Genesis
ACTS
1
1 Natarimai Teofilus, mabaji' pa'maika, Le'ba'mi kupakasingara' lalang ri kitta' makase'rea, sikamma apa le'baka Nagaukang siagang Napangngajarrang Isa, pakkaramula ri uru-uru Nagaukanna jama-jamanNa, 2 sa'genna ri allo ta'angka'Na nai' ri suruga. Ri tenanapa naNai' ri suruga, Nasare ngasemmi pappijo'jo' sikamma tunisuro le'baka Napile, lalang koasaNa RohNa Allata'ala. 3 Ri le'ba'namo attallasa' poleang battu ri kamateanga, lalanna patampulo alloa, a'mole-molei a'nyata sikali Napappicinikang KalenNa mae ri tunisuroNa, lanri ero'Na Napa'nassa angkanaya ma'nassa attallasa' poleammi battu ri kamateanga. Nicini'mi ri ke'nanga, siagang sipa'bicarami siagang ke'nanga ri passala'na Allata'ala siagang PamarentahanNa. 4 Na ri wattunna a'rappungang siagang ke'nanga, Nasaremi parenta ke'nanga Nakana, “Teako rolong a'lampai battu ri Yerusalem. Attayangko rolong anjoreng, sa'gennu Nasare Allata'ala anjo apa le'baka Napa'janjiang, iamintu apa le'baka Kupau ri kau ri pirangalloang. 5 Nasaba' je'ne' napake Yohanes anje'nekko, mingka tasalloami anne nulanije'ne' siagang RohNa Allata'ala.” 6 Ri wattunna a'rappungang sikamma anjo tunisuroa siagang Isa, akkuta'nammi ke'nanga ri Isa, angkana, “O Batara, ero' maKi' kamma-kamma anne ampaenteng poleangi PamarentahanTa ri bansa Israel?” 7 Appialimi Isa Nakana, “KalenNa ManggeKu lampattantui allonna siagang wattunna. Anjo tena naparallu nuasseng, nasaba' anjo lalang koasaNai Manggea. 8 Mingka punna battumo RohNa Allata'ala mange ri kau, langgappa mako koasa. Na la'jari mako sa'bingKu ri Yerusalem, ri sikontu Yudea, ri Samaria, sa'genna ri cappa'na linoa.” 9 Le'baki akkana kamma Isa, niangka'mi nai' ri suruga, nicini' ngaseng ri ke'nanga, sa'genna nitongko' ri rammanga natanicinikamo ri ke'nanga. 10 Lalang accongana ke'nanga nai' ri langika, ri wattunna ta'angka' Isa nai' ri suruga, ti'ring nia'mo rua tau ammakeang kebo', ammenteng ri ampi'na ke'nanga. 11 Nakanamo anjo tau ruaya, “E, ikau ngaseng tu battua ri Galilea, angngapa nummantang bawang antureng acconga nai' ri langika? Anjo Isa, nucinika ta'angka' nai' ri suruga, labattu poleangi sallang lalang kala'biranNa, sangkamma la'biri'Na ri wattunna nucini' nai' ri suruga sumpadeng.” 12 Le'baki anjo ammotere'mi anjo sikamma tunisuroa battu ri Bonto Zaitun mange ri Yerusalem. Anjo bontoa nia' kira-kira se're kilometere' bellana battu ri Yerusalem. 13 Ri wattunna battu ke'nanga mange ri Yerusalem, mangemi ke'nanga ri balla' napannumpangia ke'nanga, nampa nai' ke'nanga ri kamara' ratea ri lotenga. Anjo sikamma tunisuroa iamintu Petrus, Yohanes, Yakobus, Andreas, Filipus, Tomas, Bartolomeus, Matius, Yakobus ana'naya Alfeus, Simon nigallaraka Patriot, na Yudas ana'naya Yakobus. 14 Tuli a'julu atimi a'rappungang ke'nanga untu' appala' doang siagang bai'-bainea, siagang Maria amma'Naya Isa, kammayatompa sikamma sari'battanNa ngaseng Isa. 15 Ri se'reang allo, ri wattunna a'rappungang ke'nanga — nia' kira-kira sibilangngang ruampulo jaina tau hadere' — ammentemmi Petrus a'bicara. Nakana, 16 “Sikamma sari'battangku ngaseng! Apa niaka tattulisi' lalang ri Kittaka, musti kajariang ngasengi. Riolo, Napau memammi RohNa Allata'ala lalang ri kalenna Daud ri passala'na anjo Yudas, le'baka ampimpingi taua battu anjakkalaki Isa. 17 Anjo Yudas iami kalase'renna tau battua ri katte, siagang le'ba' tongi nipile untu' angngagangki' sipanjamang.” ( 18 Anne lapung Yudas anggappami butta untu' jera'na, a'jari sawala'na ri gau' kaja'dallanna ampasikongkolangi Isa. Tu'guru'mi naung ri buttaya namate, pue battanna, sa'genna assulu' ngaseng parru'na. 19 Naasseng ngasemmi sikontu tau niaka ammantang ri Yerusalem anjo passalaka. Iaminjo saba'na nanaaremmo ke'nanga Akeldama anjo tampaka, situru' bicaranna ke'nanga, battuanna ‘Butta Cera'’.) 20 “Nasaba' nia' tattulisi' lalang ri Kitta' Pammuji-mujia angkana, ‘Lappassammi ammantang a'jari sino pammantanganna; teako niakki manna sitau ammantang lalang.’ Nia' pole tattulisi' angkanaya, ‘Lappassammi naalle tau maraeng empoanna.’ 21 Lanri kammana minjo, namusti nia' sitau ansambeangi Yudas, amminawanga siagang ikatte a'jari sa'bi angkanaya ma'nassa attallasa' poleammi Batarata Isa battu ri kamateanga. Anjo tau ansambeangai, musti kalase'renna tau niakamo tuli angngagangki' ri wattunna a'lampa Isa ri kere-keremae siagang ikatte. Iamintu appakkaramula ri wattunta naje'ne' Yohanes, sa'genna niangka' Isa nai' ri suruga battu ri tangnga-tangngata.” 23 Jari nia'mo rua tau nacalongkang anjo tau hadereka, iamintu Yusuf nigallaraka Barsabas (nigallara' tongi Yustus), siagang Matias. 24 Nampa appala' doang ke'nanga. Nakana ke'nanga, “O Batara, iKatte angngasseng ngasengi atinna sikontu rupataua. Tu'guru'mi Yudas battu ri empoanna salaku tunisuroTa, siagang matemi. Jari Kijo'jokang sai ikambe, kereanga ri anne tau ruaya Kipile antarimai anne jama-jamanga, ansambeangai Yudas.” 26 Le'baki anjo, nilotereimi anjo ruaya areng, natu'guru' mae ri Matias. Jari niangka'mi Matias a'jari tunisuro, lasiaganga anjo sampuloa asse're tunisuroNa Allata'ala.
2
1 Ri wattunna narapi'mo allo Pentakosta, a'rappungang ngasemmi sikamma tau tappaka ri se'reang tampa'. 2 Ti'ring nia'mo sa'ra kalangngerang battu ri langika, sangkammaya anging lompo sa'ranna. Sangnging ia mami anjo sa'raya kalangngerang anjoreng ri balla' napammantangia ke'nanga ammempo a'rappungang. 3 Nampa nia'mo nacini' ke'nanga lila-lila kamma pepe', allepa' mange-mange sa'genna a'dongko' massing-massing mae ri ke'nanga. 4 Nikoasai ngasemmi ke'nanga ri RohNa Allata'ala, sa'genna appakkaramulamo akkulle a'bicara lalang a'rupa-rupa bicara. Akkullemi a'bicara ke'nanga situru' apa nisareangai ri RohNa Allata'ala untu' lanapau. 5 Anjo wattua jai tu Yahudi ammantang ri Yerusalem, battua ri a'rupa-rupa pa'rasangang ri sikontu linoa. Sangnging tau malla' ngaseng ke'nanga ri Allata'ala. 6 Ri wattunna kalangngerang anjo sa'raya, jaimi tau battu a'lipung. Ta'bangka ngasemmi ke'nanga nalangngere'na akkulle a'bicara anjo tau tappaka ngaseng situru' massing bicaranna ke'nanga. 7 Lalang lannasa'na siagang takkajanna'na ke'nanga, nakanamo ke'nanga, “Sikontu anjo tau a'bicaraya sangnging tu Galilea! 8 Antekamma kajarianna, sa'genna akkulle nilangngere' ke'nanga a'bicara lalang bicara battua massing ri pa'rasanganta? 9 Ikatte tu battua ri pa'rasangang Partia, Media, Elam; Mesopotamia, Yudea, Kapadokia, Pontus, Asia, 10 Frigia, Pamfilia, Mesir, siagang battu ri daera-daera Libia sikambania Kirene; ikatte niakki' tu battu ri Roma, 11 nia' tu Yahudi, siagang tu bansa-bansa maraeng antamayamo agama Yahudi; nia' todong tu battu ri Kreta siagang battu ri Arab. Massing nilangngere' ngasemmi ke'nanga a'bicara lalang bicaranta ngaseng; nabicaraya ke'nanga iamintu gau'-gau' appakalannasa' Nagaukanga Allata'ala!” 12 Lalang lannasa'na siagang takkajanna'na ke'nanga, akkuta'nang ngasemmi para ia ke'nanga angkana, “Apa ngaseng battuanna anne apa kajarianga?” 13 Mingka nia' tommo ri ke'nanga pacau-cau, angkana, “Hah, poro nasa'ring ngasennaja anjo ke'nanga!” 14 Ammentemmi Petrus siagang anjo sampuloa asse're tunisuro maraenganga, nampa a'bicara mae ri anjo tau jaia. Nalompoimi sa'ranna Petrus angkana, “Sikamma sari'battangku, tu Yahudia siagang sikamma tau niaka ammantang ri Yerusalem! Pilangngeri baji'-baji', nasaba' parallui nipakasingara' anne passalaka mae ri kau ngaseng. 15 Anne taua tena nanasa'ringi sangkamma nupakkanaya ri nawa-nawannu, nasaba' kamma-kamma anne nampai tette' salapang ri bari'basaka. 16 Mingka anne passalaka, le'ba' memammi Napabattu Allata'ala lalang ri kalenna Na'bi Yo"el, ri wattunna angkana: 17 Nakana Allata'ala, ‘Ri allo kala'busanna jammanga laKupaturungi RohKu mae ri sikamma taua. Lanapabattuangko ana'-ana' bura'nenu siagang ana'-ana' bainenu sikamma apa-apa le'baka Kupabattu mae ri ke'nanga. Lanaciniki tu rungkanu apa-apa Kupappicinikanga mae ri ke'nanga. Lasso'nai tu toa-toanu, iamintu so'na Kupabattua mae ri ke'nanga. 18 Ba'lalo manna ata-atangKu — bura'ne siagang baine — laKupiturungi tongi RohKu anjo allo-alloa. Lanapabattuangko ke'nanga, apa-apa le'baka Kupabattu mae ri ke'nanga. 19 Lappa'niakKa' apa-apa appakalannasa' rate ri langika, siagang gau'-gau' tantamaya ri akkala'nu irawa ri anne linoa; lania' cera' siagang pepe', umbu siagang saliu'. 20 La'jari sassangi alloa, la'jari ejai bulanga sangkamma cera' ri tenanapa nabattu AllonNa Batara, iamintu allo malompoa siagang mala'birika. 21 Anjo wattua, inai-nai akkio' mae ri Batara iami lanipasalama'.’ 22 Sikamma sari'battangku tu Israelka! Pilangngeri anne apa kupaua: Anjo Isa, battua ri Nazaret, nisarei tugasa' ri Allata'ala untu' ikau ngaseng. A'nassa sikalimi anjo lalang ri gau'-gau' appakalannasa' siagang apa-apa tenaya narapiki akkala'nu, le'baka Nagaukang Allata'ala ri tangnga-tangnganu lalang ri KalenNa anjo Isa. Yangasenna anjo massing nuassemmi. 23 Situru' ero' KalenNa, Natappukimi Allata'ala laNapassareang Isa Almasi mae ri kau ngaseng. Na ri wattunna nipassareang mae ri kau ngaseng, nuallemi nubuno, lanri nubalang parekanna nisalli' ri tau ja'dalaka. 24 Mingka nipattallasa' poleangi ri Allata'ala battu ri alla'na tau matea. Nia'luki ri kamateanga, mingka nilappassangi ri Allata'ala, lanri tena olona lakkulle tuli lanikoasai ri kamateanga. 25 Ri passala'na anne Isa, le'baki Daud akkana kamma anne, ‘Kuciniki Batara tuli nia' ri dallekangku; Narurunganga' ri sa'ringku, sollangku tanipakamallaka ri apa-apa mamo. 26 Iaminjo saba'na namarannu sanna' atingku nakupaumo pammuji-mujia; na sannammonne batangkalengku lamattayang lalang ri jerakku. 27 Nasaba' tena natuli nubalang parekangi nyawaku ammantang lalang ri linona tu matea. Tanubalang parekangai ata majarreka ri kau a'jari ancuru' na la'busu'. 28 Le'ba'ma' Nujo'jokang oloang mangea ri katallassang sitojennaya. Sanna' sikalimi lompona rannuku, lanri nia'Nu anrurunganga'.’ 29 Sikamma sari'battangku, boli'mi kamma nakupau silambusu'na ri passala'na Daud boeta ngaseng. Matemi Daud siagang le'ba'mi nitarawang; sa'genna kamma-kamma anne nia' iji jera'na ri tangnga-tangngata. 30 Le'ba'mi a'janji siagang assumpa Allata'ala mae ri Daud, angkanaya nia' sallang kalase'renna sossoranna Daud laniangka' ri Allata'ala a'jari karaeng. Lanri naassenna Daud anjo janjia, siagang ia na'bi tongi, 31 naasseng tommi apa laNagaukanga pole Allata'ala. Jari napaumi la'bi riolo angkanaya lattallasa' poleangi battu ri kamateanga anjo Karaeng Mappasalamaka, anjo Napa'janjianga Allata'ala. Nakana Daud, ‘Tena nanibalang parekangi ammantang ri linona tu matea; talaancurai siagang talala'busai BatangkalenNa.’ 32 Iaminne Isa nipattallasa' poleanga ri Allata'ala battu ri kamateanga. Ikambe minne le'ba' anciniki anjo apa kajarianga. 33 Niangka'mi nai' ri empoang kaminang tinggia siagang nisaremi koasa ri Allata'ala, nampa Natarima RohNa Allata'ala, le'baka Napa'janjiang Manggea. Na anne apa nulangngereka siagang nucinika kamma-kamma anne iaminjo RohNa Allata'ala, Napaturunga mae ri kambe. 34 Kalenna Daud tanaikai ri suruga, mingka angkanai Daud, ‘Nakana Batara mae ri Bataraku: 35 Ammempo maKo ri sa'ri kanangKu, sa'genna Kusuro ngaseng akkulantu' musu-musunNu ri dallekanNu!’ 36 Iaminjo saba'na namusti naasseng tojeng-tojeng sikontu bansa Israel angkanaya anjo Isa, le'baka nusalli', Iatommi anjo Isa le'baka Naangka' Allata'ala a'jari Batara siagang Karaeng Tumappasalamaka!” 37 Nalangngere'na ngaseng ke'nanga anjo napaua Petrus, sanna' ngasemmi dinging-dinginna atinna ke'nanga. Jari akkuta'nammi ke'nanga ri Petrus siagang anjo tunisuro maraenganga, angkana, “Jari apamo musti nigaukang anne, sari'battang?” 38 Appialimi Petrus nakana, “Toba' ngaseng mako battu ri dosa-dosanu. Siagang musti massing nije'ne' ngasengko lalang arenNa Isa Almasi, sollanna nipammopporang dosa-dosanu. Nampa lanutarima passareNa Allata'ala, iamintu RohNa Allata'ala. 39 Nasaba' anjo Napa'janjianga Allata'ala untu' ikau ngaseng siagang sossorannu, kammayatompa untu' tau battua ri pammantangang bellaya — iamintu sikontu tau Nakioka Allata'ala Batarata battu mae ri Ia.” 40 Kammaminjo napakasingaraka Petrus mae ri ke'nanga. Siagang ilalang a'rupa-rupa bicara maraengang, napakainga' tommi ke'nanga sollanna napakabella kalenna ke'nanga battu ri anne bansa ja'dalaka laNahukkunga sallang Allata'ala. 41 Jaimi tau tappa' mae ri anjo napaua Petrus, nampa nije'ne'mo ke'nanga. Jari anjo alloa katambammi jaina tau tappaka a'jari tallussa'bu tau. 42 Tuli attojeng-tojemmi ke'nanga appilajara' ri tunisuroNa Allata'ala. Siagang tuli a'rappungammi ke'nanga appala' doang siagang sipangnganreang. 43 Jai sikali gau'-gau' appakalannasa' nagaukang tunisuroNa Allata'ala. Sa'genna jaimi tau a'jari lannasa' siagang a'jari malla'. 44 Tuli ma'julu ati ngasengi anjo tau tappaka. Punna nia' apa-apanna ke'nanga, napassama-samai napake. 45 Nabalukammi apa-apanna siagang pa'barang-baranganna ke'nanga, nampa nabage-bage ballinna ke'nanga situru' massing kaparalluanna ke'nanga. 46 Allo-allona ke'nanga tuli a'rappungang ri Balla'Na Batara; kammayatompa a'le'ba'-le'basaki ke'nanga assama-sama angnganre ri balla'na. Na rannu pa'mai' siagang tuna pa'mai' ngasengi ke'nanga. 47 Siagang tuli mammuji-muji ke'nanga ri Allata'ala, na ningai ngaseng ri tau jaia. Pila' mange allo pila' katambangi jaina ke'nanga, lanri pila' Natambai Allata'ala tau nipasalamaka mae ri ke'nanga.
3
1 Ri se'reang allo a'lampai Petrus siagang Yohanes mange ri Balla'Na Batara. Anjo wattua tette' tallu ri karuenga, iamintu wattu passambayanganga. 2 Anjoreng ri pakke'bu' lompoa, niarenga “Pakke'bu' Ga'gaya”, nia' sitau bura'ne peso'. Peso' memammi baku' nilassukanna. Allo-allona nierang anjo taua mange anjoreng untu' appala'-pala' ri tau eroka antama' ri Balla'Na Batara. 3 Ri wattunna nacini' anjo tau pesoka angkana niaki Petrus siagang Yohanes ero' antama' ri Balla'Na Batara, appala'mi apa-apa ri ke'nanga. 4 Najanjammi ke'nanga anjo tau pesoka, nampa nakana Petrus, “Cinikia'!” 5 Nicinikimi ke'nanga ri anjo tau pesoka, na'minasa anjo tau pesoka lanisare apa-apa ri ke'nanga. 6 Mingka nakanamo Petrus ri anjo tau pesoka, “Tena sikali doekku. Mingka apa niaka ri nakke, iaminjo lakusareangko: Lanri koasaNa Isa Almasi, battua ri Nazaret, kukana ri kau a'jappa mako!” 7 Nampa nata'gala' Petrus lima kananna anjo tau pesoka, na nabantu ammenteng. Ajari kassa' memammi silalonna bangkenna anjo tau pesoka. 8 A'lumpa'mi nai' nammenteng, siagang a'jappa anrai'-kalau'. Nampa antama' ri Balla'Na Batara siagang Petrus na Yohanes, a'lumpa'-lumpaka tojeng na mammuji-muji ri Allata'ala. 9 Nicini'-cinikimi ri taua a'jappa' siagang ammuji-muji ri Allata'ala. 10 Na naassennamo tau jaia angkanaya iaminjo papala'-pala' biasaya ammempo ri “Pakke'bu' Ga'gaya” ri Balla'Na Batara. Lannasa' sikalimi siagang takkajanna'mi ke'nanga anciniki anjo apa kajarianga ri kalenna anjo taua. 11 Tuli amminawammi anjo taua ri Petrus siagang Yohanes. Na ri wattunna battu ke'nanga ri tampa' niarenga “Tampa' Salomo”, battu ngasemmi taua allipungi ke'nanga napakamma lannasa'. 12 Ri wattunna nacini' Petrus anjo tau jaia, nakanamo ri ke'nanga, “E, tu Israel, angngapa nulannasa' ngaseng anciniki? Angngapa naikambe tulusu' nujanjang? Barang nukana lanri kakoasanna ikambe yareka lanri mannurukinna ikambe ri Allata'ala nakkulle a'jappa' anne taua? 13 Allata'ala nasombaya Abraham, Ishak, Yakub, Allata'alana boeta, Iaminjo Allata'ala ampakalompoai Ana'Na, iamintu Isa. Iaminjo Isa le'baka nupassareang ri pamarentaya, siagang numusua ri dallekanna Pilatus, ri wattunna ero' nilappassang ri Pilatus. 14 Ia tau matangkasa' siagang tau baji', mingka nukabirisi siagang nupassai Pilatus allappassangi tu pabunoa untu' ikau sollanna nihukkung anjo Isa. 15 Nubunoi anjo Isa, na sikontutojenna Iami kabattuanna katallassanga untu' sikontu rupataua. Mingka nipattallasa' poleammi ri Allata'ala battu ri kamateanga. Kalennami ikambe anciniki anjo apa kajarianga. 16 Nucini'mi siagang nusa'bimi apa kajarianga ri kalenna anne tau pesoka. A'jari baji'mi siagang gassimmi ammotere' lanri tappaki mae ri Isa siagang kakoasanNa. Lanri tappa'na mae Isa, a'jari baji'mi ammotere' anne taua ri dallekannu ngaseng. 17 Sikamma sari'battangku ngaseng! Kamma-kamma anne kuassemmi angkanaya anjo apa nugaukanga siagang pamimping-pamimpinnu mae ri Isa, apa tena ngaseng nanupahangi nanugaukangi. 18 Na lanri kammana tomminjo, na'rupamo apa le'baka Napabattu riolo Allata'ala lalang ri na'bi-na'biNa, angkanaya musti lanisessai anjo Karaeng Mappasalama' nipa'janjianga. 19 Lanri kammana minjo sari'battangku ngaseng, nuparallumo massing toba' battu ri dosa-dosanu, siagang ammotere' mako ri Allata'ala sollanna naNapammopporang dosa-dosanu. 20 Labattui Batara mae ri kau nalanukasia' kasannangang pa'maika. Siagang lanisuroi Isa ri Batara battu mae ri kau, nasaba' Iami le'ba' Napattantu Allata'ala a'jari Karaeng Mappasalama'nu. 21 Musti ammantangi ri suruga sa'genna le'ba' ngaseng Napa'jari beru linoa Allata'ala, situru' apa le'baka Napattantu Allata'ala lalang ri na'bi-na'biNa ri jammang riolo. 22 Le'baki Musa angkana, ‘Lania' sitau na'bi Nasuro Allata'ala battu mae ri kau, sangkammaya todong inakke Nasuroa' battu mae ri kau. Anjo na'bia tu battu tonji ri bansanu. Musti nupilangngeri ngasengi sikontu apa napaua anjo na'bia mae ri kau. 23 Inai-nai taeroka ampilangngeri apa-apa napaua anjo na'bia, iami lanibuang assulu' battu ri passe'reanna umma'Na Allata'ala nampa nisessa.’ 24 Sikamma na'bi-na'bi le'baka ampabattui kabara' battua ri Allata'ala, iamintu appakkaramula battu ri Na'bi Samuel sa'genna na'bi-na'bi maraengannaya ribokoanganna, le'ba' ngasemmi nakabarrang apa-apa lakajarianga ri anne jammanga. 25 Sikontu anjo apa-apa Napa'janjianga Allata'ala lalang ri na'bi-na'biNa, untu' ikau ngaseng. Lalang ri anjo parjanjiang Napareka Allata'ala mae ri boe-boenu, kammai anne kananNa Allata'ala mae ri Abraham, ‘Battu lalangi ri sossorannu nalaKubarakkaki sikontu bansaya ri anne linoa.’ Jari anjo parjanjianga untu' ikau ngaseng todong. 26 Iaminjo saba'na naNapattantumo Ana'Na Nasuro rolong battu mae ri kau, sollanna naNabarakkakiko. Ia bateNa ambarakkakiko, iamintu Napa'jari tobakko battu ri kaja'dallanga lalang ri katallassannu.”
4
1 Lalang a'bicarana ija Petrus siagang Yohanes mae ri anjo taua ngaseng, battumi imang-imang kapalaya, komandang pajagaya ri Balla'Na Batara, kammayatompa tu Sadukia mae ri ke'nanga. 2 Larromi ke'nanga lanri napauna Petrus siagang Yohanes mae ri taua angkanaya attallasa' poleammi Isa battu ri kamateanga. Na iaminjo a'jari butti angkana lattallasa' poleangi tau matea. 3 Nijakkala'mi Petrus siagang Yohanes ri ke'nanga, nampa nipantama' ri tarungkua. Nitahammi Petrus siagang Yohanes anjoreng sa'genna ammukona, lanri anjo wattua bangngimi. 4 Mingka jaimi tau le'bakamo allangngereki anjo napangngajarrang tunisuroa, a'jari tappa'. Katambammi jaina ke'nanga a'jari kira-kira limassa'bu tau. 5 Ammukona a'rappungammi tumalompoa ri Pangadelang Agamaya, pamimping-pamimpinna tu Yahudia, siagang guru-guru agamaya ri Yerusalem. 6 Assibuntulu' ngasemmi ke'nanga siagang Imang Malompoa iamintu Hanas, siagang Kayafas, Yohanes, Aleksander, kammayatompa sikontu bija ma'reppese'na anjo imang lompoa. 7 Nierammi Petrus siagang Yohanes mae ri dallekanna ke'nanga. Nikuta'nammi ri ke'nanga angkana, “Antekamma batenu amballei anjo tau pesoka? Kagassingang apa yareka koasa battu kemae nupake anggaukangi anjo kammaya?” 8 Anjo Petrus nikoasaimi ri RohNa Allata'ala. Appialimi nakana, “Tabe', mae ri katte ngaseng pamimping bansaya siagang anggotana pangadelang agamaya! 9 Anne alloa niadelia' sipa'rua lanri a'gau' baji'na ikambe ero' antulungi se'rea tau peso'. Na kamma-kamma anne ero' ngasengki' angngassengi antekamma batena niballei anjo taua. 10 Jari, ikatte ngaseng, kammayatompa sikontu bansa Israel, musti kiasseng ngasengi angkanaya lanri kagassinganNa siagang kakoasanNa Isa Almasi anjo battua ri Nazaret, nakkullemo nia' ammenteng ri dallekannu ngaseng anne taua. Kamma-kamma anne gassimmi siagang salewangammi tubuna anne tau le'baka peso', lanri anjo Isa Almasi. Ikatte ngasemmi le'ba' ansalliki anjo Isa Almasi. Mingka nipattallasa' poleammi ammotere' ri Allata'ala. 11 Iaminjo Isa nisero kanaya lalang ri anne aya' lalang Kittaka, angkanaya, ‘Anjo batu tenaya nupakei ikau tukang-tukanga, kamma-kamma anne iami a'jari batu kaminang parallu.’ 12 Lalang bawang ri Isa nakkulle nipasalama' rupataua. Nasaba' ri sikontu anne linoa, tenanniakka se're tau le'ba' nisare koasa ri Allata'ala untu' ampasalamakki', pantaranganna Isa Almasi.” 13 Lannasa' ngasemmi anggota-anggotana anjo Pangadelanga anciniki kabaranianna Petrus siagang Yohanes. La'biangampa pole nanaassennamo ke'nanga angkanaya anjo Petrus siagang Yohanes tau biasaji bawang, tutenaya sikolana. Nasadarimi ke'nanga angkanaya anjo tau ruaya ana' gurunNa Isa. 14 Mingka tanaassengami angkana apa lanakana ke'nanga, lanri anjo tau le'baka niballei niaki ammenteng siagang Petrus na Yohanes ri dallekanna ngaseng ke'nanga. 15 Jari nasuromi ke'nanga assulu' Petrus siagang Yohanes battu ri kamara' sidanga, nampa sipa'bicara ke'nanga. 16 Nakanamo ke'nanga, “Apa musti nigaukang ri anjo tau ruaya? Sikontu tau niaka ammantang ri Yerusalem naasseng ngasemmi angkanaya anjo tau ruaya anggaukangi anjo gau' appakalannasaka. Takkulleami nicokkoi anjo apa nagaukanga ke'nanga. 17 Mingka sollanna tena napila' tassiara' anjo passalaka mae ri tau jaia, umba nanigarattaki anjo tau ruaya, sollanna tenamo na'bicara mae ri taua lalang arenNa Isa.” 18 Le'baki anjo, nakio'mi ke'nanga ammotere' Petrus siagang Yohanes, nanapauang angkanaya tena sikalimo nanipa'biangi ke'nanga ampaui yareka angngajara' lalang arenNa Isa. 19 Mingka appialimi Petrus siagang Yohanes angkana, “Pikkiri'mi ri kalennu ngaseng, angkanaya kereanga annaba ri dallekanNa Allata'ala: parentanu nituruki, yareka parentaNa Allata'ala. 20 Nasaba' takkulleai ammari ikambe ambicarai anjo apa le'baka nacini' siagang nalangngere' ikambe.” 21 Takkulleami anggappa alasang manna sirupa anjo anggota-anggota sidanga ri pangadelanga, untu' anghukkungi Petrus siagang Yohanes. Jari nagaratta'mi ke'nanga anjo tau ruaya, nampa nalappassang, nasaba' ammuji-muji ri Allata'ala tau jaia passabakkang anjo kajarianga. 22 Anjo tau peso' le'baka niballei lalang anjo gau' appakalannasaka, la'bimi patampulo taung umuru'na. 23 Ri wattunna nilappassammo Petrus siagang Yohanes, ammotere'mi ke'nanga mae ri agang-aganna ke'nanga. Nacaritami ke'nanga sikontu apa le'baka napau imang-imang kapalaya siagang pamimping-pamimpinna tu Yahudia mae ri ke'nanga. 24 Nalangngere'namo agang-aganna anjo apa nacaritaya ke'nanga, ma'julu atimi ke'nanga naassama-sama appala' doang mae ri Allata'ala. Nakana ke'nanga, “O Batara, iKattemi ampa'jari langika siagang linoa, kammayatompa tamparanga na sikontu bonena. 25 Lalang RohTa le'bakKi' a'bicara lalang atanTa Daud iamintu boena ikambe; anjo wattua angkanaKi', ‘Angngapa nalarro tu tenaya naassengi Batara; angngapa nappanggaukang tenaya matu-matunna bansa-bansaya? 26 Sadiai karaeng-karaenna linoa ero' a'bundu', siagang asse're ngasemmi pamimping-pamimpinga angngewai Batara, Karaeng Mappasalamaka.’ 27 Nasaba' memang, a'rappungammi sipa'bicara Herodes, Pontius Pilatus, sikamma tu tenaya naassengi Batara, siagang tu Israel anrinni ri kotaya. A'rappungammi ke'nanga ero' angngewai Isa, Ana' matangkasatTa, le'baka Kiangka' a'jari Karaeng Mappasalama'. 28 Asse'remi ke'nanga ero' a'gau' sangka' rupa, situru' apa le'baka Kipattantu angkanaya lakajariang memangi anjo kammaya. Na lanri koasa KalenTa siagang ero' KalenTa naKipattantu anjo apa lakajarianga. 29 Kamma-kamma anne, o, Batara, Kicini'mi antekamma batena ke'nanga anggarattaki ikambe. Na Kisaremi pangngellai ikambe anne, ata-atanTa, ampa'la'bangi kabara' battua ri Katte lalang kabaraniang. 30 Kipa'nyatai pannulunTa sollanna akkulle niballei tau garringa, siagang nakajariang gau'-gau' appakalannasaka, lanri koasana siagang kagassingang battua ri arenNa Isa, Ana' MatangkasatTa.” 31 Le'baki ke'nanga appala' doang, a'gio'mi anjo tampa' napammantangia ke'nanga a'rappungang. Nikoasai ngasemmi ke'nanga ri RohNa Allata'ala. Siagang appakkaramulami ke'nanga a'jari sanna' baranina a'bicara ri passala'na kabara' battua ri Allata'ala. 32 A'julu atimi siagang a'julu nyawa ngasemmi anjo sikontu tau tappaka. Punna nia' apa-apanna ke'nanga, tena manna sitau langkana anjo apa-apaya ia bawang pata. Sikontu apa niaka ri ke'nanga, napassama-samaimi napake. 33 Lalang koasa malompo battua ri Allata'ala, a'jari sa'bi ngasemmi anjo tunisuroa, angkanaya ma'nassa attallasa' poleammi Isa battu ri kamateanga. Sanna'mi nibarakkakina ke'nanga ri Allata'ala. 34 Na manna sitau tania' ri ke'nanga kakurangang. Nasaba' ia niaka tanana yareka balla'na, nabalukammi nampa naerang ballinna, 35 nanapassareang mae ri sikamma tunisuroNa Allata'ala. Nampa nipa'bage-bageang anjo doeka mae ri sikamma tau kaparalluanga. 36 Kamma tomminjo nagaukanga Yusuf, sossorang battu ri Lewi, battu ri Siprus, nigallaraka Barnabas (battuanna Panynyaleori) ri tunisuroNa Allata'ala. Nabalukang tommi tanana, nampa napassareang ballinna mae ri sikamma tunisuroNa Allata'ala.
5
1 Mingka nia' sitau bura'ne niareng Ananias. Siagangi bainenna niarenga Safira, ambalukang tongi sisapa' tanana. 2 Anjo doe' ballinna anjo tanaya, naboliki tawaruanna untu' kalenna ke'nanga, nampa tawaruanna maraenga napassareang mae ri tunisuroNa Allata'ala. Anne apa nagaukanga naasseng tongi bainenna. 3 Nakanamo Petrus, “Ananias, angngapa nanupassareang atinnu nakoasai Billisika, sa'gennu a'balle-balle ri RohNa Allata'ala? Iamintu nuboli' cokko-cokkoi untu' kalennu tawaruanna doe' ballinna anjo tanaya? 4 Anjo tanaya ikau pata ri wattunna tenapa nubalukangi. Na ri wattunna le'ba' nubalukang anjo tanaya, anjo doe' ballinnaya, ikau tonji pole pata. Jari angngapa nania' lalang ri atinnu ero' appanggaukang kammaya anjo? Teai rupataua nuballe-ballei, mingka Allata'ala!” 5 Kamma nalangngere'na Ananias anjo kana-kana napaua Petrus, tu'guru'mi, namate. Sikontu tau allangngerekai anjo apa kajarianga, a'jari malla' ngasemmi. 6 Battumi ana'-ana' rungkaya anrokoki anjo maya'na Ananias, nampa naerang assulu' ero' mange natarawang. 7 Kira-kira tallung tette' ribokoanganna, antama' tommi bainenna. Tanaassengapi anjo apa beru kajarianga. 8 Nakanamo Petrus ri ia, “Pauang sabeka': Maka sikamma tojeng anne ballinna anjo tana le'baka nubalukang siagang bura'nennu?” Appialimi nakana, “Tojeng-tojenga', iamintu ballinna.” 9 Nakanamo Petrus ri ia, “Angngapa nusikongkolo' siagang bura'nennu ero' ancobai RohNa Batara? Pilangngerimi! Ammotere'mi tau mangea antarawangi bura'nennu. Lanaerang tongko ke'nanga assulu'.” 10 Anjo wattua, tu'guru' memammi anjo bainenna Ananias, namate ri dallekanna Petrus. Na wattunna antama' anjo ana'-ana' rungkaya, narapikammi ke'nanga matemi anjo bainenna Ananias. Naerammi ke'nanga assulu' anjo mayaka, nampa naerang mange natarawang ri ampi'na bura'nenna. 11 Sikontu anjo tau tappaka siagang tau maraenga, a'jari malla' ngasemmi nalangngere'na anjo apa kajarianga. 12 Jaimi kajariang siagang gau' appakalannasa' kajariang ri tangnga-tangngana tau jaia, lanri jama-jamang nagaukanga tunisuroNa Allata'ala. A'julu atimi a'rappungang sikamma tau tappaka ri Kamara' Salomo, ri Balla'Na Batara. 13 Na tabarania tau battu pantaraka a'rappungang siagang anjo tau tappaka. Siagang angngali' ngasengi tau jaia mae ri anjo sikamma tau tappaka. 14 Napila' mange allo, pila' katambangi jaina anjo tau tappaka mae ri Batara — baji' na bura'ne, baji' na baine. 15 Ba'lalo lanri kammana anjo, nierammi assulu' ri aganga tau garringa rate ri bulekang, yareka nipadongko' ri tappereka, sollanna punna numalo Petrus, kaminang sike'de'na manna taung-taunnaja antabai anjo tau garringa, nakkulle a'jari baji'. 16 Teaimi sipato' jaina tau a'lipung-lipung battu, iamintu tu battua ri kota-kota niaka a'reppese' ri Yerusalem. Massing naerammi tau garrinna ke'nanga, yareka tau nasosoka setang. Naniballei ngasemmo anjo taua, sa'genna a'jari baji' silalonna. 17 Kale'bakkanna angngallemi tindakang imang lompoa siagang taunna ngaseng, iamintu golongang tu Sadukia, lanri assereatina ke'nanga. 18 Nijakkala'mi anjo sikamma tunisuroNa Allata'ala nampa nipantama' ri tarungku lompoa. 19 Mingka ri wattu lantanna bangngia, battumi malaeka'Na Batara assungke ngasengi pakke'bu'na anjo tarungkua, nampa naerang anjo sikamma tunisuroNa Allata'ala assulu'. Nakanamo anjo malaekaka mae ri sikamma anjo tunisuroNa Allata'ala. 20 “A'lampako mange ammenteng ri Balla'Na Batara siagang pauang ngasemmi taua passala'na anne katallassang berua.” 21 Naturukimi sikamma tunisuroNa Allata'ala anjo apa napappasanganga anjo malaekaka. Ri bari'basa' dudua, a'lampami ke'nanga mange ri Balla'Na Batara, nappakkaramula angngajara' anjoreng. Anjo wattua a'rappungammi pole imang lompoa siagang taunna ngaseng, ero' sipa'bicara siagang pamimping-pamimpinna tu Yahudia. Nampa nasuro taua mange angngallei anjo sikamma tunisuroNa Allata'ala, battu ri tarungkua, lanaerang mae ri dallekanna ke'nanga. 22 Mingka ri wattunna battu mange ri tarungkua anjo tunisuroa, tenami narapikang sikamma anjo tunisuroNa Allata'ala. Jari ammotere'mi ke'nanga, nampa napabattu anjo passalaka mae ri pangadelanga. Nakanamo ke'nanga mae ri sikamma anjo tau niaka ri pangadelanga, 23 “Ri wattunna battu ikambe mange anjoreng ri tarungkua, anjo pakke'bu'na tarungkua takkonci baji' ngasenji, siagang nia' ngasenji pangawalaka a'jaga ri pakke'buka. Mingka ri wattunna nisungke anjo pakke'bu' tarungkua, manna sitau tania' bonena anjo tarungkua.” 24 Ri wattunna nalangngere' perwira pangawalaka ri Balla'Na Batara siagang imang-imang kapalaya anjo laporanga, lingumi ke'nanga annawa-nawai passala'na anjo tunisuroNa Allata'ala. Siagang malla'mi ke'nanga ampikkiriki angkana apa are kutadeng lakajariang. 25 Tasalloai, nia'mo sitau bura'ne battu angngerang kabara', angkana, “Pilangngeri sai! Anjo tau kitahanga ri tarungkua, kamma-kamma anne nia' ngasengi angngajaraki tau jaia lalang ri Balla'Na Batara!” 26 Jari a'lampami perwira pangawala'na Balla'Na Batara siagang pangawalaka ngaseng, mange angngallei ammotere' anjo sikamma tunisuroNa Allata'ala. Mingka tena nanaerang passai ke'nanga, lanri mallaki ke'nanga ri tau jaia; gassingka nisambilai sallang batu ke'nanga ri anjo tau jaia. 27 Nierammi anjo sikamma tunisuroNa Allata'ala antama' ri pangadelanga. Nampa niparessa ke'nanga ri imang lompoa. 28 Nakana imang lompoa, “Le'ba' mako nipisangkai ampangngajarrangi arenNa anjo Taua. Mingka kamma-kamma anne, apa le'ba' nugaukang! Nupa'la'bammi anjo pangngajarannu mae ri sikontu tau niaka ri Yerusalem. Kammayatompa, erokko ba'lalo ampakkanaiki' anne, angkanaya passala' ikambe anne namate anjo Taua.” 29 Appialimi Petrus siagang agang-aganna, angkana, “Musti ero'Na Allata'ala naturuki ikambe, teai ero'na rupataua. 30 Anjo Isa, le'baka nusalli', nipattallasa' poleammi ammotere' battu ri kamateanga, lanri koasaNa Allata'alana boe-boeta. 31 Siagang nisaremi ri Allata'ala empoang siagang kakoasang matinggi, a'jari Pamimping siagang Mappasalamaka; sollanna nisare kasampatang bansa Israel untu' a'jari toba' battu ri dosa-dosana na nipammopporang. 32 Ikambe minne a'jari sa'bi ri yangasenna anjo passalaka — ikambe siagang pole RohNa Allata'ala, Napassareanga Allata'ala mae ri tau mannurukia ri parentaNa.” 33 Ri wattu nalangngere'na anggota-anggotana anjo Pangadelang Agamaya anjo apa napaua tunisuroNa Allata'ala, teaimi sipato' larrona ngaseng ke'nanga. Sa'genna assama turu' ngasemmi ke'nanga ero' ambunoi anjo sikammaya tunisuroNa Allata'ala. 34 Mingka nia' kalase'renna anggotana anjo pangadelang agamaya tu Farisi, niarenga Gamaliel. Iami guru agama sannaka nipakalompona ri tau jaia. Ammentemmi nai', nampa nasuro erang rolong assulu' sinampe' sikamma anjo tunisuroNa Allata'ala. 35 Nampa nakana ri anggota-anggotana anjo Pangadelang Agamaya, “Sikamma sari'battangku tu Israel! Pikkiriki rolong baji'-baji' apa lanugaukanga mae ri anne taua. 36 Nasaba' riolo le'baki nia' tau niarenga Teudas, nakanaya kalenna tumalompo, sa'genna kira-kira nia' patambilangngang tau amminawang ri ia. Mingka mate nibunomi, siagang tassia'-siara'mi sikamma tau amminawanga ri ia, sa'genna lanynya' kale-kale anjo kumpulanna. 37 Le'baki anjo, ri wattunna nisuro bilang ngaseng tuma'buttaya, nia'mo pole tau niareng Yudas, iamintu tau battu ri Galilea. Nasaba' lompona pangaruna, jai tommi tau amminawang ri ia. Mingka mate nibuno tommi, siagang tassia'-siara' ngasemmi tau amminawanga ri ia. 38 Jari kamma-kamma anne, pappakaingakku ri anne passalaka iamintu: tea' mako nanuapa-apai anne sikamma taua, mingka lappassang tommi mange ke'nanga. Nasaba' punna apa-apa battu ri rupataua anjo napangngajarranga siagang nagaukanga ke'nanga, ma'nassa lalanynya' kale-kale tonji anjo apa napangngajarranga nagaukanga ke'nanga. 39 Mingka punna apa-apa battu ri Allata'ala anjo napangngajarranga siagang nagaukanga ke'nanga, ma'nassa takkulleako ambetai ke'nanga. Ba'lalo akkullei a'butti angkanaya nuewai Allata'ala.” Natarimami sidanga anjo pappakainga'na Gamaliel. 40 Jari nikio'mi anjo sikamma tunisuroNa Allata'ala. Nicambo'mi nampa nipisangkai pole ke'nanga angngajara' lalang arenNa Isa. Le'baki anjo, nampami nilappassang ke'nanga. 41 A'lampami anjo sikamma tunisuroNa Allata'ala ambokoi anjo sidang Pangadelang Agamaya. Sanna' ngaseng rannuna ke'nanga, lanri nipassiratammi ri Allata'ala ke'nanga angkasiaki paccallaya, lanri arenNa Isa. 42 Na allo-allonamo angngajara' ke'nanga ri Balla'Na Batara siagang ri balla'na ngaseng taua. Tuli napabattumi ke'nanga Kabara' Bajika lalang arenNa Isa, angkanaya Iami anjo Karaeng Mappasalama' le'baka nipa'janjiang.
6
1 Pila' sallo, pila' jaimi tau tappa' ri Isa. Anjo wattua a'jari tenamo nasannang nyawana tau tappa' bansa Yahudi a'bicara Yunania mae ri tau tappa' bansa Yahudi totoka. Nakanamo a'bicara Yunania, “Sikamma bai'-baine janda niaka ri kambe tanibageiyai ongkoso' kaparalluang allo-allo nipa'bage-bageanga mae ri taua.” 2 Jari anjo sampuloa anrua tunisuro napa'rappungammi sikontu tau tappaka, nampa nakana ri ke'nanga, “Tabajikai punna lammari ikambe ampabattui kananNa Allata'ala, lanri langngurusu'na passala' apa-apa lanikanrea. 3 Jari, bajiki punna nupileimo battu ri kau ngaseng tuju tau baji' ampea siagang nikoasaia ri RohNa Allata'ala, akkullea nisare jama-jamang, langngatoroki anne passala' apa-apa lanikanrea; 4 nasaba' eroka lanajama ikambe iamintu appala' doanga siagang ampabattui kana-kananNa Allata'ala.” 5 Assamaturu' ngasemmi ke'nanga ri anjo apa napaua anjo sikamma tunisuroNa Allata'ala. Napileimi ke'nanga tuniarenga Stefanus, sannaka tappa'na ri Isa, siagang nikoasaia ri RohNa Allata'ala. Maraengannaya nipile tommi: Filipus, Prokhorus, Nikanor, Timon, Parmenas, siagang Nikolaus battua ri Antiokhia. Anne Nikolaus teai tu Yahudi, mingka antama'mi agama Yahudi. 6 Nierammi anne tujua tau mae ri sikamma tunisuroNa Allata'ala, nampa nipappala' doangang siagang nipappalakkang barakka' ri Batara. 7 Kammaminjo, napila' a'la'bammo kabara' battua ri Allata'ala, siagang pila' katambammi jaina tau tappaka ri Isa anjoreng ri Yerusalem. Na jai tommo imang-imang a'jari tappa' ri Isa. 8 Anjo Stefanus sanna' nibarakkakina ri Allata'ala; sa'genna jai sikalimi gau'-gau' appakalannasa' nagaukang ri tangnga-tangngana tau jaia. 9 Mingka nia'mo siapa are tau angngewai; iamintu anggotana ngaseng balla' sambayang niarenga Balla' Sambayanna Tu Bebasaka. Anggota-anggotana anjo balla' sambayanga, iamintu tu Yahudi battua ri Kirene siagang Aleksandria. Sipammemtengammi ke'nanga siagang tu Yahudi battua ri Kilikia siagang Asia, anggea'-geakki Stefanus. 10 Mingka tanakulleai ke'nanga ampitompoki anjo kana napaua Stefanus, nasaba' le'ba'mi nisare Stefanus kacara'dekang ri RohNa Allata'ala, untu' a'bicara. 11 Lanri kammana, nia'mo siapa are tau nasare doe' ke'nanga, nampa nasuro appau angkana, “Le'baki anjo taua a'bicara anghina-hinai Musa siagang Allata'ala!” 12 Kammaminjo batena ke'nanga angkompa-kompa salai sa'genna nassu tau jaia, pamimping-pamimpinna tu Yahudia, kammayatompa guru-guru agamaya. Mangemi ke'nanga anjakkalaki Stefanus, nampa naerang mange andallekang ri pangadelang agamaya. 13 Siagang naerang tommi ke'nanga battu andallekang sa'bi-sa'bi a'balle-ballea, ero' ambattalli Stefanus. Nakanamo anjo sa'bi-sa'bia, “Anne taua tuli nahinai Balla'Na Batara matangkasaka, siagang nahinai sikamma parentaNa Allata'ala napabattua Musa. 14 Le'baki nalangngere' ikambe angkana anne taua, angkanaya anjo Isa tu battua ri Nazaret, laNarumbangi anne Balla'Na Batara, nampa Napinra ngaseng pangngadakkang le'baka napassareang Musa mae ri katte!” 15 Nicinikimi Stefanus ri sikontu tau niaka hadere' lalang ri anjo sidang Pangadelang Agamaya. Na anjo wattua, attanja' kammami malaeka' nicini' rupanna Stefanus.
7
1 Akkuta'nammi imang lompoa ri Stefanus, nakana, “Maka kamma ngaseng tojengi anjo napaua taua?” 2 Appialimi Stefanus nakana, “Sikamma bapa'-bapaka siagang sari'battanga! Pilangngeri sai anne kanangku! Ri tenanapa na'lette' boeta Abraham battu ri pammantanganna ri Mesopotamia mange ri Haran, battui Allata'ala mala'birika mae ri ia, angkana, 3 ‘Bokoi anne pa'rasangannu siagang bija-bijannu. A'lampako mange ri pa'rasangang laKujo'jokangako sallang.’ 4 Jari a'lette'mi Abraham battu ri pa'rasangang Kasdim mange ri Haran. Ri wattunna matemo manggena Abraham, nipalette'mi Abraham ri Allata'ala mae anrinni, ri pa'rasangang nupammantangia ngaseng kamma-kamma anne. 5 Anjo wattua, manna sike'de' tania' anne pa'rasanganga Napassareanga Allata'ala mae ri Abraham a'jari pa'rasanganna; manna sipala' bangkeng tania' nipassareang mae ri ia. Mingka a'janji Allata'ala angkanaya laNapassareangi mae ri Abraham siagang sossoranna anne pa'rasanganga, a'jari pa'rasanganna. Anjo wattua tena ana'na Abraham. 6 Mingka iaminne kananNa Allata'ala ri ia, ‘Lammantangi sossorannu a'jari tu battu-battu ri pa'rasanganna taua. Lanipa'jari atai ke'nanga ri patanna anjo pa'rasanganga, siagang lanigau' pallaki ke'nanga patambilangngang taung sallona. 7 Mingka laKuhukkungi anjo bansa ampa'jari atayai ke'nanga, nampa assulu' ke'nanga battu anjoreng ri pa'rasanganga. Nampa lanynyombai ke'nanga mae ri Nakke anrinni ri tampaka.’ 8 Le'baki akkana kamma Allata'ala, Napa'jari assami anjo janjinNa lalang pangngadakkang sunnaka. Jari ri wattunna lassu' ana'na Abraham, iamintu Ishak, nasunna'mi anjo ana'na ri wattunna sagantuju allomo umuru'na. Nampa ribokoanganna sallang nasunna' tommi ana'na Ishak, iamintu Yakub. Nakamma tomminjo Yakub, nasunna' tongi anjo ana'na sampuloa anrua, a'jaria boe-boena bansa Yahudia. 9 Na anjo boe-boeta assereati mae ri Yusuf, sa'genna nabalukang anjo Yusuf a'jari ata ri Mesir. Mingka nirurungangi Yusuf ri Allata'ala, 10 nanitulung battu ri sikontu kasusaanna. Nisarei ri Allata'ala kabajikang pa'mai' siagang kacara'dekang ri wattunna andallekang ri Firaun karaenga ri Mesir. Sa'genna niangka' a'jari Tumalompo ri pa'rasangang Mesir, siagang tukoasa ri Balla' Lompona Karaeng Firaun. 11 Nampa nia' se're wattu nanaalle kacipurang lompo tuma'buttaya ri sikontu pa'rasangang Mesir siagang pa'rasangang Kanaan, sa'genna sanna' ngaseng pa'risi'na katallassanna taua. Takkulleami anggappa apa-apa lanakanre boe-boeta. 12 Jari ri wattunna nalangngere' Yakub angkana nia' gandung ri Mesir nasuromi ana'-ana'na, iamintu boe-boeta a'lampa mange anjoreng, maka sikalina. 13 Ri wattunna a'lampa pole ke'nanga maka pinruanna, napappiassengammi kalenna Yusuf mae ri anjo sari'battanna ngaseng. Nampami anjo wattua naasseng karaeng Mesir bija-bijanna Yusuf. 14 Nampa appasang Yusuf mae ri manggena, iamintu Yakub, sollanna ero' a'lette' siagang sikontu bija-bijanna mae ri Mesir — yangasenna nia' tujupulo allima tau jaina. 15 A'lette'mi Yakub mae ri Mesir. Nanjoremmo mate siagang boe-boeta. 16 Nampa ri bokoang allo nipalette'mi jera'na ammotere' mange ri Sikhem, iamintu jera' le'baka naballi riolo Abraham battu ri bansa Hemor ri Sikhem. 17 Ri wattunna la'birimmo narapi' wattunna laNarupai janjinNa Allata'ala mae ri Abraham, pila' katambammi jaina bansata ri pa'rasangang Mesir. 18 Kale'bakkanna nia'mo se're karaeng maraeng ammarenta ri Mesir, tenaya naassengi anjo Yusuf. 19 Anjo karaenga napare' karek-karenammi bansata, siagang sanna'mi nakapallakkina boe-boeta. Napassami boe-boeta ampelaki ana'-ana' lolona punna lassu' sollanna nibawang-bawangngang na mate anjo ana' loloa. 20 Iaminjo wattua nanilassukangi Musa; sanna' ga'gana ri wattunna ana' lolo. Tallum bulangi sallona niparakai cokko-cokko ri balla'na tau toana; 21 ri wattunna nipela' naung ri je'neka, nirappummi ri ana' tulolona Firaun, nampa naparakai sangkamma ana' kalenna. 22 Sikamma pappilajaranna bansa Mesirka nipangngajarrang tommi mae ri ia. Na'jarimo tau sannaka lompona koasana, baji' lalang kana-kananna kammayatompa lalang panggaukanna. 23 Ri wattunna patampulo taummo umuru'na Musa, nakku'mi lalang atinna, ero' mange anciniki antekamma katallassanna bansana, iamintu bansa Israel. 24 Na nia'mo sitau bansana narapikang nisessa ri tu Mesir; naallemi anjo tu nisessaya, nampa nabuno anjo tu Mesirka. 25 Nakapangi Musa angkanaya lanapahangi bansana angkanaya lanipakei kalenna ri Allata'ala untu' allappassangi anjo bansana. Mingka tanapahangai ke'nanga. 26 Ammukona nia'mo pole narapikang rua tu Israel assiba'ji. Naallemi nasa'lakki nampa napa'dame ke'nanga. Nakana ri ke'nanga, ‘Ikau antu tau assari'battangko. Apa saba'na nuero' assiba'ji?’ 27 Mingka nisorongammi Musa mae ri biring, ri anjo tau amba'jiai aganna, nampa nakana, ‘Inai angngangkakko a'jari pamimping siagang a'jari haking mae ri kambe? 28 Erottongko ambunoa' sangkamma anjo tu Mesir nubunoa subangngi?’ 29 Nalangngere'na Musa kananna anjo taua, larimi Musa battu ri Mesir, nampa mange ri pa'rasangang Midian. Anjoremmi anggappa rua ana'. 30 Patampulo taung ribokoanganna, nia'mo sitau malaeka' battu mae ri Musa, ri wattunna nia' ri parang kassika, ri ampi'na Bulu' Sinai. Battui anjo malaekaka lalang ri pepe' rompo' a'rinraya. 31 Lannasa'mi Musa anciniki anjo apa kajarianga. A'reppese'mi mange anjoreng ero' angngassengi anjo apa kajarianga. Nampa nia'mo nalangngere' sa'ranNa Batara angkana, 32 ‘INakke minne Allata'alana boe-boenu; iNakkemi Allata'alana Abraham, Ishak, siagang Yakub.’ Annekkere'mi Musa napakamma malla'. Tenamo nabarani pole accini' mae anjoreng ri rompoka. 33 Nakanamo pole Batara, ‘Pasuluki pa'la'pa' bangkennu, nasaba' antu butta nupammantangia ammenteng, butta matangkasa'. 34 Kucini'mi siagang Kuparhatikammi antekamma pa'risi'na katallassanna ummakKu ri Mesir. Kulangngere'mi kunrarenna ke'nanga, naKunaummo ero' allappassangi ke'nanga. Kamma-kamma anne, mae mako! LaKusuroko ammotere' mange ri Mesir.’ 35 Iaminne Musa, tenaya niakui ri bansa Israel, siagang nisorongbokoa angkana, ‘Inai le'ba' angngangkakko a'jari pamimping siagang a'jari haking mae ri kambe?’ Mingka sitojenna, iami nisuro ri Allata'ala a'jari pamimping siagang appasalamaka, lanri bantuanna anjo malaeka' battua mae ri ia lalang ri anjo rompo' a'rinraya. 36 Iaminjo Musa ampimpingi bansa Israel assulu' battu ri Mesir; iami anggaukangi anjo gau'-gau' appakalannasaka ri Mesir, ri Tamparang Ejaya, kammayatompa ri parang lompoa patampulo taung sallona. 37 Ia tomminjo Musa angkanaya ri bansa Israel, ‘LaNasareko Allata'ala sitau na'bi nipilea battu ri tangnga-tangnganu, sangkammaya bateku Napilei.’ 38 Musa tommi niaka ri tangnga-tangngana bansa Israel ri parang kassika, a'jaria tetena malaeka' naaganga a'bicara ri Bulu' Sinai siagang boe-boeta. Iami antarimayai battu ri Allata'ala kabara' katallassanga eroka nipabattu mae ri katte. 39 Mingka manna nakamma, taerokai boe-boeta anturuki kananna. Nisorongbokoi ri ke'nanga, siagang erokangangi ke'nanga ammotereka mange ri butta Mesir. 40 Nakana ke'nanga mae ri Harun, ‘Papparekang maki' rewata maraenganga, sollanna napimpingki' anjo rewataya. Nasaba' taniassengami apa kajarianga ri anjo Musa, angngerangaki' assulu' battu ri Mesir!’ 41 Anjo wattua appare'mi ke'nanga se're patung ana' sapi. Nampa angngerang ke'nanga koro'bang mae ri anjo patunga; siagang assua'-suara'mi ke'nanga untu' ampakalompoi anjo apa napare' kalennaya ke'nanga. 42 Jari nibokoimi ke'nanga ri Allata'ala siagang nibalang parekammi ke'nanga anynyomba mae ri sikamma bintoeng-bintoeng niaka ri langika. Sicoco'mi anjo siagang apa niaka tattulisi' lalang ri kitta'na na'bi-na'bia. Kammaminne tattulisika, ‘E ikau tu Israelka! Teai untu' iNakke nanusamballe siagang nukoro'bangkang olo'-oloka ri wattunna patampulo taung ri parang lompoa. 43 Mingka balla'-balla'na rewata Molokh nuerang mange-mange siagang patunna bintoeng rewatanu, iamintu Refan; iaminjo patung nupareka, ero' nusomba. Iaminjo saba'na nalaKupelakko sa'gennu bella mange ri ba'leanna pa'rasangang Babel.’ 44 Balla' pammantanganNa Allata'ala ri wattunna battu mae ri rupataua niaki ri boe-boeta ri parang lompoa. Anjo pa'balla'-ballakanga nipareki situru' parentaNa Allata'ala mae ri Musa, siagang situruki panrala' le'baka Napappicinikang Allata'ala mae ri Musa. 45 Nampa naerang boe-boeta siagang Yosua anjo pa'balla'-ballakanNa Allata'ala ri wattunna a'lampa ke'nanga ambunduki nampa naalle ke'nanga anne pa'rasanganga battu ri kakoasanna bansa-bansa nibongkaya ri Allata'ala battu ri dallekanna ke'nanga. Niaki anjoreng anjo pa'balla'-ballakanNa Allata'ala sa'genna jammang pamarentahanna Daud. 46 Nipakasannammi atinNa Allata'ala ri Daud siagang napala'mi sollanna nikellai appare' se're Balla' Sambayang untu' Allata'ala, nisombaya ri Yakub. 47 Mingka Salomomi ambangungi anjo ballaka untu' Allata'ala. 48 Mingka tena nammantang Allata'ala Kaminang Tinggia lalang ri balla' napareka rupataua; nasaba' nia' tattulisi' lalang ri Kitta'na na'bia angkanaya, 49 ‘Langika a'jari empoang kala'birangKu, na linoa a'jari pa'dongkokang bangkengKu. Balla' apa eroka nupaentengangA'? Kemae tampa' laKupammari-maria? 50 Sai KalengKu ampa'jari sikontu apa niaka?’ kammaminjo kananNa Allata'ala. 51 Teai sipato' kapala batunu ngaseng, siagang teai sipato' sukkara'nu mannuruki ri Allata'ala! Teai sipato' tongolo'na tolinnu mae ri kana-kananNa Allata'ala! Sangkamma le'ba' ngasengko siagang boe-boenu; tuli erokko angngewa ri RohNa Allata'ala! 52 Maka nia' na'bi tanisessaya ri boe-boenu? Nabunoi ke'nanga tunisuroNa Allata'ala, le'baka ampabattui riolo dudu angkanaya labattui anjo Ata matojenNa Allata'ala. Na kamma-kamma anne le'ba'mi nupasikongkolang siagang nubuno anjo Ana'Na Allata'ala. 53 Le'ba'mi napabattu malaeka'-malaekaka sikamma parentaNa Allata'ala mae ri kau mingka taerokako anturuki!” 54 Kamma nalangngere'na anggota-anggota sidang Pangadelang Agamaya sikamma anjo napaua Stefanus, pa'risi' sikalimi nyawana ke'nanga siagang sanna' ngasemmi larrona mae ri Stefanus. 55 Mingka anjo Stefanus nikoasaimi ri RohNa Allata'ala, naccongamo nai' ri langika. Nacini'mi kala'biranNa Allata'ala, siagang nia'mi nacini' Isa ammenteng ri tampa' kakoasanNa, iamintu ri sa'ri kananNa Allata'ala. 56 Nakanamo Stefanus, “Ciniki, tassungkei kucini' surugaya na nia' Ana' Ma'rupataua ammenteng ri sa'ri kananNa Allata'ala!” 57 Natongko'mi tolinna anjo anggota-anggotana sidang pangadelang agamaya, siagang ammarrang-marrang, nampa assama-sama ke'nanga ambakkai Stefanus. 58 Nare'resammi ke'nanga Stefanus assulu' battu ri kotaya nampa namanang-manangngi nasambila batu. Naboli'mi pakeanna anjo tau ancinikai anjo apa kajarianga mae ri se'rea tu rungka niarenga Saulus. 59 Lalang nasambilana ke'nanga Stefanus, akkio'mi Stefanus, nakana, “O Batara Isa, Kitarimami nyawaku!” 60 Nampa akkulantu' siagang ammarrang lompo, nakana, “O Batara, teaKi' patanggongiangi anne dosaya mae ri ke'nanga.” Le'baki akkana kamma, matemi Stefanus.
8
1 Na sannang todong nyawana Saulus ri nibunonamo Stefanus. Iatommi anjo alloa nappakkaramulamo niondang mange-mange jama'aka ri Yerusalem. Sa'genna tassia'-siara'mo sikamma tau tappaka ri sikontu daera Yudea siagang Samaria. TunisuroNa mami Allata'ala tena natassia'-siara'. 2 Mangemi sikamma tau mallaka ri Allata'ala antarawangi maya'na Stefanus. Nakarrukimi ke'nanga Stefanus. Sanna' ngaseng si'nana atinna ke'nanga. 3 Mingka tuli usahaji pole Saulus ansessai jama'aka. A'lampai ri tasse're-se'reang balla', nanare'resang ngaseng assulu' tau tappaka. Nampa napantama' ke'nanga ri tarungkua. 4 Sikamma anjo tau tappa' tassiaraka, massing napabattumi anjo Kabara' Baji' battua ri Allata'ala ri kere-keremae. 5 A'lampami Filipus mange ri kota Samaria na napabattu passala'na anjo Karaeng Mappasalama' Napa'janjianga Allata'ala, mae ri tau niaka anjoreng ri Samaria. 6 Ri wattunna nalangngere' taua a'bicara Filipus, siagang nacini' gau'-gau' appakalannasa' nagaukanga, jaimi ke'nanga amparhatikangi anjo apa napaua Filipus. 7 Nasaba' assulu'mi roh ja'dalaka ammarrang kodi battu ri tau jai nasosoka setang, lanri nabongkai Filipus assulu'. Jai tommi tau peso' siagang tau tempang niballei na'jari baji'. 8 Sanna'mi rannuna tau niaka ri Samaria. 9 Anjoreng ri Samaria nia' se're tau bura'ne niareng Simon. Sallomi napakalanna'-lannasa' taua ri Samaria lanri jaina pangngissenganna. Nacaritami kalenna mae ri taua angkanaya ia tau sannaki porena. 10 Jari sanna'mi niparhatikanna ri sikamma tau niaka ri anjo kotaya ri Samaria. Nakanamo ke'nanga, “Iaminne tau kagassinganNa Allata'ala, ia masahoroka nikana, ‘Kagassingang Malompoa.’ ” 11 Sallo sikalimi napakalanna'-lannasa' taua lanri pangngissengang baca-bacana. Sa'genna sanna'mi niparhatikanna ri taua. 12 Mingka napabattumi Filipus mae ri ke'nanga ri passala' antekamma bateNa Allata'ala lampaentengi PamarentahanNa, siagang passala'na Isa Almasi, Karaeng Mappasalamaka. Tappa'mi ke'nanga mae ri anjo kabara' Baji' napabattua Filipus. Nije'ne'mi ke'nanga, bura'ne-baine. 13 Manna Simon tappa' tommi. Na ri wattunna le'ba'mo nije'ne', amminawang tulimi ri Filipus. A'jari takkalanna'-lannasa'mi Simon napakamma anjo gau'-gau' appakalannasa' kajarianga. 14 Nalangngere'mi sikamma tunisuroNa Allata'ala ri Yerusalem angkanaya natarimami taua ri Samaria kananNa Allata'ala. Jari nasuromi ke'nanga Petrus siagang Yohanes mange anjoreng. 15 Ri wattunna battu Petrus siagang Yohanes mange anjoreng, napappala' doangammi anjo taua ri Samaria, sollanna nisare ke'nanga RohNa Allata'ala. 16 Nasaba' tenapa manna sitau ri ke'nanga nikoasai ri RohNa Allata'ala; nampa nije'ne' ke'nanga lalang arenNa Isa Almasi. 17 Naangka'mi limanna Petrus siagang Yohanes, irateanganna sikamma anjo tu Samariaya; jari natarimami ke'nanga RohNa Allata'ala. 18 Nacini'mi Simon angkanaya lanri naangka'na limanna anjo tunisuroNa Allata'ala irateanganna ngaseng anjo taua, nanisaremo anjo taua ngaseng RohNa Allata'ala. Jari angngerammi doe' Simon mae ri Petrus siagang Yohanes, 19 nampa nakana, “Sareang tomma' anjo koasa kammaya, sollanna punna kupadongko' limangku irateanganna taua, lanatarimami anjo taua RohNa Allata'ala.” 20 Mingka appialimi Petrus nakana, “Cilaka mako ikau siagang doe'nu! Nukana lakkullei niballi passareNa Allata'ala siagang doe'? 21 Tena ha'nu kau lamminawang lalang ri jama-jamanna ikambe, nasaba' talambusai atinnu mae ri Allata'ala. 22 Lanri kammana, bokoimi anjo pikkirang ja'dala'nu, nampa nupala' ri Batara sollanna Napammopporangi anjo pikkirang ja'dala'nu. 23 Nasaba' kuassengi angkanaya sanna' assereatinu, siagang nipare' atako ri kaja'dallanga.” 24 Nakanamo Simon mae ri Petrus siagang Yohanes, “Tulunga', nakipala' ri Batara sollanna tena lalo manna sirupa kajariang mae ri nakke, anjo apa kipaua.” 25 Le'baki ke'nanga assare kasa'biang siagang napabattu kana-kananNa Batara, ammotere'mi Petrus siagang Yohanes mange ri Yerusalem. Na lalang a'jappana ke'nanga, napabattumi ke'nanga anjo Kabara' Bajika ri kampong-kamponga ri Samaria. 26 Nia'mo sitau malaeka' battu mae ri Filipus angkana, “A'lampako linta'! A'lampako timboro', ri agang battua ri Yerusalem mange ri Gaza.” Anjo aganga sinoi. 27 A'lampami Filipus. Anjo wattua nia' sitau pagawe balla' lompoa ri Etiopia, sitabang lalang pa'lampanna ammotere' mange ri pa'rasanganna. Anjo taua pagawe tinggi, anta'galakai sikontu pa'barang-baranganna Kandake, karaeng bainea ri Etiopia. Anjo taua battumi ri Yerusalem, untu' anynyomba ri Allata'ala. Na anjo wattua ammotere'mi siagang ratei a'dongko' ri karetana. Lalang ammempona rate ri karetana, sitabangi nabaca Kitta'na Na'bi Yesaya. 29 Nakanamo RohNa Allata'ala mae ri Filipus, “Mangeko anreppesi anjo karetaya.” 30 Mangemi Filipus a'reppese' ri anjo karetaya, nanalangngere'mo anjo taua ammaca Kitta' Yesaya. Akkuta'nammi Filipus ri anjo taua nakana, “Maka kipahanji battuanna anjo apa kibacaya?” 31 Appialimi anjo taua nakana, “Antekamma lakkulle kupahang punna tena ampakasingarianga'?” Nampa nakio'mi Filipus nai' ri karetaya nammempo siagang. 32 Iaminne anjo aya'-aya' nabacaya ri Kittaka, “Sanrapangi gimbala' nieranga lamange nisamballe, sanrapangi ana' gimbala' tenaya nassa'ra punna nigoncingi bulunna, kamma tomminjo tamakkana-kanana. 33 Nihinai siagang nigau' tenai naadele'. Niallei nyawaNa battu ri linoa sa'genna tenanniakka manna sitau akkulle ancaritai antekamma passossoranNa.” 34 Nakanamo anjo pagawe tinggi battua ri Etiopia mae ri Filipus, “Pauang sabeka', inai napakkanai anne na'bia? Kalennaka, yareka tau maraeng?” 35 Appakkaramulami Filipus a'bicara. Napakemi anjo aya'-ayaka appakkaramula ancaritai Kabara' Bajika ri passala'na Isa Almasi, mae ri anjo pagawe tinggia. 36 Ri tangngana aganga; anrapi'mi ke'nanga mange ri se'reang tampa' niaka je'ne'na. Nakanamo anjo pagawea, “Ciniki, anjo mae nia' je'ne'! Apapi pole kakuranganna punna erokka' nije'ne'?” [ 37 Nakanamo Filipus, “Punna tappa' tojeng-tojemmaki' ri atinta, akkulle maki' nije'ne'.” Nakanamo anjo pagawe tinggi battua ri Etiopia, “Tappa'ma' angkanaya anjo Isa, Ana'Na Allata'ala.”] 38 Nasuro pamantammi karetana. Nampa naung ke'nanga sipa'rua iamintu Filipus siagang anjo pagawea ri je'neka, nanije'ne' ri Filipus. 39 Ri wattunna assulu' ammotere' ke'nanga battu lalang ri je'neka, battumi RohNa Allata'ala angngallei Filipus. Tanicinikami Filipus ri anjo pagawe tinggi battua ri Etiopia. Sanna'mi rannuna nyawana anjo pagawe tinggia, nanapatulusu' pa'lampanna. 40 Ti'ring nia'mi Filipus ri Asdod. Na ri wattunna napatulusu' pa'lampanna napabattumi Kabara' Bajika ri passala'na Isa, ri sikamma kota-kotaya sa'genna battu mange ri Kaisarea.
9
1 Na lalang anjo wattua tuli ero'mi Saulus ansessai siagang ambunoi sikamma tau tappaka ri Isa. A'lampami mae ri imang lompoa, 2 nappala' sura' koasa untu' lanapake a'lampa mae ri pamimping-pamimpinna balla' sambayanna tu Yahudia ri Damsyik. Sollanna, punna nia' tau tappa' ri Isa nagappa anjoreng, akkullei najakkala' ke'nanga, nampa naerang mange ri Yerusalem. 3 Lalang a'lampana mange ri Damsyik, ri wattunna a'reppese'mo mange anjoreng ri kotaya, ti'ring nia'mo singara' battu ri langika, tassioro' mae ri tammulilina Saulus. 4 Tu'guru'mi Saulus naung ri buttaya, nampa nia' sa'ra nalangngere' angkana ri ia, “O Saulus, Saulus! Apa saba'na nanusessa kamma duduA'?” 5 Akkuta'nammi Saulus nakana, “InaiKi' antu, Karaeng?” Appialimi anjo sa'raya nakana, “INakke Isa, nusessa dudua. 6 Mingka kamma-kamma anne ambangung mako nai', na nuantama' ri kotaya. Anjorempi nampa nipauangko apa musti lanugaukang.” 7 Ta'bangka ngasemmi anjo tau naaganga Saulus sa'genna takkulleamo assa'ra ke'nanga; nasaba' nalangngereki ke'nanga anjo sa'raya, mingka tena tau manna se're nacini' ke'nanga. 8 Ammentemmi Saulus naero' nasungke matanna, mingka takkulleami accini' apa-apa. Jari nita'gala'mi limanna ri ke'nanga, nampa nirenreng antama' ri Damsyik. 9 Tallungalloi takkullea accini', na anjo wattua tena sikalimo nangnganre siagang angnginung. 10 Anjoreng ri Damsyik nia' se're tau tappa' ri Isa, niarenga Ananias. Battumi Batara a'bicara mae ri ia ilalang pappiso'na. Nakana Batara ri ia, “Ananias!” Appialimi Ananias nakana, “Iye', Batara.” 11 Nakanamo Batara, “A'lampako kamma-kamma anne. A'lampako mange ri balla'na Yudas, ri Agang Lambusuka. Pakkuta'nangangi anjoreng tu niarenga Saulus, battua ri kota Tarsus. Anjo taua sitabangi appala' doang. 12 Na lalang pappiso'nana, nia' sitau bura'ne nacini' battu mae ri ia, niarenga Ananias. Battui mae ri ia ampadongkoki limanna irateanganna sollanna akkulle accini' poleang anjo taua.” 13 Appialimi Ananias nakana, “O Batara, jaimi kabara'na kulangngere' anjo taua. La'biangampa, kabara'na antekamma batena ansessai ummatTa ri Yerusalem. 14 Na kamma-kamma anne nia'mi battu anrinni, angngerang sura' koasa battu ri imang-imang kapalaya, sollanna akkulle najakkala' sikamma tau tappaka mae ri Katte.” 15 Mingka Nakanamo Batara ri Ananias, “A'lampamako! Nasaba' le'ba'mi Kupile anjo taua a'jari palayangKu; sollanna akkulle napabattu arengKu mae ri bansa-bansa maraenga, tenaya nantama' agama Yahudi, siagang ri sikamma karaenga, kammayatompa ri umma' Israel. 16 Siagang KalengKu ero' ampicinikiangi sikamma kapa'risang musti lanakasiaka passabakkang iNakke.” 17 A'lampami Ananias mange anjoreng ri ballaka, na napadongko' limanna irateanganna Saulus. Nakana Ananias, “Sari'battangku Saulus, Batara Isa nucinika ri tangngana aganga ri wattunnu mae anrinni, Iami assuroa' battu mae ri kau, sollannu akkulle accini' poleang, siagang nikoasai ri RohNa Allata'ala.” 18 Ia memang anjo wattua nia'mo kamma sissi' juku' tu'guru' battu ri matanna Saulus, nakkullemo accini' poleang. Ambangummi nai', nampa nije'ne'. 19 Na ri wattunna le'ba'mo angnganre, a'jari gassing poleammi. Ammantammi Saulus ri Damsyik, siagang sikamma tau tappaka ri Isa. Niaki pirangallo are ammantang anjoreng. 20 A'lampami mange ri sikamma balla' sambayanga, nappakkaramulamo ampabattui angkanaya, iaminjo Isa Ana'Na Allata'ala. 21 Lannasa' ngasemmi taua allangngereki Saulus angngajara'. Nakanamo ke'nanga, “Sai iaminne tau le'baka ambunoi sikamma tau tappaka ri Isa, ri Yerusalem? Sitojenna battui mae anrinni ero' anjakkalaki tau tappaka, nampa naerang mange ri imang-imang kapalaya!” 22 Mingka pila' a'jari lompomi pangaruna Saulus. Sikamma butti-butti napabattua ri passala'na Isa sanna' sikali jarre'na, angkanaya ma'nassa Iaminjo Isa Karaeng Mappasalamaka. Sa'genna takkulleami tu Yahudi niaka ri Damsyik anggeakki anjo apa napaua. 23 Tena nasallo ribokoanganna, assikongkolo'mi tu Yahudia ero' ambunoi Saulus. 24 Mingka naassemmi Saulus anjo apa eroka nagaukang ke'nanga. Allo bangngimi ke'nanga attayang ri pakke'bu' lompona kotaya, ero' ambunoi Saulus. 25 Mingka ri se'reang bangngi, battumi ana'-ana' gurunna Saulus angngallei Saulus, nampa napantama' ri karanjeng lompoa nanaoloro' napanaung battu rate ri tembo'na kotaya. 26 A'lampami Saulus mange ri Yerusalem. Ero'mi mange a'rappungang siagang tau tappaka ri Isa. Mingka malla'mi ke'nanga ri ia, lanri tenapa natappa' ke'nanga angkana tappa' tojemmi Saulus ri Isa. 27 Battumi Barnabas, nampa naerang Saulus mae ri sikamma tunisuroNa Allata'ala. Nacaritami Barnabas mae ri ke'nanga, antekamma kajarianna ri wattunna nacini' Saulus anjo Batara ri tangngana aganga, siagang antekamma batena a'bicara Batara mae ri Saulus. Nacarita tommi Barnabas antekamma baranina Saulus angngajara' lalang arenNa Isa ri Damsyik. 28 Jari ammantammi Saulus siagang ke'nanga. Siagang sanna'mi baranina akkato'ba lalang arenNa Isa ri sikontu kota Yerusalem. 29 A'bicarami siagang siewa bicarami siagang tu Yahudi a'bicara Yunania; naero'mo ke'nanga ambunoi Saulus. 30 Naassennamo sikamma tau tappa' maraengannaya anjo passalaka, naerammi ke'nanga Saulus mange ri Kaisarea, nampa nasuro a'lampa mange ri Tarsus. 31 A'jari sannammi sikontu jama'aka ri Yudea, Galilea, siagang Samaria. Na lanri malla'na ri Batara siagang pannulunNa RohNa Allata'ala, pila' jarre'mi siagang pila' katambammi jaina ke'nanga. 32 A'lampami Petrus mange-mange, angkunjungi jamaah-jama'aka. Ri se'reang allo a'lampami angkunjungi umma'Na Batara niaka ri Lida. 33 Anjoreng, assibuntulu'mi siagang sitau bura'ne, niarenga Eneas. Anjo taua pesoki, na sagantuju taummi tambangung-bangunga battu ri katinroanna. 34 Nakanamo Petrus ri Eneas, “O Eneas, kamma-kamma anne Naballeiko Isa Almasi. Ambangung mako nai' nanupakabaji' katinroannu.” Ambangung memammi Eneas anjo wattua. 35 Sikamma tau niaka ri Lida siagang Saron nacini' ngasemmi anjo apa kajarianga ri kalenna Eneas. Na tappa' ngasemmo ke'nanga mae ri Batara. 36 Anjoreng ri Yope, nia' sitau baine, niarenga Tabita. Ia tau tappa' ri Isa. (Lalang bicara Yunani arenna nikana, Dorkas, battuanna jonga.) Tuli nagaukangi apa-apa bajika, nanatulung tu kasi-asia. 37 Anjo wattua garringi, sa'genna matemo. Ri le'ba'namo nije'ne' maya'na, nipadongko'mi ri kamara' irateanga. 38 Anjo Yope tena nasiapa bellana battu ri Lida. Jari nalangngere'na tau tappaka ri Yope angkana niaki Petrus ri Lida, nia'mo rua tau nasuro ke'nanga mange ambuntuli Petrus. Appasammi ke'nanga ri Petrus angkana, “Akkaro-karoki' battu mae.” 39 Ammentemmi linta' Petrus, nampa a'lampa ampinawangi anjo tunisuroa battu. Battuna ke'nanga mange anjoreng, nierammi Petrus nai' ri kamara' rateanga. Battu ngasemmi janda niaka anjoreng angngarru', allipungi Petrus. Napaccinikammi ke'nanga mae ri Petrus sikamma baju-bajua siagang juba-juba najaika Dorkas, eroka napassareang Dorkas ri ke'nanga ri wattu attallasa'na. 40 Nasuromi Petrus assulu' ngaseng ke'nanga, nampa akkulantu' appala' doang. Le'baki anjo, a'dalle' mangemi ri maya'na Dorkas, nampa nakana, “Tabita, ambangungko!” Nasungkemi matanna Dorkas; na ri wattunna nacini' Petrus, ambangummi nai' ammempo. 41 Nampa nata'gala' Petrus limanna nanatulung ammenteng. Le'baki anjo nakio'mi Petrus sikamma tau tappa' niaka anjoreng siagang sikamma anjo janda-jandaya, nampa napassareang Dorkas le'bakamo attallasa' poleang, mae ri ke'nanga. 42 Tassiara'mi anjo apa kajarianga mae ri sikontu tau niaka ri Yope. Sa'genna jaimi tau a'jari tappa' ri Isa, a'jari Karaeng Mappasalama'na ke'nanga. 43 Ammantammi Petrus pirangallo are anjoreng, ri balla'na sitau pajama kukkuluka, niarenga Simon.
10
1 Anjoreng ri Kaisarea, nia' sitau bura'ne niarenga Kornelius. Jama-jamanna, iamintu kapiteng ri “Pasukang Italia”. 2 Ia tau malla' ri Allata'ala. Sikontu bone balla'na tau anynyomba ngaseng mae ri Allata'ala. Jai tu kasi-asi bansa Yahudi natulung. Tuli appala' doangi ri Allata'ala lalang tallasa'na. 3 Ri se'reang allo, kira-kira tette' tallu ri karuenga, nia'mo nacini' a'nyata sikali lalang pappiso'na, sitau malaeka'Na Allata'ala battu angkioki nakana, “Kornelius!” 4 Najanjammi Kornelius anjo malaekaka, nateai sipato' malla'na. Nakanamo, “Apa kutadeng Karaeng?” Appialimi anjo malaekaka nakana, “Nitarimami ri Allata'ala sikamma pappala' doannu siagang pa'mai' baji'nu, kammayatompa Nau'rangiko Allata'ala. 5 Kamma-kamma anne suromi taua mange ri Yope, nanakio' Simon. Areng la'buna iamintu Simon Petrus. 6 Kamma-kamma anne niaki annompang ri balla'na pajama kukkuluka, niarenga Simon, niaka ammantang ri biring tamparanga.” 7 A'lampanamo anjo malaeka' a'bicaraya mae ri Kornelius, nakio'mi Kornelius rua palayanna ri balla', siagang sitau tantara pangawala' baji'na. 8 Nacaritami Kornelius mae ri ke'nanga anjo apa le'baka kajariang, nampa nasuro ke'nanga a'lampa mange ri Yope. 9 Ammukona alloa, lalang a'jappana ija anjo tunisuroa siagang a'biringamo battu mange ri Yope, nai'mi Petrus ri ballaka ero' appala' doang. 10 Sanna' sikalimi cipuru'na, naero' dudumo angnganre. Lalang nipasadiana kanrea anggappami pappiso'na. 11 Tassungkei nacini' langika, nampa nia' nacini' kaeng la'ba' nioloro' naung ri linoa, ta'gentung ri appaka panynyingkulu'. 12 Ilalanganna, nia' sangka' rupa olo'-olo' appaka bangkenna, sikamma olo'-olo' akkadangkanga, siagang jangang-jangang liaraka. 13 Nampa nia'mo sa'ra angkana ri ia, “Petrus, ambangungko! Samballei, nampa nukanre!” 14 Appialimi Petrus nakana, “Tena, Batara! Tena le'bakapa' angnganre apa-apa haranga siagang ra'masaka.” 15 Mingka nakanamo pole anjo sa'raya ri ia, “Apa le'baka Nahallallang Allata'ala, teako pa'jari harangi.” 16 Pintallungi tuli battu anjo pappiso'naya, nampa ta'angka' ammotere' nai' ri suruga anjo kaenga. 17 Lippumi nawa-nawana Petrus ampikkiriki angkana apa battuanna anjo pappiso'naya. Lalang appikkiri'na Petrus, nibuntulu'mi balla'na Simon ri anjo tunisuroa ri Kornelius. Nia'mi ke'nanga ri dallekanna pakke'buka. 18 Akkio'mi tau ke'nanga nanakuta'nang angkana, “Maka nia' toana a'bangngi anrinni niarenga Simon Petrus?” 19 Lalang tuli napikiri'na ija Petrus angkana apa battuanna anjo pappiso'nana, Nakanamo RohNa Allata'ala ri ia, “He, Petrus, nia' tau tallu amboyako. 20 Lintakko naung, siagang teako bata-batai ampinawangi ke'nanga, nasaba' iNakke assuroi ke'nanga.” 21 Naummi Petrus battu ri anjo ballaka, na nakana ri anjo taua, “Inakkemi antu nuboyaya. Apa kutadeng parallu nukabattuang?” 22 Appialimi ke'nanga angkana, “Kapiteng Kornelius ansuroi anne ikambe battu mae. Anjo Kornelius tau baji', siagang tau malla' ri Allata'ala, kammayatompa sanna' nipakalompona ri sikamma tu Yahudia. Niaki malaeka'Na Allata'ala ansuroi sollanna nasuro kiokki' mange ri balla'na. Iaminjo ampa'nassai angkanaya nipilangngerimi pappala' doanna ri Allata'ala, punna akkullemo nalangngere' apa lakipabattua mae ri ia.” 23 Nakio'mi Petrus ke'nanga antama' ri balla', nampa a'bangngi ke'nanga. Ammukona, ambangummi Petrus nampa a'lampa siagang ke'nanga. Nia' todong siapa are tau tappa' ri Yope amminawang todong ri ke'nanga. 24 Siallo le'ba'na anjo, battumi ke'nanga mange ri Kaisarea. Sallomi ke'nanga nitayang-tayang ri Kornelius siagang bija-bijanna, kammayatompa passari'battangang baji'na niaka todong nakio' battu. 25 Ri wattunna battumo Petrus, mangemi Kornelius anruppai, nasu'ju' ri dallekanna. 26 Mingka nipaentemmi ammotere' ri Petrus nampa nakana, “Ambangungko nai'! Inakke tau biasa tonja'.” 27 A'bicarami Petrus siagang Kornelius, nantama' tommo ke'nanga ri balla'. Jaimi nacini' Petrus tau battu a'rappungang. 28 Le'baki anjo nakanamo ri ke'nanga, “Nuasseng ngasenji sari'battang, angkanaya situru' ajarang agamana tu Yahudia, tanipa'biangai ke'nanga angkunjungi balla'na bansa maraenga, yareka assileo' siagang bansa maraenga. Mingka le'ba'ma' Napabattuang Allata'ala, angkanaya takkulleai kucini' ra'masa' yareka harang tau maraenga. 29 Iaminjo, na ri wattungku kikio' battu, kukate'neammi eroka battu. Jari kamma-kamma anne eroki kuasseng, apa kutadeng saba'na nakikioka' battu?” 30 Appialimi Kornelius nakana, “Ri tallungallona allaloa, kira-kira ri wattu kamma-kammaya anne, sitabanga' appala' doang ri ballakku, ri wattu tette' tallu ri karuenga. Ti'ring nia'mo sitau bura'ne ammenteng ri dallekangku. Accilla'-cillaki pakeanna anjo taua. 31 Nakana ri nakke, ‘Kornelius! Natarimami Allata'ala pappala' doannu, siagang Nau'rangimi pa'mai' baji'nu. 32 Jari suromi taua mange ri Yope angkioki tau niarenga Simon Petrus. Kamma-kamma anne niaki a'bangngi ri balla'na se'rea pajama kukkulu', niarenga Simon; anjo ballaka anjorengi ri biring tamparanga.’ 33 Lanri kammana minjo nakusuromo linta' taua mae angkiokki'. Nasanna' baji'na pa'maitta, kaerokki' battu mae anrinni. Kamma-kamma anne nia' ngasemmi ikambe anrinni, ri dallekanNa Allata'ala, ero' ampilangngeri sikamma apa Nasuro pabattua Allata'ala mae ri kambe.” 34 Nakanamo Petrus, “Kamma-kamma anne ma'nassa nupahang tojemmi angkanaya Napasangkamma ngasengi Allata'ala sikamma rupataua. 35 Inai-nai malla' ri Allata'ala siagang anggaukangi kabajikanga, iami nitarima ri Allata'ala, manna pole bansa apa. 36 Nuasseng ngasemmi bonena kabara' Napabattua Allata'ala mae ri bansa Israel. Anjo kabaraka, iamintu ri passala'na Kabara' Baji' passiamakkang lalang ri KalenNa Isa Almasi iamintu Batara mae ri sikontu rupataua. 37 Nuassemmi apa le'baka kajariang ri sikontu Yudea, iamintu appakkaramula battu ri Galilea ri le'ba'namo napassuroang Yohanes anjo pa'je'nekanga mae ri taua. 38 Nuassemmi angkanaya le'ba'mi Napile Allata'ala anjo Isa tu Nazaretka, naNapassareang RohNa Allata'ala siagang koasaNa mae ri Ia. Nuasseng tommi angkanaya le'ba'mi a'lampa mange-mange Isa anggaukangi kabajikanga; Naballeimi sa'genna a'jari baji' sikamma tau nasosoka setang, lanri niaki Allata'ala anrurungangi. 39 Ikambemi anne le'baka anciniki sikontu apa le'baka Nagaukang ri pa'rasanganna tu Yahudia siagang ri Yerusalem. Mingka manna nakamma, nisalli'mi siagang nibunomi ri tu Yahudia. 40 Mingka ri makatalluna alloa, nipattallasa' poleammi ammotere' ri Allata'ala battu ri alla'na tau matea, nanipappicinikang ri rupataua angkanaya ma'nassa attallasa' poleammi. 41 Mingka tena nipappicinikang ngasengi mae ri sikontu taua, passangalinna ri kambeji bawang tu le'baka Napile la'bi riolo Allata'ala a'jari sa'bi-sa'binNa: Sipangnganreangi ikambe siagang Ia ri wattunna attallasa' poleammo battu ri kamateanga. 42 Na Nasuromo anne ikambe ampabattui anjo Kabara' Bajika mange ri sikontu rupataua. Kammayatompa a'jari sa'bi angkanaya Iami niangka' ri Allata'ala a'jari Haking mae ri sikontu tau attallasaka ija siagang tau mateamo. 43 Sikontu na'bi-na'bia, le'ba' ngasemmi nabicara riolo anjo passalaka. Nakana ke'nanga, sikamma tau tappaka ri Isa lanipammopporangi dosa-dosana, lanri kakoasanNa Isa.” 44 Sitabang a'bicarana ija Petrus, naummi RohNa Allata'ala, nanakoasai sikamma tau allangngerekai anjo kabaraka. 45 Sikamma tu Yahudi tappakamo ri Isa, anjo niaka amminawang ri Petrus battu ri Yope, a'jari lannasa' ngasemmi anciniki anjo apa kajarianga. Lannasa' ngasengi ke'nanga anciniki nasaba' Napassareang tongi RohNa Allata'ala mae ri bansa maraenga, pantaranganna bansa Yahudia. 46 Nasaba' nalangngere'mi ke'nanga anjo taua a'bicara lalang a'rupa-rupa bicara, siagang ammuji-muji ri Allata'ala. Nampa nakanamo pole Petrus, 47 “Cini'mi anne taua ngaseng, anggappa tommi RohNa Allata'ala, sangkamma ikatte. Jari maka akkulleiji taua napisangkai punna nije'ne'mo siagang je'ne' ke'nanga?” 48 Jari nasuromi Petrus ke'nanga nije'ne' lalang arenNa Isa Almasi. Le'baki anjo napala'mi ke'nanga, sollanna ammantang ija Petrus angngagangi ke'nanga pirang-pirangallo are sallona.
11
1 Nalangngere'mi sikamma tunisuroNa Allata'ala siagang sikamma tau tappaka ri sikontu Yudea, angkanaya manna tau tenayapa nantama' agama Yahudi natarima tommi kananNa Allata'ala. 2 Jari ri wattunna a'lampa Petrus mange ri Yerusalem, nicallami Petrus ri tu Yahudi tappakamo. 3 Nakana ke'nanga ri Petrus, “Angngapa nu'lampa todong mange ri balla'na tu tenayapa nisunnaki? Ba'lalo sipangnganreang tongko siagang ke'nanga!” 4 Jari napakasingara'mi Petrus mae ri ke'nanga ngaseng, sikamma apa le'baka kajariang, appakkaramula battu ri pakkaramulanna. Nakana Petrus, 5 “Sitabanga' appala' doang ri Yope, nania' se're pappiso'na battu mae ri nakke. Nia' kucini' apa-apa kamma silawara' kaeng la'ba' nipaturung battu ri langika, ta'gentung ri appaka panynyingkulu'na, nampa ammantang ri sa'ringku. 6 Ri wattunna kuciniki lalanganna, nia' kucini' olo'-olo' appaka bangkenna, olo'-olo' liaraka, olo'-olo' akkadangkanga, kammayatompa jangang-jangang liaraka. 7 Nampa nia' kulangngere' sa'ra angkana mae ri nakke, nakana, ‘Ambangungko nai' Petrus! Samballei nampa nukanre!’ 8 Mingka appialima' kukana, ‘Tena, Batara! Tena' le'bakapa' angnganre kanre harang yareka ra'masaka.’ 9 Mingka nakanamo pole anjo sa'raya battua ri langika, ‘Apa le'baka Nahallallang Allata'ala, teako pa'jari harangi.’ 10 Pintallungi kucini' anjo apa kajarianga. Nakala'busanna ta'angka' ngasemmi ammotere' nai' ri suruga. 11 Sitabang anjo wattua, nia' tommi anjo tau tallua battu ri Kaisarea iamintu tunisuroa battu mae ri nakke, battu mae ri anjo balla' kupa'bangngia. 12 Nampa Nasuroma' RohNa Allata'ala a'lampa ampinawangi ke'nanga, siagang Napasanga' sollanna tena nakubata-bata ampinawangi anjo ke'nanga. Manna anne annang sari'battanga amminawang tongi ri nakke a'lampa mange ri Kaisarea, nakisiagang ngasemmo antama' ri balla'na Kornelius. 13 Nampa nacaritamo Kornelius mae ri kambe antekamma ri wattunna nacini' malaekaka ammenteng ri balla'na na nakana, ‘Suroi taua mange ri Yope nanakio' se'rea tau bura'ne niarenga Simon Petrus. 14 Iami lampabattui mae ri kau kabara' lakkullea ampasalamakko siagang sikontu bone balla'nu.’ ” 15 Napannarrusuki caritana Petrus nakana, “Na ri wattungku appakkaramula a'bicara kamma anjo, Naummi RohNa Allata'ala mae ri ke'nanga ngaseng, sangkamma le'baka kajariang mae ri katte ngaseng pirangalloang. 16 Nampa kuu'rangimo angkanaya le'baki akkana kamma anne Batara, ‘Yohanes je'ne' napake anje'neki taua, mingka ikau ngaseng lanije'nekko siagang RohNa Allata'ala.’ 17 Jari singara'mi ma'nassana angkanaya Napassareang tongi Allata'ala passare kammaya mae ri tu tenaya nantama' agama Yahudi, sikamma apa Napassareanga mae ri katte ngaseng ri wattunta tappa'mo mae ri Isa Almasi. Jari antekamma bateku lampisangkai Allata'ala?” 18 Nalangngere'namo anjo apa napabattua Petrus, tenamo nakkana-kana ke'nanga. Nampa ammuji-mujimo ke'nanga ri Allata'ala. Nakana ke'nanga, “Punna kamma, manna bansa maraenga nisare tommi oloang ri Allata'ala sollanna toba' ke'nanga battu ri dosa-dosana, nanapahang baji' katallassang sitojennaya!” 19 Ri le'ba'namo Stefanus nibuno, appakkaramulami niondang mange-mange tau tappaka ri Isa, sa'genna tassia'-siara'mo ke'nanga ri kere-keremae. Nia' lari mange ri Fenisia, nia' todong mange ri Siprus siagang Antiokhia. Napabattumi ke'nanga kabara' battua ri Allata'ala. Mingka tu Yahudiaji bawang napabattuang ke'nanga. 20 Mingka nia' todong anjo tau tappaka, iamintu tu battua ri Siprus siagang Kirene, a'lampa mange ri Antiokhia. Na iaminne ke'nanga ampabattui tongi Kabara' Bajika ri passala'na Isa mae ri tu tenayapa nantama' agama Yahudi. 21 Niaki koasaNa Batara anrurungangi ke'nanga, sa'genna jaimi tau a'jari tappa', nanapassareang kalenna mae ri Batara. 22 Sikontu kabara'na anne apa kajarianga anrapi' tommi mae ri jama'aka ri Yerusalem. Jari nasuromi ke'nanga Barnabas mange ri Antiokhia. 23 Na ri wattunna battu Barnabas mange anjoreng, nacini'mi antekamma bateNa Allata'ala ambarakkaki ngasengi anjo taua. Sanna'mi rannuna Barnabas. Na napakainga'mo ke'nanga sollanna jarre' tojeng-tojeng tappa'na ke'nanga ri Batara. 24 Anne Barnabas tau baji' pa'mai' siagang nikoasaimi ri RohNa Allata'ala; kammayatompa sanna' jarre'na tappa'na ri Batara, sa'genna jaimi tau amminawang tappa' ri Batara. 25 Nampa a'lampa Barnabas mange ri Tarsus, amboyai Saulus. 26 Ri wattunna sibuntulu'mo Saulus, naerang tommi Saulus mange ri Antiokhia. Niaki sitaung ke'nanga ammantang a'rappungang siagang jama'aka anjoreng, najai tau naajara' ke'nanga. Anjoremmi ri Antiokhia uru-uru nigallara' tu Karisteng sikamma tau tappaka ri Isa. 27 Anjo wattua nia' siapa are na'bi battu ri Yerusalem mange ri Antiokhia. 28 Kalase'renna ke'nanga niarengi Agabus. Lanri pangngajara'Na RohNa Allata'ala, natappu riolomi angkanaya lakajariangi sallang ri sikontu linoa kacipurang lompoa. (Na anjo napakkanaya kajariang tojemmi ri wattunna Karaeng Klaudius ammarenta.) 29 Jari assamaturu'mi sikamma tau tappaka ri Isa, ero' appikatu sumbangang mae ri sikontu sari'battang niaka ammantang ri Yudea; massing appikatumi ke'nanga situru' pakkullena. 30 Nagaukammi ke'nanga anjo passamaturukanga. Na'lampamo Barnabas siagang Saulus angngerangi anjo sumbanganga mae ri pamimping-pamimping jama'aka ri Yudea.
12
1 Iatommi anjo wattua nappakkaramulamo Karaeng Herodes anjallakkangi anggota-anggota jama'aka. 2 Iami amparentakangi, nanibunomo siagang pa'dang sari'battanna Yohanes, iamintu Yakobus. 3 Ri wattunna nacini' Herodes angkanaya rannui nyawana tu Yahudia anciniki anjo apa nagaukanga, pila' katambammi panggaukang kammana; nasuro tommi taua anjakkalaki Petrus. Anjo wattua Allo Lomponai Roti Tenaya Nammake Pa'gambang. 4 Ri wattunna nijakkala'mo Petrus nipantama'mi ri tarungkua. Nia' appa' regu tantara nisuro anjagai Petrus — tasse're-se're regu, nia' appa' anggota tantara. Le'bappi passua'-suarrang allo Paskaya, nampa laniadeli Petrus ri Herodes, ri dallekanna tau jaia. 5 Jari nitahammi rolong Petrus lalang ri tarungkua; mingka tuli appala' doang dudumi sikontu jama'aka mae ri Batara sollanna Narurungangi Petrus. 6 Ri bangngi tenanapa nalanierang Petrus andallekang ri Herodes siagang tau jaia, attinromi Petrus. Anjo wattu attinrona tassikkoki rua-rua limanna, nanijagai ri rua tantara pangawala'. Anjoreng ri pakke'bu' tarungkua, nia' todong rua pangawala' maraengang anjagai tarungkua. 7 Ti'ring nia'mo malaeka'Na Batara ammenteng anjoreng, siagang accayami singaraka lalang ri kamara'na anjo tarungkua. Nironrommi Petrus ri anjo malaekaka, sa'genna ambangung Petrus. Nampa nakana anjo malaekaka, “He, ambangungko linta'!” Anjo wattua ta'lappasa'mi anjo rante bassi nipasikkoka ri limanna Petrus. 8 Le'baki anjo nakanamo anjo malaekaka, “Pakemi pakeannu siagang patabami sapatunu!” Ammakeammi Petrus siagang napatabami sapatuna. Le'baki anjo, nakanamo pole anjo malaekaka, “Pakemi jubanu, siagang amminawangko ri nakke!” 9 Jari amminawammi Petrus ri anjo malaekaka, assulu' battu ri anjo tarungkua. Mingka tena naassengi Petrus angkanaya anjo apa nagaukanga malaekaka ma'nassa kajariang tojeng-tojengi. Nakapangi Petrus angkanaya asso'naji bawang. 10 Ri wattunna nalaloimi ke'nanga tampa' pajaga makase'rea siagang makaruaya, anrapi'mi ke'nanga ri pakke'bu' bassia, angngoloa mange ri kotaya. Tassungke kale-kalemi anjo pakke'buka. Assulu'mi ke'nanga, nampa a'jappa ri se'reang lorong. Ti'ring lanynya'mi anjo malaekaka ambokoi Petrus. 11 Le'baki anjo nampami naasseng Petrus anjo apa le'baka kajariang ri kalenna. Nakanamo ri kalenna, “Kamma-kamma anne kuassemmi angkanaya ma'nassa Nasuromi malaeka'Na Batara battu allappassanga' battu ri kakoasanna Herodes siagang battu ri sikontu apa eroka nagaukang bansa Yahudi mae ri nakke.” 12 Naassennamo Petrus anjo passalaka, a'lampami Petrus mange ri balla'na Maria, amma'naya Yohanes, nigallaraka todong Markus. Anjoreng jai tau a'rappungang appala' doang. 13 Nade'de'mi Petrus pakke'buka. Nia'mo sitau baine palayang niarenga Rode, battu ero' assungkei pakke'buka. 14 Naasseng memanji silalonna sa'ranna Petrus. Lanri rannu duduna, akkaro-karomi ammotere' antama', natanasungkeapa pakke'buka. Nampa napauang sikamma tau niaka anjoreng angkana niaki Petrus pantarang. 15 Nakanamo ke'nanga, “Pongorokko antu!” Mingka attojeng-tojemmi Rode angkana ma'nassa Petrus tojeng anjo pantarang. Jari nakanamo ke'nanga, “Malaeka'naji anjo!” 16 Anjo wattua nade'de' tulimi Petrus pakke'buka. Jari nasungkemi ke'nanga pakke'buka. Na ri wattunna nacini' ke'nanga Petrus, sanna'mi lannasa'na ke'nanga. 17 Nikodemi siagang lima ke'nanga ri Petrus, sollanna sannang ke'nanga. Nampa nacarita antekamma bateNa Batara angngerangi assulu' ri tarungkua. Nampa nakana, “Pabattumi anne kabaraka mae ri Yakobus siagang sikamma sari'battang maraengannaya.” Le'baki anjo, a'lampami Petrus ambokoi anjo tampaka, nampa mange ri tampa' maraenga. 18 Ammukona bari'basa', gegere' ngasemmi tantara pangawalaka ri tarungkua. Sanna' lannasa'na ke'nanga ri passala'na anjo apa kajarianga ri kalenna Petrus. 19 Nasuromi Herodes taua mange amboyai Petrus. Mingka takkulleami ke'nanga ambuntuluki Petrus. Jari naparentakammi Herodes sollanna nikuta'nang ngaseng anjo tantara pangawalaka nampa nibuno. Le'baki anjo a'lampami Herodes battu ri Yudea, namange ammantang siapa are sallonna ri Kaisarea. 20 Sanna' larrona Herodes ri tu Tiruska siagang tu Sidonga. Lanri kammana, a'lampami ke'nanga mange andallekang ri ia. Uru-uruna nanyonyo'mi rolong Blastus, iamintu kapalaya ri balla' lompona Herodes, sa'genna sipammentengang Blastus siagang ke'nanga. Le'baki anjo nirurungammi ke'nanga mange andallekang ri Herodes. Appala' damemi ke'nanga ri Herodes, nasaba' apa-apa nikanrea ri pa'rasanganna ke'nanga, sangnging apa-apa battu ri pa'rasanganna Herodes. 21 Ri se'reang allo, iamintu allo le'bakamo nipattantu, napakemi pakeang kalompoanna Herodes. Nampa ammempo ri empoang kakaraenganna, nappakkaramula appidato ri dallekanna ra'yaka. 22 Nalangngere'na ra'yaka anjo pidatona Herodes, akkiok-kio'mi ke'nanga angkana, “Anne sa'ra rewata, teai sa'ra tau!” 23 Mingka anjo wattua battumi malaeka'Na Batara antempaka'rangi Herodes, lanri tenana nahargai Allata'ala. Nikanremi Herodes ri gallang-gallang nampa mate. 24 Jari pila' a'la'bammi mange-mange kana-kananNa Allata'ala, siagang pila' majarre'mi. 25 Le'ba'namo nagaukang jama-jamanna Barnabas siagang Saulus, a'lampami ke'nanga ambokoi Yerusalem. Naerang tommi ke'nanga Yohanes Markus.
13
1 Ri jamaah Antiokhia nia' siapa are na'bi siagang guru. Areng-arenna ke'nanga iamintu: Barnabas, Simeon nigallaraka I Le'leng, Lukius battua ri Kirene, Menahem siaganga Herodes niparakai sa'genna lompo, siagang Saulus. 2 Ri wattunna assambayang mae ri Batara siagang appuasa ke'nanga, Nakanamo RohNa Allata'ala mae ri ke'nanga, “Pilei nanusa'lakkangA' Barnabas siagang Saulus, sollanna Kusuro anjamai jama-jamang le'baka Kupattantuangi ke'nanga.” 3 Le'baki appuasa siagang appala' doang ke'nanga, napadongko'mi limanna ke'nanga irateanganna Barnabas siagang Saulus, nampa nabarakkaki nanasuro ke'nanga sipa'rua a'lampa. 4 Lanri nisuroi ke'nanga ri RohNa Allata'ala, a'lampami Barnabas siagang Saulus mange ri Seleukia. Battu anjorengi ke'nanga assombala' mange ri pulo Siprus. 5 Ri wattunna battu ke'nanga mange ri Salamis, napabattumi ke'nanga kana-kananNa Allata'ala lalang ri sikamma balla' sambayanna tu Yahudia. Nibantumi ke'nanga ri Yohanes Markus lalang ri pa'jappanna ke'nanga. 6 Najappai ngasemmi ke'nanga anjo puloa, sa'genna battu mange ri Pafos. Anjoreng assibuntulu'mi ke'nanga siagang se're tu Yahudi, niarenga Bar Yesus. Jama-jamanna iamintu pabale'-bale' mata, na nakana kalenna na'bi. 7 Anne taua agang bajiki siagang Sergius Paulus, iamintu Guburnur ri anjo puloa. Anjo Guburnurka sanna' cara'de'na siagang sanna' baji'na. Nakio'mi Barnabas siagang Saulus lanri ero' tongi nalangngere' kananNa Allata'ala. 8 Mingka nihalangimi Barnabas siagang Saulus ri Elimas, anjo pabale'-bale' mataya. Nasaba' najagai Elimas (iaminjo arenna anjo pabale'-bale' mataya lalang bicara Yunani) gassingka a'jari tappaki anjo Guburnurka mae ri Isa. 9 Mingka nikoasaimi ri RohNa Allata'ala Saulus — nigallaraka todong Paulus; sa'genna najanjang anjo pabale'-bale' mataya, 10 nampa nakana, “He, ikau paballe-balle lompoa, ana' tu sannaka ja'dala'na! Ikaumi musunna sikontu apa-apa bajika. Angngapa nutaeroka ampamari anrompa-rompai ero'Na Allata'ala untu' ampasalamaki rupataua? 11 Kamma-kamma anne lanuciniki, naNahukkungko Batara! La'jari butako siapa are sallona, sa'genna takkullea nucini' matanna alloa.” Anjo wattua nia' memammo silalonna nakasia' Elimas kamma rammang le'leng antongkoki matanna. Sa'genna angngasala'mi mange-mange, a'boya tau akkullea anrenrengi. 12 Nacini'na anjo Guburnurka anjo apa kajarianga, a'jari tappa'mi ri Isa. Nasaba' sanna' baji'na antama' ri atinna anjo pangngajarang battua ri Batara. 13 Battu ri Pafos, assombala'mi Paulus siagang agang-aganna mange ri Perga, daera Pamfilia. Battuna mange anjoreng a'lampami Yohanes Markus ambokoi ke'nanga, ammotere' mange ri Yerusalem. 14 Battu ri Perga, napatulusu'mi lampana ke'nanga mange ri Antiokhia, ri daera Pisidia. Ri allo Pammari-marianga, a'lampami ke'nanga mange ammempo ri balla' sambayanga. 15 Ri wattunna le'ba' nibaca Kitta'na Musa siagang Kitta'na Na'bi-na'bia, nasuromi pamimping-pamimping balla' sambayanga akkuta'nang tau niaka hadere' mae ri Paulus siagang agang-aganna. Nakanamo pamimping balla' sambayanga mae ri Paulus siagang aganna, “Sikamma sari'battangku, punna nia' pappakainga' ero' nupabattuangi anne taua ngaseng, pabattuammi.” 16 Ammentemmi Paulus, nanaangka' limanna, nampa nakana, “Sikamma sari'battangku bansa Israel, kammayatompa sari'battangku ngaseng maraengannaya, niaka anrinni, anynyombaya ri Allata'ala. Pilangngeri sai anne kana kupabattua: 17 Le'ba'mi Napile Allata'ala bansa Israel, boe-boeta, naNapa'jari jai anne bansaya ri wattunna ammantang ke'nanga annumpang ri butta Mesir. Nampa lalang kakoasang lompoNa Allata'ala, Naerammi Allata'ala assulu' ke'nanga battu ri Mesir. 18 Sa'baraki Allata'ala anciniki gau'-gau'na ke'nanga ri wattunna a'jappa ke'nanga patampulo taung sallona ri parang lompoa. 19 Tuju bansa maraeng nabeta Nabunduki ri butta Kanaan. Nampa Nabage-bage Allata'ala anjo butta Kanaan mange ri bansa Israel, sollanna nakammai anjo buttaya. 20 Yangasenna anjo patambilangngang allimampulo taung sallona kajariang. Le'baki Nabage Allata'ala anjo butta Kanaan mae ri ke'nanga, Nasaremi ke'nanga haking-haking a'jari pamimpinna ke'nanga. Haking kala'busanga iamintu Na'bi Samuel. 21 Nampa appala' ke'nanga sitau karaeng. Nisaremi Allata'ala ke'nanga se're karaeng, iamintu Saul, ana'na Kis, battua ri suku Benyamin. Iaminjo Saul a'jari karaeng ri ke'nanga patampulo taung sallona. 22 Ri wattunna Nalekka' Allata'ala empoanna Saul a'jari karaeng, Naangka'mi pole Allata'ala karaeng maraenga iamintu Daud a'jari karaenna ke'nanga na iaminne kananNa Allata'ala ri passala'na Daud, ‘Kugappami Daud, ana'na Isai, ampakasannangai atingKu. Iami langgaukangi erokKu.’ 23 Battu ri sossorannami anjo Daud, Napasadia Allata'ala sitau Karaeng Mappasalama'na bansa Israelka, situru' apa le'baka Napa'janjiang riolo. Na iaminjo Isa Karaeng Mappasalama' le'baka nipa'janjiang. 24 Ri tenanapa Napakkaramulai Isa jama-jamanNa, napakkio'-kiokammi Yohanes mae ri bansa Israel, sollanna toba' ke'nanga battu ri dosana nampa nije'ne'. 25 Na ri wattu lakala'busannamo jama-jamanna Yohanes, nakanamo mae ri taua, ‘Turu' panggappanu, anne inakke inaia'? Teai inakke anjo Tau salloamo nutayang. U'rangi, anjo Taua labattui ri bokoangangku; manna assungkeangi passikko' sapatuNa tena todong kusiratang.’ 26 Sossoranna ngasengko Abraham. Siagang sikamma sari'battang maraenganga anrinni anynyombai mae ri Allata'ala! Napabattumi Allata'ala mae ri katte anjo kabara' kasalamakkanga; 27 nasaba' tanapahangai tau ammantanga ri Yerusalem siagang pamimping-pamimpinna ke'nanga angkana Iaminjo Isa Karaeng Mappasalamaka. Tanapahangai ke'nanga pangngajaranna na'bi-na'bia, tuli nibacaya punna allo Pammari-mariang. Iaminjo saba'na nanabunoi ke'nanga Isa. Mingka lanri nagaukannamo anjo ke'nanga, na'jari a'rupamo apa le'baka nasero kana na'bi-na'bia riolo. 28 Manna takkullea ke'nanga anggappa kasalang ri Isa, ampassiratangai nihukkung mate, mingka kammaji napala'na ke'nanga ri Pilatus, sollanna nibuno anjo Isa. 29 Na le'ba'namo nabuno Isa, situru' apa le'baka tattulisi' lalang ri Kittaka, napanaummi ke'nanga maya'Na battu ri kayu sallika nampa napantama' ri jeraka. 30 Mingka nipattallasa' poleammi ri Allata'ala battu ri kamateanga. 31 Nampa a'mole-mole battu ampappicinikangi KalenNa mae ri sikamma tau Naaganga battu ri Galilea mange ri Yerusalem, ero' ampa'nassai angkanaya attallasa' poleammi battu ri kamateanga. Iaminjo ke'nanga a'jari sa'biNa kamma-kamma anne mae ri bansa Israel. 32 Jari, kamma-kamma anne napabattumi ikambe anjo Kabara' Bajika mae ri kau ngaseng: Anjo apa le'baka Napa'janjiang Allata'ala mae ri boe-boeta, 33 Napa'rupami mae ri katte lanri attallasa'Na ammotere' Isa battu ri kamateanga. Nasaba' ilalang ri Kitta' Pammuji-muji passala' rua nia' tattulisi' angkana, ‘Ikaumi AnakKu, anne alloa iNakkemi a'jari ManggeNu.’ 34 Nipattallasa' poleammi ammotere' ri Allata'ala battu ri kamateanga. Kamma-kamma anne tenamo nalaNakasia' pole nikanaya kamateang lalang ri jeraka. Ri anjo passalaka Nakanamo Allata'ala, ‘LaKusareKo janji matangkasa', attantua laKurupaina, le'ba' Kupa'janjianga mae ri Daud.’ 35 Kammayatompa, lalang ri aya' maraenga nia' angkana, ‘Tena nalaNubalang parekang anjo Ata majarre'Nu la'jari botto' lalang ri jeraka.’ 36 Matemi Daud ri le'ba'namo nagaukang apa-apa Napassuroanga Allata'ala ri ia. Le'ba'mi nitarawang siagang boe-boena. Anjo maya'na Daud ancuru' tommi a'jari butta ngaseng. 37 Mingka anjo Isa, nipattallasa' poleanga ammotere' battu ri kamateanga, tena naancuru' a'jari butta maya'Na. 38 Lanri kammana minjo sari'battangku ngaseng, musti nuasseng ngasengi angkanaya ilalang arenNa minjo Isa nanipabattumo anjo kabara' nipammopporanna dosaya mae ri kau ngaseng; musti nuassengi angkanaya inai-nai tappa' ri Ia, lanipata'lappasaki battu ri sikontu dosaya, tenaya nakkulle nipata'lappasa' lanri sikamma parentaNa Allata'ala napassareanga Musa. 40 Lanri kammana minjo namusti nuparhatikang baji'-baji', sollanna tena nakajariang mae ri kau apa le'baka napau na'bia, angkana, 41 ‘Parhatikangi baji'-baji' ikau tau nungaia pahina-hina! La'jari lannasakko, nunampa mate! Nasaba' anne jammanga nia' apa-apa Kugaukang tenaya nalanupatappaki, manna nia' tau ampakasingaraki mae ri kau.’ ” 42 Ri wattunna lanabokoimo Paulus siagang Barnabas anjo balla' sambayanga, napala'mi taua sollanna battu pole ke'nanga punna allo Pammari-mariang poleang, nanapakasingara' baji' anjo passalaka. 43 Assulu'na ngasemmo anjo taua battu ri balla' sambayanga, jaimi tau amminawang ri Paulus siagang Barnabas. Anjo taua tu Yahudi siagang bansa maraeng, antamayamo agama Yahudi. Nipakainga'mi ke'nanga ri anjo tunisuroNa Allata'ala, sollanna tuli tanjeng ke'nanga mae ri pangngamaseanNa Allata'ala. 44 Ri allo Pammari-mariang poleanga, a'birimmi battu ngaseng tau anjorenga ri kotaya ero' ampilangngeri kana-kananNa Batara. 45 Ri wattunna nacini' tu Yahudia anjo tau jaia, sanna'mi akkimburuna lalang atinna ke'nanga. Nahinami Paulus, siagang nageakki ngasemmi anjo apa napabattua. 46 Mingka pila' baranimi Paulus siagang Barnabas a'bicara silambusu'na. Nakanamo ke'nanga, “Musti nipabattu memangi rolong kananNa Allata'ala mae ri kau ngaseng. Mingka lanri tenana nuero' antarimai, jari kalennu tommi ampattantui angkanaya tena nusiratang antarimai katallassang sitojennaya siagang satunggu-tunggua. Jari kamma-kamma anne kubokoi ngaseng mako, nampa a'lampa ikambe mae ri bansa maraenga. 47 Nasaba' iaminne parentaNa Batara mae ri kambe; Nakana Batara, ‘Kupa'jari mako singara' mae ri bansa-bansa maraenga, teaiya tu Yahudi, sollanna nupabattu kasalamakkang mae ri sikontu linoa.’ ” 48 Ri wattunna nalangngere' tau battua ri bansa maraenga anjo kananna Paulus, sannang sikalimi nyawana ke'nanga. Ammuji-mujimi ke'nanga ri Batara. A'jari tappa'mi sikamma tau le'baka nipattantu ri Allata'ala langgappai katallassang satunggu-tunggua. 49 A'la'bammi kana-kananNa Batara mange ri kere-kere mae ri sikontu anjo daeraya. 50 Mingka nikompa-kompa salami ri tu Yahudia sikamma tumalompoa siagang bai'-baine tumalompoa ri anjo kotaya, ia tu mallakamo ri Allata'ala. Napasimusumi ke'nanga siagang Paulus na Barnabas. Sa'genna nibongkamo Paulus siagang Barnabas battu ri anjo daeraya. 51 Napatu'du'mi nanapasulu' limbu'bu' niaka ri pa'lapa' bangkenna Paulus siagang Barnabas ri dallekanna ngaseng ke'nanga. Iaminjo a'jari pappakainga' mae ri ke'nanga. Le'baki anjo a'lampami Paulus siagang Barnabas mange ri Ikonium. 52 Sanna'mi rannuna ngaseng tau tappaka ri Antiokhia siagang nikoasaimi ke'nanga ri RohNa Allata'ala.
14
1 Kammatommi anjo kajarianga ri Ikonium. A'lampa tommi Paulus siagang Barnabas ri balla' sambayanna tu Yahudia; na'bicara kamma tommo anjo, sa'genna jai sikali tu Yahudi siagang bansa maraenga a'jari tappa' ri Isa. 2 Mingka tu Yahudi tenaya naero' tappa' nakompa-kompa salami bansa maraenga, sa'genna birisi'mo ke'nanga mae ri tu tappaka ri Isa. 3 Iaminjo saba'na nammantammo sallo-sallo Paulus siagang Barnabas anjoreng. A'bicarami ke'nanga siagang barani ri passala'na Batara. Na Napa'buttimo Batara angkanaya ma'nassa kontutojengi anjo kabara' pangngamaseanNa; Nasaremi ke'nanga koasa anggaukangi gau'-gau' appakalannasaka. 4 Mingka sisala-salami para ia anjo tau niaka anjoreng ri kotaya; nia' ammenteng mae ri tu Yahudia na nia' ammenteng mae ri anjo tunisuroNa Allata'ala. 5 Assikongkolo'mi tu Yahudia siagang pamimping-pamimpinna ke'nanga, siagang pole bansa-bansa maraenga ero' ansessai siagang ansambilai batu anjo tunisuroNa Allata'ala. 6 Mingka naassemmi tunisuroNa Allata'ala anjo passikongkolanna ke'nanga. Jari naliliammi ke'nanga anjo balaya, na'lampa mange ri Listra siagang Derbe, iamintu kota-kota niaka ri daera Likaonia, siagang ri daera-daera ri ampi'naya. 7 Anjoremmi ke'nanga ampa'la'bangi anjo Kabara' Bajika. 8 Ri Listra, nia' sitau bura'ne peso'. Peso' memammi ri pakaramula nilassukanna, sa'genna takkullea a'jappa lanri sanna' lammana bangkenna. 9 Ammempomi anjo tau pesoka ampilangngeri Paulus a'bicara. Nacini'mi Paulus angkana tappaki anjo tau pesoka, jari akkullei niballei. Najanjammi Paulus anjo taua, 10 nampa nalompoi sa'ranna nakana, “Ammentengko nai'!” A'lumpa'mi ammenteng nai' anjo taua, nampa a'jappa. 11 Nacini'na tau jaia anjo apa nagaukanga Paulus, ammarrammi ke'nanga lalang bicara Likaonia, battuanna, “Manurummi rewata-rewataya antama' ri lino, a'rupa tau.” 12 Naaremmi ke'nanga anjo Barnabas Rewata Zeus; na Paulus Rewata Hermes, nasaba' iami a'bicara. 13 Battumi imanna Rewata Zeus angngerang siapa are sapi laki siagang bunga-bunga ri pakke'bu' lompona anjo kotaya. Ri dallekannai kotaya ammantang anjo balla' panynyombanga mae ri Rewata Zeus. Battu tongi anjo imanga ero' amminawang ri tau jaia assare koro'bang mae ri Paulus siagang Barnabas. 14 Nalangngere'na Barnabas siagang Paulus anjo apa eroka nagaukang anjo taua ngaseng, nakekke'-kekke'mi pakeanna ke'nanga, nalari mange ri tangnga-tangngana anjo tau jaia, nampa ammarrang angkana, 15 “He, angngapa nanugaukang ngasengi anne kammaya? Ikambe anne tau biasa tonjaki' sangkamma ikau ngaseng! Niaki ikambe mae anrinni untu' ampabattui Kabara' Bajika mae ri kau ngaseng, sollanna nubokoi anjo apa-apa tenaya matu-matunna; na nubattu mae ri dallekanNa Allata'ala attallasaka, ampa'jariai langika siagang linoa, kammayatompa tamparanga siagang sikontu apa niaka lalang. 16 Ri jammang allaloa Nacini'-ciniki Allata'ala bansa-bansaya anggaukangi ri tallasa'na apa-apa ero' kalenna. 17 Mingka tena Natakkaluppa ampa'butti kabajikanNa ilalang apa-apa Nagaukanga. Nasare ngasengko bosi battu ri langika, siagang wassele'na buttaya punna narapi' wattunna. Nasareko apa-apa lanukanrea siagang Napakasannangi atinnu.” 18 Mingka manna nakkana kammamo anjo Paulus siagang Barnabas, sukkara' iji lanihalangi anjo taua ngaseng assare koro'bang mae ri kalenna Paulus siagang Barnabas. 19 Nia'mo siapa are tu Yahudi battu ri Antiokhia ri daera Pisidia siagang battu ri Ikonium mange ri Listra. Napangaruimi tau jaia sa'genna ammenteng mae ri ke'nanga tau jaia. Nasambilami ke'nanga batu Paulus nampa nare'resang assulu' ri pantarangang kota. Nakapangi ke'nanga angkana matemi Paulus. 20 Mingka ri wattunna ammenteng tau tappaka anjoreng angkulilingi Paulus, ambangummi Paulus nampa ammotere' antama' ri kotaya. Ammukona, a'lampami mange ri Derbe siagang Barnabas. 21 Nabirittakammi Paulus siagang Barnabas Kabara' Bajika ri Derbe. Najaimo tau a'jari tappa' ri Isa anjoreng. Le'baki anjo ammotere'mi ke'nanga mange ri Listra, nampa mange ri Ikonium, nampa mange ri Antiokhia ri daera Pisidia. 22 Napakajarre'mi atinna sikamma tau tappaka ri Isa ri anjo kota-kotaya. Napakainga'mi ke'nanga, sollanna tuli jarre' tappa'na mae ri Isa. “Musti jai rolong pa'risi' nikasia', nampa akkulle nikasia' mate'nea lalang ri Lino BeruNa Allata'ala,” kammami anjo napangngajarrang tunisuroNa Allata'ala mae ri sikamma tau tappakamo mae ri Isa, ri anjo kota-kotaya. 23 Nampa naangka'mo Paulus siagang Barnabas pamimping-pamimpinga ri massing-masinna anjo jama'aka. Nampa appala' doang siagang appuasa ke'nanga, nanapassareang ke'nanga anjo pamimping-pamimping jama'aka mae ri Batara napatappaka ke'nanga. 24 Le'baki anjo, napatulusu'mi lampana ke'nanga, allalo ri daera Pisidia sa'genna anrapi' mange ri Pamfilia. 25 Na le'ba'na napabattu ke'nanga kana-kananNa Allata'ala ri Perga, a'lampami ke'nanga mange ri Atalia. 26 Battu anjoremmi ke'nanga assombala' ammotere' mange ri Antiokhia. Iaminjo kota napattampakia ke'nanga ri wattunna nipassareang ke'nanga mae ri Allata'ala, sollanna nagaukang ke'nanga anjo jama-jamang napa'le'bakamo ke'nanga kamma-kamma anne. 27 Ri wattunna battumo ke'nanga mange ri Antiokhia, napa'rappungammi ke'nanga sikamma anggota jama'aka anjoreng. Nampa nacaritakang ngaseng anjo anggota jama'aka sikamma apa le'baka Nagaukang Allata'ala lalang ri kalenna ke'nanga ilalang ri pa'lampanna ke'nanga. Nacarita tommi ke'nanga antekamma batena Nasungkeang todong Allata'ala bansa-bansa maraenga agang, sa'genna akkulle todong ke'nanga a'jari tappa' mae ri Isa. 28 Ammantammi sallo Paulus siagang Barnabas anjoreng ri kotaya siagang sikamma tau tappaka.
15
1 Nia'mo siapa are tu battu ri Yudea mange ri Antiokhia. Naajara'mi tau tappaka ri Antiokhia angkanaya takkulleai salama' ke'nanga, punna tena nanisunnaki ke'nanga situru' Napassuroanga Allata'ala, le'baka napangngajarrang Musa. 2 Sanna'mi nageakkinna Paulus siagang Barnabas panggappana anjo taua. Kale'bakkanna nipassamaturukimi sollanna a'lampa Paulus, Barnabas, siagang siapa are tau maraengannaya ri Antiokhia, mange ri Yerusalem. A'lampami ke'nanga mange ambicarai anjo passalaka siagang sikamma tunisuroNa Allata'ala kammayatompa pamimping-pamimping niaka anjoreng. 3 Nirurungammi ke'nanga ri anggota-anggota jama'aka sa'genna assulukang kota. Nampa a'lampa ke'nanga allalo ri Fenisia siagang Samaria. Anjoreng, nacaritami ke'nanga antekamma batena bansa-bansa maraenga ampassareang tommi kalenna mae ri Allata'ala. Sanna'mi rannuna ngaseng tau tappaka anjoreng allangngereki anjo kabaraka. 4 Ri wattunna battu ke'nanga mange ri Yerusalem, nitarima baji'-baji'mi ke'nanga ri jama'aka, ri tunisuroNa Allata'ala, kammayatompa ri pamimping-pamimping jama'aka. Nampa nacarita ngasemmo ke'nanga sikamma apa le'baka Nagaukang Allata'ala lalang ri kalenna ke'nanga. 5 Mingka nia'mo siapa are tu Farisi tappakamo, ammenteng angkana, “Musti nisunnaki anjo bansa-bansa maraenga, siagang musti naturuki apa-apa napassuroanga Allata'ala, le'baka napabattu Musa.” 6 Assirapakkang ngasemmi tunisuroNa Allata'ala siagang pamimping-pamimpinga, ero' ambicarai anjo passalaka. 7 Sanna' sallona ke'nanga sipa'bicara. Kala'busanna ammentemmi Petrus na nakana, “Sikamma sari'battangku ngaseng! Nuasseng ngasemmi angkanaya ri siapa are wattu allaloa Napilema' Allata'ala battu ri tangnga-tangnganu, untu' ampa'la'bangi anjo Kabara' Bajika mange ri bansa-bansa maraenga, sollanna nalangngere' todong siagang tappa' todong ke'nanga. 8 Na Allata'ala angngassengi atinna rupataua. Iami ampappicinikangi angkanaya Natarimami ke'nanga. Jari Napassareang tommi RohNa Allata'ala mae ri ke'nanga, sangkamma le'baka Napassareang todong mae ri katte. 9 Tena Napasimmara'-maraengki' Allata'ala siagang ke'nanga. Natangkasi atinna ke'nanga, lanri tappa'na ke'nanga. 10 Jari apa saba'na nanuero' ambali Allata'ala kamma-kamma anne lanri ero'nu ambattali atorang-atorang anjo tau tappaka? Na sikontutojenna manna boe-boeta, yareka manna kalenta ngaseng tena todong nanikkulle anggaukangi anjo atoranga. 11 Kabalekanna, kamma-kamma anne tappakki', angkanaya iaji nikkulle salama' lanri pangngamaseanNa bawang Batara Isa; kamma le'ba' tommi anjo ke'nanga.” 12 Tenamo nania' akkana sikontu anjo tuniaka assirapakkang. Nampa napilangngerimo ke'nanga Barnabas siagang Paulus ancarita poleangi sikamma anjo gau'-gau' appakalannasa' le'baka Nagaukang Allata'ala lalang ri kalenna ke'nanga ri tangnga-tangngana bansa maraenga. 13 Le'baki ke'nanga a'bicara, nakanamo Yakobus, “Sikamma sari'battangku! Pilangngeri sai anne kanangku. 14 Beru le'baki napakasingara' Simon, antekamma uru-uruna Allata'ala amparhatikangi bansa-bansa maraenga, lanri ero'Na Allata'ala ampile todongi bansa maraenga a'jari umma'Na. 15 Anjo coco' sikali siagang apa le'baka nasero kana na'bi-na'bia riolo. Nasaba' nia' tattulisi' lalang ri Kitta' angkanaya, 16 Nakana Batara, ‘Le'baki anjo labattu poleangA', laKupabangung poleangi balla'na Daud, le'baka rumbang laKupakabajiki ri rumbanna, nampa Kupaenteng poleang; 17 sollanna sikamma anjo tau niaka tassesa naboyai Batara, assama-samai bansa maraenga, Kukioka a'jari ummakKu.’ Kammaminjo kananNa Batara, 18 le'baka Napabattu memang ri jammang riolo.” 19 Nakanamo pole Yakobus, “Jari turu' ri panggappaku, takkulleaki' ansusai bansa maraenga, punna ero' ampassareangi kalenna mae ri Allata'ala. 20 Mingka musti apparekki' sura' mae ri ke'nanga, na nipakainga' ke'nanga sollanna tena nanakanre ke'nanga kanre ra'masaka, iamintu kanre le'baka nipassareang mae ri barhalaya; kammayatompa ceraka, yareka olo'-olo' mate niaccekanga. Kammayatompa napakabellai kalenna ke'nanga battu ri panggaukang assalimaraka. 21 Nasaba' battu riolo duduji napabattu Musa passuroNa Allata'ala, siagang tuli nibacami punna allo Pammari-mariang ri sikamma balla' sambayanga siagang nibirittakang ri kota-kotaya.” 22 Assamaturu'mi tunisuroNa Allata'ala, pamimping-pamimpinga, siagang sikontu anggota jama'aka, ero' ampilei siapa are tau lanisuroa angngagangi Paulus siagang Barnabas a'lampa mange ri Antiokhia. Napilemi ke'nanga Silas siagang Yudas, nigallaraka todong Barsabas. Iaminne tau ruaya nibilang tutoa ri sikamma tau tappaka ri Yerusalem. 23 Nisaremi anne ke'nanga angngerang se're sura', kammaya anne bonena, “Natarimai sikontu sari'battang bansa-bansa maraenga, niaka ammantang ri Antiokhia, Siria, siagang Kilikia. Salama' battu ri kambe ngaseng tunisuroNa Allata'ala siagang pamimping-pamimpinga, iamintu sari'battannu ngaseng. 24 Nia' kabara' nalangngere' ikambe angkanaya nia' siapa are tau battu ri kambe le'ba' mae ri kau ngaseng assareko pangngajarang sala, sa'gennu a'jari lussa' siagang lingu napakamma ke'nanga. Sikontutojenna teai ikambe assuroi anjo ke'nanga battu mae ri kau ngaseng anggaukangi anjo kammaya. 25 Jari le'ba' maki' sipa'bicara ngaseng, nakissamaturu'mo assuroi battu mae ri kau ngaseng anne siapa area tau. Laniaki ke'nanga battu mae ri kau ngaseng angngagangi sari'battang nikamaseanta, iamintu Barnabas siagang Paulus. 26 Anne tau ruaya le'ba'mi narellakang kalenna lanri Batarata Isa Almasi. 27 Jari nisuromi sari'battanta iamintu Yudas siagang Silas battu mae ri kau ngaseng. Iaminne ke'nanga lampabattuang ngasengko anne apa niaka tattulisi' lalang ri suraka. 28 Nasitujuimi RohNa Allata'ala — siagang ikambe nisitujui tommi — sollanna tena nanisareko atorang-atorang battallanganga na anne parallua: 29 teako angnganrei kanre le'baka nipassareang mae ri barhalaya; teako angnganrei cera', teako angnganrei olo'-olo' mate niaccekanga, siagang pakabellai kalennu ri gau'-gau' assalimaraka. Punna nupakabella ngasemmo kalennu ri apa-apa kammaya anjo, nugaukammi nikanaya kabajikang. Sikammamo anne, poro salama' ngasengko!” 30 Le'baki appala' kana ke'nanga, a'lampami anjo tunisuroa mange ri Antiokhia. Battui ke'nanga mange ri Antiokhia, nakio' ngasemmi sikontu jama'aka nampa napassareang anjo suraka. 31 Ri wattunna nabaca ke'nanga anjo suraka, teaimi sipato' sannanna ke'nanga; nasaba' bonena anjo suraka a'jari panynyaleori ri atinna ke'nanga. 32 Anjo Yudas siagang Silas, na'bi-na'bi todong, salloi sipa'bicara siagang sikamma tu tappaka ri Antiokhia; napakalompomi sumanga'na siagang napakajarre'mi tappa'na anjo sikamma tu tappaka. 33 Niaki siapa are sallona ammantang Yudas siagang Silas ri Antiokhia. Le'baki anjo nikellaimi ammotere' ke'nanga. Akkirimmi sallang sikamma tu tappaka ri Antiokhia mae ri sikamma tau assuroai ke'nanga battu. [ 34 Mingka ammantang tulimi Silas ri Antiokhia.] 35 Ammantang tongi Paulus siagang Barnabas siapa are sallona ri Antiokhia. Angngajara'mi siagang napabattui ke'nanga kana-kananNa Batara anjoreng. Jai tau maraeng naagang ke'nanga angngajara' ampabattui kana-kananNa Batara. 36 Tasalloai, nakanamo Paulus ri Barnabas, “Umba ki'lampa pole angkunjungi sikamma paranta tu tappa' ri Isa niaka ri kota-kota le'baka nibattui ampa'la'bangi kana-kananNa Batara; sollanna akkulle nicini' antekamma katallassanna ke'nanga.” 37 Eroki Barnabas angngerang tongi Yohanes Markus, 38 Mingka napikkiriki Paulus angkanaya tabajikai nierang Markus; nasaba' taerokai assamaturu' anjama siagang ke'nanga, kammayatompa le'baki Markus ampilari ke'nanga ri wattunna nia' ri Pamfilia ke'nanga. 39 Jari a'gea' lompomi Paulus siagang Barnabas sa'genna assisa'la'mo ke'nanga: A'lampami Barnabas siagang Markus, na assombala' mange ri Siprus. 40 Na Paulus napileimi Silas lanaagang a'lampa. Le'baki nipassareang ke'nanga ri jama'aka ri Antiokhia mae ri pangngamaseanNa Batara, a'lampami ke'nanga. 41 A'lampami ke'nanga angkulilingi Siria siagang Kilikia; napakajarre'mi ke'nanga sikamma jamaah niaka anjoreng.
16
1 Napatulusu'mi lampana Paulus mange ri Derbe, nampa mange ri Listra. Anjoreng nia'mo se're tu tappa' ri Isa niareng Timotius. Amma'na tu Yahudi, tappakamo ri Isa; mingka manggena tu Yunani. 2 Alla'bangi niasseng ri sikamma tu tappaka ri Listra siagang Ikonium, angkanaya anjo Timotius tau baji'. 3 Ero'mi Paulus sollanna amminawang Timotius ri ia; jari nasunna'mi Timotius. Nasunna'mi Timotius, lanri naasseng ngasengi tu Yahudi niaka ammantang anjoreng ri daeraya, angkanaya tu Yunani manggena anjo Timotius. 4 Napabattumi ri sikamma tau tappa' niaka ri kota-kota nakunjungia ke'nanga, anjo apa le'baka natappuki siagang napattantu tunisuroNa Allata'ala siagang pamimping-pamimping niaka ri Yerusalem. Napakainga'mi ke'nanga sikamma anjo tau tappaka sollanna naturuki anjo atorang-atorang le'baka nipattantu. 5 Jari pila' jarre'mi tappa'na anjo jamaah-jama'aka, siagang pila' mange allo pila' katambammi jaina ke'nanga. 6 Tena nikellai Paulus siagang Silas ri RohNa Allata'ala ampa'la'bangi kana-kananNa Allata'ala ri daera Asia. Jari napatulusu'mi lampana ke'nanga mange ri daera Frigia siagang Galatia. 7 Ri wattunna anrapi' ke'nanga ri pa'baeng-baenna daera Misia, ero'mi ke'nanga antama' ri daera Bitinia; mingka tena nikellai ke'nanga ri RohNa Isa mange anjoreng. 8 Jari ammolongammi ke'nanga ri daera Misia nampa annarrusu' mange ri Troas. 9 Ri wattunna bangngi ri Troas, nabattuimi Paulus pappiso'na. Lalang pappiso'nana, nia' nacini' se're tau battu ri daera Makedonia ammenteng ri dallekanna. Napala' dudumi anjo taua sollanna a'lampa Paulus mange ri Makedonia antulungi ke'nanga. 10 Ri le'ba'namo nabattui Paulus anjo pappiso'naya, sadia-sadia maki' ero' a'lampa mange ri daera Makedonia. Nasaba' tappa' maki' angkanaya Allata'ala assuroki' mange ambirittakangi Kabara' Bajika ri sikamma tau niaka anjoreng. 11 Nibokoimi Troas nampa kiassombala' annarrusu' mange ri Samotrake. Ammukona mange maki' ri Neapolis. 12 Battu anjoreng maki' nakimange ri Filipi, iamintu se're kota makase'rea ri daera Makedonia. Anne kota Filipi, niaki rawangang parentana karaeng Roma. Ammantang maki' anjoreng pirang-pirangallo. 13 Ri wattunna narapi' allo Pammari-marianga, a'lampa maki' mange ri biring binanga niaka ri pantaranganna pakke'bu' lompona kotaya. Nasaba' nipikkiriki angkanaya nia' tampa' passambayanganna tu Yahudia anjoreng. Ammempo maki' a'bica'-bicara siagang siapa are bai'-baine niakamo a'rappungang anjoreng ri tampaka. 14 Kalase'renna ri ke'nanga niareng Lidia, tu battu ri daera Tiatira. Jama-jamanna iamintu padanggang kaeng lango-lango. Lanri mangngamaseanna ri Allata'ala, nipagio'mi atinna ri Batara sollanna natarima anjo apa napangngajarranga Paulus mae ri ia. 15 Nije'ne'mi Lidia siagang sikontu bone balla'na. Le'baki nije'ne', nakio' maki' mange ri balla'na. Nakana Lidia, “Punna kipikkiri' ngasengi angkanaya ma'nassa tappa' tojeng-tojemma' ri Isa, umbamo kimange a'bangngi ri ballakku.” Napala' dudumi sollanna niturukiang pappala'na. 16 Ri se'reang allo a'lampa maki' mange ri tampa' passambayanganga. Ri tangngana aganga assibuntulu' maki' sitau baine ata. Anjo bainea nisosoki ri setang, sa'genna akkullei natappu la'bi riolo apa lakajarianga sallang. Lanri akkullena natappu dalle'na taua, jai sikalimi doe' napanggappangi pingga'-pinggawana anjo bainea. 17 Tuli amminawammi anjo bainea ri Paulus siagang ri kambe. Akkio'-kioki anjo bainea angkana, “Anne taua suro-suroNa Allata'ala Kaminang Lompoa! Battui ke'nanga ero' ampauang ngasengko antekamma batena nukkulle salama'!” 18 Niaki pirangallo are sallona tuli amminawang anjo bainea akkiok-kio' kamma anjo. Sa'genna takkulleami sa'bara' Paulus napakamma; jari assailemi Paulus, nampa nakana ri anjo rohna setanga, “Lanri arenNa Isa Almasi, kusuroko assulu' battu ri anne bainea!” Anjo wattua, assulu' memammi anjo rohna setanga battu lalang ri kalenna anjo bainea. 19 Ri wattunna naasseng pingga'-pinggawana anjo bainea angkanaya tappela'mi panggappang doe'na ke'nanga, najakkala'mi Paulus siagang Silas, nampa nare'resang anjo tau ruaya mange ri paranga, andallekang ri pamarentaya. 20 Naerammi ke'nanga Paulus siagang Silas mange andallekang ri wakkele'na ngaseng pamarentaya ri Roma; nampa nakana ke'nanga, “Anne tau ruaya tu Yahudi. Battui ke'nanga angkaco-kacoi kotata. 21 Naajaraki taua anggaukangi ada'-ada' sisalaya siagang atorang-atoranta ikatte tu Romaya. Takkulleaki' ikatte antarimai siagang anggaukangi ada'-ada' kammaya anjo!” 22 Battu ngaseng tommi tau jaia ero' ambakkai Paulus siagang Silas; nakekke'mi pamarentaya pakeanna anjo ruaya tunisuroNa Allata'ala, nampa nasuro taua ancamboki ke'nanga. 23 Le'baki nipisannakki nicambo' nipantama'mi ke'nanga ri tarungkua. Nisuromi kapala tarungkua anjagai baji'-bajiki ke'nanga. 24 Jari nitahammi ke'nanga ilalang ri kamara' lalang duduna tarungkua; nirantemi limanna siagang bangkenna ke'nanga mae ri baloka. 25 Kira-kira tangnga bangngi sitabangi appala' doang siagang akkelong-kelong mammuji ri Allata'ala Paulus siagang Silas. 26 Sikamma tu nitarungku maraeng nalangngereki ke'nanga akkelong. Ti'ring ta'ge'goso' sanna'mi buttaya, sa'genna ta'ge'goso' tommo batu pundasina anjo tarungkua. Tassungke ngasemmi pakke'bu'na tarungkua, kammayatompa ta'lappasa' ngaseng tommi rantena tu nitarungkua. 27 Ta'bangkami ambangung anjo kapala tarungkua. Ri wattunna nacini' tassungke ngaseng pakke'bu'na tarungkua nabi'bu'mi pa'danna naero' nabuno kalenna, nasaba' nakana lari ngasemmi tu nitarungkua. 28 Mingka ammarrang lompomi Paulus nakana, “Teako bunoi kalennu! Nia' ngaseng jaki' anrinni!” 29 Appala'mi lampu anjo kapala tarungkua nampa lari antama'. Annekkere'mi nakkulantu' anynyomba ri dallekanna Paulus siagang Silas. 30 Nampa naerang kapala tarungkua assulu' ke'nanga, na nakana, “O Tuang, apa musti kugaukang sollangku nipasalama'?” 31 Appialimi Paulus siagang Silas angkana, “Tappakko ri Batara Isa, sollannu nipasalama' — iamintu ikau siagang sikontu tau niaka lalang balla'nu!” 32 Le'baki anjo napakasingara'mi Paulus siagang Silas kana-kananNa Batara mae ri anjo kapala tarungkua siagang sikontu tau niaka ri balla'na. 33 Ia memang anjo ri tangngana bangngia, nanaerang sikontu tau niaka ri balla'na anjo kapala tarungkua mange antangkasi bokka'-bokka'na ke'nanga. Nampa nije'ne' memammo anjo kapala tarungkua siagang sikontu tau niaka ri balla'na. 34 Le'baki anjo nierammi Paulus siagang Silas mange ri balla'na anjo kapala tarungkua nampa nitoana siagang nisare kanre ke'nanga. Sannang sikalimi anjo kapala tarungkua siagang sikontu tau niaka ri balla'na, lanri tappa'mi ke'nanga ri Allata'ala. 35 Ammukona bari'basa', nisuromi pulisia ri pamarenta battu ri Roma mange ri tarungkua untu' ampabattui parentaya sollanna nilappassang Paulus siagang Silas. 36 Napabattumi kapala tarungkua anjo kabaraka mae ri Paulus. Nakana, “O Tuang, nasuro lappassammaki' pamarenta battua ri Roma. Kamma-kamma anne akkulle maki' ammotere'. Salamakki' ri lampata!” 37 Mingka angkanami Paulus ri anjo pulisia ngaseng, “Ikambe anne bansa Romaki'. Tenapa niadeliki' nakile'ba'mo nicambo' ri dallekanna tau jaia siagang nipantama' ri tarungkua. Nampa kamma-kamma anne nisuro maki' a'lampa cokko-cokko. Tena nakiero'! Suromi nakalenna battu mae anrinni anjo pamarentaya nanalappassanga' sipa'rua.” 38 A'lampami anjo pulisi-pulisia ampabattui kananna Paulus mae ri pamarenta battua ri Roma. Nalangngere'na pamarenta battua ri Roma angkanaya taunna pamarenta Roma anjo Paulus, a'jari malla'mi ke'nanga. 39 Jari a'lampami ke'nanga appala' popporo' ri Paulus siagang Silas. Nampa narurungang ke'nanga Paulus siagang Silas assulu' battu ri tarungkua, siagang napala'mi ke'nanga sollanna a'lampamo Paulus siagang Silas ambokoi anjo kotaya. 40 A'lampami Paulus siagang Silas ambokoi anjo tarungkua, nampa mange ri balla'na Lidia. Le'ba'na assibuntulu' siagang sikamma tau tappaka anjoreng, siagang napakajarre' ke'nanga, a'lampami Paulus siagang Silas.
17
1 Napatulusu'mi lampana Paulus siagang Silas. Ammolongangi ke'nanga ri Amfipolis siagang Apolonia, nampa battu ke'nanga mange ri Tesalonika. Anjoreng nia' balla' sambayang tu Yahudi. 2 Kamma biasaya nagaukang punna nia' balla' sambayang tu Yahudi ri se'reang tampa', a'lampami Paulus mange anjoreng ri balla' sambayanga. A'bicarami Paulus siagang sikamma tau niaka ri balla' sambayanga, ri passala'na apa-apa niaka tattulisi' lalang ri Kittaka. Kammaminjo nagaukanga Paulus sa'genna pintallung allo Pammari-mariang assisambung-sambung. 3 Situru' apa niaka tattulisi' lalang ri Kittaka, napakasingara'mi siagang napa'buttimi Paulus angkanaya parallui Nakasia' sessaya siagang ambangung poleang battu ri kamateanga anjo Karaeng Mappasalama' Napa'janjianga Allata'ala. Nakana Paulus, “Anjo Isa, kukabarranga mae ri kau ngaseng, Iami Karaeng Mappasalama' le'baka Napa'janjiang Allata'ala.” 4 Nia'mo siapa are tau a'jari tappa', nampa amminawang ri Paulus siagang Silas; kammayatompa jai todong tu Yunani mallaka ri Allata'ala, siagang bai'-baine nibilang tutoaya, a'jari tappa' todong. 5 Mingka assereatimi tu Yahudia. Nakio'mi ke'nanga tau ja'dalaka siagang pasolle' tenaya jama-jamanna, nampa a'rappungang ke'nanga ero' apparicu. Apparicumi ke'nanga ri kota-kotaya; nampa namangei balla'na se'rea tau tappa' niarenga Yason, ero' amboyai Paulus siagang Silas, kaeroki ke'nanga angngerangi Paulus siagang Silas assulu', ri dallekanna tau jaia. 6 Mingka lanri tenana nabuntuluki ke'nanga Paulus siagang Silas, a'gilimmi ke'nanga anre'resangi Yason siagang siapa are tau tappa' maraenganga, mae ri dallekanna sikamma pamarenta anna'galaka koasa ri anjo kotaya. Akkio'-kioki ke'nanga angkana, “Anne tau ruaya angngacoi ri kere-keremae! Kamma-kamma anne battu tommi ke'nanga ri kotata; 7 na natarimamo Yason anjo ke'nanga ri balla'na. Nadakkaimi ke'nanga apa-apa le'baka napattantu Karaenga ri Roma, lanri nakanana ke'nanga nia' ija karaeng maraeng niarenga Isa.” 8 A'jari lussa'mi tau jaia siagang sikamma pamarentaya ri anjo kotaya nalangngere'na anjo kana-kana kammaya. 9 Nisuromi Yason siagang sikamma tau tappa' maraengannaya ri pamarentaya a'bayara' doe' pappassala. Le'baki a'bayara' nampami nilappassang ke'nanga. 10 Anjo bangngia nisuromi Paulus siagang Silas ri tau tappaka anjoreng ri kotaya, a'lampa mange ri Berea. Battuna Paulus siagang Silas ri Berea, mangemi ke'nanga ri balla' sambayanna tu Yahudia. 11 Anjo tau anjorenga ri Berea baji'-bajikangangi pa'mai'na na tau niaka ri Tesalonika. Sannangi pa'mai'na ke'nanga ampilangngeri anjo kabara'Na Isa; allo-allona napilajari ke'nanga apa niaka tattulisi' lalang ri Kittaka, lanri ero'na ke'nanga angngassengi angkanaya maka kontutojengi anjo napangngajarranga Paulus. 12 Jaimi ri ke'nanga a'jari tappa' ri Isa. Jai tommi tu nipakalompona tu Yunania a'jari tappa', baji' nabaine kammayatompa bura'nea. 13 Ri wattunna nalangngere' tu Yahudi niaka ri Tesalonika angkanaya nabirittakang tommi Paulus kana-kananNa Allata'ala ri Berea, mangemi ke'nanga ri Berea; nampa napa'jari lussa' siagang napakabambang nyawana tau niaka ri Berea. 14 Akkaro-karomi tau tappaka ri Berea angngantaraki Paulus mange ri biring tamparanga. Mingka Silas siagang Timotius ammantanji anjoreng ri kotaya. 15 Le'baki naantara' Paulus sa'genna ri Atena, ammotere'mi anjo sikamma tau tappaka mange ri Berea. Angngerammi pasang ke'nanga battu ri Paulus, sollanna linta' amminawang Silas siagang Timotius. 16 Lalang natayanna Paulus kabattuanna Silas siagang Timotius ri Atena, si'nami atinna anciniki anjo kotaya lanri jaina barhala anjoreng. 17 Lanri kammana sipa'bicarami Paulus lalang ri balla' sambayanga siagang sikamma tu Yahudia kammayatompa sikamma tau anynyombaya ri Allata'ala anjoreng. Kammayatompa allo-allona sipa'bicara Paulus ri pasa'-pasaraka siagang sikamma tau niaka anjoreng. 18 Assigea'mi Paulus siagang guru-guru battua ri golongang Epikuros siagang golongang battua ri Stoa. Nia' siapa are maraeng ri ke'nanga angkana, “Apa todong naasseng anne taua? Sike'de' duduji pangngissenganna mingka teai sipato' jaina bicaranna!” Nia' todong siapa are tau angkana, “Kamma nicini' rewata-rewata bansa maraeng nakabarrang.” Akkana kammai anjo ke'nanga, lanri passala'Na Isa siagang passala' attallasa'Na ammotere' Isa battu ri kamateanga nabicara Paulus mae ri ke'nanga. 19 Nampa naerang ke'nanga Paulus mange ri passirapakkanga irate ri Bonto Areopagus. Battui mange anjoreng, nakanamo ke'nanga ri Paulus, “Eroki ikambe angngassengi anjo pangngajarang berua nupabattua. 20 Nasaba' sangnging apa-apa tena nantama' ri akkala' antu nupabattua. Jari ero' maki' anne angngassengi battuanna.” ( 21 Nasaba' anjo tau niaka ri Atena siagang sikamma tau niaka battu anjoreng, nangai ke'nanga ampakei wattu-wattu tanjamana a'rappungang ampilangngeri siagang ambicarai passala' apa-apa beru nalangngereka ke'nanga.) 22 Ri wattunna ammenteng Paulus ri dallekanna ngaseng anjo tau niaka a'rappungang ri Areopagus, angkanami Paulus, “He, ikau ngaseng tu Atenaya! Turu' ri apa kucinika, sanna' ngaseng nukatutuina agamaya. 23 Nasaba' ri wattungku a'jappa-jappa akkuliling ri kota-kotanu, nakuparhatikang sikamma tampa' passambayangannu, nia' tommo kucini' se're tampa' biasaya nupake assare koro'bang. Anjoreng ri tampaka nia' tattulisi' angkanaya, ‘Mae ri Allata'ala Tenaya Naniassengi.’ Na kamma-kamma anne, iaminjo Allata'ala nusombaya mingka tanuassengai, Iaminjo Allata'ala kukabarranga ri kau ngaseng. 24 Allata'ala ampa'jariai anne linoa siagang sikontu bonena, Iami Batarana langika siagang buttaya. Tena nalalang ammantang ri sikamma balla' rewata napareka rupataua. 25 Tena todong Naparallu ri pannulunna rupataua, nasaba' Iami assarei katallassang siagang nyawa, kammayatompa assarei sikontu apa-apa rupataua! 26 Battu ri se'rea tau Nanapa'jari sikontu bansaya, nampa Nasuro ke'nanga ampammantangi sikontu buttaya. Iatommi ampattantui battu ri uru-uruna angkana kemae sa'genna siagang kemaei akkulle ammantang rupataua. 27 Kammaminjo Nagaukanga Allata'ala, sollanna niboya Allata'ala ri rupataua. Niminasai sollanna assibuntulu' siagang Allata'ala, ri wattu naboyana ke'nanga Allata'ala. Mingka sikontutojenna tena nabella Allata'ala battu ri kalenta ngaseng. 28 Kamma biasaya napau taua angkana, ‘Akkulleki' nia', attallasa', siagang a'gio' ri anne linoa lanri kakoasanNa Allata'ala.’ Sangkamma tonji siagang apa napaua tu cara'de'nu, angkanaya, ‘Ikatte ngaseng, ana'-ana'Naki' Allata'ala.’ 29 Jari, lanri ana'-ana'Naki' Allata'ala, takkulleaki' ampasangkammai Allata'ala siagang patung bulaeng nipareka, yareka pera', yareka batu nipareka situru' kacara'dekanna rupataua. 30 Anjo wattu kadongokanta Nakaluppaimi Allata'ala, mingka kamma-kamma anne Nasuromi toba' battu ri dosa-dosana sikontu rupataua ri lino. 31 Nasaba' le'ba'mi Napattantu wattunna nalaNaadeli sikontu bonena anne linoa siagang adele'. Anjo tugasaka lanagaukangi tau le'bakamo nipile ri Allata'ala untu' anggaukangi anjo tugasaka. Na sollanna akkulle tappa' ngaseng taua ri anjo passalaka, Napattallasa' poleammi Allata'ala anjo taua battu ri kamateanga!” 32 Ri wattunna nalangngere' ke'nanga anjo passala' attallasaka ammotere' battu ri kamateanga, nia'mo ri ke'nanga angkakkali Paulus. Nia' todong angkana, “Ero' ijaki' allangngerekko ambicarai pole anne passalaka!” 33 Nabokoimi Paulus anjo tampa' pa'rappunganga. 34 Mingka nia' todong ri ke'nanga angngalle-alleangi Paulus, siagang a'jari tappa' ri Isa: nia' niareng Dionisius anggota kumpulanna Areopagus, siagang sitau baine niarenga Damaris, na siapa are pole tau maraengannaya.
18
1 Le'baki anjo a'lampami Paulus ambokoi Atena, namange ri Korintus. 2 Anjoreng ri Korintus assigappami siagang se're tu Yahudi, niarenga Akwila, battua ri pa'rasangang Pontus. Anne Akwila beru-beru battui ri Italia siagang bainenna niarenga Priskila. Battumi ke'nanga mange ri Korintus lanri nisuro ngasemmi ri Karaeng Klaudius assulu' tu Yahudia battu ri Roma. A'lampami Paulus angkunjungi anjo tau ruaya. 3 Ammantammi Paulus anjoreng siagang ke'nanga, siagang anjamami siagang ke'nanga. Nasaba' a'julu pa'boya-boyangi Paulus siagang ke'nanga, iamintu appareka balla'-balla' niarenga kema. 4 Mingka punna narapi' allo Pammari-marianga, a'lampami Paulus mange ri balla' sambayanga. A'bicarami siagang tu Yahudia kammayatompa tu Yunania, sollanna tappa' ke'nanga mae ri Isa. 5 Ri wattunna nia'mo Silas siagang Timotius battu ri Makedonia, napakemi Paulus sikontu wattunna niaka, untu' ampabattui kabara' battua ri Allata'ala mae ri tu Yahudia. Napabattumi mae ri ke'nanga ri passala'na Isa, Karaeng Mappasalama' le'baka Napa'janjiang Allata'ala. 6 Mingka lanri tuli nigeakkinna siagang tuli nicallana Paulus ri taua, napatu'du'mi bangkenna siagang napaba'basa'mi pakeanna sollanna a'lesang limbu'bu'na; iaminjo a'jari pammatei siagang pappakainga' ri kasalanna ngaseng ke'nanga. Nakanamo Paulus, “Punna cilakako, passala' kasalannu ngaseng tonji! Pantarang limangkuko! Pakkaramula ri kamma-kammaya anne la'lampa mangema' ri bansa-bansa maraenga.” 7 Le'baki anjo, a'lampami Paulus ambokoi ke'nanga nampa mange ammantang ri ba'leanna anjo balla' sambayanga. Anjo ballaka, teai balla' tu Yahudi, mingka tau anynyombai ri Allata'ala tau ammantanga anjoreng. Anjo patanna balla' niarengi Titus Yustus. 8 Mingka kapalana anjo balla' sambayanga, iamintu niarenga Krispus siagang sikontu tau niaka ri balla'na, a'jari tappa'mi ri Batara Isa. Siagang pole jai tommi tu Korintus maraenganga allangngereki anjo kabara' napabattua Paulus, na'jari tappa' mae ri Isa nampa nije'ne' ke'nanga. 9 Ri se'reang bangngi nabattuimi pappiso'na Paulus. Lalang pappiso'nana Nakana Batara ri Paulus, “Teako mallakki Paulus! A'bicarako turus, teako ammakkangi. 10 Nasaba' niaKa' anrurungangko. Tena manna sitau akkulle a'gau' ja'dala' ri kau, nasaba' jai taungKu anrinni ri kotaya.” 11 Jari ammantammi Paulus se're sitangnga taung sallona ri Korintus, siagang napangngajarrammi kana-kananNa Allata'ala mae ri ke'nanga. 12 Ri wattunna Galio a'jari Guburnur ri Akhaya, assamaturu'mi tu Yahudia ambaliangi Paulus nanaerang mange ri pangadelanga natuntu'. 13 Kammaminne tuntutanna ke'nanga mae ri Paulus, “Anne taua ampangarui tau jaia anynyomba sala ri Allata'ala; nasaba' sisalai anjo apa napangngajarranga siagang apa Napassuroanga Allata'ala le'baka napabattu Musa mae ri kambe!” 14 Kamma ero'na appiali Paulus, la'bi riolomi Galio angkana mae ri tu Yahudia, nakana, “He, ikau ngaseng tu Yahudia! Ka'de' passala' kasalang yareka kaja'dallang nanutuntu' anne taua memang siratanga' sa'bara' ampilangngeri anne tuntutannu. 15 Mingka anne passala' passigeakkang bicara, passigeakkang areng-areng, siagang passigeakkang ri passala' atorang-atorannu tonji! Jari ikau ngaseng tommo ampasilolongangi. Tena nakuero' angngadeli anne passala' kammaya!” 16 Le'baki anjo nibongkami ke'nanga assulu' ri Galio. 17 Jari a'gilimmi ke'nanga anjakkalaki Sostenes, iamintu kapalana anjo balla' sambayanga, nampa naba'ji ri dallekanna mejang pangadelanga. Mingka tena sikali najampangi Galio anjo apa nagaukanga ke'nanga. 18 Le'baki anjo sallo iji ammantang Paulus ri Korintus. Mingka ri se'reang allo appala' kanami Paulus ri sikamma tau tappaka anjoreng, nampa a'lampa assombala' siagang Priskila na Akwila mange ri Siria. Battui ke'nanga mange ri Kengkrea, nasuro cukkuru'mi uu'na Paulus, le'baka a'jari la'bu siapa are sallona lanri tinja'na mae ri Batara. 19 Ri wattunna battu ke'nanga mange ri Efesus, nasuromi ammantang Priskila siagang Akwila, nampa antama' ri balla' sambayanga sipa'bicara siagang tu Yahudi niaka anjoreng. 20 Napala'mi ke'nanga sollanna ammantang sallo-sallo Paulus, mingka takkulleai ammantang sallo Paulus. 21 Mingka manna nakamma, ri wattunna la'lampa Paulus, nakanamo ri ke'nanga, “Punna nia' pangngellai battu ri Allata'ala, labattu poleanja' antu sallang mae anrinni.” Le'baki akkana kamma, a'lampami Paulus mange ri Efesus. 22 Ri wattunna naung ri Kaisarea, a'lampami Paulus mange ri Yerusalem ampabattui sallanna ri jamaah niaka anjoreng, nampa annarrusu' mange ri Antiokhia. 23 Niaki siapa are sallona ammantang anjoreng. Le'baki anjo a'lampami angkunjungi jamaah-jamaah niaka ri daera Galatia siagang Frigia ero' ampakajarreki tappa'na sikontu anggota jama'aka. 24 Anjo wattua, nia'mo se're tu Yahudi battu mange ri Efesus, niarenga Apolos, anjorenga ri Aleksandria nilassukang. Anne Apolos tau cara'de' a'bicara, siagang napahang bajiki bonena Kittaka, 25 kammayatompa le'ba'mi niajara' sollanna naasseng pangngajarranga ri passala'na Isa. Mingka nampami sa'genna passala' pa'je'ne' nagaukanga Yohanes naasseng. Mingka manna nakamma sanna'mi lompona sumanga'na angngajara'. Naajara' baji'-baji'mi taua ri passala'na Isa. 26 Appakkaramulami a'bicara siagang barani Apolos lalang ri balla' sambayanga. Na ri wattunna nalangngere' Priskila siagang Akwila anjo apa napangngajarranga Apolos, nakio'mi ke'nanga Apolos mange ri balla'na ke'nanga. Anjoreng ri ballaka napauang la'bi baji'mi ke'nanga Apolos ri passala' antekamma ero'Na Allata'ala ampasalamaki rupataua lalang ri KalenNa Isa. 27 Le'baki anjo apparurumi Apolos ero' a'lampa mange ri Akhaya. Jari annulisi'mi sura' tau tappaka ri Isa niaka ri Efesus mae ri tau tappaka ri Akhaya sollanna ero' ke'nanga antarimai Apolos siagang te'ne pa'mai'. Na ri wattunna Apolos mange ri Akhaya, ma'nassa sanna'mi lompona matu-matunna pannulunna mae ri sikamma tau tappaka ri Isa lanri pangngamaseanNa Allata'ala. 28 Nasaba' akkullei nabeta bicara tu Yahudia punna sipa'bicara ke'nanga ri dallekanna tau jaia. Siagang akkullei napa'butti situru' apa-apa niaka tattulisi' lalang ri Kittaka angkanaya ma'nassa Iaminjo Isa Karaeng Mappasalama' le'baka Napa'janjiang Allata'ala.
19
1 Ri wattunna nia' Apolos ri Korintus, sitabang tongi a'lampa Paulus anjappai padalamanna anjo daeraya, sa'genna battu mange ri Efesus. Anjoreng, assibuntulu'mi siagang siapa are tau tappakamo ri Isa. 2 Akkuta'nammi Paulus ri ke'nanga angkana, “Le'ba'mi nutarima RohNa Allata'ala ri wattunnu tappa' ri Isa?” Appialimi ke'nanga angkana, “Tenapa. Ba'lalo tenapa kile'ba' allangngere' angkanaya nia' RohNa Allata'ala.” 3 Akkuta'nammi Paulus angkana, “Jari lanri inai nanije'nekko?” Appialimi ke'nanga angkana, “Lanri pa'je'ne'na Yohanes.” 4 Nakanamo Paulus, “Naje'neki Yohanes taua sollanna akkulle nipa'nassa angkanaya ma'nassa toba' ngasemmi anjo taua battu ri dosa-dosana. Mingka tuli napau tongiji Yohanes mae ri tu Israelka, angkanaya musti tappaki ke'nanga mae ri Tau niaka battu ribokoanganna, iamintu Isa.” 5 Ri wattunna nalangngere'mo ke'nanga anjo napaua Paulus, nasuro je'ne'mi kalenna ke'nanga lalang arenNa Batara Isa. 6 Na ri wattunna napatompang limanna Paulus irateanganna ke'nanga, battumi RohNa Allata'ala angkoasai ke'nanga; sa'genna akkullemo ke'nanga a'bicara lalang a'rupa-rupa bicara appakalannasaka, siagang napabattumi ke'nanga kabara' battua ri Allata'ala. 7 Niaki kira-kira sampulo anrua jaina ke'nanga. 8 Niaki tallum bulang sallona tuli a'bicara siagang barani Paulus mae ri tau niaka lalang ri balla' sambayanga. A'bicarami siagang ke'nanga sollanna akkulle a'jari tappa' ke'nanga mae ri Allata'ala siagang PamarentahanNa. 9 Mingka nia' siapa are ri ke'nanga sanna' terasa'na pa'mai'na, siagang taerokai tappa'. Nacallami ke'nanga ri dallekang pa'rappunganna anjo taua, anjo pangngajarang ri passala' ero'Na Allata'ala ampasalamaki rupataua lalang ri KalenNa Isa. Lanri kammana, a'lampami Paulus ambokoi ke'nanga, nampa a'lampa siagang tau tappakamo ri Isa mange ri kamara' sikolana Tiranus. Anjoreng, allo-allomi sipa'bicara siagang taua. 10 Iaminjo tuli nagaukang ruan taung sallona, sa'genna sikontu tau niaka ammantang ri daera Asia, baji' na tu Yahudi yareka bansa-bansa maraenga, nalangngere' ngasemmi ke'nanga kana-kananNa Batara. 11 Jaimi gau' appakalanna'-lannasa' Nagaukang Allata'ala lalang ri kalenna Paulus. 12 Ebara'na, punna nierang passapunna yareka passikko' aya' le'baka napake Paulus mae ri tau garringa, akkullemi a'jari baji' taua, yareka assulu'mi roh ja'dalaka ri kalenna ke'nanga. 13 Anjo wattua nia' siapa are sanro-sanro tu Yahudi masarroa a'lampa kere-keremae ambongkai roh ja'dalaka battu lalang ri kalenna tau nasosoka roh ja'dala'. Nacoba-coba tongi anjo sanro-sanroa ampakei arenNa Isa untu' ambongkai anjo roh-roh ja'dalaka. Angkanami ke'nanga ri anjo roh-roh ja'dalaka, “Lalang arenNa Isa, anjo napabattua Paulus, kamma-kamma anne kusuroko assulu'!” 14 Niaki tuju ana'-ana' bura'nena imang kapalaya, iamintu niarenga Skewa anggaukangi anjo kammaya. 15 Mingka nakanamo roh setanga ri ke'nanga, “Kuassengi anjo Isa, kammayatompa kuasseng tongi anjo Paulus; mingka ikau anne, inai ngasengko?” 16 Nampa a'lumpa'mi anjo tau nasosoka setang siagang sanna'mi larrona ambakkai ke'nanga nanakokko'. Sa'genna lari ngasemmi ke'nanga ambokoi anjo ballaka. A'bokka'-bokka'mi kalenna, siagang assolara'mi, lanri nikekke'-kekkekangi care-carena battu ri kalenna ke'nanga. 17 Nalangngere'mi sikontu tu Yahudia siagang bansa-bansa maraeng niaka ammantang ri Efesus anjo apa kajarianga, sa'genna a'jari malla'mi ke'nanga. Napila' nipujimo arenNa Batara Isa. 18 Jaimi tau tappakamo ri Isa battu ammangakui ri dallekanna tau jaia sikamma panggaukang salana ke'nanga ri wattu allaloa. 19 Na sikamma tau biasaya ammake baca-baca, massing napa'rappungammi sura' jima'-jima'na ke'nanga nampa natunu ri dallekanna tau jaia. Punna nipasse're ballinna anjo sura'-sura' nitunua, nia' kira-kira limampulo sa'bu doe' pera' jaina. 20 Kammaminjo, sanna' heba'na batena pila' tassiara' kana-kananNa Batara, siagang pila' lompomi pangaruna. 21 Le'ba'namo kajariang ngaseng anjo sikammaya, apparurumi Paulus ero' a'lampa mange ri Makedonia siagang Akhaya, nampa annarrusu' mange ri Yerusalem. Nakana Paulus, “Punna battu anjoremma' musti lamange tonga' ri Roma.” 22 Jari nasuromi rua pambantuna, iamintu Timotius siagang Erastus, a'jappa riolo mange ri Makedonia. Na ia ammantangiji siapa are sallona ri daera Asia. 23 Kira-kira iaminjo wattua nania' karicuang lompo ri Efesus passabakkang pangngajarang ri passala'na Isa. 24 Nasaba' anjoreng ri kotaya nia' sitau tukang pera', niarenga Demetrius, appareka balla'-balla'na Rewata Artemis. Sanna' jaina wassele' nagappa anjo taua mae ri pajama-jamana. 25 Lanri kammana napa'rappungammi sikamma pajama-jamana siagang pajama-jamana tukang pera' maraenganga; nampa nakana, “Kammanne sari'battangku ngaseng! Massing nuassemmi angkanaya battu ri anne jama-jamanta kinggappa wassele'. 26 Na kamma-kamma anne massing nucini'mi siagang massing nulangngere'mi, apa nagaukanga anjo Paulus. Napaui angkana anjo rewata-rewata napareka rupataua tena sikali nakkulle nikana rewata. Najaimo tau akkulle a'jari tappa' ri anjo pangngajaranna; tena na ri Efesus bawang mingka a'birimmi a'la'bang todong ri sikontu daera Asia. 27 Bahayana mae ri katte, iamintu nasaba' akkullei anggappa areng kodi usahata. Ba'lalo tena nasikammaja anjo bawang, nasaba' manna balla'na Rewata Artemis lanicini' tuna tommi siagang lanionjo'-onjokammi kalompoanna; padahala', iami rewata nipakalompoa ri sikontu tau niaka ri Asia siagang tau niaka ri sikontu linoa!” 28 Nalangngere'na ke'nanga anjo bicara kammaya, a'jari bambammi nyawana ke'nanga. Akkiok-kio'mi ke'nanga angkana, “Nipakalompoi Artemis, rewatana tu Efesus!” 29 A'la'bammi anjo karicuanga sa'genna ri sikontu kotaya. Nampa mangemi anjo kumpulanna tau apparicua anjakkalaki Gayus siagang Aristarkhus. Nasaba' iaminjo tau anrurungangi Paulus battu ri Makedonia lalang ri pa'lampanna. Nare'resammi ke'nanga anjo tau ruaya mange ri tampa' luara'na anjo kotaya. 30 Ero'mi Paulus antama' ampinawangi ke'nanga, mingka nipisangkai ri sikamma tau tappaka ri Isa. 31 Nia' todong siapa are tumalompo ri daera Asia, a'jari aganga ri Paulus, assuro pauangi Paulus sollanna tena namange ampappicinikangi kalenna anjoreng ri tampa' luaraka. 32 Anjo wattua sikamma tau niaka a'rappung ri lapanganna anjo kotaya a'jari sanna'mi ricuna. Sangka' rupami napau taua ammarrang-marrang. Nasaba' jaiangangi ke'nanga tangngassengai angkana apa saba'na nania' ke'nanga anjoreng ri paranga a'rappungang. 33 Nia' sitangnga ri ke'nanga nakana passala' Aleksander, nasaba' iami nisorong mae ri dallekang ri tu Yahudia. Jari napanai'mi limanna Aleksander sollanna nisare wattu a'bicara ampakasingaraki kalenna ri dallekanna anjo tau jaia. 34 Mingka nacini'na ke'nanga angkana tu Yahudi anjo Aleksander, appada-padami ke'nanga ammarrang lompo angkana, “Nipakalompoi Artemis, rewatana tu Efesus!” 35 Kale'bakkanna akkullemi nipakasannang anjo tau jaia ri jurutulisi'na anjo kotaya. Nakana anjo jurutulisika, “Ikau ngaseng tau ammantanga ri Efesus! Baji' ngaseng naassenna taua angkanaya anne tau niaka ri Efesus amparakai balla'na Rewata Artemis siagang batu matangkasa' tu'guruka battu ri langika. 36 Manna sitau tena nania' akkulle anggeakki anne passalaka. Jari lanri kammana, sannang ngaseng mako, siagang teako pitigau'-gauki ri apa-apa tenaya nupahangi. 37 Anne taua nuerangi mae anrinni teai passabakkang le'ba'na naalle passa apa-apa niaka ri balla' rewataya, yareka lanri le'ba'na nahina ke'nanga rewatanta. 38 Punna nia' tau lanatuntu' Demetrius siagang pajama-jamana, boli'mi kamma nanaerang anjo parkaraya mange ri pangadelanga. Tuli tassungkeji pangadelanga, siagang tuli nia' tonji pamarentaya punna nia' tau ero' nituntu'. 39 Mingka punna nia' ija apa-apa maraengang nukaeroki, anjo musti nipassirapakkang baji'-bajiki lalang ri passirapakkang tau jaia. 40 Nasaba' anne kajarianga anne alloa, akkullei a'jari bahaya ngaseng mae ri katte. Akkulleki' nitudu ero' angngewai pamarentaya, nasaba' tena sikali akkulle nipare' pattuppuang nakkulle nipannaba anne karicuanga.” 41 Le'baki akkana kamma anjo jurutulisika, nasuromi ammotere' ngaseng anjo tau jaia.
20
1 Ri wattunna a'jari sannammo ammotere' taua ri Efesus, napa'rappungammi Paulus anggota jama'aka nampa napakajarre' ke'nanga. Le'baki anjo appala' kanami, nampa a'lampa mange ri Makedonia. 2 Nakunjungimi sikamma tau tappaka ri Isa ri daera Makedonia. Jaimi pappakainga' napauangi ke'nanga, siagang napakajarre'mi tappa'na ke'nanga. Le'baki anjo a'lampami mange ri Yunani. 3 Tallum bulangi sallona ammantang anjoreng. Nampa ri wattunna apparuru ero' assombala' mange ri Siria, nia'mo kabara' angkanaya assikongkoloki tu Yunania ero' ambunoi. Jari a'giling a'lampa mangemi ammotere' angngolo ri Makedonia. 4 A'lampami siagang Sopater, ana'na Pirus battua ri Berea; nia' tommi amminawang Aristarkhus, Sekundus tu battu ri Tesalonika, siagang Gayus, tu Derbe. Kammayatompa Timotius, Tikhikus siagang Trofimus, battua ngaseng ri daera Asia. 5 A'jappa riolomi ke'nanga, nampa attayang ri Troas. 6 Le'baki Passua'-suarrang Roti Tenaya Nammake Pa'gambang, a'lampa maki' assombala', ambokoi Filipi. Narapiki limangallo sallona, a'rappungang siagang ke'nanga ri Troas. Sidamingguki' ammantang anjoreng. 7 Ri wattunna bangngi daminggu a'rappungang maki' ero' sipangnganreang ampakajarreki passari'battanganta. A'bicara memammi Paulus siagang sikamma tau hadereka, nasaba' ammukona ero'mi a'lampa. Sa'genna tangnga bangngi a'bicara iji Paulus. 8 Anjo kamara' nipa'rappungia kamara' irateang. Jai lampu lalang ri anjo kamaraka. 9 Nia'mo se're turungka ammempo ri jandelaya niarenga Eutikhus. Lanri tenapa nammari-mari a'bicara Paulus, ta'do'do' sikalimi anjo turungkaya. Tanasa'ringami kalenna nattinro ri jandelaya sa'genna tu'guru' naung battu rate ri loteng makatallua. Ri wattunna niangka', niassemmi angkana matemi anjo turungkaya. 10 Mingka naummi Paulus, nanra'ba anrakaki anjo turungkaya. Nakanamo Paulus ri taua, “Teako batai, attallasa' iji!” 11 Le'baki anjo nai'mi ammotere' Paulus ri kamara' napa'rappungia ke'nanga. Nabage-bagemi rotia nampa para angnganre ke'nanga. Sa'genna bari'basa' a'bicara iji Paulus. Le'baki anjo a'lampami Paulus. 12 Naerammi taua anjo turungka attallasa' poleanga ammotere' mange ri balla'na. Sannang ngasemmi nyawana ke'nanga siagang anggappami panynyaleori lompo ke'nanga. 13 A'lampa riolo maki' mange ri kappalaka nampa kiassombala' mange ri Asos. Anjorempaki' antayangi Paulus ri kappalaka. Nasaba' le'ba'mi naatoro' Paulus angkana ia lanumalo ri bontoai mange ri Asos. 14 Ri wattunta assigappamo ammotere' ri Asos, nai'mi Paulus ri kappalaka, nampa kiassombala' mange ri Metilene. 15 Battu anjoreng assombala' maki' pole, sa'genna ammukona battu maki' mange ri tampa' sidallekanga siagang Khios. Ammembara'na anrapi' maki' mange ri Samos. Nasiallo pole battu maki' mange ri Miletus. 16 Le'ba'mi napattantu Paulus angkana tena nalassengka ri Efesus sollanna tena nasallo dudu ammantang ri daera Asia. Eroki akkaro-karo battu mange ri Yerusalem sollanna narapikang allo lompo Pentakostaya. 17 Battu ri Miletus, akkirimmi kabara' Paulus mae ri pamimping-pamimping jama'aka ri Efesus. Napasangi ke'nanga battu angngagangi assibuntulu' punna battu Paulus mange anjoreng. 18 Ri wattunna assibuntulu'mo siagang ke'nanga, nakanamo Paulus ri ke'nanga, “Sikamma sari'battangku; nuasseng ngasemmi angkanaya antekamma bateku attallasa' ri tangnga-tangnganu pakkaramula ri uru battuku ri daera Asia. 19 Kupa'jari tunami kalengku, siagang jaimi assolong je'ne' matangku ri wattunna kugaukang jama-jamanNa Batara. Kukasia'mi pa'risika lanri kaja'dallanna tu Yahudia mae ri nakke. 20 Nuasseng ngasemmi angkanaya tena nakumalla'-malla' ampauangko apa niaka matu-matunna mae ri kau. Kusareko pangngajarang lalang ri pa'rappunganna tau jaia, yareka massing ri balla'nu ngaseng. 21 Baji' namae ri tu Yahudia, yareka mae ri bansa-bansa maraenga, tuli kupakainga' ngasemmi sollanna massing toba', battu ri dosa-dosana ke'nanga nabattu mae ri Allata'ala siagang tappa' mae ri Isa. 22 Kamma-kamma anne lakuturukimi parentaNa RohNa Allata'ala, nakua'lampa mange ri Yerusalem. Na takuassenga angkanaya apa lakajariang mae ri kalengku punna battua' mange anjoreng. 23 Iaji kuasseng angkanaya le'ba'ma' Nalambusiang RohNa Allata'ala angkanaya lanitarungkua' siagang lakukasiaki sessaya. Iaminjo Napauanga' Allata'ala ri wattungku a'lampa ri kota-kota le'baka kupa'lampai. 24 Mingka takujampangiai anne tallasakku, assala' akkulle mamo kupa'le'ba' anjo tugasa' Napassareanga Batara Isa mae ri nakke; kammayatompa assala' akkullea' jarre' sa'genna kala'busang tallasakku ampa'la'bangi Kabara' Bajika, iamintu ri passala'na pangngamaseanNa Allata'ala. 25 Le'ba' ngaseng mako massing kukunjungi, siagang le'ba' ngaseng tommi kupabattu mae ri kau ri passala'na Allata'ala siagang PamarentahanNa. Kamma-kamma anne nia'mi ri pakkasiakku angkanaya iaminne kala'busangku assicini' siagang ikau ngaseng. 26 Jari kulambusiang mako kamma-kamma anne, angkanaya punna nia' ri kau anggappai kapanrakanga sallang, teaimi inakke pata sala. 27 Tena nakule'ba' ampilari tugasakku untu' ampakasingariangko sikontu apa eroka Nagaukang Allata'ala ri kau ngaseng. 28 Paralluko anjagai kalennu. Kammayatompa paralluko anjagai sikontu jamaah le'baka Napassareang RohNa Allata'ala mae ri kau untu' lanujagai; nasaba' le'ba' mako niangka' a'jari tummarakai ri anjo jama'aka. Parallui nujagai anjo jama'aNa Allata'ala, sanrapang pakalawaki anjagai gimbala'na; nasaba' le'ba'mi Napa'jari Allata'ala anjo jama'aka a'jari pisakaNa lanri kamateanNa Ana' KalenNa. 29 Punna a'lampa' sallang, ma'nassa laniaki battu kongkong romang nye'nyereka ri tangnga-tangnganu. Na anjo tau nujagaia la'jarimi sanrapang kanre-kanrena anjo kongkong romang nye'nyereka. 30 Ba'lalo lania' tau battu ri tangnga-tangnganu tonji ambirittakangi biritta salaya. Lappanggaukang kammai anjo ke'nanga sollanna akkulle tau tappakamo ri Isa a'jari sala oloang, nampa amminawang ri ke'nanga. 31 Lanri kammana, paralluko a'jaga-jaga! U'rangi angkanaya tallun taungi salloku tammari-maria angngajarakko allo bangngi, siagang jaimi je'ne' matangku ammatti' lalang kugaukanna anjo jama-jamanga. 32 Kamma-kamma anne kupassareang mako mae ri Allata'ala, naporo Iami amparakai ngasengko, siagang nuporo anna'gala' jarre' ngaseng mae ri anjo kabara' pangngamaseanNa Allata'ala. Koasai Allata'ala ampakajarrekko siagang assareko barakka'-barakka'Na, le'baka Napasadia untu' sikontu umma'Na. 33 Manna sitau tania' le'ba' kupattayangi doe' yareka care-care. 34 Ikau ngaseng tonji angngassengi angkanaya battu ri posoku tonji anjama nakkulle kututuki kaparalluang allo-alloku siagang sikamma tau amminawang ri nakke. 35 Lalang ri kammana anjo, nakusare mako conto, angkanaya paralluki' anjama terasa', sollanna akkulle nitulung tu tenaya pakkullena. Nasaba' parallui niu'rangi apa le'baka Napau Isa, angkanaya, ‘La'bi te'neangangi nikanaya assare naia nikanaya annarima.’ ” 36 Le'baki a'bicara Paulus, akkulantu'mi siagang ke'nanga nampa appala' doang. 37 Angngarru' ngasemmi ke'nanga siagang naraka'mi Paulus nampa nalappassang na napasalama' a'lampa Paulus. 38 Sanna' ngaseng si'nana atinna ke'nanga, la'biangampa lanri nakanana Paulus angkanaya talasicinikami ke'nanga. Naantara'mi ke'nanga Paulus sa'genna nai' ri kappalaka.
21
1 Assijama'-jamakki maki' siagang anjo pamimping-pamimping jama'aka ri Efesus. Le'baki anjo a'lampa maki' ambokoi ke'nanga. Assombala' maki' annarrusu' mange ri pulo Kos; ammukona battu maki' mange ri pulo Rodos. Battu anjoreng annarrusu' maki' assombala' mange ri palabuhang Patara. 2 Ri Patara, anggappa maki' kappala' eroka mange ri Fenisia. Jari nai' maki' ri anjo kappalaka kinampa a'lampa. 3 Assombala' maki sa'genna nicini'mo pulo Siprus ri ba'leang kairinta; mingka annarrusu' maki' assombala' mange ri Siria. Battu maki' mange ri Tirus. Nakinaummo ri bontoa anjoreng, lanri lanabongkara'mi apa-apa naeranga anjo kappalaka. 4 Mange maki' angkunjungi tau tappaka ri Isa anjoreng ri tampaka, nampa ammantang maki' siagang ke'nanga sidaminggu sallona. Lanri pappijo'jo'Na RohNa Allata'ala napakainga'mi ke'nanga Paulus, sollanna tena na'lampa Paulus mange ri Yerusalem. 5 Mingka ri wattunna lala'busu'mo wattunta lammantang anjoreng, a'lampa maki' ambokoi ke'nanga, nanipannarrusu' lampata. Amminawang ngasemmi ke'nanga massing sipammanakang angngantarakki' sa'genna assulu' ri pantaranganna kotaya. Anjoreng ri biring tamparanga, akkulantu' ngaseng maki' appala' doang. 6 Le'baki anjo assijama'-jamakki maki', kinampa nai' ri kappalaka; nammotere' ngaseng tommo ke'nanga. 7 Annarrusu' maki' assombala' battu ri Tirus sa'genna mange ri Ptolemais. A'lampa maki' angkunjungi sikamma tau tappaka ri Ptolemais, untu' ampabattui sallanta. Ammantang maki' anjoreng siallo siagang ke'nanga. 8 Ammukona a'lampa maki' pole, nakibattumo mange ri Kaisarea. Anjoreng, mange maki' ri se'reang pabiritta Kabara' Baji' niarenga Filipus. Ammantang maki' ri balla'na. Anne Filipus, iami kalase'renna anjo tau tujua le'baka nipile ri Yerusalem. 9 Nia' appa' ana' tulolona le'ba' nisare pakkulle ri Allata'ala ampa'la'bangi Kabara' Baji' battua ri Allata'ala. 10 Ri wattunta pirangallo aremo ammantang anjoreng, nia'mo battu sitau na'bi niarenga Agabus; anne Na'bi Agabus battu anjorengi ri Yudea. 11 Battui mae ri kambe nampa naalle passikko' aya'na Paulus. Napakemi anjo passikko' ayaka ansikkoki lima kalenna siagang bangkeng kalenna nampa nakana, “Iaminne Napaua RohNa Allata'ala: Anne patanna passikko' ayaka lanisikko' kammaminne ri tu Yahudia ri Yerusalem, nampa nipassareang mae ri bansa maraenga.” 12 Nilangngere'na anjo bicara kammaya, nipala'mi siagang sikontu tau tappaka ri Kaisarea, sollanna tena na'lampa Paulus mange ri Yerusalem. 13 Mingka appialimi Paulus angkana, “Apa matu-matunnu angngarru' kamma ngaseng, sa'genna a'jari ancuru' kusa'ring atingku? Kamma-kamma anne sadiama'; teako angkana nijakkala' bawang, mingka sadiama' ba'lalo mate lanri Batara Isa.” 14 Taerokai Paulus ampilangngeri kananna ikambe, jari ammari maki' ampisangkai Nikanamo: “Boli'mi kamma naero'Namo bawang Batara anjari.” 15 Le'bakki' ammantang siapa are sallona anjoreng, nipasadiami apa-apanta, kinampa a'lampa mange ri Yerusalem. 16 Nia'mo siapa are sari'battanga ri Kaisarea amminawang todong angngantarakki', mange ri balla'na Manason, nasaba' anjoreng maki' a'bangngi-bangngi. (Anne Manason tau battu ri Siprus, siagang sallomi a'jari tappa' ri Isa.) 17 Ri wattunta battu mange ri Yerusalem, nitarima baji' maki' ri sikamma sari'battanga anjoreng. 18 Ammukona, a'lampa maki' siagang Paulus mange angkunjungi Yakobus; nia' ngaseng tongi pamimping-pamimping jama'aka anjoreng. 19 Le'bakki' massing sijamakki, nacaritami Paulus mae ri ke'nanga sikontu apa le'baka Nagaukang Allata'ala lalang ri kalenna ri tangnga-tangngana bansa-bansa maraenga. 20 Le'baki nalangngere' ke'nanga anjo caritana Paulus, ammuji-muji ngasemmi ke'nanga mae ri Allata'ala. Nampa nakanamo ke'nanga ri Paulus, “Paulus! Parallui nuasseng sari'battang, angkanaya assa'bu-sa'bumi tu Yahudi a'jari tappa' ri Isa. Najarre' ngaseng ke'nanga angkatutui sikamma parentaNa Allata'ala, le'baka napabattu Musa. 21 Na kamma-kamma anne nalangngere'mi ke'nanga angkanaya le'ba'mi nuajara' sikamma tu Yahudi niaka ammantang ri tangnga-tangngana bansa maraenga, sollanna nabokoimo ke'nanga anjo sikamma parentaNa Allata'ala napabattua Musa. Nupakainga'mi ke'nanga sollanna tenamo nanasunnaki ana'-ana'na ke'nanga, yareka tenamo nanaturuki ke'nanga ada'-ada'na tu Yahudia. 22 Kamma-kamma anne tantu naassemmi anjo sikamma tu Yahudi tappakamo angkanaya niakko anrinni. Jari, apamo lanigaukang kamma-kamma anne? 23 Bajikangang pilangngerimi anne pappakainga'na ikambe. Nia' appa' tau anrinni le'bakamo a'janji ri Batara. 24 Jari a'lampamako siagang ke'nanga mange appare' acara massing antangkasi ngasengi kalennu. Siagang tanggongimi ongkoso'na ke'nanga sollanna akkulle nicukkuru' ke'nanga. Punna nugaukangi anjo kammaya, la'nassami mae ri taua angkanaya tena nakamma tojeng anjo kabara' nalangngereka ke'nanga; nasaba' manna ikau nugaukang tonji sikamma parentaNa Allata'ala, situru' apa le'baka napabattu Musa. 25 Mingka anjo bansa maraenga siagang tappakamo ri Isa, le'ba'mi nikiringi sura' ke'nanga, ampauangi apa le'baka nitappuki, angkanaya: takkulleai ke'nanga angkanrei kanre le'baka nipassareang mae ri barhalaya, takkulleai ke'nanga angnganre cera', yareka takkulleai ke'nanga angnganre olo'-olo' mate niaccekang; siagang takkulleai ke'nanga anggaukangi nikanaya gau' assalimara'.” 26 Jari a'lampami Paulus siagang anjo appaka tau. Ammukona, appare'mi acara ke'nanga sollanna akkulle massing natangkasi ngaseng kalenna ke'nanga. Le'baki anjo antama'mi ke'nanga ri Balla'Na Batara ero' ampaui angkanaya pirangallopi nampa le'ba' anjo acara pannangkasi kalea. Kammayatompa angngerammi ke'nanga koro'bang, eroka massing napassareang ke'nanga. 27 Ri wattunna lala'busu'mo anjo wattu tuju alloa, nia'mo siapa are tu Yahudi battu ri daera Asia anciniki Paulus lalang ri Balla'Na Batara. Napakabambammi ke'nanga tau jaia, nampa nata'gala' Paulus. 28 Nakkio' ke'nanga angkana, “He, tu Israelka, bantu saiki'! Iaminne tau le'baka a'lampa mange-mange angngajaraki sikontu taua pangngajarang angngewai bansa Israelka, siagang andakkai sikamma parentaNa Allata'ala, le'baka napabattu Musa; kammayatompa nahina tongi anne Balla'Na Batara. Na kamma-kamma anne ba'lalo naerammi bansa-bansa maraenga antama' ri Balla'Na Batara, anra'ma'-ra'massi anne tampa' matangkasaka!” ( 29 Kammaminjo kananna ke'nanga lanri nacini'mi Trofimus anjo tu Efesuska assiagang Paulus ri kotaya; na nakapammi ke'nanga angkanaya naerang tommi Paulus anjo taua antama' ri Balla'Na Batara.) 30 A'jari sanna'mi ricuna taua ri sikontu anjo kotaya, siagang assilari-larimi mange a'lipung. Najakkala'mi ke'nanga Paulus, nampa nare'resang assulu' ri Balla'Na Batara. Anjo wattua nitongko'mi linta' pakke'bu' Balla'Na Batara. 31 Lalang ero'na anjo sikamma tau apparicua ambunoi Paulus, nia'mo tau lari mange ri komandang pasukanna tantara Roma. A'laporo'mi anjo taua angkanaya sanna' ricuna taua ri sikontu kota Yerusalem. 32 Akkio'mi linta' siapa are tantara siagang siapa are perwira anjo komandang pasukanga. Le'baki anjo akkaro-karomi ke'nanga mange anjoreng ri tampa' karicuanga. Nacini'na anjo tau jaia battu anjo komandanga siagang pasukanna, ammarimi ke'nanga amba'ji Paulus. 33 Mangemi anjo komandanga ri Paulus nampa najakkala', nampa nasuro taua ansikkoki limanna. Le'baki anjo akkuta'nammi anjo komandanga angkana inai tau anjo Paulus, siagang apa le'ba' nagaukang. 34 A'rupa-rupami batena appiali anjo tau jaia. Teaimi sipato' ricuna anjo taua. Sa'genna takkulleami napahang anjo komandanga angkanaya apa sitojenna le'ba' kajariang. Jari nasuro erammi Paulus mange ri kantoro' tantaraya. 35 Ri wattunna narapi'mo tuka'-tukaka, a'jallo' lompo ngasemmi anjo tau apparicua. Sa'genna musti niangka' mami Paulus ri anjo pasukanga. 36 Nipinawammi ke'nanga ri sikamma anjo tau apparicua. Akkiok-kio'mi anjo tau apparicua angkana, “Allei buno!” 37 Ero'namo antama' ke'nanga ri kantoro' tantaraya, nakanamo Paulus ri anjo komandanga, “Maka akkulleja' a'bicara siagang ikatte komandang?” Akkuta'nammi anjo komandanga nakana, “Akkulleko a'bicara Yunani? 38 Jari punna kamma, teai ikau anjo tu Mesir le'baka angngewai pamarentaya pirangalloang nampa lari angngerang patassa'bu tau pangaco siagang sanjata antama' ri parang lompoa?” 39 Appialimi Paulus nakana, “Inakke tu Yahudia'; kota pammantangangku ri Tarsus, kota lompoa ri daera Kilikia. Kitulunga' nakisarea' kasampatang a'bicara mae ri anjo taua ngaseng.” 40 Nisaremi kasampatang a'bicara Paulus. Ammentemmi ri tuka'-tukaka nampa naangka' limanna a'jari pammatei ri taua angkana eroki a'bicara. Sannang ngasemmi taua. Le'baki anjo a'bicarami Paulus mae ri ke'nanga lalang bicara Ibrani, nakana,
22
1 “Ikatte ngaseng bapa'-bapaka, siagang sari'battanga ngaseng! Eroki kupakasingara' kalengku mae ri katte ngaseng. Jari pilangngerimi anne kanangku!” 2 Nalangngere'na anjo tau jaia a'bicara Ibrani Paulus, pila' sannang ngasemmi ke'nanga. Jari nasambummi pole bicaranna Paulus nakana, 3 “Inakke tu Yahudia'. Anjorenga' ri kota Tarsus, ri pa'rasangang Kilikia nilassukang. Mingka anrinnia' ri Yerusalem nipakalompo. Siagang anrinnia' niajara' baji' ri guru lompoa Gamaliel ri passala' atorang-atorang le'baka napassareang Musa ri boe-boeta. Sangkamma ikau ngaseng niaka anne alloa anrinni, sanna' todong rajengku anynyomba mae ri Allata'ala. 4 Le'baki kusessa sa'genna mate tau tappaka mae ri anjo pangngajarang berua. Kujakkala' ngasengi ke'nanga, bura'ne baine, nampa kupantama' ri tarungkua. 5 Kalenna imang lompoa siagang sikontu anggotana Pangadelang Agamaya akkulle a'jari sa'bi angkanaya tena ku'balle-balle. Nasaba' iaminjo ke'nanga le'ba' assarea' sura' koasa, kueranga mae ri tu Yahudi niaka ri Damsyik. Anjo sura' koasaya akkullei kupare' panna'gallang untu' anjakkalaki sikamma tau tappaka mae ri anjo pangngajarang berua, ri Damsyik, nampa kuerang ke'nanga mange ri Yerusalem sollanna nihukkung.” 6 “Ri wattu lalang a'lampaku siagang la'birimmo battu mange ri Damsyik, kira-kira ri wattu attangngana alloa, ti'ring nia'mo caya tassioro' battu ri langika angkulilingia'. 7 Anra'bama' naung ri buttaya napakamma. Nampa nia' kulangngere' sa'ra angkana mae ri nakke, nakana, ‘Saulus, Saulus! Angngapa nanusessa kamma duduA'?’ 8 Jari akkuta'namma' angkana, ‘InaiKi' antu, Batara?’ Appialimi anjo sa'raya angkana, ‘INakkemi Isa, tu Nazaretka, sannaka nusessana.’ 9 Sikamma tau niaka kuagang a'jappa anjo wattua nacini' ngaseng tongi anjo cayaya; mingka tanalangngerai ke'nanga anjo sa'ra a'bicaraya mae ri nakke. 10 Akkuta'namma' pole angkana, ‘Apa musti kugaukang Batara?’ Appialimi Batara angkana, ‘Ambangungko nai' nampa antamakko ri kota Damsyik. Anjoreng pako sallang lanipauang sikontu apa eroka Nasuro gaukang Allata'ala ri kau.’ 11 A'jari butama' anjo wattua napakamma sioro'na anjo cayaya. Jari nirenreng mama' ri agang-agangku antama' ri Damsyik. 12 Anjoreng ri Damsyik nia' sitau niareng Ananias. Anjo taua sanna' baji'na. Tutui anggaukangi sikamma parentaNa Allata'ala, le'baka napassareang Musa mae ri katte. Sanna' nipakala'biri'na ri sikontu tu Yahudi niaka ammantang ri Damsyik. 13 Battumi antoakka'. Ammentemmi ri sa'ringku nampa nakana, ‘Sari'battangku Saulus, kamma-kamma anne accini' poleang mako!’ Anjo wattua assailema', nakucini'mo Ananias. 14 Nampa nakanamo pole Ananias mae ri nakke, ‘Napile mako Allata'alana boe-boeta, sollanna nuasseng ero'Na. Kammayatompa sollanna nucini' Isa, AtanNa Allata'ala anggaukangai ero'Na Allata'ala, kammayatompa nulangngere' kalennu sa'ranNa Isa. 15 La'jari sa'biko ampa'la'bangi anjo apa le'baka nucini' siagang nulangngere', mae ri sikontu rupataua. 16 Kamma-kamma anne tea' mako sallo-salloi pole attayang. Ambangung mako nai', nanupassareang kalennu nije'ne'. Appala' popporo' mako mae ri Batara, sollannu nipammopporang ri dosa-dosanu.’ ” 17 “Ammotere'ma' mange ri Yerusalem. Na ri wattungku sitabang appala' doang ri Balla'Na Batara, battumi RohNa Allata'ala angkoasai kalengku. 18 Kucini'mi Batara; Nakana mae ri nakke, ‘A'lampako linta' ambokoi Yerusalem. Nasaba' taerokai taua anrinni antarimai kasa'biannu mae ri Nakke.’ 19 Kukanamo, ‘O Batara, baji' ngaseng naassenna ke'nanga angkanaya le'bakka' antama' ri sikamma balla' sambayanga anjakkalaki ke'nanga, siagang amba'ji sikamma tau tappaka mae ri Katte. 20 Kammayatompa ri wattunna nibuno anjo sa'binTa Stefanus, nia' tonga' anjoreng siagang kusitujui tongi nanibuno. Ba'lalo inakkemi anjagai pakeanna sikamma tau ambunoai.’ 21 Mingka Nakanamo pole Batara mae ri nakke, ‘A'lampamako, nasaba' laKusuroko a'lampa mange ri tampa'-tampa' bellaya, mange ri bansa-bansa maraenga.’ ” 22 Appilangngeri ngasengi anjo tau jaia ri wattunna a'bicara Paulus. Mingka nalangngere'na ke'nanga anjo kala'busang kananna Paulus, ammarrang-marrammi ke'nanga angkana, “Bunoi anjo tau kammaya. Tena nasiratang attallasa'!” 23 Lalang ammarrang-marranna ke'nanga, napakape'-kape' tommi jubana ke'nanga sa'genna sanna'mo jaina limbu'bu' a'gapullung nai' ri langika. 24 Jari nisuro erammi Paulus ri anjo komandang pasukang Roma mange ri kantoro' tantaraya. Niparessa terasa'mi anjoreng, ero' niasseng angkanaya apa saba'na nammarrang-marrang kamma anjo tu Yahudia mae ri ia. 25 Mingka ri wattunna le'ba'mo nisikko' Paulus nampa lanicambo', nakanamo Paulus ri anjo perwira niaka ammenteng anjoreng, “Maka akkullei nicambo' bansa Romaya punna tenapa nale'ba' niadeli?” 26 Nalangngere'na anjo perwiraya akkana kamma Paulus, a'lampami anjo perwiraya mae ri komandang pasukanga na nakana, “Apa anne kigaukanga bapa'? Anne taua tau bansa Roma!” 27 A'lampami anjo komandanga mae ri Paulus, na nakuta'nang Paulus angkana, “Bedeng, kammatojengi angkana ikau bansa Romako?” Nakanamo Paulus, “Iye', inakke bansa Roma memanga'.” 28 Nakanamo pole anjo komandanga, “Inakke sanna' jaina kubayara' nampa akkullea' a'jari bansa Roma!” Appialimi Paulus nakana, “Mingka inakke ri wattu nilassukangku memanji nakua'jari bansa Roma memammo.” 29 Anjo wattua ammono'boko ngasemmi anjo tantara eroka amparessai Paulus. Kammayatompa anjo komandanga a'jari malla' tommi lanri le'ba'namo nasikko' Paulus, padahala' anjo Paulus bansa Roma paleng. 30 Ero' dudumi anjo komandang pasukang Romaya angngassengi angkanaya passabakkang apa sitojenna nanipasala Paulus ri anjo tu Yahudia. Jari ammukona nakio'mi imang-imang kapalaya siagang anggota-anggotana Pangadelang Agamaya sollanna a'rappungang ke'nanga. Nampa nala'gasi passikko'na Paulus, nanaerang mange ri dallekanna ngaseng ke'nanga.
23
1 Najanjang tasse're-se'remi Paulus anjo anggota-anggotana pangadelang agamaya, nampa nakana, “Sikamma sari'battangku! Sa'genna anne alloa tena kukasia' ri pa'maikku angkanaya sala' mae ri Allata'ala ri katallassangku.” 2 Ri wattunna akkana kamma Paulus, nisuro tempa ka'rammi bawana Paulus ri Imang Lompo Ananias ri anjo tau ammentenga ri sa'rinna Paulus. 3 Jari nakanamo Paulus ri anjo Imang Lompoa, “Mattantu laNatempaka'rang todongko Allata'ala, ikau tu munape' kammaya, assara-saraia sangkamma tu matangkasa'! Ammempoko antureng angngadelia' situru' parentaNa Allata'ala napabattua Musa, padahala' ikaumi kalennu andakkai anjo parentaya lanri nusurona taua antempaka'ranga'!” 4 Nakanamo anjo siapa are tau niaka ri sa'rinna Paulus, “Nuhinai Imang LompoNa Allata'ala!” 5 Mingka appialimi Paulus nakana, “O, takuassengai sari'battang angkanaya imang lompoi padeng anjo taua. Nia' memang tattulisi' lalang ri Kittaka angkana, ‘Teako hinai pamimpinna bansanu.’ ” 6 Naciniki Paulus angkanaya anjo anggota-anggota pangadelanga nia' sitangnga tu Saduki na sitangngana maraenganga tu Farisi. Lanri kammana, nakanamo mae ri ke'nanga, “Sikamma sari'battanga! Inakke anne tu Farisia', nasaba' sossorang tu Farisia'. Nakuniadeli anrinni passabakkang tappaka' angkanaya lattallasa' poleangi ammotere' tau matea.” 7 Ri wattunna akkana kamma Paulus, appakkaramulami a'gea' tu Farisia siagang tu Sadukia; sa'genna ta'bage ruamo anjo anggota-anggota pangadelanga. ( 8 Nasaba' panggappana tu Sadukia nakana, tena nalattallasa' poleang tau matea, siagang tena malaeka', kammayatompa tena natappa' ke'nanga angkana nia' roh-roh; mingka tu Farisia tappaki angkanaya, lattallasa' poleangi tau matea, angkanaya nia' malaeka' siagang nia' roh-roh.) 9 Kale'bakkanna sanna'mi siricuina ke'nanga. Nia'mo siapa are tu Farisi a'jari guru agamaya ammenteng siagang appa'ngaraya tojeng. Nakanamo ke'nanga, “Situru' panggappana ikambe, anne taua tena salana manna sike'de'! Nasaba' nakulle nia' memang todong roh yareka malaeka' a'bicara mae ri kalenna!” 10 Pila' sanna'mi ricuna anjo pa'geakkanga, sa'genna malla'mi anjo komandang pasukanga, nakana gassingka niborongi Paulus ri ke'nanga. Jari nasuromi pasukanna mange angngallei Paulus battu ri tangnga-tangngana anjo tau jaia, nampa naerang mange ri kantoro' tantaraya. 11 Bangngi poleanna, nia'mi battu Batara Isa ri sa'rinna Paulus na Nakana, “Pakajarreki pa'mai'nu! Le'ba' mako a'jari sa'bingKu ri Yerusalem. Musti la'jari sa'bi tongko sallang ri Roma.” 12 Ammukona ri subu-subua, appakkaramulami assikongkolo' tu Yahudia. Assumpami ke'nanga angkana talangnganreai siagang talangnginungai ke'nanga punna tanabunoapi Paulus. 13 Niaki la'bi patampulo jaina, anjo tau assikongkoloka. 14 A'lampami ke'nanga mae ri imang-imang kapalaya siagang pamimping-pamimpinna tu Yahudia, nampa nakana ke'nanga, “Le'ba'mi assumpa ikambe, angkanaya talangnganreai siagang talangnginungai ikambe, punna tenapa nale'ba' nibuno Paulus ri kambe. 15 Jari, akkiring maki' sura' siagang anggota-anggota Pangadelang Agamaya mae ri anjo komandang pasukanna tantara Romaya. Kipalaki ri anjo komandanga sollanna naerang pole Paulus ri pangadelang agamaya, sangkamma eroki kiparessa baji'-baji' ammotere' parkarana. Nampa sadia memang ikambe ambunoi ilalang tenanapa nanrapi' mae anrinni.” 16 Mingka nalangngere'mi kamanakanna Paulus anjo eroka lanagaukang ke'nanga. Jari a'lampami anjo kamanakanna Paulus ampauangi anjo kabaraka mae ri Paulus ri kantoro' tantaraya. 17 Akkio'mi Paulus sitau perwira nampa napauang angkana, “Erang sai anne turungkaya mae ri komandanga, nia' ero' napabattu mae ri komandanga.” 18 Nierammi anjo turungkaya ri anjo perwiraya mae ri komandanga. Napabattumi anjo perwiraya ri komandanga angkana, “Napalaki Paulus, anjo tu nitahanga, sollanna kuerang anne turungkaya mae ri katte; nia' ero' napabattu ri katte.” 19 Nata'gala'mi anjo komandanga limanna anjo turungkaya nampa naerang mange ri sa'riang akkale-kale. Nampa nakuta'nang nakana, “Apa ero' nupabattu mae ri nakke?” 20 Appialimi anjo turungkaya nakana, “Assikongkoloki tu Yahudia ero' napala' ri katte sollanna kierang Paulus ammuko mange andallekang ri Pangadelang Agamaya, assara-sarai ke'nanga ero' amparessa baji'-baji' poleangi parkarana Paulus. 21 Mingka teaki' turukiangi pappala'na ke'nanga, nasaba' nia' tau la'bi patampulo accokko ero' anruppai Paulus ri aganga. Le'ba' ngasemmi ke'nanga assumpa angkanaya talangnganreai siagang talangnginungai ke'nanga punna tanabunoapi Paulus. Kamma-kamma anne sadia memammi attayang ke'nanga; kabara' pappialinta mami natayang ke'nanga.” 22 Nakanamo anjo komandanga, “Teako pau-paui manna ri nai angkana le'ba'mi nupabattu anne kabaraka mae ri nakke.” Le'baki anjo, nasuromi ammotere' anjo turungkaya. 23 Le'baki anjo akkio'mi anjo komandanga rua perwira, nampa nakana ri ke'nanga, “Appasadiako ruambilangngang tantara kammayatompa tujupulo tantara padongko' jarang, siagang ruambilangngang tantara angngeranga poke, nampa a'lampa memangki' ri tette' salapang anne bangngia mange ri Kaisarea. 24 Appasadia tongko jarang lanadongkokia Paulus, nampa nuerang siagang salama' mae ri Guburnur Feliks.” 25 Nampa annulisi' sura' anjo komandanga, kammaya anne bonena, 26 “Natarimai Karaeng Tunipakala'birika, Guburnur Feliks. Salama' battu ri Klaudius Lisias! 27 Anne taua le'ba'mi nijakkala' ri tu Yahudia, siagang sike'de' mami nibuno ri ke'nanga, ka'de' tena nakulinta' battu siagang pasukanga angngallei, lanri kulangngereki kabara'na angkanaya anne taua bansa Roma. 28 Lanri eroki kuasseng angkana apa sikontutojenna kasalang natuduangi ke'nanga anne taua, jari kuerammi mange ri Pangadelang Agamana tu Yahudia. 29 Kale'bakkanna a'nassai angkanaya tena sikali panggaukang salana ampassiratangi nihukkung mate yareka nitarungku. Iaji bawang nipassalangi ri ke'nanga, lanri atorang-atorang agamana tonji ke'nanga. 30 Nampa nia'mo tau ampabattuanga' angkanaya assikongkoloki tu Yahudia ero' ambunoi anne taua. Jari iaminjo saba'na nakukiring anne taua mae ri katte. Nale'ba'mi kupauang sikamma tau antuduai anne taua, sollanna battu andallekang ri katte ampabattui tuduhanna ke'nanga.” 31 Jari a'lampami anjo tantaraya ngaseng anggaukangi apa nipassuroanga ri ke'nanga. Mangemi ke'nanga angngallei Paulus, nampa naerang a'lampa bangngi sa'genna mange ri Antipatris. 32 Ammukona nalappassammi ke'nanga tantara padongko' jaranga ampatulusuki lampana siagang Paulus, nampa ammotere' ke'nanga mange ri kantoro' tantaraya. 33 Ri wattunna battu anjo tantara padongko' jaranga mange ri Kaisarea, napabattumi ke'nanga anjo suraka mae ri guburnurka, nampa napassareang todong Paulus mae ri ia. 34 Le'baki nabaca guburnurka anjo suraka, akkuta'nammi ri Paulus angkana battu kemaei assala'na Paulus. Nalangngere'na angkanaya anjo Paulus tau battu ri pa'rasangang Kilikia, 35 nakanamo, “Baji'mi! Lakuparessai anne parkaranu punna battumo mae anrinni anjo tau antuduako.” Le'baki anjo nasuro tahammi Paulus lalang ri balla' lompona Herodes.
24
1 Limang allo ribokoanganna, a'lampami Imang Lompo Ananias siagang pamimping-pamimpinna tu Yahudia mange ri Kaisarea. Angngerang tommi ke'nanga sitau pabicara niarenga Tertulus. Mangemi ke'nanga andallekang ri Guburnurka, iamintu Feliks, nampa napabattu tuntutanna ke'nanga mae ri Paulus. 2 Ri wattunna nikio' Tertulus mae ri dallekang, kammaminne batena antudui Paulus, nakana, “Tunipakala'birika, Guburnurka! Baku' nia'na irawang parentata, a'jari sannangi siagang salewangangi pa'rasanganna ikambe. Siagang lanri kabajikanta, jai tommi apa-apa le'ba' nipakabaji' untu' bansana ikambe. 3 Nayangasenna anne tuli nitarima ngasemmi siagang kasukkurang kammayatompa pappakalompo sitinggi-tinggina ri kere-keremae. 4 Mingka sollanna tena nala'bu dudu karaeng, kupalaki pa'mai' bajitta nakipilangngeri anne tuntutanna ikambe. Bodo kanana iaminne: 5 Anne taua pangacoi siagang akkullei angngerang bahaya. Kemae-kemae appa'nia' karicuang ri alla'na tu Yahudia. Siagang iami a'jari pamimpinna tu Nazaretka. 6 Ba'lalo le'baki ero' nara'massi Balla'Na Batara, mingka nijakkala'mi ri kambe. [Eroki ikambe angngadeli situru' atorang agamana ikambe. 7 Mingka niallei ri komandang Lisias battu ri kambe, 8 nampa nasuro sikamma tau eroka annuntu' battu andallekang ri katte.] Punna kiparessa anne taua, lakilangngere'mi kalenta battu ri ia, angkanaya ma'nassa kontutojengi anne apa natuntuka ikambe mae ri anne taua.” 9 Amminawang ngaseng tommi sikamma tu Yahudi niaka anjoreng antudui Paulus. Siagang napakkontu tojemmi ke'nanga sikamma anjo apa le'baka napau Tertulus. 10 Le'baki anjo nisaremi wattu Paulus ri anjo Guburnurka sollanna a'bicara. Jari a'bicarami Paulus nakana, “Kuassengi angkanaya attaung-taummi sallota a'jari haking anrinni ri pa'rasanganga karaeng. Iaminjo saba'na nasannang nyawaku ero' a'bicara ampakasingaraki ri dallekang mala'biritta angkanaya tena nakusala. 11 Kalenta akkulle ansalidiki karaeng, angkanaya sampulo anrua allonna allaloa, a'lampa' mange ri Yerusalem, ero' assambayang. 12 Nakutale'baka narapikang anjo sikamma tu Yahudia a'gea'-gea' siagang manna sitaua tau; yareka tena le'bakai ke'nanga anrapikanga' ampa'rappungangi taua ero' appa'nia' karicuang, baji' nailalang ri Balla'Na Batara kammayatompa ri tampa'-tampa' maraenga lalang ri kotaya. 13 Siagang tena todong nakkulle napa'butti sikamma anjo apa natuduanga' ke'nanga ri dallekanta. 14 Mingka memang musti kuakui ri dallekanta, angkanaya anynyomba' mae ri Allata'ala nasombaya boe-boena ikambe situru' apa Napangngajarranga Isa; na iaminjo nabilang sala ke'nanga mae ri nakke. Mingka tuli tappa' tonja' mae ri sikamma apa tattulisika lalang ri Kitta'na Musa siagang Kitta'na Na'bi-na'bia. 15 Sangkamma ke'nanga, inakke tappa' tonja' mae ri Allata'ala, angkanaya sikontu tau matea lattallasa' poleangi ammotere' — iamintu sikamma tau bajika kammayatompa sikamma tau ja'dalaka! 16 Iaminjo saba'na natuli kuusahai baji'-baji', sollanna tangkasa' atingku mae ri Allata'ala siagang tangkasa' mae ri parangku rupatau. 17 Le'baki pirang taung are kubokoi Yerusalem, ammotere'ma' mange anjoreng angngerang doe' bantuang mae ri bansaku, siagang ero' angngerang koro'bang mae ri Allata'ala. 18 Mingka narapikamma' ke'nanga ri wattunna kuerang anjo koro'banga ri Balla'Na Batara, siagang ri wattungku le'ba' antangkasi kalengku. Tena najai tau kuagang, siagang tena todong karicuang anjoreng anjo wattua. 19 Nia' siapa are bawang tu Yahudi battu ri daera Asia, anjo wattua. Iaji anjo ke'nanga musti nia' anrinni antuntuka' ri dallekanta, punna nia' apa-apa lanatuntukanga'. 20 Yareka boli'mi kamma nakalenta ngaseng anne taua ampa'butti angkanaya kaja'dallang apa nagappa ri kalengku, ri wattungku niadeli ri dallekanna Pangadelang Agamaya. 21 Iaji bawang nagappa ke'nanga ri kalengku, anne kana sirupaya, iamintu ri wattu kukanana ri dallekanna ke'nanga, angkanaya: anne alloa niadelia' passabakkang tappaka' angkanaya lanipattallasa' poleangi ammotere' tau matea.” 22 Anjo Feliks, jaimi naasseng apa le'baka Napangngajarrang Isa. Jari natongko'mi anjo sidanga nakana, “Battupi komandang Lisias nampa kutappuki anne parkaraya.” 23 Le'baki anjo nasuromi anjo perwiraya angngerangi Paulus, sollanna nitahang ija. Mingka nisarei sike'de' kalonggangang Paulus, siagang tena nipisangkai punna nia' agang-aganna battu ampangngerangangi apa-apa naparalluanga. 24 Pirangallo are ribokoanganna, battumi Feliks siagang bainenna niarenga Drusila; anne Drusila tu Yahudi. Nasuromi Feliks taua angngallei Paulus, nampa nasuro Paulus ambicarai nikanaya katappakkang mae ri Isa Almasi. 25 Mingka ri wattunna narapi' nabicara Paulus passala' kalambusanga siagang antahangi kacinnanga, kammayatompa passala' hukkungang labattua punna Allo Kiama', a'jari malla'mi Feliks. Jari nakanamo Feliks, “Kamma-kamma anne akkulle mako a'lampa. Lakusuro kio' jako antu pole punna nia' wattu.” 26 Naanjo wattua attayangi Feliks ri pa'mai'na angkana lanisarei doe' ri Paulus. Iaminjo saba'na na'mole-mole nasuro taua angngallei Paulus ero' angngagangi a'bicara. 27 Ruan taungi sallona, nisambeammi Feliks ri Perkius Festus a'jari Guburnur. Na lanri ero'na Feliks angngallei pa'mai'na tu Yahudia, natahang tulimi Paulus lalang ri tarungkua.
25
1 Tallungalloi battuna Festus, mange anjoreng ri daeraya, nabokoimi Kaisarea nampa a'lampa mange ri Yerusalem. 2 Battumi mae ri ia imang-imang kapalaya siagang pamimping-pamimpinna tu Yahudia anjoreng, ampabattui tuntutanna ke'nanga mae ri Paulus. Tuli nanyonyo'mi ke'nanga Festus, 3 siagang napala'mi ke'nanga pa'mai' baji'na, sollanna ero' assuro erangi Paulus mange ri Yerusalem; nasaba' le'ba'mi assikongkolo' ke'nanga ero' ambunoi Paulus ri tangngana aganga. 4 Mingka appialimi Festus nakana, “Kamma-kamma anne nitahangi Paulus ri Kaisarea; natena tommo nasallo nakuammotere' mange anjoreng. 5 Jari, bajikangangi punna nia' siapa are pamimpinnu kuagang mange ri Kaisarea nampa nibicara anjo parkaraya anjoreng, punna ma'nassa nia' tojeng panggaukang salana Paulus.” 6 Kira-kira narapiki sagantuju allo yareka sampulo allo pole ammantang ri Yerusalem, ammotere'mi Festus mange ri Kaisarea. Ammukona appare'mi sidang ri pangadelanga, nampa nasuro erang Paulus battu andallekang. 7 Ri wattunna battu Paulus, ammentemmi anjo sikamma tu Yahudi battua ri Yerusalem angkulilingi Paulus. Nampa appakkaramulamo ke'nanga antudui siagang ambattalli Paulus. Mingka takkulleai ke'nanga ampa'butti anjo sikamma tuduhang napaua ke'nanga. 8 Ri wattunna napakasingara' kalenna Paulus nakanamo, “Tena sikali apa-apa sala le'ba' kugaukang mae ri sikamma apa-apa le'baka Napassuroang Allata'ala, situru' le'baka napabattu Musa. Tena todong panggaukang sala le'ba' kugaukang mae ri Balla'Na Batara, yareka mae ri Karaenga ri Roma.” 9 Mingka eroki Festus angngallei pa'mai'na anjo tu Yahudia. Jari akkuta'nammi ri Paulus nakana, “Maka erokko a'lampa mange ri Yerusalem nampa niadeliko anjoreng ri dallekangku ri passala'na sikammaya anjo tuduhanga mae ri kau?” 10 Appialimi Paulus nakana, “Kamma-kamma anne niakka' ammenteng ri dallekanna pangadelanna Karaenga ri Roma; jari anjoremma' ri tampaka siratang niadeli. Kalentami angngassengi angkanaya tena salaku mae ri tu Yahudia. 11 Punna nia' atorang le'ba' kudakkai siagang nia' panggaukang sala le'ba' kugaukang, nakusiratang nihukkung mate, lakurellakangi kalengku nihukkung mate. Mingka punna tannabaya tuduhanna ke'nanga, tena manna sitau akkulle ampassareangi kalengku mae ri ke'nanga. Kupalaki nakuniadeli ri pangadelanna Karaenga ri Roma!” 12 Le'baki sipa'bicara Festus siagang tutoa-tutoa biasaya napappalaki pikkirang, nakanamo mae ri Paulus, “Lanri nupalaki niadeli ri pangadelanna Karaenga ri Roma, jari musti a'lampako mange andallekang ri Karaenga.” 13 Tasalloai ribokoanganna, niaki battu Karaeng Agripa siagang Bernike ero' ampasalamaki Festus. 14 Narapiki pirangallo are ke'nanga nia' ri Kaisarea, nacaritami Festus anjo parkarana Paulus mae ri Karaeng Agripa. Nakana Festus, “Nia' anrinni sitau tahanang nabolika Feliks. 15 Ri wattungku nia' ri Yerusalem, battui ri nakke imang-imang kapalaya siagang pamimping-pamimpinna tu Yahudia antuntuki siagang ansuro hukkungi anjo taua. 16 Mingka appialima' ri ke'nanga angkanaya tabiasayai tu Romaya ampassareang bawang-bawangi nihukkung se'rea tu nitudu, punna tenapa nanipasidallekangi siagang balinna, kammayatompa punna tenapa nisarei wattu anjo tu nitudua a'bicara ampakasingaraki kalenna. 17 Jari, ri wattunna battu ke'nanga mae anrinni tenamo kusallo attayang. Ammukona appare' memamma' sidang pangadelang, nampa kusuro erang anjo taua andallekang. 18 Ri wattunna ammenteng sikamma tau antuduai ampaui tuntutanna ke'nanga, takkulleai ke'nanga ampa'butti manna sirupa, angkana apa panggaukang salana anjo taua. 19 Assisala pahannaji ke'nanga ri passala' agamana ke'nanga, siagang passala' se'rea tau niarenga Isa. Anjo taua matemi mingka naterassi Paulus angkana attallasaki anjo taua. 20 Nasaba' lingua' kusa'ring angkana antekamma bateku langgappa kasingarang ri anne parkaraya, akkuta'namma' ri Paulus angkana maka eroki a'lampa mange ri Yerusalem. Anjorempi niadeli anne parkarana. 21 Mingka napalaki Paulus sollanna nai' ri pangadelang lompoanganga; napalaki ammantanga ri tahananga sa'genna natappuki Karaenga ri Roma anjo parkarana. Iaminjo saba'na nakusuro tahang tuli, sa'gengku anggappa kasampatang angkiringi mae ri Karaenga.” 22 Nakanamo Agripa mae ri Festus, “Manna inakke ero' tonga' allangngereki bicaranna anjo taua.” Appialimi Festus nakana, “Ammuko akkullei kipilangngeri.” 23 Ammukona, battumi Agripa siagang Bernike siagang ada' kalompoang. Antama'mi ke'nanga ri pammantangang sidanga siagang sikamma tumalompona tantaraya, kammayatompa tumalompona anjo kotaya. Nasuro erammi Festus antama' Paulus. 24 Nampa nakana Festus, “Tunipakalompoa Agripa, siagang sikontu tau hadereka! Anne taua le'ba'mi nituntu' ri dallekangku ri sikontu bansa Yahudia, baji' ia niaka ri Yerusalem kammayatompa niaka anrinni. Ammarrang-marrammi ke'nanga antuntuki anne taua angkanaya tena nasiratang nipa'biang attallasa' anne taua. 25 Mingka tena kugappa manna sirupa panggaukang sala le'ba' nagaukang anne taua, sa'genna siratang nihukkung mate. Na lanri kammana, le'ba'mi napala' kalenna, sollanna anjoreng ri pangadelanna Karaenga niadeli parkarana. Jari le'ba'mi kutappuki sollanna nikiring anne taua mae ri Karaenga ri Roma. 26 Mingka tenapa kugappa kasingarang baji' dudu, ri passala' batangkalenna anne taua, akkullea kutulisi' lalang sura' mae ri Karaenga. Lanri kammana minjo nakuerang battu andallekang ri dallekanta ngaseng, la'biangampa ri dallekanna tunipakala'birika Karaeng Agripa! Pattujungku iamintu, sollanna punna le'ba'mo niparessa anne taua, akkullema' anggappa kasingarang angkana apa lakutulisi' lalang ri suraka mae ri Karaenga ri Roma. 27 Nasaba' situru' ri pakkasiakku, tena nasiratang nikiring se'rea tahanang punna tena nanipa'nassai angkanaya apa-apa kasalanna nanituntuki.”
26
1 Nakanamo Agripa mae ri Paulus, “Kamma-kamma anne nisareko kasampatang a'bicara, untu' ampakasingaraki kalennu punna tena nusala.” Jari naangka'mi limanna Paulus nampa a'bicara kamma anne. 2 “Tunipakala'birika Karaeng Agripa! Kubilang upa' sikali kusa'ring kalengku, lanri akkulleku a'bicara ri dallekang mala'biritta ri passala' sikammaya anjo apa-apa napappituduanga tu Yahudia mae ri nakke; 3 la'biangampa pole nasaba' kiasseng sikali ada'-ada'na siagang passa'-passala'na katallassanna tu Yahudia. Lanri kammana minjo, kupalaki pa'mai' bajitta nakipilangngeri baji'-baji' anne apa eroka kupakasingara'. 4 Naasseng ngasengi sikamma tu Yahudia angkana antekamma katallassangku appakkaramula ri wattungku rungka. Naassengi ke'nanga angkanaya appakkaramula ri wattungku a'jari tau rungka, nia'ma' ri tangnga-tangngana bansaku ri Yerusalem. 5 Sallomi naasseng ke'nanga angkanaya antekamma katallassangku. Na punna ero' ke'nanga, akkullei ke'nanga a'jari sa'bi angkanaya riolo iji nakuattallasa'mo sangkamma tu Farisi, siagang kuturuki ngasemmi sikontu atorang-atorang kaminang terasaka lalang ri agamana ikambe. 6 Na kamma-kamma anne niakka' ammenteng anrinni niadeli passabakkang tappakka' mae ri janjinNa Allata'ala mae ri boe-boena ikambe. 7 Ia tomminjo janjia le'ba' naminasai dudu sampuloa anrua suku bansa Israel. Sa'genna assambayang ke'nanga ri Allata'ala allo bangngi. Na lanri tappakku mae ri anjo janjia, Karaeng Tunipakala'birika, iaminjo nakunapassala mamo tu Yahudia. 8 Angngapa natakkullea tappa' sikamma sari'battangku tu Yahudia angkanaya laNapattallasa' poleangi ammotere' Allata'ala tau matea? 9 Uru-uruna, manna inakke kukana tonja musti nigaukangi sikamma apa nikullea nigaukang angngewai anjo Isa battua ri Nazaret. 10 Na memang iaminjo le'baka kugaukang ri Yerusalem. Lanri sura' koasa battu ri imang-imang kapalaya, jai sikalimi tau jarre' tappa'na ri Allata'ala le'ba' kupantama' ri tarungkua. Ba'lalo, kusitujui tongi sollanna nihukkung mate ke'nanga. 11 A'mole-mole sikali kusessa ke'nanga ri sikamma balla' sambayanga, lanri ero'na kupassa ke'nanga ambokoi anjo apa napatappaka ke'nanga. Lanri bambanna nyawaku mae ri ke'nanga, sa'genna manna mange ri kota-kota maraenga a'lampa tonja' angngondangi ke'nanga anjoreng.” 12 “Iatommi anjo pattujungku nakua'lampamo mange ri Damsyik siagang angngerang sura' koasa battu ri imang-imang kapalaya. 13 Na ri wattungku ri tangngana aganga, Karaeng Tunipakala'birika, kira-kira ri attangngana alloa, nia'mo kucini' singara' battu rate ri langika, singaranganga cayana namatanna alloa. Accayami anjo singaraka angkulilingia' siagang sikamma anjo tau kuaganga a'rurung. 14 Tu'guru' ngaseng maki' naung ri buttaya. Nampa nia'mo kulangngere' sa'ra a'bicara mae ri nakke lalang bicara Ibrani nakana, ‘Saulus, Saulus! Angngapa natuli nusessa kamma duduA'? Ikau tonji langkasiaki pa'risika punna tuli nuewana pimpinanNa a'jaria karaennu.’ 15 Jari kukanamo, ‘INaiki' antu Karaeng?’ Appialimi Batara Nakana, ‘INakkemi Isa, tuli nusessaya. 16 Ambangungko siagang ammentengko nai'! Kupappicinikangi KalengKu lanri erokko Kupicinikiang angkana apa saba'na naKuangkakko a'jari palayangKu. Musti nupa'la'bangi mae ri tau maraenga apa nucinika anne alloa. Iamintu passala'na KalengKu, siagang passala'na apa laKupicinikiangko sallang ri allo labattua. 17 LaKulappassangko battu ri limanna bansa Israelka siagang bansa-bansa maraenga. LaKusuroko a'lampa mae ri ke'nanga, 18 untu' ansungkeangi matanna ke'nanga, sollanna akkulle assulu' ke'nanga battu ri sassanga nampa antama' ri singaraka; sollanna ta'lappasa' ke'nanga battu ri pangngajara' salana Billisika, nampa nikoasai ke'nanga ri Allata'ala. Na lanri tappa'na ke'nanga mae ri Nakke, naKupammopporammo dosa-dosana siagang la'jarimi ke'nanga umma'Na Allata'ala nipilea.’ ” 19 “Jari lanri kammana, Karaeng Agripa, tuli kuusahaimi nikanaya amminawang turu' mae ri anjo apa le'baka nipicinikianga' siagang kutarimaya battu ri Allata'ala. 20 Kupaumi silambusu'na mae ri taua angkanaya musti toba' ngasengi ke'nanga battu ri massing dosa-dosana. Musti napassareangi tallasa'na ke'nanga mae ri Allata'ala. Siagang musti napa'butti lalang ri katallassanna ke'nanga, angkanaya ma'nassa toba' tojeng-tojemmi battu ri dosa-dosana ke'nanga. Uru-uruna anjorengi ri Damsyik kupau anne passalaka. Le'baki anjo nampa ri Yerusalem, siagang ri sikontu Yudea, ri tangnga-tangngana bansa maraenga. 21 Jari iaminjo saba'na nanajakkalaka' tu Yahudia ri Balla'Na Batara, siagang naero'mo ke'nanga ambunoa'. 22 Mingka sa'genna kamma-kamma anne tuli nijagaia' ri Allata'ala, sa'gengku akkulle ammenteng anrinni, a'jari sa'bi mae ri sikamma taua — baji' natau lompo kammayatompa tau ca'dia. Anne apa kupaua tena le'ba' sisalana siagang apa-apa le'baka nasero kana na'bi-na'bia siagang Musa; 23 iamintu angkanaya musti sessai anjo Karaeng Mappasalama' le'baka Napa'janjiang Allata'ala, siagang Iami la'jari tau uru-uru attallasaka ammotere' battu ri kamateanga. Sollanna lanri kammana anjo, akkullemi Napabattu kasalamakkanga, baji' namae ri tu Yahudia, kammayatompa mae ri bansa-bansa maraenga.” 24 Lalang a'bicara kammana Paulus ampakasingaraki kalenna, ammarrammi Festus nakana, “Pongoro' mako antu Paulus! Napa'jari pongoro' mako anjo pangngassengannu jai dudua!” 25 Mingka appialimi Paulus nakana, “Tena nakupongoro', karaeng. Anjo bicara kupaua sangnging bicara annaba, siagang sangnging battu ri pikkirang baji'. 26 Kalenna Karaeng Agripa angngasseng bajiki sikamma anjo passalaka. Iaminjo saba'na nakubarani a'bicara silambusu'na ri dallekanna karaenga. Tappaka' angkanaya tena manna sirupa anjo passalaka tanaassengapa karaenga, nasaba' tena nanjoreng ri tampa' kacokkoanga kajariang sikamma anjo passalaka. 27 Tunipakala'birika Karaeng Agripa, maka tappakki' mae ri anjo apa-apa le'baka napau na'bi-na'bia? Pakkasiakku kukana tappakki' Karaeng!” 28 Nakanamo Agripa mae ri Paulus, “Nukana gampanga' lanupa'jari tu Karisteng silalonna?” 29 Appialimi Paulus nakana, “Ri wattu silalonna yareka lalang wattu salloa, appala' doanga' mae ri Allata'ala sollanna ikatte siagang sikamma tau hadereka appilangngeri anne alloa, akkulle ngasengki' ajari sangkamma inakke — pantaranganna anne rante assikkoka'!” 30 Kala'busanna ammentemmi Karaenga, Guburnurka, Bernike, siagang sikamma tau hadereka. 31 Battui ke'nanga assulukang, massing nakanamo para ia ke'nanga, “Anjo taua tena sikali panggaukang sala nagaukang ampassiratangai nihukkung mate yareka nitarungku.” 32 Nakanamo Agripa ri Festus, “Anjo taua akkullemi nilappassang ka'de' tena nanapalaki niadeli parkarana ri pangadelanna Karaenga ri Roma.”
27
1 Le'ba'mi nitappuki angkanaya musti a'lampa maki' mange ri Italia. Jari nipassareammi Paulus siagang siapa are tahanang maraenga mae ri Yulius, iamintu perwira tantara Roma nigallaraka “Pasukanna Karaenga”. 2 Nai' maki' ri kappalaka ri Adramitium nampa a'lampa maki' assombala'. Anjo kappalaka eroki assombala' mange ri sikamma palabuhang niaka ri daera Asia. Nia' tongi Aristarkhus angngagangki' irate ri anjo kappalaka. Anne Aristarkhus tau battu ri Makedonia. 3 Ammukona, battu maki' mange ri Sidon. Anjo Paulus nikatutui bajiki ri Yulius. Nisarei kasampatang Paulus mange angkunjungi agang-aganna sollanna akkulle nisare ri ke'nanga apa-apa naparalluanga Paulus. 4 Battu anjoreng ri Sidon nipatulusu'mi assombala'. Mingka lanri niruppaiki' ri anging, anjoreng maki' ri birinna pulo Siprus annarrusu' assombala', lanri ta'linrungi sike'de' ri anging anjoreng. 5 Le'baki anjo assombala' maki' ri tamparang sidallekanga siagang Kilikia na Pamfilia, sa'genta battu mange ri Mira, pa'rasangang Likia. 6 Anggappami perwiraya kappala' battu ri Aleksandria, eroka mange ri Italia. Jari nipalette' maki' ri anjo perwiraya mange anjoreng ri kappalaka. 7 Pirangallo are sallota sanna' lansanta assombala'. Sanna' susata assombala' nampa akkulle nirapi' sa'genna kota Knidus. Nampa lanri kodina ija anginga, takkullea maki' annarrusu' assombala' situru' oloang nitujua uru-uruna. Jari a'lampa timboro'na maki' Pulo Kreta assombala', allalo ri Tanjung Salmone, sollanta ta'linrung ri anginga anjoreng. 8 Sanna'mi susata assombala' antulakkangi birinna anjo puloa; sa'genta anrapi' mange ri se'reang tampa' niareng Palabuhang Ga'ga, tenaya nabella battu ri kota Lasea. 9 Anjo wattua allalomi Allo Lompo Passiamakkanna tu Yahudia. Jai sikalimi wattu tappela', sa'genna tabajikami nisa'ring wattua assombala'. Jari nipakainga'mi ke'nanga ri Paulus, angkana, 10 “Sikamma sari'battangku, turu' ri panggappaku, lompo sikali bahayana punna annarrusu' ijaki assombala'. Langgappaki' karugiang lompo. Teai poro karugiang barang-barang siagang kappala', mingka manna nyawata akkulle todong tappela'.” 11 Mingka tappakangangi anjo perwiraya mae ri jurumudia siagang kapiteng kappalaka, na mae ri kananna Paulus. 12 Tena memang nabaji' napammantangi kappala' anjo palabuhanga punna wattu dinging. Iaminjo saba'na najaiangang ana'-ana' kappalaka erokangang a'lampaya pole assombala' ambokoi anjo palabuhanga. Eroki nausahai ke'nanga anrapi' mange ri Feniks nampa ammantang anjoreng sa'genna allalo wattu dinginga. Feniks, iamintu palabuhang ri Pulo Kreta a'dalle' mangei ri warakkanna sike'de' ri tampa' labuna alloa. 13 Anjo wattua battu timboroki anginga siagang lammai nisa'ring battuna. Jari nakana ana'-ana' kappalaka akkullemi ke'nanga assombala' pole. Jari assombala'mi ke'nanga antulakkangi birinna Pulo Kreta. 14 Mingka tasalloai, battumi anging lompoa — iamintu niarenga anging Battu Timboroka — battu rate ri bontoa, 15 antunrungi kappala'na ikambe. Tena sikalimo nikkulle assombala', anruppai anjo anginga. Jari sa'bara' mamaki', nanilappassang mamo ammanyu' kappalaka nierang ri anging. 16 Ri wattunta allalo ri se'reang pulo ca'di, ri timboranna pulo niarenga Kauda, ta'linrung maki' sike'de' ri anginga. Anjorenta teaimi sipato' susata angngurusuki linta' sikocina kappalaka. 17 Le'baki nipanai' sikocia ri kappalaka, nipakajarre' tommi kappalaka; nisikko' siagang nipakaluki otere'. Mallakki' nianyukang mange anjoreng ri pammantangang ambawaya, iamintu kassi'na Sirtis. Jari nipanaummi sombalaka nampa nilappassang kappalaka ampinawangi anginga. 18 Pila' sanna'mi lompona anginga. Sa'genna ammukona nipela'mi barang-baranga naung ri tamparanga. 19 Allo ammukona pole napela' tommi ana'-ana' kappalaka pakkakasa'-pakkakasa'na kappalaka naung ri tamparanga. 20 Pirangallo aremi sallona tena nakiaccini' allo siagang bintoeng. Kammayatompa pila' a'jallo' tommi anginga. Kala'busanna, tappu' panrannuang maki' lasalama'. 21 Siapa aremi sallona tena ngaseng nangnganre taua. Jari mangemi Paulus ammenteng ri tangnga-tangngana ke'nanga nampa nakana, “Sikamma sari'battangku! Ka'de' nupilangngeri kanangku natanibokoia Kreta, tenaja nalanikasia' ngaseng anne kapanrakanga siagang karugianga. 22 Mingka kamma-kamma anne kupala' dudui pole mae ri kau ngaseng, sollanna nupakalompo ngaseng pa'mai'nu. Tenapa manna sitau battu ri katte lamate. Iaji anne kappalaka bawang latappela'. 23 Nasaba' ri bangngia niaki malaeka'Na Allata'ala battu mae ri nakke, iamintu Allata'ala kusombaya, Allata'ala makoasaya mae ri kalengku. 24 Nakana anjo malaekaka, ‘Teako mallakki Paulus! Nasaba' lamangeko andallekang ri Karaenga ri Roma. Lanri kabajikanNa Allata'ala mae ri kau, nasikontu anne tau nuaganga assombala', lanipasalama' ngasengi passabakkang ikau.’ 25 Lanri kammana minjo, sari'battangku ngaseng, parallui nupakalompo pa'mai'nu! Nasaba' tappaka' ri Allata'ala angkanaya laNapa'rupa ngasengi anjo kana le'baka Napabattu mae ri nakke. 26 Mingka lanianyukangki' sallang mange ri biring ri se'reang pulo.” 27 Ri bangngi makasampulona angngappa', ammawang-mawang mami kappalaka ri Tamparang Adria. Kira-kira ri wattu lantanna bangngia nakanamo pakkasia'na ana'-ana' kappalaka angkana a'reppese'mi kappalaka mange ri bontoa. 28 Jari naukkuru'mi siagang otere' nagentungi batu anjo tamparanga. Nania' tojeng mamo kira-kira patampulo metere' lantanna anjo tamparanga. Tasalloai naukkuru'mi pole ke'nanga tampa' nirapika, nania' mamo tallumpulo metere' lantanna. 29 Malla'mi ke'nanga gassingka tassambangi kappalaka mae ri batu karanga. Jari appanaummi ke'nanga appa' jangkara' ri bokona kappalaka. Na'minasamo ke'nanga sollanna linta'mo singara'. 30 Ero'mi a'lampa cokko-cokko anjo ana'-ana' kappalaka ambokoi kappalaka. Napanaummi ke'nanga sikocia, assara-sarai ero' appanaung jangkara' battu ri ulunna kappalaka. 31 Mingka nakanamo Paulus ri anjo perwiraya siagang sikamma anjo tantara niaka ri kappalaka, angkana, “Punna tammantanga anjo ana'-ana' kappalaka anrinni ri kappalaka, tena ngaseng nulasalama' battu ri anne bahayaya.” 32 Jari mangemi tantaraya angkereki otere'na anjo sikocia, sa'genna ammanyu' anjo sikocia. 33 Ri wattunna a'birimmo ammumbamo alloa, nasuromi Paulus angnganre ngaseng taua. Nakana Paulus, “Sampulomi anggappa' allonna tuli attayang jako bawang lalang malla'nu, nanutangnganrea apa-apa. 34 Kupakaingakko sollannu angnganre sike'de'. Anne untu' kabajikannu ngaseng, sollannu anggappa ammotere' kagassingang. Nasaba' lasalama' ngasengko nutangngapa-apa.” 35 Le'baki akkana kamma Paulus, angngallemi roti nampa appala' sukkuru' mae ri Batara ri dallekanna ngaseng ke'nanga. Nampa napa'bage-bageang anjo rotia, nanakanre anjo rotia. 36 A'jari lompo ngasemmi ammotere' sumanga'na ke'nanga, siagang massing angnganre tommi ke'nanga. 37 Nia' ruambilangngang tujupulo angngannang jaina anjo taua ri kappalaka. 38 Le'baki angnganre ngaseng ke'nanga, napela'mi gandung niaka naerang anjo kappalaka naung ri tamparanga, sollanna a'jari ringang anjo kappalaka. 39 Ri wattunna singara'mo, accini'mi bonto ana'-ana' kappalaka, mingka tanaassengai ke'nanga angkana apa arenna anjo bontoa. Nia' nacini' ke'nanga bonto ca'di siagang birinna. Jari ero'mi ke'nanga angngerangi kappalaka mange anjoreng punna akkulleja. 40 Jari nipolommi otere'na ngaseng jangkaraka, nampa nilappassang tallang naung ri tamparanga. Nampa nalappassang ngaseng todong ke'nanga passikko' calagana anjo kappalaka. Le'baki anjo napanai'mi ke'nanga sombalaka ri ulunna kappalaka sollanna nierang ri anging kappalaka mange anjoreng ri birinna bontoa. 41 Mingka ta'lappoi kappalaka mae ri kassi' rawanganna anjo tamparanga. Tassangkala'mi ulunna kappalaka sa'genna takkulleami a'gio'. Na ia bokona kappalaka ancuru'mi nitunrung ri bombang lompo. 42 Ero'mi anjo tantaraya ri kappalaka ambuno ngasengi sikamma tunitahanga, lanri nakamallakkangi angkana gassingka nia' tunitahang a'lange mange ri bontoa nampa lari. 43 Mingka nipisangkai ke'nanga ri perwiraya, lanri ero'na napasalama' Paulus. Nasuro ngasemmi tau akkullea a'lange a'lumpa' rolong naung nampa a'lange mange ri birinna bontoa; 44 ia maraenganga amminawang bokoi anna'gala' ri papang-papanga, yareka apa-apa maraenganna anjo kappala' ancurukamo. Kammaminjo bateta sa'genta akkulle salama' ngaseng battu mange ri bontoa.
28
1 Ri wattunta salama' ngasemmo battu nai' ri bontoa, nampami niasseng angkana Malta arenna anjo puloa. 2 Sanna' ngaseng baji'na tuma'buttana anjo puloa mae ri kambe. Natarima maki' baji'-baji' siagang naparinrang maki' pepe' nasaba' appakkaramulami turung bosia kammayatompa sanna' tommo dinginna pakkasiaka. 3 Appasse'remi Paulus kayu-kayu, nampa napadongko' anjo kayua rate ri pepeka. Ri wattunna napadongko' anjo kayua ri pepeka, ti'ring nia'mo sikayu ulara' assulu' napakamma bambanna anjo pepeka. Nanitotto'mo limanna ri anjo ularaka. 4 Nacini'na tuma'buttaya anjoreng ri anjo puloa ta'gentung anjo ularaka ri limanna Paulus, massing nakanamo ke'nanga, “Ma'nassa pabuno tau anne taua. Nasaba' manna pole ta'lappasa'mi battu ri bahaya ri tamparanga, mingka tena nikellai attallasa' ri Dewi Kaadelanga.” 5 Mingka nasoeammi Paulus anjo ularaka antama' ri pepeka siagang tena sikali manna sike'de' pa'risi'na nakasia'. 6 Napikkiriki tuma'buttaya anjoreng angkanaya tasalloami nakkambang limanna Paulus, yareka anra'ba naung nampa mate. Mingka sallo-sallomi ke'nanga attayang natenaja apa-apa kajariang ri kalenna Paulus. Jari appakkaramulami amminra pikkiranna ke'nanga, nampa nakana rewata kutadeng anjo Paulus. 7 Tena nabella anjoreng ri tampaka, nia' buttana tuniarenga Publius, iamintu kapala sukuna taua ri anjo puloa. Natarima baji' maki' Publius, napare' kamma toananna tallungallo sallona. 8 Anjo wattua sitabangi nataba garring rammusu' manggena anjo Publius. Jari a'lampami Paulus antoaki anjo tau garringa. Napadongko'mi limanna irateanganna anjo tau garringa nampa appala' doang, sa'genna a'jari baji'mo silalonna anjo taua. 9 Lanri nia'na anjo kajarianga, nierang ngasemmi sikamma tau garringa ri anjo puloa mae ri Paulus. Naniballei ngasemmo ke'nanga sa'genna a'jari baji'. 10 Jaimi hadia nasareangki' ke'nanga. Na ri wattunta ero'mo a'lampa assombala' battu ngasemmi ke'nanga mange ri kappalaka ampangngerangangki' sikamma apa-apa niparalluia sallang ri tangngana dolanganga. 11 Tallum bulangki' ammantang anjoreng, nampa a'lampa maki' ambokoi anjo puloa. Nai' maki' ri se'reang kappala' battu ri Aleksandria, niaka ammantang anjoreng ri palabuhanna anjo puloa lalanna wattu dinginga. Anjo kappalaka ammakei gambara' “Rewata Kambara'na Kastor siagang Poluks.” 12 Ammantang maki' tallungallo ri palabuhanna kota Sirakusa. 13 Battu anjoreng maki' assombala' pole antulakkangi biring tamparanga sa'genta battu mange ri kota Regium. Ammukona, appakkaramulami battu anging battu timboroka, sa'genna lalang ruangallona anrapi' maki' mange ri kota Putioli. 14 Anjoreng ri kota Putioli assigappa maki' siagang siapa are tu tappa' ri Isa. Nakio' maki' ke'nanga mange ri balla'na. Nakiammantammo siagang ke'nanga sidaminggu sallona. Le'baki anjo a'lampa maki' mange ri kota Roma. 15 Anrapi'mi kabaratta mange ri sikamma sari'battang tappaka ri Isa ri Roma. Jari battumi ke'nanga sa'genna ri Pasara' Apius siagang Pasanggarahang Tallu, ero' anruppaiki'. Ri wattunna assibuntulu'mo Paulus siagang ke'nanga, appala' sukkuru'mi Paulus mae ri Allata'ala. A'jari sannammi pa'mai'na. 16 Ri wattunna battu mange ri Roma nipa'biammi Paulus ammantang akkale-kale siagang nijagai ri sitau tantara. 17 Narapiki tallungallo nia' ri Roma, nasuro kio'mi Paulus pamimping-pamimpinna tu Yahudia anjoreng. A'rappunganna ngasemmo ke'nanga, nakanamo Paulus mae ri ke'nanga, “Sikamma sari'battangku! Tena apa-apa kasalangku mae ri bansata, yareka mae ri ada'-ada' nitarimaya battu ri boe-boeta. Mingka manna natena salaku nijakkala' tonja' ri Yerusalem, nampa nipassareanga' mae ri tu Romaya. 18 Le'baki niparessa parkaraku, ero'mi ke'nanga allappassanga', nasaba' ma'nassa tena manna sirupa gau' sala kugaukang ampassiratanga' nihukkung mate. 19 Mingka lanri annuntu'na tu Yahudia, tarpassa kupala'mi sollanna ri pangadelanna Karaeng Roma niadeli anne parkaraku. Mingka nakupala' kammaya, teai lanri erokku antuntuki bansaku. 20 Jari iaminjo saba'na nakuero' angngagang ngasengko assibuntulu' siagang angngagang ngasengko a'bicara. Nasaba' iaji nanisikkoka' kapassabakkang Karaeng Mappasalama' salloamo naminasai bansa Israel.” 21 Nakanamo ke'nanga ri Paulus, “Tena le'bakapaki' annarima sura' manna silawara' battu ri Yudea ri passala'na batangkalennu. Siagang tenapa manna sitau battu mae anrinni angngerangi kabara'nu, yareka ambicara kodiko. 22 Mingka ero' tonjaki' anne allangngereki anjo apa nupatappaka, nasaba' nalangngere'mi ikambe antekamma batena nicalla anjo ajarang nupatappaka.” 23 Jari appattantumi ke'nanga siagang Paulus se're allo untu' a'rappungang pole. Anjo alloa jai tau battu mange ri pammantanganna Paulus. Battu ri bari'basa' sa'genna karueng napakasingara'mi siagang napabattumi Paulus anjo biritta battua ri Allata'ala siagang Pamarentahanna. Napakemi Paulus apa-apa niaka tattulisi' lalang ri Kitta'na Musa siagang Kitta'na Na'bi-na'bia, ampakasingariangi ke'nanga sollanna a'jari tappa' ke'nanga mae ri Isa. 24 Nia'mo ke'nanga a'jari tappa' ri anjo apa napabattua Paulus, mingka nia' tommo tena natappa'. 25 Ri wattunna a'lampa ngasemmo ke'nanga ambokoi anjo tampaka massing sisalami panggappana ke'nanga. Nasaba' nakana Paulus mae ri ke'nanga, “Memang annaba sikali apa le'baka Napau RohNa Allata'ala lalang ri Na'bi Yesaya mae ri boe-boenu! 26 Nakana RohNa Allata'ala, ‘A'lampako mange ampaui ri anne bansaya: Tuli lamallangngere'nu ngaseng, mingka tanupahangai; tuli lamaccini'nu ngaseng, mingka tanuassengai apa kajarianga. 27 Nasaba' a'jari pokkolo'mi pikkiranna anne bansaya, nijempammi tolinna ke'nanga, siagang nitongko'mi matanna ke'nanga. Nasaba' punna tena nakamma, mattantu lamaccini'ji matanna ke'nanga, lamallangngere'ji tolinna ke'nanga, lammahanji atinna ke'nanga, siagang lammotere'mi ke'nanga mae ri Nakke, nampa Kupa'jari baji' ke'nanga ammotere',’ kammaminjo kananNa Allata'ala.” 28 Kala'busanna, nakanamo Paulus, “Musti nuasseng ngasengi sari'battang, angkanaya nipabattumi anne kabara' kasalamakkang battua ri Allata'ala mae ri bansa-bansa maraenga. Nalanapinawammo ke'nanga anne kabaraka!” [ 29 Le'baki akkana kamma Paulus, a'lampa ngasemmi anjo tu Yahudia, na'gea'-gea' para ia.] 30 Ruan taungi sallona ammantang Paulus ri Roma, ri balla' nasewaya kalenna. Sannang sikali nyawana antarimai sikamma tau niaka battu angkunjungi. 31 Napabattumi siagang barani mae ri ke'nanga antekamma bateNa ammarenta Allata'ala, kammayatompa ri passala'na Isa Almasi. Nagaukammi Paulus sikammaya anjo siagang laloasa, tena tau anghalang-halangi.
|