JOHN
Yohan1 Sao qhid' maqhid mae mungdao: jo; ra". Aimung dao: wa Mao"So we' daga" ngad mung:- mungdao: wa Mao"So ngad: ra". 2 Aimung dao: wa sao qhid' maqhid mae" Mao"So we' daga" ngad: ra". 3 Mao"So wa ai: mungdao: khyo" yang cao jab alhab' re phan" to" ra". Yao: mabo lo: phan" to" ru daja: re: majo, ngad: ra". 4 Aimung dao: wa kao so' ajhaung ngad: ra". Amung: ai: kao so' wa xao su byu qe: qhid' mae" bo" bao ngad: ra". 5 Ai: bo" bao wa mug: cad' khug mae bao: jo, mung:- mug: cad' wa bo" bao re khonhae" re: maqo" aung: pye' ngad: ra". 6 Mao"So wa Yohan ga: mang: ra" yaug re yao" lagyo: khyo" yang nhao: ke' ra". 7 Alhab' mo, wa the' gyo: yang: lam" genae" qhid' mae" Yohan wa ai: bo" bao re ta" kyo: nae" joe" li" ru ngad: ra". 8 Yao: yao: wa bo" bao mangad:- Bo" bao: khyo re ta" kyo: nae" qhid' mae" joe" li" ru ngad: ra". 9 Ai: bo" bao wa myid gaung dao khyo joe" li" mung:- xao su byu alhab' mo; dao mae bao byid' ra" bo" bao agyang" ngad: ra". 10 Aimung dao: wa mug:myid mae ngad: ra". Mao"So wa yao: khyo" yang mug:myid re phan" to: ngadqere: mug:myid wa yao: re maba ngad: ra". 11 Yao: wa yao: yao" mug: mang: khyo joe" li" ngadqere: yao: yao" mang: byu qe wa yao: re malham: khae: yu ko" ngad: ra". 12 Ngad yang: re: yao: re khae: yu mung: lam" ra" mo, alhab' re Mao"So: zo: dau qo" boe" ra" akhang" byid' ra". 13 Ai bam wa xao su byu khyo" khau: li" mung:- yao: yao: za: Mao"So: zo: dau qe boe" li" ru mangad:- Mao"So wa yao: bam: yao: pho" ngad: ra". 14 Mung dao: wa xao su byu boe" li" mung:- nhag' myan" ru we' dangman" ru byang" jo, yang:- ngonhaung" phaung mae na: ra". Yao: pho" nho: zote: zo: dayaug khyo" yao: kham: yu: to" ra" yao" phungbao re ngonhaung" the' myao va". 15 Yao" khyo re Yohan ta" ru wa nga" thao mae joe" li" ra" yaug wa ngo tho' je: qi: yaug ngad: ra"- ein: ngo ta" na: ra" yaug wa ceyaug ngad: ra". Pe"mung:ga"re yao: wa ngo makhau shimae" na: jo, yaug ngad: ra"- ga: ta" ra". 16 Yao" nho: nhag' myan" ru byang" jo; rumae" yao: wa ngonhaung" alhab' re shaman" jeju daja: thao daja: byid' ra". 17 Mao"So wa Moshe khyo" yang tarha" byid: ngadqere: nhag' myan" ru we' dangman" rure wa Yesu Khristu khyo" yang byid' ra". 18 Mao"So re khag' re: mamyao: qu" ngadqere: yao: pho" tao: kheim" mae na mung:- Mao"So yao: ru" ra" zote: zo: wa Mao"So re qhu" byid' ava". 19 Yerusalem mae na ko" ra" Yuda kheim: so' qo" ra" mo, wa khinjaung qere we' Levi kaung daqhae: re Yohan jhao" nhao: ke' mung:- nao khag' ngad: i? ga: myid: nhao: ke' ako". 20 Ailao" Yohan wa- ngo wa Meshia mangad: ga: manyham: mazug' lo: de: de: za: ta" ra". 21 Yao: bam wa- Aire nao khag' ngad: i? Nao wa Elia ngad: i? ga: myid' ako". Yohan wa ngo mangad: ga: tau" ra". Ailao" yao: bam wa Nao wa ai: lapa yaug ngad: i? ga: myid' ako". Yohan wa Ngo mangad: ga: phaug' tau" ra". 22 Alao" yao: bam wa- Nao khag' ngad: rure ngonhaung" re ta" kyo: la,- ngonhaung" re nhao: ke' ra" mo, re lo" dam: ta" kyo: nae" dao: cilo" ca" ra"- naoyao: wa khoru: ta" nae" i? ga: myid' ako". 23 Ailao" Yohan wa ngo wa lapa Esaia ta" ru we' dakhyo:- Asang: khyo re din: din: za: nyhang" jhao" ge, ga: din"pyad' yo mae hug' na: ra" thoe ngad: ra" ga: tau" ra". 24 Ai: Pharishe qeyang nhao: ke' ko" ra" lagyo: qe Yohan re dam: myid: ko" ru wa- 25 Nao wa Meshia re: mangad:- Elia re: mangad:- ai: lapa yaug re: mangad: re wa nao wa pe"mung: qid nyhab' byid' i? ga: myid' ako". 26 Yohan wa- ngo wa qid mae qid nyhab' byid' ra"- ngadqere: naonhaung" phaung gaung: mae naonhaung" maba: ra" byu dayaug ye; jo; ra". 27 Yao: wa nga" thao mae joe" li" ra" yaug ngad: ra"- ngadqere: ngo wa- yao" khyid zhaung: taui: pheim byid: nae" lhao" re: maman: qi"- ga: ta" ra". 28 Ce: khyo jham wa Yohan qid nyhab' byid: yang: na: ra" Yodan gyaung: thoete' ba thug' shad' mae" Bethani vogaung: mae boe" ra" khyo jham ngad: ra". 29 Thao: ba re Yohan wa yao: jhao" Yesu li" na: rure myao mung:- myid gaung byu qe: qobo re yu: pye' byid' ra" Mao"So: Yao Nau" re qu" ge,- 30 Yao: wa nga" thao mae joe" li" yaug ngadqere: ngo tho' je: qi: yaug ngad: ra" ein: ngo ta" ra" yaug wa ceyaug ngad: ra". Pe"mung:ga"re yao wa ngo makhau shimae" na: jo, yaug ngad: ra". 31 Qhid' phyao: yao: khag' ngad: rure ngo maba- Qhid' phyao: maba ngadqere: Israel amyu" qe yao: re ba genae" qhid' mae" ngo wa qid mae qid nyhab' byid' ru ngad:- ga: ta" ra". 32 Amung: Yohan wa Byo wa- mug:gaung mae" phaung" kyug' ru: dao" gyo" li" mung:- yao" dao mae li" no" na: rure ngo the' myao va". 33 Ngo wa yao: aiyaug ngad: rure qhid' phyao: maba- ngadqere: qid mae qid nyhab' byid: nae" qhid' mae" ngore nhao: ke' ra". Mao"So ngore ta" ru wa Byo wa gyo" li" mung:- byu dayaug: dao mae li" no" na: rure nao the' myao: li" nae"- ai: yaug wa Gyang" Lho" Byo mae qid nyhab' byid' ra" yaug ngad: ra". 34 Ai: rure ngo the' myao va"- Airu: mung: yao: wa Mao"So: Yao: Zo: ngad: rure naonhaung" re ngo sagse: kham: kyo" ra"- ga: ta" ra". 35 Thao: ba re Yohan wa yao" mho"zo: shid' yaug we' daga" ye; jo; ra". 36 Yao: wa Yesu lai: lo" na: rure myao lao"- Mao"So: Yao Nau" re qu" ge,- ga: ta" ra". 37 Yao" mho"zo: shid' yaug wa ai: dao: re the' gyo: gelao"- Yesu thao cao" ye" lo" ako". 38 Yesu wa lhang: qu" mung:- yao: shid' zo: yao" thao cao" lo: na ko" rure myao lao"- ni" shid' zo: pe" re qho: na ko" i? ga: myid' ra". Yao: shid' zo: wa Rabai we"- nao khotau mae na: i? ga: tug' myid' ako". (Rabai ga" ru wa mho"pho" ga" ru ngad: ra".) 39 Yao: wa Li" qu" geri:- ga: tau" ra". (ai: ayo, wa myi" thao byid yo,qug ko ngad: ra".) Aimung: yao: shid' zo: wa yao: we' daga"cao" ye" lo" mung:- yao: na: ra" jo, qo re yao: shid' zo: yemyao gelao"- yao: we' daga" ai: ba geim" yena: ako". 40 Ai shid' zo: mae" dayaug wa Simon Petru yao: nhaung: Andre ga: yaug ngad: ra". 41 Yao: wa ailao"jao"- yao: mao: Simon re myao mung:- nga" shid' zo: Meshia re the' myao va" ga: Simon re ta" ra". (Meshia ga" ru wa Khristu ga" ru ngad: ra".) 42 Ai: thao yao: wa Simon re Yesu jhao" jhui"lo: ra". Yesu wa Simon re lham: qu" mung: nao wa Yohan yao: zo: Simon ngad: ra" ngadqere: nao re Kepha ga: mhang" li" genae" (Kepha we' Petru ga" ru wa dakhyo: za: ngad mung: laung: mo" baui ga" ru ngad: ra".) 43 Thao: ba re Yesu wa Galile mung" khyo ye" lo" nae" myid: phyid' ra". Yao: wa Philib re the' myao mung: yao: re- Nga" thao cao" wa,- ga: ta" ra". 44 (Philib wa Andre we' Petru shid' nhae na: ra" Bedsaida vogaung: mae" ngad: ra".) 45 Philib wa Nathanae re myao mung:- Moshe tarha" jham: paug' mae we' lapa qe: jham: paug' mae tung" to: ko" ra" yaug re ngonhaung" the' myao va". Yao: wa Nazared mae" Yoseb: yao: zo: Yesu ngad: ra" ga: yao: re ta" kyo" ra". 46 Ailao" Nathanae wa Nazared vogaung: mae" gai: ra" ru daja: ja: qo" thug' li" ra" i? ga: ta" ra". Philib wa li" qu" wa,- ga: tau" ra". 47 Yesu wa Nathanae yao: jhao" li" na: rure myao lao"- apyag' asham" mabo: ra" Israel byumyu" agyang" re qu" ge,- ga: ta" ra". 48 Ailao" Nathanae wa Nao ngore khoru: ba: i? ga: Yesu re myid' ra". Yesu wa- nao re Philib mali" khai shire pho' ham" gae qao: mae nao na: jo; ra" au: mae" nao re ngo myao va" ga: yao: re ta" ra". 49 Nathanae wa mho" pho" we"- nao wa Mao"So: Yao: Zo: ngad: ra"- nao wa Israel nho: kho:kham ngad: ra"- ga: tau" ra". 50 Yesu wa yao: re Pho' ham" gae qao: mae nao na: jo; ra" au: mae" nao re ngo myao va" ein: nao re ta" ruyang za: nao lam" i? Cetho' je: qi" ra" mau" re nao the' myao: li" nae"- ga:ta" ra". 51 Amung: Yesu wa yao: bam re naonhaung" re ngo dang za: ta" geli"- Mug:gaung wa bung" li" mung:- Mao"So: mug: lagyo: qe wa Byu: Yao: Zo" dao mae do, do, gyo" gyo" kad' na ko" rure naonhaung" the' myao: li" genae"- ga: ta" ra". 1 Ai: thao shid' ba kyo thao re Kana vogaung: mae lo, xo' poe dalam: jo, mung:- Yesu yao: myhi" wa ai: poe mae leim: na: ra". 2 Yesu we' yao" mho"zo: qere re: ai: lo, xo' poe khyo khai: ako". 3 sabyi qang: gan: byaug lao"- Yesu yao: myhi" wa Yao: bam sabyi qang: gan: byaug: avako"- ga: yao: re ta" ra". 4 Yesu wa Ngo pe" kad' ca" rure- nao ta" maqo- Nga" ayo, majoe" shi:- ga: ta" ra". 5 Ailao" Yesu yao: myhi" wa daui daui mo, re yao: naonhaung" re nhao: ra" ja: alhab' re kad' ge,- ga: ta" ra". 6 Yuda qe wa yao: bam: caung:pa" thung" we' sin" ra" cid' san: ra" thung" qo" gemung:- ai: qhid' mae" soe: dayo ko ko vao: ra" laug qid yae: khyaug' lam: aitau mae zhaung: to" ako". 7 Yesu wa ai: daui daui mo, re ai: yae: jham mae qid byang" sho' khae: zaui ge,- ga: ta" ra". Yao: bam wa yae: nhad' joe" sho' khae: zaui: ako". 8 Amung: Yesu wa yao: bam re- Ai: yae: mae" qid dajhid' khau" yu mung:- poe eib pho" re lo" byid: ge,- ga: ta" ra". Yao: bam re: lo" byid' ako". 9 Poe eib pho" wa sabyi boe" lo: ra" qid re shaug' tau" qu" ra". Daui daui mo, wa ai: sabyi qang: khai: mae" qo" rure ba: ako"- ngadqere: poe eib pho" wa maba ngad: ra". Aimung: yao: wa pho" sag' re khai: yu yang:- 10 Yaug khao: ngo" wa myho' thao" ra" sabyi qang: re shi" sao qhid' lhaung" byid: jhaug' ko" ra"- Shaug' gyi: gethao reza: mataung" myho' ra" sabyi qang: lhaung" byid: jhaug' ako"- ngadqere: nao wa myho' thao" ra" sabyi qang: re ana" joe" sho' zam" to" ra"- ga: ta" ra". 11 Yesu wa Galile mung" Kana vogaung: mae sao qhid' mug'pho: mau" re kad' mung:- yao" phungbao re aimae qhu" byid' ra". Aimung: yao" mho"zo: qe wa yao: re lam" ako". 12 Ai: thao re Yesu wa yao: myhi"- yao: nhaung:- yao" mho"zo: qe we' Kapena-um vogaung: khyo ye: mung:- aimae dayo, zo: yena: ra". 13 Lai co' Poe joe" li" na mung:- Yesu wa Yerusalem khyo ye" lo" ra". 14 Yesu wa Caung:pa" Yham mae nung: jaung- yao- phaung" kyug' aung: mo, we' ngaui tha" zo: mo, yao: bam: zoboe" mae zaung: jo, ko" rure ye:myao: ra". 15 Ailao" Yesu wa taui" yang vose: dalam: kad' ci mung:- yao we' nung: jaung- gug'nyhug' jham alhab' re caung:pa" Yham mae" khe' thug' pye' ra"- amung: ngaui tha" zo: mo; ngaui thaung jham rere: gaug: sin" pye' byid: yang:- zaboe" gai" jham re tau: phaug' sin" pye' byid' ra". 16 Phaung" kyug' aung: mo, rere: aijham alhab' re cetau mae" yu: thug' lo" ge,- nga" Pho" Yham mae gai jao: dakad' ge,- ga: amyin" byid' ra". 17 Ailao" Yao" mho"zo: qe wa Mao"So we"- ni" yham re kao bau nhag' taui" ru wa nga" aung khug mae myi: ru: nga" na: ra"- ga" ra" jham dao: re myid: beim" ako". 18 Yuda kheim: so' qo" ra" mo, wa nao ce: mau" zo" re kad' nae" akho: akhang" qo" yaug ngad: rure ba nhao nae" qhid' mae" ngonhaung" re pe" ja" mug' pho: qo" kad' qhu" nae" i? ga: ta" ako". 19 Yesu wa tau: mung:- ce: caung:pa" Yham re phyo' pye' ge,- sam ba: agyo: mae ngo dam: kad' nae"- ga: ta" ra". 20 Yao: bam wa Yesu re- Ce: caung:pa" Yham wa byid xe: khyaug' zin lam: lam: zhaug' lo: ra" yham ngad: ra". Nao wa sam ba: agyo: maeza: ce: caung:pa" Yham re dam: qo" zhaug' nae" i? ga: myid' ako". 21 Ngadqere: Yesu ta" ra" caung:pa" yham wa- yao" gaung re qang yang: ta" ru ngad: ra". 22 Airumung: yao" mho" zo" qe wa Yesu shid: rumae" dam: daui: to" li" ru qhug' thao re yao: ta" to" ra" cedao: re myid: beim: mung:- yao: bam wa jham: mugsug' rere: Yesu ta" ra" dao: rere: lam" ako". 23 Ai: Lai co' Poe ba na gyo: Yesu wa Yerusalem mae na: au:- byu myo: sho' mo, wa yao: kad' ra" mug' pho: mau" re the' myao gemung: yao: re lam" ako". 24 Ngadqere: Yesu wa yao: bam alhab' mo; khyo re ba: ruyang yao: bam re malam ngad: ra". 25 Yao: bam: khyo re khag' yang re: yao: re ta" kyo: maqo ngad: ra"- pe"mung:ga"re yao: bam yao" aung khug nhag' lam: mae pe" bo: rure yao: yao: ba gau ngad: ra". 1 Pharishe phung: mae bobo: ra" Nikodi ga: mang: ra" Yuda au: jhaung dayaug na: ra". 2 Damyi re yao: wa Yesu jhao" ye: mung:- Rabai we"- nao wa Mao"So: yang nhao: ke' ra" mho" pho" dayaug ngad: rure ngonhaung" ba:- nao zaui" qhu" na: ra" mug' pho: ve, lho jham wa Mao"So mabo ngad: re khag' re: maqo" kad' ngad: ra"- ga: ta" ra". 3 Yesu wa nao re ngo dang za: ta" li"- Dam: khau: ra" yaug mangad: re wa khag' re: Mao"So: mung"dan: re maqo" myao genae"- ga: yao: re tau" ra". 4 Nikodi wa Qi: thao re khoru: dam: gai: khau nae" i? ga: myid' ra". Gaigai: yao: yao: wa yao: myhi" aung khyo magai: vao ye" ru we' shid' lhang madam: gai: khau ngad: ra"- ga: ta" ra". 5 Ailao" Yesu wa Nao re ngo dang za: ta" li"- Qid we' Byo: yang khau: ke' ra" yaug mangad: re wa Mao"So: mung"dan: khug khyo khag' re: maqo" vao ye: ngad: ra". 6 Gaung sho" yang khau: ke' ru wa gaung sho: ngad mung:- Byo: yang khau: ke' ru wa byo ngad: ra". 7 Ngonhaung" alhab' mo, dam: khau ca"- ein: nao re ngo ta" ra" dao: re dagyo" mug'- 8 La wa yao: nug: ra" shad' khyo hug' ra"- La hug' thoe re nao the' gyo: ngadqere: khokhyo" hug' lo: ru we' khokhyo hug' lo" nae" rure nao maba ngad: ra"- Byo: yang khau: ra" mo, yaug khao: ngo" re: ai we' dau: ra"- ga: ta" ra". 9 Ailao" Nikodi wa ceru wa khoru: gai: boe" nae" i? ga: myid' ra". 10 Yesu wa tau: mung:- nao wa Israel amyu mho" pho" aqi: dayaug ngad: to: mung:- cekhyo re nao maba i? 11 Nao re ngo dang za: ta" li"- ngonhaung" wa ngonhaung" yao: ba: ru ta" mung:- ngonhaung" yao: the' myao va" khyo re dam: ta" kyo: byid: ngadqere: ngonhaung mungdao: re naonhaung" khag' re: manug: khae: yu ngad: ako". 12 Naonhaung" re ce: mug:myid dao: akhyo re ngo ta" kyo" re lhao"- ngo ta" rure malam" ko" ngad: re wa mug:gaung dao: akhyo re ngo ta" lao"- naonhaung" khoru: lam" genae" i? 13 Mug:gaung dao mae" gyo" li" ra" Byu: Yao: Zo: mae" je yang: mug:gaung dao khyo khag' re: mado, lo" qu" shingad: ra". 14 Yao: re lam: ra" mo, yaug khao: ngo" apyad ato: kao so' qo" yu nae" qhid' mae" Moshe wa din" pyad yo mae gyid: bo" lhao maui lho re zang au: mae to' to" ru we' dakhyo:- Byu: Yao: Zo: re: to' to" ru qhug' nae" ngad: ra". 16 Pe"mung:ga"re Mao"So wa- mug:myid byu qere gyai jhid'de; mung:- yao: zo: re lam" ra" mo, yaug khao: ngo" wa mashid lo:- apyad ato: kao so' qo" yu genae" qhid' mae" yao" zote: zo: re byid' pye' ra". 17 Pe"mung:ga"re mug:myid byu qere dao: kho' nae" qhid' mae" Mao:So wa yao: zo: re mug:myid dao khyo nhao: ke' ru mangad:- Mug:myid byu qere khyad' yu nae" qhid' mae" nhao: ke' ru ngad: ra". 18 Mao"So: Yao: Zo: re lam" ra" yaug khag' ngadqere: dao: kho' ru maqhug' ngad: ra". Ngad yang: re: malam" ra" yaug kam" wa Mao"So: zote: zo: re malam: ruyang dao: kho' ru qhug' ava". 19 Dao: kho' ra" khyo wa ceru: mung: ngad: ra"- Bo" bao wa mug:myid dao khyo joe" li" va" ngadqere:- byu qe wa yao: bam: makhyang" ra" mau" zo" jham: mathao: yang bo" bao re tho' mug:cad' re je: jhid'de; ako". 20 Makhyang" ra" lo, mau" kad' ra" yaug khag' ngadqere: bo" bao re nghang" ra". Yao: yao" makhyang" ra" mau" zo" mamyao: thug' li" nhao nug: ruyang yao: wa bo" bao khyo mali" ngad: ra". 21 Ngadqere: dangman" ra" mau" zo" re zaui" ra" yaug kam" wa yao: zaui" ra" mau" zo" wa Mao"So o: ra" khyo ngad: rure bo" bao: yang qhu" byid: shao: ga: yao: wa bo" bao khyo li" ra". 22 Ai: thao re Yesu wa yao" mho"zo: qe we' daga" Yuda mung" khaung: khyo thug' ye" lo" mung:- ai: khaung: mae mho"zo: qe we' daga" yena yang: qid nyhab' byid' ra". 23 Yohan re: Salim mae" mataung" va" ra" Aenon ga" ra" jo, qo mae qid myo: sho' jo; ruyang qid nyhab' byid: yang: na: ra". Byu qe wa- yao: jhao" ye: mung:- Yohan wa- yao: bam re qid nyhab' byid' na: ra". 24 (Ce wa Yohan thaung: malaung" shire boe" ru ngad: ra".) 25 Yohan: mho"zo: qe daqhae: wa caung:pa" thung" we' sin" ra" cid' san: ra" khyo we' sin: mung:- Yuda byu dayaug we' jho" ta" ngag: ako". 26 Aimung: yao: bam wa Yohan jhao" ye: mung:- Mho" pho" we"- Yodan gyaung: thoete' ba thug' shad' mae nao we' daga" na mung:- nao sagse: kham byid' ra" yaug re nao mabeim: i? Yao: wa ana"- qid nyhab' byid: yang: na: ra"- Yaug khao: ngo" yao: jhao" ye" ako"- ga: ta" ako". 27 Yohan wa- Mao"So: yang za: mabyid: re wa khag' pe" maqo" yu ngad: ra"- ga: ta" ra". 28 Ngo wa Meshia mangad:- yao" qhid' au: mae nhao: ke' ra" yaug angad: ein: ngo ta" va" ru wa naonhaung" yao: sagse: qe ngad: avako". 29 Myhi" sag' re sang: ra" yaug wa pho" sag' ngad: ra". Pho" sag' nho: ba nam pho" kam" wa- ayae mae ye; jo, yang:- pho" sag' thoe re tae" gyo" ra". Yao: wa pho" sag' thoe re the' gyo: lao"- gyai ngaui bau" ra". Airu: ngaui bau" ru wa ngo mae jab byang" li" va". 30 Yao: wa myo" laug: li" nae"- ngo kam" wa nang" lo" zai ngad:- ga: ta" ra". 31 Mug:gaung khyo" joe" li" ra" yaug wa alhab' tho' je: qi" ra" yaug ngad: ra". Myidgaung dao mae" ngad: ra" yaug wa myidgaung byu ngad yang:- myidgaung dao we' sin" ra" khyo jham reza: ta" ra". Ngadqere: mug:gaung khyo" joe" li" ra" yaug wa alhab' tho' mae" yaug ngad: ra". 32 Yao: wa yao: the' myao va" ru we' the' gyo: va" ra" khyo re ta" ra"- ngadqere: yao" mungdao: re khag' re: makhae: yu shiko" ngad: ra". 33 Yao" mungdao: re khae: yu: ra" yaug kam" wa airu: khae: yu: ra" khyo" yang Mao"So wa dangman" ra" yaug ngad: rure jao dang byid: yaug ngad va". 34 Mao"So: yang nhao: ke' ra" yaug wa Mao"So: mungdao: re ta" ra"- pe"mung:ga"re Mao"So wa aiyaug re yao" Byo byang" sho' byid' ra". 35 Yao: Pho" wa yao: zo: re jhid'de; mung:- phung qam: so' alhab' yao" lo, mae byid' to" ra". 36 Mao"So: Yao: Zo: re lam: ra" yaug khag' ngadqere: apyad ato: kao so' qo" ra". Mao"So: Yao: Zo" mho dao re maphug' cao" ra" yaug khag' ngadqere: kao so' qo" nae" mangad:- yao: wa Mao"So: qobo dae byid' ra" khug mae na: jo; li" nae"- ga: ta" ra". 1 Yesu wa Yohan tho' mho"zo: je: qo" poe" yu mung:- qid nyhab' byid' na: ra" ga" rure Pharishe qe the' gyo" ako". 2 Gaigai: yao: Yesu yao: yao: wa dayaug rere: qid nyhab' mabyid: ngad: ra". Yao" mho"zo: qeza: byid' ako". 3 Airu Pharishe qe the' gyo: vako" ra" ga" rure Yesu yao: dam: the' gyo: lao"- yao: wa Yuda mung" mae" thug' lo" mung:- Galile mung" khyo dam: tug' lo" ra". 4 Yao" gyaung: khyo wa Samari mung" khyo" su" lai: lo" ca" ra". 5 Yesu wa Samari mung" mae" Sukha ga" ra" vogaung: khyo joe" lo: ra". Ai: vogaung: wa ganhae" pyad re Yaku yang yao: zo: Yoseb re byid' to" ra" yo myid nhae mae" Samari vogaung: dalam: ngad: ra". 6 Ai: mae Yaku nho: qid thaung: jo; ra". Yesu wa khyo su" myaung: yang: qid thaung: nhae mae zaung: jo; ra". Amung: ayo, wa na" gaung ba khaung tau yo, ko ngad: ra". 7 Samari myiqe: dayaug wa qid khae nae" ga: joe" li" ra". Ailao" Yesu wa Ngo re qid byid: jhaug' la,- ga: yao: re mho' ra". 8 (Yao" mho"zo: qe wa zo:ve vai nae" qhid' mae" vogaung: khug khyo vao ye" lo" byaug: ako".) 9 Samari myiqe: wa Nao wa Yuda byu ngad mung:- ngo wa Samari byu ngad:- Khorumung: nao ngore shaug' qid mho' i? ga: ta" ra". (Pe"mung:ga"re Yuda byu qe wa- Samari byu qe ci: ra" keim kang: re malhaung" ci ko" ngad: ra".) 10 Ailao" Yesu wa Mao"So byid' ra" jhaung qhu" we' nao re qid mho' shaug' na: ra" yaug khag' ngad: rure nao ba: ngad: re wa- nao wa yao: re mho' mung:- yao: wa nao re daui: ra" kao so' qid byid' li" nae"- ga: yao: re phaug' tau" ra". 11 Ai: myiqe: wa- Nhag' bo we"- nao wa qid khae nae" qid pung" re: maqo" ngad: ra"- aimung: qid thaung: re: gyai no; ra"- ai: kao so' qid nao khai: mae" qo" yu nae" i? 12 Ce: qid thaung: wa ngonhaung" phug' pho" Yaku yang ngonhaung" re byid: co' ra" qid thaung: ngad: ra". Phug' pho" Yaku yao: yao: re:- yao: zo: qere:- yao" gug'nyhug'jham re: ce: qid thaung: mae" shaug' lai: lo" vako" ra"- nao wa Yaku tho' je: qi" i? ga: yao: re ta" ra". 13 Yesu wa ce: qid shaug' ra" yaug khag' ngadqere: qid dam: shab' shinae"- 14 Ngo byid: nae" ra" qid re shaug' ra" yaug kam" wa khonhae" re: qid madam: shab' nae"- yao: re ngo byid: nae" ra" qid wa yao" khug mae kao so' qid thug' boe" mung:- ai wa yao: re kao so' qid we' apyad ato: kao so' byid' li" nae" ga: tau" ra". 15 Ai: myiqe: wa Nhag' bo we"- ngo wa qid madam: shab' nae" we'- cekhyo qid mali" khae ca" nae" qhid' mae" ngore ai: qid byid: la,- ga: ta" ra". 16 Yesu wa yao: re Ni" yham sang pho" re lo" khai: yu yang: dam: li" ri:- ga: ta" ra". 17 Ai: myiqe: wa Ngo yham sang pho" maqo" ga: tau" ra". Yesu wa yao: re- ngo yham sang pho" maqo" ga:- nao ta" ru wa jo: ra". 18 Nao wa yham sang pho" ngo" yaug qo" qu" va"ra"- ana" nao we' daga" na: ra" yaug wa ni" yham sang pho" mangad: ngad: ra"- nao wa ngore dang: ru ta" ava"- ga: ta" ra". 19 Ai: myiqe: wa Nhag' bo we"- nao wa lapa ngad: rure ngo ba va"- ga: ta" ra". 20 Nga" phug' pho" qe wa ce: bam dao mae Mao"So re caung:pa" lo: ako". Ngadqere: naonhaung" Yuda byu qe wa Yerusalem vogaung: mae caung:pa" ca" ga: ta" ako"- ga: ta" ra". 21 Yesu wa yao: re Myiqe: we"- nga" dao: re lam" wa,- ce: bam dao mae re: mangad:- Yerusalem vogaung: mae re: mangad: lo:- Pho" re caung:pa" nae" ayo, joe" lo: li" nae". 22 Naonhaung" Samari byu qe wa naonhaung" yao: maba: ra" yaug re caung:pa" ako"- ngadqere: ngonhaung" Yuda byu qe wa ngonhaung" yao: ba: ra" yaug re caung:pa" na:- pe"mung:ga"re khyad' yu: ru wa Yuda byu qemae" joe" li" ra". 23 Byu qe wa Mao"So: Byo qam: so' khyo" yang Pho" re dangman" ra" khyo" caung:pa" nae" ra" ayo, joe" lo: na: ra"- ana" lhao" joe" ava". Mao"So wa airu: caung:pa" mo, re o ngaui: ra". 24 Mao"So wa Byo ngad: ra". Amung: yao: re caung:pa" ra" mo, wa Mao"So: Byo qam: so' khyo" yang za: dangman" ra" khyo" yao: re qo" caung:pa" ako"- ga: ta" ra". 25 Ai: myiqe: wa Yesu re- Meshia joe" li" nae" rure ngo ba: ra"- yao: joe" li" lao"- ngonhaung" re khyo ja: cao jab li" ta" kyo" li" nae"- ga: tau" ra". 26 Yesu wa Nao we' jhau: na: ra" yaug ngo wa yao: ngad va"- ga: yao: re ta" ra". 27 Ai: ayo, mae mho"zo: qe dam: tug' joe" lo: ako". Yao: bam wa Yesu re myiqe: dayaug we' jho" jhau: na: rure lomyao gemung:- gyai mug' hao" byaug: ako". Ngadqere: ai: myiqe: re Nao pe" o: i? ga: re:- Yesu re Nao ai: myiqe: we' pe"mung: dao: jho" jhau ko" i? ga: re:- khag' re: yao: bam mavae" myid: ngad: ako". 28 Ailao" ai: myiqe: wa yao" qid yae: re to: co' mung:- vogaung: khyo dam: tug' lo" yang: vobyu qere- 29 Ngo zaui" lai: lo: ra" khyo alhab' re ngore ta" kyo: yaug re li" qu" geri:- yao: wa Meshia ngad nae" laug? ga: lo" ta" ra". 30 Airumung: vobyu qe wa vogaung: mae" Yesu jhao" thug' ye" lo" ako". 31 Ai: au: re mho"zo: qe wa Asang we"- zozo: wa,- ga: Yesu re ta" ako". 32 Ngadqere: Yesu wa naonhaung" maba: ra" zo:ve ngo qo"- ga: yao: bam re phaug' tau" ra". 33 Airumung: mho" zo:qe wa byu dayaug yaug; yang yao: re zo:ve li" byid: vasam" ra" i? ga: yao: bam yao: cao: jho" myid' na: ako". 34 Yesu wa yao: bam re- Nga" zo:ve wa ngore nhao: ke' ra" yaug myid o: ra" khyo re phug' cao" nae" we' yao: zaui: nhao: to" ra" mau" zo" re kyab' sho' zaui: nae" ru ngad: ra". 35 Naonhaung" wa gaug yad yo, joe" nae" lho" byid khye' ca" shi" ga: ta: na: ako" mangad: i? Ngadqere: ngo naonhaung" re ta" geli"- Gaug yo khyo nyang" za: qu" ke' ge,- Gaug wa yad: yu nae" ana" yao: mhang" jo; ava". 36 Yad: ra" yaug wa aphug' qo" khae: yu mung:- apyad ato: kao so' ga" ra" gaug zo re qo" jham" yu: ra". Airu: mung: qho: yaug we' yad: yu yaug wa daga" za: ngaui bau" li" genae". 37 Dayaug wa qho: mung: dayaug wa yad: yu: ra"- ga" ra" dao:khyo: wa dang: ra". 38 Ngo wa naonhaung" re- naonhaung" yao: masin: maqho" ra" yo mae" gaug zo re yad: yu nae" qhid' mae" nhao: ke' va". Gatau damyo" wa ai: yo mae qho: mung:- yao: bam: lo, mau" akyu" mae" naonhaung" qo" kham: yu: ako"- ga: ta" ra". 39 Pe"mung:ga"re yao: wa Ngo kad' lo: ra" khyo alhab' re ngore ta" kyo: yaug ngad: ra"- ga: ai: myiqe: myhi" yang ta" ruyang ngad: ra". Ai: vogaung: mae" Samari byu qe myo: sho' mo, Yesu re lam" ako". 40 Airumung: Samari byu qe Yesu jhao" joe" li" gelao"- yao: bam wa Yesu re yao: bam we' daga" thang: na nae" qhid' mae" mho' ako". Aimung: Yesu wa ai: vogaung: mae shid' ba thang: na: ra". 41 Yesu mungdao" yang yao: re lam" ra" mo, je: myo" lo: ako". 42 Aimung: yao: bam wa ai: myiqe: re Ana"- ngonhaung" lam" va"- Aiwa nao ta" yang: mangad:- yao" mungdao: re ngonhaung" yao: the' gyo" yu va" rumung: lam" ru angad:- yao: wa gaigai: yao: mug:myid dao: mae" khyad' yu: Asang ngad: rure ngonhaung" ba va" ga: ta" ako". 43 Ai: vogaung: mae shid' ba bin: na co' thao- Yesu wa ai: vogaung: mae" Galile mung" khyo ye" lo" ra". 44 Pe"mung:ga"re lapa wa yao: yao" mug; mae nga: maye, ngad: ra"- ga: Yesu yao: yao: ta" to" ra". 45 Galile mug: khyo Yesu joe" ye: lao"- Galile mang: byu qe wa yao: re lham: tug: yu: ako". Pe"mung:ga"re yao: bam wa Yerusalem mae kad' ra" Lai co' Poe mae yeleim mung:- ai: poe ba na gyo: mae Yesu kad' ra" mau" ja: khao: ngo" re yao: bam the' myao: ako". 46 Ai: thao Yesu wa qid re sabyi qang: boe" nhao: ra" Galile mung" mae" Kana vogaung: khyo dam: ye" ra". Ai: vogaung: mae" Asuya mang: zug: dayaug: yauggai zo: wa Kapena-um vogaung: mae no: na: ra". 47 Yesu wa Yuda mung" mae" Galile mung" khyo joe" lo: ra"- ga" rure ai: zug: pho" the' gyo: lao"- yao: wa Yesu jhao" ye: mung:- Kapena-um vogaung: mae no yang: shid: lo" na: ra" yao" yauggai zo: re yegai byid: nae" qhid' mae" Yesu re mho' ra". 48 Yesu wa yao: re- Naonhaung" wa ve, lho we' mug'pho: za: mamyao gere wa khag' re: lam" genae" mangad:- ga: ta" ra". 49 Ai: zug: pho" wa Nhag' bo we"- nga" zo: mashid shire li" wa,- ga: phaug' tau" ra". 50 Yesu wa yao: re- Lo" wa,- ni" yauggai zo: wa daui nae"- ga: ta" ra". Ailao" yao: wa Yesu dao: re lam" yang: dam: lo" ra". 51 Yao: phao: lo" na: au:- yao" daui daui mo, joe" li" mung:- ni" zo: daui: na: ra" ga: li" ta" kyo" ako". 52 Amung: yao: wa yao: bam re- yao" yauggai zo: khoyo, mae" gai: li" rure myid' ra". Daui daui mo, wa ayenhe' myi" thao dayo, qug ko re yao: wa no gai: lo" byaug: ra"- ga: tau" ako". 53 Ailao" yao: pho" wa ai: ayo, wa- Ni" yauggai zo: wa daui nae"- ga: yao: re Yesu ta" ra" ayo, yao: ngad: rure myid: beim" ra". Airumung: yao: we' yao" yham byu qe alhab' Yesu re lam" ako". 54 Ceru wa Yuda mung" mae" Galile mug: khyo joe" lo thao re shid' lhang ein: lhang Yesu zaui" ra" mug: pho: ve,lho ngad: ra". 1 Ai: thao Yesu wa Yuda byumyu" qe: caung:pa" thung" dalam: jo, yang:- Yerusalem vogaung: khyo ye" lo" ra". 2 Yerusalem vogaung: mae" Yao Kham: Dung: nhae mae Hebre myan" khyo" Bedzatha ga: mhang" ra" qid kyaung" dalam: jo; ra". Ai: qid kyaung" lhang" yang: zaung ngo" lam: kad' to" ako". 3 Ai: zaung jham: akhug mae myo, jid- khyid qeim mo,- gaung jam: shid: mo,- no phyo: qhug' ra" mo, myo: sho' lang" jo; bam: ako". 4 Ai: mae sam xe: she' zin lam: lam: no: ra" byu dayaug na: ra". 6 Yao: airu: lang" jo; rure Yesu myao mung:- yao: no: na: ru gyai myao" va" rure Yesu ba: ra". Aimung: Yesu wa ai: no yaug re- Nao no gai: lo" nug: i? ga: myid' ra". 7 Ai: no yaug wa Nhag' bo we"- qid lab: li" ra" au:- qid kyaung" khyo ngore jhui" vao ye: nae" byu cemae ngo maqo"- ngo vao ye: nae" seim" na: au:- nga" qhid' re su gaje dayaug yaug shi" vao ye" lo" byaug byaug mung: ra"- ga: Yesu re ta" ra". 8 Yesu wa yao: re To" wa,- ni" yab qo re gaug: vo, yang:- su" lo" wa,- ga: ta" ra". 9 Ailao"- aiyaug wa gai: lo" mung: yao" yab qo re gaug; vo, yang: su" lo" ra". Ai: ba wa Dugno: Ba ngad: ra". 10 Aimung: kheim: so' qo" ra" Yuda qe wa ai: no gai: lo" yaug re- ana" ba wa Dugno: Ba ngad: ra"- ni" yab qo vo; ru wa ngonhaung" Tarha" re lhoe" ru ngad: ra"- ga: ta" ako". 11 Ailao"- yao: wa Ngo re no gai byid' ra" yaug wa ni" yab qo gaug: vo, yang: su" lo" wa,- ga: ngore ta" ra"- ga: phaug' tau" ra". 12 Yao: bam wa yao: re- Nao re ceru: kad' nae" ta" yaug wa khag' ngad: i? ga: myid' ako". 13 Ngadqere: ai: no gai: lo" ra" yaug wa Yesu khag' ngad: rure yao: maba ngad: ra". Pe"mung:ga"re ai: jo, qo mae mo, byu qe ham: na ko" ru we' Yesu wa sae za: khug' phao: thug' lo" byaug yang: ngad: ra". 14 Ai: thao Yesu wa aiyaug re caung:pa" Yham mae the' myao mung: yao: re- Tae" gyo: wa,- nao wa ana" no gai: ava"- Qobo dakad' lo: wa,- airu: mangad: re nao wa cetho' xo: ru qhug' li" nae"- ga: ta" ra". 15 Ailao"- aiyaug wa thug' lo" mung:- yao: re no gai byid: yaug wa Yesu ngad: rure kheim: so' qo" ra" Yuda qere lo" ta" kyo" ra". 16 Airumung: yao: bam wa Dugno: Ba mae Yesu no gai byid' ruyang yao: re yhin" qhid: li" ako". 17 Yesu wa yao: bam re- Nga" Pho" wa khonhae" re: mau" zaui" na:- amung: ngore: mau" zaui: ca"- ga: ta" ra". 18 Ce: dao: thoe: yang kheim: so' qo" ra" Yuda qe wa yao: re se' nae" je yang: myid: phyid' ako". Pe"mung:ga"re yao: wa Dugno: Ba: tarha" re lhoe" ruyang za: re: mangad:- Mao"So re yao: Pho" ga: ta" mung:- yao: yao" gaung re Mao"So we' daqi" ngad: ra" khyo" kad' ruyang ngad: ra". 19 Airumung: Yesu wa yao: bam re Naonhaung" re ngo dang za: ta" geli"- yao:Zo: wa yao: yao" myid khyo" pe" re: maqo" kad' ngad: ra". Yao: Pho" kad' na: rure yao: myao: ra" gu: re za: yao: kad' ra"- yao:Pho" kad' rure Yao:Zo: re: kad' ra". 20 Pe"mung:ga"re Yao:Pho" wa Yao:Zo: re jhid'de; mung: yao: yao: kad' na: ra" mau" zo" alhab' Yao:Zo: re qhu" byid' ra". Cetho' je: qi" ra" mau" re zaui: nae" lhao" re:- yao:Zo: re qhu" byid' li" nae". Amung: naonhaung" wa mug' hao" byaug: li" genae". 21 Yao:Pho" wa shid: ra" mo, re tau: to' yu mung:- yao: bam re kao so' byid' ru we' dakhyo:- yao:Zo: re: yao: o ngaui: ra" mo, re kao so' byid' ra". 22 Yao:Pho" yao: yao: wa khag' rere: dao: makho' ngad: ra". 23 Byu alhab' wa Yao:Pho" re phug' te' byid' ru we' dakhyo:- yao:Zo: rere: phug' te' byid: genae" qhid' mae" yao: Pho" wa dao: kho' nae: akho: akhang" alhab' Yao:Zo: re byid' to" ra". Yao: Zo: re nga: mayhe' byid: yaug khag' ngadqere: yao: Pho" re nga: mayhe' byid: ngad: ra". 24 Naonhaung" re ngo dang za: ta" geli"- nga" dao: thoe re gyo" yu mung:- ngore nhao: ke' ra" yaug re lam" ra" yaug wa apyad ato: kao so' qo" yu: ra"- Shid: rumae" kao so' daui: ru khyo lai: lo va" yaug ngad mung: yao: wa dao: kho' ru maqhug' nae". 25 Naonhaung" re ngo dang za: ta" geli"- shid: jo; ra" mo, wa Mao"So: Yao: Zo" thoe re the' gyo: nae" ayo, joe" lo: li" nae"- ai: ayo, wa ana" lhao" joe" ava". Aimung: ai: thoe re the' gyo" ra" mo, wa kao so' qo" daui: li" genae". 26 Yao: Pho" wa yao: yao: kao so' ajhaung ngad: ru we' dakhyo:- yao:Zo: rere: kao so' ajhaung boe" nhao: to" ra. 27 Yao: wa Byu:Yao:Zo: ngad: ruyang dao: kho' nae" akho: akhang" yao: re ab byid' to" ra". 28 Ceru re damug' ge,- shid; jo; ra" mo, alhab' wa yao" thoe re the' gyo: mung:- yao: bam: lab mae" thug' li" genae" ra" yo, khyin: joe" lo: li" nae". 29 Gai: ra" mau" zo" kad' ra" mo, wa kao so' daui: ra" khyo- magai: ra" mau" kad' ra" mo, wa dao: phyid' qhug' nae" ra" khyo- daui: to" li" genae". 30 Ngo wa ngoyao" kheim: so' khyo" pe" re: maqo" kad'- Mao"So ngore ta" ru we' dakhyo: za: ngo wa dao: kho' ra". Amung: nga" dao: kho' ru wa din: vang" ra"- pe"mung:ga"re ngo wa ngoyao: myid: o: ra" khyo" kad' ru mangad:- ngore nhao: ke' ra" yaug myid o: rure za: kad' ra". 31 Ngo wa ngoyao" gaung re sagse: kham: yu: ngad: re wa nga" sagse: kham: ra" dao: wa tarha" mavao ngad: ra". 32 Ngadqere: nga" khyo re sagse: kham byid: yaug gatau dayaug na: ra"- yao: kham: ra" sagse: dao: wa dang: rure ngo ba:. 33 Naonhaung" wa Yohan jhao" naonhaung" lagyo: nhao: ke' mung:- yao: wa dangman" rure sagse: kham byid' ra". 34 Aiwa nga" qhid' mae" byu dayaug yaug: yang sagse: kham byid: qo mung: mangad:- ngo ce: dao: re ta" ru wa naonhaung" khyad' yu: ru qhug' genae" qhid' mae" ngad: ra". 35 Yohan wa myishae de, mung: bao: jo; ra" myibaung: ngad: ra". Naonhaung" wa yao" bo" bao khug mae dazab za: pyo" na nug: ako". 36 Ngadqere: Yohan kham byid' ra" sagse: tho' je: qi" ra" sagse: ngo qo" ra". Ngo kad' ra" mau" wa Nga" Pho" yang ngore nhao: ra" mau" ngad mung:- aijham wa ngore Nga"Pho" yang nhao: ke' ru ngad: rure sagse: qhu" byid' ra". 37 Ngo re nhao: ke' ra" Nga"Pho" yao: re:- nga" khyo re sagse: kham byid' ra". Naonhaung" wa yao" thoe re khonhae" re: magyo" qu" ru we' yao" myo,khung: re mamyao: qu" ko" ngad: ra". 38 Yao" mungdao: re: naonhaung" nhag' lam: khug mae make' to: ngad: ako". Pe"mung:ga"re naonhaung" wa yao" yang nhao: ke' ra" yaug re malam" ko" ngad: ra". 39 Naonhaung" wa jham: mugsug' mae apyad ato: kao so' the' myao: li" nae"- ga: myid: jho geyang: jham: mugsug' jham re nghe' xeim: ako". 40 Ai: jham: mugsug' jham yao: re:- nga" khyo re sagse: kham byid' ako". Ngadqere: naonhaung" wa kao so' qo" yu nae" qhid' mae" ngojhao" manug: li" ko" ngad: ra". 41 Ngo wa byu: yang caung:khin" nae" khyo re maqho- 42 ngadqere: naonhaung" pe" ru" ra" byu qe ngad ko" rure ngo ba: ra". Naonhaung" aung khug mae Mao"So re jhid'de; ra" myid mabo ko" rure ngo ba:. 43 Ngo wa Nga"Pho" kheim: so' we' joe" li" yaug ngad:- ngadqere: naonhaung" ngore malham: khae: yu ko" ngad: ra". Dayaug yaug yao: yao" kheim: so' we' joe" li" re wa yao: re naonhaung" lham: khae: yu genae" ngad: ako". 44 Naonhaung" wa yao: cao: yao" yang caung:khin" rure kham: yu nae" o mo, ngad: ako". Ngadqere: date: za: ngad: ra" Mao"So: yang caung:khin" rure qo" kham: yu nae" wa naonhaung" qam: make' ko" ngad: ra". Airu: angad: re wa naonhaung: ngore khoru: qo" lam" genae" i? 45 Ngadqere: ngo wa naonhaung" re Nga"Pho" qhid' kheim: mae qobo zhaug' nae" yaug ngad: ein: dajho ge,- naonhaung" re qobo zhaug' nae" yaug wa naonhaung: yao: myid: lao" na ko" ra" Moshe yaug angad: li" nae". 46 Naonhaung" Moshe re gaigai: yao: lam" vako" ngad: re wa ngo rere: lam" genae" ngad: ra"- pe"mung:ga"re Moshe wa nga" khyo re tung" to" ra". 47 Moshe tung" to" rure naonhaung" malam" gere wa naonhaung" nga" dao: re khoru: qo" lam" genae" i? ga: ta" ra". 1 Ai: thao re Yesu wa Galile tham: (Tiberia tham: ga: re: mhang" ako") thoete' khyo gau" ye"lo" ra". 2 No phyo: qhug' ra" mo, re gai byid' ra" mug' pho: ve, lho jham re mo, byu qe the' myao gemung:- byu phung: mo" zang Yesu thao cao" ako". 3 Yesu wa bug gaung dalam: khyo Do, ye: mung:- yao" mho"zo: qe we' daga" yezaung: jo; ra". 4 Lai co' Poe kad' nae" ba na jhao" li" na: ava". 5 Yesu qu" ke' re mo, byu qe ajham ataung- yao: jhao" li" na ko" rure myao mung:- Philib re ai: mo, byu qere laug: zho: nae" zo:ve ngonhaung" khai: mae yevai zai laug i? ga: myid' ra". 6 (Yesu airu: myid' ru wa Philib re jham" qu" ru ngad: ra". Yao: wa khoru: kad' nae" rure ba: to: gau ngad: ra".) 7 Ailao" Philib wa yaug khao: ngo" re dajhid' jhid' za: byid: zho: nae" lhao" re:- ngaui shid' yo: yang vai: re lhao" re: malaug zai ngad: ra"- ga: phaug' tau" ra". 8 Yesu mho"zo: qemae" Simon Petru; yao: nhaung: Andre wa 9 Bale mug ngo" khai" we' ngo: shid' dau: vin: ra" yauggai nau" dayaug cetau mae na: ra"- ngadqere: aigu" yang za: wa mo,byu qe alhab' qhid' mae" laug nae" mangad:- ga: ta" ra". 10 Yesu wa Mo,byu qere zaung nhao ge,- ga: yao: bam re ta" ra". (Aimae vahau: gyai yaug: ra") Aimung: mo,byu qe alhab' zaung: jo; ako"- Yauggai qe ngo" taung ko ngad: ako". 11 Yesu wa ai: mug re yu: yu mung: Mao"So re jeju bin: caung: byid: lao"- aimae zaung: jo, ko" ra" mo, byu qere gae byid' ra". Ngo: rere: ai we' dakhyo: kad' ra"- Mo,byu qe wa yao: bam o: nho" zo" ako". 12 Yao: bam alhab' mo, zo" gyi: vagelao"- Yesu wa amyid: avho: maboe" vashao:- zo" tang" ra" aje, aman" jham re gaug: zhang: yu ge,- ga: yao" mho"zo: qere ta" ra". 13 Aimung: yao: bam wa alhab' re gaug: zhang: yu ko" re- bale mug ngo" khai" mae" mo, byu qe zo" tang" ko" ra" aje, aman" jham daxe: shid' gyan byang" sho' qo" gaug: zhang: yu: ako". 14 Yesu kad' ra" ce: mug' pho: ve, lho re the' myao ko" ra" mo,byu qe wa Ceyaug wa dang za: mug:myid dao khyo joe" li" nae" ga: ta" to" ra" lapa yao: ngad nhaung? ga: ta" ako". 15 Yesu wa yao: bam li" taung" yu yang:- maqad maqui" kho:kham kad' nhao: li" genae" rure ba mung:- bug gaung khyo yao: za: dam: do, ye" lo" ra". 16 Myi" thao joe" lao"- Yesu mho"zo: qe wa Galile tham: khyo gyo" ye" lo" mung:- 17 lha dakhye' dao yedo; zaung yang:- tham: thoete' mae" Kapena-um khyo dam: tug' gau" phao: lo" ako". Mug: cad' lo ngadqere: Yesu wa yao: bam jhao" majoe" lo shingad: ra". 18 Ai: au: re la qam" hug' lo mung:- tham: mae bang: lhung" to" li" ra". 19 Mho"zo: qe wa khyo sam byid man: vha" ko bin: gau" lo" gethao re- Yesu wa qid dao mae khyo su" lo: na mung:- lha khyo te' lo: na: rure yao: bam myao gelao"- yao: bam wa gyaug: din: pye' ako". 20 Yesu wa dagyaug ge,- ngo angad: ga: yao: bam re ta" ra". 21 Ailao"- yao: bam wa Yesu re ngaui bau: za: lha dao khyo lham: to' yu: ako". Ailao"jao"- lha wa yao: bam thang nug: ra" jo, qo khyo joe" lo: ra". 22 Thao: ba re tham: thoete' mae thang: na geco' ra" mo,byu qe wa aitau mae lha dakhye' za: jo; rure myid: beim" li" ako". Amung: ai: lha dao mae Yesu maye: bozaung lo:- yao" mho"zo: qeza: gau" lo" ko" rure yao: bam ba: ako". 23 Ngadqere: Tiberia te' mae" lha jham wa Yesu jeju bin: caung: byid: thao re mo,byu qe mug zo" gyi: ko" ra" jo, qo nhae khyo joe" lo: ako". 24 Mo,byu qe wa aitau mae- Yesu re:- yao" mho"zo: qere: mana loko" ga" rure ba gelao"- yao: bam wa ai: lha jham: dao mae yedo; zaung mung:- Yesu re qho nae" qhid' mae" Kapena-um khyo gau" de; ye" ako". 25 Mo,byu qe wa tham: thoete' mae Yesu re yemyao gelao"- yao: bam wa Mho" pho" we"- nao cekhyo khonhae" joe" lo: i? ga: yao: re myid' ako". 26 Yesu wa Naonhaung" re ngo dang za: ta" geli"- naonhaung" ngore qho ko" ru wa ngo kad' qhu" ra" mug' pho: ve, lho jham: lajheim: re ba: gyo: geyang: mangad: ko" ngad: ra". Naonhaung" o: ra" nho" mug qo" zo" gyi: geyang: angad ko" ra". 27 Bab: qeim: lo" ba: ra" zo:ve qhid' mae" qam: dake' ge,- Mabab maqeim: lo" ra" apyad ato: kao so' zo:ve qhid' mae" qam: ke' ge,- Byu: Yao: Zo: wa ce: zo:ve naonhaung" re byid' li" nae". Pe"mung:ga"re Pho" Mao"So wa yao: myid vang" ra" aso: dazid re yao" dao mae thaung" te' to" ra". 28 Airumung: yao: bam wa Mao"So o: ra" mau" re qo" zaui: nae" qhid' mae" ngonhaung" khoru: kad' nae" i? ga: Yesu re myid' ako". 29 Yesu wa Naonhaung" re zaui: nhao: ra" Mao"So o: ra" mau" wa yao" yang nhao: ke' ra" yaug re lam" nae" qhid' mae" ngad: ra" ga: tau" ra". 30 Yao: bam wa Ngonhaung" nao re lam" nae" qhid' mae" nao ngonhaung" re pe" ve, lho kad' qhu" nae" i? Nao pe" mau" kad' nae" i? ga: phaug' tau" ako". 31 Jham: mugsug' mae Mao"So wa yao: bam re mug:gaung mae" mug byid: zho" ra"- ga: ta" to" ru we' dakhyo:- ngonhaung" phug' phyid' qe wa din"pyad' yo mae Mana mug zo: vako" ra" ga: phaug' tau" ako". 32 Yesu wa Ngo naonhaung" re dang za: ta" geli"- Moshe naonhaung" re byid' ru wa mug:gaung mae" mug mangad:- ngadqere: nga" Pho" wa naonhaung" re mug:gaung mae" mug agyang" byid: yaug ngad: ra". 33 Pe"mung:ga"re Mao"So byid' ra"ai: zo:ve agyang" wa mug:gaung mae" gyo" li" mung:- Myid gaung byu qere kao so' byid' ra" yaug ngad: ra"- ga: ta" ra". 34 Yao: bam wa Nhag' bo we"- ngonhaung" re ce: mug khonhae" re: byid' na la,- ga: mho' ako". 35 Yesu wa yao: bam re Ngo wa kao so' zo:ve ngad:- ngojhao" li" ra" yaug wa khonhae" re: vae: mamoe; nae"- ngore lam" ra" yaug wa khonhae" re: qid mashab' nae"- 36 Ngadqere: naonhaung" wa ngore myao gengadqere: malam" genae"- ein: ngo naonhaung" re ta" va". 37 Nga" Pho" yang ngore byid' to" ra" mo, yaug khao: ngo" ngojhao" li" li" genae". Ngo jhao" li" ra" yaug khag' rere: ngo khonhae" re: manhao: tug' ke' nae". 38 Pe"mung:ga"re ngo wa ngoyao: myid o: ra" khyo" kad' nae" qhid' mae" mug:gaung khyo" gyo" li" ru mangad:- ngore nhao: ke' ra" yaug: myid o: ra" khyo" kad' nae" qhid' mae" gyo" li" ru angad:- 39 Ngo re nhao: ke' ra" yaug myid o: ru wa yao" yang ngore byid' to" ra" mo, alhab' mae" dayaug rere: majeim: nhao lo:- lo" thao" ra" ba na mae shid: rumae" dam: daui: to" li" nhao nae" qhid' mae" ngad: ra". 40 Pe"mung:ga"re nga" Pho" myid o: ru wa Yao:Zo: re myao: ra" mo, alhab' wa lam" mung: apyad ato: kao so' qo" yu genae" qhid' mae" ngad: ra". Amung: ngo wa lo"thao" ra" ba na mae shid: rumae" kao so' daui: to" li" nhao nae"- ga: ta" ra". 41 Ailao" Yesu wa ngo wa mug:gaung mae" gyo" li" ra" mug ngad:- ga: ta" ra" dao" yang mo,byu qe wa nyhung: li" ako". 42 Aimung: yao: bam wa ceyaug wa Yoseb: yao: zo: Yesu mangad: i? Yao: pho" yao: myhi" tao rere: ngonhaung" ba: mangad: i? Aire khoru: mung: ngo wa mug:gaung mae" gyo" li" yaug ngad: ga: yao: ta" i? ga: ta" ako". 43 Yesu wa naonhaung" yao: cao: nyhung: na: ru thang: pye' ge,. 44 Ngo re nhao: ke' ra" Pho" yang ngojhao" malao" te' byid: re khag' re: ngojhao" maqo" te' li" ngad: ra". Ngo wa ngojhao" li" ra" yaug re lo" thao" ra" ba na mae shid: rumae" daui: to" li" nhao nae"- 45 Byu yaug khao: ngo" wa Mao"So: yang mho" byid' ru qhug' li" genae"- ga: lapa qe tung" to" ako". Nga" Pho" ta" ra" dao: re the' gyo: mung:- zhao: yu: ra" yaug wa ngojhao" li" ra". 46 Ceru: ta" ru wa Mao"So re myao: qu" byu dayaug yaug na: ein: khyo" ngo ta" nug: ru mangad:- Mao"So mae" joe" li" ra" yaug za: Pho" re myao: qu" ra". 47 Naonhaung" re ngo dang za: ta" geli"- Lam" ra" yaug wa apyad ato: kao so' qo" ra". 48 Ngo wa kao so' mug ngad:- 49 Naonhaung" phug' phyid' qe wa din"pyad' yo mae Mana mug re zo: gengad yang: re:- yao: bam shid: lo" byaug: ako". 50 Ngadqere: mug:gaung mae" gyo" li" ra" ce: mug re zo" ra" yaug wa mashid nae". 51 Ngo wa mug:gaung mae" gyo" li" ra" kao so' mug ngad:- ce: mug re zo" ra" yaug wa apyad ato kao so' daui: na: li" nae"- ngo byid: nae" ra" mug wa myid gaung byu qe daui: na nae" qhid' mae" nga" gaung sho: ngad: ra"- ga: ta" ra". 52 Ailao" yao: bam wa- ngonhaung" re yao" gaung sho: khoru: qo" byid: zho: nae" ga" laug i? ga: ta" mung: yao: bam yao: cao: ayo: athaung" jho" ta" ngag: qhid: li" ako". 53 Yesu wa yao: bam re- Naonhaung" re ngo dang za: ta" geli"- naonhaung" wa Byu:Yao:Zo" nho: gaung sho: re mazo:- yao" sa: re mashaug' ko" re wa naonhaung" yao" khug mae kao so' mabo genae"- 54 Nga" gaung sho: re zo: mung:- nga" sa: re shaug' ra" yaug khag' ngadqere: apyad ato: kao so' qo" ra". Aimung: lo" thao" ra" ba na mae ngo wa yao: re shid: rumae" daui: li" nhao nae". 55 Pe"mung:ga"re nga" gaung sho: wa zo:ve agyang" ngad:- nga" sa: re: shaug' ja: agyang" ngad:- 56 Nga" gaung sho: re zo: mung:- nga" sa: re shaug' ra" yaug khag' ngadqere: yao: wa nga" khug mae kao so' daui mung:- ngore: yao: mae kao so' daui: na: ra". 57 Daui: na: ra" nga" Pho" wa ngore nhao: ke' mung: yao" mathao: yang ngo wa kao so' daui: na: ru we' dakhyo:- nga" gaung sho: re zo" ra" yaug khag' ngadqere: nga" mathao: yang kao so' daui: na: li" nae". 58 Ce: mug wa mug:gaung mae" gyo" li" ra" zo:vae ngad: ra"- naonhaung" phug' phyid' qe zo: mung:- thao re shid: lo" ba: ra" ai: mug ru" ru mangad:- ce: mug re zo" ra" yaug wa apyad ato kao so' daui: na: li" nae"- ga: ta" ra". 59 Ceru wa Kapena-um vogaung: mae" Tarha" Jung Yham mae mho" shid' na: ra" au:- Yesu ta" ra" dao: ngad: ra". 60 Yao" thao cao" ra" mo, myo: sho' wa cedao: re the' gyo: gelao"- ce: mho" shid' khyo wa saung" qug' ra"- Khag' qo" kham: yu nae" i? ga: ta" ako". 61 Yao: bam airu: nyhung: na ko" rure Yesu ba mung: yao: bam re- Ce: dao" yang naonhaung" qam: shan vako" i? 62 Byu:Yao:Zo: wa azhao yao: na: ra" jo, qo khyo dam: do, lo" rure naonhaung" myao gelao"- khoru: ein genae" i? 63 Kaoso' daui nhao: ru wa Mao"So: Byo ngad: ra"- Byu: qam: so' yang pe" maqo" kad' ngad: ra". Naonhaung" re ngo ta" kyo" ra" mungdao: jham wa kao so' daui nhao: ra" Mao"So: Byo re qo" nhao: ra". 64 Ngadqere: naonhaung" mae" damyo" wa malam" ko" ngad: ra"- (Malam" ra" mo, khobam ngad ko" ru we' yao: re ab byid' pye' nae" yaug khag' ngad: rure re:- Yesu yao: sao qhid' mae" ba: to: va" ra".) 65 Byu dayaug re Pho" yang ngojhao" li" nae" khyo" makad' byid: ngad: re wa khag' re: ngojhao" qo" li" genae" mangad:- ein: naonhaung" re ngo ta" ru wa cemung: yang: ta" ru ngad: ra"- ga: Yesu xo' ta" ra". 66 Ce: dao: thoe: yang Yesu nho: thao cao" mo, myo: sho' wa dam: phaug' phao: lo" gemung:- yao" thao macao" lo: gengad: ra". 67 Aimung: Yesu wa mho"zo: daxe: shid' yaug re- Naonhaung" re: phao: lo" nug ko" i? ga: myid' ra". 68 Simon Petru wa Asang we"- ngonhaung" khag' jhao" ba: lo" nae" i? Nao wa apyad ato kao so' daui nhao: ra" mungdao: qo" yaug ngad: ra". 69 Nao wa Mao"So mae" joe" li" ra" Gyang" Lho" ra" yaug ngad: rure ana" ngonhaung" lam" mung: ba: bam va"- ga: ta" ra". 70 Yesu wa Naonhaung" daxe: shid' yaug re ngo khyin: yu: mangad: i? Ngadqere: naonhaung" mae" dayaug wa Min: Yui ngad: ra"- ga: phaug' tau" ra". 71 Yesu wa Simon Iskarud yao: zo: Yuda; khyo re ta" na: ru ngad: ra". Pe"mung:ga"re Yuda wa mho"zo: daxe: shid' yaug mae" dayaug ngad sho' ngadqere:- yao: re ab byid: nae" yaug ngad: ra". 1 Ai: thao Yesu wa Galile mung" khaung: mae su" gam" qin" ra". Pe"mung:ga"re kheim: so' qo" ra" Yuda qe wa- Yesu re se' pye' nae" qhid' mae" seim" na geyang:- yao: wa Yuda mung" khaung: mae manug: su" qin" ru ngad: ra". 2 Yuda qe: Zaung Khyae: Poe kad' nae" ba na jhao" li" na: ra"- aimung: Yesu yao: nhaung: bam wa- 3 Nao kad' ra" mau" zo" jham re ni" mho"zo: qe the' myao: lo" genae" qhid' mae" cemung" mae" thug' mung:- Yuda mung" khyo ye" lo" wa,. 4 Mang qi: nug: ra" yaug khag' ngadqere: yao: kad' ra" mau" re anyham: avho' mae pe" re: malhaung" kad' gengad: ra"- nao wa ai: mau" jham re kad' na: ruyang ni" khyo re mug: myid byu qe alhab' mo,- ba sho' kad' wa, ga: ta" ako". 5 (Yesu yao: nhaung: bam lhao" re:- yao: re malam" ko" ngad: ra".) 6 Yesu wa yao: bam re- Nga" ayo, majoe" shi:- naonhaung" ayo, kam" wa khonhae" re: ngad: ako". 7 Mug: myid byu qe wa naonhaung" re magai: nghang: ngad: ra". Ngo re kam" wa nghang" ako"- pe"mung:ga"re ngo wa yao: bam: lo, mau" magai: rure ta" na: ruyang ngad: ra". 8 Ai: poe khyo naonhaung" ye: ge,- nga" ayo, majoe" shimung:- ngo wa poe khyo maye: nae"- ga: ta" ra". 9 Yesu wa airu: ta" mung:- Galile mung" mae thang: na: jo; ra". 10 Ai: poe khyo yao: nhaung: bam ye" lo" gethao re Yesu re: ai: poe khyo anyham: avho' kad' mung: sae za: ye" lo" ra". 11 Kheim: so' qo" ra" Yuda qe wa- poe mae Yesu re qho mung:- yao: khai: mae ngad: ra" i? ga: myid' ako". 12 Mo,byu qe: phaung mae Yesu khyo re sae sae za: gyai jho" ta" na: ako". Mo,byu qe daqhae: wa Yao: wa byugai ngad: ra"- ga: ta" ako". Ngadqere: gatau daqhae: wa Byugai mangad:- yao: wa mo, byu qere khyonghung: jhui" nghung" na yaug ngad: ra"- ga: ta" ako". 13 Ngadqere: yao: bam wa- kheim: so' qo" ra" Yuda qere gyaug geyang:- Yesu khyo re de: de: za: mata" ko" ngad: ra". 14 Poe ba na agaung: ba lai lao"- Yesu wa Caung:pa" Yham khyo ye: mung:- mho" shid' qhid: na: ra". 15 Yuda kheim: so' qo" ra" mo, wa qi: sho' mug' hao" byaug ko" ru we' Ceyaug wa dalhang re: mamho" zhao: yu: qu" ru khoru: mung: ceqhi" sho' ba: ra" i? ga: ta" ako". 16 Yesu wa Ngo mho" shid' ra" khyo wa ngoyao" mho" shid' khyo mangad:- ai wa ngore nhao: ke' ra" Mao"So mae" li" ra" mho" shid' khyo ngad: ra". 17 Mao"So myid o: ra" khyo re kad' nae" kao bau: ra" yaug khag' ngadqere:- ngo mho" shid' ru wa Mao"So mae" li" ra" mho" shid' khyo ngad: ra" i? Ngoyao" mho" shid' khyo ngad: ra" i? ga" rure ba: kho' yu: li" nae". 18 Yao: yao" akho: akhang" khyo" jhau: ra" yaug wa yao: yao" phungbao qo" nae" qhid' mae" qam: ke' ra". Ngadqere: yao: re nhao: ke' ra" yaug: phungbao qo" nae" qhid' mae" myid o: ra" yaug wa din: man" ra" yaug ngad: ra"- yao: mae mhug' pyag' ru pe" mabo ngad: ra". 19 Moshe wa naonhaung" re Tarha" byid' ra" mangad: i? Ngadqere: naonhaung" mae" dayaug re: ai: Tarha" re maphug' cao" ko" ngad: ra". Naonhaung" wa ngore pe"mung: se' pye' nae" seim" na ko" i? ga" ta" ra". 20 Ailao"- mo,byu qe wa Nao wa yui vao: jaung" yaug ngad: ra"- nao re se' pye' nae" khag' seim" na: ra" i? ga: tau" ako". 21 Yesu wa Ngo Dugno: Ba mae mug'pho: ve,lho dalam: za: kad' qhu" re naonhaung" alhab' mo, mug' hao" byaug: ako"- ga: phaug' tau" ra". 22 Moshe wa naonhaung" yauggai zo: qere au: qid lhai: nae" qhid' mae" naonhaung" re amyin" byid' to" ra"- (gaigai: yao: ga" re wa Dugno: Ba mae au: qid lhai" ru kad' ako"- aire qhid yaug wa Moshe mangad:- naonhaung" phug' phyid' qe ngad: ako".) Airumung: naonhaung" wa Dugno: Ba mae yauggai zo: re au: qid lhai: khyo kad' byid' ako". 23 Airu: naonhaung" wa Moshe Tarha" re mashad' lhoe" nae" qhid' mae" Dugno: Ba mae yauggai nau" dayaug re au: qid lhai: khyo byid: ko" re wa ngo Dugno: Ba mae byu dayaug re no saug za: gai byid' ruyang naonhaung" wa ngore pe"mung: nhag' yo: ko" i? 24 Adao: pyae ave, re qu" yang: dao: dakho' ge,- Dangman" ra" khyo" dao: kho' ge,- ga: yao: bam re ta" ra". 25 Yerusalem mae" mo, byu qe daqhae: wa Kheim: so' qo" ra" mo, se' pye' nae" seim" ko" ra" yaug wa ceyaug mangad: i? 26 Qu" ge,- yao: wa de: de: za: kho" kyo" na: ra"- yao: bam wa yao: re khag' pe" maga: genhaung i? Yao: wa Meshia ngad: ra" ga" rure yao: bam gaigai: yao: ba geyang: ngad: laug i? 27 Ceyaug khai: mae" ngad: rure wa ngonhaung" ba: ra". Ngadqere: Meshia joe" li" re wa yao: khai: mae" joe' li" rure khag' re: maba genae"- ga: ta" ako". 28 Yesu wa Caung:pa" Yham mae mho" shid' na: au:- thoe qi: we' Naonhaung" ngore gaigai: yao: ba: ako"- ngo khai: mae" ngad: rure naonhaung" ba: ako". Ngo wa ngoyao" akho: akhang" khyo" joe" li" ru mangad:- ngore nhao: ke' ra" yaug wa dangman" ra" yaug ngad: ra"- naonhaung" wa yao: re maba ko" ngad: ra". 29 Ngadqere: ngo wa yao: mae" joe" li" yaug ngad: ru we' yao: wa ngore nhao: ke' yaug ngad: ruyang ngo wa yao: re ba: ra"- ga: ta" ra". 30 Ailao" yao: bam wa Yesu re taung" yu nae" seim" ako". Ngadqere: yao" ayo, majoe" shiyang: yao: re khag' re: maqo" taung: ko" ngad: ra". 31 Mo,byu qemae" myo: sho' mo, Yesu re lam" ko" ru we' Meshia joe" li" lao"- yao: wa ceyaug kad' qhu" ra" ve,lho tho' je: myo: sho' ve,lho kad' qhu" li" li" nae" i? ga: ta" ako". 32 Mo,byu qe Yesu khyo re airu: jho" so' na: rure Pharishe qe the' gyo: ge mung:- yao: bam: khinjaung qi: qe wa Yesu re taung: nae" qhid' mae" gug: gam gyezo: qe damyo" re nhao: ke' ako". 33 Yesu wa Ngo wa naonhaung" we' dayo, zo: na mung:- ngore nhao: ke' ra" yaug jhao" dam: lo" zai ngad:- 34 Ailao" naonhaung" wa ngore qho: li" genae"- ngadqere: naonhaung" ngore mamyao genae"- pe"mung:ga"re ngo na: ra" jo, qo khyo naonhaung" maqo" ye: geyang: ngad: ra"- ga: ta" ra". 35 Kheim: so' qo" ra" Yuda qe wa- Ngonhaung" maqho: myao losho'- yao: wa khai: khyo ye: nae" ga" laug i? Ngonhaung" Yuda byu qe na: ra" Greeg vogaung: jham khyo ye: mung:- Greeg byumyu" qere yemho" shid' byid: nae" ga" laug i? ga: yao: cao: jho" myid' ako". 36 Yao: wa ngonhaung" yang yao: re qho ngadqere: maqhug' genae". Aimung: yao: joe" na: jo, nae" jo, qo khyo ngonhaung" maqo" ye: genae"- ga: ta" ra". Yao: pe" ga: nug: laug i? ga: jho" ta" ako". 37 Poe lo" thao" ba- poe mae" je: akhyag: ra" ba na mae Yesu wa to" ye, mung:- Qid shab' ra" yaug khag' ngadqere: ngojhao" lo mung: shaug' ge, 38 Jham: mugsug' mae tung" to" ru we' dakhyo:- ngore lam" ra" yaug khag' ngadqere: yao" aung khug nhag' lam: mae" kaoso'qid zo: gyaung: yug: thug' li" na: ra"- ga: thoe qi: we' ta" ra". 39 Yesu airu: ta" ru wa yao: re lam" ra" mo, qo" khae: yu genae" ra" Byo re qang yang: ta" ru ngad: ra". Ai: ayo, re Yesu wa phungbao byid' ru maqhug' shimung: yang: Byo mabyid' to: shingad: ra". 40 Mo, phaung mae" mo, byu qe damyo" wa ce: dao: re the' gyo: gelao"- ceyaug wa gaigai: yao: lapa ngad: ra"- ga: ta" ako". 41 Amung: gatau damyo" wa Yao: wa Meshia ngad: ra" ga: ta" mung:- gatau damyo" wa- Dang za: Meshia wa Galile mung" mae" thug' li" nae" mangad:- 42 Jham: mugsug' mae Meshia wa kho:kham myid:zo: ngad: li" nae"- Davi na: lo: ra" Betlehem vogaung: mae khau: li" zai ngad:- ga: ta" to" ra" mangad: i? ga:ta" ako". 43 Aimung: mo,byu qe wa Yesu mathao mae majho" vang" gemung:- phung: jho" kho' lo" ako". 44 Damyo" wa Yesu re taung: nug: ako"- ngadqere: khag' re: yao: re maqo" zaui: ko" ngad: ra". 45 Gug: gam gyezo: qe dam: tug' joe" lo gelao"- khinjaung qi: qe we' Pharishe qe wa yao: bam re- yao: re naonhaung" pe"mung: mataung" lo ko" i? ga: lham: myid' ako". 46 Yao: bam wa ceyaug re" ru: khag' re: mamho" byid' qu" gengad: ra"- ga: phaug' tau" ako". 47 Ailao" Pharishe qe wa yao: bam re Naonhaung" rere: yao" yang lham: mhug' pyag' vanhaung i? 48 Kheim: so' qo" ra" mo, we' Pharishe qemae" yao: re lam" ra" byu dayaug yaug na: ga" rure naonhaung" gyo" qu" ko" i? 49 Ce: mo,byu qe wa Moshe Tarha" re maba gemung:- Mao"So: nhang: kheim: qao: mae ngad: ako"- ga: ta" ako". 50 Qhid' phyao: Yesu jhao" yeqhug' qu" ra" Nikodi ga" ra" Pharishe dayaug na: ra". 51 Nikodi wa ngonhaung" tarha" jo; ru we' dakhyo: ga" re byu dayaug re sao qhid' shi" maca: qu" lo: yao: re dao: maqo" phyid' ngad: ra"- ga: ta" ra". 52 Yao: bam wa Nao re:- Galile byu ngad: i? Jham: mugsug' mae xeim: qu" wa,- Galile mung" mae" lapa dayaug re: mathug' li" qu" rure nao myao: li" nae"- ga: yao: re ta" ako". 1 (Ai: thao yao: bam alhab' mo, yao: yao" yham khyo phao: lo" ako". Ngadqere: Yesu wa Zhan:lun: bam khyo ye" lo" ra". 2 Thao: ba ne, seim no' mae" Yesu wa Caung:pa" Yham khyo dam: ye" lo" ra". Mo,byu qe alhab' mo, wa Yesu jhao" zang" ham: li" gemung:- Yesu wa zaung: jo, yang: yao: bam re mho" shid' byid' ra". 3 Jham: Tung" Pho" qe we' Pharishe qe wa- su: lao we' shad' na: au: the' taung" yu: ra" myiqe: dayaug re jhui" li" mung:- yao: bam alhab' mo; qhid' kheim: mae ai: myiqe: re yhe' to" ako". 4 Aimung: yao: bam wa Yesu re- Mho" pho" we"- ce: myiqe: wa su: lao we' shad' na: au: yao: khyag' myao yang: taung" to" ako". 5 Airu" ra" myiqe: re wa laug baui: yang pye' se' pye' ca"- ga: Moshe wa Kham" To" Ra" Tarha" mae amyin" byid' to" ra"- ana" nao wa khoru: ein: ta" nae" i? ga: myid' ako". 6 Yao: bam ceru: ta" ko" ru wa Yesu re qobo qo" zhaug' nae" qhid' mae" ta" ru ngad: ako". Yesu kam wa gam" mung: yao" lo,nyhug' yang myid gaung mae khyang" tung" na: ra". 7 Ai: tau mae ye; jo; ra" mo, wa Yesu re dao: myid: paug' myid: mung: kad' ako". Ailao" Yesu wa tau: qu" ke' mung:- yao: bam re Naonhaung" mae" qobo mashad' ra" yaug: yang shi" sao qhid' ai: myiqe: re laug baui: yang pye' ge,- ga: ta" ra". 8 Ai: thao Yesu wa dam: gam" lo" mung: myid gaung mae thug' khyang" na: ra". 9 Yao: bam wa cedao: re the' gyo: gelao"- qi: mo, shi" sao qhid' ai:tau mae" thug' lo" mung:- yao: bam alhab' mo, dayaug: thao dayaug thug' lo" byaug: ako". Yesu za: dang: jo, mung:- ai: myiqe: wa aimae ye; jo; ra". 10 Ailao" Yesu wa tau: qu" ke' mung: myiqe: re- yao: bam khai: lo" vako" ra" i? Nao re dao: phyid' nae" dayaug re: mana i? ga: myid' ra". 11 Ai: myiqe: wa Nhag' bo we"- dayaug re: mana ga: tau" ra". Ailao" Yesu wa Ngo re:- nao re dao: maphyid' nae"- Lo" se,- qobo dadam: kad' lo- ga: ai: myiqe: re ta" ke' ra".) 12 Yesu wa Pharishe qere Ngo wa mug:myid dao: nho: bo" bao ngad:- nga" thao cao" ra" yaug khag' ngadqere: kao so' bo" bao qo" yu mung:- mug:cad' mae khonhae" re: masu: nae"- ga: ta" ra". 13 Ailao" Pharishe qe wa Yesu re- Nao wa naoyao" khyo re sagse: kham: na: ra"- aimung: ni" sagse: kham: ru wa tarha" mavao ngad: ra"- ga: ta" ako". 14 Yesu wa Ngo wa- ngoyao" khyo re ngoyao: sagse: kham ngadqere: nga" sagse: kham dao: wa tarha"vao: ra"- pe"mung:ga"re ngo khai: mae" li" ru ngad: ru we' khai: khyo lo" zai ngad: rure ngo ba:- naonhaung" wa ngo khai: mae" joe" li" mung:- Khai: khyo lo" nae" rure maba ngad: ako". 15 Naonhaung" wa xao su byu: li khyo" za: dao: kho' ako"- ngo wa khag' rere: dao: maphyid'- 16 Ngadqere: ngo dao: phyid' ngad: re wa ngo dayaug za: dao: phyid' ru mangad:- ngore nhao: ke' ra" Nga"Pho" we' daga" dao: phyid' ru ngad mung:- nga" dao: phyid' ru wa dangman" ra". 17 Sagse: shid' yaug: dao: jho" zhaung: lao" wa Tarha" vao:- ga: naonhaung" tarha" mae tung" to"ako". 18 Ngo wa ngoyao" khyo re sagse: kham: ra"- amung: ngore nhao: ke' ra" Nga"Pho" re: nga" khyo re sagse: kham: ra"- ga: ta" ra". 19 Yao: bam wa Ni" pho" khai: mae i? ga: yao: re myid' ako". Ailao" Yesu wa naonhaung" ngo rere:- nga"Pho" rere: maba ngad: ako"- naonhaung" ngore ba ko" ngad: re wa Nga" Pho" rere: naonhaung" ba genae" ngad: ra"- ga: yao: bam re tau" ra". 20 Ce: dao: jham alhab' wa Yesu Caung:pa" Yham mae" alu: ngaui ban" jham zhaung: to: ko" ra" qe, mae mho" shid' na: ra" au: ta" ra" dao: jham ngad: ra". Yao" ayo, majoe" shiyang: yao: re khag' yang re: mataung: ko" ngad: ra". 21 Aimung: Yesu yao: bam re dam: ta" ru wa- ngo wa phao: lo" zai ngad:- naonhaung" wa ngore qho: li" genae"- ngo ye" lo" ra" jo, qo khyo naonhaung" maqo" ye: ko" ngad: ra"- ga: ta" ra". 22 Airumung: kheim: so' qo" ra" Yuda qe wa Ngo ye"lo" ra" jo, qo khyo naonhaung" maqo" joe" genae" ga: yao: ta" ra". Ce wa yao: yao" gaung re yao: yao: se' shid nae"- ga: ta" nug: ru laug i? ga: ta" ako". 23 Yesu wa Naonhaung" wa ce: o: gye, mug:myid we' sin" ra" mo, ngad: ako"- ngo kam" wa tho' mae" joe" li" ru ngad:- naonhaung" wa ce: mug:myid mae" mo, ngad: ako". Ngadqere: ngo wa ce: mug:myid mae" mangad:- 24 Aimung: naonhaung" wa yao: yao" qobo mae shid: li" genae"- ein: naonhaung" re ngo ta" va". Ngo wa Ngo- ga: yaug ngad: rure naonhaung" malam" ko" re wa naonhaung" wa yao: yao" qobo mae shid: li" genae"- ga: ta" ra". 25 Yao: bam wa Nao khag' ngad: i? ga: yao: re myid' ako". Ailao" Yesu wa yao: bam re Naonhaung" re ngo sao qhid' mae" ta" kyo" to: gau ngad va"- ga: tau" ra". 26 Naonhaung" khyo re ngo ta" nae" khyo myo: sho' jo; ra"- naonhaung" re dao: phyid' nae" rure: myo: sho' jo; ra". Ngadqere: ngore nhao: ke' ra" yaug wa dangman" ra" yaug ngad mung:- ngo wa yao: mae" the' gyo" yu: ra" gu: reza: mug:myid byu qere ta" kyo" ru ngad:- ga: ta" ra". 27 Yesu wa Pho" khyo re ta" kyo" na: rure yao: bam maba: gyo: ko" ngad: ra". 28 Airumung: yao: wa Byu: Yao: Zo: re naonhaung" tau: to' to: gelao"- Ngo wa Ngo ga: yaug ngad: rure naonhaung" ba: li" genae". Ailao" ngo wa Nga"Pho" yang mho" byid' to" gu: reza: ta" mung:- ngo wa ngoyao" kheim: so' khyo" yang pe" daja: re: makad' rure ba: li" genae"- ga: yao: bam re ta" ra". 29 Amung: ngore nhao: ke' ra" yaug wa ngo we' daga" ngad: na: ra"- ngo khonhae" re: yao: o ngaui: rure zaui" na: ruyang yo: wa ngoyao: reza: mashapye' to: ngad: ra"- ga: ta" ra". 30 Yesu ta" ra" dao: aijham re the' gyo" ra" mo, myo: sho' wa yao: re lam" ako". 31 Airumung: Yesu wa yao: re lam" ko" ra" mo, re- Naonhaung" nga" mho" shid' dao: re phug' cao" ko" re wa naonhaung" wa nga" mho"zo: gyang" qe ngad: ako". 32 Naonhaung" wa ai: dangman" rure ba: li" genae"- amung: ai: dangman" ru wa naonhaung" re lhoe' ke' byid' li" nae"- ga: ta" ra". 33 Ailao" yao: bam wa Ngonhaung" wa Abraham nho: myid:zo: qe ngad: ra"- ngonhaung" wa khag' jeim re: madoe; qu"- aire naonhaung" re lhoe' ke' byid' li" nae"- ga: nao ta" ru wa pe" re ta" nug: i? ga: myid' ako". 34 Yesu wa yao: bam re Naonhaung" re ngo dang za: ta" geli"- Qobo kad' ra" yaug khag' ngadqere: qobo: nho: jeim ngad: ra". 35 Jeim wa dinkhu: mae khonhae" re: maqo" na ngad: ra"- yao: zo: kam" wa khonhae" re: qo" na: ra". 36 Yao: zo" yang naonhaung" re lhoe' ke' byid' ngad: re wa loe; beim: li" genae". 37 Naonhaung" wa Abraham: nho: yao: zo: qe ngad: rure ngo ba:- ngadqere: naonhaung" wa nga" mho dao: re makhae: yu nug gemung: yang: ngore se' pye' nae" seim" na: ako". 38 Ngo wa Pho" yang ngore qhu" byid' ra" gu: re ta" ra"- naonhaung" kam" wa naonhaung" yao: pho" yang ta" ra" gu: re kad' ako"- ga: ta" ra". 39 Yao: bam wa Ngonhaung" pho" wa Abraham ngad:- ga: yao: re tau" ako". Yesu wa naonhaung" wa Abraham nho: myid:zo: qe gaigai: yao: ngad ko" ngad: re wa Abraham kad' ra" mau" jham re naonhaung" kad' li" genae". 40 Ngo kad' ra" gu: alhab' wa Mao"So mae" the' gyo" yu: ra" khyo re naonhaung" re ta" kyo" na: ru ngad: ra"- ngadqere: naonhaung" wa ngore se' pye' nae" seim" na: ako". Abraham wa airu: makad' lai: lo ngad: ra". 41 Naonhaung" wa naonhaung" yao: pho" kad' lai: lo: ru we' dakhyo:- kad' na: ako"- ga: ta" ra". Yao: bam wa- Mao"So yao:za: nganhaung" nho: dayaug za" Pho" ngad mung: ngonhaung" wa yao" yauggai zo: agyang" qe ngad:- ga: phaug' tau" ako". 42 Ailao" Yesu wa yao: bam re- Mao"So wa naonhaung" yao: pho" ngad: re wa ngore jhid'de; genae" ngad: ra". Pe"mung:ga"re ngo wa Mao"So mae" joe" li" mung:- ana" cemae ngad va"- ngo wa ngoyao" akho: akhang" khyo" joe" li" ru mangad:- Mao"So wa ngore nhao: ke' ra". 43 Ngo ta" ra" dao: re naonhaung: pe"mung: maba: gyo: ko" i? Pe"mung:ga"re aiwa nga" mungdao: naonhaung" maqo" tho' tae" gyo" yu geyang: ngad: ako". 44 Naonhaung" wa naonhaung" yao: pho" ai: min:yui: nho: myid:zo: qe ngad gemung:- naonhaung" yao: pho" myid: o: ra" khyo re cao" nug mo, ngad: ako". Yao: wa sao qhid maqhid mae" byu se' yaug ngad: ra". Yao: mae dangman" ru mabo: ruyang yao: wa dangman" ra" shad' mae khonhae" re: mana: qu" ngad: ra". Yao: mungdao: ta" lao" yao: wa yao" ave, ngad: ru we'dakhyo:- kad' na: ru ngad: ra"- pe"mung:ga"re yao: wa mhug' hab' ngad mung: mhug' hab' qe alhab' mo; yao: pho" ngad: ra". 45 Ngadqere: ngo wa dangman" ru ta" mung: ai: mathao: yang naonhaung" ngore malam" ko" ngad: ra". 46 Ngo wa qobo qo" yaug ngad: rure naonhaung" mae" khoyaug lam: sagse: qo" kham ko" i? Ngo wa dangman" ru ta" re pe"mung: naonhaung" ngore malam" ko" i? 47 Mao"So mae" ngad: ra" yaug wa Mao"So: dao: jham re tae" gyo" ra"- ngadqere: naonhaung" wa Mao"So mae" mangad: gemung: naonhaung" matae" gyo: ngad: ako". 48 Ailao" yao: bam wa Nao wa Samari byu ngad: ra"- amung: yui zaung: ra" yaug ngad: ein: ngonhaung" ta" ru wa dang: mangad: i? ga: myid' ako". 49 Yesu wa Ngo wa yui zaung yaug mangad:- ngo wa Nga"Pho" re phug' te' yaug ngad: ra"- ngadqere: naonhaung" wa ngore phug' mate' ko" ngad: ra". 50 Ngo wa ngoyao" gaung re phug' te' byid: genae" rure qho: na yaug mangad:- ngadqere: aire qho byid' na yaug we' nga" bo: de, yang: dao: kho' byid' na ru dayaug na: ra". 51 Naonhaung" re ngo dang za: ta" geli"- nga" mho" shid' dao: re phug' cao" ra" yaug wa khonhae" re: mashid nae"- ga: tau" ra". 52 Ailao" yao: bam wa Nao wa gaigai: yao: yui zaung yaug ngad: rure ngonhaung" ana" khyag' za: ba va". Abraham wa shid: byaug va"- Lapa qere: shid: byaug vako" ra"- ngadqere:nao wa nga" mho" shid' dao: re phug' cao" ra" yaug wa khonhae" re: mashid nae"- ga: ta" ra" ga: ta" ako". 53 Ngonhaung" yao: pho" Abraham wa shid: byaug: ava"- nao wa Abraham tho' je: qi: yaug ngad: i? Lapa qere: shid: byaug: avako"- nao wa khag' ngad: ein: myid: i? ga: myid' ako". 54 Yesu tau: mung:- ngo wa ngo yao" gaung re phug' te' nga: yhe' byid' ngad: re wa ai: phug' te' byid' ru wa akeim ngad: ra"- ngore nga: yhe' byid: yaug wa nga" Pho" ngad: ra"- aiyaug reyao: ngonhaung" Mao"So ngad: ga: naonhaung" ta" ako". 55 Ngadqere: naonhaung" wa yao: re maba ko" ngad: ra"- ngo kam" wa yao: re ba:- ngo wa yao: re maba ein: ta" ngad: re wa ngo wa naonhaung" we' dakhyo: mhug' hab' ngad: li" nae". Ngadqere: ngo wa yao: re ba mung:- yao" dao: re ngo phug' cao" ra". 56 Naonhaung" yao: pho" Abraham wa ngo joe" li" nae" ba na re the' myao nae" rure ngaui: ra"- yao: wa aire the' myao mung: ngaui bau" ra"- ga: ta" ra". 57 Yao: bam wa Yesu re Nao wa apyad ngo" xe zin lhao" re: madau shingad: ra"- Abraham re nao myao va" ga" o? ga: ta" ako". 58 Yesu wa- Naonhaung" re ngo dang za: ta" geli"- Abraham mana shimae" ngo na va"- ga: tau" ra". 59 Ailao" yao: bam wa Yesu re pye' nae" ga: laug baui jham gaug: yu: ako"- ngadqere: Yesu wa phao: vho' mung: Caung:pa" Yham mae" thug' lo" ra". 1 Yesu khyo su" lo" na: ra" au:- khau: mae" myo, jid: ra" byu dayaug re yao: myao: ra". 2 Yao" mho"zo: qe wa yao: re Mho" Pho" we"- Aiyaug khau: mae" myo, jid: ru wa khag' qobo: yang i? Yao: yao" qobo: yang ngad: ra" i? Mangad: lao" yao: myhi" yao: pho" nho: qobo ngad: ra" i? ga: myid' ako". 3 Yesu wa Yao: myo, jid: ru wa yao" qobo: yang re: mangad:- yao: myhi" yao: pho" tao: qobo: yang re: mangad:- yao: myo, jid: ru wa Mao:So: qam: so' myao: thug' li" nae" qhid' mae" ngad: ra". 4 Ngo re nhao: ke' yaug: mau" re na" ngad shi" au:- ngonhaung" zaui: ca" ra". Khag' re: mau" magai: zaui" ra" myi" ayo, joe" lo: li" nae". 5 Ngo wa mug:myid dao mae na: jo; au:- mug:myid: dao: nho: bo" bao ngad:- ga: ta" ra". 6 Ceru: bin: ta" lao"- Yesu wa myid gaung mae khata: phoe" mung: tham: bab dajhid' lhag' yu yang:- ai: myo, jid pho" nho: myo,jid' re gyad byid: mung:- 7 Siloam qid tham: mae ni" myo,khung: yecid' pye' wa,- ga: ta" ra". (Siloam ga" ru wa nhao: ke'- ga" ru ngad: ra.) Airumung: ai: myo, jid pho" wa yao" myo,khung: yecid' yu yang: myo, myao mung: dam: phao: lo" ra". 8 Ailao" yao" yham kyo: cao: qe we' qhid' phyao: yao: mho' zo" na: rure myao: qu" va" ra"- mo,byu qe wa Ceyaug wa lhaung" mho' zo" zaung: jo, yaug mangad: i? ga: ta" ako". 9 Damyo" wa Ngad: ra"- ga: ta" mung: gatau damyo" wa Ceyaug mangad:- yao: we' dau yaug ngad: ra-" ga: ta" ako". Aimung: aiyaug wa yao: yao:- ngo wa ai: myo,jid yaug ngad va"- ga: ta" ra". 10 Yao: bam wa nao ana" khoru: myo, qo" myao: lo: i? ga: myid' ako". 11 Yao: wa Yesu ga: mang yaug wa tham: bab dajhid' lhag' yu yang: nga" myo,jid' re gyad byid: mung:- Siloam qid tham: mae nga" myo,khung: yecid' pye' nhao: ra"- ngore: ye" lo" mung:- myo,khung: yecid' pye' we' nga" myo, myao: li" ra"- ga: tau" ra". 12 Yao: bam wa Yao: wa khai: mae ngad: ra" i? ga: myid' ako". Ailao" yao: wa Ngo maba- ga: tau" ra". 13 Ailao" yao: bam wa qhid' phyao: myo, jid: ra" yaug re Pharishe qejhao" jhui" ye" ako". 14 Yesu tham: bab lhag' yu mung: ai: myo, jid pho" re myo, myao nhao: ra" ba na wa Dugno: Ba ngad: ra". 15 Pharishe qe wa ai: myo, myao: li" va" yaug re yao" myo, dam: myao: li" ra" khyo re dam: myid' ako". Aimung: yao: wa yao: bam re Yao: wa nga" myo,jid' mae tham: bab: gyad byid' ra"- nga" myo,khung: yecid' pye' lao"- nga" myo, myao: li" ra"- ga: ta" ra". 16 Pharishe qemae" damyo" wa Ai: yaug wa Dugno: Ba: tarha" re phug' cao" yaug mangad' ruyang Mao:So mae" joe" li" ra" yaug wa magai: boe" ngad: ra"- ga: ta" mung: gatau damyo" wa Qobo qo" ra" byu dayaug wa airu" ra" mug' pho: ve,lho jham re khoru: qo" kad' nae" i? ga: ta" ako". Aimung: yao: bam yao: cao: myid majho" vang" ngad: ako". 17 Aimung: Pharishe qe wa ai: myo, myao: li" ra" yaug re- yao: wa ni" myo,jid' re myao nhao: ra"- ga: nao ta" ra". Yao" khyo re nao khoru: ein: ta" nae" i? ga: dalhang dam: myid' ako". Ailao" yao: wa Aiyaug wa lapa ngad: ra" ga: tau" ra". 18 Ngadqere: kheim: so' qo" ra" Yuda qe wa aiyaug qhid' phyao: myo, jid yaug ngad: ga" rure we' ana" yao: myo, myao: li" rure manug: lam" ko" ngad: ra". 19 Aimung: yao: bam wa yao: myhi" we' yao: pho" tao re khai: yu yang:- ceyaug wa ni" shid' tao: nho: yauggai zo: ngad: i? Khau: mae" myo, jid ngad: ga: ni" shid' tao ta" ako"- aire ana" yao: khoru: myo, myao: li" ra" i? ga: yao: shid' tao re myid' ako". 20 Yao: myhi" yao: pho" tao wa Yao: wa nga" shid' tao: nho: yauggai zo: ngad: ru we' khau: mae" myo,jid ngad: rure nga" shid' tao ba:. 21 Ngadqere: yao: ana" khoru: myo, myao: li" ra" khyo we' yao" myo,jid' re khag' yang myao nhao: rure wa nga" shid' tao maba- yao: re: apyad qi: va"- aimung: yao: re myid: ge,- yao" khyo re yao: yao: qo" ta" naeva"- ga: tau" ako". 22 Yao: myhi" yao: pho" tao ceru: tau: ko" ru wa kheim: so' qo" ra" Yuda qere gyaug geyang: ngad: ako". Pe"mung:ga"re Yesu re Meshia ngad: ra" ga: lam" ra" yaug khag' re ngadqere: Tarha" Jung Yham mae" phoe' pye' nae" qhid' mae" kheim: so' qo" ra" Yuda qe myid vang" to: vako" ra". 23 Ce: mathao: yang yao: myhi" yao: pho" tao wa Yao: re: apyad qi: va"- yao: re myid' qu" ge,- ga: ta" ru ngad: ako". 24 Yao: bam wa ai: khau: mae" myo, jid: ra" yaug re shid' lhang ein: lhang dam: khai: yu gemung:- Mao"So: qhid' kheim: mae dangman" ra" dao: ta" wa,- nao re myo, myao nhao: ra" yaug wa qobo qo" ra" yaug ngad: rure ngonhaung" ba:- ga: ta" ako". 25 Ailao" aiyaug wa Yao: wa qobo qo" yaug- maqo" yaug ngad: rure ngo maba- Ana" ngo myo, myao va"- ein: ce daja: za: ngo aba: ga: tau" ra". 26 Yao: bam wa Yao: wa nao re pe" kad' byid' ra" i? Ni" myo,jid' re khoru: kad' yang: myao nhao: ra" i? ga: myid' ako". 27 Ailao" aiyaug wa Naonhaung" re ngo ta" kyo: gau ngad va"- naonhaung" manug: tae" gyo: ko" ngad: ra". Naonhaung" pe"mung: dam: gyo: nug ko" i? Ngo qu" re naonhaung" re: yao" mho"zo: qe boe" nug gesam" ra"- ga: ta" ra". 28 Yao: bam wa aiyaug re Nao yaug lam: aiyaug: mho"zo: ngad: ra"- ngonhaung" kam" wa Moshe nho: mho"zo: qe ngad:- 29 Mao"So wa Moshe re mungdao: byid' rure ngonhaung" ba:- ngadqere: aiyaug re wa yao: khai: mae" li" yaug ngad: rure lhao" re: ngonhaung" maba ga: ta" mung:- yao: re jung" ako". 30 Ai: myo, myao: li" yaug wa Yao: wa ngore myo, myao: li" nhao: ra" yaug ngad: ra"- ngadqere: naonhaung" wa yao: khai: mae" joe" li" rure maba ko" ru wa mug' ja: yao: ngad: ra". 31 Mao"So wa qobo jab qe: akyu" mho' thoe re matae" gyo: ngad: ra". Yao: re phug' myao" ra" mo, we' yao: myid o: ra" khyo" phug' cao" ra" mo; akyu" mho' thoe re wa Mao"So tae" gyo: byid' rure ngonhaung" ba: ra". 32 Khau: mae" myo, jid: ra" yaug re myo, myao: li" nhao: ra" byu dayaug na:- ga" rure mug: myid dao mae mug: thug' sao peim mae" ana" joe" sho' magyo" qu" shi:- 33 Ceyaug wa Mao"So mae" joe" li" yaug mangad: re wa yao: wa pe" daja: re: maqo" kad' nae" ngad: ra" ga: tau" ra". 34 Ailao" yao: bam wa- Nao ru" qobo khug mae khau mung: qi" li" ra" yaug: yang ngonhaung" re mho" shid' nae" seim" na: i? ga: ta" mung: yao: bam wa yao: re Tarha" Jung Yham mae" khe' thug' pye' ako". 35 Ai: myo, myao: li" ra" yaug re airu: khe' thug' pye' ko" rure Yesu the' gyo" ra". Yesu wa yao: re myao lao"- Byu: Yao: Zo: re nao lam" i? ga: yao: re myid' ra". 36 Aiyaug wa Nhag' bo we"- ngo wa yao: re qo" lam" sho' yao: khag' ngad: rure ngore ta" kyo: la,- ga: tau" ra". 37 Yesu wa yao: re Nao wa yao: re myao: qu" ava"- yao: wa ana" nao we' jho" jhau: na: ra" yaug yao: ngad: ava"- ga: ta" ra". 38 Aiyaug wa Asang we"- ngo lam" va"- ga: pad' thaug' thaug' yang: Yesu re goe; pa" ra". 39 Yesu wa Ngo wa myo, jid qe myo, myao: li" genae" re:- myo, myao mo, myo, jid: lo" genae" qhid' mae" re:- ce: mug:myid dao khyo dao: kho' nae" qhid' mae" joe" li" ru ngad:- ga: ta" ra". 40 Ai: mae bo: ra" Pharishe qe damyo" wa ce: dao: re the' gyo: gelao"- ngonhaung" re: myo, jid qe ngad ko" ra" ein: nao ta" nug: i? ga: myid' ako". 41 Yesu wa Naonhaung" myo, jid qe ngad ko" ngad: re wa naonhaung" qobo qo" mo, mangad: genae"- ngadqere: ana" naonhaung" wa ngonhaung" myo, myao: ga: ta" ko" ruyang naonhaung" wa qobo qo" jo; ako"- ga: ta" ra". 1 Yesu wa Naonhaung" re ngo dang za: ta" geli"- yao yham khyo kham: dung: khyo" mavao lo:- gatau khyo" do; lhoe" vao: ra" yaug wa khug' hab' damya, ngad: ra". 2 Kham: dung: khyo" vao ye" ra" yaug wa- yao lhaug' yaug ngad: ra". 3 Kham: lhaug' yaug wa yao: re kham: phung" byid' ra". Yao jham re: yao" thoe re tae" gyo: gemung: yao: wa yao" yao jham re mang lao: yang khai mung: taung gaung khyo jhui" thug' lo" ra". 4 Yao jham re taung gaung khyo bin: jhui" thug' lo" lao"- yao: wa yao jham: qhid' au: mae ye" lo" ra". Yao jham wa yao" thoe re ba geyang: yao" thao cao" ye" lo" ako". 5 Su gaje dayaug: thao khyo" wa yao jham macao" genae". Pe"mung:ga"re- yao jham wa aiyaug: thoe re maba gemung: yang: aiyaug mae" tao" phao: lo" li" genae"- ga: ta" ra". 6 Yesu wa ce: dao: tau" re yao: bam re ta" kyo" ke' ra". Ngadqere: yao: bam wa dao: tau" lajheim: re maba: gyo: ko" ngad: ra". 7 Airumung: Yesu wa Naonhaung" re ngo dang za: ta" geli"- ngo wa yao jham vao: ra" kham: dung: ngad:. 8 Nga" qhid' re joe" li" ko" ra" gaje alhab' wa khug' hab' qe we' damya, qe ngad: ako". Yao jham wa yao: bam: thoe re matae" gyo: ko" ngad: ra". 9 Ngo wa kham: dung: ngad:- ngo khyo" vao: ra" yaug khag' ngadqere: khyad' yu: ru qhug' nae". Yao: wa thug' thug' vao vao kad' mung: mhin: gyo, jao: myao: li" nae". 10 Khug' hab' wa khug' nae" se' tam" pye' nae" qhid' mae" za: li" ra". Ngo wa naonhaung" kao so' qo" yu mung: magan: mago" ra" kaoso'mae qo" daui: na genae" qhid' mae" joe" li" ru ngad: 11 Ngo wa yao jham: qhid' mae" kao so' byid' pye' ra" gai: ra" yao lhaug' yaug ngad:. 12 O:kaung wa yao lhaug' yaug mangad:- yao jham re sang yaug re: mangad: mung:- zag ne li" na: rure the' myao lao" yao: wa yao jham re to: co' mung: tao" phao: lo" ra". Airumung: ai: zag ne wa bin" cad' zo: mung:- yao jham re khe' sin" ke' ra". 13 Okaung wa okaung za: ngad: ruyang yao jham re pe" sang: makho: lo: tao" phao: lo" ra". 14 Ngo wa gai: ra" yao lhaug' yaug ngad:. Nga" Pho" wa ngore ba mung: ngo wa nga" Pho" re ba: ru we' dakhyo: ngo wa nga" yao jham re ba mung:- yao jham re: ngore ba: ako". Aimung: ngo wa yao jham: qhid' mae" kao so' byid: nae" qo" dan: pye' ra". 16 Amung:- ce: yao jham mae mabo: ra" ngo sang: ra" yao gatau na shi" ra". Ngo wa ai: yao jham rere: jhui" yu ca" ra". Yao: bam wa nga" thoe re tae" gyo" li" genae". Ailao" ai: yao jham wa dakyaung" za: yao lhaug' yaug dayaug za: ngad: li" genae". 17 Ngo wa kao so' re dam: qo" khae: yu genae" qhid' mae" nga" kao so' re qo" dan: pye' ruyang nga" Pho" wa ngore jhid'de; ra". 18 Kao so' re khag' re: ngo mae" maqo" yu: pye' ngad: ra". Ngo wa nga" kao so' re ngoyao" myid khyo" byid' pye' ru ngad: ra". Ngo wa nga" kao so' re byid' pye' ru we' dam: tug' yu nae" akho: akhang" qo" yaug ngad:- ceru: kad' nae" nga" Pho" wa ngore amyin" byid' to: va". 19 Ce: dao: jham: mathao mae mo,byu qe: phaung mae yao: cao: majho" vang" lo: dam: boe" li" ko" ra". 20 Yao: bam mae" myo: sho' mo, wa Yao: wa yui zaung: ra" ago ngad: ra". Naonhaung" pe"mung: yao" dao: re tae" gyo: ko" i? ga: ta" ako". 21 Ngadqere: damyo" wa yui zaung: ra" yaug wa ceru" ra" dao: maqo" jhau ngad: ra". Yui wa myo, jid re khoru: myo, qo" myao nhao zai i? ga: ta" ko" ra". 22 Yerusalem vogaung: mae" Caung:pa" Yham re Qhaug' Byid' ra" Poe kad' na: ako". Ai: ayo, wa gyo, yo, ngad: ra". 23 Yesu wa Caung:pa" Yham mae" Sholamon zaung mae su" qin" ra". 24 Mo,byu qe wa Yesu lhang" gam: mae zang" ham: li" mung: Nao wa ngonhaung" re khomyhao" joe" sho' lao" nhao nae" i? Nao wa Meshia ngad: i? Ngonhaung" re de: de: za: ta" kyo: la, ga: myid' ako". 25 Yesu wa- Ngo naonhaung" re ta" kyo" to: gau ngad va". Ngadqere: naonhaung" ngore malam" ko" ngad: ra". Nga" Pho" kheim: so' khyo" yang ngo zaui" ra" mau" zo" jham wa nga" atha" dao: jhau: na: ako". 26 Ngadqere: naonhaung" wa nga" yao jham mangad: gemung: naonhaung" malam" ko" ngad: ra". 27 Nga" yao jham wa nga" thoe re tae" gyo" ako". Ngo wa yao: bam re ba mung:- yao: bam wa nga" thao cao" ako". 28 Ngo wa yao: bam re apyad ato: kao so' byid: mung: yao: bam wa khonhae" re: mashid genae". Yao: bam re nga" lo, mae" khag' re: maqo" lhad' yu genae". 29 Nga" Pho" yang ngore byid' to" ru wa cao jab alhab' tho' je: qi" rumung:- yao: bam re nga" pho" lo, mae" maqo" lhad' yu ko" ngad: ra". 30 Nga" Pho" we' ngo wa dadang: dalam: za: ngad: ga: yao: bam re ta" ra". 31 Alao" mo, byu qe yao: re ceim" pye' genae" ga: laug baui gaug: yu: ako". 32 Yesu wa yao: bam re Ngo wa nga" Pho" kad' nhao: ra" gai: ra" mau" zo" myo: sho' re naonhaung" qhid' kheim: mae kad' va". Ai: mau" zo" kholam" mathao mae naonhaung" ngore laug baui: yang pye' se' nug ko" i? ga: myid' ra". 33 Yao: bam wa- Gai: ra" lo, mau" daja: ja" mathao: yang ngonhaung" nao re laug baui: yang pye' se' nug: ru mangad:- nao wa xao su byu angad: ru naoyao" gaung re Mao"So we' daqi" za: kad' nae" seim" yang: Mao"So re jung" dao: jhau: ruyang ngonhaung" ceim" pye' nug: ru ngad: ra"- ga: tau" ako". 34 Yesu wa Naonhaung" Mao"So re ngag: ako" ga: Mao"So ta" to" ra" dao: re Naonhaung" yao" Tarha" jham: paug' mae tung" to" ra". 35 Jham: mugsug' mae ta" to" ra" dao: jham wa dapyad daqae: dangman" jo; ga" rure naonhaung" ba: ako". Mao"So wa yao" mungdao: re byid' to" ra" mo, re so qe -ga: ta" ra". 36 Nga" Pho" wa ngore khyin: yu mung:- mug: myid dao khyo nhao: ke' ra". Airu: mung: ngo wa Mao"So: Yao: Zo: ngad: ein: ta" ruyang- ngo wa Mao"So re jung" dao: ta" ra" ga: naonhaung" khoru: mung: qo" ta" ko" i? 37 Nga" Pho" zaui: nhao: ra" mau" re- mazaui" ru ngad: re wa naonhaung" ngore dalam" ge,. 38 Ngadqere: ai: mau" zo" jham re ngo zaui: yang: ngad: re wa ngore malam" gesho' ngadqere: nang" thao" nga" lo, mau" jham re khalhao" lam" ge,- ailao" nga" Pho" wa nga" khug mae na mung: ngo wa nga" Pho" khug mae na: rure naonhaung" phyid' phyid' kho' kho' ba: li" genae"- ga: ta" ra". 39 Yao: bam wa Yesu re taung: nae" dalhang dam: seim" ako". Ngadqere: Yesu wa- yao: bam: lo, mae" phao: loe; lo" ra". 40 Ai: thao Yesu wa Yodan gyaung: thoete' mae" qhid' phyao: Yohan qid nyhab' byid' ra" jo, qo khyo dam: gau" de; ye: mung: aitau mae yena: ra". 41 Mo, byu qe myo: sho' yao: jhao" joe" li" mung: yao: bam wa Yohan wa mug' pho: ve, lho jham makad' qhu" ngad: ra". Ngadqere: ceyaug we' sin: mung: Yohan ta" ru alhab' wa dang: ra"- ga: ta" ako". 42 Aitau mae" mo, byu qe myo: sho' Yesu re lam" ako". 1 Bethani vogaung: mae Lazaru ga: mang: ra" byu dayaug na: ra". Yao: wa no: na: ra". Bethani vogaung: wa Mari we' yao: bai: Matha tao na: ra" vogaung: ngad: ra". 2 (Mari ai: yaug wa Asang: khyid mae sheim nae pyo" ra" xau gyad byid: mung:- yao" xae: yang sad' byid' ra" yaug ngad: ra". No: na yaug Lazaru wa- yao: maung ngad: ra".) 3 Yao: nhae tao wa Asang we"- nao jhid'de; ra" ba nam pho" wa no: na: ra"- ga: Yesu re dao: pyang: ke' ako". 4 Yesu wa aire the' gyo: lao"- ce: no wa shid no mangad: ngad: ra"- Mao"So: phungbao bao: thug' li" nae" qhid' mae" no: ru ngad mung:- ce: no khyo" yang Mao"So: Yao: Zo: re: phungbao bao: thug' li" nae"- ga: ta" ra". 5 Yesu wa Matha- Mari- Lazaru maung nhae tao ho' re jhid'de; ra". 6 Ngadqere: Yesu wa Lazaru no: na: ga" rure the' gyo: thao re yao: na: ra" jo, qo mae shid' ba jan" thang: na: ra". 7 Ai: thao Yesu wa Ngonhaung" Yuda mung" khyo dam: tug' ye: gelang:- ga: yao" mho"zo: qere ta" ra". 8 Mho"zo: qe wa Mho" Pho" we"- aimung" mae" mo, byu qe wa ana" gyo: za: lhao" re: laug baui: yang pye' nae" seim" ko" ra"- ana" re: aikhyo dam: ye: shinae" ein: i? ga: ta" ako". 9 Yesu wa Daba mae daxe: shid' yo, qug bo: ra" mangad: i? Aimung: na" gaung re khyo su" ra" yaug wa ce: mug:myid dao: bo" bao re myao mung: matha" lang: ngad: ra". 10 Ngadqere: mug: cad' yo mae khyo su" ngad: re wa bo" bao maqo" yang: yao: wa tha" lang" ra"- ga: ta" ra". 11 Yesu wa ceru: bin: ta" thao re xo' mung:- ngonhaung" ba nam pho" Lazaru wa yab: myhid' jo; ra"- yao: re yenhug' nae" qhid' mae" ngo ye: nae"- ga: ta" ra". 12 Mho"zo: qe wa Asang we"- yao: yab: myhid' jo; ru angad: re wa yao: wa byan" so" li" li" nae"- ga: tau" ako". 13 Yesu wa Lazaru shid va"- ga: ta" ru ngad: ra". Ngadqere: mho"zo: qe wa gaigai: yao: yab: myhid' jo; rure ta" ru ngad: ga: jho: ako". 14 Aimung: Yesu wa yao: bam re Lazaru wa shid: ava". 15 Ngadqere: naonhaung" lam" genae" qhid' mae" ngo ai: jo, qo mae mana: ang: ruyang naonhaung" qhid' mae" ngo bau" ra". Yao: jhao" ngonhaung" ye" lo" gelang:- ga: de: de: za: ta" ra". 16 (Zozam ga" ra") Thoma wa Ngonhaung" yebocao: shid nae" qhid mae" mho"pho" we' daga" ngonhaung" alhab' mo, cao" ye: gelang:- ga: yao" byin cao: mho"zo: qere ta" ra". 17 Yesu joe" ye" lo" re Lazaru re nyhab' pye' ru byid ba ngad va" rure yemyao: ra". 18 Bethani vogaung: wa Yerusalem mae" khyo shid' man: ko za: va" ra". 19 Yuda byu myo: sho' mo, wa Matha we' Mari shid' nhae: nho: yao: maung shid yang: yao: nhae tao re nhag' tang" byid: nae" joe" li" ako". 20 Yesu li" na: ra" ga" rure Matha the' gyo: lao"- yao: wa Yesu re yetug: yu nae" qhid' mae" thug' ye" lo" ra". Ngadqere: Mari wa yham khug mae na: jo; ra". 21 Matha wa Yesu re Asang we"- nao cemae na: ngad: re wa nga" maung mashid zai ngad: ra". 22 Ana" ngadqere: Mao"So wa nao mho' ra" ja: pe" ngadqere: nao re byid' li" nae" ein: rure ngo ba:- ga: ta" ra". 23 Yesu wa- Ni" maung dam: daui: li" zai ngad:- ga: yao: re ta" ra". 24 Ailao" Matha wa Lo" thao" ra" ba na mae yao: dam: daui: to" li" nae" rure wa ngo ba: ga: phaug' tau" ra". 25 Yesu wa Ngo wa- dam: daui: to" li" ru we' kao so' ngad:. Ngo re lam" ra" yaug khag' ngadqere: yao: wa shid ngadqere: daui: na: li" nae". 26 Khag' ngadqere: daui: na mung: ngore lam" ra" yaug wa khonhae" re: mashid lo nae"- cedao: re nao lam" i? ga: myid' ra". 27 Matha wa Asang we"- ngo lam" ra"- nao wa mug:myid dao khyo joe" li" nae" ra" Mao"So: Yao:Zo: Meshia ngad: rure ngo lam" va"- ga: phaug' tau" ra". 28 Matha wa ceru: bin: ta" lao"- yao: wa lo" mung: yao: nhaung: Mari re sae za: lo" khai mung:- Mho" Pho" wa cetau mae li" joe" na: ra"- amung: yao: wa nao re myid' na: ra"- ga: Mari re ta" ra". 29 Cedao: re Mari the' gyo: lao"- yao: wa phyad za: to" li" mung: Yesu jhao" thug' ye" lo" ra". 30 (Yesu wa vogaung: khug khyo majoe" ye: shingad: ra"- Matha yetug: yu: ra" jo, qo mae na: jo; ashi") 31 Yham khug mae Mari we' daga" na mung: yao: re nhag' tang" byid' na ko" ra" mo, byu qe wa Mari phyad za: to" li" mung: thug' ye" lo" rure myao gelao"- yao" thao cao" ye" ako". Pe"mung:ga"re Mari wa lab khyo yengug nae" qhid' mae" thug' ye" lo" sam" ra"- ga: yao: bam jho: ako". 32 Mari wa Yesu na: ra" jo, qo mae joe" ye: mung: yao: re myao we' Yesu khyid qao: mae goe, mung: yang:- Asang we"- nao cetau mae na: ngad: re wa nga" maung mashid: byaug zai ngad: ra"- ga: Yesu re ta" ra". 33 Yesu wa Mari ngug: rure we' yao: we' daga" cao" li" ra" mo,byu qere: ngug ko" rure the' myao lao"- Yesu wa yao" nhag' lam: mae zao" mung: nhag' lam: mamyan: makhyad' kham zo" ra". 34 Ailao" Yesu wa Yao: re khai: mae nyhab' to: ko" i? ga: yao: bam re myid' ra". Yao: bam wa Asang we"- li" mung: qu" qu" wa,- ga: tau" ako". 35 Yesu ngug byid gyo" ra". 36 Mo,byu qe wa Qu" ge,- yao: wa Lazaru re gyai jhid'de; nhaung- ga:" ta" ako". 37 Ngadqere: yao: bam mae" damyo" wa yao: wa myo, jid re myo, myao nhao: ra" yaug mangad: i? Yao: wa Lazaru rere: mashid losho' maqo" tam" to: nhaung i? ga: ta" ako". 38 Ailao" Yesu wa nhag' lam: mamyan: makhyad' dam: kham zo: mung: lab khyo ye" lo" ra". Ai: lab wa laug khyaung lab ngad mung:- lab nhad' mae laug zang: yang jhid' to" ako". 39 Yesu wa Ai: laug zang re qhui" pye' ge,- ga: amyin" byid' ra". Ailao" shid yaug: yao: bai: Matha wa Asang we"- Bab sheim nae naeva"- yao: re nyhab' to" ru byid ba ngad va"- ga: ta" ra". 40 Yesu wa- Nao lam" ngad: re wa Mao"So: phungbao re nao the' myao: li" nae" ein: nao re ngo ta" va" mangad: i? ga: ta" ra". 41 Ailao" yao: bam wa ai: laug zang re yu: pye' ako". Yesu wa mug: khyo tau: qu" mung:- nga" Pho" we"- nao wa nga" akyu" mho' thoe re tae" gyo: byid' ruyang nao re jeju caung: byid' ra". 42 Nao wa nga" akyu" mho' thoe re khonhae" re: tae" gyo: byid' rure ngo ba:. Ngadqere: ngo wa nao: yang nhao: ke' yaug ngad: rure yao: bam lam" genae" qhid' mae" cemae na: ra" mo; akyu" mathao mae ngo ceru: ta" ru ngad: ra"- ga: ta" ra". 43 Yao: wa airu: bin: ta" lao"- Lazaru we"- Thug' lo wa,- ga: thoe qi: we' khai: ke' ra". 44 Ailao" Lazaru wa yao" khyid lo, mae pin: cug' yang thab' to" ru we' myo,khung: re pin: cug' yang thab' to: gau yao: thug' lo: ra". Yesu wa yao: bam re- yao: re thab' to" ra" pin: cug' jham re pheim: pye' byid: mung: nhao: ke' ge,- ga: ta"ra". 45 Aimung: Mari jhao" li" ko" ra" mo,byu qe myo: sho' mo, wa yao: kad' ra" lo, mau" re the' myao gelao"- yao: bam wa Yesu re lam" ako". 46 Ngadqere: damyo" wa Pharishe qejhao" tug' phao: lo" mung:- Yesu zaui" ra" mau" re lo" ta" kyo" ako". 47 Aimung: Pharishe qe we' khinjaung qi: qe wa Yuda Tarha" Qe, Do, Phung: zabphaung khai: qham mung:- Qu" ge,- ceyaug wa mug'pho: ve,lho jham myo: sho' kad' qhu" na: ava"- ngonhaung" pe" kad' zai i? 48 Ngonhaung" wa yao: re ceru: xo' yang: nha: to: lao" wa yaug khao: ngo" yao: re lam" byaug genae"- aimung: kheim: so' qo" ra" Roma zug: qe wa akhyag: li" yu mung: ngonhaung" nho: Caung:pa" Yham re we' ngonhaung" amyu" re li" phyo' pye' li" genae"- ga: ta" ako". 49 Yao: bam mae" aizin re Khinjaung Yin" kad' na: ra" Kayapha ga: mang: ra" yaug wa- Naonhaung" pe" ba mo, mangad:- 50 Byumyu" damyu" geim" jeim" lo" nae" tho' ai: byumyu" geim" qhid' mae" byu dayaug shid; ru wa je: gai: rure naonhaung" mamyid: beim: ko" i? ga: ta" ra". 51 Yao: airu: ta" ru wa gaigai: yao: yao" myid khyo" ta" ru mangad:- yao: wa ai: zin qhid' mae" Khinjaung Yin" ngad mung:- Yesu wa Yuda byumyu" alhab' qhid' mae" shid kham" li" nae" ga" rure we' 52 yao: bam: qhid' mae" za: mangad:- byo: sin" na: ra" Mao"So: byumyu" qe alhab' re dadang: dalam: za: boe" nhao nae" qhid' mae" re: Yesu shid kham: byid: nae" ra" khyo re lapa pa: ru ngad: ra". 53 Ai: ba na mae" kheim: so' qo" ra" Yuda qe wa Yesu re se' pye' nae" qhid' mae" pha,jhi" khyug' ako". 54 Aimung: Yesu wa Yuda mung" mae de: de: za: gyaung: masu" qin" lo:ngad: ra". Din" pyad' yo nhae mae" Ephrim ga" ra" vogaung: khyo thug' ye" lo" mung:- ai: mae yao" mho"zo: qe we' yena: jo; ra". 55 Lai co' Poe ba na jhao" li" na mung:- seyo: vogaung: vojhe' khaung: mae" mo,byu qe wa poe majoe" shire yao: yao" gaung re caung:pa" thung" khyo" kyang" san: ru kad' nae" qhid' mae" Yerusalem vogaung: khyo do, ye" lo" ako". 56 Yao: bam wa Yesu re qho: na: ako". Yao: bam wa Caung:pa" Yham mae yezang" ham: na: bam gemung:- naonhaung" pe" ru: myid ko" i? Yao: wa gaigai: yao: poe khyo mali" nae" laug i? ga: yao: bam yao: cao: jho" myid' na: ako". 57 Khinjaung qi: qe we' Pharishe qe wa yao: bam Yesu re qo" taung" yu nae" qhid' mae" Yesu na: ra" jo, qo re ba yaug khag' ngadqere: lota" kyo: ca"- ga: amyin" khyo" to" ako". 1 Lai co' Poe joe" nae" khyaug' ba ca" shi" au:- Yesu wa shid: rumae" yao" yang dam: daui: li" nhao: ra" Lazaru na: ra" Bethani vogaung: khyo ye" lo" ra". 2 Yao: bam wa Yesu re myi" xeim lham: nyhang" zho" ako". Matha wa zo:ve da" byid' na: ra"- Yesu we' vae: zo: jaung: mae daga" zaung: jo; ra" mo, mae Lazaru re: bobo: ra". 3 Ailao" Mari wa gyai phug' de; ra" sheim nae pyo" ra" Nard xau gyang" daxe laung ko yu: yu yang: Yesu khyid mae vhe' gyad byid: mung:- yao" xae: yang sad' pye' byid' ra". Ai: xau wa dayham geim" mae byang" sho' nae: jo; ra". 4 Yao: re ab byid' pye' nae" yaug ngad: ra" Yesu mho"zo: Yuda Iskarud wa 5 Ce: sheim nae pyo" ra" xau re pe"mung: ngaui sam yo kye' mae aung: yang: ai: ngaui re myaung sho" ra" mo, re magae byid: i? ga: ta" ra". 6 Yao: ceru: ta" ru wa myaung sho: mo; qhid' mae" myid: ci" yang: ta" ru mangad:- yao: wa khug' hab' ngad mung: ta" ru ngad: ra". Yao: wa ngaui thaung vin yaug ngad mung:- aimae" lhaung" khug' phoe' aung: zo: yaug ngad: ra". 7 Ngadqere: Yesu wa Yao: re dakhin jang wa,- ngore nyhab' shaung: pye' ra" ba na qhid' mae" ai: sheim nae pyo" ra" xau re yao: vai: to" ru ngad: ra". 8 Myaung sho" ra" mo, wa khonhae" re: naonhaung" we' daga" za: na: ako". Ngadqere: ngo wa naonhaung" we' daga" khonhae" re: na: jo, nae" mangad:- ga: ta" ra". 9 Mo,byu qe myo: sho' mo, wa Bethani vogaung: mae Yesu na thoe re the' gyo" ako"- aimung: yao: bam wa Yesu mathao: yang za: re: mangad:- Shid: rumae" Yesu yang daui: li" nhao: ra" Lazaru rere: myao nae" qhid' mae" Bethani vogaung: khyo ye" lo" ako". 10 Aimung: khinjaung qi: qe wa Lazaru rere: se' pye' nae" pha,jhi" khyug' ako". 11 Pe"mung:ga"re Lazaru mathao mae Yuda byu qe wa khinjaung qi: qere to: co' mung:- Yesu re lam" lo" geyang: ngad: ra". 12 Ai: thao: ba re Lai co' Poe khyo joe" li" ko" ra" mo,byu qe myo: sho' mo, wa Yerusalem khyo Yesu li" na: ra"- ga" rure the' gyo" ako". 13 Aimung: yao: bam wa Zhunpalun akaung jham re yu yang: yao: re tug: yu nae" qhid' mae" ye" lo" ako". Amung: yao: bam wa Mao"So re caung:khin" byid: ge,- Asang: mang we' joe' li" ra" yaug wa ngaui lho" vashao: wo"- Israel kho:kham wa ngaui lho" vashao: wo"- ga: zag: hug' ako". 14 Ailao" Yesu wa loze re myao mung: ai: dao mae do; zaung: ra". 15 Aiwa Ziun vomo" we"- Dagyaug- Ni" kho:kham pho" wa loze nau" dao mae zaung yang: joe" li" ra"- ga: jham: mugsug' mae tung" to" ru we' dakhyo: ngad: ra". 16 Yao" mho"zo: qe wa ce: khyo jham re ai: au: maba: gyo: ko" ngad: ra". Ngadqere: Yesu wa phungbao re qo" khae: yu lao" yao: bam wa ce: jham: dao: wa yao" khyo re ta" to" rure re:- yao: bam wa yao" qhid' mae" ceru: kad' byid: ko" rure re:- dam: myid: beim" li" ako". 17 Lazaru re lab khug mae" khai: thug' yu yang:- shid: rumae" daui: li" nhao: ra" au:- Yesu we' daga" na ko" ra" mo,byu qe wa boe" lo: ra" khyo re ta" kyo" ako". 18 Aimung: mo,byu qe wa yao: re li" tug: yu: ako"- pe"mung:ga"re yao: ce: mug' pho: ve, lho kad' ra" ga" rure yao: bam the' gyo: geyang: ngad: ra". 19 Ailao" Pharishe qe wa Ngonhaung" wa khoru: re: maaung lo:ngad: ra"- Qu" ge,- mug: myid geim" yao" thao cao" byaug: avako"- ga: yao: cao: jho" ta" ako". 20 Poe ba na gyo: mae caung:pa" nae" qhid' mae" Yerusalem khyo ye" lo" ko" ra" mo,phaung mae Greeg byumyu" damyo" bobo: ako". 21 Yao: bam wa (Galile mung" mae" Bedsaida vobyu) Philib jhao" ye: mung:- Nhag' bo we"- ngonhaung" wa Yesu re myao nug: ra"- ga: yeta" ako". 22 Ailao" Philib wa Andre re yeta" kyo: mung: yao: shid'zo: wa Yesu jhao" ye: yang: yeta" kyo" ako". 23 Yesu wa yao: shid' zo: re- Byu: Yao: Zo: phungbao qi: qo" khae: yu nae" yo, khyin: ana" joe" ava". 24 Naonhaung" re ngo dang za: ta" geli"- Jung: gaug ce' wa myid gaung mae ke' yang: nyhab' pye' ru maqhug' ngad: re wa dace' mae" je yang: gatau mamyo" li" ngad: ra". Nyhab' pye' ru qhug' ngad: re wa ashi: myo: sho' zaui" li" ra". 25 Yao: yao" kao so' re qhaung: ra" yaug wa kao so' jeim: nae"- ce: mug:myid dao mae yao: yao" kao so' re mabyag: ra" yaug kam" wa apyad ato: kao so' re shaung: to" li" nae". 26 Ngo re caung da" nug: ra" yaug wa nga" thao cao" ca" ra"- amung: ngo na: ra" jo, qo mae nga" daui daui yaug re: na: li" nae"- nga" Pho" wa ngore caung da" ra" yaug re phug' te' nga: yhe' li" nae"- ga: tau" ra". 27 Ana"- nga" nhag' lam: mae myid: qug: myid: ci" na: ra"- ngo pe" ta" nae" i? Nga" Pho" we"- ce: yo, qug nga" dao mae dajoe" li" nhao wa,- ein: ta" nae" laug i? Ngadqere: ngo ce: qug' khai: khyag' qhui: rure kham zo: nae" qhid' mae" joe" li" ru ngad: ra". 28 Nga" Pho" we"- ni" mang re phungbao bao: li" nhao wa,- ga: ta" ra". Ailao" mug:gaung mae" thoe dathoe jhau: thug' li" mung:- ngo phungbao bao nhao va"- ana" re: ngo wa phungbao dam: bao nhao shinae"- ga: ta" ra". 29 Ai: mae ye; jo; ra" mo,byu qe wa ai: thoe re the' gyo: geyang:- yao: bam mae" damyo" wa Mug:dam: dam" ru ngad: ra" ga: ta" gemung:- damyo" wa Mug: lagyo: yao: re dao: jhau: ru ngad: ra"- ga: ta" ako". 30 Yesu wa yao: bam re ce: dao: thoe wa nga" qhid' mae" jhau: thug' li" ru mangad:- naonhaung" qhid' mae" ngad: ra". 31 Ce: mug:myid re dao: kho' ru wa ana" ngad: ava"- ce: mug:myid dao: zug: pho" re ana" khe' thug' pye' ru qhug' naeva" myao:- 32 Ngo wa myid gaung mae" tau: to' to" ru qhug' lao"- ngo wa yaug khao: ngo" re- ngojhao" lao" yu nae"- ga: ta" ra". 33 (Ceru: ta" ru wa yao: wa shid: rure khoru: kham zo: nae" ga" rure ta" shid' ru ngad: ra") 34 Mo,byu qe wa Ngonhaung" nho: tarha" mae Meshia wa apyad ato daui: na: li" nae"- ga: ta" to" ra". Aire nao wa Byu: Yao: Zo: wa to' to" ru qhug' ca" ra"- ga: khoru: mung: qo" ta" i? Byu: Yao: Zo: wa khag' ngad: ra" i? ga: ta" ako". 35 Yesu wa yao: bam re- Ai: bo" bao wa naonhaung" phaung mae dazab myao" sho' na shizai ngad: ra"- Mug:cad' wa naonhaung" dao mae macad' nghoe' lo vashao:- naonhaung" wa bo" bao qo" jo, shiko" au: re xo' su" na ge,- pe"mung:ga"re mug: cad' khug mae su" lhau: ra" yaug wa yao: khokhyo ye" lo" na: rure maba ngad: ra". 36 Aimung: naonhaung" wa bo" bao: nho: zo:dau qe boe" genae" qhid' mae" naonhaung" wa bo" bao ajo; jo, shi" au: re ai: bo" bao re lam" ge,- ga: ta" ra". Cedao: re bin: ta" lao"- Yesu wa thug' lo" mung: yao: bam mae" phao: vho' lo" ra". 37 Yesu wa yao: bam: qhid' kheim: mae mug' pho: ve, lho jham ainho" kad' qhu" ngadqere: yao: bam wa yao: re malam" ko" ngad: ra". 38 Airu: malam" ko" ru wa Asang we"- ngonhaung" ta" ra" mungdao: re khag' lam" ra" i? Asang wa yao" qam: so' re khag' re qhu" byid' ra" i? ga: lapa Esaia ta" to" ru jab byang" li" nae" qhid' mae" ngad: ra". 39 Ai: tho' mago" Esaia wa yao: bam: myo,jid' mamyao geshao:- yao: bam: nhag' lam: maba: gyo: geshao:- ngo yao: bam re gai byid: nae" yao: bam ngojhao" matug' lo geshao:- ga: Mao"So wa yao: bam: myo,jid' re jid nhao mung:- yao: bam: nhag' lam: rere: nhag' cad' cad' nhao: ra"- ga: Mao"So ta" ra"- ga: re: ta" to" ruyang yao: bam maqo" lam" ko" ngad: ra". 41 Esaia wa Yesu phungbao re the' myao yang: Yesu khyo we' sin: mung:- ceru: ta" ru ngad: ra". 42 Ailao" kheim: so' qo" ra" Yuda qe myo: sho' Yesu re Lam" ako". Ngadqere: yao: bam re Pharishe qe- yang Tarha"Jung Yham mae" phoe' pye' ru maqhug' nae" qhid' mae"- yao: bam wa aikhyo re de: de: za: mata" ko" ngad: ra". 43 Yao: bam wa Mao"So: yang caung:khin" ru tho' byu: yang caung:khin" rure je: o: ako". 44 Yesu wa thoe qi: we' Ngo re lam" ra" yaug wa ngore za: mangad:- ngore nhao: ke' ra" yaug rere: lam" yaug ngad: ra". 45 Aimung: ngore myao: ra" yaug wa ngore nhao: ke' ra" yaug rere: myao: ra". 46 Ngo re lam" ra" mo, alhab' wa mug: cad' yo mae mana: jo, nae" qhid' mae" ngo wa bo" bao khyo" ce: mug:myid dao khyo joe" li" va". 47 Nga" mungdao: re gyo" yu mung: maphug' cao" ra" yaug re wa ngo wa- yao: re dao: makho' nae". Ngo wa mug: myid byu qere dao: kho' nae" qhid' mae" joe' li" ru mangad:- Khyad' yu nae" qhid' mae" joe" li" ru ngad: ra". 48 Ngo re ha: pye' mung: nga" mungdao: re makhae: yu: ra" yaug re dao: kho' nae" dayaug na: ra". Amung: ngo ta" to" ra" dao: thoe wa lo" thao" ra" ba na mae yao: re dao: kho' ra" tarha" zug: ngad: li" nae" 49 Pe"mung:ga"re ngo wa ngoyao" akho: akhang" khyo" ta" ru mangad:- ngore nhao: ke' ra" Nga" Pho" wa ngo pe" ta" pe" jhau nae" rure ngore amyin" byid' to" ra". 50 Yao" amyin" dao: wa apyad ato: kao so' re qo" nhao: rure ngo ba:. Aimung: ngo ta" ru wa Nga" Pho" yang ngore ta" nhao: to" ra" gu: re ta" ru ngad:- ga: ta" ra". 1 Ayo, wa Lai co' Poe joe" nae" daba ca" shi" au: ngad: ra". Yesu wa ce: mug:myid dao mae" yao: Pho" jhao" phao: lo" nae" yo, khyin: joe" li" va" rure ba: ra". Yao: wa ce: mug:myid dao mae na: ra" yao" byu qere jhid'de; mung:- lo" thao" yo, joe" sho' yao: bam re jhid'de; ra". 2 Yesu we' yao" mho"zo: qe wa myi"xeim zo" na: ako". Ai: yui wa Simon Iskarud yao: zo: Yuda nho: nhag' lam: khug mae Yesu re ab byid: nae" qhid' mae" myid ke' to: byid' ava". 3 Yesu wa yao: Pho" yang yao: re kheim: so' alhab' ab byid' to: va" rure: yao: wa Mao"So mae" joe" li" mung: Mao"So jhao" dam: phao: lo" zai ngad: rure: ba: ra". 4 Aimung: yao: wa vae: zo: jaung: mae" to" yang: yao" adao: bau: qhang re khyad' pye' mung: pha, jad: yang yao" phyid' dam: re yag: ra". 5 Ai: thao Yesu wa jarung: dalam: mae qid vhe' ke' yang: mho"zo: qe: khyid re cid' byid; mung:- yao" phyid' dam: mae yag: ci: ra" pha, jad: yang sad' pye' byid' ra". 6 Simon Petru jhao" cid' joe" lo lao"- Petru wa Asang we"- nao nga" khyid re cid' byid: nae" ein: i? ga: Yesu re myid' ra". 7 Yesu wa Petru re- Ngo pe" kad' na: rure ana" wa nao maba: gyo: ngad: ra". Ngadqere: thao phyao: nao ba: gyo" li" nae"- ga: tau" ra". 8 Ailao" Petru wa Nga" khyid re khonhae" re: nao maqo" cid' nae"- ga: ta" ra". Yesu wa Ni" khyid re ngo maqo" cid' ngad: re wa nao wa nga" mho"zo: mangad: lo nae"- ga: ta" ra". 9 Ailao" Petru wa Asang we"- nga" khyid reza: mangad:- nga" lo. we' au: rere: cid' byid; la,- ga: phaug' tau" ra". 10 Yesu wa Gaung bin: cid' va" yaug wa gaung geim" san sin" va" rumung: yao" khyid za: cid' qo: ra". Dayaug mae" je yang: naonhaung" alhab' mo, wa san sin" vako" ra"- ga: ta" ra". 11 (Yesu wa yao: re ab byid' pye' nae" yaug khag' ngad: rure ba: to: gau ngad: ruyang yao: wa dayaug mae" je yang: naonhaung" alhab' mo, wa san sin" vako" ra"- ga: ta" ru ngad: ra".) 12 Yesu wa mho"zo: qe: khyid re bin: cid' byid: thao re yao" adao: bau: qhang dam: ve, mung:- yao" zaung jo, qo mae lo" dam: zaung: ra". Aimung: yao: wa Ana" shi" za: ngo naonhaung" re kad' ra" lo,mau" re naonhaung" ba: gyo: ko" i? 13 Naonhaung" wa ngore Mho" Pho" we' Asang ga: mhang" ako"- ngore: ngad va" ruyang naonhaung" mhang" ko" ru wa jo: ra"- 14 Ngo wa naonhaung" Asang we' Mho" Pho" ngad sho' qere: ngo lhao" re: naonhaung" khyid re cid' byid: va"- aimung: naonhaung" re: naonhaung" yao: cao: khyid jho" cid' byid: gai: ra". 15 Naonhaung" re ngo kad' byid: va" ru we' dakhyo:- naonhaung" re: kad' genae" qhid' mae" ave, aso: qhu" to: byid: va". 16 Naonhaung" re ngo dang za: ta" geli"- Jeim wa yao" jeim sang tho' maje: qi: ngad: ra". Aimung: lagyo: re: yao: re nhao: ke' ra" yaug tho' maje: qi: ngad: ra". 17 Naonhaung" wa ce: dangman" rure ana" ba: avako". Aimung: naonhaung" aire phug' cao" ko" ngad: re wa naonhaung" wa khoqhi" sho' ngaui lho" genae" i? 18 Ngo wa naonhaung' alhab' re ein: ta" na: ru mangad:- ngo khyin: yu va" mo, re wa ngo ba: ra". Ngadqere: nga" zo re bocao: zo" ra" yaug wa ngore gye tug' kad' ra"- ga" ra" jham: dao: wa jab byang" li" ca" ra". 19 Airu: boe" li" lao"- Ngo wa Ngo ga: yaug ngad: rure naonhaung" lam" genae" qhid' mae" ana" maboe" li" shimae" naonhaung" re ngo ta" kyo" to: va". 20 Naonhaung" re ngo dang za: ta" geli"- ngo: yang nhao: ke' ra" yaug re lham: khae: yu: ra" yaug wa ngo rere: khae: yu yaug ngad: ra". Aimung: ngore khae: yu: ra" yaug wa ngore nhao: ke' ra" yaug re khae: yu yaug ngad: ra"- ga: ta" ra". 21 Yesu wa cedao: re bin: ta" lao"- yao: wa gyai myid: ci" mung:- naonhaung" re ngo dang za: ta" geli"- naonhaung" mae" dayaug wa ngore gyevo qe: lo, khyo ab byid' pye' naemyao:- ga: de: de: za: ta" ra". 22 Mho"zo: qe wa yao: khag' re ta" nug: rure maba: gyo: myid: mug' gemung:- yao: bam yao: cao: jho" qu" ako". 23 Ailao" Yesu jhid'de; ra" mho"zo: yaug wa Yesu we' te' te' zaung: jo; ra". 24 Simon Petru wa Yesu khag' re ta" na: rure myid: nae" qhid' mae" aiyaug re ave, byid' ke' ra". 25 Aimung: ai: mho"zo: wa Yesu jhao" te' te' qui" ye: yang:- Asang we"- ai: yaug wa khag' ngad: ra" i? ga: myid' ra". 26 Ailao" Yesu wa Mug dakhai" re xeim: qang: khug' mae jam yang: ngo byid' ra" yaug wa ai: yaug ngad: ra"- ga: tau" ra". Aimung: Yesu wa mug dakhai" re yu: yu mung: xeim: qang: khug' mae jam yang: Simon Iskarud yao: zo: Yuda re byid' ra". 27 Yuda wa ai: mug re bin: yu zo: we' Satan wa yao" khug khyo vao ye" ra". Aimung: Yesu wa Nao kad' ca" ra" mau" re phyad kad' wa,- ga: yao: re ta" ra". 28 Yesu wa Yuda re pe"mung: ceru: ta" rure vae: zo: jaung: mae zo" na mo, dayaug re: maba: gyo: ko" ngad: ra". 29 Yuda wa ngaui thaung zam: yaug ngad: ruyang Yesu wa yao: re poe mae ca" ra" zai yevai nae" we' myaung sho: mo, re daja: ja: yegae byid: nae" qhid' mae" ta" ke' ru ngad: ga: mho"zo: qe damyo" jho: ako". 30 Yuda wa ai: mug dakhai" re yu zo: mung:- ailao" jao" taung gaung khyo thug' lo" ra". Ai: yo, khyin: wa myi" mug: cad' yo, ngad: ra". 31 Yuda bin: thug' lo" thao re Yesu wa Byu: Yao: Zo" nho: phungbao ana" bao: jo, va"- Byu: Yao: Zo: khyo" yang Mao"So: phungbao re: ana" bao: jo; ava". 32 Mao:So wa Byu: Yao: Zo: khyo" yang yao" phungbao bao va" ngad: re wa Mao"So wa yao: khyo" yang Byu: Yao: Zo" phungbao rere: bao nhao: li" nae". Yao: wa ana" yao: jao" bao nhao: li" nae". 33 Nga" jhid'de; ra" byin cao: qe we"- ngo wa naonhaung" we' myao" sho' mana lo nae"- naonhaung" wa ngore qho: li" genae"- ngo lo" ra" jo, qo khyo naonhaung" maqo" ye: genae" ein:- kheim: so' qo" ra" Yuda byu qere ngo ta" va" ru we' dakhyo:- naonhaung" rere: ngo ta" ra". 34 Dayaug we'dayaug jho" jhid'de; ge,- ngo naonhaung" re jhid'de; ru we' dakhyo:- naonhaung" yao: cao: re: jho" jhid'de; ca" ra". Ce: tarha" asag' ana" ngo naonhaung" re byid' ra". 35 Amung: naonhaung" yao: cao: jho" jhid'de; ko" ngad: re wa naonhaung" wa nga" mho"zo: qe ngad: rure yaug khao: ngo" ba: li" genae"- ga: ta" ra". 36 Ailao" Simon Petru wa Asang we"- nao khai: khyo ye" lo" nae" i? ga: myid' ra". Yesu wa ngo ye" lo" ra" khyo re nao wa ana" maqo" cao" nae"- ngadqere: thao phyao: wa nao nga" thao cao" li" nae"- ga: tau" ra". 37 Petru wa Asang we"- ana" ngo ni" thao pe"mung: maqo" cao" zai i? Ngo wa ni" qhid' mae" shid nae" jin" jin" ngad:- ga: tau" ra". 38 Yesu wa- Nao wa gaigai: yao: nga" qhid' mae" shid nae" jin" jin" ngad: i? Nao re ngo dang za: ta" li"- Qo, mateim shi:re nao wa ngore maba- ga: sam lhang ha: pye' li" nae"- ga: tau" ra". 1 Yesu wa yao: bam re Naonhaung" nhag' lam: damyid: ci" ge,- Mao"So re lam" ge,- ngo rere: lam" gela,- 2 Nga" Pho" yham mae na jo, qo myo: sho' jo; ra"- naonhaung" qhid' mae" na jo, qo lo" nyhang" to: nae" qhid' mae" ngo lo" zai ngad: ra". Airu: mangad: re wa naonhaung" re ngo ceru: ta" nae" mangad:- 3 Ngo wa naonhaung" qhid' mae" na jo, qo lo" bin: nyhang" to: mung: ngo na: ra" jo, qo mae naonhaung" qhug' na genae" qhid' mae" ngo dam: li" mung: naonhaung" re li" jhui" yu nae". 4 Ngo lo" nae" ra" jo, qo khyo joe" ra" khyodang re naonhaung" ba: ako"- ga: ta" ra". 5 Ailao" Thoma wa Asang we"- nao khai: khyo ye" lo" nae" rure ngonhaung" maba- Khorumung: ngonhaung" wa khyodang re qo" ba nae" i? ga: myid' ra". 6 Yesu wa yao: re- ngo wa khyodang ngad:- Dangman" ru we' kao so' re: ngad:- ngo khyo" za: mangad: re wa Nga" Pho" jhao" khag' re: maqo" joe" ye: ngad: ra"- ga: tau" ra". 7 Yesu wa yao: bam re Naonhaung" wa ana" ngore ba: avako"- nga" Pho" rere: naonhaung" ba: li" genae". Aimung: ana" mae" thoegu: naonhaung" wa yao: re ba mung:- myao re: the' myao: avako"- ga: ta" ra". 8 Ailao" Philib wa Asang we"- Pho" re ngonhaung" re qhu" byid: la,- ailao" wa ngonhaung" alhab' mo, nhag' dag naeva"- ga: Yesu re ta" ra". 9 Yesu wa Philib we"- ngo wa naonhaung" we' daga" cemyhao" joe" sho' na: lo ngadqere: ngore nao maba i? Ngo re myao: qu" va" yaug wa Pho" rere: myao: qu" va" yaug ngad: ra". 10 Philib we"- ngo wa Pho" we' dadang: dalam: za: ngad mung:- Pho" re: ngo we' dadang" dalam: za: ngad: rure nao malam" i? ga: myid' ra". Yesu wa yao" mho"zo: qere Naonhaung" re ngo ta" kyo: va" mungdao: jham wa nga" mungdao: jham mangad:- ngo we' dadang: dalam: za: ngad: ra" Pho" zaui: so" ra" yao" mau" zo" ngad: ra". 11 Ngo wa Pho" mae Pho" wa nga" khug mae na: ein:- ngo ta" rure lam" ge,- ngo ta" rure malam" gelao" re: ngo zaui" ra" mau" zo" jham: mathao: yang lam" ge,- 12 Naonhaung" re ngo dang za: ta" geli"- ngore lam" ra" yaug wa ngo zaui" ra" mau" zo" re qo" zaui" li" nae". Pe"mung:ga"re ngo wa Pho" jhao" phao: lo" zai ngad: ra". 13 Yao:Zo: khyo" yang Pho" nho: phungbao bao: thug' li" nae" qhid' mae" nga" mang re lao: yang: naonhaung" mho' ra" gu: alhab' re ngo byid: nae" ngad: ra". 14 Naonhaung" nga" mang re lao: yang: ngore pe" mho' gengadqere: naonhaung" re ngo byid: nae"- ga: ta" ra". 15 Amung: naonhaung" ngore jhid'de; ko" ngad: re wa nga" amyin" dao: jham re naonhaung" phug' cao" li" genae". 16 Ngo wa Pho" re mho' nae"- ailao" yao: wa naonhaung" we' daga" apyad ato na nae" bao" thaug' yaug gatau dayaug re naonhaung" jhao" nhao" ke' byid' li" nae". 17 Ai: yaug wa Mao"So: khyo re dangman" ra" khyo" qhu" byid' ra" dangman" ra" Byo ngad: ra". Mug:myid byu qe wa yao: re mamyao maba ko" ruyang maqo" khae: yu ko" ngad: ra". Ngadqere: ai: Byo wa naonhaung" we' daga" na mung:- naonhaung" nhag' lam: khug mae yena: jo; ruyang naonhaung" wa yao: re ba: ako". 18 Ngo phao: lo" lao"- naonhaung" reza: masho: majhin cug' zo: qere ru: nha: to: co' nae" mangad:- naonhaung" jhao" ngo dam: li" nae". 19 Dazab zo: ngad lao" mug:myid byu qe wa ngore mathe' myao lo: genae". Ngadqere: naonhaung" wa ngore the' myao genae"- pe"mung:ga"re ngo wa daui: na: ruyang naonhaung" wa daui: na: li" genae". 20 Ai: ba na joe" lo lao"- ngo wa nga" Pho" we' dadang: dalam: za: ngad mung:- ngo wa naonhaung" we' dadang: dalam: za: ngad: ru we' dakhyo:- naonhaung" re: ngo we' dadang: dalam: za: ngad: rure naonhaung" ba: li" genae". 21 Nga" amyin" dao: jham re khae: yu mung: phug' cao" ra" yaug wa ngore jhid'de; ra" yaug ngad: ra". Ngo re jhid'de; ra" yaug khag' rere: nga" Pho" yang yao: re jhid'de; li" nae". Ngo re: yao: re jhid'de; mung:- yao: re ngoyao" gaung qhu" byid: nae"- ga: ta" ra". 22 (Yuda Iskarud mangad: yaug) Yuda wa Asang we"- naoyao" gaung re mug: myid byu qere maqhu" byid: lo:- ngonhaung" re naoyao" gaung qhu" byid: nae" ru wa khoru: gai: boe" nae" i? ga: myid' ra". 23 Yesu wa ngore jhid'de; ra" yaug khag' ngadqere: nga" mho" shid' dao: re phug' cao" li" nae". Pho" wa yao: re jhid'de; li" nae". Ailao" nga" Pho" we' ngo wa yao: jhao" li" mung: yao: we' daga" na zai ngad: ra". 24 Ngo re majhid'de; ra" yaug khag' ngadqere: nga" mho" dao: re maphug' cao" ngad: ra". Naonhaung" the' gyo: vako" ra" mho" shid' dao: wa nga" mho" shid' dao: mangad:- ngore nhao: ke' ra" Pho" nho: mho" shid' dao: ngad: ra". 25 Ngo naonhaung" we' daga" na shi" au: mae" cegu: re ngo naonhaung" re ta" kyo" to: va". 26 Pho" yang nga" mang mae nhao: ke' byid: nae" ra" ai: bao" thaug' yaug Gyang" Lho" Byo wa naonhaung" re ja: khao: ngo" mho" byid: mung:- naonhaung" re ngo ta" to" ra" dao: alhab' re myid: beim: nhao: li" nae". 27 Ngo wa naonhaung" re yaug yo: ru to: byid: co'. Nga" nho: yaug yo: ruyao: ngo naonhaung" re byid'. Mug:myid: yang byid' ruru: ngo byid' ru mangad:- naonhaung" nhag' lam: damyid: ci" ge,- Gyaug re: dagyaug ge,- 28 Ngo wa phao: lo" nae"- ngadqere: naonhaung" jhao" ngo dam: li" nae"- ein: naonhaung" re ngo ta" to" ra" dao: re naonhaung" the' gyo" avako". Naonhaung" ngore jhid'de; ko" ngad: re wa Pho" jhao" ngo phao: lo" rure naonhaung" bau: gezai ngad: ra". Pe"mung:ga"re yao: wa ngo tho' je: qi: yaug ngad: ra". 29 Airu: boe" li" lao"- naonhaung" wa ngore lam" genae" qhid' mae" ai:gu: maboe" li" shimae" naonhaung" re ngo ta" kyo" to: va". 30 Ngo wa naonhaung" we' dao: myao" sho' maqo" jhau lo nae" ngad: ra". Pe"mung:ga"re ce: mug:myid: zug: pho" wa joe" li" na: ava"- yao: wa ngore eib nae" qam: so' bo nae" mangad:- 31 Ngadqere: Pho" re ngo jhid'de; rure mug:myid byu qe ba ca". Ai: mathao mae ngo wa yao" yang amyin" byid' to" ru we' dakhyo:- ja: khao: ngo" re ngo zaui" ra". Sage,- cejo, qo mae" ye" lo" gelang: se,- ga: yao: re ta" ra". 1 Yesu wa Ngo wa sabyi naui agyang" ngad:- amung: nga" Pho" wa khyae mau" zaui: yaug ngad: ra". 2 Yao: wa ngo mae ashi: mazaui" ra" akaung khao: ngo" re cu: pye' mung:- ashi: zaui" ra" akaung khao: ngo" re wa ashi: je: zaui" li" nae" qhid' mae" sho' pye' byid' ra". 3 Naonhaung" wa ngo kho" kyo: byid: va" mungdao: khyo" yang gyao: gyao: za: ngad: avako". 4 Ngo we' xo' de; jo, ge,- ngore: naonhaung" we' xo' de; jo, nae". sabyi kaung wa sabyi naui dai we' maxo' made, lo: yao: za: ashi: maqo" zaui" ru we' dakhyo:- naonhaung" re: ngo we' maxo' made, re wa naonhaung" yao: za: ashi: maqo" zaui: ko" ngad: ra". 5 Ngo wa sabyi naui dai ngad:- aimung: naonhaung" wa sabyi akaung jham ngad: ako". Ngo we' xo' de; jo; ra" yaug khag' ngadqere: ngore: yao: we' xo' de; jo, mung:- yao: wa ashi: myo: sho' zaui" li" li" nae". Pe"mung:ga"re ngo we' gao: yang: naonhaung" pe" re: maqo" kad' ko" ngad: ra". 6 Ngo we' maxo' made; jo; ra" yaug khag' ngadqere: akaung re we' dakhyo:- shapye' pye' ru qhug' mung: kyaug' lo" ra". Airu" ra" akaung jham re wa su: yang li" gag: vo; yu mung:- myikhyeim" mae pye' zaui: ngha" pye' ako". 7 Naonhaung" wa ngo we' xo' de; jo, mung: nga" mungdao: re: naonhaung" khug mae bo: jo; ngad: re wa naonhaung" o: ra" ja: pe" mho' gengad yang: re: qo" yu: li" genae". 8 Naonhaung" ashi: myo: sho' zaui" ra" khyo" yang nga" Pho" nho: phungbao bao: thug' li" ra". Cekhyo" yang naonhaung" wa nga" mho"zo: boe' lo: ako". 9 Pho" wa ngore jhid'de; ru we' dakhyo:- ngore: naonhaung" re jhid'de; ra". Nga" jhid'de; myid mae zaug: jo, ge,- 10 Ngo wa nga" Pho" nho: amyin" dao: jham re phug' cao" mung:- yao" jhid'de; myid mae zaug: jo; ru we' dakhyo:- naonhaung" re: nga" amyin" dao: jham re phug' cao" ko" ngad: re wa naonhaung" wa nga" jhid'de; myid mae zaug: jo; li" genae". 11 Nga" ngaui bau" ru wa naonhaung" mae bo: jo, mung:- naonhaung" ngaui bau" ru byang" li" nae" qhid' mae" ngo naonhaung" re cedao: ta" ru ngad: ra". 12 Naonhaung" re ngo jhid'de; ru we' dakhyo:- naonhaung" re: dayaug we' dayaug jho" jhid'de; na ge,- ce wa nga" amyin" dao: ngad: ra". 13 Yao" ba nam qe: qhid' mae" yao: yao" kao so' re dan: pye' sho' jhid'de; ru wa qi" thao" ra" jhid'de; myid ngad: ra". 14 Naonhaung" re ngo amyin" byid' ru we' dakhyo:- naonhaung" kad' ko" ngad: re naonhaung" wa nga" ba nam qe ngad: ako". 15 Ana" mae" thoe gu: ngo wa naonhaung" re jeim qe ein: mamhang" lo nae"- pe"mung:ga"re daui daui yaug wa asang kad' ra" mau" re maba ngad: ra". Ai: atha" ngo naonhaung" re ba nam qe ein: amhang" lo nae"- pe"mung:ga"re nga" Pho" mae" ngo the' gyo" yu: ra" gu: alhab' re ngo naonhaung" re ta" kyo: va". 16 Naonhaung" wa ngore khyin: yu ko" ru mangad:- ngo yaug lam: naonhaung" re khyin: yu: ru ngad: ra". Naonhaung" thug' ye" lo" mung: gang" tang: ra" ashi: myo: sho' zaui" jo, genae" qhid' mae" naonhaung" re ngo khyin: san: to" ru ngad: ra". Aimung: nga" mang re lao: yang: naonhaung" yao: re pe" ja: mho' gengadqere: Pho" wa naonhaung" re byid' li" nae". 17 Naonhaung" yao: cao: jho" jhid'de; na ge,- ein: ce: amyin" dao: ngo naonhaung" re byid' ra". 18 Mug:myid: yang naonhaung" re nghang: ko" re wa ai wa ngore shi" sao qhid' nghang: va" rure naonhaung" myid: beim: ge,- 19 Naonhaung" wa mug:myid dao we' sin" ra" mo, ngad ko" re wa mug:myid wa yao: yao" ba nam ug zo: qere we' dakhyo:- naonhaung" re jhid'de; li" genae". Ngadqere: ngo wa naonhaung" re ce: mug:myid dao mae" khyin: yu mung:- naonhaung" wa ce: mug:myid dao we' masin: ko" ngad: ra". Ce: mathao: yang mug:myid wa naonhaung" re nghang" ra". 20 Jeim wa- yao" asang tho' maje: qi: ngad: ra" ein: naonhaung" re ngo ta" rure myid: beim: ge,- yao: bam ngore yhin" ko" re wa yao: bam wa naonhaung" rere: yhin" li" genae". Amung: yao: bam nga" mho" shid' dao: re tae" gyo: ko" ngad: re wa naonhaung" mho" shid' dao: rere: tae" gyo" li" genae". 21 Naonhaung" wa nga" byu qe ngad ko" ruyang yao: bam wa naonhaung" re airu: kad' li" genae". Pe"mung:ga"re yao: bam wa ngore nhao: ke' ra" yaug re maba yang: ngad: ako". 22 Yao: bam re ngo mali" kho" kyo: byid: ngad: re yao: bam wa qobo maqo" genae". Ana" wa yao: bam: qobo loe, khyo ta" pyo' nae" khyo mabung" lo: gengad: ra". 23 Ngo re nghang" ra" yaug khag' ngadqere: nga" Pho" rere: nghang" ra". 24 Yao: bam: phaung mae su gaje khag' re: makad' qu" ra" mau" re ngo makad' lo:ngad: re wa yao: bam qobo qo" nae" mangad:- ana" wa ngo kad' ra" mau" re yao: bam the' myao: yu: avako". Ngadqere: ngo rere:- nga" Pho" rere: yao: bam nghang" ako". 25 Ngadqere: ce wa pe" yug: mabo: rumae yao: bam ngore nghang: ko" ra"- ga: yao: bam: Tarha" mae tung" to" ra" jham: dao: jab byang" li" nae" qhid' mae" ngad: ra". 26 Mao"So wa dangman" ra" khyo re qhu" byid' ra". Ai: Bao" Thaug' Yaug ga" ra" Byo wa Pho" mae" joe" li" zai ngad: ra". Ngo wa yao: re Pho" mae" nhao: ke' nae"- ailao" yao: wa nga" khyo re sagse: li" kham byid' li" nae". 27 Naonhaung" wa sao qhid' mae" ngo we' daga" na: lo vako" rumung:- naonhaung" re: nga" khyo re sagse: kham byid' li" genae". 1 Naonhaung" lam khug: myid mabyo; lo" genae" qhid' mae" ngo wa naonhaung" re cegu: ta" to: va". 2 Naonhaung" wa Tarha" Jung Yham jham mae" khe' thug' pye' ru qhug' li" genae". Aimung: naonhaung" re se' ra" yaug wa yao: naonhaung" re se' ru wa Mao"So: mau" re vin vo; na: ru ngad: ga:- myid: jho: yu nae" ra" ba na joe" lo: li" nae". 3 Yao: bam wa Pho" rere: maba ko" ruyang naonhaung" re airu: kad' li" genae". 4 Ngadqere: airu: kad' nae" yao: bam: ba na joe" lo lao" naonhaung" wa ngo ta" to" rure myid: beim: genae" qhid' mae" ngo naonhaung" re cedao: ta" to: byid: va". Qhid' phyao: wa ngo naonhaung" we' daga" za: na: jo, shiyang: aijham re ngo mata" kyo" qu"- 5 Ana" kam" wa ngore nhao: ke' ra" yaug jhao" ngo phao: lo" zai ngad: ra". Ngadqere: ngo khokhyo phao: lo" nae" rure naonhaung" mae" khag' re: ngore mamyid: ko" ngad: ra". 6 Ana" wa ngo naonhaung" re ta" kyo: va" rumung: naonhaung" nhag' lam: khug mae nhag' kaug' ru byang" sheim: jo; avako". 7 Ngadqere: naonhaung" re ngo dang za: ta" geli"- ngo phao: lo" ru wa naonhaung" qhid' mae" je: gai: ra". Pe"mung:ga"re ngo maphao: lo" re wa ai: Bao" Thaug' Yaug re: naonhaung" jhao" joe" li" nae" mangad:. Ngadqere: ngo phao: lo" lao" kam" wa ai: Bao" Thaug' Yaug re naonhaung" jhao" ngo lo" nhao: ke' byid: nae". 8 Ai: Bao" Thaug' Yaug joe" li" lao"- yao: wa mug:myid byu qere qobo we' sin: yang: yao: bam myid: shad' ra" khyo rere:- Din:man" ra" khyo rere:- Mao"So: dao: kho' ra" khyo rere:- li" ceim" shid' byid' li" nae". 9 Yao: bam: qobo we' sin: yang: shad' ko" ru wa yao: bam wa ngore malam" geyang: ngad: ako". 10 Yao: bam jo: ru we' sin: yang: yao: bam shad' ko" ru wa- ngo wa Pho" jhao" lo" nae" ngad mung:- naonhaung" ngore mamyao lo nae" ngad: ruyang ngad: ra". 11 Dao: kho' ru we' sin: yang: yao: bam shad' ko" ru wa ce: mug:myid dao: zug: pho" wa dao: kho' ru qhug' va" ruyang ngad: ra". 12 Naonhaung" re ngo ta" nae" khyo myo: sho' jo, shi"- ngadqere: ana" naonhaung" aire maqo" khae: yu shiko" ngad: ra". 13 Ngadqere: Mao"So: dangman" ra" khyo re qhu" byid' ra" ai: Byo joe" li" lao"- yao: wa dangman" ra" khyo alhab' khyo re naonhaung" re jhui" ye" li" nae". Yao: wa yao: yao" kheim: so' khyo" majhau nae"- yao: wa yao: the' gyo" ra" gu: re jhau mung:- thao phyao: boe" li" nae" ra" khyo jham naonhaung" re ta" kyo" li" nae". 14 Yao: wa nga" mungdao: re gaug: yu yang: naonhaung" re ta" kyo" li" nae"- aimung: yao: wa nga" phungbao re bao: thug' li" nhao nae". 15 Nga" Pho" qo" ra" gu: alhab' wa nga" mae" ngad: ra". Aimung: ai: Byo wa nga" mungdao: re gaug: yu mung: naonhaung" re ta" kyo" li" nae"- ein: ngo ta" ru ngad: ra". 16 Dazab zo: ngad lao"- naonhaung" wa ngore mamyao lo: genae". Amung: dazab kyo thao re naonhaung" wa ngore dam: myao: li" genae"- ga: ta" ra". 17 Yao" mho"zo: qemae" damyo" wa dazab zo: ngad lao" yao: re mamyao lo: genae"- amung: dazab zo: kyo thao re ngonhaung" yao: re dam: myao genae"- ga: yao: ngonhaung" re ta" ra". Aiwa- Pho" jhao" ngo lo" yang: ngad: ra"- ga: re: yao: ngonhaung" re ta" ra". Ceru wa pe" re ta" nug: laug i? ga: yao: bam yao: cao: jho" myid' ako". 18 Dazab zo: ngad lao"- ga" ru wa pe" re ta" nug: ru laug i? Yao: pe" ja" khyo re ta" na: rure ngonhaung" maba: gyo: ga: jho" ta" ako". 19 Yesu yao" mho"zo: qe yao: re dao:myid: myid; nug ko" rure ba mung: yao: bam re- Naonhaung" yao: cao: jho" myid' na ko" ru wa dazab zo: ngad lao"- naonhaung" ngore mamyao lo: genae"- amung: dazab zo: kyo thao re naonhaung" ngore dam: myao: li" genae"- ein: naonhaung" re ngo ta" ra" khyo mangad: i? 20 Naonhaung" re ngo dang za: ta" geli"- naonhaung" wa ngugbyid ngugnhe' we' kaug' ngug: li" genae"- ngadqere: mug:myid byu qe wa ngaui bau" li" genae"- naonhaung" wa kaug' li" genae"- ngadqere: naonhaung" kaug' ru wa ngaui bau: ngaui lho" ru dam: tha" lo" li" nae". 21 Myiqe: dayaug wa zo:khau nae" ba na loe" lao"- zo:khau no no: rure kham zo: nae" yo, qug joe" lo yang: nhag' kaug' nhag' ngai: ra". Ngadqere: zo: bin: khau lao"- ce: mug:myid dao khyo zonau" dayaug re qo" myhung: ke' va" ruyang ngaui bau: mung: yao: kham zo" lo: ra" zo:khau no re yao: to"myhid' pye' ra". 22 Ai we' dakhyo: naonhaung" re: ana" wa kaug' na: ako". Ngadqere: ngo wa naonhaung" we' dam: jho" myao mung: naonhaung" nhag' lam: wa ngaui bau: ngaui lho" ru byang" sheim: jo; li" genae". Ai: ngaui bau: ngaui lho" rure khag' re: naonhaung" mae" maqo" yu: pye' byid: genae". 23 Ai: ba na joe" lo lao"- naonhaung" wa ngore pe" re: mho' lo: genae" mangad:- naonhaung" re ngo dang za: ta" geli"- naonhaung" wa nga" mang re lao: yang: yao: re pe" mho' gengadqere: Pho" wa naonhaung" re byid' li" nae". 24 Ana" joe" sho' nga" mang re lao: yang: naonhaung" wa pe" daja: re: mamho' shiko" ngad: ra"- naonhaung" ngaui bau" ru jab byang"li" nae" qhid' mae" mho' ge,- mho' ru we' dakhyo: qo" khae: yu: li" genae". 25 Cegu: re ngo wa naonhaung" re dao: tau" khyo" ta" kyo" ru ngad: ra"- Dao: tau" khyo" mangad: lo: Pho" khyo re de: de: za: naonhaung" re ta" kyo: nae" ra" ba na joe" lo: li" nae". 26 Ai: ba na joe" lo lao"- naonhaung" wa nga" mang re lao: yang: yao: re mho' li" genae". Ngadqere: naonhaung" gaung tha" Pho" re ngo mho' byid: nae"- ein: ngo ta" to" ru mangad: 27 Pe"mung:ga"re Pho" yao: yao: re: naonhaung" re jhid'de; ra". Naonhaung" wa ngore jhid'de; ko" ru we' ngo wa Mao"So mae" joe" li" yaug ngad: rure naonhaung" lam" vako" ruyang yao: wa naonhaung" re jhid'de; ru ngad: ra". 28 Ngo wa Pho" mae" ce: mug:myid dao khyo joe" li" ru ngad: ra". Aimung: ana" ngo wa ce: mug:myid dao mae" thug' lo" yang: Pho" jhao" dam: phao: lo" zai ngad: ra". 29 Ailao" yao" mho"zo: qe wa Yesu re- ana" wa dao: tau" maci lo:- de: de: za: nao ta" na: ava"- 30 Nao wa ja: khao: ngo" alhab' re ba yaug ngad: rure ana" ngonhaung" ba va". Nao re khag' yang re: dao: myid: mamyid: ca" lo:ngad: ra". Aimung: nao wa Mao"So mae" joe" li" yaug ngad: rure ngonhaung" lam" va"- ga: ta" ako". 31 Yesu wa yao: bam re- Ana" naonhaung" lam" vako" i? 32 Naonhaung" alhab' mo, wa yao: yao" yham khyo phao: byo: sin" lo" gemung: ngore naonhaung" alhab' yang phao: cug' to: co' li" genae" ra" ba na joe" lo: li" nae". Ana" lhao" joe" jo; ava". Ngadqere: ngo wa gaigai: ngoyao: za: mangad:- pe"mung:ga"re Pho" wa ngo we' daga" na: ra". 33 Naonhaung" wa ngo we' dadang: dalam: za: ngad: na: ra" khyo" yang ngaui pyo: yaug yo: rure naonhaung" qo" yu genae" qhid' mae" ngo naonhaung" re ce: dao: ta" ru ngad: ra". Naonhaung" wa mug:myid dao mae khyag' qhui: ru kham zo: qo: li" genae"- ngadqere: nhag'lam: dagyug: ge,- ngo wa ce: mug:myid re aung: pye' va"- ga: ta" ra". 1 Yesu wa cedao: jham re bin: ta" lao"- mug:gaung khyo tau: qu" mung:- nga"Pho" we"- yo,qug joe" lo: ava". Yao: zo: wa Yao: Pho" re phungbao byid: nae" qhid' mae" ni" zo: re phungbao byid: wa, 2 Pe"mung:ga"re yao: zo: re nao byid' to" ra" mo, alhab' re apyad ato: kao so' qo" byid: nae" qhid' mae" nao wa yao: re xao su byu alhab' mo; dao mae eib: ra" kheim: so' byid' to" ava". 3 Apyad ato: kao so' ga" ru wa date: za: ngad: ra" dangman" ra" Mao"So re ba: ru we' nao: yang nhao: ke' ra" Yesu Khristu re ba: ru ngad: ra". 4 Nao ngore kad' nhao: ra" mau" zo" re ngo bin: zaui: va". Aimung: mug:myid dao mae ni" phungbao re bin: qhu" byid: va". 5 Nga"Pho" we"- Mug:myid re maphan" shimae" ngo nao we' daga" qo" to" ra" phungbao re ni" qhid' kheim: mae ana" ngore byid: la,- 6 Mug:myid dao mae" nao: yang ngore ab byid' to" ra" mo, nao re ba gesho' ngo qhu" byid: va". Nao wa yao: bam re sang mung: yao: bam re nao ngore byid' to" ra". Yao: bam wa ni" mungdao: re phug' cao" avako". 7 Aimung: yao: bam wa nao: yang ngore byid' ra" gu:- ja: khao: ngo" nao mae" thug' li" ru ngad: rure ana" yao: bam ba: avako". 8 Nao: yang ngore byid' to" ra" mungdao: re ngo wa yao: bam rere: ai: mungdao: byid: mung:- yao: bam wa ai: mungdao: re khae: yu: ako". Ngo wa nao mae" joe" li" yaug ngad: ru dang: rure re:- yao: bam lam" ako". 9 Ngo wa yao: bam: qhid' mae" akyu" mho' ra". Ngo wa mug: myid byu qe: qhid' mae" akyu" mamho'. Ngadqere: ngore ab byid' to" ra" mo; qhid' mae" ngo akyu" mho' ra". Pe"mung:ga"re yao: bam wa nao sang: ra" mo, ngad: ako". 10 Ailao" ngo qo" ra" gu: alhab' ni" mae" ngad mung:- nao qo" ra" gu: alhab' re: nga" mae" ngad: ra". Yao: bam: mathao mae nga" phungbao bao: li" ra". 11 Ana" ngo wa nao jhao" phao: lo nae" ngad mung:- mug:myid dao mae mana lo nae"- ngadqere: yao: bam wa mug:myid dao mae na: jo, gezai ngad: ra". Gyang" lho" ra" Pho" we"- nao we' ngo wa dadang: dalam: za: ngad: ru we' dakhyo:- yao: bam re: dadang: dalam: za: ngad genae" qhid' mae" nao ngore byid' ra" ni" mang qam: so' khyo" yang yao: bam re gug: gam byid: wa,- 12 Ngo wa yao: bam we' daga" na shi" au:- nao ngore byid' to" ra" ni" mang qam: so' khyo" yang yao: bam re ngo gug: gam byid: va". Ngo wa yao: bam re gug: gam byid' lo va" ruyang jham: mugsug' jab byang" li" nae" qhid' mae" byaug: jeim" lo" ca" ra" dayaug mae" je yang: yao: bam mae" dayaug re: mabyaug: jeim" lo" gengad: ra". 13 Ngo wa ana" nao jhao" phao: lo zai ngad: ra". Amung: yao: bam wa nga" ngaui bau" rure yao: bam: nhag' lam: khug mae byang" sho' qo" yu genae" qhid' mae" mug:myid dao na shi" au: re cedao: jham re ngo ta" ra". 14 Ngo wa yao: bam re ni" mungdao: byid' ra". Ngo wa mug:myid we' sin" ra" yaug mangad' ru we' dakhyo:- yao: bam re:- mug:myid we' sin" ra" mo, mangad: ko" ruyang mug:myid wa yao: bam re nghang" ra". 15 Yao: bam re mug:myid dao mae" jhui" yu nae" qhid' mae" ngo mamho'- ngadqere: ai: makhyang" ra" yaug: lo, mae" yao: bam re gug: gam zam: so: byid: nae" qhid' mae" ngo nao re mho' ra". 16 Ngo wa mug:myid we' sin" ra" yaug mangad' ru we' dakhyo:- yao: bam re: mug:myid we' sin" ra" mo, mangad: ko" ngad: ra". 17 Dangman" ru khyo" yang yao: bam re naoyao" qhid' mae" kyang" san: yu: to: wa,- ni" mungdao: wa dangman" ru ngad: ra". 18 Nao wa ngore mug:myid khyo nhao: ke' ru we' dakhyo:- ngore: yao: bam re mug:myid khyo nhao: ke' va". 19 Yao: bam re dang za: ni" qhid' mae" kyang" san: to" ra" mo, boe" li" genae" qhid' mae" ngoyao" gaung re ngo kyang" san: to: va". 20 Ngo wa yao: bam: qhid' mae" za: akyu" mho' ru mangad:- yao: bam kho" kyo" ra" mungdao: khyo" yang ngore lam" lo ko" ra" mo; qhid' mae" re:- mho' ra". 21 Yao: bam wa dadang: dalam; za: boe" genae" qhid' mae" ngo akyu" mho' ra". Nga" Pho" we"- nao wa ngo we' dadang: dalam: za: ngad mung:- ngore: nao we' dadang: dalam: za: ngad: ru we' dakhyo:- yao: bam rere: nga" shid' pha: we' dadang: dalam: za: boe" nhao wa,- ngo wa nao: yang nhao: ke' yaug ngad: rure mug:myid byu qe lam" nae" qhid' mae" yao: bam re dadang: dalam: za: boe" nhao la,- 22 Nao we' ngo wa dadang: dalam: za: ngad: ru we' dakhyo:- yao: bam re: dadang: dalam: za: ngad genae" qhid' mae" nao: yang byid' to" ra" phungbao reyao: ngo wa yao: bam re byid: va". 23 Ngo wa yao: bam we' dadang: dalam: za: ngad mung:- nao wa ngo we' dadang: dalam: za: ngad: ruyang yao: bam wa jab byang" sho' dadang: dalam: za: boe" li" mung:- ngo wa nao: yang nhao: ke" ru ngad: rure we' nao wa ngore jhid'de; ru we' dakhyo:- yao: bam re nao jhid'de; rure mug:myid wa ba nae" ngad: ra". 24 Pho" we" Nao wa yao: bam re nga" lo, mae ab byid' to" ava". Nao ngore byid' to" ra" phungbao re yao: bam qu" myao genae" qhid' mae" ngo na: ra" jo, qo mae yao: bam ngo we' daga" qo" na: jo, nae" rure ngo o: ra". Pe"mung:ga"re mug:myid re maphan" shimae" nao ngore jhid'de; ra". 25 Din:man" ra" Pho" we' mug:myid byu qe wa nao re maba gengadqere: ngo wa nao re ba: ra". Aimung: nao: yang ngore nhao: ke' rure cebam ba: ako". 26 Nao ngore jhid'de; ra" jhid'de; myid wa yao: bam: khug mae bo: jo, mung:- ngore: yao: bam: khug mae qo" bo: jo, nae" qhid' mae" ngo wa ni" khyo re yao: bam re ba nhao va"- Xo' yang: re: ba nhao shinae" ngad: ra"- ga: mho' ra". 1 Yesu wa airu: akyu" bin: mho' thao re yao" mho"zo: qe we' daga" ai: jo, qo mae" thug' ye" lo" mung:- Kidron qid gyaung: zo: thoete' khyo gau" de; ye" lo" ra". Aimae khyae dakhyae: jo; ra". Yesu we' yao" mho"zo: qe wa ai: khyae khug khyo vao ye" ako". 2 Yesu we' yao" mho"zo: qe wa ai: jo, qo khyo myo: sho' lhang lhaung" ye" qu" vako" ruyang yao: re ab byid' pye' nae" yaug Yuda wa ai: jo, qo re ba: ra". 3 Aimung: Yuda wa Roma gyezo: daphung: we'- khinjaung qi: qe we' Pharishe qeyang nhao: ke' ra" Caung:pa" Yham gug: gam gyezo: damyo" rere: jhui" li" ra". Yao: bam wa myibaung:- myidam jham we' shae lhae ci yang: ai: jo, qo khyo li" ako". 4 Yesu wa yao: mae boe" li" na: ra" khyo alhab' re ba mung: yao: wa qhid' au: khyo qui" ye: yang:- naonhaung" khag' re qho: na ko" i? ga: yao: bam re myid' ra". 5 Yao: bam wa Nazared mae" Yesu re qho: na: ga: tau" ako". Ailao" Yesu wa- Aiyaug wa ngo ngad va"- ga: tau" ra". Yao: re ab byid' pye' nae"yaug Yuda wa yao: bam we' daga" aimae ye; jo; ra". 6 Yesu wa yao: bam re Ngo wa aiyaug ngad va"- ga: tau" ke' lao"- yao: bam wa naung zad: zad' lo" mung: myid gaung khyo gyang: lang" lo" ako". 7 Yesu wa yao: bam re Naonhaung" khag' re qho: na ko" i? ga: dam: myid' ke' ra". Yao: bam wa Nazared mae" Yesu re qho: na: ga: dam: phaug' tau" ako". 8 Ailao" Yesu wa- Aiyaug wa ngo ngad va: ein: naonhaung" re ta" va". Aimung: naonhaung" ngore qho: na ko" ru ngad: re wa ce: gatau qegu: wa phao: lo" vageshao:- ga: ta" ra". 9 (Yao: ceru: ta" ru wa Pho" we"- nao: yang ngore ab byid' to" ra" mo, mae" dayaug re lhao" re:- ngo maci: phyaug'- ga: ta" to" ra" dao: jab byang" li" nae" qhid' mae" ta" ru ngad: ra".) 10 Simon Petru wa shae dakhyae: vin: ci mung:- she: yu yang: Khinjaung Yin" nho: jeim pho" dayaug re shaqam" ke' re ai: jeim pho" nho: lo, yo shad' nokhye' qam" phyid' khyo" ke' byid' ra". Ai: Jeim pho" mang wa Malakhu ngad: ra". 11 Yesu wa Petru re Ni" shae re shae byao mae dam: ke' to: wa,- ngo wa nga" Pho" yang byid' to" ra" ai: dayin dayo: khyag' qhui: ra" keim re mashaug' li" nae" ein: nao jho: i? ga: ta" ra". 12 Ai: thao re Roma gyezo: qe we' yao: bam: gyezug: pho" we' Yuda gug: gam gyezo: qe wa Yesu re taung" yu mung: taui: yang:- 13 Anna jhao" sao qhid' jhui" ye" ako". Anna wa ai: zin mae Khinjaung Yin" kad' na: ra" Kayapha nho: yaug pho" ngad: ra". 14 Amung: Kayapha wa byu alhab' mo; qhid' mae" byu dayaug za: shid: ru wa je: gai: ra"- ga: kheim: so' qo" ra" Yuda qere pha,jhi" byid' ra" yaug ngad: ra". 15 Simon Petru we' gatau: mho"zo: dayaug wa Yesu thao cao" ye" ako". Gatau: mho"zo: yaug wa Khinjaung Yin" we' jho" se" mung: khinjaung yin" yham mo" vang" khug khyo Yesu we' daga" vao ye" lo" ra". 16 Petru wa taung gaung shad' vang" kham: nhae mae na: jo; ra". Ailao" ai: khinjaung yin" pho" we' jho" se" ra"gatau: mho"zo: yaug wa taung gaung shad' khyo dam: thug' lo mung:- kham: dung: lhaug' ra" myiqe: nau" re ta" yang: Petru re akhug shad' khyo jhui" vao lo" ra". 17 Kham: dung: lhaug' ra" myiqe: nau" wa Petru re- Nao re: aiyaug: mho"zo: qemae" dayaug ngad: ra" mangad: i? ga: ta" ra". Ailao" Petru wa ngo mangad:- ga: tau" ra". 18 Daui daui mo, we' gyezo: qe wa gyo, geyang: vha: myikhyeim" mad: to: yang: myikhyeim" lhang" gam: ye; jo, mung: myi: gao: na: bam: ako". Alao" Petru wa ai: khyo ye: mung: yao: bam we' daga" ye; jo, yang: myi: yebogao: na: ra". 19 Khinjaung Yin" wa Yesu re yao" mho"zo: qe: khyo re we' yao" mho" shid' ra" khyo re myid' ra". 20 Yesu wa Ngo wa khonhae" re: byu alhab' mo; qhid' kheim: mae de: de: za: ta" lo va". Aimung: mo,byu qe alhab' mo, zang" ham: na: ra" Tarha" Jung Yham mae we' Caung:pa" Yham mae ngo mho" shid' lo va". Ngo wa khonhae" re: anyham: avho' mae daja: re: mata" qu"- 21 Aire naonhaung" ngore myid: ko" i? Nga" mho" dao: re tae" gyo" ra" mo,byu qere myid' qu" ge,- ngo pe" ta" lo: rure yao: bam re myid: ge,- ngo pe" ta" rure yao: bam ba: ako"- ga: tau" ra". 22 Yesu ceru: ta" lao"- gug: gam qemae" dayaug wa Yesu re bopyo' pyo' mung:- khoru: mung: nao wa Khinjaung Yin" re airu: vae" ta" i? ga: ta" ra". 23 Yesu wa yao: re- ngo dakheim: kheim: jhau: shad' re wa cemae na: ra" mo, alhab' mo; qhid' kheim: mae kho:kham shad' rure ceim" shid' la,- ngadqere: ngo ta" ra" khyo dang: ngad: re wa pe"mung: ngore pyo' i? ga: ta" ra". 24 Ai: thao re Anna wa airu: taui" to: lo, qo malhai: lo: Yesu re Khinjaung Yin" Kayapha jhao" dai" nhao: ke' ra". 25 Petru wa myi: gao yang: ai:tau mae ye; jo; ashi"- aimung: gatau damyo" wa Nao re: ai: yaug: mho"zo: qemae" dayaug ngad: ra" mangad: i? ga: ta" ako". Ngadqere: Petru wa Ngo mangad: ga: ha: pye' ra". 26 Petru yang nokhye' qam" phyid' khyo" pye' byid' ra" Khinjaung Yin" nho: jeim pho" we' ba nam dau: ra" jeim gayaug re:- nao re: ai: khyae khug mae yao: we' daga" na: rure ngo myao:- mangad: i? ga: ta" ra". 27 Petru wa Ngo mangad:- ga: dam: ha: pye' ra". Ailao"jao" qo, teim: ra". 28 Ne, seim no' Yesu re Kayapha yham mae" Roma mung" zug: pho" yham khyo jhui" dai" ye" ako". Kheim: so' qo" ra" Yuda qe wa Lai co' Poe myi" xeim re qo" zo: nae" qhid' mae" yao: yao" gaung re caung:pa" thung" khyo" yang san sin" jo, nug geyang: yham mo" khug khyo mavao ye: ko" ngad: ra". 29 Aimung: Pilad wa taung gaung khyo thug' ye: yang: naonhaung" ceyaug re pe" ja" qobo zhaug' ko" i? ga: yao: bam re myid' ra". 30 Yao: bam wa Ce:yaug qobo daja: ja: kad' shad' yang: mangad: re wa ni" qhid' kheim: khyo ngonhaung" jhui" li" zai mangad:- ga: tau" ako". 31 Pilad wa Airulao" wa yao: re naonhaung" yao: jhui" lo" mung:- naonhaung" yao" tarha" jo; ru we' dakhyo:- yao: re dao: lo" kho' ge,- ga: yao: bam re ta" ra". Yao: bam wa Ngonhaung" wa byuse' nae" akhang" maqo"- ga: tau" ako". 32 (Yao: bam airu: ta" ko" ru wa Yesu yao: khoru: shid: li" nae"- ga: ta" shid' to" ra" dao: jham jab byang" li" nae" qhid' mae" ngad: ra".) 33 Pilad wa yham mo" khug khyo dam: vao lo" mung: Yesu re khai: yu yang:- nao wa Yuda qe: kho:kham ngad: i? ga: Yesu re myid' ra". 34 Yesu wa yao: re- Ce: dao: myid: wa naoyao" myid khyo" myid' ru i? Mangad: lao" nga" khyo re su gaje qe:yang nao re ta" kyo: vako" ra" i? ga: myid' ra". 35 Pilad wa Nao ngore Yuda byu dayaug ngad: ein: jho: i? Nao re nga" lo, khyo li" ab byid: ko" ra" mo, wa naoyao" amyu" qe we' khinjaung qi: qe ngad: ako"- nao pe" kad' shad' va" i? ga: phaug' tau" ra". 36 Yesu wa Nga" mung"dan: wa ce: mug:myid mae" mangad:- nga" mung"dan: wa ce: mug:myid mae" angad: re wa Yuda kheim: so' qo" ra" mo; lo, khug khyo ngo mavao lo" sho' nga" byu qe khe' khyad' yu: li" genae". Nga" mung"dan: wa cemae mangad:- ga: ta" ra". 37 Airumung: Pilad wa yao: re- Airu: ngad: re wa nao wa kho:kham ngad: i? ga: myid' ra". Yesu wa Nao wa ngore kho:kham ngad: ra"- ga: ta" ra". Ngo wa dangman" ra" khyo re ta" kyo: nae" qhid' mae" khau: li" mung: ce: mug:myid khyo joe" gyo" li" ru ngad: ra". Dangman" ru we' sin" ra" yaug khag' ngadqere: nga" dao: re tae" gyo" ra"- ga: tau" ra". 38 Ailao" Pilad wa dangman" ru wa pe" ngad: i? ga: myid' ra". Ai: thao Pilad wa taung gaung shad' khyo mo,byu qejhao" dam: thug' ye: mung: yao: bam re- ngo wa yao: re dao: phyid' nae" akhyo: pe" mamyao- 39 Ngadqere: naonhaung" thung" jo; ru we' dakhyo:- Lai co' Poe gyo: mae kyam: byu dayaug yaug re ngo wa khonhae: re: lhaung" lhoe' ke' byid' ra". Aimung: naonhaung" qhid' mae" Yuda qe: kho:kham re lhoe' ke' byid: nae" naonhaung" o ko" i? ga: myid' ra". 40 Yao: bam wa- Aiyaug re dalhoe' ke'- Baraba re lhoe' ke' byid: la,- ga: yao: re zag: hug' ako". (Baraba wa damya, ngad: ra".) 1 Pilad wa Yesu re jhui" thug' lo" mung:- be, nhao: ra". 2 Gyezo: qe wa zau: kyao: yang ba maug: dalam: kad' yu mung: Yesu au: mae zhaung: byid' ako". Ai: thao re yao: bam wa Yesu re bau: qhang ane vhe' byid' ako". 3 Yao: bam wa Yesu jhao" qui" li" mung:- Yuda qe: kho:kham we"- Kao qhang so' qhang vashao: wo"- ga: ta" yang: Yesu re bopyo' pyo' ako". 4 Pilad wa taunggaung shad' khyo dalhang dam: thug' ye: mung: mo,byu qere- Qu" ge, Ngo wa yao: re dao: phyid' nae" akhyo pe" daja: rere: mamyao: rure naonhaung" re ba nhao nae" qhid' mae" yao: re ngo ce: jo, qo khyo jhui" thug' li" nae"- ga: ta" ra". 5 Yesu wa zau: kyao maug zhaung:- bau: qhang ane ve; pye' yang: taunggaung shad' khyo thug' lo: ra". Pilad wa Qu" ge, Ceyaug ngad: ra" ga: yao: bam re ta" ra". 6 Khinjaung qi: qe we' Caung:pa" Yham gug: gam qe Yesu re myao gelao" yao: bam wa Yao: re pyao:zang mae jin" se' pye' wa,- yao: re pyao:zang mae jin" se' pye' wa,- ga: zag: hug' ako". Pilad wa yao: bam re Airu: lao" wa yao: re naonhaung" jhui" lo" mung: pyao:zang mae lo" jin" se' pye' ge,- ngo wa yao: re dao: phyid' nae" akhyo pe" daja: rere: mamyao- ga: ta" ra". 7 Alao" mo, byu qe wa- Yao: wa Mao"So: yao: Zo: ngad: ga: yao: yao" gaung re ta" na: ruyang yao: wa shid man" ra" yaug ngad: rure ngonhaung" tarha" mae ta" to" ra"- ga: dam: phaug' tau" ako". 8 Pilad wa ai: dao: re the' gyo: lao" je yang: gyaug: li" ra". 9 Yao: wa yham mo" khug khyo dam: vao lo" mung: Yesu re Nao khai: mae" ngad: i? ga: myid' ra". Ngadqere: Yesu wa pe" re: matau: ngad: ra". 10 Alao" Pilad wa Yesu re- Nao ngore majhau nae" i? Ngo wa nao re lhoe' ke' nae" kheim: so' re:- pyao:zang mae jin" se' pye' nae" kheim: so' re: qo" yaug ngad: rure nao maba i? ga: myid' ra". 11 Yesu wa- Ai: kheim:so' wa Mao"So: yang nao re byid' to: yang: za: nao qo" ru ngad: ra". Aimung: ngore ni" lo, khyo ab byid' ra" yaug wa je yang: qobo qo" ra"- ga: ta" ra". 12 Pilad wa ce:dao: re the' gyo: lao" Yesu re lhoe' ke' nae" khyo qho: ra". Ngadqere: mo, byu qe wa- Nao yao: re lhoe' ke' lao" wa Roma khosin" pho" ba nam mangad: lo:ngad: ra"- yao: Yao" gaung re kho:kham ngad: ga: ta" yaug wa Roma khosin" pho" re tau: lhan: yaug ngad: ra"- ga: hug' ako". 13 Ai: dao: jham re Pilad the' gyo: lao" yao: wa Yesu re taunggaung shad' khyo jhui" thug' ye: mung:- Laug Myhung: Jao: ga: mhang" ra" jo, qo mae" tarha" zug: pho" zaung tao" dao mae zaung: ra". (Hebre myan" khyo" Gabatha ga: mhang" ako".) 14 Ai: ayo, wa Lai co' Poe ba qhid' ba- ba khaung tau: li" na: ra" ayo, ngad: ra". Pilad wa mo,byu qere- Naonhaung" kho:kham pho" re qu" ge,- ga: ta" ra". 15 Yao: bam wa Yao: re- se' pye' wa,- yao: re se' pye' wa,- yao: re pyao:zang mae jin" se' pye' wa,- ga: zag: hug' ako". Ailao" Pilad wa yao: bam re- Ngo: yang naonhaung" kho:kham re pyao:zang mae jin" se' pye' nae" rure naonhaung" nug ko" i? ga: myid' ra". Khinjaung qi: qe wa Ngonhaung" qo" ra" kho:kham wa Roma khosin" dayaug za: angad:- ga: tau" ako". 16 Ai: thao Pilad wa Yesu re pyao: zang mae jin" se' pye' nae" qhid' mae" yao: bam: lo, khug khyo ab byid' ke' ra". Aimung: yao: bam wa Yesu re jhui" thug' lo" ako". 17 Yesu wa Au: Gao: Gye, ga" ra" jo, qo khyo yao" pyao:zang re vo, yang: ye" lo" ra". (Hebre myan" khyo" Golgotha ga: mhang" ako".) 18 Yao: bam wa ai: mae yao: re pyao:zang mae jin" se' pye' ako". Byu gatau shid' yaug rere: Yesu re agaung: mae to: mung:- dashad' mae dayaug pyao:zang mae jin" te' to" ako". 19 Pilad wa aso: tung" ce' tung" mung: Yesu nho: pyao:zang dao mae te' to: nhao: ra". Aiwa- Yuda qe: kho:kham Nazared vobyu Yesu- ga" ru ngad: ra". Aso: tung" ce' re Hebre- Latin- Greeg myan" jham kkyo" tung" te' to" ako". 20 Yesu re pyao:zang mae jin" se' pye' ra" jo, qo wa vomo" mae" mataung" va" ruyang byu myo: sho' mo, aire myao: nghe' ako". 21 Ailao" khinjaung qi: qe wa Pilad re- Yuda qe: kho:kham ein: datung"- ceyaug wa Ngo wa- Yuda qe: kho:kham ngad: ga:- ta" ra" ein: kam" tung" wa,- ga: ta" ako". 22 Pilad wa Ngo tung" to" ru we' dakhyo: ngad va"- ga: tau" ra". 23 Gyezo: qe wa Yesu re pyao:zang mae bin: jin" te' pye' gelao"- yao" mai bau: re yu: yu mung:- byid bam khyo" yang: dayaug dabam jho" gae: yu: ako". Yao: bam wa bau: qhang rere: yu: ako". Ai: bau: qhang wa khyab' khyo: made, lo: qo; to" ra" bau: ngad: ra". 24 Aimung: gyezo: qe wa ce:bau: re wa macad' gejhao"- Khag' qo" yu nae" rure pha" be, gelang:- ga: yao: cao: jho" ta" ako". Gyezo: qe airu: ta" ko" ru wa Yao: bam wa nga" mai bau: re yao: bam yao: cao: jho" gae: yu mung:- Nga" bau: qhang qhid' mae" pha" ce' khyo" ako"- ga" ra" jham: dao: jab byang" li" nae" qhid' mae" boe" ru ngad: ra". Gyezo: qere: ai we' dakhyo: kad' ako". 25 Yesu nho: pyao:zang nhae mae yao: myhi"- yao: myhi" nho: yao: nhaung:- Klopa nho: yham sang myhi" Mari- Magadala Mari bam ye; jo; ako". 26 Yesu wa yao: myhi" we' yao: jhid'de; ra" mho"zo: ai: mae ye; jo, ko" rure myao mung:- Yesu wa yao: myhi" re Yao: wa ni" zo: ngad: ra"- ga: ta" ra". 27 Ai: thao re Yesu wa ai: mho"zo: re- yao: wa ni" myhi" ngad: ra"- ga: ta" ra". Ai: ba mae" ai: mho"zo: wa Yesu yao: myhi" re yao" yham khyo lo" jhui" nha: to" ra". 28 Yesu wa mau"zo" alhab' bin va" rure ba mung:- Jham: mugsug' mae tung" to" ru we' dakhyo:- jab byang" li" nae" qhid' mae" Ngo qid shab' kyi:- ga: ta" ra". 29 Ai: mae sabyi qang: jhin byang" sho' bo: ra" jarung: dalam: jo; ra". Aimung: yao: bam wa sabyi qang: jhin mae qid mug sad' jam: yu yang:- Husub kaung mae thug' ze; te' mung: Yesu nhad' khyo to' byid' ako". 30 Yesu wa ai: sabyi qang: jhin re bin: shaug' mung:- Mau" bin va"- ga: ta" yang: yao" au: goe; lo" mung: kao gyo" lo" ra". 31 Ai: thao kheim: so' qo" ra" Yuda qe wa pyao: zang mae jin" se' pye' ra" mo; khyid jham re khyug' pye' mung:- pyao: zang dao mae" mao gaung jham re yu: khyo" yu nae" qhid' mae" Pilad re akhang" mho' ako". Yao: bam ceru: mho' ko" ru wa ai: ba wa ban thug' ngo" ba: ba ngad mung:- Dugno: Ba re pyao:zang jham mae mao gaung jham re malao" jo, nhao nug geyang: ngad: ako". Pe"mung:ga"re ai: Dugno: Ba wa je: gyang" lho" ra" ba na ngad: ra". 32 Aimung: gyezo: qe wa ye" lo" mung:- Yesu we'daga" pyao: zang mae jin" te' to: qhug' ra" sao qhid' yaug: khyid re be; khyug' pye' mung:- thao mae" yaug: khyid rere: be; khyug' pye' byid' ako". 33 Ngadqere: yao: bam wa Yesu jhao" joe" lo gelao"- Yesu shid va" rure lomyao gemung:- yao" khyid re wa mabe; khyug' ko" ngad: ra". 34 Ngadqere: gyezo: dayaug wa lhae tad' yang Yesu nae dan: mae yethug' ke' we' aijao" sa: we' qid yug: thug' li" ra". 35 (Naonhaung" re: ce: khyo re lam" genae" qhid' mae"ceru: boe" rure yao" myo; yang yao: the' myao: ra" yaug yao: ta" ru ngad: ra". Yao: ta" ru wa dang: ra"- aimung: yao: wa dangman" ra" dao: ta" ru ngad: rure yao: yao: ba: ra".) 36 Ceru: boe" ru wa- yao" shoqug: dakhe' re: khyug' ru maqhug' nae"- ga: ta" to" ra" jham: dao: jab byang" li" ru ngad: ra". 37 Amung: jham: mugsug' gatau dalam: mae re:- yao: bam: yang lhae tad' yang thug' ra" yaug re yao: bam ceim" qu" li" genae"- ga: ta" to" ra". 38 Ai: thao Arimathe vogaung: mae" Yoseb wa Yesu nho: maogaung re yu: yu nae" qhid' mae" Pilad re akhang" yemho' ra". (Yoseb wa kheim: so' qo" ra" Yuda qere gyaug yang: anyham: avho' khyo" Yesu mho"zo: boe" na yaug ngad: ra".) Ailao" Pilad wa Yoseb re akhang" byid' ke' ra". Yoseb wa ye" lo" mung:- mao gaung re yeyu: yu: ra". 39 Qhid' phyao: myi" ayo, re Yesu jhao" li" ra" Nikodi wa Mura we' Ajho: lhag' ra" sheim nae pyo" ra" ja: sam xe: ngo" joe: ko yu: vin mung:- Yoseb we' daga" cao" ye" ra". 40 Yao: shid' zo: wa Yesu mao gaung re yu: yu mung:- Yuda byu qe: nyhab' shaung nae" mao gaung re nyhang" shaung: ra" thung" we' dakhyo:- sheim nae pyo" ra" ja: gyad mung: jid:mo" pin" yang mao gaung re thab' ako". 41 Yesu re pyao: zang mae jin" se' ra" jo, qo mae khyae dalam: jo; ra". Aimung: ai: khyae mae khag' re: manyhab' qu" shi" ra" lab asag' dalam: re: jo; ra". 42 Ai: ba wa Dugno: Ba qhid' ba- seim" jin" ra" ba na ngad: ru we' lab re: ajhao" mae jo; ruyang yao: shid' zo: wa Yesu nho: mao gaung re ai: lab khug mae yeke' to" ako". 1 Laban ba ne, seim no' myo, mamyao shire- Magadala Mari wa lab khyo ye" lo" ra". Yao: wa lab nhad' mae" laug zang tau: qhui" pye' to: va" rure yemyao: ra". 2 Aimung: yao: wa Simon Petru we' Yesu jhid'de; ra" gatau: mho"zo: jhao" tao" ye: mung:- yao: bam wa Asang re lab mae" yu: pye' vagenhaung- Khai: mae yeto" pye' vako" laug? Ngonhaung" maba lo: ga: yeta" ra". 3 Ailao" Petru we' ai: gatau: mho"zo: qe wa lab khyo ye" lo" ako". 4 Yao: shid' zo: shid' zo" geim" tao" ye" lo" ako". Ngadqere: gatau: mho"zo: yaug wa Petru tho' je: qao mung:- lab khyo qhid' joe" ye" ra". 5 Yao: gam" qu" ke' re jid:mo" pin: lung: jham bam: jo; rure myao: ra". Ngadqere: yao: wa lab khug khyo mavao ye: ngad: ra". 6 Simon Petru wa yao" thao mae joe" li" mung:- lab khyaung khug khyo khyao za: vao ye" lo" ra". Yao: wa jid: mo" pin: lung: jham bam: jo; rure we' Yesu au: mae thab' ra" pin: dau re yemyao: ra". 7 Yesu au: mae thab' ra" pin: dau wa jid:mo" pin: lung: jham we' daga" majo, lo:- yao: yao: za: gatau mae kheim" bam: jo; ra". 8 Ai: thao re lab khyo sao qhid' joe" ye" ra" gatau: mho"zo: re:- lab khug khyo vao ye" lo" mung:- ai:rure yao: yao: yemyao yang: lam" ra". 9 (Yesu wa shid: rumae" dam: daui: to" li" ca"- ga" jham: dao: re yao: shid' zo: maba: gyo: shiko" ngad: ra".) 10 Ai: thao mho"zo: shid' yaug wa yham khyo phao: lo" ko" ra". 11 Mari wa lab taunggaung shad' mae ngug: ye; jo; ra". Yao: wa airu: ngug zo" re" lab khyaung khug khyo gam" qu" ke' re- 12 Mai bau: phyu ve; ci: ra" mug: lagyo: shid' yaug re Yesu nho: mao gaung mhao" to" ra" jo, qo mae- au: tho' shad' mae dayaug- khyid thao shad' mae dayaug zaung: jo, ko" rure myao: ra". 13 Lagyo: shid' zo: wa Myiqe: we"- nao pe"mung: ngug: na: i? ga: myid' ako". Ailao" Mari wa Yao: bam wa nga" Asang re yu: pye' mung:- khai: mae yeto" pye' ko" rure ngo maba yang: ngad:- ga: yao: shid' zo: re tau" ra". 14 Airu: ta" mung: lhang: lo: re Yesu aimae ye; jo; rure myao: ra". Ngadqere: Yesu ngad: rure yao: maba ngad: ra". 15 Yesu wa Myiqe: we"- nao pe"mung: ngug: na: i? ga: yao: re myid' ra". Ailao" Mari wa Yesu re khyae lhaug' yaug ngad: ga: jho mung:- Nhag' bo we"- yao" mao gaung re nao vo; yu: pye' ngad: re wa nao khai: mae yeto" rure ngore ta" kyo: la,- ngo wa yao: re yeyu: yu nae"- ga: ta" ra". 16 Yesu wa yao: re Mari we"- ga: yao: ra". Mari wa Yesu shad' khyo lhang: lo mung: Hebre myan" khyo" Raboni ga: tau" ra". (Raboni ga" ru wa mho"pho"- ga" ru ngad: ra".) 17 Yesu wa yao: re- ngore dazaui: la,- pe"mung:ga"re ngo wa Pho" jhao" mado, lo" shi:- ngadqere: nga" mao:nhaung: qejhao" lo" mung:- yao: bam re- ngo wa nga" Pho" we' yao: bam: Yao: Pho" ngad: ra" nga" Mao"So we'yao: bam: Mao"So jhao" dam: do, lo" nae" ngad: ra"- ein: lo" ta" kyo: byid: la,- ga: ta" ra". 18 Aimung: Magadala Mari wa lo" yang: Asang re yao: the' myao va" ru we' Asang yao: re pyang: ke' ra" dao: jham re mho"zo: qere yeta" kyo" ra". 19 Laban ba myi" thao mug: sham" sham" cad' lo" yo, re mho"zo: qe wa Yuda kheim: so' qo" mo, re gyaug geyang: yham khug mae kham: pyid' pye' mung: zang" ham: na: bam: ako". Ailao" Yesu wa joe" li" mung: yao: bam: phaung gaung: mae li" ye; jo, yang:- naonhaung" ngaui pyo: yaug yo vageshao:- ga: ta" ra". 20 Airu: bin: ta"lao"- Yesu wa yao" lo, we' nae dan: re yao: bam re qhu" byid' ra". Ailao" mho"zo: qe wa Asang re the' myao gemung:- gyai ngaui bau" ako". 21 Yesu wa yao: bam re- Naonhaung" ngaui bau: yaug yo vageshao:- Pho" wa ngore nhao: ke' ru we' dakhyo:- ngore: naonhaung" re nhao: ke' ra" ga: dam: ta' ra". 22 Ai: thao Yesu wa mho"zo: qe: dao mae so' she: ke' mung:- Gyang" Lho" Byo re khae: yu ge,- 23 Qobo qo" ra" mo, re naonhaung" qobo khyad' byid: ko" re wa yao: bam wa qobo khyad' byid' ru qhug' li" genae"- naonhaung" qobo makhyad' byid: ko" re wa yao: bam wa qobo khyad' byid' ru maqhug' genae"- ga: ta" ra". 24 Yesu li" ra" au: re mho"zo: daxe: shid' yaug mae bobo: ra" (zozam ga: mang: ra") Thoma wa mho"zo: qe we' daga" mana: ang ngad: ra". 25 Aimung: gatau: mho"zo: qe wa ngonhaung" wa Asang re myao va"- ga: ta" kyo" ako". Ailao" Thoma wa ngo wa yao" lo, mae" ze,jin" khu re myao mung:- ai: dae khu jham re nga" lo, nyhug' yang yao: soe' qu" yang:- nga" lo; yang yao: yao" nae dan: re maqo" soe' re wa ngo malam" nae"- ga: yao: bam re tau" ra". 26 Dalaban kyo thao re mho"zo: qe wa yham khug mae dam: zang" ham: na: bam: ako". Thoma re: yao: bam we' daga" na: jo; ra". Kham: jham re pyid' to" ako"- ngadqere: Yesu wa joe" li" mung:- yao: bam: phaung gaung: mae li" ye; jo, yang:- naonhaung" ngaui pyo" na vageshao:- ga: ta" ra". 27 Ai: thao Yesu wa Thoma re- Ni" lo, nyhug' yang nga" lo, re tin" qu" wa,- nga" lo, rere: qu" wa,- amung: ni" lo, yheim" ke' yang: nga" nae dan: mae re: soe' qu" wa,- Aug' o: myid dabo- lam" wa,- ga: ta" ra". 28 Thoma wa Yesu re- Nga" Asang we' Nga" Mao"So- ga: ta" ra". 29 Yesu wa yao: re- Nao wa ngore the' myao yang: lam" i? Ngo re mathe' myao lo:- ngore lam" mo, wa ngaui lho" ko" ra"- ga: ta" ra". 30 Ce: jham: paug' mae mabo: tung" to" ra" gatau mug' pho: ve, lho jham myo: sho' re: Yesu wa yao" mho"zo: qe: qhid' kheim: mae zaui" qhu" ra". 31 Ngadqere: Yesu wa Mao"So: yao: Zo: Meshia ngad: rure naonhaung" lam" genae" qhid' mae" we' yao: re lam khug: ra" khyo" yang naonhaung" wa kao so' qo" yu genae" qhid' mae" ce: jham: paug' re tung" to" ru ngad: ra". 1 Ai: thao re Yesu wa Tiberia tham: mae yao" mho"zo: qere yao" gaung na: qhu" byid' ra". 2 Boe" ra" khyo wa ceru: ngad: ra". Simon Petru- (zozam ga: mang yaug) Thoma- (Galile Ka Na vobyu) Nathanae- Zebede yao: zo: tao we' Yesu mho"zo: gatau shid' yaug wa daga" za: na: bam: ako". 3 Simon Petru wa gatau mho"zo: qere Ngo ngo: kung" ye: nae"- ga: ta" ra". Ailao" yao: bam wa Ngonhaung" re: cao nae"- ga: yao: re ta" ako". Ai:mung: yao: bam wa lha dakhye' mae do; zaung mung:- ngo: yekung" ako". Yao: bam wa ai:myi damyi: geim" kung" gengad yang: re:- ngo: dadau: re: mathe' ko" ngad: ra". 4 Ba thug' li" lao" Yesu wa qid yae mae yeye; jo; ra". Ngadqere: mho"zo: qe wa Yesu ngad: rure maba ko" ngad: ra". 5 Ailao" Yesu wa Zolau: bam we"- ngo: mathe' kung" ko" i? ga: yao: bam re myid' ke' ra". Yao: bam wa dadau: re: mathe' kung"- ga: tau" ako". 6 Aimung: Yesu wa Naonhaung" nho: geim re lha lo,yo shad' khyo khyo" ke' ge,- naonhaung" the' li" genae"- ga: yao: bam re ta" ra". Ailao" yao: bam wa Yesu ta" ru we' dakhyo:- geim re khyo" ke' ko" re- ngo: myo: sho' re the' myhi" yu yang: geim re lhao" matho' she: to' yu loko" ngad: ra". 7 Yesu jhid'de; ra" mho"zo: wa Petru re- Asang ngad: ra"- ga: ta" kyo" ke' ra". Petru wa Asang ngad: ra"- ga" rure the' gyo: lao"- yao: wa yao" adao: bau: qhang re gaung mae gaug: yang" mung:- qid tham: khyo byae: gyo" ye" ra". (Pe"mung:ga"re yao: wa gaung pyad' ngad: ra".) 8 Gatau: mho"zo: qe wa gyagao: yo we' gyai mataung" va: lo:- gad' dayo za: kyo loyang:- ngo: byang" sho' myi" jo; ra" geim re she zo" re" tham: yae khyo lha we' joe" lo: ako". 9 Yao: bam gyagao: yo khyo joe" lo gelao"- myi:gyoe: dao mae kao: to" ra"ngo: jham re we' mug jham re lomyao: ako". 10 Ailao" Yesu wa yao: bam re- Naonhaung" the' kung" to" ra" ngo: daqhae: cilo geri:- ga: ta" ra". 11 Simon Petru wa lha khug khyo vao ye: mung:- ngo: qi: jham byang" sho' myi" jo; ra" geim re gyagao: yo khyo yeshe: to' yu: ra". Ngo: dayo: ngo" xe: sam dau: myi" ngadqere: geim majad ngad: ra". 12 Yesu wa yao: bam re- Lozo: geri:- ga: ta" ra". Yao: bam wa Asang ngad: rure ba geyang:- nao khag' ngad: i? ga:- mho"zo: qe khag' dayaug re: Yesu re mavae" myid: ngad: ako". 13 Aimung: Yesu wa yao: bam jhao" ye: mung:- mug rere: yu: yu yang:- yao: bam re byid' ra"- ngo: rere: ai we' dakhyo: byid' ra". 14 Yesu wa yao: shid; rumae" dam: daui: to" li" thao- mho"zo: qere yao" gaung na: qhu" byid' ru celhang wa sam lhang ein: lhang ngad: ra". 15 Yao: bam bin: zo: gethao re Yesu wa Simon Petru re- Yohan nho: yauggai zo: Simon we"- Gaje qe ngore jhid'de; ko" ra" tho' nao ngore je: jhid'de; i? ga: myid' ra". Petru wa Asang we"- nao re ngo jhid'de;- nao re ngo jhid'de; rure nao ba: ra"- ga: tau" ra". Ailao" Yesu wa yao: re Nga" yao nau" jham re khau wa,- ga: ta" ra". 16 Yesu wa shid' lhang ein: lhang Petru re- Yohan nho: yauggai zo: Simon we"- nao ngore jhid'de; i? ga: dam: myid' ra". Petru wa Asang we"- ngo jhid'de;- nao re ngo jhid'de; rure nao ba: ra"- ga: tau" ra". Yesu wa yao: re Nga" yao jham re zam: wa,- ga: ta" ra". 17 Yesu wa sam lhang ein: lhang Petru re- Yohan nho: yauggai zo: Simon we"- nao ngore jhid'de; i? ga: myid' ra". Ailao" Petru wa Nao ngore jhid'de; i? ga: sam lhang yao: taung" myid' ruyang nhag' gyo" kaug' mung:- Asang we"- nao wa alhab' re ba yaug ngad: ra"- nao re ngo jhid'de; rure nao ba: ra"- ga: phaug' tau" ra". Yesu wa yao: re- Nga" yao jham re khau: na wa,- ga: ta" ra". 18 Nao re ngo dang za: ta" li"- nao wa zolau: yo, re ni" gaung re naoyao: seim" jin" mung:- naoyao: ye: nug: ra" khyo qo" ye" ra"- ngadqere: nao mao" lo" lao" wa ni" lo, shid' shad' geim" yheim" ke' mung:- su gaje: yang taui: yang:- nao manug: ye" ra" jo, qo khyo nao re jhui" ye" li" genae"- ga: ta" ra". 19 (Airu: ta" ru wa Petru wa khokhyo" shid mung: Mao"So: phungbao bao: thug' li" nae"- ga" rure Yesu ceim" shid' yang: ta" ru ngad: ra".) Ai: thao Yesu wa Petru re- Nga" thao cao" wa,- ga: ta" ra". 20 Petru lhang: qu" ke' re- yao" thao mae Yesu jhid'de; ra" gatau: mho"zo: re the' myao: ra". Ai: yaug wa myi" xeim zo" na ko" au:- Yesu we' te' te' zaung: nga: jo, yang:- Asang we"- nao re ab byid' pye' nae" khoyaug ngad: ra"i? ga: Yesu re myid' ra" yaug ngad: ra". 21 Petru wa aiyaug re myao lao"- Asang we"- ceyaug: khyo we' sin: yang: khoru: i? ga: Yesu re myid' ra". 22 Yesu wa Petru re- ngo joe" li" ra" ba na joe" sho' yao: re ngo daui: na nhao nug ngadqere:- ai wa nao we' pe" sin" i? Nga" thao cao" wa,- ga: ta" ra". 23 Aimung: ai: mho"zo: wa mashid nae"- ga" ra" lau dao: wa mho"zo: qe: phaung mae hau" nhao" lo" ra"- ngadqere: Yesu wa ai: mho"zo: mashid nae"- ga: ta" ru mangad:- yao: ta" ru wa Ngo joe" li" ra" ba na joe" sho' yao: re ngo daui: na nhao nug ngadqere:- aiwa nao we' pe" sin" i? ga: ta" ruza: angad: ra". 24 Mho"zo: aiyaug wa ce: khyo jham re sagse: kham mung:- cera" khyo jham re tung" xam" to" ra" yaug ngad: ra". Yao: sagse: kham: to" ru wa dangman" ru ngad: rure ngonhaung" ba: ra". 25 Yesu zaui" ra" mau" zo" gatau myo: sho' jo, shi" ra"- ai:gu: alhab' re azo" tai" tung" xam" to: nae" ngad: re wa ce: mug:myid geim" mae lhao" re:- ai: mugsug' paug' jham to: nae" jo, qo qui" nae" mangad:- ein: ngo myid: jho: ra".
|