Philippians
Philipi1 Khristu nho: jeim tao ngad: ra" Polu we' Timothi wa Philipi vogaung: mae na ko" ra" phung: zam: qe we' Phung: tau qe bobo yang: Yesu Khristu we' dadang: dalam: za: ngad: na ko" ra" Mao"So: byu qe alhab' re mugsug' tung" vhin: ke' ra". 2 Ngonhaung" Pho" Mao"So we' Asang Yesu Khristu wa- nhag' myan" ra" jeju we' ngaui pyo: yaug yo: ra" jeju naonhaung" re shaman" byid: vageshao: wo". 3 Naonhaung" re myid: beim: khao: ngo"- ngo wa Mao"So re jeju caung:khin" ra". 4 Naonhaung" wa Ngaui Bau" Lau Dao: Gai mau" zo" mae qhid: ra" ba na mae" ana" ba joe" sho' bobao" thaug' byid: geyang:- 5 Ngo wa naonhaung" alhab' mo; qhid' mae" akyu" mho' khao: ngo" ngaui bau" ru we' akyu" mho' ra". 6 Aimung:- naonhaung" mae ce: gai shab: ra" mau" re zaui" qhid: ra" Mao"So wa- Yesu Khristu nho: ba na joe" sho' ai: mau" zo" re bin sho' zaui" li" nae"-ein: ngo myid: lam: ra". 7 Naonhaung" wa khonhae" re: nga" nhag' lam: khug mae bo: jo; ako". Amung: ngo naonhaung" khyo re ceru: myid: lam: ru wa nga" qhid' mae" gai ang: ra" khyo ngad: ra". Pe"mung:ga"re ana" ngo thaung: laung" na: au: re we' Ngaui Bau" Lau Dao: Gai re galin: gago: ta" vha mung:- aire zhaug' tang: rumae naonhaung" wa Mao"So: yang ngore ab byid' to" ra" ce: gakai: lai ngad: ra" akho: akhang" mae naonhaung" alhab' ngo we' bovin vo; lo mo, ngad: ako". 8 Ngo wa Yesu Khristu nho: jhid'de; kao taui: myid we' naonhaung" re myid: na: ru dang: ra" khyo nga" sagse: wa Mao"So ngad: ra". 9 Naonhaung" wa gai: thao" ra" ja: re qo" ba: khyin: yu genae" qhid' mae" dangman" ra" laba lajhao we' ba: kho' ba: kin: ra" myid pha,jhi" jab byang" mung:- naonhaung" jhid' de, myid xo' yang: qi" qhang: ra" tho' je: qi" qhang: li" vashao:- ngo akyu" mho' ra". 10 Airulao"- naonhaung" wa Khristu nho: Ba Na mae qobo vhin: rumae" we' masan masin" ru alhab' mae" naonhaung" loe; beim: li" genae". 11 Naonhaung" wa phungbao bao nae" we' Mao"So re caung: khin" byid: nae" qhid' mae" Yesu Khristu za: ashi: qo" zaui: nhao: ra" dangman: gai lho" ra" gao: qam: jham byang" sheim: jo; li" genae". 12 Nga" mao:nhaung: qe we"- ngo mae boe" ra" khyo jham wa- Ngaui Bau" Lau Dao: je: byo: sin" lo" nae" khyo re gaigai: yao: bao" thaug' byid' rure ngo naonhaung" re ba nhao nug: ra". 13 Ngo wa Khristu nho: daui daui yaug ngad yang:- thaung: mae laung" jo; rure kho: kham kho" zaung" ra" gyetab tab geim" we' cetau mae na ko" ra" mo, alhab' ba: ako". 14 Airu: ngo thaung: laung" ra" mathao mae lam khug: ra" Khristan mao:nhaung: qe myo: sho' wa- Asang re lam khug: myid je yang: bo: li" mung:- yao: bam wa Mao"So: mungdao: kho" kyo" rumae re:- magyaug maci" lo:- je: vae" li" ako". 15 Yao: bam mae" damyo" wa- myid nug' ra" myid we' myan" myo: nug: ra" myid: yang Khristu nho: khyo re kho" kyo" ako". Ngadqere: damyo" wa- gyang" ra" kao bau myid we' kho" kyo" ako". 16 Ngo wa Ngaui Bau" Lau Dao: re gug: gam qhaung byid: nae" qhid' mae" Mao"So: yang san: to: yaug ngad: rure yao: bam ba geyang:- aibam wa jhid'de; myid we' kho" kyo" ako". 17 Damyo" wa- Khristu nho: khyo re nhag' lam: din: din: za: mangad: lo:- yao: yao" qhid' mae" za: so' kho' ra" myid we' kho" kyo" ako". Yao: bam wa ngo thaung: laung" na: ra" au:- ngore qug: khai: je: laug sho' kad' nae"- ga: myid: ako". 18 Airu wa akhyag mangad:- geim kad' myid we' kho" kyo" ru ngad: re ngad- nhag' lam: din: din: za: kho" kyo" ru ngad: re ngad- gai: boe" ra" khyo khe' khao: ngo" mae Khristu nho: khyo re kho" kyo" ru ngad yang: ngo ngaui bau" ra"- xo' yang: ngaui bau" na nae". 19 Pe"mung:ga"re naonhaung" akyu" mho' dao: mathao: yang re:- Khristu Yesu nho: Byo: yang bao" thaug' byid' ra" khyo" yang re:- ngo loe; beim: na: rure ngo ba yang: ngad: ra". 20 Nga" kao bau: ru we' myid: lao" ru wa- ngo wa vin vo; ang: ra" ngoyao" qo re vin vo' rumae qho' maphau: nae" we' khonhae" re: ngad: ru we' dakhyo:- ana" re: je yang:- ngo wa kaoso' daui ngadqere:- shid ngadqere:- nga" dao: thoe lo, mau" alhab' yang Khristu re phug' te' nga: yhe' byid: nae" qhid' mae" mazag mavae myid bo nae" ru ngad: ra". 21 Ta" gelang: ga" re kaoso' daui: ga" ru wa- nga" qhid' mae" wa- Khristu ngad: ra". Airumung: shid: ga"ru wa nga" qhid' mae" je: akyu" bo: li" nae". 22 Ngadqere:- ngo wa kaoso' xo' daui: na: ra" khyo" yang mau" zo" je: qo" zaui: so: nae" ngad: re wa kaoso' daui: ru we' shid: ru shid' ja: mae" khoja: re khyin: yu nae" rure ngo khyag' maba ngad: ra". 23 Ngo wa nhag' lam: shid' gao boe" jo; ra"- ngo wa ce: kaoso' daui: na: ra" qae" mae" gao: mung: Khristu we' daga" gyai na nug: ra". Airu wa je: gai: ru ngad: ra". 24 Ngadqere: naonhaung" akyu" qhid' mae" ngo kaoso' daui: na shinae" ru wa- je yang: akhyag: ra". 25 Ceru re ngo nyang" za: ba mung:- ngo xo' yang: dam: na nae" rure ngo ba:- naonhaung" qi" qhang: li" ru we' lam khug: rumae ngaui bau" rure myo" laug: li" nhao nae" qhid' mae" naonhaung" we' daga" xo' yang: ngo dam: na shinae". 26 Airumung: ngo naonhaung" jhao" dam: joe" li" lao"- Khristu we' naonhaung" dadang: dalam: za: doe; rumae" nga" khyo we' sin: mung:- phug nae" akhyo naonhaung" je: qo" li" genae". 27 Ana" akhyag: ru wa- Khristu nho: Ngaui Bau" Lau dao: we' dakhyo:- naonhaung" kaoso' daui nae" ru ngad: ra". Airumung: ngo naonhaung" re li" qo" qhug' ngadqere:- maqo" li" qhug' ngadqere:- naonhaung" wa myid: qang: ru daja: mae za:- kao bau myid o: ru daja: za: we' naonhaung" tang za: ye; jo, mung:- qam: ke' yang: myid: kao bau: ra" daja: za:- ai: Ngaui Bau" Lau Dao: we' sin" ra" lam khug: ra" gyekhe' na ko" rure ngo the' gyo" ra". 28 Naonhaung" gyevo qere dagyaug ge,- khonhae" re: mazag mavae na ge,- ceru wa- yao: bam wa seim" nae" ngad: ru we' naonhaung" wa aung doe, nae" ngad: rure sagse: qhu" byid' ra". Pe"mung:ga"re naonhaung" re aung doe, nhao: ra" yaug wa Mao"So ngad: ra". 29 Pe"mung:ga"re naonhaung" wa Khristu re lam khug: ra" khyo" za: mangad:- yao" qhid' mae" khyag' qhui: ru kham zo" ra" khyo" re:- Khristu re caung da" byid: nae" qhid' mae" gakai: lai: ra" agu re qo" kham: yu: ako". 30 Ana" naonhaung" wa gyekhe' poe mae ngo we' daga" qo" bobo: avako". Ai: gyekhe' poe wa qhid' phyao: ngo gyekhe' na: au: naonhaung" the' myao mung:- ana" re: gyekhe' na: rure naonhaung" the' myao: ra" gyekhe' poe yao: ngad: ra". 1 Naonhaung" Khristu we' kaoso' daui: ru wa naonhaung" re qam: bo: li" nhao mung:- yao" jhid'de; myid wa naonhaung" re nhag' tang" byid' ra". Naonhaung" wa ai: Byo we' qo" zam" khug gemung:- naonhaung" wa yao: cao: jho" nhag' khyag' shono myid bo: ako". 2 Airumung:- naonhaung" myid: ru daja: za:- yao: cao: jho" jhid'de; ra" myid daja: za: we' nhag' lam: myid jho" qhan" ra" khyo" yang- ngore jab byang" sho' ngaui bau: nhao gela,- ein: ngo naonhaung" re jhan" ke' ra". 3 Yao: yao" qhid' mae" za: so' kho' ra" myid- mangad: lao"- langa: kad' yang: phug nug: ra" myid we' pe" ja: re: dakad' ge,- Yao: cao: nhag' lam: jho" nyham: khyo" mung:- byin cao: qere khonhae" re: yao: yao: tho' je: ra" yaug ngad: ra" ein: myid: yu ge,. 4 Yao: yao" qhid' mae" za: akyu" maqho lo:- yao: cao: dayaug we' dayaug: akyu" qhid' mae" qho ge,- 5 Yesu Khristu mae bo: ra" myid wa naonhaung" mae re: bo nhao ge,. 6 Yao: wa Mao"So: ave, akhyao khonhae" re: bo: jo, yaug ngadqere:- maqad maqui" deim" zag: ra" khyo" yao: wa Mao"So we' daqi" za: boe" nae" qhid' mae" qam: make' ngad: ra". 7 Airu: kad' nae" atha"- yao: wa yao: yao" myid re nyham: khyo" yang: yao: qo" ra" gu: alhab' re to" pye' mung:- daui daui yaug: nho: ave, akhyao re kham: yu: ra". Yao: wa xao su byu we' dau: li" mung:- xao su byu: ave, akhyao re kham: yu: ra". 8 Yao: wa yao: yao" gaung re nyham: khyo" pye' mung:- shid nae" rumae joe" sho' mho dao: gyo" ra". Pyao: zang dao mae shid sho' mho dao: tae" gyo" ra". 9 Ce: mathao mae Mao"So wa- yao: re myhao: thao" ra" jo, qo joe" sho' tau: to' byid: mung:- Mang alhab' tho' qi" qhang: ra" mang a re ab byid' ra". 10 Airumung:- Mug:gaung- myidgaung we' myidgaung mae na: ra" mo, alhab' wa- Khristu nho: mang a re phug' myao: goe; pa" mung:- 11 Yesu Khristu wa Asang ngad: ra"- ga: de: de: za: ta" hau" kyo: gemung:- Pho" Mao"So: phungbao re bao nhao: li" genae". 12 Airu: mung:- jhid'de; ra" ba nam qe we"- ngo naonhaung" we' daga" na: au:- nga" mho dao: re naonhaung" khonhae" re: tae" gyo: ko" ru we' dakhyo:- ana" ngo naonhaung" we' va" kyo: na: au: re: nga" mho dao: re naonhaung" tae" gyo: nae" gyai akhyag: ra". 13 Mao"So yao"myid o: ra" khyo re phug' cao" nug: ra" myid we' qo" phug' cao" nae" qam: so' Mao"So: yang khonhae" re: ke' byid' na: ruyang- naonhaung" wa khyad' yu: rure jab byang" sho' qo" kham: yu nae" qhid' mae" gyaug: nin" ra" myid we' zaui: so" na ge,- 14 Ja: khao: ngo" re majho" nyhung- majho" ngag lo: zaui: so: ge,- 15 airu: lao"- naonhaung" wa- makhyang: mashab: akyang qeim qobo shad' lhoe" ra" mo, na: ra" ce: mug:myid dao mae Mao"So: jab byang" ra" zo: dau qe khyo"- qobo vhin nae" made; ru we' yaung" shab: ra" mo, ngad: li" genae". Amung: naonhaung" wa yao: bam re kaoso' mungdao: kho" kyo: byid: zo" re"- mug:gaung mae kyi bao: jo; ru we' dakhyo:- yao: bam: phaung gaung: mae naonhaung" bao byid: ca" ko" ra". 16 Naonhaung" airu: kad' ko" ngad: re wa- ngo qam: ke' zaui: so" lo: ra" mau" zo" alhab' wa- aje amyid mangad' rure qhu" byid' li" nae" ngad: ruyang- Khristu joe" li" ra" Ba Na mae ngo wa naonhaung" mathao mae phug nae" akhyo qo" li" nae". 17 Naonhaung" nho: lam khug: myid: yang Mao"So re qhaug' byid' ra" ngaui" xeim: dao mae nga" kaoso' sa: re vhe' sheim: nae" ga: ngadqere: ngo wa ngaui bau" ra". Ngo we' daga" naonhaung" alhab' mo, rere: bobau: nhao nug: ra". 18 Ai we' dakhyo: naonhaung" re: ngaui bau: ge,- amung: naonhaung" we' daga" ngo rere: ngaui bau: nhao gela,. 19 Asang myid: o yang: ngad: re ngo wa naonhaung" lau thoe re the' gyo: yang:- qam: qo" yu nae" qhid' mae" mataung" myao" re Timothi re naonhaung" jhao" qo" nhao: ke' li" nae"- ein: ngo myid: lao" na:. 20 Timothi dayaug za: ngo we' nhag' lam: jho" zhaung: yaug ngad mung:- yao: wa gaigai: yao: naonhaung" gai nae" rure myid byid' na yaug ngad: ra". 21 Gaje qe yaug khao: ngo" wa Khristu we' sin" ra" khyo mae mangad:- yao: yao: we' sin" ra" khyo mae za:- gaung yug sang: kho" ako". 22 Timothi wa mau" zaui: khoqhi" kyid yaug ngad: rure we' yao: we' ngo wa yao: pho" we' yao: zo: ru: Ngaui Bau" Lau Dao: pyo: ra" mau" zo" mae daga" za: khoru: zaui: so" lo: rure naonhaung" yao: ba: ako". 23 Airumung: nga" khyo we' sin: yang:- khoru: ngad nae" rure ba lao" jao"- yao: re naonhaung" jhao" ngo qo" nhao: ke' li" nae"- ein:- myid: lao" na:. 24 Amung:- ngoyao" gaung yao: re:- mataung" myao" re naonhaung" jhao" qo" joe" li" nae"- ein: Asang: khug mae ngo myid: lam: na:. 25 Nga" mau" zaui: cao:- ngo we' daga" gyekhe' lo: ra" yaug- naonhaung" lagyo: khyo" ngore caung da" byid: yaug ngad: ra" naonhaung" mao:nhaung: pho" Epaphrodi re naonhaung" jhao" nhao: ke' byid: ca" ra"- ein: ngo myid: to: va". 26 Yao: wa naonhaung" alhab' mo, we' gyai jho" myao nug: na: ra". Yao: no: ra" lau thoe re naonhaung" the' gyo: vako" ruyang yao: gyai myid myo" na: ra". 27 Dang za: yao: wa- alaug shid sho' no: pye' ava". Ngadqere: Mao"So wa- yao: re nhag' khyag' byid' ra". Mao"So wa yao: re za: nhag' khyag' byid' ru mangad:- ngo rere: nhag' khyag' mung: je: qi" ra" kaug' qhui: ru ngore maqhug' nhao ngad: ra". 28 Airumung: yao: re naonhaung" dam: myao gelao"- ngaui bau: genae" qhid' mae" we' nga" nho: kaug' qhui: ra" khyo re: baui" byaug vashao:- yao: re naonhaung" jhao" nhao: ke' byid: nae" nga" aung khug mae je yang: myid: kao bau: na:. 29 Amung: naonhaung" wa yao: re- Asang: khug mae mao:nhaung: dayaug we' dakhyo:- ngaui ngaui bau: bau: za: lham: khae: yu ge,- airu" mo, re phug' myao: ge,- 30 Pe"mung:ga"re yao: wa naonhaung" yao" gaung: yang maqo" bao" thaug' byid' rure ngo re qo" bao" thaug' byid: nae" qhid' mae" yao" kaoso' re dan: pye' mung:- Khristu nho: mau" zo" qhid' mae" alaug laug shid sho' zaui: so" lo: ava". 1 Nga" mao:nhaung: qe we"- dao: pin" khyo" ta" nae"- Asang we' dadang: dalam: doe; rumae ngaui bau: ge,- azhao ngo bin: tung" ke' va" khyo re za:- dam: paug' yang: tung" ke' nae" ngo pe" qo la: thoe magyo:- naonhaung" qhid' mae" je yang: gug: gam: ra" khyo ngad: ra". 2 Makhyang" ra" lo, mau" kad' mo, rere:- ai: lakha: byu qere re:- gaung khyao re phyid' lhai: ca"- ga: qam: ke' ta" ra" mo, rere:- lha" ge,. 3 Dangman" ra" au: qid lhai: khyo re kham: yu va" mo, wa- yao: bam mangad:- ngonhaung" lam: angad: ra". Pe"mung:ga"re ngonhaung" wa- Byo khyo" yang Mao"So re caung:pa" mung:- Yesu Khristu we' dadang: dalam: za: kaoso' daui yang: ngaui bau" ra" mo, ngad: ra". Ngonhaung" wa- adao shad' mae" ali aso: re khug ngha: ra" mo, mangad:. 4 Airu" ra" ja: jham re ngo khug ngha ca" yang: ngad: re wa ngo khug ngha nae" qo" ra". Adao shad' mae" ali aso: jham re qo" khug ngha:- ga: myid: ra" byu dayaug yaug na yang: ngad: re wa- ngo wa airu: myid nae" akhyo je: qo" ra". 5 Ngo wa khau: li" thao dalaban ngad: au:- au: qid lhai: khyo kham: yu: lo yaug ngad:. Ngo wa Israel byumyu"- Benyamin kaung mae" Hebre sa: gyang" ngad: ra" myhi" pho" qemae" khau: li" ra" yaug ngad:- Kham" to" ra" Tarha" re phug' cao" ru we' sin: yang: ta" re ngo wa Pharishe dayaug ngad:. 6 Lam khug: khyo re gyai nhag' lam: to" yaug ngad mung:- Phung: re yhin" lo yaug ngad:. Kham" to" ra" amyin" dao: jham re phug' cao" ra" khyo"- din:man" ru qhug' yu nae"- aga" re wa ngo wa pe" qobo made, yaug ngad: ra". 7 Ngadqere: nga" qhid' mae" gau pai: ein: khyo" ngo qo" sun" yu: ra" ai: gu: alhab' re ana" wa- Khristu mathao mae aseim" khyo" ngo myid: yu: ra". 8 Aigu: za: mangad:- nga" Asang Yesu Khristu re qo" ba qo" se" ru wa- ja: khao: ngo" tho' mae" je yang: phug' de; ru ngad mung:- ja: khao: ngo" re aseim" khyo" ngo myid: ru ngad: ra". Pe"mung:ga"re- yao" mathao mae ngo wa ja: khao: ngo" re to" pye' va"- ngo wa Khristu re qo" yu nae" qhid' mae" we' yao: we' dadang: dalam: za: jab byang" sho' qo" doe, nae" qhid' mae" ai: gu: alhab' re basad ruza: ngo myid: pye' ra". 9 Ngo wa Kham" To" ra" Tarha" re phug' cao" ra" khyo" yang din:man" rure maqhug' kham: yu lo:ngad: ra". Ana" ngo wa ai: din:man" ru re Khristu re lam khug: ra" khyo" yang za:- qo" kham: yu: ra". Ai: din:man" rure qo" kham: yu: ru wa- Mao"So: yang byid' ra" je" ju" ngad mung:- lam khug: ra" myid mae aqao: to" ru ngad: ra". 10 Ngo o: ra" khyo ajhaung wa ngoyao" gaung yao: shid: rumae" kaoso' daui: ra" khyo kaoso' daui nhao: ru qhug' nae" rure myid: lao" zo" re" Khristu re ba nae"- yao" shid: rumae" dam: daui: to: li" ra" qam: so' re ba: yu nae"- yao" dayin dayo: kham zo" rure bokham zo: nae" we' yao" shid kham" ru we' dakhyo:- boqo" shid kham: nae" ru jham ngad: ra". 12 Ngo wa aung doe, va"-jab byang" va"-ein: mata" nug- ngadqere: Yesu Khristu wa- yao" qhid' mae" boe" nae" ngore aung: yu va" ruyang ai: jhaung qhu" re qo" zaui" yu sho' ngo qam: ke' na:. 13 Nga" mao:nhaung: qe we"- ngo wa aire qo" yu va"- ein: mamyid. Ngadqere: ngo kad' ru daja: wa nga" nhaung thao" mae" rure to" myhid' pye' to: co' mung:- qhid' au: mae jo; ra" ja: re joe" myhi sho' qam: bo: thao" mae" phin: yang: qam: ke' na:. 14 Airumung: ngo wa mug:gaung: mung"dan: mae kaoso' qo" daui nae" qhid' mae" Yesu Khristu khyo" yang Mao"So khai: yu: ra" ai: jhaung qhu" re qo" yu sho' bin: zang shad' khyo myo,khung: qang yang: din: din: tao" ra". 15 Byo we' sin: yang: zoqao" ngad va" mo, naonhaung" alhab' wa ceru" ra" myid bo qo: ra". Ngadqere: naonhaung" mae" damyo" wa shai" ra" myid bo yang: ngad: re wa- Mao"So wa ce: khyo we' sin: yang:- naonhaung" re sho' kyo" li" nae". 16 Airu: ngad sho' ngadqere:- ngonhaung" wa ana" ba joe" sho' bin: cao" lo va" ra" azhao" we' dakhyo:- qhid' au: khyo xo' ye: gelang:. 17 Nga" mao:nhaung: qe we"- nga" ave, re xo' yang: qu" yu ge,- Ngonhaung" qhu" byid' ra" ave, gai re cao" ra" mo, re qu" xam" yu ge,- 18 ngo wa ce: khyo re qhid' phyao: myo: sho' lhang naonhaung" re ta" qu" va". Ngo wa ana" re: ngug byid we' dam: paug' ta" ra". Khristu nho: pyao: zang dao mae shid kham: rure gye kad' mung: kaoso' daui: ra" mo, myo: sho' na: ako". 19 Yao: bam: so wa yao: bam: gaung sho: myid o kao bau: ru ngad geyang: yao: bam wa myiqid tham: mae jeim" lo" li" genae". Yao: bam wa qho' phau: ang: ra" ja: mae phug: ako". Yao: bam wa ce: mug:myid we' sin" ra" ja: jham re za: myid: ako". 20 Ngonhaung" kam" wa mug: khaung: mung"dan: nho: mung" byu qe ngad mung:- mug:gaung dao mae" ngonhaung" nho: khyad' yu: Asang ngad: ra" Asang Yesu Khristu joe" li" nae" rure kao bau taung" lao" na: ru ngad: ra". 21 Khristu wa ja: cao jab alhab' re yao: eib: ra" qao: mae qo" to" pye' ra" qam: so' khyo" yang qam: nang: mung: shid ba: ra" ngonhaung" nho: gaung khyao jham re phungbao byang" jo; ra" yao" gaung khyao we' dau sho' tha" pye' byid' li" nae". 1 Airumung: nga" mao:nhaung: qe we"- ngo wa naonhaung" re gyai jhid'de; mung:- gyai myid: lhe"- Naonhaung" wa ngore gyai ngaui bau: nhao gemung:- ngo wa naonhaung" mathao mae gyai phug: ra". Amung: jhid'de; ra" mao: nhaung: qe we"- Naonhaung" wa Asang: khug mae kaoso' daui: rumae tang za: ye; jo, ang: ako". 2 Eodia we' Suntuki tao we"- Asang mae yao: bai: yao: nhaung: we' dakhyo: nhag' lam: jho" vang" sho' qam: ke' genae" qhid' mae" jeju khyo" ngo mho' ke' ra". 3 Amung: nga" mau" vin cao: ngad: ra" nao re:- ai: myiqe: shid' tao re jho" vang" nae" khyo re bao" thaug' byid: wa,. Pe"mung:ga"re Kelemen we' Mao"So: kaoso' mugsug' mae japhin: bo: ra" nga" mau" vin cao: gatau alhab' mo, we' daga" Ngaui Bau" Lau Dao: re ta" hau" ra" mau" zo" mae ngo we' daga" qam: ke' vako" ra" shid' tao ngad: ako". 4 Asang mae dadang: dalam: za: khonhae" re: ngaui bau" na vageshao:- ngo dam: ta" ra"- ngaui bau: ge,. 5 Yaug khao: ngo" re nau" nhae" ra" myid qhu" byid: ge,- Asang wa joe" li" na: ava". 6 Pe"ja" khyo rere: damyid: ci" ge,- khyo khe' khao: ngo" mae khonhae" re: jeju caung:khin" zo" re" akyu" mho' mung:- naonhaung" qo ca" ra" ja: Mao"So re mho' yao ge,. 7 Ailao"- xao su byu qe ba: gyo" ra" myid nyan: tho' je: ra" Mao"So: ngaui pyo: yaug yo: ru wa- naonhaung" aung khug nhag' lam: we' myid: ra" khyo re Khristu khug mae gug: gam byid' li" nae". 8 Nga" mao:nhaung: qe we"- dao: pin" khyo" ta" re- gai shab: ra" ja: jham we' caung:khin" man: qi" ra" ja: jham ngad: ra" dangman" ru- phug' de; ru- jo: ru- gyang" san: ru- jhid'de; taung" ru we' phug' myao: tho' ru jham re naonhaung" aung khug mae ke' to: ge,- 9 ngo mae" naonhaung" zhao: yu mung:- khae: yu vako" ra" nga" dao: thoe jham we' lo, mau" jham re lo, joe" kad' cao" ge,- ngonhaung" re ngaui pyo: yaug yo: ru byid' ra" Mao"So wa naonhaung" we' daga" na: jo, vashao: wo". 10 Ayo, cemyhao" myao" thao re naonhaung" wa- nga" qhid' mae" khoqhi" myid: gaung yug: na: rure qhu" byid: nae" agu dalhang dam: qo" yu ko" ruyang ngo wa Asang: khug mae gyai ngaui bau" ra". Naonhaung" nga" qhid' mae" mamyid: ci" ko" ngad: ra" ein: ngo ta" ru mangad:- Naonhaung" aire qhu" byid: nae" agu maqo" ko" rure ngo ta" ru ngad: ra". 11 Naonhaung" ngore mageim: qu" to: ko" ra" ein:- ngo myid yang: cedao: re ta" ru mangad:- pe"mung:ga"re ngo wa ngoyao: qo" ra" gu: mae nhag' dag yang: ba: na nae" rure zhao: yu: to: va". 12 Myaung sho" rure re: ngo ba: ra"- magan: mago" qo" rure re: ngo ba:- ngo wa- vae: gyi: ngadqere:- myaung sho: ngadqere:- khoyo, khotau mae na na nhag' ba: dag: yu nae" khyo re ngo zhao: yu: to: va". 13 Khristu yang ngore byid' ra" qam: so' khyo" yang ngo wa- boe" jo; ra" ayaug: ja: khao: ngo" re qo" zang: qhao" nae" qam: so' qo" ra". 14 Ngadqere: ngo qug: khai: qhug' au: naonhaung" ngore bao" thaug' byid: ko" ru wa- gai shab: ra" lo, mau" kad' ru ngad: ra". 15 Ngadqere: Philipi bao: we"- ngo wa Makedoni mung" mae" thug' mung: Lau Dao: Gai re kho" qhid: li" ra" au:- naonhaung" Philipi Phung: dalam: za: ngore bao" thaug' byid: ko" ru we' nga" nho: seim" ru jham we' myad: ru jham mae naonhaung" za: ngo we' daga" bokhae: yu vako" rure naonhaung" yao: ba gau ngad: ako". 16 Thesaloni vogaung: mae na: au:- ngo qo ca" ra" gu: re naonhaung" wa dalhang za: mangad:- bao" thaug' ru ngore vhin: ke' byid' ako". 17 Ngo wa ai: jhaung qhu" jham re za: khae: yu nug yang: ta" ru mangad:- Naonhaung" vin vo; lo: ra" gai: ra" mau" zo" japhin: mae je: gai: ra" lo, mau" laung" li" ra" khyo re myao nug yang: ta" ru ngad: ra". 18 Ailao"- naonhaung" ngore vhin: ke' byid' ra" Alu: jhaung qhu" jham alhab' re ngo qo" khae: yu va" khyo re cemae botung" ke' ra". Aijham wa- magan: mago" ngad: ava"- naonhaung" jhaung qhu" jham alhab' re Epaphrodi wa ngojhao" vin: joe" li" byid: mung:- ana" ngo wa qo ca" gu: alhab' qo" va". Ai: jhaung qhu" jham wa sheim nae pyo" ra" xeim:- Mao"So khae: yu nug: ru we' ngaui: ra" xeim: we' dakhyo: ngad: ra". 19 Airumung: nga" Mao"So wa magan: mago" jo, nho" qo" yaug ngad: ru we' dakhyo:- Yesu Khristu khyo" yang naonhaung" qo ca" ra" gu: alhab' re byid' li" nae". 20 Ngonhaung" Pho"- ngad: ra" Mao"So wa apyad ato khonhae" re: phungbao bao: jo, vashao: wo". Amen. 21 Yesu Khristu yang sang: ra" mo, ngad ko" ra" Mao"So: byu qe yaug khao: ngo" re au" ke' ra". Cemae ngo we' daga" na ko" ra" mao:nhaung: qe wa- naonhaung: re au" ke' ako". 22 Cemae"- Mao"So: byu qe alhab' wa naonhaung" re au" ke' ako"- je yang: khosin" pho" nho: kho:kham kho" mae na ko" ra" Mao"So: byu qe wa naonhaung" re au" ke' ako". 23 Asang Yesu Khristu nho: nhag' myan" ra" jeju wa naonhaung" alhab' we' daga" ngad: jo, vashao: wo".
|