Titu

Titu 1

1 Mao"So: daui daui yaug we' Yesu Khristu nho: lagyo: ngo Polu wa mugsug' tung" ke' ra". Mao"So: yang khyin: san: yu: ra" mo; nho: lam khug: myid qi" qhang: li" sho' bao" thaug' byid: nae" qhid' mae" we' ngonhaung" nho: caung:pa" thung" yang mho" byid' ra" dangman" ra" khyo re ba: li" gesho' yao: bam re khyoqhid' au: she nae" qhid' mae" Mao"So wa ngore khyin: san: to" ra". 2 Ai: caung:pa" thung" wa apyad ato kaoso' re myid: lao" rure apan aqao: to" ru ngad: ra". Maba: mhug' pyag' ra" Mao"So wa mug: thug' sao mapeim shimae" ngonhaung" re kaoso' byid: nae" dao:so: byid' to" ra". 3 Yao: wa ayo, joe" lao"- ai: kaoso' re yao" mungdao: khyo" yang qhu" byid' ra". Mao"So wa ce: mungdao: ngore ab byid' to: mung: ngonhaung" khyad' yu: Asang pho" Mao"So: amyin" khyo" yang ngo wa ai: mungdao: re kho" kyo" ru ngad: ra". 4 Ngonhaung" daga" ceim" lam khug: na: ra" lam khug: rumae nga" zo: gyang" Titu re ngo mugsug' tung" ke' ra". Ngonhaung" Pho" Mao"So we' ngonhaung" khyad' yu: Asang Yesu Khristu wa nhag' myan" ra" jeju we' ngaui pyo: yaug yo: ru nao re byid: vageshao: wo". 5 Nao zaui: so: vin vo; ca" na shi" ra" mau" zo" jham re adai: ato' jo jo za: qo" zaui: so: nae" qhid' mae" we' vo khao: ngo" mae phung: lau: de- qere cao" khyin: san: to: byid: nae" qhid' mae" ngo wa nao re Krete gagyo: kao" mae nha: to: co' ru ngad: ra". Nga" pin dao: jham re myid: beim: wa,- 6 Phung: lau:de, kad' yaug wa qobo vhin nae" made, yaug- yham sang myhi" dayaug za: qo" yaug ngad qo: ra". Yao" zo: dau qe alhab' re: Yesu re lam khug: ra" mo, ngad ca" ru we' akyaung athin- ave, kyao- mho dao: magyo" rumae mang qi" ra" yaug magai: ngad ngad: ra". 7 Pe"mung:ga"re phung: au: jhaung kad' yaug wa Mao"So: mau" zo" re jhui" pyo yaug ngad mung:- yao: wa qobo vhin nae" made, yaug ngad ca" ra". Yao: wa ngad beim: yaug- nhag' lam: lang" yaug- yhid ya: boe" yaug- se' da: be, khyad' kad' yaug- ngaui qhang so' kho' yaug magai: ngad ngad: ra". 8 Yao: wa bang" da" kao bau yaug- gai shab: ra" ja: re jhid'de; kao bau yaug- ngad qo: ra". Yao: wa yao: yao" gaung re qo" khang" yaug- din:man: yaug- gyang" lho" yaug- cao" khyo: tarha" re cao" ra" yaug ngad ca" ra". 9 Yao: wa mho" shid' khyo we' jho" zhaung: mung:- lam ga" ra" mungdao: re tang za: zaui" zag: ci yaug ngad qo: ra". Ce: khyo" yang su gaje rere: dangman" ra" mho" shid' khyo ci yang: qam: byid: mung: ai: dangman" ra" mho" shid' khyo re gye kad' ra" mo, shad' ra" khyo rere:- qo" ceim" shid' byid' li" nae". 10 Pe"mung:ga"re tau: lhan: mung: yao: bam: pe" akyu" mabo: ra" dao: keim jham: yang su gaje qere mhug' pyag' na: ra" mo, myo: sho' na: bam: ako". Je yang: Yuda caung:pa" thung" mae" Khristan caung:pa" thung" shad' khyo phaug' lo: ra" mo, myo" ako". 11 Yao: bam: mho" shid' khyo re tam" pye' ca" ra". Pe"mung:ga"re yao: bam wa aqho' axag' ngad: ra" ngaui qhang re so' kho' ra" khyo re mho" shid' geyang: ug' khug' dinkhu: jham re abyi asin: kad' pye' ako". 12 Krete gagyo: kao" byu yao: bam: lapa qemae" dayaug yao: ta" ru wa- Krete gagyo: kao" mae" mo, wa khonhae" re:- mhug' hab' qe makhyang" ra" gug'nyhug' lhe: jham- byunoe" byushoe zo: so' kho' mo, ngad:- ga: ta" ra". Yao: ta" ru we' dakhyo: dang: ako". 14 Ce: mathao mae yao: bam wa dangman" ra" lam khug: myid bo: li" mung: Yuda qe: mhomyi: saung: seim jham re we' dang: ra" khyo re ngag: ha: pye' ko" ra" mo, mae" thug' li" ra" xao su byu qe: amyin" dao: jham re to" pye' genae" qhid' mae" nao wa yao: bam re thin thin za: qeim wa,. 15 Yao: bam yao" gaung yao: san sin" ra" mo; qhid' mae" ja: khao: ngo" wa san sin" ra". Ngadqere: masan masin" ra" mo, we' malam khug: ra" mo; qhid' mae" wa pe" ja: re: masan masin" boe" ra". Pe"mung:ga"re yao: bam: myid we' aung khug nhag' lam: wa masan masin" boe" jo; ako". 16 Yao: bam wa Mao"So re ba: ga: ta" gengad yang: re:- yao: bam: ave, wa aire ha: pye' ako". Yao: bam wa byunghang: qe mho dao: magyo: mo,- gai: ra" mau" zo" daja: re kad' nae" re: madau mo, ngad: ako".

Titu 2

1 Ngadqere: nao wa jo: ra" khyo we' dau ang: ra" khyo jham re mho" shid' byid: ca" ra". 2 Apyad qi" ra" phug' mao: qere gyang: co: yo na genae"- ave, de, genae"- yao: yao" gaung re qo" khang" genae" qhid' mae" mho" byid: wa,- amung: yao: bam: lam khug: myid jo, genae" we' jhid'de; myid bo genae" qhid' mae" re: mho" byid: wa,. 3 Ai we' dakhyo: apyad qi" ra" phyid' mao: qere Khristan phyid' mao: qe: ave, de, genae" qhid' mae" mho" byid: wa,- yao: bam wa gaui mho hab' qe- yhid kha: qe- magai: ngad ngad: ra" khyo re mho" byid: wa,- yao: bam wa gai shab: ra" khyo re ba: mho" byid: mo, ngad ca" ra". 4 Yao: bam wa yao: bam tho' apyad ngai: ra" myiqe: qere yao: bam: yham sang pho" qere we' zo: dau qere ba: jhid'de; mo,- 5 yao: yao" gaung re qo" khang" mo,- san sin" mo,- yao: bam: yham sang pho" qe eib: ra" qao: mae ba: na: ra" myi" zang gai qe boe" geshao: gai shab: ra" ja: re mho" byid: ca" ako". Alao" Mao"So: mungdao: re khag' re: gaui mho ta" phoe genae" mangad:. 6 Ai we' dakhyo: zolau: qere: yao: bam yao" gaung re qo" khang" genae" qhid' mae" jhan: byid: wa,- 7 ja: khao: ngo" mae naoyao" gaung yao: gai shab: ra" lo, mau" nho: lag boe" ca" ra". Ni" mho" shid' khyo re nhag' lam: din: man" ru we' akhyag qi: to: yang: mho" shid' byid: wa,- 8 ni" gyevo qe wa ngonhaung" khyo re magai: ru ta" nae" daja: re: maqo" yang: qho' phau: genae" qhid' mae" gai magai ga: maqo" ta" ra" jo: ra" dao: jham re ci yang:- mho" shid' byid: wa,. 9 Jeim qe wa yao: bam: asang qe: mho dao: re tae" gyo: mung: ja: khao: ngo" mae yao: bam: asang qere ngaui nhao qo: ra". Yao: bam wa jeim asang qere dao: tau: magai: tau: ngad: ako". 10 Mangad: lao" asang qe: zai magai: khug' yu ngad: ra". Airu: kad' nae" atha" yao: bam zaui: so" ra" mau" zo" ja: khao: ngo" mae ngonhaung" khyad' yu: Asang pho" Mao"So: mho" shid' khyo mungdao: re nga: ye; li" nhao nae" qhid' mae" yao: bam khonhae" re: gai shab: ru we' kyid mo, ngad: ra" khyo re qhu" byid' na ca" ako". 11 Pe"mung:ga"re Mao"So wa byu alhab' mo, khyad' yu: ru qhug' ra" khyo yao" nhag' myan" ra" jeju re qhu" byid' ava". 12 Ngonhaung" nho: qi" qhang: ra" Mao"So we' ngonhaung" nho: khyad' yu: ra" Asang Yesu Khristu nho: phungbao bao: thug' li" nae" ra" ngonhaung" myid: lao" na: ra" ai: ngaui lho" Ba Na re ngonhaung" lao" na: au:- Mao"So re malam: ra" kaoso' daui khyo re we' mug: myid dao we' sin" ra" kao bau myid o: ra" khyo jham re shapye' pye' mung:- yao: yao" gaung re qo" khang" yang: din: man" ru we' Mao"So: khyo re kao bau taung" ce: mug: myid: dao mae kaoso' daui: na nae" qhid' mae" ai: nhag" myan" ra" jeju wa ngonhaung" re mho" shid' byid' na: ra". 14 Yao: wa makhyang" ra" lo, mau" alhab' mae" ngonhaung" re khyad' yu nae" we' ngonhaung" re yao: za: sang: ra" gyang" san: ra" byu jham toe' yu mung:- ai: shab: ra" mau" zo" zaui: so: nae" kao bau: ra" mo, boe" genae" qhid' mae" yao: yao" gaung re ngonhaung" qhid' mae" byid' pye' ra". 15 Ce: khyo jham re mho" byid: wa,- nao qam: byid' ru we' qeim: mho" au:- ni" kheim: so' alhab' re ci wa,- yao: bam mae" khag' dayaug: yang re: nao re daqu" ngai nhao wa,.

Titu 3

1 Mung"dan: eib: ra" zug: qe we' kheim: so' qo" ra" mo, eib: ra: qao: mae na mung: yao: bam: mho dao: re tae" gyo: yang: ja: khao: ngo" mae agai kad' nae" jin" jin" ngad: na genae" qhid' mae" ni" byu qere ta" peim: wa,- 2 Khoyaug rere: gaui mamho lo:- ngaui pyo: yaug yo jhid'de; taung" jho" zam" khug: na mung: khonhae" re: yaug khao: ngo" re nau" nhae" ra" ave, jho" qhu" byid: genae" qhid' mae" yao: bam re ta" wa,- 3 Pe"mung:ga"re ngonhaung" yao: re: ganhae" wa adu: adae: mo,- mho dao: magyo: mo, shad' nghung: mo, ngad: lo: bam va". Ngonhaung" wa gaung sho: kao bau obyid: ru we' pyo: khyo aja: ja" nho: jeim boe" lai: lo: bam va". Ngonhaung" kaoso' daui khyo mae makhyang: pyi qho- myid nug: myid khyad' na: lai: lo va". Ngonhaung" wa su re nghang: mung: su wa ngonhaung" re nghang" ako". 4 Ngadqere: ngonhaung" khyad' yu: Asang pho" Mao"So: nhag" khyag' ru we' jhid'de; myid myao: thug' li" lao"- 5 yao: wa ngonhaung" re khyad' yu: ra". Yao: airu: ngonhaung" re khyad' yu: ru wa ngonhaung" yao: zaui: so" lo: ra" gai: ra" lo, mau" daja: ja: khyo" yang mangad:- yao: yao" nhag' khyag' shogu: ru mathao mae qid: yang cid' san: byid: yang: asag' dam: khau byid' ru we' kaoso' daui khyo asag' re boe" nhao: ra" gyang" lho" Byo khyo" yang yao: ngonhaung" re khyad' yu: ru ngad: ra". 6 Ngonhaung" wa yao" nhag' myan" ra" jeju khyo" yang Mao"So: yang din:man" ra" mo, ga: sun" yu byid' ru qhug' mung: ngonhaung" myid: lao" ra" apyad ato: kaoso' re qo" sang: yu nae" qhid' mae"- 7 Mao"So wa ngonhaung" nho: khyad' yu: Asang Yesu Khristu khyo" yang ngonhaung" dao mae Gyang" Lho" Byo magan: mago" vhe' sheim: byid' ra". 8 Ce: dao: wa dangman" ra" dao: ngad: ra". Mao"So re lam khug: ra" mo, wa yaug khao: ngo" qhid' mae" gai: ru we' akyu" bo: ra" gai shab: ra" lo, mau" jham zaui: so" rumae yo, khyin: byid: ca" rure ba beim" li" genae" qhid' mae" ai: khyo jham re nao je yang: akhyag to: mung: ta" peim: byid: nae" rure ngo o: ra". 9 Ngadqere: adu: adae: jho" ta" ngag: ra" khyo- dayao: dayang byuxag' she' ra" khyo- myan" jho" myo" ra" khyo- kham" to" ra" Tarha" we' sin: yang: jho" ta" byo; ra" khyo jham re jao" pye' wa,- Airu" ra" mau" zo" jham wa akyu" mabo aphug' made; ra" mau" zo" jham ngad" ra". 10 Phung: jho" kho' ru boe" nhao: ra" yaug re nang" thao" shid' lhang ta" peim: wa,- ai:thao lao" yao: we' dajhid' re: dazam" lo: wa,. 11 Airu" ra" yaug wa thoekhyo phaug' cekhyo phaug' kad' yaug ngad: rure nao ba: ra". Yao" qobo jham wa yao: shad' nghung" na: rure sagse: qhu" byid' ra". 12 Ngo wa Artema mangad: lao"- Tukhiku re nao jhao" nhao: ke' lao"- Nikopoli vogaung: khyo nao yao: gai: boe" ra" qhi" qam: ke' yang: ngojhao" li" la,- pe"mung:ga"re ngo wa ai: vogaung: mae gyo, yo, na: lai: pye' nae" myid: phyid' to: va". 13 Tarha" zug: pho" Zena we' Apolo shid' zo: gyaung: qo" su" lo" sho' nao gai: boe" ra" qhi" bao" thaug' byid: wa,- yao: shid' zo: qo ca" ra" gu: alhab' re qo mabo losho' bao" ke' wa. 14 Ngonhaung" byu qe wa gaigai: yao: qo ca" ra" mo, re qo" bao" thaug' byid: nae" qhid' mae" yao: bam: yo, khyin: re gai ra" mau" zo" mae ba: ci yhung: genae" khyo re zhao: yu ca" ko" ra". Yao: bam wa akyu" mabo lo: kaoso' magai: daui ngad: ra". 15 Ngo we' daga" na: ra" mo, alhab' naonhaung" re au" ke' ako". Lam khug: ra" ngonhaung" ba nam qere ngonhaung" au" ke' ra" dao" bota" kyo: byid: gela,- Mao"So: nhag' myan" ra" jeju wa naonhaung" alhab' mo, we' ngad: jo, vashao: wo".