1 JOHN
1
1 Ia bonena anne kittaka, iamintu passala'na Kana attallasaka, iamintu Kana niaka memammo battu ri pakkaramulanna. Le'ba'mi nalangngere' siagang nacini' mata kalenna ikambe. Le'ba'mi nacini' siagang nata'gala' limanna ikambe. 2 Ri wattunna nipa'nyata anjo tallasaka, nacini'mi ikambe. Iaminjo saba'na na'jari sa'bimo ikambe mae ri anjo passalaka. Kibirittakammi mae ri kau ngaseng passala'na anjo tallasa' sitojennaya siagang mannannunganga, ia niaka siagang Manggea, kammayatompa le'bakamo nipa'nyata mae ri kambe. 3 Apa le'baka nacini' siagang nalangngere' ikambe, ia tomminjo nabirittakang ikambe mae ri kau ngaseng; sollannu amminawang todong siagang ikambe ampa'nyatai katallassang assiamaka, asse'rea siagang Manggea, kammayatompa asse're siagang Ana'Na iamintu Isa Almasi. 4 Natulisi'mi ikambe anne suraka sollanna rannu tojeng-tojeng pa'maitta. 5 Iaminne biritta le'baka nalangngere' ikambe battu ri Ana'Na siagang eroka napabattu ikambe mae ri kau ngaseng: Iaminjo Allata'ala singaraka, siagang tena sikali apa-apa sassang ri Ia. 6 Punna nikana asse'remi katallassanta siagang Ia, mingka attallasa' ijaki' lalang ri sassanga, a'balle-balle maki', baji' lalang kana-kana kammayatompa lalang panggaukang. 7 Mingka punna attallasakki' lalang ri singaraka, sangkamma Allata'ala niaki lalang ri singaraka, assiama' maki' massing para ikatte lalang ri katallassanta; kammayatompa nitangkasimi sikontu dosa-dosata lalang ri cera'Na Isa, Ana'Na Allata'ala. 8 Punna nikana tena nakidoraka, niballe-balleimi kalenta; taniassengami Allata'ala lalang ri atinta. 9 Mingka punna nimangakui dosa-dosata mae ri Allata'ala, laNarupaimi janjinNa siagang laNagaukammi apa-apa adeleka mae ri katte. LaNapammopporangi dosa-dosata siagang laNatangkasiki' battu ri sikontu kaja'dallanga. 10 Mingka punna angkanaki' tena kidoraka, sangkammami angkanaya nibilang paballe-ballei Allata'ala; battuanna tenamo niboliki ri atinta kananNa Allata'ala.
2
1 Sikamma ana'-anakku! Iaji nakutulisi' anne suraka kakukellaiko sollanna tena nugaukangi dosaya. Mingka punna nia' a'gau' dosa, nia' akkulle angngalleiki' iamintu Isa Almasi, Ia adeleka; laNapappala' tulungangki' mae ri dallekanNa Manggea. 2 Tete ri Ia minjo Isa Almasi nanipammopporang dosa-dosata. Siagang teai dosa-dosataji bawang, passangalinna dosana pole sikontu rupataua. 3 Punna mappilangngeriki' mae ri sikamma parentaNa Allata'ala, iaminjo a'jari pammatei angkanaya niassemmi Allata'ala. 4 Inai-nai angkana, “Kuassengi Allata'ala,” mingka tena namappilangngeri mae ri sikamma parentaNa, a'balle-ballemi anjo taua, siagang tanaassengai Allata'ala lalang ri atinna. 5 Mingka inai-nai mappilangngeri ri kananNa Allata'ala, iaminjo taua sukku' batena angkamaseangi Allata'ala. Iaminjo a'jari pammatei angkanaya asse're maki' siagang Allata'ala lalang ri katallassanta. 6 Inai-nai angkana asse'rei siagang Allata'ala lalang ri katallassanna, musti sangkammai siagang Almasi batena attallasa'. 7 Sikamma sari'battang sannaka kukarimangnginna! Anne apa kutulisika teai parenta beru. Anne parenta sallomo, le'bakamo nipabattu mae ri kau ngaseng battu ri uru-uruna tappa'nu mae ri Almasi; iamintu biritta battu ri Allata'ala le'bakamo nulangngere' ri pirangalloang. 8 Mingka manna nakamma, beru tonji anne kutulisika; nasaba' akkullei nicini' katojenganna lalang ri KalenNa Almasi siagang lalang ri kalennu ngaseng. Nasaba' lanynya'mi kamma-kamma anne sassanga siagang assioro'mi singara' kontutojenga. 9 Inai-nai nakana kalenna niaki lalang ri singaraka mingka nakabirisi sari'battanna, ma'nassa niaki lalang ri sassanga sa'genna kamma-kamma anne. 10 Inai-nai angkamaseangi sari'battanna, anjo taua attallasa'mi lalang ri singaraka, sa'genna tenamo apa-apa ri kalenna akkullea a'jari saba' natu'guru' naung ri dosaya paranna tau. 11 Mingka inai-nai angkabirisi sari'battanna, ma'nassa lalammi ri sassanga. Lalammi ri sassanga a'jappa, siagang tanaassengami angkana la'lampa kereimae, nasaba' takkulleai accini' napakamma anjo sassanga. 12 Kutulisiki anne suraka mae ri kau ngaseng ana'-anakku, nasaba' le'ba'mi nipammopporang dosa-dosanu lanri Almasi. 13 Kutulisiki mae ri kau ngaseng sikamma bapa'-bapakku, nasaba' nuassemmi anjo Ia niaka memammo battu ri pakkaramulanna. Kutulisiki mae ri kau ngaseng, sikamma ana'-ana' rungkaya, nasaba' le'ba'mi nubeta anjo I Ja'dala'. 14 Kutulisiki anne suraka mae ri kau ngaseng ana'-anaka nasaba' nuassemmi Allata'ala Manggea. Kutulisiki mae ri kau ngaseng sikamma bapa'-bapakku, nasaba' nuassemmi anjo Kana niaka memammo battu ri pakkaramulanna. Kutulisiki mae ri kau ngaseng sikamma ana'-ana' rungkaya, nasaba' gassing ngasengko. Niaki kananNa Allata'ala lalang ri atinnu ngaseng, siagang le'ba'mi nubeta anjo I Ja'dala'. 15 Teako karimangngi dudui anne linoa, yareka apa-apa mamo niaka ilalang ri anne linoa. Punna nukarimangngi dudui linoa, tenamo nalanukarimangngi Manggea. 16 Sikontu apa-apa niaka ilalang ri anne linoa, iamintu sikontu apa-apa nakaerokia sipa'-sipa' ma'rupatauna tau dorakaya, sikontu apa-apa nicinika siagang eroka nikammai, siagang sikamma apa-apa akkullea nikalompoang pa'mai' ri anne linoa, yangasenna anjo teai Allata'ala Manggea assala'na: passangalinna battu ri linoa assala'na. 17 Anne linoa siagang sikontu apa-apa niaka lalanganna, ia nakaerokia rupataua, kamma-kamma anne lanynya'mi. Mingka inai mappilangngeri ri ero'Na Allata'ala, tuli lattallasaki sa'genna satunggu-tungguna. 18 Sikamma ana'-anakku, a'reppese'mi kala'busang jammanga! Le'ba' mako nipauang la'bi riolo angkanaya labattui MusunNa Almasi; na kamma-kamma anne jaimi ammumba musu-musunNa Almasi. Iaminjo a'jari pammatei angkanaya la'birimmi wattunna Allo Kiamaka. 19 Ia musu-musunNa Almasi, iamintu sikamma tau a'lampayamo ambokoiki', nasaba' anjo ke'nanga teai memangi taunta. Punna taunta anjo ke'nanga, tantu tuli ammantangi assiagang ikatte. Mingka assulu'mi ke'nanga battu ri katte, sollanna a'jari singara'mo angkanaya tena manna sitau battu ri ke'nanga antama' tojeng-tojenga ri golonganta. 20 Mingka nutarimami RohNa Allata'ala, le'baka Napaturung Isa Almasi. Iaminjo saba'na nanuassemmo pangngajarang tojenga. 21 Jari kutulisiki anne suraka mae ri kau ngaseng teai lanri tenanapa nanuassengi pangngajarang tojenga, mingka ba'lalo lanri nuassennamo; siagang nuassenna tommo angkanaya anjo pangngajarang tojenga tale'bakai a'balle-balle. 22 Ia a'balle-ballea iamintu tau angkanaya teai Karaeng Mappasalama' Napa'janjianga Allata'ala anjo Isa. Iaminjo taua MusunNa Almasi; tena namangakui anjo Manggea siagang Anaka. 23 Inai-nai tena namangakui Anaka, ma'nassa tena tommo namangakui Manggea. Na inai-nai ammangakui Anaka, ma'nassa namangakui tommi Manggea. 24 Lanri kammana, musti nujagai baji'-baji' ri atinnu anjo biritta le'bakamo nulangngere' battu ri uru tappa'nu. Punna nuparhatikang baji'-baji' anjo birittaya, latuli asse're mako lalang ri katallassannu siagang Anaka kammayatompa Manggea. 25 Na iaminne Napa'janjianga KalenNa Almasi mae ri katte: Katallassang sitojennaya siagang mannannunganga. 26 Kutulisiki mae ri kau ngaseng ri passala'na sikamma tau eroka kamma-kamma anne antipuko. 27 Mingka ri passala'na kalennu ngaseng, le'ba'mi Napaturung Almasi RohNa mae ri kau ngaseng. Na lalang nia'na RohNa ri kau ngaseng, tenamo naparallu nia' tau angngajarakko. Nasaba' iaminjo RohNa angngajarakko untu' sikontu passalaka; na anjo apa Napangngajarranga kontutojengi, teai balle-balle. Lanri kammana, paralluko mannuruki ngaseng mae ri anjo apa Napangngajarranga; siagang paralluko tuli asse're siagang Almasi lalang ri katallassannu. 28 Jari, sikamma ana'-anakku, tuli asse're mako siagang Almasi lalang ri katallassannu, sollanna punna battui sallang, akkulle maki' andallekang mae ri Ia siagang barani; siagang tenamo nuero' accokko lanri siri'-siri'nu. 29 Nuassemmi angkanaya mappilangngeri Almasi mae ri ero'Na Allata'ala lalang ri katallassanNa. Lanri kammana, musti nuasseng tongi angkanaya inai-nai mappilangngeri mae ri ero'Na Allata'ala lalang ri katallassanna, iami ana'Na Allata'ala.
br>
3
1 Coba sai cini'! Teai sipato' Nakamaseanta Allata'ala, sa'genta niareng ana'-ana'Na Allata'ala; na kamma memang tongi, ikatte anne ana'-ana'Naki' Allata'ala. Iaminjo saba'na natena napahangki' anne lino ja'dalaka, nasaba' anne linoa tanaassengai Allata'ala. 2 Sikamma sari'battangku sannaka kukarimangnginna! Ikatte kamma-kamma anne ana'-ana'Na maki' Allata'ala, mingka antekamma kajarianta sallang, tenapa na'nassa. Mingka niassengi angkanaya punna battu sallang Almasi, la'jari sangkamma maki' Ia, nasaba' lanicini'mi kalenta sitojeng-tojennaya. 3 Sikontu tau niaka panrannuang kammana anne mae ri Almasi lanajagai kalenna sa'genna tangkasa' tojeng-tojeng, iamintu tangkasa' battu ri dosa-dosaya sangkamma tangkasa'Na todong Almasi. 4 Inai-nai anggaukangi dosaya, nadakkaimi hukkunNa Allata'ala, nasaba' nikanaya dosa iamintu nidakkai hukkunNa Allata'ala. 5 Nuassengi angkanaya battui Almasi untu' antangkasi dosa-dosana rupataua, siagang angkanaya tena dosa lalang ri KalenNa. 6 Sikontu tau asse'rea siagang Almasi lalang ri katallassanna, tenamo natuli lanagaukang ija dosaya. Inai-nai tuli anggaukangi dosaya, tenale'bakai nacini' siagang naasseng Almasi. 7 Sikamma ana'-anakku, teako passareangi kalennu nipasala oloang ri tau maraenga. Inai-nai anggaukangi ero'Na Allata'ala, iami ana'Na Allata'ala sangkamma todong Almasi Ana'Na Allata'ala. 8 Mingka inai-nai tuli a'gau' dosa, iami ana'na Billisika, nasaba' anjo Billisika doraka memammi battu ri pakkaramulanna. Untu' iaminne Nabattu Ana'Na Allata'ala, iamintu untu' angngancuruki jama-jamanna Billisika. 9 Inai-nai a'jarimo ana'Na Allata'ala, tenamo natuli la'gau' dosa, nasaba' nia'mi sipa'Na Allata'ala ri kalenna. Nasaba' iaminjo Allata'ala Manggena, tenamo natuli lanagaukang ija dosaya. 10 Iaminne sisalana ana'-ana'Na Allata'ala siagang ana'-ana'na Billisika: inai-nai tena nagaukangi ero'Na Allata'ala, yareka tena nakamaseangi paranna tau, anjo taua teai ana'Na Allata'ala. 11 Battu ri pakkaramulannaji nanipabattumo anne birittaya mae ri kau ngaseng, angkanaya: musti massing sikamaseangki' ikatte ma'rupataua. 12 Teako sangkammai Kain, ia battua ri I Ja'dala' assala'na, siagang ambunoai sari'battang kalenna. Apa saba'na nanabuno Kain sari'battanna? Nasaba' salai anjo apa-apa nagaukanga mingka annabai anjo apa-apa nagaukanga sari'battanna. 13 Lanri kammana, sikamma sari'battangku, teako lannasakki punna nakabirisiko tu linoa anne. 14 Niassemmi angkanaya assulu' maki' battu ri kamateanga siagang a'lette' maki' mae ri katallassanga. Niassemmi anjo, nasaba' massing sikamaseang maki' para ikatte. Inai-nai tena namangngamaseang, iami nikoasai ri kamateanga. 15 Inai-nai angkabirisi paranna tau iami pabuno tau; na nuassemmo angkanaya anjo tau kammaya takkulleai nagappa katallassang sitojennaya siagang mannannunganga. 16 Battu ri kammanami anne naniassemmo antekamma bateta angkamaseangi paranta tau. Le'ba'mi Napassareang katallassanNa Almasi untu' ikatte. Lanri kammana, musti nipassareang tongi katallassanta untu' sikamma paranta tau! 17 Punna nia' tau angkammai pa'barang-baranganna linoa, nampa nacini' paranna tau kakurangang, mingka taerokai antulungi anjo paranna tau, antekamma lakkulle nikana nakamaseangi Allata'ala? 18 Sikamma ana'-anakku! Teako ri bawanuji yareka ri bicarannuji bawang mangngamaseang. Mingka paralluki' mangngamaseang tojeng-tojeng, siagang nipa'butti lalang ri panggaukanta. 19 Iaminne carata angngassengi angkanaya ma'nassa antamakki' ri golonganna tau battua ri Allata'ala, sollanna akkulle sannang atinta ri dallekanNa Allata'ala. 20 Punna nibilang salaki' ri ati mailalanta, niassengi angkanaya lompoangangi pangngassenNa Allata'ala na pangngassengang niaka ri atinta siagang Naasseng ngasengi sikontu apa-apaya. 21 Jari, sikamma sari'battangku kukarimangngia, punna tena nanibilang salaki' ri ati mailalanta, akkulle maki' andallekang ri Allata'ala siagang barani. 22 Siagang apa-apa mamo nipala' battu ri Ia, tena tanigappana, lanri mappilangngeriki' mae ri sikamma parentaNa, siagang nigaukangi apa Nangaia ri atinNa. 23 Ia Napassuroanga mae ri katte iamintu: musti tappakki' mae ri Ana'Na, iamintu Isa Almasi; siagang musti massing sikamaseangki', sangkamma le'baka Napassuroang Almasi mae ri katte. 24 Sikontu tau mappilangngeria mae ri sikamma parentaNa Allata'ala, asse'rei mae ri Allata'ala lalang ri katallassanna, siagang asse're tongi Allata'ala mae ri katallassanna. Na niasseng angkanaya asse'rei Allata'ala mae ri katallassanta, lanri le'ba'mi Napassareang RohNa mae ri katte.
4
1 Sikamma sari'battangku sannaka kukarimangnginna! Teako patappa' ngasengi tau nakanaya niaki RohNa Allata'ala ri kalenna; mingka pilajari rolong baji'-baji' sollanna akkulle nuasseng angkanaya roh battu kemae anjo niaka ri ke'nanga: Roh battuka ri Allata'ala yareka teai. Nasaba' kamma-kamma anne jai na'bi balle-balle a'jappa mange-mange. 2 Kamma anne carana nakkulle nuasseng angkanaya apaka anjo RohNa Allata'ala yareka teai: Inai-nai ammangakui angkanaya anjo Isa Almasi Iami battua ri lino ma'rupatau, iaminjo taua nia' Roh battu ri Allata'ala lalang ri kalenna. 3 Mingka inai-nai tena namangakui anjo kammaya mae ri Isa, iaminjo taua tena RohNa Allata'ala ri kalenna. Rohnaji MusunNa Almasi nia' ri kalenna anjo tau kammaya. Le'ba'mi nulangngere' angkanaya laniaki battu anjo roh kammaya, siagang kamma-kamma anne nia'mi lalang ri anne linoa. 4 Mingka sikamma ana'-anakku, ikau tau battu ngasengko ri Allata'ala assala'nu. Le'ba'mi nubeta na'bi-na'bi balle-ballea, nasaba' Roh niaka ri kau la'bi makoasangangi na roh niaka ri taunna ngaseng anne linoa. 5 Anjo na'bi-na'bi balle-ballea sangnging passala' linoa nabicara; nipilangngerimi bicaranna ke'nanga ri anne linoa, nasaba' anjo ke'nanga tau battu ri linoa assala'na. 6 Mingka ikatte anne ana'-ana'Naki' Allata'ala; na inai-nai angngassengi Allata'ala, napilangngeri tommi bicaranta. Inai-nai teai taunNa Allata'ala tena nalaNapilangngeri bicaranta. Kammami anjo carata nakkulle niasseng antekamma sisalana Roh assarea pangngajarang tojeng, siagang roh ampasala oloangai taua. 7 Sikamma sari'battang sannaka kukarimangnginna! Mae mako kimassing sikamaseang; nasaba' Allata'ala assala'na anjo pangngamaseanga. Inai-nai mangngamaseang, iami ana'Na Allata'ala siagang iami angngassengi Allata'ala. 8 Tau tenaya namangngamaseang, tanaassengai Allata'ala; nasaba' anjo Allata'ala mangngamaseangi. 9 Napa'nyatami pangngamaseanNa Allata'ala lalang ri atinta, lanri Nasuromi Ana' sitau-tauNa untu' antama' ri linoa sollanna akkulle nigappa katallassanga tete ri anjo Ana'Na. 10 Iaminne pangngamaseanga: Teai ikatte le'ba' angkamaseangi Allata'ala, mingka Allata'ala angkamaseangki' siagang Nasuroi battu Ana'Na sollanna tete ri Ia nanipammopporang dosa-dosata. 11 Sikamma sari'battangku, sannaka kukarimangnginna; punna sanna' bateta nikamaseang ri Allata'ala, musti massing sikamaseang tongki'. 12 Tena manna sitau le'ba' anciniki Allata'ala; mingka punna massing sikamaseangki', asse'remi Allata'ala mae ri katte siagang a'jari sukku'mi pangngamaseanNa lalang ri kalenta. 13 Lanri le'ba'mi Napassareang RohNa Allata'ala mae ri katte, jari niassemmi angkanaya asse're maki' lalang katallassanta mae ri Allata'ala, siagang asse'remi Allata'ala mae ri katallassanta. 14 Kalenna ikambe le'ba' anciniki Ana'Na Allata'ala, siagang napabattumi ikambe mae ri tau maraenga angkanaya Iami anjo Ana'Na Nasuro Allata'ala antama' ri linoa untu' a'jari Karaeng Mappasalama' ri anne linoa. 15 Inai-nai ammangakui anjo Isa angkanaya Iami Ana'Na Allata'ala, asse'remi Allata'ala mae ri katallassanna anjo taua; kammayatompa anjo taua asse're tommi lalang tallasa'na mae ri Allata'ala. 16 Niassemmi siagang tappa' maki' mae ri pangngamaseanNa Allata'ala mae ri katte. Anjo Allata'ala Iami mangngamaseang. Inai-nai nikoasai katallassanna ri pangngamaseang, iaminjo taua asse're katallassanna mae ri Allata'ala, siagang asse'remi Allata'ala mae ri katallassanna. 17 Nipa'jari sukkuki pangngamaseanga lalang ri atinta, sollanna nakia'jari barani ri Allo Pangadelanga. La'jari baraniki', nasaba' sangkammami carata attallasa' ri anne linoa siagang caraNa Almasi attallasa'. 18 Inai-nai mangngamaseang, tanaassengami nikanaya malla'; nasaba' anjo pangngamaseang sukkuka napa'lanynya'mi nikanaya malla' lalang ri kalenna taua; nasaba' anjo mallaka nia' passisambunganna siagang hukkunganga. 19 Mangngamaseangki', lanri Allata'ala la'bi riolo angkamaseangki'. 20 Punna nia' tau angkana, “Kukamaseangi Allata'ala,” mingka nakabirisi paranna tau, paballe-ballei anjo taua. Nasaba' inai-nai tena nakamaseangi paranna tau, iamintu nacinika matanna, tena olona lakkulle nakamaseang Allata'ala, ia tenaya naciniki. 21 Lanri kammana, iaminne parenta Napassareanga Almasi mae ri katte: Inai-nai mangngamaseang ri Allata'ala, musti nakamaseang tongi paranna tau.
5
1 Inai-nai tappa' angkanaya iaminjo Isa, Karaeng Mappasalama' Napa'janjianga Allata'ala, iami Ana'Na Allata'ala. Na inai-nai mangngamaseang ri Manggea, nakamaseang tongi Anaka. 2 Lalang kammanami anne nakkulle niasseng angkanaya nikamaseangi ana'-ana'Na Allata'ala, iamintu: mangngamaseangki' mae ri Allata'ala, siagang nipilangngeri sikamma parentaNa. 3 Nasaba' battuanna nikanaya mangngamaseang mae ri Allata'ala, iamintu nipilangngeri sikamma parentaNa. Na anjo sikamma parentaNa tena nabattala' untu' ikatte; 4 nasaba' sikamma ana'Na Allata'ala akkulle ngasengi nabeta anne lino ja'dalaka. Na anne linoa akkullei nibeta siagang katappakkanta. 5 Inaika akkulle ambetai lino ja'dalaka? Iaji bawang tau tappaka angkanaya anjo Isa, Iami Ana'Na Allata'ala. 6 Iaminjo Isa Almasi, antamaka ri anne linoa angngerang je'ne' lanapa'je'neka siagang cera' kamateanNa. Tena naje'ne' bawang Naerang battu, mingka je'ne' siagang cera'. Na KalenNa RohNa Allata'ala a'jari sa'bi angkanaya kammatojengi anjo; nasaba' iaminjo Roh kontutojenga. 7 Jari, nia' tallu sa'bi: 8 RohNa Allata'ala, je'ne', siagang cera'; anne tallua sangkamma ngasengi kasa'bianNa. 9 Tappakki' mae ri kasa'bianna rupataua, mingka jarrekangangi pole kasa'bianNa Allata'ala. Na iaminjo kasa'biang le'baka Napassareang Allata'ala ri passala'na Ana'Na. 10 Lanri kammana, inai-nai tappa' ri Ana'Na Allata'ala, natarimami anjo kasa'bianga lalang ri atinna; mingka inai-nai tena natappa' mae ri Allata'ala, nacini' paballe-ballemi Allata'ala, nasaba' tena napatappaki bicaranNa Allata'ala ri passala'na anjo Ana'Na. 11 Iaminne kasa'bianna: Nasare maki' Allata'ala katallassang sitojennaya siagang mannannunganga, siagang Ana'Nami kabattuanna anjo katallassanga. 12 Inai-nai antarimai anjo Anaka, natarimami anjo katallassanga; na inai-nai tena natarimai anjo Ana'Na Allata'ala, tenamo natarimai anjo katallassanga. 13 Kutulisi'mi anne suraka mae ri kau ngaseng tau tappaka ri Ana'Na Allata'ala, sollanna nuasseng angkanaya nutarimami anjo katallassang sitojennaya siagang mannannunganga. 14 Siagang barani maki' andallekang ri Allata'ala, lanri tappakki' angkanaya laNaiyoi pappala' doanganta; manna pole apa nipala' mae ri Ia laNaiyoi assala' situruki ero'Na anjo pappalatta. 15 Nasaba' niassengi angkanaya lanipilangngeriki' punna appalakki' ri Ia, jari niasseng tommi angkanaya laNasareangki' sikamma apa nipalaka ri Ia. 16 Punna nia' nucini' parannu tu Karisteng a'gau' dosa natenaja nangngerang kamateang, paralluko appala' doang ri Allata'ala; nalanisaremo katallassang anjo taua. Anne natabaya iamintu tau a'gau' dosaya, mingka tenaja nangngerang kamateang. Mingka nia' gau' dosa angngerang kamateang; tena nakukana musti appala' doangko mae ri Allata'ala lanri anjo passalaka. 17 Sikamma panggaukang salaya dosa ngaseng, mingka nia' dosa tenayaja nangngerang kamateang. 18 Niassengi angkanaya sikontu tau a'jariamo ana'-ana'Na Allata'ala, tenamo natuli a'gau' dosa ija; nasaba' nijagai ri Ana'Na Allata'ala siagang takkulleami I Ja'dala' a'gau' apa-apa mae ri ia. 19 Niassemmi angkanaya ikatte anne tau battuki' ri Allata'ala, manna pole nanikoasaimo sikontu linoa ri I Ja'dala'. 20 Niassemmi angkanaya battumi Ana'Na Allata'ala siagang le'ba' maki' Napapahangngiang sollanta tappa' mae ri Allata'ala sitojennaya. Asse're maki' mae ri Allata'ala sitojennaya lalang ri katallassanta, kammayatompa asse're tommaki' mae ri Ana'Na, iamintu Isa Almasi. Iami Allata'ala sitojennaya, siagang Iami katallassang sitojennaya siagang mannannunganga. 21 Sikamma ana'-anakku, pakabellai kalennu battu ri sikamma barhalaya!
|