1 Corinthians
१ कोरन्थि1 निङ्वाॽफुमाङ्ङिल्ले़ कुनिङ्वाॽलाम्बा ख्रिस्त ये़सुरे़ कुसेःक्युक्मिबा पोःङ्से़ सेगाङ्बा इङ्गाॽ पावल नु आनिॽ नुसाॽ सोस्थे़नेसलाम्बा 2 कन् सक्इङ्घङ्ङिङ् कोरन्थि 3 आनिॽ पाः निङ्वाॽफुमाङ्ङिन् हे़क्क्याङ् दाङ्बा ये़सु ख्रिस्तरे़ लुङ्गुम् नु सनारुङ्ङिन् खिनिॽ के़बिरिर॥ 4 ख्रिस्त ये़सुओ निङ्वाॽफुमाङ्ङिल्ले़ के़बिरिबा लुङ्गुम्मिल्ले़ चोगुल्ले़ इङ्गाॽ सदादिङ् निङ्वाॽफुमाङ्ङिन् खिनिॽ लागि नोगे़न् पिरुङ्लो॥ 5 थेआङ्भे़ल्ले़ ख्रिस्ते़न्नु सोरिक् खिनिॽग पाःन् पाःप्मा मुक्साम् नु ने़हिनिङ्वाॽ के़गप्पा के़बोःक्खिआङ् के़वयिॽरो॥ 6 हे़क्केलॽरिक्के ख्रिस्तरे़ कुयाःम्बेओ आनिगे़ पाःत्तुम्बे़बा पाःन्हाॽ खिनिॽओ से़क्खाए कुबुङ् युङ्सिङ्ङाङ् वाॽरो, 7 खे़ल्ले़ चोगुल्ले़ आनिॽ दाङ्बा ये़सु ख्रिस्तरे़ कुनुःङ्मा युःमा ये़म्मिन् के़हाङ्घुम्मिल्ले़ चाहाबा के़जोगिबा के़रे़क् याम्साम्गे़न् पर्धाःम्मिन् खिनिॽ के़गत्तुम्लो॥ 8 खुने़ॽए कुनुप्मो थारिक् नसाःन्नो थधप् मे़ल्लॽए के़गत्तिॽ, हे़क्केःल्ले़ आनिॽ दाङ्बा ये़सु ख्रिस्ते़ल्ले़ कुनुःङ्मा युःमा ये़न्नो आत्तिल्ले़आङ् खिनिॽ पाःन्धिक्मा के़न्छुक्तिन्लो॥ 9 निङ्वाॽफुमाङ्ङिन् नसाःन्साबा चोःक्लो, हे़क्क्याङ् खुने़ॽए आबुगे़न् कुस्साः ये़सु ख्रिस्त आनिॽ दाङ्बान्नु सेसे तङ्जुम्मो खिनिॽ के़उःत्तिआङ् के़वयिॽरो॥ 10 आमिःम् फुॽनुसाॽ नु ने़ॽनुसाॽसे, खिनिॽ लुम्मो से़म्मा मे़बोःङ्ने़न्ल कर तङे़म्मे़ॽआङ् वये़म्मे़ॽ फाॽआङ् आनिॽ दाङ्बा ये़सु ख्रिस्तरे़ कुमिङ्ङो पेलि फाक्निङ्लो॥ हे़क्क्याङ् खिनिॽ निङ्वाॽ नु निङ्वाॽ इःप्माओआङ् थिक्हुप् पोःक्खे़म्मे़ॽओ॥ 11 आमिःम् फुॽनुसाॽ नु ने़ॽनुसाॽसे, खिनिॽ लुम्मो खे़माॽ पोगे़आङ् वाॽ फाॽआङ् क्लोएरे़ कुहिम्सयङ्ङोबा कुभारे़ इङ्गाॽ मे़जे़क्ताङ्ङाङ् वाॽरो॥ 12 आल्ल इङ्गाॽ आबाःप्मा पाःन्निन् अक्तङ्बा वाॽ–खिनिॽ लुम्मो कुभारे़ पावले़न् इङ्गाॽ तिम्दुङ्, कुभारे़ अप्पोलोसे़न् 13 थे, ख्रिस्ते़न् हासिङ्ङाङ् वाॽबि? पावले़न् खिनिॽलागि सिलाम्साक्मा सिङ्सम्दाङ् फोःन्छिङ्ङाङ् वाॽबि? खिनिॽओ आत्तिन्हाॽ पावलरे़ कुमिङ्ङो बप्तिस्मा के़बोःक्खिआङ् के़वयिॽबे? 14 इङ्गाॽ क्रिस्पस नु गायसे़न्लक् बप्तिस्मा पिरुङ्सिङ् कर वेॽ आत्तिन्नाङ् बप्तिस्मा मे़म्बिए वाॽआबाओ निङ्वाॽफुमाङ्ङिन् नोगे़न् पिरुङ्लो॥ 15 खे़ल्ले़ चोगुल्ले़ खिनिॽ आत्तिन्हाॽरे़आङ् पावलरे़ कुमिङ्ङो बप्तिस्मा पोःक्खिगे़ लॽरिक् पाःप्मा के़ङ्घोःसुम्मिन्लो॥ 16 (ओवा, इङ्गाॽ स्तिफनसरे़ कुहिम्सयङ्बाहाॽआङ् बप्तिस्मा पिरुङ्सिङ्, हे़क्क्याङ् वेॽहाॽआङ् पिरुङ्सिङ्बि मे़ःम्बि खे़ङ्ग इङ्गाॽ आनिङ्वाॽ मे़याक्ने़न्लो॥) 17 थेआङ्भे़ल्ले़ ख्रिस्तरे़ इङ्गाॽ बप्तिस्मा पिसे़ पाङ्घाङ्बा मे़ःन्लो कर सुनाइङ् इङ्भोःसे़ने़ पाङ्घाङ्बारो॥ खे़न्नाङ् मे़न्छाम् याप्मि सिक्कुम् निङ्वाॽओबा पाःन्सुत्लाहाॽओग मे़ःन्लो, मे़ःन्ने़ फाॽग्र ख्रिस्तरे़ कुसिलाम्साक्मा सिङ्ङिन् मुक्साम् मे़ःन्नेबा पोःङ्लो॥ 18 सिलाम्साक्मा सिङ्ङिल्ले़न् सुनाइङ्ङिङ्ग के़मे़क्पार के़बेःक्पाहाॽरे़ खुनिॽ लागि अदङ् पाःन्लो, कर आनिॽ से़न्लप् के़घोःबार के़बप्पाहाॽरे़ लागिग निङ्वाॽफुमाङ्ङिल्ले़ कुमुक्साम्लो॥ 19 थेआङ्भे़ल्ले़ साम्योसाप्लाओ अक्खेलॽरिक् साप्ते़आङ् पत्,“इङ्गाॽ सिक्कुम्दाङ्बाहाॽरे़ खुनिॽ सिक्कुम् निङ्वाॽइन् मे़क्खुङ्, हे़क्क्याङ् चाःप्पाहाॽरे़ खुनिॽ चाःप्मान् कुसुम्मे़न्दम्मना चोगुङ्लो॥” 20 सिक्कुम्दाङ्बाहाॽ, साम्योथिम्साम्बाहाॽ नु साम्जिक् मुन्धुम्साबाहाॽ आत्तो मे़वाॽबे? निङ्वाॽफुमाङ्ङिल्ले़ग इक्सादिङ् खाम्बेःक्मोबा के़रे़क् सिक्कुम् निङ्वाॽहाॽ अदङ् कुइसिःक् चोगुआङ् मे़वाॽने़न्बि? 21 आबाङे सिक्कुम् निङ्वाॽलाम्बा मे़न्छाम् याप्मिहाॽरे़ खुने़ॽ कुसिङ् मे़न्निःत्तुन् फाॽआङ् निङ्वाॽफुमाङ्ङिल्ले़ कुसिक्कुम् निङ्वाॽओ निङ्सेःक् चोगुबाल्ले़ चोगुल्ले़ इङ्भोःमनाबा अदङ् पाःन्नोलाम्बाए नसाःन् के़जोःक्पाहाॽ ताङ्से़ःप्मासि निङ्वाॽ चोगुरो॥ 22 यहुदिहाॽरे़ निङ्वाॽ के़माबा मिक्सेःन् ओमे़प्मा मे़गोःत्तुॽ, हे़क्क्याङ् ग्रिक्हाॽरे़ सिक्कुम्दिङ् निङ्वाॽ मे़गोःत्तुॽ, 23 कर आनिगे़ग सिलाम्साक्मा सिङ्सम्दाङ् मे़भोःन्दुबा ख्रिस्ते़न्ने इङ्भोःसुम्बे़रो॥ खे़ङ्ग यहुदिहाॽरे़ लागि आघघबा पाःन् नु थिम्मे़न्दङ् सुवाङ्हाॽरे़ लागि अदङ् पाःन्लो, 24 कर निङ्वाॽफुमाङ्ङिल्ले़ उःत्तुसिबा ने़प्माङ् यहुदि नु ग्रिक सुवाङ्हाॽरे़ लागि ख्रिस्ते़ङ्ग निङ्वाॽफुमाङ्ङिल्ले़ कुमुक्साम् नु कुसिक्कुम् निङ्वाॽरो॥ 25 थेआङ्भे़ल्ले़ निङ्वाॽफुमाङ्ङिल्ले़ कुअदङ् पाःन्निङ्ग मे़न्छाम् याप्मि सिक्कुम् निङ्वाॽनुःल्ले़आङ् सिक्कुम्बा चोःक्लो॥ हे़क्क्याङ् निङ्वाॽफुमाङ्ङिल्ले़ मे़न्धुम्मनाबा कुबाःन्निङ्ग मे़न्छाम् याप्मि थुम्मिन्नुःल्ले़आङ् के़धुम्बा चोःक्लो॥ 26 आमिःम् फुॽनुसाॽ नु ने़ॽनुसाॽसे, निङ्वाॽफुमाङ्ङिल्ले़ खिनिॽ के़उःत्तिल्ले़ आक्तङ्बा के़जोगि के़लॽबा पाःन्निन् निङ्वाॽ इःत्ते़म्मे़ॽओ॥ मे़न्छाम् याप्मिहाॽरे़ के़म्निःसिल्ले़ खिनिॽ यरिक्तङ्बा सिक्कुम् निङ्वाॽसाबा के़होःप्तिरो॥ खिनिॽ यरिक्तङ्बा मुक्साम्साबा नु के़गप्पा हिम्सयङ्ङोबा के़होःप्तिरो॥ 27 कर निङ्वाॽफुमाङ्ङिल्ले़ग इक्सादिङ् खाम्बेःक्मो सिक्कुम्दाङ्बा चोगिगे़ॽ के़लॽबाहाॽ सिरिङ् मःमो थामासि फाॽआङ् अदङ् मे़मे़त्तुसिबाहाॽ सेगुसिरो॥ हे़क्क्याङ् इक्सादिङ् खाम्बेःक्मो आनिगे़ के़धुम्बा मुक्साम्दाङ्बा लॽरिक् के़इःप्पाहाॽ सिरिङ् मःमो थामासि फाॽआङ् मे़न्धुम्मनाबा मे़मे़त्तुसिबाहाॽ सेगुसिरो॥ 28 निङ्वाॽफुमाङ्ङिल्ले़ कन् इक्सादिङ् खाम्बेःक्मोबा के़ये़क्पासिगे़ लॽरिक् के़इःप्पाहाॽ थेनाधेबा चोःक्से़ हिलाप्फु के़बोःङ्बाहाॽ हे़क्क्याङ् कुमे़ल्लुङ् मे़ःन्नेबा नु हने़बा मे़मे़त्तुसिबाहाॽ सेगुसिरो॥ 29 खे़ल्ले़ चोगुल्ले़ निङ्वाॽफुमाङ्ङिल्ले़ कुनिःमाओ आत्तिन्नाङ् आङ्दिङ् मे़लॽने़न्लरो॥ 30 निङ्वाॽफुमाङ्ङिल्ले़ चोगुल्ले़ए खिनिॽ ख्रिस्त ये़सुओ के़वयिॽरो॥ खुने़ॽए आनिॽ लागि निङ्वाॽफुमाङ्लाम्बा सिक्कुम् निङ्वाॽ पोःक्खे़आङ् वाॽ॥ खुने़ॽए निङ्वाॽफुमाङ्ङिल्ले़ कुनिःमाओ आप्तिक् मे़ःन्नेबा नु सेसे साङ्साङ् आजोःक्, हे़क्क्याङ् आनिॽ लायोलाम् याप्मि के़धे़ॽबा पोःक्खे़आङ् वाॽरो॥ 31 खे़ल्ले़ चोगुल्ले़ साम्योसाप्लाओ अक्खेलॽरिक् साप्ते़आङ् पत्, “आत्तिल्ले़ यम्बा पाःन् पाःत्तुॽ, खे़ल्ले़ यहवे दाङ्बाल्ले़ चोगुबा याःम्बक्कोरक् यम्बा पाःन् पाःत्तुररो॥”1 आमिःम् फुॽनुसाॽ नु ने़ॽनुसाॽसे, तगि खिनिॽओ इङ्गाॽ निङ्वाॽफुमाङ्ङिल्ले़ से़क्खाबा कुसिबिॽ पाःन् इङ्भोःसे़ त्याङ्ङिल्ले़ मना के़ले़म्बा पाःन् हे़क्क्याङ् सिक्कुम् निङ्वाॽरे़ कुधिम् पाःन्हाॽ पाःत्तुङ्ल इङ्गाॽ मे़न्दाबे़न्लो॥ 2 थेआङ्भे़ल्ले़ इङ्गाॽ खिनिॽनु वयाङ्ङिल्ले़ ये़सु ख्रिस्ते़न् नु सिलाम्साक्मा सिङ्सम्दाङ् खुने़ॽ कुसिःमे़न्नुःल्ले़ वेॽ पाःन्हाॽ निङ्वाॽमुःम्मा निःन्धो चोगुङ्ङाङ् वयाङ्॥ 3 हे़क्क्याङ् खिनिॽओ त्याङ्ङिल्ले़ किःसाङ् स्याङ्ल यक्खाङ्ल त्याङ्लो॥ 4 इङ्गाॽ पाःत्तुङ्बा नु इङ्भोःसुङ्बा पाःन्निङ्ग सिक्कुम् निङ्वाॽ कुधिम् नु मना के़ले़म्बा पाःन्नो होःप्ते़रो, कर सेसेमाङ्ङिल्ले़ कुमुक्साम्मो ओसेःन्दाङ् पोःक्खे़आङ् वये़रो॥ 5 खे़ल्ले़ चोगुल्ले़ खिनिॽ नसाःन्निङ्ग मे़न्छाम् याप्मिहाॽरे़ खुनिॽ सिक्कुम्दिङ् निङ्वाॽइल्ले़ चोगुल्ले़ मे़ःन्, कर निङ्वाॽफुमाङ्ङिल्ले़ कुमुक्साम्मिल्ले़ चोगुल्ले़ पोःङ्मा पोःङ्लो॥ 6 हे़क्केसाङ् आनिगे़ग नसाःन्नो कुनिङ्वाॽ के़दुम्बा नसानिबाहाॽनु सिक्कुम्दिङ् निङ्वाॽरे़ पाःन्हाॽ पारिगे़ॽ, कर कन् इक्सादिङ् खाम्बेःक्मोबा नु खे़प्मो हाङ्गे़जोःक्पाहाॽरे़ खुनिॽ सिक्कुम् निङ्वाॽ पाःन् मे़बारिगे़न्लो॥ खे़ङ्हाॽग मे़मे़क् मे़बेःक्लो॥ 7 कर आनिगे़ग निङ्वाॽफुमाङ्ङिल्ले़ चिक्खुआङ् वये़बा कुसिबिॽ सिक्कुम् निङ्वाॽइन्ने पाःत्तुम्बे़रो॥ खे़ङ्ग इक्सादिङ् खाम्बेःक्माल्ले़ कुहेःक्सिङ्मानुःल्ले़ तगिए आनिॽ मिमिदिङ् पोःङ्ल फाॽआङ् निःन्धो चोगुआङ् वये़रो॥ 8 कन् इक्सादिङ् खाम्बेःक्मोबा हाङ्गे़जोःक्पा आत्तिन्हाॽरे़आङ् कन् पाःन्निन् कुसिङ् मे़न्निःत्तुन्लो॥ खे़ङ्हाॽरे़ कुसिङ् मे़निःत्तुआङ् मे़वये़ल्ले़ग मिमिदिङ्गे़न् दाङ्बान् सिलाम्साक्मा सिङ्सम्दाङ् मे़म्भोःन्दुम्बा वये़मे़न्॥ 9 कर साम्योसाप्लाओ अक्खेलॽरिक् साप्ते़आङ् पत्,“आत्तिन्हाॽरे़आङ् मे़न्निए, मे़ङ्घे़म्मे हे़क्क्याङ् निङ्वाॽ मे़न्इःत्तेबा पाःन्हाॽ निङ्वाॽफुमाङ्ङिल्ले़ खुने़ॽ मिःम्जि के़मे़प्पाहाॽरे़ लागि यारिप् चोगुआङ् वाॽरो॥” 10 कर निङ्वाॽफुमाङ्ङिल्ले़ सेसेमाङ्लाम्बा के़रे़क् खे़न् पाःन्हाॽ आनिॽ ओसेःन्दाङ् चोगु आबिरे़आङ् वाॽरो, थेआङ्भे़ल्ले़ सेसेमाङ्ङिल्ले़ के़रे़क् पाःन्हाॽ नु निङ्वाॽफुमाङ्ङिल्ले़ कुसिगाङ्बा सिबिॽ पाःन्हाॽआङ् कोःत्तुॽरो॥ 11 मे़न्छाम् याप्मिःल्ले़ खुने़ॽ कुनिङ्वाॽ सिगाङ्बा पाःन्हाॽ आबाङे कुयाम्साम्मिल्ले़रक् कुसिङ् निःत्तुॽरो॥ हे़क्केलॽरिक्के निङ्वाॽफुमाङ्ङिल्ले़ कुनिङ्वाॽ सिगाङ्बा पाःन्हाॽआङ् खुने़ॽ कुसेसेमाङ्ङिल्ले़रक् कुसिङ् निःत्तुॽरो॥ 12 आनिॽग कन् इक्सादिङ् खाम्बेःक्मोबा साम्मिन् मे़ङ्घोए आवाॽरो, कर निङ्वाॽफुमाङ्ङिल्ले़ हाबा आबिरे़बा काक् पाःन्हाॽ कुसिङ् निःप्मा आसुक्तुम्ल फाॽआङ् खुने़ॽलाम्बाए सेसेमाङ्ङिन् आघोःसुम्माङ् वाॽरो॥ 13 आल्ल आनिगे़ खे़न् पाःत्तुम्बे़बा पाःन्हाॽग मे़न्छाम्गे़न् सिक्कुम्दिङ् निङ्वाॽलाम्बा मे़ःन्लो, कर सेसेमाङ्ङिल्ले़ याप्मि हुॽरिगे़बा कुइसिःक्के याम्साम्गे़न् पाःन्हाॽग सेसेमाङ् के़गप्पाहाॽ चे़क्तुम्सिम्बे़ॽरो॥ 14 नसाःन् मे़न्जोःक्मनाबा मनाःल्ले़ निङ्वाॽफुमाङ्ङिल्ले़ कुसेसेमाङ्लाम् के़दाःबा पाःन्हाॽ मे़दाःक्तुन्लो॥ खे़ङ्हाॽग खुने़ॽ कुलागि अदङ् पाःन् पोःङ्ङाङ् कुसिङ् निःप्मा मे़सुक्तुन्लो, थेआङ्भे़ल्ले़ याम्साम्गे़न् पाःन्हाॽग सेसेमाङ्लाम्रक् कुसिङ् निःप्मा सुक्ते़त्लो॥ 15 सेसेमाङ्ङिल्ले़ लाम्लोसुबा मनाःल्ले़ काक् पाःन्हाॽ नुःबा चोःक्पि मे़ःम्बि फाॽआङ् साॽरु, कर वेॽ आत्तिन्हाॽरे़आङ् खुने़ॽग मे़न्छाॽरुन्लो॥ 16 साम्योसाप्लाओ अक्खेलॽरिक् साप्ते़आङ् पत्, “दाङ्बाल्ले़ कुनिङ्वाॽइन् हाःत्ले़ निःसुआङ् वाॽबे? हे़क्क्याङ् हाःत्ले़ खुने़ॽ हुॽमा सुक्तुबे?” कर आनिगे़ग ख्रिस्तरे़ कुनिङ्वाॽइन् कत्तुम्बे़रो॥ 1 आमिःम् फुॽनुसाॽ नु ने़ॽनुसाॽसे, इङ्गाॽ खिनिॽनु पाराङ्ङिल्ले़ याम्साम्गे़न् मनाहाॽनु पाराङ्बा कुइसिःक् मे़म्बाःप्पे़न्, कर इक्साबा निङ्वाॽ के़गप्पा मनाहाॽ हे़क्तङ्बा नसाःन्नो कुनिङ्वाॽ के़बाःक्पा अङे़ःक्वाहाॽनु पाःप्मनाबा कुइसिःक् पाःराङ्लो॥ 2 इङ्गाॽ हुॽनिङ्बा निसाम्मिन् खाक्खाक्पा तःक् हे़क्के मे़जोगे़न्, कर नु हे़क्तङ्बा चोगे़रो, थेआङ्भे़ल्ले़ खिनिॽग खाक्खाक्पा तःक् चामा मे़न्छुक्के के़वयिरो॥ आल्लोसाङ् खाक्खाक्पा तःक् चामा के़सुक्पा मे़म्बोःङ्ङे के़वयिॽरो, 3 थेआङ्भे़ल्ले़ खिनिॽग आल्लो थारिक् इक्साबा निङ्वाॽइल्ले़ के़युक्तिआङ् के़वयिॽरो॥ खिनिॽ लुम्मो नाहे़त्छिङ्मा नु खे़माॽ वाॽइल्ले़ खिनिॽ आबाङे इक्साबा निङ्वाॽइल्ले़ के़युक्तिआङ् नसाःन् मे़न्जोःक्मनाबा मना कुइसिःक् के़म्बोःक्खिन्बि? 4 थेआङ्भे़ल्ले़ खिनिॽ लुम्मो थिक्किल्ले़ इङ्गाॽ पावले़न् तिम्दुङ् लॽ, वे़ॽस्माल्ले़ इङ्गाॽ अप्पोलोसे़न् तिम्दुङ् लॽइल्ले़ खिनिॽ नसाःन् मे़न्जोःक्मना मना हे़क्तङ्बा के़म्बोःक्खिम्बि? 5 अप्पोलोसे़न् नु पावले़न् हाःत्छिबे? आन्छिगे़ग दाङ्बाल्ले़ मुरा मे़त्ते़छिगे़बा, कुयाःम्बक् के़जोःक्पा कुसेवारोबासिगे़रक्लो॥ आन्छिगे़लाम्बाए खिनिॽ नसाःन् के़जोगुम्माङ् के़वयिॽरो॥ 6 इङ्गाॽ याॽ लेःत्तुङ्, अप्पोलोसरे़ 7 खे़ल्ले़ चोगुल्ले़ याॽ के़लेःप्पा नु च्वाःत् के़गेःप्पाहाॽ थेसिआङ् मे़ःन्लो॥ कर के़भोःबा निङ्वाॽफुमाङ्ङिन्लक् के़ये़क्पारो॥ 8 याॽरिःम्बा के़लेःप्पे़न् नु च्वाःत् के़गेःप्पाङ्ग कुदङ्बासिरो॥ खे़ङ्हाॽरे़ याम्बुधिक् चोःक्सुबा कुइसिःक् आबाङे खुन्छिॽ थुम्घोःन् खोःसुॽरो॥ 9 थेआङ्भे़ल्ले़ आन्छिगे़ सोरिक् निङ्वाॽफुमाङ्ङिल्ले़ कुयाःम्बक् के़जोःक्पासिगे़रो॥ खिनिॽग निङ्वाॽफुमाङ्ङिल्ले़ कुइक्ताप् नु कुहिम्निङ्लो॥ 10 निङ्वाॽफुमाङ्ङिल्ले़ पिराङ्बा लुङ्गुम्लाम्बा इङ्गाॽ चाःप्पा हिम् के़जोःक्पा कुइसिःक् हिम्पाङ्यक्किन् ने़स्सुङ्, हे़क्क्याङ् वेॽस्माल्ले़ खे़न् सम्दाङ् लुङ्धाक् से़त्तुर हिम् चोगुॽ॥ कर लुङ्धाक् के़से़प्पार हिम् के़जोःक्पाल्ले़ हिम् चोगुल्ले़ खुने़ॽ सिङ्सिङ् लॽमा पोःङ्लो॥ 11 थेआङ्भे़ल्ले़ तगि ने़स्से़ चुरे़बा हिम्पाङ्यक्किङ्ग ये़सु ख्रिस्तरो॥ खे़न् ने़मनाबा हिम्पाङ्यक्किन्नुःल्ले़ वेॽ आत्तिन्हाॽरे़आङ् वेॽ हिम्पाङ्यक् ने़मा मे़न्छुक्तुन्लो॥ 12 आल्ल हिम् के़जोःक्पाल्ले़ खे़न् सम्दाङ् साम्म्याङ्, युप्पा, इमे़ल्लुङ्बा मुधिङ्लुङ्, सिङ्, याःन्-सुङ् इग्र याॽलाङ्ङिल्ले़ हिम् चोगुने़ फाॽग्र 13 खुने़ॽ कुयाःम्बक्किन् आक्तङ्बा चोःक् फाॽआङ् खे़न् खासे़न् ये़न्नो ओसेःन्दाङ् पोःङ्लो, हे़क्क्याङ् के़रे़क्ले़ खुनिॽ याःम्बक्किन् से़क्खाबा चोःक्पि मे़ःम्बि फाॽआङ् मिःल्ले़ए साॽरुरो॥ 14 आत्तिन् मनाःल्ले़ चोगुबा कुयाःम्बक्किन् मिःल्ले़ मे़जने़न् खे़ल्ले़ थुम्घो खोःसुॽरो॥ 15 कर आत्तिन् मनाःल्ले़ चोगुबा कुयाःम्बक्किन् मिःल्ले़ थ्यःङ् चदेःसुॽ, खे़न् मनाःन् यम्बा फे़त्लाॽमाओ थाःरो॥ खे़न् ताङ्से़ःप्साङ् मिःल्ले़ खप्मे़ लाबु से़रुबा कुइसिःक् पोःङ्लो॥ 16 खिनिॽग निङ्वाॽफु माङ्हिम्निङ् फाॽआङ् निङ्वाॽ के़ङ्गत्तुम्मिम्बि? हे़क्क्याङ् निङ्वाॽफुमाङ्ङिल्ले़ 17 आत्तिल्ले़ निङ्वाॽफु माङ्हिम्मिन् फे़त्लाःन्दुॽ, निङ्वाॽफुमाङ्ङिल्ले़ खे़न् मे़क्खुॽरो, थेआङ्भे़ल्ले़ निङ्वाॽफु माङ्हिम्मिङ्ग सेसे चोःक्लो, हे़क्क्याङ् खे़न् माङ्हिम्मिङ्ग खिनिॽएरो॥ 18 खिनिॽ इङ्मे़ले़क्कासिम्मिन्ने़ॽओ! आत्तिल्ले़ कन् इक्सादिङ् खाम्बेःक्मो सिक्कुम्दाङ्बा नु चाःप्पा चोःक्का लॽरिक् निङ्वाॽ इःत्तुॽ हाराॽ खे़न् थेआङ् मे़ल्ले़ःमनाबा अदङ् कुइसिःक् पोःङ्निरो॥ हे़क्केःल्ले़ खे़न् सिक्कुम्साबा पोःङ्॥ 19 थेआङ्भे़ल्ले़ कन् इक्सादिङ् खाम्बेःक्मोबा सिक्कुम् निङ्वाॽइङ्ग निङ्वाॽफुमाङ्ङिल्ले़ कुनिःमाओग अदङ् पाःन् कुइसिःक्लो॥ साम्योसाप्लाओ अक्खेलॽरिक् साप्ते़आङ् पत्,“खुने़ॽग सिक्कुम्दाङ्बाहाॽ खुनिॽ इस्वामो ते़म्सुसिरो॥” 20 हे़क्क्याङ् याम्मो,“सिक्कुम्साबाहाॽरे़ निङ्वाॽ मे़इःत्तुबा पाःन्निन् हने़बा चोःक् फाॽआङ् यहवे दाङ्बाल्ले़ निःसुरो॥” 21 खे़ल्ले़ चोगुल्ले़ मनाहाॽरे़ खुनिॽ याःम्बेओ आत्तिन्हाॽआङ् आङ्दिङ् मे़न्लॽने़न्लरो॥ थेआङ्भे़ल्ले़ के़रे़क् पाःन्हाॽग खिनिॽइन्ने़रो॥ 22 पावल, अप्पोल्लोस, पत्रुस, हे़क्क्याङ् के़रे़क् इक्सादिङ् खाम्बेःक्मान्, ने़त्तिगे़न् हिङ्मन्, सिःमे़न्, कोये़म्बा ये़म्मिन् नु ताये़म्मिन्नाङ् खिनिॽइन्ने़रो॥ 23 हे़क्क्याङ् खिनिॽग ख्रिस्ते़ल्ले़न्निङ्लो॥ हे़क्क्याङ् ख्रिस्ते़ङ्ग निङ्वाॽफुमाङ्ङिल्ले़न्लो॥ 1 हे़क्केःल्ले़ मे़न्छाम् याप्मिहाॽरे़ आनिगे़ग ख्रिस्तरे़ कुसेवारोबा नु निङ्वाॽफुमाङ्ङिल्ले़ कुसिबिॽ पाःन्हाॽ कप्मा लक् के़घोःबासिगे़ फाॽआङ् मे़इःत्तिगे़र पोःङ्लो॥ 2 आल्ल हे़क्तङ्बा लक् के़घोःबा सेवारोबाहाॽग नसाःन्साबा पोःङ्मा पोःङ्लो॥ 3 खिनिॽ इग्र वेॽरे़ खासे़न् मे़लोःन्नाने़ फाॽग्र इङ्गाॽ आलागिग खे़न् यम्बा पाःन् मे़ःन्लो॥ से़क्खाःल्ले़ इङ्गाॽ आबाङेआङ् खासे़न् मे़लोःन्छिङ्ङान्लो॥ 4 इङ्गाॽ थे़माआङ् फे़त्मे़ल्लाःन्ने वाॽआ के़लॽबाग निङ्वाॽ कत्तुङ्, हे़क्केसाङ् इङ्गाॽ फोत्या मे़ःन्नेबा चोःक्का के़लॽबाग मे़ःन्लो॥ दाङ्बाल्ले़ए इङ्गाॽ खासे़न् लोःन्नारो॥ 5 खे़ल्ले़ चोगुल्ले़ दाङ्बाल्ले़ कुनुःङ्मा युःमा ये़म्मिन्नुःल्ले़ तगि वेॽहाॽ खासे़न् मे़लोःन्दे़म्सिम्मिन्ने़ॽ, खुने़ॽए खादाम्मोबा फे़न् पाःन्हाॽ से़न्दाङ्गे़न् ओःत्तिओ तारुॽ हे़क्क्याङ् मे़न्छाम् निङ्वाॽओबा सिबिॽ पाःन्हाॽआङ् ओसेःन्दाङ् चोगुॽरो॥ खे़न् ये़म्मोए के़रे़क्ले़ निङ्वाॽफुमाङ्लाम् खुनिॽ ने़म्भोगे़न् नारा फोःमान् मे़घोःसुॽरो॥ 6 आल्ल आमिःम् फुॽनुसाॽ नु ने़ॽनुसाॽसे, साप्ते़आङ् के़बप्पाआङ्धो थेआङ् मे़जोगे़म्मिन्ने़ॽ लॽरिक् साम्योसाप्लाओबा पाःन्निन् कुसिङ् के़निःत्तुम्ल फाॽआङ् इङ्गाॽ नु अप्पोलोसरे़ कुबि पिनिङ्बारो॥ हे़क्केलॽरिक् खिनिॽ लुम्मो आबाङे मनारे़ कुलागि आङ्दिङ् मे़लॽरे़म्मिन्ने़ॽओ॥ 7 थेआङ्भे़ल्ले़ हाःत्ले़ खिनिॽ वेॽहाॽनुःल्ले़ नुःबा के़जोगिआङ् के़वयिॽबे? निङ्वाॽफुमाङ्ङिल्ले़ के़म्बिरिम्बा थे पाःन् खिनिॽ के़गत्तुम्बे? खुने़ॽ के़बिरिबा पाःन् के़गत्तुम्ने़ फाॽग्र आबाङे के़धगुम्बा हे़क्के थेआङ् आङ्दिङ् के़लॽरिबाबे? 8 तगिनुसा खिनिॽ निङ्वाॽ के़इःत्तुम्बा काक् पाःन्हाॽ के़घोःसुम्माङ् के़वयिॽमु! खिनिॽग तगिए याङ्साकुन्धेसाबा के़बोःक्खिआङ् के़वयिॽमु! आनिगे़ मे़ःन्नेए खिनिॽ हाङ् के़बोःक्खिआङ् के़वयिॽमु! खिनिॽ से़क्खाए हाङ् के़बोःक्खिआङ् के़वयिल्ले़ग, आनिगे़आङ् खिनिॽनुए हाङ् चोःक्मा सुक्तुम्बे़मे़न्! 9 थेआङ्भे़ल्ले़ थङ् के़नाःम्बाहाॽरे़ खुनिॽ तिःक्लाओ काक्नुःल्ले़ एगाङ् के़बप्पा सिःमे़ल्ले़ खुम्दिङ् के़घोःबा कुइसिःक् निङ्वाॽफुमाङ्ङिल्ले़ आनिगे़ सेःक्युक्मिबाहाॽ काक्नुःल्ले़ एगाङ् फत्छिगे़आङ् मनालुम्मो ओसेःन्दाङ् चोगिगे़आङ् वाॽ के़लॽबान् निङ्वाॽ इःत्तुङ्लो॥ हे़क्क्याङ् आनिगे़ग काक् इक्सादिङ् खाम्बेःक्मो, माङ्लाइङ्बाहाॽ नु मे़न्छाम् याप्मिलुम्मो लामित्ता पोःक्खिगे़आङ् वयिगे़रो॥ 10 आनिगे़ग ख्रिस्तरे़ कुलागि अदङ् चोगिगे़ॽ, कर खिनिॽग ख्रिस्तरे़ कुलागि सिक्कुम्साबा के़जोगिमुबा! आनिगे़ मे़न्धुम्ना चोगिगे़ॽ, कर खिनिॽग के़धुम्बा के़जोगिमुबा! खिनिॽ मिङ्सो इङ्धाःङ् के़घोःसुम्, कर आनिगे़ग मे़घोःसुम्बे़म्मुबा! 11 कन् ये़म् थारिक् मे़न्जा मे़न्धुङ्ङे साक्मे़न्जा वयिगे़, नुःबा चाङ् तेःत्ताङ् मे़गत्तुम्बे़न्नाङ् मनाहाॽरे़ साॽरिक् ताप्फे़ःल्लिक् मे़मे़त्तिगे़ॽ हे़क्क्याङ् आनिगे़ हिम्धाःङ् मे़ःन्ने वयिगे़रो॥ 12 आनिगे़ आबाङे हुक्किल्ले़ याम्बुधिक्काङ् याःम्बक् चोगुम्बे़ॽ॥ साङ्ग्रा मे़मे़त्तिगे़ल्ले़ मुॽइसाम् पिरुम्सिम्बे़ॽ, तुक्खे मे़जाःत्तिगे़ल्ले़ नासि थःत्तुम्बे़रो॥ 13 आनिगे़ याःम्बेओ ताप्फे़ःम्बा पाःन् मे़बाःत्तुल्ले़ आनिगे़ नःम्नःम्माङ् नुःरिक्काङ् नोगप् पिरुम्सिम्बे़ॽरो॥ आल्लो थारिक् आनिगे़ग इक्साबा हिलाप्फु नु खाम्बेःक्मोबा ताम्जि पोःक्खिगे़आङ् वयिगे़रो॥ 14 खिनिॽ सिरिङ्मःमो के़ध्ये़ॽइर फाॽआङ् कन् पाःन्निन् साप्तुङ्बा मे़ःन्लो, कर आमिःम् आबुगे़न् आस्साःहाॽ कुइसिःक् साम्दिङ् पिनिङ्बारो॥ 15 ख्रिस्तओ खिनिॽ आत्तात्तान्ने यरिक् सिक्साम्बाहाॽ के़गत्तुम्सिम्साङ् यरिक् पाःहाॽग के़ङ्गत्तुम्मिन्लो, खिनिॽओ सुनाइङ् तारुङ्बाल्ले़ चोगुल्ले़ इङ्गाॽ ख्रिस्त ये़सुओ खिनिॽ पाः पोःक्खाङ्लो॥ 16 खे़ल्ले़ चोगुल्ले़ इङ्गाॽ आजोःङ् के़इःप्पा पोःक्खे़म्मे़ॽ फाॽआङ् पेलि फाक्निङ्लो॥ 17 बा खे़ल्ले़ चोगुल्ले़ इङ्गाॽ लुङ्माॽ तुक्तुङ्बा दाङ्बाओ नसाःन्साबा आबुगे़न् आस्साः तिमोथिःन् खिनिॽओ पाङ्घुङ्ल पत्तारो॥ के़रे़क् सेसेहुप्लक्को हुॽरुङ्सिङ्बा आनिसाम्मिन् कुइसिःक्के ख्रिस्त ये़सुःन् इःत्तुङ् नाःत्तुङ्बा पाःन्निन् खिनिॽ निङ्वाॽसुम्मो खुने़ॽए तारु के़बिरिॽरो॥ 18 आल्ल खिनिॽओ इङ्गाॽ याम्मो मे़दाआन् फाॽआङ् खिनिॽओ कुभाग यम्बा के़ले़ङ्ङासिआङ् के़वयिॽरो॥ 19 कर दाङ्बाल्ले़ निङ्वाॽ चोगुने़ फाॽग्र इङ्गाॽ खिनिॽओ हाराए ताआर पत्तारो, हे़क्क्याङ् खिनिॽओ यम्बा के़ले़ङ्सिङ्बाहाॽ आक्खेलॽरिक् ताॽमे़जे़ङ् फाॽआङ्लक् मे़ःन्, कर खे़ङ्हाॽरे़ आक्तङ्बा मुक्साम् मे़गत्तुॽ के़लॽबा पाःन्निन्नाङ् निङ्वाॽ खोःसुङ्लो॥ 20 थेआङ्भे़ल्ले़ निङ्वाॽफुहाङ्जुम्मिङ्ग ताॽजे़ङ् पाःन्हाॽरे़ मे़ःन्, कर मुक्साम्मिल्ले़ ओसेःन्दाङ् चोगुॽरो॥ 21 आक्खे चोगुङ्बान् खिनिॽ सिराॽ थाङ्बे? ते़ःम्भुक्नु खिनिॽओ ताआबाबि इ मिःम्जि नु चुङ्जिगे़न् नःम्नःम्माङ् ताःआबाबि? 1 खिनिॽ लुम्मो याम्बोःप्मा याःम्बक् पोःक्खे़आङ् वाॽ, खिनिॽओ लत्छाःल्ले़ आबाङे कुम्मा पाःक्मान् मेःत् कत्तुआङ् वाॽमु! हे़क्तङ्बा ताप्फे़ःम्बा याम्बोःप्मा याःम्बक्किङ्ग नसाःन् मे़न्जोःक्मनाबा सुवाङ्लुम्मोआङ् मे़बोःङ्ने़ल्लो॥ 2 कर खिनिॽग आङ्दिङ्ने़ के़लॽरिॽ! खिनिॽग मेरिङ् थक्मा के़बोःङ्बाने़ वये़, हे़क्क्याङ् हे़क्तङ्बा मनाःन् खिनिॽ सेसे तङ्जुम्लाम् लःप्मादेःमा के़बोःङ्बा वये़॥ 3 इङ्गाॽ खिनिॽनु होःप्पासाङ् आनिङ्वाॽओग सोरिक्के वाॽआरो॥ खे़ल्ले़ चोगुल्ले़ खिनिॽनु सोरिक् वाॽआबा कुइसिःक्के खे़न् मनाःल्ले़ कुदक्ले़ङ्वाओ खासे़न् लोःन्दुङ् सुरुङ्ङाङ् वाॽआरो॥ 4 आनिॽ दाङ्बा ये़सुरे़ कुमिङ्ङो सेसेहुप्लक्को खिनिॽ के़जुप्सिल्ले़ खिनिॽनु इङ्गाॽ आनिङ्वाॽइन् दाङ्बा ये़सुरे़ कुमुक्साम्मिन्नु वाॽइल्ले़, 5 खे़न् मनाःन् सेसेहुप्लक्लाम्बा लःत्ते़म्देःसे़म्मे़ॽआङ् माफे़न्साम्मिन् हुक्सुप्ते़म्मे़ॽओ॥ हे़क्केलॽरिक् नासिङ्गे़न् कुधक्किन् 6 खिनिॽ आङ्दिङ् लॽमाङ्ग नुःबा पाःन् मे़ःन्लो॥ खरे़ःङ् के़भङ्बा च्यॽसिक् सिदाॽइल्ले़ के़रे़क् फेॽरुम्मिन् युक्तुबा कुइसिःक् च्यॽसिक् ताप्फे़ःम्बा पाःन्निल्ले़ के़रे़क् नुःबा पाःन्हाॽ फे़त्लाःन्दु के़लॽबा पाःन्निन् कुसिङ् मे़न्निःत्ते के़वयिॽबि? 7 खे़ल्ले़ चोगुल्ले़ खिनिॽ सेसेबा के़बोःक्खिर फाॽआङ् खे़न् लायो के़जोःक्पा ताप्फे़ःम्बा मनाःन् 8 आनिॽग तगिबा ताप्फे़ःम्बा याःम्बक्हाॽ नु लायो हे़क्तङ्बा खे़ॽसुङ् कुधिम्बा खरे़ःङ्ङिल्ले़ मे़ःन्, कर सेसेबा नु से़क्खाबा कुसङ् खरे़ःङ्ङिल्ले़ चोःक्युम्भो तङ्नाम्ले़न् ससाङ्स्रोःत् चोगुम्लो॥ 9 तगि कन् इक्सादिङ् खाम्बेःक्मोबा याम्बोःप्मा याःम्बक् के़जोःक्पा मनाहाॽनु सोरिक् मे़वये़म्मिन्ने़ॽ लॽरिक् इङ्गाॽ सक्इङ्घङ् साप्तुङ्ङाङ् हाक्निङ्ङाङ् वयाङ्॥ 10 खे़न् फाॽइङ्ग नसाःन् मे़न्जोःक्मनाबा फे़न् याःम्बक् के़जोःक्पा, खिःम्यक्पा, इङ्ले़क्पा, नावाइत्ला माङ्गे़घबाहाॽनु मे़वये़म्मिन्ने़ॽ के़लॽबाग मे़ःन्लो॥ हे़क्के के़जोगुम्मिल्ले़ग कन् इक्सादिङ् खाम्बेःक्मोलाम्बा लःम्मा पेःक्मा के़बोःङ्बा वये़रो॥ 11 कर आल्ल इङ्गाॽ खिनिॽ अक्खेलॽरिक् सक्इङ्घङ् साप्तुङ्ङाङ् हाक्निङ्ल पत्तारो, आत्तिल्ले़ आबाङे नसानिबा नुसाॽआ लॽरिक् पाःत्तुआङ् चाराम्मा याःम्बक् चोगुॽ, खिःम्यक्पा चोःक्, नावाइत्लाहाॽ सेवा चोगुॽ, मना इङ्दो मे़त्तुसिॽ, थिमसाङ् नु इङ्ले़क्पा चोःक् हे़क्तङ्बा मनाःङ्ग चुम् मे़लेःत्ते़म्मिन्ने़ॽओ॥ हे़क्क्याङ् हे़क्तङ्बा मनाःन्नु सोरिक् चाआङ् मे़जे़म्मिन्ने़ॽओ॥ 12 नसाःन् मे़न्जोःक्मनाबा सेसेहुप्लक्पा लाःक्कात्पा मनाहाॽ खासे़न् लोःम्मासि इङ्गाॽ आलक्पे़न् मे़ःन्लो, कर सेसेहुप्लक् सिगाङ्बा मनाहाॽ खासे़न् लोःम्माग खिनिॽ याःम्बक्लो॥ 13 निङ्वाॽफुमाङ्ङिल्ले़ लाःक्कात्पा मनाहाॽ खासे़न् चोगुसिॽरो, कर साम्योसाप्लाःल्ले़ पाःत्तुबा कुइसिःक् “ताप्फे़ःम्बा लायो के़जोःक्पा मनाहाॽ खिनिॽ लुम्मोलाम् लःत्ते़म्देःसे़म्सिम्मे़ॽओ॥” 1 खिनिॽओ थिक्पारे़ वेॽ नसानिबान्नु खे़माॽ फोःक्खुआङ् वाॽने़ फाॽग्र खिनिॽ खासे़न् लोःन्छे़ ख्रिस्तरे़ सेसे कुयाप्मिहाॽरो पेःक्माल्ले़ कुले़क्वा निङ्वाॽफुमाङ्ङिन् नसाःन् मे़न्जोःक्मनाबा खासे़न्लोःम्बाल्लो आक्खेआङ् पेःक्मा के़आःन्नासिबाबे? 2 ख्रिस्ते़न् नसाःन् के़जोःक्पा सेसे याप्मिहाॽरे़ कन् इक्सादिङ् खाम्बेःक्माल्ले़न् खासे़न् मे़लोःन्दुॽ के़लॽबा पाःन्निन् कुसिङ् मे़न्निःत्ते के़वयिॽबि? हे़क्क्याङ् इक्सादिङ् खाम्बेःक्माल्ले़न् खासे़न्निन् खिनिॽए लोःम्मा पोःङ्ने़ फाॽग्र अक्तङ्बा चुजुक्सा पाःन्हाॽरे़न् खासे़न् लोःम्मा के़न्छुक्तुम्मिम्बि? 3 माङ्लाइङ्बाहाॽ आनिॽ खासे़न् आलोःन्दुम्सिम् के़लॽबा पाःन्निन् निङ्वाॽ मे़ङ्घोए के़वयिॽबि? हे़क्केःल्ले़ कन् हिङ्मन्नो थिक्याःन्धक्पा पाःन्हाॽग यम्बा मे़ःन्लो! 4 हे़क्तङ्बा पाःन्हाॽ खासे़न् लोःन्छे़ सेसेहुप्लक्किल्ले़ इङ्धाःङ् मे़बिरुन्छिम्बा खासे़न्लोःम्बाहाॽरो आक्खेआङ् के़बिगिबाबे? 5 कङ्ग खिनिॽ सिरिङ्मःमो के़ध्ये़ॽइर फाॽआङ् पाःत्तुङ्बारो॥ नसानिबा फुॽनुसाॽहाॽओ खे़माॽ पोःक्किल्ले़ खिनिॽ लुम्मो लत्थिक्काङ् नादङ् चोःक्मा के़सुक्पा सिक्कुम्साबा मना होःप्पि? 6 कर लत्छा नसानिबा नुसाॽइन् वेॽस्मा नसानिबा नुसाॽइल्ले़ कुदक्ले़ङ्वाओ आक्खेलॽरिक् तुःन्देॽ नाःत्छे़ नसाःन् मे़न्जोःक्मनाहाॽरे़ खुनिॽ खासे़न् हिम्मो पेःक्पाबे? 7 खिनिॽ लुम्मो तुःन्देॽहाॽ वाॽबाल्ले़ चोगुल्ले़ खिनिॽ नसानिबा हिङ्मन्नो हारि के़द्ये़ॽइबा पाःन्निन् थाःप्लो॥ परुमाल्ले़ थेआङ् निङ्घुम्मो मे़न्धामाबे? थेआङ् इङ्ले़क्को मे़न्धामाबे? 8 कर खिनिॽ आबाङे नसानिबा फुॽनुसाॽ नु ने़ॽनुसाॽहाॽ निङ्घुम् नु इङ्ले़क् के़मे़त्तुम्सिम्लो॥ 9 ताप्फे़ःम्बा याःम्बक् के़जोःक्पाहाॽरे़ निङ्वाॽफुहाङ्जुम्मिल्ले़न् लाघो मे़ङ्घोःसुन् के़लॽबा पाःन्निन् निङ्वाॽ मे़ङ्घोए के़वयिॽबि? इङ्ले़क्को मे़ध्ये़म्मिन्ने़ॽओ॥ फे़न् याःम्बक् के़जोःक्पाहाॽ, नावाइत्ला माङ्गे़घःबाहाॽ, चाराम्मा याःम्बक् के़जोःक्पा के़जोःक्माहाॽ, के़त्निबा के़त्निमाहाॽ, मे़न्छुमाॽ मे़न्छुमाॽइन्नु हे़क्क्याङ् ये़म्बित्छाॽ ये़म्बित्छाॽइन्नु चागे़राम्बाहाॽ, 10 के़घुःप्पाहाॽ, खिःम्यक्पाहाॽ, थिःमसाङ्हाॽ, चाःत्थि के़देःबा नु फोत्याबाहाॽरे़ निङ्वाॽफुहाङ्जुम्मिल्ले़न् लाघो मे़ङ्घोःसुन्लो॥ 11 खिनिॽआङ् कुभाग बा अक्तङ्बा के़वयि, कर वागे़म्हप्ति, सेसे के़बोःक्खि हे़क्क्याङ् दाङ्बा ये़सु ख्रिस्तरे़ कुमिङ्ङो आनिॽ निङ्वाॽफुमाङ्ङिल्ले़ कुसेसेमाङ्लाम्बा आप्तिक् मे़ःन्नेबा के़बोःक्खिरो॥ 12 कुभारे़ मे़बाःत्तुॽ, “इङ्गाॽ काक् पाःन्हाॽ चोःक्मा खोःसुङ्,” कर काक् पाःन्हाॽ आनिॽ लागि इङ्धाःङ्बा मे़जोःक्ने़न्लो॥ “काक् पाःन्हाॽ चोःक्मा खोःसुङ्,” कर इङ्गाॽ आत्तिन् पाःन्निल्ले़न्नाङ् योःक्पा मे़बोःङ्ङान्लो॥ 13 वेॽहाॽरे़ मे़बाःत्तु, “कुजाःङ्ग साप्पोःक्पाल्ले़ कुलागिरो, हे़क्क्याङ् सापोःक्पे़न् कुजाःल्ले़ लागिरो॥” कर निङ्वाॽफुमाङ्ङिल्ले़ खे़ङ्हाॽ ने़प्माङ् मे़क्खुसिॽरो॥ नासिङ्गे़न् थक्किङ्ग याम्बोःप्मा याःम्बक्किल्ले़ लागि मे़ःन्लो, कर दाङ्बाल्ले़ कुलागिरो॥ हे़क्क्याङ् नासिङ्गे़न् थक्किल्ले़ कुलागि चाहाबा के़जोःक्पा पाःन्हाॽ दाङ्बाल्ले़ हिसु तङ्घुरो॥ 14 हे़क्क्याङ् निङ्वाॽफुमाङ्ङिल्ले़ कुमुक्साम्लाम् दाङ्बान् सिःमे़न्लाम् कुहिङ्वे़त् चोगुबा कुइसिःक् आनिॽ नासिङ्गे़न् थक्किन्नाङ् याम्मो कुहिङ्वे़त् चोगुॽरो॥ 15 खिनिॽ थक्किङ्ग ख्रिस्तरे़ कुयाम्लक् के़लॽबा निङ्वाॽ मे़ङ्घोए के़वयिॽबि? हे़क्केःल्ले़ ख्रिस्तरे़ कुयाम्लक्किन् तेॽरुङ्ङाङ् के़त्निमान्नु काम्सुङ्बाबि? आप्फाल्ले़आङ् मे़नुॽने़न्लो! 16 आत्तिन् मनाःन् के़त्निमान्नु तङ्, खे़न्नुए लत्छा थक् पोःङ् के़लॽबा पाःन्निन् निङ्वाॽ मे़ङ्घोए के़वयिबि? थेआङ्भे़ल्ले़ खे़ङ्हाॽ लत्छा थक् पोःङ्सिॽ 17 कर आत्तिन् दाङ्बान्नु काम्, खे़न् खुने़ॽनुए याम्साम्मोआङ् लत्छा पोःङ्लो॥ 18 चाराम्मोलाम् माःङ्घा वये़म्मे़ॽओ॥ मे़न्छाम् याप्मिःल्ले़ काक् वेॽ लायोहाॽ नासिङ्गे़न् कुधक्लाम्बा लाःक्कात् चोगुॽ, कर चाराम्मा लायोःङ्ग आबाङे नासिङ्गे़न् कुधक्किल्ले़ कुदक्ले़ङ्वाओ चोगुॽरो॥ 19 खिनिॽ थक्किन् सेसेमाङ्ङिल्ले़ कुहिम् के़लॽबा निङ्वाॽ मे़ङ्घोए के़वयिॽबि? निङ्वाॽफुमाङ्ङिल्ले़ के़बिरिबा सेसेमाङ्ङिन् खिनिॽ सिगाङ् वाॽरो॥ हे़क्केःल्ले़ खिनिॽ थक्किन् आबाङे खिनिॽइन् मे़ःन्लो॥ 20 निङ्वाॽफुमाङ्ङिल्ले़ यरिक् कुमे़ल्लुङ् हुङुआङ् खिनिॽ के़धे़ॽरिआङ् के़वयिॽरो॥ खे़ल्ले़ चोगुल्ले़ खिनिॽ नासिङ्गे़न् थक्को निङ्वाॽफुमाङ्ङिन् मिङ्सो इङ्धाःङ् पिरे़म्मे़ॽओ॥ 1 आल्ल खिनिॽ के़साप्तुम्बा पाःन्निल्ले़ कुयाःम्बेओग इङ्गाॽ अक्खे पाःत्तुङ्लो–ये़म्बित्छाॽइल्ले़ मेःक्खिम् मे़जोगुन्निल्ले़ए नुःबा पोःङ्लो॥ 2 कर चाराम्मा याःम्बक्किन् साॽरिक् पोःङ्बाल्ले़ चोगुल्ले़ मनाःल्ले़ आबाङे मेलिङ्गे़न् मेःत् कत्तुनिरो हे़क्क्याङ् मे़न्छुमाॽइल्ले़आङ् आबाङे इत्थुङ्गे़न् ये़म्बाॽ कत्तुनिरो॥ 3 हे़क्क्याङ् ये़म्बाॽइन् आबाङे कुमेःत्तिन्नु इम्मा पोःङ्, हे़क्केलॽरिक्के मेःत्तिन्नाङ् आबाङे कुये़म्बाॽइन्नु इम्मा पोःङ्लो॥ हे़क्केलॽरिक् मेःक्खिम्ले़न् लक्पे़न्नो मे़न्अत्छिङ्ङे चोःक्मा पोःङ्लो॥ 4 मेःत्तिल्ले़ कुधक् सम्दाङ् आबाङे युक् मे़गत्तुन् कर कुये़म्बाःल्ले़ कत्तुॽरो॥ हे़क्केलॽरिक्के ये़म्बाःल्ले़आङ् कुधक् सम्दाङ् आबाङे युक् मे़गत्तुन् कर कुमेःत्तिल्ले़ कत्तुॽरो॥ 5 मेःत् ये़म्बाॽग मे़न्नाॽसिङ्ङे मे़न्अत्छिङ्ङे सोरिक् इम्मा पोःङ्लो॥ तुवा चोःक्मा फाॽआङ् कुभा ये़म्ले़ लागिरक् निङ्वाॽ तङ्माआङ् वेॽ वाॽमा पोःङ्लो॥ हे़क्क्याङ् याम्मो खिनिॽग सोरिक् वये़म्मे़ॽओ मे़ःन्ने़ फाॽग्र याम्थक्निङ्वाॽ थम्मा मे़न्छुक्मना निङ्वाॽबाल्ले़ चोगुल्ले़ माफे़न्साम्मिल्ले़ लायो चोःक्मा के़बाङ्घिॽरो॥ 6 कङ्ग इङ्जाःङ् कुइसिःक्क मे़ःन्, कर हे़क्के चोःक्मा सुजा पिनिङ्बारो॥ 7 काक् मनाहाॽरे़ इङ्गाॽ कुइसिःक् मेःक्खिम् मे़न्जोःक्के मे़वाॽनि के़लॽबा निङ्वाॽ चोगुङ्लो॥ कर काक् मनाहाॽरे़ग निङ्वाॽफुमाङ्लाम् मेःक्खिम् चोःक्माआङ् वाॽमा इग्र मेःक्खिम् मे़न्जोःक्के वाॽमा पर्धाःम् मे़घोःसुआङ् वाॽरो॥ 8 आल्ल मेःक्खिम् मे़न्जोःक्के के़वाॽबाहाॽ नु मेमेदुमाहाॽ अक्खे मे़त्तुङ्सिङ्लो–खे़ङ्हाॽग इङ्गाॽ कुइसिःक्के मेःक्खिम् मे़न्जोःक्के मे़वाॽइल्ले़ नुःबा पोःङ्लो॥ 9 कर खे़ङ्हाॽरे़ आबाङे याम्सोःप्मान् युक्मा मे़न्छुक्तुन्ने़ फाॽग्र खे़ङ्हाॽरे़ मेःक्खिम् मे़जोगुरए पोःङ्, थेआङ्भे़ल्ले़ खे़ङ्हाॽ चाराम्मा निङ्वाॽइल्ले़ ये़ःङ्सिङ्मार वाॽमानुःल्ले़ मेःक्खिम् चोःक्माए नुःबा पोःङ्लो॥ 10 आल्ल मेःक्खिम् के़जोःक्पाहाॽग इङ्गाॽ अक्खेलॽरिक् इङ्जाःङ् पिरुङ्सिङ्लो (इङ्गाॽग मे़ःन्, कर दाङ्बाल्ले़रो) मेलिङ्गे़न् मेःत्तिन् इत्थुङ्गे़न् कुये़म्बाःन्नु से़म्माआङ् वाॽमा मे़नुॽने़न्लो॥ 11 कर खे़न् वेॽ से़न्नाङ् वाॽने़ फाॽग्र हाराॽ मेःक्खिम् मे़न्जोःक्के वाॽनिरो, मे़ःन्ने़ फाॽग्र इत्थुङ्गे़न् कुये़म्बाःन्नु नादङ् चोःक्मा पोःङ्लो॥ हे़क्केलॽरिक् इत्थुङ्गे़न् ये़म्बाःल्ले़आङ् मेलिङ्गे़न् कुमेःत्तिन् मे़नाॽरुन्लरो॥ 12 आल्ल खिनिॽ वेॽहाॽ अक्खे मे़त्निङ्लो (कङ्ग इङ्गाॽ आबाःन्लो, दाङ्बाल्ले़न् मे़ःन्लो) नसाःन् के़जोःक्पा नुसाॽइल्ले़ नसाःन् मे़न्जोःक्मनामा मेलिङ्गे़न् मेःत् कत्तुॽ हे़क्क्याङ् खे़ल्ले़ कुये़म्बाॽइन्नुए वाॽमा निङ्वाॽ चोगुॽने़ फाॽग्र, खे़न् नाॽमा मे़नुॽने़न्लो॥ 13 हे़क्केलॽरिक्के नसाःन् के़जोःक्मा मे़न्छुमाॽइल्ले़ नसाःन् मे़न्जोःक्मनाबा ये़म्बाॽ कत्तुॽ हे़क्क्याङ् खे़न् कुमेःत्तिन्नुए वाॽमा निङ्वाॽ चोगुॽने़ फाॽग्र, खे़ल्ले़आङ् कुये़म्बाॽइन् लाप्फुमा मे़नुॽने़न्लो॥ 14 थेआङ्भे़ल्ले़ नसाःन् मे़न्जोःक्मनाबा इत्थुङ्गे़न् ये़म्बाॽइन् नसाःन् के़जोःक्मा मेलिङ्गे़न् मेःत्तिन्नु वाॽबाल्ले़ चोगुल्ले़ निङ्वाॽफुमाङ्ङो खे़न् सेसे चोःक्लो॥ हे़क्केलॽरिक्के नसाःन् के़जोःक्पा इत्थुङ्गे़न् ये़म्बाःन्नु वाॽबाल्ले़ चोगुल्ले़ खे़न् नसाःन् मे़न्जोःक्मनामा मेलिङ्गे़न् मेःत्तिन् निङ्वाॽफुमाङ्ङो सेसे चोःक्लो॥ मे़ःन्ने़ फाॽग्र खे़ङ्हाॽरे़ खुनिॽ साःहाॽ आसुत्थो मे़बोःङ्बा वये़, कर हे़क्के मे़म्बोःङ्ने़न्लो, खे़ङ्हाॽग निङ्वाॽफुमाङ्ङिल्लो सेसे मे़जोःक्लो॥ 15 हे़क्केसाङ् नसाःन् मे़न्जोःक्मनामा मेलिङ्गे़न् मेःत्तिल्ले़ इग्र इत्थुङ्गे़न् ये़म्बाॽइल्ले़ से़म्माआङ् पेःक्माए निङ्वाॽ चोगुॽने़ फाॽग्र हाराॽ पेःक्निरो॥ अक्तङ्बा याक्नाम्मो नसाःन् के़जोःक्मा मेःत् इग्र ये़म्बाॽ आत्तिन्नाङ् इभुत्तो मे़न्वाॽने़न्लो, थेआङ्भे़ल्ले़ निङ्वाॽफुमाङ्ङिल्ले़ आनिॽ सनारुङ्ङो वाॽसे़ने़ आउःत्ते़आङ् आवाॽरो॥ 16 नसाःन् के़जोःक्मा मेःत्हाॽरे़ नसाःन् मे़न्जोःक्मनाबा खिनिॽ ये़म्बाहाॽ खिनिॽ के़जोगुम्मिल्ले़ निङ्वाॽफुमाङ्ङो मे़दाबि के़लॽबान् निङ्वाॽ मे़भेःत्छे़म्मिन्ने़ॽओ॥ हे़क्केलॽरिक्के ये़म्बाहाॽरे़आङ् नसाःन् मे़न्जोःक्मनामा खिनिॽ मेःत्हाॽ खिनिॽ के़जोगुम्मिल्ले़ निङ्वाॽफुमाङ्ङो मे़दाबि के़लॽबा पाःन्निन् निङ्वाॽ मे़भेःत्छे़म्मिन्ने़ॽओ॥ 17 निङ्वाॽफुमाङ्ङिल्ले़ के़उःत्ते़ल्ले़ आक्खेलॽरिक् के़वये़, हाबा हे़क्केलॽरिक्के दाङ्बाल्ले़ सेःक्युक् के़जोगे़बाओ के़वाॽर पोःङ्लो॥ काक् सेसेहुप्लक्को बा कन्ने इङ्गाॽ आजोःक्थिम्लो॥ 18 हे़क्केसाङ् हर्दो के़हे़क्पाल्ले़ नसाःन् चोगुने़ फाॽग्र, खे़न् हर्दो मे़न्हे़क्मना कुइसिःक् पोःङ्मा मे़नुॽने़न्लो॥ हे़क्क्याङ् हर्दो मे़न्हे़क्मनाबाल्ले़ नसाःन् चोगुने़ फाॽग्र, खे़ल्ले़ हर्दो हे़क्मा मे़बोःङ्ने़ल्लो॥ 19 हर्दो हे़क्मान् 20 निङ्वाॽफुमाङ्ङिल्ले़ मनाःन् उःत्तुल्ले़ खे़न् आक्तङ्बा याक्नाम्मो वये़ हाबा हे़क्केलॽरिक्के खे़न् वाॽर पोःङ्लो॥ 21 दाङ्बाल्ले़ खे़ने़ॽ के़उःत्ते़ल्ले़ योःक् 22 थेआङ्भे़ल्ले़ दाङ्बाल्ले़ उःत्तुल्ले़ योःक् के़वाॽबा मनाःन् दाङ्बाल्ले़ चोःक्युम्भोबा कुमना पोःक्खे़आङ् वाॽरो॥ हे़क्केलॽरिक्के दाङ्बाल्ले़ उःत्तुल्ले़ चोःक्युम्भोओ के़वाॽबा मनाःङ्ग ख्रिस्तरे़ कुयोःक् पोःक्खे़आङ् वाॽरो॥ 23 निङ्वाॽफुमाङ्ङिल्ले़ यरिक् कुमे़ल्लुङ् हुङुआङ् खिनिॽ के़धे़ॽरिआङ् के़वयिॽरो॥ खे़ल्ले़ चोगुल्ले़ मे़न्छाम् योःक् मे़बोःक्खे़म्मिन्ने़ॽओ॥ 24 आमिःम् फुॽनुसाॽ नु ने़ॽनुसाॽसे, मनाःन् उःत्ते़ल्ले़ खे़न् आक्तङ्बा याक्नाम्मो वये़, हाबा हे़क्केलॽरिक्के निङ्वाॽफुमाङ्ङिन्नु वाॽर पोःङ्लो॥ 25 आल्ल मेःक्खिम् मे़न्जोःक्के के़वाॽमाहाॽरे़ खुनिॽ लागि दाङ्बालाम् थेआङ् इङ्जाःङ् इङ्गाॽ मे़गत्तुङ्ङिन्लो, कर निङ्वाॽफुमाङ्ङिल्ले़ कुलुङ्गुम्लाम्बा नसाःन्साबा मना कुइसिःक् सुजा पिनिङ्लो॥ 26 कोये़म्बा इनोगे़न् तुक्खेःल्ले़ चोगुल्ले़ आक्खेलॽरिक् खे़ने़ॽ के़वाॽ, हाबा हे़क्केलॽरिक्के के़वाॽइल्ले़ नुःबा पोःङ्लो के़लॽबा इङ्गाॽ निङ्वाॽ इःत्तुङ्लो॥ 27 हे़क्केःल्ले़ खे़ने़ॽ मेःक्खिम् के़जोगुआङ् के़वाॽने़ फाॽग्र से़म्मा निङ्वाॽ मे़जोगे़न्ने़ॽओ॥ खे़ने़ॽ मेःक्खिम् मे़न्जोःक्के के़वाॽने़ फाॽग्र मेःक्खिम् चोःक्मा निङ्वाॽ मे़जोगे़न्ने़ॽओ॥ 28 कर मेःक्खिम् के़जोगुॽने़ फाॽग्र लायो मे़बोःङ्ने़ल्लो॥ हे़क्क्याङ् मेःक्खिम् मे़न्जोःक्के के़वाॽमाल्ले़आङ् मेःक्खिम् चोगुॽने़ फाॽग्र लायो मे़जोगुन्लो॥ कर मेःक्खिम् के़जोःक्पाहाॽरे़ कन् हिङ्मन्नो इनोगे़न् तुक्खेःन् मे़दुमुॽरो॥ हे़क्क्याङ् इङ्गाॽग हे़क्तङ्बा तुक्खेओलाम्बा खिनिॽ ताङ्से़ःप्मानिङ् निङ्वाॽ चोगुङ्लो॥ 29 आमिःम् फुॽनुसाॽ नु ने़ॽनुसाॽसे, इङ्गाॽ थे पाःप्मा कोःत्तुङ्बा फाॽले़, दाङ्बान् हारा युःर पत्लो॥ 30 हे़क्क्याङ् मेरिङ् के़धक्पाहाॽ मेरिङ् मे़न्धक्मना कुइसिःक्, ओमु के़लॽबाहाॽ ओमु मे़न्लॽमना कुइसिःक् हे़क्क्याङ् चिगःक्वा के़गप्पाहाॽ थेआङ् मे़ङ्गप्मनाबा कुइसिःक् मे़वाॽनिरो॥ 31 हे़क्क्याङ् कन् इक्सादिङ् खाम्बेःक्मोबा चिगःक्वाहाॽ ओगप् के़जोःक्पाहाॽ खे़प्मो निङ्वाॽ मे़म्बिमनाबा मना कुइसिःक् वाॽमा पोःङ्लो, थेआङ्भे़ल्ले़ कन् इक्सादिङ् खाम्बेःक्मोबा पाःन्हाॽ ले़ङ्सिङ्ङाङ् पेःक्ल पत्लो॥ 32 कन् हिङ्मन्नोबा निङ्साम्मो मे़ध्ये़म्मिन्ने़ॽ के़लॽबा इङ्गाॽ निङ्वाॽ चोगुङ्लो॥ मेःक्खिम् मे़न्जोःक्के के़वाॽबा मनाःल्ले़ आक्खेलॽरिक् दाङ्बाल्ले़ कुनिङ्वाॽ तासुङ्बे फाॽआङ् निङ्साम्मो थाःरो॥ 33 कर मेःक्खिम् के़जोःक्पा मनाःल्ले़ग आक्खेलॽरिक् आमेःत्तिन् कुनिङ्वाॽ तासुङ्बे फाॽआङ् कन् इक्सादिङ् खाम्बेःक्मोबा पाःन्हाॽरे़न् निङ्साम्मो थाःरो, 34 हे़क्केलॽरिक् कुनिङ्वाॽ हाःसिङ्लो॥ मेःक्खिम् मे़न्जोःक्के के़वाॽमा मे़न्छुमाॽ इग्र सिसादिङ् मे़न्छियाॽइल्ले़ थक्किन् नु याम्साम्मिन् सेसे कप्मा फाॽआङ् दाङ्बाल्ले़ कुबाःन्हाॽओ निङ्वाॽ पिरुॽरो॥ कर मेःक्खिम् के़बोःङ्मा मे़न्छुमाॽइल्ले़ग आक्खेलॽरिक् आये़म्बाःन् कुनिङ्वाॽ तासुङ्बे फाॽआङ् इक्सादिङ् खाम्बेःक्मोबा पाःन्हाॽओ निङ्वाॽ पिरुॽरो॥ 35 इङ्गाॽग खिनिॽए नुःबा के़बोःक्खिर फाॽआङ् कन् पाःन्हाॽ मे़त्निङ्बारो॥ खिनिॽ मेःक्खिम् मे़जोगे़म्मिन्ने़ॽ फाॽआङ् साक्निङ्बाग मे़ःन्लो॥ दाङ्बाल्ले़ कुमिमिदिङ्ङो खिनिॽ निङ्वाॽ मे़न्हाःसिङ्ङे कुदोःप्मा पाःन्नो वये़म्मे़ॽ फाॽआङ् निङ्वाॽ इःत्तुङ्लो॥ 36 आत्तिन् मनाःल्ले़ खुने़ॽनु मेःक्खिम् पाःन् के़बुॽमा सिसादिङ् मे़न्छियाॽइन्नु नुःबा पाःन् मे़जोगुम्बा कुइसिःक् निङ्वाॽ इःत्तुॽआङ् खे़न् सिसादिङ् मे़न्छियाॽइन्नाङ् तुम् मे़न्छियाॽ पोःङ्ल पत्ताङ् खे़ल्ले़ खुने़ॽनु मेःक्खिम् चोःक्मा पोःङ् के़लॽबा निङ्वाॽ इःत्तुने़ फाॽग्र, खुने़ॽ कुनिङ्वाॽ कुइसिःक्के चोगुररो॥ हे़क्केःल्ले़ खे़ल्ले़ लायो मे़जोगुन्लो॥ खे़ङ्हाॽरे़ मेःक्खिम् चोःक्माए पोःङ्लो॥ 37 कर आत्तिल्ले़ आबाङे निङ्वाॽओ इगु मे़त्छिङ्ङाङ् मेःक्खिम् चोःक्माए पोःङ् के़लॽबा साक्के़ल्ले़क् होःप्पाङ् कुनिङ्वाॽ युक्मा सुक्तुॽने़ फाॽग्र खे़ल्ले़ खे़न् सिसादिङ् मे़न्छियाॽइन्नु मेःक्खिम् मे़न्जोःक्मा निङ्वाॽ चोगुॽने़ फाॽग्र नुःबाए चोगुॽरो॥ 38 खे़ल्ले़ चोगुल्ले़ आत्तिल्ले़ खे़न् सिसादिङ् मे़न्छियाॽइन्नु मेःक्खिम् चोगुॽ, खे़ल्ले़ नुःबाए चोगुॽ, कर मेःक्खिम् मे़जोगुन्ने़ फाॽग्र आल्लसाङ् नुःबा चोगुॽरो॥ 39 हे़क्केलॽरिक् ये़म्बाॽइन् हिङ्ल थारिक्लक् मेःत्तिन् कुये़म्बाःल्ले़ कुयुक्को वाॽरो॥ कर कुये़म्बाॽइन् सिःआङ्ग खे़ल्ले़ कुनिङ्वाॽ कुइसिःक् वेॽनु मेःक्खिम् चोःक्मा सुक्तुॽ, कर खे़न् मनाःङ्ग नसानिबाए पोःङ्मा पोःङ्लो॥ 40 कर आनिङ्वाॽओ खे़ल्ले़ याम्मो मेःक्खिम् मे़जोगुन्ने़ फाॽग्र कुलागि नुःबा पोःङ्, हे़क्क्याङ् कन् पाःत्तुङ्बाङ्ग निङ्वाॽफुमाङ्ङिल्ले़ कुसेसेमाङ्लाम् सुजा पिनिङ्बा फाॽआङ् इःत्तुङ्लो॥ 1 आल्ल नावाइत्लाओ तोःम्मनाबा कुजाहाॽरे़ कुयाःम्बेओ इङ्गाॽ अक्खे पाःत्तुङ्लो–आनिॽ के़रे़क्ले़ कन् पाःन्निल्ले़ कुयाःम्बेओ ने़हिनिङ्वाॽ आगत्तुम् लॽरिक् आनिःसुम्लो॥ ने़हिनिङ्वाॽइल्ले़ग आङ्दिङ् के़जोःक्पा आजोःक्लो, कर मिःम्जिःल्ले़ कुलिङ्धो आगे़त्लो॥ 2 आत्तिन् मनाःल्ले़ इङ्गाॽ से़क्खाए ले़स्सुङ् लॽरिक् निङ्वाॽ इःत्तुॽ, से़क्खाःल्ले़ ले़मा के़बोःङ्बा पाःन्हाॽ खे़ल्ले़ आल्लो थारिक् मे़ल्ले़ए वाॽरो॥ 3 कर निङ्वाॽफुमाङ्ङिन् मिःम्जि के़मे़प्पाङ्ग निङ्वाॽफुमाङ्ङिल्ले़ कुसिङ् निःत्तुॽरो॥ 4 हे़क्केःल्ले़ आल्ल नावाइत्लाहाॽओ तोःम्मनाबा कुजाःन् चामाल्ले़ कुयाःम्बेओग आक्खे फाॽले़–इक्सादिङ् खाम्बेःक्मोबा नावाइत्लाहाॽग थेसिआङ् मे़ःन्लो हे़क्क्याङ् निङ्वाॽफुमाङ्ङिन् थिक्लक् वाॽ फाॽआङ् आनिॽ आनिःसुम्लो॥ 5 हे़क्क्याङ् कुभा मनाहाॽरे़ मे़बाःत्तुबा हे़क्के साङ्ग्राम्पेदाङ्ङो नु इक्सादिङ् खाम्बेःक्मो माङ्-साम्माङ्हाॽ मे़वाॽबिला (से़क्खाःल्ले़ अक्तङ्बा यरिक् “माङ्-साम्माङ्हाॽ” नु “दाङ्बाहाॽ” मे़वाॽमु), 6 कर आनिॽलागिग थिक्लक् निङ्वाॽफुमाङ् वाॽरो॥ खुने़ॽग पानुदिङ् पाः निङ्वाॽफुमाङ्लो हे़क्क्याङ् खुने़ॽलाम्बाए काक् पाःन्हाॽरे़न् नावागे़न् चइःत् पोःक्खे़आङ् खुने़ॽ कुलागिए आनिॽ आहिङ्लो॥ हे़क्क्याङ् थिक्लक् दाङ्बा वाॽरो, खुने़ॽग ये़सु ख्रिस्तरो॥ खुने़ॽलाम्बाए काक् पाःन्हाॽरे़न् नावागे़न् चइःत् पोःक्खे़ हे़क्क्याङ् खुने़ॽलाम्बाए आनिॽ आहिङ्लो॥ 7 कर कन् पाःन्निङ्ग के़रे़क् मनाहाॽरे़ मे़ल्ले़स्सुन्लो॥ आल्लसाङ् कुभा मनाहाॽरे़ग उन्छेःन् नावाइत्लाहाॽ माङ्मे़घयुबाल्ले़ चोगुल्ले़ कुजा मे़जःल्ले़ खे़न् नावाइत्लाहाॽओ तोःम्मनाबान् मे़इःत्तुॽरो॥ हे़क्केलॽरिक् खुनिॽ खासिङ्ङिङ्ग के़धुम्बा मे़जोःक्ने़म्बाल्ले़ चोगुल्ले़ खासिङ्ङिन् आसुत्थो पोःक्खे़आङ् वाॽरो॥ 8 कर से़क्खाःल्ले़ चामनाबा कुजाःल्ले़ निङ्वाॽफुमाङ्ङो नुःबा आन्जोःक्ने़न्लो॥ आनिॽ कुजा आन्जाम्मिन्निल्ले़ ताप्फे़ःम्बा आबोःङ्बा नु आजाम्मिल्ले़ नुःबा आबोःङ्बा मे़ःन्लो॥ 9 कर खिनिॽ चामा थुङ्माओबा चोःक्युम्भोःल्ले़ चोगुल्ले़ नसाःन्नो मे़न्धुम्मनाबा नसानिबाहाॽ लायोओ मे़न्धाने़न्ल फाॽआङ् सिङ्सिङ् ये़क्ये़क् लॽरे़म्मे़ॽओ॥ 10 थेआङ्भे़ल्ले़ खिनिॽ चामा थुङ्मा नुॽ लॽरिक् साम्जिक् के़गप्पाहाॽरे़ नावाइत्ला के़युङ्बा माङ्हिम्मो के़जाम्ल के़युङिबा नसाःन् के़सुःम्बाहाॽरे़ के़म्निःसिल्ले़ खे़ङ्हाॽरे़ नावाइत्लाओ तोःम्मनाबा कुजाःन् चामा मे़न्आःन्छिङ्ङिम्बि? 11 हे़क्केलॽरिक् खे़ने़ॽ सिक्कुम्दिङ् के़निङ्वाॽइल्ले़ नसाःन्नो मे़न्धुम्मनाबा नसानिबे़न् फे़त्के़लाःन्दुॽरो॥ कर खे़ल्ले़ कुलागि ख्रिस्ते़न् स्ये़आङ् वाॽरो॥ 12 हे़क्केलॽरिक् खे़ने़ॽ नसानिबाल्ले़ कुदक्ले़ङ्वाओ लायो के़जोगुॽ, हे़क्क्याङ् नुःबा मे़ःन् फाॽआङ् इःत्तुबान् चोःक्मा के़बाङ्घुल्ले़ ख्रिस्तरे़ कुदक्ले़ङ्वाओ लायो के़जोगुॽरो॥ 13 खे़ल्ले़ चोगुल्ले़ इङ्गाॽ चाङ्बा कुजाःल्ले़ वेॽ नसानिबे़न् लायोओ थाने़ फाॽग्र इङ्गाॽ आप्फाल्ले़आङ् सा मे़जाआन्लो॥ हे़क्केलॽरिक् खुने़ॽ लायोओ मे़धाने़न्लरो॥ 1 वेॽहाॽ कुइसिःक् इङ्गाॽ चोःक्युम्भो मे़गत्तान्बि? इङ्गाॽ सेःक्युक्मिबा मे़ःन्नाबि? आनिॽ दाङ्बा ये़सुःन् इङ्गाॽ आबाङे आमिक्किल्ले़ मे़न्निःबे़न्बि? दाङ्बाओ याम्बुधिक्पा आयाःम्बक्किन् खिनिॽनिङ्ङे मे़ःम्बि? 2 वेॽहाॽरे़ इङ्गाॽ सेःक्युक्मिबा लॽरिक् मे़न्इःत्तान्छाङ् खिनिॽलागिग सेःक्युक्मिबाआएरो॥ इङ्गाॽ दाङ्बाल्ले़ कुसेःक्युक्मिबाआ फाॽआङ् खिनिॽए तसि-पर्माङ्गि के़वयिॽरो॥ 3 इङ्गाॽ आयुक्किल्ले़ कुदक्ले़ङ्वाओ के़बाःप्पाहाॽग बाकन् नोगप् पिरुङ्सिङ्लो॥ 4 आनिगे़ याःम्बक्लाम् चामा थुङ्मा मे़घोःसुम्बे़म्बि? 5 वेॽ सेःक्युक्मिबाहाॽ नु दाङ्बाल्ले़ कुन्साॽसि हे़क्क्याङ् पत्रुससि कुइसिःक् आबाङे नसानिमा मेःत्तिन्नु लाम्दिःक् चोःक्मा युक् मे़गत्तुम्बान्बि? 6 इ बरनाबास नु इङ्गाॽरक् हिङ्ब्राम्ले़ लागि याःम्बक् चोःक्मा पोःङ्बाबि? 7 आत्तिन् मनाःल्ले़ आबाङे पेःक्याङ्ङो थक्सुबा याःम्बक् चोगुबे? आत्तिल्ले़ चे़ल्ले़क्सेॽइक् लेःत्तुआङ् कुजाॽइन् मे़जने़न्बे? आत्तिल्ले़ पिप्माःन् हिङ्घुआङ् खे़ल्ले़ कुनुःन् मे़धुङुन्बे? 8 कङ्ग इङ्गाॽ मे़न्छाम् कुसिङ् निःप्मोरक् पाःत्तुङ्बा मे़ःन्लो, कर साम्योथिम्मिल्ले़आङ् बा अक्खे मे़बाःत्तुम्बि? 9 थेआङ्भे़ल्ले़ मोसारे़ साप्तुबा साम्योथिम्मो अक्खेलॽरिक् साप्ते़आङ् पत्, “चा के़नुक्पा पित्तिल्ले़ कुमुराओ चःप्पिल्ले़ मे़सुःप्ते़न्ने़ॽओ,” 10 से़क्खासाङ् कङ्ग आनिॽ लागिए पाःत्तुबा मे़ःम्बि? ओरो, थेआङ्भे़ल्ले़ प्याङ्सिगे़न् इक्ताप् के़धोःङ्बा नु पोगुगे़न् कुजा के़सुम्बे़ल्ले़ पोगुगे़न् कुजाःल्ले़न् लक् खोःमा खुने़ॽ निङ्साङ् चोगुॽरो॥ 11 खिनिॽ लुम्मो आनिगे़ याम्साम्गे़न् याॽरिःम्बान् हे़ॽरुम्बे़आङ् वयिगे़ने़ फाॽग्र खिनिॽलाम् आनिगे़ चाहाबा चोगिगे़बा पाःन्हाॽ खोःमा मे़सुक्तुम्बे़न्बि? 12 वेॽहाॽरे़ खिनिॽलाम् कुभाॽ खोःमा युक् मे़गत्तुने़ फाॽग्र आनिगे़ग खे़ङ्हाॽनुःल्ले़आङ् यरिक् मे़गत्तुम्बे़न्बि?कर आनिगे़ग कन् युक्किन् ओगप् मे़जोगुम्बे़न्लो॥ खे़ल्ले़ कुले़क्वाग ख्रिस्तरे़ कुसुनाइङ्ङिन् खःमा मे़ःन् फाॽआङ् थेसाङ् थरुम्बे़रो॥ 13 माङ्हिम्मो याःम्बक् के़जोःक्पाहाॽरे़ माङ्हिम्मोलाम् तोःम्मनाबा कुजाःन् मे़घोःसुॽ हे़क्क्याङ् ले़त्तिङ् तोःम्मादे़न्नो सेवा के़जोःक्पाहाॽरे़ ले़त्तिङ् तोःम्मादे़न्नो तोःम्मनाबा पाःन्हाॽलाम्मे लक् मे़घोःसुॽ के़लॽबान् निङ्वाॽ मे़ङ्घोए के़वयिॽबि? 14 हे़क्केलॽरिक्के दाङ्बाल्ले़आङ् सुनाइङ् इङ्भन् के़जोःक्पाहाॽ सुनाइङ्लाम्बाए मे़हिङ्ल फाॽआङ् इङ्जाःङ् चोगुआङ् वाॽरो॥ 15 कर इङ्गाॽग आत्तिन्नाङ् कन् युक्हाॽ ओगप् मे़न्जोःक्पान्लो॥ हे़क्क्याङ् कन् पाःन्हाॽ इङ्गाॽ आलागि याप्मि के़जोगि के़बिरिर के़लॽबा निङ्साङ्नु कन् सक्इङ्घङ्ङिन् साप्तुङ्ङाङ् हाक्निङ्बा मे़ःन्लो॥ कन् पाःन्नो चोगुङ्बा आङ्दिङ्ङिन् कुभा मनाहाॽरे़ हने़ मे़जोगुने़ फाॽग्र सिःआसाङ् पोःङ्लो॥ 16 हे़क्केसाङ् सुनाइङ् इङ्भोःसुङ्ङिल्ले़ इङ्गाॽ आङ्दिङ् मे़जोःक्कान्लो॥ थेआङ्भे़ल्ले़ इङ्गाॽ सुनाइङ्ङिन् इङ्भन् चोःक्माए के़बोःङ्बा पोःक्खे़आङ् वाॽरो॥ इङ्गाॽ सुनाइङ् इङ्मे़भोःआन्ने़ फाॽग्र चिःत्ताङ् स्याङ्लो! 17 कर कन् इङ्गाॽ आबाङे आनिङ्वाॽलाम्मे चोगुङ्ने़ फाॽग्र हाङ्से़म्मिन् खोःसुङ्लो, कर आबाङे आनिङ्वाॽलाम् मे़जोःक्कान्छाङ् निङ्वाॽफुमाङ्ङिल्ले़ नासाॽराङ्ङाङ् पिराङ्बा सुनाइङ् इङ्भोःमा लक्पे़न्निन्लक् चोगुङ्लो॥ 18 हे़क्केःल्ले़ आहाङ्से़म्मिङ्ग थेःन्बे? आहाङ्से़म्मिन् बा कन्लो–इङ्गाॽग सुनाइङ् इङ्भोःसुङ्ङिल्ले़ नाम्याक् मे़ःन्ने इङ्भोःमा पोःङ्ल॥ हे़क्केलॽरिक् सुनाइङ् इङ्भोःसुङ्ङिल्ले़ खोःमा के़बोःङ्बा आयुक्हाॽ ओगप् मे़जोःक्कान्लो॥ 19 इङ्गाॽग चोःक्युम्भोओ वाॽआ हे़क्क्याङ् आत्तिन् मनाहाॽरे़आङ् खुनिॽ युक्को होःप्पासाङ् यरिक् मनाहाॽ ख्रिस्तओ ताःप्मासि फाॽआङ् काक् मनाहाॽरे़ खुनिॽ योःक् पोःक्खाङ्लो॥ 20 यहुदिहाॽनु वयाङ्ङिल्ले़ खे़ङ्हाॽ ख्रिस्तओ ताःप्मासि फाॽआङ् यहुदिहाॽ कुइसिःक् पोःक्खाङ्लो॥ हे़क्केलॽरिक् इङ्गाॽ साम्यो इङ्जाःङ्रे़ कुयुक्कोग होःप्ताङ्साङ् साम्यो इङ्जाःङ्ङो के़वाॽबाहाॽनु वयाङ्ङिल्ले़ खे़ङ्हाॽ ख्रिस्तओ ताःप्मासि फाॽआङ् खे़ङ्हाॽ कुइसिःक्के पोःक्खाङ्लो॥ 21 साम्योथिम् मे़न्नाःप्मना थिम्मे़न्दङ् सुवाङ्हाॽनु वयाङ्ङिल्ले़ खे़ङ्हाॽ ख्रिस्तओ ताःप्मासि फाॽआङ् इङ्गाॽआङ् थिम्मे़न्दङ् सुवाङ्हाॽ कुइसिःक्के पोःक्खाङ्लो॥ (निङ्वाॽफुमाङ्ङिल्ले़ कुसाम्योथिम्मिन् मे़नाःत्तुङ्ङिन्बा मे़ःन्, कर इङ्गाॽग ख्रिस्तरे़ कुसाम्योथिम्मिन् इःत्तुङ् नाःत्तुङ्लो॥) 22 नसाःन् के़बाःक्पाहाॽनु वयाङ्ङिल्ले़ खे़ङ्हाॽ ख्रिस्तओ ताःप्मासि फाॽआङ् इङ्गाॽआङ् नसाःन् के़बाःक्पा कुइसिःक्के पोःक्खाङ्लो॥ कुभा मनाहाॽ ख्रिस्तओ ताःप्मा सुक्तुङ्सिङ्बि फाॽआङ् काक् मनाहाॽ कुइसिःक्के पोःक्खाङ्लो॥ 23 सुनाइङ्ङिल्ले़न् मुॽइसाम्हाॽ खोःमा सुक्तुङ्ल फाॽआङ् सुनाइङ्ङिल्ले़ लागिए कन् काक् पाःन्हाॽ चोगुङ्लो॥ 24 लोःक्लोःक्के हक्चाःत् नाःन्बोओ काक् मनाहाॽ मे़लोःक्, कर थिक्ले़रक् थुम्घोःन् खोःसुॽ के़लॽबा पाःन्निन् खिनिॽ के़निःसुम्लो॥ खे़ल्ले़ चोगुल्ले़ थुम्घोःन् खोःमा फाॽआङ् लोःक्ते़म्मे़ॽओ॥ 25 आल्ल हक्चाःत् के़जाःप्पा के़रे़क्ले़ के़साक्पा सधासिङ्मा मे़जोगुॽरो॥ खे़ङ्हाॽरे़ के़मे़क्पा के़बेःक्पा तिचः खोःसे़ हे़क्के मे़जोगुॽ, कर आनिॽग आप्फाल्ले़आङ् मे़म्मे़क्मनाबा थुम्घोगे़न् तिचः खोःसे़ हे़क्के आजोगुम्लो॥ 26 खे़ल्ले़ चोगुल्ले़ इङ्गाॽग तारप् मे़ःन्ने मे़लोःक्कान्लो॥ हे़क्क्याङ् हुक्पुत्तिल्ले़ सुरित्माओ के़हिप्पा कुइसिःक्काङ् मे़जोःक्कान्लो॥ 27 वेॽहाॽ सुनाइङ् इङ्भोःसुङ्सिङ्ङाङ् आबाङेग सुम्बोधा मे़ःन्नेबा मे़बोःङ्ङान्ल फाॽआङ् नासिङ्गे़न् आधक्किन् इङ्गाॽ आयुक्को कत्तुङ् हे़क्क्याङ् आयोःक् चोगुङ्लो॥ 1 आमिःम् फुॽनुसाॽ नु ने़ॽनुसाॽसे, आनिॽ सुधे़बा ताक्थे़बाहाॽ एःक्सादे़न्नो मोसाःन्नु लाम्दिःक् मे़जोगे़ल्ले़ थे पोःक्खे़ के़लॽबा पाःन्निन् निङ्वाॽ मे़भेःत्छे़म्मिन्ने़ॽ के़लॽबा आनिङ्वाॽ वाॽरो॥ खाप्मिःप्पाल्ले़ खुनिॽ लाम्दिःक्को लाम्लोसुसिर खे़ङ्हाॽ के़रे़क् वाहङ् लुम्मो मे़बोःक्खे़र मे़बेरो॥ 2 खे़ङ्हाॽ के़रे़क् खाप्मिःत्तो नु वाहङ्ङो मोसाःन् मे़दिम्दुल्ले़ बप्तिस्मा मे़बोःक्खे़रो॥ 3 खे़ङ्हाॽ के़रे़क्ले़ग लत्थिक् परिक्ले़न् याम्साम्गे़न् कुजा मे़ज, 4 हे़क्क्याङ् लत्थिक् परिक्ले़न् याम्साम्गे़न् च्वाःत्तिन् मे़धुङुरो॥ थेआङ्भे़ल्ले़ खे़ङ्हाॽनुए लाम्दिःक् के़जोःक्पा याम्साम्गे़न् लुङ्ङोनु के़लःम्बा च्वाःत्तिन् मे़धुङुआङ् मे़वये़, हे़क्क्याङ् खे़न् लुङ्ङिङ्ग ख्रिस्ते़न् वये़रो॥ 5 हे़क्केसाङ् खे़ङ्हाॽओ यरिक्नु निङ्वाॽफुमाङ्ङिल्ले़ कुसिराॽ मे़धाङे़न्, हे़क्केःल्ले़ खे़ङ्हाॽ एःक्सादे़न्नोए मे़स्ये़रो॥ 6 आल्ल कन् काक् पाःन्हाॽग आनिॽ निङ्वाॽइन् खे़ङ्हाॽरे़ मे़जोगुबा हे़क्के फे़न्पाःन्नो मे़बत्तिन्ल फाॽआङ् आनिॽ लागि कुबि पोःक्खे़आङ् वाॽरो॥ 7 खे़ङ्हाॽओ कुभारे़ नावाइत्लाःन् माङ्मे़घयुबा कुइसिःक् मे़घये़म्मिन्ने़ॽओ॥ थेआङ्भे़ल्ले़ साम्योसाप्लाओ अक्खे साप्ते़आङ् पत्, “मनाहाॽ चामा नु थुङ्माओ मे़युङ्सिङ्, हे़क्क्याङ् मे़बोगे़आङ् खुनिॽ निङ्वाॽ पाःप्पाःत् मे़जोगुरो॥” 8 खे़ङ्हाॽओ कुभारे़ मे़जोगुबा कुइसिःक् आनिॽग चाराम्मा याःम्बक् चोःक्मा मे़नुॽने़न्॥ खे़ङ्हाॽओ थिक् ये़न्नोए हे़न्छिङ् ने़त्-सुम् (२३,०००) मनाहाॽ मे़स्ये़रो॥ 9 खे़ङ्हाॽओ कुभारे़ मे़जोगुबा कुइसिःक् आनिॽग दाङ्बाल्ले़ कुनिङ्वाॽ साॽमा मे़नुॽने़न्लो॥ खे़ङ्हाॽरे़ हे़क्के मे़जोगुबाल्ले़ चोगुल्ले़ असेःक्पाहाॽरे़ मे़अःगुसिआङ् यरिक् मे़स्ये़रो॥ 10 हे़क्केलॽरिक् खे़ङ्हाॽओ कुभारे़ मे़जोगुबा कुइसिःक् आनिॽ कानाक्नाक् लॽमा मे़नुॽने़न्लो॥ हे़क्के मे़जोगुबाल्ले़ चोगुल्ले़ मे़म्भै के़जोःक्पा माङ्लाइङ्बाल्ले़ से़रुसिरो॥ 11 कन् हिन्दोःक्हाॽग आनिॽ लागि कुबि कुइसिःक् पोःक्खे़आङ् आनिॽ लागि साम्दिङ् पोःङ्ल फाॽआङ् खे़न् साप्ते़बारो॥ आनिॽग कन् इक्सादिङ् खाम्बेःक्माल्ले़ कुनुप्मा ये़म्मो के़प्मा आइःत्ते़आङ् आवाॽरो॥ 12 नुःरिक् ये़प्पा के़लॽबे़न् सिङ्सिङ् ये़क्ये़क् लॽररो, मे़ःन्ने़ फाॽग्र खे़न् चोःन्लो॥ 13 खिनिॽ हिङ्मन्नो के़दाःबा काक् हङ्साॽमाहाॽ मे़न्छाम् याप्मि लुम्मो के़दाःबा कुइसिःक् चोःक्लो॥ निङ्वाॽफुमाङ्ङिङ्ग नसाःन्साबा चोःक्लो॥ खुने़ॽग खिनिॽ थम्मा के़न्छुक्तुम्मिम्बा हङ्साॽमाओ थाःमा के़म्बाङ्घिन्लो॥ कर थम्मा के़सुक्तुम्ल फाॽआङ् खिनिॽ हङ्साॽमाओ के़ध्ये़ॽइल्ले़ खुने़ॽए खे़प्मोलाम् ताङ्से़ःप्सिङ्मा लाम्माङ् के़बिरिॽरो॥ 14 खे़ल्ले़ चोगुल्ले़ आमिःम् फुॽनुसाॽ नु ने़ॽनुसाॽसे, नावाइत्ला माङ्घःमालाम् लाःत्लाःत् वये़म्मे़ॽओ॥ 15 खिनिॽग खासिङ् के़निःप्पानिङ् फाॽआङ् मे़त्निङ्लो॥ खे़ल्ले़ चोगुल्ले़ इङ्गाॽ थे मे़त्निङ्ल पत्ता, खे़न् नुःरिक्काङ् इःत्ते़म्मे़ॽओ॥ 16 दाङ्बाल्ले़ कुसाभाङ्जाओबा चल्लङ्ना खोर्याःन् आयाङ्सिङ्ङाङ् निङ्वाॽफुमाङ्ङिन् आनिॽ नोगे़न् आबिरुम्॥ हे़क्क्याङ् खे़न् चल्लङ्ना खोर्यालाम् आधुङुम्मिल्ले़ ख्रिस्तरे़ कुमाक्खिॽओ लक् आमे़त्छिङ् मे़ःम्बि? हे़क्क्याङ् आनिॽ आघे़ःक्खुम्बा खरे़ःङ्ङिन् आजाम्मिल्ले़ ख्रिस्तरे़ नासिङ्गे़न् कुधक्को लक् आमे़त्छिङ् मे़ःम्बि? 17 आनिॽ के़रे़क्ले़ लत्थिक् खरे़ःङ्ङिन् आजाम्बाल्ले़ चोगुल्ले़ आनिॽग यरिक् आवाॽसाङ् लत्छा नासिङ्गे़न् थक्कोबासिरो॥ 18 इस्राइलस्मा मनाहाॽ ओमे़त्ते़म्सिम्मे़ॽओ–सिदुङ्जभा चोःक्मनाबा कुजा के़जाबाहाॽ ले़त्तिङ् तोःम्मादे़न्नोबा सेवारे़न् लक्मे़लोःसिङ्लो॥ 19 इङ्गाॽ थे पाःप्मा कोःत्तुङ्ल पत्ताबे? नावाइत्लाओ तोःम्मनाबा फाॽइन् थे़माबे, इग्र नावाइत्लाहाॽ थेसिआङ्बे? 20 थेसिआङ् मे़ःन्लो! कर खे़ङ्हाॽरे़ मे़दोःन्दुबा सिदुङ्जभाःङ्ग निङ्वाॽफुमाङ्ङिन् मे़ःन्, कर फे़न्साम्हाॽओ मे़दोःन्दुबारो॥ खिनिॽ फे़न्साम्हाॽनु मे़गाम्मासिम्मिन्ने़ॽ के़लॽबा आनिङ्वाॽ वाॽरो॥ 21 हे़क्केःल्ले़ खिनिॽ दाङ्बाल्ले़न् नु फे़न्साम्मिल्ले़न् चल्लङ्ना खोर्याओलाम् सोसोरिक् थुङ्मा के़न्छुक्तुम्मिल्लो॥ हे़क्केलॽरिक्के दाङ्बाल्ले़न् नु फे़न्साम्हाॽरे़ खुनिॽ साभाङ्जालाम् सोसोरिक् चामा के़न्छुक्तुम्मिल्लो॥ 22 आनिॽ दाङ्बाल्ले़ कुनाहे़न्ल चोःक्मा आगोःत्तुम्बाबि? आनिॽ खुने़ॽनुःल्ले़आङ् के़धुम्बा आजोःक्पि? 23 खिनिॽ कुभारे़ के़बाःत्तुम्, “के़रे़क् पाःन्हाॽ चोःक्मा नुॽ” कर के़रे़क्ले़ इन्धाःङ् आम्बिने़न्॥ “के़रे़क् पाःन्हाॽ चोःक्मा नुॽ” के़बाःत्तुम्, कर के़रे़क्ले़ग याःम्बक् आम्बिने़न्लो॥ 24 आत्तिल्ले़आङ् आप्फेःक् लागिरक् नुःबा पोःङ्ल के़लॽबा निङ्वाॽ चोःक्मा मे़नुॽने़न्, कर वेॽहाॽरे़लागिआङ् नुःबा पोःङ्ल के़लॽबा निङ्वाॽ चोःक्मा पोःङ्लो॥ 25 पाङ्जुम्मो मे़सङ्घुबा थे साःसाङ् कन् सिदुङ्जभा चोःक्मनाबा साबि मे़ःम्बि लॽरिक् सेःन्मे़न्दोःए चे़म्मे़ॽओ॥ 26 थेआङ्भे़ल्ले़ “इक्सादिङ् खाम्बेःक्मान् नु खे़प्मो के़वाॽबा काक् पाःन्हाॽग दाङ्बाल्ले़न्नेरो॥” 27 नसाःन् मे़न्जोःक्मनाःल्ले़ कुहिम्मो खे़ने़ॽ चाजासे़ के़उःत्ताङ् पेःक्मा के़सिराॽ थाङ्ने़ फाॽग्र के़बिबा थे़मा साःसाङ् सिदुङ्जभा चोःक्मनाबा साबि मे़ःम्बि लॽरिक् सेःन्मे़न्दोःए च्ये़ॽओ॥ 28 कर आत्तिल्ले़, कङ्ग सिदुङ्जभा चोःक्मनाबा सा फाॽआङ् के़मे़त्ने़ फाॽग्र खे़न् के़बाःप्पा मनाःल्ले़ कुघासिङ्ले़ लागि खे़न् साःन् मे़ज्ये़न्ने़ॽओ॥ 29 के़निङ्वाॽरे़ मे़ये़ःक्खुन्छाङ् खे़न् के़बाःप्पा मनाःल्ले़ कुनिङ्वाॽरे़ ये़ःक्खुबिला फाॽआङ् पाःत्तुङ्बारो॥आल्ल खिनिॽ कुभारे़ अक्खे के़बाःत्तुम्बिला, “थेआङ् वेॽ मनाःल्ले़ कुघासिङ्ङिल्ले़ आजोःक्युम्भोःन् साक्तुबाबे? 30 इङ्गाॽ नोगे़न् पिरुङ्ल चाङ्ने़ फाॽग्र थेआङ् निङ्वाॽफुमाङ्ङिन् नोगे़न् पिरुङ्बा पाःन्नो वेॽहाॽ इङ्गाॽ आदक्ले़ङ्वाओ चे़ॽया इङ्दो मे़बाःप्पाबे?” 31 खे़ल्ले़ चोगुल्ले़ खिनिॽ थे के़जाम्, थे के़धुङुम् हे़क्क्याङ् थे के़जोगुम्साङ् निङ्वाॽफुमाङ्ङिल्ले़ कुमिमिदिङ्ङिल्ले़ लागि काक् चोगे़म्मे़ॽओ॥ 32 खिनिॽ के़जोगुम्बा याःम्बक्लाम्बा यहुदि इग्र वेॽ सुवाङ्बा मनाःन् इग्र निङ्वाॽफुमाङ्ङिल्ले़ कुसेसेहुप्लक्किन् खःसुर मे़याःन्दाम्मिन्ने़ॽओ॥ 33 इङ्गाॽआङ् काक् परिक्ले़न् के़रे़क् मनाहाॽरे़ खुनिॽ निङ्वाॽ ताःमा पिमासि इःत्तुङ्लो॥ इङ्गाॽग आबाङे नुःबा पोःङ्मा मे़गोःत्तान् कर मनाहाॽ ताङ्मे़से़ःप्ल फाॽआङ् के़रे़क् मनाहाॽरे़ लागि नुःबा पोःङ्ल के़लॽबा निङ्वाॽ चोगुङ्लो॥ 1 खे़ल्ले़ चोगुल्ले़ इङ्गाॽ ख्रिस्तरे़ कुजोःङ् इःत्तुङ्बा कुइसिःक्के खिनिॽआङ् इङ्गाॽ आजोःङ् इःत्ते़म्मे़ॽओ॥ 2 आल्ल काक् पाःन्नो याप्मि निङ्वाॽ के़इःत्तिबा हे़क्क्याङ् इङ्गाॽ हुॽनिङ्बा निसाम्मिन् के़इःत्तुम् के़नाःत्तुम्बाओ खिनिॽ नारा फोःसुङ्लो॥ 3 हे़क्क्याङ् ये़म्बित्छाॽहाॽरे़ खुनिॽ थे़गेःक्पाङ्ग ख्रिस्तरो, मे़न्छुमाहाॽरे़ खुनिॽ थे़गेःक्पाङ्ग खुनिॽ ये़म्बाॽरो, हे़क्क्याङ् ख्रिस्तरे़ कुधे़गेःक्पाङ्ग निङ्वाॽफुमाङ्ङिल्लो के़लॽबा पाःन्निन् निङ्वाॽ खोःसे़म्मे़ॽ फाॽआङ् आनिङ्वाॽ वाॽरो॥ 4 कुधे़गेःक् के़दे़प्पाआङ् तुवा के़जोःक्पा इग्र माङ्निङ्वाॽपाःन् के़बाःप्पा ये़म्बित्छाॽइल्ले़ कुधे़गेःक्पा ख्रिस्ते़न् हिनाःम् मे़त्तुॽरो॥ 5 कुधे़गेःक् मे़न्दे़प्पे तुवा के़जोःक्मा इग्र माङ्निङ्वाॽपाःन् के़बाःप्मा मे़न्छुमाॽइल्ले़ 6 कुधे़गेःक् मे़न्दे़प्मनामा मे़न्छुमाॽइल्ले़ कुधे़गेःक्पे़न् नःक्खुररो॥ हे़क्क्याङ् थे़गेःक्इःन् खक्मा इग्र नःङ्माङ्ग मे़न्छुमाॽइल्ले़ कुलागि कुजाःत्थि के़बेःक्पा पाःन्लो॥ खे़ल्ले़ चोगुल्ले़ खुने़ॽ कुधे़गेःक्पे़न् ते़प्मा पोःङ्लो॥ 7 कर ये़म्बित्छाॽइल्ले़ग थे़गेःक्पे़न् ते़प्मा मे़नुॽने़न्लो, थेआङ्भे़ल्ले़ खुने़ॽग निङ्वाॽफुमाङ्ङिल्ले़ कुइःत् नु कुमिमिदिङ्लो॥ कर मे़न्छुमाॽइङ्ग ये़म्बित्छाॽइल्ले़ कुमिमिदिङ्लो॥ 8 थेआङ्भे़ल्ले़ नावागे़न् चइःत्तो ये़म्बित्छाॽइङ्ग मे़न्छुमाॽलाम्बा मे़जोगे़न् कर मे़न्छुमाॽइन्ने ये़म्बित्छाॽलाम् चोःक्मनामारो॥ 9 हे़क्केलॽरिक्के ये़म्बित्छाॽइङ्ग मे़न्छुमाॽइल्ले़ कुलागि मे़जोगे़न्, कर मे़न्छुमाॽइन्ने़ ये़म्बित्छाॽइल्ले़ कुलागि चोगे़बारो॥ 10 बा खे़ल्ले़ चोगुल्ले़ माङ्लाइङ्बाहाॽरे़ खुनिॽ तगि मे़न्छुमाॽइल्ले़ इङ्गाॽ आये़म्बाॽइल्ले़ कुयुक्को वाॽआ के़लॽबा मिक्सेःन्निन् ओसेःन्धाक्से़ कुधे़गेःक्पे़न् ते़प्मा पोःङ्लो॥ 11 कर दाङ्बाल्ले़ कुमना लुम्मोग मे़न्छुमाॽइन् ये़म्बित्छाॽलाम्बा चोःक्युम्भोमा होःप्लो, हे़क्क्याङ् ये़म्बित्छाॽइन्नाङ् मे़न्छुमाॽलाम्बा चोःक्युम्भोबा होःप्लो॥ 12 थेआङ्भे़ल्ले़ नावागे़न् चइःत्तो मे़न्छुमाॽइन् 13 मे़न्छुमाॽइल्ले़ कुधे़गेःक्पे़न् मे़न्दे़प्पे निङ्वाॽफुमाङ्ङिन्नु तुवा चोःक्मा लाॽरुबि मे़ःम्बि फाॽआङ् खिनिॽ आबाङे इःत्ते़म्मे़ॽओ॥ 14 ये़म्बित्छाॽइल्ले़ग केःम्बा थे़गेःक्इ हिङ्माग कुलागि चाःत्थि के़बेःक्पा पाःन्लो फाॽआङ् चइःत्लाम्बाए कुसिङ् निःत्ते़त्लो॥ 15 कर मे़न्छुमाॽइल्ले़ग केःम्बा थे़गेःक्इ कत्तुॽने़ फाॽग्र, खे़न् खे़ल्ले़ कुमिमिदिङ्लो, थेआङ्भे़ल्ले़ केःम्बा कुधे़गेःक्इःङ्ग खुने़ॽ कुघुःङ्मा पोःङ्ल फाॽआङ् पिरे़बारो॥ 16 खे़ल्ले़ चोगुल्ले़ कुभा मनाहाॽरे़ कन् पाःन्नो पाःन्धङ् चोःक्मा निङ्वाॽ मे़जोगुने़ फाॽग्र आनिगे़ वेॽ थिम् मे़गत्तुम्बान् हे़क्क्याङ् निङ्वाॽफुमाङ्ङिल्ले़ कुसेसेहुप्लक्किल्ले़आङ् मे़गत्तुन्लो॥ 17 आल्ल कन् इङ्जाःङ्ङिन् खिनिॽ पिनिङ्ङिल्ले़ खिनिॽ नारा मे़भोःसुङ्ङिन्लो, थेआङ्भे़ल्ले़ खिनिॽग सेसेहुप्लक्को के़जुप्सिल्ले़ नुःबा पाःन् मे़ःन्, कर ताप्फे़ःम्बा पाःन्निन् के़जोगुम्लो॥ 18 थेआङ्भे़ल्ले़ काक्नु तगिग खिनिॽ सेसेहुप्लक्को के़जुप्सिल्ले़ के़से़न्नासिमु के़लॽबा पाःन्निन् खे़प्सुङ्ङाङ् वाॽरो॥ हे़क्क्याङ् खे़न् पाःन्नो मिसाक् नसाःन्नाङ् चोगुङ्लो॥ 19 खिनिॽ लुम्मो निङ्वाॽफुमाङ्ङिल्ले़ ते़न्दिङ् चोगुसिबाहाॽ वेॽ मे़धाःप्ल फाॽआङ् से़न्छिङ्माए पोःङ्लो॥ 20 खिनिॽ सोरिक् के़जुप्सिआङ् के़जाम् के़धुङुम्बाङ्ग दाङ्बाल्ले़न् साभाङ्जा मे़ःन्लो॥ 21 थेआङ्भे़ल्ले़ चाजासे़ के़युङ्ङासिल्ले़ के़रे़क्ले़ आत्तिन्नाङ् मे़न्हाङ्ङे आबाङे चाःन् चामा के़हेःक्तुम्, हे़क्क्याङ् कुभा साक्मे़न्जा मे़बोःङ्, कुभा मे़मसिङ्लो॥ 22 खिनिॽ हिम्मो चामा थुङ्मा के़न्छुक्तुम्मिम्बि? इग्र निङ्वाॽफुमाङ्ङिल्ले़ कुसेसेहुप्लक्किन् कुना के़न्छाॽरुम्मिन्नाङ् याङ्गे़साॽबाहाॽ नु थेआङ् मे़ङ्गप्मना मनाहाॽरे़ खुनिॽ ना के़धासुम् के़बिरुम्सिम्बाबि? आक्खे मे़त्निङ्बाबे? थे कन् पाःन्नो खिनिॽ नारा फोःसुङ्बाबि? से़क्खासाङ् मे़भोःसुङ्ङिन्लो! 23 थेआङ्भे़ल्ले़ दाङ्बालाम् खोःसुङ्बा निसाम्मिन् खिनिॽ पिनिङ्ङाङ् वाॽआरो–दाङ्बा ये़सुःन् इङ्ले़क्ते़बा से़न्दिक् खुने़ॽ खरे़ःङ्ङिन् खप्सु, 24 हे़क्क्याङ् निङ्वाॽफुमाङ्ङिन् नोगे़न् पिरुआङ् खरे़ःङ्ङिन् खे़ःक्खुर अक्खे मे़त्तुसि, “कन् खिनिॽ लागि नासिङ्गे़न् आधक्लो॥ इङ्गाॽ आनिङ्वाॽसोओ अक्खे चोगे़म्मे़ॽओ॥” 25 हे़क्केलॽरिक्के मे़ज मे़सुरुआङ् चल्लङ्ना खोर्याःन् याङ्सिङ्ङाङ् अक्खेलॽरिक् पाःत्तु, “कन् आमाक्खिॽइन् वदेःन्दे़आङ् निःन्धो पोःक्खे़बा कुसङ् माङ्हुप्पिन्लो॥ कन् के़धुङुम्मिल्ले़ इङ्गाॽ आनिङ्वाॽसोओ अक्खे चोगे़म्मे़ॽओ॥” 26 थेआङ्भे़ल्ले़ खिनिॽ कन् खरे़ःङ्ङिन् के़जाम्मिल्ले़ हे़क्क्याङ् कन् खोर्यालाम् के़धुङुम्मिल्ले़ दाङ्बान् मे़न्युःए थारिक् कुसिःमे़न् इङ्गे़भोःसुम्लो॥ 27 खे़ल्ले़ चोगुल्ले़ आत्तिल्ले़ कुनामे़न्छाॽ मे़त्तुर दाङ्बाल्ले़ कुघरे़ःङ्ङिन् चःॽ हे़क्क्याङ् कुघोर्यालाम् थुङुॽ खे़ल्ले़ दाङ्बाल्ले़ कुधक्किन् नु कुमाक्खिॽइल्ले़ कुदक्ले़ङ्वाओ लायो चोगुरो॥ 28 खरे़ःङ् चामा नु खोर्यालाम् थुङ्मानुःल्ले़ तगि के़रे़क्ले़ इङ्गाॽ सुम्बोधाबा चोःक्काबि मे़ःम्बि फाॽआङ् आबाङे साॽसिङ्मा पोःङ्लो॥ 29 थेआङ्भे़ल्ले़ आत्तिल्ले़ दाङ्बाल्ले़ कुधक्किन् इङ्धाःङ् मे़म्बिए खरे़ःङ्ङिन् चःॽ हे़क्क्याङ् खोर्यालाम् थुङुॽ खे़ल्ले़ आबाङे कुसम्दाङ् खासे़न्निन् तारुरो॥ 30 खे़ल्ले़ चोगुल्ले़ए खिनिॽ लुम्मो यरिक् ये़ःङ्घिःक्खिःक्पाहाॽ नु के़दुक्पा के़यॽबाहाॽ के़वयिॽ॥ हे़क्क्याङ् कुभाग मे़स्ये़ मे़बेआङ्लो॥ 31 कर आबाङे आनिॽ निङ्वाॽइन् से़क्खाए आसाॽरुम्ने़ फाॽग्र निङ्वाॽफु खुम्दिङ्ङो आन्धाने़न्लो॥ 32 निङ्वाॽफुमाङ्ङिल्ले़ आनिॽ खासे़न् आजोःक्किल्ले़ कन् इक्सादिङ् खाम्बेःक्मोबा लायोबाहाॽनु सोरिक्के फोत्याओ आन्धाःन्ने़न्ल फाॽआङ् हे़न्धिम् आयाक्लो॥ 33 खे़ल्ले़ चोगुल्ले़ आमिःम् फुॽनुसाॽ नु ने़ॽनुसाॽसे, खिनिॽ चामा थुङ्माओ के़जुप्सिल्ले़ हाङ्ङासिम्मे़ॽओ॥ 34 आत्तिन् साक्मे़न्जा वाॽ, खे़ल्ले़ हाराॽ हिम्मोए चआङ् ताररो॥ हे़क्केलॽरिक् थिक्ते़न्नो के़जुप्सिल्ले़ खुम्दिङ्ङो के़न्ध्ये़ॽइन्लरो॥ आल्ल इङ्गाॽ खिनिॽओ ताआल्ले़ वेॽ पाःन्हाॽरे़न् ओःन्धाक् पिनिङ्लो॥ 1 आल्ल आमिःम् फुॽनुसाॽ नु ने़ॽनुसाॽसे, सेसेमाङ्लाम्बाबा याम्साम्गे़न् पर्धाःम्हाॽरे़ कुयाःम्बेओ निङ्वाॽ मे़ङ्घोए के़वयिबा आनिङ्वाॽ होःप्लो॥ 2 दाङ्बा ये़सुःन् खिनिॽ नसाःन् मे़न्जोःक्के के़वयिल्ले़ कुबाःन् मे़न्लःम्मना यरिक् परिक्पा नावाइत्लाहाॽ माङ्गे़घयुम्ल ताप्के़बे़ॽरिआङ् के़वयिॽरो॥ 3 खे़ल्ले़ चोगुल्ले़ निङ्वाॽफुमाङ्ङिल्ले़ कुसेसेमाङ्ङिल्ले़ लाम्लोसुबा आत्तिल्ले़आङ् ये़सुःन् साङ्ग्रा मे़प्मा मे़सुक्तुन्लो, हे़क्केलॽरिक् सेसेमाङ्ङिल्ले़ लाम्मे़ल्लोःए थारिक् आत्तिल्ले़आङ् ये़सुःन्ने दाङ्बारो पाःप्मा मे़सुक्तुन् फाॽआङ् कुसिङ् निःत्ते़म्मे़ॽ के़लॽबा आनिङ्वाॽ वाॽ॥ 4 आल्ल यरिक् परिक्पा याम्साम्गे़न् पर्धाःम्हाॽ मे़वाॽ, कर पर्धाःम् के़बिबा सेसेमाङ्ङिन् लत्थिक्लक् वाॽरो॥ 5 हे़क्केलॽरिक्के यरिक् परिक्पा माङ्सेवाहाॽ मे़वाॽ, कर दाङ्बाग लत्थिक्लक् वाॽरो॥ 6 हे़क्केलॽरिक्के यरिक् परिक्पा याःम्बक् चोःक्मा आसुक्तुम्, कर बा लत्छा निङ्वाॽफुमाङ्ङिल्ले़ आनिॽ के़रे़क्लाम् याःम्बक् चोगुॽरो॥ 7 आल्ल सेसेहुप्लक्को कुभाॽ पिसिङ्मारे़ लागि सेसेमाङ्ङिल्ले़ कुयाःम्बक्किन् थाःप्ल फाॽआङ् याम्साम्गे़न् पर्धाःम्हाॽ काक् मनाहाॽ लत्छाआङ् मे़न्छे़न्छिङ्ङे पिरे़आङ् वाॽरो॥ 8 आल्ल सेसेमाङ्ङिल्ले़ थिक्किन् सिक्कुम्ले़न् पाःन्जाक् पिरुॽ, वेॽस्मान् हाबा खे़न् सेसेमाङ्ङिल्ले़ निङ्वाॽरे़न् पाःन्जाक् पिरुॽ॥ 9 वेॽस्मान् हाबा खे़न् सेसेमाङ्ङिल्ले़ नसाःन्ले़न् याःम्बक् चोःक्मा, हे़क्क्याङ् वेॽइन् के़दुक्पा वेःम्मा पर्धाःम्हाॽ बा खे़न् लत्छा सेसेमाङ्ङिल्ले़ पिरुॽ॥ 10 वेॽस्मान् निङ्वाॽ के़माबा याःम्बक् चोःक्मा पर्धाःम् पिरुॽ, वेॽस्मान् माङ्निङ्वाॽपाःन् पाःप्मा पर्धाःम् पिरुॽ, वेॽस्मान् नुःबा नु ताप्फे़ःम्बा याम्साम्हाॽ से़म्मा पर्धाःम् पिरुॽ, परिक् परिक्पा वेॽ पाःन्दाङ्हाॽ पाःप्मा पर्धाःम् पिरुॽ, हे़क्क्याङ् वेॽस्मान् खे़न् पाःन्दाङ्हाॽ ले़ङ्मा पर्धाःम् पिरुॽरो॥ 11 कङ्हाॽ के़रे़क् लत्छा सेसेमाङ्ङिल्ले़ कुयाःम्बक्सिरो॥ हे़क्क्याङ् खुने़ॽग कुनिङ्वाॽ कुइसिःक् कन् याम्साम्गे़न् पर्धाःम्हाॽ लत्छाआङ् मे़न्छे़न्छिङ्ङे के़रे़क् पिरुसिॽरो॥ 12 नासिङ्गे़न् थक्को यरिक् याम्लक्हाॽ मे़बत्लो॥ कन् वेॽ वेॽ याम्लक्हाॽलाम् लत्छा नासिङ्गे़न् थक् पोःङ्लो॥ हे़क्केलॽरिक् ख्रिस्तरे़ कुधक्किन्नाङ् बा हे़क्तङ्बाए चोःक्लो॥ 13 बा हे़क्केलॽरिक् आनिॽ यहुदि, थिम्मे़न्दङ् सुवाङ्बा, योःक् इग्र चोःक्युम्भोबा आत्तिन्छाङ् थिक् सेसेमाङ्ङिल्ले़ थिक् थक्को बप्तिस्मा आजोगे़आङ् वाॽ॥ हे़क्क्याङ् आनिॽ के़रे़क्ले़ लत्छा सेसेमाङ् आघोःसुम्माङ् आवाॽरो॥ 14 आल्ल नासिङ्गे़न् थक्किङ्ग लत्थिक् याम्लक्ले़रक् मे़ःन्, कर यरिक् याम्लक्हाॽरे़ चोगे़आङ् वाॽरो॥ 15 आल्ल लाङ्ङिल्ले़ “इङ्गाॽ हुक् मे़ःन्आ, हे़क्केलॽरिक् कन् थक्कोबा याम्लक् मे़ःन्नारो” पाःत्तुॽसाङ् खे़न् नासिङ्गे़न् थक्कोबा याम्लक् मे़बोःङ्ने़न्बि? 16 हे़क्केलॽरिक्के ने़क्खोॽइल्ले़ “इङ्गाॽ मिक् मे़ःन्आ, खे़ल्ले़ चोगुल्ले़ कन् थक्कोबा याम्लक् मे़ःन्नारो” पाःत्तुॽसाङ् खे़न् नासिङ्गे़न् थक्कोबा याम्लक् मे़बोःङ्ने़न्बि? 17 काक् नासिङ्गे़न् थक्किन्ने मिक् पोःक्खे़ल्ले़ग, थेःल्ले़ खे़म्मनाबाबे? काक् नासिङ्गे़न् थक्किन्ने ने़क्खोॽ पोःक्खे़ल्ले़ग, थेःल्ले़ नाम्मनाबाबे? 18 कर निङ्वाॽफुमाङ्ङिल्ले़ कुनिङ्वाॽ कुइसिःक् काक् याम्लक्हाॽ आबाङे ते़न्नो फत्छुसिआङ् पत्लो॥ 19 काक् याम्लक्किन्ने थिक् याम्लक्लक् पोःक्खे़ल्ले़ग, नासिङ्गे़न् थक्किन् आत्तो वये़बाबे? 20 कर आल्ल यरिक् याम्लक्हाॽ मे़बत्छाङ् नासिङ्गे़न् थक्किङ्ग लत्थिक्लक् वाॽरो॥ 21 मिक्किल्ले़ हुक्किन् “इङ्गाॽ खे़ने़ॽ चाहाबा मे़जोःक्कान्लो” मे़प्मा मे़सुक्तुन्लो॥ हे़क्क्याङ् थे़गेःक्किल्ले़आङ् लाङ्ङिन् “इङ्गाॽ खे़ने़ॽ चाहाबा मे़जोःक्कान्लो” मे़प्मा मे़सुक्तुन्लो॥ 22 से़क्खाःल्ले़ नासिङ्गे़न् थक्को ये़ःङ्घिःक्खिःक्पा के़धाःप्पा याम्लक्हाॽग साॽरिक् चाहाबा के़जोःक्पा चोःक्लो, 23 हे़क्क्याङ् नासिङ्गे़न् थक्को आनिॽ साॽरिक् के़ये़क्पा मे़जोःक्ने़न् लॽरिक् आइःत्तुम्बा याम्लक्हाॽग आनिॽ साॽरिक्काङ् कम्ब्राङ् आमे़त्तुम्लो॥ हे़क्क्याङ् वेॽहाॽ ओसेःन्धाक्मा मे़न्नुॽमना याम्लक्हाॽ नुःरिक्काङ् आनिॽ आदे़प्तुम्लो, 24 कर निःमा सुक्के़दे़प्पा याम्लक्हाॽ खे़म्म्याक् साॽरिक् कम्ब्राङ् आम्मे़त्तुम्मिन्लो॥ कर निङ्वाॽफुमाङ्ङिल्ले़ग साॽरिक् के़ये़क्पा निःमे़न्धाःप्मनाबा याम्लक्हाॽरे़ नुःरिक्काङ् कम्ब्राङ् मे़घोःसुनि फाॽआङ् नासिङ्गे़न् थक्को फत्छुसिआङ् पत्॥ 25 हे़क्केलॽरिक् नासिङ्गे़न् थक्को से़म्मा मे़बोःङ्ने़न्ल, कर थिक् याम्लक्किल्ले़ वेॽ याम्लक्किन् कम्ब्राङ् चोगुनि के़लॽबा कुनिङ्वाॽ वाॽरो॥ 26 नासिङ्गे़न् थक्को लत्छा याम्लक्किन् तुक्खे चाने़ फाॽग्र खे़न्नुए वेॽ काक् याम्लक्हाॽआङ् सोसोरिक् तुक्खे मे़जारो॥ हे़क्क्याङ् लत्छा याम्लक्किल्ले़ मिङ्सो इङ्धाःङ् खोःसुॽने़ फाॽग्र खे़न्नु वेॽ काक् याम्लक्हाॽआङ् सोसोरिक् मे़सःत्लो॥ 27 आल्ल खिनिॽग ख्रिस्तरे़ नासिङ्गे़न् कुधक्निङ्लो, हे़क्क्याङ् खिनिॽ के़रे़क् कुधक्किल्ले़ कुयाम्लक्निङ्लो॥ 28 निङ्वाॽफुमाङ्ङिल्ले़ ख्रिस्तरे़ कुधक् सेसेहुप्लक्को अक्खेलॽरिक् सेःक्युक् चोगुसिआङ् वाॽरो–थिक्सिगेःक्पो सेःक्युक्मिबाहाॽ,निसिगेःक्पो माङ्निङ्वाॽपाःन् के़बाःप्पाहाॽ,सुम्सिगेःक्पो सिक्साम्बाहाॽ,हे़क्क्याङ् निङ्वाॽ के़माबा याःम्बक् के़जोःक्पाहाॽ,के़दुक्पा मनाहाॽ के़वेःम्बाहाॽ,कुभाॽ के़बिबाहाॽ,लाम्गे़लोःबाहाॽ,हे़क्क्याङ् परिक्परिक्पा वेॽ पाःन्दाङ् के़बाःप्पाहाॽ॥ 29 हे़क्केःल्ले़ के़रे़क् सेःक्युक्मिबासिबि? के़रे़क् माङ्निङ्वाॽपाःन् के़बाःप्पासिबि? के़रे़क् सिक्साम्बासिबि? के़रे़क् निङ्वाॽ के़माबा याःम्बक् के़जोःक्पासिबि? 30 थे के़रे़क्ले़ के़दुक्पा मनाहाॽ वेःम्मा पर्धाःम्हाॽ मे़गत्तुबि? के़रे़क् वेॽ पाःन्दाङ् मे़बाःप्पि? के़रे़क्ले़ खे़न् पाःन्दाङ्हाॽ ले़ङ्मा मे़सुक्तुबि? 31 कर सेसेमाङ्ङिल्ले़ आबिबा के़रे़क्नुःल्ले़ नुःबा पर्धाःम्हाॽ खोःमा निङ्वाॽ चोगे़म्मे़ॽओ॥ हे़क्क्याङ् आल्ल इङ्गाॽ के़रे़क्नुःल्ले़आङ् नुःबा लाम् ओसेःन्धाक्निङ्लो॥ 1 इङ्गाॽ मे़न्छाम् याप्मिहाॽ नु माङ्लाइङ्बाहाॽरे़ खुनिॽ पाःन्दाङ्हाॽओ पाःत्तासाङ् इङ्गाॽ वेॽहाॽ लुङ्माॽ मे़दुक्तुङ्सिङ्ङिन्ने़ फाॽग्र इङ्गाॽग हयङ्किल्लिङ् के़जोःक्पा यम्बा किङ्ना नु निङ्धे़न्धे़न् के़मे़प्पा मुक्ला कुइसिःक्लक् पोःङ्ङारो॥ 2 इङ्गाॽ माङ्निङ्वाॽपाःन् पाःप्मा पर्धाःम् कत्तुङ्साङ्, के़रे़क् सिगाङ् पाःन्हाॽ नु के़रे़क् ने़हिनिङ्वाॽ कुसिङ् निःप्मा सुक्तुङ्साङ्, हे़क्क्याङ् कोःक्मा फाङ्जङ्हाॽ चप्मा नसाःन् कत्तुङ्साङ्, इङ्गाॽ वेॽहाॽ लुङ्माॽ मे़दुक्तुङ्सिङ्ङिन्ने़ फाॽग्र इङ्गाॽग थेआङ् मे़ःन्नारो॥ 3 इङ्गाॽ के़रे़क् आयाङ्साकुन्धेःन् याङ्गे़साॽबाहाॽ हाःत्तुङ्सिङ्साङ्, नासिङ्गे़न् आधक्किन् मिहाक्को याक्तुङ्साङ्, इङ्गाॽ वेॽहाॽ लुङ्माॽ मे़दुक्तुङ्सिङ्ङिन्ने़ फाॽग्र थेआङ् इन्धाःङ् मे़घोःसुङ्ङिन्लो॥ 4 मिःम्जिःल्ले़ नासि थःत्तुॽ हे़क्क्याङ् लुङ्माॽ तुक्तुसिॽ॥ मिःम्जिःल्ले़ कुना मे़हे़न्ने़न्लो, इङ्गाॽएःक् नु आङ्दिङ्ङाङ् मे़लॽने़न्लो॥ 5 मिःम्जिःङ्ग मे़हे़न्छिङ्ङिन्, आबाङे इन्धाःङ् नु आबाङे पाःन्लक् मे़गोःत्तुन्॥ मिःम्जिःङ्ग हारा कुसिक् मे़बोःक्ने़न्, फे़न् पाःन्हाॽ निङ्वाॽबो मे़युक्खुन्॥ 6 मिःम्जिःङ्ग फे़न् पाःन्हाॽओ मे़सःत्ने़न् कर से़क्खाओरक् सःत्लो॥ 7 मिःम्जिःल्ले़ के़रे़क् पाःन्हाॽओ कुभाॽ पिरुॽ, के़रे़क् पाःन्निन् नसाःन् चोगुॽ, के़रे़क् पाःन्निन् निङ्साङ् चोगुॽ, हे़क्क्याङ् के़रे़क् पाःन्हाॽ नासि थःत्तुॽरो॥ 8 मिःम्जिन् आप्फाल्ले़आङ् मे़नुप्ने़न्॥ कर माङ्निङ्वाॽपाःन्हाॽ नु वेॽ पाःन्दाङ्हाॽ नुप्, हे़क्क्याङ् ने़हिनिङ्वाॽइन् माबेःक्लो॥ 9 आनिॽ मिसाक्लक् कुसिङ् आनिःत्तुम्लो, हे़क्क्याङ् आनिॽ माङ्निङ्वाॽपाःन् मिसाक्लक् आबाःत्तुम्लो॥ 10 कर कुलिङ्धो के़गे़प्पे़न् ताःल्ले़ कुलिङ्धो मे़ङ्गे़प्मनाबान् माबेःक्लो॥ 11 इङ्गाॽ हिन्जाॽ वयाङ्ङिल्ले़ हिन्जाॽ कुइसिःक्के पाराङ्, हिन्जाॽ कुइसिःक्के कुसिङ् निःत्तुङ्, हिन्जाॽ कुइसिःक्के इःत्तुङ्, कर इङ्गाॽ थाङ्बे़न् के़राङ्ङिल्ले़ हिन्जाॽबा पाःन्हाॽ ले़रुङ्देःसुङ्लो॥ 12 आल्लो आनिॽग नुःरिक् मे़न्धाःप्मनाबा से़ल्ले़ङ्घो आनिःसुम्बा हे़क्केरक् आनिःसुम्लो, कर खे़न् ये़म्मो चिदुप् आनिःसुम्लो॥ आल्लो इङ्गाॽ मिसाक्लक् कुसिङ् निःत्तुङ्, कर खे़न् ये़म्मो निङ्वाॽफुमाङ्ङिल्ले़ इङ्गाॽ कुसिङ् निःत्ताबा हे़क्केए इङ्गाॽआङ् काक् पाःन्निन् सरक् कुसिङ् निःत्तुङ्लो॥ 13 आल्ल नसाःन्, निङ्साङ् हे़क्क्याङ् मिःम्जि कन् सुम्सि पाःन्हाॽरक् वाॽ याःक्लो॥ कर खे़ङ्हाॽओग मिःम्जिन् काक्नुःल्ले़ यम्बारो॥ 1 खे़ल्ले़ चोगुल्ले़ मिःम्जिन् खिनिॽ तिम्दे़म्मे़ॽओ हे़क्क्याङ् याम्साम्गे़न् पर्धाःम्हाॽ खोःमा निङ्वाॽ चोगे़म्मे़ॽओ॥ कुत्चाॽओग माङ्निङ्वाॽपाःन् पाःप्मा पर्धाःम्मिन् निङ्वाॽ चोगे़म्मे़ॽओ॥ 2 थेआङ्भे़ल्ले़ वेॽ पाःन्दाङ्ङो पाःप्मा पर्धाःम् के़गप्पे़न् मे़न्छाम्गे़न् याप्मिहाॽनु मे़बाःत्ने़न्, कर निङ्वाॽफुमाङ्ङिन्नु पाःत्लो॥ खुने़ॽ पाःत्तुबा पाःन्हाॽ आत्तिल्ले़आङ् कुसिङ् मे़निःत्तुन्लो, थेआङ्भे़ल्ले़ खुने़ॽग सिगाङ् पाःन्हाॽ सेसेमाङ्लाम्बाने़ पाःत्तुॽरो॥ 3 कर माङ्निङ्वाॽपाःन् के़बाःप्पाल्ले़ग मे़न्छाम् याप्मिहाॽ के़धुम्बा चोःक्मा, हाङ्हाङ् मे़प्मा हे़क्क्याङ् सक्मा याक्मा याःम्बक् चोगुरो॥ 4 वेॽ पाःन्दाङ्ङो के़बाःप्पाल्ले़ आबाङेरक् थोबो चोगुॽरो, कर माङ्निङ्वाॽपाःन् के़बाःप्पाल्ले़ग सेसेहुप्लक्ले़न् याम्साम्गे़न् थोबो चोगुॽरो॥ 5 खिनिॽ के़रे़क् वेॽ पाःन्दाङ्ङो के़बाःरिबा आसिराॽ थाङ्लो, कर खे़न्नुःल्ले़आङ् माङ्निङ्वाॽपाःन् पारे़म्मे़ॽ के़लॽबा आनिङ्वाॽ वाॽरो॥ सेसेहुप्लक् थोबोरे़ लागि वेॽस्मा पाःन्दाङ्ङिन् के़ले़ङ्बा मे़होःप्ने़ फाॽग्र वेॽस्मा पाःन्दाङ्ङो पाःप्मानुःल्ले़ माङ्निङ्वाॽपाःन् पाःप्मान्ने यम्बारो॥ 6 आमिःम् फुॽनुसाॽ नु ने़ॽनुसाॽसे, इङ्गाॽ खिनिॽओ वेॽ पाःन्दाङ्ङो पाःत्तार ताआल्ले़ थे इन्धाःङ् के़घोःसुम्बे? कर ओसेःन्दाङ् पाःन्, इग्र ने़हिनिङ्वाॽ पाःन्, इग्र माङ्निङ्वाॽपाःन् इग्र निसाम्रे़ पाःन्जाक्किन् तारुङ्ङिल्ले़ खिनिॽ लागि कुभाॽ पोःङ्लो॥ 7 मे़प्फ्रा नु कोःम् हे़क्तङ्बा कुसक्मा मे़न्याक्मनाबा मुक्लाहाॽलाम्बा कुसिङ् निःप्मा सुक् मे़न्दे़प्मना इक्ला लःन्ने़ फाॽग्र थे मुक्ल पत् फाॽआङ् हाःत्ले़ पाःप्मा सुक्तुबे? 8 याम्मो थुत्तुरिःप्पे़ल्ले़ थङ् चोःक्से़ यारिप् पोःक्खे़म्मे़ॽ के़लॽबा इक्लाःन् नुःरिक् लाःमे़इगुन्ने़ फाॽग्र हाःत् थङ् थक्से़ यारिप् पोःङ्बाबे? 9 खिनिॽनुआङ् बा हे़क्केए पोःङ्लो॥ खिनिॽ कुसिङ् निःप्मे़न्दे़प्मना पाःन्नो के़बारिने़ फाॽग्र थे के़बाःत्तुम्ल के़बत्छि फाॽआङ् हाःत्ले़ कुसिङ् निःप्मा सुक्तुबे? खिनिॽग सुरित्तो के़बाःरिबा हे़क्के पोःङ्लो॥ 10 इक्सादिङ् खाम्बेःक्मो यरिक् पाःन्दाङ्हाॽ वाॽ, हे़क्क्याङ् आत्तिन्नाङ् कुबे मे़ःन्नेबाग होःप्लो॥ 11 पाःप्मनाबा पाःन्निल्ले़ कुबेःन् इङ्गाॽ कुसिङ् मे़निःत्तुङ्ङिन्ने़ फाॽग्र के़बाःप्पाल्ले़ लागि इङ्गाॽग पाःन्मे़न्दङ् पोःङ्ङारो, हे़क्क्याङ् के़बाःप्पे़न् आलागि पाःन्मे़न्दङ् पोःङ्लो॥ 12 खिनिॽआङ् सेसेमाङ्ङिल्ले़ कुबर्धाःम्हाॽ खोःमा साॽरिक् खिनिॽ सिक् सम्बाल्ले़ चोगुल्ले़ सेसेहुप्लक्ले़न् थोबो के़बोःङ्बा पर्धाःम्हाॽ ओगप् चोःक्मा निङ्वाॽ चोगे़म्मे़ॽओ॥ 13 खे़ल्ले़ चोगुल्ले़ वेॽ पाःन्दाङ् पाःप्मा पर्धाःम् के़गप्पाल्ले़ खुने़ॽ पाःत्तुबा पाःन्निन् पाःन् ले़ङ्मा सुक्तुर फाॽआङ् तुवा चोगुररो॥ 14 थेआङ्भे़ल्ले़ इङ्गाॽ वेॽ पाःन्दाङ्ङो तुवा चोगुङ्ङिल्ले़ आयाम्साम्मिल्ले़ तुवा चोगुॽ, कर आनिङ्वाॽइल्ले़ थेआङ् कुसिङ् मे़निःत्तुन्लो॥ 15 आल्ल आक्खे चोगुङ्बाबे? इङ्गाॽ याम्साम्मिल्ले़ तुवा चोःक्का, कर आनिङ्वाॽइल्ले़आङ् तुवा चोःक्कारो॥ इङ्गाॽ याम्साम्मिल्ले़ साम्लोआ, कर इङ्गाॽ आनिङ्वाॽइल्ले़आङ् साम्लोआरो॥ 16 खे़ने़ॽ के़याम्साम्मिल्ले़ निङ्वाॽफुमाङ्ङिन् ने़म्भोगे़न् कुनारा के़भोःसुल्ले़ खे़ने़ॽ नुःरिक्काङ् नोगे़न् के़बिरुसाङ् कुसिङ् मे़न्निःप्मनाबाल्ले़ आक्खेलॽरिक् “आमे़न्” पाःत्तुबे? थेआङ्भे़ल्ले़ खे़ने़ॽ के़बाःत्तुबान् खुने़ॽ कुसिङ् मे़निःत्तुन्लो॥ 17 खे़ने़ॽग नुःरिक्काङ् नोगे़न् के़बिरुबिला, कर वेॽ मनाःल्ले़न् थेआङ् थोबो मे़बोःङ्ने़ल्लो॥ 18 इङ्गाॽ निङ्वाॽफुमाङ्ङिन् नोगे़न् पिरुङ्लो, थेआङ्भे़ल्ले़ इङ्गाॽग खिनिॽ के़रे़क्नुःल्ले़आङ् यरिक् वेॽ पाःन्दाङ्ङो पाःत्तारो॥ 19 हे़क्केसाङ् सेसेहुप्लक्कोग हे़न्छिङ् थिबोःङ् (१०,०००) पाःन्सुत्लाहाॽ वेॽ पाःन्दाङ्ङो पाःप्मान्नुःल्ले़ग वेॽहाॽ निसाम् पिमासि फाॽआङ् कुसिङ् निःप्मा सुक्के़दे़प्पा ङासि (५) पाःन्सुत्लाहाॽ पाःप्मा निङ्वाॽ चोगुङ्लो॥ 20 फुॽनुसाॽ नु ने़ॽनुसाॽसे, खिनिॽ हिन्जाॽबित्छा कुइसिःक् निङ्वाॽ इःप्मा ले़रे़म्मे़ॽओ॥ फे़न् पाःन्नो अङे़ःक्वा कुइसिःक् पोःक्खे़म्मे़ॽओ, कर निङ्वाॽ इःप्माओग कुनिङ्वाॽ के़दुम्बा मनाहाॽ कुइसिःक् पोःक्खे़म्मे़ॽओ॥ 21 साम्योसाप्लाओ अक्खेलॽरिक् साप्ते़आङ् पत्,“कुसिङ् मे़न्निःत्तुम्बा पाःन्दाङ् के़बाःप्पा मनाहाॽलाम्हे़क्क्याङ् वेॽ लाजेॽबा मना पाःन्दाङ्लाम् आबाङे आमनाहाॽनु पाःत्तारो॥हे़क्केसाङ् खे़ङ्हाॽरे़ आबाःन् मे़ङ्घे़प्सुन् लॽरिक् यहवे दाङ्बाल्ले़ पाःत्तुरो॥” 22 वेॽ पाःन्दाङ् पाःप्मा पर्धाःम्मिङ्ग नसाःन् के़जोःक्पाहाॽरे़ लागि मे़ःन्, कर नसाःन् मे़न्जोःक्मनाबाहाॽरे़ लागि मिक्सेःन्लो॥ हे़क्केसाङ् माङ्निङ्वाॽपाःन् पाःप्मा पर्धाम्मिङ्ग नसाःन् मे़न्जोःक्मनाबाहाॽरे़ लागि मे़ःन्, कर नसाःन् के़जोःक्पाहाॽरे़ लागिरो॥ 23 खे़ल्ले़ चोगुल्ले़ सेसेहुप्लक्को के़जुप्सिल्ले़ के़रे़क् वेॽ पाःन्दाङ्ङो के़बारिने़ फाॽग्र खे़प्मो पाःन् कुसिङ् मे़न्निःप्मनाबाहाॽ इग्र नसाःन् मे़न्जोःक्मनाबाहाॽ मे़दाःल्ले़ थेआङ् कुसिङ् मे़निःत्तुन्नाङ् खिनिॽ के़रे़क् के़नाक्खि के़बिगिॽ लॽरिक् मे़म्बाःत्तुन्बि? 24 कर के़रे़क्ले़ माङ्निङ्वाॽपाःन् मे़बाःत्तुर मे़याक्किल्ले़ नसाःन् मे़न्जाःक्मना इग्र कुसिङ् मे़न्निःप्मनाबा मनाःन् खे़प्मो ताने़ फाॽग्र खे़ल्ले़ खे़प्सुबा पाःन्निल्ले़ कुसिक्लुङ्मा सिगाङ्बा पाःन्निन् ओसेःन्दाङ् चोगुआङ् कुनिङ्वाॽबान् थिक्तुॽरो॥ खे़प्मो मे़बाःत्तुबा पाःन्निल्ले़ खे़ल्ले़ कुनिङ्वाॽ लोःरो॥ 25 हे़क्क्याङ् कुसिक्लुङ्मा सिगाङ्बा सिबिॽ पाःन्हाॽ ओसेःन्दाङ् पोःङ्लो॥ हे़क्क्याङ् खे़न् थुङ्बोहजॽ युङ्सिङ्ङाङ् खे़ल्ले़ निङ्वाॽफुमाङ्ङिन् सेवा चोगुर खिनिॽ लुम्मो निङ्वाॽफुमाङ्ङिन् से़क्खाए वाॽरो लॽरिक् पाःत्तुरो॥ 26 फुॽनुसाॽ नु ने़ॽनुसाॽसे, आल्ल इङ्गाॽ अक्खे पाःत्तुङ्लो॥ खिनिॽ सेसेहुप्लक्को के़जुप्सिल्ले़ लत्थिक्किल्ले़ साम्लो कत्तुॽ, वेॽस्माल्ले़ निसाम् कत्तुॽ, वेॽस्माल्ले़ निङ्वाॽफुमाङ्ङिल्ले़ पिरुबा ओसेःन्दाङ् पाःन् कत्तुॽ, वेॽस्माल्ले़ वेॽ पाःन्दाङ् कत्तुॽ हे़क्क्याङ् वेॽस्माल्ले़ वेॽ पाःन्दाङ्ङिन् पाःन्ले़ङ्मा पर्धाःम् कत्तुॽरो॥ कन् के़रे़क् पाःन्हाॽ सेसेहुप्लक्किन् थोबो चोःक्मा फाॽआङ् ओगप् चोःक्मा पोःङ्लो॥ 27 वेॽ पाःन्दाङ् के़बाःप्पाहाॽ मे़बाःत्ने़ फाॽग्र ने़प्फुरे़रक् इग्र सुम्सि थारिक्ले़ एःक् एःक् मे़बाःत्तुर, हे़क्क्याङ् थिक्पारे़ पाःन् ले़क्खुररो॥ 28 कर पाःन् के़ले़ङ्बान् होःप्ने़ फाॽग्र हाराॽ खे़ङ्हाॽ सेसेहुप्लक्को स्वाःत् मे़युङ्ङाङ् आबाङेनु हे़क्क्याङ् निङ्वाॽफुमाङ्ङिन्नु मे़बाःत्लरो॥ 29 माङ्निङ्वाॽपाःन् के़बाःप्पाहाॽआङ् ने़प्फु इग्र सुम्सि मे़बाःत्ल, हे़क्क्याङ् वेॽहाॽरे़ खे़न् निङ्वाॽफुमाङ्लाम्बाबि मे़ःम्बि फाॽआङ् माङ्निङ्वाॽपाःन्निन् साॽमा पोःङ्लो॥ 30 कर खे़प्मो के़युङ्बा कुभाओ निङ्वाॽफुमाङ्ङिल्ले़ पिरुबा ओसेःन्दाङ् पाःन्निन् ताने़ फाॽग्र तगि के़बाःप्पे़न् स्वाःत् युङ्निरो॥ 31 हे़क्केलॽरिक् खिनिॽ थिक्पा थिक्पारे़ माङ्निङ्वाॽपाःन् पाःप्मा के़सुक्तिॽ, हे़क्केःल्ले़ के़रे़क्ले़ के़हुॽआसिआङ् याम्जाङ्वा के़घोःसुम्लो॥ 32 माङ्निङ्वाॽपाःन् के़बाःप्पाहाॽरे़ खुनिॽ पर्धाःम्मिन् आबाङे युक्को कप्मा पोःङ्लो॥ 33 थेआङ्भे़ल्ले़ निङ्वाॽफुमाङ्ङिङ्ग ये़मे़न्दङ् मे़ःन्, कर सनारुङ्ले़न् निङ्वाॽफुमाङ्लो॥के़रे़क् सेसे मनाहाॽरे़ के़रे़क् खुनिॽ सेसेहुप्लक्कोबा चोःक्थिम् कुइसिःक् 34 सेसेहुप्लक्को चुम्लुङ् पोःङ्ल पत्तिल्ले़ मे़न्छुमाहाॽ स्वाःत् युङ्मा पोःङ्लो॥ खे़ङ्हाॽ खे़न् ये़म्मो पाःप्मा नुःबा मे़ःन्, कर खे़ङ्हाॽग युक्को वाॽमा पोःङ्लो॥ साम्यो इङ्जाःङ्ङिल्ले़आङ् हे़क्के पाःत्तुॽरो॥ 35 खुनिॽ सेःन्दोःमा पाःन् मे़गत्तुॽने़ फाॽग्र हाराॽ खे़ङ्हाॽरे़ खुनिॽ हिम्मो आबाङे खुनिॽ ये़म्बाहाॽ सेःन्मे़दोसुसिररो, थेआङ्भे़ल्ले़ सेसेहुप्लक् चुम्लुङ् पोःङ्ल पत्तिल्ले़ मे़न्छुमाहाॽ ताॽजे़ङ्माग नुःम्मासिःमा पाःन्लो॥ 36 खिनिॽ कोरन्थिहाॽरे़ निङ्वाॽफु पाःन्जाक्किन् खिनिॽलाम्बा हेःक्सिङ्बा फाॽआङ् निङ्वाॽ के़इःत्तुम्बि? इग्र खिनिॽरक् के़घोःसुम्बा फाॽआङ् निङ्वाॽ के़इःत्तुम्बि? हे़क्केलॽरिक् निङ्वाॽ के़इःत्तुम्ने़ फाॽग्र के़बेःन्दिआङ् के़वयिरो॥ 37 आत्तिल्ले़ इङ्गाॽ माङ्निङ्वाॽपाःन् के़बाःप्पाआ लॽरिक् इग्र याम्साम्गे़न् पर्धाःम् कत्तुङ् लॽरिक् इःत्तुॽ हाराॽ खे़ल्ले़ इङ्गाॽ साप्तुङ्बा कन् पाःन्हाॽ दाङ्बाल्ले़ कुइङ्जाःङ् लॽरिक् ते़न्दिङ् चोगुररो॥ 38 खे़ल्ले़ कन् पाःन्हाॽ मे़घे़प्सुन्ने़ फाॽग्र खे़ल्ले़ कुबाःन्निन्नाङ् मे़घे़प्से़म्मिन्ने़ॽओ॥ 39 खे़ल्ले़ चोगुल्ले़ आमिःम् फुॽनुसाॽ नु ने़ॽनुसाॽसे, माङ्निङ्वाॽपाःन् पाःप्मा साॽरिक् निङ्वाॽ चोगे़म्मे़ॽओ॥ हे़क्क्याङ् वेॽ पाःन्दाङ् पाःप्मा मे़साक्ते़म्सिम्मिन्ने़ॽओ॥ 40 कर के़रे़क् पाःन्हाॽग थे़प्थे़प्पाङ् नुःरिक् चोःक्मा पोःङ्लो॥ 1 आल्ल आमिःम् फुॽनुसाॽ नु ने़ॽनुसाॽसे, खिनिॽओ इङ्गाॽ इङ्भन् चोगुङ्बा सुनाइङ्ङिन् याम्मो खिनिॽ निङ्वाॽसोओ ताःप्मा निङ्वाॽ चोगुङ्लो॥ खे़न् सुनाइङ्ङिन् के़दाःक्तुम्माङ् बा खे़न् नसाःन्नो चक्मे़ल्लॽए के़बत्छिरो॥ 2 इङ्गाॽ इङ्भन् चोःक्निङ्बा खे़न् सुनाइङ्ङिन् नसाःन् के़जोगुम्माङ् के़न्ले़रुम्मिन्ने़ फाॽग्र से़न्लप् के़घोःसुम्लो, मे़ःन्ने़ फाॽग्र खिनिॽ नसाःन् के़जोगुम्बाङ्ग हने़रक् पोःङ्लो॥ 3 थेआङ्भे़ल्ले़ इङ्गाॽ खोःसुङ्बा के़रे़क्नुःल्ले़ के़ये़क्पा पाःन्निन् खिनिॽ हुक्सुप्निङ्ङाङ् वाॽरो–साम्योसाप्लाःल्ले़ पाःत्तुबा कुइसिःक् ख्रिस्ते़न् आनिॽ लायोःन् ले़प्मि पिसे़ स्ये़, 4 खुने़ॽ मे़लुप्तुबा, सुम् ये़न्नो साम्योसाप्लाःल्ले़ पाःत्तुबा कुइसिःक् सिःमे़न्लाम् हिङे़, 5 खुने़ॽ पत्रुसे़न्नु थाःम्सिङ्, हे़क्क्याङ् थिक्-ने़त् (१२) हुॽसाम्बाहाॽरो थाःम्सिङ्लो॥ 6 याङ्सि थिक्ले़ङ्मो कुगिप् ङासि (५००) फुॽनुसाॽ नु ने़ॽनुसाॽहाॽरो थाःम्सिङ्लो॥ खे़ङ्हाॽओग कुभा मे़स्ये़ मे़बेसाङ् कुभाग कुहिङ्वे़त्ते मे़वाॽरो॥ 7 हे़क्क्याङ् खुने़ॽ याकुबरो हे़क्क्याङ् के़रे़क् सेःक्युक्मिबाहाॽरो थाःम्सिङ्लो॥ 8 हे़क्क्याङ् के़रे़क्नुःल्ले़ एगाङ् कुये़म् मे़ङ्गे़त्ते सागे़वाःन्छिङ्बाल्लो कुइसिःक् इङ्गाॽओआङ् थाःम्सिङ्लो॥ 9 थेआङ्भे़ल्ले़ इङ्गाॽग सेःक्युक्मिबाहाॽओ के़रे़क्नुःल्ले़ चुःक्पाआरो॥ इङ्गाॽग सेःक्युक्मिबाआ फाॽआङ् पाःप्माआङ् मे़लाॽआन्लो, थेआङ्भे़ल्ले़ निङ्वाॽफुमाङ्ङिल्ले़ कुसेसेहुप्लक्किन् इङ्गाॽ तुक्खे चाःत्तुङ्ङाङ् वये़रो॥ 10 कर आल्लो इङ्गाॽ आक्खेलॽरिक् वाॽआ खे़ङ्ग निङ्वाॽफुमाङ्ङिल्ले़ कुलुङ्गुम्मिल्ले़ चोगुल्ले़एरो॥ निङ्वाॽफुमाङ्ङिल्ले़ कुलुङ्गुम्मिन् इङ्गाॽओ चामे़सोःक्ते़न्लो॥ खे़न् वेॽ सेःक्युक्मिबाहाॽनुःल्ले़आङ् साॽरिक् याम्बुधिक्काङ् याःम्बक् चोगुङ्ङाङ् वाॽआरो, हे़क्केसाङ् इङ्गाॽ चोगुङ्बाग मे़ःन्लो कर इङ्गाॽओ के़वाॽबा निङ्वाॽफुमाङ्ङिल्ले़ कुलुङ्गुम्मिल्ले़ चोगुबारो॥ 11 खे़ल्ले़ चोगुल्ले़ इङ्गाॽसाङ् खे़ङ्हाॽरे़साङ् इङ्भन् चोःक्मनाबा सुनाइङ्ङिन् लत्छारो, हे़क्क्याङ् बा खे़न्ने खिनिॽ नसाःन् के़जोगुम्माङ् के़वयिॽरो॥ 12 कर ख्रिस्ते़न् सिःमे़न्लाम् याम्मो हिङे़आङ् वाॽ लॽरिक् इङ्भन् चोगुम्बे़आङ् वाॽइल्ले़ खिनिॽ कुभारे़ आक्खेलॽरिक् सिःमे़न्लाम् याम्मो हिङ्मन् मे़बोःङ्ने़न् लॽरिक् के़बाःत्तुम्बाबे? 13 सिःमे़न्लाम् याम्मो हिङ्मन् मे़बोःङ्ने़न्ने़ फाॽग्र ख्रिस्ते़न्नाङ् सिःमे़न्लाम् याम्मो मे़हिङे़न्लो॥ 14 हे़क्क्याङ् ख्रिस्ते़न् सिःमे़न्लाम् मे़हिङे़न्ने़ फाॽग्र आनिगे़ इङ्भन् चोगुम्बे़बा नु खिनिॽ नसाःन् के़जोगुम्बाङ्ग हने़रक् पोःङ्लो॥ 15 खे़न्नुःल्ले़आङ् निङ्वाॽफुमाङ्ङिल्ले़ कुयाःम्बेओ आनिगे़ इङ्ले़क्के पोःक्खिगे़रो, थेआङ्भे़ल्ले़ आनिगे़ग निङ्वाॽफुमाङ्ङिल्ले़ ख्रिस्ते़न् हिङ्मन्नो फोःक्खु लॽरिक् साःक्खि पिरुम्बे़आङ् वयिगे़रो॥ कर से़क्खाःल्ले़ खुने़ॽ के़सिःबाहाॽ सिःमे़न्लाम् हिङ्मन्नो मे़भोःक्खुन्सिन्ने़ फाॽग्र ख्रिस्ते़न् हिङ्मन्नो मे़भोःक्खुन्लो॥ 16 थेआङ्भे़ल्ले़ के़सिःबाहाॽ सिःमे़न्लाम् मे़न्हिङ्ने़न्ने़ फाॽग्र ख्रिस्ते़न्नाङ् सिःमे़न्लाम् मे़हिङे़न्लो॥ 17 हे़क्क्याङ् ख्रिस्ते़न् सिःमे़न्लाम् मे़हिङे़न्ने़ फाॽग्र खिनिॽ नसाःन्निन् हने़बा पोःङ् हे़क्क्याङ् आल्लसाङ् खिनिॽ लायोओए के़वयिॽरो॥ 18 हे़क्क्याङ् ख्रिस्ते़न् सिःमे़न्लाम् मे़हिङे़न्ने़ फाॽग्र ख्रिस्ते़न् नसाःन् के़जोःक्पाआङ् के़सिःबाहाॽरे़आङ् से़न्लप् मे़ङ्घोए मे़वाॽरो॥ 19 कन् हिङ्मन्ले़ लागिरक् ख्रिस्तओ आनिॽ निङ्साङ् आजोगुम्बाने़ फाॽग्र के़रे़क् मे़न्छाम् सुवाङ्हाॽनुःल्ले़आङ् यरिक् लुङ्माॽ स्याःत् के़लॽबा आजोःक्लो॥ 20 कर ख्रिस्ते़ङ्ग से़क्खाए सिःमे़न्लाम् हिङे़रो, हे़क्क्याङ् के़सिःबाआङ् के़हिङ्बाहाॽओ खुने़ॽए तुम्बारो॥ 21 थेआङ्भे़ल्ले़ सिःमे़ङ्ग लत्थिक् मनालाम्बाए त्ये़, हे़क्केलॽरिक्के सिःमे़न्लाम् याम्मो हिङ्मान्नाङ् लत्थिक् मनालाम्बाए ताःरो॥ 22 थेआङ्भे़ल्ले़ आदम्मिल्ले़ 23 कर आनिॽ के़रे़क्ले़ आबाङे ये़म्मिन् हाङ्माए पोःङ्लो॥ सिःमे़न्लाम् के़हिङ्बाहाॽओ ख्रिस्ते़ङ्ग तुम्बारो, हे़क्क्याङ् खुने़ॽ नुःङ् युःल्ले़ कुमनाहाॽ मे़हिङ्लो॥ 24 हे़क्क्याङ् कुनुप्मान् ताःरो॥ खे़न् ये़म्मो ख्रिस्तरे़ के़रे़क् याम्साम्गे़न् हाङ्युक्, युक्हाॽ नु मुक्साम्हाॽ मे़क्खुआङ् निङ्वाॽफुहाङ्जुम्मिन् पानुदिङ् पाः निङ्वाॽफुमाङ्ङिन् हुक्सुप्तुॽ॥ 25 थेआङ्भे़ल्ले़ कुनिङ्मिहाॽ कुयुक्को मे़न्दाःत्छिङ्ङे थारिक् खुने़ॽग हाङ् चोःक्माए पोःङ्लो॥ 26 के़रे़क्नुःल्ले़ एगाङ् मे़ङ्मा के़बोःङ्बा निङ्मिःङ्ग सिःमे़न्लो॥ 27 थेआङ्भे़ल्ले़ साम्योसाप्लाओ अक्खे साप्ते़आङ् पत्, “निङ्वाॽफुमाङ्ङिल्ले़ काक् पाःन्हाॽ कुयुक्को तारुआङ् वाॽ॥” 28 के़रे़क् पाःन्हाॽ ये़सुरे़ कुयुक्को ताः, हे़क्क्याङ् के़रे़क् पाःन्हाॽ ये़सुरे़ कुयुक्को के़दाःप्पा निङ्वाॽफुमाङ्ङिल्ले़ कुयुक्को आबुगे़न् कुस्साःन्नाङ् ताःरो॥ हे़क्केलॽरिक् निङ्वाॽफुमाङ्ङिन्ने के़रे़क् सम्दाङ् युक् के़जोःक्पा पोःङ्लो॥ 29 आल्ल सिःमे़न्लाम् हिङ्मन् मे़बोःङ्ने़न्ने़ फाॽग्र के़सिःबाहाॽरे़ लागि बप्तिस्मा मे़बोःक्खे़बाल्ले़ कुबेःन् थे पोःक्खे़आङ्बे? के़सिःबाहाॽ मे़न्हिङ्ने़न्निल्ले़ थेआङ् मनाहाॽ खे़ङ्हाॽरे़ खुनिॽ लागि बप्तिस्मा मे़बोःङ्बाबे? 30 हे़क्क्याङ् आनिगे़आङ् के़रे़क् ये़म्मो थेआङ् किप्मा के़घुःबाओ थ्ये़ॽइगे़र वयिगे़बाबे? 31 आमिःम् फुॽनुसाॽ नु ने़ॽनुसाॽसे, आनिॽ दाङ्बा ख्रिस्त ये़सुरे़ खिनिॽओ चोगुबा पाःन्नोबा आसिक् सम्माल्ले़ “इङ्गाॽ थिक्याःन्धक् सिःमा यारिप् पोःङ्ङा” पाःप्मा सुक्तुङ्लो॥ 32 एफिसस ये़क्यक्को ताम्भुङ् थक्साहाॽनु थङ् थक्ताङ्ङिल्ले़ थे इन्धाःङ् खोःसुङ्बे? के़सिःबाहाॽ सिःमे़न्लाम् मे़न्हिङ्ने़न्ने़ फाॽग्र “आनिॽ चाम् थुङुम्, थेआङ्भे़ल्ले़ ताःन्दिक्क आनिॽ आस्सिःएरो॥” 33 खिनिॽ पिर्बेःम्बो मे़ध्ये़म्मिन्ने़ॽओ, थेआङ्भे़ल्ले़ “ताप्फे़ःम्बा तेःङ्जुम्हाॽरे़ मे़जोगुल्ले़ नुःबा ये़प्ले़क्किन् फे़त्लाॽरो॥” 34 खिनिॽग सेनिङ्वाॽओ नुःक्खे़म्मे़ॽआङ् लायो चोःक्मा ले़रे़म्मे़ॽओ॥ खिनिॽओ कुभाग निङ्वाॽफुमाङ्ङिल्ले़ कुयाःम्बेओ थेआङ् मे़ल्ले़ःमनाबाहाॽआङ् मे़वाॽरो॥ कङ्ग खिनिॽ सिरिङ् के़मयिर फाॽआङ् मे़त्निङ्बारो॥ 35 कर खिनिॽओ कुभारे़ के़बाःत्तुम्बिला, “आक्खेलॽरिक् के़सिःबाहाॽ मे़हिङ्बे? आक्तङ्बा नासिङ्गे़न् थक्किन् मे़घोःसुॽबे?” 36 अदङ्से, खिनिॽ के़हेॽरुम्बा याॽरिःम्बान् मे़न्छिःए थारिक् मे़लिङ्ने़न्लो॥ 37 खिनिॽ के़हेॽरुम्बा याॽरिःम्बान् ताःन्दि के़बोःङ्बा कुबुङ्ङिन् मे़ःन्लो, कर सिःल्ले़न् इग्र वेॽ परिक्ले़न् याॽरिःम्बान्लक् के़हेॽरुम्॥ 38 कर निङ्वाॽफुमाङ्ङिल्ले़ कुनिङ्वाॽ कुइसिःक् के़रे़क् याॽरिःम्बाहाॽ आबाङे परिक्पा कुबुङ्मा पिरुसिॽरो॥ 39 हे़क्केलॽरिक्के नासिङ्गे़न् थक्हाॽआङ् थिक् परिक्ले़न् मे़होःप्लो॥ मे़न्छाम् याप्मिरे़न् थिक् परिक्ले़न्, थक्साहाॽ, पुसाहाॽ नु ङाहाॽरे़न् वेॽ वेॽ परिक्ले़न् थक् वाॽरो॥ 40 ताङ्साक्पो लाबा, नाम्, खेःम्सिक्हाॽ मे़बत्, हे़क्क्याङ् इक्सादिङ् खाम्बेःक्मोआङ् थक्हाॽ मे़वाॽरो, कर ताङ्साक्पोबा लाबा, नाम्, खेःम्सिक्हाॽरे़ खुनिॽ ओःप्मान् नु इक्सादिङ् खाम्बेःक्मोबा थक्हाॽरे़ खुनिॽ खे़म्सिङ्मान् वेॽ वेॽ चोःक्लो॥ 41 नाम्मिल्ले़ कुओःप्मान् थिक् परिक्ले़न्, लाबाल्ले़न् वेॽ परिक्ले़न् चोःक्, हे़क्क्याङ् खेःम्सिक्पाल्ले़ कुओःप्मान् वेॽ परिक्ले़न् चोःक्॥ हे़क्केलॽरिक्के थिक् खेःम्सिक्पाल्ले़ कुओःप्मान् नु वेॽस्मा खेःम्सिक्पाल्ले़ कुओःप्मान् वेॽ वेॽ चोःक्लो॥ 42 हे़क्क्याङ् सिःमे़न्लाम् याम्मो हिङ्मान्नाङ् बा हे़क्तङ्बाए चोःक्लो॥ कन् नासिङ्गे़न् थक्किन् सिःॽ हे़क्क्याङ् लुप्माआङ् किःॽ, कर सिःमे़न्लाम् याम्मो के़हिङ्बा थक्किन् आजुनि पोःङ्लो॥ 43 आनिॽ नासिङ्गे़न् थक्किन् लुप्पिल्ले़ ताप्फे़ःम्बा नु थुम् मे़ःन्नेबा चोःक्, कर याम्मो कुहिङ्वे़त् पोःङ्ङिल्ले़ नुःबा नु के़धुम्बा पोःङ्लो॥ 44 नासिङ्गे़न् थक्किन् लुप्, हे़क्क्याङ् याम्साम्गे़न् थक्किन् हिङ्लो॥ नासिङ्गे़न् थक् वाॽबा हे़क्केए याम्साम्गे़न् थक्किन्नाङ् वाॽरो॥ 45 साम्योसाप्लाओ अक्खेलॽरिक् साप्ते़आङ् पत्, “थिक्सिगेःक्स्मा मना आदम्मिङ्ग कुहिङ्वे़त् मना पोःक्खे़,” 46 के़रे़क्नुःल्ले़ तगि नासिङ्गे़न् थक्किन् ताः, हे़क्क्याङ्लक् याम्साम्गे़न् थक्किन् ताःरो॥ 47 थिक्सिगेःक्पा मनाःङ्ग खाम्बेःक्मोबा खाम्लाम्बा चोगे़आङ् वये़, कर निसिगेःक्स्मा मनाःङ्ग साङ्ग्राम्पेदाङ्लाम्बाबारो॥ 48 इक्साबा मनाहाॽ खाम्मिल्ले़ के़बोःङ्बा मनाःन् हे़क्तङ्बासिरो, हे़क्केलॽरिक्के साङ्ग्राम्पेदाङ्बा मनाहाॽ साङ्ग्राम्पेदाङ्लाम् के़युःबा मनाःन् हे़क्तङ्बासिरो॥ 49 आल्लो आनिॽ खाम्मिल्ले़ के़बोःङ्बा मनाःन् हे़क्तङ्बा आजोःक्, हे़क्केलॽरिक्के साङ्ग्राम्पेदाङ्लाम् के़युःबा मनाःन् हे़क्तङ्बा आबोःङ्लो॥ 50 आल्ल आमिःम् फुॽनुसाॽ नु ने़ॽनुसाॽसे, इङ्गाॽ पाःप्मा कोःत्तुङ्बान् कन्लो, ने़क्सा नु माक्खिॽइल्ले़ निङ्वाॽफुहाङ्जुम्मिल्ले़न् लक् खोःमा मे़सुक्तुन्लो, हे़क्केलॽरिक्के के़मे़क्पा के़बेःक्पाल्ले़ आप्फाल्ले़आङ् मे़म्मे़क्मनाबाल्ले़न् लक् खोःमा मे़सुक्तुन्लो॥ 51 खे़प्से़म्मे़ॽओ! इङ्गाॽ लत्छा सिबिॽबा पाःन्धिक् मे़त्निङ्–आनिॽ के़रे़क् आन्छिःने़न्लो, कर आनिॽ के़रे़क् आले़ङ्सिङ् आबेःक्लो॥ 52 सप्फारे़सा, मिक्चिराप्पोसा, थुत्थुरिःप्पाल्ले़ कुनुप्पोबा इक्लाओ आले़क्सिङ्लो॥ थेआङ्भे़ल्ले़ खे़न् ये़म्मो थुत्थुरिःप्पे़न् मुक् हे़क्क्याङ् के़सिःबा के़बेःक्पाहाॽ मे़म्मे़क्मनाबा मे़बोःङ्ङाङ् मे़हिङ्लो, हे़क्क्याङ् आनिॽ के़रे़क् आले़ङ्सिङ् आबेःक्लो॥ 53 थेआङ्भे़ल्ले़ कन् के़सिःबा के़बेःक्पा नासिङ्गे़न् थक्किन् आप्फाल्ले़आङ् मे़न्नुप्मनाबा आजुनि थक्को ले़ङ्सिङ्मा पोःङ्लो॥ 54 हे़क्क्याङ् कन् के़सिःबा के़बेःक्पा थक्किन् मे़न्छिःमनाबा आजुनि थक्को ले़ङ्सिङ्ङिल्ले़ कन् साप्ते़आङ् के़बप्पा पाःन्जाक्किन् के़त्लो,“सिःमे़न् थङ्ङो हारि त्ये़आङ् वाॽरो” 55 “सिःमे़न्ने, खे़ने़ॽ के़धङ्नाःन्निन् आत्तो वाॽबे?सिःमे़न्ने, खे़ने़ॽ के़मुक्साम्मिन् आत्तो वाॽबे?” 56 सिःमे़ल्ले़ कुमुक्साम्मिन् लायोलाम् खोःसुॽरो, हे़क्क्याङ् लायोःल्ले़ कुमुक्साम्मिङ्ग साम्यो इङ्जाःङ्लाम् खोःसुॽरो॥ 57 कर निङ्वाॽफुमाङ्ङिन् नोगे़न्लो! खुने़ॽए आनिॽ दाङ्बा ये़सु ख्रिस्तलाम्बा थङ्नाःन्निन् आबिॽरो॥ 58 खे़ल्ले़ चोगुल्ले़ आमिःम् फुॽनुसाॽ नु ने़ॽनुसाॽसे, खिनिॽ के़धुम्बा पोःक्खे़म्मे़ॽआङ् मे़म्मुन्ने वये़म्मे़ॽओ॥ दाङ्बाल्ले़ कुयाःम्बक्को सदादिङ् पोःरे़म्मे़ॽर पेगे़म्मे़ॽओ॥ थेआङ्भे़ल्ले़ दाङ्बाल्ले़ लागि खिनिॽ याम्बुधिक्किन् चामे़सोःक्ने़न् फाॽआङ् के़निःसुम्माङ् के़वयिॽरो॥
1 आल्ल यरुसले़मस्मा नसानिबाहाॽरे़ लागि कुभाॽ याङ्ङिल्ले़ कुयाःम्बेओ अक्खे मे़त्निङ्लो–गलातिया थुम्मोबा सेसेहुप्लक्हाॽ मे़त्तुङ्सिङ्बा हे़क्केए चोगे़म्मे़ॽओ॥ 2 ते़ने़बा ये़न्नो खिनिॽ के़रे़क्ले़ के़धगुम्बा याङ्लाम्बा कुभाॽ याङ् से़न्दे़म्मे़ॽआङ् फुक्खे़म् युक्खे़म्मे़ॽओ॥ हे़क्केःल्ले़ इङ्गाॽ ताआल्ले़ कुभाॽ याङ् फुङ्मा मे़बोःङ्ने़न्॥ 3 हे़क्क्याङ् इङ्गाॽ खे़प्मो ताआल्ले़ खिनिॽ निङ्वाॽइरे़ खोःप्तुसिबा मनाहाॽ निःसुम् सक्हाॽ साप्तुङ् पिरुङ्सिङ्ङाङ् खे़ङ्हाॽनुए खिनिॽ के़भोःक्खुम्बा कुभाॽ याङ्ङिन् यरुसले़म ये़क्यक्को हाङ्मादेःमा पोःङ्लो॥ 4 इङ्गाॽआङ् पेःक्काल्ले़ नुःबा पोःङ्ने़ फाॽग्र इङ्गाॽनुए खे़ङ्हाॽआङ् मे़बेःक्लो॥ 5 इङ्गाॽ मे़सेदोनिया थुम्मो लाम्दिःक् चोःक्काआङ् खिनिॽ तुम्से़ ताआ, थेआङ्भे़ल्ले़ इङ्गाॽ मे़सेदोनिया पोःङ्मार लाम्दिःक् चोःक्मा निङ्वाॽ चोगुङ्ङाङ् वाॽआरो॥ 6 इङ्गाॽ खिनिॽनु सप्फा वाॽसे़ ताआबिला, पोःङ्ने़ फाॽग्र कन् चुङ्वाःम्माओ खिनिॽनु वाॽआरो॥ हे़क्केलॽरिक् इङ्गाॽ खे़प्मोलाम् आत्ति पेःक्कासाङ् कुभाॽ पिमा आगे़सुक्तिॽरो॥ 7 थेआङ्भे़ल्ले़ कन् ये़म्मो खिनिॽ तुम्से़ सप्फारक् मे़ःन्, कर दाङ्बाल्ले़ कुनिङ्वाॽ पोःङ्ने़ फाॽग्र खिनिॽनु कुभा ये़म् थारिक् वाॽमा आनिङ्वाॽ वाॽरो॥ 8 कर पे़न्तिकोस तङ्नाम् 9 थेआङ्भे़ल्ले़ इङ्गाॽ आलागि पयम् याःम्बक् चोःक्मा चारिक् नुःबा ये़म् त्ये़आङ् वाॽरो॥ हे़क्क्याङ् कप्मो यरिक् याप्मि के़अप्पाहाॽआङ् मे़वाॽरो॥ 10 तिमोथिःन् खे़प्मो ताःल्ले़ नुःरिक्काङ् लाङ्दाःक्ते़म्मे़ॽओ, थेआङ्भे़ल्ले़ खुने़ॽग इङ्गाॽ चोगुङ्बा कुइसिःक्के दाङ्बाल्ले़ कुयाःम्बक् चोगुर वाॽरो॥ 11 खे़ल्ले़ चोगुल्ले़ आत्तिन्हाॽरे़आङ् खुने़ॽ कुनामे़न्छाॽ मे़म्मे़त्तुन्ल॥ खुने़ॽ इङ्गाॽओ फे़न्निल्ले़ कुभाॽ पिरे़म्मे़ॽआङ् पाङ्घे़म्मे़ॽओ॥ खुने़ॽ फुॽनुसाॽहाॽनु के़त् फे़न् फाॽआङ् इङ्गाॽ हाङ्घुङ्ल वाॽआरो॥ 12 आल्ल नुसाॽ अप्पोलोसरे़ कुयाःम्बेओ इङ्गाॽ अक्खे मे़त्निङ्लो–खुने़ॽ वेॽ नसानिबा फुॽनुसाॽहाॽनु खिनिॽओ फे़न्ल फाॽआङ् साॽरिक् पेलि फाक्तुङ्, कर खुने़ॽ आल्लो खिनिॽओ फे़म्मा निङ्वाॽ मे़जोगुन्लो॥ खुने़ॽ नुःबा ये़म् खोःसुल्ले़सा खिनिॽ तुम्से़ फे़न्लो॥ 13 खिनिॽ सिङ्सिङ् ये़क्ये़क् लॽरे़म्मे़ॽओ॥ नसाःन्नो मे़म्मुन्ने वये़म्मे़ॽओ॥ मे़ङ्गिःमनाबा नु के़धुम्बा पोःक्खे़म्मे़ॽआङ् 14 थे़मा के़जोगुम्साङ् मिःम्जिनु चोगे़म्मे़ॽओ॥ 15 स्तिफनसे़न् नु खुने़ॽ कुहिम्सयङ्हाॽ कुसिङ् के़निःत्तुम्सिम्लो॥ खे़ङ्हाॽग अक्खैया थुम्मोबा के़रे़क्नुःल्ले़ तगि नसाःन् के़जोःक्पासिरो॥ हे़क्क्याङ् नसानिबाहाॽ कुभाॽ पिमासिओ आबाङे मे़बिसिङ्ङाङ् मे़वाॽरो॥ आमिःम् फुॽनुसाॽ नु ने़ॽनुसाॽसे, अक्खेलॽरिक् पेलि फाक्निङ्लो, 16 अक्तङ्बा मनाहाॽ हे़क्क्याङ् वेॽ दाङ्बाओ याम्बुधिक्काङ् माङ्सेवाओ याःम्बक् के़जोःक्पाहाॽ इङ्धाःङ् पिरे़म्सिम्मे़ॽओ॥ 17 कप्मो स्तिफनस, फोर्तुनातस नु अक्खैकससि मे़गे़रे़ मे़द्ये़ल्ले़ इङ्गाॽ पसःत्सःत्ताङ्लो, थेआङ्भे़ल्ले़ खे़ङ्हाॽरे़ग खिनिॽ के़होःप्तिल्ले़ इङ्गाॽ चाहाबा चोगाङ्बा के़रे़क् पाःन्हाॽ मे़बिराङ्ङाङ् मे़वाॽरो॥ 18 खे़ङ्हाॽरे़ग खिनिॽ हाङ्हाङ् के़म्मे़त्तिबा हे़क्के इङ्गाॽआङ् हाङ्हाङ् मे़मे़त्ताङ्ङाङ् वाॽरो॥ से़क्खासाङ् हे़क्तङ्बा मनाहाॽग इङ्धाःङ् पिमासि पोःङ्लो॥ 19 एसिया ते़ङ्गप्पोबा सेसेहुप्लक्हाॽरे़ खिनिॽ सेवा के़म्हाक्तिॽरो॥ अक्विला नु प्रिस्किला हे़क्क्याङ् खुन्छिॽ हिम्मो के़जुम्बा सेसेहुप्लक्कोबा मनाहाॽरे़ दाङ्बाओ सिक्लुङ्मोलाम् सेवा के़म्हाक्तिॽरो॥ 20 कप्मोबा के़रे़क् फुॽनुसाॽ नु ने़ॽनुसाॽहाॽरे़आङ् सेवा के़म्हाक्तिॽरो॥ खिनिॽग नसानिबा मिःम्जिःल्ले़ सेवा मे़त्तासिम्मे़ॽओ॥ 21 इङ्गाॽ पावलरे़ कन् सेवाःन् आबाङे आहुक्किल्ले़ साप्तुङ्ङाङ् वाॽआरो॥ 22 आत्तिल्ले़ दाङ्बान् मिःम्जि मे़मे़त्तुन् हाराॽ खे़ङ्ग साङ्ग्राःल्ले़ ते़त्तुररो॥ आदाङ्बे, ये़ॽओ! 23 दाङ्बा ये़सुरे़ कुलुङ्गुम्मिन् खिनिॽनु वाॽर॥ 24 खिनिॽ ख्रिस्त ये़सुःन् नसाःन् के़जोःक्पा के़रे़क् लुङ्माॽ तुक्निङ्लो॥ आमे़न्॥
|