Revelation
सुफोसुफो 11 कन् साप्पन्नो ये़सु ख्रिस्तरे़ ओसेःन्दाङ् चोगुबा पाःन्हाॽरे़ कुयाःम्बेओ पत्लो॥ खे़न् ओसेःन्दाङ्ङिन् निङ्वाॽफुमाङ्ङिल्ले़ आल्ल हाराए के़बोःङ्बा पाःन्हाॽ निङ्वाॽफु सेवारोबाहाॽ ओसेःन्धाक्मासि फाॽआङ् ये़सु ख्रिस्ते़न् पिरुरो॥ कन् पाःन्हाॽ कुसेवारोबा युहुन्नाःल्ले़ कुसिङ् निःत्तुर फाॽआङ् ये़सु ख्रिस्तरे़ कुमाङ्लाइङ्बान् 2 युहुन्नारे़ग खुने़ॽ खे़प्सुबा निङ्वाॽफु पाःन्जाक्किन् नु ये़सु ख्रिस्तरे़ खुने़ॽ ओसेःन्धाक्तुबा काक् से़क्खा पाःन्हाॽ पाःत्तुॽरो॥ 3 कप्मो के़बप्पा माङ्निङ्वाॽपाःन् के़निःप्पे़न् मुॽइसाबारो, हे़क्क्याङ् खे़न् के़घे़म्बाहाॽ नु खे़प्मो के़बप्पा पाःन्हाॽ के़इःप्पा के़नाःप्पाहाॽग मुॽइसाबासिरो, थेआङ्भे़ल्ले़ आल्ल कन् काक् पाःन्हाॽ पोःङ्मा ये़म् निःत्ताङ्ङे वाॽरो॥ 4 इङ्गाॽ युहुन्नाःल्ले़ कन् सक्इङ्घङ्ङिन् एसिया ते़ङ्गप्पो के़ने़बा नुसि सेसेहुप्लक्हाॽ हाक्निङ्लो॥ आल्लो के़वाॽबा, उनाहुरिओआङ् वये़ हे़क्क्याङ् ताःन्दिआङ् के़दाःबा निङ्वाॽफुमाङ्लाम् नु कुहाङ्युक्ना तगाङ्बा नुसि साम्हाॽलाम्, हे़क्क्याङ् नसाःन् चोःक्मा सुक्के़दे़प्पा पाःन् के़बाःप्पा, के़सिःबाओलाम् याम्मो के़हिङ्बाहाॽओ थिक्सिगेःक्पा नु इक्सादिङ् खाम्बेःक्मोबा हाङ्हाॽ सम्दाङ् हाङ् के़जोःक्पा ये़सु ख्रिस्तलाम् लुङ्गुम् नु सनारुङ् हाराॽ खिनिॽओ वाॽररो॥खुने़ॽग आनिॽ लुङ्माॽ आदुक्ते़आङ् आनिॽ लायोलाम् कुमाक्खिॽइल्ले़ से़न्लप् आबिरे़आङ् वाॽरो॥ 6 हे़क्क्याङ् खुने़ॽ कुनिङ्वाॽफुमाङ् नु पानुदिङ् कुम्बारे़ लत्छा कुहाङ्जुम्मो कुसेवा के़जोःक्पा निङ्वाॽफुसाम्बा आजोगे़आङ् आवाॽरो॥ हाराॽ ये़सु ख्रिस्तओ मिमिदिङ् नु मुक्साम् सदादिङ् सदादिङ् पोःङ्लरो! आमे़न्॥ 7 ओमे़त्ते़म्मे़ॽ, खुने़ॽग खाप्मिःप्पो युःर पत्लो॥ हे़क्क्याङ् काक् मे़न्छाम्गे़न् याप्मिहाॽ नु खुने़ॽ के़धुप्पाहाॽरे़आङ् मे़निःसुॽरो॥ हे़क्क्याङ् इक्सादिङ् खाम्बेःक्मोबा के़रे़क् मे़न्छाम् सुवाङ्हाॽ खुने़ॽ चोगुल्ले़ मेरिङ् मे़धक्लो॥ हाराॽ अक्खेए पोःङ्लरो! आमे़न्॥ 8 दाङ्बा निङ्वाॽफुमाङ्ङिल्ले़, अल्फा नु ओमेगा 9 इङ्गाॽ युहुन्नाःन् नसाःन्नो खिनिॽ फुॽआरो॥ ख्रिस्त ये़सुःन् नसाःन् चोःक्मे़ल्ले़ खुने़ॽ कुहाङ्जुम्मो के़वाॽबाहाॽरे़ मे़घोःसुबा निङ्घुम्मिन् खिनिॽनु सोसोरिक् नासि थःत्तुङ्ल थरुङ्ङाङ् वाॽआरो॥ निङ्वाॽफु पाःन्जाक्किन् नु ये़सुरे़ पाःत्तुबा नु चोगुबा पाःन्हाॽ इङ्भन् चोगुङ्बाल्ले़ चोगुल्ले़ इङ्गाॽ पत्मोस वागप्लाजेॽओ साक्पा के़धाःबा मे़जोगाङ् मे़देॽराङ्ङाङ् वयाङ्॥ 10 दाङ्बाल्ले़ कुये़न्नो सेसेमाङ्ङिल्ले़ थुक्ताङ्ङाङ् वयाङ्ङिल्ले़ आएगाङ्लाम् थुत्थुरिःप्पाल्ले़ पयम् यम्बा कुइक्ला हे़क्तङ्बा इक्लाधिक् खे़प्सुङ्॥ 11 खे़न् इक्लाःल्ले़ इङ्गाॽ अक्खे मे़त्ताङ्, “खे़ने़ॽ के़निःसुबा पाःन्हाॽ साप्ते़ॽआङ् एफिसस, इस्मर्ना, पर्गामम, थियातिरा, सार्दिस, फिलादेल्फिया नु लाओदिकिया ये़क्यक्हाॽओबा नुसि सेसेहुप्लक्हाॽ हाक्ते़से़ॽओ॥” 12 इङ्गाॽनु के़बाःप्पे़न् हाःत्निबे फाॽआङ् खिरि हिसिङ्ङाङ्ङिल्ले़ खे़प्मो नुसि साम्म्याङ् सेमियुङ्दे़न्हाॽ निःसुङ्सिङ्॥ 13 खे़ल्ले़ कुलुम्मो थोलाम्बा यो लाङ्जक्को थारिक् तेःत् के़जाङ्बा हे़क्क्याङ् कुसङ्बेॽओ साम्म्याङ् फयुम् पे़र्घे़क् के़हेबा “मे़न्छाम्साःन्” हे़क्तङ्बाधिक् निःसुङ्लो॥ 14 खे़ल्ले़ कुधे़गेःक्किन् नाःङ्ङिन् हे़क्के फुत्त्रिःङ्ग्याःप्पा नु खिः हे़क्के फः लॽरे़रो॥ खुने़ॽ कुमिक्किङ्ग मि हे़क्के के़दिःप्पा चोगे़रो॥ 15 खुने़ॽ कुलाङ्हाॽग थथनाबान् मिओ ओॽमाल्ले़ से़ल्ले़ङ् से़ल्ले़ङ् ओःप्पा कुइसिःक्, हे़क्क्याङ् कुइक्लाःङ्ग पयम् यम्बा वधाःम्मिन् सःक्पा कुइसिःक् चोगे़रो॥ 16 खुने़ॽ कुजुप्साङ् हुक्किल्ले़ नुसि खेःम्सिक्हाॽ ते़म्सुसिआङ् पत्छे़, हे़क्क्याङ् कुमुराओलाम् ने़प्जाङ् ले़प्माङ् खागे़सुक्पा कुया के़बप्पा ताभेःन् लःन्दे़आङ् पत्छे़रो॥ हे़क्क्याङ् कुनाराःङ्ग ले़न्दिक् के़ओःप्पा नाम्मिन् हे़क्के मिक् के़जे़म्बा चोगे़रो॥ 17 हे़क्क्याङ् खुने़ॽ निःसुङ्ङाङ् इङ्गाॽग सिःमालिङ्धोओ के़राङ्ङाङ् कुलाङ्जक्पो हर्गुप्सा चोःन्दाङ्लो॥ खुने़ॽ कुजुप्साङ् हुक्किन् आसम्दाङ् ने़स्सुआङ् अक्खे मे़त्ताङ्लो, “मे़गिसे़न्ने़ॽओ इङ्गाॽ तोलिङ्सोमु नु कुनुप्माआरो॥ 18 कुहिङ्वे़त् के़बोःङ्बे़ङ्ग इङ्गाॽएरो॥ इङ्गाॽ स्याङ्ङाङ् वयाङ्, कर ओमे़त्ते़ॽ, इङ्गाॽ सदादिङ्ले़ लागि याम्मो हिङाङ्ङाङ् वाॽआरो॥ हे़क्क्याङ् सिःमे़न् नु खे़मायङ्सङ्ङिल्ले़न् तिमिक्हाॽ इङ्गाॽ कत्तुङ्लो॥ 19 खे़ल्ले़ चोगुल्ले़ आल्ल खे़ने़ॽ के़निःसुबा आल्लो के़बोःङ्बा पाःन्हाॽ नु ताःन्दि के़बोःङ्बा पाःन्हाॽ साप्ते़ॽओ॥ 20 खे़ने़ॽ इङ्गाॽ आजुप्साङ् ले़प्माङ् के़निःसुबा नुसि खेःम्सिक्हाॽ नु नुसि साम्म्याङ् सेमियुङ्दे़न्हाॽरे़न् सिबिॽ पाःन्हाॽग बा कन्लो–नुसि खेःम्सिक्हाॽ नुसि सेसेहुप्लक्हाॽओबा माङ्लाइङ्बासिरो, हे़क्क्याङ् नुसि साम्म्याङ् सेमियुङ्दे़न्हाॽ नुसि सेसेहुप्लक्सिरो॥” 1 “एफिसस्बा सेसेहुप्लक्कोबा माङ्लाइङ्बान् कन् इङ्घङ्ङिन् साप्ते़ॽओ॥ कन् इङ्घङ्हाॽग कुजुप्साङ् हुक्किल्ले़ नुसि खेःम्सिक्हाॽ के़दे़म्बा नु नुसि साम्म्याङ् सेमियुङ्दे़न् लुम्मोलाम् लाङ्गे़घेःक्पाल्ले़ पाःत्तुबारो– 2 ‘खे़ने़ॽ आक्खे़न् साॽरिक् याम्बुधिक्पा नु नासिके़धःप्पा के़जोःक् फाॽआङ् इङ्गाॽ निःसुङ्लो॥ हे़क्क्याङ् खे़ने़ॽ ताप्फे़ःम्बा मनाहाॽ नासि के़न्धःत्तुन्छिम्बान् नु खे़ङ्हाॽ सेःक्युक्मिबा मे़ःन्छिसाङ् आनिगे़ सेःक्युक्मिबासिगे़ के़लॽबाहाॽरे़ खुनिॽ याःम्बक्किन् के़साॽरुआङ् खे़ङ्हाॽ इङ्ले़क्पासि फाॽआङ् निङ्वाॽ के़घोःसुबान् इङ्गाॽ निःसुङ्लो॥ 3 हे़क्क्याङ् खे़ने़ॽ नासि थःप्मान् के़गत्तुआङ् इङ्गाॽ आलागि तुक्खे के़ज्ये़बान् नु इङ्गाॽ के़ल्ले़राङ्ङिम्बान् निःसुङ्लो॥ 4 कर खे़ने़ॽ के़दक्ले़ङ्वाओ इङ्गाॽ लत्छा पाःन्धिक् पाःप्माए पोःङ्–तगि मिःम्जि के़मे़त्ताङ्बा यारिक् अक्खेःल्ले़ इङ्गाॽ मिःम्जि के़म्मे़त्तान्लो॥ 5 खे़ने़ॽ तगि मिःम्जि के़मे़त्ताङ्बा मिःम्जिलाम् आक्खे़म्म्याक् माःङ्घा के़बोःक्खे़आङ् के़वाॽ खे़न् पाःन्निन् निङ्वाॽ इःत्ते़ॽ॥ खे़ने़ॽ लायोलाम् हिन्दे़ॽआङ् तगि के़जोगुबा हे़क्केए चोगे़ॽओ॥ खे़ने़ॽ के़लायोओनु के़न्नुःङ्ने़न्ने़ फाॽग्र इङ्गाॽ खे़ने़ॽओ ताआ हे़क्क्याङ् के़सेमियुङ्दे़न्निन् कुयुङ्दे़न्नोलाम् खे़त्तुङ्देःसुङ्लो॥ 6 कर लत्छा नुःबा पाःन्धिक् खे़ने़ॽ के़गत्तुॽरो–निकोलाइत्ति मे़प्मनाबाहाॽरे़ मे़जोगुबा ताप्फे़ःम्बा पाःन्हाॽ इङ्गाॽ चिःत्तुङ्बा हे़क्के खे़ने़ॽआङ् के़जिःत्तुरो॥ 7 सेसेमाङ्ङिल्ले़ सेसेहुप्लक्हाॽ मे़त्तुसिबा पाःन्निन् नुःरिक्काङ् खे़प्से़म्मे़ॽआङ् कुसिङ् निःत्ते़म्मे़ॽओ! के़नाःम्बान् निङ्वाॽफुमाङ्ङिल्ले़ कुसिङ्सेॽ इक्कोबा मे़न्नुप्मनाबा हिङ्मन् के़बिबा सिङ्बुङ्माल्ले़ कुजाॽइन् चामा पिरुङ्लो॥’ ” 8 “इस्मर्नाबा सेसेहुप्लक्कोबा माङ्लाइङ्बान् कन् इङ्घङ्ङिन् साप्ते़ॽओ॥ कन् इङ्घङ्ङिन् कुहेःक्सिङ्मा नु कुनुप्मा, के़सिःबाआङ् याम्मो कुहिङ्वे़त् के़बोःङ्बाल्ले़ पाःत्तुॽरो– 9 ‘के़दुमुबा निङ्घुम्हाॽ नु के़याङ्साॽमान् इङ्गाॽ निःसुङ्लो, कर से़क्खाःल्ले़ निङ्वाॽफुमाङ्ङिल्ले़ कुनिःमाओ खे़ने़ॽ याङ्साकुन्धेसाबा के़जोःक्लो॥ आनिगे़ यहुदिसिगे़ के़लॽबाहाॽरे़ खे़ने़ॽ के़दक्ले़ङ्वाओ चे़ॽया के़मे़प्पे़न् इङ्गाॽ निःसुङ्ङाङ् वाॽआरो॥ खे़ङ्हाॽग यहुदिसि मे़ःन्, कर माफे़न्साम्मिल्ले़ कुमनासिरो॥ 10 आल्ल खे़ने़ॽओ के़दाःबार के़बप्पा इनोगे़न् तुक्खेहाॽनु मे़गिसे़न्ने़ॽओ॥ खे़प्से़ॽओ, के़नसाःन्निन् हङ्साॽमारे़ लागि माफे़न्साम्मिल्ले़ कुभा खिनिॽ पुङ्लाहिम्मो के़धे़क्तिॽसाङ् थिबोःङ् ये़न् थारिक्लक् इनोगे़न् तुक्खे के़ज्ये़ॽइरो॥ सिःमालिङ्धोओ के़गे़रिसाङ् इङ्गाॽ नसाःन् चोःक्मा याप्मि आल्ले़रे़म्मिन्ने़ॽओ, हे़क्क्याङ् के़नाःन्दुम्माङ् के़घोःसुम्बा थुम्घोःल्ले़ लागि मे़न्नुप्मनाबा हिङ्मन् पिनिङ्लो॥ 11 सेसेमाङ्ङिल्ले़ सेसेहुप्लक्हाॽ मे़त्तुसिबा पाःन्निन् नुःरिक्काङ् खे़प्से़म्मे़ॽआङ् कुसिङ् निःत्ते़म्मे़ॽओ! के़नाःम्बान् निसिगेःक्पा सिःमे़ल्ले़आङ् थेआङ् मे़प्मा मे़सुक्तुन्लो॥’ ” 12 “पर्गाममस्मा सेसेहुप्लक्कोबा माङ्लाइङ्बान् कन् इङ्घङ्ङिन् साप्ते़ॽओ॥ कन् इङ्घङ्ङिन् ने़प्जाङ् ले़प्माङ् कुया के़बप्पा खागे़सुक्पा ताभे के़गप्पाल्ले़ पाःत्तुबारो– 13 ‘खे़ने़ॽ माफे़न्साम्मिल्ले़ हाङ् चोगुबा ते़न्नो के़वाॽ फाॽआङ् इङ्गाॽ निःसुङ्लो॥ करसाङ् खे़ने़ॽग चक्मे़ल्लॽए इङ्गाॽ नसाःन् के़जोःक्कार के़वाॽ॥ नसाःन्साबा आदोःन्दि के़बाःप्पा एन्तिपासे़न् माफे़न्साम्मिन् के़वाॽबा खिनिॽ ये़क्यक्को मे़से़रुसाङ् खे़ने़ॽग के़नसाःन्निन् के़न्ले़रुन्लो॥ 14 हे़क्केसाङ् खे़ने़ॽ के़दक्ले़ङ्वाओ कुभा पाःन् पाःप्माए पोःङ्लो–खिनिॽओ कुभारे़ग माङ्निङ्वाॽपाःन् के़बाःप्पा बालामरे़ कुनिसाम्मिन् मे़नाःत्तुआङ् मे़वाॽरो॥ उन्छोःन् बालामरे़ग इस्राइलिहाॽ लायोओ मे़धार फाॽआङ् नावाइत्लाओ तोःम्मनाबा चा चामा नु याम्बोःप्मा याःम्बक् चोःक्मा बालाक हाङ्ङिन् हुॽरुआङ् वये़रो॥ 15 हे़क्केलॽरिक्के खिनिॽओ कुभाग निकोलाइत्ति मे़प्मनाबाहाॽरे़ खुनिॽ निसाम्मिन् के़नाःप्पाहाॽ मे़वाॽरो॥ 16 हे़क्तङ्बा लायोलाम् हिन्दे़ॽओ, मे़ःन्ने़ फाॽग्र इङ्गाॽ खे़ने़ॽओ हाराए ताआआङ् आमुराओलाम् के़लःम्बा ताभेःन्नु खे़न् निकोलाइत्तिहाॽरे़ खुनिॽ तक्ले़ङ्वाओ थङ् चोःक्कारो॥ 17 सेसेमाङ्ङिल्ले़ सेसेहुप्लक्हाॽ मे़त्तुसिबा पाःन्निन् नुःरिक्काङ् खे़प्से़म्मे़ॽआङ् कुसिङ् निःत्ते़म्मे़ॽओ! के़नाःम्बे़न् इङ्गाॽ चिङ्मनाबा मन्नाःन् पिरुङ्लो॥ 18 “थियातिराबा सेसेहुप्लक्कोबा माङ्लाइङ्बान् कन् इङ्घङ्ङिन् साप्ते़ॽओ॥ कन् इङ्घङ्ङिन् कुमिक्किन् मि हे़क्के के़दिःप्पा नु कुलाङ्हाॽ थथनाबा हे़क्के से़ल्ले़ङ् के़ले़क्पा निङ्वाॽफुसाःल्ले़ पाःत्तुबारो– 19 ‘खे़ने़ॽ के़याःम्बक्किन्, के़मिःम्जिन्, के़नसाःन्निन्, के़माङ्सेवाःन् हे़क्क्याङ् खे़ने़ॽ तुक्खे के़धःरुबान् इङ्गाॽ निःसुङ्, हे़क्क्याङ् आल्लोग खे़ने़ॽ तगिनुःल्ले़आङ् यरिक् माङ्सेवा याःम्बक् के़जोःक् फाॽआङ् निःसुङ्लो॥ 20 हे़क्केसाङ् खे़ने़ॽ के़दक्ले़ङ्वाओ इङ्गाॽ लत्छा पाःन्धिक् पाःप्माए पोःङ्–खे़ने़ॽग इजेबे़ल मे़प्मनामा मे़न्छुमाॽइन् नासि के़धःत्तुआङ् के़वाॽरो॥ खे़ल्ले़ आबाङे निङ्वाॽफुमाङ्ङिल्ले़ माङ्निङ्वाॽपाःन् के़बाःप्माआ लॽरिक् मे़त्छिङ्लो॥ कर इङ्गाॽ आसेवारोबाहाॽ याम्बोःप्मा याःम्बक् चोःक्मा नु नावाइत्लाहाॽओ तोःम्मनाबा चाहाॽ चामा हुॽरुसिआङ् इङ्ले़क्तुसि॥ 21 इङ्गाॽ खे़न्निन् कुलायोलाम् हिन्ल फाॽआङ् ये़म् पिरुङ् कर खे़न् याम्बोःप्मा कुयाःम्बक्कोलाम् हिम्मा मे़दे़न्ने़न्लो॥ 22 खे़ल्ले़ चोगुल्ले़ खे़न् खुम्दिङ् पिरुङ् हे़क्क्याङ् खुने़ॽनु चाराम्मा याःम्बक् के़जोःक्पाहाॽरे़ खुनिॽ लायोलाम् मे़न्हिन्ने़न्ने़ फाॽग्र काक् इङ्गाॽ यॽ थे़त्तुसिर खुम्दिङ् पिरुङ्सिङ्लो॥ 23 हे़क्क्याङ् इङ्गाॽ खे़ल्ले़ कुहुॽसाम्बाहाॽआङ् से़रुङ्सिङ्लो॥ हे़क्केलॽरिक् के़रे़क् सेसेहुप्लक्हाॽरे़ इङ्गाॽ मे़न्छाम्गे़न् याप्मिहाॽरे़ खुनिॽ निङ्वाॽ नु सिक्लुङ्मा के़निःबा फाॽआङ् कुसिङ् मे़निःत्तारो॥ हे़क्क्याङ् इङ्गाॽ खिनिॽ याःम्बक् के़जोगुम्बा कुइसिःक् खिनिॽ के़रे़क् पिनिङ्लो॥ 24 कर फे़न् निसाम्मिन् मे़न्नाःप्मनाबाहाॽ नु माफे़न्साम्मिल्ले़ कुसिबिॽ पाःन् मे़बाःत्तुबा निसाम्मिन्नाङ् मे़न्हुॽसिङ्मनाबाहाॽ खिनिॽ थियातिराओबा वेॽ मनाहाॽ वेॽ कक् मे़गुःत्निङ्ङिन् के़लॽबा पाःन्निन् मे़त्निङ्लो॥ 25 कर इङ्गाॽ मे़न्युःए थारिक् खिनिॽ के़गत्तुम्बा नसाःन्निन् नुःरिक्काङ् तक्ते़म्मे़ॽआङ् कत्ते़म्मे़ॽओ॥ 26 के़नाःम्बा हे़क्क्याङ् कुनुप्मो थारिक् आयाःम्बक्किन् के़जोःक्पार के़वाॽबान् इङ्गाॽ मे़न्छाम् सुवाङ्हाॽ युक्को कप्मासि युक् पिरुङ्लो॥ 27 इङ्गाॽ पानुदिङ् आम्बालाम् युक् खोःसुङ्बा कुइसिःक् खुने़ॽ युक् पिरुङ्लो॥ खे़ल्ले़ फे़न्जेॽ तक्काःत्तिल्ले़ मे़न्छाम् सुवाङ्हाॽ युक्को कत्तुसिॽ, हे़क्क्याङ् खाम् कुःन्दाःन् यःप्पा कुइसिःक् खे़ङ्हाॽ यःप्सुसिॽरो॥ 28 हे़क्क्याङ् इङ्गाॽ खे़न् मनाःन् तान्छोःक्पे़न्नाङ् पिरुङ्लो॥ 29 सेसेमाङ्ङिल्ले़ सेसेहुप्लक्हाॽ मे़त्तुसिबा पाःन्निन् नुःरिक्काङ् खे़प्से़म्मे़ॽआङ् कुसिङ् निःत्ते़म्मे़ॽओ!’ ” 1 “सार्दिसबा सेसेहुप्लक्कोबा माङ्लाइङ्बान् कन् इङ्घङ्ङिन् साप्ते़ॽओ॥ कन् इङ्घङ्ङिन् नुसि खेःम्सिक्पा नु निङ्वाॽफुमाङ्ङिल्ले़ नुसि कुसेसेमाङ् के़गप्पाल्ले़ पाःत्तुबारो–‘खे़ने़ॽ काक् के़याःम्बक्हाॽ इङ्गाॽ निःसुङ्लो॥ हे़क्क्याङ् खे़ने़ॽ कुहिङ्वे़त् के़वाॽ फाॽआङ् इङ् से़ःरे़आङ् वाॽसाङ् खे़ने़ॽग कुसिवे़त् कुइसिःक् के़जोःक्लो॥ 2 हे़क्केःल्ले़ पोगे़ॽओ, सिःमा के़जोःक्पाआङ् के़दाङ्बा के़याक्पा खिनिॽ नसाःन्निन् के़धुम्बा चोगे़म्मे़ॽओ, थेआङ्भे़ल्ले़ आनिङ्वाॽफुमाङ्ङिल्ले़ कुनिःमाओ खिनिॽ याःम्बक्हाॽ कुलिङ्धो मे़ङ्गे़त्ते वाॽबान् इङ्गाॽ निःसुङ्॥ 3 खे़ने़ॽ के़घे़प्सुबा नु के़हुॽसिङ्बा पाःन्निन् नुःरिक्काङ् इःत्ते़ॽ॥ हे़क्क्याङ् खे़न् ते़न्दिङ् चोगे़ॽआङ् के़लायोलाम् हिन्दे़ॽओ॥ कर के़म्बोःक्ने़न्ने़ फाॽग्र के़घुःम्बान् सुल्लि ताबा कुइसिःक् इङ्गाॽ खे़ने़ॽओ ताआरो, हे़क्क्याङ् ताःआबा ये़म्मिन् खे़ने़ॽ के़न्निःसुन् ॥ 4 कर सार्दिसओ आल्ल थारिक् खुनिॽ तेःत् चाङ्हाॽ लायोःल्ले़ मे़न्जिःन्ने के़जाङ्बा कुभा मनाहाॽ मे़वाॽ॥ खे़ङ्हाॽरे़ फःगे़लॽबा तेःत् मे़जाक्खुआङ् इङ्गाॽनु लाङ्मे़घेःक्लो, थेआङ्भे़ल्ले़ खे़ङ्हाॽग सुम्बोधासाबा मे़जोःक्लो॥ 5 खे़ङ्हाॽ हे़क्के के़नाःम्बा काक्ले़ फःगे़लॽबा तेःत् मे़जाक्खुॽरो॥ हे़क्क्याङ् खुनिॽ मिङ्ङिन् हिङ्मन्ले़न् साप्पन्नोलाम् आप्फाल्ले़आङ् मे़दुःक्कान्लो, कर पानुदिङ् आम्बा नु कुमाङ्लाइङ्बाहाॽरे़ खुनिॽ तगि खे़ङ्हाॽ ते़न्दिङ् चोगुङ्सिङ्लो॥ 6 सेसेमाङ्ङिल्ले़ सेसेहुप्लक्हाॽ मे़त्तुसिबा पाःन्निन् नुःरिक्काङ् खे़प्से़म्मे़ॽआङ् कुसिङ् निःत्ते़म्मे़ॽओ!॥’ ” 7 “हे़क्क्याङ् फिलादेल्फियाबा सेसेहुप्लक्कोबा माङ्लाइङ्बान् कन् इङ्घङ्ङिन् साप्ते़ॽओ॥ कन् इङ्घङ्ङिन् सेसे नु से़क्खाबा हे़क्क्याङ् दाउद हाङ्ङिल्ले़ कुदिमिक् के़गप्पे़ल्ले़ पाःत्तुबारो॥ खुने़ॽ हन्दुबान् हाःत्ले़आङ् सुप्मा मे़सुक्तुन्, हे़क्क्याङ् खुने़ॽ सुबुबान् हाःत्ले़आङ् हम्मा मे़सुक्तुन्लो॥ 8 ‘खे़ने़ॽ के़याःम्बक्हाॽ इङ्गाॽ निःसुङ्ङाङ् वाॽआरो॥ के़दगि इङ्गाॽ हन्दुङ्ङाङ् के़बप्पा लाम्धेःप्पे़न् आत्तिन्हाॽरे़आङ् सुप्मा मे़न्छुक्तुन्लो॥ खे़ने़ॽग मिसाक्लक् के़धुम्साङ् इङ्गाॽ आनिसाम्मिन् के़नाःत्तुआङ् के़वाॽ हे़क्क्याङ् इङ्गाॽओ नसाःन्साबा के़बोःक्खे़आङ् के़वाॽरो॥ 9 कुभारे़ आनिगे़ यहुदिसिगे़ मे़लॽ कर खे़ङ्हाॽ मे़ःन्छिरो, खे़ङ्हाॽग माफे़न्साम्मिल्ले़ कुमना इङ्ले़क् के़बाःप्पासिरो॥ खे़प्से़ॽओ, खे़ङ्हाॽ के़लाङ्जक्पो मे़नःम्सिङ्ङाङ् मे़दार चोगुङ्सिङ्ङाङ् खे़ङ्हाॽरे़ खे़ने़ॽए लुङ्माॽ तुक्ने़ॽ के़लॽबान् कुसिङ् मे़निःत्तुॽरो॥ 10 खे़ने़ॽ निङ्घुम् के़दुमुल्ले़ निङ्वाॽ हाङ्गे़म्सिङ्ङे़ॽओ फाॽआङ् इङ्गाॽ पिने़बा इङ्जाःङ्ङिन् ते़न्दिङ् के़जोगुबाल्ले़ चोगुल्ले़ खे़ने़ॽग इक्सादिङ् खाम्बेःक्मो के़दाःबा इनोगे़न् पयम् यम्बा तुक्खेलाम् इङ्गाॽ ताङ्से़ःप्ने़ॽरो॥ खे़ङ्ग इक्सादिङ् खाम्बेःक्मो के़वाॽबा काक् मनाहाॽरे़ खुनिॽ नसाःन्निन् साॽसे़ तार पत्लो॥ 11 इङ्गाॽ हाराए युःआर पत्तारो॥ हे़क्केःल्ले़ खे़ने़ॽ के़नाःन्दुआङ् खोःमा के़बोःङ्बा थुम्घोःन् आत्तिन्हाॽरे़आङ् के़मे़न्नाप्ने़न्ल फाॽआङ् खे़ने़ॽ के़गत्तुबा पाःन्हाॽ नुःरिक्काङ् ताङ्सेःप्ते़ कत्ते़ॽओ॥ 12 के़नाःम्बाङ्ग आनिङ्वाॽफुमाङ्ङिल्ले़ कुहिम्मो इङ्गाॽ सित्लाङ् चोगुङ्लो॥ खुने़ॽ खे़प्मोलाम् आप्फाल्ले़आङ् मे़जत्छिङ्ङिन्लो॥ आनिङ्वाॽफुमाङ्ङिल्ले़ कुमिङ्ङिन् खे़ल्लो इङ्गाॽ साप्तुङ्, हे़क्क्याङ् खे़ल्लो इङ्गाॽ कुसङ् आमिङ्ङिन्नाङ् साप्तुङ्लो॥ हे़क्क्याङ् आनिङ्वाॽफुमाङ्ङिल्ले़ कुसेसे ये़क्यक् कुसङ् यरुसले़मिल्ले़ कुमिङ्ङिन्नाङ् खे़ल्लो साप्तुङ्लो॥ खे़ङ्ग आनिङ्वाॽफुमाङ्ङिल्ले़ साङ्ग्राम्पेदाङ्लाम् पाङ्घु युःसुॽ॥ 13 सेसेमाङ्ङिल्ले़ सेसेहुप्लक्हाॽ मे़त्तुसिबा पाःन्निन् नुःरिक्काङ् खे़प्से़म्मे़ॽआङ् कुसिङ् निःत्ते़म्मे़ॽओ!’ ” 14 “लाओदिकियास्मा सेसेहुप्लक्कोबा माङ्लाइङ्बान् कन् इङ्घङ्ङिन् साप्ते़ॽओ॥ कन् इङ्घङ्ङिन् आमे़न् मे़प्मनाबा, नसाःन्साबा नु से़क्खाबा तोःन्दि, हे़क्क्याङ् निङ्वाॽफुमाङ्ङिल्ले़ ने़स्सुबा नावागे़न् चइःत्तो हाङ्गे़जोःक्पाल्ले़ पाःत्तुबारो– 15 ‘खे़ने़ॽ के़जोगुबा याःम्बक्किन् इङ्गाॽ निःसुङ्लो॥ खे़ने़ॽग के़न्छे़ःम्ने़न्नाङ्, के़ङ्गोःने़न्नाङ्॥ खे़ने़ॽग के़गोःबा मे़ःङ्ग्र के़से़ःम्बा के़बोःक्खे़ल्ले़ नुःरे़बामे़न्! 16 खे़ने़ॽग के़न्छे़ःम्ने़न्नाङ्, के़ङ्गोःने़न्नाङ् कर मक्कोगोरक् के़लॽबाल्ले़ चोगुल्ले़ इङ्गाॽ लाःक्कात् अःने़ लःत्ने़ॽरो॥ 17 खे़ने़ॽग, इङ्गाॽ याङ्साकुन्धेसाबाआ, इङ्गाॽ थेआङ् चाहाबा मे़जोःक्कान् लॽरिक् निङ्वाॽ के़इःत्तुॽ, कर निङ्वाॽफुमाङ्ङिल्ले़ कुनिःमाओ खे़ने़ॽ आक्खे़न् कुबाङ् के़बेःक्पा, लुङ्माॽ के़दुक्पा, याङ्गे़साॽबा, मिक्फःम्बा नु ले़क्चाबे़धिःक् के़जोःक् फाॽआङ् निङ्वाॽ के़ङ्घोःसुन्लो॥ 18 हे़क्केःल्ले़ खे़ने़ॽ याङ्साकुन्धेसाबा पोःङ्मा के़सुक्ल फाॽआङ् मिओ योःम्मनाबा इसेःङ्बा साम्म्याङ्ङिन् इङ्गाॽओलाम् इङे़ॽओ लॽरिक् सुजा पिने़, ले़क्चाबे़धिःक्पा के़धक्किन् ते़प्ते़ॽआङ् नुःम्मा मे़बोःङ्ने़न्ल फाॽआङ् फःगे़लॽबा तेःत्तिन् इङे़ॽओ, हे़क्क्याङ् निःमा के़सुक्पा पोःङ्मा फाॽआङ् मिक् सिदाॽइन् इङे़ॽओ॥ 19 इङ्गाॽ लुङ्माॽ तुक्तुङ्सिङ्बाहाॽ फे़ःक्तुङ्सिङ्ङाङ् तोःन्दुङ्सिङ्लो॥ हे़क्केःल्ले़ खिनिॽ नुःबा याःम्बक् चोःक्माओ सिक् के़सम्बा पोःक्खे़म्मे़ॽओ॥ खिनिॽ लायोलाम् हिन्दे़म्मे़ॽओ॥ 20 खे़प्से़ॽओ! इङ्गाॽ लाम्धेःप्पो ये़प्पाआङ् खक् खक् मे़त्तुङ्॥ आइक्लाःन् खे़प्सुआङ् लाम्धेःप्पे़न् हन्नाॽ पिआने़ फाॽग्र, इङ्गाॽ हिम्सिगाङ् लाःत्ताआङ् खे़न्नु सोरिक् चा चासुगे़ॽरो॥ 21 नसाःन्नो के़नाःम्बान् पानुदिङ् आम्बानु कुहाङ्युक्नाओ इङ्गाॽ नाःन्दुङ्ङाङ् युङ्मा खोःसुङ्बा कुइसिःक् इङ्गाॽनु आहाङ्युक्नाओ युङ्मा युक् पिरुङ्लो॥ 22 सेसेमाङ्ङिल्ले़ सेसेहुप्लक्हाॽ मे़त्तुसिबा पाःन्निन् नुःरिक्काङ् खे़प्से़म्मे़ॽआङ् कुसिङ् निःत्ते़म्मे़ॽओ!’ ” 1 कन् एगाङ् इङ्गाॽ साङ्ग्राम्पेदाङ्ङो लाम्धेःप्पे़न् हल्ले़क् हरे़आङ् पत्छे़बा निःसुङ्लो॥ हे़क्क्याङ् तगि खे़प्सुङ्बा थुत्थुरिःप्पाल्ले़ कुइक्ला कुइसिःक् याम्मो अक्खेलॽरिक् इङ्गाॽनु पारे़रो, “कत्थो थाङे़ॽओ, आल्ल इङ्गाॽ ताःन्दि के़बोःङ्बा पाःन्हाॽ ओःन्धाक्ने़ॽरो॥” 2 खिमो सेसेमाङ्ङिल्ले़ इङ्गाॽ थुक्ताङ्, हे़क्क्याङ् इङ्गाॽ आदगाङ् साङ्ग्राम्पेदाङ्ङोबा हाङ्युक्नाओ के़युङ्बाधिक् निःसुङ्, 3 खे़प्मो के़युङ्बाल्ले़ कुनाराःङ्ग के़ओःप्पा माङ्लुङ् नु कुहे़ःत्लुङ्, इमे़ल्लुङ्बा लुङ् कुइसिःक् ओःत्ते़रो॥ हे़क्क्याङ् हाङ्युक्नाःल्ले़ कुघिरि लुङ्सेःक्कुम् माङ्लुङ् हे़क्के के़ले़क्पा नाम्धिङ्गो पत्छे़॥ 4 हाङ्युक्नाःल्ले़ कुघिरि ने़त्-लि (२४) वेॽ हाङ्युक्नाहाॽ मे़युङे़ हे़क्क्याङ् खे़प्मो फःगे़लॽबा तेःत् के़जाङ्बा साम्म्याङ् तिचः के़घुःङ्बा ने़त्-लि तुम्लाम्लोःबाहाॽ मे़युङे़रो॥ 5 हे़क्क्याङ् हाङ्युक्नालाम् साःम्भे ले़क्ते़ हे़क्क्याङ् खे़प्मोलाम् खे़रे़ङ् घुरुङ् लॽरिक् ताङ्साङ् के़लोःङ्बा इक्लाहाॽ लःन्दे़रो॥ खे़प्मो हाङ्युक्नाःल्ले़ कुदगाङ् नुसि सेमिहाॽ 6 हाङ्युक्नाःल्ले़ कुदगाङ् सिसा हे़क्तङ्बा वहःङ् ने़स्से़रो॥ खे़ङ्ग माङ्लुङ् हे़क्के से़ल्ले़ङ् के़ले़क्पा चोगे़॥ हे़क्क्याङ् कुलुम्मो, हाङ्युक्नाःल्ले़ कुघिरि, एगाङ् तगाङ् काक् पिसाङ् मिक् इस्सेःङ् के़बप्पा लिसि कुहिङ्वे़त् पाथुङ्साहाॽ मे़ये़बे़रो॥ 7 थिक्सिगेःक्पा कुहिङ्वे़त् पाथुङ्साःङ्ग थिरिङ्बान् हे़क्के लॽरे़॥ निसिगेःक्पे़न् पित् हे़क्के लॽरे़॥ सुम्सिगेःक्पाल्ले़ कुनाराःन् मे़न्छाम् याप्मि नारा हे़क्के लॽरे़॥ हे़क्क्याङ् लिसिगेःक्पाङ्ग के़बे़बार के़बप्पा मुया हे़क्तङ्बा चोगे़रो॥ 8 खे़न् लिसि कुहिङ्वे़त् पाथुङ्साहाॽरे़ खुनिॽ नासिङ्गे़न् थक्को तुक्सि लाप्हाॽ मे़बत्छे़, हे़क्क्याङ् खुनिॽ नासिङ्गे़न् थक्किन् नु लाप्पिल्ले़ कुधिम् काक् पिसाङ् मिक् इस्सेःङ् पत्छे़रो॥ खे़ङ्हाॽ से़न्दिक् ले़न्दिक् चक्मे़ल्लॽए अक्खे मे़बाःत्तुर साम्मे़लोःॽ, “मुक्साम्दाङ्बा निङ्वाॽफुमाङ्ङिन् सेसे, सेसे, सेसेबा चोःक्लो॥ खुने़ॽ उनाहुरिओ वये़, आल्लोआङ् वाॽ, हे़क्क्याङ् ताःन्दिआङ् ताःरो॥” 9 खे़न् लिसि कुहिङ्वे़त् पाथुङ्साहाॽरे़ सदादिङ् नु सदादिङ् के़वाॽबाआङ् हाङ्युक्नाओ के़युङ्बान् मिमिदिङ्, मिङ्सो इङ्धाःङ्, नु नोगे़न्रे़न् साम्लोःन् साम्मे़मे़त्तुल्ले़ 10 खे़न् ने़त्-लि (२४) तुम्लाम्लोःबाहाॽरे़ साम्बोःन् मे़भन्छिङ्ल सदादिङ् नु सदादिङ् के़वाॽबाआङ् हाङ्युक्नाओ के़युङ्बान् सेवा मे़जोगुॽरो॥ खे़ङ्हाॽरे़ खुनिॽ तिचःन् हाङ्युक्नाःल्ले़ कुदगाङ् मे़ने़स्सुर अक्खे मे़बाःत्तुॽरो, 11 “खे़ने़ॽग आनिगे़ दाङ्बा नु निङ्वाॽफुमाङ्ने़ॽरो॥खे़ने़ॽग मिमिदिङ् नु मिङ्सो इङ्धाःङ्हे़क्क्याङ् मुक्साम्रे़न् नारा फोःसुम्बे़बा आनिगे़ सेवागे़न् साम्लोःन् ताःक्मा सुम्बोधासाबा के़जोःक्लो,थेआङ्भे़ल्ले़ खे़ने़ॽग काक् पाःन्हाॽ नावागे़न् चइःत् के़जोगु, हे़क्क्याङ् सिक्कुम्दिङ् के़निङ्वाॽलाम् खे़ङ्हाॽ मे़बोःक्खे, हे़क्क्याङ् हिङ्मन् के़बिरुसिआङ् वाॽरो॥” 1 हे़क्क्याङ् इङ्गाॽ हाङ्युक्नाओ के़युङ्बाल्ले़ कुजुप्साङ् हुक्को एगाङ् तगाङ् साप्ते़आङ् के़बप्पा साप्कित्तिन् कत्तुबा निःसुङ्॥ खे़न् साप्कित्तिन् मे़सुबुआङ् नुसि एःप्साप्हाॽ मे़युक्तुआङ् पत्छे़रो॥ 2 हे़क्क्याङ् खे़प्मो मुक्साम्साबा माङ्लाइङ्बान् यम्बा इक्लाओ अक्खेलॽरिक् पारे़बा इङ्गाॽ निःसुङ्, “कन् एःप्साप्हाॽ अङ्मा के़सुक्पा नु साप्कित्तिन् फाःङ्मा के़सुक्पा हाःत् वाॽबे?” 3 कर साङ्ग्राम्पेदाङ्ङो, इक्सादिङ् खाम्बेःक्मो, हे़क्क्याङ् इक्सादिङ् खाम्बेःक् सिगाङ्ङाङ् खे़न् साप्कित्तिन् के़भाःङ्बाआङ् सिगाङ् ओमे़प्मा के़सुक्पा आत्तिन्नाङ् होःप्ते़रो॥ 4 हे़क्केःल्ले़ इङ्गाॽ साॽरिक् हाबाङ्लो, थेआङ्भे़ल्ले़ खे़न् साप्कित्तिन् के़भाःङ्बाआङ् सिगाङ्बा पाःन्निन् निःप्मा के़सुक्पा सुम्बोधासाबा आत्तिन्नाङ् खोःमा सुक्मे़दे़त्ते़न्लो॥ 5 हे़क्क्याङ् तुम्लाम्लोःबाधिक्ले़ इङ्गाॽ मे़त्ताङ्, “मे़हाबे़ने़ॽओ! ओमे़त्ते़ॽ, यहुदा सुवाङ्बा थिरिङ्बा दाउद हाङ्ङिल्ले़ कुमुॽइदाङ्साःल्ले़ कन् नुसि एःप्साप्हाॽ अङ्मा हे़क्क्याङ् साप्कित्तिन् फाःङ्मा सुक्तुॽरो॥” 6 हे़क्क्याङ् इङ्गाॽ हाङ्युक्नाःल्ले़ कुबेसाङ्, लिसि कुहिङ्वे़त् पाथुङ्साहाॽ नु तुम्लाम्लोःबाहाॽरे़ खुनिॽ लुम्मो, मे़ल्लुक्साःन् 7 हे़क्क्याङ् मे़ल्लुक्साःन् त्ये़आङ् हाङ्युक्नाओ के़युङ्बाल्ले़ कुजुप्साङ् हुक्कोलाम् खे़न् साप्कित्तिन् याङ्सिङ्॥ 8 खे़न् साप्कित्तिन् याङ्सिङ्ङिल्ले़ लिसि कुहिङ्वे़त् पाथुङ्साहाॽ नु ने़त्-लि (२४) तुम्लाम्लोःबाहाॽ मे़ल्लुक्साःल्ले़ कुदगि साम्बोःन् मे़भन्छिङ्॥ खे़न् के़रे़क्ले़ खुनिॽ हुक्को साराङ्गि हे़क्तङ्बा मुक्ला नु साङ्सिङ्रे़ के़दिम्बा साम्म्याङ् खोर्याहाॽ मे़गत्तु॥ खे़न् साङ्सिङ्ङिङ्ग निङ्वाॽफुमाङ्ङिल्ले़ सेसे कुयाप्मिहाॽरे़ खुनिॽ तुवारो॥ 9 हे़क्क्याङ् खे़ङ्हाॽरे़ अक्खेलॽरिक् कुसङ् साम्लोधिक् साम्मे़मे़त्तुरो,“खे़ने़ॽग साप्कित्तिन् पङ्माआङ् खे़प्मो के़बप्पा कुएःप्साप्हाॽ अङ्मा सुम्बोधासाबा के़जोःक्लो,थेआङ्भे़ल्ले़ खे़ने़ॽग के़म्से़रे़ हे़क्क्याङ् निङ्वाॽफुमाङ्ङिल्ले़ कुलागि के़रे़क् मे़न्छाम् सुवाङ्हाॽ, के़रे़क् पाःन्दाङ्हाॽ, हे़क्क्याङ् के़रे़क् लाजेहाॽलाम् मनाहाॽ खे़ने़ॽ के़माक्खिॽइल्ले़ के़धे़ॽरुसिरो, 10 हे़क्क्याङ् खे़ङ्हाॽ आनिॽ निङ्वाॽफुमाङ्ङिल्ले़ लत्छा कुहाङ्जुम्मो कुसेवा के़जोःक्पा निङ्वाॽफुसाम्बा के़जोगुसि,हे़क्क्याङ् खे़ङ्हाॽरे़ इक्सादिङ् खाम्बेःक्मो हाङ् मे़जोगुॽरो॥” 11 हे़क्क्याङ् इङ्गाॽ यरिक् माङ्लाइङ्बाहाॽरे़ खुनिॽ इक्लाःन् खे़प्सुङ्ङाङ् ओमे़त्तुङ्सिङ्ङिल्ले़ खे़प्मो हाङ्युक्नाःन् नु कुहिङ्वे़त् पाथुङ्साहाॽ हे़क्क्याङ् तुम्लाम्लोःबाहाॽरे़ खुनिॽ खिरि आत्तात्तान्ने यरिक् माङ्लाइङ्बाहाॽ मे़ये़बे़बा निःसुङ्॥ 12 खे़ङ्हाॽ यम्बा इक्लाओ अक्खेलॽरिक् साम्मे़लोरे़रो,“खे़न् मे़से़रुबा मे़ल्लुक्साःन्, मुक्साम् नु याङ्साकुन्धे, सिक्कुम्दिङ् निङ्वाॽ नु थुम्, मिङ्सो इङ्धाःङ्, मिमिदिङ्, नु नारा फोःमा सुम्बोधासाबा चोःक्लो!” 13 हे़क्क्याङ् इङ्गाॽ साङ्ग्राम्पेदाङ्बा, इक्सादिङ् खाम्बेःक्मोबा नु इक्सादिङ् खाम्बेःक् सिगाङ्बा, हे़क्क्याङ् वाहङ्ङोबा के़रे़क् पाथुङ्साहाॽ अक्खेलॽरिक् साम्मे़लोरे़बा खे़प्सुङ्लो,“हाङ्युक्नाओ के़युङ्बान् नु मे़ल्लुक्साःल्ले़ कुनारा फोःमान्,मिङ्सो इङ्धाःङ्, मिमिदिङ् नु मुक्साम् सदादिङ् सदादिङ् पोःङ्लरो!” 14 हे़क्क्याङ् लिसि कुहिङ्वे़त् पाथुङ्साहाॽरे़ “आमे़न्” मे़बाःत्तु, हे़क्क्याङ् तुम्लाम्लोःबाहाॽरे़ साम्बोःन् मे़भन्छिङ्ङाङ् निङ्वाॽफुमाङ्ङिन् नु मे़ल्लुक्साःन् सेवा मे़जोगुसिरो॥ 1 हे़क्क्याङ् इङ्गाॽ मे़ल्लुक्साःल्ले़ नुसि एःप्साप्पो थिक्सिगेःक्पा एःप्साप्पिन् फाःक्खुबा निःसुङ्, हे़क्क्याङ् लिसि कुहिङ्वे़त् पाथुङ्साहाॽओ थिक्सिगेःक्पाल्ले़ ताङ्साक्पे़न् के़लोःङ्बा इक्लाओ “फे़रे़ॽ” पाःत्तुबा खे़प्सुङ्॥ 2 हे़क्क्याङ् फःदाङ्बा अन्धिक् निःसुङ्॥ खे़न् अन् के़युक्पाल्ले़ कुहुक्को लत्छा लिधिक् कत्तु, हे़क्क्याङ् खे़न् तिचःधिक् मे़बिरुआङ् थङ् के़नाःम्बा कुइसिःक् काक् नाःम्मासि फाॽआङ् खुने़ॽ थासिङ्लो॥ 3 हे़क्क्याङ् मे़ल्लुक्साःल्ले़ निसिगेःक्पा एःप्साप्पिन् फाःक्खुल्ले़ निसिगेःक्पा कुहिङ्वे़त् पाथुङ्साःल्ले़ “फे़रे़ॽ” पाःत्तुबा खे़प्सुङ्॥ 4 हे़क्क्याङ् हे़ःत्ताङ्बा वेॽस्मा अन्धिक् लःन्दे़ फे़रे़ हे़क्क्याङ् मे़न्छाम् याप्मिहाॽ मे़से़त्छिङ्ल फाॽआङ् अन् के़युक्पे़न् इक्सादिङ् खाम्बेःक्मोलाम् सनारुङ्ङिन् खे़प्मादेःमा मुक्साम् मे़बिरु॥ हे़क्क्याङ् यम्बा ताभेधिक्काङ् खे़न् मे़बिरु॥ 5 हे़क्क्याङ् मे़ल्लुक्साःल्ले़ सुम्सिगेःक्पा एःप्साप्पिन् फाःक्खुल्ले़ सुम्सिगेःक्पा पाथुङ्साःल्ले़ “फे़रे़ॽ” पाःत्तुबा खे़प्सुङ्॥ हे़क्क्याङ् माक्ताङ्बा अन्धिक् निःसुङ्, हे़क्क्याङ् खे़न् अन् के़युक्पाल्ले़ कुहुक्को ते़न्दुरिधिक् कत्तु॥ 6 हे़क्क्याङ् खे़प्मो लिसि कुहिङ्वे़त् पाथुङ्साहाॽओलाम् अक्खे के़लॽबा इक्लाधिक् खे़प्सुङ्, “थिक् ये़न्बा नाम्याक् किलो थिक् मासि हे़क्क्याङ् थिक् ये़न्बा नाम्याक् किलो सुम्सि हःक्सिः पोःङ्लो॥ कर जैतुन निःङ्गेःन् नु चे़ल्ले़क्सेॽ थिःन् फे़त्मे़लाःन्दे़ने़ॽओ॥” 7 हे़क्क्याङ् मे़ल्लुक्साःल्ले़ लिसिगेःक्पा एःप्साप्पिन् फाःक्खुल्ले़ लिसिगेःक्पा कुहिङ्वे़त् पाथुङ्साःल्ले़ “फे़रे़ॽ” पाःत्तुबा खे़प्सुङ्॥ 8 हे़क्क्याङ् इङ्गाॽ अम्दाङ्बा अन्निन् खे़प्मो निःसुङ्लो॥ खे़न् अन् के़युक्पाल्ले़ कुमिङ्ग “सिःमे़न्” वये़॥ हे़क्क्याङ् खे़मायङ्सङ्ङोबा के़सिःबाहाॽरे़ खुने़ॽ मे़दिम्दुरो॥ इक्सादिङ् खाम्बेःक्मोबा कुलक् लिसिओ कुलक् थिक् मे़न्छाम् याप्मिहाॽ थङ्, साक्, तुक्मा नु ताम्भुङ् थक्साहाॽलाम् से़प्मासि फाॽआङ् खे़ङ्हाॽ युक् मे़बिरुसिरो॥ 9 हे़क्क्याङ् मे़ल्लुक्साःल्ले़ ङासिगेःक्पा एःप्साप्पिन् फाःक्खुल्ले़ निङ्वाॽफु पाःन्जाक्किन् नु ये़सुरे़ कुयाःम्बेओ मे़बाःत्तुबा पाःन्नो नसाःन्साबा मे़जोगे़बाल्ले़ चोगुल्ले़ मे़से़रुसिबा मे़न्छाम् याप्मिहाॽरे़ खुनिॽ याम्साम्हाॽ इङ्गाॽ ले़त्तिङ् तोःम्मादे़न्निल्ले़ कुसिगाङ् निःसुङ्सिङ्लो॥ 10 खे़ङ्हाॽ अक्खेलॽरिक् यम्बा इक्लाओ मे़अःक्ते़, “सेसे नु से़क्खाबा मुक्साम्दाङ्बाए, खे़ने़ॽ याप्मि के़से़प्पा इक्सादिङ् खाम्बेःक्मोबा मे़न्छाम् याप्मिहाॽ आप्फाल्ले़ खासे़न् के़लोःन्दुसिआङ् खुम्दिङ् के़बिरुसिबाबे?” 11 खे़ङ्हाॽ काक् फःदाङ्बा तेःत् मे़बिरुसि॥ हे़क्क्याङ् खे़ङ्हाॽ हे़क्केए से़प्मा के़बोःङ्बा वेॽ सेवारोबाहाॽ हे़क्क्याङ् फुॽनुसाॽ ने़ॽनुसाॽहाॽ मे़न्छे़त्छिङ्ङे थारिक् हाङ्घे़म्मे़ॽ फाॽआङ् मे़मे़त्तुसिरो॥ 12 आल्ल मे़ल्लुक्साःल्ले़ तुक्सिगेःक्पा एःप्साप्पिन् फाःक्खुबा निःसुङ्॥ हे़क्क्याङ् पयम् यम्बा लुप्लि थाङे़, नाम्मिन्नाङ् माक्थक्ते़आङ् माक्ताङ्बा पोःक्खे़, लाःबान्नाङ् माक्खिॽ कुइसिःक् हे़ःत्ताङ्बा पोःक्खे़ पे, 13 हे़क्क्याङ् पःत्छेॽबुङ्मान् सुरित्माल्ले़ साॽरिक् वाःन्दुल्ले़ मे़न्दुम्मनाबा पःत्छेॽहाॽ मक्थाबा कुइसिःक् यरिक् खेःम्सिक्पाहाॽ इक्सादिङ् खाम्बेःक्मो ताङ्साक्पोलाम् मक्मे़ध्ये़रो॥ 14 हे़क्क्याङ् ताङ्साक्पे़न्नाङ् साप्कित्तिन् कुइसिःक् कित्छिङ्ङाङ् चत्छिङ् पेरो॥ काक् कोःक्मा फाङ्जङ्हाॽ नु वागप्खाम्हाॽ मे़घे़त्छिङ् मे़बेरो॥ 15 हे़क्क्याङ् इक्सादिङ् खाम्बेःक्मोबा हाङ्हाॽ, हाङ्युक्पाहाॽ, थक्लिहाङ्हाॽ, याङ्साकुन्धेसाबाहाॽ, के़धुम्बा मुक्के़गुबाहाॽ, हे़क्क्याङ् काक् योःक्पाहाॽ नु चोःक्युम्भोबाहाॽ के़रे़क् कोःक्माओबा फुक्कुहाॽ नु याक्केःक्हाॽओ मे़जिङ्सिङ्लो॥ 16 खे़ङ्हाॽरे़ कोःक्माहाॽ नु लुङ्हाॽ अक्खे मे़मे़त्तुरो, “आनिगे़ सम्दाङ् मक्थ्ये़ॽआङ् हाङ्युक्नाओ के़युङ्बान् हे़क्क्याङ् मे़ल्लुक्साःल्ले़ कुसिक्के़न्लाम्बा याप्मि आधेःक्ते़ॽ आजिक्खे़ॽओ! 17 थेआङ्भे़ल्ले़ कप्मो खुन्छिॽ किप्मा के़घुःबा सिक् पोःक्माल्ले़न् यम्बा ये़न् त्ये़आङ् वाॽ॥ हाःत्ले़ खे़न् थःप्मा सुक्तुबे?” 1 कन् एगाङ् इङ्गाॽ इक्सादिङ् खाम्बेःक्माल्ले़ लिसि कुसुक्पो के़ये़प्पा लिसि माङ्लाइङ्बाहाॽरे़ खाम्बेःक्मो, वाहङ्ङो, सिङ्बुङ्हाॽओ सुरित् केजङ् मे़हुने़न्ल फाॽआङ् लिसि पिसाङ्लाम् सुरित् केजङ्ङिन् मे़धेःक्तुबा निःसुङ्॥ 2 हे़क्क्याङ् आजुनि निङ्वाॽफुमाङ्ङिल्ले़ कुएःप्साप् के़बङ्बा वेॽस्मा माङ्लाइङ्बाधिक् नाम्गे़न् पिसाङ्लाम् थाङे़बा निःसुङ्॥ खे़ल्ले़ खे़न् खाम्बेःक्मान् नु वाहङ्ङिन् फे़त्लाःम्मा युक् के़घोःबा लिसि माङ्लाइङ्बाहाॽ यम्बा इक्लाओ मे़त्तुसि, 3 “आनिॽ निङ्वाॽफुमाङ्ङिल्ले़ कुसेवारोबाहाॽरे़ खुनिॽ तोवाबाओ आनिगे़ एःप्साप् मे़न्युक्के थारिक् खिनिॽ खाम्बेःक्मान्, वाहङ्ङिन्, सिङ्बुङ्हाॽ थेआङ् फे़त्मे़लाःन्दे़म्मिन्ने़ॽओ॥” 4 हे़क्क्याङ् खुनिॽ तोवाबाओ एःप्साप् मे़युक्तुसिबाहाॽ मे़निःरुसिबा खे़प्सुङ्॥ काक् इस्राइलबा सुवाङ्हाॽरोलाम् लाङे़न्छिङ्धिक्काङ् हे़न्छिङ् लि-लि (१,४४,०००) मे़वये़रो– 5 यहुदा सुवाङ्लाम् हे़न्छिङ् थिक्-ने़त् (१२०००),रुबेन सुवाङ्लाम् हे़न्छिङ् थिक्-ने़त् (१२०००),गाद सुवाङ्लाम् हे़न्छिङ् थिक्-ने़त् (१२०००), 6 आसेर सुवाङ्लाम् हे़न्छिङ् थिक्-ने़त् (१२०००),नाप्तालि सुवाङ्लाम् हे़न्छिङ् थिक्-ने़त् (१२०००),मनस्से सुवाङ्लाम् हे़न्छिङ् थिक्-ने़त् (१२०००), 7 सिमियोन सुवाङ्लाम् हे़न्छिङ् थिक्-ने़त् (१२०००),ले़बि सुवाङ्लाम् हे़न्छिङ् थिक्-ने़त् (१२०००),इस्साकार सुवाङ्लाम् हे़न्छिङ् थिक्-ने़त् (१२०००), 8 जबुलुन सुवाङ्लाम् हे़न्छिङ् थिक्-ने़त् (१२०००),युसुफ सुवाङ्लाम् हे़न्छिङ् थिक्-ने़त् (१२०००), हे़क्क्याङ्बे़न्जामिन सुवाङ्लाम् हे़न्छिङ् थिक्-ने़त् (१२०००)॥ 9 कन् एगाङ् खे़प्मो आत्तात्तान्ने निःप्मा सुक्मे़न्दे़प्मना मनाहाॽ, के़रे़क् लाजेॽहाॽ, के़रे़क् मे़न्छाम् सुवाङ्हाॽ, हे़क्क्याङ् के़रे़क् पाःन्दाङ्हाॽलाम्, हाङ्युक्नाःन् नु मे़ल्लुक्साःल्ले़ कुदगि कब्रिङ् मे़ये़बे़बा निःसुङ्सिङ्॥ खे़ङ्हाॽरे़ फःदाङ्बा तेःत् मे़जाक्खुआङ् खुनिॽ हुक्को खे़बक्सिङ्ङिल्ले़ कुबोराःक्हाॽ मे़बक्खुआङ् मे़ये़बे़॥ 10 खे़ङ्हाॽ यम्बा इक्लाओ अक्खे लॽरिक् मे़अःक्ते़, “हाङ्युक्नाओ के़युङ्बा आनिॽ निङ्वाॽफुमाङ्ङिन् नु मे़ल्लुक्साःल्ले़ खुन्छिॽ मनाहाॽ ताङ्से़ःप्मा मुक्साम् कत्छुॽरो॥” 11 हे़क्क्याङ् हाङ्युक्नाःन्, तुम्लाम्लोःबाहाॽ नु लिसि कुहिङ्वे़त् पाथुङ्साहाॽरे़ खुनिॽ कब्रिङ् के़रे़क् माङ्लाइङ्बाहाॽ मे़ये़बे़आङ् हाङ्युक्नाःल्ले़ कुदगि साम्बोःन् मे़भन्छिङ्ल निङ्वाॽफुमाङ्ङिन् अक्खेलॽरिक् सेवा मे़जोगुरो, 12 “आमे़न्! नारा फोःमान्, मिमिदिङ्ङिन्, सिक्कुम्दिङ् निङ्वाॽइन्, नोगे़न्निन्, इङ्धाःङ्ङिन्, मुक्साम्मिन् नु थुम्मिन् सदादिङ् नु सदादिङ् आनिॽ निङ्वाॽफुमाङ्ङिल्ले़न्नेरो॥ आमे़न्!” 13 हे़क्क्याङ् तुम्लाम्लोःबाधिक्ले़ इङ्गाॽ अक्खेलॽरिक् सेःन्दोःसाङ् “कन् फःदाङ्बा तेःत् के़जाङ्बाहाॽ हाःत्छिबे? हे़क्क्याङ् आत्तोलाम् मे़द्ये़बाबे?” 14 इङ्गाॽ खुने़ॽ नोगप् पिरुङ्, “आदाङ्बे, इङ्गाॽग मे़निःसुङ्सिङ्ङिन्लो, खे़ने़ॽए के़निःसुॽरो॥”हे़क्क्याङ् खुने़ॽ अक्खे मे़त्ताङ्, “कन्हाॽग पयम् यम्बा निङ्घुम्लाम् के़दाःबासिरो॥ कङ्हाॽरे़ मे़ल्लुक्साःल्ले़ कुमाक्खिॽओ खुनिॽ तेःत् चाङ्हाॽ वामे़हप्तुआङ् फःदाङ्बा मे़जोगुआङ् मे़वाॽरो॥ 15 खे़ल्ले़ चोगुल्ले़ए कङ्हाॽग हाङ्युक्नाओ के़युङ्बा निङ्वाॽफुमाङ्ङिल्ले़ कुदगि मे़ये़प्पाङ् से़न्दिक् ले़न्दिक् कुहिम्मो सेवा मे़जोगुॽरो॥ हे़क्क्याङ् हाङ्युक्नाओ के़युङ्बान् खुनिॽनु वाॽआङ् कम्ब्राङ् मे़त्तुसिॽरो॥ 16 कङ्हाॽ याम्मो आप्फाल्ले़आङ् से़त्लाःक्मा नु आङ्गुगे़न् वामिःमाल्ले़ मे़दरुसिन्लो॥ हे़क्क्याङ् नाम्साङ्ङिल्ले़आङ् से़ःप्माआङ् मे़से़ःप्तुसिन्, ये़म्माआङ् मे़ये़म्दुसिन्लो॥ 17 थेआङ्भे़ल्ले़ हाङ्युक्ना लुम्मो के़वाॽबा मे़ल्लुक्साःल्ले़ कङ्हाॽ कमुसिॽ, खुने़ॽ ने़त्तिगे़न् हिङ्मन् के़बिबा वाबुन्नो लाम्लोसुसिरो॥ हे़क्क्याङ् निङ्वाॽफुमाङ्ङिल्ले़ खुनिॽ मिक्वाःन् तुगु पिरुसिॽरो॥” 1 हे़क्क्याङ् मे़ल्लुक्साःल्ले़ नुसिगेःक्पा एःप्साप्पिन् फाःक्खुल्ले़ साङ्ग्राम्पेदाङ्ङो कुमुक् कुभ्रे़ःङ् थारिक् चिजि ये़म्ये़म् पोःक्खे़॥ 2 हे़क्क्याङ् निङ्वाॽफुमाङ्ङिल्ले़ कुदगि के़ये़प्पा नुसि माङ्लाइङ्बाहाॽ निःसुङ्सिङ्॥ खे़ङ्हाॽ नुसि थुत्थुरिःप्पाहाॽ मे़बिरुसिरो॥ 3 हे़क्क्याङ् साम्म्याङ् साङ्ते़रे़ङ् के़बङ्बा वेॽस्मा माङ्लाइङ्बान् त्ये़आङ् ले़त्तिङ् तोःम्मादे़न्निल्ले़ कुबेसाङ् ये़म्सिङ्लो॥ के़रे़क् निङ्वाॽफुमाङ्ङिल्ले़ सेसे कुयाप्मिहाॽरे़ खुनिॽ तुवाःन्नु तोःम्मा फाॽआङ् हाङ्युक्नाःल्ले़ कुदगिबा साम्म्याङ् ले़त्तिङ् तोःम्मादे़न्नो साङ्सिङ् हाःम्मा फाॽआङ् यरिक् साङ्सिङ् मे़बिरुरो॥ 4 हे़क्क्याङ् साङ्सिङ् मिःक्खुःन् नु निङ्वाॽफुमाङ्ङिल्ले़ सेसे कुयाप्मिहाॽरे़ मे़जोगुबा तुवाःन् सोरिक् माङ्लाइङ्बाल्ले़ कुहुक्कोलाम् निङ्वाॽफुमाङ्ङो थाःङ् के़रे़रो॥ 5 हे़क्क्याङ् खे़न् माङ्लाइङ्बाल्ले़ साङ्ते़रे़ङ्ङिन् याङ्सिङ्ङाङ् ले़त्तिङ् तोःम्मादे़न्नोबा मिघाःङ्ङिन् साङ्ते़रे़ङ्ङो केःत्तु, हे़क्क्याङ् इक्सादिङ् खाम्बेःक्मो लाप्फुसु थाःसुरो॥ हे़क्क्याङ् खे़प्मो साःम्भे ले़क्ते़, ताङ्साक्पे़न् खे़रे़ङ् घुरुङ् लॽरिक् लोःक्खु, हे़क्क्याङ् लुप्लि थाङे़रो॥ 6 हे़क्क्याङ् नुसि माङ्लाइङ्बाहाॽरे़ नुसि थुत्थुरिःप्पाहाॽ मुःप्मा फाॽआङ् यारिप् मे़जोगुरो॥ 7 हे़क्क्याङ् थिक्सिगेःक्पा माङ्लाइङ्बाल्ले़ कुधुत्थुरिःप्पे़न् मुःत्तुल्ले़ माक्खिॽनु के़भुत्छिङ्बा फःन् नु मिःन् इक्सादिङ् खाम्बेःक्मो इक्सिङ्ल थाःमा हेःक्ते़रो॥ हे़क्क्याङ् कुलक् सुम्सिओ कुसुक्वा थिक् इक्सादिङ् खाम्बेःक्मान् नु कुलक् सुम्सिओ कुसुक्वा थिक् सिङ्बुङ्हाॽ, हे़क्क्याङ् काक् सरेःत्क्याःप्पा याःन्हाॽ मिदिगे़बेरो॥ 8 हे़क्क्याङ् निसिगेःक्पा माङ्लाइङ्बाल्ले़ कुधुत्थुरिःप्पे़न् मुःत्तुल्ले़ मि के़दिःप्पार के़बप्पा पयम् यम्बा कोःक्मा हे़क्तङ्बान् वाहङ्ङो लाप्फुसिङ्लो॥ हे़क्क्याङ् कुलक् सुम्सिओ कुसुक्वा थिक् वाहङ्ङिन् माक्खिॽ पोःक्खे़ पेरो॥ 9 हे़क्क्याङ् कुलक् सुम्सिओ कुसुक्वा थिक् वाहङ्ङो के़याक्पा कुहिङ्वे़त् पाथुङ्साहाॽ मे़स्ये़, हे़क्क्याङ् खे़प्मोबा कुलक् सुम्सिओ कुसुक्वा थिक् वालाधाहाॽआङ् मे़यरे़ मे़बेरो॥ 10 हे़क्क्याङ् सुम्सिगेःक्पा माङ्लाइङ्बाल्ले़ कुधुत्थुरिःप्पे़न् मुःत्तुल्ले़ ताङ्साक्पोलाम् यम्बा खेःम्सिक्पान् के़दिःप्पा तियालो कुइसिःक् कुलक् सुम्सिओ कुसुक्वा थिक् यङ्घङ् नु वाबुन्हाॽओ मक्थ्ये़रो॥ 11 खे़न् खेःम्सिक्पाल्ले़ कुमिङ्ग “पघिःक् के़घिःक्पा” वये़॥ खे़ल्ले़ कुलक् सुम्सिओ कुसुक्वा थिक् च्वाःत्तिन् के़घिःक्पा चोगु, हे़क्क्याङ् खे़न् च्वाःत्तिन् मे़धुङुआङ् यरिक् मे़न्छाम् याप्मिहाॽ मे़स्ये़रो॥ 12 आल्ल लिसिगेःक्पा माङ्लाइङ्बाल्ले़ कुधुत्थुरिःप्पे़न् मुःत्तुल्ले़ नाम्, लाबा, नु खेःम्सिक्पाहाॽ कुलक् सुम्सिओ कुसुक्वा थिक् याङ्घुआङ् खे़ङ्हाॽरे़ कुलक् सुम्सिओ कुसुक्वा थिक् ओःत्तिःन् मये़रो॥ हे़क्क्याङ् ले़न्दिक् नु से़न्दिक्ले़न्नाङ् कुलक् सुम्सिओ कुसुक्वा थिक् खादामे़रो॥ 13 हे़क्क्याङ् इङ्गाॽ थाःङ् ओमे़त्तुङ्ङिल्ले़ ताङ्साक्पो के़बे़बार के़बप्पा मुयाधिक् यम्बा इक्लाओ अक्खेलॽरिक् अःक्ते़बा खे़प्सुङ्लो, “इक्सादिङ् खाम्बेःक्मो के़वाॽबाहाॽओ तुक्खे, तुक्खे, तुक्खेरो, थेआङ्भे़ल्ले़ आल्ल वेॽस्मा सुम्सि माङ्लाइङ्बाहाॽरे़ खुनिॽ थुत्थुरिःप्पे़न् मुःप्मा ये़म् त्ये़आङ् वाॽरो॥” 1 हे़क्क्याङ् ङासिगेःक्पा माङ्लाइङ्बाल्ले़ कुधुत्थुरिःप्पे़न् मुःत्तुल्ले़ ताङ्साक्पोलाम् इक्सादिङ् खाम्बेःक्मो मक्के़धाःबा खेःम्सिक्पाधिक् निःसुङ्लो॥ खे़न् खेःम्सिक्पे़न् कुद्रोःम् मे़ःन्नेबा लुम्बाःत्तोबा तिमिक्किन् मे़बिरु॥ 2 खे़न् खेःम्सिक्पाल्ले़ कुद्रोःम् मे़ःन्नेबा लुम्बाःत्तिन् हन्दुल्ले़ खे़प्मोलाम् आत्तात्तान्ने यम्बा मिहाःत्लुङ्ङोलाम् के़लःम्बा कुइसिःक् मिःक्खुःन् थाङे़, हे़क्क्याङ् ताङ्साक्पे़न् सिदे़प् ते़प्तुआङ् नाम्मिन् इःप्तुदेःसुरो॥ 3 हे़क्क्याङ् मिःक्खुओलाम् निःङ्घुःक्वाहाॽ मे़लःन्दे़आङ् खाम्बेःक्मो मे़जुक्ते़, हे़क्क्याङ् खे़ङ्हाॽ ताङ्साक्खे़बक्पाहाॽरे़ हे़क्के सिक्मा मुक् मे़बिरुसिरो॥ 4 खे़ङ्हाॽ याःन् पोःक्लाहाॽ, सिङ्बुङ्हाॽ फे़त्लाःम्मा मे़ःन्, कर खुनिॽ तोवाबो निङ्वाॽफुमाङ् एःप्साप् मे़म्बप्मनाबा मे़न्छाम् याप्मिहाॽरक् तुक्खे चाःत्ते़म्सिम्मे़ॽ मे़मे़त्तुसिरो॥ 5 खे़ङ्हाॽ मे़न्छाम् याप्मिहाॽ मे़से़रे़म्सिम्मिन्ने़ॽ कर ला ङासि थारिक् तुक्खे चाःत्ते़म्सिम्मे़ॽ के़लॽबा इङ्जाःङ् मे़बिरुसि॥ हे़क्क्याङ् खे़न् मनाहाॽरे़ खुनिॽ तुक्खेःङ्ग ताङ्साक्खे़बक्पाल्ले़ आसिक्किल्ले़ तुक्पा हे़क्तङ्बा वये़रो॥ 6 खे़न् ये़न्हाॽओ मे़न्छाम् याप्मिहाॽरे़ सिःमे़न् मे़गोःत्तु, कर मे़ङ्घोःसुन्लो॥ हे़क्क्याङ् सिःमा निङ्वाॽ मे़जोगुसाङ् मे़न्छिःने़न्लो॥ 7 खे़न् निःङ्घुःक्वाहाॽग थङ्ङो यारिप् चोःक्मनाबा अन् कुइसिःक् निःमे़धाबे़रो॥ खे़ङ्हाॽरे़ खुनिॽ थे़गेःक्को साम्म्याङ् तिचः हे़क्तङ्बान् मे़घुःक्खुआङ् पत्छे़, हे़क्क्याङ् खुनिॽ नाराःङ्ग मे़न्छाम् याप्मिरे़न् कुइसिःक् चोगे़रो॥ 8 खे़ङ्हाॽरे़ खुनिॽ थे़गेःक्इःङ्ग मे़न्छुमाॽरे़न् हे़क्के केःम्बा चोगे़॥ हे़क्क्याङ् खे़ङ्हाॽरे़ खुनिॽ हाबोॽहाॽग थे़रिङ्बाल्ले़ कुहाबोॽ हे़क्के लॽरे़रो॥ 9 खे़ङ्हाॽरे़ खुनिॽ सङ्बेॽमो फे़न्जेॽ से़ःप्चाङ् मे़जाक्खु॥ हे़क्क्याङ् खे़ङ्हाॽरे़ खुनिॽ लाप्पिङ्ग थङ्ङो अन्लाहाॽ के़उःङ्बाआङ् के़लोःक्पा कुइसिःक् सःक्ते़रो॥ 10 खे़ङ्हाॽरे़ खुनिॽ मेःङ्ग ताङ्साक्खे़बक्पाल्ले़ कुमे कुइसिःक् चोगे़, हे़क्क्याङ् खुनिॽ मेःल्ले़ ला ङासि थारिक् मे़न्छाम् याप्मिहाॽ तुक्खे चाःप्मासि मुक्साम् मे़गत्तु॥ 11 खुनिॽ हाङ्ङिङ्ग कुद्रोःम् मे़ःन्नेबा लुम्बाःत्तिल्ले़ कुमाङ्लाइङ्बान् वये़रो॥ खे़ल्ले़ कुमिङ्ग हिब्रु पाःन्दाङ्ङो अब्बादोन नु ग्रिक पाःन्दाङ्ङो अपोल्लियोन्लो (कङ्हाॽरे़ कुबेःङ्ग “के़मे़ङ्बा” पोःङ्लो)॥ 12 खे़न् थिक्सिगेःक्पा इनोगे़न् तुक्खेःङ्ग पेरो॥ कर ओमे़त्ते़म्मे़ॽओ, वेॽस्मा ने़त्छि इनोगे़न् तुक्खेहाॽ ताःमा के़बोःङ्बा वाॽरो॥ 13 हे़क्क्याङ् तुक्सिगेःक्पा माङ्लाइङ्बाल्ले़ कुधुत्थुरिःप्पे़न् मुःत्तुल्ले़ निङ्वाॽफुमाङ्ङिल्ले़ कुदगिबा साम्म्याङ् ले़त्तिङ् तोःम्मादे़न्निल्ले़ लिसि कुसुक्पो के़बप्पा हासम्सम्बाओनु इक्लाधिक् लःन्दे़बा खे़प्सुङ्॥ 14 खे़न् इक्लाःल्ले़ अक्खेलॽरिक् खे़न् थुत्तुरिःप्पा के़गप्पा तुक्सिगेःक्पा माङ्लाइङ्बान् मे़त्तु, “पयम् यम्बा युफ्रेतिस वाहङ्ङो इघेःङ्मनासिबा लिसि माङ्लाइङ्बाहाॽ ले़रे़से़ॽ॥” 15 हे़क्केलॽरिक् बा कन् तङ्बे, ला, ये़न्, नु कुमुक्ले़ लागि यारिप् मे़बोःक्खे़आङ् के़वाॽबा खे़न् लिसि माङ्लाइङ्बाहाॽ कुसुक्वा थिक् मे़न्छाम् याप्मिहाॽ से़प्मासि फाॽआङ् मे़ले़रुसिरो॥ 16 हे़क्क्याङ् खे़ङ्हाॽरे़ खुनिॽ अन् के़युक्पा थक्सुबाहाॽ युङ्सिङ् ने़त्छि (२०,००,००,०००) मे़वये़बा खुनिॽ खानिःत्तिन् खे़प्सुङ्लो॥ 17 इङ्गाॽ निःसुङ्बा सुफोओ अन्हाॽ नु अन् के़युक्पाहाॽ अक्तङ्बा मे़जोगे़–खे़ङ्हाॽरे़ खुनिॽ सङ्बेॽ से़ःप्चाङ्ङिन् मि हे़क्के हे़ःत्ताङ्बा, कुभिङ्लुङ् हे़क्के फिङ्दाङ्बा नु कान्धाक् हे़क्के अम्दाङ्बा चोगे़रो॥ हे़क्क्याङ् अन्हाॽरे़ खुनिॽ थे़गेःक्पाङ्ग थे़रिङ्बाल्ले़न् कुइसिःक् चोगे़, हे़क्क्याङ् खे़ङ्हाॽरे़ खुनिॽ मुराओलाम् मि, मिःक्खुॽ नु कान्धाक्किन् लःन्दे़रो॥ 18 इक्सादिङ् खाम्बेःक्मोबा कुलक् सुम्सिओ कुलक् थिक् मे़न्छाम् याप्मिहाॽ कन् अन्हाॽरे़ खुनिॽ मुराहाॽओलाम् के़लःम्बा मि, मिःक्खुॽ नु कान्धाक्ले़न् सुम्सि मिन्देॽओलाम् मे़स्ये़रो॥ 19 अन्हाॽरे़ खुनिॽ मुक्साम्मिङ्ग खुनिॽ मुराहाॽओ नु मेहाॽओ पत्छे़रो॥ खुनिॽ मेहाॽग असेःक्पा कुइसिःक् कुधे़गेःक् के़बप्पा चोगे़रो॥ खे़न् थे़गेःक्हाॽरे़ मे़न्छाम् याप्मिहाॽ खाःम्मासि मुक्साम् मे़गत्तुरो॥ 20 हे़क्क्याङ् कन् मिन्देॽलाम् मे़न्छिःमना वेॽ मनाहाॽ आबाङे मे़जोगुबा फे़न् याःम्बक्कोलाम् मे़न्हिन्दे़न्लो॥ आल्लसाङ् खे़ङ्हाॽरे़ फे़न्साम्हाॽ नु मे़म्बाःप्मना, मे़न्निःमना हे़क्क्याङ् लाङ्मे़ङ्घेःक्मना साम्म्याङ्, युप्पा, थथनाबा, लुङ् नु सिङ्ङिल्ले़न् नावाइत्लाहाॽ सेवा चोःक्मा मे़ल्ले़रुन्लो॥ 21 हे़क्क्याङ् खे़ङ्हाॽ मना से़प्मा, कित्चाक् चोःक्मा, याम्बोःप्मा नु खुःम्मालाम् मे़न्हिन्दे़न्लो॥ 1 हे़क्क्याङ् इङ्गाॽ वेॽ मुक्साम्दाङ्बा माङ्लाइङ्बाधिक् साङ्ग्राम्पेदाङ्लाम् ये़ःर पत्छे़बा निःसुङ्॥ खे़न् खाप्मिःत्तिल्ले़ पन्छिङ्ङाङ् वये़, कुधे़गेःक् सम्दाङ्ग नाम्धिङ्गोःन् पत्छे़, खुने़ॽ कुनाराःङ्ग नाम्मिन् हे़क्के मिक् के़जे़म्बा चोगे़, हे़क्क्याङ् कुलाङ्हाॽग मि के़दिःप्पा सित्लाङ् कुइसिःक् चोगे़रो॥ 2 खे़ल्ले़ कुहुक्को चुक्सा फाःङ्मनाबा साप्कित्थिक् कत्तु॥ खे़ल्ले़ कुजुप्साङ् लाङ्ङिल्ले़ वाहङ्ङो नु कुभे़न्छाङ् लाङ्ङिल्ले़ खाम्बेःक्मो तोॽरुआङ् ये़बे़रो॥ 3 हे़क्क्याङ् खे़न् माङ्लाइङ्बान् थे़रिङ्बान् हुःक्ते़बा कुइसिःक्के यम्बा इक्लाओ अःक्ते़रो॥ खुने़ॽ अःक्ते़ल्ले़ ताङ्साक्पे़न् नुसिले़ङ् लोःक्खुरो॥ 4 हे़क्क्याङ् इङ्गाॽ खे़न् ताङ्साक्पा के़लोःङ्बाल्ले़ कुबाःन्निन् साप्माए इःत्तुङ्ङाङ् पत्छाङ्, कर साङ्ग्राम्पेदाङ्लाम् खे़न् नुसि खे़रे़ङ् घुरुङ् के़लॽबाल्ले़ कुबाःन्निन् मे़साप्ते़न्ने़ॽ, कर खे़ङ्हाॽ माॽरे़आङ् कत्ते़ॽओ के़लॽबा इक्लाधिक् खे़प्सुङ्॥ 5 हे़क्क्याङ् इङ्गाॽ निःसुङ्बा खे़न् वाहङ्ङो नु खाम्बेःक्मो के़ये़प्पा माङ्लाइङ्बाल्ले़ कुजुप्साङ् हुक्किन् साङ्ग्राम्पेदाङ् ले़प्माङ् फोःक्खुर 6 साङ्ग्राम्पेदाङ्, इक्सादिङ् खाम्बेःक् नु वाहङ् हे़क्क्याङ् खे़प्मो के़वाॽबा काक् पाःन्हाॽरे़न् नावागे़न् चइःत् के़ने़बा सदादिङ् कुहिङ्वे़त् के़वाॽबा निङ्वाॽफुमाङ्ङिल्ले़ कुमिङ्ङो माङ्हे़क्सिङ्लो॥ खे़न् माङ्लाइङ्बाल्ले़ पाःत्तु, “आल्ल खे़न् ये़म्मिन् ताःमा यरिक् होःप्लो, 7 कर नुसिगेःक्पा माङ्लाइङ्बाल्ले़ कुधुत्थुरिःप्पे़न् मुःत्तुल्ले़ माङ्निङ्वाॽपाःन् के़बाःप्पा 8 हे़क्क्याङ् साङ्ग्राम्पेदाङ्लाम् खे़प्सुङ्बा इक्लाःल्ले़ याम्मो अक्खे मे़त्ताङ्, “पेगे़ॽआङ् खे़न् वाहङ्ङो नु खाम्बेःक्मो के़ये़प्पा माङ्लाइङ्बाल्ले़ कुहुक्को कत्तुबा खे़न् के़बाःङ्बा साप्कित्तिन् ताःक्ते़ॽ॥” 9 हे़क्क्याङ् इङ्गाॽआङ् खे़न् माङ्लाइङ्बाल्लो पेगाङ्ङाङ् खे़न् चुक्सा साप्कित्तिन् नाःक्तुङ्॥ खे़ल्ले़ मे़त्ताङ्, “क्वे़! कन् ताःक्ते़ॽआङ् च्ये़ॽ, कन् के़जःल्ले़ के़मुराओ सक्वाघु हे़क्के पलिम्लिम्साङ् के़साप्पोःक्पो लाःत्ताङ् पघिःक्खिःक्लो॥” 10 हे़क्क्याङ् खे़न् चुक्सा साप्कित्तिन् कुहुक्कोलाम् ताःक्तुङ्ङाङ् इङ्गाॽ चाङ्॥ खे़न् चाङ्ङिल्ले़ आमुराओ पलिम्लिम्दे़, कर आसाप्पोःक्पो लाःसे़आङ् पघिःक्खिःक्ते़रो॥ 11 हे़क्क्याङ् खुने़ॽ अक्खे मे़त्ताङ्, “खे़ने़ॽ यरिक् मनाहाॽ, मे़न्छाम् सुवाङ्हाॽ, यरिक् पाःन्दाङ्हाॽ नु हाङ्हाॽरे़ खुनिॽ याःम्बेओ याम्मो माङ्निङ्वाॽपाःन् के़बाःत्तुरए पोःङ्लो॥” 1 हे़क्क्याङ् इङ्गाॽ कुसिःक्मा सिङ् कुइसिःक् तक्काःत्धिक् मे़बिराङ्ङाङ् अक्खे मे़मे़त्ताङ्, “पेगे़ॽआङ् निङ्वाॽफु माङ्हिम् नु ले़त्तिङ् तोःम्मादे़न्निन् सिःक्ते़ॽ, हे़क्क्याङ् खे़प्मो सेवा के़जोःक्पाहाॽआङ् निरे़से़ॽओ॥ 2 कर हिम्मिल्ले़ लक्खुम्मिन् मे़सिःक्ते़न्ने़ॽओ, थेआङ्भे़ल्ले़ खे़ङ्ग के़रे़क् लाजेॽबा सुवाङ्हाॽ पिरे़आङ् वाॽरो॥ खे़ङ्हाॽरे़ खे़ॽयो ला लि-ने़त् (४२) थारिक् सेसे ये़क्यक्किन् मे़सॽरु मे़लाःक्तुॽरो॥ 3 हे़क्क्याङ् इङ्गाॽ ने़त्छि आदोःन्दि के़बिबाहाॽ युक् पिरुङ्सिङ्, हे़क्क्याङ् खे़ङ्हाॽरे़ सगि तेःत् 4 खुन्छिॽग इक्सादिङ् खाम्बेःक् दाङ्बाल्ले़ कुदगि के़ये़प्पा ने़त्छि जैतुन सिङ्बुङ् नु ने़त्छि सेमियुङ्दे़न्सिरो॥ 5 आत्तिन्हाॽरे़ खुन्छिॽ तुक्खे चाःप्मासि निङ्वाॽ मे़जोगुॽ, खे़ङ्हाॽरे़ खुन्छिॽ मुराओलाम् के़लःम्बा मिराःक्किल्ले़ खुन्छिॽ निङ्मिहाॽ लाबु से़रुसिॽरो॥ अक्खेलॽरिक् खुन्छिॽ तुक्खे चाःप्मासि निङ्वाॽ के़जोःक्पाहाॽ सिःमाए पोःङ्लो॥ 6 खे़ङ्हाॽरे़ माङ्निङ्वाॽपाःन् पाःत्छुर थारिक् पाङ्गे़न्दिङ् वाहित्मान् मे़धाने़न्ल फाॽआङ् तरःङ्गे़न् ताङ्साक्पे़न् सुप्मा मुक्साम् कत्छुॽरो॥ हे़क्क्याङ् यङ्घङ् नु वाहङ्ङिन् माक्खिॽओ ले़ङ्मा मुक्साम्माङ् कत्छुॽ, याम्मो इक्सादिङ् खाम्बेःक्मो खुन्छिॽ निङ्वाॽ हे़क्केए काक् परिक्ले़न् मिन्देॽहाॽआङ् ताःप्मा सुक्सुॽरो॥ 7 खुन्छिॽ तोःन्दि पिमा सुःत्छुआङ् खे़न् कुद्रोःम् मे़ःन्नेबा लुम्बाःत्लाम् के़लःम्बा खे़न् थक्साःल्ले़ खुन्छिॽनु थङ् चोगुॽ, हे़क्क्याङ् खे़ल्ले़ ने़प्मजाङ् नाःन्दुसिॽआङ् से़रुसिॽरो॥ 8 हे़क्क्याङ् खे़ङ्हाॽरे़ खुन्छिॽ थक्किङ्ग खे़न् पयम् यम्बा ये़क्यक्किल्ले़ कुमाराम्मो ने़सिरो॥ खे़प्मोए खुन्छिॽ दाङ्बान् सिलाम्साक्मा सिङ्सम्दाङ् मे़भोःन्दु मे़से़रुआङ् वये़रो॥ खे़न् ये़क्यक्किङ्ग सदोम ये़क्यक् नु मिस्र लाजेॽ हे़क्तङ्बारो॥ 9 हे़क्क्याङ् ये़न् सुम्सिआङ् ले़न्जो थारिक् के़रे़क् मे़न्छाम् सुवाङ्हाॽ, के़रे़क् पाःन्दाङ्हाॽ, हे़क्क्याङ् के़रे़क् लाजेॽहाॽलाम् मनाहाॽरे़ खुन्छिॽ चेहाॽ ओमे़मे़त्तुसाङ् इप्पुङ्ङो लुप्माग मे़म्बाङ्घुन्छिन्लो॥ 10 हे़क्क्याङ् खे़ङ्हाॽ स्ये़त्छिबाओ इक्सादिङ् खाम्बेःक्मोबा मनाहाॽरे़ खुनिॽ सिराॽ थाङ्ङाङ् मे़सःत्लो, हे़क्क्याङ् मिक्तोःक् मे़बिसिङ्लो, थेआङ्भे़ल्ले़ खे़न् ने़प्फु माङ्निङ्वाॽपाःन् के़बाःप्पाहाॽरे़ इक्सादिङ् खाम्बेःक्मो के़वाॽबाहाॽ साॽरिक् इनोगे़न् तुक्खे चाःत्ते़त्छुआङ् वये़त्छिरो॥ 11 कर ये़न् सुम्सिआङ् ले़न्जो एगाङ् खे़ङ्हाॽ ने़प्माङ्ङो ने़त्तिगे़न् हिङ्मन् के़बिबा निङ्वाॽफुमाङ्ङिल्ले़ साःङ्गुगे़न् कुसक्माःन् लाःसे़आङ् ने़प्माङ् पोगे़त्छिआङ् ये़बे़त्छिरो॥ हे़क्क्याङ् खुन्छिॽ ओगे़मे़प्पार के़बप्पा काक् मनाहाॽ साॽरिक् मे़गिसे़रो॥ 12 हे़क्क्याङ् साङ्ग्राम्पेदाङ्लाम् कत्थो थाङे़त्छे़ॽ के़लॽबा यम्बा इक्लाधिक् त्ये़आङ् खुन्छिॽ निङ्मिहाॽरे़ ओमे़मे़त्तुसिर मे़बत्छे़ल्ले़सा थो खाप्मिःत्तो लाःसे़त्छिर साङ्ग्राम्पेदाङ्ङो पेसे़त्छिरो॥ 13 हे़क्क्याङ् आम्भा खे़न् ये़म्मो पयम् यम्बा किप्मा के़घुःबा लुप्लि थाङे़आङ् खे़न् ये़क्यक्किन् थिबोःङ् लक् यरे़ल्ले़ हे़न्छिङ् नुसि (७०००) मनाहाॽ हदॽ मे़स्ये़रो॥ हे़क्क्याङ् मे़न्छिःमना काक् मनाहाॽ साॽरिक् मे़गिसे़आङ् साङ्ग्राम्पेदाङ्बा निङ्वाॽफुमाङ्ङिन् मुक्साम्दाङ्बा चोःक् फाॽआङ् मिमिदिङ् मे़बिरुरो॥ 14 खे़न् निसिगेःक्पा इनोगे़न् तुक्खेःङ्ग पे, कर ओमे़त्ते़म्मे़ॽओ, सुम्सिगेःक्पा इनोगे़न् तुक्खेःङ्ग हाराए तार पत्लो॥ 15 हे़क्क्याङ् नुसिगेःक्पा माङ्लाइङ्बाल्ले़ कुधुत्थुरिःप्पे़न् मुःत्तुल्ले़ साङ्ग्राम्पेदाङ्ङो यम्बा इक्लाहाॽ अक्खेलॽरिक् त्ये़रो, “काक् इक्सादिङ् खाम्बेःक्मान् आनिॽ दाङ्बा नु निङ्वाॽफुमाङ्ङिल्ले़ सेःन्दुबा ख्रिस्ते़ल्ले़ कुहाङ्जुम् पोःक्खे़आङ् वाॽरो॥ हे़क्क्याङ् खुने़ॽ चक्मे़ल्लॽए सदादिङ् सदादिङ् हाङ् चोगुॽरो॥” 16 हे़क्क्याङ् निङ्वाॽफुमाङ्ङिल्ले़ कुदगि आबाङे खुनिॽ हाङ्युक्नाओ के़युङ्बा ने़त्-लि (२४) तुम्लाम्लोःबाहाॽ साम्बोःन् मे़भन्छिङ्ङाङ् निङ्वाॽफुमाङ्ङिन् सेवा मे़जोगुर 17 अक्खे मे़बाःत्तु,“उनाहुरिआङ्धोनु आल्लो थारिक् के़वाॽबा मुक्साम्दाङ्बा निङ्वाॽफुमाङ्ङे, आनिगे़ नाजम्गे़न् नोगे़न् पिआसिगे़ॽरो, थेआङ्भे़ल्ले़ आल्ल पयम् यम्बा के़मुक्साम्मिन् के़दाःक्तुआङ् के़वाॽ हे़क्क्याङ् हाङ्युक् चोःक्मा के़हेःक्तुआङ् के़वाॽरो॥ 18 मे़न्छाम् सुवाङ्हाॽ खे़ने़ॽनु खुनिॽ याःक्ले़ॽरे़आङ् वाॽ,कर आल्ल खे़ने़ॽ के़सिक् पोःक्मा ये़म् के़रे़आङ् वाॽ॥ के़सिःबाहाॽ खासे़न् चोःक्मासि ये़म् त्ये़आङ् वाॽ॥हे़क्क्याङ् खे़ने़ॽनु के़गिबा चुक्सा नु यम्बा, माङ्निङ्वाॽपाःन् के़बाःप्पा के़सेवारोबाहाॽ हे़क्क्याङ् के़सेसे मनाहाॽ हाङ्से़म् पिमासि सुये़म् त्ये़आङ् वाॽ॥आल्ल इक्सादिङ् खाम्बेःक्मान् के़मे़ङ्बाहाॽ मे़ङ्मासि ये़म्माङ् त्ये़आङ् वाॽरो॥” 19 हे़क्क्याङ् साङ्ग्राम्पेदाङ्ङो निङ्वाॽफुमाङ्ङिल्ले़ कुहिम्मिन् हरे़आङ् खे़न् सिगाङ्बा माङ्हुप्पिल्ले़न् सन्दोःक्किन्नाङ् निःधाबे़रो॥ हे़क्क्याङ् साःम्भे ले़क्ते़, ताङ्साक्पे़न् खे़रे़ङ् घुरुङ् लॽरिक् लोःक्खु, लुप्लि थाङे़, हे़क्क्याङ् यम्ब् यम्बा फःन् थ्ये़रो॥ 1 हे़क्क्याङ् तरःङ्दिङ् ताङ्साक्पो इङ्गाॽ निङ्वाॽ के़माबा मिक्सेःन् निःसुङ्लो॥ खे़प्मो चाङ् चाङ्मनाबा कुइसिःक् नाम्मिन् के़जाङ्मा मे़न्छुमाॽधिक् वये़रो॥ खे़ल्ले़ कुलाङ्भोसाङ् लाबान् पत्छे़ हे़क्क्याङ् कुधे़गेःक् सम्दाङ् थिक्-ने़त् खेःम्सिक्हाॽरे़न् तिचः खुःक्खुआङ् पत्छे़॥ 2 खे़न् मे़न्छुक्मा वये़ हे़क्क्याङ् कुसावाःम्मा ये़म्मिन् त्ये़बाल्ले़ सावाःन्दुङ्ङिल्ले़ तरुआङ् यारे़र वये़॥ 3 हे़क्क्याङ् तरःङ्दिङ् ताङ्साक्पो याम्मो इङ्गाॽ वेॽस्मा निङ्वाॽ के़माबा मिक्सेःन्धिक्काङ् निःसुङ्लो–खे़प्मो हे़ःत्के़लॽबा नुसि कुधे़गेःक् के़बप्पा पयम् यम्बा किप्मा के़घुःबा हन्दगेःक्गे़न् वासेरिःन् 4 खे़ल्ले़ कुमेःल्ले़ ताङ्साक्पोबा कुलक् सुम्सिओ कुसुक्वा थिक् खेःम्सिक्हाॽ इक्सादिङ् खाम्बेःक्मो यो सुःन्दु थाःसुसिरो॥ हे़क्क्याङ् अङे़ःक्वाःन् सावाःन्दुल्ले़ लरुङ्देःसुङ् फाॽआङ् मे़न्छुमाॽइल्ले़ कुदगि खे़न् पेआङ् ये़म्सिङ्लो॥ 5 खे़न् मे़न्छुमाॽइल्ले़ इक्सादिङ् खाम्बेःक्मो फे़न्जेॽ तक्काःत्तिल्ले़ काक् मे़न्छाम् सुवाङ् सम्दाङ् हाङ् के़जोःक्पा अङे़ःक्वासाःन् सावाःन्दु॥ खे़न् अङे़ःक्वाःन् सावाःन्छिङ्नामे़ःन्ने निङ्वाॽफुमाङ्ङो हे़क्क्याङ् कुहाङ्युक्नाओ थाःङ् मे़घे़त्तु मे़देॽरुरो॥ 6 हे़क्क्याङ् खे़न् मे़न्छुमाॽइन् हे़न्छिङ् थिक् किप् ने़त्छिआङ् तुक्पोःङ् (१,२६०) ये़न् थारिक् चा मे़प्मा फाॽआङ् एःक्सादे़न्नो निङ्वाॽफुमाङ्ङिल्ले़ यारिप् चोगुबा ते़न्नो खे़त्छिङ् पेरो॥ 7 हे़क्क्याङ् साङ्ग्राम्पेदाङ्ङो पयम् यम्बा ते़न्धङ् पोःक्खे़रो॥ मिखाएल 8 कर खे़न् हन्दगेःक्गे़न् वासेरिःन् नु खे़ल्ले़ कुमाङ्लाइङ्बाहाॽ 9 कन् पयम् यम्बा हन्दगेःक्गे़न् वासेरिःङ्ग उन्छोःन्बा असेःक्पे़न्लो, खे़ङ्ग इक्सादिङ् खाम्बेःक्मोबाहाॽ इङ्ले़क् के़मे़प्पा माफे़न्साम् इग्र सैतान मे़मे़त्तुरो॥ खे़ङ्ग कुमाङ्लाइङ्बाहाॽनु यो इक्सादिङ् खाम्बेःक्मो लाप्फुसे़रो॥ 10 हे़क्क्याङ् साङ्ग्राम्पेदाङ्ङो अक्तङ्बा यम्बा इक्लाधिक् खे़प्सुङ्,“आल्ल निङ्वाॽफुमाङ्ङिल्ले़ कुसे़न्लप्, कुमुक्साम्, कुहाङ्जुम् नु खुने़ॽ सेःन्दुबा ख्रिस्ते़ल्ले़ कुयुक्किन् त्ये़आङ् वाॽरो॥ थेआङ्भे़ल्ले़ निङ्वाॽफुमाङ्ङिल्ले़ कुदगि से़न्दिक् ले़न्दिक् आनिॽ नसानिबा फुॽनुसाॽ ने़ॽनुसाॽहाॽ आप्तिक् के़गुःप्पार के़ने़बान् यो इक्सादिङ् खाम्बेःक्मो लाप्मे़भुसु मे़धासुरो॥ 11 आनिॽ नसानिबा फुॽनुसाॽ ने़ॽनुसाॽहाॽरे़ग मे़ल्लुक्साःल्ले़ कुमाक्खिॽ नु खे़ङ्हाॽरे़ इङ्मे़भोःसुबा से़क्खाःल्ले़ खे़न् माफे़न्साम्मिन् मे़नाःन्दुआङ् मे़वाॽरो॥ हे़क्क्याङ् खे़ङ्हाॽग सिःमाआङ् मे़ङ्गिसे़न्लो॥ 12 खे़ल्ले़ चोगुल्ले़ साङ्ग्राम्पेदाङ् नु खे़प्मो के़वाॽबासे, सःत्ते़म्मे़ॽओ! कर इक्सादिङ् खाम्बेःक्मो नु वाहङ्ङो के़वाॽबासे, खिनिॽग के़जिःत्ति के़स्ये़ॽइरो, थेआङ्भे़ल्ले़ माफे़न्साम्मिङ्ग खिनिॽओ थ्ये़आङ् वाॽरो॥ खे़ल्ले़ साॽरिक् कुसिक्के़न् पोगे़, थेआङ्भे़ल्ले़ खे़ल्ले़ कुये़म्मिन् सुःल्लिक्लक् वाॽ फाॽआङ् निङ्वाॽ खोःसुआङ् वाॽ॥” 13 हे़क्क्याङ् हन्दगेःक्गे़न् वासेरिःल्ले़ खुने़ॽ इक्सादिङ् खाम्बेःक्मो लाप्मे़भुसाङ् के़लॽबा निङ्वाॽ खोःसुआङ् खे़न् अङे़ःक्वासाः के़गप्मा मे़न्छुमाॽइन् तुक्खे चाःत्छे़ नाःप्मा हेःक्तु॥ 14 कर खे़न् मे़न्छुमाॽइन् हन्दगेःक्गे़न् वासेरिःल्ले़ मे़याङ्घुन्ल फाॽआङ् एःक्सादे़न्नो यारिप् चोःक्मनाबा चिङ्सिङ्मादे़न्नो खे़त्छिङ्मा पेःक्मा सुक्ल फाॽआङ् पयम् यम्बा ने़त्छि मुया लाप्हाॽ मे़बिरुरो॥ खे़प्मो तङ्बे सुम्सिआङ् कुभ्रे़ःङ् थारिक् खुने़ॽ चा मे़मे़त्तुॽरो॥ 15 खे़न् हन्दगेःक्गे़न् वासेरिःल्ले़ खे़न् मे़न्छुमाॽइन् च्वाःत्तिल्ले़ वादेःम्मा तेःमाआङ् से़प्मा फाॽआङ् यङ्घङ् क्याःप्पा च्वाःत्तिन् कुमुराओलाम् अःसु लःत्तुरो॥ 16 कर इक्सादिङ् खाम्बेःक्माल्ले़ खे़न् हन्दगेःक्गे़न् वासेरिःल्ले़ कुमुराओलाम् अःसु लःत्तुबा यङ्घङ्ङिन् काक् लरुदेःसुआङ् खे़न् मे़न्छुमाॽइन् कुभाॽ पिरुरो॥ 17 हे़क्क्याङ् खे़न् हन्दगेःक्गे़न् वासेरिःल्ले़ मे़न्छुमाॽइन्नु साॽरिक् कुसिक् पोगे़आङ् निङ्वाॽफुमाङ्ङिल्ले़ कुइङ्जाःङ् के़नाःप्पा के़इःप्पा नु ये़सुरे़ कुनिसाम् नसाःन् के़जोःक्पा खे़न् मे़न्छुमाॽइल्ले़ वेॽ कुमुॽइदाङ्साहाॽनु थङ् चोगुरो॥ 18 हे़क्क्याङ् खे़न् हन्दगेःक्गे़न् वासेरिःन् वाहङ्ङिल्ले़ कुयाओ ये़म्सिङ्लो॥ 1 हे़क्क्याङ् इङ्गाॽ वाहङ्ङोलाम् के़लःम्बा किप्मा के़घुःबा थक्साःन् निःसुङ्लो॥ खे़ल्ले़ नुसि कुधे़गेःक्हाॽओ थिबोःङ् कुदाङ्हाॽ मे़बत्छे़, हे़क्क्याङ् खे़ल्ले़ कुदाङ्हाॽओ थिबोःङ् तिचःहाॽ खुःक्खुआङ् पत्छे़॥ खे़ल्ले़ के़रे़क् कुधे़गेःक्को निङ्वाॽफुमाङ्ङिल्ले़ कुदक्ले़ङ्वाओ माङ्चे़ॽया मिङ् साप्ते़आङ् पत्छे़॥ 2 खे़न् किप्मा के़घुःबा थक्साःङ्ग थक्केबा कुइसिःक् निःसुङ्, कर खे़ल्ले़ कुलाङ्हाॽ माःॽयुबाल्ले़न् नु कुमुराःङ्ग थे़रिङ्बाल्ले़न् हे़क्तङ्बा चोगे़रो॥ हन्दगेःक्गे़न् वासेरिःल्ले़ खे़न् किप्मा के़घुःबा थक्साःन् आबाङे कुमुक्, कुहाङ्युक्नाःन् हे़क्क्याङ् पयम् यम्बा कुयुक्किन् पिरुरो॥ 3 खे़न् किप्मा के़घुःबा थक्साःल्ले़ थिक् कुधे़गेःक्पे़न् सिःमालिङ्धोओ के़रे़र थारिक् काःन्दे़आङ् पत्छे़बा निःदे़त्ते़, कर याङ्सि खे़न् के़गाःम्बा याङ्घेःक्किन् वेःत्ते़रो॥ हे़क्क्याङ् इक्सादिङ् खाम्बेःक्मोबा काक् मे़न्छाम्गे़न् याप्मिहाॽरे़ खे़न् मे़निःसुआङ् खुनिॽ निङ्वाॽ मये़र खे़न् किप्मा के़घुःबा थक्साःन् मे़दिम्दुरो॥ 4 मनाहाॽरे़ खे़न् हन्दगेःक्गे़न् वासेरिःन् सेवा मे़जोगु, थेआङ्भे़ल्ले़ खे़ल्ले़ कुयुक्किन् किप्मा के़घुःबा थक्साःन् पिरुआङ् वये़, हे़क्क्याङ् खे़ङ्हाॽरे़ अक्खे मे़बाःत्तुर सेवा मे़जोगु, “कन् किप्मा के़घुःबा थक्साःन् हे़क्तङ्बा हाःत् वाॽबे? कन् किप्मा के़घुःबा थक्साःन्नु थङ् चोःक्मा के़सुक्पा हाःत् वाॽआङ्बे?” 5 हे़क्क्याङ् खे़न् किप्मा के़घुःबा थक्साःन् आङ्दिङ् पाःन् नु निङ्वाॽफुमाङ्ङिल्ले़ कुदक्ले़ङ्वाओ ताप्फे़ःम्बा माङ्चे़ॽया पाःन्हाॽ पाःप्मा मे़बाङ्घुरो॥ हे़क्क्याङ् लि-ने़त् ला (४२) थारिक् कुबाःप्पाःत् चोःक्मा युक् खोःसुरो॥ 6 हे़क्क्याङ् खे़ल्ले़ निङ्वाॽफुमाङ्ङिल्ले़ कुदक्ले़ङ्वाओ ताप्फे़ःम्बा माङ्चे़ॽया पाःन्हाॽ पाःत्तुर निङ्वाॽफुमाङ्ङिल्ले़ कुमिङ् नु कुयुङ्दे़न् हे़क्क्याङ् साङ्ग्राम्पेदाङ्ङो के़वाॽबाहाॽरे़ खुनिॽ चाःत्थि तेःसु पिरुसिरो॥ 7 हे़क्क्याङ् खे़न् थक्साःल्ले़ निङ्वाॽफुमाङ्ङिल्ले़ सेसे कुमनाहाॽरे़ खुनिॽ तक्ले़ङ्वाओ थङ् चोःक्माआङ् नाःम्मासि युक् खोःसुरो॥ हे़क्क्याङ् याम्मो खे़न् थक्साःल्ले़ इक्सादिङ् खाम्बेःक्मोबा के़रे़क् मे़न्छाम् सुवाङ्हाॽ, के़रे़क् पाःन्दाङ्हाॽ, हे़क्क्याङ् के़रे़क् लाजेॽहाॽ सम्दाङ् युक् चोःक्मा खोःसुरो॥ 8 से़प्मनाबा मे़ल्लुक्साःल्ले़ कुहिङ्मन्ले़ कुसाप्पन्नो इक्सादिङ् खाम्बेःक्माल्ले़न् नावागे़न् चइःत् ने़मानुःल्ले़ तगिए खुनिॽ मिङ् मे़न्छाप्पे के़वाॽबा इक्सादिङ् खाम्बेःक्मोबा के़रे़क्ले़ खे़न् थक्साःन् सेवा मे़जोगुरो॥ 9 आल्ल नुःरिक्काङ् खे़प्से़म्मे़ॽआङ् कुसिङ् निःत्ते़म्मे़ॽओ! 10 पुङ्लाहिम्मो थाःमा के़बोःङ्बान्, पुङ्लाहिम्मो थाःॽ हे़क्क्याङ् ताभेलाम् सिःमा के़बोःङ्बान्, ताभेलाम्बाए सिःरो॥ खे़ल्ले़ चोगुल्ले़ निङ्वाॽफुमाङ्ङिल्ले़ सेसे कुमनाहाॽरे़ इनोगे़न् तुक्खेःन् नासि थःप्मा पोःङ्ङाङ् नसाःन्साबा पोःङ्माआङ् वाॽमाए पोःङ्लो॥ 11 हे़क्क्याङ् इङ्गाॽ इक्सादिङ् खाम्बेःक्मोलाम् वेॽस्मा किप्मा के़घुःबा थक्साधिक् लःन्दे़ थाङे़बा निःसुङ्लो॥ खे़ल्ले़ थुःम्बाल्ले़न् कुइसिःक् ने़त्छि कुदाङ् युङे़, कर खे़ङ्ग हन्दगेःक्गे़न् वासेरिःन् कुइसिःक् पारे़रो॥ 12 खे़ल्ले़ थिक्सिगेःक्पा किप्मा के़घुबा थक्साःल्ले़ काक् कुयुक्हाॽ ओगप् चोगुरो॥ खे़ल्ले़ इक्सादिङ् खाम्बेःक्मोबा काक् मे़न्छाम् याप्मिहाॽ सिःमालिङ्धो थारिक् के़गाःम्बाआङ् के़हिङ्बा खे़न् थिक्सिगेःक्पा किप्मा के़घुबा थक्साःन् सेवा चोःक्मा पाङ्घुसिरो॥ 13 हे़क्क्याङ् खे़ल्ले़ग निङ्वाॽ के़माबा याःम्बक्हाॽ चोगुआङ् तरःङ्दिङ् ताङ्साङ्लाम् इक्सादिङ् खाम्बेःक्मो मनाहाॽरे़ खुनिॽ तगि मिराःक्काङ् थाःसुरो॥ 14 थिक्सिगेःक्पा किप्मा के़घुःबा थक्साःल्ले़ कुले़क्वा खे़न् किप्मा के़घुःबा थक्साःल्ले़ निङ्वाॽ के़माबा याःम्बक्हाॽ चोःक्मा खोःसुआङ् इक्सादिङ् खाम्बेःक्मोबा मे़न्छाम् याप्मिहाॽ इङ्ले़क्तुसिरो॥ खे़ल्ले़ खे़न् सिःमालिङ्धोओ थारिक् ताभेःल्ले़ के़गाःम्बाआङ् याम्मो के़हिङ्बा थिक्सिगेःक्पा किप्मा के़घुःबा थक्साःल्ले़ कुमिङ्सो कुधाःङ्सोओ नावाइत्ला चोःक् पाङ्घुसिरो॥ 15 हे़क्क्याङ् खे़ल्ले़ खे़न् थिक्सिगेःक्पा किप्मा के़घुःबा थक्साःल्ले़न् नावाइत्लाःन् पाःप्मा सुक्ल हे़क्क्याङ् खे़न् सेवा चोःक्मा मे़न्दे़म्मनाबाहाॽ से़रुसिर फाॽआङ् खे़न् नावाइत्लाओ साःङ्गुगे़न् सक्मा केःप्मा मुक्साम् खोःसुरो॥ 16 खे़ल्ले़ यम्बा चुक्पा, याङ्साकुन्धेसाबा नु याङ्के़साॽबा, योःक्पा नु चोःक्युम्भोबा काक् मे़न्छाम् याप्मिहाॽ खुनिॽ चुप्साङ् हुक्को इग्र खुनिॽ तोवाबो इबुगे़न् मिक्सेःन् लक्मा पाङ्घुसिरो॥ 17 खे़न् इबुगे़न् मिक्सेःन् मे़ःन्ने सङ्मा नु इङ्मा आत्तिल्ले़आङ् मे़सुक्तुन्लो॥ खे़न् मिक्सेःन्निङ्ग किप्मा के़घुःबा थक्साःल्ले़ कुमिङ् इग्र कुमिङ्ङिल्ले़ कुघानिःत् पोःङ्लो॥ 18 कन् पाःन्निन् कुसिङ् निःप्मा सिक्कुम्दिङ् निङ्वाॽ चाहाबा चोःक्लो॥ आत्तिन् सिक्कुम्दिङ् निङ्वाॽसाबा चोःक् हाराॽ खे़ल्ले़ खे़न् किप्मा के़घुःबा थक्साःल्ले़ कुघानिःत्तिल्ले़ कुबेःन् फाःक्खुररो, थेआङ्भे़ल्ले़ खे़न् लत्छा मे़न्छाम् याप्मिःल्ले़ कुघानिःत्लो॥ खे़न् खानिःत्तिङ्ग ६६६रो॥ 1 हे़क्क्याङ् इङ्गाॽ मे़ल्लुक्साःन् सियोन कोःक्मा सम्दाङ् ये़बे़बा निःसुङ्लो॥ खुने़ॽनु लाङे़न्छिङ्धिक्काङ् हे़न्छिङ् लि-लि (१,४४,०००) मनाहाॽ मे़वये़रो॥ खे़ङ्हाॽरे़ खुनिॽ तोवाबो खुने़ॽ कुमिङ् नु पानुदिङ् कुम्बारे़ कुमिङ्ङिन् साप्ते़आङ् पत्छे़रो॥ 2 हे़क्क्याङ् इङ्गाॽ साङ्ग्राम्पेदाङ्ङो पयम् यम्बा च्वाःत् सःक्ते़बा कुइसिःक् नु खे़रे़ङ् घुरुङ् के़लॽबा इक्लाधिक् खे़प्सुङ्लो॥ खे़न् के़सःक्पे़न् खे़प्मो यरिक् मनाहाॽरे़ सोरिक् साराङ्गि मे़मुक्खुबा कुइसिःक् चोगे़रो॥ 3 खे़ङ्हाॽरे़ निङ्वाॽफुमाङ्ङिल्ले़ कुहाङ्युक्नाःल्ले़न् हे़क्क्याङ् लिसि कुहिङ्वे़त् पाथुङ्साहाॽ नु तुम्लाम्लोःबाहाॽरे़ खुनिॽ तगि कुसङ् साम्लोःन् साम्मे़मे़त्तुबा इङ्गाॽ खे़प्सुङ्लो॥ खे़न् साम्लोःङ्ग इक्सादिङ् खाम्बेःक्मोलाम् थे़ॽमनाबा खे़न् लाङे़न्छिङ्धिक्काङ् हे़न्छिङ् लि-लि (१,४४,०००) मनाहाॽनुःल्ले़ वेॽ आत्तिन्हाॽरे़आङ् हुॽसिङ्मा मे़न्छुक्तुन्लो॥ 4 खे़ङ्हाॽग आप्फाल्ले़आङ् मे़न्छुमाॽनु मे़म्बोःत्ते मे़वये़ हे़क्क्याङ् आबाङे सेसे मे़गत्छिङ्ङाङ् मे़वये़रो॥ खे़ङ्हाॽग मे़ल्लुक्साःन् आत्तान् पेःक्साङ् कुएगाङ् कुएगाङ् के़दिम्बासिरो॥ खे़ङ्हाॽग काक्नु तगि के़दुम्बा पोगुगे़न् कुजा कुइसिःक् निङ्वाॽफुमाङ् नु मे़ल्लुक्साःओ तोःम्मासि फाॽआङ् इक्सादिङ् खाम्बेःक्मोबा मे़न्छाम् याप्मिलाम् कुमे़ल्लुङ् हुङ्मनाआङ् थे़ॽमनाबासिरो॥ 5 खे़ङ्हाॽरे़ आप्फाल्ले़आङ् इङ्ले़क् पाःन् मे़म्बाःत्तुन्नाङ् फोत्या मे़ःन्ने मे़वाॽरो॥ 6 हे़क्क्याङ् इङ्गाॽ ताङ्साक्पो वेॽस्मा माङ्लाइङ्बाधिक् पे़रे़र पत्छे़बा निःसुङ्लो॥ खे़ल्ले़ इक्सादिङ् खाम्बेःक्मो के़वाॽबा के़रे़क् मे़न्छाम् सुवाङ्हाॽ, के़रे़क् पाःन्दाङ्हाॽ, हे़क्क्याङ् के़रे़क् लाजेॽहाॽओ मे़न्नुप्मनाबा सुनाइङ् इङ्भन् चोःक्मा कत्तुरो॥ 7 खे़ल्ले़ यम्बा इक्लाओ अक्खे पाःत्तु, “निङ्वाॽफुमाङ्ङिन्नु किःसे़म्मे़ॽआङ् मिमिदिङ् पिरे़म्मे़ॽओ, थेआङ्भे़ल्ले़ खुने़ॽ कुघासे़न् चोःक्मा ये़म्मिन् त्ये़आङ् वाॽरो॥ तरःङ्दिङ् ताङ्साक्पे़न्, इक्सादिङ् खाम्बेःक्मान्, वाहङ् नु च्वाःत्तिल्ले़ कुबुन्हाॽरे़न् नावागे़न् चइःत् के़ने़बान् सेवा चोगे़म्मे़ॽओ॥” 8 हे़क्क्याङ् थिक्सिगेःक्पा माङ्लाइङ्बाल्ले़ कुएगाङ् के़बप्पा निसिगेःक्पा माङ्लाइङ्बाल्ले़ अक्खे पाःत्तुर अःक्ते़, “बे़बिलोनिन् 9 हे़क्क्याङ् सुम्सिगेःक्पा माङ्लाइङ्बाल्ले़ खुन्छिॽ एगाङ् तिम्दुसिर यम्बा इक्लाओ अक्खेलॽरिक् अःक्ते़, “हाःत्ले़ खे़न् किप्मा के़घुःबा थक्साःन् नु कुनावाइत्लाःन् सेवा चोगुॽ, हे़क्क्याङ् कुदोॽवाबो इग्र कुहुक्को खे़न् किप्मा के़घुःबा थक्साःल्ले़ इबुगे़न् कुमिक्सेःन्निन् लक्तुॽ, 10 खे़ल्ले़ग थेआङ् मे़म्भुत्तेबा निङ्वाॽफुमाङ्ङिल्ले़ किप्मा के़घुःबा कुसाक्किल्ले़न् खोर्याःन्लाम् थुङ्माए पोःङ्लो॥ हे़क्क्याङ् खे़ङ्ग मे़ल्लुक्साःन् नु सेसे माङ्लाइङ्बाहाॽरे़ खुनिॽ तगि कान्धाक् नु मिःल्ले़ लाबुर तुक्खे चारो॥ 11 हे़क्क्याङ् खे़ङ्हाॽ तुक्खे के़जाःप्पा मिःल्ले़ मिःक्खुॽइङ्ग सदादिङ् सदादिङ् थाःङ् पेःक्लो॥ हे़क्क्याङ् खे़ङ्हाॽरे़ खुनिॽ तुक्खेःन् से़न्दिक् ले़न्दिक् आप्फाल्ले़आङ् मे़नुप्ने़न्लो, थेआङ्भे़ल्ले़ खे़ङ्हाॽरे़ किप्मा के़घुःबा थक्सा नु कुनावाइत्लाःन् सेवा मे़जोगुआङ् कुमिङ्ङिल्ले़न् इबुगे़न् मिक्सेःन्निन् मे़लक्तुआङ् मे़वये़रो॥” 12 खे़ल्ले़ चोगुल्ले़ निङ्वाॽफुमाङ्ङिल्ले़ कुइङ्जाःङ् के़घे़म्बाहाॽ नु ये़सुःन् नसाःन् के़जोःक्पा निङ्वाॽफुमाङ्ङिल्ले़ सेसे कुमनाहाॽरे़ नासि थःप्माए पोःङ्लो॥ 13 हे़क्क्याङ् साङ्ग्राम्पेदाङ्ङो इक्लाधिक् अक्खेलॽरिक् पारे़बा खे़प्सुङ्, “कन् पाःन्निन् साप्ते़ॽ, आल्लआङ्धो दाङ्बान् नसाःन् के़जोःक्पाआङ् के़सिःबाहाॽग मुॽइसाबासिरो॥”सेसेमाङ्ङिल्ले़ पाःत्तु, “से़क्खाए खे़ङ्हाॽ मुॽइसाबासिरो, खे़ङ्हाॽ खुनिॽ याम्बुधिक्लाम् मे़नाःम्सिङ्, थेआङ्भे़ल्ले़ खे़ङ्हाॽरे़ मे़जोगुबा याःम्बक् कुइसिःक् हाङ्से़म् मे़घोःसुॽरो॥” 14 हे़क्क्याङ् इङ्गाॽ “मे़न्छाम्साःन्” हे़क्तङ्बाधिक् फःगे़लॽबा खाप्मिःत्तो युङे़बा निःसुङ्लो॥ खुने़ॽ साम्म्याङ् तिचःन् खुःक्खुआङ् पत्छे़ हे़क्क्याङ् कुहुक्को खागे़सुक्पा कात्च्याःन् कत्तुरो॥ 15 हे़क्क्याङ् निङ्वाॽफु माङ्हिम्मोलाम् वेॽस्मा माङ्लाइङ्बान् लःन्दे़आङ् खे़ल्ले़ यम्बा इक्लाओ खे़न् खाप्मिःत्तो के़युङ्बान् मे़त्तु, “के़गात्च्याःन् याङ्सिङ्ङे़ॽआङ् चा सुप्से़ॽओ, थेआङ्भे़ल्ले़ चा सुम्मा ये़म्मिन् त्ये़आङ् वाॽ हे़क्क्याङ् पोगुगे़न् कुजाःन् 16 हे़क्क्याङ् खे़न् खाप्मिःत्तो के़युङ्बाल्ले़ कुगात्च्याःन् याङ्सिङ्ङाङ् हे़गुर काक् इक्सादिङ् खाम्बेःक्मो चाःन् सुप्सुॽरो॥ 17 खे़न् एगाङ् साङ्ग्राम्पेदाङ्बा निङ्वाॽफुमाङ्ङिल्ले़ कुहिम्मोलाम् वेॽस्मा माङ्लाइङ्बाधिक् लःन्दे़॥ खे़ल्ले़आङ् कुहुक्को खागे़सुक्पा कात्च्याःन् कत्तुरो॥ 18 हे़क्क्याङ् साङ्सिङ् हाःम्मादे़न्नोलाम् मिःसम्दाङ् युक् के़गप्पा वेॽस्मा माङ्लाइङ्बान् लःन्दे़आङ् खे़ल्ले़ खे़न् खागे़सुक्पा कात्च्या के़गप्पे़न् यम्बा इक्लाओ अःक्ते़र मे़त्तु, “खे़न् खागे़सुक्पा के़गात्च्याःन् याङ्सिङ्ङे़ॽआङ् इक्सादिङ् खाम्बेःक्मोबा काक् चे़ल्ले़क्सेॽहाॽ सुप्से़ॽ, थेआङ्भे़ल्ले़ खे़ङ्हाॽग तुम्से़घे़रे़आङ् पत्लो॥” 19 हे़क्केःल्ले़ खे़न् माङ्लाइङ्बाल्ले़ कुगात्च्याःन् याङ्सिङ्ङाङ् इक्सादिङ् खाम्बेःक्मो काक् चे़ल्ले़क्सेॽहाॽ सुप्सुआङ् निङ्वाॽफुमाङ्ङिल्ले़ कुसाक्किल्ले़न् पयम् यम्बा चे़ल्ले़क्सेॽ एःम्मादे़न्नो केःत्तुॽरो॥ 20 हे़क्क्याङ् ये़क्यक् लाःक्कात् चे़ल्ले़क्सेॽ एःम्मादे़न्नो मे़लाःक्तु मे़सॽरुआङ् खे़प्मोलाम् माक्खिॽ लःन्दे़रो॥ खे़न् माक्खिॽइन् अन्हाॽरे़ खुनिॽ करे़लि थारिक् थाःङ् थाङे़आङ् कुगिप् सुम्सि (३००) किलोमितर थारिक् वागुसे़ पेरो॥ 1 हे़क्क्याङ् साङ्ग्राम्पेदाङ्ङो वेॽस्मा निङ्वाॽ के़माबा नु पयम् यम्बा इबुगे़न् मिक्सेःन्निन् इङ्गाॽ निःसुङ्लो–खे़प्मो नुसि माङ्लाइङ्बाहाॽरे़ नुसि कुनुप्मोबा मिन्देॽहाॽ मे़गत्तुरो॥ खे़न् मिन्देॽहाॽओए निङ्वाॽफुमाङ्ङिल्ले़ कुसाक्के़न्निन् नुबे़आङ् वाॽरो॥ 2 हे़क्क्याङ् इङ्गाॽ मि नु के़बुप्पा से़ल्ले़ङ्घो कुइसिःक्पा वाहङ्धिक् निःसुङ्लो॥ खे़ल्ले़ कुयाओ खे़न् किप्मा के़घुःबा थक्साःन्, कुनावाइत्ला नु खे़ल्ले़ कुमिङ्ङिल्ले़ कुघानिःत्तिन् के़नाःम्बाहाॽ खे़प्मो मे़ये़बे़बा निःसुङ्सिङ्लो॥ खे़ङ्हाॽरे़ निङ्वाॽफुमाङ्ङिल्ले़ पिरुसिबा साराङ्गिहाॽ मे़गत्तुरो॥ 3 हे़क्क्याङ् खे़ङ्हाॽरे़ निङ्वाॽफुमाङ्ङिल्ले़ कुसेवारोबा मोसारे़ कुसाम्लो नु मे़ल्लुक्साःल्ले़ कुसाम्लोःन् अक्खेलॽरिक् साम्मे़मे़त्तु,“मुक्साम्दाङ्बा निङ्वाॽफुमाङ्ङे,खे़ने़ॽ के़याःम्बक्हाॽग पयम् यम्बा नु निङ्वाॽ के़माबा चोःक्लो॥काक् मे़न्छाम् सुवाङ्हाॽरे़ खुनिॽ हाङ्ङे,खे़ने़ॽ के़लाम्हाॽग नुःबा नु से़क्खाबा चोःक्लो॥ 4 यहवे दाङ्बाए,खे़ने़ॽग हाःत्ले़ के़ङ्गित्ने़न्बे? हे़क्क्याङ् हाःत्ले़ के़नारा मे़भोःसुम्बे?थेआङ्भे़ल्ले़ खे़ने़ॽरक् सेसेबा के़जोःक्॥काक् मे़न्छाम् सुवाङ्हाॽ मे़दाःआङ् खे़ने़ॽ सेवा के़म्जोःक्लो,थेआङ्भे़ल्ले़ साम्योनिबा के़याःम्बक्किन् ओसेःन्दाङ् पोःक्खे़आङ् वाॽरो॥” 5 हे़क्क्याङ् ओमे़त्तुङ्ङिल्ले़ साङ्ग्राम्पेदाङ्बा निङ्वाॽफुमाङ्ङिल्ले़ कुहिम्मो निङ्वाॽफुमाङ्ङिल्ले़ कुमाङ्हुप्पिल्ले़ साःङ्गाहिम्मिन् हरे़बा निःसुङ्लो॥ 6 खे़न् हिम्मोलाम् नुसि माङ्लाइङ्बाहाॽरे़ नुसि मिन्देॽहाॽ मे़याङ्सिङ्ङाङ् लाःक्कात् मे़लःन्दे़रो॥ खे़ङ्हाॽरे़ग फः लॽरिक् के़ओःप्पा नु सेसेबा तेःत् मे़जाक्खुआङ् मे़वये़, हे़क्क्याङ् खुनिॽ सङ्बेॽओ पे़र्घे़क् साम्म्याङ् चे़प्फेत् मे़हेसुआङ् पत्छे़रो॥ 7 हे़क्क्याङ् लिसि कुहिङ्वे़त् पाथुङ्साहाॽओ थिक्किल्ले़ खे़न् काक् नुसि माङ्लाइङ्बाहाॽ सदादिङ् सदादिङ् के़हिङ्बा निङ्वाॽफुमाङ्ङिल्ले़न् किप्मा के़घुःबा कुसाक्किल्ले़ के़दिम्बा नुसि साम्म्याङ् खोर्याहाॽ पिरुसिरो॥ 8 हे़क्क्याङ् निङ्वाॽफुमाङ्ङिल्ले़ कुमिमिदिङ् नु कुमुक्साम्लाम् के़लःम्बा मिःक्खुॽइल्ले़ माङ्हिम्मिन् सिदाक् थिम्सुरो॥ खे़न् नुसि माङ्लाइङ्बाहाॽरे़ मे़दारुबा खे़न् नुसि मिन्देॽहाॽ मे़न्गे़त् मे़न्जुःत्ते थारिक् आत्तिन्हाॽआङ् माङ्हिम्मो लाःप्मा मे़न्छुक्ते़न्लो॥ 1 हे़क्क्याङ् निङ्वाॽफु माङ्हिम्मोलाम् के़लःम्बा यम्बा इक्लाःल्ले़ खे़न् नुसि माङ्लाइङ्बाहाॽ अक्खेलॽरिक् मे़त्तुसिर यागे़बा खे़प्सुङ्, “पेगे़म्मे़ॽआङ् निङ्वाॽफुमाङ्ङिल्ले़ कुसाक्के़न्निल्ले़न् नुसि खोर्याहाॽ इक्सादिङ् खाम्बेःक्मो हुक्खे़म्मे़ॽओ॥” 2 हे़क्क्याङ् थिक्सिगेःक्पा माङ्लाइङ्बान् पेआङ् कुघोर्याःन् खाम्बेःक्मो हुक्खु, हे़क्क्याङ् खे़न् किप्मा के़घुःबा थक्साःल्ले़ इबुगे़न् कुमिक्सेःन्निन् के़लक्पा नु कुनावाइत्लाःन् सेसे माङ्गे़घःबाहाॽ याम्गे़सिङ्बा नु साॽरिक् के़दुक्पा याङ्घेःक्किल्ले़ खुनिॽ थक्किन् सिदे़प् ते़प्तुर लःन्दे़रो॥ 3 हे़क्क्याङ् निसिगेःक्पा माङ्लाइङ्बाल्ले़ कुघोर्याःन् वाहङ्ङो हुक्खु, हे़क्क्याङ् खे़न् वाहङ्ङिङ्ग के़सिःबा मनाःल्ले़ कुमाक्खिॽइन् हे़क्के ले़ङ्सिङ् पेरो॥ हे़क्केलॽरिक् खे़प्मो के़याक्पा काक् कुहिङ्वे़त् पाथुङ्साहाॽ मे़स्ये़रो॥ 4 हे़क्क्याङ् सुम्सिगेःक्पा माङ्लाइङ्बाल्ले़ कुघोर्याःन् यङ्घङ् नु वाबुन्हाॽओ हुक्खुआङ् खे़ङ्हाॽ माक्खिॽ पोःक्खे़ पेरो॥ 5 हे़क्क्याङ् च्वाःत् सम्दाङ् युक् के़गप्पा माङ्लाइङ्बाल्ले़ निङ्वाॽफुमाङ्ङिन् अक्खे मे़त्तुबा इङ्गाॽ खे़प्सुङ्, “निङ्वाॽफुमाङ्ङे, खे़ने़ॽ सेसे के़वये़ हे़क्क्याङ् आल्लोआङ् सेसे के़वाॽरो॥ कन् मिन्देॽहाॽ के़बाङ्घुआङ् खासे़न् के़जोगुसिल्ले़ के़घासे़न्निन् कुदोःप्मा चोःक्लो॥ 6 खे़ङ्हाॽरे़ निङ्वाॽफुमाङ्ङिल्ले़ सेसे कुमनाहाॽ नु माङ्निङ्वाॽपाःन् के़बाःप्पाहाॽरे़ खुनिॽ माक्खिॽइन् मे़से़ःसुआङ् मे़वाॽरो॥ खे़ल्ले़ चोगुल्ले़ खे़ङ्हाॽ माक्खिॽइन् थुङ्मा के़बाङ्घुसिरो॥ खे़ङ्ग खे़ङ्हाॽ लाॽरुसिबा खुम्दिङ्ङिन् वये़रो॥” 7 हे़क्क्याङ् ले़त्तिङ् तोःम्मादे़न्नोलाम् अक्खे के़लॽबा इक्लाधिक् खे़प्सुङ्, “मुक्साम्दाङ्बा निङ्वाॽफुमाङ्ङे, खे़ने़ॽ के़जोगुबा खासे़न्निन् से़क्खाबा नु साम्योनिबा चोःक्लो॥” 8 हे़क्क्याङ् लिसिगेःक्पा माङ्लाइङ्बाल्ले़ कुघोर्याःन् नाम्मो हुक्खुआङ् नाम्मिल्ले़ मे़न्छाम् याप्मिहाॽ मिःल्ले़ ओॽमासि युक् खोःसुरो॥ 9 हे़क्क्याङ् मे़न्छाम् याप्मिहाॽ नाम्मिल्ले़ साॽरिक् ओॽरुसिल्ले़ खे़न् मिन्देॽहाॽ सम्दाङ् युक् के़गप्पा निङ्वाॽफुमाङ्ङिन् साङ्ग्रा मे़मे़त्तुरो॥ हे़क्केसाङ् खे़ङ्हाॽ खुनिॽ फे़न् याःम्बक्कोनु मे़न्हिन्दे़न् हे़क्क्याङ् खुने़ॽ मिमिदिङ्ङाङ् मे़म्बिरुन्लो॥ 10 हे़क्क्याङ् ङासिगेःक्पा माङ्लाइङ्बाल्ले़ कुघोर्याःन् खे़न् किप्मा के़घुःबा थक्साःल्ले़ कुहाङ्युक्ना सम्दाङ् हुक्खुरो॥ हे़क्क्याङ् खे़न् किप्मा के़घुःबा थक्साःल्ले़ कुहाङ्जुम्मिन् माक्चिगे़न् खादाम्माल्ले़ सिदे़प् ते़प्तुरो॥ हे़क्क्याङ् साॽरिक् तुक्खेःल्ले़ चोगुल्ले़ खे़प्मोबा मे़न्छाम् याप्मिहाॽ मे़हाबे़ मे़भिःक्ते़रो॥ 11 हे़क्क्याङ् खे़ङ्हाॽरे़ खुनिॽ याङ्घेःक्हाॽ साॽरिक् तुगे़बाल्ले़ चोगुल्ले़ साङ्ग्राम्पेदाङ्बा निङ्वाॽफुमाङ्ङिन् साङ्ग्रा मे़मे़त्तुरो॥ आल्लसाङ् खे़ङ्हाॽ खुनिॽ फे़न् याःम्बक्कोनु मे़न्हिन्दे़न्लो॥ 12 हे़क्क्याङ् तुक्सिगेःक्पा माङ्लाइङ्बाल्ले़ कुघोर्याःन् पयम् यम्बा युफ्रेतिस वाहङ्ङो हुक्खुआङ् खे़प्मोबा च्वाःत्तिन् चबे़बेरो, हे़क्क्याङ् नाम्गे़न् पिसाङ्लाम् थङ् चोःक्से़ के़भे़म्बा हाङ्हाॽरे़ खुनिॽ माराम्मिन् यारिप् पोःक्खे़रो॥ 13 हे़क्क्याङ् खे़प्मो हन्दगेःक्गे़न् वासेरिःल्ले़ कुमुराओलाम्, थक्साःल्ले़ कुमुराओलाम् हे़क्क्याङ् इङ्ले़क्पा माङ्निङ्वाॽपाःन् के़बाःप्पाल्ले़ कुमुराओलाम् सुम्सि पदःक् हे़क्तङ्बा आजिःन्जिःम्बा फे़न्साम्हाॽ मे़लःन्दे़बा निःसुङ्सिङ्लो॥ 14 खे़ङ्हाॽग निङ्वाॽ के़माबा याःम्बक् के़जोःक्पा फे़न्साम्सिरो॥ खे़ङ्हाॽ इक्सादिङ् खाम्बेःक्मोबा काक् हाङ्हाॽओ मे़बेःक्काङ् मुक्साम्दाङ्बा निङ्वाॽफुमाङ्ङिल्ले़ पयम् यम्बा कुये़न्नो थङ् चोःक्से़ खे़ङ्हाॽ मे़सुप्सु मे़दारुसिॽ॥ 15 दाङ्बाल्ले़ पाःत्तुॽ, “नुःरिक्काङ् खे़प्से़म्मे़ॽओ! इङ्गाॽग के़घुःप्पा कुइसिःक् स्वाःत्ताङ् ताआरो॥ हाःत् मे़न्इम्मे सिङ्सिङ् वाॽआङ् कुदेःत् चाङ्हाॽ खुने़ॽनु कत्तु खे़ङ्ग मुॽइसाबारो, थेआङ्भे़ल्ले़ खे़न् ले़क्चाबे़धिःक् लाङ्घेःक्माआङ् सिरिङ् मःमो थाःमा मे़बोःङ्ने़ल्लो॥” 16 हे़क्क्याङ् हिब्रु पाःन्दाङ्ङो “आरमागे़द्दोन” मे़प्मनाबा ते़न्नो खे़न् फे़न्साम्हाॽरे़ काक् हाङ्हाॽ मे़सुप्सुसिॽ॥ 17 हे़क्क्याङ् नुसिगेःक्पा माङ्लाइङ्बाल्ले़ कुघोर्याःन् सुरित् केजङ्ङो हुक्खुआङ् निङ्वाॽफुमाङ्ङिल्ले़ कुहिम्मोबा हाङ्युक्नालाम् आल्ल चुरे़रो के़लॽबा यम्बा इक्लाधिक् त्ये़रो॥ 18 हे़क्क्याङ् खे़प्मो साःम्भे ले़क्ते़, ताङ्साक्पे़न् खे़रे़ङ् घुरुङ् लॽरिक् लोःक्खु, हे़क्क्याङ् किप्मा के़घुःबा लुप्लि थाङे़रो॥ इक्सादिङ् खाम्बेःक्माल्ले़न् नावागे़न् चइःत् ने़स्से़आङ्धो मे़न्छाम् याप्मिहाॽरे़ अक्तङ्बा साॽरिक् किप्मा के़घुःबा लुप्लि थाङे़बाग आप्फाल्ले़आङ् मे़न्निए मे़वये़रो॥ 19 हे़क्क्याङ् खे़न् पयम् यम्बा ये़क्यक् बे़बिलोनिन् खे़ल्ले़क् पःक्खे़र सुम्सि लक्को हाःसिङ्लो, हे़क्क्याङ् इक्सादिङ् खाम्बेःक्मोबा काक् लाजेॽबा ये़क्यक्हाॽ थ्यःङ् पोःक्खे़रो॥ बे़बिलोनरे़ काक् कुलायोहाॽ निङ्वाॽफुमाङ्ङिल्ले़ इःत्तुआङ् किप्मा के़घुःबा कुसाक्के़न्निल्ले़ के़दिम्बा खोर्यालाम् खे़न् थुङ्मा पाङ्घुरो॥ 20 लुप्लि थाङे़बाल्ले़ चोगुल्ले़ काक् वागप्लाजेॽहाॽ नु कोःक्मा फाङ्जङ्हाॽ मे़मये़ मे़बेरो॥ 21 हे़क्क्याङ् मे़न्छाम् याप्मि सम्दाङ् ताङ्साक्पोलाम् यम्ब् यम्बा फःन् थ्ये़रो॥ खे़न् फःन्निङ्ग लिबोःङ् (४०) लिबोःङ् किलो थारिक् के़लिःप्पा चोगे़रो॥ हे़क्क्याङ् खे़न् मे़न्छाम् याप्मिहाॽरे़ग कन् फःन्निल्ले़न् मिन्देॽइल्ले़ चोगुल्ले़ निङ्वाॽफुमाङ्ङिन् साङ्ग्रा मे़मे़त्तुरो, थेआङ्भे़ल्ले़ खे़न् मिन्देॽइङ्ग साॽरिक् किप्मा के़घुःबा चोगे़रो॥ 1 हे़क्क्याङ् खे़न् खोर्याहाॽ के़गप्पा खे़न् नुसि माङ्लाइङ्बाहाॽओ थिक्पा फे़रे़आङ् अक्खे मे़त्ताङ्, “फे़रे़ॽ, इङ्गाॽ खे़ने़ॽ खे़न् कुइङ् कुनाम् के़से़ःमा के़त्निमाल्ले़ खोःमा के़बोःङ्बा खुम्दिङ्ङिन् ओसेःन्धाक्ने़ॽरो॥ खे़न् के़त्निमान् यरिक् च्वाःत्तिल्ले़ कुबेसाङ् के़ने़बा यम्बा ये़क्यक्किन्लो॥ 2 खे़न् के़त्निमान्नुग इक्सादिङ् खाम्बेःक्मोबा काक् हाङ्हाॽरे़ ताप्फे़ःम्बा याःम्बक् मे़जोगुआङ् इक्सादिङ् खाम्बेःक्मो के़वाॽबा काक् मे़न्छाम् याप्मिहाॽ सिजङ्वाःल्ले़ मयुसिबा हे़क्के खुने़ॽ कुभे़न् याःम्बक्किल्ले़ मयुसिआङ् मे़वाॽरो॥” 3 हे़क्क्याङ् इङ्गाॽ सेसेमाङ्ङिल्ले़ थुक्ताङ्ङाङ् माङ्लाइङ्बाल्ले़ एःक्सादे़न्नो पक्खाङ् तेॽराङ्लो॥ हे़क्क्याङ् खे़प्मो नुसि कुधे़गेःक् के़बप्पा नु थिबोःङ् कुदाङ् के़युङ्बा हे़ःत् के़लॽबा थक्सा सम्दाङ् मे़न्छुमाॽधिक् युङे़बा निःसुङ्॥ खे़न् थक्साःल्ले़ कुधक् कुले़म् निङ्वाॽफुमाङ्ङिल्ले़ कुदक्ले़ङ्वाओ माङ्चे़ॽया मिङ्हाॽ साप्ते़आङ् पत्छे़॥ 4 हे़क्क्याङ् खे़न् मे़न्छुमाॽइङ्ग परान्ला नु हे़ःत् के़लॽबा चाङ् चाक्सिङ्ङाङ् साम्म्याङ्, मुधिङ्लुङ् नु ते़क्सेःक्लुङ्हाॽ वाःत्छिङ् चोःक्सिङ्ङाङ् वये़रो॥ खे़ल्ले़ कुहुक्को सिक्के़ले़ःङ्बा नु याम्गे़सिङ्बा पाःन्हाॽ हे़क्क्याङ् कुभे़न् याःम्बक्हाॽरे़ के़दिम्बा साम्म्याङ् खोर्याःन् पक्खुआङ् वये़रो॥ 5 हे़क्क्याङ् खे़ल्ले़ कुदोॽवाबोग कुबे कुसिङ् निःप्मे़न्दे़प्मनाबा मिङ्धिक् साप्ते़आङ् पत्छे़रो–“पयम् यम्बा ये़क्यक् बे़बिलोन,के़त्निमाहाॽरे़ खुनिॽ मा,इक्सादिङ् खाम्बेःक्मोबा सिक्के़ले़ःङ्बा याःम्बक् के़जोःक्पाहाॽरे़ खुनिॽ मारो॥” 6 हे़क्क्याङ् इङ्गाॽ खे़न् मे़न्छुमाॽइन् ओमे़त्तुङ्ङिल्ले़ निङ्वाॽफुमाङ्ङिल्ले़ कुसेसे मनाहाॽ नु ये़सु ख्रिस्तरे़ कुरुमेहाॽरे़ खुनिॽ माक्खिॽइल्ले़ मयुआङ् वये़बा निःसुङ्ङाङ् साॽरिक् आनिङ्वाॽ मये़रो॥ 7 कर खे़न् माङ्लाइङ्बाल्ले़ अक्खे मे़त्ताङ्, “थेआङ् के़निङ्वाॽ माःबाबे? खे़न् मे़न्छुमाॽइन् नु नुसि कुधे़गेःक् के़बप्पा हे़क्क्याङ् थिबोःङ् कुदाङ् के़युङ्बा थक्साःल्ले़ कुयाःम्बेओबा सिबिॽ पाःन्निन् इङ्गाॽ मे़त्ने़ॽरो॥ 8 खे़न् के़निःसुबा किप्मा के़घुःबा थक्साःङ्ग कुहिङ्वे़त् वये़, कर खे़न् आल्लो होःप्लो॥ खे़ङ्ग याम्मो कुद्रोःम् मे़ःन्नेबा लुम्बाःत्तोलाम् थाङ्ङाङ् मे़न्नुप्मनाबा मे़क्माओ पेःक्लो॥ हे़क्क्याङ् कन् इक्सादिङ् खाम्बेःक्माल्ले़न् नावागे़न् चइःत् ने़स्से़आङ्धो हिङ्मन्ले़न् साप्पन्नो खुनिॽ मिङ् मे़म्बप्मना इक्सादिङ् खाम्बेःक्मोबा मे़न्छाम् याप्मिहाॽरे़ कन् के़सिःबा किप्मा के़घुःबा थक्साःन् याम्मो कुहिङ्वे़त् मे़निःसुआङ् खुनिॽ निङ्वाॽ मारो॥ 9 हे़क्क्याङ् कन् पाःन्हाॽ कुसिङ् निःप्मा सिक्कुम्दिङ् निङ्वाॽ चाहाबा चोःक्लो॥ खे़न् नुसि थे़गेःक्पाहाॽग खे़न् मे़न्छुमाॽइन् युङ्बा नुसि कोःक्माहाॽरो॥ 10 खे़न् नुसि थे़गेःक्पाहाॽग नुसि हाङ्सिआङ्लो॥ ङासि हाङ्हाॽग आसेःन्छा मे़स्ये़ मे़बेरो, तुक्सिगेःक्पाल्ले़ आल्लो हाङ् चोगुॽ हे़क्क्याङ् नुसिगेःक्पाङ्ग तामाए वाॽरो॥ कर खे़न् ताआङ् सप्फारक् हाङ् चोगुॽरो॥ 11 खे़न् तगि कुहिङ्वे़त् के़वाॽबा कर आल्लो के़होःप्पा किप्मा के़घुःबा थक्साःन् ये़त्छिगेःक्पा हाङ्लो॥ खे़न् वेॽस्मा नुसि हाङ्हाॽ हे़क्तङ्बा चोःक्लो, हे़क्क्याङ् खे़न्नाङ् मे़क्लो॥ 12 खे़न् के़निःसुबा थिबोःङ् कुदाङ्हाॽग थिबोःङ् हाङ्सिरो॥ खे़ङ्हाॽरे़ग आल्ल थारिक् हाङ् चोःक्मा युक् मे़ङ्घोए मे़वाॽरो, कर खे़ङ्हाॽरे़ थक्साःन्नु सोरिक् सप्फारक् हाङ् चोःक्मा युक् मे़घोःसुॽरो॥ 13 खे़ङ्हाॽरे़ग थिक् हुप् मे़बोःङ्ङाङ् खुनिॽ मुक्साम् नु युक्किन् खे़न् किप्मा के़घुःबा थक्साःन् मे़बिरुॽरो॥ 14 हे़क्क्याङ् खे़ङ्हाॽरे़ मे़ल्लुक्साःल्ले़ कुदक्ले़ङ्वाओ थङ् मे़जोगुॽ, कर मे़ल्लुक्साःल्ले़, खुने़ॽ उःत्तुसिबा सेगुसिबा नसाःन्साबाहाॽनु सोरिक्, खे़ङ्हाॽ नाःन्दुसिॽरो, थेआङ्भे़ल्ले़ मे़ल्लुक्साःङ्ग दाङ्बाहाॽरे़ खुनिॽ दाङ्बा नु हाङ्हाॽरे़ खुनिॽ हाङ्लो॥” 15 हे़क्क्याङ् खे़न् माङ्लाइङ्बाल्ले़ इङ्गाॽ अक्खे मे़त्ताङ्, “खे़ने़ॽ के़निःसुबा खे़न् कुइङ् कुनाम् के़से़ःमा के़त्निमान् युङ्बा च्वाःत्हाॽग यरिक् मे़न्छाम् सुवाङ्हाॽ, लाजेॽहाॽ नु पाःन्दाङ्सिरो॥ 16 हे़क्क्याङ् खे़ने़ॽ के़निःसुबा खे़न् हे़ःत् के़लॽबा किप्मा के़घुःबा थक्साःल्ले़ नु थिबोःङ् ताङ्हाॽरे़ खे़न् के़त्निमान् मे़जिःत्तुआङ् खे़ल्ले़ कत्तुबा काक् पाःन्हाॽ मे़नाप्तुआङ् खे़न् ले़क्चाबे़धिःक् मे़जोगुॽरो॥ हे़क्क्याङ् खे़ल्ले़ कुने़क्साःन् मे़जआङ् के़नम्बान् मि मे़धिक्खुॽरो॥ 17 थेआङ्भे़ल्ले़ निङ्वाॽफुमाङ्ङिल्ले़ कुबाःन्हाॽ मे़ङ्गे़त्ते थारिक् निङ्वाॽफुमाङ्ङिल्ले़ इःत्तुबा कुनिङ्वाॽ हे़क्केए खे़न् थिबोःङ् हाङ्हाॽ चोःक् पाङ्घुसिॽ, हे़क्केःल्ले़ खे़ङ्हाॽग थिक्हुप् मे़बोःङ्ङाङ् खे़न् किप्मा के़घुःबा थक्साःन् खुनिॽ हाङ् चोःक्मा युक्किन् मे़बिरुॽरो॥ 18 खे़ने़ॽ के़निःसुमा खे़न् मे़न्छुमाॽइङ्ग इक्सादिङ् खाम्बेःक्मोबा हाङ्हाॽ सम्दाङ् युक् के़जोःक्मा पयम् यम्बा ये़क्यक्किन्लो॥” 1 खे़न् एगाङ् इङ्गाॽ साङ्ग्राम्पेदाङ्लाम् पयम् यम्बा युक्साबा वेॽस्मा माङ्लाइङ्बाधिक् ये़ःर पत्छे़बा निःसुङ्लो॥ खे़ल्ले़ कुमिमिदिङ्ङिल्ले़ इक्सादिङ् खाम्बेःक्मान् थोॽरुरो॥ 2 हे़क्क्याङ् खे़ल्ले़ पयम् यम्बा इक्लाओ अक्खेलॽरिक् पाःत्तुर अःक्ते़रो,“बे़बिलोनिन् मे़गे़रो, पयम् यम्बा ये़क्यक्किन् मे़गे़रो! खे़न् आल्ल लेःत्छाम् फुङ्साम् नु फे़न्साम्हाॽरे़ खुनिॽ वाॽमा ते़न् पोःक्खे़आङ् वाॽ॥ खे़प्मोग काक् परिक्ले़न् सिक्के़ले़ःङ्बा नु आसुत्थो पुहाॽ याङ्मे़धोःक्लो॥ 3 थेआङ्भे़ल्ले़ इक्सादिङ् खाम्बेःक्को के़वाॽबा काक् मे़न्छाम् सुवाङ्हाॽ कुयाम्बोःप्मा सिजङ्वाःल्ले़ मयुसि॥ हे़क्क्याङ् इक्सादिङ् खाम्बेःक्मोबा काक् हाङ्हाॽरे़ खे़न्नु याम्बोःप्मा याःम्बक् मे़जोगु, हे़क्क्याङ् खे़ल्ले़ याम्दादा नु निङ्वाॽतादाबा कुहिङ्मन्निल्ले़ चोगुल्ले़ इक्सादिङ् खाम्बेःक्मोबा ले़ङ्हङ्बाहाॽ साॽरिक् याङ्साकुन्धेसाबा मे़बोःक्खे़रो॥” 4 हे़क्क्याङ् साङ्ग्राम्पेदाङ्लाम् वेॽ इक्लाधिक् खे़प्सुङ्लो,“आयाप्मिसे, खे़न् ये़क्यक्कोलाम् लाःक्कात् लःन्दे़म्मे़ॽओ!खे़न् ये़क्यक्कोबा मनाहाॽरे़ मे़जोगुबा हे़क्के लायो मे़जोगे़म्मिन्ने़ॽओ,मे़ःन्ने़ फाॽग्र खिनिॽआङ् खे़ङ्हाॽरे़ मे़घोःसुबा खुम्दिङ्ङिन् के़घोःसुम्लो, 5 थेआङ्भे़ल्ले़ कुलायोःङ्ग साङ्ग्राम्पेदाङ् थारिक् लुम्सिङ्ङाङ् वाॽरो,हे़क्क्याङ् निङ्वाॽफुमाङ्ङिल्ले़ खे़ल्ले़ काक् कुभे़न् याःम्बक्हाॽ निङ्वाॽ इःत्तुआङ् वाॽरो॥ 6 खे़ङ्ग आक्खे मे़प्मा लाॽरुॽ, बा हे़क्केए मे़त्ते़म्मे़ॽओ॥हे़क्क्याङ् काक् कुयाःम्बक्किल्ले़ कुले़क्वान् निले़ङ् थारिक् नुःक्ते़म्पिरे़म्मे़ॽओ॥हे़क्क्याङ् खुने़ॽ वेॽहाॽरे़ लागि यारिप् चोगुबा खोर्याओबा तुक्खेःल्ले़ कुले़क्वा निले़ङ् थारिक् कुघोर्याओ योॽरे़म् पिरे़म्मे़ॽओ॥ 7 खे़न् याम्दादा निङ्वाॽतादाबा नु सुक्खेवाओ वये़बा यारिक् तुक्खे चाःत्ते़म्मे़ॽआङ् मेरिङ् थक्ल याःन्दे़म्मे़ॽ॥थेआङ्भे़ल्ले़ खे़ल्ले़, ‘इङ्गाॽग पयम् यम्मा हाङ्माआरो, इङ्गाॽग मेमेदुमा मे़ःन्नारो, इङ्गाॽग आप्फाल्ले़आङ् मेरिङ् मे़धक्कान्लो फाॽआङ् हे़न्छिङ्ङाङ् वाॽरो॥ 8 खे़ल्ले़ चोगुल्ले़ थिक् ये़न्नोए खे़ल्लो सिःमे़न्, मेरिङ् थक्मे़न्, हे़क्क्याङ् साक्वाःल्ले़न् मिन्देॽइन् ताःरो॥ हे़क्क्याङ् खे़न् मे़न्छुमाॽइन् मिःल्ले़ खाप्पु थ्यःङ् पोःङ्लो,थेआङ्भे़ल्ले़ खे़न् खुम्दिङ् के़बिबा निङ्वाॽफुमाङ्ङिङ्ग मुक्साम्दाङ्बा चोःक्लो॥’ ” 9 हे़क्क्याङ् खे़न् ये़क्यक्किन् मिदिक्काङ् के़लःम्बा मिःक्खुॽइन् खुने़ॽनु याम्बोःप्मा याःम्बक् के़जोःक्पा नु याम्दादा वाॽमाओ चुम् के़मे़प्पा इक्सादिङ् खाम्बेःक्मोबा हाङ्हाॽरे़ मे़निःसुॽआङ् मे़हाःप्ल मेरिङ् मे़धक्लो॥ 10 खे़ङ्हाॽ खे़ल्ले़ कुदुक्खेःन्नु मे़गि, हे़क्क्याङ् माःङ्घा मे़ये़प्पाङ् अक्खे मे़बाःत्तुॽरो, “आयाक्को, आयाक्को! के़धुम्बा नु पयम् यम्बा बे़बिलोन ये़क्यक्के, सप्फारे़सा के़घुम्दिङ्ङिन् त्ये़आङ् वाॽरो!” 11 इक्सादिङ् खाम्बेःक्मोबा ले़ङ्हङ्बाहाॽ मे़हाःप्ल मेरिङ् मे़धक्लो, थेआङ्भे़ल्ले़ खुनिॽ चिगःक्वाहाॽ याम्मो आत्तिन्हाॽरे़आङ् मे़न्इङुन्लो॥ 12 आत्तिन्हाॽरे़आङ् खुनिॽ साम्म्याङ्, युप्पा, मुधिङ्लुङ्, ते़क्सेःक्, हे़क्क्याङ् नुःब् नुःबा नाइनासुःत्, परान्ला नु हे़ःत् के़लॽबा तेःत्हाॽ, असेःक्खि तेःत्, हे़क्क्याङ् काक् परिक्ले़न् कुनाम् के़नुॽबा सिङ्हाॽ, हे़क्क्याङ् तक्मिबाल्ले़ कुगेःङ्, इमे़ल्लुङ्बा सिङ्हाॽलाम, थत्नामाहाॽलाम, फे़न्जेॽलाम नु वाले़ङ्लुङ्लाम् चोःक्मनाबा काक् परिक्ले़न् चिगःक्वाहाॽ, 13 हे़क्क्याङ् नाम्सिङ् हक्, मारुक्हाॽ, कुनाम् के़नुॽबा साङ्सिङ्, मुर्र, पाङ्बःत् फुङ्मा, चे़ल्ले़क्सेॽ थिः, जैतुन निःङ्गेःन्, फे़ॽरुम्, सिः, हे़क्क्याङ् पित् साःङ्वे़त्, मे़ल्लुक्हाॽ, अन्हाॽ, अन्लाहाॽ, हे़क्क्याङ् योःक्पा योःक्माहाॽ नु थङ्ङो मे़नाप्तुसिबा मनाहाॽआङ् मे़न्इङुन्छिन्लो॥ 14 ले़ङ्हङ्बाहाॽरे़ खुने़ॽ अक्खे मे़मे़त्तुॽरो, “खे़ने़ॽ काक् आबाङे कप्मा निङ्वाॽ के़जोगुबा नुःब् नुःबा चिगःक्वाहाॽ काक् मे़मये़ मे़बेरो॥ हे़क्क्याङ् के़याङ्साकुन्धे नु के़घे़म्सिङ्माहाॽआङ् मये़बेरो॥ खे़ङ्हाॽग खे़ने़ॽ याम्मो आप्फाल्ले़आङ् के़ङ्घोःसुन्लो॥” 15 खे़न् ये़क्यक्को ले़ङ्हङ् चोःक्से़ के़दाःबाआङ् याङ्साकुन्धेसाबा के़बोःङ्बा ले़ङ्हङ्बाहाॽग माःङ्घाए मे़ये़प्लो, थेआङ्भे़ल्ले़ खे़ङ्हाॽ खे़ल्ले़ कुदुक्खेःन्नु साॽरिक् मे़गिरो॥ खे़ङ्हाॽ मे़हाःप्ल मेरिङ् थक्नु 16 अक्खे मे़लॽरो,“आयाक्को, आयाक्को! खे़न् पयम् यम्बा ये़क्यक्किङ्ग नुःब् नुःबा नाइनासुःत्, परान्ला नु हे़ःत् के़लॽबा तेःत् फुङ्हाॽ चाक्सिङ्ङाङ् साम्म्याङ्हाॽ, इमे़ल्लुङ्बा मुधिङ्लुङ्हाॽ हे़क्क्याङ् ते़क्सेःक्किल्ले़न् वाःत्तिहाॽ के़वाःप्मा मे़न्छुमाॽइन् कुइसिःक् साॽरिक् नुःबा चोगे़रो॥ 17 सप्फारे़सा काक् कुयाङ्साकुन्धेहाॽ खे़ल्ले़ माःसुदेःसुरो!”काक् वालाधा दाङ्बाहाॽ, वालाम्दिःक्पाहाॽ, वालाधा चाःक्पाहाॽ नु वाहङ्ङो याःम्बक् के़जोःक्पा के़जाबाहाॽ माःङ्घा मे़ये़प्पाङ् 18 खे़ङ्हाॽरे़ खे़न् पयम् यम्बा ये़क्यक्किन् मिदिगे़आङ् के़लःम्बा मिःक्खुॽइन् मे़निःसुआङ् अक्खे मे़बाःत्तुर मे़अःक्,“कन् पयम् यम्बा ये़क्यक् हे़क्तङ्बा ये़क्यक्किङ्ग आत्तिन्नाङ् होःप्ते़रो!” 19 हे़क्क्याङ् खे़ङ्हाॽरे़ खाम्हिःक्किन् खुनिॽ थे़गेःक् सम्दाङ् मे़जुःत्छिङ्ङाङ् मे़हाःप्ल, मे़भिःक्ल, मेरिङ् थक्नु अक्खे मे़बाःत्तुॽरो,“आयाक्को, आयाक्को! कन् पयम् यम्बा ये़क्यक्कोग, यरिक् वालाधा दाङ्बाहाॽरे़ खे़ल्ले़ कुयाङ्साकुन्धेलाम् याङ्साकुन्धेसाबा मे़बोःक्खे़रो॥ कर सप्फारे़सा खे़न् ये़क्यक्किन् काक् मे़गे़रो॥ 20 साङ्ग्राम्पेदाङ्ङो के़वाॽबासे, खे़न् मे़गे़बाओ सःत्ते़म्मे़ॽओ! निङ्वाॽफुमाङ्ङिल्ले़ सेसे कुमनाहाॽ, सेःक्युक्मिबाहाॽ हे़क्क्याङ् माङ्निङ्वाॽपाःन् के़बाःप्पासे, सःत्ते़म्मे़ॽओ! थेआङ्भे़ल्ले़ खिनिॽ निङ्घुम् के़मे़त्तिबाल्ले़ चोगुल्ले़ निङ्वाॽफुमाङ्ङिल्ले़ खे़न् खुम्दिङ् पिरुआङ् वाॽरो॥” 21 हे़क्क्याङ् मुक्साम्दाङ्बा माङ्लाइङ्बाधिक्ले़ पयम् यम्बा लुङ्सुम् हे़क्तङ्बा लुङ्धिक् पक्खुआङ् यो वाहङ्ङो लाप्फुसु थाःसुर अक्खे पाःत्तुरो,“पयम् यम्बा ये़क्यक् बे़बिलोनिन्नाङ् बा अक्खेलॽरिक्के लाप्फुरो, हे़क्क्याङ् खे़न् याम्मो आप्फाल्ले़आङ् निमे़धाःप्ने़न्लो॥ 22 हे़क्क्याङ् साराङ्गि, मे़प्फ्रामा नु थुत्तुरिःप्पा मुक्पा इक्लाःन् हे़क्क्याङ् साम्गे़लोबाहाॽरे़ खुनिॽ साम्लोहाॽ खे़ने़ॽओ याम्मो आप्फाल्ले़आङ् खे़म् मे़दे़त्ने़न्लो॥ हे़क्क्याङ् काक् परिक्पा साप्चोःक्गे़म्बाहाॽ खे़ने़ॽओ याम्मो आप्फाल्ले़आङ् खोमे़न्देत्ने़न्लो॥ याम्मो लुङ्सुम् युःप्मनाबाआङ् खे़ने़ॽओ याम्मो आप्फाल्ले़आङ् खे़म् मे़दे़त्ने़न्लो॥ 23 खे़ने़ॽओ याम्मो आप्फाल्ले़आङ् सेमि मे़ओःत्ने़न्लो, हे़क्क्याङ् सिसामेःत् नु नालिसाङ्ङिल्ले़ खुन्छिॽ इक्लाःन्नाङ् खे़ने़ॽओ याम्मो आप्फाल्ले़आङ् खे़म् मे़दे़त्ने़न्लो॥ खे़ने़ॽ के़ले़ङ्हङ्बाहाॽग इक्सादिङ् खाम्बेःक्मो मुक्साम्साबा नु के़इङ्बा के़धुम्बाहाॽ मे़वये़, हे़क्क्याङ् खे़ने़ॽ फे़न्साम् मुन्धुम्लाम् इक्सादिङ् खाम्बेःक्मोबा काक् मे़न्छाम् सुवाङ्हाॽ इङ्गे़ले़क्तुसिरो॥ 24 बे़बिलोने, खे़ने़ॽ के़माराम्हाॽओए माङ्निङ्वाॽपाःन् के़बाःप्पाहाॽ, निङ्वाॽफुमाङ्ङिल्ले़ सेसे कुमनाहाॽ नु इक्सादिङ् खाम्बेःक्मोबा काक् से़प्मनाबा मनाहाॽरे़ खुनिॽ माक्खिॽइन् से़ःरे़आङ् वये़रो॥” 1 खे़न् एगाङ् साङ्ग्राम्पेदाङ्ङो यरिक् मनाहाॽ यम्बा इक्लाओ अक्खेलॽरिक् मे़अःक्ते़बा हे़क्के खे़प्सुङ्लो,“हाल्ले़लुया! से़न्लप्, मिमिदिङ् नु मुक्साम्मिङ्ग आनिॽ निङ्वाॽफुमाङ्ङिल्ले़न्लो, 2 थेआङ्भे़ल्ले़ कुघासे़न्निङ्ग से़क्खाबा नु नुःबा चोःक्लो, हे़क्क्याङ् याम्बोःप्मा कुयाःम्बक्किल्ले़ इक्सादिङ् खाम्बेःक्मान् के़जिःम्मा खे़न् पयम् यम्मा के़त्निमान् खुम्दिङ् पिरुरो॥ निङ्वाॽफुमाङ्ङिल्ले़ कुसेवारोबाहाॽ खे़ल्ले़ से़रुसिबाल्ले़ चोगुल्ले़ खे़न् खुम्दिङ् पिरुआङ् वाॽरो॥” 3 हे़क्क्याङ् खे़ङ्हाॽ याम्मो मे़अःक्ते़, “हाल्ले़लुया! खे़न् ये़क्यक्किन् मिदिक्काङ् मिःक्खुॽइङ्ग सदादिङ् थाःङ् पेःक्लो॥” 4 हे़क्क्याङ् ने़त्-लि (२४) तुम्लाम्लोःबाहाॽ नु लिसि कुहिङ्वे़त् पाथुङ्साहाॽ हाङ्युक्नाओ के़युङ्बा निङ्वाॽफुमाङ्ङिल्ले़ कुदगि साम्बोःन् मे़भन्छिङ्ल सेवा मे़जोगुरो॥ हे़क्क्याङ् खे़ङ्हाॽ याम्मो मे़अःक्ते़, “आमे़न्, हाल्ले़लुया!” 5 हे़क्क्याङ् हाङ्युक्नालाम् अक्तङ्बा इक्लाधिक् त्ये़रो,“काक् चुक्पालाम् यम्बा थारिक् खुने़ॽनु के़गिबा कुसेवारोबासे, आनिॽ निङ्वाॽफुमाङ्ङिल्ले़ कुनारा फोःसे़म्मे़ॽओ!” 6 हे़क्क्याङ् इङ्गाॽ यरिक् मनाहाॽरे़ खुनिॽ इक्ला हे़क्तङ्बा इक्लाःन् खे़प्सुङ्॥ खे़ङ्ग पयम् यम्बा च्वाःत् सःक्ते़बा कुइसिःक् नु खे़रे़ङ् घुरुङ् लॽरे़र लोःक्खुआङ् अक्खेलॽरिक् अःक्ते़,“हाल्ले़लुया! थेआङ्भे़ल्ले़ मुक्साम्दाङ्बा आनिगे़ निङ्वाॽफुमाङ्ङिल्ले़ हाङ् चोगुॽरो॥ 7 आल्ल आनिॽ साॽरिक्के सःत्ति,हे़क्क्याङ् खुने़ॽ मिमिदिङ् पिरुम्लो,थेआङ्भे़ल्ले़ मे़ल्लुक्साःल्ले़ ते़न्धाम्गे़न् कुमेःक्खिम्मिन् त्ये़आङ् वाॽ,हे़क्क्याङ् कुसिसामेःत्तिन् 8 सिसामेःत्तिङ्ग फःगे़लॽबा के़ओःप्पा नुःबा नाइनासुःत् चाङ् चाङ्मा मे़बिरुआङ् वाॽ॥”(नुःबा नाइनासुःत् चाङ्ङिङ्ग निङ्वाॽफुमाङ्ङिल्ले़ सेसे कुमनाहाॽरे़ मे़जोगुबा साम्योनिबा याःम्बक्लो॥) 9 हे़क्क्याङ् माङ्लाइङ्बाल्ले़ मे़त्ताङ्, “कन् पाःन्निन् साप्ते़ॽ–मे़ल्लुक्साःल्ले़ कुमेःक्खिम् साभाङ्जाओ मे़उःत्तुसिबाहाॽ मुॽइसाबासिरो॥” खे़ल्ले़ याम्मो इङ्गाॽ मे़त्ताङ्, “कङ्हाॽग निङ्वाॽफुमाङ्ङिल्ले़ से़क्खा कुबाःन्जाक्सिरो॥” 10 हे़क्क्याङ् इङ्गाॽग खुने़ॽ सेवा चोःक्मा फाॽआङ् कुलाङ्ङो साम्बोःन् फन्छिङाङ्, कर खे़ल्ले़ इङ्गाॽ अक्खे मे़त्ताङ्, “हे़क्के चोःक्मा मे़नुॽने़न्! इङ्गाॽग खे़ने़ॽ नु के़म्भुॽ के़न्साॽसि हे़क्तङ्बा निङ्वाॽफुमाङ्ङिल्ले़ कुसेवारोबा नु ये़सुःन् तोःन्दि के़बिबाआरक्लो॥ निङ्वाॽफुमाङ्ङिन्ने सेवा चोगे़ॽ!”थेआङ्भे़ल्ले़ ये़सुरे़ चोगुबा पाःत्तुबा से़क्खा पाःन्हाॽरे़ माङ्निङ्वाॽपाःन् के़बाःप्पाहाॽ हाङ्हाङ् मे़त्तुसिॽरो॥ 11 हे़क्क्याङ् इङ्गाॽ साङ्ग्राम्पेदाङ्ङिन् हरे़बा निःसुङ्, हे़क्क्याङ् खे़प्मो फःदाङ्बा अन्धिक् वये़॥ खे़न् सम्दाङ् के़युङ्बाल्ले़ कुमिङ्ङिन् “नसाःन्साबा” नु “से़क्खा” मे़मे़त्तुरो॥ खुने़ॽग नुःरिक्काङ् खासे़न् चोगुॽ हे़क्क्याङ् थङ् चोगुॽरो॥ 12 खुने़ॽ कुमिक्हाॽग मि हे़क्के के़दिःप्पा चोगे़, हे़क्क्याङ् खुने़ॽ कुधे़गेःक्पो यरिक् तिचःहाॽ मे़बत्छे़॥ खुने़ॽ नासिङ्गे़न् कुधक्को कुमिङ् साप्ते़आङ् पत्छे़॥ खे़ल्ले़ कुबेःङ्ग आत्तिन्हाॽरे़आङ् कुसिङ् निःप्मा मे़न्छुक्तुन्, कर खुने़ॽरक् कुसिङ् निःत्तुरो॥ 13 खुने़ॽग माक्खिॽओ निःम्मनाबा तेःत् चाक्खुआङ् वये़, हे़क्क्याङ् खुने़ॽ कुमिङ्ङिङ्ग “निङ्वाॽफु पाःन्जाक्लो”॥ 14 हे़क्क्याङ् फःगे़लॽबा नु सेसेबा नाइनासुःत् तेःत् के़जाङ्बा साङ्ग्राम्पेदाङ्बा थक्सुबाहाॽरे़ फःगे़लॽबा अन्हाॽ मे़युक्तुसिआङ् खुने़ॽ मे़दिम्दुरो॥ 15 खुने़ॽ कुमुराओलाम् इक्सादिङ् खाम्बेःक्मोबा मे़न्छाम् सुवाङ्हाॽ नाःम्मासि फाॽआङ् खागे़सुक्पा ताभेःन् लःन्दे़रो॥ हे़क्क्याङ् खे़ङ्हाॽ फे़न्जेॽ तक्काःत्तिल्ले़ युक् चोगुसिॽरो॥ हे़क्क्याङ् खुने़ॽ चे़ल्ले़क्सेॽ एःम्मादे़न्नो लाङ्ङिल्ले़ चे़ल्ले़क्सेॽइन् सॽमनाबा हे़क्के मुक्साम्दाङ्बा निङ्वाॽफुमाङ्ङिल्ले़ कुसाक्के़न्निल्ले़ कुनिङ्मिहाॽ सॽरुसिरो॥ 16 हे़क्क्याङ् खुने़ॽ कुदेःत्तो नु कुसे़बङ्बो हाङ्हाॽरे़ खुनिॽ हाङ् नु दाङ्बाहाॽरे़ खुनिॽ दाङ्बा लॽरिक् साप्ते़आङ् पत्छे़॥ 17 हे़क्क्याङ् इङ्गाॽ माङ्लाइङ्बाधिक् नाम्मो ये़बे़बा निःसुङ्, खे़ल्ले़ ताङ्साक्पो के़बे़बार के़वाॽबा काक् किदाबाहाॽ यम्बा इक्लाओ अःक्ते़र अक्खे मे़त्तुसि, “खिनिॽ त्ये़म्मे़ॽओ, निङ्वाॽफुमाङ्ङिल्ले़ यारिप् चोगुबा पयम् यम्बा साभाङ्जाओ चुप्से़म्मे़ॽओ॥ 18 हाङ्हाॽ, थक्तुम्बाहाॽ, थक्सुबाहाॽ, हे़क्क्याङ् अन्हाॽ नु अन् के़युक्पाहाॽ, हे़क्क्याङ् योःक्पा नु चोःक्युम्भोबाहाॽ, चुक्पा नु यम्बाहाॽरे़ खुनिॽ ने़क्साःन् चासे़ त्ये़म्मे़ॽओ॥” 19 हे़क्क्याङ् खे़न् किप्मा के़घुःबा थक्साःन् नु इक्सादिङ् खाम्बेःक्मोबा हाङ्हाॽ हे़क्क्याङ् खुनिॽ थक्सुबाहाॽ थङ् चोःक्से़ अन् के़युक्पे़न् नु खुने़ॽ कुधक्सुबाहाॽरे़ कुदक्ले़ङ्वाओ मे़जुप्से़बा निःसुङ्सिङ्लो॥ 20 हे़क्क्याङ् खे़न् किप्मा के़घुःबा थक्साःन् नु खुने़ॽ कुदगि निङ्वाॽ के़माबा याःम्बक् के़जोःक्पा खे़न् इङ्ले़क्पा माङ्निङ्वाॽपाःन् के़बाःप्पे़न् मे़दे़म्सुसिरो॥ खे़ल्ले़ मुक्साम्रे़ कुधिम्बा निङ्वाॽ के़माबा याःम्बक्हाॽरे़ खे़न् किप्मा के़घुःबा थक्साःल्ले़ इबुगे़न् कुमिक्सेःन् के़लक्पा नु कुनावाइत्लाःन् सेवा के़जोःक्पाहाॽ इङ्ले़क्तुसिआङ् वये़रो॥ खे़ङ्हाॽ ने़प्माङ् कुहिङ्वे़त्ते कान्धाक् के़दिःप्पा मिराःक् लुम्बाःत्तो लाप्मे़भुसुसिरो॥ 21 हे़क्क्याङ् अन् के़युक्पाल्ले़ कुमुराओलाम् के़लःम्बा ताभेलाम् खे़ङ्हाॽरे़ खुनिॽ थक्सुबाहाॽ मे़स्ये़आङ् काक् किथहाॽरे़ खुनिॽ ने़क्साःन् खाघा मे़जरो॥ 1 हे़क्क्याङ् इङ्गाॽ साङ्ग्राम्पेदाङ्लाम् माङ्लाइङ्बाधिक् ये़ःर पत्छे़बा निःसुङ्॥ खे़ल्ले़ कुहुक्को खे़न् कुद्रोःम् मे़ःन्नेबा लुम्बाःत्तोबा तिमिक्किन् नु पयम् यम्बा फे़न्थक्क्रङ्ङिन् कत्तुरो॥ 2 खे़न् माङ्लाइङ्बाल्ले़ हन्दगेःक्गे़न् वासेरिःन् ते़म्सुआङ् तङ्बे हे़न्छिङ् (१०००) थारिक् खे़न्निन् इघेःक्खुरो॥ खे़न् हन्दगेःक्गे़न् वासेरिःङ्ग उन्छोःन्बा असेःक्, माफे़न्साम् इग्र सैताःन्नाङ् मे़मे़त्तुरो॥ 3 खे़न् माङ्लाइङ्बाल्ले़ माफे़न्साम्मिन् कुद्रोःम् मे़ःन्नेबा लुम्बाःत्तो लाप्फुसु केःत्तु, हे़क्क्याङ् तङ्बे हे़न्छिङ् (१०००) थारिक् आत्तिन् मे़न्छाम् सुवाङ्हाॽआङ् इङ्ले़क् मे़प्मा मे़सुक्तुन्छिन्ल फाॽआङ् खे़ल्ले़ कुसुःप्नाःन् सुबुआङ् एःप्साप् लक्तुरो॥ खे़न् एगाङ् सप्फारे़ लागि खे़न् ले़प्माए पोःङ्लो॥ 4 हे़क्क्याङ् इङ्गाॽ हाङ्युक्नाहाॽ निःसुङ्सिङ्॥ खे़प्मो खासे़न् लोःम्मा युक् के़घोःबाहाॽ मे़युङे़॥ हे़क्क्याङ् ये़सु ख्रिस्तरे़ ओसेःन्दाङ् चोगुबा से़क्खाःन् नु निङ्वाॽफु पाःन्जाक्किन् इङ्भन् मे़जोगुबाल्ले़ चोगुल्ले़ खुनिॽ थे़गेःक्पा मे़घक्तु मे़से़रुसिबाहाॽरे़ खुनिॽ याम्साम्हाॽ निःसुसिङ्लो॥ खे़ङ्हाॽरे़ग खे़न् किप्मा के़घुःबा थक्साःन् नु कुनावाइत्लाःन् सेवा मे़न्जोगुन् हे़क्क्याङ् इबुगे़न् कुमिक्सेःन्निन्नाङ् खुनिॽ तोवाबो इग्र हुक्को मे़न्दाःक्तुन्नाङ् वये़रो॥ खे़ङ्हाॽग सिःमे़न्लाम् याम्मो मे़हिङे़आङ् ख्रिस्ते़न्नु तङ्बे हे़न्छिङ् थारिक् हाङ् मे़जोगुरो॥ 5 (वेॽ के़सिःबाहाॽग तङ्बे हे़न्छिङ् मे़ल्ले़क्के थारिक् मे़न्हिङे़न्लो॥) कङ्ग थिक्सिगेःक्पा सिःमे़न्लाम् याम्मो हिङ्मान्लो॥ 6 थिक्सिगेःक्पा सिःमे़न्लाम् याम्मो हिङ्मन् के़घोःबाहाॽग मुॽइसाबासि नु सेसेबासिरो॥ खे़ङ्हाॽ निसिगेःक्पा सिःमे़ल्ले़ थेआङ् मे़प्मा मे़सुक्तुसिन्, कर खे़ङ्हाॽ निङ्वाॽफुमाङ् नु ख्रिस्तरे़ कुनिङ्वाॽफुसाम्बा मे़बोःङ्ङाङ् ख्रिस्ते़न्नु तङ्बे हे़न्छिङ् थारिक् हाङ् मे़जोःक्लो॥ 7 हे़क्क्याङ् तङ्बे हे़न्छिङ् के़त् चुःत्ताङ् माफे़न्साम्मिन् साक्ते़बा ते़न्नोलाम् ले़त्लो॥ 8 हे़क्क्याङ् खे़न् इक्सादिङ् खाम्बेःक्मो लःन् थाङ्ङाङ् काक् पिसाङ्बा के़रे़क् मे़न्छाम् सुवाङ्हाॽ–“गोग” नु “मागोग” मे़प्मनाबा मे़न्छाम् सुवाङ्हाॽ–इङ्ले़क्तुसिआङ् निङ्वाॽफुमाङ्ङिल्ले़ सेसे कुमनाहाॽरे़ खुनिॽ तक्ले़ङ्वाओ थङ् चोःक्मारे़ लागि सुप्सुसिरो॥ खे़ङ्हाॽग आत्तात्तान्ने ये़ःङ्घा कुइसिःक् निःप्मा सुक्मे़न्दे़प्मनाबा मे़जोःक्लो॥ 9 हे़क्क्याङ् खे़ङ्हाॽ इक्सा खाम्बेःक्मान् सिदे़प् मे़दे़प्तुर मे़बेआङ् निङ्वाॽफुमाङ्ङिल्ले़ सेसे कुमनाहाॽ नु निङ्वाॽफुमाङ्ङिल्ले़ मिःम्जि मे़त्तुबा ये़क्यक्किन् मे़गबुरो॥ कर साङ्ग्राम्पेदाङ्लाम् मिराःक् थ्ये़आङ् खे़ङ्हाॽ लाबु से़रुसिरो॥ 10 हे़क्क्याङ् खुनिॽ इङ्ले़क् के़मे़प्पा माफे़न्साम्मिन् मिराःक् नु कान्धाक् के़दिःप्पा लुम्बाःत्तो लाप्फुसुरो॥ खे़प्मोग किप्मा के़घुःबा थक्साःन् नु इङ्ले़क्पा माङ्निङ्वाॽपाःन् के़बाःप्पे़न्नाङ् तगिसा लाप्मे़भुसुसिआङ् यागे़त्छिरो॥ हे़क्क्याङ् खे़ङ्हाॽग से़न्दिक् ले़न्दिक् सदादिङ् खे़प्मो तुक्खे मे़जारो॥ 11 हे़क्क्याङ् इङ्गाॽ पयम् यम्बा फःगे़लॽबा हाङ्युक्नाःन् नु खे़प्मो के़युङ्बान् निःसुङ्लो॥ इक्सादिङ् खाम्बेःक्मान् नु तरःङ्दिङ् ताङ्साक्पे़न् खुने़ॽ कुदगिलाम् खे़त्ने़त्छि, हे़क्क्याङ् खे़ङ्हाॽ याम्मो निःमे़दे़त्ते़त्छिन्लो॥ 12 हे़क्क्याङ् इङ्गाॽ यम्बा चुक्पा काक् के़सिःबाहाॽ खे़न् हाङ्युक्ना तगि मे़ये़बे़बा निःसुसिङ्, हे़क्क्याङ् खे़प्मो साप्पन्हाॽ मे़हन्दे़॥ खे़प्मो वेॽ साप्पन्धिक्काङ् हन्दे़॥ खे़ङ्ग हिङ्मन्ले़न् साप्पन्लो॥ हे़क्क्याङ् खे़न् साप्पन्हाॽओ साप्ते़आङ् पत्छे़बा के़सिःबाहाॽरे़ मे़जोगुबा खुनिॽ याःम्बक् कुइसिःक् खुनिॽ खासे़न् पोःक्खे़रो॥ 13 हे़क्क्याङ् वाहङ्ङिल्ले़आङ् खे़प्मो के़याक्पा के़सिःबाहाॽ नुःक्तुसिरो॥ सिःमे़न् नु खे़मायङ्सङ्ङिल्ले़आङ् खुन्छिॽओ के़वाॽबा के़सिःबाहाॽ नुःक्ते़त्छुरो॥ हे़क्क्याङ् खे़ङ्हाॽरे़ मे़जोगुबा खुनिॽ याःम्बक् कुइसिःक् के़रे़क्ले़न् खासे़न् पोःक्खे़रो॥ 14 हे़क्क्याङ् सिःमे़न् नु खे़मायङ्सङ्ङिन् मिराःक् के़दिःप्पा लुम्बाःत्तो लाप्फुसे़त्छिरो॥ कन् मिराःक् लुम्बाःत्तिङ्ग निसिगेःक्पा सिःमे़न्लो॥ 15 हिङ्मन्ले़न् साप्पन्नो खुन्छिॽ मिङ् मे़म्बप्मनाबाहाॽ के़रे़क् मिराःक् के़दिःप्पा लुम्बाःत्तो लाप्मे़भुःसे़रो॥ 1 हे़क्क्याङ् इङ्गाॽ कुसङ् साङ्ग्राम्पेदाङ् नु कुसङ् इक्सादिङ् खाम्बेःक्मान् निःसुङ्सिङ्, थेआङ्भे़ल्ले़ तगिबा साङ्ग्राम्पेदाङ् नु इक्सादिङ् खाम्बेःक्मान् ले़क्खे़ पेआङ् तुम्बोदिङ् वाहङ्ङिन्नाङ् मे़ने़स्से़न्लो॥ 2 हे़क्क्याङ् इङ्गाॽ सेसे ये़क्यक्, कुसङ् यरुसले़म्मिन्, निङ्वाॽफुमाङ्लाम् साङ्ग्राम्पेदाङ्नु ये़ःर पत्छे़बा निःसुङ्॥ खे़ङ्ग नालिसाङ्ङिन् मेःक्खिम् चोःक्मा फाॽआङ् नुःब् नुःबा वाःत्ति नु चाङ्हाॽरे़ यारिप् चोःक्मनामा सिसामेःत् कुइसिःक् चोगे़रो॥ 3 हे़क्क्याङ् इङ्गाॽ हाङ्युक्नाओलाम् यम्बा इक्लाधिक् त्ये़बा खे़प्सुङ्लो,“आल्ल निङ्वाॽफुमाङ्ङिल्ले़ कुवाॽमा ते़न्निङ्ग मे़न्छाम् याप्मिहाॽनु सोरिक् पोःक्खे़आङ् वाॽ, हे़क्क्याङ् खुने़ॽ खे़ङ्हाॽनु वाॽ॥ हे़क्क्याङ् खे़ङ्हाॽग कुसेसे याप्मि मे़बोःङ्लो॥ निङ्वाॽफुमाङ्ङिन् आबाङे खे़ङ्हाॽनु वाॽआङ् खुने़ॽ खे़ङ्हाॽरे़ खुनिॽ निङ्वाॽफुमाङ् पोःङ्लो॥ 4 खुने़ॽ के़रे़क्ले़ खुनिॽ मिक्कोलाम् मिक्वाःन् तुगु पिरुसिॽ॥ आत्तिन्नाङ् याम्मो मे़न्छिःने़न्, मेरिङ् मे़न्धक्ने़न्, मे़न्हाःप्ने़न्, मे़न्दुक्ने़न् मे़न्यॽने़न्, थेआङ्भे़ल्ले़ तगिबा पाःन्हाॽग ले़क्ते़बेरो॥” 5 हे़क्क्याङ् हाङ्युक्नाओ के़युङ्बाल्ले़ अक्खे पाःत्तु, “ओमे़त्ते़ॽ, काक् पाःन्हाॽ इङ्गाॽ कुसङ् चोगुङ्ल पत्तारो॥” हे़क्क्याङ् अक्खेआङ् मे़त्ताङ्, “कन् पाःन्हाॽ साप्ते़ॽओ, थेआङ्भे़ल्ले़ कन् पाःन्हाॽग नसाःन् चोःक्मा सुक्के़दे़प्पा नु से़क्खाबा चोःक्लो॥” 6 हे़क्क्याङ् खुने़ॽ अक्खे मे़त्ताङ्, “काक् पोःक्खे़ चुरे़रो! अल्फा नु ओमेगा इङ्गाॽएरो, तोलिङ्सोमु नु कुनुप्मान् इङ्गाॽएरो॥ हाःत् आङ्गुगे़न् वामिःक्माल्ले़ तरुॽ, खे़न् इङ्गाॽ कुमे़ल्लुङ् मे़ःन्नेए मे़न्नुप्मनाबा हिङ्मन् के़बिबा च्वाःत्तिल्ले़ वाबुन्लाम् थुङ्मा पिरुङ्लो॥ 7 हाःत्ले़ नाःन्दुॽ, खे़ल्ले़ कन् काक् मुॽइसाम्हाॽ खोःसुॽरो॥ इङ्गाॽ खे़ल्ले़ कुनिङ्वाॽफुमाङ् पोःङ्ङाआङ् खे़न् इङ्गाॽ आबुगे़न् आस्साः पोःङ्लो॥ 8 कर किस्रुक्पाहाॽ, नसाःन् मे़न्जोःक्मनाबाहाॽ, फे़क्के़लाॽबाहाॽ, मना के़से़प्पाहाॽ, ताप्फे़ःम्बा याःम्बक् के़जोःक्पाहाॽ, फे़न्साम् मुन्धुम् के़नाःप्पाहाॽ, नावाइत्ला सेवा के़जोःक्पाहाॽ नु इङ्ले़क् के़बाःप्पाहाॽरे़ खुनिॽ वाॽमादे़ङ्ग कान्धाक् नु मि के़दिःप्पार के़बप्पा लुम्बाःत्तो पोःङ्लो॥ खे़ङ्ग निसिगेःक्पा सिःमे़न्लो॥” 9 हे़क्क्याङ् कुनुप्मोबा नुसि मिन्देॽहाॽरे़न् नुसि खोर्या के़बङ्बा नुसि माङ्लाइङ्बाहाॽओ थिक्ले़ इङ्गाॽ अक्खे मे़त्ताङ्, “फे़रे़ॽ, इङ्गाॽ मे़ल्लुक्साःल्ले़ मेलिङ्गे़न् कुमेःत् के़बोःङ्मा सिसामेःत्तिन् ओसेःन्धाक्ने़ॽरो॥” 10 हे़क्क्याङ् इङ्गाॽ सेसेमाङ्ङिल्ले़ थुक्ताङ्ङाङ् पयम् यम्बा केःम्बा कोःक्मा सम्दाङ् पक्खाङ् तेॽराङ्ङाङ् निङ्वाॽफुमाङ्लाम् साङ्ग्राम्पेदाङ्नु ये़ःर पत्छे़बा सेसे ये़क्यक् यरुसले़म्मिन् ओसेःन्धाक्ताङ्लो॥ 11 निङ्वाॽफुमाङ्ङिल्ले़ कुमिमिदिङ्ङिल्ले़ खे़न् कुधिम् चोगे़, हे़क्क्याङ् माङ्लुङ् नु से़रुम्लुङ् कुइसिःक्पा इमे़ल्लुङ्बा मुधिङ्लुङ् हे़क्के से़ल्ले़ङ् के़ले़क्पा चोगे़रो॥ 12 हे़क्क्याङ् खे़ॽयो थिक्-ने़त् ताःक्हन्हाॽ के़बप्पा यम्बा केःम्बा लुङ्धाक् ये़बे़रो॥ खे़न् ताःक्हन्हाॽओ थिक्-ने़त् माङ्लाइङ्बाहाॽ मे़ये़बे़रो॥ हे़क्क्याङ् खे़न् ताःक्हन्हाॽओ इस्राइलरे़न् थिक्-ने़त् सुवाङ्हाॽरे़ खुनिॽ मिङ्हाॽ मे़साप्तुआङ् पत्छे़॥ 13 हे़क्क्याङ् नाम्गे़न् ले़प्माङ् सुम्सि, नाम्धा ले़प्माङ् सुम्सि, थाङ्गे़त् ले़प्माङ् सुम्सि, हे़क्क्याङ् लाङ्गे़त् ले़प्माङ् सुम्सि ताःक्हन्हाॽ मे़बत्छे़रो॥ 14 खे़न् ये़क्यक्कोबा लुङ्धाक्किल्ले़ थिक्-ने़त् कुने़ःम्भो ने़स्से़, हे़क्क्याङ् खे़न् सम्दाङ् मे़ल्लुक्साःल्ले़ थिक्-ने़त् कुसेःक्युक्मिबाहाॽरे़ खुनिॽ मिङ्हाॽ साप्ते़आङ् पत्छे़रो॥ 15 इङ्गाॽनु के़बाःप्पा माङ्लाइङ्बाल्ले़ कुहुक्को ये़क्यक्किन् हे़क्क्याङ् खे़प्मोबा ताःक्हन्हाॽ नु लुङ्धाक्हाॽ सिःक्मा फाॽआङ् साम्म्याङ्ङिल्ले़न् कुसिःक्मा तक्काःत्तिन् कत्तुरो॥ 16 खे़न् ये़क्यक्किङ्ग लिसि कुसुक्पा के़बप्पा चोगे़रो॥ खे़ल्ले़ कुलाम्तिःन् नु कुभे़रे़ःङ्ग कुदङ्बा चोगे़रो॥ खे़न् कुसिःक्माल्ले़ सिःक्तुल्ले़ खे़ङ्ग हे़न्छिङ् ने़त्छिआङ् किप् लिसि (२४००) किलोमितर ने़स्से़रो॥ खे़ल्ले़ कुलाम्ति, कुभे़रे़ नु कुलिङ्गे़न्निन्नाङ् कुदङ्बा चोगे़रो॥ 17 हे़क्क्याङ् माङ्लाइङ्बाल्ले़ खे़न् लुङ्धाक्किन् सिःक्तु, हे़क्केःल्ले़ मे़न्छाम् याप्मिहाॽरे़ ओगप् मे़जोगुबा कुसिःक्मान् कुइसिःक् खे़न् किप्थिक्काङ् लि-लि (१४४) हुक्सिक् ने़स्से़रो॥ 18 खे़न् लुङ्धाक्किङ्ग माङ्लुङ्ले़न् मे़जोगुआङ् वये़, हे़क्क्याङ् ये़क्यक्किङ्ग नुःबा साम्म्याङ् से़ल्ले़ङ्घो कुइसिःक् के़ले़क्पा चोगे़रो॥ 19 लुङ्धाक्किल्ले़ कुने़ःम्भोओग यरिक् परिक्ले़न् इमे़ल्लुङ्बा मुधिङ्लुङ्हाॽ मे़भत्छुआङ् पत्छे़॥ थिक्सिगेःक्पे़न् से़रुम्लुङ्, निसिगेःक्पे़न् कुभिङ्लुङ्, सुम्सिगेःक्पे़न् कुहे़ःत्लुङ्, लिसिगेःक्पे़न् लुङ्सेःक्कुम्, 20 ङासिगेःक्पे़न् मुधिङ्लुङ्, तुक्सिगेःक्पे़न् लुङ्से़रुम्बा, नुसिगेःक्पे़न् अम्ले़ङ्लुङ्, ये़त्छिगेःक्पे़न् लुङ्मिङ्, फाङ्सिगेःक्पे़न् कुरिङ्लुङ्, थिबोःङ् सिगेःक्पे़न् कुहिःक्लुङ्, थिक्-थिक् सिगेःक्पे़न् फुःत्ताङ्लुङ्, हे़क्क्याङ् थिक्-ने़त् सिगेःक्पे़न् हे़ःक्कङ्लुङ्ङिल्ले़न् मे़जोगुआङ् वये़रो॥ 21 खे़प्मो थिक्-ने़त् ताःक्हन्हाॽग थिक्-ने़त् ते़क्सेःक्ले़न् वये़–लत्छा ताःक्हन्निन् लत्छा ते़क्सेःक्किल्ले़ चोगे़आङ् वये़॥ हे़क्क्याङ् ये़क्यक्कोबा माराम्मिङ्ग से़ल्ले़ङ्घो कुइसिःक् के़ले़क्पा नुःबा साम्म्याङ्ङिल्ले़न् चोगे़रो॥ 22 इङ्गाॽ खे़न् ये़क्यक् सिगाङ् माङ्हिम्मिन् मे़न्निःबान्लो, थेआङ्भे़ल्ले़ मुक्साम्दाङ्बा निङ्वाॽफुमाङ्ङिन् नु मे़ल्लुक्साःन्ने खे़न् ये़क्यक्कोबा माङ्हिम्लो॥ 23 हे़क्क्याङ् खे़न् ये़क्यक्किन् के़धोॽबा नाम् नु लाबा थेआङ् चाहाबा मे़जोगे़न्लो, थेआङ्भे़ल्ले़ निङ्वाॽफुमाङ्ङिल्ले़ कुमिमिदिङ्ङिल्ले़ए खे़न् ये़क्यक्किन् थोॽरुरो॥ हे़क्क्याङ् खे़ल्ले़ कुसेमिःङ्ग मे़ल्लुक्साःन्नेरो॥ 24 हे़क्क्याङ् मे़न्छाम् सुवाङ्हाॽ कन् निङ्वाॽफुमाङ्ङिल्ले़ कुमिमिदिङ्ङिल्ले़ थोॽरुबा ओःत्तिओ मे़वाॽ मे़बेःक्, हे़क्क्याङ् इक्सादिङ् खाम्बेःक्मोबा काक् हाङ्हाॽरे़ खुनिॽ मिमिदिङ्ङिन् खे़प्मो मे़दारुॽ॥ 25 खे़न् ये़क्यक्किल्ले़न् ताःक्हन्निङ्ग आप्फाल्ले़आङ् मे़सुप्ने़न्, थेआङ्भे़ल्ले़ खे़प्मो से़न्दिक् होःप्लो॥ 26 हे़क्क्याङ् काक् मे़न्छाम् सुवाङ्हाॽरे़ मिङ्सो इङ्धाःङ्ङिन् नु खुनिॽ मिमिदिङ्ङिन् खे़न् ये़क्यक्को मे़दारुॽ॥ 27 खे़प्मोग मे़ल्लुक्साःल्ले़ कुहिङ्मन्निल्ले़न् साप्पन्नो मिङ् साप्ते़आङ् के़बप्पाहाॽरक् मे़लाःत्लो॥ कर आसुत्थो पाःन् नु सिक्के़ले़ःङ्बा याम्गे़सिङ्बा याःम्बक् के़जोःक्पाहाॽ नु इङ्ले़क् के़बाःप्पाहाॽ आत्तिन्नाङ् खे़न् ये़क्यक्को लाःप्मा मे़ङ्घोने़न्लो॥ 1 हे़क्क्याङ् माङ्लाइङ्बाल्ले़ इङ्गाॽ माङ्लुङ् हे़क्के से़ल्ले़ङ् के़ले़क्पा यङ्घङ्ङिन् ओसेःन्धाक्ताङ्लो॥ खे़प्मोबा च्वाःत्तिङ्ग मे़न्नुप्मनाबा हिङ्मन् के़बिबारो॥ खे़न् यङ्घङ्ङिङ्ग निङ्वाॽफुमाङ्ङिन् नु मे़ल्लुक्साःल्ले़ खुन्छिॽ हाङ्युक्नालाम् वगुसे़र 2 खे़न् ये़क्यक्कोबा माराम् लुम्मो ये़रो॥ यङ्घङ्ङिल्ले़ कुयाओ मे़न्नुप्मनाबा हिङ्मन् के़बिबा सिङ्बुङ्ङिन् युङे़रो॥ खे़न् सिङ्बुङ्ङो तङ्बे लावा थिक्-ने़त् परिक्ले़न् सिङ्सेहाॽ थोःक्ते़रो॥ हे़क्क्याङ् खे़न् सिङ्बुङ्ङिल्ले़ कुभे़क्वाहाॽग काक् मे़न्छाम् सुवाङ्हाॽ के़वेःम्बा सिदाॽ चोगे़रो॥ 3 खे़न् ये़क्यक्को आल्लआङ्धो निङ्वाॽफुमाङ्ङिल्ले़ मे़दाःक्तुन्छिन्बा लत्छाआङ् मे़होःप्लो॥ निङ्वाॽफुमाङ्ङिन् नु मे़ल्लुक्साःल्ले़ खुन्छिॽ हाङ्युक्नाःन् खे़प्मो पोःङ्लो, हे़क्क्याङ् कुसेवारोबाहाॽरे़ खुने़ॽ सेवा मे़जोगुॽरो॥ 4 खे़ङ्हाॽरे़ निङ्वाॽफुमाङ्ङिल्ले़ कुनाराःन् मे़निःसुॽ, हे़क्क्याङ् कुमिङ्ङिन् खुनिॽ तोवाबो साप्ते़आङ् पत्लो॥ 5 खे़प्मो याम्मो से़न्दिक् मे़बोःङ्ने़न्, हे़क्क्याङ् थोॽमारे़ लागि सेमि नु नाम्साङ्ङाङ् चाहाबा मे़जोःक्ने़न्लो, थेआङ्भे़ल्ले़ यहवे दाङ्बा निङ्वाॽफुमाङ्ङिन् आबाङे खुनिॽ ओःत्ति पोःङ्॥ हे़क्क्याङ् खे़ङ्हाॽरे़ सदादिङ् हाङ् मे़जोगुॽरो॥ 6 खे़न् माङ्लाइङ्बाल्ले़ इङ्गाॽ मे़त्ताङ्, “कन् पाःन्जाक्हाॽ ताःक्पो चोःक्मा सुक्के़दे़प्पा नु से़क्खाबा चोःक्लो॥ माङ्निङ्वाॽपाःन् के़बाःप्पाहाॽ सेसेमाङ् के़बिबा यहवे दाङ्बा निङ्वाॽफुमाङ्ङिल्ले़ कुसेवारोबाहाॽ आल्ल हाराए पोःङ्मा के़बोःङ्बा पाःन्हाॽ ओसेःन्धाक्मासि फाॽआङ् कुमाङ्लाइङ्बे़न् पाङ्घु युःसुरो॥” 7 ये़सुरे़ पाःत्तुॽ, “ओमे़त्ते़ॽओ, इङ्गाॽ हाराए युःआरो! हे़क्क्याङ् कन् साप्पन्नो के़बप्पा माङ्निङ्वाॽपाःन् के़इःप्पा के़नाःप्पाहाॽग मुॽइसाबासिरो॥” 8 इङ्गाॽ युहुन्नारे़ कन् पाःन्हाॽ निःसुङ् खे़प्सुङ्लो॥ हे़क्क्याङ् कन् पाःन्हाॽ निःसुङ् खे़प्सुङ्ङिल्ले़ कन् पाःन्हाॽ याप्मि ओसेःन्गे़धाक्पा माङ्लाइङ्बान् सेवा चोःक्मा फाॽआङ् इङ्गाॽ कुलाङ्जक्पो साम्बोःन् हबत् फन्छिङ्ङाङ्लो॥ 9 कर खे़ल्ले़ इङ्गाॽ अक्खे मे़त्ताङ्लो, “इङ्गाॽ सेवा मे़जोगाङ्ङिन्ने़ॽ! इङ्गाॽग खे़ने़ॽ कुइसिःक् हे़क्क्याङ् माङ्निङ्वाॽपाःन् के़बाःप्पा के़म्भुॽ के़न्साॽसि नु कन् साप्पन्नो के़बप्पा पाःन्हाॽ के़इःप्पा के़नाःप्पाहाॽ हे़क्तङ्बा निङ्वाॽफुमाङ्ङिल्ले़ कुसेवारोबाआरो॥ निङ्वाॽफुमाङ्ङिन्लक् सेवा चोगे़ॽओ!” 10 हे़क्क्याङ् खुने़ॽ इङ्गाॽ अक्खे मे़त्ताङ्लो, “कन् साप्पन्नोबा माङ्निङ्वाॽपाःन्हाॽ मे़माॽरे़न्ने़ॽओ, थेआङ्भे़ल्ले़ खे़न् काक् पाःन्हाॽ के़प्मा ये़म्मिन् निःत्ताङ्ङे वाॽरो॥ 11 हाराॽ ताप्फे़ःम्बा याःम्बक् के़जोःक्पाहाॽरे़ ताप्फे़ःम्बा याःम्बक्के मे़जोगुररो, के़जिःम्बा याःम्बक् के़जोःक्पाहाॽ मे़जिःन्छिङ्ल मे़वाॽररो, कर साम्योनिबाहाॽरे़ साम्योनिबा याःम्बक् मे़जोगुर हे़क्क्याङ् सेसेबाहाॽ सेसेए मे़वाॽनिरो॥” 12 ये़सुरे़ पाःत्तुॽ,“ओमे़त्ते़ॽओ, इङ्गाॽ हाराए युःआरो! हे़क्क्याङ् काक् मनाहाॽरे़ मे़जोगुबा याःम्बक् कुइसिःक्के खुम्दिङ्ङिन् नु हाङ्से़म्मिन् पिरुङ्सिङ्लो॥ 13 इङ्गाॽ अल्फा नु ओमेगा, तगिबा नु एगाङ्बा, हे़क्क्याङ् कुहेःक्सिङ्मा नु कुनुप्माआरो॥ 14 हे़क्क्याङ् खुनिॽ तेःत्हाॽ सेसे लॽरिक् वागे़हप्पाहाॽग मुॽइसाबासिरो, थेआङ्भे़ल्ले़ खे़ङ्हाॽरे़ग ताःक्हन्हाॽओलाम् ये़क्यक्को लाःप्मा नु मे़न्नुप्मनाबा हिङ्मन् के़बिबा सिङ्बुङ्ङोलाम् चामा युक् मे़घोःसुॽरो॥ 15 कर कोःत्चो हे़क्तङ्बा ये़प्ले़क् के़गप्पाहाॽ, निङ्वाॽ के़माबा कित्चाक् के़जोःक्पाहाॽ, चागे़राम्बाहाॽ, मना के़से़प्पाहाॽ, नावाइत्ला माङ्गे़घःबाहाॽ हे़क्क्याङ् काक् इङ्ले़क् पाःप्मा खुनिॽ सिराॽ के़धाङ्बाहाॽ नु इङ्ले़क् के़बाःप्पाहाॽ लाःक्कात्ते मे़वाॽरो॥ 16 इङ्गाॽ ये़सुरे़ सेसेहुप्लक्हाॽरे़ लागि कन् पाःन्हाॽ मे़त्छे़ आमाङ्लाइङ्बान् खिनिॽओ पाङ्घुङ्ङाङ् वाॽआरो॥ इङ्गाॽग दाउद हाङ्ङिल्ले़ कुमुॽइदाङ्साआरो, हे़क्क्याङ् तान्छोःक्पाआरो॥” 17 सेसेमाङ्ङिन् नु सिसामेःत्तिल्ले़ पाःत्छुॽ, “ये़ॽओ!” हे़क्क्याङ् कन् पाःन्हाॽ के़घे़म्बाल्ले़आङ् “ये़ॽओ!” पाःत्तुरो॥ आत्तिन् आङ्गुगे़न् वामिःक्माल्ले़ तरुआङ् वाॽ, खे़न् ताररो॥ आत्तिल्ले़ निङ्वाॽ चोगुॽ, हाराॽ खे़ल्ले़ कुमे़ल्लुङ् मे़ःन्नेए मे़न्नुप्मनाबा हिङ्मन् के़बिबा च्वाःत्तिन् थुङुररो॥ 18 कन् साप्पन्नोबा माङ्निङ्वाॽपाःन् के़घे़म्बा काक् मे़न्छाम् याप्मिहाॽ इङ्गाॽ साम्दिङ् पिरुङ्सिङ्लो–हाःत्ले़ कन् साप्पन्नो थेइ योॽरु, निङ्वाॽफुमाङ्ङिल्ले़आङ् कन् साप्पन्नो चे़ङ्मनाबा मिन्देॽहाॽ खे़न् के़योॽबाल्ले़ कुसम्दाङ् योॽरुरो॥ 19 हे़क्क्याङ् हाःत्ले़ कन् माङ्निङ्वाॽपाःन्निल्ले़न् साप्पन्नोलाम् थेइ खक्तुॽ, कन् साप्पन्नो साप्ते़आङ् के़बप्पा मे़न्नुप्मनाबा हिङ्मन् के़बिबा सिङ्बुङ्ङोलाम् हे़क्क्याङ् सेसे ये़क्यक्कोलाम् खे़ल्ले़ खोःमा के़बोःङ्बा लक्किन् निङ्वाॽफुमाङ्ङिल्ले़ खक्तुॽरो॥ 20 कन् पाःन्निन् साःक्खि के़बिबाल्ले़ पाःत्तुॽ, “से़क्खाए इङ्गाॽ हाराए युःआरो॥”आमे़न्! दाङ्बा ये़सुए, ये़ॽओ! 21 दाङ्बा ये़सुरे़ कुलुङ्गुम्मिन् खिनिॽ के़रे़क्नु वाॽररो॥ आमे़न्॥
|