Matthew
Mathe1 Ceru wa Abraham we' Davi myid:zo: Yesu Khristu byuxag' ngad: ra". 2 Abraham wa Isag re- Isag wa Yaku re khau mung:- Yaku wa Yuda tao ho' re khau: ke' ra". 3 Yuda myi: Tama mae" Pere we' Zera tao re khau: ra". Pere wa Hezrum re khau: mung Hezrum wa- Aram re khau: ra". 4 Aram wa Amminadab re- Amminadab wa Nashon re- Nashon wa Salmon re khau: ra". 5 Salmon myi: Rahab kham: mae" Bua re khau: ra". Bua myi: Rutha mae" Obed re khau mung:- Obed wa Yese re khau: ra". 6 Yese wa Davi kho:kham re khau: ra". Davi wa Uria yham sang myhi" mae" Sholamon re khau: ra". 7 Sholamon wa Rehoboam re- Rehoboam wa Abiya re- Abiya wa Asab re khau mung: Asab wa Yehoshaphad re khau: ra". 8 Yehoshaphad wa Yoram re- Yoram wa Uzia re- Uzia wa Yotham re khau: ra". 9 Yotham wa Ahad re khau mung:- Ahad wa Hezekia re khau: ra". 10 Hezekia wa Manashe re- Manashe wa- Amon re- Amon wa Yoshia re khau: ra". 11 Babelon mung" khyo jeim kad' nae" taung" jhui" lo" ra" ayo, mae Yoshia wa Yehoiakhin tao ho' re khau: ra". 12 Babelon mung" khyo jeim kad' nae" taung" jhui" lo" thao re Yehoiakhin wa Shealtie re- wa Zerubabela re- wa khau: ra". 13 Zerubabela wa Abiud re- Abiud wa Eliakim re- Eliakim wa Azo re khau: ra". 14 Azo wa Zadog re- Zadog wa Akhim re- Akhim wa Eliu re khau: ra". 15 Eliu wa Eleaza re- Eleaza wa Mathan re- Mathan wa Yaku re khau: ra". 16 Yaku wa Mari yham sang pho" Yoseb re khau: ra". Mari wa Khristu ga: mhang" ra" Yesu yao: myhi" ngad: ra". 17 Aimung: Abraham mae" Davi kho:kham pyad joe" sho' byuxag' daxe: byid xag'- Davi kho:kham mae" Babelon mung" khyo jeim kad' nae" taung" jhui" lo" ra" pyad joe" sho' byuxag' daxe: byid xag'- Babelon mung" khyo jeim kad' nae" taung" jhui" lo" ra" pyad mae" Meshia pyad joe" sho' byuxag' daxe: byid xag' ngad: ra". 18 Ana" Yesu khau: li" ra" khyo wa ceru: ngad: ra". Yao: myhi" Mari wa Yoseb: yang lo,xo' yu nae" mho' to" ra". Yao: shid' zo: daga" mazam" na shi: re Mari wa Gyang"lho" Byo: yang gaung la" li" ra". 19 Yao" yham sang pho" Yoseb wa din:man" ra" byu dayaug ngad mung: Mari re qho' maphyo' nhao nug yang: yao: re sae za: kao" pye' nae" myid: na: ra". 20 Ngadqere: yao: cekhyo re myid qu" na: ra" au: Qu" wa,- Asang: Mug: Lagyo: dayaug yab mo, mae yao: re li" qhu" byid: mung:- Davi yao: zo: Yoseb we"- Mari re lo,xo' yu nae" dagyaug, wa,- pe"mung:ga"re yao: gaung la" li" ru wa Gyang" Lho" Byo: yang ngad: ra". 21 Amung: yao: wa yauggai nau" khau: li" nae" ngad:- nao wa Yao: re Yesu ein: mhang" byid: zai ngad: ra". Pe"mung:ga"re yao: wa- yao" amyu" re yao: bam: qobo mae" khyad' yu: li" nae"- ga: ta" ra". 22 Ceru alhab' wa lapa: nhad' khyo" Asang ta" to" ra" dao: jab byang: li" nae" qhid' mae" boe" lo: ra". 23 Ai: Lapa dao: wa Qu" wa,- Zomyi: gyang" dayaug wa gaung la" li" mung: yauggai nau" khau: li" nae" ngad:- yao: re Emanuela ga: mhang" li" genae" ngad: ra". (Emanuela ga" ru wa Mao"So ngonhaung" we' daga" na: ga" ru ngad: ra".) 24 Yoseb yab: myhid' jo; rumae" so" li" mung:- Asang: Mug:Lagyo" yang Yao: re amyin" byid' ru we' dakhyo: kad' mung: Mari re lo,xo' yu: ra". 25 Ngadqere: yauggai zo: re makhau khau wa Mari we' mazam" na ngad: ra". Amung: Yoseb wa ai: yauggai zo: re Yesu ga: mhang" byid' ra". 1 Ana"- Herod kho:kham ban: Yuda mung" mae" Betlehem vogaung: mae Yesu bin: khau: li" thao- Qu" wa, ba thug' shad' mae" pha,jhi" bo: ra" mo, Yerusalem khyo joe" ye: mung:- 2 Khau: li" va" Yuda kho:kham wa khotau mae ngad: ra" i? Ba thug'shad' mung"dan: mae yao" kyi re ngonhaung" the' myao yang: yao: re caung:pa" nae" qhid' mae" joe" li" ru ngad: ga: myid' ako". 3 Herod kho:kham wa ai: dao: re the' gyo: lao"- yao: we' Yerusalem byu qe yaug khao: ngo" sang: gyo" kho" ako". 4 Amung: Herod' kho:kham wa khinjaung qi: qe we' tung" pho" qere khai: zhang" yu mung: Meshia wa khotau mae khau: li" zai ngad: i? ga: yao: bam re myid' ra". 5 Yao: bam wa yao: re- Yuda mung" mae" Betlehem vogaung: mae khau: li" zai ngad: ra". Pe"mung:ga"re lapa pho" yang ceru: tung" to" ra". 6 Yuda mung" mae" Betlehem vogaung: we"- Nao wa Yuda mung" mae" vogaung: jham mae" ngai: thao" ra" mageim" vogaung: mangad:- Nga" amyu" Israel byumyu" re au: jhui" she nae" zug: wa nao mae" thug' li" zai ngad:- ga: bo: ra" ga: ta" ako". 7 Alao" Herod wa pha,jhi" bo: ra" mo, re sae za: khai: yu mung: ai: kyi thug' li" ra" ayo, re jhaug' za: yao: bam mae" myid' yu mung: yang:- 8 Yao: wa yao: bam re- Naonhaung" ye" lo" mung: ai: zoshao re nyang" za: yeqho ge,- naonhaung" ai zoshao re yeqho: myao gelao"- ngore: yao: re qo" goe; pa" nae" qhid' mae" ngore lodam: kyo: gela, ga: ta" mung: yao: bam re Betlehem khyo ye: nhao: ke' ra". 9 Yao: bam wa kho:kham dao: re bin: gyo" yu lao" thug' ye" lo" ko" ra". Alao" qu" wa- ba thug' shad' mae" mung"dan: mae yao: bam myao: ra" ai: kyi re yao: bam dam: myao lao" yao: bam wa matho' ta" lo: sho' gyai ngaui bau" ako". 10 Ai: kyi wa yao: bam: qhid' au: mae ye" lo" mung:- ai: zoshao na: ra" jo, qo dao mae vang" vang" lo" thang: ra". 11 Alao" Yao: bam yham khug khyo vao ye" lo" ko" re zoshao we' yao: myhi" Mari re yao: bam yemyao gelao" pad' thaug' thaug' mung: yao: re goe; pa" ko" ra". Yao: bam: jo,nho" thaung phung" mung: yang: qhang- Lo: ban:- Mura: jhaung qhu" jham yao: re phoe' byid' ako". 12 Herod kho:kham jhao" madam: tug' lo" nae" qhid' mae" Mao"So wa yao: bam re yab mo, mae ta" peim: byid' ra". Amung: yao: bam wa- khyo gagau: khyo" yao: bam: mung" khyo dam: tug' lo" ako". 13 Pha,jhi" bo: ra" mo, phao: lo" byaug gethao re- qu" wa,- Asang: Mug: Lagyo: dayaug yab mo, mae Yoseb jhao" thug' li" mung:- ai: zoshao ma: re jhui: mung: Egutu mung" khyo phao: ye: wa,- ngo nao re madam: khai khai wa aimae na: jo, wa,- pe"mung:ga"re Herod wa zoshao re se' pye' nae" qhid' mae" qho: li" nae"- ga: ta" ra". 14 Alao" Yoseb wa to" mung: yang: zoshao ma: re jhui: mung: myi" re Egutu mung" khyo phao: ye" lo" ra". Amung: ai: mae Herod shid sho' yena: ra". 15 Ceru wa- Nga" zo: re ngo Egutu mung" mae" khai: jhui" yu va"- ga: lapa: nhad' thoe khyo" ai: Asang ta" to" ru jab byang" li" nae" qhid' mae" boe" li" ru ngad: ra". 16 Herod wa Pha,jhi" bo: ra" mo; yang yao: re mhug' pyag' to: co' vako" rure beim: lao" nhag' gyai yo" ra". Amung: yao: wa pha,jhi" bo: ra" mo, mae" myid' yu: ra" ayo, re tau" qu" mung" Betlehem vogaung: mae" we' avai: ayae mae" vogaung: jham mae na: ra" shid' zin we' shid' zin: o mae" zoshao yauggai nau" qe alhab' re cao" se' pye' nhao: ra". 17 Aimung:- Rama jo, qo mae gyai nhag' kaug' nhag' qhui: ru we' kaug' ngug: ra" thoe re the' gyo: va". Rakhela wa yao: zo: qere ngug: na: ra". Yao: zo: bam mana lo: gemung: yang: yao: re nhag' maqo" tang" byid: lo: ga:- 18 Lapa Yeremia yang ta" to" ra" dao: jab byang" lo: ra". 19 Herod shid: byaug thao re Qu" ge,- Asang: mug: lagyo: dayaug wa Egutu mung" mae yab mo, mae Yoseb jhao" thug' li" mung:- 20 Yoseb re To" wa,- ai: zoshao ma: re jhui: mung: Israel mung" khyo dam: tug' lo" wa, Pe"mung:ga"re ai: zoshao re se' pye' nug: ra" mo, alhab' shid: byaug vako" ra"- ga: ta" ra". 21 Alao" Yoseb wa to" mung:- zoshao ma: re jhui: yang: Israel mung" khyo dam: tug' lo" ra". 22 Ngadqere: Yuda mung" mae" Akelau wa yao: pho" Herod khu mae kho:kham kad' mung: eib: na: ga" rure Yoseb the' gyo: lao"- yao: wa ai: khyo vao ye: nae" gyaug: ra". Alao" yab mo, mae Asang: mug: lagyo: wa yao: re ta" peim: byid: yang: Galile mung" khyo ye" lo" mung: Nazared ga: mang: ra" vogaung mae yena: ra". 23 Airumung: yao: re Nazared Byu ga: mhang" li" genae" ga:- lapa qeyang ta" to" ra" dao: jab byang" lo: ra". 1 Ai: ayo, mae qid nyhab' byid: yaug Yohan wa Yuda mung" mae" din"pyad' yo khyo joe" li" mung:- 2 Myid tha" ge,- pe"mung:ga"re mug:gaung: mung"dan: wa jhao" li" na: ava"- ga: kho" kyo" na: ra". 3 Yohan wa Lapa Esaia yang- Din" pyad' yo mae hug' na: ra" thoe wa Asang: khyo re nyhang" to: ge,- yao" khyo re din: za: nyhang" jhao" ge, ga: ta" ra" yaug ngad: ra". 4 Amung: Yohan wa gola:u mug' yang qo; ra" mai bau: re ve, mung: sho:qid phyid' cui: cui" ci: ra". Yao" zo:ve wa khyag' phaung" we' seyo: byoyhid ngad: ra". 5 Yerusalem mae na: ra" mo,- Yuda mung" geim" mae" mo, we' Yodan gyaung: lhang" mae" mo,byu qe alhab' Yohan jhao" ye: mung:- 6 Yao: bam: qobo jham yelhang: yu: ru we' Yohan: lo, mae Yodan gyaung: mae qid nyhab' kham: yu: ako". 7 Yohan wa Pharishe qe we' Saduke qe myo: sho' mo, qid nyhab' kham: yu nae" ga: li" ko" rure myao lao"- yao: bam re- Lhao maui amyu" qe we"- Joe" lo: na: ra" Mao"So nhag' yo" rumae" qo" phao: loe, nae" naonhaung" re khag' yang li" ta" peim: byid: ko" i? 8 Amung: myid tha" ru we' man: qi" ra" ashi: zaui: ge,- 9 Abraham wa naonhaung" yao: pho" ngad: ein: naonhaung" yao: yao" aung khug mae damyid: lam: na ge,- ngo naonhaung" re ta" geli"- Mao"So wa ce: laug baui jham mae" Abraham qhid' mae" yao: zo: qe re qo" phan" thug' ke' ra". 10 Ana" yao: lhao" sag' gae jham re apan mae" thau: pye' nae" qhid' mae" vozaung: wa jin" jin" ngad: ava". Airu: mung: ashi: gai mazaui" ra" sag' gae khao: ngo" re thau: lhang" ke' mung: myi:khyeim" khug khyo pye' zaui: ke' ra". 11 Ngo wa naonhaung" myid tha" va" ga" ru qhid' mae" naonhaung" re qid mae qid nyhab' byid' ra". Ngadqere: nga" thao mae joe" li" nae" ra" yaug wa naonhaung" re Gyang" lho" Byo mae re:- myi: mae re: qid nyhab' li" byid' li" nae". Yao: wa ngo tho' qam: so' je: bo yaug ngad: ra". 12 Yao" lo, mae gaug khyo" nae" qhid' mae" gaug khyo" gaung: zhab' ci: ra". Amung: yao: wa gaug nao: jao: mae" gaug bam re vhag' kyang" pye' mung yang: gaug mo jham re wa yao" gaug jhi khug mae gag: zhang: ke' to" li" nae". Gaug seim jham re kam" wa matho' se' ra" myi:khyeim" mae ngha" pye' li" nae"- ga: kho" kyo" ra". 13 Ai: thao re Yesu wa Yohan lo, mae qid nyhab' kham: yu nae" qhid' mae" Galile mung" mae" Yodan gyaung: khyo Yohan jhao" joe" lo: ra". 14 Ngadqere: Yohan wa Ngo yaug; ni" lo, mae qid nyhab' kham: yu ca" yaug angad: ru nao lam: ngojhao" ali" i? ga: ta" mung: Yesu re lham: tam" ra". 15 Alao" Yesu wa yao: re tau: mung:- ana" wa ngore qid nyhab' kham: byid: la,- pe"mung:ga"re ceru: kad' ru wa nyhao: shid' zo: Mao"So myid o: ra" mau" zo" alhab' re zaui" pyang" ru ngad nae" ga:- ta" ra". Alao" Yohan wa gai: ga: tau" ra". 16 Yesu qid nyhab' bin: kham: yu we' qid mae" thug' lo: na: au:- qu" wa, mung: gaung go; bung" li" mung: Mao"So: Byo wa phaung" kyug' ru: dao" gyo" li" mung: Yesu dao mae li" no" rure yao: myao: ra". 17 Ai: thao re- ceyaug, wa ngo jhid'de; ra" nga" zo: ngad: Yao: re ngo o ngaui: ra" ga: mug:gaung mae" thoe jhau: thug' li" ra". 1 Ai: thao re yui: yang ju" phyo' ru qhug' vashao: ga: Gyang" Lho" Byo wa Yesu re din"pyad' yo khyo jhui" vao ye" ra". 2 Byid xe myi byid xe ba zo:ve jao" thao re- Yesu wa vae: moe' ra". 3 Alao" yui wa Yesu jhao" li" mung: Nao Mao"So: Yao: Zo: ngad: re wa ce: laug baui jham re mug boe" li" geshao: amyin" byid: wa,- ga: ta" ra". 4 Ngadqere: Yesu wa tau: mung:- Byu wa zo:ve: yang za: kao so' qo" daui: na: ru mangad:- Mao"So: nhad' mae thug' li" ra" dao: thoe: yang za: kao so' qo" daui: na nae" ngad: ra" ga: jham: mugsug' mae tung" to" ra"- ga: ta" ra". 5 Alao" yui wa Yesu re gyang" lho" ra" vogaung: mo" Yerusalem khyo jhui" lo mung: Caung:pa" Yham mae" khaung nho thao mae yhe' to: mung: 6 Yesu re Nao Mao"So: Yao: Zo: ngad: re wa mho: khyo byae: gyo" lo" wa,- pe"mung:ga"re jham: mugsug' mae Mao"So wa nao re lhaug' zaung" byid: nae" qhid' mae" Mug: Lagyo: jham re amyin" byid: mung: yao: bam wa- laug baui dao ni" khyid lhao" mathaung" cad' vashao:- Yao: bam: lo; yang: lham: vo; yu: li" genae" ga: tung" to" ra"- ga: ta" ra". 7 Yesu wa tau: mung:- ai: Asang ni" Mao"So re nao magai: jham" qu" nae" ga: re: tung" to" ra"- ga: ta" ra". 8 Ai mae" yui wa Yesu re gyai myhao: ra" bam khyo jhui" do, lo" mung: myid gaung dao mae" mung"dan: alhab' we' ai: mung"dan: jham: phung qab bao re ceim" shid' mung:- 9 Nao Ngo re goe; pa" ngad: re wa cegu: alhab' ngo nao re byid: nae" ga: Yesu re ta" ra". 10 Yesu wa tau:- mung: Satan we"- thug' lo" wa,- Asang ni" Mao"So re za: nao goe; pa" mung: Yao: re za: caung da" nae" ngad: ra" ga: jham: mugsug' mae atung" to" ra"- ga: ta" ra". 11 Alao" yui wa Yesu mae" thug' lo" byaug: ra". Ai: thao re mug: lagyo: jham li" caung da" byid' ako". 12 Yesu wa Yohan re thaung: taung" lhaung" pye' va" ga" rure the' gyo: lao"- yao: wa Galile mug: khyo thug' ye" lo" ra". 13 Yao: wa Nazared mae maye: na lo: Zebulun we' Nabhtali mug: gyo:- Galile tham: yae mae" Kapena-um vogaung: mae yena: ra". 14 Ceru: kad' ru wa Lapa Esaia ta" to" ra" dao: jab byang" li" nae" qhid' mae" ngad: ra". 15 Lapa Esaia wa Zebulun we' Nabhtali mug:- Yodan gyaung: thoete' Galile tham: khyo- joe" ra" khyo cao" yang: taung bug qe na: ra" mug: Galile we"- 16 Mug: cad' mae na: ra" mo, wa bo" bao qi: re the' myao: li" genae"- Amung: shid: ra" mug: cad' khug mae na: ra" mo; dao mae ai: bo" bao wa bao: li" nae" ga: ta" to" ra". 17 Ai: au: mae" Yesu wa Naonhaung" myid tha" ge,- pe"mung:ga"re mug:gaung: mung"dan: wa jhao" li" na va"- ga: yao" mungdao: re kho" kyo" ra". 18 Yesu wa Galile tham: yae cao" yang: su" lo" na: au:- ngo: kung" zo: byu ngad: ra" Petru ga: mang: ra" Simon we' yao: nhaung: Andre tao wa tham: mae geim pye' na: ko" rure yao: myao: ra". 19 Alao" Yesu wa yao: tao re Nga" thao cao" ge,- ngo ni" shid' tao re byu kung" byu boe" nhao nae"- ga: ta" ra". 20 Alao" yao: shid' tao wa geim jham re to" pye' co' mung: yao: jhao" cao" ako". 21 Yesu wa aitau mae" dam: su" ye" lo" re gatau danhae tao ngad: ra" Zebede yao: zo: Yaku we' yao: nhaung: Yohan tao re myao: ra"- yao: tao wa lha dao mae yao: pho" Zebede we' daga"- yao: bam: geim jham re pho: na: ako". Yesu wa yao: shid' tao re yao" thao cao" nae" qhid' mae" khai: ke' ra". 22 Ailao" jao" yao: shid' tao wa lha we' yao: pho" re to: co' mung: yao: jhao" cao" ako". 23 Amung: Yesu wa Galile mung" geim" jao: sho' du" qin" mung: Tarha" Jung Yham jham mae mho" shid' byid' ra". Mung"dan: ra" Ngaui Bau" Lau Dao: Gai re kho" kyo: mung:- no phyo: aja: ja: qhug' ra" mo, re we' no aja: ja: de; ra" mo, byu qere gai byid' ra". 24 Yao" khyo re Suri mung" geim" jao: sho' hau" nhao" lo" ko" ruyang mo, byu qe wa no phyo: qhug' ra" mo,- no aja: ja: de, ra" mo,- khai" nho mo,- yui zaung mo,- ngho' be, mo,- gaung ajam: shid mo, re yao: jhao" jhui" li" ako". Alao" Yesu wa yao: bam: no re gai byid' ra". 25 Alao" Galile" mung"- Dekapoli mung"- Yerusalem Yuda mung" we' Yodan gyaung: thoete' mae" byu phung: mo" Yesu thao cao" ako". 1 Yesu wa byu phung: mo" re myao lao" bug gaung dalam: dao khyo do, ye" lo" ra". Yao: yezaung: jo, lao" Yao" mho"zo: qe wa yao: jhao" zang" lo: ako". 2 Alao" yao: wa dao: phung" mung: yao: bam re mho" shid' ru wa- 3 Byo mae myaung sho: beim" ra" mo, wa- ngaui lho" ko" ra"- Pe"mung:ga"re mug:gaung: mung"dan: wa yao: bam: mung"dan: ngad: ra". 4 Kaug' qhui: ra" mo, wa ngaui lho" ko" ra"- Pe"mung:ga"re Mao"So wa yao: bam re nhag' tang" byid' li" nae". 5 Nhag' lam: nau" nhae" ra" mo, wa ngaui lho" ko" ra"- Pe"mung:ga"re yao: bam wa Mao"So: dao:so: to" ra" shaman" jeju re yao: bam qo" khae: yu genae". 6 Mao"So myid o: ra" khyo re phug' cao" nae" moe, shab' ra" mo, wa ngaui lho" ko" ra"- Pe"mung:ga"re- Mao"So wa yao: bam re nhag' dag nhao: li" nae". 7 Nhag' ba: khyag' ra" mo, wa- ngaui lho" ko" ra"- Pe"mung:ga"re Mao"So wa yao: bam re nhag' khyag' yu: li" nae". 8 Nhag' lam: san sin" mo, wa ngaui lho" ko" ra"- Pe"mung:ga"re yao: bam wa- Mao"So re qhug' myao: li" genae". 9 Mang: dae ba: tae" ra" mo, wa ngaui lho" ko" ra"- Pe"mung:ga"re yao: bam re Mao"So: yao: zo: qe ga: mhang" li" genae". 10 Mao"So myid o: ra" khyo re phug' cao" yang: yhin" ru qhug' ra" mo, wa ngaui lho" ko" ra"- Pe"mung: ga: re Mug:gaung: mung"dan: wa yao: bam: mung"dan: ngad: ra". 11 Nga" mathao: yang byu qe wa naonhaung" re maphug' makhyad' kad' ru we' yhin" mung: madang: ra" khyo" qobo vhin mung: ta" gelao"- naonhaung" wa ngaui lho" ko" ra"- 12 Ngaui bau: ngaui lho" na ge,- pe"mung:ga"re mug:gaung: mung"dan: mae naonhaung" aphug' jhaung qhu" wa gyai qi" ra". Naonhaung" qhid' au: mae" lapa qere re: yao: bam airu: za: yhin" avako". 13 Naonhaung" wa myid gaung: dao: xo: ngad: ako". Ngadqere: xo: wa ngae: ra" ru shao" byaug lao" ai: xo: re dam: ngae sho' magai: kad' yu lo:ngad: ra". Ai: xo: wa pe" akyu" mabo loyang: taung gaung khyo shapye' pye' mung: byu jham zab: nhae" pye' ko" ra". 14 Naonhaung" wa mug: myid: bo" bao ngad: ako"- Bug gaung dao mae te" to" ra" vogaung: re maqo" go: to: ngad: ra". 15 Myikaug' re te' mung: ban" yang mamaug: lhaung" to" qu"- Yham khug mae na: ra" mo, alhab' re bao byid: nae" qhid' mae myikaug' tao" dao mae lhaung" zhaung: to" ako". 16 Ai we' dakhyo: byu jham wa naonhaung" kad' ra" gai: ra" mau" zo" jham re the' myao mung: mug:gaung dao mae na: ra" naonhaung" Pho" re caung:khin" byid: vageshao: naonhaung" bo" bao re byu jham: qhid' kheim: mae bao byid' to: ge,- 17 Kham" to" ra" Tarha" we' Lapa qe: dao: jham re qab: pye' nae" qhid' mae" ngo joe" li" ru ngad: ein: naonhaung" dajho ge,- aijham re qab: pye' nae" ein: ngo joe" li" ru mangad:. Jab byang" li" nae" qhid' mae" ngo joe" li" ru ngad:. 18 Naonhaung" re ngo dang dang ta" geli"- Mug:gaung we' myid gaung malai: lo" shire ta" to" ra" gu: alhab' majab byang" byang" wa kham" to" ra" Tarha" dao: mae" tung" ce' dace' we' myo, dace' lhao" malai: lo" nae". 19 Airu: mung: khag' ngadqere: ai: ngai: thao" ra" amyin" dao: re yao: shad' lhoe" mung: su gaje qere airu: shad' lhoe" nae" mho" byid' ra" yaug wa- Mug:gaung: mung"dan: mae ngai thao" yaug ngad: li" nae". Ngadqere: ai: amyin" dao: jham re phug' cao" mung: su gaje qere airu: phug' cao" nae" mho" byid' ra" yaug wa mug:gaung: mung"dan: mae qi" thao" yaug boe" nae" ngad: ra". 20 Amung: Ngo naonhaung" re ta" ru wa Mao"So myid o: ra" khyo" phug' cao" rumae Pharishe qe we' tung" pho" qe tho' naonhaung" maje qere wa mug:gaung: mung"dan: khyo maqo" vao ye: genae". 21 Byu dase'- Byu se' ra" yaug wa dao: kho' ru qhug' ca" nae" ga: daba: pyad mae" mo, ta" to" ra" dao: naonhaung" the' gyo" avako". 22 Ngadqere: ngo naonhaung" re ta" ru wa yao: mao: yao: nhaung: re nhag' yo" ra" yaug khag' ngadqere: dao: kho' ru qhug' ca" nae". Yao: mao: yao: nhaung: re byugao: ga: ta" ra" yaug wa tarha" yung" mae dao: phyid' ru qhug' ca" nae"- amung: yao: mao: yao: nhaung: re ago ga: shad' ra" yaug khag' ngadqere: myiqid tham: khyo pye' zaui: ke' ru qhug' li" nae". 23 Amung: nao wa phan dao mae Mao"So re xeim: ngaui" byid: nae" seim" na: au:- ni" mao:nhaung: dayaug yaug nao re nhag' mashid qobo vhin: to" ru daja: ja: re myid: beim" ke' lao"- 24 Ai: xeim: re shi" to: co' mung: lo" yang: ni" mao:nhaung: pho" we' shi" mang: dae sho' lo" kad' wa,- Bin lao" dam: tug' lo mung: ni" xeim: Mao"So re lo: ngaui" byid: wa,. 25 Nao re qobo zhaug' yaug we' daga" tarha" yung" khyo ye" lo" na: au:- tarha" yung" khyo majoe" shi: re yao: we' jho" vang" sho' phyad kad' yu wa,. Nao airu: makad' lao" yao: wa nao re tarha" zug: pho" lo, khug khyo ab byid' pye' li" nae". Alao" tarha" zug: pho" wa nao re gug: gam pho" lo, khyo ab byid' pye' mung: nao re thaung: khug mae lhaung" to" li" nae". 26 Naonhaung" re ngo dang dang ta" geli"- nao khyug' ca" ra" ngaui alhab' mabin: khyug' khyug' wa thaung: mae" nao qo" thug' lo nae" mangad:. 27 Su: myi: su: lao dashad' wa,- ga: ta" to" ra" dao: re naonhaung" gyo" qu" vako" ra". 28 Ngadqere:- ngo naonhaung" re ta" ru wa nhag' lam" yang qu" sang yu nug: ra" khyo" myiqe: re qu" ra" yaug khag' ngadqere: yao" nhag' lam: mae ai: myiqe: re shad' yaug ngad: ra". 29 Amung: ni" lo, yo shad' myo,jid' yang nao re qobo kad' nhao: ngad: re wa ai: myo,jid' re thad' shalhaui" pye' wa,- pe"mung:ga"re ni" gaung geim" myiqid tham: khyo gyo" lo" nae" tho' ni" gaung mae" dadau qeim: byaug: ru wa je: gai shi" ra". 30 Ni" lo, yo lo; yang nao re qobo kad' nhao: ngad: re wa ai: lo, re qam" phyid' pye' wa,- pe"mung:ga"re ni" gaung geim" myiqid tham: khyo gyo" lo" nae" tho' ni" gaung dadau qeim: byaug: ru wa ni" qhid' mae" je: gai shi" ra". 31 Alao"- yao" yham sang myhi" re kao" pye' nug yaug wa yao" yham sang myhi" re kao: mugsug' tung" byid' ke' ca"- ga" ra" dao: jo, gau ngad: ra". 32 Ngadqere: ngo naonhaung" re ta" ru wa yao" yham sang myhi" re yug: qho yang: mangad: lo: kao" pye' mung: ai: myiqe: wa gatau dayaug we' dam: lo, xo' yu: ngad: re wa yao: wa yao" yham sang myhi" re lao shad' nhao: ra" qobo qo" ra". Alao" ai: myiqe: re dam: lo, xo' yu: ra" yaug re: su: myi: lhad' yaug ngad: ra". 33 Nao to" ra" dao:so: re daphyo' wa,- Mao"So re byid' to" ra" ni" dao:so: re zaui" pyang" wa,- ga: daba: mae" mo, re ta" to" ra" dao: re naonhaung" gyo" qu" vako" ra". 34 Ngadqere: ngo naonhaung" re ta" ru wa- naonhaung" dao:so: dalam: lam: to" ra" au: mug:gaung re lao: yang: jham datang" ge,- pe"mung:ga"re mug:gaung wa Mao"So: zaung tao ngad: ra". 35 Myid gaung re lao: yang: re: jham datang: ge,- Myid gaung wa Mao"So: khyid nao: jo, qo ngad: ra". Yerusalem re lao: yang: re: jham datang: ge,- Yerusalem wa kho:kham mo" na: ra" vogaung: ngad: ra". 36 Alao" yao: yao" au: re lao: yang: re: jham datang: ge,- pe"mung:ga"re Naonhaung" wa xae dakhe' re za: lhao" phyu sho' no, sho' maqo" kad' gengad: ra". 37 Airumung:- naonhaung" dao: wa- ngad lao" wa ngad va" ein: mangad: lao" wa mangad: ein: za: ta" ge,- aimae" je: ra" naonhaung" ta" ra" dao: wa makhyang" ra" yaug mae" lo: ra" dao: ngad: ra". 38 Myo,jid' qhid' mae" myo,jid'- zaui qhid' mae" zaui dam: tug' ca" ga" ra" dao: re naonhaung" gyo" qu" vako" ra". 39 Ngadqere: ngo naonhaung" re ta" ru wa- Nao re magai kad' ra" yaug re lage, daphaug' wa- Ni" lo, yo shad' boqae pyo' yaug re lo, kaung: shad' rere: pyo' nhao shi: wa- 40 Ni" akhug: bau: re yu nug yang: yung" zaung: ra" yaug re ni" bau: qhang rere: yu: lo" nhao shi: wa,- 41 Nao re maqad maqui" deim" zag mung: khyo daman: qovin ye: nhao: yaug we' khyo shid' man: ye: shi: wa. 42 Nao jhao" mho' yaug re byid: wa,- nao jhao" daja: ja: jhid' ngho: nug yaug re jhid' ngho: byid: wa,- 43 Ni" Ba nam sang: cao: qere jhid'de; wa,- ni" gye jham re nghang: wa, ga" ra" dao: re naonhaung" gyo" qu" avako". 44 Ngadqere: ngo naonhaung" re ta" ru wa naonhaung" re yhin" ra" mo; qhid' mae" akyu" mho' byid: ge,. 45 Airulao" naonhaung" wa mug:gaung dao mae na: ra" yao: Pho" zo: dau qe boe" genae". Pe"mung:ga"re magai: ra" mo, we' gai: ra" mo; dao mae dakhyo: za: Mao"So wa ba zho byid' ru we' din:man" ra" khyo kad' mo, we' madin: man" ra" khyo kad' ra" mo; dao mae mug: qu byid' ra". 46 Naonhaung" re jhid'de; ra" mo, re za: naonhaung" jhid'de; ko" re wa- Mao"So mae" pe" jhaung qhu" qo" yu genae" i? Khang: khyui zo: mo, lhao" re: airu: kad' ko" ra". 47 Amung: naonhaung" wa- mao:nhaung: qe we' za: jho" jhau zam" khug ko" ngad: re wa- gaje tho' nao kad' ru pe" je: i? Taung bug qere: ai we' dakhyo: kad' ako". 48 Amung: mug:gaung dao mae" naonhaung" Pho" wa jab byang" ru we' dakhyo: naonhaung" re: jab byang" na ge,. 1 Amung: su the' myao vageshao: ein:- mo, byu qe myo: sho' qhid' kheim: mae naonhaung" lalam lakhug: mau" zo" jham re mazaui: nae" qhid' mae lha" ge,- Airu: mangad: re mug:gaung dao mae na: ra" naonhaung" yao: Pho" mae" pe" shaman" jeju re: maqo" yu genae". 2 Amung: nao wa qo ca" ra" mo, re aung lam alu: byid' ngad: re- su: yang caung:khin" geshao: ein:- tarha" jung yham jham mae we' hau" mo" khyodang khaung: mae geim kad' ra" mo, kad' ru we' dakhyo: labo" mad nhao yang: dahau: wa,- ngo naonhaung" re ta" ru wa yao: bam wa yao: bam o: ra" jhaung qhu" qo" yu: avako". 3 Ngadqere: qo ca" mo, re naonhaung" aung lam alu: byid: ko" re- ni" lo, yo lo, kad' ra" mau" zo" re ni" lo, kaung: lo, re daba nhao wa,. 4 Alao" ni" aung lam alu: byid' ra" khyo wa anyham: avho' mae kad' ru ngad nae". Amung: anyham: avho' kad' rure myao: ra" ni" Pho" wa nao re jhaung qhu" byid' li" nae". 5 Amung: naonhaung" akyu" mho' gelao"- geim kad' ra" mo, we' dakhyo: dakad' ge, Pe"mung:ga"re yao: bam wa su alhab' yao: bam re the' myao vageshao: ga:- tarha" jung yham jham mae we' hau" mo" khyokao: jham mae ye; jo, yang: akyu" mho' nug mo, ngad: ako". 6 Naonhaung" kam" wa akyu" mho' gelao"- kug qe, khyo vao lo" mung: kham: pyid' yang: myo, yang mamyao: ra" naonhaung" yao: Pho" re akyu" mho' ge,. Alao" anyham: avho' mae kad' rure myao: ra" naonhaung" yao: Pho" wa naonhaung" re shaman" jeju byid' li" nae". 7 Amung: naonhaung" akyu" mho' gelao" taung bug qe kad' ru we' dakhyo: lajheim: mabo ra" dao: jham re daci ge,- Taung bug qe wa akyu" qhang sho' mho' ruyang yao: bam akyu" mho' dao: re tae" gyo: byid' li" nae" ga: myid: jho: ako". 8 Ai bam ru: dakad' ge,- pe"mung:ga"re naonhaung" mamho' shi: gamae" naonhaung" qo: ra" ja: alhab' re naonhaung" yao: Pho" wa ba: to: gau ngad: ra". 9 Airu: mung: naonhaung" akyu" mho' gelao"- ceru: mho' ge,- Mug:gaung dao mae" ngonhaung" Pho" we"- Ni" gyang" lho" ra" mang A re phug' myao: vageshao:- 10 Ni" mung"dan: joe" lo vashao:- Mug:gaung dao mae ni" nhag' dag: ru we' dakhyo: myid gaung: dao mae re: dag: lo vashao wo"- 11 Ngonhaung" qo: ra" zo:ve ana" ba ngonhaung" re byid: la,- 12 Ngonhaung" re shad' ra" mo; qobo re ngonhaung" khyad' byid' ru we' dakhyo: ngonhaung" qobo rere: khyad' byid: la,- 13 Ju" phyo' ra" khyo ngonhaung" re maye: nhao lo: makhyang: yaug: lo, mae" ngonhaung" re khyad' yu la, wo"- 14 Naonhaung" re shad' ra mo; qobo re naonhaung" khyad' byid: ko" ngad: re mug:gaung: dao mae na: ra" naonhaung" Pho" re: naonhaung" qobo re khyad' byid' li" nae". 15 Naonhaung" re shad' ra" mo; qobo re naonhaung" makhyad' byid: ko" ngad: re wa naonhaung" Pho" wa naonhaung" qobo rere: makhyad' byid: nae". 16 Amung: naonhaung" zo:ve jao" gelao"- geim kad' mo, we' dakhyo: myo, nho asham zang dakad' ci ge,- yao: bam wa yao: bam zo:ve jao" na: ra" khyo re su alhab' the' myao vageshao: ga: yao: bam: ave, re lhai" pye' ako"- naonhaung" re ngo ta" gali" Yao: bam wa yao: bam o: ra" aphug' jhaung qhu" re qo" yu: avako". 17 Naonhaung" zo:ve jao" gelao" myo,jid' yang mamyao: ra" naonhaung" Pho" mae" lai yang: naonhaung" zo:ve jao" na: rure khag' maqo" ba genae" qhid' mae" myo, cid' mung: au: xau gyad yang: kyo' shaung: pye' ge,. 18 Anyham: avho' kad' rure myao: ra" naonhaung" Pho" wa- naonhaung" re shaman" jeju byid' li" nae". 19 Nhug we' zu: yang qo" zo" qheim" pye' mung: khug' mo, kyaung" thad' vao ye: yang: qo" khug' yu: ra" ce: myid gaung dao mae Naonhaung" jo,nho" jham re naonhaung" qhid' mae" daqaung" to: ge,- 20 Ai: atha" nhug we' zu: yang maqo" zo" qheim" ru we' khug' mo, re: maqo" kyaung" vao ye: maqo" khug' yu: ra" mug:gaung dao mae naonhaung" jo,nho" jham re naonhaung" qhid' mae" qaung" to: ge,. 21 Pe"mung:ga"re naonhaung" jo,nho" jo; ra" tau mae naonhaung" nhag' lam: taui" jo, li" genae". 22 Amung: ai: myo,jid' wa- gaung khyao qhid mae" myi:baung: ru" ru ngad: ra". Ai: ni" myo, jid' qang: qang: za: ngad: re wa ni" gaung geim" bao: jo; li" nae". 23 Ngadqere: ni" myo,jid' mae athab zang ngad: re wa- ni" gaung wa cad' jo; li" nae". Airu: mung: ni" bo" bao wa mug: cad' boe" byaug: re wa ai: mug: cad' wa khoqhi" no, sang: kyid ngad: nae" i?. 24 Khag' ngadqere: asang shid' yaug: jeim qo" kad' nae" mangad:- yao: wa asang dayaug re nghang: mung: dayaug re jhid'de; li" nae". Asang dayaug re gyaug phug' mung:- gatau dayaug re maphug' makhyad' kad' li" nae". Amung: naonhaung" wa Mao"So re we' ngaui qhang jo,nho" re daga" za: qo" caung da" byid: genae" mangad:. 25 Aimung: ngo naonhaung" re ta" ru wa- Pe" zo: pe" shaug' nae" laug ein: kao so' qhid' mae" Pe" ve, nae" laug ein: gaung khyao qhid' mae" naonhaung" damyid: ci" ge, Ai: kao so' wa zo:ve tho'- gaung khyao wa ve, mai ve, bau tho' je: akhyag: mangad: i? 26 Mug: phyo: mae dao" qin" ra" ngho' jham re qu" qu" ge,- yao: bam wa myug: shi: re masin: maqho:- yad re: mayad: yu- jhi mae re: maqaung" to: gengad: ra". Ngadqere: mug:gaung dao mae na: ra" naonhaung" Pho" wa yao: bam re zho" na: ra". Naonhaung" wa ngho' jham tho' myo: sho' je: phug' de, ko" mangad: i? 27 Naonhaung" mae" khag' ngadqere: myid: ci" ruyang yao: yao" kao re dadaung" je: qo" qhang nhao ko" i? 28 Naonhaung" wa pe"mung yang:- ve,mai ve,bau: qhid' mae" myid: ci" ko" i? Pa: din" mae" seyo: bin: gae jham khoru: yaug: qi" li" ko" rure myid: qu" ge,. Yao: bam wa mau" re: mazaui:- jid: re: manai: ko" ngad: ra". 29 Ngadqere: ngo naonhaung" re ta" kyo: geli". Phung qab bao qi" ru we' gyai qo" ra" Sholamon kho:kham lhao" re: ai: bin: gae jham mae" dagae ru: yaung" sho' maqo" shaung ve; ngad: ra". 30 Mao"So re lam khug: ra" myid ngai: ra" mo, we"- ana" ba yaug: jo, mung: ne, mo" ba myi:khyeim" mae ngha" pye' ra" seyo mae" myo, gae jham re Mao"So shaung vhe' byid' ra". Yao: wa naonhaung" re je yang: vhe' byid' li" nae" mangad: i? 31 Airu: mung: naonhaung" wa- myid: ci" yang: pe" zo: pe" shaug' zai laug ein: data" ge,. 32 Pe"mung:ga"re taung bug qe wa- ai: gu: alhab' qhid' mae" myid: ci" yang: qho: ako". Mug:gaung dao mae na: ra" naonhaung" Pho" wa ai: gu: alhab' naonhaung" qo ca" na ko" rure ba gau ngad: ra". 33 Naonhaung" kam" wa- Mao"So: mung"dan: we' yao: myid o: ra" khyo re sao qhid' qho ge,. Alao" yao: wa ai gatau qo ca" ra" gu: alhab' rere: naonhaung" re byid' li" nae". 34 Airu: mung: ne, mo" ba: qhid' mae" damyid: ci" ge,- Ne, mo" ba wa yao" qhid' mae" myid: ci" li" nae"- ana" ba qug: khai" ru wa ana" ba: qhid' mae" ga" va" ra". 1 Su re dao: dakho' ge,- ailao" za: Mao"So wa naonhaung" re dao: makho' nae". 2 Pe"mung:ga"re naonhaung" su re dao: kho' ra" au: ci: ra" jao dang re Mao"So ci: li" nae". 3 Yao: yao" myo,jid' mae bo: ra" sag'thaung: re bo thoe magyo: lo: ni" mao:nhaung: pho" myo,jid' mae" sag' je, re pe"mung: qu" i? 4 Ni" myo,jid' mae sag' thaung: bo: jo, zang ni" mao:nhaung: pho" re ni" myo,jid' mae" myo, vao sag' je, re yu: pye' byid: li" ein: nao khoru: mung: vae" ta" i? 5 Geim kad' yaug we"- ni" myo,jid' mae bo: ra" sag' je; re shi" sao qhid' yu: pye' wa,- ailao" za: ni" mao:nhaung: pho" myo,jid' mae bo: ra" myo, vao bodan re nyang" za: nao myao mung: qo" yu: pye' byid' li" nae". 6 Gyang" lho" ra" zai re lakha: jham re dabyid: ge, Airu: kad' lao" naonhaung" re dam: tug' bin" li" nae". Amung: naonhaung" palhe" qui: re vo, jham: qhid' kheim: mae dashapye' to: ge,- Airu: kad' lao" vo, jham wa ai: palhe" qui: jham re khyid: yang zab: nhae" pye' li" genae". 7 Mho' ge,- alao" naonhaung" qo" yu genae"- Qho ge,- alao" naonhaung" myao genae"- Kham: ko' ge, alao" naonhaung" re kham: phung" byid' li" nae". 8 Pe"mung:ga"re mho' ra" yaug wa qo" yu: li" nae"- Qho: ra" yaug wa qho: qhug' li" nae"- Kham: ko' yaug re kham: phung" byid' li" nae". 9 Naonhaung" mae" dayaug yaug- yao: zo: mug mho' re laug baui byid: genae" i? 10 Ngo: mho' re lhao maui byid: genae" i? 11 Magai makhyang" ra" qobo jab qe- naonhaung" lhao" re:- naonhaung" yao: zo: qere gai: ra" ja: byid: nae" ba ko" ngad: re wa mug:gaung dao mae na: ra" naonhaung" Pho" wa yao: re mho' ra" mo, re gai: ra" ja: ai: tho' mago" je yang: byid: nae" mangad: i? 12 Aimung:- su: yang naonhaung" re khoru: kad' re naonhaung" o ngaui: ru we' dakhyo: naonhaung" re: su gaje re airu: kad' byid: ge, Ce wa kham" to" ra" tarha" we' lapa qe: dao: amyhi" ngad: ra". 13 Ai: lhae" ra" kham: dung: khyo" vao ye: ge,- pe"mung:ga"re myi:qid: tham: khyo joe" ra" kham: dung: we' khyodang wa lae: ra". Amung: ai: khyo su" lo" mo, gyai myo" ako". 14 Kao so' daui: ra" khyo joe" ra" khyodang we' kham: dung: wa lhae" ra". Amung: aire qho: myao mo, mamyo: ko" ngad: ra". 15 Aung khug mae zag ne we' dau: ra" myid bo mung: adao mae yao qid ve; ci yang: naonhaung" jhao" joe" li" ra" lapa apyag' qere lha" yang: jao" ge,. 16 Zau: bye, mae" sabyi shi: re mangad: lao"- zau: gae mae" pho' ham" shi: jham re lhaung" qo" phyo' yu ko" i? Yao: bam lapa apyag' qe ngad: rure yao: bam: mau" zo" ave, khyo" yang naonhaung" ba: li" genae". 17 Amung: gai: ra" agae khao: ngo" wa- lho" ra" ashi: zaui" ra". Qam: mabo: ra" agae wa malho" ra" ashi: zaui" ra". 18 Gai: ra" agae mae malho" ra" ashi: maqo" zaui: ngad: ra". Alao" magai: ra" agae mae re: lho" ra" ashi: maqo" zaui: ngad: ra". 19 Ashi: lho" mazaui" ra" agae khao: ngo" wa thau: lhang" pye' mung: myi:khyeim" khyo pye' zaui: pye' ru qhug' ako". 20 Airu: mung: lapa apyag' qere yao: bam: ave, khyo" yang naonhaung" ba: li" genae". 21 Ngo re Asang we"- Asang we"- ga: ta" ra" mo, alhab' mug:gaung: mung"dan: qo" vao ye: genae" mangad:- Mug:gaung dao mae na: ra"- nga" Pho" myid o: ra" khyo" cao" ra" yaug za: qo" vao ye" li" nae". 22 Aimung: dao: kho' ra" ba na joe" lao"- byu myo: sho' wa Asang we"- Asang we"- ngonhaung" wa ni" mang re lao: yang Mao"So: mungdao: re kho" kyo" lo va" mangad: i? Ni" mang re lao: yang: yui myo: sho' re khe' thug' pye' lo va" mangad: i? ga: ta" li" genae". 23 Ailao"- ngo wa yao: bam re Naonhaung" re ngo khonhae" re: maba- makhyang" ra" mo, we"- nga" qhid' kheim: mae" thug' lo" ge, ein: ta" nae". 24 Ce: nga" dao: jham re gyo" yu mung: phug' cao" ra" yaug khag' ngadqere: yao: yao" yham re laug thin dao mae zhaug' ra" pha,jhi" bo yaug we' dau: ra". 25 Mug: qu mung: qid je" li" ru we' la qam" hug' lo mung:- ai: yham re lo deim: gengadqere: ai: yham wa laug thin dao mae zhaug' to" ruyang mabyo; gyang: lo" ngad: ra". 26 Ngadqere: ce:- nga" dao: jham re gyo" yu mung:- maphug' cao" ra" yaug khag' ngadqere:- yao: yao" yham re ma dam: mae zhaug' ra" kopyad' we' dau: ra". 27 Mug: qu mung: qid je" li" ru we' la qam" hug' lo yang:- ai: yham re lodeim: gelao" ai: yham wa byo, gyang: lo" ra". Ai: yham byo; gyang: lo" ru wa phyi yao: ngad: ra". 28 Yesu ai: dao: jham re bin: kho" kyo: lao"- mo, byu qe wa yao: mho" shid' ra" khyo re mug' hao" byaug: ako". 29 Pe"mung:ga"re Yesu wa tung" pho" qeru: mangad:- kheim: so' qo" ra" yaug we' dakhyo: mho" shid' byid' ra". 1 Yesu bug gaung mae" gyo" lo lao"- byu phaung mo" zang yao" thao cao" lo: ako". 2 Alao" mao gae: de: ra" byu dayaug Yesu jhao" li" mung:- yao" qhid' kheim: mae pad' thaug' thaug' yang:- Asang we"- nao nug: re wa ngore qo" gai: shao: lo" nhao zai ngad: ra" ga: mho' ra". 3 Yesu wa lo, yheim" ke' mung: yao: re tin: byid: zo" re"- ngo nug:- Gyang" shao: lo" se,- ga: ta" ra". Ailao" jao" yao" mao gae: gyang" shao: lo" byaug: ra". 4 Alao"- Yesu wa yao: re- Ce:ra" khyo re nao khag' rere: data" kyo: wa,- ngadqere: khinjaung pho" jhao" lo" mung: ni" gaung yao: re lo" qhu" wa,- amung: nao no gai: shao: lo va" khyo mo, byu qe: qhid' mae" sagse: doe, vashao:- Moshe amyin" to" ra" xeim: re lo" ngaui" byid: wa ga: ta" ke' ra". 5 Yesu Kapena-um vogaung: khyo joe" vao lo lao"- Roma gyezug: pho" dayaug yao: jhao" li" mung:- 6 Asang we"- nga" daui daui okaung dayaug no zang qhug' mung: maqo" lab lo: yham mae no: lang" jo; ra" ga: Yesu re ta" kyo: zo" re" bao" yu nae" mho' ra". 7 Yesu wa yao: re ngo li" mung: yao" no re gai byid: nae"- ga: ta" ra". 8 Alao" gyezug: pho" wa Yesu re tau: mung:- Asang we" nao nga" yham khyo vao li" nae" wa- ngo wa maman: qi" yaug ngad: ra"- nao amyin" dakheim: byid' ke' lao" re: nga" daui daui yaug wa gai: lo: li" nae". 9 Pe"mung:ga"re ngore: kheim: so' qo" ra" zug: mo" qe: o mae na: ra" byu dayaug ngad:- amung: nga" o mae re: gyezo: qe na: ako". Gyezo: dayaug re ye: wa, ein: ngo amyin" byid: lao" yao: ye" ra". Amung: gatau dayaug re lo wa, ein: amyin" byid' ke' lao" yao: lo: ra". Alao" nga" jeim dayaug re ceru kad' wa, ein: ta" lao" yao: kad' ra"- ga: ta" ra". 10 Yesu wa Ce:dao: re the' gyo: lao" mug' ra". Amung: yao" thao mae cao" ra" mo, byu qere Naonhaung" re ngo dang dang ta" geli"- Israel amyu" mae lhao" ceru" ra" lam khug: myid bo: ra" byu dayaug rere: ngo mamyao: qu" shi: 11 Amung: naonhaung" re ngo ta" geli"- Ba thug' shad'- ba vao shad' mae" byu myo: sho' lo mung: mug:gaung: mung"dan: mae Abraham- Isag- Yaku bam we' daga" qo" zo: shaug' li" genae". 12 Ngadqere: ai: mung"dan: byumyu" boe" ang: ra" mo, wa taung gaung shad' mug: cad' yo khyo khe' thug' pye' ru qhug' genae". Ai: mae yao: bam wa ngug byid ngug nhe' we' zaui kyag' yang: na: li" genae"- ga: ta" ra". 13 Ai: thao- Yesu wa gyezug: pho" re- Nao yham khyo lo" se,- nao lam khug: ru we' dakhyo: boe" vashao:- ga: ta" ra". Ai: au: mae yao: gyezug: pho" daui daui yaug wa no gai: lo" byaug: ra". 14 Yesu wa Petru yham khyo vao ye" lo" ra". Yham khug mae Petru yaug myhi" wa noqam" bug yang: yab jaung: dao mae lang" jo; rure yemyao: ra". 15 Yesu wa yao" lo, re tin: byid' ra"- Alao" noqam" gai: lo" byaug mung: to" li" yang: Yesu re bang" da" byid' ra". 16 Myi" thao joe" lo lao" mo, byu qe wa yui zaung: ra" byu myo: sho' mo, re Yesu jhao" jhui" li" ako". Alao" Yesu wa makhyang" ra" yui jham re dao: thoe: yang khe' thug' pye' ra". No phyo: qhug' ra" mo, rere: gai byid' ra". 17 Yesu ceru: kad' ru wa- yao: wa ngonhaung" no phyo: re yu: pye' byid: mung: ngonhaung" no jham re vin: pye' byid' ra" ga: Lapa Esaia ta" to" ra" dao: jab byang" lo nae" qhid' mae" ngad: ra". 18 Yesu wa yao" lhang" gam: mae na: ra" byu phung: mo" re myao lao"- yao" mho"zo: qere tham: thoete' khyo gau" de: ye" lo" nae" qhid' mae" amyin" byid' ra". 19 Alao" Tung" pho" dayaug Yesu jhao" li" mung:- Mho" pho" we"- nao khai: ye: khai: ni" thao ngo cao" nae" ga: Yesu re ta" ra". 20 Yesu wa yao: re tau: mung:- Zag ne jham wa khyaung qo" ako"- Ngho' jham re: asad' qo" ko" ra". Ngadqere: Byu: Yao: Zo: wa au: khyo" jo, qo lhao" maqo" ngad: ra"- ga: ta" ra". 21 Mho"zo: gatau dayaug wa Asang we" nga" pho" mao gaung re shi" lo" nyhab' shaung: pye' nae" qhid' mae" akhang" byid: la,- ga: ta" ra". 22 Ngadqere: Yesu wa yao: re Nga" thao cao" wa,- byushid qe wa yao: bam: byushid qere nyhab' shaung vageshao:- ga: ta" ra". 23 Ai: thao Yesu wa lha khug khyo yevao: zaung: ra". Yao" mho"zo: qere: yao: we' daga" cao" ye" ako". 24 Alao" qu" ge, ai: tham: mae nyag din taung" la qam" hug' lo mung: lha wa bang: lhung" khug mae nab: lo" na: ra". Ngadqere: Yesu wa yab: myhid' jo; ra". 25 Yao" mho"zo: qe wa Yesu re nhug' mung: Asang we"- ngonhaung" re khyad' yu la, wo"- ngonhaung" wa nab: shid: lo" na va" ga: ta" ako". 26 Alao" Yesu wa yao: bam re- Mao"So re lam khug: ra" myid ngai: ra" mo, we"- naonhaung" pe"mung: ai: qhi" sho' gyaug: nin" ko" i? ga: bin: ta" lao" yab; jo; rumae" to" li" mung: la we' bang: lhung" re qeim: ke' ra". Alao" la we' bang: lhung" wa saug za: tae" lo" byaug: ra". 27 Mho"zo: qe alhab' mug' hao" byaug: ru we'- ceyaug wa pe" ru" byu ngad: i? La we' bang: lhung" lhao" re: yao" dao: re tae" gyo" ako" ga: ta" ako". 28 Yesu wa tham: thoete' Gadara mug: khyo joe" lo" ra". Alao" yui zaung: ra" byu shid' zo: wa lab bug mae" thug' li" mung: Yesu we' li" qhug' ako". Yao: shid" zo: wa gyai makhyang: ko" ngad: ra"- amung: ai: khyo" khag' re: mavae" su: lai: lhau ko" ngad: ra". 29 Yao: shid' zo: wa Mao"So: yao: zo: we"- nao we' nga" shid' zo: pe" jho" sin" i? Ayo, majoe" shire qobo byid: nae" qhid' mae" cejo, qo khyo joe" lo: i? ga: zag: hug' ako". 30 Yao: bam we' mataung" va" rumae vo, dajham mo" zang bad zo" na: ako". 31 Alao" yui jham wa- Nao ngonhaung" re khe' thug' pye' nae" ngad: re wa- ai: vo, jham: khug mae ngonhaung" re yevao nhao la,- ga: Yesu re mho' ako". 32 Yesu wa- Ye" lo" ge,- ga: yao: bam re ta" ke' ra". Alao" yui jham wa ai shid' zo: mae" phao: thug' lo" mung: vo, jham: khug mae yevao gelao"- ai: vo, jham mo" zang dang" kam" nhad' mae" qid tham: khug khyo tao" byae: gyo" lo" gemung: nab: shid: pye' ako". 33 Vo, zam: mo, wa- vogaung: khug khyo tao" phao: lo" gemung:- yui zaung: ra" byu shid' yaug: khyo re we' boe" lo" ra" khyo alhab' re vobyu qere ta" kyo" ako". 34 Alao" vogaung geim" mae" mo, thug' li" mung: Yesu re li" qhug' ako". Yao: bam Yesu re li" myao gelao"- yao: bam: mug: mae" thug' lo" nae" qhid' mae" yao: re mho' ako". 1 Alao" Yesu wa lha khug yedo; zaung mung:- yao" vogaung: khyo dam: tug' gau" de; lo" ra". 2 Byu damyo" wa yab qo mae lang" jo; ra" gaung jam: shid: ra" byu dayaug re Yesu jhao" dao: li" ko" ra". Yesu wa yao: bam: lam khug: myid bo: rure myao lao"- gaung jam: shid yaug re- Nga" zo: we"- nhag' dangai wa,- ni" qobo khyad' pye' byid: va"- ga: ta" ra". 3 Alao" Tung" pho" qe damyo" wa- byu ceyaug wa Mao"So re jung" dao: jhau: ra" ga: yao: cao: yao: jho" ta" ako". 4 Yesu wa- yao: bam: aung khug mae pe" myid: na ko" rure ba mung:- naonhaung" aung khug mae pe"mung: magai: ra" khyo" myid: na ko" i? 5 Ni" qobo re khyad' pye' byid: va" ein: ta" nae" je: laui: i? Mangad: lao"- To" ye, mung: su" lo" wa, ein: ta" nae" je: laui: i? 6 Ngadqere: byu: yao: zo: wa- myid gaung dao mae qobo khyad' byid: nae" kheim: so' qo" yaug ngad: rure qhu" byid: geli" ga: ta" mung:- ai: gaung jam: shid yaug re- To" wa, Ni" yab qo re gaug: vo, yang: yham khyo lo" wa,- ga: ta" ra". 7 Ailao" yao: wa to" mung: yham khyo lo" ra". 8 Aire myao: ra" mo, byu qe wa- gyaug: mug' ru we' xao su byu qere ceru" ra" kheim: so' byid' ra" Mao"So re caung:khin" byid' ako". 9 Yesu wa ai: jo, qo mae" to" mung: su" ye" lo" na: au:- yao" khang: khyui zaung mae zaung: jo; ra" Mathe ga: mang: ra" khang: khyui zo: byu dayaug re myao: ra". Yesu wa yao: re- Nga" thao cao" la, ga: ta" lao"- Mathe wa to" mung: Yesu thao cao" ye" lo" ra". 10 Mathe yham mae Yesu zozo" na: au:- khang: khyui zo: mo, myo: sho' we' qobo qo" ra" mo, myo: sho' wa Yesu we' yao" mho"zo: qe we' daga" zo li" bozo" na: ako". 11 Pharishe qe wa aire myao lao"- yao" mho"zo: qere- naonhaung" mho" pho" wa airu" ra" byu qe we' daga" pe"mung: zo qhan: zo" ra" i? ga: myid' ako". 12 Yesu aire the' gyo: lao"- yao: bam re- Qao" zin" mo, wa macid' sara maqo gengad: ra"- No mo, za: aqo: ako". 13 Ngo wa xeim: ngaui" byid' rure- ma o nhag' khyag' rure o: ra"- ga" ra" jham: dao: lajheim: re ba nae" qhid' mae" lo" mung: xeim: yu ge,- ngo wa din:man: mo, re khai nae" qhid' mae" li" ru mangad:- Qobo qo" ra" mo, re khai nae" qhid' mae" li" ru angad:- ga: ta" ra". 14 Alao"- Yohan: mho"zo: qe Yesu jhao" li" mung:- ngonhaung" we' Pharishe qe wa dazab: makyo zo:ve lhaung" jao" bam:- pe"mung: ni" mho"zo: qe zo:ve majao" ko" i? ga: Yesu re myid' ako". 15 Yesu wa yao: bam re Lo,xo' poe mae poe leim bang" vo qe wa- pho" sag' we' na: jo, shi" au:- kaug' qhui gai: i? Airu: mangad: nae"- ngadqere: pho" sag' re yao: bam: phaung mae" kao" jhui" lo" ra" ba na joe" lo: li" nae". Ailao" yao: bam wa zo:ve jao" li" genae". 16 Bau: xug' mae pin: sag' yang khag' malhaung" pho: qu"- Airu: pho lao" zhan: lo" mung: pin: sag' cug' yang bau: xug' re lao" cad' mung: bau: je: jad; lae: lo" nae". 17 Amung: sabyi qang: asag' rere: shoqid thaung axug' mae khag' malhaung" ke' qu". Airu: ke' lao" shoqid thaung baug: go; lo" mung: sabyi qang: yug: lo" ru we' shoqid thaung re: qeim: lo" byaug nae". sabyi qang: asag' re wa shoqid thaung asag' khug mae ke' to: lao" za: shid' ja: geim" maqeim nae"- ga" ta" ra". 18 Yesu ceru: ta" na shi" au:- tarha" jung yham agyi dayaug Yesu jhao" li" mung:- yao" qhid' kheim: mae pad' thaug' thaug' mung: yang: Yesu re- Nga" zo: myiqe: nau" shid: byaug va"- ngadqere: nao li" mung: yao" dao mae ni" lo, li" kai: byid' ngad: re wa yao: dam: daui: li" nae" ngad: ra"- ga: ta" ra". 19 Yesu wa to" mung: yao" thao cao" ye" lo" ra". Yao" mho"zo: qere: yao: we' daga" cao" ye" lo" ako". 20 Alao"- qu" ge, daxe: shid' zin geim" sa: sheim no no: ra" myiqe: dayaug wa- Yesu nhaung thao" khyo te' li" mung: Yesu bau: qhang thao mae ye tin" ra". 21 Yao" bau: thao re khalhao" ngo qo" tin" ke' re wa nga" no gai: lo" byaug nae" ga: yao: yao" aung khug mae ta" ra". 22 Yesu wa lhang: qu" yang: yao: re myao lao" Nga" myiqe: zo: we"- Nhag' dangai wa,- ni" lam khug: myid wa ni" no re gai nhao: ava"- ga: yao: re ta" ra". Ai: au: re yao:- ai: myiqe: myhi" wa no gai: lo" byaug: ra". 23 Ai: thao Yesu wa tarha" jung yham agyi pho" yham khyo joe" ye" lo" ra". Alao" yao: wa khalhao: mad mo, we" mo,byu qe mo, thaui: mo, yaug mung: na ko" rure myao lao"- 24 Yesu wa yao: bam re- Phao: qhui: ge,- Myiqe: nau" wa shid: ru mangad:- yab: myhid' jo, ru angad:- ga: ta" ra". Yao: bam alhab' mo, Yesu re qi: jung" pye' ako". 25 Mo, byu qere taung gaung khyo bin: khe' thug' pye' lao"- Yesu wa qe, khug khyo vao ye: mung: myiqe: nau" lo, mae yezaui: yang: she: to" ke' ra". Ailao" ai: myiqe: nau" wa to" lo: ra". 26 Ce: lau dao: re- ai: mung" geim" byang" sho' hau" nhao" lo" ako". 27 Yesu wa aitau mae" to" mung: su" lo" na: au:- myo, jid shid' yaug wa yao" thao cao" mung: Davi yao: zo: we"- nga" shid' yaug re nhag' khyag' yu la, wo"- ga: hug' ako". 28 Yesu yham dayham khyo vao lo" lao"- myo, jid shid' yaug wa Yesu jhao" li" ako". Alao" Yesu wa ni" shid' yaug lam" ko" i? ga: myid' ra". Yao: shid' yaug wa Asang we" lam" ra"- ga: phaug' tau" ako". 29 Yesu wa yao: shid' yaug: myo,jid' re tin: byid: zo" re" ni" shid' yaug lam khug: ru we' dakhyo: boe" lo vashao:- ga: ta" ra". 30 Ailao" yao: shid' yaug: myo, myao: li" ko" ra". Yesu wa yao: shid' yaug re cekhyo re khag' rere: data" kyo: ge, ga: jhaug' za: zug' nhao: ke' ra". 31 Ngadqere: yao: shid' yaug wa thug' lo" mung: Yesu khyo re ai: mung" geim" byang" sho' hau" nhao" lo" ako". 32 Yao: shid' yaug thug' lo" na ko" au:- qu" ge, byu damyo" wa yui zaung: ra" nhad' jid dayaug re Yesu jhao" jhui" li" ko" ra". 33 Ai: yui re khe' thug' pye' lao" jao" ai: nhad' jid yaug wa- dao: jhau: thug' li" ra". Mo, byu qe wa mug' hao" byaug: ru we'- ceru" ru Israel mung" mae ngonhaung" khonhae" re: mamyao: qu" shi:- ga: ta" ako". 34 Ngadqere: Pharishe qe wa yao: wa yui zug: mo" qam: so' khyo" yang yui jham re khe' thug' pye' ru ngad: ra"- ga: ta" ako". 35 Yesu wa vogaung: mo" vogaung: ngai jham alhab' geim" khyo gam: sho' du" qin" mung: yao: bam: tarha" jung yham jham mae mho" shid' byid' ru we' mug:gaung: mung"dan: ngaui bau" lau dao: gai re kho" kyo: mung:- no phyo: aja: ja: qhug' mo, re gai byid' ra". 36 Byu phung: mo" wa- yao zaung" yaug mabo: ra" yao jham we' dakhyo: qug: khai: qhug' mung: byo: sin" qin" ko" rure Yesu myao lao" nhag' qu" khyag' ra". 37 Alao" Yesu wa yao" mho"zo: qere- Gaug myo: sho' mhang" jo; ra"- ngadqere: yad: yu nae" mau" zaui: mo, malaug ngad: ra". 38 Airu: mung:- ai: gaug sang: yang Yao" gaug mhang" yo mae mau" zaui: nae" byu nhao byid: nae" qhid' mae" gaug sang re akyu" mho' ge,- ga: ta" ra". 1 Yesu yao" mho"zo: daxe: shid' yaug re khai: yu mung:- makhyang" ra" yui jham re khe' thug' pye' nae" we'- no phyo: aja: ja: re gai byid: nae" kheim: so' yao: bam re byid' ra". 2 Ai: lagyo: daxe: shid' yaug: mang jham wa- Petru ga: mang: ra" Simon we' yao: nhaung: Andre Zebede yao: zo: tao ngad: ra" Yaku we' yao: nhaung: Yohan 3 Philib we' Batholame- Thoma we' khang: khyui zo: yaug Mathe- Alphaeu yao: zo: Yaku we' Thadaeu 4 Byumyu" jhid' myid qi" ra" Simon we' thao phyao: yao: re ab: pye' ra" Yuda Iskarud ga: mo, bam ngad: ako". 5 Yesu ai: daxe: shid' yaug re ceru: ta" mung: nhao: ke' ra". Naonhaung" wa taung bug: mug: khyo we' Samari vogaung: jham khyo davao ye: ge,- 6 Ngadqere: Israel amyu" mae" byaug: lo" ra" yao jham jhao" ye: mung:- 7 Yao: bam re- Mug:gaung mung"dan: wa jhao" li" va' ein: kho" kyo: ge,. 8 No mo, re gai byid: ge,- Shid va" mo, re dam: daui nhao ge,- Mao gae: de, mo, re gai byid: ge,- Yui jham re khe' thug' pye' ge,- Aphug' mabyid: lo: naonhaung" qo" khae: yu vako" ru we' dakhyo:- aphug' mayu lo: su re byid: ge,. 9 Naonhaung" phyid' cui: mae qhang- ngaui- gyid: ngaui thang: the: davin ge,. 10 Gyaung: khyo qhid' mae" thaung pyan- bau: tha"- khyid zhaung: we' zaung: bao" daci ge,- pe"mung:ga"re mau" zaui: yaug wa zao: kho qo" yu ang: ra". 11 Khovo khodam: khyo ngadqere:- naonhaung" vao ye: gelao"- naonhaung" re lham: khae: yu nug: ra" yaug re qho mung:- naonhaung" ai: vogaung: mae" dam: thug' lo" sho' aiyaug: yham mae za: thang: na ge,- 12 Amung: naonhaung" dayham yham khyo vao ye: gelao"- Ngaui bau: yaug yo geshao:- ein: bang" se" dao: ta" ge,- 13 Ai: yham mae na: ra" mo, naonhaung" re ngaui bau: za: lham: khae: yu ko" ngad: re wa- ai: bang" se" shaman" dao: wa yao: bam: dao mae thang: jo, vashao:- naonhaung" re ngaui bau: za: malham: khae: yu: ra" mo, ngad: re wa- naonhaung" bang" se" shaman" dao: wa- naonhaung" jhao" dam: tug' lo vashao:. 14 Amung:- naonhaung" re malham: khae: yu lo:- naonhaung" ta" ra" dao: rere: malham: tae" gyo: ko" ra" yham we' vogaung: mae" naonhaung" dam: thug' lo" ge,- naonhaung" dam: thug' lo" au:- naonhaung" khovo: mae" bodan jham re ko: khyo" co' ge,- 15 Ngo naonhaung" re dang za: ta" ru wa- dao: kho' ra" ba na mae Mao"So wa Sodom we' Gomora vobyu qere tho' je: qi" ra" qobo byid' li" nae". 16 Qu" ge, zag ne phaung gaung: khyo yao jham re nhao: ke' ru we' dakhyo: naonhaung" re nhao: ke' ra". Amung:- naonhaung" wa lhao maui ru: qag mung: phaung" kyug' ru xam: mag ge,- 17 Lha" yang: na ge,- Byu jham wa naonhaung" re tarha" yung" khyo ab byid' pye' mung: yao: bam wa naonhaung" re yao: bam: tarha" jung yham mae taui" be: li" genae". 18 Taung bug qere we' zug:- kho:kham qere Ngaui Bau" Lau Dao: sagse: kham byid: nae" qhid' mae" Nga" mathao mae naonhaung" re zug: qe we' kho:kham qe: qhid' kheim: khyo taui" she: ye" li" genae". 19 Naonhaung" airu: ab byid' pye' qhug' gelao"- khoru: jhau nae" laug- pe" ru ta" nae" laug ein: damyid: ci" ge,- naonhaung" jhau nae" dao: jham ayo, joe" lao" qo" yu: li" genae". 20 Pe"mung:ga"re ai: dao: jham wa naonhaung" jhau: ra" dao: jham mangad: nae"- naonhaung" yao: Pho" nho: Gyang" lho" Byo wa- naonhaung" nhad' khyo" yang jhau: thug' li" ra" dao: jham ngad: li" nae". 21 Mao:nhaung: yao: cao: dayaug wa dayaug re shid nae" khyo jho" ab byid' pye' mung: myhi" pho" qe wa yao: zo: qere- shid nae" khyo ab byid' pye' li" genae". Alao" yao: zo: qere: yao: bam: myhi" pho" qere gye kad' mung: se' pye' nhao: li" genae". 22 Nga" mang mathao: yang byu alhab' mo, naonhaung" re nghang" li" genae"- ngadqere: athao" joe" sho' zang: qhao" yaug wa khyad' yu: ru qhug' nae". 23 Vogaung: dalam: mae naonhaung" re yhin" gelao"- gatau vogaung: dalam: khyo phao: ye: ge,- ngo naonhaung" re dang za: ta" ru wa- Israel mung" mae" vogaung: jham alhab' mae naonhaung" mau" mabin: zaui: shi: re Byu: yao: Zo: wa joe" li" nae" ngad: ra". 24 Mho"zo: wa mho" pho" tho' maje ngad: ra". Amung: jeim re: jeim sang tho' maje ngad: ra". 25 Airu: mung: mho"zo: wa yao" mho" pho" we' dakhyo:- jeim re: jeim sang we' dakhyo: ngad lao" wa nhag' dag gai: ava"- Yham khaung vin yaug re Bezelbu ga: mhang" ko" re wa- yham khug: byu qere wa je yang: magai: ra" khyo" mhang" li" genae". 26 Amung:- byu qere dagyaug ge,- pe"mung:ga"re nghoe' to" ra" ja: alhab' wa de: de: mung: li" nae"- Nyham" to" ra" ja: alhab' wa myao: thug' li" nae". 27 Ngo naonhaung" re mug: cad' khug mae ta" ra" dao: re mug: bo" mae ta" kyo: ge,- naonhaung" re dao: so' so' yang: ta" ra" dao: re yham khaung dao mae" kho" kyo: ge,. 28 Myi:qid: tham: mae qo" phyo' qheim" pye' ra" Mao"So re gyaug ge, Gaung khyao re qo" se' pye' ngadqere:- alo zo: re maqo" se' pye' ra" mo, re dagyaug ge,. 29 Gyid: ngaui thang: the: dakye' yang za: jokhyao" shid' dau: re qo" vai: yu: mangad: i? Ngadqere: naonhaung" yao: pho" maqad lo: ai: jokhyao" dadau: lhao" re: maqo" gai: shid. 30 Naonhaung" au: mae" xae khe' jham alhab' re lhao" nghe' to: gau ngad: ra". 31 Airu: mung: dagyaug ge,- naonhaung" wa jokhyao" myo: sho' dau: tho' je: phug' de; ako". 32 Su: qhid' kheim: mae ngore lhang: yu ra" yaug khag' re ngadqere:- mug:gaung mae na: ra" nga" pho" qhid' kheim: mae yao: re ngo lhang: yu nae". 33 Su: qhid' kheim: mae ngore ha: pye' ra" yaug re kam" wa- mug:gaung dao mae na: ra" nga" Pho" qhid' kheim: mae yao: re ngo ha: pye' nae". 34 Ce: myid gaung dao mae ngaui pyo: yaug yo: ru byid: nae" qhid' mae" ngo joe" li" ru ngad: ein: dajho ge,- ngo wa ngaui pyo: yaug yo: ru byid: nae" qhid' mae" joe" li" ru mangad:- Shae cili" byid: nae" qhid' mae" ngo joe" li" ru ngad:. 35 Pe"mung:ga"re- yao: zo: wa yao: pho" we' myiqe: zo: wa yao: myhi" we' dau mo" qe wa yao: na qe we' gye jho" boe" nhao nae" qhid' mae" ngo joe" li" ru ngad:. 36 Amung: byu dayaug: qhid' mae" magai: thao" ra" gye jham wa yao" yham khug: byu qe ngad: li" genae". 37 Khag' ngadqere: ngore jhid'de; ra" tho' mae myhi" pho" qere je: jhid'de; ra" yaug wa- nga" mho"zo: boe" nae" qhid' mae" maman: qi" ngad: ra". Amung: ngore jhid'de; ra" tho' mae" yao: zo: yao: dau qere je: jhid'de; ra" yaug re: nga" mho"zo: boe" nae" qhid' mae" maman: qi" ngad: ra". 38 Alao"- khag' ngadqere: yao: yao" pyao: zang re tau: vo, mung:- nga" khyid khu mae macao" ra" yaug wa- nga" mho"zo: boe" nae" qhid' mae" maman: qi" ngad: ra". 39 Amung:- yao: yao" kao so' gug: nae" qhid' mae" qam: ke' gug: gam yaug wa- kao so' jeim: nae". Ngadqere: nga" mathao mae yao: yao" kao so' jeim: yaug wa kao so' qo" yu nae". 40 Naonhaung" re lham: khae: yu: ra" yaug wa- ngore lham: khae: yu: ra" yaug ngad: ra". Ngo re lham: khae: yu: ra" yaug re: ngore nhao: ke' ra" yaug re lham: khae: yu: ru ngad: ra". 41 Mao"So: lagyo: ngad: ra" ga" khyo" yang Mao"So: lagyo: re lham: khae: yu: ra" yaug wa ai: lagyo: the' yu: ra" aphug' jhaung qhu" re qo" yu: li" nae". Alao" din:man: yaug ngad: ra" ga" khyo" yang din:man: yaug re lham: khae: yu: ra" yaug re:- ai: din:man: yaug qo" yu: ra" aphug' jhaung qhu" re qo" yu li" nae". 42 Naonhaung" re ngo dang dang za: ta" geli". Nga" mho"zo: qe mae" ngai: thao" ra" yaug re nga" mho"zo: ngad: ra" ga: qid cae: dakeim byid: jhaug' yaug wa gaigai: yao: aphug' jhaung qhu" maqo" yu nae" khyo majo,. 1 Yesu wa Yao" mho"zo: daxe: shid' yaug re ai: dao: jham bin: pyang lao"- avai: ayae mae" vogaung: jham mae mho" shid' kho" kyo: nae" qhid' mae" yao: wa ai: jo, qo mae" thug' lo" ra". 2 Khristu zaui" na: ra" mau" zo" jham: khyo re Yohan wa thaung: mae" the' gyo: lao"- yao" mho"zo: daqhae: re Yesu jhao" nhao: ke' ra". 3 Yohan: mho"zo: qe wa Yesu re nao wa ai: joe" li" nae" ga" ra" yaug ngad va" i? Mangad: lao"- gatau re ngonhaung" myid: lao" na ca" shi" i? ga: myid' ako". 4 Yesu wa yao: bam re naonhaung" myao: ru we' the' gyo" ra" gu: Yohan re lo" ta" kyo: ge,- 5 Myo, jid qe myo, myao: li" ko" ra"- Khyid qeim mo, khyo qo" su: ko" ra"- Mao gae: de, mo, gyang" shao: lo" ko" ra"- No: jid mo, no: gyo" li" ko" ra"- Shid: ra" mo, dam: daui: li" ko" ra"- Myaung sho" ra" mo, wa Lau Dao: Gai the' gyo ako". 6 Ngo re lam: ra" myid maaug' o: mo, wa ngaui lho" ko" ra"- ga: ta" ra". 7 Yohan: mho"zo: qe phao: lo" na ko" au: Yesu wa Yohan: khyo we' sin: mung: mo, byu qere naonhaung" wa din" pyad yo khyo pe" re ye: qu" nae" ein: thug' ye: ko" i? La: yang hug' nghan" na: ra" myo, phaung: gae jham re ye:qu" nae" ein: ye: ko" i? 8 Airu: mangad: lao" pe" re ye: qu" nae" ein: ye: ko" i? Mai gai bau: gai ve; ci: ra" mo, re qu" nae" ein: ye: ko" i? Mai gai bau: gai ve, mo, wa kho:kham kho" mae na: ako". 9 Airu: mangad: re- pe"mung: naonhaung" ye: ko" i? Lapa re ye: qu" nae" ein ko" i? Ngad: va"- ngo naonhaung" re ta" geli"- Lapa tho' je: qi" ra" yaug re naonhaung" myao: avako". 10 Amung: jham: mugsug' mae Qu" wa,- ni" khyo re nyhang" na nae" qhid' mae" nga" lagyo: re ni" qhid' au: mae ngo nhao: ke' nae"- ga: tung" to" ru wa Yohan re ta" ru ngad: ra". 11 Naonhaung" re ngo dang dang za: ta" geli"- qid nyhab' kham: byid' ra" Yohan tho' je: qi" ra" xao su byu dayaug re: mana: qu" shi: ngad: ra". Ngadqere: mug:gaung: mung"dan: mae je: ngai: thao" ra" yaug wa- Yohan tho' je: qi" ra". 12 Qid nyhab' byid' ra" yaug Yohan mungdao: kho" kyo" ra" ba na mae" ana" ba joe" sho' mug:gaung: mung"dan: re lhad' yu nae" qam: ke' ko" ra". 13 Pe"mung:ga"re lapa qe alhab' we' kham" to" ra" Tarha" wa ai: mung"dan: khyo re Yohan: pyad joe" sho' ta" kyo" lo: avako". 14 Yao: bam: mungdao: re khae: yu mung: lam" ko" ngad: re wa Yohan wa joe" li" nae" ra" Elia ngad: rure re: naonhaung" khae: yu: li" genae". 15 No: khye' de, mo, wa gyo" yu geshao:. 16 Ngo wa ce: qae" mae" byu qere pe" we' dau tau" nae" i? Yao: bam wa gai jao: mae zaung: jo, mung:- 17 Naonhaung" wa ngonhaung" khalhao: mad ngadqere: mago" ngad: ako". Ngonhaung" ngug yao" yao" ngadqere: makaug' gengad ko" ra" ga: daphung: wa daphung: re zo:jhi jhi mung: jho" yao: na: ako" ra" zoshao qe we' dau: ako". 18 Pe"mung:ga"re Yohan wa zo:ve jao" mung: mazo: mashaug' lo: joe" li" lao"- yao: bam wa yao: re yui de; ra" ga: ta" ako". 19 Byu: yao: zo: wa zo: mung: shaug' mung: joe" li" lao" re:- yao: bam wa Qu" ge, yao: wa zo: shaug' so' kho' shu yaug- qobo qo" mo, we' khang: khyui zo: mo; byin cao: ngad: ra" ga: ta" ako". Mao"So: pha,jhi" laba lajhao wa dang: ru ngad: ga" rure yao" ashi: jham khyo" yang sagse: kham byid' ra". 20 Alao"- Yesu wa mug' pho: mau" zo" laug phyao: kad' qhu" lo: ra" vogaung: jham mae"- mo, byu qere myid matha" ko" ruyang ai: vogaung: jham re qeim: ra". 21 Korazin we"- nao byu xa: voqoe, qhug' nae"- Bedsaida we"- nao re: byu xa: voqoe, qhug' nae"- naonhaung" shid' vo re kad' qhu" ra" mug' pho: mau" zo" jham re Ture we' Sidon shid' vo mae kad' qhu" ngad: re wa- ai shid' vo wa daba: mae" jid: mo" mai bau: ve, mung:- myiqe, bam mae lhau: yang: myid tha" genae" va". 22 Dao: kho' ra" ba na mae naonhaung" shid' vo wa- Ture we' Sidon shid' vo tho' je: qi" ra" qobo dae qhug' kham zo: genae". 23 Ai we' dakhyo:- Kapena-um we"- nao wa mug:gaung joe" sho' to' ke' ru qhug' nae" ein: jho: i? Myi:qid tham: khyo joe" sho' khyo" ke' ru nao qhug' nae". Pe"mung:ga"re nao re ngo kad' qhu" ra" mug' pho: mau" zo" jham re Sodom mae kad' ngad: re wa ai: vogaung: wa ana" ba joe" sho' jo, shinae" ngad: ra". 24 Dao: kho' ra" ba na mae nao wa Sodom vogaung: tho' je: qi" ra" qobo dae qhug' kham zo: nae"- ga: ta" ra". 25 Alao"- Yesu wa mug:gaung we' myid gaung: Asang Pho" we"- Pha,jhi" bo: ra" mo, we' nyan: kung: ra" mo, re maba nhao lo: nyham" to" ra" ja: jham re pha,jhi" mabo: ra" mo, re nao qhu" byid' ruyang ngo nao re caung:khin" byid' ra". 26 Ngad va"- Pho" we"- ceru: boe" ru wa nao myid o: ra" khyo ngad: ra". 27 Nga" Pho" wa ngore ja: khao: ngo" alhab' byid' to: va" ra". Pho" mae" je yang; ai: yao: zo: re khag' re maba. Pho" rere: ai: yao: zo: we' ai: yao: zo" yang qhu" byid: nae" khyin: yu: ra" mo, mae" je yang: khag' maba ko" ngad: ra". 28 Qola: vin yang: myaung: dug: ra" mo, alhab' we"- ngojhao" lo geri:- ngo naonhaung" re myaung: ngho: nhao nae". 29 Ngo wa xam: mag mung:- nhag' lam: nyham yaug ngad: ra". Airumung:- nga" kyau: re vin ge,- nga" khyo re mho" yu ge,- ailao" naonhaung" dugno: qhug' genae". 30 Pe"mung:ga"re ngo byid' ra" kyau: wa vin laui: ru we' ngo vhin: ra" qo wa seim" ra"- ga: ta" ra". 1 Ai: thao Yesu wa Dugno: Ba mae gaug yo khyo" lai: lo" ra". Yao" mho"zo: qe wa vae: moe; geyang: gaug shi: shan" yu mung: zo" ako". 2 Aire Pharishe qe myao gelao"- Qu" wa,- ni" mho"zo: qe wa Dugno: Ba mae magai: kad' ra" ja: re kad' ako" ga: Yesu re ta" ako". 3 Yesu wa yao: bam re Davi wa yao: we' yao" byu qe vae: moe; gelao"- khoru: kad' ko" ra" khyo re naonhaung" manghe' qu" ko" i? 4 Yao: wa Mao"So: yham khyo vao ye: mung:- khinjaung qe mae" je yang: khag' re: magai: zo" ra"- Mao"So: qhid' kheim: mae qhaug' byid' to" ra" mug re yao: we' yao" byu qe yu zo: ko" ra" mangad: i? 5 Aimae"- Dugno: Ba khao: ngo" khinjaung qe wa Caung:pa" Yham mae- Dugno: Ba Tarha" re shad' lhoe" gengadqere: qobo maqo" ko" ngad: ra"- ga" ra" Moshe Tarha" re naonhaung" manghe' qu" ko" i? 6 Naonhaung" re ngo ta" geli"- Caung:pa" Yham tho' je: qi" ru wa cemae na: ra". 7 Ngo wa xeim: ngaui" byid' rure tho' nhag' khyag' rure je: o: ra" ga" ra" jham: dao: re ba: gyo: ko" ngad: re wa- qobo maqo" ra" mo, re naonhaung" qobo vhin genae" mangad:. 8 Pe"mung:ga"re- Byu: Yao: Zo: wa Dugno: Ba: Asang ngad: ra". 9 Yesu wa ai: jo, qo mae" thug' ye" lo" mung: Tarha" jung yham dalam: khyo vao ye" ra". 10 Qu" ge, ai: Tarha" Jung Yham mae lo, dashad' shid: ra" byu dayaug na: ra". Byu damyo" wa Yesu re qobo zhaug' nug mung:- Dugno: Ba mae no gai: nyhang" gai byid' i? ga: Yesu re myid' ako". 11 Yesu wa yao: bam re tau: mung:- naonhaung" yao dadau: wa Dugno: Ba mae dung:khung: khug khyo byid: gyo" lo" ngad: re ai: yao re maye: phoe' yu nae" byu naonhaung" mae bo ko" i? 12 Byu wa yao tho' myo: sho' je: phug' de; mangad: i? Airu: mung:- Dugno: Ba mae gai: ra" mau" zaui: nae" akhang" jo; ra"- ga: ta" ra". 13 Alao" Yesu wa ai: lo, dashad' shid yaug re Ni" lo, din" ke' wa,- ga: ta" ra". Yao" lo, din" ke' we' lo, gai lo, we' dakhyo: gai: lo" byaug: ra". 14 Pharishe qe wa aimae" thug' lo" mung: Yesu re se' pye' nae" qhid' mae" khyo qho: ako". 15 Yesu wa ai: khyo re ba lao"- ai: jo, qo mae" thug' lo" ra". Mo, byu myo: sho' yao" thao cao" ako". No phyo: qhug' ra" mo, alhab' re gai byid' ra". 16 Ngadqere: yao" khyo re mahau: genae" qhid' mae" yao: bam re zug' nhao: ra". 17 Yao: ceru: kad' ru wa Lapa Esaia nhad' khyo" Mao"So ta" ra" dao: jham jab byang" lo nae" qhid' mae" ngad: ra". 18 Ai: Lapa dao: mae- ngo khyin: yu: ra" nga" daui daui yaug- ngo jhid'de; o ngaui: ra" yaug re qu" ge,- Nga" Gyang" lho" Byo yao" dao mae nhao: ke' byid: nae"- Yao: wa nga" dao: kho' ra" khyo re byumyu" cao jab alhab' re ta" hau" kyo" li" nae". 19 Yao: wa maha mangag- thoe qi: re: mahug' nae"- Hau" mo" khyodang mae yao" thoe re khag' mathe' gyo: genae". 20 Yao: wa kaui: ra" qid phaung: yao: re makhyug' pye' nae". Amung: kyi za: kyi: lo" ra" myi: rere: mase' pye' nae". Yao: wa tarha" din: vang" ru aung: nghoe' lo sho' qam: ke' li" nae". 21 Byumyu" cao jab alhab' yao: re khug ngha: li" genae"- ga: ta" to" ra". 22 Ai: thao byu damyo" wa yui zaung yang: myo, jid: ru we' nhad' jid: ra" byu dayaug re Yesu jhao" jhui" li" ako". Yesu wa aiyaug re gai byid' ra"- Alao" yao: wa myo, myao: li" mung: dao: re: jhau: li" ra". 23 Mo, byu qe alhab' mo, wa mug' hao" byaug: ru we'- ceyaug wa Davi yao: zo: gai: ngad nae" i? ga: ta" ako". 24 Pharishe qe wa aire the' gyo: gelao"- ceyaug wa yui zug: mo" Bezelbu qam: so' khyo" yang yui jham re khe' thug' pye' ru ngad: ra"- ga: ta" ako". 25 Yesu wa yao: bam: aung khug mae pe" bo: rure ba mung: yao: bam re- Mung"dan: dalam: wa phung: jho" kho' yang: yao: cao: gye jho" se' na ko" ngad: re wa mamyao" re byo; qeim: lo" li" nae". Ai we' dakhyo: yao: cao: nhag' lam: majho" vang" ra" vogaung:- ug' khug' dinkhu: re: byo; qeim: lo" li" nae". 26 Gatau: Satan re khe' thug' mung: Satan yao: cao: majho" vang" lo:- gye jho" se' na ko" ngad: re wa yao" mung"dan: wa khoru: qo" gang" tang: jo, nae" i? 27 Ngo wa Bezelbu qam: so' yang yui jham re khe' ru ngad: re wa naonhaung" mho"zo: qe wa khag' qam: so' khyo" yang yui jham re khe' thug' ko" ra" i? Airu: mung:- naonhaung" shad' na: rure naonhaung" mho"zo: qe: lo, mau" jham: yang yao: sagse: qhu" byid' na: ra". 28 Ngo wa Bezelbu qam: so' khyo" yang mangad:- Mao"So: Gyang" Lho" Byo: Qam: so' khyo" yang yui jham re khe' thug' pye' ru ngad: ra". Aiwa naonhaung" phaung mae Mao"So: mung"dan: joe" li" va" ga" rure qhu" byid' ru ngad: ra". 29 Qam: bo yaug re shi" sao qhid' mataui" to: lo: yao" zai jham re lhad' yu nae" qhid' mae" ai: qam: bo yaug: yham khug khyo khag' re: maqo" vao ye: ngad: ra"- Bin: taui" to: thao re za: yeqo" lhad' yu: ra". 30 Nga" thao khyo made, ra" yaug wa ngore gye kad' yaug ngad: ra". Ngo we' daga" masham" zhang: ra" yaug wa abyo asin: yaug ngad: ra". 31 Naonhaung" re ngo dang dang ta" geli"- Byu wa qobo alhab' we' Mao"So re jung" dao: ta" ra" qobo alhab' re khyad' pye' byid' ru gai: qhug' ra". Ngadqere: Gyang" Lho" Byo re jung" dao: ta" ra" yaug kam" wa qobo khyad' pye' byid' ru magai: qhug' nae". 32 Byu: Yao: Zo: re jung" dao: ta" ra" yaug khag' ngadqere: qobo khyad' pye' byid: ru gai: qhug' ra". Gyang" Lho" Byo re jung" dao: ta" yaug kam" wa ana" ce: pyad mae ngadqere: thao: pyad khonhae" re: qobo khyad' pye' byid ru magai: qhug' nae". 33 Gai: ra" agae wa lho" ra" ashi: zaui" ra". Qam: mabo: ra" agae wa ashi: seim zaui" ra". Pe"mung:ga"re- agae qam: mabo: bo ru wa ashi: re qu" yang: ba: kho' ra". 34 Lhao maui jham we"- Makhyang: magai: ra" mo, naonhaung" wa gai: ra" dao: khoru: gai: jhau genae" i? Pe"mung:ga"re aung khug nhag' lam: mae byang" sheim: jo, ra" gu: nhad' khyo" jhau: thug' li" ra". 35 Gai: ra" yaug wa yao" jo,nho" ban" mae" gai: ra" zai jham re phoe' thug' ra"- Magai: ra" yaug wa yao" jo,nho" ban" mae" magai: ra" zai jham re phoe' thug' ra". 36 Naonhaung" re ngo ta" geli" dao: kho' ra" ba na mae byu yaug khao: ngo" wa yao: yao: jhau: lai: pye' ra" akyu" mabo: ra" dao: jham: qhid' mae" dao: kho' ru qhug' ca" li" genae". 37 Nao jhau: lo: ra" dao: jham khyo" yang nao qobo qo" maqo" rure Mao"So wa nao re dao: kho' li" nae". 38 Ai: thao tung" pho" qe damyo" we' Pharishe qe wa Yesu re Mho" pho" we"- ngonhaung" re mug' pho: ve, lho daja: ja: kad' qhu" la, ga: ta" ako". 39 Ngadqere: Yesu wa yao: bam re tau: mung: magai makhyang" ru we' Mao"So re malam: ra" ce: qae: mae" byu qe wa mug' pho: ve, lho kad' qhu" nae" mho' ako". Lapa Yona nho: mug' pho: ve, lho mae" je yang: pe" mug' pho: ve, lho re: makad' qhu" nae". 40 Yona wa ai: ngo: zang: vae: dug: khug mae sam myi sam ba geim" laung" jo, ru we' dakhyo: Byu: Yao: Zo: re: myid kao" khug mae sam myi sam ba laung" jo; li" nae". 41 Nineve vobyu qe wa Yona kho" kyo" ra" mungdao: re the' gyo: gelao" yao: bam: qobo mae" myid tha" lo: ako". Airumung: dao: kho' ra" ba na mae Nineve vobyu qe wa to" ye, mung: naonhaung" re qobo zhaug' li" genae". Naonhaung" re ngo ta" geli" Ce: jo, qo mae Yona tho' je: qi: yaug na: ra". 42 Sheba kho:kham myhi" wa kho:kham Sholamon: Pha,jhi" dao: re tae" gyo: nae" qhid' mae" va" ra" mung"dan: mae" joe" lo: ra". Airumung: dao: kho' ra" ba na mae Sheba kho:kham myhi" wa to" ye, mung: naonhaung" re qobo zhaug' li" nae". Naonhaung" re ngo ta" geli"- ce: jo, qo mae kho:kham Sholamon tho' je: qi: yaug na: ra". 43 Ai: makhyang" ra" yui wa yao: vao: jaung" na: ra" byu mae" thug' lo" lao"- kyaug' ho: ra" jo, qo khaung: mae ye: du" qin" mung:- no: nae" jo, qo re cao" qho: ra". No:qo maqhug' lao"- 44 Ai: yui wa- azhao ngo na co' ra" yham khyo dam: tug' lo" nae" ngad: ra"- ga: ta" ra". Amung: yao: dam: tug' joe" lo: re phyao: sham" pye' mung: nyang" za: shaung: nyhang" to" ra" yham keim re lomyao: ra". 45 Ai: yui wa thug' ye" lo" mung:- yao: tho' je: makhyang" ra" yui nhad' dau: re khai: jhui" lo mung: yao: bam wa ai: yham mae lovao: na: ako"- Alao" byu aiyaug: ave, wa qhid' phyao: mae" tho' je: qo: byaug: ra". Ce:ban: mae" makhyang: mo, re: ai we' dakhyo: boe" genae"- ga: ta" ra". 46 Yesu wa mo, byu qere dao: jhau: na shi" au: yao: myhi" we' yao: nhaung: bam joe" li" ako". Yao: bam wa yao: we' qhug' jhau nug gemung: taung gaung mae lao" ye: jo; ako". 47 Mo, byu qemae" dayaug wa Yesu re Asang we" ni" myhi" we' ni" nhaung: bam nao we' jho" qhug' jhau nug mung: taung gaung mae lao" ye: jo; ako" ga: ta" kyo" ra". 48 Yesu wa nga" myhi" khag' ngad: i? Nga" nhaung: bam wa khag' ngad: ako" i? ga: phaug' ta" ra". 49 Amung: Yesu wa Yao" mho"zo: qere lo, ceim: mung:- Qu" ge, cebam wa nga" myhi" we' nga" mao:nhaung: qe ngad ko" ra". 50 Mug:gaung dao mae na: ra" nga" Pho" myid o: ra" khyo" cao" ra" yaug khag' ngadqere: nga" mao:nhaung:- nga" myhi" ngad:- ga: ta" ra". 1 Ai: ba yao: re Yesu wa ai: yham mae" thug' lo" mung: tham: yae mae yezaung: jo; ra". 2 Yao: jhao" zang" li" ra" mo,byu qe mo, paug' saung" thau: ruyang Yesu wa lha dakhye' dao mae yezaung: jo; ra"- Mo, byu qe wa tham: yae mae ye; jo; bam: ako". 3 Alao" yao: wa yao: bam re dao: tau" tau" mung:- myo: sho' ja: re mho" kyo: zo" re" ta" ru wa- Myug: shi: sin: yaug wa myug' shi: sin: nae" qhid' mae" thug' ye" lo" ra". 4 Yo mae myug: shi: yesin" ke' re- daqhae: wa khyodang cao" yang: gyo" lo" ako". Aimung: myug: shi: jham re ngho' jham li" yang: gaug zo" pye' ko" ra". 5 Daqhae: wa myid zhai: mathau: ra" laug qan" dao mae gyo" lo" ako"- Myid zhai: mathau yang: ajao" yao: yaug: thug' li" ra". 6 Ngadqere: ba thaung: li" lao" lhe' mhai: pye' mung:- agyi: no, sho' macin" ruyang kyaug' shid: byaug: ako". 7 Daqhae: wa zau: bye, gyo: mae gyo" lo" ako"- Zau: bye, jham yaug: qi" li" mung: qhovo: pan jham re hab' pye' ako". 8 Ngadqere: myug: shi: daqhae: wa myid gai mae gyo" lo" ako"- Yaug: li" mung: daqhae: wa dayo nho"- daqhae: wa khyaug' xe nho"- gatau daqhae: wa sam xe nho" ashi: zaui" li" ako". 9 No:khye' de, ko" re wa gyo" yu ge,- ga: ta" ra". 10 Alao" yao" mho"zo: qe wa Yesu jhao" te' ye: mung:- Mo, byu qere nao pe"mung: dao: tau" ci yang: ta" i? ga: yao: re myid' ako". 11 Yesu wa yao: bam re tau: mung:- naonhaung" wa mug:gaung: mung"dan: no; thao" ra" khyo re ba: gyo: nae" akhang" qhug' yu: ako". Ngadqere: yao: bam wa aire maqhug' yu ko" ngad: ra". 12 Pe"mung:ga"re qo" ra" yaug re je: laung: byid: mung: yao: wa jan" sho' qo" li" nae". Maqo" ra" yaug mae" kam" wa yao: qo" ra" gu dajhid' za: mae" lhao" alhab' re yu: pye' byid: nae". 13 Yao: bam wa qu" gengadqere: mamyao- gyo: gengadqere: maba: gyo: ko" ruyang ngo wa ce: dao: tau" ci yang: ta" ru ngad: ra". 14 Amung: Lapa Esaia ta" ru wa- yao: bam mae jab byang" lo: ra". Esaia Lapa dao: wa Cebam wa tae" gyo: gengadqere: maba: gyo: genae"- Yao: bam qu" gengadqere: mamyao genae". 15 Pe"mung:ga"re- yao: bam: nhag' lam: nhag' cad' cad' ru we' yao: bam: no:khye' va: mung:- yao: bam: myo, jid' cam" ci: ako". Airu mangad: lo: yao: bam: myo, jid: myao mung: yao: bam: nokhye' gyo: yang:- yao: bam: aung khug nhag' lam: mae ba: gyo: ko" ngad: re wa yao: bam wa ngore khug ngha: lo: li" genae"- Ailao" ngo wa yao: bam re gai byid: nae" ga: ta" to" ra"- ga: ta" ra". 16 Naonhaung" myo,jid' myao mung: naonhaung" no:khye' gyo: ko" ruyang naonhaung" wa ngaui lho" ko" ra". 17 Ngo naonhaung" re dang za: ta" ru wa naonhaung" no:khye' gyo: ko" ruyang naonhaung" the' myao: ra" ja: re lapa qe we' Mao"So: byu qe myo: sho' mo, gyai myao nug: ako". Ngadqere: yao: bam maqo" myao ko" ngad: ra"- amung: naonhaung" the' gyo" ra" ja: rere: yao: bam gyai gyo: nug ko" ra". Ngadqere: yao: bam maqo" the' gyo: gengad: ra". 18 Amung: myug: shi: sin: yaug: dao: tau" lajheim: re tae" gyo" yu ge,- 19 Khyodang cao" yang: gyo" lo" ra" myug: shi" jham wa Ai: mung"dan: lau dao: re the' gyo: gengadqere: aire maba: gyo" yu: ra" mo, ngad: ako". Satan wa li" mung: yao: bam: nhag' lham: khug mae sin" ke' to" ra" mung"dan: mungdao: myug: shi: jham re yu: pye' byid' ra". 20 Myid zhai: mathau: ra" laug qan" dao mae gyo" lo" ra" myug: shi: jham wa mung"dan: lau dao: re the' gyo" yu we' ai jao" yao: ngaui bau: za: khae" yu: ra" mo, ngad: ako". 21 Ngadqere: ai: mung"dan: lau dao: wa yao: bam: nhag' lam: khug mae no, sho' agyi: macin" mung: myao" sho' maqo" yaug: jo, gengad: ra". Ai: mung"dan: lau dao" mathao mae qug: khai" ru we' yhin" ru qhug' lo lao" yao: bam wa phyad za: dam: phaug' lo" ako". 22 Zau: bye, gyo: mae gyo" lo" ra" myug: shi: jham wa ai: mung"dan: lau dao: re the' gyo" yu ngadqere: yao: bam byu na ban qhid' mae" myid: qug: myid: ci" ru we' ngaui qhang jo,nho" magan: mago" qo" nug: ruyang ai: mungdao: re hab' pye' mung: ashi: maqo" zaui" ra" mo, ngad: ako". 23 Amung: myid gai mae gyo" lo" ra" myug: shi: jham wa ai: mung"dan: lau dao: re gyo" yu mung: ba gyo" yu mo, ngad: ako". Yao: bam wa ashi: zaui" li" mung: daqhae: wa dayo nho"- daqhae: wa khyaug' xe nho" daqhae: wa sam xe nho" myo" laug: lo: ako". 24 Yesu wa dao: tau" gatau we' yao: bam re dam: ta" ra". Mug:gaung: mung"dan: wa ceru we' dau: ra". Byu dayaug wa- yao" yo mae gaug gai yesin" to" ra". 25 Ngadqere: myi" re byu alhab' yab: myhid' jo, ra" au: geim lau gye wa li" mung: gaug yo mae myo, shi: jham re li" sin: co' mung: lo" byaug: ra". 26 Gaug gae jham yaug: qi" li" mung: gaug nhae thug' li" lao"- ai: myo, gae jham re: myao: thug' li" ra". 27 Alao" yosang: jeim qe wa lo mung: Asang we"- ni" yo mae nao gaug myug: gai asin" to" mangad: i? Aire myo, gae jham wa khai: mae" yaug: li" ko" ra" i? ga: yao: re ta" ako". 28 Alao" yao: wa yao" jeim qere- Aiwa geim lau gye: yang kad' ru ngad: ra" ga: tau" ra". Jeim qe wa ngonhaung" ai: myo, gae jham re yephan" pye' zai i? ga: myid' ako". 29 Yosang wa daye: phan" pye' ge, Pe"mung:ga"re myo, gae jham re phan" lao"- gaug gae jham damyo" re: boban" lo" zai ngad: ra". 30 Yad yo, joe" sho' gaug we' myo, gae shid' ja" geim" daga" yaug: qi" li" vageshao:- Gaug yad yo, joe" lo lao"- gaug yad okaung qere myo, gae jham re shi" sao qhid' phan" dang" yu mung: myi: mae ngha" pye' ge,- ai:thao gaug re yad: zhang: yu: mung: nga" jhi mae ke' to: ge,- ein: ngo ta" nae"- ga: ta" ra". 31 Yesu wa dao: tau" gatau we' yao: bam re dam: ta" ra". Mao"So: mung"dan: wa ceru we' dau: ra". Byu dayaug wa ao: shi: jid' re yao" yo mae yesin" ke' ra". 32 Ao: shi: jid' wa myug: shi: jid' alhab' tho' mae ngai: thao" ra" myug: shi: jid' ngadqere: agae yaug: qi" li" lao"- ao: pho' gae alhab' tho' mae je: qi" ra" agae boe" li" ra". Ngho' jham wa yao" akaung jham mae asad' li" sad' ako". 33 Yesu wa dao: tau" gatau ci yang: yao: bam re dam: ta" ra". Mug:gaung: mung"dan: wa ceru we' dau: ra". Myiqe: dayaug man" yu: yu mung:- cin man" phaui: datang mae ke' mung: yang: lhag' ke' lao" cin man" alhab' geim" re bai" do, li" nhao: ra"- ga: ta" ra". 34 Yesu wa cegu: alhab' re dao: tau" ci yang: mo, byu qere ta" kyo" ra". Dao: tau" maci lo: daja: rere: yao: bam re mata" kyo: ngad: ra". 35 Yao: ceru: kad' ru wa Ngo wa dao: tau" ci yang: nga" nhad' thoe phung" mung: mug: myid phan" to" ra" ba na mae" nyham" to" ra" ja: re ngo ta" pheim: kyo: nae"- ga" ra" Lapa dao: jab byang" li" nae" qhid' mae" ngad: ra". 36 Ai: thao Yesu wa mo, byu qere to: co' mung: yham khug khyo vao lo" ra". Yao" mho"zo: qe wa yao: jhao" te' lo mung:- ai: myo, gae jham: dao: tau" lajheim: ngonhaung" re pheim: kyo: byid: la, ga: mho' ako". 37 Alao" Yesu wa gaug myug: gai sin: yaug wa ai: Byu: Yao: Zo: ngad: ra". 38 Amung: yothaung: pa: wa ce: mug: myid dao ngad: ra"- Gaug myug: gai wa Mao"So: mung"dan: zo: dau qe ngad: ako"- Myo, gae jham wa yui Satan" nho: zo: dau qe ngad: ako". 39 Aire sin: yaug wa yui Satan ngad: ra". Gaug yad yo, wa mug: myid thao" lo" ra" ba na ngad: ra"- amung: gaug yad o: kaung qe wa mug: lagyo: qe ngad: ako". 40 Ai: myo, gae jham re phan" dang" yu mung: myi: mae ngha" pye' ru we' dakhyo: mug: myid thao" lo" ra" ba na mae re: ai: yui Satan" nho: zo: dau qere myi: mae ngha" pye' li" nae". 41 Byu: Yao: Zo: wa yao" mug: lagyo: jham re nhao: ke' mung:- su re qobo kad' nhao: ra" mo, we' magai: ra" mau" zo" kad' ra" mo, re yao" mung"dan: khug mae" khyin: thug' yu mung: 42 Yao: bam re myi:khyeim" mae pye' zaui: pye' li" nae"- aimae yao: bam ngug byid ngug nhe' we' zaui kyag' genae". 43 Alao"- din:man: ra" mo, wa Pho" Mao"So: mung"dan: mae ba we' dakhyo: zho: na: li" genae"- no: khye' de, ko" re wa gyo" yu ge,- 44 Mug:gaung: mung"dan: wa ceru we' dau: ra". Byu dayaug wa yo mae nyhab' to" ra" jo,nho" re yethe' myao lao"- yao: wa dam: nghoe' to: co' mung: ngaui bau" ru we' lo mung: yao: qo" gu: alhab' re lo: aung" pye' yang:- ai: yo re yevai: yu: ra". 45 Mao"So: mung"dan: wa ceru we' re: dau: ra". Phaga: byu dayaug wa phug' de; ra" palhe" re qho: na: ra". 46 Yao: wa phug' de; ra" palhe" re qho: myao lao"- yao: qo" ra" gu: alhab' re lo" aung" pye' mung: ai: phug' de; ra" palhe" re yevai: yu: ra". 47 Aimae"- mug:gaung: mung"dan: wa ceru we' dau: ra". Ngo: kung" mo, wa yao: bam: geim re tham: khug mae ye: khyo" to: lao"- ngo: myo: sho' ja: myi" ako". 48 Ngo: jham byang" sho' myi" gelao"- yao: bam wa tham: yae gyagao: yo khyo she: to' yu mung: zaung: jo, yang:- gai: ra" ngo: jham re gyan khug mae ke' to: mung:- magai: ra" ngo: jham re wa khyin: shapye' ko" ra". 49 Mug: myid thao" lo" ra" ba na mae re:- ai we' dakhyo: ngad nae"- Mug: lagyo: jham wa makhyang" ra" mo, re din:man" ra" mo; phaung mae" li" khyin: zhang: yu mung:- 50 Myi:khyeim" khug khyo pye' zaui: pye' li" genae". Aimae yao: bam wa ngug byid ngug nhe' we' zaui kyag' li" genae"- ga: ta" ra". 51 Yesu wa yao: bam re naonhaung" cegu: alhab' re ba: gyo: ko" i? ga: myid' ra". Alao" yao: bam wa ba: gyo"- ga: phaug' tau" ako". 52 Alao" Yesu wa airumung:- mug:gaung: mung"dan: mho"zo: boe" lo" ra" tung" pho" khag' ngadqere: yao" kyaung" lhaung" qe, khug mae" zai sag' zai kug jham re phoe' yu: ra" yham sang dayaug we' dau: ra"- ga: ta" ra". 53 Yesu wa ai: dao: tau" jham re bin: ta" lao"- yao: wa ai: jo, qo mae" thug' lo" mung:- 54 Yao" vogaung: khyo dam: tug' joe" lo: ra". Yao: wa Tarha" Jung Yham mae mho" shid' byid' ra". The' gyo" ra" mo, alhab' mug: hao" byaug: ako". Amung: yao: bam wa yao: wa airu" ra" pha,jhi" khai: mae" ba: yu: laug i? Mug' pho: ve, lho jham re khoru: qo" kad' laug i? 55 Yao: wa lag sama yao: zo: mangad: i? Yao: nhaung: bam wa Yaku- Yoseb- Simon we'- Yuda bam mangad: ge, i? 56 Yao: nhae: mo" bam re: cemae nyhao: nhaung" we' daga" za: na: bam: ru mangad: i? Aire yao: wa cejham re khai: mae" qo" yu: laug i? ga: ta" mung: yao: re yao: bam ngag: pye' ako". 57 Amung: Yesu wa yao: bam re Lapa wa yao: yao" vogaung: we' yao: yao" yham mae" je mung: khyi" khao: ngo" mae nga: ye; ra"- ga: ta" ra". 58 Yao: bam wa yao: re lam khug: myid mabo ko" ruyang yao: wa ai: vogaung: mae mug' pho: mau" myo: sho' mazaui" qhu" ngad: ra". 1 Ai: ayo, re Galile mung" re eib: na: ra" Herod wa Yesu khyo re the' gyo" ra". 2 Alao" yao: wa yao" zug: qere ceyaug wa qid nyhab' byid: yaug Yohan ngad: ra"- yao: wa shid: rumae" dam: daui: to" li" ru ngad: ra". Airumung:- yao: wa mug' pho: mau" zo" jham kad' ru ngad: ra"- ga: ta" ra". 3 Herod wa yao: nhaung: Philib yham sang myhi" mathao mae Yohan re taung" yu mung: thaung: khug mae lhaung" to" ra". 4 Pe"mung:ga"re Yohan wa Herod re- Ni" nhaung" nho: yham sang myhi" Herodia re magai: ngho" ngad: ra" ga: ta" ruyang ngad: ra". 5 Herod wa Yohan re se' pye' nug: ra". Ngadqere: Yuda mung" byu qere gyaug yang: mavae" se' pye' ngad: ra". Pe"mung:ga"re yao: bam wa Yohan re lapa ngad: ga: jho: na geyang: ngad: ra". 6 Herod khau: ra" ba na mae Herodia nho: myiqe: zo: wa alhab' mo; qhid' kheim: mae li" go" nhan" qhu" ra". Herod wa airu re gyai qu" ngaui: ra". 7 Alao" Herod wa ai: myiqe: nau" re nao ngore mho' ra" jhaung qhu" pe" ja: ngadqere: nao re ngo byid: nae"- ga: jham tang: yang: yao: re dao:so: byid' ke' ra". 8 Ai: myiqe: nau" wa yao: myhi" yang jhan" nhao: ru we' dakhyo: yao: wa qid nyhab' byid: yaug Yohan: au: re ban dao mae kai: yang: cemae ana" yao: ngore byid: la, ga:- mho' ra". 9 Kho:kham pho" wa nhag' lam: gyai myid: qug: ngadqere: yao" bang" vo qe: qhid' kheim: mae jham tang: yang: dao:so: byid' pye' va" ruyang myiqe: nau" mho' ru we' dakhyo: byid: nae" qhid' mae" amyin" byid' ke' ra". 10 Alao" Herod wa Yohan: au: re thaung: khug mae" ye: phyid' yu nhao mung:- 11 Ban dao mae kai: yang: ai: myiqe: nau" re byid' ako". Yao: wa yu: yu mung: yao: myhi" re lo" kai" byid' ra". 12 Yohan: mho"zo: qe wa ai: mao gaung re yegaug: yu mung:- nyhab' shaung: pye' ako". Ai: thao yao: bam wa Yesu jhao" ye: mung: lau dao: ye: ta" kyo" ako". 13 Yesu wa Yohan: khyo re the' gyo: lao"- yao: wa ai: jo, qo mae" cae: tae" ra" dajo, qo khyo yao: dayaug za: lha jui: yang: thug' ye" lo" ra". Ai: khyo re mo, byu qe the' gyo: gelao"- vo khao: ngo" mae" mo, byu qe wa taung gaung khyo" yao" thao cao" ye" ako". 14 Yesu lha khug mae" thug' lo we' byu phung: mo" re myao lao"- yao: bam re nhag'qu" khyag' mung: yao: wa yao: bam: no phyo: re gai byid: ra". 15 Myi" thao joe" lo lao"- yao" mho"zo: qe wa yao: jhao" lo mung: ce: jo, qo wa din"pyad' yo ngad: ru we' ba re: vao: lo" va" ra"- Airu: mung:- ce: mo, byu qere vogaung: jham khyo zo:ve ye: vai zo: geshao:- yao: bam re nhao: ke' wa,- ga: ta" ako". 16 Yesu wa mho"zo: qere Yao: bam ye: maca"- yao: bam re naonhaung" yao: zo:ve byid: zho: ge, ga: phaug' tau" ra". 17 Alao" mho"zo: qe wa ngonhaung" mug ngo" khai" we' ngo shid' dau: za: aqo"- ga: ta" ako". 18 Yesu wa ai: mug we' ngo: cekhyo cilo geri:- ga: ta" ra". 19 Yesu wa mo, byu qere vohau: yo mae zaung nhao mung:- ai: mug ngo" khai" we' ngo shid' dau: re yu yang: mug:gaung khyo tau: qu" mung: Mao"So re jeju caung: byid' ra". Mug re khyoe' phai" yang: yao" mho"zo: qere byid' ra"- Mho"zo: qe wa mo, byu qere gae byid' ako". 20 Yaug khao: ngo" gyi: sho' zo" ako". Ai: thao mho"zo: qe wa zo" tang" ra" mug aje, abai" jham re daxe: shid' gyan byang" sho' gaug: zhang: yu: ako". 21 Myiqe: zoshao qe manghe' lo:- mug zo" ra" mo, yauggai qeza: ngo" taung ko ngad: ako". 22 Ai: thao Yesu wa- mo, byu qere nhao: ke' zo" re"- yao" mho"zo: qere- lha dao do; zaung mung: tham: thoete' khyo gau" ye" lo" na genae" qhid' mae" nhao: ke' ra". 23 Mo, byu qere phao nhao: ke' thao re- Yesu wa akyu" mho' nae" qhid' mae" yao: za:- bug gaung dalam: khyo do, ye" lo" ra". Myi" thao mug: cad' lo: re Yesu wa yao: za: ai: jo, qo mae na: jo; ra". 24 Mho"zo: qe zaung: ra" lha wa gyagao: mae" gyai va" byaug: ava". La mayo" mung: la: yang lham: deim" thaug' ruyang lha re bang: lhung" jham lobe; ako". 25 Ne, kao mug: bo" zo" re- Yesu wa qid dao mae khyo su: mung: mho"zo: qejhao" lo: ra". 26 Mho"zo: qe wa subyo ngad: ra"- ga: mung: gyaug yang: gyi: hug' ako". 27 Yesu wa yao: bam re nhag' dangai ge,- ngo angad: dagyaug ge,- ga: ta" ra". 28 Alao" Petru wa Asang we" nao ngad: re wa qid dao khyo" nao jhao" ngo su" lo nae" khai: ke' la,- ga: ta" ra". 29 Yesu wa lo ri:- ga: khai: ke' ra". Alao" Petru wa lha khug mae" gyo" mung: qid dao mae khyo su: yang: Yesu jhao" ye" ra". 30 Ngadqere: Petru wa la thin: rure myao lao"- qu" gyaug: li" mung: qid khug khyo nab: vao lo" na: ra". Alao" yao: wa Asang we"- ngore khyad' yu la,- ga: hug' ke' ra". 31 Ailao" jao" Yesu wa lo, yheim" ke' yang: Petru re zaui" yu mung:- Lam khug: myid ngai: ra" yaug we"- nao pe"mung: aug' o: na: i? ga: yao: re ta" ra". 32 Yesu we' Petru lha khug khyo joe" vao lo lao"- la wa tae" lo" byaug: ra". 33 Lha khug mae" mho"zo: qe wa Yesu re goe; pa" mung: Nao wa gaigai: yao: Mao"So: Yao: Zo: ngad: ra"- ga: ta" ako". 34 Yesu we' mho"zo: qe wa tham: re gau" phyid' lo" mung:- Genesared mae lothang: ako". 35 Vo byu qe wa Yesu re qu" xam: geyang:- avai: ayae vogaung: jham khyo byu nhao: ke' mung:- no phyo: qhug' ra" mo, alhab' re Yesu jhao" jhui" lo: ako". 36 Yao: bam wa no phyo: qhug' ra" mo, alhab' re yao" mai bau: thao mae khalhao" tin" yu nhao nae" qhid' mae" Yesu re mho' ako". Qo" tin" yu: ra" mo, alhab' re: no phyo: gai: byaug: ako". 1 Alao"- Yerusalem mae" Pharishe qe damyo" we' Tung" Pho" qe wa Yesu jhao" joe" lo mung:- 2 Yesu re- Ni" mho"zo: qe wa phug' phyid' qe: thung" li" jham re pe"mung: maphug' cao" ko" ra" i? Yao: bam wa lo, macid' lo: zo zo: ko" ra"- ga: ta" ako". 3 Yesu wa yao: bam re tau: mung:- aire naonhaung" wa pe"mung: Mao"So: amyin" dao: jham re to" pye' mung: naonhaung" yao" thung" li jham re phug' cao" ko" i? 4 Pe"mung:ga"re Mao"So wa ni" myhi" we' ni" pho" re phug' myao: wa,- yao: myhi" we' yao: pho" re nhad' dao: thoe: yang shad' yaug khag' ngadqere: se' pye' ru qhug' shao: ga: ta" to" ra". 5 Ngadqere: naonhaung" mho" shid' ru wa byu dayaug yaug yao: myhi" we' yao: pho" re bao" thaug' nae" zai daja: ja: qo" ngadqere:- ai wa Mao"So re qhaug' byid' to: va" zai ngad: ga: ta" lao"- 6 Ai: yaug wa yao: myhi" we' yao: pho" re bao" thaug' maca"- ga: mho" shid' ako". Airu: mung: naonhaung" wa naonhaung" yao" thung" li jham re qo" phug' cao" nae" qhid' mae" Mao"So: amyin" dao: jham re kyae" khyo" pye' ako". 7 Geim kad' mo, we"- naonhaung" khyo we' sin: mung: Mao"So wa Lapa Esaia nhad' khyo" Ce: amyu" wa nhad' dao: thoe: yang za: ngore phug' myao" ako". 8 Yao: bam: nhag' lam: kam" wa gaigai: yao: ngo we' gyai va" kyo: na: ako". 9 Yao: bam wa byu: yang kad' to" ra" thung" li jham re nga" amyin" dao: jham we' dakhyo: mho" byid' ako". Airumung: yao: bam ngore goe; pa" ru wa akeim ngad: ra"- ga: ta" to" ru wa gyai dang: ra"- ga: ta" ra". 10 Yesu wa mo, byu qere yao: jhao" khai: yu mung: yao: bam re tae" gyo: yang: ba: gyo" yu ge, 11 Nhad' khug khyo" vao lo: ra" ja: wa byu re masan masin" boe" nhao: ru mangad:- Nhad' mae" thug' li" ra" ja: kam" wa byu re masan masin" boe" nhao: ra"- ga: ta" ra". 12 Alao" mho"zo: qe wa Yesu jhao" lo mung: nao ceru: ta" ruyang Pharishe qe nhag' gyo" no ko" rure nao ba: i? ga: ta" ako". 13 Yesu wa tau: mung:- Mug:gaung dao mae na: ra" nga" Pho" maqho" to" ra" agae jham alhab' wa phan" pye' ru qhug' nae". 14 Yao: bam re damyid: ci" ge,- yao: bam wa myo, jid qere khyo jhui" ra" myo, jid qe ngad: ako". Myo, jid yaug wa myo, jid re khyo jhui" ngad: re wa shid' zo" geim" dung:khung: mae byid: gyo" lo" li" genae"- ga: ta" ra". 15 Alao" Petru wa ce: dao: tau" lajheim: ngonhaung" re pheim: kyo: byid: la,- ga: ta" ra". 16 Yesu wa naonhaung" ana" joe" sho' su gatau tho' maje: ba: gyo: shi: genhaung i? 17 Byu: nhad' khyo" vao lo: ra" gu: alhab' wa vae dug: khug khyo vao lo" mung: ngha ye: jo, qo khyo dam: thug' lo" rure naonhaung" maba ko" i? 18 Ngadqere: byu: nhad' mae" thug' li" ra" ja: alhab' wa- nhag' lam: aung khug mae" thug' li" ru ngad: ra". Amung: aijham wa byu re masan masin" boe" nhao: ra". 19 Pe"mung:ga"re byu: nhag' lam: aung khug mae" makhyang" ra" myid byu se' ru- myi: shad' lao shad' ru- seim lai qho: ru- su: zai khug' ru- madang: ra" sagse: kham: ru- su re gaui mho: ru jham thug' li" ra". 20 Aijham wa byu re masan masin" boe" nhao: ra"- Lo, macid' lo: zo zo" ru wa- byu re masan masin" maboe" nhao ngad: ra"- ga: ta" ra". 21 Yesu wa ai: jo, qo mae" thug' lo" mung:- Ture we' Sidon mang: khaung: khyo ye" lo" ra". 22 Ai: mang: mae na: ra" Khanan myiqe: dayaug wa- Yesu jhao" li" mung:- Davi yao: zo: Asang we"- ngore nhag' khyag' yu la, wo"- nga" myiqe: zo: wa yui vao: jaung" mung: qu" gyaug sho' no: na: ra"- ga: zag: hug' ra". 23 Ngadqere: Yesu wa pe" re: maphaug' tau: ngad: ra". Alao" yao" mho"zo: qe wa yao: jhao" te' lo mung: yao: re- Ai: myiqe: myhi" re phao nhao: ke' wa,- pe"mung:ga"re yao: wa ngonhaung" thao mae cao" zag: hug' na: ra"- ga: ta" ako". 24 Alao" Yesu wa Israel byumyu" mae" byaug: lo" ra" yao jham: qhid' mae" za: ngore nhao: ke' ru ngad: ra"- ga: phaug' tau" ra". 25 Myiqe: myhi" wa Yesu khyid qao: mae li" goe; jo, mung:- Asang we"- ngore bao" yu la,- ga: Yesu re mho' ra". 26 Yesu wa- yao: re- zoshao qe: zo:ve re yu: yu mung: lakha: jham re byid' pye' nae" magai ngad: ra"- ga: phaug' tau" ra". 27 Myiqe: myhi" wa- Ngad: ra"- Asang we"- Lakha: jham lhao" re: yao: bam: asang: zozo: jaung: mae" gyo" ra" zosheim jham re qo" gaug zo" ako"- ga: ta" ra". 28 Alao" Yesu wa yao: re- Nao wa lam khug: myid qi" ra" myiqe: ngad: ra"- nao o: ru we' dakhyo: boe" lo vashao:- ga: ta" ra". Ai: ayo, mae" yao" myiqe: zo: wa gai: lo" byaug: ra". 29 Yesu ai: jo, qo mae" thug' lo" mung:- Galile tham: yae cao" yang: su" lo" ra". Amung: yao: wa bug gaung dalam: khyo do, ye: mung: yezaung: jo, ra". 30 Byu phung: mo" zang wa- khyid qeim- lo, qeim- myo, jid mo, gaung dau qeim mo,- nhad' jid mo, we' gatau no phyo: qhug' ra" mo, myo: sho' re jhui" li" mung: Yesu khyid qao: mae li" nha: to" ako". Yesu wa yao: bam alhab' re gai byid' ra". 31 Amung:- nhad' jid mo, dao: jhau: li" ru- gaung dau qeim mo, dam: gai: lo: ru- khyid qeim mo, khyo su" li" ru- myo, jid qe myo, myao: li" ko" rure- mo, byu qe the' myao gelao"- yao: bam mug' hao" byaug: ako"- amung: yao: bam wa- Israel nho: Mao"So: phungbao re caung:khin" byid' ako". 32 Yesu wa yao" mho"zo: Qere: yao: jhao" khai: yu: mung: yao: bam re ce: mo, byu qe wa ngo we' daga" na: ru sam ba ngad va". Ana" yao: bam zo:ve maqo" lo ko" ngad: ra". Airumung: ngo yao: bam re nhag' khyag' ra". Ngo wa yao: bam re zo:ve mazho: lo: manug: phao nhao: ke'- pe"mung:ga"re- yao: bam khyole; mae vae: moe' myad gazai ngad: ra"- ga: ta" ra". 33 Mho"zo: qe wa- Yesu re ceqhi" laug: ra" byu phung: mo" zang re gyi: sho' zho: nae" zo:ve ceru" ga" din"pyad' yo mae ngonhaung" khai: mae" qo" nae" i? ga: ta" ako". 34 Alao" Yesu wa yao: bam re naonhaung" mug khonho" qo" ko" i? ga: myid' ra"- Yao: bam wa mug nhad' khai" we' ngo: nau" dajhid' zo: qo"- ga: phaug' tau" ako". 35 Alao" Yesu wa mo, byu qere myid gaung mae zaung: jo, nae" qhid' mae" amyin" byid' ke' ra". 36 Yao: wa mug nhad' khai" we' ngo: re yu: yu mung:- Mao"So re jeju bin: caung: byid: lao" mug we' ngo: re khyoe' phai" mung: mho"zo: qere byid' ra". Mho"zo: qe wa mo, byu qere gae byid' ako". 37 Yao: bam alhab' mo, gyi: sho' zo" ako". Mho"zo: qe wa mo, byu qe zo" tang" ra" aje, abai" jham nhad' gyan byang" sho' gaug zhang: yu: ako". 38 Myiqe: zoshao re manghe' lo: mug zo" ra" mo, wa yauggai za: byid taung ko ngad: ra". 39 Ai: thao re Yesu wa mo, byu qere phao nhao: ke' mung: yao: wa lha zaung yang: Magadan mang: khyo gau" ye" lo" ra". 1 Pharishe qe damyo" we' Saduke qe wa Yesu jhao" li" mung: yao: re jham" qu" zo" re"- yao: bam wa Yesu re- Nao wa Mao"So: yang nhao: ke' yaug ngad: rure ba nae" qhid' mae" ngonhaung" re mug:gaung mae" mug' pho: ve, lho kad' qhu" la,- ga: mho' ako". 2 Yesu wa tau: mung:- myi" thao ba vao: lo" au: re mug:gaung ne lao"- mug: gyang: naemyao:- ga: naonhaung" ta" mung:- 3 Ne, kao re mug:gaung mae mug: no, lao"- mug: qu- la qam" lo naemyao:- ga: naonhaung" ta" ako". Naonhaung" wa mug:gaung re qu" yang: ba zho mug: qu re qo" ba: ta" ako". Ngadqere: ana" ban: mae" ve, lho jham we' sin: mung: yang: wa naonhaung" maba: pheim ngad: ako". 4 Ce: pyad mae" byu qe wa makhyang" ru we' Mao"So mabo: ra" mo, ngad: ako"- ngadqere: Yona mug' pho: ve, lho mae" je yang: pe" mug' pho: ve, lho re: naonhaung" re ngo maqhu" byid: nae"- ga: ta" ra". Ai: thao Yesu wa yao: bam mae" thug' lo" ra". 5 Mho"zo: qe wa tham: thoete' khyo gau" joe" ye" ako". Yao: bam wa mug yu: vin nae" to" myhid' pye' ko" ra". 6 Yesu wa yao: bam re- Pharishe qe we' Saduke qe: man" re lha" yang: jao" pye' ge,- ga: ta" ra". 7 Mho"zo: qe wa ngonhaung" mug mavin yang: yao: ceru: ta" ru ngad: ra"- ga: yao: bam yao: cao: jho" ta" ako". 8 Yao: bam yao: cao: airu: jho" ta" na ko" rure Yesu ba lao"- Yesu wa yao: bam re lam khug: myid ngai: ra" mo, we"- naonhaung" pe"mung: yang: mug mayu: vin: ra" khyo re jho" ta" na ko" i? 9 Naonhaung" ana" re: maba: gyo: shi: genhaung i? Mug ngo" khai" re ngo cug' phai" mung: byu ngo" taung re zho" ra" au:- naonhaung" khonho" gyan byang" sho' qo" gaug: zhang: yu shiko" rure mabeim: ge, i? 10 Amung: ai: mug nhad' khai" re ngo cug' phai" mung: byu byid taung re zho" ra" au: naonhaung" khonho" gyan byang" sho' qo" gaug: zhang: yu shi: ko" rure re: mabeim: ge, i? 11 Mug we' sin: yang: ngo ta" na: ru mangad' rure naonhaung" pe"mung: maba: gyo: ko" i? Pharishe qe we' Saduke qe: man" re naonhaung" jao" pye' ge,- ga: ta" ra". 12 Alao" mho"zo: qe wa mug kad' rumae ci: ra" man" re jao" pye' nae" qhid' mae" ta" ru mangad: lo: Pharishe qe we' Saduke qe: mho" shid' ra" khyo re jao" pyae' nae" qhid' mae" Yesu ta" peim: byid' na: rure ba: gyo" yu: ako". 13 Yesu wa Kesarea- Philipi mang: khyo joe" lo lao"- yao" mho"zo: qere Byu qe wa Byu Yao: Zo: re khag' ngad: ra" ga: ta" na ko" ra" i? ga: myid' ra". 14 Yao: bam wa tau: mung: damyo" wa qid nyhab' byid' yaug Yohan ngad: ra"- Damyo" wa Elia ngad: ra"- Damyo" wa Yeremia mangad: lao"- gatau Lapa dayaug yaug ngad: ra"- ga: ta" na: ako"- ga ta: ako". 15 Yesu wa yao: bam re- aire naonhaung" wa ngo khag' ngad: ein: ta" ko" i? ga: myid' ra". 16 Simon Petru wa Nao wa kao so' daui: na: ra" Mao"So: Yao: Zo: Meshia ngad: ra"- ga: ta" ra". 17 Alao" Yesu wa- Yona nho: yauggai zo: Simon we"- nao wa ngaui lho" ra". Pe"mung:ga"re ce: dangman" rure nao re xao su byu: yang qhu" byid' ru mangad:- Mug:gaung dao mae na: ra" nga" Pho" yang nao re qhu" byid' ru ngad: ra". 18 Amung: ngo nao re ta" li"- nao wa Petru laug zang ga" ru ngad: ra". Ngo wa ce: laug zang dao mae nga" Phung: re te" to: nae" shid: ru wa ai: phung: re maqo" aung: pye' nae". 19 Ngo wa nao re mug:gaung: mung"dan: kham: thug' jham re byid: nae" Myid gaung dao mae nao tam" to" ra" gu: alhab' re mug:gaung dao mae re: Mao"So wa tam" to" li" nae". Amung: myid gaung dao mae nao akhang" byid' ra" gu: alhab' rere: mug:gaung dao mae akhang" byid' li" nae"- ga: ta" ra". 20 Alao" Yesu wa yao: Meshia ngad: rure khag' rere: mata" kyo: genae" qhid' mae" yao" mho"zo: qere jhaug' za: zug' nhao: ra". 21 Yesu ai: ayo, mae" yao" mho"zo: qere ngo wa Yerusalem khyo ye: mung:- Yuda au: jhaung lau: de, qe- khinjaung agyi qe we' tung" pho" qe: lo, mae khyag' qhui: ru myo: sho' kham zo: ca" nae". Amung: ngo wa se' ru qhug' nae"- ngadqere: sam ba thao re ngo wa dam: taui: to' ke' ru qhug' nae"- ga: de: de: za: ta" ra". 22 Alao" Petru wa Yesu re dadug khyo jhui" yu mung: Asang we"- nao ta" ru: maboe" nae" qhid' mae" Mao"So tam" pye' vashao:- nao wa airu: khonhae" re: magai: boe" nae" ga: qeim: ra". 23 Yesu wa lhang: lo mung: Petru re Satan we"- ngo mae" thug' lo" wa,- nao wa nga" khyo mae kaung: kag' yaug ngad: ra". Pe"mung:ga"re nao wa Mao"So shad' khyo" mamyid lo: byu: shad' khyo" za: myid ra"- ga: ta" ra". 24 Alao" Yesu wa yao" mho"zo: qere nga" thao cao" nug: ra" yaug khag' ngadqere: yao: yao" qhid' mae" ha: pye' mung: yang: yao" pyao: zang re tau: vo, mung: nga" thao cao" ca" ra". 25 Pe"mung:ga"re yao: yao" kao so' khyad' yu nug: ra" yaug khag' ngadqere: kao so' jeim: nae". Nga" mathao mae kao so' jeim" ra" yaug kam" wa kao so' qo" yu nae". 26 Alao"- byu wa mug: myid alhab' geim" re qo" sang: yu ngadqere: yao" kao so' jeim" byaug: ngad: re wa pe" akyu" bo nae" i? 27 Byu: Yao: Zo: wa yao: Pho" phungbao we' yao" mug: lagyo: jham we' daga" joe" li" zai ngad:- Alao" yao: wa byu yaug khao: ngo" re yao: yao: kad' ra" mau" zo" we' dakhyo: aphug' dam: tug' byid' li" nae". 28 Naonhaung" re ngo dang dang ta" geli"- Byu: Yao: Zo: wa kho:kham khyo" joe" li" rure maqhug' myao geshi: re- cemae bo: ra" mo, mae" damyo" wa mashid genae"- ga: ta" ra". 1 Khyaug' ba kyo thao re Yesu wa Petru- Yaku we' yao: nhaung: Yohan bam re za: jhui: mung: myhao ra" bam khyo jhui" do, ye" ra". 2 Yao: bam: qhid' kheim: mae yao:- Yesu ve, bao tha" lo" byaug: ra". Yao" myo,khung: wa ba we' dakhyo: zho mung:- yao" mai bau: wa bao: bao: phyu: li" ra". 3 Moshe we' Elia wa Yesu we' dao: jho" jhau: na ko" rure yao: bam myao: ako". 4 Alao" Petru wa Yesu re Asang we"- ngonhaung" ce: jo, qo mae na: re gai: ra"- nao nug: ngad: re wa Asang: qhid' mae" dalam:- Moshe qhid' mae" dalam:- Elia qhid' mae" dalam:- zaung sam zaung ce: jo, qo mae- ngo kad' nae"- ga: ta" ra". 5 Petru airu: jhau: na shi" au:- Qu" ge,- bao qhui: ra" jham dathaui: yao: bam: dao mae losham: nghoe' ra". Jham thaui: khug mae"- ceyaug wa ngo jhid'de; ra" nga" Zo: ngad:- ngo yao: re gyai o ngaui: ra"- yao" dao: re tae" gyo: ge,- ga: jhau: thug' li" ra". 6 Mho"zo: qe ai: thoe re the' gyo: gelao"- yao: bam wa gyaug: nin" byaug mung: myid gaung mae goe; jo; bam: ako". 7 Yesu wa yao: bam jhao" lo mung:- yao: bam re lotin: yang:- To" ge, dagyaug ge,- ga: yao: bam re ta" ra". 8 Alao" yao: bam tau: qu" ke' ko" re- Yesu mae" je yang: gatau khag' rere: mathe' myao loko" ngad: ra". 9 Yao: bam- bam dao mae" tug' gyo" lo: na ko" au:- Yesu wa yao: bam re- Byu: Yao: Zo: shid: rumae" madam: daui: to" li" shire- naonhaung" myao: ra" ai: ve, lho we' sin: mung: khag' rere: data" kyo: ge,- ga: zug' nhao: ra". 10 Alao" mho"zo: qe wa Yesu re- aire Elia shi" sao qhid' joe" li" zai ngad: ga:- tung" pho" qe pe"mung: ta" ko" ra" i? ga: myid' ako". 11 Yesu wa yao: bam re- Elia wa gaigai: yao: sao qhid' joe" li" mung:- ja: khao: ngo" alhab' re jin" jin" seim" to: zai ngad:- 12 Ngo naonhaung" re ta" geli" Elia wa gaigai: yao: joe" li" ava" ngadqere: yao: bam yao: re maba geyang: yao: bam nug: khyo" yao: re kad' avako"- Byu: Yao: Zo: rere: ai we' dakhyo: yao: bam kad' li" genae"- ga: ta" ra". 13 Alao" Yesu wa yao: bam re- qid nyhab' byid: yaug Yohan nho: khyo re ta" na: rure mho"zo: qe ba; gyo" yu: ako". 14 Yesu we' mho"zo: qe wa mo, byu qe na: ra" jo, qo khyo joe" lo gelao"- byu dayaug Yesu qhid' kheim: mae pad' thaug' li" thaug' yang:- 15 Asang we"- nga" zo: re nhag' khyag' yu byid: la,- yao: wa ngho' be, be, yaug ngad mung: myi: mae re:- qid mae re: alhang lhang gyang: vao lo" qu" va" ra". Amung: yao: wa gyai yao: kham zo: qug' na: ra". 16 Yao: re ni" mho"zo: qejhao" jhui" li" ngadqere: yao: bam yao: re maqo" gai byid: ko" ngad: ra"- ga: ta" ra". 17 Alao" Yesu tau: mung:- Lam khug: myid mabo: ru we' shad' nghung" ra" mo, we"- ngo naonhaung" we' daga" khomyhao" joe" sho' na zai i? Ngo khomyhao" joe" sho' naonhaung" re zang: zai i? Ai: yauggai nau" re ngojhao" jhui" lo geri:- ga: ta" ra". 18 Yesu wa yui re phao: thug' lo" nae" qhid' mae" amyin" byid' ke' ra"- Yui wa ai: yauggai nau" mae" phao: thug' lo" ra". Ailao" jao"- ai: yauggai nau" wa gai: lo" byaug: ra". 19 Ai: thao re mho"zo: qe wa Yesu we' yao: bam za: na ko" au:- ai: yui re ngonhaung" pe"mung: maqo" khe' thug' pye' geli" laug i? ga: Yesu re myid' ako". 20 Yesu wa yao: bam re naonhaung" lam khug: myid malaug: bo yang: ngad: ra"- ga: tau" ra". Ngo naonhaung" re dang za: ta" ru wa naonhaung" lam khug: myid ao: jid' qhi" zo: bo: ngad: re bam re cemae" thoe: khyo qui" lo" wa, ein: ta" lao" qui" lo" li" nae"- Lam khug: myid bo: ngad: re wa- naonhaung" alhab' re qo" kad' genae". 21 Ce: yui re wa- akyu" mho' ru we' zo:ve jao" ruyang za: mangad: re wa gatau pe" khyo" yang re: maqo" khe' thug' pye' ngad: ra"- ga: ta" ra". 22 Yesu we' mho"zo: qe Galile mung" khaung: mae daga" du" qin" ko" au:- Yesu wa yao: bam re Byu: Yao: Zo: wa su: lo, khyo ab byid' pye' ru qhug' nae" jhao" li" na va" ra". 23 Yao: bam wa yao: re se' pye' li" genae"- ngadqere: yao: wa sam ba kyo thao re dam: taui: ke' ru qhug' li" nae"- ga: ta" ra". Ailao" mho"zo: qe wa gyai myid: kaug' ako". 24 Yesu we' yao" mho"zo: qe Kapena-um khyo joe" lo gelao"- Caung:pa" Yham khang: khyui mo, wa Petru jhao" li" mung:- naonhaung" mho" pho" wa Mao"So: yham khang: malhaung" ke' ra" i? ga: myid' ako". 25 Petru wa lhaung" ke' ra"- ga: tau" ra". Petru yham khug khyo vao lo" lao"- Yesu shi" Petru re lham: jhau mung:- Simon we"- nao pe" ru: myid: i? Ce: mug: myid: dao: mae" kho:kham qe wa khag' mae"- khang: khyui: yu: ako" i? Yao: bam: mung" byu qe mae" i? Mangad: lao" taung bug qe mae" i? ga: myid' ra". 26 Petru wa taung bug qe mae" khyui: yu ko" ra"- ga: tau" ra". Alao" Yesu wa Airu: ngad: re wa mung" byu qe wa make' ca" gengad: ra". 27 Ngad yang: re: yao: bam: nhag' lam: mamyid: shad' genae" qhid' mae" nao tham: khyo ye: mung:- ngo myhad' taui: ye: khyo" wa, Sao qhid' myi" ra" dau: re taung" yu mung: ai: ngo: nhad' re lao" ho" ke' lao"- ngaui thang: the: dapye: re nao myao nae"- ai: ngaui re yu: yu mung:- nao we' nga" qhid' mae" Caung:pa" Yham khang: ye: ke' wa,- ga: ta" ra". 1 Ai: au: re mho"zo: qe wa Yesu jhao" lo mung:- mug:gaung: mung"dan: mae qi" thao" yaug khag' ngad: i? ga: myid' ako". 2 Alao" Yesu wa- zoshao dayaug re khai: yu mung:- mho"zo: qe: qhid' kheim: mae yhe' to: yang:- 3 Ngo naonhaung" re dang za: ta" ru wa- Nhag' lam: tha" pye' mung: zoshao ru: boe" gelao" za: mug:gaung: mung"dan: khyo qo" vao genae". 4 Ce: zoshao we' dakhyo:- yao: yao" nhag' lam: re goe; nyham: ra" yaug wa- Mao"So: mung"dan mae qi" thao" yaug ngad: ra". 5 Ce: zoshao ru" ra" yaug re nga" mang khyo" yang khae: yu: ra" yaug khag' ngadqere: ngore khae: yu: ru ngad: ra". 6 Ngo re lam khug: na: ra" ce: zoshao qe mae" dayaug yaug re lam khug: myid zai" phyo' ra" yaug khag' ngadqere:- yao" lang zang: mae laug lhang qi: taui" lhao: mung: no; thao" ra" panglai: khug khyo pye' zaui: pye' qhug' ru wa yao" qhid' mae" je: gai shi" ra". 7 Lam khug: myid tha" lang: nhao: ra" ja: jo; ruyang myid gaung byu qe byu xa: vaqoe, qhug' ako". Lam khug: myid tha" lang: nhao: ra" ja: jham wa khonhae" re: jo; ra" ngadqere: lam khug: myid tha" lang: nae" boe" nhao: ra" yaug wa byu xa: vaqoe; qhug' ra". 8 Ni" khyid mangad: lao" ni" lo; yang ni" lam khug: myid re zai" phyo' nhao: ngad: re wa ai: khyid lo, re qam" phyid' shalhaui" pye' wa,- Khyid lo, jab jab za: apyad ato: myi: mae pye' zaui: pye' ru qhug' nae" tho' khyid lo, majab lo:- apyad ato kao so' daui: ra" khyo vao ye: nae" ru wa ni" qhid' mae" je: gai: ra". 9 Ni" myo,jid' yang ni" lam khug: myid re zai" phyo' nhao: ngad: re wa ai: myo,jid' re thad' shalhaui" pye' wa,- myo,jid' shid' shad' geim" we' myi: qid tham: mae" myi: mae pye' zaui: pye' ru qhug' nae" tho' myo,jid' dashad' za:- apyad ato kao so' daui: ra" khyo vao ye: nae" ru wa ni" qhid' mae" je: gai: ra". 10 Ai: zoshao qe mae" dayaug re za: lhao" naonhaung" maphug' makhyad' makad' genae" qhid' mae" lha" ge,- ngo naonhaung" re ta" geli"- Mug:gaung dao mae ai: zoshao qe: mug: lagyo: jham wa mug:gaung: mung"dan: mae" nga" Pho" myo,khung: mae khonhae" re: qu" na: ako". 11 (Pe"mung:ga"re- Byu: Yao: Zo: wa byaug: lo" ra" mo, re khyad' yu nae" qhid' mae" joe" li" ru ngad:) 12 Byu dayaug yaug yao: qo" ra" yao dayo dau: mae" dadau: byaug: lo" lao"- aiyaug pe" ru: kad' nae" ein: naonhaung" jho ko" i? Yao: wa ai: dang: ra" yao gug xe: gug dau: re bam khyid mae zad zo: nhao: to: co' mung: byaug: byaug: ra" ai: yao re yeqho: yu: li" nae" mangad: i? 13 Yao: wa ai: yao re yeqho: myao lao"- mabyaug: ra" yao gug xe: gug dau: re bau" ra" tho' ai: byaug: byaug: ra" yao dadau" ra" mathao mae je yang: ngaui bau" ra" ein: ngo naonhaung" re dang za: ta" ra". 14 Ai we' dakhyo:- mug:gaung dao mae" naonhaung" Pho" re:- ai: zoshao qemae" dayaug yaug byaug seim" lo" nae" lhao" manug ngad: ra". 15 Ni" mao:nhaung: pho" nao re shad' ngad: re wa yao: jhao" ye: mung: ni" shid' tao myo, nho zam" zaung: jo, yang: sae za: yao" qobo re ceim" shid' byid: wa, Ni" dao: re yao: tae" gyo" yu: ngad: re wa ni" mao nhaung: pho" we' nao qo" dam: jho" vang" ra". 16 Ngadqere: ni" dao: re yao: matae" gyo: ngad: re wa nao qobo zhaug' ra" khyo alhab' ngad dang: rure boba nae" qhid' mae" jham: mugsug' mae ta" to" ru we' dakhyo:- sagse: shid' yaug- sam yaug re khai: jhui" ye: wa,- 17 Yao: wa ai bam: dao: rere: matae" gyo: lao" wa phung: re ai: khyo alhab' yeta" kyo: wa, Phung: rere: yao: matae" gyo: lo: lao" kam" wa yao: re Mao"So maba: ra" yaug we' khang: khyui zo: yaug re we' dakhyo: to" pye' wa,. 18 Ngo naonhaung" re dang za: ta" ru wa myid gaung dao mae naonhaung" tam" to" ra" gu: alhab' re- Mao"So wa mug:gaung dao mae re: tam" to" li" nae"- amung: myid gaung dao mae naonhaung" akhang" byid' ra" gu: alhab' rere:- mug:gaung dao mae akhang" byid' li" nae". 19 Ai: tho' mae" ngo naonhaung" re dang za: ta" ru wa ce: myid gaung dao mae naonhaung" shid' yaug ko za: ngad yang: re: nhag' lam: qhan: mung:- akyu" mho' ra" ja: re mug:gaung dao mae na: ra" nga" Pho" wa yao: shid' zo: re byid' li" nae". 20 Pe"mung:ga"re nga" mang mae byu shid' sam yaug zang" ham: na ko" ra" phaung mae ngo wa yao: bam we' daga" na: ra"- ga: ta" ra". 21 Alao" Petru wa- Yesu jhao" qui" lo mung:- Asang we"- nga" mao:nhaung: pho" wa ngore ana" na" shad' ngad: re- yao: re ngo khonho" lhang joe" sho' qobo khyad' byid: zai i? Nhad' lhang joe" sho' khyad' byid' zai i? ga: Yesu re myid' ra". 22 Yesu wa Petru re- nhad' lhang joe" sho' za: mangad:- nhad' xe lhang lhang mung:- nhad' lhang joe" sho' khyad' byid: ca"- ga: ta" ra". 23 Pe"mung:ga"re- mug:gaung: mung"dan: wa yao" jeim qe we' japhin: sho' nug: ra" kho:kham dayaug we' dau: ra". 24 Yao: wa japhin: sho' qhid: lo" we' ngaui myo: sho' kye' jhin de; ra" jeim dayaug re yao: jhao" jhui" lo: ako". 25 Ai: jeim wa jhin xe' nae" pe" maqo" lao"- kho:kham pho" wa ai: jeim pho" we' daga" yao: myi: yao: zo: qe we' qo" ra" zai alhab' re aung" pye' mung: jhin xe' vashao: ga: amyin" khyo" ke' ra". 26 Alao" ai: jeim pho" wa kho:kham pho" qhid' kheim: mae pad' thaug' thaug' mung:- ngore nhag' khyag' yu shi: la,- Jhin alhab' zaung: sho' ngo nao re xe' byid: nae"- ga: goe; mho' ra". 27 Kho:kham pho" wa yao: re nhag' khyag' yang:- yao" jhin alhab' re khyad' pye' byid: mung: phao nhao: ke' ra". 28 Ngadqere: yao: wa thug' lo" mung:- yao: re ngaui dayo jhin de, ra" yao" jeim byin cao: dayaug we' qhug' lao"- yao: wa aiyaug re zaui" yu mung: lang zang mae nhag' ci yang:- jhin phyad xe' la, ga: mho' ra". 29 Yao" jeim byin cao: wa pad' thaug' thaug' mung:- ngore nhag' khyag' yu shi: la,- Jhin alhab' zaung: sho' ngo nao re xe' byid: nae"- ga: mho' ra". 30 Ngadqere: yao: wa maqad ha: pye' mung: jhin alhab' re bin xe' sho' yao: re thaung: khug mae lhaung" to" ra". 31 Airu re jeim gatau qe the' myao gelao"- yao: bam wa nhag' lam: qu" no gemung:- yao: bam the' myao: ra" gu: alhab' kho:kham pho" re lo" ta" kyo" ako". 32 Alao" kho:kham pho" wa ai: jeim re khai: yu mung:- makhyang" ra" jeim we"- nao ngore goe; mho' ruyang ni" jhin alhab' re ngo khyad' pye' byid: va". 33 Nao re ngo nhag' khyag' ru we' dakhyo: nao re: ni" jeim byin cao: pho" re nhag' gai: khyag' ra"- ga: ta" ra". 34 kho:kham pho" wa gyai nhag' yo: mung:- ai: jeim re jhin bin: xe' sho' thaung: khug mae lhaung" to" ra". 35 Airumung: naonhaung" khag' ngadqere: mao:nhaung: pho" shad' ra" qobo re gaigai: yao: makhyad' byid: ko" ngad: re wa mug:gaung dao mae na: ra" nga" Pho" re:- naonhaung" shad' ra" qobo re makhyad' byid: nae"- ga: ta" ra". 1 Yesu wa ai: dao: jham re bin: ta" lao"- Galile mung" mae" thug' lo" mung:- Yodan gyaung: thoete' mae" Yuda mung" khyo joe" ye" ra". 2 Byu phung: mo" zang wa yao" thao cao" ako"- aitau mae Yesu wa no phyo: qhug' ra" mo, re gai byid' ra". 3 Pharishe qe damyo" li" mung:- yao: re jham" qu" ako". Pe" qobo khyo" ngad ngad yao: myid: o: ra" khyo"- yao" yham sang myhi" re gai: kao" pye' i? ga: myid' ako". 4 Yesu wa tau: mung:- Phan" Asang wa sao qhid' maqhid mae yauggai we' myiqe: re phan" to" ra". 5 Airumung: yauggai wa yao: myhi" yao: pho" re to: co' mung: yao" yham sang myhi" we' yezam" khug: na yang: yao: shid' tao wa dagaung dasho: za: boe" lo: li" genae". 6 Alao" yao: shid' tao wa shid' zo: mangad: lo:- dayaug za: ngad: ra". Airumung: Mao"So: yang zham" to: va" rure byu: yang dazai" kao: ge- ga" ra" dao: re naonhaung" manghe' qu" ko" i? ga: ta" ra". 7 Pharishe qe wa Yesu re Airu: ngad: re- kao: mugsug' tung" byid: yang: yao: yao" yham sang myhi" re kao" pye' nae" qhid' mae" Moshe wa pe"mung: amyin" byid' to: co' i? ga: myid' ako". 8 Yesu wa tau: mung:- naonhaung" nhag' lam: qao ko" ruyang yao: yao" yham sang myhi" re kao" pye' nae" qhid' mae" akhang" byid' to" ru ngad: ra". Ngadqere: sao qhid' maqhid mae wa airu: mangad:- ngad: ra". 9 Ngo naonhaung" re ta" geli"- Na: shad' ye, shad' ra" khyo" mangad: lo: gaja" qobo khyo" yang yao" yham sang myhi" re kao" pye' yang:- myiqe: gatau dayaug re lo, dam: xo' yu: ra" yaug khag' ngadqere: myi: shad' yaug ngad: ra" ga: ta" ra". 10 Yao" mho"zo: qe wa Yesu re yham sang myhi" we' yham sang pho" agyo: mae ceru: ngad: re wa- lo, maxo' lo: na: re wa je: gai: ra"- ga: ta" ako". 11 Ngadqere: Yesu wa yao: bam re- lo, maxo' lo: byu yaug khao: ngo" maqo" na ko" ngad: ra"- Qo" na nae" jeju qo" khae: yu: ra" mo, za: aqo" na: ako". 12 Pe"mung:ga"re damyo" wa yao: myhi" aung mae" yao: yauggai maboe" geyang: lo, maxo' ko" ngad: ra". Damyo" wa- byu: yang yauggai maboe" nae" thaug kad' pye' mung: yauggai maboe" gengad: ra"- Airumung: yao: bam wa lo, magai: xo' ko" ngad: ra". Gatau damyo" wa- mug:gaung: mung"dan: mathao mae lo, maxo' lo: na: ako"- Airumung: myi: mayu lo: qo" na: ra" yaug wa airu: na vashao:- ga: ta" ra". 13 Alao" damyo" wa- zoshao qe: dao mae yao" lo, kai: byid: mung:- akyu" mho' byid: vashao: ga: zoshao qere Yesu jhao" jhui" li" ako". Ngadqere: mho"zo: qe wa yao: bam re lham: qeim: ako". 14 Yesu wa- zoshao qere ngojhao" lo nhao: ke' ge,- yao: bam re datam" ge,- pe"mung:ga"re mug:gaung: mung"dan: wa airu" mo; mung"dan: ngad: ra"- ga: ta" ra". 15 Yesu wa zoshao qe: dao mae yao" lo, kai: mung: yao: bam re shaman" byid' ra". Amung: yao: wa ai: jo, qo mae" thug' lo" ra". 16 Alao"- qu" ge,- Byu dayaug Yesu jhao" li" mung:- Mho" Pho" we" apyad ato: kao so' qo" yu nae" qhid' mae" ngo gai: ra" mau" pe" kad' ca" i? ga: Yesu re myid' ra". 17 Yesu wa yao: re- gai: ra" ja: we' sin: mung: nao ngore pe"mung: myid' i? Gai: ru wa dayaug za: na: ra". Nao apyad ato: kao so' qo" yu nug: ngad: re wa kham" to" tarha" re phug' cao" wa,- ga: ta" ra". 18 Yao: wa Yesu re- Kham" to" ra" tarha" kholam: i? ga: myid' ra". Yesu wa tau mung:- Byu dase' wa,- su: myi: dalhad' wa,- su: zai dakhug'- madang: ra" sagse: dakham:- 19 Ni" myhi" we' ni" pho" re phug' myao: wa,- ni" yham kyo: cao: re nao yao" gaung re jhid de; ru we' dakhyo: jhid'de; wa,- ga: ta" ra". 20 Ai: zolau: pho" wa Yesu re- Ai: kham" to" ra" tarha" jham alhab' re ngo phug' cao" va" ngo gatau pe" ja: kad' ca" shi" i? ga: ta" ra". 21 Yesu wa yao: re- Nao wa qobo ta" nae" mabo lo" yaug boe" nug: ngad: re wa ni" jo,nho" alhab' re lo" aung" pye' mung: ai: ngaui jham re myaung sho" ra" mo, re gae byid: wa,- airulao" mug:gaung dao mae nao jo,nho" qo" li" nae"- amung: nga" thao cao" la,- ga: ta" ra". 22 Zolau: pho" wa ai: dao: re the' gyo: lao" nhag' lam: mapyo: lo: phao: lo" ra"- pe"mung:ga"re- yao: wa gyai qo" yaug ngad: ra". 23 Yesu wa yao" mho"zo: qere Ngo naonhaung" re dang za: ta" ru wa jo,nho" qo" yaug wa Mao"So: mung"dan: khyo vao ye: nae" qhid' mae" gyai qug' ra". 24 Ngo naonhaung" re dam: ta" geli"- Jo,nho" qo" yaug Mao"So: mung"dan: khyo vao ye: laui: ra" tho'- gola:u wa nghe' no: dung: khyo" vao: lai: lo" nae" ru wa je: laui shi" ra"- ga: ta" ra". 25 Mho"zo: qe wa ai: dao: re the' gyo: gelao"- yao: bam mug' hao" byaug mung:- Airu: ngad: re khyad' yu: ru khag' qhug' zai i? ga: ta" ako". 26 Yesu wa yao: bam re zhaug' qu" zo" re"- ceru wa byu: yang magai: boe" ngad: ra". Ngadqere: Mao"So wa alhab' re qo" boe" yaug ngad: ra". 27 Alao" Petru wa phaug' tau: mung:- ngonhaung" wa alhab' re to" pye' co' yang: ni" thao cao" va"- ngonhaung" pe" the' zai i? ga: ta" ra". 28 Yesu wa yao: bam re- ngo naonhaung" re dang za: ta" ru wa joe" lo nae" ra" pyad sag' mae Byu: Yao: Zo: wa phung qab bao byang" sheim: jo, ra" yao" zaung tao" mae zaung: jo, lao" nga" thao cao" mo, ngad: ra" naonhaung" daxe: shid' yaug re: zaung tao" daxe: shid' lam: mae bozaung: jo; mung: Israel byumyu" daxe: shid' kaung re eib: li" genae". 29 Alao"- khag' ngadqere:- nga" mathao mae yham- mao:nhaung:- nhae: mo"- myhi" pho"- zo:dau- yham dang: yokhyao:- re to: co' ra" yaug wa yao: to: co' ra" tho' dayo nho" qo" khae: yu: li" genae". Apyad ato: kao so' re: qo" yu: li" nae". 30 Ngadqere:- ana" qhid' au: mae ngad mo, myo: sho' wa thao khyo ngad: li" genae"- ana" thao mae ngad mo, myo: sho' kam" wa qhid' au: mae ngad: li" genae"- ga: ta" ra". 1 Mao"So: mung"dan: wa ceru we' dau: ra". Byu dayaug wa yao" sabyi khyae mae mau" zaui: okaung lhaung nae" qhid' mae" ne, seim no' mae" thug' ye" lo" ra". 2 Yao: wa mau" zaui: okaung qe we' ba na phug' daba re ngaui dakye' byid: nae" qhid' mae" jho" dang mung:- yao: bam re yao" sabyi khyae khyo ye: nhao: ke' ra". 3 Ne, kao gug yo, qug ko re yao: wa gai jao: khyo dam: ye" lo" re mau" maqo" yang: mageim: ye; jo; bam ko" ra" byu damyo" re ye: myao: ra". 4 Yao: wa yao: bam re- naonhaung" re: nga" sabyi khyae mae mau" zaui: ge,- ngo naonhaung" re man: qi" ra" ba na phug' byid: nae"- ga: ta" ra". 5 Alao" yao: bam wa thug' ye" lo" ko" ra"- ai:thao re yao: wa daxe: shid' yo, qug mae dalhang- myi" thao sam yo, qug mae dalhang gai jao: khyo ye: mung:- mau" zaui: okaung yelhaung: ra". 6 Myi" thao ngo" yo, qug ko re gai jao: khyo dam: ye" lo" re- byu gatau damyo" mageim: ye; jo; bam shiko" rure yedam: myao lao"- yao: wa yao: bam re- Naonhaung" Cetau mae daba geim" pe" makad' lo: mageim: ye; jo, ko" i? ga: myid' ra". 7 Yao: bam wa ngonhaung" re khag' mali" lhaung ko" ngad: ra"- ga: tau" ako". Alao" sabyi khyae sang wa yao: bam re- airu: angad lao" wa naonhaung" re: nga" sabyi khyae mae mau" ye:zaui: ge,- ga: ta" ra". 8 Myi" thao joe" lao"- khyae sang wa yao" mau" sang pho re- okaung jham alhab' re khai: yu yang: thao re mau" vao: ra" mo, mae" qhid mung: sao qhid' mau" vao: ra" mo, alhab' re okaung phug' sho' byid: wa,- ga: ta" ra". 9 Mau" sang pho wa myi" thao ngo" yo, qug ko re mau" vao: ra" mo, dayaug re- ngaui dakye' kye' byid' ra". 10 Sao qhid' no' mae" mau" vao: ra" mo, jhao" byid' joe" lo" lao"- yao: bam wa okaung phug' je: qo" nae" ga: myid: jho: ako". Ngadqere: yao: bam re: dayaug ngaui dakye' za: qo" yu: ako". 11 Alao" yao: bam wa khyae sang re- Ce: thao re mau" li" vao: ra" mo, wa dayo, qug za: mau" zaui" ako". 12 Ngonhaung" wa ba zho wa te, ga" rumae daba geim" mau" zaui: va"- ngadqere: nao wa ngonhaung" re yao: bam re we' dakhyo: za: o:kaung phug' byid' ra"- ga: nyhung mung: ta" ako". 13 Khyae sang wa sao qhid' mau" vao: ra" mo, mae" dayaug re- Ba nam pho we"- ngo nao re mavhan" zo: va" re- Nao wa daba re okaung phug' ngaui dakye' byid: nae" ein: jho" dang: rure myid vang" to: va" ra" mangad: i? 14 Ni" okaung phug' yu: ci mung: phao: lo" wa,- Thao re mau" vao: ra" yaug rere: nao re we' dakhyo: ngo byid: nug: ra". 15 Nga" ngaui re ngoyao: nug: ra" khyo" magai: kad' i? Ngo gai kad' rure nao myo, qu" zau" i? ga: ta" ra". 16 Airumung: thao gyo" ra" mo, wa qhid' khyo ngad: li" genae"- Qhid' mae" mo, wa thao gyo" li" genae" ga: ta" ra". 17 Yesu wa Yerusalem khyo do, ye" lo" na: au:- yao: wa mho"zo: daxe: shid' yaug re za: dajheim khyo khai: yu mung:- yao bam su" ye" lo" zo" re"- 18 Qu" ge,- ngonhaung" wa Yerusalem khyo do, ye" lo" na: ru ngad:- aimae Byu: Yao: Zo: wa khinjaung qi: qe we' tung" pho" qe: lo, khyo ab byid' pye' ru qhug' li" nae"- yao: bam wa yao: re shid nae" qhid' mae" dao: phyid' mung:- 19 Taung bug qe: lo, khyo ab byid' pye' li" genae"- Taung bug qe wa Byu: Yao: Zo: re jung" qi: pye' ru we' se' da: be, khyad' kad' yang: pyao: zang mae jin" se' pye' li" genae". Ngadqere: sam ba kyo thao re yao: wa shid: rumae" dam: daui: to" li" zai ngad:- ga: ta" ra". 20 Ai: thao Zebede yao: zo: tao: yao: myhi" wa- myo,nho mho' nae" qhid' mae" yao: zo: tao we' daga" Yesu jhao" li" mung: yao" qhid' kheim: mae pad' thaug' li" thaug' ra". 21 Alao" Yesu wa yao: re nao pe" ja: o: i? ga: myid' ra". Yao: wa nao kho:kham boe" lao"-ce: nga" zo: shid' tao re ni" lo, yo shad' mae dayaug- ni" lo, kaung: shad' mae dayaug qo" zaung nae" qhid' mae" akhang" byid: wa,- ga: mho' ra". 22 Ngadqere: Yesu wa Naonhaung" pe" nam mho' na ko" rure naonhaung" maba ko" ngad: ra"- ngo shaug' nae" ra" ai: keim re naotao qo" shaug' genae" i? ga: tau" ra". Yao: tao wa qo" shaug'- ga: phaug' tau" ako". 23 Yesu wa yao: tao re- Ni" shid' tao gaigai: yao: nga" keim re qhug' shaug' li" genae"- ngadqere: nga" lo, yo shad' lo, kaung shad' mae" ru khyin: yu nae" akhang" ngo maqo"- ai wa nga" Pho" yang nyhang" to: byid' ra" mo; qhid' mae" za: ngad: ra"- ga: ta" ra". 24 Ai: khyo re gatau mho"zo: daxe yaug qhug' gyo: gelao"- yao: bam wa yao: shid' tao re nhag' yo" ako". 25 Airumung: Yesu wa mho"zo: qe alhab' re khai: zhang" yu yang: yao: bam re- Mao"So re malam: ra" mo, qemae" eib nae" akhang" qo" ra" mo, wa mung" byu qe: dao mae qam: so' we' eib: ako"- Zug: au: jhaung qere: kheim: so' qo" ko" rure naonhaung" ba: ako". 26 Naonhaung" gyo: mae kam" wa airu: magai: ngad. Naonhaung" mae" je: qi: nug: ra" yaug khag' ngadqere: yao: wa alhab' mo; daui daui yaug boe" ca". 27 Naonhaung" mae" au: jhaung boe" nug yaug khag' ngadqere: yao: wa alhab' mo; jeim boe" ca". 28 Byu: Yao: Zo: lhao" re: su re yam" zo: nae" qhid' mae" joe" li" ru mangad:- su re caung da" nae" we' byu myo: sho' re khyad' yu nae" qhid' mae" yao" kao so' re byid' pye' nae" ga: joe" li" ru ngad:- ga: ta" ra". 29 Yesu we' mho"zo: qe wa Yerikho vogaung: mae" thug' lo ko" au:- byu phung: mo" zang cao" ako". 30 Qu" ge,- myo, jid shid' yaug wa khyoyae mae zaung: jo; ako"- yao: shid' zo: wa Yesu su" lo: na: rure ba gelao"- Davi yao: zo: Asang we"- nga" shid' zo: re nhag' khyag' yu la, ga: zag: hug' ako". 31 Mo, byu qe wa yao: shid' zo: re sae za: na nae" qhid' mae" qeim: ako". Ngadqere: yao: shid zo: wa Davi yao:zo: Asang we" nga" shid' zo: re nhag' khyag' yu la, wo"- ga: je: zag: hug' ako". 32 Yesu wa thang mung: yao: shid' zo: re khai: yu yang:- ni" shid' zo" qhid' mae" ngo pe" kad' byid: nae" o ko" i? ga: myid' ra". 33 Yao: shid' zo: wa Yesu re- Asang we"- nga" shid' zo: re myo, myao: li" nhao byid: la,- ga: mho' ako". 34 Yesu wa yao: shid' zo: re nhag' khyag' mung:- yao: shid' zo" myo,jid' re tin: byid' ra". Ailao" jao"- yao: shid' zo: wa myo, myao: li" mung:- yao" thao cao" ye" ako". 1 Yesu we' mho"zo: qe wa Yerusalem khyo jhao" li" mung:- Zhan:lun: bam nhae mae" Betphage vogaung: khyo joe" lo: ako". Yesu wa mho"zo: shid' yaug re- ni" shid' yaug: qhid' au: mae" vogaung: khyo ye" lo" ge,- 2 Ai: mae loze nau" jhui" ra" loze myhi" dadau: taui" to" rure yemyao: li" genae"- ai: loze nau" re pheim: yu mung: ngojhao" she: lo geri:- 3 Byu dayaug yaug ni" shid' zo: re- loze Pe"mung: pheim ko" i? ga: myid' ngad: re- Asang ce shid' ma: re ci qo: ga"- ein: ta" ge,- ailao" jao" yao: wa ai: loze ma: re she: lo" nhao: li" nae"- ga: pyang mung: nhao: ke' ra". 4 Ceru: boe" ru wa Ziun myiqe: nau" re ta" kyo: ge,- qu" wa,- ni" kho:kham pho" wa nau" nhae" xam: mag mung: loze dao mae zaung: ra". Loze nau" dao mae zaung mung: nao jhao" joe" li" ra"- 5 Ga: lapa pho" ta" to" ra" dao: jab byang" li" nae" qhid' mae" ngad: ra". 6 Mho"zo: shid' yaug thug' ye" lo" mung:- yao: shid' zo: re Yesu ta" ke' ru we' dakhyo: yekad' ako". 7 Yao: shid' zo: wa loze myhi" we' loze nau" re she: lo mung: loze dao mae yao: shid' zo" bau: qhang khyad' nhae: byid' ako". Yesu wa ai: dao mae do; zaung: ra". 8 Ai: byu phung: mo" zang wa yao: bam: mai bau: jham re khyodang mae myhung: byid' ako"- Damyo" wa sag' dang" jham xe" yu mung: khyo mae myhung: byid' ako". 9 Yesu qhid' au: mae su" ra" mo, byu qe we' yao" thao cao" ra" mo, byu qe wa zag: hug' mung:- Davi yao: zo: re Hosana ngad vashao:- Asang: mang we' joe" li" ra" yaug wa ngaui lho" vashao: wo"- ga: ta" ako". 10 Yesu Yerusalem khyo vao ye" lo" au: re- vogaung: geim" mo,thaui: mo,yaug boe" li" mung:- ceyaug wa khag' ngad: ra" i? ga: myid' ako". 11 Alao" mo, byu qe wa tau: mung:- ceyaug wa Galile mung"- Nazared vogaung: mae" lapa Yesu ngad: ra"- ga: ta" ako". 12 Yesu wa Caung:pa" Yham khyo vao ye: mung:- ai: mae zai aung: zai vai mo, re khe' thug' pye' ru we' ngaui tha" zo: mo; jaung: jham we' phaung" kyug' aung: zo: mo; tao" khau" jham rere: tau: phaug' sin" pye' byid' ra". 13 Yesu wa yao: bam re- Nga" yham re akyu" mho' yham ga: mhang" li" genae"- ga: jham: mugsug' mae tung" to" ra". Ngadqere: naonhaung" wa aire damya, laug aug' kad' na: ako"- ga: ta" ra". 14 Myo, jid qe we' khyid qeim mo, Caung:pa" Yham mae Yesu jhao" li" ako"- Yesu wa yao: bam re gai byid' ra". 15 Khinjaung qi: qe we' tung" pho" qe wa Yesu kad' ra" mug' pho: mau" zo" re myao mung:- Davi yao: zo: re Hosana ngad vashao: wo"- ga: Caung:pa" Yham mae zoshao qe zag: hug' na ko" rure the' gyo: gelao"- nhag'qu" yo: geyang:- 16 Yao: bam wa Yesu re- ai: zoshao qe pe" ta" na ko" rure nao the' gyo" i? ga: myid' ako". Yesu wa ngo the' gyo"- ga: tau" ra". Yesu wa yao: bam re- Nao wa zoshao qe we' nug' nau" qe: nhad' thoe khyo" caung: nghaui" nhao nae" yao: bam re mho" to" ava"- ga" ra" jham: dao: re naonhaung" manghe' qu" ko" i? ga: ta" ra". 17 Yesu wa yao: bam re to: co' yang: ai: vogaung: mae" thug' lo" mung:- Bethani vogaung: mae ai: myi ye:yab: ra". 18 Thao: ba ne, seim no' mae" Yerusalem khyo dam: vao lo: na: au:- Yesu wa vae: moe' ra". 19 Khyoyae mae yaug: jo; ra" pho' ham" gae dagae re myao mung: yao: wa ai: pho' ham" gae khyo ye" lo" ra". Ngadqere: pho' ham" gae mae avho' reza: yemyao lao"- Yesu wa nao wa khonhae" re: ashi: mazaui: lo: vashao:- ga: pho' ham" gae re ta" ra". Ailao" jao"- ai: pho' ham" gae wa kyaug' shid: lo" byaug: ra". 20 Mho"zo: qe wa aire the' myao gelao" mug' hao" byaug: ako". Yao: bam wa Yesu re- Ai: pho' ham" gae wa khoru: mung: ai qhi" yao: phyad za: kyaug' shid: lo" byaug: laug i? ga: myid' ako". 21 Yesu wa tau: mung:- ngo naonhaung" re dang za: ta" ru wa naonhaung" aug' o: myid mabo: ra" lam khug: myid bo ko" ngad: re wa ngo ce: pho' ham" gae re kad' ru we' dakhyo:- naonhaung" qo" kad' li" genae"- ai za: mangad:- ai: bam re- Bam nao qui" lo" mung: panglai: khug khyo gyang: vao lo" wa,- ein: ta" lao"- ta" ru we' dakhyo: boe" nae". 22 Naonhaung" lam" mung: akyu" mho' ko" ngad: re wa naonhaung" pe" mho' gengadqere: qo" khae: yu: li" genae"- ga: ta" ra". 23 Yesu wa Caung:pa" Yham khyo dam: tug' lo mung: mho" shid' byid' na: au: re- khinjaung qi: qe we' au: jhaung lau: de, qe wa Yesu jhao" li" mung: yao: re- Nao wa aijham re pe" kheim: so' khyo" yang kad' i? Nao re ai: kheim: so' byid: yaug khag' ngad: i? ga: myid' ako". 24 Yesu wa yao: bam re tau: mung:- ngore: naonhaung" re dao: dakheim: myid: nae"- naonhaung" aire phaug' tau: gelao" wa aijham re ngo pe" kheim: so' khyo" yang kad' rure ngo naonhaung" re ta" kyo: nae"- ga: ta" ra". 25 Yohan byid' ra" qid nyhab' wa khai: mae" ngad: i? Mao"So: kheim: so' khyo" yang ngad: i? Mangad: lao"- byu: kheim: so' khyo" yang ngad: i? ga: myid' ra". Ailao" yao: bam wa ngonhaung" pe" ru: ta" zai i? Mao"So: kheim: so' khyo" yang ngad: ra" ein: ngonhaung" ta" lao"- aire naonhaung" Yohan re pe"mung: malam" ko" i? ga: ta" li" nae". 26 Aimung: byu khyo" yang ngad: ra" ein: ngonhaung" tau: lao" re:- mo, byu qe wa Yohan re lapa ngad: ga: myid: lam: na ko" ruyang mo, byu qere ngonhaung" gyaug ca" ra" ga: yao: bam yao: cao: jho" qham: ako". 27 Alao" yao: bam wa Yesu re- ngonhaung" maba ga: tau" ako". Alao" Yesu wa yao: bam re- ngore: aijham re pe" kheim: so' khyo" yang kad' rure naonhaung" re ngo mata" nae"- ga: ta" ra". 28 Yesu wa naonhaung" pe" ru: myid ko" i? Byu dayaug wa yauggai zo: shid' yaug qo" ra". Yao: wa zoqhid' yaug jhao" ye: mung:- nga" zo: we"- ana" ba sabyi khyae khyo ye: mung: mau" yezaui: wa,- ga: ta" ra". 29 Yao: zo: wa yao: pho" re- ngo manug: ye: ga: tau: ngadqere: thao re yao: wa nhag' lam: tha" mung: sabyi khyae khyo ye" lo" ra". 30 Yao: pho" wa yao: nhaung: jhao" re: ye: mung:- azhao ta" ru we' dakhyo: yedam: ta" ra". Yao: wa Ngo ye: nae"- ga: tau" ra" ngad yang: re: yao: wa maye: ngad: ra". 31 Ai: yauggai zo: shid' yaug mae" khoyaug lam: yao: pho" mho dao: re tae" gyo" ra" i? ga: myid' ra". Yao: bam wa zoqhid' yaug ngad: ra"- ga: tau" ako". Alao" Yesu wa ngo naonhaung" re dang za: ta" ru wa khang: gaug zo: mo, we' shava myhi" qe wa Mao"So: mung"dan: khyo naonhaung" qhid' au: mae vao ye" li" genae". 32 Pe"mung:ga"re Yohan wa naonhaung" re jo: ra" khyo re li" ceim" shid' byid: ngadqere:- naonhaung" wa yao: re malam" ko" ngad: ra". Ngadqere: khang: gaug zo: mo, we' shava myhi" qe wa yao: re lam" ako". Naonhaung" wa aire the' myao gesho' ngadqere: nhag' lam: tha" pye' mung: Yohan re malam" ko" ngad: ra". 33 Yesu wa yao: bam re dao: tau" gatau dalam: re tae" gyo: shige,- ga: ta" ra". sabyi khyae qho: zo" ra" mug: myid sang dayaug wa sabyi khyae qho" to: mung: aire khyae kyae" lhang" to: sabyi pyag' khung: dau" to:- gyebyu zaung dalam: myhae" to: mung: sabyi khyae ngho" zaui: mo, re ngho: byid' to: co' yang: gatau: mung" khyo gyaung: su" lo" ra". 34 sabyi shi: phyo' yo, joe" lao"- yao: wa yao" jeim qere khyae ngho" zaui: mo, jao" khyae ngho: phug' sabyi shi: mho' nhao: ke' ra". 35 sabyi khyae ngho" zaui: mo, wa yao" jeim qere lham: taung" yu yang:- be, yaug re be,- se' yaug re se'- laug baui: yang pye' se'yaug re pye' mung: kad' ako". 36 Khyae sang wa sao qhid' lhang tho' mae" jeim gatau myo: sho' re dam: nhao: ke' ra"- Khyae ngho" zaui: mo, wa azhao we' dakhyo: za: ai: jeim qere lham: kad' ko" ra". 37 Lo" thao" mae khyae sang wa nga" zo: re wa yao: bam lham: phug' myao: genae"- ga: ta" mung: yao: zo: re khyae ngho: zo: mo, jhao" nhao: ke' ra". 38 Ngadqere: khyae ngho" zaui: mo, wa khyae sang: yao: zo: re myao lao"- ceyaug wa khyae sang: nho: yham khaung sang nae" yaug ngad: ra"- lo geri:- yao: re se' pye' gelang:- yao" jo,nho" re ngonhaung" yu: pye' gelang:- ga: yao: cao: yao: jho" ta" ako". 39 Alao" yao: bam wa yao: re taung" yu yang:- khyae taung gaung khyo she: thug' lo" mung:- yao: re se' pye' ako". 40 Amung: khyae sang joe" li" lao"- yao: wa ai: khyae ngho" zaui: mo, re pe" ru: kad' li" nae" i? ga: myid' ra". 41 Yao: bam wa tau: mung:- yao: wa ai: makhyang" ra" byu qere gaigai: yao: li" se' pye' li" nae"- amung: sabyi khyae rere: sabyi mhang" yo, re khyae ngho: phug' sabyi shi: man: man: za: byid' ra" gatau khyae ngho" zaui: mo, re ngho: byid' pye' li" nae"- ga: ta" ako". 42 Alao" Yesu wa yao: bam re Yham zhaug' mo, khyin: khyo" pye' ra" laug baui wa yham jheim mae" akhyag: thao" ra" laug baui boe" lo ra"- Ce wa Asang: yang kad' ru ngad: ra". Amung: ai wa ngonhaung" qhid' kheim: mae mug' pho: mau" ngad: ra"- ga" ra" jham: dao: re naonhaung" khonhae" re: manghe' qu" ko" i? ga: ta" ra". 43 Airumung: ngo naonhaung" re ta" geli"- Mao"So: mung"dan: re naonhaung" mae" qab: yu mung: ai: mung"dan: ashi: zaui: nae" byumyu" re byid' pye' li" nae". 44 Ai: laug zang dao mae gyo" lo" ra" yaug khag' ngadqere: adau dau gyug' lo" li" nae"- amung: dayaug yaug: dao mae ai: laug zang gyo" zag: lo" re wa yao: re aphaui: mhan" pye' li" nae"- ga: ta" ra". 45 Khinjaung qi: qe we' Pharishe qe wa Yesu dao: tau" jham re the' gyo: gelao"- Yesu wa yao: bam: khyo re ta" na: rure ba: gyo" yu: ako". 46 Airumung: yao: bam wa Yesu re taung: nae" khyo qho: ako". Ngadqere: Yesu re lapa ngad: ra" ga: myid: lam: na: ko" ra" mo, byu qere yao: bam gyaug: ako". 1 Yesu wa dao: tau" jham ci yang: yao: bam re dam: ta" ra". 2 Mug:gaung: mung"dan: wa ceru we' dau: ra". kho:kham dayaug wa yao: zo" lo,xo' poe re seim" jin" to: mung: 3 ai: khai: to" ra" bang" vo qere lo,xo' poe khyo li" genae" qhid' mae" yao" jeim qere khai nhao: ke' ra"- ngadqere: yao: bam wa manug: li" ko" ngad: ra". 4 kho:kham pho" wa Nga" poe wa zo: nae" jin" jin" ngad va"- nga" nung: jaung lo: jham we' zhe' to" ra" gug'nyhug'jham re: se' to: va"- Alhab' jin" va"- lo,xo' poe khyo li" gase, ga"- ein: khai: to" ra" bang" vo qere yeta" ge, ga: gatau jeim re dam: nhao: ke' ra". 5 Ngadqere: khai: to" ra" bang" vo qe wa jeim qe li" ta" ko" rure pe" shui magyo" nho lo:- dayaug wa yothaung: khyo- gatau dayaug wa yao" phaga: mau" zo" khyo ye" lo" ko" ra". 6 Gatau dang: ra" gu: wa- jeim qe re lham: taung" yu yang: be, mung: se' pye' ako". 7 kho:kham pho" kam" wa nhag' gyai yo" ra". Amung: yao: wa yao" gyezo: jham re nhao: ke' mung: ai: byu se' ra" mo, re yese' nhao: ra". Yao: bam: vogaung: rere: ngha" pye' nhao: ra". 8 Ai: thao re kho:kham pho" wa yao" jeim re khai: yu mung:- nga" poe wa jin" jin" ngad va"- ngadqere: ngo khai: to" ra" mo, wa ai: poe we' maman: qi" ko" ngad: ra". 9 Airumung:- hau" mo" khyodang khyo ye: yang: naonhaung" the' myao: ra" mo, alhab' re yekhai ge, ga: ta" ra". 10 Airumung: jeim qe wa hau" mo" khyodang khyo thug' ye" lo" mung:- yao: bam the' myao: ra" magai: ra" byu- gai: ra" byu alhab' mo, re khai: zhang" lo: ako". Ai: lo,xo' poe mae bang" vo jham byang" sho' zaung: bam: ako". 11 Alao" kho:kham pho" wa bang" vo qere qu" nae" qhid' mae" vao lo: ra". Yao: wa lo,xo' poe ve,mai ve,bau: mave; ra" byu dayaug re the' myao lao"- 12 kho:kham pho" wa yao: re- ba nam pho" we"- nao wa lo,xo' poe ve,mai ve,bau: mave, lo:- khoru: mung: ce: poe khyo li" i? ga: myid' ra". Ngadqere: aiyaug wa pe" re: matau: lo: sae za: na: ra". 13 Alao" kho:kham pho" wa yao" jeim qere khyid lo, re taui: mung: taung gaung shad' mug: cad' yo khyo yeshe: to: ge,- ai: jo, qo mae yao: wa ngug byid ngug nhe' we' zaui kyag' yang: na: li" nae"- ga: ta" ra". 14 Pe"mung:ga"re- khai: yu qhug' ra" mo, myo: geyang: re: khyin: yu qhug' ra" mo, wa nang" ako"- ga: Yesu dao: pin" pye' ra". 15 Ai: thao re Pharishe qe wa thug' lo" mung:- Yesu re yao" dao: thoe: yang Yao: re myi" nae" dao: myid: khoru: myid: nae" rure pha,jhi" khyug' ako". 16 Amung: yao: bam wa yao: bam: mho"zo: qe damyo" we' Herod byu damyo" re Yesu jhao" nhao: ke' ako". Yao: bam wa Yesu re- Nao wa dangman" yaug ngad: ru we' Mao"So: khyo rere: dangman" ra" khyo" mho" shid' byid' ra". Nao wa khoyaug khokhyo" myid: jho nae" rure re:- pe" shui manho yaug- myo, nho nga: lao: makhyin yaug ngad: rure ngonhaung" ba:. 17 Airumung:- nao khoru: myid: rure ta" la,- Roma khosin" re ngonhaung" khang: gai: byid' i? Magai: byid: i? ga: myid' ako". 18 Ngadqere: Yesu wa yao: bam: makhyang" ra" nhag' lam: re beim: mung: yao: wa yao: bam re- Geim kad' mo, we"- naonhaung" ngore pe"mung: pha,jhi" khyug' yang: myid: ko" i? 19 Ai: khang: ke' nae" ngaui kye' ngore qhu" gela,- ga: ta" ra". Alao" yao: bam wa Yesu jhao" ngaui dakye' cilo: ako". 20 Yesu wa yao: bam re- Ai: ngaui kye' mae khag' sulho we' khag' mang aso: de; ra" i? ga: myid' ra". 21 Yao: bam wa khosin" sulho we' mang aso: ngad: ra"- ga: tau" ako". Yesu wa yao: bam re kho:sin" we' sin" ra" gu: wa kho:sin" re byid: ge, Mao"So we' sin" ra" gu: wa Mao"So re byid: ge,- ga: ta" ra". 22 Ai: dao: re yao: bam the' gyo: gelao"- yao: bam wa mug' hao" byaug: ako" alao" yao: bam wa Yesu re nha co' mung: lo" byaug: ako". 23 Ai: ba mae yao:- shid: rumae" dam: daui: to" li" ru majo, ga: ta" na ko" ra" Saduke qe damyo" Yesu jhao" li" mung:- 24 Mho" pho" we"- Byu dayaug yaug zo: dau maqo" lo: shid: lo" byaug: ngad: re- yao: nhaung: wa ai: yao: mao" cug' re dam: gaug mung: yao: mao" qhid' mae" nyaug xo' myhung byid: ca" ga: Moshe ngonhaung" re tung" to: byid: co' ra". 25 Ana"- ngonhaung" mae yao: mao: yao: nhaung: nhad' yaug na: ako". Mao: mo" yaug wa myi: dayaug lo,xo' yu: ra"- ngadqere: zo: dau maqo" lo: shid: lo" byaug: ra". Alao" yao: nhaung: yaug cug' dam: gaug: ra". 26 Mao: le; thao re sam yaug- airu: dayaug: thao dayaug yao: tao ho' nhad' yaug: geim" ai: myiqe: myhi" we' zam" mung: zo: dau maqo" lo: shid: lo" ko" ra". 27 Lo" thao" mae ai: myiqe: re: shid: lo" ra". 28 Yao: tao ho' alhab' yao: re lo,xo' yu: ako". Aire shid: rumae" dam: daui: to" li" ra" ba na mae yao: tao ho' nhad' yaug mae"- khoyaug: yham sang myhi" lam: ngad nae" i? ga: myid' ako". 29 Yesu wa yao: bam re- Naonhaung" wa Jham: mugsug' we' Mao"So: qam: so' re maba geyang:- shad' nghung" na: ako". 30 Pe"mung:ga"re shid: rumae" dam: daui to" li" gelao"- yao: bam wa myi: byid: myi: yu makad' lo: genae". Yao: bam wa mug:gaung dao mae" mug: lagyo: qe we' dakhyo: ngad: li" genae". 31 Shid: lo" ra" mo, dam: daui: to" li" nae" ra" mo, we' sin: yang: ngo wa Abraham Mao"So- Isag nho: Mao"So- Yaku nho: Mao"So ngad:- ga: Mao"So ta" to" rure naonhaung" manghe' qu" ko" i? ga: myid' ra". 32 Mao"So wa shid: byaug va" mo, nho: Mao"So mangad: daui: na: ra" mo; nho: Mao"So ngad: ra"- ga: ta" ra". 33 Ai: dao: re mo, byu qe the' gyo: gelao"- gyo" mug' ako". 34 Yesu wa Saduke qere pe" dakheim: re: maqo" phaug' tau: losho' kad' pye' rure Pharishe qe the' gyo: gelao"- yao: bam wa Yesu jhao" zang" li" mung:- 35 yao: bam mae" tung" pho" dayaug wa- Yesu re jham" qu" zo" re"- Mho" Pho" we"- 36 Kham" to" ra" amyin" dao: mae" kholam: qi" thao" ru ngad: ra" i? ga: myid' ra". 37 Yesu wa- ai: Asang ni" Mao"So re- ni" aung khug nhag' lam:- ni" kao so' we' ni" myid nyan: ba: ru 38 alhab' yang jhid'de; wa,- ga" ra" amyin" dao: wa je: akhyag: ru we' je: qi" thao" ru ngad: ra". 39 Shid' lam: ein: ra" lam: wa- Ni" yham kyo: cao: re naoyao" gaung re we' dakhyo: jhid'de; wa,- ga" ru ngad: ra". 40 Ce: amyin" dao: shid' lam: wa- Moshe kham" to" ra" Tarha" alhab' we' lapa qe: mho" dao: alhab' ra" ajhaung ngad: ra"- ga: tau" ra". 41 Amung: Pharishe qe zang" ham: na ko" au: Yesu wa- yao: bam re- 42 Naonhaung" wa Meshia re khoru: ein: myid: jho: na ko" i? Yao: wa khag' myid:zo: ngad: ra" i? ga: myid' ra". Alao" yao: bam wa- yao: wa Davi myid:zo: ngad: ra"- ga: tau" ako". 43 Yesu wa yao: bam re- airu: ngad: re- Davi wa Gyang" Lho" Byo jaung" yang: Meshia re pe"mung: Asang ga: ta" ra" i? 44 Pe"mung:ga"re- Davi wa Ni" gyevo qere ni" khyid vo: khug mae ngo mato: byid: byid: wa- nga" lo, yo shad' mae zaung: jo, wa, ga: ai: Asang wa nga" Asang re ta" ra"- ga: ta" to" ra". 45 Airumung: Davi wa Meshia re Asang- ga: ta" ngad: re wa Meshia wa Khoru: mung: Davi yao: zo: gai: ngad nae" i? ga: myid' ra". 46 Yesu re khag' re: pe" dakheim: lhao" maqo" phaug' tau: ko" ngad: ra". Ai: ba mae" Yesu re khag' pe" dakheim: re: mavae" myid: loko" ngad: ra". 1 Ai: thao Yesu wa- mo, byu qere we' yao" mho"zo: qere- 2 Tung" pho" qe we' Pharishe qe wa- Moshe nho: Tarha" re pheim: kyo: nae" kheim: so' qo" mo, ngad: ako". 3 Airumung:- yao: bam ta" ra" gu: alhab' re naonhaung" tae" gyo: mung: phug' cao" ge,- ngadqere: yao: bam: ave, alai re dacao" ge,- pe"mung:ga"re yao: bam wa- yao: yao: kho" kyo" ru we' dakhyo:- macao" ngad: ako". 4 Yao: bam wa- la: mung: vin qug' ra" qo re seim" mung: byu qere vin nhao: ako". Ngadqere:- yao: bam yao: wa ai: qo jham re lo, au" yang re: manug: tin: ko" ngad: ra". 5 Yao: bam kad' ra" mau" zo" jham re su gaje the' myao genae" qhid' mae" kad' qhu" ako". Qu" ge,- Jham: dao: tung" ke' to" ra" shoqid: yang thaung kyab' nau" zo: khyab' mung:- ai: khug mae jham: mugsug' mae" dao: jham re tung" ke' to" ako". Amung: lo, kaung: shad' lo, pau" mae we' nga: lao: mae te' ci: ako". Aijham re lu sho' qi: sho' kad' ve; ci mung:- yao: bam: bau: qhang athao mae ban byau: qhang sho' te' ve; ci: ako". 6 Yao: bam wa poe mae je: gai: ra" zaung jo, qo mae zaung nug mo,- tarha" jung yham mae gatau jaung: to" ra" tao" khau" jham mae zaung nug mo, ngad: ako". 7 Gai jao: gyo: mae su: yang lham: phug' myao: nae" o mo,- su: yang Rabai: ga: mhang" byid: nae" o mo, ngad: ako". 8 Ngadqere: naonhaung" kam" wa Rabai: ga: mhang" rure dangaui ge,- naonhaung" Mho" Pho" wa dayaug za: ngad: ra". Amung: naonhaung" alhab' wa mao:nhaung: qe ngad: ako". 9 Naonhaung" wa ce: myid gaung dao mae khag' re ngadqere: Pho"- ein: damhang" ge,- naonhaung" yao: Pho" wa mug:gaung dao mae dayaug za: ngad: ra". 10 Amung:- Au: Jhaung ga: mhang" nae" re: naonhaung" dangaui ge,- naonhaung" Au: Jhaung wa Meshia ga" ra" Au: Jhaung dayaug za: ngad: ra". 11 Naonhaung" phaung mae" je: qi" thao" ra" yaug wa- naonhaung" daui daui yaug boe" ca" nae". 12 Yao: yao" gaung re caung:khin" nug: ra" yaug khag' ngadqere: khyo" pye' ru qhug' li" nae". Amung: yao: yao" gaung re khyo" pye' yaug kam" wa- caung:khin" byid' ru qhug' li" nae". 13 Geim kad' ra" Pharishe qe we' tung" pho" qe we"- naonhaung" wa byuxa: vaqoe, qhug' ako". Pe"mung:ga"re byu qe mug:gaung: mung"dan: khyo vao ye: nae" seim" lao" naonhaung" wa ai: kham: dung: re pyid' pye' ako". Ngadqere: naonhaung" yao: re: mavao ye:- vao ye: nae" qam: ke' mo, rere: naonhaung" mavao ye: nhao ko" ngad: ra". 14 Geim kad' ra" Pharishe qe we' Tung" pho" qe we"- naonhaung" wa byuxa: vaqoe, qhug' ako". Pe"mung:ga"re naonhaung" wa cug' mo" qe: yham zai yokhyao: jham re phyo' zo: lhad' zo" ci yang:- su qu" gai nae"- geim kad' mung: akyu" qhang sho' mho' mo, ngad: ako". Airumung: naonhaung" wa je: qi" ra" dao: phyid' ru qhug' li" genae". 15 Geim kad' ra" Pharishe qe we' Tung" pho" qe we"- naonhaung" wa byuxa: vaqoe, qhug' ako". Pe"mung:ga"re- naonhaung" wa phung: byu dayaug qo" poe" yu nae" qhid' mae" qid khyo"- taung khyo" su" gam" qin" mung:- phung: byu dayaug qo" poe" yu lao" re:- naonhaung" wa aiyaug re- naonhaung" tho' shid' zhao" myi:qid tham: khyo gyo" lo" nae" man: qi" ra" yaug boe" nhao: ako". 16 Khyo jhui" ra" myo, jid qe we"- naonhaung" wa byuxa: vaqoe, qhug' ako". Khag' ngadqere: Caung:pa" Yham re lao: mung: jham tang" re wa- ai wa madang ca"- ngadqere: Caung:pa" Yham mae" qhang re lao: yang: jham tang" ngad: re wa- ai wa dang ca"- ga: naonhaung" ta" ako". 17 Ago myo,jid qe we"- Kholam: je: akhyag: i? Qhang i? Mangad: lao"- qhang re gyang" lho" nhao: ra" Caung:pa" Yham lam: i? 18 Amung: naonhaung" wa byu dayaug yaug phan re lao: mung: jham tang" ngad: re- ai wa madang ca"- ngadqere: ai: phan dao mae" ngaui" xeim: re jham tang: lao" wa- ai wa gaigai: dang ca"- ga: ta" ako". 19 Myo, jid qe we"- Kholam: je: akhyag: i? Ngaui" xeim: i? Mangad: lao"- ngaui" xeim: re gyang" lho" nhao: ra" phan lam: i? 20 Phan re lao: mung: jham tang" ra" yaug wa- phan re we' ai: dao mae jo; ra" ja: alhab' rere: lao: yang: jham tang" ru ngad: ava". 21 Ai: Caung:pa" Yham re lao: yang: jham tang: yaug re: Caung:pa" Yham mae we' ai: mae na: ra" Asang rere: lao: yang: jham tang" ru ngad: ava". 22 Mug:gaung re lao: yang: jham tang: yaug wa- Mao"So: zaung tao" we' ai: mae zaung: jo, yaug rere: lao: yang: jham tang" ru ngad: ava". 23 Geim kad' ra" Pharishe qe we' tung" pho" qe we"- naonhaung" wa byuxa: vaqoe, qhug' ako". Naonhaung" wa shaban sham: nhang:- ban gya pajhi" jham re daxe bam mae" dabam Mao"So re byid: gengad yang: re:- ai: kham" to" ra" Tarha" dao: mae" je: akhyag: ra"- tarha" din: vang" ru- nhag' khyag' ru we' din:man" ru jham re wa naonhaung" to" pye' ko" ra". Naonhaung" wa alhab' re dakhyo: za: phug' cao" ko" ngad: re wa gai: ra". 24 Khyo jhui" ra" myo, jid qe we"- naonhaung" wa shaug' qid mae" pyab' re wa kyae" pye' mung:- gola:u re wa myug: pye' ako". 25 Geim kad' ra" mo, Pharishe qe we' tung" pho" qe we"- naonhaung" wa byuxa: vaqoe, qhug' ko" ra". Naonhaung" wa ai: keim kang:- ban khug' jham re adao shad' mae cid' shao: pye' gengadqere: akhug shad' mae wa- myo, nyad o:byid: ru we' se' da: be, khyad' ru byang" jo; ra". 26 Myo, jid Pharishe qe we"- Keim akhug shad' re shi" sao qhid' cid' san: pye' ge,- ailao" wa adao mae" re: san: lo" li" nae". 27 Geim kad' ra" Pharishe qe we' Tung" pho" qe we"- naonhaung" byuxa: vaqoe, qhug' ako". Naonhaung" wa adao shad' mae qu" yaung" sho' laug man gyad: to" ra" lab zao jham we' dau: ako" ngad yang: re: akhug mae wa shoqug: thaung: jham we' mao gaung bab jham byang" jo; ako". 28 Ai we' dakhyo:- naonhaung" wa adao shad' su: qhid' kheim: mae din:man: mo, ru" ru ngad geyang: re: nhag' lam: khug mae geim kad' ru we' qobo mau" za: byang" sheim: jo; ra". 29 Geim kad' ra" Pharishe qe we' tung" pho" qe we"- naonhaung" wa byuxa: vaqoe, qhug' ako". Naonhaung" wa Lapa qe: lab jham re zao byid' ako". 30 Amung: ngonhaung" wa- phug' phyid' pyad mae naonhaung: qe bo:bo: ngad: re wa- lapa qere se' ra" mau" zo" mae bo:bo: zai mangad:- ga: ta" ako". 31 Ai: ruyang naonhaung" wa- lapa qere se' pye' ra" mo; yao: myid: yao: zo: qe ngad ko" rure gaigai: yao: naonhaung" tau" yu: avako". 32 Airumung:- naonhaung" phug' phyid' qeyang qhid: to: byid: co' ko" ra" mau" re bin sho' naonhaung" xo' yang: kad' ge, 33 Lhao maui jham we' Lhao maui: myid:zo: qe we" Naonhaung" wa myiqid tham: mae" khoru: qo" phao: loe, genae" i? 34 Airumung: ngo naonhaung" re ta" geli"- ngo wa lapa qe pha,jhi" bo mo,- Tung" pho" qere naonhaung" jhao" nhao: ke' nae". Naonhaung" wa yao: bam mae" daqhae: re se' pye' mung:- daqhae: re wa pyao: zang mae jin" se' pye' li" genae" gatau daqhae: re wa tarha" jung yham jham mae taui" be, mung:- daqhae: re wa davo mae" davo khyo khe' taung" pye' li" genae". 35 Qobo maqo" ra" Abela mae" Caung:pa" Yham we' phan gyo: mae naonhaung" se' pye' ra" Barakhia yao: zo: Zakari joe" sho' qobo maqo" mo, re se' ra" yug: alhab' wa naonhaung" au: dao mae joe" lo nae". 36 Ngo naonhaung" re dang za: ta" ru wa- Ai: byu se' ra" qobo alhab' wa- ana" pyad mae" byu qe qhug' kham zo: genae". 37 Yerusalem we"- Yerusalem we"- Lapa qere se' pye' mung: Mao"So: yang nao jhao" nhao: ke' ra" lagyo: qere laug baui: yang pye' se' ra" vogaung: we"- Qo, zang wa qo, nau" jham re yao" daung khug mae zhang" to" ru we' dakhyo:- ni" vobyu qere nga" lo, khug mae zhang" to: nae" ngo khonho" lhang qam: ke' ngadqere: nao maqad ngad: ra". 38 Airumung:- ni" Caung:pa" Yham wa shapye' pye' ru qhug' mung: akeim ngad: jo; li" nae". 39 Nao re ngo ta" ru wa- Asang: mang we' joe" li" ra" yaug wa ngaui lho" vashao: wo"- ga: nao mata" ta" wa- ana" mae" thoegu: nao ngore maqhug' myao lo nae"- ga: ta" ra". 1 Yesu wa Caung:pa" yham mae" thug' lo" mung: su" lo" na: au:- mho"zo: qe wa yao: jhao" qui" lo yang:- Caung:pa" Yham mae" yham jham re Yesu re ceim" shid' ako". 2 Yesu wa yao: bam re- ce: yham jham re naonhaung" myao ko" mangad: i? Ngo naonhaung" re ta" ru wa- Ce: yham wa laug baui dabaui re: makai" jo, lo: sho' byo; qeim: lo" byaug li" nae"- ga: ta" ra". 3 Yesu wa zhanlun bam dao mae zaung: jo, ra" au:- mho"zo: qe wa yao: bam yao: za: Yesu jhao" qui" lo gemung:- ceru khonhae" boe" li" zai i? Nao dam: joe" li" nae" ayo, we' mug: myid thao" lo" nae" ba na lao"- pe" ja" ve, lho jham boe" thug' li" zai laug i? ngonhaung" re ta" kyo: la,- ga: Yesu re myid' ako". 4 Yesu wa yao: bam re- Naonhaung" re khag' yang re: majhui" pyag' lo" geshao:- lha" yang: na ge,- 5 Pe"mung:ga"re byu myo: sho' mo, wa nga" mang vin yang: thug' li" mung:- ngo wa Meshia ngad va"- ga: ta" yang: byu myo: sho' mo, re jhui" pyag' lo" byaug: li" genae". 6 Gye khe' ru we' gyekhe' lau dao: jham re the' gyo: gelao"- naonhaung" dagyo" din ge,- ai: gu: wa boe" li" ca" ra"- ngadqere: ai: lo" thao" ru wa mangad: shi: ngad: ra". 7 Byu damyu" we' damyu"- damang: we' damang: gye jho" zin" li" genae"- Jo, qo gatau tau mae myid lab: lab' li" nae"- bao" khug' khug' li" nae"- 8 Ai:jham wa qug: khai" ru aqhid ngad: ra". 9 Byu jham wa- naonhaung" re qobo dae kham zo: nae" we' se' pye' nae" qhid' mae" ab byid' pye' li" genae"- nga" mathao mae byu alhab' mo, naonhaung" re nghang" li" genae". 10 Alao"- byu myo: sho' mo, wa khyonghung: nghung: mung: yao: cao: yao: jho" ab byid' ru we' yao: cao: yao: manug jho" thug'- jho" nghang" li" genae". 11 Lapa apyag' qe myo: sho' thug' li" mung:- byu myo: sho' mo, re jhui" pyag' lo" byaug: li" genae". 12 Makhyang" ra" mau" zo" laug: li" yang:- byu jham wa jhid'de; myid cae" lo" byaug: li" genae". 13 Ngadqere: athao jao: sho' thaug' qhao" yaug wa khyad' yu: ru qhug' nae". 14 Byumyu" cao jab: qhid' mae" sagse: boe" vashao:- Mug:gaung: mung"dan: Ngaui Bau" Lau Dao: re mug: myid gam: sho' kho" kyo: byid: ca" nae". Ai: thao re za: lo" thao" ra" ba na joe" lo: li" nae". 15 Lapa Daniela ta" to" ra" qu" din sho' ra" maca' majhad' wa- ai: gyang" lho" ra" jo, qo mae li" ye, jo; rure naonhaung" myao: li" genae"- (Nghe' na yaug wa ba: gyo: vashao:) 16 Ceru re the' myao lao"- Yuda mung" mae na yaug wa- bam khyo tao" phao vashao:- 17 Yham khaung dao mae na: ra" yaug wa- gyo" lo mung: yham khug mae" zai daja: ja: malo" vao: yu lo: vashao:. 18 Alao"- yothaung: din" mae na: ra" yaug re:- yao" bau: qhang yu: ci nae" qhid' mae" yham khyo madam: tug' lo vashao:- 19 Ai: ba na gyo: mae gaung la: mo, we' nug: nau" jhui: mo, wa- gyai qug: khai: genae". 20 Airumung:- naonhaung" tao" phao nae" ra" ayo, wa- gyo, yo, mae we' Dugno: Ba mae mangad: vashao:- Mao"So re akyu" mho' na ge,. 21 Pe"mung:ga"re- Mao"So phan" to" ra" mug: myid aqhid mae" ana" ba joe" sho' maboe" qu" shi" ra" qug: khai: khyag' qhui: ru wa ai: ba na gyo: mae boe" thug' li" nae". 22 Amung: ai: ayo, ba na jham re Mao"So: yang maqhaung" pye' ngad: re wa- khag' re: qo" daui: na nae" ru mangad:- ngadqere: khyin: yu: to" ra" mo; qhid' mae" Mao"So: wa ai: ba na jham re qhaung" pye' li" nae". 23 Ai: ayo, mae byu dayaug yaug wa naonhaung" re- Qu" wa cetau mae Meshia na: ra"- thoetau mae Meshia na: ra" ga: ta" ngad: re- yao: ta" rure dalam" ge,- 24 Pe"mung:ga"re- Meshia apyag' qe we' lapa apyag' jham thug' li" genae". Yao: bam wa gai: boe" ngad: re khyin: yu: to: va" mo, re lhao" qo" jhui" pyag' yu nae" qhid' mae" ve, lho jham we' mug' pho: mau" zo" jham kad' qhu" li" genae". 25 Tae" gyo: ge,- ngo naonhaung" re gau: qhid' khae" yang: ta" to: va". 26 Su: yang naonhaung" re- Qu" ge,- Meshia wa din"pyad' yo mae na: ra"- ga: ta" gengadqere:- ai: khyo dathug' ye: ge,- Yham khug mae na: ra" ga: ngadqere: dalam" ge,. 27 Pe"mung:ga"re- lhe' cad' wa ba thug' shad' mae" cad' mung: ba vao shad' joe" sho' mug:gaung geim" bao qhui: lo" ru we' dakhyo: Byu: Yao: Zo: joe" li" nae" ngad: ra". 28 Mao gaung jo; ra" tau nangda jham na: li" genae". 29 Ai: qug: khai: khyag' qhui: ru bin: boe" we' ba wa no; byaug: li" nae". Lho" re: mazho lo nae". Kyi jham wa mug:gaung mae" byid: gyo" lo" mung:- mug:gaung mae" qam: so' jham wa- laui" nan" li" genae". 30 Alao" mug:gaung mae" Byu: Yao: Zo: joe" li" nae" ve, lho jham myao: thug' li" nae". Byu: Yao: Zo: wa qam: so' phungbao we' daga" mug:gaung: jham thaui: dao mae joe" li" rure myid gaung dao mae" byumyu" alhab' the' myao gelao"- ngug byid ngug nhe' boe" genae". 31 Alao"- labo" qi: thoe myang: li" mung:- yao" mug: lagyo: qere mug: myid byid khyug geim" khyo nhao: ke' li" nae". Yao: bam wa yao" yang khyin: yu: to" ra" mo, re mug: myid gam: sho' mae" cao" zhang: yu: li" genae". 32 Alao" pho' ham" gae re qu" yang: zhao: yu ge,- Pho' ham" gae mae" anyaug thug' li" mung: vho' nau" tad' li" lao"- zin vao kheim: joe" li" na va" rure naonhaung" ba: ako". 33 Ai we' dakhyo:- aijham alhab' boe" lo: na: rure naonhaung" the' myao gelao"- Byu: Yao: Zo: wa jhao" li" mung: kham: dung: mae lhao" ngad va" rure naonhaung" ba ge,. 34 Ngo naonhaung" re dang za: ta" ru wa- Ana" na: jo; ra" byu ceqae: alhab' mashid shi: re aijham alhab' boe" li" nae". 35 Mug:gaung we' myid gaung lai: lo" byaug ngadqere:- nga" dao: jham wa khonhae" re: malai: lo" nae". 36 Ngadqere: ai: ba na we' yo, qug re Mao"So mae" je yang: khag' re: maba- Mug:gaung dao mae" mug: lagyo: jham we' Yao: Zo: lhao" re: maba ngad: ra". 37 Noa ban: mae boe" ru we' dakhyo: Byu: Yao: Zo: joe" li" rumae re: airu boe" nae". 38 Pe"mung:ga"re daqid mashi: shi" ra" pyad mae" byu jham wa Noa qid sang pho khyo vao lo" ra" ba na joe" sho'- zo: zo: shaug' shaug' myi:byid: myi:yu mung: na: ako". 39 Ai: daqid shi" li" mung: yao: bam alhab' nab: shid: lo" ra" ba na joe" sho' yao: bam mabeim: maso: lo: na: ako". 40 Alao"- yothaung: mae na: ra" byu shid' yaug mae" dayaug re jhui" yu mung:- dayaug re wa tang" to: co' li" nae". 41 Laug lhang daga" gyag: na ko" ra" myiqe: shid' yaug mae" dayaug re jhui" yu mung:- dayaug re tang" to: co' li" nae". 42 Airumung: lha" yang: lhaug' na ge,- pe"mung:ga"re naonhaung" Asang wa kho: au: joe" li" nae" rure naonhaung" maba gengad: ra". 43 Yham sang wa khug' hab' li" nae" yo,khyin: re ba: to" ngad: re wa yao" yham re khug' hab' maqo" kyaung" thad' vao li" nae" qhid' mae" yao: wa lha" yang: lhaug' na: li" nae" rure naonhaung" beim: ge,- 44 Airumung: naonhaung" wa khonhae" re: jin" jin" za: seim" to: ge,- pe"mung:ga"re- Byu: Yao: Zo: wa naonhaung" mamyid: to" ra" au: re joe" li" nae". 45 Alao"- ai: kyid: ru we' qag: ra" jeim wa khoyaug ngad: i? Ai: yaug wa gatau: jeim qere eib khang" nae" we' ayo, joe" lao" zokho gae byid: nae" qhid' mae" Asang: yang san: to" ra" yaug ngad: ra". 46 Yao" Asang dam: joe" lo: au: re airu:- yao" mau" zo" re kyid kyid za: zaui" na: ra" jeim wa ngaui lho" ra". 47 Ngo naonhaung" re dang za: ta" ru wa Asang wa yao" jo,nho" alhab' re zaui: nae" qhid' mae" ai: jeim re san: to" li" nae". 48 Ngadqere: ai: jeim wa makhyang" ra" jeim ngad: re wa yao" aung khug mae- Nga" Asang wa dam: tug' lo nae" myao" shi"- ga: myid yang:- 49 Yao" jeim byin cao: qere be, thaung: mung:- yhid ya: qe we' zo: shaug' yang: na: li" nae". 50 Amung:- ai: jeim pho" matag: to" ra" ba na ayo, mae yao" Asang wa dam: lo: li" nae". 51 Alao"- ai: Asang wa jeim pho" re qi: sho' qobo byid: be, mung: geim kad' ra" mo, kham zo" ra" qobo dae re kham zo: nhao: li" nae". Amung: yao: wa ngug byid ngug nhe' we' zaui kyag' yang: na: li" nae". 1 Ai: ayo, mae- mug:gaung: mung"dan: wa ceru we' dau: li" nae". Zomyi: daxe yaug wa yao: bam: xau myibaung: re yu: ci mung:- pho" sag' re yetug: yu nae" thug' ye" lo" ako". 2 Yao: bam mae" ngo" yaug wa qag mo, ngad mung: ngo" yaug: gu: wa maqag mo, ngad: ako". 3 Maqag mo, wa yao: bam: myibaung: jham re yu: ci gengad yang: re: xau ajan" mabo: yu: vin ko" ngad: ra". 4 Qag mo, kam" wa- yao: bam: myibaung: we' daga" xau ajan" re boyu: vin: ako". 5 Alao" pho" sag' joe" li" nae" thao gyo" mung:- yao: bam alhab' mo, yab nghoe" nghoe" yang: yab: myhid' bam: ako". 6 Gae gaung: myi: joe" lao"- Qu" ge, Pho" sag' joe" li" va"- yetug: yu gese,- ga: hug' thug' li" ra". 7 Alao" zomyi: jham alhab' to" mung: yao: bam: myibaung: jham re myi: te' ako". 8 Ai: maqag: ra" zomyi: qe wa qag: ra" zomyi: qere- ngonhaung" myibaung: shid: lo" na: ra"- amung: naonhaung" myibaung: xau ngonhaung" re dajhid' byid: gela,- ga: mho' ako". 9 Ngadqere: ai: qag: ra" zomyi: qe wa tau: mung:- naonhaung" qhid' mae" we' ngonhaung" qhid' mae" ga" re wa ai: xau malaug nae". Amung: xau aung: mo, jhao" mae" naonhaung" qhid' mae" xau yevai: yu ge,- ga: ta" ako". 10 Ai: maqag: ra" zomyi: qe xau vai ye" lo" ra" gyo: mae- pho" sag' joe" li" mung:- ai: jin" jin" seim" na: ra" zomyi: qe wa pho" sag' we' daga" lo,xo' poe khyo vao ye" lo" mung:- kham: pyid' pye' ako". 11 Ai: thao re- ai: maqag: ra" zomyi: qere: dam: joe" li" mung:- Asang we"- Asang we"- ngonhaung" re kham: phung" byid: la,- ga: yao: ako". 12 Ngadqere: pho" sag' wa Ngo naonhaung" re dang dang za: ta" geli"- naonhaung" re ngo maba- ga: tau" ra". 13 Pe"mung:ga"re- naonhaung" wa ai: ba na we' ayo, re maba ko" ruyang lha" mung: lhaug' na ge,- ga: Yesu dao: pin" ra". 14 Ai: ayo, mae mug:gaung: mung"dan: wa ceru we' dau: li" nae". Byu dayaug wa gyaung: su" lo" nae" seim" lao"- yao: wa yao" jeim qere khai: yu mung:- yao: bam re yao" jo,nho" ab byid: co' ra". 15 Dayaug re ngaui ngo" joe:- dayaug re shid' joe:- gatau dayaug re dajoe: kad' mung: yao: bam: qam: o: re cao" yang: ab byid: co' yang: yao: wa gyaung: su" lo" ra". 16 Ngaui ngo" joe: qo" yu: ra" yaug wa ai lao" jao" thug' ye" lo" mung:- ai: ngaui jham: yang phaga: yekad' yang: yao: wa gatau ngaui ngo" joe: gau pai: the' yu: ra". 17 Ai we' dakhyo:- ngaui shid' joe: qo" yu: ra" yaug re:- phaga: yekad' mung: ngaui gau pai: shid' joe: the' yu: ra". 18 Ngadqere:- ngaui dajoe: qo" yu: ra" jeim wa thug' ye: mung: dung:khung: dau: yang: yao" Asang: nho: ngaui re nyhab' to" ra". 19 Dayo, kyo thao re ai: jeim qe: Asang wa dam: tug' lo mung:- yao: bam we' ngaui japhin: losho' ra". 20 Ngaui ngo" joe: qo" yu: ra" yaug wa gatau ngaui gau pai: ngo" joe: re cili" mung:- Asang we"- nao ngore ngaui ngo" joe: ab byid: co' ra"- Qu" wa,- ngo wa ngaui ngo" joe: gau pai: the' yu va"- ga: ta" ra". 21 Alao" Asang wa gai va"- gai: ru we' kyid: ra" jeim we"- nao wa bun ngaui dajhid' za" rumae kyid: ra". Amung: ngo nao re bun ngaui myo: sho' ab byid: nae"- nga" ngaui bau" rumae li" boleim ri:- ga: ta" ra". 22 Ngaui shid' joe: qo" yu yaug re: ngaui gau pai: shid' joe: re cili" mung:- Asang we"- nao wa ngore ngaui shid' joe: ab byid: co' ra". Qu" wa,- ngo wa ngaui gau pai: shid' joe: the' yu va"- ga: ta" ra". 23 Alao" Asang wa gai va"- gai: ru we' kyid: ra" jeim we"- nao wa bun dajhid' za" rumae kyid yaug ngad: ra". Amung: ngo wa nao re bun ngaui myo: sho' ab byid: nae"- nga" ngaui bau" rumae li" boleim" ri:- ga: ta" ra". 24 Ai: thao re ngaui dajoe: qo" yu: ra" yaug wa joe" li" mung:- Asang we"- nao wa gyai qhag' yaug ngad: ru we' nao maqho" to" ra" jo, qo mae" yad: yu nug yaug- nao masin" to" ra" jo, qo mae" yad: zhang: yu nug yaug ngad: rure ngo ba:. 25 Ngo wa gyaug yang:- ni" ngaui joe: re myid gaung mae yedau" nyhab' to"- Qu" wa,- ni" ngaui cemae jo; ra"- ga: ta" ra". 26 Alao"- yao" Asang wa Makhyang" ru we' noe" ra" jeim we"- ngo wa maqho" to" ra" jo, qo mae" yad: yu nug: ru we' masin" to" ra" jo, qo mae" zhang: yu nug: ra" yaug ngad: rure nao ba: ra". 27 Airu: ngad: re- nao wa nga" ngaui re ngaui jhi mae yeke' to: ang: ra". Ngo dam: tug' joe" lo lao"- ai: bun ngaui we' daga" gau pai: ngaui re ngo dam: qo" yu zai ngad: ra". 28 Airumung: yao" lo, mae" ngaui joe: re yu mung: daxe joe: qo" ra" yaug re byid: ge,- 29 Pe"mung:ga"re- qo" ra" yaug wa laung: byid' ru qhug' mung: yao: wa magan: mago" je: qo" li" nae". Maqo" ra" yaug mae" kam" wa- yao: qo" ra" gu: alhab' re lhao" yu: pye' byid' ru qhug' li" nae". 30 Ai: lam maga" ra" jeim gao: re wa taung gaung shad' mug: cad' yo khyo khe' thug' pye' ge,- ai: mae yao: wa ngug byid ngug nhe' we' zaui kyag' yang: na: li" nae"- ga: ta" ra". 31 Byu: Yao: Zo: wa yao" phung qab bao we' mug: lagyo: jham alhab' we' daga" kho:kham khyo" joe" li" lao"- yao" kho:kham zaung tao" dao mae zaung: jo; li" nae". 32 Alao"- byumyu" cao jab alhab' wa yao" qhid' kheim: mae ham: phaung: na: bam: li" genae". Yao zaung" yaug wa yao we' cad' be, jham re gatau tau kho' to" ru we' dakhyo:- Byu: Yao: Zo: re: byu qere phung: kho' to" li" nae". 33 Amung: yao: wa din:man" ra" mo, re yao" lo, yo shad' mae- makhyang" ra" mo, re yao" lo, kaung: shad' mae nha: to" li" nae". 34 Ai: thao re kho:kham pho" wa ai: lo, yo shad' mae" mo, re- Nga" pho" nho: shaman" jeju re qhug' khae: yu: ra" mo, we"- Lo geri:- Mug:myid phan" to" ra" ba na mae" naonhaung" qhid' mae" nyhang" jaung: to" ra" mung"dan: re kham: yu ge,- 35 Pe"mung:ga"re- ngo vae: moe' ra" au: re naonhaung" ngore byid: zho" ako". Ngo qid shab' ra" au: re naonhaung" ngore qid byid: jhaug' ako". Ngo bang" vo ngad: ra" au: re naonhaung" ngore bang" da" byid' ako". 36 Ngo gaung pyad' ngad: au: re- naonhaung" ngore mai bau: byid: vhe' ako". Ngo no phyo: qhug' au: re- naonhaung" ngore gun caung: ako"- ngo thaung: laung" jo; au: naonhaung" ngore li" kam: vako" ra"- ga: ta" ra". 37 Alao" din:man" ra" mo, wa- yao: re tau: mung:- Asang we"- nao vae: moe' rure ngonhaung" khonhae" myao yang: nao re byid: zho: geli" laug i? Nao qid shab' rure ngonhaung" khonhae" myao yang: nao re qid byid: jhaug' geli" laug i? 38 Nao bang" vo ngad: rure ngonhaung" khonhae" myao yang:- nao re bang" da" byid' lai: lo geli" laug i? Nao gaung pyad' na: rure ngonhaung" khonhae" myao yang: nao re mai bau: vhe' geli" laug i? 39 Nao no phyo: qhug' rure ngonhaung" khonhae" myao yang nao re gun caung byid'lai: lo geli" laug i? Nao thaung: laung" jo; rure ngonhaung" khonhae" myao yang: nao re li" kam: geli" va" laug i? ga: ta" ako". 40 Alao" kho:kham pho" wa Ngo naonhaung" re dang za: ta" ru wa Ce: nga" mao:nhaung: qe mae" je: ngai: thao" ra" yaug re naonhaung" gun caung: ru wa ngore gun caung: ru ngad: ava".- ga: ta" li" nae". 41 Ai: thao re kho:kham pho" wa yao" lo, kaung: shad' mae" mo, re- Mao"So: nhang: kheim: zao" ra" mo, we"- nga" qhid' kheim: mae" thug' lo" ge,- ai: yui Satan we' yao" lagyo: jham: qhid' mae" nyhang" jaung: to" ra" apyad ato: myiqid tham: khug khyo vao ye: ge,- 42 Pe"mung:ga"re- ngo vae: moe' au: naonhaung" ngore mabyid: zho: ko"- ngo qid shab' au: naonhaung" ngore shaug' qid mabyid: jhaug' ko"- 43 Ngo bang" vo ngad: au:- naonhaung" ngore bang" mada" byid: ko"- ngo gaung pyad' na: au:- naonhaung" ngore mai bau: mavhe' ko"- ngo no phyo: qhug' ru we' thaung: laung" jo; au:- naonhaung" ngore magun caung ko" ngad: ra"- ga: ta" ra". 44 Alao" yao: bam wa Asang we"- nao vae: moe' ru- qid shab' ru- bang" vo ngad: ru- gaung pyad' na: ru- nao no phyo: qhug' ru- thaung: laung" jo; rure ngonhaung" khonhae" myao yang: nao re ngonhaung" macaung da" byid: geli" laug i? ga: ta" li" genae". 45 kho:kham pho" wa ngo naonhaung" re dang za: ta" ru wa je: ngai: thao" ra" cebam mae" dayaug yaug re naonhaung" magun macaung ko" ru wa ngore magun macaung: ru ngad: ava"- ga: ta" li" nae". 46 Alao" yao: bam wa apyad ato: qobo dae kham zo: nae" khyo vao ye: mung:- din:man" ra" mo, kam" wa apyad ato: kao so' daui: ra" khyo vao ye" li" genae"- ga: ta" ra". 1 Yesu wa ai: gu: alhab' re bin: ta" lao"- yao: wa yao" mho"zo: qere- 2 Shid' ba lai lao"- Lai co' Poe joe" zai ngad: rure naonhaung" ba: ako". Byu: Yao: Zo: wa pyao: zang mae jin" se' pye' nae" qhid' mae" ab byid' pye' ru qhug' li" nae". 3 Alao"- khinjaung qi: qe we' lau: de, au: jhaung qe wa Khinjaung Yin" Kayapha yham mo" mae zang" phaung mung:- 4 Yesu re sae za: taung" yu yang: se' pye' nae" qhid' mae" jho" qham: ako". 5 Ngadqere: yao: bam wa mo, byu qe mabeim" li" geshao: poe ba na gyo: gu: mae makad' ge jhao" ga: jho" ta" ako". 6 Yesu wa Bethani mae- mao gae: boe" qu" ra" Simon: yham mae zozo" na: au:- 7 Myiqe: dayaug wa gyai phug' de; ra" Mura Nard xau laug gyang" thaug' dalam: cili" mung: Yesu au: mae ai: xau li" vhe' sheim: byid' ra". 8 Yao" mho"zo: qe wa aire myao gelao" nhag' qu" yo: gemung:- pe"mung: ai: xau re amyid: avho: kad' pye' ra" i? 9 Ai: xau wa ngaui myo: sho' kye' re aung: mung:- myaung sho" ra" mo, re qo" gae byid: zai ngad: ra"- ga: ta" ako". 10 Yesu wa aire ba lao"- yao: bam re- Naonhaung" ai: myiqe: re pe"mung: khin jang ko" ra" i? Yao: wa ngore gai: ra" mau" kad' byid' ava". 11 Pe"mung:ga"re myaung sho" ra" mo, wa khonhae" re: naonhaung" we' daga" za: na: ako". Ngadqere: naonhaung" wa ngo we' daga" khonhae" re: abang mabyid maqo" na genae". 12 Ce: myiqe: nga" gaung re xau vhe' sheim: byid' ru wa ngore nyhab' shaung: pye' nae" qhid' mae" seim" nyhang" ru ngad: ra". 13 Ngo naonhaung" re dang za: ta" ru wa Ngaui Bau" Lau Dao: re kho" kyo" lo" ra" mug: myid gye, geim" khyi" khao: ngo" mae ce: myiqe: re beim: so: nae" qhid' mae" yao: kad' ra" mau" zo" rere: ta" kyo" li" genae"- ga: ta" ra". 14 Ai: thao re mho"zo: daxe: shid' yaug mae bobo: ra" Yuda Iskarud ga: mang: ra" yaug wa khinjaung qi: qejhao" thug' ye" lo" mung:- 15 Yao: wa yao: bam re- ngo naonhaung" lo, khyo Yesu re ab byid: lao"- naonhaung" ngore ngaui khonho" byid: genae" i? ga: yemyid' ra"- yao: bam wa yao: re ngaui sam xe kye' nghe' byid' ako". 16 Ai: ba na mae" Yuda wa Yesu re ab: pye' nae" khoau: yo" nae" rure qho: na: ra". 17 Ai: Man" Make' ra" Mug Poe sao qhid' ba mae mho"zo: qe wa Yesu jhao" li" mung:- ni" qhid' mae" Lai co' Poe myi" xeim re khotau mae nao ngonhaung" re yenyhang" seim" to: nhao nug: i? ga: myid' ako". 18 Yesu wa yao: bam re- Vogaung: mae" byu dayaug jhao" ye: mung: aiyaug re- Mho" Pho" ta" ke' ra"- nga" ayo, joe" li" na va"- amung: ni" yham mae nga" mho"zo: qe we' ai: Lai co' Poe re kad' nug: ra" ga"- ein: yao: re yeta" ge,- ga: ta" ra". 19 Alao" mho"zo: qe wa Yesu yao: bam re ta" ke' ru we' dakhyo: kad' mung:- ai: Lai co' Poe re yeseim" nyhang" to" ako". 20 Myi" thao cad' sham" zo" joe" lao"- Yesu wa mho"zo: daxe: shid' yaug we' daga" zaung: jo, mung: myi" xeim zo" ra". 21 Yao: bam myi" xeim zo" na ko" au:- Yesu wa ngo naonhaung" re dang za: ta" ru wa naonhaung" mae" dayaug wa ngore ab byid' pye' li" nae"- ga: ta" ra". 22 Alao"- mho"zo: qe wa gyai nhag' gyo" kaug' ru we' Yesu re dayaug: thao dayaug aiyaug wa Ngo ngad nae" i? ga: myid' ako". 23 Yesu wa tau: mung:- ngo we' daga" dakhug' mae" za: mug jam zo" ra" yaug wa ngore ab byid' pye' li" nae". 24 Byu: Yao: Zo: wa jham: mugsug' mae tung" to" ru we' dakhyo: shid kham: nae" qhid' mae" ye" li" nae". Ngadqere: Byu: Yao: Zo: re ab byid' pye' ra" yaug wa byuxa: vaqoe, qhug' ra"- aiyaug wa makhau: li" ngad: re yao" qhid' mae" je: gai zai ngad: ra"- ga: ta" ra". 25 Alao"- Yesu re ab byid' pye' nae" yaug Yuda wa Mho" Pho" we"- aiyaug wa ngo ngad nae" laug i? ga: Yesu re myid' ra". Yesu wa tau: mung:- nao ta" ru we' dakhyo: ngad: ra"- ga: ta" ra". 26 Yao: bam zozo" na ko" au: Yesu wa mug re yu mung: jeju caung: akyu" mho' ra". Ai: thao re ai: mug re cug' phai" yang: Ce wa nga" gaung ngad:- yu mung: zo: ge,- ga: ta" mung: yao" mho"zo: qere gae byid' ra". 27 Keim rere: yu mung: Mao"So re jeju bin: caung: byid: lao"- yao: bam re- Naonhaung" alhab' mo, aimae" shaug' ge,- 28 Ce wa qobo khyad' byid' ru qhug' geshao:- byu myo: sho' qhid' mae" sheim: pye' ra" Mao"So: dao: thang" re dazid thaung" te' to" ra" nga" sa: ngad: ra". 29 Ngo naonhaung" re ta" geli"- nga" Pho" mung"dan: mae ngo wa naonhaung" we' daga" sabyi qang: asag' re mashaug' shaug' wa sabyi qang: re ana" mae" ngo khonhae" re: mashaug' lo nae"- ga: ta" ra". 30 Ai: thao re yao: bam wa caung: nghaui" dalam: bin: caung: lao"- Zhan:lun: Bam khyo thug' ye" lo" ko" ra". 31 Yesu wa yao: bam re- Ana" myi yao: naonhaung" alhab' mo, ngore to: co' mung: tao" phao: lo" byaug: li" genae". Pe"mung:ga"re jham: mugsug' mae- ngo wa yao zaung" yaug re be, mung: yao jham wa byo: sin" lo" byaug: li" genae"- ga: tung" to" ra". 32 Ngadqere:- ngo dam: daui: to" li" thao re ngo wa naonhaung" qhid' au: mae Galile khyo ye" lo" na: li" nae"- ga: ta" ra". 33 Alao" Petru wa Yao: bam alhab' mo, nao re phao: cug' to: co' gengadqere: ngo wa nao re khonhae" re: maphao: cug' to: co' nae"- ga: Yesu re ta" ra". 34 Yesu wa Petru re- ngo nao re dang dang ta" li"- ana" myi yao: qo, mateim shi: re nao ngore sam lhang ha: pye' li" nae"- ga: ta" ra". 35 Petru wa Ngo nao we' daga" shid qo: li" ngadqere: ngo wa nao re maha: pye' nae"- ga: Yesu re tau" ra". Mho"zo: gaje alhab' mo, re: ai we' dakhyo: ta" ako". 36 Ai: thao re Yesu wa mho"zo: qe we' daga" Getseman ga: mang: ra" jo, qo khyo joe" ye" lo" ra". Alao" Yesu wa yao" mho"zo: qere- ngo thoetau khyo ye: mung: akyu" yemho' na: ra" au:- naonhaung" wa cetau mae zaung: jo, lao: shi ge,- ga: ta" ra". 37 Yesu wa Petru we' Zebede yao: zo: tao re yao: we' daga" jhui" ye" lo" ra". Yesu wa qi: sho' nhag' kaug' nhag' qhui: ru we' myid: qug: myid: ci" qhug' ra". 38 Yesu wa Nga" nhag' lam: shid nae" qhi" yao: gyai kaug' qhui: ra"- naonhaung" cetau mae ngo we' daga" lha" yang: lhaug' na ge,- ga: yao: bam re ta" ra". 39 Yesu wa aimae" dazab zo: lai: ye: mung: myid gaung mae ye:goe; jo, yang:- nga" Pho" we"- gai: boe" ngad: re wa- ce: keim re ngo mae" lhai: ke' byid: la,- ngadqere: ngo o: ra" khyo" mangad:- nao o: ra" khyo" za: boe" lo vashao:- ga: akyu" yemho' ra". 40 Ai: thao Yesu mho"zo: sam yaug jhao" dam: tug' lo: re yao: bam wa yab: pyo" jo, ko" rure lomyao: ra". Yesu wa naonhaung" sam yaug wa dayo, qug za: lhao" re: ngo we' daga" maqo" lhaug' na ge i? 41 Naonhaung" wa ju" phyo' ru khyo magyo" lo" genae" qhid' mae" lha" mung: akyu" mho' na ge,- Byo wa nug kao bau ngadqere: gaung sho: wa qam: nang" ra"- ga: Petru re ta" ra". 42 Yesu wa shid' lhang ein: lhang dam: ye" lo" mung: Nga" Pho" we"- ce: keim re ngo mae" magai: lhai: ke' lao" wa nao myid: o: ra" khyo" boe" lo vashao:- ga: akyu" mho' ra". 43 Yesu dam: tug' lo: re mho"zo: qe wa myo, qid gyai la: geyang: yab: myhid' jo, ko" rure lodam: myao: ra". 44 Yesu wa yao: bam re nha co' mung: dam: ye: yang: azhao: mae" dao: we' dakhyo: sam lhang ein: lhang akyu" yedam: mho' ra". 45 Ai: thao Yesu wa mho"zo: qejhao" dam: tug' lo mung: yao: bam re- naonhaung" ana" joe" sho' yab: myhid' jo, mung: no" na genhaung i? Qu" ge,- Byu: Yao: Zo: re qobo kad' ra" mo, khyo ab byid' pye' nae" yo, qug joe" li" va" ra". 46 To" ge,- ngonhaung" ye" lo" gelang: se, Qu" ge,- ngore ab byid' pye' nae" yaug wa joe" li" na: ava"- ga: ta" ra". 47 Yesu airu: jhau: na shi" au: re yao" mho"zo: daxe: shid' yaug mae bobo: ra" Yuda wa khinjaung qi: qe tung" pho" qe we' lau: de, au: jhaung qeyang nhao: ke' ra" shae tam" thaung kang ci: ra" byu phung: we' daga" joe" li" ra". 48 Yesu re ab byid' pye' yaug wa- ngo bobaug baug: ra" yaug wa naonhaung" o: ra" yaug ngad: ra" Yao: re taung" yu ge, ga:- ave, byid' to" ra". 49 Yuda wa Yesu jhao" din: za: li" mung: Mho" Pho" we"- qao" na: i? ga: ta" yang:- bobaug baug: ra". 50 Yesu wa yao: re- Ba nam pho" we"- nao kad' nae" mau" re phyad za: kad' wa,- ga: tau" ra". Alao" yao: bam wa Yesu re taung" yu mung: tang za: zaui" zag: ci: ako". 51 Alao" qu" ge, Yesu we' daga" na: ra" mo, mae" dayaug wa yao" shae pyang: she: yu yang: Khinjaung Yin" nho: jeim dayaug re qam" ke' mung: yao" nokhye' byid: lo" ra". 52 Yesu wa yao: re- Ni" shae pyang: re shae byao khug mae dam: ke' to: wa,- Shae pyang: ci yang: gye kad' yaug khag' ngadqere: shae pyang" yang shid nae". 53 Ngo wa Nga" Pho" re bao" thaug' nae" mho' lao"- yao: wa gyetab daxe: shid' tab mae" gyezo: tho' myo" ra" mug: lagyo: jham re ngojhao" nhao: ke' byid: zai ngad: rure nao maba i? 54 Ngadqere: airu: kad' ngad: re wa- ceru wa boe" lo ca" nae"- ga: tung" to" ra" jham: dao: wa khoru: qo" jab byang" lo zai i? ga: ta" ra". 55 Ai: thao re Yesu wa mo, byu qere- Naonhaung" wa damya, re taung" ruru: ngore taung: nae" qhid' mae" shae we' thaung kang we' li" ko" i? Ngo wa ba khao: ba ngo" Caung:pa" Yham mae zaung: jo, mung: mho" byid' na ngadqere: naonhaung" ngore mataung: ko" ngad: ra". 56 Ngadqere: lapa qe tung" to" ra" jham: dao: jham jab byang" li" nae" qhid' mae" cegu: alhab' boe" li" ru ngad: ra"- ga: ta" ra". Alao" mho"zo: qe alhab' wa Yesu re to: co' mung: tao" phao" lo" ko" ra". 57 Yesu re taung" yu: ra" mo, wa yao: re Khinjaung Yin" Kayapha yham khyo jhui" ye" ako". Tung" pho" qe we' lau: de, au: jhaung qe wa ai: mae zang" phaung: na: bam: ako". 58 Petru wa Khinjaung Yin" nho: yham vang" khyo joe" sho' va: va: mae" Yesu thao cao" ye" ra". Yao: wa yham vang" khug khyo vao ye: mung: Yesu khoru: boe" lo" ra" rure ba nae" qhid' mae" gug: gam qe we' daga" ye:zaung: jo; ra". 59 Khinjaung qi: qe we' Tarha" Qe, Do, geim" mae" mo, wa Yesu re qo" se' pye' nae" qhid' mae" madang: ra" sagse: qho: ako". 60 Mhug' mung: sagse: kham: ra" mo, myo: sho' thug' li" mung:- yao" khyo re madang: ra" khyo" sagse: mhug' kham gengad yang: re:- yao: bam pe" sagse: mamyao ko" ngad: ra". 61 Lo" thao" mae byu shid' yaug thug' li" mung: Byu ceyaug wa Ngo wa Caung:pa" Yham re phyo' pye' mung: sam ba gyo: mae qo" dam: kad' nae" ga: ta" ra"- ga: sagse: kham: ako". 62 Alao" Khinjaung Yin" wa to" ye; li" mung: Yesu re- Nao dakheim: re: mata" i? Yao: bam ni" khyo re sagse: kham: na ko" ru wa khoru: i? ga: myid' ra". 63 Ngadqere: Yesu wa sae za: na: ra". Khinjaung Yin" wa Yesu re Nao Mao"So: Yao: Zo: ngad lao" wa ngonhaung" re ta" la,- ngo wa daui: na: ra" Mao"So: mang re lao: mung: ngo nao re myid' ra"- ga: dam: ta" ra". 64 Yesu wa Yao: re- Aiwa nao ta" ru ngad: ra". Ngadqere: ngo naonhaung" alhab' re ta" geli"- ana" mae" thao phyao: Byu: Yao: Zo: wa phung qam: so' nho: lo, yo shad' mae zaung: jo; ru we' mug:gaung: jham thaui: dao mae jui: mung: li" rure naonhaung" qhug' myao: li" genae"- ga: ta" ra". 65 Alao" Khinjaung Yin" wa yao: yao" bau: qhang lao" cad' pye' mung:- yao: wa Mao"So re jung" gaui: ra" dao: jhau: ava"- ngonhaung" gatau pe" sagse: qo shilo" i? Yao: Mao"So re jung" gaui: rure naonhaung" yao: the' gyo" yu: avako". 66 Naonhaung" khoru: myid ko" i? ga: ta" ra". Alao" yao: bam wa tau: mung:- yao: wa qobo qo" yaug ngad mung: shid man" ra"- ga: ta" ako". 67 Ai: thao re yao: bam wa Yesu myo,khung: re khota: phoe" sheim" ru we' zhab' thaung" ako". 68 Daqhae: wa Yesu re bo:pyo' pyo' mung:- Asang Meshia we"- nao re khag' be; rure ngonhaung" re lapa pa: kyo: la,- ga: ta" ako". 69 Petru wa taung gaung shad' ai: vang" khug mae zaung: jo; ra" au:- Khinjaung Yin" nho: okaung myiqe: nau" dayaug yao: jhao" li" mung:- Petru re- Nao re: Galile mae" Yesu we' daga" na yaug ngad: ra"- ga: ta" ra". 70 Ngadqere: Petru wa alhab' mo; qhid' kheim: mae ha: pye' mung:- nao ta" ra" khyo re ngo maba- ga: phaug' tau: yang: vang" kham: nhad' khyo thug' ye" lo" ra". 71 Okaung myiqe: nau" gatau dayaug re: dam: the' myao lao" aitau mae na: ra" mo, re ceyaug re: Nazared mae" Yesu we' daga" na yaug ngad: ra"- ga: ta" ra". 72 Petru wa Ai: yaug re ngo maba- ga: nhang: myan" nhang: thoe we' dam: ha: pye' ra". 73 Ai: thao dazab gai re ayae mae ye; jo; ra" mo, wa Petru jhao" qui" li" mung:- yao: re gaigai: yao: nao re: yao: bam: phung: mae" dayaug ngad: ra". Pe"mung:ga"re ni" jhau thoe: yang yao: shid' na: ava"- ga: ta" ako". 74 Petru wa nhang: myan" nhang: thoe we' Ngo wa aiyaug re maba- ga: ta" ra". Ailao" jao" qo, teim: ra". 75 Petru wa qo, mateim shi:re nao wa ngore maba ga: sam lhang ha: pye' li" nae" ga: Yesu yao: re ta" to" ra" dao: re myid: beim" ra". Alao" Petru wa taung gaung khyo thug' ye: mung:- gyai kaug' ngug: ra". 1 Ne,seim no' mae" khinjaung qi: qe we' lau: de, au: jhaung qe wa Yesu re se' pye' nae" qhid' mae" byin phyo: jho" zin" ako". 2 Ai: thao re yao: bam wa Yesu re taung" yu mung: Roma mang: zug: pho" Pilad' re yeshe: ab, byid' ako". 3 Yesu re ab: pye' ra" Yuda wa Yesu shid nae" dao: phyid' ru qhug' ra" khyo re ba lao"- Yuda wa myid tha" mung:- ai: ngaui sam xe kye' re khinjaung qi: qe we' lau: de, au: jhaung qejhao" dam: citug' ye: mung:- 4 ngo wa qobo maqo" ra" yaug re shid nae" qhid' mae" ab byid' pye' ra" qobo qo" va"- ga: yeta" ra". Ngadqere: yao: bam wa Yuda re- Airu wa ngonhaung" we' pe" sin" i? Aiwa ni" mau" angad:- ga tau" ako". 5 Alao" Yuda wa ai: ngaui sam xe kye' re Caung:pa" Yham mae shapye' to: co' yang: ai:tau mae" thug' lo" mung:- yao: yao: za: ye: jui" shid: pye' ra". 6 Khinjaung yin" qe wa- ai: ngaui re gaug: yu mung: ce wa sa: phug' ngaui ngad: ra". Airumung:- Caung:pa" Yham mae" Alu: ban" mae ke' to: nae" magai- ga: ta" ako". 7 Yao: bam bin: jho" phyo" nyang thao re ai: ngaui: yang zhogam: ug' kad' yaug: myid gaung re taung bug qe: lab bug kad' nae" qhid' mae" vai: yu: ako". 8 Aimung: ai: myid gaung re ana" ba joe" sho' Sa: Myid Gaung ga: mhang" ako". 9 Amung: yao: bam wa aiyaug: gaung phug' khyo" Israel byumyu" qe gau jho ta" phyid' to: byid' ra" ai: ngaui sam xe kye' re yu: yu mung:- 10 Asang ngore pyang: to: co' ru we' dakhyo:- ai: ngaui: yang zhogam: kad' yaug: nho: myid gaung re vai yu: ako"- ga: lapa Yeremia ta" to" ru jab byang" li" ra". 11 Yesu wa Roma mang: zug: pho" qhid' kheim: mae ye; jo; ra". Mang: zug: pho" wa Yesu re- Nao wa Yuda qe: kho:kham ngad i? ga: myid' ra". Yesu wa yao: re- Aiwa nao ta" ru ngad: ra" ga: phaug' tau" ra". 12 Ngadqere: khinjaung qi: qe we' lau: de, au: jhaung qeyang qobo zhaug' ko" ra" khyo jham re yao: wa pe" dakheim: re: maphaug' tau: ngad: ra". 13 Alao" Pilad' wa Yesu re- yao: bam nao re khoqhi" sho' qobo zhaug' na ko" rure nao mathe' gyo: i? ga: myid' ra". 14 Ngadqere: Yesu wa yao: re dakheim: re: maphaug' tau: ngad: ra". Airumung: mang: zug: pho" wa gyai mug' ra". 15 Roma mang: zug: pho" wa- Lai co' Poe khao: ngo" mae mo, byu qe mho' ra" kyam: byu dayaug yaug re yao: bam: qhid' mae" lhaung" nhao: thug' ke' byid' ra". 16 Ai: yo, mae makhyang: yang: su hau: qi" ra" Baraba ga: mang: ra" kyam: byu dayaug na: ra". 17 Mo, byu qe zang" ham: li" gelao"- Pilad wa yao: bam re- Naonhaung" qhid' mae" khag' re lhoe' ke' nae" o ko" i? Yesu Baraba re i? Mangad: lao" Meshia ga" ra" Yesu i? ga: myid' ra". 18 Pe"mung:ga"re yao: bam myid nug: geyang:- Yesu re yao" lo, khyo li" ab byid: ko" rure Pilad ba: ra". 19 Pilad wa dao: kho' zaung tao" mae zaung: jo, shi" au:- yao" yham sang myhi" wa byu dayaug re nhao: ke' mung:- ai: qobo maqo" ra" yaug re pe" dakad' wa,- pe"mung:ga"re amyi ngo wa yab mo, mae yao" mathao: yang nhag' lam: dayin dayo: qhug' va"- ga: ta" nhao: ke' ra". 20 Khinjaung qi: qe we' lau: de, au: jhaung qe wa Baraba re lhoe' ke' byid: mung: Yesu re se' pye' wa,- ga: Pilad re mho' genae" qhid' mae" mo, byu qere poe: ako". 21 Ngadqere: Pilad wa mo, byu qere- ce shid' yaug mae" khoyaug re lam: naonhaung" qhid' mae" lhoe' ke' byid: nae" naonhaung" o ko" i? ga: myid' ra". Yao: bam wa Baraba re lhoe' ke' byid: la, ga: phaug' tau" ako". 22 Alao" Pilad' wa yao: bam re- Airu: ngad lao" wa- Meshia ga" ra" Yesu re ngo khoru: kad' zai i? ga: ta" ra". Yao: bam alhab' mo, wa- yao: re wa- pyao: zang mae jin" se' pye' wa,- ga: phaug' tau" ako". 23 Alao" Pilad wa- yao: pe" ja" qobo shad' lhoe" ra" i? ga: myid' ra". Alao" yao: bam wa- yao: re pyao: zang mae jin" se' pye' wa,- ga: je yang: zag: hug' ako". 24 Pilad wa pe" xo' ta" ngad yang: re: pe" akyu" mabo- mo, byu qe lu" to" li" na: rure qu" myao lao"- qid yu: yu yang:- ceyaug shid: ra" xao qug: wa ngo we' pe" re: masin:- ceyaug: xao qug: naonhaung" vin ca"- ga: ta" mung: mo, byu qe: qhid' kheim: mae lo, cid' ra". 25 Mo, byu qe alhab' mo, wa Yao" xao qug: wa- ngonhaung" we' ngonhaung" myid:zo: qe: dao mae ngad vashao:- ga: ta" ako". 26 Alao" Pilad wa Baraba re yao: bam: qhid' mae" lhoe' ke' byid' ra". Yesu re wa be, mung: pyao: zang mae jin" se' pye' nae" qhid' mae" ab byid' ke' ra". 27 Mang: zug: pho" nho: gyezo: jham wa Yesu re mang: zug: pho" yham mo" khug khyo jhui" vao ye" lo" ko" ra". Gyetab geim" mae" gyezo: jham Yesu lhang" gam: zang" ham: li" ako". 28 Yao: bam wa Yesu re mai bau: khyad' pye' byid: yang:- bau: qhang amo, tha" vhe' byid' ako". 29 Ai: thao re- yao: bam wa zau: kyao: yang maug dalam: nag mung: Yesu au: mae zhaung: byid: mung: yao" lo, yo lo, mae qid phaung: yao: dakhyaung: ke' byid' ako". Bin lao" yao: bam wa Yesu qhid' kheim: mae pad' thaug' thaug' yang: yao: re jung" zo" re"- Yuda qe: kho:kham we"- kao qhang so' qhang vashao: wo"- ga: ta" ako". 30 Yao: bam wa Yesu re- khata: phoe" sheim: byid' ru we' qid phaung: yao: yu: yu yang: yao" au: re be; ako". 31 Yao: bam wa yao: re bin: jung" khyoe' gelao"- ai: bau: qhang re khyad' pye' byid: mung: yao" mai bau: dam: vhe' byid: yang: pyao: zang dao mae jin" se' pye' nae" qhid' mae" Yesu re jhui" thug' lo" ako". 32 Yao: bam thug' ye" lo" na ko" au: Kureni mung" byu- Simon ga: mang: ra" yaug re the' myao gelao"- gyezo: jham wa Yesu pyao: zang re vo, nae" qhid' mae" yao: re deim" zag: nhao: ako". 33 Golgotha ga: mang: ra" au: gao: gye, jo, qo khyo joe" ye: gelao"- 34 yao: bam wa mocid' kho: we' phaung: to" ra" sabyi qang: Yesu re byid: jhaug' ako". Yesu wa aire lham: yo; tau" qu" mung:- mashaug' ngad: ra". 35 Yao: bam Yesu re- pyao: zang mae bin: jin" te' pye' gelao"- yao: bam wa pha" be, mung: Yesu mai bau: jham re yao: bam yao: cao: jho" gae: yu: ako". 36 Ai: thao re- yao: bam wa aitau mae zaung: jo, mung: Yesu re lhaug' na: ako". 37 Yao" au: tho' mae- ceyaug wa Yuda qe: kho:kham Yesu ngad: ra"- ga: yao: re qobo zhaug' ra" mugsug' tung" te' to" ako". 38 Alao" yao: we' daga" damya, shid' yaug re- lo, yo shad' mae dayaug- lo, kaung: shad' mae dayaug pyao: zang dao mae jin" te' to" ako". 39 Khyo mae su" lai: lo" mo, re:- Yesu re jung" ru we' au: nghoe" nghoe" mung:- Caung:pa" Yham re phyo' pye' yang; sam ba gyo: mae dam: kad' nae" ga: yaug we"- 40 nao Mao"So: Yao: zo: ngad: re wa- ni" gaung re naoyao: khyad' yu wa,- Amung: pyao: zang dao mae" gyo" lo ri:- ga: nyhe' ako". 41 Khinjaung qi: qe- tung" pho" qe we' lau: de, au: jhaung qere:- ai we' dakhyo:- Yesu re jung" khyoe' ako". 42 Su gaje qere wa yao: khyad' yu: ra"- ngadqere: yao: yao" gaung re wa maqo" khyad' yu nhaung. Yao: wa Israel qe: kho:kham mangad: i? Pyao: zang dao mae" ana" gyo" lo:ngad: re wa- ngonhaung" yao: re lam" zai ngad:- 43 yao: wa Mao"So re khug ngha: ra". Aimung: Ngo wa Mao"So: Yao: Zo: ga: ta" yaug ngad: ra". Airu: ngad; re Mao"So yao: re ana" khyad' yu nug: laug ceim" qu" gelang: ga: ta" ako". 44 Yao: we' daga" pyao: zang mae jin" te' to" ra" damya, shid' zo: lhao" re:- ai we' dakhyo: Yesu re jung" ako". 45 Amung:- ba khaung tau yo, mae" myi" thao sam yo, qug joe" sho' damung" geim" no, sang: kyid mug: cad' cad' lo" byaug: ra". 46 Myi" thao sam yo, qug mae Yesu wa- thoe qi: we'- Eli- Eli Lema Sabagthani?- ga: hug' ta" ra". Aiwa- Nga" Mao"So- Nga" Mao"So Nao ngore pe"mung: yang: shapye' co' i? ga" ru ngad: ra". 47 Ai: nhae mae ye; jo; ra" mo, damyo" aire the' gyo: gelao"- yao: Elia re khai: na: ra"- ga: ta" ako". 48 Ailao" jao" yao: bam mae" dayaug wa tao" ye" lo" mung:- qid mug sad' yu: yu yang: yhid jhin qang dag sho' jam: yu mung: gyang: yao: au: mae thug' ze: ci yang: Yesu re byid: jhaug' nae" seim" ra". 49 Ngadqere: gaje qe wa na: jo, vashao:- Elia yao: re li" khyad' yu: ra" la,- mali" khyad' yu: ra" la,- ngonhaung" qu" na gelang:- ga: ta" ako". 50 Yesu wa thoe qi: zang hug' mung: kao gyo" lo" ra". 51 Ailao"- Caung:pa" Yham mae" qe, kyo pin: lung: wa aau: mae" akhyid joe" sho' shid' gao go; lo" byaug: ra". Mug: myid nan" li" ru we' laug thin jham go; sin" lo" byaug ko" ra". 52 Lab jham re: bung" go; lo" mung:- shid: jo; ra" Mao"So: byu myo: sho' mo, re dam: daui: to" li" nhao: ra". 53 Yesu shid: rumae" dam: daui: to" li" thao re yao: bam wa lab jham mae" thug' li" mung: gyang" lho" ra" vogaung: khug khyo vao ye" ako". Byu myo: sho' mo, wa yao: bam re the' myao: ako". 54 Gyezug: pho" we' daga" Yesu re lhaug' na: ra" gyezo: qe wa myid lab: lab' ru we' gatau boe" ra" gu: jham re the' myao gelao"- yao: bam wa gyaug: nin" mung:- ceyaug wa gaigai: yao: Mao"So: yao: zo: ngad nhaung ga: ta" ako". 55 Galile mung" mae" yao" thao cao" mung:- yao: re caung da" byid: ko" ra" myiqe: myo: sho' mo, re: ai:tau mae va: va: mae" qu" ye; jo; bam: ako". 56 Ai bam: phaung mae Magadala Mari- Yaku we' Yoseb tao: yao: myhi" Mari- Zebede yao: zo: tao ho' yao: myhi" bam bobo: ako". 57 Myi" thao joe" lao"- Arimathe vo byu Yoseb ga: mang: ra"- jo,nho" qo" ra" byu dayaug joe" li" ra". Yao: re: Yesu mho"zo: dayaug ngad: ra". 58 Yao: wa Pilad jhao" ye: mung: Yesu mao gaung re yemho" ra". Alao" Pilad wa Yoseb re mao gaung byid' ke' nae" qhid' mae" amyin" byid' ke' ra". 59 Yoseb wa mao gaung re yu mung: jid: mo" pin: sag' yang mao gaung re thab' yang:- 60 Laug thin re kyaung" to" ra" yao" laug khyaung lab asag' khug mae ye:ke' to" ra". Amung: lab kham: re laug zang qi: dazang: yang lhang" jhid' to: co' yang: phao: lo" ra". 61 Aitau mae- Magadala Mari we' gatau Mari tao wa ai: lab tau" te' mae zaung: jo; ako". 62 Ai: thao- Dugno: Ba mae khinjaung qi: qe we' Pharishe qe wa Pilad jhao" zang" ye: mung: 63 Asang we"- ai: mhug' pyag' yaug wa- yao: daui shi" au:- ngo wa sam ba kyo thao re dam: daui: to" li" nae" ga: ta" rure- ngonhaung" dam: myid: beim: va"- 64 Airumung:- yao" mho"zo: qe wa mao gaung re maye: qo" khug' yu genae" khyo: sam ba ein: ba joe" sho' yao" lab re nyang" za: zaung" nae" qhid' mae" amyin" byid: wa,- airu: mangad' re yao" mho"zo: qe wa- yao: wa shid: rumae" dam: daui: to" li" va" ra"- ga: mo, byu qere ta" li" genae"- ce: lo" thao" re mhug' pyag' ra" ru wa- sao qhid' mhug' pyag' ra" tho' je: xo: li" nae"- ga: ta" ako". 65 Pilad wa yao: bam re gug: gam gyezo: daphung: re khai: yu yang:- lab re qo" gug' qhi" gug: sho' yezaung" nhao ge,- ga: ta" ke' ra". 66 Alao" yao: bam wa- lab khyo ye: mung: laug baui re dazid thaung" te' yang: lab re gyai gug: sho' kad' ako". 1 Dugno: Ba: thao: ba- Laban ba ne, seim myo, phye: phye: myao: li" au: re- Magadala Mari we' gatau Mari tao wa- lab kam: nae" ga: lab khyo ye" lo" ako". 2 Qu" ge,- ai: mae nyag din taung" myid lab: qi: sho' lab: li" ra". Asang: mug: lagyo: dayaug wa mug:gaung mae" gyo" li" mung: lab kham: mae" laug baui re tau: lhang" pye' yang: ai: laug baui dao mae zaung: jo; ra". 3 Yao" myo,khung: wa lhe' cad' we' dau mung: yao" mai bau: wa gyu: ru: phyu: ra". 4 Zaung" na mo, wa gyaug: din: nin" mung:- byu shid we' dakhyo: mo; byaug: ako". 5 Mug: lagyo: wa ai: myiqe: tao re- Ni" shid' yaug dagyaug ge,- ni" shid' yaug wa pyao: zang mae jin" se' pye' ra" Yesu re qho: na ko" rure ngo ba:- 6 Yao: cetau mae mana lo:- yao: ta" ru we' dakhyo: dam: daui: to" lo" byaug va"- li" geri:- yao: lang" jo, co' ra" jo, qo re li" qu" ge, 7 ana" phyad za: lo" mung: yao" mho"zo: qere yao: wa shid: rumae" dam: daui: to" li" va"- yao: wa naonhaung" qhid' au: mae Galile mung" khyo ye" lo" na: li" nae"- aitau mae naonhaung" yao: re myao: li" genae" ga" ein:- yeta" kyo: ge,- ngo ta" ra" dao: re ni" shid' yaug xam" ci ge,- ga: ta" ra". 8 Yao: shid' yaug wa gyaug ngadqere:- gyai ngaui bau" ru we' ai: lab mae" phyad za: thug' lo" mung: yao" mho"zo: qere ta" kyo: nae" qhid' mae" tao" lo" ako". 9 Alao" Yesu wa nyag din taung" yao: shid' yaug jhao" li" mung:- Yaug yo: na ge,- ga: ta" ra". Yao: shid' yaug wa Yesu jhao" qui" ye: mung: Yesu khyid re yezaui" ci yang: yao: re goe; pa" ako". 10 Yesu wa yao: shid' yaug re dagyaug ge,- nga" mao:nhaung: qere Galile mung" khyo ye" lo" genae" qhid' mae" yeta" kyo: ge,- aitau mae yao: bam ngore qhug' myao: li" genae"- ga: ta" ra". 11 Yao: shid' yaug ye" lo" na ko" au:- lab zaung" ra" mo, damyo" wa vomo" khug khyo dam: tug' vao lo mung: khinjaung qi: qere boe" ra" ru alhab' lota" kyo" ako". 12 Alao" khinjaung qi: qe we' lau: de, au: jhaung qe wa qham yang: byin phyo: nyang pha,jhi" bin: khyug' mung:- gyezo: qere ngaui myo: sho' byid: mung: yang:- 13 myi" re ngonhaung" yab: myhid' jo; au:- yao" mho"zo: qe li" mung: yao" mao gaung re li" khug' cilo" byaug ko" ra"- ein: naonhaung" ta" ge,- 14 Cera" khyo re mang: zug: pho" the' gyo: lao" re:- naonhaung" qobo maqo" ra" khyo mang: zug: pho" re lam" sho' ngonhaung" jhu" nae"- naonhaung" pe" gaung yug maca" nae"- ga: ta" ako". 15 Gyezo: qe wa ai: ngaui re yu: yu mung: khinjaung qi: qeyang yao: bam re mho" ke' ru we' dakhyo: ta" ako". Gyezo: qe ta" ra" lau dao: wa ana" ba joe" sho' Yuda byumyu" qemae hau" nhao" lo" ako". 16 Alao" ai: mho"zo: daxe: shid' yaug wa Yesu yao: bam re pyang: to: co' ru we' dakhyo:- Galile mung" mae" bam dao khyo do, ye" lo" ako". 17 Yao: bam wa Yesu re myao lao"- yao: re goe; pa" ako". Ngadqere: daqhae: wa aug' o: myid bo: ako". 18 Yesu wa yao: bam jhao" qui" ye: mung:- yao: bam re Mug:gaung dao mae re:- myid gaung dao mae re: eib nae" kheim: so' alhab' ngore ab byid' to: va" ra". 19 Airumung:- naonhaung" wa thug' ye" lo" mung: byumyu" cao jab alhab' re nga" mho"zo: boe" nhao ge,- amung: Yao: Pho"- yao: Zo:- Gyang" Lho" Byo: mang mae qid nyhab' byid: mung:- 20 Ngo naonhaung" re pyang: to" ra" amyin" dao: alhab' re phug' cao" genae" qhid' mae" yao: bam re mho" shid' byid: ge,- ngo wa mug: myid thao" sho' naonhaung" we' khonhae" re: daga" na nae"- ga: ta" ra".
|