Roma

Roma 1

1 Lau Dao: Gai re hau" pyo: kyo: nae" qhid' mae" Mao"So: yang khai: yu mung: lagyo: dayaug khyo" khyin: yu: to" ra" Khristu Yesu jeim pho" ngo wa mugsug' tung" ke' ra". 2 Ganhae"- Mao"So wa Yao" Lapa qe: nhad' dao: thoe khyo" yang Lau Dao: Gai re byid: nae" ga: dao:so: byid' to: va" ra" khyo re Gyang" lho" ra" Jham: Mugsug' mae tung" to" ra". 3 Ai: Lau Dao: Gai wa Mao"So: Yao: Zo:- ngonhaung" Asang Yesu Khristu khyo ngad: ra". Yao: wa xao su byu khyo"- Davi myid:zo: kaung mae khau: li" ra". 4 Amung: yao: wa Mao"So khyo"- Mao"So: Yao: Zo: ngad: rure qam: so' mo" we' shid: rumae" dam: daui: to" li" ra" khyo" yang qhu" byid' ava". 5 Byumyu" cao jab alhab' mo, wa Yesu re lam khug: lo mung: phug' cao" genae" qhid' mae" au: jhui" she nae" Mao"So wa ai: Asang khyo" yang Khristu mathao mae ngore ai: lagyo: aya: byid' ra". 6 Amung: Roma vogaung: mae na ko" ra" mo, naonhaung" re: Yesu Khristu byu qe boe" genae" qhid' mae" Mao"So: yang khai: yu: to: va" mo, ngad ko" ruyang ai bam: phung: mae bobo: ako". 7 Airumung: Mao"So jhid'de; yang: yao" amyu" boe" nae" qhid' mae" khai: yu: to" ra" Roma vogaung: bao: alhab' re ngo mugsug' tung" ke' ra". Ngonhaung" Pho" Mao"So we' Asang Yesu Khristu wa nhag' myan" ru we' yaug yo: ru naonhaung" re shaman" byid: vageshao: wo". 8 Asang Yesu re naonhaung" lam khug ko" ra" khyo re mug: myid geim" mae hau" nhao" jo; ruyang ngo wa naonhaung" alhab' mo; qhid' mae" Yesu Khristu mathao mae sao qhid' Mao"So: jeju re caung:khin" ra". 9 Ngo ta" ra" dao: dangman" rure Yao: Zo" nho: Lau Dao: Gai re ta" hau" kyo" ra" khyo" yang nga" aung khug nhag' lam: alhab' yang ngo caung da" byid' na: ra" Mao"So yao: yao: nga" sagse: ngad: ra". 10 Ngo akyu" mho' khao: ngo" naonhaung" re ngo myid: beim" na: ra" khyo re Mao"So yao: ba: ra". Mao"So myid o: ra" khyo jo; ngad: re wa celhang wa naonhaung" jhao" ngo qo" li" nae" khyo phung" byid: nae" qhid' mae" Mao"So re ngo akyu" mho' ra". 11 Pe"mung:ga"re naonhaung" nhag' lam: re qam: bo nhao nae" qhid' mae" Byo we' sin" ra" shaman" jeju naonhaung" re gae byid: nug: ruyang ngo wa naonhaung" we' gyai jho" myao nug: ra". 12 Ngo ta" nug: ru wa naonhaung" wa nga" lam khug: myid khyo" yang- ngo wa naonhaung" lam khug: myid khyo" yang dayaug we' dayaug qam: jho" bao" thaug' ru qhug' yu: li" nae" ein: ru ngad: ra". 13 Mao:nhaung: qe we"- ngo wa naonhaung" jhao" li" nae" qhid' mae" myo: sho' lhang seim" qu" va"- ngadqere: daja: ja" yang khonhae" re: kaung: kag' mung:- naonhaung" jhao" maqo" li" ru ngad: ra" khyo re naonhaung" myid: beim: byid: gela,- ngo wa gatau Taung bug byu qe: phaung mae qo" kho" aung: yu: ru we' dakhyo:- naonhaung" phaung mae re: qo" kho" aung: yu nug: ra". 14 Pe"mung:ga"re ngo wa byuyin- byujam:- pha,jhi" ba: ra" byu- pha,jhi" maba: ra" byu alhab' mo; dao mae qo qo" ra" yaug ngad: ra". 15 Airumung: naonhaung" Roma vobyu qere re: Lau Dao: Gai kho" kyo: byid: nae" qhid' mae" ngo kao bau: na: ra". 16 Ngo wa ai: Ngaui Bau: Lau Dao: re myo, cam: tang lam: ra". Aiwa sao qhid' re Yesu re lam" ko" ra" Yuda byu qe alhab' ai: thao re Yesu re lam" ko" ra" Taung bug byu qe alhab' re khyad' yu: ra" Mao"So: qam: so' ngad: ra". 17 Pe"mung:ga"re ai: Ngaui Bau: Lau Dao: wa xao su byu qere Mao"So: yang jo: ra" yaug ngad: ga: khoru: sun" yu: ra" khyo re qhu" byid' ra". Ai: ru wa aqhid mae" lo" thao" sho' lam khug: ra" khyo" yang sun" yu: ra" khyo ngad: ra". Airumung: Jham: Mugsug' mae- lam khug: ra" khyo" Mao"So: yang jo: ra" yaug ngad:- ga: sun" yu byid' ru qhug' ra" yaug wa kao so' daui: na: li" nae"- ga: tung" to" ru we' dakhyo: ngad: ra". 18 Ai: dangman" ra" khyo myao: thug' li" na: ra" khyo mae tam" to" ra" makhyang" ra" mau" zo" aja: ja: we' qobo alhab' dao mae Mao"So: nhag' yo" rure mug:gaung mae" qhu" byid' ava". 19 Pe"mung:ga"re Mao"So wa yao: yao" khyo re yao: bam re de: de: za: qhu" byid' ava". Airu: mung: yao: bam wa Mao"So: khyo we' sin: yang: gai: ba: ra" gu: re de: de: za: ba: yu: avako". Ce: mathao mae Mao"So wa yao: bam re qobo dae byid' ru ngad: ra". 20 Yao: bam wa Mao"So: yang phan" to: va" ra" ja: jham re qu" mung:- myid gaung re Mao"So phan" ra" ba na mae" maqo" gai: myao: ra" yao" qam: o: we' yao" Mao"So: ve, khyao re de: de: za: qu" ba: yu: avako". Airu: mung: yao: bam wa yao: yao" qhid' mae" ta" qid' yu nae" akhyo majo, loko" ngad: ra". 21 Yao: bam wa Mao"So re ba gengad yang: re: Mao"So re caung:khin" phug' te' byid: ang: ru we' dakhyo:- macaung: khin" byid: ko" ru we' Mao"So re jeju re: mabeim: so: ngad: ako". Ai: atha" yao: bam myid: ra" khyo jham wa akeim boe" pye' mung: yao: bam maba mabeim" ra" nhag' lam: re: mug: cad' cad' no; jo; ra". 22 Yao: bam wa yao: bam yao: pha,jhi" bo: ga:- ta" gengadqere: yao: bam wa adu: adae: mo, ngad: ako". 23 Shid no maba: ra" Mao"So re caung:pa" byid: nae" atha"- yao: bam wa shid no ba: ra" byu- ngho' jham- gug'nyhug' jham we' yoe" du" lhau: ra" ja: gug'nyhug' jham we' dau: ra" khyo" kad' to" ra" sulho jham re caung:pa" byid' ako". 24 Airumung: Mao"So wa ai: byu qere yao: bam: nhag' lam: kao bau: ra" masan masin" mau" zo" re kad' genae" qhid' mae" we' yao: bam yao: cao: aqho' aqhid mau" zo" kad' genae" qhid' mae" shapye' to" ra". 25 Yao: bam wa Mao"So: dangman" ra" khyo re mhug' pyag' ru we' tha" yu: pye' gemung: phan" Asang Mao"So yao: re caung:pa" byid: nae" atha"- Mao"So: yang phan" to" ra" ja: re yao: bam caung:pa" byid: yang: caung da" byid: na: ako". Phan" Asang wa apyad ato caung:khin" byid' ru qhug' vashao: wo". Amen. 26 Yao: bam ceru: kad' ko" ruyang Mao"So wa aqho' aqhid mung: ra" gaung sho" ra" shab' mhin: ru shad' khyo ab: pye' ava". Myiqe: qe lhao" re: gaung sho: jho" zam" na: ra" khyo re yauggai qe we' mangad: lo:- akhyo mangad' ra" khyo" jho" zam" ako". 27 Ai we' dakhyo: yauggai qere: gaung sho: jho" zam" ra" khyo re myiqe: qe we' mangad: lo:- akhyo mangad' ra" khyo" gaung sho: shab' ra" khyo yao: cao: jho" qho: ako". Yauggai qe wa yao: cao: aqho' aqhid mau" zo" kad' ko" ruyang yao: bam shad' lhoe" ra" magai: mau" zo" we' man: qi" ra" qobo dae re yao: bam yao: gag: vo; yu: ako". 28 Ai: byu jham wa Mao"So re Mao"So khyo" mamyid gemung:- Mao"So wa yao: bam mazaui: maso: ang: ra" mau" zo" re zaui: so: genae" qhid' mae" nhag' cad' noyaug myid khyo yao: bam re jhan: byid' ke' ra". 29 Yao: bam wa makhyang: mashab: ru- makhyang" ra" mau" zo" aja: ja:- so' kho' obyid: ru- maca' majhad' ru byang" sheim: jo; ako". Amung: yao: bam wa myid nug' ru- byu se' ru- nhag' lam: kaui: ru- mhug' pyag' ru- mo, byo, qho: ru byang" sho' ngad: ako". 30 Yao: bam wa gaui mho mung: dayaug we' dayaug makhyang" ra" dao: jho" ta" ako". Yao: bam wa Mao"So re nghang" ra" mo,- yao: cao: jho" roe" mung: ngad beim" ru we' phug mo, ngad: ako". Amung: yao: bam wa aphaug' alhag' kad' mo,- yao: bam: myhi" pho" mho dao: re magyo" ra" mo, ngad: ako". 31 Yao: bam wa akyang qeim mo,- dao:so: madang mo,- su gaje re nhag' khyag' myid- kao taui: myid mabo: ra" mo, ngad: ako". 32 Ceru: kao so' daui: ra" mo, wa shid man" ra"- ga: Mao"So: tarha" mae ta" to" rure yao: bam ba gau ngad: ako". Ngadqere: yao: bam wa yao: bam yao: ceru: kao so' daui ko" ru za: mangad:- Airu: kao so' daui: ra" mo, gaje qere re:- jo: ga: qam: byid' ako".

Roma 2

1 Nga" ba nam pho" we"- nao wa su gaje re dao: kho' nae" akhang" qo" i? Nao wa khoru" ra" yaug ngadqere: dao: kho' ra" akhang" dajhid' re: maqo" ngad: ra". Pe"mung:ga"re nao wa su gaje qere dao: kho' mung: yao: bam shad' lhoe" ra" qobo re naoyao: re: shad' lhoe" re wa naoyao" gaung naoyao: dao: phyid' yu: ru ngad: ra". 2 Airu: makhyang" ra" mau" zo" zaui: so" ra" mo, re Mao"So: dao: kho' ru wa tarha" ru ngad: ru ngonhaung" ba: ra". 3 Ngadqere: su gaje qere dao: kho' ra" qobo re naoyao: shad' lhoe" ra" yaug nga" ba nam pho" we"- Mao"So: dao: kho' rumae" qo" phao: loe, nae" ein: nao jho: i? 4 Airu: mangad: lao"- nao wa Mao"So: qi" qhang: ra" nhag' khyag' shogu ru- zang: kham: ru we' nhag' lam: qhang: ru jham re nao maphug' makhyad' kad' i? Pe"mung:ga"re Mao"So wa nao re myid tha" lo sho' khyoqhid' au: she: na: ruyang Mao"So wa nhag' khyag' shogu: yaug ngad: rure gaigai: yao: nao ba: ra". 5 Ngadqere: nao wa nhag' lam: qao yang: myid matha" ruyang Mao"So: nhag' yo" ru de" thug' li" nae" ra" ba na- din:man" ra" khyo" dao: kho' nae" ra" ba na mae kham zo: nae" qobo dae re je: qi: naekhyo" nao qaung" na: ra". 6 Pe"mung:ga"re Mao"So wa ngonhaung" yaug khao: ngo" re yao: yao" lo, mau" re cao" yang:- aphug' jhaung qhu" byid' li" nae". 7 Gai: ra" mau" zo" zaui: so" na mung: phungbao- phug' te' nga: yhe' nae" we' maba: shid: ra" kao so' re qho: ra" mo, re Mao"So wa apyad ato: kao so' byid' li" nae". 8 Yao: yao" qhid' mae" za: myid yang: jo: ra" khyo re ngag: pye' mung: shad' ra" khyo cao" ra" mo; dao mae Mao"So wa yao" nhag' gyid' nhag' yo" ra" dae byid' li" nae". 9 Sao qhid' Yuda byu qe- amung: ai: thao re- Taung bug byu qere:- makhyang" ra" mau" zo" zaui: so" ra" byu qe alhab' wa- dayin dayo: no: ru we' qug: khai: qhug' kham zo" li" genae". 10 Ngadqere: din: man" ra" khyo re zaui: mo, alhab' Yuda byu qeshi" sao qhid'- amung: ai: thao re Taung bug byu qere re: Mao"So wa phungbao- phug' te' nga: yhe' ru we' ngaui pyo: yaug yo: ru byid' li" nae". 11 Pe"mung:ga"re- Mao"So wa yaug khao: ngo" re myo, nho nga: lao: makhyin lo: dao: kho' ra". 12 Moshe kham" to" ra" Tarha" re maba ko" ra" Taung bug byu qe qobo shad' lhoe" gelao"- yao: bam wa Tarha" khyo" mangad: lo:- jeim" shid: lo" ako". Tarha" ba: ra" Yuda byu qe qobo shad' lhoe" gelao"- yao: bam wa tarha" khyo" dao: kho' ru qhug' ako". 13 Pe"mung:ga"re xao su byu re Mao"So: yang jo:- ga: sun" yu byid' ru wa- ai: Tarha" re gyo" yu: ruyang za: mangad:- ai: Tarha" mae amyin" byid' to" ra" gu: re phug' cao" ra" khyo" sun" yu byid' ru ngad: ra". 14 Taung bug byu qe wa ai: kham" to" ra" Tarha" maqo" ko" ngad: ra". Ngadqere: ai: Tarha" mae bo: ra" amyin" dao: jham re yao: bam: nhag' lam: aung khug mae yao: yao: ba mung: phug' cao" gelao"- yao: bam wa Tarha" maqo" gesho' ngadqere: ai: aung khug mae ba: ru wa yao: bam: Tarha" ngad: ako". 15 Ai: Tarha" mae bo: ra" dao: jham wa yao: bam: nhag' lam: aung khug mae tung" to" ra" khyo re yao: bam: lo, mau" yang qhu" byid' ako". Yao: bam: nhag' lam: akhug myid re: ceru dangman" ra" khyo re shid' byid' na: ra". Dalhang lhang yao: bam: nhag' lam: wa yao: bam re qobo zhaug' mung: dalhang lhang wa yao: bam re jo: ra"- ga: khin" byid' ra". 16 Airumung: ngo kho" kyo" ra" lau dao: gai we' dakhyo:- ai: dao: kho' ra" ba na mae Mao"So wa Yesu Khristu khyo" yang byu alhab' mo; nho: nhag' lam: khug mae nyham" to" ra" mau" zo" jham re airu: dao: kho' li" nae". 17 Nao khoru: i? Nao wa naoyao" gaung re Yuda byu ngad:- ga: ta" ra". Amung: nao wa kham" to" ra" Tarha" re lam khug: ru we' Mao"So re ngha yang: phug: ra". 18 Nao wa Mao"So myid o: ra" khyo re ba yaug ngad: ra"- amung: kham" to" ra" tarha" mae" jo: ru we' shad' rure ba: khyin: yu nae" qhid' mae" zhao: yu va" yaug ngad: ra". 19 Amung: nao wa myo, jid jham: qhid' mae" khyo jhui: yaug- mug: cad' khug mae na: ra" mo; mug: bo" ngad:- adu: adae: mo, re mho" shid' ra" yaug- maba mabeim" ra" mo; mho" pho" ngad:- ga: nao gaigai: myid: jho: ra". 20 Kham" to" ra" Tarha" mae laba lajhao we' dangman" ru byang" sho' bo: ga" rure nao gaigai: ba: ra". 21 Nao wa su gaje qere mho" byid: mung: naoyao" gaung re pe"mung: mamho" peim: i? Nao wa su gaje qere magai: khug' ga: mho" kyo: mung: naoyao: wa pe"mung: khug' i? 22 Nao wa su: myi: magai: shad' ga:- ta" mung: naoyao: wa pe"mung: su: myi: re shad' i? Nao wa so sulho jham re ca' mung: naoyao: wa ai: sulho yham mae" pe"mung: lhad' zo" na: i? 23 Amung: nao wa- ai: kham" to" ra" Tarha" re ngha yang: phug: ta" mung:- yao" Tarha" re shad' lhoe" ra" khyo" nao pe"mung: Mao"So re qho' phyo' i? 24 Yuda byu qe: mathao mae Taung bug byu qe wa Mao"So: mang re makhyang: mayao: ra" khyo" jung" gaui: ako"- ga: jham: mugsug' mae ta" to" ra". 25 Amung: nao wa kham" to" ra" Tarha" re phug' cao" yaug ngad: re wa- ni" nho: au: qid lhai" ra" khyo wa phug' de; ra". Ngadqere: nao wa ai: kham" to" ra" Tarha" re maphug' cao" yang: ngad: re wa- khonhae" re: au: qid malhai" ru wa je: gai: ra". 26 Au: qid lhai" ra" khyo makham: yu: ra" Taung bug byu dayaug wa ai: kham" to" ra" amyin" dao: jham re phug' cao" ngad: re wa- Mao"So wa aiyaug re au: qid lhai" ra" khyo kham: yu: ra" yaug khyo" sun" yu byid' li" nae" mangad: i? 27 Yuda byu ngad: ra" nao wa tung" to" ra" Tarha" re qo" ru we' au: qid lhai" ra" khyo re kham: yu sho' ngadqere: nao wa ai: kham" to" ra" Tarha" re shad' lhoe" ra" yaug ngad: ra". Airu: mung: Taung bug byu qe wa naonhaung" Yuda byu qere dao: kho' li" genae"- pe"mung:ga"re yao: bam wa gaung sho: we' sin: yang: au: qid lhai" ra" khyo makham: yu gengadqere: yao: bam wa ai: kham" to" ra" Tarha" re phug' cao" ako". 28 Au: qid lhai: kham: ra" Yuda agyang" wa khoyaug lam: ngad: ra" i? Gaung sho: we' sin: yang: au: qid lhai" ra" khyo re kham: yu mung: adao shad' mae za: Yuda byu ngad: ra" yaug wa Yuda byu agyang" mangad:- 29 Yuda byu agyang" wa- nhag' lam: khug mae au: qid lhai" ra" khyo re kham: yu: ra" yaug za: ngad: ra". Yao: re Yuda byu agyang" boe" nhao: ru wa ai: tung" to" ra" Tarha" yang boe" nhao: ru mangad:- ai wa Mao"So: Byo: yang aung khug nhag' lam: mae Yuda byu boe" nhao: ru ngad: ra". Airu" ra" yaug wa byu: yang caung:khin" byid: qhug' yaug mangad:- Mao"So: yang caung:khin" byid: qhug' ra" yaug ngad: ra".

Roma 3

1 Airulao" wa Yuda byu qe wa Taung bug byu qe tho' gatau pe" je: ra" i? Yao: bam au: qid lhai: khyo kham: yu: ru wa pe" akyu" bo: i? 2 Khyo khao: ngo" mae akyu" bo: ra". Sao qhid' mae Mao"So wa Yuda byu qere lam mung: yao" mungdao: byid' ra". 3 Ngadqere: yao: bam mae" damyo" wa makyid ko" ra" mangad: i? Yao: bam makyid: ruyang Mao"So re makyid ein: gai: ta" genae" i? 4 Dajhid' re: airu: mangad:- Byu yaug khao: ngo" mhug' gengad yang: re: Mao"So wa jo: ra". Amung: Jham: Mugsug' mae- Nao dao: jhau: au: nao jo: rure qhu" ca" ra". Amung: nao dao: phyid' ru qhug' lao" re: nao aung ca" ra"- ga: ta" to" ru we' dakhyo: ngad: ra". 5 Ngadqere: ngonhaung" nho: makhyang" ra" mau" zo" wa- Mao"So: dangman: gai shab: rure je yang: de: de: za: qhu" byid' ra" mangad: i? ga: myid' li" genae". Ngonhaung" khoru: tau: nae" i? Mao"So ngonhaung" re qobo dae byid' ru wa shad' ru ngad: ra" ein:- tau: nae" i? (ga" ra" dao: myid: wa byu shad' khyo" ngo myid' ra" dao: myid: ngad: ra".) 6 Mao"So shad' ra" ein: khokhyo" re: maqo" ta" ngad: ra". Mao"So wa- matarha" ra" yaug ngad: re wa- yao: wa mug: myid re khoru: dao: qo" kho' nae" i? 7 Amung: nga" nho: madangman" ru wa Mao"So: dangman" ra" khyo re je yang: de: de: za: qhu" byid' ru ngad: re wa- pe"mung: ngo wa qobo qo" ra" byu dayaug we' dakhyo: dao: phyid' ru kham zo" na ca" shilo" i? 8 Airulao" gai: ru boe" thug' li" nae" qhid' mae" makhyang" ru ngonhaung" kad' gelang: ein: ta" nae" i? Gai gai: yao: byu damyo" wa cedao: re ngo ta" ru ngad: ra"- ga: ngore qobo zhaug' yang: maphug' makhyad' ta" phoe: pye' ako". Airu" mo, wa yao: bam kham zo: ang: ru we' dakhyo: dao: phyid' ru qhug' li" genae". 9 Airu: ngad: re wa- ngonhaung" Yuda Byu qe wa Taung bug byu qe tho' je: gai: ra" akhyo mae jo; i? Dajhid' re: mangad:- Yuda byu qe we' Taung bug byu qe wa alhab' mo, dakhyo: za: qobo: nho: qam: so' qao: mae na: jo; rure ngo ta" shid' to: gau ngad va". 10 Jham: Mugsug' mae- Din:man" ra" byu dayaug re: mana- Pha,jhi" ba: ra" byu dayaug re: mana- 11 Mao"So re caung:pa" ra" yaug re: dayaug re: mana ngad: ra". 12 Byu alhab' mo, wa Mao"So re nhaung thao" phaug' lo" byaug: avako". Yao: bam alhab' mo, shad' nghung" lo" byaug: avako"- Din:man" ra" khyo re cao" ra" byu mana- dayaug lhao" re: mana ngad: ra". 13 Yao: bam: nhad' dao: thoe wa su re shid nhao: ra" apyag' asham" dao: jham za: byang" sheim: jo; ra". Yao: bam: sho jham wa aphaug' alhag' mhug' pyag' ako". Lhao maui daug ru" ru gyaug pho: yao: bam: nhad' qid mae bo: ako". 14 Yao: bam:nhad' khug mae nhang: kheim: nhang: thoe za: byang" sheim: jo; ako". 15 Yao: bam wa su re dae te' nae" we' byu se' nae" rumae phyad mo, ngad: ako". 16 Yao: bam joe" ra" jo, qo khao: ngo" mae byo; qeim: ru we' lhau: phyo' lhau: sin" ru kad' to: co' ako". 17 Yao: bam wa ngaui pyo: yaug yo: ra" khyodang re maba ko" ngad: ra". 18 Amung: yao: bam wa Mao"So re gyaug phug' ra" myid re: mabo ko" ngad: ra"- ga: ta" to" ru we' dakhyo: ngad: ra". 19 Xao su byu alhab' mo; nho: ceru:- mhoru: ga: ta" rure tam" pye' nae" we' mug: myid geim" Mao"So: dao: kho' ra" qao: mae ngad nae" qhid' mae" kham" to" ra" Tarha" gu: alhab' wa Tarha" khug mae na: ra" mo; qhid' mae" ngad: rure ngonhaung" ba: ra". 20 Pe"mung:ga"re khag' re: ai: Tarha" phug' cao" ra" khyo" yang Mao"So: qhid' kheim: mae jo: ra" yaug maqo" boe" ngad: ra". Ai: Tarha" wa byu re yao: qobo shad' lhoe" va" rure ba nhao: ra". 21 Ngadqere: ana" wa- Mao"So: yang xao su byu qere jo:- ga: khoru: sun" yu: ra" khyo re qhu" byid' ava". Ngadqere: Mao"So wa byu re jo: ra"- ga: sun" yu: ru wa Tarha" we' dajhid' re: masin: ngad: ra". Ce: Moshe Tarha" we' lapa qe: mugsug' wa ce: khyo re sagse: kham byid' avako". 22 Xao su byu qere jo: ra"- ga: Mao"So sun" yu: ru wa Yesu Khristu re yao: bam lam khug: ra" myid khyo" yang ngad: ra". Mao"So wa Yesu re lam khug: ra" mo, alhab' re ceru: sun" yu: ruyang yao: cao: dajhid' re: majho" shai" ngad: ako". 23 Yaug khao: ngo" qobo shad' lhoe" gemung: Mao"So: khyad' yu: ra" phungbao mae" va" kyo: byaug: ako". 24 Ngadqere: xao su byu qere lhoe' ke' byid' ra" Yesu Khristu khyo" aphug' mayu lo: byid' ra" Mao"So: nhag' myan" ra" jeju jhaung qhu" yang xao su byu alhab' mo, re jo: ra"- ga: Mao"So sun" yu: ra". 25 Yao: shid kham: ra" khyo" yang xao su byu qe wa qobo mae" loe; beim khyo qo" genae" qhid' mae" Mao"So wa Yesu re xeim: khyo" san: to" ra". Xao su byu qe wa yao: re lam khug: ra" khyo" yao: bam: qobo jham re khyad' pye' byid' ru qhug' yu: ako". Mao"So ceru: kad' ru wa- yao: wa din:man" ra" yaug ngad:- ga" rure qhu" byid: nae" qhid' mae" kad' ru ngad: ra". 26 Mao"So wa lai: lo" va" ayo, mae nhag' lam: qhang- zang: kham byid: mung: xao su byu qe: qobo jham re maxam: byid: ngad: ra". Ngadqere: ana" ceyo, mae wa yao" din:man" rure qhu" byid: nae" qhid' mae" Mao"So wa yao: bam: qobo jham re akhyag xam" yu: ra". Ceru: kad' mung: Mao"So yao: yao: din:man" ra" yaug ngad: rure we' Yesu re lam" ra" mo, yaug khao: ngo" re din:man" ra" ga: yao: sun" yu: ra" khyo re qhu" byid' ra". 27 Aire wa- ngonhaung" pe" ru: gai: qo" phug nae" i? Ngonhaung" phug nae" khyo majo,- pe"mung: ngad: i? Ai: Tarha" re ngonhaung" phug' cao" ra" khyo" yang ngad: i? Mangad:- ngonhaung" lam" ra" khyo" yang ngad: ra". 28 Pe"mung:ga"re byu wa Tarha" mae amyin" byid' to" rure phug' cao" ra" khyo" yang mangad: lo:- lam khug: ra" khyo" yang za: Mao"So wa jo: ra"- ga: sun" yu: ru ngad: rure ngonhaung" khae: yu: to" ra". 29 Mao"So wa Yuda byu qe: Mao"So za: ngad: i? Mao"So wa Taung bug byu qe: Mao"So re: ngad: ra" mangad: i? Gai gai: ngad: ra". 30 Mao"So wa date: za: ngad: ra". Yao: wa Yuda byu qere yao: bam: lam khug: ra" apan aqao: khyo" yang jo: ra" ga: sun" yu: li" nae"- amung: Taung bug byu qere re:- yao: bam: lam khug: ra" khyo" yang jo: ra"- ga: sun" yu: li" nae". 31 Ngonhaung" wa ce: lam khug: ra" khyo" yang kham" to" ra" tarha" re to" pye' naeva" i? Dajhid' re: magai: to" pye'- ai: atha" ngonhaung" wa ai: kham" to" ra" Tarha" re phug' cao" na: ru ngad: ra".

Roma 4

1 Airulao" wa ngonhaung" phug' pho" ajhaung Abraham nho: khyo re khoru: ta" nae" i? Yao: thaung" qhug' lo: ra" khyo wa pe" ru: i? 2 Abraham wa yao: zaui: so" lo: ra" lo, mau" mathao: yang jo: ra" ga: Mao"So: yang sun" yu: ru qhug' ngad: re wa yao: wa phug nae" khyo jo; ra". Ngadqere: Mao"So: qhid' kheim: mae mangad:- 3 Jham: Mugsug' mae- Abraham wa Mao"So re lam khug: ra"- ai: yao" lam khug: ra" myid mathao: yang Mao"So wa yao: re din:man" ra" yaug- ga: khae: yu: ra"- ga: ta" to" ra". 4 Mau" zaui" ra" byu dayaug wa aphug' qo" khae: yu: ra". Ngadqere: ai: aphug' wa jhaung qhu" khyo" mangad:- yao: qo" kham: yu ang: ra" mau" zaui: phug' ngad: ra". 5 Ngadqere: yao" mau" zo" lo, mau" re makhug ngha lo:- yao" lam khug: ra" myid re khug ngha mung: qobo qo" ra" yaug re qobo maqo"- ga: ta" hau" ke' ra" Mao"So re lam khug: ra" yaug re wa- yao" lam khug: ra" myid mathao: yang Mao"So wa yao: re jo: ra" ga: sun" yu: ra". 6 Byu dayaug wa lo, mau" mathao: yang mangad: lo:- Mao"So: yang din:man" ra" yaug khyo" khae: yu:ru qhug' ra" yaug wa ngaui lho" ra" khyo re yao: ta" au:- Davi wa- 7 Tarha" shad' lhoe" rure qobo khyad' byid: qhug' ru we' yug: no qobo jham re khyad' pye' byid: qhug' ra" mo, wa ngaui lho" ako". 8 Yao: yao" qobo re Mao"So: yang maxam" to: byid: nae" yaug wa ngaui lho" ra"- ga: ta" ra". 9 Davi ta" ra" ce: ngaui lho" ru wa au: qid lhai: khyo re kad' ra" mo; qhid' mae" za: ngad: ra" i? Dajhid' re: mangad: ngad: ra". Ai: ngaui lho" ru wa au: qid lhai" ra" khyo makham: yu: ra" mo; qhid' mae" re: ngad: ra". Pe"mung:ga"re- Abraham wa Mao"So re lam khug: ra". Aimung: yao" lam khug: myid mathao: yang Mao"So wa yao: re din:man" ra" yaug khyo" khae: yu: ra"- ein: ngonhaung" Jham: Mugsug' re ngha yang: ta" va". 10 Ceru wa khonhae" boe" ru ngad: i? Abraham wa au: qid lhai: khyo makham: yu shire ngad: i? Mangad: lao"- au: qid lhai" ra" khyo re kham: yu thao re ngad: ra" i? Au: qid lhai" ra" khyo kham: yu thao re mangad:- Au: qid lhai" ra" khyo makham: yu shimae" ngad: ra". 11 Abraham wa- au: qid lhai" ra" khyo re ai: thao re kham: yu: ra"- ai: au: qid lhai" ra" khyo re kham: yu: ru wa- Mao"So wa Abraham nho: lam khug: myid mathao mae ai: au: qid lhai" ra" khyo makham: yu shimae" Abraham re din:man" ra" yaug khyo" sun" yu: ra" khyo re qhu" byid' ra" ave, ngad: ra". Airumung: Abraham wa ai: au: qid lhai" ra" khyo re makham: yu gesho' ngadqere: Mao"So re lam khug: ra" myid mathao mae din:man" ra"- ga: Mao"So: yang sun" yu byid' ra" mo, alhab' nho: yao: pho" ngad: ra". 12 Yao: wa au: qid lhai" ra" khyo re kham: yu: ra" mo; yao: pho" re: ngad: ra". Aiwa yao: bam: au: qid lhai" ra" khyo re kham: yu ko" ruyang za: mangad:- ngonhaung" phug' pho" Abraham yao: au: qid lhai" ra" khyo re makham: yu shire Mao"So re lam khug yang: kao so' daui: lo: ra" lo, mau" we' dakhyo:- yao: bam kao so' daui geyang: ngad: ra". 13 Mao"So wa Abraham we' yao" myid:zo: qere- mug: myid re sang nhao nae"- ga: dao:so: byid' to" ra". Airu: dao:so: byid' to" ra" au:- Abraham wa kham" to" ra" tarha" re phug' cao" yang: mangad:- yao: wa Mao"So re lam khug mung: Mao"So: yang yao: re din:man" ra" yaug khyo" sun" yu byid' ruyang ngad: ra". 14 Mao"So: dao:so: wa ai: kham" to" ra" tarha" re phug' cao" ra" mo; qhid' mae" za: ngad: re wa- lam khug: ru wa aje amyid ngad mung:- Mao"So: dao:so: re: pe" phug' made, ngad: ra". 15 Kham" to" ra" tarha" wa Mao"So: nhag' yo" rure boe" nhao: ra"- ngadqere: ai: kham" to" ra" tarha" majo, re wa tarha" shad' lhoe" rure: majo, ngad: ra". 16 Airumung: ai: dao:so: wa Abraham nho: myid:zo: qe alhab' re aphug' mabyid: ca" lo: byid' ra" Mao"So: jeju jhaung qhu" ngad: ra" khyo re gang" tang: jo, vashao:- lam khug: rumae apan te" to" ra" khyo re qhu" byid: nae" qhid' mae" dao:so: ngad: ra". Ai: dao:so: wa kham" to" ra" Tarha" re phug' cao" ra" mo; qhid' mae" za: mangad:- Abraham we' dakhyo: Mao"So re lam khug: ra" mo; qhid' mae" re: ngad: ra". 17 Pe"mung:ga"re jham: mugsug' mae- ngo wa nao re byumyu" myo: sho' mo; yao: pho" boe" nhao va"- ga: ta" to" ru we' dakhyo:- Abraham wa Byo we' sin" ra" ngonhaung" alhab' mo; yao: pho" ngad: ra". Airu: mung: ai: dao:so: wa Abraham lam khug: ra" Mao"So: qhid' kheim: mae gai: ra". Ai: Mao"So wa sushid re kao so' daui: li" nhao: ru we' azhao majo; rure jo; li" nae" qhid' mae" amyin" byid' ra" Mao"So ngad: ra". 18 Abraham wa myid: lao" nae" khyo agu majo; au: lhao" re: Mao"So re lam khug mung: myid: lao" ra"- Airumung: yao: wa byumyu" myo: sho' mo; yao: pho" boe" lo: ra". Jham: Mugsug mae- ni" myid:zo: qe wa kyi ce' nho" je" li" nae"- ga: ta" to" ru we' dakhyo: ngad: ra". 19 Yao" apyad dayo zin ko byang" li" na mung: yao" gaung dau: wa ashid ru" ru ngad: byaug va" rure re:- Sarah wa zo: dau maqo" khau lo" rure ba ngadqere: yao" lam khug: myid wa manang" lo" ngad: ra". 20 Yao: wa Mao"So re lam khug: ra" myid mato" pye' ngad: ra". Mao"So: dao:so: rere: aug' o: myid mabo ngad: ra"- yao" lam khug: myid wa yao: re qam: so' pyang" byid: mung: yao: wa Mao"So re caung:khin" byid' ra". 21 Mao"So wa yao: dao:so: byid' to" ru we' dakhyo:- qo" kad' boe" yaug ngad: rure Abraham wa myo, cam: tang lam: ra". 22 Abraham wa airu: Mao"So re lam khug: ruyang Mao"So: yang yao: re din:man" ra"- ga: khae: yu byid' ra". 23 Mao"So wa yao: re din:man" ra" yaug khyo" khae: yu: ra"- ga" ra" dao: wa Abraham yao: dayaug reza: qang yang: tung" to" ru mangad:- 24 Ngonhaung" Asang Yesu re shid: rumae" dam: daui: to" li" nhao: ra" Mao"So re lam khug: ra" mathao mae Mao"So: yang din:man" ra"- ga: khae: yu qhug' ra" mo, ngonhaung" rere: qang yang: tung" to" ru ngad: ra". 25 Pe"mung:ga"re- Asang Yesu wa ngonhaung" qobo mathao mae shid kham: byid: nae" ab: pye' ru qhug' mung:- ngonhaung" re Mao"So: yang jo: ra"- ga: khae: yu nae" qhid' mae" yao: wa shid: rumae" dam: daui: to" li" nhao: ru qhug' ra".

Roma 5

1 Ana"- ngonhaung" wa lam khug: ra" myid khyo" yang jo: ra"- ga: Mao"So: yang sun" yu: ru qhug' mung:- ngonhaung" Asang Yesu Khristu khyo" yang Mao"So we' ngonhaung" agyo: mae yaug yo: ru qhug' yu: ra". 2 Ana" ngonhaung" daui: na: ra" Mao"So: jeju re kham zo" ra" kao so' mae yao: ngonhaung" re lam khug: ru khyo" yang jhui" lo: ra". Airumung: Mao"So: phungbao re qo" bokhae: yu nae"- myid: lao" yang: ngonhaung" ngaui bau: ngaui yao phug: na: ra". 3 Ngonhaung" wa qug: khai" rumae re: ta" phug: na:- pe"mung:ga"re qug: khai" ru wa zang: qhao" rure- boe" nhao: ra". 4 Zang: qhao" ru wa Mao"So: yang myid bovang" byid' rure boe" nhao: ra". Asang Mao"So: yang myid bovang" byid' ru wa myid: lao" rure boe" nhao: rure- ngonhaung" ba: ra". 5 Ai: myid: lao" ru wa ngonhaung" re qam: shan nhao nae" mangad:- pe"mung:ga"re ngonhaung" re byid' ra" jhaung qhu"- Gyang" Lho" Byo khyo" yang Mao"So wa yao" jhid'de; myid ngonhaung" nhag' lam: khug mae vhe' zaui byid' to" ra". 6 Ngonhaung" khug ngha qo majo, shi" au:- Khristu wa Mao"So: yang dang: to" ra" yo, khyin: mae makhyang: mashab; ra" mo; qhid' mae" shid kham: byid' ra". 7 Din:man" ra" byu dayaug: qhid' mae" byu dayaug yaug shid kham: byid: nae" wa qug' ra" mau" ngad: ra". Byugai dayaug: qhid' mae" vae" shid kham: byid: nae" byu kam" wa- dayaug yaug bo maba- 8 Ngadqere: ngonhaung" wa qobo gaung qe ngad: jo; bam shi" au:- Khristu wa ngonhaung" qhid' mae" shid kham: byid' ru wa Mao"So ngonhaung" re khoqhi" jhid'de; ra" khyo ngonhaung" re qhu" byid' ava". 9 Ana" ngonhaung" wa Khristu shid kham: byid' ra" khyo" yang jo: ra"- ga: Mao"So: yang sun" yu: ru qhug' mo, ngad mung: Mao"So: nhag' yo" rumae" Khristu mathao mae khyad' yu: ru je yang: qhug' nae" ngad: ra". 10 Ngonhaung" wa Mao"So: gyevo qe ngad: bam ngadqere: Mao"So: yao: zo: shid kham: byid' ra" khyo" yang ngonhaung" re yao" ba nam kad' yu: ra". Ana" ngonhaung" wa Mao"So: ba nam qe ngad va" ruyang kao so' daui: na: ra" Khristu kao so' mathao mae ngonhaung" wa khyad' yu: ru je yang: qhug' nae" ngad: ra". 11 Ana" ngonhaung" re Mao"So: ba nam boe" nhao: ra" Asang Yesu Khristu khyo" yang Mao"So kad' va" ra" mau" zo" mathao mae ngonhaung" ngaui bau" na:. 12 Qobo wa byu dayaug khyo" yang mug:myid khyo vao li" mung: yao" qobo mathao mae shid: ru boe" li" ra". Airumung: byu alhab' mo, wa qobo shad' lhoe" ko" ruyang shid: ru wa xao su byu alhab' mo; dao mae byo: lo" ra". 13 Kham" to" ra" Tarha" majo, shimae"- qobo wa mug: myid dao mae jo; ra". Ngadqere: ai: kham" to" ra" Tarha" majo; ra" yo, mae qobo jham re xam" to" ra" khyo majo, ngad: ra". 14 Ngadqere: shid: ru wa Adam nho: pyad mae" Moshe nho: pyad mae joe" sho' xao su byu alhab' mo; dao mae eib; to" ra". Mao"So: amyin" dao: re mho dao: magyo" ra" khyo"- Adam: shad' lhoe" ra" qobo ru" rure mashad' lhoe" ko" ra" mo; dao mae lhao" re:- shid: ru wa eib: jo; ra". Adam: wa joe" li" nae" ra" yaug: ve, lho ngad: ra". 15 Ngadqere: ai shid' yaug wa majho" dau ngad: ako"- pe"mung:ga"re Mao"So: jeju jhaung qhu" wa Adam nho: qobo we' madau ngad: ra". Byu dayaug qobo shad' lhoe" ra" mathao: yang byu myo: sho' mo, shid: ru qhug' ko" ru wa dang: ra". Ngadqere: Mao"So: nhag' myan" ru we' Yesu Khristu ga" ra" byu dayaug: nho: nhag' myan" ra" khyo" yang byu myo: sho' mo, re byid' ra" Mao"So: jeju jhaung qhu" wa je yang: qi" qhang: ra". 16 Mao"So byid' ra" jeju jhaung qhu" we' byu dayaug shad' lhoe" ra" qobo dae wa majho" dau ngad: ra". Qobo daja: thao re qobo qo" ra"- ga: dao: kho' ru joe" ra". Ngadqere: qobo myo: sho' thao mae qobo maqo" ga: ta" pyo: ra" maman: maqi" ra" khyo" khae: yu: ra" jeju jhaung qhu" thug' li" ra". 17 Byu dayaug shad' lhoe" ra" qobo mathao mae shid: ru wa ai: byu dayaug: mathao mae byu alhab' mo, re eib: na: ru wa dang: ra". Ngadqere:- Yesu Khristu ga" ra" byu dayaug khyo" yang kad' thug' ke' ra" akyu" wa khoqhi" sho' je: qi:nae" i? Mao"So: magan: mago" ra" nhag' myan" ru jeju re qo" khae: yu: ra" mo, we' Mao"So: yang jo: ra"- ga: sun" yu qhug' ra" mo, wa Khristu khyo" yang qam: bo bo za: kao so' daui: li" genae". 18 Airumung:- byu dayaug qobo shad' lhoe" ruyang byu alhab' mo, dao: kho' ru qhug' ruwe' dakhyo: byu dayaug din:man" ra" mau" zo" zaui: so" ruyang byu alhab' mo, re loe; beim nhao mung:- yao: bam re kao so' byid' ra". 19 Byu dayaug mho dao: magyo" ra" mathao mae byu alhab' mo, qobo shad' lhoe" ra" mo, ga: sun" pye' ru we' dakhyo:- byu dayaug mho dao: gyo" ruyang byu alhab' mo, re din" man" ra"- ga: Mao"So: yang sun" yu byid' ru qhug' li" genae". 20 Shad' lhoe" ra" qobo myo" laug: li" nae" qhid' mae" Mao"So wa kham" to" ra" Tarha" re byid' to" ra". Ngadqere: shad' lhoe" ra" qobo myo" laug: li" lao"- Mao"So: nhag' myan" ra" jeju re: jeyang: myo" laug: li" ra". 21 Airumung: qobo wa shid: ra" qam: so' yang eib: na: ru we' dakhyo:- Mao"So: nhag' myan" ra" jeju re: din:man" ru we' eib khang" na mung:- ngonhaung" nho: Asang Yesu Khristu khyo" yang ngonhaung" re apyad ato: kao so' re qo" yu nhao: ra".

Roma 6

1 Airulao"- ngonhaung" pe" ru: ta" nae" i? Mao"So: nhag' myan" ra" jeju myo" laug: li" nae" qhid' mae" ngonhaung" wa qobo khug mae xo' yang: kao so' daui nae" i? 2 Gaigai: airu: mangad:- Qobo we' shid: gao: va" mo, ngonhaung" wa qobo khug mae khoru: mung: kao so' qo" gai: daui nae" i? 3 Pe"mung:ga"re ngonhaung" wa Yesu Khristu we' dagaung dasho: za: doe, nae" qhid' mae" qid nyhab' kham: yu: ra" au:- yao: we' daga" boshid kham va" rure naonhaung" gaigai: yao: ba: ako". 4 Airumung: Yesu wa yao: Pho" phungbao qam: so' khyo" yang shid: rumae" dam: daui: to" li" nhao: ru qhug' ru we' dakhyo:- ngonhaung" re: kao so' daui khyo asag' re kao so' qo" daui: na nae" qhid' mae"- ngonhaung" qid nyhab' kham: yu: ra" khyo" Yesu yao" shid kham" rumae bobo mung: yao: we' daga" nyhab' pye' ru qhug' bam va". 5 Pe"mung:ga"re ngonhaung" wa yao: we' daga" yao" shid: rumae yao: we' boshid va" ru we' dakhyo:- yao: re daui: to" li" nhao: ru qhug' rumae ngonhaung" re: yao: we' daga" daui: to" li" nhao: ru qhug' nae" ngad: ra". 6 Amung: qobo kad' nae" kao bau: ra" myid qam: so' re se' pye' mung: ngonhaung" wa qobo: nho: jeim maboe" na lo nae" qhid' mae" ngonhaung" nho: qobo gaung byuxug' wa Khristu we' daga" pyao: zang dao mae bose' pye' ru qhug' va" rure ngonhaung" ba: ra". Airumung: ngonhaung" wa qobo: nho: jeim magai: boe" na lo:ngad: ra". 7 Pe"mung:ga"re byu dayaug yaug wa shid: au:- yao: wa qobo: qam: so' lo, mae" lhoe' ke' byid' ru qhug' ra". 8 Ngonhaung" wa Yesu we' daga" shid kham: va" ruyang ngonhaung" re: yao: we' daga" kao so' daui: li" nae" ein: myid: lam: ra". 9 Pe"mung:ga"re Khristu wa shid: rumae" dam: daui: to" li" nhao: ru qhug' va" rumung:- thao phyao: khonhae" re: madam: shid lo nae". Shid: ru wa yao: re maqo" eib lo nae" rure ngonhaung" ba:. 10 Airumung: yao: shid kham: va" ruyang qobo wa yao" dao mae maqo" eib: na lo:ngad: ra". Ana"- yao: wa Mao"So we' zam" khug yang: kao so' daui: na: ra". 11 Ai we' dakhyo: qobo we' sin: yang: ta" gelang: ga" re- naonhaung" yao" gaung re shid va" khyo" myid: jho: yu ca" ako". Ngadqere: Yesu Khristu khyo" yang Mao"So we' zam" khug: daui: na: ein: myid: jho: na ge,. 12 Airumung: naonhaung" wa naonhaung" yao" gaung sho: obyid: ra" khyo re cao" ye: sho'- qobo wa naonhaung" shid ba: ra" gaung dau re ana" mae" daeib nhao loge,- 13 Naonhaung" yao" gaung dau khodau rere: makhyang" ra" khyo mae dadaui nhao ge,. Naonhaung" wa shid: rumae" dam: daui: to" li" va" mo, ngad: ru we' dakhyo:- naonhaung" gaung geim" re Mao"So re qhaug' byid: mung: din:man" ra" khyo re ci nae" qhid' mae" naonhaung" yao" gaung dau re Mao"So re ab byid: ge,- 14 Qobo re naonhaung" Asang dakad' nhao ge,- pe"mung:ga"re naonhaung" wa kham" to" ra" Tarha" qao: mae na mo, mangad:- Mao"So: nhag' myan" ra" jeju qao: mae na: ra" mo, ngad: ako". 15 Airulao" wa- ngonhaung" wa kham" to" ra" Tarha" qao: mae mana lomung:- Mao"So: nhag' myan" ra" jeju qao: mae na mo, ngad va" ruyang qobo kad' nae" i? Airu: dajhid' re: mangad:- 16 Dayaug yaug jhao" mho dao: gyo: nae"- ga: naonhaung" yao" gaung re jeim khyo" yesang nhao: pye' lao"- naonhaung" wa naonhaung" mho dao: gyo: byid' ra" yaug; nho: jeim qe ngad ko" rure gaigai: yao: naonhaung" ba: ako". 17 Pe"mung:ga"re daba naonhaung" wa qobo: nho: jeim qe boe" qu" vako" ra"- ngadqere: ana" wa- mho" shid' rumae naonhaung" kham: yu: ra" dangman" ra" khyo re naonhaung" aung khug nhag' lam: alhab' we' phug' cao" vako" ruyang Mao"So: jeju re caung:khin" byid' ra". 18 Naonhaung" wa qobo: nho: jeim boe" na: rumae" lhoe' ke' byid' ru qhug' mung: din:man" ru nho: jeim qe boe" lo: avako". 19 (Naonhaung" wa gaung sho: shad' mae azhao: mae" yao: laba lajhao mae qam: nang: mo, ngad ko" ruyang ba: gyo: laui: ra" dao: jham re ngo ci: ru ngad: ra".) Ganhae" naonhaung" wa- naonhaung gaung dau: alhab' re makhyang" ra" lo,mau" qhid' mae" masan masin" ru we' makhyang: mashab: ru: nho: jeim qe kad' nhao: lo: avako". Ai we' dakhyo:- ana"- naonhaung" gaung dau: alhab' re gyang" lho" ra" lo, mau" jham: qhid' mae" din:man" ra" khyo: nho: jeim qe kad' nhao ca" ko" ra". 20 Naonhaung" wa qobo: nho: jeim qe doe; na shiko" au:- din:man" rumae" loe; jo; ako". 21 Ana" naonhaung" myid: qho' na ko" ra" naonhaung" kad' qu" vako" ra" mau" zo" jham mae" pe" ja" akyu" qo" kham: yu vako" i? Ai: mau" zo" jham: nho: athao wa shid: ru ngad: ra". 22 Ngadqere: naonhaung" wa ana"- qobo: lo, mae" lhoe' ke' byid' ru qhug' mung:- Mao"So: jeim qe boe" lo: avako". Naonhaung" qo" kham: yu: ra" akyu" wa- Mao"So: qhid' mae" yao: yao" gaung dau: geim" re qhaug' byid' ru we' apyad ato: kao so' qo" yu: ru ngad: ra". 23 Pe"mung:ga"re qobo: nho: aphug' wa shid: ru ngad: ra". Mao"So: nhag' myan" ra" jeju jhaung qhu" kam" wa ngonhaung" Asang Khristu Yesu we' dagaung dasho: boe" rumae apyad ato: kao so' ngad: ra".

Roma 7

1 Nga" mao:nhaung: qe we"- naonhaung" wa tarha" khyo we' sin: yang: ba: to: mo, ngad ko" ruyang ana" ngo ta" kyo: nae" ra" khyo re naonhaung" nyang" za: ba: gyo" li" genae". Tarha" wa byu kao so' daui: na: ra" gu: mae za: eib: jo; ra". 2 Dao: tau" tau" re- lo, xo' xo' va" ra" myiqe: dayaug wa yao" yham sang pho" daui: na: ra" gu: mae lo, xo' xo' ra" tarha" qao: mae yham sang pho" we' zham" to: qhug' ra". Ngadqere: yham sang pho" shid: byaug lao" wa- ai: lo, xo' ra" tarha" qao: mae" yham sang pho" we' zham" to: qhug' rumae" loe; beim: ra". 3 Airumung: yao" yham sang pho" daui: na shi" au:- gatau: yauggai we' zam" na: ngad: re wa lao shad' ra" yaug- ga: yao: re mhang" li" genae"- ngadqere: yao" yham sang pho" shid thao re kam" wa tarha" vao su: myi: mangad' ra" myiqe: ngad mung: yauggai gatau dayaug we' dam: lo, xo' yu ngadqere: lao shad' yaug mangad: lo:ngad: ra". 4 Mao:nhaung: qe we"- naonhaung" re: ceru we' dakhyo: ngad: ako"- Tarha" we' sin: yang: ta" gelang: ga" re naonhaung" re: shid va" mo, ngad: ako". Pe"mung:ga"re naonhaung" wa Khristu nho: gaung dau qe ngad: ako". Ngonhaung" wa Mao"So: mau" zo" mae akyu" bo: ra" mo, boe" nae" qhid' mae" ana" naonhaung" wa shid: rumae" dam: daui: to" li" ra" Khristu nho: byu qe boe" lo: ako". 5 Pe"mung:ga"re ngonhaung" wa byu xao su gaung dau: shad' re cao" yang: kao so' daui: ra" au:- kham" to" ra" Tarha" yang nhug' byid: qhug'ra" qobo shad' lhoe" nug: ra" myid we' ngonhaung" kao so' daui: lo: bam va". Amung: ngonhaung" kad' ra" lo, mau" alhab' wa shid: rumae thao" lo" byaug va". 6 Daba ngonhaung" re taui" lhaung" to" rumae" ngonhaung" shid: gao: va" ruyang ana" ngonhaung" wa- kham" to" ra" Tarha" mae" loe; beim: bam va". Airu: mung: ngonhaung" wa tung" to" ra" tarha" khyo axug' re macao" lo:- Gyang" Lho" Byo: nho: khyo asag' mae Mao"So re caung da" byid' na: ru ngad: ra". 7 Airulao"- kham" to" ra" Tarha" airu yao: wa qobo ngad: ra"- ein: ngonhaung" ta" nae" i? Airu: magai: ta"- ngadqere: qobo ga" ru pe" ja: ngad: rure kham" to" ra" Tarha" wa ngore ba nhao: ra". Su gaje qe sang: ra" zai re myo, nyad o: dabyid wa,- ga: kham" to" ra" Tarha" mae mata" to: ngad: re wa myo, nyad obyid ru ga" ru pe" ja: ngad: rure ngo ba nae" mangad:- 8 Ngadqere: qobo wa ai: kham" to" ra" Tarha" mae agu gai yu mung: nga" aung khug nhag' lam: mae kao bau obyid: ra" mau" zo" aja: aja: re boe" thug' li" nhao: ra". Tarha" majo, ngad: re wa qobo wa ashid ngad: ra". 9 Daba wa ngoyao: re:- Tarha" re maba lo: kao so' daui: na: lo: qu" va"- ngadqere: kham" to" ra" Tarha" re ba lao" qobo wa daui: thug' li" mung: ngo wa shid: lo" ra". 10 Kao so' daui nhao nae" qhid' mae" byid' ra" kham" to" ra" Tarha" wa nga" qhid' mae" wa shid: rure byid' ra". 11 Qobo wa agu qho: yu mung: ai: kham" to" ra" Tarha" khyo" yang ngore mhug' pyag' mung: yang: ngore se' pye' ra". 12 Airu: mung: kham" to" ra" Tarha" yao: yao: wa gyang" lho" ra". Ai: amyin" dao: re: gyang" lho" ru we' dangman: mung: gai: ra". 13 Airu: ngad: re wa- gai: ra" tarha" wa ngore shid nhao: ra" i? Mashid nhao ngad: ra"- ngore shid nhao: ru wa qobo ngad: ra". Qobo wa azhao: mae" yao: yao" ave, re qhu" shid' byid: nae" qhid' mae" gai: rure ci mung: ngore shid nhao: ru ngad: ra". Airumung: kham" to" ra" tarha" wa qobo wa matho' ka" losho' ngad: ra" magai: rure qhu" byid' ra". 14 Kham" to" ra" Tarha" wa Byo we' sin" ra" khyo ngad: rure ngonhaung" ba: ra"- ngadqere: ngo wa qobo: nho: jeim shid ba: ra" byu dayaug ngad: ra". 15 Ngoyao: kad' ra" lo, mau" re ngoyao: maba: gyo:- pe"mung:ga"re ngo kad' nug: ra" lo, mau" re ngo makad'- ngo nghang" ra" lo, mau" re za: kad' na yang: ngad: ra". 16 Ngo wa ngoyao: manug: kad' ra" lo, mau" re kad' na: ruyang ce: lo, mau" wa kham" to" ra" Tarha" wa jo: ra"- ga" rure ngo bomyid vang" byid' ru ngad: ra". 17 Airumung: ce: lo, mau" re kad' ra" yaug wa gaigai: yao: wa ngo mangad:- nga" khug mae bo: ra" qobo yaug kad' ru ngad: ra". 18 Nga" gaung sho: nhag' lam: khug mae gai: ra" ru mabo: rure ngo ba:- pe"mung:ga"re nga" khug mae gai: ra" ja: kad' nae" kao bau myid bo: jo, ngadqere:maqo" zaui: ngad: ra". 19 Ngo wa gai: ra" lo, mau" re kad' nug ngadqere: ngo makad' lo:- ngo manug: kad' ra" makhyang" ra" lo, mau" re za: ngo kad' ra". 20 Ngo manug: kad' ra" lo, mau" re ngo kad' re wa- ce: lajheim: wa ai: lo, mau" re kad' ra" yaug wa ngo mangad:- nga" nhag' lam: khug mae bo: ra" qobo yaug kad' ru ngad: ra". 21 Airumung:- ngo kad' ra" mau" mae tarha" daja: re ngo the' myao: ra". Ai: tarha" wa gai: ra" mau" re ngo zaui: nug: ra" au:- magai: rure za: qo" khyin: yu: ra". 22 Nga" aung khug nhag' lam: wa Mao"So: tarha" re ngaui bau: ngaui yao za: khae: yu: ra". 23 Ngadqere: nga" gaung dau: khug mae nga" myid: yang ngaui: ra" tarha" re gye kad' na: ra" mange; ra" tarha" dalam: bo: jo; rure ngo the' myao: ra". Ai: tarha" wa nga" khug mae mau" zaui: mung: ngore qobo tarha" nho: kyam: byu kad' nhao: ra". 24 Dayin dayo: khyag' qhui: ra" ngoru" yaug we"- ngore shid: ru khyo jhui" ye" lo" naeva" ce: gaung khyao mae" ngore khag' yang khyad' yu naeva" laug i? 25 Ngonhaung" Asang Yesu Khristu khyo" yang ngore khyad' yu: ra" Mao"So: jeju wa qi" qhang: jo, vashao: wo"- Airumung: ngo boe" na: ra" khyo re ta" gelang: ein: re- ngo wa nga" myid khyo" yang za: Mao"So: tarha" re qo" caung da" byid: mung:- nga" nho: byu: gaung sho: shad' khyo" wa qobo: nho: tarha" re caung da" byid' ra".

Roma 8

1 Yesu Khristu we' dagaung dasho: za: ngad: na: ra" mo; qhid' mae" wa dao: phyid' ru pe" majo, ngad: ra". 2 Pe"mung:ga"re Yesu Khristu we' dagaung dasho: za: kao so' daui nhao: ra" Byo: nho: tarha" wa qobo: nho: tarha" mae" we' shid: ra" tarha" lo, mae" ngore lhoe' ke' byid' ra". 3 Byu xao su qam: nang: yang: ai: kham" to" ra" Tarha" yang maqo" kad' byid' ra" mau" zo" re Mao"So: yang zaui: so: byid' ra". Mao"So wa qobo vin: pye' byid: nae" ngonhaung" we' dakhyo: qobo qo" ra" xao su byu qobo gaung khyao ve, vin: ra" yao" yao: zo: re nhao: ke' byid: mung: byu: gaung sho: mae qobo re dao: phyid' ra". 4 Mao"So airu: kad' ru wa- ngonhaung" wa xao su byu: ave, khyo" mangad: lo:- Byo: nho: myid o: ra" khyo" kao so' daui: ra" mo, ngonhaung" mae kham" to" ra" Tarha" yang ta" to" ra" din:man" ra" khyo jham re jab byang" sho' boe" thug' li" nae"qhid' mae" kad' ru ngad: ra". 5 Byu xao su gaung sho: o: ra" khyo" kao so' daui: ra" mo, wa- gaung sho: we' sin" ra" ja: re za: nhag' nghae" jo; ako". Byo o: ra" khyo" kao so' daui: ra" mo, wa- Byo we' sin" ra" ja: re za: nhag' nghae" jo; ako". 6 Gaung sho: we' sin" ra" ja: re nhag' nghae" ra" mo, wa shid: ru khyo joe" ako". Byo we' sin" ra" ja: re nhag' nghae" ra" mo, wa kao so' daui: ru we' ngaui pyo: yaug yo: ra" khyo re qo" yu: ako". 7 Airumung: gaung sho: we' sin" ra" ja: re nhag' nghae" ra" yaug wa Mao"So: gyevo boe" li" ra". Pe"mung:ga"re yao: wa Mao"So: tarha" re maphug' cao" ngad: ra"- gaigai: ga" re yao: wa aire maqo" phug' cao" ngad: ra". 8 Gaung sho: o: ra" khyo re cao" ra" mo, wa Mao"So re maqo" ngaui nhao ko" ngad: ra". 9 Ngadqere: Mao"So: Byo naonhaung" khug mae daui: na: ngad: re wa- naonhaung" wa gaung sho: o: ra" khyo" kao so' madaui lo:- Byo o: ra" khyo" kao so' daui: ako"- Khag' ngadqere: Khristu nho: Byo maqo" ra" yaug wa Khristu we' masin: ngad: ra". 10 Naonhaung" khug mae Khristu na: jo; ngad: re wa- qobo: mathao mae naonhaung" gaung dau: shid: lo" ca" nae" ngadqere: Byo wa kao so' daui: na nae" ngad: ra". Pe"mung:ga"re naonhaung" wa- Mao"So: yang din:man" ra"- ga: sun" yu: ru qhug' avako". 11 Yesu re shid: rumae" dam: daui: to" li" nhao: ra" Mao"So: Byo naonhaung" khug mae na: ngad: re wa Khristu re shid: rumae" dam: daui: to" li" nhao: ra" Mao"So wa naonhaung" khug mae na: jo; ra" Yao" Byo khyo" yang naonhaung" shid ba: ra" gaung khyao rere: kao so' daui nhao: li" nae". 12 Airumung:- Mao:nhaung: qe we"- ngonhaung" wa qo qo" ra" mo, ngad: ra"- ngadqere: ai wa ngonhaung" gaung sho: o: ra" khyo" kao so' daui nae" ra" qo mangad:- 13 Pe"mung:ga"re naonhaung" wa gaung sho: o: ra" khyo" kao so' daui: ngad: re wa- naonhaung" wa shid: li" genae". Ngadqere: yao" Byo: yang naonhaung" qobo lo, mau" jham re se' pye' ko" ngad: re wa naonhaung" kao so' daui: na: li" genae". 14 Mao"So: Byo: yang khyoqhid' au: she byid: qhug' ra" mo, wa Mao"So: zo: dau qe ngad: ako". 15 Pe"mung:ga"re Mao"So: yang naonhaung" re byid' to" ra" Byo wa naonhaung" re jeim boe" nhao: ru mangad:- Gyaug: ra" myid rere: maboe" nhao ngad: ra". Ai: atha" Ai: Byo wa ngonhaung" re Mao"So: yao: zo: qe boe" nhao yang:- ai: Byo: nho: qam: so' khyo" yang ngonhaung" wa Mao"So re- Pho" we"- nga" Pho" we"- ga: qo" yao: ra" akhang" re qo" yu ra". 16 Ngonhaung" wa Mao"So: zo: dau qe ngad: rure sagse: kham byid: nae" qhid' mae" Mao"So: Byo yao: re: ngonhaung" byo we' daga" qhan: yang: sagse: kham byid' ra". 17 Ngonhaung" wa Mao"So yao" zo: dau qe ngad: ruyang yao" byu qe: qhid' mae" jaung: to" ra" shaman" jeju re ngonhaung" qo" sang: yu: li" nae". Khristu qhid' mae" Mao"So jaung: to: byid' ra" phungbao rere: yao: we' daga" ngonhaung" qo" sang: yu: li" nae". Pe"mung:ga"re ngonhaung" wa Khristu nho: dayin dayo: kham zo" rumae bobo: ngad: re wa yao" phungbao mae re: ngonhaung" qo" bokham: yu: li" nae". 18 Ana"- ce: pyad mae ngonhaung" dayin dayo: kham zo" ru wa thao phyao: ngonhaung" re qhu" byid: nae" ra" phungbao we' dajhid' re: maqo" tho' gai: tau"- ein: ngo myid: ra". 19 Phan" to" ra" gu: alhab' wa- Mao"So: zo: dau qe de: de: qhu" byid' thug' li" nae" rure mamyan: makhyad' kao bau yang: lao" na: bam: ako". 20 Pe"mung:ga"re phan" to" ra" gu: alhab' wa akeim boe" nae" qhid' mae" dao: phyid' ra". Airu: boe" ru wa phan" to" ra" gu alhab' nho: myid o: ra" khyo" boe" ru mangad:- Mao"So: myid o: ra" khyo" boe" nhao: ru ngad: ra". 21 Ngadqere: phan" to" ru wa daba na re byo; qeim: lo" ra" khyo mae" loe; beim: ru qhug' mung: Mao"So: zo: dau qere: phungbao bo: ra" loe; beim khyo re qo" bokham: yu: li" nae"- ga" rure myid: lao" nae" jo; ra". 22 Pe"mung:ga"re phan" to" ra" gu: alhab' wa ana" ba joe" sho' zo:khau no we' dakhyo:- no mung: nokyang: kyang" na: rure ngonhaung" ba: ra". 23 Ngadqere: phan" to" ra" gu: za: nokyang: kyang" na: ru mangad:- Mao"So: sao qhid' jeju jhaung qhu" ngad: ra" Byo re qo" kham: yu: ra" mo, ngonhaung" re:- Mao"So: yao: zo: toe' yu: ru qhug' nae" we' ngonhaung" gaung geim" khyad' yu: ru qhug' nae" rure lao" mung: nokyang: kyang" na: bam: ra". 24 Pe"mung:ga"re ngonhaung" wa myid: lao" ra" khyo" yang khyad' yu: ru qhug' ra"- ngadqere: ngonhaung" myid: lao" rure ngonhaung" qo" myao: ngad: re wa ngonhaung" myid: lao" ru wa gaigai: myid: lao" ru mangad:- pe"mung:ga"re qo" myao: ra" ja: re khoyaug myid: lao" ra" i? 25 Ngonhaung" wa maqo" myao: ra" ja: re myid: lao" na: ngad: re wa- ngonhaung" wa aire nhag' lam: qhang qhang za: lao" na: ra". 26 Ai we' dakhyo: Byo re: qam: nang" ra" ngonhaung" re bao" thaug' byid: nae" qhid' mae" joe" li" ra". Ngonhaung" wa akyu" khoru: mho' ca" rure maba- nhad' dao: thoe: yang maqo" ta" thug' ra" nokyang: kyang: thoe we' ai: Byo yao: ngonhaung" qhid' mae" Mao"So re bao" mho' byid' ra". 27 Ngonhaung" nhag' lam: re myao: kyao" ra" Mao"So wa Byo: nho: myid rere: ba: ra". Pe"mung:ga"re Byo wa Mao"So myid o: ru we' dakhyo:- yao" byu qe: qhid' mae" Mao"So re mho' yao byid' ra". 28 Mao"So wa yao: yao: re jhid'de; ra" yao" myid: yaung: to" ra" khyo re cao" yang: khai: yu: ru qhug' ra" ngonhaung" we' daga" ja: khao: ngo" mae gai: ra" khyo" boe" sho' bokad' na: rure ngonhaung" ba: ra". 29 Yao: Zo: wa mao:nhaung: qe myo: sho' phaung mae mao: mo" boe" nae" qhid' mae" Mao"So wa yao: khyin: yu: to: va" ra" mo, re yao: Zo: we' dakhyo: dau: ru boe" li" nae" gatau khyin: san: yu: to" ava". 30 Airumung: Mao"So wa yao: gatau khyin: san: yu: to: va" ra" mo, re khai: yu: ra". Airu: khai: yu: ra" mo, rere: Mao"So wa yao: bam re din:man" ra"- ga: sun" yu byid' ra". Amung: yao" phungbao rere: yao: bam re bomyho" kham zo: nhao: ra". 31 Cegu: alhab' re qu" yang: ngonhaung" pe" ta" nae" i? Mao"So wa ngonhaung" shad' mae na yang: ngad: re wa ngonhaung" re gye khag' qo" kad' nae" i? Mao"So wa gai: gai: yao: ngonhaung" re gye kad' nae" mangad: 32 Mao"So wa yao" yao: Zo: re lhao" re: o: mabyid lo:- ngonhaung" alhab' mo; qhid' mae" yao: re ab byid' pye' ava". Ngonhaung" qhid' mae" yao: Zo: re lhao" re: ab byid' pye' ra" yaug wa- ja: khao: ngo" rere: mabyag lo: ngonhaung" re byid' li" nae" mangad: i? 33 Mao"So khyin: yu: to" ra" mo, re qobo khag' qo" zhaug' nae" i? Yao: bam qobo maqo" rure Mao"So yao: ta" hau" pye' ava". 34 Airumung:- yao: bam re khoyaug dao: qo" phyid' nae" i? Khristu Yesu wa ngonhaung" re dao: phyid' nae" mangad:. Shid kham: byid: mung: shid: rumae" daui: to" li" ra" Yesu Khristu wa Mao"So: lo, yo shad' mae zaung: jo, yang: ngonhaung" qhid' mae" Mao"So re mho' yao byid' na: ra". 35 Airumung: Khristu nho: jhid'de; myid mae" ngonhaung" re khag' qo" kao" pye' byid: nae" i? Qug: khai: qhug' ru- myid: qug: myid: ci" qhug' ru- yhin" qhug' ru- moe, shab' qhug' ru- myaung sho" ru we' se' pye' qhug' ru jham wa Khristu nho: jhid'de; myid mae" ngonhaung" re qo" kao" pye' nae" i? 36 Jham: Mugsug' mae- Ni" mathao mae ngonhaung" wa ba khao: ba ngo" mae shid gyan nogyan we' jho" qhug' na: ra"- Se' pye' nae" jaung: to" ra" yao jham re we' dakhyo:- ngonhaung" re kad' to" ako"- ga: tung" to" ru we' dakhyo: ngad: ra". 37 Ngonhaung" re maqo" kao" pye' nae"- ngonhaung" re jhid'de; ra" Khristu khyo" yang ai: gu: alhab' re ngonhaung" wa nyang" za: aung doe; pye' va" ru ngad:- 38 Pe"mung:ga"re- yao" jhid'de; myid mae" pe" ja" yang re: ngonhaung" re maqo" kao" pye' ngad: ra". Shid: ru ngadqere:- daui: ru ngadqere:- mug: lagyo: jham ngadqere:- Mug:gaung kheim: so' qo" mo, ngadqere:- ana" pyad ngadqere:- joe" lo nae" pyad ngadqere:- 39 mug:gaung tho' pyae ngadqere:- myid gaung o: pyae ngadqere:- phan" to" ra" gu: alhab' pe" ja" yang ngadqere:- ngonhaung" re ngonhaung" Asang Yesu Khristu khyo" yang qhu" byid' ra" Mao"So: jhid'de; myid mae" maqo" kao" pye' byid' rure ngo jhaug' za: ba: ra".

Roma 9

1 Ngo wa din:man" ra" dao: re jhau: na: ra". Ngo wa Khristu yang sang yaug ngad mung: mamhug'. Nga" nhag' lam: khug mae nga" byumyu"- nga" sho:- nga" sa: qe: qhid' mae" khoqhi" sho' kaug' ru we' mathang mano: dayin dayo: no: ra" khyo re- ta" au: ngo mamhug' rure Gyang" Lho" Byo: yang eib: ra" nga" aung khug myid: yang re: ngore jhaug' za: ba nhao: ra". 3 Yao: bam khyad' yu: ru aqhug' genae" ngad: re wa ngo yao: wa Mao"So: nhang: kheim: re kham: yu mung: Khristu mae" kao" pye' ru qhug' nae" rure lhao" re: ngo kham: yu nug: ra". 4 Yao: bam wa Mao"So: byu qe ngad: ako". Mao"So wa yao: bam re yao: zo: toe' yu: ru we' yao" phungbao yao: bam re qhu" byid' ra". Yao: wa yao: bam we' dao: thang" to: mung: yao: bam re Tarha" byid' ra". Yao: bam wa jo: ra" caung:pa" khyo re we' Mao"So: dao:so: jham re qo" khae: yu: ako". 5 Yao: bam wa mang qi" ra" Hebre phug' pho" qemae" myhung: gyo" li" mo, ngad: ako". Khristu wa xao su byu khyo" yao: bam: byumyu" kaung mae bobo: ra". Alhab' re eib: na: ra" Mao"So wa khonhae" re: caung:khin" byid' ru qhug' vashao:- Amen. 6 Mao"So: dao:so: wa akeim boe" byaug: ra" ein: ngo ta" na: ru mangad:- pe"mung:ga"re Israel byumyu" alhab' wa Mao"So: byumyu" qe mangad: ko" ngad: ra". 7 Abraham mae" gyo" li" ra" mo, alhab' ngadqere: Mao"So: zo: dau qe mangad:- Mao"So wa Abraham re- Nao wa Isag khyo" yang nao re ngo dao:so: byid' to" ra" myid:zo: qe qo" li" nae"- ga: ta" ra". 8 Ceru: ga" ru wa gaung sho: khyo khyo" khau: li" ko" ra" zo: dau qe wa Mao"So: zo: dau qe mangad: ko" ngad" ra". Ai: atha" Mao"So: dao:so: khyo" yang khau: li" ko" ra" zo: dau qere za:- zogyang" dau gyang" khyo" sun" yu: ra". 9 Pe"mung:ga"re Mao"So wa- ayo, byang" lao"- ngo dam: joe" li" nae"- aimung: Sarah wa yauggai zo:khau: li" li" nae"- ga: re: dao:so: byid' to" ra". 10 Cetho' mae- Rebekha nho: yauggai zo: tao wa yao: pho" dayaug za: qo" ako". Aiwa ngonhaung" nho: phug' pho" Isag ngad: ra". 11 Ngadqere: yauggai zo: dayaug re khyin: yu: ru wa- Mao"So: myid: yaung to" ra" khyo" za: ngad: rure qhu" byid: nae" qhid' mae" yao: wa Rebekha re- mao: mo" yaug wa yao: nhaung: yaug re caung da " byid' li" nae"- ga: ta" ra". Yao: ceru ta" ru wa- yao: shid' tao makhau shimae" yao: shid' tao agai- aqeim pe" re: maba: kad' shi: gere ta" ru ngad: ra". 12 Airumung: Mao"So: yang khyin: yu: ru wa- yao" yang khai: yu: rumae apan to: mung: yao: bam pe" kad' va" rumae apan mato: ngad: ra". 13 Jham: Mugsug' mae ngo wa Yaku re jhid'de; ngadqere: Eso re wa ngo nghang" ra"- ga: ta" to" ru we' dakhyo: ngad: ra". 14 Airumung: Mao"So wa matarha" ngad: ra" ein: ngonhaung" ta" nae" i? Dajhid' re: magai: ta". 15 Pe"mung:ga"re Mao"So wa Moshe re ngo wa ngoyao: nug: ra" yaug re jeju kad' nae"- ngoyao: nug: ra" yaug re nhag' khyag' nae"- ga: ta" ra". 16 Airumung: ja: khao: ngo" wa byu myid o: ra" rumae we' byu: lo, mau" dao mae apan aqao: mato: ngad: ra". Mao"So: nhag' khyag' shogu: rumae za: apan aqao: to" ra". 17 Pe"mung:ga"re Jham: Mugsug' mae Egutu kho:kham re- Nao re ngo kho:kham kad' nhao: ru wa nga" qam: so' re qhu" byid: nae" rumae ci nae" we' mug: myid geim" mae nga" mang hau" nhao" ke' nae" qhid' mae" ngad: ra"- ga: ta" ra". 18 Airumung: Mao"So wa yao: nug: ra" yaug re jeju kad' byid: mung:- yao: nug: ra" yaug re nhag' lam: qao nhao: ra". 19 Ceru: ngad: re wa- Mao"So wa byu dayaug yaug re khoru: qobo qo" vhin nae" i? Mao"So: myid o: rure khag' thaug' tam" nae" i? ga: naonhaung" mae" dayaug yaug ngore ta" li" genae". 20 Nga" ba nam pho" we"- nao wa khag' ngad mung:- Mao"So re airu: dao: tau: tau" i? Zhogam: ug' wa yao: re kad' ra" yaug re nao ngore pe"mung: ceru: kad' to" i? ga: mamyid: ngad: ra". 21 Ta" gelang: ein: re zhogam: ug' kad' ra" yaug wa myid zhai: re yao: o nug: ra" khyo" kad' nae" we'- yao: wa myid zhai: dathaung: mae" za: zhogam: ug' shid' lam: kad' mung:- dalam: re wa akhyag: rumae ci nae"- dalam re wa yu" yu" ci nae" qhid' mae" kad' nae" akhang" jo; ra". 22 Mao"So re: ai we' dakhyo: kad' to" ra". Yao" nhag' yo" rure qhu" byid: mung: yao" qam: so' re ba nhao nug: ra". Ngadqere: yao" nhag' yo" rure kham zo: mung: jeim" lo" nae" mo; dao mae yao: wa gyai nhag' lam: qhang: ru we' zang: kham byid' ra". 23 Yao: wa yao" magan: mago" ra" phungbao rere: qhu" byid: nug: ra". Aiwa- yao" phungbao re qo" yu nae" qhid' mae" yao: nyhang" jaung: to" ra" yao" nhag' khyag' shogu: rure khae: yu: ra" ngonhaung" dao mae vhe' sheim" ke' ra" phungbao ngad: ra". 24 Pe"mung:ga"re ngonhaung" wa yao" yang khai: yu: to" ra" mo, ngad: ra". Yao: wa Yuda byu qemae" za: mangad:- Taung bug byumyu" qemae" re: khai: yu: ra". 25 Mao"So wa Hosea Mugsug' mae- Nga" amyu" kaung mangad' ra" mo, re ngo wa nga" amyu" kaung qe ein: mhang" nae". Ngo majhid'de; ra" byumyu" re nga" jhid'de; ra" byumyu" ein: ngo mhang" nae". 26 Naonhaung" wa nga" amyu" kaung qe mangad:- ga: naonhaung" re ta" ko" ra" jo, qo mae yao:- yao: bam wa kao so' daui: ra" Mao"So: yao: zo: qe ga: mhang" ru qhug' li" genae"- ga: ta" to" ra". 27 Amung: Esaia wa- Israel byumyu" khyo we' sin: yang:- Israel byumyu" qe wa panglai: qid yae mae" ma coe nho" myo" laug gesho' ngadqere: yao: bam mae" damyo" za: khyad' yu: ru qhug' genae". 28 Pe"mung:ga"re- Asang wa myid gaung byu qe alhab' mo, re phyad za: dao: kho' nae" ngad: ra"- ga: ta" ra". 29 Ai: ru wa qam: so' bo: thao" ra" Asang wa ngonhaung" myid:zo: qe damyo" re matang" to: byid: ngad: re wa- ngonhaung" wa Sodom vogaung: we' Gomora vogaung: byu qe we' dakhyo: qobo dae qo" kham zo: nae" ngad: ra" ga: qhid' phyao: Esaia ta" to" ru we' dakhyo: ngad: ra". 30 Airumung: ngonhaung" ta" ru wa- jo: ra"- ga: Mao"So sun" yu byid' ru qhug' nae" qam: make' ko" ra" Taung bug byu qe wa lam khug: ra" khyo" yang jo: ra"- ga: Mao"So: yang sun" yu byid' ru qhug' ako". 31 Mao"So: amyu" kaung qe wa jo: ra"- ga: Mao"So: yang sun" yu byid' ru qhug' nae" ra" tarha" re cao" gengadqere: ai: tarha" re mamyao ko" ngad: ra". 32 Pe"mung: mamyao ko" ra" i? Pe"mung:ga"re yao: bam wa lam khug: ra" myid re mangha lo: yao: bam: lo, mau" re ngha gemung: yang: ngad: ra". Airumung: yao: bam wa Jham: Mugsug ta" to" ra"- tha" lang: laug baui mae tha" lang" ako". 33 Jham: Mugsug' mae- Qu" wa, Ngo wa Ziun bam mae byu qe tha" lang: genae" ra" laug baui dabaui to: byid' ra". Byu qe wa ai: laug baui mae tha" lang: yang: gyang: lang" lo" li" genae". Ngadqere: yao: re lam" ra" yaug wa qam: gyug: qam: shan: ru maqhug' nae"- ga: ta" to" ra".

Roma 10

1 Nga" Mao:nhaung: qe we"- ngoyao" byumyu" qe khyad' yu: ru qhug' genae" qhid' mae" nga" aung khug nhag'lam: alhab' we' gyai o ngaui kao bau: na mung:- yao: bam: qhid' mae" Mao"So re gyai akyu" bao" mho' ra". 2 Yao: bam wa Mao"So re gyai phug' myao: kao bau mo, ngad: rure ngo naonhaung" re zhaug' za: sagse: qo" kham byid' ra". Ngadqere: yao: bam: phug' myao: kao bau: ru wa jo: ra" laba lajhao dao mae apan mato: ko" ngad: ra". 3 Yao: bam wa jo: ra"- ga: Mao"So sun" yu byid' ra" khyo re maba ko" ngad: ra". Ai: atha"- yao: bam yao: kad' yu: ra" khyo re qam: ke' cao" ako". Airumung: yao: bam wa jo: ra"- ga: Mao"So sun" yu byid' ra" khyo re yao: bam makhae: yu ko" ngad: ra". 4 Pe"mung:ga"re- lam" ra" mo, yaug khao: ngo" wa jo: ra"- ga:- Mao"So: yang sun" yu: ru qhug' yu genae" qhid' mae" Khristu wa ai: kham" to" ra" tarha" re thao" lo" nhao: ava". 5 Moshe wa kham" to" ra" Tarha" re phug' cao" ra" khyo" yang Mao"So: yang jo: ra"- ga: sun" yu: ru qhug' ra" khyo we' sin: mung:- ai: kham" to" ra" amyin" dao: re phug' cao" ra" yaug wa kao so' daui: na: li" nae"- ga: tung" to" ra". 6 Ngadqere: lam khug: ra" khyo" yang jo: ra"- ga: Mao"So: yang sun" yu byid' ra" khyo we' sin: mung: Jham: Mugsug' mae- mug:gaung khyo khag' do, lo" nae" i? 7 Movo: mug: khyo khag' gyo" lo" nae" i? ein: naonhaung" yao" aung khug mae damyid ge,- ga: ta" to" ra". Amung: lajheim: wa- Khristu re ngonhaung" jhao" khyo" yu nae" mug:gaung khyo khag' qo" do, lo" nae" i? Amung: Khristu re shid: rumae" tau: to' yu nae" movo: mug: khyo khag' qo" gyo" lo" nae" i? ga" ru ngad: ra". 8 Jham: dao: ta" nug: ru wa- Mao"So: mungdao: wa nao we' te' te' mae ngad: ra"- ni" nhad' qid mae we' ni" nhag' lam: khug mae ngad: ra"- aimung dao: wa ngonhaung" kho" kyo" ra" lam khug: ra" mungdao: ngad: ra". 9 Khristu wa Asang ngad: ra"- ga: nao lhang: yu mung: Mao"So wa yao: re shid: rumae" daui: to" li" nhao: ra"- ga" rure nao lam" ngad: re wa nao wa khyad' yu: ru qhug' li" nae". 10 Pe"mung:ga"re ngonhaung" wa ngonhaung" lam khug: myid khyo" yang jo: ra"- ga: Mao"So: yang sun" yu byid' ru qhug' mung:- ngonhaung" nhad' dao: thoe: yang lhang: yu: ru khyo" yang khyad' yu: ru qhug' yu: ra". 11 Jham: Mugsug' mae- yao: re lam" ra" yaug wa qam: gyug: qam: shan qhug' nae" mangad:- ga: ta" to" ra". 12 Ceru wa yaug khao: ngo" re ta" ru ngad: ra"- pe"mung:ga"re Yuda byu qe we' Taung bug byu qe: gyo: mae pe" jho" shai" ru majo, ngad: ra". Mao"So wa alhab' mo; dao mae" dakhyo: za: Asang ngad mung: yao: re mho' yao: ra" mo, alhab' re magan: mathao" ra" shaman" jeju byid' ra". 13 Jham: Mugsug' mae- Asang re bao" thaug' mho' yao: ra" mo, yaug khao: ngo" wa khyad' yu: ru qhug' li" genae"- ga: ta" to" ra". 14 Ngadqere: yao: bam malam" ko" ngad: re wa- yao: bam wa Asang re khoru: qo" mho' yao genae" i? Amung: yao: bam ai: mungdao: re mathe' gyo: gere wa- yao: bam khoru: lam" genae" i? Ailao"- ai: mungdao: re makho" kyo: re- yao: bam khoru: qo" the' gyo: genae" i? 15 Mungdao: kho" kyo: nae" mo, re manhao: ke' re wa- ai: mung: dao: re khoru: qo" kho" kyo: nae" i? Jham: Mugsug' mae- lau dao: gai vin: ra" lagyo: qe joe" li" ru wa khoqhi" sho' gai: ra" i? ga: ta" to" ra". 16 Ngadqere: ai: Lau Dao: Gai re alhab' mo, makhae: yu ko" ngad: ra". Esaia yao: yao: re:- Asang we"- ngonhaung" mungdao: re khag' lam" ko" ra" i? ga: ta" ra". 17 Airumung: lam khug: ru wa mungdao: re the' gyo" yu: ra" khyo" yang ngad mung:- aimung dao: wa Khristu ra" khyo re kho" kyo" ra" khyo" yang the' gyo" yu: ra". 18 Ngadqere: yao: bam ai: mungdao: re mathe' gyo: ga" ru wa dang: i? ein: ngo myid: nug: ra". Yao: bam wa gaigai: yao: the' gyo" yu: avako"- pe"mung:ga"re Jham: Mugsug' mae- Ai: dao: re kho" kyo: ko" ra" mo; thoe wa mug: myid geim" mae byang" sheim: jo; ava". Yao: bam: nhad' dao: thoe wa myid gaung thao" sho' khyo joe" ava"- ga: ta" to" ru we' dakhyo: ngad: ra". 19 Amung:- Israel byu qe maba: gyo: genhaung i? Ein: ngo dam: myid: nae"- Mao"So wa Moshe yao: khyo" yang- Ngo wa pe" mangad' ra" byumyu" re ci mung: nga" byumyu" re myid nug: nhao nae"- Atug' akhyug mung: ra" byumyu" khyo" yang Nga" byumyu" re nhag' yo: nhao nae"- ga: sao qhid' phaug' tau" ra". 20 Alao"- Esaia wa je: mazag mavae lo:- Ngo re maqho ko" ra" mo, wa ngore myao: ako"- Nga" khyo re mamyid: maqin" ra" mo, re nga" gaung qhu" byid: va"- ga: ta" ra". 21 Ngadqere: Israel byumyu" we' sin: mung:- ngo wa mho dao: magyo" ru we' gye kad' ra" byumyu" re pang" yu nae" qhid' mae" nga" lo, daba gyam geim" yheim" to" ra"- ga: yao: ta" ra".

Roma 11

1 Airumung:- ngo myid: nae"- Mao"So wa yao" byumyu" qere shapye' pye' va" ra" i? Gai gai: yao: mashapye' ngad: ra". Ngoyao" gaung yao: re: Israel byu dayaug ngad mung: Abraham: nho: myid:zo:- Benyamin: kaung mae bobo: ra" yaug ngad: ra". 2 Mao"So wa aqhid mae" yao: khyin: yu: ra" byumyu" re mashapye' pye' ngad: ra"- Elia wa Israel byumyu" qere qobo vhin mung: 3 Asang we"- yao: bam wa ni" lapa qere se' pye' avako". Ni" nho: phan jham rere: phyo' sin" pye' avako"- ngo dayaug za: adang lo"- yao: bam wa ngo rere: se' pye' nae" seim" na: ako"- ga: Mao"So re mho' yao: ra" jham: dau re naonhaung" ba: ako". 4 Mao"So wa yao: re pe" ru: phaug' tau: byid' ra" i? So apyag' Ba la re macaung:pa" ko" ra" yauggai nhad' taung gu: re wa ngoyao" qhid' mae" tang" to: va"- ga: Mao"So phaug' tau: byid' ra". 5 Ana" re:- ai we' dakhyo: ngad: ra"- yao" nhag' myan" ra" jeju khyo" yang yao: khyin: yu: ra" byu dajhid' zo: dang: jo; ashi"- 6 Mao"So yao: bam re khyin: yu: ru wa- yao: bam: lo, mau" re aqao: to: mung: khyin: yu: ru mangad:- yao" nhag' myan" ra" jeju re aqao: to: mung: khyin: yu: ru ngad: ra". Pe"mung:ga"re Mao"So: khyin: yu: ru wa- byu: lo, mau" re aqao: to: mung: yang: ngad: re wa- yao" nhag' myan" ra" jeju wa agyang" mangad: ngad: ra". 7 Airulao" wa khoru: i? Israel byumyu" qe wa yao: bam qho: ra" ja: re mamyao ko" ngad: ra".- Mao"So: yang khyin: yu: ra" mo, dajhid' za: aire the' myao: yu: ako". Dang: ra" mo, wa Mao"So khai: ra" thoe re mathe' gyo:- no: jid: jo; ako". 8 Jham: Mugsug' mae- Mao"So wa yao: bam: myid we' nhag' lam: re vhao: lo" nhao: ra". Ana" ba joe" sho' yao: bam maqo" myao- maqo" gyo: ko" ngad: ra". 9 Davi re:- Yao: bam: zo: shaug' poe jham wa yao: bam myi" ra" taui: we' lha" boe" vageshao:- Yao: bam lang" lo" mung: qobo dae kham zo: vageshao:- 10 Yao: bam mamyao genae" qhid' mae" yao: bam: myo, jid: byaug vageshao:- Yao: bam wa yao: bam: qug' khai: qola: vin yang: khonhae" re: jang: nghaug' jo, vageshao:- ga: ta" ra". 11 Airumung: ngo myid: nae"- Yuda byu qe wa tha" lang: gelao" yao: bam byo; qeim: lo" vako" ra" i? Airu: dajhid' re: mangad:- Taung bug byu qere yao: bam myid nug: genae" qhid' mae" yao: bam qobo shad' lhoe" ko" ruyang khyad' yu: ru wa Taung bug byu qejhao" joe" li" va" ra". 12 Yuda byu qe: qobo wa mug: myid byu qere magan: mago" ra" shaman" jeju kham zo: nhao: ra". Amung: yao: bam: Byo we' sin: yang: myaung sho" ru wa Taung bug byu qere magan: mago" ra" shaman" jeju kham zo: nhao: ra". Airumung: Yuda byu qe jab sho' bobo gelao" shaman" jeju wa khoqhi" sho' qi" ru ngad nae" i? 13 Ngo wa ana" Taung bug byu qe naonhaung" re dao: jhau: na:- ngo wa Taung bug byu qejhao" nhao: ke' qhug' ra" lagyo: ngad: na: gu: mae nga" mau" zo" mae ngo nga: yu nae". 14 Ngo wa ngo yao" byumyu" qere qu" myid nug: nhao yang: yao: bam mae" daqhae: khyad' yu: ru qhug' yu: re qhug' yu: li" genae". 15 Pe"mung:ga"re yao: bam shapye' ru qhug' gelao"- xao su byu qere Mao"So: gyevo qe ngad: rumae" yao" ba nam qe boe" lo nhao: ra". Airumung: Yuda byu qere Mao"So dam: khae: yu lao"- khoru: ngad nae" i? Aiwa shid: ra" mo; qhid' mae" kao so' ngad: li" nae". 16 Sao qhid' mae" mug je, re Mao"So re qhaug' byid: va" ngad: re wa mug akhai" geim" re: yao" ngad: ava"- amung: sag' gae agyi: re Mao"So re qhaug' byid: va" ngad: re wa- sag' kaung jham alhab' re: yao" ngad: ava"- 17 Zhanlun gae agai mae" akaung jham damyo" re cu: pye' mung: zhanlun gae alae" mae" akaung re aimae xo' to" ra". Taung bug byu qe naonhaung" wa ai: zhanlun gae alae" we' dau: ako"- amung: ana" Yuda byu qenho: Byo we' sin" ra" qam: bo: ra" kao so' daui khyo re qo" bomyao: kham: yu: ako". 18 Airumung: cu: khyo" pye' ra" akaung jham we' dau ko" ra" Yuda byu qere daqu" ngai ge,- naonhaung" khoru: qo" gai: phug genae" i? Naonhaung" wa akaung qeza: angad: ako"- naonhaung" wa agyi: re bao" thaug' byid: mo, mangad:- Agyi: jham wa naonhaung" re bao" thaug' byid' ako". 19 Ngadqere: naonhaung" wa- ngonhaung" re xo' nae" qhid' mae" ai: akaung jham re cu: pye' ru mangad: i? ga: ta" li" genae". 20 Ai: ru wa dang: ra". Yao: bam malam" ko" ruyang yao: bam wa cu: pye' ru qhug' ako". Naonhaung" wa lam" gemung: yang: qo" de; jo; ako"- ngadqere: aire nhag' lam: damyid: qi: ge,- ai: atha" gyaug lha" yang: na ge,- 21 Mao"So wa azhao: mae" yaug gau akaung gyang" ngad ko" ra" Yuda byu qere lhao" re: matang" to: ngad: ra". Mao"So wa nao re tang" to" li" nae" ein: jho: i? 22 Cemae Mao"So wa khoqhi" nhag' khyag' yaug ngad: rure we' khoqhi" thin: ra" yaug ngad: rure ngonhaung" qu" ba: yu: ra". Mao"So wa qobo shad' lhoe" ra" mo; dao mae gyai thin ngadqere: naonhaung" wa yao" nhag' khyag' ru khug mae kao so' xo' daui: na ko" re wa yao: wa naonhaung" re nhag' khyag' li" nae". Ngadqere: naonhaung" airu: kao so' madaui ko" re wa naonhaung" re: cu: pye' ru qhug' li" genae". 23 Amung: Yuda byu qe yao: bam: malam khug: ra" myid re to" pye' ko" re wa azhao: mae" yao: bam: angad mae dam: te' byid' ru qhug' li" genae". Pe"mung:ga"re Mao"So wa ai: mau" zo" re qo" kad' ra". 24 Zhanlun lae" qe ngad ko" ra" naonhaung" Taung bug byu qere azhao: mae" naonhaung" yao" zhanlun lae" akaung mae" cu: yu mung: azhao: mae" yao: yao: boe" jo; ra" tarha" re lhoe" yang: azhao naonhaung" yao" akaung mangad' ra" zhanlun gyang" akaung mae xo' to" ru we' dau: ra". Yuda byu qe wa ai: zhanlun agyang" gae we' dau: ako". Amung: yao: bam: agae yao: mae" cu: pye' ra" akaung jham re yao: yao" agae mae dam: xo' te' ke' byid: nae" ru wa Mao"So: qhid' mae" je" laui: ra". 25 Nga" mao:nhaung: qe we"- No; thao" ra" dangman" ra" khyo dalam: re ngo naonhaung" re ba nhao nug: ra". Pe"mung:ga"re ai: dangman" ra" khyo wa naonhaung" re pha,jhi" ba beim" ra" myid mabo losho' gug: gam byid' li" nae". Ai:ruwa Israel byu qenho: nhag' lam: qao: ru wa apyad ato ngad nae" mangad:- Taung bug byu qemae" Mao"So jhao" lo: ru jab yo, joe" sho' za: yao: bam: nhag' lam: qao: jo; li" genae". 26 Alao"- Israel byu qe alhab' mo, wa khyad' yu: rure ceru: qhug' li" genae". Jham: Mugsug' mae- Khyad' yu: Asang wa Ziun mae" thug' li" mung:- Yaku myid:zo: qera" makhyang" ra" khyo alhab' re yu: pye' li" nae". 27 Ngo wa yao: bam: qobo jham re yu: pye' byid: lao"- Yao: bam we' ce: dao: thang" re ngo to: nae"- ga: ta" ru we' dakhyo: ngad: ra". 28 Pe"mung:ga"re naonhaung" Taung bug byu qe: mathao mae Yuda byu qe wa Lau Dao: Gai re ha: pye' gemung:- yao: bam wa Mao"So: gyevo qe boe" pye' ako". Ngadqere: Mao"So: yang khyin: yu: ra" mo, ngad mung: yao: bam: phug' pho" qe: mathao mae yao: bam wa Mao"So: ba nam qe ngad: ako". 29 Pe"mung:ga"re Mao"So wa yao: khyin: yu mung: shaman" byid' ra" yaug we' sin: yang: yao" myid re malhai: ngad: ra". 30 Taung bug byu qe ngad: ra" naonhaung" wa lai: lo" ra" yo, re Mao"So: mho dao: re: magyo: mo, ngad: ako". Ngadqere: ana" wa Yuda byu qe mho dao: magyo: ko" ruyang Mao"So: nhag' khyag' shogu: rure naonhaung" qo" khae: yu: avako". 31 Airu: Mao"So: nhag' khyag' shogu: rure naonhaung" qo" khae: yu vako" ru we' dakhyo: Yuda byu qere: Mao"So: nhag' khyag' shagu: rure qo" khae: yu genae" qhid' mae" Yuda byu qe wa ana" Mao"So: mho dao: re matae" gyo: ko"ru ngad: ako". 32 Pe"mung:ga"re Mao"So wa byu alhab' mo; re nhag' khyag' shogu: ru qo" qhu" byid: nae" qhid' mae" byu alhab' mo, re mho dao: magyo" ra" kyam: byu qe boe" nhao: pye' ra". 33 Mao"So wa khoqhi" sho' jo,nho" qo" yaug ngad: i? Yao" pha,jhi" we' laba lajhao wa khoqhi" sho' no; i? Mao"So: myid: phyid' to"rure khag' qo" sho' kyo" i? Yao" khyo re khag' qo" ba: i? 34 Jham: Mugsug' mae- Asang: myid re khag' ba: i? Yao: re khag' pha,jhi" qo" byid' i? 35 Yao" yang dam: xe' qo sho' Yao: re khag' pe" byid' qu" ko" i? 36 Pe"mung:ga"re cao jab alhab' wa yao" yang phan" to: mung:- cao jab alhab' wa yao: khyo" yang we' yao" qhid' mae" boe" jo; ru ngad: ra". Mao"So wa apyad ato mae phungbao qi" qhang: jo, vashao: wo"- Amen.

Roma 12

1 Airumung: nga" mao:nhaung: qe we"- Mao"So: nhag' myan" ra" jeju yang ngo naonhaung" re mho' ke' ra". Naonhaung" gaung khyao re Mao"So: mau" zo" mae qhaug' byid: mung: Mao"So o ngaui: ra"- daui: na: ra" xeim: khyo" Mao"So re qhaug' byid: ge,- ceru wa naonhaung" caung da" ang: ra" jo: ra" khyo ngad: ra". 2 Amung: naonhaung" ave, re ce: myid gaung dao mae" ave, azhao" we' dau datau" yu ge,- naonhaung" myid alhab' geim" tha" pye' yang: Mao"So re naonhaung" nhag' lam: asag' lhai" pye' byid: nhao ge,- ailao"- gai shab: ru- yao: o ngaui: ru- jab byang" ru ga" ra" Mao"So myid o: ru pe" ja: ngad: rure naonhaung" ba: li" genae". 3 Mao"So: yang ngore byid' ra" jeju jhaung qhu" re ngha yang: naonhaung" yaug khao: ngo" re ngo ceru: ta" ra". Naonhaung" yao" gaung re ang: ra" tho' mae je yang: damyid: qi" yu ge,- ai: atha"- naonhaung" myid: ra" khyo mae nau" nhae" ave, de, ge,- naonhaung" gaung re Mao"So: yang byid' ra" lam khug: ra" khyo re cao" yang: dao: kho' yu ge,- 4 Ngonhaung" gaung khyao dalam: mae gaung dau jham myo: sho' de, mung: ai: gaung dau jham alhab' wa yao: yao" mau" qo" ako". 5 Ai we' dakhyo:- ngonhaung" wa myo: sho' ngadqere:- Khristu mae dagaung dasho: za: boe" mung: gaung khyao dalam: mae za: de; jo, mo, ngad: ra". Ngonhaung" wa gaung khyao dalam: mae yao: cao: jho" xo' ra" gaung dau jham ngad: ra". 6 Airumung:- Mao"So: yang ngonhaung" re byid' to" ra" nhag' myan" ra" jeju jhaung qhu" re cao" yang:- majho" dau: ra" ngonhaung" nho: jeju jhaung qhu" jham re ci yhung: qo: ra". Ngonhaung" nho: jeju jhaung qhu" wa- Mao"So: mungdao: re kho" kyo: nae" ru ngad: re wa ngonhaung" qo" ra" lam khug: myid re cao" yang: ai: mau" re kad' qo: ra". 7 Caung da" byid: nae" jhaung qhu" ngad: re wa ngonhaung" caung da" byid: qo: ra". Mho" shid' byid: nae" jhaung qhu" ngad: re wa ngonhaung" mho" shid' byid: qo: ra". 8 Amung: su gaje qere qam: byid: nae" jhaung qhu" ngad: re wa- ngonhaung" airu: qam: byid: qo: ra". Su gaje qere gae byid: nae" yaug khag' ngadqere: magan: mago" gae byid: qo: ra". Au: she nae" kheim: so' qo qo" yaug wa- qam: ke' yang: au: she- eib khang" qo: ra". Nhag' khyag' myid qhu" byid: ba: ra" yaug wa- ngaui bau: ngaui yao qhu" byid: qo: ra". 9 Jhid' de; myid mae jab byang" sho' gyang" shao qo: ra"- makhyang" rure nghang" pye' mung: gai shab: rure zaui" zag: ci ge,. 10 Dayaug we' dayaug Khristu mae jho" jhid'de; ge,- dayaug we' dayaug jho" phug' jho" myao: nae" kao bau ge,. 11 Mau" zaui" rumae qam: ke' ge,- danoe" dashoe ge,- ai: Asang re aung khug nhag' lam: alhab' we' kao bau yang: caung da" byid: ge,. 12 Naonhaung" wa ngaui bau: taung" myid: lao" na ge,- Qug: khai: qhug' rumae zang: qhao" ge,- Ayo, khao: ngo" akyu" mho' na ge,. 13 Naonhaung" jo,nho" jham re qo ca" ko" ra" naonhaung" Khristan: mao:nhaung: qere gae byid: ge,- naonhaung" maba mase" ra" bang" vo qere naonhaung" yham mae bang" da" byid: ge,. 14 Naonhaung" re yhin" ra" mo, re shaman" byid: nae" Mao"So re mho' ge,- ngad va"- Nhang: byid: nae" qhid' mae" mangad:- Shaman" byid" nae" qhid' mae" yao: re mho' ge,. 15 Ngaui bau" ra" mo, we' daga"- ngaui bau: ge,- ngug: ra" mo, we' daga" ngug ge,- 16 Yaug khao: ngo" re dakhyo: za: myid: sang: kho: byid: ge,- dangad beim: ge,- nyham: ra" mau" zo" re zaui: ge,- naonhaung" yao" gaung re pha,jhi" ba: ra" yaug khyo" damyid: jho ge,. 17 Naonhaung" re dayaug yaug: yang magai kad' re- yao: re lage, dadam: phaug' ge,- Yaug khao: ngo" yang gai: ga" ra" mau" re qam: ke' kad' ge,. 18 Yaug khao: ngo" we' ngaui pyo: yaug yo za: qo" na nae" qhid' mae" naonhaung" shad' khyo" gai: boe" ra" gu: alhab' re kad' ge,. 19 Ba nam qe we"- Khonhae" re: lage, daphaug' ge,- ai: atha" Mao"So nhag' yo" ruyang lage, phaug' vashao:- pe"mung:ga"re jham: mugsug' mae Asang wa- ngo lage, phaug' nae"- ngo dam: tug' xe' nae"- ga: ta" ra". 20 Airumung: lage, phaug' nae" atha"- Jham: Mugsug' mae- Ni" nho: gyevo vae: moe' ngad: re- yao: re zo:ve byid: zho: wa,- yao: qid shab' ngad: re yao: re qid byid: jhaug' wa; Nao ceru: kad' lao"- yao: re nao gyai qho' nhao: li" nae"- ga: ta" to" ra". 21 Makhyang: mashab: ruyang nao re daaung: pye' nhao. Ai: atha" gai shab: ruyang makhyang: mashab: rure aung: pye' wa,.

Roma 13

1 Byu yaug khao: ngo" wa mung"dan: eib khang" nae" kheim: so' qo" ra" mo; mho dao: re tae" gyo: ca" ra". Pe"mung:ga"re Mao"So: akhang" maqo" lo: eib nae" kheim: so' majo, ngad: ra"- Eib khang" nae" kheim: so' qo" ra" mo, wa Mao"So: yang san: to" ra" mo, ngad: ako". 2 Khag' ngadqere: eib khang" nae" kheim: so' qo" ra" yaug re ngag: thaug' ra" yaug wa- Mao"So: yang jaung: san: to" rure ngag: thaug' ra" yaug ngad: ra"- Airu: kad' ra" yaug wa dao: phyid' ru qhug' li" nae". 3 Pe"mung:ga"re- gai: ra" mau" zaui: mo, wa zug: qere gyaug maca" ngad: ra"- Makhyang" ra" mau" zaui: mo, kam" wa zug: qere gyaug ca" ako". Nao wa kheim: so' qo" ra" yaug re gyaug maca" lo:- na nug: i? Gai: ra" mau" zo" re zaui: so: wa,- Alao"- yao: wa nao re caung:khin" li" nae"- 4 Pe"mung:ga"re yao: wa nao re gai kad' byid: nae" qhid' mae" san: to" ra" Mao"So: daui daui yaug ngad: ra". Ngadqere: nao makhyang" ra" mau" zaui" ru ngad: re wa- yao: re gyaug wa,- pe"mung:ga"re yao: wa gaigai: yao: qobo dae byid: nae" qam: so' qo" ra" yaug ngad: ra". Yao: wa Mao"So: daui daui yaug ngad mung: makhyang" ra" mau" zaui: mo, re Mao"So: qobo dae byid' ra" yaug ngad: ra". 5 Cerumung:- naonhaung" wa eib nae" kheim: so' qo" ra" mo; mho dao: re tae" gyo: ca" ra". Mao"So: yang qobo dae byid: nae" rure gyaug yang: za: mangad:- ni" nho: aung khug nhag' lam: mae myid ba: kin yang:- kheim: so' qo" ra" mo; mho dao: re tae" gyo: ca" ra". 6 Ai: mathao mae naonhaung" wa khang: ke' ru ngad: ako". Pe"mung:ga"re kheim: so' qo" ra" mo, yao: bam: mau" zo" re kyab' sho' zaui" ru wa- Mao"So re mau" zaui: byid' na: ru ngad: ako". 7 Airumung:- naonhaung" wa yao: bam re byid: ca" ra" gu: re byid: ge,- khang: ke' byid: ca" ra" gu: alhab' re ke' byid: ge,- kheim: so' qo" ra" mo, alhab' re phug' myao: mung:- nga: yhe' byid: ge,- 8 Naonhaung" yao: cao: jho" jhid'de; nae" jhin mae" je yang: khag' we' re: pe" jhin dade, ge,- Su re jhid'de; ra" yaug wa kham" to" ra" Tarha" re phug' cao" ra" yaug ngad: ra". 9 Pe"mung:ga"re- ai: kham" to" ra" Tarha" mae su: myi:- su: lao dashad'- byu dase' wa,- dakhug' wa, su gaje qe: zai re myo, nyad o: dabyid wa,- ga" ra" tarha" jham we' gatau jo; ra" tarha" jham alhab' ni" yham kyo: cao: re naoyao" gaung re jhid'de; ru we' dakhyo: jhid'de; wa,- ga" rumae bovao: ava". 10 Dayaug yaug re nao jhid'de; ngad: re wa- nao wa yao: re khonhae" re: magai: ru makad' ngad: ra"- Airu: mung: jhid'de; ru wa kham" to" ra" Tarha" alhab' geim" re phug' cao" ru ngad: ra". 11 Naonhaung" wa yab: myid' jo; rumae" yab so: to" li" ca" va" ra" yo, khyin: joe" va" rure ba geyang: ceru re naonhaung" phug' cao" ca" ko" ra". Pe"mung:ga"re naonhaung" khyad' yu: ru qhug' nae" ra" ba na wa- ngonhaung" sao qhid' Yesu re lam" qhid; ra" ba na tho' ana" je: jhao" li" na: ra". 12 Myi" wa lai: lo" kaung: mung:- na" gaung wa joe" li" na: ava". Airumung: ngonhaung" wa mug: cad' we' sin" ra" mau" zo" jham re to" pye' yang: mug: bo" mae gyekhe' nae" shae lhae jham re yu: ci gelang:- 13 Ngonhaung" wa- na" gaung mug: bo" yo mae su" ra" mo, we' dakhyo:- dau shab: ra" khyo" zaui: so: ca" ra". Zo: pyo: shaug' pyo: kad' ru- yhid yid: ru- gintho' zaung: ru- akyang qeim: ru- myan" myo: jho" byo; ru- myid nug: obyid: ru jham re jao" pye' ca" ra". 14 Asang Yesu Khristu nho: shae lhae jham re yu: ci ge,- gaung sho: myid: o: ra" mau" zo" jham re we' airu re nhag' shid nhag' dag nhao: ra" mau" zo" jham re to" pye' ge,.

Roma 14

1 Lam khug: ra" myid mae qam: nang" ra" yaug re pang" yu ge,- ngadqere: yao" myid: ra" khyo jham we' sin: yang: yao: we' dajho" ngag ge,- 2 dayaug yaug: nho: lam khug: myid wa- zo:ve alhab' re gai: zo" ra" khyo" lam" ra". Ngadqere: lam khug: ra" myid mae qam: nang" ra" yaug wa- ao: pho' myiqui: za: zo" ra". 3 Zo: ve alhab' zo" ra" yaug wa mazo" ra" yaug re daqu" jung" wa,- amung: ao: pho' myiqui: za: zo" ra" yaug re:- zo:ve alhab' re zo" ra" yaug re dao: magai: phyid' ngad: ra". Pe"mung:ga"re Mao"So wa yao: re khae: yu: ava". 4 Nao wa khag' ngad mung: su gaje qera" daui daui yaug re dao: phyid' ra" i? Yao: myo, nho qo" nae" maqo" nae" ga" ru wa yao" Asang yao: dao: kho' li" nae". Yao: myo, nho qo" li" nae"- pe"mung:ga"re Asang wa yao: re myo, nho qo" nhao: ra". 5 Byu dayaug yaug wa ba na daba ba re- ba na gatau myo: sho' mae tho' je: akhyag:- ga: myid: jho: ra"- amung: gatau dayaug yaug wa- ba na alhab' wa dakhyo: za: ngad:- ga: myid: jho: ra". Yaug khao: ngo" wa yao: yao" myid re tang za: myid: phyid' ci qo: ra". 6 Ba na re jo" kho' qu" ra" yaug wa Asang re nga: yhe' byid: nae" qhid' mae" qu" ru ngad: ra". Amung: zo:ve alhab' re zo" ra" yaug re: Asang re nga: yhe' nae" qhid' mae" zo" ru ngad: ra"- pe"mung:ga"re yao: wa ai: zo:ve qhid' mae" Mao"So re jeju caung:khin" ra". Zo: ve daqhae: re jao" ra" yaug re: Asang re nga: yhe' nae" qhid' mae" airu: mazo" ru ngad: ra". Amung: yao: wa Mao"So re jeju caung:khin" byid' ra". 7 Ngonhaung" khag' dayaug re:- yao: yao" gaung qhid' mae" za: kao so' daui: na: ru mangad:- amung: ngonhaung" khag' dayaug re: yao: yao" gaung qhid' mae" za: shid: ru mangad:- 8 Ngonhaung" daui: na: re wa- Asang: qhid' mae" ngonhaung" daui: na: ru ngad: ra". Alao"- ngonhaung" shid: re wa- Asang: qhid' mae" ngonhaung" shid: ru ngad: ra". Airumung: ngonhaung" wa daui: na ngadqere:- shid ngadqere: ai: Asang we' sin" ra" mo, ngad: ra". 9 Pe"mung:ga"re Khristu wa shid mo, we' daui: na: ra" mo; Asang boe" nae" qhid' mae" shid mung: dam: daui: to" li" va" ra". 10 Airumung:- ao: pho' myiqui: za: zo: ko" ra" mo, naonhaung" wa naonhaung" mao:nhaung: pho" re pe"mung: dao: kho' ko" i? Amung: zo:ve alhab' re zo: ko" ra" mo, naonhaung" re: naonhaung" mao:nhaung: pho" re pe"mung: qu" jung" ko" i? Ngonhaung" alhab' mo, wa dao: kho' ru qhug' nae" qhid' mae" Mao"So: qhid' kheim: mae ye; jo; li" nae". 11 Pe"mung:ga"re Jham: Mugsug' mae- Asang wa- ngo dang za: daui: na: ra" Mao"So ngad: ru we' dakhyo:- Yaug khao: ngo" wa nga" qhid' kheim: mae pad' thaug' thaug' mung:- Yaug khao: ngo" wa ngo Mao"So ngad:- ga" rure- lhang: yu: li" genae"- ga: ta" to" ra". 12 Airumung:- ngonhaung" mae" yaug khao: ngo" wa Mao"So re yao: yao" mau" zo" japhin: ta" sho' kyo: qo: li" nae". 13 Airumung:- yao: cao: dao: jho" kho' rure ngonhaung" to" pye' gelang:. Naonhaung" mao:nhaung: pho" re tha" lang: nhao nae" mangad: lao"- qobo shad' nghung: nhao nae" ra" lo, mau" jham re khonhae" re: makad' nae" rure kam" wa naonhaung" myid: phyid' ge,. 14 Asang Yesu we' dadang: dalam: za: kao so' daui yang: ngo khyag' za: ba: ra" khyo wa- zo:ve daja: ja: wa yao: yao: caung:pa" thung" khyo" masan masin" boe" ga" ru majo, ngad: ra". Ngadqere: zo:ve daqhae: wa masan masin" ngad: ga: nao lam" yang: ngad: re ai: zo:ve wa ni" qhid' mae" masan masin" ru boe" ra". 15 Nao zo" ra" zo:ve daja: ja: khyo" yang ni" mao:nhaung: pho" re no nhao: ngad: re wa- nao wa jhid'de; myid khyo" kao so' daui yaug mangad: lo:ngad: ra". Khristu wa yao" qhid' mae" bin: shid kham: byid: va" ruyang nao zo" ra" zo:ve: yang yao: re dabyo; qeim: lo" nhao wa,. 16 Naonhaung" gai:- ga: myid: jho: ra" ja: re dajung" pye' nhao wa,. 17 Pe"mung:ga"re Mao"So: mung"dan: wa zo" ru shaug' ru we' masin: lo: Gyang" Lho" Byo khyo" yang byid' ra" din:man" ru- yaug yo: ru- ngaui bau" ru we' sin" ru ngad: ra". 18 Khristu re cekhyo" caung da" byid' ra" yaug wa Mao"So re o ngaui nhao mung: su: yang re: caung:khin" ru qhug' ra". 19 Airumung: ngonhaung" wa ai: ngaui pyo: yaug yo: ru boe" nhao nae" rure we' yao: cao: qam: bo nhao nae" ra" khyo jham re khonhae" re: au: qang mung: qam: ke' na ca" ra". 20 Zo: ve mathao: yang Mao"So kad' to" ra" mau" zo" re daphyo' pye' wa,. Zo: ve alhab' wa gai: zo: ngadqere:- su gaje qere qobo shad' nghung: nhao: ra" zo:ve re zo" ru wa shad' ra". 21 Ni" mao:nhaung: pho" re shad' nghung: nhao nae" ngad: re wa- sho: zo" ru- sabyi qang: shaug' ru mangad: lao"- gatau pe" ja: ngadqere: jao" pye' ru wa jo ang: ra" khyo ngad: ra". 22 Ce: khyo we' sin: yang: nao lam" ru we' dakhyo: zaui" zag: ci wa,- Aiwa Mao"So we' ni" agyo: mae ngad vashao:- dayaug yaug jo: ga: khae: yu: ra" mau" re qobo qo" thoe magyo: lo: kad' ra" yaug wa ngaui lho" ra". 23 Ngadqere: aug' o" ra" myid we' zo:ve re zo" ra" yaug re Mao"So wa yao: re dao: phyid' li" nae". Pe"mung:ga"re yao" lo, mau" wa lam khug: myid re apan mato: yang: ngad: ra". Amung:- lam khug: ra" myid re apan mato: lo: kad' ra" ja: pe" ja: ngadqere: qobo ngad: ra".

Roma 15

1 Lam khug: ra" myid qi" ra" mo, ngonhaung" wa- lam khug: ra" myid qam: nang" ra" mo; nho: qo jham re vin nae" rure bobao" thaug' byid: nae" ang: ra". Ngonhaung" wa ngonhaung" yao" gaung re ngaui nhao nae" maang ngad: ra". 2 Ai: atha" ngonhaung" wa lam khug: myid mae yao: bam re zao: to' byid: nae" qhid' mae" yao: bam yao" akyu" qhid' mae" qu" mung:- ngonhaung" nho: mao:nhaung: qere ngaui nhao nae" ang: ra". 3 Pe"mung:ga"re Khristu wa yao: yao" gaung re ngaui nae" makad' yu ngad: ra". Ai: atha"- Jham: Mugsug' mae- nao re maphug' makhyad' jung" gaui: ra" dao: jham wa nga" dao mae gyo" zao" shaung" yu: ra"- ga: ta" to" ru we' dakhyo: ngad: ra". 4 Jham: Mugsug' yang ngonhaung" re byid' to" ra" qam: byid' ru we' zang: kham: ru khyo" yang ngonhaung" wa myid: lao" ra" khyo re ngonhaung" qo" nae" qhid' mae" Jham: Mugsug' mae tung" to" ra" gu: ja: khao: ngo" wa ngonhaung" re mho" shid' nae" tung" to" ru ngad: ra". 5 Aimung: zang: qhao" ru we' myid qam: so' byid' ra" khyo: ajhaung Mao"So wa Khristu Yesu nho: lag re qu" mung: naonhaung" yaug khao: ngo" nhag' lam: jho" vang" na nae" qam: o: byid: vashao:. 6 Airumung: naonhaung" alhab' mo, daga" za: ngonhaung" Asang Yesu Khristu nho: Yao: Pho" ngad: ra" Mao"So re danhad' dathoe we' za: qo" caung:khin" nae" ngad: ra". 7 Airumung: Mao"So: phungbao qhid' mae" Khristu wa naonhaung" re khae: yu va" ru we' dakhyo: naonhaung" re: yao: cao: jho" khae: yu ge,- 8 Pe"mung:ga"re ngo naonhaung" re ta" geli"- Khristu nho: caung da" byid' ra" kao so' daui khyo wa Yuda byu qe: qhid' mae" ngad: ra". Airu wa Mao"So: dao:so: zaung: rure qhu" byid: nae" qhid' mae"- yao: bam: phug' pho" qere Mao"So: yang byid' to" ra" dao:so: jham re zaui" pyang" nae" we' Taung bug byu qere lhao" re: Mao"So: nhag' khyag' shogu: ra" jeju khyo" yang yao: re caung:khin" byid: nhao nae" qhid' mae" ngad: ra". 10 Amung:- Jham: Mugsug' mae- Taung bug byu qe we" Mao"So: byumyu" we"- Ngaui bau: ge,- ga: dam: ta" ra". 11 Amung: Taung bug byu qe alhab' mo, we"- Asang re caung:khin" byid: ge,- Byumyu" alhab' we"- yao: re caung:khin" byid: ge,- ga: re: ta" to" ra". 12 Ailao"- Esaia wa- Yese myid:zo: kaung mae" dayaug na: thug' li" li" nae"- Yao: wa Taung bug byumyu" re eib nae" qhid' mae" joe" li" yaug ngad: li" nae"- Amung: Taung bug byu qe wa yao: mae myid: lao" na: li" genae"- ga: dam: ta" ra". 13 Myid: lao" ru byid' ra" yaug ajhaung ngad: ra" Mao"So wa naonhaung" lam khug: myid khyo" yang ngaui bau" ru we' yaug yo: ru byid: vashao: wo". Airulao" Gyang" Lho" Byo: qam: so' khyo" yang naonhaung" myid: lao" ru wa xo' yang: qi" qhang: li" nae" ngad: ra". 14 Nga" mao:nhaung: qe we"- naonhaung" wa gai shab jab byang" jo; ru we' laba lajhao to, ngad: jo, gemung: naonhaung" yao: cao: qo" jho" mho" shid' mo, ngad ko" rure ngoyao: jhaug' za: myid: ba: ra". 15 Ngadqere: ce: vhin tung" mae khyo daqhae: we' sin: yang: ngo naonhaung" re ta" peim: ta" kyang" rumae dajhid' zo:ve" vae" tung" ke' ra". Mao"So wa ngore Taung bug byu qe: qhid' mae" mau" zaui: nae" Yesu Khristu nho: daui daui yaug qo" boe" ra" akho: akhang" byid' to" ruyang airu: vae" vae" tung" ke' ru ngad: ra". 16 Taung bug byu qe wa Gyang" Lho" Byo: yang Mao"So re qhaug' byid' ra" Mao"So khae: yu: ra" ngaui" xeim: qe boe" lo genae" qhid' mae" Mao"So mae" lau dao: gai re kho" kyo: byid' rumae ngo wa khinjaung dayaug ru: caung da" byid' ra". 17 Airumung: ngo wa Khristu we' dagaung dasho: za: boe" na mung: Mao"So: mau" zo" re ngo qo" vin vo' ruyang ngo qo" phug: ra". 18 Taung bug byu qe Mao"So: mho dao: re tae" gyo" lo genae" qhid' mae" Khristu wa ngore ci yang: mau" zaui" lo: ra" khyo re za: ngo wa phug: ta" nae". 19 Khristu wa nhad' dao: thoe we' lo, mau" yang re: mug' pho: ve, lho jham we' mug' pho: ve, lho jham: nho: qam: so' khyo" yang re: Mao"So: Byo: qam: so' khyo" yang re: ngo wa Yerusalem: vogaung: mae" Iluri mung" jao: sho' du" qin" yang: Khristu nho: khyo Lau Dao: Gai re bin sho' cao" kho" kyo: byid: va". 20 Su gaje: yang zao: to" ra" apan aqao: dao mae paug' zao: ru maboe" vashao:- ngo kao bau: ru wa ai: Khristu nho: khyo re magyo" qu" shiko" ra" jo, qo khao: ngo" mae Lau Dao: Gai cao" kho" kyo: byid: nae" ru ngad: ra". 21 Jham: Mug: Sug' mae- Yao" khyo re khag' yang re: makyo" qu" ko" ra" mo, wa- yao: re the' myao: li" genae". Amung: mathe' gyo" qu" ko" ra" mo, wa- ba: gyo" li" genae"- ga: ta" ru we' dakhyo: ngad: ra". 22 Airu: mung: naonhaung" jhao" ngo joe" li" nae" seim" rumae myo: sho' lhang tam" pye' ru qhug' ra". 23 Ngadqere: ana" wa- ai: mang: khaung: mae nga" mau" zo" re kyab' sho' bin: zaui: va". Amung: naonhaung" jhao" li" qhug' nae" myo: sho' zin mae" kao bau: na va" ruyang- 24 Ana" wa naonhaung" jhao" qo" joe" li" naeva"- ein: ngo myid: lao" ra". Ngo Spain mung" khyo ye" lo" au:- naonhaung" jhao" li" vao: qhug' co' nug: ra". Naonhaung" jhao" dayo, zo: li" thang: na yang: ngaui bau: taung" zam" khug co' mung: naonhaung" bao" thaug' ruyang Spain mung" khyo ye" lo" nug: ra". 25 Ngadqere: ana" ngo wa Mao"So: byu qere caung da" byid: nae" qhid' mae" Yerusalem vogaung: khyo ye" lo" nae" ngad: ra". 26 Pe"mung:ga"re Makedoni mung" we' Akhaia mung" mae" phung: jham wa Yerusalem mae na ko" ra" Mao"So: byu qemae" myaung sho" ra" mo, re bao" thaug' nae" aung lam Alu: byid: nae" qhid' mae" ngaui bau: taung" myid: phyid' to: vako" ruyang ngad: ra". 27 Aiwa yao: bam yao: yao: myid: phyid' ru ngad: ako". Gai gai: yao: re:- yao: bam wa Yerusalem mae" Mao"So: byu qere bao" thaug' byid: nae" khyo ang mo, ngad: ako". Yuda byu qe wa yao: bam: Byo we' sin" ra" shaman" jeju re Taung bug byu qere myho" gae byid: vako" ruyang Taung bug byu qere: yao: bam: jo,nho" jham: yang Yuda byu qere bao" thaug' byid: nae" ang: ako". 28 Amung:- ngo wa ce: mau" zo" re bin mung: yao: bam: qhid' mae" qo" gaug: yu: ra" Alu: ngaui alhab' re Yao: bam: lo, khug mae bin: ke' byid: lao"- Spain mung" khyo ye" lo" nae" au: naonhaung" jhao" li" vao: qhug' to: co' nae". 29 Ngo naonhaung" jhao" joe" li" lao"- ngo wa Khristu nho: shaman" jeju byang" sho' we' joe" li" nae" ngad: rure ngo ba: ra". 30 Mao:nhaung: qe we"- ngonhaung" Asang Yesu Khristu khyo" yang re:- Gyang" Lho" Byo: yang byid' ra" jhid'de; myid khyo" yang re:- akyu" mho' rumae ngo we' qhan: mung: nga" qhid' mae" Mao"So re qam: ke' yang: boceim" mho' byid: genae" qhid' mae" naonhaung" re jhan" ke' ra". 31 Ngo wa Yuda mung" mae na ko" ra" Yesu re malam khug: ra" mo; lo, mae" loe; beim mung: nga" nho: caung da" bao" thaug' byid' ra" mau" zo" re Yerusalem vogaung: mae na ko" ra" Mao"So: byu qere lham: khae: yu genae" qhid' mae" akyu" mho' ge,- 32 Airumung:- Mao"So myid o: ru ngad: re wa ngo wa naonhaung" jhao" ngaui bau: ngaui yao we' byang" yang: joe" li" mung:- naonhaung" we' daga" ngaui bau: ngaui lho" taung" qo" zam" khug: na: li" nae". 33 Ngonhaung" nho: ngaui: pyo: yaug yo: ru apan ajhaung ngad: ra" Mao"So wa naonhaung" alhab' mo, we' daga" ngad: jo, vashao: wo"- Amen.

Roma 16

1 Kenkhrea vogaung: phung: mae caung da" byid' na: ra" ngonhaung" nhae: mo" Phobe ra" khyo re ngo naonhaung" re bobao" thaug' ta" ke' ra". 2 Mao"So: byu qe kad' ang: ru we' dakhyo:- Asang: mang mae naonhaung" yao: re lham: pang" yu mung:- yao: qo ca" ra" gu: mae yao: re bao" thaug' byid: ge,. Pe"mung:ga"re yao: wa byu myo: sho' mo, re bao" thaug' byid: yaug ngad: ru we' ngo rere: bao" thaug' byid: yaug ngad: ra". 3 Yesu Khristu mau" zo" mae nga" mau" vin cao: qe ngad ko" ra" Priskila we' Akula shid' tao re ngo au" ke' ra". 4 Yao: shid' tao wa yao: shid' tao: nho: kao so' re nga" qhid' mae" dan: pye' yang: ngore khyad' yu: qu" va" ru tao ngad: ako". Ngo dayaug za: yao: shid' tao re jeju beim: so" ru mangad. Taung bug byu qe: phung: jham alhab' re: yao: shid' tao re jeju beim: so" ako". 5 Yao: shid' tao: yham mae zang" ham yang: caung:pa" na ko" ra" phung: byu qere re: ngo au" ke' ra" khyo re ta" kyo: ge,- Amung: Asia mung" mae Khristu re sao qhid' lam" yaug ngad: ra" ngo jhid'de; ra" Epaenetu rere: au" ke' ra". 6 Naonhaung" qhid' mae" qam: ke' yang: mau" zaui: byid' ra" Mari re au" byid: gela,- 7 Ngo we' daga" thaung: laung" lo: ra" Yuda mao:nhaung: tao ngad: ra" Androniku we' Yunia shid' zo: rere: au" ke' ra". Yao: shid' yaug wa lagyo: qe: phaung mae mang qi" ru we' nga" qhid' re Khristan boe" lo: ra" shid' yaug ngad: ako". 8 Asang: khug mae ngo jhid'de; ra" ba nam pho" Ampliatu re au" ke'ra". 9 Khristu mau" zo" mae ngonhaung" mau" vin cao: ngad: ra" Obanu re we' ngo jhid'de; ra" Staku rere: au" ke' ra". 10 Khristu shad' mae vin tang: ngad: jo; ra" Apele re au" ke" ra"- amung: Aristobulu nho: yham byu qere au" ke' ra". 11 Nga" Yuda amyu" Herodion re au" ke' ra". Nakisu nho: yham byu qemae" Khristan mao:nhaung: qere au" ke' ra". 12 Asang: mau" zo" re zaui: so: ko" ra" Truphaena we' Truphosa re au" ke' ra:. Amung: Asang: qhid' mae" mau" myo: sho' zaui" lo yaug ngad: ra" nga" jhid'de; ra" ba nam pho" Persia re au" ke' ra". 13 Asang: mau" zo" vin vo; rumae baug thug' yaug ngad: ra" Rufu re we' ngore yao: zo: dayaug rere" ru: gun caung: ra" ai: yao: myhi" rere: ngo au" ke' ra". 14 Asunkristu- Phlegon- Herme- Patroba- Herma- bam we' yao: bam we' daga" ngad ko" ra" Khristan mao:nhaung: alhab' mo, re au" ke' ra". 15 Alao"- Philologu- Yulia- Nereu we' yao: nhae: mo" rere:- Olumpa we' yao: bam we' daga" ngad: ra" Mao"So: byu qe alhab' mo, re au" ke' ra". 16 Naonhaung" yao: cao: dayaug we' dayaug mao:nhaung: jhid'de; myid we' bobaug baug yang: jho" au" ge,- Khristu nho: phung: jham alhab' wa naonhaung" re au" ke' ko" ra". 17 Nga" mao:nhaung: qe we"- naonhaung" kham: yu: ci vako" ra" mho" shid' ra" khyo re ngag: thaug' mung:- phung: kho' lo" nhao: ru we' lam khug: ra" khyo mae" khyonghung: nghung" lo" nhao: ra" mo, re lha" yang: jao" pye' genae" qhid' mae" ngo naonhaung" re jhan" ke' ra". 18 Pe"mung:ga"re airu: kad' ra" mo, wa ngonhaung" Asang Yesu Khristu re caung da" byid: mo, mangad: ko" ngad: ra". Yao: bam: nhad' re za: myid mo, ngad: ako". Yao: bam: dao: yaung"- nhad' cug: ra" dao: thoe jham khyo" yang pe" maba: ra" mo, re yao: bam mhug' pyag' pye' ako". 19 Ai: Ngaui Bau" Lau Dao: re vin tang: za: naonhaung" lam" na ko" ra" khyo re yaug khao: ngo" the' gyo" avako"- Airumung: ngo wa naonhaung" khyo re ngaui bau: nhao: ra". Ngo wa naonhaung" re gai shab: rumae pha,jhi" ba: ra" mo,- makhyang" rumae wa qobo maqo" mo, boe" nhao nug: ra". 20 Amung: ngonhaung" nho: ngaui pyo: yaug yo: ru ajhaung ngad: ra" Mao"So wa mataung" myao" re Satan re naonhaung" khyid qao: mae zab: khyoe' pye' li" nae". Ngonhaung" nho: Asang Yesu nho: nhag' myan" ra" jeju wa naonhaung" we' daga" ngad: jo, vashao: wo"- 21 Nga" nho: mau" vin byin cao: Timothi we' nga" Yuda amyu" ngad ko" ra" Lukai- Yason we' Sosipata bam wa naonhaung" re au" ke' ko" ra". 22 Ce: vhin tung" re tung" yaug ngo Tertiu wa Asang: khug mae naonhaung" re au" ke' ra". 23 Nga" bang" sang pho ngad mung: phung: byu qe zang" ham yang: caung:pa" ko" ra" yham mae" yham sang re: ngad: ra" Gaiu wa naonhaung" re au" ke' ra". Vomo" mae" ngaui zam: yaug ngad: ra" Erastu we' ngonhaung" mao:nhaung: pho" Kuatu shid' zo: re: naonhaung" re au" ke' ako". (Lo, tung" jham: Mugsug' daqhae: mae adau ngai 24 mae- ngonhaung" Asang Yesu nho: nhag' myan" ra" jeju wa- naonhaung" alhab' mo, we' daga" ngad: jo, vashao: wo"- Amen ga: tung" laung" to" ako".) 25 Ngonhaung" wa Mao"So re phungbao caung: byid: gelang:- Yesu khyo we' sin: yang: ngo kho" kyo" ra" Lau Dao: Gai re cao" yang: re:- daba ganhae" gaco' pyad mae nyham" to" ra" no; thao" ra" dangman" ra" khyo re qhu" byid' rumae cao" yang: re: Mao"So wa naonhaung" lam khug: rumae gang: tang za: qo" ye; jo, nhao: ra". 26 Ngadqere: ana" wa ai: nyham" to" ra" dangman" ru wa lapa jham: paug' jham khyo" yang de: de: za: qhu" byid' ava". Byumyu" cao jab Mao"So re lam" mung: yao" mho dao: re tae" gyo: genae" qhid' mae" apyad ato daui: na: ra" Mao"So: amyin" khyo" yang byumyu" alhab' re ba nhao: ava". 27 Date: za: ngad mung: Pha,jhi" bo: thao" yaug ngad: ra" Mao"So wa Yesu Khristu khyo" yang apyad ato phungbao jo; jo, vashao: wo"- Amen.