Colossians
कलस्सि1 निङ्वाॽफुमाङ्ङिल्ले़ सेगुसिबा कलस्सि 3 आनिगे़ खिनिॽ लागि तुवा चोगुम्बे़ल्ले़ आनिॽ दाङ्बा ये़सु ख्रिस्तरे़ पानुदिङ् कुम्बा निङ्वाॽफुमाङ्ङिन् सदादिङ् नोगे़न् पिरुम्बे़ॽरो, 4 थेआङ्भे़ल्ले़ खिनिॽ ख्रिस्त ये़सुःन् नसाःन् के़जोगुम्बान् हे़क्क्याङ् निङ्वाॽफुमाङ्ङिल्ले़ काक् सेसे कुमनाहाॽ लुङ्माॽ के़दुक्तुम्सिम्बा पाःन्निन् आनिगे़ खे़प्सुम्बे़आङ् वयिगे़रो॥ 5 थेआङ्भे़ल्ले़ खिनिॽ थे निङ्साङ् के़जोगुम्माङ् के़वयिॽ खे़न् साङ्ग्राम्पेदाङ्ङो नुःरिक्काङ् याङ्घोःत्ते़आङ् वाॽरो॥ तगि खिनिॽ से़क्खाबा पाःन्जाक्किन् के़घे़प्सुम्माङ् के़वयिल्ले़सा कन् निङ्साङ्ङिल्ले़ कुयाःम्बेओ के़घे़प्सुम्माङ् के़वयि॥ खे़ङ्ग सुनाइङ्ङिन्नेरो॥ 6 खिनिॽ सुनाइङ्ङिन् के़घे़प्सुम् हे़क्क्याङ् निङ्वाॽफुमाङ्ङिल्ले़ कुलुङ्गुम्मिन् काक् से़क्खाओ कुसिङ् के़निःत्तुम्बा ये़न्नाङ्धो खिनिॽ लुम्मो पोःङ्ल पप्पा हे़क्केए काक् इक्सादिङ् खाम्बेःक्मो आत्तिसाङ् मनालुम्मो सुनाइङ्ङिल्ले़ मुॽइसाम् तारुर पोःर पत्लो॥ 7 खे़न् पाःन्निन् आनिगे़नु सोरिक् माङ्सेवा याःम्बक् के़जोःक्पा इपाफ्रासलाम् के़हुॽआसिआङ् के़वयिॽरो॥ खुने़ॽग लुङ्माॽ तुक्तुम्बे़बा आनिगे़ ले़क्वा खिनिॽ लुम्मो ख्रिस्तरे़ कुनसाःन्साबा माङ्सेवा के़जोःक्पारो॥ 8 सेसेमाङ्ङिल्ले़ खिनिॽ वेॽहाॽ लुङ्माॽ के़दुक्पा के़जोगिबा पाःन्निन् खुने़ॽ याप्मि चे़क्ते़रो॥ 9 खे़ल्ले़ चोगुल्ले़ खिनिॽ याःम्बेओ आनिगे़ खे़प्सुम्बे़आङ्धोए खिनिॽ लागि चक्मे़ल्लॽए तुवा चोगुम्बे़रो॥ सिक्कुम्दिङ् निङ्वाॽ नु इःत्छिङ्साम्लाम् निङ्वाॽफुमाङ्ङिल्ले़ साम्जिक्गे़न् कुनिङ्वाॽइल्ले़ खिनिॽ के़धिम्सिर फाॽआङ् तुवा चोगुम्बे़रो॥ 10 हे़क्क्याङ् दाङ्बा ये़सुःन् लाॽरुबा हिङ्मन्नो सुम्बोधासाबा के़बोःक्खिर, हे़क्केलॽरिक् काक् परिक्ले़ खुने़ॽ कुनिङ्वाॽ के़दाःसुम्ल हे़क्क्याङ् निङ्वाॽफुमाङ्ङिन् आल्लसाङ् नुःरिक्काङ् कुसिङ् निःप्मा के़सुक्तुम्माङ् काक् नुःबा याःम्बक्किल्ले़ निङ्वाॽफुमाङ्ङिल्ले़ कुनिङ्वाॽ के़दाःसुम्ल फाॽआङ् आनिगे़ तुवा चोगुम्बे़रो॥ 11 खुने़ॽ कुमिमिदिङ्गे़न् कुमुक्साम्लाम्बा खिनिॽ के़धुम्बा के़बोःक्खिर फाॽआङ् आनिगे़ तुवा चोगुम्बे़, हे़क्केलॽरिक् खिनिॽ चाहाबा के़जोगिबा काक् निङ्वाॽ हाङ्गे़म्सिङ्मान् नु नासि थःप्मान् के़घोःसुम्लरो॥ हे़क्क्याङ् सःप्मे़ल्ले़ कुधिम् के़बोःक्खिररो, 12 हे़क्क्याङ् सदादिङ् पानुदिङ् पाः निङ्वाॽफुमाङ्ङिन् नोगे़न् पिमा पोःङ्, खुने़ॽए निङ्वाॽफुहाङ्जुम्ले़न् ओःत्तिओ के़वाॽबा ख्रिस्तरे़ कुसेसे मनाहाॽरे़ मे़घोःसुबा लक् के़घोःबा आजोगे़आङ् आवाॽरो॥ 13 थेआङ्भे़ल्ले़ खुने़ॽए माक्चिगे़न् खादाम्माल्ले़न् हाङ्जुम्लाम् आसे़ःप्ते़आङ् आबुगे़न् कुमिःम् कुस्साःल्ले़ कुहाङ्जुम्मो आनिॽ आदाःरे़आङ् वाॽरो॥ 14 निङ्वाॽफुसाःलाम् आनिॽ चोःक्युम्भो आबिरे़, हे़क्क्याङ् काक् आनिॽ आजोगुम्बा लायोहाॽ ले़प्मि आबिरे़रो॥ 15 ख्रिस्ते़न् मे़न्नि मे़न्धाःप् निङ्वाॽफुमाङ्ङिल्ले़ कुइःत्लो॥ निङ्वाॽफुमाङ्ङिल्ले़ काक् पाःन्हाॽ चोःक्मानुःल्ले़ तगिए खुने़ॽ वये़, हे़क्क्याङ् खुने़ॽए काक् नावागे़न् चइःत् सम्दाङ् युक्साबा चोःक्लो॥ 16 ख्रिस्तलाम् साङ्ग्राम्पेदाङ् नु इक्सादिङ् खाम्बेःक्मोबा काक् नावागे़न् चइःत् ने़स्सुबारो॥ खुने़ॽग निगे़धाःप्पा नु निमे़न्धाःप्मना पाःन्हाॽ, हाङ्हाॽ नु हाङ्जुम्हाॽ, हाङ्गे़जोःक्पाहाॽ नु युक्साबाहाॽआङ् चोगुसिबारो॥ काक् पाःन्हाॽरे़न् नावागे़न् चइःत्तिन् ख्रिस्तलाम् नु ख्रिस्तरे़ कुलागिए पोःक्खे़बारो॥ 17 निङ्वाॽफुमाङ्ङिल्ले़ नावागे़न् चइःत् ने़मानुःल्ले़ तगिए खुने़ॽ वये़, हे़क्क्याङ् खुने़ॽओ काक् पाःन्हाॽ सोसोरिक् हुप्सिङ्ङाङ् पत्लो॥ 18 हे़क्क्याङ् खुने़ॽ नासिङ्गे़न् कुधक्किन् सेसेहुप्लक्लो, खे़न् सेसेहुप्लक्किल्ले़ कुधे़गेःक्पाङ्ग खुने़ॽएरो॥ खुने़ॽग तोलिङ्सोमु, हे़क्क्याङ् सिःमे़न्लाम् याम्मो के़हिङ्बा काक्को तुम्बारो, हे़क्केलॽरिक्के खुने़ॽ काक् सम्दाङ् युक्साबा चोःक्लो॥ 19 थेआङ्भे़ल्ले़ निङ्वाॽफुमाङ्ङिल्ले़ काक् कुलिङ्धो के़प्मान् ये़सु ख्रिस्तओ ने़मा कुसिराॽ थाङे़रो॥ 20 हे़क्क्याङ् निङ्वाॽफुमाङ्ङिल्ले़ सिलाम्साक्मा सिङ्सम्दाङ् ये़सुरे़ कुमाक्खिॽइन् वादेःन्दुबाओलाम्बा आबाङेलागि सनारुङ् चोगुआङ् इक्सादिङ् खाम्बेःक् नु ताङ्साक्पोबा के़रे़क् पाःन्हाॽ याम्मो आबाङे खुने़ॽओ नादङ् चोगुआङ् नुःक्तु तारुरो॥ 21 पेबा ये़म्मो खिनिॽ फे़न् याःम्बक्किल्ले़ चोगुल्ले़ खिनिॽ निङ्वाॽओ निङ्वाॽफुमाङ्ङिल्ले़ कुनिङ्मि के़बोःक्खिआङ् के़वयिरो॥ खिनिॽ खुने़ॽलाम्बा के़से़न्दिआङ् माःङ्घा के़वयिरो॥ 22 कर आल्लोग निङ्वाॽफुमाङ्ङिल्ले़ आबाङे कुदगि सेसेसाङ्साङ् नु आप्तिक् मे़ःन्नेबा चोःक्मासि फाॽआङ् ये़सु ख्रिस्तरे़ कुसिलाम्साक्मा सिङ्सम्दाङ्बा कुसिःमे़न्लाम्बा नादङ्ङो के़दाःरिआङ् वाॽरो॥ 23 कर खिनिॽ के़घे़प्सुम्बा सुनाइङ्ङिल्ले़ निङ्साङ्ङो मे़म्मुन्ने नु ताप्मे़म्बे़ॽए हे़क्क्याङ् चक्मे़ल्लॽए नसाःन् चोःक्माए पोःङ्लो॥ हाबा कन् सुनाइङ्ङिन् इक्सादिङ् खाम्बेःक्मोबा काक् मे़न्छाम् सुवाङ्हाॽओ इङ्मे़भोःसुआङ् वाॽ, हे़क्क्याङ् खे़न् सुनाइङ्ङिन् इङ्भोःमा फाॽआङ् इङ्गाॽ पावले़न् निङ्वाॽफुमाङ्ङिल्ले़ कुसेवारोबा पोःक्खाङ्लो॥ 24 ये़सु ख्रिस्तरे़ नासिङ्गे़न् कुधक्किङ्ग सेसेहुप्लक्लो, खे़ल्ले़ चोगुल्ले़ इङ्गाॽग खिनिॽ लागि इनोगे़न् तुक्खेहाॽ नासिङ्गे़न् आधक्को थम्मा सःत्तारो॥ थम्मा के़बोःङ्बा ख्रिस्तरे़ इनोगे़न् कुदुक्खेहाॽ इङ्गाॽ थरुङ्लो॥ 25 इङ्गाॽ सेसेहुप्लक्ले़न् सेवारोबा पोःक्खाङ्लो, थेआङ्भे़ल्ले़ निङ्वाॽफु पाःन्जाक्किन् काक् कुधिम्मो खिनिॽओ इङ्भोःसे़ निङ्वाॽफुमाङ्ङिल्ले़ इङ्गाॽ सेःक्युक् चोगाङ्ङाङ् वाॽआरो 26 कन् सिबिॽ पाःन्हाॽग उनाहुरिआङ्धो पेबा मे़न्छाम् थाःक्हाॽओ चिक्खुआङ् वये़, कर आल्लो निङ्वाॽफुमाङ्ङिल्ले़ सेसे कुमनाहाॽ ओःन्धाक्तुसिआङ् वाॽरो॥ 27 निङ्वाॽफुमाङ्ङिल्ले़ कुमनाहाॽ कुमिमिदिङ्गे़न् इमे़ल्लुङ्बा सिबिॽ पाःन्निन् थिम्मे़न्दङ् सुवाङ्हाॽ ओसेःन्दाङ् चोःक्मा खुने़ॽ कुसिराॽ थाङे़आङ् वाॽरो॥ ख्रिस्ते़न् खिनिॽओ वाॽबान्ने सिबिॽ पाःन्लो, खे़ल्ले़ चोगुल्ले़ के़दाःबा कुमिमिदिङ्गे़न् लक्किन् खिनिॽ के़घोःसुम्लो॥ 28 खे़ल्ले़ चोगुल्ले़ आत्ति पिगिगे़ॽसाङ् काक् मनाहाॽ ख्रिस्तरे़ कुयाःम्बेओ इङ्भोःसुम्सिम्बे़ॽरो॥ खे़ङ्हाॽ निङ्वाॽफुमाङ्ङिल्ले़ पिरिगे़बा काक् सिक्कुम्मिल्ले़ साम्दिङ् नु खाहुन् पिरुम्सिम्बे़ॽ, थेआङ्भे़ल्ले़ ख्रिस्ते़न्नु थिक्हुप् पोःङ्मान् कुलिङ्धो के़त्ल लॽरिक् निङ्वाॽफुमाङ्ङो काक् मे़न्छाम् याप्मिहाॽ तोःम्मासि आनिगे़ निङ्वाॽ कत्तुम्बे़रो॥ 29 कन् याःम्बक्को ख्रिस्तरे़ पिराङ्बा आसिगाङ् याःम्बक् के़जोःक्पा पयम् यम्बा मुक्साम्लाम् याम्बुधिक्काङ् स्याङ्मे़न्दाङ् पत्तारो॥1 खिनिॽ नु लाओदिकिया पाङ्जुम्बा सेसेहुप्लक् हे़क्क्याङ् वेॽ याप्मि मे़न्दुम्मे के़वाॽबा के़रे़क् फुॽनुसाॽहाॽरे़ लागि स्याङ्मे़न्दाङ् याःम्बक् चोगुङ्ङाङ् वाॽआ के़लॽबान् कुसिङ् निःत्ते़म्मे़ॽ फाॽआङ् निङ्वाॽ चोगुङ्लो॥ 2 खिनिॽ के़रे़क्ले़ सिक्लुङ्मो हाङ्हाङ् के़बोःक्खिआङ् खिनिॽ लुङ्माॽ तुक्सिङ्मो थिक्हुप् के़बोःक्खिर के़लॽबा आनिङ्वाॽ वाॽरो, हे़क्केलॽरिक् खिनिॽ के़रे़क्ले़ कुलिङ्धो इःत्छिङ्साम् के़घोःसुम्माङ् निङ्वाॽफुमाङ्ङिल्ले़ कुसिबिॽ पाःन्निन् कुसिङ् के़निःत्तुम्लरो॥ खे़न् कुसिबिॽ पाःन्निङ्ग ख्रिस्ते़न्नेरो॥ 3 खुने़ॽए काक् सिक्कुम्दिङ् निङ्वाॽ नु साम्जिक् निङ्वाॽरे़ कुबुन्लो॥ 4 आत्तिन्हाॽरे़आङ् कुघे़म्गे़नुॽबा पाःन्हाॽलाम् इङ्गे़मे़ल्ले़क्तिन्ल फाॽआङ् अक्खे मे़त्निङ्बारो॥ 5 थेआङ्भे़ल्ले़ इङ्गाॽग खिनिॽनु माःङ्घा वाॽआसाङ् आनिङ्वाॽइन् खिनिॽनु सोरिक्के वाॽरो॥ हे़क्क्याङ् हिङ्मा के़बोःङ्बा हिङ्मन्नो के़हिङिबा नु ख्रिस्तओबा नसाःन्नो यो-धो मे़ल्लॽए के़वयिबा खे़प्सुङ्ङाङ् साॽरिक् सःत्तारो॥ 6 हे़क्केःल्ले़ आक्खेलॽरिक् ख्रिस्त ये़सु दाङ्बे़न् नसाःन् के़जोगुम् हे़क्केलॽरिक्के खुने़ॽनु थिक्हुप् पोःक्खे़म्मे़ॽआङ् चक्मे़ल्लॽए हिङे़म्मे़ॽओ॥ 7 खुने़ॽओ, के़हुॽआसिबा निसाम्मो, साःप् लेःत्ते़म्मे़ॽआङ् पोःरे़म्मे़ॽ, नसाःन्नो के़धुम्बा पोःक्खे़म्मे़ॽर दाङ्बान् सदादिङ् नोगे़न् पिरे़म्मे़ॽओ॥ 8 सिङ्सिङ् लॽरे़म्मे़ॽओ, मे़ःङ्ग्र मे़न्छाम् याप्मिरे़ मे़जोगुबा कुघे़म्गे़नुॽबा इङ्ले़क्पा निसाम्हाॽरे़ के़युक्तिॽरो॥ खे़न् निसाम्हाॽग ख्रिस्तलाम् मे़ःन्, कर मे़न्छाम्थाःक्लाम् के़युःबा थिम् नु इक्सादिङ् खाम्बेःक्मोबा कुहेःक्सिङ्मोबा हने़बा खाहुन्लाम् के़दाःबारक्लो॥ 9 थेआङ्भे़ल्ले़ ख्रिस्तओरक् निङ्वाॽफुमाङ्ङिन् नासिङ्गे़न् थक्को कुलिङ्धो के़त्लो॥ 10 हे़क्क्याङ् खुने़ॽओए खिनिॽ कुलिङ्धो के़प्मान् के़घोःसुम्माङ् वाॽरो॥ खुने़ॽग काक् मुक्साम् नु युक् सम्दाङ् युक्साबारो॥ 11 हर्दो हे़क्माल्ले़ नासिङ्गे़न् थक्लाम् ने़क्सा से़म्बेःक्पा कुइसिःक् ख्रिस्तरे़ कुहर्दो हे़क्माल्ले़ खिनिॽ लायो चोःक्मा निङ्वाॽइन् से़न्दुदेॽरुआङ् वाॽरो॥ कङ्ग मे़न्छाम् हुक्कोलाम् पोःक्खे़बा मे़ःन्, कर ख्रिस्तलाम् पोःक्खे़बारो॥ 12 बप्तिस्मा के़बोःक्खिल्ले़ ख्रिस्ते़न्नु सोरिक् के़हुमि, हे़क्क्याङ् निङ्वाॽफुमाङ्ङिल्ले़ खुने़ॽ कुसिवे़त्लाम् कुहिङ्वे़त् चोगुबा मुक्साम्मो खिनिॽ नसाःन् के़जोगुम्बाल्ले़ चोगुल्ले़ खुने़ॽनु सोरिक् के़हिङिआङ् के़वयिॽरो॥ 13 खिनिॽग लायोबा नु निङ्वाॽफुमाङ्ङिल्ले़ कुमना के़होःप्तिबाल्ले़ चोगुल्ले़ खिनिॽ याम्साम्मो कुसिवे़त् के़वयि, कर आल्लोग निङ्वाॽफुमाङ्ङिल्ले़ कुहिङ्वे़त् के़जोगिआङ् के़वयिॽरो॥ खुने़ॽ आनिॽ काक् लायोहाॽ ले़प्मि आबिरे़आङ् वाॽ॥ 14 हे़क्क्याङ् निङ्वाॽफुमाङ्ङिल्ले़ आनिॽ तक्ले़ङ्वाओ के़बप्पा आप्तिक् सक्हाॽ थे़ःक्खुदेःसुआङ् खुने़ॽ खे़न् के़रे़क् सिलाम्साक्मा सिङ्सम्दाङ् खिप्सुआङ् खे़त्तुदेःसुरो॥ 15 हे़क्केलॽरिक्के निङ्वाॽफुमाङ्ङिल्ले़ फे़न्साम्हाॽरे़ खुनिॽ मुक्साम्हाॽ नु युक्हाॽ नाप्तुसिआङ् ख्रिस्तरे़ कुसिलाम्साक्मा सिङ्ङो थङ् नाःन्दुसि, हे़क्केलॽरिक्के के़रे़क्ले़ मे़निःसुर खे़ङ्हाॽरे़ खुनिॽ नाधाःसु पिरुसिरो॥ 16 खे़ल्ले़ चोगुल्ले़ आत्तिन्हाॽरे़आङ् साम्यो तङ्नाम्, लासिबा ससाङ्स्रोःत्, नाःम्सिङ् ये़न्नो नु चामनाबा थुङ्मनाबा पाःन्हाॽओ आप्तिक् के़मे़न्गुःत्तिन्लरो॥ 17 कन् पाःन्हाॽग के़दाःबा पाःन्हाॽरे़न् साम्म्रिःप्पारक् वये़रो, कर से़क्खा पाःन्निङ्ग ख्रिस्तरो॥ 18 आनिगे़ सुफो निःम्मना लॽरिक् के़बाःप्पार, निगे़दे़प्पा पाःन्नोरक् चुङ्जिगे़न् नःम्नःम्बा ओसेःन्धाक्सिङ्मा कुसिराॽ के़धाङ्बा हे़क्क्याङ् माङ्लाइङ्बाहाॽ सेवा के़जोःक्पाहाॽआङ् मे़वाॽरो॥ खे़ङ्हाॽरे़ हाङ्से़म् मे़ङ्घोःमनाबा के़मे़न्जोगिन्लरो॥ कङ्हाॽग थेनाधे लायोबा निङ्वाॽओ आङ्दिङ् मे़लॽरो॥ 19 कर खे़ङ्हाॽरे़ खुनिॽ नासिङ्गे़न् थक्किल्ले़ कुधे़गेःक् ये़सु ख्रिस्ते़न्नु थेआङ् तङ्जुम् होःप्लो॥ कङ्ग खुने़ॽलाम्बा नासिङ्गे़न् थक्ले़न् काक् याम्लक्किल्ले़ कम्ब्राङ् खोःसुॽ हे़क्क्याङ् थिक्हुप् पोःङ्ङाङ् निङ्वाॽफुमाङ्ङिल्ले़ कुनिङ्वाॽ हे़क्के पोःर पेःक्लो॥ 20 खिनिॽ ख्रिस्ते़न्नु सोरिक् के़स्ये़ॽइबारो, हे़क्क्याङ् खुने़ॽए इक्सादिङ् खाम्बेःक् कुहेःक्सिङ्माआङ्धोबा हने़बा खाहुन्लाम् चोःक्युम्भो के़बिरिआङ् वाॽरो॥ हे़क्केःल्ले़ कन् ओगप् मे़जोगे़न्ने़ॽ, खे़न् मे़साॽरे़न्ने़ॽ, हे़क्क्याङ् मे़सुसे़न्ने़ॽ के़लॽबा इक्साबा थिम्हाॽ थेआङ् के़इःत्तुम् के़नाःत्तुबाबे? 22 कन् पाःन्हाॽग ओगप् चोःक्माआङ् माबेःक्लो, थेआङ्भे़ल्ले़ कङ्हाॽग मे़न्छाम् याप्मिहाॽरे़ मे़युक्खुबा निसाम् नु थिम्हाॽरक्लो॥ 23 खे़न् हे़क्तङ्बा थिम्हाॽग साम्योबा याःम्बक् चोःक्मा, चुङ्जिगे़न् नःम्नःम्बा ले़ङ्सिङ्मा नु नासिङ्गे़न् थक्को तुक्खे चाःत्छिङ्मा सिक्कुम्दिङ् निङ्वाॽ हे़क्के लॽ, कर कल्ले़ नासिङ्गे़न् थक्कोबा नोस्रङ्ङिल्ले़न् फे़न् निङ्वाॽइन् युक्मा मे़सुक्तुन्लो॥ 1 खे़ल्ले़ चोगुल्ले़ निङ्वाॽफुमाङ्ङिल्ले़ खिनिॽ ख्रिस्ते़न्नुए कुहिङ्वे़त् के़जोगिआङ् के़वयिबाल्ले़ चोगुल्ले़ खिनिॽ साङ्ग्राम्पेदाङ्ङोबा पाःन्हाॽ कोःत्ते़म्मे़ॽर वये़म्मे़ॽओ॥ खे़त्थोए निङ्वाॽफुमाङ्ङिल्ले़ कुजुप्साङ् ले़प्माङ् मिङ्सो इङ्धाःङ्नु मुक्साम्दे़न्नो ख्रिस्ते़न् युक्खुआङ् युङ्लो॥ 2 कप्मो इक्सादिङ् खाम्बेःक्मोबा पाःन्हाॽरक् मे़इःत्ते़म्मिन्ने़ॽओ, कर साङ्ग्राम्पेदाङ्ङोबा पाःन्हाॽओ निङ्वाॽ पिरे़म्मे़ॽओ॥ 3 थेआङ्भे़ल्ले़ ख्रिस्ते़न् स्ये़ःल्ले़ खिनिॽआङ् खुने़ॽनुए के़स्ये़ॽइआङ् के़वयिॽरो, हे़क्क्याङ् खिनिॽ से़क्खाबा ने़त्तिगे़न् हिङ्मन्निन् ख्रिस्ते़न्नु निङ्वाॽफुमाङ्ङो चिक्खे़आङ् वाॽरो॥ 4 खिनिॽ से़क्खाबा ने़त्तिगे़न् हिङ्मन्निङ्ग ख्रिस्तरो॥ खुने़ॽ इक्सादिङ् खाम्बेःक्मो थाःम्सिङ्ङिल्ले़ खिनिॽआङ् खुने़ॽनुए मिमिदिङ्ङो के़धाःम्मासिरो॥ 5 खे़ल्ले़ चोगुल्ले़ मे़न्छुमाॽ नु ये़म्बित्छाॽहाॽ चाराम्मा पाःन्निन्, चिःन्जिन्बा के़जोःक्पा याःम्बक्, चाराम्मा निङ्वाॽ चोःक्मान्, फे़न् याःम्बक् चोःक्मान् नु खिःम्यक् चोःक्मान् हे़क्तङ्बा नासिङ्गे़न् थक्कोबा नोस्रङ्गे़न् ये़प्ले़क्हाॽग नावाइत्लाःन् माङ्घःमनाबारो॥ खिनिॽ खे़न् काक् युक्ते़म्मे़ॽओ॥ 6 थेआङ्भे़ल्ले़ अक्तङ्बा याःम्बक् के़जोःक्पाहाॽ सम्दाङ् निङ्वाॽफुमाङ्ङिल्ले़ कुसाक्के़न्निन् चुक्लो॥ 7 उन्छोःन्बा खिनिॽ हिङ्मन्नो बा अक्तङ्बा पाःन्हाॽ के़जोःक्पा के़वयिरो॥ 8 कर आल्लोग खिनिॽआङ् सिक् पोःक्मान्, साक्के़न्निन्, नाहे़म्मान्, हिनाःम् मे़त्छिङ्मान्, मे़न्छिक्क्रा पाःन्हाॽ काक् ले़प्मा तेःमाए पोःङ्लो॥ 9 खिनिॽ इङ्ले़क् मे़मे़त्तासिम्मिन्ने़ॽओ, थेआङ्भे़ल्ले़ खे़ङ्ग तगिबा लायोबा सुत्नाःन् नु ताप्फे़ःम्बा ये़प्ले़क्हाॽ काक् के़ले़रुम् के़देःसुम्माङ् के़वयिॽ, 10 हे़क्क्याङ् खिनिॽग कुसङ् सुत्नाःन् तेःत् हे़क्के के़जाक्खुम्माङ् के़वयिॽरो॥ खिनिॽग नावागे़न् चइःत्दाङ्बा निङ्वाॽफुमाङ्ङिन् कुसिङ् के़निःत्तुम्माङ् खुने़ॽ कुइःत् हे़क्के के़बोःक्खिर के़बत्छिरो॥ 11 आल्ल थिम्मे़न्दङ् सुवाङ् नु यहुदि, हर्दो के़हे़क्पा नु हर्दो मे़न्हे़क्मनाबा, खासिङ् के़निःप्पा नु खासिङ् मे़न्निःप्मनाबा, योःक् नु चोःक्युम्भोबाहाॽ से़न्छिङ्मा होःप्लो, कर ख्रिस्ते़नलक् के़ये़क्पा चोःक्, हे़क्क्याङ् खुने़ॽ काक् पाःन्हाॽओए वाॽरो॥ 12 हे़क्केःल्ले़ निङ्वाॽफुमाङ्ङिल्ले़ सेगुसिबा मनाहाॽ, सेसे नु साॽरिक् लुङ्माॽ तुक्तुसिबाहाॽरे़, लुङ्दुक्किन्, लुङ्माॽ तुक्सिङ्मान्, नोनिङ्वाॽइन्, चुङ्जिगे़न् नःम्नःम् लॽमान् नु नासि थःप्मान् चाङ् कुइसिःक् चाक्सिङ्मा पोःङ्लो॥ 13 खिनिॽग वेॽहाॽनु नासि थःत्छिङ्मा पोःङ्ङाङ् निङ्वाॽ तुक्मा पाःन्हाॽ वाॽसाङ् ले़प्मि पिआसिम्मे़ॽओ॥ दाङ्बाल्ले़ ले़प्मि के़बिरिबा कुइसिःक्के ले़प्मि पिआसिम्मे़ॽओ॥ 14 हे़क्क्याङ् कन् के़रे़क्नुःल्ले़ यरिक् लुङ्माॽ तुक्कासिम्मे़ॽओ॥ खे़ल्ले़ए खिनिॽ थिक्हुप् पोःङ्मा कुलिङ्धो के़गे़त्तिॽरो॥ 15 हाराॽ ख्रिस्तरे़ कुसनारुङ्ङिल्ले़ खिनिॽ सिक्लुङ्मान् युक्तुररो, थेआङ्भे़ल्ले़ सनारुङ्ङो वाॽमा फाॽआङ् खिनिॽग लत्थिक् नासिङ्गे़न् थक्को उःत्छिङ्मा के़घोःसुम्माङ् के़वयिॽरो॥ खिनिॽ नोगे़न्साबा पोःक्खे़म्मे़ॽओ॥ 16 हाराॽ ख्रिस्तरे़ कुबाःन्जाक्किल्ले़ खिनिॽ सिक्लुङ्मान् तिम्माङ् वाॽररो॥ खिनिॽ बा कन् पाःन्जाक्किल्ले़ हुॽआसिम्मे़ॽ, हे़क्क्याङ् काक् सिक्कुम्दिङ् निङ्वाॽओ सुजा पिआसिम्मे़ॽओ॥ हे़क्क्याङ् सेवा चोःक्मा साम्लोहाॽ, याम्साम्गे़न् साम्लोहाॽ नु सेसेमाङ्लाम् के़दाःबा साम्लोहाॽ साम्गे़मे़त्तुम्मिल्ले़ खिनिॽ सिक्लुङ्मोनुए निङ्वाॽफुमाङ्ङिन् नोगे़न् पिरे़म्मे़ॽओ॥ 17 खिनिॽ च्या के़बाःत्तुम्साङ् च्या के़जोगुम्साङ् दाङ्बा ये़सुरे़ कुमिङ्ङो चोगे़म्मे़ॽओ, हे़क्क्याङ् खुने़ॽलाम्बाए पानुदिङ् पाः निङ्वाॽफुमाङ्ङिन् नोगे़न् पिरे़म्मे़ॽओ॥ 18 मेलिङ्गे़न् मेःत्छे, खिनिॽ इत्थुङ्गे़न् ये़म्बाहाॽरे़ खुनिॽ युक्को वये़म्मे़ॽओ॥ अक्खे चोःक्माग दाङ्बाओ लाॽरुरो॥ 19 हे़क्क्याङ् इत्थुङ्गे़न् ये़म्बाॽसे, खिनिॽ मेलिङ्गे़न् मेःत्हाॽ ताप्फे़ःल्लिक् मे़मे़त्ते़म्सिम्मिन्ने़ॽ कर लुङ्माॽ तुक्ते़म्सिम्मे़ॽओ॥ 20 हिन्जाॽबित्छासे, खिनिॽ पाः माहाॽरे़ मुरा के़म्मे़त्तिबा पाःन्निन् आप्फाल्ले़साङ् खे़प्से़म्मे़ॽ, थेआङ्भे़ल्ले़ कन् पाःन्निल्ले़ दाङ्बाल्ले़ कुनिङ्वाॽ तासुॽरो॥ 21 पानुदिङ् पाःसे, खिनिॽ हिन्जाॽबित्छाहाॽरे़ खुनिॽ निङ्वाॽ मे़दुक्खे़म् मे़बिरे़म्सिम्मिन्ने़ॽओ, मे़ःन्ने़ फाॽग्र खुनिॽ निङ्वाॽ पङ्सिङ्लो॥ 22 सेवारोबासे, इक्साबा खिनिॽ दाङ्बाहाॽरे़ खुनिॽ के़रे़क् पाःन् के़घे़म्बा पोःक्खे़म्मे़ॽओ॥ कङ्ग खे़ङ्हाॽरे़ मे़निःसुल्ले़ खुनिॽ निङ्वाॽ ताःमा पिमासिरे़ लागिरक् मे़ःन्, कर काक् कुदोःप्मा निङ्वाॽइन्नु दाङ्बा ये़सुरे़ कुमिङ्सो कुधाःङ्सोरे़ लागि चोगे़म्मे़ॽओ॥ 23 खिनिॽ च्या के़जोगुम्साङ् मनारे़ लागि मे़ःन्, कर दाङ्बाल्ले़ कुलागि चोःक्मनाबा कुइसिःक् निङ्वाॽ पिरे़म्मे़ॽर चोगे़म्मे़ॽओ॥ 24 थेआङ्भे़ल्ले़ हाङ्से़म् कुइसिःक् दाङ्बाल्ले़ पिनिङ् के़मे़त्तिबा लक्किन् खोःसुम्बे़ॽ के़लॽबान् के़निःसुम्माङ् के़वयिॽरो॥ खिनिॽ दाङ्बा ख्रिस्ते़न् सेवा के़जोगुम्ल के़वयिॽरो॥ 25 ताप्फे़ःम्बा याःम्बक् के़जोःक्पाल्ले़ के़साक्पा खुम्दिङ् खोःसुॽरो॥ खे़प्मोग मना एःक्पएःक् चोःक्मान् थेआङ् मे़बोःङ्ने़ल्लो॥
1 सेवारोबाल्ले़ कुन्दाङ्बासे, खिनिॽ सेवारोबाहाॽ नुःरिक् मे़त्ते़म्सिम्मे़ॽओ, थेआङ्भे़ल्ले़ साङ्ग्राम्पेदाङ्ङो खिनिॽआङ् दाङ्बाधिक् के़गत्तुम् के़लॽबा पाःन्निन् निङ्वाॽ मे़भेःत्छे़म्मिन्ने़ॽओ॥ 2 चक्मे़ल्लॽए निङ्वाॽफुमाङ्ङिन् नोगे़न् पिरे़म्मे़ॽर सिङ्सिङ् ये़क्ये़क्काङ् तुवा चोगे़म्मे़ॽओ॥ 3 ख्रिस्तरे़ कुसुनाइङ् इङ्भोःसे़ निङ्वाॽफुमाङ्ङिल्ले़ लाम् हन्दु पिरिगे़र फाॽआङ् आनिगे़ लागिआङ् तुवा आजोगे़म् आबिरे़म्मे़ॽओ॥ बा खे़न् पाःन्निन् इङ्भोःसुङ्बाल्ले़ चोगुल्ले़ इङ्गाॽग कन् पुङ्लाहिम्मो साक्पा थ्याङ्ङाङ् वाॽआरो॥ 4 इङ्गाॽ पाःप्मा के़बोःङ्बा कन् पाःन्हाॽ नुःरिक्काङ् इङ्भोःमा सुक्तुङ्ल फाॽआङ् तुवा आजोगे़म् आबिरे़म्मे़ॽओ॥ 5 खिनिॽग सिक्कुम्साबा पोःक्खे़म्मे़ॽआङ् ख्रिस्तानि मे़ःम्बाहाॽनु वये़म्मे़ॽओ, हे़क्क्याङ् ये़सुरे़ कुयाःम्बेओ खुनिॽनु इङ्भोःमा काक् सुये़म्हाॽ नुःरिक्काङ् ओगप् चोगे़म्मे़ॽओ॥ 6 हाराॽ युम्मिल्ले़ कुजाःन् कुजागे़नुॽबा चोगुबा कुइसिःक् खिनिॽ पाःन्छेःक्वाःन् लुङ्गुम् कुधिम्बा नु कुघे़म् के़नुॽबा पोःङ्लरो, हे़क्केलॽरिक् वेॽहाॽ के़रे़क् नुःबा नोगप् पिमा के़सुक्तुम्सिम्लो॥ 7 तुखिकसरे़ इङ्गाॽ आयाःम्बेओबा इङ्घङ्ङिन् खिनिॽ के़जे़क्तिॽरो॥ खुने़ॽग आनिॽ लुङ्माॽ आदुक्तुम्बा नसानिबा नुसाॽ नु नसाःन्साबा माङ्सेवा के़जोःक्पा हे़क्क्याङ् दाङ्बाओ सेवारोबा चुम्लो॥ 8 कप्मोबा काक् आनिगे़ पाःन्हाॽ खिनिॽ के़जे़क्तिर फाॽआङ् खुने़ॽ खिनिॽओ पाङ्घुङ्ल पत्तारो॥ हे़क्क्याङ् खुने़ॽए हाङ्हाङ् के़जोगिॽरो, 9 खुने़ॽ खिनिॽनुएबा थिक्पा ओने़सिमसे़न्नु फे़न्ल पत्लो॥ खुने़ॽ नसाःन्साबा नु आनिॽ लुङ्माॽ आदुक्तुम्बा नुसाॽरो॥ खे़ङ्हाॽरे़ कप्मो के़बोःङ्बार के़बप्पा काक् पाःन्हाॽ खिनिॽनु चे़ङ्सुरो॥ 10 अरिस्तार्खसे़न् इङ्गाॽनु सोरिक् पुङ्लाहिम्मो साक्ते़आङ् वाॽरो॥ खुने़ॽनु बरनाबासरे़ कुल्लाम्सा मर्कुसरे़ सेवा के़हाक्तिरो॥ मर्कुसरे़ कुयाःम्बेओ तगिसा ओःन्धाक् चोःक्निङ्ङाङ् वाॽआ॥ खिनिॽओ लःन्निल्ले़ लाङ्दाःक्मा पिरे़म्मे़ॽओ॥ 11 युस्तस मे़प्मनाबा ये़सुरे़आङ् सेवा के़हाक्तिआङ् वाॽरो॥ निङ्वाॽफुहाङ्जुम्मो इङ्गाॽनु सोरिक् याःम्बक् के़जोःक्पाहाॽओ खे़ङ्हाॽरक् यहुदि नसानिबासिरो॥ कङ्हाॽरे़ इङ्गाॽ आनिङ्वाॽओ हाङ्हाङ् मे़मे़त्ताङ्ङाङ् वाॽरो॥ 12 खिनिॽनुएबा थिक्पा ख्रिस्त ये़सुरे़ कुसेवारोबा इपाफ्रासरे़ खिनिॽ सेवा के़हाक्तिरो॥ खुने़ॽग खिनिॽलागि निङ्वाॽफुमाङ्ङिल्ले़ के़धुम्बा नु कुलिङ्धो के़गे़प्पा हे़क्क्याङ् काक् निङ्वाॽफु निङ्वाॽओ ताःक्पोगे़म्बा के़जोगिर फाॽआङ् सदादिङ् साॽरिक् तुवा चोगुॽरो॥ 13 इङ्गाॽ से़क्खा पाःन् मे़त्निङ्, खिनिॽ नु लाओदिकिया हे़क्क्याङ् हैरापोलिस ये़क्यक्कोबा ख्रिस्तानिहाॽरे़ लागि याम्बुधिक्काङ् खुने़ॽ याःम्बक् चोगुआङ् वाॽरो॥ 14 आनिगे़ मिःम् चुम् सिदाॽसाम्बा लुका नु देमासरे़आङ् सेवा हाङ्सुॽरो॥ 15 लाओदिकियाबा नसानिबाहाॽ हे़क्क्याङ् तुत्तुगे़म्मा नुम्फास नु कुहिम्मो के़जुम्बा सेसेहुप्लक्कोबा नसानिबाहाॽओ सेवा तोःन्दे़म् आबिरे़म्मे़ॽओ॥ 16 कन् सक्इङ्घङ्ङिन् खिनिॽओ निःत् चुःत्ताङ् लाओदिकियाबा सेसेहुप्लक्कोबाहाॽरे़आङ् मे़निःरुर फाॽआङ् पिरे़म्सिम्मे़ॽओ, हे़क्क्याङ् खे़ङ्हाॽ हाक्तुङ्सिङ्बा सक्इङ्घङ्ङिन् खिनिॽआङ् निःरे़म्मे़ॽओ॥ 17 अर्खिपसे़न् दाङ्बाल्ले़ के़बिरे़बा याःम्बक्किन् चक्मे़ल्लॽए चोगे़सुरे़ॽओ लॽरिक् मे़त्ते़म् आबिरे़म्मे़ॽओ॥ 18 इङ्गाॽ पावलरे़ कन् सेवाःन् आबाङे आहुक्किल्ले़ साप्तुङ्ङाङ् वाॽआरो॥ हे़क्क्याङ् इङ्गाॽ पुङ्लाहिम्मो याक्काबा पाःन्निन् निङ्वाॽ इःत्ते़म्मे़ॽओ॥ हाराॽ निङ्वाॽफुमाङ्ङिल्ले़ कुलुङ्गुम्मिन् खिनिॽनु वाॽररो॥
|