Ephesians
एफिसि1 एफिसस 2 आनिॽ पानुदिङ् पाः निङ्वाॽफुमाङ्ङिन् हे़क्क्याङ् दाङ्बा ये़सु ख्रिस्तरे़ लुङ्गुम् नु सनारुङ् के़बिरिर॥ 3 आनिॽ दाङ्बा ये़सु ख्रिस्तरे़ कुम्बा निङ्वाॽफुमाङ्ङिल्ले़ कुनारा पोःररो॥ खुने़ॽए ये़सु ख्रिस्तलाम् साङ्ग्राम्पेदाङ्बा के़रे़क् याम्साम्गे़न् मुॽइसाम्मिल्ले़ आनिॽ मुॽइसाबा आजोगे़आङ् वाॽ॥ 4 खुने़ॽ कुनिःमाओ सेसे नु आप्तिक् मे़ःन्नेबा आबोःङ्ल फाॽआङ् ख्रिस्ते़ल्ले़ चोगुल्ले़ इक्सा खाम्बेःक् पोःङ्मानुःल्ले़ तगिसा आसेगे़आङ् वये़॥ खुने़ॽ लुङ्माॽ आदुक्ते़बाल्ले़ चोगुल्ले़ 5 खुने़ॽ कुनिङ्वाॽ कुइसिःक् कुसिराॽ थाङे़र ये़सु ख्रिस्तलाम् कुस्साः पोःङ्से़ तगिनुए आनिॽ आसेगे़आङ् वये़रो॥ 6 हे़क्केःल्ले़ निङ्वाॽफुमाङ्ङिल्ले़ आबाङे लुङ्माॽ तुक्तुबा कुस्साःन्लाम्बा कुनिङ्वाॽ हन्दुआङ् साॽरिक् लुङ्माॽ आदुक्ते़बाल्ले़ चोगुल्ले़ कुनारा फोःसुम्लो॥ 7 हे़क्क्याङ् निङ्वाॽफुमाङ्ङिल्ले़ साॽरिक् लुङ्माॽ आदुक्ते़बाल्ले़ चोगुल्ले़ ये़सुरे़ कुमाक्खिॽइल्ले़ आनिॽ लायोलाम् ले़प्मि आबिरे़र आधे़ॽरे़आङ् वाॽ॥ 8 साॽरिक्के लुङ्माॽ आदुक्ते़आङ् वाॽरो! 9 काक् सिक्कुम् निङ्वाॽ नु खासिङ् निःप्माल्ले़ निङ्वाॽफुमाङ्ङिल्ले़ ख्रिस्तलाम्बा चोःक्मा निङ्वाॽ इःत्तुबा सिबिॽ पाःन्निन् कुसिराॽ थाङे़र कुसिङ् निःप्मा आबाङ्घे़आङ् वाॽ॥ 10 हे़क्क्याङ् सुये़म्मिन् के़त्ताङ् निङ्वाॽफुमाङ्ङिल्ले़ ख्रिस्तरे़ युक् चोगुर फाॽआङ् साङ्ग्राम्पेदाङ् नु इक्सा खाम्बेःक्को के़वाॽबा के़रे़क् पाःन्हाॽ तारुॽरो॥ 11 ख्रिस्ते़न्नु थिक्हुप् आवाॽबाल्ले़ चोगुल्ले़ निङ्वाॽफुमाङ्ङिल्ले़ आनिॽआङ् खुने़ॽलाम् लक् खोःसे़ आसेगे़आङ् आवाॽ, थेआङ्भे़ल्ले़ कङ्ग तगिनुसा खुने़ॽ चोःक्मा निङ्वाॽ इःत्तुबा हे़क्के के़रे़क् पाःन्हाॽ पोःङ्लो॥ 12 हे़क्केलॽरिक् आनिगे़ यहुदिहाॽ के़रे़क्नुःल्ले़ तगि ख्रिस्तओ निङ्साङ् के़जोःक्पाहाॽए मिमिदिङ्गे़न् निङ्वाॽफुमाङ्ङिल्ले़ कुनारा के़भोःबा पोःक्खिगे़ररो॥ 13 आल्ल खिनिॽआङ् से़क्खाबा पाःन्जाक् से़न्लप्रे़न् सुनाइङ् के़घे़प्सुम्लो, हे़क्क्याङ् ख्रिस्ते़न् नसाःन् के़जोगुम्बा ये़म्मो खिनिॽग आमनानिङ् फाॽआङ् ओसेःन्दाङ् चोःक्से़ निङ्वाॽफुमाङ्ङिल्ले़ माङ्हे़क् चोगुबा सेसेमाङ्ङिन् के़बिरिआङ् वाॽरो॥ 14 आनिॽ निङ्वाॽफुमाङ्ङिल्ले़ कुमनाहाॽ थे़ॽमा आन्छुःत्ने़न्ल थारिक् निङ्वाॽफुमाङ्ङिल्ले़ माङ्हे़क् आजोगे़बा के़रे़क् पाःन्हाॽ से़क्खाए आबिॽ लॽरिक् सेसेमाङ्ङिन् ते़न्याङ् कुइसिःक् आबिरे़बारो॥ मिमिदिङ्गे़न् निङ्वाॽफुमाङ्ङिल्ले़ कुनारा के़भोःबा आनिॽ आबोःङ्ल फाॽआङ् खुने़ॽ हे़क्के चोगुबारो॥ 15 खे़ल्ले़ चोगुल्ले़ इङ्गाॽआङ् दाङ्बा ये़सुःन् के़जोगुम्बा नसाःन्निन् नु के़रे़क् निङ्वाॽफुमाङ्ङिल्ले़ सेसे कुमना नसानिबाहाॽ लुङ्माॽ के़दुक्तुम्सिम्बा पाःन्निन् खे़प्सुङ्ङाङ् 16 खिनिॽ लागि निङ्वाॽफुमाङ्ङिन् चक्मे़ल्लॽए नोगे़न् पिरुङ्लो॥ इङ्गाॽ चोगुङ्बा तुवाओ निङ्वाॽ इःत्निङ्ल 17 आनिॽ दाङ्बा ये़सु ख्रिस्तरे़ मिमिदिङ्गे़न् कुम्बा निङ्वाॽफुमाङ्ङिल्ले़ खुने़ॽ कुयाःम्बेओ नुःरिक्काङ् कुसिङ् निःप्मारे़ लागि सिक्कुम्दिङ् निङ्वाॽ के़बिबा नु निङ्वाॽफुमाङ्ङिन् ओसेःन्दाङ् के़जोःक्पा सेसेमाङ्ङिन् के़बिरिर फाॽआङ् तुवा चोःक्कारो॥ 18 खिनिॽ खासिङ् निःप्मा के़सुक्पा के़बोःक्खिर फाॽआङ् इङ्गाॽ तुवा चोःक्कारो॥ हे़क्क्याङ् खिनिॽ के़उःत्तिआङ् खोःमा के़बोःङ्बा लक्किन् कुसिङ् के़निःत्तुम्लो॥ खे़न् साॽरिक् इमे़ल्लुङ्बा मिमिदिङ्गे़न् लक्किन् निङ्वाॽफुमाङ्ङिल्ले़ सेसे कुमनाहाॽनु माङ्हे़क् चोगुआङ् वाॽरो॥ 19 हे़क्क्याङ् खुने़ॽ पयम् यम्बा कुमुक्साम्मिल्ले़ आनिॽ नसाःन् के़जोःक्पाहाॽ कुभाॽ आबिॽ के़लॽबा पाःन्निन् कुसिङ् निःप्मा के़सुक्तुम्लो॥ हाबा खे़न् मुक्साम्मिन् 20 ओगप् चोगुल्ले़ खुने़ॽ के़सिःबा ख्रिस्ते़न् कुहिङ्वे़त् चोगु हे़क्क्याङ् साङ्ग्राम्पेदाङ्बा ते़न्नो मिङ्सो इङ्धाःङ् पिरुर कुजुप्साङ् ले़प्माङ् युक्खुआङ् युङ्लो॥ 21 खे़प्मो ख्रिस्तरे़ के़रे़क् सुहाङ्गे़म्बाहाॽ, युक् के़गप्पाहाॽ, मुक्साम् के़गप्पाहाॽ, नु हाङ्युक् के़जोःक्पाहाॽ सम्दाङ् हाङ् चोगुॽरो॥ हे़क्क्याङ् कन् ये़म्मोरक् मे़ःन्, कर के़दाःबा ये़म्मोआङ् खुने़ॽ वेॽ के़रे़क्नुःल्ले़आङ् थोधोक्पा चोःक्॥ 22 हे़क्क्याङ् निङ्वाॽफुमाङ्ङिल्ले़ ख्रिस्तरे़ कुयुक् सिगाङ् के़रे़क् युक्खुआङ् वाॽ, हे़क्क्याङ् सेसेहुप्लक्ले़ लागि खुने़ॽए के़रे़क् सम्दाङ् कुधे़गेःक् चोगुरो॥ 23 आल्ल कन् सेसेहुप्लक्किङ्ग ख्रिस्तरे़ नासिङ्गे़न् कुधक् नु कुलिङ्धो के़गे़प्पा पाःन्लो॥ हे़क्क्याङ् खुने़ॽए के़रे़क् कुलिङ्धो के़त्तुॽरो॥1 के़बेःक्पा ये़म्मो खिनिॽ के़जोगुम्बा लायोबा याःम्बक्किल्ले़ चोगुल्ले़ के़स्ये़ॽइआङ् के़वयि॥ 2 खे़न् ये़म्मो खिनिॽआङ् कन् खाम्बेःक्मोबा थिम्मिन् नु फे़न्साम्हाॽरे़ खुनिॽ हाङ्जुम्मो हाङ् के़जोःक्पा माफे़न्साम्मिल्ले़ कुबाःन्निन् के़घे़प्सुम्माङ् के़वयि॥ खे़न् साम्मिन्ने निङ्वाॽफुमाङ् इङ्जाःङ् मे़ङ्घे़म्मनाबाहाॽरे़ खुनिॽ सिक्लुङ्मो याःम्बक् चोःक्ल वाॽरो॥ 3 खे़ङ्हाॽरे़ खुनिॽ लुम्मो उन्छोःन् आनिॽआङ् याम् नु निङ्वाॽइल्ले़ चोःक्मा कोःत्तुबा लायोबा लाम्मो आवये़॥ खे़ङ्हाॽ हे़क्के आनिॽआङ् निङ्वाॽफुमाङ्ङिल्ले़ कुघासे़न्नो के़धाःबा आबोःक्खे़आङ् आवये़रो॥ 4 कर साॽरिक् लुङ्गुम्दाङ्बा निङ्वाॽफुमाङ्ङिल्ले़ साॽरिक् लुङ्माॽ आदुक्ते़रो॥ 5 आनिॽ लायोःल्ले़ चोगुल्ले़ याम्साम्मो आस्ये़आङ् आवये़साङ् ख्रिस्ते़न्नु सोरिक् खुने़ॽ कुहिङ्वे़त् आजोगे़आङ् आवाॽरो–खुने़ॽ लुङ्माॽ के़दुक्तिबाल्ले़ खिनिॽ ताङ्गे़से़ःप्तिआङ् के़वयिॽ॥ 6 हे़क्केलॽरिक् खुने़ॽ ख्रिस्ते़न्नु सोरिक् कुहिङ्वे़त् आजोगे़आङ् साङ्ग्राम्पेदाङ्बा ते़न्नो ख्रिस्त ये़सुःन्नु आयुक्खे़आङ् आवाॽरो॥ 7 कङ्ग के़दाःबा ये़म्मो खुने़ॽ साॽरिक् इमे़ल्लुङ्बा कुलुङ्गुम्मिन् ओसेःन्दाङ् चोःक्मा फाॽआङ् हे़क्के चोगुबारो॥ ख्रिस्त ये़सुलाम् लुङ्माॽ आदुक्ते़बा कन् लुङ्गुम्मिन् ओसेःन्आधाक्ते़रो॥ 8 निङ्वाॽफुमाङ्ङिल्ले़ लुङ्माॽ के़दुक्तिबाल्ले़ चोगुल्ले़ ख्रिस्ते़न् नसाःन् के़जोगुम्बालाम्बा खिनिॽ ताङ्गे़से़ःप्तिआङ् के़वयिॽ॥ कङ्ग आबाङे खिनिॽ के़जोगुम्बा याःम्बक्लाम् मे़ःन्, कर निङ्वाॽफुमाङ्ङिल्ले़ कुबर्धाःम्मिल्ले़ चोगुबारो॥ 9 मनारे़ मे़जोगुबा याःम्बक्लाम् अक्खे पोःक्खे़बा मे़ःन्लो, खे़ल्ले़ चोगुल्ले़ मनाहाॽरे़ आङ्दिङ् लॽमा पाःन्ने होःप्लो॥ 10 थेआङ्भे़ल्ले़ नुःबा याःम्बक्हाॽ चोःक्मा फाॽआङ् ख्रिस्त ये़सुलाम् निङ्वाॽफुमाङ्ङिल्ले़ आनिॽ आजोगे़बारो॥ निङ्वाॽफुमाङ्ङिल्ले़ खे़न् नुःबा याःम्बक्हाॽ आनिॽ आजोगुम्ल फाॽआङ् तगिसा यारिप् चोगुआङ् वये़बारो॥ 11 खे़ल्ले़ चोगुल्ले़ थिम्मे़न्दङ् सुवाङ्ङो सागे़वाःन्नासिबान् निङ्वाॽ इःत्ते़म्मे़ॽओ॥ हे़क्क्याङ् आनिगे़ हर्दो हे़क्मा थिम् के़गप्पासिगे़ के़लॽबा यहुदिहाॽरे़ खिनिॽ “हर्दो मे़न्हे़क्मनानिङ्” के़म्मे़त्तिॽ (कर खे़ङ्ग मनाहाॽरे़ नासिङ्गे़न् थक्को मे़जोगुबा थिम्लक्लो)॥ 12 खे़न् ये़म्मो खिनिॽ ख्रिस्त मे़ःन्ने, इस्राइलबा यक्युङ्बा के़न्वयिन्, निङ्वाॽफुमाङ्ङिल्ले़ पिनिङ् फाॽआङ् माङ्हे़क् चोगुबा माङ्हुप्हाॽ मे़ङ्घोःमनाबा, निङ्साङ् के़होःप्पा नु कन् इक्सादिङ् खाम्बेःक्माओ निङ्वाॽफुमाङ् मे़ःन्ने के़वयिबान् निङ्वाॽ इःत्ते़म्मे़ॽओ॥ 13 कर खिनिॽ तगि निङ्वाॽफुमाङ्लाम् माःङ्घा के़वयिसाङ् आल्लो खिनिॽ ख्रिस्त ये़सुःन्नु थिक्हुप् के़बोःङ्बाहाॽ ख्रिस्तरे़ कुमाक्खिॽइन् वादेःन्दुबाल्ले़ चोगुल्ले़ निःत्ताङ् के़बोःक्खिआङ् के़वयिॽरो॥ 14 थेआङ्भे़ल्ले़ खुने़ॽलाम्बाए आनिॽ सनारुङ् आघोःसुम्माङ् आवाॽ॥ खुने़ॽए यहुदिहाॽ नु थिम्मे़न्दङ् सुवाङ्हाॽ के़से़म्बा निङ्मिगे़न् लुङ्धाक् कुइसिःक्पा थिम्मिन् आबाङे नासिङ्गे़न् कुधक्को यस्सुर खे़ङ्हाॽ थिक्हुप् चोगुसिआङ् वाॽ॥ 15 खुने़ॽए साम्योथिम् इङ्जाःङ्ङोबा थिम्हाॽ थेनाधेबा चोगु॥ खुने़ॽए यहुदि नु थिम्मे़न्दङ् सुवाङ्लुम्मो सनारुङ् ताःत्छे़ ने़त्छि सुवाङ्लाम्बा खुने़ॽनु थिक्हुप् के़बोःङ्बा लत्छा कुसङ् सुवाङ्धिक् चोगुआङ् वाॽरो॥ 16 हे़क्केःल्ले़ खुने़ॽ सिलाम्साक्मा सिङ्ङो स्ये़आङ् आनिॽ ने़त्छि सुवाङ्बा मनाहाॽ थिक्हुप्पो आदारे़ हे़क्क्याङ् निङ्वाॽफुमाङ्ङिन्नु नादङ् आजोगे़, हे़क्केलॽरिक् आनिॽ लुम्मोबा चिःत्छिङ्मान् खे़त्तुदेःसुरो॥ 17 ख्रिस्ते़न् त्ये़आङ् निङ्वाॽफुमाङ्ङिन्नु माःङ्घा के़वाॽबा खिनिॽ थिम्मे़न्दङ् सुवाङ्हाॽ नु निःत्ताङ् के़वाॽबा यहुदिहाॽओ सनारुङ्ङिल्ले़न् सुनाइङ् से़ःसुरो॥ 18 खुने़ॽलाम्मे आनिॽ के़रे़क्ले़ थिक् सेसेमाङ् आघोःसुम्माङ् पानुदिङ् पाः निङ्वाॽफुमाङ्ङो पेःक्मा आघोःसुम्माङ् आवाॽरो॥ 19 खे़ल्ले़ चोगुल्ले़ आल्ल खिनिॽ थिम्मे़न्दङ् सुवाङ्हाॽ वेॽ लाजेॽबा नु तास्वाबानिङ् मे़ःन्, कर खिनिॽग निङ्वाॽफुमाङ्ङिल्ले़ सेसे कुमनाहाॽनु निङ्वाॽफुमाङ्ङिल्ले़ कुहिम्सयङ्ङोबा यक्युङ्बा के़बोःक्खिआङ् के़वयिॽरो॥ 20 आनिॽग सेःक्युक्मिबा नु माङ्निङ्वाॽपाःन् के़बाःप्पाहाॽरे़ मे़ने़स्सुबा हिम्पाङ्यक्को चोःक्मनाबा हिम् कुइसिःक् आजोःक्॥ हे़क्क्याङ् खे़न् हिम्मिल्ले़न् के़ये़क्पा कुम्मालुङ्ङिङ्ग ख्रिस्त ये़सुःन्नेरो॥ 21 खुने़ॽओए काक् हिम्मिन् काम्माङ् दाङ्बाल्ले़ लागि सेसेबा माङ्हिम् पोःङ्ङाङ् पोःर पेःक्लो॥ 22 हे़क्क्याङ् खिनिॽआङ् खुने़ॽनु सोरिक् थिक्हुप् के़बोःक्खिआङ् निङ्वाॽफुमाङ्ङिल्ले़ कुयुङ्मादे़न् के़बोःक्खिॽ, हे़क्केलॽरिक् खिनिॽओ निङ्वाॽफुमाङ्ङिन् सेसेमाङ्लाम् युङ्लो॥ 1 हे़क्केःल्ले़ इङ्गाॽ पावलरे़ खिनिॽ थिम्मे़न्दङ् सुवाङ्हाॽओ ख्रिस्त ये़सुरे़ कुयाःम्बेओ सुनाइङ् से़ःसुङ्बाल्ले़ चोगुल्ले़ पुङ्लाहिम्मो साक्पा थ्याङ्बारो॥ 2 निङ्वाॽफुमाङ्ङिल्ले़ लुङ्माॽ आदुक्ते़बाल्ले़ कुयाःम्बेओ खिनिॽ इङ्भोःमा लक्पे़न्निन् खुने़ॽ पिराङ्बान् खिनिॽ के़घे़प्सुम्माङ् के़वयिॽ के़लॽबा निङ्वाॽ इःत्तुङ्लो॥ 3 कङ्ग निङ्वाॽफुमाङ्ङिल्ले़ ओसेःन्धाक्ताङ्बा कुनिङ्वाॽ सिगाङ्बा पाःन्लो॥ कल्ले़ कुयाःम्बेओ इङ्गाॽ तगिसा मिसाक् साप्तुङ्ङाङ् वाॽरो॥ 4 कन् सक्इङ्घङ्ङिन् के़निःरुम्माङ् इङ्गाॽ निङ्वाॽ खोःसुङ्बा ख्रिस्तरे़ कुयाःम्बेओबा सिबिॽ पाःन्निन् कुसिङ् निःप्मा के़सुक्तुम्लो॥ 5 खे़न् पाःन्निन् के़बेःक्पा ये़म्मोबा मनाहाॽओ ओसेःन्दाङ् मे़म्बोःङ्ङे वये़, कर कन् ये़म्मो सेसेमाङ्लाम् निङ्वाॽफुमाङ्ङिल्ले़ सेसे कुसेःक्युक्मिबाहाॽ नु माङ्निङ्वाॽपाःन् के़बाःप्पाहाॽओ ओसेःन्दाङ् पोःक्खे़आङ् वाॽरो॥ 6 खे़न् सिबिॽबा पाःन्निन् बा कन्लो–सुनाइङ्लाम्बाए थिम्मे़न्दङ् सुवाङ्हाॽ यहुदिहाॽनु सोरिक् युक्साबासि, सोरिक् थिक्हुप् के़बोःङ्बासि हे़क्क्याङ् ख्रिस्त ये़सुलाम् के़दाःबा निङ्वाॽफुमाङ्ङिल्ले़ कुमाङ्हे़क्किल्ले़न् सोरिक् लक् के़घोःबासिरो॥ 7 निङ्वाॽफुमाङ्ङिल्ले़ कुलुङ्गुम् नु कुमुक्साम्लाम् इङ्गाॽ कन् सुनाइङ् के़से़बा सेवारोबा पोःक्खाङ्लो॥ 8 निङ्वाॽफुमाङ्ङिल्ले़ के़रे़क् सेसे कुमनाहाॽनुःल्ले़ इङ्गाॽ योःयोःक्पा चोःक्कासाङ् कुसिङ् निःप्माए सुक्मे़न्दे़प्मनाबा ख्रिस्तरे़ आबिरे़बा हाङ्वा मुॽइसाम्मिल्ले़ कुयाःम्बेओ थिम्मे़न्दङ् सुवाङ्हाॽ इङ्भोःमासि फाॽआङ् कन् लुङ्गुम्मिन् इङ्गाॽ पिराङ्लो॥ 9 हे़क्क्याङ् काक् पाःन्हाॽरे़न् नावागे़न् चइःत् के़ने़बा निङ्वाॽफुमाङ्ङिल्ले़ उनाहुरिआङ्धो माॽरुबा पाःन्निल्ले़न् निङ्सेःक्किन् काक् मनाहाॽ चे़क्मासि फाॽआङ् इङ्गाॽ सेगाङ्लो॥ 10 अक्खेलॽरिक् सेसेहुप्लक्लाम्बा निङ्वाॽफुमाङ्ङिल्ले़न् काक् परिक्पा सिक्कुम्दिङ् निङ्वाॽइन् ताङ्साक्पाओबा काक् हाङ् के़जोःक्पा नु युक् के़जोःक्पा फे़न्साम्हाॽओ ओसेःन्दाङ् पोःङ्लो॥ 11 कङ्ग निङ्वाॽफुमाङ्ङिल्ले़ चोगुबा मे़न्नुप्मनाबा निङ्वाॽसोःक् कुइसिःक् आनिॽ दाङ्बा ख्रिस्त ये़सुलाम्बा कुलिङ्धो के़त्तुरो॥ 12 खुने़ॽ चोगुल्ले़ हे़क्क्याङ् खुने़ॽ आजोगुम्बा नसाःन्लाम्बा हाङ्हाङ् लॽरिक् मे़ङ्गिए निङ्वाॽफुमाङ्ङो पेःक्मा आघोःसुम्लो॥ 13 खे़ल्ले़ चोगुल्ले़ खिनिॽ लागि इङ्गाॽ तुमुङ्बा इनोगे़न् तुक्खेःन् के़निःसुम्मिल्ले़ खिनिॽ निङ्साङ् मे़बुक्ने़न्ल कर खे़ङ्ग खिनिॽ इङ्धाःङ् के़घोःसुम्बा हे़क्के इःत्ते़म्मे़ॽओ फाॽआङ् पेलि फाक्निङ्लो॥ 14 खे़ल्ले़ चोगुल्ले़ए इङ्गाॽ पानुदिङ् पाः निङ्वाॽफुमाङ्ङिल्ले़ कुदगि थुङ्बोहजॽआङ् तुवा चोःक्कारो॥ 15 खुने़ॽलाम्बाए इक्सादिङ् खाम्बेःक् नु साङ्ग्राम्पेदाङ्बा के़रे़क् मे़न्छाम् सयङ्हाॽरे़ खुनिॽ मिङ् मे़घोःसुॽरो॥ 16 खुने़ॽ मुल्लुक् मिमिदिङ्गे़न् कुमुक्साम्लाम् कुसेसेमाङ्ङिल्ले़ खिनिॽ याम्साम्मो के़धुम्बा के़जोगिर फाॽआङ् तुवा चोःक्कारो॥ 17 हे़क्केलॽरिक् नसाःन्लाम् ख्रिस्ते़न् खिनिॽ सिक्लुङ्मो वाॽर॥ निङ्वाॽफुमाङ्ङिल्ले़ कुमिःम्जिओ खिनिॽ साःप् लेःत्छिङ्ङाङ् के़धुम्बा के़बोःक्खिर, 18 हे़क्केलॽरिक् खिनिॽ के़रे़क् निङ्वाॽफुमाङ्ङिल्ले़ सेसे कुमनाहाॽनु ख्रिस्तरे़ आक्खे़न् साॽरिक् लुङ्माॽ आदुक् के़लॽबान् काक् परिक्लाम् कुसिङ् निःप्मा के़सुक्तुम्लो॥ 19 हे़क्क्याङ् ने़हिनिङ्वाॽरे़ मे़घोःप्तुम्बा ख्रिस्तरे़ कुमिःम्जिन् कुसिङ् के़निःत्तुम्माङ् निङ्वाॽफुमाङ्ङिन् कुलिङ्धो के़गे़प्पा चोःक्पा कुइसिःक् के़बोःक्खिररो॥ 20 आल्ल आनिॽ नाःक्मनाबा हे़क्क्याङ् इःप्मनाबानुःल्ले़आङ् यरिक् चोःक्मा के़सुक्पा आनिॽओ याःम्बक् के़जोःक्पा खुने़ॽ कुमुक्साम्लाम् निङ्वाॽफुमाङ्ङिल्ले़न् 21 के़रे़क् ये़म्मो, के़रे़क् मे़न्छाम् थाःक्को, सेसेहुप्लक्को नु ख्रिस्त ये़सुओ सदादिङ् सदादिङ् कुनारा पोःररो॥ आमे़न्॥ 1 ख्रिस्त ये़सुरे़ कुयाःम्बेओ इङ्भोःसुङ्बाल्ले़ चोगुल्ले़ इङ्गाॽ पुङ्लाहिम्मो साक्पा के़धाःबाल्ले़ निङ्वाॽफुमाङ्ङिल्ले़ सेगुसिबा मनाहाॽ खे़म्दु लाॽरुसिबा हिङ्मन्नो मे़वाॽबा हे़क्के वये़म्मे़ॽ फाॽआङ् पेलि फाक्निङ्लो॥ 2 काक् चुङ्जिगे़न् नःम्नःम् नु सुम्सुम्माङ् वये़म्मे़ॽ॥ हे़क्क्याङ् निङ्वाॽ यो धो मे़ल्लॽए लुङ्माॽ तुक्कासिम्मे़ॽर नासि थःत्ते़म्मे़ॽओ॥ 3 वेॽहाॽनु सनारुङ्ङो वये़म्मे़ॽआङ् सेसेमाङ्लाम् के़दाःबा थिक्हुप्पो वाॽमा साॽरिक् कोःत्ते़म्मे़ॽओ॥ सेसेमाङ्लाम् के़दाःबा थिक्हुप्पो वाॽमा फाॽआङ् काक् परिक्ले़ तम्सिन् चोगे़म्मे़ॽर सनारुङ्ङो वये़म्मे़ॽओ॥ 4 निङ्वाॽफुमाङ्ङिल्ले़ के़उःत्तिल्ले़ लत्छा निङ्साङ् के़बिरिबा कुइसिःक्के, ख्रिस्ते़न् नसाःन् के़जोःक्पाहाॽ लत्थिक् थक्सिरो॥ हे़क्क्याङ् सेसेमाङ् लत्थिक् वाॽ, 5 दाङ्बान् लत्थिक् वाॽ, नसाःन् लत्थिक् वाॽ, हे़क्क्याङ् बप्तिस्माआङ् लत्थिक् वाॽ॥ 6 हे़क्क्याङ् काक् मे़न्छाम् याप्मिरे़ पानुदिङ् पाः निङ्वाॽफुमाङ्ङिन् लत्थिक् वाॽरो॥ खुने़ॽए आनिॽ के़रे़क् सम्दाङ् युक् कत्तुॽ, आनिॽ के़रे़क्लाम्बा याःम्बक् चोगुॽ, हे़क्क्याङ् आनिॽ के़रे़क्को वाॽरो॥ 7 कर ख्रिस्तरे़ हाबा पिमा निङ्वाॽ चोगुबा इसिःक् आनिॽ के़रे़क्ले़ पर्धाःम् आघोःसुम्माङ् आवाॽ॥ 8 खे़ल्ले़ चोगुल्ले़ साम्योसाप्लाओ अक्खे साप्ते़आङ् पत्,“खुने़ॽ थाःङ् पेःल्ले़ नाःन्दुसिबाहाॽखुने़ॽनु तेॽरुसि,हे़क्क्याङ् कुमनाहाॽ पर्धाःम्हाॽ पिरुसि॥” 9 आल्ल कन् “थाःङ् पे” फाॽइङ्ग थेःन्बे? कन् फाॽइङ्ग खुने़ॽग यो खाम्बेःक् सिगाङ् थारिक्काङ् थ्ये़ के़लॽबाने़ पोःङ्लो॥ 10 थोलाम्नु के़धाःबान्ने के़रे़क् खाम्बेःक्माओ नु तरःङ्गे़न् ताङ्साङ्ङो वाॽर फाॽआङ् ताङ्साक्पे़न्नुःल्ले़आङ् थो थारिक् पे॥ 11 खुने़ॽए कुभा सेःक्युक्मिबा, माङ्निङ्वाॽपाःन् के़बाःप्पा, सुनाइङ् के़से़बा हे़क्क्याङ् नसानिबाहाॽ कम्ब्राङ् के़मे़प्पा नु सिक्साम्बा पोःङ्से़ पर्धाःम्हाॽ पिरुसिरो॥ 12 हे़क्केलॽरिक् सेसेहुप्लक् ख्रिस्तरे़ कुधक्किन् थोबो पोःङ्ल फाॽआङ् निङ्वाॽफुमाङ्ङिल्ले़ सेसे कुमनाहाॽ माङ्सेवा याःम्बक् चोःक्मारे़ लागि यारिप् मे़बोःङ्लरो॥ 13 हे़क्केलॽरिक् आनिॽ के़रे़क् नसाःन्नो नु निङ्वाॽफुसाःल्ले़ कुने़हिनिङ्वाॽओ थिक्हुप् आबोःङ्, हे़क्क्याङ् दाङ्बाओ के़रे़क् खासिङ् के़निःप्पा आबोःङ्ङाङ् ख्रिस्तओ कुलिङ्धो आगे़त्लो॥ 14 हे़क्केःल्ले़ आनिॽ अङे़ःक्वाहाॽ कुइसिःक् कुनिङ्वाॽ के़बाःक्पा आम्बोःङ्ने़न्॥ हे़क्क्याङ् वाभे़ल्ले़ङ्ङिल्ले़ हिप्तुआङ् वाःन्दुबा खःङ्बेन् कुइसिःक् इङ्ले़क्के मनाहाॽरे़ खुनिॽ मुजाःप्पा फे़न् निसाम्मिल्ले़ आनिॽ ना-कत्ना आन्वाःन्ने़न्लो॥ 15 खे़ल्ले़ कुले़क्वा मिःम्जिन्नु से़क्खा पाःन् आबाःत्तुम्मिल्ले़ आल्लसाङ् यरिक् आनिॽ काक् परिक्ले़ ख्रिस्ते़न् हे़क्केए आबोःङ्, थेआङ्भे़ल्ले़ खुने़ॽए आनिॽ थे़गेःक्पारो॥ 16 खुने़ॽलाम्बाए नासिङ्गे़न् थक्कोबा के़रे़क् याम्लक्हाॽ चक्सिङ्ङाङ् आबाङे याःम्बक् चोगुर मिःम्जिःल्ले़ कुधिम् पोःङ्ङाङ् के़धुम्बा पोःङ्ल पेःक्लो॥ 17 खे़ल्ले़ चोगुल्ले़ इङ्गाॽ दाङ्बाल्ले़ कुयुक्किल्ले़ अक्खे मे़त्निङ्, खिनिॽ निङ्वाॽफुमाङ् कुसिङ् मे़न्निःप्मनाबाहाॽ मे़वाॽबा कुइसिःक् मे़वये़म्मिन्ने़ॽओ, थेआङ्भे़ल्ले़ खे़ङ्हाॽरे़ खुनिॽ निङ्वाॽइन् कुसुम्मे़न्दम्मनाबा चोःक्लो॥ 18 खे़ङ्हाॽरे़ के़साक्पा खुनिॽ निङ्वाॽइल्ले़ नु निङ्वाॽ पाःक्माल्ले़ चोगुल्ले़ खे़ङ्हाॽ निङ्वाॽफुमाङ्ङिल्ले़ पिरुसिबा हिङ्मन्लाम् माःङ्घा मे़बोःक्खे़आङ् मे़वाॽ, हे़क्क्याङ् खे़ङ्हाॽरे़ खुनिॽ निङ्वाॽइन् खादाप्तुआङ् वाॽ॥ 19 खे़ङ्हाॽरे़ खुनिॽ निङ्वाॽ थःप्पाङ् निङ्वाॽ थाप्थाप् फे़न् याःम्बक् मे़जोगुरो॥ खे़ङ्हाॽरे़ के़रे़क् परिक्पा आजिःन्जिःम्बा नु सिक्के़ले़ःङ्बा पाःन्नो चक्मे़ल्लॽए निङ्वाॽ मे़बिरुॽरो॥ 20 कर खिनिॽग ख्रिस्तरे़ कुयाःम्बेओ हे़क्केलॽरिक् के़न्हुॽआसिन्॥ 21 कुजे़क्के खुने़ॽ कुयाःम्बेओ के़घे़प्सुम्माङ् ये़सुरे़ कुसे़क्खाःन् के़हुॽआसिआङ् के़वयिॽरो॥ 22 खे़ल्ले़ चोगुल्ले़ ख्रिस्ते़न् नसाःन् मे़न्जोःक्के के़वयिल्ले़ इङ्ले़क्के फे़न् निङ्वाॽइल्ले़ फे़त्लाःन्दुबा खिनिॽ तगिबा ये़प्ले़क्किन् लाप्फुसे़म्मे़ॽआङ् 23 खिनिॽ सिक्लुङ्मान् नु निङ्वाॽइन् कुसङ् पोःङ्माए पोःङ्॥ 24 हे़क्क्याङ् निङ्वाॽफुमाङ् कुइसिःक् से़क्खा, साम्योनिबा नु सेसे चोगे़बा कुसङ् ये़प्ले़क्किन् कुसङ् चाङ् कुइसिःक् चाक्खे़म्मे़ॽओ॥ 25 खे़ल्ले़ चोगुल्ले़ इङ्ले़क् पाःन्हाॽ खिनिॽ के़रे़क्ले़ ले़रे़म्मे़ॽआङ् खिनिॽ लुम्मो से़क्खा पारे़म्मे़ॽ, थेआङ्भे़ल्ले़ आनिॽग लत्छा थक्कोबा याम्लक्सिरो॥ 26 खिनिॽ सिक् पोःक्साङ् लायो मे़जोगे़म्मिन्ने़ॽ॥ नाम्धामानुःल्ले़ तगिए खिनिॽ सिक् पोःक्मान् चिप्ल, 27 हे़क्केलॽरिक्के माफे़न्साम्मिन् खिनिॽ निङ्वाॽओ याःम्बक् चोःक्मा मे़बाङ्घे़म्मिन्ने़ॽओ॥ 28 के़घुःम्बाल्ले़ आल्लआङ्धो खुःप्मा मे़नुॽने़न्लो, कर खे़ल्ले़ मे़ङ्गप्मनाबाहाॽ पिमा सुक्तुसिर फाॽआङ् याम्बुधिक्काङ् नुःबा याःम्बक् चोःक्माए पोःङ्लो॥ 29 खिनिॽ ताप्फे़ःम्बा पाःन् पाःप्मा मे़नुॽने़न्, कर के़घे़म्बाहाॽरे़ कुभाॽ मे़घोःसुर फाॽआङ् कुसुम्गे़दम्बा नु हाङ्हाङ् के़मे़प्पा पाःन्लक् पारे़म्मे़ॽ॥ 30 हे़क्क्याङ् के़जोगुम्बा पाःन्लाम् निङ्वाॽफुमाङ्ङिल्ले़ कुसेसेमाङ्ङिल्ले़ कुनिङ्वाॽ मे़दुक्खे़म्मिन्ने़ॽ, थेआङ्भे़ल्ले़ काक् चोःक्युम्भो खोःमा ये़न् थारिक् खिनिॽ आमनानिङ् फाॽआङ् ओसेःन्दाङ् चोःक्से़ निङ्वाॽफुमाङ्ङिल्ले़ सेसेमाङ्ङिन् के़बिरिआङ् वाॽरो॥ 31 के़रे़क् सिक् कुःमा, सिक् पोःक्मा, याःक् ले़ॽमा, हयङ्किल्लिङ् चोःक्मा, चे़ॽया इङ्दो पाःप्मा हे़क्क्याङ् काक् परिक्पा मना चिःप्मा ले़रे़म्मे़ॽओ॥ 32 कर निङ्वाॽफुमाङ्ङिल्ले़ ख्रिस्तलाम् खिनिॽ लायोःन् ले़प्मि के़बिरिबा हे़क्केए, खिनिॽआङ् ले़प्मि पिआसिम्मे़ॽर लुङ्माॽ तुक्कासिम्मे़ॽआङ् लुङ्माॽ स्याःत् मे़त्तासिम्मे़ॽओ॥ 1 खे़ल्ले़ चोगुल्ले़ खिनिॽ निङ्वाॽफुमाङ्ङिल्ले़ कुमिःम् कुस्साः के़बोःक्खिबाल्ले़ चोगुल्ले़ खुने़ॽ हे़क्के पोःङ्मा कोःत्ते़म्मे़ॽओ॥ 2 ख्रिस्तरे़ आनिॽ लुङ्माॽ आदुक्ते़आङ् आनिॽ लागि स्ये़बा कुइसिःक् खिनिॽआङ् लुङ्माॽ तुक्कासिम्मे़ॽओ॥ खुने़ॽए निङ्वाॽफुमाङ्ङो तोःम्मनाबा कुनाम् के़नुॽबा नु कुनिङ्वाॽ के़दाःबा सिदुङ्जभा पोःङ्से़ आबाङे पिसिङ्लो॥ 3 कर याम्बोःप्मान्, काक् आजिःन्जिःम्बा पाःन्हाॽ इग्र खिःम्मा पाःन्निन् लत्छाआङ् खिनिॽ लुम्मो मे़वाॽने़न्ल, थेआङ्भे़ल्ले़ हे़क्तङ्बा पाःन्हाॽरे़ निङ्वाॽफुमाङ्ङिल्ले़ सेसे कुमनाहाॽ मे़घे़म्दुन्छिन् मे़लाॽरुन्छिन्लो॥ 4 हे़क्क्याङ् मे़घे़म्दुन्छिन्बा मे़न्जिक्क्रा पाःन्, अदङ् पाःन् नु माङ्बाःन् पाःप्मा मे़नुॽने़न्लो, कर निङ्वाॽफुमाङ्ङिन् नोगे़न् पिमा पाःन् पाःप्मा पोःङ्लो॥ 5 थेआङ्भे़ल्ले़ याम्बोःप्मा याःम्बक् के़जोःक्पा, आजिःन्जिःम्बा याःम्बक् के़जोःक्पा नु खिःम्ब्राक्पा आत्तिन्हाॽरे़आङ् ख्रिस्त नु निङ्वाॽफुमाङ्ङिल्ले़ खुन्छिॽ हाङ्जुम्मो लक् मे़ङ्घोःसुन् फाॽआङ् खिनिॽ नुःरिक्काङ् कुसिङ् के़निःत्तुम्मेरो॥ खे़न् खिःम्ब्राक्पाङ्ग नावाइत्ला सेवा के़जोःक्पाएरो॥ 6 खे़न् हे़क्तङ्बा पाःन्नो हाःत्ले़आङ् खिनिॽ हने़बा पाःन्लाम् इङ्ले़क्मा के़न्छुक्तिन्लरो, थेआङ्भे़ल्ले़ खे़न् हने़बा पाःन्निल्ले़ चोगुल्ले़ निङ्वाॽफुमाङ्ङिल्ले़ कुसाक्के़न् खुने़ॽ मे़न्इःप्मना मे़न्नाःप्मनाबाहाॽओ थाःरो॥ 7 खे़ल्ले़ चोगुल्ले़ हे़क्तङ्बा मनाहाॽनु लाःत्लाःत् वये़म्मे़ॽओ, 8 थेआङ्भे़ल्ले़ तगि खिनिॽआङ् खादाम्मो के़वयि, कर आल्ल खिनिॽ दाङ्बान्नु थिक्हुप् के़बोःक्खिआङ् ओःत्तिओ के़वयिॽ॥ खे़ल्ले़ चोगुल्ले़ खिनिॽ ओःत्तिओ के़वाॽबा मनाहाॽ कुइसिःक् वये़म्मे़ॽ॥ 9 थेआङ्भे़ल्ले़ ओःत्तिओ के़वाॽबाहाॽरे़ के़रे़क् नुःबा, साम्योनिबा नु से़क्खाबा याःम्बक्हाॽ मे़जोगुॽ॥ 10 दाङ्बाल्ले़ कुनिङ्वाॽ के़दाःबा पाःन्हाॽ कोःत्ते़म्मे़ॽ॥ 11 खादाम्मालुम्मोबा कुसुम्मे़न्दम्मनाबा याःम्बक् के़जोःक्पाहाॽनु मे़गाम्मासिम्मे़न्ने़ॽ, कर खे़न् हे़क्तङ्बा याःम्बक्हाॽ नुःबा मे़ःन् फाॽआङ् ओसेःन्धाक्ते़म्सिम्मे़ॽ॥ 12 थेआङ्भे़ल्ले़ लायो के़जोःक्पा मनाहाॽरे़ स्वाःत्ताङ् मे़जोगुबा पाःन्हाॽ पाःप्माआङ् आनुःन्लो॥ 13 कर खे़ङ्हाॽरे़ मे़जोगुबा याःम्बक्हाॽ आक्खे़न् ताप्फे़ःम्बा चोःक् फाॽआङ् ओःत्तिओ थाःप्लो॥ 14 थेआङ्भे़ल्ले़ ओःत्तिःल्ले़ थोॽरुबा काक् पाःन्हाॽ निधाःप्लो॥ खे़ल्ले़ चोगुल्ले़ कुभारे़ अक्खे मे़बाःत्तुॽ,“के़इम्बासे, सोरे़म्मे़ॽ! सिःमे़न्लाम् पोगे़म्मे़ॽ,हे़क्क्याङ् ख्रिस्तरे़ कुओःत्तिःन् खिनिॽओ ओःत्लो॥” 15 खे़ल्ले़ चोगुल्ले़ खिनिॽ सिङ्सिङ् ये़क्ये़क् लॽरे़म्मे़ॽ, अदङ् हे़क्के मे़ःन्, कर सिक्कुम्साबा हे़क्के वये़म्मे़ॽ॥ 16 काक् सुये़म्मिन् नुःरिक्काङ् ओगप् चोगे़म्मे़ॽ, थेआङ्भे़ल्ले़ कन् ये़म्मिन् ताप्फे़ःम्बा चोःक्॥ 17 खे़ल्ले़ चोगुल्ले़ अदङ् मे़बोःक्खे़म्मिन्ने़ॽ, कर दाङ्बाल्ले़ कुनिङ्वाॽइन् कुसिङ् निःत्ते़म्मे़ॽआङ् चोगे़म्मे़ॽ॥ 18 चे़ल्ले़क्सेॽ थिःल्ले़ मे़मआसिम्मिन्ने़ॽ, थेआङ्भे़ल्ले़ खे़ल्ले़ ताप्फे़ःम्बा लाम्मो लाम्आलो, कर सेसेमाङ्ङिल्ले़ कुधिम् पोःक्खे़म्मे़ॽओ॥ 19 खिनिॽ लुम्मो निङ्वाॽफु साम्लोहाॽ, सेवासाम्लोहाॽ हे़क्क्याङ् याम्साम्गे़न् साम्लोहाॽओ पारे़म्मे़ॽआङ् सिक्लुङ्मोलाम्बा कुसागे़नुॽबा इक्लाःल्ले़ दाङ्बान् साम्मे़त्ते़म्मे़ॽओ॥ 20 सदादिङ् काक् पाःन्हाॽरे़ लागि आनिॽ दाङ्बा ये़सु ख्रिस्तरे़ कुमिङ्ङो पानुदिङ् पाः निङ्वाॽफुमाङ्ङिन् नोगे़न् पिरे़म्मे़ॽ॥ 21 आल्ल ख्रिस्ते़न् मिङ्सो इङ्धाःङ् पिमनाबाल्ले़ चोगुल्ले़ थिक्किन् वेॽइल्ले़ कुयुक्को वये़म्मे़ॽओ॥ 22 मेलिङ्गे़न् मेःत्छे, दाङ्बाल्ले़ कुयुक्को वाॽमनाबा हे़क्केए खिनिॽ ये़म्बाहाॽरे़ खुनिॽ युक्को वये़म्मे़ॽओ॥ 23 थेआङ्भे़ल्ले़ ख्रिस्ते़न् सेसेहुप्लक्किल्ले़ कुधे़गेःक् वाॽबा कुइसिःक् ये़म्बाॽइन्नाङ् मेःत्तिल्ले़ कुधे़गेःक्लो॥ आल्ल सेसेहुप्लक्किन् ख्रिस्तरे़ कुधक्लो, हे़क्क्याङ् खुने़ॽए खे़न् सेसेहुप्लक्किल्ले़न् से़न्लप्दाङ्बारो॥ 24 आल्ल सेसेहुप्लक्किन् ख्रिस्तरे़ कुयुक्को वाॽबा कुइसिःक्के, मेःत्हाॽआङ् काक् पाःन्हाॽओ ये़म्बाहाॽरे़ खुनिॽ युक्को वाॽमा पोःङ्लो॥ 25 इत्थुङ्गे़न् ये़म्बाॽसे, ख्रिस्तरे़ सेसेहुप्लक्किन् लुङ्माॽ तुक्तुबा कुइसिःक्के खिनिॽ मेःत्हाॽ लुङ्माॽ तुक्ते़म्सिम्मे़ॽओ॥ खुने़ॽग सेसेहुप्लक्ले़ लागि कुहिङ्मन्निन् पिरुरो॥ 26 ख्रिस्तरे़ सेसेहुप्लक्किन् सेसे चोःक्से़ च्वाःत्तिल्ले़ वाहप्तुआङ् कुबाःन्जाक्किल्ले़ सेसेसाङ्साङ् चोगुरो॥ 27 खुने़ॽग इगे़सुॽबा नु से़रे़म् मे़ःन्नेबा इग्र अक्तङ्बा थेआङ् मे़म्बप्मनाबा, सेसे नु आप्तिक् मे़ःन्नेबा मिमिदिङ्गे़न् सेसेहुप्लक्किन् आबाङेओ तोःम्मा सुक्तुर फाॽआङ् हे़क्के चोगुरो॥ 28 हे़क्केलॽरिक्के ये़म्बाहाॽरे़ आबाङे थक्किन् नुःरिक् मे़मे़त्तुबा हे़क्के खुनिॽ मेःत्हाॽ नुःरिक् मे़प्मासि पोःङ्, थेआङ्भे़ल्ले़ आत्तिल्ले़ कुमेःत्तिन् लुङ्माॽ तुक्तुॽ, खे़न् आबाङे लुङ्माॽ तुक्सिङ्लो॥ 29 आत्तिन् मनाःल्ले़आङ् आबाङे नासिङ्गे़न् कुधक्किन् आप्फाल्ले़आङ् मे़जिःत्तुन्, कर ख्रिस्तरे़ सेसेहुप्लक्किन् कम्ब्राङ् मे़त्तुबा कुइसिःक्के खे़ल्ले़ आबाङे कुधक्किन् कम्ब्राङ् मे़त्तुॽरो॥ 30 थेआङ्भे़ल्ले़ आनिॽग खुने़ॽ कुधक्किल्ले़न् याम्लक्सिरो॥ 31 साम्योसाप्लाओ अक्खेलॽरिक् साप्ते़आङ् पत्, “खे़ल्ले़ चोगुल्ले़ मनाःल्ले़ आबाङे कुम्बा नु कुम्मासि ले़रुसिआङ् कुमेःत्तिन्नु थिक्हुप् पोःङ्लो, हे़क्क्याङ् खे़ङ्हाॽ लत्छा थक् पोःङ्सिॽ॥” 32 कन् पाःन्निङ्ग निङ्वाॽ के़माबा सिबिॽ पाःन्लो, कर इङ्गाॽग ख्रिस्त नु सेसेहुप्लक्किल्ले़ कुयाःम्बेओ पाःत्तुङ्बारो॥ 33 कर खिनिॽआङ् के़इःत्तुम्ल पोःङ्लो, खिनिॽ के़रे़क् आबाङे लुङ्माॽ के़दुक्कासिबा कुइसिःक्के खिनिॽ मेःत्हाॽ लुङ्माॽ तुक्ते़म्सिम्मे़ॽ, हे़क्क्याङ् मेःत्हाॽरे़आङ् खिनिॽ ये़म्बाहाॽ मिङ्सो इङ्धाःङ् पिरे़म्सिम्मे़ॽओ॥
1 हिन्जाॽबित्छासे, दाङ्बाल्ले़ कुमना के़बोःक्खिबाल्ले़ चोगुल्ले़ खिनिॽ पाः माहाॽरे़ मुरा के़म्मे़त्तिबा पाःन्निन् खे़प्से़म्मे़ॽ, थेआङ्भे़ल्ले़ अक्खे चोःक्माल्ले़ नुःबा पोःङ्लो॥ 2 “खिनिॽ पाः नु माहाॽ मिङ्सो इङ्धाःङ् पिरे़म्सिम्मे़ॽ”–कङ्ग माङ्हे़क्नुबा थिक्सिगेःक्पा इङ्जाःङ्लो– 3 खुन्छिॽ मिङ्सो इङ्धाःङ् के़बिरुम्सिम्ने़ फाॽग्र “खिनिॽ के़नुःरि के़दासिरो, हे़क्क्याङ् कन् इक्सादिङ् खाम्बेःक्मो कुधाःक् केःम्बा के़बोःक्खिॽरो॥” 4 पानुदिङ् पाःसे, खिनिॽ साःहाॽ खुनिॽ सिक् मे़भोःक्खे़म् मे़बिरे़म्सिःमे़न्ने़ॽ, कर दाङ्बाल्ले़ कुहे़न्धिम् नु कुनिसाम्मो थाङ्बे़न् मे़न्छिन् के़त्ते़म्सिम्मे़ॽओ॥ 5 सेवारोबासे, के़गिःसि के़यक्खिर कुदोःप्मा निङ्वाॽलाम् ख्रिस्तरे़ कुसेवा के़जोगुम्बा हे़क्के कन् इक्साबा खिनिॽ दाङ्बाहाॽरे़ के़म्मे़त्तिबा पाःन्निन् खे़प्से़म्मे़ॽ॥ 6 खिनिॽ दाङ्बाहाॽरे़ खुनिॽ सिराॽ थाङ्ल फाॽआङ् खे़ङ्हाॽरे़ मे़निःसुल्ले़रक् याःम्बक् मे़जोगे़म्मिन्ने़ॽ, कर ख्रिस्तरे़ कुसेवारोबा कुइसिःक् सिक्लुङ्मोलाम्मे निङ्वाॽफुमाङ्ङिल्ले़ कुनिङ्वाॽइन् हे़क्के याःम्बक् चोगे़म्मे़ॽओ॥ 7 मनाहाॽ सेवा के़जोगुम्सिम्बा हे़क्के मे़ःन्, कर दाङ्बान् सेवा के़जोगुम्बा हे़क्के खिनिॽ सिराॽ पधाङ्धाङ्ल याःम्बक् चोगे़म्मे़ॽओ॥ 8 योःक्पासाङ् योःक्पा मे़ःम्बासाङ्, आत्तिल्ले़ नुःबा याःम्बक् चोगुॽ, खे़ल्ले़ चोगुबा हे़क्केए दाङ्बालाम् हाङ्से़म् खोःसुॽ फाॽआङ् खिनिॽ कुसिङ् के़निःत्तुम्लो॥ 9 हे़क्क्याङ् दाङ्बासे, खिनिॽ सेवारोबाहाॽआङ् हे़क्केलॽरिक्के मे़त्ते़म्सिम्मे़ॽओ॥ खे़ङ्हाॽ यङ्मा मे़से़रे़म्सिमन्ने़ॽ, थेआङ्भे़ल्ले़ खे़ङ्हाॽरे़न् नु खिनिॽ दाङ्बान् साङ्ग्राम्पेदाङ्ङो वाॽ, हे़क्क्याङ् खुने़ॽ एःक्पएःक् मे़जोगुन् फाॽआङ् खिनिॽ कुसिङ् के़निःत्तुम्लो॥ 10 आल्ल कुनुप्मा पाःन्–दाङ्बाल्ले़ पयम् यम्बा कुमुक्साम्मिल्ले़ए के़धुम्बा पोःक्खे़म्मे़ॽओ॥ 11 माफे़न्साम्मिल्ले़ कुजे़म्भन्निल्ले़ कुदक्ले़ङ्वाओ थक्मा के़सुक्तिर फाॽआङ् थक्सुबा चाङ्ङिल्ले़ थक्सुबान् काप्तुबा कुइसिःक् निङ्वाॽफुमाङ्ङिल्ले़ आबिबा काक् फे़जुम् फे़याःन् काप्सिङ्ङे़म्मे़ॽओ॥ 12 थेआङ्भे़ल्ले़ आनिॽ थङ्ङिङ्ग मे़न्छाम् याप्मिनु मे़ःन्, कर हाङ्गे़जोःक्पाहाॽ, युक्दाङ्बाहाॽ, कन् खागे़माक्पा खाम्बेःक्कोबा मुक्साम्हाॽ हे़क्क्याङ् ताङ्साक्पाओबा काक् फे़न्साम्हाॽनु थक्मनाबा थङ्लो॥ 13 खे़ल्ले़ चोगुल्ले़ फे़न् ये़म्हाॽ ताःल्ले़ से़ःप्सिङ्मा के़सुक्कासिर फाॽआङ् थक्सुबा चाङ्ङिल्ले़ थक्सुबान् काप्तुबा हे़क्के निङ्वाॽफुमाङ्ङिल्ले़ आबिबा काक् पाःन्निल्ले़ काप्सिङ्ङे़म्मे़ॽओ॥ हे़क्क्याङ् खे़न् थङ् एगाङ् खिनिॽ थधप् मे़ल्लॽए ये़प्मा के़सुक्तिॽरो॥ 14 हे़क्केःल्ले़ यारिप् पोःक्खे़म्मे़ॽआङ् ये़बे़म्मे़ॽ॥ खिनिॽ से़क्खाःल्ले़न् फॽइःन् युप्से़म्मे़ॽ हे़क्क्याङ् साम्योनिबा से़ःप्चाङ्ङिन् चाक्खे़म्मे़ॽ, 15 हे़क्क्याङ् सनारुङ् के़दाःप्पा सुनाइङ् इङ्भोःसे़ के़बेःक्पा लाङ्सुःप्पिन् चाक्खे़म्मे़ॽआङ् यारिप् पोःक्खे़म्मे़ॽओ॥ 16 खे़न्लक् मे़ःन्, कर नसाःन्निल्ले़न् खोःन् याङ्ङासिम्मे़ॽ॥ खे़न्लाम् खिनिॽ माफे़न्साम्मिल्ले़ के़आबिबा मिराःक् इसेःङ्बा तोःङ्हाॽलाम् से़ःप्सिङ्मा के़सुक्तिॽरो॥hk00194c.tifथक्सुबा 17 फे़न्जेॽ ताङ्घुःक्किन् कुइसिःक् से़न्लप्पिन् खुःक्खे़म्मे़ॽ, हे़क्क्याङ् सेसेमाङ्ङिल्ले़ कुदाभेःन् याङ्ङासिम्मे़ॽ, खे़ङ्ग निङ्वाॽफु पाःन्जाक्लो॥ 18 के़रे़क् ये़म्हाॽओ के़रे़क् परिक्ले़न् तुवा नु ये़क्पेलिहाॽ सेसेमाङ्ङिल्ले़ लाम्गे़लोःसिबा कुइसिःक् तुवा चोगे़म्मे़ॽ॥ कन् पाःन्निन् निङ्वाॽ इःत्ते़म्मे़ॽर सिङ्सिङ् ये़क्ये़क्काङ् निङ्वाॽफुमाङ्ङिल्ले़ सेसे कुमनाहाॽरे़ लागि तुवा चोःक्मा पिमासि मे़ले़रे़म्मिन्ने़ॽओ॥ 19 इङ्गाॽ सुनाइङ् से़ःसुङ्ङिल्ले़ पाःप्मा के़बोःङ्बा पाःन्जाक्किन् खोःसुङ्ल हे़क्क्याङ् मे़ङ्गिए सुनाइङ्ङिल्ले़न् सिबिॽ पाःन्हाॽ इङ्भोःमा सुक्तुङ्ल फाॽआङ् इङ्गाॽ आलागिआङ् तुवा आजोगे़ॽ आबिरे़ॽओ॥ 20 सुनाइङ्ङिन् से़ःसुङ्बाल्ले़ चोगुल्ले़ इङ्गाॽ इघेःङ्ङो के़धाःबा हाङ्लाइङ्बाआरो॥ हे़क्क्याङ् इङ्गाॽ चोःक्मा के़बोःङ्बा हे़क्केए मे़ङ्गि मे़न्यङ्ङे सुनाइङ् इङ्भोःसुङ्ल फाॽआङ् तुवा आजोगे़ॽ आबिरे़ॽओ॥ 21 इङ्गाॽ आक्खे लॽआ हे़क्क्याङ् थे चोगुङ्ल वाॽआ, खे़न् खिनिॽ कुसिङ् के़निःत्तुम्ल फाॽआङ् आनिॽ लुङ्माॽ आदुक्तुम्बा नुसाॽ नु दाङ्बाओ नसाःन्साबा सेवारोबा तुखिकसरे़ के़रे़क् पाःन्हाॽ के़जे़क्तिॽरो॥ 22 आनिगे़ आक्खेलॽरिक् वयिगे़ के़लॽबान् के़मे़त्तिआङ् खिनिॽ हाङ्हाङ् के़जोगिर फाॽआङ्ङे खुने़ॽ खिनिॽओ पाङ्घुङ्बारो॥ 23 फुॽनुसाॽ नु ने़ॽनुसाॽसे, पानुदिङ् पाः निङ्वाॽफुमाङ्ङिन् नु दाङ्बा ये़सु ख्रिस्तरे़ सनारुङ् के़बिरिर हे़क्क्याङ् ख्रिस्ते़न् चक्मे़ल्लॽए नसाःन् चोःक्मा नु खिनिॽ लुम्मो लुङ्माॽ तुक्सिङ्मा के़सुक्पा के़बोःक्खिररो॥ 24 आनिॽ दाङ्बा ये़सु ख्रिस्ते़न् मिःम्जि के़मे़प्पा के़रे़क्नु लुङ्गुम्मिन् सदादिङ् वाॽररो॥
|