Luke
Luka1 Phug' myao" ra" Theophilu we"- Sao qhid' maqhid mae" yao: bam yao" myo,jid' yang yao: zhaug' the' myao mo, we' ai: mungdao: re kho" kyo" ra" mo; yang- 2 Ngonhaung" qhid' kheim: mae boe" lai: lo: ra" khyo jham re ngonhaung" re ta" zhao: kyo: vako" ru we' dakhyo:- mhomyi: tung" to: mo, myo: sho' na: ako". 3 Airumung: ngore: boe" li" ra" khyo alhab' re athai: atho' bin: myid' zhao: yu mung:- 4 Nao mho" zhao: yu va" ra" khyo wa gaigai: yao: dang: ra" khyo ngad: rure nao ba vashao:- adai: ato' jo jo za: ni" qhid' mae" tung" vhin: ke' re gai nae"- ein: ngo qo" myid: ra". 5 Yuda kho:kham Herod pyad mae khinjaung Abiya phung: mae bobo: ra" Zakari ga: mang: ra" khinjaung dayaug na: ra". Yao" yham sang myhi" wa Elizabed ga: mang yaug ngad: ra"- Elizabed re: khinjaung Arun" kaung mae" ngad: ra". 6 Yao: shid' tao wa Mao"So: amyin" dao: alhab' re mashad' manghung: phug' cao" na: rutao ngad mung:- Mao"So: qhid' kheim: mae yao: shid' tao geim" dan:man" ra" byu tao ngad: ako". 7 Ngadqere: Elizabed wa bug daung: ngad yang: yao: shid' tao wa zo: dau maqo" ko" ngad: ra"- yao: shid' tao geim" re: mao" avako". 8 Daba mae Zakari wa yao: bam: phung: ayab ang mung:- Mao"So: qhid' kheim: mae khinjaung mau" kad' na: au:- 9 Mao"So: qhid' kheim: khyo vao ye: mung: phan dao mae nae pyo" ra" sheim phad' ngaui" byid: nae" qhid' mae" khinjaung qe: thung" jo; ru we' dakhyo:- pha" be, yang: khyin: yu: rumae yao: ang: ra". 10 Ai: nae pyo" ra" sheim phad' ngaui" na: ra" yo, khyin: gyo: mae mo, byu qe wa taung gaung shad' mae akyu" mho' yang: na: ako". 11 Alao" Asang: mug: lagyo: dayaug wa nae pyo" ra" sheim phad' nghaui" ra" phan lo, yo shad' mae Zakari re li" ye; qhu" ra". 12 Zakari wa ai: mug: lagyo: re the' myao lao"- gyaug: din: pye' ra". 13 Ngadqere: mug: lagyo: wa Zakari we"- Dagyaug wa,- Mao"So wa ni" akyu" mho' thoe re tae" gyo: byid' ava". Ni" yham sang myhi" Elizabed wa ni" qhid' mae" yauggai nau" dayaug khau: li" nae" ngad:- nao wa yao" mang re Yohan- ga: mhang" byid: zai ngad: ra". 14 Nao wa ngaui bau: ngaui lho" ru qhug' nae"- yao: khau: li" ruyang byu myo: sho' mo, ngaui bau: genae". 15 Pe"mung:ga"re yao: wa Mao"So: qhid' kheim: mae qi" qhang yaug ngad nae"- yao: wa sabyi qang: we' yhid phai: shaug' nae" mangad:- yao: wa yao: myhi" aung mae" yao: Gyang" Lho" Byo we' byang" jo; li" nae". 16 Yao: wa Israel byumyu" myo: sho' re yao: bam: Asang Mao"So jhao" dam: jhui" tug' lo: li" nae". 17 Yao: wa lapa Elia we' dakhyo: qam: so' we' Asang Meshia qhid' au: mae ye" lo" na: li" nae"- yao: wa yao: pho" qe we' yao: zo: qe: gyo: mae dam: jho" vang" nhao nae"- Mao"So re geimlau gye kad' ra"mo, re din:man" ra" mo; myid pha,jhi" shad' khyo dam: tug' lo nhao nae"- yao: wa Mao"So: qhid' mae" jin" jin" ngad nae" qhid' mae" Asang: byumyu" re seim" nyhang" to" li" nae"- ga: Zakari re ta" ra". 18 Ailao" Zakari wa mug: lagyo: re Ceru: boe" nae" rure ngo khoru: ba nae" i? Pe"mung:ga"re ngo wa mao: va"- nga" yham sang myhi" re: mao: zo: ngad va"- ga: ta"ra". 19 Mug: lagyo: wa Ngo wa Mao"So: qhid' kheim: mae ye; jo; ra" mug: lagyo: Gabriela ngad:- nao re ce: ngaui bau" lau dao: ta" kyo: byid: nae" qhid' mae" Mao"So: yang nhao: ke' yaug ngad:- 20 Qu" wa,- ngo ta" ra" dao: re nao malam" ruyang ceru: boe" li" nae" ra"ayo, joe" sho' nao wa dao: maqo" jhau lo: nhad' jid; jo; li" nae"- amung: ayo, joe" lao"- nga" dao: wa dang: lo: li" nae"- ga: ta" ra". 21 Mo,byu qe wa Zakari re lao" na: ako"- yao: bam wa Zakari Mao"So: yham khug mae myao" sho' yena: byaug: rure myid: mug' ako". 22 Zakari Mao"So: yham mae" thug' lo lao"- yao: wa yao: bam re dao: maqo" jhau ngad: ra". Airumung: yao: bam wa Caung:pa" Yham khug mae yao: wa ve, lho daja: ja: the' myao va" rure yao: bam ba: qu" yu: ako". Yao: wa dao: dakheim: re: maqo" jhau yang: yao: bam re lo, tu" tu" qhu" ra". 23 Caung:pa" Yham khug mae yao: zaui: ang: ra" ayo, gan lao"- Zakari wa yham khyo phao: lo" ra". 24 Ai: thao mataung" myao" re Elizabed wa gaung la" li" mung: lho" mo" ngo" khye' lam: lam: khai: mathug' qin" lo: laung" jo; ra". 25 Elizabed wa Ana"- Mao"So wa ngore nhag' khyag' yu va"- Su: yang ngore gaui mho jung" khyoe' ta" rure- yao: yu: pye' byid: va"- ga: ta" ra". 26 Elizabed gaung la" li" ru lho" khyaug' khye' joe" li" lao"- Mao"So wa mug: lagyo: Gabriela re Galile mung" mae" Nazared vogaung: mae na: ra" 27 Davi kaung mae" Yoseb ga: mang: ra" yaug: yang mho' to" ra" zomyi: gyang" dayaug jhao" nhao: ke' ra"- ai: zomyi: gyang" wa Mari ga: mang yaug ngad: ra". 28 Mug: lagyo: wa Mari jhao" li" mung: Ngaui bau: yaug yo vashao:- nao wa ngaui lho" ra"- Mao"So wa nao we' daga" ngad: ra"- ga: ta" ra". 29 Mari wa ai: mug: lagyo: li" ta" ra" dao: thoe: yang gyai myid: mug' sang: kho: mung:- ce: bang" se" dao: wa pe" ga" ru ngad nae" laug i? ga: myid: qu" na: ra". 30 Ailao"- ai: mug: lagyo: wa Mari re Mari we"- dagyaug wa,- nao wa Mao"So: qhid' kheim: mae myo,nho qo" ava". 31 Nao wa gaung la" li" mung: yauggai nau" dayaug khau: li" nae"- nao wa yao: re Yesu ein: mhang" byid: zai ngad: ra". 32 Yao: wa qi" qhang yaug ngad: li" nae"- yao: wa myhao: thao" ra" Mao"So: yao: Zo: ga: mhang" ru qhug' li" nae"- Asang Mao"So wa yao: pho" Davi nho: kho:kham tao" khau" yao: re ab byid' li" nae", 33 Yao: wa Yaku myid:zo: qere apyad ato eib: na: li" nae"- yao" mung"dan: wa khonhae" re: mathao" magan nae"- ga: ta" ra". 34 Alao"- Mari wa mug: lagyo: re Ceru wa khoru: gai: boe" li" zai ngad: laug i? Ngo wa yauggai we' mana: qu" shi" ra" zomyi: gyang" dayaug ngad:- ga: ta" ra". 35 Mug: lagyo: wa Gyang" Lho" Byo wa ni" dao mae joe" li" mung:- myhao: thao" ra" Mao"So: qam: so' wa nao re nghoe' qab: to: byid: nae"- Airumung: khau: li" nae" ra" yaug re Mao"So: yao: Zo:- ga: mhang" li" genae". 36 Amung: Qu" wa,- ni" amyu" ba nam myhi" Elizabed re: mao: thao re yauggai nau" khau nae" gaung la: va" ra"- Su: yang bug daung:- ga: mhang" ra" yaug wa gaung la" li" mung: ana"- lho" khyaug' khye' ngad: ava". 37 Pe"mung:ga"re Mao"So maqo" kad' ru pe" re: majo,- ga: ta" ra". 38 Alao"- Mari wa Ngo wa Asang: jeim myhi" ngad:- nao ta" ru we' dakhyo: ngo mae boe" li" vashao:- ga: tau" ra". Alao" mug: lagyo: wa yao: mae" phao: lo" ra". 39 Ai: thao mataung" myao" re Mari wa Yuda mung" mae" bam vogaung: dalam: khyo hin hin za: to" ye" lo" ra". 40 Yao: wa Zakari yham khyo vao ye: mung: Elizabed re bang" yese" ra". 41 Mari bang" li" se" ra" dao: re Elizabed the' gyo: lao"- yao" aung khug mae" zonau" wa thug' jhu" li" ra". 42 Elizabed wa Gyang" Lho" Byo we' byang" jo, mung: thoe qi: we' Nao wa myiqe: alhab' mo, tho' mae ngaui lho" ra"- ni" aung mae" zoshao re: ngaui lho" ra" wo". 43 Nga" Asang: yao: myhi" ngojhao" joe" li" ru wa pe" jeju khyo" yang qo" kham: yu li" laug i? 44 Pe"mung:ga"re Qu" wa,- ni" bang" se" dao: re ngo the' gyo: we' nga" aung mae" zonau" wa ngaui bau: mung:- thug' jhu" li" ra". 45 Asang yao: re ta" ra" dao: wa gaigai: jab byang" li" zai ngad:- ga: lam" ra" myiqe: wa ngaui lho" ra" wo"- ga: ta" ra". 46 Alao"- Mari wa- Nga" aung khug nhag' lam: ai: Asang re caung:khin" byid' ra". 47 Nga" alo zo: re: ngore khyad' yu: ra" Asang Mao"So: khug mae ngaui bau" ra". 48 Asang wa nyham: gyo" jo; ra" yao" jeim myhi" re qu" myao: ava"- qu" ge,- Ana" mae" byu qae: khao: ngo" mae" mo, wa ngore ngaui lho" ra" yaug ga: mhang" genaeva". 49 Pe"mung:ga"re qam: so' bo: ra" Asang wa qi" qhang: ra" mau" zo" nga" qhid' mae" kad' byid: mung: ngad: ra". Asang yao" mang wa gyang" lho" ra". 50 Asang yao: re gyaug phug' ra" mo; dao mae myid:zo: daqae: mae" daqae: yao" nhag' khyag' ru qhu" byid' na: ra". 51 Yao" qam: bo: ra" lo,pau" re yheim" ke' mung: langa: kad' phug mo; nhag' lam: khug mae myid: yaung: to" ra" mau" zo" jham re abyi asin: kad' pye' byid' ra". 52 Yao: wa zug: kho:kham qe: aya: khyo" pye' byid: mung: ngai nyham: ra" mo, re tau: to' byid' ra". 53 Moe, shab' ra" mo, re gai: ra" ja" yang nhag' shid nhag' dag nhao mung:- jo,nho" qo" mo, re lo, cin nhao: ke' ra". 54 Ngonhaung" phug' phyid' qere yao: ta" to" ru we' dakhyo:- Abraham we' yao" myid:zo: qere- 55 Khonhae" re: yao" nhag' khyag' shogu: ru myid: beim: mung:- yao: wa yao" daui daui yaug Israel amyu" re bao" thaug' byid' ava"- ga: ta" ra". 56 Mari wa Elizabed we' daga" lho" mo" sam khye' ko na co' mung: yham khyo dam: phao: lo" ra". 57 Alao" Elizabed wa khau nae" ba na nge, mung:- yauggai nau" dayaug khau: ra". 58 Ai: Asang wa Elizabed re mug' pho: jeju kad' qhu" va"- ga" rure yao" yham kyo: cao: qe we' ba nam sang: cao: qe the' gyo: gelao" yao: bam wa yao: we' daga" ngaui bau" ako". 59 Ai: thao she' ba ein: ba re yao: bam wa zonau" au: qid lhai: poe khyo li" ako". Yao: bam wa ai: zonau" re yao: pho" mang ru: yao: Zakari- ga: mhang" byid: nug: ako". 60 Ngadqere: ai: zonau" yao: myhi" wa airu: mamhang" nae"- Yohan ein: mhang" zai ngad:- ga: ta" ra". 61 Yao: bam wa Elizabed re Ni"amyu" kaung mae Yohan ga: mang ru dayaug re: mabo- ga: phaug' tau" ako". 62 Alao"- yao: bam wa yao: pho" khoru: mhang" byid: nug: laug- ga: zonau" yao: pho" re lo, tu" tu" yang: myid' qu" ako". 63 Zakari wa tung" the: dalam: mho' yu mung:- zonau" mang wa Yohan ngad:- ga: tung" qhu" ra". Yao: bam alhab' mo, mug' hao" byaug: ako". 64 Ailao" jao" Zakari wa dao: dam: gai: jhau: li" mung: Mao"So re caung:khin" ra". 65 Yham kyo: cao: qe alhab' mo, wa gyaug: mug' pye' ako"- Airu: boe" ra" lau dao: re Yuda mung" mae" bam mug: khaung: jao: sho' hau" nhao" lo" ako". 66 Ai: khyo re the' gyo" ra" mo, alhab' wa- airu re yao: bam: nhag' lam: khug mae xam" to: mung:- ce: zoshao wa khoru" ra" yaug boe" nae" ngad: i? ga: ta" ako". Ai: Asang: qam: so' wa yao: we' daga" ngad: ra". 67 Alao" Yohan yao: pho" Zakari wa- Gyang" Lho" Byo byang" mung: lapa dao: ta" ru wa 68 Ai: Asang Israel nho: Mao"So wa ngaui lho" vashao: wo"- Yao: wa yao" amyu" qejhao" li" mung:- yao: bam re loe; beim nhao: ava". 69 Yao: wa yao" daui daui yaug Davi amyu" mae" qam: so' qi" qhang: ra" khyad' yu: Asang ngonhaung" re byid' ava". 70 Amung: yao: wa ganhae" mae" yao" gyang" lho" ra" lapa qe: nhad' khyo" yang- 71 ngonhaung" re gye jham: lo, mae" re:- ngonhaung" re nhang" ra" alhab' mo; lo, mae" re:- yao: ngonhaung" re khyad' yu nae"- ga: dao:so: byid' to" ra". 72 Yao: wa ngonhaung" phug' pho" qere nhag' khyag' shogu: ru qhu" byid: mung: yao" gyang" lho" ra" dao: thang" re myid: beim: nae"- ga: ta" to" ra". 73 Ngonhaung" wa Mao"So: qhid' kheim: mae ngonhaung" pyad geim" gyang" lho" ru we' din:man: mo, boe" nae" qhid' mae"- 75 Ngonhaung" re gye jham: lo, mae" khyad' yu mung:- yao: re magyaug maci" lo: caung da" byid: nhao nae"- ga: ngonhaung" phug' pho" Abraham re jham tang: yang: ta" to" ra". 76 Nga" zo: we"- nao wa myhao: thao" ra" Mao"So: lapa- ga: mhang" ru qhug' nae"- Nao wa Mao"So: khyodang re nyhang" to: nae"- Asang: qhid' au: mae ye" lo" mung:- 77 Asang: byumyu" re yao: bam: qobo re khyad' pye' byid: mung: khyad' yu nae"- ga" rure ta" kyo" li" nae". 78 Ngonhaung" Asang Mao"So wa nhag' khyag' shogu: ru byang" jo, yaug ngad: ra"- Yao: wa khyad' yu: ra" jeju ba bao re ngonhaung" dao mae zho nhao mung:- 79 Shid: ra" aqab khug mae na: jo; ra" mo; dao mae zho: bao byid' li" nae"- Amung: ngonhaung" khyid re yaug yo cae: tae" ra" khyodang khyo jhui" gun: su" ye" li" nae" yaug ngad: ra"- ga: ta" to" ra". 80 Ai: zoshao wa gaung khyao qi" qhang: li" ru we' byo qam: so' bo: li" mung: Israel amyu" qhid' kheim: mae de: de: za: mana: qhu" shire yao: wa din"pyad' yo mae na: ra". 1 Ai: ayo, mae- Roma khosin" Augustu wa mung"dan: geim" mae" gaegaung: japhin: re gaug: yu nae" qhid' mae" amyin" dalam: khyo" ke' ra". 2 Ai: gaegaung: japhin: gaug: yu: ru wa Suri mung" mae Kureni mang: zug: kad' na: au: sao qhid' lhang gaug: yu: ra" japhin: ngad: ra". 3 Airumung: byu yaug khao: ngo" wa mang japhin: ke' nae" qhid' mae" yao: yao" co' phyid' vogaung: khyo lo: ako". 4 Alao" Yoseb re: Davi kaung mae" myid:zo: ngad mung:- Galile mung" Nazared vogaung: mae" Yuda mung" mae" Betlehem- ga: mhang" ra" Davi vogaung: khyo- 5 yao: vhin" yu nae" mho' to" ra" Mari we' daga" mang japhin: ke' nae" qhid' mae" lo: ra". Mari kam" wa gaung la: gaung ngad: ra". 6 Yao: shid' tao Betlehem mae na: jo, ko" au:- khau ba na nge; li" mung:- 7 Yao: wa zoqhid' yauggai nau" re khau: ra"- Bang" khug yham mae jo, qo majo, yang: ai: zonau" re mai cug' yang thab' mung:- thaung: lhao: dalam: khug mae lhang" to" ra". 8 Ai: mang: khaung: mae yao zaung" mo, damyo" wa myi" re pa: din" mae yao: bam: yao kyaung" jham re lhaug' mung: na: jo; ako". 9 Asang: mug: lagyo: dayaug wa yao: bam jhao" thug' li" mung: Asang: phungbao wa yao: bam: lhang" gam: mae bao: jo; ra"- Alao" yao: bam wa gyai din: gyaug: pye' ako". 10 Mug: lagyo: wa yao: bam re- Dagyaug ge,- Qu" ge,- Byu alhab' mo; qhid' mae" gyai ngaui bau: nae" ra" lau dao: gai ngo naonhaung" jhao" vin: li" ru ngad:- 11 Ana" ba: ba na mae khyad' yu yaug Asang Khristu wa Davi vogaung: mae naonhaung" qhid' mae" khau: li"va" ra". 12 Ceru wa naonhaung" qhid' mae" ave, ngad nae"- zoshao nau" nin" dayaug re mai cug' yang thab' mung: thaung: lhao: khug mae lhang" to" rure naonhaung" yemyao genae"- ga: ta" ra". 13 Ai: mug: lagyo: nhae mae mug:gaung mae" mo, ajham ataung nyag din taung" thug' li" mung: Mao"So re caung:khin" zo" re"- 14 Myhao: thao" ra" mug:gaung tho' mae Mao"So wa phungbao qi" qhang: jo, vashao:- Myid gaung dao mae re: yao: o ngaui: ra" mo; dao mae yaug yo cae: tae" ru jo; jo, vashao: wo"- ga: ta" ako". 15 Ai: mug: lagyo: jham yao: bam khyi" mae" mug:gaung khyo dam: phao: lo" gethao re yao zaung" mo, wa ngonhaung" wa Betlehem vogaung: khyo ye" lo"gelang:- Asang ngonhaung" re li" ta" kyo" ra" khyo re yequ" qu" gelang:- ga: yao: cao: jho" ta" ako". 16 Alao" yao: bam wa hin hin za: ye" lo" mung: Mari we' Yoseb rere: thaung: lhao: khug mae lang" jo; ra" zonau" rere: yemyao: ako". 17 Yao zaung" mo, wa ai: zonau" re yemyao gelao"- yao: bam wa ai: zonau" we' sin: mung:- mug: lagyo: pho" yang li" ta" kyo" ra" khyo yao: bam re ta" kyo" ako". 18 Yao zaung" mo, ta" rure the' gyo: mo, alhab' wa gyo" mug' ako". 19 Ngadqere: Mari wa ai: gu: alhab' re xam" ci mung: yao" aung khug mae myid: qu" na: ra". 20 Yao zaung" mo, wa mug: lagyo: ta" ru we' dakhyo:- the' myao: yu ba: yu gemung:- Mao"So: phungbao re caung:khin" zo" re" dam: tug' phao: lo" ko" ra". 21 Ai: zonau" wa she' ba byang" mung:- au: qid lhai: yo, joe" lao"- yao: myhi" aung mae mabo shimae" mug: lagyo" yang mhang" byid' ra" mang we' dakhyo:- yao: re Yesu ga: mhang" ako". 22 Moshe amyin" dao: re cao" yang: yao: bam: kyang" san: ra" gin khyao kad' nae" ayo, joe" lao"- 23 Zoqhid' yauggai nau" alhab' re Asang: qhid' mae" jaung: to: ca"- ga: Asang: tarha" mae tung" to" ru we' dakhyo:- ai: zoshao re Mao"So: qhid' kheim: mae yeqhaug' byid: nae" we'- 24 Asang: Tarha" mae ta" to" ru we' dakhyo:- phaung" kyug' shid' dau:- mangad: lao"- jid: au shid' dau: re xeim: ngaui" byid: nae" qhid' mae" Mari we' Yoseb wa ai: zoshao re Yerusalem vomo" khyo jhui" ye" ako". 25 Ana"- Yerusalem mae Simon ga: mang: ra" byu dayaug na: ra"- yao: wa Mao"So re gyaug phug' ru we' din:man" ra" yaug ngad mung:- Israel amyu" qe khyad' yu: ru qhug' nae" qhid' mae" myid: lao" na yaug ngad: ra". Ai: Gyang" Lho" Byo re: yao: we' daga" ngad: ra". 26 Amung: yao: wa Mao"So: yang dao:so: byid' to" ra" Meshia re mathe' myao myao wa nao mashid nae"- ga: Gyang" Lho" Byo: yang qhu" byid' ra" ve, lho re myao: to: yaug ngad: ra". 27 Yao: wa Byo: yang nhug' jhan: byid' ru qhug' mung: Caung:pa" Yham khug khyo vao ye" ra". Yao: myhi" we' yao: pho" tao wa- kham" to" ra"Tarha" we' dakhyo:- ai: zoshao re au: qid lhai: byid: nae" qhid' mae" Caung:pa" Yham khug khyo jhui" vao li" gelao"- 28 Simon wa ai: zoshao re yao" lo, khug mae lham: vo; yu yang: Mao"So re caung:khin" zo" re"- 29 Asang we"- ni" dao:so: jab byang" va" rumung: ana"- ni" jeim pho" ngore yaug yo za: lo" nhao la, se,- 30 Byumyu" alhab' qhid' kheim: mae nyhang" jaung: to: mung:- 31 Taung bug qere ni" myid o: ra" khyo" qhu" byid: nae" bo" bao we'- 32 Ni" amyu" Israel qhid' mae" phungbao ngad: ra" ni" khyad' yu: ra" khyo re nga" myo,jid' yang yao: zhaug' za: the' myao va"- ga: ta" ra". 33 Yao: myhi" we' yao: pho" tao wa ai: zoshao: khyo we' sin: mung: Simon ta" ra" dao: jham re the' gyo: gelao" mug' ako". 34 Simon wa yao: mho' re shaman" byid: mung: yao: myhi" Mari- re Qu" wa,- ce: zoshao wa Israel amyu" myo: sho' byo; qeim: ru we' myo: sho' mo, khyad' yu: ru qhug' nae" qhid' mae" Mao"So: yang khyin: to" ra" yaug ngad: ra"- Byu myo: sho' mo, yao: re ngag: ha: pye' mung: yao: bam: nhag' lam: khug mae khug' myid: yaung: to" ra" gu: jham myao: thug' li" nae" ra" Mao"So: ve, lho ngad: li" nae". 35 Ni" nhag' lam: kheim ce' re shae ceim" yang thug' kyao" to" ru we' dakhyo: ngad: li" nae"- ga: ta" ra". 36 Ashe amyu" kaung mae" Penue ga" ra" yaug: yao: zo: Anna- ga: mang: ra" lapa cug' mo" myhi" dayaug na: ra"- yao: wa gyai mao: va" ra". Zoqae: yo, re yham qo" mung: yao" yham sang pho" we' nhad' zin za: qo" zam" na: ra"- yao" apyad she' xe: byid zin joe" sho' cug' mo" mo" ra". 37 Yao: wa Caung:pa" Yham mae" magao: lo:- zo:ve jao" akyu" mho' ru we' myi" re: na" re: Mao"So re caung:pa" yang: na: ra". 38 Ai: au: reyao:- Anna wa joe" li" mung: Mao"So re caung:khin" zo" re"- Yerusalem re khyad' yu nae"- ga: myid: lao" na ko" ra" mo, alhab' re ai: zoshao: nho: khyo re ta" kyo" ra". 39 Yoseb we' Mari wa ai: Asang Kham" To" Ra" Tarha" we' dakhyo: gin khyao alhab' re bin: kad' gelao"- Galile mae" yao: bam: mug: Nazared vogaung: khyo dam: tug' phao: lo: ako". 40 Ai: zoshao wa qi" qhang: li" mung: qam: o: bo: li" ru we' nyan: pha,jhi" bo: li" ra". Mao"So: shaman" jeju wa yao" dao mae bo: jo; ra". 41 Yesu yao: myhi" we' yao: pho" tao wa zin khao: ngo" Yerusalem khyo Lai co' Poe lhaung" ye" ako". 42 Yesu daxe: shid' zin byang" lao"- thung" jo; ru we' dakhyo:- yao: mho' wa Yerusalem khyo Lai co' Poe ye" ako". 43 Ai: poe bin lao"- Yoseb we' Mari wa yham khyo dam: tug' phao: lo: ako"- ngadqere: zoshao Yesu wa Yerusalem mae thang: na co' ra"- yao: myhi" we' yao: pho" tao wa aire maba ko" ngad: ra". 44 Yao: tao wa Yesu re vogaung: bao: we' ngad naeva"- ga: myid: jho geyang: daba gyam sho' phao: lo" ako"- Thao re yao: shid' tao wa Yesu re ba nam qe we' byin cao: qe: phaung mae yeqho: ako". 45 Yao: tao wa Yesu re mamyao lao"- Yerusalem khyo dam: tug' qho: ye" ako". 46 Sam ba ein: ba re yao: tao wa Yesu re Caung:pa" Yham khug mae Yuda amyu" qe: mho" pho" qe: phaung gaung: mae zaung: jo, yang: mho" pho" qe ta" ra" dao: jham re tae" gyo: zo" re"- yao: bam rere: dao: myid: tug' myid: mung: na: jo; rure yao: tao yemyao: ako". 47 Yao" dao: re the' gyo: mo, alhab' wa pha,jhi" kung: ra" yao" dao: myid: we' dao: phyid re mug' ako". 48 Yao: myhi" we' yao: pho" tao wa yao: re the' myao gelao"- mug' byaug: ako". Alao" yao: myhi" wa Nga" zo: we"- ni" pho" we' ngotao re nao pe"mung: yang: ceru: kad' i? Ni" pho" we' ngotao wa nao re sang: kho: yang: qho: qin"- ga: ta" ako". 49 Yesu wa yao: myhi" we' yao: pho" tao re- Naotao ngore pe"mung: qho ko" i? Ngo wa nga" Pho" yham khug mae na ca"- ga" rure naotao maba ko" i? ga: phaug' tau" ra". 50 Ngadqere: yao: tao wa Yesu ta" ra" dao: re maba: gyo: ko" ngad: ra". 51 Yesu wa yao: myhi" yao: pho" tao we' daga" Nazared vogaung: khyo dam: tug' phao: lo mung:- mho dao: gyo: gyo: za: na: ra"- yao: myhi" wa ai:gu: alhab' re yao" aung khug mae xam" ci: ra". 52 Amung: Yesu wa gaung khyao qi" qhang: li" ru we' nyan: pha,jhi" bo: li" mung:- byu: qhid' kheim: mae re: Mao"So: qhid' kheim: mae re: myo,nho lu: li" ra". 1 Roma kho:sin" Tiberiu kho: kham kad' ru daxe: ngo" zin ein: zin re Yuda mung" mae Pontiu Pilad wa- mang: zug:- Galile mung" mae wa Herod- Iturea we' Trakonid mung" mae wa Herod yao: nhaung: Philib- Abilen mung" mae wa Lusania mung" zug: kad' na mung:- 2 Anna we' Kayapha wa khinjaung yin" kad' na: ako"- ai: yo, re Mao"So: mungdao: wa din"pyad' yo mae na: ra" Zakari yao: zo: Yohan jhao" joe" li" ra". 3 Alao" Yohan wa Yodan gyaung: cao" mae" mug: myid gam: sho' khyo ye: mung:- Nhag' lam: tha" pye' mung: qid nyhab' kham: yu ge,- ailao" Mao"So wa naonhaung" qobo jham re khyad' pye' byid' li" nae"- ga: kho" kyo" ra". 4 Airu wa- Asang: khyo re nyhang" to: ge,- Yao" khyo re din: za: nyhang" jhao" ge,- 5 Lao: khaung: alhab' re bam" pye' mung: bam we' bug gaung alhab' re dau" tae" pye' ca" nae" ngad: ra"- Khyo kaui jham re jhao" pye' mung: abau" akhyad' ra" khyodang jham re nyhang" tae" pye' ca" nae" ngad: ra". 6 Alao"- xao su byu qe alhab' Mao"So khyad' khyui: yu: ra" khyo re the' myao: li" genae"- ga: din"pyad' yo mae dayaug hug' na: ra"- ga: lapa Esaia Mugsug' mae tung" to" ru we' dakhyo: ngad: ra". 7 Amung: Yohan wa yao" lo, mae qid nyhab' kham: yu nae" ga:- joe" li" ra" mo,byu qere- Lhao maui amyu" qe we"- Joe" lo: na: ra" Mao"So nhag' yo" rumae" qo" phao: loe, nae" naonhaung" re khag' yang li" ta" peim: byid: vako" i? 8 Myid tha" ru we' man: qi" ra" ashi: zaui: ge,- Abraham wa ngonhaung" yao: pho" ngad:- ein: data" ge,- pe"mung:ga"re ngo naonhaung" re ta" geli"- Mao"So wa ce: laug baui jham mae" Abraham qhid' mae" yao: zo: jham qo" phan" phaug' thug' ke' ra". 9 Ana" yao: lhao" re: ai: vozaung: wa sag' gae jham re apan mae" thau: lhang" pye' nae" qhid' mae" jin" jin" ngad: ava"- Airumung: ashi: gai mazaui" ra" sag' gae alhab' re thau: lhang" ke' mung: myikhyeim" khug khyo pye' zaui: pye' ra"- ga: ta" ra". 10 Alao"- mo, byu qe wa- Yohan re Airu: ngad lao" wa ngonhaung" khoru: kad' zai i? ga: myid' ako". 11 Yohan wa tau: mung:- Bau: shid' khye' qo" ra" yaug wa maqo" ra" yaug re dakhye' gae byid: vashao:- Zo: ve qo" yaug re: maqo" ra" yaug re gae zho: vashao:- ga: ta" ra". 12 Khang: gaug mo, damyo" re: qid nyhab' kham: yu nae"- ga: joe" li" mung: yao: bam wa Yohan re- Mho" pho" we"- ngonhaung" khoru: kad' zai i? ga: myid' ako". 13 Ailao"- Yohan wa naonhaung" gaug: yu ang: ra" gau jho tho' je yang: khang: dagaug: yu ge,- ga: yao: bam re ta" ra". 14 Gyezo: qere: Aire ngonhaung" wa khoru: kad' zai i? ga: myid' ako". Alao" Yohan wa yao: bam re naonhaung" wa khag' rere: mangad mangung: qobo dazhaug' ge,- Khag' mae" re: dadeim" zag: lhad' zo: ge,- naonhaung" the' ra" lho" khye' okaung phug' we' nhag' shid nhag' dag yang: na ge,- ga: phaug' tau" ra". 15 Mo, byu qe wa myid: lao" na: ru bo gemung: Yohan wa Meshia ngad va" laug- ga: yao: bam: nhag' lam: khug mae myid: qu" na: ako". 16 Airumung: Yohan wa yao: bam alhab' re Ngo wa naonhaung" re qid: yang qid nyhab' byid' ra"- ngadqere: nga" tho' qam: so' je: bo yaug wa nga" thao mae joe" li" nae" ngad:- ngo wa yao" khyid zhaung: taui: pheim byid: nae" lhao" maman: qi"- yao: wa Gyang" Lho" Byo: yang re:- myi" yang re: naonhaung" re qid nyhab' byid' li" nae". 17 Yao" lo, mae gaug khyo" nae" qhid' mae" gaug khyo" gaung: zhab' ci: ra". Amung: yao: wa gaug nao: zam jao: mae" gaug bam re vhag' kyang" pye' mung: gaug mo gu: re wa yao" gaug jhi khug mae gag: zhang: ke' to" li" nae"- gaug seim jham re kam" wa matho' se' ra"myikhyeim" mae ngha" pye' li" nae"- ga:ta" kyo" ra". 18 Airumung: Yohan wa ta"peim: ta" kyang" ra" dao: gatau myo: sho' we' re: ai: mo, byu qere Ngaui Bau" Lau Dao: Gai kho" kyo" ra". 19 Ngadqere: Yohan wa Mung" zug: pho" Herod re- yao: nhaung: Philib yham sang myhi" Herodia re vhin" yu: ra" mathao mae we' gatau shad' lhoe" ra" makhyang" ra" mau" zo" jham: mathao mae qeim: ra". 20 Ai: thao Herod wa Yohan re thaung: khug mae taung" lhaung" pye' nhao mung: je: xo: ra" qobo re shad' lhoe" ra". 21 Mo, byu qe alhab' qid nyhab' bin: kham: yu gelao"- Yesu re: qid nyhab' kham: yu: ra"- yao: akyu" mho' na: au:- 22 mug:gaung bung" li" mung: Gyang" Lho" Byo wa phaung" kyug' ru: dao" gyo" li" ra". Amung: mug:gaung mae"- Nao wa ngo jhid'de; ra"- nga" Zo: ngad:- nao re ngo gyai o ngaui: ra"- ga: thoe jhau: thug' li" ra". 23 Yesu wa yao" mau" zo" zaui" qhid: ra" au: re yao" apyad wa sam xe zin ko ngad: ava"- Byu jham yao: re Yoseb: yao: zo: ngad: ga: jho: ako". Yoseb wa Heli yao: zo:- Heli wa Mathad yao: zo:- 24 Mathad wa Levi yao: zo:- Levi wa Melkhi yao: zo:- Melkhi wa Yannai yao: zo:- Yannai wa Yoseb yao: zo:- Yoseb wa Matathia yao: zo:- Matathia wa Amo yao: zo:- Amo wa Nahum yao: zo:- 25 Nahum wa Esli yao: zo:- Esli wa Magai yao: zo:- 26 Magai wa Maad yao: zo:- Maad wa Matathia yao: zo:- Matathia wa Semein yao: zo:- Semein wa Yoseg yao: zo:- Yoseg wa Yuda yao: zo:- 27 Yuda wa Yohan yao: zo: Yohan wa Rhesa yao: zo:- Rhesa wa Zerubabela yao: zo:- Zerubabela wa Shealtie yao: zo:- Shealtie wa Neri yao: zo:- 28 Neri wa Melkhi yao: zo:- Melkhi wa Addi yao: zo:- Addi wa Kusam yao: zo:- Kusam wa Elmadam yao: zo:- Elmadam wa Era yao: zo:- 29 Era wa Yesu yao: zo:-Yesu wa Elieze yao: zo:- Elieze wa Yorim yao: zo:- Yorim wa Mathad yao: zo:- Mathad' wa Levi yao: zo:- 30 Levi wa Simon yao: zo:- Simon wa Yuda yao: zo:-Yuda wa Yoseb yao: zo:- Yoseb wa Yonam yao: zo:- Yonam wa Eliakim yao: zo:- 31 Eliakim wa Melea yao: zo:- Melea wa Mena yao: zo:- Mena wa- Matatha yao: zo:- Matatha wa Nathan yao: zo:- Nathan wa Davi yao: zo:- 32 Davi wa Yese yao: zo:- Yese wa Obed yao: zo:- Obed wa Bua yao: zo:- Bua wa Salmon yao: zo:- Salmon wa Nashon yao: zo:- 33 Nashon wa Adminadab yao: zo:- Admin wa Arni yao: zo:- Arni wa Hezron yao: zo:- Hezron wa Pere yao: zo:- Pere wa Yuda yao: zo:. 34 Yuda wa Yaku yao: zo:- Yaku wa Isag yao: zo:- Isag wa Abraham yao: zo:- Abraham wa Tera yao: zo: Tera wa Naho yao: zo:. 35 Naho wa Serug yao: zo:- Serug wa Reu yao: zo:- Reu wa Peleg yao: zo:- Peleg wa Eber yao: zo:- Eber wa Shela yao:zo:. 36 Shela wa Kainan yao: zo:- Kainan wa Arphaxad yao: zo:- Arphaxad wa Shem yao: zo:- Shem wa Noa yao: zo:- Noa wa Lameg yao: zo:. 37 Lameg wa Methusela yao: zo:- Methusela wa Enog yao: zo:- Enog wa Yared yao: zo:- Yared wa Mahalale yao: zo:- Mahalale wa Kenan yao: zo:- 38 Kenan wa Enu yao: zo:- Enu wa Sed yao: zo:- Sed wa Adam yao: zo:- Adam wa Mao"So: yao: zo: ngad: ra". 1 Ai: thao Yesu wa Gyang" Lho" Byo we' byang" mung: Yodan gyaung: mae" dam: thug' lo: au:- Byo: yang din"pyad' yo khyo jhui" ye" ra"- ai:tau mae Yesu wa byid xe ba geim" yui: yang ju" phyo' ru qhug' ra". 2 Yesu wa ai: ba na gu: mae pe" re: mazo: ngad: ra"- ai: ba na gu: gan lao"- Yesu wa vae: moe' ra". 3 Alao" yui wa Yesu re Nao Mao"So: yao: zo: ngad: re wa ce: laug baui re mug boe" li" nae" amyin" byid: wa,- ga: ta" ra". 4 Yesu wa yui re Byu wa mug: yang za: kao so' qo" daui: na nae" mangad:- ga: Jham: Mugsug' mae tung" to" ra"- ga: phaug' tau" ra". 5 Ai: thao yui wa Yesu re jhui" do, lo"mung: mug: myid dao mae" mung"dan: alhab' re damyo, nyag: gyo: mae ceim" shid' mung:- 6 Ce: kheim: so' we' ai: mung"dan: jham: phungbao alhab' ngo nao re byid: nae"- ai:gu: alhab' wa ngore ab byid' to" ru ngad mung:- ngo byid: nug: ra" yaug khag' re ngadqere: ngo qo" byid' ra". 7 Airumung: nao ngore goe; pa" ngad: re wa ai:gu: alhab' ngo nao re byid: nae"- ga: Yesu re ta" ra". 8 Yesu wa Asang ni" Mao"So re za: goe; pa" mung: caung da" wa,- ga: Jham: Mugsug' mae tung" to" ra"- ga: tau" ra". 9 Ai: thao re yui wa Yesu re Yerusalem khyo jhui" ye" lo" mung: Caung:pa" Yham mae" je: myhao: thao" ra" jo, qo mae yenha: to: mung: yang:- nao Mao"So: yao: Zo: ngad: re wa- 10 Mho" khyo byae: gyo" lo" wa,- pe"mung:ga"re Nao re lhaug' zaung" byid: nae" Mao"So wa mug: lagyo: jham re amyin" byid' li" nae". 11 Amung: laug baui mae ni" khyid lhao" re: mathe' thaung: sho' yao: bam: lo; yang nao re lham: vo; yu: li" genae"- ga: re: Jham: Mugsug' mae tung" to" ra"- ga: Yesu re ta" ra". 12 Alao" Yesu wa tau: mung:- ai: Asang ni" Mao"So re magai: jham" qu" nae"- ga: re: Jham: Mugsug' mae tung" to" ra"- ga: ta" ra". 13 Ai: yui wa Yesu re aja: ja: mae ju" phyo' qu" ru bin lao"- Yesu tau mae" dayo, dataung zo: phao: lo" byaug: ra"- Khoau: agu: dam: yo" nae" rure lao" na: ra". 14 Yesu wa Gyang" Lho" Byo qam: so' we' byang" mung: Galile mung" khyo dam: tug' lo: ra". Yao" khyo re ai: mung" alhab' mae gam: sho' hau" nhao" lo" ako". 15 Yesu wa yao: bam: Tarha" Jung Yham jham mae mho" shid' byid' ra". Yao: re yaug khao: ngo" caung:khin" ako". 16 Yesu wa yao: na: qi" li" ra" Nazared vogaung: khyo joe" lo: ra"- yao: lhaung" kad' ru we' dakhyo:- Dugno: Ba mae Tarha" Jung Yham khyo ye" ra". Yao: wa Jham: Mugsug' nghe' nae"- ga: to" ye; li" lao"- 17 Tarha" Jung Yham agyi pho" wa yao: re lapa Esaia Jham: Mugsug' dang: re byid' ke' ra". Yesu wa ai: Jham: Mugsug'dang: re phung" ke' we' ceru: tung" to" rure myao mung:- 18 Asang: Byo wa nga" dao mae ngad: ra". Pe"mung:ga"re myaung sho" ra" mo, re Ngaui Bau"Lau Dao: Gai kho" kyo: byid: nae" qhid' mae" ngore xau gyad byid' to" ra"- taung" lhaung" to" ru qhug' ra" mo, re loe; beim nhao nae" ru we' myo, jid mo, re myo, dam: myao: li" nhao nae"- ga" ra" khyo re kho" kyo: byid: nae" qhid' mae" re:- deim" zag: yhin" ru qhug' ra" mo, re loe; beim nhao nae"- ga" ru we' 19 Asang o ngaui: ra" zin na joe" li" va" rure kho" kyo: byid: nae" qhid' mae" yao: ngore nhao: ke' ru ngad: ra"- ga: nghe' ra". 20 Ai: thao Yesu wa ai: Jham: Mugsug' dang: re dang: mung: Tarha" Jung Yham agyi pho" re dam: byid' ke' mung: zaung: jo; ra"- ai: Tarha" Jung Yham mae na: ra" mo, alhab' Yesu re zhaug' qu" na: bam: ako". 21 Alao" Yesu wa yao: bam re Ce: jham: dao: wa ana" ba naonhaung" the' gyo: vako" ru we' dakhyo:- jab byang" li" va" ra"- ga: ta" ra". 22 Alhab' mo, yao: re caung:khin" mung:- yao" nhad' thoe mae" jhau: thug' ke' ra" jeju dao: jham re mug' ako". Amung: yao: bam wa- Ceyaug wa Yoseb yao: zo: mangad: i? ga: ta" ako". 23 Alao" Yesu wa yao: bam re Naonhaung" wa mocid' sara pho" we"- naoyao" gaung re naoyao: ya: gai: yu wa,- ga" ra" dao: khyo: re tai" yang: Kapena-um re kad' ra" mau" zo" jham re ngonhaung" the' gyo: va" ru we' dakhyo:- ce: naoyao" mug: mae re: kad' wa,- ga: dang za: ngore ta" li" genae"- 24 Ngo naonhaung" re dang za: ta" ru wa lapa khoyaug rere: yao: yao" mug: mae" mo; yang makhae: yu gengad: ra". 25 Tae" gyo: ge,- Lapa Elia pyad mae Israel mung"dan: mae sam zin: lho" khyaug' khye' mug: maqu yang: ai: mung"dan: geim" mae bao" khug' mo" khug' lo: au:- Israel amyu" qemae cug' mo" myo: sho' na: ako". 26 Ai ngadqere: Mao"So wa ai bam mae" dayaug jhao" re: lapa Elia re manhao: ke' ngad: ra". Sidon mung" Zarephad vogaung: mae na: ra" cug' mo" myhi" dayaug jhao" za: nhao: ke' ra". 27 Lapa Elisha pyad mae re: Israel amyu" mae mao gae: de, mo, myo: sho' na gengad yang: re:- yao: bam mae" dayaug re: magai: shao: lo" ko"ngad: ra". Suri amyu" Naman za: gai: shao: lo" ra"- ga: ta" ra". 28 Tarha" Jung Yham mae na: ra" mo,byu qe wa cedao: re the' gyo: gelao"- nhag' gyai yo" ako". 29 Alao" yao: bam wa to" li" mung: Yesu re vogaung: khug mae" she: khyad' thug' lo" yang: yao: bam: vogaung: te" to" ra" bam au: thao byo, nhad' mae" yao: re deim" phyid' khyo" ke' nae" ga: she: ye" lo" ako". 30 Ngadqere: Yesu wa yao: bam: phaung gaung: khyo" phao: thug' lo" ra". 31 Ai: thao re Yesu wa Galile mung" mae" Kapena-um vogaung: khyo joe" lo: ra". Dugno: Ba mae yao: wa ai: vogaung: mae"- mo, byu qere mho" shid' byid' ra". 32 Yao: mho" shid' ra" khyo re yao: bam alhab' gyo" mug' ako". Pe"mung:ga"re yao" dao: thoe wa kheim: so' bo yang: ngad: ra". 33 Ai: Tarha" Jung Yham khug mae makhyang" ra" yui vao: jaung" ra" byu dayaug na: ra"- yao: wa thoe qi: we'- 34 Nazared mae" Yesu we"- nao ngonhaung" we' pe" jho" sin" i? Ngonhaung" re lhau: phyo' pye' nae" ein: nao cekhyo joe" li" i? Nao khag' ngad: rure ngo ba:- nao wa Mao"So: Gyang" Lho" ra" Lagyo: ngad: ra"- ga: zag: hug' ra". 35 Yesu wa yao: re Sae za: na wa,- yao: mae" thug' lo" wa,- ga: amyin" byid' ke' ra". Alao" yui wa aiyaug re mo, phaung gaung: mae be; mho' lhang" ke' mung: yao: re pe" dae mate' lo: yao" khug mae" phao: thug' lo" ra". 36 Mo,byu qe alhab' wa mug' yang: Cedao: jham wa pe" ru" ra" dao: kheim: jham ngad: i? Byu ceyaug wa kheim: so' qam: o: we' makhyang" ra" yui jham re amyin" byid' ke' lao" yao: bam phao: thug' lo" ko" ra"- ga: yao: cao: jho" ta" ako". 37 Yesu lau thoe wa ai: mung" geim" byang" sho' hau" nhao" lo" ra". 38 Yesu wa ai: Tarha" Jung Yham mae" thug' lo" mung: Simon: yham khyo vao ye" ra"- Simon: yaug myhi" wa noqam" bug yang: gyai no: na: ra"- Airumung: yao: bam wa Yesu re bao" yu nae" qhid' mae" lham: mho' ako". 39 Alao" Yesu wa ai: myiqe: myhi" nhae mae yeye; jo, mung: Noqam" gai: lo" wa,- ga: amyin" byid' ke' ra"- ai: myiqe: myhi" wa noqam" gai: lo" byaug: ru we' ailao" jao" to" li" mung: yao: bam re bang" da" byid' ra". 40 Ba vao: lo" lao"- no phyo: aja: ja: qhug' ra" mo, re Yesu jhao" jhui" li" ako". Ailao" Yesu wa no phyo: qhug' mo, yaug khao: ngo" dao mae lo, kai: byid: yang: yao: bam alhab' re gai byid' ra". 41 Yui jham re: Nao wa Mao"So: yao: zo: ngad: ra"- ga: gyi: hug' mung: byu myo: sho' yaug mae" phao: thug' lo" ko" ra". Yao: wa Meshia ngad: rure yui jham ba ko" ruyang Yesu wa yui jham re qeim mung: yao: bam re dao: jhau nae" akhang" mabyid: ngad: ra". 42 Mug: bo" lao"- ai: vogaung: mae" thug' lo" mung: cae: tae" ra" dajo, qo khyo ye" lo" ra"- Mo, byu qe wa yao: re cao" qho mung:- yao: bam Yesu re qho: myao gelao"- yao: bam mae" mathug' lo" nae" Yesu re tam" ako". 43 Ngadqere: Yesu wa yao: bam re Ngo wa Mao"So: mung"dan: Ngaui Bau" Lau Dao: Gai re gatau: vogaung: jham mae re: yekho" kyo: ca" ra"- pe"mung:ga"re ce: mau" zo" qhid' mae" Mao"So ngore nhao: ke' ru ngad: ra"- ga: ta" ra". 44 Airumung: Yesu wa Yuda mung" geim" mae"Tarha" Jung Yham jham mae kho" kyo: byid' ra". 1 Dalhang: mae" Yesu Genesared tham: yae mae ye; jo; au:- mo, byu qe wa Mao"So: mungdao: re tae" gyo: nae" ga: Yesu jhao" jhin" vao ye" ako". 2 Alao" Yesu wa tham: yae mae taui" to" ra" lha shid' khye' re myao: ra". Ngo: kung" mo, wa ai: lha mae" thug' mung: yao: bam: geim jham re cid' san: na: ako". 3 Yesu wa ai: lha shid' khye' mae" Simon: lha khug khyo vao ye: mung: lha re gyagao: mae" tham: gaung: khyo dajhid' zo: qhui" ke' nae" qhid' mae" Simon re ta" ra". Yesu wa lha dao mae zaung: jo, yang:- mo, byu qere mho" shid' byid' ra". 4 Bin lao" Yesu wa Simon re qid no; ra" khyo qui" ye: mung: ngo: myhi" nae" naonhaung" geim jham re khyo" ke' ge,- ga: ta" ra". 5 Simon wa tau: mung:- Asang we"- ngonhaung" wa amyi damyi khyeim mayab macam: kung" yang: re: ngo: dadau: re: mathe' kung"- ngadqere: ni" dao: thoe khyo" yang ngo wa geim jham re khyo" ke' nae"- ga: ta" ra". 6 Yao: bam wa geim jham re khyo" ke' mung: ngo: dajham dataung geim" re the' lhaung" yu: ako"- ngo: saung" laug yang: yao: bam: geim jham lhao" re: alaug laug jad: lo" ra". 7 Ailao"- gatau: lha mae na: ra" yao: bam: byin cao: qere li" bao" yu genae" qhid' mae" lo, tu" tu" yang: khai: ako"- yao: bam li" mung: lha shid' khye' geim" alaug laug nab: lo" sho' ngo: ke' ako". 8 Ceru re Petru myao lao"- Yesu khyid qao: mae goe, mung:- Asang we"- ngo wa qobo qo" yaug ngad:- ngo khyi" mae" phao: lo" wa,- ga: ta" ra". 9 Petru we' yao" byin cao: qe alhab' wa yao: bam the' kung" to" ra" ngobam ngozao re qu" mug' ako". 10 Simon we' ngo: kung" byin cao: ngad ko" ra" Zebede yao: zo: Yaku we' Yohan tao re: ai we' dakhyo: mug' ako"- ailao" Yesu wa Simon re Dagyaug wa,- ana" ba mae" thoegu: nao wa byu kung" yaug ngad: li" nae"- ga: ta" ra". 11 Yao: bam wa lha re qid yae mae lo" thang: to: mung:- alhab' re to" pye' co' yang: Yesu thao cao" ako". 12 Dalhang: mae" Yesu wa vogaung: dalam: mae na: jo; au:- ai: vogaung: mae dagaung: geim" mao gae: de; ra" byu dayaug na: ra"- yao: wa Yesu re myao lao" goe; pa" mung: Asang we"- nao o nug: re wa ngore qo" gai: shao: lo" nhao zai ngad: ra"- ga: ta" ra". 13 Yesu wa yao" lo, yheim" ke' yang: yao: re tin: byid: zo" re" Ngo o nug: ra"- Gai: shao: lo" wa, ga: ta" ra". Ailao" jao" mao gae: gai: shao: lo" byaug: ra". 14 Yesu wa yao: re- Ce: khyo re khag' rere: data" kyo: wa,- ngadqere: khinjaung pho" jhao" din: za: lo" mung: ni" gaung yao: re lo" qhu" wa,- amung: nao gai: shao: lo" va" khyo mo, byu qe: qhid' mae" sagse: doe, vashao:- Moshe amyin" byid' to" ra"xeim: re lo" ngaui" byid: wa,- ga: ta" ke' ra". 15 Ngadqere: Yesu lau thoe wa je: je: za: hau" nhao" lo" mung:- mo, byu qe ajham ataung wa yao" mungdao: re tae" gyo" yu nae" we' yao: bam: no phyo: gai nae" qhid' mae" Yesu jhao" zang" li" ako". 16 Yesu kam" wa yao: lhaung" kad' ru we' dakhyo: cae: tae" ra" jo, qo khyo ye" lo" mung: akyu" yemho' ra". 17 Daba re Yesu mho" shid' byid' na: au:- Yuda mung" we' Galile mung" vogaung: khao: ngo" mae" we' Yerusalem vogaung: mae" joe" li" ko" ra" Pharishe qe we' Tung" Pho"qe wa aitau mae zaung: jo; bam: ako"- No phyo: gai byid: nae" Asang: qam: so' wa Yesu mae bo: ra". 18 Alao" Qu" ge,- Byu daqhae: wa yab qo mae lang" jo; ra" gaung jam: shid: ra" byu dayaug re Yesu jhao" dao: li" ko" ra"- yao: bam wa ai: gaung jam: shid yaug re yham khug khyo dao: vao ye: mung:- Yesu qhid' kheim: mae yeqo" dao: to: nae" qam: ke' ako". 19 Ngadqere: mo,paug' saung" thau: ruyang yao: bam wa ai: gaung jam: shid yaug re yham khug khyo dao: vao ye: nae" khyo mamyao ko" ngad: ra". Ailao" yao: bam wa ai: gaung jam: shid yaug re yham khaung dao khyo dao: do, lo" mung:- mhao: mug: zhogam: pye: re tau: qhid' pye' yang: yab qo geim" we' mo, phaung gaung: Yesu qhid' kheim: mae shoe' khyo" ke' ako". 20 Yesu wa yao: bam: lam khug: myid re myao lao"- ai: gaung jam: shid yaug re ba nam pho" we"- ni" qobo re khyad' pye' byid: va"- ga: ta" ra". 21 Tung" Pho" qe we' Pharishe qe wa Mao"So re ceru: jung" dao: jhau: ra" yaug wa khoru" byu ngad: ra" i? Mao"So dayaug mae" je yang: qobo re khoyaug qo" khyad' byid' i? ga: yao: bam: aung khug mae myid: qu"na: bam: ako". 22 Yesu wa yao: bam: aung khug mae airu: myid: qu" na ko" rure ba yang: Naonhaung" airu: pe"mung: myid: qu" na ko" i? 23 Ni" qobo re khyad' pye' byid: va"- ein: ta" nae" je: laui: i? Mangad: lao"- To" ye, yang: su" lo" wa,- ein: ta" nae" je: laui: i? 24 Ngadqere: byu: yao: zo: wa myid gaung dao mae qobo khyad' byid: nae" kheim: so' qo" yaug ngad: rure qhu" byid: geli"- ga: ta" mung: ai: gaung jam: shid yaug re Ngo nao re ta" li"- To" wa,- ni" yab qo re gaug: vo, mung: yham khyo phao: lo" wa,- ga: ta" ra". 25 Ailao" jao"- ai: gaung jam: shid yaug wa yao: bam alhab' mo; qhid' kheim: mae to" ye; li" mung: yao" yab qo re gaug: vo,yang: Mao"So re caung:khin" zo" re" yham khyo phao: lo" ra". 26 Yao: bam wa matho' ta" losho' gyaug: mug' pye' ru we' Ana" ba ngonhaung" mug' pho: mau" zo" re the' myao va"- ga: ta" mung: Mao"So re caung:khin" ako". 27 Ai: thao Yesu ai: vogaung: mae" thug' lo" re yao" khang: gaug zaung mae zaung: jo; ra" Levi- ga: mang: ra" khang: gaug byu dayaug re myao: ra"- Yesu wa yao: re Nga" thao cao" la,- ga: khai: ra". 28 Levi wa alhab' re to" pye' co' mung: Yesu thao cao" ra". 29 Levi wa yao" yham mae Yesu qhid' mae" bang" da" poe aqi: dalam: kad' ra"- ai: poe mae khang: gaug mo, myo: sho' we' gatau bang" vo qe myo: sho' bobo: ako". 30 Ailao" Pharishe qe we' yao: bam: phung: mae" Tung" Pho" qe daqhae: wa Yesu mho"zo: qere Naonhaung" wa khang: gaug mo,we' daga" za: pe"mung: zo: shaug' na ko" i? ga: jung" ta" ako". 31 Yesu wa yao: bam re Qao" zin" ra" mo, wa mocid' sara maqo ko" ngad: ra"- No mo, za: aqo: ako". 32 Ngo wa din:man: mo, re khai nae" qhid' mae" li" ru mangad:- Qobo qo" ra" mo, myid tha" nae" qhid 'mae" ngo li" ru angad:- ga: phaug' tau" ra". 33 Byu damyo" wa Yesu re- Yohan mho"zo: qe we' Pharishe qe: mho"zo: qe wa- dazab: makyo zo:ve jao" yang: akyu" lhaung" mho' mho' mung: kad' ako"- ngadqere: ni" mho: zo: qe wa zo: yang: shaug' yang: na: ako"- ga: ta" ako". 34 Ailao" Yesu wa yao: bam re Lo, xo' poe mae" bang" vo qe wa- pho" sag' we' daga" na: jo, shi" au:- yao: bam re zo:ve qo" jao" nhao genae" i? Maqo" jao" nhao genae". 35 Ngadqere: yao: bam: phaung mae" pho" sag' re li" jhui" yu: ra" ba na joe" lo: li" nae"- ailao" kam" wa yao: bam zo:ve jao" li" genae"- ga: phaug' tau" ra". 36 Yesu wa dao: tau" ci yang re: yao: bam re- Mai bau: sag' mae" dacug' cad' yu yang: mai bau: xug' mae khag' re: malhaung" pho ko" ngad: ra"- Airu: pho lao" mai bau: asag' khye' jad: lo" li" nae"- ai za: mangad:- Mai bau: asag' cug' we' mai bau: xug' re: majho" dau zai ngad: ra". 37 Aimae" sabyi qang: asag' rere: shoqid thaung xug' mae khoyaug re: malhaung" ke' ngad: ra"- Airu: ke' lao"- sabyi qang: asag' yang shoqid thaung xug' re jhin" kho' ke' mung: sabyi qang: yug: sheim:lo" byaug: li" nae". Alao" shoqid thaung re:qeim: lo" byaug zai ngad: ra". 38 sabyi qang: asag' re wa shoqid thaung asag' khug mae ke' to: qo: ra". 39 Amung: khag' ngadqere: sabyi qang: axug' re bin: shaug' thao re sabyi qang: asag' re manug: shaug' ko" ngad: ra". Yao: wa axug' yao: je: gai:- ga: ta" ra". 1 Dugno: Ba daba mae Yesu wa jung: gaug yo khyo" su" lai: lo" ra"- yao" mho"zo: qe wa jung: gaug shi: re shan" yu mung: yao: bam: lo, vo: khug mae nai: phaug' yang: zo" ako". 2 Pharishe qe daqhae: wa- Naonhaung" pe"mung: Dugno: Ba mae magai: kad' ra" ja: kad' ko" i? ga: myid' ako". 3 Yesu yao: bam re phaug' tau: mung:- Davi wa yao: we' yao" byu qe vae: moe; gelao" khoru: kad' ko" rure naonhaung" manghe' qu" ko" i? 4 Yao: wa Mao"So: yham khug khyo vao ye: mung: khinjaung qemae"je yang: khag' re: magai: zo" ra" Mao"So: qhid' kheim: mae qhaug' byid' to" ra" mug re yu zo: mung: yao" byu qere re: byid: zho" ra"- ga: ta" ra". 5 Ailao" Yesu wa yao: bam re- Byu: Yao: Zo: wa Dugno: Ba: Asang ngad: ra"- ga: ta" ra". 6 Dugno: Ba gatau daba mae Yesu wa Tarha" Jung Yham khyo vao ye: yang: mho" shid' byid' ra"- ai: mae lo, yo lo, shid: ra" byu dayaug na: ra". 7 Alao" Tung" Pho" qe we' Pharishe daqhae: wa Yesu re qobo zhaug' nae" khyo qho nug gemung: Dugno: Ba mae no gai byid' ra" la,- magai byid' ra" la,- ga: yao: re nyang" za: jo" qu" na: bam: ako". 8 Ngadqere: Yesu wa yao: bam: nhag' lam: re ba: pye' byid: mung: ai: lo, dashad' shid yaug re- To" mung: ce: qhid' au: mae li" ye, ri:- ga: ta" ra". Ailao" aiyaug wa to" li" mung: yeye; jo; ra". 9 Yesu wa yao: bam re- ngo naonhaung" re myid: geli"- Kham" To" Ra" Tarha" wa Dugno: Ba mae gai: ra" mau" zo" kad' nae"- mangad: lao"- magai: ra" mau" kad' nae"- byu: kao: so' re khyad' yu nae"- mangad: lao" se' pye' nae" kholam: re kad' gai:- ga: akhang" byid' to" ra" i? ga: ta" ra". 10 Yesu wa yao: bam re gam: sho' lhang: qu" mung: ai: lo, dashad' shid yaug re- Ni" lo, yheim" ke' wa,- ga: ta" ra". Ailao" aiyaug wa yao" lo, yheim" ke' mung: yao" lo, gai: lo" byaug: ra". 11 Yao: bam wa nhag' kyid kyid yo: mung: Yesu re khoru: kad' nae" ra" khyo re yao: bam yao: cao: jho" qham: ako". 12 Ai: thao Yesu wa bug gaung dalam: khyo akyu" mho' nae"- ga: do, ye" lo" ra"- ai: mae damyi: geim" Mao"So re akyu" mho' mung: na: ra". 13 Mug: bo" lao"- mho"zo: qere yao: jhao" khai: yu mung: yao: bam mae" daxe: shid' yaug re khyin: yu yang: yao: bam re lagyo: qe- ga: mhang" byid' ra". 14 Ai: lagyo: daxe: shid' yaug wa- Petru ga: yao: mhang" byid' ra" Simon- Simon: yao: nhaung: Andre- Yaku we' Yohan- Philib we' Batholame- 15 Mathe we' Thoma- Alphaeu yao: zo: Yaku we' byumyu" jhid' myid qi" ra" Simon- 16 Yaku yao: zo: Yuda we' thao phyao: yao: re ab byid' pye' nae" yaug boe" li" ra" Yuda Iskarud bam ngad: ako". 17 Yesu wa lagyo: qe we' daga" bug gaung mae" gyo" lo mung:- bug gaung khyid- jao: dae mae yao" mho"zo: qe phung: mo" zang we' daga" ye; jo; ra". Yuda mung"geim" mae" we' Yerusalem mae" re:- panglai: qid yae cao" mae" Ture we' Sidon vogaung: mae" joe" li" ko" ra"- mo, byu qe ajham ataung phung: mo" zang wa Yesu mungdao: re tae" gyo" yu nae" we' yao: bam: no phyo: gai: lo nug geyang: zang" ham: na: bam: ako". 18 Makhyang" ra" yui jham: yang yhin" na: ru qhug' ra" mo, re: li" mung: gai byid' ru qhug' ako". 19 Yesu gaung mae" qam: so' thug' lo" mung: yao: bam: no phyo: alhab' re gai byid' ruyang mo, byu qe alhab' mo, wa yao: re qo" tin: nae" qhid' mae" qam: ke' yang: cao" ako". 20 Yesu wa yao" mho"zo: qere qu" mung: ta" ru wa- Myaung sho" ra" mo, naonhaung" wa ngaui lho" ko" ra"- pe"mung:ga"re Mao"So: mung"dan: wa naonhaung" mung"dan: ngad: ra". 21 Ana" moe, shab' na mo, naonhaung" wa ngaui lho" ko" ra"- pe"mung:ga"re naonhaung" nhag' shid nhag' dag: ru qhug' li" genae"- ana" kaug' ngug: na mo, naonhaung" wa ngaui lho" ko" ra"- Pe"mung:ga"re naonhaung" qi: li" genae". 22 Byu: Yao: Zo" mathao mae byu jham naonhaung" re ngag: ha: pye'- jung" gaui mung: naonhaung" mang re ta" phyo' ta"qheim" ru qhug' gelao"- naonhaung" wa ngaui lho" ko" ra". 23 Airu: qhug' gelao"- thug' jhu: sho' bau: ge,- pe"mung:ga"re mug:gaung: mung"dan: dao mae naonhaung" aphug' jhaung qhu" wa- gyai qi" ra"- naonhaung" re airu: kad' ra" mo; phug' phyid' qe wa naonhaung" re kad' ru we' dakhyo:- daba: mae" lapa qere re: airu: kad' vako" ra". 24 Ngadqere: jo,nho" qo" ra" mo, naonhaung" wa byuxa: vaqoe, qhug' ko" ra"- pe"mung:ga"re naonhaung" wa myan myan yo yo za: qo" na: avako". 25 Ana" zo" gyi: shaug' gyi: mo, naonhaung" wa byuxa: vaqoe, qhug' ko" ra"- Pe"mung:ga"re naonhaung" vae: moe; genae"- Ana" qi mo, naonhaung" wa byuxa: vaqoe, qhug' ko" ra"- Pe"mung:ga"re naonhaung" kaug' ngug: li" genae". 26 Byu alhab' yang naonhaung" re gai:- ga: caung:khin" gelao"- naonhaung" byuxa: vaqoe, qhug' ko" ra"- pe"mung:ga"re yao: bam: phug' phyid' qere: lapa apyag' qere ai we' dakhyo: caung:khin" byid: vako" ra". 27 Ngadqere: nga" mungdao: re tae" gyo" yu: ra" mo, naonhaung" re ngo ta" ru wa- Naonhaung" gyevo qere jhid'de; ge,- naonhaung" re manug thug nghang" ra" mo, re gai kad' ge,- 28 Naonhaung" re nhang" ra" mo, re shaman" byid: ge,- naonhaung" re roe" zo" ra" mo; qhid' mae" akyu" mho' byid: ge,- 29 Ni" boqae dashad' re pyo' ra" yaug re gatau dashad' rere: khae byid: shi: wa,- ni" adao: bau: re yu: pye' ra" yaug re ni" akhug: bau: rere: yu nhao shi: wa,- 30 Nao jhao" li" mho' ra" mo, alhab' re byid: wa,- ni" zai yu: pye' ra" yaug mae" dadam: mho' yu wa,- 31 Su: yang nyhao: re khoru: kad' byid: nae" nyhao: yao: myid: o: ru we' dakhyo:- su rere: ai we' dakhyo: kad' byid: ge,- 32 Naonhaung" re jhid'de; ra" mo, reza: naonhaung" jhid'de; ko" re wa- naonhaung" wa Mao"So: shaman" jeju khoru: qo" khae: yu genae" i? Qobo qo" ra" mo, lhao" re: yao: bam re jhid'de; ra" mo, re wa jhid'de; ako" 33 Naonhaung" re gai kad' mo, reza: naonhaung" gai dam: phaug' kad' ko" ngad: re wa naonhaung" wa Mao"So: shaman" jeju khoru: qo" khae: yu genae" i? Qobo qo" ra" mo, lhao" re: ai we' dakhyo: kad' ako". 34 Dam: qo" xe' byid' li" nae"- ga: myid: lam: ra" mo, re za: naonhaung" jhid' byid: ko" re wa- naonhaung" wa Mao"So: jeju khoru: qo" khae: yu genae" i? Qobo qo" ra" mo, lhao" re: dam: qo" tug' yu nae"- ga: myid: lam yang: qobo qo" ra" mo, yao: cao: jho" jhid' byid' ako". 35 Ngadqere: naonhaung" kam" wa naonhaung" gyevo qere jhid'de; mung: yao: bam re gai kad' ge,- Pe" rere: nhag' manghae: lo: jhid' byid: ge,- Airu: kad' gelao"- naonhaung" aphug' jhaung qhu" wa qi: nae"- ailao" Myhao: Thao" ra" Mao"So: Yao: Zo: bam re: naonhaung" boe" genae"- pe"mung:ga"re Mao"So wa jeju maba: beim" ra" mo, we' makhyang" ra" mo, re gai kad' ra" yaug ngad: ra". 36 Naonhaung" Yao: Pho" wa nhag' khyag' shogu: yaug ngad: ru we' dakhyo:- naonhaung" re: nhag' khyag' shogu: na ge,- 37 Su re dao: dakho' ge,- ailao" Mao"So wa naonhaung" re dao: makho' nae"- Su re dao: daphyid' ge,- ailao" Mao"So wa naonhaung" re dao: maphyid' nae"- amung: su re qobo khyad' byid: ge,- ailao" Mao"So wa naonhaung" qobo re khyad' byid' li" nae". 38 Su re byid: ge,-Ailao" Mao"So wa naonhaung" re byid' li" nae". Byang" sheim sho' deim" jhan yang: man" ra" jo, lag: yang naonhaung" lo, mae ke' byid' li" nae". Gaigai: yao: naonhaung" lo, khug mae qo" yu: li" genae". Mao"So wa- naonhaung" yang su re lag byid' ra" jo, lag: yang naonhaung" re lag byid: li" nae". 39 Yesu wa ce: dao: tau" yang re: yao: bam re- mho" shid' ra". Myo, jid yaug wa myo, jid yaug re khyoqhid' qo" she nae" i? Yao: airu: khyoqhid' she: ngad: re wa yao: shid' zo: shid' zo" geim" dung: gyan: khug khyo byid: gyo" lo" li" genae" mangad: i? 40 Mho"zo: wa mho" pho" tho' maje ngad: ra". Ngadqere: mho"zo: wa cao jab alhab' bin: zhao: yu thao re wa- yao" mho" pho" we' dakhyo: ngad: li" nae". 41 Nao wa naoyao" myo,jid' khug mae bo: ra" thao: thaung: re bo thoe magyo: lo:- ni" mao:nhaung: pho" myo,jid' khug mae bo: ra" thao: je; re pe"mung: myao: i? 42 Nao wa naoyao" myo,jid' khug mae bo: ra" thao: thaung: re lhao" bo thoe magyo: lo:- ni" mao:nhaung: pho" re Mao:nhaung: pho" we"- ni" myo,jid' khug mae" thao: je, re yu: pye' byid: li"-ein: khoru: mung: qo" ta" i? Geim kad' yaug we"- ni" myo,jid' khug mae" thao: thaung: re shi" sao qhid' yu: pye' wa,- airulao" za:- ni" mao:nhaung: pho" myo,jid' khug mae bo: ra" thao: je, re qang: qang: za: myao yang: qo" yu: pye' byid: nae". 43 Qam: bo: ra" shi: gae wa malho" ra" ashi: mazaui: ngad: ra"- Qam: mabo: ra" shi: gae re: lho" ra" ashi: maqo" zaui: ngad: ra". 44 Zaui" ra" ashi: re qu" yang: shi: gae khao: ngo" re gai: qu" ba: yu: ra"- naonhaung" wa zau: gae mae" pho' ham" shi: maqo" phyo' yu gengad: ra"- amung: zau: bye, mae" re: sabyi shi: maqo" phyo' yu gengad: ra". 45 Gai: ra" yaug wa yao: yao" nhag' lam: gai: ra" jo,nho" ban" mae" gai: ra" ja: re phoe' thug' ba: ra". Amung: magai: ra" yaug re: yao: yao" nhag' lam: magai: ra" jo,nho" ban" mae" magai: ra" ja: re phoe' thug' ba: ra"- pe"mung:ga"re nhad' wa nhag' lam: khug mae byang" jo; rure jhau: thug' ke' ra". 46 Naonhaung" wa nga" mho dao: re wa magyo: lo:- ngore Asang we"- Asang we"- ein: pe"mung: ta" ko" i? 47 Ngo jhao" li" mung: nga" dao: re tae" gyo" yu yang: phug' cao" ra" yaug khag' ngadqere: yao: wa khag' we' dau: rure ngo naonhaung" re ta" kyo: geli". 48 Aiyaug wa yham zhaug' ra" au:- no, sho' dau: yang: laug thin dao mae apan zhaug' mung: yham zhaug' ra" yaug we' dau: ra". Qid je" li" lao" moe bug: yang ai: yham re lodeim: ngadqere: ai: yham wa tang tang za: zhaug' to" ru ngad mung: ai: yham wa malaui: ngad: ra". 49 Ngadqere: nga" dao: re gyo" yu mung: maphug' cao" ra" yaug wa- apan mazao lo: myid cin mae yham zhaug' ra" yaug we' dau: ra". Moe bug: yang lodeim: we' aijao" yao: byo; gyang: lo" ra"- amung: ai: yham byo; gyang: lo" ru wa phyi yao: ngad: ra"- ga: ta" ra". 1 Yesu wa ai: dao: jham re mo, byu qere bin: ta" lao"- yao: wa Kapena-um vogaung: khyo ye" lo" ra". 2 Ai: vogaung: mae Roma gyezug: pho" dayaug wa yao: gyai ngaui: ra" daui daui okaung pho" dayaug qo" ra"- ai: daui daui okaung pho" wa no yang: alaug laug shid: lo" na: ra". 3 Gyezug: pho" wa Yesu khyo re the' gyo: lao"- yao: wa Yuda byu au: jhaung daqhae: re Yesu jhao" nhao: ke' mung:- yao" daui daui okaung pho" re li" gai byid: nae" qhid' mae Yesu re mho' ke' ra". 4 Yao: bam Yesu jhao" joe" li" gelao"- yao: bam wa Yesu re Ce: gyezug: pho" wa- nao bao" thaug' yu nae" man: qi" ra" yaug ngad: ra". 5 Pe"mung:ga"re yao: wa ngonhaung" amyu" re jhid'de; mung:- ngonhaung" qhid' mae" Tarha" Jung Yham dalam: re kad' byid: yaug ngad: ra"- ga: ta" zo" re" kyid kyid ga: mho' ako". 6 Airumung: Yesu wa yao: bam we' daga" cao" ye" lo" ra". Yao: wa ai: yham we' mataung" va" rumae joe" lao"- gyezug: pho" wa yao" ba nam qere nhao: ke' mung:- Yesu re- Asang we"- naoyao" gaung re aqug: akhai: dakad' wa,- nao nga" yham khyo vao li" nae" qhid' mae" ngo wa maman: qi" yaug ngad:- 7 Ngo yao: nao jhao" li" nae" re: man: qi" nae"-ein: ngo majho- Ni" amyin" dao: dakheim: zo: ta" ke' re nga" daui daui yaug wa gai: lo" li" nae". 8 Pe"mung:ga"re ngore: kheim: so' qo" ra" gyezug: mo" qe: o mae na: ra" byu dayaug ngad:- nga" o mae re: gyezo: qe myo: sho' na: ako". Gyezo: dayaug re ye: wa,- ein: amyin" byid: lao"- yao: ye" ra"- Gatau dayaug re- lo wa,- ein: amyin" byid: lao"- yao: lo: ra". Amung: nga" jeim pho" rere:- ce kad' wa,- ein: amyin" byid: lao"- yao: kad' ra"- ga: ta" nhao: ke' ra". 9 Yesu wa cedao: re the' gyo: lao" mug' mung:- yao" thao cao" qin" ko" ra"- Mo, byu qere lhang: qu" yang:- naonhaung" re ngo ta" geli"- Israel amyu" mae lhao" re: ce: lam khug: myid qhi" bo: ru ngo mamyao: qu" shi:- ga: ta" ra". 10 Gyezug: pho" ba nam qe yao" yham khyo dam: tug' joe" lo ko" re- gyezug: pho" daui daui yaug wa no gai: byaug va" rure yao: bam lomyao: ako". 11 Ai: thao mataung" myao" re Yesu wa Nain ga" ra" vogaung: khyo ye" lo" ra"- yao" mho"zo: qe we' byu phung: mo" zang re: cao" ye" ako". 12 Vogaung: kyae" kham: mae Yesu joe" ye" lo" au:- byushid mao dai" mo, daphung: yan" thug' li" ako"- ai: byushid mao wa cug' mo" myhi" dayaug: zote: zo: ngad: ra". Ai: cug' mo" myhi" we' daga" vobyu qe phung: mo" zang re: bocao: dai" li" ako". 13 Asang wa ai: cug' mo" myhi" re myao lao"- nhag' gyai qu" khyag' mung: yao: re- Dangug wa,- ga: ta" ra". 14 Yesu wa te' sho' qui" ye: mung: ai: gaung: re yetin" ra"- Mao dao mo, re: thang byid' ako". Alao" Yesu wa- Zolau: zo: we"- nao re ngo ta" li"- To" wa,- ga: ta" ra". 15 Alao" shid yaug wa to" zaung mung: dao: jhau: li" ra"- Yesu wa ai: zolau: zo: re yao: myhi" re dam: ab byid' ra". 16 Byu alhab' mo, gyaug: mug' ru we' Mao"So re caung:khin" zo: re"- yao: bam wa- Ngonhaung" phaung gaung: mae lapa aqi: dayaug thug' li" va"- Mao"So wa yao" byumyu" re khyad' yu nae" qhid' mae" joe" li" va"- ga: ta" ako". 17 Ce: Yesu lau thoe wa Yuda mung" geim" jao: sho' we' avai: ayae mug: khaung: mae hau" nhao" lo" ra". 18 Yohan: mho"zo: re wa ai: khyo alhab' re Yohan re lo" ta" kyo: gelao"- 19 Yohan wa yao" mho"zo: shid' yaug re khai: yu yang:- Asang jhao" nhao: ke' mung:- nao wa ai: joe" li" nae" yaug ngad va" i? Mangad: lao"- gatau dayaug re ngonhaung" myid: lao" na shizai i? ga: myid: nhao: ke' ra". 20 Yao: shid' zo: wa Yesu jhao" joe" lao"- nao wa ai: joe" li" nae" yaug ngad va" i? Mangad: lao"- gatau dayaug re ngonhaung" myid: lao" na shizai i? ga: qid nyhab' byid: yaug Yohan wa nga" shid' zo: re myid: nhao: ke' ra"- ga: ta" ako". 21 Ai: ayo, mae yao:- Yesu wa byu myo: sho' mo; no phyo: we' no jham re gai byid: mung: makhyang" ra" byo jham re khe' thug' ke' ru we' myo, jid myo: sho' mo, rere: myo, myao: li" nhao: ra". 22 Yesu wa Yao: shid' zo: re tau: mung:- ni" shid' zo: the' myao- the' gyo: vako" rure Yohan re lo" ta" kyo: ge,- Myo, jid mo, dam: qo" myao: li" ako"- Khyid qeim mo, khyo qo" su" li" ako"- Mao gae: de, mo, gai: shao: lo" ko" ra"- No: jid mo, no: gyo" li" ako"- Shid mo, dam: daui: to" li" ako"- Myaung sho: mo, wa Ngaui Bau" Lau Dao: re the' gyo" yu: ako". 23 Ngo re maaug' o: yaug wa ngaui lho" ra"- ga: ta" ra". 24 Yohan mho"zo: shid' yaug phao: lo" gethao re Yesu wa Yohan: khyo we' sin: yang: byu phung: mo" re- Naonhaung" Yohan jhao" din"pyad' yo khyo ye: ko" au:- naonhaung" pe" re qu" nae"ein: thug' ye: ko" i? La: yang hug' nghan" na: ra" myo, gae jham re qu" nae"ein: ye: ko" i? 25 Naonhaung" pe" re qu" nae"ein: thug' ye: ko" i? Mai gai bau: gai ve; ra" yaug re qu" nae"ein ko" i? Mai gai bau: gai ve, mung: ngaui qhang dao mae langa: khyo" na: na mo, wa kho:kham kho" mae na: ako". 26 Ngo re ta" kyo: gela,- naonhaung" pe" re qu" nae" ein: thug' ye: ko" i? Lapa re qu" nae" ein ko" i? Gaigai: yao: ngad: ra"- naonhaung" wa lapa tho' je: qi" yaug re yemyao: avako". 27 Pe"mung:ga"re Yohan wa Jham: Mugsug' mae- ngo wa ni" khyo re seim" nyhang" to: nae" qhid' mae" lagyo: re ni" qhid' au: mae ngo nhao: ke' nae"- ga: Mao"So ta" to" ra" yaug ngad: ra". 28 Naonhaung" re ngo ta" geli"- Yohan tho' je: qi" ra" xao su byu dayaug re: mana: qu" shi: ngad: ra". Ngadqere: Mao"So: mung"dan: mae je: ngai: thao" ra" yaug wa Yohan tho' je: qi" ra". 29 Mo, byu qe alhab' mo, Yesu dao: re gyo" ako"- yao: bam we' khang: gaug mo, wa- je yang: Mao"So nho: din:man" khyo re phug' cao" mo, ngad: ako". Yao: bam wa Yohan lo, mae qid nyhab' kham: yu va" mo, ngad: ako". 30 Ngadqere: Pharishe qe we' Tung" Pho" qe wa yao: bam: qhid' mae" Mao"So myid: yaung: to" rure ngag: pye' ako". Yao: bam wa Yohan: lo, mae qid nyhab' kham: yu nae" ha: pye' mo, ngad: ako". 31 Yesu wa xo' mung:- ana" ceqae" mae" byu qere ngo pe" we' dau tau" nae" i? Yao: bam wa pe" we' dau: i? 32 Yao: bam wa gai jao: mae zaung: jo, mung: Naonhaung" wa ngonhaung" khalhao: mad ngadqere: mago" gengad: ra"- ngonhaung" ngug yao" yao" ngadqere: naonhaung" makaug' ngug gengad: ako"- ga: daphung: we' daphung: zojhi jhi yang: yao: cao: yao: jho" yao: na ko" ra" zoshao qe we' dau: ako". 33 qid nyhab' byid: yaug Yohan wa zo:ve jao" ru we' sabyi qang: mashaug' lo: joe" li" ra". Alao" naonhaung" wa Yao: wa yui zaung yaug ngad: ra"- ga: ta" ako". 34 Byu: Yao: Zo: wa zo: mung: shaug' mung: joe" li" lao" re:- naonhaung" wa- Ceyaug re qu" qu" ge,- yao: wa zo: shaug' so' kho' nhad' shu yaug- qobo qo" mo, we' khang: gaug mo; byin cao: ngad: ra"- ga: ta" ako". 35 Ngadqere: Mao"So: pha,jhi" wa khae: yu: ra" mo, alhab' khyo" yang dang: rure qhu" byid' ava"- ga: ta" ra". 36 Pharishe dayaug wa yao: we' daga" myi" xeim zo: nae" qhid' mae" Yesu re khai: ra". Yesu wa ai: Pharishe yham khyo vao ye: mung: zozo: nae" ga: zaung: jo; ra". 37 Ai: vogaung: mae qobo gyai kad' ra" myiqe: dayaug na: ra". Yao: wa Pharishe pho" yham mae Yesu zozo" na: ga" rure the' gyo: lao"- nae pyo" ra" xau byang" sho' bo: ra" laug gyang" thaug' dathaug' cili" mung:- 38 Yesu nhaung thao" shad' yao" khyid thao mae li" ngug: ye; jo; ra"- Yesu khyid wa yao" ngug byid jham: yang jhug' lo" byaug: ra". Alao" ai: myiqe: wa aire yao" xae: yang sad' byid: mung: khyid re bobaug baug yang: nae pyo" ra" xau vhe' gyad byid' ra". 39 Ceru re Pharishe pho" myao lao"- ceyaug wa lapa gaigai: ngad dang: re wa yao: re tin" ra" myiqe: wa khag' ngad: rure we' qobo jab ngad: rure ba nae" ngad: ra"- ga: yao" aung khug mae ta" ra". 40 Yesu wa yao: re- Simon we"- nao re ngo ta" nae" daja: jo;- ga: ta" ra". Simon wa Mho" pho" we"- ngore ta" kyo: la,- ga: ta" ra". 41 Ailao" Yesu wa ngaui jhid' zo" ra" byu dayaug jhao" jhin de; ra" byu shid' zo: na: ako"- Dayaug wa ngaui thang: the: ngo" yo kye' jhin de, mung:- dayaug wa ngo" xe kye' jhin de; ra". 42 Yao: shid' zo: wa jhin madam: qo" xe' gemung: ai: ngaui sang wa- yao: shid' zo" geim" re jhin khyad' pye' byid' ra"- Alao" ai shid' zo: mae" khoyaug lam: ai: ngaui sang re je: jhid'de; nae" laug i? ga: ta" ra". 43 Simon wa- je: laug sho' re khyad' pye' byid: qhug' yaug ngad: ra" ein: ngo jho:- ga: tau" ra". 44 Alao" Yesu wa myiqe: shad' khyo lhang: lo mung: Simon re- Ce: myiqe re nao myao: i? Ngo ni" yham khyo vao li" re nao wa nga" khyid cid' qid mabyid: ngad: ra". Ngadqere: yao: wa nga" khyid re yao" ngug byid: yang cid' byid: mung: yao" xae: yang sad' ho byid' ra". 45 Nao wa ngore bobaug malham: baug ngad: ra"- ngadqere: yao: wa ngojhao" vao li" mae" nga" khyid re bobaug baug mathang ngad: ra". 46 Nao wa nga" au: mae xau magyad byid: ngad: ra"- ngadqere: yao: wa nga" khyid re nae pyo" ra" xau gyad byid' ra". 47 Airumung: ngo nao re ta" li"- yao" qobo myo: sho' khyad' pye' byid: qhug' va" ruyang yao: wa jhid'de; myid myo: sho' qhu" byid' ava"- Dajhid' za: khyad' pye' byid: qhug' yaug kam" wa jhid'de; myid dajhid' za: qhu" byid' ra"- ga: ta" ra". 48 Ailao" Yesu wa ai: myiqe: re- Ni" qobo jham re khyad' pye' byid: va"- ga: ta" ra". 49 Saboe" mae daga" zaung: jo, mo, wa- Qobo jham re lhao" qo" khyad' pye' byid' ra" byu ceyaug wa- khag' ngad: i? ga: yao: bam: aung khug mae ta" ako". 50 Ngadqere: Yesu wa ai: myiqe: re- Ni" lam khug: myid wa nao re khyad' yu: ava"- Yaug yo za: phao: lo" se,- ga: ta" ra". 1 Ai: thao mataung" myao" re Yesu wa vozo: vozang jham khyo gam: sho' du" qin" mung: Mao"So: mung"dan: Lau Dao: Gai re cao" kho" kyo: byid' ra"- Mho"zo: daxe: shid' yaug wa Yesu we' daga" bocao" qin" ako". 2 Makhyang" ra" yui jham we' no jham mae" gai shao: lo" byaug ko" ra" mo, mae" myiqe: damyo" ngad: ra" yui nhad' dau: re khe' thug' pye' byid' ra" Magadala Mari- 3 Herod yham mae" zug:pho" Khuza yao: myi: Yoana- Susanna bam we' gatau myiqe: myo: sho' mo, re: yao: bam yao" ngaui qhang: yang Yesu we' yao" mho"zo: qere bao" thaug' byid: mung: bocao: qin" ako". 4 Mo,byu qe wa vogaung: khao: ngo" mae" zang" ham: li" na mung: byu phung: mo" zang ham: na: bam gelao"- ce: dao: tau" ci yang: yao: bam re ta" kyo" ra". 5 (Dalhang: mae- byu dayaug wa myug: shi: sin: nae" qhid' mae" thug' ye" lo" ra". Yao: wa yo mae myug: shi: yesin" ke' re myug: shi: daqhae: wa khyodang mae gyo" lo" ge mung: byu jham zab: nhe" pye' ru we' ngho' jham: yang gaug zo" pye' ko" ra". 6 Myug: shi: daqhae: wa laug qan" myid dao mae gyo" lo" ako"- Agae yaug: thug' li" qere: myid zhai: majhug' yang: kyaug' shid: lo" ko" ra". 7 Myug: shi: daqhae: wa zau: bye, gyo: mae gyo" lo" ako"- Zau: gae jham we' daga" yaug: qi" li" mung: zau: gae jham: yang hab' pye' ra". 8 Amung: myug: shi: daqhae: wa myid gai dao mae gyo" lo" ako"- Agae yaug: qi" li" gemung:- myug: shi: khao: ngo" anho" dayo nho" nho" ashi: zaui" li" ako"- ga: ta" ra".) Alao" Yesu wa No: de, ko" re wa gyo" yu ge,- ga: ta" mung: dao: pin" pye' ra". 9 Yao" mho"zo: qe wa ce: dao: tau" pe" re ta" nug: ra" khyo Yesu re myid' ako". 10 Yesu wa tau: mung: Naonhaung"wa Mao"So: mung"dan: no; thao" khyo re ba: gyo: nae" akhang" Mao"So wa naonhaung" re byid' to" ra". Ngadqere: dang: ra" gaje wa yao: bam qu" gengadqere:- mamyao- gyo: gengadqere: maba: gyo: genae" qhid' mae" dao: tau" khyo" yang ta" ru ngad:- ga: ta" ra". 11 Dao: tau" lajheim: wa ceru: ngad: ra"- ai: myug: shi: wa Mao"So: mungdao: ngad: ra". 12 Khyodang mae gyo" lo" ko" ra" myug: shi: jham wa ai: mungdao: re gyo" yu gengadqere:- lam" mung: khyad' yu: ru maqhug' genae" qhid' mae" Satan wa li" mung: yao: bam: nhag' lam: khug mae" mungdao: re li" yu: pye' byid' ra" mo, ngad: ako". 13 Laug qan" myid dao mae gyo" lo" ko" ra" myug: shi: jham wa mungdao: re gyo" yu ge we' ngaui bau: za: khae: yu gengadqere:- agyi: no, sho' macin" ruyang dayo, daban: za: lam khug mung: jham" qu" ru thaung" qhug' lo lao"- dam: phaug' lo" ra" mo, ngad: ako". 14 Zau: bye, gyo: mae gyo" lo" ko" ra" myug: shi: jham wa ai: mungdao: re gyo" yu gengadqere: myid: qug: myid: ci" ru- jo,nho" qo" nug: ru- cepyad mae pyo: nug: ru jham: yang hab' pye' mung: ashi: lho" mazaui" ra" mo, ngad: ako". 15 Myid gai dao mae gyo" lo" ra" myug: shi: jham wa ai: mungdao: re gyo" yu mung: gai: ru we' phug' cao" ra" nhag' lam: khug mae tang tang zaui" zag: ci yang: ashi: zaui"ra" mo, ngad: ako". 16 Myikaug' re te' mung: ban" yang maug: lhaung" to:- mangad: lao"- jaung: gyid' mae khag' malhaung" zhaung: to" qu"- Yham khug khyo vao li" mo, alhab' myibao re myao genae" qhid' mae" myikaug' tao" dao mae lhaung" zhaung: to" ako". 17 Nyham" to" ra" ja: pe" ngadqere: myao: thug' li" nae"- amung: nghoe' to" ra" ja: pe" ngadqere: de: de: za: myao: thug' li" nae". 18 Airumung: naonhaung" khoru: gyo" yu ko" rure lha" ge,- pe"mung:ga"re qo" ra" yaug khag' re ngadqere: je: laung: byid' li" nae"- ngadqere: maqo" yaug mae" kam" wa- yao: qo"- ga: myid: jho: na: ra" dajhid' za: re lhao" yao: mae" yu: pye' byid' li" nae"- ga: ta" ra". 19 Yesu yao: myhi" we' yao: nhaung: bam wa Yesu jhao" joe" li" ako"- ngadqere: mo, paug' saung" thau yang: yao: jhao" maqo" joe" vao ye: ngad: ako". 20 Byu dayaug wa Yesu re Ni" myhi" we' ni" nhaung: bam nao re qhug' nug mung: taung gaung mae li" ye; jo; ako"- ga: ta" kyo" ra". 21 Yesu wa yao: bam alhab' mo, re- Mao"So: mungdao: re gyo" yu mung: phug' cao" ra" mo, wa- nga" myhi"- nga" nhaung: bam ngad: ako"- ga: ta" ra". 22 Daba re- Yesu wa yao" mho"zo: qe we' daga" lha dakhye' mae yedo; zaung mung: yao: bam re- Nyhao: nhaung"- tham: thoete' khyo gau"de; ye: gelang:- ga: ta" ra". Airumung: yao: bam wa gau" de; ye" lo" ako". 23 Yao: bam gau" de; ye" lo" na ko" au:- Yesu wa yab: myhid' jo; ra". Ai: tham: mae nyag din taung" la qam" hug' lo mung: lha khug mae qid byang" li" na: ruyang yao: bam wa gyai gyaug: ci" na: ako". 24 Mho"zo: qe wa Yesu re yenhug' mung:- Asang we" Asang we"- ngonhaung" jeim" lo" na va"- ga: ta" ako". Alao" Yesu wa to" li" mung: ai: la we' bang: lhung" re qeim: ke' ra"- La we' bang: lhung" wa yo za: tae" lo" byaug mung:- gyai qi: sho' yo: byaug: ra". 25 Alao" Yesu wa mho"zo: qere Naonhaung" lam khug: myid wa khotau mae i? ga: ta" ra". Yao: bam kam" wa mug' ru we' gyaug mung:- ceyaug wa khag' ngad: i? La we' bang: lhung" re lhao"- yao: amyin" byid: mung: yao" mho dao: gyo" ako"- ga: yao: cao: jho" ta" ako". 26 Yesu we' yao" mho"zo: qe wa- Galile mung" we' tau" te' mae" Gerasa mung" khyo gau" de; ye" ako". 27 Yesu taung gaung khyo su" do, lo" na: au:- ai: vo mae" yui zaung: ra" byu dayaug yao: re li" qhug' ra"- aiyaug wa gaung pyad' du" qin" ru myao" va" ra"- yao: wa yham mae mana lo:- lab bug khaung: mae na: qin" ra". 28 Yao: wa Yesu re myao lao"- zag: hug' mung: Yesu khyid qao: mae gyang: goe, yang:- Myhao: thao" ra" Mao"So: Yao: Zo: Yesu we"- nao we' ngo pe" jho" sin" i? Nao re ngo mho' ra"- ngore dayhin" la,- ga: hug' ta" ra". 29 Yao: ceru: ta" ru wa yao" khug mae" ai: makhyang" ra" yui re phao: thug' lo" nae" Yesu amyin" byid' ke' ruyang ngad: ra". Ai: makhyang" ra" yui wa aiyaug re myo: sho' lhang vao: jaung" va" ra"- yao" khyid lo, jham re jao co" yang taui: mung: kyam: khug mae lhaung" to: sho' ngadqere:- yao: wa jao co: jham re lao" phyid' pye' mung: ai: yui wa yao: re din"pyad' yo khyo cidao" lo" lo" mung: ra". 30 Yesu wa yao: re- Ni" mang pe" ngad: i? ga: myid' ra"- Alao" yao: wa- nga" mang wa Legio ngad: ga: tau" ra". Pe"mung:ga"re yui myo: sho' yao" khug mae vao: jaung" jo, gemung: ngad: ra". 31 Yui jham wa yao: bam re no; thao" ra" jo, qo khyo makhe' khyo" ke' nae" qhid' mae" Yesu re mho' ako". 32 Aitau mae vo, dajham mo" zang bug gaung mae bad zo" na: ako"- Airumung: yui jham wa yao: bam re vo, jham: khug mae yevao: jaung" nhao nae" qhid' mae" Yesu re akhang" mho' ako". Yesu wa yao: bam re akhang" byid' ke' ra". 33 Yui jham wa ai: byu mae" phao: thug' lo" mung: vo, jham: khug mae yevao: jaung" ako". Alao" ai: vo, phung: mo" geim" wa dang" kam" nhad' mae" tham: khug khyo tao" byae: gyo" lo" gemung: nab: shid: pye' ako". 34 Airu: boe" rure vo, zam: mo, myao gelao"- yao: bam tao" phao: lo" mung: ai: lau thoe re vogaung: khug mae we' seyo: vogaung: jham khyo hau" nhao" lo" ko" ra". 35 Mo, byu qe wa boe" lo: ra" khyo re yequ" nae" qhid' mae" thug' ye" lo" ako". Yao: bam Yesu jhao" joe" ye: ko" re yao" khug mae" yui jham phao: thug' lo" vako" ra" yaug wa mai bau: ve, yang: Yesu khyid qao: mae nhag' gyang: gyang: za: zaung: jo; rure yemyao gemung:- yao: bam alhab' mo, gyaug: din: pye' ako". 36 Aire the' myao: ra" mo, wa- mo, byu qere ai: yui vao: jaung" ra" yaug khoru: gai: lo" byaug: rure lham: ta" kyo" ako". 37 Ailao" ai: mang: khaung: mae"- mo, byu qe wa gyai gyaug: nin" pye' geyang: Yesu re yao: bam tau mae" phao: lo" nae" qhid' mae" mho' ako". Airumung: Yesu wa lha dao yedo; zaung yang: dam: tug' phao: lo" ra". 38 Ai: yui jham phao: thug' lo" byaug vako" ra" yaug wa Yesu re- ngore: nao we' daga" cao" nae" qhid' mae"akhang" byid: la,- ga: mho' ra". 39 Ngadqere: Yesu wa Ni" yham khyo phao: lo" mung: Mao"So nao re khoqhi" bao" thaug' byid: va" ra" khyo alhab' re lo" ta" kyo: wa,- ga: yao: re ta" mung: nhao: ke' ra". Ai: yaug wa- Yesu yao: re gai byid: va" khyo re vogaung: gam: sho' ta" hau" lo" ra". 40 Yesu tham: thoete' mae" dam: tug' joe" lo lao"- mo, byu qe alhab' mo, yao: re lao" na: bam ko" ruyang mo, byu qe wa yao: re lham: tug: yu: ako". 41 Alao" Ya:iru ga: mang: ra" Tarha" Jung Yham agyi pho" dayaug joe" li" ra". Yao: wa Yesu khyid qao: mae li" goe, mung: Yesu re yao" yham khyo li" nae" qhid' mae" mho' ra". 42 Pe"mung:ga"re daxe: shid' zin ngad va" ra" yao" zote: myiqe: zo: shid: lo" na mung: ngad: ra". Yesu wa aiyaug jhao" cao" ye" lo" na: au: mo, byu qe wa shad' khao: ngo" khyo" Yesu re the' jhin" ako". 43 Aibam: phaung mae daxe: shid' zin lam: lam: sa: sheim no no: ra" myiqe: dayaug bobo: ra". Yao: wa yao: qo" ra" gu: alhab' mocid' sara qere byid: mung: ya nhao ngadqere:- yao: re khag' maqo" ya: gai byid: gengad: ra". 44 Ai: myiqe: wa Yesu nhaung thao" khyo qui" li" mung: Yesu bau: thao mae yetin" ke' ra". Ailao" jao"- yao" sa: sheim: ru thang: lo" byaug: ra". 45 Yesu wa- ngore tin: yaug khag' ngad: i? ga: myid' ra". Yaug khao: ngo" wa khag' matin:- ga: ha: ako". Petru wa- Asang we" Mo, byu qe wa nao re lhang" kham" to: mung: nao re the' jhin" zao" ako"- ga: ta" ra". 46 Ngadqere: Yesu wa- Dayaug yaug ngore tin" kyivako"- pe"mung:ga"re nga" khug mae" qam: so' thug' lo" kyiva" ruyang aire ngo ba:- ga: ta" ra". 47 Ai: myiqe: wa yao: kad' rure beim: va" ra"- ga" rure ba: qu" lao"- yao: wa ko, ko, nin" ru we' Yesu khyid qao: mae li" goe, mung:- yao: pe"mung: Yesu re tin" ra" khyo we' ailao" jao"- yao" no khoru: gai: lo" byaug: ra" khyo re mo, byu qe alhab' mo; qhid' kheim: mae Yesu re ta" kyo" ra". 48 Yesu wa ai: myiqe: re- Nga" myiqe: zo: we"- ni" lam khug: myid wa nao re gai byid' ava"- Yaug yo za: lo" se,- ga: ta" ra". 49 Yesu cedao: ta" na shi" au:- ai: Tarha" Jung Yham agyi pho" yham mae" byu dayaug joe" li" mung:- Ya:iru re- Ni" myiqe: zo: shid: ava"- Mho" Pho" re aqug: akhai: dacekad' lo: wa,- ga: ta" ra". 50 Ngadqere: Yesu aire the' gyo: mung: Ya:iru re- Dagaung yug- Lam" za: lam" wa,- ni" myiqe: zo: dam: gai: li" zai ngad:- ga: ta" ra". 51 Yesu wa Ya:iru yham mae joe" ye: lao"- Petru- Yohan- Yaku we' ai: myiqe: nau" yao: myhi" yao: pho" tao mae" je yang: khag' rere: yham khug khyo yao: we' daga" mavao nhao ngad: ra". 52 Ai: tau mae yaug khao: ngo" wa- ai: myiqe: nau" mathao mae kaug' ngug: na: bam: ako"- yao: wa Dangug ge,- ai: zoshao wa mashid- yao: wa yab: myhid' jo; ru angad:- ga: ta" ra". 53 Yao: bam alhab' mo, wa ai: myiqe: nau" shid va"- ga" rure ba geyang:- Yesu re qi: jung" pye' ako". 54 Yesu kam" wa ai: myiqe: nau" lo, mae zaui" ci mung:- Zoshao we"- To" wa,- ga: yao: ke'ra". 55 Myiqe: nau" wa kao so' dam: daui: li" mung: ailao" jao" to" li" ra"- Yesu wa ai: myiqe: nau" re zo:ve byid: zho: genae" qhid' mae" amyin" byid' ra". 56 Ai: myiqe: nau" yao: myhi" yao: pho" tao wa mug' hao" byaug: ako". Ngadqere: Yesu wa ai: boe" ra" khyo re khag' rere: mata" kyo: genae" qhid' mae" yao: shid' tao re zug' nhao: ra". 1 Yesu wa mho"zo: qe daxe: shid' yaug re khai: zhang" yu mung:- yui alhab' re khe' thug' pye' nae" qam: so' we' no phyo: jham re gai byid: nae" qam: so' byid' ra". 2 Ai: thao Yesu wa yao: bam re Mao"So: mung"dan: akhyo yekho" kyo: genae" we' no mo, re yegai byid: genae" qhid' mae" nhao: ke' ra". 3 Yesu wa yao: bam re- Naonhaung" ai: gyaung: khyo qhid' mae" pe" re: dayu: ci ge,- Zaung: bao" daci ge,- Thaung pyan- zo:ve- Ngaui davin ge,- Bau: lhao" re: ajan" davin ge,- 4 Naonhaung" re bang" lham: tug: yu: ra" yham kho:yham mae ngadqere: naonhaung" ai: vogaung: mae" dam: thug' lo" yo, joe" sho' ai: yham mae yethang: na ge,- 5 Naonhaung" re bang" malham: tug: yu ko" re wa ai: vogaung: mae" thug' lo" mung: yao: bam shad' mae sagse: boe" nae" qhid' mae" naonhaung" khuvo: mae" phalhug re ko: khyo" to: co' ge,- ga: ta" ra". 6 Alao" lagyo: qe wa thug' ye" lo" mung: vogaung: alhab' khyo jao: sho' du" qin" mung: Lau Dao: Gai re cao" kho" kyo" ru we' khyi" khao: ngo" mae" mo, re gai byid' ako". 7 Galile mung" zug: Herod wa ai: boe" na: ra" khyo alhab' re the' gyo: lao"- yao: wa myid gyai gyo" nhaung" ra". Pe"mung:ga"re mo, byu qe daqhae: wa qid nyhab' Yohan kao so' dam: daui: li" ru ngad: ra"- ga: ta" na: ako". 8 Amung: gatau daqhae: wa Elia po" thug' li" va" ra"- Daqhae: wa ganhae" mae" lapa qemae" dayaug yaug kao so' dam: daui: li" ru ngad: ra"- ga: ta" na: ako". 9 Alao" Herod wa- Yohan au: re ngo phyid' pye' byid: va" ru ngad:- ngo lau thoe the' gyo" na: ra" ceyaug wa khag' ngad: i? ga: ta" mung: yao: wa Yesu re the' myao nae" qhid' mae" qam: ke' na: ra". 10 Lagyo: qe wa phao: lo mung:- yao: bam zaui" lo: ra" mau" zo" alhab' Yesu re lota" kyo" ako". Alao" Yesu wa yao: bam re jhui: mung: Bedsaida ga: mang: ra" vogaung: khyo ye" lo" ko" ra". 11 Mo, byu qe ai: khyo re the' gyo: gelao"- yao: bam wa Yesu thao cao" ye" lo" ako"- Yesu wa yao: bam re lham: tug: yu mung: Mao"So: mung"dan: khyo yao: bam re ta" kyo" ru we' qo ca" ra" mo, re gai byid' ra". 12 Ba vao: lo" na lao"- mho"zo: qe daxe: shid' yaug wa Yesu jhao" lo mung:- Mo, byu qere vogaung: jham khyo we' yozao jham khyo lo" mung: yab jo, qo we' zo:ve lo" qho genae" qhid' mae" nhao: ke' wa,- pe"mung:ga"re ce: jo, qo wa din"pyad' yo ngad: ra"- ga: ta" ako". 13 Ngadqere: Yesu wa yao: bam re- Naonhaung" yao:- yao: bam re zo:ve byid: zho: ge,- ga: ta" ra"- Yao: bam wa tau: mung:- ngonhaung" qo" ru wa mug ngo" khai" we' ngo: shid' dau: za: angad:- nao ngonhaung" re ce: mo, byu qe alhab' mo, geim" qhid' mae" zo:ve yevai nhao nug: i? ga: ta" ako". 14 (Ai: mae yauggai qe za: ngo" taung ko ngad: ra".) Yesu wa yao" mho"zo: qere- Daphung: re ngo" xe zo: zo: ko kad' mung: aphung: phung: zaung: jo, nhao ge,- ga: ta" ra". 15 Mho"zo: qe airu: bin: kad' gethao re Yesu wa ai: mug ngo" khai" we' ngo: shid' dau: re yu: yu mung:- mug:gaung khyo tau: qu" yang: Mao"So re jeju caung: mung: mug we' ngo: re khyoe' phai" yang: mo, byu qere gae byid: genae" qhid' mae" mho"zo: qere byid' ra". 17 Yao: bam alhab' mo, gyi: sho' zo" ako"- Mho"zo: qe wa zo" tang" ra" aje, abai" jham daxe: shid' gyan byang" sho' gaug: zhang: yu: ako". 18 Daba mae Yesu wa yao: za: akyu" mho' na: au:- mho"zo: qe wa yao: jhao" lo: ako"- Yesu wa yao: bam re Ngo khag' ngad: ra"- ga: mo, byu qe ta" ako" i? ga: myid' ra". 19 Yao: bam wa tau: mung: Daqhae: wa nao wa- qid nyhab' Yohan ngad: ra"- ga: ta" ako". Amung: daqhae: wa daba ganhae" mae" lapa qemae" dayaug dam: daui: li" ru ngad: ra"- ga: ta" ako"- ga: phaug' tau" ako". 20 Alao" Yesu wa yao: bam re- Aire naonhaung" wa ngore khag' ngad: ein: ta" ko" i? ga: myid' ra". Petru wa tau: mung:- nao wa Mao"So: yang nhao: ke' ra" Meshia ngad: ra"- ga: ta" ra". 21 Alao" Yesu wa cekhyo re khag' rere: mata" kyo: genae" qhid' mae" yao: bam re jhaug' za: zug' nhao: ra". 22 Yesu wa yao: bam re- Byu: Yao: Zo: wa khyag' qhui: ru myo: sho' kham zo: ca" zai ngad:- Yuda lau de, au: jhaung qe- khinjaung qi: qe we' Jham: Tung" Pho" qeyang ngag: pye' ru qhug' mung: se' pye' li" genae"- ngadqere: sam ba thao re dam: daui: to" li" nhao nae". 23 Amung: yao: wa yao: bam alhab' re- Nga" thao cao" nug yaug khag' ngadqere: yao: yao" qhid' mae" ha: pye' ca"- amung: yao: yao" pyao: zang re ba khao: ngo" vo, yang: nga" thao cao" ca". 24 Pe"mung:ga"re yao: yao" kao so' re khyad' yu nug: ra" yaug khag' ngadqere: kao so' jeim: nae"- ngadqere: nga" mathao mae yao: yao" kao so' jeim" ra" yaug wa khyad' yu: ru qhug' nae". 25 Byu wa ce: mug: myid geim" re qo" sang: yu ngadqere:- yao: yao" kao so' jeim" byaug: re wa pe" akyu" bo: i? Pe" akyu" mabo ngad: ra". 26 Alao" ngore we' nga" mho dao: re qho' ra" yaug re wa Byu: Yao: Zo: wa yao" phungbao- yao: pho" phungbao- mug: lagyo: qe: phungbao we' joe" li" lao"- Byu: Yao: Zo: re: yao: re qho' li" nae". 27 Naonhaung" re ngo dang za: ta" geli"- cetau mae na: ra" mo, mae" daqhae: Mao"So: mung"dan: re mamyao myao wa mashid genae"- ga: ta" ra". 28 Aijham re bin: ta" thao dalaban kyo: re Yesu wa Petru- Yohan we' Yaku bam re jhui: mung: akyu" mho' nae" qhid' mae" bug gaung dalam: khyo do, ye" lo" ako". 29 Yao: akyu" mho' na: au:- yao" myo, nho lai" lo" mung: yao" mai bau: jham wa qhui qhui qhag qhag bao: bao: phyu: li" ra". 30 Ai: tau mae nyag din taung" byu shid' yaug wa Yesu we' dao: jho" jhau: na: ako"- ai shid' zo: wa- Moshe we' Elia ngad: ako"- yao: shid' zo: wa mug:gaung: phungbao we' thug' li" mung:- Yesu wa mataung" myao" re Yerusalem vogaung: mae shid kham: ra" khyo" yang- 31 Mao"So myid o: ra" khyo re jab byang" nhao nae" khyo we' sin: mung: Yesu we' jho" jhau: na: ako". 32 Petru we' yao" byin cao: qe wa yab nug moe moe mung: nug: ako"- ngadqere: yao: bam so" li" gelao"- Yesu phungbao re we' yao: we' daga" ye; jo; ra" byu shid' zo: re myao: ako". 33 Ai shid' zo: Yesu mae" phao: lo" na ko" au:- Petru wa Yesu re Asang we"- ngonhaung" cetau mae na: re gai: ra"- ni" qhid' mae" zaung dalam:- Moshe qhid' mae" dalam:- Elia qhid' mae" dalam: ngonhaung" zaung sam lam: kad' nae"- ga: pe" mabeim: maso: ta" ke' ra". 34 Petru airu: jhau: na shi" au:- jham dathaui: thug' li" mung: yao: bam re losham: nghoe' ra"- Mho"zo: qe wa ai: jham thaui: yao: bam: dao mae losham: nghoe' ke' lao"- yao: bam gyaug: din: ako". 35 Jham thaui: khug mae"- Ceyaug wa nga" Zo: ngad:- yao: re ngo khyin: to" ru ngad:- yao" mho dao: re tae" gyo: ge,- ga: thoe dathoe jhau: thug' li" ra". 36 Ai: thoe jhau: thang: lo" lao"- aitau mae wa Yesu za: thang: jo; ra". Mho"zo: qe wa yao: bam the' myao: ra" khyo alhab' re ai: ayo, gyo: mae khag' rere: mata" kyo: lo: sae za: na: ako". 37 Thao: ba Yesu we' mho"zo: sam yaug wa bug gaung mae" dam: tug' gyo" lo: ako"- Byu phung: mo" zang Yesu re li" tug: yu: ako". 38 Byu dayaug wa mo, phaung gaung: mae" hug' mung:- Mho" Pho" we"- nga" zo: zote: zo: re qu" byid: nae" ngo nao re mho' ra". 39 Ai: yui yao: re vao: jaung" mung:- nyag din taung" hug' ru we' lao" thin: jab: lo" yang: nhad' mae" nyab dui" athaui: thaui: thug' ra"- no sho' gyai aqug: akhai: kad' yang: lhaung" phao: thug' lo" ra". 40 Ai: yui re khe' thug' pye' byid: nae" qhid' mae" ngo wa ni" mho"zo: qere mho' ngadqere: yao: bam maqo" khe' thug' ngad: ako"- ga: ta" ra". 41 Yesu wa- Lam khug: myid mabo: ru we' shad' nghung" ra" byu qe we"- ngo naonhaung" we' khomyhao" joe" sho' na zai i? Ngo naonhaung" re khomyhao" joe" sho' zang: qhao" zai i? ga: tau" ra". Ai: thao Yesu wa- aiyaug re Ni" zo: re cekhyo jhui" lo ri:- ga: ta" ra". 42 Ai: yauggai nau" lo: na: au:- yui wa yao: re myid gaung khyo gyang: lang" lo" nhao mung: lao" thin: jab: lang" lo" nhao: ra". Yesu wa ai: makhyang" ra" yui re amyin" byid: mung:- yauggai nau" re gai byid' ra". Amung: yao: pho" re dam: ab byid' ke' ra". 43 Mo, byu qe alhab' mo, wa Mao"So: qam: so' re mug' hao" byaug: ako". Mo, byu qe wa Yesu zaui" ra" mau" zo" ja: khao: ngo" re mug' na: bam shiko" au:- 44 Yesu wa yao" mho"zo: qere- Byu: Yao: Zo: wa byu jham: lo, khug khyo ab byid' pye' ru qhug' li" nae"- Dao: ceru re naonhaung" mato" myhid' lo: xam" ci ge,- ga: ta" ra". 45 Ngadqere: mho"zo: qe wa cedao: pe" re ta" nug: rure maba: gyo: ko" ngad: ra". Ai: dao: re yao: bam maba: gyo: vageshao: ga:- nyham" to: byid' ra". Mho"zo: qe wa ai: khyo we' sin: mung: Yesu re mavae" myid: ngad: ako". 46 Mho"zo: qe wa yao: bam mae" qi" thao" ru khoyaug ngad: i? ga: yao: bam yao: cao: jho" ta" ngag: thug' li" ko" ra". 47 Yesu wa yao: bam: aung khug mae pe" myid: na ko" rure ba: ruyang yao: wa zoshao dayaug re jhui" yu mung: yao" ayae mae yhe' to: yang:- 48 yao: bam re- Nga" mang mathao mae ce: zoshao re khae: yu: ra" yaug khag' ngadqere: ngore khae: yu: ra"- ngore khae: yu: ra" yaug khag' ngadqere: ngore nhao: ke' ra" yaug re khae: yu: ra". Pe"mung:ga"re naonhaung" mae alhab' tho' ngai: thao" ra" yaug wa qi" thao" ra" yaug ngad: ra"- ga: ta" ra". 49 Alao"- Yohan wa Asang we"- ni" mang khyo" yang yui jham re khe' thug' na: ra" byu dayaug re ngonhaung" the' myao:- ngadqere: yao: wa ngonhaung" phung: mae" mangad: yang: ngonhaung" yao: re tam" pye' va"- ga: ta" ra". 50 Yesu wa Yohan we' gatau mho"zo: qere- Naonhaung" yao: re datam" ge,- pe"mung:ga"re naonhaung" re gye makad' ra" yaug khag' ngadqere: naonhaung" shad' mae" yaug ngad: ra". 51 Yesu mug:gaung khyo to' yu: ru qhug' nae" ayo, joe" li" na lao"- yao: wa myid: phyid' ci mung:- Yerusalem khyo ye" lo" na: ra". 52 Yesu wa yao" qhid' au: khyo lagyo: qere nhao: ke' mung: yao: bam wa- Yesu qhid' mae" ja: khao: ngo" nyhang" seim" byid: nae"qhid' mae" Samari vogaung: dalam: khyo vao ye" ako". 53 Ngadqere: Yesu wa Yerusalem vogaung: khyo ye" lo" na: ruyang vogaung: bao: wa yao: re makhae: yu ko" ngad: ra". 54 Mho"zo: Yaku we' Yohan tao wa ceru re myao gelao"- yao: shid' tao wa- Asang we"- yao: bam re ngha" se' pye' nae" qhid' mae" ngotao mug:gaung mae" myi: khai: khyo" yu nae"- nao qad: i? ga: ta" ako". 55 Yesu wa lhang: lo mung:- yao: shid' tao re qeim: ra". 56 Ai: thao Yesu we' yao" mho"zo: qe wa gatau: vogaung: khyo thug' ye" lo" ako". 57 Yao: bam khyole; mae su" na ko" au:-byu dayaug wa Yesu re- nao khai: ye: khai: ni" thao ngo cao" nae"- ga: ta" ra". 58 Yesu wa yao: re- Zag ne jham wa khyaung qo" ako"- Ngho' zo: jham re: asad' qo" ko" ra"- ngadqere: Byu: Yao: Zo: wa au: khug jo, qo lhao" re: maqo" ngad: ra"- ga: ta" ra". 59 Yesu wa gatau dayaug re nga" thao cao" wa,- ga: ta" ra". Ngadqere: aiyaug wa- Mho" Pho" we"- nga" pho" mao gaung re shi" lo" nyhab' shaung: pye' nae" qhid' mae" akhang" byid: la,- ga: ta" ra". 60 Yesu wa- byushid qe wa yao: bam: byushid qere nyhab' shaung vageshao:- nao wa Mao"So: mung"dan: khyo yehau" kyo: byid: wa,- ga: tau" ra". 61 Gatau dayaug wa- Mho" Pho" we"- ngo ni" thao cao" nae"- ngadqere: nga" yham byu qere shi" lo" au" co' nae" akhang" byid: la,- ga: ta" ra". 62 Yesu wa yao: re- Kheim zhaug' mae zaui" ci yang: nhaung thao" khyo lhang: qu" ra" yaug khag' ngadqere: Mao"So: mung"dan: qhid' mae" akyu" mabo ngad: ra"- ga: ta" ra". 1 Ai: thao Asang wa gatau nhad' xe: shid' yaug re khyin: yu mung:- yao: yao: re: ye: nae" vogaung: jo, qo khao: ngo" khyo shid' zo: dazam" zam" kad' mung: yao" qhid' au:khyo ye" na genae" qhid' mae" yao: bam re nhao: ke' ra". 2 Yesu wa yao: bam re- gaug myo: sho' mhang" jo; ra"- ngadqere: yad: yu nae" mau" zaui: byu malaug ngad: ra". Airumung: ai: gaug sang wa yao" gaug mhang" yo mae mau" zaui: nae" byu qere nhao: ke' byid: nae" qhid' mae" gaug sang re akyu" mho' ge,- ga: ta" ra". 3 Ye:ge,- Zag ne jham: phaung gaung: khyo yao nau" jham re nhao: ke' ru we' dakhyo:- ngo naonhaung" re nhao: ke' ra". 4 Ngaui thaung- thaung pyan- khyid zhaung: jham davin ge,- Khyodang mae dayaug yaug re au" nae" qhid' mae" dathang ge,- 5 Kho:yham mae ngad ngad naonhaung" vao ye: gelao"- Ce:yham ngaui bau: yaug yo vashao: wo"- ein: shi" sao qhid' ta" ge,- 6 Ai: yham mae ngaui bau: yaug yo: rure kao bau: ra" byu na: ngad: re wa naonhaung" bang" se" shaman" dao: wa aiyaug: dao mae ngad vashao:- Airu" ra" yaug mana ngad: re wa naonhaung" bang" se" shaman" dao: wa naonhaung" jhao" dam: tug' lo: li" nae". 7 Ai: yham mae na mung: yao: bam da" byid' rure zo: shaug' ge,- pe"mung:ga"re mau" zaui: yaug wa okaung phug' qo" yu ang: ra"- dayham mae" gatau dayham khyo dakai" na: qin" ge,. 8 Naonhaung" vogaung: khyo vao ye: khao: ngo" bang" lham: tug: yu ko" ngad: re wa naonhaung"qhid' kheim: mae da" byid' rure zo: ge,. 9 Aimung: ai: vogaung: mae" no mo, re gai byid: ge,- ai: vogaung: byu qere- Mao"So: mung"dan: wa naonhaung: we' ajhao" mae joe" li" na va" ra"- ein: yao: bam re ta" kyo: ge,- 10 Ngadqere: naonhaung" vogaung: khao: ngo" khyo vao ye: khao: ngo" bang"malham: tug: yu ko" re wa- hau" mo" khyo jham khyo thug' ye: mung:- 11 ngonhaung" khyid mae de; ra" naonhaung" vogaung: mae" phalhug re lhao" re: naonhaung" re the nae" khyo" ngonhaung" ko: khyo" to: co' va"- ngadqere: Mao"So: mung"dan: wa naonhaung" we' ajhao" mae joe" li" va" rure beim: ge,- ein: ta" to: co' ge,- 12 Naonhaung" re ngo dang za: ta" geli"- Dao: Kho' ra" Ba Na mae Mao"So wa ai: vogaung: re tho' Sodom vogaung: re je yang: nhag' khyag' myid qhu" byid' li" nae". 13 O"- Korazin we"- nao byuxa: vaqoe, qhug' ra". O"- Bedsaida we"- nao re: byuxa: vaqoe, qhug' ra"- Vogaung: ni" shid' vo mae zaui" qhu" lo: ra" mug' pho: ve, lho jham re Ture we' Sidon shid' vo mae zaui" qhu" ngad: re wa- daba gaco' mae" jid: mo" mai bau: ve,- myiqe, bam mae zaung: jo, yang: yao: bam yao" gaung dao mae myiqe, gag: sheim: mung: yao: bam myid tha" va" khyo re qhu" byid: genaeva". 14 Mao"So wa Dao: Kho' ra" Ba Na mae vogaung: ni" shid' vo re tho' Sidon we' Ture shid' vo re nhag' khyag' myid je yang: qhu" byid' li" nae". 15 Kapena-um we"- nao re: mug:gaung joe" sho' to' yu nae" o: i? Nao wa movo: mug: khyo joe" sho' khyo" pye' ru qhug' li" nae"- ga: ta" ra". 16 Yesu wa yao" mho"zo: qere- naonhaung" dao: re tae" gyo" ra" yaug wa nga" dao: re tae" gyo" ra"yaug ngad: ra"- amung: ngore ngag: pye' yaug wa ngore nhao: ke' ra" yaug re ngag: pye' ra" yaug ngad: ra"- ga: ta" ra". 17 Mho"zo: nhad' xe: shid' yaug wa gyai ngaui bau" ru we' dam: tug' joe" lo mung: yao: bam wa- Asang we"- ngonhaung" ni" mang lao: mung: amyin" byid: lao"- yui jham lhao" re: ngonhaung" dao: tae" gyo" ako"- ga: ta" ako". 18 Yesu wa yao: bam re- Satan wa lhe' cad' ru: mug:gaung mae" byid: gyo" lo" rure ngo myao va". 19 Tae" gyo: ge,- ngo wa naonhaung" re lhao maui jham we' gung gug' jham: dao mae qo" zab: lai: lo" mung: Satan" nho: qam: so' alhab' re aung doe, nae" kheim: so' byid' to: va"- naonhaung" re pe" ja" yang re: dae mate' nae". 20 Ngadqere: yui jham naonhaung" mho dao: tae" gyo: geyang: dabau: ge,- naonhaung" mang jham re mug:gaung dao mae tung" xam" to: va" ruyang bau: ge,- ga: ta" ra". 21 Ai: yo, khyin: mae Yesu wa Gyang" Lho" Byo: yang ngaui bau: nhao mung:- Mug:gaung we' myid gaung Asang Pho" we"- nao wa pha,jhi" bo mo, we' ba jhao mo, mae" nyham" to" rure pha,jhi" mabo: ra" mo, re qhu" byid: va" ruyang nao re ngo jeju caung: byid' ra". Ngad va"- nga" Pho" we"- ce wa nao o ngaui: ra" khyo" boe" ru ngad: ra". 22 Nga" Pho" wa ja: cao jab alhab' ngore ab byid' to" ra". Yao: zo: wa khag' ngad: rure yao: pho" mae" je yang: khag' maba ngad: ra"- amung: yao: pho" khag' ngad: rure re: yao: zo: we' yao: zo" yang qhu" byid: nae" khyin: yu: ra" yaug mae" je yang: khag' maba ko" ngad: ra". 23 Ai: thao Yesu we' yao" mho"zo: qe wa yao: bam za: na ko" au:- Yesu wa mho"zo: qe shad' khyo lhang: lo mung:- naonhaung" myao: ra" gu: jham re the' myao: ra" mo, wa ngaui lho" ko" ra". 24 Naonhaung" re ngo ta" geli"- naonhaung" myao: ra" gu: jham re lapa qe we' kho:kham qe myo: sho' mo, myao nug gengad yang: re:- maqhug' myao ko" ngad: ra". Naonhaung" the' gyo" ra" gu: jham re gyo: nug gengad yang: re: maqhug' gyo: ko"ngad: ra"- ga: ta" ra". 25 Alao" qu" ge,- Jham: Tung" Pho" dayaug to" ye, mung:- Mho" Pho" we"- Apyad ato: kao so' qo" yu nae" qhid' mae" ngo pe" kad' ca" ra" i? ga: Yesu re kung" ra" khyo" myid' ra". 26 Yesu wa- Tarha" mugsug' mae pe" ru: ta" to" ra" i? Nao khoru: ba: nghe' yu: i? ga: yao: re phaug' ta" ra". 27 Alao" ai: Jham: Tung" Pho" wa- Asang ni" Mao"So re ni" aung khug nhag' lam: alhab'- ni" kao so' alhab'- ni" gaung dau: qam: so' alhab'- ni" myid nyan: ba: ru alhab' yang jhid'de; wa,- amung: ni" yham kyo: cao: re nao yao" gaung re we' dakhyo: jhid'de; wa,- ga: ta" ra". 28 Nao ta" ru jo: ra"- Airu: kad' wa,- ailao" nao apyad ato: kao so' qo" yu: li" nae"- ga: ta" ra". 29 Ngadqere: ai: Jham: Tung" Pho" wa yao: yao: jo: rure qhu" nug mung: Yesu re- Nga" yham kyo: cao: khag' ngad: i? ga: myid' ra". 30 Alao" Yesu wa- Dalhang: mae" byu dayaug wa Yerusalem vogaung: mae" Yerikho vogaung: khyo gyo" lo" ra" au:- damya, jham we' thaung" qhug' ra". Damya, jham wa ai: yaug re mai bau: khyad' yu: pye' byid: mung:- be, yang: alaug laug shid: ru shapye' to: co' ako". 31 Khinjaung dayaug wa khyo ai:gau: khyo" su" gyo" lo" ang: ra"- ngadqere: khinjaung pho" wa ai: yaug re lomyao lao"- gashad' khyo" jao" lai: lo" ra". 32 Ai we' dakhyo:- Levi kaung mae" dayaug re: ai: jo, qo khyo joe" lo mung: ai: yaug re lomyao lao"- gashad' khyo" jao" lai: lo" ra". 33 Ngadqere: khyo ai:gau: khyo" Samari byu dayaug gyaung: su" lo: re- ai: damya, qhug' ra" yaug jhao" joe" lo mung:- yao: re lomyao lao" nhag' qu" khyag' ra". 34 Yao: wa damya, qhug' yaug jhao" te' ye: mung:- yao" dae khu jham mae xau we' sabyi qang: vhe' gyad byid: yang: thab' byid' ra"- Bin lao"- yao" loze dao mae ai: yaug re vo; zhaung mung:- bang" khug yham dalam: khyo jhui" lo mung: nyhang" caung byid' ra". 35 Thao: ba re yao: wa ngaui shid' kye' phoe' yu yang:- bang" khug yham sang re byid: mung:- ceyaug re nyang" za: caung wa,- yao: re caung yang: gan: ra" ngaui gatau alhab' rere: ngo dam: tug' lo lao" nao re ngo lo:xe' byid: shinae"- ga: bang" khug yham sang pho" re pin co' ra". 36 Yesu wa ai: Jham:Tung" Pho" re- Ai: byu sam yaug mae" damya, qhug' ra" yaug: nho: yham kyo: cao: khyo" kad' yaug khoyaug lam: ngad: ra"- ein: nao myid: jho: i? ga: myid' ra" 37 Alao" Jham: Tung" Pho" wa- Ai: damya, qhug'ra" yaug re nhag' khyag' ra" yaug ngad: ra"- ga: phaug' tau" ra". Yesu wa- Nao re: ai we' dakhyo: lo" kad' wa,- ga: phaug' tau" ra". 38 Yesu we' yao" mho"zo: qe su" ye" lo" na ko" au:- vogaung: dalam: khyo joe" lo: ako"- Matha ga: mang: ra" myiqe: dayaug wa Yesu re yao" yham mae bang" lham: tug: yu: ra". 39 Yao: wa Mari ga: mang: ra" yao: nhaung: dayaug qo" ra". Mari wa Asang: khyid qao: mae zaung: jo, mung: Yesu ta" ra" mungdao: re tae" gyo" na: ra". 40 Matha wa bang" da" mau" kad' nae" mau" laug: ruyang myid laug sang: kho: mung:- Yesu jhao" lo yang:- Asang we"- nga" nhaung: wa bang" da" mau" alhab' re ngo dayaug reza: shapye' to: byid' rure nao pe" maqu" jho i? Ngo re bao" nae" qhid' mae" yao: re ta" wa,- ga: Yesu re ta" ra". 41 Asang wa Matha re- Matha- Matha- Nao wa mau" myo: sho' ja: re myid: qug: myid: ci" na: ra". 42 Ngadqere: qo ca" ru wa daja: za: ngad: ra". Mari wa jo: ra" ja: re khyin: yu: ava"- ai:rure yao: mae" khag' re: maqo" yu: pye' byid: genae"- ga: ta" ra". 1 Daba mae- Yesu wa jo, qo dalam: mae akyu" mho' na: ra". Yao: akyu" bin: mho' lao" yao" mho"zo: qemae" dayaug wa- Asang we"- Yohan wa yao" mho"zo: qere akyu" mho' nae" mho" byid' ru we' dakhyo:- ngonhaung" re akyu" mho' nae" mho" byid: la,- ga: Yesu re ta" ra". 2 Yesu wa yao: bam re- Naonhaung" akyu" mho' gelao"- ceru: mho' ge,- Pho" we"- Ni" gyang" lho" ra" mang a re phug' myao: vageshao:- Ni" mung"dan: joe" lo vashao:- 3 Ngonhaung" qo ca" ra" zo:ve ba khao: ngo" ngonhaung" re byid: la,- 4 Ngonhaung" re shad' ra" mo; qobo re ngonhaung" khyad' byid' ruyang ngonhaung" qobo jham re khyad' byid: la,- Ngonhaung" re gyai qug' ra" ju" phyo' ru khyo dajhui" ye: la,- ein: mho' ge,- ga: ta" ra". 5 Yesu wa yao" mho"zo: qere- Naonhaung" mae" dayaug yaug wa gae gaung: myi: re ba nam pho" yham khyo ye: mung:- Ba nam pho" we"- ngore mug sam khai" ko lhau" jhid' byid: la,. 6 Nga" ba nam pho" dayaug gyaung: su" rumae" nga" yham khyo joe" vao lo: ra"- yao: re byid: zho: nae" pe" re: maqo"- ga: ta" re- 7 Ba nam pho" wa- ngore dakhin jang la,- Kham: pyid' pye' va"- ngo we' nga" zoshao qere: yab qo vao va"- Airumung: ngo to" yang: nao re mug maqo" byid:- ga: yham khug mae" ta" li" nae". 8 Naonhaung" re ngo ta" geli"- nao wa yao" ba nam pho" ngad: ruyang yao: wa to" li" mung: nao re ai: mug jham re mabyid: nae"- ngadqere: nao wa mathang mano: mho' na: ruyang yao: wa to" li" mung: nao qo: ra" mug jham re byid' li" nae". 9 Naonhaung" re ngo ta" geli"- Mho' ge,- ailao" qo" yu: li" genae"- Qho ge,- ailao" naonhaung" qhug' myao genae"- Kham: ko' ge,- ailao" naonhaung" re kham: phung" byid' li" nae". 10 Pe"mung:ga"re mho' ra" yaug khag' ngadqere: qo" yu: li" nae"- Qho: ra" yaug wa qhug' myao: li" nae"- Kham: ko' yaug re wa kham: phung" byid' li" nae". 11 Naonhaung" yao: pho" qe khag' ngadqere: naonhaung" yao: zo: ngo: mho' re- lhao maui byid: nae" i? 12 Qo, au" mho' re gung gug' byid: nae" i? 13 Makhyang" ra" mo, naonhaung" lhao" re:- naonhaung" yao: zo: qere gai: ra" ja: byid: nae" ba: ako"- ai:tho' mae" je yang: mug:gaung dao mae" Pho" wa- yao: re mho' ra" mo, re Gyang" Lho" Byo byid' li" nae" mangad: i? ga: ta" ra". 14 Yesu wa nhad' jid: ra" yui re khe' thug' pye' ra"- ai: yui phao: thug' lo" byaug lao"- nhad' jid: ra" yaug wa dao: jhau: li" ra". Mo, byu qe wa mug' hao" byaug: ako". 15 Ngadqere: byu daqhae: wa yui zug: mo" Bezelbu yang yao: re qam: so' byid: mung: yui jham re khe' thug' pye' ru ngad: ra"- ga: ta" ako". 16 Byu daqhae: wa Yesu re kung" nug gemung:- Mao"So: qam: so' qo" yaug ngad: rure qhu" byid: nae" mug' pho: ve, lho daja: kad' qhu" nae" qhid' mae" Yesu re mho' ako". 17 Ngadqere: Yesu wa yao: bam: aung khug mae pe" myid: na ko" rure ba yang: yao: bam re- mung"dan: dalam: wa phung: jho" kho' yang: yao: cao: gye jho" se' na ko" ngad: re wa myao" sho' magang" tang: jo; li" nae"- ai we' dakhyo:- ug' khug' dinkhu: dalam: re: yao: cao: nhag' lam: majho" vang" re wa byo; qeim: lo" li" nae". 18 Airu: mung: Satan" nho: mung"dan: wa phung: jho" kho' mung: yao: cao: gye jho" se' na ko" re wa khoru: qo" gang" tang: jo, nae" i? Naonhaung" wa ngore Belzebu qam: so' yang yui jham re khe' thug' ra"- ga: ta" ako". 19 Ngo wa Bezelbu qam: so' yang yui jham re khe' thug' ngad: re wa naonhaung" mho"zo: qe wa khag' qam: so' yang yui jham re khe' thug' ko" ra" i? Naonhaung" yao" mho"zo: qe yao: naonhaung" shad' rure sagse: qhu" byid: vako" ra". 20 Ceru: angad:- ngo wa Mao"So: qam: so' yang yui jham re khe' thug' pye' ru ngad: ra". Ce wa naonhaung" jhao" Mao"So: mung"dan: joe" li" va"- ga" ra" sagse: ngad: ra"- ga: ta" ra". 21 Qam: bo yaug wa yao" yham re shae lhae cao jab we' zaung" na: au:- yao" jo,nho" jham wa gug: za: ngad: ra". 22 Ngadqere: qam: je: bo: ra" yaug yao: re li" khe' aung: pye' lao"- ai: qam: je: bo: ra" yaug wa- ai: yaug khug ngha: na: ra" shae lhae jham re sham" yu mung: qo" lhad' yu: ra" lanyab rere: gae byid' pye' ra". 23 Nga" bo: made; ra" yaug wa ngore gye kad' yaug ngad: ra"- amung: ngo we' daga" masham" zhang: ra" yaug wa abyo asin" yaug ngad: ra". 24 Ai: Makhyang" ra" yui wa byu mae" thug' lo" lao"- kyaug' ho: ra" jo, qo khaung: mae yedu" qin" mung: no:qo cao" qho: qin" ra"- No:qo maqhug' lao"- yui wa Azhao ngo na co' ra" yham khyo dam: tug' lo" nae" ngad: ra"- ga: ta" ra". 25 Airu: mung: yao: dam: tug' joe" lo: re- phyao: sham" pye' mung:- nyang" za: shaung: nyhang" to" rure lomyao: ra". 26 Ailao"ai: yui wa thug' ye" lo" mung: yao: tho' je: makhyang" ra" yui nhad' dau: re khai: jhui" lo mung:- yao: bam wa ai: yham mae lona: ako". Airumung: byu ai: yaug: ave, wa sao qhid' mae" tho' je: qo: byaug: ra"- ga: ta" ra". 27 Airu: Yesu bin: ta" lao"- mo, phaung mae" myiqe: dayaug wa Yesu re- Nao re khau mung: nug' jhaug' ra" myiqe: wa ngaui lho" ra" wo"- ga: hug' ta" ra". 28 Ngadqere: Yesu wa Mao"So: mungdao: re tae" gyo: mung: phug' cao" ko" ra" mo, kam" wa ngaui lho" ko" ra"- ga: tau" ra". 29 Mo, byu qe Yesu lhang" gam: zang" ham: na: jo, ko" au:- xo' mung: Ceqae" mae" byu qe wa makhyang: mo, ngad: ako"- yao: bam wa mug' pho: ve, lho re mho' ako"- ngadqere: Yona nho: ve, lho mae" je yang: pe" ve, lho re: yao: bam re qhu" byid: nae" mangad:- 30 Yona wa Nineve vobyu qe: qhid' mae" ve, lho ngad: ru we' dakhyo:- ai: Byu: Yao: Zo: re: ceqae" mae" byu qe: qhid' mae" ve, lho ngad: li" nae". 31 Sheba kho:kham myhi" wa kho:kham Sholamon: pha,jhi" dao: re tae" gyo: nae" qhid' mae" va" ra" mung"dan: mae" joe" lo: ra"- Airumung: dao: kho' ra" ba na mae Sheba kho: kham myhi" wa to" ye, mung: naonhaung" re qobo zhaug' li" nae"- naonhaung" re ngo ta" geli"- ce: jo, qo mae Sholamon kho:kham tho' je: qi: yaug na: ra". 32 Nineve vobyu qe wa- Yona kho" kyo" ra" mungdao: re the' gyo: gelao"- yao: bam: qobo mae" myid tha" lo: ako"- Airumung: dao: kho' ra" ba na mae Nineve vobyu qe wa to" ye, mung: naonhaung" re qobo zhaug' li" genae"- cejo, qo mae Yona tho' je: qi" ra" yaug na: ra"- ga: ta" ra". 33 Myikaug' re te' mung: khag' malhaung" nyham" to:- Ban" yang re: khag' malhaung" maug: lhaung" to"qu"- Yham khug khyo vao lo: ra" mo, alhab' re bao byid: nae" qhid' mae" myikaug' tao" dao mae lhaung" zhaung: to" ako". 34 Ni" myo,jid' wa gaung khyao: qhid' mae" myibaung: ru" ru ngad: ra". Ai: ni" myo,jid' qang: qang: za: ngad: re wa ni" gaung geim" bao: jo; li" nae"- ngadqere: ni" myo,jid' athab zang ngad: re wa ni" gaung geim" cad' no; jo; li" nae". 35 Airumung: naonhaung" mae bo: ra" bo" bao wa mug: cad' mangad: nae" qhid' mae" lha" ge,- 36 Ni" gaung mae dakhyi" mae re: macad' jo, lo: gaung geim" bao: jo; ngad: re wa- myibaung: wa bao qhui: ra" bo" yang ni" dao mae bao byid' ru we' dakhyo:- ni" gaung geim" bao: jo; li" nae"- ga: ta" ra". 37 Yesu airu: bin: ta" lao"- Pharishe dayaug wa yao: we' zo daga" zo: nae" qhid' mae" Yesu re khai: ra"- Airumung: Yesu wa ai: yaug: yham khyo ye: mung: zozo: nae" ga: yezaung: jo; ra". 38 Yesu wa zo mazo: shi:re cid' san: ru makad' rure Pharishe pho"qu" ba lao" mug' ra". 39 Airumung: Yesu wa yao: re- Pharishe qe naonhaung" wa naonhaung" ban- keim kang: jham re adao shad' mae za: cid' san: ako"- ngadqere: naonhaung" aung khug mae wa se' da: be, khyad' ru we' makhyang" ru byang" sho' bo: jo; ako". 40 Byugo qe we"- Adao shad' re phan" to" ra" Mao"So wa akhug shad' rere: phan" to" ra" mangad: i? 41 Ngadqere: naonhaung" ban we' keim kang: jham mae bo: ra" zo:ve jham re myaung sho" ra" mo, re byid: ge,- ailao" ja: khao: ngo" naonhaung" qhid' mae" thung" li we' dakhyo: san: lo" li" nae". 42 Pharishe qe we"- naonhaung" byuxa: vaqoe, qhug' ako"- naonhaung" wa shaban- sham: nhang:- ban gya ru" ra" ao: pho' vho' aja: ja: mae" daxe bam mae" dabam Mao"So re qhaug' byid: gengad yang: re: naonhaung" wa tarha" din: vang" ru we' Mao"So re jhid'de; rure to" pye' ko" ra". Naonhaung" wa daxe bam mae"dabam Mao"So re qhaug' byid' ru za: mangad:- tarha" din: vang" ru we' Mao"So re jhid'de; rure re: mato" pye' co' lo:- ai:gu: alhab' re phug' cao" ang: ako". 43 Pharishe qe we"- naonhaung" wa byuxa: vaqoe, qhug' ako"- pe"mung:ga"re naonhaung" wa Tarha" Jung Yham jham mae" gakai: lai jaung: to" ra" tao" khau" mae zaung nug mo,- gai jao: gyo: mae su: yang lham: phug' myao: nae" o mo, ngad: ako". 44 Naonhaung" wa byuxa: vaqoe, qhug' ako"- naonhaung" wa axam: aso: majo, lo" ra" lab we' dau: ako"- Byu jham wa lab ngad: rure maba mung:- ai: dao mae su" lai: qin" ko" ra"- ga: ta" ra". 45 Jham: Tung" Pho" dayaug wa- Mho" Pho" we"- nao ceru: ta" ru wa ngonhaung" rere: ta" phoe: ru ngad: ra"- ga: Yesu re ta" ra". 46 Yesu wa tau: mung:- Jham: Tung" pho" qe naonhaung" re: byuxa: vaqoe, qhug' ako"- naonhaung" wa su gaje qere vin qug' ra" qo jham re vin nhao gemung:- naonhaung" yao: wa ai: qo jham re lo, nyhug' yang re: mabotin: ko" ngad: ra". 47 Naonhaung" wa byuxa: vaqoe, qhug' ako"- naonhaung" wa naonhaung" phug' phyid' qeyang se' pye' ra" lapa qe: lab jham re gyai yaung" sho' zao byid' ako". 48 Naonhaung" phug' phyid' qe kad' lo: ra" mau" zo" re naonhaung" bomyid vang" rure naonhaung" yao: sagse: qhu" byid' na: ako". Naonhaung" phug' phyid' qe wa lapa qere se' mung:- naonhaung" wa yao: bam: lab jham re zao byid' ako". 49 Airumung: Mao"So: pha,jhi" ta" ru wa- Lapa qe we' lagyo: qere yao: bam jhao" nhao: ke' byid: nae"- yao: bam wa daqhae: re se' pye' li" genae"- Daqhae: re wa yhin" li" genae"- ga: ta" ra". 50 Airumung: Abela re se' pye' rumae" Gyang" Lho" Jo, qo we' phan: agyo: mae se' pye' qhug' ra" Zakari joe" sho' mae" xao qug: we' mug: myid phan" to" rumae" se' pye' qhug' ra" lapa alhab' mo; xao qug: wa ana" ceqae" mae" byu qe qhug' vin: li" genae" ngad: ra". 51 Ngad va"- naonhaung" re ngo ta" geli"- ai: xao qug: alhab' wa ana" ceqae" mae" byu qe xao qug: qhug' vin: li" genae". 52 Jham: Tung" Pho" qe we"- naonhaung" byuxa: vaqoe, qhug' ako"- naonhaung" wa ai: pha,jhi" yham kham: thug' re sang: ci gemung:- naonhaung" yao: re: ai:khyo mavao ye:- Vao ye: nae" qam: ke' mo, rere: naonhaung" tam" to" ako"- ga: ta" ra". 53 Yesu ai: jo, qo mae" thug' lo" lao"- Jham: Tung" Pho" qe we' Pharishe qe wa Yesu re xo sho' gaui mho mung: yao" nhad' thoe: yang jhau: shad' rure qobo taung: nae" qhid' mae" dao: myid: myo: sho' ja: Yesu re myid' ako". 1 Mo, byu qe ajham ataung zang" phaung: li" gemung:- yao: cao: jho" zab: khyad' na ko" au:- Yesu wa sao qhid' yao" mho"zo: qere- Geim kad' ru ngad: ra" Pharishe qe: man" re naonhaung" lha" ge,- 2 Nghoe' to" ra" ja: pe" re: de: de: myao: thug' li" nae"- Zug' to" ra" ja:- ja: khao: ngo" wa- ba: thug' li" nae". 3 Amung: mug: cad' yo mae naonhaung" ta" ra" dao: re mug: bo" mae the' gyo" li" genae"- Kug qe, mae naonhaung" dao: so' so' yang: ta" ra" dao: re yham khaung dao mae" hug' ta" li" genae"- ga: ta" ra". 4 Nga" ba nam qe we"- naonhaung" re ngo ta" geli"- Gaung khyao re qo" se' pye' ngadqere: ai:thao gatau pe" re: maqo" kad' ra" mo, re dagyaug ge,- 5 Naonhaung" khag' re gyaug ca" ko" rure ngo naonhaung" re ta" shid' geli"- Gaung khyao re se' pye' thao naonhaung" re myiqid tham: khyo pye' zaui: ke' nae" qam: so' qo" ra" Mao"So re gyaug ge,- ngad va"- yao: wa naonhaung" gyaug qo: ra" yaug ngad: ra". 6 Jokhyao" ngo" dau: re byad san: shid' kye' mae aung" mangad: i? Ngadqere: Mao"So wa ai: jokhyao" dadau: rere: mato" myhid' ngad: ra". 7 Naonhaung" au: mae" xae khe' alhab' re lhao" re: nghe' to" ra"- Airu: mung: dagyaug ge,- naonhaung" wa jokhyao" myo: sho' dau: tho' je: phug' de; ako". 8 Naonhaung" re ngo ta" geli"- Su: qhid' kheim: mae nga" mho"zo: qe ngad:- ga: lhang: yu yaug khag' re ngadqere: Byu: Yao: Zo: re: Mao"So: lagyo: qe: qhid' kheim: mae yao" mho"zo: qe ngad:- ga: lhang: yu: li" nae". 9 Ngadqere: su: qhid' kheim: mae ngore ngag: ha: pye' yaug re kam" wa Byu: Yao: Zo: re: Mao"So: mug: lagyo: qe: qhid' kheim: mae yao: re ngag: ha: pye' li" nae". 10 Byu: Yao: Zo: re nhad' dao: thoe: yang shad' ra" yaug wa qobo khyad' byid' ru gai: qhug' ra"- ngadqere: Gyang" Lho" Byo re jung" gaui: ra" yaug kam" wa qobo khyad' pye' ru gai: qhug' nae" mangad:- 11 Amung: byu qe wa naonhaung" re yung" zaung nae" qhid' mae" Tarha" Jung Yham khyo- zug: qe we' kheim: so' qo" ra" mo; qhid' kheim: khyo jhui" ye: gelao"- khoru: ta" nae" laug ein: damyid: ci" ge,- 12 Pe"mung:ga"re ai: yo, khyin: mae khoru: jhau ang: rure Gyang" Lho" Byo wa naonhaung" re mho" byid' li" nae"- ga: ta" ra". 13 Mo, byu phaung gaung: mae" byu dayaug wa Yesu re- Mho" Pho" we"- ngonhae tao: yao: pho" to: byid: co' ra" jo,nho" jham re ngo we' jho" gae ngho" nae" qhid' mae" nga" mao: re ta" byid: la,- ga: ta" ra". 14 Yesu wa yao: re- Nga" ba nam pho" we"- Dao: kho' nae" akhang"- mangad: lao"- ni" shid' tao: jo,nho" re kho' byid: nae" qhid' mae" ngore khag' yang khyin: to" ra" i? ga: tau" ra". 15 Yesu wa xo' mung: yao: bam alhab' re- So' kho' obyid: ru aja: ja: re naonhaung" lha" yang: jao" pye' ge,- Byu dayaug: dangman" ra" kao so' wa yao: jo,nho" khonho" qo" yaug ngadqere: yao: qo" ra" jo,nho" mae mabo ngad: ra"- ga: ta" ra"- ga: ta" ra". 16 Ai: thao Yesu wa ce:dao: tau" ci yang: yao: bam re- Dalhang mae- gaug zo maui: lam: gyai thug' ra" yo qo" ra" daizug: dayaug na: ra". 17 Yao: wa- yao" aung khug mae Nga" gaug zo maui: lam: jham re ke' to: nae" jo, qo majo, lo:- ngo pe"ru: kad' nae" i? ga: myid: ra". 18 Amung: yao: wa- ngo ceru: kad' nae" ngad: ra"- nga" jhi jham re phyo' pye' mung: je: qi" ra" jhi sag' jham re ngo dam: kad' nae"- amung: nga" gaug zo maui: lam: jham we' jo,nho" zai jham re jhi sag' jham mae ke' to: nae"- ga: yao: re yao: ta" ra". 19 Ai: thao ngo wa ngoyao" gaung re Zhau: vha: gai yaug we"- nao wa myo: sho' zin: qhid' mae" qo ca" ra" jo,nho" zai jham alhab' qo" ava"- Yo yo za: na wa,- Zo: se,- Shaug' se,- amung: pyo: pyo: na wa,- ein: ta" nae"- ga: ta" ra". 20 Ngadqere: Mao"So wa yao: re- Byugo we"- ana" myi yao: nao kao gyo" li" nae"- ailao" nao qaung" to" ra" jo,nho" zai jham wa khag' qo" sang nae" i? ga: ta" ra". 21 Alao" Yesu wa yao: yao" qhid' mae" jo,nho" abam azao qaung" to: mung:- Mao"So: qhid' kheim: mae jo,nho" maqo" ra" mo, wa ceru" ra" yaug we' dau: ra"- ga: yao: bam re ta" ra". 22 Ai: thao Yesu wa yao" mho"zo: qere- Airumung: naonhaung" re ngo ta" geli"- naonhaung" kao so' daui: na nae" qhid' mae" qo ca" ra" zo:ve we' naonhaung" gaung khyao: qhid' mae" ve,mai ve,bau: we' sin: mung: damyid: ci" ge,- 23 Kao so' wa zo:ve tho' myo: sho' je: akhyag mung:- gaung khyao wa ve,mai ve,bau: tho' myo: sho' je: akhyag: ra". 24 Kano, jham re qu" ge,- yao: bam wa myug: shi: maqho:- masin:- yad re: mayad: yu ngad: ako"- yao: bam wa zai to: qe, we' gaug jhi jham re: maqo" ngad: ako". Ngadqere: Mao"So wa yao: bam re zho" na: ra". Naonhaung" wa ngho' zo: jham tho' gyai myo: sho' je: phug' de; ako". 25 Naonhaung" mae" khoyaug myid: ci" ruyang yao: yao" kao dajhid' je: qhang sho' qo"daui: na ko" i? 26 Airumung: naonhaung" wa- airu" ra" angai athao za: re lhao" maqo" kad' ko" re wa gatau: khyo jham we' sin: mung: pe"mung: myid: ci" ko" i? 27 Seyo: bin: gae jham khoru: yaug: qi" li" ko" rure qu" ge,- yao: bam wa mau" mazaui:- yao: bam: qhid' mae" mai bau: re: maqo, ko" ngad: ra"- ngadqere: naonhaung" re ngo ta" kyo: geli"- Sholamon kho:kham lhao" re: ai: seyo: bin: gae dagae qhi" yaung" sho' maqo" shaung: ve, ngad: ra". 28 Mao"So re lam khug: myid ngai: ra" mo, we"- ana" ba yaug: jo, mung: ne, mo" ba myikhyeim" mae ngha" pye' ra" seyo mae" myo, gae jham re Mao"So wa airu: shaung vhe' byid' to" ngad: re wa- aitho' mago" naonhaung" re je yang: shaung vhe' byid' li" nae" mangad: i? 29 Airumung: naonhaung" wa pe" zo: pe" shaug' nae" laug ein: damyid: ci" damyid: qug: ge,- 30 (Pe"mung:ga"re dangman" ra" Mao"So re malam khug: ra" ce: mug: myid dao mae" byumyu" alhab' wa aijham we' sin: mung: khonhae" re: myid: ci" na: ako") Aijham re naonhaung" qo ca" rure naonhaung" yao: Pho" ba: ra". 31 Ai: atha"- naonhaung" wa Mao"So: mung"dan: re qho ge,- Airu:lao"- Mao"So wa ai:gu: alhab' naonhaung" re byid' li" nae". 32 Yao kyaung" ngai we"- Dagyaug wa,- pe"mung:ga"re naonhaung" Pho" wa naonhaung" re mung"dan: byid: nug: ra". 33 Naonhaung" jo,nho" jham re aung" pye' mung:- myaung sho: mo, re byid: ge,- maqeim: majad: ra" ngaui thaung jham re kad' yu ge,- Khug' hab' maqo" khug' yu mung: nhug: yang maqo" zo" qheim" pye' ra" mug:gaung: dao mae magyid mayeim: ra" naonhaung" jo,nho" jham re qaung" to: ge,- 34 Pe"mung:ga"re naonhaung" jo,nho: jo; ra" tau mae naonhaung" nhag' lam: taui" jo; li" nae". 35 Naonhaung" wa pe" boe" lo ngadqere: jin" jin" ngad: na genae" qhid' mae" phyid' cui: cui" ci yang:- naonhaung" myibaung: jham re te' to: ge,- 36 Lo, xo' poe mae" thug' lo: ra" Asang re lao" na ko" ra" daui daui mo, we' dakhyo: kad' na ge,- Asang joe" lo mung: kham: loko' we' aijao" yao:- yao: bam wa yao: re kham: phung" byid' li" genae". 37 Asang dam: tug' joe" lo: ra" au:- jin" jin" za: lhaug' na ko" rure daui daui mo; asang: yang lomyao: ra" daui daui mo, wa ngaui lho" ko" ra"- naonhaung" re ngo ta" geli"- ai: daui daui mo; asang wa yao: bam re zozo: jaung: mae zaung: jo, nhao mung:- yao" bau: qang khyad' pye' yang:- yao: bam re caung da" byid' li" nae". 38 Gae gaung: myi: re- mangad: lao"-qo, teim myi: re ngad ngad yao: joe" lo: re jin" jin" za: kad' na ko" rure yao: lomyao: re wa ai: daui daui mo, wa ngaui lho" ko" ra". 39 Yham sang wa khug' hab' vao li" nae" ayo, re yao: ba: ngad: re wa yao" yham khug khyo ai: khug' hab' re cad' vao li" nhao nae" mangad: ein: rure naonhaung" xam" to: ge,- 40 Aimung: naonhaung" re: jin" jin" kad' to: ge,- Byu: Yao: Zo: wa naonhaung" mamyid: to" ra" yo, khyin: mae joe" li" li" nae"- ga: ta" ra". 41 Alao" Petru wa- Asang we"- ce: dao: tau" wa ngonhaung" qhid' mae" ta" ru i? Mangad: lao"- yaug khao: ngo" qhid' mae" nao ta" ru ngad: i? ga: Yesu re- myid' ra". 42 Asang wa Kyid: ru we' qag yaug khoyaug ngad: i? Yao: wa yao" Asang: yang yao" yham khug: mau" zo" jham re au: jhui" she: kad' nae" we' ayo, joe" lao"- yao" daui daui mo, re zo:ve kho' byid: nae" qhid' mae" san: to" ra" yaug ngad: li" nae". 43 Asang dam: joe" lo: au:- ai: daui daui yaug wa byid' to" ra" mau" zo" jham re kyid kyid za: zaui" na: rure yao" Asang lomyao: re wa ai: daui daui yaug wa ngaui lho" ra". 44 Naonhaung" re ngo dang za: ta" geli"- Asang wa yao" jo,nho" zai yo alhab' re pyo nae" qhid' mae" ai: daui daui yaug re san: to" li" nae". 45 Ngadqere: ai: daui daui yaug wa nga" Asang dam: joe" lo nae" myao" shi"- ga: yao: yao" aung khug mae myid yang:- yao: wa gatau: daui daui yauggai- myiqe: qere be; ru we' zo: shaug' mung: yid: na: ra". 46 Ai: daui daui yaug mamyid: to" ra" ba na we' yao: maba mabeim" ra" yo, khyin: mae Asang wa dam: joe" lo: li" nae". Ailao" yao" Asang wa ai: daui daui yaug re xo sho' qobo dae byid: mung: mho dao: magyo" ra" mo, kham zo" ra" qobo dae re kham zo: nhao: li" nae". 47 Khoru: kad' re yao: yao" Asang o: ga" rure ba: to: qere: jin" jin" maseim" to:- Asang myid o: ra" khyo" makad' to" ra" daui daui yaug wa qobo dae myo: sho' be; ru qhug' kham zo" li" nae". 48 Ngadqere: yao" Asang pe" o: ga" rure maba lo:- qobo kham zo: man" ra" mau" shad' ra" daui daui yaug kam" wa qobo dae po: nae"- Myo: sho' kham: yu: ra" yaug mae" wa myo: sho' mho' yu: li" nae"- myo: sho' ab byid' to: yaug mae" wa myo: sho' mho' yu: li" nae". 49 Ngo wa myid gaung dao re myi: ngha" nae" qhid' mae" joe" li" ru ngad:- ana" yao: de; nga" re wo"- 50 Ngo kham: yu ca" ra" qid nyhab' dalam: jo, shi"- ai: mau" zo" mabin bin wa ngo gyai myid myo: myid laug mung: ra". 51 Ngo wa ce: mug: myid dao khyo yaug yo nhao nae" qhid' mae" joe" li" ru ngad: ein: naonhaung" jho ko" i? Mangad:- Ngaui pyo: yaug yo: ru mangad:- jho" kho' nhao nae" qhid' mae" joe" li" ru angad:- 52 Ana" mae" thoegu:- yham khug byu ngo" zo: na: ra" ug' khug' dinkhu: dalam: mae shid' zo: wa dashad' sam zo" gu: wa dashad' jho" kho' li" genae". 53 Yao: pho" qe wa yao: bam: yauggai zo: qe we'- yauggai zo:qe wa yao: pho" qe we'- yao: myhi" qe wa yao: bam: myiqe: zo: qe we'- myiqe: zo: qe wa yao: myhi" qe we'- yao: na bam wa dau mo" qe we'- dau mo" qe wa yao: na bam we' gye jho" boe" mung:- byo; sin" lo" li" genae". 54 Yesu wa mo, byu qere- ba vao shad' mae" nhag' qhid' do, lo: na: rure naonhaung" myao gelao"- mug: qu naemyao:- ga: naonhaung" dalhang: dae lhaung" ta" ako"- ai we' dakhyo: re: lhaung" boe" ra". 55 Qid bang: shad' khyo" la hug' lo lao"- ba lhe' naemyao:- ga: naonhaung" lhaung" ta" ako"- ai we' dakhyo: re: lhaung" boe" ra". 56 Geim kad' mo, we"- naonhaung" wa mug:gaung we' myid gaung re qu" mung: mug: phung: mug: qu nae" ave, ayaug: re qo" ba: kho' ta" ako"- aire ana" pyad qae" mae" ave, ayaug: re naonhaung" pe"mung: maba: kho' qu" ko" i? 57 Jo: ru kad' nae" qhid' mae" naonhaung" yao: pe"mung: dao: maqo" kho' ko" i? 58 Byu dayaug yaug nao re yug: zhaug' mung: yung" zaung nae" qhid' mae"tarha" yung" khyo jhui" ye" lo" ngad: re- tarha" yung" khyo majoe" ye: shire gai: boe" ra" qhi" yao: we' mang: dae sho' kad' wa, Nao airu: makad' re wa yao: wa nao re tarha" zug: pho" qhid' kheim: khyo she: khyad' ye" lo" li" nae"- ailao" tarha" zug: pho" wa nao re gug: gam pho" lo, khyo ab byid' pye' mung:- nao re thaung: mae lhaung" to" li" nae". 59 Nao khyug' ca" ra" ngaui alhab' mabin: khyug' khyug' wa thaung: khug mae" nao qo" thug' lo nae" mangad:- ga: mo, byu qere ta" ra". 1 Ai: ayo, mae ai: jo, qo mae na: ra" mo, byu qemae" damyo" wa Galile mang: byu qe Mao"So re xeim: ngaui" byid' na ko" au:- Pilad yang se' pye' ra" mo; khyo re Yesu re ta" kyo" ako". 2 Yesu wa yao: bam re- Ai: Galile mang: byu qe airu: se' pye' qhug' ko" ruyang Galile mang: byu gaje qe alhab' mo, tho' je: xo: ra" qobo qo" mo, ngad ko" ra"-ein: naonhaung" jho ko" i? 3 Gaigai: yao: airu: mangad:- naonhaung" re ngo ta" geli"- naonhaung" re: myid matha" ko" re wa ai bam shid ko" ru we' dakhyo:- naonhaung" alhab' re: shid: li" genae". 4 Alao" Siloam mae" gyebyu zaung byo; gyo" lo" mung: lonhai" se' pye' ra" byu daxe: she' yaug wa Yerusalem vobyu alhab' tho' qobo qo" mo, ngad: ako" ein: naonhaung" jho ko" i? 5 Gaigai: yao: mangad:- naonhaung" re- ngo ta" geli"- naonhaung" re:- naonhaung" qobo jham mae" myid matha" ko" re wa aibam shid: ru we' dakhyo:- naonhaung" re: shid: li" genae" ga: tau" ra". 6 Alao" Yesu wa ce: dao: tau" ci yang: ta" ra"- Dalhang mae byu dayaug wa yao" sabyi khyae mae pho' ham" gae dagae qho" to" ra". Yao: wa pho' ham" shi: zaui: va" laug ga: yeqho qho mung: kad' ngadqere: dace' re: mamyao ngad: ra". 7 Airumung: yao: wa yao" khyae lhaug' caung yaug re Ngo wa ce: pho' ham" gae re ashi: li" cao" qho: ru sam zin ngad va"- ngadqere: dace' re: ngo mamyao- Ce: pho' ham" gae thau: lhang" pye' wa,- Myid gaung re amyid: avho: pe"mung: kad' to: nae" i? ga: ta" ra". 8 Ngadqere: khyae caung yaug wa Asang we"- dazin za: wa yaug: jo, shi: vashao:- Apan gam: sho' khoe' mung: myid xau ke' qu" shinae"- 9 Airumung: sao nhag' ashi: gai zaui" li" shi: maba- Ashi: mazaui" li" lao" kam" wa thau: lhang" pye' wa,- ga: ta" ra". 10 Dugno: Ba daba mae Yesu wa Tarha" Jung Yham dalam: khug mae mho" shid' na: ra". 11 Aimae makhyang" ra" yui bin: yang: daxe: she' zin geim" no: na: ra" myiqe: dayaug na: ra". Yao: wa dao nghaug' lo" byaug mung: dajhid' re: maqo" jhao" ke' ngad: ra". 12 Yesu yao: re myao lao" yao: re khai: ke' mung: Myiqe: we"- ni" no mae" loe; ava"- ga: ta" ra". 13 Amung: yao" dao mae lo, kai: byid' ra"- ailao" jao" ai: myiqe: wa yao" dao kao" jao: lo" byaug mung:- Mao"So re caung:khin" ra". 14 Airu:- Dugno: Ba mae Yesu no gai byid' ruyang Tarha" Jung Yham au: jhaung pho" wa nhag' yo: mung:- Mo, byu qere Mau" zaui: nae" ba na khyaug' ba jo; ra"- Airumung: ai: ba na gyo" gu: mae no li" ya: gai: yu geri:- Dugno: Ba mae wa dali" ge,- ga: ta" ra". 15 Asang wa yao: re- Geim kad' mo, naonhaung" we"- naonhaung" mae" khag' ngadqere: Dugno: Ba mae yao" nung: lo:- mangad: lao"- yao" lo ze re qid jhaug' nae" qhid' mae" gug'nyhug' yham mae" lhaung" pheim: ke' ko" ra" mangad: i? 16 Abraham nho: myiqe: zo: ceyaug wa Satan" yang daxe: she' zin geim" taui" to" ru qhug' ra"- Dugno: Ba mae aimae" yao: re magai: pheim: ke' i? ga: phaug' tau" ra". 17 Yesu phaug' tau" ra" dao: wa yao: re gye kad' na ko" ra" mo, re qho' ne phyi boe" nhao: ra". Mo, byu qe wa Yesu zaui" ra" mug' pho: mau" zo" jham: mathao mae ngaui bau" ako". 18 Yesu wa- Mao"So: mung"dan: wa pe" we' dau: i? Ngo pe" ja: we' dau tau" nae" i? 19 Mao"So: mung"dan: wa ceru we' dau: ra". Byu dayaug wa ao: shi: jid' re yu mung:- yao" yo mae sin" ke' ra". Ao: shi: wa yaug: qi" li" mung: ngho' jham wa ao: gae akaung jham mae asad' sad' ako"- ga: ta" ra". 20 Alao" Yesu wa- Mao"So: mung"dan: re ngo pe" we' dau tau" nae" i? Aiwa ceru we' dau: ra"- ga: ta" ra". 21 Myiqe: dayaug man" re yu mung:- cin man" sam phai" mae ke' lao" cin man" bam geim" re bai" do, li" nhao: ra" man" we' dau: ra". 22 Yesu wa Yerusalem khyo ye" lo" ra" gyaung: khyo mae mo, byu qere mho" byid: zo" re" vozo: vozang khao: ngo" re su" lai: ye" ra". 23 Byu dayaug wa Yesu re- Asang we"- Khyad' yu qhug' ra" mo, dajhid' za: ngad nae" i? ga: myid' ra". 24 Yesu wa yao: bam re- Lhae" ra" kham: dung: khyo" vao ye: nae" qhid' mae" naonhaung" qam: ke' ge,- naonhaung" re ngo ta" geli"- byu myo: sho' mo, ai: kham: dung: khyo" vao ye: nae" qam: ke' li" genae"- ngadqere: yao: bam maqo" vao ye: genae". 25 Yham sang wa ai: kham: re li" pyid' pye' mung: naonhaung" wa ai: taung gaung mae ye; jo, yang: Asang we"- Ngonhaung" re kham: li" phung" byid: la, ga: mho' gelao"- yham sang wa- Naonhaung" khai: mae" joe" li" mo, ngad ko" rure ngo maba- ga: ta" li" nae". 26 Alao" naonhaung" wa- Ngonhaung" wa nao we' daga" zo: shaug' mung: na: qu" va" mo, ngad:- nao wa ngonhaung" vogaung: mae mho" shid' byid' qu" va" ra" ga: ta" li" genae". 27 Ngadqere: yham sang wa- Naonhaung" khai: mae" joe" li" mo, ngad ko" rure ngo maba- Makhyang" ra" mo, we"- ngo mae" thug' lo" ge,- ga: tau" li" nae". 28 Naonhaung" wa Mao"So: mung"dan: khug mae Abraham- Isag- Yaku we' lapa alhab' re myao gemung:- naonhaung" yao: wa ai: mung"dan: taung gaung shad' khyo khe' thug' pye' ru qhug' gelao"- ai:tau mae naonhaung" wa ngug byid ngug nhe' we' zaui kyag' yang: na: li" genae". 29 Byu qe wa ba thug'- ba vao- mug: am:- mug:thao shad' mae" joe" li" mung:- Mao"So: mung"dan: zo: shaug' poe mae li" zaung: jo; li" genae". 30 Amung: ana" athao" mae ngad: ra" mo, wa qhid' au: mae ngad: li" genae"- ana" qhid' au: mae ngad: ra" mo, wa athao" mae ngad: li" genae"- ga: ta" ra". 31 Ai: yo, khyin: mae Pharishe qe daqhae: wa Yesu jhao" li" mung:- nao Cetau mae" gatau dakhyo khyo thug' ye" lo" wa,- pe"mung:ga"re Herod nao re se' pye' nae" seim" na: ra"- ga: ta" ako". 32 Yesu wa yao: bam re- ngo wa ana" ba we' ne, mo" ba gu: mae yui jham re khe' thug' mung:- no phyo: jham re gai byid: yang: na nae"- amung: sam ba: ba re wa nga" mau" zo" re zaui" pin" nae" ga" ein: ai: zagne pho" re lo" ta" kyo: ge,- 33 Ngadqere: ana" ba- ne, mo" ba- sao pho" ba wa ngo gyaung: xo' ye: ca" shi"- Lapa wa Yerusalem mae" je yang: gatau mae se' pye' qhug' nae" maang ngad: ra". 34 Yerusalem we"- Yerusalem we"- Lapa qere se' pye' mung:- Mao"So: yang nhao: ke' ra" lagyo: qere laug baui: yang nao pye' se' ra". Qo, zang wa qo, nau" jham re yao" daung khug mae zhang" to" ru we' dakhyo:- ngo wa ni" vobyu qere nga" lo, khug mae zhang" to: nae" qhid' mae" ngo khonho" lhang qam: ke' ngadqere: nao maqad ngad: ra". 35 Airumung: ni" Caung:pa" Yham re shapye' pye' ru qhug' li" nae". Nao re ngo ta" nae"- Mao"So: mang we' joe" li" ra" yaug wa ngaui lho" vashao: wo"- ga: nao mata" ta" wa ana" ba mae" nao ngore maqhug' myao lo nae"- ga: ta" ra". 1 Dugno: Ba daba mae Yesu wa Pharishe au: jhaung dayaug: yham khyo zozo: nae" ga: vao ye" ra". Mo, byu qe wa Yesu re te' te'za: lhaug' qu" na: bam: ako". 2 Khyid lo, qae: mung: no: ra" byu dayaug Yesu jhao" li" joe" na: jo; ra". 3 Yesu wa Tarha" Mho" Pho" qe we' Pharishe qere- Ngonhaung" tarha" wa- Dugno: Ba mae no gai: gai byid' ga:- ta" ra" i? Mangad: lao"- magai: gai byid:- ga: ta" ra" i? ga: myid' ra". 4 Ngadqere: yao: bam wa pe" dakheim: re: matau: ko" ngad: ra". Ailao" Yesu wa ai: no yaug re jhui" yu yang: gai byid: mung: yao: re phao nhao: ke' ra". 5 Amung: Yesu wa yao: bam re- Naonhaung" mae" dayaug yaug wa yao: zo:- mangad: lao"- nung: lo: dadau: Dugno: Ba mae qid thaung: khug khyo byid: gyo" vao: jo; ngad: re aijao" yao: naonhaung" mashe: thug' yu lo: khag' na genae" i? ga: myid' ra". 6 Ngadqere: yao: bam wa cedao: re maqo" phaug' tau: ko" ngad: ra". 7 Bang" vo qemae" damyo" wa gai: thao" ra" jo, qo re khyin: na ko" rure Yesu qu" ba lao"- yao: wa yao: bam re dao: tau" ci yang:- 8 Nao re dayaug yaug myi: vhin" poe khyo li" khai lao"- gai: thao" ra" jo, qo mae dazaung wa,- 9 Nao tho' je: akhyag: ra" yaug rere: khai: to: mung:- ni" shid' zo: geim" re khai: to" ra" poe sang pho wa nao jhao" li" yang: Yao: re- cejo, qo mae zaung nhao wa,- ga: ta" lao"- nao wa qho' phau" ru we' nyham: thao" ra" jo, qo khyo qui" zaung ca" li" nae"- ga: ta" ra". 10 Airumung: nao re khai gelao"- nyham: ra" zaung jo, qo mae yezaung wa,- ailao" nao re khai: ra" bang" sang pho wa nao jhao" li" mung:- ba nam pho" we"- Je: gai: ra" zaung jo, qo khyo li" zaung wa,- ga: nao re ta" nae"- ailao" nao wa bang" vo alhab' mo; qhid' kheim: mae nga: ye; li" nae". 11 Pe"mung:ga"re yao: yao" gaung re khin" ra" yaug wa nyham: khyo" pye' ru qhug' li" nae"- yao: yao" gaung re nyham: khyo" ra" yaug kam" wa khin" byid' ru qhug' li" nae"- ga: ta" ra". 12 Ai: thao Yesu wa yao" bang" sang pho re Nao wa ne, xe: mangad: lao"- myi"xeim re da" zho: nae"ein lao"- ni" ba nam qe- ni" mao:nhaung: qe- ni" ba nam ug zo: qe- ni" yham kyo: cao: sathe" qere dakhai- pe"mung:ga"re yao: bam wa nao re dam: tug' khai zho: mung: nao re jeju dam: tug' xe' li" genae". 13 Airumung: nao wa zo: shaug' poe da" zho: lao"- myaung sho: mo,- gaung dau: qeim mo, khyid gyug: mo, myo, jid mo, re khai zho: wa,- 14 Alao" nao wa ngaui lho" li" nae"- pe"mung:ga"re yao: bam wa nao re jeju maqo" dam: xe' ko" ngad: ra". Din:man" ra" mo, dam: daui: to" li" ra" ba na mae Mao"So wa nao re jeju dam: xe' li" nae"- ga: ta" ra". 15 Saboe" mae zaung: jo; ra" mo, mae" dayaug wa ai: dao: re the' gyo: lao"- yao: wa Yesu re- Mao"So: mung"dan: mae" zo: shaug' poe mae yeqo" vao zo: nae" yaug wa ngaui lho" ra" wo"- ga: ta" ra". 16 Yesu wa yao: re- Byu dayaug wa zo: shaug' poe mo" dalam: seim" nyhang" na mung:- yao: wa byu myo: sho' re khai: to" ra". 17 Ai: zo: shaug' poe ba na joe" lao"- yao" daui daui byu dayaug re yao: khai: to" ra" mo, jhao" nhao: ke' mung:- Li" gese,- Alhab' jin" va"- ga: yecao" ta" nhao: ra". 18 Ngadqere: yao: bam wa dayaug: thao dayaug maqo" li" ra" khyo ta" ako". Sao qhid' mae" yaug wa- ngo yo dakhyao: vai: to"- ai re yequ" ca" ra"- Airumung: ngore akhang" byid: la,- ga: ai: daui daui yaug re ta" ra". 19 Gatau dayaug wa- ngo wa nung: jaung lo: ngo" zam" vai: to"- Aijham we' mau" yezaui" jham" qu" ca" ra". Airumung: ngore akhang" byid: la,- ga: ta" ra". 20 Amung: gatau dayaug wa Ngo wa ana" za: shi" myi: yu: to: yang: maqo" li"- ga: ta" ra". 21 Daui daui yaug wa dam: tug' lo mung: ai: gu: alhab' yao" asang re lota" kyo" ra"- yao" asang wa nhag' yo: mung:- yao" daui daui yaug re hau" mo" khyodang jham we' yham gyo: khaung: mae" khyodang jham khyo phyad thug' ye: mung: myaung sho" ra" mo,- gaung dau qeim: ra" mo,- myo, jid mo,- khyid gyug: mo, re yekhai: jhui" lo ri:- ga: ta" ra". 22 Mataung" myao" re ai: daui daui yaug wa dam: lo mung:- Asang we"- nao ta" ru we' dakhyo: bin: kad' va"- ngadqere: zaung jo, qo gung" jo; ashi"- ga: yao" asang re ta" ra". 23 Alao" asang wa yao" daui daui yaug re- Seyo: vogaung: khyo jham khyo phyad thug' ye: mung:- byu qere nga" yham byang" sho' maqad maqui" yekhai: jhui" lo ri:- ga: ta" ra". 24 Naonhaung" re ngo ta" geli"- ngo khai: to" ra" mo, wa nga" myi" xeim re qhug' tau" genae" mangad:- ga: ta" ra". 25 Dalhang: mae" mo, byu qe ajham ataung Yesu we' su" ye" lo" na ko" au:- Yesu wa yao: bam shad' khyo lhang: lo mung:- 26 Ngo jhao" li" ra" yaug khag' ngadqere: yao" myhi" pho"- yao" myi: zo:- yao" mao:nhaung: nhae: mo" we' yao: yao" gaung re jhid'de; ra" tho' ngore majhid'de; ra" yaug wa nga" mho"zo: maqo" boe" ngad: ra". 27 Amung: yao" pyao: zang re tau: vo, mung: nga" thao macao" ra" yaug khag' ngadqere: nga" mho"zo: maqo" boe" ngad: ra". 28 Naonhaung" mae" khag' ngadqere: gyebyu zaung kad' nae" ein lao"- aire bin sho' kad' nae" yao" lo, mae ngaui laug nae" malaug nae" gyo" ang: ra" gau jho re shi" zaung: jo, mung: masun" qu" nae" khag' na: i? 29 Yao: wa airu: masun" qu" lo:- apan aqao: wa yekad' qhid: to: mung:- ai: gyebyu zaung re maqo" kad' pin" ngad: re wa- aire myao: ra" mo, alhab' wa yao: re qi: jung" pye' li" genae". 30 Ceyaug wa apan aqao: wa zhaug' qhid: to: mung: maqo" kad' pin" ngad: ra"- ga: ta" li" genae". 31 Amung kho: kham dayaug yaug wa yao: re gye kad' ra" kho:kham dayaug- gyezo: shid' tug we' gye to" li" ra" yaug re yao" gyezo: datug we' thug' ye: mung:- gye yezin: nae" ein lao"- yao: wa gyo" zaung mung:- ai: gatau kho:kham pho" we' gye zin: nae" yao" gyezo: qam: bo mabo: rure shi" sao qhid' mamyid: phyid' qu" ra" kho:kham na nae" i? 32 Yao: gye maqo" zin: re wa ai: gatau kho:kham pho" va: va: mae ngad shi" au:- yao: wa lagyo: qere nhao: ke' mung:- ai:gatau kho: kham pho" re mang: jho" dae nae" qhid' mae" mho' nhao: ke' li" nae". 33 Ai we' dakhyo:- naonhaung" mae" khag' ngadqere: yao: qo" ra" gu: alhab' re mato" pye' co' ra" yaug wa nga" mho"zo: maqo" boe" ngad: ra"- ga: dao: pin" ra". 34 Xo: wa gai: ra"- ngadqere: ai: xo: wa ngae: ru shao" byaug lao" wa dam: ngae sho' khoru: madam: gai: kad' ngad: ra". 35 Aiwa yo myid gaung qhid' mae" re:- myid xau kad' nae" qhid' mae" re: magai lo:ngad: ra". Amung: ai: xo: re taung gaung khyo shapye' pye' nae" za: angad: ra". Amung: nokhye' de; ra" yaug wa tae" gyo" yu vashao:- ga: ta" ra". 1 Daba mae khang: gaug mo, myo: sho' we' qobo qo" ra" mo, wa Yesu mungdao: re tae" gyo: nae" ga: Yesu jhao" li" ako". 2 Alao" Pharishe qe we' Jham: Tung" Pho" qe wa ceyaug wa qobo qo" ra" mo, re- bang" tug: yu mung: yao: bam we' lhao" re: zo daga" zo" ra"- ga: nyhung: ako". 3 Airumung: Yesu wa ce: dao: tau" ci yang:- naonhaung" mae" dayaug yaug wa yao dayo dau: qo" mung:- 4 Aimae" dadau: byaug: byaug lao"- yao: pe" ru: kad' nae" i? Yao: wa ai: dang: ra" gug xe: gug dau: re mhin: gyo, jao: mae nha: to: co' mung: ai: byaug: lo" ra" yao re myao sho' qho: li" nae". 5 Ai: byaug: ra" yao re qho: myao lao"- yao: wa gyai bau" ru we' yao" lo, sin dao mae vo, yang: dam: lo: ra". 6 Yham khyo joe" lo lao"- yao: wa yao" ba nam qere we' yham kyo: cao: qere khai: zhang" yu mung:- Byaug: byaug: ra" nga" yao dam: qho: qhug' va"- ngo we' daga" ngaui bau: gelang:- ga: ta" li" nae". 7 Naonhaung" re ngo ta" geli"- ai we' dakhyo:- myid tha" maca"- ga: myid: na ko" ra" din:man" ra" byu gug xe: gug yaug: mathao mae ngaui bau" ra" tho' qobo qo" ra" byu dayaug myid tha" lo: ra" mathao: yang- mug:gaung dao mae je yang: ngaui bau" ra"- ga: ta" ra". 8 Amung: dakhyo" wa myiqe: dayaug wa- ngaui thang: the: daxe kye' qo" mung:- aimae" dakye' byaug: byaug lao"- yao: wa pe" ru: kad' nae" i? Yao: wa myikaug' te' yang: yham geim" sham: mung: aire myao sho' khyi" khao: ngo" jid' jid' naug naug qho: li" nae". 9 Yao: wa ai: ngaui thang: the: re qho: myao lao"- yao" ba nam qe we' yham kyo: cao: qere khai: zhang" yu mung:- Byaug: byaug: ra" nga" ngaui thang: the: kye' dam: myao va"- amung: ngo we' daga" ngaui bau: gelang:- ga: yao: bam re ta" li" nae". 10 Naonhaung" re ngo ta" geli"- ai we' dakhyo: Mao"So: mug: lagyo: wa qobo qo" ra" byu dayaug myid tha" lo: ra" mathao: yang ngaui bau" ako"- ga: ta" ra". 11 Yesu xo' yang: ta" ru wa- dalhang: mae" byu dayaug wa yauggai zo: shid' yaug qo" ra". 12 Angai yaug wa yao: pho" re- Nga" pho" we"- ngo sang ang: ra" jo,nho" re ana" yao: ngore gae bam khyo" byid: la,- ga: mho' ra". Ailao" yao: pho" wa yao: zo: tao re yao" jo,nho" gae byid' ra". 13 Ai: thao mataung" myao" re yao: zo: angai yaug wa jo,nho" gae bam re aung" pye' mung:- jo,nho" aung: yang: qo" ra" ngaui alhab' re vin mung:- yham mae" thug' lo" ra". Yao: wa va" ra" mung" khyo ye" lo" mung:- ai: mung"dan: mae pyo: poe" kad' mung: mageim: be, lhu" pye' ra". 14 Yao" ngaui alhab' yhung: zo" gan thao re ai: mung"dan: geim" mae bao" khug' mo" zang khug' lo mung:- yao: wa masho: majhin ngad: byaug: ra". 15 Airumung:- yao: wa ai:mung" mae" byu dayaug jhao" yecao: khug: na: ra". Ai: yaug wa yao: re yao" khyae khyo vo, yezam: nae" qhid' mae" nhao: ke' ra". 16 Yao: wa vo, jham zo" ra" vo, zo shagyao: daung" re lhao"- zo: nug: li" ra". Ngadqere: yao: re zo:ve khag' re: mabyid: zho: gengad: ra". 17 Lo" thao" mae myid: beim" li" mung:- nga" pho" okaung qe alhab' wa magan: mago" qo" zo" ako"- ana" ngo wa cetau mae moe; kyaug' shid: lo" na:- 18 Ngo wa to" mung:- nga" pho" jhao" lo" mung:- nga" pho" we"- ngo wa Mao"So rere:- nga" pho" nao rere: shad' va"- 19 Ngo wa ni" zo: ein: ta" nae" lhao" re: maman: qi" lo:ngad: ra"- ni" okaung pho" dayaug we' dakhyo: ngore to: la,-ein: nga" pho" re lo" ta" nae"- ga: ta" ra". 20 Alao" yao: wa to" mung: yao: pho" jhao" phao: lo" ra". Yao: va: va: mae ngad shi" au: mae" yao: pho" wa yao: re myao mung:- nhag' qu" khyag' ru we' tao" ye: yang:- yao: zo" lang zang: re yege; vo, mung:- bobaug baug: ra". 21 Yao: zo: wa nga" pho" we"- ngo wa Mao"So rere:- nga" pho" nao rere: shad' va"- ngo wa ni" zo: ein: mhang" nae" lhao" re: maman: qi" ngad: ra"- ga: ta" ra". 22 Ngadqere: yao: pho" wa yao" daui daui mo, re- Gai: thao" ra" bau: qhang phyad yu: lo mung: yao: re lovhe' byid: geri:- yao" lo, mae lo, pin: lopin: byid: geri:- yao" khyid mae khyid zhaung: lozhaung: byid: geri:- 23 Amung: myhaug' to" ra" nung: jaung nau" se' ge,- amung: ngonhaung" ngaui ngaui bau: bau: za: zo: shaug' poe kad' gelang:- 24 Pe"mung:ga"re nga" zo: ceyaug wa shid va" ru ngad:- ngadqere: ana" dam: daui: li" va". Yao: wa byaug: byaug va" yaug ngad:- ana" wa dam: myao va"- ga: ta" ra". Amung: ngaui ngaui bau: bau: zo: shaug' poe kad' ako". 25 Ai: au: zoqhid' yaug wa yo mae ngad: ra". Yo mae" lo mung:- yham khyo jhao" li" na lao"- yao: wa zang- mao" be, thoe we' go" na ko" ra" thoe re lothe' gyo" ra". 26 Airumung: yao: wa daui daui byu dayaug re khai: yu mung:- Pe" kad' na ko" ra" i? ga: myid' ra". 27 Ai: daui daui yaug wa ni" nhaung: dam: joe" lo mung: ni" pho" wa Ni"- nhaung: pe" maqo byan: byan: za: dam: joe" lo yang: myhaug' to" ra" nung: jaung nau" re se' nhao va" ra"- ga: tau" ra". 28 Zoqhid' yaug wa gyai nhag' yo: mung:- yham khug khyo mavao lo" lo: na: ra". Ailao" yao: pho" wa thug' ye: mung:- yham khug khyo vao lo nae" qhid' mae" yejhu" ra". 29 Ngadqere: yao: zo: zoqhid' yaug wa yao: pho" re- Qu" wa,- ngo wa jeim dayaug we' dakhyo: ni" qhid' mae" cenho" zin mau" zaui" lo va"- ni" amyin" dao: re ngo khonhae" re: mangag: qu"- ngadqere: nao ngore pe" daja: byid' qu" i? Nga" byin cao: qe we' pyo: poe" kad' nae" qhid' mae" cad' be, dadau: lhao" re: nao ngore mabyid' qu" ngad: ra". 30 Ngadqere: ni" jo,nho" jham re shava myhi" qe we' zam" mung:- mageim: da" sin" pye' ra" ce: ni" zo: dam: joe" lo lao"- nao wa yao" qhid' mae" myhaug' to" ra" nung: jaung nau" se' ra"- ga: ta" ra". 31 Yao: pho" wa Nga" zo: we"- nao wa khonhae" re: ngo we' daga" za: na: ra"- ngo qo" gu: alhab' ni" mae" ngad: ra". 32 Ni" nhaung: wa shid: byaug va" ru ngad:- ngadqere: yao: wa ana" dam: daui: li" va" ra"- yao: wa byaug: byaug va" ru ngad: ra"- ana" wa dam: myao va". Aimung: ngonhaung" wa ngaui bau: za: zo: shaug' poe kad' gai: ra"- ga: jhu" ra"- ga: ta" ra". 1 Yesu wa yao" mho"zo: qere- Dalhang mae- sathe" dayaug wa yao" jo,nho" re zam: pyo byid' ra" daui daui byu dayaug qo" ra". Ai: daui daui yaug wa sathe" pho" jo,nho" jham re mageim: da" sin" pye' na: ra"- ga: sathe" pho" re ta" kyo" ako". 2 Airumung: sathe" pho" wa yao: re khai: yu yang:- ni" khyo we' sin: mung: ngo the' gyo" ru wa pe" ru: i? Nao zam: pyo: na: ra" nga" jo,nho" japhin: alhab' sho' qhu" la,- pe"mung:ga"re ana" mae" thoegu: zam: pyo mau" kad' zai mangad: lo:- ga: ta" ra". 3 Ai: daui daui yaug wa yao: yao: re- Nga" asang wa ngore zam: pyo mau" mae" phoe' pye' naeva" myao:- ngo pe" ru: kad' nae" i? Myid dau: myid baug nae" qam: o: mabo- Mho' zo: mho' shaug' nae" re: ngo qho' ra". 4 Ngo re zam: pyo mau" mae" phoe' pye' lao"- su bam ngore yao: bam: yham mae lham: khae: yu nug gesho' pe" ru: kad' nae" rure ana" ngo ba va"- ga: ta" ra". 5 Airumung: yao: wa yao" asang re jhin de, ko" ra" mo, alhab' re khai: yu: ra"- yao: wa sao qhid' yaug re- Nao nga" asang re jhin khonho" de; i? ga: myid' ra". 6 Ai: yaug wa zhanlun xau yae: dayo jhin de;- ga: ta" ra". Zam: pyo pho" wa ni" japhin: ce ngad: ra"- Gyo" zaung mung:- ngo" xe ein: tung" wa,- ga: ta" ra". 7 Ai: thao yao: wa gatau dayaug re Nao re: nga" asang re jhin khonho" de; i? ga: myid' ra". Ai: yaug wa jung: gaug tang dataung de;- ga: tau" ra". Zam: pyo pho" wa Ni" japhin: cemae ngad: ra"- Gyo" zaung mung: she' yo ein: tung" wa,- ga: ta" ra". 8 Ai: nhag' lam: madin" ra" zam: pyo pho" wa airu: qag qag za: kad' ruyang yao" asang wa yao: re khin" byid' ra". Pe"mung:ga"re ce: myid gaung byu qe wa yao: bam: myid gaung: mau" zo" kad' rumae mug: bo" yao: zo: qe tho' je: qag: ako". 9 Yesu wa xo' yang: Naonhaung" re ngo ta" geli"- Myid gaung dao: jo,nho" yang naonhaung" yao" ba nam kad' yu ge,- amung: ai: jo,nho" gan: byaug lao"- naonhaung" wa apyad ato: yham mae khae: yu: ru qhug' li" genae". 10 Ngai: ra" mau" zo" mae kyid: ra" yaug wa qi" ra" mau" zo" mae re: kyid: li" nae"- Ngai: ra" mau" zo" mae nhag' lam: madin" ra" yaug wa qi" ra" mau" zo" mae re: nhag' lam: din: nae" mangad:- 11 Airumung: myid gaung dao: jo,nho" we' sin: yang: naonhaung" makyid ko" ngad: re wa dangman" ra" jo,nho" we' sin: yang: naonhaung" re khag' lam genae" i? 12 Naonhaung" wa su gaje qe sang: ra" jo,nho" we' sin: yang: makyid ko" ngad: re wa naonhaung" sang ang: ra" jo,nho" re naonhaung" re khag' byid' li" nae" i? 13 Daui daui byu okaung khoyaug ngadqere: asang shid' zo" nho: jeim maqo" kad'- yao: wa dayaug re nghang: mung:- gatau dayaug re wa jhid'de; li" nae"- Dayaug re wa phug' myao: mung: gatau dayaug re maphug' makhyad' kad' li" nae" Aimung: naonhaung" wa Mao"So re we' ngaui qhang jo,nho" shid' ja: geim" re jeim maqo" kad' genae"- ga: ta" ra". 14 Ai: dao: alhab' re ngaui qhang jo,nho" so' kho' mo, ngad ko" ra" Pharishe qe gyo: gelao"- yao: bam wa Yesu re jung" ako". 15 Yesu wa yao: bam re Naonhaung" wa su gaje: qhid' kheim: mae yao: yao" gaung din:man: mo, ngad: ako"- ga: qu" jho nae" kad' mo, ngad: ako"- ngadqere: Mao"So wa naonhaung" nhag' lam: re ba: ra"- pe"mung:ga"re byu: yang phug' te' ra" ja: wa Mao"So: qhid' kheim: mae phug' made, ngad: ra". 16 Moshe Tarha" dao: we' lapa qe: jham: paug' jham wa qid nyhab' Yohan joe" li" ra" ba na joe" sho' kheim: so' bo: jo; ra"- Yohan joe" li" ra" ba na mae" Mao"So: mung"dan: Ngaui Bau" Lau Dao: Gai wa ta" hau" lo: na mung:- yaug khao: ngo" ai: mung"dan: khug khyo jhin" jhe' vao ye" ako". 17 Ngadqere: ai: Tarha" dao: mae" ngai: thao" ra" tung" ce' dace' byaug: lo" nae" laui: ra" tho' mug:gaung we' myid gaung baui" lo"nae" je yang: laui: ra". 18 Yao" yham sang myhi" re kao" pye' yang: gatau dayaug re dam: vhin" yu: ra" yaug wa myi: shad' yaug ngad: ra"- Kao" pye' to" ra" myiqe: re vhin" yu: ra" yaug re: myi: shad' yaug ngad: ra". 19 Dalhang: mae sathe" dayaug wa phug' thao" ra" ve,mai ve,bau: re ve, yang: ba khao: ngo" zo: pyo: shaug' pyo: yang: na: ra". 20 Myaung sho: mung: gaung geim" jad: ra" Lazaru ga: mang: ra" byu dayaug re: sathe" pho" yham kham: dung: mae li" jhui" nha: to: to: kad' ako". 21 Yao: wa sathe" pho" saboe" mae" sheim: gyo" ra" zosheim re the' zo: nae" myid: lao" na: ra". Lakha: jham lhao" re: yao" dae jad: re li" yo, byid' ako". 22 Ai: thao re ai: myaung sho" ra" yaug wa shid: lo" mung:- mug: lagyo: qeyang Abraham nho: lo, yo shad' mae zaung: jo, nae" vo; lo" byaug: ako"- Sathe" pho" re: shid: lo" mung:- nyhab' shaung: pye' ako". 23 Sathe" pho" wa movo: mug: mae gyai dayin dayo: kham zo: mung: tau: qu" ke' re Abraham rere: Abraham nhae mae zaung: jo; ra" Lazaru rere: va: mae" myao: ra". 24 Airumung: yao: wa nga" pho" Abraham we"- ngore nhag' khyag' yu la,- ngo wa ce: myikhyeim" khug mae dayin dayo: kham zo" na:- Lazaru wa qid mae yao" lo, nyhug' au: thug' jam: yu yang: nga" sho re li" tag' byid: nae" qhid' mae" yao: re ngojhao" nhao: ke' byid: la,- ga: hug' ta" ra". 25 Ngadqere: Abraham wa Nga" zo: we"- nao wa daui: na shi" au: ngaui bau: ngaui lho" qhug' kham zo" lo: rure re:- Lazaru wa dayin dayo: masho: majhin kham zo" lai: lo: rure myid: beim: wa,- ana" yao: wa cemae ngaui bau: ngaui lho" qhug' kham zo" na: ra"- nao wa dayin dayo: no kham zo" na: ava". 26 Ai: tho' mago" cetau mae" naonhaung" jhao" de; ye: nug mo, maqo" de; ye: genae" we' naonhaung" na: mae" ngonhaung" jhao" maqo" de; li" genae" qhid' mae" ngonhaung" we' naonhaung" agyo: mae gyai no; ra" lao: khaung: dalam: jo; ra"- ga: ta" ra". 27 Sathe" pho" wa Ailao"- nga" pho" Abraham we"- Lazaru re nga" pho" yham khyo nhao: ke' byid: nae" ngo goe; mho' ra". 28 Nga" nhaung: bam ngo" zo: na shiko" ra"- yao: bam khalhao" dayin dayo: no kham zo" ra" cejo, qo khyo mali" genae" qhid' mae" yao: bam re lo" ta"peim: byid: nhao la,- ga: ta" ra". 29 Alao" Abraham wa yao: re- Ni" nhaung: bam re ta"peim: byid: nae" Moshe we' lapa qe na: bam: ako"- ni" nhaung: bam wa aibam: dao: re tae" gyo: vageshao:- ga: ta" ra". 30 Sathe" pho" wa- Nga" pho" Abraham we"- ai:yang za: maga" nae"- Shid: byaug va" mo, mae" daui: li" ra" dayaug yaug yao: bam jhao" ye" lo" ngad: re wa yao: bam myid tha" lo: li" genae"- ga: ta" ra". 31 Ngadqere: Abraham wa Moshe we' lapa qe: dao: re matae" gyo: ko" re wa shid: rumae" dayaug yaug daui: li" ngadqere: yao: bam lam" genae" mangad:- ga: ta" ra". 1 Yesu wa yao" mho"zo: qere- Byu re nhag' lam: tha" lang: nhao: ra" ja: jham wa khonhae" re: boe" zai ngad: ra"- ngadqere: aijham re boe" nhao: ra" yaug wa byuxa: vaqoe, qhug' ra". 2 Ce: ngai: ra" mo, mae" dayaug re nhag' lam: tha" lang: nhao yaug wa yao" lang zang: mae laug lhang taui" lhao: mung: panglai: khug khyo pye' zaui: pye' qhug' ru wa yao" qhid' mae" je: gai: ra". 3 Airumung: naonhaung"wa lha" yang: na ge,- (Ni" mao:nhaung: pho" nao re shad' ngad: re- yao: re qeim wa,- yao: myid tha" lo lao" wa qobo khyad' byid: wa,. 4 Daba na mae za: yao: wa nao re nhad' lang shad' mung:- nhad' lhang: geim" nao jhao" li" yang: ngo myid tha" va"- ga: ta" lao" wa yao" qobo re khyad' pye' byid: ca" ra"- ga: ta" ra".) 5 Alao"- lagyo: qe wa Asang re- ngonhaung" lam khug: myid re je: qi" li" nhao la,- ga: mho' ako". 6 Asang wa yao: bam re- Naonhaung" lam khug: myid ao: shi: jid' qhi" bo gelao" re:- ce: thaung zo gae re- Agyi: we' daga" apan mae" ban" lo" mung: panglai: mae yeyaug: jo, wa,- ein: ta" gelao" thaung zo gae wa naonhaung" mho dao: re tae" gyo" li" nae". 7 Naonhaung" mae" dayaug yaug wa yothaung: phaug' ra" daui daui okaung- mangad: lao"- yao lhaug' ra" daui daui okaung dayaug qo" ein: gelang:- ai: daui daui okaung pho" yothaung: mae" dam: joe" lo lao"- Myi" xeim zo: nae" phyad lozaung ri:- ein: yao: re naonhaung" khag' ta" genae" i? 8 Naonhaung" mata" genae"- yao: re yaug kam" wa nga" myi" xeim phyad nyhang" jaung wa,- ngo zo: shaug' na: au:- mai bau: nyhang" ve,- lo, cid' pye' yang: ngore caung da" la,- ai bin thao re nao zo: shaug' wa,- ga: naonhaung" ta" genae" mangad: i? 9 Daui daui yaug wa asang: amyin" dao: re tae" gyo" ruyang yao: re pe" jeju beim: maqo ngad: ra". 10 Ai we' dakhyo:- naonhaung" re ta" to" ra" mau" zo" alhab' re bin: zaui: gelao"- ngonhaung" wa mageim: daui daui byu qe angad:- ngonhaung" wa ngonhaung" yao" mau" zo" re zaui: mo, za: angad:- ein: ta" ge,- ga: ta" ra". 11 Yesu wa Yerusalem vogaung: khyo ye" lo" na: au:- yao: wa Samari mung" we' Galile mung" kyo: khyo" lai: ye" lo" ra". 12 Vogaung: dalam: khyo vao ye" lo" re- mao gae: de; ra" byu daxe yaug wa Yesu re li" qhug' ako". 13 Yao: bam wa va: va: mae ye; jo, mung:- Asang Yesu we"- ngonhaung" re nhag' khyag' yu la, wo"- ga: zag: hug' ako". 14 Yao: bam re Yesu myao lao" yao: wa- Naonhaung" gaung khinjaung qere lo" qhu" byid: ge,- ga: yao: bam re ta" ra". 15 Yao: bam khyo mae lo" na: au: no gai: shao: lo" byaug ko" ra". Yao: bam mae" dayaug wa yao: gai: shao: lo" byaug va" rure ba lao"- dam: tug' lo mung:- thoe qi: we' Mao"So re caung:khin" byid'ra". 16 Yao: wa Yesu khyid qao: khyo goe; gyo" yang: Yesu re jeju beim: so" ra"- aiyaug wa Samari byumyu" ngad: ra". 17 Yesu wa- (Byu daxe zo: mao gae: gai: shao: lo" byaug vako" ra" mangad: i? Gatau gug zo" gu: khai: lo" ko" ra" i? 18 Pe"mung: ce: taung bug byu dayaug za: Mao"So: jeju re caung: byid: nae" dam: tug' lo: ra" i? ga: myid' ra". 19 Yesu wa yao: re- To" mung: lo" se,- ni" lam khug: myid wa nao re gai: shao: lo" nhao: ava"- ga: ta" ra".) 20 Pharishe qe daqhae: wa Yesu re Mao"So: mung"dan: khonhae" joe" li" nae" i? ga: myid' ako"- Alao" Yesu wa- Mao"So: mung"dan: wa myo; yang myao: ra" khyo" joe" li" nae" mangad:- 21 Qu" ge,- Mao"So: mung"dan: wa cetau mae ngad: ra"- Mangad: lao"- thoe:tau mae ngad: ra"- ga: khag' re: maqo" ta" ngad: ra"- pe"mung:ga"re Mao"So: mung"dan: wa naonhaung" khug mae ngad: ra"- ga: yao: bam re tau" ra". 22 Ai: thao Yesu wa yao" mho"zo: qere- Byu: Yao: Zo" nho: ba na mae" daba re- naonhaung" myao nug kao bau nae" ra" ba na joe" lo: li" nae"- ngadqere: naonhaung"aire maqhug' myao genae". 23 Byu daqhae: wa Qu" ge,- Byu: Yao: Zo: wa thoe:tau mae na: ra"- cetau mae na: ra"- ga: ta" gengad yang: re:- naonhaung" daye: qho ge,. 24 Lhe' cad' wa mug: myid dashad' mae" gatau dashad' joe" sho' mug:gaung mae bao: qhui: lai: lo" ru we' dakhyo:- Byu: Yao: Zo: re: yao" ba na mae airu: ngad: li" nae". 25 Ngadqere: Byu: Yao: Zo: wa dayin dayo: myo: sho' kham zo" ru we' ceqae" mae" byu qeyang ngag: ha: pye' rure sao qhid' kham zo: ca" li" nae", 26 Noa ban: pyad mae boe" ru we' dakhyo:- Byu: Yao: Zo: joe" li" nae" ba na mae re: airu: boe" nae". 27 Noa wa qid sang pho khug khyo vao lo" mung: daqid shi" li" yang: alhab' mo, nab: shid: lo" ra" ba na joe" sho' xao su byu qe wa zo: zo: shaug' shaug' myi:byid:- myi:yu mung:- na: ako". 28 Ai we' dakhyo:- Lod ba na mae re: byu qe wa zo: zo: shaug' shaug' zai vai zai aung:- qho: zo: qho: shaug'- yham zhaug' yang: na: ako". 29 Sodom vogaung: mae" Lod thug' lo" ra" ba na mae mug:gaung mae" myi: we' vhang qu: gyo" lo mung:- byu alhab' mo, re ngha" se' pye' ra". 30 Byu: Yao: Zo: joe" thug' li" ra" ba na mae re: ai we' dakhyo: ngad: li" nae". 31 Ai: ba na mae yao" yham khaung dao mae na: ra" yaug wa gyo" lo" mung: yham khug mae" yao" ngaui qhang jo,nho" yu: ci nae" davao lo" shao:- ai we' dakhyo:- yothaung: din" mae na: ra" yaug re:- yham khyo datug' lo" shao:- 32 Lod nho: yham sang myhi" re myid: beim: ge,- 33 Yao: yao" kao so' re khyad' yu nug: ra" yaug khag' ngadqere: kao so' jeim: nae"- yao: yao" kao so' jeim: yaug wa kao so' khyad' yu: ru qhug' nae". 34 Naonhaung" re ngo ta" geli"- ai: myi re yab qo dalam: mae za: yab: jo, ko" ra" byu shid' zo: re dayaug re wa jhui" lo" mung:- dayaug re wa tang" to: co' li" nae". 35 Laug lhang dalam: mae za: daga" gyag: na ko" ra" myiqe: shid' zo: mae" re: dayaug re jhui" yu mung:- dayaug re wa tang" to: co' li" nae". 36 (Yo mae mau" daga" zaui" na ko" ra" byu shid' zo: mae" byu dayaug re jhui" yu mung:- dayaug re wa tang" to: co' li" nae"- ga: ta" ra".) 37 Mho"zo: qe wa Yesu re Asang we"- ai kho:tau mae boe" zai ngad: ra" i? ga: myid' ako". Yesu wa- sushid mao jo; ra" jo, qo mae nang da ngho' jham zang" ham: li" genae"- ga: ta" ra". 1 Ai: thao Yesu wa yao" mho"zo: qere khonhae" re: akyu" mho' na genae" qhid' mae" we' qam: mashan genae" qhid' mae" dao: tau" ci yang: yao: bam re mho" byid' ra". 2 Vogaung: dalam: mae Mao"So rere: magyaug- byu rere: maphug' ra" tarha" zug: dayaug na: ra". 3 Ai: vogaung: mae cug' mo" myhi" dayaug re: na: ra"- yao: wa tarha" zug: pho" jhao" dazab: makyo li" mung:- ngo we' tarha" yung" jho" zaung: ra" yaug: agyo: mae nga" shad' mae din:man" ra" khyo" dao: kho' byid: la,- ga: tarha" zug: pho" re mho' ra". 4 Ngadqere: tarha" zug: pho" wa ba na myao" sho' dao: makho' byid: lo: na: ra". Thao re tarha" zug: pho" wa- ngo wa Mao"So rere: magyaug- byu rere: maphug' yaug ngad:- 5 Ngadqere: ce:- cug' mo" myhi" wa ngore khin jang: na: ruyang tarha" din: vang" ra" khyo" yao" shad' mae ye, yang: dao: kho' byid: nae"- ngo airu: makad' re wa yao: wa ngojhao" dazab zab li" yang: lo" thao" mae ngore gyai myid myaung: nhao: li" nae"- ga: yao" aung khug mae ta" ra". 6 Asang wa xo' yang:- ai: madin: man" ra" tarha" zug: pho" ta" ra" dao: re tae" gyo" qu" ge,- 7 Mao"So wa myi" re: na" re: mho' yao: na ko" ra" yao" byu qe: shad' mae ye, yang: tarha" din: vang" ra" khyo" dao: makho' byid: lo: na nae" i? 8 Naonhaung" re ngo ta" geli"- Mao"So wa phyad phyad za: yao: bam: qhid' mae" tarha" din: vang" ra" khyo" dao: kho' byid' li" nae"- ngadqere: Byu: Yao: Zo: joe" li" ra" ba na mae myid gaung dao mae lam khug: myid re li" the' myao shinae" laug?- ga: ta" ra". 9 Yesu wa yao: yao" gaung re gai beim: mung: su gaje qere qu" ngai: ra" mo, re ce: dao: tau" ci yang: ta" ra". 10 Dalhang mae byu shid' yaug wa akyu" mho' nae" qhid' mae" Caung:pa" Yham khyo ye" ako". Dayaug wa Pharishe ngad mung:- dayaug wa khang: gaug yaug ngad: ra". 11 Pharishe pho" wa yao: za: gatau ye; jo, mung: Pho" Mao"So we"- ngo wa su gaje qe we' dakhyo: so' kho' yaug- nhag' lam: madin: yaug- su: myi: lhad' yaug mangad:- Aitho' mago" thoe: khang: gaug yaug we' dakhyo: re: mangad: mung:- ngo nao re jeju caung: byid' ra". 12 Ngo wa dalaban mae shid' ba zo:ve jao" mung: ngo the' ra" gu: alhab' mae" daxe bam mae" dabam nao re byid'- ga: akyu" mho' ra". 13 Ngadqere: khang: gaug yaug wa va: mae ye; jo, yang:- mug:gaung khyo lhao" mavae" tau: qu" lo:- yao" qao gao mae theim yang: Pho" Mao"So we"- Qobo jab ngore nhag' khyag' yu la, wo"- ga: akyu" mho' ra". 14 Yesu wa Naonhaung" re ngo ta" geli"- Pharishe yaug mangad:- khang: gaug yaug kam" wa Mao"So: qhid' kheim: mae din:man: yaug khyo" yham khyo phao: lo" ra". Pe"mung:ga"re yao: yao" gaung re khin" yaug khag' ngadqere: nyham: khyo" pye' ru qhug' li" nae"- yao: yao" gaung re nyham: khyo" ra" yaug khag' ngadqere: khin" byid' ru qhug' nae"- ga: ta" ra". 15 Byu daqhae: wa yao: bam: zonau" qe: dao mae Yesu yao" lo, kai: byid: vashao:- ga: yao: bam: zonau" qere Yesu jhao" jhui" li" ako"- ai:rure mho"zo: qe myao gelao"- yao: bam re qeim: ako". 16 Ngadqere: Yesu wa zoshao qere yao: jhao" khai: yu yang:- ai: zoshao qere ngojhao" lo nhao: ke' ge,- yao: bam re datam" to: ge,- pe"mung:ga"re Mao"So: mung"dan: wa airu" mo; mung"dan: ngad: ra". 17 Cere xam" to: ge,- Khag' ngadqere: Mao"So: mung"dan: re ce: zoshao dayaug we' dakhyo:- makhae: yu: ra" yaug wa ai: mung"dan: khug khyo maqo" vao ye: nae"- ga: ta" ra". 18 Yuda au: jhaung dayaug wa Yesu re- Gai: ra" Mho"Pho" we"- Apyad ato: kao so' qo" yu nae" qhid 'mae" ngo pe" kad' ca" i? ga: myid' ra". 19 Yesu wa yao: re Nao ngore- pe"mung: gai: ein: ta" i? Mao"So mae" je yang: gai: ru khag' re: mana- 20 Nao wa kham" to" ra" tarha" jham mae bo: ra" Myi: shad' lao dashad'- Byu dase'- Dakhug'- Madang: ra" sagse: dakham- Ni" myhi" we' ni" pho" re phug' myao: wa, ga" ra" tarha" dao: re ba gau ngad: ra" mangad: i? ga: ta" ra". 21 Ailao" ai: yaug wa Yesu re- Ai: kham" to"ra" dao: alhab' re ngo zoshao: yo, mae" phug' cao" lo va"- ga: phaug' tau" ra". 22 Yesu cedao: re the' gyo: lao" yao: re- Nao daja: kad' ca"shi" ra"- nao qo" ra" gu: alhab' re aung" pye' mung:- myaung sho: mo, re gae byid: wa,- ailao" nao wa mug:gaung dao mae jo,nho" qo" nae". Airu: bin: kad' lao"- nga" thao cao" wa,- ga: ta" ra". 23 Ngadqere: ai: yaug wa cedao: re the' gyo: lao"- yao: wa gyai nhag' kaug' lo" byaug: ra". Pe"mung:ga"re yao: wa jo,nho" gyai qo" yaug ngad: ra". 24 Yao: airu: nhag' kaug' rure Yesu myao mung:- Jo,nho" qo" ra" mo, wa Mao"So: mung"dan: khyo vao ye: nae" gyai qug' ako". 25 gola:u wa nghe' no: dung: khyo" lai: lo" nae" qug' ra" tho' jo,nho" qo" ra" yaug: qhid' mae" Mao"So: Mung"dan: khyo vao ye: nae" je: qug' ra"- ga: ta" ra". 26 Ce:dao: re the' gyo" ra" mo, byu qe wa Yesu re- Aire khyad' yu: ru khag' za: qhug' zai i? ga: myid' ako". 27 Yesu wa tau: mung:- Byu: yang maqo" kad' boe" ra" ja: alhab' re Mao"So wa qo" kad' boe" ra"- ga: ta" ra". 28 Alao" Petru wa Qu" wa,- ngonhaung" wa ngonhaung" yham dang: yokhyao: to" pye' co' yang: ni" thao cao" va"- ga: ta" ra". 29 Yesu wa yao: bam re Ngad va"- naonhaung" re ngo dang za: ta" geli"- Mao"So: mung"dan: mathao mae yao: yao" yham- mangad: lao"- yham sang myhi"- mangad: lao"- mao:nhaung:- mangad: lao"- myhi" pho"- mangad: lao"- zo: dau qere to: co' ra" yaug khag' ngadqere:- 30 ana" ce: pyad mae myo: sho' nho" qo" khae: yu: li" genae"- amung: thao: pyad mae wa apyad ato: kao so' qo" khae: yu: li" genae"- ga: ta" ra". 31 Yesu wa mho"zo: daxe: shid' yaug re gatau jhui" yu yang: yao: bam re- Tae" gyo: ge,- ngonhaung" Yerusalem khyo ye" lo" na: ru ngad:- Byu: Yao: Zo: we' sin: yang: lapa qe tung" ra" jham: dao: alhab' jab byang" lo: li" nae". 32 Byu: Yao: Zo: re taung bug qe: lo, khyo ab byid' pye' li" genae"- yao: bam wa yao: re jung" mung:- roe" ru we' khata: phoe" sheim" li" genae"- 33 Yao: bam wa yao: re be, mung: se' pye' li" genae"- ngadqere: sam ba kyo thao re yao: wa dam: daui: to" li" zai ngad:- ga: ta" ra". 34 Ngadqere: mho"zo: qe wa ai: dao: dakheim: rere: maba: gyo: ko" ngad: ra". Dao: lajheim: re yao: bam maba: gyo: genae" qhid' mae" nyham" to: byid' ruyang Yesu pe" ta" na: rure yao: bam maba: gyo: gengad: ra". 35 Yesu Yerikho vogaung: khyo joe" lo: na: au:- myo, jid pho" dayaug wa khyoyae mae zaung: jo, yang: mho' zo" na: ra". 36 Yao: wa byu ajham ataung su" lai: lo" na: ra" thoe re the' gyo: lao"- pe" ngad: ra" i? ga: myid' ra". 37 Yao: bam wa Nazared mae" Yesu su" lai: lo" na: ra"- ga: ta" kyo"ako". 38 Ailao" yao: wa Davi yao: zo: Yesu we"- ngore nhag' khyag' yu la, wo"- ga: zag: hug' ra". 39 Qhid 'au: mae su" ra" mo, wa sae za: na nae" qhid' mae" yao: re qeim: ako"- ngadqere: yao: wa thoe je: to' mung:- Davi yao: zo: we"- ngore nhag' khyag' yu la, wo"- ga: zag: hug' ra". 40 Ailao" Yesu wa thang mung:- ai: myo, jid pho" re yao: jhao" jhui" lo nae" qhid' mae" amyin" byid' ra"- ai: myo, jid pho" wa Yesu jhao" te' li" lao"- 41 Yesu wa yao: re- Ni" qhid' mae" ngo pe" kad' byid: nae" o: i? ga: myid' ra". Myo, jid pho" wa Asang we"- ngo myo, dam: myao nug: ra"- ga: tau" ra". 42 Yesu wa yao: re- Ni" myo, myao: li" vashao:- ni" lam khug: ra" myid wa nao re myo, myao nhao: ava"- ga: ta" ra". 43 Ailao" jao"-yao: wa myo, dam: myao: li" mung: Mao"So: jeju re caung:khin" byid: yang:- Yesu thao cao" ra". Mo, byu qe wa aire myao gelao"- yao: bam alhab'mo, Mao"So re caung:khin" ako". 1 Yesu wa Yerikho vogaung: khyo" su" lai: lo" na: ra". 2 Ai: vogaung: mae Zake ga: mang: ra" khang: gaug au: jhaung dayaug na: ra"- yao: wa jo,nho" gyai qo" yaug re: ngad: ra". 3 Yao: wa Yesu khag' ngad: rure qu" nae" qhid' mae" qam: ke' na: ra"- ngadqere: yao: wa byulang" ngad: ru we' mo, paug' saung" thau: ruyang Yesu re maqo" the' myao ngad: ra". 4 Airumung: yao: wa Yesu re qo" myao nae" qhid' mae" mo, byu qe: qhid' au: khyo tao" lo" mung:- pho'ham" gae dao mae lo" do; zaung: jo; ra". 5 Yesu ai:jo, qo mae joe" lo lao"- tau: qu" mung: Zake we"- Phyad gyo" lo wa,- ana" ba ngo ni" yham mae thang zai ngad:- ga: ta" ra". 6 Alao" Zake wa phyad za: gyo" lo mung:- gyai ngaui bau" ru we' bang" tug: yu: ra". 7 Aire myao: ra" mo, alhab' wa- Byu ceyaug wa qobo qo" ra" yaug: yham mae bang" khug nae"- ga: cao: lo" ava"- ga: ta" nyhung: ako". 8 Zake wa to" ye, mung:- Asang we"- nga" jo,nho" agaung: daqi" myaung sho: mo, re ngo gae byid: nae"- Dayaug yaug mae" ngo mhug' zo" ci: ngad: re ngo wa yao: re byid nho" dam: tug' byid: nae"- ga: ta" ra". 9 Yesu wa yao: re- Khyad' yu: ru wa ana" ba ceyham mae joe" li" va" ra"- pe"mung:ga"re ceyaug re: Abraham nho: myid:zo: ngad: ra". 10 Byu: Yao: Zo: wa byaug: lo" ra" mo, re qho: yu nae" we' khyad' yu nae" qhid' mae" joe" li" ru ngad:- ga: ta" ra". 11 Mo, byu qe cedao: re tae" gyo" na shiko" au:- Yesu wa Yerusalem khyo jhao" li" na: ru we' mo, byu qe wa Mao"So: mung"dan: wa ana" jao" yao: myao: thug' li" naeva" ga: myid: jho: na ko" ruyang Yesu wa xo' mung:- yao: bam re dao: tau" dalam: ci yang: ta" kyo" ra". 12 Dalhang: mae aya: qi" ra" byu dayaug wa kho: kham aya: yetang" yu mung:- dam: lo nae" qhid' mae" va" ra" mung"dan: khyo gyaung: su" lo" nae" seim" to" ra". 13 Yao: gyaung: masu: shire- yao" jeim qe daxe yaug re khai: yu mung:- yaug khao: ngo" re qhang thang: the: dakye' kye' byid: yang:- ngo dam: joe" lo sho' ce:yang phaga: kad' ge,- ga: ta" co' ra". 14 Yao"mung" byu qe wa yao: re nghang: geyang:- ceyaug kho:kham lokad' nae"rure ngonhaung" ma-o ga:- yao" thao re lagyo: nhao: ke' yang: ta" nhao: ke' ako". 15 Ai: yaug wa kho:kham aya: tang" ci mung: dam: tug' lo: ra". Ailao" jao"- yao: wa yao" jeim qe phaga: gau pai: khonho" ga" the' vako" rure ba nae" qhid' mae" yao" qhid' kheim: khyo vao li" genae" qhid' mae" amyin" khyo" ke' ra". 16 Sao qhid' yaug wa li" mung:- Asang we"- ngo wa nao byid' to" ra" qhang thang: the: kye' yang qhang thang: the: daxe kye' the' qho: to: va"- ga: ta" ra". 17 kho:kham pho" wa Ngad va"- nao wa jeim gai dayaug ngad: ra". Nao wa ngai: ra" mau" zo" mae kyid yaug ngad: ruyang nao re ngo wa vogaung: mo" daxe eib zo: nhao nae"- ga: ta" ra". 18 Shid' yaug ein: yaug re: li" mung:- Asang we"- ngo wa nao byid' to" ra" qhang thang: the: kye' yang qhang thang: the: ngo" kye' gau pai: the' qho: to: va"- ga: ta" ra". 19 kho:kham pho" wa ai: yaug rere:- nao re ngo vogaung: ngo" lam: re eib zo: nhao nae"- ga: ta" ra". 20 Jeim gatau dayaug wa li" mung:- Asang we"- ni" qhang thang: the: ce ngad: ra". Ngo wa aire pha, jad: yang kag' mung: shaung: to"- 21 Nao wa gyai qug' ra" yaug ngad: ruyang ngo wa nao re gyaug: ra"- nao wa naoyao: masang: ra" zai jham re gaug: sham" yu: ru we' naoyao: masin: maqho" ra" rumae" ashi: jham" yu nug yaug ngad: ra"- ga: ta" ra". 22 Alao"- kho:kham pho" wa yao: re- Jeim gao: we"- ni" nhad' dao: thoe re cao" yang: nao re ngo dao: kho' nae"- ngo wa qug' ra" yaug ngad: rure we' nga" zai mangad' rure gaug: sham" yu yang:- ngo masin: maqho" to" rumae" ashi: jham" yu yaug ngad: rure nao ba gau ngad: ra". 23 Airumung: ngo dam: tug' joe" lo lao"- ai: nga" qhang thang: the: wa gau pai: we' daga" dam: qo" yu nae" qhid' mae"- ai: nga" qhang thang: the: re nao pe"mung: ngaui jhi mae maye:ke' to: i? ga: ta" ra". 24 Ai: kho:kham pho" wa ai: ayae mae ye; jo; ra" mo, re- Ai: jeim pho" mae" qhang thang: the: yu: yu yang:- qhang thang: the: daxe kye' qo" ra" jeim re byid: ge,- ga: ta" ra". 25 Ngadqere: yao: bam wa kho:kham pho" re- Asang we"- yao: wa qhang thang: the: daxe kye' qo" yaug ngad: ra"- ga: tau" ako". 26 Alao"- kho:kham pho" wa Naonhaung" re ngo ta" geli"- Daja: ja: qo" ra" yaug khag' re ngadqere: je: laug sho' byid: shinae"- ngadqere:- Pe" maqo" ra" yaug mae" kam" wa yao: qo" ra" gu: dajhid' za: mae" lhao" yu: pye' byid: nae". 27 Aimung: Ngo kho: kham kad' nae" ma-o: ra" ai: nga" gyevo qere wa ce:khyo jhui" lo mung:- nga"qhid' kheim: mae yao:- yao: bam re se' pye' ge,- ga: dao: kho' ra"- ga: ta" ra". 28 Yesu wa ce:dao: jham re bin: ta" lao"- mho"zo: qe: qhid' au: mae Yerusalem khyo ye" lo" ra". 29 Yao: wa Zhan:lun: bam mae" Bedphage we' Bethani vogaung: nhae khyo joe"lo lao"- yao" mho"zo: shid' yaug re qhid' khyo nhao: ke' mung:- 30 Ni" shid' yaug: qhid' au: mae" vogaung: khyo ye" lo" ge,- ni" shid' zo: vogaung: khug khyo vao ye" lo" re khag' re: majui" qu" shi" ra" loze nau" dadau: taui" to" rure yemyao: li" genae"- ai: loze nau" re pheim yang: ce:khyo she: lo geri:. 31 Dayaug yaug- ni" shid' zo: re Ni" shid' zo: pe"mung: pheim ko" i? ga: myid: lao"- Asang ci qo: ga"- ein: yao: re ta" ge,- ga: pin: ke' ra". 32 Amung: yao: shid' zo: ye" lo" re yao: shid' zo: re: Yesu ta" ke' ru we' dakhyo:- yemyao: ako". 33 Yao: shid' zo: loze taui: yepheim: na ko" au:- loze sang qe wa- Ni" shid' zo: pe"mung: pheim ko" i? ga: myid' ako"- 34 Alao" yao: shid' zo: wa- Asang ci qo: ga"- ga: phaug' tau" ako". 35 Yao: shid' zo: wa loze nau" re Yesu jhao" she: lo mung:- yao: bam: mai bau: jham re loze nau" dao mae nhe: byid: yang:- Yesu re jui: nhao: ako". 36 Yesu jui" ye" lo" na: au:- mo, byu qe wa yao: bam: mai bau: jham re khyodang mae myhung: byid' ako". 37 Yesu wa Yerusalem vogaung: nhae khyo joe" lo: na: au:- zhanlun bam to' gyo" jo, qo mae joe" lao"- yao" mho"zo: qe ajham ataung wa yao: bam myao: lo: ra" mug' pho: mau" zo" qi: jham: mathao mae thoe qi: we' Mao"So re jeju caung:khin" byid: mung:- 38 Asang: mang mae joe" li" ra" kho:kham pho" wa ngaui lho" vashao: wo"- Mug:gaung dao mae yaug yo: ru we' Mao"So wa phungbao qi" qhang: jo, vashao: wo"- ga: ta" ako". 39 Alao"- mo, phaung mae" Pharishe qe daqhae: wa Yesu re- Mho" Pho" we"- Ni" mho"zo: qere sae za: na genae" qhid' mae" amyin" byid: wa,- ga: ta" ako". 40 Yesu wa yao: bam re- Naonhaung" re ngo ta"geli"- cebam sae za: na gelao" wa- ce: laug bam jham yao: zag: hug' thug' li" genae"- ga: phaug' tau" ra". 41 Yesu wa Yerusalem vogaung: nhae khyo te' ye" lo" mung:- vogaung: re the' myao lao"- ai: vogaung" mathao mae Yesu ngug yang:- 42 Vogaung: nao we"- Yaug yo: ra" khyo boe" nhao: ru pe" ngad: rure ana" ba nao ba: ngad: qa: we"- ngadqere: ana" wa nao maqo" the' myao ngad: ra". 43 Ni" gyevo qe wa nao re akham" we' lhang" gam" to: mung:- shad' khao: ngo" khyo" kham" lhaung" pye' ra" ayo, joe" lo: li" nae". 44 Yao: bam wa nao we' ni" vang khug mae na: ra" vobyu qe alhab' re mhan" za: kad' pye' li" genae"- Laug baui dabaui lhao" re: yao" jo, qo mae makai" jo, losho' kad' li" genae"- pe"mung:ga"re Mao"So nao re khyad' yu nae" qhid' mae" nao jhao" joe" li" ra" ayo, ba na re nao maba mabeim: ngad: ra"- ga: ta" ra". 45 Ai: thao Yesu wa Caung:pa" Yham khug khyo ye: mung:- zai aung: zai vai mo, re- Nga" yham re akyu" mho' yham ga: mhang" li" genae"- ga: Jham: Mugsug' mae tung" to" ra". Ngadqere:- 46 naonhaung" wa aire damya, khyaung kad' pye' avako"- ga: ta" yang: yao: bam re khe' thug' pye' ra". 47 Ba khao: ngo" Yesu wa Caung:pa" Yham mae mho" shid' byid' ra". Khinjaung qi: qe Jham: Tung" Pho" qe we' lau: de, au: jhaung qe wa Yesu re se' pye' nug: ako". 48 Ngadqere: mo, byu qe alhab' wa Yesu mho" dao: re dakheim: rere: malhai: ke' lo:- tae" gyo" na: bam ko" ruyang yao: bam wa Yesu re khoru: qo" se' pye' nae" khyo mamyao ko" ngad: ra". 1 Daba mae Yesu wa Caung:pa" Yham mae mo, byu qere Lau Dao: Gai mho" shid' na: ra" au:- khinjaung qi: qe Jham: Tung" Pho" qe we' lau: de, au: jhaung qe li" mung:- 2 Yesu re nao wa ai: mau" zo" jham re pe" kheim: so' khyo" yang kad' i? Nao re ai: kheim: so' khag' yang byid' i? Ngonhaung" re ta" kyo: la,- ga: myid' ako". 3 Yesu wa yao: bam re Naonhaung" re shi" ngo dakheim: myid: geli"- 4 Yohan qid nyhab' byid' ru wa Mao"So: kheim: so' khyo" yang ngad: ra" i? Mangad: lao"- byu: kheim: so' khyo" yang ngad: ra" i? Ngo re ta" kyo: gela,- ga: phaug' tau" ra". 5 Yao: bam wa ngonhaung" pe" ru: ta" zai i? Mao"So: kheim: so' khyo" yang ngad: ra"- ein: ngonhaung" ta" lao"- aire naonhaung" pe"mung: Yohan re malam" ko" i? ga: yao: ta" li" nae". 6 Byu: kheim: so' khyo" yang ngad: ra" ein: ngonhaung" ta" lao" re:- mo, byu qe alhab' mo, wa Yohan re lapa ngad: ra"- ga: myid: lam" na ko" ruyang yao: bam ngonhaung" re laug baui: yang pye' li" genae"- ga: yao: bam yao: cao: jho" ta" ngag: ako". 7 Airumung: yao: bam wa- Ai: kheim: so' khai: mae" ngad: rure ngonhaung" maba- ga: tau" ako". 8 Alao" Yesu wa yao: bam re- Ai: mau" zo" jham re pe" kheim: so' khyo" yang ngo kad'- ga" rure ngore: naonhaung" re mata" kyo: nae"- ga: ta" ra". 9 Ai: thao Yesu wa mo, byu qere ce:dao: tau" ci yang: ta" kyo" ra"- Dalhang mae byu dayaug wa sabyi khyae dakhyae qho" to: mung:- khyae ngho" zaui: mo, re ngho: byid: co' yang: yao: wa mug: va: khyo gyaung: su" lo" ra". 10 sabyi shi: phyo' yo, joe" lao"- yao: wa jeim dayaug re khyae ngho" zaui: mo, jhao" khyae ngho: phug' sabyi shi: mho' nhao: ke' ra". Ngadqere: ai: khyae ngho" zaui: mo, wa ai: jeim pho" re lham: be, mung: akeim lham: dam: nhao: ke' ako". 11 Airumung: yao: wa jeim gatau dayaug re dam: nhao: ke' ra"- ngadqere: ai: khyae ngho" zaui: mo, wa ai: jeim rere: lham: be, mung: qho' lham: phyo' yang:- akeim dam: tug' nhao: ke' ako". 12 Thao re yao: wa jeim sam yaug ein: yaug re dam: nhao: ke' ra". Khyae ngho" zaui: mo, wa yao: rere: dae lham: te' mung:- taung gaung khyo lham: deim" geim: thug' pye' ako". 13 Alao" sabyi khyae sang wa Ngo pe" ru: kad' nae" laug i? Ngo wa jhid'de; ra" nga" zo: re nhao: ke' nae"- yao: bam wa yao: re lham: phug' myao: ko" maba- ga: ta" ra". 14 Ngadqere: khyae ngho" zaui: mo, wa yao: re lham: myao gelao"- ceyaug wa khyae sang: yao: zo: ngad: ra"- yao: re se' pye' gelang:- ailao" yao" jo,nho" wa ngonhaung" qo" sang zai ngad: ra"- ga: yao: bam yao: cao: jho" ta" ako". 15 Khyae ngho" zaui: mo, wa yao: re sabyi khyae taung gaung shad' khyo deim" geim: thug' lo" mung: se' pye' ako". Alao" ai: khyae sang wa ai: khyae ngho" zaui: mo, re khoru: kad' li" nae" laug i? 16 Khyae sang wa ai: khyae ngho" zaui: mo, re li" se' pye' li" nae"- amung: ai: khyae rere: gatau khyae ngho" zaui: mo, re dam: kai" ngho: byid' pye' li" nae"- ga: Yesu ta" ra". Cedao: re mo, byu qe the' gyo: gelao"- Airu: wa mangad: vashao: wo"- ga: ta" ako". 17 Yesu wa yao: bam re qu" mung: Yham zhaug' mo, khyin: khyo" pye' ra" laug baui wa yham jheim mae" akhyag: thao" ra" laug baui boe" lo va"- ga" ra" ce: jham: dao: pe" ga" ru ngad: ra" i? ga: myid' ra". 18 Ai: laug zang dao gyo" lo" ra" yaug khag' ngadqere: adau dau gyug' lo" ru qhug' li" nae". Amung:- dayaug yaug: dao mae ai: laug zang gyo" zag: lo" re wa yao: re aphaui: mhan" pye' li" nae"- ga: ta" ra". 19 Jham: Tung" Pho" qe we' khinjaung qi: qe wa yao: bam re qang yang: Yesu ce:dao: tau" ta" rure yao: bam ba geyang:- aimae yao: dalhang: dae taung" yu nae" seim" ko" ra". Ngadqere: yao: bam wa mo, byu qere gyaug: ako". 20 Airumung: yao: bam wa agu gai re lao" na: ako"- yao: bam Yesu re kheim: so' qo" ra" Roma mang: zug: pho" lo, khyo qo" ab byid' pye' nae" qhid' mae" Yesu yao" dao: thoe: yang qobo qo" zhaug' sho' yekung" genae" qhid' mae" byu daqhae: re byugai geim kad' nae" khug vag: byid: yang:- Yesu jhao" nhao: ke' ako". 21 Yao: bam wa �Yesu re Mho" Pho" we"- nao ta" ra" dao: we' Nao mho" kyo" ra" khyo wa dang: rure ngonhaung" ba:. Nao wa byu: myo, nho nga: lao: re maqu" lo:- Mao"So myid o: ra" khyo re jo: ra" khyo" mho" shid' byid' rure re: ngonhaung" ba:- 22 Ngonhaung" wa Roma khosin" re khang: gai: byid' i? Magai: byid: i? Ngonhaung" re ta" kyo: la,- ga: myid' ako".� 23 Ngadqere: Yesu wa yao: bam pha,jhi" khyug' rure ba: qu" mung:- 24 Yao: bam re- Ngore ngaui thang: the: dakye' qhu" gela,- ce: ngaui kye' dao mae khag' sulho we' khag' mang aso: de; ra" i? ga: myid' ra". Yao: bam wa Ketha sulho we' mang aso: de; ra"- ga: tau" ako" 25 Airumung: Yesu wa- Airulao" wa Ketha khosin" we' sin" ra" gu: wa Ketha kho:sin" re byid: ge,- Mao"So we' sin" ra" gu: wa Mao"So re byid: ge,- ga: ta" ra".� 26 Yao: bam wa mo, byu qe: qhid' kheim: mae Yesu re qobo maqo" zhaug' ko" ngad: ra". Airumung: yao: bam wa sae za: na: ako". Yesu phaug' tau" ra" dao: thoe re mug' hao" byaug: ako". 27 Ai: thao re- byu wa shid: rumae" madam: daui: to" li"- ga: ta" ko" ra" Saduke qe daqhae: Yesu jhao" li" mung:- 28 Mho" Pho" we"- Byu dayaug zo: dau maqo" lo:- yao: myi: re shid: cug' to: co' ngad: re wa yao: nhaung: wa ai: yao: mao" cug' mo" re dam: gaug mung:- yao: mao" qhid' mae" nyaug xo' myhung byid: ca"- ga: Moshe wa ce: tarha" ngonhaung" re tung"to: byid: co' ra". 29 Dalhang: mae" yao: mao: yao: nhaung: nhad' yaug na: ako". Mao: mo" yaug wa yham sang myhi" yu ngadqere: zo: dau maqo" lo:- shid: lo" byaug: ra". 30 Ai: thao mao: le; yaug cug' dam: gaug: ra". 31 Ai: thao sam yaug ein: yaug re:- cug' dam: gaug: ra". Yao: tao ho' nhad' yaug geim" dakhyo: za: zo: dau maqo" lo:- shid: lo" ako". 32 Lo" thao" mae ai: myiqe: re:- shid: lo" ra". 33 Shid: lo" ra" mo, dam: daui: to" li" ra" ba na mae ai: myiqe: wa khoyaug: yham sang myhi" lam: ngad nae" i? Yao: tao ho' nhad' yaug: geim" yao: re ngho" vako" ra"- ga: myid' ako". 34 Yesu wa yao: bam re- Ce:myid gaung dao mae na: ra" pyad mae xao su byu qe wa ug' khug' dinkhu: te: yang: na: ako". 35 Ngadqere: shid: rumae" dam: daui: to" li" mung:- mug:gaung: mung"dan: mae vao ye: nae" man: qi" ra" mo, wa ug' khug' dinkhu: mate: lo: genae". 36 Yao: bam wa mug: lagyo: qe we' dakhyo: ngad mung:- mashid lo: genae". Yao: bam wa shid: rumae" dam: daui: to" vako" rumung:- yao: bam wa Mao"So: zo: dau qe ngad: ako". 37 Shid: ra" mo, dam: daui: to" li" ra" khyo re Moshe wa de: de: za: sagse: qhu" byid' to" ava"- Myi: nga" na: ra" thao" paung" we' sin: yang: ta" ra" Jham: dau mae Moshe wa Asang re Abraham nho: Mao"So- Isag nho: Mao"So- Yaku nho: Mao"So ngad:- ga: ta" to" ra". 38 Mao"So wa shid: jo; ra" mo; nho: Mao"So mangad:- daui: na: ra" mo; nho: Mao"So angad:- pe"mung:ga"re alhab' mo, wa yao" qhid' kheim: mae daui: na: ako"- ga: ta" ra". 39 Jham: Tung" Pho" qe daqhae: wa Mho" Pho" we"- Gyai gai: ra" dao: phaug' ngad: ra"- ga: ta" ako". 40 Pe"mung:ga"re yao: bam wa Yesu re pe" daja: re: mavae" myid: loko" ngad: ra". 41 Yesu wa yao: bam re- Meshia wa Davi yao: zo: ngad:- ein: khoru: qo" ta" ko" i? 42 Pe"mung:ga"re Davi yao: yao: lhao" re: caung:khin" paug' mae- ai: Asang wa nga" Asang re- 43 Ni" gyevo qere ni" khyid vo: khug mae khyid kai: tao" khyo" ngo mato: byid: byid: wa- nga" lo, yo shad' mae zaung: jo, wa,- ga: ta" ra"- ga: ta" to" ra". 44 Davi wa yao: re Asang- ga: ta" ra". Airu: ngad: re- Meshia wa Davi myid:zo: khoru: gai: boe" nae" i? ga: myid' ra"." 45 Mo, byu qe alhab' mo, yao" dao: re tae" gyo" na ko" au:- Yesu wa yao" mho"zo: qere- 46 Jham: Tung" Pho" qere lha" yang: jao" pye' ge,- yao: bam wa bau: qhang ve; pye' mung: su" qin" nug mo,- gai jao: mae su: yang lham: phug' myao: nae" o ngaui mo,- Tarha" Jung Yham mae gatau jaung: to" ra" tao" khau" mae khyin: zaung mo,- poe mae je: gai: ra" zaung jo, qo mae zaung nug mo,- 47 Cug' mo" qe: yham zai yokhyao: re lhad' zo" ci gemung:- su qu" gai nae" geim kad' yang: akyu" qhang sho' mho' mhug' mo, ngad: ako"- yao: bam: qobo dae wa je: xo genae"- ga: ta" ra". 1 Yesu cao" qu" ke' re jo,nho" qo" ra" mo, wa Caung:pa" Yham Alu: Ban" khug khyo Alu: ke' na ko" rure myao: ra". 2 Gyai myaung sho" ra" cug' mo" myhi" dayaug gyid: ngaui shid' kye' Alu: ke' rure re: yao: myao: ra". 3 Yesu wa Ngo naonhaung" re ta" geli"- ce: myaung sho" ra" cug' mo" myhi" wa gaje qe alhab' mo, tho' Alu: ngaui je: ke' ava". 4 Pe"mung:ga"re gaje qe wa yao: bam magan: mago" qo" ra" jo,nho" mae" jan" ra" gu: Alu: ke' ako". Ngadqere: ce: cug' mo" myhi" wa masho: majhin myaung sho" rumae" yao: zo: nae" ru alhab' re Alu: ke' pye' ava"- ga: ta" ra". 5 Mho"zo: qe daqhae: wa Caung:pa" Yham wa yaung" ra" laug baui jham: yang zao: to" ru we' Mao"So re qhaug' byid' to" ra" Alu: zai jham: yang gyai qu" yaung" jo; ra" khyo re ta" na: ako". 6 Alao" Yesu wa Ce: naonhaung" the' myao: na: ra" gu: alhab' wa laug baui dabaui re: yao" jo, qo mae makai" jo, losho' byo; gyo" lo" ra" ba na yo, khyin: joe" lo: li" nae"- ga: ta" ra". 7 Yao: bam wa Mho" Pho" we"- Airu: khonhae" boe" li" zai ngad: i? Airu: boe" va" ga" rure ba nae" qhid' mae" pe" ja" ve, lho jham thug' li" nae" i? ga: myid' ako". 8 Yesu wa Naonhaung" mhug' pyag' ru maqhug' genae" qhid' mae' lha" yang: na ge,- Byu myo: sho' wa nga" aqid ve, yang: thug' li" mung:- ngo wa ai: Meshia ngad va"- Ayo, joe" va"- ga: ta" li" genae"- ngadqere: yao: bam: thao dacao" ge,- 9 Naonhaung" wa gyekhe' ru we' tau: lhan: gye to" ra" thoe the' gyo: gelao"- dagyaug ge,- ai:ru alhab' wa sao qhid' boe" li" ca" nae"- ngadqere: ai: lo" thao" ba na wa mangad: shinae"- ga: ta" ra". 10 Yesu xo' yang:- Byu damyu" we' damyu"- damang: we' damang: gye jho" zin" li" genae". 11 Myid lab: qi: jham lab: li" nae"- Bao" khug' jham thug' li" nae"- Khyi" khao: ngo" mae no phyo: aqam" jham boe" thug' li" nae"- Mug:gaung mae" gakai: lai: ru we' qu" gyaug qu" lhaung sho' ra" ja: jham thug' li" nae. 12 Cegu: alhab' maboe" shire naonhaung" re taung" yu mung:- yhin" li" genae"- yao: bam wa naonhaung" re dao: phyid' nae" qhid' mae" Tarha" Jung Yham jham khyo ab byid' pye' mung:- thaung: khug mae lhaung" to" li" genae". Naonhaung" wa nga" mathao mae kho: kham qe we' zug: qe: qhid' kheim: khyo jhui" ye" ru qhug' genae". 13 Airu wa naonhaung" qhid' mae" Lau Dao: Gai sagse: kham nae" qhid' mae" akho: akhang" agu gai ngad: li" nae". 14 Naonhaung" wa khoru: ta" qid' yu nae" rure gau: qhid' khae" yang: sang kho: sang: lhe' maboe" genae" qhid' mae" naonhaung" aung khug mae myid: phyid' to: ge,- 15 Pe"mung:ga"re naonhaung" gyevo qemae" khag' re: maqo" ngag: thaug' nae" ra" nhad' dao: thoe qam: we' pha,jhi" qam: o: ngo naonhaung" re byid: nae". 16 Naonhaung" wa naonhaung" yao" myhi" pho" qe- mao:nhaung: qe- ba nam ug zo: qe- naonhaung" ba nam qeyang ab byid' pye' ru qhug' li" genae"- naonhaung" mae" daqhae: wa se' pye' ru qhug' genae". 17 Nga" mathao mae yaug khao: ngo" nghang" li" genae". 18 Ngadqere: naonhaung" au: mae" xae dakhe' lhao" re: mabyaug nae". 19 Naonhaung" wa zang: qhao" yang:- tang tang za: ye; jo, ge,- ailao" naonhaung" yao" gaung re qo" khyad' yu: li" genae"- ga: ta" ra". 20 Naonhaung" wa Yerusalem vogaung: re gyevo qeyang lhang" gam" to" rure myao gelao"- ai: vogaung: wa byo; qeim: lo" nae" jhao" li" va"- ein: rure naonhaung" beim: ge,- 21 Alao" Yuda mang: mae na: ra" mo, wa bam khyo tao" phao geshao:- Vomo" khug mae na: ra" mo, wa aimae" phao: thug' geshao:- Voyae mae" vogaung: ngai mae na: ra" mo, wa vomo" khug khyo mavao lo" geshao:- 22 Pe"mung:ga"re ai: ba na jham wa Jham: Mugsug' mae ta" to" gu: alhab' jab byang" nhao: ra" qobo dae byid' ra" ba na jham ngad: li" nae". 23 Ai: ba na gyo: mae gaung la: mo, we' nug' nau" jhui: mo, wa gyai qug: khai: genae". Ce: mung" mae qug: khai: qi: joe" lo: mung: ce: byumyu" qe: dao mae Mao"So: qobo dae byid' ru joe" li" nae" ngad: ra". 24 Damyo" re shae: yang se' pye' li" genae"- amung: damyo" wa mung"dan: khao: ngo" khyo kyam: byu khyo" taung" jhui" lo" ru qhug' li" genae". Tarha" taung bug qe wa yao: bam: ayo, ba na magan gan wa Yerusalem re zab: nhe" pye' li" genae"- ga: ta" ra". 25 Alao"- ba kyi lho" mo" jham mae ve, lho jham boe" thug' li" nae"- Myid gaung dao mae" byumyu" alhab' wa qid panglai: myang thoe we' bang: lhung" to" li" ra" thoe: yang gyaug mung nhag' lam: thao" li" genae". 26 Xao su byu qe wa mug: myid dao geim" mae joe" lo: na: ra" qug: khai: khyag' qhui: ru jham re myid: gyaug yang:- mo; byaug: li" genae". Pe"mung:ga"re mug:gaung mae" qam: so' jham wa laui" nin" li" genae". 27 Alao"- Byu: Yao: Zo: wa qam: so' phungbao qi: we' daga" jham thaui: mae joe" li"rure the' myao: li" genae". 28 Cegu: boe" qhid: li" na gelao"- to" ye, mung: naonhaung" au: re tau: qu" ge,- pe"mung:ga"re naonhaung" re khyad' yu nae" ra" ba na wa jhao" li" va" ra"- ga: ta" ra". 29 Ai: thao Yesu wa yao: bam re ce:dao: tau" ci yang: ta" ra". Pho' ham" gae we' gatau: sag' gae alhab' khyo re myid: qu" ge,- 30 Ai: agae jham: avho' tad' li" rure naonhaung" myao gelao"- zin vao kheim: jhao" va" rure naonhaung" ba: ako". 31 Ai we' dakhyo:- ta" to" ra" gu: boe" na: rure naonhaung" the' myao gelao"- Mao"So: mung"dan: wa joe" li" na va" rure naonhaung" ba ge,- 32 Naonhaung" re ngo dang za: ta" geli"- ana" daui: na: ra" mo, alhab' mashid; gan shire ai:gu: alhab' boe" li" zai ngad:- 33 Mug:gaung we' myid gaung wa lai: lo" byaug: li" nae"- ngadqere: nga" dao: thoe wa khonhae" re: lai: lo" nae" mangad:- ga: ta" ra". 34 Naonhaung" wa zo: pyo: shaug' pyo: lai: ru we' ce:pyad mae na: ra" au: qhid' mae" myid: qug: myid: ci" ru jham mae za: dathaui" yaug: na ge,- Mangad: re wa ai: ba na wa nyag din taung" naonhaung" re lha" we' dakhyo:- myi" li" nae". 35 Pe"mung:ga"re ai: ba na wa myid gaung xao su byu alhab' mo; dao mae joe" li" zai ngad: ra". 36 Airumung: ai: boe" li" nae" qug: khai: khyag' qhui: ru jham re qo" thaug' qhao" nae" qam: o:- qo" nae" we' Byu: Yao: Zo" nho: qhid' kheim: mae qo" ye; jo; ra" mo, boe" genae" qhid' mae" akyu" mho' mung:- khonhae" re: lha" yang: na ge,- ga: ta" ra". 37 Yesu wa ai: ba na gyo" gu: mae na" gaung re wa Caung:pa" Yham mae mho" shid' byid' na mung: myi" thao lao" Zhan:lun: bam khyo yena: na mung: ra". 38 Ba khao: ngo" ne, seim no' mae" byu alhab' mo, wa- yao" dao: gyo: nae" qhid' mae" Caung:pa" Yham khyo ye" ako". 1 Lai co' Poe ga: mhang" ra" Man" Make' Ra" Mug Poe joe" nae" jhao" li" ra". 2 Khinjaung qi: qe we' Jham: Tung" Pho" qe wa mo, byu qere gyaug geyang:- Yesu re sae za: se' pye' nae" khyo qho: ako". 3 Alao" Satan wa mho"zo: daxe: shid' yaug mae bobo: ra" Iskarud ga: mang: ra" Yuda nho: nhag' lam: mae vao ye" ra". 4 Airumung: Yuda wa khinjaung qi:qe we' Caung:pa" Yham gug: gam zug: qejhao" ye: mung:- yao: bam: lo, khyo Yesu re yao: khoru: qo" ab byid: nae" khyo re yeqham: ra". 5 Yao: bam gyo" ngaui gemung:- yao: re ngaui byid: nae"- ga: dao:so: byid' ke' ako". 6 Yuda re: aire myid vang" mung:- mo, byu qe maba mabeim: lo:- Yesu re yao: bam: lo, khyo ab byid: nae" qhid' mae" ayo, khoau: yo" nae" rure qho: na: ra". 7 Man" Make' Ra" Mug Poe mae- Lai co' Poe myi" xeim qhid' mae" yao nau" re se' nyhang" nae" ba na joe" lo: ra". 8 Alao" Yesu wa Petru we' Yohan re Ngonhaung" zo: nae" Lai co' Poe myi" xeim re yenyhang" seim" to: ge,- ga: ta" mung: nhao: ke' ra". 9 Yao: shid 'zo: wa Yesu re- Khojo, qo mae yenyhang" seim" nae" nao o: i? ga: myid' ako". 10 Yesu wa Ni" shid' zo: vogaung: khug khyo vao ye" lo" ko" re- qid am vo; ci: ra" yauggai dayaug wa ni" shid' zo: re lham: tug: yu: li" nae"- yao: vao lo" ra" yham khug khyo vao ye: mung:- 11 Ai: yham sang re- Nga" mho"zo: qe we' ngo Lai co' Poe myi" xeim zo: nae" khoqe, ngad: ra" i? ga: Mho"Pho" nao re myid: nhao: ke' ra"- ein: ye:ta" ge,- 12 Alao" yao: wa nyhang" seim" jin" to" ra" tho' pyae mae" qe, mo" daqe, re ni" shid' zo: re ceim" shid' byid' li" nae-" Ni" shid' zo: ai: mae yenyhang" seim" na ge,- ga: ta" ke' ra". 13 Yao: shid' zo: thug' ye" lo" ko" re yao: shid' zo: re Yesu ta" ke' ru we' dakhyo:- yemyao gemung:- Lai co' Poe myi" xeim re yenyhang" seim" ako". 14 Ayo, joe" lao"- Yesu wa lagyo: qe we' daga" saboe" mae zaung: ra". 15 Yesu wa yao: bam re- ngo qug: khai: dayin dayo: makham zo: shire ce: Lai co' Poe myi" xeim naonhaung" we' daga" zo: nae" ngo gyai myid: o: ra". 16 Pe"mung:ga"re naonhaung" re ngo ta" geli"- ce: Lai o' Poe kad' ra" lajheim: Mao"So: mung"dan: mae majab byang" li" li" wa- Lai co' Poe myi" xeim re ngo khonhae" re: mazo: lo nae"- ga: ta" ra". 17 Ai: thao Yesu wa sabyi keim re yu: yu mung: Mao"So re jeju bin: caung: byid: lao"- ce: sabyi keim re yu mung:- naonhaung" yao: cao: jho" gae shaug' ge,- 18 Naonhaung" re ngo ta" geli"- Mao"So: mung"dan: majoe" li" li" wa- ce: sabyi qang: re ana" mae" thoegu: ngo mashaug' lo nae"- ga: ta" ra". 19 Alao" Yesu wa mug rere: yu: yu mung:- Mao"So re jeju bin: caung: byid: lao"- ai: mug re khyoe' phai" yang:- mho"zo: qere byid: mung:- ce wa naonhaung" qhid' mae" byid' pye' ra" nga" gaung ngad: ra"- ngore myid: beim: nae" qhid' mae" ceru kad' ge,- ga: ta" ra". 20 Ai we' dakhyo:- myi" xeim bin: zo: thao yao: wa sabyi keim rere: yu: yu yang:- yao: bam re byid: mung:- ce: keim wa naonhaung" qhid' mae" sheim: pye' ra" nga" sa" yang dazid thaung" to" ra" Mao"So: dao: thang" asag' ngad: ra". 21 Ngadqere: qu" ge,- ngore ab byid' pye' nae" yaug wa ngo we' daga" ce: saboe" mae ngad: ra". 22 Byu: Yao: Zo: wa Mao"So myid: phyid' to: va" ruwe' dakhyo:- shid kham" li" nae". Ngadqere: yao: re ab byid' pye' ra" yaug wa byuxa: vaqoe, qhug' ra"- ga: ta" ra". 23 Alao" mho"zo: qe wa ceru: kad' nae" yao: bam mae" khoyaug lam: ngad nae" i? ga: yao: cao: jho" myid' ako". 24 Mho"zo: qe wa yao: bam mae" khoyaug lam: qi" thao" yaug ngad: i? ga: yao: cao: jho" ta" ngag: thug' li" ako". 25 Alao" Yesu wa yao: bam re Mao"So re malam: ra" amyu" kho:kham qe wa yao: bam: mung" byu qe: dao mae qam: so' we' eib: ako". Kheim: so' qo" ra" kho:kham qe wa mung" byu qe: jeju asang qe ga:- mhang" byid: nae" rure o: ako". 26 Ngadqere: naonhaung" wa ai we' dakhyo:- magai: ngad- Naonhaung" mae" qi" thao" ra" yaug wa ngai: thao" ra" yaug we' dakhyo:- ngad ca"- Au: jhaung wa daui daui yaug we' dakhyo: ngad ca". 27 Saboe" mae zaung: jo, yang: zozo" na yaug we' zozo: yaug re caung da" byid' ra" yaug mae" kho:yaug lam: je: qi" ra" i? Saboe" mae zaung: jo; ra" yaug je: qi" ra". Ngadqere: ngo wa naonhaung" phaung mae caung da" yaug we' dakhyo: ngad:- 28 Naonhaung" wa ngo we' daga" ju" phyo' khin jang: ru jham re thaung" qhug' lai: lo va" mo, ngad: ako". 29 Nga" Pho" yang ngore eib nae" akhang" byid' to" ru we' dakhyo:- ngore: ai: eib nae" akhang" naonhaung" re byid: nae". 30 Naonhaung" wa nga" mung"dan: khug mae- nga" saboe" mae qo" zo: shaug' li" genae"- ga: ta" ra". 31 Yesu wa Simon we"- Simon we"- Tae" gyo: wa,- Jung: gaug re amo we' aseim gatau tau hug' kyang" pye' ru we' dakhyo:- naonhaung" alhab' rere: magai: ru we' gai: ru kyang" pye' nae" qhid' mae" Satan wa akhang" qo" ava". 32 Ngadqere: Simon we"- ni" lam khug: myid mabyo; lo" nae" qhid' mae" ngo akyu" mho' byid' to: va"- ngo jhao" nao dam: myid: phaug' lo lao"- nao wa ni" mao:nhaung: qere qam: laung: nyhad' tang byid: ca"- ga: ta" ra". 33 Petru wa Asang we"- Ngo wa thaung: laung" nae" khyo ngad: re ngad- Shid nae" ru khyo ngad: re ngad cao" nae" jin" jin" ngad:- ga: Yesu re tau" ra". 34 Yesu wa Petru we"- nao re ngo ta" li"- ana" myi yao: qo, mateim shire nao wa ngore maba- ga: sam lhang ha: pye' li" nae"- ga: ta" ra". 35 Ai: thao Yesu wa yao" mho"zo: qere- ngo naonhaung" re ngaui thaung- thaung a:- khyid zhaung: mavin nhao lo:- nhao: ke' ra" au:- naonhaung" daja: ja: qo ca" ko" i? ga: myid' ra". Yao: bam wa- Daja: re: maca"- ga: tau" ako". 36 Yesu wa yao: bam re Ana" kam" wa ngaui thaung- thaung a: qo"ra"yaug wa yu: vin ge,- Shae maqo" ra" yaug wa yao" bau: qhang aung" pye' yang:- shae vai: ci ge,- 37 Pe"mung:ga"re Ngo naonhaung" re ta" geli"- Jham: Mugsug' mae yao: wa tarha" macao" ra" mo; japhin: mae boke' ru qhug' ra"- ga: tung" to" ru wa ngo mae jab byang" li" ca" ra"- Gaigai: yao:- ai: tung" to" ru wa ngo mae jab byang" li" ca" ra"- ga: ta" ra". 38 Alao" mho"zo: qe wa Asang we"- Qu" wa,- cemae shae shid' khyae: jo; ra"- ga: ta"ako". Yesu wa Ai: gu: ga" va"- ga: phaug' tau" ra". 39 Yesu wa vomo" mae" thug' lo" mung:- yao: khonhae" re: lhaung" ye" ru we' dakhyo: Zhan:lun: bam khyo ye" lo" ra". Mho"zo: qere: yao" thao cao" ye" ako". 40 Ai: jo, qo khyo joe" ye: lao"- yao: wa mho"zo: qere Naonhaung" wa ju" phyo' ru khyo magyo" lo" genae" qhid' mae" akyu" mho' ge,- ga: ta" ra". 41 Amung: yao: wa mho"zo: qemae" laug baui dalhang pye' joe" vha" lai: ye: mung:- pad' thaug' thaug' yang:- 42 Pho" we"- nao myid: o: ru ngad: re wa- ce: qug: khai: khyag' qhui: ra" keim re ngo mae" yu: pye' byid: la,- ngadqere: ngo myid: o: ra" khyo" mangad:- nao myid o: ra" khyo" boe" lo vashao:- ga: akyu" mho' ra". 43 Mug:gaung dao mae" mug: lagyo: Yesu jhao" thug' li" mung:- yao: re qam: li" byid' ra". 44 Yesu wa yao" nhag' lam: aung khug mae dayin dayo: kham zo" na: ruyang qam: ke' mung:- akyu" mho' ra". Yao" gaung mae" bau kyoe: wa sa: we' dakhyo:- myid gaung khyo yug: gyo" lo" ra". 45 Yesu wa akyu" mho' rumae" to" mung:- mho"zo: qejhao" dam: tug' lo: re- yao: bam myid: kaug' myid: myaung: geyang: yab: jo; bam ko" rure Yesu lomyao: ra". 46 Alao" Yesu wa yao: bam re- Naonhaung" pe"mung: yab: myhid' jo, ko" i? To" mung:- naonhaung" wa ju" phyo' ru khyo magyo" lo" genae" qhid' mae" akyu" mho' ge,- ga: ta" ra". 47 Yesu airu: jhau: na shi" au:- mho"zo: daxe: shid' yaug mae bobo: ra" Yuda yang jhui" li" ra" byu daphung: joe" li" ako". Yuda wa Yesu re bobaug baug nae" qhid' mae" Yesu jhao" qui" ye" ra". 48 Yesu wa yao: re Yuda we"- nao wa Byu: Yao: Zo: re bobaug baug yang: ab byid' pye' nae" i? ga: ta" ra". 49 Alao" Yesu we' daga" na: ra" mho"zo: qe wa boe" li" nae" ra" ave, re ba: qu" geyang:- yao: bam wa Yesu re- Ngonhaung" shae ci naeva" laug i? ga: myid' ako". 50 Mho"zo: qemae" dayaug wa Khinjaung Yin" jeim pho" dayaug re qam" ke' mung:- ai: yaug: lo, yo shad' no:khye' byid: lo" ra". 51 Ngadqere: Yesu wa Airu: dakad'- ga: ta" mung:- jeim pho" nokhye' re yao" lo, tin: byid: yang:- gai byid' ra". 52 Alao" Yesu wa yao: re taung: nae" ga: joe" li" ko" ra". Khinjaung qi: qe- Caung:pa" Yham gug: gam gyezug: qe we' lau: de, au: jhaung qere- Naonhaung" wa damya, re taung" ruru: ngore taung: nae" qhid' mae" shae we' thaung kang we' li" ko" i? 53 Ngo wa Mao"So: yham mae ba khao: ngo" naonhaung" we' daga" na ngad yang: re:- naonhaung" ngore mataung: ko" ngad: ra". Ngadqere: ce: yo, khyin: wa naonhaung" yo, khyin:- mug: cad' zug' nho: qam: so' eib: ra" yo, khyin: ngad: ra"- ga: ta" ra". 54 Yao: bam wa Yesu re taung: mung:- Khinjaung Yin" yham khug khyo yao: re jhui" ye" ako". Petru wa va: va: mae" cao" ye" lo" ra". 55 Byu daqhae: wa yham vang" agaung: mae myi: mad: gao yang:- zaung: bam: ako". Petru re: yao: bam: phaung mae yebo: zaung: jo; ra". 56 Daui daui okaung myiqe: nau" dayaug wa ai: myikhyeim" mae Petru zaung: jo; rure the' myao lao"- yao: wa Petru re zhaug' qu" mung:- ceyaug re:- Yesu we' daga" na: qin" yaug ngad: ra"- ga: ta" ra". 57 Ngadqere: Petru wa Myiqe: nao we"- yao: re ngo ba lhao" re: maba- ga: ha: pye' ra". 58 Ai: thao dazab re yauggai dayaug wa- Petru re the' myao mung:- nao re: yao: bam: phung: mae" dayaug ngad: ra"- ga: ta" ra". Ngadqere: Petru wa Byu nao we"- yao: bam: phung: mae ngo mabo- ga: tau" ra". 59 Amung: dayo, qug ko kyo thao re yauggai gatau dayaug wa ceyaug wa Yesu we' daga" na: qin" yaug ngad: rure aug' o: nae" khyo pe" majo, ngad: ra"- pe"mung:ga"re yao: re: Galile byu dayaug ngad: ra"- ga: qam: ke' yang: ta" ra". 60 Ngadqere: Petru wa- Byu nao we"- nao ta" ra" khyo re ngo maba- ga: phaug' tau" ra". Yao: airu: ta" na shi" au: yao:- qo, teim: ra". 61 Asang wa lhang: lo mung:- Petru re zhaug' qu" ke' ra". Alao" Petru wa- Ana" myi yao: qo, mateim shi:re nao ngore maba- ga: sam lhang ha: pye' li" nae"- ga: Asang yao: re ta" to" ra" dao: re myid: beim" ra". 62 Arumung: Petru wa taung gaung khyo thug' ye: mung:- gyai ye:kaug' ngug: ra". 63 Yesu re zaung" na: ra" mo, wa yao: re jung" mung: be; ako". 64 Yao: bam wa Yesu myo,khung: re thab' pye' byid: mung:- nao re be, yaug khag' ngad: ra" i? Tag: qu" wa,- ga: ta" ako". 65 Amung: yao: bam wa jung" dao: gatau myo: sho' we' yao: re maphug' makhyad' roe" ako". 66 Mug: bo" li" lao"- lau: de, au: jhaung qe- khinjaung qi: qe we' Jham: Tung" Pho" qe wa daga" za: zang" ham: na: bam: ako". Ai: thao yao: bam wa Yesu re Tarha" Qe, Do, khyo jhui" vao ye" ako". 67 Yao: bam wa nao Meshia ngad: i? Ngonhaung" re ta" kyo: la,- ga: Yesu re myid' ako". Yesu wa yao: bam re- ngo ta" kyo: ngadqere: naonhaung" lam" genae" mangad:- 68 Alao" ngo naonhaung" re dao: myid: ngadqere: naonhaung" phaug' tau: genae" mangad:- 69 Ngadqere: Byu: Yao: Zo: wa ana" mae" thoegu: phung qam: so' bo: ra" Mao"So: lo, yo shad' mae zaung: jo; li" nae"- ga: ta" ra". 70 Yao: bam alhab' mo, wa Aire wa- Nao wa Mao"So: yao: Zo: ngad: i? ga: myid' ako". Yesu wa yao: bam re Ngo Mao"So: yao: Zo: ngad: ra"- ga: naonhaung" yao: ta" vako" ra"- ga: tau" ra". 71 Yao: bam wa Ngonhaung" sagse: gatau pe" qo lo" i? Yao: ta" ra" dao: thoe reyao:- ngonhaung" the' gyo: va"- ga: ta" ko" ra". 1 Tarha" qe, do, phung: geim" alhab' mo, to" yang:- Yesu re Pilad qhid' kheim: khyo jhui" vao ye: mung:- 2 Ceyaug wa mung" byu qere khyonghung: jhui" nghung" na: ra". Yao: wa Ketha kho:kham re khang: make' nae" qhid' mae" mo, byu qere ta" mung:- yao: yao" gaung rere: Meshia ga" ra" kho:kham ngad:- ga: ta" na: rure ngonhaung" the' gyo: va"- ga: Yesu re qobo zhaug' ako". 3 Pilad wa Yesu re- Nao wa Yuda qe: kho:kham ngad: i? ga: myid' ra". Yesu wa- Aiwa nao ta" ru ngad: ra"- ga: phaug' tau" ra". 4 Ai: thao Pilad wa khinjaung qi: qe we' mo, byu qere- ceyaug re dao: phyid' nae" qhid' mae" ngo pe" akhyo mamyao- ga: ta" ra". 5 Ngadqere: yao: bam wa Yao: re- Galile mung" mae" qhid mung:- Yuda mung" geim" gam: sho' we' ce: jo, qo khyo lhao" re: joe" sho' mho" shid' byid: mung:- mo, byu qe lu" to" li" nae" qhid' mae" poe: na yaug ngad: ra"- ga: qam: ke' yang:- tin: tin: ga: qobo zhaug' ako". 6 Pilad wa cedao: re the' gyo: lao"- yao: wa Ceyaug Galile byu ngad: ra" i? ga: myid' ra". 7 Yesu wa Herod eib: ra" mung" mae" byu ngad: rure ba lao"- Yesu re Herod jhao" dai" ke' ra". Herod re: ai: ayo, mae Yerusalem mae lojoe" na: jo; ra". 8 Herod wa Yesu re myao lao"- gyai bau" ra". Pe"mung:ga"re yao: wa Yesu khyo re the' gyo" qu" va" rumung:- Yesu re myao nug: ru myao" ava". Alao" yao: wa Yesu kad' qhu" ra" mug' pho: ve, lho daja: ja: re myao nae" myid: lao" na: ra". 9 Airumung: Herod wa Yesu re dao: myid: myo: sho' ja: myid' ra". Ngadqere: Yesu wa pe" matau: ngad: ra". 10 Khinjaung qi: qe we' Jham: Tung" Pho" qe wa qhid' au: khyo qui" ye: mung:- Yesu re qi: sho' qobo zhaug' ako". 11 Herod we' yao" gyezo: qere:- Yesu re jung" mung:- maphug' makhyad' kad' ako". Ai: thao yao: bam wa Yesu re gyai yaung" phug' de; ra" bau: qhang vhe' byid: yang:- Pilad jhao" dam: tug' dai" ke' ko" ra". 12 Ai: ba na mae yao:- Herod we' Pilad wa dam: jho" nyang: ako". Qhid' phyao: wa yao: shid' zo: dayaug we' dayaug majho" vang" ko" ngad: ra". 13 Pilad wa khinjaung qi: qe- lau: de, au: jhaung qe- mo, byu qere khai: zhang" to: mung:- 14 yao: bam re- ceyaug wa mung" byu qere khyonghung: jhui" nghung: yaug ngad: ra"- ga: ta" mung:- naonhaung" yao: re ngojhao" jhui" li" ako". Naonhaung" yao" qhid' kheim: mae yao:- ngo wa yao: re myid' ca: qu" va"- naonhaung" zhaug' ra" qobo daja: re: yao: kad' shad' rure ngo mamyao- 15 Herod re: Yesu qobo re mamyao ngad: ra"- Airumung: yao: re ngojhao" dam: tug' dai" ke' lo: ra"- ceyaug wa shid man" ra" qobo daja: re: mashad' ngad: ra". 16 Airumung: ngo wa yao: re be, yang: nhao: ke' nae"- ga: ta" ra". 17 Pilad wa Lai co' Poe khao: ngo" mae mo, byu qe: qhid' mae" khonhae" re: kyam: byu dayaug re lhaung" lhoe' ke' byid' ra". 18 Mo, byu qe alhab' wa Yao: re se' pye' wa,- ngonhaung" qhid' mae" Baraba re lhoe' ke' byid: la,- ga: zag: hug' ako". 19 (Baraba wa vomo" khug mae geim lau to" ru we' byu se' ra"qobo: yang thaung: laung" jo, yaug ngad: ra".) 20 Pilad wa Yesu re lhoe' ke' nug yang:- mo, byu qere dam: ta"qu"ra". 21 Ngadqere: yao: bam wa Yao: re pyao: zang mae jin" se' pye' wa,- yao: re pyao: zang mae jin" se' pye' wa,- ga: zag: hug' ako". 22 Pilad wa yao: bam re Yao: pe" ja" qobo shad' lhoe" ra" i? Yao: mae shid man" ra" qobo daja: shad' qo re: mamyao- Amung: ngo wa yao: re be, yang:- nhao: ke' nae"- ga: sam lhang ein: lhang ta" ra". 23 Ngadqere: Yao: bam wa Yesu re pyao: zang dao mae jin" se' pye' nae" qhid' mae" thoe myhao: thao" mae" zag: hug' na: ako". Lo" thao" mae wa yao: bam hug' aung: yu: ako". 24 Airumung: Pilad wa yao: bam mho' ko" ruwe' dakhyo:- ngad shao:- ga: Yesu re dao: phyid' ke' ra". 25 Ai: thao Pilad wa geim lau to" ru we' byu se' ra" qobo: mathao mae thaung: laung" jo; ra" yaug re yao: bam mho' ru we' dakhyo:- nhao: ke' byid: mung:- Yesu re wa yao: bam o: ra" khyo" kad' genae" qhid' mae" ab: ke' ra". 26 Gyezo: qe wa Yesu re jhui" ye" lo" ako"- yao: bam ye" lo" na ko" au:- Seyo: vogaung: mae" vomo" khug khyo lo: na: ra" Simon ga: mang: ra" Kureni mang: byu dayaug re myao: ako". Yao: bam yao: re taung" yu yang:- pyao: zang re vo, nhao mung:- Yesu nhaung thao" mae su: nhao: ako". 27 Mo, byu qe ajham ataung Yesu thao cao" ye" ako". Ai: mo, byu phaung mae myiqe: qe damyo" wa Yesu qhid' mae" kaug' mung:- ngug byid ngug nhe' we' cao" ye" ako". 28 Yesu wa yao: bam shad' khyo lhang: lo mung: Yerusalem: myiqe: qe we"- nga" qhid' mae"dangug ge,- naonhaung" yao" qhid' mae" we' naonhaung" zo: dau qe: qhid' mae" kam" wa ngug ge, 29 Pe"mung:ga"re Zo: dau maqo" qu" ra" myiqe:- gaung mala" qu" ra" myiqe:- nug' cug majhaug' qu" ra" myiqe: wa ngaui lho" ra" wo"- ga: ta" genae" ra" ba na joe" lo: na: ra". 30 Ai: ba na mae byu qe wa bam jham re- Ngonhaung" dao mae logyo" nhai" gela,- Bug gaung jham re- ngonhaung" re lobam" pye' gela,- ga: ta" li" genae". 31 Pe"mung:ga"re sag' jam: gae re lhao" re:- ceru: kad' ko" ngad: re wa sag' kyaug' gae re wa khoqhi" sho' kad' genae" i? ga: ta" ra". 32 Qobo shad' lhoe" ra" yauggai gatau shid' yaug rere:- Yesu we' daga" se' pye' nae" qhid' mae" jhui" ye" lo" ko" ra". 33 Yao: bam wa Au: Gao: Gye,- ga" ra" jo, qo khyo joe" ye: lao"- Yesu we' qobo shad' lhoe" ra" byu shid' yaug re- Yesu lo, yo shad' mae dayaug lo, kaung: shad' mae dayaug pyao: zang mae jin" te' ako". 34 Yesu wa- Pho" we"- yao: bam re qobo khyad' byid: wa,- yao: bam wa yao: bam yao: pe" kad' na: rure maba ko" ngad: ra"- ga: ta" ra". Yao: bam wa Yesu mai bau: jham re pha" ce' khyo" yang: yao: cao: jho" gae: yu: ako". 35 Mo, byu qe aitau mae lhaug' qu" na ko" au:- Yuda lau: de, au: jhaung qe wa- Su gaje qere wa yao: khyad' yu: ra"- yao: wa Mao"So: yang khyin: san: to" ra" Meshia ngad: re wa yao: yao" gaung re khyad' yu vashao:- ga: Yesu re gaui mho: ako". 36 Gyezo: qere:- Yesu jhao" qui" ye: gemung:- yhid jhin qang: byid: jhaug' zo" re"- 37 Nao Yuda qe: kho:kham ngad: re wa naoyao" gaung re khyad' yu wa,- ga: Yesu re jung" ako". 38 Amung: yao" au: tho' mae- ceyaug wa Yuda qe: kho:kham ngad: ra"- ga: tung" te' to" ako". 39 Pyao: zang mae jin" te' to" ra" damya, shid' zo: mae" dayaug wa- Nao wa Meshia ngad:- mangad: i? Nao yao: re we' nga" shid' zo: rere:- khyad' yu la,- ga: jung" dao: ta" ra". 40 Ngadqere: gatau dayaug wa Mao"So re nao magyaug i? Nao wa yao: kham: yu: ra" dao: phyid' ra" qobo dae we' daja: za: qobo dae kham: yu: ra". 41 Ngadqere: nga" shid' zo: wa nga" shid' zo: yao: shad' lhoe" ra" qobo dae kham zo: man" ru we' dakhyo:- dao: phyid' ru qhug' va". Ngadqere: yao: wa pe" re: mashad' ngad: ra"- ga: qeim: ra". 42 Amung: yao: wa Yesu re- Yesu we" Nao kho:kham khyo" joe" li" lao"- ngore myid: beim: la, wo"- ga: ta" ra". 43 Yesu wa yao: re- Nao re ngo dang za: ta" li"- ana" ba yao: nao wa ngo we' daga" Pharadisu mae qhug' na: li" nae"- ga: ta" ra". 44 Na" gaung daxe: shid' yo, qug ko ngad: au: mae"- myi" thao sam yo, qug joe" sho' ba zho: ru thang: lo" mung:- no, sang: kyid mug: cad' cad' lo" byaug: ra". 45 Caung:pa" Yham mae" qe, kyo pin: lung: re:- shid' gao go; lo" byaug; ra". 46 Alao" Yesu wa Pho" we"- nga" byo ni" lo, mae ab byid' ra"- ga: thoe qi: we' hug' ta" mung:- kao gyo" lo" ra". 47 Airu: boe" rure gyezo: dayo eib: ra" gyezug: pho" myao lao"- ceyaug wa gaigai: yao: byugai dayaug ngad nhaung wo"- ga: ta" mung:- Mao"So re caung:khin" byid' ra". 48 Ai: tau mae li" zang" ham: qu" na ko" ra" mo, byu qe wa airu: boe" rure myao gelao"- alhab' mo, yao: yao" qao gao re theim yang: kaug' phao: lo" ko" ra". 49 Yesu re ba se" ra" mo, alhab' we' Galile mae" yao" thao cao" ko" ra" myiqe: qe wa va: va: mae ye; jo, yang:- qu" na: bam: ako". 50 Yuda mung"- Arimathe vobyu Yoseb ga: mang: ra" Yuda Tarha" Qe, Do, phung: mae bobo: ra" byu dayaug na: ra". Yao: wa phug' myao: tho' ra" din:man" ra" byu dayaug ngad: ru we' Mao"So: mung"dan: joe" li" nae" rure lao" na: ra" yaug ngad: ra"- yao: wa Tarha" Qe, Do, phung: vao byu dayaug ngadqere: Tarha" Qe, Do, phung" yang dao: phyid' ru we' kad' ra"lo, mau" re myid mabovang" ngad: ra". 52 Yao: wa Pilad qhid' kheim: khyo vao ye: mung:- Yesu mao gaung re yemho' ra". 53 Yoseb wa mao gaung re yu: khyo" yu yang:- jid: mo" pin: dau: yang mao gaung re thab' pye' mung:- khag' re: manyhab' qu" shi" ra" laug thin re kyaung" to" ra" laug khyaung lab mae Yesu mao gaung re yeke' to" ra". 54 Ai: ba wa ban thug' ngo" ba- nyhang" seim" ra" ba na ngad mung:- Dugno: Ba khyo de; ye: nae" jhao" li" na: ra". 55 Galile mae" Yesu thao cao" qin" ko" ra" myiqe: qere:- Yoseb we' daga" ye: mung:- lab re we' Yesu mao gaung re khoru: to" rure yao: bam myao: ako". 56 Airumung: yao: bam wa yham khyo tug' phao: lo" mung:- sheim nae pyo" ra" ja: we' Mura xau nyhang" to" ako". Kham" To" Ra" Tarha" jo; ru we' dakhyo:- yao: bam wa Dugno: Ba mae thang: na: ako". 1 Laban ba ne, seim no' mug: qab qab bo" li" we' ai: myiqe: qe wa yao: bam nyhang" seim" to" ra" sheim nae pyo" ra" xau jham ci yang:- lab khyo ye" lo" ko" ra". 2 Lab khyaung nhad' mae" laug zang tau: lhang" pye' to: va" rure yao: bam yemyao mung:- 3 Lab khyaung khug khyo vao ye" ako"- ngadqere: Asang Yesu mao gaung re yao: bam maye: myao ko" ngad: ra". 4 Ce:khyo re yao: bam mug' ye; jo, ko" au:- Qu" ge,- Qhui qhui qhag qhag mung: bao: ra" mai bau: ve; ci: ra" byu shid' yaug wa yao: bam: nhae mae ye; jo; ako". 5 Ai: myiqe: qe wa din: gyaug mung:- myid gaung mae goe; jo; ako". Ai shid' yaug wa yao: bam re daui: na: ra" yaug re shid: ra" mo; phaung mae naonhaung" pe"mung: qho: na ko" i? ga: ta" ako". 6 Yao: wa cetau mae mana lo:- Daui: to" lo" va"- yao: Galile mae na shi" au:- 7 Byu: Yao: Zo: wa qobo shad' lhoe" ra" mo; lo, khyo ab byid' ru qhug' mung:- pyao: zang mae jin" se' pye' ru qhug' li" nae"- amung: sam ba thao re dam: daui: to" li" nae" ngad:- ga: yao: naonhaung" re ta" to" ra" dao: re myid: beim: ge,- ga: yao: bam re ta" ako". 8 Alao"- ai: myiqe: qe wa Yesu dao: re myid: beim: mung:- 9 Lab tau mae" dam: phao: lo" mung:- yao: bam wa mho"zo: daxe: dayaug we' gaje qe alhab' mo, re ai: khyo lota" kyo" ako". 10 Lagyo: qere ai: khyo lota" kyo" ra" myiqe: qe wa Magadala Mari- Yoana- Yaku yao: myhi" Mari we' yao: bam we' daga" bobo: ra" gatau myiqe: qe ngad: ako". 11 Lagyo: qe wa ai: myiqe: qe ta" ra" dao: re dao: keim ngad:- ga: myid gemung:- yao: bam ta" rure malam" ko" ngad: ra". 12 Ngadqere: Petru wa to" yang: lab khyo tao" ye" lo" mung:- lab khyaung re yegam" qu" ke' re- mao gaung re thab' ra" jid: mo" pin: dau reza: yao: myao: ra". Ailao" yao: wa ai: khyo re myid: mug' mung:- yham khyo dam: tug' phao: lo" ra". 13 Ai: ba reyao: Yesu mho"zo: shid' yaug wa Yerusalem vogaung: we' khyo nhad' man: ko va" ra" Ema-u vogaung: khyo ye" lo" na: ako". 14 Yao: shid' yaug wa boe" lai: lo: ra" khyo jham re yao: cao: jho" ta" ako". 15 Yao: shid' yaug wa yao: cao: jho" ta" jho" myid: mung:- ye" lo" na ko" au:- Yesu wa yao: yao: te' te' su" ye: mung:- yao: shid' zo: we' daga" ye" lo" ra". 16 Yao: shid' zo: wa- Yesu re myao gengad yang: re: daru: zang mung yang: yao: re maqu" se" ko" ngad: ra". 17 Yesu wa yao: shid' zo: re- Ni" shid' yaug wa khyo su: zo" mae" pe" nam jho" ta" na ko" i? ga: myid' ra". Ailao" yao: shid' zo: wa myo, nho sham sham mung: thang: ye; jo; ako". 18 Yao: shid' zo: mae" Cleopa ga: mang: ra" yaug wa- Nao wa Yerusalem khyo joe" li" ra" bang" vo qemae" ana" gyo: shi" ai: vogaung: mae boe" lai: lo: ra" khyo re maba: ru nao dayaug za: ngad nhaung i? ga: ta" ra". 19 Alao" yao: wa pe" boe" ra" i? ga: myid' ra". Yao: shid' zo: wa Nazared mae" Yesu nho: khyo ngad: ra"- ceyaug wa lapa dayaug ngad mung: Mao"So: qhid' kheim: mae re: byu alhab' mo; qhid' kheim: mae re: dao: thoe we' lo, mau" qam: so' bo: ra" lapa ngad: ra". 20 Ngonhaung" khinjaung qi: qe we' zug: ade, qe wa yao: re se' pye' nae" dao: phyid' nae"qhid' mae" ab byid' pye' mung:- yao: wa pyao: zang mae jin" se' pye' ru qhug' ra". 21 Yao: wa Israel amyu" re lhoe' ke' byid: nae" yaug ngad: ra"- ein: ngonhaung" myid: lao" qu" va"- ai:tho' mago"- ana" wa ai: khyo: boe" va" rulao" re:- sam ba ngad: ava". 22 Ngonhaung" phung: mae" myiqe: damyo" wa ngonhaung" re myid: mug' nhao: ako". Yao: bam wa ne, seim no' mae" lab khyo ye" lo" ko" ra"- ngadqere: Yesu mao gaung re mayemyao ko" ngad: ra". 23 Alao" yao: bam wa dam: tug' phao: lo mung:- Yesu wa daui: na: ra"- ga: mug: lagyo: qe yao: bam re ta" kyo" ra" bao qab re the' myao va"- ga: ta" ako". 24 Ngonhaung" phung: mae" daqhae: re: lab khyo yequ" ko" re ai: myiqe: qe lo:ta" ru we' dakhyo:- khyag' za: ngad: rure ye:myao: ako". Ngadqere: yao: bam wa Yesu re mamyao ko" ngad: ra"- ga: ta" ako". 25 Alao" Yesu wa yao: shid' zo: re- Naonhaung" wa lapa qe ta" to" ra" dao: jham re phyad za: manug: lam" ko" ra"- Nhag' magyang" ra" mo, we"- 26 Meshia wa airu" ra" khyag' qhui: rure kham zo: mung:- yao" phungbao khug mae vao ye: zai ngad: ra" mangad: i? ga: ta" ra". 27 Amung: Yesu wa Moshe tung" to" rumae" qhid mung: lapa qe tung" to" ra" Jham: Mugsug' alhab' mae yao" khyo we' sin: mung:- tung" to" ra" Jham: dau jham: lajheim: re yao: shid' zo: re sho' kyo" ra". 28 Yao: bam ye" lo" na ko" ra" vogaung: nhae mae joe" lao"- Yesu wa su" lai: ye" lo" nae" seim" ra". 29 Ngadqere: yao: shid' zo: wa- Ba vao mug: cad' va" ra". Nga" shid' zo: we' daga" thang: na gelang:- ga: ta" mung: yao: re tam" ako". Airumung: Yesu wa yao: shid' zo: we' thang: na nae" qhid' mae" cao" ye" lo" ra". 30 Yesu wa yao: shid' zo: we' daga" zozo: nae" zaung: jo, mung:- mug re yu: yu yang:- jeju bin: caung: lao"- khyoe' phai" mung: yao: shid' zo: re byid' ra". 31 Alao"- yao: shid' zo: wa myo, bung" li" mung:- Yesu ngad: rure ba: ako". Ngadqere: Yesu wa yao: shid' zo" qhid' kheim: mae" byaug: lo" ra". 32 Amung: yao: shid' zo: wa- Khyo mae nga" shid' zo: re yao: dao: jhau: ra" au: we' Jham: dao: lajheim: sho' kyo: byid' ra" au:- nga" shid' zo" nhag' lam: khug mae thug thug ga: laung: li" kyi: mangad: i? ga: yao: cao: jho" ta" ako". 33 Ailao" jao" yao: shid' zo: wa to" mung:- Yerusalem khyo dam: tug' phao: lo: ako". Aimae mho"zo: daxe: dayaug we' zang" ham: na: bam ko" ra" mo, wa- 34 Ai: Asang wa gaigai: yao: dam: daui: to" li" va" ra"- yao: wa Simon re na: thug' qhu" va"- ga: jho" ta" na ko" rure lo:myao: ako". 35 Alao" yao: shid' zo: wa khyo mae boe" ru we' mug khyoe' phai" ra" au:- Asang re yao: shid' zo: qu" ba: se" ra" khyo alhab' yao: bam re ta" sho' kyo" ako". 36 Yao: shid' zo: yao: bam re airu: ta" kyo" na shi" au:- nyag din taung" Yesu wa yao" gaung re yao:- yao: bam: phaung mae li" ye; qhu" mung:- naonhaung" ngaui bau: yaug yo vageshao:- ga: yao: bam re ta" ra". 37 Yao: bam myao: ru wa subyo ngad:- ga: jho mung:- gyaug: nin" ako". 38 Ngadqere: Yesu wa yao: bam re- Naonhaung" pe"mung: gyaug: din ko" i? Naonhaung" aung khug mae pe"mung: aug' o: ko" i? 39 Nga" khyid we' lo, re qu" ge,- naonhaung" myao: ra" yaug wa ngo yao: ngad va"- ngore soe' qu" ge,- pe"mung:ga"re subyo wa gaung sho: we' shoqug: shoqe mabo ngad: ra". Ngo wa naonhaung" myao: ru we' dakhyo:- gaung sho: we' shoqug: shoqe bo yaug ngad:- ga: ta" mung:- 40 Yao" wa ceru: ta" mung: mho"zo: qere yao" khyid lo, jham qhu" byid' ra". 41 Yao: bam: nhag' lam: mae ngaui bau" ru we' mug' ru saung" byang" jo, gemung:- yao: bam maqo" lam" shiko" ngad: ra"- Airumung: Yesu wa yao: bam re Naonhaung" cetau mae zo: nae" daja: ja: qo" ko" i? ga: myid' ra". 42 Ailao" yao: bam wa ngo: nyo, datam" yao: re byid' ako". 43 Yao: wa aire yu: yu mung:- yao: bam: qhid' kheim: mae zo" ra". 44 Ai: thao Yesu wa yao: bam re Moshe Kham" To" Ra" Tarha" Jham: paug'- Lapa qe tung" to" ra" jham: paug' we' Caung:khin" Jham: paug' jham mae nga" khyo we' sin: mung: ta" to" ra" khyo jham wa jab byang" li" ca"- ein: naonhaung" we' ngo daga" na shi" au: mae" ai:gu: alhab' ngo naonhaung" re ta" to: va"- ga: yao: bam re ta" ra". 45 Ai: thao Jham: Dao: jham re ba: gyo: genae" qhid' mae" yao: bam: myid re yao: phung" byid: mung:- 46 Yao: bam re Meshia wa khyag' qhui: rure kham zo: mung:- sam ba thao re shid: rumae" dam: daui: to" li" ca" zai ngad:- 47 Yao" mang re lao: yang:- myid tha" ra" khyo mungdao: we' qobo khyad' byid' ra" khyo re Yerusalem mae" qhid mung:- byumyu" cao jab alhab' re kho" kyo: byid: ca"- ga: Jham: Mugsug' mae ceru: tung" to" ra". 48 Naonhaung" wa ai: khyo jham we' sin: mung: myo, myao sagse: qe ngad: ako". 49 Airumung: nga" Pho" yang dao:so: byid' to" rure naonhaung" dao mae ngoyao: nhao: ke' byid: nae". Ngadqere: naonhaung" wa mug: tho' mae" qam: so' naonhaung" dao mae majoe" gyo" li" li" wa Yerusalem vogaung: mae lao" na ca" ako"- ga: ta" ra". 50 Ai: thao Yesu wa mho"zo: qere Bethani vogaung: nhae khyo jhui" ye: mung: yao" lo, shid' shad' re tau yang:- yao: bam re shaman" byid' ra". 51 Airu: yao: bam re shaman" byid' na: au:- Yesu wa mho"zo: qemae" gao" lo" mung:- mug:gaung khyo to' yu: ru qhug' ra". 52 Yao: bam wa Yesu re goe; caung:pa" yang:- gyai ngaui bau" ru we' Yerusalem khyo dam: tug' phao: lo" mung:- 53 Caung:pa" Yham mae abang mabyid na: jo, yang:- Mao"So: jeju re caung:khin" byid' ako".
|