Hebrews
Hebre1 Daba: pyad mae Mao"So wa ngonhaung" phug' pho" qere myo: sho' lhang we' khyo aja: ja: mae lapa qe: nhad' dao: thoe khyo" yang dao: jhau: lo: ra". 2 Ngadqere: ce: lo" thao" ra" ba na gu: mae wa Mao"So wa yao: zo: khyo" yang ngonhaung" re dao: jhau: ava". Mao"So wa ai: yao: Zo: khyo" yang mug: kin myid kin alhab' re phan" phaug' mung: lo" thao" mae ja: khao: ngo" alhab' re sang: yu nhao nae" qhid' mae" yao: re khyin: san: to" ava". 3 Yao: wa Mao"So: phungbao bao: qhui: na: ru we' Mao"So: gaung khyao ave, vin mung: yao" qam: so' bo: ra" dao: thoe: yang mug: kin re zaui" ci: ra". Amung: xao su byu qe: qobo jham re khyad' pye' byid' ra" mau" zo" bin: zaui: thao re yao: wa mug:gaung dao mae qam: bo: thao" ra" Mao"So: lo, yo shad' mae zaung: jo; ra". 4 Mao"So: yang yao: re byid' to" ra" mang wa- mug: lagyo: qe: mang tho' je: qi" ra" khyo" byid' to" ru we' dakhyo:- yao: Zo: wa mug: lagyo: qe tho' je: qi" ra". 5 Pe"mung:ga"re Mao"So wa yao" mug: lagyo: qemae" khoyaug rere:- Nao wa nga" Zo: ngad: ra"- ana" ba ngo wa ni" Pho" boe" lo va" ga: re:- ailao" Mao"So wa mug: lagyo: khoyaug rere: Ngo wa yao" yao: pho" boe" nae"- amung: yao: wa nga" Zo: boe" lo: li" nae" ga: re: khonhae" re: mata" qu" ngad: ra". 6 Ngadqere: Mao"So wa yao" zoqhid' yauggai Zo: re mug:myid dao khyo nhao: ke' nae" au: re- Mao"So: mug: lagyo: qe alhab' yao: re caung:pa" ca"- ga: ta" ra". 7 Ngadqere: Mug:lagyo: qe: khyo we' sin: yang:- Mao"So wa yao" mug: lagyo: qere la boe" nhao mung: yao" daui daui mo, re myishae boe" nhao: ra" ga: Mao"So ta" ra". 8 Ngadqere: Yao: Zo" khyo we' sin: yang: Mao"So we"- Ni" mung"dan: wa apyad ato jo; jo; li" nae" wo"- Nao wa nao yao" byu qe: dao mae din: nyang: ra" khyo" eib: ra". Nao wa jo: rure jhid'de; mung: shad' rure nghang" ra". 9 Airu: mung: Mao"So- ni" Mao"So wa nao re khyin: yu mung: ni" byin cao: qe tho' nao re je: phug' te' mung: ngaui bau" ru nao re byid' ava" ga: Mao"So ta" ra". 10 Amung: Mao"So wa Asang we"- nao wa sao qhid' maqhid mae mug:myid re phan" to: mung: nao yao" lo; yang mug:gaung re phan" to" ra". 11 Ai: gu: wa byo; qeim: lo" li" genae"- ngadqere: nao wa dang: jo; li" nae". Ai: gu: alhab' wa mai bau: jham we' dakhyo: qeim" lo" byaug: li" genae". 12 Nao wa adao: bau: qhang re dang" lham" ru we' dakhyo: aijham re dang" lham" pye' li" nae"- Aijham wa mai bau: re tha" pye' ru we' dakhyo: tha" pye' ru qhug' li" genae". Ngadqere: nao wa khonhae" re: dakhyo: za: ngad: jo, mung: ni" kaoso' wa apyad ato khonhae" re: mathao" ngad: ra"- ga: re: ta" ra". 13 Mao"So wa yao" mug: lagyo: qemae" khoyaug rere: Ni" gyevo qere ni" khyid zab tao" we' dakhyo: ni" khyid qao: mae ngo mato: byid: byid: wa ce: nga" lo, yo shad' mae zaung: jo, wa,- ga: khonhae" re: mata" qu" ngad: ra". 14 Airulao"- mug: lagyo: qe wa pe" ru" mo, ngad: ako" i? Yao: bam wa khyad' yu: ru qhug' yu nae" ra" mo, re bao" thaug' byid: nae" qhid' mae" Mao"So: yang nhao: to" ra" Mao"So re caung da" byid' ra" byo jham ngad: ako". 1 Airumung: naonhaung" wa cidao" lo" byaug: ru maqhug' genae" qhid' mae" naonhaung" the' gyo" yu vako" ra" ai: dangman" ra" khyo re je yang: tang za: zaui" zag: ci qo: ra". 2 Mug: lagyo: qekhyo" yang ngonhaung" phug' pho" qere byid' to" ra" ai: mungdao: wa dangman" ru ngad mung: aire maphug' cao" ra" yaug wa qobo dae re kham: yu nae" man: qi" ra". 3 Airumung: ngonhaung" wa ai qhi" qi" qhang: ra" khyad' yu: ra" khyo re pe" shui manho lo: na: bam: ngad: re wa ai: qobo dae kham zo: nae" rumae" ngonhaung" khoru: qo" phao: loe; bam nae" i? Ce: khyad' yu: ra" khyo re Asang yao: shi" sao qhid' ta" hau" kyo: mung: aire the' gyo" yu: ra" mo, wa ai: dangman" rure ngonhaung" re sagse: kham byid' ako". 4 Aitho' mago"- Mao"So yao: re: mug' pho: ve, lho aja: ja: mug' pho: mau" zo" jham re zaui" qhu" ru we' Gyang" Lho" Byo: jeju jhaung qhu" jham re yao" myid o: ru we' dakhyo: gae byid' ra" khyo" yang yao: bam: sagse: kham: rumae bolaung: mung: sagse: qhu" byid' ra". 5 Mao"So wa- ana" ngonhaung" ta" na: ra" mug: myid ngad: ra" thao phyao: joe" lo nae" ra" mug: myid asag' re mug: lagyo: qere maeib nhao: to: ngad: ra". 6 Ai: atha" Jham: Mugsug' datau mae- Mao"So we"- nao beim" na: ra" xao su byu we' nao qu" gun caung: na: ra" byu wa pe" ru" yaug ngad: ra" i? 7 Nao wa yao: re dayo, daban: za: mug: lagyo: qe: o mae khyo" to" ra". Amung: phungbao we' phug' te' nga: yhe' ru yao: re zhaung: byid: mung: Cao jab alhab' re eib: ra" zug: kad' nhao: ra"- ga: ta" to" ra". 8 Jham: Mugsug' mae Mao"So wa byu re cao jab alhab' re eib nae" zug: kad' nhao: ra"- ga: ta" ru wa ja: khao: ngo" re bota" ru ngad: ra". Ngadqere: ngonhaung" wa ana"- cao jab alhab' re byu: yang eib: na: rure mathe' myao ngad: ra". 9 Ngadqere: ngonhaung" wa Mao"So: nhag' myan" ra" jeju khyo" yang byu yaug khao: ngo" qhid' mae" qo" shid kham: byid: nae" qhid' mae" dayo, daban: za: mug: lagyo: qe: o mae khyo" to: byid' ru qhug' ra" Yesu re the' myao: bam va". Yao: dayin dayo: kham zo: mung: shid kham: byid: va" ruyang phungbao we' phug' te' nga: yhe' ru zhaung" ci: rure ngonhaung" yao: re ana" the' myao va". 10 Cao jab alhab' re phan" to: mung: zaui" ci: na: ra" Mao"So wa zo: dau myo: sho' re yao" phungbao qo" kham: yu nhao nae" qhid' mae" dayin dayo: kham zo: nhao: ra" khyo" yang Yesu re jab byang" nhao: ru wa Mao"So kad' ru gai ang: ra" khyo ngad: ra". Pe"mung:ga"re Yesu wa yao: bam re khyad' yu: ru qhug' sho' jhui" ye" ra" yaug ngad: ra". 11 Yesu wa byu qere yao: bam: qobo mae" kyang" san: pye' byid' ra". Amung: yao: we' yao" yang kyang" san: pye' ru qhug' va" ra" mo, alhab' wa Pho" dayaug za: ngad: ako". Airumung: Yesu wa yao: bam re yao" mao:nhaung: qe ga: mhang" nae"- maqho' ngad: ra". 12 Yao: wa Mao"So re- Ngo wa nao zaui" lo: ra" lo, mau" re nga" mao:nhaung: qere ta" kyo: nae"- Yao: bam: zabphaung mae ngo nao re caung:khin" byid: nae"- ga: ta" ra". 13 Yesu wa ngo wa Mao"So re khug ngha: na nae"- ga: re:- amung: Mao"So: yang ngore byid' to" ra" zo: dau qe we' daga" ngo ce: jo, qo mae na: jo;- ga: re: ta" ra". 14 Ai: zo: dau qe wa sa: sho: bo: ra" mo, ngad ko" ruyang Yesu yao: yao: re: yao: bam we' dakhyo: xao su byu: nho: ve, khyao re kham: yu: ra". Yao: ceru: kham: yu: ru wa yao: shid kham: ra" khyo" yang shid: rure eib: na: ra" Satan re phyo' pye' nae" qhid' mae" ngad: ra". 15 Ce: khyo khyo" yang shid: rure gyaug yang: yao: bam: dapyad geim" jeim boe" na ko" ra" mo, re loe; beim nhao: ke' byid' ra". 16 Pe"mung:ga"re yao: wa mug: lagyo: qere bao" thaug' byid: yaug mangad:- Jham: Mugsug' mae ta" to" ru we' dakhyo: yao: wa Abraham: nho: myid:zo: qere bao" thaug' byid' ra" yaug ngad: ru wa de: de: za: ngad: ra". 17 Ceru wa yao: wa byu qenho: qobo jham re qo" khyad' pye' byid: nae" jhaug' zaug: ru we' nhag' khyag' shogu: myid bo: ra" yao: bam: Khinjaung Yin" kad' yang: Mao"So: mau" zo" re caung da" byid: nae" qhid' mae" khyo khe' khao: ngo" mae yao" mao:nhaung: qe we' dakhyo: dau sho' tau" yu ca" ra" ga" ru ngad: ra". 18 Amung: ana" wa- yao: yao: re: ju" phyo' ru qhug' mung: qug: khai: dayin dayo: kham zo" qu" va" yaug ngad: ruyang yao: wa ju" phyo' ru qhug' ra" mo, re qo" bao" thaug' byid' ra". 1 Mao"So: yang khai: yu qhug' ko" ra" nga" Khristan mao:nhaung: qe we"- ngonhaung" lhang: yu: ra" lalam lakhug: nho: Khinjaung Yin" kad' nae" qhid' mae" Mao"So: yang nhao: ke' ra" Yesu re myid: qu" ge,- 2 Moshe wa Mao"So: yham mae yao" mau" zo" mae lam ga" kyid yaug ngad: ru we' dakhyo: Yesu wa ce: mau" zo" re zaui: nae" qhid' mae" yao: re khyin: san: yu: ra" Mao"So: qhid' mae" lam ga" kyid yaug ngad: ra". 3 Yham kad' ra" yaug wa ai: yham re tho' je yang: phug' te' nga: yhe' byid' ru qhug' yu: ra". Ai we' dakhyo: Yesu wa Moshe tho' je yang: phug' te' nga: yhe' byid' ru qhug' yu nae" man: qi" ra" yaug ngad: ra". 4 Yham wa byu dayaug yaug: yang kad' to" ru ngad: ra". Mao"So wa ja: cao jab alhab' re kad' to: yaug ngad: ra". 5 Moshe wa daui daui yaug ngad mung: Mao"So: yham mae lam ga" kyid mung: joe" lo nae" ayo, mae Mao"So ta" nae" khyo jham re yao: jhau: ra". 6 Ngadqere: Khristu wa Mao"So: yham mae eib: ra" Yao: Zo: we' dakhyo: lam ga" kyid yaug ngad mung:- ngonhaung" wa vae" ru we' ngonhaung" myid: lao" ra" ja: re tang za: zaui" ci: ngad: re wa ngonhaung" wa Mao"So: yham ngad: ra". 7 Airumung: Gyang" Lho" Byo ta" ru we' dakhyo: naonhaung" ana" ba- Mao"So: thoe re the' gyo: ko" ngad: re wa- ai: ba na mae 8 naonhaung" phug' pho" qe wa din"pyad' yo mae Mao"So re geim lau to" mung: yao: bam wa yao: re jham" qu" ko" ru we' dakhyo: naonhaung" nhag' lam: daqao ge,- 9 Yao: bam wa byid xe zin lam: lam: ngo zaui: so" ra" lo, mau" re bin: the' myao: lo gesho' ngad yang: re: yao: bam wa ngore geim lau to" mung:- jham" qu" ko" ra"- ga: Mao"So ta" ra". 10 Airumung: ngo wa ai: byumyu" re nhag' yo: mung: yao: bam wa ngore khonhae" re: ngag: pye' mung: nga" amyin" dao: jham re phug' cao" nae" qhid' mae" ha: pye' ako"- ein: ngo ta". 11 Ngo wa nhag' yo: mung: Yao: bam wa khonhae" re: ngo byid' to" ra" ai: dugno: re qo" kham: yu nae" ra" mung"dan: khyo maqo" vao ye: genae" ein: ngo jham tang" to: va"- ga: ta" ra". 12 Lam khug: ra" mo, ngad: ra" nga" mao:nhaung: qe we"- Kaoso' daui: na: ra" Mao"So mae" phaug' lo" sho' malam makhug: ru we' gyai makhyang" ra" nhag' lam: wa naonhaung" phaung mae" dayaug mae re: mabo genae" qhid' mae" lha" ge,- 13 Ai: atha"- naonhaung" mae" khag' ngadqere: qobo: yang ju" phyo' ru qhug' mung: nhag' lam: qao: li" na mo, maboe" genae" qhid' mae" Jham: Mugsug' mae ta" to" ra" ana" ba- ba na ayo, ngonhaung" qhid' mae" ajo, jo, wa ba khao: ngo" naonhaung" yao: cao: jho" bao" thaug' na qo: ra". 14 Pe"mung:ga"re naonhaung" wa aqhid mae" khug ngha: lo: rure lo" thao" sho' zaui" zag: ci: ngad: re wa ngonhaung" wa Khristu we' mau" zam" zaui" ra" mo, ngad: ra". 15 Ceru wa Jham: Mugsug' mae- Naonhaung" wa ana" ba Mao"So: thoe re the' gyo: ko" ngad: re wa naonhaung" phug' pho" qe Mao"So re gye kad' yang: geim lau to" ko" ra" au: we' dakhyo: nhag' lam: daqao ge,- ga: ta" to" ra". 16 Mao"So: thoe re the' gyo" yu mung: Mao"So re gye kad' geim lau to" ra" mo, wa khag' bam ngad: ako" i? Yao: bam wa Moshe yang Egutu mung" mae" jhui" thug' lo: ra" mo, ngad: ako". 17 Byid xe zin lam: lam: Mao"So: yang nhag' yo" ru qhug' ra" mo, wa khag' bam ngad: ako" i? Qobo shad' lhoe" geyang: din"pyad' yo mae gyang: shid: lang" lo" ko" ra" mo, ngad: ako". 18 Yao: bam wa ngo byid' to" ra" ai: myaung: ngho" ra" mung"dan: khyo khonhae" re: maqo" vao ye: genae" ga:- Mao"So jham tang" ru wa khag' bam re qang yang: tang" ru ngad: ra" i? Mao"So re geim lau to" ra" mo, re qang yang: jham tang" ru ngad: ra". 19 Airumung: yao: bam wa malam" ko" ruyang ai: mung"dan: khyo maqo" vao ye: ko" rure ngonhaung" the' myao: bam va". 1 Ana" ai: dugno: re naonhaung" qo" kham: yu nae" qhid' mae" Mao"So wa naonhaung" re dao:so: byid' to" ava". Airumung: naonhaung" dayaug re: dao:so: byid' to" ra" ai: dugno: re qo" kham: yu nae" rure mazai" lhag' ke' nae" qhid' mae" ngonhaung" lha" gelang:- 2 Pe"mung:ga"re ngonhaung" wa yao: bam we' dakhyo: ai: Lau Dao: Gai re the' gyo" yu: bam va". Yao: bam wa ai: mungdao: re the' gyo" yu gengadqere: ai: mungdao: re lam khug: ra" myid we' malham: khae: yu gemung: ai: mungdao: wa yao: bam: qhid' mae" pe" akyu" mabo ngad: ra". 3 Aire lam" ra" mo, ngonhaung" wa Mao"So: dao:so: byid' to" ra" ai: dugno: re qo" kham: yu: bam va". Airu wa Ngo wa nhag' yo: mung: yao: bam wa dug no" yu genae" qhid' mae" ngo byid: nae" ein: dao:so: byid' to" ra" mung" khyo khonhae" re: qo" vao ye: genae" mangad: ein: ta" ru we' dakhyo: ngad: ra". Yao: wa mug:myid re phan" ra" au: re yao" mau" zo" re bin: zaui: ngadqere: Mao"So wa cedao: re ta" ra". 4 Pe"mung:ga"re Jham: Mugsug' datau mae ai: nhad' ba ein: ba we' sin: yang: Mao"So wa nhad' ba ein: ba re yao" mau" zo" alhab' re to" pye' yang: no" na: ra"- ga: ta" to" ra"- 5 Yao: bam dug no" na genae" qhid' mae" ngo byid' ra" mung"dan: khyo khonhae" re: qo" vao ye: genae" mangad:- ga: ce: khyo re yao: dam: ta" na: ra". 6 Lau Dao: Gai re sao qhid' the' gyo" yu: ra" mo, wa aire malam" ko" ruyang ai: dugno: re maqo" kham: yu ko" ngad: ra". Airumung: ai: dugno: re qo" kham: yu nae" Mao"So: yang akhang" byid' ra" mo, gaje qe qo" kham: yu: ako". 7 Ceru wa ana" ba ga: mhang" ra" gatau daba na re Mao"So jaung: to: byid' ra" khyo" yang qhu" byid' ra". Jham: Mugsug' mae ngha yang: ta" va" ru we' dakhyo:- Mao"So wa zin na myo: sho' kyo thao re Davi nhad' dao: thoe khyo" ai: ba na re ceim: yang- Naonhaung" ana" ba Mao"So: dao: thoe re the' gyo: ko" ngad: re wa nhag' lam: daqao ge, ga: ta" ra". 8 Mao"So dao:so: byid' to" ra" dug no" ra" khyo re Yoshu yang byu qere byid' to: va" ngad: re Mao"So wa thao re gatau ba na daba na: nho: khyo re ta" nae" mangad:- 9 Ngadqere: nhad' ba ein: ba mae Mao"So wa dugno: thang: na: ru we' dakhyo: Mao"So: byu qe: qhid' mae" Dugno: Ba na daba jo; ashi". 10 Pe"mung:ga"re Mao"So: yang dao:so: byid' to" ra" ai: dugno: re qo" kham: yu: ra" yaug khag' ngadqere: Mao"So wa yao" mau" zo" mae" dugno: thang: na: ru we' dakhyo: yao" mau" zo" mae" dugno: thang: na: li" nae". 11 Airumung: yao: bam lam khug: myid mabo: ruyang shid: dam" lo" ko" ru we' dakhyo: ngonhaung" mae" dayaug re: maboe" vashao:- ngonhaung" wa ai: dugno: re qo" kham: yu nae" qhid' mae" qam: bo: thao" qhi" qhao: gelang:- 12 Mao"So: dao: thoe wa daui: na: ru we' kad' boe" ra" qam: so' bo mung:- shae su: shid' shad' geim" tho' ra" pe" ja" shae tho' re: je: tho' ra". Amung: alo zo: we' byo jho" qham: ra" mae joe" sho' re:- shoqug: shoqae we' qug:khyao jho" qham: rumae joe" sho' re:-alhab' re qo" thug' kyao" lai: lo" ra". Byu: aung khug nhag' lam: mae myid: ru we' o kao bau: rure kin byid' ra". 13 Mao"So: qhid' kheim: mae mamyao losho' pe" ja: rere: maqo" nyham" to: ngad: ra". Phan" to" ra" gu: ja: khao: ngo" wa yao" myo, kheim: mae de: de: za: ngad: jo; ra". Ngonhaung" alhab' wa yao: yao" khyo we' sin: yang: Mao"So re japhin: qhaug' byid: ca" nae" ngad: ra". 14 Airumung: ngonhaung" wa ngonhaung" yao: lhang: yu: ra" ai: lam khug: ra" khyo re tang tang zaui" zag: ci gelang:- pe"mung:ga"re ngonhaung" wa Mao"So: qhid' kheim: khyo joe" vao lo" ra" Mao"So: yao: zo: Yesu ga" ra" qi" qhang: ra" Khinjaung Yin" dayaug qo" bam va". 15 Ngonhaung" nho: Khinjaung Yin" wa ngonhaung" qam: nang" rure nhag' maba: khyag' yaug mangad:- Ja: khao: ngo" mae ngonhaung" re" ru: ju" phyo' ru qhug' qu" yaug ngadqere: qobo maqo" ra" Khinjaung Yin" ngonhaung" qo" bam va". 16 Airumung: ngonhaung" vae" vae" za: Mao"So: nhag' myan" ra" tao" khau" khyo qui" vao ye: gelang:- ailao" ngonhaung" qo ca" ra" au: ngonhaung" re bao" thaug' byid: nae" nhag' khyag' shogu: ru we' nhag' myan" ra" jeju re ngonhaung" qo" khae: yu: li" nae" ngad: ra". 1 Byu mae" khyin: yu: ra" Khinjaung Yin" yaug khao: ngo wa yao" byin cao: qemae" khyin: yu: ru ngad: ra". Ngaui" xeim: jham we' qobo khyad' xeim: re ngaui" byid: nae" qhid' mae" xao su byu qe: gaung tha" Mao"So re caung da" byid: nae" khyin: san: to" ra" yaug ngad: ra". 2 Yao: yao: re: myo: sho' ja: mae qam: nang: yaug ngad: ruyang yao: wa nhag' cad' noyaug mung mo, we' shad' nghung" ra" mo; qhid' mae" ba: bomyid byid' ra". 3 Yao: yao: re: qam: nang: yaug ngad: ruyang qobo khyad' xeim: re mo, byu qe: qobo qhid' mae" za: mangad:- yao" qobo: qhid' mae" re: qobo khyad' xeim: ngaui" byid: qo: ra". 4 Khag' re: yao: yao" gaung re Khinjaung Yin" aya: maqo" san: yu ngad: ra". Mao"So wa Arun re Mao"So: khinjaung yin" aya: mae khyin: san: yu: ru we' dakhyo:- Mao"So: yang khyin: yu: ra" yaug za: Khinjaung Yin" gai: boe" ra". 5 Ai we' dakhyo: Khristu wa Khinjaung Yin" aya: mang re yao: yao: za: kai" yu: ru mangad: ngad: ra". Ai: atha" Mao"So wa yao: re- Nao wa nga" Zo: ngad: ra"- Ana" ba ngo wa ni" Pho" boe" lo va"- ga: re:- 6 Yao: wa gatau jham: dau dalam: mae re:- Nao wa Melkhizedeg nho: khu mae xo' zaui: nae" ra" apyad ato: khinjaung yin" ngad: li" nae"- ga: re: ta" to" ra". 7 Yesu wa mug:myid dao mae kaoso' daui: na shi" ra" au:- yao: re shid: rumae" qo" khyad' yu: ra" Mao"So re mho' yao mung: ngug byid ngug nhe' we' akyu" gyi: hug' mho' ra". Mao"So wa yao" akyu" mho' thoe re tae" gyo: byid' ra". Pe"mung:ga"re yao: wa nhag' lam: nyham: khyo" ru we' Mao"So re gyaug phug' ruyang tae" gyo: byid' ra". 8 Yao: wa Mao"So: yao: Zo: lhao" re ngad sho' ngadqere: qug: khai: dayin dayo: re kham zo" ra" khyo" yang Mao"So: mho dao: re ba: tae" gyo: nae" zhao: yu: ra". 9 Amung: yao: wa jab byang" yaug boe" lo lao"- yao" mho dao: re tae" gyo" ra" byu alhab' mo; qhid' mae" apyad ato: khyad' yu: ra" Asang boe" lo: ra". 10 Ailao" Mao"So wa yao: re Melkhizedeg khu mae xo' zaui: nae" Khinjaung Yin" ga: mang mhang" ta" hau: byid' ra". 11 Melkhizedeg khyo we' sin: yang: ngonhaung" ta" nae" khyo myo: sho' jo; ra". Ngadqere: naonhaung" wa phyad za: ba: gyo: mo, mangad: ko" ruyang naonhaung" re ta" sho' kyo: nae" qhid' mae" qug' ra". 12 Ayo, khyo" tau" ke' re naonhaung" wa mho" pho" qe boe" gai yo, ngad: avako". Ngadqere: naonhaung" wa Mao"So: mungdao: mae" sao qhid' zhao: yu ca" ra" khyo re lhao" re: dayaug yaug: yang naonhaung" re mho" byid: qo: ashiko". Qao: ra" zo:ve zo: nae" atha" naonhaung" wa nug' shaug' ca" shi" mo, za: boe" na: ako". 13 Nug' shaug' shi" ra" yaug wa zonau" ngad: ashi"- jo: ru we' shad' rure ba: kho' kin nae" qhid' mae" thaung" qhug' qu" ru maqo" shi" ra" yaug ngad: ra". 14 Ngadqere: qao: ra" zo:ve wa zoqao" qe: qhid' mae" ngad: ra". Yao: bam wa myid: qu" ra" khyo mae min: mo, ngad geyang: gai: ru we' magai: rure qo" ba: kho' yu mo, ngad: ako". 1 Airumung: Khristan mungdao" nho: sao qhid' zhao: yu: ra" khyo re nhaung thao" mae to: co' mung:- qao" ra" mho" shid' mungdao: re kham: yu nae" qhid' mae" qhid' au: khyo khe' ye: gelang:- 2 Ngonhaung" wa akyu" mabo: ra" lo, mau" jham re to" pye' mung: Mao"So re lam khug: ra" khyo- qid nyhab' kham: yu: ru we' sin" ra" mho" shid' khyo- lo, kai: byid' ra" khyo- shid: rumae" dam: daui: to" li" ra" khyo- apyad ato: nho: dao: kho' ra" khyo jham: nho: apan aqao: re ngonhaung" dam: to: byid: maang ngad: ra". 3 Ngonhaung" wa qhid' khyo jhin" ye: gelang:- amung: Mao"So qad: ngad: re wa ngonhaung" ceru: kad' bam zai ngad: ra". 4 Yao: bam: lam khug: myid mae" phaug' lo" ko" mo, re myid dam: tha" lo gesho' khoru: qo" kad' nae" i? Yao: bam wa Mao"So: bo" bao khug mae dalhang kaoso' daui: qu" ru we' mug:gaung: jhaung qhu" re meim" qu" va" mo, ngad mung: Gyang" Lho" Byo re kham: yu: qu" va" mo, ngad: ako". 5 Yao: bam wa Mao"So: mungdao: gai: rure we' joe" lo nae" ra" pyad we' sin" ra" qam: so' jham rere: thaung" qhug' ba: lo mo, ngad: ako". 6 Ngadqere: yao: bam wa yao: bam: lam khug: ra" khyo mae" phaug' lo" byaug vako" ra". Yao: bam wa Mao"So: yao: Zo: re pyao: zang mae dam: jin" se' pye' na: ru we' qho' phyo' na ko" ruyang yao: bam re nhag' lam: dam: tha" lo nhao nae" magai: boe" ngad: ra". 7 Yao" dao mae ana" na" za: qu: sheim: byid' ra" mug: qid re qo" yu: ra" myid gaung re Mao"So shaman" byid: mung: ai: myid gaung wa qhovo: qhoshi: qho: mo, re akyu" bo: ra" gaug zo maui: lam: qo" nhao: ra". 8 Ngadqere: ai: yo myid wa zau: we' myo, gae jham reza: yaug: thug' li" nhao: ngad: re wa ai wa pe" phug' made, lomung: Mao"So: yang nhang" pye' ru qhug' ru we' myi" yang ngha" pye' ru qhug' li" nae". 9 Mao:nhaung: qe we"- ngonhaung" ceru: ta" sho' ngadqere: ngonhaung" wa naonhaung" khyo re gaigai: yao: ba: ra". Naonhaung" nho: khyad' yu: ru we' sin" ra" je: gai: ra" shaman" jeju jham naonhaung" qo" ko" rure ngonhaung" ba: ra". 10 Mao"So wa tarha" madin: nyang: ra" yaug mangad: ngad: ra". Naonhaung" zaui: so" lo: ra" mau" rere:- yao: re jhid'de; rure qhu" byid' ra" naonhaung" bao" thaug' byid' rure re:- naonhaung" Khristan mao:nhaung: qere ana" joe" sho' bao" thaug' byid' na ko" rure re: Mao"So wa to" myhid' li" nae" mangad: ngad: ra". 11 Naonhaung" yaug khao: ngo" wa naonhaung" myid: lao" na: ra" ja: jab byang" li" nae" qhid' mae" lo" thao" joe" sho' mathang mano: nhag' lam: zhau: to" na genae" rure ngonhaung" gyai o ngaui: ra". 12 Ngonhaung" wa naonhaung" re noe" shoe: ra" mo, maboe" nhao nug- Lam khug mung: zang: kham yang: Mao"So byid' to" ra" dao:so: re qo" khae: yu: ra" mo, we' dakhyo: kam" wa boe" nhao nug: ra". 13 Mao"So wa Abraham re yao" dao:so: to" ra" au:- jham tang: yang: dao:so: to" ra". Yao: tho' je: qi" ru khag' mana yang: yao: wa yao: yao" mang re lao: mung: jham tang: yang: dao:so: to" ra". 14 Mao"So wa ngo nao re shaman" byid: nae"- Myid:zo: myo: sho' nao re ngo byid: nae"- ga" rure nao re dao:so: byid: va"- ga: yao: re ta" ra". 15 Abraham wa nhag'lam: qhang qhang za: zang: kham: lo: ruyang yao: wa Mao"So: dao:so: byid' to" rure qo" khae: yu: ra". 16 Byu wa jham tang" ra" au: yao: tho' je: qi" ra" byu dayaug yaug: mang re lao: yang: jham tang: ba: ra". Airu: jham tang" ru wa jho" ngag: byo; ra" khyo alhab' re athao yab: lo" nhao: ra". 17 Mao"So wa yao" myid: yaung: to" ra" khyo re yao: khonhae" re: matha" pye'- ga" rure yao: byid' to" ra" dao:so: re khae: yu nae" ra" mo, re de: de: za: qhu" byid: nug: ra". Airumung: yao: wa jham tang: yang: dao:so: byid' ra". 18 Aimung: ce shid' ja: re- maqo" gai: tha" pye' ngad: ra". Ce we' sin: yang: Mao"So wa maqo" mhug' ngad: ra". Airumung: yao" khug mae gug: gug: za: khug ngha: ru qhug' ra" mo, ngonhaung" wa ngonhaung" qhid' kheim: mae byid' to" ra" myid: lao" rure tang za: zaui" zag: ci nae" qi: sho' qam: byid' ru qhug' yu: ra". 19 Ce: myid: lao" ru wa ngonhaung" nho: kaoso' daui: ra" khyo qhid' mae" jo,to' nghoe: we' dakhyo: ngad: ra". Airu wa gug' ru we' lam ga" ru ngad mung: mug:gaung: yham zang mae" qe, kyo pin: lung: re lai: vao ye" lo" yang: akhug shad' gyang" lho" ra" jo, qo khyo joe" ye" ra". 20 Yesu wa Melkhizedeg nho: khu mae xo' zaui" ra" apyad ato: Khinjaung Yin" boe" thao re ngonhaung" gaung tha" ai: jo, qo khyo ngonhaung" qhid' khyo vao ye" lo" ava". 1 Ce: Melkhizedeg wa Salem kho: kham ngad mung: Myhao: Thao" Ra" Mao"So: Khinjaung pho" ngad: ra". Abraham wa kho:kham byid yaug re gyekhe' aung: pye' yang: dam: tug' phao: lo: ra" au: re Melkhizedeg wa yao: re tug: yu mung: shaman" byid' ra". 2 Alao" Abraham wa yao: sham" lo: ra" lanyab alhab' mae" daxe bam mae" dabam re yao: re qhaug' byid' ra". (Melkhizedeg nho: sao qhid' mae" mang lajheim: wa din:man" ra" kho:kham ga" ru ngad: ra". Amung: Salem: vogaung: mae" kho:kham re: ngad: ruyang yao" mang wa yaug yo: ra" kho:kham ga" rure: ngad: ra".) 3 Melkhizedeg nho: yao: myhi" yao: pho"- yao" phug' pho" qe: byuxag' tung" xam: re:- yao: khau: li" ru we' yao: shid: ra" khyo tung" xam: re: pe" majo, ngad: ra". Yao: wa Mao"So: yao: Zo: re"ru:- apyad ato: Khinjaung boe" jo; ra". 4 Airumung: yao: wa khoqhi" qi" qhang yaug ngad: rure naonhaung" qu" ge,- Lahau: qi" ra" ngonhaung" phug' pho" Abraham wa gyekhe' jao: mae" yao: qo" sham" yu: ra" lanyab alhab' mae" daxe bam mae" dabam yao: re qhaug' byid' ra". 5 Israel amyu" wa Abraham mae" myhung: li" mo, ngad mung: khinjaung Levi amyu" nho: mao:nhaung: amyu" qeza: ngad gesho' ngadqere: khinjaung aya: qo" yu ko" ra" Levi kaung mae" myid:zo: qe wa daxe bam mae" dabam alu: re yao: bam mae" gaug zo: nae" qhid' mae" Tarha" khyo" yang amyin" byid' to" ra". 6 Melkhizedeg' wa Levi kaung mae" gyo" li" yaug mangad: ngadqere: Abraham mae" daxe bam mae" dabam alu: re kham: yu mung: Mao"So: dao:so: re qo" kham: yu: ra" yaug ngad: ra" Abraham re shaman" byid' ra". 7 Airumung: shaman" byid' ra" yaug wa shaman" byid' ru kham: yu: ra" yaug tho' je: qi: yaug ngad: rure pe" aug' o: nae" khyo majo, ngad: ra". 8 Khinjaung qe: mau" mae daxe bam mae" dabam re shid ba: ra" xao su byu qekhyo" gaug: yu: ru ngad: ra". Ngadqere: Jham: Mugsug' mae tung" to" ru we' dakhyo:- Melkhizedeg nho: khyo mae daxe bam mae" dabam re kaoso' daui: na yaug khyo" gaug: yu: ra". 9 Ceru: re: gai: ta" ra". Daxe bam mae" dabam re gaug yu: ra" Levi yao: yao: re: Abraham khyo" yang daxe bam mae" dabam re byid' ru ngad: ra". 10 Pe"mung:ga"re Abraham we' Melkhizedeg jho" qhug' ko" ra" au: re Levi wa makhau: li" shi: ngadqere: yao" phug' pho" Abraham nho: gaung khyao khug mae bo: jo; ein: gai: ta" ra". 11 Israel byumyu" qere tarha" byid' ru wa Levi khinjaung qere aqao: to: yang: byid' ru ngad: ra". Levi khinjaung re wa yao: bam: mau" zo" re mashad' lo: kyab' sho' zaui: vako" ru ngad: re wa Arun nho: khinjaung aya: agu khyo" mangad: lo: Melkhizedeg nho: khu mae xo' zaui" ra" khinjaung gatau dayaug po" thug' li" maca" lo:ngad: ra". 12 Pe"mung:ga"re khinjaung amyu" kaung re tha" pye' lao" wa ai: tarha" rere: tha" pye' ca" ra". 13 Ceru: ta" to: qhug' ra" yaug ngonhaung" Asang wa gatau: amyu" kaung mae bobo yaug ngad mung: yao" amyu" kaung mae" khag' re: khinjaung mau" mazaui" qu" ngad: ako". 14 Yao: wa Yuda amyu" kaung mae" khau: li" yaug ngad: ru wa de: de: za: ngad: ra". Moshe wa khinjaung aya: we' sin: yang: ta" ra" au: ce: amyu" kaung re pe" re: mata" ngad: ra". 15 Melkhizedeg we' dau: ra" khinjaung gatau dayaug po" thug' li" va" rumung: khinjaung amyu" kaung tha" va" ra" khyo wa je: lhao" re: de: de: za: ngad: ra". 16 Yao: wa ai: khinjaung aya: re xao su byu qe: thung" tarha" khyo" yang kham: yu: ru mangad:- Mathao" magan: ra" kaoso' qam: o: khyo" yang kham: yu: to" ru ngad: ra". 17 Pe"mung:ga"re Jham: Mugsug' mae nao wa Melkhizedeg khu mae xo' zaui" ra" apyad ato: khinjaung ngad: li" nae"- ga: ta" to" ra". 18 Airumung: kham" to" ra" tarha" xug' wa qam: nang" ru we' akyu" mabo: ruyang to" pye' ru qhug' ra". 19 Pe"mung:ga"re Moshe Tarha" wa pe" rere: bin sho' maqo" jab byang" nhao ngad: ra". Amung: ngonhaung" wa ana"- je: gai: ra" myid: lao" khyo re the' yu va" rumung: ai: myid: lao" ru khyo" yang Mao"So jhao" qui" te' ye" bam va". 20 Aitho' mago" Mao"So: dao: thang" jham tang" ra" dao: re: jo; ra". Gaje qere khinjaung aya: jaung byid' ra" au:- airu" dao: thang" jham tang" ru majo, ngad: ra". 21 Ngadqere: Yesu re khinjaung khyo" san: to" ra" au: re- Mao"So wa yao: re- Nao wa apyad ato: khinjaung ngad: li" nae"- ga: Asang wa jham tang" to" ava". Asang wa yao" myid re lhai" pye' nae" mangad:- ga: ta" ra". 22 Ceru: jho" shai" ruyang Yesu wa je: gai: ra" dao: thang" re pakham: kham: byid: yaug ngad: ra". 23 Alao" gatau jho" shai" ru daja: jo; ashi"- ai wa khinjaung qe wa shid: rure maqo" lai geyang: yao: bam: khinjaung mau" zo" re maqo" xo' zaui: ko" ngad: ra". Amung: khinjaung gatau myo: sho' na qo: ra". 24 Ngadqere: Yesu wa apyad ato kaoso' daui: na yaug ngad: ruyang yao" khinjaung aya: wa gatau dayaug: lo, khyo malai: lo" lo:ngad: ra". 25 Airumung: yao: wa yao: khyo" yang Mao"So jhao" vao lo ko" ra" mo, re ayo, maqho lo: qo" khyad' yu byid' ra". Pe"mung:ga"re yao: wa ai bam: qhid' mae" Mao"So re mho' yao byid: nae" apyad ato kaoso' daui: na yaug ngad: ra". 26 Airumung: Yesu wa ngonhaung" nho: qo ca" ra" khyo re qo" bao" thaug' byid' ra" Khinjaung Yin" ngad: ra". Yao: wa gyang" lho" ru we' qobo mho qo mabo: ra" yaug ngad: ra". Yao: wa qobo qo" ra" mo, mae" gatau san san kho' to: qhug' mung: mug:gaung mae khin" to' to: qhug' yaug ngad: ra". 27 Yesu wa khinjaung qi: qe gatau we' dakhyo:- ba khao: ngo" yao: yao" qobo qhid' mae" shi" sao qhid' xeim: ngaui" byid: maqo yaug ngad: ra". Yao: wa yao: yao" gaung re qhaug' byid' pye' ra" au: re dalhang: dae mae za: bin sho' qhid' mae" xeim: ngaui" byid' ava". 28 Moshe tarha" wa majab byang" ra" byu qere khinjaung agyi qekhyo" san: to" ra". Ngadqere: ai: kham" to" ra" tarha" thao mae Mao"So jham tang" to" ra" dao:so: wa apyad ato jab byang" jo; ra" yao: Zo: re khinjaung qi: khyo" san: to" ra". 1 Ngonhaung" ta" lo: ra" dao: alhab' gu: mae" je: akhyag: ra" ajhaung wa- ngonhaung" wa airu" Khinjaung Yin" re qo" ra" mo, ngad: ra". Yao: wa mug:gaung dao mae phung qab bao qi" qhang: ra" Mao"So: zaung tao" lo, yo shad' mae zaung: jo, yaug ngad: ra". 2 Yao: wa byu: yang mangad:- Mao"So: yang kad' to" ra" ai: zaung agyang" khug mae" gyang" lho" thao" ra" jo, qo mae Khinjaung Yin" dayaug khyo" caung da" byid' na: ra". 3 Khinjaung Yin" yaug khao: ngo" wa Mao"So re xeim: jham we' gug'nyhug' xeim: jham re phad' ngaui" byid: nae" qhid' mae" san: to: qhug' yaug ngad: ra". Airumung: ngonhaung" nho: khinjaung yin" yaug mae re: ngaui" byid: nae" xeim: ngaui" daja: ja: qo" ca" ra". 4 Yao: myidgaung dao mae qe na: jo; ngad: re wa yao: wa khinjaung yin" dayaug dajhid' re: gai: boe" nae" mangad:- pe"mung:ga"re Yuda Tarha" khyo" yang jhaung qhu" xeim: jham re ngaui" byid: nae" qhid' mae" khinjaung qe na: bam geyang: ngad: ra". 5 Khinjaung qe zaui: so" ra" lo, mau" jham wa mug:gaung dao mae boe" na: ra" khyo: nho: lho dau we' bao qab za: ngad: ra". Airu wa Moshe kad' lo: ru we' dakhyo: za: ngad: ra". Moshe wa ai: dao: thang" Zaung re kad' nae" seim" ra" au:- Mao"So wa- bam dao mae Nao re ngo qhu" byid' ra" akhyao we' dakhyo:- ja: khao: ngo" re kad' nae" qhid' mae" lha" yang: kad' wa,- ga: yao: re ta" ra". 6 Ngadqere: ana" wa- je: gai: ra" Mao"So: dao:so: jham: dao: mae aqao: kad' yang: Mao"So we' xao su byu qe: agyo: mae Yesu nyhang" jaung byid' ra" dao: thang" wa je: gai: ru ngad: ru we' dakhyo:- khinjaung khyo" Yesu caung da" ra" mau" zo" wa ai: khinjaung qe caung da" byid' ra" mau" zo" tho' je: gai: ra". 7 Sao qhid' mae" dao: thang" mae pe" qo mabo ngad: re wa dao: thang" shid' lam: ein: lam: to: nae" khyo majo, ngad: ra". 8 Ngadqere: Mao"So wa yao" byu qere qobo vhin yang: ta" ru wa- Israel amyu"- Yuda amyu" qe we'- ngo dao: thang" asag' to: nae" ba na joe" lo: li" nae". 9 Ai: dao: thang" wa yao: bam: phug' pho" qere lo; yang she mung: Egutu mung" mae" ngo jhui" thug' lo: ra" au: re yao: bam we' ngo to" ra" dao: thang" we' dau nae" mangad:- Yao: bam wa ngo we' yao: bam: agyo: mae to" ra" ai: dao: thang" re jhaug' mazaug geyang: ngo wa yao: bam re to" pye' va"- ga: ta" ra". 10 Mao"So wa joe" lo nae" ba na mae Israel amyu" qe we' ngo to: nae" ra" dao: thang" wa nga" tarha" re yao: bam: aung khug nhag' lam: mae ngo ke' byid: nae". Yao: bam: nhag' lam: mae tung" te' to: byid: nae". Ngo wa yao: bam: Mao"So boe" lo: li" nae". Amung: yao: bam wa nga" byumyu" qe boe" lo: li" genae". 11 Yao: bam mae" dayaug re: yao: yao" byumyu" yao: cao: re ngad ngad- yao: yao" kaung mae" mao:nhaung: qere ngad ngad Asang re ba wa,- ga: mho" byid: qo nae" mangad:- Pe"mung:ga"re yao: bam wa ngai: thao" yaug mae" qi" thao" yaug joe" sho' ngore ba: li" genae". 12 Ngo wa yao: bam: qobo jham re khyad' pye' byid: mung: yao: bam: shad' nghung" rure xam" to: byid: lo nae" mangad:- ga: ta" ra". 13 Mao"So wa ai: dao: thang" asag' khyo re ta" ra" khyo" yang sao qhid' mae" dao: thang" lam: re axug' boe" lo" nhao: ra". Xug' lo" byaug: ra" ja: pe" ngadqere: dazab re baui" lo" byaug: li" nae". 1 Sao qhid' mae" dao: thang" re phug' cao" nae" qhid' mae" caung:pa" thung" li we' byu: yang kad' to" ra" caung:pa" nae" jo, qo re: jo; ra". 2 Gyang" Lho" ra" jo, qo ga: mang: ra" zaung sao qhid' mae" qe, kad' ca" ra". Ai: qe, mae myikaug' tao" we' Mao"So re qhaug' byid' to" ra" mug jaung: re to" ako". 3 Ai: shid' lam: ein: ra" qe,kyo pin:lung: nhaung thao" mae" qe, re wa Gyang" Lho" Thao" Ra" Qe, ga: mhang" ako". 4 Ai: qe, mae wa sheim nae pyo" ra" xau ngha" ra" qhang phan we' alhab' qhang: yang thab' to" ra" dao: thang" ban" jo; ra". Ai: ban" khug mae Manna mug ke' to" ra" qhang yae:- anyaug tad' ra" Arun nho: zaung: bao" we' kham" to" ra" amyin" dao: jham tung" to" ra" laug pye: shid' pye: bo: ra". 5 Ai: ban" dao mae kherubin alho shid' lam: de; ra". Ai: kherubin wa Mao"So na: jo; ga" ra" lajheim: ngad: ra". Kherubin daung jham wa qobo khyad' pye' ra" jo, qo dao mae mug' nghoe' jo; ako". Ngadqere: ana" ce wa cejham: lajheim: re adai: ato' sho' kyo: nae" ayo, mangad: ngad: ra". 6 Ai: gu: re bin: nyhang" jaung: to: lao"- khinjaung qe wa yao: bam: caung da" byid' ra" mau" zo" re zaui: so: nae" qhid' mae" ba khao: ngo" ai: zaung sao qhid' mae" qe, khyo vao ye" ako". 7 Ngadqere: zaung shid' qe, ein: qe, akhug qe, khyo wa khinjaung yin" yao: dayaug za: yao: yao" qobo qhid' mae" we' mo,byu qe maba mabeim: lo: shad' lhoe" ko" ra" qobo qhid' mae" ngaui" byid: nae" sa: ci yang: dazin re dalhang za: qo" vao ye" ra". 8 Zaung sao qhid' mae" qe, ajo, jo, wa ai: gyang" lho" thao" ra" zaung akhug qe, khyo vao ye: nae" qhid' mae" khyo pyid' jo; rure ai: Gyang" Lho" Byo wa de: de: za: mho" shid' byid' ra". 9 Ceru wa ana" pyad re ceim" shid' na: ra" alho dalam: ngad: ra". Mao"So re xeim: ngaui" we' gug'nyhug' ngaui" xeim: re ngaui" byid' ru wa caung:pa" ra" mo; nhag' lam: re jab byang" sho' maqo" kad' byid: ngad: ra". 10 Pe"mung:ga"re aijham wa zo: shaug' yang cid' san: pye' ra" thung" tarha" agin akhyao aja: aja: we' sin" ru ngad: ra". Ai: gu: alhab' wa adao shad' we' sin" ra" thung" li jham ngad mung: Mao"So wa ja: khao: ngo" re asag' kad' pye' nae" ra" ayo, joe" sho' gai: ci: ra" thung" tarha" ngad: ra". 11 Ngadqere: Yesu wa cemae jo, gau ngad: ra" gai lho" ra" ja: jham: nho: Khinjaung Yin" khyo" joe" li" ava". Yao: caung da" mau" zo" zaui: so" na: ra" zaung wa je: qi" qhang mung: jab byang" ru ngad: ra". Ai: zaung wa byu: lo; yang kad' ra" zaung mangad:- ce: phan" to" ra" mug:myid we' masin: ngad: ra". 12 Yesu wa Gyang" Lho" Thao" Ra" Jo, Qo khyo dalhang mae za: alhab' bin: kyab' sho' vao ye" ra" au: re xeim: ngaui" byid: nae" yao: wa cad' be, sa:- nung: jaung sa: re ci yang: mavao ye: ngad: ra". Yao: wa yao" sa: re ci yang: vao ye: mung: ngonhaung" qhid' mae" apyad ato khyad' yu: ru qo" byid' ra". 13 Cad' be, sa:- nung: jaung lo: sa: we' nung: jaung bae: myimhab re caung:pa" thung" khyo" masan: ra" mo; dao mae pyi" sheim: byid: lao" caung:pa" thung" masan: rure ceyang gyang" san: lo" nhao: ra". 14 Ceru dang: ngad: re wa Yesu sa" yang wa khoqhi" je yang: kyang" san: pye' nhao nae" i? Yao: wa apyad ato: Byo khyo" yang yao: yao" gaung re qo mabo jab byang" ra" xeim: khyo" Mao"So re xeim: ngaui" byid' ava". Kaoso' daui: na: ra" Mao"So re ngonhaung" qo" caung da" byid: nae" qhid' mae" yao" sa: wa akyu" mabo: ra" caung:pa" thung" yang moe: jo; ra" ngonhaung" aung khug nhag' lam: re kyang" san: pye' nhao: li" nae". 15 Airumung: Mao"So: yang khai: yu qhug' vako" ra" mo, wa Mao"So dao:so: byid' to" ra" apyad ato: shaman" jeju re qo" kham: yu genae" qhid' mae" Khristu wa ai: dao: thang" asag' re nyhang" jaung byid: yaug ngad: ra". Ceru: qo" kad' ru wa sao qhid' mae" dao: thang" jo; jo, shi" au: yao: bam shad' lhoe" ra" qobo jham mae" lhoe' ke' byid: nae" qhid' mae" byu dayaug shid va" ruyang ngad: ra". 16 Ma qhaug' mugsug' jao dang boe" nae" qhid' mae" ma qhaug' mugsug' tung" ra" yaug wa gaigai: shid va" ga" rure sagse: qhu" byid: qo: ra". 17 Pe"mung:ga"re ma qhaug' mugsug' tung" ra" yaug kaoso' daui: na shi" au: re- ai: ma qhaug' mugsug' wa jao dang magai: yu ngad: ra". Airu wa yao: shid thao re za: jao dang gai: yu: ra". 18 Airumung: ai: sao qhid' mae" dao: thang" lhao" re: sa: ci: ra" khyo" yang za: jao dang boe" ra". 19 Sao qhid' Moshe wa ai: kham" to" ra" tarha" mae bo: ru we' dakhyo: amyin" dao: jham alhab' re mo, byu qere ta" kyo" ra". Ai: thao re Moshe wa yao mug' ane te' ra" Husub kyao re ci yang: nung: jaung lo: sa:- cad' be, sa: re qid we' lhag' yu mung: ai: tarha" mugsug' paug' dao mae re:- mo, byu qe alhab' mo; dao mae re: pyi" sin: byid' ra". 20 Alao" Moshe wa ceru wa Mao"So: yang naonhaung" re phug' cao" genae" qhid' mae" amyin" byid' to" ra" dao: thang" re dazid thaung" te' to" ra" sa: ngad: ra"- ga: ta" ra". 21 Ai we' dakhyo: Moshe wa ai: caung:pa" Zaung rere: caung:pa" rumae ci: ra" zai ja: cao jab alhab' dao mae re:- ai: sa: re pyi" sin" ra". 22 Kham" to" ra" Tarha" we' dakhyo: alaug ja: khao: ngo" ein nae" gu: wa sa" yang kyang" san: pye' ru qhug' ako"- Sa: sheim: gyo" lao" za: qobo khyad' byid' ru gai: qhug' ra". 23 Cekhyo" yang mug:khaung dao mae jo; ra" ja: jham: nho: lho dau jham re qo" kyang" san: pye' ra". Ngadqere: mug:khaung dao mae" zai jham re kyang" san: pye' nae" ru je: gai: ra" xeim: re ngaui" byid: qo: ra". 24 Pe"mung:ga"re Khristu wa ai: gyang" lho" ra" jo, qo agyang" nho: lho dau ngad: ra" byu: lo; yang kad' to" ra" Gyang" Lho" ra" jo, qo khyo mavao ye: ngad: ra". Yao: wa mug:gaung dao khyo khyao- vao ye: mung: ngonhaung" gaung tha" ana" Mao"So: qhid' kheim: mae yena: qhu" ra". 25 Yuda khinjaung yin" wa gug'nyhug' sa: re ci yang: Gyang" Lho" Thao" ra" jo, qo khyo zin khao: zin ngo" vao ye: qo: ra". Ngadqere: Khristu wa yao" gaung re airu: xeim: ngaui" byid: nae" qhid' mae" myo: sho' lhang mavao ye: ngad: ra". 26 Yao: airu: vao ye" ngad: re wa mug:myid re Mao"So phan" to" ra" au: mae" ga" re yao: wa myo: sho' lhang qug: khai: dayin dayo: kham zo: qo nae" ngad: ra". Ai: atha" ana" wa pyad ban: thao" lo" nae" jhao" li" na lao" yao: yao" gaung re xeim: ngaui" ngaui" byid' ra" khyo" yang qobo re yu: pye' nae" qhid' mae" yao: wa dalhang za: po" thug' li" ava". 27 Byu yaug khao: ngo" wa dalhang za: shid ca" mung: ai: thao re Mao"So: yang dao: kho' ru qhug' ra". 28 Ai we' dakhyo:- Khristu re: byu myo: sho' mo; nho: qobo khyad' pye' byid: nae" qhid' mae" yao: yao" gaung re dalhang za: xeim: ngaui" ngaui" byid' ra". Amung: yao: wa qobo re yu: pye' nae" qhid' mae" mangad: lo:- yao: re lao" na ko" ra" mo, re khyad' yu nae" qhid' mae" shid' lhang ein: lhang de" thug' li" nae" ngad: ra". 1 Yuda qe: kham" to" ra" Tarha" wa ai: zai: agyang" jham: nho: azung akhyao we' shab za: jho" dau: ra" khyao dau mangad: ngad: ra"- ai wa joe" lo nae" ra" gai shab: ra" ja: jham: nho: thab thab mung: ra" bao qab za: ngad: ra". Ai: xeim: re yao: za: dazin we' dazin khonhae" re: ngaui" byid: qo: ra". Airumung: kham" to" ra" tarha" wa Mao"So jhao" te' lo: ra" mo, re ai: xeim: jham re ngaui" byid' ra" khyo" yang khoru: qo" jab byang" nhao nae" i? 2 Mao"So re caung:pa" ko" ra" mo, wa yao: bam: qobo mae" dang za: kyang" san: pye' byid' ru qhug' vako" ngad: re wa yao: bam wa qobo qo" ga: mamyid: jho lomung: xeim: jham ngaui" byid' ru alhab' rere: thang: pye' gezai ngad: ra". 3 Ngadqere: ana"- ai: xeim: jham re ngaui" byid' ru wa dazin we' dazin yao: bam: qobo jham re myid: beim: nhao: ra". 4 Pe"mung:ga"re nung:jaung lo: jham: sa: we' cad' be, jham: sa: wa qobo jham re maqo" khyad' pye' byid: ngad: ra". 5 Ce: mathao mae Khristu wa ce: mug:myid dao khyo gyo" li" nae" au:- Yao: wa Mao"So re Nao wa xeim: we' xeim: ngaui" byid' rure ma o ngad: ra" Ngadqere: nao wa nga" qhid' mae" gaung khyao re nyhang" jaung byid' to" ava"- 6 Gug'nyhug' jham re phan dao mae gaung geim" phad' ngaui" byid' rure re:- qobo khyad' byid' ra" xeim: rere: nao ma o ngad: ra". 7 Alao" kham" to" ra" Tarha" mugsug' mae nga" khyo re tung" to" ru we' dakhyo: Mao"So we"- Ni" myid o: ra" khyo re zaui: so: nae" ngo cetau mae na: ein: ngo tau: va"- ga: ta" ra". 8 Sao qhid' mae yao: wa xeim: jham- ngaui" xeim: jham- gug'nyhug' jham re gaung geim" phan dao mae phad' ngaui" ru- qobo khyad' ra" xeim: jham re nao ma o ngad: ra". Cejham re kham" to" ra" Tarha" we' dakhyo:- ngaui" byid: ngad sho' ngadqere: aigu: re nao ma o mangaui ngad: ra"- ga: ta" ra". 9 Ai: thao re yao: wa Mao"So we"- ni" myid o: ra" khyo re zaui: so: nae" ngo cetau mae na:- ga: ta" ra". Airumung: Mao"So wa daba: mae" xeim: ngaui" byid' ra" khyo axug' alhab' re to" pye' mung: ai: khu mae Khristu nho: xeim: ngaui" byid' ra" khyo re tha" ke' byid' ra". 10 Pe"mung:ga"re Yesu Khristu wa Mao"So yao: re zaui: so: nhao nug: ra" khyo re cao" yang:- yao: yao" gaung re dalhang mae za: bin: kyab' bin sho' xeim: ngaui" byid' ra" khyo" yang ngonhaung" alhab' mo, wa qobo mae" kyang" san: pye' byid' ru qhug' bam va". 11 Yuda khinjaung yaug khao: ngo" wa yao:yao" mau" zo" re ba khao: ba ngo" zaui: so: mung: ai: xeim: re yao: za: myo: sho' lhang ngaui" byid' ako". Ngadqere: ai: xeim: jham wa qobo jham re khonhae" re: maqo" khyad' pye' byid: ngad: ako". 12 Ngadqere: Khristu wa qobo khyad' ra" xeim: re apyad ato gang" tang: jo; ra" xeim: dalam: ngaui" byid' ra". Ai: thao re yao: wa Mao"So: lo, yo shad' mae zaung: jo; ra". 13 Yao: wa yao" gyevo qere khyid zab tao" khyo" yao" khyid qao: mae Mao"So: yang to: byid' ra" ayo, joe" sho' lao" na: ra". 14 Airumung: yao: wa xeim: dalhang ngaui" byid' ru we' qobo mae" kyang" san: pye' byid: qhug' ra" mo, re apyad ato jab byang" ra" mo, boe" nhao: ra". 15 Alao" Gyang" Lho" Byo re: ngonhaung" re sagse: kham byid' ra". 16 Sao qhid' mae yao: ta" ru wa- Ceru wa joe" lo nae" ra" ayo, mae yao: bam we' ngo to: nae" dao: thang" ngad: ga: Asang ta" ra". Ngo wa yao: bam: nhag' lam: khug mae nga" tarha" ke' byid: mung: ai: tarha" jham re yao: bam: aung khug mae tung" to: byid: nae"- ga: ta" ra". 17 Ai: thao re yao: wa ngo wa yao: bam: qobo jham re we' makhyang" ra" mau" zo" jham re myid: beim: byid: lo nae" mangad:- ga: dam: ta" ra". 18 Airu: qobo khyad' pye' byid' ra" khyo jo, lao" wa- qobo khyad' ra" xeim: re: ngaui" byid: maqo lo:ngad: ra". 19 Airumung: nga" mao:nhaung: qe we"- Yesu shid kham: byid' ra" khyo" yang ngonhaung" wa ai: Gyang" Lho" thao" ra" jo, qo khyo vao ye: nae" galin: gago: loe; beim: ru qo" yu: bam va". 20 Yesu wa yao: yao" gaung ngad: ra" qe,kyo pin:lung" yang kaoso' daui: ra" khyo asag' ngonhaung" qhid' mae" phung" byid' ava". 21 Mao"So: yham mae eib: ra" qi" qhang: ra" khinjaung pho" ngonhaung" qo" bam va". 22 Airumung: ngonhaung" wa yao: yao" aung khug mae qobo qo" jho: ra" aung khug nhag' lam: re kyang" san: pye' mung: ngonhaung" gaung khyao re qid gyang" yang cid' san: pye' yang: gyang" phyu: ra" nhag' lam:- gang" tang: ra" lam khug: myid we' Mao"So: qhid' kheim: khyo qui" vao ye: gelang:- 23 Mao"So wa yao" dao:so: re boe" sho' kad' yaug ngad: rure ngonhaung" qo" lam khug yang: ngonhaung" lhang: yu: ra" myid: lao" rure tang za: zaui" zag: ci gelang:- 24 Ngonhaung" wa dayaug we' dayaug sho: jho" no mung: yao: cao: jho" bao" thaug' byid' ru we' jhid'de; myid jho" qhu" byid: mung: gai: ra" lo, mau" re zaui: so" na gelang:- 25 Yao: cao: daga" lhaung" jho" ham: phaung: ra" khyo re su damyo" to" pye' ko" ru we' dakhyo: ngonhaung" wa mato" pye' lo:- Asang: nho: ba na jhao" li" na va" rure naonhaung" ba vako" ruyang ngonhaung" wa yao: cao: je yang: qam: jho" byid' na gelang:. 26 Pe"mung:ga"re ngonhaung" wa ai: dangman" ra" khyo re bin: ba thao thaug qobo shad' lhoe" na: ngad: re wa- ngonhaung" qobo re khyad' pye' byid' ra" xeim: gatau jo, lo nae" mangad:- 27 Ngonhaung" wa ai: joe" lo nae" ra" dao: kho' rure we' Mao"So re gye kad' ra" mo, re ngha" jheim" pye' nae" ra" laung: thao" ra" myi: re gyaug: nin" ru we' lao" na nae" za: angad lo" ra". 28 Moshe kham" to" ra" Tarha" re maphug' cao" ra" yaug khag' re ngadqere:- sagse: shid' yaug- mangad: lao"- ai: tho' je: ra" sagse: qe ta" thug' mung: qobo qo" rure myao lao" nhag' makhyag' lo: se' pye' ru qhug' ra". 29 Airumung: Mao"So: yao: Zo: re pe" xan: masun" ra" yaug- yao: yao" qobo re kyang" san: pye' byid' ra" Mao"So: dao: thang" sa: re phug' mate' ra" yaug- Gyang" Lho" Byo: nho: nhag' myan" ra" jeju re maphug' makhyad' kad' ra" yaug wa khoqhi" la" ra" qobo dae kham zo: man" ra" yaug ngad nae" rure myid: qu" ge,- 30 Pe"mung:ga"re ngo wa lage, phaug' byid: nae"- qobo phug' dam: tug' byid: nae" ga: re:- Asang wa yao" byumyu" re dao: kho' li" nae" ga: ta" ra" yaug khag' ngad: rure ngonhaung" ba:. 31 Kaoso' daui: na: ra" Mao"So: lo, khug khyo gyo" vao lo" ru wa gyai gyaug ca" ru ngad: ra". 32 Qhid' phyao: mae" ba na jham mae naonhaung" khoru: boe" lo ko" rure myid: beim: ge,- Lai: lo: ra" ayo, mae naonhaung" wa Mao"So: mug: bo" re bin: qo" kham: yu gemung: ai: thao re qug: khai: dayin dayo: myo: sho' ja: kham zo" lo gengadqere: aseim" mabyid: tang za: ye; lo: ako". 33 Naonhaung" wa su myo: sho' mo; qhid' kheim: mae maphug' makhyad' roe" ru we' gaui: ru qhug' mung: airu: maphug' makhyad' roe" ru we' jung" gaui: ru qhug' lo ko" ra" mo; bo: bode; lo: ra" mo, re: ngad: ako". 34 Naonhaung" wa thaung: laung" ra" mo; qhid' mae" sho: bono mung: naonhaung" jo,nho" jham re lhad' yu: ru qhug' ra" au: re ngaui bau: taung" za: zang: kham: pye' ako". Pe"mung:ga"re naonhaung" wa aijham tho' je: gai mung: khonhae" mabaui mabyo; ra" jo,nho" jham re qo" sang: jo, shiko" rure naonhaung" ba geyang: ngad: ra". 35 Airumung: naonhaung" qam: dashan ge,- pe"mung:ga"re airu wa naonhaung" re aphug' jhaung qhu" qi: qo" yu nhao: li" nae". 36 Mao"So myid o: ra" khyo re zaui: so: nae" we' yao" dao:so: re qo" kham: yu nae" qhid' mae" naonhaung" wa zang: qhao" ra" myid qo: ako". 37 Pe"mung:ga"re Jham: Mugsug' mae Dazab zo: lao" joe" li" nae" ra" yaug wa li" nae" ngad: ra". Yao: wa yam" na nae" mangad:- 38 Nga" nho: din:man" ra" byu qe kam" wa lam khug mung: daui: na: li" genae". Ngadqere: yao: bam mae" dayaug yaug naung zad: zad' lo" re wa ngo yao: re ngaui nae" mangad:- ga: ta" ra". 39 Ngonhaung" wa naung zad: zad' lo" mung: jeim" lo" byaug: ra" mo, mangad:- Lam khug: myid bo mung: khyad' yu: ru qhug' mo, kam" wa ngad: ra". 1 Lam khug: myid bo: ga" ru wa ngonhaung" myid: lao" ra" ja: jham re gaigai: yao: nhag' dag: ru we' maqo" myao: ra" ja: jham re gaigai: yao: ba: to" rure ta" ru ngad: ra". 2 Ganhae" mae" byu qe wa yao: bam: lam khug: myid mathao mae Mao"So: yang o ngaui myid vang" byid' rure qo" kham: yu: ako". 3 Mamyao: rumae" qo" myao: ra" ja: boe" thug' li" nae" qhid' mae" Mao"So: mungdao" yang mug:kin re phan" to" ru ngad: rure lam khug: ra" khyo" yang ngonhaung" ba: yu: ra". 4 Lam khug: ruyang Abela wa Ka-in ngaui" byid' ra" xeim: tho' je: gai: ra" xeim: Mao"So re ngaui" byid' ra"- Abela wa yao" lam khug: ru khyo" yang din:man" ra" byu dayaug khyo" Mao"So: yang o ngaui myid vang" byid' rure qo" kham: yu: ra". Pe"mung:ga"re yao" jhaung qhu" re Mao"So: yang khae: yu byid: yang: ngad: ra". Abela wa shid: byaug ngadqere yao" lam khug: ru khyo" yang dao: jhau: na: ashi". 5 Lam khug: ru khyo" yang Enog wa shid: ru maqhug' lo: adaui phe, Mao"So jhao" to' yu: ru qhug' ra". Mao"So: yang yao: re to' yu: ru ngad yang:- yao: re khag' re: maqo" myao ngad: ako". Mao"So: yang yao: re mato' yu shi" ra" au: re- yao: wa Mao"So ngaui: ra" yaug ngad: ra" ga: Jham: Mugsug' mae ta" to" ra". 6 Lam khug: myid mabo: ra" yaug khag' ngadqere: Mao"So re maqo" o ngaui nhao ngad: ra". Pe"mung:ga"re Mao"So jhao" qui" lo: ra" yaug khag' ngadqere: Mao"So na: jo; rure we' yao: re qho: na: ra" mo, re jhaung qhu" byid: yaug ngad: rure lam khug ca" ra". 7 Lam khug: ruyang Noa wa joe" lo nae" ayo, mae" yao: maqo" myao: ra" khyo we' sin: yang: Mao"So: yang ta" peim: byid' ra" dao: re the' gyo" ra". Yao: wa Mao"So: mho dao: re tae" gyo: mung: qid sang pho dalam: zhaug' yang: ai: khug mae yao: we' yao" yham byu qe khyad' yu: ru qhug' ako". Aimung: mug:myid re dao: phyid' ra" au: re yao: wa lam khug: myid khyo" yang din:man" ra" ga: Mao"So: yang sun" yu byid' rure qo" khae: yu: ra". 8 Abraham wa lam khug: ruyang Mao"So khai: ra" au: mho dao: gyo: mung: Mao"So: yang byid: nae" ga: dao:so: byid' to" ra" mung"dan: khyo thug' ye" lo" ra". Abraham wa yao: khai: ye" lo" nae" rure maba lo: yao: yao" mung"dan: mae" thug' lo" ra". 9 Lam khug: ru khyo" yang Abraham wa Mao"So: yang yao: re dao:so: byid' to" ra" mung"dan: mae bang" vo dayaug khyo" yena: ra". Yao: wa Mao"So: dao:so: re dakhyo: za: qo" khae: yu: ra". Isag- Yaku we' dakhyo: za: zaung jham: khug mae na: jo; ra". 10 Pe"mung:ga"re Abraham wa Mao"So: yang nyhang" jaung yang: zao: to" ra" gang" tang: ra" apan we' te" to" ra" vogaung: mo" re myid: lao" na: ra". 11 Abraham wa gyai mao" byaug: ru we' Sarah re: zo:dau maqo" khau lo: ngadqere:- yao: wa lam khug: ruyang zoshao: yao: pho" boe" lo: ra". Mao"So wa yao" dao:so: re dao:so: zaung yaug ngad: rure yao: lam khug: ra". 12 Abraham wa sa: sho: khyo" yang yauggai ashid ru: ngadqere: yao: dayaug mae" za: mug:gaung mae" kyi jham we' panglai: qid yae ma dam: mae" matho' nghe' ra" ma coe jham nho" na: je" ra" myid:zo: qe myo" laug: li" ko" ra". 13 Byu ai: gu: alhab' wa Mao"So re lam khug yang: shid: lo" vako" ra". Yao: bam wa Mao"So: dao:so: byid' to" ra" ja: re maqo" khae: yu ko" ngad: ra". Ngadqere: va: mae" the' myao mung: tug: yu: ako". Yao: bam wa myid gaung dao mae taung bug qe we' phao: khug: na mo, za: ngad: rure de: de: za: lhang: yu: ako". 14 Airu: lhang: yu: ra" mo, wa yao: bam yao: sang: ra" mung"dan: re qho: na mo, ngad: ko" rure de: de: za: myao: ra". 15 Yao: bam to: co' ra" mung"dan: re yao: bam mamyid: beim" na loko" ngad: ra". Yao: bam airu: myid: beim" na yang: ngad: re wa- ai: khyo dam: tug' phao: lo" nae" akho: akhang" yao: bam qo" ako". 16 Ai: atha" yao: bam wa je: gai: ra" mung"dan: ngad: ra" mug:khaung: mung"dan: re nhag' nghae" na: ako". Airumung: Mao"So wa Yao: bam: Mao"So ngad:- ga: mhang" rure maqho' ngad: ako". Pe"mung:ga"re Mao"So wa yao: bam: qhid' mae" vogaung: mo" dalam: nyhang" te" to: byid' ra". 17 Lam khug: ruyang Abraham wa Mao"So yao: re jham" qu" ra" au: yao: zo: Isag re xeim: khyo" Mao"So re ngaui" byid' ra". Abraham wa Mao"So: yang dao:so: byid' to" ra" yaug ngadqere: yao: wa yao" zote: zo: re xeim: khyo" ngaui" byid: nae" jin" jin" ngad: ra". 18 Mao"So wa Abraham re Nao wa Isag khyo" yang myid:zo: qo" li" nae" ga: ta" to" ra". 19 Mao"So wa Isag re shid: rumae" dam: qo" daui: li" nhao yaug ngad: ga: Abraham myid: yu: ra". Airumung: Abraham wa Isag re shid: rumae" dam: qo" khae: yu: ru ngad: ra"- ein: gai: ta" ra". 20 Lam khug: ruyang Isag wa joe" lo nae" ayo, qhid' mae" Yaku we' Eso tao re shaman" byid' ra". 21 Lam khug: ruyang Yaku wa yao: shid qid re Yoseb yao: zo: tao re shaman" byid' ra". Yao: wa yao" zaung: bao" nyaug re nga yang: Mao"So re goe; pa" ra". 22 Lam khug: ruyang Yoseb wa yao: shid: lo" na lao" Israel byu qe Egutu mung" mae" phao: thug' lo" nae" khyo re ta" mung:- yao" mao gaung we' sin: yang: khoru: kad' nae" rure dao: pyang: to: co' ra". 23 Lam khug: ruyang Moshe nho: yao: myhi" yao: pho" tao wa yao: khau thao re lho" mo" sam khye' lam: lam: nyham" to" ako". Moshe wa gyai yaung" ra" zonau" ngad: rure yao: shid' tao myao mung: yao: shid' tao wa kho:kham amyin" dao: re ngag: pye' nae" magyaug ko" ngad: ra". 24 Lam khug: ruyang Moshe wa yao: qi" li" lao"- kho:kham myiqe: zo" nho: yauggai zo: ga: mhang" nae" rure ha: pye' ra". 25 Yao: wa dazab daso' qobo mae pyo" na nae" tho' Mao"So: byumyu" we' qug: khai: dayin dayo: kham zo: nae" rure je: nug ngaui: ra". 26 Meshia qhid' mae" maphug' makhyad' jung" pye' ru qhug' ru wa Egutu mung" mae" jo,nho" alhab' tho' mae je: phug' de; ru ngad: ga: yao: myid: yu: ra". Pe"mung:ga"re yao: wa joe" lo nae" ayo, mae qo" khae: yu nae" ra" jhaung qhu" re nhag' nghae" na yang: ngad: ra". 27 Lam khug: ruyang Moshe wa kho: kham pho" nhag' yo" rure magyaug lo: Egutu mung" mae" thug' lo" ra". Yao: wa myo; yang maqo" gai: myao: ra" Mao"So re the' myao: ruru:- dam: tug' lo" nae" khyo re ha: pye' ra". 28 Lam khug: ruyang Moshe wa Israel byumyu" qe: zoqhid' yauggai zo: qere Se' ra" Mug: Lagyo" yang mase' pye' nae" qhid' mae" Lai co' Poe re kad' qhid: to: mung: kham: zang jham mae sa: pyi" sheim" te' to: genae" qhid' mae" amyin" byid' ra". 29 Lam khug: ruyang Israel byumyu" qe wa ai: Tham: Ne mae taung gaung we' dakhyo: qo" su" lai: lo" ko" ra". Egutu byu qe airu: su" lai: lo" ko" au: yao: bam alhab' re ai: qid: yang myug: pye' ra". 30 Lam khug: ruyang Israel byumyu" qe wa Yerikho vogaung: re nhad' ba lam: lam: bin su" gam: gethao re Yerikho vogaung: vang byo; gyang: lo" nhao: ako". 31 Lam khug: ruyang shava myhi" Rahab wa Israel jin" byu tao re nyang" za: lham: tug: yu: ruyang Mao"So: mho dao: matae" gyo" ra" mo, we' daga" se' pye' ru maqhug' ngad: ra". 32 Ngo xo' ta" qo shinae" i? Gidon- Barag- Samson- Yebtha- Davi- Samuela we' lapa qe: khyo re ta" kyo: nae" qhid' mae" nga" ayo, matho' laug ngad: ra". 33 Lam khug: ru khyo" yang yao: bam wa mung"dan: jham re gyekhe' aung: pye' ako". Din:man" ra" mau" zo" re yao: bam zaui: so: mung: Mao"So byid' to" ra" dao:so: re qo" kham: yu: ako". Yao: bam wa khang khyi nhad' re pyid' pye' ako". 34 Laung: thao" ra" myi: re se' pye' ako". Shae: yang se' pye' nae" rumae" loe; beim: ako". Yao: bam wa qam: nang: gengadqere: qam: bo: li" ako". Yao: bam wa gyekhe' rumae gai lo: boe" mung: taung bug mung"dan: gyetab re aung: pye' ako". 35 Lam khug: ra" khyo" yang myiqe: qere: shid: byaug vako" ra" yao: bam: ba nam qe kaoso' dam: daui: li" rure qo" kham: yu: ako". Gatau damyo" wa loe; beim nae" khyo re makhae: yu lo: ha: pye' gemung: je: gai: ra" kaoso' daui khyo re qo" khae: yu nae" qhid' mae" yhin" rure kham zo: mung: shid: lo" ko" ra". 36 Damyo" wa jung" gaui: pye' ru we' be; ru qhug' ako". Amung: damyo" wa jao co" yang taui" ru qhug' mung: thaung: khug mae lhaung" to" ru qhug' ako". 37 Yao: bam wa laug baui: yang pye' se' ru- sag'qhag' yang shid' dau qhag' phyid' ru- shae: yang se' pye' ru qhug' ako". Yao: bam wa sho: jhin: ru qhug' ru we' yhin" ru- maphug' makhyad' kad' ru qhug' mung: yao qid- cad' be, qid ve, yang: na: qin" ako". 38 Mug:myid wa yao: bam we' maman: qi" ngad: ra". Yao: bam wa laug aug' jham mae we' myid khung: jham mae na mung: din"pyad' yo mae we' bug gaung khaung: mae phao: khug: na: qin" mo, we' dakhyo: na: lae" qin" ako". 39 Cebam alhab' mo, wa yao: bam: lam khug: ru khyo" Mao"So: yang o ngaui myid vang" byid' rure qo" kham: yu: ako". Ngadqere: yao: bam wa Mao"So byid' to" ra" dao:so: re maqo" khae: yu ko" ngad: ra". 40 Pe"mung:ga"re Mao"So wa ngonhaung" qhid' mae" je: lhao" re: gai: ru myid: yaung: to" ra" khyo re myid: phyid' to: byid' ava". Yao: myid: yaung: to" ra" khyo wa ngonhaung" we' daga" ngad lao" za: yao: bam wa jab byang" ru qo" yu: li" genae"- ga" ru ngad: ra". 1 Ceru: myo" laug: ra" lam khug: ra" mo; sagse: jham wa ngonhaung" re lhang" kham" to" ra". Airumung: ngonhaung" wa akaung: akag' ru ja: khao: ngo" re we' ngonhaung" mae tang za: kyin" de; jo; ra" qobo re qhid' pye' mung: ngonhaung" qhid' au: mae" bin: zang khyo joe" sho' myid: phyid' pye' yang: tao" ye: gelang:- 2 Ngonhaung" lam khug: ru apan aqao: we' athao" ngad: ra" Yesu re ngonhaung" zhaug' qu" to: gelang:- yao: wa pyao: zang: mathao mae qam: mashan ngad: ra". Ai: atha" yao: re lao" na: ra" ngaui bau: ngaui yao: ru: mathao mae- pyao: zang dao mae shid kham: rure aqho' aqhid ngad: ra" khyo" yao: majho lo: shid: kham: mung: ana" yao: wa Mao"So: zaung tao" lo, yo shad' mae zaung: jo; ra". 3 Qobo qo" ra" mo; yang gyai nghang" pye' rure yao: khoqhi" dayin dayo: kham zo" lo: rure myid: qu" mung:- naonhaung" qam: dashan- nhag' lam: dathao" ge,- 4 Pe"mung:ga"re naonhaung" wa qobo we' gye jho" khe' rumae se' pye' ru joe" sho' mathaung" qhug' shiko" ngad: ra". 5 Ai: tho' mago" Nga" zo: we"- Asang nao re mho" ra" dao: re nyang" za: tae" gyo: wa,- Yao: nao re qeim: ra" au: nhag' lam: dathao" wa,- 6 Pe"mung:ga"re Asang wa yao: jhid'de; ra" yaug re mho" mung: yao: zo: khyo" khae: yu: ra" yaug re qobo dae byid' ra" ga:- Mao"So wa naonhaung" re yao: zo: qere we' dakhyo: qam: byid: dao: ta" to" rure naonhaung" to" myhid' pye' ko" i? 7 Naonhaung" qug: khai: kham zo" ru wa yao: pho" qobo dae byid' ru ngad: ra" khyo" zang: kham ge,- naonhaung" qug: khai: kham zo" ru wa Mao"So wa naonhaung" re yao" yao: zo: qere khyo" kad' na: rure ceim" shid' byid' ra". Yao: pho" yang qobo dae mabyid' ra" yauggai zo: khag' na: ra" i? 8 Yao: zo: qere we' dakhyo: qobo dae byid' ru naonhaung" maqhug' ko" re wa naonhaung" wa yao: zo: agyang" qe mangad:- nin gyid qe ngad: ako". 9 Ngonhaung" xao su byu: yao: pho" qe wa ngonhaung" re qobo dae byid: mung: ngonhaung" wa yao: bam re phug' myao" ra". Airumung: ngonhaung" wa je yang: byo we' sin" ra" ngonhaung" Pho" qao: mae na mung: kaoso' daui: na nae" ang: ra" mangad: i? 10 Ngonhaung" nho: xao su byu: yao: pho" qe wa- dayo, daban: za: yao: bam gai ang: ru we' dakhyo:- ngonhaung" re qobo dae byid' ako". Ngadqere: Mao"So wa yao" Gyang" Lho" rure ngonhaung" qobo khae: yu geshao:- ga: ngonhaung" akyu" qhid' mae" ai: rure kad' ra". 11 Ngonhaung" wa qobo dae byid: qhug' ra" au: re mangaui bau:- ai: au: re kaug' ja: khyo" myid: jho: yu ngadqere: airu: qobo dae byid: yang: mho" ru qhug' va" mo, wa- thao re din:man" ra" kaoso' ga" ra" ngaui pyo: yaug yo: ra" jhaung qhu" re qo" jham" yu: li" genae". 12 Myaung: dug: ra" naonhaung" lo, jham re tau: ke' mung: qam: nang" ra" pad' laug jham re qam: bo nhao ge,- 13 Qeim: ra" khyid wa mapyan" jo, lo: gai: li" nae" qhid' mae" din" ra" khyodang mae xo' yang: su" ye" lo" ge,- 14 Yaug khao: ngo" we' yaug yo za: qo" na nae" qhid' mae" qam: ke' ge,- Gyang" lho" ra" khyo" kaoso' qo" daui nae" qhid' mae" qam: ke' ge,- pe"mung:ga"re airu: kaoso' madaui lo: khag' re: Asang re maqhug' myao genae"- 15 Mao"So: nhag' myan" ra" jeju mae" maphaug' lo" nae" qhid' mae" lha" ge,- Kho" ra" agae wa yaug: qi" li" mung: yao" daug: yang qug: khai: myo: sho' re boe" nhao: ru we' dakhyo: khag' re: airu: maboe" nae" qhid' mae" lha" ge,- 16 Zoqhid' aya: re zo damyo: we' za: tha" aung: zo" pye' ra" Eso we' dakhyo: shad' nghung" ru we' Mao"So re magyaug maphug' ra" yaug khag' re: maboe" nae" qhid' mae" lha" ge,- 17 Ai: thao Eso wa yao: pho" yang shaman" byid' rure khae: yu nug: rure naonhaung" ba: ako". Ngadqere: maqo" khae: yu ngad: ra". Pe"mung:ga"re yao: kad' lai: lo: ra" lo, mau" re lhai" pye' nae" khyo re ngug byid ngug nhe' we' khyo qho ngadqere: maqhug' loyang: ngad: ra". 18 Naonhaung" wa Israel byumyu" qe we' dakhyo: lo; yang qo" the' tin" ra" myi: nga" na: ru we' no, sang: kyid mug: cad' cad' jo, mung: la qam" we' labo" mad thoe myang mung:- 19 Thoe hug' na: ra" Sina bam khyo joe" qu" mo, mangad: ko" ngad; ra". Mo, byu qe wa ai: thoe re the' gyo: gelao" ai: thoe re madam: the' gyo: nae" qhid' mae" Moshe re mho' yao: ako". 20 Pe"mung:ga"re yao: bam wa gug'nyhug' re lhao" re:- ai: bam re the' tin: lao" wa laug baui: yang pye' se' ca"- ga" ra" amyin" dao: re maqo" kham geyang: ngad: ako". 21 Ai: myao jao: wa gyai qu" gyaug sho' ru ngad mung: Moshe lhao" re: Ngo wa gyaug: nin" pye' va"- ga: ta" ra". 22 Ai: atha" naonhaung" wa Ziun bam we' kaoso' daui: na: ra" Mao"So: vogaung: mo" ngad: ra" mug: lagyo: qe tug tig ajham ataung na: ra" mug:gaung mae" Yerusalem khyo joe" na: ako". 23 Naonhaung" wa mug:gaung dao mae" japhin: mae bo: ra" Mao"So: zoqhid' qe ngaui bau: ngaui yao ham: phaung: na ko" ra" jo, qo mae joe" na: ako". Naonhaung" wa byu alhab' mo; nho: dao: kho' zug: ngad: ra" Mao"So jhao" re: qo mabo jab byang" vako" ra" byugai qenho: byo jham jhao" re: joe" na: ako". 24 Amung: naonhaung" wa dao: thang" asag' re nyhang" jaung: to: byid' ra" Yesu jhao" re:- Abela nho: sa" yang byid' ra" tho' je: gai: ra" ja: jham re pakham: kham: byid' ra" pyi" sheim" ra" sa: khyo re: joe" na: ako". 25 Airumung: naonhaung" wa ai: mungdao: ta" ra" yaug re tae" gyo: nae" ha: pye' ra" mo, maboe" genae" qhid' mae" lha" ge,- Myidgaung dao mae Mao"So: mungdao: re ta" ra" yaug: dao: re tae" gyo: nae" ha: pye' ko" ra" mo, wa maloe, ko" ngad: ra". Airumung: ngonhaung" wa mug:gaung mae" ta" ra" yaug re nhaung thao" phaug' pye' ngad: re wa je yang: maqo" loe, nae" mangad: i? 26 Ai: ayo, re Mao"So: thoe wa myidgaung re laui" nin" nhao: ra". Ngadqere: ana" Mao"So wa Ngo wa ana" dalhang myidgaung reza: mangad:- mug:gaung rere: laui" nin" li" nhao shinae"- ga: dao:so: to" ra". 27 Amung: dalhang dam:- ga" ra" dao: kheim: wa maqo" laui" nin" ra" ja: jham wa dang: jo, nae" qhid' mae" ai: phan" to" ra" ja: jham wa laui" nin" ru qhug' mung:- yu: pye' ru qhug' li" nae"- ga" ru ngad: ra". 28 Airumung: maqo" laui" nin" ra" mung"dan: re ngonhaung" qo" kham: yu: bam va" ruyang Mao"So: jeju re caung:khin" gelang:- ngonhaung" wa jeju beim: so: mung: gyaug phug' ru we' Mao"So re o ngaui nhao: ra" lo, mau" khyo" caung:pa" byid: gelang:- 29 Pe"mung:ga"re ngonhaung" nho: Mao"So wa nga" jeim" lo" nhao: ra" myi: yao: ngad: ra". 1 Khristan mao:nhaung: qe ngad: ru we' dakhyo: khonhae" re: naonhaung" yao: cao: jho" jhid'de; na ge,- 2 Naonhaung" yham mae bang" vo qere bang" da" byid: nae" dato" myhid' ge,- Airu: bang" da" byid' ra" mo, damyo" wa mabeim: maso: lo: mug: lagyo: qere bang" qhug' da" byid' ako". 3 Naonhaung" wa thaung: laung" jo; ra" mo, we' daga" thaung: bolaung" jo; ra" khyo" myid: yu mung: thaung: khug mae laung" jo; ra" mo, re myid: beim: ge,- naonhaung" yao: re: bokham zo" ra" khyo" myid: yu mung: qug: khai: kham zo" na: ra" mo, re myid: beim: ge,- 4 Byu yaug khao: ngo" lo, xo' rure phug' te' qo: ra". Yham sang pho" we' yham sang myhi" wa dayaug we' dayaug yao: cao: dao:so: dang ca" ra". Mao"So wa shad' nghung" ra" mo, we' myi: lao shad' ra" mo, re dao: kho' li" nae". 5 Ngaui qhang re dajhid'de, ge,- naonhaung" qo" ra" gu: re nhag' dag: na ge,- pe"mung:ga"re Mao"So wa Ngo wa naonhaung" re khonhae" re: mato: co' nae"- ngo wa naonhaung" re khonhae" re: mashapye' nae" ga: ta" to" ra". 6 Aimung: Asang wa ngore bao" thaug' yaug ngad: ra". Ngo wa gyaug nae" mangad:- Ngo re khag' pe" qo" kad' nae" i? ein: ngonhaung" wa mazag mavae ta" gelang:- 7 Naonhaung" re Mao"So: mungdao: ta" kyo" lo ko" ra" qhid' phyao: mae" naonhaung" au: jhaung qere myid: beim: ge,- yao: bam khoru: kaoso' daui: lo ko" rure we' khoru: shid: lo" byaug ko" ra" khyo re dam: tug' myid: qu" mung:- yao: bam: lam khug: ra" khyo re lag qu" yu ge,- 8 Yesu Khristu wa ayenhe' ana" ba apyad ato dakhyo: za: ngad: jo; ra". 9 Mho" shid' ra" khyo abang" aja: ja" yang ai: jo: ra" khyo mae" naonhaung" re dajhui" nghung" lo" nhao ge,- Zo: ve jham we' sin" ra" kham" to" ra" Tarha" jham re phug' cao" ra" khyo" yang mangad: lo: Mao"So: nhag' myan" ra" jeju mae" aung khug nhag' lam: qam: o: qo" kham: yu nae" ru wa gai: ra". Ai: kham" to" ra" Tarha" re phug' cao" ra" mo, wa akyu" maqo" kham: yu ko" ngad: ra". 10 Yuda qe: caung:pa" ra" jo, qo mae caung da" byid: ko" ra" khinjaung qe wa ngonhaung" nho: phan dao mae" pe" xeim: rere: zo: nae" akhang" maqo" ngad: ra". 11 Yuda khinjaung yin" wa gug'nyhug' jham: sa: re qobo khyad' ra" xeim: khyo" Gyang" Lho" thao" ra" jo, qo khyo civao ye" ra". Ngadqere: ai: xeim: mao gaung jham re wa jamu taung gaung shad' mae ngha" pye' ako". 12 Ce: khyo mathao mae Yesu re: yao: yao" sa" yang xao su byu qe: qobo kyang" san: pye' byid: nae" qhid' mae" vogaung: taung gaung shad' mae shid kham: ra". 13 Airumung: jamu taung gaung shad' yao: jhao" thug' ye: mung: yao: kham zo" ra" qho' phyo' rure yebokham zo: gelang:- 14 Pe"mung:ga"re ce: myidgaung dao mae ngonhaung" qhid' mae" mabaui mabyo; ra" vogaung: majo, ngad: ra". Ngonhaung" wa ai: joe" lo nae" ra" vogaung: re qho: na: bam:- 15 Airumung: naonhaung" wa Yesu re ngonhaung" nho: Asang khyo" lhang: yu: ra" nhad' yang jeju caung:khin" ra" xeim: re Yesu khyo" yang Mao"So re khonhae" re: xeim: ngaui" byid' na gelang:- 16 Gai: ra" mau" zo" zaui: so: nae" we' naonhaung" yao: cao: jho" bao" thaug' byid' ra" khyo re dato" myhid' ge,- pe"mung:ga"re ai: ngaui" xeim: jham wa Mao"So o ngaui: ra" ngaui" xeim: jham ngad: ra". 17 Naonhaung" nho: au: jhaung qe: dao: re tae" gyo: mung: yao: bam ta" ru we' dakhyo: kad' cao" ge,- yao: bam wa yao: bam yao: zaui: so" ra" mau" zo" qhid' mae" japhin: qhu" byid: nae" mo, ngad ko" ruyang naonhaung" yaug nhag' lam: re abang mabyid mathang qu" gun caung: na: ako". Yao: bam: mho dao: re naonhaung" tae" gyo: ko" ngad: re wa yao: bam wa mau" zo" re ngaui bau: za: zaui: so" li" genae". Airu: mangad: re wa yao: bam wa mau" zo" re kaug' ru we' zaui" li" genae"- ailao"wa naonhaung" qhid' mae" pe" akyu" bo nae" mangad: ngad: ra". 18 Ngonhaung" qhid' mae" khonhae" re: akyu" bao" mho' byid' na gela,- ngonhaung" nho: aung khug nhag' lam: wa gyang: gyang: za: ngad: rure ngonhaung" ba: ra". Pe"mung:ga"re yo, khyin: khao: ngo" ngonhaung" wa jo: ra" khyo" kad' nae" o nug yang: ngad: ra". 19 Mataung" myao" re Mao"So wa ngore naonhaung" jhao" dam: tug' nhao: ke' nae" qhid' mae" akyu" bao" mho' byid: gela,- ein: ngo wa naonhaung" re qam: ke' yang: mho' ke' ra". 20 Ngaui" xeim: khyo" yao: shid kham yang: apyad ato: nho: dao: thang" re dazid thaung" te' ra" khyo" yang yao kyaung" jham: nho: Yao Zam: Aqi: ngad: ra" ngonhaung" Asang Yesu re Mao"So wa shid: rumae" dam: daui: to" li" nhao: ava". 21 Ngaui pyo: yaug yo: ra" Mao"So wa yao" myid o: ra" khyo re qo" zaui: so: nae" qhid' mae" ngonhaung" qo ca" ra" gai shab: ra" ja: alhab' naonhaung" re byid: vashao:- amung: Yesu Khristu khyo" yang yao" myid o ngaui: ra" khyo" ngonhaung" mae zaui: so: vashao:- Khristu wa apyad ato phungbao qab qi" qhang: jo, vashao: wo"- Amen. 22 Nga" mao:nhaung: qe we"- ce: qam: byid: mungdao: re zang: kham yang: tae" gyo" yu genae" qhid' mae" naonhaung" re ngo mho' ra". Pe"mung:ga"re ngo naonhaung" re tung" ke' ra" ce: vhin tung" wa gyai maqhang ngad: ra". 23 Ngonhaung" mao:nhaung: pho" Timothi wa thaung: mae" loe; thug' lo" byaug va" rure naonhaung" re ngo ba nhao nug: ra". Yao: phyad za: ngojhao" joe" lo:ngad: re wa ngo naonhaung" re li" qhug' ra" au: re ngo we' daga" yao: re jhui" li" nae". 24 Naonhaung" au: jhaung alhab' mo, re we' Mao"So: byu qe alhab' re ngonhaung" au" ke' ra" khyo ta" kyo: byid: gela,- Itali mung" mae" mao:nhaung: qere: naonhaung" re au" ke' ako". 25 Mao"So: nhag' myan" ra" jeju wa naonhaung" alhab' mo, we' daga" ngad: jo, vashao: wo".
|