Mark
Marku1 Ce wa Mao"So: yao: zo: Yesu Khristu nho: khyo Ngaui Bau" Lau Dao: Gai ngad: ra". 2 Qu" ge,- Ni" qhid' au: mae ni" khyo re nyhang" byid: nae" qhid' mae" nga" lagyo: re ngo nhao: ke' ra". 3 Din" pyad' yo mae dayaug hug' na: ra" thoe wa Asang: khyo re nyhang" to: ge,- Yao" khyo re din: za: nyhang" jhao" ge,- ga: Lapa Esaia mugsug' mae tung" to" ru we' dakhyo: qhid: to" ra". 4 Aimung: Yohan wa din"pyad' yo mae" thug' li" mung:- Qobo khyad' pye' byid' ru qhug' nae" qhid' mae" myid tha" pye' yang: qid nyhab' kham: yu ge,- ga: kho" kyo: byid: mung: qid nyhab' byid' na: ra". 5 Yerusalem vobyu qe alhab' mo, we' Yuda mung" geim" mae" mo, byu qe yao: jhao" ye: mung: yao: yao" qobo jham re lhang: yu: ru we' yao" lo, mae Yodan gyaung: mae qid nyhab' kham: yu: ako". 6 Yohan wa gola:u mug' yang qo; ra" mai bau: re ve, mung: shoqid phyid' cui: cui" ci: ra". Yao" zo:ve wa khyag' phaung" we' seyo: byoyhid ngad: ra". 7 Alao" Yohan wa Nga" thao re joe" li" nae" yaug wa ngo tho' mae" qam: so' je: bo yaug ngad: ra". Ngo wa yao" khyid zhaung: taui: goe; pheim nae" lao" maman: qi"- 8 Ngo wa naonhaung" re qid mae qid nyhab' byid' ra"- yao: wa naonhaung" re Gyang" Lho" Byo mae qid nyhab' byid' li" nae"- ga: kho" kyo" ra". 9 Ai: thao mataung" myao" re Yesu wa Galile mung" Nazared vogaung: mae" joe" li" mung:- Yohan lo, mae Yodan gyaung: mae qid nyhab' kham: yu: ra". 10 Qid mae" thug' li" lao" jao" mug:gaung go; bung" li" mung:- Gyang" Lho" Byo wa phaung" kyug' ru: yao" dao mae li" gyo" no" rure yao: myao: ra". 11 Ailao" mug:gaung mae" thoe jhau: thug' li" mung:- nao wa ngo jhid'de; ra" nga" zo: ngad:- nao re ngo gyai o ngaui: ra"- ga: ta" ra". 12 Ailao" jao"- gyang" lho" byo wa yao: re din"pyad' yo khyo jhan" nhao: ke' ra". 13 Yao: wa din"pyad' yo mae ba na byid xe geim" Satan yang ju" phyo' ru qhug' ra". Aimae seyo: gug'nyhug' jham re: na: ako". Ngadqere: mug: lagyo: jham wa yao: re li" caung da" byid' ako". 14 Aimung: Yohan re thaung: taung" lhaung" pye' thao Yesu wa 15 Galile mung" khyo ye: mung:- Ayo, byang" va"- Mao"So: mung"dan: jhao" li" va"- Myid tha" mung: Ngaui Bau" Lau Dao: re lam" ge,- ga: Mao"So: Ngaui Bau" Lau Dao: re kho" kyo" ra". 16 Yesu Galile tham: yae mae su" lo" na: ra" au:- ngo: kung" zo: byu Simon we' yao: nhaung: Andre shid' tao geim pye' na: rure myao: ra". 17 Ailao" Yesu wa Nga" thao cao" ge,- ngo naotao re byu kung" byu boe" nhao nae"- ga: yao: shid' tao re ta" ra". 18 Ailao" jao" yao: shid' tao wa geim jham re to" pye' co' mung: yao: jhao" cao" ako". 19 Dazab zo: ye" lo" tau mae yao: bam: lha dao mae geim pho: na: ra" Zebede yao: zo: Yaku we' yao: nhaung: Yohan tao re myao: ra". 20 Yao: shid' tao re myao we' Yesu khai: ke' ra". Ailao" yao: shid' tao wa yao: pho" Zebede re okaung jham we' daga" lha dao mae nha: to: co' mung: Yesu jhao" cao" ye" lo" ko" ra". 21 Yesu we' yao" mho"zo: qe wa Kapena-um khyo joe" lo: ako". Dugno: Ba mae Yesu wa Tarha" Jung Yham khyo vao ye: mung: mho" shid' byid' ra". 22 Yao" mho" shid' khyo re the' gyo" ra" mo, byu qe wa gyai mug' byaug: ako". Pe"mung:ga"re yao: wa Tung" Pho" qeru: mangad:- kheim: so' qo" yaug ru: mho" shid' byid' ra". 23 Ailao" Tarha" Jung Yham mae bona: ra" makhyang" byo zaung: ra" byu dayaug gyi: hug' mung:- 24 Nazared mae" Yesu we"- nao we' ngonhaung" pe" sin" i? Ngonhaung" re lhau: phyo' pye' nae" ein: joe" li" i? Nao khag' ngad: rure ngo ba:- nao wa Mao"So: gyang" lho" yaug ngad: ra"- ga: ta" ra". 25 Ailao" Yesu wa Sae za: na wa,- yao: mae" thug' lo" wa,- ga: ai: makhyang" ra" byo re amyin" byid' ra". 26 Ai: makhyang" ra" byo wa yao: re lao" thin: lhang" ke' ru we' zag: hug' mung: yao: mae" thug' lo" ra". 27 Mo, byu qe alhab' mug' hao" bam mung:- ce wa pe" ngad va" i? Pe" ru" mho" shid' khyo asag' ngad va" i? Ceyaug wa makhyang" ra" byo jham re amyin" byid: nae" kheim: so' qo" ru we' yao: amyin" byid' rure yao: bam tae" gyo: ko" ra" ga: yao: cao: jho" ta" ako". 28 Ai: lau dao: re Galile mang: geim" gam: sho' mae phyad za: hau" nhao" lo" ko" ra". 29 Ailao" Yesu yao" mho"zo: qe wa Tarha" Jung Yham mae" thug' li" mung: Yaku we' Yohan tao we' daga" Simon we' Andre shid' tao: yham khyo vao ye" lo" ako". 30 Joe" vao ye: we' Simon: yaug myhi" wa noqam" no mung: yab qo mae koe' jo; rure Yesu re ta" kyo" ako". 31 Ailao" Yesu ye: mung: yao" lo; yang yao: re yeshe: to" ke' ra". Ailao" jao" noqam" gai: byaug: ru we' yao: bam re da" zho: da" jhaug' ra". 32 Aimung: myi" thao ba vao: cae: yo, joe" lao"- mo, byu qe no phyo: qhug' mo, alhab' we' yui zaung: ra" mo, alhab' re Yesu jhao" jhui" li" ako". 33 Vobyu qere: alhab' mo, yham kheim: mae li" zang" ham: na: bam: ako". 34 Alao" Yesu wa no phyo: aja: ja: qhug' ra" mo, myo: sho' re gai byid' ru we' yui myo: sho' rere; khe' khyo" pye' ra". Yao: wa yui jham re dao: jhau nae" akhang" mabyid: ngad: ra". Pe"mung:ga"re yui jham wa yao: khag' ngad: rure ba: ako". 35 Thao: ba ne,seim mug: bo" myi: re Yesu to" mung: cae: tae" ra" dajo, qo mae akyu" yemho' na: ra". 36 Simon we' yao" byin cao: qe wa Yesu thao cao" qho: ye: mung:- 37 qho: myao lao" alhab' mo, nao re qho: na: ako"- ga: ta" kyo" ako". 38 Ngadqere: Yesu tau: mung: ce: lhang" gam: vogaung: jham mae re: ngo qo" kho" kyo: nae" qhid' mae" gatau: vogaung: jham khyo ngonhaung" ye: gelang:- ai: qhid' mae" ngo joe" li" ru ngad:- ga: ta" ra". 39 Amung: yao: wa Galile mung" geim" jao: sho' du" qin" mung: Tarha" Jung Yham jham mae cao" kho" kyo" ru we' yui jham re khe' thug' pye' ra". 40 Ailao" mao gae: de; ra" byu dayaug Yesu jhao" li" ra". Yao: wa Yesu qhid' kheim: mae pad' thaug' thaug' mung:- nao nug: re wa ngore qo" gyang" shao: lo" nhao byid: zai ngad: ra"- ga: yao: re mho' ra". 41 Yesu wa nhag' gyo" khyag' ru we' yao" lo, yheim" ke' mung: yao: re zaui" ci zo" re" Ngo nug:- Gyang" shao: lo" se,- ga: ta" ra". 42 Ailao" jao" mao gae: gai: lo" mung: gyang" shao: lo" byaug: ra". 43 Yesu wa yao: re jhaug' za: zug' nhao mung: cekhyo re khag' rere: pe" data" kyo:- Lha" wa,- 44 Ngadqere: khinjaung pho" jhao" ye: mung: ni" gaung re yeqhu" wa,- amung: mo, byu qe: qhid' mae" nao gyang" shao: lo va" khyo sagse: doe, vashao:- Moshe amyin" to" ra" ngaui" xeim: re xeim: lo" ngaui" byid: wa,- ga: ta" mung: phyad za: lo" nhao: ke' ra". 45 Ngadqere: yao: wa thug' ye" lo" mung: ai: khyo re qam: ke' ta" kyo" ru we' lau dao: hau" nhao" ke' ra". Airumung: Yesu wa vogaung: khug khyo de: de: za: magai: vao ye: lomung: vovai: voyae mae na: ra". Khyi" khao: ngo" mae" mo, wa yao: jhao" li" ako". 1 Dayo, zo: kyo thao re Yesu wa Kapena-um khyo dam: tug' joe" lo mung:- yham mae na: jo; ra" ga: ta" hau" ako". 2 Qe, khug kham: dung: maqui" losho' mo, byu qe myo: sho' zang" li" ako". Alao" Yesu wa yao: bam re mungdao: kho" kyo" na: ra". 3 Gaung jam: shid: ra" byu dayaug re byu byid zo" yang Yesu jhao" dao: li" ako". 4 Yao: bam wa mo, paug' saung" thau yang: Yesu jhao" maqo" te' ye: gelao" yao" au: tho' mae" mhao: mug: tau: qhid' pye' mung: gaung jam: shid yaug re yab qo we' daga" shoe' khyo" ke' ako". 5 Yao: bam: lam khug: myid re Yesu the' myao lao" yao: wa gaung jam: shid yaug re- Nga" zo: we"- ni" qobo re khyad' pye' byid: va"- ga: ta" ra". 6 Aitau mae zaung: jo; ra" Tung" Pho" qe damyo" nhag' lam: khug mae- 7 Ceyaug wa khoru: mung: cedao: vae" ta" i? Ce wa Mao"So re jung" ru ngad: ra". Mao"So dayaug za: qobo re qo" khyad' byid: yaug ngad: ra" ga: myid: qho: na: ako". 8 Yao: bam: nhag' lam: khug mae airu: myid: qho: na ko" rure Yesu dalhang: dae yao" nhag' lam: khug mae beim: mung:- naonhaung" nhag' lam: khug mae pe"mung: airu: myid: qho: qu" na ko" i? 9 Gaung jam: shid: ra" yaug re- Ni" qobo khyad' pye' byid: va" ein: ta" re je: laui: i? Mangad: lao"- To" wa,- ni" yab qo vo, yang: su" lo" wa,- ein: ta" re je: laui: i? 10 Ngadqere: Byu: Yao: Zo: wa myidgaung dao mae qobo qo" khyad' byid' ra" kheim:so' qo" yaug ngad mangad: rure ngo naonhaung" re qhu" byid: geli"- ga: ta" mung: gaung jam: shid yaug re- 11 Nao re ngo ta" li"- To" wa,- ni" yab qo gaug: vo, mung: yham khyo lo" se,- ga: ta" ra". 12 Ailao" jao" yao: to" mung: yao" yab qo gaug: vo, yang: yao: bam: qhid' kheim: mae" to" phao: lo" ra". Alao" yao: bam alhab' mo, mug' hao" bam mung: Mao"So re caung:khin" zo" re"- ngonhaung" ceru" ru khonhae" re: mamyao: qu" shi: ga: ta" ako". 13 Yesu wa Galile tham: yae khyo dam: ye" lo" ra". Byu phung: alhab' yao: jhao" zang" phaung: li" gelao" Yesu wa yao: bam re mho" shid' ra". 14 Aimae" yao: su" ye" lo" au: Alphaeu yao: zo: Levi wa yao" khang: khyui zaung mae zaung: jo; rure myao lao"- Yesu wa yao: re- Nga" thao cao" la,- ga: ta" ra". Ailao" jao" Levi to" mung: yao" thao cao" ye" lo" ra". 15 Ai: thao Yesu wa Levi yham mae zozo" na: ra". Yao" thao cao" ra" khang: khyui zo: mo, myo: sho' we' qobo qo" ra" byu myo: sho' mae" damyo" wa- Yesu we' yao" mho"zo: qe we' daga" zozo: jaung: mae bocao: zo" na: ako". 16 Ailao" khang: khyui zo: mo,- qobo qo" ra" mo, we' daga" Yesu zo: shaug' na: rure Pharishe qemae" Tung" Pho" qe damyo" myao lao" yao: bam wa- Pe"mung: yao: wa qobo qo" ra" mo,- khang: khyui zo: mo, we' daga" zo: shaug' na: i? ga: yao" mho"zo: qere myid' ako". 17 Aire Yesu the' gyo: lao" yao: wa yao: bam re- Qao" zin" mo, wa mocid' sara maqo ngad: ako"- No mo, za: aqo: ako". Din:man" ra" mo, re khai nae" qhid' mae" ngo li" ru mangad:- Qobo qo" ra" mo, re khai nae" kam" wa ngo li" ru ngad: ra"- ga: ta" ra". 18 Qid nyhab' byid: yaug Yohan mho"zo: qe we' Pharishe qe wa zo:ve lhaung" jao" ako". Amung: mo, byu qe damyo" Yesu jhao" li" mung: yao: re- qid nyhab' byid' yaug Yohan: mho"zo: qe we' Pharishe qe: mho"zo: qe zo:ve jao" re ni" mho"zo: qe pe"mung: zo:ve majao" ko" i? ga: myid' ako". 19 Yesu wa yao: bam re tau: mung: Lo,xo' poe leim mo, wa pho" sag' we' na shi" au: re zo:ve gai: jao" i? Yao: bam pho" sag' we' daga" ana na wa zo:ve magai: jao". 20 Ngadqere: pho" sag' re yao: bam: phaung mae" kao" jhui" lo" nae" ra" ba na joe" li" nae"- ailao" yao: bam zo:ve jao" genae" ngad: ra". 21 Bau: xug' mae pin: sag' cug' yang khonhae" khag' malhaung" pho- Airu: pho lao" pin: sag' cug' yang bau: xug' re lao" cad' mung: bau: je: jad; lae: lo" byaug nae". 22 Alao" sabyi qang: asag' rere: shoqid thaung axug' mae khonhae" khag' malhaung" ke'- Airu: ke' lao" shoqid thaung baug; go; lo" mung: sabyi qang: yug: sheim: lo" ru we' shoqid thaung re: qeim: byaug nae". Amung: sabyi qang: asag' re shoqid thaung asag' mae ke' to: ca"- ga: ta" ra". 23 Ai: thao Yesu wa Dugno: Ba re gaug yo khyo" su" lai: lo" ang: ra". Yao" mho"zo: qe wa gaug shi: re shan" yu: ako". 24 Alao" Pharishe qe wa yao: re- Qu" wa,- Dugno: Ba re tarha" mavao: ra" mau" re yao: bam pe"mung: kad' na: ako" i? ga: ta" ako". 25 Yesu wa tau: mung:- Khinjaung Yin" Abiatha" ban: re Davi wa yao" thao cao" mo, vae: moe; qo ca" gelao" khoru: Mao"So: yham khug khyo vao ye: mung: khinjaung yin" mae" je yang: khag' zo: nae" tarha" mavao: ra" Mao"So: qhid' kheim: mae qhaug' byid' to" ra" mug re zo: mung: yao" thao cao" mo, rere: byid: zho" ra" khyo re naonhaung" khonhae" re: manghe' qu" ko" i? ga: yao: bam re ta" ra". 27 Alao" Yesu yao: bam re- Byu wa Dugno: Ba: qhid' mae" mangad:- Dugno: Ba kam" wa byu: qhid' mae" to" ru ngad: ra". 28 Amung: Byu: Yao: Zo: wa Dugno: Ba: Asang re: ngad: ra"- ga: ta" ra". 1 Ailao" Yesu wa Tarha" jung yham khyo dam: vao ye" ra". Ai: mae lo, dashad' shid: ra" byu dayaug na: ra". 2 Ai: mae na: ra" mo, byu damyo" wa Dugno: Ba re aiyaug re yao: gai byid' ra" la, magai byid' ra" la, Yesu re qobo zhaug' nae" ga: te' za: jo" qu" na: ako". 3 Amung: yao: wa lo, dashad' shid yaug re- Ce: qhid' au: khyo li" ye, ri:- ga: ta" ra". 4 Alao" yao: wa mo, byu qere- Dugno: Ba mae gai: ra" mau" zaui: nae"- mangad: lao" magai: ra" mau" zaui: nae"- kao so' khyad' nae"- mangad: lao" se' nae" kholam: tarha" vao: i? ga: myid' ra". Yao: bam wa sae za: na: ako". 5 Yao: bam: nhag' lam: qao: ruyang yao: nhag' kaug' mung: nhag' yo" ru we' lhang" gam: zhaug' qu" mung: aiyaug re Ni" lo, yheim" ke' wa,- ga: ta" ra". Lo, yheim" ke' we' yao" lo, gai: lo" byaug: ra". 6 Alao" Pharishe qe wa thug' lo" mung: yao: re khoru: kad' mung: qo" se' pye' nae" ru Herod nho: byu qe we' ai jao" yao: byin phyo: lo" zin: ako". 7 Amung: Yesu wa yao" mho"zo: qe we' daga" Galile" tham: khyo dam: ye" lo" ra". Galile" mae" byu phung: mo" zang re: yao: bam: thao cao" ako". 8 Ai: tho' mago" Yuda mang mae" mo, Yerusalem vomo" mae" mo, Idumia mang: mae" mo,- Yodan gyaung: thoete' ba thug' shad' mae" mo,- Ture we' Sidon mang: mae" mo,byu phung: mo" qere: yao: kad' ra" mau" re the' gyo: gemung:- yao: jhao" li" ako". 9 Alao" Yesu wa mo, byu qeyang yao: re mathe' zab: jhin" lhang: vageshao: ga: yao" qhid' mae" lha ngai dakhye' nyhang" to: byid: nae" qhid' mae" yao" mho"zo: qere ta" ra". 10 Pe"mung:ga"re byu myo: sho' re gai byid' qu" va" rumung: no phyo: qhug' ra" mo, alhab' wa yao: re qo" tin: sho' ga: yao: jhao" jhin" vao li" ako". 11 Makhyang" byo zaung: ra" mo, re: yao: re myao lao" yao: bam wa yao" qhid' kheim: mae gyang: goe; lo" mung: nao wa Mao"So: Yao: Zo: ngad: ra"- ga: zag: hug' ako". 12 Yesu wa makhyang" ra" byo jham re yao" khyo we' sin: mung: mahau" nhao" lo" genae" qhid' mae" jhaug' za: zug' nhao: ke' ra". 13 Alao" yao: wa bug gaung dalam: khyo do, ye: mung:- yao: o: ra" mo, re khai: yu: ra". Yao: bam re: yao: jhao" lo: ako". 14 Yao: wa daxe: shid' yaug re khyin: yu mung: yao: bam re lagyo: qe ga: mhang" byid' ra". 15 Yao: wa yao: bam re- Naonhaung" re ngo we' daga" na nae" qhid' mae" khyin: to" ru ngad:. Amung: mungdao: kho" kyo: nae" qhid' mae" re: naonhaung" re ngo nhao: ke' nae". Ailao" naonhaung" wa yui jham re khe' thug' pye' nae" kheim: so' re: qo" li" genae"- ga: ta" ra". 16 Amung: Yao: wa Simon re Petru ga: mhang" byid' ra". 17 Zebede yao: zo: Yaku we' Yohan tao re Boanerga ga: mhang" byid' ra". (Aiwa mug: dam: nau" tao ga" ru ngad: ra".) 18 Aimae"- Andre- Philib- Batholame- Mathe- Alphaeu yao: zo: Yaku- Thadaeu- byumyu" jhid' myid qi" ra" Simon we'- 19 Thao phyao: yao: re ab: pye' nae" ra" Yuda Iskarud bam re khyin: to" ra". 20 Ai: thao Yesu wa yham khyo vao ye" ra". Yao: we' yao" mho"zo: qe zo lhao" maqo" gai: zo: losho' mo, byu qe dam: zang" li" ako". 21 Ai: khyo re yao" yham byu qe the' gyo: lao" yao: bam wa yao: re taung" yu nae" ga: thug' ye" lo" ako". Pe"mung:ga"re mo, byu qe yao: re go: ava" ga: ta" na: ako". 22 Amung: Yerusalem mae" gyo" lo: ra" tung" pho" qere:- yao: wa yui bo yang: ngad: ra". Yui zug: mo" qam" yang yui jham re khe' thug' pye' ra" ga: ta" ako". 23 Alao" yao: wa yao: bam re yao: jhao" khai: yu mung: dao: tau" we'- Satan wa Satan re khoru: qo" khe' thug' nae" i? 24 Mung"dan: dalam: wa yao: phung: yao: jho" kho' mung: yao: cao: yao: gye kad' na: ru wa ai: mung"dan: wa byo; qeim: lo" byaug nae" ngad: ra". 25 Ug' khug' dalam: re: yao: cao: yao: jho" kho' mung: manug jho" mung: re wa ai: ug' khug' wa byo: sin" lo" byaug nae" ngad: ra". 26 Ai we' dakhyo: Satan wa Satan yao: cao: jho" kho' mung: gye kad' to" thug' li" re wa yao: wa maqo" gang" tang: jo, lo: thao" byaug nae" ngad: ra". 27 Qam: bo yaug re sao qhid' mataui" to: lo: khag' re: yao" yham khug khyo vao ye: mung: yao" zai re maye: qo" lhad' yu ngad: ra". Yao: re bin: taui" to: thao reza: yao" zai re yeqo" lhad' yu: ra". 28 Ngo naonhaung" re dang za: ta" ru wa- xao su byu qe wa yao: bam shad' lhoe" ra" qobo alhab' we' jung" ra" dao: aja: ja" qobo jham re khyad' pye' byid' ru qhug' ako". 29 Ngadqere: Gyang" Lho" Byo re jung" dao: ta" ra" yaug wa khonhae" re: qobo khyad' pye' byid: qhug' nae" mangad:- pe"mung:ga"re yao: wa apyad ato: qobo re shad' lhoe" yaug ngad: ra". 30 (Yesu ceru: ta" ru wa mo, byu qe damyo" yao: re makhyang" ra" yui bo: ra" ga: ta" geyang: ngad: ra".) 31 Alao" Yesu yao: myhi" we' yao: nhaung: bam wa yham kheim: mae li" joe" ye; jo, mung:- byu dayaug re yao: re khai nhao: ke' ko" ra". 32 Yesu lhang" gam: mae zaung: jo; ra" mo,byu qe wa yao: re Ni" myhi" we' ni" nhaung:- ni" nhae: mo" bam yham kheim: mae nao re li" qho: na: ako" ga: ta" kyo" ako". 33 Yesu tau: mung:- nga" myhi" we' nga" nhaung: bam khobam ngad: ako" i? ga: ta" ra". 34 Amung: yao: wa- yao" lhang" gam: zaung: jo; ra" mo,byu qere gam: sho' qu" mung:- Qu" ge,- cebam wa nga" myhi" we' nga" nhaung: bam ngad va". 35 Pe"mung:ga"re Mao"So myid o: ra" khyo" cao" mo, khag' ngadqere: nga" myhi" we' nga" nhaung: nga" nhae: mo" bam ngad va"- ga: ta" ra". 1 Ai: thao- Yesu wa Galile tham: yae mae dam: mho" shid' na: ra". Byu phung: mo" zang yao: jhao" zang" li" gelao" yao: wa tham: mae" lha dakhye' dao mae yevao: zaung jo; ra". Mo, byu qe wa tham: yae taung gaung mae na: jo; ako". 2 Alao" yao: wa dao: tau" yang yao: bam re myo: sho' ja: mho" shid' byid: mung: ta" ru wa- Tae" gyo" qu" ge,- 3 Byu dayaug wa myug: shi: sin: nae" ga: yo khyo thug' ye" lo" ra". 4 Yao: yesin" ke' ra" myug: shi: daqhae: wa khyodang mae gyo" lo" ako". Ai: myug: shi:jham re ngho' jham: yang li" gaug zo" pye' ko" ra". 5 Daqhae: wa myid zhai: mathau: ra" laug qan" dao mae gyo" lo" ako". Myid zhai: mathau yang: aijao" yao: yaug: thug' li" geyang: re:- 6 ba thaung: li" lao" lhe' mhai: pye' ru we' agyi: no, sho' maqo" cin" ruyang jhoe' byaug: ako". 7 Daqhae: wa zau: bye, gyo: mae gyo" lo" ako". Zau: bye, jham yaug: qi" li" ru we' qhovo: pan jham re li" hab' pye' byid: mung: ashi: maqo" zaui: gengad: ra". 8 Ngadqere: myug: shi: daqhae: wa myid gai mae gyo" lo" ako". Yaug: qi" li" mung: ashi: zaui" li" ko" ra". Daqhae: sam xe nho" daqhae: khyaug' xe nho" daqhae: dayo nho" myo" laug: lo: ako". 9 Nokhye' de, mo, wa gyo" yu geshao:- ga: ta" ra". 10 Yesu yao: za: ngad lao"- yao" dao: re the' gyo" ra" mo, mae" damyo" wa- mho"zo: daxe: shid' yaug we' daga" Yesu jhao" li" mung:- ai: dao: tau" jham re pheim: kyo: byid: nae" qhid' mae" mho' ako". 11 Ailao" yao: wa yao: bam re Mao"So: mung"dan: we' sin" ra" no; thao" ra" khyo pe" ngad: rure ba: gyo: nae" akhang" naonhaung" qhug' yu: avako". Ai: akhang" re maqhug' yu: ra" mo, kam" wa dao: tau" jham khyo" za: gyo" yu: ako". Pe"mung:ga"re 12 Yao: bam wa Qu" ngadqere: mamyao- Gyo: ngadqere: maba: gyo: gengad: ra". Yao: bam myao mung: ba: gyo" yu ko" ngad: re wa Mao"So jhao" tug' lo: li" genae". Ailao" Mao"So wa yao: bam re qobo khyad' pye' byid: nae" ga: jham: mugsug' mae tung" to" ru we' dakhyo: ngad: ra"- ga: tau" ra". 13 Ailao" Yesu wa Yao: bam re- Ce: dao: tau" re naonhaung" maba: gyo: ko" i? Airu: ngad: re dao: tau" alhab' re khoru: ba: gyo: genae" i? 14 Myug:shi: sin: yaug wa ai: mungdao: re sin" ra". 15 Byu damyo" wa khyodang mae gyo" lo" ra" myug: shi: jham we' dau: ako". Mao"So: mungdao: re the' gyo: lao" jao" Satan li" mung: yao: bam: nhag' lam: khug mae" ai: mungdao: re yu: pye' byid' ra". 16 Gatau damyo" wa myid zhai: mathau: ra" laug qan" myid mae gyo" lo" ra" myug: shi: jham we' dau: ako". Ai: mungdao: re the' gyo: lao" jao" yao: bam ngaui bau" ru we' lham: khae: yu: ako". 17 Ngadqere: ai: mungdao: wa yao: bam: nhag' lam: khug mae agyi: no, sho' maqo" cin" mung: myao" sho' maqo" zang: kham gengad: ra". Aimung dao" ra" mathao mae qug: khai" ru- mangad: lao" yhin" ru qhug' lo lao" phyad za: dam: phaug' lo" ko" ra". 18 Amae" damyo" wa zau: bye, mae sin" ke' ra" myug: shi: jham we' dau: ako". Yao: bam wa ai: mungdao: re the' gyo" yu ngadqere:- 19 Ce: mug: myid: byu na ban" qhid' mae" myid: qug: myid ci" ru- ngaui qhang jo,nho" mamyaung: masho: qo" nug: ru we' gatau aja: ja: re myo, no, o: byid: ra" ruyang ai: mungdao: re hab' pye' mung: ashi: maqo" zaui: gengad: ra". 20 Ngadqere: gatau damyo" wa myid gai re sin" ke' ra" myug: shi: jham we' dau: ako". Yao: bam wa ai: mungdao: re the' gyo: lao" khae: yu mung: daqhae: sam xe nho"- daqhae: khyaug' xe nho"- daqhae: dayo nho" ashi: zaui" li" ako"- ga: ta" ra". 21 Yesu wa xo' mung: yao: bam re myikaug' re yao" tao" dao mae makai" to: lo: dao: khug maug: lhaung" to: nae"- mangad: lao" yab jaung: gyid' mae to" to: nae" qhid' mae" khoyaug lhaung" ci: li" ko" i? 22 Pe"mung:ga"re mamyao lo: sho' nyham" to" ra" ja: alhab' de: de: za: myao: thug' li" nae"- Nghoe' to" ra" ja: alhab' re: bung" lo: li" nae". 23 No: khye' de, mo, wa gyo" yu geshao: ga:- ta" ra". 24 Alao" yao: wa Naonhaung" the' gyo" ra" ja: re galho: za: tae" gyo" yu ge,- naonhaung" su re lag byid' ra" jao, lag: yang yao: Mao"So wa naonhaung" re dam: tug' lag byid' li" nae". 25 Pe"mung:ga"re qo" yaug re wa je: dam: laung: byid: shi: nae" ga: yao: bam re ta" ra". 26 Yesu wa xo' mung: Mao"So: mung"dan: wa ce we' dau: ra". Byu dayaug yao" yo mae gaug myug: ye sin" ke' to: mung:- 27 myi" re yab- na" lao" to"- dam: to" dam: yab mung: na: ra" gyo: mae ai: gaug shi: wa baug: thug' li" mung: yaug: qi" li" na: ra". Ngadqere: ai: gaug shi: khoru: yaug: qi" li" rure yao: maba ngad: ra". 28 Pe"mung:ga"re myid gaung wa yao: yao: za: ai: gaug gae re yaug: qi" li" nhao: ra". Sao qhid' agan"- ai: dao gaug nhae thug' li" nhao mung: thao re gaug nhae mae" ashi: zaui" li" nhao: ra". 29 Gaug mhang" lao"- yad yo, joe" va" rumung: yao: wa lagam" yang ye: yad: yu: ra"- ga: yao: bam re ta" ra". 30 Amung: Yesu wa Mao"So: mung"dan: re pe" ja: we' dao: tau" nae" i? Pe" ja" dao: tau" ci mung: ta" nae" i? 31 Mao"So: mung"dan: wa ao: shi: jid' we' dau: ra". Ao: shi: wa sin" ke' au: myid gaung dao mae jo; ra" ashi: alhab' tho' je: ngai: thao" ra" ashi: ngadqere:- 32 Myid mae sin" ke' lao" yaug: qi" li" mung: gatau: ao: pho' vho' alhab' tho' je: qi" lu: li" ra". Akaung jham re: qi" byo: li" ru we' ai: aqab mae ngho' jham sad' li" sad' mung: qo" khug: na: ako". 33 Amung: Yesu wa yao: bam qo" ba: gyo" ra" dao: tau" jham khyo" yang za: ai:mungdao: re kho" kyo" ra". 34 Yao: bam yao: za: ngad lao"- Yesu wa yao" mho"zo: qere acao jab ta" pheim: kyo" ra". 35 Ai: ba re yao:- myi" thao joe" lao" Yesu wa yao" mho"zo: qere- Soge, ngonhaung" tham: thoete' khyo gau" de; lo" gelang:- ga: ta" ra". 36 Alao" yao: bam wa mo, byu qere to: co' mung: Yesu yao: zaung: jo, ra" lha dao mae yevao: zaung mung: gau" lo" ko" ra". Gatau: lha jham re: bobo: ako". 37 Ai: au: re la qam" mo" zang nyag din taung" hug' lo mung: bang: lhung" yang lha khug khyo qid lobe, vhao" ke' ra"- amung: lha khug mae qid alaug laug byang" lo: na: ra". 38 Yesu wa lha thao mae au: khau" dalam: khau" mung: yab; jo; ra". Mho"zo: qe wa yao: re nhug' mung: Mho" Pho" we"- ngonhaung" nab: shid: lo" na: rure nao pe" shui manho: i? ga: yao: re ta" ako". 39 Yesu wa yab jo, rumae" to" li" mung: la qam" re Sae za: na wa,- ga: amyin" byid' ra"- bang: lhung" rere: Tae" lo" wa,- ga: ta" ke' ra". Alao" la qam" thang: lo" mung: bang: lhung" re: tae" lo" byaug: ra". 40 Alao" Yesu wa yao" mho"zo: qere- Naonhaung" pe"mung: ai: qhi" taung" gyaug ko" i? Naonhaung" ana" joe" sho' lam khug: myid mabo shi: ge, i? ga: ta" ra". 41 Yao: bam kam" wa gyai gyaug: din: pye' ako". Amung:- ceyaug wa pe" ru" byu ngad: i? La qam" we' bang: lhung" lhao" yao" dao: re tae" gyo: ko" ra" ga: yao: cao: jho" ta" ako". 1 Yesu we' yao" mho"zo: qe wa Galile" tham: thoete' mae" Gerasa mang: khyo joe" ye" ako". 2 Yesu lha khug mae" thug' lo lao" jao" makhyang" ra" byo zaung: ra" byu dayaug lab bug mae" thug' li" mung: yao: re li" qhug' ra". 3 Ai: yaug wa lab jham: agyo: mae na: ra". Yao: re khag' re: maqo" taui: gengad: ako". Jao co: taui" yang lhao" re: maqo" taui" to: ngad: ra". 4 Pe"mung:ga"re yao: re myo: sho' lhang kyam: vhe' mung: jao co: taui" yang re: taui" to" qu" vako" ra"- ngadqere: lhang khao: ngo" jao co: taui: re lao" phyid' pye' mung: kyam: rere: lao" kho' sin" pye' ra". Amung: yao: re khag' re: maqo" zaui: gengad: ra". 5 Yao: wa myi" re: na" re: lab jham: agyo: mae we' bam khaung: mae hug' du" qin" mung: laug baui re yao: yao" gaung deim" thaung" cad' ci yang: na: ra". 6 Yao: wa va: mae" Yesu re lham: myao lao" tao" ye: mung:- yao: re goe; pa" ra". 7 Amung: yao: wa- Myhao: thao" ra" Mao"So: yao: zo: Yesu we"- nao we' ngo pe" jho" sin" i? Ngo re mayhin" vashao:- Mao"So re jham tang: yang: mho' ra"- ga: zag: hug' ra". 8 Yao: airu: hug' ta" ru wa- makhyang" ra" byo we"- byu ceyaug mae" phao: thug' lo" se, ga:- Yesu amyin" byid' ke' mung: ngad: ra". 9 Yesu wa yao: re- Ni" mang pe" ngad: i? ga: myid' ra". Alao" yao: wa- Ngonhaung" phung: mo" zang ngad: ruyang nga" mang wa Legio ngad: ga: tau" ra". 10 Yao: wa Yesu re- ai: mang: mae" yao: bam re makhe' thug' pye' nae" qhid' mae" gyai ga: mho' ra". 11 Ana" ai: bug gaung khyid cao" mung: vo, jham mo" dajham bad zo" na: ako". 12 Makhyang" ra" byo jham wa Yesu re- Ngonhaung" vo, jham: khug mae yevao: zaung nae" qhid' mae" vo, jham na: khyo nhao: ke' la, ga: mho' ako". 13 Yesu wa yao: bam re akhang" byid' ke' ra". Makhyang" ra" byo jham wa ai: yaug khug mae" phao: thug' lo" mung: vo, jham: khug mae yevao: zaung: ako". Alao" shid' taung ko bo: ra" vo, jham alhab' wa dang" kam" nhad' mae" qid tham: khug khyo tao" byae: gyo" vao: lo" gemung: nab: shid: pye' ako". 14 Vo, zam: mo, wa tao" phao: lo" mung: ai: khyo re vomo" khug mae re:- seyo: vogaung: jham: khyo re joe" sho' ta" hau" ke' ako". Alao" mo,byu qe wa boe" lai: lo va" khyo re qu" nae" qhid' mae" ai: jo, qo khyo thug' ye" lo" ako". 15 Yao: bam Yesu jhao" joe" lao"- qhid' phyao: makhyang" byo Legio zaung: ra" yaug wa mai bau: nyang" za: ve, yang: nhag' gyang: gyang: za: zaung: jo; rure yemyao ge mung: yao: bam gyaug: byaug; ako". 16 Aimung: ai: khyo re the' myao: ra" mo, wa makhyang" ra" byo zaung: ra" yaug we' vo, jham khoru: boe" lai: lo: ra" khyo mo, byu qere lham: ta" kyo" ako". 17 Alao" yao: bam wa Yesu re yao: bam: mung" mae" thug' lo" nae" qhid' mae" mho' ako". 18 Yesu lha khug khyo vao lo" na: au: qhid' phyao: makhyang" ra" byo zaung: ra" yaug wa Yesu jhao" yao: re: cao nae" qhid' mae" mho' ra". 19 Ngadqere: Yesu yao: re akhang" mabyid: lo:- ni" yham khyo phao: lo" mung: yham byu qe we' ba nam qere Asang wa nao re khoqhi" nhag' khyag' yang: bao" thaug' va" khyo re lo" ta" kyo: wa,- ga: ta" ra". 20 Alao" yao: wa thug' lo" mung: Yesu yao: re khoqhi" bao" thaug' byid: va" khyo re Dekapoli mang: jao: sho' ta" hau" lo" ra". Aire the' gyo: mo, alhab' re: gyo" mug' ako". 21 Thao re Yesu wa lha khyo" tham: thoete' khyo dam: gau" de; lo" ra". Alao" tham: yae mae byu phung: mo" zang yao" lhang" gam: mae li" zang" phaung: na: ako". Yesu wa tham: yae mae na: jo; ra". 22 Alao" Ya:iru ga: mang: ra" Tarha" Jung yham agyi dayaug joe" li" mung: Yesu re myao lao"- yao" khyid qao: mae goe, mung:- 23 nga" zo: myiqe: nau" shid: lo" na va"- yao: no gai: lo mung: daui: na nae" qhid' mae" yao" dao mae ni" lo, li" kai: byid: la,- ga: yao: re gyai ga: li" mho' ra". 24 Yesu wa Ya:iru we' daga" cao" ye" lo" ra". Mo, byu phung: mo" zang yao" thao cao" gemung: Yesu re the' jhin" zao" ako". 25 Ai: mae daxe: shid' zin sa: sheim no no: ra" myiqe: dayaug re: bobo: ra". 26 Mocid' sara myo: sho' yang ya: qu" vako" ra". Yao: qo" ra" gu: alhab' gan sho' yang ya ngadqere: no gai: li" khyo majo,- je: za: no: li" ra". 27 Yao: wa Yesu khyo re the' gyo" qu" va" rumung:- 28 mo, phaung khyo ye: mung: Yesu nhaung thao"mae yeye; jo, yang:- ngo wa yao" mai bau: re khalhao" yeqo" tin" ke' ngad: re wa nga" no gai: lo" li" nae"- ga: ta" ra". 29 Airumung: Yesu mai bau: mae yao" lo; yang yetin" ke' ra"- ailao" jao" yao: sa: sheim: ru dam: lo" byaug: ru we' yao" no gai: lo" byaug va" rure beim" ra". 30 Yesu wa yao" khug mae" qam: so' thug' lo" va" rure aijao" ba: ruyang mo, byu qe: shad' khyo lhang: qu" mung:- nga" mai bau: re khag' li" the' tin: ko" i? ga: myid' ra". 31 Yao" mho"zo: qe wa- Mo, byu qe nao re the' jhin" zao" na: rure nao myao: na gau- ngore khag' li" the' tin: ko" i? ein: pe"mung: myid' i? ga: yao: re tau" ako". 32 Ngadqere: Yesu wa yao: re the' tin: yaug khag' ngad: rure myao nae" qhid' mae" gam: sho' lhang: qu" na: ra". 33 Ai: myiqe: kam" wa yao: mae boe" lo va" khyo re ba beim: yang: gyaug: nin" ru we' Yesu qhid' kheim: mae goe, mung: ngad dang: ra" khyo alhab' yao: re ta" kyo" ra". 34 Amung: Yesu wa yao: re- Nga" myiqe: zo: we"- ni" lam khug: myid: yang nao re gai byid: va"- Yaug yo za: lo" se,- ni" no gai: shao: lo" vashao:- ga: ta" ra". 35 Airu: ta" na shi" au: Ya:iru yham mae" mo, joe" li" mung: Ni" myiqe: zo: shid: ava"- Mho" Pho" re pe" aqug: akhai: cekad' na shi" i? ga: ta" ako". 36 Ngadqere: yao: bam ta" rure Yesu the' gyo: lao" Ya:iru re- Dagaung yug wa, lam za: lam wa, ga: yao: re ta" ra". 37 Alao" Petru- Yaku we' Yaku yao: nhaung: Yohan mae" je yang: gatau khag' rere: yao: we' daga" macao" nhao ngad: ra". 38 Ya:iru yham mae joe" lao" mo, thaui: mo, yaug mung: gyai kaug' ngug: yhau: na ko" rure myao: ra". 39 Alao" yao: wa yham khug khyo vao ye: mung: yao: bam re- Naonhaung" pe"mung: mo, thaui" mo, yaug ngug: yhau: na ko" i? Zomyi: zo: wa shid: ru mangad:- yab: myhid' jo; ru angad: ra"- ga: ta" ra". 40 Yao: bam wa yao: re qi: jung" pye' byid' ako". Alao" Yesu wa yao: bam re taung gaung khyo nhao: thug' pye' mung: zomyi: zo" nho: yao: pho" yao: myhi" we' yao" mho"zo: sam yaug re jhui: mung: ai: zomyi: zo: lang" jo; ra" qe, khyo vao ye" lo" ra". 41 Yao: wa ai: zomyi: zo" nho: lo, re zaui: mung:- Talitha koum ga: ta" ra". Aiwa Zomyi: zo: we"- nao re ngo ta" li"- To" wa,- ga" ru ngad: ra". 42 Ailao" jao"- zomyi: zo: wa to" li" mung: su" lo" ra". Yao" apyad wa daxe: shid' zin ngad: ra". Yao: bam wa gyai mug' byaug: ako". 43 Ngadqere: Yesu wa cekhyo we' sin: yang: naonhaung" khag' rere: data" kyo: ge, ga:- yao: bam re zug' nhao mung: zomyi: zo: re zo:ve daja: ja: byid' zho: gese,- ga: ta" ra". 1 Ailao" Yesu wa yao" mho"zo: qe we' daga" ai: jo, qo mae" thug' lo" mung: yao" yham mug: khyo joe" lo: ra". 2 Dugno: Ba joe" lao" yao: wa Tarha" Jung Yham mae byu myo: sho' mo, re mho" shid' byid' ra". Yao" mho" dao: re the' gyo" ra" mo, alhab' gyo" mug' ako". Ailao" yao: bam wa- Ceyaug khokhyi" mae" ce: pha,jhi" re ba: yu: laug i? Yao: ba: yu: ra" pha,jhi" wa pe" ja" pha,jhi" ngad: i? Mug' pho: mau" jham re yao: khoru: qo" zaui" i? 3 Yao: wa Mari yao: zo:- Yaku- Yoseb- Yuda we' Simon tao ho' yao: mao: lagsama" mangad: i? Yao: nhae: mo" bam: re: cemae nyhao: we' daga" na: bam: ru mangad: i? ga: ta" ako". Airumung: yao: bam wa yao: re ngag: pye' ako". 4 Yesu wa yao: bam re- Lapa wa yao" mug:- ba nam ug zo: we' yao" ug' khug' mae" je yang: khyi" khao: ngo" mae myo, nho qo" ra"- ga: ta" ra". 5 Yao: wa no phyo: dajhid' dathao qhug' ra" mo, re lo, kai: yang: gai byid' rumae" je yang: ai: vo mae mug' pho: mau" pe" re: maqo" zaui: ngad: ra". 6 Yesu wa mo,byu qe lam khug: myid mabo ko" ruyang gyai myid: mug' ra". 7 Alao" Yesu wa ai: lhang" gam: mae" vogaung: jham khyo ye: mung: mo, byu qere yemho" shid' byid' ra". Yao: wa mho"zo: daxe: shid' yaug re yao: jhao" khai: yu mung: shid' zo: dazam" zam" zham" mung: nhao: ke' ra". Makhyang" ra" byo jham re aung doe, nae" kheim: so' re: yao: bam re byid' ke' ra". 8 Yesu wa yao: bam re- Gyaung: khyo qhid' mae" zaung: bao" mae" je yang: zokho- thaung a: we' naonhaung" phyid' cui: mae ngaui davin ge,- 9 khyid zhaung: kam" wa zhaung: ge,- ngadqere: bau: shid' khye' dapaug' ve, ge,- 10 naonhaung" re bang" lham: tug: yu: ra" vo mae" yham khoyham mae ngadqere ai: vo mae" dam: thug' lo" yo, joe" sho' aiyham mae thang: na ge,- 11 Davo vo mae" mo, naonhaung" re bang" malham: tug: yu lo:- naonhaung" kho" kyo" ra" dao: re malham: tae" gyo: ko" ngad: re wa ai: jo, qo mae" thug' lo" ge,- aimae" thug' lo" au: re yao: bam: shad' mae sagse: boe" nae" qhid' mae" naonhaung" khuvo: mae" phalhug jham re ko: khyo" to: co' ge,- ga: re: ta" ra". 12 Ailao" yao: bam thug' ye" lo" mung: mo,byu qere myid tha" nae" qhid' mae" cao" kho" kyo" ako". 13 Yao: bam wa yui myo: sho' khe' thug' pye' byid' ru we' no phyo: qhug' mo, myo: sho' re xau gyad byid: yang: nyhang" gai byid' ako". 14 Ana" Yesu khyo alhab' re kho: kham Herod the' gyo" ra". Pe"mung:ga"re Yesu mang wa khyi" khao: ngo" mae suhau: qi" lo: na: ra". Byu damyo" wa Yesu re qid nyhab' byid: yaug Yohan dam: daui: li" ru ngad: ra". Aimung: mug' pho: mau" zaui: nae" ceru" ra" qam: so' qo" ru ngad: ra" ga: ta" ako". 15 Ngadqere: gatau damyo" wa Yesu wa Elia ngad: ra"- ga: ta" mung: damyo" wa daba: pyad mae" lapa qe we' dau: ra" lapa dayaug ngad: ra"- ga: ta" ako". 16 Herod aire the' gyo: lao"- ceyaug wa ngoyang au: phyid' pye' byid' ra" qid nyhab' Yohan dam: daui: li" ru ngad: ra"- ga: ta" ra". 17 Herod wa yao: nhaung: Philib yham sang myhi" Herodia re lhad' ngho" ra" mathao mae Yohan re thaung: lhaung" nae" amyin" byid: mung: thaung: khug mae taui" to" ra". 18 Pe"mung:ga"re Yohan wa Herod re- Ni" nhaung" nho: yham sang myhi" re lhad' yu nae" magai maang ngad: ra"- ga: gyai qeim: ra". 19 Airumung: Herodia wa Yohan re manug yang: se' pye' nug ngadqere: Herod mathao mae khoru: maqo" se' pye' ngad: ra". 20 Pe"mung:ga"re Yohan wa din:man" ru we' gyang" lho" ra" byu dayaug ngad: rure Herod ba mung: yao: re gyaug phug' ru we' qu" gam byid' ra". Yohan: mungdao: re the' gyo: khao: ngo" yao" nhag' lam: mae qi: sho' nhag' lam: mamyan ngadqere: yao" mungdao: re ngaui bau: taung" za: tae" gyo: nug: ra". 21 Herodia wa Herod kho:kham khau: ra" ba na joe" lao"- yao: myid: to" ru kad' nae" ayo, gai the' yu: ra". Khorumung: ga" re Herod wa yao: khau: ra" ba na mae Galile mang: mae" au: she mo, au: jhaung qe- lau: de, qe- mung" zug: qe we' yao" gyezug: qere khai mung: myi" xeim zo: poe da" byid' ra". 22 Ai: myi" xeim zo: poe mae Herodia yao: zo: zomyi: nau" wa zozo: poe khyo vao li" mung: li" go" nhan" qhu" ra". Airu re Herod we' yao" bang" vo qe qu" ngaui: ako". Amung: kho: kham wa myiqe: nau" re- Nao o: ra" ja: ngore mho' la,- ngo nao re byid: nae". 23 Nao ngore mho' ra" gu: nga" mung"dan: agaung: daqi" joe" sho' ngo nao re byid: nae" ga: jham tang: yang: ta" ra". 24 Ailao" myiqe: nau" wa thug' lo" mung: yao: myhi" re- ngo pe" ja: mho' yu nae" laug i? ga: myid' ra". Yao: myhi" wa qid nyhab' Yohan: au: re mho' yu wa,- ga: tau" ra". 25 Ailao" jao" myiqe: nau" wa hin hin za: kho:kham jhao" dam: tug' vao lo mung: qid nyhab' Yohan: nho: au: re ban mae ke' yang: ana" yao: ngore byid: nae" rure ngo o: ra" ga: mho' ra". 26 Kho:kham pho" gyai nhag' lam: mangaui bau: boe" pye' ra". Ngadqere: yao" bang" vo qe: qhid' kheim: mae jham tang: yang: ta" pye' va" dao" yang myiqe: nau" mho' rure maqo" ha: pye' ngad: ra". 27 Amung: yao: wa ai lao" jao" gug: gam gyezo: dayaug re Yohan: nho: au: re cilo nae" amyin" we' daga" nhao: ke' ra". Gyezo: pho" wa thaung: khyo ye: mung: Yohan: au: re yephyid' ra". 28 Ai: au: lam: re ban dao mae kai" cilo mung: myiqe: nau" re lobyid' ra". Myiqe: nau" re: yao: myhi" re lo" kai" byid' ra". 29 Yohan: nho: mho"zo: qe cekhyo re the' gyo: gelao"- yao: bam li" mung: yao" mao gaung re li" gaug: nyhab' pye' ako". 30 Ai: thao lagyo: qe wa Yesu jhao" dam: tug' lo mung: yao: bam zaui" lo: ra" mau" zo" we' mho" shid' byid' ra" khyo bin sho' yao: re lota" kyo" ako". 31 Mo,byu qe myo: sho' ye: ye: lo lo abang mabyid gemung: Yesu we' yao" mho"zo: qe wa zo zo: ayo, lhao" re: maqo" gengad: ra". Amung: Yesu wa yao" mho"zo: qere- Cae: tae" ra" jo, qo dakhyo khyo ye: mung: nyhao: nhaung" yao: za: dazab zo: yeno" yu gelang:- ga: ta" ra". 32 Amung: yao: bam wa cae: tae" ra" dajo, qo khyo lha khyo" gau" de; ye" lo" ako". 33 Ngadqere: mo,byu qe myo: sho' mo, wa yao: bam thug' ye" lo" rure cao" myao: ke' ru we' Yesu we' yao" mho"zo: qe ngad: rure qu" se" ke' ako". Airumung: vo khao: ngo" mae" mo, byu qe wa khyid khyo" gau: qhid' khae" yang: tao" ye" lo" mung: Yesu we' yao" mho"zo: qe: qhid' mae yejoe" na: jo; ako". 34 Yesu lha khug mae" thug' li" lao"- yao: wa byu phung: mo" re myao: ra". Zaung" yaug mabo: ra" yao phung: we' dau gemung: Yesu wa yao: bam re nhag' qu" khyag' ra". Amung: yao: wa yao: bam re myo: sho' ja: mho" byid' ra". 35 Ba vao: lo" na lao" Yesu nho: mho"zo: qe wa yao: jhao" lo mung: cejo, qo wa din pyad' yo ngad: ru we' ba re: vao: lo" na: ava". 36 Zo: ve daja: ja: yevai zo: genae" qhid' mae" yao: bam re avai: ayae mae" vogaung: jham khyo ye: nhao: ke' wa,- ga: yao: re ta" ako". 37 Yesu wa naonhaung" yao:- yao: bam re zo: nae" daja: ja: byid: ge, ga: yao: bam re ta" ra". Ailao" yao" mho"zo: qe wa ngonhaung" ngaui shid' yo kye' phug' mae" mug yevai mung: yao: bam re byid: zho: zai i? ga: myid' ako". 38 Yesu wa Naonhaung" mug khonho" qo" ko? Yequ" qu" ge,- ga: yao: bam re ta" ra". Yao: bam yeqho: myao gelao"- mug ngo" khai" we' ngo: shid' dau:- ga: yao: re ta" ako". 39 Ailao" Yesu wa mo,byu qe alhab' re kho' mung: vohau: yo mae azhan zhan zaung nhao nae" qhid' mae" yao" mho"zo: qere ta" ra". 40 Amung: mo, byu qe wa dazhan re dayo- dazhan re ngo" xe jin mung: zaung: jo; ako". 41 Yesu wa ai: mug ngo" khai" we' ngo: shid' dau: re bin: yu: yu lao" mug:gaung khyo qu" mung: Mao"So re jeju caung: byid' ra". Yao: wa mug re khyoe' phai" mung: mo, byu qere gae byid: nae" qhid' mae" yao" mho"zo: qere byid' ke' ra". Amae" Yesu wa ngo: shid' dau: rere: yao: bam re kho' byid' ra". 42 Yaug khao: ngo" gyi: sho' zo" ako". 43 Ai: thao mho"zo: qe wa dang: ra" ngo: we' mug aje, aman" jham daxe: shid' gyan byang" sho' gaug: zhang: yu: ako". 44 Mug zo: mo, yauggai qe ngo" taung ko ngad: ako". 45 Yesu wa mo,byu qere nhao: ke' zo" re" yao" mho"zo: qere lha dao do; zaung yang: tham: thoete' mae" Betsaida vogaung: khyo gau" de; ye" lo" na genae" qhid' mae" nhao: ke' ra". 46 Mo, byu qere bin: au" ke' thao re Yesu wa akyu" mho' nae" qhid' mae" bug gaung khyo do, ye" lo" ra". 47 Myi" thao joe" lao" mho"zo: qe zaung: ra" lha wa tham: gaung: mae gau" ye" lo" na: ako". Yesu wa yao: za: taung gaung mae na: jo; ra". 48 Yesu wa la mayo" mung:- la lham: deim" thaug' ruyang yao" mho"zo: qe lha gau" qug' na ko" rure the' myao lao"- ne, kao mug: bo" zo" re qid dao khyo" yao: bam jhao" su" ye" lo" ra". Yesu wa yao: bam: nhae khyo" su" lai: lo" nae" seim" ra". 49 Yao: bam kam" wa qid dao mae Yesu khyo su" na: rure myao gelao"- subyo ngad: ga: jho mung: gyi: hug' ako". 50 Yesu re myao lao" yao: bam gyai gyaug: pye' ko" ra". Ailao" jao" Yesu wa yao: bam re jhau mung:- Dagyaug ge,- ngo angad:- ga: ta" ra". 51 Yesu wa yao: bam zaung: jo, ko" ra" lha dao khyo do; vao ye" lo" ra". Alao" la wa tae" lo" byaug: ra". Yao" mho"zo: qe wa matho' ta" losho' mug' byaug: ako". 52 Pe"mung:ga"re byu ngo" taung re mug zho" ra" mug' pho: mau" zo" lajheim: re yao: bam maba: gyo: geyang: ngad: ra". Yao: bam: myid wa aire maqo" khae: yu ngad: ako". 53 Yesu we' yao" mho"zo: qe wa tham: thoete' khyo gau" ye" lo" ko" ra". Genesared khyo joe" lao" yethang mung: lha re aimae taui" to" ako". 54 Lha khug mae" yao: bam thug' li" lao" jao" mo, byu qe wa Yesu re qu" xam: gemung:- 55 Yao: bam wa avai: ayae mung" geim" jao: sho' tao" ye" lo" mung: no phyo: qhug' ra" mo, re yab myhung: phaung: thin we' zung geim" Yesu na thoe the' gyo" ra" jo, qo khao: ngo" khyo dao: li" ako". 56 Yesu vao ye" ra" vozo: vozang khao: ngo" mae" hau" mo" cao" yang: mo, byu qe wa no phyo: qo" ra" mo, re li" jhui" lhang" to: mung: no mo, re yao" bau: thao mae khalhao" the' tin: nhao nae" qhid' mae" mho' ako". Yao" bau: thao re qo" tin" yu: ra" mo, alhab' wa no phyo: gai: shao: lo" byaug: ako". 1 Ailao" Pharishe qe we' Yerusalem mae" do, lo: ra" Tung" Pho" qe daqhae: wa Yesu jhao" zang" li" ko" ra". 2 Yao: bam wa Yesu nho: mho"zo: qe damyo" macid' san: pye' lo:- masan: ra" lo; yang zozo" na ko" rure the' myao: ako". 3 Pe"mung:ga"re Pharishe qe we' Yuda byumyu" alhab' wa daba: mae" phug' phyid' thung" li re cao" mung: lo, shi" macid' san: pye' lo: zo:ve khonhae" re: mazo" qu" gengad: ra". 4 Amung: gai mae" vai: cilo: ra" ja: alhab' rere: sao qhid' macid' san: pye' lo: yao: bam mazo" qu" ko" ngad: ra". Aimae" gatau keim kang: ug' we' gyid: khug' jham re cid' san: ra" thung" li" myo: sho' ja: rere: cao" ako". 5 Pharishe qe we' Tung" Pho" qe wa Yesu re- Ni" mho"zo: qe wa phug' phyid' thung" li re macao" lo: masan masin" ra" lo; yang zozo" na ko" ra" i? ga: myid' ako". 6 Yesu wa yao: bam re tau: mung:- naonhaung" khyo re Lapa Esaia tung" to" ru khoqhi" dang: ra" i? Naonhaung" wa geim kad' mo, ngad: ako". Esaia wa yao" lapa dao: mae byu cemyu" wa yao: bam: nhad' qid: yang za: ngore phug' myao" ako". Yao: bam: nhag' lam: kam" wa ngo we' gyai va" kyo: na: ako". 7 Yao: bam wa byu: mho" dao: jham reza: mho" shid' byid' na gemung: yao: bam wa aje mae goe; pa" na ko" ra" ga: tung" to" ru we' dakhyo: ngad: ra". 8 Naonhaung" wa Mao"So: amyin" dao: jham re to" pye' co' mung: byu: thung" li jham reza: phug' cao" na: ako"- ga: ta" ra". 9 Xo' mung: Yesu wa naonhaung" wa naonhaung" thung" li re qo" phug' cao" nae" qhid' mae" Mao"So: amyin" dao: jham re gyai shab shab za: ngag: shapye' vako" ra". 10 Pe"mung:ga"re Moshe wa Ni" myhi" ni" pho" re phug' myao: wa,- yao: myhi" yao: pho" re magai: ra" dao: jhau: ra" yaug khag' ngadqere: dang dang yao: shid' ca" ga:- amyin" byid' to" ra". 11 Ngadqere: naonhaung" wa byu dayaug yaug yao: pho" mangad: lao"- yao: myhi" re bao" thaug' nae" daja: ja: qo" ngadqere: aire Mao"So re byid' to: va" jhaung qhu" Koban- ngad: ga: ta" re wa 12 yao: wa yao: pho" mangad: lao"- yao: myhi" re khau maca" ga: naonhaung" mho" byid' ako". 13 Ceru: naonhaung" phug' phyid' thung" li" re naonhaung" lo, dai" mho" byid' gyo" lo ko" ruyang Mao"So: mungdao: re kyae" khyo" pye' ako". Ceru" ru gatau myo: sho' ja: re: naonhaung" kad' ako"- ga: ta" ra". 14 Alao" Yesu wa mo, byu qere yao: jhao" dam: khai: yu mung: yao: bam re Naonhaung" alhab' nga" dao: re tae" gyo" yu mung: ba: gyo" yu ge,- 15 Taung gaung mae" byu: aung khug khyo vao lo: ra" ja: pe" ja" yang ngadqere: byu re masan masin" maqo" boe" nhao ngad: ra". Byu: aung khug mae" thug' li" ra" ja" yang kam" wa byu re masan masin" qo" boe" nhao: ra". 16 Airumung: naonhaung" no: de, ko' re wa tae" gyo: ge,- ga: ta" ra" 17 Yesu wa mo, byu qere nha: to: co' mung: yham khug khyo joe" vao lo" lao"- yao" mho"zo: qe wa ai: dao: tau" lajheim: re sho' kyo: nae" qhid' mae" mho' ako". 18 Alao" yao: wa yao: bam re- Naonhaung" re: maba: gyo: shi: genhaung i? Taung gaung mae" byu: aung khug khyo vao lo: ra" ja: pe" re: nhag' lam: khug khyo vao lo: ru mangad:- vae: dug: am phae: khug khyo vao lo" mung: ngha ye: jo, qo khyo dam: thug' lo" ra". 19 Airumung: taung gaung mae" byu: aung khug khyo vao lo: ra" ja: pe" yang ngadqere: byu re masan masin" maqo" boe" nhao: rure naonhaung" maba ko" i? ga: ta" ra". (Yesu ceru: ta" ru wa zo:ve alhab' zo: gai: ga" rure sho' kyo" ru ngad: ra".) 20 Xo' mung: Yesu wa byu: aung khug mae" thug' li" ra" ja" yang byu re masan masin" boe" nhao: ra". 21 Pe"mung:ga"re byu: aung khug nhag' lam: mae" makhyang: mashab: ra" mau" zo" kad' nae" myid: yaung: thug' li" ra"- seim lai qho: ru- su: zai khug' ru- 22 byu se' ru- myi: shad' lao shad' ru- ju" phyo' ru- shab' mhin: ru- myid nug' ru- gaui mho: ru- nga: kad' ru we' go: joe; ru jham thug' li" ra". 23 Ce: makhyang: mashab'- ra" ja: alhab' wa byu: aung khug mae" thug' li" mung: byu re masan masin" boe" nhao: ra"- ga: ta" ra". 24 Alao" Yesu wa ai: jo, qo mae" to" lo" mung: Ture mang: khyo ye" lo" ra". Yao: wa yham dayham mae yethang: na: ra". Ai: rure khag' rere: maba nhao nug ngad: ra". Ngadqere: yao: maqo" vho' na ngad: ra". 25 Yao: zo: myiqe: nau" re makhyang" ra" byo vao: jaung" ra" myiqe: myhi" dayaug wa Yesu li" joe" na: rure the' gyo: we' li" mung: Yesu khyid qao: mae li" goe; ra". 26 Ai: myiqe: myhi" wa taung bug amyu" ngad mung: Suri Phoenikia mang: byu ngad: ra". Yao: wa Yesu re yao" myiqe: zo" khug mae" ai: yui re khe' thug' pye' byid: nae" mho' ra". 27 Yesu wa yao: re zoshao qere shi" sao qhid' gyi: sho' zho: ca"- pe"mung:ga"re- zoshao qe: vae: re yu mung: lakha: jham re pye' byid: nae" magai ngad: ra"- ga: ta" ra". 28 Myiqe: myhi" wa- Ngad va" Asang we"- Lakha: jham lhao" vae: zo: jaung: gyid' mae" zoshao qe: zosheim jham qo" zo" ako"- ga: Yesu re tau" ra". 29 Yesu wa myiqe: myhi" re- Nao airu: ta" ruyang yham khyo tug' lo" se,- ai: yui wa ni" myiqe: zo: mae" phao: thug' lo" ava"- ga: ta" ra". 30 Yao: yham khyo joe" lo" re yui wa yao: zo: mae" phao: thug' lo" byaug mung: yao: zo: wa yab jaung: dao mae lang" jo; rure lo" myao: ra". 31 Alao" Yesu wa Ture mang: mae" dam: tug' lo" au:- Sidon mang: re lai: to: co' mung: Dekapoli mang: gaung: khyo" Galile tham: khyo joe" ye" lo" ra". 32 Byu damyo" wa nojid: ru we' myan" maboe" ra" nhad' jid dayaug re Yesu jhao" jhui" li" mung: yao" dao mae lo, kai: byid: nae" qhid' mae" mho' ako". 33 Yesu wa mo, phaung mae" yao: re za: gatau dajheim khyo jhui" thug' lo" mung: aiyaug: nokhyaung khug khyo yao" lo, nyhug' thug' zaui byid' ra". 34 Khota: phoe" yu mung: aiyaug: sho re tin: byid' ru we' mug:gaung khyo tau: qu" mung: so' mo" she yang: aiyaug re Ephata ga: ta" ra". Aiwa bung" lo wa, ga" ru ngad: ra". 35 Ailao" jao" yao" nokhye' bung" lo: ru we' shotaui: beim: lo" byaug mung: yao: wa dao: boe" boe" za: jhau: ra". 36 Yesu wa ai: khyo re khag' rere: mata" kyo: nae" qhid' mae" mo, byu qere zug' nhao: ra". Ngadqere: yao: bam wa yao: je: zug' nhao re je: aire je yang: hau" lo" ako". 37 Aire the' gyo" ra" mo, alhab' matho' mho losho' gyo" mug' pye' ru we' yao: wa ja: khao: ngo" re shab shab za: kad' ra". Nojid mo, re no: gyo: nhao mung:- nhad' jid mo, re gai: jhau nhao: ra"- ga: ta" ako". 1 Ai: thao mataung" myao" re byu phung: mo" zang dam: zang" phaung: na: ako". Yao: bam zo: nae" zo:ve maqo" gelao"- Yesu wa yao" mho"zo: qere yao: jhao" khai: yu mung: 2 Ce: mo, byu qe ngo we' daga" na: ru sam ba ngad va". Ana" yao: bam zo:ve maqo" lo ge, ngad: ra"- amung: ngo ce: mo, byu qere nhag' khyag' ra". 3 Yao: bam re vae: moe; zang yham khyo phao nhao: ke' ngad: re yao: bam khyole; mae moe; myad genae"- pe"mung:ga"re yao: bam mae" damyo" wa mug: va: mae" li" mo, ngad: ako" ga: yao: bam re ta" ra". 4 Alao" yao" mho"zo: qe wa yao: re tau: mung:- ceru: din"pyad' yo mae mo, byu alhab' re zho: nae" qhi" zo:ve khai: mae" qo" nae" i? ga: ta" ako". 5 Yesu wa yao: bam re- mug khonho" khai" qo" ko" i? ga: myid' ra". Yao: bam wa- mug nhad' khai" qo" ga: tau" ako". 6 Yesu wa mo, byu qere myid gaung mae zaung: jo, nae" qhid' mae" amyin" byid' ra". Ai: mug nhad' khai" re yu: yu mung: Mao"So: jeju re bin: caung: lao" khyoe' phai" mung: mo, byu qere gae byid: nae" qhid' mae" yao" Mho" Zo: qere: byid' ke' ra". mho"zo: qe wa mo, byu qere gae byid' ako". 7 Amung: yao: bam wa ngo: nau" re: dajhid' zo: qo" ko" ra". Yesu wa Mao"So re jeju bin: caung: lao" ngo rere: mo, byu qere gae byid: nae" qhid' mae" yao" mho"zo: qere ta" ra". 8 Yaug khao: ngo" nyang" za: gyi: sho' qo" zo" ako". mho"zo: qe wa zo" tang" to" ra" aje, abai" jham nhad' gyan byang" sho' qo" gaug: zhang: yu: ako". 9 Mug zo" ra" mo, byu byid taung ko ngad: ako". Ai: thao Yesu wa mo, byu qere aitau mae" phao nhao: ke' ra". 10 Ailao" jao" yao" mho"zo: qe we' daga" lha khug khyo ye: vao: zaung mung:- Dalmanutha mung" khyo ye" lo" ra". 11 Pharishe qe damyo" Yesu jhao" li" mung: yao: we' li" jho" ngag: ako". Yao: re jham" qu" nug: ra" khyo" Mao"So yao: re o ngaui: rure sagse: qhu" nae" qhid' mae" ve, lho dalam: kad' qhu" la,- ga: yao: re mho' ako". 12 Yesu wa so' mo" she mung:- ceqae" mae" byu qe pe"mung: ve, lho re mho' ko" i? Ngo naonhaung" re ta" geli"- cebam re airu" ra" ve, lho kad' qhu" nae" mangad:- ga: ta" ra". 13 Alao" Yesu wa yao: bam re nha: to: co' mung: lha khug khyo dam: do; zaung yang: tham: thoete' khyo gau" de; ye" lo" ra". 14 Mho"zo: qe wa mug vin nae" to" myhid' pye' ko" ra". Lha khug mae mug dakhai" za: bo: ra". 15 Alao" Yesu wa yao: bam re Pharishe qe: man" we' Herod nho: man" re lha" yang: jao" ge, ga: ta" peim" ra". 16 Mho"zo: qe wa Yao: ceru: ta" ru wa ngonhaung" mug mavin yang: ta" ru ngad: ra" ga: yao: cao: yao: jho" ta" na: ako". 17 Yao: bam airu: jho" ta" na: rure Yesu ba lao" yao: wa yao: bam re- Naonhaung" pe"mung: mug mavin: ra" khyo re jho" ta" na ko" i? Ana" joe" sho' maba: gyo: shi:ko" i? Naonhaung" ai: qhi" myid: vhao: na shiko" i? 18 Naonhaung" myo,jid' de, geqere: mamyao ge i? Naonhaung" nokhye' de, geqere: magyo: ge i? 19 Ngo wa byu ngo" taung re mug ngo" khai" za: cug' phai" zho" rure naonhaung" mabeim: ge i? Zo" tang" ra" aje, aman" jham khonho" gyan byang" sho' naonhaung" gaug: zhang: yu ko" i? ga: myid' ra"- Yao: bam wa- daxe: shid' gyan ngad:- ga: tau" ako". 20 Ai mae" byu byid taung re mug nhad' khai" za: cug' phai" zho" ra" au: zo" tang" ra" aje, aman" jham khonho" gyan byang" sho' naonhaung" gaug: zhang" yu ko" i? ga: myid' ra". Yao: bam wa- nhad' gyan ga: tau" ako". 21 Alao" Yesu wa yao: bam re- Naonhaung" ana" joe" sho' pe"mung: maba: gyo: ge i? ga: ta" ra". 22 Yesu we' yao" mho"zo: qe wa Betsaida vogaung: khyo joe" ye" ako". Byu damyo" wa myo, jid dayaug re Yesu jhao" jhui" li" mung: aiyaug re tin: byid: nae" qhid' mae" yao: re mho' ako". 23 Yesu wa myo, jid yaug re lo; yang she mung: voyae khyo jhui" thug' lo" ra". Yao" myo,jid' mae khata: bin: tag' byid: lao" Yesu wa aiyaug: dao mae lo, kai: mung:- Daja: ja: re nao myao: i? ga: yao: re myid' ra". 24 Ailao" myo, jid wa tau: mung:- Byu jham re ngo myao:- ngadqere: yao: bam wa sag' gae jham ru" ru su" lhau: ako"- ga: ta" ra". 25 Yesu wa aiyaug: myo,jid' dao mae yao" lo, dam: kai: byid' ra"- celhang re yao: wa qam: ke' yang: qu" ke' ra". Ailao" jao" myo, dam: myao: lo mung: ja: khao: ngo" re qang: qang: za: myao: ra". 26 Alao" Yesu wa yao: re- vogaung: khug khyo davao lo" ga: amyin" byid: mung: yao" yham khyo phao nhao: ke' ra". 27 Ai: thao re Yesu we' yao" mho"zo: qe wa Kesarea Philipi vogaung: jham khyo ye" lo" ako". Khyole; mae yao" mho"zo: qere- Su bam wa ngore khag' ngad: ra" ga: ta" ako" i? ga: myid' ra". 28 Alao" yao: bam wa yao: re- Damyo" wa qid nyhab' byid: yaug Yohan ngad: ra" ga:- damyo" wa Elia ngad: ra"- amung: damyo" wa lapa qemae" dayaug ngad: ra" ga: ta" na: ako"- ga: tau" ako". 29 Yesu wa yao" mho"zo: qere- aire naonhaung" wa ngore khag' ngad: ra" ein: jho ko" i? ga: myid' ra". Ailao" Petru wa tau: mung:- Nao wa Meshia ngad: ra"- ga: ta" ra". 30 Yesu wa yao" mho"zo: qere- ngo khag' ngad: ga" rure naonhaung" khag' rere: data" kyo: ge,- ga: zug' nhao: ra". 31 Yesu wa yao" mho"zo: qere- Byu: Yao: Zo: wa khyag' qhui: ru myo: sho' ja: re kham zo: ca" nae"- zug: ade, qe- khinjaung qi: qe we' Tung" pho" qeyang ha: pye' ru qhug' ru we' se' pye' ru qhug' nae". Ngadqere: sam ba lao" dam: daui: to" li" nae"- ga: mho" shid' ra". 32 Yesu wa cekhyo re de: de: za: yao: bam re ta" kyo" ra". Aimung: Petru wa Yesu re gatau khyo jhui" ye: mung: qobo vhin: ra" khyo" qeim: ra". 33 Yesu wa mho"zo: qere lhang: qu" mung: Petru re- Satan we" ngo mae" phao: lo" wa,- nao wa Mao"So shad' khyo" mamyid- byu: shad' khyo" za: myid: ra"- ga: qeim: ra". 34 Ai: thao Yesu wa mho"zo: qere we' mo, byu qere yao: jhao" khai: yu mung: yao: bam re- Nga" thao cao" nug yaug wa yao: yao" qhid' mae" ha: pye' yang: yao" pyao: zang vo, mung: nga" thao cao" vashao:- 35 Pe"mung:ga"re yao: yao" kao so' re khyad' yu nug: ra" yaug khag' ngadqere: kao so' jeim: nae"- nga" mathao mae we' Ngaui Bau" Lau Dao" mathao: yang kao so' jeim: yaug kam" wa yao" kao so' khyad' yu: ru qhug' nae". 36 Alao" byu wa mug: myid geim" alhab' re qo" sang: yu ngadqere: yao: yao" kao so' jeim" byaug: ngad: re wa pe" akyu" bo: i? 37 Byu wa yao" kao so' re pe" ja" yang tha" mung: dam: qo" tug' yu nae" i? 38 Pe"mung:ga"re Mao"So re malam: ru we' makhyang: mashab: ra" ceqae" mae ngore we' nga" mho" dao: re qho' ra" yaug khag' re ngadqere: Byu: Yao: Zo: wa yao: pho" phungbao we' gyang" lho" ra" mug: lagyo: jham we' mung: daga" joe" li" ra" au: re Byu: Yao: Zo: re: yao: re qho' pye' nae"- ga: ta" ra". 1 Ailao" Yesu wa yao: bam re- ngo naonhaung" re ta" ru wa Mao"So: mung"dan: wa qam: so' we' joe" li" rure mathe' myao myao wa cemae na: jo; ra" mo, mae" damyo" mashid genae"- ga: ta" ra". 2 Ai: thao khyaug' ba re- Yesu wa Petru- Yaku we' Yohan bam re za: gathaung: san bam myhao khyo jhui" do, lo" ra". Yao: bam: qhid' kheim: mae yao: Yesu wa ve, bao tha" lo" ra". 3 Yao" mai bau: bao: li" ru we' bao: bao: phyu: li" ra". Myid gaung dao mae" mai bau: zab zo: mo, khag' re: ai qhi" bao: bao: phyu sho' maqo" cid' phyu gengad: ra". 4 Amung: yao: bam: qhid' kheim: mae Moshe we' Elia thug' li" mung: Yesu we' jho" jhau: na: ako". 5 Ailao" Petru wa Yesu re Asang we"- ngonhaung" cejo, qo mae na: re gai: ra". Asang: qhid' mae" zaung dazaung- Moshe qhid' mae" dazaung Elia qhid' mae" dazaung- zaung sam lam: ngonhaung" re kad' nhao la,- ga: ta" ra". 6 Pe"mung:ga"re yao: bam gyai gyaug: pye' ruyang pe" ta" nae" ru maba lo: ta" ke' ru ngad: ra". 7 Ai: thao re jham dathaui: thug' li" mung: yao: bam re losham: nghoe' ra". Jham thaui: khug mae"- ceyaug wa ngo jhid'de; ra" nga" zo: ngad:- yao" dao: re tae" gyo: ge, ga: thoe jhau: thug' li" ra". 8 Alao" yao: bam wa avai: ayae khyo nyag din taung" qu" ke' ako". ngadqere: Yesu mae" je yang: gatau khag' rere: mathe' myao lo: gengad: ra". 9 Ai: bam mae" yao: bam dam: tug' gyo" lo: na: au: Yesu wa mho"zo: qere Byu: Yao: Zo: shid: rumae" madam: daui: to" li" li" wa naonhaung" the' myao: ra" khyo re khag' rere: data" kyo: ge,- ga: zug' nhao: ra". 10 Yao: bam wa Yesu amyin" dao: re phug' cao" gengadqere: shid: rumae" dam: daui: to" li" ga" ru wa pe" ga" ru ngad: i? ga: yao: bam yao: cao: jho" ta" qham: na: ako". 11 Alao" yao: bam wa Yesu re- Elia shi" sao qhid' joe" li" nae" ga:- Tung" Pho" qe pe"mung: ta" ko" ra" i? ga: myid' ako". 12 Yesu wa yao: bam re- Ja: khao: ngo" re jin" jin" seim" nyhang" to: nae" qhid' mae" Elia wa gaigai: yao: sao qhid' joe" li" nae" ngad:- ngadqere: Jham: Mugsug' mae Byu: Yao: Zo: wa khyag' qhui: ru myo: sho' kham zo: mung: ha: pye' ru qhug' li" nae" ga: pe"mung: tung" to" ra" i? 13 Ngo naonhaung" re ta" ru wa Elia wa joe" li" ava"- yao" khyo re Jham: Mugsug' mae tung" to" ru we' dakhyo: yao: bam o nug: ra" khyo" yao: re kad' yu vako" ra"- ga: ta" ra". 14 Yesu we' mho"zo: sam yaug wa- dang: ra" mho"zo: qejhao" joe" lo gelao" yao: bam: lhang" gam: byu phung: mo" zang zang" na: bam: ru we' Tung" Pho" qe wa yao: bam we' jho" ta" ngag: na ko" rure yao: bam lomyao: ako". 15 Mo,byu qe Yesu re myao lao"- yao: jhao" tao" ye: mung: yetug: ako". 16 Yesu wa yao" mho"zo: qere Pe" ja" khyo re naonhaung" yao: bam we' jho" ta" ngag: na ko" i? ga: myid' ra". 17 Mo, phaung mae" byu dayaug tau: mung:- Mho" Pho" we"- ngo nao jhao" nga" zo: re jhui" li" ra". Pe"mung:ga"re yao: wa nhad'jid yui bo: ra" yaug ngad: ra". 18 Ai: yui vao: jaung" khao: ngo" myidgaung khyo be; lhang" ke' mung: nhad' mae" nyab dui" athaui: thaui: thug' ru we' zaui kyag' mung: gaung geim" kyaung: thin: byaug byaug mung: ra"- ai: yui re khe' thug' pye' byid: nae" qhid' mae" ni" mho"zo: qere ngo mho' ngadqere: yao: bam maqo" khe' thug' pye' ngad: ako"- ga: Yesu re ta" ra". 19 Ailao" Yesu wa yao: bam re- Lam khug: myid mabo: ra" byumyu" we"- ngo naonhaung" we' daga" khomyhao" joe" sho' na zai i? Ngo naonhaung" re khomyhao"joe" sho' zang: kham byid: zai i? Ai: yauggai nau" re ngojhao" jhui" lo geri:- ga: ta" ra". 20 Yao: bam wa ai: yauggai nau" re Yesu jhao" jhui" lo: ako". Ai: yui wa Yesu re myao lao"jao" ai: yauggai nau" re lao" thin: jab: lo" nhao mung: myid gaung khyo gyang: be; lo" ru we' nhad' mae" nyab dui" athaui: thaui: lang" lhe' lhau: ra". 21 Yesu wa yao: pho" re- yao: ceru: boe" ru khomyhao" ngad va" i? ga: myid' ra". Yao: pho" wa- Zonau" mae" ngad va" ga: tau" ra". 22 Yui wa yao: re se' pye' nae" ga: myo: sho' lhang yao: re myi: mae qid mae lang" be; zaui: ke' ke' mung: ra". Nao qo" boe" ngad: re wa ngopha: re nhag' khyag' ru we' bao" yu la,- ga: ta" ra". 23 Yesu wa- Nao qo" boe" ngad: re wa ein: pe"mung: ta" i? Lam khug: myid bo: ra" yaug: qhid' mae" ja: khao: ngo" qo" gai: boe" ra"- ga: ta" ra". 24 Ailao" jao" ai: zoshao: yao: pho" wa- Ngo lam khug: ra"- nga" malam" ra" myid re bao" thaug' yu la,- ga: hug' ta" ra". 25 Yesu wa mo, byu qe yao: jhao" tao" zang" phaung: lo: na: rure myao lao" ai: makhyang" ra" yui re- Nhad'jid nojid: ra" yui we"- ngo nao re amyin" byid' ra"- Yauggai nau" mae" thug' lo" wa,- yao: mae khonhae" re: dadam: vao lo:- ga: qeim: ra". 26 Ai: makhyang" ra" yui wa gyi: hug' yang: ai: yauggai nau" re lao" thin: jab nhao mung: yao" khug mae" phao: thug' lo" ra". Yauggai nau" re: sushid mao we' dakhyo: lang" jo; ra". Byu myo: sho' wa yao: shid: ava"- ga: ta" ako". 27 Ngadqere: Yesu wa ai: yauggai nau" lo, mae zaui: mung: she: to" ke' ra". Ailao" ai: yauggai nau" wa to" ye; li" ra". 28 Yesu wa yham khug khyo dam: vao lo" mung: yao: za: na: au: yao" mho"zo: qe wa yao: re- Ngonhaung" ai: yui re pe"mung: maqo" khe' thug' pye' geli" laug i? ga: myid' ako". 29 Yesu wa yao: bam re- Akyu" mho' ruyang mangad: re wa gatau pe" yang re: ceja" yui re maqo" khe' thug' pye'- ga: ta" ra". 30 Yesu we' yao" mho"zo: qe wa aimae" to" mung: Galile khyo" lai: ye" lo" ako". Ai: khyo re khag' rere: maba nhao nug ngad: ra". 31 Pe"mung:ga"re Yesu wa yao" mho"zo: qere- Byu: Yao: Zo: wa byu qe: lo, khug khyo ab byid' pye' ru qhug' mung: yao: bam wa yao: re se' pye' li" genae"- ngadqere: se' pye' thao sam ba re yao: wa dam: daui: to" li" nae" ga:- mho" byid' na: ruyang ngad: ra". 32 Yao" mho"zo: qe wa yao" mho" shid' dao: re maba: gyo: ko" ngad: ra". Ngadqere: yao: bam wa yao: re mavae" myid: gengad: ra". 33 Yesu we' yao" mho"zo: qe wa Kapena-um khyo joe" ye" ako". Yham khug mae yevao: na thao Yesu wa yao" mho"zo: qere Naonhaung" wa khyole; mae pe" nam jho" ta" ngag ko" i? ga: myid' ra". 34 Ngadqere: yao: bam wa sae za: tae" bam: ako". Pe"mung:ga"re yao: bam wa khyole; mae yao: bam mae" khag' qi" thao" ngad: ga" rure yao: cao: jho" ta" ngag: lo geyang: ngad: ra". 35 Ailao" Yesu wa zaung: jo, mung: daxe: shid' yaug re khai: yu yang: yao: bam re- Qhid' mae na nug yaug wa alhab' mo; thao mae na ca"- amung: alhab' mo; daui daui yaug boe" ca"- ga: ta" ra". 36 Yesu wa zoshao dayaug re jhui" yu mung: yao: bam: agaung: mae yhe' to" ra". Ai: zoshao re yao" lo; yang ge; ci zo" re" yao: bam re- 37 Zoshao qe mae" ceru" ra" zoshao dayaug re nga" mang khyo" lham: khae: yu: ra" yaug khag' ngadqere: ngore lham: khae: yu: ra". Amung: ngore lham: khae: yu: ra" yaug khag' ngadqere: ngore za: lham: khae: yu: ru mangad:- ngore nhao: ke' ra" yaug rere: lham: khae: yu: ra"- ga: ta" ra". 38 Yohan wa Yesu re Mho" Pho" we"- ni" mang: yang yui khe' thug' na: ra" byu dayaug re ngonhaung" myao:- ngadqere: yao: wa ngonhaung" we' daga" cao yaug mangad: mung: yao: re ngonhaung" tam" pye' co' va"- ga: ta" kyo" ako". 39 Yesu wa- yao: re datam" ge,- pe"mung:ga"re nga" mang khyo" yang mug' pho: mau" bin: zaui: thao nga" khyo re magai: ra" dao: xoe" xoe" za: qo" ta" byu khag' mana. 40 Pe"mung:ga"re nyhao: re gye makad' ra" yaug wa nyhao" shad' mae" byu ngad: ra". 41 Ngo naonhaung" re dang za: ta" ru wa- Nga" byu qe ngad: ako" ga" ra" khyo" yang naonhaung" re qid dakeim byid: jhaug' yaug khag' ngadqere: gaigai: yao: aphug' jhaung qhu" qo" khae: yu nae"- ga: ta" ra". 42 Amung: ngore lam khug: na: ra" ce: zoshao qemae" dayaug yaug re lam khug: myid zai" phyo' ra" yaug khag' ngadqere: yao" lang zang: mae laug lhang gye, qi: taui" lhao: mung: qid tham: khug khyo pye' zaui: ke' ru wa yao" qhid' mae" je: gai: ra". 43 Ni" lo; yang ni" lam khug: myid re zai" phyo' byid' ngad: re wa- ai: lo, re qam" phyid' pye' wa,- lo, shid' lo, geim" we' myi: khonhae" re: mashid masham: ra" myiqid tham: khyo gyo" lo" nae" tho' lo, dashad' made, lo: kao so' daui: ra" khyo vao ye: nae" ru wa ni" qhid' mae" je: gai: ra". 45 Ni" khyid: yang ni" lam khug: myid re zai" phyo' ngad: re wa ai: khyid re qam" phyid' pye' wa,- khyid shid' khyid geim" we' myi: khonhae" re: mashid masham: ra" myiqid tham: khyo gyo" lo" nae" tho' khyid dashad' made, lo: kao so' daui: ra" khyo vao ye: nae" ru wa ni" qhid' mae" je: gai: ra". 47 Ni" myo,jid' yang ni" lam khug: myid re zai" phyo' ngad: re wa- ai: myo,jid' re thad' pye' wa,- myo,jid' shid' shad' geim" we' khonhae" re: myi: mashid masham- yao: bam re zo" ra" laug daung: khonhae" re mashid: ra" myiqid: tham: khyo gyo" lo" nae" ru tho' mae- myo,jid' dashad' za: de, mung: Mao"So: mung"dan: khyo vao ye: nae" ru wa ni" qhid' mae" je: gai: ra". 49 Xeim: re xo: ke' yang: kyang" shao: pye' ru we' dakhyo:- byu alhab' rere: myi" yang kyang" shao: pye' li" nae". 50 Xo: wa gai: ra"- ngadqere: ai: xo: shao: byaug lao"- ai: xo: re dam: ngae sho' naonhaung" khoru: qo" kad' yu genae" i? Naonhaung" khug mae jho" zam" khug: ra" xo: bo: jo, mung:- dayaug we' dayaug ngaui pyo: yaug yo za: zam" khug: na ge,- ga: ta" ra". 1 Ai: thao Yesu wa ai: jo, qo mae" Yuda mung" khyo ye" lo" mung: Yodan gyaung: thoete' khyo gau" de; ye" lo" ra". Byu phung: mo" zang yao: jhao" dam: zang" phaung: li" gelao"- yao: khonhae" re: lhaung" kad' ru we' dakhyo:- yao: bam re mho" shid' ra". 2 Pharishe qe damyo" Yesu jhao" li" mung: yao: re jham" qu" zo" re"- byu dayaug yaug wa yao" yham sang myhi" re kao" pye' gai: i? ga: myid' ako". 3 Yesu wa yao: bam re- Naonhaung" re Moshe khoru: amyin" byid' to" ra" i? ga: dam: tug' myid' ra". 4 Yao: bam wa- Kao: mugsug' tung" byid: mung: kao" pye' nae" akhang" byid' to" ra"- ga: tau" ako". 5 Ailao" Yesu wa yao: bam re Naonhaung" nhag' lam: qao ko" ruyang ce: amyin" naonhaung" qhid' mae" tung" to: co' ru ngad: ra". 6 Ngadqere: sao qhid' maqhid phan" to" au: mae" Mao"So wa yauggai we' myiqe: re phan" to" ra". 7 Airumung: yauggai wa yao: myhi" we' yao: pho" re to: co' mung: yao" yham sang myhi" we' yezam" khug: na: li" nae". 8 Alao" yao: shid' zo: wa dagaung dasho: za: boe" lo genae". Yao: shid' zo: wa- shid' zo: mangad:- dayaug za: ngad: ra". 9 Airumung: Mao"So: yang zham" to" rure byu: yang dazai" kao: ge,- ga: ta" ra". 10 Yham khug mae dam: lo" na: au:- ce: khyo Yesu re dam: myid' ako". 11 Alao" Yesu wa yao: bam re- yao: yao" yham sang myhi" re kao" pye' mung: gatau dayaug re dam: xo' yu: ra" yaug wa yao" yham sang myhi" re shad' yaug ngad: ra". 12 Ai we' dakhyo: yao: yao" yham sang pho" re kao" pye' mung: gatau dayaug we' lo, dam: xo' yu: ra" yaug wa lao shad' yaug ngad: ra"- ga: ta" ra". 13 Byu daqhae: wa zoshao qere lo, kai: mung: shaman" byid: vashao:- ga: Yesu jhao" jhui" li" ako". Ngadqere: mho"zo: qe wa yao: bam re qeim: ako". 14 Aire Yesu myao lao"- nhag' qu" yo" ru we' yao" mho"zo: qere- Ai: zoshao qere ngojhao"lo nhao: ke' ge,- pe"mung:ga"re Mao"So: Mung"dan: wa airu" mo; nho: mung"dan: ngad: ra". 15 Ngo naonhaung" re dang za: ta" ru wa Mao"So: Mung"dan: re zoshao we' dakhyo: makhae: yu: ra" yaug wa ai: khug khyo maqo" vao ye: nae"- ga: ta" ra". 16 Amung: Yesu wa zoshao qere yao" tao: kheim" khyo vo; yu mung: yaug khao: ngo" dao mae lo, kai: yang: shaman" byid' ra". 17 Yesu wa gyaung: khyo mae dam: su" lo" na: au:- byu dayaug wa tao" li" mung: Yesu qhid' kheim: mae pad' thaug' thaug' yang: yao: re- Gai: ra" Mho" Pho" we"- Apyad ato: kao so' qo" yu nae" qhid' mae" ngo pe" kad' ca" i? ga: myid' ra". 18 Yesu wa yao: re- Nao ngore pe"mung: gai: ein: ta" i? Mao"So mae" je yang: gai ru khag' mana. 19 Byu dase'- su: myi: dalhad'- su: zai dakhug'- madang: ra" sagse: dakham- damhug' pyag' zo:- ni" myhi" we' ni" pho" re phug' myao: wa,- ga" ra" amyin" dao: jham re nao ba gau ngad: ra"- ga: ta" ra". 20 Ai: yaug wa Yesu re Mho" Pho" we"- ai: amyin" dao: jham alhab' re zoqae: yo, mae" ngo phug' cao" lo va"- ga: tau" ra". 21 Yesu wa yao: re jhid'de; myid we' zhaug' qu" mung:- nao daja: ca" ashi"- nao lo" wa,- ni" jo,nho" jham re lo" aung: mung: myaung sho: mo, re gae byid: wa,- ailao" nao mug: khaung: mung"dan: mae jo,nho" qo" nae"- amung: nga" thao cao" la,- ga: ta" ra". 22 Yesu dao: re yao: the' gyo: lao"- myo, nho phyug' mung: sham: lo" byaug: ru we' nhag' kaug' zang phao: lo" ra". Pe"mung:ga"re yao: wa jo,nho" gyai qo" yaug ngad: ra". 23 Yesu wa yao" mho"zo: qere lhang: qu" mung:- Jo,nho" qo" ra" mo, wa Mao"So: Mung"dan: khyo vao ye: nae" qhid' mae" gyai qug: ako"- ga: yao: bam re ta" ra". 24 Mho"zo: qe wa Yesu dao: re gyo" mug' ako". Alao" Yesu wa yao: bam re Nga" zo: bam we"- Mao"So: Mung"dan: khyo vao ye: nae" gyai qug' ra". 25 Jo,nho" qo" ra" yaug Mao"So: mung"dan: khyo vao ye: laui: ra" tho' gola:u wa nghe' no: dung: khyo" vao: lai: lo" nae" ru wa je: laui: ra"- ga: dam: ta" ra". 26 Mho"zo: qe wa matho' ta" losho' mug' byaug: ru we'- Airu: ngad: re wa khoyaug khyad' yu: ru qhug' nae" laug i? ga: yao: cao: jho" ta" ako". 27 Yesu yao: bam re tau: qu" mung: Aiwa byu: yang magai: boe"- ngadqere: Mao"So wa gai: boe" ra"- Mao"So wa ja: khao: ngo" re qo" boe" ra"- ga: ta" ra". 28 Ailao" Petru wa Yesu re- Qu" wa,- ngonhaung" wa alhab' re to" pye' co' yang: ni" thao cao" va"- ga: ta" ra". 29 Yesu wa yao: bam re- ngo naonhaung" re dang za: ta" ru wa nga" mathao mae we' Ngaui Bau" Lau Dao" mathao: yang yham- yo- mao:nhaung:- nhae: mo"- myhi" pho"- zo: dau jham re to" pye' co' ra" yaug khag' ngadqere: 30 ce: apyad mae yhin" ru we' daga" yham- yo- mao:nhaung:- nhae: mo"- myhi" pho"- zo: dau jham re dayo nho" qo" khae: yu: li" genae"- thao: pyad ngad lao"- apyad ato: kao so' qo" yu genae". 31 Ngadqere: qhid' au: mae" mo, myo: sho' wa nhaung thao" khyo ngad: li" genae"- nhaung thao" mae" mo, myo: sho' kam" wa qhid' au: mae ngad: li" genae"- ga: ta" ra". 32 Alao" Yao: bam Yerusalem khyo do, lo" na ko" au: Yesu wa mho"zo: qe: qhid' au: mae su" na: ra". Yao" mho"zo: qe wa mug' mung: thao cao" mo, wa gyaug: ako". Yesu wa mho"zo: daxe: shid' yaug re dam: khai: yu mung: yao" dao mae boe" li" nae" ra" khyo re ta" kyo" ra". 33 Tae" gyo: ge,- ngonhaung" Yerusalem khyo do, lo" na va"- Byu: Yao: Zo: wa- ai: mae khinjaung qi: qe we' Tung" Pho" qe: lo, mae ab: pye' ru qhug' nae"- amung: yao: bam wa Byu: Yao: Zo: re se' pye' nae" qhid' mae" dao: phyid' mung: taung bug qe: lo, khyo ab: pye' li" genae". 34 Taung bug byu qe wa Byu: Yao: Zo: re jung" ru we' khata: phoe" sheim: mung: be, yang: se' pye' li" genae". Ngadqere: yao: wa sam ba thao re dam daui: to" li" nae" ngad:- ga: ta" ra". 35 Zebede yao: zo: Yaku we' Yohan tao wa Yesu jhao" te' lo mung: yao: re- Mho" Pho" we"- ngotao nao re mho' ra" ja: ngotao re kad' byid: nae" ngotao o: ra"- ga: ta" ako". 36 Ailao" Yesu wa yao: tao re- ngo naotao: qhid' mae" pe" kad' byid: nae" o ko" i? ga: myid' ra". 37 Yao: tao wa Yesu re- Nao phungbao we' kho:kham boe" lao"- ngotao re ni" lo, yo shad' mae dayaug- lo, kaung: shad' mae dayaug nao we' daga" zaung nhao la,- ga: ta" ako". 38 Ngadqere: Yesu wa yao: tao re- Naotao pe" mho' na ko" rure naotao maba ko" ngad: ra"- naotao wa ngo shaug' ca" ra" keim re qo" shaug' genae" i? Ngo kham: yu ca" ra" qid nyhab' re qo" kham: yu genae" i? ga: myid' ra". 39 Ailao" yao: tao wa Yesu re- Ngotao qo" doe;- ga: tau" ako". Yesu wa yao: tao re- ngo shaug' ca" ra" keim re naotao qhug' shaug' genae"- ngo kham: yu ca" ra" qid nyhab' re qhug' kham: yu genae". 40 Ngadqere: nga" lo, yo shad'- lo, kaung: shad' mae khoyaug zaung nae" rure khyin: yu nae" qhid' mae" ngo mae akhang" majo,- ai wa Mao"So: yang nyhang" to: byid' ra" mo; qhid' mae" za: ngad: ra"- ga: ta" ra". 41 Gatau: mho"zo: daxe yaug ai: khyo re gyo: gelao"- Yaku we' Yohan tao re nhag' yo" ako". 42 Yesu wa yao" mho"zo: qere yao: jhao" khai: yu mung: yao: bam re- Mao"So re malam: ra" mo, qemae" eib nae" akhang" qo" ra" mo, wa mung" byu qe: dao mae qam: so' we' eib: ako". Zug: au: jhaung qere: kheim: so' qo" rure naonhaung" ba: ako". 43 Naonhaung" gyo: mae kam" wa airu: magai: ngad- Naonhaung" mae" je: qi: nug: ra" yaug khag' ngadqere: yao: wa alhab' mo; daui daui yaug boe" ca". 44 Naonhaung" mae" au: jhaung boe" nug yaug khag' ngadqere: yao: wa alhab' mo; jeim kad' ca"- 45 Pe"mung:ga"re Byu: Yao: Zo: lhao" re: su re yam" zo: nae" qhid' mae" joe" li" ru mangad:- su re caung da" nae" we' byu myo: sho' re khyad' yu nae" qhid' mae" yao" kao so' re byid' pye' nae"- ga: joe" li" ru angad:- ga: ta" ra". 46 Alao" yao: bam wa Yerikho khyo joe" ye" ako". Yesu wa yao" mho"zo: qe we' byuphung: mo" zang we' daga" Yerikho mae" dam: thug' lo: na ko" au:- Tema nho: yao: zo: Barteme ga: mang: ra" mho' zo: byu myo, jid dayaug wa khyoyae mae zaung: jo; ra". 47 Yao: wa Nazared mae" Yesu joe" na: rure the' gyo: lao" zag: hug' mung:- Davi yao: zo: Yesu we"- ngore nhag' khyag' yu la, wo"- ga: ta" ra". 48 Myo: sho' mo, wa yao: re sae za: na nae" qhid' mae" qeim: ako". Ngadqere: yao: wa- Davi yao: zo: we"- ngore nhag' khyag' yu la, wo"- ga: je: zag: hug' ra". 49 Ailao" Yesu wa thang mung: Yao: re khai: lo ge,- ga: ta" ra". Yao: bam wa myo, jid re khai mung: yao: re- Ngaui bau: se,- To" wa,- yao: nao re khai: na: ra"- ga: ta" ako". 50 Ailao" yao: wa yao" bau: qhang khyad' shalhaui" pye' yang: pag' to" li" mung: Yesu jhao" ye" lo" ra". 51 Yesu wa yao: re- ngo ni" qhid' mae" pe" kad' byid: nae" nao o: i? ga: myid' ra". Ailao" myo, jid wa Yesu re- Asang we"- nga" myo, re myao nhao la,- ga: ta" ra". 52 Yesu yao: re- Su" lo" wa,- ni" lam khug: myid wa nao re gai nhao: ava"- ga: ta" ra". Ailao" jao"- myo, myao: lo mung: Yesu ye" lo" khyo thao mae cao" ye" lo" ra". 1 Yesu we' yao" mho"zo: qe wa Yerusalem we' Zhan:lun: bam khyid mae" Betphage we' Bethani khyo jhao" li" na lao"- 2 Yesu wa mho"zo: shid' yaug re nhao: ke' mung: yao: shid' zo: re- Ni" shid' zo" qhid' au: mae" vogaung: khyo ye" lo" ge,- vogaung: khug khyo vao ye: we' khag' re: mazaung: qu" shi" ra" loze nau" dadau: taui" to" rure ni" shid' zo: yemyao genae"- aire pheim: yu mung: she: lo ge,- 3 Byu dayaug yaug Pe"mung: airu: kad' ko" i? ga: ni" shid' zo: re myid: lao"- ni" shid' zo: wa yao: re Asang cere ci qo: ga"- ana" yao: jao" cekhyo dam: tug' nhao: ke' byid: nae" ga" ein: ta" ge,- ga: ta" ke' ra". 4 Yao: shid' zo: wa ye" lo" mung: yham dayham: kham: dung: ayae- khyodang shad' mae loze nau" dadau: taui" to" rure yemyao lao" aire yepheim: ako". 5 Aitau mae ye; jo; ra" mo, wa loze nau" pe"mung: pheim ko" i? ga: yao: shid' zo: re myid' ako". 6 Yao: shid' zo: wa Yesu ta" ke' ru we' dakhyo: yao: bam re ta" kyo" ako". Ailao" yao: bam wa yao: shid' zo: re loze nau" pheim: she: lo" nhao: ako". 7 Yao: shid' zo: wa loze nau" re Yesu jhao" she: lo mung: loze nau" dao mae yao: shid' zo" mai bau: nhe: byid' ako". Yesu re: loze nau" dao mae do; zaung: ra". 8 Byu myo: sho' re: yao: bam: mai bau: jham re khyodang mae myhung: byid' ako". Gatau damyo" wa pa: din" mae" cilo: ra" sag' vho' sag' dang" jham re khyodang mae myhung: byid' ako". 9 Yesu qhid' au: mae" mo, byu qe we' thao cao" ra" mo, byu qe wa zag: hug' mung:- Hosana- Asang: mang we' joe" li" ra" yaug wa ngaui lho" vashao: wo"- 10 Joe" lo nae" ra" ngonhaung" yao: pho" Davi mung"dan: wa ngaui lho" vashao: wo"- Myhao: thao" ra" jo, qo mae Hosana ngad vashao: ga: ta" ako". 11 Yerusalem khyo joe" lao" Caung:pa" Yham khug khyo vao ye: mung: ja: khao: ngo" re yecao" qu" lhau: ra". Ba vao: lo" na lao" mho"zo: daxe: shid' yaug we' yao: wa Bethani vogaung: khyo ye" lo" ra". 12 Ai: thao: ba Yesu we' yao" mho"zo: qe wa Bethani mae" dam: lo: na: au:- Yesu wa vae: moe' ra". 13 Ailao" Yesu wa avho' maung" jo; ra" pho' ham" gae dagae re va: mae" the' myao: ra"- yao: wa ashi: zaui" laug ga: pho' ham" gae qao: khyo ye" lo" ra". Pho' ham" shi: zaui: yo, mangad: yang: avho' za: maung" jo; rure yemyao: ra". 14 Alao" Yesu wa pho' ham" gae re thao phyao: dapyad daqae: khonhae" re: ni" ashi: khag' maqhug' zo: geshao:- ga: ta" ra". Yao" mho"zo: qere: ai: dao: re the' gyo" ako". 15 Yesu we' mho"zo: qe wa Yerusalem khyo joe" ye" ako". Ailao" Yesu wa Caung:pa" Yham khug khyo vao ye: mung: Caung:pa" Yham khug mae zai aung: zai: vai mo, re khe' thug' mung: ngaui tha" zo: mo; jaung: jham we' phaung" kyug' aung: zo: mo; tao" khau" jham re tau: phaug' sin" pye' byid' ra". 16 Yesu wa Caung:pa" Yham vang" khyo" pe" ja" zai rere: maci: lai: lhau nhao ngad: ra". 17 Amung: yao: wa mo, byu qere- Nga" yham re byumyu" cao jab qera" akyu" mho' yham ga: mhang" genae" ga: Jham: Mugsug' mae tung" to" mangad: i? Ngadqere: naonhaung" wa aire damya, laug aug' kad' pye' avako"- ga: mho" byid' ra". 18 Aikhyo re khinjaung qi: qe we' Tung" Pho" qe the' gyo: gelao"- Yesu re se' pye' nae" khyo qho: ako". Pe"mung:ga"re mo, byu qe alhab' yao: mho" byid' ra" khyo re mug'hao" na: bam geyang: yao: bam wa Yesu re gyaug: ako". 19 Myi" thao joe" lo lao" Yesu we' mho"zo: qe wa vomo" mae" thug' lo" ko" ra". 20 Ai: thao: ba no' mae" Yesu we' mho"zo: qe su" lai: lo" na: au: ai: pho' ham" gae wa gae geim" kyaug' shid: jo; rure myao: ako". 21 Ailao" Petru wa myid: beim: mung: Yesu re Mho" Pho" we"- qu" wa,- nao nhang: co' ra" pho' ham" gae kyaug' shid: byaug vanhaung- ga: ta" ra". 22 Yesu wa tau: mung: yao: bam re Mao"So re lam khug: na ge,- 23 Ngo naonhaung" re dang za: ta" ru wa yao: yao" nhag' lam: khug mae aug' o: myid mabo lo: yao: yao: ta" ru we' dakhyo: boe" nae"- ga: lam: ra" yaug khag' ngadqere: ce: bam re- bam nao qui" lo" wa,- amung: panglai: khyo gyo" vao lo" wa,- ga: ta" ngad: re ai wa yao: ta" ru we' dakhyo: boe" nae". 24 Airumung: ngo naonhaung" re ta" ru wa Naonhaung" mho' ra" ja: alhab' qo" yu nae" ein: lam ge,- ailao" naonhaung" gaigai: yao: qo" khae: yu genae". 25 Naonhaung" akyu" mho' ye; jo; au: naonhaung" re shad' lhoe" ra" yaug: qobo jham re khyad' pye' byid: ge,- ailao" za: mug:gaung dao mae" Pho" Mao"So wa naonhaung" shad' lhoe" ra" qobo jham re khyad' pye' byid: nae". 26 Su gaje qere naonhaung" qobo makhyad' byid: ko" re wa mug:khaung dao mae" naonhaung" Pho" re: naonhaung" shad' lhoe" ra" qobo re makhyad' byid: nae"- ga: ta" ra". 27 Yesu we' mho"zo: qe wa Yerusalem khyo dalhang dam: joe" lo: ako". Yesu wa Caung:pa" Yham mae su" qin" au:- khinjaung qi: qe- Tung" Pho" qe we' zug: ade, qe yao: jhao" li" mung:- 28 Nao aijham re pe" kheim: so' khyo" yang kad' i? Nao re aijham kad' nae" ce: kheim: so' khag' yang byid' to" i? ga: Yesu re myid' ako". 29 Yesu wa yao: bam re Ngo naonhaung" re dao: dakheim: myid: geli"- naonhaung" aire tau: gelao"- aijham re ngo pe" kheim: so' yang kad' rure naonhaung" re ngo ta" kyo: nae". 30 Yohan byid' ra" qid nyhab' wa Mao"So: kheim: so' khyo" yang ngad: i? Mangad: lao"- byu: kheim: so' khyo" yang ngad: i? Ngo re tau: gela,- ga: ta" ra". 31 Ailao" yao: bam wa- Mao"So: kheim: so' khyo" yang ngad: ra" ein: ngonhaung" ta" re wa- airu: ngad: re pe"mung: naonhaung" yao: re malam" ko" i? ga: yao: ta" li" nae". 32 Amung: byu: kheim: so' khyo" yang ngad: ra" ein: ngonhaung" ta" nae" i? ga: yao: cao: jho" qham: ako". (Yao: bam wa mo, byu qere gyaug: ako"- pe"mung:ga"re byu alhab' mo, wa Yohan wa gaigai: yao: lapa ngad: ra" ga: myid: ako".) 33 Ailao" yao: bam wa tau: mung:- ngonhaung" maba ga: Yesu re ta" ako". Yesu yao: bam re- Aijham re pe" kheim: so' yang kad' rure ngore: naonhaung" re mata" kyo: nae"- ga: ta" ra". 1 Yesu wa dao: tau" jham we' yao: bam re ta" ra". Byu dayaug wa sabyi khyae dakhyae qho" to: mung:- aire khyae kyae" lhang" to:- sabyi pyag' khung: dau" to" ru we' gyebyu zaung dalam: kad' to: mung: khyae kad' zo: mo, re ngho: byid' to: co' yang: gatau: mung" khyo ye" lo" ra". 2 Ayo, joe" lao"- yao: wa khyae ngho" zaui: mo, jhao" jeim dayaug re khyae ngho: phug' sabyi shi: mho' nhao: ke' ra". 3 Khyae ngho" zaui: mo, wa ai: jeim re lham: taui" be, mung: akeim dam: nhao: ke' ko" ra". 4 Khyae sang wa gatau jeim dayaug re dam: nhao: ke' ra". Khyae ngho" zaui: mo, wa ai: jeim re au: lham: be; cad'- dae te' mung: qho' lham: phyo' ako". 5 Amung: khyae sang wa jeim gatau dayaug re dam: nhao: ke' lao"- khyae ngho" zaui: mo, wa yao: re lham: se' pye' ako". Gatau myo: sho' mo, rere: dakhyo: za: be, mo, re be,- se' pye' mo, re se' pye' mung: kad' ako". 6 Khyae sang wa nhao: ke' nae" ru yao" zote: zo: dayaug za: adang: alo". Amung: yao: wa- Nga" zo: re wa lham: phug' myao: genae"- ga: ta" yang: lo" thao" mae khyae ngho" zaui: mo, jhao" yao: zo: re nhao: ke' ra". 7 Ngadqere: khyae ngho" zaui: mo, wa Ceyaug wa khyae sang: nho: yham khaung sang nae" yaug ngad: ra"- lo geri: Ceyaug re se' pye' gelang:- ailao"- yao" jo,nho" wa nyhao: mae" boe" zai ngad: ra" ga:- yao: cao: yao: jho" ta" ako". 8 Amung: yao: bam wa yao: re taung" yu yang: se' pye' mung: khyae taung gaung mae yeshapye' to" ako". 9 Ailao" khyae sang wa khoru: kad' nae" i? Yao: wa li" mung: khyae ngho" zaui: mo, re se' pye' yang: ai: sabyi khyae rere: gaje qere byid' li" nae". 10 Amung: Yham zhaug' mo, khyin: khyo" pye' ra" laug baui wa yham jheim mae" akhyag: thao" ra" laug baui boe" lo va". 11 Ce wa Mao"So: yang kad' ru ngad: ra". Aiwa ngonhaung" qhid' kheim: mae mug' pho: mau" ngad: ra"- ga" ra" jham: dao: re naonhaung" manghe' qu" ko" i? ga: ta" ra". 12 Yuda au: jhaung qe wa yao: bam re qang yang: Yesu ce: dao: tau" re ta" rure ba gemung: yao: bam wa Yesu re taung: nae" seim" ako". Ngadqere: byuphung: mo" re gyaug: ako". Amung: yao: bam wa Yesu re nha: to: co' mung: phao: lo" ko" ra". 13 Ai: thao re yao: bam wa Yesu yao" dao: thoe: yang yao: re taung: nae" qhid' mae" Pharishe qe daqhae: we' Herod byu daqhae: re Yesu jhao" nhao: ke' ako". 14 Yao: bam li" mung: Yesu re Mho" Pho" we"- nao wa dangman" ru we' khag' rere: myo, nho makhyin: rure ngonhaung" ba: ra". Pe"mung:ga"re nao wa byugaui maqu" lo: Mao"So: khyo re dang dang za: mho" na: ra". Roma Khosin" re khang: gai: byid' i? Magai: byid: i? 15 Ngonhaung" byid: zai: i? Mabyid: zai i? ga: myid' ako". Yesu kam" wa yao: bam geim kad' rure ba mung: yao: bam re- Naonhaung" ngore pe"mung: jham" qu" ko" i? Ngo jhao" ngaui dakye' cilo: qu" ge,- ngo qu" qu" nae"- ga: ta" ra". 16 Ailao" yao: bam wa ngaui dakye' cilo: ako". Yesu wa Cemae khag' sulho we' khag' mang aso: de; ra" i? ga: myid' ra". Yao: bam wa yao: re Roma khosin" sulho we' mang aso: de; ra"- ga: tau" ako". 17 Yesu wa yao: bam re Roma khosin" we' sin" ra" gu: Roma Khosin" re byid: ge,- Mao"So we' sin" ra" gu: Mao"So re byid: ge,- ga: ta" ra". Yao: bam wa gyai mug' byaug: ako". 18 Ai: thao re dam: daui: to" li" khyo majo, ga: ta" na ko" ra" Saduke damyo" Yesu jhao" li" mung:- 19 Mho" Pho" we"- byu dayaug yaug: yao: mao: wa zo: dau maqo" lo: yao" yham sang myhi" re shid: cug' to: co' ngad: re aiyaug: yao: nhaung: wa yao: mao" cug' mo" re gaug mung: yao: mao" qhid' mae" zo: dau nyaug xo' myhung byid: ca"- ga: Moshe ngonhaung" re tung" to: byid: co' ra". 20 Ana"- yao: mao: yao: nhaung: nhad' yaug na: ako". Mao: mo" yaug wa myi: dayaug lo,xo' yu: ra"- ngadqere: zo: dau maqo" lo: shid: lo" ra". 21 Alao" mao: le; yaug cug' dam: gaug: ra"- mao: le; re: zo: dau maqo" lo: shid: lo" ra". Sam yaug ein: yaug re: ai we' dakhyo: zo: dau maqo" lo: shid: lo" ra". 22 Yao: tao ho' nhad' yaug geim" zo: dau maqo" lo: shid: lo" ko" ra". Lo" thao" mae ai: myiqe: re: shid: lo" ra". 23 Shid: rumae" dam: daui: to" li" rumae ai: myiqe: myhi" wa khoyaug: yham sang myhi" ngad nae" i? Pe"mung:ga"re yao: tao ho' nhad' yaug geim" aiyaug re ceim" ngho" vako" ra"- ga: ta" ako". 24 Alao" Yesu wa yao: bam re Naonhaung" wa Jham: Mugsug' we' Mao"So: qam: so' re maba geyang: shad' nghung" na ko" ra" mangad: i? 25 Pe"mung:ga"re shid: ra" mo, dam: daui: to" li" lao"- yao: bam wa myibyid: myiyu makad' lo: genae"- yao: bam wa mug:gaung dao mae" mug: lagyo: qe we' dakhyo: ngad: ako". 26 Amung: shid: ra" mo, dam: daui: to" li" ra" khyo we' sin: mung: myi: nga" na: ra" thao" paung" we' sin: yang: ta" ra" jham: dau mae Mao"So wa Moshe re ngo wa Abraham nho: Mao"So- Isag nho: Mao"So we' Yaku nho: Mao"So ngad: ga: ta" ra" Jham: dao: re tung" to" ra" Moshe tung" paug' re naonhaung" manghe' qu" ge i? 27 Mao"So wa shid: jo; ra" mo; nho: Mao"So mangad:- Daui: na: ra" mo; nho: Mao"So angad:- naonhaung" wa gyai yao: shad' nghung" byaug: avako"- ga: ta" ra". 28 Ailao" Tung" Pho" qemae" dayaug wa Yesu we' Saduke bam dayaug we' dayaug jho" ta" ngag: na ko" rure the' gyo" ru we' Yesu yao: bam re shab shab za: tau: byid' rure qu" myao lao"- Yesu jhao" qui" li" mung: yao: re Amyin" dao: alhab' mae" kholam: je: qi"thao" ngad: i? ga: myid' ra". 29 Yesu wa Israel amyu" we"- tae" gyo: ge,- ai: Asang ngonhaung" Mao"So wa date: za" Asang ngad: ra". 30 Ai: Asang ni" Mao"So re ni" aung khug nhag' lam:- myid nyan: ba: ru- gaung dau: qam: so' alhab' we' jhid'de; ca" nae" ngad: ra"- ga" ra" lam: wa qi" thao" amyin" dao: ngad: ra". 31 Shid' lam" lam: wa- ni" yham kyo: cao: re naoyao" gaung re we' dakhyo: jhid'de; ca" nae" ngad: ra"- ga" ru ngad: ra". Ce shid: lam: tho' je: qi" ra" amyin" dao: gatau majo,- ga: ta" ra". 32 Ailao" ai: Tung" Pho" wa Yesu re Ngad: ra"- Mho" Pho" we"- Mao"So wa date: za: ngad: ru we' yao: mae" je yang: gatau mana ga: nao ta" ru wa dang: ra". 33 Alao" Mao"So re aung khug: nhag' lam: alhab' we' myid nyan: ba: ru alhab' we' gaung dau: qam: so' alhab' we' jhid'de; ca" nae" ngad: ra" ga" ru we' yham kyo: cao: re yao: yao" gaung re we' dakhyo: jhid'de; ca" nae" ngad: ra" ga" ra" amyin" dao: shid' lam: re phug' cao" ru wa phad' nghaui" xeim: alhab' we' xeim: alhab' tho' je: qi" ra"- ga: ta" ra". 34 Yesu wa aiyaug shab za: phaug' tau" rure ba lao" yao: re- Nao wa Mao"So: Mung"dan: we' mataung" va: lo:ngad: ra"- ga: ta" ra". Ai: thao Yesu re khag' pe" re: mavae" myid: loko" ngad: ra". 35 Yesu wa Mao"So: yham mae mho" shid' na: au:- yao: bam re Meshia wa Davi yao: zo: ngad: ra" ga: Tung" Pho" qe khoru: mung: qo" ta" ko" ra" i? 36 Ni" gyevo jham re ni" khyid vo: khug mae ngo mato: to: byid: wa- nga" lo, yo shad' mae zaung: jo, wa, ga: ai: Asang wa nga" Asang re ta" ra"- ga: Davi wa Gyang" Lho" Byo vao: jaung" mung: ta" ra". 37 Airumung: Davi yao: yao: lhao"- Meshia re Asang ga: ta" ngad: re wa Meshia wa khoru: mung: Davi myid:zo: gai: ngad nae" i? ga: ta" ra". Byuphung: mo" wa Yesu mho" dao: re ngaui bau: za: tae" gyo" yu: ako". 38 Amung: Yesu wa mho" shid' zo" re"- Tung" Pho" qere lha" ge,- yao: bam wa bau: qhang ve; pye' mung: su" qin" nug mo, gai jao: gyo: mae lham: phug' myao: byid: nae" o mo,- 39 Tarha" Jung Yham mae gatau jaung: to" ra" tao" khau" mae zaung nug mo, ngad: ako". 40 Yao: bam wa cug' mo" qe: yham zai yokhyao: jham re phyo' zo: lhad' zo" ci mung: su qu" gai nae" geim kad' akyu" qhang sho' mho' mhug' mo, ngad: ako". Yao: bam wa je: qi" ra" dao: phyid' ru qhug' li" genae"- ga: ta" ra". 41 Ai: thao Yesu wa Alu: ban" qhid' au: mae zaung: jo, mung: mo, byu qe aimae Alu: ngaui li" ke' rure qu" na: ra". Jo,nho" qo" ra" mo, myo: sho' wa Alu: ngaui myo: sho' li" ke' ako". 42 Masho: majhin myaung sho" ra" cug' mo" myhi" dayaug re: Alu: ban" jo; khyo li" mung: byad san: dakye' we' man" ra" gyid: ngaui shid' kye' re li" ke' ra". 43 Yesu wa yao" mho"zo: qere khai: yu mung: yao: bam re- Ngo naonhaung" re dang za: ta" ru wa Ce: masho: majhin myaung sho" ra" cug' mo" myhi" wa Alu: ban" mae Alu: ngaui li" ke' ra" mo, alhab' tho' mae" Alu: ngaui je: ke' ava". 44 Pe"mung:ga"re yao: bam alhab' wa yao: bam magan: mago" rumae" jan" ra" gu: re li" ke' byid' ako". Ce: cug' mo" myhi" kam" wa yao: masho: majhin myaung sho: ngadqere: qo" ra" gu: alhab' yao: zo: nae" alhab' re li" ke' pye' ava"- ga: ta" ra". 1 Yesu wa Caung:pa" Yham mae" thug' lo" na: ra" au:- yao" mho"zo: qemae" dayaug wa yao: re- Mho" Pho" we"- Qu" wa, khoqhi" gyag: ra" laug zang jham we' laug yham jham ngad: ra" i? ga: ta" ra". 2 Ailao" Yesu wa yao: re Nao ce: laug yham qi: jham re myao: i? Ce: laug yham jham mae" laug zang jham dazang re: madang losho' byo; gyo" lo" byaug genae"- ga: ta" ra". 3 Ai: thao Yesu wa Zhan:lun: bam dao mae yao: za: Caung:pa" Yham shad' khyo myo, nho qang yang: zaung: jo; ra" au:- Petru- Yaku- Yohan we' Andre bam yao: jhao" li" mung:- 4 Ceru khonhae" boe" li" zai ngad: i? Aijham boe" nae" ngad lao" pe" ja" ve, lho boe" thug' li" nae" laug i? Ngonhaung" re ta" kyo: la, ga: ta" ako". 5 Ailao" Yesu wa yao: bam re Naonhaung" re khag' yang re: majhui" pyag' lo" geshao:- lha" ge,- 6 Byu myo: sho' nga" mang vin yang: thug' li" mung:- ngo wa Meshia ngad va" ga: ta" yang: byu myo: sho' re jhui" pyag' lo" byaug: li" genae". 7 Amung: gyekhe' ru we' gyekhe' lau thoe jham re the' gyo: gelao" naonhaung" dagyo" din ge,- ai: gu: wa boe" li" ca" ra"- ngadqere: ai: lo" thao" ru wa mangad: shingad: ra". 8 Byu damyu" we' damyu"- mung"dan: dalam: we' dalam: gye jho" zin" li" genae"- Jo, qo gatau tau mae myid lab: lab' li" nae"- bao" khug' khug' li" nae"- cejham wa qug: khai" ru aqhid ngad: ra". 9 Naonhaung" kam" wa yao: yao: lha" yang: na ge,- Khorumung: ga" re yao: bam wa naonhaung" re taung" yu mung: tarha" yung" khyo ab byid' pye' li" genae". Tarha" Jung Yham mae naonhaung" re be; li" genae"- Zug: qe we' kho:kham qere Ngaui Bau" Lau Dao: ta" kyo: nae" qhid' mae" nga" mathao mae naonhaung" wa yao: bam: qhid' kheim: mae ye; jo, qo: li" genae". 10 Amung: ai: Ngaui Bau" Lau Dao: re byumyu" alhab' re sao qhid' kho" kyo: ca" nae" ngad: ra". 11 Naonhaung" re taung: mung: tarha" yung" khyo ab: pye' gelao"- pe" ta" nae" laug ein: gau: qhid' khae" yang: damyid: ci ge,- Ayo, joe" lao" naonhaung" re jhau nhao: ru we' dakhyo: jhau ge,- khorumung:gare ai: dao: jham wa naonhaung" jhau: ru mangad: Gyang" Lho" Byo jhau: ru ngad: ra". 12 Alao" yao: mao: wa yao: nhaung: re shid nae" khyo jhui" ab: pye' li" genae"- yao: zo: qe wa yao: myhi" yao: pho" qere gye kad' mung: se' nhao: li" genae". 13 Amung: nga" mang mathao mae byu alhab' yang naonhaung" re nghang" pye' li" genae" ngadqere: lo" thao" joe" sho' zang: qhao" yaug wa khyad' yu: ru qhug' nae". 14 Amung: ai: qu" din sho' ra" maca' majhad' wa mato: ang: ra" jo, qo mae to" to" rure naonhaung" the' myao gelao" (nghe' na yaug wa ba: gyo: vashao:) Yuda mung" mae na: ra" mo, wa bam khyo tao" phao geshao:- 15 Yham khaung dao mae na: ra" yaug wa gyo" lo" mung: yham khug mae" zai daja: ja: re lo" yu: ciphao nae" qhid' mae" yham khug khyo mavao lo" loshao:- 16 Yothaung: din" mae na yaug re: yao" bau: qhang yu: ci nae" qhid' mae" yham khyo madam: tug' lo vashao:- 17 Ai: ba na gyo: mae gaung la: mo, we' zoshao nug' nau" ci mo, wa gyai qug: genae". 18 Airumung: ai: ayo, wa gyo, yo, re mangad: nae" qhid' mae" Mao"So re akyu" mho' na ge,- 19 Pe"mung:ga"re Mao"So phan" to" ra" mug: myid aqhid mae" ana" ba joe" sho' maboe" qu" shi" ru we' thao phyao: re: maboe" nae" ra" qug: khai: khyag' qhui: ru wa ai: ba na gyo: mae boe" thug' li" nae". 20 Amung: ai: ayo, ba na jham re Mao"So: yang maqhaung" pye' ngad: re wa khag' re: qo" daui: na nae" mangad:- ngadqere: yao: khyin: yu: to" ra" mo; qhid' mae" ai: ba na jham re Mao"So qhaung" pye' byid' ra". 21 Byu dayaug yaug wa naonhaung" re Qu" ge,- cetau mae Meshia na: ra"- thoetau mae Meshia na: ra" ga: ta" ngad: re dalam" ge,- 22 Pe"mung:ga"re Meshia apyag' qe we' Lapa apyag' qe thug' li" li" genae"- gai: boe" ngad: re yao: bam wa khyin: to: va" mo, re lhao"- qo" jhui" pyag' yu nae" qhid' mae" ve, lho jham we' mug' pho: mau" zo" jham kad' qhu" li" genae". 23 Naonhaung" kam" wa lha" yang: na ge,- ngo wa maboe" li" shimae" naonhaung" re gau: qhid' khae" yang: cegu: alhab' ta" to: va". 24 Amung: ai: qug: khai: khyag' qhui: ru boe" thao re ba wa no; byaug nae"- lho" re: mazho: byaug lo nae". 25 Kyi jham mug:gaung mae" byid: gyo" lo" byaug mung:- mug:gaung mae" qam: so' jham laui" nin" li" genae". 26 Ailao" Byu: Yao: Zo: wa qam: so' phungbao we' daga" jham thaui: khug mae li" rure yao: bam myao genae". 27 Ai: thao Byu: Yao: Zo: wa mug: lagyo: jham re- mug: thao" myid thao"- mug: myid byid khyug geim" khyo nhao: ke' mung: yao" yang khyin: yu: to" ra" mo, re cao" zhang: yu: li" genae". 28 Pho'ham" gae re qu" yang: zhao: yu ge,- Pho'ham" gae mae" anyaug thug' li" mung: vho' nau" tad' li" lao"- zin vao kheim: joe" li" na va" rure naonhaung" ba: ako". 29 Ai we' dakhyo:- aijham boe" lo: na: rure naonhaung" the' myao gelao"- ayo, joe" li" va" rure naonhaung" ba: li" genae". 30 Ngo naonhaung" re dang za: ta" ru wa- Ana" na: jo; ra" byu ceqae" alhab' mashid shire aijham alhab' boe" lo: li" nae". 31 Mug:gaung we' myid gaung lai: lo" byaug ngadqere: nga" dao: wa khonhae" re: malai: lo" nae". 32 Ngadqere: ai: ba na we' yo, khyin: re Mao"So mae" je yang: khag' re: maba- Mug:gaung dao mae na: ra" mug: lagyo: jham we' ai: Yao: Zo: lhao" maba gengad: ra". 33 Ai: ba na we' yo, khyin: khonhae" joe" li" nae" rure naonhaung" maba: to" ruyang lha" mung: gyang: gyang: za: lhaug' na ge,- 34 Amung: aiwa byu dayaug yao: yao" yham mae" gatau: mung" khyo gyaung: su" lo" nae" ngad lao"- yao" jeim qere dayaug we' dayaug yao" mau" we' yao: yham mau" re pyo: to: byid: co' mung:- kham: lhaug' yaug re lha" yang: lhaug' na nae" qhid' mae" amyin" byid: co' ru we' dau: ra". 35 Pe"mung:ga"re ai: yham sang wa cad' sham" zo" re la,- gae gaung: myi: re la,- qo, teim: myi: re la,- ne, seim re la,- khonhae" joe" lo nae" ru naonhaung" maba: to" rumung: lha" yang: lhaug' na ge,- 36 Amung: yham sang nyag din taung" joe" lo: au: naonhaung" yab: myhid' jo; rure malo: myao nae" qhid' mae" lha" ge,- 37 Ngo naonhaung" re ta" ru we' dakhyo: alhab' re ta" ru wa- lha" yang: lhaug' na ge,- ga: ta" ra". 1 Lai co' Poe we' Man" Make' Poe joe" nae" shid' ba ca" shi" au:- khinjaung qi: qe we' Tung" Pho" qe wa Yesu re sae za: taung" yu mung: se' pye' nae" qhid' mae" pha,jhi" khyug' na: ako". 2 Ngadqere: yao: bam wa mo, byu qe malhun" li" geshao:- poe ba na gyo: gu: mae makad' gejhao" ga: jho" ta" ako". 3 Yesu wa Bethani mae mao gae: boe" qu" ra" Simon: yham mae zozo" na: au:- myiqe: dayaug wa gyai phug' de; ra" Mu Ra Na: Du: xau laug gyang" thaug' dathaug' cili" mung: Yesu au: mae ai: xau li" vhe' sheim: byid' ra". 4 Ai: tau mae na: ra" mo, damyo" wa aire nhag' qu" yo" ru we'- pe"mung: ai: xau re amyid: avho: kad' pye' ra" i? 5 Ai: xau re ngaui kye' sam yo je mae aung: mung: myaung sho: mo, re qo" gae byid: zai ngad: ra" ga:- yao: cao: jho" ta" ru we' ai: myiqe: re qobo vhin: ako". 6 Ailao" Yesu wa- yao: yao: sae za: na shao:- naonhaung" yao: re pe"mung: khin jang: na ko" i? Yao: wa ngore gai: ra" mau" kad' byid' ava". 7 Pe"mung:ga"re myaung sho" ra" mo, wa khonhae" re: naonhaung" we' daga" za: na: ako". Ngadqere: ngo wa naonhaung" we' khonhae" re: abang mabyid na: jo, nae" mangad:- 8 Yao: kam" wa yao: qo" gai: kad' ra" gu: kad' ava"- yao: wa nyhab' pye' nae" qhid' mae" nga" gaung re gau: qhid' khae" yang: xau gyad byid' ava". 9 Airumung: ngo naonhaung" re dang za: ta" ru wa Ngaui Bau" Lau Dao: re kho" kyo" lo" ra" myid gye, geim" khyi" khao: ngo" mae ce: myiqe: re beim: so: nae" qhid' mae" yao: kad' ra" mau" zo" re ta" kyo" li" genae"- ga: ta" ra". 10 Ai: thao daxe: shid' yaug mae bo: ra" Yuda Iskarud wa Yesu re ab byid' pye' nae" qhid' mae" khinjaung qi: qejhao" thug' ye" lo" ra". 11 Yao: bam wa yao" dao: re the' gyo: gelao" ngaui mung: yao: re ngaui byid: nae" ga: dao:so: byid' ako". Yuda wa Yesu re ab byid' pye' nae" khoau: yo" nae" rure qho: na: ra". 12 Ai: Lai co' poe xeim: yao nau" re se' ra" Man" Make' mug Poe ba na joe" nae" daba kyo shi" au:- yao" mho"zo: qe wa Yesu re Ngonhaung" wa ni" qhid' mae" Lai co' Poe myi" xeim re nao ngonhaung" re khotau mae yenyhang" seim" to: nhao nug: i? ga: myid' ako". 13 Ailao" Yesu wa yao" mho"zo: shid' yaug re- Ni" shid' zo: vogaung: khug khyo vao ye: ge,- Qid am vo; ci: ra" yauggai dayaug wa ni" shid' zo: re lham: tug: yu: li" nae". 14 Yao" thao cao" lo" mung: yao: vao lo" ra" yham mae" yham sang re- ngo nga" mho"zo: qe we' daga" Lai co' Poe myi" xeim zo: nae" bang" do, qe, khai: mae ngad: ra" i? ga: Mho" Pho" myid: nhao: ke' ra" ein: ta" ge,- 15 Ailao" yao: wa ni" shid' zo: re nyhang" seim" jin" to: va" tho' pyae mae" qe, mo" daqe, re ceim" shid' byid' li" nae" Ai: qe, mae ngonhaung" qhid' mae" myi" xeim yenyhang" to: ge,- ga: pin mung: nhao: ke' ra". 16 Mho"zo: shid' zo: wa thug' ye" lo" mung: vogaung: khug khyo vao ye" lo" ko" re- yao: shid' zo: re: Yesu ta" ke' ru we' dakhyo: yemyao gelao"- Lai co' Poe myi" xeim re yenyhang" ako". 17 Ana" cad' sham" zo" re Yesu wa mho"zo: daxe: shid' yaug we' daga" joe" lo: ra". 18 Yao: bam zaung: jo, mung: zozo: jaung: mae zo zo" na ko" au: Yesu wa- ngo naonhaung" re dang za: ta" ru wa- ngo we' zo zo" na: ra" naonhaung" mae" dayaug wa ngore gyevo: lo, khyo ab byid' pye' li" nae"- ga: ta" ra". 19 Airumung: yao: bam wa nhag' gyo" kaug' ru we' dayaug: thao dayaug Yesu re- Ai: yaug wa ngo ngad nae" i? ga: myid' ako". 20 Yesu wa Ai: yaug wa daxe: shid' yaug mae bobo mung: ngo we' daga" dakhug' mae za: mug jam zo: yaug ngad: ra". 21 Pe"mung:ga"re Jham: Mugsug' mae tung" to" ru we' dakhyo: Byu: Yao: Zo: wa shid kham: nae"- ngadqere: Byu: Yao: Zo: re gyevo: lo, khyo ab byid' pye' ra" yaug wa byuxa:vaqoe, qhug' nae"- ai: yaug wa makhau: li" ngad: re yao" qhid' mae" je: gai zai ngad: ra"- ga: ta" ra". 22 Amung: yao: bam zozo" na ko" au: Yesu wa mug re yu: yu yang:- Mao"So re jeju bin: caung: byid: lao" aire cug' phai" mung:- Yu zo: ge,- ce wa nga" gaung ngad: ga: ta" mung: mho"zo: qere gae byid' ra". 23 Yesu wa sabyi keim rere: yu: yu mung: Mao"So re jeju bin: caung: byid: lao"- mho"zo: qere byid' ra". Yao: bam alhab' ai: keim mae" shaug' ako". 24 Yesu wa- Ce wa byu myo: sho' mo; qhid' mae" sheim: pye' ra" Mao"So: dao: thang" re dazid thaung" te' to" ra"- nga" sa: ngad:. 25 Ngo naonhaung" re dang za: ta" ru wa- Mao"So: Mung"dan: mae sabyi asag' re ngo qhug' shaug' ra" ba na joe" sho' ngo wa ce: sabyi re khonhae" re: dam: shaug' nae" mangad:- ga: ta" ra". 26 Ai: thao yao: bam wa caung: nghaui" dalam: bin: caung: lao" Zhan:lun: bam khyo thug' ye" lo" ko" ra". 27 Yesu wa yao: bam re naonhaung" alhab' mo, ngore to: co' mung: tao" phao: byaug genae"- pe"mung:ga"re Jham: Mugsug' mae Mao"So wa yao zaung" yaug re se' mung: yao jham wa byo: sin" lo" byaug: li" genae"- ga: tung" to" ra". 28 Ngadqere: ngo daui: to" li" thao re naonhaung" qhid' au: mae Galile khyo ye" lo" na: li" nae"- ga: ta" ra". 29 Ailao" Petru wa- yao: bam alhab' mo, nao re phao: cug' to: co' gengadqere: ngo wa nao re khonhae" re: maphao: cug' to: co' nae"- ga: Yesu re ta" ra". 30 Yesu wa Petru re- ngo nao re ta" ru wa ana" myi yao: qo, shid' kheim: mateim shire nao wa ngore sam lhang ha: pye' li" nae"- ga: ta" ra". 31 Ngadqere: Petru wa- ngo nao we' daga" shid qo: li" ngadqere: nao re ngo maha: pye' nae" ga: je yang: phin" ta" ra". Mho"zo: gaje alhab' mo, re: ai we' dakhyo: ta" ako". 32 Yesu we' mho"zo: qe wa Getseman ga: mhang" ra" jo, qo khyo joe" ye" ako". Yesu wa yao" mho"zo: qere- ngo akyu" mho' na: au: naonhaung" cemae zaung: jo, lao: ge,- ga: ta" co' ra". 33 Amung: yao: wa Petru- Yaku we' Yohan bam re yao: we' daga" jhui" ye" lo" ra". Yesu wa gyai qi: sho' myid myo: myid laug qug: khai: qhug' ra". 34 Alao" yao: wa yao: bam re- Nga" nhag' lam: shid naeqhi" yao: gyai kaug' qhui: ra"- naonhaung" cemae lha" mung: lao" na shige,- ga: ta" ra". 35 Yesu wa aimae" dajhid' zo: lai: ye: mung:- myid gaung mae yegoe; jo, yang:- Gai: boe" ngad: re wa ai: yo, khyin: lai: lo" shao: ga:- 36 Aba- Pho" we"- nao wa alhab' re qo" kad' boe" yaug ngad: ra". Amung: ce: qug: khai: khyag' qhui: ra" keim re ngo mae" yu: pye' byid: la,- ngadqere: ngo o: ra" khyo" mangad:- nao o: ra" khyo" ngad vashao: ga: akyu" mho' ra". 37 Yao: dam: tug' lo: re yao: bam yab: myhid' jo; rure lomyao lao"- Yesu wa Petru re- Simon we"- nao yab: myhid' jo; i? Nao wa yo, qug dalam: khalhao" maqo" lhaug' na i? 38 Naonhaung" wa ju" phyo' ru khyo magyo" lo" nae" qhid' mae" lha" mung: akyu" mho' na ge,- byo wa nug kao bau ngadqere: gaung sho: wa qam: nang" ra". 39 Alao" yao: dam: ye: mung: azhao: mae" dao: we' dakhyo: akyu" dam: mho' ra"- ga: ta" ra". 40 Yao: dam: tug' lo: re- yao: bam wa myo, qid gyai la: geyang: yab: myhid' jo; rure lodam: myao: ra". Ailao" yao: bam wa Yesu re khoru: dam: phaug' tau: nae" maba logengad: ra". 41 Yesu wa sam lhang ein: lhang dam: tug' lo lao"- yao: bam re naonhaung" ana" joe" sho' yab: myhid' mung: no" na genhaung i? Ga" va"- Yo, khyin: joe" va"- Qu" ge,- Byu Yao: Zo: wa qobo jab qenho: lo, khyo ab: pye' ru qhug' ava". 42 To" ge,- ngonhaung" ye" lo" gelang: se,- Qu" ge,- ngore ab byid' pye' yaug wa joe" li" na: ava"- ga: ta" ra". 43 Yesu airu: jhau: na shi" au:- daxe: shid' yaug mae bobo ra" Yuda wa khinjaung qi: qe- Tung" Pho" qe we' lau: de, au: jhaung qeyang nhao: ke' ra" shae tam"- thaung kang ci: ra" byuphung: we' daga" joe" li" ra". 44 Yesu re ab byid' pye' yaug wa- ngo bobaug baug: ra" yaug wa naonhaung" o: ra" yaug ngad: ra"- yao: re taung" yu mung: nyang" za: zaung" yang: jhui" lo" ge,- ga: yao: bam re ave, byid' to" ra". 45 Amung: Yuda wa joe" li" we' Yesu jhao" te' ye" lo" mung:- Mho" Pho" we"- ga: ta" mung: bobaug yebaug: ra". 46 Ailao" yao: bam wa Yesu re taung: mung: tang za: zaui" zag: ci: ako". 47 Ai: ayae mae ye; jo; ra" mo, mae" dayaug wa yao" shae pyang: she: yu yang: Khinjaung Yin" nho: jeim pho" dayaug: nokhye' qam" phyid' khyo" pye' byid' ra". 48 Yesu wa yao: bam re- Damya, re taung" ruru: ngore taung: nae" qhid' mae" shae we' thaung kang we' li" ko" i? 49 Ngo wa ba khao: ngo" Caung:pa" Yham mae mho" shid' mung: naonhaung" we' daga" na ngad yang: re: naonhaung" ngore mataung: ko" ngad: ra". Ngadqere: Jham: Mugsug' wa jab byang" lo ca"- ga: ta" ra". 50 Ailao" mho"zo: qe alhab' mo, wa Yesu re to: co' mung: tao" phao: lo" byaug: ako". 51 Jid: mo" pin: dau za: yang" ci: ra" zolau: dayaug wa Yesu thao cao" ye" lo" ra". Yao: bam yao: re taung: nae" seim" gelao"- 52 Yao: wa jid: mo" pin: dau re to: co' mung: gaung pyad' tao" phao: lo" ra". 53 Ai: thao yao: bam wa Yesu re Khinjaung Yin" yham khyo jhui" ye" ako". Khinjaung qi: qe alhab' mo, we' Tung" Pho" qe alhab' wa ai: mae zang" ham: na: bam: ako". 54 Petru wa Khinjaung Yin" nho: yham vang" khug khyo joe" sho'- va: va: mae" Yesu thao cao" ye" ra". Yao: wa khinjaung yin" qe: gug: gam qe we' daga" zaung: jo, mung: myikhyeim" mae myi: bogao: na: ra". 55 Khinjaung yin" qe we' Yuda Tarha" qe, do, geim" mae" lau: de, qe alhab' wa Yesu re qo" se' pye' nae" qhid' mae" sagse: qho gengad yang: re: yao: bam mathe' qho ko" ngad: ra". 56 Sagse: myo: sho' mo, wa Yesu re gye kad' yang: mhug' ta" ako". Ngadqere: yao: bam: dao: majho" zhaung: ngad: ako". 57 Ailao" byu damyo" to" ye; li" mung: yao" khyo re sagse: mhug' kham mung:- 58 Ceyaug wa byu: lo; yang kad' to" ra" ce: Caung:pa" Yham re phyo' pye' mung: sam ba kyo lao" byu: lo; yang makad' ra" Caung:pa" Yham re ngo kad' nae"- ga: yao: ta" rure ngonhaung" the' gyo: va"- ga: ta" ako". 59 Ngadqere: yao: bam: sagse: dao: jham re: majho" zhaung: gengad: ra". 60 Ailao" Khinjaung Yin" wa mo, phaung gaung: mae" to" li" mung:- Yesu re nao dakheim: re: matau: i? Ni" khyo re yao: bam sagse: kham: na ko" ru wa khoru: i? ga: myid' ra". 61 Ngadqere: Yesu wa dakheim: re: matau: lo: sae za: na: ra". Alao" Khinjaung Yin" wa Yesu re nao wa ngaui lho" ra" Mao"So: yao: zo: Meshia ngad: i? ga: dam: myid' ra". 62 Yesu wa Ngo ngad:- Byu: Yao: Zo: wa phung qam: so' nho: lo, yo shad' mae zaung: jo; ru we' mug:gaung: jham thaui: we' daga" li" na: rure the' myao: li" genae"- ga: ta" ra". 63 Khinjaung Yin" wa yao" adao: bau: qhang lao" cad' pye' mung:- ngonhaung" pe" sagse: qo lo" i? 64 Yao: Mao"So re jung" gaui: rure naonhaung" the' gyo: vako" ra". Naonhaung" khoru: myid ko" i? ga: ta" ra". Yao: bam alhab' wa Yesu re qobo qo" mung: se' pye' qhug' ang: ra" yaug ngad: ra"- ga: ta" ako". 65 Damyo" wa Yesu re khata: phoe" sheim: byid' ako". Yao" myo,khung: re thab' pye' byid: yang: zhab' thaung: mung: Nao re khag' zhab' thaung" rure tag: qu" wa,- ga: ta" ako". Khinjaung yin" nho: gug: gam qere: yao: re pyo' ako". 66 Petru wa ai: vang" khug mae na: jo; au:- Khinjaung Yin" nho: okaung myiqe: nau" dayaug li" mung:- 67 Petru myi: gao: na: rure myao lao"- yao: re zhaug' qu" mung: Nao re:- Nazared mae" Yesu we' daga" lhaung" na: ra" yaug ngad: ra"- ga: ta" ra". 68 Ngadqere: Petru wa aire ha: pye' mung:- Nao ta" ru ngo maba- Gyo: re: maba: gyo:- ga: ta" ra". Amung: yao: wa vang" kham: nhad' khyo ye" lo" ra". 69 Ai: okaung myiqe: nau" yao: re dam: myao lao"- ayae mae ye; jo; ra" mo, re- Ceyaug re: yao: bam: phung: mae" dayaug ngad: ra"- ga: dam: ta" ra". 70 Ngadqere: Petru wa aire dam: ha: pye' ra". Ailao" ai:thao dazab gai re- ai: ayae mae ye; jo; ra" mo, wa Petru re- Gaigai: yao: nao wa yao: bam: phung: mae" ngad: ra". Pe"mung:ga"re nao wa Galile byu ngad: ra"- ga: ta" ako". 71 Ailao" Petru wa nhang: myan" nhang: thoe we' Naonhaung" ta" ra" byu ceyaug re ngo maba- ga: jham tang: yang: ta" ra". 72 Ailao" jao" qo, shid' kheim: ein: kheim: teim: ra". Petru wa Yesu yao: re Qo, shid' kheim: mateim shire nao ngore sam lhang ha: pye' li" nae"- ga: ta" ra" dao: re dam: myid: beim" li" mung: ngug: ra". 1 Ne, seim no' mae" khinjaung qi: qe wa lau: de, qe- Tung" Pho" qe- Yuda tarha" qe, do, geim" we' hin hin za: byin phyo: jho" qham: ako". Ai: thao Yesu re taui: mung: Pilad re yeshe: ab byid' ako". 2 Pilad wa Yesu re Nao wa Yuda kho:kham ngad: i? ga: myid' ra". Ailao" Yesu wa yao: re- Aiwa nao ta" ru ngad: ra"- ga: phaug' tau" ra". 3 Khinjaung qi: qe wa Yesu re qobo myo: sho' ja: zhaug' ako". 4 Aimung: Pilad wa Yesu re- Nao pe" re: maphaug' tau: i? Yao: bam nao re khonho" gye kad' qobo zhaug' na: rure qu" wa,- ga: dam: myid' ra". 5 Ngadqere: Yesu wa pe" dakheim: re: maphaug' tau: ngad: ra"- aimung: Pilad wa mug' ra". 6 Pilad wa Lai co' Poe khao: ngo" mae- mo,byu qe mho' ra" kyam: byu dayaug yaug re yao: bam: qhid' mae" lhaung" nhao: ke' byid' ra". 7 Ai: gyo: mae geim lau to" rumae byu se' mung: thaung: khug mae taung" lhaung" to" ra" geim lau qe: phaung mae Baraba ga: mang: ra" byu dayaug bo: ra". 8 Mo, byu qe wa li" mung: Pilad re- yao: khonhae" re: lhaung" kad' byid' ru we' dakhyo: kad' byid: nae" qhid' mae" mho' ako". 9 Ailao" Pilad wa yao: bam re- Ngo wa Yuda kho:kham re nhao: ke' byid: nae" naonhaung" o ko" i? ga: myid' ra". 10 Pe"mung:ga"re khinjaung qi: qe wa Yesu re myid nug: mung: yao" lo, mae li" ab byid' to: ko" rure yao: ba yang: ngad: ra". 11 Ngadqere: khinjaung qi: qe wa mo,byu qere Yesu atha" Baraba re nhao: ke' byid: nae" Pilad re mho' nae" qhid' mae" poe: to" ako". 12 Pilad wa yao: bam re- Airulao"- Yuda kho:kham ga: naonhaung" yang mhang" ra" yaug re ngo khoru: kad' nae" i? ga: dam: myid' ra". 13 Yao: bam wa- yao: re pyao: zang mae jin" se' pye' wa,- ga: dam: zag: hug' ako". 14 Pilad wa yao: bam re- Pe"mung: i? Yao: pe" ja" qobo shad' lhoe" va" ra" i? ga: ta" ra". Ngadqere: yao: bam alhab' mo, wa- yao: re pyao: zang mae jin" se' pye' wa,- ga: je: zag: hug' ako". 15 Ailao" Pilad wa mo, byu qere nhag' dag nhao nug yang: Baraba re nhao: ke' byid' ra". Yesu re wa be, mung: pyao: zang mae jin" se' pye' nae" qhid' mae" ab byid' ke' ra". 16 Gyezo: jham wa Yesu re Pretori ga: mhang" ra" mung" zug: pho" yham mo" vang" khug khyo jhui" vao lo" mung:- gyetab geim" re khai: zhang" to" ako". 17 Yao: bam wa Yesu re bau: qhang amo, vhe' byid: mung: zau: kyao: yang nag: to" ra" maug re yao" au: mae zhaung: byid' ako". 18 Amung: yao: bam wa Yuda qenho: kho:kham we"- Kao qhang so' qhang vashao: wo"- ga: jung" nyhe' dao: we' phug' myao: byid' ako". 19 Alao" yao: bam wa thao: khyaung" yang Yesu au: re be, mung: khata: phoe" sheim: byid' ru we' pad' thaug' thaug' yang: yao: re goe; pa" ako". 20 Yao: bam wa Yesu re nug: khyo: bin: jung" pye' lao"- bau: qhang amo, re khyad' pye' byid: mung: yao" mai bau: re dam: vhe' byid' ako". Amung: yao: bam wa yao: re pyao: zang mae jin" se' pye' nae" qhid' mae" jhui" thug' lo" ko" ra". 21 Alao" yao: bam wa seyo: vogaung: mae" li" mung: su" lai: lo" na: ra" Simon ga: mang: ra" yaug re Yesu nho: pyao: zang re vo, byid: nae" lham: deim" zag: nhao: ako". (Simon wa Kureni mang: byu ngad mung: Alexanda we' Rufu tao: yao: pho" ngad: ra".) 22 Yao: bam wa Yesu re Golgotha ga: mhang" ra" jo, qo khyo jhui" ye" ako". (Golgotha ga" ru wa- au: gao: gye, jo, qo ga" ru ngad: ra".) 23 Yao: bam wa Mura we' lhag' to" ra" sabyi qang: Yesu re byid: jhaug' ako". Ngadqere: Yesu mashaug' ngad: ra". 24 Amung: yao: bam wa Yesu re pyao: zang mae jin" se' pye' ako". Yao" mai bau: jham re wa gae bam khyo" to: mung: khoyaug khobam yu ang: rure pha" be, yang: jho" gae: yu: ako". 25 Yesu re pyao: zang mae jin" pye' ra" ayo, wa- ne, kao gug yo, qug: mae ngad: ra". 26 Pyao: zang dao mae Yuda qe: kho:kham- ga: yao: re qobo zhaug' ra" khyo" tung" te' to" ako". 27 Amung: yao: bam wa yao: we' daga" damya, shid' zo: rere: yao" lo, yo shad' mae dayaug- yao" lo, kaung: shad' mae dayaug pyao: zang mae jin" te' to" ako". 28 Jham: mugsug' mae Yao: wa tarha" macao" ra" mo; japhin: mae boke' ru qhug' ra"- ga" ra" jham: dao: wa ceru: jab byang" lo: ra". 29 Khyo mae su" lai: lo" mo, re: Yesu re jung" ru we' au: nghoe" nghoe" mung:- No"- Caung:pa" Yham re phyo' pye' mung: sam ba gyo: mae dam: kad' nae" ga: yaug we"- 30 Ni" gaung re naoyao: khyad' yu mung: pyao: zang mae" gyo" lo wa, mhao"- ga: ta" ako". 31 Ai we' dakhyo: khinjaung qi: qe we' Tung" Pho" qere: Yesu re jung" mung: su gaje qere yao: khyad' yu: ra"- ngadqere: yao" gaung re wa yao: maqo" khyad' yu ngad: ra". 32 Ngonhaung" the' myao mung: lam" nae" qhid' mae" Israel kho:kham Meshia wa ai: pyao: zang mae" gyo" lo vashao:- ga: yao: cao: jho" ta" ako". Yao: we' daga" pyao: zang mae bojin" te' to" ra" damya, shid' zo: re: yao: re jung" pye' ako". 33 Amung: ba khaung tau yo, mae" myi" thao sam yo, qug joe" sho' damung" geim" no, sang: kyid mug: cad' byaug: ra". 34 Myi" thao sam yo, qug mae Yesu wa thoe qi: we' Eloi- Eloi- Lema sabagthani?- ga: hug' ta" ra". Aiwa Nga" Mao"So- Nga" Mao"So- Pe"mung: nao ngore shapye' ra" i? ga" ru ngad: ra". 35 Amung: ai: nhae mae ye: jo; ra" mo, damyo" aire the' gyo: gelao"- Qu" ge,- yao: wa Elia re khai: na: ra"- ga: ta" ako". 36 Byu dayaug wa tao" ye" lo" mung:- qid mug sad' mae sabyi jhin qang: dag sho' tag' yu mung: gyang: yao: au: mae thug' ze; te' ci yang:- Yesu re byid: jhaug' zo" re" Elia yao: re li" khyo" yu nae" la,- mali" khyo" yu nae" la,- ngonhaung" qu" na gelang:- ga: ta" ra". 37 Yesu wa thoe qi: zang hug' mung: kao gyo" lo" ra". 38 Ailao" Caung:pa" Yham mae" qe, kyo pin: lung: wa aau: mae" aqao: joe" sho' shid' gao go; lo" byaug: ra". 39 Yesu airu: kao gyo" lo" rure yao" qhid' kheim: mae ye; jo; ra" gyezo: dayo re eib: ra" gyezug: pho" myao lao"- ceyaug wa gaigai: yao: Mao"So: yao: zo: ngad: ra"- ga: ta" ra". 40 Myiqe: qe damyo" wa va: mae" qu" na: bam: ako". Aibam: phaung mae- yao: Galile mung" mae na shi" au:- yao" thao cao" mung: yao: re caung da" byid' ra" Magadala Mari- Yaku ngai we' Yoseb tao: yao: myhi" Mari we' Salome bam bobo: ako". 41 Alao" Yerusalem khyo yao: we' daga" do, lo: ra" gatau myiqe: myo: sho' mo, re: bobo: ako". 42 Myi" thao mug: cad' lo" na: au: Arimathe vobyu Yoseb joe" li" ra". Yao: wa Yuda tarha" qe, do, mae bobo yaug ngad: ru we' phug' myao: tho' ra" byu dayaug ngad: ra". Mao"So: Mung"dan: joe" li" nae" rure lao" na: ra" yaug re: ngad: ra". 43 Ai: ba wa (Dugno: Ba qhid' mae" ba) Seim" Jin" ra" Ba na ngad: ruyang Yoseb wa magyaug mavae Pilad jhao" vao ye: mung: Yesu mao gaung re yemho' yu: ra". 44 Ailao" Pilad wa Yesu kao gyo" va" rure the' gyo: lao"- yao: wa gyezug: pho" re khai: yu yang: Yesu kao gyo" ru khomyhao" ngad va" rure myid' ra". 45 Pilad wa gyezug: pho" ta" kyo" rure the' gyo: lao" Yoseb re yao" mao gaung yu: yu nae" akhang" byid' ke' ra". 46 Ailao" Yoseb wa jid: mo" pin: dau vai: yu mung: Yesu mao gaung re yekhyo" yu yang: jid: mo" pin: dau: yang bin: thab' lao"- laug thin mae kyaung" to" ra" laug khyaung lab khug mae ye:vhao" to: mung: laug zang qi: dazang: yang lab kham: re lhang" jhid' to" ako". 47 Yesu re nyhab' to" ra" jo, qo re Magadala Mari we' Yoseb: yao: myhi" Mari shid' zo: myao: ako".- 1 Dugno: Ba lai lao"- Magadala Mari- Yaku yao: myhi" Mari we' Salome bam wa Yesu mao gaung re gyad byid: nae" qhid' mae" sheim nae pyo" ra" xau vai: yu: ako". 2 Yao: bam wa Laban ba ne, seim no' ba thug' so' re lab khyo ye" ako". 3 Yao: bam wa ngonhaung" re lab khyaung nhad' mae" laug zang khag' yang tau: lhang" khyo" pye' byid: nae" laug i? ga: khyole; mae yao: cao: jho" ta" ako". 4 Yao: bam yequ" ke' ko" re laug zang wa tau: lhang" pye' to: va" rure myao: ako". Ai: laug zang wa gyai qi" ra". 5 Yao: bam lab khyaung khug khyo vao ye: we' mai bau: phyu ve; ra" zolau: dayaug lo, yo shad' mae zaung: jo; rure yemyao mung: yao: bam din: mug' byaug: ako". 6 Alao" yao: wa yao: bam re- Dadin: mug' ge,- naonhaung" wa pyao: zang mae jin" se' pye' ra" Nazared mae" Yesu re qho: na: ako". Yao: wa daui: to" lo" byaug va"- yao: Cemae mana lo:- yao: re lhang" to" ra" cejo,qo re qu" ge,- 7 Ngadqere: naonhaung" lo" mung: Petru we' mho"zo: qere- yao: wa Galile mung" khyo naonhaung" qhid' au: mae ye" lo" na: ga"- yao: naonhaung" re ta" to: va" ru we' dakhyo:- aimae naonhaung" yao: re yemyao: li" genae" ga" ein:- lo" ta" kyo: ge,- ga: ta" ra". 8 Yao: bam wa lab khyaung mae" thug' lo mung: tao" phao: lo" ako". Pe"mung:ga"re yao: bam wa din: nin" ru we' mug' hao" byaug: ako". Yao: bam gyaug geyang: khag' rere: pe" mata" kyo: ko" ngad: ra". 9 Myiqe: qe wa- Petru we' yao" byin cao: qejhao" ye: mung:- yao: bam re ta" ra" dao: jham alhab' re lang" ra" khyo" yao: bam re yeta" kyo" ako". 10 Ai: thao re Yesu wa yao" mho"zo: qere apyad ato khyad' yu: ra" gyang" lho" ru we' khonhae" re: daui: na: ra" lau dao: re ba thug' shad' mae" ba vao shad' jao: sho' yekho" kyo: nae" qhid' mae" nhao: ke' ra".] 11 Ngadqere: yao: bam wa Yesu daui: na: ga" rure we' Mari wa Yesu re myao va" ga" rure the' gyo: gengad yang: re: aire malam" ko" ngad: ra". 12 Ai: thao re Yesu wa seyo: vogaung: khyo su" ye" lo" na ko" ra" mho"zo: shid' yaug re gatau ve, bao khyo" yang yao" gaung na: qhu" ra". 13 Ailao" yao: shid' zo: wa dam: tug' phao: lo mung: dang: ra" gatau: mho" zo" qere ai: khyo lota" kyo" ako". Ngadqere: yao: bam wa aire malam" gengad: ra". 14 Amung: ai:thao re Yesu wa mho"zo: daxe: dayaug za: zozo" na ko" au:- yao" gaung na: qhu" ra". Yesu wa yao: bam re yao: shid: rumae" dam: daui: to" li" thao yao: re the' myao va" mo; dao: re mho"zo: qe malam" ko" ruyang yao: bam: lam khug: myid mabo: ru we' nhag' lam: qao: rure qeim: ra". 15 Ailao" Yesu wa yao: bam re Naonhaung" mug: myid geim" jao: sho' ye" lo" mung: byumyu" cao jab alhab' re ai: Ngaui Bau" Lau Dao: yekho" kyo: ge,- 16 Lam" mung: qid nyhab' kham: yu: ra" yaug khag' ngadqere: khyad' yu: ru qhug' nae. Alao" malam" ra" yaug khag' ngadqere: dao: phyid' ru qhug' nae". 17 Lam" ra" mo, wa- nga" mang khyo" yang yui jham re qo" khe' thug' pye' li" genae". Amung: gakai: lai mung: ra" dao: jham re qo" jhau: li" genae". 18 Yao: bam wa- lhao maui jham re taung" zaui: gengadqere:- shid ja: daug daja: ja: shaug' gengadqere: pe" maca" genae". Amung: no phyo: qhug' ra" mo; dao mae yao: bam: lo, kai: byid: lao"- no phyo: qhug' ra" mo, gai: shao: lo" li" genae"- ga: ta" ra". 19 Asang Yesu wa airu: mho"zo: qere bin: ta" lao"- yao: wa mug:gaung khyo to' yu: ru qhug' mung:- Mao"So: lo, yo shad' mae zaung: jo; ra". 20 Ailao" mho"zo: qe wa thug' ye" lo" mung: jo, qo khyi" khao: ngo" mae cao" kho" kyo" ako". Asang wa yao: bam we' daga" mau" zaui" qin" mung: mug' pho: ve, lho bobo byid' ra" khyo" yang ai: mungdao: re nyhad' tang byid' ra".
|