuro buno ngaseng anjo tau le'baka ambunoi pala'-palayanna. Kammayatompa kotana ke'nanga nasuro tunu tongi. 8 Le'baki anjo nakio'mi pala'-palayanna maraenganga. Nakana ri ke'nanga, ‘Sadiami passua'-suarranga, mingka tena ngaseng nasiratang anjo tau le'baka niburittai. 9 Kamma-kamma anne a'lampamako mange ri agang-agang lompoa nanukio' ngaseng tau jaia battu mae assua'-suara'.’ 10 A'lampa ngasemmi anjo palayanga. A'lampami ke'nanga ri agang-agang lompoa nanapa'rappungang ngaseng tau nabuntuluka ke'nanga, baji'na tau bajika kammayatompa tau ja'dalaka. Rassimi anjo balla' passua'-suarrang pa'buntinganga napakamma jaina toana. 11 Battumi anjo Karaenga anciniki ngasengi toanaya. Nia'mo sitau nacini' tena nammake pakeang passua'-suarrang. 12 Akkuta'nammi ri anjo taua nakana, ‘E, gang, antekamma nukkulle antama' anrinni natena nummake pakeang passua'-suarrang?’ Tanaassengami appiali anjo taua. 13 Nakanamo anjo Karaenga mae ri pala'-palayanna, ‘Sikkoki bangkenna siagang limanna anne taua nampa nupela' assulukang ri pammantangang sassanga. Anjoremmi langngarru'-arru' siagang lanakasia' sessaya.’ ” 14 Kala'busang Nacaritana Isa anjo pangngebaranga Nakanamo, “Jai tau nikio' mingka sike'de'ji nipile.” 15 Le'baki anjo a'lampami tu Farisia sipa'bicara; eroki ke'nanga a'boya pakkuta'nang sollanna akkulle nakuta'nang Isa nasala pappialinNa. 16 Nasuromi ana'-ana' gurunna ke'nanga mange ri Isa. A'rurummi ke'nanga siagang ana'-ana'na Herodes. Battui mange ri Isa, angkanami ke'nanga, “O Guru, niassemmi angkanaya iKatte tau lambusukKi'. Apa ero'Na Allata'ala Kipangngajarrammi silambusu'na ri sikamma taua. Manna pole inai tena Kijampangi antekamma panggappana. Nasaba' iKatte tena Kimmile-mile tau. 17 Lanri kammana, Kipausai bedeng: Manuru' atoranna agamata, maka siratangki' a'bayara' sima ri Karaenga yareka tena?” 18 Mingka Naassemmi Isa pikkirang ja'dala'na ke'nanga. Jari Nakanamo ri ke'nanga, “E, tu munape'! Angngapa nuero' ampa'boyangA' sala? 19 PicinikiangsA' doe' akkullea nupake a'bayara' sima ri Karaenga!” Nisaremi ri ke'nanga se're doe' pera'. 20 Akkuta'nammi Isa ri ke'nanga Nakana, “Inai pata gambara' siagang areng anne lalang ri doeka?” 21 Appialimi ke'nanga angkana, “Karaenga pata gambara' siagang areng.” Nakanamo Isa ri ke'nanga, “Jari punna kamma, sareammi Karaenga apa napatanga Karaenga; nanusareang Allata'ala apa Napatanga Allata'ala.” 22 Nalangngere'na ke'nanga pappialinna Isa, a'jari lannasa' sikalimi ke'nanga. A'lampami ke'nanga ambokoi Isa. 23 Ia todong anjo alloa nania' siapa are tu Saduki battu mae ri Isa. Anjo tu Sadukia tena natappa' angkanaya lattallasa' poleangi tau matea. 24 Nakanamo ke'nanga ri Isa, “O Pa' Guru, napangngajarrangi Musa kammaya anne: Punna nia' sitau bura'ne mate natena ana'na, parallui sari'battanna ambuntingi anjo bainenna nabokoia, sollanna nasare ana' anjo sari'battanna matea. 25 Le'baki nia' tau tuju assari'battang ammantang anrinni ri pa'rasanganga. A'buntimmi anjo kaminang toaya, namate, natena ana'na. Anjo bainenna nabokoia, nibuntingimi ri sari'battanna. 26 Mingka mate tongi anjo sari'battanna, natena todong ana' naboli'. Kamma tomminjo kajarianna ri sari'battanna maka tallua, sa'genna ri sari'battanna maka tujua. A'bunting ngaseng tommi siagang anjo bainea, mingka mate ngaseng tongi, siagang tena ngaseng ana' naboli'. 27 Kala'busanna mate tommi anjo bainea. 28 Jari punna attallasa' poleang tau matea kereangami pata baine anjo bainea? Nasaba' le'ba' ngasemmi nibuntingi ri anjo tujua bura'ne.” 29 Appialimi Isa Nakana, “Sala pikkirang ngasengko antu. Nasaba' tena nupahangi bonena Kittaka siagang koasaNa Allata'ala. 30 Nasaba' punna attallasa' poleangi sallang tau matea, tenamo nala'bunting poleang ke'nanga. Passangalinna lakammami ke'nanga malaekaka ri suruga. 31 Apa tale'bakapi nubaca lalang ri Kittaka apa le'baka Napau Allata'ala ri passala'na tau mate nipattallasa' poleanga? Nakana Allata'ala, 32 ‘INakkemi Allata'alana Abraham, Allata'alana Ishak, siagang Allata'alana Yakub.’ Anjo Allata'ala, teai Allata'alana tau matea; mingka Allata'alana tau attallasaka!” 33 Nalangngere'na tau jaia akkana kamma Isa, lannasa' ngasemmi ke'nanga ri pangngajaranNa. 34 Nalangngere'na tu Farisia angkanaya takkulleami akkana tu Sadukia Napakamma Isa, a'rappungammi ke'nanga. 35 Nia'mo kalase'renna ke'nanga iamintu sitau guru agama, ero' ancoba-coba ampa'boyangi sala Isa. Nakuta'nammi Isa nakana, 36 “O Pa' Guru, kereanga parenta lomoro' se'rea lalang ri atorang agamaya?” 37 Appialimi Isa Nakana, “Kamaseangi Karaeng Allata'alanu siagang sitepu atinnu, sitepu pa'mai'nu kammayatompa sitepu tallasa'nu. 38 Iaminjo parenta lomoro' se'rea siagang kaminang parallua. 39 Parenta makaruaya, sangkammaya parenta lomoro' se'rea iamintu: Kamaseangi parannu tau sangkamma todong nukamaseanna batangkalennu. 40 Sikontu atorang agama napassareanga Musa siagang napangngajarranga na'bi-na'bia battu anrinni ngaseng minne ri ruaya parenta.” 41 Sitabang a'rappunganna ngaseng ija tu Farisia anjoreng, akkuta'nammi Isa ri ke'nanga Nakana, 42 “Antekamma panggappanu ngaseng ri passala'na Karaeng Mappasalamaka? Sossorang battu ri nai?” Appialimi ke'nanga angkana, “Sossorang battu ri Daud.” 43 Akkuta'nammi Isa Nakana, “Punna kamma, apa saba'na naniajara' Daud ri RohNa Allata'ala sollanna akkio' ‘Batara’ ri Karaeng Mappasalamaka? Nasaba' nakana Daud, 44 ‘Nakana Batara ri Bataraku: Ammempoko ri sa'ri kanangKu, Sa'genna Kusuro ngaseng akkulantu' musu-musunNu ri dallekanNu.’ 45 Jari punna Daud akkio' ‘Batara’ ri anjo Karaeng Mappasalamaka antekamma lakkulle nikana sossorang battui ri Daud?” 46 Manna sitau tenamo akkulle appiali ri Isa. Na appakkaramula anjo alloa tenamo manna sitau barani akkuta'nang apa-apa mamo ri Isa.
23
1 Le'baki anjo Nakanamo Isa ri tau jaia siagang ana'-ana' gurunNa, 2 “Anjo guru-guru agamaya siagang tu Farisia nisarei pangngissengang ambattuangngi atorang agama napassareanga Musa. 3 Lanri kammana pilangngerimi siagang gaukammi apa napassuroanga. Mingka teako gaukangi apa nagaukanga ke'nanga. Nasaba' kalenna ke'nanga tena nagaukangi apa napangngajarranga ke'nanga. 4 Nasareki' atorang-atorang battala' siagang nakellaiki' anggaukangi apa sannaka susana. Mingka manna sike'de' tena todong natulungki' anggaukangi. 5 Sikontu anjo apa nagaukanga ke'nanga poro ero'naja napappicini'-cinikang ri taua. Napakkunjung-kunjungiammi ke'nanga ammake soro'bang siagang juba turunga! 6 Nangai ke'nanga ammempo ri pammempoang kaminang bajika ri tampa' passua'-suarranga, yareka lalang ri balla' sambayanga. 7 Nangai ke'nanga punna nipakala'biri' ri pasa'-pasaraka, siagang sannang sikali punna nikio' ‘Bapa' Guru’ ri taua. 8 Mingka ikau ngaseng teako eroki nikio' ‘Bapa' Guru’, nasaba' se'reji Gurunnu, na ikau assari'battang ngasengko. 9 Siagang teako akkio' ‘Bapakki’ manna ri nai, nasaba' se'reji Bapa'nu, iamintu Bapa'nu niaka ri suruga. 10 Natea tongko eroki nikio' ‘Pamimping’, nasaba' se'reji pamimpinnu, iamintu Karaeng Mappasalamaka, Napa'janjianga Allata'ala. 11 Inai kaminang la'biri' ri kau parallui a'jari palayang. 12 Inai-nai ampakalompoi kalenna iami lanipakatuna; na inai-nai ampakatunai kalenna, iami lanipakalompo.” 13 Nakanamo pole Isa, “Cilaka ngaseng mako ikau guru-guru agamaya siagang tu Farisia, lanri nungaina assara-saraia. Ikau ngasemmi anrompai taua la'jari umma'Na Allata'ala. Ikau ngasenji tea a'jari umma'Na Allata'ala, nanurompai todong tau maraenga, eroka a'jari umma'Na Allata'ala. [ 14 Cilaka ngaseng mako ikau guru-guru agamaya siagang tu Farisia lanri nungaina assara-saraia. Nutipui janda-jandaya, nanualleang balla'na. Nalanri ero'na nucokkoi kaja'dallannu, nula'bu-la'buimi punna assambayangko. Lanri kammana minjo nabattala' sikali sallang hukkungannu!] 15 Cilaka ngaseng mako ikau guru-guru agamaya siagang tu Farisia, lanri nungaina assara-saraia! A'lampa bella mako a'limbang tamparang, nujappai ngasemmi tompo'na buttaya, naporo sitauji bawang ero' nupantama' ri agamanu. Na punna antama'mo anjo taua ri agamanu, nupa'jarimi parekang tulantamaka ri naraka, a'lappi ruaya ja'dala'na na ikau ngaseng! 16 Cilaka ngaseng mako ikau pamimping-pamimping butaya! Nuajari taua angkana, ‘Punna assumpa taua na Balla'Na Batara nipau, tenaja naparallu niu'rangi anjo sumpaya; mingka punna assumpai lanri bulaeng lalang ri Balla'Na Batara musti niu'rangi anjo sumpaya.’ 17 Ikau ngaseng tu toloa siagang tu butaya! Kereanga paralluangang: bulaenga yareka Balla'Na Batara ampa'jariai matangkasa' anjo bulaenga? 18 Nupangngajarrang tongi angkanaya, ‘Punna assumpa taua na tampa' pakkoro'bangnganga nipau, tenaja naparallu niu'rangi anjo sumpaya; mingka punna assumpa taua na koro'bang ratea ri tampa' pakkoro'bangnganga nipau, parallu niu'rangi anjo sumpaya.’ 19 Teai sipato' butanu ngaseng! Kereanga paralluangang? Koro'banga, yareka tampa' koro'banga ampa'jariai matangkasa' anjo koro'banga? 20 Jari, punna nia' tau assumpa na napau tampa' koro'banga, battuanna napalalang ngasemmi tampa' koro'banga, kammayatompa pole koro'bang niaka irate ri anjo tampa' koro'banga. 21 Siagang punna nia' tau assumpa na napau Balla'Na Batara, battuanna napalalang ngasemmi Balla'Na Batara, kammayatompa pole Allata'ala ammantanga ilalang. 22 Siagang punna nia' tau assumpa na suruga napau, battuanna napalalang tommi empoang kala'biranNa Batara kammayatompa pole Allata'ala niaka ammempo irate ri anjo empoang kala'biranga. 23 Cilaka ngaseng mako ikau guru-guru agamaya siagang tu Farisia, lanri nungai assara-saraia. Assare mako passidakka mae ri Batara; wassele' lamung-lamunnu kammaya lamung-lamung nipareka pa'bumbu lisere'na, lamung-lamung nipareka bumbu yareka pa'minynya'-minynya' siagang lamung-lamung nipareka pa'balle leko'na. Yangasenna anjo nupassidakkammi bage sampulona ri Batara. Mingka kaminang parallua lalang pangatorang agamaya kammaya: Kaadelang, pangngamaseang, siagang akkana sitappaka, tena ngaseng nujampangi. Na sikontutojenna yangaseng minjo parallu nugaukang, nampa nuu'rangi todong maraenganga. 24 Ma'nassa pamimping buta ngasengko! Nubongkai katingalo lalanga ri je'ne' inunnu, na unta sikayu nua'lu'! 25 Cilaka ngaseng mako ikau guru-guru agamaya siagang tu Farisia, lanri nungaina assara-saraia! Nubissai sa'genna tangkasa' bageang pantara'na mangkoka siagang piringa. Na lalanganna teai sipato' ra'masa'na napakamma apa-apa tena na hallala' siagang napakamma angngoa dudunu. 26 E, tu Farisi butaya! Bissaimi sa'genna tangkasa' ilalanganna anjo mangko'-mangko'nu siagang piring-pirinnu, sollanna tangkasa' ngaseng todong pantaranganna! 27 Cilaka ngaseng mako ikau guru-guru agamaya siagang tu Farisia, lanri nungaina assara-saraia! Sanrapangko jera' nice' keboka; sanna' ga'gana nicini' pantaranganna; mingka lalanganna rassi buku-buku sannaka ngaseng botto'na. 28 Kamma ngaseng tommako anjo. Punna nicini' battu pantarang, baji' ngasengko mae ri taua; mingka lalang ri nyawanu, sangnging tu munapekko siagang tena ngaseng nungngasseng atorang.” 29 Nakana pole Isa, “Cilaka ngaseng mako ikau guru-guru agamaya siagang tu Farisia, lanri nungaina assara-saraia! Nuga'gai pare'na jera'na na'bi-na'bia. Siagang numode bajiki mesanna tau baji'-bajika katallassanna. 30 Siagang nukana ngaseng, ‘Ka'de' ninia' tommo ri wattu attallasa'na boe-boeta, tenaja katte nikaturu'-turukang ambunoi na'bi-na'bia.’ 31 Jari numangakuimi angkanaya sossoranna ngasengko tau ambunoai na'bi-na'bia! 32 Punna kamma gaukang tulimi siagang pa'le'ba'mi dosa-dosa le'baka napakkaramulai boe-boenu! 33 E, ikau ngaseng tau ja'dalaka siagang sossorang tau ja'dalaka! Antekamma lakkulle nuliliang hukkunganga ri naraka? 34 Pilangngerimi baji'-baji': LaKusuroi battu ri kau na'bi-na'bia, tu cara'deka, siagang guru-gurua; na nia'mo ri ke'nanga nubuno, nia' tommo nusalli'. Nia' nusessa lalang ri balla' sambayanga, na nia' tommo nuondang mange-mange ri kota-kotaya. 35 Jari lanihukkung ngasengko sallang, lanri nubunona tau tenaya salana: Appakkaramula ri nibunona Habel tenaya salana, sa'genna nubunona Zakharia ana'na Berekia lalang ri alla'na Balla'Na Batara siagang tampa' pakkoro'bangnganga. 36 Patappa'mi angkanaya: yangasenna anjo panggaukanga lanagappa ngasengi hukkunganna tau niaka ri anne jammanga!” 37 “O Yerusalem, O Yerusalem! Kau ambunoi na'bi-na'bia. Nusambilai batu sikamma tunisuroNa Allata'ala sa'genna mate. A'mole-moleMa' ero' anraka' ngasengko sanrapang anrong janganga ancokkoi ana'-ana'na irawangang ka'nyi'na. Mingka tena ngaseng nuero'! 38 Lanri kammana minjo Nataerokamo Allata'ala anrurungangko. 39 Asseng memammi angkanaya: Appakkaramula ri kamma-kammaya anne tenamo nalanucinikKa', sa'gengKu battu poleang sallang nanukanamo, ‘Nibarakkakimi Ia battua lalang arenNa Batara.’ ”
24
1 Ri wattunna a'lampamo Isa ambokoi Balla'Na Batara ri Yerusalem, battumi ana'-ana' gurunNa anjo'jokangi bangunang-bangunanna Balla'Na Batara. 2 Nakanamo Isa ri ke'nanga, “Nucini' ngasemmi anjo bangunanga? Assemmi angkanaya, manna se're batu talania' sallang ammantang assusung ri tampa'na, nasaba' lanirumbang ngasengi!” 3 Le'baki anjo, a'lampami Isa mange ri Bonto Zaitun. Na ammemponamo, battumi ana'-ana' gurunNa angngagangi a'bicara kale-kalenna. Nakanamo ke'nanga ri Ia, “Kipaumi ri kambe anne, singngapanna nalakajariang ngaseng anjo kammaya? Apa la'jari pammateina punna battu poleangKi' sallang ri allo kala'busang jammanga?” 4 Appialimi Isa Nakana, “Tutu laloko, sollanna tena nanitipuko. 5 Nasaba' lajai sallang tau battu ambalukangi arengKu nakana, ‘Inakke minne Karaeng Mappasalamaka!’ Jaimi tau lanatipu ke'nanga. 6 Lanulangngereki sallang sa'ra bunduka, kammayatompa kabara' pa'bundukanga. Mingka teako mallakki. Nasaba' anjo sikammaya lakajariang ngaseng memang tongi; mingka teaipi anjo wattua nabattu allo kiamaka. 7 Bansa se'rea la'bunduki siagang bansa maraenga, siagang se'rea pa'rasangang lanabakkai pa'rasangang maraenga. Ri kere-keremae lakajariangi bala kacipuranga siagang lata'ge'gosoki linoa. 8 Na yangasenna anjo nampami pakkaramulanna, sanrapang tu tianang appisa'ringia ri wattu ero'na lammana'. 9 Siagang lanijakkalakko nunipassareang nisessa nampa nibuno. Lanikabirisiko ri sikontu bonena linoa, lanri amminawangko ri Nakke. 10 Na anjo wattua jai tau lammono'boko; jai lanynyaleweng, siagang lasikabirisi massing para ia. 11 Jai na'bi patipu lantipui tau jaia. 12 Teai sipato' jaina kaja'dallang alla'bang ri kere-keremae, sa'genna jai sikalimi tau tenamo nangngasseng angngamaseang. 13 Mingka inai-nai attahang sa'genna kala'busang tallasa'na, iami lanipasalama'. 14 Na lanibirittakammo ri sikontu linoa Kabara' Bajika, ri passala' antekamma batena ammarenta Allata'ala, sollanna nalangngere' ngaseng taua. Le'baki anjo nampami battu allo kiamaka.” 15 “Lanuciniki sallang ammenteng ri tampa' matangkasaka, ‘Kaja'dallang langngancuruka’, sangkamma le'baka napau Na'bi Daniel. 16 Anjo wattua, tau niaka ri pa'rasangang Yudea parallui lari nai' ri buluka. 17 Tau niaka irate ri pattongko'na ballaka teami naungi angngalle apa-apa battu lalang ri balla'na. 18 Tau niaka ri kokoa teami ammoteri angngallei bajunna. 19 Anjo allo-alloa teai sipato' appakamalla'na mae ri bai'-baine tiananga siagang bai'-baine appasusua ana' lolo! 20 Appala' doangko sollanna tena laloja nawattu bosi yareka wattu allo Pammari-mariang, nuparallu lari! 21 Ri wattu battuna anjo allo-allo appakamallaka labattumi susa lompo dudua, tenayapa nale'ba' kajariang baku' nia'na linoa, siagang tenayamo nalakajariang pole ribokoanganna. 22 Na ka'de' tena Napa'jari sinampeki Allata'ala anjo wattu kasusaang lompo dudua, ma'nassa manna sitau tenamo lakkulle salama'. Mingka lanri Nau'ranginna umma'Na, Napa'jari sinampe'mi Allata'ala anjo wattu kasusaang lompo dudua. 23 Anjo wattua, punna nia' tau angkana ri kau, ‘Ciniki, niaki anrinni Karaeng Mappasalamaka!’ yareka nakana, ‘Niaki anjoreng!’ — teako tappakki ri anjo taua. 24 Nasaba' lania' sallang battu siapa are tumappasalama' patipu, siagang na'bi-na'bi patipu. Lanappicinikangi ke'nanga gau'-gau' teai sipatoka lompona siagang appakalanna'-lannasaka, sollanna akkulle, manna umma'Na Allata'ala lanatipu todong. 25 Jari, u'rangi memangi! Kupauang mako anne la'bi riolo ri tenanapa nakajariang. 26 Punna nakana taua ri kau, ‘Ciniki, niaki anjoreng ri parang lompoa!’ — teako mangei anjoreng. Yareka punna nakana ke'nanga, ‘Ciniki, niaki anrinni accokko lalang ri kamaraka!’ — teako tappakki. 27 Nasaba' kabattuanNa sallang Ana' Ma'rupataua sanrapangi caya kila' tassioroka battu raya sa'genna kalau'. 28 Kemae nia' maya', anjoreng tommi nia' jangang-jangang pakanre mayaka.” 29 “Tena nasallo ri le'ba'na anjo wattu kasusaanga, la'jari sassammi alloa, na tenamo naccaya singara' bulanga. Latu'guru' ngasemmi bintoenga battu ri langika. Na sikamma makoasaya lalang lino, la'jari sanna'mi ricuna. 30 Le'baki anjo lammumbami rate ri langika pammatei kabattuanNa Ana' Ma'rupataua. Na anjo wattua langngarru' ngasemmi sikontu bansa-bansa niaka lalang lino. Lanacini'mi ke'nanga battu Ana' Ma'rupataua ri tompo'na rammanga, lalang koasaNa siagang kala'birang malompoNa. 31 Nipasa'rami tarompe' lompoa. Na Nasuromo malaeka'-malaeka'Na Ana' Ma'rupataua ampa'rappungangi umma'Na battu ri sikontu linoa, battu raya sa'genna kalau', kammayatompa battu timboro' sa'genna wara'.” 32 “Angngalle mako pappilajarang battu ri poko' araya. Punna lu'mu'mo siagang moncongbulomo tangke-tangkenna, kammayatompa appakkaramulami accu'la', akkullemi nuasseng angkanaya la'birimmi battu bambang alloa. 33 Kamma tomminjo, punna nucini'mo kajariang anjo passala' le'baka Kupauangko, akkullemi nuasseng angkanaya la'biring dudumi battu Ana' Ma'rupataua. 34 Assengi! Angkanaya, tenapa namate ngaseng taua nakajariang anjo passalaka. 35 Lalanynyaki langika siagang linoa, mingka tuli lania'na kana-kanangKu satunggu-tungguna.” 36 “Tena tau angngassengi ringngapanna allonna siagang tette'na; manna malaekaka ri suruga tena todong; kammayatompa manna Ana'Na Allata'ala tena todong Naassengi. Passangalinna Manggea bawang angngassengi. 37 Punna sallang battu Ana' Ma'rupataua, lakammai lampa-lampana ri jammanna Na'bi Nuh. 38 Ri allo-allo tenanapa nabattu a'ba lompoa, angnganre-nganrei, angnginung-nginungi, siagang a'bunting-buntingi taua. Kammaminjo tuli nagaukanga taua, sa'genna antama' Na'bi Nuh ri biseang lompo napareka. 39 Ri wattunna battumo a'ba lompoa antujui ke'nanga nampami naasseng ke'nanga apa kajarianga. Kamma tomminjo lampa-lampana sallang punna battu Ana' Ma'rupataua. 40 Anjo wattua nia' tau rua sitabang anjama ri kokoa: sitau lanierang, na sitau laniboli'. 41 Rua baine sitabang a'dengka ase: sitau lanierang, na sitau laniboli'. 42 Jari a'jaga-jagako, nasaba' tena nuassengi ringngapanna nalabattu Bataranu. 43 U'rangi minne! Ka'de' naasseng patanna balla' angkanaya tette' siapa ri bangngia nalabattu palukkaka, tenaja nalattinro, sollanna tena nantama' palukkaka ri balla'na. 44 Jari parallu tongko sadi'-sadia. Nasaba' tena nuassengi wattunna nati'ring lania' battu Ana' Ma'rupataua.” 45 Nakanamo pole Isa, “Punna kamma, maka kereanga palayang tuli bajika siagang cara'deka? Iami niangka' ri karaenna a'jari kapala mae ri palayang-palayang maraenga, sollanna nasare ke'nanga kanre punna narapi' wattunna. 46 Teai sipato' upa'na anjo palayanga, punna ammotere' karaenna nanirapikang anggaukangi siagang baji' jama-jamanna. 47 Patappa'mi angkanaya lanapappirannuang ngasengi apa-apanna anjo karaenga mae ri anjo palayanga. 48 Mingka punna kodi sipa' anjo palayanga, lanakanamo lalang ri nyawana, 49 ‘Lasallo iji nampa ammotere' karaenga,’ naallemi naba'ji palayang-palayang maraenga. Nampa angnganre siagang angnginung-nginung siagang tu nangaia angnginung sa'genna nasa'ring. 50 Nati'ring ammotere' karaenna ri allo siagang ri tette' tenaya naassengi. 51 Niba'jimi anjo palayanga ri karaenna sa'ge patea-teana, nampa nipela' antama' ri pammantanganna tau munapeka. Lasessa sikalimi siagang langngarru'-arru'mi ke'nanga angkarruki sarenna.”
25
1 “Punna battu Ana' Ma'rupataua salaku Batara, lakammai anne pangngebaranna: Nia' sampulo tulolo paerang bunting, massing angngalle sulo, nampa a'lampa mange anruppai bunting bura'nea. 2 Nia' lima ri ke'nanga tolo, na lima maraengannaya cara'deki. 3 Anjo limaya tulolo toloa, angngerangi sulo mingka tangngerangai minynya' tana pappasadia. 4 Anjo tulolo cara'deka, angngerangi sulo nangngerang todong minynya' tana pappasadia. 5 Na talintaka battu anjo bunting bura'nea. Jari appakkaramulami ta'do'do' ngaseng anjo tuloloa, sa'genna attinro. 6 Ri lantannamo bangngia, nampami nia' sa'ra akkio' angkana, ‘Nia' minjo mae bunting bura'nea! Umba niruppai!’ 7 Ambangummi anjo sampuloa tulolo na massing naparinra sulona ke'nanga. 8 Nakanamo anjo tulolo toloa mae ri tulolo cara'deka, ‘Sare tongki' minynya' tananu sike'de', kaikatte lamatemi rinrana sulota.’ 9 Appialimi anjo tulolo cara'deka angkana, ‘Takkulleai! Nasaba' kala'busang ngasengki' sallang minynya'. A'lampamako ammalli ri ga'dea.’ 10 A'lampami anjo tulolo toloa mange ammalli minynya' tana ri ga'dea. Lalang a'lampana ke'nanga, battumi bunting bura'nea. Antama'mi anjo tulolo cara'deka anrurungangi anjo bunting bura'nea ri tampa' passua'-suarranga, nampa nitongko' pakke'buka! 11 Le'baki anjo nampami battu anjo tulolo maraenga. Akkiok-kio'mi ke'nanga angkana, ‘O Karaeng, o Karaeng, kisungke sai pakke'buka.’ 12 Mingka appialimi anjo bunting bura'nea nakana, ‘Tena ngaseng nakuassengko!’ ” 13 Le'baki anjo Natongko'mi Isa anjo pangngebaranga Nakana, “Lanri kammana, a'jaga-jaga mako, nasaba' tena nuassengi allonna siagang tette'na nabattu Ana' Ma'rupataua.” 14 “Punna battu Ana' Ma'rupataua salaku Batara, lakammai anne pangngebaranna: Nia' se're bura'ne ero' a'lampa ri se'reang pa'rasangang bella. Nakio'mi tallua palayanna, nampa napappirannuangang barang-baranna ri ke'nanga. 15 Massing nasaremi anjo palayanna situru' massing pakkullena. Anjo se'rea nasarei limassa'bu doe' ringgi' bulaeng. Maka ruaya nasarei ruassa'bu doe' ringgi' bulaeng. Na makatallua nasarei sisa'bu doe' ringgi' bulaeng. Le'baki anjo a'lampami. 16 Anjo palayang annarimaya limassa'bu doe' ringgi' bulaeng, a'lampa memammi a'danggang; nanggappamo passawallang limassa'bu doe' ringgi' bulaeng. 17 Kamma tomminjo nagaukanga palayang annarimaya ruassa'bu doe' ringgi' bulaeng; nanggappamo passawallang ruassa'bu doe' ringgi' bulaeng. 18 Mingka anjo palayang annarimaya sisa'bu doe' ringgi' bulaeng, a'lampami angngeke kali'bong nampa nacokko doe'na karaenna anjoreng. 19 Sallo sikali le'ba'namo anjo, ammotere'mi anjo karaenga. Nappakkaramulamo assirekengang siagang ke'nanga. 20 Battumi anjo palayang annarimaya limassa'bu doe' ringgi' bulaeng, nampa nasare anjo karaenga anjo doeka sampuloa sa'bu. Na nakana ri karaenga, ‘O, karaeng, limassa'bu doe' ringgi' bulaeng le'ba' kisareanga'. Kicini' minne, nia' kugappa limassa'bu passawallang.’ 21 Nakanamo anjo karaenga, ‘Baji' sikalimi! Ikau palayang bajikko siagang tutuko. Lanri akkulleko nipatappa' ri apa-apa sike'deka, lakupirannuangiko pole apa-apa jaianganga. Antama' mako nakisiagang assannang-sannang!’ 22 Nampa battu tommi anjo palayang annarimaya ruassa'bu doe' ringgi' bulaeng. Nakana ri karaenga, ‘O karaeng, ruassa'bu doe' ringgi' bulaeng le'ba' kisareanga'. Kicini' minne, nia' kugappa ruassa'bu passawallang.’ 23 Nakanamo anjo karaenga, ‘Baji' sikalimi! Ikau palayang bajikko siagang tutuko. Lanri akkulleko nipatappa' ri apa-apa sike'deka, lakupirannuangiko pole apa-apa jaianganga. Antama' mako kisiagang assannang-sannang!’ 24 Battu tommi anjo palayang annarimaya sisa'bu doe' ringgi' bulaeng. Nakanamo ri karaenga, ‘O karaeng, kuassengki' angkanaya ikatte tau sekkekki'. Angngalleki' rappo-rappoang battu ri poko'-poko' takilamunga; siagang angngalleki' wassele' ri tampa' tenaya naikatte allamungi bine. 25 Jari lanri mallakku, a'lampama' ancokkoi doetta rawa ri buttaya. Annemi doetta karaeng.’ 26 Nakanamo anjo karaenga, ‘Ikau palayang ja'dalakko siagang malasakko. Sai nuassemmi angkanaya angngallea' rappo-rappoang battu ri poko'-poko' takulamunga; siagang angngallea' wassele' ri tampa' tenaya kulamungi bine? 27 Punna kamma, siratanna nuboliki doekku ri kantoro' banga, sollanna punna niakka' ammotere' akkullei kualle ammotere' doekku siagang bungana. 28 Lanri kammana, allei ammotere' anjo doeka battu ri ia nampa nusareang anjo tau niaka sampulo sa'bu doe' ringgi' bulaenna. 29 Nasaba' tau niakamo ri ia, lanitambaiangi pole la'bi jai, sollanna la'jari kala'biang. Mingka tau tenayapa ri ia, lanialleangi pole apa-apa niaka sike'de' ri ia. 30 Na anjo palayang tenaya matu-matunna pelaki assulukang ri tampa' sassanga. Anjoremmi langngarru' siagang lasessa!’ ” 31 “Punna battu sallang Ana' Ma'rupataua a'jari Karaeng siagang nirurungang ri sikontu malaeka'Na, lammempomi irate ri empoang kala'biranNa. 32 Sikontu bansaya lanipa'rappungang ngasemmi ri dallekanNa. Nampa laNasa'la' anjo rupataua a'jari ruang pammantangang, rapang pakalawaki ansa'laki gimbalaka siagang bembea. 33 Sikamma tau le'baka anggaukangi ero'Na Allata'ala laNapa'rappungangi ri sa'ri kananNa, na maraenganga ri sa'ri kairinNa. 34 Nampa laNakana anjo Karaenga mae ri anjo tau niaka ri sa'ri kananNa, ‘Mae ngaseng mako kau tu nibarakkakia ri ManggeKu. Antama' mako ri Tampa' le'baka nipasadiang memangko ri uru nia'na linoa. 35 Nasaba' ri wattungKu cipuru' nusareA' kanre, ri wattungKu turere nusareA' je'ne inung. Ri wattungKu a'jari tau battu-battu nualleA' nupariballa'. 36 Tena care-carengKu nusareA' care-care. GarringA' nuparakaiA'. NitarungkuA' nanutulungA'.’ 37 Nakana ngasemmo anjo taua, ‘O, Batara, ringngapanna nakucinikKi' cipuru' nakusareKi' kanre, yareka turereKi' nakusareKi' je'ne' inung? 38 Ringngapanna nakucinikKi' a'jari tau battu-battu nakupariballakKi'? Ringngapanna natena Kiccare-care nakusareKi' care-care? 39 Ringngapanna kucinikKi' garring yareka nitarungku nakutulungKi'?’ 40 Lappiali Karaenga Nakana, ‘Asseng laloi anne: ri wattu nugaukanna sikammaya anjo mae ri kalase'renna sari'battangKu kaminang tunaya, ilalang kammana minjo nanugaukammo ri Nakke!’ 41 Nampa Nakana anjo Karaenga mae ri tau niaka ri sa'ri kairinNa, ‘Bellako anrinni, ikau ngaseng tau ja'dalaka! Antama' mako ri pepe' a'rinraya satunggu-tungguna, le'baka napasadiangko Billisika siagang sikamma malaeka'na! 42 Nasaba' ri wattungKu cipuru' tanusareA' kanre; ri wattungKu turere tanusareA' je'ne' inung. 43 Ri wattungKu a'jari tu battu-battu taerokako ampariballakKa'. Tena Kuccare-care, natanusareA' care-care. GarringA' siagang nitarungkuA', natena nuparakaiA'.’ 44 Appialimi ke'nanga ri Ia angkana, ‘O, Batara, ringngapanna nakucinikKi' cipuru', yareka turere, yareka nitarungku, yareka a'jari tu battu-battu, yareka taccare-carea, yareka garring, natakutulungaKi'?’ 45 Lappialimi anjo Karaenga Nakana, ‘Asseng laloi anne: ri wattunnu taeroka antulungi kalase'renna anne tau kaminang tunaya, lalang kammana minjo nutaeroka antulungA'.’ 46 Jari lanihukkung ngaseng minjo taua sa'genna satunggu-tungguna. Mingka tau anggaukangai ero'Na Allata'ala, lanakasia'mi katallassang sitojennaya siagang mannannunganga.”
26
1 Le'ba'na Napangngajarrang ngaseng Isa anjo sikammaya, Nakanamo ri ana'-ana' gurunNa, 2 “Nuassemmi angkanaya ruangallo mami naallo Lompo Paska, nalaniallemi nipassareang Ana' Ma'rupataua nampa nisalli'!” 3 Anjo wattua a'rappungammi imang-imang kapalaya siagang sikamma pinggawana tu Yahudia ri balla' lompona Imang Malompona Kayafas. 4 A'bicarami siagang a'boyami akkala' ke'nanga, antekamma nakkulle najakkala' cokko-cokko Isa, nampa nabuno. 5 Mingka nia'mo ri ke'nanga angkana, “Mingka teako jakkali ri allonna passua'-suarranga, sollanna tena nasiricui tau jaia.” 6 Ri wattunna nia' Isa ri Betania, ri balla'na Simon le'baka garring sala, 7 nia'mo sitau baine battu mae ri Ia angngerang sibotolo' minynya'-minynya' bau', sannaka ka'jala'na ballinna. Natumpami anjo minynya'-minynya' bauka ri ulunNa Isa, ri sitabanna angnganre Isa. 8 Larromi ana'-ana' gurunNa Isa nacini'na appakamma anjo bainea. Nakanamo ke'nanga, “Apa matu-matunna napa'laboang kamma anjo minynya'-minynyaka? 9 Akkullei nibalukang ka'jala' anjo minynya'-minynyaka nampa nipassareang ballinna mae ri tau kasi-asia!” 10 Nalangngere'na Isa anjo bicaranna ke'nanga, Nakanamo, “Angngapa nanususai kamma anne bainea? Anu baji' siagang anu annaba anne nagaukanga ri Nakke. 11 Ia tau kasi-asia tuli lania'na ri ampi'nu, mingka iNakke tena Kutuli lania' ri ampi'nu. 12 Punna paleng natiriki minynya'-minynya' bau' KalengKu, naparuruiMa' lamange ri jerakKu. 13 Patappa'mi angkanaya, kere-keremae nipa'la'bang Kabara' Baji' battua ri Allata'ala ri sikontu linoa, anjoremmi lanibicara todong anne nagaukanga bainea, a'jari pammatei siagang pangngu'rangi ri ia.” 14 Nia'mo kalase'renna anjo sampuloa anrua ana' gurunNa Isa, iamintu Yudas Iskariot, a'lampa mae ri imang-imang kapalaya. 15 Nakanamo ri ke'nanga, “Apa lanusareanga' punna kupassareang Isa ri kau?” Nisaremi ri ke'nanga tallumpulo doe' pera'. 16 Pakkaramulami anjo wattua a'boyami wattu baji' Yudas antekamma nakkulle napassareang Isa. 17 Ri allo pakkaramulanna allo Passua'-suarrang Roti Tenaya Nammake Pa'gambang, battumi ana'-ana' gurunNa Isa mae ri Ia. Nakanamo ke'nanga, “Kemae erotTa lanipasadia pangnganreang Paskaya?” 18 Appialimi Isa Nakana, “A'lampamako antama' ri kotaya, numange ri se'reang tau anjoreng, angkana, ‘Nakana Gurua: La'birimmi narapi' wattungKu; eroKa' angnganre Paska siagang ana'-ana' gurungKu ri balla'nu.’ ” 19 Nagaukammi ana'-ana' gurunNa Isa anjo Napassuroanga. A'lampami ke'nanga ampasadiai anjo kanre Paskaya. 20 Wattunna bangngimo, ammempomi Isa siagang anjo sampuloa anrua ana' gurunNa. 21 Lalang angnganrena ke'nanga, Nakanamo Isa, “Pilangngeri sai: nia' sallang kalase'rennu ambalukangA'.” 22 Nalangngere'na anjo, sanna' ngasemmi si'nana pa'mai'na ana'-ana' gurunNa. A'le'ba'-le'basa'mi akkuta'nang ri Isa angkana, “Tantu teaiji nakke nataba kananTa?” 23 Appialimi Isa Nakana, “Ia Kuaganga appada appanaung roti ri mangkoka, iaminjo eroka ambalukangA'. 24 Mingka lamate memang tonji Ana' Ma'rupataua, kamma le'ba' tattulisika lalang ri Kittaka. Mingka cilakami anjo tau eroka ambalukangi Ana' Ma'rupataua! Bajikangngangi punna sikali tena nale'ba' nilassukang anjo tau kammaya.” 25 Nakanamo Yudas lapung tau la'baluka, “O, Guru, tantu teaiji nakke nataba kananTa?” Nakanamo Isa, “Kamma mintu kanannu!” 26 Ri wattu angnganre bangngina Isa, angngallemi roti nampa appala' sukkuru'. Nampa Napue-pue anjo rotia. Le'baki anjo Natawa-tawaimi ana'-ana' gurunNa, Nakana, “Allei, kanremi, iaminne tubuKu.” 27 Le'baki anjo angngallemi pangnginungang anggoro' nampa appala' sukkuru' ri Allata'ala. Nampa Napassareang mae ri ana'-ana' gurunNa, na Nakana, “Angnginung ngaseng mako battu ri anne pangnginunganga. 28 Nasaba' iaminne cerakKu, ampakajarrekai janjinNa Allata'ala — cera' nipasolonga, sollanna akkulle nipammopporang sikontu dosana tau jaia. 29 Patappaki: Pakkaramula anne wattua, tenamo Kulangnginung anggoro' sa'genna narapi' wattunna Kuinung anggoro' berua siagang ikau ngaseng lalang ri Lino BeruNa ManggeKu.” 30 Le'baki anjo, akkelong-kelommi ke'nanga se're kelongang pammuji ri Allata'ala. Nampa a'lampa ke'nanga mange ri Bonto Zaitun. 31 Nampa Nakana Isa ri ana'-ana' gurunNa, “Anne bangngia lalari ngasengko ambokoiA' Kale-kalengKu; nasaba' nia' tattulisi' lalang ri Kittaka angkanaya: Nakana Allata'ala, ‘LaKubunoi anjo pakalawakia, nalari ngaseng tassia'-siara' gimbala'na.’ 32 Mingka punna attallasa' poleangA', la'lampa rioloA' mange antayangko ri Galilea.” 33 Nakanamo Petrus ri Isa, “Manna a'lampa ngaseng maraenganga ampilariKi', mingka inakke tena sikali kuero' ampilariKi'!” 34 Nakanamo Isa ri ia, “U'rangi Petrus! Ia memang jinne bangngia, ri tenanapa nattingkoko janganga napintallumMa' nusassali.” 35 Appialimi Petrus nakana, “Manna pole lasikamateangki', mingka tena sikali nakuero' ansassaliKi'!” Kammayatompa ana'-ana' gurunNa maraenga akkana kamma ngaseng tommi. 36 Le'baki anjo a'lampami Isa siagang ana'-ana' gurunNa mange ri se'reang tampa' nikana Getsemani. Nakanamo ri ana'-ana' gurunNa, “Ammempo mako anrinni antayangA', erokKa' a'lampa anjoreng appala' doang.” 37 Naerang tommi Petrus siagang ruaya ana'na Zebedeus. Paccemi siagang si'na sikalimi Nasa'ring pa'mai'Na. 38 Nakanamo ri ana'-ana' gurunNa, “Sanna' si'nana Kusa'ring pa'maikKu, kamma Kusa'ring tau lamatea. Ammantang mako anrinni anrurungangA' a'jaga-jaga.” 39 A'lampa bella-bellami Isa sike'de' mange ri dallekang, nampa su'ju' naung ri buttaya appala' doang angkana, “O, ManggeKu, ka'de' nia' kulleanna, pabellami anne passessaya ri Nakke. Mingka teaKi' naerokKu anjari, passangalinna erotTamo anjari.” 40 Le'baki anjo, ammotere'mi mae ri ana'-ana' gurunNa tallua. Mingka narapikangi attinro ke'nanga. Nakanamo ri Petrus, “Maka takkulleako angngagangA' a'jaga manna sinampe'ja? 41 A'jaga-jaga mako siagang appala' doang mako, sollanna tena nanukasiaki paccobaya. Ero' memanji nyawaya anggaukangi tojenga, mingka tamakkulleai tubua lanri lammana.” 42 A'lampami pole Isa appala' doang maka pinruanna angkana, “O, ManggeKu, punna paleng takkulleami nipakabella anne passessaya ri Nakke, natakkullea taKupisa'ringi, boli'mi kamma Kipa'jari erotTa.” 43 Le'baki anjo ammotere'mi pole, nanarapikang pole ana'-ana' gurunNa attinro, lanri ta'do'do' duduna ke'nanga. 44 Sikalipi pole a'lampa ambokoi ke'nanga, mange appala' doang maka pintallunna, kamma sumpaeng. 45 Nampa ammotere' pole ri ana'-ana' gurunNa, na Nakana, “Attinro ngasengijako siagang ammari-mari ngasengijako? Ciniki, narapi'mi wattunna lanialle Ana' Ma'rupataua, nampa nipassareang mae ri sikamma tau ja'dalaka. 46 Ambangung mako nai', umba naki'lampa! Nia'mi battu tau le'baka ambalukangA'.” 47 Lalang a'bicara kammana Isa, nia'mi battu Yudas, kalase'renna anjo ana' gurunNa sampuloa anrua. Nia'mo tau jai anrurungangi, massing angngerang pa'dang siagang palu-palu. Yangaseng minjo tau nasuroa kapa'-kapalana imanga siagang pingga'-pinggawana tu Yahudia. 48 Le'ba'mi nipato ri Yudas angkanaya, “Kereanga tau kubau sinampe', iaminjo taunna, allemi jakkala'!” 49 Battuna mange anjoreng ke'nanga, mange memammi Yudas ri Isa na nakana, “Salama', Guru!” Nampa nabau Isa. 50 Appialimi Isa Nakana, “Apa parallunu battu sari'battang?” Maju ngasemmi anjo tau jaia anjakkalaki Isa, nampa nasikko'. 51 Ti'ring nia'mo sitau ana' gurunNa niaka anrurungangi, ambi'buki kalewanna, nampa nate'ba' kalase'renna anjo tunisurona imang lompoa, sa'genna kaccili' leko' tolinna. 52 Mingka angkanami Isa ri ia, “Poterangi antama' ri banoanna antu kalewanga; nasaba' inai-nai akkarena kalewang, iami lanipanraki ri kalewang. 53 Maka tenapa nuassengi angkanaya punna erokKa', akkullei Kupala' ri ManggeKu sollanna Nasuro battu silalonna memang surudadu malaeka'Na, sampulo anrua sa'bu battu angngalleiA'? 54 Mingka punna kamma anjo, antekammami la'rupa apa le'baka napau Kittaka, angkanaya tena takajarianna anjo ri kamma-kammaya anne?” 55 Nampa Nakanamo Isa ri anjo tau jaia, “Apaka nucini' ja'dalakKa' numassing angngerang kamma pa'dang siagang palu-palu battu anjakkalakKa'? Allo-alloKu angngajara' lalang ri Balla'Na Allata'ala natena nujakkalakKa'! 56 Mingka lakajariang ngaseng memanji anne kammaya, sollanna a'rupamo apa le'baka natulisi' na'bi-na'bia lalang ri Kittaka.” Le'baki anjo, apaji nalari ngasemmo ana'-ana' gurunNa Isa, a'lampa ambokoi. 57 Le'baki najakkala' Isa, a'lampami ke'nanga angngerangi Isa mange ri balla'na Kayafas, Imang Lompoa. A'rappungang ngasemmi anjoreng sikamma guru-guru agamaya siagang sikamma pinggawana tu Yahudia. 58 Battu bellami Petrus ampinawang bokoi Isa, sa'genna paranglakkenna Imang Lompoa. Antama'mi ammempo ri alla'na pajagaya, ero' naasseng angkanaya antekamma kale'bakkanna lakajarianga ri Isa. 59 Sikamma imang-imang kapalaya kammayatompa sikamma haking Pangadelang Agamaya, massing a'boyami sa'bi a'balle-balle, sollanna akkulle nihukkung mate Isa. 60 Mingka takkulleai ke'nanga appa'nia' butti, manna pole najaimo battu sa'bi a'balle-balle ero' ambattali. Kala'busanna nia'mo rua tau battu andallekang angkana, 61 “Anne taua le'baki angkana, ‘Akkullei Kurumbang anne Balla'Na Allata'ala, nampa Kupabangung poleang ri makatalluna alloa.’ ” 62 Ammentemmi imang lompoa na nakana ri Isa, “Apaka tena Nuero' ampiali bicaranna anne sa'bi-sa'bia?” 63 Mingka tena Nakkana-kana Isa. Nakanamo pole imang lompoa ri Ia, “Nasaba' Allata'ala mattallasaka, paumi ri kambe, maka Ikau tojeng mintu Karaeng Mappasalamaka, Ana'naya Allata'ala?” 64 Appialimi Isa Nakana, “Annaba mintu kanannu. Mingka patappa'mi angkanaya: Anne kamma appakkaramulami lanucini' Ana' Ma'rupataua ammempo ri sa'ri kananNa Allata'ala Kaminang Koasaya. Siagang lanucini' tommi sallang battu poleang irate ri langika ri tompo'na rammanga!” 65 Nalangngere'na imang lompoa akkana kamma Isa, naallemi nasinre' jubana na nakana, “Nahinai Allata'ala! Tenamo naparallu pole sa'bia. Massing nilangngere'mi bicaranNa anghinai Allata'ala. 66 Jari antekamma panggappanu ngaseng?” Appialimi ke'nanga angkana, “A'nassami kasalanna. Jari siratangi nihukkung mate.” 67 Massing battumi ke'nanga ampi'rui rupanNa Isa, nampa nasessa naba'ji. Nia' tommo antempaka'rangi, 68 na nakana, “O, Karaeng Mappasalamaka, tappu sai bedeng siagang pau sai bedeng, inai antempaka'rangKo?” 69 Anjo wattua sitabang niaki Petrus ammempo pantarang ri paranglakkenga. Nia'mo kalase'renna baine palayang battu angkana ri Petrus, “Sai siagang tongko anjo Isa tu battua ri Galilea?” 70 Mingka assassala'mi Petrus ri dallekanna ngaseng ke'nanga, nakana, “Tena kupahangi antu apa nupakkuta'nanganga.” 71 Le'baki appiali kamma, a'lampami mange ri pakke'bu' parang lakkenga. Nia'mo pole baine palayang maraeng anciniki; na nakana ri tau niaka ngaseng anjoreng, “Anne taua assiagang tongi sumpaeng Isa, anjo tu battua ri Nazaret.” 72 Assassala'mi siagang assumpami Petrus nakana, “Tojenga', tena nakuassengi anjo taua!” 73 Tena nasallo le'ba'na anjo, battumi ri dallekanna Petrus tau niaka ammenteng anjoreng, na nakana ke'nanga, “Ma'nassa kalase'rennako battu ri ke'nanga. A'nassa sikali nilangngere' ri batenu a'bicara.” 74 Assumpa-sumpa tojemmi Petrus nakana, “Matea' naung, tena tojeng nakuassengi anjo taua!” Anjo wattua attingkokomi janganga. 75 Nau'rangimi Petrus le'baka Napau Isa ri ia angkanaya, “Ri tenanapa nattingkoko janganga na pintallumMa' nusassali.” Assulukammi Petrus angngarru', si'na pa'mai'na.
27
1 Ri bari'basa' dudua, natappukimi sikontu kapala imanga kammayatompa pamimping-pamimpinna tu Yahudia, angkanaya lanabunoi Isa. 2 Nasikko'bokomi Isa, nampa naerang ke'nanga mange napassareang ri Pilatus, wakkele'na pamarenta Roma. 3 Nacini'na Yudas, le'baka ambalukangi Isa, angkanaya nihukkummi Isa, nasassala'mi kalenna. Naerammi mange napoterang anjo doeka tallumpuloa doe' pera' ri imang-imang kapalaya siagang pamimping-pamimpinna tu Yahudia. 4 Nakanamo ri ke'nanga, “Dorakama' kubalukangi tau tenaya salanna, sa'genna nihukkung mate!” Appialimi ke'nanga angkana, “Ikatte tena naparallu kijampangi; anjo urusannu kau!” 5 Napasambilami Yudas anjo doeka antama' ri Balla'Na Batara, nampa a'lampa anggentungi kalenna. 6 Mangemi imang-imang kapalaya anrappungi anjo doeka. Na nakana ke'nanga, “Anne doeka, doe' cera'. Situru' atoranga ri agamaya, anne doe' kammaya takkulleai nipantama' ri pammoneang passidakkanga lalang ri Balla'Na Batara.” 7 Assamaturu'mi ke'nanga ampaballi anjo doeka se're tampa' niarenga Tampa' Papare' Uring. Anjo tampaka nipare'mi pa'jerakkanna tau battu pantarang pa'rasanganga. 8 Iaminjo saba'na na sa'genna kamma-kamma anne niarengi anjo tampaka, “Tampa' Cera'”. 9 Lanri kammana, a'rupami apa le'baka napau Na'bi Yeremia, angkanaya, “Natarimai ke'nanga tallumpulo doe' pera', iamintu pa'bayara' ballinna KalenNa, napassamaturukianga bansa Israel. 10 Na anjo doeka napakei ke'nanga ammalli Tampa' Papare' uring, situru' le'baka Napassuroang Batara ri nakke.” 11 Ri wattunna andallekang Isa ri Pilatus, guburnurna anjo pa'rasanganga, akkuta'nammi Pilatus nakana, “Maka karaennaKo tu Yahudia?” Appialimi Isa Nakana, “Kammaminjo nukanaya.” 12 Mingka ri wattunna jai sikali nituduangi ri imang-imang kapalaya siagang pamimping-pamimpinna tu Yahudia, tena sikali Naero' akkana Isa. 13 Jari nakanamo Pilatus ri Ia, “Tanulangngerai anjo apa natuduangKo ke'nanga?” 14 Mingka manna sikali tena todong Naero' appiali Isa, sa'genna lannasa' sikalimi Pilatus. 15 Punna narapi' allo lompo Passua'-suarrang Paska, biasana nia' sitau tu nitarungku nilappassang ri pamarentaya, situru' napilea tau jaia. 16 Anjo wattua nia' se're tu nihukkung, a'la'banga niasseng kaja'dallanna ri tau jaia. Arenna iamintu Isa Barabas. 17 Jari wattunna a'rappungammo tau jaia, akkuta'nammi Pilatus ri ke'nanga nakana, “Kereanga nupala' lakulappassang? Isa Barabas yareka Isa nigallaraka Almasi?” 18 Nakkana kamma anjo Pilatus, kasaba' naassengi angkanaya na napassareang ke'nanga Isa, lanri assereati ke'nanga ri Isa. 19 Ri wattunna ammempo Pilatus anjoreng ri kantoro' pangadelanga nia'mi battu pappasanna bainenna angkana, “Tea' laloko pantama'-tamakki kara-karana antu tau tenaya salana. Nasaba' lanri Iami nakunggappa so'na appakamalla'-malla' dudua, anne alloa.” 20 Mingka imang-imang kapalaya siagang pamimping-pamimpinna tu Yahudia, tuli naajara' salai tau jaia sollanna napala' ri Pilatus, na Barabas nilappassang, nampa Isa nihukkung mate. 21 Akkuta'nammi pole Pilatus ri ke'nanga nakana, “Kereanga anne tau ruaya nupala' kulappassang?” Appialimi ke'nanga angkana, “Barabas!” 22 Akkuta'nammi Pilatus ri ke'nanga nakana, “Jari apa lakugaukangi ri anne Isa, nigallaraka Almasi?” Appialimi ke'nanga angkana, “Allei Salli'!” 23 Akkuta'nammi Pilatus nakana, “Mingka apa kaja'dallanNa?” Pila' akkio' lompomi pole ke'nanga angkana, “Allei Salli'!” 24 Kala'busanna naassemmi Pilatus angkanaya tena memang tommo maraeng akkulle nagaukang. Siagang akkullei a'jallo' anjo tau jaia punna tena niturukiangi ero'na. Jari angngallemi je'ne', nampa nabissai limanna ri dallekanna anjo tau jaia. Na nakana, “Inakke tena nakutanggongi kamateanNa anne taua! Anne urusannu ngaseng kau!” 25 Appiali ngasemmi anjo tau jaia angkana, “Boli'mi kamma, ikambepa siagang ana'-ana'na ikambe antanggongi hukkunganga lanri kamateanNa!” 26 Nalappassammi Pilatus anjo Barabas. Nampa nasuro taua ancamboki Isa; nampa napassareang nierang mange nisalli'. 27 Le'baki anjo nierammi Isa ri surudaduna Pilatus antama' ri balla' lompona guburnurka. A'rappungang ngasemmi surudadua amparitangngai Isa. 28 Napusumi ke'nanga pakeanNa Isa, nampa napipakei juba cura' lame butung. 29 Appare'mi ke'nanga passikko' ulu akkatintinga, nampa napasongko' ri ulunNa Isa. Nampa napita'galliang takkang bulo ri lima kananNa. Le'baki anjo akkulantu'mi ke'nanga ri dallekanNa Isa. Nacau-caumi Isa nakana, “Iye', Karaeng tu Yahudi!” 30 Napi'ruimi rupanNa Isa, nampa naalle anjo takkanga, na napalu-palui ulunNa. 31 Le'baki nakarek-karenai, napasulu'mi ammotere' ke'nanga anjo juba cura' lame butunga. Nampa napipakei ammotere' pakeang KalenNa Isa. Le'baki anjo nierammi assulu' nampa mange nisalli'. 32 Ri tangngana aganga, sibuntulu'mi ke'nanga siagang sitau tu battu ri Kirene, niarenga Simon. Napassami ke'nanga anjo taua ampisangi kayu salli'na Isa. 33 Anrapi'mi ke'nanga mange ri se'reang tampa' niarenga Golgota, battuanna “Tampa' Tangkora'”. 34 Battuna anjoreng nasaremi angnginung anggoro' Isa, nicampuruka campurang sannaka pai'na. Mingka Naassenna kasia'na teami Isa angnginungi anjo anggoroka. 35 Nampa nasalli' ke'nanga Isa. Na nabotorimi pakeanNa ero' nabage massing tawana. 36 Le'baki anjo ammempomi ke'nanga anjagai Isa. 37 Ri tompo' ulunNa Isa, nia' natannang ke'nanga tulisang angkanaya, “Iaminne Isa, Karaenna tu Yahudia”. Iaminjo tattulisika nituduangi Isa. 38 Nia' todong rua tau paella' naagang Isa nisalli'; se're ri sa'ri kananNa, se're ri sa'ri kairinNa. 39 Sikamma tau niaka numalo, massing napammenggong ulunna, nahina-hinaimi Isa. 40 Nakana ke'nanga, “Ikaumi eroka anrumbangi Balla'Na Allata'ala, na nupabangung poleang ri makatalluna alloa! Punna Ana'naKo Allata'ala, naung maKo mae battu ri antu sallika, na Nupasalama' KalenNu!” 41 Kamma tomminjo nagaukang imang-imang kapalaya siagang guru-guru agamaya, kammayatompa pamimping-pamimpinna tu Yahudia. Nacau-cau tommi Isa angkana, 42 “Napasalamaki tau maraenga, na KalenNa taNakulle Napasalama'! Punna Karaennai bansa Israel, lappassammi naung battu ri sallika kamma-kamma anne, na kinampa tappa' ri Ia. 43 Na patappaki Allata'ala, siagang Nakanai KalenNa Ana'Na Allata'ala. Jari umbamo niciniki kamma-kamma anne, maka ero' tojenji Allata'ala ampasalamaki.” 44 Anjo paella' Naaganga nisalli', amminawang turu' tommi anghina-hinai Isa. 45 Ri tangngana alloa, kira-kira tallung tette', a'jari sassammi sikontu pa'rasanganga. 46 Tette' tallu ri karuenga, ammarrang lompomi Isa Nakana, “Eli, Eli, lama sabakhtani?” battuanna, “O, Allata'alaKu, O, Allata'alaKu, angngapa naKibokoiA'?” 47 Nalangngere'na tau niaka anjoreng akkio' kamma Isa, angkanami ke'nanga, “Nakioki Na'bi Elia!” 48 Nia'mo kalase'renna ke'nanga akkaro-karo mange angngalle bunga batu karang, nampa napantama' ri anggoro' kaccia; nampa napasappi' ri cappa' kayu la'bua, na napanai' napa'reppese' mae ri bawaNa Isa. 49 Mingka nia'mo maraenganga angkana, “Tayangi rolong sinampe'. Umba na niciniki, maka battu tojenji Na'bi Elia ampasalamaKi?” 50 Ammarrang lompomi pole Isa, nampa tappu' nyawaNa. 51 Anjo wattua sinre'mi gordenga lalang ri Balla'Na Batara, ta'bage rua battu rate sa'genna naung. Ta'ge'goso'mi buttaya, siagang ta'bage ruami bulu' batua. 52 Tassungkemi kuburuka, siagang jaimi tau mate umma'Na Allata'ala nipattallasa' poleang. 53 Assulu'mi ke'nanga battu ri jeraka ri wattunna attallasa' poleang Isa battu ri kamateanga, nampa antama' ke'nanga ri Yerusalem. Na jai tau anciniki ke'nanga anjoreng. 54 Malla'mi komandanna surudadua siagang sikamma surudadu niaka anjagai Isa, ri wattunna nacini' ta'ge'goso' buttaya siagang yangasenna anjo kajarianga. Nakanamo ke'nanga, “Ma'nassa Ana'Na tojeng Allata'ala anne Taua!” 55 Jai todong tu baine anjoreng, ancini' battu bellai anjo kajarianga. Ia ngaseng minjo ke'nanga le'baka amminawang siagang ambantui Isa appakkaramula battu ri Galilea. 56 Nia' tommi anjoreng Maria Magdalena, Maria amma'na Yakobus siagang Yusuf, kammayatompa anrong ana'-ana'na Zebedeus. 57 Anjo bangngia nia'mo se're tau kalumanynyang battu ri Arimatea niarenga Yusuf, ana' gurunNa todong Isa. 58 A'lampai andallekang ri Pilatus, na napala' maya'na Isa. Na parentakammi Pilatus sollanna nisareang anjo maya'Na Isa. 59 Naallemi Yusuf anjo mayaka nampa naroko' kaeng lenang beru. 60 Nampa naerang anjo maya'Na Isa mange natarawang ri jera' napareka kalenna. Anjo jeraka lalangi ri bulu' batua nipare'. Le'baki napantama' maya'Na Isa, nagulungimi batu lompo nampa natongko' pakke'bu'na anjo jeraka, nampa a'lampa. 61 Mingka Maria Magdalena siagang Maria se'rea, ammantangiji ammempo andallekangi anjo jeraka. 62 Ammukona, ri allo Pammari-marianga, a'lampami imang-imang kapalaya siagang tu Farisia mange andallekang ri Pilatus. 63 Na angkana ke'nanga, “Nau'rangi ikambe angkanaya ri wattu attallasa'na anjo patipua le'baki angkana, ‘Ri makatalluna alloa lattallasa' poleangA'.’ 64 Jari suro jagai baji'-baji' anjo jeraka sa'genna tallungalloa, sollanna tena nabattu ana'-ana' gurunNa allukkaki maya'Na, nampa nakabarrang angkana attallasa' poleammi battu ri kamateanga. Na anne pannipuang ri boko dudua lakodiangangi na pannipuang rioloa.” 65 Nakanamo Pilatus ri ke'nanga, “Nia' surudadu pangawala'nu. A'lampamako suro jagai baji'-baji'anjo jeraka.” 66 A'lampami ke'nanga mange ri jeraka. Najarrekimi ke'nanga anjo batu pannongko'na jeraka. Nampa nasuro surudadua a'jaga ri dallekanna anjo jeraka, sollanna tena tau angkaccaki.
28
1 Allalonamo allo Pammari-marianga, iamintu ri allonna Minggua, ri bari'basa' dudua, a'lampami Maria Magdalena siagang Maria maraenganga, mange assiara ri jera'Na Isa. 2 Ti'ring ta'ge'goso' sanna'mi buttaya. Nampa nia'mo malaeka'Na Batara manaung battu ri suruga mange anggulungi assulu' anjo batu antongkokiai jera'Na Isa, nampa nai' ammempo ri tompo'na anjo batua. 3 Accayai rupanna nicini' anjo malaekaka kamma kila', na pakeanna sanna' sikali kebo'na. 4 Annekkere'mi anjo sikamma surudadu a'jagaya napakamma malla', sa'genna pi'lasa' ngaseng tanja'na kamma tau matea. 5 Nakanamo anjo malaekaka ri anjo bai'-bainea, “Teako mallakki! Kuassengi angkanaya Isa, le'baka nisalli', battu nuboya. 6 Mingka tenami anrinni. Nasaba' attallasa' poleammi situru' kananNa pirangalloang. Mae mako na nucini' le'ba' pammantanganNa. 7 A'lampamako linta' mange ampauangi ana'-ana' gurunNa angkanaya, ‘Atallasa' poleammi battu ri kamateanNa, na kamma-kamma anne a'lampa riolomi mange ri Galilea. Anjoremmi sallang lanucini'!’ U'rangi laloi anne kupabattua.” 8 Akkaro-karomi anjo bai'-bainea a'lampa ambokoi anjo jeraka. Sanna' malla'na ke'nanga, mingka sanna' todong rannuna ngaseng nyawana. Larimi ke'nanga mange ampabattui ri ana'-ana' gurunNa Isa. 9 Ti'ring nia'mi Isa ampappicinikangi KalenNa ri anjo bai'-bainea, siagang angkanami, “Salama'!” A'reppese'mi ke'nanga mange ero' anrakaki bangkenNa siagang ansombai Isa. 10 Nakanamo Isa ri ke'nanga, “Teako mallakki, a'lampamako mae ri sikamma sari'battangKu na nupauang sollanna a'lampa ke'nanga mange ri Galilea; anjorempA' sallang nacini' ke'nanga.” 11 Lalang a'lampana anjo bai'-bainea, nia'mo siapa are Surudadu a'jagaya ri jeraka, ammotere' ri kotaya. Mangei nalaporo' ke'nanga ri imang-imang kapalaya sikamma anjo apa le'baka kajariang. 12 Sipa'bicarami anjo imang-imang kapalaya siagang pamimping-pamimpinna tu Yahudia. Assikongkolo'mi ke'nanga, nampa nasare doe' sijaiang anjo Surudadu a'jagaya. 13 Siagang napasammi ke'nanga angkanaya, “Paui ri taua angkana battui ana'-ana' gurunNa allukkaki maya'Na ri bangngia ri wattunnu attinro ngaseng. 14 Na punna nalangngere' Pilatus anne passalaka, ikambepa anynyonyoki sollanna tena nunia' anggappa susa.” 15 Naallemi Surudadu pajagaya anjo doeka, na nagaukang anjo apa nipappasanganga ri ke'nanga. Lanri kammana minjo natassiara'mo anjo caritaya ri tangnga-tangngana tu Yahudia sa'genna anne alloa. 16 A'lampami mange se'reang bonto ri Galilea asse're ana'-ana' gurunNa Isa, situru' le'baka Napappasangang Isa ri ke'nanga. 17 Nacini'na ke'nanga Isa anjoreng, su'ju'mi ke'nanga anynyomba ri Ia. Mingka nia' todong ri ke'nanga bata-bata. 18 A'reppese'mi Isa ri ke'nanga, na Nakana, “Sikontu koasaya, ri suruga siagang ri linoa le'ba' ngasemmi nipassareang ri Nakke. 19 Jari a'lampamako mange ri sikontu bansaya ri lino, pa'jarimi ke'nanga ana'-ana' gurungKu. Je'neki ke'nanga lalang arenNa Manggea, siagang Anaka, kammayatompa RohNa Allata'ala. 20 Ajaraki ke'nanga anggaukangi sikontu le'baka Kupassuroang ri kau ngaseng. Na u'rangimi angkanaya laniakKa' anrurungangko sa'genna kala'busang jammanga.”
|