Revelation
Qhu" byid1 Ce: mugsug' paug' wa Yesu Khristu re Mao"So: yang qhu" byid' ra" boe" ra" khyo jham re tung" xam" to" ra" mugsug' ngad: ra". Mao"So yao: re ce: qhu" lho byid' ru wa mataung" myao" re boe" ca" ra" khyo jham re Mao"So: daui daui mo, re qhu" byid: nae" qhid' mae" byid' ra" qhu" lho ngad: ra". Khristu wa yao" daui daui yaug Yohan jhao" yao" mug: lagyo: re nhao: ke' ra" khyo" yang ai: qhu" lho jham re ba nhao: ra". 2 Aimung: Yohan wa yao: the' myao: ra" gu: alhab' re ce: mugsug' mae ta" to" ra". Ceru wa Mao"So mae" joe" li" ra" mungdao: we' Khristu yang yao: re qhu" byid' ra" dangman" ra" khyo we' sin" ra" lau dao: ngad: ra". 3 Ce: mugsug' paug' re nghe' ra" yaug wa ngaui lho" ra". Amung: ce: lapa: mungdao: jham re tae" gyo: mung: ce: mugsug' paug' mae tung" to" ra" mungdao: re phug' cao" ra" mo, wa ngaui lho" ko" ra" wo". Pe"mung:ga"re ai: khyo jham alhab' boe" li" nae" yo, khyin: wa jhao" li" ava". 4 Ngo Yohan wa Asia mung" mae" phung: nhad' lam: khyo mugsug' tung" ke' ra". Ana" pyad- lai: lo: ra" pyad- joe" lo nae" pyad mae na: jo; ra" Mao"So mae" re:- yao" kho:kham tao" qhid' au: mae na: jo; ra" byo nhad' yaug mae" re:- 5 Amung: jhaug' zaug: ra" sagse: kham yaug- shid: rumae" sao qhid' daui: to" li" ra" yaug- mug:myid dao mae" kho:kham jham re eib: ra" yaug re:- ngad: ra" Yesu Khristu mae" re:- nhag' myan" ra" jeju we' ngaui pyo: yaug yo: ru wa naonhaung" we' daga" ngad: jo, vashao: wo". Yao: wa ngonhaung" re jhid'de; yang: yao: shid kham: byid' ra" khyo" yang ngonhaung" nho: qobo jham mae" loe, beim nhao mung:- 6 Yao: yao" Pho" Mao"So re caung da" byid: nae" ra" mung"dan: nho: khinjaung ngonhaung" re toe' yu: ra". Yesu Khristu mae phungbao we' qam: so' apyad ato byang" jo, vashao: wo"- Amen. 7 Qu" ge, Yao: wa jham thaui: dao mae zaung yang: joe" li" na: ra". Yao: re thug' kyao" ra" mo, bobo mung: yaug khao: ngo" wa yao: re qhug' myao: li" genae". Mug:myid dao mae" byumyu" alhab' wa yao" mathao mae kaug' qhui: li" genae". Airu: boe" li" vashao: wo"- 8 Ngo wa sao qhid' we' lo" thao" yaug ngad: ga:- ana" pyad- lai: lo: ra" pyad- joe" lo nae" pyad mae na: jo, yaug ngad: ra" qam: bo: thao" ra" Asang Mao"So ta" ra". 9 Ngo wa yao" Mung"dan: byu qe kham zo" ra" qug: khai: khyag' qhui: rure zang: qhao" kham zo" rumae Yesu thao cao" yaug khyo" naonhaung" we' daga" bokham zo: yaug naonhaung" mao:nhaung: pho" Yohan ngad: ra". Ngo wa Mao"So: mungdao: re we' Yesu yang qhu" byid' ra" dangman" ra" khyo re ta" hau" kyo: byid' ra" mau" mathao mae Pad Mu gagyo: kao" mae dai" nha: to" ru qhug' ra". 10 Asang: ba na mae ai: Byo: yang ngore jaung" mung:- labo" thoe we' dau: ra" thoe qi: nga" nhaung thao" mae jhau: na: rure ngo the' gyo". 11 Ai: thoe qi: wa Nao the' myao: rure tung" mung:- ai: mugsug' re Ephesu- Samurna- Pergamum- Thuatira- Sardi- Philadelphia- Ladoki we' ce: vogaung: jham mae" phung: nhad' lam: khyo vhin: ke' wa,- ga: ta" ra". 12 Ngo re jhau: na: ra" yaug khag' ngad: rure qu" nae" qhid' mae" ngo lhang: qu" ke' re qhang myikaug' tao" nhad' lam: re we' aijham: agaung: mae xao su byu we' dau: ru dayaug re ngo the' myao:- 13 Yao: wa khyid vo: joe" ra" bau: qhang re ve; ci mung:- yao" qao gao mae qhang pye: phyid' cui: cui" ci: ra". 14 Yao" xae wa sug'gug we' dakhyo:- mangad: lao" gyu: we' dakhyo: phyu: ra". Amung: yao" myo, jid' wa myi: we' dakhyo: de; ra". 15 Yao" khyid wa kyang" pye' mung: boe; jhad' to" ra" gyid: ne we' dakhyo: bao mung:- yao" thoe wa qid coe: gyo" thoe we' dakhyo: ngad: ra". 16 Yao: wa yao" lo,yo shad' mae kyi nhad' ce' re zaui" ci mung:- yao" nhad' mae" shid' shad' geim" tho' ra" shae thug' li" ra". Yao" myo,khung: wa ba khaung tau: au: mae" ba we' dakhyo: zho: jo; ra". 17 Yao: re ngo myao lao"- yao" khyid qao: mae sushid we' dakhyo:- gyang: lang" jo; byaug: ra". Ailao" yao" lo,yo lo, nga" dao mae kai: byid: mung:- Dagyaug wa,- ngo wa sao qhid' yaug we' lo" thao" yaug ngad:- ga: ta" ra". 18 Ngo wa kao so' daui: na yaug ngad:- ngo wa shid va"- ngadqere: ana" wa apyad ato kao so' daui: na yaug ngad va". Ngo wa shid: rure we' movo: mug: re eib: ra" kheim: so' qo" yaug ngad: ra". 19 Airumung:- nao myao: ra" ja: jham rere:- ana" jo; ra" ja: jham we' thao re boe" li" nae" ra" ja: jham alhab' khyo re tung" to: wa,- 20 Nga" lo,yo lo, mae nao myao: ra" kyi nhad' ce' we' qhang myikaug' tao" nhad' lam" nho: no; thao" ra" lajheim: wa ceru: ngad: ra". Ai: kyi nhad' ce' wa phung: nhad' lam" nho: mug: lagyo: jham ngad: ako". Amung: ai: qhang myikaug' tao" nhad' lam: wa Phung: nhad' lam: ngad: ako". 1 Ephesu vogaung: phung" nho: mug: lagyo: re ceru: tung" ke' wa,- ce: mungdao: wa yao" lo,yo lo, mae kyi nhad' ce' re zaui" ci: ra" yaug- qhang myikaug' tao" nhad' lam" agaung: mae su" lhau: ra" yaug mae" mungdao: ngad: ra". 2 Nao kad' ra" ave, lo,mau" re ngo ba:. Nao khoqhi" qam: ke' yang: mau" zaui" lo: rure re:- nao khoqhi" sho' nhag' lam: qhang zang: kham: lo: rure re:- ngo ba:. Makhyang" ra" byu qere nao maqo" zang: kham: rure re:- lagyo: mangad' ra" mo, lagyo: ga: ta" ko" rure ca: qu" mung:- yao: bam mhug' ra" khyo myao: thug' li" nhao: ra" khyo rere: ngo ba:. 3 Nao wa zang: qhao" mung: nga" mathao mae qug: khai: kham zo: va" ru we' nao qam: magyug: ngad: ra". 4 Ngadqere: nao wa sao qhid' ngore jhid'de; ru we' dakhyo:- ana" nao ngore majhid'de, lo" ruyang qobo ceru ngo nao re vhin: ra". 5 Amung: nao khovha" va: sho' gyo" lo" byaug va" rure myid: qu" wa,- ni" qobo jham mae" phaug' lo mung: nao sao qhid' kad' ru we' dakhyo: kad' wa,- ni" qobo jham mae" nao madam: phaug' lo re wa ngo nao jhao" li" mung:- ni" myikaug' tao" re yao" jo, qo mae" yu: pye' byid: nae". 6 Ngadqere: Nikola thao cao" mo, re ngo nghang" ra" qhi" nao yao: bam re nghang" pye' ruyang khin" nae" khyo dalam: de; ra". 7 Airumung: nao no: de; ngad: re wa Byo: yang phung: jham re ta" ra" dao: re tae" gyo: vashao:- Ngo wa aung doe; ra" mo, re Mao"So: khyae mae yaug: ra" kao so' sag' gae mae" ashi: re zo: nae" akhang" byid: nae". 8 Samurna vogaung: phung" nho: mug: lagyo: re ceru: tung" ke' wa,- Ce: mungdao: wa sao qhid' we' lo" thao" yaug- shid mung: dam: daui: to" li" ra" yaug mae" ngad: ra". 9 Ni" nho: qug: khai: jham re ngo ba:. Nao wa myaung sho: ngadqere: gaigai: yao: wa nao qo" rure ngo ba:. Yuda byu qe mangad: mo,- Yuda byu qe ngad: ga: ta" ra" mo; yang magai: ra" khyo" naonhaung" re ta" phoe: pye' byid' na ko" rure ngo ba:. Yao: bam wa Satan nho: phung: mae bobo mo, ngad: ako". 10 Nao qhug' kham zo: nae" ra" qug: khai: jham: qhid' mae" dagyaug daci" wa,. Tae" gyo: ge,- Min: yui wa naonhaung" mae" damyo" re thaung: taung" lhaung" pye' ra" khyo" naonhaung" re jham" qu" li" nae". Ni" nho: qug: khai: wa daxe ba myao" li" nae". Shid sho' jhaug' zaug wa,- ailao" aung doe; aphug' jhaung qhu" khyo" nao re ngo kao so' byid: nae". 11 Airumung: nao no: de; ngad: re wa Byo: yang phung: jham re ta" ra" dao: re tae" gyo: wa,- Aung doe; ra" mo, re shid' lhang ein: lhang shid: ruyang qo" zao" genae" mangad:. 12 Pergamum vogaung: phung" nho: mug: lagyo: re ceru: tung" ke' wa,- Ce: mungdao: wa shae su: shid' shad' geim" tho' ra" shae ci: ra" yaug mae" mungdao: ngad: ra". 13 Nao khai: mae na: jo; rure ngo ba:- nao wa Satan" nho: tao" khau" jo; ra" jo, qo mae na: jo; ra". Nga" nho: jhaug' zaug: ra" sagse: pho" Antipa wa Satan na: ra" jo, qo mae se' pye' qhug' ra" ayo, gyo: mae lhao" re:- nao ngore jhaug' zaug mung:- ngore lam khug: ra" myid re nao mashapye' ngad: ra". 14 Ngadqere: nao re qobo vhin nae" khyo dajhid' zo: bo: ra". Israel byu qere sulho re qhaug' byid' to" ra" zo:ve re zo: nhao nae" we' gaung sho: shab' ra" gintho' mau" zo" khyo re cao" nae" ju" phyo' ra" khyo" yang yao: bam re qobo shad' lhoe" sho' khoru: au: jhui" she nae" khyo Balag re mho" shid' byid' ra" Balam nho: mho" shid' khyo re phug' cao" ra" mo, damyo" naonhaung" phaung mae bo: ako". 15 Ai we' dakhyo:- naonhaung" phaung mae Nikola nho: mho"zo: qe: mho" shid' ra" khyo re cao" ra" mo, bobo: ako". 16 Ana" ni" qobo jham mae" dam: phaug' lo wa,- Airu: mangad: re wa nao jhao" ngo phyad phyad li" mung:- nga" nhad' mae" thug' ra" shae: yang ai: byu qere gye kad' li" nae". 17 Airumung: nao no: de; ngad: re wa Byo: yang phung: jham re ta" ra" dao: jham re tae" gyo: wa, Aung doe; ra" mo, re nyham" to" ra" mana mug daqhae: ngo byid' nae". Ngo wa yao: bam mae" yaug khao: ngo" re qo" khae: yu: ra" yaug mae" je yang: khag' re: maba: ra" mang sag' re tung" te' to" ra" ai: laug baui aphyu rere: byid: nae". 18 Thuatira vogaung: phung" nho: mug: lagyo: re ceru: tung" ke' wa,- Ce: mungdao: wa yao" myo,jid' wa myi: we' dakhyo: de, mung:- yao" khyid wa boe; qhui: to" ra" gyid: ne we' dakhyo: bao: ra" Mao"So: Yao: Zo: mae" mungdao: ngad: ra". 19 Nao pe" kad' rure ngo ba:. Ngo wa ni" jhid'de; myid- ni" nho: jhaug' zaug: ra" myid- ni" nho: mau" zo" we' ni" nho: zang: qhao" ra" myid re ngo ba:. Ana" nao zaui: so" na: ru wa nao sao qhid' re zaui: so" lo: ra" tho' je: rure ngo ba:. 20 Ngadqere: nao re qobo vhin nae" khyo ceru bo: ra". Yao: yao" gaung re Mao"So: lagyo: ngad: ga: mhang" ra" ai: myiqe: Yezebe re nao zang: byid' ra". Yao" nho: mho" shid' khyo khyo" yang nga" daui daui mo, re sulho re qhaug' byid' to" ra" zo:ve re zo: nae" gaung sho: shab' ra" gintho' mau" zo" re kad' genae" qhid' mae" khyonghung: nghung: nhao: ra". 21 Yao" qobo jham mae" myid tha" lo nae" ayo, re ngo byid' to: ngadqere: yao: wa yao" gaung sho: shab' ra" gintho' mau" zo" mae" myid matha" lo nug ngad: ra". 22 Airumung: ngo wa yao: re yab jaung: dao mae shapye' to: nae"- Aimae yao: we' daga" myi: shad' lao shad' ra" mo, qug: khai: khyag' qhui: ru qu" gyaug qu" lhaung: ru qhug' kham zo" li" genae". Yao: bam wa yao: we' daga" kad' ra" makhyang" ra" lo, mau" jham mae" myid matha" lo ko" re wa ce: qug: khai: khyag' qhui: rure kham zo: nhao nae". 23 Yao" mho"zo: qere re: ngo se' pye' byid: nae". Airumung: ngo wa yaug khao: ngo" nho: myid: o: ra" khyo re we' kao bau myid o: ra" khyo jham re ba yaug ngad: rure phung: jham alhab' ba: li" genae". Ngo wa naonhaung" mae" yaug khao: ngo" re yao: yao: zaui: so" lo: ra" lo,mau" re cao" yang: dam: tug' byid: nae". 24 Ngadqere: Thuatira vogaung: mae dang: ra" mo, naonhaung" wa ai: makhyang" ra" mho" shid' khyo re macao" ko" ngad: ra". Naonhaung" wa Satan" nho: no; thao" ra" nyham" to" ra" khyo ga: su gaje qeyang mhang" ra" khyo re mazhao: yu ko" ngad: ra". Ngo naonhaung" re ta" ru wa naonhaung" dao mae qola: pe" ja: re: ngo makai: byid: nae". 25 Ngadqere: ngo joe" li" sho' naonhaung" mho" zhao: yu: ra" khyo jham re tang za: naonhaung" zaui" zag: ci qo: ra". 26 Aung doe; ra" mo, re we' ngo o ngaui: ra" mau" re xo' yang: kyab' sho' zaui: byid: nae". Ngo wa yao: bam re byumyu" alhab' re eib nae" kheim: so' byid: mung:- ai: kheim: so' wa ai: mung"dan: jham re jo,to' zaung: bao" yang eib nae" we' zhogam: ug' jham re we' dakhyo:- aje, aman" be; kho' sin" pye' nae" kheim: so' yao: bam re ngo byid: nae". Bo" myhung rere: ngo yao: bam re byid: nae". 29 Airu: mung: no: de; ngad: re wa Byo: yang phung: jham re ta" ra" dao: re tae" gyo: wa, 1 Sardi vogaung: phung" nho: mug: lagyo: re ceru: tung" ke' wa,- ce: mungdao: wa Mao"So: byo nhad' yaug we' kyi nhad' ce' qo" ra" yaug mae" mungdao: ngad: ra". Nao pe" kad' na: rure ngo ba:- nao wa shid: jo, sho' ngadqere: daui: na: ga: mang qi" na: rure ngo ba:- 2 Airumung: beim: so" lo wa,- nao mae qo" jo, shi" ra" qam: so' bin sho' mathao" byaug shire qam: dam: pyang" yu wa,- pe"mung:ga"re nga" Mao"So: qhid' kheim: mae nao zaui: so" lo: ra" lo, mau" majab byang" shi" rure ngo qhug' myao:. 3 Aimung:- nao zhao: yu va" ru we' the' gyo" yu va" ja: re myid: beim: wa,- aire phug' cao" mung:- ni" qobo jham mae" dam: phaug' lo wa,- nao mabeim: so" lo ngad: re wa- khug' hab' we' dakhyo: ngo nao jhao" joe" li" nae"- ngo joe" li" nae" ayo, re lhao" re: nao maba nae". 4 Ngadqere: Sardi vogaung: mae na: ra" mo, mae" damyo" wa naonhaung" yao" mai bau: jham re san san za: zam" ci: avako". Naonhaung" wa mai bau: phyu ve; ci yang: ngo we' daga" su" li" genae". Pe"mung:ga"re naonhaung" wa airu: kad' nae" man: qi" ra" mo, ngad: ako". 5 Aung doe; ra" mo, wa ce we' dakhyo: mai bau: phyu qhug' ve; li" genae". Amung: ngo wa yao: bam: mang jham re kao so' mugsug' paug' mae" mayu: pye' nae". Nga" pho" we' yao" mug: lagyo: qe: qhid' kheim: mae yao: bam nga" byu qe ngad: rure de: de: za: ta" nae". 6 Airumung: no: de; ngad: re wa Byo: yang phung: jham re ta" ra" dao: re tae" gyo: wa, 7 Philadelphia vogaung: phung" nho: mug: lagyo: re ceru: tung" ke' wa,. Ce: mungdao: wa gyang" lho" ru we' dangman" ra" yaug mae" mungdao: ngad: ra". Yao: wa Davi kham: thug' re sang yaug ngad mung:- ai: kham: re yao: phung" lao" khag' maqo" pyid' ngad: ra". Amung: aire yao: pyid' pye' lao" re: khag' maqo" phung" ngad: ra". 8 Nao pe" kad' rure ngo ba:. nao mae qam: so' dajhid' za: bo: rure ngo ba:- nao wa nga" mho" shid' khyo re cao" mung:- jhaug' zaug: rure Ngo ba:- ngo wa khag' re: maqo" pyid' ra" kham: ni" qhid' kheim: mae phung" to: va". 9 Tae" gyo: wa,- Yuda byu re: mangad' ru Yuda byu qe ngad: ga: ta" ra" mo, ai: mhug' hab' qe ngad: ra" Satan" nho: byu qere re: ni" khyid qao: mae li" goe; gyo" nhao nae". Amung: nao re ngo jhid'de; ra" khyo re yao: bam alhab' ba: li" genae". 10 Pe"mung:ga"re nao wa nga" amyin" dao: re zang: qhao" yang: zaui" zag: ci: ava". Amung: myidgaung dao mae" byumyu" alhab' re jham" qu" nae" mug:myid dao khyo joe" li" na: ra" qug: khai: ra" yo, khyin: mae" re: lhaug' zaung" gug: gam byid: nae". 11 Ngo wa mataung" myao" lo: joe" li" nae". Nao qo" rure gug: gug: za: zam" ci wa,- airulao" za: ni" nho: aung doe, jhaung qhu" re khag' re: maqo" lhad' yu genae" ngad: ra". 12 Ngo wa aung doe; ra" yaug re nga" Mao"So: yham mae zang baung: boe" nhao nae"- amung: yao: wa khonhae" re: aimae" mathug' lo nae". Nga" nho: Mao"So: mang we' mug:gaung: dao mae" nga" Mao"So mae" gyo" li" ra" Yerusalem asag' ga" ra" Mao"So: vomo" mang re yao" dao mae ngo tung" te' to: nae". Nga" mang asag' rere: yao" dao mae ngo tung" te' to: nae". 13 Nao no: de; ngad: re wa Byo: yang phung: jham re ta" ra" dao: re tae" gyo: wa,- 14 Ladoki vogaung: phung" nho: mug: lagyo: re ceru: tung" ke' wa,- Ce: mung dao: wa jhaug' zaug mung: dangman" ra" sagse: ngad mung:- Mao"So: yang phan" to" ra" ja: alhab' nho: ajhaung ngad: ra". Amen ga" ra" yaug mae" mung dao: ngad: ra". 15 Nao pe" kad' lo va" rure Ngo ba:- nao wa angin" re: mangad:- alaung re: mangad: rure ngo ba:- nao wa angin"- mangad: lao"- alaung ngad: qa: we". 16 Nao wa alaung re: mangad:- angin" re: mangad:- lam ai" ngad: ruyang nga" nhad' mae" nao re ngo phoe" pye' nae va". 17 Nao wa jo,nho" qo"- na gai ye, gai:- ngo pe" maqo lo:- ga: ta" ra". Ngadqere: nao wa sho: jhin mung: nhag' khyag' tho' ra" yaug ngad: rure nao maba ngad: ra". Nao wa myaung sho: yaug- gaung pyad' yaug- myo, jid yaug ngad: ra". 18 Airumung: nao jo, nho" qo" nae" qhid' mae" ngo mae" qhang gyang" vai: yu nae" qhid' mae" nao re ngo pha,jhi" byid: li". Amung: ni" aqho' aqhid ngad: ra" gaung pyad' re go nae" qhid' mae" mai bau: phyu rere: naoyao" gaung re vai ve; wa,- nao myo, myao nae" qhid' mae" myo, mocid' xau rere: ni" myo, mae vai: gyad wa,- 19 Ngo jhid'de; ra" mo, alhab' re ngo wa qeim mung: qobo dae byid' ra". Airumung: nhag' lam: to" wa,- ni" qobo jham mae" dam: phaug' lo wa,- 20 Tae" gyo: wa,- Ngo wa kham: mae ye; jo, yang: kham: ko' na:. Dayaug yaug nga" thoe re the' gyo: yang: kham: phung" byid' re wa Ngo wa yao" yham khug khyo vao ye: mung:- yao: we' daga" zo: shaug' nae"- yao: re: ngo we' daga" zo: shaug' li" nae". 21 Ngo wa aung doe, va" rumung:- ana" nga" pho" nho: yao" zaung tao" mae ngo zaung: jo, va" ru we' dakhyo:- aung doe; ra" mo, re nga" zaung tao" nhae mae zaung nae" akhang" Ngo byid: nae". 22 Nao no: de; ngad: re wa Byo: yang ai: phung: jham re ta" ra" dao: re tae" gyo: wa,. 1 Ai: thao qhu" lho dalam: mae mug:gaung: mung"dan: kham: dung: bung" jo; rure ngo myao: ra". Qhid' phyao: ngo the' gyo" qu" ra" labo" myang thoe we' dau: ra" thoe wa Cekhyo do, lo wa,- thao phyao: boe" ca" ra" khyo Ngo nao re qhu" byid: nae"- ga: ngo re ta" ra". 2 Dalhang: dae Byo wa ngo re vao: jaung" ra". Mug:gaung: dao mae tao" khau" dalam: jo, mung:- ai: dao mae byu dayaug zaung: jo; ra". 3 Yao" myo,khung: wa phug' de; ra" dan: lung we' Patamya laug we' dakhyo: bao mung: tao" khau" lhang" gam: mae Mya laugsin" anyhug sang yhao lhang" to" ra". 4 Amung: ai: tao" khau" lhang" gam: yang: gatau tao" khau" shid' xe: byid lam: mae mai bau: phyu ve; ci yang: qhang ba maug: zhaung" ci ko" ra" lau: de, shid' xe: byid yaug zaung: jo, ko" rure re: ngo myao:. 5 Tao" khau" mae" lhe' cad' cad' ru- mug: dam: dam" ru- mug: gyug: gyug: thoe jham myang: thug' li" ra". Tao" khau" qhid' au: mae Mao"So: byo ngad: ra" myidam nhad' dam de; nga" na: ra". 6 Ai: tao" khau" qhid' au: mae bao tang" laug we' dakhyo:- gyang" ra" pad' tham: mo" datham: dang: jo; ra". Ai: tao" khau" lhang" gam: yang: shad' khao: ngo" mae qhid' khyo- thao khyo myo,jid' za: ngad: ra" gug'nyhug' byid dau: na: jo; ako". 7 Sao qhid' dau: wa khang khyi we' dau: ra". Shid' dau: ein: dau: wa nung: jaung lo: we' dau: ra". Sam dau: ein: dau" myo,khung: wa byu: myo,khung we' dau mung:- byid dau: ein: dau: wa dao" qin" ra" zeim baung: we' dau: ra". 8 Gug'nyhug' byid dau" geim" dau: khao: ngo" mae daung khyaug' lam: lam: de; ako". Yao: bam: gaung akhug taung gaung shad' myo,jid' za: byang" sho' de; ako". Yao: bam wa myi" na" mathang mano: lo:- lai: lo" ra" pyad- ana" pyad joe" lo nae" ra" pyad mae qam: bo: thao" ra" Asang Pho" Mao"So wa Gyang" Lho"- Gyang" Lho"- Gyang" Lho" yaug ngad: ra" wo"- ga: nghaui"caung: na: ako". 9 Ai: gug'nyhug' byid dau: wa tao" khau" mae zaung: jo, mung:- apyad ato khonhae" re: daui: na: ra" yaug: nho: phungbao nga: we' jeju re caung: khin" ako". Yao: bam ai ru: caung:khin" byid' au:- 10 Lau: de, shid' xe: byid yaug wa tao" khau" dao mae zaung: jo, mung:- apyad ato khonhae" re: daui: na yaug: qhid' kheim: mae goe; gyo" yang: yao: re goe; pa" ako". Yao: bam wa Yao: bam yao" ba maug: re tao" khau" qhid' au: mae khyad' khyo" to: mung:- 11 Ngonhaung" Asang we' Mao"So we"- Nao wa phungbao- nga:- qam: so' re khae: yu nae" man: qi" ra" yaug ngad: ra" wo"- Pe"mung:ga"re Nao wa cao jab alhab' re phan" to: yaug ngad mung:- Ni" myid o: ra" khyo" yang ai jham wa kao so' daui: na: jo, nae" akhang" qo" ako"- ga: ta" ako". 1 Tao" khau" dao mae zaung: jo; ra" yaug: nho: lo,yo shad' mae mugsug' dang: dalam: ci: rure ngo myao:. Ai: mug sug' dang: wa shid' shad' geim" byang" sho' tung" to: mung:- dazid nhad' lam" yang thaung" to" ra". 2 Amung:- qam: bo: thao" ra" mug: lagyo: dayaug wa dazid jham re qhid' pye' mung:- mugsug' dang: jham re phung" nae" khoyaug man: qi" ra" i?- ga: thoe qi: we' hug' ta" rure ngo myao: ra". 3 Ngadqere: mug:gaung- myidgaung we' mug:myid o mae ai: mugsug' dang: re phung" yang: qo" qu" yaug dayaug re: mana ngad: ra". 4 Ai: mugsug' dang: re phung" nae"- mangad: lao" aire nghe' nae" man: qi" ru dayaug re: mamyao: ruyang ngo wa kyid kyid ein: ngug:- 5 Ailao"- lau: de, qemae" dayaug wa ngo re- Dangug wa,- qu" wa,- Yuda kaung mae" Khangkhyi ngad: ra" qi" qhang: ra" Davi myid:zo: yaug wa aung doe; pye' ava". Yao: wa ai: dazid nhad' lam: re qhid' pye' mung: mug sug' dang: re qo" phung" ra"- ga: ta" ra". 6 Ai: thao- Yao Nau" wa daui: na: ra" gug'nyhug' byid dau: we' lau:de, qeyang lhang" gam" to" ra" tao" khau" agaung: mae ye; jo; rure ngo myao: ra". Ai: Yao Nau" wa se' pye' qhug' va" ru we' dau: ra". Ai: Yao Nau" mae khyug nhad' khe' yaug mung:- myo,jid' nhad' jid' de; ra". Ai: myo,jid' nhad' jid' wa myidgaung geim" khyo jao: sho' nhao: ke' ra" Mao"So: byo nhad' yaug ngad: ako". 7 Yao Nau" wa ye: mung: tao" khau" dao mae zaung: jo; ra" yaug: lo,yo lo, mae" mug sug' dang: re yu: yu: ra". Yao: airu: yu: yu: ra" au:- daui: na: ra" gug'nyhug' byid dau: we' lau: de, shid' xe: byid yaug wa ai: Yao Nau" qhid' kheim: mae goe; gyo" ako". 8 Yao: bam yaug khao: ngo" wa tang: nge, sho' we' Mao"So: byu qenho: akyu" mho' thoe ngad: ra" sheim nae pyo" ra" ja: byang" sho' bo: ra" qhang ban jarung: nge, sho' ci: ako". 9 Yao: bam wa Nao wa- mugsug' dang: re yu mung:- Ai: dazid jham re qhid' pye' yang: phung" nae" man: qi" ra" yaug ngad: ra". Pe"mung:ga" re nao wa se' pye' qhug' mung:- ni" shid kham: byid' ra" khyo" yang mung"dan: khao: ngo" mae" myan" cao jab jhau: ra" byumyu" alhab' mae" byu jham re Mao"So: qhid' mae" vai: yu: ra". 10 Nao wa yao: bam re ngonhaung" nho: Mao"So re caung da" byid: nae" mung"dan: nho: khinjaung jham kad' nhao: ra". Amung: yao: bam wa myid gaung re eib: li" genae"- ga: nghaui" caung: ako". 11 Ngo dam: qu" ke' re- mug: lagyo: jham: thoe re the' gyo"- yao: bam wa matho' nghe' losho' ajham ataung ngad: ako". Yao: bam wa ai: tao" khau: lhang" gam: mae re:- daui: na: ra" gug'nyhug' byid dau" nho: lhang" gam: mae re:- lau: de, qe: lhang" gam: mae re:- ye; jo, mung: thoe qi: we'- 12 Se' pye' qhug' ra" Yao Nau" wa phung qam: so'- sudgan zai yo pha,jhi" qam: o:- nga:- phungbao we' khin" byid' rure khae: yu man: qi" ra" yaug ngad: ra" wo"- ga: nghaui"caung: ako". 13 Amung: mug:gaung dao- myidgaung dao- mug:myid o mae" panglai: khug mae- mug: we' myid gyo: mae daui: na: ra" ja: alhab' wa tao" khau" mae zaung: jo; ra" yaug we' Yao Nau" wa apyad ato khonhae" re: caung:khin" ru- nga: yhe' ru- phungbao qam: so' bo: jo, vashao: ga:- Nghaui"caung: na ko" ra" thoe re ngo the' gyo". 14 Ai: daui: na: ra" gug'nyhug' byid dau: wa A men" ga: phaug' tau" ako". Amung: lau: de, qere: goe; gyo" yang: caung:pa" ako". 1 Ai: thao Yao nau" wa dazid nhad' lam: mae" sao qhid' lam: re phung" rure ngo myao:- daui: na: ra" gug'nyhug' byid dau: mae" dadau: wa mug: gyug: gyug: thoe we' dau: ra" thoe qi: we' Lo ri:- ga: ta" ra" thoe re ngo the' gyo". 2 Ngo qu" ke' re myao: phyu dadau: re ngo myao:- ai: dao mae jui: yaug wa lo, la: daphau: ci mung:- yao: wa ba maug: qo" zhaung" ci: ra". Yao: wa aung doe; yaug ru:- aung doe; nae" thug' lo" ra". 3 Ai: thao Yao Nau" wa dazid shid' lam: ein: lam: re phung" ke' ra". Daui: na: ra" gug'nyhug' shid' dau: ein: dau: wa Lo ri:- ga: ta" ra" thoe re ngo the' gyo". 4 Ailao" gatau myao: ne dadau: thug' li" ra". Byu dayaug we' dayaug jho" se' genae" qhid' mae" ai: dao mae jui: ra" yaug re myid gaung dao mae gye khe' poe boe" nhao nae" qhid' mae" qam: so' byid' to" ra". Yao" lo, mae shae zang dakhyae: byid' to: qhug' ra". 5 Ai: thao Yao Nau" wa dazid sam lam: ein: lam: phung" ke' ra". Daui: na: ra" gug'nyhug' sam dau: ein: dau: wa Lo ri:- ga: ta" rure ngo the' gyo". Ngo qu" ke' re myao: ne dadau: na: rure myao:- aimae jui" ra" yaug wa yao" lo, mae jao dalam: ci: ra". 6 Daui: na: ra" gug'nyhug' byid dau: mae" thug' li" ra" thoe we' dau: ra" thoe dathoe re ngo the' gyo". Ai: thoe wa jung: gaug cin dakhug' re daba: okaung phug' ngad mung:- saung so cin sam khug' re daba: okaung phug' ngad: ra". Ngadqere: zhanlun gae jham re we' sabyi khyae jham re wa dazai" qheim" ge,- ga: ta" ra". 7 Ai: thao Yao Nau" wa dazid byid lam: ein: lam: re phung" ke' ra". Daui: na: ra" gug'nyhug' byid dau: ein: dau: wa Lo ri:- ga: ta" ra" thoe re ngo the' gyo". 8 Ngo qu" ke' re myao: ama" dadau: na: rure ngo myao:- aimae jui" ra" yaug re Shid Zug: Pho"- ga: mhang" byid' to" ra". Movo: mug: wa yao" thao mae te' te' za: cao" na: ra". Myidgaung byid bam mae" dabam gu: re gye khyo"- bao" khug' khyo"- no phyo: khyo"- gug'nyhug' lhe: jham khyo" yang se' tam" pye' nae" ra" kheim: so' yao: bam qo" yu: to" ako". 9 Ai: thao- Yao Nau" wa dazid ngo" lam: ein: lam: phung" ke' ra". Yao: bam Mao"So: mungdao: re ta" hau: yang:- kyid kyid za: sagse: kham ko" ruyang se' pye' qhug' ko" ra" mo; nho: alo zo: jham wa phan gyid' mae na: bam ko" rure ngo myao: 10 Yao: bam wa thoe qi: we'- Gyang" lho" dangman" ru we' qam: so' bo: thao" ra" Asang we"- Ngonhaung" re se' ra" qhid' mae" myidgaung byu qere qobo dae byid: nae" dao: makho' lo:- khomyhao" joe" sho' na nae" i? ga: zag: hug' ako". 11 Yao: bam yaug khao: ngo" re bau: qhang phyu dakhye' khye' vhe' to: byid: mung:- yao: bam re" ru: se' pye' qhug' genae" ra" yao: bam: mau" vin cao: qe we' Khristan mao: nhaung: qe: aso: byang" ra" ayo, joe" sho' dazab zo: nhag' lam: qhang yang:- na genae" qhid' mae" ta" to" ra". 12 Amung: Yao Nau" wa dazid khyaug' lam: ein: lam: re phung" ke' rure ngo myao:- Ailao" myid lab: xo sho' lab: li" mung: ba wa pin: no, we' dakhyo: no; lo" byaug: ra". Amung: lho" mo" wa sa: we' dakhyo: ne: lo" byaug: ra". 13 Kyi jham wa thin: ra" la qam" yang agae lodeim" lhaui: mung:- pho'ham" shi: akyid shu: gyo" lo" ko" ru we' dakhyo:- myidgaung khyo byid: gyo" lo" byaug: ako". 14 Mug:gaung wa mugsug' dang: we' dakhyo:- dang" lam: mung:- byaug: lo" byaug: ra". Amung: bam khao: ngo" we' gagyo: kao" jham wa yao: yao" jo, qo mae" qui" lo" byaug: ako". 15 Ailao" myidgaung dao mae" kho:kham qe- zug: qe- jo,nho" qo" mo,- phung qam: so' bo mo, we' gatau: byu qe- jeim we' jeim mangad: mo, wa laug khyaung jham mae re:- bam mae" laug byo, jham mae yao: bam phao: vho' ako". 16 Yao: bam wa bam jham we' laung: mo" baui jham re- ngonhaung" dao mae bad: gyo" gela,- Tao" khau" dao mae zaung: jo; ra" yaug; myo; yang mamyao nae" we' Yao Nau" nho: nhag' yo" ru mazao" nae" qhid' mae" ngonhaung" re nyham" to: byid: gela, wo". 17 Yao: shid' yaug: nho: qu" gyaug qu" lhaung sho' nhag' yo" ra" ba na wa ana" ngad: ava"- aire khag' qo" thaug' ngag nae" i?- ga: hug' yao: ako". 1 Ai: thao re mug: lagyo: byid yaug wa myid gaung byid khyug mae ye; jo, yang:- myid gaung dao mae re:- panglai: mae re:- sag' gae mae re:- la mahug' zao" nae" qhid' mae" byid khyug mae" la re taung" ci: rure ngo myao:. 2 Amung: kao so' daui: na: ra" Mao"So: dazid ci: ra" mug: lagyo: gatau dayaug ba thug' shad' mae" do, lo: rure ngo myao:. Yao: wa thoe qi: we' Mao"So: yang myid gaung we' panglai: re phyo' qheim" pye' nae" qam: so' byid' to" ra" mug: lagyo: byid yaug re hug' ta" ra". 3 Ai: mug: lagyo: wa Ngonhaung" pho" Mao"So: daui daui mo; nho: nga: lao: re ai: dazid: yang ngonhaung" madeim" te' te' wa myid gaung rere:- panglai: rere:- sag' gae rere:- pe" dae date' ge,- ga: ta" ra". 4 Yao: bam: nga: lao: mae Mao"So: dazid deim" te' qhug' ra" mo, wa 144,000 yaug ngad: ako"- ga: nghe' thoe ngo the' gyo". Yao: bam wa Israel amyu" daxe: shid' kaung qe ngad: ako". 5 Yao: bam wa Yuda amyu" daxe: shid' kaung ngad ko" ra"- Yuda- Rubin- Gad- Ashe- Nabhtali- Manashe- Simon- Levi- Isakha- Zebulun- Yoseb- Benyamin- kaung jham mae" ngad gemung:- dakaung mae" datug: shid' taung yaug ngad: ako". 9 Ai: thao ngo qu" ke' re khag' re: maqo" nghe' ra" byu phung: mo" zang re ngo myao:. Mung"dan: khao: ngo" mae" myan" cao jab jhau: ra" byumyu" cao jab mae" ngad gemung:- yao: bam wa bau: qhang phyu ve; ci yang: yao: bam: lo, mae laso' kyao jham ci mung: tao" khau" we' ai: Yao Nau" qhid' au: mae ye; jo; ako". 10 Yao: bam wa Khyad' yu: ru wa- tao" khau" mae zaung: jo; ra" ngonhaung" Mao"So mae" we' ai: Yao Nau" mae" joe" li" ra" wo"- ga: thoe qi: we' hug' ta" ako". 11 Mug: lagyo: qe alhab' wa tao" khau" rere:- lau: de, qere re:- ai: daui: na: ra" gug'nyhug' byid dau: rere: lhang" gam" to: yang: ye; jo; ako". Ai: thao yao: bam wa tao" khau" qhid' au: mae yao: bam yao" myo,khung: re goe; gyo" mung:- 12 Mao"So re goe; pa" yang: ��A men�� caung:khin" ru- phungbao pha,jhi" jeju caung" ru- nga:- phung qam: so' we' qam: o: wa apyad ato khonhae" re: ngonhaung" Mao"So mae bo: jo, vashao: wo"- A men- ga: ta" ako". 13 Lau: de, qemae" dayaug wa ai: bau: qhang phyu ve; ra" mo, wa khag' bam ngad mung:- khai: mae" joe" li" mo, ngad: ako" i?- ga: ngo re myid' ra". 14 Asang we" Ngo maba- Asang wa ba: ra" ein: ngo phaug' tau:- Alao" yao: wa ai: byu jham wa- qu" gyaug qu" lhaung sho' ra" yhin" rure lai: phyid' lo: ra" mo, ngad: ako". Yao: bam wa yao: bam: bau: qhang jham re Yao Nau" sa" yang phyu sho' zab: cid' yu vako" ra" mo, ngad: ako". 15 Airumung:- yao: bam wa Mao"So: tao" khau" qhid' au: mae ye; jo, yang:- yao" yham mo" mae myi" re: na" re: yao: re caung da" byid' na: ako". Ai: tao" khau" mae zaung: jo; ra" yaug wa yao: bam we' daga" na mung:- gug: gam byid' li" nae". 16 Yao: bam wa khonhae" re: vae: moe, qid madam: shab' lo: genae". Ba lo; we' laung: ra" pe" ja" yang re: yao: bam re manga" laung lo nae". 17 Pe"mung:ga"re ai: tao" khau" agaung: mae na: ra" Yao Nau" wa yao: bam: yao zam: yaug ngad: li" nae". Amung:- yao: wa kao so' byid' ra" qid thug' khyo yao: bam re jhui" au: she: ye" li" nae" ngad: ra". Amung: Mao"So wa yao: bam: myo, mae" ngug byid alhab' re sad' pye' byid' li" nae"- ga: ta" ra". 1 Yao Nau" wa ai: dazid nhad' lam: re phung" ke' lao"- mug:gaung dao mae yo,qug agaung: daqi" ko cae: tae" lo" byaug: ra". 2 Ai: thao Mao"So: qhid' kheim: mae ye; jo, ko" ra" mug: lagyo: nhad' yaug re ngo myao:. Yao: bam re labo" nhad' lam: byid' to" ra". 3 Sheim nae pyo" ra" ja: phad' ngha" ra" qhang khug' ci: ra" mug: lagyo: gatau dayaug phan nhae mae li" ye; jo; ra". Tao" khau" qhid' kheim: mae ye; jo; ra" qhang phan dao mae Mao"So: byu qe alhab' mo; akyu" mho' thoe we' daga" ngaui" byid: nae" sheim nae pyo" ra" ja:- myo: sho' yao: re byid' to" ra". 4 Mao"So: qhid' kheim: mae ye; jo; ra" mug: lagyo" nho: lo, mae" ai: sheim nae pyo" ra" ja: nga" ra" myikhug' wa Mao"So: byu qe: akyu" mho' thoe we' daga" do, lo" ra". 5 Ai: thao re mug: lagyo: wa ai: sheim nae pyo" ra" ja: ngha" ra" khug' re yu: yu mung:- aire phan dao mae" myi: ke' pyang" yang: myid gaung khyo pye' khyo" ke' ra". Ailao" mug: dam: dam: thoe- mug: gyug: gyug: thoe we' daga" lhe' cad' cad' mung: myid lab: lab' li" ra". 6 Ai: thao re mug: lagyo: nhad' yaug wa labo" nhad' lam: re ci yang: mad nae" seim" na: ako". 7 Mug: lagyo: sao qhid' yaug wa yao" labo" re mad: ke' ra". Ailao"- sa: we' lhag' to" ra" myi: we' lag qu jham myid gaung khyo qu: gyo" lo" ako". Myid gaung sam bam mae" dabam- sag' gae sam bam mae" dabam we' mhin: nyug alhab' nga" lo" byaug: ra". 8 Ai: thao mug: lagyo: shid' yaug ein: yaug wa yao" labo" re mad: ke' ra". Ailao" myi: nga" na: ra" bam qi: zang we' dau: ru daja: panglai: khyo gyo" lo" ra". Pang:lai: qid sam bam mae" dabam wa sa: boe" lo" mung:- 9 panglai: mae daui: na: ra" ja: cao jab sam bam mae" dabam shid: lo" ru we' qid sang pho sam bam mae" dabam wa byo; qeim: lo" byaug: ako". 10 Ai: thao mug: lagyo: sam yaug ein: yaug wa yao" labo" re mad: ke' ra". Ailao" myidam we' dakhyo:- myishae de; ra" kyi qi: dace' wa mug:gaung mae" byid: gyo" lo" mung:- qid gyaung: sam bam mae" dabam mae we' qid thug' jham mae gyo" lo" ra". 11 (Ai: kyi mang wa akho: ga" ru ngad: ra") Qid sam bam mae" dabam wa kho" lo" byaug mung: ai: qid kho: shaug' ra"- mo,byu myo: sho' shid: lo" ako". 12 Ai: thao mug: lagyo: byid yaug ein: yaug wa yao" labo" re mad: ke' ra". Ailao" ba sam bam mae" dabam- lho" sam bam mae" dabam- kyi sam bam mae" dabam wa byo; qeim: lo" mung:- yao: bam bao: ra" bo" bao sam bam mae" dabam sham: lo" yang: na" sam bam mae" dabam we' myi" sam bam mae" dabam gyo: mae bo" bao majo, ngad: ra". 13 Ai: thao ngo qu" ke' re zeim baung: dadau: wa gyai myhao: ra" mug: le; phyo: mae dao" qin" mung:- thoe qi: we' ai: mug: lagyo: gatau sam yaug mad genae" ra" labo" jham: thoe thug' li" lao"- Byuxa: vaqoe,- Byuxa: vaqoe,- myid gaung dao mae na: ra" mo; qhid' mae" byuxa: vaqoe, ngad: li" nae" wo"- ga" ra" thoe qi: re ngo the' gyo". 1 Ai: thao re mug: lagyo: ngo" yaug ein: yaug wa yao" labo" re mad: ke' ra". Ailao"- kyi dace' myid gaung dao khyo byid: gyo" lo" rure ngo myao:. Ai: kyi re dung: khung: no, kham: thug' byid: to: byid' ra". 2 Ai: kyi wa dung: khung: no, re phung" ke' ra". Ai mae" myikhug' thaui: wa myikhyeim" mo" zang mae" myikhug' thaui: we' dakhyo: thug' li" ra". Ai: dung: khung: no, mae" thug' li" ra" myikhug' thaui" yang ba we' mug: le; phyo: wa cad' no; lo" byaug: ra". 3 Ai: myikhug' thaui: mae" khyag' phaung" jham thug' li" mung:- myid gaung khyo gyo" lo" ako". Ai: khyag' phaung" jham re gung gug' jham qo" ra" daug, qam: byid' to" ra". 4 Mhin:- sag'gae jham we' pe" agae jham rere: dae mate' genae" qhid' mae" yao: bam re ta" to" ra". Yao: bam: nga: lao: mae Mao"So: dazid madae; ra" byu qere za: dae te' nae" yao: bam re ta" to" ra". 5 Khyag' phaung" jham wa ai: byu qere se' pye' nae" akhang" maqo" ko" ngad: ra". Lho" ngo" khye' yhin" nae" akhang" za: qo" ako". Ai: yhin" ruyang khai" no nhao: ru wa gung gug' yang pe' yang: khai" no: ru we' dau: ra". 6 Ai: lho" ngo" khye' gyo: mae yao: bam wa shid khyo qho: li" genae". Ngadqere: maqhug' genae". Yao: bam wa shid nug: li" genae". Ngadqere: shid zug: wa yao: bam mae" phao: byaug: li" nae". 7 Khyag' phaung" jham wa gye khe' nae" jin" jin" ngad: ra" myao: jham we' dau: ako". Yao: bam: au: mae qhang ba maug: ru" ru zhaung" ci: ako". Yao: bam: myo,khung: jham wa byu: myo,khung: jham we' dau: ako". 8 Yao: bam: xae wa myiqe: qe: xae we' dau mung:- yao: bam: zaui jham wa khang khyi zaui jham we' dau: ako". 9 Yao: bam: qao gao jham wa jo,to' qao nghoe' nghoe' ci: ru we' dau: ako". Amung: yao: bam: daung dao" myhang" thoe wa gye khe' poe khyo myao: myo: sho' dau" yang myao: lhin" re she: tao" ye" lo" ra" thoe we' dau: ra". 10 Yao: bam wa gung gug' jham we' dakhyo:- shomyi: mae nyhan: de; ako". Amung: yao: bam: shomyi: wa byu qere lho" ngo" khye' no nhao nae" daug qam: bo: ako". 11 Yao: bam re eib: ra" kho:kham wa ai: dung: khung: no, re eib: ra" mug: lagyo: ngad: ra". Yao" mang re Hebre myan" khyo" Abaddon ga: mhang" mung: Greeg myan" khyo" wa Apolion ga: mhang" ako". (Lajheim: wa Phyo' Pye' Yaug ga" ru ngad: ra".) 12 Sao qhid' mae" byuxa: vaqoe, wa lai: lo" va" ra". Thao mae joe" lo nae" byuxa: vaqoe, shid' lam: jo, shi" ra". 13 Ai: thao mug: lagyo: khyaug' yaug ein: yaug wa yao" labo" re mad: ke' ra". Ailao" Mao"So: qhid' kheim: mae ye; jo; ra" qhang phan byid khyug mae" thug' li" ra" thoe dathoe re ngo the' gyo". 14 Ai:thoe wa mug: lagyo: khyaug' yaug ein: yaug re Uphrad qid gyaung: nhae mae taui" to" ra" mug: lagyo: byid yaug re pheim: ke' wa,- ga: ta" ra". 15 Mug: lagyo: byid yaug wa pheim: ke' ru qhug' ako". Pe"mung:ga" re yao: bam wa ce: zin na lho" khye'- ba na - yo,qug mae yao: xao su byu sam bam mae" dabam re se' pye' nae" qhid' mae" jin" jin" jaung: to: qhug' mo, ngad: ako". 16 Myao: jui: gyezo: qe wa tig shid' yo ngad: ga: nghe' thoe re ngo the' gyo". 17 Amung: ngo wa qhu"lho mae myao: jham re we' myao: jui: mo, re ngo the' myao:. Yao: bam wa myi: we' dakhyo: ne: ra" qao nghoe' Nila anyhug we' dakhyo: dau: ra" qao nghoe'- vhang we' dakhyo: dau: ra" mhin cao: nyug qao nghoe' jham re nghoe' ci: ako". Myao: jham: au: wa khang khyi au: we' dau mung:- yao: bam: nhad' mae" myishae myikhug'- vhang jham thug' li" ako". 18 Xao su byu sam bam mae" dabam wa ai: myao: jham: nhad' mae" thug' li" ra" myishae- myikhug we' vhang myicid'- ce: qam" sam lam" yang se' pye' qhug' ako". 19 Pe"mung:ga" re myao: jham: nho: qam: so' wa yao: bam: nhad' mae we' shomyi: mae bo: ako". Yao: bam: shomyi: jham wa lhao maui we' dau mung:- au: jham de, yang: byu qere ai: yang dae te' ako". 20 Ai: qam" jham: yang mazao" lo: dang: na: ra" byu alhab' mo, wa yao: bam yao: kad' ra" lo, mau" mae" myid matha" ko" ngad: ra". Yao: bam wa min: yui rere:- myo, mamyao no: magyo: maqo" su" ra" qhang- ngaui- gyid: ne- laug baui we' sag' yang kad' ra" sulho jham re goe; pa" rure mathang: pye' ko" ngad: ra". 21 Byu se' ru- vha" ru- yao: bam: gaung sho: shab' ra" gintho' mau" zo"- su: zai khug' ra" lo, mau" mae" re: myid matha" lo gengad: ra". 1 Ai: thao qam: bo: thao" ra" mug: lagyo: gatau dayaug mug:gaung mae" gyo" li" rure ngo myao:- yao: wa jham thaui" yang- yang" ci mung: yao" au: mae sang yhao lhang" kham" to" ra". Yao" myo,khung: wa ba we' dau mung:- Yao" khyid wa myi: zang baung: we' dau: ra". 2 Yao" lo, mae mug sug' dang: ngai dalam: phung" ci: ra"- Yao" lo,yo khyid wa panglai: dao mae zab: ci: ra". 3 Amung: khang khyi jham myang: ra" thoe we' dau: ra" thoe qi: we' hug' ke' ra". Yao: airu: hug' ke' thao re mug: gyug: thoe nhad' lhang myang: thug' li" ako". 4 Yao: bam jhau: thug' li" we' ngo wa tung" nae" seim" ra". Ngadqere: mug:gaung mae" thoe dathoe wa datung". Ai: mug: gyug: thoe nhad' lhang jhau thoe re zug' to: wa,- ga: jhau: thug' li" rure ngo the' gyo". 5 Ai: thoe re panglai: dao mae we' myid gaung dao mae zab yang: ye; jo; ra" mug: lagyo wa yao" lo,yo lo, re mug:gaung khyo to' ke' mung:- 6 mug:gaung- myidgaung- panglai: re we' ai jham: dao mae jo; ra"- na: ra" ja: alhab' re phan" to: yaug ngad mung:- apyad ato khonhae" re: daui: na: ra" Mao"So: mang re lao: yang: jham tang" ra". Ai: mug: lagyo: wa myao" lo nae" mangad:- 7 mug: lagyo: nhad' yaug ein: yaug yao" labo" re mad: ke' lao"- Mao"So wa yao" daui daui mo, ngad: ra" lapa qere ta" lo: ru we' dakhyo: yao" nho: no; thao" ra" myid: yaung: to" ra" khyo re zaui" pin" li" nae"- ga: ta" ra". 8 Ai: thao- mug:gaung mae" ngo the' gyo" qu" ra" jhau thoe wa Pang:lai:: dao mae we' myid gaung dao mae na yang: ye; jo; ra" mug: lagyo" lo, mae phung" ci: ra" mugsug' dang: ngai re yeyu: yu wa,- ga: ngo re dam: ta" ra". 9 Ai: thao ngo wa mug: lagyo: jhao" ye: mung:- ai: mugsug' dang: ngai ngo re byid: nae" qhid' mae" yao: re yemho'. Mug: lagyo: wa Aire yu: yu yang: zo" pye' wa,- ai: mugsug' dang: ngai wa ni" vae: dug; mae wa jhin: li" nae"- Ngadqere: nhad' mae wa byoyhid we' dakhyo: cug: li" nae"- ga: ta" ra". 10 Ngo wa ai: mugsug' dang: ngai re yao" lo, mae" yu: yu yang: zo" ke' va". Ai wa nga" nhad' mae byoyhid we' dakhyo: cug: ra". Ngad qere: aire myug: ke' thao nga" vae: dug: mae wa jhin: byaug: ra". 11 Ai: thao- mug: lagyo: wa nao wa Mao"So: mung dao: khyo re mung"dan: myo: sho'- myan" cao jab jhau: ra" byumyu" alhab' re we' kho:kham qe we' sin" ra" Mao"So: mungdao: re dalhang dam: ta" hau" kyo: ca" ra"- ga: ta" ra". 1 Ai: thao- qu" re ka" rumae ci: ra" gyang: yao: we' dau: ra" gyang: yao: dayao: ngo re byid: mung: caung:pa" yham we' phan re yeka" wa,- amung: caung:pa" yham mae caung:pa" ra" mo, re yenghe' wa,- 2 Ngadqere: ai: Caung:pa" Yham taung gaung shad' vang" mae wa daka" wa,- Pe"mung:ga"re ai re wa Mao"So re malam ko" ra" mo, re byid: to: va" ru ngad mung:- yao: bam wa gyang" lho" vomo" re lho" mo" byid xe: shid' khye' lam: lam: zab: nhae" pye' li" genae". 3 Jid: mo" bau: ve; ra" nga" sagse: shid' yaug ngo nhao: ke' nae". Yao: shid' zo: wa ba na 1,260 gyo: mae Mao"So: mung dao: re ta" hau" kyo" li" genae"- ga: ngo re ta" ra". 4 Ai: sagse: shid' yaug wa myid gaung: nho: Asang: qhid' kheim: mae ye; jo, ko" ra" zhanlun shid' gae we' myikaug' shid' lam: ngad: ako". 5 Yao: shid' zo: re dae te' nae" qam: ke' yaug khag' ngad qere: yao: shid' zo" nhad' mae" myishae thug' li" mung:- yao: shid' zo" gyevo qere ngha" pye' li" genae". Yao: shid' zo: re dae te' nae" qam: ke' ra" yaug khag' ngad qere: ce: khyo" se' pye' ru qhug' li" genae". 6 Yao: shid' zo: Mao"So: mungdao: ta" hau" kyo" ra" yo, khyin: gyo: mae mug: maqu nae" qhid' mae" mug:gaung re pyid' pye' nae" kheim: so' yao: shid' yaug qo" ako". Yao: shid' yaug wa qid thug' qid jham re sa: boe" lo" nhao: ra" kheim: so' rere:- yao: shid' yaug nug: ra" au: myidgaung re qam" aja: ja: gyo" nhao nae" kheim: so' re:- yao: shid' yaug qo" ako". 7 Yao: shid' yaug: nho: mungdao: ta" hau" kyo" ra" mau" bin gelao"- ai: dung: khung: no, mae" thug' li" ra" gug'nyhug' lhe: wa yao: shid' yaug re gye kad' li" nae". Ai: gug'nyhug' lhe: wa yao: shid' yaug re aung: pye' ru we' yao: shid' yaug re se' pye' mung:- 8 yao: shid' yaug: mao gaung wa yao: shid' yaug: nho: Asang re pyao: zang dao mae jin" se' pye' ra" vomo" mae" hau" mo" khyodang mae lang" jo; li" genae". Ave, aso: khyo" ai: vomo" mang wa Sodom mangad: lao"- Egutu ngad: ra". 9 Mung"dan: khao: ngo" mae" myan" cao jab jhau: ra" byumyu" alhab' wa yao: shid' yaug: mao gaung re sam ba: dakhyug' li" qu" li" genae". Amung: yao: shid' yaug: mao gaung re nyhab' shaung: pye' nae" akhang" mabyid' li" genae". 10 Myid gaung byu qe wa ai shid' yaug shid: ruyang ngaui bau" li" genae". Yao: bam wa poe kad' yang: yao: bam yao: cao: jhaung qhu" jho" byid' li" genae". Pe"mung:ga"re ai: lapa shid' yaug wa xao su byu qere qug: khai: qug: khai: myo: sho' boe" nhao geyang: ngad: ra". 11 Sam ba: dakhyug' thao re Mao"So mae" kao so' wa yao: shid' yaug: khug khyo joe" vao li" mung:- to" ye; li" ako". Yao: shid' yaug re myao: ra" mo, alhab' wa gyaug: din: pye' ako". 12 Ai: thao- ai: lapa shid' yaug wa cekhyo do, lo geri:- ga: mug:gaung mae" thoe qi: we' yao: shid' yaug re ta" rure the' gyo" ako". Yao: shid' yaug: nho: gyevo qe lhaug' qu" na shiko" au: yao:- yao: shid' yaug wa jham thaui: khug mae mug:gaung khyo do, lo" ako". 13 Ai: au: reyao: gyai thin sho' myid lab: lab' li" ra". Vomo" nho: daxe bam mae" dabam wa byo; qeim: lo" gemung:- byu nhad' taung se' pye' qhug' ako". Dang: ra" mo, wa gyaug: din: pye' geyang: mug:gaung mae" Mao"So: qi" qhang: rure caung:khin" byid' ako". 14 Byuxa: vaqoe, shid' lam: ein: lam: wa thao" lo" byaug va". Ngadqere: byuxa: voqoe, sam lam: ein: lam wa mamyao" re joe" li" li" nae" ngad: ra". 15 Ai: thao re mug: lagyo: nhad' yaug ein: yaug wa yao" labo" re mad: ke' ra". Mug:gaung dao mae thoe qi: we' Ana"- mug:myid re eib nae" phung qam: so' wa naonhaung" we' yao" Meshia nho: lo, khug mae ngad mung: yao: wa apyad ato khonhae" re: eib: na: li" nae"- ga: ta" ra". 16 Ai: thao Mao"So: qhid' kheim: mae yao: bam yao" tao" khau" mae zaung: jo, ko" ra" lau: de, shid' xe: byid yaug wa goe; gyo" mung: Mao"So re goe; pa" zo" re"- 17 Ana" pyad- lai: lo: ra" pyad mae na: jo; ra" qam: bo: thao" ra" Asang Mao"So we"- Nao wa qi" qhang: ra" phung qam: so' re ci yang:- eib: na va" ruyang ngonhaung" wa Mao"So re jeju caung:khin" ra". 18 Mao"So re malam: ra" mo, wa nhag' yo" ako". Pe"mung:ga"re ni" nhag' yo" ra" yo, khyin: joe" li" mung:- shid: ra" mo, re dao: kho' ra" yo,khyin: joe" li" ru we' ni" daui daui mo, ngad: ra" lapa qe- ni" byu qe alhab' we' nao re caung:pa" ra" mo, aqi: angai alhab' mo, re aphug' jhaung qhu" byid: nae" yo,khyin: joe" li" ava". Myid gaung re phyo' pye' ra" mo, re phyo' pye' nae" yo,khyin: joe" li"ava" wo"- ga: ta" ako". 19 Mug:gaung dao mae" caung:pa" yham wa bung" jo, mung:- ai: khug mae" dao: thang" ban" re the' myao: ra". Ai: thao lhe' cad' cad' mung:- mug: gyug: thoe we' daga" myid lab: lab' li" yang: lag qu myo: sho' gyo" li" ra". 1 Ai: thao- mug:gaung mae mug' pho: aqi: dalam: myao: thug' li" ra". Myiqe: dayaug wa ba re ve; ci mung:- lho" dao mae yao" khyid zab: ci yang: yao" au: mae kyi daxe: shid' ce' de; ra" ba maug: zhaung" ci: ra". 2 Yao: wa zo: khau nae" za: ngad mung: zo:khau no no yang: gyi: ngug: na: ra". 3 Mug:gaung mae gatau mug' pho: dalam: dam: myao: thug' li" ra". Au: nhad' au: khyug daxe khe' de; ra" mao jaung: ne aqi: dadau: wa yao" au: jham mae ba maug: nge, sho' zhaung" ci: ra". 4 Mug:gaung mae" kyi sam bam mae" dabam re yao" shomyi" yang she: khyad' yu mung:- aijham re myid gaung khyo pye' khyo" ke' ra". Zonau" khau: ke' we' yao" zonau" re zo" pye' nae" qhid' mae" ai: mao jaung: wa myiqe: myhi" qhid' au: mae ye; jo; ra". 5 Ai: thao- myiqe: myhi" wa byumyu" alhab' re jo, to' zaung: bao" yang eib nae" qhid' mae" yauggai zo: dayaug re khau: ke' ra". Ngadqere: ai: zonau" wa Mao"So we' yao" tao" khau" khyo lao" thin: lhad' jhui" yu: lo" ru qhug' ra". 6 Myiqe: myhi" wa yao" qhid' mae" Mao"So jaung: to: byid' ra" jo, qo din"pyad' yo khyo phao: ye" lo" ra". Ai: jo, qo mae yao: wa ba na 1,260 geim" gun caung byid' ru qhug' ra". 7 Ai: thao mug:gaung mae gye khe' poe boe" thug' li" ra". Mikhae we' yao" mug: lagyo: qe wa ai: mao jaung: we' gye jho" khe' ako". 8 Ngadqere: mao jaung: wa seim" byaug: ra". Amung: yao: we' yao" mug: lagyo: qe wa mug:gaung mae na: jo, nae" akhang" maqo" loko" ngad: ra". 9 Mug:myid geim" re mhug' pyag' yaug Min:yui mangad: lao"- Satan ga: mang: ra" ganhae" mae" lhao maui- mao jaung: qi: wa khe' thug' pye' ru qhug' ra". Yao: wa yao" mug: lagyo: qe alhab' mo, we' daga" myid gaung khyo pye' khyo" pye' ru qhug' ako". 10 Ai: thao- mug:gaung dao mae thoe qi: dathoe wa- Ana" Mao"So: khyad' yu: ru joe" li" ava". Mao"So wa kho:kham khyo" yao" phung qam: so' re qhu" byid' ava". Ana"- yao" Meshia wa yao" nho: kheim: so' re qhu" byid' ava". Pe" mung:ga" re ngonhaung" Mao"So: qhid' kheim: mae ye; jo, yang:- lam khug: ra" mo, re myi" re: na" re: qobo zhaug' na: ra" yaug wa mug:gaung: mung"dan: mae" khe' thug' pye' ru qhug' ava". 11 Yao: bam wa Yao Nau" nho: sa" yang re:- yao: bam ta" hau" ra" dangman" ra" khyo" yang re:- yao: re aung: pye' avako". Yao: bam wa shid sho' yao: bam yao" kao so' re byid' pye' nug: ako". 12 Airumung: mug:gaung: mung"dan: we' aimae na: ra" mo, alhab' we"- Ngaui bau: ge,- Ngadqere: myid gaung we' panglai: qhid' mae" wa byuxa: vaqoe, ngad: ra". Pe"mung:ga" re Min:yui wa yao" ayo, dajhid' za: dang lo" rure yao: ba: ruyang nhag' gyai yo" ru we' ni" shid' yaug jhao" joe" li" va"- ga: ta" na: rure ngo the' gyo". 13 Mao jaung: wa yao: re myid gaung khyo pye' khyo" pye' va" rure beim: lao"- yauggai zo: khau: ra" myiqe: myhi" re cao" khe' taung" ra". 14 Ai: myiqe: wa yao" jo, qo din"pyad' yo khyo qo" dao" ye" lo" nae" qhid' mae" zeim baung: daung shid' lam: qo" yu: ci: to" ra". Aimae mao jaung" nho: gye mae" loe; beim mung:- sam zin: dakhyae: gun caung byid' ru qhug' li" nae" ngad: ra". 15 Ai: myiqe: myung: lo" nae" qhid' mae" mao jaung: wa yao" nhad' mae" myiqe: myhi" thao khyo qid gyui gyui: thug' ke' ra". 16 Ngadqere: myid gaung wa ai: myiqe: re bao" thaug' byid' ra". Mao jaung" nho: nhad' mae" thug' li" ra" qid re myug: pye' ra". 17 Ailao"- mao jaung: wa ai: myiqe: re nhag' yo: mung:- dang: na shiko" ra" yao" myid:zo: qe ngad ko" ra" Mao"So: amyin" dao: jham re phug' cao" mung:- Yesu yang qhu" byid' ra" ai: dangman" rure jhaug' zaug za: zaui" zag: ci mo, alhab' re gye kad' nae" qhid' mae" thug' ye" lo" ra". 18 Amung: mao jaung: wa panglai: qid yae mae ye; jo; ra". 1 Ai: thao- panglai: mae" gug'nyhug' lhe: dadau: thug' li" rure ngo myao:. Ai: gug'nyhug' lhe: wa au: nhad' lam: we' khyug daxe khe' yaug mung:- khyug khe' khao: ngo" mae ba maug: zhaung" ci: ra". Amung: au: lam: khao: ngo" mae re: Mao"So re roe" ra" mang jham tung" te' to" ra". 2 Ai: gug'nyhug' lhe: wa myang kha: nin tin we' dau: ra". Khyid wa vae khyid we' dau mung:- nhad' wa khang khyi nhad' we' dau: ra". Mao jaung: wa yao: yao" phung qam: so'- yao" tao" khau"- yao" nho: qi" qhang: ra" kheim: so' ai: gug'nyhug' lhe: re ab byid' to" ra". 3 Yao" au: dalam: wa shid naeqhi" dae de' qu" va" ru: ngad qere:- ai: dae wa gai: lo" byaug: ava". Myid gaung byu qe wa mug' hao" byaug gemung:- ai: gug'nyhug' lhe: thao cao" ye" ako". 4 Mao jaung: wa yao: yao" kheim: so' re ai: gug'nyhug' lhe: re ab byid' to: va" yaug ngad: ruyang yaug khao: ngo" wa mao jaung: re goe; pa" ako". Yao: bam wa ai: gug'nyhug' lhe: rere: goe; pa" zo" re"- gug'nyhug' lhe: we' khag' dau: i?- Yao: we' gye khag' qo" kad' i?- ga: ta" ako". 5 Ai: gug'nyhug' lhe: wa Mao"So re shad' lhoe" ra"- ngad beim: phug: ra" dao: jhau nae" akhang" byid' to: byid: qhug' mung:- lho" mo" byid xe: shid' khye' qhid' mae" kheim: so' yao: re byid' to: byid' ra". 6 Yao: wa Mao"So rere:- yao" mang rere: yao" na jo, qo rere:- mug:gaung: mung"dan: mae na ko" ra" mo, alhab' rere:- nhang" ra". 7 Mao"So: byu qere gye khe' aung: pye' nae" akhang" yao: re byid' to: byid' ra". Amung: mung"dan: khao: ngo" mae" myan" cao jab jhau: ra" byumyu" alhab' re eib nae" kheim: so' re: yao: re byid' to: byid' ra". 8 Se' pye' qhug' ra" Yao nau" nho: kao so' mugsug' paug' mae mug:myid re maphan" shimae" mang tung" te' to: qhug' ra" mo, mae" je: ra" myid gaung byu qe alhab' wa yao: re goe; pa" li" genae". 9 Airumung:- naonhaung" no: de, ko" re wa gyo" yu ge,- 10 Taung" ru qhug' nae" yaug wa gai gai: yao: taung" yu qhug' li" genae". Amung: shae: yang se' pye' qhug' nae" yaug wa gai gai: yao: shae: yang se' pye' qhug' li" nae" ngad: ra". Ceru: mung: Mao"So: byu qe wa zang: qhao" ru we' lam khug: myid mae kyid kyid za: tang tang ye; jo, ca" ra". 11 Ai: thao myid gaung mae" thug' li" ra" gug'nyhug' lhe: gatau dadau: re ngo myao:- Yao: wa yao nau" khyug we' dau: ra" khyug shid' khe' yaug: ra". Yao: wa mao jaung: we' dakhyo: jhau: ra". 12 Yao: wa sao qhid' mae" gug'nyhug' lhe" nho: qi" qhang: ra" kheim:so' re ai: gug'nyhug' lhe" nho: qhid' kheim: mae ci: ra". Yao: wa myid gaung we' aimae na: ra" mo, re dae gai byid: va" ra". Sao qhid' mae" gug'nyhug' lhe: re maqad maqui" deim" zag yang: goe; pa" nhao: ra". 13 Ce: gug'nyhug' lhe: shid' dau: ein: dau: wa mug: pho: ve,lho jham kad' qhu" ra". Yaug khao: ngo" myao jao: mae mug:gaung mae" myid gaung khyo myi: gyo" li" nhao: ra". 14 Yao: wa gug'nyhug' lhe: sao qhid' dau" qhid' kheim: mae kad' qhu" nae" akhang" qo" ra" ai: mug' pho: ve, lho jham khyo" yang myid gaung dao mae" byu alhab' re mhug' pyag' yu: ra". Ai: gug'nyhug' lhe: wa shae dae de; ngad qere: daui: na shi" ra" gug'nyhug' lhe: re phug' te' nga: yhe' byid' ra" khyo"- khyao dau sulho dalam: kad' nae" qhid' mae" myid gaung byu qere ta" ra". 15 Ai: khyao dau sulho wa dao: qo" jhau nae" we' yao: re magoe; pa" ko" ra" mo, alhab' re se' pye' nae" qhid' mae" gug'nyhug' lhe: shid' dau: ein: dau: wa sao qhid' mae" gug'nyhug' lhe: khyao dau sulho khug khyo so' mad: zaui byid: nae" akhang" qo" yu: to" ra". 16 Ai: gug'nyhug' lhe: wa qi" qhang yaug we' ngai nyham yaug- jo,nho" qo" yaug we' myaung sho: yaug- jeim we' jeim mangad: yaug- byu alhab' mo, re yao: bam: lo,yo lo, mae mangad: lao"- yao: bam: nga: lao: mae axam: dazid deim" te' byid: nae" maqad maqui" deim" zag: nhao: ra". 17 Gug'nyhug' lhe" nho: mang mangad: lao"- ai: mang re vin: ra" aso: xam: dazid made; ra" yaug khag' re:- zai vai zai aung: gau pai: maqo" kad' ngad: ako". 18 Ceru qhid' mae" pha,jhi" bo qo: ra". Nyan pha,jhi" suzo: du" ra" yaug wa ai: gug'nyhug' lhe" nho: aso: lajheim: re qo" sun" yu: ra". Pe"mung: ga" re ai: aso: wa byu dayaug: nho: mang ngad: ra". Ai wa 666 ngad: ra". 1 Ai: thao- ngo qu" ke' re- Yao Nau" wa Ziun bam dao mae ye; jo; rure ngo myao:. Yao" mang we' yao: Pho" mang re yao: bam: nga: lao: mae tung" te' to" ra" byu 144,000 yaug wa yao: we' daga" na: jo; ako". 2 Qid coe: myang thoe- mug: gyug: gyug: thoe we' dau: ra" thoe dathoe mug:gaung mae" myang: thug' li" rure ngo the' gyo". Ai: thoe wa tang: be, mo; yang be; myhang" ke' ra" tang: thoe we' dau: ra". 3 Ai: byu 144,000 yaug wa tao" khau" qhid' kheim:- daui: na: ra" gug'nyhug' byid dau" qhid' kheim:- lau: de, qe: qhid' kheim: mae ye; jo; ako". Yao: bam wa yao: bam za: qo" zhao: yu: ra" nghaui" caung: asag' re caung" na: ako". Byumyu" alhab' mae" khyad' yu qhug' ra" mo, wa yao: bam za: ngad: ako". 4 Yao: bam wa myiqe: qe we' gaung sho: majho" zam" lo:- yao: bam yao" gaung re gyang" lho" sho' zang: qhao" mo, ngad gemung:- zolau: agyang" qe ngad: ako". Yao: bam wa ai: Yao Nau" khai: ye: khai: cao" lhau: ako". Yao: bam wa dang: ra" byumyu" alhab' mae" khyad' yu qhug' ra" mo, ngad mung:- Mao"So we' Yao Nau" re sao qhid' qhaug' byid: qhug' ra" mo, ngad: ako". 5 Yao: bam wa khonhae" re: mhug' dao: mata" mo,- qobo vhin khyo mabo mo, ngad: ako". 6 Ai: thao- mug: lagyo: gatau dayaug wa myid gaung mung"dan: khao: ngo" mae" myan" cao jab jhau: ra" byumyu" alhab' re ta" hau" kyo: byid: nae" apyad ato: Lau Dao: Gai re ci yang:- myhao: ra" mug: le; phyo: mae dao" lhau: rure ngo myao:. 7 Yao: wa thoe qi: we'- Mao"So re gyaug phug' mung:- yao" qi" qhang: ra" khyo re caung:khin" ge,- Pe"mung:ga"re byumyu" alhab' re dao: kho' nae" yo, khyin: joe" ava". Mug:gaung myid gaung panglai: we' qid thug' alhab' re phan" to" ra" yaug re caung:pa" ge,- ga: ta" ra". 8 Mug: lagyo: shid' yaug ein: yaug wa sao qhid' yaug: thao cao: thug' li" mung:- Qi" qhang: ra" Babelon wa byo; qeim: lo" va". Ai: vogaung: wa yao" nho: gaung sho: shab' ra" gintho' mau" ngad: ra". yao" nho: yid: ra" sabyi qang: re byu alhab' mo, re jhaug' ava"- ga: ta" ra". 9 Mug: lagyo: sam yaug ein: yaug wa sao qhid' shid' yaug: thao cao" mung:- thoe qi: we'- gug'nyhug' lhe: we' ai: nho: khyao dau sulho re caung:pa" mung:- yao" nga: lao: mae mangad: lao"- lo, mae axam: dazid re kham: yu: ra" yaug wa- 10 Mao"So: nhag' yo" ru byang" sho' vhe' zaui: to" ra" keim ngad: ra" Mao"So: nhag' yo" ra" sabyi qang: re qhug' shaug' li" nae". Ceru: kad' ra" yaug wa Gyang" Lho" mug: lagyo: qe we' Yao Nau" qhid' kheim: mae myi: we' vhang khug mae yhin" ru qhug' li" nae". 11 Aibam re yhin" ra" myi: mae" myikhug' wa apyad ato thaui" do, lo" na: ra". Ai: gug'nyhug' lhe: re we' yao" khyao dau sulho re goe; pa" mung:- yao" mang axam: dazid de; ra" mo, wa myi" re: na" re: na myan genae" mangad:- ga: ta" ra". 12 Mao"So: amyin" dao: jham re phug' cao" mo, we' Yesu re jhaug' zaug za: lam: ra" Mao"So: byu qe wa zang: qhao" ca" ra". 13 Ai: thao- mug:gaung mae" thoe qi: dathoe wa ceru re tung" to: wa,- ana" mae" thoegu: Asang: mau" mae shid: ra" mo, wa ngaui lho" ko" ra" wo"- ga: ta" ra" thoe re ngo the' gyo". Byo ta" ru wa Ngad va"- Yao: bam wa yao: bam: dug myaung: sho' zaui: so" ra" mau" zo" mae" ngaui bau: za: dugno" na: li" genae". Pe"mung:ga"re yao: bam: lo, mau" phug' wa yao: bam we' daga" ngad: ra"- ga: phaug' tau" ra". 14 Ana" ngo qu" ke' re- jham phyu dathaui: re ngo myao:. Ai: jham thaui: mae xao su byu we' dau: ru dayaug zaung: jo; ra". Yao" au: mae qhang ba maug: zhaung" ci mung:- yao" lo, mae tho' ra" lagam: zhab' ci: ra". 15 Ai: thao- mug: lagyo: gatau dayaug wa caung:pa" yham mae" thug' li" mung:- ai: jham thaui: mae zaung: jo; ra" yaug re thoe qi: we'- ni" lagam: re ci yang: gaug yad: yu wa,- Pe"mung:ga" re ayo, joe" va" ra"- myid gaung wa yad: yu nae" mhang" sheim: jo; ava"- ga: ta" ra". 16 Ailao" jham thaui: mae zaung: jo; ra" yaug wa yao" lagam: re myidgaung khyo vha: ke' mung: gaug jham re yad: yu: ra". 17 Ai: thao- mug: lagyo: gatau dayaug wa mug:gaung mae jo; ra" caung:pa" yham mae" thug' li" rure ngo myao:. Yao: re: tho' ra" lagam: dalam: ci: ra". 18 Alao"- myi: re eib: ra" mug: lagyo: gatau dayaug wa phan mae" thug' li" ra". Yao: wa ai: tho' ra" lagam: re ci: ra" mug: lagyo: re thoe qi: we'- Ni" lagam: re ci yang: myid gaung: nho: sabyi khyae mae" sabyi shi: jham re lhai" phyo' yu wa,- Pe"mung:ga"re sabyi shi: jham wa mhang" sheim: jo; ava"- ga: ta" ra". 19 Airumung:- mug: lagyo: wa yao" lagam: re myid gaung khyo vha: ke' mung:- sabyi shi: jham re xe" yu yang: Mao"So: nhag' yo" ru byang" jo; ra" sabyi nao: jao: khyo pye' zaui: ke' ra". 20 sabyi shi: jham re vomo" taung gaung shad' mae" sabyi nao: jao: mae nao: mung:- ai: sabyi nao: jao: mae" sa: qid yug: thug' li" ru wa qhang phyao: khyoman: shid' xe yo man:- no, phyao: daye, ko no; ra". 1 Ai: thao ngo wa mug:gaung mae gyai qi" qhang: ru we' mug' pho: myao jao: gatau dalam: the' myao:- aimae lo" thao" mae" qam" ngad: ra" qam" nhad' lam: re boe" nhao: ra" mug: lagyo: nhad' yaug re the' myao:. Pe"mung:ga"re ai jham wa lo" thao" mae Mao"So: nhag' yo" rure qhu" byid' ra" ve, so: jham ngad: ako". 2 Ai: thao myi: we' lhag' to" ra" bao tang" tham: mo" we' dau: ra" ja: re ngo myao:- ai: gug'nyhug' lhe: re we' yao" khyao dau sulho rere:- aso" yang axam: deim" te' to: qhug' ra" mo, rere:- aung doe; pye' ra" mo, rere:- ngo myao:- bao tang" tham: mo" nhae mae ye; jo; ako". Yao: bam wa Mao"So: yang byid' to" ra" tang: jham ci yang:- Mao"So: daui daui yaug Moshe nho: nghaui" caung: dao: re we' Yao Nau" nho: nghaui" caung: dao: re caung: mung:- 3 Qam: bo: thao" ra" Asang Mao"So we"- Ni" lo,mau" jham wa gyai yao: qi" qhang: ru we' mug' pho: ngad: ra". Byumyu" alhab' nho: kho:kham we"- Ni" khyo qid jham wa gyai yao: din: nyang: ru we' dangman" ra". 4 Asang we"- Nao re magyaug lo: khag' na nae" i?- Ni" nho: qi" qhang: ra" khyo re ta" thug' nae" rure khoyaug ngag: pye' nae" i?- Nao dayaug za: gyang" lho" yaug ngad: ra". Byumyu" alhab' wa nao re li" goe; pa" li" genae"- ga: Mao"So: daui daui yaug ngad: ra"- Moshe nho: nghaui" caung: re we' Yao Nau" nho: nghaui" caung: re caung" na: bam: ako". 5 Ai: thao re mug:gaung dao mae" Mao"So: Dao: Thang" Zaung bo: ra" caung:pa" yham wa bung" jo; rure ngo myao:. 6 Ai: qam" nhad' ja: re boe" nhao ko" ra" mug: lagyo: nhad' yaug wa qhui qhui mung: bao: ra" jid; mo" pin: re ve, mung:- yao: bam: qao gao mae qhang phyid' cui: cui" ci yang: caung:pa" yham mae" thug' li" ako". 7 Gug'nyhug' byid dau: mae" dadau: wa apyad ato kao so' daui: na yaug ngad: ra"- Mao"So: nhag' yo" ru byang" sheim: jo; ra" qhang khug' nhad' lam: re: mug: lagyo: nhad' yaug re byid' ke' ra". 8 Caung:pa" yham wa Mao"So: phung qam: so' we' byang" jo; ra". Ai: mug: lagyo: nhad' yaug: yang vin: li" ra" qam" nhad' ja: mathao" thao" wa caung:pa" yham khyo khag' re: maqo" vao ye: ko" ngad: ra". 1 Ai: thao caung:pa" yham mae" thoe qi: we'- Mao"So nhag' yo" ru bo: ra" keim nhad' lam: re myid gaung khyo vhe' khyo" ke' ge,- ga: mug: lagyo: nhad' yaug re ta" thoe ngo the' gyo". 2 Mug: lagyo: sao qhid' yaug ein: yaug wa yao" keim re myid gaung khyo vhe' khyo" ke' ra". Ailao"- gug'nyhug' lhe: aso: de; ra" mo, we' yao" khyao dau sulho re goe; pa" ko" ra" mo, mae qu" gyaug qu" lhaung sho' no: ra" byang jham to" li" ako". 3 Mug: lagyo: shid' yaug ein: yaug wa yao" keim re panglai: khug khyo vhe' khyo" ke' ra". Ailao"- panglai: qid wa byushid sa: we' dau: lo" byaug: ra". Pang:lai:: khug mae daui: na ko" ra" ja: alhab' wa shid: byaug: ako". 4 Ai: thao mug: lagyo: sam yaug ein: yaug wa yao" keim re qid gyaung: jham we' qid thug' jham khyo vhe' khyo" ke' ra". Ailao"- qid jham wa sa: boe" lo" byaug: ako". 5 Qid re eib: ra" mug: lagyo: wa- ana" pyad lai: lo" ra" pyad mae na: jo; ra" Gyang" Lho" Yaug we"- Nao kad' ra" dao: kho' ru wa din: nyang: ra" wo"- 6 Yao: bam wa Mao"So: byu qe we' lapa qere sa: sheim: gyo" nhao mo, ngad mung:- nao wa yao: bam re sa: byid: jhaug' ava". Man: qi" ru we' dakhyo:- yao: bam qo" kham zo" na: avako"- ga: ta" rure ngo the' gyo: va". 7 Ai: phan mae" thoe dathoe wa Qam: bo: thao" ra" Asang Mao"So we"- Ni" dao: kho' ru jham wa gai gai: yao: dangman" ru we' din: nyang: ra" wo"- ga: ta" rure ngo the' gyo". 8 Ai: thao mug: lagyo: byid yaug ein: yaug wa yao" keim re ba dao khyo vhe' khyo" ke' ra". Ailao"- byu jham re gyai thin: ra" ba lhe' nae" akhang" qo" yu: ra". 9 Yao: bam wa gyai thin: ra" ba lo; yang lhe' mhai: ru qhug' geyang:- ai: qam" jham re boe" nhao nae" kheim: so' qo" ra" Mao"So: mang re nhang: myan" nhang: thoe ta" ako". Ngadqere: yao: bam wa yao: bam: qobo jham mae" madam: phaug' lo ko" ru we' yao" qi" qhang: ra" khyo re macaung:khin" ko" ngad: ra". 10 Ai: thao mug: lagyo: ngo" yaug ein: yaug wa yao" keim re ai: gug'nyhug' lhe" nho: tao" khau" dao mae vhe' khyo" ke' ra". Ailao" ai: gug'nyhug' lhe" nho: mung"dan: wa no, sang: kyid cad' no; lo" mung:- ai: mung"dan: byu qe wa khai" no geyang: yao: bam yao" sho re bin" zag: ci: ako". 11 Amung: yao: bam: khai" no: ru we' byang myaug: ra" dae mathao mae mug:gaung: mung"dan: nho: Mao"So re nhang: myan" nhang: thoe ta" ako". Ngadqere: yao: bam wa yao: bam yao" makhyang" ra" khyo jham mae" madam: phaug' lo ko" ngad: ra". 12 Ai: thao mug: lagyo: khyaug' yaug ein: yaug wa yao" keim re Uphrad qid gyaung: mo" khug khyo vhe' khyo" ke' ra". Ailao" ai: qid gyaung: mo" wa kin" lo" byaug mung: ba thug' shad' mae" joe" li" ra" kho:kham qere khyo phung" byid' ra". 13 Ai: thao pohaung we' dau: ra" masan masin" ra" byo sam dau: re ngo myao:. Yao: bam wa mao jaung:- gug'nyhug' lhe:- lapa apyag' qenho: nhad' jham mae" thug' li" ako". 14 Yao: bam wa mug'pho: ve,lho jham re kad' qhu" ko" ra" min: yui jham: nho: byo jham ngad: ako". Ai: byo sam dau: wa Qam: Bo: Thao" ra" Mao"So: ba na qi: gye khe' poe khyo mug: myid dao mae" kho:kham qe alhab' re zhang: phaung: yu nae" qhid' mae" thug' ye" lo" ako". 15 Tae" gyo: ge,- Ngo wa khug' hab' we' dakhyo: joe" li" nae". Khag' ngadqere: gaung pyad' su" qin" yang: su: qhid' kheim: mae qho' maphau: nae" qhid' mae" gyang" na mung:- yao" mai bau: jham re lhaug' na: ra" yaug wa- ngaui lho" ra" wo". 16 Ai: thao- ai: byo jham wa kho:kham qere Hebre myan" khyo" Amagedon ga: mhang" ra" jo, qo mae zhang: phaung: yu: to" ako". 17 Ai: thao mug: lagyo: nhad' yaug ein: yaug wa yao" keim re la mae vhe' khyo" ke' ra". Ailao"- caung:pa" yham mae jo; ra" tao" khau" mae" thoe qi: dathoe wa Bin va"- ga: ta" ra". 18 Lhe' cad' cad' mung:- mug: dam: dam:- mug: gyug: gyug: mung:- myid lab: qu" gyaug qu" lhaung lab' li" ra". Xao su byu qere phan" ra" ba na mae" khonhae" re: airu: myid lab: malab: qu" ngad: ra". Ce: myid lab: wa alhab' tho' mae thin: thao" ru ngad: ra". 19 Qi" qhang: ra" vomo" wa sam gao go; lo" byaug: ra". Mung"dan: khao: ngo" mae" vomo" jham wa byo; qeim: lo" byaug: ako". Mao"So wa Babelon vogaung: re myid: beim: mung:- yao" nhag' yo" ra" sabyi qang: ngad: ra" yao" keim mae" sabyi qang: yao: re jhaug' ra". 20 Gagyo: kao" jham alhab'- bam jham alhab' byaug: lo" byaug: ako". 21 Dace' re sam joe" dakyin: kyin: ko bo: ra" lag qu mo" jham wa mug:gaung mae" byu jham: dao mae qu: zag byid' ra". Byu qe wa qu" gyaug qu" lhaung sho' ra" lag qu mo" qu: gyo" ra" qam" mathao mae Mao"So re nhang: myan" nhang: thoe ta" ako". 1 Ai: thao keim nhad' lam: ci ko" ra" mug: lagyo: jham nhad' yaug mae" dayaug wa ngo jhao" li" mung:- Lo ri:- qid gyaung: mo" myo: sho' nhae mae te" to" ra" qi" qhang: ra" vomo" ngad: ra" mang qi" ra" shava myhi" qobo dae kham zo: qhug' ra" khyo ngo nao re qhu" li". 2 Myidgaung dao mae" kho:kham qe wa yao: we' gaung sho: jho" zam" ako". Mug:myid byu qe wa yao" nho: gaung sho: gintho' mau" zo" ngad: ra" sabyi qang: re shaug' yid: ako". 3 Ai: Byo wa ngo re jaung" mung:- mug: lagyo: wa ngo re din"pyad' yo khyo jhui" ye" lo" ra". Mao"So re ta" phoe: ra" mang jham gaung geim" byang" sho' tung" te' to" ra" gug'nyhug' lhe: ane dadau" nho: dao mae myiqe: dayaug zaung: jo; rure ngo myao:. Ai: gug'nyhug' lhe: wa au: nhad' lam: de,mung: khyug daxe khe' yaug: ra". 4 Ai: myiqe: wa mai bau: ane we' amo; yang shaung: ve; ci mung:- qhang- phug' de; ra" laug- palhe" laug jham: yang shaung: ci: ra". Yao" lo, mae gaung sho" nho: gintho' mau" zo" ngad: ra" maca' majhad' lo, mau" byang" jo; ra" qhang keim dakeim zhab' ci: ra". 5 Yao" nga: lao: mae Shava myhi" qe alhab' mo; nho: yao: myhi" we' mug: myid mae" maca' majhad' ra" yao: myhi"- Qi" qhang: ra" Babelon ga" ra" lajheim: anyham: bo: ra" mang tung" te' to" ra". 6 Ai: myiqe: wa Mao"So: byu qenho: sa: rere:- Yesu qhid' mae" jhaug' zaug geyang: se' pye' qhug' ko" ra" mo; nho: sa: rere: shaug' mung:- Yid: jo; rure ngo the' myao: ra". Yao: re ngo myao lao" gyai mug' hao" byaug: ra". 7 Mug: lagyo: wa Nao pe" mung: mug' i?- ga: ngo re myid' ra". Ai: myiqe: ga" ra" mang anyham: lajheim: re we' yao: zaung: ci: ra" au: nhad' au: de, mung: khyug daxe khe' yaug: ra" gug'nyhug' lhe" nho: lajheim: re ngo nao re ta" kyo: li". 8 Ai: gug'nyhug' lhe: wa ganhae" daui: na: qu" ngad qere: ana" wa madaui: na lo:ngad: ra". Yao: wa dung: khung: no, mae" thug' li" na mung: phyo' pye' qhug' nae" khyo ye" lo" li" nae". Mug:myid re maphan" shimae" kao so' mugsug' mae mang mabo: ra" mo, mug: myid byu qe wa ai: gug'nyhug' lhe: re yao: bam the' myao gelao"- mug' hao" byaug: li" genae". Yao: wa ganhae" daui: na: qu" ra". Ana" wa madaui: na lo:ngad: ra". Ngadqere: dalhang dam: na: thug' li" li" nae". 9 Nyan pha,jhi" laba lajhao bo: ra" yaug khag' re: ceru re qo" ba: yu: ako". Ai: au: nhad' au: wa ai: myiqe: zaung: ra" buggaung nhad' lam: ngad: ra". Ai jham wa kho:kham nhad' yaug re: ngad: ako". 10 Ai mae" ngo" yaug wa gyo" lo" byaug: avako". Dayaug wa ana" eib: na: ashi"- Amung: gatau dayaug wa mana: li" shi:ngad: ra". Yao: joe" li" lao"- yao: wa dazab za: qo" eib: li" nae". 11 Ai: gug'nyhug' lhe: wa ganhae" daui: na: qu" ngad qere: ana" wa madaui: na lo:ngad: ra". Yao: wa she' yaug ein: yaug kho:kham ngad mung: ai: kho:kham nhad' yaug mae" dayaug ngad: ra". Amung: yao: wa phyo' pye' qhug' nae" khyo ye" lo" na: ra". 12 Nao myao: ra" ai khyug daxe wa eib nae" kheim: so' maqo" shiko" ra" kho:kham daxe yaug ngad: ako". Ngadqere: yao: bam wa kho:kham khyo" ai: gug'nyhug' lhe: we' daga" dayo, qug ko eib nae" kheim: so' byid' to: qhug' mo, ngad: li" genae". 13 Ai: daxe gu: alhab' wa myid: qang: to" ru dakhe' za: ngad: ako". Amung: yao: bam wa yao: bam: qam: so' we' kheim: so' ai: gug'nyhug' lhe: re qhaug' byid' ako". 14 Yao: bam wa Yao Nau" re gye kad' li" genae". Ngadqere: Yao Nau" we' yao" yang khai: yu: to: mo,- kyid: ra" thao cao" mo, wa ai bam re khe' aung: pye' li" genae". Pe"mung:ga"re yao: wa asang qe: Asang- kho:kham qe: kho:kham ngad: ruyang ngad: ra". 15 Mug:lagyo: wa nao myao: ra" shava myhi" zaung: jo; ra" qid wa mung"dan: jham- mung" byu qe- myan" cao jab jhau: ra" byumyu" qe ngad: ako". 16 Nao myao: ra" khyug daxe khe' we' gug'nyhug' lhe: wa ai: shava myhi" re nghang" li" genae". Yao: bam wa yao: qo" ra" ja: alhab' re khyad' yu: pye' mung:- yao: re gaung pyad' khyad' shao: to" li" genae". Yao: bam wa yao" sho: re zo: mung: myi" yang yao: re ngha" jheim" pye' li" genae". 17 Pe"mung:ga"re Mao"So: mungdao: jham jab byang" li" ra" ayo, joe" sho' yao: bam myid jho" vang" mung:- yao: bam yao: eib: ra" kheim: so' re ai: gug'nyhug' lhe: re qhaug' byid' ra" khyo" yang Mao"So yao" myid: qang: to" ra" khyo re kad' boe" nae" qhid' mae" lo, joe" zaui" thug' ke' nae" myid re Mao"So wa yao: bam: nhag' lam: aung khug mae ke' to: byid' ra". 18 Nao myao: ra" ai: myiqe: wa myid gaung dao mae" kho:kham jham re eib: ra" qi" qhang" ra" vomo" ngad: ra"- ga: ngo re ta" ra". 1 Ai: thao re mug:gaung mae" mug: lagyo: dayaug gyo" li" rure ngo myao:- Yao: wa qi" qhang: ra" kheim: so' qo" ru we' yao" nho: phung qab bao wa myidgaung geim" mae bo" bao byid' ra". 2 Yao: wa thoe qi: we' Yao: wa byo; qeim: lo" ava"- Qi" qhang: ra" Babelon: vogaung: wa byo; qeim: lo" byaug: ava". Ana" ai: vogaung: wa min: yui jham we' masan: ra" byo jham: yang kyaug' rure qhug' mung:- maca' majhad' jab sho' we' nghang" thao" ra" ngho' jham na: ra" jo, qo boe" jo; ava". 3 Pe"mung:ga"re byumyu" cao jab alhab' wa yao" nho: gaung sho: shab' mhin: ru ngad: ra"- gyai thin: ra" sabyi re shaug' avako". Myidgaung mae" kho:kham qe wa gaung sho" nho: gintho' mau" zo" mae yao: we' jho" zam" mung:- mug:myid dao mae" phaga: pho" qe wa ai: vogaung" nho: maqo" khang" ra" gaung sho: shab' ra" mau" zo" mathao mae jo,nho" qo" li" ako"- ga: zag: hug' ako". 4 Ai: thao re mug:gaung mae" thoe gatau dathoe wa- Nga" byu qe we"- Phao: thug' lo geri:- Yao" lo, mae" phao: thug' lo geri:- Yao" qobo jham mae naonhaung" dabocao: bo ge,- Yao" qobo dae mae dabocao: kham ge,- 5 Pe"mung:ga"re yao" qobo jham wa mug:gaung loe" sho' bam: jo; ra". Mao"So wa yao" nho: makhyang" ra" khyo jham re myid: beim" ra". 6 Yao: naonhaung" re kad' ru we' dakhyo:- naonhaung" yao: re khyag' kad' ge,- Yao: naonhaung" re kad' lo: ra" gu: alhab' qhid' mae" shid' zhao" yao: re dam: tug' byid: ge,- Naonhaung" qhid' mae" yao: phaung byid' lo: ra" shaug' ja: re shid' zhao" thin sho' phaung yang: yao" keim re vhe' pyang" byid: ge,- 7 Yao: yao" gaung re phungbao we' gaung sho: pyo: khyo kad' yu: ra" qhi" yao: re qug: khai: we' nhag' kaug' nhag' qhui: ru boe" nhao ge,- Pe"mung:ga"re yao: wa yao" gaung re kho:kham myhi" ngo cemae kho" zaung: jo;- Ngo wa cug' mo" mangad:- Ngo wa nhag' kaug' nhag' qhui: rure khonhae" re: ba nae" mangad:- ga: ta" ra". 8 Ce: mathao mae no phyo: nhag' kaug' nhag' qhui: ru- bao" khug' khug' ru- qam" jham yao" dao mae daba mae joe" li" nae". Pe"mung:ga"re myi" yang ngha" jheim" pye' ru qhug' li" nae". Pe"mung:ga"re yao: re dao: kho' ra" Asang Mao"So wa qam: bo: thao" yaug ngad: ra"- ga: ta" rure ngo the' gyo". 9 Yao: we' gaung sho: shab' mhin: ra" gintho' mau" zo" mae bokad' ko" ra" myid gaung dao mae" kho:kham qe wa yao: re nga" jeim" lo" na: ra" myi: mae" myikhug' re yao: bam myao gelao"- ai: vomo" qhid' mae" kaug' gyi: ngug: li" genae". 10 Yao: bam wa yao: kham zo" ra" qug: khai: dae re qu" gyaug ko" ruyang va: mae ye; jo, geyang:- Qi" qhang: ru we' qam: bo: thao" ra" Babelon vomo" we"- Nao yahau" we"- Nao yahau" we"- Nao wa dayo, qug khug mae za: qobo dae byid' rure qhug' kham zo: vanhaung- ga: ta" ako". 11 Myidgaung dao mae" phaga: byu qere: yao" qhid' mae" kaug' ngug: ako". Pe"mung:ga"re yao: bam: aung: xan: jham re vai: yu nae" khag' mana lo: geyang: ngad: ra". 12 Yao: bam: qhang zai jham- ngaui bau:- phug' de; ra" laug zai jham- palhe" zai jham- jid: mo" pin: zai jham- zin yung pin: ne- bathaung khyang pin:- pin: ne jham- myaung: ra" sag' aja: ja:- xao zaui: yang kad' ra" zai aja: ja:- phug' de; ra" sag'- gyid: ne jo, to' we' laug phyu- 13 sag' hau:- zoxeim: sheim nae cid'- sheim nae pyo: ja:- Mura- Loban- sabyi qang:- xau cin man" phaui:- jung: cin- nung:- myao: jham- myao: lhin" jham- jeim qe we' byu: kao so' alhab' re lhao" vai nae" byu khag' mana lo:. 14 Phaga: byu qe wa Nao sang nug nhag' nghae" ra" zai gai alhab' wa byaug; lo" byaug: avako"- Amung: ni" jo, nho" we' phung qab bao jham alhab' baui" byaug; ava". Ai jham re nao khonhae" re: dam: the' yu lo nae" mangad: lo:ngad: ra"- ga: yao: re ta" ako". 15 Ai: vogaung: mae phaga: kad' yang: jo, nho" qo" lo ko" ra" phaga: byu qe wa yao: kham zo" ra" qug: khai: dae re boleim zo: nae" gyaug geyang: va: mae ye; jo; li" genae". Yao: wa kaug' ngug zo" re"- 16 Qi" qhang: ra" vomo" yao: we"- Yahau" re wo"- Yao: wa jid: mo" pin: jhad'- zin yung pin: mo,- pin: ne- ve, yang: qhang zai- phug' de; ra" laug zai- palhe" zai jham: yang lhaung" shaung: ci: ru wo". 17 Dayo, qug mae za: ce: jo,nho" alhab' re yao: cephyaug' pye' vanhaung wo"- ga: ta" ako". Qid sang pho keim: au: jhaung qe- zaung mo,- kau: mo,- qid panglai: mae kao so' khau mo, gatau alhab' mo, wa va: mae ye; jo, gemung:- 18 Ai: vomo" re nga" jeim" pye' lo" ra" myi: mae" myikhug' re myao lao"- Ce: vomo" we' dau: ra" vomo" gatau khonhae" re" majo; qu"- ga: hug' ako". 19 Yao: bam wa yao: bam: au: dao mae phalhug gag: gyan" yu mung:- vomo" yao: we"- Yahau" re wo"- Yao: wa qid sang pho qo" ra" mo, alhab' re jo, nho" qo" nhao: ra" vomo" ngad" ra". Dayo, qug mae za: yao: qo" ra" gu: alhab' baui" lo" byaug: avako"- ga: kaug' gyi: ngug: ako". 20 Mug:gaung we"- Ai: vomo" byo; qeim: lo" va" ruyang ngaui bau: wa,- Mao"So: byu qe- lagyo: qe- lapa qe we"- Ngaui bau: ge,- Pe"mung:ga"re ai: vomo" yang naonhaung" re kad' ra" gu: qhid' mae" Mao"So wa yao: re dao: phyid' ava". 21 Ai: thao qam: bo: ra" mug: lagyo: dayaug wa laug lhang qi: qhi" qi" ra" laug baui dabaui re gaug: yu yang: panglai: khyo pye' zaui: ke' zo" re"- Qi" qhang: ra" Babelon vomo" wa ceru: atug' akhyug pye' khyo" pye' ru qhug' li" nae". Amung: yao: re khonhae" re: dam: myao lo nae" mangad:- ga: ta" ra". 22 Nao mae tang: thoe- byu thoe- khalhao: mad: myhang" thoe- labo" thoe- khonhae" re: the' gyo: lo nae" mangad:- Nao mae lo, mau" kad' ra" mo, khonhae" re: madam: myao lo nae"- Laug lhang myang thoe magyo: lo nae". 23 Nao mae myibaung: bao khonhae" re: mamyao lo nae"- Myhi" sag' pho" sag' qe: thoe nao mae mathe' gyo: lo nae". Ni" nho: gau pai: byu qe wa mug: myid alhab' geim" mae qam: so' bo: thao" ra" mo, ngad: ako". Ni" nho: vha" ra" pha,jhi" apyag' yang mug: myid byu qe alhab' re mhug' pyag' yu: lo: ra"- ga: ta" ra". 24 Babelon qobo dae qhug' kham zo" ru wa lapa qe: sa:- Mao"So: byu qe: sa:- ai: vomo" khug mae the' myao yang:- ngad: ra". Ngad va"- ai wa myid gaung dao mae se' pye' qhug' ra" mo, alhab' mo; nho: sa: ngad: ra". 1 Ai: thao- mug:gaung dao mae" byu ajham ataung: thoe we' dau: ra" thoe re ngo the' gyo". Ai: thoe wa Mao"So re caung:khin" ge,- Ngonhaung" nho: Mao"So wa khyad' yu: ra" khyo- phungbao we' qam: so' qo" yaug ngad: ra". 2 Yao" nho: dao: kho' ra" khyo jham wa dangman" ru we' din: nyang: ra". Yao: wa myidgaung byu qere yao" nho: gaung sho" nho: gintho' mau" zo" yang shad' nghung: nhao: ra" ai: shava myhi" re dao: phyid' ava". Yao" daui daui mo, re ai: shava myhi" yang se' pye' yang:- Mao"So wa yao: re qobo dae byid' ava"- ga: ta: ako". 3 Ailao"- yao: bam wa Mao"So re caung:khin" ge,- Ai: qi" qhang: ra" vomo" re nga" jeim" pye' ra" myi: mae" myikhug' wa apyad ato khonhae" re: thaui" do, lo" ra"- ga: hug' ako". 4 Lau: de, shid' xe: byid yaug we' kao so' daui: ra" gug'nyhug' byid dau: wa tao" khau" dao mae zaung: jo; ra" Mao"So re goe; pa" ako". Yao: bam wa Amen- Mao"So re caung:khin: ge,- ga: ta" ako". 5 Ai: thao- tao" khau" mae" thoe wa yao" nho: daui daui mo, we' yao" byu qe ngad ko"ra" yao: re phug' myao: ko" ra" mo, aqi: angai qe we"- Ngonhaung" nho: Mao"So re caung:khin" ge,- ga: ta" ra" thoe thug' li" ra". 6 Ai: thao- byu ajham ataung: thoe ru" ru- qid coe: myang thoe ru" ru- mug: gyug: thoe ru" ru re ngo the' gyo" ra". Ai: thoe jham wa Mao"So re caung:khin" byid: ge,- Pe"mung:ga"re- qam: Bo: Thao" ra" ngonhaung" Asang Mao"So wa kho:kham ngad: ra". 7 Ngonhaung" ngaui bau: ngaui lho" mung:- yao" qi" qhang: ra" khyo re caung:khin" gelang:- Pe"mung:ga"re Yao Nau" nho: lo, xo' poe ayo,wa joe" mung:- yao" myhi" sag' wa yao: yao" gaung re ai: poe qhid' mae" seim" nyhang" to" ava". 8 Yao" gaung re shaung: ve, nae" bao qhui: ra" jid: mo" pin: jhad' mai bau: qo" ava". (Ai: jid: mo" pin: jhad' wa Mao"so: byu qenho: gai shab: ra" ave, lo,mau" ngad: ra") 9 Ai: thao- mug: lagyo: wa Yao Nau" nho: lo, xo' poe khyo li" nae" khai qhug' ra" yaug wa ngaui lho" ra"- Ceru re tung" to: wa,- amung: mug: lagyo: dam: laung: yang: ta" ru wa- Cejham wa Mao"So: dangman" ra" dao: jham ngad: ra"-ga: ngo re ta" ra". 10 Ngo wa yao: re goe; pa" nae" ein:- yao" khyid qao: khyo goe; gyo" lo". Ngadqere: yao: wa- Airu: dakad' wa,- Ngo wa Yesu qhu" byid' ra" dangman" ra" khyo re zaui" zag: ci: ra" mo, ngad ko" ra" nao we' ni" mao:nhaung: qe: daui daui byin cao: dayaug za: angad:- Mao"So re goe; pa" wa,- ga: ngo re ta" ra"- pe"mung:ga"re Yesu qhu" byid' ra" dangman" ra" khyo wa lapa qere jaung" byid' ra". 11 Ai: thao mug:gaung wa bung" jo, mung: myao: phyu dadau: na: jo; rure ngo myao:- Ai: myao: phyu jui: yaug wa Jhaug' zaug yaug we' Dang man" yaug ga: mang yaug ngad: ra". Yao: wa tarha" din: nyang: ra" khyo" dao: kho' mung: yao" gye khe' poe jham re gye zin" na: ra". 12 Yao" myo,jid' wa myishae we' dau mung:- yao" au: mae ba maug: myo: sho' zhaung" ci: ra". Yao" gaung mae mang tung" te' ci: ra". Ngadqere: ai: mang re yao: mae" je yang: khag' re: maba ngad: ako". 13 Yao: ve; ci: ra" bau: qhang wa sa: za: dag: jo; ru ngad: ra". Yao" mang wa Mao"So: Mungdao: ga" ru ngad: ra". 14 Mug:gaung mae" gyezo: qe wa san: yaung" ra" jid: mo" pin: phyu ve,- myao: phyu jham: dao mae jui: yang: yao" thao cao" ako". 15 Yao" nhad' mae" byumyu" cao jab re aung: pye' nae" ngad: ra"- tho' ra" shae pyang: thug' li" ra". Yao: wa ai bam re jo,to' zaung: bao" yang eib mung:- yao: wa qam: bo: thao" ra" Mao"So: nhag' yo" runho: sabyi nao: xam mae sabyi qang: re nao" jhab' ke' li" nae". 16 Yao" bau: qhang mae we' yao" paung daung: dao mae kho:kham qe: kho:kham asang qe:nho: Asang ga" ra" mang tung" te' to" ra". 17 Ai: thao- mug: lagyo: dayaug wa ba mae ye; jo; rure ngo myao:. Yao: wa mug: le; phyo: mae dao" lhau ko" ra" ngho' jham re thoe qi: we' Lo geri:- Mao"So: zo: shaug' poe mo" khyo zang" li" geri:- 18 kho:kham qenho: sho:- gyezug: mo" qenho: sho:- gyezo: qenho: sho:- myao: jham: nho: sho: we' ai jham: dao mae jui" ra" mo; sho:- byu alhab' mo; nho: sho:- jeim qe we' jeim mangad: mo; nho: sho:- byu angai aqi: qenho: sho: li" zo: geri:- ga: hug' ra". 19 Ai: thao re ai: gug'nyhug' lhe: we' myid gaung dao mae" kho:kham qe wa myao: dao mae jui" ra" yaug re we' yao" gyezo: qere gye khe' nae" qhid' mae" yao: bam: gyezo: qe we' zang" ham: na ko" rure ngo myao:. 20 Gug'nyhug' lhe: wa yao" qhid' kheim: mae mug' pho: ve, lho kad' qhu" ko" ra" lapa apyag' qe we' daga" za: taung" lhaung" pye' ru qhug' ako". (Yao: wa ai: gug'nyhug' lhe" nho: aso: de; ra" mo, re we' ai: gug'nyhug' lhe" nho: khyao dau sulho re goe; pa" ra" mo, re ai: mug' pho: ve, lho jham kad' qhu" yang: mhug' pyag' yu: ra" yaug ngad: ra".) Ai: gug'nyhug' lhe: we' lapa apyag' wa myi: nga" na: ra" vhang myiqid tham: khug khyo adaui phe, phe, daga" za: pye' zaui: ke' ru qhug' ako". 21 Yao: bam: gyezo: qe wa ai: myao: dao mae jui" ra" yaug: nho: nhad' mae" thug' li" ra" shae pyang: jham: yang se' tam" pye' ru qhug' ako". Ngho' jham alhab' wa ai bam: sho: re yao: bam ga" nho" zo" ako". 1 Ai: thao- mug: lagyo: dayaug wa yao" lo, mae ai: dung: khung: no; nho: kham: thug' we' jao co: qi: ci yang: mug:gaung mae" gyo" li" rure ngo myao:. 2 Yao: wa ai: Min: yui Satan- ganhae" mae" lhao maui ngad: ra" mao jaung: re taung: mung:- jao co" yang taui: mung: zin na dataung taui" to" ra". 3 Byumyu" cao jab re yao: maqo" mhug' pyag' nae" qhid' mae" zin na dataung gan: lo" sho' mug: lagyo: wa dung: khung: no, khug khyo yao: re pye' zaui: pye' mung:- kham: thug' thug' yang: ai re dazid thaung" te' ra". Ai: thao re yao: re dazab zo: pheim: nhao: to: ca" nae" ngad" ra". 4 Ai: thao ngo wa kho:kham tao" khau: jham re the' myao:. Ai: tao" khau" jham: dao mae zaung: jo; ra" mo, wa dao: kho' nae" qam: so' byid' to: qhug' mo, ngad: ako". Alao"- Yesu yang qhu" byid' ra" dangman" rure we' Mao"So: dao: re ta" hau" kyo: geyang: se' pye' qhug' ko" ra" mo; nho: subyo jham rere: ngo the' myao:- Yao: bam wa ai: gug'nyhug' lhe: rere:- yao" khyao dau sulho rere: magoe; pa" ngad: ako". Amung: yao: bam: nga: lao: mae- mangad: lao"- yao: bam: lo, mae re: ai: gug'nyhug' lhe" nho: aso: makham: yu: to: ngad: ako". Yao: bam wa kao so' dam: daui: li" gemung:- Yesu we' daga" kho:kham khyo" zin na dataung eib: ako". 5 (Dang: ra" shid: jo, mo, wa zin na dataung gan: lo" sho' kao so' madaui: li" ko" ngad: ra".) Ceru wa shid: ra" mo, mae" sao qhid' lhang daui: to" li" nhao: ra" khyo ngad: ra". 6 Shid: ra" mo, mae" ce: sao qhid' lhang daui: to" li" nhao: ru mae bobo: ra" mo, wa qi: sho' ngaui lho" ra" mo, ngad: ako". Shid' lhang ein: lhang shid: ru wa yao: bam re eib nae" qam: so' maqo" lo:ngad: ra". Yao: bam wa Mao"So we' Khristu nho: khinjaung qe ngad: li" genae". Yao: bam wa yao: we' daga" zin na dataung eib: li" genae". 7 Zin na dataung gan: lo" thao re Satan wa taui" lhaung" to" rumae" pheim: ke' ru qhug' mung:- 8 Gog we' Magog ga" ra" mug: myid geim" mae byo: sin" na: ra" byumyu" cao jab re mhug' pyag' yu nae" qhid' mae" thug' ye" lo" li" nae". Satan wa panglai: ma dam: mae" ma coe nho" myo: sho' byu qere gye khe' poe qhid' mae" zhang" to" li" nae". 9 Yao: bam wa myid gaung geim" khyo byo: sin" lo" gemung:- Mao"So: byu qenho: gyetab re we' yao" yang jhid'de; ra" vomo" re vang" to" ako". Ngadqere: mug:gaung mae" myi: gyo" li" mung:- yao: bam re nga" jeim" pye' ra". 10 Ai: thao- yao: bam re mhug' pyag' ra" Min:yui wa ai: gug'nyhug' lhe: we' lapa apyag' re pye' zaui: to: gau ngad: ra" myi: nga" na: ra" vhang myiqid tham: khyo pye' zaui: pye' ru qhug' ra". Yao: bam ai: jo, qo mae apyad ato myi" re: na" re: yhin" ru qhug' li" genae". 11 Ai: thao- qi" qhang: ra" tao" khau" phyu re we' ai: dao mae zaung: jo; ra" yaug re ngo myao:. Myidgaung we' mug:gaung wa yao" qhid' kheim: mae" phao: lo" byaug gemung:- madam: myao lo:ngad: ra". 12 Ailao"- shid: lo" va" mo, aqi: angai wa kho:kham tao" khau" qhid' au: mae ye; jo, ko" rure ngo the' myao:- Mugsug' paug' jham phung" to: mung:- kao so' daui mo; mugsug' paug' ngad: ra" mugsug' paug' gatau rere: phung" to" ra". Ai: shid: lo" va" mo, wa mugsug' paug' jham mae tung" xam" to" ru we' dakhyo:- yao: bam: lo, mau" re cao" yang: dao: kho' ru qhug' ako". 13 Pang:lai:: wa yao: yao" khug mae" sushid qere nhao: ke' byid' ra". Shid: ru we' movo: mug: re: yao: yao" khug mae" sushid re ab byid' ako". Alhab' mo, wa yao: bam kad' lai: lo: ra" yao: bam: lo, mau" re cao" yang: dao: kho' ru qhug' ako". 14 Ai: thao- shid: ru we' movo: mug: wa myiqid tham: khyo pye' zaui: pye' ru qhug' ako". (Ce: myiqid tham: wa shid' lhang ein: lhang shid: ru ngad: ra".) 15 Kao so' daui mo; mugsug' paug' mae mang mabo: ra" yaug khag' ngad qere: myiqid tham: khyo pye' zaui: pye' ru qhug' ra". 1 Ai: thao re mug:gaung sag' we' myid gaung sag' re ngo myao:. Sao qhid' mae" mug:gaung we' myid gaung wa baui" lo" byaug mung:- panglai: wa byaug: byaug: ra". 2 Ai: Gyang" Lho" Vomo" ngad: ra" Yerusalem vosag' wa yao" yham sang pho" we' qhug' na nae" qhid' mae" shaung: yaung" ci: ra" myhi" sag' we' dakhyo:- jin" jin" nyhang" seim" ci yang: Mao"So mae" mug:gaung khyo" gyo" li" rure ngo myao:. 3 kho:kham tao" khau" mae" thoe qi: dathoe khyo"- Ana" Mao"So: yham wa yao" byu qe we' daga" ngad: ra". Yao: wa yao: bam we' daga" na: li" nae"- Yao: bam wa yao" byu qe ngad: li" genae". Mao"So yao:- yao: bam we' daga" na: li" nae". Yao: wa yao: bam: Mao"So ngad: li" nae". 4 Yao: bam: myo,jid' jham mae" ngug byid alhab' re yao: sad' pye' byid' li" nae"- shid: ru majo, lo nae"- kaug' qhui: ru- mangad: lao"- gyi: ngug: ru- mangad: lao"- khai" no: ru majo, lo nae". Qhid' phyao: boe" ru jham alhab' gu: wa baui" lo" byaug: ava"- ga: jhau: rure ngo the' gyo". 5 Ai: thao- tao" khau" mae zaung: jo; ra" yaug wa Ana" ngo wa cao jab alhab' re asag' kad' pye' va"- ga: ta" ra". Yao: wa Ceru: tung" to: wa,- Pe"mung:ga"re ce: dao: jham wa dangman" ru we' lam ga" ra" dao: jham ngad: ra" ga: re:- ngo re ta" ra". 6 Amung: yao: wa Bin va"- Ngo wa sao qhid' we' lo" thao"- aqhid we' athao" yaug ngad:. Qid shab' ra" yaug khag' ngad qere: kao so' qid thug' mae" qid re aphug' mabyid: ca" lo: shaug' nae" akhang" ngo byid: nae". 7 Aung doe; ra" yaug khag' ngad qere: ce: qid re ngo mae" qo" khae: yu: li" nae"- Ngo wa yao" Mao"So ngad: li" nae"- Amung: yao: wa nga" zo: ngad: li" nae". 8 Ngadqere: gyaug mo,- dao:so: mazaung mo,- khyonghung: nghung: mo,- byu se' mo,- gaung sho" nho: gintho' mau" zaui: mo,- vha" mo,- sulho re goe; pa" mo,- mhug' mo, alhab' mo; qhid' mae" jo, qo wa myi: nga" na: ra" vhang myiqid tham: ngad: ra". Ai: ru wa shid' lhang ein: lhang shid: ru ngad: ra"- ga: ta" ra". 9 Lo" thao" aqam" jham nhad' ja: byang" sho' bo: jo; ra" keim nhad' lam: ci: ra" mug: lagyo: nhad' yaug mae" dayaug wa ngo jhao" li" mung:- Lo ri:- Yao Nau" nho: Yham Sang Myhi" ngad: ra" ai: myhi" sag' re ngo nao re qhu" byid: nae"- ga: ta" ra". 10 Ai: Byo wa ngo re jaung" mung:- mug: lagyo: wa gyai myhao: ra" bam au: khyo ngo re jhui" lo" ra". Mug:gaung dao Mao"So mae" gyo" li" ra" Gyang" Lho" Vogaung: ngad: ra" Yerusalem vogaung: re yao: ngo re qhu" byid' ra". 11 Ai: vomo" wa Mao"So: phungbao we' bao: qhui: jo; ra". Ai: vomo" wa phug' de; ra" laug sin" jham- dan: lung we' laug gyang" we' dakhyo: bao qhui: ra". 12 Ai: vomo" wa gyai myhao: ra" vang we' ngad mung:- kham: daxe: shid' dung: de; ra". Ai: kham: daxe: shid' dung: re mug: lagyo: daxe: shid' yaug zaung" na: ako". Kham: jham mae Israel byumyu" daxe: shid' kaung: nho: mang jham re tung" te' to" ako". 13 Dashad' mae kham: sam dung: dung: de; ra". Ba thug' shad' kham: sam dung:- Mug: thao shad' kham: sam dung:- Mug: am: shad' kham: sam dung:- Ba vao shad' kham: sam dung:- ngad: ra". 14 Vomo" vang wa apan aqao: laug zang daxe: shid' zang: dao mae zao: to" ru ngad mung:- ai: laug zang jham: dao mae Yao Nau" nho: lagyo: daxe: shid' yaug: nho: mang re tung" te' to" ra". 15 Ngo re dao: jhau: ra" mug: lagyo: wa vomo" rere:- kham: rere:- vang rere:- ka" nae" qhid' mae" ka" zai qhang gyang: yao: dayao: ci: ra". 16 Ai: vomo" wa byid khyug ngad mung:- lae phyao: qhang phyao: daqi" za: ngad: ra". Mug: lagyo: wa ka" zai yao" gyang: yao" yang ai: vomo" re ka" ra". Qhang phyao: lae phyao: myhao phyao: khyoman: dataung: ngo" yo yo bo: ako". 17 Ai: mug: lagyo: wa vang rere: ka" ra". Mug: lagyo: wa byu ci: ra" aka" we' dau: ra" aka" ci yang: ka" ke' re dayo: byid xe: byid daung" bo: ra". 18 Vang re dan:lung laug we' zao: to: mung:- Vomo" re wa pad' we' dakhyo: san: ra" qhang gyang" yang kad' to" ra". 19 Apan aqao: laug zang jham wa phug' de; ra" laug cao jab sho' yang shaung: te' to" ra". Sao qhid' mae" apan aqao: laug zang wa dan: lung laug- shid' lam: ein: lam: wa Nila laug- sam lam: ein: lam: wa Mahoya laug sin"- byid lam: ein: lam: wa Mya laug- 20 Ngo" lam: ein: lam: wa Jhaung: laug- khyaug' lam: ein: lam: wa patamya laug- nhad" lam: ein: lam: wa laug ma"- she' lam: ein: lam: wa myed yoe laug- gug lam: ein: lam: wa Utaphya laug- daxe lam: ein: lam: wa mahoya laug nyug- daxe: dalam: ein: lam: wa Laug Nyug- daxe: shid' lam: ein: lam: wa gomug laug jham ngad: ako". 21 Kham: daxe: shid' dung: wa Palhe" daxe: shid' ce' yang kad' to" ra". Kham: dalam: re Palhe" dace' yang kad' to" ra". Vomo" mae" hau" mo" khyodang re pad' we' dakhyo:- myao: kyao" ra" qhang gyang" yang myhung" to" ra". 22 Ai: vomo" khug mae Caung:pa" Yham re ngo mathe' myao- pe"mung:ga"re caung:pa" yham wa Qam: Bo: Thao" ra" Asang Mao"So we' Yao Nau: ngad: ako". 23 Ai: vomo" wa ba bao- lho" bao zho byid: maqo ngad: ra". Pe"mung:ga"re Mao"So: phungbao wa vomo" dao mae zho byid: mung:- Yao Nau" wa ai: vomo" nho: myibaung: ngad: ra". 24 Mug: myid dao mae" byumyu" cao jab wa ai: bo" bao re ngha yang: khyo su" li" genae". Amung: myid gaung dao mae" kho:kham qe wa yao: bam: jo,nho" jham re ai: vomo" khug khyo yu: vao lo" li" genae". 25 Ai: vomo" mae" kham: wa ba geim" phung" to" li" nae". Aimae myi" majo; ruyang khonhae" re: kham: pyid' to: nae" mangad:- 26 Byumyu" cao jab wa yao: bam yao" qi" qhang: ru we' jo,nho" jham re ai: vomo" khug khyo civao lo: li" genae". 27 Ngadqere: masan masin" ra" ja: pe" re: ai: vomo" khug khyo qo" vao ye: nae" mangad:- Aqho' aqhid mau" jham re kad' mo,- mhug' dao: jhau mo,- khag' re: qo" vao ye: genae" mangad:- Yao Nau" nho: kao so' mugsug' paug' mae yao: bam: mang botung" to" ra" mo, za: ai: vomo" khug khyo qo" vao ye" li" genae". 1 Mug:lagyo: wa Mao"So we' Yao Nau" tao" khau" mae" thug' li" mung"- ai: vomo" hau" mo" khyodang agaung: cao" yang: yug: gyo" lo" ra" pad' we' dakhyo: bao: ra" kao so' qid gyaung: mo" rere: ngo re qhu" byid' ra". 2 Ai: qid gyaung: mo" qid yae shid' shad' geim" mae lho" dakhye' dalhang ashi: zaui: mung:- dazin re daxe: shid' lhang ashi: zaui" ra" kao so' sag'gae yaug: ra". Avho' jham wa byumyu" cao jab re no gai byid: nae" qhid' mae" ngad: ra". 3 Ai: vomo" khug mae Mao"So: nhang: kheim: zao" ra" ja: pe" re: jo, nae" mangad:- Mao"So we' Yao Nau" nho: tao" khau" wa ai: vomo" mae jo, mung:- yao" nho: daui daui mo, wa yao: re goe; pa" li" genae". 4 Yao: bam wa yao" myo,khung: re the' myao: li" genae". Yao: bam: nga: lao: mae yao" mang tung" te' to: byid' li" nae". 5 Ai: mae myi" majo, lo nae"- Yao: bam wa myibaung:- mangad: lao"- ba bao qo logenae" mangad:- Pe"mung:ga"re Mao"So wa yao: bam: bo" bao ngad: li" nae". Yao: bam wa kho:kham qe boe" mung: apyad ato eib: na: li" genae". 6 Ai: thao mug: lagyo: wa- Ce: dao: jham wa dangman" ru ngad mung:- lam ga" ra" dao: jham ngad: ra". Lapa qere yao" Byo jaung" byid' ra" Asang Mao"So wa mataung" myao" re boe" li" ca" ra" khyo jham re yao" daui daui mo, re qhu" byid: nae" qhid' mae" yao" mug: lagyo: re nhao: ke' ava"- ga: ngo re ta" ra". 7 Yesu wa Tae" gyo: ge,- Ngo wa mamyao" re joe" li" nae" ngad:- Ce: mugsug' paug' mae bo: ra" lapa dao: jham re phug' cao" ko" ra" mo, wa ngaui lho" ko" ra"- ga: ta" ra". 8 Ngo- Yohan wa cegu: alhab' re myao yaug we' the' gyo: va" yaug ngad: ra". Ngo wa ai jham re bin: gyo: bin: the' myao thao re ngo re cejham qhu" byid' lo: ra" mug: lagyo: re goe; pa" nae" ein: seim" yang: mug: lagyo" nho: khyid qao: khyo gyang: goe; lo". 9 Ngadqere: yao: wa- airu: dakad' wa,- Ngo wa ni" daui daui cao: ngad mung:- ni" nho: mao:nhaung: lapa qe we' ce: mugsug' paug' mae bo: ra" mungdao: jham re phug' cao" ko" ra" mo, alhab' nho: daui daui cao: angad:- Mao"So re goe; pa" wa, ga: ngo re ta" ra". 10 Amung: yao: wa ce: mugsug' paug' mae bo: ra" lapa dao: jham re danyham: dazug' to: wa,- Pe"mung:ga"re cejham alhab' boe" li" nae" yo, khyin: wa jhao" li" ava". 11 Makhyang: yaug khag' ngad qere: makhyang" ra" lo, mau" xo' kad' na ca" ra". Masan masin" yaug khag' ngad qere: masan masin" lo, mau" xo' yang: kad' na ca" ra".Gai shab: ra" yaug khag' ngad qere: gai shab: ra" mau" xo' yang kad' na ca" ra". Gyang" Lho" yaug wa xo' yang: gyang" lho" na ca" ra"- ga: ngo re ta" ra". 12 Yesu wa Tae" gyo: wa,- Ngo wa mamyao" re joe" li" nae" ngad:- Yao: yao: kad' lo: ra" lo, mau" re cao" yang: byu yaug khao: ngo" re aphug' jhaung qhu" byid: nae" qhid' mae" ngo wa aphug' jhaung qhu" jham ci yang: joe" li" nae". 13 Ngo wa sao qhid' we' lo" thao" athao" yaug ngad mung:- aqhid we' athao" yaug ngad:. 14 Yao: bam yao" bau: qhang jham re cid' san: pye' mung: kao so' sag' gae mae" ashi: re qo" zo: nae" we' ai: kham: jham khyo" vomo" khug khyo vao ye: nae" akhang" qo" yu: ra" mo, wa ngaui lho" ko" ra". 15 Ngadqere: ai: vomo" taung gaung shad' mae wa lakha: byu qe- vha" mo,- gaung sho" nho: gintho' mau" zo" kad' mo,- byu se' mo,- sulho re goe; pa" mo,- nhad' dao: thoe lo, mau" mae mhug' mo, na: bam: ako". 16 Ngo Yesu wa phung: khug mae" naonhaung" re cegu: ta" hau" kyo: byid: nae" qhid' mae" nga" mug: lagyo: re nhao: ke' ra". Ngo wa Davi kaung mae" myhung: li" yaug ngad:- Ngo wa bao qhui: ra" bo" myhung kyi ngad:. 17 Byo we' Myhi" Sag' wa Lo ri:- ga: ta" ra". Ceru re the' gyo: yaug khag' ngad qere: Lo ri:- ga: ta" vashao:- Qid shab' ra" yaug khag' ngad qere: li" ri:- O: ra" yaug khag' ngad qere: kao so' qid re jhaung qhu" khyo" khae: yu vashao:- 18 Ngo Yohan wa ce: mugsug' paug' mae bo: ra" lapa dao: jham re gyo" yu: ra" mo, yaug khao: ngo" re jhaug' za: ta" peim" ke' ra". Dayaug yaug ce: dao: jham mae daja: ja: laung" ke' yang: ngad: re Mao"So wa ce: mugsug' paug' mae ta" to" ra" aqam" jham re yao" qobo dae mae laung: byid' li" nae". 19 Dayaug yaug ce: lapa dao: jham mae" daja: ja: re phoe' pye' yang: ngad: re Mao"So wa ce: mugsug' paug' mae tung" to" ra" kao so' sag' gae mae" ashi: we' Gyang" Lho" ra" Vomo" yao: bam qo" khae: yu nae" gae bam re yu: pye' byid' li" nae". 20 Cegu: alhab' re sagse: kham: kyo" ra" yaug wa Ngad va"- Ngo wa gaigai: yao: mamyao" re joe" li" nae" ngad:- ga: ta" ra". Airu: boe" vashao:- Asang Yesu we"- Joe" li" ri:- 21 Asang Yesu nho: nhag' myan" ra" jeju wa yaug khao: ngo" we' ngad: jo, vashao: wo".
|